၃. ဗြဟ္မစရိယကထာ
၁. သုဒ္ဓဗြဟ္မစရိယကထာ
၂၆၉. နတ္ထိ ဒေဝေသု ဗြဟ္မစရိယဝါသောတိ? အာမန္တာ။ သဗ္ဗေ ဒေဝါ ဇဠာ ဧလမူဂါ [ဧဠမူဂါ (သျာ.)] အဝိညူ ဟတ္ထသံဝါစိကာ နပ္ပဋိဗလာ သုဘာသိတဒုဗ္ဘာသိတာနံ အတ္ထမညာတုံ, သဗ္ဗေ ဒေဝါ န ဗုဒ္ဓေ ပသန္နာ န ဓမ္မေ ပသန္နာ န သံဃေ ပသန္နာ, န ဗုဒ္ဓံ ဘဂဝန္တံ ပယိရုပါသန္တိ, န ဗုဒ္ဓံ ဘဂဝန္တံ ပဉ္ဟံ ပုစ္ဆန္တိ, န ဗုဒ္ဓေန ဘဂဝတာ ပဉ္ဟေ ဝိဿဇ္ဇိတေ အတ္တမနာ, သဗ္ဗေ ဒေဝါ ကမ္မာဝရဏေန သမန္နာဂတာ ကိလေသာဝရဏေန သမန္နာဂတာ ဝိပါကာဝရဏေန သမန္နာဂတာ အဿဒ္ဓါ အစ္ဆန္ဒိကာ ဒုပ္ပညာ အဘဗ္ဗာ နိယာမံ ဩက္ကမိတုံ ကုသလေသု ဓမ္မေသု သမ္မတ္တံ, သဗ္ဗေ ဒေဝါ မာတုဃာတကာ ပိတုဃာတကာ အရဟန္တဃာတကာ ရုဟိရုပ္ပါဒကာ သံဃဘေဒကာ, သဗ္ဗေ ဒေဝါ ပါဏာတိပါတိနော အဒိန္နာဒါယိနော ကာမေသုမိစ္ဆာစာရိနော မုသာဝါဒိနော ပိသုဏဝါစာ ဖရုသာဝါစာ သမ္ဖပ္ပလာပိနော အဘိဇ္ဈာလုနော ဗျာပန္နစိတ္တာ မိစ္ဆာဒိဋ္ဌိကာတိ? န ဟေဝံ ဝတ္တဗ္ဗေ။ပေ.။။
နနု အတ္ထိ ဒေဝါ အဇဠာ အနေလမူဂါ ဝိညူ န ဟတ္ထသံဝါစိကာ ပဋိဗလာ သုဘာသိတဒုဗ္ဘာသိတာနံ အတ္ထမညာတုံ, အတ္ထိ ဒေဝါ ဗုဒ္ဓေ ပသန္နာ ဓမ္မေ ပသန္နာ သံဃေ ပသန္နာ, ဗုဒ္ဓံ ဘဂဝန္တံ ပယိရုပါသန္တိ, ဗုဒ္ဓံ ဘဂဝန္တံ ပဉ္ဟံ ပုစ္ဆန္တိ, ဗုဒ္ဓေန ဘဂဝတာ ပဉ္ဟေ ဝိဿဇ္ဇိတေ အတ္တမနာ ဟောန္တိ, အတ္ထိ ဒေဝါ န ကမ္မာဝရဏေန သမန္နာဂတာ န ကိလေသာဝရဏေန သမန္နာဂတာ န ဝိပါကာဝရဏေန သမန္နာဂတာ သဒ္ဓါ ဆန္ဒိကာ ပညဝန္တော ဘဗ္ဗာ နိယာမံ ဩက္ကမိတုံ ကုသလေသု ဓမ္မေသု သမ္မတ္တံ, အတ္ထိ ဒေဝါ န မာတုဃာတကာ န ပိတုဃာတကာ န အရဟန္တဃာတကာ န ရုဟိရုပ္ပါဒကာ န သံဃဘေဒကာ, အတ္ထိ ဒေဝါ န ပါဏာတိပါတိနော န အဒိန္နာဒါယိနော န ကာမေသုမိစ္ဆာစာရိနော န မုသာဝါဒိနော န ပိသုဏာဝါစာ န ဖရုသာဝါစာ န သမ္ဖပ္ပလာပိနော န အဘိဇ္ဈာလုနော အဗျာပန္နစိတ္တာ သမ္မာဒိဋ္ဌိကာတိ? အာမန္တာ။
ဟဉ္စိ အတ္ထိ ဒေဝါ အဇဠာ အနေလမူဂါ ဝိညူ န ဟတ္ထသံဝါစိကာ ပဋိဗလာ သုဘာသိတဒုဗ္ဘာသိတာနံ အတ္ထမညာတုံ။ပေ.။ အတ္ထိ ဒေဝါ ဗုဒ္ဓေ ပသန္နာ။ပေ.။ သမ္မာဒိဋ္ဌိကာ, နော စ ဝတ ရေ ဝတ္တဗ္ဗေ – ‘‘နတ္ထိ ဒေဝေသု ဗြဟ္မစရိယဝါသော’’တိ။
၂၇၀. အတ္ထိ ဒေဝေသု ဗြဟ္မစရိယဝါသောတိ? အာမန္တာ။ အတ္ထိ တတ္ထ ပဗ္ဗဇ္ဇာ မုဏ္ဍိယံ ကာသာဝဓါရဏာ ပတ္တဓါရဏာ, ဒေဝေသု သမ္မာသမ္ဗုဒ္ဓါ ဥပ္ပဇ္ဇန္တိ, ပစ္စေကသမ္ဗုဒ္ဓါ ဥပ္ပဇ္ဇန္တိ, သာဝကယုဂံ ဥပ္ပဇ္ဇတီတိ? န ဟေဝံ ဝတ္တဗ္ဗေ။ပေ.။။
ဒေဝေသု ပဗ္ဗဇ္ဇာ နတ္ထီတိ, နတ္ထိ ဒေဝေသု ဗြဟ္မစရိယဝါသောတိ? အာမန္တာ။ ယတ္ထ အတ္ထိ ပဗ္ဗဇ္ဇာ တတ္ထေဝ ဗြဟ္မစရိယဝါသော, ယတ္ထ နတ္ထိ ပဗ္ဗဇ္ဇာ နတ္ထိ တတ္ထ ဗြဟ္မစရိယဝါသောတိ? န ဟေဝံ ဝတ္တဗ္ဗေ။ပေ.။ ယတ္ထ အတ္ထိ ပဗ္ဗဇ္ဇာ တတ္ထေဝ ဗြဟ္မစရိယဝါသော, ယတ္ထ နတ္ထိ ပဗ္ဗဇ္ဇာ နတ္ထိ တတ္ထ ဗြဟ္မစရိယဝါသောတိ? အာမန္တာ။ ယော ပဗ္ဗဇတိ တဿေဝ ဗြဟ္မစရိယဝါသော, ယော န ပဗ္ဗဇတိ နတ္ထိ တဿ ဗြဟ္မစရိယဝါသောတိ? န ဟေဝံ ဝတ္တဗ္ဗေ။ပေ.။။
ဒေဝေသု မုဏ္ဍိယံ နတ္ထီတိ, နတ္ထိ ဒေဝေသု ဗြဟ္မစရိယဝါသောတိ? အာမန္တာ။ ယတ္ထ အတ္ထိ မုဏ္ဍိယံ တတ္ထေဝ ဗြဟ္မစရိယဝါသော, ယတ္ထ နတ္ထိ မုဏ္ဍိယံ နတ္ထိ တတ္ထ ဗြဟ္မစရိယဝါသောတိ? န ဟေဝံ ဝတ္တဗ္ဗေ။ပေ.။ ယတ္ထ အတ္ထိ မုဏ္ဍိယံ တတ္ထေဝ ဗြဟ္မစရိယဝါသော, ယတ္ထ နတ္ထိ မုဏ္ဍိယံ နတ္ထိ တတ္ထ ဗြဟ္မစရိယဝါသောတိ? အာမန္တာ။ ယော မုဏ္ဍော ဟောတိ တဿေဝ ဗြဟ္မစရိယဝါသော, ယော မုဏ္ဍော န ဟောတိ နတ္ထိ တဿ ဗြဟ္မစရိယဝါသောတိ? န ဟေဝံ ဝတ္တဗ္ဗေ။ပေ.။။
ဒေဝေသု ကာသာဝဓါရဏာ နတ္ထီတိ, နတ္ထိ ဒေဝေသု ဗြဟ္မစရိယဝါသောတိ? အာမန္တာ။ ယတ္ထ အတ္ထိ ကာသာဝဓါရဏာ တတ္ထေဝ ဗြဟ္မစရိယဝါသော, ယတ္ထ နတ္ထိ ကာသာဝဓါရဏာ နတ္ထိ တတ္ထ ဗြဟ္မစရိယဝါသောတိ? န ဟေဝံ ဝတ္တဗ္ဗေ။ပေ.။ ယတ္ထ အတ္ထိ ကာသာဝဓါရဏာ တတ္ထေဝ ဗြဟ္မစရိယဝါသော, ယတ္ထ နတ္ထိ ကာသာဝဓါရဏာ နတ္ထိ တတ္ထ ဗြဟ္မစရိယဝါသောတိ? အာမန္တာ။ ယော ကာသာဝံ ဓါရေတိ တဿေဝ ဗြဟ္မစရိယဝါသော, ယော ကာသာဝံ န ဓါရေတိ နတ္ထိ တဿ ဗြဟ္မစရိယဝါသောတိ? န ဟေဝံ ဝတ္တဗ္ဗေ။ပေ.။။
ဒေဝေသု ပတ္တဓါရဏာ နတ္ထီတိ, နတ္ထိ ဒေဝေသု ဗြဟ္မစရိယဝါသောတိ? အာမန္တာ။ ယတ္ထ အတ္ထိ ပတ္တဓါရဏာ တတ္ထေဝ ဗြဟ္မစရိယဝါသော, ယတ္ထ နတ္ထိ ပတ္တဓါရဏာ နတ္ထိ တတ္ထ ဗြဟ္မစရိယဝါသောတိ? န ဟေဝံ ဝတ္တဗ္ဗေ။ပေ.။ ယတ္ထ အတ္ထိ ပတ္တဓါရဏာ တတ္ထေဝ ဗြဟ္မစရိယဝါသော, ယတ္ထ နတ္ထိ ပတ္တဓါရဏာ နတ္ထိ တတ္ထ ဗြဟ္မစရိယဝါသောတိ? အာမန္တာ? ယော ပတ္တံ ဓါရေတိ တဿေဝ ဗြဟ္မစရိယဝါသော, ယော ပတ္တံ န ဓါရေတိ နတ္ထိ တဿ ဗြဟ္မစရိယဝါသောတိ? န ဟေဝံ ဝတ္တဗ္ဗေ။ပေ.။။
ဒေဝေသု သမ္မာသမ္ဗုဒ္ဓါ နုပ္ပဇ္ဇန္တီတိ, နတ္ထိ ဒေဝေသု ဗြဟ္မစရိယဝါသောတိ ? အာမန္တာ။ ယတ္ထ သမ္မာသမ္ဗုဒ္ဓါ ဥပ္ပဇ္ဇန္တိ တတ္ထေဝ ဗြဟ္မစရိယဝါသော, ယတ္ထ သမ္မာသမ္ဗုဒ္ဓါ နုပ္ပဇ္ဇန္တိ နတ္ထိ တတ္ထ ဗြဟ္မစရိယဝါသောတိ? န ဟေဝံ ဝတ္တဗ္ဗေ။ပေ.။ ယတ္ထ သမ္မာသမ္ဗုဒ္ဓါ ဥပ္ပဇ္ဇန္တိ တတ္ထေဝ ဗြဟ္မစရိယဝါသော, ယတ္ထ သမ္မာသမ္ဗုဒ္ဓါ နုပ္ပဇ္ဇန္တိ နတ္ထိ တတ္ထ ဗြဟ္မစရိယဝါသောတိ? အာမန္တာ ။ လုမ္ဗိနိယာ ဘဂဝါ ဇာတော, ဗောဓိယာ မူလေ အဘိသမ္ဗုဒ္ဓေါ, ဗာရာဏသိယံ ဘဂဝတာ ဓမ္မစက္ကံ ပဝတ္တိတံ; တတ္ထေဝ ဗြဟ္မစရိယဝါသော, နတ္ထညတြ ဗြဟ္မစရိယဝါသောတိ? န ဟေဝံ ဝတ္တဗ္ဗေ။ပေ.။။
ဒေဝေသု ပစ္စေကသမ္ဗုဒ္ဓါ နုပ္ပဇ္ဇန္တီတိ, နတ္ထိ ဒေဝေသု ဗြဟ္မစရိယဝါသောတိ? အာမန္တာ။ ယတ္ထ ပစ္စေကသမ္ဗုဒ္ဓါ ဥပ္ပဇ္ဇန္တိ တတ္ထေဝ ဗြဟ္မစရိယဝါသော, ယတ္ထ ပစ္စေကသမ္ဗုဒ္ဓါ နုပ္ပဇ္ဇန္တိ နတ္ထိ တတ္ထ ဗြဟ္မစရိယဝါသောတိ? န ဟေဝံ ဝတ္တဗ္ဗေ။ပေ.။ ယတ္ထ ပစ္စေကသမ္ဗုဒ္ဓါ ဥပ္ပဇ္ဇန္တိ တတ္ထေဝ ဗြဟ္မစရိယဝါသော, ယတ္ထ ပစ္စေကသမ္ဗုဒ္ဓါ နုပ္ပဇ္ဇန္တိ နတ္ထိ တတ္ထ ဗြဟ္မစရိယဝါသောတိ? အာမန္တာ။ မဇ္ဈိမေသု ဇနပဒေသု ပစ္စေကသမ္ဗုဒ္ဓါ ဥပ္ပဇ္ဇန္တိ, တတ္ထေဝ ဗြဟ္မစရိယဝါသော, နတ္ထညတြ ဗြဟ္မစရိယဝါသောတိ? န ဟေဝံ ဝတ္တဗ္ဗေ။ပေ.။။
ဒေဝေသု သာဝကယုဂံ နုပ္ပဇ္ဇတီတိ, နတ္ထိ ဒေဝေသု ဗြဟ္မစရိယဝါသောတိ? အာမန္တာ။ ယတ္ထ သာဝကယုဂံ ဥပ္ပဇ္ဇတိ တတ္ထေဝ ဗြဟ္မစရိယဝါသော, ယတ္ထ သာဝကယုဂံ နုပ္ပဇ္ဇတိ နတ္ထိ တတ္ထ ဗြဟ္မစရိယဝါသောတိ? န ဟေဝံ ဝတ္တဗ္ဗေ။ပေ.။ ယတ္ထ သာဝကယုဂံ ဥပ္ပဇ္ဇတိ တတ္ထေဝ ဗြဟ္မစရိယဝါသော, ယတ္ထ သာဝကယုဂံ နုပ္ပဇ္ဇတိ နတ္ထိ တတ္ထ ဗြဟ္မစရိယဝါသောတိ? အာမန္တာ။ မဂဓေသု သာဝကယုဂံ ဥပ္ပန္နံ, တတ္ထေဝ ဗြဟ္မစရိယဝါသော, နတ္ထညတြ ဗြဟ္မစရိယဝါသောတိ? န ဟေဝံ ဝတ္တဗ္ဗေ။ပေ.။။
၂၇၁. အတ္ထိ ဒေဝေသု ဗြဟ္မစရိယဝါသောတိ? အာမန္တာ ။ သဗ္ဗဒေဝေသု အတ္ထိ ဗြဟ္မစရိယဝါသောတိ? န ဟေဝံ ဝတ္တဗ္ဗေ။ပေ.။။
အတ္ထိ မနုဿေသု ဗြဟ္မစရိယဝါသောတိ? အာမန္တာ။ သဗ္ဗမနုဿေသု အတ္ထိ ဗြဟ္မစရိယဝါသောတိ? န ဟေဝံ ဝတ္တဗ္ဗေ။ပေ.။။
အတ္ထိ ဒေဝေသု ဗြဟ္မစရိယဝါသောတိ? အာမန္တာ။ အသညသတ္တေသု ဒေဝေသု အတ္ထိ ဗြဟ္မစရိယဝါသောတိ? န ဟေဝံ ဝတ္တဗ္ဗေ။ပေ.။။
အတ္ထိ မနုဿေသု ဗြဟ္မစရိယဝါသောတိ? အာမန္တာ။ ပစ္စန္တိမေသု ဇနပဒေသု အတ္ထိ ဗြဟ္မစရိယဝါသော မိလက္ခေသု [မိလက္ခူသု (သျာ. က.)] အဝိညာတာရေသု ယတ္ထ နတ္ထိ ဂတိ ဘိက္ခူနံ ဘိက္ခုနီနံ ဥပါသကာနံ ဥပါသိကာနန္တိ? န ဟေဝံ ဝတ္တဗ္ဗေ။
အတ္ထိ ဒေဝေသု ဗြဟ္မစရိယဝါသောတိ? အတ္ထိ ယတ္ထ အတ္ထိ, အတ္ထိ ယတ္ထ နတ္ထီတိ။ အသညသတ္တေသု ဒေဝေသု အတ္ထိ ယတ္ထ အတ္ထိ, အတ္ထိ ယတ္ထ နတ္ထိ ဗြဟ္မစရိယဝါသော, သညသတ္တေသု [အသညသတ္တေသု (က.)] ဒေဝေသု အတ္ထိ ယတ္ထ အတ္ထိ, အတ္ထိ ယတ္ထ နတ္ထိ ဗြဟ္မစရိယဝါသောတိ? န ဟေဝံ ဝတ္တဗ္ဗေ။
ဒေဝေသု အတ္ထိ ယတ္ထ အတ္ထိ, အတ္ထိ ယတ္ထ နတ္ထိ ဗြဟ္မစရိယဝါသောတိ? အာမန္တာ။ ကတ္ထ အတ္ထိ, ကတ္ထ နတ္ထီတိ? အသညသတ္တေသု ဒေဝေသု နတ္ထိ ဗြဟ္မစရိယဝါသော, သညသတ္တေသု [အသညသတ္တေသု (က.)] ဒေဝေသု အတ္ထိ ဗြဟ္မစရိယဝါသောတိ။ အသညသတ္တေသု ဒေဝေသု နတ္ထိ ဗြဟ္မစရိယဝါသောတိ? အာမန္တာ။ သညသတ္တေသု [အသညသတ္တေသု (က.)] ဒေဝေသု နတ္ထိ ဗြဟ္မစရိယဝါသောတိ? န ဟေဝံ ဝတ္တဗ္ဗေ။
သညသတ္တေသု ဒေဝေသု အတ္ထိ ဗြဟ္မစရိယဝါသောတိ? အာမန္တာ။ အသညသတ္တေသု ဒေဝေသု အတ္ထိ ဗြဟ္မစရိယဝါသောတိ? န ဟေဝံ ဝတ္တဗ္ဗေ။
အတ္ထိ မနုဿေသု ဗြဟ္မစရိယဝါသောတိ? အတ္ထိ ယတ္ထ အတ္ထိ, အတ္ထိ ယတ္ထ နတ္ထီတိ။ ပစ္စန္တိမေသု ဇနပဒေသု အတ္ထိ ယတ္ထ အတ္ထိ, အတ္ထိ ယတ္ထ နတ္ထိ ဗြဟ္မစရိယဝါသော မိလက္ခေသု အဝိညာတာရေသု ယတ္ထ နတ္ထိ ဂတိ ဘိက္ခူနံ ဘိက္ခုနီနံ ဥပါသကာနံ ဥပါသိကာနံ, မဇ္ဈိမေသု ဇနပဒေသု အတ္ထိ ယတ္ထ အတ္ထိ, အတ္ထိ ယတ္ထ နတ္ထိ ဗြဟ္မစရိယဝါသောတိ? န ဟေဝံ ဝတ္တဗ္ဗေ။
မနုဿေသု အတ္ထိ ယတ္ထ အတ္ထိ, အတ္ထိ ယတ္ထ နတ္ထိ ဗြဟ္မစရိယဝါသောတိ? အာမန္တာ။ ကတ္ထ အတ္ထိ, ကတ္ထ နတ္ထီတိ? ပစ္စန္တိမေသု ဇနပဒေသု နတ္ထိ ဗြဟ္မစရိယဝါသော မိလက္ခေသု အဝိညာတာရေသု ယတ္ထ နတ္ထိ ဂတိ ဘိက္ခူနံ ဘိက္ခုနီနံ ဥပါသကာနံ ဥပါသိကာနံ, မဇ္ဈိမေသု ဇနပဒေသု အတ္ထိ ဗြဟ္မစရိယဝါသောတိ။ ပစ္စန္တိမေသု ဇနပဒေသု နတ္ထိ ဗြဟ္မစရိယဝါသော မိလက္ခေသု အဝိညာတာရေသု ယတ္ထ နတ္ထိ ဂတိ ဘိက္ခူနံ ဘိက္ခုနီနံ ဥပါသကာနံ ဥပါသိကာနန္တိ? အာမန္တာ။ မဇ္ဈိမေသု ဇနပဒေသု နတ္ထိ ဗြဟ္မစရိယဝါသောတိ? န ဟေဝံ ဝတ္တဗ္ဗေ။
မဇ္ဈိမေသု ဇနပဒေသု အတ္ထိ ဗြဟ္မစရိယဝါသောတိ? အာမန္တာ။ ပစ္စန္တိမေသု ဇနပဒေသု အတ္ထိ ဗြဟ္မစရိယဝါသော မိလက္ခေသု အဝိညာတာရေသု ယတ္ထ နတ္ထိ ဂတိ ဘိက္ခူနံ ဘိက္ခုနီနံ ဥပါသကာနံ ဥပါသိကာနန္တိ? န ဟေဝံ ဝတ္တဗ္ဗေ။
အတ္ထိ ဒေဝေသု ဗြဟ္မစရိယဝါသောတိ? အာမန္တာ။ နနု ဝုတ္တံ ဘဂဝတာ – ‘‘တီဟိ, ဘိက္ခဝေ, ဌာနေဟိ ဇမ္ဗုဒီပကာ မနုဿာ ဥတ္တရကုရုကေ စ မနုဿေ အဓိဂ္ဂဏှန္တိ ဒေဝေ စ တာဝတိံသေ! ကတမေဟိ တီဟိ? သူရာ, သတိမန္တော, ဣဓ ဗြဟ္မစရိယဝါသော’’တိ [အ. နိ. ၉.၂၁]။ အတ္ထေဝ သုတ္တန္တောတိ? အာမန္တာ။ တေန ဟိ နတ္ထိ ဒေဝေသု ဗြဟ္မစရိယဝါသောတိ။
သာဝတ္ထိယံ ဝုတ္တံ ဘဂဝတာ – ‘‘ဣဓ ဗြဟ္မစရိယဝါသော’’တိ? အာမန္တာ။ သာဝတ္ထိယံယေဝ ဗြဟ္မစရိယဝါသော, နတ္ထိ အညတြ ဗြဟ္မစရိယဝါသောတိ? န ဟေဝံ ဝတ္တဗ္ဗေ။
၂၇၂. အနာဂါမိဿ ပုဂ္ဂလဿ ပဉ္စောရမ္ဘာဂိယာနိ သံယောဇနာနိ ပဟီနာနိ, ပဉ္စုဒ္ဓမ္ဘာဂိယာနိ သံယောဇနာနိ အပ္ပဟီနာနိ, ဣတော စုတဿ တတ္ထ ဥပပန္နဿ ကုဟိံ ဖလုပ္ပတ္တီတိ? တတ္ထေဝ။ ဟဉ္စိ အနာဂါမိဿ ပုဂ္ဂလဿ ပဉ္စောရမ္ဘာဂိယာနိ သံယောဇနာနိ ပဟီနာနိ , ပဉ္စုဒ္ဓမ္ဘာဂိယာနိ သံယောဇနာနိ အပ္ပဟီနာနိ, ဣတော စုတဿ တတ္ထ ဥပပန္နဿ တဟိံ ဖလုပ္ပတ္တိ; နော စ ဝတ ရေ ဝတ္တဗ္ဗေ – ‘‘နတ္ထိ ဒေဝေသု ဗြဟ္မစရိယဝါသော’’တိ။
အနာဂါမိဿ ပုဂ္ဂလဿ ပဉ္စောရမ္ဘာဂိယာနိ သံယောဇနာနိ ပဟီနာနိ, ပဉ္စုဒ္ဓမ္ဘာဂိယာနိ သံယောဇနာနိ အပ္ပဟီနာနိ , ဣတော စုတဿ တတ္ထ ဥပပန္နဿ ကုဟိံ ဘာရောဟရဏံ, ကုဟိံ ဒုက္ခပရိညာတံ, ကုဟိံ ကိလေသပ္ပဟာနံ, ကုဟိံ နိရောဓသစ္ဆိကိရိယာ, ကုဟိံ အကုပ္ပပဋိဝေဓေါတိ? တတ္ထေဝ။ ဟဉ္စိ အနာဂါမိဿ ပုဂ္ဂလဿ ပဉ္စောရမ္ဘာဂိယာနိ သံယောဇနာနိ ပဟီနာနိ, ပဉ္စုဒ္ဓမ္ဘာဂိယာနိ သံယောဇနာနိ အပ္ပဟီနာနိ, ဣတော စုတဿ တတ္ထ ဥပပန္နဿ တဟိံ အကုပ္ပပဋိဝေဓေါ; နော စ ဝတ ရေ ဝတ္တဗ္ဗေ – ‘‘နတ္ထိ ဒေဝေသု ဗြဟ္မစရိယဝါသော’’တိ။
အနာဂါမိဿ ပုဂ္ဂလဿ ပဉ္စောရမ္ဘာဂိယာနိ သံယောဇနာနိ ပဟီနာနိ, ပဉ္စုဒ္ဓမ္ဘာဂိယာနိ သံယောဇနာနိ အပ္ပဟီနာနိ, ဣတော စုတဿ တတ္ထ ဥပပန္နဿ တဟိံ ဖလုပ္ပတ္တိ, တဟိံ ဘာရောဟရဏံ, တဟိံ ဒုက္ခပရိညာတံ, တဟိံ ကိလေသပ္ပဟာနံ, တဟိံ နိရောဓသစ္ဆိကိရိယာ, တဟိံ အကုပ္ပပဋိဝေဓေါ; ကေနဋ္ဌေန ဝဒေသိ – ‘‘နတ္ထိ ဒေဝေသု ဗြဟ္မစရိယဝါသော’’တိ? ဟန္ဒ ဟိ အနာဂါမီ ပုဂ္ဂလော ဣဓ ဘာဝိတေန မဂ္ဂေန တတ္ထ ဖလံ သစ္ဆိကရောတီတိ [သစ္ဆိကရောတိ (ဗဟူသု)]။
၂. သံသန္ဒနဗြဟ္မစရိယကထာ
၂၇၃. အနာဂါမီ ပုဂ္ဂလော ဣဓ ဘာဝိတေန မဂ္ဂေန တတ္ထ ဖလံ သစ္ဆိကရောတီတိ? အာမန္တာ။ သောတာပန္နော ပုဂ္ဂလော တတ္ထ ဘာဝိတေန မဂ္ဂေန ဣဓ ဖလံ သစ္ဆိကရောတီတိ? န ဟေဝံ ဝတ္တဗ္ဗေ။
အနာဂါမီ ပုဂ္ဂလော ဣဓ ဘာဝိတေန မဂ္ဂေန တတ္ထ ဖလံ သစ္ဆိကရောတီတိ? အာမန္တာ။ သကဒါဂါမီ ပုဂ္ဂလော ဣဓ ပရိနိဗ္ဗာယိပုဂ္ဂလော [ဣဓပရိနိဗ္ဗာယီ (?)] တတ္ထ ဘာဝိတေန မဂ္ဂေန ဣဓ ဖလံ သစ္ဆိကရောတီတိ? န ဟေဝံ ဝတ္တဗ္ဗေ။
သောတာပန္နော ပုဂ္ဂလော ဣဓ ဘာဝိတေန မဂ္ဂေန ဣဓ ဖလံ သစ္ဆိကရောတီတိ? အာမန္တာ။ အနာဂါမီ ပုဂ္ဂလော တတ္ထ ဘာဝိတေန မဂ္ဂေန တတ္ထ ဖလံ သစ္ဆိကရောတီတိ? န ဟေဝံ ဝတ္တဗ္ဗေ။
သကဒါဂါမီ ပုဂ္ဂလော ဣဓ ပရိနိဗ္ဗာယိပုဂ္ဂလော ဣဓ ဘာဝိတေန မဂ္ဂေန ဣဓ ဖလံ သစ္ဆိကရောတီတိ? အာမန္တာ။ အနာဂါမီ ပုဂ္ဂလော တတ္ထ ဘာဝိတေန မဂ္ဂေန တတ္ထ ဖလံ သစ္ဆိကရောတီတိ? န ဟေဝံ ဝတ္တဗ္ဗေ။ပေ.။။
ဣဓ ဝိဟာယ နိဋ္ဌဿ ပုဂ္ဂလဿ မဂ္ဂေါ စ ဘာဝီယတိ, န စ ကိလေသာ ပဟီယန္တီတိ? အာမန္တာ။ သောတာပတ္တိဖလသစ္ဆိကိရိယာယ ပဋိပန္နဿ ပုဂ္ဂလဿ မဂ္ဂေါ စ ဘာဝီယတိ, န စ ကိလေသာ ပဟီယန္တီတိ? န ဟေဝံ ဝတ္တဗ္ဗေ။ပေ.။။
ဣဓ ဝိဟာယ နိဋ္ဌဿ ပုဂ္ဂလဿ မဂ္ဂေါ စ ဘာဝီယတိ, န စ ကိလေသာ ပဟီယန္တီတိ? အာမန္တာ။ သကဒါဂါမိဖလသစ္ဆိကိရိယာယ ပဋိပန္နဿ ပုဂ္ဂလဿ။ပေ.။ အရဟတ္တသစ္ဆိကိရိယာယ ပဋိပန္နဿ ပုဂ္ဂလဿ မဂ္ဂေါ စ ဘာဝီယတိ, န စ ကိလေသာ ပဟီယန္တီတိ? န ဟေဝံ ဝတ္တဗ္ဗေ။ပေ.။။
သောတာပတ္တိဖလသစ္ဆိကိရိယာယ ပဋိပန္နဿ ပုဂ္ဂလဿ အပုဗ္ဗံ အစရိမံ မဂ္ဂေါ စ ဘာဝီယတိ, ကိလေသာ စ ပဟီယန္တီတိ? အာမန္တာ။ ဣဓ ဝိဟာယ နိဋ္ဌဿ ပုဂ္ဂလဿ အပုဗ္ဗံ အစရိမံ မဂ္ဂေါ စ ဘာဝီယတိ, ကိလေသာ စ ပဟီယန္တီတိ? န ဟေဝံ ဝတ္တဗ္ဗေ။
သကဒါဂါမိဖလသစ္ဆိကိရိယာယ ပဋိပန္နဿ ပုဂ္ဂလဿ။ပေ.။ အရဟတ္တသစ္ဆိကိရိယာယ ပဋိပန္နဿ ပုဂ္ဂလဿ အပုဗ္ဗံ အစရိမံ မဂ္ဂေါ စ ဘာဝီယတိ, ကိလေသာ စ ပဟီယန္တီတိ? အာမန္တာ။ ဣဓ ဝိဟာယ နိဋ္ဌဿ ပုဂ္ဂလဿ အပုဗ္ဗံ အစရိမံ မဂ္ဂေါ စ ဘာဝီယတိ, ကိလေသာ စ ပဟီယန္တီတိ? န ဟေဝံ ဝတ္တဗ္ဗေ ။
အနာဂါမီ ပုဂ္ဂလော ကတကရဏီယော ဘာဝိတဘာဝနော တတ္ထ ဥပပဇ္ဇတီတိ? အာမန္တာ။ အရဟာ ဥပပဇ္ဇတီတိ? န ဟေဝံ ဝတ္တဗ္ဗေ။
အရဟာ ဥပပဇ္ဇတီတိ? အာမန္တာ။ အတ္ထိ အရဟတော ပုနဗ္ဘဝေါတိ? န ဟေဝံ ဝတ္တဗ္ဗေ။
အတ္ထိ အရဟတော ပုနဗ္ဘဝေါတိ? အာမန္တာ။ အရဟာ ဘဝေန ဘဝံ ဂစ္ဆတိ, ဂတိယာ ဂတိံ ဂစ္ဆတိ, သံသာရေန သံသာရံ ဂစ္ဆတိ, ဥပပတ္တိယာ ဥပပတ္တိံ ဂစ္ဆတီတိ? န ဟေဝံ ဝတ္တဗ္ဗေ။
အနာဂါမီ ပုဂ္ဂလော ကတကရဏီယော ဘာဝိတဘာဝနော အနောဟဋဘာရော တတ္ထ ဥပပဇ္ဇတီတိ? အာမန္တာ။ ဘာရောဟရဏာယ ပုန မဂ္ဂံ ဘာဝေတီတိ? န ဟေဝံ ဝတ္တဗ္ဗေ။
အနာဂါမီ ပုဂ္ဂလော ကတကရဏီယော ဘာဝိတဘာဝနော အပရိညာတဒုက္ခော အပ္ပဟီနကိလေသော အသစ္ဆိကတနိရောဓေါ အပ္ပဋိဝိဒ္ဓါကုပ္ပော တတ္ထ ဥပပဇ္ဇတီတိ? အာမန္တာ။ အကုပ္ပပဋိဝေဓါယ ပုန မဂ္ဂံ ဘာဝေတီတိ? န ဟေဝံ ဝတ္တဗ္ဗေ။
အနာဂါမီ ပုဂ္ဂလော ကတကရဏီယော ဘာဝိတဘာဝနော အနောဟဋဘာရော တတ္ထ ဥပပဇ္ဇတိ, န စ ဘာရောဟရဏာယ ပုန မဂ္ဂံ ဘာဝေတီတိ? အာမန္တာ။ အနောဟဋဘာရော စ တတ္ထ ပရိနိဗ္ဗာယတီတိ? န ဟေဝံ ဝတ္တဗ္ဗေ။
အနာဂါမီ ပုဂ္ဂလော ကတကရဏီယော ဘာဝိတဘာဝနော အပရိညာတဒုက္ခော အပ္ပဟီနကိလေသော အသစ္ဆိကတနိရောဓေါ အပ္ပဋိဝိဒ္ဓါကုပ္ပော တတ္ထ ဥပပဇ္ဇတိ, န စ အကုပ္ပပဋိဝေဓါယ ပုန မဂ္ဂံ ဘာဝေတီတိ ? အာမန္တာ။ အပ္ပဋိဝိဒ္ဓါကုပ္ပော စ တတ္ထ ပရိနိဗ္ဗာယတီတိ? န ဟေဝံ ဝတ္တဗ္ဗေ။ ယထာ မိဂေါ သလ္လေန ဝိဒ္ဓေါ ဒူရမ္ပိ ဂန္တွာ ကာလံ ကရောတိ, ဧဝမေဝံ အနာဂါမီ ပုဂ္ဂလော ဣဓ ဘာဝိတေန မဂ္ဂေန တတ္ထ ဖလံ သစ္ဆိကရောတီတိ။
ယထာ မိဂေါ သလ္လေန ဝိဒ္ဓေါ ဒူရမ္ပိ ဂန္တွာ သသလ္လောဝ ကာလံ ကရောတိ, ဧဝမေဝံ အနာဂါမီ ပုဂ္ဂလော ဣဓ ဘာဝိတေန မဂ္ဂေန တတ္ထ သသလ္လောဝ ပရိနိဗ္ဗာယတီတိ? န ဟေဝံ ဝတ္တဗ္ဗေ။ပေ.။။
ဗြဟ္မစရိယကထာ နိဋ္ဌိတာ။
၃. ဩဓိသောကထာ
၂၇၄. ဩဓိသောဓိသော ကိလေသေ ဇဟတီတိ? အာမန္တာ။ သောတာပတ္တိဖလသစ္ဆိကိရိယာယ ပဋိပန္နော ပုဂ္ဂလော ဒုက္ခဒဿနေန ကိံ ဇဟတီတိ? သက္ကာယဒိဋ္ဌိံ ဝိစိကိစ္ဆံ သီလဗ္ဗတပရာမာသံ တဒေကဋ္ဌေ စ ကိလေသေ ဧကဒေသေ ဇဟတီတိ။ ဧကဒေသံ သောတာပန္နော, ဧကဒေသံ န သောတာပန္နော, ဧကဒေသံ သောတာပတ္တိဖလပ္ပတ္တော [သောတာပတ္တိဖလံ ပတ္တော (?)] ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတိ, ဧကဒေသံ န ကာယေန ဖုသိတွာ ဝိဟရတိ, ဧကဒေသံ သတ္တက္ခတ္တုပရမော, ကောလင္ကောလော, ဧကဗီဇီ, ဗုဒ္ဓေ အဝေစ္စပ္ပသာဒေန သမန္နာဂတော, ဓမ္မေ။ပေ.။ သံဃေ။ပေ.။ အရိယကန္တေဟိ သီလေဟိ သမန္နာဂတော ဧကဒေသံ အရိယကန္တေဟိ သီလေဟိ န သမန္နာဂတောတိ? န ဟေဝံ ဝတ္တဗ္ဗေ။ပေ.။။
သမုဒယဒဿနေန ကိံ ဇဟတီတိ? သက္ကာယဒိဋ္ဌိံ ဇဟတိ, ဝိစိကိစ္ဆံ သီလဗ္ဗတပရာမာသံ တဒေကဋ္ဌေ စ ကိလေသေ ဧကဒေသေ ဇဟတီတိ။ ဧကဒေသံ သောတာပန္နော, ဧကဒေသံ န သောတာပန္နော။ပေ.။ ဧကဒေသံ အရိယကန္တေဟိ သီလေဟိ သမန္နာဂတော, ဧကဒေသံ အရိယကန္တေဟိ သီလေဟိ န သမန္နာဂတောတိ? န ဟေဝံ ဝတ္တဗ္ဗေ။ပေ.။။
နိရောဓဒဿနေန ကိံ ဇဟတီတိ? ဝိစိကိစ္ဆံ သီလဗ္ဗတပရာမာသံ တဒေကဋ္ဌေ စ ကိလေသေ ဧကဒေသေ ဇဟတီတိ။ ဧကဒေသံ သောတာပန္နော, ဧကဒေသံ န သောတာပန္နော။ပေ.။ ဧကဒေသံ အရိယကန္တေဟိ သီလေဟိ သမန္နာဂတော, ဧကဒေသံ အရိယကန္တေဟိ သီလေဟိ န သမန္နာဂတောတိ? န ဟေဝံ ဝတ္တဗ္ဗေ။ပေ.။။
မဂ္ဂဒဿနေန ကိံ ဇဟတီတိ? သီလဗ္ဗတပရာမာသံ တဒေကဋ္ဌေ စ ကိလေသေ ဇဟတီတိ။ ဧကဒေသံ သောတာပန္နော, ဧကဒေသံ န သောတာပန္နော, ဧကဒေသံ သောတာပတ္တိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတိ, ဧကဒေသံ န ကာယေန ဖုသိတွာ ဝိဟရတိ, ဧကဒေသံ သတ္တက္ခတ္တုပရမော, ကောလင္ကောလော, ဧကဗီဇီ, ဗုဒ္ဓေ အဝေစ္စပ္ပသာဒေန သမန္နာဂတော, ဓမ္မေ။ပေ.။ သံဃေ။ပေ.။ အရိယကန္တေဟိ သီလေဟိ သမန္နာဂတော, ဧကဒေသံ အရိယကန္တေဟိ သီလေဟိ န သမန္နာဂတောတိ? န ဟေဝံ ဝတ္တဗ္ဗေ။ပေ.။။
၂၇၅. သကဒါဂါမိဖလသစ္ဆိကိရိယာယ ပဋိပန္နော ပုဂ္ဂလော ဒုက္ခဒဿနေန ကိံ ဇဟတီတိ? ဩဠာရိကံ ကာမရာဂံ ဇဟတိ, ဩဠာရိကံ ဗျာပါဒံ တဒေကဋ္ဌေ စ ကိလေသေ ဧကဒေသေ ဇဟတီတိ။ ဧကဒေသံ သကဒါဂါမီ, ဧကဒေသံ န သကဒါဂါမီ, ဧကဒေသံ သကဒါဂါမိဖလပ္ပတ္တော [သကဒါဂါမိဖလံ ပတ္တော (?)] ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတိ, ဧကဒေသံ န ကာယေန ဖုသိတွာ ဝိဟရတီတိ? န ဟေဝံ ဝတ္တဗ္ဗေ။ပေ.။။
သမုဒယဒဿနေန ကိံ ဇဟတီတိ? ဩဠာရိကံ ကာမရာဂံ ဇဟတိ, ဩဠာရိကံ ဗျာပါဒံ တဒေကဋ္ဌေ စ ကိလေသေ ဧကဒေသေ ဇဟတီတိ။ ဧကဒေသံ သကဒါဂါမီ, ဧကဒေသံ န သကဒါဂါမီ, ဧကဒေသံ သကဒါဂါမိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတိ, ဧကဒေသံ န ကာယေန ဖုသိတွာ ဝိဟရတီတိ? န ဟေဝံ ဝတ္တဗ္ဗေ။ပေ.။။
နိရောဓဒဿနေန ကိံ ဇဟတီတိ? ဩဠာရိကံ ဗျာပါဒံ ဇဟတိ, တဒေကဋ္ဌေ စ ကိလေသေ ဧကဒေသေ ဇဟတီတိ။ ဧကဒေသံ သကဒါဂါမီ, ဧကဒေသံ န သကဒါဂါမီ, ဧကဒေသံ သကဒါဂါမိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတိ, ဧကဒေသံ န ကာယေန ဖုသိတွာ ဝိဟရတီတိ? န ဟေဝံ ဝတ္တဗ္ဗေ။ပေ.။။
မဂ္ဂဒဿနေန ကိံ ဇဟတီတိ? ဩဠာရိကံ ဗျာပါဒံ ဇဟတိ, တဒေကဋ္ဌေ စ ကိလေသေ ဇဟတီတိ။ ဧကဒေသံ သကဒါဂါမီ, ဧကဒေသံ န သကဒါဂါမီ, ဧကဒေသံ သကဒါဂါမိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတိ, ဧကဒေသံ န ကာယေန ဖုသိတွာ ဝိဟရတီတိ? န ဟေဝံ ဝတ္တဗ္ဗေ။ပေ.။။
၂၇၆. အနာဂါမိဖလသစ္ဆိကိရိယာယ ပဋိပန္နော ပုဂ္ဂလော ဒုက္ခဒဿနေန ကိံ ဇဟတီတိ? အဏုသဟဂတံ ကာမရာဂံ ဇဟတိ, အဏုသဟဂတံ ဗျာပါဒံ တဒေကဋ္ဌေ စ ကိလေသေ ဧကဒေသေ ဇဟတီတိ။ ဧကဒေသံ အနာဂါမီ, ဧကဒေသံ န အနာဂါမီ , ဧကဒေသံ အနာဂါမိဖလပ္ပတ္တော [အနာဂါမိဖလံ ပတ္တော (?)] ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတိ, ဧကဒေသံ န ကာယေန ဖုသိတွာ ဝိဟရတိ, ဧကဒေသံ အန္တရာပရိနိဗ္ဗာယီ, ဥပဟစ္စပရိနိဗ္ဗာယီ, အသင်္ခါရပရိနိဗ္ဗာယီ, သသင်္ခါရပရိနိဗ္ဗာယီ, ဥဒ္ဓံသောတော အကနိဋ္ဌဂါမီ, ဧကဒေသံ န ဥဒ္ဓံသောတော အကနိဋ္ဌဂါမီတိ? န ဟေဝံ ဝတ္တဗ္ဗေ။ပေ.။။
သမုဒယဒဿနေန ကိံ ဇဟတီတိ? အဏုသဟဂတံ ကာမရာဂံ ဇဟတိ, အဏုသဟဂတံ ဗျာပါဒံ တဒေကဋ္ဌေ စ ကိလေသေ ဧကဒေသေ ဇဟတီတိ။ ဧကဒေသံ အနာဂါမီ, ဧကဒေသံ န အနာဂါမီ။ပေ.။ ဧကဒေသံ ဥဒ္ဓံသောတော အကနိဋ္ဌဂါမီ, ဧကဒေသံ န ဥဒ္ဓံသောတော အကနိဋ္ဌဂါမီတိ? န ဟေဝံ ဝတ္တဗ္ဗေ။ပေ.။။
နိရောဓဒဿနေန ကိံ ဇဟတီတိ? အဏုသဟဂတံ ဗျာပါဒံ ဇဟတိ, တဒေကဋ္ဌေ စ ကိလေသေ ဧကဒေသေ ဇဟတီတိ။ ဧကဒေသံ အနာဂါမီ, ဧကဒေသံ န အနာဂါမီ။ပေ.။ ဧကဒေသံ ဥဒ္ဓံသောတော အကနိဋ္ဌဂါမီ, ဧကဒေသံ န ဥဒ္ဓံသောတော အကနိဋ္ဌဂါမီတိ? န ဟေဝံ ဝတ္တဗ္ဗေ။ပေ.။။
မဂ္ဂဒဿနေန ကိံ ဇဟတီတိ? တဒေကဋ္ဌေ စ ကိလေသေ ဇဟတီတိ။ ဧကဒေသံ အနာဂါမီ, ဧကဒေသံ န အနာဂါမီ, ဧကဒေသံ အနာဂါမိဖလပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတိ, ဧကဒေသံ န ကာယေန ဖုသိတွာ ဝိဟရတိ, ဧကဒေသံ အန္တရာပရိနိဗ္ဗာယီ, ဥပဟစ္စပရိနိဗ္ဗာယီ, အသင်္ခါရပရိနိဗ္ဗာယီ, သသင်္ခါရပရိနိဗ္ဗာယီ, ဥဒ္ဓံသောတော အကနိဋ္ဌဂါမီ, ဧကဒေသံ န ဥဒ္ဓံသောတော အကနိဋ္ဌဂါမီတိ? န ဟေဝံ ဝတ္တဗ္ဗေ။ပေ.။။
၂၇၇. အရဟတ္တသစ္ဆိကိရိယာယ ပဋိပန္နော ပုဂ္ဂလော ဒုက္ခဒဿနေန ကိံ ဇဟတီတိ? ရူပရာဂံ အရူပရာဂံ မာနံ ဥဒ္ဓစ္စံ အဝိဇ္ဇံ တဒေကဋ္ဌေ စ ကိလေသေ ဧကဒေသေ ဇဟတီတိ။ ဧကဒေသံ အရဟာ, ဧကဒေသံ န အရဟာ, ဧကဒေသံ အရဟတ္တပ္ပတ္တော [အရဟတ္တံ ပတ္တော (?)] ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတိ, ဧကဒေသံ န ကာယေန ဖုသိတွာ ဝိဟရတိ, ဧကဒေသံ ဝီတရာဂေါ ဝီတဒေါသော ဝီတမောဟော ကတကရဏီယော ဩဟိတဘာရော အနုပ္ပတ္တသဒတ္ထော ပရိက္ခီဏဘဝသံယောဇနော သမ္မဒညာဝိမုတ္တော ဥက္ခိတ္တပလိဃော သင်္ကိဏ္ဏပရိခေါ အဗ္ဗူဠ္ဟေသိကော နိရဂ္ဂဠော အရိယော ပန္နဒ္ဓဇော ပန္နဘာရော ဝိသညုတ္တော သုဝိဇိတဝိဇယော, ဒုက္ခံ တဿ ပရိညာတံ, သမုဒယော ပဟီနော, နိရောဓေါ သစ္ဆိကတော, မဂ္ဂေါ ဘာဝိတော, အဘိညေယျံ အဘိညာတံ, ပရိညေယျံ ပရိညာတံ, ပဟာတဗ္ဗံ ပဟီနံ, ဘာဝေတဗ္ဗံ ဘာဝိတံ, သစ္ဆိကာတဗ္ဗံ သစ္ဆိကတံ, (ဧကဒေသံ သစ္ဆိကာတဗ္ဗံ သစ္ဆိကတံ,) [( ) (?)] ဧကဒေသံ သစ္ဆိကာတဗ္ဗံ န သစ္ဆိကတန္တိ? န ဟေဝံ ဝတ္တဗ္ဗေ။ပေ.။။
သမုဒယဒဿနေန ကိံ ဇဟတီတိ? ရူပရာဂံ အရူပရာဂံ ဇဟတိ, မာနံ ဥဒ္ဓစ္စံ အဝိဇ္ဇံ တဒေကဋ္ဌေ စ ကိလေသေ ဧကဒေသေ ဇဟတီတိ။ ဧကဒေသံ အရဟာ, ဧကဒေသံ န အရဟာ။ပေ.။ ဧကဒေသံ သစ္ဆိကာတဗ္ဗံ သစ္ဆိကတံ, ဧကဒေသံ သစ္ဆိကာတဗ္ဗံ န သစ္ဆိကတန္တိ? န ဟေဝံ ဝတ္တဗ္ဗေ။ပေ.။။
နိရောဓဒဿနေန ကိံ ဇဟတီတိ? မာနံ ဇဟတိ, ဥဒ္ဓစ္စံ အဝိဇ္ဇံ တဒေကဋ္ဌေ စ ကိလေသေ ဧကဒေသေ ဇဟတီတိ။ ဧကဒေသံ အရဟာ, ဧကဒေသံ န အရဟာ ။ပေ.။ ဧကဒေသံ သစ္ဆိကာတဗ္ဗံ သစ္ဆိကတံ, ဧကဒေသံ သစ္ဆိကာတဗ္ဗံ န သစ္ဆိကတန္တိ? န ဟေဝံ ဝတ္တဗ္ဗေ။ပေ.။။
မဂ္ဂဒဿနေန ကိံ ဇဟတီတိ? ဥဒ္ဓစ္စံ အဝိဇ္ဇံ တဒေကဋ္ဌေ စ ကိလေသေ ဇဟတီတိ။ ဧကဒေသံ အရဟာ, ဧကဒေသံ န အရဟာ, ဧကဒေသံ အရဟတ္တပ္ပတ္တော ပဋိလဒ္ဓေါ အဓိဂတော သစ္ဆိကတော ဥပသမ္ပဇ္ဇ ဝိဟရတိ, ကာယေန ဖုသိတွာ ဝိဟရတိ, ဧကဒေသံ န ကာယေန ဖုသိတွာ ဝိဟရတိ, ဧကဒေသံ ဝီတရာဂေါ ဝီတဒေါသော ဝီတမောဟော ကတကရဏီယော ဩဟိတဘာရော အနုပ္ပတ္တသဒတ္ထော ပရိက္ခီဏဘဝသံယောဇနော သမ္မဒညာဝိမုတ္တော ဥက္ခိတ္တပလိဃော သင်္ကိဏ္ဏပရိခေါ အဗ္ဗူဠ္ဟေသိကော နိရဂ္ဂဠော အရိယော ပန္နဒ္ဓဇော ပန္နဘာရော ဝိသညုတ္တော သုဝိဇိတဝိဇယော, ဒုက္ခံ တဿ ပရိညာတံ, သမုဒယော ပဟီနော, နိရောဓေါ သစ္ဆိကတော, မဂ္ဂေါ ဘာဝိတော, အဘိညေယျံ အဘိညာတံ, ပရိညေယျံ ပရိညာတံ, ပဟာတဗ္ဗံ ပဟီနံ, ဘာဝေတဗ္ဗံ ဘာဝိတံ , သစ္ဆိကာတဗ္ဗံ သစ္ဆိကတံ, ဧကဒေသံ သစ္ဆိကာတဗ္ဗံ သစ္ဆိကတံ, ဧကဒေသံ သစ္ဆိကာတဗ္ဗံ န သစ္ဆိကတန္တိ? န ဟေဝံ ဝတ္တဗ္ဗေ။ပေ.။။
၂၇၈. န ဝတ္တဗ္ဗံ – ‘‘ဩဓိသောဓိသော ကိလေသေ ဇဟတီ’’တိ? အာမန္တာ။ နနု ဝုတ္တံ ဘဂဝတာ –
‘‘အနုပုဗ္ဗေန မေဓါဝီ၊ ထောကံ ထောကံ ခဏေ ခဏေ။
ကမ္မာရော ရဇတဿေဝ၊ နိဒ္ဓမေ မလမတ္တနော’’တိ [ဓ. ပ. ၂၃၉ ဓမ္မပဒေ]။
အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ဩဓိသောဓိသော ကိလေသေ ဇဟတီ’’တိ။
ဩဓိသောဓိသော ကိလေသေ ဇဟတီတိ? အာမန္တာ။ နနု ဝုတ္တံ ဘဂဝတာ –
‘‘သဟာဝဿ ဒဿနသမ္ပဒါယ၊
တယဿု ဓမ္မာ ဇဟိတာ ဘဝန္တိ။
သက္ကာယဒိဋ္ဌီ ဝိစိကိစ္ဆိတဉ္စ၊
သီလဗ္ဗတံ ဝါပိ ယဒတ္ထိ ကိဉ္စိ။
စတူဟပါယေဟိ စ ဝိပ္ပမုတ္တော၊
ဆစ္စာဘိဌာနာနိ အဘဗ္ဗ [အဘဗ္ဗော (သီ. သျာ.)] ကာတု’’န္တိ [ခု. ပါ. ၆.၁၀; သု. နိ. ၂၃၃]။
အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ဩဓိသောဓိသော ကိလေသေ ဇဟတီ’’တိ။
ဩဓိသောဓိသော ကိလေသေ ဇဟတီတိ? အာမန္တာ။ နနု ဝုတ္တံ ဘဂဝတာ – ‘‘ယသ္မိံ, ဘိက္ခဝေ, သမယေ အရိယသာဝကဿ ဝိရဇံ ဝီတမလံ ဓမ္မစက္ခုံ ဥဒပါဒိ – ‘ယံ ကိဉ္စိ သမုဒယဓမ္မံ, သဗ္ဗံ တံ နိရောဓဓမ္မ’န္တိ, သဟ ဒဿနုပ္ပါဒါ, ဘိက္ခဝေ, အရိယသာဝကဿ တီဏိ သံယောဇနာနိ ပဟီယန္တိ – သက္ကာယဒိဋ္ဌိ ဝိစိကိစ္ဆာ သီလဗ္ဗတပရာမာသော’’တိ [အင်္ဂုတ္တရနိကာယေ]။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ဩဓိသောဓိသော ကိလေသေ ဇဟတီ’’တိ။
ဩဓိသောကထာ နိဋ္ဌိတာ။