၆. ဆဋ္ဌဝဂ္ဂ
(၅၃) ၁. နိယာမကထာ
၄၄၅. နိယာမော အသင်္ခတောတိ? အာမန္တာ။ နိဗ္ဗာနံ တာဏံ လေဏံ သရဏံ ပရာယနံ အစ္စုတံ အမတန္တိ? န ဟေဝံ ဝတ္တဗ္ဗေ။ပေ.။။
နိယာမော အသင်္ခတော, နိဗ္ဗာနံ အသင်္ခတန္တိ? အာမန္တာ။ ဒွေ အသင်္ခတာနီတိ? န ဟေဝံ ဝတ္တဗ္ဗေ။ပေ.။။
ဒွေ အသင်္ခတာနီတိ? အာမန္တာ။ ဒွေ တာဏာနိ ဒွေ လေဏာနိ ဒွေ သရဏာနိ ဒွေ ပရာယနာနိ ဒွေ အစ္စုတာနိ ဒွေ အမတာနိ ဒွေ နိဗ္ဗာနာနီတိ? န ဟေဝံ ဝတ္တဗ္ဗေ။ပေ.။။
ဒွေ နိဗ္ဗာနာနီတိ? အာမန္တာ။ အတ္ထိ ဒွိန္နံ နိဗ္ဗာနာနံ ဥစ္စနီစတာ ဟီနပဏီတတာ ဥက္ကံသာဝကံသော သီမာ ဝါ ဘေဒေါ ဝါ ရာဇိ ဝါ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
နိယာမော အသင်္ခတောတိ? အာမန္တာ။ အတ္ထိ ကေစိ နိယာမံ ဩက္ကမန္တိ ပဋိလဘန္တိ ဥပ္ပါဒေန္တိ သမုပ္ပါဒေန္တိ ဥဋ္ဌာပေန္တိ သမုဋ္ဌာပေန္တိ နိဗ္ဗတ္တေန္တိ အဘိနိဗ္ဗတ္တေန္တိ ဇနေန္တိ သဉ္ဇနေန္တီတိ? အာမန္တာ။ အတ္ထိ ကေစိ အသင်္ခတံ ဩက္ကမန္တိ ပဋိလဘန္တိ ဥပ္ပါဒေန္တိ သမုပ္ပါဒေန္တိ ဥဋ္ဌာပေန္တိ သမုဋ္ဌာပေန္တိ နိဗ္ဗတ္တေန္တိ အဘိနိဗ္ဗတ္တေန္တိ ဇနေန္တိ သဉ္ဇနေန္တီတိ? န ဟေဝံ ဝတ္တဗ္ဗေ။ပေ.။။
၄၄၆. နိယာမော အသင်္ခတောတိ? အာမန္တာ။ မဂ္ဂေါ အသင်္ခတောတိ? န ဟေဝံ ဝတ္တဗ္ဗေ။ပေ.။။
မဂ္ဂေါ သင်္ခတောတိ? အာမန္တာ။ နိယာမော သင်္ခတောတိ? န ဟေဝံ ဝတ္တဗ္ဗေ။ပေ.။။
သောတာပတ္တိနိယာမော အသင်္ခတောတိ? အာမန္တာ။ သောတာပတ္တိမဂ္ဂေါ အသင်္ခတောတိ? န ဟေဝံ ဝတ္တဗ္ဗေ။ပေ.။။
သောတာပတ္တိမဂ္ဂေါ သင်္ခတောတိ? အာမန္တာ။ သောတာပတ္တိနိယာမော သင်္ခတောတိ? န ဟေဝံ ဝတ္တဗ္ဗေ။ပေ.။။
သကဒါဂါမိနိယာမော။ပေ.။ အနာဂါမိနိယာမော။ပေ.။ အရဟတ္တနိယာမော အသင်္ခတောတိ? အာမန္တာ။ အရဟတ္တမဂ္ဂေါ အသင်္ခတောတိ? န ဟေဝံ ဝတ္တဗ္ဗေ ။ပေ.။ အရဟတ္တမဂ္ဂေါ သင်္ခတောတိ? အာမန္တာ။ အရဟတ္တနိယာမော သင်္ခတောတိ? န ဟေဝံ ဝတ္တဗ္ဗေ။ပေ.။။
သောတာပတ္တိနိယာမော အသင်္ခတော။ပေ.။ အရဟတ္တနိယာမော အသင်္ခတော, နိဗ္ဗာနံ အသင်္ခတန္တိ? အာမန္တာ။ ပဉ္စ အသင်္ခတာနီတိ? န ဟေဝံ ဝတ္တဗ္ဗေ။ပေ.။ ပဉ္စ အသင်္ခတာနီတိ? အာမန္တာ။ ပဉ္စ တာဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
နိယာမော အသင်္ခတောတိ? အာမန္တာ။ မိစ္ဆတ္တနိယာမော အသင်္ခတောတိ? န ဟေဝံ ဝတ္တဗ္ဗေ။ပေ.။ မိစ္ဆတ္တနိယာမော သင်္ခတောတိ? အာမန္တာ။ သမ္မတ္တနိယာမော သင်္ခတောတိ? န ဟေဝံ ဝတ္တဗ္ဗေ။ပေ.။။
၄၄၇. န ဝတ္တဗ္ဗံ – ‘‘နိယာမော အသင်္ခတော’’တိ? အာမန္တာ။ နိယာမေ ဥပ္ပဇ္ဇ နိရုဒ္ဓေ အနိယတော ဟောတီတိ? န ဟေဝံ ဝတ္တဗ္ဗေ။ပေ.။။ တေန ဟိ နိယာမော အသင်္ခတောတိ။ မိစ္ဆတ္တနိယာမေ ဥပ္ပဇ္ဇ နိရုဒ္ဓေ အနိယတော ဟောတီတိ? န ဟေဝံ ဝတ္တဗ္ဗေ။ပေ.။ တေန ဟိ မိစ္ဆတ္တနိယာမော အသင်္ခတောတိ။
နိယာမကထာ နိဋ္ဌိတာ။
၆. ဆဋ္ဌဝဂ္ဂေါ
(၅၄) ၂. ပဋိစ္စသမုပ္ပါဒကထာ
၄၄၈. ပဋိစ္စသမုပ္ပါဒေါ အသင်္ခတောတိ? အာမန္တာ။ နိဗ္ဗာနံ တာဏံ လေဏံ သရဏံ ပရာယနံ အစ္စုတံ အမတန္တိ? န ဟေဝံ ဝတ္တဗ္ဗေ။ပေ.။ ပဋိစ္စသမုပ္ပါဒေါ အသင်္ခတော, နိဗ္ဗာနံ အသင်္ခတန္တိ? အာမန္တာ။ ဒွေ အသင်္ခတာနီတိ? န ဟေဝံ ဝတ္တဗ္ဗေ။ပေ.။ ဒွေ အသင်္ခတာနီတိ? အာမန္တာ။ ဒွေ တာဏာနိ ဒွေ လေဏာနိ ဒွေ သရဏာနိ ဒွေ ပရာယနာနိ ဒွေ အစ္စုတာနိ ဒွေ အမတာနိ ဒွေ နိဗ္ဗာနာနီတိ? န ဟေဝံ ဝတ္တဗ္ဗေ။ပေ.။ ဒွေ နိဗ္ဗာနာနီတိ? အာမန္တာ။ အတ္ထိ ဒွိန္နံ နိဗ္ဗာနာနံ ဥစ္စနီစတာ ဟီနပဏီတတာ ဥက္ကံသာဝကံသော သီမာ ဝါ ဘေဒေါ ဝါ ရာဇိ ဝါ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
၄၄၉. ပဋိစ္စသမုပ္ပါဒေါ အသင်္ခတောတိ? အာမန္တာ။ အဝိဇ္ဇာ အသင်္ခတာတိ? န ဟေဝံ ဝတ္တဗ္ဗေ။ပေ.။ အဝိဇ္ဇာ သင်္ခတာတိ? အာမန္တာ။ ပဋိစ္စသမုပ္ပါဒေါ သင်္ခတောတိ ? န ဟေဝံ ဝတ္တဗ္ဗေ။ပေ.။ ပဋိစ္စသမုပ္ပါဒေါ အသင်္ခတောတိ? အာမန္တာ။ အဝိဇ္ဇာပစ္စယာ သင်္ခါရာ အသင်္ခတာတိ? န ဟေဝံ ဝတ္တဗ္ဗေ။ပေ.။ အဝိဇ္ဇာပစ္စယာ သင်္ခါရာ သင်္ခတာတိ? အာမန္တာ။ ပဋိစ္စသမုပ္ပါဒေါ သင်္ခတောတိ? န ဟေဝံ ဝတ္တဗ္ဗေ။ပေ.။ ပဋိစ္စသမုပ္ပါဒေါ အသင်္ခတောတိ? အာမန္တာ။ သင်္ခါရပစ္စယာ ဝိညာဏံ အသင်္ခတန္တိ? န ဟေဝံ ဝတ္တဗ္ဗေ။ပေ.။ သင်္ခါရပစ္စယာ ဝိညာဏံ သင်္ခတန္တိ? အာမန္တာ။ ပဋိစ္စသမုပ္ပါဒေါ သင်္ခတောတိ? န ဟေဝံ ဝတ္တဗ္ဗေ။ပေ.။ ပဋိစ္စသမုပ္ပါဒေါ အသင်္ခတောတိ? အာမန္တာ။ ဝိညာဏပစ္စယာ နာမရူပံ အသင်္ခတန္တိ? န ဟေဝံ ဝတ္တဗ္ဗေ။ပေ.။ ဝိညာဏပစ္စယာ နာမရူပံ သင်္ခတန္တိ? အာမန္တာ။ ပဋိစ္စသမုပ္ပါဒေါ သင်္ခတောတိ? န ဟေဝံ ဝတ္တဗ္ဗေ။ပေ.။ ပဋိစ္စသမုပ္ပါဒေါ အသင်္ခတောတိ? အာမန္တာ။ ဇာတိပစ္စယာ ဇရာမရဏံ အသင်္ခတန္တိ? န ဟေဝံ ဝတ္တဗ္ဗေ။ပေ.။ ဇာတိပစ္စယာ ဇရာမရဏံ သင်္ခတန္တိ? အာမန္တာ။ ပဋိစ္စသမုပ္ပါဒေါ သင်္ခတောတိ? န ဟေဝံ ဝတ္တဗ္ဗေ။ပေ.။။
၄၅၀. န ဝတ္တဗ္ဗံ – ‘‘ပဋိစ္စသမုပ္ပါဒေါ အသင်္ခတော’’တိ? အာမန္တာ။ နနု ဝုတ္တံ ဘဂဝတာ – ‘‘ဇာတိပစ္စယာ, ဘိက္ခဝေ, ဇရာမရဏံ။ ဥပ္ပါဒါ ဝါ တထာဂတာနံ အနုပ္ပါဒါ ဝါ တထာဂတာနံ ဌိတာဝ သာ ဓါတု ဓမ္မဋ္ဌိတတာ ဓမ္မနိယာမတာ ဣဒပ္ပစ္စယတာ။ တံ တထာဂတော အဘိသမ္ဗုဇ္ဈတိ အဘိသမေတိ။ အဘိသမ္ဗုဇ္ဈိတွာ အဘိသမေတွာ အာစိက္ခတိ ဒေသေတိ ပညာပေတိ ပဋ္ဌပေတိ ဝိဝရတိ ဝိဘဇတိ ဥတ္တာနိံ ကရောတိ။ ‘ပဿထာ’တိ စာဟ – ဇာတိပစ္စယာ, ဘိက္ခဝေ, ဇရာမရဏံ ။ ဘဝပစ္စယာ, ဘိက္ခဝေ, ဇာတိ။ပေ.။ အဝိဇ္ဇာပစ္စယာ, ဘိက္ခဝေ, သင်္ခါရာ။ ဥပ္ပါဒါ ဝါ တထာဂတာနံ အနုပ္ပါဒါ ဝါ တထာဂတာနံ ဌိတာဝ သာ ဓါတု။ပေ.။ ‘ပဿထာ’တိ စာဟ – အဝိဇ္ဇာပစ္စယာ, ဘိက္ခဝေ, သင်္ခါရာ။ ဣတိ ခေါ, ဘိက္ခဝေ, ယာ တတြ တထတာ အဝိတထတာ အနညထတာ ဣဒပ္ပစ္စယတာ – အယံ ဝုစ္စတိ, ဘိက္ခဝေ, ပဋိစ္စသမုပ္ပါဒေါ’’တိ [သံ. နိ. ၂.၂၀]။ အတ္ထေဝ သုတ္တန္တောတိ? အာမန္တာ။ တေန ဟိ ပဋိစ္စသမုပ္ပါဒေါ အသင်္ခတောတိ။
၄၅၁. အဝိဇ္ဇာပစ္စယာ သင်္ခါရာတိ ယာ တတ္ထ ဓမ္မဋ္ဌိတတာ ဓမ္မနိယာမတာ အသင်္ခတာ, နိဗ္ဗာနံ အသင်္ခတန္တိ? အာမန္တာ။ ဒွေ အသင်္ခတာနီတိ? န ဟေဝံ ဝတ္တဗ္ဗေ။ပေ.။ ဒွေ အသင်္ခတာနီတိ? အာမန္တာ။ ဒွေ တာဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
အဝိဇ္ဇာပစ္စယာ သင်္ခါရာတိ ယာ တတ္ထ ဓမ္မဋ္ဌိတတာ ဓမ္မနိယာမတာ အသင်္ခတာ, သင်္ခါရပစ္စယာ ဝိညာဏန္တိ ယာ တတ္ထ ဓမ္မဋ္ဌိတတာ ဓမ္မနိယာမတာ အသင်္ခတာ, နိဗ္ဗာနံ အသင်္ခတန္တိ? အာမန္တာ။ တီဏိ အသင်္ခတာနီတိ? န ဟေဝံ ဝတ္တဗ္ဗေ။ပေ.။။ တီဏိ အသင်္ခတာနီတိ? အာမန္တာ။ တီဏိ တာဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
အဝိဇ္ဇာပစ္စယာ သင်္ခါရာတိ ယာ တတ္ထ ဓမ္မဋ္ဌိတတာ ဓမ္မနိယာမတာ အသင်္ခတာ, သင်္ခါရပစ္စယာ ဝိညာဏန္တိ ယာ တတ္ထ ဓမ္မဋ္ဌိတတာ ဓမ္မနိယာမတာ အသင်္ခတာ။ပေ.။ ဇာတိပစ္စယာ ဇရာမရဏန္တိ ယာ တတ္ထ ဓမ္မဋ္ဌိတတာ ဓမ္မနိယာမတာ အသင်္ခတာ, နိဗ္ဗာနံ အသင်္ခတန္တိ? အာမန္တာ။ ဒွါဒသ အသင်္ခတာနီတိ? န ဟေဝံ ဝတ္တဗ္ဗေ။ပေ.။ ဒွါဒသ အသင်္ခတာနီတိ? အာမန္တာ။ ဒွါဒသ တာဏာနိ ဒွါဒသ လေဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
ပဋိစ္စသမုပ္ပါဒကထာ နိဋ္ဌိတာ။
၆. ဆဋ္ဌဝဂ္ဂေါ
(၅၅) ၃. သစ္စကထာ
၄၅၂. စတ္တာရိ သစ္စာနိ အသင်္ခတာနီတိ? အာမန္တာ။ စတ္တာရိ တာဏာနိ စတ္တာရိ လေဏာနိ စတ္တာရိ သရဏာနိ စတ္တာရိ ပရာယနာနိ စတ္တာရိ အစ္စုတာနိ စတ္တာရိ အမတာနိ စတ္တာရိ နိဗ္ဗာနာနီတိ? န ဟေဝံ ဝတ္တဗ္ဗေ။ပေ.။ စတ္တာရိ နိဗ္ဗာနာနီတိ? အာမန္တာ။ အတ္ထိ စတုန္နံ နိဗ္ဗာနာနံ ဥစ္စနီစတာ ဟီနပဏီတတာ ဥက္ကံသာဝကံသော သီမာ ဝါ ဘေဒေါ ဝါ ရာဇိ ဝါ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
ဒုက္ခသစ္စံ အသင်္ခတန္တိ? အာမန္တာ ။ ဒုက္ခံ အသင်္ခတန္တိ? န ဟေဝံ ဝတ္တဗ္ဗေ။ပေ.။ ဒုက္ခသစ္စံ အသင်္ခတန္တိ? အာမန္တာ။ ကာယိကံ ဒုက္ခံ စေတသိကံ ဒုက္ခံ သောကပရိဒေဝဒုက္ခဒေါမနဿဥပါယာသာ အသင်္ခတာတိ? န ဟေဝံ ဝတ္တဗ္ဗေ။ပေ.။ သမုဒယသစ္စံ အသင်္ခတန္တိ? အာမန္တာ။ သမုဒယော အသင်္ခတောတိ? န ဟေဝံ ဝတ္တဗ္ဗေ။ပေ.။ သမုဒယသစ္စံ အသင်္ခတန္တိ? အာမန္တာ။ ကာမတဏှာ ဘဝတဏှာ ဝိဘဝတဏှာ အသင်္ခတာတိ? န ဟေဝံ ဝတ္တဗ္ဗေ။ပေ.။ မဂ္ဂသစ္စံ အသင်္ခတန္တိ? အာမန္တာ။ မဂ္ဂေါ အသင်္ခတောတိ? န ဟေဝံ ဝတ္တဗ္ဗေ။ပေ.။ မဂ္ဂသစ္စံ အသင်္ခတန္တိ? အာမန္တာ။ သမ္မာဒိဋ္ဌိ။ပေ.။ သမ္မာသမာဓိ အသင်္ခတောတိ? န ဟေဝံ ဝတ္တဗ္ဗေ။ပေ.။။
ဒုက္ခံ သင်္ခတန္တိ? အာမန္တာ။ ဒုက္ခသစ္စံ သင်္ခတန္တိ? န ဟေဝံ ဝတ္တဗ္ဗေ။ပေ.။ ကာယိကံ ဒုက္ခံ စေတသိကံ ဒုက္ခံ သောကပရိဒေဝဒုက္ခဒေါမနဿဥပါယာသာ သင်္ခတာတိ? အာမန္တာ။ ဒုက္ခသစ္စံ သင်္ခတန္တိ? န ဟေဝံ ဝတ္တဗ္ဗေ။ပေ.။ သမုဒယော သင်္ခတောတိ? အာမန္တာ။ သမုဒယသစ္စံ သင်္ခတန္တိ? န ဟေဝံ ဝတ္တဗ္ဗေ။ပေ.။ ကာမတဏှာ ဘဝတဏှာ ဝိဘဝတဏှာ သင်္ခတာတိ? အာမန္တာ ။ သမုဒယသစ္စံ သင်္ခတန္တိ? န ဟေဝံ ဝတ္တဗ္ဗေ။ပေ.။ မဂ္ဂေါ သင်္ခတောတိ? အာမန္တာ။ မဂ္ဂသစ္စံ သင်္ခတန္တိ? န ဟေဝံ ဝတ္တဗ္ဗေ။ပေ.။ သမ္မာဒိဋ္ဌိ။ပေ.။ သမ္မာသမာဓိ သင်္ခတောတိ? အာမန္တာ။ မဂ္ဂသစ္စံ သင်္ခတန္တိ? န ဟေဝံ ဝတ္တဗ္ဗေ။ပေ.။။
၄၅၃. နိရောဓသစ္စံ အသင်္ခတံ, နိရောဓေါ အသင်္ခတောတိ? အာမန္တာ။ ဒုက္ခသစ္စံ အသင်္ခတံ, ဒုက္ခံ အသင်္ခတန္တိ? န ဟေဝံ ဝတ္တဗ္ဗေ။ပေ.။ နိရောဓသစ္စံ အသင်္ခတံ, နိရောဓေါ အသင်္ခတောတိ? အာမန္တာ။ သမုဒယသစ္စံ အသင်္ခတံ, သမုဒယော အသင်္ခတောတိ? န ဟေဝံ ဝတ္တဗ္ဗေ။ပေ.။ နိရောဓသစ္စံ အသင်္ခတံ, နိရောဓေါ အသင်္ခတောတိ? အာမန္တာ။ မဂ္ဂသစ္စံ အသင်္ခတံ, မဂ္ဂေါ အသင်္ခတောတိ? န ဟေဝံ ဝတ္တဗ္ဗေ။ပေ.။။
ဒုက္ခသစ္စံ အသင်္ခတံ, ဒုက္ခံ သင်္ခတန္တိ? အာမန္တာ။ နိရောဓသစ္စံ အသင်္ခတံ, နိရောဓေါ သင်္ခတောတိ? န ဟေဝံ ဝတ္တဗ္ဗေ။ပေ.။ သမုဒယသစ္စံ အသင်္ခတံ, သမုဒယော သင်္ခတောတိ? အာမန္တာ။ နိရောဓသစ္စံ အသင်္ခတံ, နိရောဓေါ သင်္ခတောတိ? န ဟေဝံ ဝတ္တဗ္ဗေ။ပေ.။ မဂ္ဂသစ္စံ အသင်္ခတံ, မဂ္ဂေါ သင်္ခတောတိ? အာမန္တာ။ နိရောဓသစ္စံ အသင်္ခတံ, နိရောဓေါ သင်္ခတောတိ? န ဟေဝံ ဝတ္တဗ္ဗေ။ပေ.။။
၄၅၄. န ဝတ္တဗ္ဗံ – ‘‘စတ္တာရိ သစ္စာနိ အသင်္ခတာနီ’’တိ? အာမန္တာ ။ နနု ဝုတ္တံ ဘဂဝတာ – ‘‘စတ္တာရိမာနိ, ဘိက္ခဝေ, တထာနိ အဝိတထာနိ အနညထာနိ! ကတမာနိ စတ္တာရိ? ‘ဣဒံ ဒုက္ခ’န္တိ, ဘိက္ခဝေ, တထမေတံ အဝိတထမေတံ အနညထမေတံ။ပေ.။ ‘အယံ ဒုက္ခသမုဒယော’တိ။ပေ.။ ‘အယံ ဒုက္ခနိရောဓေါ’တိ။ပေ.။ ‘အယံ ဒုက္ခနိရောဓဂါမိနီ ပဋိပဒါ’တိ တထမေတံ အဝိတထမေတံ အနညထမေတံ။ ဣမာနိ ခေါ, ဘိက္ခဝေ, စတ္တာရိ တထာနိ အဝိတထာနိ အနညထာနီ’’တိ [သံ. နိ. ၅.၁၀၉၀]။ အတ္ထေဝ သုတ္တန္တောတိ? အာမန္တာ။ တေန ဟိ စတ္တာရိ သစ္စာနိ အသင်္ခတာနီတိ။
သစ္စကထာ နိဋ္ဌိတာ။
၆. ဆဋ္ဌဝဂ္ဂေါ
(၅၆) ၄. အာရုပ္ပကထာ
၄၅၅. အာကာသာနဉ္စာယတနံ အသင်္ခတန္တိ? အာမန္တာ။ နိဗ္ဗာနံ တာဏံ လေဏံ သရဏံ ပရာယနံ အစ္စုတံ အမတန္တိ? န ဟေဝံ ဝတ္တဗ္ဗေ။ပေ.။ အာကာသာနဉ္စာယတနံ အသင်္ခတံ, နိဗ္ဗာနံ အသင်္ခတန္တိ? အာမန္တာ။ ဒွေ အသင်္ခတာနီတိ? န ဟေဝံ ဝတ္တဗ္ဗေ။ပေ.။ ဒွေ အသင်္ခတာနီတိ? အာမန္တာ။ ဒွေ တာဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
အာကာသာနဉ္စာယတနံ အသင်္ခတန္တိ? အာမန္တာ။ အာကာသာနဉ္စာယတနံ ဘဝေါ ဂတိ သတ္တာဝါသော သံသာရော ယောနိ ဝိညာဏဋ္ဌိတိ အတ္တဘာဝပဋိလာဘောတိ? အာမန္တာ။ အသင်္ခတံ ဘဝေါ ဂတိ သတ္တာဝါသော သံသာရော ယောနိ ဝိညာဏဋ္ဌိတိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။။
အတ္ထိ အာကာသာနဉ္စာယတနူပဂံ ကမ္မန္တိ? အာမန္တာ။ အတ္ထိ အသင်္ခတူပဂံ ကမ္မန္တိ? န ဟေဝံ ဝတ္တဗ္ဗေ။ပေ.။ အတ္ထိ အာကာသာနဉ္စာယတနူပဂါ သတ္တာတိ? အာမန္တာ။ အတ္ထိ အသင်္ခတူပဂါ သတ္တာတိ? န ဟေဝံ ဝတ္တဗ္ဗေ။ပေ.။။
အာကာသာနဉ္စာယတနေ သတ္တာ ဇာယန္တိ ဇီယန္တိ မီယန္တိ စဝန္တိ ဥပပဇ္ဇန္တီတိ? အာမန္တာ။ အသင်္ခတေ သတ္တာ ဇာယန္တိ ဇီယန္တိ မီယန္တိ စဝန္တိ ဥပပဇ္ဇန္တီတိ? န ဟေဝံ ဝတ္တဗ္ဗေ။ပေ.။ အာကာသာနဉ္စာယတနေ အတ္ထိ ဝေဒနာ သညာ သင်္ခါရာ ဝိညာဏန္တိ? အာမန္တာ။ အသင်္ခတေ အတ္ထိ ဝေဒနာ သညာ သင်္ခါရာ ဝိညာဏန္တိ? န ဟေဝံ ဝတ္တဗ္ဗေ။ပေ.။ အာကာသာနဉ္စာယတနံ စတုဝေါကာရဘဝေါတိ? အာမန္တာ။ အသင်္ခတံ စတုဝေါကာရဘဝေါတိ? န ဟေဝံ ဝတ္တဗ္ဗေ။ပေ.။။
၄၅၆. န ဝတ္တဗ္ဗံ – ‘‘စတ္တာရော အာရုပ္ပါ အသင်္ခတာ’’တိ? အာမန္တာ။ နနု စတ္တာရော အာရုပ္ပါ အနေဇာ ဝုတ္တာ ဘဂဝတာတိ? အာမန္တာ။ ဟဉ္စိ စတ္တာရော အာရုပ္ပါ အနေဇာ ဝုတ္တာ ဘဂဝတာ, တေန ဝတ ရေ ဝတ္တဗ္ဗေ ‘‘စတ္တာရော အာရုပ္ပါ အသင်္ခတာ’’တိ။
အာရုပ္ပကထာ နိဋ္ဌိတာ။
၆. ဆဋ္ဌဝဂ္ဂေါ
(၅၇) ၅. နိရောဓသမာပတ္တိကထာ
၄၅၇. နိရောဓသမာပတ္တိ အသင်္ခတာတိ? အာမန္တာ။ နိဗ္ဗာနံ တာဏံ လေဏံ သရဏံ ပရာယနံ အစ္စုတံ အမတန္တိ? န ဟေဝံ ဝတ္တဗ္ဗေ။ပေ.။ နိရောဓသမာပတ္တိ အသင်္ခတာ, နိဗ္ဗာနံ အသင်္ခတန္တိ? အာမန္တာ။ ဒွေ အသင်္ခတာနီတိ? န ဟေဝံ ဝတ္တဗ္ဗေ။ပေ.။ ဒွေ အသင်္ခတာနီတိ? အာမန္တာ။ ဒွေ တာဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
နိရောဓသမာပတ္တိ အသင်္ခတာတိ? အာမန္တာ။ အတ္ထိ ကေစိ နိရောဓံ သမာပဇ္ဇန္တိ ပဋိလဘန္တိ ဥပ္ပါဒေန္တိ သမုပ္ပါဒေန္တိ ဥဋ္ဌပေန္တိ သမုဋ္ဌပေန္တိ နိဗ္ဗတ္တေန္တိ အဘိနိဗ္ဗတ္တေန္တိ ဇနေန္တိ သဉ္ဇနေန္တီတိ? အာမန္တာ။ အတ္ထိ ကေစိ အသင်္ခတံ သမာပဇ္ဇန္တိ ပဋိလဘန္တိ ဥပ္ပါဒေန္တိ သမုပ္ပါဒေန္တိ ဥဋ္ဌပေန္တိ သမုဋ္ဌပေန္တိ နိဗ္ဗတ္တေန္တိ အဘိနိဗ္ဗတ္တေန္တိ ဇနေန္တိ သဉ္ဇနေန္တီတိ? န ဟေဝံ ဝတ္တဗ္ဗေ။ပေ.။။
၄၅၈. နိရောဓါ ဝေါဒါနံ ဝုဋ္ဌာနံ ပညာယတီတိ? အာမန္တာ။ အသင်္ခတာ ဝေါဒါနံ ဝုဋ္ဌာနံ ပညာယတီတိ ? န ဟေဝံ ဝတ္တဗ္ဗေ။ပေ.။ နိရောဓံ သမာပဇ္ဇန္တဿ ပဌမံ နိရုဇ္ဈတိ ဝစီသင်္ခါရော, တတော ကာယသင်္ခါရော, တတော စိတ္တသင်္ခါရောတိ? အာမန္တာ။ အသင်္ခတံ သမာပဇ္ဇန္တဿ ပဌမံ နိရုဇ္ဈတိ ဝစီသင်္ခါရော, တတော ကာယသင်္ခါရော, တတော စိတ္တသင်္ခါရောတိ? န ဟေဝံ ဝတ္တဗ္ဗေ။ပေ.။ နိရောဓါ ဝုဋ္ဌဟန္တဿ ပဌမံ ဥပ္ပဇ္ဇတိ စိတ္တသင်္ခါရော, တတော ကာယသင်္ခါရော, တတော ဝစီသင်္ခါရောတိ? အာမန္တာ ။ အသင်္ခတာ ဝုဋ္ဌဟန္တဿ ပဌမံ ဥပ္ပဇ္ဇတိ စိတ္တသင်္ခါရော, တတော ကာယသင်္ခါရော, တတော ဝစီသင်္ခါရောတိ? န ဟေဝံ ဝတ္တဗ္ဗေ။ပေ.။။
နိရောဓါ ဝုဋ္ဌိတံ တယော ဖဿာ ဖုသန္တိ – သုညတော ဖဿော, အနိမိတ္တော ဖဿော, အပ္ပဏိဟိတော ဖဿောတိ? အာမန္တာ။ အသင်္ခတာ ဝုဋ္ဌိတံ တယော ဖဿာ ဖုသန္တိ – သုညတော ဖဿော, အနိမိတ္တော ဖဿော, အပ္ပဏိဟိတော ဖဿောတိ? န ဟေဝံ ဝတ္တဗ္ဗေ။ပေ.။။
နိရောဓါ ဝုဋ္ဌိတဿ ဝိဝေကနိန္နံ စိတ္တံ ဟောတိ ဝိဝေကပေါဏံ ဝိဝေကပဗ္ဘာရန္တိ? အာမန္တာ။ အသင်္ခတာ ဝုဋ္ဌိတဿ ဝိဝေကနိန္နံ စိတ္တံ ဟောတိ ဝိဝေကပေါဏံ ဝိဝေကပဗ္ဘာရန္တိ? န ဟေဝံ ဝတ္တဗ္ဗေ။ပေ.။။
၄၅၉. န ဝတ္တဗ္ဗံ – ‘‘နိရောဓသမာပတ္တိ အသင်္ခတာ’’တိ? အာမန္တာ။ သင်္ခတာတိ? န ဟေဝံ ဝတ္တဗ္ဗေ။ပေ.။ တေန ဟိ နိရောဓသမာပတ္တိ အသင်္ခတာတိ။
နိရောဓသမာပတ္တိကထာ နိဋ္ဌိတာ။
၆. ဆဋ္ဌဝဂ္ဂေါ
(၅၈) ၆. အာကာသကထာ
၄၆၀. အာကာသော အသင်္ခတောတိ? အာမန္တာ။ နိဗ္ဗာနံ တာဏံ လေဏံ သရဏံ ပရာယနံ အစ္စုတံ အမတန္တိ? န ဟေဝံ ဝတ္တဗ္ဗေ။ပေ.။ အာကာသော အသင်္ခတော, နိဗ္ဗာနံ အသင်္ခတန္တိ? အာမန္တာ။ ဒွေ အသင်္ခတာနီတိ? န ဟေဝံ ဝတ္တဗ္ဗေ။ပေ.။။ ဒွေ အသင်္ခတာနီတိ? အာမန္တာ ။ ဒွေ တာဏာနိ။ပေ.။ အန္တရိကာ ဝါတိ? န ဟေဝံ ဝတ္တဗ္ဗေ။ပေ.။။
အာကာသော အသင်္ခတောတိ? အာမန္တာ။ အတ္ထိ ကေစိ အနာကာသံ အာကာသံ ကရောန္တီတိ? အာမန္တာ။ အတ္ထိ ကေစိ သင်္ခတံ အသင်္ခတံ ကရောန္တီတိ? န ဟေဝံ ဝတ္တဗ္ဗေ။ပေ.။ အတ္ထိ ကေစိ အာကာသံ အနာကာသံ ကရောန္တီတိ? အာမန္တာ။ အတ္ထိ ကေစိ အသင်္ခတံ သင်္ခတံ ကရောန္တီတိ? န ဟေဝံ ဝတ္တဗ္ဗေ။ပေ.။။
အာကာသေ ပက္ခိနော ဂစ္ဆန္တိ, စန္ဒိမသူရိယာ ဂစ္ဆန္တိ, တာရကရူပါနိ ဂစ္ဆန္တိ, ဣဒ္ဓိံ ဝိကုဗ္ဗန္တိ, ဗာဟုံ စာလေန္တိ, ပါဏိံ စာလေန္တိ, လေဍ္ဍုံ ခိပန္တိ, လဂုဠံ ခိပန္တိ, ဣဒ္ဓိံ [သတ္တိံ (?)] ခိပန္တိ, ဥသုံ ခိပန္တီတိ? အာမန္တာ။ အသင်္ခတေ ပက္ခိနော ဂစ္ဆန္တိ, စန္ဒိမသူရိယာ ဂစ္ဆန္တိ, တာရကရူပါနိ ဂစ္ဆန္တိ, ဣဒ္ဓိံ ဝိကုဗ္ဗန္တိ, ဗာဟုံ စာလေန္တိ, ပါဏိံ စာလေန္တိ, လေဍ္ဍုံ ခိပန္တိ, လဂုဠံ ခိပန္တိ, ဣဒ္ဓိံ ခိပန္တိ, ဥသုံ ခိပန္တီတိ? န ဟေဝံ ဝတ္တဗ္ဗေ။ပေ.။။
၄၆၁. အာကာသံ ပရိဝါရေတွာ ဃရာနိ ကရောန္တိ ကောဋ္ဌာနိ ကရောန္တီတိ? အာမန္တာ။ အသင်္ခတံ ပရိဝါရေတွာ ဃရာနိ ကရောန္တိ ကောဋ္ဌာနိ ကရောန္တီတိ? န ဟေဝံ ဝတ္တဗ္ဗေ။ပေ.။။
ဥဒပါနေ ခညမာနေ အနာကာသော အာကာသော ဟောတီတိ? အာမန္တာ။ သင်္ခတံ အသင်္ခတံ ဟောတီတိ? န ဟေဝံ ဝတ္တဗ္ဗေ။ပေ.။။
တုစ္ဆဥဒပါနေ ပူရိယမာနေ, တုစ္ဆကောဋ္ဌေ ပူရိယမာနေ, တုစ္ဆကုမ္ဘိယာ ပူရိယမာနာယ အာကာသော အန္တရဓါယတီတိ? အာမန္တာ။ အသင်္ခတံ အန္တရဓါယတီတိ? န ဟေဝံ ဝတ္တဗ္ဗေ။ပေ.။။
၄၆၂. န ဝတ္တဗ္ဗံ – ‘‘အာကာသော အသင်္ခတော’’တိ? အာမန္တာ။ အာကာသော သင်္ခတောတိ? န ဟေဝံ ဝတ္တဗ္ဗေ။ပေ.။ တေန ဟိ အာကာသော အသင်္ခတောတိ။
အာကာသကထာ နိဋ္ဌိတာ။
၆. ဆဋ္ဌဝဂ္ဂေါ
(၅၉) ၇. အာကာသော သနိဒဿနောတိကထာ
၄၆၃. အာကာသော သနိဒဿနောတိ? အာမန္တာ။ ရူပံ ရူပါယတနံ ရူပဓါတု နီလံ ဣတကံ လောဟိတကံ ဩဒါတံ စက္ခုဝိညေယျံ စက္ခုသ္မိံ ပဋိဟညတိ စက္ခုဿ အာပါထံ အာဂစ္ဆတီတိ? န ဟေဝံ ဝတ္တဗ္ဗေ။ပေ.။။
အာကာသော သနိဒဿနောတိ? အာမန္တာ။ စက္ခုဉ္စ ပဋိစ္စ အာကာသဉ္စ ဥပ္ပဇ္ဇတိ စက္ခုဝိညာဏန္တိ? န ဟေဝံ ဝတ္တဗ္ဗေ ။ပေ.။။
စက္ခုဉ္စ ပဋိစ္စ အာကာသဉ္စ ဥပ္ပဇ္ဇတိ စက္ခုဝိညာဏန္တိ? အာမန္တာ။ ‘‘စက္ခုဉ္စ ပဋိစ္စ အာကာသဉ္စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ [အတ္ထိ (?)] သုတ္တန္တောတိ? နတ္ထိ။ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ [မ. နိ. ၁.၄၀၀; ၃.၄၂၁; သံ. နိ. ၄.၆၀] – အတ္ထေဝ သုတ္တန္တောတိ? အာမန္တာ။ ဟဉ္စိ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တော, နော စ ဝတ ရေ ဝတ္တဗ္ဗေ – ‘‘စက္ခုဉ္စ ပဋိစ္စ အာကာသဉ္စ ဥပ္ပဇ္ဇတိ စက္ခုဝိညာဏ’’န္တိ။
၄၆၄. န ဝတ္တဗ္ဗံ – ‘‘အာကာသော သနိဒဿနော’’တိ? အာမန္တာ။ နနု ပဿတိ ဒွိန္နံ ရုက္ခာနံ အန္တရံ, ဒွိန္နံ ထမ္ဘာနံ အန္တရံ, တာဠစ္ဆိဒ္ဒံ ဝါတပါနစ္ဆိဒ္ဒန္တိ? အာမန္တာ ။ ဟဉ္စိ ပဿတိ ဒွိန္နံ ရုက္ခာနံ အန္တရံ, ဒွိန္နံ ထမ္ဘာနံ အန္တရံ, တာဠစ္ဆိဒ္ဒံ ဝါတပါနစ္ဆိဒ္ဒံ, တေန ဝတ ရေ ဝတ္တဗ္ဗေ – ‘‘အာကာသော သနိဒဿနော’’တိ။
အာကာသော သနိဒဿနောတိကထာ နိဋ္ဌိတာ။
၆. ဆဋ္ဌဝဂ္ဂေါ
(၆၀) ၈. ပထဝီဓါတု သနိဒဿနာတိအာဒိကထာ
၄၆၅. ပထဝီဓါတု သနိဒဿနာတိ? အာမန္တာ။ ရူပံ ရူပါယတနံ ရူပဓါတု နီလံ ဣတကံ လောဟိတကံ ဩဒါတံ စက္ခုဝိညေယျံ စက္ခုသ္မိံ ပဋိဟညတိ စက္ခုဿ အာပါထံ အာဂစ္ဆတီတိ? န ဟေဝံ ဝတ္တဗ္ဗေ။ပေ.။။
ပထဝီဓါတု သနိဒဿနာတိ? အာမန္တာ။ စက္ခုဉ္စ ပဋိစ္စ ပထဝီဓါတုဉ္စ ဥပ္ပဇ္ဇတိ စက္ခုဝိညာဏန္တိ? န ဟေဝံ ဝတ္တဗ္ဗေ။ပေ.။။
စက္ခုဉ္စ ပဋိစ္စ ပထဝီဓါတုဉ္စ ဥပ္ပဇ္ဇတိ စက္ခုဝိညာဏန္တိ? အာမန္တာ။ ‘‘စက္ခုဉ္စ ပဋိစ္စ ပထဝီဓါတုဉ္စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? နတ္ထိ။ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? အာမန္တာ။ ဟဉ္စိ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တော, နော စ ဝတ ရေ ဝတ္တဗ္ဗေ – ‘‘စက္ခုဉ္စ ပဋိစ္စ ပထဝီဓါတုဉ္စ ဥပ္ပဇ္ဇတိ စက္ခုဝိညာဏ’’န္တိ။
၄၆၆. န ဝတ္တဗ္ဗံ – ‘‘ပထဝီဓါတု သနိဒဿနာ’’တိ? အာမန္တာ။ နနု ပဿတိ ဘူမိံ ပါသာဏံ ပဗ္ဗတန္တိ? အာမန္တာ။ ဟဉ္စိ ပဿတိ [ပဿသိ (သီ. သျာ. က.) ဧဝမုပရိပိ] ဘူမိံ ပါသာဏံ ပဗ္ဗတံ, တေန ဝတ ရေ ဝတ္တဗ္ဗေ – ‘‘ပထဝီဓါတု သနိဒဿနာ’’တိ။ပေ.။။
န ဝတ္တဗ္ဗံ – ‘‘အာပေါဓါတု သနိဒဿနာ’’တိ? အာမန္တာ။ နနု ပဿတိ ဥဒကန္တိ? အာမန္တာ။ ဟဉ္စိ ပဿတိ ဥဒကံ, တေန ဝတ ရေ ဝတ္တဗ္ဗေ – ‘‘အာပေါဓါတု သနိဒဿနာတိ။ပေ.။။
န ဝတ္တဗ္ဗံ – တေဇောဓါတု သနိဒဿနာတိ? အာမန္တာ။ နနု ပဿတိ အဂ္ဂိံ ဇလန္တန္တိ? အာမန္တာ။ ဟဉ္စိ ပဿတိ အဂ္ဂိံ ဇလန္တံ, တေန ဝတ ရေ ဝတ္တဗ္ဗေ – ‘‘တေဇောဓါတု သနိဒဿနာ’’တိ။ပေ.။။
န ဝတ္တဗ္ဗံ – ‘‘ဝါယောဓါတု သနိဒဿနာ’’တိ? အာမန္တာ။ နနု ပဿတိ ဝါတေန ရုက္ခေ သဉ္စာလိယမာနေတိ? အာမန္တာ။ ဟဉ္စိ ပဿတိ ဝါတေန ရုက္ခေ သဉ္စာလိယမာနေ, တေန ဝတ ရေ ဝတ္တဗ္ဗေ – ‘‘ဝါယောဓါတု သနိဒဿနာ’’တိ။ပေ.။။
ပထဝီဓါတု သနိဒဿနာတိအာဒိကထာ နိဋ္ဌိတာ။
၆. ဆဋ္ဌဝဂ္ဂေါ
(၆၁) ၉. စက္ခုန္ဒ္ရိယံ သနိဒဿနန္တိအာဒိကထာ
၄၆၇. စက္ခုန္ဒ္ရိယံ သနိဒဿနန္တိ? အာမန္တာ။ ရူပံ ရူပါယတနံ ရူပဓါတု။ပေ.။ စက္ခုဿ အာပါထံ အာဂစ္ဆတီတိ? န ဟေဝံ ဝတ္တဗ္ဗေ။ပေ.။။
စက္ခုန္ဒ္ရိယံ သနိဒဿနန္တိ? အာမန္တာ။ စက္ခုဉ္စ ပဋိစ္စ စက္ခုန္ဒ္ရိယဉ္စ ဥပ္ပဇ္ဇတိ စက္ခုဝိညာဏန္တိ? န ဟေဝံ ဝတ္တဗ္ဗေ။ပေ.။။
စက္ခုဉ္စ ပဋိစ္စ စက္ခုန္ဒ္ရိယဉ္စ ဥပ္ပဇ္ဇတိ စက္ခုဝိညာဏန္တိ? အာမန္တာ။ ‘‘စက္ခုဉ္စ ပဋိစ္စ စက္ခုန္ဒ္ရိယဉ္စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? နတ္ထိ။ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? အာမန္တာ။ ဟဉ္စိ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တော, နော စ ဝတ ရေ ဝတ္တဗ္ဗေ – ‘‘စက္ခုဉ္စ ပဋိစ္စ စက္ခုန္ဒ္ရိယဉ္စ ဥပ္ပဇ္ဇတိ စက္ခုဝိညာဏ’’န္တိ။
၄၆၈. န ဝတ္တဗ္ဗံ – ‘‘ပဉ္စိန္ဒ္ရိယာနိ သနိဒဿနာနီ’’တိ? အာမန္တာ။ နနု ပဿတိ စက္ခုံ သောတံ ဃာနံ ဇိဝှံ ကာယန္တိ? အာမန္တာ။ ဟဉ္စိ ပဿတိ စက္ခုံ သောတံ ဃာနံ ဇိဝှံ ကာယံ, တေန ဝတ ရေ ဝတ္တဗ္ဗေ – ‘‘ပဉ္စိန္ဒ္ရိယာနိ သနိဒဿနာနီ’’တိ။ပေ.။။
စက္ခုန္ဒ္ရိယံ သနိဒဿနန္တိအာဒိကထာ နိဋ္ဌိတာ။
၆. ဆဋ္ဌဝဂ္ဂေါ
(၆၂) ၁၀. ကာယကမ္မံ သနိဒဿနန္တိကထာ
၄၆၉. ကာယကမ္မံ သနိဒဿနန္တိ? အာမန္တာ။ ရူပံ ရူပါယတနံ ရူပဓါတု နီလံ ဣတကံ လောဟိတကံ ဩဒါတံ စက္ခုဝိညေယျံ စက္ခုသ္မိံ ပဋိဟညတိ စက္ခုဿ အာပါထံ အာဂစ္ဆတီတိ? န ဟေဝံ ဝတ္တဗ္ဗေ။ပေ.။။
ကာယကမ္မံ သနိဒဿနန္တိ? အာမန္တာ။ စက္ခုဉ္စ ပဋိစ္စ ကာယကမ္မဉ္စ ဥပ္ပဇ္ဇတိ စက္ခုဝိညာဏန္တိ? န ဟေဝံ ဝတ္တဗ္ဗေ။ပေ.။။
စက္ခုဉ္စ ပဋိစ္စ ကာယကမ္မဉ္စ ဥပ္ပဇ္ဇတိ စက္ခုဝိညာဏန္တိ? အာမန္တာ။ ‘‘စက္ခုဉ္စ ပဋိစ္စ ကာယကမ္မဉ္စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? နတ္ထိ။ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တောတိ? အာမန္တာ။ ဟဉ္စိ ‘‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏ’’န္တိ – အတ္ထေဝ သုတ္တန္တော, နော စ ဝတ ရေ ဝတ္တဗ္ဗေ – ‘‘စက္ခုဉ္စ ပဋိစ္စ ကာယကမ္မဉ္စ ဥပ္ပဇ္ဇတိ စက္ခုဝိညာဏ’’န္တိ။
၄၇၀. န ဝတ္တဗ္ဗံ – ‘‘ကာယကမ္မံ သနိဒဿန’’န္တိ? အာမန္တာ။ နနု ပဿတိ အဘိက္ကမန္တံ ပဋိက္ကမန္တံ အာလောကေန္တံ ဝိလောကေန္တံ သမိဉ္ဇေန္တံ ပသာရေန္တန္တိ? အာမန္တာ။ ဟဉ္စိ ပဿတိ အဘိက္ကမန္တံ ပဋိက္ကမန္တံ အာလောကေန္တံ ဝိလောကေန္တံ သမိဉ္ဇေန္တံ ပသာရေန္တံ, တေန ဝတ ရေ ဝတ္တဗ္ဗေ – ‘‘ကာယကမ္မံ သနိဒဿန’’န္တိ။
ကာယကမ္မံ သနိဒဿနန္တိကထာ နိဋ္ဌိတာ။
ဆဋ္ဌဝဂ္ဂေါ။
တဿုဒ္ဒါနံ –
နိယမော အသင်္ခတော, ပဋိစ္စသမုပ္ပါဒေါ အသင်္ခတော, စတ္တာရိ သစ္စာနိ အသင်္ခတာနိ, စတ္တာရော အာရုပ္ပါ အသင်္ခတာ, နိရောဓသမာပတ္တိ အသင်္ခတာ, အာကာသော အသင်္ခတော, အာကာသော သနိဒဿနော, စတ္တာရော မဟာဘူတာ, ပဉ္စိန္ဒ္ရိယာနိ, တထေဝ ကာယကမ္မန္တိ။