၁၀. ဒသမနယ
၁၀. ဝိပ္ပယုတ္တေနဝိပ္ပယုတ္တပဒနိဒ္ဒေသ
၃၅၃. ရူပက္ခန္ဓေန ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓါတူဟိ ဝိပ္ပယုတ္တာ? တေ ဓမ္မာ စတူဟိ ခန္ဓေဟိ ဧကေနာယတနေန သတ္တဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၅၄. ဝေဒနာက္ခန္ဓေန ယေ ဓမ္မာ။ သညာက္ခန္ဓေန ယေ ဓမ္မာ။ သင်္ခါရက္ခန္ဓေန ယေ ဓမ္မာ။ ဝိညာဏက္ခန္ဓေန ယေ ဓမ္မာ။ မနာယတနေန ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ပေ.။ တေ ဓမ္မာ ဧကေန ခန္ဓေန ဒသဟာယတနေဟိ ဒသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၅၅. စက္ခာယတနေန ယေ ဓမ္မာ။ပေ.။ ဖောဋ္ဌဗ္ဗာယတနေန ယေ ဓမ္မာ။ စက္ခုဓါတုယာ ယေ ဓမ္မာ။ပေ.။ ဖောဋ္ဌဗ္ဗဓါတုယာ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ စတူဟိ ခန္ဓေဟိ ဧကေနာယတနေန သတ္တဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၅၆. စက္ခုဝိညာဏဓါတုယာ ယေ ဓမ္မာ။ပေ.။ မနောဝိညာဏဓါတုယာ ယေ ဓမ္မာ။ သမုဒယသစ္စေန ယေ ဓမ္မာ။ မဂ္ဂသစ္စေန ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၅၇. နိရောဓသစ္စေန ယေ ဓမ္မာ။ စက္ခုန္ဒ္ရိယေန ယေ ဓမ္မာ။ပေ.။ ကာယိန္ဒ္ရိယေန ယေ ဓမ္မာ.. ဣတ္ထိန္ဒ္ရိယေန ယေ ဓမ္မာ။ ပုရိသိန္ဒ္ရိယေန ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ စတူဟိ ခန္ဓေဟိ ဧကေနာယတနေန သတ္တဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၅၈. မနိန္ဒ္ရိယေန ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ ဒသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၅၉. သုခိန္ဒ္ရိယေန ယေ ဓမ္မာ။ ဒုက္ခိန္ဒ္ရိယေန ယေ ဓမ္မာ။ သောမနဿိန္ဒ္ရိယေန ယေ ဓမ္မာ။ ဒေါမနဿိန္ဒ္ရိယေန ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၆၀. ဥပေက္ခိန္ဒ္ရိယေန ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ ဧကာဒသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၆၁. သဒ္ဓိန္ဒ္ရိယေန ယေ ဓမ္မာ။ ဝီရိယိန္ဒ္ရိယေန ယေ ဓမ္မာ။ သတိန္ဒ္ရိယေန ယေ ဓမ္မာ။ သမာဓိန္ဒ္ရိယေန ယေ ဓမ္မာ။ ပညိန္ဒ္ရိယေန ယေ ဓမ္မာ။ အနညာတညဿာမီတိန္ဒ္ရိယေန ယေ ဓမ္မာ။ အညိန္ဒ္ရိယေန ယေ ဓမ္မာ။ အညာတာဝိန္ဒ္ရိယေန ယေ ဓမ္မာ။ အဝိဇ္ဇာယ ယေ ဓမ္မာ။ အဝိဇ္ဇာပစ္စယာ သင်္ခါရေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၆၂. သင်္ခါရပစ္စယာ ဝိညာဏေန ယေ ဓမ္မာ။ သဠာယတနပစ္စယာ ဖဿေန ယေ ဓမ္မာ။ ဖဿပစ္စယာ ဝေဒနာယ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ ဒသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၆၃. ဝေဒနာပစ္စယာ တဏှာယ ယေ ဓမ္မာ။ တဏှာပစ္စယာ ဥပါဒါနေန ယေ ဓမ္မာ။ ကမ္မဘဝေန ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၆၄. ရူပဘဝေန ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ တီဟိ ဓါတူဟိ ဝိပ္ပယုတ္တာ။
၃၆၅. အသညာဘဝေန ယေ ဓမ္မာ။ ဧကဝေါကာရဘဝေန ယေ ဓမ္မာ။ ပရိဒေဝေန ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ စတူဟိ ခန္ဓေဟိ ဧကေနာယတနေန သတ္တဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၆၆. အရူပဘဝေန ယေ ဓမ္မာ။ နေဝသညာနာသညာဘဝေန ယေ ဓမ္မာ။ စတုဝေါကာရဘဝေန ယေ ဓမ္မာ။ သောကေန ယေ ဓမ္မာ။ ဒုက္ခေန ယေ ဓမ္မာ။ ဒေါမနဿေန ယေ ဓမ္မာ။ ဥပါယာသေန ယေ ဓမ္မာ။ သတိပဋ္ဌာနေန ယေ ဓမ္မာ။ သမ္မပ္ပဓါနေန ယေ ဓမ္မာ။ ဣဒ္ဓိပါဒေန ယေ ဓမ္မာ။ ဈာနေန ယေ ဓမ္မာ။ အပ္ပမညာယ ယေ ဓမ္မာ။ ပဉ္စဟိ ဣန္ဒ္ရိယေဟိ ယေ ဓမ္မာ။ ပဉ္စဟိ ဗလေဟိ ယေ ဓမ္မာ။ သတ္တဟိ ဗောဇ္ဈင်္ဂေဟိ ယေ ဓမ္မာ။ အရိယေန အဋ္ဌင်္ဂိကေန မဂ္ဂေန ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၆၇. ဖဿေန ယေ ဓမ္မာ။ ဝေဒနာယ ယေ ဓမ္မာ။ သညာယ ယေ ဓမ္မာ။ စေတနာယ ယေ ဓမ္မာ။ စိတ္တေန ယေ ဓမ္မာ။ မနသိကာရေန ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ ဒသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၆၈. အဓိမောက္ခေန ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ ပန္နရသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၁. တိကံ
၃၆၉. ကုသလေဟိ ဓမ္မေဟိ ယေ ဓမ္မာ။ အကုသလေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၇၀. သုခါယ ဝေဒနာယ သမ္ပယုတ္တေဟိ ဓမ္မေဟိ ယေ ဓမ္မာ။ ဒုက္ခာယ ဝေဒနာယ သမ္ပယုတ္တေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ ပန္နရသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၇၁. အဒုက္ခမသုခါယ ဝေဒနာယ သမ္ပယုတ္တေဟိ ဓမ္မေဟိ ယေ ဓမ္မာ ဝိပ္ပယုတ္တာ , တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ ဧကာဒသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၇၂. ဝိပါကေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ ဒသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၇၃. ဝိပါကဓမ္မဓမ္မေဟိ ယေ ဓမ္မာ။ သံကိလိဋ္ဌသံကိလေသိကေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၇၄. နေဝဝိပါကနဝိပါကဓမ္မဓမ္မေဟိ ယေ ဓမ္မာ။ အနုပါဒိန္နုပါဒါနိယေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ပဉ္စဟိ ဓါတူဟိ ဝိပ္ပယုတ္တာ။
၃၇၅. အနုပါဒိန္နအနုပါဒါနိယေဟိ ဓမ္မေဟိ ယေ ဓမ္မာ။ အသံကိလိဋ္ဌအသံကိလေသိကေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ဆဟိ ဓါတူဟိ ဝိပ္ပယုတ္တာ။
၃၇၆. သဝိတက္ကသဝိစာရေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ ပန္နရသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၇၇. အဝိတက္ကဝိစာရမတ္တေဟိ ဓမ္မေဟိ ယေ ဓမ္မာ။ ဣတိသဟဂတေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၇၈. အဝိတက္ကအဝိစာရေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ဧကာယ ဓါတုယာ ဝိပ္ပယုတ္တာ။
၃၇၉. သုခသဟဂတေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ ပန္နရသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၈၀. ဥပေက္ခာသဟဂတေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ ဧကာဒသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၈၁. ဒဿနေန ပဟာတဗ္ဗေဟိ ဓမ္မေဟိ ယေ ဓမ္မာ။ ဘာဝနာယ ပဟာတဗ္ဗေဟိ ဓမ္မေဟိ ယေ ဓမ္မာ။ ဒဿနေန ပဟာတဗ္ဗဟေတုကေဟိ ဓမ္မေဟိ ယေ ဓမ္မာ။ ဘာဝနာယ ပဟာတဗ္ဗဟေတုကေဟိ ဓမ္မေဟိ ယေ ဓမ္မာ။ အာစယဂါမီဟိ ဓမ္မေဟိ ယေ ဓမ္မာ။ အပစယဂါမီဟိ ဓမ္မေဟိ ယေ ဓမ္မာ။ သေက္ခေဟိ ဓမ္မေဟိ ယေ ဓမ္မာ။ အသေက္ခေဟိ ဓမ္မေဟိ ယေ ဓမ္မာ။ မဟဂ္ဂတေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၈၂. အပ္ပမာဏေဟိ ဓမ္မေဟိ ယေ ဓမ္မာ။ ပဏီတေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ဆဟိ ဓါတူဟိ ဝိပ္ပယုတ္တာ။
၃၈၃. ပရိတ္တာရမ္မဏေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ ဒသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၈၄. မဟဂ္ဂတာရမ္မဏေဟိ ဓမ္မေဟိ ယေ ဓမ္မာ။ အပ္ပမာဏာရမ္မဏေဟိ ဓမ္မေဟိ ယေ ဓမ္မာ။ ဟီနေဟိ ဓမ္မေဟိ ယေ ဓမ္မာ။ မိစ္ဆတ္တနိယတေဟိ ဓမ္မေဟိ ယေ ဓမ္မာ။ သမ္မတ္တနိယတေဟိ ဓမ္မေဟိ ယေ ဓမ္မာ။ မဂ္ဂါရမ္မဏေဟိ ဓမ္မေဟိ ယေ ဓမ္မာ။ မဂ္ဂဟေတုကေဟိ ဓမ္မေဟိ ယေ ဓမ္မာ။ မဂ္ဂါဓိပတီဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၈၅. အနုပ္ပန္နေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ပဉ္စဟိ ဓါတူဟိ ဝိပ္ပယုတ္တာ။
၃၈၆. အတီတာရမ္မဏေဟိ ဓမ္မေဟိ ယေ ဓမ္မာ။ အနာဂတာရမ္မဏေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၈၇. ပစ္စုပ္ပန္နာရမ္မဏေဟိ ဓမ္မေဟိ ယေ ဓမ္မာ။ အဇ္ဈတ္တာရမ္မဏေဟိ ဓမ္မေဟိ ယေ ဓမ္မာ။ ဗဟိဒ္ဓါရမ္မဏေဟိ ဓမ္မေဟိ ယေ ဓမ္မာ။ အဇ္ဈတ္တဗဟိဒ္ဓါရမ္မဏေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ ဒသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၈၈. သနိဒဿနသပ္ပဋိဃေဟိ ဓမ္မေဟိ ယေ ဓမ္မာ။ အနိဒဿနသပ္ပဋိဃေဟိ ဓမ္မေဟိ ယေ ဓမ္မာ ဝိပ္ပယုတ္တာ , တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ စတူဟိ ခန္ဓေဟိ ဧကေနာယတနေန သတ္တဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၂. ဒုကံ
၃၈၉. ဟေတူဟိ ဓမ္မေဟိ ယေ ဓမ္မာ။ သဟေတုကေဟိ ဓမ္မေဟိ ယေ ဓမ္မာ။ ဟေတုသမ္ပယုတ္တေဟိ ဓမ္မေဟိ ယေ ဓမ္မာ။ ဟေတူဟိ စေဝ သဟေတုကေဟိ စ ဓမ္မေဟိ ယေ ဓမ္မာ။ သဟေတုကေဟိ စေဝ န စ ဟေတူဟိ ဓမ္မေဟိ ယေ ဓမ္မာ။ ဟေတူဟိ စေဝ ဟေတုသမ္ပယုတ္တေဟိ စ ဓမ္မေဟိ ယေ ဓမ္မာ။ ဟေတုသမ္ပယုတ္တေဟိ စေဝ န စ ဟေတူဟိ ဓမ္မေဟိ ယေ ဓမ္မာ။ န ဟေတုသဟေတုကေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၉၀. အပ္ပစ္စယေဟိ ဓမ္မေဟိ ယေ ဓမ္မာ။ အသင်္ခတေဟိ ဓမ္မေဟိ ယေ ဓမ္မာ။ သနိဒဿနေဟိ ဓမ္မေဟိ ယေ ဓမ္မာ။ သပ္ပဋိဃေဟိ ဓမ္မေဟိ ယေ ဓမ္မာ။ ရူဣဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ စတူဟိ ခန္ဓေဟိ ဧကေနာယတနေန သတ္တဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၉၁. လောကုတ္တရေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ဆဟိ ဓါတူဟိ ဝိပ္ပယုတ္တာ။
၃၉၂. အာသဝေဟိ ဓမ္မေဟိ ယေ ဓမ္မာ။ အာသဝသမ္ပယုတ္တေဟိ ဓမ္မေဟိ ယေ ဓမ္မာ။ အာသဝေဟိ စေဝ သာသဝေဟိ စ ဓမ္မေဟိ ယေ ဓမ္မာ။ အာသဝေဟိ စေဝ အာသဝသမ္ပယုတ္တေဟိ စ ဓမ္မေဟိ ယေ ဓမ္မာ။ အာသဝသမ္ပယုတ္တေဟိ စေဝ နော စ အာသဝေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၉၃. အနာသဝေဟိ ဓမ္မေဟိ ယေ ဓမ္မာ။ အာသဝဝိပ္ပယုတ္တေဟိ အနာသဝေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ဆဟိ ဓါတူဟိ ဝိပ္ပယုတ္တာ။
၃၉၄. သံယောဇနေဟိ ဓမ္မေဟိ ယေ ဓမ္မာ။ ဂန္ထေဟိ ဓမ္မေဟိ ယေ ဓမ္မာ။ ဩဃေဟိ ဓမ္မေဟိ ယေ ဓမ္မာ။ ယောဂေဟိ ဓမ္မေဟိ ယေ ဓမ္မာ။ နီဝရဏေဟိ ဓမ္မေဟိ ယေ ဓမ္မာ။ ပရာမာသေဟိ ဓမ္မေဟိ ယေ ဓမ္မာ။ ပရာမာသသမ္ပယုတ္တေဟိ ဓမ္မေဟိ ယေ ဓမ္မာ။ ပရာမာသေဟိ စေဝ ပရာမဋ္ဌေဟိ စ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၉၅. အပရာမဋ္ဌေဟိ ဓမ္မေဟိ ယေ ဓမ္မာ။ ပရာမာသဝိပ္ပယုတ္တေဟိ အပရာမဋ္ဌေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ဆဟိ ဓါတူဟိ ဝိပ္ပယုတ္တာ။
၃၉၆. သာရမ္မဏေဟိ ဓမ္မေဟိ ယေ ဓမ္မာ။ စိတ္တေဟိ ဓမ္မေဟိ ယေ ဓမ္မာ။ စေတသိကေဟိ ဓမ္မေဟိ ယေ ဓမ္မာ။ စိတ္တသမ္ပယုတ္တေဟိ ဓမ္မေဟိ ယေ ဓမ္မာ။ စိတ္တသံသဋ္ဌေဟိ ဓမ္မေဟိ ယေ ဓမ္မာ။ စိတ္တသံသဋ္ဌသမုဋ္ဌာနေဟိ ဓမ္မေဟိ ယေ ဓမ္မာ။ စိတ္တသံသဋ္ဌသမုဋ္ဌာနသဟဘူဟိ ဓမ္မေဟိ ယေ ဓမ္မာ။ စိတ္တသံသဋ္ဌသမုဋ္ဌာနာနုပရိဝတ္တီဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ ဒသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၉၇. အနာရမ္မဏေဟိ [အနုပါဒိဏ္ဏေဟိ (သီ. က.)] ဓမ္မေဟိ ယေ ဓမ္မာ။ စိတ္တဝိပ္ပယုတ္တေဟိ ဓမ္မေဟိ ယေ ဓမ္မာ။ စိတ္တဝိသံသဋ္ဌေဟိ ဓမ္မေဟိ ယေ ဓမ္မာ။ ဥပါဒါဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ စတူဟိ ခန္ဓေဟိ ဧကေနာယတနေန သတ္တဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၃၉၈. အနုပါဒိန္နေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ပဉ္စဟိ ဓါတူဟိ ဝိပ္ပယုတ္တာ။
၃၉၉. ဥပါဒါနေဟိ ဓမ္မေဟိ ယေ ဓမ္မာ။ ကိလေသေဟိ ဓမ္မေဟိ ယေ ဓမ္မာ။ သံကိလိဋ္ဌေဟိ ဓမ္မေဟိ ယေ ဓမ္မာ။ ကိလေသသမ္ပယုတ္တေဟိ ဓမ္မေဟိ ယေ ဓမ္မာ။ ကိလေသေဟိ စေဝ သံကိလေသိကေဟိ စ ဓမ္မေဟိ ယေ ဓမ္မာ။ ကိလေသေဟိ စေဝ သံကိလိဋ္ဌေဟိ စ ဓမ္မေဟိ ယေ ဓမ္မာ။ သံကိလိဋ္ဌေဟိ စေဝ နော စ ကိလေသေဟိ ဓမ္မေဟိ ယေ ဓမ္မာ။ ကိလေသေဟိ စေဝ ကိလေသသမ္ပယုတ္တေဟိ စ ဓမ္မေဟိ ယေ ဓမ္မာ။ ကိလေသသမ္ပယုတ္တေဟိ စေဝ နော စ ကိလေသေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၄၀၀. အသံကိလေသိကေဟိ ဓမ္မေဟိ ယေ ဓမ္မာ။ ကိလေသဝိပ္ပယုတ္တေဟိ အသံကိလေသိကေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ဆဟိ ဓါတူဟိ ဝိပ္ပယုတ္တာ။
၄၀၁. ဒဿနေန ပဟာတဗ္ဗေဟိ ဓမ္မေဟိ ယေ ဓမ္မာ။ ဘာဝနာယ ပဟာတဗ္ဗေဟိ ဓမ္မေဟိ ယေ ဓမ္မာ။ ဒဿနေန ပဟာတဗ္ဗဟေတုကေဟိ ဓမ္မေဟိ ယေ ဓမ္မာ။ ဘာဝနာယ ပဟာတဗ္ဗဟေတုကေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၄၀၂. သဝိတက္ကေဟိ ဓမ္မေဟိ ယေ ဓမ္မာ။ သဝိစာရေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ ပန္နရသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၄၀၃. အဝိတက္ကေဟိ ဓမ္မေဟိ ယေ ဓမ္မာ။ အဝိစာရေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ဧကာယ ဓါတုယာ ဝိပ္ပယုတ္တာ။
၄၀၄. သပ္ပီတိကေဟိ ဓမ္မေဟိ ယေ ဓမ္မာ။ ဣတိသဟဂတေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၄၀၅. သုခသဟဂတေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ ပန္နရသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၄၀၆. ဥပေက္ခာသဟဂတေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ ဧကေန ခန္ဓေန ဒသဟာယတနေဟိ ဧကာဒသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
၄၀၇. န ကာမာဝစရေဟိ ဓမ္မေဟိ ယေ ဓမ္မာ။ အပရိယာပန္နေဟိ ဓမ္မေဟိ ယေ ဓမ္မာ။ အနုတ္တရေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ။ တေ ဓမ္မာ န ကေဟိစိ ခန္ဓေဟိ န ကေဟိစိ အာယတနေဟိ ဆဟိ ဓါတူဟိ ဝိပ္ပယုတ္တာ။
၄၀၈. ရူပါဝစရေဟိ ဓမ္မေဟိ ယေ ဓမ္မာ။ အရူပါဝစရေဟိ ဓမ္မေဟိ ယေ ဓမ္မာ။ နိယျာနိကေဟိ ဓမ္မေဟိ ယေ ဓမ္မာ။ နိယတေဟိ ဓမ္မေဟိ ယေ ဓမ္မာ။ သရဏေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေဟိ ဓမ္မေဟိ ယေ ဓမ္မာ ဝိပ္ပယုတ္တာ, တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓါတူဟိ ဝိပ္ပယုတ္တာ? တေ ဓမ္မာ ဧကေန ခန္ဓေန ဒသဟာယတနေဟိ သောဠသဟိ ဓါတူဟိ ဝိပ္ပယုတ္တာ; ဧကေနာယတနေန ဧကာယ ဓါတုယာ ကေဟိစိ ဝိပ္ပယုတ္တာ။
ဓမ္မာယတနံ ဓမ္မဓါတု၊ ဒုက္ခသစ္စဉ္စ ဇီဝိတံ။
သဠာယတနံ နာမရူပံ၊ စတ္တာရော စ မဟာဘဝါ။
ဇာတိ ဇရာ စ မရဏံ၊ တိကေသွေကူနဝီသတိ။
ဂေါစ္ဆကေသု စ ပညာသ၊ အဋ္ဌ စူဠန္တရေ ပဒါ။
မဟန္တရေ ပန္နရသ၊ အဋ္ဌာရသ တတော ပရေ။
တေဝီသ ပဒသတံ ဧတံ၊ သမ္ပယောဂေ န လဗ္ဘတီတိ။
ဝိပ္ပယုတ္တေနဝိပ္ပယုတ္တပဒနိဒ္ဒေသော ဒသမော။