၅. ပဉ္စမဝဂ္ဂ
(၄၃) ၁. ဝိမုတ္တိကထာ
၄၁၈. ဝိမုတ္တိဉာဏံ ဝိမုတ္တန္တိ? အာမန္တာ။ ယံ ကိဉ္စိ ဝိမုတ္တိဉာဏံ သဗ္ဗံ တံ ဝိမုတ္တန္တိ? န ဟေဝံ ဝတ္တဗ္ဗေ။ပေ.။။ ဝိမုတ္တိဉာဏံ ဝိမုတ္တန္တိ? အာမန္တာ။ ပစ္စဝေက္ခဏဉာဏံ ဝိမုတ္တန္တိ? န ဟေဝံ ဝတ္တဗ္ဗေ။ပေ.။။
ဝိမုတ္တိဉာဏံ ဝိမုတ္တန္တိ? အာမန္တာ။ ဂေါတြဘုနော ပုဂ္ဂလဿ ဝိမုတ္တိဉာဏံ ဝိမုတ္တန္တိ? န ဟေဝံ ဝတ္တဗ္ဗေ။ပေ.။ သောတာပတ္တိဖလသစ္ဆိကိရိယာယ ပဋိပန္နဿ ပုဂ္ဂလဿ ဝိမုတ္တိဉာဏံ ဝိမုတ္တန္တိ? အာမန္တာ။ သောတာပန္နဿ ဉာဏံ, သောတာပတ္တိဖလံ ပတ္တဿ ပဋိလဒ္ဓဿ အဓိဂတဿ သစ္ဆိကတဿ ဉာဏန္တိ? န ဟေဝံ ဝတ္တဗ္ဗေ။ပေ.။ သကဒါဂါမိဖလသစ္ဆိကိရိယာယ ပဋိပန္နဿ ပုဂ္ဂလဿ ဝိမုတ္တိဉာဏံ ဝိမုတ္တန္တိ? အာမန္တာ။ သကဒါဂါမိဿ ဉာဏံ, သကဒါဂါမိဖလံ ပတ္တဿ ပဋိလဒ္ဓဿ အဓိဂတဿ သစ္ဆိကတဿ ဉာဏန္တိ? န ဟေဝံ ဝတ္တဗ္ဗေ။ပေ.။ အနာဂါမိဖလသစ္ဆိကိရိယာယ ပဋိပန္နဿ ပုဂ္ဂလဿ ဝိမုတ္တိဉာဏံ ဝိမုတ္တန္တိ? အာမန္တာ။ အနာဂါမိဿ ဉာဏံ, အနာဂါမိဖလံ ပတ္တဿ ပဋိလဒ္ဓဿ အဓိဂတဿ သစ္ဆိကတဿ ဉာဏန္တိ? န ဟေဝံ ဝတ္တဗ္ဗေ။ပေ.။ အရဟတ္တသစ္ဆိကိရိယာယ ပဋိပန္နဿ ပုဂ္ဂလဿ ဝိမုတ္တိဉာဏံ ဝိမုတ္တန္တိ? အာမန္တာ။ အရဟတော ဉာဏံ, အရဟတ္တံ ပတ္တဿ ပဋိလဒ္ဓဿ အဓိဂတဿ သစ္ဆိကတဿ ဉာဏန္တိ? န ဟေဝံ ဝတ္တဗ္ဗေ။ပေ.။။
၄၁၉. သောတာပတ္တိဖလသမင်္ဂိဿ ပုဂ္ဂလဿ ဝိမုတ္တိဉာဏံ ဝိမုတ္တန္တိ? အာမန္တာ။ သောတာပတ္တိဖလသစ္ဆိကိရိယာယ ပဋိပန္နဿ ပုဂ္ဂလဿ ဝိမုတ္တိဉာဏံ ဝိမုတ္တန္တိ? န ဟေဝံ ဝတ္တဗ္ဗေ။ပေ.။ သကဒါဂါမိဖလသမင်္ဂိဿ ပုဂ္ဂလဿ ဝိမုတ္တိဉာဏံ ဝိမုတ္တန္တိ? အာမန္တာ။ သကဒါဂါမိဖလသစ္ဆိကိရိယာယ ပဋိပန္နဿ ပုဂ္ဂလဿ ဝိမုတ္တိဉာဏံ ဝိမုတ္တန္တိ? န ဟေဝံ ဝတ္တဗ္ဗေ။ပေ.။ အနာဂါမိဖလသမင်္ဂိဿ ပုဂ္ဂလဿ ဝိမုတ္တိဉာဏံ ဝိမုတ္တန္တိ? အာမန္တာ။ အနာဂါမိဖလသစ္ဆိကိရိယာယ ပဋိပန္နဿ ပုဂ္ဂလဿ ဝိမုတ္တိဉာဏံ ဝိမုတ္တန္တိ? န ဟေဝံ ဝတ္တဗ္ဗေ။ပေ.။ အရဟတ္တဖလသမင်္ဂိဿ ပုဂ္ဂလဿ ဝိမုတ္တိဉာဏံ ဝိမုတ္တန္တိ? အာမန္တာ။ အရဟတ္တသစ္ဆိကိရိယာယ ပဋိပန္နဿ ပုဂ္ဂလဿ ဝိမုတ္တိဉာဏံ ဝိမုတ္တန္တိ? န ဟေဝံ ဝတ္တဗ္ဗေ။ပေ.။။
၄၂၀. သောတာပတ္တိဖလသမင်္ဂိဿ ပုဂ္ဂလဿ ဝိမုတ္တိဉာဏံ ဝိမုတ္တံ တဉ္စ ဖလံ ပတ္တဿ ဉာဏန္တိ? အာမန္တာ။ သောတာပတ္တိဖလသစ္ဆိကိရိယာယ ပဋိပန္နဿ ပုဂ္ဂလဿ ဝိမုတ္တိဉာဏံ ဝိမုတ္တံ တဉ္စ ဖလံ ပတ္တဿ ဉာဏန္တိ? န ဟေဝံ ဝတ္တဗ္ဗေ။ပေ.။ သကဒါဂါမိဖလသမင်္ဂိဿ ပုဂ္ဂလဿ ဝိမုတ္တိဉာဏံ ဝိမုတ္တံ တဉ္စ ဖလံ ပတ္တဿ ဉာဏန္တိ? အာမန္တာ ။ သကဒါဂါမိဖလသစ္ဆိကိရိယာယ ပဋိပန္နဿ ပုဂ္ဂလဿ ဝိမုတ္တိဉာဏံ ဝိမုတ္တံ တဉ္စ ဖလံ ပတ္တဿ ဉာဏန္တိ? န ဟေဝံ ဝတ္တဗ္ဗေ။ပေ.။ အနာဂါမိဖလသမင်္ဂိဿ ပုဂ္ဂလဿ ဝိမုတ္တိဉာဏံ ဝိမုတ္တံ တဉ္စ ဖလံ ပတ္တဿ ဉာဏန္တိ? အာမန္တာ။ အနာဂါမိဖလသစ္ဆိကိရိယာယ ပဋိပန္နဿ ပုဂ္ဂလဿ ဝိမုတ္တိဉာဏံ ဝိမုတ္တံ တဉ္စ ဖလံ ပတ္တဿ ဉာဏန္တိ? န ဟေဝံ ဝတ္တဗ္ဗေ။ပေ.။ အရဟတ္တဖလသမင်္ဂိဿ ပုဂ္ဂလဿ ဝိမုတ္တိဉာဏံ ဝိမုတ္တံ တဉ္စ ဖလံ ပတ္တဿ ဉာဏန္တိ? အာမန္တာ။ အရဟတ္တသစ္ဆိကိရိယာယ ပဋိပန္နဿ ပုဂ္ဂလဿ ဝိမုတ္တိဉာဏံ ဝိမုတ္တံ တဉ္စ ဖလံ ပတ္တဿ ဉာဏန္တိ? န ဟေဝံ ဝတ္တဗ္ဗေ။ပေ.။။
ဝိမုတ္တိကထာ နိဋ္ဌိတာ။
၅. ပဉ္စမဝဂ္ဂေါ
(၄၄) ၂. အသေခဉာဏကထာ
၄၂၁. သေခဿ အသေခံ ဉာဏံ အတ္ထီတိ? အာမန္တာ။ သေခေါ အသေခံ ဓမ္မံ ဇာနာတိ ပဿတိ, ဒိဋ္ဌံ ဝိဒိတံ သစ္ဆိကတံ ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတီတိ? န ဟေဝံ ဝတ္တဗ္ဗေ။ပေ.။ နနု သေခေါ အသေခံ ဓမ္မံ န ဇာနာတိ န ပဿတိ, အဒိဋ္ဌံ အဝိဒိတံ အသစ္ဆိကတံ န ဥပသမ္ပဇ္ဇ ဝိဟရတိ, န ကာယေန ဖုသိတွာ ဝိဟရတီတိ? အာမန္တာ။ ဟဉ္စိ သေခေါ အသေခံ ဓမ္မံ န ဇာနာတိ န ပဿတိ, အဒိဋ္ဌံ အဝိဒိတံ အသစ္ဆိကတံ န ဥပသမ္ပဇ္ဇ ဝိဟရတိ, န ကာယေန ဖုသိတွာ ဝိဟရတိ, နော စ ဝတ ရေ ဝတ္တဗ္ဗေ – ‘‘သေခဿ အသေခံ ဉာဏံ အတ္ထီ’’တိ။
အသေခဿ အသေခံ ဉာဏံ အတ္ထိ, အသေခေါ အသေခံ ဓမ္မံ ဇာနာတိ ပဿတိ, ဒိဋ္ဌံ ဝိဒိတံ သစ္ဆိကတံ ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတီတိ? အာမန္တာ။ သေခဿ အသေခံ ဉာဏံ အတ္ထိ , သေခေါ အသေခံ ဓမ္မံ ဇာနာတိ ပဿတိ, ဒိဋ္ဌံ ဝိဒိတံ သစ္ဆိကတံ ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတီတိ? န ဟေဝံ ဝတ္တဗ္ဗေ။ပေ.။။
၄၂၂. သေခဿ အသေခံ ဉာဏံ အတ္ထိ, သေခေါ အသေခံ ဓမ္မံ န ဇာနာတိ န ပဿတိ, အဒိဋ္ဌံ အဝိဒိတံ အသစ္ဆိကတံ န ဥပသမ္ပဇ္ဇ ဝိဟရတိ, န ကာယေန ဖုသိတွာ ဝိဟရတီတိ? အာမန္တာ။ အသေခဿ အသေခံ ဉာဏံ အတ္ထိ, အသေခေါ အသေခံ ဓမ္မံ န ဇာနာတိ န ပဿတိ, အဒိဋ္ဌံ အဝိဒိတံ အသစ္ဆိကတံ န ဥပသမ္ပဇ္ဇ ဝိဟရတိ, န ကာယေန ဖုသိတွာ ဝိဟရတီတိ? န ဟေဝံ ဝတ္တဗ္ဗေ။ပေ.။။
သေခဿ အသေခံ ဉာဏံ အတ္ထီတိ? အာမန္တာ။ ဂေါတြဘုနော ပုဂ္ဂလဿ သောတာပတ္တိမဂ္ဂေ ဉာဏံ အတ္ထီတိ? န ဟေဝံ ဝတ္တဗ္ဗေ။ပေ.။ သောတာပတ္တိဖလသစ္ဆိကိရိယာယ ပဋိပန္နဿ ပုဂ္ဂလဿ သောတာပတ္တိဖလေ ဉာဏံ အတ္ထီတိ? န ဟေဝံ ဝတ္တဗ္ဗေ။ပေ.။ သကဒါဂါမိဖလ။ အနာဂါမိဖလ။ အရဟတ္တသစ္ဆိကိရိယာယ ပဋိပန္နဿ ပုဂ္ဂလဿ အရဟတ္တေ ဉာဏံ အတ္ထီတိ? န ဟေဝံ ဝတ္တဗ္ဗေ။ပေ.။။
၄၂၃. န ဝတ္တဗ္ဗံ – ‘‘သေခဿ အသေခံ ဉာဏံ အတ္ထီ’’တိ? အာမန္တာ။ နနု အာယသ္မာ အာနန္ဒော သေခေါ – ‘‘ဘဂဝါ ဥဠာရော’’တိ ဇာနာတိ, ‘‘သာရိပုတ္တော ထေရော, မဟာမောဂ္ဂလ္လာနော ထေရော ဥဠာရော’’တိ ဇာနာတီတိ? အာမန္တာ။ ဟဉ္စိ အာယသ္မာ အာနန္ဒော သေခေါ – ‘‘ဘဂဝါ ဥဠာရော’’တိ ဇာနာတိ, ‘‘သာရိပုတ္တော ထေရော, မဟာမောဂ္ဂလ္လာနော ထေရော ဥဠာရော’’တိ ဇာနာတိ, တေန ဝတ ရေ ဝတ္တဗ္ဗေ – ‘‘သေခဿ အသေခံ ဉာဏံ အတ္ထီ’’တိ။
အသေခဉာဏကထာ နိဋ္ဌိတာ။
၅. ပဉ္စမဝဂ္ဂေါ
(၄၅) ၃. ဝိပရီတကထာ
၄၂၄. ပထဝီကသိဏံ သမာပတ္တိံ [ပထဝီကသိဏသမာပတ္တိံ (သီ. က.)] သမာပန္နဿ ဝိပရီတေ ဉာဏန္တိ? အာမန္တာ။ အနိစ္စေ နိစ္စန္တိ ဝိပရိယေသောတိ? န ဟေဝံ ဝတ္တဗ္ဗေ။ပေ.။ ဒုက္ခေ သုခန္တိ။ပေ.။ အနတ္တနိ အတ္တာတိ။ပေ.။ အသုဘေ သုဘန္တိ ဝိပရိယေသောတိ? န ဟေဝံ ဝတ္တဗ္ဗေ။ပေ.။။
ပထဝီကသိဏံ သမာပတ္တိံ သမာပန္နဿ ဝိပရီတေ ဉာဏန္တိ? အာမန္တာ။ အကုသလန္တိ? န ဟေဝံ ဝတ္တဗ္ဗေ။ပေ.။ နနု ကုသလန္တိ? အာမန္တာ။ ဟဉ္စိ ကုသလံ, နော စ ဝတ ရေ ဝတ္တဗ္ဗေ – ‘‘ပထဝီကသိဏံ သမာပတ္တိံ သမာပန္နဿ ဝိပရီတေ ဉာဏ’’န္တိ။
အနိစ္စေ နိစ္စန္တိ ဝိပရိယေသော, သော စ အကုသလောတိ? အာမန္တာ။ ပထဝီကသိဏံ သမာပတ္တိံ သမာပန္နဿ ဝိပရီတေ ဉာဏံ, တဉ္စ အကုသလန္တိ? န ဟေဝံ ဝတ္တဗ္ဗေ။ပေ.။ ဒုက္ခေ သုခန္တိ။ပေ.။ အနတ္တနိ အတ္တာတိ။ပေ.။ အသုဘေ သုဘန္တိ ဝိပရိယေသော, သော စ အကုသလောတိ? အာမန္တာ။ ပထဝီကသိဏံ သမာပတ္တိံ သမာပန္နဿ ဝိပရီတေ ဉာဏံ, တဉ္စ အကုသလန္တိ? န ဟေဝံ ဝတ္တဗ္ဗေ။ပေ.။။
၄၂၅. ပထဝီကသိဏံ သမာပတ္တိံ သမာပန္နဿ ဝိပရီတေ ဉာဏံ, တဉ္စ အကုသလန္တိ? အာမန္တာ။ အနိစ္စေ နိစ္စန္တိ ဝိပရိယေသော, သော စ ကုသလောတိ? န ဟေဝံ ဝတ္တဗ္ဗေ။ပေ.။ ပထဝီကသိဏံ သမာပတ္တိံ သမာပန္နဿ ဝိပရီတေ ဉာဏံ, တဉ္စ အကုသလန္တိ? အာမန္တာ။ ဒုက္ခေ သုခန္တိ။ပေ.။ အနတ္တနိ အတ္တာတိ။ပေ.။ အသုဘေ သုဘန္တိ ဝိပရိယေသော, သော စ ကုသလောတိ? န ဟေဝံ ဝတ္တဗ္ဗေ။ပေ.။။
၄၂၆. ပထဝီကသိဏံ သမာပတ္တိံ သမာပန္နဿ ဝိပရီတေ ဉာဏန္တိ? အာမန္တာ။ အရဟာ ပထဝီကသိဏံ သမာပတ္တိံ သမာပဇ္ဇေယျာတိ? အာမန္တာ။ ဟဉ္စိ အရဟာ ပထဝီကသိဏံ သမာပတ္တိံ သမာပဇ္ဇေယျ, နော စ ဝတ ရေ ဝတ္တဗ္ဗေ – ‘‘ပထဝီကသိဏံ သမာပတ္တိံ သမာပန္နဿ ဝိပရီတေ ဉာဏ’’န္တိ။
ပထဝီကသိဏံ သမာပတ္တိံ သမာပန္နဿ ဝိပရီတေ ဉာဏံ, အရဟာ ပထဝီကသိဏံ သမာပတ္တိံ သမာပဇ္ဇေယျာတိ? အာမန္တာ။ အတ္ထိ အရဟတော ဝိပရိယေသောတိ? န ဟေဝံ ဝတ္တဗ္ဗေ။ပေ.။။
အတ္ထိ အရဟတော ဝိပရိယေသောတိ? အာမန္တာ။ အတ္ထိ အရဟတော သညာဝိပရိယေသော စိတ္တဝိပရိယေသော ဒိဋ္ဌိဝိပရိယေသောတိ? န ဟေဝံ ဝတ္တဗ္ဗေ။ပေ.။။
နတ္ထိ အရဟတော သညာဝိပရိယေသော စိတ္တဝိပရိယေသော ဒိဋ္ဌိဝိပရိယေသောတိ? အာမန္တာ။ ဟဉ္စိ နတ္ထိ အရဟတော သညာဝိပရိယေသော စိတ္တဝိပရိယေသော ဒိဋ္ဌိဝိပရိယေသော, နော စ ဝတ ရေ ဝတ္တဗ္ဗေ – ‘‘အတ္ထိ အရဟတော ဝိပရိယေသော’’တိ။
၄၂၇. န ဝတ္တဗ္ဗံ – ပထဝီကသိဏံ သမာပတ္တိံ သမာပန္နဿ ဝိပရီတေ ဉာဏန္တိ? အာမန္တာ။ ပထဝီကသိဏံ သမာပတ္တိံ သမာပဇ္ဇန္တဿ သဗ္ဗေဝ ပထဝီတိ? န ဟေဝံ ဝတ္တဗ္ဗေ။ တေန ဟိ ပထဝီကသိဏံ သမာပတ္တိံ သမာပန္နဿ ဝိပရီတေ ဉာဏန္တိ။
ပထဝီကသိဏံ သမာပတ္တိံ သမာပန္နဿ ဝိပရီတေ ဉာဏန္တိ? အာမန္တာ။ နနု ပထဝီ အတ္ထိ, အတ္ထိ စ ကောစိ ပထဝိံ ပထဝိတော သမာပဇ္ဇတီတိ? အာမန္တာ။ ဟဉ္စိ ပထဝီ အတ္ထိ, အတ္ထိ စ ကောစိ ပထဝိံ ပထဝိတော သမာပဇ္ဇတိ, နော စ ဝတ ရေ ဝတ္တဗ္ဗေ – ‘‘ပထဝီကသိဏံ သမာပတ္တိံ သမာပန္နဿ ဝိပရီတေ ဉာဏ’’န္တိ။
ပထဝီ အတ္ထိ, ပထဝိံ ပထဝိတော သမာပဇ္ဇန္တဿ ဝိပရီတံ ဟောတီတိ? အာမန္တာ။ နိဗ္ဗာနံ အတ္ထိ, နိဗ္ဗာနံ နိဗ္ဗာနတော သမာပဇ္ဇန္တဿ ဝိပရီတံ ဟောတီတိ? န ဟေဝံ ဝတ္တဗ္ဗေ။ပေ.။ တေန ဟိ န ဝတ္တဗ္ဗံ – ‘‘ပထဝီကသိဏံ သမာပတ္တိံ သမာပန္နဿ ဝိပရီတေ ဉာဏ’’န္တိ။
ဝိပရီတကထာ နိဋ္ဌိတာ။
၅. ပဉ္စမဝဂ္ဂေါ
(၄၆) ၄. နိယာမကထာ
၄၂၈. အနိယတဿ နိယာမဂမနာယ အတ္ထိ ဉာဏန္တိ? အာမန္တာ။ နိယတဿ အနိယာမဂမနာယ အတ္ထိ ဉာဏန္တိ? န ဟေဝံ ဝတ္တဗ္ဗေ။ပေ.။။
နိယတဿ အနိယာမဂမနာယ နတ္ထိ ဉာဏန္တိ? အာမန္တာ။ အနိယတဿ နိယာမဂမနာယ နတ္ထိ ဉာဏန္တိ? န ဟေဝံ ဝတ္တဗ္ဗေ။ပေ.။။
အနိယတဿ နိယာမဂမနာယ အတ္ထိ ဉာဏန္တိ? အာမန္တာ ။ နိယတဿ နိယာမဂမနာယ အတ္ထိ ဉာဏန္တိ? န ဟေဝံ ဝတ္တဗ္ဗေ။ပေ.။။
နိယတဿ နိယာမဂမနာယ နတ္ထိ ဉာဏန္တိ? အာမန္တာ။ အနိယတဿ နိယာမဂမနာယ နတ္ထိ ဉာဏန္တိ? န ဟေဝံ ဝတ္တဗ္ဗေ။ပေ.။။
အနိယတဿ နိယာမဂမနာယ အတ္ထိ ဉာဏန္တိ? အာမန္တာ။ အနိယတဿ အနိယာမဂမနာယ အတ္ထိ ဉာဏန္တိ? န ဟေဝံ ဝတ္တဗ္ဗေ။ပေ.။။
အနိယတဿ အနိယာမဂမနာယ နတ္ထိ ဉာဏန္တိ? အာမန္တာ။ အနိယတဿ နိယာမဂမနာယ နတ္ထိ ဉာဏန္တိ? န ဟေဝံ ဝတ္တဗ္ဗေ။ပေ.။။
၄၂၉. အနိယတဿ နိယာမဂမနာယ အတ္ထိ ဉာဏန္တိ? အာမန္တာ။ အနိယတဿ နိယာမဂမနာယ အတ္ထိ နိယာမောတိ? န ဟေဝံ ဝတ္တဗ္ဗေ။ပေ.။။
အနိယတဿ နိယာမဂမနာယ အတ္ထိ ဉာဏန္တိ? အာမန္တာ။ အနိယတဿ နိယာမဂမနာယ အတ္ထိ သတိပဋ္ဌာနာ။ သမ္မပ္ပဓါနာ။ ဣဒ္ဓိပါဒါ။ ဣန္ဒ္ရိယာ။ ဗလာ။ ဗောဇ္ဈင်္ဂါတိ? န ဟေဝံ ဝတ္တဗ္ဗေ။ပေ.။။
အနိယတဿ နိယာမဂမနာယ နတ္ထိ နိယာမောတိ? အာမန္တာ။ ဟဉ္စိ အနိယတဿ နိယာမဂမနာယ နတ္ထိ နိယာမော, နော ဝတ ရေ ဝတ္တဗ္ဗေ – ‘‘အနိယတဿ နိယာမဂမနာယ အတ္ထိ ဉာဏ’’န္တိ။
အနိယတဿ နိယာမဂမနာယ နတ္ထိ သတိပဋ္ဌာနာ။ပေ.။ ဗောဇ္ဈင်္ဂါတိ? အာမန္တာ။ ဟဉ္စိ အနိယတဿ နိယာမဂမနာယ နတ္ထိ ဗောဇ္ဈင်္ဂါ, နော ဝတ ရေ ဝတ္တဗ္ဗေ – ‘‘အနိယတဿ နိယာမဂမနာယ အတ္ထိ ဉာဏ’’န္တိ။
၄၃၀. အနိယတဿ နိယာမဂမနာယ အတ္ထိ ဉာဏန္တိ? အာမန္တာ။ ဂေါတြဘုနော ပုဂ္ဂလဿ သောတာပတ္တိမဂ္ဂေ ဉာဏံ အတ္ထီတိ? န ဟေဝံ ဝတ္တဗ္ဗေ။ပေ.။ သောတာပတ္တိဖလသစ္ဆိကိရိယာယ ပဋိပန္နဿ ပုဂ္ဂလဿ သောတာပတ္တိဖလေ ဉာဏံ အတ္ထီတိ? န ဟေဝံ ဝတ္တဗ္ဗေ ။ပေ.။ အရဟတ္တသစ္ဆိကိရိယာယ ပဋိပန္နဿ ပုဂ္ဂလဿ အရဟတ္တေ ဉာဏံ အတ္ထီတိ? န ဟေဝံ ဝတ္တဗ္ဗေ။ပေ.။။
၄၃၁. န ဝတ္တဗ္ဗံ – ‘‘အနိယတဿ နိယာမဂမနာယ အတ္ထိ ဉာဏ’’န္တိ? အာမန္တာ။ နနု ဘဂဝါ ဇာနာတိ – ‘‘အယံ ပုဂ္ဂလော သမ္မတ္တနိယာမံ ဩက္ကမိဿတိ, ဘဗ္ဗော အယံ ပုဂ္ဂလော ဓမ္မံ အဘိသမေတု’’န္တိ? အာမန္တာ။ ဟဉ္စိ ဘဂဝါ ဇာနာတိ – ‘‘အယံ ပုဂ္ဂလော သမ္မတ္တနိယာမံ ဩက္ကမိဿတိ, ဘဗ္ဗော အယံ ပုဂ္ဂလော ဓမ္မံ အဘိသမေတုံ,’’ တေန ဝတ ရေ ဝတ္တဗ္ဗေ – ‘‘အနိယတဿ နိယာမဂမနာယ အတ္ထိ ဉာဏ’’န္တိ။
နိယာမကထာ နိဋ္ဌိတာ။
၅. ပဉ္စမဝဂ္ဂေါ
(၄၇) ၅. ပဋိသမ္ဘိဒါကထာ
၄၃၂. သဗ္ဗံ ဉာဏံ ပဋိသမ္ဘိဒါတိ? အာမန္တာ။ သမ္မုတိဉာဏံ ပဋိသမ္ဘိဒါတိ ? န ဟေဝံ ဝတ္တဗ္ဗေ။ပေ.။ သမ္မုတိဉာဏံ ပဋိသမ္ဘိဒါတိ? အာမန္တာ။ ယေ ကေစိ သမ္မုတိံ ဇာနန္တိ, သဗ္ဗေ တေ ပဋိသမ္ဘိဒါပတ္တာတိ? န ဟေဝံ ဝတ္တဗ္ဗေ။ပေ.။ သဗ္ဗံ ဉာဏံ ပဋိသမ္ဘိဒါတိ? အာမန္တာ။ စေတောပရိယာယေ ဉာဏံ ပဋိသမ္ဘိဒါတိ? န ဟေဝံ ဝတ္တဗ္ဗေ။ပေ.။ စေတောပရိယာယေ ဉာဏံ ပဋိသမ္ဘိဒါတိ? အာမန္တာ။ ယေ ကေစိ ပရစိတ္တံ ဇာနန္တိ, သဗ္ဗေ တေ ပဋိသမ္ဘိဒါပတ္တာတိ? န ဟေဝံ ဝတ္တဗ္ဗေ။ပေ.။။
သဗ္ဗံ ဉာဏံ ပဋိသမ္ဘိဒါတိ? အာမန္တာ။ သဗ္ဗာ ပညာ ပဋိသမ္ဘိဒါတိ? န ဟေဝံ ဝတ္တဗ္ဗေ။ပေ.။ သဗ္ဗာ ပညာ ပဋိသမ္ဘိဒါတိ? အာမန္တာ။ ပထဝီကသိဏံ သမာပတ္တိံ သမာပန္နဿ အတ္ထိ ပညာ, သာ ပညာ ပဋိသမ္ဘိဒါတိ? န ဟေဝံ ဝတ္တဗ္ဗေ။ပေ.။ အာပေါကသိဏံ။ပေ.။ တေဇောကသိဏံ။ပေ.။ ဝါယောကသိဏံ။ပေ.။ နီလကသိဏံ။ပေ.။ ဣတကသိဏံ။ပေ.။ လောဟိတကသိဏံ။ပေ.။ ဩဒါတကသိဏံ။ပေ.။ အာကာသာနဉ္စာယတနံ။ပေ.။ ဝိညာဏဉ္စာယတနံ။ပေ.။ အာကိဉ္စညာယတနံ။ပေ.။ နေဝသညာနာသညာယတနံ သမာပန္နဿ။ပေ.။ ဒါနံ ဒဒန္တဿ။ပေ.။ စီဝရံ ဒဒန္တဿ။ပေ.။ ပိဏ္ဍပါတံ ဒဒန္တဿ။ပေ.။ သေနာသနံ ဒဒန္တဿ။ပေ.။ ဂိလာနပစ္စယဘေသဇ္ဇပရိက္ခာရံ ဒဒန္တဿ အတ္ထိ ပညာ, သာ ပညာ ပဋိသမ္ဘိဒါတိ? န ဟေဝံ ဝတ္တဗ္ဗေ။ပေ.။။
၄၃၃. န ဝတ္တဗ္ဗံ – ‘‘သဗ္ဗံ ဉာဏံ ပဋိသမ္ဘိဒါ’’တိ? အာမန္တာ။ အတ္ထိ လောကုတ္တရာ ပညာ, သာ ပညာ န ပဋိသမ္ဘိဒါတိ? န ဟေဝံ ဝတ္တဗ္ဗေ။ပေ.။ တေန ဟိ သဗ္ဗံ ဉာဏံ ပဋိသမ္ဘိဒါတိ။
ပဋိသမ္ဘိဒါကထာ နိဋ္ဌိတာ။
၅. ပဉ္စမဝဂ္ဂေါ
(၄၈) ၆. သမ္မုတိဉာဏကထာ
၄၃၄. န ဝတ္တဗ္ဗံ – ‘‘သမ္မုတိဉာဏံ သစ္စာရမ္မဏညေဝ န အညာရမ္မဏ’’န္တိ? အာမန္တာ။ နနု ပထဝီကသိဏံ သမာပတ္တိံ သမာပန္နဿ အတ္ထိ ဉာဏံ, ပထဝီကသိဏဉ္စ သမ္မုတိသစ္စမှီတိ? အာမန္တာ။ ဟဉ္စိ ပထဝီကသိဏံ သမာပတ္တိံ သမာပန္နဿ အတ္ထိ ဉာဏံ, ပထဝီကသိဏဉ္စ သမ္မုတိသစ္စမှိ, တေန ဝတ ရေ ဝတ္တဗ္ဗေ – ‘‘သမ္မုတိဉာဏံ သစ္စာရမ္မဏညေဝ န အညာရမ္မဏ’’န္တိ။
န ဝတ္တဗ္ဗံ – ‘‘သမ္မုတိဉာဏံ သစ္စာရမ္မဏညေဝ န အညာရမ္မဏ’’န္တိ? အာမန္တာ။ပေ.။ နနု အာပေါကသိဏံ။ပေ.။ တေဇောကသိဏံ။ပေ.။ ဂိလာနပစ္စယဘေသဇ္ဇပရိက္ခာရံ ဒဒန္တဿ အတ္ထိ ဉာဏံ, ဂိလာနပစ္စယဘေသဇ္ဇပရိက္ခာရော စ သမ္မုတိသစ္စမှီတိ? အာမန္တာ။ ဟဉ္စိ ဂိလာနပစ္စယဘေသဇ္ဇပရိက္ခာရံ ဒဒန္တဿ အတ္ထိ ဉာဏံ, ဂိလာနပစ္စယဘေသဇ္ဇပရိက္ခာရော စ သမ္မုတိသစ္စမှိ, တေန ဝတ ရေ ဝတ္တဗ္ဗေ – ‘‘သမ္မုတိဉာဏံ သစ္စာရမ္မဏညေဝ န အညာရမ္မဏ’’န္တိ။
၄၃၅. သမ္မုတိဉာဏံ သစ္စာရမ္မဏညေဝ န အညာရမ္မဏန္တိ? အာမန္တာ ။ တေန ဉာဏေန ဒုက္ခံ ပရိဇာနာတိ, သမုဒယံ ပဇဟတိ, နိရောဓံ သစ္ဆိကရောတိ, မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
သမ္မုတိဉာဏကထာ နိဋ္ဌိတာ။
၅. ပဉ္စမဝဂ္ဂေါ
(၄၉) ၇. စိတ္တာရမ္မဏကထာ
၄၃၆. စေတောပရိယာယေ ဉာဏံ စိတ္တာရမ္မဏညေဝ န အညာရမ္မဏန္တိ? အာမန္တာ။ နနု အတ္ထိ ကောစိ ‘‘သရာဂံ စိတ္တံ သရာဂံ စိတ္တ’’န္တိ ပဇာနာတီတိ? အာမန္တာ။ ဟဉ္စိ အတ္ထိ ကောစိ ‘‘သရာဂံ စိတ္တံ သရာဂံ စိတ္တ’’န္တိ ပဇာနာတိ, နော စ ဝတ ရေ ဝတ္တဗ္ဗေ – ‘‘စေတောပရိယာယေ ဉာဏံ စိတ္တာရမ္မဏညေဝ န အညာရမ္မဏ’’န္တိ။
နနု အတ္ထိ ကောစိ ဝီတရာဂံ စိတ္တံ။ပေ.။ သဒေါသံ စိတ္တံ။ ဝီတဒေါသံ စိတ္တံ။ သမောဟံ စိတ္တံ။ ဝီတမောဟံ စိတ္တံ။ သံခိတ္တံ စိတ္တံ။ ဝိက္ခိတ္တံ စိတ္တံ။ မဟဂ္ဂတံ စိတ္တံ။ အမဟဂ္ဂတံ စိတ္တံ။ သဥတ္တရံ စိတ္တံ။ အနုတ္တရံ စိတ္တံ။ သမာဟိတံ စိတ္တံ။ အသမာဟိတံ စိတ္တံ။ ဝိမုတ္တံ စိတ္တံ။ပေ.။ အဝိမုတ္တံ စိတ္တံ ‘‘အဝိမုတ္တံ စိတ္တ’’န္တိ ပဇာနာတီတိ? အာမန္တာ။ ဟဉ္စိ အတ္ထိ ကောစိ ‘‘အဝိမုတ္တံ စိတ္တံ အဝိမုတ္တံ စိတ္တ’’န္တိ ပဇာနာတိ, နော စ ဝတ ရေ ဝတ္တဗ္ဗေ – ‘‘စေတောပရိယာယေ ဉာဏံ စိတ္တာရမ္မဏညေဝ န အညာရမ္မဏ’’န္တိ။
၄၃၇. ဖဿာရမ္မဏေ ဉာဏံ ဝတ္တဗ္ဗံ – ‘‘စေတောပရိယာယေ ဉာဏ’’န္တိ? အာမန္တာ ။ ဟဉ္စိ ဖဿာရမ္မဏေ ဉာဏံ ဝတ္တဗ္ဗံ စေတောပရိယာယေ ဉာဏံ, နော စ ဝတ ရေ ဝတ္တဗ္ဗေ – ‘‘စေတောပရိယာယေ ဉာဏံ စိတ္တာရမ္မဏညေဝ န အညာရမ္မဏ’’န္တိ။ ဝေဒနာရမ္မဏေ ဉာဏံ။ပေ.။ သညာရမ္မဏေ ဉာဏံ။ စေတနာရမ္မဏေ ဉာဏံ။ စိတ္တာရမ္မဏေ ဉာဏံ။ သဒ္ဓါရမ္မဏေ ဉာဏံ။ ဝီရိယာရမ္မဏေ ဉာဏံ။ သတာရမ္မဏေ ဉာဏံ။ သမာဓါရမ္မဏေ ဉာဏံ။ ပညာရမ္မဏေ ဉာဏံ။ ရာဂါရမ္မဏေ ဉာဏံ ။ ဒေါသာရမ္မဏေ ဉာဏံ။ မောဟာရမ္မဏေ ဉာဏံ။ပေ.။ အနောတ္တပ္ပါရမ္မဏေ ဉာဏံ ဝတ္တဗ္ဗံ – ‘‘စေတောပရိယာယေ ဉာဏ’’န္တိ? အာမန္တာ။ ဟဉ္စိ အနောတ္တပ္ပါရမ္မဏေ ဉာဏံ ဝတ္တဗ္ဗံ စေတောပရိယာယေ ဉာဏံ, နော စ ဝတ ရေ ဝတ္တဗ္ဗေ – ‘‘စေတောပရိယာယေ ဉာဏံ စိတ္တာရမ္မဏညေဝ န အညာရမ္မဏ’’န္တိ။
ဖဿာရမ္မဏေ ဉာဏံ န ဝတ္တဗ္ဗံ – ‘‘စေတောပရိယာယေ ဉာဏ’’န္တိ? အာမန္တာ။ ဖဿပရိယာယေ ဉာဏန္တိ? န ဟေဝံ ဝတ္တဗ္ဗေ။ပေ.။ ဝေဒနာရမ္မဏေ ဉာဏံ။ပေ.။ သညာရမ္မဏေ ဉာဏံ။ပေ.။ အနောတ္တပ္ပါရမ္မဏေ ဉာဏံ န ဝတ္တဗ္ဗံ – ‘‘စေတောပရိယာယေ ဉာဏ’’န္တိ? အာမန္တာ။ အနောတ္တပ္ပပရိယာယေ ဉာဏန္တိ? န ဟေဝံ ဝတ္တဗ္ဗေ။ပေ.။။
၄၃၈. န ဝတ္တဗ္ဗံ – ‘‘စေတောပရိယာယေ ဉာဏံ စိတ္တာရမ္မဏညေဝ န အညာရမ္မဏ’’န္တိ? အာမန္တာ။ နနု စေတောပရိယာယေ ဉာဏန္တိ? အာမန္တာ။ ဟဉ္စိ စေတောပရိယာယေ ဉာဏံ, တေန ဝတ ရေ ဝတ္တဗ္ဗေ – ‘‘စေတောပရိယာယေ ဉာဏံ စိတ္တာရမ္မဏညေဝ န အညာရမ္မဏ’’န္တိ။
စိတ္တာရမ္မဏကထာ နိဋ္ဌိတာ။
၅. ပဉ္စမဝဂ္ဂေါ
(၅၀) ၈. အနာဂတဉာဏကထာ
၄၃၉. အနာဂတေ ဉာဏံ အတ္ထီတိ? အာမန္တာ။ အနာဂတံ မူလတော ဇာနာတိ, ဟေတုတော ဇာနာတိ, နိဒါနတော ဇာနာတိ, သမ္ဘဝတော ဇာနာတိ, ပဘဝတော ဇာနာတိ, သမုဋ္ဌာနတော ဇာနာတိ, အာဟာရတော ဇာနာတိ , အာရမ္မဏတော ဇာနာတိ, ပစ္စယတော ဇာနာတိ, သမုဒယတော ဇာနာတီတိ? န ဟေဝံ ဝတ္တဗ္ဗေ။ပေ.။။
အနာဂတေ ဉာဏံ အတ္ထီတိ? အာမန္တာ။ အနာဂတံ ဟေတုပစ္စယတံ ဇာနာတိ, အာရမ္မဏပစ္စယတံ ဇာနာတိ, အဓိပတိပစ္စယတံ ဇာနာတိ, အနန္တရပစ္စယတံ ဇာနာတိ, သမနန္တရပစ္စယတံ ဇာနာတီတိ? န ဟေဝံ ဝတ္တဗ္ဗေ။ပေ.။။
အနာဂတေ ဉာဏံ အတ္ထီတိ? အာမန္တာ။ ဂေါတြဘုနော ပုဂ္ဂလဿ သောတာပတ္တိမဂ္ဂေ ဉာဏံ အတ္ထီတိ? န ဟေဝံ ဝတ္တဗ္ဗေ။ပေ.။။ သောတာပတ္တိဖလသစ္ဆိကိရိယာယ ပဋိပန္နဿ ပုဂ္ဂလဿ သောတာပတ္တိဖလေ ဉာဏံ အတ္ထီတိ? န ဟေဝံ ဝတ္တဗ္ဗေ။ပေ.။။
သကဒါဂါမိ။ပေ.။ အနာဂါမိ ။ပေ.။ အရဟတ္တသစ္ဆိကိရိယာယ ပဋိပန္နဿ ပုဂ္ဂလဿ အရဟတ္တေ ဉာဏံ အတ္ထီတိ? န ဟေဝံ ဝတ္တဗ္ဗေ။ပေ.။။
၄၄၀. န ဝတ္တဗ္ဗံ – ‘‘အနာဂတေ ဉာဏံ အတ္ထီ’’တိ? အာမန္တာ။ နနု ဝုတ္တံ ဘဂဝတာ – ‘‘ပါဋလိပုတ္တဿ ခေါ, အာနန္ဒ, တယော အန္တရာယာ ဘဝိဿန္တိ – အဂ္ဂိတော ဝါ ဥဒကတော ဝါ မိထုဘေဒါ ဝါ’’တိ [မဟာဝ. ၂၈၆; ဒီ. နိ. ၂.၁၅၂; ဥဒါ. ၇၆]! အတ္ထေဝ သုတ္တန္တောတိ? အာမန္တာ။ တေန ဟိ အနာဂတေ ဉာဏံ အတ္ထီတိ။
အနာဂတဉာဏကထာ နိဋ္ဌိတာ။
၅. ပဉ္စမဝဂ္ဂေါ
(၅၁) ၉. ပဋုပ္ပန္နကထာ
၄၄၁. ပဋုပ္ပန္နေ [ပစ္စုပ္ပန္နေ (သီ. သျာ.)] ဉာဏံ အတ္ထီတိ? အာမန္တာ။ တေန ဉာဏေန တံ ဉာဏံ ဇာနာတီတိ? န ဟေဝံ ဝတ္တဗ္ဗေ။ပေ.။ တေန ဉာဏေန တံ ဉာဏံ ဇာနာတီတိ? အာမန္တာ။ တေန ဉာဏေန တံ ဉာဏံ ‘‘ဉာဏ’’န္တိ ဇာနာတီတိ? န ဟေဝံ ဝတ္တဗ္ဗေ။ပေ.။ တေန ဉာဏေန တံ ဉာဏံ ‘‘ဉာဏ’’န္တိ ဇာနာတီတိ? အာမန္တာ။ တံ ဉာဏံ တဿ ဉာဏဿ အာရမ္မဏန္တိ? န ဟေဝံ ဝတ္တဗ္ဗေ။ပေ.။။
တံ ဉာဏံ တဿ ဉာဏဿ အာရမ္မဏန္တိ? အာမန္တာ။ တေန ဖဿေန တံ ဖဿံ ဖုသတိ, တာယ ဝေဒနာယ တံ ဝေဒနံ ဝေဒေတိ, တာယ သညာယ တံ သညံ သဉ္ဇာနာတိ, တာယ စေတနာယ တံ စေတနံ စေတေတိ, တေန စိတ္တေန တံ စိတ္တံ စိန္တေတိ, တေန ဝိတက္ကေန တံ ဝိတက္ကံ ဝိတက္ကေတိ, တေန ဝိစာရေန တံ ဝိစာရံ ဝိစာရေတိ, တာယ ဣတိယာ တံ ဣတိံ ပိယာယတိ, တာယ သတိယာ တံ သတိံ သရတိ, တာယ ပညာယ တံ ပညံ ပဇာနာတိ, တေန ခဂ္ဂေန တံ ခဂ္ဂံ ဆိန္ဒတိ, တေန ဖရသုနာ တံ ဖရသုံ တစ္ဆတိ, တာယ ကုဓါရိယာ တံ ကုဓါရိံ တစ္ဆတိ, တာယ ဝါသိယာ တံ ဝါသိံ တစ္ဆတိ, တာယ သူစိယာ တံ သူစိံ သိဗ္ဗေတိ, တေန အင်္ဂုလဂ္ဂေန တံ အင်္ဂုလဂ္ဂံ ပရာမသတိ, တေန နာသိကဂ္ဂေန တံ နာသိကဂ္ဂံ ပရာမသတိ, တေန မတ္ထကေန တံ မတ္ထကံ ပရာမသတိ, တေန ဂူထေန တံ ဂူထံ ဓေါဝတိ, တေန မုတ္တေန တံ မုတ္တံ ဓေါဝတိ, တေန ခေဠေန တံ ခေဠံ ဓေါဝတိ, တေန ပုဗ္ဗေန တံ ပုဗ္ဗံ ဓေါဝတိ, တေန လောဟိတေန တံ လောဟိတံ ဓေါဝတီတိ? န ဟေဝံ ဝတ္တဗ္ဗေ ။ပေ.။။
၄၄၂. န ဝတ္တဗ္ဗံ – ‘‘ပဋုပ္ပန္နေ ဉာဏံ အတ္ထီ’’တိ? အာမန္တာ။ နနု သဗ္ဗသင်္ခါရေ အနိစ္စတော ဒိဋ္ဌေ တမ္ပိ ဉာဏံ အနိစ္စတော ဒိဋ္ဌံ ဟောတီတိ? အာမန္တာ။ ဟဉ္စိ သဗ္ဗသင်္ခါရေ အနိစ္စတော ဒိဋ္ဌေ တမ္ပိ ဉာဏံ အနိစ္စတော ဒိဋ္ဌံ ဟောတိ, တေန ဝတ ရေ ဝတ္တဗ္ဗေ – ‘‘ပဋုပ္ပန္နေ ဉာဏံ အတ္ထီ’’တိ။
ပဋုပ္ပန္နဉာဏကထာ [ပစ္စုပ္ပန္နကထာ (သီ.)] နိဋ္ဌိတာ။
၅. ပဉ္စမဝဂ္ဂေါ
(၅၂) ၁၀. ဖလဉာဏကထာ
၄၄၃. သာဝကဿ ဖလေ ဉာဏံ အတ္ထီတိ? အာမန္တာ။ သာဝကော ဖလဿ ကတံ ပညာပေတီတိ? န ဟေဝံ ဝတ္တဗ္ဗ။ပေ.။။
သာဝကဿ ဖလေ ဉာဏံ အတ္ထီတိ? အာမန္တာ။ အတ္ထိ သာဝကဿ ဖလပရောပရိယတ္တိ ဣန္ဒ္ရိယပရောပရိယတ္တိ ပုဂ္ဂလပရောပရိယတ္တီတိ? န ဟေဝံ ဝတ္တဗ္ဗေ။ပေ.။။
သာဝကဿ ဖလေ ဉာဏံ အတ္ထီတိ? အာမန္တာ။ အတ္ထိ သာဝကဿ ခန္ဓပညတ္တိ အာယတနပညတ္တိ ဓါတုပညတ္တိ သစ္စပညတ္တိ ဣန္ဒ္ရိယပညတ္တိ ပုဂ္ဂလပညတ္တီတိ? န ဟေဝံ ဝတ္တဗ္ဗေ။ပေ.။။
သာဝကဿ ဖလေ ဉာဏံ အတ္ထီတိ? အာမန္တာ။ သာဝကော ဇိနော သတ္ထာ သမ္မာသမ္ဗုဒ္ဓေါ သဗ္ဗညူ သဗ္ဗဒဿာဝီ ဓမ္မဿာမီ ဓမ္မပ္ပဋိသရဏောတိ? န ဟေဝံ ဝတ္တဗ္ဗေ။ပေ.။။
သာဝကဿ ဖလေ ဉာဏံ အတ္ထီတိ? အာမန္တာ။ သာဝကော အနုပ္ပန္နဿ မဂ္ဂဿ ဥပ္ပါဒေတာ အသဉ္ဇာတဿ မဂ္ဂဿ သဉ္ဇနေတာ အနက္ခာတဿ မဂ္ဂဿ အက္ခာတာ မဂ္ဂညူ မဂ္ဂဝိဒူ မဂ္ဂကောဝိဒေါတိ? န ဟေဝံ ဝတ္တဗ္ဗေ။ပေ.။။
၄၄၄. န ဝတ္တဗ္ဗံ – ‘‘သာဝကဿ ဖလေ ဉာဏံ အတ္ထီ’’တိ? အာမန္တာ။ သာဝကော အညာဏီတိ? န ဟေဝံ ဝတ္တဗ္ဗေ။ပေ.။ တေန ဟိ သာဝကဿ ဖလေ ဉာဏံ အတ္ထီတိ။ပေ.။။
ဖလဉာဏကထာ နိဋ္ဌိတာ။
ပဉ္စမဝဂ္ဂေါ။
တဿုဒ္ဒါနံ –
ဝိမုတ္တိဉာဏံ ဝိမုတ္တံ, သေခဿ အသေခံ ဉာဏံ, ဝိပရီတေ ဉာဏံ, အနိယတဿ နိယာမဂမနာယ အတ္ထိ ဉာဏံ, သဗ္ဗံ ဉာဏံ ပဋိသမ္ဘိဒါတိ, သမ္မုတိဉာဏံ, စေတောပရိယာယေ ဉာဏံ, အနာဂတေ ဉာဏံ, ပဋုပ္ပန္နေ ဉာဏံ, သာဝကဿ ဖလေ ဉာဏန္တိ။
မဟာပဏ္ဏာသကော။
တဿာပိ ဥဒ္ဒါနံ –
သတ္တုပလဒ္ဓိံ, ဥပဟရတော, ဗလံ, ဂိဟိဿ အရဟာ စ, ဝိမုတ္တိပဉ္စမန္တိ။