၃. တတိယနယ
၃. အသင်္ဂဟိတေနသင်္ဂဟိတပဒနိဒ္ဒေသ
၁၇၉. ဝေဒနာက္ခန္ဓေန ယေ ဓမ္မာ။ သညာက္ခန္ဓေန ယေ ဓမ္မာ။ သင်္ခါရက္ခန္ဓေန ယေ ဓမ္မာ။ သမုဒယသစ္စေန ယေ ဓမ္မာ။ မဂ္ဂသစ္စေန ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ, တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓါတူဟိ သင်္ဂဟိတာ? တေ ဓမ္မာ အသင်္ခတံ ခန္ဓတော ဌပေတွာ တီဟိ ခန္ဓေဟိ ဧကေနာယတနေန ဧကာယ ဓါတုယာ သင်္ဂဟိတာ။
၁၈၀. နိရောဓသစ္စေန ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ။ပေ.။ တေ ဓမ္မာ စတူဟိ ခန္ဓေဟိ ဧကေနာယတနေန ဧကာယ ဓါတုယာ သင်္ဂဟိတာ။
၁၈၁. ဇီဝိတိန္ဒ္ရိယေန ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ။ပေ.။ တေ ဓမ္မာ အသင်္ခတံ ခန္ဓတော ဌပေတွာ ဒွီဟိ ခန္ဓေဟိ ဧကေနာယတနေန ဧကာယ ဓါတုယာ သင်္ဂဟိတာ။
၁၈၂. ဣတ္ထိန္ဒ္ရိယေန ယေ ဓမ္မာ။ ပုရိသိန္ဒ္ရိယေန ယေ ဓမ္မာ။ သုခိန္ဒ္ရိယေန ယေ ဓမ္မာ။ ဒုက္ခိန္ဒ္ရိယေန ယေ ဓမ္မာ။ သောမနဿိန္ဒ္ရိယေန ယေ ဓမ္မာ။ ဒေါမနဿိန္ဒ္ရိယေန ယေ ဓမ္မာ။ ဥပေက္ခိန္ဒ္ရိယေန ယေ ဓမ္မာ။ သဒ္ဓိန္ဒ္ရိယေန ယေ ဓမ္မာ။ ဝီရိယိန္ဒ္ရိယေန ယေ ဓမ္မာ။ သတိန္ဒ္ရိယေန ယေ ဓမ္မာ။ သမာဓိန္ဒ္ရိယေန ယေ ဓမ္မာ။ ပညိန္ဒ္ရိယေန ယေ ဓမ္မာ။ အနညာတညဿာမီတိန္ဒ္ရိယေန ယေ ဓမ္မာ။ အညိန္ဒ္ရိယေန ယေ ဓမ္မာ။ အညာတာဝိန္ဒ္ရိယေန ယေ ဓမ္မာ။ အဝိဇ္ဇာယ ယေ ဓမ္မာ။ အဝိဇ္ဇာပစ္စယာ သင်္ခါရေန ယေ ဓမ္မာ။ သဠာယတနပစ္စယာ ဖဿေန ယေ ဓမ္မာ။ ဖဿပစ္စယာ ဝေဒနာယ ယေ ဓမ္မာ။ ဝေဒနာပစ္စယာ တဏှာယ ယေ ဓမ္မာ။ တဏှာပစ္စယာ ဥပါဒါနေန ယေ ဓမ္မာ။ ကမ္မဘဝေန [ဥပါဒါနပစ္စယာ ကမ္မဘဝေန (သျာ.)] ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ။ပေ.။ တေ ဓမ္မာ အသင်္ခတံ ခန္ဓတော ဌပေတွာ တီဟိ ခန္ဓေဟိ ဧကေနာယတနေန ဧကာယ ဓါတုယာ သင်္ဂဟိတာ။
၁၈၃. ဇာတိယာ ယေ ဓမ္မာ။ ဇရာယ ယေ ဓမ္မာ။ မရဏေန ယေ ဓမ္မာ။ ဈာနေန ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ။ပေ.။ တေ ဓမ္မာ အသင်္ခတံ ခန္ဓတော ဌပေတွာ ဒွီဟိ ခန္ဓေဟိ ဧကေနာယတနေန ဧကာယ ဓါတုယာ သင်္ဂဟိတာ။
၁၈၄. သောကေန ယေ ဓမ္မာ။ ဒုက္ခေန ယေ ဓမ္မာ။ ဒေါမနဿေန ယေ ဓမ္မာ။ ဥပါယာသေန ယေ ဓမ္မာ။ သတိပဋ္ဌာနေန ယေ ဓမ္မာ။ သမ္မပ္ပဓါနေန ယေ ဓမ္မာ။ အပ္ပမညာယ ယေ ဓမ္မာ။ ပဉ္စဟိ ဣန္ဒ္ရိယေဟိ ယေ ဓမ္မာ။ ပဉ္စဟိ ဗလေဟိ ယေ ဓမ္မာ။ သတ္တဟိ ဗောဇ္ဈင်္ဂေဟိ ယေ ဓမ္မာ။ အရိယေန အဋ္ဌင်္ဂိကေန မဂ္ဂေန ယေ ဓမ္မာ။ ဖဿေန ယေ ဓမ္မာ။ ဝေဒနာယ ယေ ဓမ္မာ။ သညာယ ယေ ဓမ္မာ။ စေတနာယ ယေ ဓမ္မာ။ အဓိမောက္ခေန ယေ ဓမ္မာ။ မနသိကာရေန ယေ ဓမ္မာ။ ဟေတူဟိ ဓမ္မေဟိ ယေ ဓမ္မာ။ ဟေတူဟိ စေဝ သဟေတုကေဟိ စ ဓမ္မေဟိ ယေ ဓမ္မာ။ ဟေတူဟိ စေဝ ဟေတုသမ္ပယုတ္တေဟိ စ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ။ပေ.။ တေ ဓမ္မာ အသင်္ခတံ ခန္ဓတော ဌပေတွာ တီဟိ ခန္ဓေဟိ ဧကေနာယတနေန ဧကာယ ဓါတုယာ သင်္ဂဟိတာ။
၁၈၅. အပ္ပစ္စယေဟိ ဓမ္မေဟိ ယေ ဓမ္မာ။ အသင်္ခတေဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ။ပေ.။ တေ ဓမ္မာ စတူဟိ ခန္ဓေဟိ ဧကေနာယတနေန ဧကာယ ဓါတုယာ သင်္ဂဟိတာ။
၁၈၆. အာသဝေဟိ ဓမ္မေဟိ ယေ ဓမ္မာ။ အာသဝေဟိ စေဝ သာသဝေဟိ စ ဓမ္မေဟိ ယေ ဓမ္မာ။ အာသဝေဟိ စေဝ အာသဝသမ္ပယုတ္တေဟိ စ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ။ တေ ဓမ္မာ အသင်္ခတံ ခန္ဓတော ဌပေတွာ တီဟိ ခန္ဓေဟိ ဧကေနာယတနေန ဧကာယ ဓါတုယာ သင်္ဂဟိတာ။
၁၈၇. သံယောဇနေဟိ ။ ဂန္ထေဟိ။ ဩဃေဟိ။ ယောဂေဟိ။ နီဝရဏေဟိ။ ပရာမာသေဟိ ဓမ္မေဟိ ယေ ဓမ္မာ။ ပရာမာသေဟိ စေဝ ပရာမဋ္ဌေဟိ စ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ။ တေ ဓမ္မာ အသင်္ခတံ ခန္ဓတော ဌပေတွာ တီဟိ ခန္ဓေဟိ ဧကေနာယတနေန ဧကာယ ဓါတုယာ သင်္ဂဟိတာ။
၁၈၈. စေတသိကေဟိ ဓမ္မေဟိ ယေ ဓမ္မာ။ စိတ္တသမ္ပယုတ္တေဟိ ဓမ္မေဟိ ယေ ဓမ္မာ။ စိတ္တသံသဋ္ဌေဟိ ဓမ္မေဟိ ယေ ဓမ္မာ။ စိတ္တသံသဋ္ဌသမုဋ္ဌာနေဟိ ဓမ္မေဟိ ယေ ဓမ္မာ။ စိတ္တသံသဋ္ဌသမုဋ္ဌာနသဟဘူဟိ ဓမ္မေဟိ ယေ ဓမ္မာ။ စိတ္တသံသဋ္ဌသမုဋ္ဌာနာနုပရိဝတ္တီဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ။ပေ.။ တေ ဓမ္မာ အသင်္ခတံ ခန္ဓတော ဌပေတွာ ဧကေန ခန္ဓေန ဧကေနာယတနေန ဧကာယ ဓါတုယာ သင်္ဂဟိတာ။
၁၈၉. စိတ္တသဟဘူမိ ဓမ္မေဟိ ယေ ဓမ္မာ။ စိတ္တာနုပရိဝတ္တီဟိ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ။ပေ.။ တေ ဓမ္မာ န ကေဟိစိ ခန္ဓေဟိ ဧကေနာယတနေန ဧကာယ ဓါတုယာ သင်္ဂဟိတာ။
၁၉၀. ဥပါဒါနေဟိ ဓမ္မေဟိ ယေ ဓမ္မာ။ ကိလေသေဟိ ဓမ္မေဟိ ယေ ဓမ္မာ။ ကိလေသေဟိ စေဝ သံကိလေသိကေဟိ စ ဓမ္မေဟိ ယေ ဓမ္မာ။ ကိလေသေဟိ စေဝ သံကိလိဋ္ဌေဟိ စ ဓမ္မေဟိ ယေ ဓမ္မာ။ ကိလေသေဟိ စေဝ ကိလေသသမ္ပယုတ္တေဟိ စ ဓမ္မေဟိ ယေ ဓမ္မာ ခန္ဓသင်္ဂဟေန အသင်္ဂဟိတာ အာယတနသင်္ဂဟေန သင်္ဂဟိတာ ဓါတုသင်္ဂဟေန သင်္ဂဟိတာ, တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓါတူဟိ သင်္ဂဟိတာ? တေ ဓမ္မာ အသင်္ခတံ ခန္ဓတော ဌပေတွာ တီဟိ ခန္ဓေဟိ ဧကေနာယတနေန ဧကာယ ဓါတုယာ သင်္ဂဟိတာ။
တယော ခန္ဓာ တထာ သစ္စာ၊ ဣန္ဒ္ရိယာနိ စ သောဠသ။
ပဒါနိ ပစ္စယာကာရေ၊ စုဒ္ဒသူပရိ စုဒ္ဒသ။
သမတိံသ ပဒါ ဟောန္တိ၊ ဂေါစ္ဆကေသု ဒသသ္ဝထ။
ဒုဝေ စူဠန္တရဒုကာ [စုလ္လန္တရဒုကာ (သီ.)]၊ အဋ္ဌ ဟောန္တိ မဟန္တရာတိ။
အသင်္ဂဟိတေနသင်္ဂဟိတပဒနိဒ္ဒေသော တတိယော။