၁၀. ဒသမဝဂ္ဂ
(၉၅) ၁. နိရောဓကထာ
၅၇၁. ဥပပတ္တေသိယေ ပဉ္စက္ခန္ဓေ အနိရုဒ္ဓေ ကိရိယာ ပဉ္စက္ခန္ဓာ ဥပ္ပဇ္ဇန္တီတိ? အာမန္တာ။ ဒသန္နံ ခန္ဓာနံ သမောဓါနံ ဟောတိ, ဒသ ခန္ဓာ သမ္မုခီဘာဝံ အာဂစ္ဆန္တီတိ ? န ဟေဝံ ဝတ္တဗ္ဗေ။ပေ.။ ဒသန္နံ ခန္ဓာနံ သမောဓါနံ ဟောတိ, ဒသ ခန္ဓာ သမ္မုခီဘာဝံ အာဂစ္ဆန္တီတိ? အာမန္တာ။ ဒွိန္နံ ဖဿာနံ။ပေ.။ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
ဥပပတ္တေသိယေ ပဉ္စက္ခန္ဓေ အနိရုဒ္ဓေ ကိရိယာ စတ္တာရော ခန္ဓာ ဥပ္ပဇ္ဇန္တီတိ? အာမန္တာ။ နဝန္နံ ခန္ဓာနံ သမောဓါနံ ဟောတိ, နဝ ခန္ဓာ သမ္မုခီဘာဝံ အာဂစ္ဆန္တီတိ? န ဟေဝံ ဝတ္တဗ္ဗေ။ပေ.။ နဝန္နံ ခန္ဓာနံ သမောဓါနံ ဟောတိ, နဝ ခန္ဓာ သမ္မုခီဘာဝံ အာဂစ္ဆန္တီတိ? အာမန္တာ။ ဒွိန္နံ ဖဿာနံ။ပေ.။ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
ဥပပတ္တေသိယေ ပဉ္စက္ခန္ဓေ အနိရုဒ္ဓေ ကိရိယာဉာဏံ ဥပ္ပဇ္ဇတီတိ? အာမန္တာ။ ဆန္နံ ခန္ဓာနံ သမောဓါနံ ဟောတိ, ဆ ခန္ဓာ သမ္မုခီဘာဝံ အာဂစ္ဆန္တီတိ? န ဟေဝံ ဝတ္တဗ္ဗေ။ပေ.။ ဆန္နံ ခန္ဓာနံ သမောဓါနံ ဟောတိ, ဆ ခန္ဓာ သမ္မုခီဘာဝံ အာဂစ္ဆန္တီတိ? အာမန္တာ။ ဒွိန္နံ ဖဿာနံ။ပေ.။ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
၅၇၂. ဥပပတ္တေသိယေ ပဉ္စက္ခန္ဓေ နိရုဒ္ဓေ မဂ္ဂေါ ဥပ္ပဇ္ဇတီတိ? အာမန္တာ။ မတော မဂ္ဂံ ဘာဝေတိ, ကာလင်္ကတော မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
နိရောဓကထာ နိဋ္ဌိတာ။
၁၀. ဒသမဝဂ္ဂေါ
(၉၆) ၂. ရူပံ မဂ္ဂေါတိကထာ
၅၇၃. မဂ္ဂသမင်္ဂိဿ ရူပံ မဂ္ဂေါတိ? အာမန္တာ။ သာရမ္မဏံ, အတ္ထိ တဿ အာဝဋ္ဋနာ အာဘောဂေါ သမန္နာဟာရော မနသိကာရော စေတနာ ပတ္ထနာ ပဏိဓီတိ? န ဟေဝံ ဝတ္တဗ္ဗေ။ပေ.။ နနု အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ ဟဉ္စိ အနာရမ္မဏံ, နတ္ထိ တဿ အာဝဋ္ဋနာ။ပေ.။ ပဏိဓိ; နော စ ဝတ ရေ ဝတ္တဗ္ဗေ – ‘‘မဂ္ဂသမင်္ဂိဿ ရူပံ မဂ္ဂေါ’’တိ။
သမ္မာဝါစာ မဂ္ဂေါတိ? အာမန္တာ။ သာရမ္မဏာ, အတ္ထိ တာယ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ နနု အနာရမ္မဏာ, နတ္ထိ တာယ အာဝဋ္ဋနာ။ပေ.။ ပဏိဓီတိ? အာမန္တာ။ ဟဉ္စိ အနာရမ္မဏာ, နတ္ထိ တာယ အာဝဋ္ဋနာ။ပေ.။ ပဏိဓိ; နော စ ဝတ ရေ ဝတ္တဗ္ဗေ – ‘‘သမ္မာဝါစာ မဂ္ဂေါ’’တိ။
သမ္မာကမ္မန္တော ။ပေ.။ သမ္မာအာဇီဝေါ မဂ္ဂေါတိ? အာမန္တာ။ သာရမ္မဏော, အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ နနု အနာရမ္မဏော, နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ ။ ဟဉ္စိ အနာရမ္မဏော, နတ္ထိ တဿ အာဝဋ္ဋနာ။ပေ.။ ပဏိဓိ; နော စ ဝတ ရေ ဝတ္တဗ္ဗေ – ‘‘သမ္မာအာဇီဝေါ မဂ္ဂေါ’’တိ။
၅၇၄. သမ္မာဒိဋ္ဌိ မဂ္ဂေါ, သာ စ သာရမ္မဏာ, အတ္ထိ တာယ အာဝဋ္ဋနာ။ပေ.။ ပဏိဓီတိ? အာမန္တာ။ သမ္မာဝါစာ မဂ္ဂေါ, သာ စ သာရမ္မဏာ, အတ္ထိ တာယ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ ။ပေ.။ သမ္မာဒိဋ္ဌိ မဂ္ဂေါ, သာ စ သာရမ္မဏာ, အတ္ထိ တာယ အာဝဋ္ဋနာ။ပေ.။ ပဏိဓီတိ? အာမန္တာ။ သမ္မာကမ္မန္တော။ပေ.။ သမ္မာအာဇီဝေါ မဂ္ဂေါ, သော စ သာရမ္မဏော, အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ သမ္မာသင်္ကပ္ပော။ပေ.။ သမ္မာဝါယာမော။ပေ.။ သမ္မာသတိ။ပေ.။။
သမ္မာသမာဓိ မဂ္ဂေါ, သော စ သာရမ္မဏော, အတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ သမ္မာဝါစာ မဂ္ဂေါ, သာ စ သာရမ္မဏာ, အတ္ထိ တာယ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ သမ္မာသမာဓိ မဂ္ဂေါ, သော စ သာရမ္မဏော, အတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ သမ္မာကမ္မန္တော။ပေ.။ သမ္မာအာဇီဝေါ မဂ္ဂေါ, သော စ သာရမ္မဏော, အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
သမ္မာဝါစာ မဂ္ဂေါ, သာ စ အနာရမ္မဏာ, နတ္ထိ တာယ အာဝဋ္ဋနာ။ပေ.။ ပဏိဓီတိ? အာမန္တာ။ သမ္မာဒိဋ္ဌိ မဂ္ဂေါ, သာ စ အနာရမ္မဏာ, နတ္ထိ တာယ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။ သမ္မာဝါစာ မဂ္ဂေါ, သာ စ အနာရမ္မဏာ, နတ္ထိ တာယ အာဝဋ္ဋနာ။ပေ.။ ပဏိဓီတိ? အာမန္တာ။ သမ္မာသင်္ကပ္ပော။ပေ.။ သမ္မာဝါယာမော။ သမ္မာသတိ ။ သမ္မာသမာဓိ မဂ္ဂေါ, သော စ အနာရမ္မဏော, နတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
သမ္မာကမ္မန္တော ။ပေ.။ သမ္မာအာဇီဝေါ မဂ္ဂေါ, သော စ အနာရမ္မဏော, နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ သမ္မာဒိဋ္ဌိ။ သမ္မာသင်္ကပ္ပော။ သမ္မာဝါယာမော။ သမ္မာသတိ။ပေ.။ သမ္မာသမာဓိ မဂ္ဂေါ, သော စ အနာရမ္မဏော, နတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
၅၇၅. န ဝတ္တဗ္ဗံ – ‘‘မဂ္ဂသမင်္ဂိဿ ရူပံ မဂ္ဂေါ’’တိ? အာမန္တာ။ နနု သမ္မာဝါစာ သမ္မာကမ္မန္တော သမ္မာအာဇီဝေါ မဂ္ဂေါတိ? အာမန္တာ။ ဟဉ္စိ သမ္မာဝါစာ သမ္မာကမ္မန္တော သမ္မာအာဇီဝေါ မဂ္ဂေါ, တေန ဝတ ရေ ဝတ္တဗ္ဗေ – ‘‘မဂ္ဂသမင်္ဂိဿ ရူပံ မဂ္ဂေါ’’တိ။
ရူပံ မဂ္ဂေါတိကထာ နိဋ္ဌိတာ။
၁၀. ဒသမဝဂ္ဂေါ
(၉၇) ၃. ပဉ္စဝိညာဏသမင်္ဂိဿ မဂ္ဂကထာ
၅၇၆. ပဉ္စဝိညာဏသမင်္ဂိဿ အတ္ထိ မဂ္ဂဘာဝနာတိ? အာမန္တာ။ နနု ပဉ္စဝိညာဏာ ဥပ္ပန္နဝတ္ထုကာ ဥပ္ပန္နာရမ္မဏာတိ? အာမန္တာ။ ဟဉ္စိ ပဉ္စဝိညာဏာ ဥပ္ပန္နဝတ္ထုကာ ဥပ္ပန္နာရမ္မဏာ, နော စ ဝတ ရေ ဝတ္တဗ္ဗေ – ‘‘ပဉ္စဝိညာဏသမင်္ဂိဿ အတ္ထိ မဂ္ဂဘာဝနာ’’တိ။
နနု ပဉ္စဝိညာဏာ ပုရေဇာတဝတ္ထုကာ ပုရေဇာတာရမ္မဏာ အဇ္ဈတ္တိကဝတ္ထုကာ ဗာဟိရာရမ္မဏာ အသမ္ဘိန္နဝတ္ထုကာ အသမ္ဘိန္နာရမ္မဏာ နာနာဝတ္ထုကာ နာနာရမ္မဏာ န အညမညဿ ဂေါစရဝိသယံ ပစ္စနုဘောန္တိ, န အသမန္နာဟာရာ ဥပ္ပဇ္ဇန္တိ, န အမနသိကာရာ ဥပ္ပဇ္ဇန္တိ, န အဗ္ဗောကိဏ္ဏာ ဥပ္ပဇ္ဇန္တိ, န အပုဗ္ဗံ အစရိမံ ဥပ္ပဇ္ဇန္တိ, န အညမညဿ သမနန္တရာ ဥပ္ပဇ္ဇန္တိ, နနု ပဉ္စဝိညာဏာ အနာဘောဂါတိ? အာမန္တာ။ ဟဉ္စိ ပဉ္စဝိညာဏာ အနာဘောဂါ, နော စ ဝတ ရေ ဝတ္တဗ္ဗေ – ‘‘ပဉ္စဝိညာဏသမင်္ဂိဿ အတ္ထိ မဂ္ဂဘာဝနာ’’တိ။
၅၇၇. စက္ခုဝိညာဏသမင်္ဂိဿ အတ္ထိ မဂ္ဂဘာဝနာတိ? အာမန္တာ။ စက္ခုဝိညာဏံ သုညတံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။ စက္ခုဝိညာဏံ သုညတံ အာရဗ္ဘ ဥပ္ပဇ္ဇတီတိ? အာမန္တာ။ စက္ခုဉ္စ ပဋိစ္စ သုညတဉ္စ ဥပ္ပဇ္ဇတိ စက္ခုဝိညာဏန္တိ? န ဟေဝံ ဝတ္တဗ္ဗေ။ပေ.။ စက္ခုဉ္စ ပဋိစ္စ သုညတဉ္စ ဥပ္ပဇ္ဇတိ စက္ခုဝိညာဏန္တိ? အာမန္တာ။ ‘‘စက္ခုဉ္စ ပဋိစ္စ သုညတဉ္စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? နတ္ထိ။ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? အာမန္တာ။ ဟဉ္စိ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တော, နော စ ဝတ ရေ ဝတ္တဗ္ဗေ – ‘‘စက္ခုဉ္စ ပဋိစ္စ သုညတဉ္စ ဥပ္ပဇ္ဇတိ စက္ခုဝိညာဏ’’န္တိ။
၅၇၈. စက္ခုဝိညာဏသမင်္ဂိဿ အတ္ထိ မဂ္ဂဘာဝနာတိ? အာမန္တာ။ စက္ခုဝိညာဏံ အတီတာနာဂတံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။ စက္ခုဝိညာဏသမင်္ဂိဿ အတ္ထိ မဂ္ဂဘာဝနာတိ? အာမန္တာ။ စက္ခုဝိညာဏံ ဖဿံ အာရဗ္ဘ။ပေ.။ ဝေဒနံ အာရဗ္ဘ။ သညံ အာရဗ္ဘ ။ စေတနံ အာရဗ္ဘ။ စိတ္တံ အာရဗ္ဘ။ စက္ခုံ အာရဗ္ဘ။ ကာယံ အာရဗ္ဘ။ပေ.။ သဒ္ဒံ အာရဗ္ဘ။ပေ.။ ဖောဋ္ဌဗ္ဗံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။။
မနောဝိညာဏသမင်္ဂိဿ အတ္ထိ မဂ္ဂဘာဝနာ, မနောဝိညာဏံ သုညတံ အာရဗ္ဘ ဥပ္ပဇ္ဇတီတိ? အာမန္တာ။ စက္ခုဝိညာဏသမင်္ဂိဿ အတ္ထိ မဂ္ဂဘာဝနာ, စက္ခုဝိညာဏံ သုညတံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။ မနောဝိညာဏသမင်္ဂိဿ အတ္ထိ မဂ္ဂဘာဝနာ, မနောဝိညာဏံ အတီတာနာဂတံ အာရဗ္ဘ ဥပ္ပဇ္ဇတီတိ? အာမန္တာ။ စက္ခုဝိညာဏသမင်္ဂိဿ အတ္ထိ မဂ္ဂဘာဝနာ, စက္ခုဝိညာဏံ အတီတာနာဂတံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။ မနောဝိညာဏသမင်္ဂိဿ အတ္ထိ မဂ္ဂဘာဝနာ, မနောဝိညာဏံ ဖဿံ အာရဗ္ဘ။ ဝေဒနံ အာရဗ္ဘ။ပေ.။ ဖောဋ္ဌဗ္ဗံ အာရဗ္ဘ ဥပ္ပဇ္ဇတီတိ? အာမန္တာ။ စက္ခုဝိညာဏသမင်္ဂိဿ အတ္ထိ မဂ္ဂဘာဝနာ, စက္ခုဝိညာဏံ ဖဿံ အာရဗ္ဘ။ ဝေဒနံ အာရဗ္ဘ။ပေ.။ ဖောဋ္ဌဗ္ဗံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။။
၅၇၉. န ဝတ္တဗ္ဗံ – ‘‘ပဉ္စဝိညာဏသမင်္ဂိဿ အတ္ထိ မဂ္ဂဘာဝနာ’’တိ? အာမန္တာ။ နနု ဝုတ္တံ ဘဂဝတာ – ‘‘ဣဓ, ဘိက္ခဝေ, ဘိက္ခု စက္ခုနာ ရူပံ ဒိသွာ န နိမိတ္တဂ္ဂါဟီ ဟောတိ နာနုဗျဉ္ဇနဂ္ဂါဟီ။ပေ.။ သောတေန သဒ္ဒံ သုတွာ။ပေ.။ ဃာနေန ဂန္ဓံ ဃာယိတွာ။ပေ.။ ဇိဝှာယ ရသံ သာယိတွာ။ပေ.။ ကာယေန ဖောဋ္ဌဗ္ဗံ ဖုသိတွာ န နိမိတ္တဂ္ဂါဟီ ဟောတိ နာနုဗျဉ္ဇနဂ္ဂါဟီ’’တိ! [မ. နိ. ၁.၃၄၉; အ. နိ. ၄.၃၇] အတ္ထေဝ သုတ္တန္တောတိ? အာမန္တာ ။ တေန ဟိ ပဉ္စဝိညာဏသမင်္ဂိဿ အတ္ထိ မဂ္ဂဘာဝနာတိ။
ပဉ္စဝိညာဏသမင်္ဂိဿ မဂ္ဂကထာ နိဋ္ဌိတာ။
၁၀. ဒသမဝဂ္ဂေါ
(၉၈) ၄. ပဉ္စဝိညာဏာ ကုသလာပိ အကုသလာဣတိကထာ
၅၈၀. ပဉ္စဝိညာဏာ ကုသလာပိ အကုသလာဣတိ? အာမန္တာ။ နနု ပဉ္စဝိညာဏာ ဥပ္ပန္နဝတ္ထုကာ ဥပ္ပန္နာရမ္မဏာတိ? အာမန္တာ။ ဟဉ္စိ ပဉ္စဝိညာဏာ ဥပ္ပန္နဝတ္ထုကာ ဥပ္ပန္နာရမ္မဏာ, နော စ ဝတ ရေ ဝတ္တဗ္ဗေ – ‘‘ပဉ္စဝိညာဏာ ကုသလာပိ အကုသလာဣ’’တိ။ နနု ပဉ္စဝိညာဏာ ပုရေဇာတဝတ္ထုကာ ပုရေဇာတာရမ္မဏာ အဇ္ဈတ္တိကဝတ္ထုကာ ဗာဟိရာရမ္မဏာ အသမ္ဘိန္နဝတ္ထုကာ အသမ္ဘိန္နာရမ္မဏာ နာနာဝတ္ထုကာ နာနာရမ္မဏာ န အညမညဿ ဂေါစရဝိသယံ ပစ္စနုဘောန္တိ, န အသမန္နာဟာရာ ဥပ္ပဇ္ဇန္တိ, န အမနသိကာရာ ဥပ္ပဇ္ဇန္တိ, န အဗ္ဗောကိဏ္ဏာ ဥပ္ပဇ္ဇန္တိ, န အပုဗ္ဗံ အစရိမံ ဥပ္ပဇ္ဇန္တိ, န အညမညဿ သမနန္တရာ ဥပ္ပဇ္ဇန္တိ, နနု ပဉ္စဝိညာဏာ အနာဘောဂါတိ? အာမန္တာ။ ဟဉ္စိ ပဉ္စဝိညာဏာ အနာဘောဂါ, နော စ ဝတ ရေ ဝတ္တဗ္ဗေ – ‘‘ပဉ္စဝိညာဏာ ကုသလာပိ အကုသလာဣ’’တိ။
၅၈၁. စက္ခုဝိညာဏံ ကုသလန္တိ? အာမန္တာ။ စက္ခုဝိညာဏံ သုညတံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။ စက္ခုဝိညာဏံ သုညတံ အာရဗ္ဘ ဥပ္ပဇ္ဇတီတိ? အာမန္တာ။ စက္ခုဉ္စ ပဋိစ္စ သုညတဉ္စ ဥပ္ပဇ္ဇတိ စက္ခုဝိညာဏန္တိ? န ဟေဝံ ဝတ္တဗ္ဗေ။ စက္ခုဉ္စ ပဋိစ္စ သုညတဉ္စ ဥပ္ပဇ္ဇတိ စက္ခုဝိညာဏန္တိ? အာမန္တာ။ စက္ခုဉ္စ ပဋိစ္စ သုညတဉ္စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? နတ္ထိ။ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? အာမန္တာ ။ ဟဉ္စိ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တော, နော စ ဝတ ရေ ဝတ္တဗ္ဗေ – ‘‘စက္ခုဉ္စ ပဋိစ္စ သုညတဉ္စ ဥပ္ပဇ္ဇတိ စက္ခုဝိညာဏ’’န္တိ။
၅၈၂. စက္ခုဝိညာဏံ ကုသလမ္ပိ အကုသလမ္ပီတိ? အာမန္တာ။ စက္ခုဝိညာဏံ အတီတာနာဂတံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။။ စက္ခုဝိညာဏံ ကုသလမ္ပိ အကုသလမ္ပီတိ? အာမန္တာ။ စက္ခုဝိညာဏံ ဖဿံ အာရဗ္ဘ။ပေ.။ စိတ္တံ အာရဗ္ဘ။ စက္ခုံ အာရဗ္ဘ။ပေ.။ ကာယံ အာရဗ္ဘ။ သဒ္ဒံ အာရဗ္ဘ။ပေ.။ ဖောဋ္ဌဗ္ဗံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။။
မနောဝိညာဏံ ကုသလမ္ပိ အကုသလမ္ပိ, မနောဝိညာဏံ သုညတံ အာရဗ္ဘ ဥပ္ပဇ္ဇတီတိ? အာမန္တာ။ စက္ခုဝိညာဏံ ကုသလမ္ပိ အကုသလမ္ပိ, စက္ခုဝိညာဏံ သုညတံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။ မနောဝိညာဏံ ကုသလမ္ပိ အကုသလမ္ပိ, မနောဝိညာဏံ အတီတာနာဂတံ အာရဗ္ဘ ဥပ္ပဇ္ဇတီတိ? အာမန္တာ။ စက္ခုဝိညာဏံ ကုသလမ္ပိ အကုသလမ္ပိ, စက္ခုဝိညာဏံ အတီတာနာဂတံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။ မနောဝိညာဏံ ကုသလမ္ပိ အကုသလမ္ပိ, မနောဝိညာဏံ ဖဿံ အာရဗ္ဘ။ပေ.။ စိတ္တံ အာရဗ္ဘ။ပေ.။ ကာယံ အာရဗ္ဘ ။ သဒ္ဒံ အာရဗ္ဘ ။ပေ.။ ဖောဋ္ဌဗ္ဗံ အာရဗ္ဘ ဥပ္ပဇ္ဇတီတိ? အာမန္တာ။ စက္ခုဝိညာဏံ ကုသလမ္ပိ အကုသလမ္ပိ, စက္ခုဝိညာဏံ ဖဿံ အာရဗ္ဘ။ပေ.။ ဖောဋ္ဌဗ္ဗံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။။
၅၈၃. န ဝတ္တဗ္ဗံ – ‘‘ပဉ္စဝိညာဏာ ကုသလာပိ အကုသလာဣ’’တိ? အာမန္တာ။ နနု ဝုတ္တံ ဘဂဝတာ – ‘‘ဣဓ, ဘိက္ခဝေ, ဘိက္ခု စက္ခုနာ ရူပံ ဒိသွာ နိမိတ္တဂ္ဂါဟီ ဟောတိ။ပေ.။ န နိမိတ္တဂ္ဂါဟီ ဟောတိ။ပေ.။ သောတေန သဒ္ဒံ သုတွာ။ပေ.။ ကာယေန ဖောဋ္ဌဗ္ဗံ ဖုသိတွာ နိမိတ္တဂ္ဂါဟီ ဟောတိ။ပေ.။ န နိမိတ္တဂ္ဂါဟီ ဟောတီ’’တိ! အတ္ထေဝ သုတ္တန္တောတိ? အာမန္တာ။ တေန ဟိ ပဉ္စဝိညာဏာ ကုသလာပိ အကုသလာဣတိ။
ပဉ္စဝိညာဏာ ကုသလာပိ အကုသလာဣတိကထာ နိဋ္ဌိတာ။
၁၀. ဒသမဝဂ္ဂေါ
(၉၉) ၅. သာဘောဂါတိကထာ
၅၈၄. ပဉ္စဝိညာဏာ သာဘောဂါတိ? အာမန္တာ။ နနု ပဉ္စဝိညာဏာ ဥပ္ပန္နဝတ္ထုကာ ဥပ္ပန္နာရမ္မဏာတိ? အာမန္တာ။ ဟဉ္စိ ပဉ္စဝိညာဏာ ဥပ္ပန္နဝတ္ထုကာ ဥပ္ပန္နာရမ္မဏာ, နော စ ဝတ ရေ ဝတ္တဗ္ဗေ – ‘‘ပဉ္စဝိညာဏာ သာဘောဂါ’’တိ။ နနု ပဉ္စဝိညာဏာ ပုရေဇာတဝတ္ထုကာ ပုရေဇာတာရမ္မဏာ အဇ္ဈတ္တိကဝတ္ထုကာ ဗာဟိရာရမ္မဏာ အသမ္ဘိန္နဝတ္ထုကာ အသမ္ဘိန္နာရမ္မဏာ နာနာဝတ္ထုကာ နာနာရမ္မဏာ န အညမညဿ ဂေါစရဝိသယံ ပစ္စနုဘောန္တိ, န အသမန္နာဟာရာ ဥပ္ပဇ္ဇန္တိ, န အမနသိကာရာ ဥပ္ပဇ္ဇန္တိ, န အဗ္ဗောကိဏ္ဏာ ဥပ္ပဇ္ဇန္တိ, န အပုဗ္ဗံ အစရိမံ ဥပ္ပဇ္ဇန္တိ, နနု ပဉ္စဝိညာဏာ န အညမညဿ သမနန္တရာ ဥပ္ပဇ္ဇန္တီတိ? အာမန္တာ။ ဟဉ္စိ ပဉ္စဝိညာဏာ န အညမညဿ သမနန္တရာ ဥပ္ပဇ္ဇန္တိ, နော စ ဝတ ရေ ဝတ္တဗ္ဗေ – ‘‘ပဉ္စဝိညာဏာ သာဘောဂါ’’တိ။
၅၈၅. စက္ခုဝိညာဏံ သာဘောဂန္တိ? အာမန္တာ။ စက္ခုဝိညာဏံ သုညတံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။ စက္ခုဝိညာဏံ သုညတံ အာရဗ္ဘ ဥပ္ပဇ္ဇတီတိ? အာမန္တာ။ စက္ခုဉ္စ ပဋိစ္စ သုညတဉ္စ ဥပ္ပဇ္ဇတိ စက္ခုဝိညာဏန္တိ? န ဟေဝံ ဝတ္တဗ္ဗေ။ပေ.။ စက္ခုဉ္စ ပဋိစ္စ သုညတဉ္စ ဥပ္ပဇ္ဇတိ စက္ခုဝိညာဏန္တိ? အာမန္တာ။ ‘‘စက္ခုဉ္စ ပဋိစ္စ သုညတဉ္စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? နတ္ထိ။ပေ.။ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? အာမန္တာ။ ဟဉ္စိ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တော, နော စ ဝတ ရေ ဝတ္တဗ္ဗေ – ‘‘စက္ခုဉ္စ ပဋိစ္စ သုညတဉ္စ ဥပ္ပဇ္ဇတိ စက္ခုဝိညာဏ’’န္တိ။
စက္ခုဝိညာဏံ သာဘောဂန္တိ? အာမန္တာ။ စက္ခုဝိညာဏံ အတီတာနာဂတံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။ စက္ခုဝိညာဏံ သာဘောဂန္တိ? အာမန္တာ။ စက္ခုဝိညာဏံ ဖဿံ အာရဗ္ဘ။ပေ.။ ဖောဋ္ဌဗ္ဗံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။ မနောဝိညာဏံ သာဘောဂံ, မနောဝိညာဏံ သုညတံ အာရဗ္ဘ ဥပ္ပဇ္ဇတီတိ? အာမန္တာ။ စက္ခုဝိညာဏံ သာဘောဂံ, စက္ခုဝိညာဏံ သုညတံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။ မနောဝိညာဏံ သာဘောဂံ, မနောဝိညာဏံ အတီတာနာဂတံ အာရဗ္ဘ ဥပ္ပဇ္ဇတီတိ? အာမန္တာ။ စက္ခုဝိညာဏံ သာဘောဂံ, စက္ခုဝိညာဏံ အတီတာနာဂတံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။ မနောဝိညာဏံ သာဘောဂံ, မနောဝိညာဏံ ဖဿံ အာရဗ္ဘ။ပေ.။ ဖောဋ္ဌဗ္ဗံ အာရဗ္ဘ ဥပ္ပဇ္ဇတီတိ? အာမန္တာ။ စက္ခုဝိညာဏံ သာဘောဂံ, စက္ခုဝိညာဏံ ဖဿံ အာရဗ္ဘ။ပေ.။ ဖောဋ္ဌဗ္ဗံ အာရဗ္ဘ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။။
၅၈၆. န ဝတ္တဗ္ဗံ – ‘‘ပဉ္စဝိညာဏာ သာဘောဂါ’’တိ? အာမန္တာ။ နနု ဝုတ္တံ ဘဂဝတာ – ‘‘ဣဓ, ဘိက္ခဝေ, ဘိက္ခု စက္ခုနာ ရူပံ ဒိသွာ နိမိတ္တဂ္ဂါဟီ ဟောတိ။ပေ.။ န နိမိတ္တဂ္ဂါဟီ ဟောတိ။ပေ.။ ကာယေန ဖောဋ္ဌဗ္ဗံ ဖုသိတွာ နိမိတ္တဂ္ဂါဟီ ဟောတိ။ပေ.။ န နိမိတ္တဂ္ဂါဟီ ဟောတီ’’တိ! အတ္ထေဝ သုတ္တန္တောတိ? အာမန္တာ။ တေန ဟိ ပဉ္စဝိညာဏာ သာဘောဂါတိ။ပေ.။။
သာဘောဂါတိကထာ နိဋ္ဌိတာ။
၁၀. ဒသမဝဂ္ဂေါ
(၁၀၀) ၆. ဒွီဟိသီလေဟိကထာ
၅၈၇. မဂ္ဂသမင္ဂီ ဒွီဟိ သီလေဟိ သမန္နာဂတောတိ? အာမန္တာ။ မဂ္ဂသမင္ဂီ ဒွီဟိ ဖဿေဟိ ဒွီဟိ ဝေဒနာဟိ ဒွီဟိ သညာဟိ ဒွီဟိ စေတနာဟိ ဒွီဟိ စိတ္တေဟိ ဒွီဟိ သဒ္ဓါဟိ ဒွီဟိ ဝီရိယေဟိ ဒွီဟိ သတီဟိ ဒွီဟိ သမာဓီဟိ ဒွီဟိ ပညာဟိ သမန္နာဂတောတိ? န ဟေဝံ ဝတ္တဗ္ဗေ။ပေ.။။
မဂ္ဂသမင္ဂီ လောကိယေန သီလေန သမန္နာဂတောတိ? အာမန္တာ။ မဂ္ဂသမင္ဂီ လောကိယေန ဖဿေန လောကိယာယ ဝေဒနာယ လောကိယာယ ပညာယ လောကိယာယ စေတနာယ လောကိယေန စိတ္တေန လောကိယာယ သဒ္ဓါယ လောကိယေန ဝီရိယေန လောကိယာယ သတိယာ လောကိယေန သမာဓိနာ လောကိယာယ ပညာယ သမန္နာဂတောတိ? န ဟေဝံ ဝတ္တဗ္ဗေ။ပေ.။။
မဂ္ဂသမင္ဂီ လောကိယေန စ လောကုတ္တရေန စ သီလေန သမန္နာဂတောတိ? အာမန္တာ။ မဂ္ဂသမင္ဂီ လောကိယေန စ လောကုတ္တရေန စ ဖဿေန သမန္နာဂတော။ပေ.။ လောကိယာယ စ လောကုတ္တရာယ စ ပညာယ သမန္နာဂတောတိ? န ဟေဝံ ဝတ္တဗ္ဗေ။ပေ.။ မဂ္ဂသမင္ဂီ လောကိယေန သီလေန သမန္နာဂတောတိ? အာမန္တာ။ မဂ္ဂသမင္ဂီ ပုထုဇ္ဇနောတိ? န ဟေဝံ ဝတ္တဗ္ဗေ။ပေ.။။
၅၈၈. မဂ္ဂသမင္ဂီ လောကိယာယ သမ္မာဝါစာယ သမန္နာဂတောတိ? အာမန္တာ။ မဂ္ဂသမင္ဂီ လောကိယာယ သမ္မာဒိဋ္ဌိယာ သမန္နာဂတောတိ? န ဟေဝံ ဝတ္တဗ္ဗေ။ပေ.။ မဂ္ဂသမင္ဂီ လောကိယာယ သမ္မာဝါစာယ သမန္နာဂတောတိ ? အာမန္တာ။ မဂ္ဂသမင္ဂီ လောကိယေန သမ္မာသင်္ကပ္ပေန။ပေ.။ လောကိယေန သမ္မာဝါယာမေန။ပေ.။ လောကိယာယ သမ္မာသတိယာ။ပေ.။ လောကိယေန သမ္မာသမာဓိနာ သမန္နာဂတောတိ? န ဟေဝံ ဝတ္တဗ္ဗေ။ပေ.။ မဂ္ဂသမင္ဂီ လောကိယေန သမ္မာကမ္မန္တေန။ပေ.။ လောကိယေန သမ္မာအာဇီဝေန သမန္နာဂတောတိ? အာမန္တာ။ မဂ္ဂသမင္ဂီ လောကိယာယ သမ္မာဒိဋ္ဌိယာ။ပေ.။ လောကိယေန သမ္မာသမာဓိနာ သမန္နာဂတောတိ? န ဟေဝံ ဝတ္တဗ္ဗေ။ပေ.။။
မဂ္ဂသမင္ဂီ လောကိယာယ စ လောကုတ္တရာယ စ သမ္မာဝါစာယ သမန္နာဂတောတိ? အာမန္တာ။ မဂ္ဂသမင္ဂီ လောကိယာယ စ လောကုတ္တရာယ စ သမ္မာဒိဋ္ဌိယာ သမန္နာဂတောတိ? န ဟေဝံ ဝတ္တဗ္ဗေ။ပေ.။ မဂ္ဂသမင္ဂီ လောကိယာယ စ လောကုတ္တရာယ စ သမ္မာဝါစာယ သမန္နာဂတောတိ? အာမန္တာ။ မဂ္ဂသမင္ဂီ လောကိယေန စ လောကုတ္တရေန စ သမ္မာသင်္ကပ္ပေန။ပေ.။ လောကိယေန စ လောကုတ္တရေန စ သမ္မာဝါယာမေန ။ပေ.။ လောကိယာယ စ လောကုတ္တရာယ စ သမ္မာသတိယာ။ပေ.။ လောကိယေန စ လောကုတ္တရေန စ သမ္မာသမာဓိနာ သမန္နာဂတောတိ? န ဟေဝံ ဝတ္တဗ္ဗေ။ပေ.။။
မဂ္ဂသမင္ဂီ လောကိယေန စ လောကုတ္တရေန စ သမ္မာကမ္မန္တေန။ပေ.။ သမ္မာအာဇီဝေန သမန္နာဂတောတိ? အာမန္တာ။ မဂ္ဂသမင္ဂီ လောကိယာယ စ လောကုတ္တရာယ စ သမ္မာဒိဋ္ဌိယာ သမန္နာဂတောတိ? န ဟေဝံ ဝတ္တဗ္ဗေ။ပေ.။ မဂ္ဂသမင္ဂီ လောကိယေန စ လောကုတ္တရေန စ သမ္မာအာဇီဝေန သမန္နာဂတောတိ? အာမန္တာ ။ မဂ္ဂသမင္ဂီ လောကိယေန စ လောကုတ္တရေန စ သမ္မာသင်္ကပ္ပေန။ပေ.။ လောကိယေန စ လောကုတ္တရေန စ သမ္မာသမာဓိနာ သမန္နာဂတောတိ? န ဟေဝံ ဝတ္တဗ္ဗေ။ပေ.။။
၅၈၉. န ဝတ္တဗ္ဗံ – ‘‘မဂ္ဂသမင္ဂီ ဒွီဟိ သီလေဟိ သမန္နာဂတော’’တိ? အာမန္တာ။ လောကိယေ သီလေ နိရုဒ္ဓေ မဂ္ဂေါ ဥပ္ပဇ္ဇတီတိ? အာမန္တာ။ ဒုဿီလော ခဏ္ဍသီလော ဆိန္နသီလော မဂ္ဂံ ဘာဝေတီတိ? န ဟေဝံ ဝတ္တဗ္ဗေ ။ပေ.။ တေန ဟိ မဂ္ဂသမင္ဂီ ဒွီဟိ သီလေဟိ သမန္နာဂတောတိ။
ဒွီဟိသီလေဟိကထာ နိဋ္ဌိတာ။
၁၀. ဒသမဝဂ္ဂေါ
(၁၀၁) ၇. သီလံ အစေတသိကန္တိကထာ
၅၉၀. သီလံ အစေတသိကန္တိ? အာမန္တာ။ ရူပံ။ပေ.။ နိဗ္ဗာနံ။ပေ.။ စက္ခာယတနံ ။ပေ.။ ကာယာယတနံ။ ရူပါယတနံ။ပေ.။ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ.။ သီလံ အစေတသိကန္တိ? အာမန္တာ။ ဖဿော အစေတသိကောတိ? န ဟေဝံ ဝတ္တဗ္ဗေ ။ပေ.။ သီလံ အစေတသိကန္တိ? အာမန္တာ။ ဝေဒနာ။ပေ.။ သညာ။ပေ.။ စေတနာ။ပေ.။ သဒ္ဓါ။ပေ.။ ဝီရိယံ။ပေ.။ သတိ။ပေ.။ သမာဓိ။ပေ.။ ပညာ အစေတသိကာတိ? န ဟေဝံ ဝတ္တဗ္ဗေ။ပေ.။။
ဖဿော စေတသိကောတိ? အာမန္တာ။ သီလံ စေတသိကန္တိ? န ဟေဝံ ဝတ္တဗ္ဗေ။ပေ.။ ဝေဒနာ။ပေ.။ သညာ။ပေ.။ စေတနာ။ပေ.။ သဒ္ဓါ။ပေ.။ ဝီရိယံ။ပေ.။ သတိ။ပေ.။ သမာဓိ။ပေ.။ ပညာ စေတသိကာတိ? အာမန္တာ။ သီလံ စေတသိကန္တိ? န ဟေဝံ ဝတ္တဗ္ဗေ။ပေ.။။
၅၉၁. သီလံ အစေတသိကန္တိ? အာမန္တာ။ အနိဋ္ဌဖလန္တိ? န ဟေဝံ ဝတ္တဗ္ဗေ။ပေ.။ နနု ဣဋ္ဌဖလန္တိ? အာမန္တာ။ ဟဉ္စိ ဣဋ္ဌဖလံ, နော စ ဝတ ရေ ဝတ္တဗ္ဗေ – ‘‘သီလံ အစေတသိက’’န္တိ။
သဒ္ဓါ ဣဋ္ဌဖလာ, သဒ္ဓါ စေတသိကာတိ? အာမန္တာ။ သီလံ ဣဋ္ဌဖလံ, သီလံ စေတသိကန္တိ? န ဟေဝံ ဝတ္တဗ္ဗေ။ပေ.။ ဝီရိယံ။ပေ.။ သတိ။ပေ.။ သမာဓိ။ပေ.။ ပညာ ဣဋ္ဌဖလာ, ပညာ စေတသိကာတိ? အာမန္တာ။ သီလံ ဣဋ္ဌဖလံ, သီလံ စေတသိကန္တိ? န ဟေဝံ ဝတ္တဗ္ဗေ။ပေ.။။
သီလံ ဣဋ္ဌဖလံ, သီလံ အစေတသိကန္တိ? အာမန္တာ ။ သဒ္ဓါ ဣဋ္ဌဖလာ, သဒ္ဓါ အစေတသိကာတိ? န ဟေဝံ ဝတ္တဗ္ဗေ။ပေ.။ သီလံ ဣဋ္ဌဖလံ, သီလံ အစေတသိကန္တိ? အာမန္တာ။ ဝီရိယံ။ပေ.။ သတိ။ပေ.။ သမာဓိ။ပေ.။ ပညာ ဣဋ္ဌဖလာ, ပညာ အစေတသိကာတိ? န ဟေဝံ ဝတ္တဗ္ဗေ။ပေ.။။
၅၉၂. သီလံ အစေတသိကန္တိ? အာမန္တာ။ အဖလံ အဝိပါကန္တိ? န ဟေဝံ ဝတ္တဗ္ဗေ။ပေ.။ နနု သဖလံ သဝိပါကန္တိ? အာမန္တာ။ ဟဉ္စိ သဖလံ သဝိပါကံ, နော စ ဝတ ရေ ဝတ္တဗ္ဗေ – ‘‘သီလံ အစေတသိက’’န္တိ။ပေ.။။
စက္ခာယတနံ အစေတသိကံ အဝိပါကန္တိ? အာမန္တာ။ သီလံ အစေတသိကံ အဝိပါကန္တိ? န ဟေဝံ ဝတ္တဗ္ဗေ။ပေ.။ သောတာယတနံ။ပေ.။ ကာယာယတနံ ။ပေ.။ ရူပါယတနံ။ပေ.။ ဖောဋ္ဌဗ္ဗာယတနံ အစေတသိကံ အဝိပါကန္တိ? အာမန္တာ။ သီလံ အစေတသိကံ အဝိပါကန္တိ? န ဟေဝံ ဝတ္တဗ္ဗေ။ပေ.။။
သီလံ အစေတသိကံ သဝိပါကန္တိ? အာမန္တာ။ စက္ခာယတနံ အစေတသိကံ သဝိပါကန္တိ? န ဟေဝံ ဝတ္တဗ္ဗေ။ပေ.။ သီလံ အစေတသိကံ သဝိပါကန္တိ? အာမန္တာ။ သောတာယတနံ။ပေ.။ ကာယာယတနံ။ ရူပါယတနံ။ပေ.။ ဖောဋ္ဌဗ္ဗာယတနံ အစေတသိကံ သဝိပါကန္တိ? န ဟေဝံ ဝတ္တဗ္ဗေ။ပေ.။။
၅၉၃. သမ္မာဝါစာ အစေတသိကာတိ? အာမန္တာ။ သမ္မာဒိဋ္ဌိ အစေတသိကာတိ? န ဟေဝံ ဝတ္တဗ္ဗေ။ပေ.။ သမ္မာဝါစာ အစေတသိကာတိ? အာမန္တာ။ သမ္မာသင်္ကပ္ပော။ပေ.။ သမ္မာဝါယာမော။ပေ.။ သမ္မာသတိ။ပေ.။ သမ္မာသမာဓိ အစေတသိကောတိ? န ဟေဝံ ဝတ္တဗ္ဗေ။ပေ.။ သမ္မာကမ္မန္တော။ပေ.။ သမ္မာအာဇီဝေါ အစေတသိကောတိ? အာမန္တာ။ သမ္မာဒိဋ္ဌိ အစေတသိကာတိ? န ဟေဝံ ဝတ္တဗ္ဗေ။ပေ.။ သမ္မာအာဇီဝေါ အစေတသိကောတိ? အာမန္တာ။ သမ္မာသင်္ကပ္ပော။ သမ္မာဝါယာမော။ သမ္မာသတိ။ သမ္မာသမာဓိ အစေတသိကောတိ? န ဟေဝံ ဝတ္တဗ္ဗေ။ပေ.။။
သမ္မာဒိဋ္ဌိ စေတသိကာတိ? အာမန္တာ။ သမ္မာဝါစာ စေတသိကာတိ? န ဟေဝံ ဝတ္တဗ္ဗေ။ပေ.။ သမ္မာဒိဋ္ဌိ စေတသိကာတိ? အာမန္တာ။ သမ္မာကမ္မန္တော။ပေ.။ သမ္မာအာဇီဝေါ စေတသိကောတိ? န ဟေဝံ ဝတ္တဗ္ဗေ။ပေ.။ သမ္မာသင်္ကပ္ပော။ပေ.။ သမ္မာဝါယာမော။ပေ.။ သမ္မာသတိ။ပေ.။ သမ္မာသမာဓိ စေတသိကောတိ? အာမန္တာ။ သမ္မာဝါစာ စေတသိကာတိ? န ဟေဝံ ဝတ္တဗ္ဗေ။ပေ.။ သမ္မာသမာဓိ စေတသိကောတိ? အာမန္တာ။ သမ္မာကမ္မန္တော။ပေ.။ သမ္မာအာဇီဝေါ စေတသိကောတိ? န ဟေဝံ ဝတ္တဗ္ဗေ။ပေ.။။
၅၉၄. န ဝတ္တဗ္ဗံ – ‘‘သီလံ အစေတသိက’’န္တိ? အာမန္တာ။ သီလေ ဥပ္ပဇ္ဇိတွာ နိရုဒ္ဓေ ဒုဿီလော ဟောတီတိ? န ဟေဝံ ဝတ္တဗ္ဗေ။ တေန ဟိ သီလံ အစေတသိကန္တိ။
သီလံ အစေတသိကန္တိကထာ နိဋ္ဌိတာ။
၁၀. ဒသမဝဂ္ဂေါ
(၁၀၂) ၈. သီလံ န စိတ္တာနုပရိဝတ္တီတိကထာ
၅၉၅. သီလံ န စိတ္တာနုပရိဝတ္တီတိ? အာမန္တာ။ ရူပံ။ နိဗ္ဗာနံ။ စက္ခာယတနံ။ပေ.။ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ.။ သီလံ န စိတ္တာနုပရိဝတ္တီတိ? အာမန္တာ။ ဖဿော န စိတ္တာနုပရိဝတ္တီတိ? န ဟေဝံ ဝတ္တဗ္ဗေ။ပေ.။ သီလံ န စိတ္တာနုပရိဝတ္တီတိ? အာမန္တာ။ ဝေဒနာ။ပေ.။ သညာ။ စေတနာ။ သဒ္ဓါ။ ဝီရိယံ။ သတိ။ သမာဓိ။ပေ.။ ပညာ န စိတ္တာနုပရိဝတ္တီတိ? န ဟေဝံ ဝတ္တဗ္ဗေ။ပေ.။။
ဖဿော စိတ္တာနုပရိဝတ္တီတိ? အာမန္တာ။ သီလံ စိတ္တာနုပရိဝတ္တီတိ? န ဟေဝံ ဝတ္တဗ္ဗေ။ပေ.။ ဝေဒနာ။ပေ.။ သညာ။ စေတနာ ။ သဒ္ဓါ။ ဝီရိယံ။ သတိ။ သမာဓိ။ပေ.။ ပညာ စိတ္တာနုပရိဝတ္တီတိ? အာမန္တာ။ သီလံ စိတ္တာနုပရိဝတ္တီတိ? န ဟေဝံ ဝတ္တဗ္ဗေ။ပေ.။။
၅၉၆. သမ္မာဝါစာ န စိတ္တာနုပရိဝတ္တီတိ? အာမန္တာ။ သမ္မာဒိဋ္ဌိ န စိတ္တာနုပရိဝတ္တီတိ? န ဟေဝံ ဝတ္တဗ္ဗေ။ပေ.။ သမ္မာဝါစာ န စိတ္တာနုပရိဝတ္တီတိ? အာမန္တာ။ သမ္မာသင်္ကပ္ပော။ သမ္မာဝါယာမော။ သမ္မာသတိ။ပေ.။ သမ္မာသမာဓိ န စိတ္တာနုပရိဝတ္တီတိ? န ဟေဝံ ဝတ္တဗ္ဗေ။ပေ.။။
သမ္မာကမ္မန္တော။ပေ.။ သမ္မာအာဇီဝေါ န စိတ္တာနုပရိဝတ္တီတိ? အာမန္တာ ။ သမ္မာဒိဋ္ဌိ န စိတ္တာနုပရိဝတ္တီတိ? န ဟေဝံ ဝတ္တဗ္ဗေ။ပေ.။ သမ္မာအာဇီဝေါ န စိတ္တာနုပရိဝတ္တီတိ ? အာမန္တာ။ သမ္မာသင်္ကပ္ပော။ သမ္မာဝါယာမော။ သမ္မာသတိ။ပေ.။ သမ္မာသမာဓိ န စိတ္တာနုပရိဝတ္တီတိ? န ဟေဝံ ဝတ္တဗ္ဗေ။ပေ.။။
သမ္မာဒိဋ္ဌိ စိတ္တာနုပရိဝတ္တီတိ? အာမန္တာ။ သမ္မာဝါစာ စိတ္တာနုပရိဝတ္တီတိ? န ဟေဝံ ဝတ္တဗ္ဗေ။ပေ.။ သမ္မာဒိဋ္ဌိ စိတ္တာနုပရိဝတ္တီတိ? အာမန္တာ။ သမ္မာကမ္မန္တော။ပေ.။ သမ္မာအာဇီဝေါ စိတ္တာနုပရိဝတ္တီတိ? န ဟေဝံ ဝတ္တဗ္ဗေ။ပေ.။။
သမ္မာသင်္ကပ္ပော ။ သမ္မာဝါယာမော။ သမ္မာသတိ။ပေ.။ သမ္မာသမာဓိ စိတ္တာနုပရိဝတ္တီတိ? အာမန္တာ။ သမ္မာဝါစာ စိတ္တာနုပရိဝတ္တီတိ? န ဟေဝံ ဝတ္တဗ္ဗေ။ပေ.။ သမ္မာသမာဓိ စိတ္တာနုပရိဝတ္တီတိ? အာမန္တာ။ သမ္မာကမ္မန္တော။ပေ.။ သမ္မာအာဇီဝေါ စိတ္တာနုပရိဝတ္တီတိ ? န ဟေဝံ ဝတ္တဗ္ဗေ။ပေ.။။
၅၉၇. န ဝတ္တဗ္ဗံ – ‘‘သီလံ န စိတ္တာနုပရိဝတ္တီ’’တိ? အာမန္တာ။ သီလေ ဥပ္ပဇ္ဇိတွာ နိရုဒ္ဓေ ဒုဿီလော ဟောတီတိ? န ဟေဝံ ဝတ္တဗ္ဗေ။ တေန ဟိ သီလံ န စိတ္တာနုပရိဝတ္တီတိ။
သီလံ န စိတ္တာနုပရိဝတ္တီတိကထာ နိဋ္ဌိတာ။
၁၀. ဒသမဝဂ္ဂေါ
(၁၀၃) ၉. သမာဒါနဟေတုကထာ
၅၉၈. သမာဒါနဟေတုကံ သီလံ ဝဍ္ဎတီတိ? အာမန္တာ။ သမာဒါနဟေတုကော ဖဿော ဝဍ္ဎတိ, ဝေဒနာ ဝဍ္ဎတိ, သညာ ဝဍ္ဎတိ, စေတနာ ဝဍ္ဎတိ, စိတ္တံ ဝဍ္ဎတိ, သဒ္ဓါ ဝဍ္ဎတိ, ဝီရိယံ ဝဍ္ဎတိ, သတိ ဝဍ္ဎတိ, သမာဓိ ဝဍ္ဎတိ, ပညာ ဝဍ္ဎတီတိ? န ဟေဝံ ဝတ္တဗ္ဗေ။ပေ.။။
သမာဒါနဟေတုကံ သီလံ ဝဍ္ဎတီတိ? အာမန္တာ။ လတာ ဝိယ ဝဍ္ဎတိ, မာလုဝါ ဝိယ ဝဍ္ဎတိ, ရုက္ခော ဝိယ ဝဍ္ဎတိ, တိဏံ ဝိယ ဝဍ္ဎတိ, မုဉ္ဇပုဉ္ဇော ဝိယ ဝဍ္ဎတီတိ? န ဟေဝံ ဝတ္တဗ္ဗေ။ပေ.။။
၅၉၉. သမာဒါနဟေတုကံ သီလံ ဝဍ္ဎတီတိ? အာမန္တာ။ သီလံ သမာဒိယိတွာ ကာမဝိတက္ကံ ဝိတက္ကေန္တဿ ဗျာပါဒဝိတက္ကံ ဝိတက္ကေန္တဿ ဝိဟိံသာဝိတက္ကံ ဝိတက္ကေန္တဿ သီလံ ဝဍ္ဎတီတိ? အာမန္တာ။ ဒွိန္နံ ဖဿာနံ။ပေ.။ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။ ဒွိန္နံ ဖဿာနံ။ပေ.။ ဒွိန္နံ စိတ္တာနံ သမောဓါနံ ဟောတီတိ ? အာမန္တာ။ ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီတိ? န ဟေဝံ ဝတ္တဗ္ဗေ။ပေ.။။
ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီတိ? အာမန္တာ။ နနု ဝုတ္တံ ဘဂဝတာ – ‘‘စတ္တာရိမာနိ, ဘိက္ခဝေ, သုဝိဒူရဝိဒူရာနိ! ကတမာနိ စတ္တာရိ? နဘဉ္စ, ဘိက္ခဝေ, ပထဝီ စ – ဣဒံ ပဌမံ သုဝိဒူရဝိဒူရံ။ပေ.။ တသ္မာ သတံ ဓမ္မော အသဗ္ဘိ အာရကာ’’တိ။ အတ္ထေဝ သုတ္တန္တောတိ? အာမန္တာ ။ တေန ဟိ န ဝတ္တဗ္ဗံ – ‘‘ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီ’’တိ။
၆၀၀. န ဝတ္တဗ္ဗံ – ‘‘သမာဒါနဟေတုကံ သီလံ ဝဍ္ဎတီ’’တိ? အာမန္တာ။ နနု ဝုတ္တံ ဘဂဝတာ – ‘‘အာရာမရောပါ ဝနရောပါ။ပေ.။ ဓမ္မဋ္ဌာ သီလသမ္ပန္နာ တေ ဇနာ သဂ္ဂဂါမိနော’’တိ။ အတ္ထေဝ သုတ္တန္တောတိ? အာမန္တာ။ တေန ဟိ သမာဒါနဟေတုကံ သီလံ ဝဍ္ဎတီတိ။
သမာဒါနဟေတုကထာ နိဋ္ဌိတာ။
၁၀. ဒသမဝဂ္ဂေါ
(၁၀၄) ၁၀. ဝိညတ္တိ သီလန္တိကထာ
၆၀၁. ဝိညတ္တိ သီလန္တိ? အာမန္တာ။ ပါဏာတိပါတာ ဝေရမဏီတိ? န ဟေဝံ ဝတ္တဗ္ဗေ။ပေ.။ အဒိန္နာဒါနာ ဝေရမဏီတိ? န ဟေဝံ ဝတ္တဗ္ဗေ။ပေ.။ ကာမေသုမိစ္ဆာစာရာ ဝေရမဏီတိ? န ဟေဝံ ဝတ္တဗ္ဗေ ။ပေ.။ မုသာဝါဒါ ဝေရမဏီတိ? န ဟေဝံ ဝတ္တဗ္ဗေ။ပေ.။ သုရာမေရယမဇ္ဇပမာဒဋ္ဌာနာ ဝေရမဏီတိ? န ဟေဝံ ဝတ္တဗ္ဗေ။ပေ.။။
အဘိဝါဒနံ သီလံ, ပစ္စုဋ္ဌာနံ သီလံ, အဉ္ဇလိကမ္မံ သီလံ, သာမီစိကမ္မံ သီလံ, အာသနာဘိဟာရော သီလံ, သေယျာဘိဟာရော သီလံ, ပါဒေါဒကာဘိဟာရော သီလံ, ပါဒကထလိကာဘိဟာရော သီလံ, နှာနေ ပိဋ္ဌိပရိကမ္မံ သီလန္တိ? အာမန္တာ ။ ပါဏာတိပါတာ ဝေရမဏီတိ? န ဟေဝံ ဝတ္တဗ္ဗေ။ပေ.။ သုရာမေရယမဇ္ဇပမာဒဋ္ဌာနာ ဝေရမဏီတိ? န ဟေဝံ ဝတ္တဗ္ဗေ။ပေ.။။
၆၀၂. န ဝတ္တဗ္ဗံ – ‘‘ဝိညတ္တိ သီလ’’န္တိ? အာမန္တာ။ ဒုဿိလ္ယန္တိ? န ဟေဝံ ဝတ္တဗ္ဗေ။ပေ.။ တေန ဟိ ဝိညတ္တိ သီလန္တိ။
ဝိညတ္တိ သီလန္တိကထာ နိဋ္ဌိတာ။
၁၀. ဒသမဝဂ္ဂေါ
(၁၀၅) ၁၁. အဝိညတ္တိ ဒုဿိလ္ယန္တိကထာ
၆၀၃. အဝိညတ္တိ ဒုဿိလ္ယန္တိ? အာမန္တာ။ ပါဏာတိပါတောတိ? န ဟေဝံ ဝတ္တဗ္ဗေ။ပေ.။ အဒိန္နာဒါနန္တိ? န ဟေဝံ ဝတ္တဗ္ဗေ။ပေ.။ ကာမေသုမိစ္ဆာစာရောတိ? န ဟေဝံ ဝတ္တဗ္ဗေ။ပေ.။ မုသာဝါဒေါတိ? န ဟေဝံ ဝတ္တဗ္ဗေ။ပေ.။ သုရာမေရယမဇ္ဇပမာဒဋ္ဌာနန္တိ? န ဟေဝံ ဝတ္တဗ္ဗေ။ပေ.။။
ပါပကမ္မံ သမာဒိယိတွာ ဒါနံ ဒဒန္တဿ ပုညဉ္စ အပုညဉ္စ ဥဘော ဝဍ္ဎန္တီတိ? န ဟေဝံ ဝတ္တဗ္ဗေ။ပေ.။ ပုညဉ္စ အပုညဉ္စ ဥဘော ဝဍ္ဎန္တီတိ? အာမန္တာ ။ ဒွိန္နံ ဖဿာနံ။ပေ.။ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။ ဒွိန္နံ ဖဿာနံ။ပေ.။ ဒွိန္နံ စိတ္တာနံ သမောဓါနံ ဟောတီတိ? အာမန္တာ။ ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီတိ? န ဟေဝံ ဝတ္တဗ္ဗေ။ပေ.။။
ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီတိ? အာမန္တာ။ နနု ဝုတ္တံ ဘဂဝတာ – ‘‘စတ္တာရိမာနိ, ဘိက္ခဝေ, သုဝိဒူရဝိဒူရာနိ ! ကတမာနိ စတ္တာရိ? နဘဉ္စ, ဘိက္ခဝေ, ပထဝီ စ – ဣဒံ ပဌမံ သုဝိဒူရဝိဒူရံ။ပေ.။ တသ္မာ သတံ ဓမ္မော အသဗ္ဘိ အာရကာ’’တိ။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီ’’တိ။
၆၀၄. န ဝတ္တဗ္ဗံ – ‘‘အဝိညတ္တိ ဒုဿိလ္ယ’’န္တိ? အာမန္တာ။ နနု ပါပကမ္မံ သမာဒိန္နော အာသီတိ? အာမန္တာ။ ဟဉ္စိ ပါပကမ္မံ သမာဒိန္နော အာသိ, တေန ဝတ ရေ ဝတ္တဗ္ဗေ – ‘‘အဝိညတ္တိ ဒုဿိလ္ယ’’န္တိ။
အဝိညတ္တိ ဒုဿိလ္ယန္တိကထာ နိဋ္ဌိတာ။
ဒသမဝဂ္ဂေါ။
တဿုဒ္ဒါနံ –
ဥပပတ္တေသိယေ ပဉ္စက္ခန္ဓေ အနိရုဒ္ဓေ ကိရိယာ ပဉ္စက္ခန္ဓာ ဥပ္ပဇ္ဇန္တိ, မဂ္ဂသမင်္ဂိဿ ရူပံ မဂ္ဂေါ, ပဉ္စဝိညာဏသမင်္ဂိဿ အတ္ထိ မဂ္ဂဘာဝနာ, ပဉ္စဝိညာဏာ ကုသလာပိ အကုသလာပိ, ပဉ္စဝိညာဏာ သာဘောဂါ, မဂ္ဂသမင္ဂီ ဒွီဟိ သီလေဟိ သမန္နာဂတော, သီလံ အစေတသိကံ, သီလံ န စိတ္တာနုပရိဝတ္တိ, သမာဒါနဟေတုကံ သီလံ ဝဍ္ဎတီတိ, ဝိညတ္တိသီလံ အဝိညတ္တိ ဒုဿိလ္ယန္တိ။
ဒုတိယော ပဏ္ဏာသကော။
တဿုဒ္ဒါနံ –
နိယာမသင်္ဂဟဂတာနိသံသတာ စ နိရောဓေါတိ [နိယာမ သင်္ဂဟဂတာနိသံသတာ အတ္ထိ ပဉ္စဝေါကာရဘဝေါ နိရောဓေါ မဂ္ဂသမင်္ဂိဿ ပဉ္စဝေါကာရဘဝေါတိ (သီ. သျာ. က.), နိယာမ သင်္ဂဟ ဂတာနိသံသတာ အတ္ထိ ပဉ္စဝေါကာရဘဝေါ မဂ္ဂသမင်္ဂိဿ နော ပဉ္စဝေါကာရဘဝေါ (ဣ.)]။