ဧကစ္စံ အတ္ထီတိကထာ

၇. ဧကစ္စံ အတ္ထီတိကထာ

၁. အတီတာဒိဧကစ္စကထာ

၂၉၉. အတီတံ အတ္ထီတိ? ဧကစ္စံ အတ္ထိ, ဧကစ္စံ နတ္ထီတိ။ ဧကစ္စံ နိရုဒ္ဓံ, ဧကစ္စံ န နိရုဒ္ဓံ; ဧကစ္စံ ဝိဂတံ, ဧကစ္စံ အဝိဂတံ; ဧကစ္စံ အတ္ထင်္ဂတံ, ဧကစ္စံ န အတ္ထင်္ဂတံ; ဧကစ္စံ အဗ္ဘတ္ထင်္ဂတံ, ဧကစ္စံ န အဗ္ဘတ္ထင်္ဂတန္တိ? န ဟေဝံ ဝတ္တဗ္ဗေ။ပေ.။။

အတီတံ ဧကစ္စံ အတ္ထိ, ဧကစ္စံ နတ္ထီတိ? အာမန္တာ။ အတီတာ အဝိပက္ကဝိပါကာ ဓမ္မာ ဧကစ္စေ အတ္ထိ, ဧကစ္စေ နတ္ထီတိ? န ဟေဝံ ဝတ္တဗ္ဗေ။ပေ.။ အတီတံ ဧကစ္စံ အတ္ထိ, ဧကစ္စံ နတ္ထီတိ? အာမန္တာ။ အတီတာ ဝိပက္ကဝိပါကာ ဓမ္မာ ဧကစ္စေ အတ္ထိ, ဧကစ္စေ နတ္ထီတိ? န ဟေဝံ ဝတ္တဗ္ဗေ။ပေ.။ အတီတံ ဧကစ္စံ အတ္ထိ, ဧကစ္စံ နတ္ထီတိ? အာမန္တာ။ အတီတာ အဝိပါကာ ဓမ္မာ ဧကစ္စေ အတ္ထိ ဧကစ္စေ နတ္ထီတိ? န ဟေဝံ ဝတ္တဗ္ဗေ။ပေ.။။

အတီတံ ဧကစ္စံ အတ္ထိ ဧကစ္စံ နတ္ထီတိ? အာမန္တာ။ ကိံ အတ္ထိ ကိံ နတ္ထီတိ? အတီတာ အဝိပက္ကဝိပါကာ ဓမ္မာ – တေ အတ္ထိ; အတီတာ ဝိပက္ကဝိပါကာ ဓမ္မာ – တေ နတ္ထီတိ။ အတီတာ အဝိပက္ကဝိပါကာ ဓမ္မာ – တေ အတ္ထီတိ? အာမန္တာ ။ အတီတာ ဝိပက္ကဝိပါကာ ဓမ္မာ – တေ အတ္ထီတိ? န ဟေဝံ ဝတ္တဗ္ဗေ။ပေ.။ အတီတာ အဝိပက္ကဝိပါကာ ဓမ္မာ – တေ အတ္ထီတိ? အာမန္တာ။ အတီတာ အဝိပါကာ ဓမ္မာ – တေ အတ္ထီတိ [အတီတာ အဝိပက္ကဝိပါကာ ဓမ္မာ တေ နတ္ထီတိ (က.)]? န ဟေဝံ ဝတ္တဗ္ဗေ။ပေ.။။

အတီတာ ဝိပက္ကဝိပါကာ ဓမ္မာ – တေ နတ္ထီတိ? အာမန္တာ။ အတီတာ အဝိပက္ကဝိပါကာ ဓမ္မာ – တေ နတ္ထီတိ? န ဟေဝံ ဝတ္တဗ္ဗေ ။ပေ.။။

အတီတာ အဝိပါကာ [ဝိပက္ကဝိပါကာ (သျာ.), အဝိပက္ကဝိပါကာ (က.)] ဓမ္မာ – တေ နတ္ထီတိ? အာမန္တာ။ အတီတာ အဝိပက္ကဝိပါကာ [အဝိပါကာ (သျာ.)] ဓမ္မာ – တေ နတ္ထီတိ? န ဟေဝံ ဝတ္တဗ္ဗေ။ပေ.။။

အတီတာ အဝိပက္ကဝိပါကာ ဓမ္မာ – တေ အတ္ထီတိ? အာမန္တာ။ နနု အတီတာ အဝိပက္ကဝိပါကာ ဓမ္မာ နိရုဒ္ဓါတိ? အာမန္တာ။ ဟဉ္စိ အတီတာ အဝိပက္ကဝိပါကာ ဓမ္မာ နိရုဒ္ဓါ, နော စ ဝတ ရေ ဝတ္တဗ္ဗေ – ‘‘အတီတာ အဝိပက္ကဝိပါကာ ဓမ္မာ – တေ [ဓမ္မာ နိရုဒ္ဓါ တေ (သျာ. က.)] အတ္ထီ’’တိ။

အတီတာ အဝိပက္ကဝိပါကာ ဓမ္မာ နိရုဒ္ဓါ – တေ အတ္ထီတိ? အာမန္တာ။ အတီတာ ဝိပက္ကဝိပါကာ ဓမ္မာ နိရုဒ္ဓါ – တေ အတ္ထီတိ? န ဟေဝံ ဝတ္တဗ္ဗေ။ပေ.။ အတီတာ အဝိပက္ကဝိပါကာ ဓမ္မာ နိရုဒ္ဓါ – တေ အတ္ထီတိ? အာမန္တာ။ အတီတာ အဝိပါကာ [အဝိပက္ကဝိပါကာ (သီ. က.)] ဓမ္မာ နိရုဒ္ဓါ – တေ အတ္ထီတိ? န ဟေဝံ ဝတ္တဗ္ဗေ။ပေ.။။

အတီတာ ဝိပက္ကဝိပါကာ ဓမ္မာ နိရုဒ္ဓါ – တေ နတ္ထီတိ? အာမန္တာ။ အတီတာ အဝိပက္ကဝိပါကာ ဓမ္မာ နိရုဒ္ဓါ – တေ နတ္ထီတိ? န ဟေဝံ ဝတ္တဗ္ဗေ။ပေ.။။

အတီတာ အဝိပါကာ [ဝိပက္ကဝိပါကာ (သျာ.), အဝိပက္ကဝိပါကာ (က.)] ဓမ္မာ နိရုဒ္ဓါ – တေ နတ္ထီတိ? အာမန္တာ။ အတီတာ အဝိပက္ကဝိပါကာ [အဝိပါကာ (သျာ.)] ဓမ္မာ နိရုဒ္ဓါ – တေ နတ္ထီတိ? န ဟေဝံ ဝတ္တဗ္ဗေ။ပေ.။။

အတီတာ အဝိပက္ကဝိပါကာ ဓမ္မာ နိရုဒ္ဓါ – တေ အတ္ထီတိ? အာမန္တာ ။ အတီတာ ဝိပက္ကဝိပါကာ ဓမ္မာ နိရုဒ္ဓါ – တေ နတ္ထီတိ? အာမန္တာ။ အတီတာ ဧကဒေသံ ဝိပက္ကဝိပါကာ ဓမ္မာ ဧကဒေသံ အဝိပက္ကဝိပါကာ ဓမ္မာ နိရုဒ္ဓါ – တေ ဧကစ္စေ အတ္ထိ ဧကစ္စေ နတ္ထီတိ? န ဟေဝံ ဝတ္တဗ္ဗေ။ပေ.။။

န ဝတ္တဗ္ဗံ – ‘‘အတီတာ အဝိပက္ကဝိပါကာ ဓမ္မာ – တေ အတ္ထီ’’တိ? အာမန္တာ။ နနု အတီတာ အဝိပက္ကဝိပါကာ ဓမ္မာ ဝိပစ္စိဿန္တီတိ? အာမန္တာ။ ဟဉ္စိ အတီတာ အဝိပက္ကဝိပါကာ ဓမ္မာ ဝိပစ္စိဿန္တိ, တေန ဝတ ရေ ဝတ္တဗ္ဗေ – ‘‘အတီတာ အဝိပက္ကဝိပါကာ ဓမ္မာ – တေ အတ္ထီ’’တိ။

အတီတာ အဝိပက္ကဝိပါကာ ဓမ္မာ ဝိပစ္စိဿန္တီတိ ကတွာ တေ အတ္ထီတိ? အာမန္တာ။ ဝိပစ္စိဿန္တီတိ ကတွာ ပစ္စုပ္ပန္နာတိ? န ဟေဝံ ဝတ္တဗ္ဗေ။ပေ.။ ဝိပစ္စိဿန္တီတိ ကတွာ ပစ္စုပ္ပန္နာတိ? အာမန္တာ။ ပစ္စုပ္ပန္နာ ဓမ္မာ နိရုဇ္ဈိဿန္တီတိ ကတွာ တေ နတ္ထီတိ? န ဟေဝံ ဝတ္တဗ္ဗေ။ပေ.။။

၂. အနာဂတာဒိဧကစ္စကထာ

၃၀၀. အနာဂတံ အတ္ထီတိ? ဧကစ္စံ အတ္ထိ, ဧကစ္စံ နတ္ထီတိ။ ဧကစ္စံ ဇာတံ, ဧကစ္စံ အဇာတံ; ဧကစ္စံ သဉ္ဇာတံ, ဧကစ္စံ အသဉ္ဇာတံ; ဧကစ္စံ နိဗ္ဗတ္တံ, ဧကစ္စံ အနိဗ္ဗတ္တံ; ဧကစ္စံ ပါတုဘူတံ, ဧကစ္စံ အပါတုဘူတန္တိ? န ဟေဝံ ဝတ္တဗ္ဗေ။ပေ.။။

အနာဂတံ ဧကစ္စံ အတ္ထိ, ဧကစ္စံ နတ္ထီတိ? အာမန္တာ။ အနာဂတာ ဥပ္ပါဒိနော ဓမ္မာ ဧကစ္စေ အတ္ထိ, ဧကစ္စေ နတ္ထီတိ? န ဟေဝံ ဝတ္တဗ္ဗေ။ပေ.။ အနာဂတံ ဧကစ္စံ အတ္ထိ, ဧကစ္စံ နတ္ထီတိ? အာမန္တာ။ အနာဂတာ အနုပ္ပါဒိနော ဓမ္မာ ဧကစ္စေ အတ္ထိ, ဧကစ္စေ နတ္ထီတိ? န ဟေဝံ ဝတ္တဗ္ဗေ။ပေ.။။

အနာဂတံ ဧကစ္စံ အတ္ထိ, ဧကစ္စံ နတ္ထီတိ? အာမန္တာ။ ကိံ အတ္ထိ, ကိံ နတ္ထီတိ? အနာဂတာ ဥပ္ပါဒိနော ဓမ္မာ – တေ အတ္ထိ; အနာဂတာ အနုပ္ပါဒိနော ဓမ္မာ – တေ နတ္ထီတိ။ အနာဂတာ ဥပ္ပါဒိနော ဓမ္မာ – တေ အတ္ထီတိ? အာမန္တာ။ အနာဂတာ အနုပ္ပါဒိနော ဓမ္မာ – တေ အတ္ထီတိ ? န ဟေဝံ ဝတ္တဗ္ဗေ။ပေ.။ အနာဂတာ အနုပ္ပါဒိနော ဓမ္မာ – တေ နတ္ထီတိ? အာမန္တာ။ အနာဂတာ ဥပ္ပါဒိနော ဓမ္မာ – တေ နတ္ထီတိ? န ဟေဝံ ဝတ္တဗ္ဗေ။ပေ.။။

အနာဂတာ ဥပ္ပါဒိနော ဓမ္မာ – တေ အတ္ထီတိ? အာမန္တာ။ နနု အနာဂတာ ဥပ္ပါဒိနော ဓမ္မာ အဇာတာတိ? အာမန္တာ။ ဟဉ္စိ အနာဂတာ ဥပ္ပါဒိနော ဓမ္မာ အဇာတာ, နော စ ဝတ ရေ ဝတ္တဗ္ဗေ – ‘‘အနာဂတာ ဥပ္ပါဒိနော ဓမ္မာ – တေ အတ္ထီ’’တိ။

အနာဂတာ ဥပ္ပါဒိနော ဓမ္မာ အဇာတာ – တေ အတ္ထီတိ? အာမန္တာ။ အနာဂတာ အနုပ္ပါဒိနော ဓမ္မာ အဇာတာ – တေ အတ္ထီတိ? န ဟေဝံ ဝတ္တဗ္ဗေ။ပေ.။ အနာဂတာ အနုပ္ပါဒိနော ဓမ္မာ အဇာတာ – တေ နတ္ထီတိ? အာမန္တာ။ အနာဂတာ ဥပ္ပါဒိနော ဓမ္မာ အဇာတာ – တေ နတ္ထီတိ? န ဟေဝံ ဝတ္တဗ္ဗေ။ပေ.။။

န ဝတ္တဗ္ဗံ – ‘‘အနာဂတာ ဥပ္ပါဒိနော ဓမ္မာ – တေ အတ္ထီ’’တိ? အာမန္တာ။ နနု အနာဂတာ ဥပ္ပါဒိနော ဓမ္မာ ဥပ္ပဇ္ဇိဿန္တီတိ? အာမန္တာ ။ ဟဉ္စိ အနာဂတာ ဥပ္ပါဒိနော ဓမ္မာ ဥပ္ပဇ္ဇိဿန္တိ, တေန ဝတ ရေ ဝတ္တဗ္ဗေ – ‘‘အနာဂတာ ဥပ္ပါဒိနော ဓမ္မာ – တေ အတ္ထီ’’တိ။

အနာဂတာ ဥပ္ပါဒိနော ဓမ္မာ ဥပ္ပဇ္ဇိဿန္တီတိ ကတွာ တေ အတ္ထီတိ? အာမန္တာ။ ဥပ္ပဇ္ဇိဿန္တီတိ ကတွာ ပစ္စုပ္ပန္နာတိ? န ဟေဝံ ဝတ္တဗ္ဗေ။ပေ.။ ဥပ္ပဇ္ဇိဿန္တီတိ ကတွာ ပစ္စုပ္ပန္နာတိ? အာမန္တာ။ ပစ္စုပ္ပန္နာ ဓမ္မာ နိရုဇ္ဈိဿန္တီတိ ကတွာ တေ နတ္ထီတိ? န ဟေဝံ ဝတ္တဗ္ဗေ။ပေ.။။

ဧကစ္စံ အတ္ထီတိကထာ နိဋ္ဌိတာ။