၂. ပရိဟာနိကထာ
၁. ဝါဒယုတ္တိပရိဟာနိ
၂၃၉. ပရိဟာယတိ အရဟာ အရဟတ္တာတိ? အာမန္တာ။ သဗ္ဗတ္ထ အရဟာ အရဟတ္တာ ပရိဟာယတီတိ? န ဟေဝံ ဝတ္တဗ္ဗေ။ပေ.။ သဗ္ဗတ္ထ အရဟာ အရဟတ္တာ ပရိဟာယတီတိ? အာမန္တာ။ သဗ္ဗတ္ထ အရဟတော ပရိဟာနီတိ? န ဟေဝံ ဝတ္တဗ္ဗေ။ပေ.။။
ပရိဟာယတိ အရဟာ အရဟတ္တာတိ? အာမန္တာ ။ သဗ္ဗဒါ အရဟာ အရဟတ္တာ ပရိဟာယတီတိ? န ဟေဝံ ဝတ္တဗ္ဗေ။ပေ.။ သဗ္ဗဒါ အရဟာ အရဟတ္တာ ပရိဟာယတီတိ? အာမန္တာ။ သဗ္ဗဒါ အရဟတော ပရိဟာနီတိ? န ဟေဝံ ဝတ္တဗ္ဗေ။ပေ.။။
ပရိဟာယတိ အရဟာ အရဟတ္တာတိ? အာမန္တာ။ သဗ္ဗေဝ အရဟန္တော အရဟတ္တာ ပရိဟာယန္တီတိ? န ဟေဝံ ဝတ္တဗ္ဗေ။ပေ.။ သဗ္ဗေဝ အရဟန္တော အရဟတ္တာ ပရိဟာယန္တီတိ? အာမန္တာ။ သဗ္ဗေသံယေဝ အရဟန္တာနံ ပရိဟာနီတိ? န ဟေဝံ ဝတ္တဗ္ဗေ။ပေ.။။
ပရိဟာယတိ အရဟာ အရဟတ္တာတိ? အာမန္တာ။ အရဟာ အရဟတ္တာ ပရိဟာယမာနော စတူဟိ ဖလေဟိ ပရိဟာယတီတိ? န ဟေဝံ ဝတ္တဗ္ဗေ။ပေ.။။
စတူဟိ သတသဟဿေဟိ သေဋ္ဌီ သေဋ္ဌိတ္တံ ကာရေန္တော သတသဟဿေ ပရိဟီနေ သေဋ္ဌိတ္တာ ပရိဟီနော ဟောတီတိ? အာမန္တာ။ သဗ္ဗသာပတေယျာ ပရိဟီနော ဟောတီတိ? န ဟေဝံ ဝတ္တဗ္ဗေ။ပေ.။။
စတူဟိ သတသဟဿေဟိ သေဋ္ဌီ သေဋ္ဌိတ္တံ ကာရေန္တော သတသဟဿေ ပရိဟီနေ ဘဗ္ဗော သဗ္ဗသာပတေယျာ ပရိဟာယိတုန္တိ? အာမန္တာ။ အရဟာ အရဟတ္တာ ပရိဟာယမာနော ဘဗ္ဗော စတူဟိ ဖလေဟိ ပရိဟာယိတုန္တိ? န ဟေဝံ ဝတ္တဗ္ဗေ။ပေ.။။
၂. အရိယပုဂ္ဂလသံသန္ဒနပရိဟာနိ
၂၄၀. ပရိဟာယတိ အရဟာ အရဟတ္တာတိ? အာမန္တာ။ ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။။
ပရိဟာယတိ အရဟာ အရဟတ္တာတိ? အာမန္တာ။ ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။ပေ.။။
ပရိဟာယတိ အရဟာ အရဟတ္တာတိ? အာမန္တာ။ ပရိဟာယတိ အနာဂါမီ အနာဂါမိဖလာတိ? န ဟေဝံ ဝတ္တဗ္ဗေ။ပေ.။။
ပရိဟာယတိ အနာဂါမီ အနာဂါမိဖလာတိ? အာမန္တာ။ ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။။
ပရိဟာယတိ အနာဂါမီ အနာဂါမိဖလာတိ? အာမန္တာ။ ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။ပေ.။။
ပရိဟာယတိ သကဒါဂါမီ သကဒါဂါမိဖလာတိ? အာမန္တာ။ ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။။
န ပရိဟာယတိ သောတာပန္နော သောတာပတ္တိဖလာတိ? အာမန္တာ။ န ပရိဟာယတိ အရဟာ အရဟတ္တာတိ? န ဟေဝံ ဝတ္တဗ္ဗေ။ပေ.။။
န ပရိဟာယတိ သကဒါဂါမီ သကဒါဂါမိဖလာတိ? အာမန္တာ။ န ပရိဟာယတိ အရဟာ အရဟတ္တာတိ? န ဟေဝံ ဝတ္တဗ္ဗေ။ပေ.။။
န ပရိဟာယတိ အနာဂါမီ အနာဂါမိဖလာတိ? အာမန္တာ။ န ပရိဟာယတိ အရဟာ အရဟတ္တာတိ? န ဟေဝံ ဝတ္တဗ္ဗေ။ပေ.။။
န ပရိဟာယတိ သောတာပန္နော သောတာပတ္တိဖလာတိ? အာမန္တာ။ န ပရိဟာယတိ အနာဂါမီ အနာဂါမိဖလာတိ? န ဟေဝံ ဝတ္တဗ္ဗေ။ပေ.။။
န ပရိဟာယတိ သကဒါဂါမီ သကဒါဂါမိဖလာတိ? အာမန္တာ ။ န ပရိဟာယတိ အနာဂါမီ အနာဂါမိဖလာတိ? န ဟေဝံ ဝတ္တဗ္ဗေ။ပေ.။။
န ပရိဟာယတိ သောတာပန္နော သောတာပတ္တိဖလာတိ? အာမန္တာ။ န ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။ပေ.။။
၂၄၁. ပရိဟာယတိ အရဟာ အရဟတ္တာတိ? အာမန္တာ။ အရဟာ အရဟတ္တာ ပရိဟာယမာနော ကတ္ထ သဏ္ဌာတီတိ? အနာဂါမိဖလေတိ။ အနာဂါမီ အနာဂါမိဖလာ ပရိဟာယမာနော ကတ္ထ သဏ္ဌာတီတိ? သကဒါဂါမိဖလေတိ။ သကဒါဂါမီ သကဒါဂါမိဖလာ ပရိဟာယမာနော ကတ္ထ သဏ္ဌာတီတိ? သောတာပတ္တိဖလေတိ။ သောတာပန္နော သောတာပတ္တိဖလာ ပရိဟာယမာနော ပုထုဇ္ဇနဘူမိယံ သဏ္ဌာတီတိ? န ဟေဝံ ဝတ္တဗ္ဗေ။
အာဇာနာဟိ နိဂ္ဂဟံ။ ဟဉ္စိ အရဟာ အရဟတ္တာ ပရိဟာယမာနော အနာဂါမိဖလေ သဏ္ဌာတိ, အနာဂါမီ အနာဂါမိဖလာ ပရိဟာယမာနော သကဒါဂါမိဖလေ သဏ္ဌာတိ, သကဒါဂါမီ သကဒါဂါမိဖလာ ပရိဟာယမာနော သောတာပတ္တိဖလေ သဏ္ဌာတိ; တေန ဝတ ရေ ဝတ္တဗ္ဗေ – ‘‘သောတာပန္နော သောတာပတ္တိဖလာ ပရိဟာယမာနော ပုထုဇ္ဇနဘူမိယံ သဏ္ဌာတီ’’တိ။
အရဟာ အရဟတ္တာ ပရိဟာယမာနော သောတာပတ္တိဖလေ သဏ္ဌာတီတိ? အာမန္တာ။ သောတာပတ္တိဖလဿ အနန္တရာ အရဟတ္တံယေဝ သစ္ဆိကရောတီတိ? န ဟေဝံ ဝတ္တဗ္ဗေ။ပေ.။။
၂၄၂. ပရိဟာယတိ အရဟာ အရဟတ္တာတိ? အာမန္တာ။ ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။ ကဿ ဗဟုတရာ ကိလေသာ ပဟီနာ အရဟတော ဝါ သောတာပန္နဿ ဝါတိ? အရဟတော။ ဟဉ္စိ အရဟတော ဗဟုတရာ ကိလေသာ ပဟီနာ, ပရိဟာယတိ အရဟာ အရဟတ္တာ; တေန ဝတ ရေ ဝတ္တဗ္ဗေ – ‘‘ပရိဟာယတိ သောတာပန္နော သောတာပတ္တိဖလာ’’တိ။
ပရိဟာယတိ အရဟာ အရဟတ္တာတိ? အာမန္တာ။ ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။ပေ.။ ကဿ ဗဟုတရာ ကိလေသာ ပဟီနာ အရဟတော ဝါ သကဒါဂါမိဿ ဝါတိ? အရဟတော။ ဟဉ္စိ အရဟတော ဗဟုတရာ ကိလေသာ ပဟီနာ, ပရိဟာယတိ အရဟာ အရဟတ္တာ; တေန ဝတ ရေ ဝတ္တဗ္ဗေ – ‘‘ပရိဟာယတိ သကဒါဂါမီ သကဒါဂါမိဖလာ’’တိ။
ပရိဟာယတိ အရဟာ အရဟတ္တာတိ? အာမန္တာ။ ပရိဟာယတိ အနာဂါမီ အနာဂါမိဖလာတိ? န ဟေဝံ ဝတ္တဗ္ဗေ။ပေ.။ ကဿ ဗဟုတရာ ကိလေသာ ပဟီနာ အရဟတော ဝါ အနာဂါမိဿ ဝါတိ? အရဟတော။ ဟဉ္စိ အရဟတော ဗဟုတရာ ကိလေသာ ပဟီနာ, ပရိဟာယတိ အရဟာ အရဟတ္တာ; တေန ဝတ ရေ ဝတ္တဗ္ဗေ – ‘‘ပရိဟာယတိ အနာဂါမီ အနာဂါမိဖလာ’’တိ။
ပရိဟာယတိ အနာဂါမီ အနာဂါမိဖလာတိ? အာမန္တာ။ ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။ ကဿ ဗဟုတရာ ကိလေသာ ပဟီနာ အနာဂါမိဿ ဝါ သောတာပန္နဿ ဝါတိ? အနာဂါမိဿ။ ဟဉ္စိ အနာဂါမိဿ ဗဟုတရာ ကိလေသာ ပဟီနာ, ပရိဟာယတိ အနာဂါမီ အနာဂါမိဖလာ; တေန ဝတ ရေ ဝတ္တဗ္ဗေ – ‘‘ပရိဟာယတိ သောတာပန္နော သောတာပတ္တိဖလာ’’တိ။
၂၄၃. ပရိဟာယတိ အနာဂါမီ အနာဂါမိဖလာတိ? အာမန္တာ။ ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။ပေ.။ ကဿ ဗဟုတရာ ကိလေသာ ပဟီနာ အနာဂါမိဿ ဝါ သကဒါဂါမိဿ ဝါတိ? အနာဂါမိဿ။ ဟဉ္စိ အနာဂါမိဿ ဗဟုတရာ ကိလေသာ ပဟီနာ, ပရိဟာယတိ အနာဂါမီ အနာဂါမိဖလာ; တေန ဝတ ရေ ဝတ္တဗ္ဗေ – ‘‘ပရိဟာယတိ သကဒါဂါမီ သကဒါဂါမိဖလာ’’တိ။
ပရိဟာယတိ သကဒါဂါမီ သကဒါဂါမိဖလာတိ? အာမန္တာ။ ပရိဟာယတိ သောတာပန္နော သောတာပတ္တိဖလာတိ ? န ဟေဝံ ဝတ္တဗ္ဗေ။ပေ.။ ကဿ ဗဟုတရာ ကိလေသာ ပဟီနာ သကဒါဂါမိဿ ဝါ သောတာပန္နဿ ဝါတိ? သကဒါဂါမိဿ။ ဟဉ္စိ သကဒါဂါမိဿ ဗဟုတရာ ကိလေသာ ပဟီနာ, ပရိဟာယတိ သကဒါဂါမီ သကဒါဂါမိဖလာ; တေန ဝတ ရေ ဝတ္တဗ္ဗေ – ‘‘ပရိဟာယတိ သောတာပန္နော သောတာပတ္တိဖလာ’’တိ။
၂၄၄. ပရိဟာယတိ အရဟာ အရဟတ္တာတိ? အာမန္တာ။ ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။ ကဿ အဓိမတ္တာ မဂ္ဂဘာဝနာ အရဟတော ဝါ သောတာပန္နဿ ဝါတိ? အရဟတော။ ဟဉ္စိ အရဟတော အဓိမတ္တာ မဂ္ဂဘာဝနာ, ပရိဟာယတိ အရဟာ အရဟတ္တာ; တေန ဝတ ရေ ဝတ္တဗ္ဗေ – ‘‘ပရိဟာယတိ သောတာပန္နော သောတာပတ္တိဖလာ’’တိ။
ပရိဟာယတိ အရဟာ အရဟတ္တာတိ? အာမန္တာ။ ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။ ကဿ အဓိမတ္တာ သတိပဋ္ဌာနဘာဝနာ။ပေ.။ သမ္မပ္ပဓါနဘာဝနာ။ ဣဒ္ဓိပါဒဘာဝနာ။ ဣန္ဒ္ရိယဘာဝနာ ။ ဗလဘာဝနာ။ ဗောဇ္ဈင်္ဂဘာဝနာ အရဟတော ဝါ သောတာပန္နဿ ဝါတိ? အရဟတော။ ဟဉ္စိ အရဟတော အဓိမတ္တာ ဗောဇ္ဈင်္ဂဘာဝနာ, ပရိဟာယတိ အရဟာ အရဟတ္တာ; တေန ဝတ ရေ ဝတ္တဗ္ဗေ – ‘‘ပရိဟာယတိ သောတာပန္နော သောတာပတ္တိဖလာ’’တိ။
ပရိဟာယတိ အရဟာ အရဟတ္တာတိ? အာမန္တာ။ ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။ပေ.။ ကဿ အဓိမတ္တာ မဂ္ဂဘာဝနာ။ပေ.။ ဗောဇ္ဈင်္ဂဘာဝနာ အရဟတော ဝါ သကဒါဂါမိဿ ဝါတိ? အရဟတော။ ဟဉ္စိ အရဟတော အဓိမတ္တာ ဗောဇ္ဈင်္ဂဘာဝနာ, ပရိဟာယတိ အရဟာ အရဟတ္တာ; တေန ဝတ ရေ ဝတ္တဗ္ဗေ – ‘‘ပရိဟာယတိ သကဒါဂါမီ သကဒါဂါမိဖလာ’’တိ။
ပရိဟာယတိ အရဟာ အရဟတ္တာတိ? အာမန္တာ။ ပရိဟာယတိ အနာဂါမီ အနာဂါမိဖလာတိ? န ဟေဝံ ဝတ္တဗ္ဗေ။ပေ.။ ကဿ အဓိမတ္တာ မဂ္ဂဘာဝနာ။ပေ.။ ဗောဇ္ဈင်္ဂဘာဝနာ အရဟတော ဝါ အနာဂါမိဿ ဝါတိ? အရဟတော။ ဟဉ္စိ အရဟတော အဓိမတ္တာ ဗောဇ္ဈင်္ဂဘာဝနာ, ပရိဟာယတိ အရဟာ အရဟတ္တာ; တေန ဝတ ရေ ဝတ္တဗ္ဗေ – ‘‘ပရိဟာယတိ အနာဂါမီ အနာဂါမိဖလာ’’တိ။
၂၄၅. ပရိဟာယတိ အနာဂါမီ အနာဂါမိဖလာတိ? အာမန္တာ။ ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။ ကဿ အဓိမတ္တာ မဂ္ဂဘာဝနာ။ပေ.။ ဗောဇ္ဈင်္ဂဘာဝနာ အနာဂါမိဿ ဝါ သောတာပန္နဿ ဝါတိ? အနာဂါမိဿ။ ဟဉ္စိ အနာဂါမိဿ အဓိမတ္တာ ဗောဇ္ဈင်္ဂဘာဝနာ, ပရိဟာယတိ အနာဂါမီ အနာဂါမိဖလာ; တေန ဝတ ရေ ဝတ္တဗ္ဗေ – ‘‘ပရိဟာယတိ သောတာပန္နော သောတာပတ္တိဖလာ’’တိ။
ပရိဟာယတိ အနာဂါမီ အနာဂါမိဖလာတိ? အာမန္တာ။ ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။ပေ.။ ကဿ အဓိမတ္တာ မဂ္ဂဘာဝနာ။ပေ.။ ဗောဇ္ဈင်္ဂဘာဝနာ အနာဂါမိဿ ဝါ သကဒါဂါမိဿ ဝါတိ? အနာဂါမိဿ။ ဟဉ္စိ အနာဂါမိဿ အဓိမတ္တာ ဗောဇ္ဈင်္ဂဘာဝနာ, ပရိဟာယတိ အနာဂါမီ အနာဂါမိဖလာ; တေန ဝတ ရေ ဝတ္တဗ္ဗေ – ‘‘ပရိဟာယတိ သကဒါဂါမီ သကဒါဂါမိဖလာ’’တိ။
၂၄၆. ပရိဟာယတိ သကဒါဂါမီ သကဒါဂါမိဖလာတိ? အာမန္တာ။ ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။ ကဿ အဓိမတ္တာ မဂ္ဂဘာဝနာ။ပေ.။ ဗောဇ္ဈင်္ဂဘာဝနာ သကဒါဂါမိဿ ဝါ သောတာပန္နဿ ဝါတိ? သကဒါဂါမိဿ။ ဟဉ္စိ သကဒါဂါမိဿ အဓိမတ္တာ ဗောဇ္ဈင်္ဂဘာဝနာ, ပရိဟာယတိ သကဒါဂါမီ သကဒါဂါမိဖလာ; တေန ဝတ ရေ ဝတ္တဗ္ဗေ – ‘‘ပရိဟာယတိ သောတာပန္နော သောတာပတ္တိဖလာ’’တိ။ပေ.။။
၂၄၇. အရဟတာ ဒုက္ခံ ဒိဋ္ဌံ, ပရိဟာယတိ အရဟာ အရဟတ္တာတိ? အာမန္တာ။ သောတာပန္နေန ဒုက္ခံ ဒိဋ္ဌံ, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။။
အရဟတာ သမုဒယော ဒိဋ္ဌော, ပရိဟာယတိ အရဟာ အရဟတ္တာတိ ? အာမန္တာ။ သောတာပန္နေန သမုဒယော ဒိဋ္ဌော, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။။
အရဟတာ နိရောဓေါ ဒိဋ္ဌော, ပရိဟာယတိ အရဟာ အရဟတ္တာတိ? အာမန္တာ။ သောတာပန္နေန နိရောဓေါ ဒိဋ္ဌော, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။။
အရဟတာ မဂ္ဂေါ ဒိဋ္ဌော, ပရိဟာယတိ အရဟာ အရဟတ္တာတိ? အာမန္တာ။ သောတာပန္နေန မဂ္ဂေါ ဒိဋ္ဌော, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။။
အရဟတာ စတ္တာရိ သစ္စာနိ ဒိဋ္ဌာနိ, ပရိဟာယတိ အရဟာ အရဟတ္တာတိ? အာမန္တာ။ သောတာပန္နေန စတ္တာရိ သစ္စာနိ ဒိဋ္ဌာနိ, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။။
အရဟတာ ဒုက္ခံ ဒိဋ္ဌံ, ပရိဟာယတိ အရဟာ အရဟတ္တာတိ? အာမန္တာ။ သကဒါဂါမိနာ ဒုက္ခံ ဒိဋ္ဌံ, ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။ပေ.။။
အရဟတာ သမုဒယော ဒိဋ္ဌော။ပေ.။ နိရောဓေါ ဒိဋ္ဌော။ပေ.။ မဂ္ဂေါ ဒိဋ္ဌော။ပေ.။ စတ္တာရိ သစ္စာနိ ဒိဋ္ဌာနိ, ပရိဟာယတိ အရဟာ အရဟတ္တာတိ? အာမန္တာ။ သကဒါဂါမိနာ စတ္တာရိ သစ္စာနိ ဒိဋ္ဌာနိ, ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။ပေ.။။
အရဟတာ ဒုက္ခံ ဒိဋ္ဌံ, ပရိဟာယတိ အရဟာ အရဟတ္တာတိ? အာမန္တာ။ အနာဂါမိနာ ဒုက္ခံ ဒိဋ္ဌံ, ပရိဟာယတိ အနာဂါမီ အနာဂါမိဖလာတိ? န ဟေဝံ ဝတ္တဗ္ဗေ။ပေ.။။
အရဟတာ သမုဒယော ဒိဋ္ဌော။ပေ.။ နိရောဓေါ ဒိဋ္ဌော။ပေ.။ မဂ္ဂေါ ဒိဋ္ဌော။ပေ.။ စတ္တာရိ သစ္စာနိ ဒိဋ္ဌာနိ, ပရိဟာယတိ အရဟာ အရဟတ္တာတိ? အာမန္တာ။ အနာဂါမိနာ စတ္တာရိ သစ္စာနိ ဒိဋ္ဌာနိ, ပရိဟာယတိ အနာဂါမီ အနာဂါမိဖလာတိ? န ဟေဝံ ဝတ္တဗ္ဗေ။ပေ.။။
၂၄၈. အနာဂါမိနာ ဒုက္ခံ ဒိဋ္ဌံ, ပရိဟာယတိ အနာဂါမီ အနာဂါမိဖလာတိ? အာမန္တာ။ သောတာပန္နေန ဒုက္ခံ ဒိဋ္ဌံ, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။။
အနာဂါမိနာ သမုဒယော ဒိဋ္ဌော။ပေ.။ နိရောဓေါ ဒိဋ္ဌော။ပေ.။ မဂ္ဂေါ ဒိဋ္ဌော။ပေ.။ စတ္တာရိ သစ္စာနိ ဒိဋ္ဌာနိ, ပရိဟာယတိ အနာဂါမီ အနာဂါမိဖလာတိ? အာမန္တာ ။ သောတာပန္နေန စတ္တာရိ သစ္စာနိ ဒိဋ္ဌာနိ, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။။
အနာဂါမိနာ ဒုက္ခံ ဒိဋ္ဌံ, ပရိဟာယတိ အနာဂါမီ အနာဂါမိဖလာတိ? အာမန္တာ။ သကဒါဂါမိနာ ဒုက္ခံ ဒိဋ္ဌံ, ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။ပေ.။။
အနာဂါမိနာ သမုဒယော ဒိဋ္ဌော။ပေ.။ နိရောဓေါ ဒိဋ္ဌော။ပေ.။ မဂ္ဂေါ ဒိဋ္ဌော။ပေ.။ စတ္တာရိ သစ္စာနိ ဒိဋ္ဌာနိ, ပရိဟာယတိ အနာဂါမီ အနာဂါမိဖလာတိ? အာမန္တာ။ သကဒါဂါမိနာ စတ္တာရိ သစ္စာနိ ဒိဋ္ဌာနိ, ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။ပေ.။။
၂၄၉. သကဒါဂါမိနာ ဒုက္ခံ ဒိဋ္ဌံ, ပရိဟာယတိ သကဒါဂါမီ သကဒါဂါမိဖလာတိ? အာမန္တာ။ သောတာပန္နေန ဒုက္ခံ ဒိဋ္ဌံ, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။။
သကဒါဂါမိနာ သမုဒယော ဒိဋ္ဌော။ပေ.။ နိရောဓေါ ဒိဋ္ဌော။ပေ.။ မဂ္ဂေါ ဒိဋ္ဌော။ပေ.။ စတ္တာရိ သစ္စာနိ ဒိဋ္ဌာနိ, ပရိဟာယတိ သကဒါဂါမီ သကဒါဂါမိဖလာတိ? အာမန္တာ။ သောတာပန္နေန စတ္တာရိ သစ္စာနိ ဒိဋ္ဌာနိ, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။။
၂၅၀. သောတာပန္နေန ဒုက္ခံ ဒိဋ္ဌံ, န ပရိဟာယတိ သောတာပန္နော သောတာပတ္တိဖလာတိ? အာမန္တာ။ အရဟတာ ဒုက္ခံ ဒိဋ္ဌံ, န ပရိဟာယတိ အရဟာ အရဟတ္တာတိ? န ဟေဝံ ဝတ္တဗ္ဗေ။ပေ.။။
သောတာပန္နေန သမုဒယော ဒိဋ္ဌော။ပေ.။ နိရောဓေါ ဒိဋ္ဌော။ပေ.။ မဂ္ဂေါ ဒိဋ္ဌော။ပေ.။ စတ္တာရိ သစ္စာနိ ဒိဋ္ဌာနိ, န ပရိဟာယတိ သောတာပန္နော သောတာပတ္တိဖလာတိ? အာမန္တာ။ အရဟတာ စတ္တာရိ သစ္စာနိ ဒိဋ္ဌာနိ, န ပရိဟာယတိ အရဟာ အရဟတ္တာတိ? န ဟေဝံ ဝတ္တဗ္ဗေ။ပေ.။။
သကဒါဂါမိနာ ဒုက္ခံ ဒိဋ္ဌံ။ပေ.။ စတ္တာရိ သစ္စာနိ ဒိဋ္ဌာနိ, န ပရိဟာယတိ သကဒါဂါမီ သကဒါဂါမိဖလာတိ? အာမန္တာ။ အရဟတာ စတ္တာရိ သစ္စာနိ ဒိဋ္ဌာနိ, န ပရိဟာယတိ အရဟာ အရဟတ္တာတိ? န ဟေဝံ ဝတ္တဗ္ဗေ။ပေ.။။
အနာဂါမိနာ ဒုက္ခံ ဒိဋ္ဌံ။ပေ.။ စတ္တာရိ သစ္စာနိ ဒိဋ္ဌာနိ, န ပရိဟာယတိ အနာဂါမီ အနာဂါမိဖလာတိ? အာမန္တာ။ အရဟတာ စတ္တာရိ သစ္စာနိ ဒိဋ္ဌာနိ, န ပရိဟာယတိ အရဟာ အရဟတ္တာတိ? န ဟေဝံ ဝတ္တဗ္ဗေ။ပေ.။။
သောတာပန္နေန ဒုက္ခံ ဒိဋ္ဌံ။ပေ.။ စတ္တာရိ သစ္စာနိ ဒိဋ္ဌာနိ, န ပရိဟာယတိ သောတာပန္နော သောတာပတ္တိဖလာတိ? အာမန္တာ။
အနာဂါမိနာ ဒုက္ခံ ဒိဋ္ဌံ။ပေ.။ စတ္တာရိ သစ္စာနိ ဒိဋ္ဌာနိ, န ပရိဟာယတိ အနာဂါမီ အနာဂါမိဖလာတိ? န ဟေဝံ ဝတ္တဗ္ဗေ။ပေ.။။
သကဒါဂါမိနာ ဒုက္ခံ ဒိဋ္ဌံ။ပေ.။ စတ္တာရိ သစ္စာနိ ဒိဋ္ဌာနိ, န ပရိဟာယတိ သကဒါဂါမီ သကဒါဂါမိဖလာတိ? အာမန္တာ။ အနာဂါမိနာ ဒုက္ခံ ဒိဋ္ဌံ။ပေ.။ စတ္တာရိ သစ္စာနိ ဒိဋ္ဌာနိ, န ပရိဟာယတိ အနာဂါမီ အနာဂါမိဖလာတိ? န ဟေဝံ ဝတ္တဗ္ဗေ။ပေ.။။
သောတာပန္နေန ဒုက္ခံ ဒိဋ္ဌံ။ပေ.။ စတ္တာရိ သစ္စာနိ ဒိဋ္ဌာနိ, န ပရိဟာယတိ သောတာပန္နော သောတာပတ္တိဖလာတိ? အာမန္တာ။ သကဒါဂါမိနာ ဒုက္ခံ ဒိဋ္ဌံ။ပေ.။ စတ္တာရိ သစ္စာနိ ဒိဋ္ဌာနိ, န ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။ပေ.။။
၂၅၁. အရဟတော ရာဂေါ ပဟီနော, ပရိဟာယတိ အရဟာ အရဟတ္တာတိ? အာမန္တာ။ သောတာပန္နဿ သက္ကာယဒိဋ္ဌိ ပဟီနာ, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။။
အရဟတော ရာဂေါ ပဟီနော, ပရိဟာယတိ အရဟာ အရဟတ္တာတိ? အာမန္တာ။ သောတာပန္နဿ ဝိစိကိစ္ဆာ ပဟီနာ။ပေ.။ သီလဗ္ဗတပရာမာသော ပဟီနော။ပေ.။ အပါယဂမနီယော ရာဂေါ ပဟီနော ။ပေ.။ အပါယဂမနီယော ဒေါသော ပဟီနော။ပေ.။ အပါယဂမနီယော မောဟော ပဟီနော, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။။
အရဟတော ဒေါသော ပဟီနော။ပေ.။ မောဟော ပဟီနော။ မာနော ပဟီနော။ ဒိဋ္ဌိ ပဟီနာ။ ဝိစိကိစ္ဆာ ပဟီနာ။ ထိနံ [ထီနံ (သီ. သျာ. ကံ. ဣ.)] ပဟီနံ။ ဥဒ္ဓစ္စံ ပဟီနံ။ အဟိရိကံ ပဟီနံ။ပေ.။ အနောတ္တပ္ပံ ပဟီနံ, ပရိဟာယတိ အရဟာ အရဟတ္တာတိ ? အာမန္တာ။ သောတာပန္နဿ သက္ကာယဒိဋ္ဌိ ပဟီနာ, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။။
အရဟတော အနောတ္တပ္ပံ ပဟီနံ, ပရိဟာယတိ အရဟာ အရဟတ္တာတိ? အာမန္တာ။ သောတာပန္နဿ ဝိစိကိစ္ဆာ ပဟီနာ။ပေ.။ သီလဗ္ဗတပရာမာသော ပဟီနော။ပေ.။ အပါယဂမနီယော ရာဂေါ ပဟီနော။ပေ.။ အပါယဂမနီယော ဒေါသော ပဟီနော။ပေ.။ အပါယဂမနီယော မောဟော ပဟီနော, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။ပေ.။။
အရဟတော ရာဂေါ ပဟီနော, ပရိဟာယတိ အရဟာ အရဟတ္တာတိ? အာမန္တာ။ သကဒါဂါမိဿ သက္ကာယဒိဋ္ဌိ ပဟီနာ, ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။
အရဟတော ရာဂေါ ပဟီနော, ပရိဟာယတိ အရဟာ အရဟတ္တာတိ? အာမန္တာ။ သကဒါဂါမိဿ ဝိစိကိစ္ဆာ ပဟီနာ။ပေ.။ သီလဗ္ဗတပရာမာသော ပဟီနော။ပေ.။ ဩဠာရိကော ကာမရာဂေါ ပဟီနော။ ဩဠာရိကော ဗျာပါဒေါ ပဟီနော, ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။ပေ.။။
အရဟတော ဒေါသော ပဟီနော။ပေ.။ အနောတ္တပ္ပံ ပဟီနံ, ပရိဟာယတိ အရဟာ အရဟတ္တာတိ? အာမန္တာ။ သကဒါဂါမိဿ သက္ကာယဒိဋ္ဌိ ပဟီနာ။ပေ.။ ဩဠာရိကော ဗျာပါဒေါ ပဟီနော, ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။
အရဟတော ရာဂေါ ပဟီနော, ပရိဟာယတိ အရဟာ အရဟတ္တာတိ? အာမန္တာ။ အနာဂါမိဿ သက္ကာယဒိဋ္ဌိ ပဟီနာ, ပရိဟာယတိ အနာဂါမီ အနာဂါမိဖလာတိ? န ဟေဝံ ဝတ္တဗ္ဗေ။ပေ.။။
အရဟတော ရာဂေါ ပဟီနော, ပရိဟာယတိ အရဟာ အရဟတ္တာတိ? အာမန္တာ။ အနာဂါမိဿ ဝိစိကိစ္ဆာ ပဟီနာ။ပေ.။ သီလဗ္ဗတပရာမာသော ပဟီနော။ အဏုသဟဂတော ကာမရာဂေါ ပဟီနော။ အဏုသဟဂတော ဗျာပါဒေါ ပဟီနော, ပရိဟာယတိ အနာဂါမီ အနာဂါမိဖလာတိ? န ဟေဝံ ဝတ္တဗ္ဗေ။
အရဟတော ဒေါသော ပဟီနော။ပေ.။ အနောတ္တပ္ပံ ပဟီနံ, ပရိဟာယတိ အရဟာ အရဟတ္တာတိ? အာမန္တာ။ အနာဂါမိဿ သက္ကာယဒိဋ္ဌိ ပဟီနာ။ပေ.။ အဏုသဟဂတော ဗျာပါဒေါ ပဟီနော, ပရိဟာယတိ အနာဂါမီ အနာဂါမိဖလာတိ? န ဟေဝံ ဝတ္တဗ္ဗေ။
၂၅၂. အနာဂါမိဿ သက္ကာယဒိဋ္ဌိ ပဟီနာ, ပရိဟာယတိ အနာဂါမီ အနာဂါမိဖလာတိ? အာမန္တာ။ သောတာပန္နဿ သက္ကာယဒိဋ္ဌိ ပဟီနာ, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။
အနာဂါမိဿ သက္ကာယဒိဋ္ဌိ ပဟီနာ, ပရိဟာယတိ အနာဂါမီ အနာဂါမိဖလာတိ? အာမန္တာ။ သောတာပန္နဿ ဝိစိကိစ္ဆာ ပဟီနာ။ပေ.။ အပါယဂမနီယော မောဟော ပဟီနော, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။
အနာဂါမိဿ ဝိစိကိစ္ဆာ ပဟီနာ။ပေ.။ အဏုသဟဂတော ဗျာပါဒေါ ပဟီနော, ပရိဟာယတိ အနာဂါမီ အနာဂါမိဖလာတိ? အာမန္တာ ။ သောတာပန္နဿ သက္ကာယဒိဋ္ဌိ ပဟီနာ။ပေ.။ အပါယဂမနီယော မောဟော ပဟီနော, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။
အနာဂါမိဿ သက္ကာယဒိဋ္ဌိ ပဟီနာ, ပရိဟာယတိ အနာဂါမီ အနာဂါမိဖလာတိ? အာမန္တာ။ သကဒါဂါမိဿ သက္ကာယဒိဋ္ဌိ ပဟီနာ, ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။
အနာဂါမိဿ သက္ကာယဒိဋ္ဌိ ပဟီနာ, ပရိဟာယတိ အနာဂါမီ အနာဂါမိဖလာတိ? အာမန္တာ။ သကဒါဂါမိဿ ဝိစိကိစ္ဆာ ပဟီနာ။ပေ.။ သီလဗ္ဗတပရာမာသော ပဟီနော။ ဩဠာရိကော ကာမရာဂေါ ပဟီနော။ ဩဠာရိကော ဗျာပါဒေါ ပဟီနော, ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။
အနာဂါမိဿ ဝိစိကိစ္ဆာ ပဟီနာ။ပေ.။ အဏုသဟဂတော ဗျာပါဒေါ ပဟီနော, ပရိဟာယတိ အနာဂါမီ အနာဂါမိဖလာတိ? အာမန္တာ။ သကဒါဂါမိဿ သက္ကာယဒိဋ္ဌိ ပဟီနာ။ပေ.။ ဩဠာရိကော ဗျာပါဒေါ ပဟီနော, ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။
၂၅၃. သကဒါဂါမိဿ သက္ကာယဒိဋ္ဌိ ပဟီနာ, ပရိဟာယတိ သကဒါဂါမီ သကဒါဂါမိဖလာတိ? အာမန္တာ။ သောတာပန္နဿ သက္ကာယဒိဋ္ဌိ ပဟီနာ, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။
သကဒါဂါမိဿ သက္ကာယဒိဋ္ဌိ ပဟီနာ, ပရိဟာယတိ သကဒါဂါမီ သကဒါဂါမိဖလာတိ? အာမန္တာ။ သောတာပန္နဿ ဝိစိကိစ္ဆာ ပဟီနာ။ပေ.။ အပါယဂမနီယော မောဟော ပဟီနော, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။
သကဒါဂါမိဿ ဝိစိကိစ္ဆာ ပဟီနာ။ပေ.။ ဩဠာရိကော ကာမရာဂေါ ပဟီနော။ ဩဠာရိကော ဗျာပါဒေါ ပဟီနော, ပရိဟာယတိ သကဒါဂါမီ သကဒါဂါမိဖလာတိ ? အာမန္တာ ။ သောတာပန္နဿ သက္ကာယဒိဋ္ဌိ ပဟီနာ။ပေ.။ အပါယဂမနီယော မောဟော ပဟီနော, ပရိဟာယတိ သောတာပန္နော သောတာပတ္တိဖလာတိ? န ဟေဝံ ဝတ္တဗ္ဗေ။
၂၅၄. သောတာပန္နဿ သက္ကာယဒိဋ္ဌိ ပဟီနာ, န ပရိဟာယတိ သောတာပန္နော သောတာပတ္တိဖလာတိ? အာမန္တာ။ အရဟတော ရာဂေါ ပဟီနော, န ပရိဟာယတိ အရဟာ အရဟတ္တာတိ? န ဟေဝံ ဝတ္တဗ္ဗေ။
သောတာပန္နဿ သက္ကာယဒိဋ္ဌိ ပဟီနာ, န ပရိဟာယတိ သောတာပန္နော သောတာပတ္တိဖလာတိ? အာမန္တာ။ အရဟတော ဒေါသော ပဟီနော။ပေ.။ အနောတ္တပ္ပံ ပဟီနံ, န ပရိဟာယတိ အရဟာ အရဟတ္တာတိ? န ဟေဝံ ဝတ္တဗ္ဗေ။
သောတာပန္နဿ ဝိစိကိစ္ဆာ ပဟီနာ။ပေ.။ အပါယဂမနီယော မောဟော ပဟီနော, န ပရိဟာယတိ သောတာပန္နော သောတာပတ္တိဖလာတိ? အာမန္တာ။ အရဟတော ရာဂေါ ပဟီနော။ပေ.။ အနောတ္တပ္ပံ ပဟီနံ, န ပရိဟာယတိ အရဟာ အရဟတ္တာတိ? န ဟေဝံ ဝတ္တဗ္ဗေ။
၂၅၅. သကဒါဂါမိဿ သက္ကာယဒိဋ္ဌိ ပဟီနာ, န ပရိဟာယတိ သကဒါဂါမီ သကဒါဂါမိဖလာတိ? အာမန္တာ။ အရဟတော ရာဂေါ ပဟီနော။ပေ.။ အနောတ္တပ္ပံ ပဟီနံ, န ပရိဟာယတိ အရဟာ အရဟတ္တာတိ? န ဟေဝံ ဝတ္တဗ္ဗေ။
သကဒါဂါမိဿ ဝိစိကိစ္ဆာ ပဟီနာ။ပေ.။ ဩဠာရိကော ဗျာပါဒေါ ပဟီနော, န ပရိဟာယတိ သကဒါဂါမီ သကဒါဂါမိဖလာတိ? အာမန္တာ။ အရဟတော ရာဂေါ ပဟီနော။ပေ.။ အနောတ္တပ္ပံ ပဟီနံ, န ပရိဟာယတိ အရဟာ အရဟတ္တာတိ? န ဟေဝံ ဝတ္တဗ္ဗေ။
၂၅၆. အနာဂါမိဿ သက္ကာယဒိဋ္ဌိ ပဟီနာ, န ပရိဟာယတိ အနာဂါမီ အနာဂါမိဖလာတိ? အာမန္တာ။ အရဟတော ရာဂေါ ပဟီနော။ပေ.။ အနောတ္တပ္ပံ ပဟီနံ, န ပရိဟာယတိ အရဟာ အရဟတ္တာတိ? န ဟေဝံ ဝတ္တဗ္ဗေ ။
အနာဂါမိဿ ဝိစိကိစ္ဆာ ပဟီနာ။ပေ.။ အဏုသဟဂတော ဗျာပါဒေါ ပဟီနော, န ပရိဟာယတိ အနာဂါမီ အနာဂါမိဖလာတိ? အာမန္တာ။ အရဟတော ရာဂေါ ပဟီနော။ပေ.။ အနောတ္တပ္ပံ ပဟီနံ, န ပရိဟာယတိ အရဟာ အရဟတ္တာတိ? န ဟေဝံ ဝတ္တဗ္ဗေ။
၂၅၇. သောတာပန္နဿ သက္ကာယဒိဋ္ဌိ ပဟီနာ, န ပရိဟာယတိ သောတာပန္နော သောတာပတ္တိဖလာတိ? အာမန္တာ။ အနာဂါမိဿ သက္ကာယဒိဋ္ဌိ ပဟီနာ။ အဏုသဟဂတော ဗျာပါဒေါ ပဟီနော, န ပရိဟာယတိ အနာဂါမီ အနာဂါမိဖလာတိ? န ဟေဝံ ဝတ္တဗ္ဗေ။
သောတာပန္နဿ ဝိစိကိစ္ဆာ ပဟီနာ။ပေ.။ အပါယဂမနီယော မောဟော ပဟီနော, န ပရိဟာယတိ သောတာပန္နော သောတာပတ္တိဖလာတိ? အာမန္တာ။ အနာဂါမိဿ သက္ကာယဒိဋ္ဌိ ပဟီနာ။ပေ.။ အဏုသဟဂတော ဗျာပါဒေါ ပဟီနော, န ပရိဟာယတိ အနာဂါမီ အနာဂါမိဖလာတိ? န ဟေဝံ ဝတ္တဗ္ဗေ။
၂၅၈. သကဒါဂါမိဿ သက္ကာယဒိဋ္ဌိ ပဟီနာ, န ပရိဟာယတိ သကဒါဂါမီ သကဒါဂါမိဖလာတိ? အာမန္တာ။ အနာဂါမိဿ သက္ကာယဒိဋ္ဌိ ပဟီနာ။ပေ.။ အဏုသဟဂတော ဗျာပါဒေါ ပဟီနော, န ပရိဟာယတိ အနာဂါမီ အနာဂါမိဖလာတိ? န ဟေဝံ ဝတ္တဗ္ဗေ။
သကဒါဂါမိဿ ဝိစိကိစ္ဆာ ပဟီနာ။ပေ.။ ဩဠာရိကော ဗျာပါဒေါ ပဟီနော, န ပရိဟာယတိ သကဒါဂါမီ သကဒါဂါမိဖလာတိ? အာမန္တာ။ အနာဂါမိဿ သက္ကာယဒိဋ္ဌိ ပဟီနာ။ပေ.။ အဏုသဟဂတော ဗျာပါဒေါ ပဟီနော, န ပရိဟာယတိ အနာဂါမီ အနာဂါမိဖလာတိ? န ဟေဝံ ဝတ္တဗ္ဗေ။
၂၅၉. သောတာပန္နဿ သက္ကာယဒိဋ္ဌိ ပဟီနာ, န ပရိဟာယတိ သောတာပန္နော သောတာပတ္တိဖလာတိ? အာမန္တာ။ သကဒါဂါမိဿ သက္ကာယဒိဋ္ဌိ ပဟီနာ။ပေ.။ ဩဠာရိကော ဗျာပါဒေါ ပဟီနော, န ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။
သောတာပန္နဿ ဝိစိကိစ္ဆာ ပဟီနာ။ပေ.။ အပါယဂမနီယော မောဟော ပဟီနော, န ပရိဟာယတိ သောတာပန္နော သောတာပတ္တိဖလာတိ? အာမန္တာ။ သကဒါဂါမိဿ သက္ကာယဒိဋ္ဌိ ပဟီနာ။ပေ.။ ဩဠာရိကော ဗျာပါဒေါ ပဟီနော, န ပရိဟာယတိ သကဒါဂါမီ သကဒါဂါမိဖလာတိ? န ဟေဝံ ဝတ္တဗ္ဗေ။
၂၆၀. ပရိဟာယတိ အရဟာ အရဟတ္တာတိ? အာမန္တာ။ နနု အရဟတော ရာဂေါ ပဟီနော ဥစ္ဆိန္နမူလော တာလာဝတ္ထုကတော အနဘာဝင်္ကတော [အနဘာဝကတော (သီ.)] အာယတိံ အနုပ္ပါဒဓမ္မောတိ? အာမန္တာ။ ဟဉ္စိ အရဟတော ရာဂေါ ပဟီနော ဥစ္ဆိန္နမူလော တာလာဝတ္ထုကတော အနဘာဝင်္ကတော အာယတိံ အနုပ္ပါဒဓမ္မော, နော စ ဝတ ရေ [နော ဝတ ရေ (သျာ. ဣ.) ဧဝမုပရိပိ] ဝတ္တဗ္ဗေ – ‘‘ပရိဟာယတိ အရဟာ အရဟတ္တာ’’တိ။
ပရိဟာယတိ အရဟာ အရဟတ္တာတိ? အာမန္တာ။ နနု အရဟတော ဒေါသော ပဟီနော။ပေ.။ မောဟော ပဟီနော။ မာနော ပဟီနော။ ဒိဋ္ဌိ ပဟီနာ။ ဝိစိကိစ္ဆာ ပဟီနာ။ ထိနံ ပဟီနံ။ ဥဒ္ဓစ္စံ ပဟီနံ။ အဟိရိကံ ပဟီနံ။ အနောတ္တပ္ပံ ပဟီနံ ဥစ္ဆိန္နမူလံ တာလာဝတ္ထုကတံ အနဘာဝင်္ကတံ အာယတိံ အနုပ္ပါဒဓမ္မန္တိ? အာမန္တာ။ ဟဉ္စိ အရဟတော အနောတ္တပ္ပံ ပဟီနံ ဥစ္ဆိန္နမူလံ တာလာဝတ္ထုကတံ အနဘာဝင်္ကတံ အာယတိံ အနုပ္ပါဒဓမ္မံ, နော စ ဝတ ရေ ဝတ္တဗ္ဗေ – ‘‘ပရိဟာယတိ အရဟာ အရဟတ္တာ’’တိ။
ပရိဟာယတိ အရဟာ အရဟတ္တာတိ? အာမန္တာ။ နနု အရဟတော ရာဂပ္ပဟာနာယ မဂ္ဂေါ ဘာဝိတောတိ ? အာမန္တာ။ ဟဉ္စိ အရဟတော ရာဂပ္ပဟာနာယ မဂ္ဂေါ ဘာဝိတော, နော စ ဝတ ရေ ဝတ္တဗ္ဗေ – ‘‘ပရိဟာယတိ အရဟာ အရဟတ္တာ’’တိ။
ပရိဟာယတိ အရဟာ အရဟတ္တာတိ? အာမန္တာ။ နနု အရဟတော ရာဂပ္ပဟာနာယ သတိပဋ္ဌာနာ ဘာဝိတာ။ပေ.။ သမ္မပ္ပဓါနာ ဘာဝိတာ။ ဣဒ္ဓိပါဒါ ဘာဝိတာ။ ဣန္ဒ္ရိယာ ဘာဝိတာ။ ဗလာ ဘာဝိတာ။ ဗောဇ္ဈင်္ဂါ ဘာဝိတာတိ? အာမန္တာ။ ဟဉ္စိ အရဟတော ရာဂပ္ပဟာနာယ ဗောဇ္ဈင်္ဂါ ဘာဝိတာ, နော စ ဝတ ရေ ဝတ္တဗ္ဗေ – ‘‘ပရိဟာယတိ အရဟာ အရဟတ္တာ’’တိ။
ပရိဟာယတိ အရဟာ အရဟတ္တာတိ? အာမန္တာ။ နနု အရဟတော ဒေါသပ္ပဟာနာယ။ပေ.။ အနောတ္တပ္ပပဟာနာယ မဂ္ဂေါ ဘာဝိတော။ပေ.။ ဗောဇ္ဈင်္ဂါ ဘာဝိတာတိ? အာမန္တာ။ ဟဉ္စိ အရဟတော အနောတ္တပ္ပပဟာနာယ ဗောဇ္ဈင်္ဂါ ဘာဝိတာ, နော စ ဝတ ရေ ဝတ္တဗ္ဗေ – ‘‘ပရိဟာယတိ အရဟာ အရဟတ္တာ’’တိ။
၂၆၁. ပရိဟာယတိ အရဟာ အရဟတ္တာတိ? အာမန္တာ။ နနု အရဟာ ဝီတရာဂေါ ဝီတဒေါသော ဝီတမောဟော ကတကရဏီယော ဩဟိတဘာရော အနုပ္ပတ္တသဒတ္ထော ပရိက္ခီဏဘဝသံယောဇနော သမ္မဒညာဝိမုတ္တော ဥက္ခိတ္တပလိဃော သင်္ကိဏ္ဏပရိခေါ အဗ္ဗူဠ္ဟေသိကော နိရဂ္ဂဠော အရိယော ပန္နဒ္ဓဇော ပန္နဘာရော ဝိသညုတ္တော သုဝိဇိတဝိဇယော; ဒုက္ခံ တဿ ပရိညာတံ, သမုဒယော ပဟီနော, နိရောဓေါ သစ္ဆိကတော, မဂ္ဂေါ ဘာဝိတော, အဘိညေယျံ အဘိညာတံ , ပရိညေယျံ ပရိညာတံ, ပဟာတဗ္ဗံ ပဟီနံ, ဘာဝေတဗ္ဗံ ဘာဝိတံ, သစ္ဆိကာတဗ္ဗံ သစ္ဆိကတန္တိ? အာမန္တာ။ ဟဉ္စိ အရဟာ ဝီတရာဂေါ ဝီတဒေါသော ဝီတမောဟော။ပေ.။ သစ္ဆိကာတဗ္ဗံ သစ္ဆိကတံ, နော စ ဝတ ရေ ဝတ္တဗ္ဗေ – ‘‘ပရိဟာယတိ အရဟာ အရဟတ္တာ’’တိ။
၂၆၂. ပရိဟာယတိ အရဟာ အရဟတ္တာတိ? ( ) [(အာမန္တာ) (က.)] သမယဝိမုတ္တော အရဟာ အရဟတ္တာ ပရိဟာယတိ, အသမယဝိမုတ္တော အရဟာ အရဟတ္တာ န ပရိဟာယတီတိ။ သမယဝိမုတ္တော အရဟာ အရဟတ္တာ ပရိဟာယတီတိ? အာမန္တာ။ အသမယဝိမုတ္တော အရဟာ အရဟတ္တာ ပရိဟာယတီတိ [န ပရိဟာယတီတိ (က.)]? န ဟေဝံ ဝတ္တဗ္ဗေ။
အသမယဝိမုတ္တော အရဟာ အရဟတ္တာ န ပရိဟာယတီတိ? အာမန္တာ။ သမယဝိမုတ္တော အရဟာ အရဟတ္တာ န ပရိဟာယတီတိ? န ဟေဝံ ဝတ္တဗ္ဗေ။
သမယဝိမုတ္တဿ အရဟတော ရာဂေါ ပဟီနော, ပရိဟာယတိ သမယဝိမုတ္တော အရဟာ အရဟတ္တာတိ? အာမန္တာ။ အသမယဝိမုတ္တဿ အရဟတော ရာဂေါ ပဟီနော, ပရိဟာယတိ အသမယဝိမုတ္တော အရဟာ အရဟတ္တာတိ? န ဟေဝံ ဝတ္တဗ္ဗေ။
သမယဝိမုတ္တဿ အရဟတော ဒေါသော ပဟီနော။ပေ.။ အနောတ္တပ္ပံ ပဟီနံ, ပရိဟာယတိ သမယဝိမုတ္တော အရဟာ အရဟတ္တာတိ? အာမန္တာ။ အသမယဝိမုတ္တဿ အရဟတော အနောတ္တပ္ပံ ပဟီနံ, ပရိဟာယတိ အသမယဝိမုတ္တော အရဟာ အရဟတ္တာတိ? န ဟေဝံ ဝတ္တဗ္ဗေ။
သမယဝိမုတ္တဿ အရဟတော ရာဂပ္ပဟာနာယ မဂ္ဂေါ ဘာဝိတော, ပရိဟာယတိ သမယဝိမုတ္တော အရဟာ အရဟတ္တာတိ? အာမန္တာ။ အသမယဝိမုတ္တဿ အရဟတော ရာဂပ္ပဟာနာယ မဂ္ဂေါ ဘာဝိတော, ပရိဟာယတိ အသမယဝိမုတ္တော အရဟာ အရဟတ္တာတိ? န ဟေဝံ ဝတ္တဗ္ဗေ။
သမယဝိမုတ္တဿ အရဟတော ရာဂပ္ပဟာနာယ သတိပဋ္ဌာနာ ဘာဝိတာ။ပေ.။ သမ္မပ္ပဓါနာ ဘာဝိတာ။ ဣဒ္ဓိပါဒါ ဘာဝိတာ။ ဣန္ဒ္ရိယာ ဘာဝိတာ။ ဗလာ ဘာဝိတာ။ ဗောဇ္ဈင်္ဂါ ဘာဝိတာ, ပရိဟာယတိ သမယဝိမုတ္တော အရဟာ အရဟတ္တာတိ? အာမန္တာ။ အသမယဝိမုတ္တဿ အရဟတော ရာဂပ္ပဟာနာယ သတိပဋ္ဌာနာ ဘာဝိတာ။ပေ.။ ဗောဇ္ဈင်္ဂါ ဘာဝိတာ, ပရိဟာယတိ အသမယဝိမုတ္တော အရဟာ အရဟတ္တာတိ? န ဟေဝံ ဝတ္တဗ္ဗေ။
သမယဝိမုတ္တဿ အရဟတော ဒေါသပ္ပဟာနာယ။ပေ.။ အနောတ္တပ္ပပဟာနာယ မဂ္ဂေါ ဘာဝိတော။ပေ.။ ဗောဇ္ဈင်္ဂါ ဘာဝိတာ, ပရိဟာယတိ သမယဝိမုတ္တော အရဟာ အရဟတ္တာတိ? အာမန္တာ။ အသမယဝိမုတ္တဿ အရဟတော အနောတ္တပ္ပပဟာနာယ မဂ္ဂေါ ဘာဝိတော။ပေ.။ ဗောဇ္ဈင်္ဂါ ဘာဝိတာ, ပရိဟာယတိ အသမယဝိမုတ္တော အရဟာ အရဟတ္တာတိ? န ဟေဝံ ဝတ္တဗ္ဗေ။ပေ.။။
သမယဝိမုတ္တော အရဟာ ဝီတရာဂေါ ဝီတဒေါသော ဝီတမောဟော ကတကရဏီယော ဩဟိတဘာရော အနုပ္ပတ္တသဒတ္ထော ပရိက္ခီဏဘဝသံယောဇနော သမ္မဒညာဝိမုတ္တော ဥက္ခိတ္တပလိဃော သင်္ကိဏ္ဏပရိခေါ အဗ္ဗူဠ္ဟေသိကော နိရဂ္ဂဠော အရိယော ပန္နဒ္ဓဇော ပန္နဘာရော ဝိသညုတ္တော သုဝိဇိတဝိဇယော, ဒုက္ခံ တဿ ပရိညာတံ, သမုဒယော ပဟီနော, နိရောဓေါ သစ္ဆိကတော, မဂ္ဂေါ ဘာဝိတော, အဘိညေယျံ အဘိညာတံ, ပရိညေယျံ ပရိညာတံ, ပဟာတဗ္ဗံ ပဟီနံ, ဘာဝေတဗ္ဗံ ဘာဝိတံ, သစ္ဆိကာတဗ္ဗံ သစ္ဆိကတံ , ပရိဟာယတိ သမယဝိမုတ္တော အရဟာ အရဟတ္တာတိ? အာမန္တာ။ အသမယဝိမုတ္တော အရဟာ ဝီတရာဂေါ ဝီတဒေါသော ဝီတမောဟော။ပေ.။ သစ္ဆိကာတဗ္ဗံ သစ္ဆိကတံ, ပရိဟာယတိ အသမယဝိမုတ္တော အရဟာ အရဟတ္တာတိ? န ဟေဝံ ဝတ္တဗ္ဗေ။
၂၆၃. အသမယဝိမုတ္တဿ အရဟတော ရာဂေါ ပဟီနော, န ပရိဟာယတိ အသမယဝိမုတ္တော အရဟာ အရဟတ္တာတိ? အာမန္တာ။ သမယဝိမုတ္တဿ အရဟတော ရာဂေါ ပဟီနော, န ပရိဟာယတိ သမယဝိမုတ္တော အရဟာ အရဟတ္တာတိ? န ဟေဝံ ဝတ္တဗ္ဗေ။
အသမယဝိမုတ္တဿ အရဟတော ဒေါသော ပဟီနော။ပေ.။ အနောတ္တပ္ပံ ပဟီနံ, န ပရိဟာယတိ အသမယဝိမုတ္တော အရဟာ အရဟတ္တာတိ? အာမန္တာ။ သမယဝိမုတ္တဿ အရဟတော အနောတ္တပ္ပံ ပဟီနံ, န ပရိဟာယတိ သမယဝိမုတ္တော အရဟာ အရဟတ္တာတိ? န ဟေဝံ ဝတ္တဗ္ဗေ။
အသမယဝိမုတ္တဿ အရဟတော ရာဂပ္ပဟာနာယ မဂ္ဂေါ ဘာဝိတော။ပေ.။ ဗောဇ္ဈင်္ဂါ ဘာဝိတာ, န ပရိဟာယတိ အသမယဝိမုတ္တော အရဟာ အရဟတ္တာတိ? အာမန္တာ။ သမယဝိမုတ္တဿ အရဟတော ရာဂပ္ပဟာနာယ မဂ္ဂေါ ဘာဝိတော။ပေ.။ ဗောဇ္ဈင်္ဂါ ဘာဝိတာ, န ပရိဟာယတိ သမယဝိမုတ္တော အရဟာ အရဟတ္တာတိ? န ဟေဝံ ဝတ္တဗ္ဗေ။
အသမယဝိမုတ္တဿ အရဟတော ဒေါသပ္ပဟာနာယ။ပေ.။ အနောတ္တပ္ပပဟာနာယ မဂ္ဂေါ ဘာဝိတော။ပေ.။ ဗောဇ္ဈင်္ဂါ ဘာဝိတာ, န ပရိဟာယတိ အသမယဝိမုတ္တော အရဟာ အရဟတ္တာတိ? အာမန္တာ။ သမယဝိမုတ္တဿ အရဟတော အနောတ္တပ္ပပဟာနာယ မဂ္ဂေါ ဘာဝိတော။ပေ.။ ဗောဇ္ဈင်္ဂါ ဘာဝိတာ, န ပရိဟာယတိ သမယဝိမုတ္တော အရဟာ အရဟတ္တာတိ? န ဟေဝံ ဝတ္တဗ္ဗေ။
အသမယဝိမုတ္တော အရဟာ ဝီတရာဂေါ ဝီတဒေါသော ဝီတမောဟော။ပေ.။ သစ္ဆိကာတဗ္ဗံ သစ္ဆိကတံ, န ပရိဟာယတိ အသမယဝိမုတ္တော အရဟာ အရဟတ္တာတိ? အာမန္တာ။ သမယဝိမုတ္တော အရဟာ ဝီတရာဂေါ ဝီတဒေါသော ဝီတမောဟော။ပေ.။ သစ္ဆိကာတဗ္ဗံ သစ္ဆိကတံ, န ပရိဟာယတိ သမယဝိမုတ္တော အရဟာ အရဟတ္တာတိ? န ဟေဝံ ဝတ္တဗ္ဗေ။ပေ.။။
၂၆၄. ပရိဟာယတိ အရဟာ အရဟတ္တာတိ? အာမန္တာ။ သာရိပုတ္တော ထေရော ပရိဟာယိတ္ထ အရဟတ္တာတိ ? န ဟေဝံ ဝတ္တဗ္ဗေ။ မဟာမောဂ္ဂလ္လာနော [မဟာမောဂ္ဂလာနော (က.)] ထေရော။ မဟာကဿပေါ ထေရော။ မဟာကစ္စာယနော [မဟာကစ္စာနော (မ. နိ. ၁.၂၀၂ အာဒယော)] ထေရော။ မဟာကောဋ္ဌိကော [မဟာကောဋ္ဌိတော (သီ. သျာ. ကံ. ဣ.)] ထေရော။ မဟာပန္ထကော ထေရော ပရိဟာယိတ္ထ အရဟတ္တာတိ? န ဟေဝံ ဝတ္တဗ္ဗေ။
သာရိပုတ္တော ထေရော န ပရိဟာယိတ္ထ အရဟတ္တာတိ? အာမန္တာ။ ဟဉ္စိ သာရိပုတ္တော ထေရော န ပရိဟာယိတ္ထ အရဟတ္တာ, နော စ ဝတ ရေ ဝတ္တဗ္ဗေ – ‘‘ပရိဟာယတိ အရဟာ အရဟတ္တာ’’တိ။
မဟာမောဂ္ဂလ္လာနော ထေရော။ မဟာကဿပေါ ထေရော။ မဟာကစ္စာယနော ထေရော။ မဟာကောဋ္ဌိကော ထေရော။ မဟာပန္ထကော ထေရော န ပရိဟာယိတ္ထ အရဟတ္တာတိ? အာမန္တာ။ ဟဉ္စိ မဟာပန္ထကော ထေရော န ပရိဟာယိတ္ထ အရဟတ္တာ, နော စ ဝတ ရေ ဝတ္တဗ္ဗေ – ‘‘ပရိဟာယတိ အရဟာ အရဟတ္တာ’’တိ။
အရိယပုဂ္ဂလသံသန္ဒနံ။
၃. သုတ္တသာဓနပရိဟာနိ
၂၆၅. ပရိဟာယတိ အရဟာ အရဟတ္တာတိ? အာမန္တာ။ နနု ဝုတ္တံ ဘဂဝတာ –
‘‘ဥစ္စာဝစာ ဟိ ပဋိပဒါ [ပဋိပါဒါ (အဋ္ဌ.)]၊ သမဏေန ပကာသိတာ။
န ပါရံ ဒိဂုဏံ ယန္တိ၊ နယိဒံ ဧကဂုဏံ မုတ’’န္တိ [သု. နိ. ၇၁၉ သုတ္တနိပါတေ]။
အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ပရိဟာယတိ အရဟာ အရဟတ္တာ’’တိ။
ပရိဟာယတိ အရဟာ အရဟတ္တာတိ? အာမန္တာ။ အတ္ထိ ဆိန္နဿ ဆေဒိယန္တိ? န ဟေဝံ ဝတ္တဗ္ဗေ။
အတ္ထိ ဆိန္နဿ ဆေဒိယန္တိ? အာမန္တာ။ နနု ဝုတ္တံ ဘဂဝတာ –
‘‘ဝီတတဏှော အနာဒါနော၊ ကိစ္စံ ယဿ န ဝိဇ္ဇတိ။
ဆိန္နဿ ဆေဒိယံ နတ္ထိ၊ ဩဃပါသော သမူဟတော’’တိ။
အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘အတ္ထိ ဆိန္နဿ ဆေဒိယ’’န္တိ။
၂၆၆. ပရိဟာယတိ အရဟာ အရဟတ္တာတိ? အာမန္တာ။ အတ္ထိ ကတဿ ပတိစယောတိ? န ဟေဝံ ဝတ္တဗ္ဗေ။
အတ္ထိ ကတဿ ပတိစယောတိ? အာမန္တာ။ နနု ဝုတ္တံ ဘဂဝတာ –
‘‘တဿ သမ္မာ ဝိမုတ္တဿ၊ သန္တစိတ္တဿ ဘိက္ခုနော။
ကတဿ ပတိစယော နတ္ထိ၊ ကရဏီယံ န ဝိဇ္ဇတိ။
‘‘သေလော ယထာ ဧကဂ္ဃနော၊ ဝါတေန န သမီရတိ။
ဧဝံ ရူပါ ရသာ သဒ္ဒါ၊ ဂန္ဓာ ဖဿာ စ ကေဝလာ။
‘‘ဣဋ္ဌာ ဓမ္မာ အနိဋ္ဌာ စ၊ နပ္ပဝေဓေန္တိ တာဒိနော။
ဌိတံ စိတ္တံ ဝိပ္ပမုတ္တံ၊ ဝယံ စဿာနုပဿတီ’’တိ [မဟာဝ. ၂၄၄; အ. နိ. ၆.၅၅]။
အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘အတ္ထိ ကတဿ ပတိစယော’’တိ။
၂၆၇. န ဝတ္တဗ္ဗံ – ‘‘ပရိဟာယတိ အရဟာ အရဟတ္တာ’’တိ? အာမန္တာ။ နနု ဝုတ္တံ ဘဂဝတာ – ‘‘ပဉ္စိမေ, ဘိက္ခဝေ, ဓမ္မာ သမယဝိမုတ္တဿ ဘိက္ခုနော ပရိဟာနာယ သံဝတ္တန္တိ။ ကတမေ ပဉ္စ? ကမ္မာရာမတာ, ဘဿာရာမတာ, နိဒ္ဒါရာမတာ, သင်္ဂဏိကာရာမတာ, ယထာဝိမုတ္တံ စိတ္တံ န ပစ္စဝေက္ခတိ။ ဣမေ ခေါ, ဘိက္ခဝေ, ပဉ္စ ဓမ္မာ သမယဝိမုတ္တဿ ဘိက္ခုနော ပရိဟာနာယ သံဝတ္တန္တီ’’တိ [အ. နိ. ၅.၁၄၉]။ အတ္ထေဝ သုတ္တန္တောတိ? အာမန္တာ။ တေန ဟိ ပရိဟာယတိ အရဟာ အရဟတ္တာတိ။
အတ္ထိ အရဟတော ကမ္မာရာမတာတိ? န ဟေဝံ ဝတ္တဗ္ဗေ။
အတ္ထိ အရဟတော ကမ္မာရာမတာတိ? အာမန္တာ။ အတ္ထိ အရဟတော ရာဂေါ ကာမရာဂေါ ကာမရာဂပရိယုဋ္ဌာနံ ကာမရာဂသံယောဇနံ ကာမောဃော ကာမယောဂေါ ကာမစ္ဆန္ဒနီဝရဏန္တိ? န ဟေဝံ ဝတ္တဗ္ဗေ။
အတ္ထိ အရဟတော ဘဿာရာမတာ, အတ္ထိ အရဟတော နိဒ္ဒါရာမတာ, အတ္ထိ အရဟတော သင်္ဂဏိကာရာမတာတိ? န ဟေဝံ ဝတ္တဗ္ဗေ။
အတ္ထိ အရဟတော သင်္ဂဏိကာရာမတာတိ? အာမန္တာ။ အတ္ထိ အရဟတော ရာဂေါ ကာမရာဂေါ ကာမရာဂပရိယုဋ္ဌာနံ ကာမရာဂသံယောဇနံ ကာမောဃော ကာမယောဂေါ ကာမစ္ဆန္ဒနီဝရဏန္တိ? န ဟေဝံ ဝတ္တဗ္ဗေ။
၂၆၈. ပရိဟာယတိ အရဟာ အရဟတ္တာတိ? အာမန္တာ။ အရဟာ အရဟတ္တာ ပရိဟာယမာနော ကိံ ပရိယုဋ္ဌိတော ပရိဟာယတီတိ? ရာဂပရိယုဋ္ဌိတော ပရိဟာယတီတိ။ ပရိယုဋ္ဌာနံ ကိံ ပဋိစ္စ ဥပ္ပဇ္ဇတီတိ? အနုသယံ ပဋိစ္စ ဥပ္ပဇ္ဇတီတိ။ အတ္ထိ အရဟတော အနုသယာတိ? န ဟေဝံ ဝတ္တဗ္ဗေ။
အတ္ထိ အရဟတော အနုသယာတိ? အာမန္တာ။ အတ္ထိ အရဟတော ကာမရာဂါနုသယော ပဋိဃာနုသယော မာနာနုသယော ဒိဋ္ဌာနုသယော ဝိစိကိစ္ဆာနုသယော ဘဝရာဂါနုသယော အဝိဇ္ဇာနုသယောတိ? န ဟေဝံ ဝတ္တဗ္ဗေ။
ဒေါသပရိယုဋ္ဌိတော ပရိဟာယတီတိ။ပေ.။ မောဟပရိယုဋ္ဌိတော ပရိဟာယတီတိ။။ ပရိယုဋ္ဌာနံ ကိံ ပဋိစ္စ ဥပ္ပဇ္ဇတီတိ? အနုသယံ ပဋိစ္စ ဥပ္ပဇ္ဇတီတိ။ အတ္ထိ အရဟတော အနုသယာတိ? န ဟေဝံ ဝတ္တဗ္ဗေ။ပေ.။။
အတ္ထိ အရဟတော အနုသယာတိ? အာမန္တာ။ အတ္ထိ အရဟတော ကာမရာဂါနုသယော။ပေ.။ အဝိဇ္ဇာနုသယောတိ? န ဟေဝံ ဝတ္တဗ္ဗေ။
ပရိဟာယတိ အရဟာ အရဟတ္တာတိ? အာမန္တာ။ အရဟတော အရဟတ္တာ ပရိဟာယမာနဿ ကိံ ဥပစယံ ဂစ္ဆတီတိ? ရာဂေါ ဥပစယံ ဂစ္ဆတီတိ။ သက္ကာယဒိဋ္ဌိ ဥပစယံ ဂစ္ဆတီတိ, ဝိစိကိစ္ဆာ ဥပစယံ ဂစ္ဆတီတိ, သီလဗ္ဗတပရာမာသော ဥပစယံ ဂစ္ဆတီတိ? န ဟေဝံ ဝတ္တဗ္ဗေ။ ဒေါသော ဥပစယံ ဂစ္ဆတီတိ။ပေ.။ မောဟော ဥပစယံ ဂစ္ဆတီတိ, သက္ကာယဒိဋ္ဌိ ဥပစယံ ဂစ္ဆတီတိ, ဝိစိကိစ္ဆာ ဥပစယံ ဂစ္ဆတီတိ, သီလဗ္ဗတပရာမာသော ဥပစယံ ဂစ္ဆတီတိ? န ဟေဝံ ဝတ္တဗ္ဗေ။
ပရိဟာယတိ အရဟာ အရဟတ္တာတိ? အာမန္တာ။ အရဟာ အာစိနတီတိ? န ဟေဝံ ဝတ္တဗ္ဗေ။ အရဟာ အပစိနတီတိ? န ဟေဝံ ဝတ္တဗ္ဗေ။ အရဟာ ပဇဟတီတိ? န ဟေဝံ ဝတ္တဗ္ဗေ။ အရဟာ ဥပါဒိယတီတိ? န ဟေဝံ ဝတ္တဗ္ဗေ။ အရဟာ ဝိသိနေတီတိ? န ဟေဝံ ဝတ္တဗ္ဗေ။ အရဟာ ဥဿိနေတီတိ? န ဟေဝံ ဝတ္တဗ္ဗေ။ အရဟာ ဝိဓူပေတီတိ? န ဟေဝံ ဝတ္တဗ္ဗေ။ အရဟာ သန္ဓူပေတီတိ? န ဟေဝံ ဝတ္တဗ္ဗေ။
နနု အရဟာ နေဝါစိနတိ န အပစိနတိ အပစိနိတွာ ဌိတောတိ? အာမန္တာ။ ဟဉ္စိ အရဟာ နေဝါစိနတိ န အပစိနတိ အပစိနိတွာ ဌိတော, နော စ ဝတ ရေ ဝတ္တဗ္ဗေ – ‘‘ပရိဟာယတိ အရဟာ အရဟတ္တာ’’တိ။
နနု အရဟာ နေဝ ပဇဟတိ န ဥပါဒိယတိ ပဇဟိတွာ ဌိတောတိ? အာမန္တာ။ ဟဉ္စိ အရဟာ နေဝ ပဇဟတိ န ဥပါဒိယတိ ပဇဟိတွာ ဌိတော, နော စ ဝတ ရေ ဝတ္တဗ္ဗေ – ‘‘ပရိဟာယတိ အရဟာ အရဟတ္တာ’’တိ။
နနု အရဟာ နေဝ ဝိသိနေတိ န ဥဿိနေတိ ဝိသိနိတွာ ဌိတောတိ? အာမန္တာ။ ဟဉ္စိ အရဟာ နေဝ ဝိသိနေတိ န ဥဿိနေတိ ဝိသိနိတွာ ဌိတော, နော စ ဝတ ရေ ဝတ္တဗ္ဗေ – ‘‘ပရိဟာယတိ အရဟာ အရဟတ္တာ’’တိ။
နနု အရဟာ နေဝ ဝိဓူပေတိ န သန္ဓူပေတိ ဝိဓူပေတွာ ဌိတောတိ? အာမန္တာ။ ဟဉ္စိ အရဟာ နေဝ ဝိဓူပေတိ န သန္ဓူပေတိ ဝိဓူပေတွာ ဌိတော, နော စ ဝတ ရေ ဝတ္တဗ္ဗေ – ‘‘ပရိဟာယတိ အရဟာ အရဟတ္တာ’’တိ။
ပရိဟာနိကထာ နိဋ္ဌိတာ။