၃. တတိယဝဂ္ဂ
(၂၁) ၁. ဗလကထာ
၃၅၄. တထာဂတဗလံ သာဝကသာဓါရဏန္တိ? အာမန္တာ။ တထာဂတဗလံ သာဝကဗလံ, သာဝကဗလံ တထာဂတဗလန္တိ? န ဟေဝံ ဝတ္တဗ္ဗေ။ပေ.။။
တထာဂတဗလံ သာဝကသာဓါရဏန္တိ? အာမန္တာ။ တညေဝ တထာဂတဗလံ တံ သာဝကဗလံ, တညေဝ သာဝကဗလံ တံ တထာဂတဗလန္တိ? န ဟေဝံ ဝတ္တဗ္ဗေ။ပေ.။။
တထာဂတဗလံ သာဝကသာဓါရဏန္တိ? အာမန္တာ။ ယာဒိသံ တထာဂတဗလံ တာဒိသံ သာဝကဗလံ, ယာဒိသံ သာဝကဗလံ တာဒိသံ တထာဂတဗလန္တိ? န ဟေဝံ ဝတ္တဗ္ဗေ။ပေ.။။
တထာဂတဗလံ သာဝကသာဓါရဏန္တိ? အာမန္တာ။ ယာဒိသော တထာဂတဿ ပုဗ္ဗယောဂေါ ပုဗ္ဗစရိယာ ဓမ္မက္ခာနံ ဓမ္မဒေသနာ တာဒိသော သာဝကဿ ပုဗ္ဗယောဂေါ ပုဗ္ဗစရိယာ ဓမ္မက္ခာနံ ဓမ္မဒေသနာတိ? န ဟေဝံ ဝတ္တဗ္ဗေ။ပေ.။။
တထာဂတဗလံ သာဝကသာဓါရဏန္တိ? အာမန္တာ။ တထာဂတော ဇိနော သတ္ထာ သမ္မာသမ္ဗုဒ္ဓေါ သဗ္ဗညူ သဗ္ဗဒဿာဝီ ဓမ္မဿာမီ ဓမ္မပ္ပဋိသရဏောတိ? အာမန္တာ ။ သာဝကော ဇိနော သတ္ထာ သမ္မာသမ္ဗုဒ္ဓေါ သဗ္ဗညူ သဗ္ဗဒဿာဝီ ဓမ္မဿာမီ ဓမ္မပ္ပဋိသရဏောတိ? န ဟေဝံ ဝတ္တဗ္ဗေ။ပေ.။။
တထာဂတဗလံ သာဝကသာဓါရဏန္တိ? အာမန္တာ။ တထာဂတော အနုပ္ပန္နဿ မဂ္ဂဿ ဥပ္ပါဒေတာ အသဉ္ဇာတဿ မဂ္ဂဿ သဉ္ဇနေတာ အနက္ခာတဿ မဂ္ဂဿ အက္ခာတာ မဂ္ဂညူ မဂ္ဂဝိဒူ မဂ္ဂကောဝိဒေါတိ? အာမန္တာ။ သာဝကော အနုပ္ပန္နဿ မဂ္ဂဿ ဥပ္ပါဒေတာ အသဉ္ဇာတဿ မဂ္ဂဿ သဉ္ဇနေတာ အနက္ခာတဿ မဂ္ဂဿ အက္ခာတာ မဂ္ဂညူ မဂ္ဂဝိဒူ မဂ္ဂကောဝိဒေါတိ? န ဟေဝံ ဝတ္တဗ္ဗေ။ပေ.။။
ဣန္ဒ္ရိယပရောပရိယတ္တံ ယထာဘူတံ ဉာဏံ တထာဂတဗလံ သာဝကသာဓါရဏန္တိ? အာမန္တာ။ သာဝကော သဗ္ဗညူ သဗ္ဗဒဿာဝီတိ? န ဟေဝံ ဝတ္တဗ္ဗေ။ပေ.။။
၃၅၅. သာဝကော ဌာနာဌာနံ ဇာနာတီတိ? အာမန္တာ။ ဟဉ္စိ သာဝကော ဌာနာဌာနံ ဇာနာတိ, တေန ဝတ ရေ ဝတ္တဗ္ဗေ – ‘‘ဌာနာဌာနံ ယထာဘူတံ ဉာဏံ တထာဂတဗလံ သာဝကသာဓါရဏ’’န္တိ။
သာဝကော အတီတာနာဂတပစ္စုပ္ပန္နာနံ ကမ္မသမာဒါနာနံ ဌာနသော ဟေတုသော ဝိပါကံ ဇာနာတီတိ? အာမန္တာ။ ဟဉ္စိ သာဝကော အတီတာနာဂတပစ္စုပ္ပန္နာနံ ကမ္မသမာဒါနာနံ ဌာနသော ဟေတုသော ဝိပါကံ ဇာနာတိ, တေန ဝတ ရေ ဝတ္တဗ္ဗေ – ‘‘အတီတာနာဂတပစ္စုပ္ပန္နာနံ ကမ္မသမာဒါနာနံ ဌာနသော ဟေတုသော ဝိပါကံ ယထာဘူတံ ဉာဏံ တထာဂတဗလံ သာဝကသာဓါရဏ’’န္တိ။
သာဝကော သဗ္ဗတ္ထဂါမိနိံ ပဋိပဒံ ဇာနာတီတိ? အာမန္တာ။ ဟဉ္စိ သာဝကော သဗ္ဗတ္ထဂါမိနိံ ပဋိပဒံ ဇာနာတိ, တေန ဝတ ရေ ဝတ္တဗ္ဗေ – ‘‘သဗ္ဗတ္ထဂါမိနိံ ပဋိပဒံ ယထာဘူတံ ဉာဏံ တထာဂတဗလံ သာဝကသာဓါရဏ’’န္တိ။
သာဝကော အနေကဓါတုံ နာနာဓါတုံ လောကံ ဇာနာတီတိ? အာမန္တာ။ ဟဉ္စိ သာဝကော အနေကဓါတုံ နာနာဓါတုံ လောကံ ဇာနာတိ, တေန ဝတ ရေ ဝတ္တဗ္ဗေ – ‘‘အနေကဓါတုံ နာနာဓါတုံ လောကံ ယထာဘူတံ ဉာဏံ တထာဂတဗလံ သာဝကသာဓါရဏ’’န္တိ။
သာဝကော သတ္တာနံ နာနာဓိမုတ္တိကတံ ဇာနာတီတိ? အာမန္တာ။ ဟဉ္စိ သာဝကော သတ္တာနံ နာနာဓိမုတ္တိကတံ ဇာနာတိ, တေန ဝတ ရေ ဝတ္တဗ္ဗေ – ‘‘သတ္တာနံ နာနာဓိမုတ္တိကတံ ယထာဘူတံ ဉာဏံ တထာဂတဗလံ သာဝကသာဓါရဏ’’န္တိ။
သာဝကော ဈာနဝိမောက္ခသမာဓိသမာပတ္တီနံ သံကိလေသံ ဝေါဒါနံ ဝုဋ္ဌာနံ ဇာနာတီတိ? အာမန္တာ။ ဟဉ္စိ သာဝကော ဈာနဝိမောက္ခသမာဓိသမာပတ္တီနံ သံကိလေသံ ဝေါဒါနံ ဝုဋ္ဌာနံ ဇာနာတိ, တေန ဝတ ရေ ဝတ္တဗ္ဗေ – ‘‘ဈာနဝိမောက္ခသမာဓိသမာပတ္တီနံ သံကိလေသံ ဝေါဒါနံ ဝုဋ္ဌာနံ ယထာဘူတံ ဉာဏံ တထာဂတဗလံ သာဝကသာဓါရဏ’’န္တိ။
သာဝကော ပုဗ္ဗေနိဝါသာနုဿတိံ ဇာနာတီတိ? အာမန္တာ။ ဟဉ္စိ သာဝကော ပုဗ္ဗေနိဝါသာနုဿတိံ ဇာနာတိ, တေန ဝတ ရေ ဝတ္တဗ္ဗေ – ‘‘ပုဗ္ဗေနိဝါသာနုဿတိ ယထာဘူတံ ဉာဏံ တထာဂတဗလံ သာဝကသာဓါရဏ’’န္တိ။
သာဝကော သတ္တာနံ စုတူပပါတံ ဇာနာတီတိ? အာမန္တာ။ ဟဉ္စိ သာဝကော သတ္တာနံ စုတူပပါတံ ဇာနာတိ, တေန ဝတ ရေ ဝတ္တဗ္ဗေ – ‘‘သတ္တာနံ စုတူပပါတံ ယထာဘူတံ ဉာဏံ တထာဂတဗလံ သာဝကသာဓါရဏ’’န္တိ။
နနု တထာဂတဿာပိ အာသဝါ ခီဏာ သာဝကဿာပိ အာသဝါ ခီဏာတိ ? အာမန္တာ။ အတ္ထိ ကိဉ္စိ နာနာကရဏံ တထာဂတဿ ဝါ သာဝကဿ ဝါ အာသဝက္ခယေန ဝါ အာသဝက္ခယံ ဝိမုတ္တိယာ ဝါ ဝိမုတ္တီတိ? နတ္ထိ။ ဟဉ္စိ နတ္ထိ ကိဉ္စိ နာနာကရဏံ တထာဂတဿ ဝါ သာဝကဿ ဝါ အာသဝက္ခယေန ဝါ အာသဝက္ခယံ ဝိမုတ္တိယာ ဝါ ဝိမုတ္တိ, တေန ဝတ ရေ ဝတ္တဗ္ဗေ – ‘‘အာသဝါနံ ခယေ ယထာဘူတံ ဉာဏံ တထာဂတဗလံ သာဝကသာဓါရဏ’’န္တိ။
၃၅၆. အာသဝါနံ ခယေ ယထာဘူတံ ဉာဏံ တထာဂတဗလံ သာဝကသာဓါရဏန္တိ? အာမန္တာ ။ ဌာနာဌာနေ ယထာဘူတံ ဉာဏံ တထာဂတဗလံ သာဝကသာဓါရဏန္တိ? န ဟေဝံ ဝတ္တဗ္ဗေ။ပေ.။။
အာသဝါနံ ခယေ ယထာဘူတံ ဉာဏံ တထာဂတဗလံ သာဝကသာဓါရဏန္တိ? အာမန္တာ။ သတ္တာနံ စုတူပပါတေ ယထာဘူတံ ဉာဏံ တထာဂတဗလံ သာဝကသာဓါရဏန္တိ? န ဟေဝံ ဝတ္တဗ္ဗေ။ပေ.။။
ဌာနာဌာနေ ယထာဘူတံ ဉာဏံ တထာဂတဗလံ သာဝကအသာဓါရဏန္တိ? အာမန္တာ။ အာသဝါနံ ခယေ ယထာဘူတံ ဉာဏံ တထာဂတဗလံ သာဝကအသာဓါရဏန္တိ? န ဟေဝံ ဝတ္တဗ္ဗေ။ပေ.။။
သတ္တာနံ စုတူပပါတေ ယထာဘူတံ ဉာဏံ တထာဂတဗလံ သာဝကအသာဓါရဏန္တိ? အာမန္တာ။ အာသဝါနံ ခယေ ယထာဘူတံ ဉာဏံ တထာဂတဗလံ သာဝကအသာဓါရဏန္တိ? န ဟေဝံ ဝတ္တဗ္ဗေ။ပေ.။။
ဣန္ဒ္ရိယပရောပရိယတ္တံ ယထာဘူတံ ဉာဏံ တထာဂတဗလံ သာဝကအသာဓါရဏန္တိ? အာမန္တာ။ ဌာနာဌာနေ ယထာဘူတံ ဉာဏံ တထာဂတဗလံ သာဝကအသာဓါရဏန္တိ ? န ဟေဝံ ဝတ္တဗ္ဗေ [အယမေတ္ထ သာဓါရဏပက္ခံ သန္ဓာယ ပဋိက္ခေပေါ (ဋီကာ ဩလောကေတဗ္ဗာ)] ။ပေ.။။
ဣန္ဒ္ရိယပရောပရိယတ္တံ ယထာဘူတံ ဉာဏံ တထာဂတဗလံ သာဝကအသာဓါရဏန္တိ? အာမန္တာ။ပေ.။။ အာသဝါနံ ခယေ ယထာဘူတံ ဉာဏံ တထာဂတဗလံ သာဝကအသာဓါရဏန္တိ? န ဟေဝံ ဝတ္တဗ္ဗေ။ပေ.။။
ဌာနာဌာနေ ယထာဘူတံ ဉာဏံ တထာဂတဗလံ သာဝကသာဓါရဏန္တိ? အာမန္တာ။ ဣန္ဒ္ရိယပရောပရိယတ္တံ ယထာဘူတံ ဉာဏံ တထာဂတဗလံ သာဝကသာဓါရဏန္တိ? န ဟေဝံ ဝတ္တဗ္ဗေ။ပေ.။။
အာသဝါနံ ခယေ ယထာဘူတံ ဉာဏံ တထာဂတဗလံ သာဝကသာဓါရဏန္တိ? အာမန္တာ။ ဣန္ဒ္ရိယပရောပရိယတ္တံ ယထာဘူတံ ဉာဏံ တထာဂတဗလံ သာဝကသာဓါရဏန္တိ? န ဟေဝံ ဝတ္တဗ္ဗေ။ပေ.။။
ဗလကထာ နိဋ္ဌိတာ။
၃. တတိယဝဂ္ဂေါ
(၂၂) ၂. အရိယန္တိကထာ
၃၅၇. ဌာနာဌာနေ ယထာဘူတံ ဉာဏံ တထာဂတဗလံ အရိယန္တိ? အာမန္တာ။ မဂ္ဂေါ ဖလံ နိဗ္ဗာနံ, သောတာပတ္တိမဂ္ဂေါ သောတာပတ္တိဖလံ, သကဒါဂါမိမဂ္ဂေါ သကဒါဂါမိဖလံ, အနာဂါမိမဂ္ဂေါ အနာဂါမိဖလံ, အရဟတ္တမဂ္ဂေါ အရဟတ္တဖလံ, သတိပဋ္ဌာနံ သမ္မပ္ပဓါနံ ဣဒ္ဓိပါဒေါ ဣန္ဒ္ရိယံ ဗလံ ဗောဇ္ဈင်္ဂေါတိ? န ဟေဝံ ဝတ္တဗ္ဗေ။ပေ.။။
ဌာနာဌာနေ ယထာဘူတံ ဉာဏံ တထာဂတဗလံ အရိယန္တိ? အာမန္တာ ။ သုညတာရမ္မဏန္တိ? န ဟေဝံ ဝတ္တဗ္ဗေ။ပေ.။။ သုညတာရမ္မဏန္တိ? အာမန္တာ။ ဌာနာဌာနဉ္စ မနသိ ကရောတိ, သုညတဉ္စ မနသိ ကရောတီတိ? န ဟေဝံ ဝတ္တဗ္ဗေ။ပေ.။။
ဌာနာဌာနဉ္စ မနသိ ကရောတိ, သုညတဉ္စ မနသိ ကရောတီတိ? အာမန္တာ။ ဒွိန္နံ ဖဿာနံ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။ ဌာနာဌာနေ ယထာဘူတံ ဉာဏံ တထာဂတဗလံ အရိယန္တိ? အာမန္တာ။ အနိမိတ္တာရမ္မဏံ။ပေ.။ အပ္ပဏိဟိတာရမ္မဏန္တိ? န ဟေဝံ ဝတ္တဗ္ဗေ။ပေ.။ အပ္ပဏိဟိတာရမ္မဏန္တိ? အာမန္တာ။ ဌာနာဌာနဉ္စ မနသိ ကရောတိ, အပ္ပဏိဟိတဉ္စ မနသိ ကရောတီတိ? န ဟေဝံ ဝတ္တဗ္ဗေ။ပေ.။။
ဌာနာဌာနဉ္စ မနသိ ကရောတိ, အပ္ပဏိဟိတဉ္စ မနသိ ကရောတီတိ? အာမန္တာ။ ဒွိန္နံ ဖဿာနံ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
၃၅၈. သတိပဋ္ဌာနာ အရိယာ သုညတာရမ္မဏာတိ? အာမန္တာ။ ဌာနာဌာနေ ယထာဘူတံ ဉာဏံ တထာဂတဗလံ အရိယံ သုညတာရမ္မဏန္တိ? န ဟေဝံ ဝတ္တဗ္ဗေ။ပေ.။။
သတိပဋ္ဌာနာ အရိယာ အနိမိတ္တာရမ္မဏာ။ပေ.။ အပ္ပဏိဟိတာရမ္မဏာတိ? အာမန္တာ။ ဌာနာဌာနေ ယထာဘူတံ ဉာဏံ တထာဂတဗလံ အရိယံ အပ္ပဏိဟိတာရမ္မဏန္တိ? န ဟေဝံ ဝတ္တဗ္ဗေ။ပေ.။။
သမ္မပ္ပဓါနာ, ဣဒ္ဓိပါဒါ, ဣန္ဒ္ရိယာ, ဗလာ, ဗောဇ္ဈင်္ဂါ အရိယာ သုညတာရမ္မဏာတိ? အာမန္တာ။ ဌာနာဌာနေ ယထာဘူတံ ဉာဏံ တထာဂတဗလံ အရိယံ သုညတာရမ္မဏန္တိ? န ဟေဝံ ဝတ္တဗ္ဗေ။ပေ.။။
ဗောဇ္ဈင်္ဂါ အရိယာ အနိမိတ္တာရမ္မဏာ။ အပ္ပဏိဟိတာရမ္မဏာတိ? အာမန္တာ ။ ဌာနာဌာနေ ယထာဘူတံ ဉာဏံ တထာဂတဗလံ အရိယံ အပ္ပဏိဟိတာရမ္မဏန္တိ? န ဟေဝံ ဝတ္တဗ္ဗေ။ပေ.။။
၃၅၉. ဌာနာဌာနေ ယထာဘူတံ ဉာဏံ တထာဂတဗလံ အရိယံ န ဝတ္တဗ္ဗံ – ‘‘သုညတာရမ္မဏ’’န္တိ? အာမန္တာ။ သတိပဋ္ဌာနာ အရိယာ န ဝတ္တဗ္ဗာ – ‘‘သုညတာရမ္မဏာ’’တိ? န ဟေဝံ ဝတ္တဗ္ဗေ။ပေ.။။
ဌာနာဌာနေ ယထာဘူတံ ဉာဏံ တထာဂတဗလံ အရိယံ န ဝတ္တဗ္ဗံ – အနိမိတ္တာရမ္မဏံ။ပေ.။ အပ္ပဏိဟိတာရမ္မဏန္တိ ? အာမန္တာ။ သတိပဋ္ဌာနာ အရိယာ န ဝတ္တဗ္ဗာ – ‘‘အပ္ပဏိဟိတာရမ္မဏာ’’တိ? န ဟေဝံ ဝတ္တဗ္ဗေ။ပေ.။။
ဌာနာဌာနေ ယထာဘူတံ ဉာဏံ တထာဂတဗလံ အရိယံ န ဝတ္တဗ္ဗံ – သုညတာရမ္မဏံ။ပေ.။ အနိမိတ္တာရမ္မဏံ။ပေ.။ အပ္ပဏိဟိတာရမ္မဏန္တိ? အာမန္တာ။ သမ္မပ္ပဓါနံ။ပေ.။ ဗောဇ္ဈင်္ဂါ အရိယာ န ဝတ္တဗ္ဗာ – ‘‘အပ္ပဏိဟိတာရမ္မဏာ’’တိ? န ဟေဝံ ဝတ္တဗ္ဗေ။ပေ.။။
၃၆၀. သတ္တာနံ စုတူပပါတေ ယထာဘူတံ ဉာဏံ တထာဂတဗလံ အရိယန္တိ? အာမန္တာ။ မဂ္ဂေါ ဖလံ နိဗ္ဗာနံ, သောတာပတ္တိမဂ္ဂေါ သောတာပတ္တိဖလံ။ပေ.။ ဗောဇ္ဈင်္ဂေါတိ? န ဟေဝံ ဝတ္တဗ္ဗေ။ပေ.။။
သတ္တာနံ စုတူပပါတေ ယထာဘူတံ ဉာဏံ တထာဂတဗလံ အရိယန္တိ? အာမန္တာ။ သုညတာရမ္မဏန္တိ? န ဟေဝံ ဝတ္တဗ္ဗေ။ပေ.။ သုညာတာရမ္မဏန္တိ ? အာမန္တာ။ သတ္တာနံ စုတူပပါတဉ္စ မနသိ ကရောတိ , သုညတဉ္စ မနသိ ကရောတီတိ? န ဟေဝံ ဝတ္တဗ္ဗေ။ပေ.။။
သတ္တာနံ စုတူပပါတဉ္စ မနသိ ကရောတိ, သုညတဉ္စ မနသိ ကရောတီတိ? အာမန္တာ။ ဒွိန္နံ ဖဿာနံ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
သတ္တာနံ စုတူပပါတေ ယထာဘူတံ ဉာဏံ တထာဂတဗလံ အရိယန္တိ? အာမန္တာ။ အနိမိတ္တာရမ္မဏံ အပ္ပဏိဟိတာရမ္မဏန္တိ? န ဟေဝံ ဝတ္တဗ္ဗေ။ပေ.။ အပ္ပဏိဟိတာရမ္မဏန္တိ? အာမန္တာ။ သတ္တာနံ စုတူပပါတဉ္စ မနသိ ကရောတိ, အပ္ပဏိဟိတဉ္စ မနသိ ကရောတီတိ? န ဟေဝံ ဝတ္တဗ္ဗေ။ပေ.။။
သတ္တာနံ စုတူပပါတဉ္စ မနသိ ကရောတိ, အပ္ပဏိဟိတဉ္စ မနသိ ကရောတီတိ? အာမန္တာ။ ဒွိန္နံ ဖဿာနံ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
၃၆၁. သတိပဋ္ဌာနာ အရိယာ သုညတာရမ္မဏာ။ပေ.။ အနိမိတ္တာရမ္မဏာ။ပေ.။ အပ္ပဏိဟိတာရမ္မဏာတိ? အာမန္တာ။ သတ္တာနံ စုတူပပါတေ ယထာဘူတံ ဉာဏံ တထာဂတဗလံ အရိယံ အပ္ပဏိဟိတာရမ္မဏန္တိ? န ဟေဝံ ဝတ္တဗ္ဗေ။ပေ.။။
သမ္မပ္ပဓါနံ ။ပေ.။ ဗောဇ္ဈင်္ဂါ အရိယာ သုညတာရမ္မဏာ။ပေ.။ အနိမိတ္တာရမ္မဏာ။ပေ.။ အပ္ပဏိဟိတာရမ္မဏာတိ? အာမန္တာ။ သတ္တာနံ စုတူပပါတေ ယထာဘူတံ ဉာဏံ တထာဂတဗလံ အရိယံ အပ္ပဏိဟိတာရမ္မဏန္တိ? န ဟေဝံ ဝတ္တဗ္ဗေ။ပေ.။။
သတ္တာနံ စုတူပပါတေ ယထာဘူတံ ဉာဏံ တထာဂတဗလံ အရိယံ န ဝတ္တဗ္ဗံ – သုညတာရမ္မဏံ။ပေ.။ အနိမိတ္တာရမ္မဏံ။ပေ.။ အပ္ပဏိဟိတာရမ္မဏန္တိ? အာမန္တာ။ သတိပဋ္ဌာနာ အရိယာ န ဝတ္တဗ္ဗာ – ‘‘အပ္ပပဏိဟိတာရမ္မဏာ’’တိ ? န ဟေဝံ ဝတ္တဗ္ဗေ။ပေ.။။
၃၆၂. သတ္တာနံ စုတူပပါတေ ယထာဘူတံ ဉာဏံ တထာဂတဗလံ အရိယံ န ဝတ္တဗ္ဗံ – သုညတာရမ္မဏံ။ပေ.။ အနိမိတ္တာရမ္မဏံ။ပေ.။ အပ္ပဏိဟိတာရမ္မဏန္တိ? အာမန္တာ။ သမ္မပ္ပဓါနာ။ပေ.။ ဗောဇ္ဈင်္ဂါ အရိယာ န ဝတ္တဗ္ဗာ – ‘‘အပ္ပဏိဟိတာရမ္မဏာ’’တိ? န ဟေဝံ ဝတ္တဗ္ဗေ။ပေ.။။
အာသဝါနံ ခယေ ယထာဘူတံ ဉာဏံ တထာဂတဗလံ အရိယန္တိ? အာမန္တာ။ ဌာနာဌာနေ ယထာဘူတံ ဉာဏံ တထာဂတဗလံ အရိယန္တိ? န ဟေဝံ ဝတ္တဗ္ဗေ။ပေ.။။
အာသဝါနံ ခယေ ယထာဘူတံ ဉာဏံ တထာဂတဗလံ အရိယန္တိ? အာမန္တာ။ သတ္တာနံ စုတူပပါတေ ယထာဘူတံ ဉာဏံ တထာဂတဗလံ အရိယန္တိ? န ဟေဝံ ဝတ္တဗ္ဗေ။ပေ.။။
ဌာနာဌာနေ ယထာဘူတံ ဉာဏံ တထာဂတဗလံ န ဝတ္တဗ္ဗံ – ‘‘အရိယ’’န္တိ? အာမန္တာ။ အာသဝါနံ ခယေ ယထာဘူတံ ဉာဏံ တထာဂတဗလံ န ဝတ္တဗ္ဗံ – ‘‘အရိယ’’န္တိ? န ဟေဝံ ဝတ္တဗ္ဗေ ။ပေ.။။
သတ္တာနံ စုတူပပါတေ ယထာဘူတံ ဉာဏံ တထာဂတဗလံ န ဝတ္တဗ္ဗံ – ‘‘အရိယ’’န္တိ? အာမန္တာ။ အာသဝါနံ ခယေ ယထာဘူတံ ဉာဏံ တထာဂတဗလံ န ဝတ္တဗ္ဗံ – ‘‘အရိယ’’န္တိ? န ဟေဝံ ဝတ္တဗ္ဗေ။ပေ.။။
အာသဝါနံ ခယေ ယထာဘူတံ ဉာဏံ တထာဂတဗလံ အရိယံ သုညတာရမ္မဏန္တိ? အာမန္တာ။ ဌာနာဌာနေ ယထာဘူတံ ဉာဏံ တထာဂတဗလံ အရိယံ သုညတာရမ္မဏန္တိ? န ဟေဝံ ဝတ္တဗ္ဗေ။ပေ.။။
အာသဝါနံ ခယေ ယထာဘူတံ ဉာဏံ တထာဂတဗလံ အရိယံ အနိမိတ္တာရမ္မဏံ။ အပ္ပဏိဟိတာရမ္မဏန္တိ? အာမန္တာ။ ဌာနာဌာနေ ယထာဘူတံ ဉာဏံ တထာဂတဗလံ အရိယံ အပ္ပဏိဟိတာရမ္မဏန္တိ? န ဟေဝံ ဝတ္တဗ္ဗေ။ပေ.။။
အာသဝါနံ ခယေ ယထာဘူတံ ဉာဏံ တထာဂတဗလံ အရိယံ သုညတာရမ္မဏံ။ပေ.။ အနိမိတ္တာရမ္မဏံ။ပေ.။ အပ္ပဏိဟိတာရမ္မဏန္တိ? အာမန္တာ။ပေ.။။ သတ္တာနံ စုတူပပါတေ ယထာဘူတံ ဉာဏံ တထာဂတဗလံ အရိယံ အပ္ပဏိဟိတာရမ္မဏန္တိ? န ဟေဝံ ဝတ္တဗ္ဗေ။ပေ.။။
ဌာနာဌာနေ ယထာဘူတံ ဉာဏံ တထာဂတဗလံ အရိယံ န ဝတ္တဗ္ဗံ – ‘‘သုညတာရမ္မဏ’’န္တိ? အာမန္တာ။ အာသဝါနံ ခယေ ယထာဘူတံ ဉာဏံ တထာဂတဗလံ အရိယံ န ဝတ္တဗ္ဗံ – ‘‘သုညတာရမ္မဏ’’န္တိ? န ဟေဝံ ဝတ္တဗ္ဗေ။ပေ.။။
ဌာနာဌာနေ ယထာဘူတံ ဉာဏံ တထာဂတဗလံ အရိယံ န ဝတ္တဗ္ဗံ – အနိမိတ္တာရမ္မဏံ။ အပ္ပဏိဟိတာရမ္မဏန္တိ? အာမန္တာ။ အာသဝါနံ ခယေ ယထာဘူတံ ဉာဏံ တထာဂတဗလံ အရိယံ န ဝတ္တဗ္ဗံ – ‘‘အပ္ပဏိဟိတာရမ္မဏ’’န္တိ? န ဟေဝံ ဝတ္တဗ္ဗေ။ပေ.။။
သတ္တာနံ စုတူပပါတေ ယထာဘူတံ ဉာဏံ တထာဂတဗလံ အရိယံ န ဝတ္တဗ္ဗံ – သုညတာရမ္မဏံ။ပေ.။ အနိမိတ္တာရမ္မဏံ။ပေ.။ အပ္ပဏိဟိတာရမ္မဏန္တိ? အာမန္တာ။ အာသဝါနံ ခယေ ယထာဘူတံ ဉာဏံ တထာဂတဗလံ အရိယံ န ဝတ္တဗ္ဗံ – ‘‘အပ္ပဏိဟိတာရမ္မဏ’’န္တိ? န ဟေဝံ ဝတ္တဗ္ဗေ။ပေ.။။
အရိယန္တိကထာ နိဋ္ဌိတာ။
၃. တတိယဝဂ္ဂေါ
(၂၃) ၃. ဝိမုတ္တိကထာ
၃၆၃. သရာဂံ စိတ္တံ ဝိမုစ္စတီတိ? အာမန္တာ။ ရာဂသဟဂတံ ရာဂသဟဇာတံ ရာဂသံသဋ္ဌံ ရာဂသမ္ပယုတ္တံ ရာဂသဟဘု ရာဂါနုပရိဝတ္တိ အကုသလံ လောကိယံ သာသဝံ သံယောဇနိယံ ဂန္ထနိယံ ဩဃနိယံ ယောဂနိယံ နီဝရဏိယံ ပရာမဋ္ဌံ ဥပါဒါနိယံ သံကိလေသိယံ စိတ္တံ ဝိမုစ္စတီတိ? န ဟေဝံ ဝတ္တဗ္ဗေ။ပေ.။။
သဖဿံ စိတ္တံ ဝိမုစ္စတိ, ဖဿော စ စိတ္တဉ္စ ဥဘော ဝိမုစ္စန္တီတိ? အာမန္တာ။ သရာဂံ စိတ္တံ ဝိမုစ္စတိ, ရာဂေါ စ စိတ္တဉ္စ ဥဘော ဝိမုစ္စန္တီတိ? န ဟေဝံ ဝတ္တဗ္ဗေ။ပေ.။။
သဝေဒနံ။ပေ.။ သသညံ။ပေ.။ သစေတနံ။ပေ.။ သပညံ [သသညံ (သီ. က.)] စိတ္တံ ဝိမုစ္စတိ, ပညာ စ စိတ္တဉ္စ ဥဘော ဝိမုစ္စန္တီတိ? အာမန္တာ။ သရာဂံ စိတ္တံ ဝိမုစ္စတိ, ရာဂေါ စ စိတ္တဉ္စ ဥဘော ဝိမုစ္စန္တီတိ? န ဟေဝံ ဝတ္တဗ္ဗေ။ပေ.။။
သဖဿံ သရာဂံ စိတ္တံ ဝိမုစ္စတိ, ဖဿော စ စိတ္တဉ္စ ဥဘော ဝိမုစ္စန္တီတိ? အာမန္တာ။ ရာဂေါ စ စိတ္တဉ္စ ဥဘော ဝိမုစ္စန္တီတိ? န ဟေဝံ ဝတ္တဗ္ဗေ။ပေ.။။
သဝေဒနံ သရာဂံ။ပေ.။ သသညံ သရာဂံ။ပေ.။ သစေတနံ သရာဂံ။ပေ.။ သပညံ သရာဂံ စိတ္တံ ဝိမုစ္စတိ, ပညာ စ စိတ္တဉ္စ ဥဘော ဝိမုစ္စန္တီတိ? အာမန္တာ။ ရာဂေါ စ စိတ္တဉ္စ ဥဘော ဝိမုစ္စန္တီတိ? န ဟေဝံ ဝတ္တဗ္ဗေ။ပေ.။။
၃၆၄. သဒေါသံ စိတ္တံ ဝိမုစ္စတီတိ? အာမန္တာ။ ဒေါသသဟဂတံ ဒေါသသဟဇာတံ ဒေါသသံသဋ္ဌံ ဒေါသသမ္ပယုတ္တံ ဒေါသသဟဘု ဒေါသာနုပရိဝတ္တိ အကုသလံ လောကိယံ သာသဝံ။ပေ.။ သံကိလေသိယံ စိတ္တံ ဝိမုစ္စတီတိ? န ဟေဝံ ဝတ္တဗ္ဗေ။ပေ.။။
သဖဿံ စိတ္တံ ဝိမုစ္စတိ, ဖဿော စ စိတ္တဉ္စ ဥဘော ဝိမုစ္စန္တီတိ? အာမန္တာ။ သဒေါသံ စိတ္တံ ဝိမုစ္စတိ, ဒေါသော စ စိတ္တဉ္စ ဥဘော ဝိမုစ္စန္တီတိ? န ဟေဝံ ဝတ္တဗ္ဗေ။ပေ.။။
သဝေဒနံ။ပေ.။ သသညံ။ပေ.။ သစေတနံ။ပေ.။ သပညံ စိတ္တံ ဝိမုစ္စတိ, ပညာ စ စိတ္တဉ္စ ဥဘော ဝိမုစ္စန္တီတိ? အာမန္တာ ။ သဒေါသံ စိတ္တံ ဝိမုစ္စတိ, ဒေါသော စ စိတ္တဉ္စ ဥဘော ဝိမုစ္စန္တီတိ? န ဟေဝံ ဝတ္တဗ္ဗေ။ပေ.။။
သဖဿံ သဒေါသံ စိတ္တံ ဝိမုစ္စတိ, ဖဿော စ စိတ္တဉ္စ ဥဘော ဝိမုစ္စန္တီတိ? အာမန္တာ။ သဒေါသံ စိတ္တံ ဝိမုစ္စတိ, ဒေါသော စ စိတ္တဉ္စ ဥဘော ဝိမုစ္စန္တီတိ? န ဟေဝံ ဝတ္တဗ္ဗေ။ပေ.။။
သဝေဒနံ သဒေါသံ။ သသညံ သဒေါသံ။ သစေတနံ သဒေါသံ။ သပညံ သဒေါသံ စိတ္တံ ဝိမုစ္စတိ, ပညာ စ စိတ္တဉ္စ ဥဘော ဝိမုစ္စန္တီတိ? အာမန္တာ။ ဒေါသော စ စိတ္တဉ္စ ဥဘော ဝိမုစ္စန္တီတိ? န ဟေဝံ ဝတ္တဗ္ဗေ။ပေ.။။
၃၆၅. သမောဟံ စိတ္တံ ဝိမုစ္စတီတိ? အာမန္တာ။ မောဟသဟဂတံ မောဟသဟဇာတံ မောဟသံသဋ္ဌံ မောဟသမ္ပယုတ္တံ မောဟသဟဘု မောဟာနုပရိဝတ္တိ အကုသလံ လောကိယံ သာသဝံ။ပေ.။ သံကိလေသိယံ စိတ္တံ ဝိမုစ္စတီတိ? န ဟေဝံ ဝတ္တဗ္ဗေ။ပေ.။။
သဖဿံ စိတ္တံ ဝိမုစ္စတိ, ဖဿော စ စိတ္တဉ္စ ဥဘော ဝိမုစ္စန္တီတိ? အာမန္တာ။ သမောဟံ စိတ္တံ ဝိမုစ္စတိ, မောဟော စ စိတ္တဉ္စ ဥဘော ဝိမုစ္စန္တီတိ? န ဟေဝံ ဝတ္တဗ္ဗေ။ပေ.။။
သဝေဒနံ ။ သသညံ။ သစေတနံ။ သပညံ စိတ္တံ ဝိမုစ္စတိ, ပညာ စ စိတ္တဉ္စ ဥဘော ဝိမုစ္စန္တီတိ? အာမန္တာ။ သမောဟံ စိတ္တံ ဝိမုစ္စတိ, မောဟော စ စိတ္တဉ္စ ဥဘော ဝိမုစ္စန္တီတိ? န ဟေဝံ ဝတ္တဗ္ဗေ။ပေ.။။
သဖဿံ သမောဟံ စိတ္တံ ဝိမုစ္စတိ, ဖဿော စ စိတ္တဉ္စ ဥဘော ဝိမုစ္စန္တီတိ? အာမန္တာ ။ မောဟော စ စိတ္တဉ္စ ဥဘော ဝိမုစ္စန္တီတိ? န ဟေဝံ ဝတ္တဗ္ဗေ။ပေ.။။
သဝေဒနံ သမောဟံ။ သသညံ သမောဟံ။ သစေတနံ သမောဟံ။ပေ.။ သပညံ သမောဟံ စိတ္တံ ဝိမုစ္စတိ, ပညာ စ စိတ္တဉ္စ ဥဘော ဝိမုစ္စန္တီတိ? အာမန္တာ။ မောဟော စ စိတ္တဉ္စ ဥဘော ဝိမုစ္စန္တီတိ? န ဟေဝံ ဝတ္တဗ္ဗေ။ပေ.။။
သရာဂံ သဒေါသံ သမောဟံ စိတ္တံ ဝိမုစ္စတီတိ? အာမန္တာ။ ဝီတရာဂံ ဝီတဒေါသံ ဝီတမောဟံ နိက္ကိလေသံ စိတ္တံ ဝိမုစ္စတီတိ? န ဟေဝံ ဝတ္တဗ္ဗေ။ပေ.။ တေန ဟိ န ဝတ္တဗ္ဗံ – ‘‘သရာဂံ သဒေါသံ သမောဟံ စိတ္တံ ဝိမုစ္စတီ’’တိ။
ဝိမုတ္တိကထာ နိဋ္ဌိတာ။
၃. တတိယဝဂ္ဂေါ
(၂၄) ၄. ဝိမုစ္စမာနကထာ
၃၆၆. ဝိမုတ္တံ ဝိမုစ္စမာနန္တိ? အာမန္တာ။ ဧကဒေသံ ဝိမုတ္တံ, ဧကဒေသံ အဝိမုတ္တန္တိ? န ဟေဝံ ဝတ္တဗ္ဗေ။ပေ.။။
ဧကဒေသံ ဝိမုတ္တံ, ဧကဒေသံ အဝိမုတ္တန္တိ? အာမန္တာ။ ဧကဒေသံ သောတာပန္နော, ဧကဒေသံ န သောတာပန္နော, ဧကဒေသံ သောတာပတ္တိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတိ, ဧကဒေသံ န ကာယေန ဖုသိတွာ ဝိဟရတိ, ဧကဒေသံ သတ္တက္ခတ္တုပရမော ကောလင္ကောလော ဧကဗီဇီ ဗုဒ္ဓေ အဝေစ္စပ္ပသာဒေန သမန္နာဂတော ဓမ္မေ။ပေ.။ သံဃေ။ပေ.။ အရိယကန္တေဟိ သီလေဟိ သမန္နာဂတော, ဧကဒေသံ အရိယကန္တေဟိ သီလေဟိ န သမန္နာဂတောတိ? န ဟေဝံ ဝတ္တဗ္ဗေ။ပေ.။။
ဧကဒေသံ ဝိမုတ္တံ, ဧကဒေသံ အဝိမုတ္တန္တိ? အာမန္တာ ။ ဧကဒေသံ သကဒါဂါမီ, ဧကဒေသံ န သကဒါဂါမီ, ဧကဒေသံ သကဒါဂါမိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတိ, ဧကဒေသံ န ကာယေန ဖုသိတွာ ဝိဟရတီတိ? န ဟေဝံ ဝတ္တဗ္ဗေ။ပေ.။။
ဧကဒေသံ ဝိမုတ္တံ, ဧကဒေသံ အဝိမုတ္တန္တိ? အာမန္တာ။ ဧကဒေသံ အနာဂါမီ, ဧကဒေသံ န အနာဂါမီ, ဧကဒေသံ အနာဂါမိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတိ, ဧကဒေသံ န ကာယေန ဖုသိတွာ ဝိဟရတိ, ဧကဒေသံ အန္တရာပရိနိဗ္ဗာယီ , ဥပဟစ္စပရိနိဗ္ဗာယီ, အသင်္ခါရပရိနိဗ္ဗာယီ, သသင်္ခါရပရိနိဗ္ဗာယီ, ဥဒ္ဓံသောတောအကနိဋ္ဌဂါမီ, ဧကဒေသံ န ဥဒ္ဓံသောတောအကနိဋ္ဌဂါမီတိ? န ဟေဝံ ဝတ္တဗ္ဗေ။ပေ.။။
ဧကဒေသံ ဝိမုတ္တံ, ဧကဒေသံ အဝိမုတ္တန္တိ? အာမန္တာ။ ဧကဒေသံ အရဟာ ဧကဒေသံ န အရဟာ, ဧကဒေသံ အရဟတ္တပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတိ, ဧကဒေသံ န ကာယေန ဖုသိတွာ ဝိဟရတိ, ဧကဒေသံ ဝီတရာဂေါ ဝီတဒေါသော ဝီတမောဟော။ပေ.။ ဧကဒေသံ သစ္ဆိကာတဗ္ဗံ သစ္ဆိကတံ, ဧကဒေသံ သစ္ဆိကာတဗ္ဗံ န သစ္ဆိကတန္တိ? န ဟေဝံ ဝတ္တဗ္ဗေ။ပေ.။။
ဝိမုတ္တံ ဝိမုစ္စမာနန္တိ? အာမန္တာ။ ဥပ္ပါဒက္ခဏေ ဝိမုတ္တံ, ဘင်္ဂက္ခဏေ ဝိမုစ္စမာနန္တိ? န ဟေဝံ ဝတ္တဗ္ဗေ။ပေ.။။
၃၆၇. န ဝတ္တဗ္ဗံ – ‘‘ဝိမုတ္တံ ဝိမုစ္စမာန’’န္တိ? အာမန္တာ။ နနု ဝုတ္တံ ဘဂဝတာ – ‘‘တဿ ဧဝံ ဇာနတော ဧဝံ ပဿတော ကာမာသဝါပိ စိတ္တံ ဝိမုစ္စတိ, ဘဝါသဝါပိ စိတ္တံ ဝိမုစ္စတိ, အဝိဇ္ဇာသဝါပိ စိတ္တံ ဝိမုစ္စတီ’’တိ [ဒီ. နိ. ၁.၂၄၈ အာဒယော]! အတ္ထေဝ သုတ္တန္တောတိ? အာမန္တာ ။ တေန ဟိ ဝတ္တဗ္ဗံ [တေန ဟိ (သီ. သျာ. ကံ.), တေန ဟိ န ဝတ္တဗ္ဗံ (က.)] – ‘‘ဝိမုတ္တံ ဝိမုစ္စမာန’’န္တိ။
ဝိမုတ္တံ ဝိမုစ္စမာနန္တိ? အာမန္တာ။ နနု ဝုတ္တံ ဘဂဝတာ – ‘‘သော ဧဝံ သမာဟိတေ စိတ္တေ ပရိသုဒ္ဓေ ပရိယောဒါတေ အနင်္ဂဏေ ဝိဂတူပက္ကိလေသေ မုဒုဘူတေ ကမ္မနိယေ ဌိတေ အာနေဉ္ဇပ္ပတ္တေ အာသဝါနံ ခယဉာဏာယ စိတ္တံ အဘိနိန္နာမေတီ’’တိ! အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ဝိမုတ္တံ ဝိမုစ္စမာန’’န္တိ။
အတ္ထိ စိတ္တံ ဝိမုစ္စမာနန္တိ? အာမန္တာ။ အတ္ထိ စိတ္တံ ရဇ္ဇမာနံ ဒုဿမာနံ မုယှမာနံ ကိလိဿမာနန္တိ? န ဟေဝံ ဝတ္တဗ္ဗေ။ပေ.။ နနု ရတ္တဉ္စေဝ အရတ္တဉ္စ, ဒုဋ္ဌဉ္စေဝ အဒုဋ္ဌဉ္စ, မူဠှဉ္စေဝ အမူဠှဉ္စ, ဆိန္နဉ္စေဝ အဆိန္နဉ္စ, ဘိန္နဉ္စေဝ အဘိန္နဉ္စ, ကတဉ္စေဝ အကတဉ္စာတိ ? အာမန္တာ။ ဟဉ္စိ ရတ္တဉ္စေဝ အရတ္တဉ္စ, ဒုဋ္ဌဉ္စေဝ အဒုဋ္ဌဉ္စ, မူဠှဉ္စေဝ အမူဠှဉ္စ, ဆိန္နဉ္စေဝ အဆိန္နဉ္စ, ဘိန္နဉ္စေဝ အဘိန္နဉ္စ, ကတဉ္စေဝ အကတဉ္စ, နော စ ဝတ ရေ ဝတ္တဗ္ဗေ – ‘‘အတ္ထိ စိတ္တံ ဝိမုစ္စမာန’’န္တိ။
ဝိမုစ္စမာနကထာ နိဋ္ဌိတာ။
၃. တတိယဝဂ္ဂေါ
(၂၅) ၅. အဋ္ဌမကကထာ
၃၆၈. အဋ္ဌမကဿ ပုဂ္ဂလဿ ဒိဋ္ဌိပရိယုဋ္ဌာနံ ပဟီနန္တိ? အာမန္တာ။ အဋ္ဌမကော ပုဂ္ဂလော သောတာပန္နော သောတာပတ္တိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတီတိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ ဝိစိကိစ္ဆာပရိယုဋ္ဌာနံ ပဟီနန္တိ? အာမန္တာ။ အဋ္ဌမကော ပုဂ္ဂလော သောတာပန္နော သောတာပတ္တိဖလပ္ပတ္တော။ပေ.။ ကာယေန ဖုသိတွာ ဝိဟရတီတိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ ဒိဋ္ဌိပရိယုဋ္ဌာနံ ပဟီနန္တိ? အာမန္တာ။ အဋ္ဌမကဿ ပုဂ္ဂလဿ ဒိဋ္ဌာနုသယော ပဟီနောတိ? န ဟေဝံ ဝတ္တဗ္ဗေ။ပေ.။ အဋ္ဌမကဿ ပုဂ္ဂလဿ ဒိဋ္ဌိပရိယုဋ္ဌာနံ ပဟီနန္တိ ? အာမန္တာ။ အဋ္ဌမကဿ ပုဂ္ဂလဿ ဝိစိကိစ္ဆာနုသယော။ သီလဗ္ဗတပရာမာသော ပဟီနောတိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ ဝိစိကိစ္ဆာပရိယုဋ္ဌာနံ ပဟီနန္တိ? အာမန္တာ။ အဋ္ဌမကဿ ပုဂ္ဂလဿ ဝိစိကိစ္ဆာနုသယော ပဟီနောတိ? န ဟေဝံ ဝတ္တဗ္ဗေ။ပေ.။ အဋ္ဌမကဿ ပုဂ္ဂလဿ ဝိစိကိစ္ဆာပရိယုဋ္ဌာနံ ပဟီနန္တိ? အာမန္တာ။ အဋ္ဌမကဿ ပုဂ္ဂလဿ ဒိဋ္ဌာနုသယော။ သီလဗ္ဗတပရာမာသော ပဟီနောတိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ ဒိဋ္ဌာနုသယော အပ္ပဟီနောတိ? အာမန္တာ။ အဋ္ဌမကဿ ပုဂ္ဂလဿ ဒိဋ္ဌိပရိယုဋ္ဌာနံ အပ္ပဟီနန္တိ? န ဟေဝံ ဝတ္တဗ္ဗေ။ပေ.။ အဋ္ဌမကဿ ပုဂ္ဂလဿ ဒိဋ္ဌာနုသယော အပ္ပဟီနောတိ? အာမန္တာ။ အဋ္ဌမကဿ ပုဂ္ဂလဿ ဝိစိကိစ္ဆာပရိယုဋ္ဌာနံ အပ္ပဟီနန္တိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ ဝိစိကိစ္ဆာနုသယော။ သီလဗ္ဗတပရာမာသော အပ္ပဟီနောတိ? အာမန္တာ။ အဋ္ဌမကဿ ပုဂ္ဂလဿ ဒိဋ္ဌိပရိယုဋ္ဌာနံ အပ္ပဟီနန္တိ? န ဟေဝံ ဝတ္တဗ္ဗေ။ပေ.။ အဋ္ဌမကဿ ပုဂ္ဂလဿ သီလဗ္ဗတပရာမာသော အပ္ပဟီနောတိ? အာမန္တာ။ အဋ္ဌမကဿ ပုဂ္ဂလဿ ဝိစိကိစ္ဆာပရိယုဋ္ဌာနံ အပ္ပဟီနန္တိ? န ဟေဝံ ဝတ္တဗ္ဗေ။ပေ.။။
၃၆၉. အဋ္ဌမကဿ ပုဂ္ဂလဿ ဒိဋ္ဌိပရိယုဋ္ဌာနံ ပဟီနန္တိ? အာမန္တာ။ အဋ္ဌမကဿ ပုဂ္ဂလဿ ဒိဋ္ဌိပရိယုဋ္ဌာနပဟာနာယ မဂ္ဂေါ ဘာဝိတောတိ? န ဟေဝံ ဝတ္တဗ္ဗေ။ပေ.။ အဋ္ဌမကဿ ပုဂ္ဂလဿ ဒိဋ္ဌိပရိယုဋ္ဌာနံ ပဟီနန္တိ? အာမန္တာ။ အဋ္ဌမကဿ ပုဂ္ဂလဿ ဒိဋ္ဌိပရိယုဋ္ဌာနပဟာနာယ သတိပဋ္ဌာနာ ဘာဝိတာ။ပေ.။ သမ္မပ္ပဓါနာ။ပေ.။ ဗောဇ္ဈင်္ဂါ ဘာဝိတာတိ? န ဟေဝံ ဝတ္တဗ္ဗေ။
အဋ္ဌမကဿ ပုဂ္ဂလဿ ဝိစိကိစ္ဆာပရိယုဋ္ဌာနံ ပဟီနန္တိ? အာမန္တာ။ အဋ္ဌမကဿ ပုဂ္ဂလဿ ဝိစိကိစ္ဆာပရိယုဋ္ဌာနပဟာနာယ မဂ္ဂေါ ဘာဝိတော။ပေ.။ ဗောဇ္ဈင်္ဂါ ဘာဝိတာတိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ ဒိဋ္ဌိပရိယုဋ္ဌာနပဟာနာယ မဂ္ဂေါ အဘာဝိတောတိ? အာမန္တာ။ အမဂ္ဂေန ပဟီနံ လောကိယေန သာသဝေန။ပေ.။ သံကိလေသိယေနာတိ? န ဟေဝံ ဝတ္တဗ္ဗေ။ပေ.။ အဋ္ဌမကဿ ပုဂ္ဂလဿ ဒိဋ္ဌိပရိယုဋ္ဌာနပဟာနာယ သတိပဋ္ဌာနာ။ပေ.။ ဗောဇ္ဈင်္ဂါ အဘာဝိတာတိ? အာမန္တာ။ အမဂ္ဂေန ပဟီနံ လောကိယေန သာသဝေန။ပေ.။ သံကိလေသိယေနာတိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ ဝိစိကိစ္ဆာပရိယုဋ္ဌာနပဟာနာယ မဂ္ဂေါ အဘာဝိတော။ပေ.။ သတိပဋ္ဌာနာ။ပေ.။ ဗောဇ္ဈင်္ဂါ အဘာဝိတာတိ? အာမန္တာ။ အမဂ္ဂေန ပဟီနံ လောကိယေန သာသဝေန။ပေ.။ သံကိလေသိယေနာတိ? န ဟေဝံ ဝတ္တဗ္ဗေ။ပေ.။။
၃၇၀. န ဝတ္တဗ္ဗံ – ‘‘အဋ္ဌမကဿ ပုဂ္ဂလဿ ဒိဋ္ဌိပရိယုဋ္ဌာနံ ပဟီန’’န္တိ? အာမန္တာ။ ဥပ္ပဇ္ဇိဿတီတိ? နုပ္ပဇ္ဇိဿတိ။ ဟဉ္စိ နုပ္ပဇ္ဇိဿတိ, တေန ဝတ ရေ ဝတ္တဗ္ဗေ – ‘‘အဋ္ဌမကဿ ပုဂ္ဂလဿ ဒိဋ္ဌိပရိယုဋ္ဌာနံ ပဟီန’’န္တိ။
န ဝတ္တဗ္ဗံ – ‘‘အဋ္ဌမကဿ ပုဂ္ဂလဿ ဝိစိကိစ္ဆာပရိယုဋ္ဌာနံ ပဟီန’’န္တိ? အာမန္တာ။ ဥပ္ပဇ္ဇိဿတီတိ? နုပ္ပဇ္ဇိဿတိ။ ဟဉ္စိ နုပ္ပဇ္ဇိဿတိ, တေန ဝတ ရေ ဝတ္တဗ္ဗေ – ‘‘အဋ္ဌမကဿ ပုဂ္ဂလဿ ဝိစိကိစ္ဆာပရိယုဋ္ဌာနံ ပဟီန’’န္တိ။
အဋ္ဌမကဿ ပုဂ္ဂလဿ ဒိဋ္ဌိပရိယုဋ္ဌာနံ နုပ္ပဇ္ဇိဿတီတိ ကတွာ ပဟီနန္တိ? အာမန္တာ။ အဋ္ဌမကဿ ပုဂ္ဂလဿ ဒိဋ္ဌာနုသယော နုပ္ပဇ္ဇိဿတီတိ ကတွာ ပဟီနောတိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ ဒိဋ္ဌိပရိယုဋ္ဌာနံ နုပ္ပဇ္ဇိဿတီတိ ကတွာ ပဟီနန္တိ? အာမန္တာ။ အဋ္ဌမကဿ ပုဂ္ဂလဿ ဝိစိကိစ္ဆာနုသယော။ သီလဗ္ဗတပရာမာသော နုပ္ပဇ္ဇိဿတီတိ ကတွာ ပဟီနောတိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ ဝိစိကိစ္ဆာပရိယုဋ္ဌာနံ နုပ္ပဇ္ဇိဿတီတိ ကတွာ ပဟီနန္တိ? အာမန္တာ ။ အဋ္ဌမကဿ ပုဂ္ဂလဿ ဝိစိကိစ္ဆာနုသယော။ သီလဗ္ဗတပရာမာသော နုပ္ပဇ္ဇိဿတီတိ ကတွာ ပဟီနောတိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ ဒိဋ္ဌိပရိယုဋ္ဌာနံ နုပ္ပဇ္ဇိဿတီတိ ကတွာ ပဟီနန္တိ? အာမန္တာ။ ဂေါတြဘုနော ပုဂ္ဂလဿ ဒိဋ္ဌိပရိယုဋ္ဌာနံ နုပ္ပဇ္ဇိဿတီတိ ကတွာ ပဟီနန္တိ? န ဟေဝံ ဝတ္တဗ္ဗေ။ပေ.။ အဋ္ဌမကဿ ပုဂ္ဂလဿ ဝိစိကိစ္ဆာပရိယုဋ္ဌာနံ နုပ္ပဇ္ဇိဿတီတိ ကတွာ ပဟီနန္တိ? အာမန္တာ။ ဂေါတြဘုနော ပုဂ္ဂလဿ ဝိစိကိစ္ဆာပရိယုဋ္ဌာနံ နုပ္ပဇ္ဇိဿတီတိ ကတွာ ပဟီနန္တိ? န ဟေဝံ ဝတ္တဗ္ဗေ။ပေ.။။
အဋ္ဌမကကထာ နိဋ္ဌိတာ။
၃. တတိယဝဂ္ဂေါ
(၂၆) ၆. အဋ္ဌမကဿဣန္ဒ္ရိယကထာ
၃၇၁. အဋ္ဌမကဿ ပုဂ္ဂလဿ နတ္ထိ သဒ္ဓိန္ဒ္ရိယန္တိ? အာမန္တာ။ အဋ္ဌမကဿ ပုဂ္ဂလဿ နတ္ထိ သဒ္ဓါတိ? န ဟေဝံ ဝတ္တဗ္ဗေ။ အဋ္ဌမကဿ ပုဂ္ဂလဿ နတ္ထိ ဝီရိယိန္ဒ္ရိယံ။ပေ.။ နတ္ထိ သတိန္ဒ္ရိယံ။ပေ.။ နတ္ထိ သမာဓိန္ဒ္ရိယံ။ပေ.။ နတ္ထိ ပညိန္ဒ္ရိယန္တိ? အာမန္တာ။ အဋ္ဌမကဿ ပုဂ္ဂလဿ နတ္ထိ ပညာတိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ အတ္ထိ သဒ္ဓါတိ? အာမန္တာ။ အဋ္ဌမကဿ ပုဂ္ဂလဿ အတ္ထိ သဒ္ဓိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ အဋ္ဌမကဿ ပုဂ္ဂလဿ အတ္ထိ ဝီရိယံ။ပေ.။ အတ္ထိ သတိ။ အတ္ထိ သမာဓိ။ အတ္ထိ ပညာတိ? အာမန္တာ။ အဋ္ဌမကဿ ပုဂ္ဂလဿ အတ္ထိ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ အတ္ထိ မနော, အတ္ထိ မနိန္ဒ္ရိယန္တိ? အာမန္တာ။ အဋ္ဌမကဿ ပုဂ္ဂလဿ အတ္ထိ သဒ္ဓါ, အတ္ထိ သဒ္ဓိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ အဋ္ဌမကဿ ပုဂ္ဂလဿ အတ္ထိ မနော, အတ္ထိ မနိန္ဒ္ရိယန္တိ? အာမန္တာ။ အဋ္ဌမကဿ ပုဂ္ဂလဿ အတ္ထိ ပညာ, အတ္ထိ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ အတ္ထိ သောမနဿံ, အတ္ထိ သောမနဿိန္ဒ္ရိယံ, အတ္ထိ ဇီဝိတံ, အတ္ထိ ဇီဝိတိန္ဒ္ရိယန္တိ? အာမန္တာ။ အဋ္ဌမကဿ ပုဂ္ဂလဿ အတ္ထိ သဒ္ဓါ, အတ္ထိ သဒ္ဓိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ အဋ္ဌမကဿ ပုဂ္ဂလဿ အတ္ထိ ဇီဝိတံ, အတ္ထိ ဇီဝိတိန္ဒ္ရိယန္တိ? အာမန္တာ။ အဋ္ဌမကဿ ပုဂ္ဂလဿ။ပေ.။ အတ္ထိ ပညာ, အတ္ထိ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ အတ္ထိ သဒ္ဓါ, နတ္ထိ သဒ္ဓိန္ဒ္ရိယန္တိ? အာမန္တာ။ အဋ္ဌမကဿ ပုဂ္ဂလဿ အတ္ထိ မနော, နတ္ထိ မနိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ အတ္ထိ သဒ္ဓါ, နတ္ထိ သဒ္ဓိန္ဒ္ရိယန္တိ? အာမန္တာ။ အဋ္ဌမကဿ ပုဂ္ဂလဿ အတ္ထိ သောမနဿံ, နတ္ထိ သောမနဿိန္ဒ္ရိယန္တိ။ပေ.။ အတ္ထိ ဇီဝိတံ, နတ္ထိ ဇီဝိတိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ အဋ္ဌမကဿ ပုဂ္ဂလဿ အတ္ထိ ပညာ, နတ္ထိ ပညိန္ဒ္ရိယန္တိ? အာမန္တာ။ အဋ္ဌမကဿ ပုဂ္ဂလဿ အတ္ထိ မနော, နတ္ထိ မနိန္ဒ္ရိယန္တိ? အတ္ထိ သောမနဿံ, နတ္ထိ သောမနဿိန္ဒ္ရိယန္တိ? အတ္ထိ ဇီဝိတံ, နတ္ထိ ဇီဝိတိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ နတ္ထိ သဒ္ဓိန္ဒ္ရိယန္တိ? အာမန္တာ။ အဋ္ဌမကော ပုဂ္ဂလော အဿဒ္ဓေါတိ? န ဟေဝံ ဝတ္တဗ္ဗေ။ပေ.။ အဋ္ဌမကဿ ပုဂ္ဂလဿ နတ္ထိ ဝီရိယိန္ဒ္ရိယန္တိ? အာမန္တာ။ အဋ္ဌမကော ပုဂ္ဂလော ကုသီတော ဟီနဝီရိယောတိ? န ဟေဝံ ဝတ္တဗ္ဗေ။ပေ.။ အဋ္ဌမကဿ ပုဂ္ဂလဿ နတ္ထိ သတိန္ဒ္ရိယန္တိ? အာမန္တာ။ အဋ္ဌမကော ပုဂ္ဂလော မုဋ္ဌဿတိ အသမ္ပဇာနောတိ? န ဟေဝံ ဝတ္တဗ္ဗေ။ပေ.။ အဋ္ဌမကဿ ပုဂ္ဂလဿ နတ္ထိ သမာဓိန္ဒ္ရိယန္တိ? အာမန္တာ။ အဋ္ဌမကော ပုဂ္ဂလော အသမာဟိတော ဝိဗ္ဘန္တစိတ္တောတိ? န ဟေဝံ ဝတ္တဗ္ဗေ။ပေ.။ အဋ္ဌမကဿ ပုဂ္ဂလဿ နတ္ထိ ပညိန္ဒ္ရိယန္တိ? အာမန္တာ။ အဋ္ဌမကော ပုဂ္ဂလော ဒုပ္ပညော ဧလမူဂေါတိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ အတ္ထိ သဒ္ဓါ, သာ စ သဒ္ဓါ နိယျာနိကာတိ? အာမန္တာ။ ဟဉ္စိ အဋ္ဌမကဿ ပုဂ္ဂလဿ အတ္ထိ သဒ္ဓါ, သာ စ သဒ္ဓါ နိယျာနိကာ, နော စ ဝတ ရေ ဝတ္တဗ္ဗေ – ‘‘အဋ္ဌမကဿ ပုဂ္ဂလဿ နတ္ထိ သဒ္ဓိန္ဒ္ရိယ’’န္တိ။ အဋ္ဌမကဿ ပုဂ္ဂလဿ အတ္ထိ ဝီရိယံ, တဉ္စ ဝီရိယံ နိယျာနိကံ; အတ္ထိ သတိ, သာ စ သတိ နိယျာနိကာ; အတ္ထိ သမာဓိ, သော စ သမာဓိ နိယျာနိကော; အတ္ထိ ပညာ, သာ စ ပညာ နိယျာနိကာတိ? အာမန္တာ ။ ဟဉ္စိ အဋ္ဌမကဿ ပုဂ္ဂလဿ အတ္ထိ ပညာ, သာ စ ပညာ နိယျာနိကာ, နော စ ဝတ ရေ ဝတ္တဗ္ဗေ – ‘‘အဋ္ဌမကဿ ပုဂ္ဂလဿ နတ္ထိ ပညိန္ဒ္ရိယ’’န္တိ။
၃၇၂. သကဒါဂါမိဖလသစ္ဆိကိရိယာယ ပဋိပန္နဿ ပုဂ္ဂလဿ အတ္ထိ သဒ္ဓါ, အတ္ထိ သဒ္ဓိန္ဒ္ရိယန္တိ? အာမန္တာ။ အဋ္ဌမကဿ ပုဂ္ဂလဿ အတ္ထိ သဒ္ဓါ, အတ္ထိ သဒ္ဓိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ သကဒါဂါမိဖလသစ္ဆိကိရိယာယ ပဋိပန္နဿ ပုဂ္ဂလဿ အတ္ထိ ပညာ, အတ္ထိ ပညိန္ဒ္ရိယန္တိ? အာမန္တာ။ အဋ္ဌမကဿ ပုဂ္ဂလဿ အတ္ထိ ပညာ, အတ္ထိ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
အနာဂါမိဖလသစ္ဆိကိရိယာယ ပဋိပန္နဿ ပုဂ္ဂလဿ။ အရဟတ္တသစ္ဆိကိရိယာယ ပဋိပန္နဿ ပုဂ္ဂလဿ အတ္ထိ သဒ္ဓါ, အတ္ထိ သဒ္ဓိန္ဒ္ရိယံ။ပေ.။ အတ္ထိ ပညာ, အတ္ထိ ပညိန္ဒ္ရိယန္တိ? အာမန္တာ။ အဋ္ဌမကဿ ပုဂ္ဂလဿ အတ္ထိ ပညာ, အတ္ထိ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ အတ္ထိ သဒ္ဓါ, နတ္ထိ သဒ္ဓိန္ဒ္ရိယန္တိ? အာမန္တာ။ သကဒါဂါမိဖလသစ္ဆိကိရိယာယ ပဋိပန္နဿ ပုဂ္ဂလဿ အတ္ထိ သဒ္ဓါ, နတ္ထိ သဒ္ဓိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ အဋ္ဌမကဿ ပုဂ္ဂလဿ အတ္ထိ ပညာ, နတ္ထိ ပညိန္ဒ္ရိယန္တိ? အာမန္တာ။ သကဒါဂါမိဖလသစ္ဆိကိရိယာယ ပဋိပန္နဿ ပုဂ္ဂလဿ အတ္ထိ ပညာ, နတ္ထိ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ အတ္ထိ သဒ္ဓါ, နတ္ထိ သဒ္ဓိန္ဒ္ရိယန္တိ။ပေ.။ အတ္ထိ ပညာ, နတ္ထိ ပညိန္ဒ္ရိယန္တိ? အာမန္တာ ။ အနာဂါမိဖလသစ္ဆိကိရိယာယ ပဋိပန္နဿ ပုဂ္ဂလဿ။ အရဟတ္တသစ္ဆိကိရိယာယ ပဋိပန္နဿ ပုဂ္ဂလဿ အတ္ထိ ပညာ, နတ္ထိ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
အဋ္ဌမကဿ ပုဂ္ဂလဿ နတ္ထိ ပဉ္စိန္ဒ္ရိယာနီတိ? အာမန္တာ။ နနု ဝုတ္တံ ဘဂဝတာ – ‘‘ပဉ္စိမာနိ, ဘိက္ခဝေ, ဣန္ဒ္ရိယာနိ! ကတမာနိ ပဉ္စ? သဒ္ဓိန္ဒ္ရိယံ, ဝီရိယိန္ဒ္ရိယံ, သတိန္ဒ္ရိယံ, သမာဓိန္ဒ္ရိယံ, ပညိန္ဒ္ရိယံ – ဣမာနိ ခေါ, ဘိက္ခဝေ, ပဉ္စိန္ဒ္ရိယာနိ။ ဣမေသံ ခေါ, ဘိက္ခဝေ, ပဉ္စန္နံ ဣန္ဒ္ရိယာနံ သမတ္တာ ပရိပူရတ္တာ အရဟာ ဟောတိ။ တတော မုဒုတရေဟိ အရဟတ္တသစ္ဆိကိရိယာယ ပဋိပန္နော ဟောတိ, တတော မုဒုတရေဟိ အနာဂါမီ ဟောတိ, တတော မုဒုတရေဟိ အနာဂါမိဖလသစ္ဆိကိရိယာယ ပဋိပန္နော ဟောတိ, တတော မုဒုတရေဟိ သကဒါဂါမီ ဟောတိ, တတော မုဒုတရေဟိ သကဒါဂါမိဖလသစ္ဆိကိရိယာယ ပဋိပန္နော ဟောတိ, တတော မုဒုတရေဟိ သောတာပန္နော ဟောတိ, တတော မုဒုတရေဟိ သောတာပတ္တိဖလသစ္ဆိကိရိယာယ ပဋိပန္နော ဟောတိ။ ယဿ ခေါ, ဘိက္ခဝေ, ဣမာနိ ပဉ္စိန္ဒ္ရိယာနိ သဗ္ဗေန သဗ္ဗံ သဗ္ဗထာ သဗ္ဗံ နတ္ထိ, တမဟံ ‘ဗာဟိရော ပုထုဇ္ဇနပက္ခေ ဌိတော’တိ ဝဒါမီ’’တိ [သံ. နိ. ၅.၄၈၈]။ အတ္ထေဝ သုတ္တန္တောတိ? အာမန္တာ။ အဋ္ဌမကော ပုဂ္ဂလော ဗာဟိရော ပုထုဇ္ဇနပက္ခေ ဌိတောတိ? န ဟေဝံ ဝတ္တဗ္ဗေ။ပေ.။ တေန ဟိ အဋ္ဌမကဿ ပုဂ္ဂလဿ အတ္ထိ ပဉ္စိန္ဒ္ရိယာနီတိ။
အဋ္ဌမကဿ ဣန္ဒ္ရိယကထာ နိဋ္ဌိတာ။
၃. တတိယဝဂ္ဂေါ
(၂၇) ၇. ဒိဗ္ဗစက္ခုကထာ
၃၇၃. မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ။ မံသစက္ခုံ ဒိဗ္ဗစက္ခုံ, ဒိဗ္ဗစက္ခုံ မံသစက္ခုန္တိ? န ဟေဝံ ဝတ္တဗ္ဗေ။ပေ.။။
မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ။ ယာဒိသံ မံသစက္ခုံ တာဒိသံ ဒိဗ္ဗစက္ခုံ, ယာဒိသံ ဒိဗ္ဗစက္ခုံ တာဒိသံ မံသစက္ခုန္တိ? န ဟေဝံ ဝတ္တဗ္ဗေ။ပေ.။။
မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ။ တညေဝ မံသစက္ခုံ တံ ဒိဗ္ဗစက္ခုံ, တံ ဒိဗ္ဗစက္ခုံ တံ မံသစက္ခုန္တိ? န ဟေဝံ ဝတ္တဗ္ဗေ။ပေ.။။
မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ။ ယာဒိသော မံသစက္ခုဿ ဝိသယော အာနုဘာဝေါ ဂေါစရော တာဒိသော ဒိဗ္ဗဿ စက္ခုဿ ဝိသယော အာနုဘာဝေါ ဂေါစရောတိ? န ဟေဝံ ဝတ္တဗ္ဗေ။ပေ.။။
မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ။ ဥပါဒိဏ္ဏံ [ဥပါဒိန္နံ (သျာ. ကံ.)] ဟုတွာ အနုပါဒိဏ္ဏံ ဟောတီတိ? န ဟေဝံ ဝတ္တဗ္ဗေ။ပေ.။။
ဥပါဒိဏ္ဏံ ဟုတွာ အနုပါဒိဏ္ဏံ ဟောတီတိ? အာမန္တာ။ ကာမာဝစရံ ဟုတွာ ရူပါဝစရံ ဟောတီတိ? န ဟေဝံ ဝတ္တဗ္ဗေ။ပေ.။။
ကာမာဝစရံ ဟုတွာ ရူပါဝစရံ ဟောတီတိ? အာမန္တာ။ ရူပါဝစရံ ဟုတွာ အရူပါဝစရံ ဟောတီတိ? န ဟေဝံ ဝတ္တဗ္ဗေ။ပေ.။။
ရူပါဝစရံ ဟုတွာ အရူပါဝစရံ ဟောတီတိ? အာမန္တာ။ ပရိယာပန္နံ ဟုတွာ အပရိယာပန္နံ ဟောတီတိ? န ဟေဝံ ဝတ္တဗ္ဗေ။ပေ.။။
၃၇၄. မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ။ ဒိဗ္ဗစက္ခုံ ဓမ္မုပတ္ထဒ္ဓံ မံသစက္ခုံ ဟောတီတိ? န ဟေဝံ ဝတ္တဗ္ဗေ။ပေ.။။
မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ။ ဒိဗ္ဗစက္ခုံ ဓမ္မုပတ္ထဒ္ဓံ ပညာစက္ခုံ ဟောတီတိ? န ဟေဝံ ဝတ္တဗ္ဗေ။ပေ.။။
မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ။ ဒိဗ္ဗစက္ခုံ ဓမ္မုပတ္ထဒ္ဓံ မံသစက္ခုံ ဟောတီတိ? န ဟေဝံ ဝတ္တဗ္ဗေ။ပေ.။။
မံသစက္ခုံ ဓမ္မုပတ္ထဒ္ဓံ ဒိဗ္ဗစက္ခုံ ဟောတီတိ? အာမန္တာ။ ဒွေဝ စက္ခူနီတိ? န ဟေဝံ ဝတ္တဗ္ဗေ။ပေ.။ ဒွေဝ စက္ခူနီတိ? အာမန္တာ။ နနု တီဏိ စက္ခူနိ ဝုတ္တာနိ ဘဂဝတာ – မံသစက္ခုံ, ဒိဗ္ဗစက္ခုံ, ပညာစက္ခုန္တိ? အာမန္တာ။ ဟဉ္စိ တီဏိ စက္ခူနိ ဝုတ္တာနိ ဘဂဝတာ – မံသစက္ခုံ, ဒိဗ္ဗစက္ခုံ, ပညာစက္ခုံ, နော စ ဝတ ရေ ဝတ္တဗ္ဗေ – ‘‘ဒွေဝ စက္ခူနီ’’တိ။
ဒွေဝ စက္ခူနီတိ? အာမန္တာ။ နနု ဝုတ္တံ ဘဂဝတာ – ‘‘တီဏိမာနိ, ဘိက္ခဝေ, စက္ခူနိ! ကတမာနိ တီဏိ? မံသစက္ခုံ, ဒိဗ္ဗစက္ခုံ, ပညာစက္ခုန္တိ – ဣမာနိ ခေါ, ဘိက္ခဝေ, တီဏိ စက္ခူနီ’’တိ။
‘‘မံသစက္ခုံ ဒိဗ္ဗစက္ခုံ၊ ပညာစက္ခုံ အနုတ္တရံ။
ဧတာနိ တီဏိ စက္ခူနိ၊ အက္ခာသိ ပုရိသုတ္တမော။
‘‘မံသစက္ခုဿ ဥပ္ပါဒေါ၊ မဂ္ဂေါ ဒိဗ္ဗဿ စက္ခုနော။
ယဒါ စ ဉာဏံ ဥဒပါဒိ၊ ပညာစက္ခုံ အနုတ္တရံ။
တဿ စက္ခုဿ ပဋိလာဘာ၊ သဗ္ဗဒုက္ခာ ပမုစ္စတီ’’တိ [ဣတိဝု. ၆၁ ဣတိဝုတ္တကေ]။
အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ဒွေဝ စက္ခူနီ’’တိ။
ဒိဗ္ဗစက္ခုကထာ နိဋ္ဌိတာ။
၃. တတိယဝဂ္ဂေါ
(၂၈) ၈. ဒိဗ္ဗသောတကထာ
၃၇၅. မံသသောတံ ဓမ္မုပတ္ထဒ္ဓံ ဒိဗ္ဗသောတံ ဟောတီတိ? အာမန္တာ။ မံသသောတံ ဒိဗ္ဗသောတံ, ဒိဗ္ဗသောတံ မံသသောတန္တိ? န ဟေဝံ ဝတ္တဗ္ဗေ။ပေ.။။
မံသသောတံ ဓမ္မုပတ္ထဒ္ဓံ ဒိဗ္ဗသောတံ ဟောတီတိ? အာမန္တာ။ ယာဒိသံ မံသသောတံ တာဒိသံ ဒိဗ္ဗသောတံ, ယာဒိသံ ဒိဗ္ဗသောတံ တာဒိသံ မံသသောတန္တိ? န ဟေဝံ ဝတ္တဗ္ဗေ။ပေ.။။
မံသသောတံ ဓမ္မုပတ္ထဒ္ဓံ ဒိဗ္ဗသောတံ ဟောတီတိ? အာမန္တာ။ တညေဝ မံသသောတံ တံ ဒိဗ္ဗသောတံ, တံ ဒိဗ္ဗသောတံ တံ မံသသောတန္တိ? န ဟေဝံ ဝတ္တဗ္ဗေ။ပေ.။။
မံသသောတံ ဓမ္မုပတ္ထဒ္ဓံ ဒိဗ္ဗသောတံ ဟောတီတိ? အာမန္တာ။ ယာဒိသော မံသသောတဿ ဝိသယော အာနုဘာဝေါ ဂေါစရော တာဒိသော ဒိဗ္ဗဿ သောတဿ ဝိသယော အာနုဘာဝေါ ဂေါစရောတိ? န ဟေဝံ ဝတ္တဗ္ဗေ။ပေ.။။
မံသသောတံ ဓမ္မုပတ္ထဒ္ဓံ ဒိဗ္ဗသောတံ ဟောတီတိ? အာမန္တာ။ ဥပါဒိဏ္ဏံ ဟုတွာ အနုပါဒိဏ္ဏံ ဟောတီတိ? န ဟေဝံ ဝတ္တဗ္ဗေ။ပေ.။။
ဥပါဒိဏ္ဏံ ဟုတွာ အနုပါဒိဏ္ဏံ ဟောတီတိ? အာမန္တာ။ ကာမာဝစရံ ဟုတွာ ရူပါဝစရံ ဟောတီတိ? န ဟေဝံ ဝတ္တဗ္ဗေ။ပေ.။။
ကာမာဝစရံ ဟုတွာ ရူပါဝစရံ ဟောတီတိ? အာမန္တာ။ ရူပါဝစရံ ဟုတွာ အရူပါဝစရံ ဟောတီတိ? န ဟေဝံ ဝတ္တဗ္ဗေ။ပေ.။။
ရူပါဝစရံ ဟုတွာ အရူပါဝစရံ ဟောတီတိ? အာမန္တာ။ ပရိယာပန္နံ ဟုတွာ အပရိယာပန္နံ ဟောတီတိ? န ဟေဝံ ဝတ္တဗ္ဗေ။ပေ.။။
၃၇၆. မံသသောတံ ဓမ္မုပတ္ထဒ္ဓံ ဒိဗ္ဗသောတံ ဟောတီတိ? အာမန္တာ။ ဒိဗ္ဗသောတံ ဓမ္မုပတ္ထဒ္ဓံ မံသသောတံ ဟောတီတိ? န ဟေဝံ ဝတ္တဗ္ဗေ။ပေ.။။
မံသသောတံ ဓမ္မုပတ္ထဒ္ဓံ ဒိဗ္ဗသောတံ ဟောတီတိ? အာမန္တာ။ ဧကံယေဝ သောတန္တိ? န ဟေဝံ ဝတ္တဗ္ဗေ။ပေ.။။
ဧကံယေဝ သောတန္တိ? အာမန္တာ။ နနု ဒွေ သောတာနိ ဝုတ္တာနိ ဘဂဝတာ – ‘‘မံသသောတံ, ဒိဗ္ဗသောတ’’န္တိ? အာမန္တာ။ ဟဉ္စိ ဒွေ သောတာနိ ဝုတ္တာနိ ဘဂဝတာ – မံသသောတံ, ဒိဗ္ဗသောတံ, နော စ ဝတ ရေ ဝတ္တဗ္ဗေ – ‘‘ဧကညေဝ သောတ’’န္တိ။
ဒိဗ္ဗသောတကထာ နိဋ္ဌိတာ။
၃. တတိယဝဂ္ဂေါ
(၂၉) ၉. ယထာကမ္မူပဂတဉာဏကထာ
၃၇၇. ယထာကမ္မူပဂတံ ဉာဏံ [ယထာကမ္မူပဂတဉာဏံ (သျာ. ကံ.)] ဒိဗ္ဗစက္ခုန္တိ? အာမန္တာ။ ယထာကမ္မူပဂတဉ္စ မနသိ ကရောတိ, ဒိဗ္ဗေန စက္ခုနာ ရူပံ ပဿတီတိ? န ဟေဝံ ဝတ္တဗ္ဗေ။ပေ.။။
ယထာကမ္မူပဂတဉ္စ မနသိ ကရောတိ, ဒိဗ္ဗေန စက္ခုနာ ရူပံ ပဿတီတိ? အာမန္တာ။ ဒွိန္နံ ဖဿာနံ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
ယထာကမ္မူပဂတံ ဉာဏံ ဒိဗ္ဗစက္ခုန္တိ? အာမန္တာ။ ‘‘ဣမေ ဝတ ဘောန္တော သတ္တာ’’တိ စ မနသိ ကရောတိ, ‘‘ကာယဒုစ္စရိတေန သမန္နာဂတာ’’တိ စ မနသိ ကရောတိ, ‘‘ဝစီဒုစ္စရိတေန သမန္နာဂတာ’’တိ စ မနသိ ကရောတိ, ‘‘မနောဒုစ္စရိတေန သမန္နာဂတာ’’တိ စ မနသိ ကရောတိ, ‘‘အရိယာနံ ဥပဝါဒကာ’’တိ စ မနသိ ကရောတိ, ‘‘မိစ္ဆာဒိဋ္ဌိကာ’’တိ စ မနသိ ကရောတိ, ‘‘မိစ္ဆာဒိဋ္ဌိကမ္မသမာဒါနာ’’တိ စ မနသိ ကရောတိ, ‘‘တေ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပန္နာ’’တိ စ မနသိ ကရောတိ, ‘‘ဣမေ ဝါ ပန ဘောန္တော သတ္တာ’’တိ စ မနသိ ကရောတိ, ‘‘ကာယသုစရိတေန သမန္နာဂတာ’’တိ စ မနသိ ကရောတိ, ‘‘ဝစီသုစရိတေန သမန္နာဂတာ’’တိ စ မနသိ ကရောတိ, ‘‘မနောသုစရိတေန သမန္နာဂတာ’’တိ စ မနသိ ကရောတိ, ‘‘အရိယာနံ အနုပဝါဒကာ’’တိ စ မနသိ ကရောတိ, ‘‘သမ္မာဒိဋ္ဌိကာ’’တိ စ မနသိ ကရောတိ, ‘‘သမ္မာဒိဋ္ဌိကမ္မသမ္မာဒါနာ’’တိ စ မနသိ ကရောတိ, ‘‘တေ ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပန္နာ’’တိ စ မနသိ ကရောတိ, ဒိဗ္ဗေန စက္ခုနာ ရူပံ ပဿတီတိ? န ဟေဝံ ဝတ္တဗ္ဗေ။ပေ.။။
‘‘တေ ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပန္နာ’’တိ စ မနသိ ကရောတိ, ဒိဗ္ဗေန စက္ခုနာ ရူပံ ပဿတီတိ? အာမန္တာ။ ဒွိန္နံ ဖဿာနံ ဒွိန္နံ စိတ္တာနံ သမောဓါနံ ဟောတီတိ? န ဟေဝံ ဝတ္တဗ္ဗေ။ပေ.။။
၃၇၈. ယထာကမ္မူပဂတံ ဉာဏံ ဒိဗ္ဗစက္ခုန္တိ? အာမန္တာ။ အတ္ထိ ကောစိ အဒိဗ္ဗစက္ခုကော ဒိဗ္ဗစက္ခုံ အပ္ပဋိလဒ္ဓေါ အနဓိဂတော အသစ္ဆိကတော ယထာကမ္မူပဂတံ ဇာနာတီတိ? အာမန္တာ။ ဟဉ္စိ အတ္ထိ ကောစိ အဒိဗ္ဗစက္ခုကော ဒိဗ္ဗစက္ခုံ အပ္ပဋိလဒ္ဓေါ အနဓိဂတော အသစ္ဆိကတော ယထာကမ္မူပဂတံ ဇာနာတိ, နော စ ဝတ ရေ ဝတ္တဗ္ဗေ – ‘‘ယထာကမ္မူပဂတံ ဉာဏံ ဒိဗ္ဗစက္ခု’’န္တိ။
ယထာကမ္မူပဂတံ ဉာဏံ ဒိဗ္ဗစက္ခုန္တိ? အာမန္တာ။ အာယသ္မာ သာရိပုတ္တော ယထာကမ္မူပဂတံ ဉာဏံ ဇာနာတီတိ? အာမန္တာ။ ဟဉ္စိ အာယသ္မာ သာရိပုတ္တော ယထာကမ္မူပဂတံ ဉာဏံ ဇာနာတိ, နော စ ဝတ ရေ ဝတ္တဗ္ဗေ – ‘‘ယထာကမ္မူပဂတံ ဉာဏံ ဒိဗ္ဗစက္ခု’’န္တိ။
ယထာကမ္မူပဂတံ ဉာဏံ ဒိဗ္ဗစက္ခုန္တိ? အာမန္တာ။ အာယသ္မာ သာရိပုတ္တော ယထာကမ္မူပဂတံ ဉာဏံ ဇာနာတီတိ? အာမန္တာ။ အတ္ထာယသ္မတော သာရိပုတ္တဿ ဒိဗ္ဗစက္ခုန္တိ? န ဟေဝံ ဝတ္တဗ္ဗေ။ပေ.။။
အတ္ထာယသ္မတော သာရိပုတ္တဿ ဒိဗ္ဗစက္ခုန္တိ? အာမန္တာ။ နနု အာယသ္မာ သာရိပုတ္တော ဧတဒဝေါစ –
‘‘နေဝ ပုဗ္ဗေနိဝါသာယ၊ နပိ ဒိဗ္ဗဿ စက္ခုနော။
စေတောပရိယာယ ဣဒ္ဓိယာ၊ သောတဓါတုဝိသုဒ္ဓိယာ။
စုတိယာ ဥပပတ္တိယာ၊ ပဏိဓိ မေ န ဝိဇ္ဇတီ’’တိ [ထေရဂါ. ၉၉၆ ထေရဂါထာယံ]။
အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ယထာကမ္မူပဂတံ ဉာဏံ ဒိဗ္ဗစက္ခု’’န္တိ။
ယထာကမ္မူပဂတဉာဏကထာ နိဋ္ဌိတာ။
၃. တတိယဝဂ္ဂေါ
(၃၀) ၁၀. သံဝရကထာ
၃၇၉. အတ္ထိ ဒေဝေသု သံဝရောတိ? အာမန္တာ။ အတ္ထိ ဒေဝေသု အသံဝရောတိ? န ဟေဝံ ဝတ္တဗ္ဗေ။ပေ.။။
နတ္ထိ ဒေဝေသု အသံဝရောတိ? အာမန္တာ။ နတ္ထိ ဒေဝေသု သံဝရောတိ? န ဟေဝံ ဝတ္တဗ္ဗေ။ပေ.။။
နနု အသံဝရာ သံဝရော သီလံ, အတ္ထိ ဒေဝေသု သံဝရောတိ? အာမန္တာ။ အတ္ထိ ဒေဝေသု အသံဝရော, ယမှာ အသံဝရာ သံဝရော သီလန္တိ? န ဟေဝံ ဝတ္တဗ္ဗေ။ပေ.။။
အာဇာနာဟိ နိဂ္ဂဟံ။ ဟဉ္စိ အသံဝရာ သံဝရော သီလံ, အတ္ထိ ဒေဝေသု သံဝရော, တေန ဝတ ရေ ဝတ္တဗ္ဗေ – ‘‘အတ္ထိ ဒေဝေသု အသံဝရော, ယမှာ အသံဝရာ သံဝရော သီလ’’န္တိ။ ယံ တတ္ထ ဝဒေသိ – ‘‘ဝတ္တဗ္ဗေ ခေါ – ‘အသံဝရာ သံဝရော သီလံ, အတ္ထိ ဒေဝေသု သံဝရော,’ နော စ ဝတ္တဗ္ဗေ – ‘အတ္ထိ ဒေဝေသု အသံဝရော, ယမှာ အသံဝရာ သံဝရော သီလ’’’န္တိ မိစ္ဆာ။
နော စေ ပန ဝတ္တဗ္ဗေ – ‘‘အတ္ထိ ဒေဝေသု အသံဝရော, ယမှာ အသံဝရာ သံဝရော သီလ’’န္တိ, နော စ ဝတ ရေ ဝတ္တဗ္ဗေ – ‘‘အသံဝရာ သံဝရော သီလံ, အတ္ထိ ဒေဝေသု သံဝရော’’တိ။ ယံ တတ္ထ ဝဒေသိ – ‘‘ဝတ္တဗ္ဗေ ခေါ ‘အသံဝရာ သံဝရော သီလံ, အတ္ထိ ဒေဝေသု သံဝရော,’ နော စ ဝတ္တဗ္ဗေ – ‘အတ္ထိ ဒေဝေသု အသံဝရော, ယမှာ အသံဝရာ သံဝရော သီလ’’’န္တိ မိစ္ဆာ။
အတ္ထိ မနုဿေသု သံဝရော, အတ္ထိ တတ္ထ အသံဝရောတိ? အာမန္တာ။ အတ္ထိ ဒေဝေသု သံဝရော, အတ္ထိ တတ္ထ အသံဝရောတိ? န ဟေဝံ ဝတ္တဗ္ဗေ။ပေ.။။
အတ္ထိ ဒေဝေသု သံဝရော, နတ္ထိ တတ္ထ အသံဝရောတိ? အာမန္တာ။ အတ္ထိ မနုဿေသု သံဝရော, နတ္ထိ တတ္ထ အသံဝရောတိ? န ဟေဝံ ဝတ္တဗ္ဗေ။ပေ.။။
၃၈၀. အတ္ထိ ဒေဝေသု ပါဏာတိပါတာ ဝေရမဏီတိ? အာမန္တာ။ အတ္ထိ ဒေဝေသု ပါဏာတိပါတောတိ? န ဟေဝံ ဝတ္တဗ္ဗေ။ပေ.။။
အတ္ထိ ဒေဝေသု သုရာမေရယမဇ္ဇပမာဒဋ္ဌာနာ ဝေရမဏီတိ? အာမန္တာ။ အတ္ထိ ဒေဝေသု သုရာမေရယမဇ္ဇပမာဒဋ္ဌာနန္တိ? န ဟေဝံ ဝတ္တဗ္ဗေ။ပေ.။။
နတ္ထိ ဒေဝေသု ပါဏာတိပါတောတိ? အာမန္တာ။ နတ္ထိ ဒေဝေသု ပါဏာတိပါတာ ဝေရမဏီတိ? န ဟေဝံ ဝတ္တဗ္ဗေ။ပေ.။။
နတ္ထိ ဒေဝေသု သုရာမေရယမဇ္ဇပမာဒဋ္ဌာနန္တိ? အာမန္တာ။ နတ္ထိ ဒေဝေသု သုရာမေရယမဇ္ဇပမာဒဋ္ဌာနာ ဝေရမဏီတိ? န ဟေဝံ ဝတ္တဗ္ဗေ။ပေ.။။
အတ္ထိ မနုဿေသု ပါဏာတိပါတာ ဝေရမဏိ, အတ္ထိ တတ္ထ ပါဏာတိပါတောတိ ? အာမန္တာ။ အတ္ထိ ဒေဝေသု ပါဏာတိပါတာ ဝေရမဏိ, အတ္ထိ တတ္ထ ပါဏာတိပါတောတိ? န ဟေဝံ ဝတ္တဗ္ဗေ။ပေ.။။
အတ္ထိ မနုဿေသု သုရာမေရယမဇ္ဇပမာဒဋ္ဌာနာ ဝေရမဏိ, အတ္ထိ တတ္ထ သုရာမေရယမဇ္ဇပမာဒဋ္ဌာနန္တိ? အာမန္တာ။ အတ္ထိ ဒေဝေသု သုရာမေရယမဇ္ဇပမာဒဋ္ဌာနာ ဝေရမဏိ, အတ္ထိ တတ္ထ သုရာမေရယမဇ္ဇပမာဒဋ္ဌာနန္တိ? န ဟေဝံ ဝတ္တဗ္ဗေ။ပေ.။။
အတ္ထိ ဒေဝေသု ပါဏာတိပါတာ ဝေရမဏိ, နတ္ထိ တတ္ထ ပါဏာတိပါတောတိ? အာမန္တာ။ အတ္ထိ မနုဿေသု ပါဏာတိပါတာ ဝေရမဏိ, နတ္ထိ တတ္ထ ပါဏာတိပါတောတိ? န ဟေဝံ ဝတ္တဗ္ဗေ။ပေ.။။
အတ္ထိ ဒေဝေသု သုရာမေရယမဇ္ဇပမာဒဋ္ဌာနာ ဝေရမဏိ, နတ္ထိ တတ္ထ သုရာမေရယမဇ္ဇပမာဒဋ္ဌာနန္တိ? အာမန္တာ။ အတ္ထိ မနုဿေသု သုရာမေရယမဇ္ဇပမာဒဋ္ဌာနာ ဝေရမဏိ, နတ္ထိ တတ္ထ သုရာမေရယမဇ္ဇပမာဒဋ္ဌာနန္တိ? န ဟေဝံ ဝတ္တဗ္ဗေ။ပေ.။။
နတ္ထိ ဒေဝေသု သံဝရောတိ? အာမန္တာ။ သဗ္ဗေ ဒေဝါ ပါဏာတိပါတိနော အဒိန္နာဒါယိနော ကာမေသုမိစ္ဆာစာရိနော မုသာဝါဒိနော သုရာမေရယမဇ္ဇပမာဒဋ္ဌာယိနောတိ? န ဟေဝံ ဝတ္တဗ္ဗေ။ပေ.။ တေန ဟိ အတ္ထိ ဒေဝေသု သံဝရောတိ။
သံဝရကထာ နိဋ္ဌိတာ။
၃. တတိယဝဂ္ဂေါ
(၃၁) ၁၁. အသညကထာ
၃၈၁. အသညသတ္တေသု သညာ အတ္ထီတိ? အာမန္တာ။ သညာဘဝေါ သညာဂတိ သညာသတ္တာဝါသော သညာသံသာရော သညာယောနိ သညတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။။
နနု အသညဘဝေါ အသညဂတိ အသညသတ္တာဝါသော အသညသံသာရော အသညယောနိ အသညတ္တဘာဝပဋိလာဘောတိ? အာမန္တာ။ ဟဉ္စိ အသညဘဝေါ အသညဂတိ အသညသတ္တာဝါသော အသညသံသာရော အသညယောနိ အသညတ္တဘာဝပဋိလာဘော, နော စ ဝတ ရေ ဝတ္တဗ္ဗေ – ‘‘အသညသတ္တေသု သညာ အတ္ထီ’’တိ။
အသညသတ္တေသု သညာ အတ္ထီတိ? အာမန္တာ ။ ပဉ္စဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။။
နနု ဧကဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘောတိ? အာမန္တာ ။ ဟဉ္စိ ဧကဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘော, နော စ ဝတ ရေ ဝတ္တဗ္ဗေ – ‘‘အသညသတ္တေသု သညာ အတ္ထီ’’တိ။
အသညသတ္တေသု သညာ အတ္ထီတိ? အာမန္တာ။ တာယ သညာယ သညာကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။။
၃၈၂. မနုဿေသု သညာ အတ္ထိ, သော စ သညာဘဝေါ သညာဂတိ သညာသတ္တာဝါသော သညာသံသာရော သညာယောနိ သညတ္တဘာဝပဋိလာဘောတိ? အာမန္တာ။ အသညသတ္တေသု သညာ အတ္ထိ, သော စ သညာဘဝေါ သညာဂတိ သတ္တာဝါသော သံသာရော ယောနိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။။
မနုဿေသု သညာ အတ္ထိ, သော စ ပဉ္စဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘောတိ? အာမန္တာ။ အသညသတ္တေသု သညာ အတ္ထိ, သော စ ပဉ္စဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။။
မနုဿေသု သညာ အတ္ထိ, တာယ သညာယ သညာကရဏီယံ ကရောတီတိ? အာမန္တာ။ အသညသတ္တေသု သညာ အတ္ထိ, တာယ သညာယ သညာကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။။
အသညသတ္တေသု သညာ အတ္ထိ, သော စ အသညဘဝေါ အသညဂတိ အသညသတ္တာဝါသော အသညသံသာရော အသညယောနိ အသညတ္တဘာဝပဋိလာဘောတိ? အာမန္တာ။ မနုဿေသု သညာ အတ္ထိ, သော စ အသညဘဝေါ အသညဂတိ။ပေ.။ အသညတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။။
အသညသတ္တေသု သညာ အတ္ထိ, သော စ ဧကဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘောတိ? အာမန္တာ။ မနုဿေသု သညာ အတ္ထိ, သော စ ဧကဝေါကာရဘဝေါ ဂတိ။ပေ.။ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။။
အသညသတ္တေသု သညာ အတ္ထိ, န စ တာယ သညာယ သညာကရဏီယံ ကရောတီတိ? အာမန္တာ။ မနုဿေသု သညာ အတ္ထိ, န စ တာယ သညာယ သညာကရဏီယံ ကရောတီတိ? န ဟေဝံ ဝတ္တဗ္ဗေ။ပေ.။။
၃၈၃. န ဝတ္တဗ္ဗံ – ‘‘အသညသတ္တေသု သညာ အတ္ထီ’’တိ? အာမန္တာ။ နနု ဝုတ္တံ ဘဂဝတာ – ‘‘သန္တိ, ဘိက္ခဝေ, အသညသတ္တာ နာမ ဒေဝါ; သညုပ္ပါဒါ စ ပန တေ ဒေဝါ တမှာ ကာယာ စဝန္တီ’’တိ [ဒီ. နိ. ၁.၆၈]! အတ္ထေဝ သုတ္တန္တောတိ? အာမန္တာ။ တေန ဟိ အသညသတ္တေသု သညာ အတ္ထီတိ။
အသညသတ္တေသု သညာ အတ္ထီတိ? ကိဉ္စိ [ကဉ္စိ (သျာ.)] ကာလေ အတ္ထိ, ကိဉ္စိ ကာလေ နတ္ထီတိ။ ကိဉ္စိ ကာလေ သညသတ္တာ ကိဉ္စိ ကာလေ အသညသတ္တာ, ကိဉ္စိ ကာလေ သညဘဝေါ ကိဉ္စိ ကာလေ အသညဘဝေါ, ကိဉ္စိ ကာလေ ပဉ္စဝေါကာရဘဝေါ ကိဉ္စိ ကာလေ ဧကဝေါကာရဘဝေါတိ? န ဟေဝံ ဝတ္တဗ္ဗေ။ပေ.။။
အသညသတ္တေသု သညာ ကိဉ္စိ ကာလေ အတ္ထိ, ကိဉ္စိ ကာလေ နတ္ထီတိ? အာမန္တာ။ ကံ ကာလံ အတ္ထိ, ကံ ကာလံ နတ္ထီတိ? စုတိကာလေ ဥပပတ္တိကာလေ အတ္ထိ, ဌိတိကာလေ နတ္ထီတိ။ စုတိကာလေ ဥပပတ္တိကာလေ သညသတ္တာ, ဌိတိကာလေ အသညသတ္တာ; စုတိကာလေ ဥပပတ္တိကာလေ သညဘဝေါ, ဌိတိကာလေ အသညဘဝေါ; စုတိကာလေ ဥပပတ္တိကာလေ ပဉ္စဝေါကာရဘဝေါ, ဌိတိကာလေ ဧကဝေါကာရဘဝေါတိ? န ဟေဝံ ဝတ္တဗ္ဗေ။ပေ.။။
အသညကထာ နိဋ္ဌိတာ။
၃. တတိယဝဂ္ဂေါ
(၃၂) ၁၂. နေဝသညာနာသညာယတနကထာ
၃၈၄. နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထီ’’တိ? အာမန္တာ။ အသညဘဝေါ အသညဂတိ အသညသတ္တာဝါသော အသညသံသာရော အသညယောနိ အသညတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။။
နနု သညာဘဝေါ သညာဂတိ သညာသတ္တာဝါသော သညာသံသာရော သညာယောနိ သညတ္တဘာဝပဋိလာဘောတိ? အာမန္တာ။ ဟဉ္စိ သညာဘဝေါ သညာဂတိ။ပေ.။ သညတ္တဘာဝပဋိလာဘော, နော စ ဝတ ရေ ဝတ္တဗ္ဗေ – ‘‘နေဝသညာနာသညာယတနေ န ဝတ္တဗ္ဗံ – ‘သညာ အတ္ထီ’’’တိ။
နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထီ’’တိ? အာမန္တာ။ ဧကဝေါကာရဘဝေါ ဂတိ။ပေ.။ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။။
နနု စတုဝေါကာရဘဝေါ ဂတိ။ပေ.။ အတ္တဘာဝပဋိလာဘောတိ? အာမန္တာ။ ဟဉ္စိ စတုဝေါကာရဘဝေါ ဂတိ။ပေ.။ အတ္တဘာဝပဋိလာဘော, နော စ ဝတ ရေ ဝတ္တဗ္ဗေ – ‘‘နေဝသညာနာသညာယတနေ န ဝတ္တဗ္ဗံ – ‘သညာ အတ္ထီ’’’တိ။
၃၈၅. အသညသတ္တေသု န ဝတ္တဗ္ဗံ – ‘‘သညာ အတ္ထိ’’, သော စ အသညဘဝေါ အသညဂတိ အသညသတ္တာဝါသော အသညသံသာရော အသညယောနိ အသညတ္တဘာဝပဋိလာဘောတိ? အာမန္တာ။ နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထိ,’’ သော စ အသညဘဝေါ အသညဂတိ အသညသတ္တာဝါသော အသညသံသာရော အသညယောနိ အသညတ္တဘာဝပဋိလာဘောတိ ? န ဟေဝံ ဝတ္တဗ္ဗေ။ပေ.။။
အသညသတ္တေသု န ဝတ္တဗ္ဗံ – ‘‘သညာ အတ္ထိ,’’ သော စ ဧကဝေါကာရဘဝေါ ဂတိ။ပေ.။ အတ္တဘာဝပဋိလာဘောတိ? အာမန္တာ။ နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထိ,’’ သော စ ဧကဝေါကာရဘဝေါ ဂတိ သတ္တာဝါသော သံသာရော ယောနိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။။
နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထိ,’’ သော စ သညာဘဝေါ သညာဂတိ။ပေ.။ သညတ္တဘာဝပဋိလာဘောတိ? အာမန္တာ။ အသညသတ္တေသု န ဝတ္တဗ္ဗံ – ‘‘သညာ အတ္ထိ,’’ သော စ သညာဘဝေါ သညာဂတိ။ပေ.။ သညတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။။
နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထိ,’’ သော စ စတုဝေါကာရဘဝေါ ဂတိ။ပေ.။ အတ္တဘာဝပဋိလာဘောတိ? အာမန္တာ။ အသညသတ္တေသု န ဝတ္တဗ္ဗံ – ‘‘သညာ အတ္ထိ,’’ သော စ စတုဝေါကာရဘဝေါ ဂတိ။ပေ.။ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။။
နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထီ’’တိ? အာမန္တာ။ နနု နေဝသညာနာသညာယတနံ စတုဝေါကာရဘဝေါတိ? အာမန္တာ။ ဟဉ္စိ နေဝသညာနာသညာယတနံ စတုဝေါကာရဘဝေါ, နော စ ဝတ ရေ ဝတ္တဗ္ဗေ – ‘‘နေဝသညာနာသညာယတနေ န ဝတ္တဗ္ဗံ – ‘သညာ အတ္ထီ’’’တိ။
၃၈၆. နေဝသညာနာသညာယတနံ စတုဝေါကာရဘဝေါ နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထီ’’တိ? အာမန္တာ။ အာကာသာနဉ္စာယတနံ စတုဝေါကာရဘဝေါ အာကာသာနဉ္စာယတနေ န ဝတ္တဗ္ဗံ – ‘‘သညာ အတ္ထီ’’တိ? န ဟေဝံ ဝတ္တဗ္ဗေ။ပေ.။။
နေဝသညာနာသညာယတနံ စတုဝေါကာရဘဝေါ, နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထီ’’တိ? အာမန္တာ။ ဝိညာဏဉ္စာယတနံ။ပေ.။ အာကိဉ္စညာယတနံ စတုဝေါကာရဘဝေါ, အာကိဉ္စညာယတနေ န ဝတ္တဗ္ဗံ – ‘‘သညာ အတ္ထီ’’တိ? န ဟေဝံ ဝတ္တဗ္ဗေ။ပေ.။။
အာကာသာနဉ္စာယတနံ စတုဝေါကာရဘဝေါ, အတ္ထိ တတ္ထ သညာတိ? အာမန္တာ။ နေဝသညာနာသညာယတနံ စတုဝေါကာရဘဝေါ, အတ္ထိ တတ္ထ သညာတိ? န ဟေဝံ ဝတ္တဗ္ဗေ။ပေ.။။
ဝိညာဏဉ္စာယတနံ။ပေ.။ အာကိဉ္စညာယတနံ စတုဝေါကာရဘဝေါ, အတ္ထိ တတ္ထ သညာတိ? အာမန္တာ။ နေဝသညာနာသညာယတနံ စတုဝေါကာရဘဝေါ, အတ္ထိ တတ္ထ သညာတိ? န ဟေဝံ ဝတ္တဗ္ဗေ။ပေ.။။
နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထီ’’တိ ဝါ ‘‘နတ္ထီ’’တိ ဝါတိ? အာမန္တာ ။ နနု နေဝသညာနာသညာယတနံ စတုဝေါကာရဘဝေါတိ? အာမန္တာ။ ဟဉ္စိ နေဝသညာနာသညာယတနံ စတုဝေါကာရဘဝေါ, နော စ ဝတ ရေ ဝတ္တဗ္ဗေ – ‘‘နေဝသညာနာသညာယတနေ န ဝတ္တဗ္ဗံ – ‘သညာ အတ္ထီ’တိ ဝါ ‘နတ္ထီ’တိ ဝါ’’တိ။
နေဝသညာနာသညာယတနံ စတုဝေါကာရဘဝေါ, နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထီ’’တိ ဝါ ‘‘နတ္ထီ’’တိ ဝါတိ? အာမန္တာ။ အာကာသာနဉ္စာယတနံ။ပေ.။ ဝိညာဏဉ္စာယတနံ။ပေ.။ အာကိဉ္စညာယတနံ စတုဝေါကာရဘဝေါ, အာကိဉ္စညာယတနေ န ဝတ္တဗ္ဗံ – ‘‘သညာ အတ္ထီ’’တိ ဝါ ‘‘နတ္ထီ’’တိ ဝါတိ? န ဟေဝံ ဝတ္တဗ္ဗေ။ပေ.။။
အာကာသာနဉ္စာယတနံ စတုဝေါကာရဘဝေါ, အတ္ထိ တတ္ထ သညာတိ? အာမန္တာ။ နေဝသညာနာသညာယတနံ စတုဝေါကာရဘဝေါ, အတ္ထိ တတ္ထ သညာတိ? န ဟေဝံ ဝတ္တဗ္ဗေ။ပေ.။။
ဝိညာဏဉ္စာယတနံ။ပေ.။ အာကိဉ္စညာယတနံ စတုဝေါကာရဘဝေါ, အတ္ထိ တတ္ထ သညာတိ? အာမန္တာ။ နေဝသညာနာသညာယတနံ စတုဝေါကာရဘဝေါ, အတ္ထိ တတ္ထ သညာတိ? န ဟေဝံ ဝတ္တဗ္ဗေ။ပေ.။။
နေဝသညာနာသညာယတနေ န ဝတ္တဗ္ဗံ [နေဝသညာနာသညာယတနေ ဝတ္တဗ္ဗံ (?)] – ‘‘သညာ အတ္ထီ’’တိ ဝါ ‘‘နတ္ထီ’’တိ ဝါတိ? အာမန္တာ။ နနု နေဝသညာနာသညာယတနန္တိ? အာမန္တာ။ ဟဉ္စိ နေဝသညာနာသညာယတနံ, တေန ဝတ ရေ ဝတ္တဗ္ဗေ – ‘‘နေဝသညာနာသညာယတနေ န ဝတ္တဗ္ဗံ – ‘သညာ အတ္ထီ’တိ ဝါ ‘နတ္ထီ’တိ ဝါ’’တိ။
နေဝသညာနာသညာယတနန္တိ ကတွာ နေဝသညာနာသညာယတနေ န ဝတ္တဗ္ဗံ – ‘‘သညာ အတ္ထီ’’တိ ဝါ ‘‘နတ္ထီ’’တိ ဝါတိ? အာမန္တာ။ အဒုက္ခမသုခါ ဝေဒနာတိ ကတွာ အဒုက္ခမသုခါယ ဝေဒနာယ [အဒုက္ခမသုခါ ဝေဒနာ (သီ. က.)] န ဝတ္တဗ္ဗံ – ‘‘ဝေဒနာ’’တိ ဝါ ‘‘အဝေဒနာ’’တိ ဝါတိ? န ဟေဝံ ဝတ္တဗ္ဗေ။ပေ.။။
နေဝသညာနာသညာယတနကထာ နိဋ္ဌိတာ။
တတိယဝဂ္ဂေါ။
တဿုဒ္ဒါနံ –
ဗလံ သာဓါရဏံ အရိယံ၊ သရာဂံ စိတ္တံ ဝိမုစ္စတိ။
ဝိမုတ္တံ ဝိမုစ္စမာနံ၊ အတ္ထိ စိတ္တံ ဝိမုစ္စမာနံ။
အဋ္ဌမကဿ ပုဂ္ဂလဿ၊ ဒိဋ္ဌိပရိယုဋ္ဌာနံ ပဟီနံ။
အဋ္ဌမကဿ ပုဂ္ဂလဿ၊ နတ္ထိ ပဉ္စိန္ဒ္ရိယာနိ စက္ခုံ။
သောတံ ဓမ္မုပတ္ထဒ္ဓံ၊ ယထာကမ္မူပဂတံ ဉာဏံ။
ဒေဝေသု သံဝရော အသည-သတ္တေသု သညာ ဧဝမေဝ ဘဝဂ္ဂန္တိ။