၂. ဒုတိယနယ
၂. သင်္ဂဟိတေနအသင်္ဂဟိတပဒနိဒ္ဒေသ
၁၇၁. စက္ခာယတနေန ယေ ဓမ္မာ။ ဖောဋ္ဌဗ္ဗာယတနေန ယေ ဓမ္မာ။ စက္ခုဓါတုယာ ယေ ဓမ္မာ။ ဖောဋ္ဌဗ္ဗဓါတုယာ ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန အသင်္ဂဟိတာ ဓါတုသင်္ဂဟေန အသင်္ဂဟိတာ, တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓါတူဟိ အသင်္ဂဟိတာ? တေ ဓမ္မာ စတူဟိ ခန္ဓေဟိ ဒွီဟာယတနေဟိ အဋ္ဌဟိ ဓါတူဟိ အသင်္ဂဟိတာ။
၁၇၂. စက္ခုဝိညာဏဓါတုယာ ယေ ဓမ္မာ။ သောတဝိညာဏဓါတုယာ ယေ ဓမ္မာ။ ဃာနဝိညာဏဓါတုယာ ယေ ဓမ္မာ။ ဇိဝှာဝိညာဏဓါတုယာ ယေ ဓမ္မာ။ ကာယဝိညာဏဓါတုယာ ယေ ဓမ္မာ။ မနောဓါတုယာ ယေ ဓမ္မာ။ မနောဝိညာဏဓါတုယာ ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန အသင်္ဂဟိတာ ဓါတုသင်္ဂဟေန အသင်္ဂဟိတာ။ပေ.။ တေ ဓမ္မာ စတူဟိ ခန္ဓေဟိ ဧကာဒသဟာယတနေဟိ ဒွါဒသဟိ ဓါတူဟိ အသင်္ဂဟိတာ။
၁၇၃. စက္ခုန္ဒ္ရိယေန ယေ ဓမ္မာ။ သောတိန္ဒ္ရိယေန ယေ ဓမ္မာ။ ဃာနိန္ဒ္ရိယေန ယေ ဓမ္မာ။ ဇိဝ္ဟိန္ဒ္ရိယေန ယေ ဓမ္မာ။ ကာယိန္ဒ္ရိယေန ယေ ဓမ္မာ။ ဣတ္ထိန္ဒ္ရိယေန ယေ ဓမ္မာ။ ပုရိသိန္ဒ္ရိယေန ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန အသင်္ဂဟိတာ ဓါတုသင်္ဂဟေန အသင်္ဂဟိတာ။ပေ.။ တေ ဓမ္မာ စတူဟိ ခန္ဓေဟိ ဒွီဟာယတနေဟိ အဋ္ဌဟိ ဓါတူဟိ အသင်္ဂဟိတာ။
၁၇၄. အသညာဘဝေန ယေ ဓမ္မာ။ ဧကဝေါကာရဘဝေန ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန အသင်္ဂဟိတာ ဓါတုသင်္ဂဟေန အသင်္ဂဟိတာ။ပေ.။ တေ ဓမ္မာ စတူဟိ ခန္ဓေဟိ တီဟာယတနေဟိ နဝဟိ ဓါတူဟိ အသင်္ဂဟိတာ။
၁၇၅. ပရိဒေဝေန ယေ ဓမ္မာ။ သနိဒဿနသပ္ပဋိဃေဟိ ဓမ္မေဟိ ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန အသင်္ဂဟိတာ ဓါတုသင်္ဂဟေန အသင်္ဂဟိတာ။ပေ.။ တေ ဓမ္မာ စတူဟိ ခန္ဓေဟိ ဒွီဟာယတနေဟိ အဋ္ဌဟိ ဓါတူဟိ အသင်္ဂဟိတာ။
၁၇၆. အနိဒဿနသပ္ပဋိဃေဟိ ဓမ္မေဟိ ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန အသင်္ဂဟိတာ ဓါတုသင်္ဂဟေန အသင်္ဂဟိတာ။ပေ.။ တေ ဓမ္မာ စတူဟိ ခန္ဓေဟိ ဒသဟာယတနေဟိ သောဠသဟိ ဓါတူဟိ အသင်္ဂဟိတာ။
၁၇၇. သနိဒဿနေဟိ ဓမ္မေဟိ ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန အသင်္ဂဟိတာ ဓါတုသင်္ဂဟေန အသင်္ဂဟိတာ။ပေ.။ တေ ဓမ္မာ စတူဟိ ခန္ဓေဟိ ဒွီဟာယတနေဟိ အဋ္ဌဟိ ဓါတူဟိ အသင်္ဂဟိတာ။
၁၇၈. သပ္ပဋိဃေဟိ ဓမ္မေဟိ ယေ ဓမ္မာ။ ဥပါဒါဓမ္မေဟိ ယေ ဓမ္မာ ခန္ဓသင်္ဂဟေန သင်္ဂဟိတာ အာယတနသင်္ဂဟေန အသင်္ဂဟိတာ ဓါတုသင်္ဂဟေန အသင်္ဂဟိတာ, တေ ဓမ္မာ ကတိဟိ ခန္ဓေဟိ ကတိဟာယတနေဟိ ကတိဟိ ဓါတူဟိ အသင်္ဂဟိတာ? တေ ဓမ္မာ စတူဟိ ခန္ဓေဟိ ဧကာဒသဟာယတနေဟိ သတ္တရသဟိ ဓါတူဟိ အသင်္ဂဟိတာ။
ဒသာယတနာ သတ္တရသ ဓါတုယော၊
သတ္တိန္ဒ္ရိယာ အသညာဘဝေါ ဧကဝေါကာရဘဝေါ။
ပရိဒေဝေါ သနိဒဿနသပ္ပဋိဃံ၊
အနိဒဿနံ ပုနဒေဝ [ပုနရေဝ (ဣ.)] သပ္ပဋိဃံ ဥပါဒါတိ။
သင်္ဂဟိတေနအသင်္ဂဟိတပဒနိဒ္ဒေသော ဒုတိယော။