၄. စတုတ္ထနယ
၄. သင်္ဂဟိတေနသင်္ဂဟိတပဒနိဒ္ဒေသ
၁၉၁. သမုဒယသစ္စေန ယေ ဓမ္မာ။ မဂ္ဂသစ္စေန ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ, တေဟိ ဓမ္မေဟိ ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ, တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓါတူဟိ သင်္ဂဟိတာ? တေ ဓမ္မာ ဧကေန ခန္ဓေန ဧကေနာယတနေန ဧကာယ ဓါတုယာ သင်္ဂဟိတာ။
၁၉၂. ဣတ္ထိန္ဒ္ရိယေန ယေ ဓမ္မာ။ ပုရိသိန္ဒ္ရိယေန ယေ ဓမ္မာ။ သုခိန္ဒ္ရိယေန ယေ ဓမ္မာ။ ဒုက္ခိန္ဒ္ရိယေန ယေ ဓမ္မာ။ သောမနဿိန္ဒ္ရိယေန ယေ ဓမ္မာ။ ဒေါမနဿိန္ဒ္ရိယေန ယေ ဓမ္မာ။ ဥပေက္ခိန္ဒ္ရိယေန ယေ ဓမ္မာ။ သဒ္ဓိန္ဒ္ရိယေန ယေ ဓမ္မာ။ ဝီရိယိန္ဒ္ရိယေန ယေ ဓမ္မာ။ သတိန္ဒ္ရိယေန ယေ ဓမ္မာ။ သမာဓိန္ဒ္ရိယေန ယေ ဓမ္မာ။ ပညိန္ဒ္ရိယေန ယေ ဓမ္မာ။ အနညာတညဿာမီတိန္ဒ္ရိယေန ယေ ဓမ္မာ။ အညိန္ဒ္ရိယေန ယေ ဓမ္မာ။ အညာတာဝိန္ဒ္ရိယေန ယေ ဓမ္မာ။။
အဝိဇ္ဇာယ ယေ ဓမ္မာ။ အဝိဇ္ဇာပစ္စယာ သင်္ခါရေန ယေ ဓမ္မာ။ သဠာယတနပစ္စယာ ဖဿေန ယေ ဓမ္မာ။ ဝေဒနာပစ္စယာ တဏှာယ ယေ ဓမ္မာ။ တဏှာပစ္စယာ ဥပါဒါနေန ယေ ဓမ္မာ။ ကမ္မဘဝေန ယေ ဓမ္မာ။ သောကေန ယေ ဓမ္မာ။ ပရိဒေဝေန ယေ ဓမ္မာ။ ဒုက္ခေန ယေ ဓမ္မာ။ ဒေါမနဿေန ယေ ဓမ္မာ။ ဥပါယာသေန ယေ ဓမ္မာ။။
သတိပဋ္ဌာနေန ယေ ဓမ္မာ။ သမ္မပ္ပဓါနေန ယေ ဓမ္မာ။ အပ္ပမညာယ ယေ ဓမ္မာ။ ပဉ္စဟိ ဣန္ဒ္ရိယေဟိ ယေ ဓမ္မာ။ ပဉ္စဟိ ဗလေဟိ ယေ ဓမ္မာ။ သတ္တဟိ ဗောဇ္ဈင်္ဂေဟိ ယေ ဓမ္မာ။ အရိယေန အဋ္ဌင်္ဂိကေန မဂ္ဂေန ယေ ဓမ္မာ။ ဖဿေန ယေ ဓမ္မာ။ စေတနာယ ယေ ဓမ္မာ။ အဓိမောက္ခေန ယေ ဓမ္မာ။ မနသိကာရေန ယေ ဓမ္မာ ။။
ဟေတူဟိ ဓမ္မေဟိ ယေ ဓမ္မာ။ ဟေတူဟိ စေဝ သဟေတုကေဟိ စ ဓမ္မေဟိ ယေ ဓမ္မာ။ ဟေတူဟိ စေဝ ဟေတုသမ္ပယုတ္တေဟိ စ ဓမ္မေဟိ ယေ ဓမ္မာ။ အာသဝေဟိ။ သံယောဇနေဟိ။ ဂန္ထေဟိ။ ဩဃေဟိ။ ယောဂေဟိ။ နီဝရဏေဟိ။ ပရာမာသေဟိ။ ဥပါဒါနေဟိ။ ကိလေသေဟိ ဓမ္မေဟိ ယေ ဓမ္မာ။ ကိလေသေဟိ စေဝ သံကိလေသိကေဟိ စ ဓမ္မေဟိ ယေ ဓမ္မာ။ ကိလေသေဟိ စေဝ သံကိလိဋ္ဌေဟိ စ ဓမ္မေဟိ ယေ ဓမ္မာ။ ကိလေသေဟိ စေဝ ကိလေသသမ္ပယုတ္တေဟိ စ ဓမ္မေဟိ ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ, တေဟိ ဓမ္မေဟိ ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ, တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓါတူဟိ သင်္ဂဟိတာ? တေ ဓမ္မာ ဧကေန ခန္ဓေန ဧကေနာယတနေန ဧကာယ ဓါတုယာ သင်္ဂဟိတာ။
ဒွေ သစ္စာ ပန္နရသိန္ဒ္ရိယာ၊ ဧကာဒသ ပဋိစ္စပဒါ။
ဥဒ္ဓံ ပုန ဧကာဒသ၊ ဂေါစ္ဆကပဒမေတ္ထ တိံသဝိဓါတိ [တိံသဝိဓန္တိ (ဣ.)]။
သင်္ဂဟိတေနသင်္ဂဟိတပဒနိဒ္ဒေသော စတုတ္ထော။