၁၁. ဧကာဒသမနယ
၁၁. သင်္ဂဟိတေနသမ္ပယုတ္တဝိပ္ပယုတ္တပဒနိဒ္ဒေသော
၄၀၉. သမုဒယသစ္စေန ယေ ဓမ္မာ။ မဂ္ဂသစ္စေန ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ, တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓါတူဟိ သမ္ပယုတ္တာ? တေ ဓမ္မာ တီဟိ ခန္ဓေဟိ ဧကေနာယတနေန သတ္တဟိ ဓါတူဟိ သမ္ပယုတ္တာ; ဧကေန ခန္ဓေန ဧကေနာယတနေန ဧကာယ ဓါတုယာ ကေဟိစိ သမ္ပယုတ္တာ။ ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ ဒသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၄၁၀. ဣတ္ထိန္ဒ္ရိယေန ယေ ဓမ္မာ။ ပုရိသိန္ဒ္ရိယေန ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ, တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓါတူဟိ သမ္ပယုတ္တာတိ? နတ္ထိ။ ကတိဟိ ဝိပ္ပယုတ္တာ? စတူဟိ ခန္ဓေဟိ ဧကေနာယတနေန သတ္တဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၄၁၁. သုခိန္ဒ္ရိယေန ယေ ဓမ္မာ။ ဒုက္ခိန္ဒ္ရိယေန ယေ ဓမ္မာ။ သောမနဿိန္ဒ္ရိယေန ယေ ဓမ္မာ။ ဒေါမနဿိန္ဒ္ရိယေန ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ။ပေ.။ တေ ဓမ္မာ တီဟိ ခန္ဓေဟိ ဧကေနာယတနေန သတ္တဟိ ဓါတူဟိ သမ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ သမ္ပယုတ္တာ။ ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ ဒသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၄၁၂. ဥပေက္ခိန္ဒ္ရိယေန ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ။ တေ ဓမ္မာ တီဟိ ခန္ဓေဟိ ဧကေနာယတနေန ဒွီဟိ ဓါတူဟိ သမ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ သမ္ပယုတ္တာ။ ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ ပန္နရသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၄၁၃. သဒ္ဓိန္ဒ္ရိယေန ယေ ဓမ္မာ။ ဝီရိယိန္ဒ္ရိယေန ယေ ဓမ္မာ။ သတိန္ဒ္ရိယေန ယေ ဓမ္မာ။ သမာဓိန္ဒ္ရိယေန ယေ ဓမ္မာ။ ပညိန္ဒ္ရိယေန ယေ ဓမ္မာ။ အနညာတညဿာမီတိန္ဒ္ရိယေန ယေ ဓမ္မာ။ အညိန္ဒ္ရိယေန ယေ ဓမ္မာ။ အညာတာဝိန္ဒ္ရိယေန ယေ ဓမ္မာ။ အဝိဇ္ဇာယ ယေ ဓမ္မာ။ အဝိဇ္ဇာပစ္စယာ သင်္ခါရေဟိ ယေ ဓမ္မာ။ သဠာယတနပစ္စယာ ဖဿေန ယေ ဓမ္မာ။ ဝေဒနာပစ္စယာ တဏှာယ ယေ ဓမ္မာ။ တဏှာပစ္စယာ ဥပါဒါနေန ယေ ဓမ္မာ။ ကမ္မဘဝေန ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ တေ ဓမ္မာ တီဟိ ခန္ဓေဟိ ဧကေနာယတနေန သတ္တဟိ ဓါတူဟိ သမ္ပယုတ္တာ; ဧကေန ခန္ဓေန ဧကေနာယတနေန ဧကာယ ဓါတုယာ ကေဟိစိ သမ္ပယုတ္တာ။ ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ ဒသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၄၁၄. ပရိဒေဝေန ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ, တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓါတူဟိ သမ္ပယုတ္တာတိ? နတ္ထိ။ ကတိဟိ ဝိပ္ပယုတ္တာ? စတူဟိ ခန္ဓေဟိ ဧကေနာယတနေန သတ္တဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၄၁၅. သောကေန ယေ ဓမ္မာ။ ဒုက္ခေန ယေ ဓမ္မာ။ ဒေါမနဿေန ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ။ တေ ဓမ္မာ တီဟိ ခန္ဓေဟိ ဧကေနာယတနေန သတ္တဟိ ဓါတူဟိ သမ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ သမ္ပယုတ္တာ။ ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ ဒသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၄၁၆. ဥပါယာသေန ယေ ဓမ္မာ။ သတိပဋ္ဌာနေန ယေ ဓမ္မာ။ သမ္မပ္ပဓါနေန ယေ ဓမ္မာ။ အပ္ပမညာယ ယေ ဓမ္မာ။ ပဉ္စဟိ ဣန္ဒ္ရိယေဟိ ယေ ဓမ္မာ။ ပဉ္စဟိ ဗလေဟိ ယေ ဓမ္မာ။ သတ္တဟိ ဗောဇ္ဈင်္ဂေဟိ ယေ ဓမ္မာ။ အရိယေန အဋ္ဌင်္ဂိကေန မဂ္ဂေန ယေ ဓမ္မာ။ ဖဿေန ယေ ဓမ္မာ။ စေတနာယ ယေ ဓမ္မာ။ အဓိမောက္ခေန ယေ ဓမ္မာ။ မနသိကာရေန ယေ ဓမ္မာ။ ဟေတူဟိ ဓမ္မေဟိ ယေ ဓမ္မာ။ ဟေတူဟိ စေဝ သဟေတုကေဟိ စ ဓမ္မေဟိ ယေ ဓမ္မာ။ ဟေတူဟိ စေဝ ဟေတုသမ္ပယုတ္တေဟိ စ ဓမ္မေဟိ ယေ ဓမ္မာ။ အာသဝေဟိ ဓမ္မေဟိ ယေ ဓမ္မာ။ အာသဝေဟိ စေဝ သာသဝေဟိ စ ဓမ္မေဟိ ယေ ဓမ္မာ။ အာသဝေဟိ စေဝ အာသဝသမ္ပယုတ္တေဟိ စ ဓမ္မေဟိ ယေ ဓမ္မာ။ သံယောဇနေဟိ ဓမ္မေဟိ ယေ ဓမ္မာ။ ဂန္ထေဟိ ဓမ္မေဟိ ယေ ဓမ္မာ။ ဩဃေဟိ ဓမ္မေဟိ ယေ ဓမ္မာ။ ယောဂေဟိ ဓမ္မေဟိ ယေ ဓမ္မာ။ နီဝရဏေဟိ ဓမ္မေဟိ ယေ ဓမ္မာ။ ပရာမာသေဟိ ဓမ္မေဟိ ယေ ဓမ္မာ။ ဥပါဒါနေဟိ ဓမ္မေဟိ ယေ ဓမ္မာ။ ကိလေသေဟိ ဓမ္မေဟိ ယေ ဓမ္မာ။ ကိလေသေဟိ စေဝ သံကိလေသိကေဟိ စ ဓမ္မေဟိ ယေ ဓမ္မာ။ ကိလေသေဟိ စေဝ သံကိလိဋ္ဌေဟိ စ ဓမ္မေဟိ ယေ ဓမ္မာ။ ကိလေသေဟိ စေဝ ကိလေသသမ္ပယုတ္တေဟိ စ ဓမ္မေဟိ ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ, တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓါတူဟိ သမ္ပယုတ္တာ? တေ ဓမ္မာ တီဟိ ခန္ဓေဟိ ဧကေနာယတနေန သတ္တဟိ ဓါတူဟိ သမ္ပယုတ္တာ; ဧကေန ခန္ဓေန ဧကေနာယတနေန ဧကာယ ဓါတုယာ ကေဟိစိ သမ္ပယုတ္တာ။ ကတိဟိ ဝိပ္ပယုတ္တာ? ဧကေန ခန္ဓေန ဒသဟာယတနေဟိ ဒသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
ဒွေ သစ္စာ ပန္နရသိန္ဒ္ရိယာ၊ ဧကာဒသ ပဋိစ္စပဒါ။
ဥဒ္ဓံ ပုန ဧကာဒသ၊ ဂေါစ္ဆကပဒမေတ္ထ တိံသဝိဓါတိ။
သင်္ဂဟိတေနသမ္ပယုတ္တဝိပ္ပယုတ္တပဒနိဒ္ဒေသော ဧကာဒသမော။