၁၆. သောဠသမဝဂ္ဂ
(၁၅၆) ၁. နိဂ္ဂဟကထာ
၇၄၃. ပရော ပရဿ စိတ္တံ နိဂ္ဂဏှာတီတိ? အာမန္တာ။ ပရော ပရဿ စိတ္တံ ‘‘မာ ရဇ္ဇိ’’, ‘‘မာ ဒုဿိ’’, ‘‘မာ မုယှိ’’, ‘‘မာ ကိလိဿီ’’တိ နိဂ္ဂဏှာတီတိ? န ဟေဝံ ဝတ္တဗ္ဗေ။ပေ.။ ပရော ပရဿ စိတ္တံ နိဂ္ဂဏှာတီတိ? အာမန္တာ။ ပရော ပရဿ ဥပ္ပန္နော ဖဿော ‘‘မာ နိရုဇ္ဈီ’’တိ နိဂ္ဂဏှာတီတိ? န ဟေဝံ ဝတ္တဗ္ဗေ။ပေ.။ ပရော ပရဿ ဥပ္ပန္နာ ဝေဒနာ။ပေ.။ ဥပ္ပန္နာ သညာ။ ဥပ္ပန္နာ စေတနာ။ ဥပ္ပန္နံ စိတ္တံ။ ဥပ္ပန္နာ သဒ္ဓါ။ ဥပ္ပန္နံ ဝီရိယံ ။ ဥပ္ပန္နာ သတိ။ ဥပ္ပန္နော သမာဓိ။ပေ.။ ဥပ္ပန္နာ ပညာ ‘‘မာ နိရုဇ္ဈီ’’တိ နိဂ္ဂဏှာတီတိ? န ဟေဝံ ဝတ္တဗ္ဗေ။ပေ.။။
ပရော ပရဿ စိတ္တံ နိဂ္ဂဏှာတီတိ? အာမန္တာ။ ပရော ပရဿ အတ္ထာယ ရာဂံ ပဇဟတိ။ ဒေါသံ ပဇဟတိ။ပေ.။ အနောတ္တပ္ပံ ပဇဟတီတိ? န ဟေဝံ ဝတ္တဗ္ဗေ။ပေ.။။
ပရော ပရဿ စိတ္တံ နိဂ္ဂဏှာတီတိ? အာမန္တာ။ ပရော ပရဿ အတ္ထာယ မဂ္ဂံ ဘာဝေတိ။ သတိပဋ္ဌာနံ ဘာဝေတိ။ပေ.။ ဗောဇ္ဈင်္ဂံ ဘာဝေတီတိ ? န ဟေဝံ ဝတ္တဗ္ဗေ။ပေ.။။
ပရော ပရဿ စိတ္တံ နိဂ္ဂဏှာတီတိ? အာမန္တာ။ ပရော ပရဿ အတ္ထာယ ဒုက္ခံ ပရိဇာနာတိ, သမုဒယံ ပဇဟတိ, နိရောဓံ သစ္ဆိကရောတိ, မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
ပရော ပရဿ စိတ္တံ နိဂ္ဂဏှာတီတိ? အာမန္တာ။ အညော အညဿ ကာရကော, ပရင်္ကတံ သုခံ ဒုက္ခံ အညော ကရောတိ အညော ပဋိသံဝေဒေတီတိ? န ဟေဝံ ဝတ္တဗ္ဗေ။ပေ.။။
ပရော ပရဿ စိတ္တံ နိဂ္ဂဏှာတီတိ? အာမန္တာ။ နနု ဝုတ္တံ ဘဂဝတာ –
‘‘အတ္တနာဝ ကတံ ပါပံ၊ အတ္တနာ သံကိလိဿတိ။
အတ္တနာ အကတံ ပါပံ၊ အတ္တနာဝ ဝိသုဇ္ဈတိ။
သုဒ္ဓိ အသုဒ္ဓိ ပစ္စတ္တံ၊ နာညော အညံ ဝိသောဓယေ’’တိ [ဓ. ပ. ၁၆၅]။
အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ပရော ပရဿ စိတ္တံ နိဂ္ဂဏှာတီ’’တိ။
၇၄၄. န ဝတ္တဗ္ဗံ – ‘‘ပရော ပရဿ စိတ္တံ နိဂ္ဂဏှာတီ’’တိ? အာမန္တာ။ နနု အတ္ထိ ဗလပ္ပတ္တာ, အတ္ထိ ဝသီဘူတာတိ? အာမန္တာ။ ဟဉ္စိ အတ္ထိ ဗလပ္ပတ္တာ, အတ္ထိ ဝသီဘူတာ, တေန ဝတ ရေ ဝတ္တဗ္ဗေ – ‘‘ပရော ပရဿ စိတ္တံ နိဂ္ဂဏှာတီ’’တိ။
နိဂ္ဂဟကထာ နိဋ္ဌိတာ။
၁၆. သောဠသမဝဂ္ဂေါ
(၁၅၇) ၂. ပဂ္ဂဟကထာ
၇၄၅. ပရော ပရဿ စိတ္တံ ပဂ္ဂဏှာတီတိ? အာမန္တာ။ ပရော ပရဿ စိတ္တံ ‘‘မာ ရဇ္ဇိ,’’‘‘မာ ဒုဿိ,’’‘‘မာ မုယှိ,’’‘‘မာ ကိလိဿီ’’တိ ပဂ္ဂဏှာတီတိ? န ဟေဝံ ဝတ္တဗ္ဗေ။ပေ.။ ပရော ပရဿ စိတ္တံ ပဂ္ဂဏှာတီတိ? အာမန္တာ။ ပရော ပရဿ အလောဘံ ကုသလမူလံ ဇနေတိ။ အဒေါသံ ကုသလမူလံ ဇနေတိ။ အမောဟံ ကုသလမူလံ ဇနေတိ။ သဒ္ဓံ ဇနေတိ။ ဝီရိယံ ဇနေတိ။ သတိံ ဇနေတိ။ သမာဓိံ ဇနေတိ။ ပညံ ဇနေတီတိ? န ဟေဝံ ဝတ္တဗ္ဗေ။ပေ.။ ပရော ပရဿ စိတ္တံ ပဂ္ဂဏှာတီတိ? အာမန္တာ။ ပရော ပရဿ ဥပ္ပန္နော ဖဿော ‘‘မာ နိရုဇ္ဈီ’’တိ ပဂ္ဂဏှာတီတိ? န ဟေဝံ ဝတ္တဗ္ဗေ။ပေ.။ ပရော ပရဿ ဥပ္ပန္နာ ဝေဒနာ။ပေ.။ ဥပ္ပန္နာ ပညာ ‘‘မာ နိရုဇ္ဈီ’’တိ ပဂ္ဂဏှာတီတိ? န ဟေဝံ ဝတ္တဗ္ဗေ။ပေ.။။
ပရော ပရဿ စိတ္တံ ပဂ္ဂဏှာတီတိ? အာမန္တာ။ ပရော ပရဿ အတ္ထာယ ရာဂံ ပဇဟတိ။ ဒေါသံ ပဇဟတိ။ မောဟံ ပဇဟတိ။ပေ.။ အနောတ္တပ္ပံ ပဇဟတီတိ? န ဟေဝံ ဝတ္တဗ္ဗေ။ပေ.။။
ပရော ပရဿ စိတ္တံ ပဂ္ဂဏှာတီတိ? အာမန္တာ။ ပရော ပရဿ အတ္ထာယ မဂ္ဂံ ဘာဝေတိ။ သတိပဋ္ဌာနံ ဘာဝေတိ။ပေ.။ ဗောဇ္ဈင်္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
ပရော ပရဿ စိတ္တံ ပဂ္ဂဏှာတီတိ? အာမန္တာ။ ပရော ပရဿ အတ္ထာယ ဒုက္ခံ ပရိဇာနာတိ။ပေ.။ မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
ပရော ပရဿ စိတ္တံ ပဂ္ဂဏှာတီတိ? အာမန္တာ။ အညော အညဿ ကာရကော, ပရင်္ကတံ သုခံ ဒုက္ခံ အညော ကရောတိ အညော ပဋိသံဝေဒေတီတိ? န ဟေဝံ ဝတ္တဗ္ဗေ။ပေ.။။
ပရော ပရဿ စိတ္တံ ပဂ္ဂဏှာတီတိ? အာမန္တာ။ နနု ဝုတ္တံ ဘဂဝတာ – ‘‘အတ္တနာဝ ကတံ ပါပံ။ပေ.။ နာညော အညံ ဝိသောဓယေ’’တိ။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ပရော ပရဿ စိတ္တံ ပဂ္ဂဏှာတီ’’တိ။
၇၄၆. န ဝတ္တဗ္ဗံ – ‘‘ပရော ပရဿ စိတ္တံ ပဂ္ဂဏှာတီ’’တိ? အာမန္တာ။ နနု အတ္ထိ ဗလပ္ပတ္တာ, အတ္ထိ ဝသီဘူတာတိ? အာမန္တာ။ ဟဉ္စိ အတ္ထိ ဗလပ္ပတ္တာ, အတ္ထိ ဝသီဘူတာ, တေန ဝတ ရေ ဝတ္တဗ္ဗေ – ‘‘ပရော ပရဿ စိတ္တံ ပဂ္ဂဏှာတီ’’တိ။
ပဂ္ဂဟကထာ နိဋ္ဌိတာ။
၁၆. သောဠသမဝဂ္ဂေါ
(၁၅၈) ၃. သုခါနုပ္ပဒါနကထာ
၇၄၇. ပရော ပရဿ သုခံ အနုပ္ပဒေတီတိ? အာမန္တာ။ ပရော ပရဿ ဒုက္ခံ အနုပ္ပဒေတီတိ? န ဟေဝံ ဝတ္တဗ္ဗေ။ပေ.။ ပရော ပရဿ ဒုက္ခံ န အနုပ္ပဒေတီတိ? အာမန္တာ။ ပရော ပရဿ သုခံ န အနုပ္ပဒေတီတိ? န ဟေဝံ ဝတ္တဗ္ဗေ။ပေ.။ ပရော ပရဿ သုခံ အနုပ္ပဒေတီတိ? အာမန္တာ။ ပရော ပရဿ အတ္တနော သုခံ အနုပ္ပဒေတိ, အညေသံ သုခံ အနုပ္ပဒေတိ, တဿ သုခံ အနုပ္ပဒေတီတိ? န ဟေဝံ ဝတ္တဗ္ဗေ။ပေ.။ ပရော ပရဿ နေဝတ္တနော, န အညေသံ, န တဿ သုခံ အနုပ္ပဒေတီတိ? အာမန္တာ။ ဟဉ္စိ ပရော ပရဿ နေဝတ္တနော, န အညေသံ, န တဿ သုခံ အနုပ္ပဒေတိ, နော စ ဝတ ရေ ဝတ္တဗ္ဗေ – ‘‘ပရော ပရဿ သုခံ အနုပ္ပဒေတီ’’တိ။
ပရော ပရဿ သုခံ အနုပ္ပဒေတီတိ? အာမန္တာ။ အညော အညဿ ကာရကော, ပရင်္ကတံ သုခံ ဒုက္ခံ အညော ကရောတိ အညော ပဋိသံဝေဒေတီတိ? န ဟေဝံ ဝတ္တဗ္ဗေ။ပေ.။။
၇၄၈. န ဝတ္တဗ္ဗံ – ‘‘ပရော ပရဿ သုခံ အနုပ္ပဒေတီ’’တိ? အာမန္တာ။ နနု အာယသ္မာ ဥဒါယီ ဧတဒဝေါစ – ‘‘ဗဟူနံ ဝတ နော ဘဂဝါ ဒုက္ခဓမ္မာနံ အပဟတ္တာ, ဗဟူနံ ဝတ နော ဘဂဝါ သုခဓမ္မာနံ ဥပဟတ္တာ, ဗဟူနံ ဝတ နော ဘဂဝါ အကုသလာနံ ဓမ္မာနံ အပဟတ္တာ, ဗဟူနံ ဝတ နော ဘဂဝါ ကုသလာနံ ဓမ္မာနံ ဥပဟတ္တာ’’တိ [မ. နိ. ၂.၁၄၈ လဋုကိကောပမေ]! အတ္ထေဝ သုတ္တန္တောတိ? အာမန္တာ။ တေန ဟိ ပရော ပရဿ သုခံ အနုပ္ပဒေတီတိ။
သုခါနုပ္ပဒါနကထာ နိဋ္ဌိတာ။
၁၆. သောဠသမဝဂ္ဂေါ
(၁၅၉) ၄. အဓိဂယှမနသိကာရကထာ
၇၄၉. အဓိဂယှ မနသိ ကရောတီတိ? အာမန္တာ။ တေန စိတ္တေန တံ စိတ္တံ ပဇာနာတီတိ? န ဟေဝံ ဝတ္တဗ္ဗေ။ပေ.။ တေန စိတ္တေန တံ စိတ္တံ ပဇာနာတီတိ? အာမန္တာ ။ တေန စိတ္တေန တံ စိတ္တံ ‘‘စိတ္တ’’န္တိ ပဇာနာတီတိ? န ဟေဝံ ဝတ္တဗ္ဗေ။ပေ.။ တေန စိတ္တေန တံ စိတ္တံ ‘‘စိတ္တ’’န္တိ ပဇာနာတီတိ? အာမန္တာ။ တံ စိတ္တံ တဿ စိတ္တဿ အာရမ္မဏန္တိ? န ဟေဝံ ဝတ္တဗ္ဗေ။ပေ.။။
တံ စိတ္တံ တဿ စိတ္တဿ အာရမ္မဏန္တိ? အာမန္တာ။ တေန ဖဿေန တံ ဖဿံ ဖုသတိ, တာယ ဝေဒနာယ။ပေ.။ တာယ သညာယ။ တာယ စေတနာယ။ တေန စိတ္တေန။ တေန ဝိတက္ကေန။ တေန ဝိစာရေန။ တာယ ဣတိယာ။ တာယ သတိယာ။ တာယ ပညာယ တံ ပညံ ပဇာနာတီတိ? န ဟေဝံ ဝတ္တဗ္ဗေ။ပေ.။။
၇၅၀. အတီတံ ‘‘အတီတ’’န္တိ မနသိကရောန္တော, အနာဂတံ ‘‘အနာဂတ’’န္တိ မနသိ ကရောတီတိ? န ဟေဝံ ဝတ္တဗ္ဗေ။ပေ.။ အတီတံ ‘‘အတီတ’’န္တိ မနသိကရောန္တော, အနာဂတံ ‘‘အနာဂတ’’န္တိ မနသိ ကရောတီတိ? အာမန္တာ။ ဒွိန္နံ ဖဿာနံ။ပေ.။ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
အတီတံ ‘‘အတီတ’’န္တိ မနသိကရောန္တော, ပစ္စုပ္ပန္နံ ‘‘ပစ္စုပ္ပန္န’’န္တိ မနသိ ကရောတီတိ? န ဟေဝံ ဝတ္တဗ္ဗေ။ပေ.။ အတီတံ ‘‘အတီတ’’န္တိ မနသိကရောန္တော, ပစ္စုပ္ပန္နံ ‘‘ပစ္စုပ္ပန္န’’န္တိ မနသိ ကရောတီတိ? အာမန္တာ။ ဒွိန္နံ ဖဿာနံ။ပေ.။ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
အတီတံ ‘‘အတီတ’’န္တိ မနသိကရောန္တော, အနာဂတံ ‘‘အနာဂတ’’န္တိ မနသိ ကရောတိ, ပစ္စုပ္ပန္နံ ‘‘ပစ္စုပ္ပန္န’’န္တိ မနသိ ကရောတီတိ? န ဟေဝံ ဝတ္တဗ္ဗေ။ပေ.။ အတီတံ ‘‘အတီတ’’န္တိ မနသိကရောန္တော, အနာဂတံ ‘‘အနာဂတ’’န္တိ မနသိ ကရောတိ, ပစ္စုပ္ပန္နံ ‘‘ပစ္စုပ္ပန္န’’န္တိ မနသိ ကရောတီတိ? အာမန္တာ။ တိဏ္ဏံ ဖဿာနံ။ပေ.။ တိဏ္ဏံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
၇၅၁. အနာဂတံ ‘‘အနာဂတ’’န္တိ မနသိကရောန္တော, အတီတံ ‘‘အတီတ’’န္တိ မနသိ ကရောတီတိ? န ဟေဝံ ဝတ္တဗ္ဗေ။ပေ.။ အနာဂတံ ‘‘အနာဂတ’’န္တိ မနသိကရောန္တော, အတီတံ ‘‘အတီတ’’န္တိ မနသိ ကရောတီတိ? အာမန္တာ။ ဒွိန္နံ ဖဿာနံ။ပေ.။ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
အနာဂတံ ‘‘အနာဂတ’’န္တိ မနသိကရောန္တော, ပစ္စုပ္ပန္နံ ‘‘ပစ္စုပ္ပန္န’’န္တိ မနသိ ကရောတီတိ? န ဟေဝံ ဝတ္တဗ္ဗေ။ပေ.။ အနာဂတံ ‘‘အနာဂတ’’န္တိ မနသိကရောန္တော, ပစ္စုပ္ပန္နံ ‘‘ပစ္စုပ္ပန္န’’န္တိ မနသိ ကရောတီတိ? အာမန္တာ။ ဒွိန္နံ ဖဿာနံ။ပေ.။ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
အနာဂတံ ‘‘အနာဂတ’’န္တိ မနသိကရောန္တော, အတီတံ ‘‘အတီတ’’န္တိ မနသိ ကရောတိ, ပစ္စုပ္ပန္နံ ‘‘ပစ္စုပ္ပန္န’’န္တိ မနသိ ကရောတီတိ? န ဟေဝံ ဝတ္တဗ္ဗေ။ပေ.။ အနာဂတံ ‘‘အနာဂတ’’န္တိ မနသိကရောန္တော, အတီတံ ‘‘အတီတ’’န္တိ မနသိ ကရောတိ, ပစ္စုပ္ပန္နံ ‘‘ပစ္စုပ္ပန္န’’န္တိ မနသိ ကရောတီတိ? အာမန္တာ။ တိဏ္ဏံ ဖဿာနံ။ပေ.။ တိဏ္ဏံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
၇၅၂. ပစ္စုပ္ပန္နံ ‘‘ပစ္စုပ္ပန္န’’န္တိ မနသိကရောန္တော , အတီတံ ‘‘အတီတ’’န္တိ မနသိ ကရောတီတိ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ ‘‘ပစ္စုပ္ပန္န’’န္တိ မနသိကရောန္တော, အတီတံ ‘‘အတီတ’’န္တိ မနသိ ကရောတီတိ? အာမန္တာ။ ဒွိန္နံ ဖဿာနံ။ပေ.။ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
ပစ္စုပ္ပန္နံ ‘‘ပစ္စုပ္ပန္န’’န္တိ မနသိကရောန္တော, အနာဂတံ ‘‘အနာဂတ’’န္တိ မနသိ ကရောတီတိ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ ‘‘ပစ္စုပ္ပန္န’’န္တိ မနသိကရောန္တော, အနာဂတံ ‘‘အနာဂတ’’န္တိ မနသိ ကရောတီတိ? အာမန္တာ။ ဒွိန္နံ ဖဿာနံ။ပေ.။ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
ပစ္စုပ္ပန္နံ ‘‘ပစ္စုပ္ပန္န’’န္တိ မနသိကရောန္တော, အတီတံ ‘‘အတီတ’’န္တိ မနသိ ကရောတိ, အနာဂတံ ‘‘အနာဂတ’’န္တိ မနသိ ကရောတီတိ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ ‘‘ပစ္စုပ္ပန္န’’န္တိ မနသိကရောန္တော, အတီတံ ‘‘အတီတ’’န္တိ မနသိ ကရောတိ, အနာဂတံ ‘‘အနာဂတ’’န္တိ မနသိ ကရောတီတိ? အာမန္တာ။ တိဏ္ဏံ ဖဿာနံ။ပေ.။ တိဏ္ဏံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
၇၅၃. န ဝတ္တဗ္ဗံ – ‘‘အဓိဂယှ မနသိ ကရောတီ’’တိ? အာမန္တာ။ နနု ဝုတ္တံ ဘဂဝတာ –
‘‘သဗ္ဗေ သင်္ခါရာ အနိစ္စာတိ၊ ယဒါ ပညာယ ပဿတိ။
အထ နိဗ္ဗိန္ဒတိ ဒုက္ခေ၊ ဧသ မဂ္ဂေါ ဝိသုဒ္ဓိယာ။
‘‘သဗ္ဗေ သင်္ခါရာ ဒုက္ခာတိ၊ ယဒါ ပညာယ ပဿတိ။
အထ နိဗ္ဗိန္ဒတိ ဒုက္ခေ၊ ဧသ မဂ္ဂေါ ဝိသုဒ္ဓိယာ။
‘‘သဗ္ဗေ ဓမ္မာ အနတ္တာတိ၊ ယဒါ ပညာယ ပဿတိ။
အထ နိဗ္ဗိန္ဒတိ ဒုက္ခေ၊ ဧသ မဂ္ဂေါ ဝိသုဒ္ဓိယာ’’တိ [ဓ. ပ. ၂၇၇-၂၇၉]။
အတ္ထေဝ သုတ္တန္တောတိ? အာမန္တာ။ တေန ဟိ အဓိဂယှ မနသိ ကရောတီတိ။
အဓိဂယှမနသိကာရကထာ နိဋ္ဌိတာ။
၁၆. သောဠသမဝဂ္ဂေါ
(၁၆၀) ၅. ရူပံ ဟေတူတိကထာ
၇၅၄. ရူပံ ဟေတူတိ? အာမန္တာ။ အလောဘော ဟေတူတိ? န ဟေဝံ ဝတ္တဗ္ဗေ။ပေ.။ အဒေါသော ဟေတု။ပေ.။ အမောဟော ဟေတု။ လောဘော ဟေတု။ ဒေါသော ဟေတု။ မောဟော ဟေတူတိ? န ဟေဝံ ဝတ္တဗ္ဗေ။ပေ.။။
ရူပံ ဟေတူတိ? အာမန္တာ။ သာရမ္မဏံ, အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ နနု အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ ဟဉ္စိ အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓိ, နော စ ဝတ ရေ ဝတ္တဗ္ဗေ – ‘‘ရူပံ ဟေတူ’’တိ။
၇၅၅. အလောဘော ဟေတု သာရမ္မဏော, အတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ ရူပံ ဟေတု သာရမ္မဏံ, အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ အဒေါသော ဟေတု။ အမောဟော ဟေတု။ လောဘော ဟေတု။ ဒေါသော ဟေတု။ မောဟော ဟေတု သာရမ္မဏော, အတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ ရူပံ ဟေတု သာရမ္မဏံ, အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
ရူပံ ဟေတု အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ အလောဘော ဟေတု အနာရမ္မဏော, နတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ ရူပံ ဟေတု အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ ။ အဒေါသော ဟေတု။ အမောဟော ဟေတု။ လောဘော ဟေတု။ ဒေါသော ဟေတု။ မောဟော ဟေတု အနာရမ္မဏော, နတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
၇၅၆. န ဝတ္တဗ္ဗံ – ‘‘ရူပံ ဟေတူ’’တိ? အာမန္တာ။ နနု မဟာဘူတာ ဥပါဒါယရူပါနံ [ဥပါဒါရူပါနံ (သီ. ဣ. က.)] ဥပါဒါယဟေတူတိ? အာမန္တာ။ ဟဉ္စိ မဟာဘူတာ ဥပါဒါယရူပါနံ ဥပါဒါယဟေတု, တေန ဝတ ရေ ဝတ္တဗ္ဗေ – ‘‘ရူပံ ဟေတူ’’တိ။
ရူပံ ဟေတူတိကထာ နိဋ္ဌိတာ။
၁၆. သောဠသမဝဂ္ဂေါ
(၁၆၁) ၆. ရူပံ သဟေတုကန္တိကထာ
၇၅၇. ရူပံ သဟေတုကန္တိ? အာမန္တာ။ အလောဘဟေတုနာတိ? န ဟေဝံ ဝတ္တဗ္ဗေ။ပေ.။ အဒေါသဟေတုနာတိ ။ပေ.။ အမောဟဟေတုနာတိ။ပေ.။ လောဘဟေတုနာ။ပေ.။ ဒေါသဟေတုနာ။ပေ.။ မောဟဟေတုနာတိ? န ဟေဝံ ဝတ္တဗ္ဗေ။ပေ.။။
ရူပံ သဟေတုကန္တိ? အာမန္တာ။ သာရမ္မဏံ, အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ နနု အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ ဟဉ္စိ အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓိ, နော စ ဝတ ရေ ဝတ္တဗ္ဗေ – ‘‘ရူပံ သဟေတုက’’န္တိ။
၇၅၈. အလောဘော သဟေတုကော သာရမ္မဏော, အတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ ရူပံ သဟေတုကံ သာရမ္မဏံ, အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ အဒေါသော သဟေတုကော။ပေ.။ အမောဟော။ သဒ္ဓါ။ ဝီရိယံ။ သတိ။ သမာဓိ။ ပညာ။ လောဘော။ ဒေါသော။ မောဟော။ မာနော။ ဒိဋ္ဌိ။ ဝိစိကိစ္ဆာ။ ထိနံ။ ဥဒ္ဓစ္စံ။ အဟိရိကံ။ အနောတ္တပ္ပံ သဟေတုကံ သာရမ္မဏံ, အတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ ရူပံ သဟေတုကံ သာရမ္မဏံ, အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
ရူပံ သဟေတုကံ အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ အလောဘော သဟေတုကော အနာရမ္မဏော, နတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ ရူပံ သဟေတုကံ အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ အဒေါသော သဟေတုကော။ပေ.။ အနောတ္တပ္ပံ သဟေတုကံ အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
၇၅၉. န ဝတ္တဗ္ဗံ – ‘‘ရူပံ သဟေတုက’’န္တိ? အာမန္တာ။ နနု ရူပံ သပ္ပစ္စယန္တိ ? အာမန္တာ။ ဟဉ္စိ ရူပံ သပ္ပစ္စယံ, တေန ဝတ ရေ ဝတ္တဗ္ဗေ – ‘‘ရူပံ သဟေတုက’’န္တိ။
ရူပံ သဟေတုကန္တိကထာ နိဋ္ဌိတာ။
၁၆. သောဠသမဝဂ္ဂေါ
(၁၆၂) ၇. ရူပံ ကုသလာကုသလန္တိကထာ
၇၆၀. ရူပံ ကုသလန္တိ? အာမန္တာ။ သာရမ္မဏံ, အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ နနု အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ ဟဉ္စိ အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓိ, နော စ ဝတ ရေ ဝတ္တဗ္ဗေ – ‘‘ရူပံ ကုသလ’’န္တိ။
၇၆၁. အလောဘော ကုသလော သာရမ္မဏော, အတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ ရူပံ ကုသလံ သာရမ္မဏံ, အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
အဒေါသော ကုသလော။ပေ.။ အမောဟော ကုသလော။ပေ.။ သဒ္ဓါ။ ဝီရိယံ။ သတိ။ သမာဓိ။ပေ.။ ပညာ ကုသလာ သာရမ္မဏာ, အတ္ထိ တာယ အာဝဋ္ဋနာ။ပေ.။ ပဏိဓီတိ? အာမန္တာ။ ရူပံ ကုသလံ သာရမ္မဏံ, အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
ရူပံ ကုသလံ အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ အလောဘော ကုသလော အနာရမ္မဏော, နတ္ထိ တဿ အာဝဋ္ဋနာ ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
ရူပံ ကုသလံ အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ အဒေါသော ကုသလော။ပေ.။ ပညာ ကုသလာ အနာရမ္မဏာ, နတ္ထိ တာယ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
၇၆၂. ရူပံ အကုသလန္တိ? အာမန္တာ။ သာရမ္မဏံ, အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ နနု အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓီတိ ? အာမန္တာ။ ဟဉ္စိ အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓိ, နော စ ဝတ ရေ ဝတ္တဗ္ဗေ – ‘‘ရူပံ အကုသလ’’န္တိ။ပေ.။။
၇၆၃. လောဘော အကုသလော သာရမ္မဏော, အတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ ။ ရူပံ အကုသလံ သာရမ္မဏံ, အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ ဒေါသော။ မောဟော။ မာနော။ပေ.။ အနောတ္တပ္ပံ အကုသလံ သာရမ္မဏံ, အတ္ထိ တဿ အာဝဋ္ဋနာ။ပေ.။ ပဏိဓီတိ ? အာမန္တာ။ ရူပံ အကုသလံ သာရမ္မဏံ, အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
ရူပံ အကုသလံ အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ လောဘော အကုသလော အနာရမ္မဏော, နတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ ရူပံ အကုသလံ အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ ဒေါသော။ မောဟော။ပေ.။ အနောတ္တပ္ပံ အကုသလံ အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
၇၆၄. န ဝတ္တဗ္ဗံ – ‘‘ရူပံ ကုသလမ္ပိ အကုသလမ္ပီ’’တိ? အာမန္တာ။ နနု ကာယကမ္မံ ဝစီကမ္မံ ကုသလမ္ပိ အကုသလမ္ပီတိ? အာမန္တာ။ ဟဉ္စိ ကာယကမ္မံ ဝစီကမ္မံ ကုသလမ္ပိ အကုသလမ္ပိ, တေန ဝတ ရေ ဝတ္တဗ္ဗေ – ‘‘ရူပံ ကုသလမ္ပိ အကုသလမ္ပီ’’တိ။
ရူပံ ကုသလာကုသလန္တိကထာ နိဋ္ဌိတာ။
၁၆. သောဠသမဝဂ္ဂေါ
(၁၆၃) ၈. ရူပံ ဝိပါကောတိကထာ
၇၆၅. ရူပံ ဝိပါကောတိ? အာမန္တာ။ ရူပံ သုခဝေဒနိယံ ဒုက္ခဝေဒနိယံ အဒုက္ခမသုခဝေဒနိယံ , သုခါယ ဝေဒနာယ သမ္ပယုတ္တံ, ဒုက္ခာယ ဝေဒနာယ သမ္ပယုတ္တံ, အဒုက္ခမသုခါယ ဝေဒနာယ သမ္ပယုတ္တံ, ဖဿေန သမ္ပယုတ္တံ။ပေ.။ စိတ္တေန သမ္ပယုတ္တံ, သာရမ္မဏံ, အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ နနု န သုခဝေဒနိယံ န ဒုက္ခဝေဒနိယံ။ပေ.။ အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ ဟဉ္စိ န သုခဝေဒနိယံ န ဒုက္ခဝေဒနိယံ။ပေ.။ အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓိ, နော စ ဝတ ရေ ဝတ္တဗ္ဗေ – ‘‘ရူပံ ဝိပါကော’’တိ။
၇၆၆. ဖဿော ဝိပါကော, ဖဿော သုခဝေဒနိယော ဒုက္ခဝေဒနိယော။ပေ.။ သာရမ္မဏော , အတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ ရူပံ ဝိပါကော, ရူပံ သုခဝေဒနိယံ ဒုက္ခဝေဒနိယံ။ပေ.။ သာရမ္မဏံ, အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
ရူပံ ဝိပါကော , ရူပံ န သုခဝေဒနိယံ န ဒုက္ခဝေဒနိယံ။ပေ.။ အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ ဖဿော ဝိပါကော, ဖဿော န သုခဝေဒနိယော န ဒုက္ခဝေဒနိယော။ပေ.။ အနာရမ္မဏော, နတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
၇၆၇. န ဝတ္တဗ္ဗံ – ‘‘ရူပံ ဝိပါကော’’တိ? အာမန္တာ။ နနု ကမ္မဿ ကတတ္တာ ဥပ္ပန္နာ စိတ္တစေတသိကာ ဓမ္မာ ဝိပါကောတိ? အာမန္တာ။ ဟဉ္စိ ကမ္မဿ ကတတ္တာ ဥပ္ပန္နာ စိတ္တစေတသိကာ ဓမ္မာ ဝိပါကော, တေန ဝတ ရေ ဝတ္တဗ္ဗေ – ‘‘ကမ္မဿ ကတတ္တာ ဥပ္ပန္နံ ရူပံ ဝိပါကော’’တိ။
ရူပံ ဝိပါကောတိကထာ နိဋ္ဌိတာ။
၁၆. သောဠသမဝဂ္ဂေါ
(၁၆၄) ၉. ရူပံ ရူပါဝစရာရူပါဝစရန္တိကထာ
၇၆၈. အတ္ထိ ရူပံ ရူပါဝစရန္တိ? အာမန္တာ။ သမာပတ္တေသိယံ ဥပပတ္တေသိယံ ဒိဋ္ဌဓမ္မသုခဝိဟာရံ, သမာပတ္တေသိယေန စိတ္တေန ဥပပတ္တေသိယေန စိတ္တေန ဒိဋ္ဌဓမ္မသုခဝိဟာရေန စိတ္တေန သဟဂတံ သဟဇာတံ သံသဋ္ဌံ သမ္ပယုတ္တံ ဧကုပ္ပါဒံ ဧကနိရောဓံ ဧကဝတ္ထုကံ ဧကာရမ္မဏန္တိ? န ဟေဝံ ဝတ္တဗ္ဗေ။ပေ.။ နနု န သမာပတ္တေသိယံ န ဥပပတ္တေသိယံ န ဒိဋ္ဌဓမ္မသုခဝိဟာရံ, န သမာပတ္တေသိယေန စိတ္တေန န ဥပပတ္တေသိယေန စိတ္တေန န ဒိဋ္ဌဓမ္မသုခဝိဟာရေန စိတ္တေန သဟဂတံ သဟဇာတံ သံသဋ္ဌံ သမ္ပယုတ္တံ ဧကုပ္ပါဒံ ဧကနိရောဓံ ဧကဝတ္ထုကံ ဧကာရမ္မဏန္တိ? အာမန္တာ။ ဟဉ္စိ န သမာပတ္တေသိယံ န ဥပပတ္တေသိယံ န ဒိဋ္ဌဓမ္မသုခဝိဟာရံ, န သမာပတ္တေသိယေန စိတ္တေန။ပေ.။ ဧကာရမ္မဏံ, နော စ ဝတ ရေ ဝတ္တဗ္ဗေ – ‘‘အတ္ထိ ရူပံ ရူပါဝစရ’’န္တိ။
၇၆၉. အတ္ထိ ရူပံ အရူပါဝစရန္တိ? အာမန္တာ။ သမာပတ္တေသိယံ ဥပပတ္တေသိယံ ဒိဋ္ဌဓမ္မသုခဝိဟာရံ, သမာပတ္တေသိယေန စိတ္တေန ဥပပတ္တေသိယေန စိတ္တေန ဒိဋ္ဌဓမ္မသုခဝိဟာရေန စိတ္တေန သဟဂတံ သဟဇာတံ သံသဋ္ဌံ သမ္ပယုတ္တံ ဧကုပ္ပါဒံ ဧကနိရောဓံ ဧကဝတ္ထုကံ ဧကာရမ္မဏန္တိ? န ဟေဝံ ဝတ္တဗ္ဗေ။ပေ.။ နနု န သမာပတ္တေသိယံ န ဥပပတ္တေသိယံ န ဒိဋ္ဌဓမ္မသုခဝိဟာရံ, န သမာပတ္တေသိယေန စိတ္တေန ။ပေ.။ ဧကာရမ္မဏန္တိ? အာမန္တာ။ ဟဉ္စိ န သမာပတ္တေသိယံ န ဥပပတ္တေသိယံ။ပေ.။ ဧကဝတ္ထုကံ ဧကာရမ္မဏံ, နော စ ဝတ ရေ ဝတ္တဗ္ဗေ – ‘‘အတ္ထိ ရူပံ အရူပါဝစရ’’န္တိ။
၇၇၀. န ဝတ္တဗ္ဗံ – ‘‘အတ္ထိ ရူပံ ရူပါဝစရံ, အတ္ထိ ရူပံ အရူပါဝစရ’’န္တိ? အာမန္တာ။ နနု ကာမာဝစရကမ္မဿ ကတတ္တာ ရူပံ ကာမာဝစရန္တိ? အာမန္တာ။ ဟဉ္စိ ကာမာဝစရကမ္မဿ ကတတ္တာ ရူပံ ကာမာဝစရံ , တေန ဝတ ရေ ဝတ္တဗ္ဗေ – ‘‘ရူပါဝစရကမ္မဿ ကတတ္တာ ရူပံ ရူပါဝစရံ, အရူပါဝစရကမ္မဿ ကတတ္တာ ရူပံ အရူပါဝစရ’’န္တိ။
ရူပံ ရူပါဝစရာရူပါဝစရန္တိကထာ နိဋ္ဌိတာ။
၁၆. သောဠသမဝဂ္ဂေါ
(၁၆၅) ၁၀. ရူပါရူပဓါတုပရိယာပန္နကထာ
၇၇၁. ရူပရာဂေါ ရူပဓါတုပရိယာပန္နောတိ? အာမန္တာ။ သမာပတ္တေသိယော ဥပပတ္တေသိယော ဒိဋ္ဌဓမ္မသုခဝိဟာရော, သမာပတ္တေသိယေန စိတ္တေန ဥပပတ္တေသိယေန စိတ္တေန ဒိဋ္ဌဓမ္မသုခဝိဟာရေန စိတ္တေန သဟဂတော သဟဇာတော သံသဋ္ဌော သမ္ပယုတ္တော ဧကုပ္ပါဒေါ ဧကနိရောဓေါ ဧကဝတ္ထုကော ဧကာရမ္မဏောတိ? န ဟေဝံ ဝတ္တဗ္ဗေ။ပေ.။ နနု န သမာပတ္တေသိယော န ဥပပတ္တေသိယော န ဒိဋ္ဌဓမ္မသုခဝိဟာရော, န သမာပတ္တေသိယေန စိတ္တေန။ပေ.။ ဧကဝတ္ထုကော ဧကာရမ္မဏောတိ? အာမန္တာ။ ဟဉ္စိ န သမာပတ္တေသိယော န ဥပပတ္တေသိယော န ဒိဋ္ဌဓမ္မသုခဝိဟာရော, န သမာပတ္တေသိယေန စိတ္တေန။ပေ.။ ဧကဝတ္ထုကော ဧကာရမ္မဏော, နော စ ဝတ ရေ ဝတ္တဗ္ဗေ – ‘‘ရူပရာဂေါ ရူပဓါတုပရိယာပန္နော’’တိ။
၇၇၂. ရူပရာဂေါ ရူပဓါတုပရိယာပန္နောတိ? အာမန္တာ။ သဒ္ဒရာဂေါ သဒ္ဒဓါတုပရိယာပန္နောတိ? န ဟေဝံ ဝတ္တဗ္ဗေ ။ပေ.။ ရူပရာဂေါ ရူပဓါတုပရိယာပန္နောတိ? အာမန္တာ။ ဂန္ဓရာဂေါ။ပေ.။ ရသရာဂေါ။ပေ.။ ဖောဋ္ဌဗ္ဗရာဂေါ ဖောဋ္ဌဗ္ဗဓါတုပရိယာပန္နောတိ? န ဟေဝံ ဝတ္တဗ္ဗေ။ပေ.။။
သဒ္ဒရာဂေါ န ဝတ္တဗ္ဗံ – ‘‘သဒ္ဒဓါတုပရိယာပန္နော’’တိ? အာမန္တာ။ ရူပရာဂေါ န ဝတ္တဗ္ဗံ – ‘‘ရူပဓါတုပရိယာပန္နော’’တိ? န ဟေဝံ ဝတ္တဗ္ဗေ။ပေ.။ ဂန္ဓရာဂေါ။ပေ.။ ရသရာဂေါ။ပေ.။ ဖောဋ္ဌဗ္ဗရာဂေါ န ဝတ္တဗ္ဗံ – ‘‘ဖောဋ္ဌဗ္ဗဓါတုပရိယာပန္နော’’တိ? အာမန္တာ ။ ရူပရာဂေါ န ဝတ္တဗ္ဗံ – ‘‘ရူပဓါတုပရိယာပန္နော’’တိ? န ဟေဝံ ဝတ္တဗ္ဗေ။ပေ.။။
၇၇၃. အရူပရာဂေါ အရူပဓါတုပရိယာပန္နောတိ? အာမန္တာ။ အရူပရာဂေါ န ဝတ္တဗ္ဗံ – ‘‘အရူပဓါတုပရိယာပန္နော’’တိ? န ဟေဝံ ဝတ္တဗ္ဗေ။ပေ.။ အရူပရာဂေါ အရူပဓါတုပရိယာပန္နောတိ? အာမန္တာ။ သမာပတ္တေသိယော ဥပပတ္တေသိယော ဒိဋ္ဌဓမ္မသုခဝိဟာရော, သမာပတ္တေသိယေန စိတ္တေန ဥပပတ္တေသိယေန စိတ္တေန ဒိဋ္ဌဓမ္မသုခဝိဟာရေန စိတ္တေန သဟဂတော သဟဇာတော သံသဋ္ဌော သမ္ပယုတ္တော ဧကုပ္ပါဒေါ ဧကနိရောဓေါ ဧကဝတ္ထုကော ဧကာရမ္မဏောတိ? န ဟေဝံ ဝတ္တဗ္ဗေ။ပေ.။ နနု န သမာပတ္တေသိယော န ဥပပတ္တေသိယော န ဒိဋ္ဌဓမ္မသုခဝိဟာရော, န သမာပတ္တေသိယေန စိတ္တေန။ပေ.။ ဧကဝတ္ထုကော ဧကာရမ္မဏောတိ? အာမန္တာ။ ဟဉ္စိ န သမာပတ္တေသိယော န ဥပပတ္တေသိယော န ဒိဋ္ဌဓမ္မသုခဝိဟာရော, န သမာပတ္တေသိယေန စိတ္တေန န ဥပပတ္တေသိယေန စိတ္တေန န ဒိဋ္ဌဓမ္မသုခဝိဟာရေန စိတ္တေန သဟဂတော သဟဇာတော သံသဋ္ဌော သမ္ပယုတ္တော ဧကုပ္ပါဒေါ ဧကနိရောဓေါ ဧကဝတ္ထုကော ဧကာရမ္မဏော, နော စ ဝတ ရေ ဝတ္တဗ္ဗေ – ‘‘အရူပရာဂေါ အရူပဓါတုပရိယာပန္နော’’တိ။
၇၇၄. အရူပရာဂေါ အရူပဓါတုပရိယာပန္နောတိ? အာမန္တာ။ သဒ္ဒရာဂေါ သဒ္ဒဓါတုပရိယာပန္နောတိ ? န ဟေဝံ ဝတ္တဗ္ဗေ။ပေ.။ အရူပရာဂေါ အရူပဓါတုပရိယာပန္နောတိ? အာမန္တာ။ ဂန္ဓရာဂေါ။ပေ.။ ရသရာဂေါ။ပေ.။ ဖောဋ္ဌဗ္ဗရာဂေါ ဖောဋ္ဌဗ္ဗဓါတုပရိယာပန္နောတိ? န ဟေဝံ ဝတ္တဗ္ဗေ။ပေ.။။
သဒ္ဒရာဂေါ န ဝတ္တဗ္ဗံ – ‘‘သဒ္ဒဓါတုပရိယာပန္နော’’တိ? အာမန္တာ။ အရူပရာဂေါ န ဝတ္တဗ္ဗံ – ‘‘အရူပဓါတုပရိယာပန္နော’’တိ? န ဟေဝံ ဝတ္တဗ္ဗေ။ပေ.။ ဂန္ဓရာဂေါ။ပေ.။ ရသရာဂေါ။ပေ.။ ဖောဋ္ဌဗ္ဗရာဂေါ န ဝတ္တဗ္ဗံ – ‘‘ဖောဋ္ဌဗ္ဗဓါတုပရိယာပန္နော’’တိ? အာမန္တာ။ အရူပရာဂေါ န ဝတ္တဗ္ဗံ – ‘‘အရူပဓါတုပရိယာပန္နော’’တိ? န ဟေဝံ ဝတ္တဗ္ဗေ။ပေ.။။
၇၇၅. န ဝတ္တဗ္ဗံ – ‘‘ရူပရာဂေါ ရူပဓါတုပရိယာပန္နော, အရူပရာဂေါ အရူပဓါတုပရိယာပန္နော’’တိ? အာမန္တာ။ နနု ကာမရာဂေါ ကာမဓါတုပရိယာပန္နောတိ ? အာမန္တာ။ ဟဉ္စိ ကာမရာဂေါ ကာမဓါတုပရိယာပန္နော, တေန ဝတ ရေ ဝတ္တဗ္ဗေ – ‘‘ရူပရာဂေါ ရူပဓါတုပရိယာပန္နော, အရူပရာဂေါ အရူပဓါတုပရိယာပန္နော’’တိ။
ရူပရာဂေါ ရူပဓါတုပရိယာပန္နော အရူပရာဂေါ အရူပဓါတုပရိယာပန္နောတိကထာ နိဋ္ဌိတာ။
ရူပါရူပဓါတုပရိယာပန္နကထာ နိဋ္ဌိတာ။
သောဠသမဝဂ္ဂေါ။
တဿုဒ္ဒါနံ –
စိတ္တနိဂ္ဂဟော, စိတ္တပဂ္ဂဟော, သုခါနုပ္ပဒါနံ, အဓိဂယှ မနသိကာရော, ရူပံ ဟေတု, ရူပံ သဟေတုကံ, ရူပံ ကုသလမ္ပိ အကုသလမ္ပိ, ရူပံ ဝိပါကော, အတ္ထိ ရူပံ ရူပါဝစရံ အတ္ထိ ရူပံ အရူပါဝစရံ, သဗ္ဗေ ကိလေသာ ကာမဓါတုပရိယာပန္နာတိ။