၄. စတုတ္ထဝဂ္ဂ
(၃၃) ၁. ဂိဟိဿ အရဟာတိကထာ
၃၈၇. ဂိဟိဿ အရဟာတိ? အာမန္တာ။ အတ္ထိ အရဟတော ဂိဟိသံယောဇနန္တိ? န ဟေဝံ ဝတ္တဗ္ဗေ။ပေ.။ နတ္ထိ အရဟတော ဂိဟိသံယောဇနန္တိ? အာမန္တာ။ ဟဉ္စိ နတ္ထိ အရဟတော ဂိဟိသံယောဇနံ, နော စ ဝတ ရေ ဝတ္တဗ္ဗေ – ‘‘ဂိဟိဿ အရဟာ’’တိ။
ဂိဟိဿ အရဟာတိ? အာမန္တာ။ နနု အရဟတော ဂိဟိသံယောဇနံ ပဟီနံ ဥစ္ဆိန္နမူလံ တာလာဝတ္ထုကတံ အနဘာဝင်္ကတံ အာယတိံ အနုပ္ပါဒဓမ္မန္တိ? အာမန္တာ။ ဟဉ္စိ အရဟတော ဂိဟိသံယောဇနံ ပဟီနံ ဥစ္ဆိန္နမူလံ တာလာဝတ္ထုကတံ အနဘာဝင်္ကတံ အာယတိံ အနုပ္ပါဒဓမ္မံ, နော စ ဝတ ရေ ဝတ္တဗ္ဗေ – ‘‘ဂိဟိဿ အရဟာ’’တိ။
ဂိဟိဿ အရဟာတိ? အာမန္တာ။ အတ္ထိ ကောစိ ဂိဟီ ဂိဟိသံယောဇနံ အပ္ပဟာယ ဒိဋ္ဌေဝ ဓမ္မေ ဒုက္ခဿန္တကရောတိ [မ. နိ. ၂.၁၈၆]? နတ္ထိ။ ဟဉ္စိ နတ္ထိ ကောစိ ဂိဟီ ဂိဟိသံယောဇနံ အပ္ပဟာယ ဒိဋ္ဌေဝ ဓမ္မေ ဒုက္ခဿန္တကရော, နော စ ဝတ ရေ ဝတ္တဗ္ဗေ – ‘‘ဂိဟိဿ အရဟာ’’တိ။
ဂိဟိဿ အရဟာတိ? အာမန္တာ။ နနု ဝစ္ဆဂေါတ္တော ပရိဗ္ဗာဇကော ဘဂဝန္တံ ဧတဒဝေါစ – ‘‘အတ္ထိ နု ခေါ, ဘော ဂေါတမ, ကောစိ ဂိဟီ ဂိဟိသံယောဇနံ အပ္ပဟာယ ကာယဿ ဘေဒါ ဒုက္ခဿန္တကရော’’တိ? ‘‘နတ္ထိ ခေါ, ဝစ္ဆ, ကောစိ ဂိဟီ ဂိဟိသံယောဇနံ အပ္ပဟာယ ကာယဿ ဘေဒါ ဒုက္ခဿန္တကရော’’တိ။ အတ္ထေဝ သုတ္တန္တောတိ? အာမန္တာ ။ တေန ဟိ န ဝတ္တဗ္ဗံ – ‘‘ဂိဟိဿ အရဟာ’’တိ။
ဂိဟိဿ အရဟာတိ? အာမန္တာ။ အရဟာ မေထုနံ ဓမ္မံ ပဋိသေဝေယျ, မေထုနံ ဥပ္ပါဒေယျ, ပုတ္တသမ္ဗာဓသယနံ အဇ္ဈာဝသေယျ, ကာသိကစန္ဒနံ ပစ္စနုဘဝေယျ, မာလာဂန္ဓဝိလေပနံ ဓါရေယျ, ဇာတရူပရဇတံ သာဒိယေယျ, အဇေဠကံ ပဋိဂ္ဂဏှေယျ, ကုက္ကုဋသူကရံ ပဋိဂ္ဂဏှေယျ, ဟတ္ထိဂဝဿဝဠဝံ ပဋိဂ္ဂဏှေယျ, တိတ္တိရဝဋ္ဋကမောရကပိဉ္ဇရံ [။ ကပိဉ္ဇလံ (သျာ. ကံ. ဣ.)] ပဋိဂ္ဂဏှေယျ, စိတ္တဝဏ္ဍဝါလမောဠိံ [ဣတဝဏ္ဋဝါလမောဠိကံ (သျာ. ကံ. ဣ.)] ဓါရေယျ, ဩဒါတာနိ ဝတ္ထာနိ ဒီဃဒသာနိ ဓါရေယျ, ယာဝဇီဝံ အဂါရိယဘူတော အဿာတိ? န ဟေဝံ ဝတ္တဗ္ဗေ။ပေ.။။
န ဝတ္တဗ္ဗံ – ‘‘ဂိဟိဿ အရဟာ’’တိ? အာမန္တာ။ နနု ယသော ကုလပုတ္တော, ဥတ္တိယော ဂဟပတိ, သေတု မာဏဝေါ, ဂိဟိဗျဉ္ဇနေန အရဟတ္တံ ပတ္တောတိ? အာမန္တာ။ ဟဉ္စိ ယသော ကုလပုတ္တော, ဥတ္တိယော ဂဟပတိ, သေတု မာဏဝေါ, ဂိဟိဗျဉ္ဇနေန အရဟတ္တံ ပတ္တော, တေန ဝတ ရေ ဝတ္တဗ္ဗေ – ‘‘ဂိဟိဿ အရဟာ’’တိ။
ဂိဟိဿ အရဟာတိကထာ နိဋ္ဌိတာ။
၄. စတုတ္ထဝဂ္ဂေါ
(၃၄) ၂. ဥပပတ္တိကထာ
၃၈၈. သဟ ဥပပတ္တိယာ အရဟာတိ? အာမန္တာ။ သဟ ဥပပတ္တိယာ သောတာပန္နော ဟောတီတိ? န ဟေဝံ ဝတ္တဗ္ဗေ။ပေ.။။
သဟ ဥပပတ္တိယာ အရဟာတိ? အာမန္တာ ။ သဟ ဥပပတ္တိယာ သကဒါဂါမီ ဟောတီတိ? န ဟေဝံ ဝတ္တဗ္ဗေ။ပေ.။။
သဟ ဥပပတ္တိယာ အရဟာတိ? အာမန္တာ။ သဟ ဥပပတ္တိယာ အနာဂါမီ ဟောတီတိ? န ဟေဝံ ဝတ္တဗ္ဗေ။ပေ.။။
သဟ ဥပပတ္တိယာ သောတာပန္နော န ဟောတီတိ? အာမန္တာ။ ဟဉ္စိ သဟ ဥပပတ္တိယာ သောတာပန္နော န ဟောတိ, နော စ ဝတ ရေ ဝတ္တဗ္ဗေ – ‘‘သဟ ဥပပတ္တိယာ အရဟာ’’တိ။
သဟ ဥပပတ္တိယာ သကဒါဂါမီ န ဟောတီတိ? အာမန္တာ။ ဟဉ္စိ သဟ ဥပပတ္တိယာ သကဒါဂါမီ န ဟောတိ, နော စ ဝတ ရေ ဝတ္တဗ္ဗေ – ‘‘သဟ ဥပပတ္တိယာ အရဟာ’’တိ။
သဟ ဥပပတ္တိယာ အနာဂါမီ န ဟောတီတိ? အာမန္တာ။ ဟဉ္စိ သဟ ဥပပတ္တိယာ အနာဂါမီ န ဟောတိ, နော စ ဝတ ရေ ဝတ္တဗ္ဗေ – ‘‘သဟ ဥပပတ္တိယာ အရဟာ’’တိ။
၃၈၉. သဟ ဥပပတ္တိယာ အရဟာတိ? အာမန္တာ။ သာရိပုတ္တော ထေရော သဟ ဥပပတ္တိယာ အရဟာတိ? န ဟေဝံ ဝတ္တဗ္ဗေ။ မဟာမောဂ္ဂလ္လာနော ထေရော ။ပေ.။ မဟာကဿပေါ ထေရော။ပေ.။ မဟာကစ္စာနော ထေရော။ပေ.။ မဟာကောဋ္ဌိကော ထေရော။ပေ.။ မဟာပန္ထကော ထေရော သဟ ဥပပတ္တိယာ အရဟာတိ? န ဟေဝံ ဝတ္တဗ္ဗေ။ပေ.။။
သာရိပုတ္တော ထေရော န သဟ ဥပပတ္တိယာ အရဟာတိ? အာမန္တာ။ ဟဉ္စိ သာရိပုတ္တော ထေရော န သဟ ဥပပတ္တိယာ အရဟာ, နော စ ဝတ ရေ ဝတ္တဗ္ဗေ – ‘‘သဟ ဥပပတ္တိယာ အရဟာ’’တိ။
မဟာမောဂ္ဂလ္လာနော ထေရော။ပေ.။ မဟာကဿပေါ ထေရော။ပေ.။ မဟာကစ္စာနော ထေရော။ပေ.။ မဟာကောဋ္ဌိကော ထေရော။ပေ.။ မဟာပန္ထကော ထေရော န သဟ ဥပပတ္တိယာ အရဟာတိ? အာမန္တာ။ ဟဉ္စိ မဟာပန္ထကော ထေရော န သဟ ဥပပတ္တိယာ အရဟာ, နော စ ဝတ ရေ ဝတ္တဗ္ဗေ – ‘‘သဟ ဥပပတ္တိယာ အရဟာ’’တိ။
၃၉၀. သဟ ဥပပတ္တိယာ အရဟာတိ? အာမန္တာ။ ဥပပတ္တေသိယေန စိတ္တေန အရဟတ္တံ သစ္ဆိကရောတိ လောကိယေန သာသဝေန။ပေ.။ သံကိလေသိယေနာတိ ? န ဟေဝံ ဝတ္တဗ္ဗေ။ပေ.။။
သဟ ဥပပတ္တိယာ အရဟာတိ? အာမန္တာ။ ဥပပတ္တေသိယံ စိတ္တံ နိယျာနိကံ ခယဂါမီ ဗောဓဂါမီ အပစယဂါမီ အနာသဝံ။ပေ.။ အသံကိလေသိယန္တိ? န ဟေဝံ ဝတ္တဗ္ဗေ။ပေ.။။
နနု ဥပပတ္တေသိယံ စိတ္တံ အနိယျာနိကံ န ခယဂါမိ န ဗောဓဂါမိ န အပစယဂါမိ သာသဝံ။ပေ.။ သံကိလေသိယန္တိ? အာမန္တာ။ ဟဉ္စိ ဥပပတ္တေသိယံ စိတ္တံ အနိယျာနိကံ န ခယဂါမိ န ဗောဓဂါမိ န အပစယဂါမိ သာသဝံ။ပေ.။ သံကိလေသိယံ, နော စ ဝတ ရေ ဝတ္တဗ္ဗေ – ‘‘သဟ ဥပပတ္တိယာ အရဟာ’’တိ။
သဟ ဥပပတ္တိယာ အရဟာတိ? အာမန္တာ။ ဥပပတ္တေသိယေန စိတ္တေန ရာဂံ ပဇဟတိ, ဒေါသံ ပဇဟတိ, မောဟံ ပဇဟတိ, အနောတ္တပ္ပံ ပဇဟတီတိ? န ဟေဝံ ဝတ္တဗ္ဗေ။ပေ.။။
သဟ ဥပပတ္တိယာ အရဟာတိ? အာမန္တာ။ ဥပပတ္တေသိယံ စိတ္တံ မဂ္ဂေါ။ သတိပဋ္ဌာနံ။ပေ.။ သမ္မပ္ပဓါနံ။ ဣဒ္ဓိပါဒေါ။ ဣန္ဒ္ရိယံ။ ဗလံ။ ဗောဇ္ဈင်္ဂေါတိ? န ဟေဝံ ဝတ္တဗ္ဗေ။ပေ.။။
သဟ ဥပပတ္တိယာ အရဟာတိ? အာမန္တာ။ ဥပပတ္တေသိယေန စိတ္တေန ဒုက္ခံ ပရိဇာနာတိ, သမုဒယံ ပဇဟတိ, နိရောဓံ သစ္ဆိကရောတိ, မဂ္ဂံ ဘာဝေတီတိ? န ဟေဝံ ဝတ္တဗ္ဗေ ။ပေ.။ သဟ ဥပပတ္တိယာ အရဟာတိ? အာမန္တာ။ စုတိစိတ္တံ မဂ္ဂစိတ္တံ ဥပပတ္တေသိယံ စိတ္တံ ဖလစိတ္တန္တိ? န ဟေဝံ ဝတ္တဗ္ဗေ။ပေ.။။
ဥပပတ္တိကထာ နိဋ္ဌိတာ။
၄. စတုတ္ထဝဂ္ဂေါ
(၃၅) ၃. အနာသဝကထာ
၃၉၁. အရဟတော သဗ္ဗေ ဓမ္မာ အနာသဝါတိ? အာမန္တာ။ မဂ္ဂေါ ဖလံ နိဗ္ဗာနံ, သောတာပတ္တိမဂ္ဂေါ သောတာပတ္တိဖလံ, သကဒါဂါမိမဂ္ဂေါ သကဒါဂါမိဖလံ, အနာဂါမိမဂ္ဂေါ အနာဂါမိဖလံ, အရဟတ္တမဂ္ဂေါ အရဟတ္တဖလံ, သတိပဋ္ဌာနံ သမ္မပ္ပဓါနံ ဣဒ္ဓိပါဒေါ ဣန္ဒ္ရိယံ ဗလံ ဗောဇ္ဈင်္ဂေါတိ? န ဟေဝံ ဝတ္တဗ္ဗေ။ပေ.။။
အရဟတော သဗ္ဗေ ဓမ္မာ အနာသဝါတိ? အာမန္တာ။ အရဟတော စက္ခုံ အနာသဝန္တိ? န ဟေဝံ ဝတ္တဗ္ဗေ။ပေ.။။ အရဟတော စက္ခုံ အနာသဝန္တိ? အာမန္တာ။ မဂ္ဂေါ ဖလံ နိဗ္ဗာနံ, သောတာပတ္တိမဂ္ဂေါ သောတာပတ္တိဖလံ။ပေ.။ ဗောဇ္ဈင်္ဂေါတိ? န ဟေဝံ ဝတ္တဗ္ဗေ။ပေ.။။
အရဟတော သောတံ။ပေ.။ အရဟတော ဃာနံ။ အရဟတော ဇိဝှာ။ အရဟတော ကာယော အနာသဝေါတိ? န ဟေဝံ ဝတ္တဗ္ဗေ ။ပေ.။ အရဟတော ကာယော အနာသဝေါတိ? အာမန္တာ။ မဂ္ဂေါ ဖလံ နိဗ္ဗာနံ, သောတာပတ္တိမဂ္ဂေါ သောတာပတ္တိဖလံ။ပေ.။ ဗောဇ္ဈင်္ဂေါတိ? န ဟေဝံ ဝတ္တဗ္ဗေ။ပေ.။။
အရဟတော ကာယော အနာသဝေါတိ? အာမန္တာ။ အရဟတော ကာယော ပဂ္ဂဟနိဂ္ဂဟုပဂေါ ဆေဒနဘေဒနုပဂေါ ကာကေဟိ ဂိဇ္ဈေဟိ ကုလလေဟိ သာဓါရဏောတိ? အာမန္တာ။ အနာသဝေါ ဓမ္မော ပဂ္ဂဟနိဂ္ဂဟုပဂေါ ဆေဒနဘေဒနုပဂေါ ကာကေဟိ ဂိဇ္ဈေဟိ ကုလလေဟိ သာဓါရဏောတိ? န ဟေဝံ ဝတ္တဗ္ဗေ ။ပေ.။။
အရဟတော ကာယေ ဝိသံ ကမေယျ, သတ္ထံ ကမေယျ, အဂ္ဂိ ကမေယျာတိ? အာမန္တာ။ အနာသဝေ ဓမ္မေ ဝိသံ ကမေယျ, သတ္ထံ ကမေယျ, အဂ္ဂိ ကမေယျာတိ? န ဟေဝံ ဝတ္တဗ္ဗေ။ပေ.။။
လဗ္ဘာ အရဟတော ကာယော အဒ္ဒုဗန္ဓနေန ဗန္ဓိတုံ, ရဇ္ဇုဗန္ဓနေန ဗန္ဓိတုံ, သင်္ခလိကဗန္ဓနေန ဗန္ဓိတုံ, ဂါမဗန္ဓနေန ဗန္ဓိတုံ, နိဂမဗန္ဓနေန ဗန္ဓိတုံ, နဂရဗန္ဓနေန ဗန္ဓိတုံ, ဇနပဒဗန္ဓနေန ဗန္ဓိတုံ , ကဏ္ဌပဉ္စမေဟိ ဗန္ဓနေဟိ ဗန္ဓိတုန္တိ? အာမန္တာ။ လဗ္ဘာ အနာသဝေါ ဓမ္မော အဒ္ဒုဗန္ဓနေန ဗန္ဓိတုံ, ရဇ္ဇုဗန္ဓနေန ဗန္ဓိတုံ, သင်္ခလိကဗန္ဓနေန ဗန္ဓိတုံ, ဂါမနိဂမနဂရဇနပဒဗန္ဓနေန ဗန္ဓိတုံ, ကဏ္ဌပဉ္စမေဟိ ဗန္ဓနေဟိ ဗန္ဓိတုန္တိ? န ဟေဝံ ဝတ္တဗ္ဗေ။ပေ.။။
၃၉၂. ယဒိ အရဟာ ပုထုဇ္ဇနဿ စီဝရံ ဒေတိ, အနာသဝံ ဟုတွာ သာသဝံ ဟောတီတိ? န ဟေဝံ ဝတ္တဗ္ဗေ။ပေ.။ အနာသဝံ ဟုတွာ သာသဝံ ဟောတီတိ? အာမန္တာ။ တညေဝ အနာသဝံ တံ သာသဝန္တိ? န ဟေဝံ ဝတ္တဗ္ဗေ။ပေ.။ တညေဝ အနာသဝံ တံ သာသဝန္တိ? အာမန္တာ။ မဂ္ဂေါ အနာသဝေါ ဟုတွာ သာသဝေါ ဟောတီတိ? န ဟေဝံ ဝတ္တဗ္ဗေ။ပေ.။ ဖလံ။ သတိပဋ္ဌာနံ။ သမ္မပ္ပဓါနံ။ ဣဒ္ဓိပါဒေါ။ ဣန္ဒ္ရိယံ။ ဗလံ။ ဗောဇ္ဈင်္ဂေါ အနာသဝေါ ဟုတွာ သာသဝေါ ဟောတီတိ? န ဟေဝံ ဝတ္တဗ္ဗေ။ပေ.။။
ယဒိ အရဟာ ပုထုဇ္ဇနဿ ပိဏ္ဍပါတံ ဒေတိ, သေနာသနံ ဒေတိ , ဂိလာနပစ္စယဘေသဇ္ဇပရိက္ခာရံ ဒေတိ, အနာသဝေါ ဟုတွာ သာသဝေါ ဟောတီတိ? န ဟေဝံ ဝတ္တဗ္ဗေ။ပေ.။ အနာသဝေါ ဟုတွာ သာသဝေါ ဟောတီတိ? အာမန္တာ။ တညေဝ အနာသဝံ တံ သာသဝန္တိ? န ဟေဝံ ဝတ္တဗ္ဗေ။ပေ.။ တညေဝ အနာသဝံ တံ သာသဝန္တိ? အာမန္တာ။ မဂ္ဂေါ အနာသဝေါ ဟုတွာ သာသဝေါ ဟောတီတိ? န ဟေဝံ ဝတ္တဗ္ဗေ။ပေ.။ ဖလံ။ သတိပဋ္ဌာနံ။ သမ္မပ္ပဓါနံ။ ဣဒ္ဓိပါဒေါ။ ဣန္ဒ္ရိယံ။ ဗလံ။ ဗောဇ္ဈင်္ဂေါ အနာသဝေါ ဟုတွာ သာသဝေါ ဟောတီတိ? န ဟေဝံ ဝတ္တဗ္ဗေ။ပေ.။။
ယဒိ ပုထုဇ္ဇနော အရဟတော စီဝရံ ဒေတိ, သာသဝံ ဟုတွာ အနာသဝံ ဟောတီတိ? န ဟေဝံ ဝတ္တဗ္ဗေ။ပေ.။ သာသဝံ ဟုတွာ အနာသဝံ ဟောတီတိ? အာမန္တာ။ တညေဝ သာသဝံ တံ အနာသဝန္တိ? န ဟေဝံ ဝတ္တဗ္ဗေ။ပေ.။ တညေဝ သာသဝံ တံ အနာသဝန္တိ? အာမန္တာ။ ရာဂေါ သာသဝေါ ဟုတွာ အနာသဝေါ ဟောတီတိ? န ဟေဝံ ဝတ္တဗ္ဗေ။ပေ.။ ဒေါသော။ပေ.။ မောဟော။ပေ.။ အနောတ္တပ္ပံ သာသဝံ ဟုတွာ အနာသဝံ ဟောတီတိ? န ဟေဝံ ဝတ္တဗ္ဗေ။ပေ.။။
ယဒိ ပုထုဇ္ဇနော အရဟတော ပိဏ္ဍပါတံ ဒေတိ, သေနာသနံ ဒေတိ, ဂိလာနပစ္စယဘေသဇ္ဇပရိက္ခာရံ ဒေတိ, သာသဝေါ ဟုတွာ အနာသဝေါ ဟောတီတိ? န ဟေဝံ ဝတ္တဗ္ဗေ။ပေ.။ သာသဝေါ ဟုတွာ အနာသဝေါ ဟောတီတိ? အာမန္တာ။ တညေဝ သာသဝံ တံ အနာသဝန္တိ? န ဟေဝံ ဝတ္တဗ္ဗေ။ပေ.။ တညေဝ သာသဝံ တံ အနာသဝန္တိ? အာမန္တာ။ ရာဂေါ သာသဝေါ ဟုတွာ အနာသဝေါ ဟောတီတိ ? န ဟေဝံ ဝတ္တဗ္ဗေ။ပေ.။ ဒေါသော။ပေ.။ မောဟော။ပေ.။ အနောတ္တပ္ပံ သာသဝံ ဟုတွာ အနာသဝံ ဟောတီတိ? န ဟေဝံ ဝတ္တဗ္ဗေ။ပေ.။။
န ဝတ္တဗ္ဗံ – ‘‘အရဟတော သဗ္ဗေ ဓမ္မာ အနာသဝါ’’တိ? အာမန္တာ။ နနု အရဟာ အနာသဝေါတိ? အာမန္တာ။ ဟဉ္စိ အရဟာ အနာသဝေါ, တေန ဝတ ရေ ဝတ္တဗ္ဗေ – ‘‘အရဟတော သဗ္ဗေ ဓမ္မာ အနာသဝါ’’တိ။
အနာသဝကထာ နိဋ္ဌိတာ။
၄. စတုတ္ထဝဂ္ဂေါ
(၃၆) ၄. သမန္နာဂတကထာ
၃၉၃. အရဟာ စတူဟိ ဖလေဟိ သမန္နာဂတောတိ? အာမန္တာ။ အရဟာ စတူဟိ ဖဿေဟိ စတူဟိ ဝေဒနာဟိ စတူဟိ သညာဟိ စတူဟိ စေတနာဟိ စတူဟိ စိတ္တေဟိ စတူဟိ သဒ္ဓါဟိ စတူဟိ ဝီရိယေဟိ စတူဟိ သတီဟိ စတူဟိ သမာဓီဟိ စတူဟိ ပညာဟိ သမန္နာဂတောတိ? န ဟေဝံ ဝတ္တဗ္ဗေ။ပေ.။။
အနာဂါမီ တီဟိ ဖလေဟိ သမန္နာဂတောတိ? အာမန္တာ။ အနာဂါမီ တီဟိ ဖဿေဟိ။ပေ.။ တီဟိ ပညာဟိ သမန္နာဂတောတိ? န ဟေဝံ ဝတ္တဗ္ဗေ။ပေ.။။
သကဒါဂါမီ ဒွီဟိ ဖလေဟိ သမန္နာဂတောတိ? အာမန္တာ။ သကဒါဂါမီ ဒွီဟိ ဖဿေဟိ။ပေ.။ ဒွီဟိ ပညာဟိ သမန္နာဂတောတိ? န ဟေဝံ ဝတ္တဗ္ဗေ။ပေ.။။
အရဟာ သောတာပတ္တိဖလေန သမန္နာဂတောတိ? အာမန္တာ။ အရဟာ သောတာပန္နော သတ္တက္ခတ္တုပရမော, ကောလင္ကောလော, ဧကဗီဇီတိ? န ဟေဝံ ဝတ္တဗ္ဗေ။ပေ.။ အရဟာ သကဒါဂါမိဖလေန သမန္နာဂတောတိ? အာမန္တာ။ အရဟာ သကဒါဂါမီတိ? န ဟေဝံ ဝတ္တဗ္ဗေ ။ပေ.။ အရဟာ အနာဂါမိဖလေန သမန္နာဂတောတိ? အာမန္တာ။ အရဟာ အနာဂါမီ, အန္တရာပရိနိဗ္ဗာယီ, ဥပဟစ္စပရိနိဗ္ဗာယီ, အသင်္ခါရပရိနိဗ္ဗာယီ, သသင်္ခါရပရိနိဗ္ဗာယီ, ဥဒ္ဓံသောတော အကနိဋ္ဌဂါမီတိ? န ဟေဝံ ဝတ္တဗ္ဗေ။ပေ.။။
အနာဂါမီ သောတာပတ္တိဖလေန သမန္နာဂတောတိ? အာမန္တာ။ အနာဂါမီ သောတာပန္နော သတ္တက္ခတ္တုပရမော, ကောလင္ကောလော, ဧကဗီဇီတိ? န ဟေဝံ ဝတ္တဗ္ဗေ ။ပေ.။ အနာဂါမီ သကဒါဂါမိဖလေန သမန္နာဂတောတိ? အာမန္တာ။ အနာဂါမီ သကဒါဂါမီတိ? န ဟေဝံ ဝတ္တဗ္ဗေ။ပေ.။။
သကဒါဂါမီ သောတာပတ္တိဖလေန သမန္နာဂတောတိ? အာမန္တာ။ သကဒါဂါမီ သောတာပန္နော သတ္တက္ခတ္တုပရမော, ကောလင္ကောလော, ဧကဗီဇီတိ? န ဟေဝံ ဝတ္တဗ္ဗေ။ပေ.။။
၃၉၄. သောတာပတ္တိဖလေန သမန္နာဂတော ‘‘သောတာပန္နော’’တိ ဝတ္တဗ္ဗောတိ? အာမန္တာ။ အရဟာ သောတာပတ္တိဖလေန သမန္နာဂတောတိ? အာမန္တာ။ သွေဝ အရဟာ, သော သောတာပန္နောတိ? န ဟေဝံ ဝတ္တဗ္ဗေ။ပေ.။။
သကဒါဂါမိဖလေန သမန္နာဂတော ‘‘သကဒါဂါမီ’’တိ ဝတ္တဗ္ဗောတိ? အာမန္တာ ။ အရဟာ သကဒါဂါမိဖလေန သမန္နာဂတောတိ? အာမန္တာ။ သွေဝ အရဟာ, သော သကဒါဂါမီတိ? န ဟေဝံ ဝတ္တဗ္ဗေ။ပေ.။။
အနာဂါမိဖလေန သမန္နာဂတော ‘‘အနာဂါမီ’’တိ ဝတ္တဗ္ဗောတိ? အာမန္တာ ။ အရဟာ အနာဂါမိဖလေန သမန္နာဂတောတိ? အာမန္တာ။ သွေဝ အရဟာ, သော အနာဂါမီတိ? န ဟေဝံ ဝတ္တဗ္ဗေ။ပေ.။။
သောတာပတ္တိဖလေန သမန္နာဂတော ‘‘သောတာပန္နော’’တိ ဝတ္တဗ္ဗောတိ? အာမန္တာ။ အနာဂါမီ သောတာပတ္တိဖလေန သမန္နာဂတောတိ? အာမန္တာ။ သွေဝ အနာဂါမီ, သော သောတာပန္နောတိ? န ဟေဝံ ဝတ္တဗ္ဗေ။ပေ.။။
သကဒါဂါမိဖလေန သမန္နာဂတော ‘‘သကဒါဂါမီ’’တိ ဝတ္တဗ္ဗောတိ? အာမန္တာ။ အနာဂါမီ သကဒါဂါမိဖလေန သမန္နာဂတောတိ? အာမန္တာ။ သွေဝ အနာဂါမီ, သော သကဒါဂါမီတိ? န ဟေဝံ ဝတ္တဗ္ဗေ။ပေ.။။
သောတာပတ္တိဖလေန သမန္နာဂတော ‘‘သောတာပန္နော’’တိ ဝတ္တဗ္ဗောတိ? အာမန္တာ။ သကဒါဂါမီ သောတာပတ္တိဖလေန သမန္နာဂတောတိ? အာမန္တာ။ သွေဝ သကဒါဂါမီ, သော သောတာပန္နောတိ? န ဟေဝံ ဝတ္တဗ္ဗေ။ပေ.။။
၃၉၅. အရဟာ သောတာပတ္တိဖလေန သမန္နာဂတောတိ? အာမန္တာ။ နနု အရဟာ သောတာပတ္တိဖလံ ဝီတိဝတ္တောတိ? အာမန္တာ။ ဟဉ္စိ အရဟာ သောတာပတ္တိဖလံ ဝီတိဝတ္တော, နော စ ဝတ ရေ ဝတ္တဗ္ဗေ – ‘‘အရဟာ သောတာပတ္တိဖလေန သမန္နာဂတော’’တိ။
အရဟာ သောတာပတ္တိဖလံ ဝီတိဝတ္တော တေန သမန္နာဂတောတိ? အာမန္တာ။ အရဟာ သောတာပတ္တိမဂ္ဂံ ဝီတိဝတ္တော, သက္ကာယဒိဋ္ဌိံ ဝိစိကိစ္ဆံ သီလဗ္ဗတပရာမာသံ, အပါယဂမနီယံ ရာဂံ, အပါယဂမနီယံ ဒေါသံ, အပါယဂမနီယံ မောဟံ ဝီတိဝတ္တော တေန သမန္နာဂတောတိ? န ဟေဝံ ဝတ္တဗ္ဗေ။ပေ.။။
အရဟာ သကဒါဂါမိဖလေန သမန္နာဂတောတိ? အာမန္တာ။ နနု အရဟာ သကဒါဂါမိဖလံ ဝီတိဝတ္တောတိ? အာမန္တာ။ ဟဉ္စိ အရဟာ သကဒါဂါမိဖလံ ဝီတိဝတ္တော, နော စ ဝတ ရေ ဝတ္တဗ္ဗေ – ‘‘အရဟာ သကဒါဂါမိဖလေန သမန္နာဂတော’’တိ။
အရဟာ သကဒါဂါမိဖလံ ဝီတိဝတ္တော တေန သမန္နာဂတောတိ? အာမန္တာ။ အရဟာ သကဒါဂါမိမဂ္ဂံ ဝီတိဝတ္တော, ဩဠာရိကံ ကာမရာဂံ, ဩဠာရိကံ ဗျာပါဒံ ဝီတိဝတ္တော တေန သမန္နာဂတောတိ? န ဟေဝံ ဝတ္တဗ္ဗေ။ပေ.။။
အရဟာ အနာဂါမိဖလေန သမန္နာဂတောတိ? အာမန္တာ။ နနု အရဟာ အနာဂါမိဖလံ ဝီတိဝတ္တောတိ? အာမန္တာ။ ဟဉ္စိ အရဟာ အနာဂါမိဖလံ ဝီတိဝတ္တော, နော စ ဝတ ရေ ဝတ္တဗ္ဗေ – ‘‘အရဟာ အနာဂါမိဖလေန သမန္နာဂတော’’တိ။
အရဟာ အနာဂါမိဖလံ ဝီတိဝတ္တော တေန သမန္နာဂတောတိ? အာမန္တာ။ အရဟာ အနာဂါမိမဂ္ဂံ ဝီတိဝတ္တော, အဏုသဟဂတံ ကာမရာဂံ, အဏုသဟဂတံ ဗျာပါဒံ ဝီတိဝတ္တော တေန သမန္နာဂတောတိ? န ဟေဝံ ဝတ္တဗ္ဗေ။ပေ.။။
အနာဂါမီ သောတာပတ္တိဖလေန သမန္နာဂတောတိ? အာမန္တာ။ နနု အနာဂါမီ သောတာပတ္တိဖလံ ဝီတိဝတ္တောတိ? အာမန္တာ။ ဟဉ္စိ အနာဂါမီ သောတာပတ္တိဖလံ ဝီတိဝတ္တော, နော စ ဝတ ရေ ဝတ္တဗ္ဗေ – ‘‘အနာဂါမီ သောတာပတ္တိဖလေန သမန္နာဂတော’’တိ။
အနာဂါမီ သောတာပတ္တိဖလံ ဝီတိဝတ္တော တေန သမန္နာဂတောတိ? အာမန္တာ ။ အနာဂါမီ သောတာပတ္တိမဂ္ဂံ ဝီတိဝတ္တော, သက္ကာယဒိဋ္ဌိံ။ပေ.။ အပါယဂမနီယံ မောဟံ ဝီတိဝတ္တော တေန သမန္နာဂတောတိ? န ဟေဝံ ဝတ္တဗ္ဗေ။ပေ.။။
အနာဂါမီ သကဒါဂါမိဖလေန သမန္နာဂတောတိ? အာမန္တာ။ နနု အနာဂါမီ သကဒါဂါမိဖလံ ဝီတိဝတ္တောတိ? အာမန္တာ။ ဟဉ္စိ အနာဂါမီ သကဒါဂါမိဖလံ ဝီတိဝတ္တော, နော စ ဝတ ရေ ဝတ္တဗ္ဗေ – ‘‘အနာဂါမီ သကဒါဂါမိဖလေန သမန္နာဂတော’’တိ။
အနာဂါမီ သကဒါဂါမိဖလံ ဝီတိဝတ္တော တေန သမန္နာဂတောတိ? အာမန္တာ။ အနာဂါမီ သကဒါဂါမိမဂ္ဂံ ဝီတိဝတ္တော, ဩဠာရိကံ ကာမရာဂံ, ဩဠာရိကံ ဗျာပါဒံ ဝီတိဝတ္တော တေန သမန္နာဂတောတိ? န ဟေဝံ ဝတ္တဗ္ဗေ။ပေ.။။
သကဒါဂါမီ သောတာပတ္တိဖလေန သမန္နာဂတောတိ? အာမန္တာ။ နနု သကဒါဂါမီ သောတာပတ္တိဖလံ ဝီတိဝတ္တောတိ? အာမန္တာ။ ဟဉ္စိ သကဒါဂါမီ သောတာပတ္တိဖလံ ဝီတိဝတ္တော, နော စ ဝတ ရေ ဝတ္တဗ္ဗေ – ‘‘သကဒါဂါမီ သောတာပတ္တိဖလေန သမန္နာဂတော’’တိ။
သကဒါဂါမီ သောတာပတ္တိဖလံ ဝီတိဝတ္တော တေန သမန္နာဂတောတိ? အာမန္တာ။ သကဒါဂါမီ သောတာပတ္တိမဂ္ဂံ ဝီတိဝတ္တော, သက္ကာယဒိဋ္ဌိံ။ပေ.။ အပါယဂမနီယံ မောဟံ ဝီတိဝတ္တော တေန သမန္နာဂတောတိ? န ဟေဝံ ဝတ္တဗ္ဗေ။ပေ.။။
၃၉၆. န ဝတ္တဗ္ဗံ – ‘‘အရဟာ စတူဟိ ဖလေဟိ သမန္နာဂတော’’တိ? အာမန္တာ ။ နနု အရဟတာ စတ္တာရိ ဖလာနိ ပဋိလဒ္ဓါနိ, တေဟိ စ အပရိဟီနောတိ? အာမန္တာ ။ ဟဉ္စိ အရဟတာ စတ္တာရိ ဖလာနိ ပဋိလဒ္ဓါနိ တေဟိ စ အပရိဟီနော, တေန ဝတ ရေ ဝတ္တဗ္ဗေ – ‘‘အရဟာ စတူဟိ ဖလေဟိ သမန္နာဂတော’’တိ။
န ဝတ္တဗ္ဗံ – ‘‘အနာဂါမီ တီဟိ ဖလေဟိ သမန္နာဂတော’’တိ? အာမန္တာ။ နနု အနာဂါမိနာ တီဏိ ဖလာနိ ပဋိလဒ္ဓါနိ, တေဟိ စ အပရိဟီနောတိ? အာမန္တာ။ ဟဉ္စိ အနာဂါမိနာ တီဏိ ဖလာနိ ပဋိလဒ္ဓါနိ တေဟိ စ အပရိဟီနော, တေန ဝတ ရေ ဝတ္တဗ္ဗေ – ‘‘အနာဂါမီ တီဟိ ဖလေဟိ သမန္နာဂတော’’တိ။
န ဝတ္တဗ္ဗံ – ‘‘သကဒါဂါမီ ဒွီဟိ ဖလေဟိ သမန္နာဂတော’’တိ? အာမန္တာ။ နနု သကဒါဂါမိနာ ဒွေ ဖလာနိ ပဋိလဒ္ဓါနိ, တေဟိ စ အပရိဟီနောတိ? အာမန္တာ။ ဟဉ္စိ သကဒါဂါမိနာ ဒွေ ဖလာနိ ပဋိလဒ္ဓါနိ တေဟိ စ အပရိဟီနော, တေန ဝတ ရေ ဝတ္တဗ္ဗေ – ‘‘သကဒါဂါမီ ဒွီဟိ ဖလေဟိ သမန္နာဂတော’’တိ။
အရဟတာ စတ္တာရိ ဖလာနိ ပဋိလဒ္ဓါနိ တေဟိ စ အပရိဟီနောတိ, အရဟာ စတူဟိ ဖလေဟိ သမန္နာဂတောတိ? အာမန္တာ။ အရဟတာ စတ္တာရော မဂ္ဂါ ပဋိလဒ္ဓါ တေဟိ စ အပရိဟီနောတိ, အရဟာ စတူဟိ မဂ္ဂေဟိ သမန္နာဂတောတိ? န ဟေဝံ ဝတ္တဗ္ဗေ။ပေ.။။
အနာဂါမိနာ တီဏိ ဖလာနိ ပဋိလဒ္ဓါနိ တေဟိ စ အပရိဟီနောတိ, အနာဂါမီ တီဟိ ဖလေဟိ သမန္နာဂတောတိ? အာမန္တာ။ အနာဂါမိနာ တယော မဂ္ဂါ ပဋိလဒ္ဓါ တေဟိ စ အပရိဟီနောတိ, အနာဂါမီ တီဟိ မဂ္ဂေဟိ သမန္နာဂတောတိ? န ဟေဝံ ဝတ္တဗ္ဗေ။ပေ.။။
သကဒါဂါမိနာ ဒွေ ဖလာနိ ပဋိလဒ္ဓါနိ တေဟိ စ အပရိဟီနောတိ, သကဒါဂါမီ ဒွီဟိ ဖလေဟိ သမန္နာဂတောတိ? အာမန္တာ။ သကဒါဂါမိနာ ဒွေ မဂ္ဂါ ပဋိလဒ္ဓါ, တေဟိ စ အပရိဟီနောတိ, သကဒါဂါမီ ဒွီဟိ မဂ္ဂေဟိ သမန္နာဂတောတိ? န ဟေဝံ ဝတ္တဗ္ဗေ။ပေ.။။
သမန္နာဂတကထာ နိဋ္ဌိတာ။
၄. စတုတ္ထဝဂ္ဂေါ
(၃၇) ၅. ဥပေက္ခာသမန္နာဂတကထာ
၃၉၇. အရဟာ ဆဟိ ဥပေက္ခာဟိ သမန္နာဂတောတိ? အာမန္တာ။ အရဟာ ဆဟိ ဖဿေဟိ, ဆဟိ ဝေဒနာဟိ, ဆဟိ သညာဟိ။ပေ.။ ဆဟိ ပညာဟိ သမန္နာဂတောတိ? န ဟေဝံ ဝတ္တဗ္ဗေ။ပေ.။။
အရဟာ ဆဟိ ဥပေက္ခာဟိ သမန္နာဂတောတိ? အာမန္တာ။ အရဟာ စက္ခုနာ ရူပံ ပဿန္တော သောတေန သဒ္ဒံ သုဏာတိ, ဃာနေန ဂန္ဓံ ဃာယတိ, ဇိဝှာယ ရသံ သာယတိ, ကာယေန ဖောဋ္ဌဗ္ဗံ ဖုသတိ, မနသာ ဓမ္မံ ဝိဇာနာတိ။ပေ.။ မနသာ ဓမ္မံ ဝိဇာနန္တော စက္ခုနာ ရူပံ ပဿတိ, သောတေန သဒ္ဒံ သုဏာတိ, ဃာနေန ဂန္ဓံ ဃာယတိ, ဇိဝှာယ ရသံ သာယတိ, ကာယေန ဖောဋ္ဌဗ္ဗံ ဖုသတီတိ? န ဟေဝံ ဝတ္တဗ္ဗေ။ပေ.။။
အရဟာ ဆဟိ ဥပေက္ခာဟိ သမန္နာဂတောတိ? အာမန္တာ။ သတတံ သမိတံ အဗ္ဗောကိဏ္ဏံ ဆဟိ ဥပေက္ခာဟိ သမန္နာဂတော သမောဟိတော [သမာဟိတော (သျာ.)], ဆ ဥပေက္ခာယော ပစ္စုပဋ္ဌိတာတိ? န ဟေဝံ ဝတ္တဗ္ဗေ။ပေ.။။
န ဝတ္တဗ္ဗံ – ‘‘အရဟာ ဆဟိ ဥပေက္ခာဟိ သမန္နာဂတော’’တိ? အာမန္တာ။ နနု အရဟာ ဆဠင်္ဂုပေက္ခောတိ? အာမန္တာ။ ဟဉ္စိ အရဟာ ဆဠင်္ဂုပေက္ခော, တေန ဝတ ရေ ဝတ္တဗ္ဗေ – ‘‘အရဟာ ဆဟိ ဥပေက္ခာဟိ သမန္နာဂတော’’တိ။ပေ.။။
ဥပေက္ခာသမန္နာဂတကထာ နိဋ္ဌိတာ။
၄. စတုတ္ထဝဂ္ဂေါ
(၃၈) ၆. ဗောဓိယာ ဗုဒ္ဓေါတိကထာ
၃၉၈. ဗောဓိယာ ဗုဒ္ဓေါတိ? အာမန္တာ။ ဗောဓိယာ နိရုဒ္ဓါယ ဝိဂတာယ ပဋိပဿဒ္ဓါယ အဗုဒ္ဓေါ ဟောတီတိ? န ဟေဝံ ဝတ္တဗ္ဗေ။ပေ.။။
ဗောဓိယာ ဗုဒ္ဓေါတိ? အာမန္တာ။ အတီတာယ ဗောဓိယာ ဗုဒ္ဓေါတိ? န ဟေဝံ ဝတ္တဗ္ဗေ။ပေ.။ အတီတာယ ဗောဓိယာ ဗုဒ္ဓေါတိ? အာမန္တာ။ တာယ ဗောဓိယာ ဗောဓိကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။။
တာယ ဗောဓိယာ ဗောဓိကရဏီယံ ကရောတီတိ? အာမန္တာ။ တာယ ဗောဓိယာ ဒုက္ခံ ပရိဇာနာတိ, သမုဒယံ ပဇဟတိ, နိရောဓံ သစ္ဆိကရောတိ, မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
ဗောဓိယာ ဗုဒ္ဓေါတိ? အာမန္တာ။ အနာဂတာယ ဗောဓိယာ ဗုဒ္ဓေါတိ ? န ဟေဝံ ဝတ္တဗ္ဗေ။ပေ.။။
အနာဂတာယ ဗောဓိယာ ဗုဒ္ဓေါတိ? အာမန္တာ။ တာယ ဗောဓိယာ ဗောဓိကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။။
တာယ ဗောဓိယာ ဗောဓိကရဏီယံ ကရောတီတိ? အာမန္တာ။ တာယ ဗောဓိယာ ဒုက္ခံ ပရိဇာနာတိ။ပေ.။ မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
ပစ္စုပ္ပန္နာယ ဗောဓိယာ ဗုဒ္ဓေါ, တာယ ဗောဓိယာ ဗောဓိကရဏီယံ ကရောတီတိ? အာမန္တာ။ အတီတာယ ဗောဓိယာ ဗုဒ္ဓေါ, တာယ ဗောဓိယာ ဗောဓိကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။။
ပစ္စုပ္ပန္နာယ ဗောဓိယာ ဗုဒ္ဓေါ, တာယ ဗောဓိယာ ဒုက္ခံ ပရိဇာနာတိ, သမုဒယံ ပဇဟတိ, နိရောဓံ သစ္ဆိကရောတိ, မဂ္ဂံ ဘာဝေတီတိ? အာမန္တာ။ အတီတာယ ဗောဓိယာ ဗုဒ္ဓေါ, တာယ ဗောဓိယာ ဒုက္ခံ ပရိဇာနာတိ။ပေ.။ မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
ပစ္စုပ္ပန္နာယ ဗောဓိယာ ဗုဒ္ဓေါ, တာယ ဗောဓိယာ ဗောဓိကရဏီယံ ကရောတီတိ? အာမန္တာ။ အနာဂတာယ ဗောဓိယာ ဗုဒ္ဓေါ, တာယ ဗောဓိယာ ဗောဓိကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။။
ပစ္စုပ္ပန္နာယ ဗောဓိယာ ဗုဒ္ဓေါ, တာယ ဗောဓိယာ ဒုက္ခံ ပရိဇာနာတိ။ပေ.။ မဂ္ဂံ ဘာဝေတီတိ ? အာမန္တာ။ အနာဂတာယ ဗောဓိယာ ဗုဒ္ဓေါ, တာယ ဗောဓိယာ ဒုက္ခံ ပရိဇာနာတိ။ပေ.။ မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
အတီတာယ ဗောဓိယာ ဗုဒ္ဓေါ, န စ တာယ ဗောဓိယာ ဗောဓိကရဏီယံ ကရောတီတိ? အာမန္တာ။ ပစ္စုပ္ပန္နာယ ဗောဓိယာ ဗုဒ္ဓေါ, န စ တာယ ဗောဓိယာ ဗောဓိကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။။
အတီတာယ ဗောဓိယာ ဗုဒ္ဓေါ, န စ တာယ ဗောဓိယာ ဒုက္ခံ ပရိဇာနာတိ။ပေ.။ မဂ္ဂံ ဘာဝေတီတိ? အာမန္တာ။ ပစ္စုပ္ပန္နာယ ဗောဓိယာ ဗုဒ္ဓေါ, န စ တာယ ဗောဓိယာ ဒုက္ခံ ပရိဇာနာတိ။ပေ.။ မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
အနာဂတာယ ဗောဓိယာ ဗုဒ္ဓေါ, န စ တာယ ဗောဓိယာ ဗောဓိကရဏီယံ ကရောတီတိ? အာမန္တာ။ ပစ္စုပ္ပန္နာယ ဗောဓိယာ ဗုဒ္ဓေါ, န စ တာယ ဗောဓိယာ ဗောဓိကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။။
အနာဂတာယ ဗောဓိယာ ဗုဒ္ဓေါ, န စ တာယ ဗောဓိယာ ဒုက္ခံ ပရိဇာနာတိ။ပေ.။ မဂ္ဂံ ဘာဝေတီတိ? အာမန္တာ။ ပစ္စုပ္ပန္နာယ ဗောဓိယာ ဗုဒ္ဓေါ, န စ တာယ ဗောဓိယာ ဒုက္ခံ ပရိဇာနာတိ။ပေ.။ မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
၃၉၉. အတီတာယ ဗောဓိယာ ဗုဒ္ဓေါ, အနာဂတာယ ဗောဓိယာ ဗုဒ္ဓေါ, ပစ္စုပ္ပန္နာယ ဗောဓိယာ ဗုဒ္ဓေါတိ? အာမန္တာ။ တီဟိ ဗောဓီဟိ ဗုဒ္ဓေါတိ? န ဟေဝံ ဝတ္တဗ္ဗေ။ပေ.။။
တီဟိ ဗောဓီဟိ ဗုဒ္ဓေါတိ? အာမန္တာ။ သတတံ သမိတံ အဗ္ဗောကိဏ္ဏံ တီဟိ ဗောဓီဟိ သမန္နာဂတော သမောဟိတော, တိဿော ဗောဓိယော ပစ္စုပဋ္ဌိတာတိ? န ဟေဝံ ဝတ္တဗ္ဗေ။ပေ.။။
န ဝတ္တဗ္ဗံ – ‘‘ဗောဓိယာ ဗုဒ္ဓေါ’’တိ? အာမန္တာ။ နနု ဗောဓိပဋိလာဘာ ဗုဒ္ဓေါတိ? အာမန္တာ။ ဟဉ္စိ ဗောဓိပဋိလာဘာ ဗုဒ္ဓေါ, တေန ဝတ ရေ ဝတ္တဗ္ဗေ – ‘‘ဗောဓိယာ ဗုဒ္ဓေါ’’တိ။
ဗောဓိပဋိလာဘာ ဗုဒ္ဓေါတိ, ဗောဓိယာ ဗုဒ္ဓေါတိ? အာမန္တာ။ ဗောဓိပဋိလာဘာ ဗောဓီတိ? န ဟေဝံ ဝတ္တဗ္ဗေ။ပေ.။။
ဗောဓိယာ ဗုဒ္ဓေါတိကထာ နိဋ္ဌိတာ။
၄. စတုတ္ထဝဂ္ဂေါ
(၃၉) ၇. လက္ခဏကထာ
၄၀၀. လက္ခဏသမန္နာဂတော ဗောဓိသတ္တောတိ? အာမန္တာ။ ပဒေသလက္ခဏေဟိ သမန္နာဂတော ပဒေသဗောဓိသတ္တောတိ? န ဟေဝံ ဝတ္တဗ္ဗေ။ပေ.။။
လက္ခဏသမန္နာဂတော ဗောဓိသတ္တောတိ? အာမန္တာ ။ တိဘာဂလက္ခဏေဟိ သမန္နာဂတော တိဘာဂဗောဓိသတ္တောတိ? န ဟေဝံ ဝတ္တဗ္ဗေ။ပေ.။။
လက္ခဏသမန္နာဂတော ဗောဓိသတ္တောတိ? အာမန္တာ။ ဥပဍ္ဎလက္ခဏေဟိ သမန္နာဂတော ဥပဍ္ဎဗောဓိသတ္တောတိ? န ဟေဝံ ဝတ္တဗ္ဗေ။ပေ.။။
လက္ခဏသမန္နာဂတော ဗောဓိသတ္တောတိ? အာမန္တာ။ စက္ကဝတ္တိသတ္တော လက္ခဏသမန္နာဂတော, စက္ကဝတ္တိသတ္တော ဗောဓိသတ္တောတိ? န ဟေဝံ ဝတ္တဗ္ဗေ။ပေ.။။
စက္ကဝတ္တိသတ္တော လက္ခဏသမန္နာဂတော, စက္ကဝတ္တိသတ္တော ဗောဓိသတ္တောတိ? အာမန္တာ။ ယာဒိသော ဗောဓိသတ္တဿ ပုဗ္ဗယောဂေါ ပုဗ္ဗစရိယာ ဓမ္မက္ခာနံ ဓမ္မဒေသနာ, တာဒိသော စက္ကဝတ္တိသတ္တဿ ပုဗ္ဗယောဂေါ ပုဗ္ဗစရိယာ ဓမ္မက္ခာနံ ဓမ္မဒေသနာတိ? န ဟေဝံ ဝတ္တဗ္ဗေ။ပေ.။။
၄၀၁. ယထာ ဗောဓိသတ္တဿ ဇာယမာနဿ ဒေဝါ ပဌမံ ပဋိဂ္ဂဏှန္တိ ပစ္ဆာ မနုဿာ [ဒီ. နိ. ၂.၂၇; မ. နိ. ၃.၂၀၅ ဝုတ္တံ ဒိဿာယ ပုစ္ဆတိ], ဧဝမေဝံ စက္ကဝတ္တိသတ္တဿ ဇာယမာနဿ ဒေဝါ ပဌမံ ပဋိဂ္ဂဏှန္တိ ပစ္ဆာ မနုဿာတိ? န ဟေဝံ ဝတ္တဗ္ဗေ။ပေ.။။
ယထာ ဗောဓိသတ္တဿ ဇာယမာနဿ စတ္တာရော နံ ဒေဝပုတ္တာ ပဋိဂ္ဂဟေတွာ မာတု ပုရတော ဌပေန္တိ – ‘‘အတ္တမနာ, ဒေဝိ, ဟောဟိ! မဟေသက္ခော တေ ပုတ္တော ဥပ္ပန္နော’’တိ, ဧဝမေဝံ စက္ကဝတ္တိသတ္တဿ ဇာယမာနဿ စတ္တာရော နံ ဒေဝပုတ္တာ ပဋိဂ္ဂဟေတွာ မာတု ပုရတော ဌပေန္တိ – ‘‘အတ္တမနာ, ဒေဝိ, ဟောဟိ! မဟေသက္ခော တေ ပုတ္တော ဥပ္ပန္နော’’တိ? န ဟေဝံ ဝတ္တဗ္ဗေ။ပေ.။။
ယထာ ဗောဓိသတ္တဿ ဇာယမာနဿ ဒွေ ဥဒကဿ ဓါရာ အန္တလိက္ခာ ပါတုဘဝန္တိ – ဧကာ သီတဿ, ဧကာ ဥဏှဿ – ယေန ဗောဓိသတ္တဿ ဥဒကကိစ္စံ ကရောန္တိ မာတု စ, ဧဝမေဝံ စက္ကဝတ္တိသတ္တဿ ဇာယမာနဿ ဒွေ ဥဒကဿ ဓါရာ အန္တလိက္ခာ ပါတုဘဝန္တိ – ဧကာ သီတဿ, ဧကာ ဥဏှဿ – ယေန စက္ကဝတ္တိသတ္တဿ ဥဒကကိစ္စံ ကရောန္တိ မာတု စာတိ? န ဟေဝံ ဝတ္တဗ္ဗေ။ပေ.။။
ယထာ သမ္ပတိဇာတော ဗောဓိသတ္တော သမေဟိ ပါဒေဟိ ပတိဋ္ဌဟိတွာ ဥတ္တရေန အဘိမုခေါ သတ္တပဒဝီတိဟာရေန ဂစ္ဆတိ သေတမှိ ဆတ္တေ အနုဓါရိယမာနေ, သဗ္ဗာ စ ဒိသာ ဝိလောကေတိ, အာသဘိဉ္စ ဝါစံ ဘာသတိ – ‘‘အဂ္ဂေါဟမသ္မိ လောကဿ, ဇေဋ္ဌောဟမသ္မိ လောကဿ, သေဋ္ဌောဟမသ္မိ လောကဿ, အယမန္တိမာ ဇာတိ, နတ္ထိ ဒါနိ ပုနဗ္ဘဝေါ’’တိ, ဧဝမေဝံ သမ္ပတိဇာတော စက္ကဝတ္တိသတ္တော သမေဟိ ပါဒေဟိ ပတိဋ္ဌဟိတွာ ဥတ္တရေန အဘိမုခေါ သတ္တပဒဝီတိဟာရေန ဂစ္ဆတိ သေတမှိ ဆတ္တေ အနုဓါရိယမာနေ, သဗ္ဗာ စ ဒိသာ ဝိလောကေတိ, အာသဘိဉ္စ ဝါစံ ဘာသတိ – ‘‘အဂ္ဂေါဟမသ္မိ လောကဿ, ဇေဋ္ဌောဟမသ္မိ လောကဿ, သေဋ္ဌောဟမသ္မိ လောကဿ, အယမန္တိမာ ဇာတိ, နတ္ထိ ဒါနိ ပုနဗ္ဘဝေါ’’တိ? န ဟေဝံ ဝတ္တဗ္ဗေ။ပေ.။။
ယထာ ဗောဓိသတ္တဿ ဇာယမာနဿ မဟတော အာလောကဿ မဟတော ဩဘာသဿ မဟတော ဘူမိစာလဿ ပါတုဘာဝေါ ဟောတိ, ဧဝမေဝံ စက္ကဝတ္တိသတ္တဿ ဇာယမာနဿ မဟတော အာလောကဿ မဟတော ဩဘာသဿ မဟတော ဘူမိစာလဿ ပါတုဘာဝေါ ဟောတီတိ? န ဟေဝံ ဝတ္တဗ္ဗေ။ပေ.။။
ယထာ ဗောဓိသတ္တဿ ပကတိကာယော သမန္တာ ဗျာမံ ဩဘာသတိ, ဧဝမေဝံ စက္ကဝတ္တိသတ္တဿ ပကတိကာယော သမန္တာ ဗျာမံ ဩဘာသတီတိ? န ဟေဝံ ဝတ္တဗ္ဗေ။ပေ.။။
ယထာ ဗောဓိသတ္တော မဟာသုပိနံ ပဿတိ, ဧဝမေဝံ စက္ကဝတ္တိသတ္တော မဟာသုပိနံ ပဿတီတိ? န ဟေဝံ ဝတ္တဗ္ဗေ။ပေ.။။
၄၀၂. န ဝတ္တဗ္ဗံ – ‘‘လက္ခဏသမန္နာဂတော ဗောဓိသတ္တော’’တိ? အာမန္တာ။ နနု ဝုတ္တံ ဘဂဝတာ – ‘‘ဒွတ္တိံသိမာနိ, ဘိက္ခဝေ, မဟာပုရိသဿ မဟာပုရိသလက္ခဏာနိ, ယေဟိ သမန္နာဂတဿ မဟာပုရိသဿ ဒွေဝ ဂတိယော ဘဝန္တိ အနညာ [န အညာ (က.)]! သစေ အဂါရံ အဇ္ဈာဝသတိ, ရာဇာ ဟောတိ စက္ကဝတ္တီ ဓမ္မိကော ဓမ္မရာဇာ စာတုရန္တော ဝိဇိတာဝီ ဇနပဒတ္ထာဝရိယပ္ပတ္တော သတ္တရတနသမန္နာဂတော။ တဿိမာနိ သတ္တ ရတနာနိ ဘဝန္တိ, သေယျထိဒံ – စက္ကရတနံ, ဟတ္ထိရတနံ, အဿရတနံ , မဏိရတနံ, ဣတ္ထိရတနံ, ဂဟပတိရတနံ, ပရိဏာယကရတနမေဝ သတ္တမံ။ ပရောသဟဿံ ခေါ ပနဿ ပုတ္တာ ဘဝန္တိ သူရာ ဝီရင်္ဂရူပါ ပရသေနပ္ပမဒ္ဒနာ။ သော ဣမံ ပထဝိံ သာဂရပရိယန္တံ အဒဏ္ဍေန အသတ္ထေန ဓမ္မေန အဘိဝိဇိယ အဇ္ဈာဝသတိ။ သစေ ခေါ ပန အဂါရသ္မာ အနဂါရိယံ ပဗ္ဗဇတိ, အရဟံ ဟောတိ သမ္မာသမ္ဗုဒ္ဓေါ လောကေ ဝိဝဋ္ဋစ္ဆဒေါ’’တိ [ဒီ. နိ. ၃.၂၀၀]။ အတ္ထေဝ သုတ္တန္တောတိ? အာမန္တာ။ တေန ဟိ လက္ခဏသမန္နာဂတော ဗောဓိသတ္တောတိ။
လက္ခဏကထာ နိဋ္ဌိတာ။
၄. စတုတ္ထဝဂ္ဂေါ
(၄၀) ၈. နိယာမောက္ကန္တိကထာ
၄၀၃. ဗောဓိသတ္တော ကဿပဿ ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယောတိ [မ. နိ. ၂.၂၈၂ ဃဋိကာရသုတ္တံ နိဿာယ ပုစ္ဆတိ]? အာမန္တာ။ ဗောဓိသတ္တော ကဿပဿ ဘဂဝတော သာဝကောတိ? န ဟေဝံ ဝတ္တဗ္ဗေ။ပေ.။။
ဗောဓိသတ္တော ကဿပဿ ဘဂဝတော သာဝကောတိ? အာမန္တာ။ သာဝကော ဟုတွာ ဗုဒ္ဓေါ ဟောတီတိ? န ဟေဝံ ဝတ္တဗ္ဗေ။ပေ.။။
သာဝကော ဟုတွာ ဗုဒ္ဓေါ ဟောတီတိ? အာမန္တာ။ အနုဿဝိယောတိ? န ဟေဝံ ဝတ္တဗ္ဗေ။ပေ.။။
အနုဿဝိယောတိ ? အာမန္တာ။ နနု ဘဂဝါ သယမ္ဘူတိ? အာမန္တာ။ ဟဉ္စိ ဘဂဝါ သယမ္ဘူ, နော စ ဝတ ရေ ဝတ္တဗ္ဗေ – ‘‘အနုဿဝိယော’’တိ။
ဗောဓိသတ္တော ကဿပဿ ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယောတိ? အာမန္တာ။ ဘဂဝတာ ဗောဓိယာ မူလေ တီဏေဝ သာမညဖလာနိ အဘိသမ္ဗုဒ္ဓါနီတိ? န ဟေဝံ ဝတ္တဗ္ဗေ။ပေ.။။
နနု ဘဂဝတာ ဗောဓိယာ မူလေ စတ္တာရိ သာမညဖလာနိ အဘိသမ္ဗုဒ္ဓါနီတိ? အာမန္တာ။ ဟဉ္စိ ဘဂဝတာ ဗောဓိယာ မူလေ စတ္တာရိ သာမညဖလာနိ အဘိသမ္ဗုဒ္ဓါနိ, နော စ ဝတ ရေ ဝတ္တဗ္ဗေ – ‘‘ဗောဓိသတ္တော ကဿပဿ ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယော’’တိ။
၄၀၄. ဗောဓိသတ္တော ကဿပဿ ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယောတိ? အာမန္တာ။ ဗောဓိသတ္တော ဒုက္ကရကာရိယံ အကာသီတိ? အာမန္တာ။ ဒဿနသမ္ပန္နော ပုဂ္ဂလော ဒုက္ကရကာရိယံ ကရေယျာတိ? န ဟေဝံ ဝတ္တဗ္ဗေ။ပေ.။။
ဗောဓိသတ္တော အပရန္တပံ [အမရံ တပံ (သံ. နိ. ၁.၁၃၇)] အကာသိ, အညံ သတ္ထာရံ ဥဒ္ဒိသီတိ? အာမန္တာ။ ဒဿနသမ္ပန္နော ပုဂ္ဂလော အညံ သတ္ထာရံ ဥဒ္ဒိသေယျာတိ? န ဟေဝံ ဝတ္တဗ္ဗေ။ပေ.။။
အာယသ္မာ အာနန္ဒော ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယော, အာယသ္မာ အာနန္ဒော ဘဂဝတော သာဝကောတိ? အာမန္တာ။ ဗောဓိသတ္တော ကဿပဿ ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယော , ဗောဓိသတ္တော ကဿပဿ ဘဂဝတော သာဝကောတိ? န ဟေဝံ ဝတ္တဗ္ဗေ။ပေ.။။
စိတ္တော ဂဟပတိ ဟတ္ထကော အာဠဝကော ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယော, စိတ္တော ဂဟပတိ ဟတ္ထကော အာဠဝကော ဘဂဝတော သာဝကောတိ? အာမန္တာ။ ဗောဓိသတ္တော ကဿပဿ ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယော, ဗောဓိသတ္တော ကဿပဿ ဘဂဝတော သာဝကောတိ? န ဟေဝံ ဝတ္တဗ္ဗေ။ပေ.။။
ဗောဓိသတ္တော ကဿပဿ ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယော, န စ ကဿပဿ ဘဂဝတော သာဝကောတိ? အာမန္တာ။ အာယသ္မာ အာနန္ဒော ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယော, န စ ဘဂဝတော သာဝကောတိ? န ဟေဝံ ဝတ္တဗ္ဗေ။ပေ.။။
ဗောဓိသတ္တော ကဿပဿ ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယော, န စ ကဿပဿ ဘဂဝတော သာဝကောတိ? အာမန္တာ။ စိတ္တော ဂဟပတိ ဟတ္ထကော အာဠဝကော ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယော, န စ ဘဂဝတော သာဝကောတိ? န ဟေဝံ ဝတ္တဗ္ဗေ။ပေ.။။
ဗောဓိသတ္တော ကဿပဿ ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယော, န စ ကဿပဿ ဘဂဝတော သာဝကောတိ? အာမန္တာ။ သာဝကော ဇာတိံ ဝီတိဝတ္တော အသာဝကော ဟောတီတိ? န ဟေဝံ ဝတ္တဗ္ဗေ။ပေ.။။
၄၀၅. န ဝတ္တဗ္ဗံ – ‘‘ဗောဓိသတ္တော ကဿပဿ ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယော’’တိ? အာမန္တာ။ နနု ဝုတ္တံ ဘဂဝတာ – ‘‘ကဿပေ အဟံ, အာနန္ဒ, ဘဂဝတိ ဗြဟ္မစရိယံ အစရိံ အာယတိံ သမ္ဗောဓါယာ’’တိ! အတ္ထေဝ သုတ္တန္တောတိ? အာမန္တာ ။ တေန ဟိ န ဝတ္တဗ္ဗံ – ‘‘ဗောဓိသတ္တော ကဿပဿ ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယော’’တိ။
ဗောဓိသတ္တော ကဿပဿ ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယောတိ? အာမန္တာ။ နနု ဝုတ္တံ ဘဂဝတာ –
‘‘သဗ္ဗာဘိဘူ သဗ္ဗဝိဒူဟမသ္မိ၊
သဗ္ဗေသု ဓမ္မေသု အနုပလိတ္တော။
သဗ္ဗဉ္ဇဟော တဏှက္ခယေ ဝိမုတ္တော၊
သယံ အဘိညာယ ကမုဒ္ဒိသေယျံ။
‘‘န မေ အာစရိယော အတ္ထိ၊ သဒိသော မေ န ဝိဇ္ဇတိ။
သဒေဝကသ္မိံ လောကသ္မိံ၊ နတ္ထိ မေ ပဋိပုဂ္ဂလော။
‘‘အဟဉှိ အရဟာ လောကေ၊ အဟံ သတ္ထာ အနုတ္တရော။
ဧကောမှိ သမ္မာသမ္ဗုဒ္ဓေါ၊ သီတိဘူတောသ္မိ နိဗ္ဗုတော။
‘‘ဓမ္မစက္ကံ ပဝတ္တေတုံ၊ ဂစ္ဆာမိ ကာသိနံ ပုရံ။
အန္ဓီဘူတသ္မိံ [အန္ဓဘူတသ္မိံ (သီ. သျာ. ကံ. ဣ.)] လောကသ္မိံ၊ အာဟဉ္ဆံ [အာဟညိံ (က.)] အမတဒုန္ဒုဘိ’’န္တိ [ဒုဒြဘိန္တိ (က.)]။
‘‘ယထာ ခေါ တွံ, အာဝုသော, ပဋိဇာနာသိ, အရဟသိ အနန္တဇိနော’’တိ?
‘‘မာဒိသာ ဝေ ဇိနာ ဟောန္တိ၊ ယေ ပတ္တာ အာသဝက္ခယံ။
ဇိတာ မေ ပါပကာ ဓမ္မာ၊ တသ္မာဟံ ဥပက ဇိနော’’တိ [မဟာဝ. ၁၁; မ. နိ. ၁.၂၈၅; ၂.၃၄၁]။
အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ဗောဓိသတ္တော ကဿပဿ ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယော’’တိ။
ဗောဓိသတ္တော ကဿပဿ ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယောတိ? အာမန္တာ။ နနု ဝုတ္တံ ဘဂဝတာ – ‘‘‘ဣဒံ ဒုက္ခံ အရိယသစ္စ’န္တိ မေ, ဘိက္ခဝေ, ပုဗ္ဗေ အနနုဿုတေသု ဓမ္မေသု စက္ခုံ ဥဒပါဒိ, ဉာဏံ ဥဒပါဒိ, ပညာ ဥဒပါဒိ, ဝိဇ္ဇာ ဥဒပါဒိ, အာလောကော ဥဒပါဒိ။ ‘တံ ခေါ ပနိဒံ ဒုက္ခံ အရိယသစ္စံ ပရိညေယျ’န္တိ မေ, ဘိက္ခဝေ။ပေ.။ ပရိညာတန္တိ မေ, ဘိက္ခဝေ, ပုဗ္ဗေ အနနုဿုတေသု ဓမ္မေသု စက္ခုံ ဥဒပါဒိ။ပေ.။ အာလောကော ဥဒပါဒိ။ ‘ဣဒံ ဒုက္ခသမုဒယံ အရိယသစ္စ’န္တိ မေ, ဘိက္ခဝေ။ပေ.။ ‘တံ ခေါ ပနိဒံ ဒုက္ခသမုဒယံ [ဒုက္ခသမုဒယော (သျာ. ကံ.)] အရိယသစ္စံ ပဟာတဗ္ဗ’န္တိ မေ, ဘိက္ခဝေ။ပေ.။ ပဟီနန္တိ မေ, ဘိက္ခဝေ။ပေ.။ ‘ဣဒံ ဒုက္ခနိရောဓံ [ဒုက္ခနိရောဓေါ (သျာ. ကံ.)] အရိယသစ္စ’န္တိ မေ, ဘိက္ခဝေ။ပေ.။ ‘တံ ခေါ ပနိဒံ ဒုက္ခနိရောဓံ အရိယသစ္စံ သစ္ဆိကာတဗ္ဗ’န္တိ မေ, ဘိက္ခဝေ။ပေ.။ သစ္ဆိကတန္တိ မေ, ဘိက္ခဝေ။ပေ.။ ‘ဣဒံ ဒုက္ခနိရောဓဂါမိနီ ပဋိပဒါ အရိယသစ္စ’န္တိ မေ, ဘိက္ခဝေ။ပေ.။ ‘တံ ခေါ ပနိဒံ ဒုက္ခနိရောဓဂါမိနီ ပဋိပဒါ အရိယသစ္စံ ဘာဝေတဗ္ဗ’န္တိ မေ, ဘိက္ခဝေ။ပေ.။ ဘာဝိတန္တိ မေ, ဘိက္ခဝေ, ပုဗ္ဗေ အနနုဿုတေသု ဓမ္မေသု စက္ခုံ ဥဒပါဒိ, ဉာဏံ ဥဒပါဒိ, ပညာ ဥဒပါဒိ, ဝိဇ္ဇာ ဥဒပါဒိ, အာလောကော ဥဒပါဒီ’’တိ [မဟာဝ. ၁၅; သံ. နိ. ၅.၁၀၈၁; ပဋိ. မ. ၂.၃၀]။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ဗောဓိသတ္တော ကဿပဿ ဘဂဝတော ပါဝစနေ ဩက္ကန္တနိယာမော စရိတဗြဟ္မစရိယော’’တိ။
နိယာမောက္ကန္တိကထာ နိဋ္ဌိတာ။
၄. စတုတ္ထဝဂ္ဂေါ
(၄၁) ၉. အပရာပိ သမန္နာဂတကထာ
၄၀၆. အရဟတ္တသစ္ဆိကိရိယာယ ပဋိပန္နော ပုဂ္ဂလော တီဟိ ဖလေဟိ သမန္နာဂတောတိ? အာမန္တာ။ အရဟတ္တသစ္ဆိကိရိယာယ ပဋိပန္နော ပုဂ္ဂလော စတူဟိ ဖဿေဟိ စတူဟိ ဝေဒနာဟိ စတူဟိ သညာဟိ စတူဟိ စေတနာဟိ စတူဟိ စိတ္တေဟိ စတူဟိ သဒ္ဓါဟိ စတူဟိ ဝီရိယေဟိ စတူဟိ သတီဟိ စတူဟိ သမာဓီဟိ စတူဟိ ပညာဟိ သမန္နာဂတောတိ? န ဟေဝံ ဝတ္တဗ္ဗေ။ပေ.။။
အနာဂါမိဖလသစ္ဆိကိရိယာယ ပဋိပန္နော ပုဂ္ဂလော ဒွီဟိ ဖလေဟိ သမန္နာဂတောတိ? အာမန္တာ။ အနာဂါမိဖလသစ္ဆိကိရိယာယ ပဋိပန္နော ပုဂ္ဂလော တီဟိ ဖဿေဟိ တီဟိ ဝေဒနာဟိ။ပေ.။ တီဟိ ပညာဟိ သမန္နာဂတောတိ? န ဟေဝံ ဝတ္တဗ္ဗေ။ပေ.။။
သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလေန သမန္နာဂတောတိ? အာမန္တာ။ သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော ဒွီဟိ ဖဿေဟိ ဒွီဟိ ဝေဒနာဟိ။ပေ.။ ဒွီဟိ ပညာဟိ သမန္နာဂတောတိ? န ဟေဝံ ဝတ္တဗ္ဗေ။ပေ.။။
အရဟတ္တသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလေန သမန္နာဂတောတိ? အာမန္တာ။ အရဟတ္တသစ္ဆိကိရိယာယ ပဋိပန္နော ပုဂ္ဂလော သောတာပန္နော သတ္တက္ခတ္တုပရမော, ကောလင္ကောလော, ဧကဗီဇီတိ? န ဟေဝံ ဝတ္တဗ္ဗေ။ပေ.။။
အရဟတ္တသစ္ဆိကိရိယာယ ပဋိပန္နော ပုဂ္ဂလော သကဒါဂါမိဖလေန သမန္နာဂတောတိ? အာမန္တာ။ အရဟတ္တသစ္ဆိကိရိယာယ ပဋိပန္နော ပုဂ္ဂလော သကဒါဂါမီတိ? န ဟေဝံ ဝတ္တဗ္ဗေ။ပေ.။။
အရဟတ္တသစ္ဆိကိရိယာယ ပဋိပန္နော ပုဂ္ဂလော အနာဂါမိဖလေန သမန္နာဂတောတိ? အာမန္တာ။ အရဟတ္တသစ္ဆိကိရိယာယ ပဋိပန္နော ပုဂ္ဂလော အနာဂါမီ အန္တရာပရိနိဗ္ဗာယီ, ဥပဟစ္စပရိနိဗ္ဗာယီ, အသင်္ခါရပရိနိဗ္ဗာယီ, သသင်္ခါရပရိနိဗ္ဗာယီ, ဥဒ္ဓံသောတော အကနိဋ္ဌဂါမီတိ? န ဟေဝံ ဝတ္တဗ္ဗေ။ပေ.။။
အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလေန သမန္နာဂတောတိ? အာမန္တာ ။ အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပန္နော သတ္တက္ခတ္တုပရမော, ကောလင္ကောလော, ဧကဗီဇီတိ? န ဟေဝံ ဝတ္တဗ္ဗေ။ပေ.။။
အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သကဒါဂါမိဖလေန သမန္နာဂတောတိ? အာမန္တာ။ အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သကဒါဂါမီတိ? န ဟေဝံ ဝတ္တဗ္ဗေ။ပေ.။။
သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလေန သမန္နာဂတောတိ? အာမန္တာ။ သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပန္နော သတ္တက္ခတ္တုပရမော, ကောလင္ကောလော, ဧကဗီဇီတိ? န ဟေဝံ ဝတ္တဗ္ဗေ။ပေ.။။
၄၀၇. သောတာပတ္တိဖလေန သမန္နာဂတော သောတာပန္နောတိ ဝတ္တဗ္ဗောတိ? အာမန္တာ ။ အရဟတ္တသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလေန သမန္နာဂတောတိ? အာမန္တာ။ သွေဝ အရဟတ္တသစ္ဆိကိရိယာယ ပဋိပန္နော ပုဂ္ဂလော, သော သောတာပန္နောတိ? န ဟေဝံ ဝတ္တဗ္ဗေ။ပေ.။။
သကဒါဂါမိဖလေန သမန္နာဂတော သကဒါဂါမီတိ ဝတ္တဗ္ဗောတိ? အာမန္တာ။ အရဟတ္တသစ္ဆိကိရိယာယ ပဋိပန္နော ပုဂ္ဂလော သကဒါဂါမိဖလေန သမန္နာဂတောတိ? အာမန္တာ။ သွေဝ အရဟတ္တသစ္ဆိကိရိယာယ ပဋိပန္နော ပုဂ္ဂလော, သော သကဒါဂါမီတိ? န ဟေဝံ ဝတ္တဗ္ဗေ။ပေ.။။
အနာဂါမိဖလေန သမန္နာဂတော အနာဂါမီတိ ဝတ္တဗ္ဗောတိ? အာမန္တာ။ အရဟတ္တသစ္ဆိကိရိယာယ ပဋိပန္နော ပုဂ္ဂလော အနာဂါမိဖလေန သမန္နာဂတောတိ? အာမန္တာ ။ သွေဝ အရဟတ္တသစ္ဆိကိရိယာယ ပဋိပန္နော ပုဂ္ဂလော, သော အနာဂါမီတိ? န ဟေဝံ ဝတ္တဗ္ဗေ။ပေ.။။
သောတာပတ္တိဖလေန သမန္နာဂတော သောတာပန္နောတိ ဝတ္တဗ္ဗောတိ? အာမန္တာ။ အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလေန သမန္နာဂတောတိ? အာမန္တာ။ သွေဝ အနာဂါမိဖလသစ္ဆိကိရိယာယ ပဋိပန္နော ပုဂ္ဂလော, သော သောတာပန္နောတိ? န ဟေဝံ ဝတ္တဗ္ဗေ။ပေ.။။
သကဒါဂါမိဖလေန သမန္နာဂတော သကဒါဂါမီတိ ဝတ္တဗ္ဗောတိ? အာမန္တာ။ အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သကဒါဂါမိဖလေန သမန္နာဂတောတိ? အာမန္တာ။ သွေဝ အနာဂါမိဖလသစ္ဆိကိရိယာယ ပဋိပန္နော ပုဂ္ဂလော, သော သကဒါဂါမီတိ? န ဟေဝံ ဝတ္တဗ္ဗေ။ပေ.။။
သောတာပတ္တိဖလေန သမန္နာဂတော သောတာပန္နောတိ ဝတ္တဗ္ဗောတိ? အာမန္တာ ။ သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလေန သမန္နာဂတောတိ? အာမန္တာ။ သွေဝ သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော, သော သောတာပန္နောတိ? န ဟေဝံ ဝတ္တဗ္ဗေ။ပေ.။။
၄၀၈. အရဟတ္တသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလေန သမန္နာဂတောတိ? အာမန္တာ။ နနု အရဟတ္တသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလံ ဝီတိဝတ္တောတိ? အာမန္တာ။ ဟဉ္စိ အရဟတ္တသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလံ ဝီတိဝတ္တော, နော စ ဝတ ရေ ဝတ္တဗ္ဗေ – ‘‘အရဟတ္တသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလေန သမန္နာဂတော’’တိ။
အရဟတ္တသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလံ ဝီတိဝတ္တော, တေန သမန္နာဂတောတိ? အာမန္တာ။ အရဟတ္တသစ္ဆိကိရိယာယ ပဋိပန္နော ပုဂ္ဂလော သောတာပတ္တိမဂ္ဂံ ဝီတိဝတ္တော, သက္ကာယဒိဋ္ဌိံ ဝိစိကိစ္ဆံ သီလဗ္ဗတပရာမာသံ အပါယဂမနီယံ ရာဂံ အပါယဂမနီယံ ဒေါသံ အပါယဂမနီယံ မောဟံ ဝီတိဝတ္တော, တေန သမန္နာဂတောတိ? န ဟေဝံ ဝတ္တဗ္ဗေ။ပေ.။။
အရဟတ္တသစ္ဆိကိရိယာယ ပဋိပန္နော ပုဂ္ဂလော သကဒါဂါမိဖလေန သမန္နာဂတောတိ? အာမန္တာ။ နနု အရဟတ္တသစ္ဆိကိရိယာယ ပဋိပန္နော ပုဂ္ဂလော သကဒါဂါမိဖလံ ဝီတိဝတ္တောတိ? အာမန္တာ။ ဟဉ္စိ အရဟတ္တသစ္ဆိကိရိယာယ ပဋိပန္နော ပုဂ္ဂလော သကဒါဂါမိဖလံ ဝီတိဝတ္တော, နော စ ဝတ ရေ ဝတ္တဗ္ဗေ – ‘‘အရဟတ္တသစ္ဆိကိရိယာယ ပဋိပန္နော ပုဂ္ဂလော သကဒါဂါမိဖလေန သမန္နာဂတော’’တိ။
အရဟတ္တသစ္ဆိကိရိယာယ ပဋိပန္နော ပုဂ္ဂလော သကဒါဂါမိဖလံ ဝီတိဝတ္တော, တေန သမန္နာဂတောတိ? အာမန္တာ။ အရဟတ္တသစ္ဆိကိရိယာယ ပဋိပန္နော ပုဂ္ဂလော သကဒါဂါမိမဂ္ဂံ ဝီတိဝတ္တော, ဩဠာရိကံ ကာမရာဂံ ဩဠာရိကံ ဗျာပါဒံ ဝီတိဝတ္တော, တေန သမန္နာဂတောတိ? န ဟေဝံ ဝတ္တဗ္ဗေ။ပေ.။။
အရဟတ္တသစ္ဆိကိရိယာယ ပဋိပန္နော ပုဂ္ဂလော အနာဂါမိဖလေန သမန္နာဂတောတိ? အာမန္တာ။ နနု အရဟတ္တသစ္ဆိကိရိယာယ ပဋိပန္နော ပုဂ္ဂလော အနာဂါမိဖလံ ဝီတိဝတ္တောတိ? အာမန္တာ။ ဟဉ္စိ အရဟတ္တသစ္ဆိကိရိယာယ ပဋိပန္နော ပုဂ္ဂလော အနာဂါမိဖလံ ဝီတိဝတ္တော, နော စ ဝတ ရေ ဝတ္တဗ္ဗေ – ‘‘အရဟတ္တသစ္ဆိကိရိယာယ ပဋိပန္နော ပုဂ္ဂလော အနာဂါမိဖလေန သမန္နာဂတော’’တိ။
အရဟတ္တသစ္ဆိကိရိယာယ ပဋိပန္နော ပုဂ္ဂလော အနာဂါမိဖလံ ဝီတိဝတ္တော, တေန သမန္နာဂတောတိ? အာမန္တာ။ အရဟတ္တသစ္ဆိကိရိယာယ ပဋိပန္နော ပုဂ္ဂလော အနာဂါမိမဂ္ဂံ ဝီတိဝတ္တော, အဏုသဟဂတံ ကာမရာဂံ အဏုသဟဂတံ ဗျာပါဒံ ဝီတိဝတ္တော, တေန သမန္နာဂတောတိ? န ဟေဝံ ဝတ္တဗ္ဗေ။ပေ.။။
၄၀၉. အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလေန သမန္နာဂတောတိ? အာမန္တာ။ နနု အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလံ ဝီတိဝတ္တောတိ? အာမန္တာ။ ဟဉ္စိ အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလံ ဝီတိဝတ္တော, နော စ ဝတ ရေ ဝတ္တဗ္ဗေ – ‘‘အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလေန သမန္နာဂတော’’တိ။
အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလံ ဝီတိဝတ္တော, တေန သမန္နာဂတောတိ? အာမန္တာ။ အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိမဂ္ဂံ ဝီတိဝတ္တော, သက္ကာယဒိဋ္ဌိံ။ပေ.။ အပါယဂမနီယံ မောဟံ ဝီတိဝတ္တော, တေန သမန္နာဂတောတိ? န ဟေဝံ ဝတ္တဗ္ဗေ။ပေ.။။
အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သကဒါဂါမိဖလေန သမန္နာဂတောတိ? အာမန္တာ။ နနု အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သကဒါဂါမိဖလံ ဝီတိဝတ္တောတိ? အာမန္တာ။ ဟဉ္စိ အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သကဒါဂါမိဖလံ ဝီတိဝတ္တော, နော စ ဝတ ရေ ဝတ္တဗ္ဗေ – ‘‘အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သကဒါဂါမိဖလေန သမန္နာဂတော’’တိ။
အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သကဒါဂါမိဖလံ ဝီတိဝတ္တော, တေန သမန္နာဂတောတိ? အာမန္တာ ။ အနာဂါမိဖလသစ္ဆိကိရိယာယ ပဋိပန္နော ပုဂ္ဂလော သကဒါဂါမိမဂ္ဂံ ဝီတိဝတ္တော, ဩဠာရိကံ ကာမရာဂံ ဩဠာရိကံ ဗျာပါဒံ ဝီတိဝတ္တော, တေန သမန္နာဂတောတိ? န ဟေဝံ ဝတ္တဗ္ဗေ။ပေ.။။
၄၁၀. သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလေန သမန္နာဂတောတိ? အာမန္တာ။ နနု သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလံ ဝီတိဝတ္တောတိ? အာမန္တာ။ ဟဉ္စိ သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလံ ဝီတိဝတ္တော, နော စ ဝတ ရေ ဝတ္တဗ္ဗေ – ‘‘သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလေန သမန္နာဂတော’’တိ။
သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလံ ဝီတိဝတ္တော, တေန သမန္နာဂတောတိ? အာမန္တာ။ သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိမဂ္ဂံ ဝီတိဝတ္တော , သက္ကာယဒိဋ္ဌိံ။ပေ.။ အပါယဂမနီယံ မောဟံ ဝီတိဝတ္တော, တေန သမန္နာဂတောတိ? န ဟေဝံ ဝတ္တဗ္ဗေ။ပေ.။။
၄၁၁. န ဝတ္တဗ္ဗံ – ‘‘အရဟတ္တသစ္ဆိကိရိယာယ ပဋိပန္နော ပုဂ္ဂလော တီဟိ ဖလေဟိ သမန္နာဂတော’’တိ? အာမန္တာ။ နနု အရဟတ္တသစ္ဆိကိရိယာယ ပဋိပန္နေန ပုဂ္ဂလေန တီဏိ ဖလာနိ ပဋိလဒ္ဓါနိ, တေဟိ စ အပရိဟီနောတိ? အာမန္တာ။ ဟဉ္စိ အရဟတ္တသစ္ဆိကိရိယာယ ပဋိပန္နေန ပုဂ္ဂလေန တီဏိ ဖလာနိ ပဋိလဒ္ဓါနိ တေဟိ စ အပရိဟီနော, တေန ဝတ ရေ ဝတ္တဗ္ဗေ – ‘‘အရဟတ္တသစ္ဆိကိရိယာယ ပဋိပန္နော ပုဂ္ဂလော တီဟိ ဖလေဟိ သမန္နာဂတော’’တိ။
န ဝတ္တဗ္ဗံ – ‘‘အနာဂါမိဖလသစ္ဆိကိရိယာယ ပဋိပန္နော ပုဂ္ဂလော ဒွီဟိ ဖလေဟိ သမန္နာဂတော’’တိ? အာမန္တာ။ နနု အနာဂါမိဖလသစ္ဆိကိရိယာယ ပဋိပန္နေန ပုဂ္ဂလေန ဒွေ ဖလာနိ ပဋိလဒ္ဓါနိ, တေဟိ စ အပရိဟီနောတိ? အာမန္တာ။ ဟဉ္စိ အနာဂါမိဖလသစ္ဆိကိရိယာယ ပဋိပန္နေန ပုဂ္ဂလေန ဒွေ ဖလာနိ ပဋိလဒ္ဓါနိ တေဟိ စ အပရိဟီနော, တေန ဝတ ရေ ဝတ္တဗ္ဗေ – ‘‘အနာဂါမိဖလသစ္ဆိကိရိယာယ ပဋိပန္နော ပုဂ္ဂလော ဒွီဟိ ဖလေဟိ သမန္နာဂတော’’တိ။
န ဝတ္တဗ္ဗံ – ‘‘သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလေန သမန္နာဂတော’’တိ? အာမန္တာ။ နနု သကဒါဂါမိဖလသစ္ဆိကိရိယာယ ပဋိပန္နေန ပုဂ္ဂလေန သောတာပတ္တိဖလံ ပဋိလဒ္ဓံ, တေန စ အပရိဟီနောတိ? အာမန္တာ။ ဟဉ္စိ သကဒါဂါမိဖလသစ္ဆိကိရိယာယ ပဋိပန္နေန ပုဂ္ဂလေန သောတာပတ္တိဖလံ ပဋိလဒ္ဓံ တေန စ အပရိဟီနော, တေန ဝတ ရေ ဝတ္တဗ္ဗေ – ‘‘သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလေန သမန္နာဂတော’’တိ။
၄၁၂. အရဟတ္တသစ္ဆိကိရိယာယ ပဋိပန္နေန ပုဂ္ဂလေန တီဏိ ဖလာနိ ပဋိလဒ္ဓါနိ တေဟိ စ အပရိဟီနောတိ, အရဟတ္တသစ္ဆိကိရိယာယ ပဋိပန္နော ပုဂ္ဂလော တီဟိ ဖလေဟိ သမန္နာဂတောတိ? အာမန္တာ။ အရဟတ္တသစ္ဆိကိရိယာယ ပဋိပန္နေန ပုဂ္ဂလေန စတ္တာရော မဂ္ဂါ ပဋိလဒ္ဓါ တေဟိ စ အပရိဟီနောတိ, အရဟတ္တသစ္ဆိကိရိယာယ ပဋိပန္နော ပုဂ္ဂလော စတူဟိ မဂ္ဂေဟိ သမန္နာဂတောတိ? န ဟေဝံ ဝတ္တဗ္ဗေ။ပေ.။။
အနာဂါမိဖလသစ္ဆိကိရိယာယ ပဋိပန္နေန ပုဂ္ဂလေန ဒွေ ဖလာနိ ပဋိလဒ္ဓါနိ တေဟိ စ အပရိဟီနောတိ , အနာဂါမိဖလသစ္ဆိကိရိယာယ ပဋိပန္နော ပုဂ္ဂလော ဒွီဟိ ဖလေဟိ သမန္နာဂတောတိ? အာမန္တာ။ အနာဂါမိဖလသစ္ဆိကိရိယာယ ပဋိပန္နေန ပုဂ္ဂလေန တယော မဂ္ဂါ ပဋိလဒ္ဓါ တေဟိ စ အပရိဟီနောတိ, အနာဂါမိဖလသစ္ဆိကိရိယာယ ပဋိပန္နော ပုဂ္ဂလော တီဟိ မဂ္ဂေဟိ သမန္နာဂတောတိ? န ဟေဝံ ဝတ္တဗ္ဗေ။ပေ.။။
သကဒါဂါမိဖလသစ္ဆိကိရိယာယ ပဋိပန္နေန ပုဂ္ဂလေန သောတာပတ္တိဖလံ ပဋိလဒ္ဓံ တေန စ အပရိဟီနောတိ, သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော သောတာပတ္တိဖလေန သမန္နာဂတောတိ? အာမန္တာ။ သကဒါဂါမိဖလသစ္ဆိကိရိယာယ ပဋိပန္နေန ပုဂ္ဂလေန ဒွေ မဂ္ဂါ ပဋိလဒ္ဓါ တေဟိ စ အပရိဟီနောတိ, သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော ဒွီဟိ မဂ္ဂေဟိ သမန္နာဂတောတိ? န ဟေဝံ ဝတ္တဗ္ဗေ။ပေ.။။
အပရာပိ သမန္နာဂတကထာ နိဋ္ဌိတာ။
၄. စတုတ္ထဝဂ္ဂေါ
(၄၂) ၁၀. သဗ္ဗသံယောဇနပ္ပဟာနကထာ
၄၁၃. သဗ္ဗသံယောဇနာနံ ပဟာနံ အရဟတ္တန္တိ? အာမန္တာ။ အရဟတ္တမဂ္ဂေန သဗ္ဗေ သံယောဇနာ ပဟီယန္တီတိ? န ဟေဝံ ဝတ္တဗ္ဗေ။ပေ.။။
အရဟတ္တမဂ္ဂေန သဗ္ဗေ သံယောဇနာ ပဟီယန္တီတိ? အာမန္တာ။ အရဟတ္တမဂ္ဂေန သက္ကာယဒိဋ္ဌိံ ဝိစိကိစ္ဆံ သီလဗ္ဗတပရာမာသံ ပဇဟတီတိ? န ဟေဝံ ဝတ္တဗ္ဗေ။ပေ.။။
အရဟတ္တမဂ္ဂေန သက္ကာယဒိဋ္ဌိံ ဝိစိကိစ္ဆံ သီလဗ္ဗတပရာမာသံ ပဇဟတီတိ? အာမန္တာ။ နနု တိဏ္ဏံ သံယောဇနာနံ ပဟာနံ သောတာပတ္တိဖလံ ဝုတ္တံ ဘဂဝတာတိ? အာမန္တာ။ ဟဉ္စိ တိဏ္ဏံ သံယောဇနာနံ ပဟာနံ သောတာပတ္တိဖလံ ဝုတ္တံ ဘဂဝတာ, နော စ ဝတ ရေ ဝတ္တဗ္ဗေ – ‘‘အရဟတ္တမဂ္ဂေန သဗ္ဗေ သံယောဇနာ ပဟီယန္တီ’’တိ။
၄၁၄. အရဟတ္တမဂ္ဂေန သဗ္ဗေ သံယောဇနာ ပဟီယန္တီတိ? အာမန္တာ။ အရဟတ္တမဂ္ဂေန ဩဠာရိကံ ကာမရာဂံ ဩဠာရိကံ ဗျာပါဒံ ပဇဟတီတိ? န ဟေဝံ ဝတ္တဗ္ဗေ။ပေ.။။
၄၁၅. အရဟတ္တမဂ္ဂေန ဩဠာရိကံ ကာမရာဂံ ဩဠာရိကံ ဗျာပါဒံ ပဇဟတီတိ? အာမန္တာ။ နနု ကာမရာဂဗျာပါဒါနံ တနုဘာဝံ သကဒါဂါမိဖလံ ဝုတ္တံ ဘဂဝတာတိ? အာမန္တာ။ ဟဉ္စိ ကာမရာဂဗျာပါဒါနံ တနုဘာဝံ သကဒါဂါမိဖလံ ဝုတ္တံ ဘဂဝတာ, နော စ ဝတ ရေ ဝတ္တဗ္ဗေ – ‘‘အရဟတ္တမဂ္ဂေန သဗ္ဗေ သံယောဇနာ ပဟီယန္တီ’’တိ။
အရဟတ္တမဂ္ဂေန သဗ္ဗေ သံယောဇနာ ပဟီယန္တီတိ? အာမန္တာ။ အရဟတ္တမဂ္ဂေန အဏုသဟဂတံ ကာမရာဂံ အဏုသဟဂတံ ဗျာပါဒံ ပဇဟတီတိ? န ဟေဝံ ဝတ္တဗ္ဗေ။ပေ.။။
၄၁၆. အရဟတ္တမဂ္ဂေန အဏုသဟဂတံ ကာမရာဂံ အဏုသဟဂတံ ဗျာပါဒံ ပဇဟတီတိ? အာမန္တာ။ နနု ကာမရာဂဗျာပါဒါနံ အနဝသေသပ္ပဟာနံ အနာဂါမိဖလံ ဝုတ္တံ ဘဂဝတာတိ? အာမန္တာ။ ဟဉ္စိ ကာမရာဂဗျာပါဒါနံ အနဝသေသပ္ပဟာနံ အနာဂါမိဖလံ ဝုတ္တံ ဘဂဝတာ, နော စ ဝတ ရေ ဝတ္တဗ္ဗေ – ‘‘အရဟတ္တမဂ္ဂေန သဗ္ဗေ သံယောဇနာ ပဟီယန္တီ’’တိ။
အရဟတ္တမဂ္ဂေန သဗ္ဗေ သံယောဇနာ ပဟီယန္တီတိ? အာမန္တာ။ နနု ရူပရာဂအရူပရာဂမာနဥဒ္ဓစ္စအဝိဇ္ဇာယ အနဝသေသပ္ပဟာနံ အရဟတ္တံ ဝုတ္တံ ဘဂဝတာတိ? အာမန္တာ။ ဟဉ္စိ ရူပရာဂအရူပရာဂမာနဥဒ္ဓစ္စအဝိဇ္ဇာယ အနဝသေသပ္ပဟာနံ အရဟတ္တံ ဝုတ္တံ ဘဂဝတာ, နော စ ဝတ ရေ ဝတ္တဗ္ဗေ – ‘‘အရဟတ္တမဂ္ဂေန သဗ္ဗေ သံယောဇနာ ပဟီယန္တီ’’တိ။
၄၁၇. န ဝတ္တဗ္ဗံ – ‘‘သဗ္ဗသံယောဇနာနံ ပဟာနံ အရဟတ္တ’’န္တိ? အာမန္တာ။ နနု အရဟတော သဗ္ဗေ သံယောဇနာ ပဟီနာတိ? အာမန္တာ ။ ဟဉ္စိ အရဟတော သဗ္ဗေ သံယောဇနာ ပဟီနာ, တေန ဝတ ရေ ဝတ္တဗ္ဗေ – ‘‘သဗ္ဗသံယောဇနာနံ ပဟာနံ အရဟတ္တ’’န္တိ။
သဗ္ဗသံယောဇနပ္ပဟာနကထာ နိဋ္ဌိတာ။
စတုတ္ထဝဂ္ဂေါ။
တဿုဒ္ဒါနံ –
ဂိဟိဿ အရဟာ, သဟ ဥပပတ္တိယာ အရဟာ, အရဟတော သဗ္ဗေ ဓမ္မာ အနာသဝါ, အရဟာ စတူဟိ ဖလေဟိ သမန္နာဂတော, ဧဝမေဝံ ဆဟိ ဥပေက္ခာဟိ, ဗောဓိယာ ဗုဒ္ဓေါ, သလက္ခဏသမန္နာဂတော, ဗောဓိသတ္တော ဩက္ကန္တနိယာမော စရိတဗြဟ္မစရိယော, ပဋိပန္နကော ဖလေန သမန္နာဂတော, သဗ္ဗသံယောဇနာနံ ပဟာနံ အရဟတ္တန္တိ။