မာတိကာ

အဘိဓမ္မပိဋက

ပုဂ္ဂလပညတ္တိပါဠိ

နမော တဿ ဘဂဝတော အရဟတော သမ္မာသမ္ဗုဒ္ဓဿ။

မာတိကာ

၁. ဧကကဥဒ္ဒေသ

၁. ဆ ပညတ္တိယော – ခန္ဓပညတ္တိ, အာယတနပညတ္တိ, ဓါတုပညတ္တိ, သစ္စပညတ္တိ, ဣန္ဒ္ရိယပညတ္တိ, ပုဂ္ဂလပညတ္တီတိ။

၂. ကိတ္တာဝတာ ခန္ဓာနံ ခန္ဓပညတ္တိ? ယာဝတာ ပဉ္စက္ခန္ဓာ – ရူပက္ခန္ဓော, ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော; ဧတ္တာဝတာ ခန္ဓာနံ ခန္ဓပညတ္တိ။

၃. ကိတ္တာဝတာ အာယတနာနံ အာယတနပညတ္တိ? ယာဝတာ ဒွါဒသာယတနာနိ – စက္ခာယတနံ, ရူပါယတနံ, သောတာယတနံ, သဒ္ဒါယတနံ, ဃာနာယတနံ, ဂန္ဓာယတနံ, ဇိဝှာယတနံ, ရသာယတနံ, ကာယာယတနံ, ဖောဋ္ဌဗ္ဗာယတနံ, မနာယတနံ, ဓမ္မာယတနံ; ဧတ္တာဝတာ အာယတနာနံ အာယတနပညတ္တိ။

၄. ကိတ္တာဝတာ ဓါတူနံ ဓါတုပညတ္တိ? ယာဝတာ အဋ္ဌာရသ ဓါတုယော – စက္ခုဓါတု, ရူပဓါတု, စက္ခုဝိညာဏဓါတု, သောတဓါတု, သဒ္ဒဓါတု, သောတဝိညာဏဓါတု, ဃာနဓါတု, ဂန္ဓဓါတု, ဃာနဝိညာဏဓါတု, ဇိဝှာဓါတု, ရသဓါတု, ဇိဝှာဝိညာဏဓါတု, ကာယဓါတု, ဖောဋ္ဌဗ္ဗဓါတု, ကာယဝိညာဏဓါတု, မနောဓါတု, ဓမ္မဓါတု, မနောဝိညာဏဓါတု; ဧတ္တာဝတာ ဓါတူနံ ဓါတုပညတ္တိ။

၅. ကိတ္တာဝတာ သစ္စာနံ သစ္စပညတ္တိ? ယာဝတာ စတ္တာရိ သစ္စာနိ – ဒုက္ခသစ္စံ, သမုဒယသစ္စံ, နိရောဓသစ္စံ, မဂ္ဂသစ္စံ; ဧတ္တာဝတာ သစ္စာနံ သစ္စပညတ္တိ။

၆. ကိတ္တာဝတာ ဣန္ဒ္ရိယာနံ ဣန္ဒ္ရိယပညတ္တိ? ယာဝတာ ဗာဝီသတိန္ဒ္ရိယာနိ – စက္ခုန္ဒ္ရိယံ, သောတိန္ဒ္ရိယံ, ဃာနိန္ဒ္ရိယံ, ဇိဝ္ဟိန္ဒ္ရိယံ, ကာယိန္ဒ္ရိယံ, မနိန္ဒ္ရိယံ, ဣတ္ထိန္ဒ္ရိယံ, ပုရိသိန္ဒ္ရိယံ, ဇီဝိတိန္ဒ္ရိယံ, သုခိန္ဒ္ရိယံ, ဒုက္ခိန္ဒ္ရိယံ, သောမနဿိန္ဒ္ရိယံ, ဒေါမနဿိန္ဒ္ရိယံ, ဥပေက္ခိန္ဒ္ရိယံ, သဒ္ဓိန္ဒ္ရိယံ, ဝီရိယိန္ဒ္ရိယံ, သတိန္ဒ္ရိယံ, သမာဓိန္ဒ္ရိယံ, ပညိန္ဒ္ရိယံ, အနညာတညဿာမီတိန္ဒ္ရိယံ, ယံ, အညာတာဝိန္ဒ္ရိယံ; ဧတ္တာဝတာ ဣန္ဒ္ရိယာနံ ဣန္ဒ္ရိယပညတ္တိ။

၇. ကိတ္တာဝတာ ပုဂ္ဂလာနံ ပုဂ္ဂလပညတ္တိ?

(၁) သမယဝိမုတ္တော

(၂) အသမယဝိမုတ္တော

(၃) ကုပ္ပဓမ္မော

(၄) အကုပ္ပဓမ္မော

(၅) ပရိဟာနဓမ္မော

(၆) အပရိဟာနဓမ္မော

(၇) စေတနာဘဗ္ဗော

(၈) အနုရက္ခဏာဘဗ္ဗော

(၉) ပုထုဇ္ဇနော

(၁၀) ဂေါတြဘူ

(၁၁) ဘယူပရတော

(၁၂) အဘယူပရတော

(၁၃) ဘဗ္ဗာဂမနော

(၁၄) အဘဗ္ဗာဂမနော

(၁၅) နိယတော

(၁၆) အနိယတော

(၁၇) ပဋိပန္နကော

(၁၈) ဖလေဌိတော

(၁၉) သမသီသီ

(၂၀) ဌိတကပ္ပီ

(၂၁) အရိယော

(၂၂) အနရိယော

(၂၃) သေက္ခော

(၂၄) အသေက္ခော

(၂၅) နေဝသေက္ခနာသေက္ခော

(၂၆) တေဝိဇ္ဇော

(၂၇) ဆဠဘိညော

(၂၈) သမ္မာသမ္ဗုဒ္ဓေါ

(၂၉) ပစ္စေကသမ္ဗုဒ္ဓေါ [ပစ္စေကဗုဒ္ဓေါ (သီ.)]

(၃၀) ဥဘတောဘာဂဝိမုတ္တော

(၃၁) ပညာဝိမုတ္တော

(၃၂) ကာယသက္ခီ

(၃၃) ဒိဋ္ဌိပ္ပတ္တော

(၃၄) သဒ္ဓါဝိမုတ္တော

(၃၅) ဓမ္မာနုသာရီ

(၃၆) သဒ္ဓါနုသာရီ

(၃၇) သတ္တက္ခတ္တုပရမော

(၃၈) ကောလင္ကောလော

(၃၉) ဧကဗီဇီ

(၄၀) သကဒါဂါမီ

(၄၁) အနာဂါမီ

(၄၂) အန္တရာပရိနိဗ္ဗာယီ

(၄၃) ဥပဟစ္စပရိနိဗ္ဗာယီ

(၄၄) အသင်္ခါရပရိနိဗ္ဗာယီ

(၄၅) သသင်္ခါရပရိနိဗ္ဗာယီ

(၄၆) ဥဒ္ဓံသောတောအကနိဋ္ဌဂါမီ

(၄၇) သောတာပန္နော

(၄၈) သောတာပတ္တိဖလသစ္ဆိကိရိယာယ ပဋိပန္နော

(၄၉) သကဒါဂါမီ

(၅၀) သကဒါဂါမိဖလသစ္ဆိကိရိယာယ ပဋိပန္နော

(၅၁) အနာဂါမီ

(၅၂) အနာဂါမိဖလသစ္ဆိကိရိယာယ ပဋိပန္နော

(၅၃) အရဟာ

(၅၄) အရဟတ္တဖလသစ္ဆိကိရိယာယ [အရဟတ္တာယ (သီ.)] ပဋိပန္နော

ဧကကံ။

၂. ဒုကဥဒ္ဒေသော

၈. ဒွေ ပုဂ္ဂလာ –

(၁) ကောဓနော စ, ဥပနာဟီ စ။

(၂) မက္ခီ စ, ပဠာသီ [ပလာသီ (သျာ. က.)] စ။

(၃) ဣဿုကီ စ, မစ္ဆရီ စ။

(၄) သဌော စ, မာယာဝီ စ။

(၅) အဟိရိကော စ, အနောတ္တပ္ပီ စ။

(၆) ဒုဗ္ဗစော စ, ပါပမိတ္တော စ။

(၇) ဣန္ဒ္ရိယေသု အဂုတ္တဒွါရော စ, ဘောဇနေ အမတ္တညူ စ။

(၈) မုဋ္ဌဿတိ စ, အသမ္ပဇာနော စ။

(၉) သီလဝိပန္နော စ, ဒိဋ္ဌိဝိပန္နော စ။

(၁၀) အဇ္ဈတ္တသံယောဇနော စ, ဗဟိဒ္ဓါသံယောဇနော စ။

(၁၁) အက္ကောဓနော စ, အနုပနာဟီ စ။

(၁၂) အမက္ခီ စ, အပဠာသီ စ။

(၁၃) အနိဿုကီ စ, အမစ္ဆရီ စ။

(၁၄) အသဌော စ, အမာယာဝီ စ။

(၁၅) ဟိရိမာ စ, ဩတ္တပ္ပီ စ။

(၁၆) သုဝစော စ, ကလျာဏမိတ္တော စ။

(၁၇) ဣန္ဒ္ရိယေသု ဂုတ္တဒွါရော စ, ဘောဇနေ မတ္တညူ စ။

(၁၈) ဥပဋ္ဌိတဿတိ စ, သမ္ပဇာနော စ။

(၁၉) သီလသမ္ပန္နော စ, ဒိဋ္ဌိသမ္ပန္နော စ။

(၂၀) ဒွေ ပုဂ္ဂလာ ဒုလ္လဘာ လောကသ္မိံ။

(၂၁) ဒွေ ပုဂ္ဂလာ ဒုတ္တပ္ပယာ။

(၂၂) ဒွေ ပုဂ္ဂလာ သုတပ္ပယာ။

(၂၃) ဒွိန္နံ ပုဂ္ဂလာနံ အာသဝါ ဝဍ္ဎန္တိ။

(၂၄) ဒွိန္နံ ပုဂ္ဂလာနံ အာသဝါ န ဝဍ္ဎန္တိ။

(၂၅) ဟီနာဓိမုတ္တော စ, ပဏီတာဓိမုတ္တော စ။

(၂၆) တိတ္တော စ, တပ္ပေတာ စ။

ဒုကံ။

၃. တိကဥဒ္ဒေသော

၉. တယော ပုဂ္ဂလာ –

(၁) နိရာသော, အာသံသော, ဝိဂတာသော။

(၂) တယော ဂိလာနူပမာ ပုဂ္ဂလာ။

(၃) ကာယသက္ခီ, ဒိဋ္ဌိပ္ပတ္တော, သဒ္ဓါဝိမုတ္တော။

(၄) ဂူထဘာဏီ, ပုပ္ဖဘာဏီ, မဓုဘာဏီ။

(၅) အရုကူပမစိတ္တော ပုဂ္ဂလော, ဝိဇ္ဇူပမစိတ္တော ပုဂ္ဂလော , ဝဇိရူပမစိတ္တော ပုဂ္ဂလော။

(၆) အန္ဓော, ဧကစက္ခု, ဒွိစက္ခု။

(၇) အဝကုဇ္ဇပညော ပုဂ္ဂလော, ဥစ္ဆင်္ဂပညော [ဥစ္စင်္ဂုပညော (သျာ.)] ပုဂ္ဂလော, ပုထုပညော ပုဂ္ဂလော။

(၈) အတ္ထေကစ္စော ပုဂ္ဂလော ကာမေသု စ ဘဝေသု စ အဝီတရာဂေါ, အတ္ထေကစ္စော ပုဂ္ဂလော ကာမေသု ဝီတရာဂေါ ဘဝေသု အဝီတရာဂေါ, အတ္ထေကစ္စော ပုဂ္ဂလော ကာမေသု စ ဘဝေသု စ ဝီတရာဂေါ။

(၉) ပါသာဏလေခူပမော ပုဂ္ဂလော, ပထဝိလေခူပမော ပုဂ္ဂလော, ဥဒကလေခူပမော ပုဂ္ဂလော။

(၁၀) တယော ပေါတ္ထကူပမာ ပုဂ္ဂလာ။

(၁၁) တယော ကာသိကဝတ္ထူပမာ ပုဂ္ဂလာ။

(၁၂) သုပ္ပမေယျော, ဒုပ္ပမေယျော, အပ္ပမေယျော။

(၁၃) အတ္ထေကစ္စော ပုဂ္ဂလော န သေဝိတဗ္ဗော န ဘဇိတဗ္ဗော န ပယိရုပါသိတဗ္ဗော, အတ္ထေကစ္စော ပုဂ္ဂလော သေဝိတဗ္ဗော ဘဇိတဗ္ဗော ပယိရုပါသိတဗ္ဗော, အတ္ထေကစ္စော ပုဂ္ဂလော သက္ကတွာ ဂရုံ ကတွာ [ဂရုကတွာ (သီ.)] သေဝိတဗ္ဗော ဘဇိတဗ္ဗော ပယိရုပါသိတဗ္ဗော။

(၁၄) အတ္ထေကစ္စော ပုဂ္ဂလော ဇိဂုစ္ဆိတဗ္ဗော န သေဝိတဗ္ဗော န ဘဇိတဗ္ဗော န ပယိရုပါသိတဗ္ဗော, အတ္ထေကစ္စော ပုဂ္ဂလော အဇ္ဈုပေက္ခိတဗ္ဗော န သေဝိတဗ္ဗော န ဘဇိတဗ္ဗော န ပယိရုပါသိတဗ္ဗော; အတ္ထေကစ္စော ပုဂ္ဂလော သေဝိတဗ္ဗော ဘဇိတဗ္ဗော ပယိရုပါသိတဗ္ဗော။

(၁၅) အတ္ထေကစ္စော ပုဂ္ဂလော သီလေသု ပရိပူရကာရီ [ပရိပူရီကာရီ (သျာ.)], သမာဓိသ္မိံ မတ္တသော ကာရီ, ပညာယ မတ္တသော ကာရီ; အတ္ထေကစ္စော ပုဂ္ဂလော သီလေသု စ ပရိပူရကာရီ, သမာဓိသ္မိဉ္စ ပရိပူရကာရီ, ပညာယ မတ္တသော ကာရီ; အတ္ထေကစ္စော ပုဂ္ဂလော သီလေသု စ ပရိပူရကာရီ, သမာဓိသ္မိဉ္စ ပရိပူရကာရီ, ပညာယ စ ပရိပူရကာရီ။

(၁၆) တယော သတ္ထာရော။

(၁၇) အပရေပိ တယော သတ္ထာရော။

တိကံ။

၄. စတုက္ကဥဒ္ဒေသော

၁၀. စတ္တာရော ပုဂ္ဂလာ –

(၁) အသပ္ပုရိသော, အသပ္ပုရိသေန အသပ္ပုရိသတရော, သပ္ပုရိသော, သပ္ပုရိသေန သပ္ပုရိသတရော။

(၂) ပါပေါ, ပါပေန ပါပတရော, ကလျာဏော, ကလျာဏေန ကလျာဏတရော။

(၃) ပါပဓမ္မော , ပါပဓမ္မေန ပါပဓမ္မတရော, ကလျာဏဓမ္မော, ကလျာဏဓမ္မေန ကလျာဏဓမ္မတရော။

(၄) သာဝဇ္ဇော, ဝဇ္ဇဗဟုလော, အပ္ပဝဇ္ဇော [အပ္ပသာဝဇ္ဇော (သျာ. က.) အ. နိ. ၄.၁၃၅], အနဝဇ္ဇော။

(၅) ဥဂ္ဃဋိတညူ, ဝိပဉ္စိတညူ [ဝိပစိတညူ (သီ.) အ. နိ. ၄.၁၃၃], နေယျော, ပဒပရမော။

(၆) ယုတ္တပ္ပဋိဘာနော , နော မုတ္တပ္ပဋိဘာနော, မုတ္တပ္ပဋိဘာနော, နော ယုတ္တပ္ပဋိဘာနော, ယုတ္တပ္ပဋိဘာနော စ မုတ္တပ္ပဋိဘာနော စ, နေဝ ယုတ္တပ္ပဋိဘာနော နော မုတ္တပ္ပဋိဘာနော။

(၇) စတ္တာရော ဓမ္မကထိကာ ပုဂ္ဂလာ။

(၈) စတ္တာရော ဝလာဟကူပမာ ပုဂ္ဂလာ။

(၉) စတ္တာရော မူသိကူပမာ ပုဂ္ဂလာ။

(၁၀) စတ္တာရော အမ္ဗူပမာ ပုဂ္ဂလာ။

(၁၁) စတ္တာရော ကုမ္ဘူပမာ ပုဂ္ဂလာ။

(၁၂) စတ္တာရော ဥဒကရဟဒူပမာ ပုဂ္ဂလာ။

(၁၃) စတ္တာရော ဗလီဗဒ္ဒူပမာ [ဗလိဗဒ္ဒူပမာ (သီ.)] ပုဂ္ဂလာ။

(၁၄) စတ္တာရော အာသီဝိသူပမာ ပုဂ္ဂလာ။

(၁၅) အတ္ထေကစ္စော ပုဂ္ဂလော အနနုဝိစ္စ အပရိယောဂါဟေတွာ အဝဏ္ဏာရဟဿ ဝဏ္ဏံ ဘာသိတာ ဟောတိ, အတ္ထေကစ္စော ပုဂ္ဂလော အနနုဝိစ္စ အပရိယောဂါဟေတွာ ဝဏ္ဏာရဟဿ အဝဏ္ဏံ ဘာသိတာ ဟောတိ, အတ္ထေကစ္စော ပုဂ္ဂလော အနနုဝိစ္စ အပရိယောဂါဟေတွာ အပ္ပသာဒနီယေ ဌာနေ ပသာဒံ ဥပဒံသိတာ ဟောတိ, အတ္ထေကစ္စော ပုဂ္ဂလော အနနုဝိစ္စ အပရိယောဂါဟေတွာ ပသာဒနီယေ ဌာနေ အပ္ပသာဒံ ဥပဒံသိတာ ဟောတိ။

(၁၆) အတ္ထေကစ္စော ပုဂ္ဂလော အနုဝိစ္စ ပရိယောဂါဟေတွာ အဝဏ္ဏာရဟဿ အဝဏ္ဏံ ဘာသိတာ ဟောတိ, အတ္ထေကစ္စော ပုဂ္ဂလော အနုဝိစ္စ ပရိယောဂါဟေတွာ ဝဏ္ဏာရဟဿ ဝဏ္ဏံ ဘာသိတာ ဟောတိ, အတ္ထေကစ္စော ပုဂ္ဂလော အနုဝိစ္စ ပရိယောဂါဟေတွာ အပ္ပသာဒနီယေ ဌာနေ အပ္ပသာဒံ ဥပဒံသိတာ ဟောတိ, အတ္ထေကစ္စော ပုဂ္ဂလော အနုဝိစ္စ ပရိယောဂါဟေတွာ ပသာဒနီယေ ဌာနေ ပသာဒံ ဥပဒံသိတာ ဟောတိ။

(၁၇) အတ္ထေကစ္စော ပုဂ္ဂလော အဝဏ္ဏာရဟဿ အဝဏ္ဏံ ဘာသိတာ ဟောတိ ဘူတံ တစ္ဆံ ကာလေန, နော စ ခေါ ဝဏ္ဏာရဟဿ ဝဏ္ဏံ ဘာသိတာ ဟောတိ ဘူတံ တစ္ဆံ ကာလေန; အတ္ထေကစ္စော ပုဂ္ဂလော ဝဏ္ဏာရဟဿ ဝဏ္ဏံ ဘာသိတာ ဟောတိ ဘူတံ တစ္ဆံ ကာလေန, နော စ ခေါ အဝဏ္ဏာရဟဿ အဝဏ္ဏံ ဘာသိတာ ဟောတိ ဘူတံ တစ္ဆံ ကာလေန; အတ္ထေကစ္စော ပုဂ္ဂလော အဝဏ္ဏာရဟဿ စ အဝဏ္ဏံ ဘာသိတာ ဟောတိ ဘူတံ တစ္ဆံ ကာလေန; ဝဏ္ဏာရဟဿ စ ဝဏ္ဏံ ဘာသိတာ ဟောတိ ဘူတံ တစ္ဆံ ကာလေန, အတ္ထေကစ္စော ပုဂ္ဂလော နေဝ အဝဏ္ဏာရဟဿ အဝဏ္ဏံ ဘာသိတာ ဟောတိ ဘူတံ တစ္ဆံ ကာလေန, နော စ ဝဏ္ဏာရဟဿ ဝဏ္ဏံ ဘာသိတာ ဟောတိ ဘူတံ တစ္ဆံ ကာလေန။

(၁၈) ဥဋ္ဌာနဖလူပဇီဝီ နော ပုညဖလူပဇီဝီ, ပုညဖလူပဇီဝီ နော ဥဋ္ဌာနဖလူပဇီဝီ, ဥဋ္ဌာနဖလူပဇီဝီ စ ပုညဖလူပဇီဝီ စ, နေဝ ဥဋ္ဌာနဖလူပဇီဝီ နော ပုညဖလူပဇီဝီ။

(၁၉) တမော တမပရာယနော, တမော ဇောတိပရာယနော, ဇောတိ တမပရာယနော, ဇောတိ ဇောတိပရာယနော။

(၂၀) ဩဏတောဏတော, ဩဏတုဏ္ဏတော, ဥဏ္ဏတောဏတော, ဥဏ္ဏတုဏ္ဏတော။

(၂၁) စတ္တာရော ရုက္ခူပမာ ပုဂ္ဂလာ။

(၂၂) ရူပပ္ပမာဏော, ရူပပ္ပသန္နော, ဃောသပ္ပမာဏော, ဃောသပ္ပသန္နော။

(၂၃) လူခပ္ပမာဏော, လူခပ္ပသန္နော , ဓမ္မပ္ပမာဏော, ဓမ္မပ္ပသန္နော။

(၂၄) အတ္ထေကစ္စော ပုဂ္ဂလော အတ္တဟိတာယ ပဋိပန္နော ဟောတိ, နော ပရဟိတာယ; အတ္ထေကစ္စော ပုဂ္ဂလော ပရဟိတာယ ပဋိပန္နော ဟောတိ, နော အတ္တဟိတာယ; အတ္ထေကစ္စော ပုဂ္ဂလော အတ္တဟိတာယ စေဝ ပဋိပန္နော ဟောတိ ပရဟိတာယ စ; အတ္ထေကစ္စော ပုဂ္ဂလော နေဝ အတ္တဟိတာယ ပဋိပန္နော ဟောတိ နော ပရဟိတာယ။

(၂၅) အတ္ထေကစ္စော ပုဂ္ဂလော အတ္တန္တပေါ ဟောတိ အတ္တပရိတာပနာနုယောဂမနုယုတ္တော; အတ္ထေကစ္စော ပုဂ္ဂလော ပရန္တပေါ ဟောတိ ပရပရိတာပနာနုယောဂမနုယုတ္တော; အတ္ထေကစ္စော ပုဂ္ဂလော အတ္တန္တပေါ စ ဟောတိ အတ္တပရိတာပနာနုယောဂမနုယုတ္တော , ပရန္တပေါ စ ပရပရိတာပနာနုယောဂမနုယုတ္တော; အတ္ထေကစ္စော ပုဂ္ဂလော နေဝ အတ္တန္တပေါ ဟောတိ န အတ္တပရိတာပနာနုယောဂမနုယုတ္တော, န ပရန္တပေါ န ပရပရိတာပနာနုယောဂမနုယုတ္တော။ သော အနတ္တန္တပေါ အပရန္တပေါ ဒိဋ္ဌေဝ ဓမ္မေ နိစ္ဆာတော နိဗ္ဗုတော သီတီဘူတော [သီတိဘူတော (သီ. က.)] သုခပ္ပဋိသံဝေဒီ ဗြဟ္မဘူတေန အတ္တနာ ဝိဟရတိ။

(၂၆) သရာဂေါ, သဒေါသော, သမောဟော, သမာနော။

(၂၇) အတ္ထေကစ္စော ပုဂ္ဂလော လာဘီ ဟောတိ အဇ္ဈတ္တံ စေတောသမထဿ, န လာဘီ အဓိပညာဓမ္မဝိပဿနာယ; အတ္ထေကစ္စော ပုဂ္ဂလော လာဘီ ဟောတိ အဓိပညာဓမ္မဝိပဿနာယ, န လာဘီ အဇ္ဈတ္တံ စေတောသမထဿ; အတ္ထေကစ္စော ပုဂ္ဂလော လာဘီ စေဝ ဟောတိ အဇ္ဈတ္တံ စေတောသမထဿ, လာဘီ စ အဓိပညာဓမ္မဝိပဿနာယ; အတ္ထေကစ္စော ပုဂ္ဂလော နေဝ လာဘီ ဟောတိ အဇ္ဈတ္တံ စေတောသမထဿ, န လာဘီ အဓိပညာဓမ္မဝိပဿနာယ။

(၂၈) အနုသောတဂါမီ ပုဂ္ဂလော, ပဋိသောတဂါမီ ပုဂ္ဂလော, ဌိတတ္တော ပုဂ္ဂလော, တိဏ္ဏော ပါရင်္ဂတော [ပါရဂတော (သီ. သျာ.)] ထလေ တိဋ္ဌတိ ဗြာဟ္မဏော။

(၂၉) အပ္ပဿုတော သုတေန အနုပပန္နော, အပ္ပဿုတော သုတေန ဥပပန္နော, ဗဟုဿုတော သုတေန အနုပပန္နော, ဗဟုဿုတော သုတေန ဥပပန္နော။

(၃၀) သမဏမစလော, သမဏပဒုမော, သမဏပုဏ္ဍရီကော, သမဏေသု သမဏသုခုမာလော။

စတုက္ကံ။

၅. ပဉ္စကဥဒ္ဒေသော

၁၁. ပဉ္စ ပုဂ္ဂလာ –

(၁) အတ္ထေကစ္စော ပုဂ္ဂလော အာရဘတိ [အာရမ္ဘတိ (သီ. သျာ.)] စ ဝိပ္ပဋိသာရီ စ ဟောတိ, တဉ္စ စေတောဝိမုတ္တိံ ပညာဝိမုတ္တိံ ယထာဘူတံ နပ္ပဇာနာတိ, ယတ္ထဿ တေ ဥပ္ပန္နာ ပါပကာ အကုသလာ ဓမ္မာ အပရိသေသာ နိရုဇ္ဈန္တိ။ အတ္ထေကစ္စော ပုဂ္ဂလော အာရဘတိ န ဝိပ္ပဋိသာရီ စ ဟောတိ, တဉ္စ စေတောဝိမုတ္တိံ ပညာဝိမုတ္တိံ ယထာဘူတံ နပ္ပဇာနာတိ, ယတ္ထဿ တေ ဥပ္ပန္နာ ပါပကာ အကုသလာ ဓမ္မာ အပရိသေသာ နိရုဇ္ဈန္တိ။ အတ္ထေကစ္စော ပုဂ္ဂလော နာရဘတိ ဝိပ္ပဋိသာရီ စ ဟောတိ, တဉ္စ စေတောဝိမုတ္တိံ ပညာဝိမုတ္တိံ ယထာဘူတံ နပ္ပဇာနာတိ, ယတ္ထဿ တေ ဥပ္ပန္နာ ပါပကာ အကုသလာ ဓမ္မာ အပရိသေသာ နိရုဇ္ဈန္တိ။ အတ္ထေကစ္စော ပုဂ္ဂလော နာရဘတိ န ဝိပ္ပဋိသာရီ ဟောတိ, တဉ္စ စေတောဝိမုတ္တိံ ပညာဝိမုတ္တိံ ယထာဘူတံ နပ္ပဇာနာတိ, ယတ္ထဿ တေ ဥပ္ပန္နာ ပါပကာ အကုသလာ ဓမ္မာ အပရိသေသာ နိရုဇ္ဈန္တိ။ အတ္ထေကစ္စော ပုဂ္ဂလော နာရဘတိ န ဝိပ္ပဋိသာရီ ဟောတိ, တဉ္စ စေတောဝိမုတ္တိံ ပညာဝိမုတ္တိံ ယထာဘူတံ ပဇာနာတိ, ယတ္ထဿ တေ ဥပ္ပန္နာ ပါပကာ အကုသလာ ဓမ္မာ အပရိသေသာ နိရုဇ္ဈန္တိ။

(၂) ဒတွာ အဝဇာနာတိ, သံဝါသေန အဝဇာနာတိ, အာဓေယျမုခေါ ဟောတိ, လောလော ဟောတိ, မန္ဒော မောမူဟော ဟောတိ။

(၃) ပဉ္စ ယောဓါဇီဝူပမာ ပုဂ္ဂလာ။

(၄) ပဉ္စ ပိဏ္ဍပါတိကာ။

(၅) ပဉ္စ ခလုပစ္ဆာဘတ္တိကာ။

(၆) ပဉ္စ ဧကာသနိကာ။

(၇) ပဉ္စ ပံသုကူလိကာ။

(၈) ပဉ္စ တေစီဝရိကာ။

(၉) ပဉ္စ အာရညိကာ။

(၁၀) ပဉ္စ ရုက္ခမူလိကာ။

(၁၁) ပဉ္စ အဗ္ဘောကာသိကာ။

(၁၂) ပဉ္စ နေသဇ္ဇိကာ။

(၁၃) ပဉ္စ ယထာသန္ထတိကာ။

(၁၄) ပဉ္စ သောသာနိကာ။

ပဉ္စကံ။

၆. ဆက္ကဥဒ္ဒေသော

၁၂. ဆ ပုဂ္ဂလာ –

(၁) အတ္ထေကစ္စော ပုဂ္ဂလော ပုဗ္ဗေ အနနုဿုတေသု ဓမ္မေသု သာမံ သစ္စာနိ အဘိသမ္ဗုဇ္ဈတိ, တတ္ထ စ သဗ္ဗညုတံ ပါပုဏာတိ ဗလေသု [ဖလေသု (ဣ.)] စ ဝသီဘာဝံ။ အတ္ထေကစ္စော ပုဂ္ဂလော ပုဗ္ဗေ အနနုဿုတေသု ဓမ္မေသု သာမံ သစ္စာနိ အဘိသမ္ဗုဇ္ဈတိ, န စ တတ္ထ သဗ္ဗညုတံ ပါပုဏာတိ န စ ဗလေသု ဝသီဘာဝံ။ အတ္ထေကစ္စော ပုဂ္ဂလော ပုဗ္ဗေ အနနုဿုတေသု ဓမ္မေသု သာမံ သစ္စာနိ အနဘိသမ္ဗုဇ္ဈတိ, ဒိဋ္ဌေ စေဝ ဓမ္မေ ဒုက္ခဿန္တကရော ဟောတိ သာဝကပါရမိဉ္စ ပါပုဏာတိ။ အတ္ထေကစ္စော ပုဂ္ဂလော ပုဗ္ဗေ အနနုဿုတေသု ဓမ္မေသု သာမံ သစ္စာနိ အနဘိသမ္ဗုဇ္ဈတိ , ဒိဋ္ဌေဝ ဓမ္မေ ဒုက္ခဿန္တကရော ဟောတိ, န စ သာဝကပါရမိံ ပါပုဏာတိ။ အတ္ထေကစ္စော ပုဂ္ဂလော ပုဗ္ဗေ အနနုဿုတေသု ဓမ္မေသု သာမံ သစ္စာနိ အနဘိသမ္ဗုဇ္ဈတိ, န စ ဒိဋ္ဌေဝ ဓမ္မေ ဒုက္ခဿန္တကရော ဟောတိ, အနာဂါမီ ဟောတိ အနာဂန္တာ [အနာဂန္တွာ (သျာ. က.) အ. နိ. ၄.၁၇၁] ဣတ္ထတ္တံ။ အတ္ထေကစ္စော ပုဂ္ဂလော ပုဗ္ဗေ အနနုဿုတေသု ဓမ္မေသု သာမံ သစ္စာနိ အနဘိသမ္ဗုဇ္ဈတိ, န စ ဒိဋ္ဌေဝ ဓမ္မေ ဒုက္ခဿန္တကရော ဟောတိ, အာဂါမီ [သောတာပန္နသကဒါဂါမီ (သျာ. က.)] ဟောတိ အာဂန္တာ ဣတ္ထတ္တံ။

ဆက္ကံ။

၇. သတ္တကဥဒ္ဒေသော

၁၃. သတ္တ ပုဂ္ဂလာ –

(၁) သတ္တ ဥဒကူပမာ ပုဂ္ဂလာ။ သကိံ နိမုဂ္ဂေါ နိမုဂ္ဂေါဝ ဟောတိ, ဥမ္မုဇ္ဇိတွာ နိမုဇ္ဇတိ, ဥမ္မုဇ္ဇိတွာ ဌိတော ဟောတိ, ဥမ္မုဇ္ဇိတွာ ဝိပဿတိ ဝိလောကေတိ, ဥမ္မုဇ္ဇိတွာ ပတရတိ, ဥမ္မုဇ္ဇိတွာ ပဋိဂါဓပ္ပတ္တော ဟောတိ, ဥမ္မုဇ္ဇိတွာ တိဏ္ဏော ဟောတိ ပါရင်္ဂတော ထလေ တိဋ္ဌတိ ဗြာဟ္မဏော။

(၂) ဥဘတောဘာဂဝိမုတ္တော , ပညာဝိမုတ္တော, ကာယသက္ခီ, ဒိဋ္ဌိပ္ပတ္တော, သဒ္ဓါဝိမုတ္တော, ဓမ္မာနုသာရီ, သဒ္ဓါနုသာရီ။

သတ္တကံ။

၈. အဋ္ဌကဥဒ္ဒေသော

၁၄. အဋ္ဌ ပုဂ္ဂလာ –

(၁) စတ္တာရော မဂ္ဂသမင်္ဂိနော, စတ္တာရော ဖလသမင်္ဂိနော ပုဂ္ဂလာ။

အဋ္ဌကံ။

၉. နဝကဥဒ္ဒေသော

၁၅. နဝ ပုဂ္ဂလာ –

(၁) သမ္မာသမ္ဗုဒ္ဓေါ, ပစ္စေကသမ္ဗုဒ္ဓေါ, ဥဘတောဘာဂဝိမုတ္တော, ပညာဝိမုတ္တော, ကာယသက္ခီ, ဒိဋ္ဌိပ္ပတ္တော, သဒ္ဓါဝိမုတ္တော, ဓမ္မာနုသာရီ, သဒ္ဓါနုသာရီ။

နဝကံ။

၁၀. ဒသကဥဒ္ဒေသော

၁၆. ဒသ ပုဂ္ဂလာ –

(၁) ပဉ္စန္နံ ဣဓ နိဋ္ဌာ, ပဉ္စန္နံ ဣဓ ဝိဟာယ နိဋ္ဌာ။

ဒသကံ။

ပုဂ္ဂလပညတ္တိမာတိကာ နိဋ္ဌိတာ။