၆. အတီတက္ခန္ဓာဒိကထာ
၁. နသုတ္တသာဓန
၂၉၇. အတီတံ ခန္ဓာတိ? အာမန္တာ။ အတီတံ အတ္ထီတိ? န ဟေဝံ ဝတ္တဗ္ဗေ။ပေ.။ အတီတံ အာယတနန္တိ? အာမန္တာ။ အတီတံ အတ္ထီတိ? န ဟေဝံ ဝတ္တဗ္ဗေ။ပေ.။ အတီတံ ဓါတူတိ? အာမန္တာ။ အတီတံ အတ္ထီတိ ? န ဟေဝံ ဝတ္တဗ္ဗေ။ပေ.။ အတီတံ ခန္ဓာ ဓါတု အာယတနန္တိ [ခန္ဓဓါတုအာယတနန္တိ (သျာ.)]? အာမန္တာ။ အတီတံ အတ္ထီတိ? န ဟေဝံ ဝတ္တဗ္ဗေ။ပေ.။။
အနာဂတံ ခန္ဓာတိ? အာမန္တာ။ အနာဂတံ အတ္ထီတိ? န ဟေဝံ ဝတ္တဗ္ဗေ။ပေ.။ အနာဂတံ အာယတနန္တိ? အာမန္တာ။ အနာဂတံ အတ္ထီတိ? န ဟေဝံ ဝတ္တဗ္ဗေ။ပေ.။ အနာဂတံ ဓါတူတိ? အာမန္တာ။ အနာဂတံ အတ္ထီတိ? န ဟေဝံ ဝတ္တဗ္ဗေ။ပေ.။ အနာဂတံ ခန္ဓာ ဓါတု အာယတနန္တိ? အာမန္တာ။ အနာဂတံ အတ္ထီတိ? န ဟေဝံ ဝတ္တဗ္ဗေ။ပေ.။။
ပစ္စုပ္ပန္နံ ခန္ဓာ ပစ္စုပ္ပန္နံ အတ္ထီတိ? အာမန္တာ။ အတီတံ ခန္ဓာ အတီတံ အတ္ထီတိ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ အာယတနံ ပစ္စုပ္ပန္နံ အတ္ထီတိ? အာမန္တာ။ အတီတံ အာယတနံ အတီတံ အတ္ထီတိ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ ဓါတု ပစ္စုပ္ပန္နံ အတ္ထီတိ? အာမန္တာ။ အတီတံ ဓါတု အတီတံ အတ္ထီတိ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ ခန္ဓာ ဓါတု အာယတနံ ပစ္စုပ္ပန္နံ အတ္ထီတိ? အာမန္တာ။ အတီတံ ခန္ဓာ ဓါတု အာယတနံ အတီတံ အတ္ထီတိ? န ဟေဝံ ဝတ္တဗ္ဗေ။ပေ.။။
ပစ္စုပ္ပန္နံ ခန္ဓာ ပစ္စုပ္ပန္နံ အတ္ထီတိ? အာမန္တာ။ အနာဂတံ ခန္ဓာ အနာဂတံ အတ္ထီတိ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ အာယတနံ ပစ္စုပ္ပန္နံ အတ္ထီတိ? အာမန္တာ။ အနာဂတံ အာယတနံ အနာဂတံ အတ္ထီတိ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ ဓါတု ပစ္စုပ္ပန္နံ အတ္ထီတိ? အာမန္တာ။ အနာဂတံ ဓါတု အနာဂတံ အတ္ထီတိ ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ ခန္ဓာ ဓါတု အာယတနံ ပစ္စုပ္ပန္နံ အတ္ထီတိ? အာမန္တာ။ အနာဂတံ ခန္ဓာ ဓါတု အာယတနံ အနာဂတံ အတ္ထီတိ? န ဟေဝံ ဝတ္တဗ္ဗေ။ပေ.။။
အတီတံ ခန္ဓာ အတီတံ နတ္ထီတိ? အာမန္တာ။ ပစ္စုပ္ပန္နံ ခန္ဓာ ပစ္စုပ္ပန္နံ နတ္ထီတိ? န ဟေဝံ ဝတ္တဗ္ဗေ။ပေ.။ အတီတံ အာယတနံ အတီတံ နတ္ထီတိ? အာမန္တာ။ ပစ္စုပ္ပန္နံ အာယတနံ ပစ္စုပ္ပန္နံ နတ္ထီတိ? န ဟေဝံ ဝတ္တဗ္ဗေ။ပေ.။ အတီတံ ဓါတု အတီတံ နတ္ထီတိ? အာမန္တာ။ ပစ္စုပ္ပန္နံ ဓါတု ပစ္စုပ္ပန္နံ နတ္ထီတိ? န ဟေဝံ ဝတ္တဗ္ဗေ။ပေ.။ အတီတံ ခန္ဓာ ဓါတု အာယတနံ အတီတံ နတ္ထီတိ? အာမန္တာ။ ပစ္စုပ္ပန္နံ ခန္ဓာ ဓါတု အာယတနံ ပစ္စုပ္ပန္နံ နတ္ထီတိ? န ဟေဝံ ဝတ္တဗ္ဗေ။ပေ.။။
အနာဂတံ ခန္ဓာ အနာဂတံ နတ္ထီတိ? အာမန္တာ။ ပစ္စုပ္ပန္နံ ခန္ဓာ ပစ္စုပ္ပန္နံ နတ္ထီတိ? န ဟေဝံ ဝတ္တဗ္ဗေ။ပေ.။ အနာဂတံ အာယတနံ။ပေ.။ အနာဂတံ ဓါတု။ပေ.။ အနာဂတံ ခန္ဓာ ဓါတု အာယတနံ အနာဂတံ နတ္ထီတိ? အာမန္တာ။ ပစ္စုပ္ပန္နံ ခန္ဓာ ဓါတု အာယတနံ ပစ္စုပ္ပန္နံ နတ္ထီတိ? န ဟေဝံ ဝတ္တဗ္ဗေ။ပေ.။။
အတီတံ ရူပံ ခန္ဓောတိ? အာမန္တာ။ အတီတံ ရူပံ အတ္ထီတိ? န ဟေဝံ ဝတ္တဗ္ဗေ။ပေ.။ အတီတံ ရူပံ အာယတနန္တိ? အာမန္တာ။ အတီတံ ရူပံ အတ္ထီတိ? န ဟေဝံ ဝတ္တဗ္ဗေ။ပေ.။ အတီတံ ရူပံ ဓါတူတိ? အာမန္တာ။ အတီတံ ရူပံ အတ္ထီတိ? န ဟေဝံ ဝတ္တဗ္ဗေ။ပေ.။ အတီတံ ရူပံ ခန္ဓာ ဓါတု အာယတနန္တိ ? အာမန္တာ။ အတီတံ ရူပံ အတ္ထီတိ? န ဟေဝံ ဝတ္တဗ္ဗေ။ပေ.။။
အနာဂတံ ရူပံ ခန္ဓောတိ? အာမန္တာ။ အနာဂတံ ရူပံ အတ္ထီတိ? န ဟေဝံ ဝတ္တဗ္ဗေ။ပေ.။ အနာဂတံ ရူပံ အာယတနံ။ပေ.။ အနာဂတံ ရူပံ ဓါတု။ပေ.။ အနာဂတံ ရူပံ ခန္ဓာ ဓါတု အာယတနန္တိ? အာမန္တာ။ အနာဂတံ ရူပံ အတ္ထီတိ? န ဟေဝံ ဝတ္တဗ္ဗေ။ပေ.။။
ပစ္စုပ္ပန္နံ ရူပံ ခန္ဓော ပစ္စုပ္ပန္နံ ရူပံ အတ္ထီတိ? အာမန္တာ။ အတီတံ ရူပံ ခန္ဓော အတီတံ ရူပံ အတ္ထီတိ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ ရူပံ အာယတနံ။ပေ.။ ပစ္စုပ္ပန္နံ ရူပံ ဓါတု။ပေ.။ ပစ္စုပ္ပန္နံ ရူပံ ခန္ဓာ ဓါတု အာယတနံ ပစ္စုပ္ပန္နံ ရူပံ အတ္ထီတိ? အာမန္တာ။ အတီတံ ရူပံ ခန္ဓာ ဓါတု အာယတနံ အတီတံ ရူပံ အတ္ထီတိ? န ဟေဝံ ဝတ္တဗ္ဗေ။ပေ.။။
ပစ္စုပ္ပန္နံ ရူပံ ခန္ဓော ပစ္စုပ္ပန္နံ ရူပံ အတ္ထီတိ? အာမန္တာ။ အနာဂတံ ရူပံ ခန္ဓော အနာဂတံ ရူပံ အတ္ထီတိ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ ရူပံ အာယတနံ။ပေ.။ ပစ္စုပ္ပန္နံ ရူပံ ဓါတု။ပေ.။ ပစ္စုပ္ပန္နံ ရူပံ ခန္ဓာ ဓါတု အာယတနံ ပစ္စုပ္ပန္နံ ရူပံ အတ္ထီတိ? အာမန္တာ။ အနာဂတံ ရူပံ ခန္ဓာ ဓါတု အာယတနံ အနာဂတံ ရူပံ အတ္ထီတိ? န ဟေဝံ ဝတ္တဗ္ဗေ။ပေ.။။
အတီတံ ရူပံ ခန္ဓော အတီတံ ရူပံ နတ္ထီတိ? အာမန္တာ။ ပစ္စုပ္ပန္နံ ရူပံ ခန္ဓော ပစ္စုပ္ပန္နံ ရူပံ နတ္ထီတိ? န ဟေဝံ ဝတ္တဗ္ဗေ။ပေ.။ အတီတံ ရူပံ အာယတနံ။ပေ.။ အတီတံ ရူပံ ဓါတု။ပေ.။ အတီတံ ရူပံ ခန္ဓာ ဓါတု အာယတနံ အတီတံ ရူပံ နတ္ထီတိ? အာမန္တာ။ ပစ္စုပ္ပန္နံ ရူပံ ခန္ဓာ ဓါတု အာယတနံ ပစ္စုပ္ပန္နံ ရူပံ နတ္ထီတိ? န ဟေဝံ ဝတ္တဗ္ဗေ။ပေ.။။
အနာဂတံ ရူပံ ခန္ဓော အနာဂတံ ရူပံ နတ္ထီတိ? အာမန္တာ။ ပစ္စုပ္ပန္နံ ရူပံ ခန္ဓော ပစ္စုပ္ပန္နံ ရူပံ နတ္ထီတိ? န ဟေဝံ ဝတ္တဗ္ဗေ။ပေ.။ အနာဂတံ ရူပံ အာယတနံ။ပေ.။ အနာဂတံ ရူပံ ဓါတု။ပေ.။ အနာဂတံ ရူပံ ခန္ဓာ ဓါတု အာယတနံ အနာဂတံ ရူပံ နတ္ထီတိ? အာမန္တာ။ ပစ္စုပ္ပန္နံ ရူပံ ခန္ဓာ ဓါတု အာယတနံ ပစ္စုပ္ပန္နံ ရူပံ နတ္ထီတိ? န ဟေဝံ ဝတ္တဗ္ဗေ။ပေ.။။
အတီတာ ဝေဒနာ။ အတီတာ သညာ။ အတီတာ သင်္ခါရာ။ အတီတံ ဝိညာဏံ ခန္ဓောတိ? အာမန္တာ။ အတီတံ ဝိညာဏံ အတ္ထီတိ? န ဟေဝံ ဝတ္တဗ္ဗေ။ပေ.။ အတီတံ ဝိညာဏံ အာယတနံ ။ပေ.။ အတီတံ ဝိညာဏံ ဓါတု။ပေ.။ အတီတံ ဝိညာဏံ ခန္ဓာ ဓါတု အာယတနန္တိ? အာမန္တာ။ အတီတံ ဝိညာဏံ အတ္ထီတိ? န ဟေဝံ ဝတ္တဗ္ဗေ။ပေ.။။
အနာဂတံ ဝိညာဏံ ခန္ဓောတိ? အာမန္တာ။ အနာဂတံ ဝိညာဏံ အတ္ထီတိ? န ဟေဝံ ဝတ္တဗ္ဗေ။ပေ.။ အနာဂတံ ဝိညာဏံ အာယတနံ။ပေ.။ အနာဂတံ ဝိညာဏံ ဓါတု။ပေ.။ အနာဂတံ ဝိညာဏံ ခန္ဓာ ဓါတု အာယတနန္တိ? အာမန္တာ။ အနာဂတံ ဝိညာဏံ အတ္ထီတိ? န ဟေဝံ ဝတ္တဗ္ဗေ။ပေ.။။
ပစ္စုပ္ပန္နံ ဝိညာဏံ ခန္ဓော ပစ္စုပ္ပန္နံ ဝိညာဏံ အတ္ထီတိ? အာမန္တာ။ အတီတံ ဝိညာဏံ ခန္ဓော အတီတံ ဝိညာဏံ အတ္ထီတိ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ ဝိညာဏံ အာယတနံ။ပေ.။ ပစ္စုပ္ပန္နံ ဝိညာဏံ ဓါတု။ပေ.။ ပစ္စုပ္ပန္နံ ဝိညာဏံ ခန္ဓာ ဓါတု အာယတနံ ပစ္စုပ္ပန္နံ ဝိညာဏံ အတ္ထီတိ? အာမန္တာ။ အတီတံ ဝိညာဏံ ခန္ဓာ ဓါတု အာယတနံ အတီတံ ဝိညာဏံ အတ္ထီတိ? န ဟေဝံ ဝတ္တဗ္ဗေ။ပေ.။။
ပစ္စုပ္ပန္နံ ဝိညာဏံ ခန္ဓော ပစ္စုပ္ပန္နံ ဝိညာဏံ အတ္ထီတိ? အာမန္တာ။ အနာဂတံ ဝိညာဏံ ခန္ဓော အနာဂတံ ဝိညာဏံ အတ္ထီတိ? န ဟေဝံ ဝတ္တဗ္ဗေ။ပေ.။ ပစ္စုပ္ပန္နံ ဝိညာဏံ အာယတနံ။ပေ.။ ပစ္စုပ္ပန္နံ ဝိညာဏံ ဓါတု။ပေ.။ ပစ္စုပ္ပန္နံ ဝိညာဏံ ခန္ဓာ ဓါတု အာယတနံ ပစ္စုပ္ပန္နံ ဝိညာဏံ အတ္ထီတိ? အာမန္တာ။ အနာဂတံ ဝိညာဏံ ခန္ဓာ ဓါတု အာယတနံ အနာဂတံ ဝိညာဏံ အတ္ထီတိ? န ဟေဝံ ဝတ္တဗ္ဗေ။ပေ.။။
အတီတံ ဝိညာဏံ ခန္ဓော အတီတံ ဝိညာဏံ နတ္ထီတိ? အာမန္တာ။ ပစ္စုပ္ပန္နံ ဝိညာဏံ ခန္ဓော ပစ္စုပ္ပန္နံ ဝိညာဏံ နတ္ထီတိ? န ဟေဝံ ဝတ္တဗ္ဗေ။ပေ.။ အတီတံ ဝိညာဏံ အာယတနံ။ပေ.။ အတီတံ ဝိညာဏံ ဓါတု။ပေ.။ အတီတံ ဝိညာဏံ ခန္ဓာ ဓါတု အာယတနံ အတီတံ ဝိညာဏံ နတ္ထီတိ? အာမန္တာ။ ပစ္စုပ္ပန္နံ ဝိညာဏံ ခန္ဓာ ဓါတု အာယတနံ ပစ္စုပ္ပန္နံ ဝိညာဏံ နတ္ထီတိ? န ဟေဝံ ဝတ္တဗ္ဗေ။ပေ.။ အနာဂတံ ဝိညာဏံ ခန္ဓော အနာဂတံ ဝိညာဏံ နတ္ထီတိ? အာမန္တာ။ ပစ္စုပ္ပန္နံ ဝိညာဏံ ခန္ဓော ပစ္စုပ္ပန္နံ ဝိညာဏံ နတ္ထီတိ? န ဟေဝံ ဝတ္တဗ္ဗေ။ပေ.။ အနာဂတံ ဝိညာဏံ အာယတနံ။ပေ.။ အနာဂတံ ဝိညာဏံ ဓါတု။ပေ.။ အနာဂတံ ဝိညာဏံ ခန္ဓာ ဓါတု အာယတနံ အနာဂတံ ဝိညာဏံ နတ္ထီတိ? အာမန္တာ။ ပစ္စုပ္ပန္နံ ဝိညာဏံ ခန္ဓာ ဓါတု အာယတနံ ပစ္စုပ္ပန္နံ ဝိညာဏံ နတ္ထီတိ? န ဟေဝံ ဝတ္တဗ္ဗေ။ပေ.။။
၂. သုတ္တသာဓနံ
၂၉၈. န ဝတ္တဗ္ဗံ – ‘‘အတီတာနာဂတာ ခန္ဓာ ဓါတု အာယတနံ နတ္ထိ စေတေ’’တိ? အာမန္တာ ။ နနု ဝုတ္တံ ဘဂဝတာ – ‘‘တယောမေ, ဘိက္ခဝေ, နိရုတ္တိပထာ အဓိဝစနပထာ ပညတ္တိ။ပေ.။ ဝိညူဟီတိ။ပေ.။’’။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘အတီတာနာဂတာ ခန္ဓာ ဓါတု အာယတနံ နတ္ထိ စေတေ’’တိ။
အတီတာနာဂတာ ခန္ဓာ ဓါတု အာယတနံ နတ္ထိ စေတေတိ? အာမန္တာ။ နနု ဝုတ္တံ ဘဂဝတာ – ‘‘ယံ ကိဉ္စိ, ဘိက္ခဝေ, ရူပံ အတီတာနာဂတပစ္စုပ္ပန္နံ အဇ္ဈတ္တံ ဝါ ဗဟိဒ္ဓါ ဝါ ဩဠာရိကံ ဝါ သုခုမံ ဝါ ဟီနံ ဝါ ပဏီတံ ဝါ ယံ ဒူရေ သန္တိကေ ဝါ, အယံ ဝုစ္စတိ ရူပက္ခန္ဓော။ ယာ ကာစိ ဝေဒနာ။ ယာ ကာစိ သညာ။ ယေ ကေစိ သင်္ခါရာ။ ယံ ကိဉ္စိ ဝိညာဏံ အတီတာနာဂတပစ္စုပ္ပန္နံ။ပေ.။ အယံ ဝုစ္စတိ ဝိညာဏက္ခန္ဓော’’တိ။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘အတီတာနာဂတာ ခန္ဓာ ဓါတု အာယတနံ နတ္ထိ စေတေ’’တိ။
အတီတက္ခန္ဓာဒိကထာ နိဋ္ဌိတာ။