၉. ဟေဝတ္ထိကထာ
၃၀၄. အတီတံ အတ္ထီတိ? ဟေဝတ္ထိ, ဟေဝ နတ္ထီတိ။ သေဝတ္ထိ, သေဝ နတ္ထီတိ? န ဟေဝံ ဝတ္တဗ္ဗေ။ပေ.။ သေဝတ္ထိ, သေဝ နတ္ထီတိ? အာမန္တာ။ အတ္ထဋ္ဌော နတ္ထဋ္ဌော, နတ္ထဋ္ဌော အတ္ထဋ္ဌော, အတ္ထိဘာဝေါ နတ္ထိဘာဝေါ, နတ္ထိဘာဝေါ အတ္ထိဘာဝေါ, အတ္ထီတိ ဝါ နတ္ထီတိ ဝါ, နတ္ထီတိ ဝါ အတ္ထီတိ ဝါ ဧသေသေ ဧကဋ္ဌေ သမေ သမဘာဂေ တဇ္ဇာတေတိ? န ဟေဝံ ဝတ္တဗ္ဗေ။ပေ.။။
အနာဂတံ အတ္ထီတိ? ဟေဝတ္ထိ, ဟေဝ နတ္ထီတိ။ သေဝတ္ထိ, သေဝ နတ္ထီတိ? န ဟေဝံ ဝတ္တဗ္ဗေ။ပေ.။ သေဝတ္ထိ, သေဝ နတ္ထီတိ? အာမန္တာ။ အတ္ထဋ္ဌော နတ္ထဋ္ဌော, နတ္ထဋ္ဌော အတ္ထဋ္ဌော, အတ္ထိဘာဝေါ နတ္ထိဘာဝေါ, နတ္ထိဘာဝေါ အတ္ထိဘာဝေါ, အတ္ထီတိ ဝါ နတ္ထီတိ ဝါ, နတ္ထီတိ ဝါ အတ္ထီတိ ဝါ ဧသေသေ ဧကဋ္ဌေ သမေ သမဘာဂေ တဇ္ဇာတေတိ? န ဟေဝံ ဝတ္တဗ္ဗေ။ပေ.။။
ပစ္စုပ္ပန္နံ အတ္ထီတိ? ဟေဝတ္ထိ, ဟေဝ နတ္ထီတိ။ သေဝတ္ထိ, သေဝ နတ္ထီတိ? န ဟေဝံ ဝတ္တဗ္ဗေ။ပေ.။ သေဝတ္ထိ, သေဝ နတ္ထီတိ? အာမန္တာ ။ အတ္ထဋ္ဌော နတ္ထဋ္ဌော။ပေ.။ သမေ သမဘာဂေ တဇ္ဇာတေတိ? န ဟေဝံ ဝတ္တဗ္ဗေ။ပေ.။။
၃၀၅. အတီတံ ဟေဝတ္ထိ, ဟေဝ နတ္ထီတိ? အာမန္တာ။ ကိန္တတ္ထိ, ကိန္တိ နတ္ထီတိ? အတီတံ အတီတန္တိ ဟေဝတ္ထိ, အတီတံ အနာဂတန္တိ ဟေဝ နတ္ထိ, အတီတံ ပစ္စုပ္ပန္နန္တိ ဟေဝ နတ္ထီတိ။ သေဝတ္ထိ, သေဝ နတ္ထီတိ? န ဟေဝံ ဝတ္တဗ္ဗေ။ပေ.။ သေဝတ္ထိ, သေဝ နတ္ထီတိ? အာမန္တာ။ အတ္ထဋ္ဌော နတ္ထဋ္ဌော, နတ္ထဋ္ဌော အတ္ထဋ္ဌော, အတ္ထိဘာဝေါ နတ္ထိဘာဝေါ, နတ္ထိဘာဝေါ အတ္ထိဘာဝေါ, အတ္ထီတိ ဝါ နတ္ထီတိ ဝါ, နတ္ထီတိ ဝါ အတ္ထီတိ ဝါ ဧသေသေ ဧကဋ္ဌေ သမေ သမဘာဂေ တဇ္ဇာတေတိ? န ဟေဝံ ဝတ္တဗ္ဗေ။ပေ.။။
အနာဂတံ ဟေဝတ္ထိ, ဟေဝ နတ္ထီတိ? အာမန္တာ။ ကိန္တတ္ထိ, ကိန္တိ နတ္ထီတိ? အနာဂတံ အနာဂတန္တိ ဟေဝတ္ထိ, အနာဂတံ အတီတန္တိ ဟေဝ နတ္ထိ, အနာဂတံ ပစ္စုပ္ပန္နန္တိ ဟေဝ နတ္ထီတိ။ သေဝတ္ထိ, သေဝ နတ္ထီတိ? န ဟေဝံ ဝတ္တဗ္ဗေ။ပေ.။ သေဝတ္ထိ, သေဝ နတ္ထီတိ? အာမန္တာ။ အတ္ထဋ္ဌော နတ္ထဋ္ဌော, နတ္ထဋ္ဌော အတ္ထဋ္ဌော။ပေ.။ သမေ သမဘာဂေ တဇ္ဇာတေတိ? န ဟေဝံ ဝတ္တဗ္ဗေ။ပေ.။။
ပစ္စုပ္ပန္နံ ဟေဝတ္ထိ, ဟေဝ နတ္ထီတိ? အာမန္တာ။ ကိန္တတ္ထိ, ကိန္တိ နတ္ထီတိ? ပစ္စုပ္ပန္နံ ပစ္စုပ္ပန္နန္တိ ဟေဝတ္ထိ, ပစ္စုပ္ပန္နံ အတီတန္တိ ဟေဝ နတ္ထိ, ပစ္စုပ္ပန္နံ အနာဂတန္တိ ဟေဝ နတ္ထီတိ။ သေဝတ္ထိ, သေဝ နတ္ထီတိ? န ဟေဝံ ဝတ္တဗ္ဗေ။ပေ.။ သေဝတ္ထိ, သေဝ နတ္ထီတိ? အာမန္တာ။ အတ္ထဋ္ဌော နတ္ထဋ္ဌော။ပေ.။ သမေ သမဘာဂေ တဇ္ဇာတေတိ? န ဟေဝံ ဝတ္တဗ္ဗေ။ပေ.။။
န ဝတ္တဗ္ဗံ – ‘‘အတီတံ ဟေဝတ္ထိ, ဟေဝ နတ္ထိ; အနာဂတံ ဟေဝတ္ထိ, ဟေဝ နတ္ထိ; ပစ္စုပ္ပန္နံ ဟေဝတ္ထိ, ဟေဝ နတ္ထီ’’တိ? အာမန္တာ။ အတီတံ အနာဂတန္တိ ဟေဝတ္ထိ, အတီတံ ပစ္စုပ္ပန္နန္တိ ဟေဝတ္ထိ, အနာဂတံ အတီတန္တိ ဟေဝတ္ထိ, အနာဂတံ ပစ္စုပ္ပန္နန္တိ ဟေဝတ္ထိ, ပစ္စုပ္ပန္နံ အတီတန္တိ ဟေဝတ္ထိ , ပစ္စုပ္ပန္နံ အနာဂတန္တိ ဟေဝတ္ထီတိ? န ဟေဝံ ဝတ္တဗ္ဗေ။။ပေ.။။ တေန ဟိ အတီတံ ဟေဝတ္ထိ ဟေဝ နတ္ထိ, အနာဂတံ ဟေဝတ္ထိ ဟေဝ နတ္ထိ, ပစ္စုပ္ပန္နံ ဟေဝတ္ထိ, ဟေဝ နတ္ထီတိ။
၃၀၆. ရူပံ အတ္ထီတိ? ဟေဝတ္ထိ, ဟေဝ နတ္ထီတိ။ သေဝတ္ထိ, သေဝ နတ္ထီတိ ? န ဟေဝံ ဝတ္တဗ္ဗေ။ပေ.။ သေဝတ္ထိ, သေဝ နတ္ထီတိ? အာမန္တာ။ အတ္ထဋ္ဌော နတ္ထဋ္ဌော, နတ္ထဋ္ဌော အတ္ထဋ္ဌော, အတ္ထိဘာဝေါ နတ္ထိဘာဝေါ, နတ္ထိဘာဝေါ အတ္ထိဘာဝေါ, အတ္ထီတိ ဝါ နတ္ထီတိ ဝါ, နတ္ထီတိ ဝါ အတ္ထီတိ ဝါ ဧသေသေ ဧကဋ္ဌေ သမေ သမဘာဂေ တဇ္ဇာတေတိ? န ဟေဝံ ဝတ္တဗ္ဗေ။ပေ.။။
ဝေဒနာ။ သညာ။ သင်္ခါရာ။ ဝိညာဏံ အတ္ထီတိ? ဟေဝတ္ထိ, ဟေဝ နတ္ထီတိ။ သေဝတ္ထိ , သေဝ နတ္ထီတိ? န ဟေဝံ ဝတ္တဗ္ဗေ။ပေ.။ သေဝတ္ထိ, သေဝ နတ္ထီတိ? အာမန္တာ။ အတ္ထဋ္ဌော နတ္ထဋ္ဌော။ပေ.။ သမေ သမဘာဂေ တဇ္ဇာတေတိ? န ဟေဝံ ဝတ္တဗ္ဗေ။ပေ.။။
ရူပံ ဟေဝတ္ထိ, ဟေဝ နတ္ထီတိ? အာမန္တာ။ ကိန္တတ္ထိ, ကိန္တိ နတ္ထီတိ? ရူပံ ရူပန္တိ ဟေဝတ္ထိ, ရူပံ ဝေဒနာတိ ဟေဝံ နတ္ထိ။ပေ.။ ရူပံ သညာတိ ဟေဝ နတ္ထိ။ပေ.။ ရူပံ သင်္ခါရာတိ ဟေဝ နတ္ထိ။ပေ.။ ရူပံ ဝိညာဏန္တိ ဟေဝ နတ္ထီတိ။ သေဝတ္ထိ, သေဝ နတ္ထီတိ? န ဟေဝံ ဝတ္တဗ္ဗေ။ပေ.။ သေဝတ္ထိ, သေဝ နတ္ထီတိ? အာမန္တာ။ အတ္ထဋ္ဌော နတ္ထဋ္ဌော။ပေ.။ သမေ သမဘာဂေ တဇ္ဇာတေတိ? န ဟေဝံ ဝတ္တဗ္ဗေ။ပေ.။။
ဝေဒနာ။ သညာ။ သင်္ခါရာ။ ဝိညာဏံ ဟေဝတ္ထိ, ဟေဝ နတ္ထီတိ? အာမန္တာ။ ကိန္တတ္ထိ, ကိန္တိ နတ္ထီတိ? ဝိညာဏံ ဝိညာဏန္တိ ဟေဝတ္ထိ။ ဝိညာဏံ ရူပန္တိ ဟေဝ နတ္ထိ။ပေ.။ ဝိညာဏံ ဝေဒနာတိ ဟေဝ နတ္ထိ။ပေ.။ ဝိညာဏံ သညာတိ ဟေဝ နတ္ထိ။ပေ.။ ဝိညာဏံ သင်္ခါရာတိ ဟေဝ နတ္ထီတိ။ သေဝတ္ထိ, သေဝ နတ္ထီတိ? န ဟေဝံ ဝတ္တဗ္ဗေ။ပေ.။ သေဝတ္ထိ , သေဝ နတ္ထီတိ? အာမန္တာ။ အတ္ထဋ္ဌော နတ္ထဋ္ဌော။ပေ.။ သမေ သမဘာဂေ တဇ္ဇာတေတိ? န ဟေဝံ ဝတ္တဗ္ဗေ။ပေ.။။
န ဝတ္တဗ္ဗံ – ‘‘ရူပံ ဟေဝတ္ထိ, ဟေဝ နတ္ထီတိ; ဝေဒနာ။ သညာ။ သင်္ခါရာ။ ဝိညာဏံ ဟေဝတ္ထိ, ဟေဝ နတ္ထီတိ? အာမန္တာ။ ရူပံ ဝေဒနာတိ ဟေဝတ္ထိ။ပေ.။ ရူပံ သညာတိ ဟေဝတ္ထိ။ပေ.။ ရူပံ သင်္ခါရာတိ ဟေဝတ္ထိ။ပေ.။ ရူပံ ဝိညာဏန္တိ ဟေဝတ္ထိ။ ဝေဒနာ။ သညာ ။ သင်္ခါရာ။ ဝိညာဏံ ရူပန္တိ ဟေဝတ္ထိ။ ဝိညာဏံ ဝေဒနာတိ ဟေဝတ္ထိ။ ဝိညာဏံ သညာတိ ဟေဝတ္ထိ။ ဝိညာဏံ သင်္ခါရာတိ ဟေဝတ္ထီတိ? န ဟေဝံ ဝတ္တဗ္ဗေ။ပေ.။ တေန ဟိ ရူပံ ဟေဝတ္ထိ, ဟေဝ နတ္ထိ; ဝေဒနာ။ သညာ။ သင်္ခါရာ။ ဝိညာဏံ ဟေဝတ္ထိ, ဟေဝ နတ္ထီတိ။
ဟေဝတ္ထိကထာ နိဋ္ဌိတာ။
တဿုဒ္ဒါနံ –
ဥပလဗ္ဘော ပရိဟာနိ၊ ဗြဟ္မစရိယဝါသော ဩဓိသော။
ပရိညာ ကာမရာဂပ္ပဟာနံ၊ သဗ္ဗတ္ထိဝါဒေါ အာယတနံ။
အတီတာနာဂတော သုဘင်္ဂေါ [အတီတာနာဂတေသု ဘာဂေါ (သျာ.)]၊ သဗ္ဗေ ဓမ္မာ သတိပဋ္ဌာနာ။
ဟေဝတ္ထိ ဟေဝ နတ္ထီတိ။
ပဌမဝဂ္ဂေါ
မဟာဝဂ္ဂေါ။