၇. သတ္တမဝဂ္ဂ
(၆၃) ၁. သင်္ဂဟိတကထာ
၄၇၁. နတ္ထိ ကေစိ ဓမ္မာ ကေဟိစိ ဓမ္မေဟိ သင်္ဂဟိတာတိ [သင်္ဂဟီတာတိ (ဣ.)]? အာမန္တာ။ နနု အတ္ထိ ကေစိ ဓမ္မာ ကေဟိစိ ဓမ္မေဟိ ဂဏနံ ဂစ္ဆန္တိ ဥဒ္ဒေသံ ဂစ္ဆန္တိ ပရိယာပန္နာတိ? အာမန္တာ။ ဟဉ္စိ အတ္ထိ ကေစိ ဓမ္မာ ကေဟိစိ ဓမ္မေဟိ ဂဏနံ ဂစ္ဆန္တိ ဥဒ္ဒေသံ ဂစ္ဆန္တိ ပရိယာပန္နာ, နော စ ဝတ ရေ ဝတ္တဗ္ဗေ – ‘‘နတ္ထိ ကေစိ ဓမ္မာ ကေဟိစိ ဓမ္မေဟိ သင်္ဂဟိတာ’’တိ။
စက္ခာယတနံ ကတမက္ခန္ဓဂဏနံ [ကတမံ ခန္ဓဂဏနံ (သီ. ဣ. က.)] ဂစ္ဆတီတိ? ရူပက္ခန္ဓဂဏနံ ဂစ္ဆတီတိ။ ဟဉ္စိ စက္ခာယတနံ ရူပက္ခန္ဓဂဏနံ ဂစ္ဆတိ, တေန ဝတ ရေ ဝတ္တဗ္ဗေ – ‘‘စက္ခာယတနံ ရူပက္ခန္ဓေန သင်္ဂဟိတ’’န္တိ။ သောတာယတနံ။ပေ.။ ဃာနာယတနံ။ပေ.။ ဇိဝှာယတနံ။ပေ.။ ကာယာယတနံ ကတမက္ခန္ဓဂဏနံ ဂစ္ဆတီတိ? ရူပက္ခန္ဓဂဏနံ ဂစ္ဆတီတိ။ ဟဉ္စိ ကာယာယတနံ ရူပက္ခန္ဓဂဏနံ ဂစ္ဆတိ, တေန ဝတ ရေ ဝတ္တဗ္ဗေ – ‘‘ကာယာယတနံ ရူပက္ခန္ဓေန သင်္ဂဟိတ’’န္တိ။
ရူပါယတနံ။ပေ.။ သဒ္ဒါယတနံ။ပေ.။ ဂန္ဓာယတနံ။ပေ.။ ရသာယတနံ။ပေ.။ ဖောဋ္ဌဗ္ဗာယတနံ ကတမက္ခန္ဓဂဏနံ ဂစ္ဆတီတိ? ရူပက္ခန္ဓဂဏနံ ဂစ္ဆတီတိ။ ဟဉ္စိ ဖောဋ္ဌဗ္ဗာယတနံ ရူပက္ခန္ဓဂဏနံ ဂစ္ဆတိ, တေန ဝတ ရေ ဝတ္တဗ္ဗေ – ‘‘ဖောဋ္ဌဗ္ဗာယတနံ ရူပက္ခန္ဓေန သင်္ဂဟိတ’’န္တိ။
သုခါ ဝေဒနာ ကတမက္ခန္ဓဂဏနံ ဂစ္ဆတီတိ? ဝေဒနာက္ခန္ဓဂဏနံ ဂစ္ဆတီတိ။ ဟဉ္စိ သုခါ ဝေဒနာ ဝေဒနာက္ခန္ဓဂဏနံ ဂစ္ဆတိ, တေန ဝတ ရေ ဝတ္တဗ္ဗေ – ‘‘သုခါ ဝေဒနာ ဝေဒနာက္ခန္ဓေန သင်္ဂဟိတာ’’တိ။ ဒုက္ခာ ဝေဒနာ။ပေ.။ အဒုက္ခမသုခါ ဝေဒနာ ကတမက္ခန္ဓဂဏနံ ဂစ္ဆတီတိ? ဝေဒနာက္ခန္ဓဂဏနံ ဂစ္ဆတီတိ။ ဟဉ္စိ အဒုက္ခမသုခါ ဝေဒနာ ဝေဒနာက္ခန္ဓဂဏနံ ဂစ္ဆတိ, တေန ဝတ ရေ ဝတ္တဗ္ဗေ – ‘‘အဒုက္ခမသုခါ ဝေဒနာ ဝေဒနာက္ခန္ဓေန သင်္ဂဟိတာ’’တိ။
စက္ခုသမ္ဖဿဇာ သညာ ကတမက္ခန္ဓဂဏနံ ဂစ္ဆတီတိ? သညာက္ခန္ဓဂဏနံ ဂစ္ဆတီတိ။ ဟဉ္စိ စက္ခုသမ္ဖဿဇာ သညာ သညာက္ခန္ဓဂဏနံ ဂစ္ဆတိ, တေန ဝတ ရေ ဝတ္တဗ္ဗေ – ‘‘စက္ခုသမ္ဖဿဇာ သညာ သညာက္ခန္ဓေန သင်္ဂဟိတာ’’တိ။ သောတသမ္ဖဿဇာ သညာ။ပေ.။ မနောသမ္ဖဿဇာ သညာ ကတမက္ခန္ဓဂဏနံ ဂစ္ဆတီတိ? သညာက္ခန္ဓဂဏနံ ဂစ္ဆတီတိ။ ဟဉ္စိ မနောသမ္ဖဿဇာ သညာ သညာက္ခန္ဓဂဏနံ ဂစ္ဆတိ, တေန ဝတ ရေ ဝတ္တဗ္ဗေ – ‘‘မနောသမ္ဖဿဇာ သညာ သညာက္ခန္ဓေန သင်္ဂဟိတာ’’တိ။
စက္ခုသမ္ဖဿဇာ စေတနာ။ပေ.။ မနောသမ္ဖဿဇာ စေတနာ ကတမက္ခန္ဓဂဏနံ ဂစ္ဆတီတိ? သင်္ခါရက္ခန္ဓဂဏနံ ဂစ္ဆတီတိ။ ဟဉ္စိ မနောသမ္ဖဿဇာ စေတနာ သင်္ခါရက္ခန္ဓဂဏနံ ဂစ္ဆတိ, တေန ဝတ ရေ ဝတ္တဗ္ဗေ – ‘‘မနောသမ္ဖဿဇာ စေတနာ သင်္ခါရက္ခန္ဓေန သင်္ဂဟိတာ’’တိ။
စက္ခုဝိညာဏံ ။ပေ.။ မနောဝိညာဏံ ကတမက္ခန္ဓဂဏနံ ဂစ္ဆတီတိ ? ဝိညာဏက္ခန္ဓဂဏနံ ဂစ္ဆတီတိ။ ဟဉ္စိ မနောဝိညာဏံ ဝိညာဏက္ခန္ဓဂဏနံ ဂစ္ဆတိ, တေန ဝတ ရေ ဝတ္တဗ္ဗေ – ‘‘မနောဝိညာဏံ ဝိညာဏက္ခန္ဓေန သင်္ဂဟိတ’’န္တိ။
၄၇၂. ယထာ ဒါမေန ဝါ ယောတ္တေန ဝါ ဒွေ ဗလိဗဒ္ဒါ သင်္ဂဟိတာ, သိက္ကာယ ပိဏ္ဍပါတော သင်္ဂဟိတော, သာ ဂဒ္ဒုလေန သင်္ဂဟိတော; ဧဝမေဝ တေ ဓမ္မာ တေဟိ ဓမ္မေဟိ သင်္ဂဟိတာတိ [သကဝါဒိဝစနံ (အဋ္ဌကထာ ပဿိတဗ္ဗာ)]? ဟဉ္စိ ဒါမေန ဝါ ယောတ္တေန ဝါ ဒွေ ဗလီဗဒ္ဒါ သင်္ဂဟိတာ, သိက္ကာယ ပိဏ္ဍပါတော သင်္ဂဟိတော, သာ ဂဒ္ဒုလေန သင်္ဂဟိတော, တေန ဝတ ရေ ဝတ္တဗ္ဗေ – ‘‘အတ္ထိ ကေစိ ဓမ္မာ ကေဟိစိ ဓမ္မေဟိ သင်္ဂဟိတာ’’တိ [သကဝါဒိဝစနံ (အဋ္ဌကထာ ပဿိတဗ္ဗာ)]။
သင်္ဂဟိတကထာ နိဋ္ဌိတာ။
၇. သတ္တမဝဂ္ဂေါ
(၆၄) ၂. သမ္ပယုတ္တကထာ
၄၇၃. နတ္ထိ ကေစိ ဓမ္မာ ကေဟိစိ ဓမ္မေဟိ သမ္ပယုတ္တာတိ? အာမန္တာ။ နနု အတ္ထိ ကေစိ ဓမ္မာ ကေဟိစိ ဓမ္မေဟိ သဟဂတာ သဟဇာတာ သံသဋ္ဌာ ဧကုပ္ပါဒါ ဧကနိရောဓါ ဧကဝတ္ထုကာ ဧကာရမ္မဏာတိ? အာမန္တာ။ ဟဉ္စိ အတ္ထိ ကေစိ ဓမ္မာ ကေဟိစိ ဓမ္မေဟိ သဟဂတာ သဟဇာတာ သံသဋ္ဌာ ဧကုပ္ပါဒါ ဧကနိရောဓါ ဧကဝတ္ထုကာ ဧကာရမ္မဏာ, နော စ ဝတ ရေ ဝတ္တဗ္ဗေ – ‘‘နတ္ထိ ကေစိ ဓမ္မာ ကေဟိစိ ဓမ္မေဟိ သမ္ပယုတ္တာ’’တိ။
ဝေဒနာက္ခန္ဓော သညာက္ခန္ဓေန သဟဇာတောတိ? အာမန္တာ။ ဟဉ္စိ ဝေဒနာက္ခန္ဓော သညာက္ခန္ဓေန သဟဇာတော, တေန ဝတ ရေ ဝတ္တဗ္ဗေ – ‘‘ဝေဒနာက္ခန္ဓော သညာက္ခန္ဓေန သမ္ပယုတ္တော’’တိ။
ဝေဒနာက္ခန္ဓော သင်္ခါရက္ခန္ဓေန။ ဝိညာဏက္ခန္ဓေန သဟဇာတောတိ? အာမန္တာ။ ဟဉ္စိ ဝေဒနာက္ခန္ဓော ဝိညာဏက္ခန္ဓေန သဟဇာတော, တေန ဝတ ရေ ဝတ္တဗ္ဗေ – ‘‘ဝေဒနာက္ခန္ဓော ဝိညာဏက္ခန္ဓေန သမ္ပယုတ္တော’’တိ။
သညာက္ခန္ဓော ။ သင်္ခါရက္ခန္ဓော။ ဝိညာဏက္ခန္ဓော ဝေဒနာခန္ဓေန။ သညာက္ခန္ဓေန။ သင်္ခါရက္ခန္ဓေန သဟဇာတောတိ? အာမန္တာ။ ဟဉ္စိ ဝိညာဏက္ခန္ဓော သင်္ခါရက္ခန္ဓေန သဟဇာတော , တေန ဝတ ရေ ဝတ္တဗ္ဗေ – ‘‘ဝိညာဏက္ခန္ဓော သင်္ခါရက္ခန္ဓေန သမ္ပယုတ္တော’’တိ။
၄၇၄. ယထာ တိလမှိ တေလံ အနုဂတံ အနုပဝိဋ္ဌံ, ဥစ္ဆုမှိ ရသော အနုဂတော အနုပဝိဋ္ဌော; ဧဝမေဝ တေ ဓမ္မာ တေဟိ ဓမ္မေဟိ အနုဂတာ အနုပဝိဋ္ဌာတိ? န ဟေဝံ ဝတ္တဗ္ဗေ။ပေ.။။
သမ္ပယုတ္တကထာ နိဋ္ဌိတာ။
၇. သတ္တမဝဂ္ဂေါ
(၆၅) ၃. စေတသိကကထာ
၄၇၅. နတ္ထိ စေတသိကော ဓမ္မောတိ? အာမန္တာ။ နနု အတ္ထိ ကေစိ ဓမ္မာ စိတ္တေန သဟဂတာ သဟဇာတာ သံသဋ္ဌာ သမ္ပယုတ္တာ ဧကုပ္ပါဒါ ဧကနိရောဓါ ဧကဝတ္ထုကာ ဧကာရမ္မဏာတိ? အာမန္တာ။ ဟဉ္စိ အတ္ထိ ကေစိ ဓမ္မာ စိတ္တေန သဟဂတာ သဟဇာတာ သံသဋ္ဌာ သမ္ပယုတ္တာ ဧကုပ္ပါဒါ ဧကနိရောဓါ ဧကဝတ္ထုကာ ဧကာရမ္မဏာ, နော စ ဝတ ရေ ဝတ္တဗ္ဗေ – ‘‘နတ္ထိ စေတသိကော ဓမ္မော’’တိ။
ဖဿော စိတ္တေန သဟဇာတောတိ? အာမန္တာ။ ဟဉ္စိ ဖဿော စိတ္တေန သဟဇာတော, တေန ဝတ ရေ ဝတ္တဗ္ဗေ – ‘‘ဖဿော စေတသိကော’’တိ။ ဝေဒနာ။ပေ.။ သညာ။ စေတနာ။ သဒ္ဓါ။ ဝီရိယံ။ သတိ။ သမာဓိ။ ပညာ။ ရာဂေါ။ ဒေါသော။ မောဟော။ပေ.။ အနောတ္တပ္ပံ စိတ္တေန သဟဇာတန္တိ? အာမန္တာ။ ဟဉ္စိ အနောတ္တပ္ပံ စိတ္တေန သဟဇာတံ, တေန ဝတ ရေ ဝတ္တဗ္ဗေ – ‘‘အနောတ္တပ္ပံ စေတသိက’’န္တိ။
၄၇၆. စိတ္တေန သဟဇာတာတိ ကတွာ စေတသိကာတိ? အာမန္တာ။ ဖဿေန သဟဇာတာတိ ကတွာ ဖဿသိကာတိ [ဖဿိကာတိ (ဣ. အဋ္ဌ.)]? အာမန္တာ။ စိတ္တေန သဟဇာတာတိ ကတွာ စေတသိကာတိ? အာမန္တာ ။ ဝေဒနာယ။ သညာယ။ စေတနာယ။ သဒ္ဓါယ။ ဝီရိယေန။ သတိယာ။ သမာဓိနာ။ ပညာယ။ ရာဂေန။ ဒေါသေန။ မောဟေန။ပေ.။ အနောတ္တပ္ပေန သဟဇာတာတိ ကတွာ အနောတ္တပ္ပါသိကာတိ [အနောတ္တပ္ပိကာတိ (?)]? အာမန္တာ။
၄၇၇. နတ္ထိ စေတသိကော ဓမ္မောတိ? အာမန္တာ။ နနု ဝုတ္တံ ဘဂဝတာ –
‘‘စိတ္တဉှိဒံ စေတသိကာ စ ဓမ္မာ၊
အနတ္တတော သံဝိဒိတဿ ဟောန္တိ။
ဟီနပ္ပဏီတံ တဒုဘယေ ဝိဒိတွာ၊
သမ္မဒ္ဒသော ဝေဒိ ပလောကဓမ္မ’’န္တိ။
အတ္ထေဝ သုတ္တန္တောတိ? အာမန္တာ။ တေန ဟိ အတ္ထိ စေတသိကော ဓမ္မောတိ။
နတ္ထိ စေတသိကော ဓမ္မောတိ? အာမန္တာ။ နနု ဝုတ္တံ ဘဂဝတာ – ‘‘ဣဓ, ကေဝဋ္ဋ, ဘိက္ခု ပရသတ္တာနံ ပရပုဂ္ဂလာနံ စိတ္တမ္ပိ အာဒိသတိ စေတသိကမ္ပိ အာဒိသတိ ဝိတက္ကိတမ္ပိ အာဒိသတိ ဝိစာရိတမ္ပိ အာဒိသတိ – ‘ဧဝမ္ပိ တေ မနော, ဣတ္ထမ္ပိ တေ မနော, ဣတိပိ တေ စိတ္တ’’’န္တိ [ဒီ. နိ. ၁.၄၈၅]။ အတ္ထေဝ သုတ္တန္တောတိ? အာမန္တာ။ တေန ဟိ အတ္ထိ စေတသိကော ဓမ္မောတိ။
စေတသိကကထာ နိဋ္ဌိတာ။
၇. သတ္တမဝဂ္ဂေါ
(၆၆) ၄. ဒါနကထာ
၄၇၈. စေတသိကော ဓမ္မော ဒါနန္တိ? အာမန္တာ။ လဗ္ဘာ စေတသိကော ဓမ္မော ပရေသံ ဒါတုန္တိ? န ဟေဝံ ဝတ္တဗ္ဗေ ။ပေ.။ လဗ္ဘာ စေတသိကော ဓမ္မော ပရေသံ ဒါတုန္တိ? အာမန္တာ။ လဗ္ဘာ ဖဿော ပရေသံ ဒါတုန္တိ? န ဟေဝံ ဝတ္တဗ္ဗေ ။ပေ.။ လဗ္ဘာ ဝေဒနာ။ပေ.။ သညာ။ စေတနာ။ သဒ္ဓါ။ ဝီရိယံ။ သတိ။ သမာဓိ။ ပညာ ပရေသံ ဒါတုန္တိ? န ဟေဝံ ဝတ္တဗ္ဗေ။ပေ.။။
၄၇၉. န ဝတ္တဗ္ဗံ – စေတသိကော ဓမ္မော ဒါနန္တိ? အာမန္တာ။ ဒါနံ အနိဋ္ဌဖလံ အကန္တဖလံ အမနုညဖလံ သေစနကဖလံ ဒုက္ခုဒြယံ ဒုက္ခဝိပါကန္တိ? န ဟေဝံ ဝတ္တဗ္ဗေ။ပေ.။ နနု ဒါနံ ဣဋ္ဌဖလံ ကန္တဖလံ မနုညဖလံ အသေစနကဖလံ သုခုဒြယံ သုခဝိပါကန္တိ? အာမန္တာ။ ဟဉ္စိ ဒါနံ ဣဋ္ဌဖလံ ကန္တဖလံ မနုညဖလံ အသေစနကဖလံ သုခုဒြယံ သုခဝိပါကံ , တေန ဝတ ရေ ဝတ္တဗ္ဗေ – ‘‘စေတသိကော ဓမ္မော ဒါန’’န္တိ။
ဒါနံ ဣဋ္ဌဖလံ ဝုတ္တံ ဘဂဝတာ, စီဝရံ ဒါနန္တိ [ဥပရိ ဝုစ္စမာနာယ ပရဝါဒီပုစ္ဆာယ သဒိသာ, အဋ္ဌကထာ ဩလောကေတဗ္ဗာ]? အာမန္တာ။ စီဝရံ ဣဋ္ဌဖလံ ကန္တဖလံ မနုညဖလံ အသေစနကဖလံ သုခုဒြယံ သုခဝိပါကန္တိ? န ဟေဝံ ဝတ္တဗ္ဗေ။ပေ.။ ဒါနံ ဣဋ္ဌဖလံ ဝုတ္တံ ဘဂဝတာ, ပိဏ္ဍပါတော သေနာသနံ ဂိလာနပစ္စယဘေသဇ္ဇပရိက္ခာရော ဒါနန္တိ? အာမန္တာ။ ဂိလာနပစ္စယဘေသဇ္ဇပရိက္ခာရော ဣဋ္ဌဖလော ကန္တဖလော မနုညဖလော အသေစနကဖလော သုခုဒြယော သုခဝိပါကောတိ? န ဟေဝံ ဝတ္တဗ္ဗေ။ပေ.။။
၄၈၀. န ဝတ္တဗ္ဗံ – ‘‘စေတသိကော ဓမ္မော ဒါန’’န္တိ? အာမန္တာ။ နနု ဝုတ္တံ ဘဂဝတာ –
‘‘သဒ္ဓါ ဟိရိယံ ကုသလဉ္စ ဒါနံ၊
ဓမ္မာ ဧတေ သပ္ပုရိသာနုယာတာ။
ဧတဉှိ မဂ္ဂံ ဒိဝိယံ ဝဒန္တိ၊
ဧတေန ဟိ ဂစ္ဆတိ ဒေဝလောက’’န္တိ [အ. နိ. ၈.၃၂]။
အတ္ထေဝ သုတ္တန္တောတိ? အာမန္တာ။ တေန ဟိ စေတသိကော ဓမ္မော ဒါနန္တိ။
န ဝတ္တဗ္ဗံ – ‘‘စေတသိကော ဓမ္မော ဒါန’’န္တိ? အာမန္တာ။ နနု ဝုတ္တံ ဘဂဝတာ – ‘‘ပဉ္စိမာနိ, ဘိက္ခဝေ, ဒါနာနိ မဟာဒါနာနိ အဂ္ဂညာနိ ရတ္တညာနိ ဝံသညာနိ ပေါရာဏာနိ အသင်္ကိဏ္ဏာနိ အသင်္ကိဏ္ဏပုဗ္ဗာနိ, န သင်္ကိယန္တိ န သင်္ကိယိဿန္တိ, အပ္ပဋိကုဋ္ဌာနိ သမဏေဟိ ဗြာဟ္မဏေဟိ ဝိညူဟိ! ကတမာနိ ပဉ္စ? ဣဓ, ဘိက္ခဝေ, အရိယသာဝကော ပါဏာတိပါတံ ပဟာယ ပါဏာတိပါတာ ပဋိဝိရတော ဟောတိ။ ပါဏာတိပါတာ ပဋိဝိရတော, ဘိက္ခဝေ, အရိယသာဝကော အပရိမာဏာနံ သတ္တာနံ အဘယံ ဒေတိ အဝေရံ ဒေတိ အဗျာဗဇ္ဈံ [အဗျာပဇ္ဈံ (သျာ. က.)] ဒေတိ။ အပရိမာဏာနံ သတ္တာနံ အဘယံ ဒတွာ အဝေရံ ဒတွာ အဗျာဗဇ္ဈံ ဒတွာ အပရိမာဏဿ အဘယဿ အဝေရဿ အဗျာဗဇ္ဈဿ ဘာဂီ ဟောတိ။ ဣဒံ, ဘိက္ခဝေ , ပဌမံ ဒါနံ မဟာဒါနံ အဂ္ဂညံ ရတ္တညံ ဝံသညံ ပေါရာဏံ အသင်္ကိဏ္ဏံ အသင်္ကိဏ္ဏပုဗ္ဗံ, န သင်္ကိယတိ န သင်္ကိယိဿတိ, အပ္ပဋိကုဋ္ဌံ သမဏေဟိ ဗြာဟ္မဏေဟိ ဝိညူဟိ။ ပုန စပရံ, ဘိက္ခဝေ, အရိယသာဝကော အဒိန္နာဒါနံ ပဟာယ။ပေ.။ ကာမေသုမိစ္ဆာစာရံ ပဟာယ။ပေ.။ မုသာဝါဒံ ပဟာယ။ပေ.။ သုရာမေရယမဇ္ဇပမာဒဋ္ဌာနံ ပဟာယ သုရာမေရယမဇ္ဇပမာဒဋ္ဌာနာ ပဋိဝိရတော ဟောတိ။ သုရာမေရယမဇ္ဇပမာဒဋ္ဌာနာ ပဋိဝိရတော, ဘိက္ခဝေ, အရိယသာဝကော အပရိမာဏာနံ သတ္တာနံ အဘယံ ဒေတိ အဝေရံ ဒေတိ အဗျာဗဇ္ဈံ ဒေတိ။ အပရိမာဏာနံ သတ္တာနံ အဘယံ ဒတွာ အဝေရံ ဒတွာ အဗျာဗဇ္ဈံ ဒတွာ အပရိမာဏဿ အဘယဿ အဝေရဿ အဗျာဗဇ္ဈဿ ဘာဂီ ဟောတိ။ ဣဒံ, ဘိက္ခဝေ , ပဉ္စမံ ဒါနံ မဟာဒါနံ အဂ္ဂညံ ရတ္တညံ ဝံသညံ ပေါရာဏံ အသင်္ကိဏ္ဏံ အသင်္ကိဏ္ဏပုဗ္ဗံ, န သင်္ကိယတိ န သင်္ကိယိဿတိ, အပ္ပဋိကုဋ္ဌံ သမဏေဟိ ဗြာဟ္မဏေဟိ ဝိညူဟိ။ ဣမာနိ ခေါ, ဘိက္ခဝေ, ပဉ္စ ဒါနာနိ မဟာဒါနာနိ အဂ္ဂညာနိ ရတ္တညာနိ ဝံသညာနိ ပေါရာဏာနိ အသင်္ကိဏ္ဏာနိ အသင်္ကိဏ္ဏပုဗ္ဗာနိ, န သင်္ကိယန္တိ န သင်္ကိယိဿန္တိ, အပ္ပဋိကုဋ္ဌာနိ သမဏေဟိ ဗြာဟ္မဏေဟိ ဝိညူဟီ’’တိ [အ. နိ. ၈.၃၉]။ အတ္ထေဝ သုတ္တန္တောတိ? အာမန္တာ။ တေန ဟိ စေတသိကော ဓမ္မော ဒါနန္တိ။
၄၈၁. န ဝတ္တဗ္ဗံ – ‘‘ဒေယျဓမ္မော ဒါန’’န္တိ? အာမန္တာ။ နနု ဝုတ္တံ ဘဂဝတာ – ‘‘ဣဓေကစ္စော အန္နံ ဒေတိ, ပါနံ ဒေတိ, ဝတ္ထံ ဒေတိ, ယာနံ ဒေတိ, မာလံ ဒေတိ, ဂန္ဓံ ဒေတိ, ဝိလေပနံ ဒေတိ, သေယျံ ဒေတိ, အာဝသထံ ဒေတိ, ပဒီပေယျံ ဒေတီ’’တိ [သံ. နိ. ၃.၃၆၂-၃၉၁ ထောကံ ဝိသဒိသံ]! အတ္ထေဝ သုတ္တန္တောတိ? အာမန္တာ။ တေန ဟိ ဒေယျဓမ္မော ဒါနန္တိ။
၄၈၂. ဒေယျဓမ္မော ဒါနန္တိ? အာမန္တာ။ ဒေယျဓမ္မော ဣဋ္ဌဖလော ကန္တဖလော မနုညဖလော အသေစနကဖလော သုခုဒြယော သုခဝိပါကောတိ? န ဟေဝံ ဝတ္တဗ္ဗေ။ပေ.။ ဒါနံ ဣဋ္ဌဖလံ ဝုတ္တံ ဘဂဝတာ, စီဝရံ ဒါနန္တိ? အာမန္တာ။ စီဝရံ ဣဋ္ဌဖလံ ကန္တဖလံ မနုညဖလံ အသေစနကဖလံ သုခုဒြယံ သုခဝိပါကန္တိ? န ဟေဝံ ဝတ္တဗ္ဗေ။ပေ.။ ဒါနံ ဣဋ္ဌဖလံ ဝုတ္တံ ဘဂဝတာ, ပိဏ္ဍပါတော ဒါနံ။ သေနာသနံ ဒါနံ။ ဂိလာနပစ္စယဘေသဇ္ဇပရိက္ခာရော ဒါနန္တိ? အာမန္တာ။ ဂိလာနပစ္စယဘေသဇ္ဇပရိက္ခာရော ဣဋ္ဌဖလော ကန္တဖလော မနုညဖလော အသေစနကဖလော သုခုဒြယော သုခဝိပါကောတိ? န ဟေဝံ ဝတ္တဗ္ဗေ။ပေ.။ တေန ဟိ န ဝတ္တဗ္ဗံ – ‘‘ဒေယျဓမ္မော ဒါန’’န္တိ။
ဒါနကထာ နိဋ္ဌိတာ။
၇. သတ္တမဝဂ္ဂေါ
(၆၇) ၅. ပရိဘောဂမယပုညကထာ
၄၈၃. ပရိဘောဂမယံ ပုညံ ဝဍ္ဎတီတိ? အာမန္တာ။ ပရိဘောဂမယော ဖဿော ဝဍ္ဎတိ, ဝေဒနာ ဝဍ္ဎတိ, သညာ ဝဍ္ဎတိ, စေတနာ ဝဍ္ဎတိ, စိတ္တံ ဝဍ္ဎတိ, သဒ္ဓါ ဝဍ္ဎတိ, ဝီရိယံ ဝဍ္ဎတိ, သတိ ဝဍ္ဎတိ, သမာဓိ ဝဍ္ဎတိ, ပညာ ဝဍ္ဎတီတိ? န ဟေဝံ ဝတ္တဗ္ဗေ။ပေ.။။
ပရိဘောဂမယံ ပုညံ ဝဍ္ဎတီတိ? အာမန္တာ။ လတာ ဝိယ ဝဍ္ဎတိ, မာလုဝါ ဝိယ ဝဍ္ဎတိ, ရုက္ခော ဝိယ ဝဍ္ဎတိ, တိဏံ ဝိယ ဝဍ္ဎတိ, မုဉ္ဇပုဉ္ဇော ဝိယ ဝဍ္ဎတီတိ? န ဟေဝံ ဝတ္တဗ္ဗေ။ပေ.။။
၄၈၄. ပရိဘောဂမယံ ပုညံ ဝဍ္ဎတီတိ? အာမန္တာ။ ဒါယကော ဒါနံ ဒတွာ န သမန္နာဟရတိ, ဟောတိ ပုညန္တိ? အာမန္တာ။ အနာဝဋ္ဋေန္တဿ [အနာဝဋ္ဋန္တဿ (သီ. ဣ. က.), အနာဝဇ္ဈန္တဿ (သျာ.)] ဟောတိ။ အနာဘောဂဿ ဟောတိ။ အသမန္နာဟရန္တဿ ဟောတိ။ အမနသိကရောန္တဿ ဟောတိ။ အစေတယန္တဿ ဟောတိ။ အပတ္ထယန္တဿ ဟောတိ။ အပ္ပဏိဒဟန္တဿ ဟောတီတိ? န ဟေဝံ ဝတ္တဗ္ဗေ။ပေ.။ နနု အာဝဋ္ဋေန္တဿ ဟောတိ။ အာဘောဂဿ ဟောတိ။ သမန္နာဟရန္တဿ ဟောတိ။ မနသိကရောန္တဿ ဟောတိ။ စေတယန္တဿ ဟောတိ။ ပတ္ထယန္တဿ ဟောတိ။ ပဏိဒဟန္တဿ ဟောတီတိ? အာမန္တာ။ ဟဉ္စိ အာဝဋ္ဋေန္တဿ ဟောတိ။ အာဘောဂဿ ဟောတိ။ သမန္နာဟရန္တဿ ဟောတိ။ မနသိကရောန္တဿ ဟောတိ။ စေတယန္တဿ ဟောတိ။ ပတ္ထယန္တဿ ဟောတိ။ ပဏိဒဟန္တဿ ဟောတိ, နော စ ဝတ ရေ ဝတ္တဗ္ဗေ – ‘‘ပရိဘောဂမယံ ပုညံ ဝဍ္ဎတီ’’တိ။
၄၈၅. ပရိဘောဂမယံ ပုညံ ဝဍ္ဎတီတိ? အာမန္တာ။ ဒါယကော ဒါနံ ဒတွာ ကာမဝိတက္ကံ ဝိတက္ကေတိ, ဗျာပါဒဝိတက္ကံ ဝိတက္ကေတိ, ဝိဟိံသာဝိတက္ကံ ဝိတက္ကေတိ , ဟောတိ ပုညန္တိ? အာမန္တာ။ ဒွိန္နံ ဖဿာနံ။ပေ.။ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။ ဒွိန္နံ ဖဿာနံ။ပေ.။ ဒွိန္နံ စိတ္တာနံ သမောဓါနံ ဟောတီတိ? အာမန္တာ။ ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီတိ? န ဟေဝံ ဝတ္တဗ္ဗေ။ပေ.။ ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီတိ? အာမန္တာ။ နနု ဝုတ္တံ ဘဂဝတာ – ‘‘စတ္တာရိမာနိ, ဘိက္ခဝေ, သုဝိဒူရဝိဒူရာနိ! ကတမာနိ စတ္တာရိ? နဘဉ္စ, ဘိက္ခဝေ, ပထဝီ စ – ဣဒံ ပဌမံ သုဝိဒူရဝိဒူရံ။ ဩရိမဉ္စ, ဘိက္ခဝေ, တီရံ သမုဒ္ဒဿ ပါရိမဉ္စ တီရံ – ဣဒံ ဒုတိယံ သုဝိဒူရဝိဒူရံ။ ယတော စ, ဘိက္ခဝေ, ဝေရောစနော အဗ္ဘုဒေတိ ယတ္ထ စ အတ္ထမေတိ – ဣဒံ တတိယံ သုဝိဒူရဝိဒူရံ။ သတဉ္စ, ဘိက္ခဝေ, ဓမ္မော အသတဉ္စ ဓမ္မော – ဣဒံ စတုတ္ထံ သုဝိဒူရဝိဒူရံ။ ဣမာနိ ခေါ, ဘိက္ခဝေ, စတ္တာရိ သုဝိဒူရဝိဒူရာနီတိ။
‘‘နဘဉ္စ ဒူရေ ပထဝီ စ ဒူရေ၊
ပါရံ သမုဒ္ဒဿ တဒါဟု ဒူရေ။
ယတော စ ဝေရောစနော အဗ္ဘုဒေတိ၊
ပဘင်္ကရော ယတ္ထ စ အတ္ထမေတိ။
‘‘တတော ဟဝေ ဒူရတရံ ဝဒန္တိ၊
သတဉ္စ ဓမ္မံ အသတဉ္စ ဓမ္မံ။
အဗျာယိကော ဟောတိ သတံ သမာဂမော၊
ယာဝမ္ပိ တိဋ္ဌေယျ တထေဝ ဟောတိ။
‘‘ခိပ္ပဉှိ ဝေတိ [ခိပ္ပံဟဝေတိ (ဗဟူသု)] အသတံ သမာဂမော။
တသ္မာ သတံ ဓမ္မော အသဗ္ဘိ အာရကာ’’တိ [အ. နိ. ၄.၄၇]။
အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ကုသလာကုသလာ သာဝဇ္ဇာနဝဇ္ဇာ ဟီနပဏီတာ ကဏှသုက္ကသပ္ပဋိဘာဂါ ဓမ္မာ သမ္မုခီဘာဝံ အာဂစ္ဆန္တီ’’တိ။
၄၈၆. န ဝတ္တဗ္ဗံ – ‘‘ပရိဘောဂမယံ ပုညံ ဝဍ္ဎတီ’’တိ? အာမန္တာ။ နနု ဝုတ္တံ ဘဂဝတာ –
‘‘အာရာမရောပါ ဝနရောပါ၊ ယေ ဇနာ သေတုကာရကာ။
ပပဉ္စ ဥဒပါနဉ္စ၊ ယေ ဒဒန္တိ ဥပဿယံ။
‘‘တေသံ ဒိဝါ စ ရတ္တော စ၊ သဒါ ပုညံ ပဝဍ္ဎတိ။
ဓမ္မဋ္ဌာ သီလသမ္ပန္နာ၊ တေ ဇနာ သဂ္ဂဂါမိနော’’တိ [သံ. နိ. ၁.၄၇]။
အတ္ထေဝ သုတ္တန္တောတိ? အာမန္တာ။ တေန ဟိ ပရိဘောဂမယံ ပုညံ ဝဍ္ဎတီတိ။
န ဝတ္တဗ္ဗံ – ‘‘ပရိဘောဂမယံ ပုညံ ဝဍ္ဎတီ’’တိ? အာမန္တာ။ နနု ဝုတ္တံ ဘဂဝတာ – ‘‘စတ္တာရောမေ, ဘိက္ခဝေ, ပုညာဘိသန္ဒာ ကုသလာဘိသန္ဒာ သုခဿာဟာရာ သောဝဂ္ဂိကာ သုခဝိပါကာ သဂ္ဂသံဝတ္တနိကာ ဣဋ္ဌာယ ကန္တာယ မနာပါယ ဟိတာယ သုခါယ သံဝတ္တန္တိ! ကတမေ စတ္တာရော? ယဿ, ဘိက္ခဝေ, ဘိက္ခု စီဝရံ ပရိဘုဉ္ဇမာနော အပ္ပမာဏံ စေတောသမာဓိံ ဥပသမ္ပဇ္ဇ ဝိဟရတိ, အပ္ပမာဏော တဿ ပုညာဘိသန္ဒော ကုသလာဘိသန္ဒော သုခဿာဟာရော သောဝဂ္ဂိကော သုခဝိပါကော သဂ္ဂသံဝတ္တနိကော ဣဋ္ဌာယ ကန္တာယ မနာပါယ ဟိတာယ သုခါယ သံဝတ္တတိ။ ယဿ, ဘိက္ခဝေ, ဘိက္ခု ပိဏ္ဍပါတံ ပရိဘုဉ္ဇမာနော။ပေ.။ သေနာသနံ ပရိဘုဉ္ဇမာနော။ပေ.။ ဂိလာနပစ္စယဘေသဇ္ဇပရိက္ခာရံ ပရိဘုဉ္ဇမာနော အပ္ပမာဏံ စေတောသမာဓိံ ဥပသမ္ပဇ္ဇ ဝိဟရတိ, အပ္ပမာဏော တဿ ပုညာဘိသန္ဒော ကုသလာဘိသန္ဒော သုခဿာဟာရော သောဝဂ္ဂိကော သုခဝိပါကော သဂ္ဂသံဝတ္တနိကော ဣဋ္ဌာယ ကန္တာယ မနာပါယ ဟိတာယ သုခါယ သံဝတ္တတိ။ ဣမေ ခေါ, ဘိက္ခဝေ, စတ္တာရော ပုညာဘိသန္ဒာ ကုသလာဘိသန္ဒာ သုခဿာဟာရာ သောဝဂ္ဂိကာ သုခဝိပါကာ သဂ္ဂသံဝတ္တနိကာ ဣဋ္ဌာယ ကန္တာယ မနာပါယ ဟိတာယ သုခါယ သံဝတ္တန္တီ’’တိ [အ. နိ. ၄.၅၁]။ အတ္ထေဝ သုတ္တန္တောတိ? အာမန္တာ။ တေန ဟိ ပရိဘောဂမယံ ပုညံ ဝဍ္ဎတီတိ။
၄၈၇. ပရိဘောဂမယံ ပုညံ ဝဍ္ဎတီတိ? အာမန္တာ။ ဒါယကော ဒါနံ ဒေတိ, ပဋိဂ္ဂါဟကော ပဋိဂ္ဂဟေတွာ န ပရိဘုဉ္ဇတိ ဆဍ္ဍေတိ ဝိဿဇ္ဇေတိ, ဟောတိ ပုညန္တိ? အာမန္တာ။ ဟဉ္စိ ဒါယကော ဒါနံ ဒေတိ, ပဋိဂ္ဂါဟကော ပဋိဂ္ဂဟေတွာ န ပရိဘုဉ္ဇတိ ဆဍ္ဍေတိ ဝိဿဇ္ဇေတိ, ဟောတိ ပုညံ; နော စ ဝတ ရေ ဝတ္တဗ္ဗေ – ‘‘ပရိဘောဂမယံ ပုညံ ဝဍ္ဎတီ’’တိ။
ပရိဘောဂမယံ ပုညံ ဝဍ္ဎတီတိ? အာမန္တာ။ ဒါယကော ဒါနံ ဒေတိ, ပဋိဂ္ဂါဟကေ ပဋိဂ္ဂဟိတေ ရာဇာနော ဝါ ဟရန္တိ, စောရာ ဝါ ဟရန္တိ, အဂ္ဂိ ဝါ ဒဟတိ, ဥဒကံ ဝါ ဝဟတိ, အပ္ပိယာ ဝါ ဒါယာဒါ ဟရန္တိ, ဟောတိ ပုညန္တိ? အာမန္တာ ။ ဟဉ္စိ ဒါယကော ဒါနံ ဒေတိ, ပဋိဂ္ဂါဟကေ ပဋိဂ္ဂဟိတေ ရာဇာနော ဝါ ဟရန္တိ, စောရာ ဝါ ဟရန္တိ, အဂ္ဂိ ဝါ ဒဟတိ, ဥဒကံ ဝါ ဝဟတိ, အပ္ပိယာ ဝါ ဒါယာဒါ ဟရန္တိ, ဟောတိ ပုညံ; နော စ ဝတ ရေ ဝတ္တဗ္ဗေ – ‘‘ပရိဘောဂမယံ ပုညံ ဝဍ္ဎတီ’’တိ။
ပရိဘောဂမယပုညကထာ နိဋ္ဌိတာ။
၇. သတ္တမဝဂ္ဂေါ
(၆၈) ၆. ဣတောဒိန္နကထာ
၄၈၈. ဣတော ဒိန္နေန တတ္ထ ယာပေန္တီတိ? အာမန္တာ။ ဣတော စီဝရံ ဒေန္တိ တံ စီဝရံ တတ္ထ ပရိဘုဉ္ဇန္တီတိ? န ဟေဝံ ဝတ္တဗ္ဗေ။ပေ.။ ဣတော ပိဏ္ဍပါတံ ဒေန္တိ, ဣတော သေနာသနံ ဒေန္တိ, ဣတော ဂိလာနပစ္စယဘေသဇ္ဇပရိက္ခာရံ ဒေန္တိ, ဣတော ခါဒနီယံ ဒေန္တိ, ဣတော ဘောဇနီယံ ဒေန္တိ, ဣတော ပါနီယံ ဒေန္တိ; တံ ပါနီယံ တတ္ထ ပရိဘုဉ္ဇန္တီတိ? န ဟေဝံ ဝတ္တဗ္ဗေ။ပေ.။။
ဣတော ဒိန္နေန တတ္ထ ယာပေန္တီတိ? အာမန္တာ။ အညော အညဿ ကာရကော ပရကတံ သုခဒုက္ခံ အညော ကရောတိ, အညော ပဋိသံဝေဒေတီတိ? န ဟေဝံ ဝတ္တဗ္ဗေ။ပေ.။။
၄၈၉. န ဝတ္တဗ္ဗံ – ‘‘ဣတော ဒိန္နေန တတ္ထ ယာပေန္တီ’’တိ? အာမန္တာ။ နနု ပေတာ အတ္တနော အတ္ထာယ ဒါနံ ဒေန္တံ အနုမောဒေန္တိ, စိတ္တံ ပသာဒေန္တိ, ဣတိံ ဥပ္ပါဒေန္တိ, သောမနဿံ ပဋိလဘန္တီတိ? အာမန္တာ။ ဟဉ္စိ ပေတာ အတ္တနော အတ္ထာယ ဒါနံ ဒေန္တံ အနုမောဒေန္တိ, စိတ္တံ ပသာဒေန္တိ, ဣတိံ ဥပ္ပါဒေန္တိ, သောမနဿံ ပဋိလဘန္တိ; တေန ဝတ ရေ ဝတ္တဗ္ဗေ – ‘‘ဣတော ဒိန္နေန တတ္ထ ယာပေန္တီ’’တိ။
၄၉၀. န ဝတ္တဗ္ဗံ – ‘‘ဣတော ဒိန္နေန တတ္ထ ယာပေန္တီ’’တိ? အာမန္တာ။ နနု ဝုတ္တံ ဘဂဝတာ –
‘‘ဥန္နမေ ဥဒကံ ဝုဋ္ဌံ၊ ယထာနိန္နံ ပဝတ္တတိ။
ဧဝမေဝ ဣတော ဒိန္နံ၊ ပေတာနံ ဥပကပ္ပတိ။
‘‘ယထာ ဝါရိဝဟာ ပူရာ၊ ပရိပူရေန္တိ သာဂရံ။
ဧဝမေဝ ဣတော ဒိန္နံ၊ ပေတာနံ ဥပကပ္ပတိ။
‘‘န ဟိ တတ္ထ ကသီ အတ္ထိ၊ ဂေါရက္ခေတ္ထ န ဝိဇ္ဇတိ။
ဝဏိဇ္ဇာ တာဒိသီ နတ္ထိ၊ ဟိရညေန ကယာကယံ [ကယက္ကယံ (သီ. ဣ.)]။
ဣတော ဒိန္နေန ယာပေန္တိ၊ ပေတာ ကာလင်္ကတာ တဟိ’’န္တိ [ခု. ပါ. ၇.၆; ပေ. ဝ. ၁၉]။
အတ္ထေဝ သုတ္တန္တောတိ? အာမန္တာ။ တေန ဟိ ဣတော ဒိန္နေန တတ္ထ ယာပေန္တီတိ။
၄၉၁. န ဝတ္တဗ္ဗံ – ‘‘ဣတော ဒိန္နေန တတ္ထ ယာပေန္တီ’’တိ? အာမန္တာ။ နနု ဝုတ္တံ ဘဂဝတာ – ‘‘ပဉ္စိမာနိ, ဘိက္ခဝေ, ဌာနာနိ သမ္ပဿန္တာ မာတာပိတရော ပုတ္တံ ဣစ္ဆန္တိ ကုလေ ဇာယမာနံ! ကတမာနိ ပဉ္စ? ဘဋော ဝါ နော ဘရိဿတိ, ကိစ္စံ ဝါ နော ကရိဿတိ, ကုလဝံသော စိရံ ဌဿတိ, ဒါယဇ္ဇံ ပဋိပဇ္ဇိဿတိ, အထ ဝါ ပန ပေတာနံ ကာလင်္ကတာနံ ဒက္ခိဏံ အနုပ္ပဒဿတိ – ဣမာနိ ခေါ, ဘိက္ခဝေ, ပဉ္စ ဌာနာနိ သမ္ပဿန္တာ မာတာပိတရော ပုတ္တံ ဣစ္ဆန္တိ ကုလေ ဇာယမာန’’န္တိ။
‘‘ပဉ္စ ဌာနာနိ သမ္ပဿံ၊ ပုတ္တံ ဣစ္ဆန္တိ ပဏ္ဍိတာ။
ဘဋော ဝါ နော ဘရိဿတိ၊ ကိစ္စံ ဝါ နော ကရိဿတိ။
‘‘ကုလဝံသော စိရံ တိဋ္ဌေ၊ ဒါယဇ္ဇံ ပဋိပဇ္ဇတိ။
အထ ဝါ ပန ပေတာနံ၊ ဒက္ခိဏံ အနုပ္ပဒဿတိ။
‘‘ဌာနာနေတာနိ သမ္ပဿံ၊ ပုတ္တံ ဣစ္ဆန္တိ ပဏ္ဍိတာ။
တသ္မာ သန္တော သပ္ပုရိသာ၊ ကတညူ ကတဝေဒိနော။
‘‘ဘရန္တိ မာတာပိတရော၊ ပုဗ္ဗေ ကတမနုဿရံ။
ကရောန္တိ တေသံ ကိစ္စာနိ၊ ယထာ တံ ပုဗ္ဗကာရိနံ။
‘‘ဩဝါဒကာရီ ဘဋပေါသီ၊ ကုလဝံသံ အဟာပယံ။
သဒ္ဓေါ သီလေန သမ္ပန္နော၊ ပုတ္တော ဟောတိ ပသံသိယော’’တိ [အ. နိ. ၅.၃၁]။
အတ္ထေဝ သုတ္တန္တောတိ? အာမန္တာ။ တေန ဟိ ဣတော ဒိန္နေန တတ္ထ ယာပေန္တီတိ။
ဣတော ဒိန္နကထာ နိဋ္ဌိတာ။
၇. သတ္တမဝဂ္ဂေါ
(၆၉) ၇. ပထဝီ ကမ္မဝိပါကောတိကထာ
၄၉၂. ပထဝီ ကမ္မဝိပါကောတိ? အာမန္တာ။ သုခဝေဒနိယာ ဒုက္ခဝေဒနိယာ အဒုက္ခမသုခဝေဒနိယာ, သုခါယ ဝေဒနာယ သမ္ပယုတ္တာ, ဒုက္ခာယ ဝေဒနာယ သမ္ပယုတ္တာ, အဒုက္ခမသုခါယ ဝေဒနာယ သမ္ပယုတ္တာ, ဖဿေန သမ္ပယုတ္တာ, ဝေဒနာယ သမ္ပယုတ္တာ, သညာယ သမ္ပယုတ္တာ, စေတနာယ သမ္ပယုတ္တာ, စိတ္တေန သမ္ပယုတ္တာ, သာရမ္မဏာ; အတ္ထိ တာယ အာဝဋ္ဋနာ [အာဝဇ္ဇနာ (သျာ. ကံ.)] အာဘောဂေါ သမန္နာဟာရော မနသိကာရော စေတနာ ပတ္ထနာ ပဏိဓီတိ? န ဟေဝံ ဝတ္တဗ္ဗေ။ပေ.။ နနု န သုခဝေဒနိယာ န ဒုက္ခဝေဒနိယာ န အဒုက္ခမသုခဝေဒနိယာ, န သုခါယ ဝေဒနာယ သမ္ပယုတ္တာ, န ဒုက္ခာယ ဝေဒနာယ သမ္ပယုတ္တာ, န အဒုက္ခမသုခါယ ဝေဒနာယ သမ္ပယုတ္တာ, န ဖဿေန သမ္ပယုတ္တာ, န ဝေဒနာယ သမ္ပယုတ္တာ, န သညာယ သမ္ပယုတ္တာ, န စေတနာယ သမ္ပယုတ္တာ, န စိတ္တေန သမ္ပယုတ္တာ, အနာရမ္မဏာ; နတ္ထိ တာယ အာဝဋ္ဋနာ အာဘောဂေါ သမန္နာဟာရော မနသိကာရော စေတနာ ပတ္ထနာ ပဏိဓီတိ? အာမန္တာ။ ဟဉ္စိ န သုခဝေဒနိယာ န ဒုက္ခဝေဒနိယာ။ပေ.။ အနာရမ္မဏာ; နတ္ထိ တာယ အာဝဋ္ဋနာ။ပေ.။ ပဏိဓိ, နော စ ဝတ ရေ ဝတ္တဗ္ဗေ – ‘‘ပထဝီ ကမ္မဝိပါကော’’တိ။
ဖဿော ကမ္မဝိပါကော, ဖဿော သုခဝေဒနိယော ဒုက္ခဝေဒနိယော အဒုက္ခမသုခဝေဒနိယော သုခါယ ဝေဒနာယ သမ္ပယုတ္တော ဒုက္ခာယ။ပေ.။ အဒုက္ခမသုခါယ ဝေဒနာယ သမ္ပယုတ္တော ဖဿေန သမ္ပယုတ္တော ဝေဒနာယ သမ္ပယုတ္တော သညာယ သမ္ပယုတ္တော စေတနာယ သမ္ပယုတ္တော စိတ္တေန သမ္ပယုတ္တော သာရမ္မဏော; အတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ ပထဝီ ကမ္မဝိပါကော, ပထဝီ သုခဝေဒနိယာ ဒုက္ခဝေဒနိယာ အဒုက္ခမသုခဝေဒနိယာ သုခါယ ဝေဒနာယ သမ္ပယုတ္တာ ဒုက္ခာယ။ပေ.။ အဒုက္ခမသုခါယ ဝေဒနာယ သမ္ပယုတ္တာ ဖဿေန သမ္ပယုတ္တာ ဝေဒနာယ သမ္ပယုတ္တာ သညာယ သမ္ပယုတ္တာ စေတနာယ သမ္ပယုတ္တာ စိတ္တေန သမ္ပယုတ္တာ သာရမ္မဏာ; အတ္ထိ တာယ အာဝဋ္ဋနာ အာဘောဂေါ သမန္နာဟာရော မနသိကာရော စေတနာ ပတ္ထနာ ပဏိဓီတိ? န ဟေဝံ ဝတ္တဗ္ဗေ ။ပေ.။ ပထဝီ ကမ္မဝိပါကော, ပထဝီ န သုခဝေဒနိယာ န ဒုက္ခဝေဒနိယာ။ပေ.။ အနာရမ္မဏာ; နတ္ထိ တာယ အာဝဋ္ဋနာ။ပေ.။ ပဏိဓီတိ? အာမန္တာ။ ဖဿော ကမ္မဝိပါကော, ဖဿော န သုခဝေဒနိယော န ဒုက္ခဝေဒနိယော ။ပေ.။ အနာရမ္မဏော; နတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
ပထဝီ ကမ္မဝိပါကောတိ? အာမန္တာ။ ပထဝီ ပဂ္ဂဟနိဂ္ဂဟုပဂါ ဆေဒနဘေဒနုပဂါတိ? အာမန္တာ ။ ကမ္မဝိပါကော ပဂ္ဂဟနိဂ္ဂဟုပဂေါ ဆေဒနဘေဒနုပဂေါတိ? န ဟေဝံ ဝတ္တဗ္ဗေ။ပေ.။။
လဗ္ဘာ ပထဝီ ကေတုံ ဝိက္ကေတုံ အာဌပေတုံ ဩစိနိတုံ ဝိစိနိတုန္တိ? အာမန္တာ။ လဗ္ဘာ ကမ္မဝိပါကော ကေတုံ ဝိက္ကေတုံ အာဌပေတုံ ဩစိနိတုံ ဝိစိနိတုန္တိ? န ဟေဝံ ဝတ္တဗ္ဗေ။ပေ.။။
၄၉၃. ပထဝီ ပရေသံ သာဓါရဏာတိ? အာမန္တာ။ ကမ္မဝိပါကော ပရေသံ သာဓါရဏောတိ? န ဟေဝံ ဝတ္တဗ္ဗေ။ပေ.။။
ကမ္မဝိပါကော ပရေသံ သာဓါရဏောတိ? အာမန္တာ။ နနု ဝုတ္တံ ဘဂဝတာ –
‘‘အသာဓါရဏမညေသံ၊ အစောရဟရဏော နိဓိ။
ကယိရာထ မစ္စော ပုညာနိ၊ သစေ သုစရိတံ စရေ’’တိ [ခု. ပါ. ၈.၉ ခုဒ္ဒကပါဌေ၊ ထောကံ ဝိသဒိသံ]။
အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ကမ္မဝိပါကော ပရေသံ သာဓါရဏော’’တိ။
ပထဝီ ကမ္မဝိပါကောတိ? အာမန္တာ။ ပဌမံ ပထဝီ သဏ္ဌာတိ, ပစ္ဆာ သတ္တာ ဥပ္ပဇ္ဇန္တီတိ? အာမန္တာ။ ပဌမံ ဝိပါကော ဥပ္ပဇ္ဇတိ, ပစ္ဆာ ဝိပါကပဋိလာဘာယ ကမ္မံ ကရောန္တီတိ? န ဟေဝံ ဝတ္တဗ္ဗေ။ပေ.။။
ပထဝီ သဗ္ဗသတ္တာနံ ကမ္မဝိပါကောတိ? အာမန္တာ ။ သဗ္ဗေ သတ္တာ ပထဝိံ ပရိဘုဉ္ဇန္တီတိ? န ဟေဝံ ဝတ္တဗ္ဗေ။ပေ.။ သဗ္ဗေ သတ္တာ ပထဝိံ ပရိဘုဉ္ဇန္တီတိ? အာမန္တာ။ အတ္ထိ ကေစိ ပထဝိံ အပရိဘုဉ္ဇိတွာ ပရိနိဗ္ဗာယန္တီတိ? အာမန္တာ။ အတ္ထိ ကေစိ ကမ္မဝိပါကံ အခေပေတွာ ပရိနိဗ္ဗာယန္တီတိ? န ဟေဝံ ဝတ္တဗ္ဗေ။ပေ.။။
ပထဝီ စက္ကဝတ္တိသတ္တဿ ကမ္မဝိပါကောတိ? အာမန္တာ။ အညေ သတ္တာ ပထဝိံ ပရိဘုဉ္ဇန္တီတိ? အာမန္တာ။ စက္ကဝတ္တိသတ္တဿ ကမ္မဝိပါကံ အညေ သတ္တာ ပရိဘုဉ္ဇန္တီတိ? န ဟေဝံ ဝတ္တဗ္ဗေ။ပေ.။ စက္ကဝတ္တိသတ္တဿ ကမ္မဝိပါကံ အညေ သတ္တာ ပရိဘုဉ္ဇန္တီတိ? အာမန္တာ ။ စက္ကဝတ္တိသတ္တဿ ဖဿံ ဝေဒနံ သညံ စေတနံ စိတ္တံ သဒ္ဓံ ဝီရိယံ သတိံ သမာဓိံ ပညံ အညေ သတ္တာ ပရိဘုဉ္ဇန္တီတိ? န ဟေဝံ ဝတ္တဗ္ဗေ။ပေ.။။
၄၉၄. န ဝတ္တဗ္ဗံ – ‘‘ပထဝီ ကမ္မဝိပါကော’’တိ? အာမန္တာ။ နနု အတ္ထိ ဣဿရိယသံဝတ္တနိယံ ကမ္မံ အဓိပစ္စသံဝတ္တနိယံ ကမ္မန္တိ? အာမန္တာ။ ဟဉ္စိ အတ္ထိ ဣဿရိယသံဝတ္တနိယံ ကမ္မံ အဓိပစ္စသံဝတ္တနိယံ ကမ္မံ, တေန ဝတ ရေ ဝတ္တဗ္ဗေ – ‘‘ပထဝီ ကမ္မဝိပါကော’’တိ။
ပထဝီ ကမ္မဝိပါကောတိကထာ နိဋ္ဌိတာ။
၇. သတ္တမဝဂ္ဂေါ
(၇၀) ၈. ဇရာမရဏံ ဝိပါကောတိကထာ
၄၉၅. ဇရာမရဏံ ဝိပါကောတိ? အာမန္တာ။ သုခဝေဒနိယံ ဒုက္ခဝေဒနိယံ အဒုက္ခမသုခဝေဒနိယံ, သုခါယ ဝေဒနာယ သမ္ပယုတ္တံ, ဒုက္ခာယ ဝေဒနာယ သမ္ပယုတ္တံ, အဒုက္ခမသုခါယ ဝေဒနာယ သမ္ပယုတ္တံ, ဖဿေန သမ္ပယုတ္တံ, ဝေဒနာယ သမ္ပယုတ္တံ, သညာယ သမ္ပယုတ္တံ, စေတနာယ သမ္ပယုတ္တံ, စိတ္တေန သမ္ပယုတ္တံ, သာရမ္မဏံ; အတ္ထိ တဿ အာဝဋ္ဋနာ အာဘောဂေါ သမန္နာဟာရော မနသိကာရော စေတနာ ပတ္ထနာ ပဏိဓီတိ? န ဟေဝံ ဝတ္တဗ္ဗေ။ပေ.။ နနု န သုခဝေဒနိယံ န ဒုက္ခဝေဒနိယံ။ပေ.။ အနာရမ္မဏံ; နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ ဟဉ္စိ န သုခဝေဒနိယံ န ဒုက္ခဝေဒနိယံ။ပေ.။ အနာရမ္မဏံ; နတ္ထိ တဿ အာဝဋ္ဋနာ ။ပေ.။ ပဏိဓိ, နော စ ဝတ ရေ ဝတ္တဗ္ဗေ – ‘‘ဇရာမရဏံ ဝိပါကော’’တိ။
ဖဿော ဝိပါကော, ဖဿော သုခဝေဒနိယော ဒုက္ခဝေဒနိယော။ပေ.။ သာရမ္မဏော; အတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ ဇရာမရဏံ ဝိပါကော, ဇရာမရဏံ သုခဝေဒနိယံ ဒုက္ခဝေဒနိယံ။ပေ.။ သာရမ္မဏံ; အတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
ဇရာမရဏံ ဝိပါကော, ဇရာမရဏံ န သုခဝေဒနိယံ န ဒုက္ခဝေဒနိယံ။ပေ.။ အနာရမ္မဏံ; နတ္ထိ တဿ အာဝဋ္ဋနာ။ပေ.။ ပဏိဓီတိ? အာမန္တာ။ ဖဿော ဝိပါကော, ဖဿော န သုခဝေဒနိယော န ဒုက္ခဝေဒနိယော။ပေ.။ အနာရမ္မဏော; နတ္ထိ တဿ အာဝဋ္ဋနာ။ပေ.။ ပဏိဓီတိ? န ဟေဝံ ဝတ္တဗ္ဗေ။ပေ.။။
၄၉၆. အကုသလာနံ ဓမ္မာနံ ဇရာမရဏံ, အကုသလာနံ ဓမ္မာနံ ဝိပါကောတိ? အာမန္တာ။ ကုသလာနံ ဓမ္မာနံ ဇရာမရဏံ, ကုသလာနံ ဓမ္မာနံ ဝိပါကောတိ? န ဟေဝံ ဝတ္တဗ္ဗေ။ပေ.။။
ကုသလာနံ ဓမ္မာနံ ဇရာမရဏံ, န ဝတ္တဗ္ဗံ – ‘‘ကုသလာနံ ဓမ္မာနံ ဝိပါကော’’တိ? အာမန္တာ။ အကုသလာနံ ဓမ္မာနံ ဇရာမရဏံ, န ဝတ္တဗ္ဗံ – ‘‘အကုသလာနံ ဓမ္မာနံ ဝိပါကော’’တိ? န ဟေဝံ ဝတ္တဗ္ဗေ။ပေ.။။
ကုသလာနံ ဓမ္မာနံ ဇရာမရဏံ, အကုသလာနံ ဓမ္မာနံ ဝိပါကောတိ? အာမန္တာ။ အကုသလာနံ ဓမ္မာနံ ဇရာမရဏံ, ကုသလာနံ ဓမ္မာနံ ဝိပါကောတိ? န ဟေဝံ ဝတ္တဗ္ဗေ။ပေ.။။
အကုသလာနံ ဓမ္မာနံ ဇရာမရဏံ, န ဝတ္တဗ္ဗံ – ‘‘ကုသလာနံ ဓမ္မာနံ ဝိပါကော’’တိ? အာမန္တာ။ ကုသလာနံ ဓမ္မာနံ ဇရာမရဏံ, န ဝတ္တဗ္ဗံ – ‘‘အကုသလာနံ ဓမ္မာနံ ဝိပါကော’’တိ? န ဟေဝံ ဝတ္တဗ္ဗေ။ပေ.။။
ကုသလာနဉ္စ အကုသလာနဉ္စ ဓမ္မာနံ ဇရာမရဏံ, အကုသလာနံ ဓမ္မာနံ ဝိပါကောတိ? အာမန္တာ။ ကုသလာနဉ္စ အကုသလာနဉ္စ ဓမ္မာနံ ဇရာမရဏံ, ကုသလာနံ ဓမ္မာနံ ဝိပါကောတိ? န ဟေဝံ ဝတ္တဗ္ဗေ။ပေ.။။
ကုသလာနဉ္စ အကုသလာနဉ္စ ဓမ္မာနံ ဇရာမရဏံ, န ဝတ္တဗ္ဗံ – ‘‘ကုသလာနံ ဓမ္မာနံ ဝိပါကော’’တိ? အာမန္တာ။ ကုသလာနဉ္စ အကုသလာနဉ္စ ဓမ္မာနံ ဇရာမရဏံ, န ဝတ္တဗ္ဗံ – ‘‘အကုသလာနံ ဓမ္မာနံ ဝိပါကော’’တိ? န ဟေဝံ ဝတ္တဗ္ဗေ။ပေ.။။
၄၉၇. န ဝတ္တဗ္ဗံ – ‘‘ဇရာမရဏံ ဝိပါကော’’တိ? အာမန္တာ။ နနု အတ္ထိ ဒုဗ္ဗဏ္ဏသံဝတ္တနိယံ ကမ္မံ အပ္ပါယုကသံဝတ္တနိယံ ကမ္မန္တိ? အာမန္တာ။ ဟဉ္စိ အတ္ထိ ဒုဗ္ဗဏ္ဏသံဝတ္တနိယံ ကမ္မံ အပ္ပါယုကသံဝတ္တနိယံ ကမ္မံ, တေန ဝတ ရေ ဝတ္တဗ္ဗေ – ‘‘ဇရာမရဏံ ဝိပါကော’’တိ။
ဇရာမရဏံ ဝိပါကောတိကထာ နိဋ္ဌိတာ။
၇. သတ္တမဝဂ္ဂေါ
(၇၁) ၉. အရိယဓမ္မဝိပါကကထာ
၄၉၈. နတ္ထိ အရိယဓမ္မဝိပါကောတိ? အာမန္တာ။ နနု မဟပ္ဖလံ သာမညံ မဟပ္ဖလံ ဗြဟ္မညန္တိ? အာမန္တာ။ ဟဉ္စိ မဟပ္ဖလံ သာမညံ မဟပ္ဖလံ ဗြဟ္မညံ, နော စ ဝတ ရေ ဝတ္တဗ္ဗေ – ‘‘နတ္ထိ အရိယဓမ္မဝိပါကော’’တိ။
နတ္ထိ အရိယဓမ္မဝိပါကောတိ? အာမန္တာ။ နနု အတ္ထိ သောတာပတ္တိဖလန္တိ? အာမန္တာ။ ဟဉ္စိ အတ္ထိ သောတာပတ္တိဖလံ, နော စ ဝတ ရေ ဝတ္တဗ္ဗေ – ‘‘နတ္ထိ အရိယဓမ္မဝိပါကော’’တိ။ နနု အတ္ထိ သကဒါဂါမိဖလံ။ပေ.။ အနာဂါမိဖလံ။ပေ.။ အရဟတ္တဖလန္တိ? အာမန္တာ။ ဟဉ္စိ အတ္ထိ အရဟတ္တဖလံ, နော စ ဝတ ရေ ဝတ္တဗ္ဗေ – ‘‘နတ္ထိ အရိယဓမ္မဝိပါကော’’တိ။
သောတာပတ္တိဖလံ န ဝိပါကောတိ? အာမန္တာ။ ဒါနဖလံ န ဝိပါကောတိ? န ဟေဝံ ဝတ္တဗ္ဗေ။ပေ.။ သောတာပတ္တိဖလံ န ဝိပါကောတိ? အာမန္တာ။ သီလဖလံ။ပေ.။ ဘာဝနာဖလံ န ဝိပါကောတိ? န ဟေဝံ ဝတ္တဗ္ဗေ။ပေ.။။
သကဒါဂါမိဖလံ။ပေ.။ အနာဂါမိဖလံ။ပေ.။ အရဟတ္တဖလံ န ဝိပါကောတိ? အာမန္တာ။ ဒါနဖလံ န ဝိပါကောတိ? န ဟေဝံ ဝတ္တဗ္ဗေ။ပေ.။ အရဟတ္တဖလံ န ဝိပါကောတိ? အာမန္တာ။ သီလဖလံ။ပေ.။ ဘာဝနာဖလံ န ဝိပါကောတိ? န ဟေဝံ ဝတ္တဗ္ဗေ။ပေ.။ ဒါနဖလံ ဝိပါကောတိ? အာမန္တာ။ သောတာပတ္တိဖလံ ဝိပါကောတိ? န ဟေဝံ ဝတ္တဗ္ဗေ။ပေ.။။
ဒါနဖလံ ဝိပါကောတိ? အာမန္တာ။ သကဒါဂါမိဖလံ။ပေ.။ အနာဂါမိဖလံ။ပေ.။ အရဟတ္တဖလံ ဝိပါကောတိ? န ဟေဝံ ဝတ္တဗ္ဗေ။ပေ.။ သီလဖလံ။ပေ.။ ဘာဝနာဖလံ ဝိပါကောတိ? အာမန္တာ။ သောတာပတ္တိဖလံ ဝိပါကောတိ? န ဟေဝံ ဝတ္တဗ္ဗေ။ပေ.။ ဘာဝနာဖလံ ဝိပါကောတိ? အာမန္တာ။ သကဒါဂါမိဖလံ။ပေ.။ အနာဂါမိဖလံ ။ပေ.။ အရဟတ္တဖလံ ဝိပါကောတိ? န ဟေဝံ ဝတ္တဗ္ဗေ။ပေ.။။
၄၉၉. ကာမာဝစရံ ကုသလံ သဝိပါကန္တိ? အာမန္တာ။ လောကုတ္တရံ ကုသလံ သဝိပါကန္တိ? န ဟေဝံ ဝတ္တဗ္ဗေ။ပေ.။ ရူပါဝစရံ ကုသလံ။ပေ.။ အရူပါဝစရံ ကုသလံ သဝိပါကန္တိ? အာမန္တာ။ လောကုတ္တရံ ကုသလံ သဝိပါကန္တိ? န ဟေဝံ ဝတ္တဗ္ဗေ။ပေ.။။
လောကုတ္တရံ ကုသလံ အဝိပါကန္တိ? အာမန္တာ။ ကာမာဝစရံ ကုသလံ အဝိပါကန္တိ? န ဟေဝံ ဝတ္တဗ္ဗေ။ပေ.။ လောကုတ္တရံ ကုသလံ အဝိပါကန္တိ? အာမန္တာ ။ ရူပါဝစရံ။ပေ.။ အရူပါဝစရံ ကုသလံ အဝိပါကန္တိ? န ဟေဝံ ဝတ္တဗ္ဗေ။ပေ.။။
၅၀၀. ကာမာဝစရံ ကုသလံ သဝိပါကံ အာစယဂါမီတိ? အာမန္တာ။ လောကုတ္တရံ ကုသလံ သဝိပါကံ အာစယဂါမီတိ? န ဟေဝံ ဝတ္တဗ္ဗေ။ပေ.။ ရူပါဝစရံ။ပေ.။ အရူပါဝစရံ ကုသလံ သဝိပါကံ အာစယဂါမီတိ? အာမန္တာ။ လောကုတ္တရံ ကုသလံ သဝိပါကံ အာစယဂါမီတိ? န ဟေဝံ ဝတ္တဗ္ဗေ။ပေ.။။
လောကုတ္တရံ ကုသလံ သဝိပါကံ အပစယဂါမီတိ? အာမန္တာ။ ကာမာဝစရံ ကုသလံ သဝိပါကံ အပစယဂါမီတိ? န ဟေဝံ ဝတ္တဗ္ဗေ။ပေ.။။ လောကုတ္တရံ ကုသလံ သဝိပါကံ အပစယဂါမီတိ? အာမန္တာ။ ရူပါဝစရံ။ပေ.။ အရူပါဝစရံ ကုသလံ သဝိပါကံ အပစယဂါမီတိ? န ဟေဝံ ဝတ္တဗ္ဗေ။ပေ.။။
အရိယဓမ္မဝိပါကကထာ နိဋ္ဌိတာ။
၇. သတ္တမဝဂ္ဂေါ
(၇၂) ၁၀. ဝိပါကော ဝိပါကဓမ္မဓမ္မောတိကထာ
၅၀၁. ဝိပါကော ဝိပါကဓမ္မဓမ္မောတိ? အာမန္တာ။ တဿ ဝိပါကော ဝိပါကဓမ္မဓမ္မောတိ? န ဟေဝံ ဝတ္တဗ္ဗေ။ပေ.။ တဿ ဝိပါကော ဝိပါကဓမ္မဓမ္မောတိ? အာမန္တာ။ တဿ တဿေဝ နတ္ထိ ဒုက္ခဿ အန္တကိရိယာ နတ္ထိ ဝဋ္ဋုပစ္ဆေဒေါ နတ္ထိ အနုပါဒါပရိနိဗ္ဗာနန္တိ? န ဟေဝံ ဝတ္တဗ္ဗေ။ပေ.။။
ဝိပါကော ဝိပါကဓမ္မဓမ္မောတိ? အာမန္တာ။ ဝိပါကောတိ ဝါ ဝိပါကဓမ္မဓမ္မောတိ ဝါ ဝိပါကဓမ္မဓမ္မောတိ ဝါ ဝိပါကောတိ ဝါ ဧသေသေ ဧကဋ္ဌေ သမေ သမဘာဂေ တဇ္ဇာတေတိ? န ဟေဝံ ဝတ္တဗ္ဗေ။ပေ.။။
ဝိပါကော ဝိပါကဓမ္မဓမ္မောတိ? အာမန္တာ။ ဝိပါကော စ ဝိပါကဓမ္မဓမ္မော စ ဝိပါကဓမ္မဓမ္မော စ ဝိပါကော စ သဟဂတာ သဟဇာတာ သံသဋ္ဌာ သမ္ပယုတ္တာ ဧကုပ္ပါဒါ ဧကနိရောဓါ ဧကဝတ္ထုကာ ဧကာရမ္မဏာတိ? န ဟေဝံ ဝတ္တဗ္ဗေ။ပေ.။။
ဝိပါကော ဝိပါကဓမ္မဓမ္မောတိ? အာမန္တာ။ တညေဝ အကုသလံ သော အကုသလဿ ဝိပါကော, တညေဝ ကုသလံ သော ကုသလဿ ဝိပါကောတိ? န ဟေဝံ ဝတ္တဗ္ဗေ။ပေ.။။
ဝိပါကော ဝိပါကဓမ္မဓမ္မောတိ? အာမန္တာ။ ယေနေဝ စိတ္တေန ပါဏံ ဟနတိ တေနေဝ စိတ္တေန နိရယေ ပစ္စတိ, ယေနေဝ စိတ္တေန ဒါနံ ဒေတိ တေနေဝ စိတ္တေန သဂ္ဂေ မောဒတီတိ? န ဟေဝံ ဝတ္တဗ္ဗေ။ပေ.။။
၅၀၂. န ဝတ္တဗ္ဗံ – ‘‘ဝိပါကော ဝိပါကဓမ္မဓမ္မော’’တိ? အာမန္တာ။ နနု ဝိပါကာ စတ္တာရော ခန္ဓာ အရူပိနော အညမညပစ္စယာတိ? အာမန္တာ။ ဟဉ္စိ ဝိပါကာ စတ္တာရော ခန္ဓာ အရူပိနော အညမညပစ္စယာ, တေန ဝတ ရေ ဝတ္တဗ္ဗေ – ‘‘ဝိပါကော ဝိပါကဓမ္မဓမ္မော’’တိ။
ဝိပါကော ဝိပါကဓမ္မဓမ္မောတိကထာ နိဋ္ဌိတာ။
သတ္တမဝဂ္ဂေါ။
တဿုဒ္ဒါနံ –
သင်္ဂဟော , သမ္ပယုတ္တော, စေတသိကော ဓမ္မော, စေတသိကံ ဒါနံ, ပရိဘောဂမယံ ပုညံ ဝဍ္ဎတိ, ဣတော ဒိန္နေန တတ္ထ ယာပေန္တိ, ပထဝီ ကမ္မဝိပါကော, ဇရာမရဏံ ဝိပါကော, နတ္ထိ အရိယဓမ္မဝိပါကော, ဝိပါကော ဝိပါကဓမ္မဓမ္မောတိ။