သတ္တရသမဝဂ္ဂ

၁၇. သတ္တရသမဝဂ္ဂ

(၁၆၆) ၁. အရဟတော ပုညူပစယကထာ

၇၇၆. အတ္ထိ အရဟတော ပုညူပစယောတိ? အာမန္တာ။ အတ္ထိ အရဟတော အပုညူပစယောတိ? န ဟေဝံ ဝတ္တဗ္ဗေ။ပေ.။ နတ္ထိ အရဟတော အပုညူပစယောတိ? အာမန္တာ။ နတ္ထိ အရဟတော ပုညူပစယောတိ? န ဟေဝံ ဝတ္တဗ္ဗေ။ပေ.။။

၇၇၇. အတ္ထိ အရဟတော ပုညူပစယောတိ? အာမန္တာ။ အရဟာ ပုညာဘိသင်္ခါရံ အဘိသင်္ခရောတိ, အာနေဉ္ဇာဘိသင်္ခါရံ အဘိသင်္ခရောတိ, ဂတိသံဝတ္တနိယံ ကမ္မံ ကရောတိ, ဘဝသံဝတ္တနိယံ ကမ္မံ ကရောတိ, ဣဿရိယသံဝတ္တနိယံ ကမ္မံ ကရောတိ, အဓိပစ္စသံဝတ္တနိယံ [အာဓိပစ္စသံဝတ္တနိကံ (?)] ကမ္မံ ကရောတိ, မဟာဘောဂသံဝတ္တနိယံ ကမ္မံ ကရောတိ, မဟာပရိဝါရသံဝတ္တနိယံ ကမ္မံ ကရောတိ, ဒေဝသောဘဂ္ယသံဝတ္တနိယံ ကမ္မံ ကရောတိ, မနုဿသောဘဂ္ယသံဝတ္တနိယံ ကမ္မံ ကရောတီတိ? န ဟေဝံ ဝတ္တဗ္ဗေ။ပေ.။။

၇၇၈. အတ္ထိ အရဟတော ပုညူပစယောတိ? အာမန္တာ။ အရဟာ အာစိနာတီတိ? န ဟေဝံ ဝတ္တဗ္ဗေ။ပေ.။ အရဟာ အပစိနာတီတိ? န ဟေဝံ ဝတ္တဗ္ဗေ ။ပေ.။ အရဟာ ပဇဟတီတိ။ပေ.။ အရဟာ ဥပါဒိယတီတိ။ပေ.။ အရဟာ ဝိသိနေတီတိ။ပေ.။ အရဟာ ဥဿိနေတီတိ။ပေ.။ အရဟာ ဝိဓူပေတီတိ ။ပေ.။ အရဟာ သန္ဓူပေတီတိ? န ဟေဝံ ဝတ္တဗ္ဗေ။ပေ.။ နနု အရဟာ နေဝါစိနာတိ န အပစိနာတိ အပစိနိတွာ ဌိတောတိ? အာမန္တာ။ ဟဉ္စိ အရဟာ နေဝါစိနာတိ နာပစိနာတိ အပစိနိတွာ ဌိတော, နော စ ဝတ ရေ ဝတ္တဗ္ဗေ – ‘‘အတ္ထိ အရဟတော ပုညူပစယော’’တိ။

နနု အရဟာ နေဝ ပဇဟတိ န ဥပါဒိယတိ ပဇဟိတွာ ဌိတော, နေဝ ဝိသိနေတိ န ဥဿိနေတိ ဝိသိနေတွာ ဌိတော, နေဝ ဝိဓူပေတိ န သန္ဓူပေတိ ဝိဓူပေတွာ ဌိတောတိ? အာမန္တာ။ ဟဉ္စိ အရဟာ နေဝ ဝိဓူပေတိ န သန္ဓူပေတိ ဝိဓူပေတွာ ဌိတော, နော စ ဝတ ရေ ဝတ္တဗ္ဗေ – ‘‘အတ္ထိ အရဟတော ပုညူပစယော’’တိ။

၇၇၉. နတ္ထိ အရဟတော ပုညူပစယောတိ? အာမန္တာ။ အရဟာ ဒါနံ ဒဒေယျာတိ? အာမန္တာ ။ ဟဉ္စိ အရဟာ ဒါနံ ဒဒေယျ, နော စ ဝတ ရေ ဝတ္တဗ္ဗေ – ‘‘နတ္ထိ အရဟတော ပုညူပစယော’’တိ။

အရဟာ စီဝရံ ဒဒေယျ။ပေ.။ ပိဏ္ဍပါတံ ဒဒေယျ။ သေနာသနံ ဒဒေယျ။ ဂိလာနပစ္စယဘေသဇ္ဇပရိက္ခာရံ ဒဒေယျ။ ခါဒနီယံ ဒဒေယျ။ ဘောဇနီယံ ဒဒေယျ။ ပါနီယံ ဒဒေယျ။ စေတိယံ ဝန္ဒေယျ။ စေတိယေ မာလံ အာရောပေယျ။ ဂန္ဓံ အာရောပေယျ။ ဝိလေပနံ အာရောပေယျ။ပေ.။ စေတိယံ အဘိဒက္ခိဏံ [ပဒက္ခိဏံ (?)] ကရေယျာတိ? အာမန္တာ။ ဟဉ္စိ အရဟာ စေတိယံ အဘိဒက္ခိဏံ ကရေယျ, နော စ ဝတ ရေ ဝတ္တဗ္ဗေ – ‘‘နတ္ထိ အရဟတော ပုညူပစယော’’တိ။

အတ္ထိ အရဟတော ပုညူပစယောတိကထာ နိဋ္ဌိတာ။

၁၇. သတ္တရသမဝဂ္ဂေါ

(၁၆၇) ၂. နတ္ထိ အရဟတော အကာလမစ္စူတိကထာ

၇၈၀. နတ္ထိ အရဟတော အကာလမစ္စူတိ? အာမန္တာ။ နတ္ထိ အရဟန္တဃာတကောတိ? န ဟေဝံ ဝတ္တဗ္ဗေ။ပေ.။ အတ္ထိ အရဟန္တဃာတကောတိ? အာမန္တာ။ အတ္ထိ အရဟတော အကာလမစ္စူတိ? န ဟေဝံ ဝတ္တဗ္ဗေ။ပေ.။ နတ္ထိ အရဟတော အကာလမစ္စူတိ? အာမန္တာ။ ယော အရဟန္တံ ဇီဝိတာ ဝေါရောပေတိ, သတိ ဇီဝိတေ ဇီဝိတာဝသေသေ ဇီဝိတာ ဝေါရောပေတိ, အသတိ ဇီဝိတေ ဇီဝိတာဝသေသေ ဇီဝိတာ ဝေါရောပေတီတိ? သတိ ဇီဝိတေ ဇီဝိတာဝသေသေ ဇီဝိတာ ဝေါရောပေတီတိ။ ဟဉ္စိ သတိ ဇီဝိတေ ဇီဝိတာဝသေသေ ဇီဝိတာ ဝေါရောပေတိ, နော စ ဝတ ရေ ဝတ္တဗ္ဗေ – ‘‘နတ္ထိ အရဟတော အကာလမစ္စူ’’တိ။ အသတိ ဇီဝိတေ ဇီဝိတာဝသေသေ ဇီဝိတာ ဝေါရောပေတီတိ, နတ္ထိ အရဟန္တဃာတကောတိ? န ဟေဝံ ဝတ္တဗ္ဗေ။ပေ.။။

၇၈၁. နတ္ထိ အရဟတော အကာလမစ္စူတိ? အာမန္တာ။ အရဟတော ကာယေ ဝိသံ န ကမေယျ, သတ္ထံ န ကမေယျ, အဂ္ဂိ န ကမေယျာတိ? န ဟေဝံ ဝတ္တဗ္ဗေ။ပေ.။ နနု အရဟတော ကာယေ ဝိသံ ကမေယျ , သတ္ထံ ကမေယျ, အဂ္ဂိ ကမေယျာတိ? အာမန္တာ။ ဟဉ္စိ အရဟတော ကာယေ ဝိသံ ကမေယျ, သတ္ထံ ကမေယျ, အဂ္ဂိ ကမေယျ, နော စ ဝတ ရေ ဝတ္တဗ္ဗေ – ‘‘နတ္ထိ အရဟတော အကာလမစ္စူ’’တိ။

အရဟတော ကာယေ ဝိသံ န ကမေယျ, သတ္ထံ န ကမေယျ, အဂ္ဂိ န ကမေယျာတိ? အာမန္တာ။ နတ္ထိ အရဟန္တဃာတကောတိ? န ဟေဝံ ဝတ္တဗ္ဗေ။ပေ.။။

၇၈၂. အတ္ထိ အရဟတော အကာလမစ္စူတိ? အာမန္တာ။ နနု ဝုတ္တံ ဘဂဝတာ – ‘‘နာဟံ, ဘိက္ခဝေ, သဉ္စေတနိကာနံ ကမ္မာနံ ကတာနံ ဥပစိတာနံ အပ္ပဋိသံဝေဒိတွာ ဗျန္တီဘာဝံ ဝဒါမိ; တဉ္စ ခေါ ဒိဋ္ဌေဝ ဓမ္မေ ဥပပဇ္ဇံ ဝါ အပရေ ဝါ ပရိယာယေ’’တိ။ အတ္ထေဝ သုတ္တန္တောတိ? အာမန္တာ ။ တေန ဟိ နတ္ထိ အရဟတော အကာလမစ္စူတိ။

နတ္ထိ အရဟတော အကာလမစ္စူတိကထာ နိဋ္ဌိတာ။

၁၇. သတ္တရသမဝဂ္ဂေါ

(၁၆၈) ၃. သဗ္ဗမိဒံ ကမ္မတောတိကထာ

၇၈၃. သဗ္ဗမိဒံ ကမ္မတောတိ? အာမန္တာ။ ကမ္မမ္ပိ ကမ္မတောတိ? န ဟေဝံ ဝတ္တဗ္ဗေ။ပေ.။ သဗ္ဗမိဒံ ကမ္မတောတိ? အာမန္တာ။ သဗ္ဗမိဒံ ပုဗ္ဗေကတဟေတူတိ? န ဟေဝံ ဝတ္တဗ္ဗေ။ပေ.။ သဗ္ဗမိဒံ ကမ္မတောတိ? အာမန္တာ။ သဗ္ဗမိဒံ ကမ္မဝိပါကတောတိ? န ဟေဝံ ဝတ္တဗ္ဗေ။ပေ.။။

၇၈၄. သဗ္ဗမိဒံ ကမ္မဝိပါကတောတိ? အာမန္တာ။ ကမ္မဝိပါကေန ပါဏံ ဟနေယျာတိ? အာမန္တာ။ ပါဏာတိပါတော သဖလောတိ? အာမန္တာ။ ကမ္မဝိပါကော သဖလောတိ? န ဟေဝံ ဝတ္တဗ္ဗေ။ပေ.။ ကမ္မဝိပါကော အဖလောတိ? အာမန္တာ။ ပါဏာတိပါတော အဖလောတိ? န ဟေဝံ ဝတ္တဗ္ဗေ။ပေ.။။

ကမ္မဝိပါကေန အဒိန္နံ အာဒိယေယျ။ပေ.။ မုသာ ဘဏေယျ။ ပိသုဏံ ဘဏေယျ။ ဖရုသံ ဘဏေယျ။ သမ္ဖံ ပလပေယျ။ သန္ဓိံ ဆိန္ဒေယျ။ နိလ္လောပံ ဟရေယျ။ ဧကာဂါရိကံ ကရေယျ။ ပရိပန္ထေ တိဋ္ဌေယျ။ ပရဒါရံ ဂစ္ဆေယျ။ ဂါမဃာတကံ ကရေယျ။ နိဂမဃာတကံ ကရေယျ။ ကမ္မဝိပါကေန ဒါနံ ဒဒေယျ။ စီဝရံ ဒဒေယျ ။ ပိဏ္ဍပါတံ ဒဒေယျ။ သေနာသနံ ဒဒေယျ။ ဂိလာနပစ္စယဘေသဇ္ဇပရိက္ခာရံ ဒဒေယျာတိ? အာမန္တာ။ ဂိလာနပစ္စယဘေသဇ္ဇပရိက္ခာရော သဖလောတိ? အာမန္တာ။ ကမ္မဝိပါကော သဖလောတိ? န ဟေဝံ ဝတ္တဗ္ဗေ။ပေ.။ ကမ္မဝိပါကော အဖလောတိ? အာမန္တာ။ ဂိလာနပစ္စယဘေသဇ္ဇပရိက္ခာရော အဖလောတိ? န ဟေဝံ ဝတ္တဗ္ဗေ။ပေ.။။

၇၈၅. န ဝတ္တဗ္ဗံ – ‘‘သဗ္ဗမိဒံ ကမ္မတော’’တိ? အာမန္တာ။ နနု ဝုတ္တံ ဘဂဝတာ –

‘‘ကမ္မုနာ ဝတ္တတီ [ဝတ္တတိ (ဣ. က.၊ မ. နိ. ၂.၄၆၀)၊ ဝတ္တတေ (?)] လောကော၊ ကမ္မုနာ ဝတ္တတီ [ဝတ္တတိ (ဣ. က.၊ မ. နိ. ၂.၄၆၀)၊ ဝတ္တတေ (?)] ပဇာ။

ကမ္မနိဗန္ဓနာ သတ္တာ၊ ရထဿာဏီဝ ယာယတော [မ. နိ. ၂.၄၆၀; သု. နိ. ၆၅၉]။

‘‘ကမ္မေန ကိတ္တိံ လဘတေ ပသံသံ၊

ကမ္မေန ဇာနိဉ္စ ဝဓဉ္စ ဗန္ဓံ။

တံ ကမ္မံ နာနာကရဏံ ဝိဒိတွာ၊

ကသ္မာ ဝဒေ နတ္ထိ ကမ္မန္တိ လောကေ’’တိ။

အတ္ထေဝ သုတ္တန္တောတိ? အာမန္တာ။ တေန ဟိ ‘‘သဗ္ဗမိဒံ ကမ္မတော’’တိ။

သဗ္ဗမိဒံ ကမ္မတောတိကထာ နိဋ္ဌိတာ။

၁၇. သတ္တရသမဝဂ္ဂေါ

(၁၆၉) ၄. ဣန္ဒ္ရိယဗဒ္ဓကထာ

၇၈၆. ဣန္ဒ္ရိယဗဒ္ဓညေဝ ဒုက္ခန္တိ? အာမန္တာ။ ဣန္ဒ္ရိယဗဒ္ဓညေဝ အနိစ္စံ သင်္ခတံ ပဋိစ္စသမုပ္ပန္နံ ခယဓမ္မံ ဝယဓမ္မံ ဝိရာဂဓမ္မံ နိရောဓဓမ္မံ ဝိပရိဏာမဓမ္မန္တိ? န ဟေဝံ ဝတ္တဗ္ဗေ။ပေ.။ နနု အနိန္ဒ္ရိယဗဒ္ဓံ အနိစ္စံ သင်္ခတံ ပဋိစ္စသမုပ္ပန္နံ ခယဓမ္မံ ဝယဓမ္မံ ဝိရာဂဓမ္မံ နိရောဓဓမ္မံ ဝိပရိဏာမဓမ္မန္တိ? အာမန္တာ။ ဟဉ္စိ အနိန္ဒ္ရိယဗဒ္ဓံ အနိစ္စံ သင်္ခတံ ပဋိစ္စသမုပ္ပန္နံ ခယဓမ္မံ ဝယဓမ္မံ ဝိရာဂဓမ္မံ နိရောဓဓမ္မံ ဝိပရိဏာမဓမ္မံ, နော စ ဝတ ရေ ဝတ္တဗ္ဗေ – ‘‘ဣန္ဒ္ရိယဗဒ္ဓညေဝ ဒုက္ခ’’န္တိ။

အနိန္ဒ္ရိယဗဒ္ဓံ အနိစ္စံ သင်္ခတံ ပဋိစ္စသမုပ္ပန္နံ။ပေ.။ ဝိပရိဏာမဓမ္မံ, တဉ္စ န ဒုက္ခန္တိ? အာမန္တာ။ ဣန္ဒ္ရိယဗဒ္ဓံ အနိစ္စံ သင်္ခတံ။ပေ.။ ဝိပရိဏာမဓမ္မံ, တဉ္စ န ဒုက္ခန္တိ? န ဟေဝံ ဝတ္တဗ္ဗေ။ပေ.။။

ဣန္ဒ္ရိယဗဒ္ဓံ အနိစ္စံ သင်္ခတံ။ပေ.။ ဝိပရိဏာမဓမ္မံ, တဉ္စ ဒုက္ခန္တိ [ဣဒံ-ပုစ္ဆာဒွယေန ပုရိမပုစ္ဆာဒွယဿ ပုရတော ဘဝိတဗ္ဗံ]? အာမန္တာ။ အနိန္ဒ္ရိယဗဒ္ဓံ အနိစ္စံ သင်္ခတံ။ပေ.။ ဝိပရိဏာမဓမ္မံ, တဉ္စ ဒုက္ခန္တိ [ဣဒံ-ပုစ္ဆာဒွယေန ပုရိမပုစ္ဆာဒွယဿ ပုရတော ဘဝိတဗ္ဗံ]? န ဟေဝံ ဝတ္တဗ္ဗေ။ပေ.။။

၇၈၇. ဣန္ဒ္ရိယဗဒ္ဓညေဝ ဒုက္ခန္တိ? အာမန္တာ။ နနု ယဒနိစ္စံ တံ ဒုက္ခံ [သံ. နိ. ၃.၁၅] ဝုတ္တံ ဘဂဝတာ – ‘‘အနိန္ဒ္ရိယဗဒ္ဓံ အနိစ္စ’’န္တိ? အာမန္တာ။ ဟဉ္စိ ယဒနိစ္စံ တံ ဒုက္ခံ [သံ. နိ. ၃.၁၅] ဝုတ္တံ ဘဂဝတာ – အနိန္ဒ္ရိယဗဒ္ဓံ အနိစ္စံ, နော စ ဝတ ရေ ဝတ္တဗ္ဗေ – ‘‘ဣန္ဒ္ရိယဗဒ္ဓညေဝ ဒုက္ခ’’န္တိ။

၇၈၈. န ဝတ္တဗ္ဗံ – ‘‘ဣန္ဒ္ရိယဗဒ္ဓညေဝ ဒုက္ခ’’န္တိ? အာမန္တာ။ ယထာ ဣန္ဒ္ရိယဗဒ္ဓဿ ဒုက္ခဿ ပရိညာယ ဘဂဝတိ ဗြဟ္မစရိယံ ဝုဿတိ, ဧဝမေဝံ အနိန္ဒ္ရိယဗဒ္ဓဿ ဒုက္ခဿ ပရိညာယ ဘဂဝတိ ဗြဟ္မစရိယံ ဝုဿတီတိ ? န ဟေဝံ ဝတ္တဗ္ဗေ။ပေ.။ ယထာ ဣန္ဒ္ရိယဗဒ္ဓံ ဒုက္ခံ ပရိညာတံ န ပုန ဥပ္ပဇ္ဇတိ , ဧဝမေဝံ အနိန္ဒ္ရိယဗဒ္ဓံ ဒုက္ခံ ပရိညာတံ န ပုန ဥပ္ပဇ္ဇတီတိ? န ဟေဝံ ဝတ္တဗ္ဗေ။ တေန ဟိ ဣန္ဒ္ရိယဗဒ္ဓညေဝ ဒုက္ခန္တိ။

ဣန္ဒ္ရိယဗဒ္ဓကထာ နိဋ္ဌိတာ။

၁၇. သတ္တရသမဝဂ္ဂေါ

(၁၇၀) ၅. ဌပေတွာ အရိယမဂ္ဂန္တိကထာ

၇၈၉. ဌပေတွာ အရိယမဂ္ဂံ အဝသေသာ သင်္ခါရာ ဒုက္ခာတိ? အာမန္တာ။ ဒုက္ခသမုဒယောပိ ဒုက္ခောတိ? န ဟေဝံ ဝတ္တဗ္ဗေ။ပေ.။ ဒုက္ခသမုဒယောပိ ဒုက္ခောတိ? အာမန္တာ။ တီဏေဝ အရိယသစ္စာနီတိ? န ဟေဝံ ဝတ္တဗ္ဗေ။ပေ.။ တီဏေဝ အရိယသစ္စာနီတိ? အာမန္တာ။ နနု စတ္တာရိ အရိယသစ္စာနိ ဝုတ္တာနိ ဘဂဝတာ – ဒုက္ခံ, ဒုက္ခသမုဒယော, ဒုက္ခနိရောဓေါ, ဒုက္ခနိရောဓဂါမိနီ ပဋိပဒါတိ? အာမန္တာ။ ဟဉ္စိ စတ္တာရိ အရိယသစ္စာနိ ဝုတ္တာနိ ဘဂဝတာ – ဒုက္ခံ, ဒုက္ခသမုဒယော, ဒုက္ခနိရောဓေါ, ဒုက္ခနိရောဓဂါမိနီ ပဋိပဒါ; နော စ ဝတ ရေ ဝတ္တဗ္ဗေ – ‘‘တီဏေဝ အရိယသစ္စာနီ’’တိ။

ဒုက္ခသမုဒယောပိ ဒုက္ခောတိ? အာမန္တာ။ ကေနဋ္ဌေနာတိ? အနိစ္စဋ္ဌေန။ အရိယမဂ္ဂေါ အနိစ္စောတိ? အာမန္တာ။ အရိယမဂ္ဂေါ ဒုက္ခောတိ? န ဟေဝံ ဝတ္တဗ္ဗေ။ပေ.။။

အရိယမဂ္ဂေါ အနိစ္စော, သော စ န ဒုက္ခောတိ? အာမန္တာ။ ဒုက္ခသမုဒယော အနိစ္စော, သော စ န ဒုက္ခောတိ? န ဟေဝံ ဝတ္တဗ္ဗေ။ပေ.။ ဒုက္ခသမုဒယော အနိစ္စော, သော စ ဒုက္ခောတိ? အာမန္တာ။ အရိယမဂ္ဂေါ အနိစ္စော, သော စ ဒုက္ခောတိ? န ဟေဝံ ဝတ္တဗ္ဗေ။ပေ.။။

၇၉၀. န ဝတ္တဗ္ဗံ – ‘‘ဌပေတွာ အရိယမဂ္ဂံ အဝသေသာ သင်္ခါရာ ဒုက္ခာ’’တိ? အာမန္တာ။ နနု သာ ဒုက္ခနိရောဓဂါမိနီ ပဋိပဒါတိ? အာမန္တာ။ ဟဉ္စိ သာ ဒုက္ခနိရောဓဂါမိနီ ပဋိပဒါ, တေန ဝတ ရေ ဝတ္တဗ္ဗေ – ‘‘ဌပေတွာ အရိယမဂ္ဂံ အဝသေသာ သင်္ခါရာ ဒုက္ခာ’’တိ။

ဌပေတွာ အရိယမဂ္ဂန္တိကထာ နိဋ္ဌိတာ။

၁၇. သတ္တရသမဝဂ္ဂေါ

(၁၇၁) ၆. န ဝတ္တဗ္ဗံ သံဃော ဒက္ခိဏံ ပဋိဂ္ဂဏှာတိကထာ

၇၉၁. န ဝတ္တဗ္ဗံ – ‘‘သံဃော ဒက္ခိဏံ ပဋိဂ္ဂဏှာတီ’’တိ? အာမန္တာ။ နနု သံဃော အာဟုနေယျော ပါဟုနေယျော ဒက္ခိဏေယျော အဉ္ဇလိကရဏီယော အနုတ္တရံ ပုညက္ခေတ္တံ လောကဿာတိ? အာမန္တာ။ ဟဉ္စိ သံဃော အာဟုနေယျော ပါဟုနေယျော ဒက္ခိဏေယျော အဉ္ဇလိကရဏီယော အနုတ္တရံ ပုညက္ခေတ္တံ လောကဿ, တေန ဝတ ရေ ဝတ္တဗ္ဗေ – ‘‘သံဃော ဒက္ခိဏံ ပဋိဂ္ဂဏှာတီ’’တိ။

န ဝတ္တဗ္ဗံ – ‘‘သံဃော ဒက္ခိဏံ ပဋိဂ္ဂဏှာတီ’’တိ? အာမန္တာ။ နနု စတ္တာရော ပုရိသယုဂါ အဋ္ဌပုရိသပုဂ္ဂလာ ဒက္ခိဏေယျာ ဝုတ္တာ ဘဂဝတာတိ? အာမန္တာ။ ဟဉ္စိ စတ္တာရော ပုရိသယုဂါ အဋ္ဌ ပုရိသပုဂ္ဂလာ ဒက္ခိဏေယျာ ဝုတ္တာ ဘဂဝတာ, တေန ဝတ ရေ ဝတ္တဗ္ဗေ – ‘‘သံဃော ဒက္ခိဏံ ပဋိဂ္ဂဏှာတီ’’တိ။

န ဝတ္တဗ္ဗံ – ‘‘သံဃော ဒက္ခိဏံ ပဋိဂ္ဂဏှာတီ’’တိ? အာမန္တာ။ နနု အတ္ထိ ကေစိ သံဃဿ ဒါနံ ဒေန္တီတိ? အာမန္တာ။ ဟဉ္စိ အတ္ထိ ကေစိ သံဃဿ ဒါနံ ဒေန္တိ, တေန ဝတ ရေ ဝတ္တဗ္ဗေ – ‘‘သံဃော ဒက္ခိဏံ ပဋိဂ္ဂဏှာတီ’’တိ။ နနု အတ္ထိ ကေစိ သံဃဿ စီဝရံ ဒေန္တိ။ပေ.။ ပိဏ္ဍပါတံ ဒေန္တိ။ သေနာသနံ ဒေန္တိ။ ဂိလာနပစ္စယဘေသဇ္ဇပရိက္ခာရံ ဒေန္တိ။ ခါဒနီယံ ဒေန္တိ။ ဘောဇနီယံ ဒေန္တိ။ပေ.။ ပါနီယံ ဒေန္တီတိ? အာမန္တာ။ ဟဉ္စိ အတ္ထိ ကေစိ သံဃဿ ပါနီယံ ဒေန္တိ, တေန ဝတ ရေ ဝတ္တဗ္ဗေ – ‘‘သံဃော ဒက္ခိဏံ ပဋိဂ္ဂဏှာတီ’’တိ။

န ဝတ္တဗ္ဗံ – ‘‘သံဃော ဒက္ခိဏံ ပဋိဂ္ဂဏှာတီ’’တိ? အာမန္တာ။ နနု ဝုတ္တံ ဘဂဝတာ –

‘‘အာဟုတိံ ဇာတဝေဒေါဝ၊ မဟာမေဃံဝ မေဒနီ။

သံဃော သမာဓိသမ္ပန္နော၊ ပဋိဂ္ဂဏှာတိ ဒက္ခိဏ’’န္တိ။

အတ္ထေဝ သုတ္တန္တောတိ? အာမန္တာ။ တေန ဟိ သံဃော ဒက္ခိဏံ ပဋိဂ္ဂဏှာတီတိ။

၇၉၂. သံဃော ဒက္ခိဏံ ပဋိဂ္ဂဏှာတီတိ? အာမန္တာ။ မဂ္ဂေါ ပဋိဂ္ဂဏှာတိ, ဖလံ ပဋိဂ္ဂဏှာတီတိ? န ဟေဝံ ဝတ္တဗ္ဗေ။ပေ.။။

န ဝတ္တဗ္ဗံ သံဃော ဒက္ခိဏံ ပဋိဂ္ဂဏှာတီတိကထာ နိဋ္ဌိတာ။

၁၇. သတ္တရသမဝဂ္ဂေါ

(၁၇၂) ၇. န ဝတ္တဗ္ဗံ သံဃော ဒက္ခိဏံ ဝိသောဓေတီတိကထာ

၇၉၃. န ဝတ္တဗ္ဗံ – ‘‘သံဃော ဒက္ခိဏံ ဝိသောဓေတီ’’တိ? အာမန္တာ။ နနု သံဃော အာဟုနေယျော ပါဟုနေယျော ဒက္ခိဏေယျော အဉ္ဇလိကရဏီယော အနုတ္တရံ ပုညက္ခေတ္တံ လောကဿာတိ? အာမန္တာ။ ဟဉ္စိ သံဃော အာဟုနေယျော။ပေ.။ အနုတ္တရံ ပုညက္ခေတ္တံ လောကဿ, တေန ဝတ ရေ ဝတ္တဗ္ဗေ – ‘‘သံဃော ဒက္ခိဏံ ဝိသောဓေတီ’’တိ။

န ဝတ္တဗ္ဗံ – ‘‘သံဃော ဒက္ခိဏံ ဝိသောဓေတီ’’တိ? အာမန္တာ။ နနု စတ္တာရော ပုရိသယုဂါ အဋ္ဌ ပုရိသပုဂ္ဂလာ ဒက္ခိဏေယျာ ဝုတ္တာ ဘဂဝတာတိ? အာမန္တာ။ ဟဉ္စိ စတ္တာရော ပုရိသယုဂါ အဋ္ဌ ပုရိသပုဂ္ဂလာ ဒက္ခိဏေယျာ ဝုတ္တာ ဘဂဝတာ, တေန ဝတ ရေ ဝတ္တဗ္ဗေ – ‘‘သံဃော ဒက္ခိဏံ ဝိသောဓေတီ’’တိ။

န ဝတ္တဗ္ဗံ – ‘‘သံဃော ဒက္ခိဏံ ဝိသောဓေတီ’’တိ? အာမန္တာ။ နနု အတ္ထိ ကေစိ သံဃဿ ဒါနံ ဒတွာ ဒက္ခိဏံ အာရာဓေန္တီတိ? အာမန္တာ။ ဟဉ္စိ အတ္ထိ ကေစိ သံဃဿ ဒါနံ ဒတွာ ဒက္ခိဏံ အာရာဓေန္တိ, တေန ဝတ ရေ ဝတ္တဗ္ဗေ – ‘‘သံဃော ဒက္ခိဏံ ဝိသောဓေတီ’’တိ။

နနု အတ္ထိ ကေစိ သံဃဿ စီဝရံ ဒတွာ။ပေ.။ ပိဏ္ဍပါတံ ဒတွာ။ပေ.။ သေနာသနံ ဒတွာ။ ဂိလာနပစ္စယဘေသဇ္ဇပရိက္ခာရံ ဒတွာ။ ခါဒနီယံ ဒတွာ။ ဘောဇနီယံ ဒတွာ။ပေ.။ ပါနီယံ ဒတွာ ဒက္ခိဏံ အာရာဓေန္တီတိ? အာမန္တာ။ ဟဉ္စိ အတ္ထိ ကေစိ သံဃဿ ပါနီယံ ဒတွာ ဒက္ခိဏံ အာရာဓေန္တိ, တေန ဝတ ရေ ဝတ္တဗ္ဗေ – ‘‘သံဃော ဒက္ခိဏံ ဝိသောဓေတီ’’တိ။

၇၉၄. သံဃော ဒက္ခိဏံ ဝိသောဓေတီတိ? အာမန္တာ။ မဂ္ဂေါ ဝိသောဓေတိ, ဖလံ ဝိသောဓေတီတိ? န ဟေဝံ ဝတ္တဗ္ဗေ။ပေ.။။

န ဝတ္တဗ္ဗံ သံဃော ဒက္ခိဏံ ဝိသောဓေတီတိကထာ နိဋ္ဌိတာ။

၁၇. သတ္တရသမဝဂ္ဂေါ

(၁၇၃) ၈. န ဝတ္တဗ္ဗံ သံဃော ဘုဉ္ဇတီတိကထာ

၇၉၅. န ဝတ္တဗ္ဗံ – ‘‘သံဃော ဘုဉ္ဇတိ ပိဝတိ ခါဒတိ သာယတီ’’တိ? အာမန္တာ။ နနု အတ္ထိ ကေစိ သံဃဘတ္တာနိ ကရောန္တိ, ဥဒ္ဒေသဘတ္တာနိ ကရောန္တိ, ယာဂုပါနာနိ ကရောန္တီတိ? အာမန္တာ။ ဟဉ္စိ အတ္ထိ ကေစိ သံဃဘတ္တာနိ ကရောန္တိ, ဥဒ္ဒေသဘတ္တာနိ ကရောန္တိ, ယာဂုပါနာနိ ကရောန္တိ, တေန ဝတ ရေ ဝတ္တဗ္ဗေ – ‘‘သံဃော ဘုဉ္ဇတိ ပိဝတိ ခါဒတိ သာယတီ’’တိ။

န ဝတ္တဗ္ဗံ – ‘‘သံဃော ဘုဉ္ဇတိ ပိဝတိ ခါဒတိ သာယတီ’’တိ? အာမန္တာ။ နနု ဝုတ္တံ ဘဂဝတာ – ‘‘ဂဏဘောဇနံ ပရမ္ပရဘောဇနံ အတိရိတ္တဘောဇနံ အနတိရိတ္တဘောဇန’’န္တိ? အာမန္တာ။ ဟဉ္စိ ဝုတ္တံ ဘဂဝတာ – ‘‘ဂဏဘောဇနံ ပရမ္ပရဘောဇနံ အတိရိတ္တဘောဇနံ အနတိရိတ္တဘောဇနံ’’, တေန ဝတ ရေ ဝတ္တဗ္ဗေ – ‘‘သံဃော ဘုဉ္ဇတိ ပိဝတိ ခါဒတိ သာယတီ’’တိ။

န ဝတ္တဗ္ဗံ – ‘‘သံဃော ဘုဉ္ဇတိ ပိဝတိ ခါဒတိ သာယတီ’’တိ? အာမန္တာ။ နနု အဋ္ဌ ပါနာနိ ဝုတ္တာနိ ဘဂဝတာ – အမ္ဗပါနံ, ဇမ္ဗုပါနံ , စောစပါနံ, မောစပါနံ, မဓုကပါနံ, [မဓုပါနံ (သီ. သျာ. ကံ. ဣ.) မဟာဝ. ၃၀၀ ပန ပဿိတဗ္ဗံ] မုဒ္ဒိကပါနံ, သာလုကပါနံ, ဖာရုသကပါနန္တိ? အာမန္တာ။ ဟဉ္စိ အဋ္ဌ ပါနာနိ ဝုတ္တာနိ ဘဂဝတာ – အမ္ဗပါနံ, ဇမ္ဗုပါနံ, စောစပါနံ, မောစပါနံ, မဓုကပါနံ, မုဒ္ဒိကပါနံ , သာလုကပါနံ, ဖာရုသကပါနံ, တေန ဝတ ရေ ဝတ္တဗ္ဗေ – ‘‘သံဃော ဘုဉ္ဇတိ ပိဝတိ ခါဒတိ သာယတီ’’တိ။

၇၉၆. သံဃော ဘုဉ္ဇတိ ပိဝတိ ခါဒတိ သာယတီတိ? အာမန္တာ။ မဂ္ဂေါ ဘုဉ္ဇတိ ပိဝတိ ခါဒတိ သာယတိ, ဖလံ ဘုဉ္ဇတိ ပိဝတိ ခါဒတိ သာယတီတိ? န ဟေဝံ ဝတ္တဗ္ဗေ။ပေ.။။

န ဝတ္တဗ္ဗံ သံဃော ဘုဉ္ဇတီတိကထာ နိဋ္ဌိတာ။

၁၇. သတ္တရသမဝဂ္ဂေါ

(၁၇၄) ၉. န ဝတ္တဗ္ဗံ သံဃဿဒိန္နံ မဟပ္ဖလန္တိကထာ

၇၉၇. န ဝတ္တဗ္ဗံ – ‘‘သံဃဿ ဒိန္နံ မဟပ္ဖလ’’န္တိ? အာမန္တာ။ နနု သံဃော အာဟုနေယျော ပါဟုနေယျော ဒက္ခိဏေယျော အဉ္ဇလိကရဏီယော အနုတ္တရံ ပုညက္ခေတ္တံ လောကဿာတိ? အာမန္တာ။ ဟဉ္စိ သံဃော အာဟုနေယျော။ပေ.။ အနုတ္တရံ ပုညက္ခေတ္တံ လောကဿ, တေန ဝတ ရေ ဝတ္တဗ္ဗေ – ‘‘သံဃဿ ဒိန္နံ မဟပ္ဖလ’’န္တိ။

န ဝတ္တဗ္ဗံ – ‘‘သံဃဿ ဒိန္နံ မဟပ္ဖလ’’န္တိ? အာမန္တာ။ နနု စတ္တာရော ပုရိသယုဂါ အဋ္ဌ ပုရိသပုဂ္ဂလာ ဒက္ခိဏေယျာ ဝုတ္တာ ဘဂဝတာတိ? အာမန္တာ။ ဟဉ္စိ စတ္တာရော ပုရိသယုဂါ အဋ္ဌ ပုရိသပုဂ္ဂလာ ဒက္ခိဏေယျာ ဝုတ္တာ ဘဂဝတာ, တေန ဝတ ရေ ဝတ္တဗ္ဗေ – ‘‘သံဃဿ ဒိန္နံ မဟပ္ဖလ’’န္တိ။

၇၉၈. န ဝတ္တဗ္ဗံ – ‘‘သံဃဿ ဒိန္နံ မဟပ္ဖလ’’န္တိ? အာမန္တာ။ နနု ဝုတ္တံ ဘဂဝတာ – ‘‘သံဃေ, ဂေါတမိ, ဒေဟိ, သံဃေ တေ ဒိန္နေ အဟဉ္စေဝ ပူဇိတော ဘဝိဿာမိ သံဃော စာ’’တိ [မ. နိ. ၃.၃၇၆]။ အတ္ထေဝ သုတ္တန္တောတိ? အာမန္တာ။ တေန ဟိ သံဃဿ ဒိန္နံ မဟပ္ဖလန္တိ။

န ဝတ္တဗ္ဗံ – ‘‘သံဃဿ ဒိန္နံ မဟပ္ဖလ’’န္တိ? အာမန္တာ။ နနု သက္ကော ဒေဝါနမိန္ဒော ဘဂဝန္တံ ဧတဒဝေါစ –

‘‘ယဇမာနာနံ မနုဿာနံ၊ ပုညပေက္ခာန ပါဏိနံ။

ကရောတံ ဩပဓိကံ ပုညံ၊ ကတ္ထ ဒိန္နံ မဟပ္ဖလန္တိ။

‘‘စတ္တာရော စ ပဋိပန္နာ၊ စတ္တာရော စ ဖလေ ဌိတာ။

ဧသ သံဃော ဥဇုဘူတော၊ ပညာသီလသမာဟိတော။

‘‘ယဇမာနာနံ မနုဿာနံ၊ ပုညပေက္ခာန ပါဏိနံ။

ကရောတံ ဩပဓိကံ ပုညံ၊ သံဃေ ဒိန္နံ မဟပ္ဖလ’’န္တိ [သံ. နိ. ၁.၂၆၂; ဝိ. ဝ. ၆၄၂၊ ၇၅၁]။

‘‘ဧသော ဟိ သံဃော ဝိပုလော မဟဂ္ဂတော၊

ဧသပ္ပမေယျော ဥဒဓီဝ သာဂရော။

ဧတေ ဟိ သေဋ္ဌာ နရဝီရသာဝကာ [နရသီဟသာဝကာ (က.)]၊

ပဘင်္ကရာ ဓမ္မမုဒီရယန္တိ။

‘‘တေသံ သုဒိန္နံ သုဟုတံ သုယိဋ္ဌံ၊

ယေ သံဃမုဒ္ဒိဿ ဒဒန္တိ ဒါနံ။

သာ ဒက္ခိဏာ သံဃဂတာ ပတိဋ္ဌိတာ၊

မဟပ္ဖလာ လောကဝိဒူန ဝဏ္ဏိတာ။

‘‘ဧတာဒိသံ ယညမနုဿရန္တာ၊

ယေ ဝေဒဇာတာ ဝိစရန္တိ [ဝိဟရန္တိ (သီ. က.)] လောကေ။

ဝိနေယျ မစ္ဆေရမလံ သမူလံ၊

အနိန္ဒိတာ သဂ္ဂမုပေန္တိ ဌာန’’န္တိ [ဝိ. ဝ. ၆၄၅၊ ၇၅၄]။

အတ္ထေဝ သုတ္တန္တောတိ? အာမန္တာ။ တေန ဟိ သံဃဿ ဒိန္နံ မဟပ္ဖလန္တိ။

န ဝတ္တဗ္ဗံ သံဃဿ ဒိန္နံ မဟပ္ဖလန္တိကထာ နိဋ္ဌိတာ။

၁၇. သတ္တရသမဝဂ္ဂေါ

(၁၇၅) ၁၀. န ဝတ္တဗ္ဗံ ဗုဒ္ဓဿဒိန္နံ မဟပ္ဖလန္တိကထာ

၇၉၉. န ဝတ္တဗ္ဗံ – ‘‘ဗုဒ္ဓဿ ဒိန္နံ မဟပ္ဖလ’’န္တိ? အာမန္တာ။ နနု ဘဂဝါ ဒွိပဒါနံ အဂ္ဂေါ, ဒွိပဒါနံ သေဋ္ဌော, ဒွိပဒါနံ ပမောက္ခော, ဒွိပဒါနံ ဥတ္တမော, ဒွိပဒါနံ ပဝရော အသမော အသမသမော အပ္ပဋိသမော အပ္ပဋိဘာဂေါ အပ္ပဋိပုဂ္ဂလောတိ? အာမန္တာ။ ဟဉ္စိ ဘဂဝါ ဒွိပဒါနံ အဂ္ဂေါ, ဒွိပဒါနံ သေဋ္ဌော, ဒွိပဒါနံ ပမောက္ခော, ဒွိပဒါနံ ဥတ္တမော, ဒွိပဒါနံ ပဝရော အသမော အသမသမော အပ္ပဋိသမော အပ္ပဋိဘာဂေါ အပ္ပဋိပုဂ္ဂလော, တေန ဝတ ရေ ဝတ္တဗ္ဗေ – ‘‘ဗုဒ္ဓဿ ဒိန္နံ မဟပ္ဖလ’’န္တိ။

န ဝတ္တဗ္ဗံ – ‘‘ဗုဒ္ဓဿ ဒိန္နံ မဟပ္ဖလ’’န္တိ? အာမန္တာ။ အတ္ထိ ကောစိ ဗုဒ္ဓေန သမသမော – သီလေန သမာဓိနာ ပညာယာတိ? နတ္ထိ ။ ဟဉ္စိ နတ္ထိ ကောစိ ဗုဒ္ဓေန သမသမော – သီလေန သမာဓိနာ ပညာယ, တေန ဝတ ရေ ဝတ္တဗ္ဗေ – ‘‘ဗုဒ္ဓဿ ဒိန္နံ မဟပ္ဖလ’’န္တိ။

န ဝတ္တဗ္ဗံ – ‘‘ဗုဒ္ဓဿ ဒိန္နံ မဟပ္ဖလ’’န္တိ? အာမန္တာ။ နနု ဝုတ္တံ ဘဂဝတာ –

‘‘နယိမသ္မိံ ဝါ လောကေ ပရသ္မိံ ဝါ ပန၊

ဗုဒ္ဓေန သေဋ္ဌော စ သမော စ ဝိဇ္ဇတိ။

ယမာဟုနေယျာနံ အဂ္ဂတံ ဂတော၊

ပုညတ္ထိကာနံ ဝိပုလပ္ဖလေသိန’’န္တိ [ဝိ. ဝ. ၁၀၄၇]။

အတ္ထေဝ သုတ္တန္တောတိ? အာမန္တာ။ တေန ဟိ ဗုဒ္ဓဿ ဒိန္နံ မဟပ္ဖလန္တိ။

န ဝတ္တဗ္ဗံ ဗုဒ္ဓဿ ဒိန္နံ မဟပ္ဖလန္တိကထာ နိဋ္ဌိတာ။

၁၇. သတ္တရသမဝဂ္ဂေါ

(၁၇၆) ၁၁. ဒက္ခိဏာဝိသုဒ္ဓိကထာ

၈၀၀. ဒါယကတောဝ ဒါနံ ဝိသုဇ္ဈတိ, နော ပဋိဂ္ဂါဟကတောတိ? အာမန္တာ။ နနု အတ္ထိ ကေစိ ပဋိဂ္ဂါဟကာ အာဟုနေယျာ ပါဟုနေယျာ ဒက္ခိဏေယျာ အဉ္ဇလိကရဏီယာ အနုတ္တရံ ပုညက္ခေတ္တံ လောကဿာတိ? အာမန္တာ ။ ဟဉ္စိ အတ္ထိ ကေစိ ပဋိဂ္ဂါဟကာ အာဟုနေယျာ ပါဟုနေယျာ ဒက္ခိဏေယျာ အဉ္ဇလိကရဏီယာ အနုတ္တရံ ပုညက္ခေတ္တံ လောကဿ, နော စ ဝတ ရေ ဝတ္တဗ္ဗေ – ‘‘ဒါယကတောဝ ဒါနံ ဝိသုဇ္ဈတိ, နော ပဋိဂ္ဂါဟကတော’’တိ။

ဒါယကတောဝ ဒါနံ ဝိသုဇ္ဈတိ, နော ပဋိဂ္ဂါဟကတောတိ? အာမန္တာ ။ နနု စတ္တာရော ပုရိသယုဂါ အဋ္ဌ ပုရိသပုဂ္ဂလာ ဒက္ခိဏေယျာ ဝုတ္တာ ဘဂဝတာတိ? အာမန္တာ။ ဟဉ္စိ စတ္တာရော ပုရိသယုဂါ အဋ္ဌ ပုရိသပုဂ္ဂလာ ဒက္ခိဏေယျာ ဝုတ္တာ ဘဂဝတာ, နော စ ဝတ ရေ ဝတ္တဗ္ဗေ – ‘‘ဒါယကတောဝ ဒါနံ ဝိသုဇ္ဈတိ, နော ပဋိဂ္ဂါဟကတော’’တိ။

ဒါယကတောဝ ဒါနံ ဝိသုဇ္ဈတိ, နော ပဋိဂ္ဂါဟကတောတိ? အာမန္တာ။ နနု အတ္ထိ ကေစိ သောတာပန္နေ ဒါနံ ဒတွာ ဒက္ခိဏံ အာရာဓေန္တီတိ? အာမန္တာ။ ဟဉ္စိ အတ္ထိ ကေစိ သောတာပန္နေ ဒါနံ ဒတွာ ဒက္ခိဏံ အာရာဓေန္တိ, နော စ ဝတ ရေ ဝတ္တဗ္ဗေ – ‘‘ဒါယကတောဝ ဒါနံ ဝိသုဇ္ဈတိ, နော ပဋိဂ္ဂါဟကတော’’တိ။

နနု အတ္ထိ ကေစိ သကဒါဂါမိဿ။ပေ.။ အနာဂါမိဿ။ပေ.။ အရဟတော ဒါနံ ဒတွာ ဒက္ခိဏံ အာရာဓေန္တီတိ? အာမန္တာ။ ဟဉ္စိ အတ္ထိ ကေစိ အရဟတော ဒါနံ ဒတွာ ဒက္ခိဏံ အာရာဓေန္တိ, နော စ ဝတ ရေ ဝတ္တဗ္ဗေ – ‘‘ဒါယကတောဝ ဒါနံ ဝိသုဇ္ဈတိ, နော ပဋိဂ္ဂါဟကတော’’တိ။

၈၀၁. ပဋိဂ္ဂါဟကတော ဒါနံ ဝိသုဇ္ဈတီတိ? အာမန္တာ။ အညော အညဿ ကာရကော, ပရကတံ သုခဒုက္ခံ, အညော ကရောတိ အညော ပဋိသံဝေဒေတီတိ? န ဟေဝံ ဝတ္တဗ္ဗေ။ပေ.။။

ဒါယကတောဝ ဒါနံ ဝိသုဇ္ဈတိ, နော ပဋိဂ္ဂါဟကတောတိ? အာမန္တာ။ နနု ဝုတ္တံ ဘဂဝတာ – ‘‘စတဿော ခေါ ဣမာ, အာနန္ဒ, ဒက္ခိဏာ ဝိသုဒ္ဓိယော! ကတမာ စတဿော? အတ္ထာနန္ဒ, ဒက္ခိဏာ ဒါယကတော ဝိသုဇ္ဈတိ, နော ပဋိဂ္ဂါဟကတော; အတ္ထာနန္ဒ, ဒက္ခိဏာ ပဋိဂ္ဂါဟကတော ဝိသုဇ္ဈတိ, နော ဒါယကတော ; အတ္ထာနန္ဒ, ဒက္ခိဏာ ဒါယကတော စေဝ ဝိသုဇ္ဈတိ ပဋိဂ္ဂါဟကတော စ; အတ္ထာနန္ဒ, ဒက္ခိဏာ နေဝ ဒါယကတော ဝိသုဇ္ဈတိ, နော ပဋိဂ္ဂါဟကတော။ ဣမာ ခေါ, အာနန္ဒ, စတဿော ဒက္ခိဏာ ဝိသုဒ္ဓိယော’’တိ [မ. နိ. ၃.၃၈၁]။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ဒါယကတောဝ ဒါနံ ဝိသုဇ္ဈတိ, နော ပဋိဂ္ဂါဟကတော’’တိ။

ဒက္ခိဏာဝိသုဒ္ဓိကထာ နိဋ္ဌိတာ။

သတ္တရသမဝဂ္ဂေါ။

တဿုဒ္ဒါနံ –

အတ္ထိ အရဟတော ပုညူပစယော, နတ္ထိ အရဟတော အကာလမစ္စု, သဗ္ဗမိဒံ ကမ္မတော, ဣန္ဒ္ရိယဗဒ္ဓညေဝ ဒုက္ခံ, ဌပေတွာ အရိယမဂ္ဂံ အဝသေသာ သင်္ခါရာ ဒုက္ခာ, သံဃော ဒက္ခိဏံ ပဋိဂ္ဂဏှာတိ, သံဃော ဒက္ခိဏံ ဝိသောဓေတိ, သံဃော ဘုဉ္ဇတိ ပိဝတိ ခါဒတိ သာယတိ, သံဃဿ ဒိန္နံ မဟပ္ဖလံ, အတ္ထိ ဒါနံ ဝိသုဒ္ဓိယာတိ [ဝိသုဇ္ဈတီတိ (သျာ.)]။