၁၈. ဓမ္မဟဒယဝိဘင်္ဂ
၁. သဗ္ဗသင်္ဂဟိကဝါရော
၉၇၈. ကတိ ခန္ဓာ, ကတိ အာယတနာနိ, ကတိ ဓါတုယော, ကတိ သစ္စာနိ, ကတိ ဣန္ဒ္ရိယာနိ, ကတိ ဟေတူ, ကတိ အာဟာရာ, ကတိ ဖဿာ, ကတိ ဝေဒနာ, ကတိ သညာ, ကတိ စေတနာ, ကတိ စိတ္တာနိ?
ပဉ္စက္ခန္ဓာ, ဒွါဒသာယတနာနိ, အဋ္ဌာရသ ဓါတုယော, စတ္တာရိ သစ္စာနိ, ဗာဝီသတိန္ဒ္ရိယာနိ, နဝ ဟေတူ, စတ္တာရော အာဟာရာ, သတ္တ ဖဿာ, သတ္တ ဝေဒနာ, သတ္တ သညာ, သတ္တ စေတနာ, သတ္တ စိတ္တာနိ။
၉၇၉. တတ္ထ ကတမေ ပဉ္စက္ခန္ဓာ? ရူပက္ခန္ဓော, ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော – ဣမေ ဝုစ္စန္တိ ‘‘ပဉ္စက္ခန္ဓာ’’။
၉၈၀. တတ္ထ ကတမာနိ ဒွါဒသာယတနာနိ? စက္ခာယတနံ, ရူပါယတနံ, သောတာယတနံ, သဒ္ဒါယတနံ, ဃာနာယတနံ, ဂန္ဓာယတနံ, ဇိဝှာယတနံ, ရသာယတနံ, ကာယာယတနံ, ဖောဋ္ဌဗ္ဗာယတနံ, မနာယတနံ, ဓမ္မာယတနံ – ဣမာနိ ဝုစ္စန္တိ ‘‘ဒွါဒသာယတနာနိ’’။
၉၈၁. တတ္ထ ကတမာ အဋ္ဌာရသ ဓါတုယော? စက္ခုဓါတု, ရူပဓါတု, စက္ခုဝိညာဏဓါတု, သောတဓါတု, သဒ္ဒဓါတု, သောတဝိညာဏဓါတု, ဃာနဓါတု , ဂန္ဓဓါတု, ဃာနဝိညာဏဓါတု, ဇိဝှာဓါတု, ရသဓါတု, ဇိဝှာဝိညာဏဓါတု, ကာယဓါတု, ဖောဋ္ဌဗ္ဗဓါတု, ကာယဝိညာဏဓါတု, မနောဓါတု, ဓမ္မဓါတု, မနောဝိညာဏဓါတု – ဣမာ ဝုစ္စန္တိ ‘‘အဋ္ဌာရသ ဓါတုယော’’။
၉၈၂. တတ္ထ ကတမာနိ စတ္တာရိ သစ္စာနိ? ဒုက္ခသစ္စံ, သမုဒယသစ္စံ, နိရောဓသစ္စံ, မဂ္ဂသစ္စံ – ဣမာနိ ဝုစ္စန္တိ ‘‘စတ္တာရိ သစ္စာနိ’’။
၉၈၃. တတ္ထ ကတမာနိ ဗာဝီသတိန္ဒ္ရိယာနိ? စက္ခုန္ဒ္ရိယံ, သောတိန္ဒ္ရိယံ, ဃာနိန္ဒ္ရိယံ, ဇိဝ္ဟိန္ဒ္ရိယံ, ကာယိန္ဒ္ရိယံ, မနိန္ဒ္ရိယံ, ဣတ္ထိန္ဒ္ရိယံ, ပုရိသိန္ဒ္ရိယံ, ဇီဝိတိန္ဒ္ရိယံ, သုခိန္ဒ္ရိယံ, ဒုက္ခိန္ဒ္ရိယံ, သောမနဿိန္ဒ္ရိယံ, ဒေါမနဿိန္ဒ္ရိယံ, ဥပေက္ခိန္ဒ္ရိယံ , သဒ္ဓိန္ဒ္ရိယံ, ဝီရိယိန္ဒ္ရိယံ, သတိန္ဒ္ရိယံ, သမာဓိန္ဒ္ရိယံ, ပညိန္ဒ္ရိယံ, အနညာတညဿာမီတိန္ဒ္ရိယံ, အညိန္ဒ္ရိယံ, အညာတာဝိန္ဒ္ရိယံ – ဣမာနိ ဝုစ္စန္တိ ‘‘ဗာဝီသတိန္ဒ္ရိယာနိ’’။
၉၈၄. တတ္ထ ကတမေ နဝ ဟေတူ? တယော ကုသလဟေတူ, တယော အကုသလဟေတူ, တယော အဗျာကတဟေတူ။
တတ္ထ ကတမေ တယော ကုသလဟေတူ? အလောဘော ကုသလဟေတု, အဒေါသော ကုသလဟေတု, အမောဟော ကုသလဟေတု – ဣမေ တယော ကုသလဟေတူ။
တတ္ထ ကတမေ တယော အကုသလဟေတူ? လောဘော အကုသလဟေတု, ဒေါသော အကုသလဟေတု, မောဟော အကုသလဟေတု – ဣမေ တယော အကုသလဟေတူ။
တတ္ထ ကတမေ တယော အဗျာကတဟေတူ? ကုသလာနံ ဝါ ဓမ္မာနံ ဝိပါကတော ကိရိယာဗျာကတေသု ဝါ ဓမ္မေသု အလောဘော, အဒေါသော, အမောဟော – ဣမေ တယော အဗျာကတဟေတူ။ ဣမေ ဝုစ္စန္တိ ‘‘နဝ ဟေတူ’’။
၉၈၅. တတ္ထ ကတမေ စတ္တာရော အာဟာရာ? ကဗဠီကာရာဟာရော [ကဗဠိံကာရော အာဟာရော (သီ. သျာ.)], ဖဿာဟာရော, မနောသဉ္စေတနာဟာရော , ဝိညာဏာဟာရော – ဣမေ ဝုစ္စန္တိ ‘‘စတ္တာရော အာဟာရာ’’။
၉၈၆. တတ္ထ ကတမေ သတ္တ ဖဿာ? စက္ခုသမ္ဖဿော, သောတသမ္ဖဿော, ဃာနသမ္ဖဿော, ဇိဝှာသမ္ဖဿော, ကာယသမ္ဖဿော, မနောဓါတုသမ္ဖဿော, မနောဝိညာဏဓါတုသမ္ဖဿော – ဣမေ ဝုစ္စန္တိ ‘‘သတ္တ ဖဿာ’’။
၉၈၇. တတ္ထ ကတမာ သတ္တ ဝေဒနာ? စက္ခုသမ္ဖဿဇာ ဝေဒနာ, သောတသမ္ဖဿဇာ ဝေဒနာ, ဃာနသမ္ဖဿဇာ ဝေဒနာ, ဇိဝှာသမ္ဖဿဇာ ဝေဒနာ, ကာယသမ္ဖဿဇာ ဝေဒနာ, မနောဓါတုသမ္ဖဿဇာ ဝေဒနာ, မနောဝိညာဏဓါတုသမ္ဖဿဇာ ဝေဒနာ – ဣမာ ဝုစ္စန္တိ ‘‘သတ္တ ဝေဒနာ’’။
၉၈၈. တတ္ထ ကတမာ သတ္တ သညာ? စက္ခုသမ္ဖဿဇာ သညာ, သောတသမ္ဖဿဇာ သညာ, ဃာနသမ္ဖဿဇာ သညာ, ဇိဝှာသမ္ဖဿဇာ သညာ, ကာယသမ္ဖဿဇာ သညာ, မနောဓါတုသမ္ဖဿဇာ သညာ, မနောဝိညာဏဓါတုသမ္ဖဿဇာ သညာ – ဣမာ ဝုစ္စန္တိ ‘‘သတ္တ သညာ’’။
၉၈၉. တတ္ထ ကတမာ သတ္တ စေတနာ? စက္ခုသမ္ဖဿဇာ စေတနာ, သောတသမ္ဖဿဇာ စေတနာ, ဃာနသမ္ဖဿဇာ စေတနာ, ဇိဝှာသမ္ဖဿဇာ စေတနာ, ကာယသမ္ဖဿဇာ စေတနာ, မနောဓါတုသမ္ဖဿဇာ စေတနာ, မနောဝိညာဏဓါတုသမ္ဖဿဇာ စေတနာ – ဣမာ ဝုစ္စန္တိ ‘‘သတ္တ စေတနာ’’။
၉၉၀. တတ္ထ ကတမာနိ သတ္တ စိတ္တာနိ? စက္ခုဝိညာဏံ, သောတဝိညာဏံ, ဃာနဝိညာဏံ, ဇိဝှာဝိညာဏံ , ကာယဝိညာဏံ, မနောဓါတု, မနောဝိညာဏဓါတု – ဣမာနိ ဝုစ္စန္တိ ‘‘သတ္တ စိတ္တာနိ’’။
၂. ဥပ္ပတ္တာနုပ္ပတ္တိဝါရော
၁. ကာမဓါတု
၉၉၁. ကာမဓါတုယာ ကတိ ခန္ဓာ, ကတိ အာယတနာနိ, ကတိ ဓါတုယော, ကတိ သစ္စာနိ, ကတိ ဣန္ဒ္ရိယာနိ, ကတိ ဟေတူ, ကတိ အာဟာရာ, ကတိ ဖဿာ, ကတိ ဝေဒနာ, ကတိ သညာ, ကတိ စေတနာ, ကတိ စိတ္တာနိ?
ကာမဓါတုယာ ပဉ္စက္ခန္ဓာ, ဒွါဒသာယတနာနိ, အဋ္ဌာရသ ဓါတုယော, တီဏိ သစ္စာနိ, ဗာဝီသတိန္ဒ္ရိယာနိ, နဝ ဟေတူ, စတ္တာရော အာဟာရာ, သတ္တ ဖဿာ, သတ္တ ဝေဒနာ, သတ္တ သညာ, သတ္တ စေတနာ, သတ္တ စိတ္တာနိ။
၉၉၂. တတ္ထ ကတမေ ကာမဓါတုယာ ပဉ္စက္ခန္ဓာ? ရူပက္ခန္ဓော, ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော – ဣမေ ဝုစ္စန္တိ ‘‘ကာမဓါတုယာ ပဉ္စက္ခန္ဓာ’’။
တတ္ထ ကတမာနိ ကာမဓါတုယာ ဒွါဒသာယတနာနိ? စက္ခာယတနံ, ရူပါယတနံ , သောတာယတနံ, သဒ္ဒါယတနံ, ဃာနာယတနံ, ဂန္ဓာယတနံ, ဇိဝှာယတနံ, ရသာယတနံ, ကာယာယတနံ, ဖောဋ္ဌဗ္ဗာယတနံ, မနာယတနံ, ဓမ္မာယတနံ – ဣမာနိ ဝုစ္စန္တိ ‘‘ကာမဓါတုယာ ဒွါဒသာယတနာနိ’’။
တတ္ထ ကတမာ ကာမဓါတုယာ အဋ္ဌာရသ ဓါတုယော? စက္ခုဓါတု, ရူပဓါတု, စက္ခုဝိညာဏဓါတု, သောတဓါတု, သဒ္ဒဓါတု, သောတဝိညာဏဓါတု, ဃာနဓါတု, ဂန္ဓဓါတု, ဃာနဝိညာဏဓါတု, ဇိဝှာဓါတု, ရသဓါတု, ဇိဝှာဝိညာဏဓါတု, ကာယဓါတု, ဖောဋ္ဌဗ္ဗဓါတု, ကာယဝိညာဏဓါတု, မနောဓါတု, ဓမ္မဓါတု , မနောဝိညာဏဓါတု – ဣမာ ဝုစ္စန္တိ ‘‘ကာမဓါတုယာ အဋ္ဌာရသ ဓါတုယော’’။
တတ္ထ ကတမာနိ ကာမဓါတုယာ တီဏိ သစ္စာနိ? ဒုက္ခသစ္စံ, သမုဒယသစ္စံ, မဂ္ဂသစ္စံ – ဣမာနိ ဝုစ္စန္တိ ‘‘ကာမဓါတုယာ တီဏိ သစ္စာနိ’’။
တတ္ထ ကတမာနိ ကာမဓါတုယာ ဗာဝီသတိန္ဒ္ရိယာနိ? စက္ခုန္ဒ္ရိယံ, သောတိန္ဒ္ရိယံ။ပေ.။ အညာတာဝိန္ဒ္ရိယံ – ဣမာနိ ဝုစ္စန္တိ ‘‘ကာမဓါတုယာ ဗာဝီသတိန္ဒ္ရိယာနိ’’။
တတ္ထ ကတမေ ကာမဓါတုယာ နဝ ဟေတူ? တယော ကုသလဟေတူ, တယော အကုသလဟေတူ, တယော အဗျာကတဟေတူ။ပေ.။ ဣမေ ဝုစ္စန္တိ ‘‘ကာမဓါတုယာ နဝ ဟေတူ’’။
တတ္ထ ကတမေ ကာမဓါတုယာ စတ္တာရော အာဟာရာ? ကဗဠီကာရာဟာရော, ဖဿာဟာရော, မနောသဉ္စေတနာဟာရော, ဝိညာဏာဟာရော – ဣမေ ဝုစ္စန္တိ ‘‘ကာမဓါတုယာ စတ္တာရော အာဟာရာ’’။
တတ္ထ ကတမေ ကာမဓါတုယာ သတ္တ ဖဿာ? စက္ခုသမ္ဖဿော သောတသမ္ဖဿော, ဃာနသမ္ဖဿော, ဇိဝှာသမ္ဖဿော, ကာယသမ္ဖဿော, မနောဓါတုသမ္ဖဿော, မနောဝိညာဏဓါတုသမ္ဖဿော – ဣမေ ဝုစ္စန္တိ ‘‘ကာမဓါတုယာ သတ္တ ဖဿာ’’။
တတ္ထ ကတမာ ကာမဓါတုယာ သတ္တ ဝေဒနာ? စက္ခုသမ္ဖဿဇာ ဝေဒနာ, သောတသမ္ဖဿဇာ ဝေဒနာ, ဃာနသမ္ဖဿဇာ ဝေဒနာ, ဇိဝှာသမ္ဖဿဇာ ဝေဒနာ, ကာယသမ္ဖဿဇာ ဝေဒနာ, မနောဓါတုသမ္ဖဿဇာ ဝေဒနာ, မနောဝိညာဏဓါတုသမ္ဖဿဇာ ဝေဒနာ – ဣမာ ဝုစ္စတ္တိ ‘‘ကာမဓါတုယာ သတ္တ ဝေဒနာ’’။
တတ္ထ ကတမာ ကာမဓါတုယာ သတ္တ သညာ? စက္ခုသမ္ဖဿဇာ သညာ, သောတသမ္ဖဿဇာ သညာ, ဃာနသမ္ဖဿဇာ သညာ, ဇိဝှာသမ္ဖဿဇာ သညာ, ကာယသမ္ဖဿဇာ သညာ, မနောဓါတုသမ္ဖဿဇာ သညာ, မနောဝိညာဏဓါတုသမ္ဖဿဇာ သညာ – ဣမာ ဝုစ္စန္တိ ‘‘ကာမဓါတုယာ သတ္တ သညာ’’။
တတ္ထ ကတမာ ကာမဓါတုယာ သတ္တ စေတနာ? စက္ခုသမ္ဖဿဇာ စေတနာ, သောတသမ္ဖဿဇာ စေတနာ, ဃာနသမ္ဖဿဇာ စေတနာ, ဇိဝှာသမ္ဖဿဇာ စေတနာ, ကာယသမ္ဖဿဇာ စေတနာ, မနောဓါတုသမ္ဖဿဇာ စေတနာ, မနောဝိညာဏဓါတုသမ္ဖဿဇာ စေတနာ – ဣမာ ဝုစ္စန္တိ ‘‘ကာမဓါတုယာ သတ္တ စေတနာ’’။
တတ္ထ ကတမာနိ ကာမဓါတုယာ သတ္တ စိတ္တာနိ? စက္ခုဝိညာဏံ, သောတဝိညာဏံ, ဃာနဝိညာဏံ, ဇိဝှာဝိညာဏံ, ကာယဝိညာဏံ, မနောဓါတု, မနောဝိညာဏဓါတု – ဣမာနိ ဝုစ္စန္တိ ‘‘ကာမဓါတုယာ သတ္တ စိတ္တာနိ’’။
၂. ရူပဓါတု
၉၉၃. ရူပဓါတုယာ ကတိ ခန္ဓာ, ကတိ အာယတနာ, ကတိ ဓါတုယော, ကတိ သစ္စာနိ, ကတိ ဣန္ဒ္ရိယာနိ။ပေ.။ ကတိ စိတ္တာနိ?
ရူပဓါတုယာ ပဉ္စက္ခန္ဓာ, ဆ အာယတနာနိ, နဝ ဓါတုယော, တီဏိ သစ္စာနိ , စုဒ္ဒသိန္ဒ္ရိယာနိ, အဋ္ဌ ဟေတူ, တယော အာဟာရာ, စတ္တာရော ဖဿာ, စတဿော ဝေဒနာ, စတဿော သညာ, စတဿော စေတနာ, စတ္တာရိ စိတ္တာနိ။
၉၉၄. တတ္ထ ကတမေ ရူပဓါတုယာ ပဉ္စက္ခန္ဓာ? ရူပက္ခန္ဓော, ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော – ဣမေ ဝုစ္စန္တိ ‘‘ရူပဓါတုယာ ပဉ္စက္ခန္ဓာ’’။
တတ္ထ ကတမာနိ ရူပဓါတုယာ ဆ အာယတနာနိ? စက္ခာယတနံ, ရူပါယတနံ, သောတာယတနံ, သဒ္ဒါယတနံ, မနာယတနံ, ဓမ္မာယတနံ – ဣမာနိ ဝုစ္စန္တိ ‘‘ရူပဓါတုယာ ဆ အာယတနာနိ’’။
တတ္ထ ကတမာ ရူပဓါတုယာ နဝ ဓါတုယော? စက္ခုဓါတု, ရူပဓါတု, စက္ခုဝိညာဏဓါတု, သောတဓါတု, သဒ္ဒဓါတု, သောတဝိညာဏဓါတု, မနောဓါတု, ဓမ္မဓါတု, မနောဝိညာဏဓါတု – ဣမာ ဝုစ္စန္တိ ‘‘ရူပဓါတုယာ နဝ ဓါတုယော’’။
တတ္ထ ကတမာနိ ရူပဓါတုယာ တီဏိ သစ္စာနိ? ဒုက္ခသစ္စံ, သမုဒယသစ္စံ, မဂ္ဂသစ္စံ – ဣမာနိ ဝုစ္စန္တိ ‘‘ရူပဓါတုယာ တီဏိ သစ္စာနိ’’။
တတ္ထ ကတမာနိ ရူပဓါတုယာ စုဒ္ဒသိန္ဒ္ရိယာနိ? စက္ခုန္ဒ္ရိယံ, သောတိန္ဒ္ရိယံ, မနိန္ဒ္ရိယံ, ဇီဝိတိန္ဒ္ရိယံ, သောမနဿိန္ဒ္ရိယံ , ဥပေက္ခိန္ဒ္ရိယံ, သဒ္ဓိန္ဒ္ရိယံ, ဝီရိယိန္ဒ္ရိယံ, သတိန္ဒ္ရိယံ, သမာဓိန္ဒ္ရိယံ, ပညိန္ဒ္ရိယံ, အနညာတညဿာမီတိန္ဒ္ရိယံ, အညိန္ဒ္ရိယံ, အညာတာဝိန္ဒ္ရိယံ – ဣမာနိ ဝုစ္စန္တိ ‘‘ရူပဓါတုယာ စုဒ္ဒသိန္ဒ္ရိယာနိ’’။
တတ္ထ ကတမေ ရူပဓါတုယာ အဋ္ဌ ဟေတူ? တယော ကုသလဟေတူ, ဒွေ အကုသလဟေတူ, တယော အဗျာကတဟေတူ။
တတ္ထ ကတမေ တယော ကုသလဟေတူ? အလောဘော ကုသလဟေတု, အဒေါသော ကုသလဟေတု, အမောဟော ကုသလဟေတု – ဣမေ တယော ကုသလဟေတူ။
တတ္ထ ကတမေ ဒွေ အကုသလဟေတူ? လောဘော အကုသလဟေတု, မောဟော အကုသလဟေတု – ဣမေ ဒွေ အကုသလဟေတူ။
တတ္ထ ကတမေ တယော အဗျာကတဟေတူ? ကုသလာနံ ဝါ ဓမ္မာနံ ဝိပါကတော ကိရိယာဗျာကတေသု ဝါ ဓမ္မေသု အလောဘော, အဒေါသော, အမောဟော – ဣမေ တယော အဗျာကတဟေတူ။ ဣမေ ဝုစ္စန္တိ ရူပဓါတုယာ အဋ္ဌ ဟေတူ။
တတ္ထ ကတမေ ရူပဓါတုယာ တယော အာဟာရာ? ဖဿာဟာရော, မနောသဉ္စေတနာဟာရော, ဝိညာဏာဟာရော – ဣမေ ဝုစ္စန္တိ ‘‘ရူပဓါတုယာ တယော အာဟာရာ’’။
တတ္ထ ကတမေ ရူပဓါတုယာ စတ္တာရော ဖဿာ? စက္ခုသမ္ဖဿော, သောတသမ္ဖဿော, မနောဓါတုသမ္ဖဿော, မနောဝိညာဏဓါတုသမ္ဖဿော – ဣမေ ဝုစ္စန္တိ ‘‘ရူပဓါတုယာ စတ္တာရော ဖဿာ’’။
တတ္ထ ကတမာ ရူပဓါတုယာ စတဿော ဝေဒနာ။ပေ.။ စတဿော သညာ။ပေ.။ စတဿော စေတနာ။ပေ.။ စတ္တာရိ စိတ္တာနိ? စက္ခုဝိညာဏံ, သောတဝိညာဏံ, မနောဓါတု, မနောဝိညာဏဓါတု – ဣမာနိ ဝုစ္စန္တိ ‘‘ရူပဓါတုယာ စတ္တာရိ စိတ္တာနိ’’။
၃. အရူပဓါတု
၉၉၅. အရူပဓါတုယာ ကတိ ခန္ဓာ။ပေ.။ ကတိ စိတ္တာနိ?
အရူပဓါတုယာ စတ္တာရော ခန္ဓာ, ဒွေ အာယတနာနိ, ဒွေ ဓါတုယော, တီဏိ သစ္စာနိ, ဧကာဒသိန္ဒ္ရိယာနိ , အဋ္ဌ ဟေတူ, တယော အာဟာရာ, ဧကော ဖဿော, ဧကာ ဝေဒနာ, ဧကာ သညာ, ဧကာ စေတနာ, ဧကံ စိတ္တံ။
၉၉၆. တတ္ထ ကတမေ အရူပဓါတုယာ စတ္တာရော ခန္ဓာ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော – ဣမေ ဝုစ္စန္တိ ‘‘အရူပဓါတုယာ စတ္တာရော ခန္ဓာ’’။
တတ္ထ ကတမာနိ အရူပဓါတုယာ ဒွေ အာယတနာနိ? မနာယတနံ, ဓမ္မာယတနံ – ဣမာနိ ဝုစ္စန္တိ ‘‘အရူပဓါတုယာ ဒွေ အာယတနာနိ’’။
တတ္ထ ကတမာ အရူပဓါတုယာ ဒွေ ဓါတုယော? မနောဝိညာဏဓါတု , ဓမ္မဓါတု – ဣမာ ဝုစ္စန္တိ ‘‘အရူပဓါတုယာ ဒွေ ဓါတုယော’’။
တတ္ထ ကတမာနိ အရူပဓါတုယာ တီဏိ သစ္စာနိ? ဒုက္ခသစ္စံ, သမုဒယသစ္စံ, မဂ္ဂသစ္စံ – ဣမာနိ ဝုစ္စန္တိ ‘‘အရူပဓါတုယာ တီဏိ သစ္စာနိ’’။
တတ္ထ ကတမာနိ အရူပဓါတုယာ ဧကာဒသိန္ဒ္ရိယာနိ? မနိန္ဒ္ရိယံ, ဇီဝိတိန္ဒ္ရိယံ, သောမနဿိန္ဒ္ရိယံ, ဥပေက္ခိန္ဒ္ရိယံ, သဒ္ဓိန္ဒ္ရိယံ, ဝီရိယိန္ဒ္ရိယံ, သတိန္ဒ္ရိယံ, သမာဓိန္ဒ္ရိယံ, ပညိန္ဒ္ရိယံ, အညိန္ဒ္ရိယံ, အညာတာဝိန္ဒ္ရိယံ – ဣမာနိ ဝုစ္စန္တိ ‘‘အရူပဓါတုယာ ဧကာဒသိန္ဒ္ရိယာနိ’’။
တတ္ထ ကတမေ အရူပဓါတုယာ အဋ္ဌ ဟေတူ? တယော ကုသလဟေတူ, ဒွေ အကုသလဟေတူ, တယော အဗျာကတဟေတူ။ပေ.။ ဣမေ ဝုစ္စန္တိ ‘‘အရူပဓါတုယာ အဋ္ဌ ဟေတူ’’။
တတ္ထ ကတမေ အရူပဓါတုယာ တယော အာဟာရာ? ဖဿာဟာရော, မနောသဉ္စေတနာဟာရော, ဝိညာဏာဟာရော – ဣမေ ဝုစ္စန္တိ ‘‘အရူပဓါတုယာ တယော အာဟာရာ’’။
တတ္ထ ကတမော အရူပဓါတုယာ ဧကော ဖဿော? မနောဝိညာဏဓါတုသမ္ဖဿော – အယံ ဝုစ္စတိ ‘‘အရူပဓါတုယာ ဧကော ဖဿော’’။
တတ္ထ ကတမာ အရူပဓါတုယာ ဧကာ ဝေဒနာ။ပေ.။ ဧကာ သညာ။ပေ.။ ဧကာ စေတနာ။ပေ.။ ဧကံ စိတ္တံ? မနောဝိညာဏဓါတု – ဣဒံ ဝုစ္စတိ ‘‘အရူပဓါတုယာ ဧကံ စိတ္တံ’’။
၄. အပရိယာပန္နံ
၉၉၇. အပရိယာပန္နေ ကတိ ခန္ဓာ။ပေ.။ ကတိ စိတ္တာနိ?
အပရိယာပန္နေ စတ္တာရော ခန္ဓာ, ဒွေ အာယတနာနိ, ဒွေ ဓါတုယော, ဒွေ သစ္စာနိ, ဒွါဒသိန္ဒ္ရိယာနိ, ဆ ဟေတူ, တယော အာဟာရာ, ဧကော ဖဿော, ဧကာ ဝေဒနာ, ဧကာ သညာ, ဧကာ စေတနာ, ဧကံ စိတ္တံ။
၉၉၈. တတ္ထ ကတမေ အပရိယာပန္နေ စတ္တာရော ခန္ဓာ? ဝေဒနာက္ခန္ဓော, သညာက္ခန္ဓော , သင်္ခါရက္ခန္ဓော, ဝိညာဏက္ခန္ဓော – ဣမေ ဝုစ္စန္တိ ‘‘အပရိယာပန္နေ စတ္တာရော ခန္ဓာ’’။
တတ္ထ ကတမာနိ အပရိယာပန္နေ ဒွေ အာယတနာနိ? မနာယတနံ, ဓမ္မာယတနံ – ဣမာနိ ဝုစ္စန္တိ ‘‘အပရိယာပန္နေ ဒွေ အာယတနာနိ’’။
တတ္ထ ကတမာ အပရိယာပန္နေ ဒွေ ဓါတုယော? မနောဝိညာဏဓါတု, ဓမ္မဓါတု – ဣမာ ဝုစ္စန္တိ ‘‘အပရိယာပန္နေ ဒွေ ဓါတုယော’’။
တတ္ထ ကတမာနိ အပရိယာပန္နေ ဒွေ သစ္စာနိ? မဂ္ဂသစ္စံ, နိရောဓသစ္စံ – ဣမာနိ ဝုစ္စန္တိ ‘‘အပရိယာပန္နေ ဒွေ သစ္စာနိ’’။
တတ္ထ ကတမာနိ အပရိယာပန္နေ ဒွါဒသိန္ဒ္ရိယာနိ? မနိန္ဒ္ရိယံ, ဇီဝိတိန္ဒ္ရိယံ, သောမနဿိန္ဒ္ရိယံ, ဥပေက္ခိန္ဒ္ရိယံ, သဒ္ဓိန္ဒ္ရိယံ, ဝီရိယိန္ဒ္ရိယံ, သတိန္ဒ္ရိယံ, သမာဓိန္ဒ္ရိယံ, ပညိန္ဒ္ရိယံ, အနညာတညဿာမီတိန္ဒ္ရိယံ, အညိန္ဒ္ရိယံ, အညာတာဝိန္ဒ္ရိယံ – ဣမာနိ ဝုစ္စန္တိ ‘‘အပရိယာပန္နေ ဒွါဒသိန္ဒ္ရိယာနိ’’။
တတ္ထ ကတမေ အပရိယာပန္နေ ဆ ဟေတူ? တယော ကုသလဟေတူ, တယော အဗျာကတဟေတူ။
တတ္ထ ကတမေ တယော ကုသလဟေတူ? အလောဘော ကုသလဟေတု, အဒေါသော ကုသလဟေတု, အမောဟော ကုသလဟေတု – ဣမေ တယော ကုသလဟေတူ။
တတ္ထ ကတမေ တယော အဗျာကတဟေတူ? ကုသလာနံ ဓမ္မာနံ ဝိပါကတော အလောဘော, အဒေါသော, အမောဟော – ဣမေ တယော အဗျာကတဟေတူ။ ဣမေ ဝုစ္စန္တိ ‘‘အပရိယာပန္နေ ဆ ဟေတူ’’။
တတ္ထ ကတမေ အပရိယာပန္နေ တယော အာဟာရာ? ဖဿာဟာရော, မနောသဉ္စေတနာဟာရော, ဝိညာဏာဟာရော – ဣမေ ဝုစ္စန္တိ ‘‘အပရိယာပန္နေ တယော အာဟာရာ’’။
တတ္ထ ကတမော အပရိယာပန္နေ ဧကော ဖဿော? မနောဝိညာဏဓါတုသမ္ဖဿော – အယံ ဝုစ္စတိ ‘‘အပရိယာပန္နေ ဧကော ဖဿော’’။
တတ္ထ ကတမာ အပရိယာပန္နေ ဧကာ ဝေဒနာ။ပေ.။ ဧကာ သညာ။ပေ.။ ဧကာ စေတနာ။ပေ.။ ဧကံ စိတ္တံ? မနောဝိညာဏဓါတု – ဣဒံ ဝုစ္စတိ ‘‘အပရိယာပန္နေ ဧကံ စိတ္တံ’’။
၃. ပရိယာပန္နာပရိယာပန္နဝါရော
၁. ကာမဓါတု
၉၉၉. ပဉ္စန္နံ ခန္ဓာနံ ကတိ ကာမဓါတုပရိယာပန္နာ, ကတိ န ကာမဓါတုပရိယာပန္နာ။ပေ.။ သတ္တန္နံ စိတ္တာနံ ကတိ ကာမဓါတုပရိယာပန္နာ, ကတိ န ကာမဓါတုပရိယာပန္နာ?
၁၀၀၀. ရူပက္ခန္ဓော ကာမဓါတုပရိယာပန္နော; စတ္တာရော ခန္ဓာ သိယာ ကာမဓါတုပရိယာပန္နာ, သိယာ န ကာမဓါတုပရိယာပန္နာ။
ဒသာယတနာ ကာမဓါတုပရိယာပန္နာ; ဒွေ အာယတနာ သိယာ ကာမဓါတုပရိယာပန္နာ, သိယာ န ကာမဓါတုပရိယာပန္နာ။
သောဠသ ဓါတုယော ကာမဓါတုပရိယာပန္နာ; ဒွေ ဓါတုယော သိယာ ကာမဓါတုပရိယာပန္နာ, သိယာ န ကာမဓါတုပရိယာပန္နာ။
သမုဒယသစ္စံ ကာမဓါတုပရိယာပန္နံ; ဒွေ သစ္စာ န ကာမဓါတုပရိယာပန္နာ; ဒုက္ခသစ္စံ သိယာ ကာမဓါတုပရိယာပန္နံ, သိယာ န ကာမဓါတုပရိယာပန္နံ။
ဒသိန္ဒ္ရိယာ ကာမဓါတုပရိယာပန္နာ; တီဏိန္ဒ္ရိယာ န ကာမဓါတုပရိယာပန္နာ; နဝိန္ဒ္ရိယာ သိယာ ကာမဓါတုပရိယာပန္နာ, သိယာ န ကာမဓါတုပရိယာပန္နာ။
တယော အကုသလဟေတူ ကာမဓါတုပရိယာပန္နာ; ဆ ဟေတူ သိယာ ကာမဓါတုပရိယာပန္နာ, သိယာ န ကာမဓါတုပရိယာပန္နာ။
ကဗဠီကာရော အာဟာရော ကာမဓါတုပရိယာပန္နော; တယော အာဟာရာ သိယာ ကာမဓါတုပရိယာပန္နာ, သိယာ န ကာမဓါတုပရိယာပန္နာ။
ဆ ဖဿာ ကာမဓါတုပရိယာပန္နာ; မနောဝိညာဏဓါတုသမ္ဖဿော သိယာ ကာမဓါတု ပရိယာပန္နော, သိယာ န ကာမဓါတုပရိယာပန္နော။
ဆ ဝေဒနာ။ပေ.။ ဆ သညာ။ ဆ စေတနာ။ ဆ စိတ္တာ ကာမဓါတုပရိယာပန္နာ; မနောဝိညာဏဓါတု သိယာ ကာမဓါတုပရိယာပန္နာ, သိယာ န ကာမဓါတုပရိယာပန္နာ။
၂. ရူပဓါတု
၁၀၀၁. ပဉ္စန္နံ ခန္ဓာနံ ကတိ ရူပဓါတုပရိယာပန္နာ, ကတိ န ရူပဓါတုပရိယာပန္နာ ။ပေ.။ သတ္တန္နံ စိတ္တာနံ ကတိ ရူပဓါတုပရိယာပန္နာ, ကတိ န ရူပဓါတုပရိယာပန္နာ?
၁၀၀၂. ရူပက္ခန္ဓော န ရူပဓါတုပရိယာပန္နော; စတ္တာရော ခန္ဓာ သိယာ ရူပဓါတုပရိယာပန္နာ, သိယာ န ရူပဓါတုပရိယာပန္နာ။
ဒသာယတနာ န ရူပဓါတုပရိယာပန္နာ; ဒွေ အာယတနာ သိယာ ရူပဓါတုပရိယာပန္နာ, သိယာ န ရူပဓါတုပရိယာပန္နာ။
သောဠသ ဓါတုယော န ရူပဓါတုပရိယာပန္နာ; ဒွေ ဓါတုယော သိယာ ရူပဓါတုပရိယာပန္နာ, သိယာ န ရူပဓါတုပရိယာပန္နာ။
တီဏိ သစ္စာနိ န ရူပဓါတုပရိယာပန္နာ; ဒုက္ခသစ္စံ သိယာ ရူပဓါတုပရိယာပန္နံ, သိယာ န ရူပဓါတုပရိယာပန္နံ။
တေရသိန္ဒ္ရိယာ န ရူပဓါတုပရိယာပန္နာ; နဝိန္ဒ္ရိယာ သိယာ ရူပဓါတုပရိယာပန္နာ, သိယာ န ရူပဓါတုပရိယာပန္နာ။
တယော အကုသလဟေတူ န ရူပဓါတုပရိယာပန္နာ; ဆ ဟေတူ သိယာ ရူပဓါတုပရိယာပန္နာ, သိယာ န ရူပဓါတုပရိယာပန္နာ။
ကဗဠီကာရော အာဟာရော န ရူပဓါတုပရိယာပန္နော; တယော အာဟာရာ သိယာ ရူပဓါတုပရိယာပန္နာ, သိယာ န ရူပဓါတုပရိယာပန္နာ။
ဆ ဖဿာ န ရူပဓါတုပရိယာပန္နာ; မနောဝိညာဏဓါတုသမ္ဖဿော သိယာ ရူပဓါတုပရိယာပန္နော, သိယာ န ရူပဓါတုပရိယာပန္နော။
ဆ ဝေဒနာ။ပေ.။ ဆ သညာ။ ဆ စေတနာ။ ဆ စိတ္တာ န ရူပဓါတုပရိယာပန္နာ; မနောဝိညာဏဓါတု သိယာ ရူပဓါတုပရိယာပန္နာ, သိယာ န ရူပဓါတုပရိယာပန္နာ။
၃. အရူပဓါတု
၁၀၀၃. ပဉ္စန္နံ ခန္ဓာနံ ကတိ အရူပဓါတုပရိယာပန္နာ, ကတိ န အရူပဓါတုပရိယာပန္နာ။ပေ.။ သတ္တန္နံ စိတ္တာနံ ကတိ အရူပဓါတုပရိယာပန္နာ, ကတိ န အရူပဓါတုပရိယာပန္နာ?
၁၀၀၄. ရူပက္ခန္ဓော န အရူပဓါတုပရိယာပန္နော; စတ္တာရော ခန္ဓာ သိယာ အရူပဓါတုပရိယာပန္နာ, သိယာ န အရူပဓါတုပရိယာပန္နာ။
ဒသာယတနာ န အရူပဓါတုပရိယာပန္နာ; ဒွေ အာယတနာ သိယာ အရူပဓါတုပရိယာပန္နာ, သိယာ န အရူပဓါတုပရိယာပန္နာ။
သောဠသ ဓါတုယော န အရူပဓါတုပရိယာပန္နာ; ဒွေ ဓါတုယော သိယာ အရူပဓါတုပရိယာပန္နာ, သိယာ န အရူပဓါတုပရိယာပန္နာ။
တီဏိ သစ္စာနိ န အရူပဓါတုပရိယာပန္နာနိ။
ဒုက္ခသစ္စံ သိယာ အရူပဓါတုပရိယာပန္နံ, သိယာ န အရူပဓါတုပရိယာပန္နံ။
စုဒ္ဒသိန္ဒ္ရိယာ န အရူပဓါတုပရိယာပန္နာ; အဋ္ဌိန္ဒ္ရိယာ သိယာ အရူပဓါတုပရိယာပန္နာ, သိယာ န အရူပဓါတုပရိယာပန္နာ။
တယော အကုသလဟေတူ န အရူပဓါတုပရိယာပန္နာ; ဆ ဟေတူ သိယာ အရူပဓါတုပရိယာပန္နာ, သိယာ န အရူပဓါတုပရိယာပန္နာ။
ကဗဠီကာရော အာဟာရော န အရူပဓါတုပရိယာပန္နော; တယော အာဟာရာ သိယာ အရူပဓါတုပရိယာပန္နာ, သိယာ န အရူပဓါတုပရိယာပန္နာ။
ဆ ဖဿာ န အရူပဓါတုပရိယာပန္နာ; မနောဝိညာဏဓါတုသမ္ဖဿော သိယာ အရူပဓါတုပရိယာပန္နော, သိယာ န အရူပဓါတုပရိယာပန္နော။
ဆ ဝေဒနာ။ပေ.။ ဆ သညာ ။ ဆ စေတနာ။ ဆ စိတ္တာ န အရူပဓါတုပရိယာပန္နာ; မနောဝိညာဏဓါတု သိယာ အရူပဓါတုပရိယာပန္နာ, သိယာ န အရူပဓါတုပရိယာပန္နာ။
၄. ပရိယာပန္နာပရိယာပန္နံ
၁၀၀၅. ပဉ္စန္နံ ခန္ဓာနံ ကတိ ပရိယာပန္နာ, ကတိ အပရိယာပန္နာ။ပေ.။ သတ္တန္နံ စိတ္တာနံ ကတိ ပရိယာပန္နာ, ကတိ အပရိယာပန္နာ?
၁၀၀၆. ရူပက္ခန္ဓော ပရိယာပန္နော; စတ္တာရော ခန္ဓာ သိယာ ပရိယာပန္နာ, သိယာ အပရိယာပန္နာ။
ဒသာယတနာ ပရိယာပန္နာ; ဒွေ အာယတနာ သိယာ ပရိယာပန္နာ, သိယာ အပရိယာပန္နာ။
သောဠသ ဓါတုယော ပရိယာပန္နာ; ဒွေ ဓါတုယော သိယာ ပရိယာပန္နာ, သိယာ အပရိယာပန္နာ။
ဒွေ သစ္စာ ပရိယာပန္နာ; ဒွေ သစ္စာ အပရိယာပန္နာ။
ဒသိန္ဒ္ရိယာ ပရိယာပန္နာ, တီဏိန္ဒ္ရိယာ အပရိယာပန္နာ; နဝိန္ဒ္ရိယာ သိယာ ပရိယာပန္နာ, သိယာ အပရိယာပန္နာ။
တယော အကုသလဟေတူ ပရိယာပန္နာ; ဆ ဟေတူ သိယာ ပရိယာပန္နာ, သိယာ အပရိယာပန္နာ။
ကဗဠီကာရော အာဟာရော ပရိယာပန္နော; တယော အာဟာရာ သိယာ ပရိယာပန္နာ, သိယာ အပရိယာပန္နာ။
ဆ ဖဿာ ပရိယာပန္နာ; မနောဝိညာဏဓါတုသမ္ဖဿော သိယာ ပရိယာပန္နော, သိယာ အပရိယာပန္နော။
ဆ ဝေဒနာ။ပေ.။ ဆ သညာ။ ဆ စေတနာ။ ဆ စိတ္တာ ပရိယာပန္နာ; မနောဝိညာဏဓါတု သိယာ ပရိယာပန္နာ, သိယာ အပရိယာပန္နာ။
၄. ဓမ္မဒဿနဝါရော
၁. ကာမဓါတု
၁၀၀၇. ကာမဓါတုယာ ဥပပတ္တိက္ခဏေ ကတိ ခန္ဓာ ပါတုဘဝန္တိ။ပေ.။ ကတိ စိတ္တာနိ ပါတုဘဝန္တိ?
ကာမဓါတုယာ ဥပပတ္တိက္ခဏေ သဗ္ဗေသံ ပဉ္စက္ခန္ဓာ ပါတုဘဝန္တိ; ကဿစိ ဧကာဒသာယတနာနိ ပါတုဘဝန္တိ; ကဿစိ ဒသာယတနာနိ ပါတုဘဝန္တိ; ကဿစိ အပရာနိ ဒသာယတနာနိ ပါတုဘဝန္တိ; ကဿစိ နဝါယတနာနိ ပါတုဘဝန္တိ; ကဿစိ သတ္တာယတနာနိ ပါတုဘဝန္တိ; ကဿစိ ဧကာဒသ ဓါတုယော ပါတုဘဝန္တိ; ကဿစိ ဒသ ဓါတုယော ပါတုဘဝန္တိ; ကဿစိ အပရာ ဒသ ဓါတုယော ပါတုဘဝန္တိ; ကဿစိ နဝ ဓါတုယော ပါတုဘဝန္တိ; ကဿစိ သတ္တ ဓါတုယော ပါတုဘဝန္တိ; သဗ္ဗေသံ ဧကံ သစ္စံ ပါတုဘဝတိ; ကဿစိ စုဒ္ဒသိန္ဒ္ရိယာနိ ပါတုဘဝန္တိ; ကဿစိ တေရသိန္ဒ္ရိယာနိ ပါတုဘဝန္တိ; ကဿစိ အပရာနိ တေရသိန္ဒ္ရိယာနိ ပါတုဘဝန္တိ; ကဿစိ ဒွါဒသိန္ဒ္ရိယာနိ ပါတုဘဝန္တိ; ကဿစိ ဒသိန္ဒ္ရိယာနိ ပါတုဘဝန္တိ; ကဿစိ နဝိန္ဒ္ရိယာနိ ပါတုဘဝန္တိ; ကဿစိ အပရာနိ နဝိန္ဒ္ရိယာနိ ပါတုဘဝန္တိ; ကဿစိ အဋ္ဌိန္ဒ္ရိယာနိ ပါတုဘဝန္တိ; ကဿစိ အပရာနိ အဋ္ဌိန္ဒ္ရိယာနိ ပါတုဘဝန္တိ; ကဿစိ သတ္တိန္ဒ္ရိယာနိ ပါတုဘဝန္တိ; ကဿစိ ပဉ္စိန္ဒ္ရိယာနိ ပါတုဘဝန္တိ; ကဿစိ စတ္တာရိန္ဒ္ရိယာနိ ပါတုဘဝန္တိ; ကဿစိ တယော ဟေတူ ပါတုဘဝန္တိ; ကဿစိ ဒွေ ဟေတူ ပါတုဘဝန္တိ; ကဿစိ [ကေစိ (သျာ.)] အဟေတုကာ ပါတုဘဝန္တိ ; သဗ္ဗေသံ စတ္တာရော အာဟာရာ ပါတုဘဝန္တိ; သဗ္ဗေသံ ဧကော ဖဿော ပါတုဘဝတိ; သဗ္ဗေသံ ဧကာ ဝေဒနာ။ ဧကာ သညာ။ ဧကာ စေတနာ။ ဧကံ စိတ္တံ ပါတုဘဝတိ။
၁၀၀၈. ကာမဓါတုယာ ဥပပတ္တိက္ခဏေ သဗ္ဗေသံ ကတမေ ပဉ္စက္ခန္ဓာ ပါတုဘဝန္တိ? ရူပက္ခန္ဓော။ပေ.။ ဝိညာဏက္ခန္ဓော – ကာမဓါတုယာ ဥပပတ္တိက္ခဏေ သဗ္ဗေသံ ဣမေ ပဉ္စက္ခန္ဓာ ပါတုဘဝန္တိ။
၁၀၀၉. ကာမဓါတုယာ ဥပပတ္တိက္ခဏေ ကဿ ဧကာဒသာယတနာနိ ပါတုဘဝန္တိ? ကာမာဝစရာနံ ဒေဝါနံ, ပဌမကပ္ပိကာနံ မနုဿာနံ, ဩပပါတိကာနံ ပေတာနံ, ဩပပါတိကာနံ အသုရာနံ, ဩပပါတိကာနံ တိရစ္ဆာနဂတာနံ, နေရယိကာနံ ပရိပုဏ္ဏာယတနာနံ ဥပပတ္တိက္ခဏေ ဧကာဒသာယတနာနိ ပါတုဘဝန္တိ – စက္ခာယတနံ, ရူပါယတနံ, သောတာယတနံ, ဃာနာယတနံ, ဂန္ဓာယတနံ, ဇိဝှာယတနံ, ရသာယတနံ, ကာယာယတနံ, ဖောဋ္ဌဗ္ဗာယတနံ, မနာယတနံ, ဓမ္မာယတနံ။ ကာမဓါတုယာ ဥပပတ္တိက္ခဏေ ဧတေသံ ဣမာနိ ဧကာဒသာယတနာနိ ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ ဒသာယတနာနိ ပါတုဘဝန္တိ? ဩပပါတိကာနံ ပေတာနံ, ဩပပါတိကာနံ အသုရာနံ, ဩပပါတိကာနံ တိရစ္ဆာနဂတာနံ နေရယိကာနံ, ဇစ္စန္ဓာနံ ဥပပတ္တိက္ခဏေ ဒသာယတနာနိ ပါတုဘဝန္တိ – ရူပါယတနံ, သောတာယတနံ, ဃာနာယတနံ, ဂန္ဓာယတနံ, ဇိဝှာယတနံ, ရသာယတနံ , ကာယာယတနံ, ဖောဋ္ဌဗ္ဗာယတနံ, မနာယတနံ, ဓမ္မာယတနံ။ ကာမဓါတုယာ ဥပပတ္တိက္ခဏေ ဧတေသံ ဣမာနိ ဒသာယတနာနိ ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ အပရာနိ ဒသာယတနာနိ ပါတုဘဝန္တိ? ဩပပါတိကာနံ ပေတာနံ, ဩပပါတိကာနံ အသုရာနံ, ဩပပါတိကာနံ တိရစ္ဆာနဂတာနံ နေရယိကာနံ, ဇစ္စဗဓိရာနံ ဥပပတ္တိက္ခဏေ ဒသာယတနာနိ ပါတုဘဝန္တိ – စက္ခာယတနံ, ရူပါယတနံ, ဃာနာယတနံ, ဂန္ဓာယတနံ, ဇိဝှာယတနံ, ရသာယတနံ, ကာယာယတနံ, ဖောဋ္ဌဗ္ဗာယတနံ, မနာယတနံ, ဓမ္မာယတနံ။ ကာမဓါတုယာ ဥပပတ္တိက္ခဏေ ဧတေသံ ဣမာနိ ဒသာယတနာနိ ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ နဝါယတနာနိ ပါတုဘဝန္တိ? ဩပပါတိကာနံ ပေတာနံ, ဩပပါတိကာနံ အသုရာနံ, ဩပပါတိကာနံ တိရစ္ဆာနဂတာနံ နေရယိကာနံ, ဇစ္စန္ဓဗဓိရာနံ ဥပပတ္တိက္ခဏေ နဝါယတနာနိ ပါတုဘဝန္တိ – ရူပါယတနံ, ဃာနာယတနံ, ဂန္ဓာယတနံ, ဇိဝှာယတနံ, ရသာယတနံ, ကာယာယတနံ, ဖောဋ္ဌဗ္ဗာယတနံ, မနာယတနံ, ဓမ္မာယတနံ။ ကာမဓါတုယာ ဥပပတ္တိက္ခဏေ ဧတေသံ ဣမာနိ နဝါယတနာနိ ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ သတ္တာယတနာနိ ပါတုဘဝန္တိ? ဂဗ္ဘသေယျကာနံ သတ္တာနံ ဥပပတ္တိက္ခဏေ သတ္တာယတနာနိ ပါတုဘဝန္တိ – ရူပါယတနံ, ဂန္ဓာယတနံ, ရသာယတနံ, ကာယာယတနံ, ဖောဋ္ဌဗ္ဗာယတနံ, မနာယတနံ, ဓမ္မာယတနံ။ ကာမဓါတုယာ ဥပပတ္တိက္ခဏေ ဧတေသံ ဣမာနိ သတ္တာယတနာနိ ပါတုဘဝန္တိ။
၁၀၁၀. ကာမဓါတုယာ ဥပပတ္တိက္ခဏေ ကဿ ဧကာဒသ ဓါတုယော ပါတုဘဝန္တိ? ကာမာဝစရာနံ ဒေဝါနံ, ပဌမကပ္ပိကာနံ မနုဿာနံ, ဩပပါတိကာနံ ပေတာနံ, ဩပပါတိကာနံ အသုရာနံ, ဩပပါတိကာနံ တိရစ္ဆာနဂတာနံ နေရယိကာနံ ပရိပုဏ္ဏာယတနာနံ ဥပပတ္တိက္ခဏေ ဧကာဒသ ဓါတုယော ပါတုဘဝန္တိ – စက္ခုဓါတု, ရူပဓါတု, သောတဓါတု, ဃာနဓါတု, ဂန္ဓဓါတု, ဇိဝှာဓါတု, ရသဓါတု, ကာယဓါတု, ဖောဋ္ဌဗ္ဗဓါတု, မနောဝိညာဏဓါတု, ဓမ္မဓါတု။ ကာမဓါတုယာ ဥပပတ္တိက္ခဏေ ဧတေသံ ဣမာ ဧကာဒသ ဓါတုယော ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ ဒသ ဓါတုယော ပါတုဘဝန္တိ? ဩပပါတိကာနံ ပေတာနံ, ဩပပါတိကာနံ အသုရာနံ, ဩပပါတိကာနံ တိရစ္ဆာနဂတာနံ နေရယိကာနံ , ဇစ္စန္ဓာနံ ဥပပတ္တိက္ခဏေ ဒသ ဓါတုယော ပါတုဘဝန္တိ – ရူပဓါတု, သောတဓါတု, ဃာနဓါတု, ဂန္ဓဓါတု, ဇိဝှာဓါတု, ရသဓါတု, ကာယဓါတု, ဖောဋ္ဌဗ္ဗဓါတု, မနောဝိညာဏဓါတု, ဓမ္မဓါတု။ ကာမဓါတုယာ ဥပပတ္တိက္ခဏေ ဧတေသံ ဣမာ ဒသ ဓါတုယော ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ အပရာ ဒသ ဓါတုယော ပါတုဘဝန္တိ? ဩပပါတိကာနံ ပေတာနံ, ဩပပါတိကာနံ အသုရာနံ, ဩပပါတိကာနံ တိရစ္ဆာနဂတာနံ နေရယိကာနံ, ဇစ္စဗဓိရာနံ ဥပပတ္တိက္ခဏေ ဒသ ဓါတုယော ပါတုဘဝန္တိ – စက္ခုဓါတု, ရူပဓါတု, ဃာနဓါတု, ဂန္ဓဓါတု, ဇိဝှာဓါတု, ရသဓါတု, ကာယဓါတု, ဖောဋ္ဌဗ္ဗဓါတု, မနောဝိညာဏဓါတု, ဓမ္မဓါတု။ ကာမဓါတုယာ ဥပပတ္တိက္ခဏေ ဧတေသံ ဣမာ ဒသ ဓါတုယော ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ နဝ ဓါတုယော ပါတုဘဝန္တိ? ဩပပါတိကာနံ ပေတာနံ, ဩပပါတိကာနံ အသုရာနံ, ဩပပါတိကာနံ တိရစ္ဆာနဂတာနံ နေရယိကာနံ, ဇစ္စန္ဓဗဓိရာနံ ဥပပတ္တိက္ခဏေ နဝ ဓါတုယော ပါတုဘဝန္တိ – ရူပဓါတု, ဃာနဓါတု, ဂန္ဓဓါတု, ဇိဝှာဓါတု, ရသဓါတု, ကာယဓါတု, ဖောဋ္ဌဗ္ဗဓါတု, မနောဝိညာဏဓါတု, ဓမ္မဓါတု။ ကာမဓါတုယာ ဥပပတ္တိက္ခဏေ ဧတေသံ ဣမာ နဝ ဓါတုယော ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ သတ္တ ဓါတုယော ပါတုဘဝန္တိ? ဂဗ္ဘသေယျကာနံ သတ္တာနံ ဥပပတ္တိက္ခဏေ သတ္တ ဓါတုယော ပါတုဘဝန္တိ – ရူပဓါတု, ဂန္ဓဓါတု, ရသဓါတု, ကာယဓါတု, ဖောဋ္ဌဗ္ဗဓါတု, မနောဝိညာဏဓါတု, ဓမ္မဓါတု။ ကာမဓါတုယာ ဥပပတ္တိက္ခဏေ ဧတေသံ ဣမာ သတ္တ ဓါတုယော ပါတုဘဝန္တိ။
၁၀၁၁. ကာမဓါတုယာ ဥပပတ္တိက္ခဏေ သဗ္ဗေသံ ကတမံ ဧကံ သစ္စံ ပါတုဘဝတိ? ဒုက္ခသစ္စံ – ကာမဓါတုယာ ဥပပတ္တိက္ခဏေ သဗ္ဗေသံ ဣဒံ ဧကံ သစ္စံ ပါတုဘဝတိ။
၁၀၁၂. ကာမဓါတုယာ ဥပပတ္တိက္ခဏေ ကဿ စုဒ္ဒသိန္ဒ္ရိယာနိ ပါတုဘဝန္တိ? ကာမာဝစရာနံ ဒေဝါနံ, သဟေတုကာနံ ဉာဏသမ္ပယုတ္တာနံ ဥပပတ္တိက္ခဏေ စုဒ္ဒသိန္ဒ္ရိယာနိ ပါတုဘဝန္တိ – စက္ခုန္ဒ္ရိယံ, သောတိန္ဒ္ရိယံ, ဃာနိန္ဒ္ရိယံ, ဇိဝ္ဟိန္ဒ္ရိယံ, ကာယိန္ဒ္ရိယံ , မနိန္ဒ္ရိယံ, ဣတ္ထိန္ဒ္ရိယံ ဝါ ပုရိသိန္ဒ္ရိယံ ဝါ, ဇီဝိတိန္ဒ္ရိယံ, သောမနဿိန္ဒ္ရိယံ ဝါ ဥပေက္ခိန္ဒ္ရိယံ ဝါ, သဒ္ဓိန္ဒ္ရိယံ, ဝီရိယိန္ဒ္ရိယံ, သတိန္ဒ္ရိယံ, သမာဓိန္ဒ္ရိယံ, ပညိန္ဒ္ရိယံ။ ကာမဓါတုယာ ဥပပတ္တိက္ခဏေ ဧတေသံ ဣမာနိ စုဒ္ဒသိန္ဒ္ရိယာနိ ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ တေရသိန္ဒ္ရိယာနိ ပါတုဘဝန္တိ? ကာမာဝစရာနံ ဒေဝါနံ သဟေတုကာနံ ဉာဏဝိပ္ပယုတ္တာနံ ဥပပတ္တိက္ခဏေ တေရသိန္ဒ္ရိယာနိ ပါတုဘဝန္တိ – စက္ခုန္ဒ္ရိယံ, သောတိန္ဒ္ရိယံ, ဃာနိန္ဒ္ရိယံ, ဇိဝ္ဟိန္ဒ္ရိယံ, ကာယိန္ဒ္ရိယံ, မနိန္ဒ္ရိယံ, ဣတ္ထိန္ဒ္ရိယံ ဝါ ပုရိသိန္ဒ္ရိယံ ဝါ, ဇီဝိတိန္ဒ္ရိယံ, သောမနဿိန္ဒ္ရိယံ ဝါ ဥပေက္ခိန္ဒ္ရိယံ ဝါ, သဒ္ဓိန္ဒ္ရိယံ, ဝီရိယိန္ဒ္ရိယံ, သတိန္ဒ္ရိယံ, သမာဓိန္ဒ္ရိယံ။ ကာမဓါတုယာ ဥပပတ္တိက္ခဏေ ဧတေသံ ဣမာနိ တေရသိန္ဒ္ရိယာနိ ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ အပရာနိ တေရသိန္ဒ္ရိယာနိ ပါတုဘဝန္တိ? ပဌမကပ္ပိကာနံ မနုဿာနံ သဟေတုကာနံ ဉာဏသမ္ပယုတ္တာနံ ဥပပတ္တိက္ခဏေ တေရသိန္ဒ္ရိယာနိ ပါတုဘဝန္တိ – စက္ခုန္ဒ္ရိယံ, သောတိန္ဒ္ရိယံ, ဃာနိန္ဒ္ရိယံ, ဇိဝ္ဟိန္ဒ္ရိယံ, ကာယိန္ဒ္ရိယံ, မနိန္ဒ္ရိယံ, ဇီဝိတိန္ဒ္ရိယံ, သောမနဿိန္ဒ္ရိယံ ဝါ ဥပေက္ခိန္ဒ္ရိယံ ဝါ, သဒ္ဓိန္ဒ္ရိယံ , ဝီရိယိန္ဒ္ရိယံ, သတိန္ဒ္ရိယံ, သမာဓိန္ဒ္ရိယံ, ပညိန္ဒ္ရိယံ။ ကာမဓါတုယာ ဥပပတ္တိက္ခဏေ ဧတေသံ ဣမာနိ တေရသိန္ဒ္ရိယာနိ ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ ဒွါဒသိန္ဒ္ရိယာနိ ပါတုဘဝန္တိ? ပဌမကပ္ပိကာနံ မနုဿာနံ သဟေတုကာနံ ဉာဏဝိပ္ပယုတ္တာနံ ဥပပတ္တိက္ခဏေ ဒွါဒသိန္ဒ္ရိယာနိ ပါတုဘဝန္တိ – စက္ခုန္ဒ္ရိယံ, သောတိန္ဒ္ရိယံ, ဃာနိန္ဒ္ရိယံ, ဇိဝ္ဟိန္ဒ္ရိယံ, ကာယိန္ဒ္ရိယံ, မနိန္ဒ္ရိယံ, ဇီဝိတိန္ဒ္ရိယံ, သောမနဿိန္ဒ္ရိယံ ဝါ ဥပေက္ခိန္ဒ္ရိယံ ဝါ, သဒ္ဓိန္ဒ္ရိယံ, ဝီရိယိန္ဒ္ရိယံ, သတိန္ဒ္ရိယံ, သမာဓိန္ဒ္ရိယံ။ ကာမဓါတုယာ ဥပပတ္တိက္ခဏေ ဧတေသံ ဣမာနိ ဒွါဒသိန္ဒ္ရိယာနိ ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ ဒသိန္ဒ္ရိယာနိ ပါတုဘဝန္တိ? ဂဗ္ဘသေယျကာနံ သတ္တာနံ သဟေတုကာနံ ဉာဏသမ္ပယုတ္တာနံ ဥပပတ္တိက္ခဏေ ဒသိန္ဒ္ရိယာနိ ပါတုဘဝန္တိ – ကာယိန္ဒ္ရိယံ, မနိန္ဒ္ရိယံ, ဣတ္ထိန္ဒ္ရိယံ ဝါ ပုရိသိန္ဒ္ရိယံ ဝါ, ဇီဝိတိန္ဒ္ရိယံ, သောမနဿိန္ဒ္ရိယံ ဝါ ဥပေက္ခိန္ဒ္ရိယံ ဝါ, သဒ္ဓိန္ဒ္ရိယံ, ဝီရိယိန္ဒ္ရိယံ, သတိန္ဒ္ရိယံ, သမာဓိန္ဒ္ရိယံ, ပညိန္ဒ္ရိယံ။ ကာမဓါတုယာ ဥပပတ္တိက္ခဏေ ဧတေသံ ဣမာနိ ဒသိန္ဒ္ရိယာနိ ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ နဝိန္ဒ္ရိယာနိ ပါတုဘဝန္တိ? ဂဗ္ဘသေယျကာနံ သတ္တာနံ သဟေတုကာနံ ဉာဏဝိပ္ပယုတ္တာနံ ဥပပတ္တိက္ခဏေ နဝိန္ဒ္ရိယာနိ ပါတုဘဝန္တိ – ကာယိန္ဒ္ရိယံ, မနိန္ဒ္ရိယံ, ဣတ္ထိန္ဒ္ရိယံ ဝါ ပုရိသိန္ဒ္ရိယံ ဝါ, ဇီဝိတိန္ဒ္ရိယံ, သောမနဿိန္ဒ္ရိယံ ဝါ ဥပေက္ခိန္ဒ္ရိယံ ဝါ, သဒ္ဓိန္ဒ္ရိယံ, ဝီရိယိန္ဒ္ရိယံ, သတိန္ဒ္ရိယံ, သမာဓိန္ဒ္ရိယံ။ ကာမဓါတုယာ ဥပပတ္တိက္ခဏေ ဧတေသံ ဣမာနိ နဝိန္ဒ္ရိယာနိ ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ အပရာနိ နဝိန္ဒ္ရိယာနိ ပါတုဘဝန္တိ? ဩပပါတိကာနံ ပေတာနံ, ဩပပါတိကာနံ အသုရာနံ, ဩပပါတိကာနံ တိရစ္ဆာနဂတာနံ နေရယိကာနံ ပရိပုဏ္ဏာယတနာနံ ဥပပတ္တိက္ခဏေ နဝိန္ဒ္ရိယာနိ ပါတုဘဝန္တိ – စက္ခုန္ဒ္ရိယံ, သောတိန္ဒ္ရိယံ, ဃာနိန္ဒ္ရိယံ, ဇိဝ္ဟိန္ဒ္ရိယံ, ကာယိန္ဒ္ရိယံ, မနိန္ဒ္ရိယံ, ဣတ္ထိန္ဒ္ရိယံ ဝါ ပုရိသိန္ဒ္ရိယံ ဝါ, ဇီဝိတိန္ဒ္ရိယံ , ဥပေက္ခိန္ဒ္ရိယံ။ ကာမဓါတုယာ ဥပပတ္တိက္ခဏေ ဧတေသံ ဣမာနိ နဝိန္ဒ္ရိယာနိ ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ အဋ္ဌိန္ဒ္ရိယာနိ ပါတုဘဝန္တိ? ဩပပါတိကာနံ ပေတာနံ, ဩပပါတိကာနံ အသုရာနံ, ဩပပါတိကာနံ တိရစ္ဆာနဂတာနံ နေရယိကာနံ, ဇစ္စန္ဓာနံ ဥပပတ္တိက္ခဏေ အဋ္ဌိန္ဒ္ရိယာနိ ပါတုဘဝန္တိ – သောတိန္ဒ္ရိယံ, ဃာနိန္ဒ္ရိယံ, ဇိဝ္ဟိန္ဒ္ရိယံ, ကာယိန္ဒ္ရိယံ, မနိန္ဒ္ရိယံ, ဣတ္ထိန္ဒ္ရိယံ ဝါ ပုရိသိန္ဒ္ရိယံ ဝါ, ဇီဝိတိန္ဒ္ရိယံ, ဥပေက္ခိန္ဒ္ရိယံ။ ကာမဓါတုယာ ဥပပတ္တိက္ခဏေ ဧတေသံ ဣမာနိ အဋ္ဌိန္ဒ္ရိယာနိ ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ အပရာနိ အဋ္ဌိန္ဒ္ရိယာနိ ပါတုဘဝန္တိ? ဩပပါတိကာနံ ပေတာနံ, ဩပပါတိကာနံ အသုရာနံ, ဩပပါတိကာနံ တိရစ္ဆာနဂတာနံ နေရယိကာနံ, ဇစ္စဗဓိရာနံ ဥပပတ္တိက္ခဏေ အဋ္ဌိန္ဒ္ရိယာနိ ပါတုဘဝန္တိ – စက္ခုန္ဒ္ရိယံ, ဃာနိန္ဒ္ရိယံ, ဇိဝ္ဟိန္ဒ္ရိယံ, ကာယိန္ဒ္ရိယံ မနိန္ဒ္ရိယံ, ဣတ္ထိန္ဒ္ရိယံ ဝါ ပုရိသိန္ဒ္ရိယံ ဝါ, ဇီဝိတိန္ဒ္ရိယံ, ဥပေက္ခိန္ဒ္ရိယံ။ ကာမဓါတုယာ ဥပပတ္တိက္ခဏေ ဧတေသံ ဣမာနိ အဋ္ဌိန္ဒ္ရိယာနိ ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ သတ္တိန္ဒ္ရိယာနိ ပါတုဘဝန္တိ? ဩပပါတိကာနံ ပေတာနံ, ဩပပါတိကာနံ အသုရာနံ, ဩပပါတိကာနံ တိရစ္ဆာနဂတာနံ နေရယိကာနံ, ဇစ္စန္ဓဗဓိရာနံ ဥပပတ္တိက္ခဏေ သတ္တိန္ဒ္ရိယာနိ ပါတုဘဝန္တိ – ဃာနိန္ဒ္ရိယံ , ဇိဝ္ဟိန္ဒ္ရိယံ, ကာယိန္ဒ္ရိယံ, မနိန္ဒ္ရိယံ, ဣတ္ထိန္ဒ္ရိယံ ဝါ ပုရိသိန္ဒ္ရိယံ ဝါ, ဇီဝိတိန္ဒ္ရိယံ, ဥပေက္ခိန္ဒ္ရိယံ။ ကာမဓါတုယာ ဥပပတ္တိက္ခဏေ ဧတေသံ ဣမာနိ သတ္တိန္ဒ္ရိယာနိ ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ ပဉ္စိန္ဒ္ရိယာနိ ပါတုဘဝန္တိ? ဂဗ္ဘသေယျကာနံ သတ္တာနံ အဟေတုကာနံ, ဌပေတွာ နပုံသကာနံ, ဥပပတ္တိက္ခဏေ ပဉ္စိန္ဒ္ရိယာနိ ပါတုဘဝန္တိ – ကာယိန္ဒ္ရိယံ, မနိန္ဒ္ရိယံ, ဣတ္ထိန္ဒ္ရိယံ ဝါ ပုရိသိန္ဒ္ရိယံ ဝါ, ဇီဝိတိန္ဒ္ရိယံ, ဥပေက္ခိန္ဒ္ရိယံ။ ကာမဓါတုယာ ဥပပတ္တိက္ခဏေ ဧတေသံ ဣမာနိ ပဉ္စိန္ဒ္ရိယာနိ ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ စတ္တာရိန္ဒ္ရိယာနိ ပါတုဘဝန္တိ? ဂဗ္ဘသေယျကာနံ သတ္တာနံ အဟေတုကာနံ, နပုံသကာနံ ဥပပတ္တိက္ခဏေ စတ္တာရိန္ဒ္ရိယာနိ ပါတုဘဝန္တိ – ကာယိန္ဒ္ရိယံ, မနိန္ဒ္ရိယံ, ဇီဝိတိန္ဒ္ရိယံ , ဥပေက္ခိန္ဒ္ရိယံ။ ကာမဓါတုယာ ဥပပတ္တိက္ခဏေ ဧတေသံ ဣမာနိ စတ္တာရိန္ဒ္ရိယာနိ ပါတုဘဝန္တိ။
၁၀၁၃. ကာမဓါတုယာ ဥပပတ္တိက္ခဏေ ကဿ တယော ဟေတူ ပါတုဘဝန္တိ? ကာမာဝစရာနံ ဒေဝါနံ, ပဌမကပ္ပိကာနံ မနုဿာနံ, ဂဗ္ဘသေယျကာနံ သတ္တာနံ သဟေတုကာနံ ဉာဏသမ္ပယုတ္တာနံ ဥပပတ္တိက္ခဏေ တယော ဟေတူ ပါတုဘဝန္တိ – အလောဘော ဝိပါကဟေတု, အဒေါသော ဝိပါကဟေတု, အမောဟော ဝိပါကဟေတု။ ကာမဓါတုယာ ဥပပတ္တိက္ခဏေ ဧတေသံ ဣမေ တယော ဟေတူ ပါတုဘဝန္တိ။
ကာမဓါတုယာ ဥပပတ္တိက္ခဏေ ကဿ ဒွေ ဟေတူ ပါတုဘဝန္တိ? ကာမာဝစရာနံ ဒေဝါနံ, ပဌမကပ္ပိကာနံ မနုဿာနံ, ဂဗ္ဘသေယျကာနံ သတ္တာနံ သဟေတုကာနံ ဉာဏဝိပ္ပယုတ္တာနံ ဥပပတ္တိက္ခဏေ ဒွေ ဟေတူ ပါတုဘဝန္တိ – အလောဘော ဝိပါကဟေတု, အဒေါသော ဝိပါကဟေတု။ ကာမဓါတုယာ ဥပပတ္တိက္ခဏေ ဧတေသံ ဣမေ ဒွေ ဟေတူ ပါတုဘဝန္တိ။ အဝသေသာနံ သတ္တာနံ [အဝသေသာ သတ္တာ (?)] အဟေတုကာ ပါတုဘဝန္တိ။
၁၀၁၄. ကာမဓါတုယာ ဥပပတ္တိက္ခဏေ သဗ္ဗေသံ ကတမေ စတ္တာရော အာဟာရာ ပါတုဘဝန္တိ။ ကဗဠီကာရော အာဟာရော, ဖဿာဟာရော, မနောသဉ္စေတနာဟာရော, ဝိညာဏာဟာရော – ကာမဓါတုယာ ဥပပတ္တိက္ခဏေ သဗ္ဗေသံ ဣမေ စတ္တာရော အာဟာရာ ပါတုဘဝန္တိ။
ကာမဓါတုယာ ဥပပတ္တိက္ခဏေ သဗ္ဗေသံ ကတမော ဧကော ဖဿော ပါတုဘဝတိ? မနောဝိညာဏဓါတုသမ္ဖဿော – ကာမဓါတုယာ ဥပပတ္တိက္ခဏေ သဗ္ဗေသံ အယံ ဧကော ဖဿော ပါတုဘဝတိ။
ကာမဓါတုယာ ဥပပတ္တိက္ခဏေ သဗ္ဗေသံ ကတမာ ဧကာ ဝေဒနာ ။ ဧကာ သညာ။ ဧကာ စေတနာ။ ဧကံ စိတ္တံ ပါတုဘဝတိ? မနောဝိညာဏဓါတု – ကာမဓါတုယာ ဥပပတ္တိက္ခဏေ သဗ္ဗေသံ ဣဒံ ဧကံ စိတ္တံ ပါတုဘဝတိ။
၂. ရူပဓါတု
၁၀၁၅. ရူပဓါတုယာ ဥပပတ္တိက္ခဏေ ကတိ ခန္ဓာ ပါတုဘဝန္တိ။ပေ.။ ကတိ စိတ္တာနိ ပါတုဘဝန္တိ?
ရူပဓါတုယာ ဥပပတ္တိက္ခဏေ, ဌပေတွာ အသညသတ္တာနံ ဒေဝါနံ, ပဉ္စက္ခန္ဓာ ပါတုဘဝန္တိ, ပဉ္စာယတနာနိ ပါတုဘဝန္တိ, ပဉ္စ ဓါတုယော ပါတုဘဝန္တိ, ဧကံ သစ္စံ ပါတုဘဝတိ, ဒသိန္ဒ္ရိယာနိ ပါတုဘဝန္တိ, တယော ဟေတူ ပါတုဘဝန္တိ, တယော အာဟာရာ ပါတုဘဝန္တိ, ဧကော ဖဿော ပါတုဘဝတိ, ဧကာ ဝေဒနာ။ ဧကာ သညာ။ ဧကာ စေတနာ။ ဧကံ စိတ္တံ ပါတုဘဝတိ။
၁၀၁၆. ရူပဓါတုယာ ဥပပတ္တိက္ခဏေ ကတမေ ပဉ္စက္ခန္ဓာ ပါတုဘဝန္တိ ? ရူပက္ခန္ဓော, ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော – ရူပဓါတုယာ ဥပပတ္တိက္ခဏေ ဣမေ ပဉ္စက္ခန္ဓာ ပါတုဘဝန္တိ။
ရူပဓါတုယာ ဥပပတ္တိက္ခဏေ ကတမာနိ ပဉ္စာယတနာနိ ပါတုဘဝန္တိ? စက္ခာယတနံ, ရူပါယတနံ, သောတာယတနံ, မနာယတနံ, ဓမ္မာယတနံ – ရူပဓါတုယာ ဥပပတ္တိက္ခဏေ ဣမာနိ ပဉ္စာယတနာနိ ပါတုဘဝန္တိ။
ရူပဓါတုယာ ဥပပတ္တိက္ခဏေ ကတမာ ပဉ္စ ဓါတုယော ပါတုဘဝန္တိ? စက္ခုဓါတု, ရူပဓါတု, သောတဓါတု, မနောဝိညာဏဓါတု, ဓမ္မဓါတု – ရူပဓါတုယာ ဥပပတ္တိက္ခဏေ ဣမာ ပဉ္စ ဓါတုယော ပါတုဘဝန္တိ။
ရူပဓါတုယာ ဥပပတ္တိက္ခဏေ ကတမံ ဧကံ သစ္စံ ပါတုဘဝတိ? ဒုက္ခသစ္စံ – ရူပဓါတုယာ ဥပပတ္တိက္ခဏေ ဣဒံ ဧကံ သစ္စံ ပါတုဘဝတိ။
ရူပဓါတုယာ ဥပပတ္တိက္ခဏေ ကတမာနိ ဒသိန္ဒ္ရိယာနိ ပါတုဘဝန္တိ? စက္ခုန္ဒ္ရိယံ, သောတိန္ဒ္ရိယံ, မနိန္ဒ္ရိယံ, ဇီဝိတိန္ဒ္ရိယံ, သောမနဿိန္ဒ္ရိယံ ဝါ ဥပေက္ခိန္ဒ္ရိယံ ဝါ, သဒ္ဓိန္ဒ္ရိယံ, ဝီရိယိန္ဒ္ရိယံ , သတိန္ဒ္ရိယံ, သမာဓိန္ဒ္ရိယံ, ပညိန္ဒ္ရိယံ – ရူပဓါတုယာ ဥပပတ္တိက္ခဏေ ဣမာနိ ဒသိန္ဒ္ရိယာနိ ပါတုဘဝန္တိ။
ရူပဓါတုယာ ဥပပတ္တိက္ခဏေ ကတမေ တယော ဟေတူ ပါတုဘဝန္တိ? အလောဘော ဝိပါကဟေတု, အဒေါသော ဝိပါကဟေတု, အမောဟော ဝိပါကဟေတု – ရူပဓါတုယာ ဥပပတ္တိက္ခဏေ ဣမေ တယော ဟေတူ ပါတုဘဝန္တိ။
ရူပဓါတုယာ ဥပပတ္တိက္ခဏေ ကတမေ တယော အာဟာရာ ပါတုဘဝန္တိ? ဖဿာဟာရော, မနောသဉ္စေတနာဟာရော, ဝိညာဏာဟာရော – ရူပဓါတုယာ ဥပပတ္တိက္ခဏေ ဣမေ တယော အာဟာရာ ပါတုဘဝန္တိ။
ရူပဓါတုယာ ဥပပတ္တိက္ခဏေ ကတမော ဧကော ဖဿော ပါတုဘဝတိ? မနောဝိညာဏဓါတုသမ္ဖဿော – ရူပဓါတုယာ ဥပပတ္တိက္ခဏေ အယံ ဧကော ဖဿော ပါတုဘဝတိ။
ရူပဓါတုယာ ဥပပတ္တိက္ခဏေ ကတမာ ဧကာ ဝေဒနာ။ ဧကာ သညာ။ ဧကာ စေတနာ။ ဧကံ စိတ္တံ ပါတုဘဝတိ? မနောဝိညာဏဓါတု – ရူပဓါတုယာ ဥပပတ္တိက္ခဏေ ဣဒံ ဧကံ စိတ္တံ ပါတုဘဝတိ။
၃. အသညသတ္တာ
၁၀၁၇. အသညသတ္တာနံ ဒေဝါနံ ဥပပတ္တိက္ခဏေ ကတိ ခန္ဓာ ပါတုဘဝန္တိ။ပေ.။ ကတိ စိတ္တာနိ ပါတုဘဝန္တိ?
အသညသတ္တာနံ ဒေဝါနံ ဥပပတ္တိက္ခဏေ ဧကော ခန္ဓော ပါတုဘဝတိ – ရူပက္ခန္ဓော; ဒွေ အာယတနာနိ ပါတုဘဝန္တိ – ရူပါယတနံ, ဓမ္မာယတနံ; ဒွေ ဓါတုယော ပါတုဘဝန္တိ – ရူပဓါတု, ဓမ္မဓါတု; ဧကံ သစ္စံ ပါတုဘဝတိ – ဒုက္ခသစ္စံ; ဧကိန္ဒ္ရိယံ ပါတုဘဝတိ – ရူပဇီဝိတိန္ဒ္ရိယံ။ အသညသတ္တာ ဒေဝါ အဟေတုကာ အနာဟာရာ အဖဿကာ အဝေဒနကာ အသညကာ အစေတနကာ အစိတ္တကာ ပါတုဘဝန္တိ။
၄. အရူပဓါတု
၁၀၁၈. အရူပဓါတုယာ ဥပပတ္တိက္ခဏေ ကတိ ခန္ဓာ ပါတုဘဝန္တိ။ပေ.။ ကတိ စိတ္တာနိ ပါတုဘဝန္တိ?
အရူပဓါတုယာ ဥပပတ္တိက္ခဏေ စတ္တာရော ခန္ဓာ ပါတုဘဝန္တိ, ဒွေ အာယတနာနိ ပါတုဘဝန္တိ, ဒွေ ဓါတုယော ပါတုဘဝန္တိ, ဧကံ သစ္စံ ပါတုဘဝတိ, အဋ္ဌိန္ဒ္ရိယာနိ ပါတုဘဝန္တိ, တယော ဟေတူ ပါတုဘဝန္တိ, တယော အာဟာရာ ပါတုဘဝန္တိ, ဧကော ဖဿော ပါတုဘဝတိ, ဧကာ ဝေဒနာ။ ဧကာ သညာ။ ဧကာ စေတနာ။ ဧကံ စိတ္တံ ပါတုဘဝတိ။
၁၀၁၉. အရူပဓါတုယာ ဥပပတ္တိက္ခဏေ ကတမေ စတ္တာရော ခန္ဓာ ပါတုဘဝန္တိ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော – အရူပဓါတုယာ ဥပပတ္တိက္ခဏေ ဣမေ စတ္တာရော ခန္ဓာ ပါတုဘဝန္တိ။
အရူပဓါတုယာ ဥပပတ္တိက္ခဏေ ကတမာနိ ဒွေ အာယတနာနိ ပါတုဘဝန္တိ? မနာယတနံ, ဓမ္မာယတနံ – အရူပဓါတုယာ ဥပပတ္တိက္ခဏေ ဣမာနိ ဒွေ အာယတနာနိ ပါတုဘဝန္တိ။
အရူပဓါတုယာ ဥပပတ္တိက္ခဏေ ကတမာ ဒွေ ဓါတုယော ပါတုဘဝန္တိ? မနောဝိညာဏဓါတု, ဓမ္မဓါတု – အရူပဓါတုယာ ဥပပတ္တိက္ခဏေ ဣမာ ဒွေ ဓါတုယော ပါတုဘဝန္တိ။
အရူပဓါတုယာ ဥပပတ္တိက္ခဏေ ကတမံ ဧကံ သစ္စံ ပါတုဘဝတိ? ဒုက္ခသစ္စံ – အရူပဓါတုယာ ဥပပတ္တိက္ခဏေ ဣဒံ ဧကံ သစ္စံ ပါတုဘဝတိ။
အရူပဓါတုယာ ဥပပတ္တိက္ခဏေ ကတမာနိ အဋ္ဌိန္ဒ္ရိယာနိ ပါတုဘဝန္တိ? မနိန္ဒ္ရိယံ, ဇီဝိတိန္ဒ္ရိယံ, ဥပေက္ခိန္ဒ္ရိယံ, သဒ္ဓိန္ဒ္ရိယံ, ဝီရိယိန္ဒ္ရိယံ, သတိန္ဒ္ရိယံ, သမာဓိန္ဒ္ရိယံ, ပညိန္ဒ္ရိယံ – အရူပဓါတုယာ ဥပပတ္တိက္ခဏေ ဣမာနိ အဋ္ဌိန္ဒ္ရိယာနိ ပါတုဘဝန္တိ။
အရူပဓါတုယာ ဥပပတ္တိက္ခဏေ ကတမေ တယော ဟေတူ ပါတုဘဝန္တိ? အလောဘော ဝိပါကဟေတု, အဒေါသော ဝိပါကဟေတု, အမောဟော ဝိပါကဟေတု – အရူပဓါတုယာ ဥပပတ္တိက္ခဏေ ဣမေ တယော ဟေတူ ပါတုဘဝန္တိ။
အရူပဓါတုယာ ဥပပတ္တိက္ခဏေ ကတမေ တယော အာဟာရာ ပါတုဘဝန္တိ? ဖဿာဟာရော, မနောသဉ္စေတနာဟာရော, ဝိညာဏာဟာရော – အရူပဓါတုယာ ဥပပတ္တိက္ခဏေ ဣမေ တယော အာဟာရာ ပါတုဘဝန္တိ။
အရူပဓါတုယာ ဥပပတ္တိက္ခဏေ ကတမော ဧကော ဖဿော ပါတုဘဝတိ? မနောဝိညာဏဓါတုသမ္ဖဿော – အရူပဓါတုယာ ဥပပတ္တိက္ခဏေ အယံ ဧကော ဖဿော ပါတုဘဝတိ။
အရူပဓါတုယာ ဥပပတ္တိက္ခဏေ ကတမာ ဧကာ ဝေဒနာ။ပေ.။ ဧကာ သညာ။ ဧကာ စေတနာ။ ဧကံ စိတ္တံ ပါတုဘဝတိ? မနောဝိညာဏဓါတု – အရူပဓါတုယာ ဥပပတ္တိက္ခဏေ ဣဒံ ဧကံ စိတ္တံ ပါတုဘဝတိ။
၅. ဘူမန္တရဒဿနဝါရော
၁၀၂၀. ကာမာဝစရာ ဓမ္မာ, န ကာမာဝစရာ ဓမ္မာ, ရူပါဝစရာ ဓမ္မာ, န ရူပါဝစရာ ဓမ္မာ, အရူပါဝစရာ ဓမ္မာ, န အရူပါဝစရာ ဓမ္မာ, ပရိယာပန္နာ ဓမ္မာ, အပရိယာပန္နာ ဓမ္မာ။
ကတမေ ဓမ္မာ ကာမာဝစရာ? ဟေဋ္ဌတော အဝီစိနိရယံ ပရိယန္တံ ကရိတွာ, ဥပရိတော ပရနိမ္မိတဝသဝတ္တီ ဒေဝေ အန္တောကရိတွာ, ယံ ဧတသ္မိံ အန္တရေ ဧတ္ထာဝစရာ ဧတ္ထ ပရိယာပန္နာ ခန္ဓဓါတုအာယတနာ; ရူပံ, ဝေဒနာ, သညာ, သင်္ခါရာ, ဝိညာဏံ – ဣမေ ဓမ္မာ ကာမာဝစရာ။
ကတမေ ဓမ္မာ န ကာမာဝစရာ? ရူပါဝစရာ, အရူပါဝစရာ, အပရိယာပန္နာ – ဣမေ ဓမ္မာ န ကာမာဝစရာ။
ကတမေ ဓမ္မာ ရူပါဝစရာ? ဟေဋ္ဌတော ဗြဟ္မလောကံ ပရိယန္တံ ကရိတွာ, ဥပရိတော အကနိဋ္ဌေ ဒေဝေ အန္တောကရိတွာ , ယံ ဧတသ္မိံ အန္တရေ ဧတ္ထာဝစရာ ဧတ္ထ ပရိယာပန္နာ သမာပန္နဿ ဝါ ဥပပန္နဿ ဝါ ဒိဋ္ဌဓမ္မသုခဝိဟာရိဿ ဝါ စိတ္တစေတသိကာ ဓမ္မာ – ဣမေ ဓမ္မာ ရူပါဝစရာ။
ကတမေ ဓမ္မာ န ရူပါဝစရာ? ကာမာဝစရာ, အရူပါဝစရာ, အပရိယာပန္နာ – ဣမေ ဓမ္မာ န ရူပါဝစရာ။
ကတမေ ဓမ္မာ အရူပါဝစရာ? ဟေဋ္ဌတော အာကာသာနဉ္စာယတနူပဂေ ဒေဝေ ပရိယန္တံ ကရိတွာ, ဥပရိတော နေဝသညာနာသညာယတနူပဂေ ဒေဝေ အန္တောကရိတွာ, ယံ ဧတသ္မိံ အန္တရေ ဧတ္ထာဝစရာ ဧတ္ထ ပရိယာပန္နာ သမာပန္နဿ ဝါ ဥပပန္နဿ ဝါ ဒိဋ္ဌဓမ္မသုခဝိဟာရိဿ ဝါ စိတ္တစေတသိကာ ဓမ္မာ – ဣမေ ဓမ္မာ အရူပါဝစရာ။
ကတမေ ဓမ္မာ န အရူပါဝစရာ? ကာမာဝစရာ, ရူပါဝစရာ, အပရိယာပန္နာ – ဣမေ ဓမ္မာ န အရူပါဝစရာ။
ကတမေ ဓမ္မာ ပရိယာပန္နာ? သာသဝါ ကုသလာကုသလဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, ရူပက္ခန္ဓော, ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော – ဣမေ ဓမ္မာ ပရိယာပန္နာ။
ကတမေ ဓမ္မာ အပရိယာပန္နာ? မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ အပရိယာပန္နာ။
၆. ဥပ္ပါဒကကမ္မအာယုပ္ပမာဏဝါရော
၁. ဥပ္ပါဒကကမ္မံ
၁၀၂၁. ဒေဝါတိ ။ တယော ဒေဝါ – သမ္မုတိဒေဝါ [သမ္မတိဒေဝါ (သျာ.)], ဥပပတ္တိဒေဝါ, ဝိသုဒ္ဓိဒေဝါ။
သမ္မုတိဒေဝါ နာမ – ရာဇာနော, ဒေဝိယော, ကုမာရာ။
ဥပပတ္တိဒေဝါ နာမ – စာတုမဟာရာဇိကေ [စာတုမ္မဟာရာဇိကေ (သီ. သျာ.)] ဒေဝေ ဥပါဒါယ တဒုပရိ ဒေဝါ။
ဝိသုဒ္ဓိဒေဝါ နာမ – အရဟန္တော ဝုစ္စန္တိ။
ဒါနံ ဒတွာ, သီလံ သမာဒိယိတွာ, ဥပေါသထကမ္မံ ကတွာ ကတ္ထ ဥပပဇ္ဇန္တိ? ဒါနံ ဒတွာ, သီလံ သမာဒိယိတွာ, ဥပေါသထကမ္မံ ကတွာ အပ္ပေကစ္စေ ခတ္တိယမဟာသာလာနံ သဟဗျတံ ဥပပဇ္ဇန္တိ, အပ္ပေကစ္စေ ဗြာဟ္မဏမဟာသာလာနံ သဟဗျတံ ဥပပဇ္ဇန္တိ, အပ္ပေကစ္စေ ဂဟပတိမဟာသာလာနံ သဟဗျတံ ဥပပဇ္ဇန္တိ, အပ္ပေကစ္စေ စာတုမဟာရာဇိကာနံ ဒေဝါနံ သဟဗျတံ ဥပပဇ္ဇန္တိ, အပ္ပေကစ္စေ တာဝတိံသာနံ ဒေဝါနံ သဟဗျတံ ဥပပဇ္ဇန္တိ, အပ္ပေကစ္စေ ယာမာနံ ဒေဝါနံ သဟဗျတံ ဥပပဇ္ဇန္တိ, အပ္ပေကစ္စေ တုသိတာနံ ဒေဝါနံ သဟဗျတံ ဥပပဇ္ဇန္တိ, အပ္ပေကစ္စေ နိမ္မာနရတီနံ ဒေဝါနံ သဟဗျတံ ဥပပဇ္ဇန္တိ, အပ္ပေကစ္စေ ပရနိမ္မိတဝသဝတ္တီနံ ဒေဝါနံ သဟဗျတံ ဥပပဇ္ဇန္တိ။
၂. အာယုပ္ပမာဏံ
၁၀၂၂. မနုဿာနံ ကိတ္တကံ အာယုပ္ပမာဏံ? ဝဿသတံ, အပ္ပံ ဝါ ဘိယျော [အပ္ပံ ဝါ ဘိယျော ဝါ (သျာ. က.) ဒီ. နိ. ၂.၇]။
၁၀၂၃. စာတုမဟာရာဇိကာနံ ဒေဝါနံ ကိတ္တကံ အာယုပ္ပမာဏံ? ယာနိ မာနုသကာနိ ပညာသ ဝဿာနိ, စာတုမ္မဟာရာဇိကာနံ ဒေဝါနံ ဧသော ဧကော ရတ္တိန္ဒိဝေါ [ရတ္တိဒိဝေါ (က.) အ. နိ. ၃.၇၁]။ တာယ ရတ္တိယာ တိံသ ရတ္တိယော မာသော။ တေန မာသေန ဒွါဒသမာသိယော သံဝစ္ဆရော။ တေန သံဝစ္ဆရေန ဒိဗ္ဗာနိ ပဉ္စ ဝဿသတာနိ စာတုမ္မဟာရာဇိကာနံ ဒေဝါနံ အာယုပ္ပမာဏံ။ မနုဿာနံ ဂဏနာယ ကိတ္တကံ ဟောတိ? နဝုတိ ဝဿသတသဟဿာနိ။
တာဝတိံသာနံ ဒေဝါနံ ကိတ္တကံ အာယုပ္ပမာဏံ? ယံ မာနုသကံ ဝဿသတံ, တာဝတိံသာနံ ဒေဝါနံ ဧသော ဧကော ရတ္တိန္ဒိဝေါ။ တာယ ရတ္တိယာ တိံသ ရတ္တိယော မာသော။ တေန မာသေန ဒွါဒသမာသိယော သံဝစ္ဆရော။ တေန သံဝစ္ဆရေန ဒိဗ္ဗံ ဝဿသဟဿံ တာဝတိံသာနံ ဒေဝါနံ အာယုပ္ပမာဏံ။ မနုဿာနံ ဂဏနာယ ကိတ္တကံ ဟောတိ? တိဿော စ ဝဿကောဋိယော သဋ္ဌိ စ ဝဿသတသဟဿာနိ။
ယာမာနံ ဒေဝါနံ ကိတ္တကံ အာယုပ္ပမာဏံ? ယာနိ မာနုသကာနိ ဒွေ ဝဿသတာနိ, ယာမာနံ ဒေဝါနံ ဧသော ဧကော ရတ္တိန္ဒိဝေါ။ တာယ ရတ္တိယာ တိံသရတ္တိယော မာသော ။ တေန မာသေန ဒွါဒသမာသိယော သံဝစ္ဆရော။ တေန သံဝစ္ဆရေန ဒိဗ္ဗာနိ ဒွေ ဝဿသဟဿာနိ ယာမာနံ ဒေဝါနံ အာယုပ္ပမာဏံ။ မနုဿာနံ ဂဏနာယ ကိတ္တကံ ဟောတိ? စုဒ္ဒသဉ္စ ဝဿကောဋိယော စတ္တာရီသဉ္စ ဝဿသတသဟဿာနိ။
တုသိတာနံ ဒေဝါနံ ကိတ္တကံ အာယုပ္ပမာဏံ? ယာနိ မာနုသကာနိ စတ္တာရိ ဝဿသတာနိ, တုသိတာနံ ဒေဝါနံ ဧသော ဧကော ရတ္တိန္ဒိဝေါ။ တာယ ရတ္တိယာ တိံသရတ္တိယော မာသော။ တေန မာသေန ဒွါဒသမာသိယော သံဝစ္ဆရော။ တေန သံဝစ္ဆရေန ဒိဗ္ဗာနိ စတ္တာရိ ဝဿသဟဿာနိ တုသိတာနံ ဒေဝါနံ အာယုပ္ပမာဏံ။ မနုဿာနံ ဂဏနာယ ကိတ္တကံ ဟောတိ? သတ္တပညာသ ဝဿကောဋိယော သဋ္ဌိ စ ဝဿသတသဟဿာနိ။
နိမ္မာနရတီနံ ဒေဝါနံ ကိတ္တကံ အာယုပ္ပမာဏံ? ယာနိ မာနုသကာနိ အဋ္ဌ ဝဿသတာနိ, နိမ္မာနရတီနံ ဒေဝါနံ ဧသော ဧကော ရတ္တိန္ဒိဝေါ။ တာယ ရတ္တိယာ တိံသရတ္တိယော မာသော။ တေန မာသေန ဒွါဒသမာသိယော သံဝစ္ဆရော။ တေန သံဝစ္ဆရေန ဒိဗ္ဗာနိ အဋ္ဌ ဝဿသဟဿာနိ နိမ္မာနရတီနံ ဒေဝါနံ အာယုပ္ပမာဏံ။ မနုဿာနံ ဂဏနာယ ကိတ္တကံ ဟောတိ? ဒွေ ဝဿကောဋိသတာနိ တိံသဉ္စ ဝဿကောဋိယော စတ္တာရီသဉ္စ ဝဿသတသဟဿာနိ။
ပရနိမ္မိတဝသဝတ္တီနံ ဒေဝါနံ ကိတ္တကံ အာယုပ္ပမာဏံ? ယာနိ မာနုသကာနိ သောဠသ ဝဿသတာနိ, ပရနိမ္မိတဝသဝတ္တီနံ ဒေဝါနံ ဧသော ဧကော ရတ္တိန္ဒိဝေါ။ တာယ ရတ္တိယာ တိံသရတ္တိယော မာသော။ တေန မာသေန ဒွါဒသမာသိယော သံဝစ္ဆရော။ တေန သံဝစ္ဆရေန ဒိဗ္ဗာနိ သောဠသ ဝဿသဟဿာနိ ပရနိမ္မိတဝသဝတ္တီနံ ဒေဝါနံ အာယုပ္ပမာဏံ။ မနုဿာနံ ဂဏနာယ ကိတ္တကံ ဟောတိ? နဝ စ ဝဿကောဋိသတာနိ ဧကဝီသဉ္စ ဝဿကောဋိယော သဋ္ဌိ စ ဝဿသတသဟဿာနီတိ။
ဆ ဧတေ [ဆပိ တေ (သျာ.)] ကာမာဝစရာ၊ သဗ္ဗကာမသမိဒ္ဓိနော။
သဗ္ဗေသံ ဧကသင်္ခါတော၊ အာယု ဘဝတိ ကိတ္တကော။
ဒွါဒသ ကောဋိသတံ တေသံ၊ အဋ္ဌဝီသဉ္စ ကောဋိယော။
ပညာသ သတသဟဿာနိ၊ ဝဿဂ္ဂေန ပကာသိတာတိ။
၁၀၂၄. ပဌမံ ဈာနံ ပရိတ္တံ ဘာဝေတွာ ကတ္ထ ဥပပဇ္ဇန္တိ? ပဌမံ ဈာနံ ပရိတ္တံ ဘာဝေတွာ ဗြဟ္မပါရိသဇ္ဇာနံ ဒေဝါနံ သဟဗျတံ ဥပပဇ္ဇန္တိ။ တေသံ ကိတ္တကံ အာယုပ္ပမာဏံ? ကပ္ပဿ တတိယော ဘာဂေါ။
ပဌမံ ဈာနံ မဇ္ဈိမံ ဘာဝေတွာ ကတ္ထ ဥပပဇ္ဇန္တိ? ပဌမံ ဈာနံ မဇ္ဈိမံ ဘာဝေတွာ ဗြဟ္မပုရောဟိတာနံ ဒေဝါနံ သဟဗျတံ ဥပပဇ္ဇန္တိ။ တေသံ ကိတ္တကံ အာယုပ္ပမာဏံ? ဥပဍ္ဎကပ္ပော။
ပဌမံ ဈာနံ ပဏီတံ ဘာဝေတွာ ကတ္ထ ဥပပဇ္ဇန္တိ? ပဌမံ ဈာနံ ပဏီတံ ဘာဝေတွာ မဟာဗြဟ္မာနံ ဒေဝါနံ သဟဗျတံ ဥပပဇ္ဇန္တိ။ တေသံ ကိတ္တကံ အာယုပ္ပမာဏံ? ကပ္ပော [ဧကော ကပ္ပော (သျာ.)]။
၁၀၂၅. ဒုတိယံ ဈာနံ ပရိတ္တံ ဘာဝေတွာ ကတ္ထ ဥပပဇ္ဇန္တိ? ဒုတိယံ ဈာနံ ပရိတ္တံ ဘာဝေတွာ ပရိတ္တာဘာနံ ဒေဝါနံ သဟဗျတံ ဥပပဇ္ဇန္တိ။ တေသံ ကိတ္တကံ အာယုပ္ပမာဏံ? ဒွေ ကပ္ပါ။
ဒုတိယံ ဈာနံ မဇ္ဈိမံ ဘာဝေတွာ ကတ္ထ ဥပပဇ္ဇန္တိ? ဒုတိယံ ဈာနံ မဇ္ဈိမံ ဘာဝေတွာ အပ္ပမာဏာဘာနံ ဒေဝါနံ သဟဗျတံ ဥပပဇ္ဇန္တိ။ တေသံ ကိတ္တကံ အာယုပ္ပမာဏံ? စတ္တာရော ကပ္ပါ။
ဒုတိယံ ဈာနံ ပဏီတံ ဘာဝေတွာ ကတ္ထ ဥပပဇ္ဇန္တိ? ဒုတိယံ ဈာနံ ပဏီတံ ဘာဝေတွာ အာဘဿရာနံ ဒေဝါနံ သဟဗျတံ ဥပပဇ္ဇန္တိ။ တေသံ ကိတ္တကံ အာယုပ္ပမာဏံ? အဋ္ဌ ကပ္ပါ။
၁၀၂၆. တတိယံ ဈာနံ ပရိတ္တံ ဘာဝေတွာ ကတ္ထ ဥပပဇ္ဇန္တိ? တတိယံ ဈာနံ ပရိတ္တံ ဘာဝေတွာ ပရိတ္တသုဘာနံ ဒေဝါနံ သဟဗျတံ ဥပပဇ္ဇန္တိ။ တေသံ ကိတ္တကံ အာယုပ္ပမာဏံ? သောဠသ ကပ္ပါ။
တတိယံ ဈာနံ မဇ္ဈိမံ ဘာဝေတွာ ကတ္ထ ဥပပဇ္ဇန္တိ? တတိယံ ဈာနံ မဇ္ဈိမံ ဘာဝေတွာ အပ္ပမာဏသုဘာနံ ဒေဝါနံ သဟဗျတံ ဥပပဇ္ဇန္တိ။ တေသံ ကိတ္တကံ အာယုပ္ပမာဏံ? ဗာတ္တိံသ ကပ္ပါ။
တတိယံ ဈာနံ ပဏီတံ ဘာဝေတွာ ကတ္ထ ဥပပဇ္ဇန္တိ? တတိယံ ဈာနံ ပဏီတံ ဘာဝေတွာ သုဘကိဏှာနံ ဒေဝါနံ သဟဗျတံ ဥပပဇ္ဇန္တိ။ တေသံ ကိတ္တကံ အာယုပ္ပမာဏံ? စတုသဋ္ဌိ ကပ္ပါ။
၁၀၂၇. စတုတ္ထံ ဈာနံ ဘာဝေတွာ အာရမ္မဏနာနတ္တတာ မနသိကာရနာနတ္တတာ ဆန္ဒနာနတ္တတာ ပဏိဓိနာနတ္တတာ အဓိမောက္ခနာနတ္တတာ အဘိနီဟာရနာနတ္တတာ ပညာနာနတ္တတာ အပ္ပေကစ္စေ အသညသတ္တာနံ ဒေဝါနံ သဟဗျတံ ဥပပဇ္ဇန္တိ, အပ္ပေကစ္စေ ဝေဟပ္ဖလာနံ ဒေဝါနံ သဟဗျတံ ဥပပဇ္ဇန္တိ, အပ္ပေကစ္စေ အဝိဟာနံ ဒေဝါနံ သဟဗျတံ ဥပပဇ္ဇန္တိ, အပ္ပေကစ္စေ အတပ္ပါနံ ဒေဝါနံ သဟဗျတံ ဥပပဇ္ဇန္တိ, အပ္ပေကစ္စေ သုဒဿာနံ ဒေဝါနံ သဟဗျတံ ဥပပဇ္ဇန္တိ, အပ္ပေကစ္စေ သုဒဿီနံ ဒေဝါနံ သဟဗျတံ ဥပပဇ္ဇန္တိ, အပ္ပေကစ္စေ အကနိဋ္ဌာနံ ဒေဝါနံ သဟဗျတံ ဥပပဇ္ဇန္တိ, အပ္ပေကစ္စေ အာကာသာနဉ္စာယတနူပဂါနံ ဒေဝါနံ သဟဗျတံ ဥပပဇ္ဇန္တိ, အပ္ပေကစ္စေ ဝိညာဏဉ္စာယတနူပဂါနံ ဒေဝါနံ သဟဗျတံ ဥပပဇ္ဇန္တိ, အပ္ပေကစ္စေ အာကိဉ္စညာယတနူပဂါနံ ဒေဝါနံ သဟဗျတံ ဥပပဇ္ဇန္တိ, အပ္ပေကစ္စေ နေဝသညာနာသညာယတနူပဂါနံ ဒေဝါနံ သဟဗျတံ ဥပပဇ္ဇန္တိ။
အသညသတ္တာနဉ္စ ဝေဟပ္ဖလာနဉ္စ ဒေဝါနံ ကိတ္တကံ အာယုပ္ပမာဏံ? ပဉ္စကပ္ပသတာနိ။
အဝိဟာနံ ဒေဝါနံ ကိတ္တကံ အာယုပ္ပမာဏံ? ကပ္ပသဟဿံ။
အတပ္ပါနံ ဒေဝါနံ ကိတ္တကံ အာယုပ္ပမာဏံ? ဒွေ ကပ္ပသဟဿာနိ။
သုဒဿာနံ ဒေဝါနံ ကိတ္တကံ အာယုပ္ပမာဏံ? စတ္တာရိ ကပ္ပသဟဿာနိ။
သုဒဿီနံ ဒေဝါနံ ကိတ္တကံ အာယုပ္ပမာဏံ? အဋ္ဌ ကပ္ပသဟဿာနိ။
အကနိဋ္ဌာနံ ဒေဝါနံ ကိတ္တကံ အာယုပ္ပမာဏံ? သောဠသ ကပ္ပသဟဿာနိ။
၁၀၂၈. အာကာသာနဉ္စာယတနူပဂါနံ ဒေဝါနံ ကိတ္တကံ အာယုပ္ပမာဏံ? ဝီသတိ ကပ္ပသဟဿာနိ။
ဝိညာဏဉ္စာယတနူပဂါနံ ဒေဝါနံ ကိတ္တကံ အာယုပ္ပမာဏံ? စတ္တာရီသ ကပ္ပသဟဿာနိ။
အာကိဉ္စညာယတနူပဂါနံ ဒေဝါနံ ကိတ္တကံ အာယုပ္ပမာဏံ? သဋ္ဌိ ကပ္ပသဟဿာနိ။
နေဝသညာနာသညာယတနူပဂါနံ ဒေဝါနံ ကိတ္တကံ အာယုပ္ပမာဏံ? စတုရာသီတိ ကပ္ပသဟဿာနီတိ။
၁၀၂၉. ဥက္ခိတ္တာ ပုညတေဇေန, ကာမရူပဂတိံ ဂတာ။
ဘဝဂ္ဂတမ္ပိ [ဘဝဂ္ဂံ ဝါပိ (သျာ.)] သမ္ပတ္တာ၊ ပုနာဂစ္ဆန္တိ [ပုန ဂစ္ဆန္တိ (သျာ.)] ဒုဂ္ဂတိံ။
တာဝ ဒီဃာယုကာ သတ္တာ၊ စဝန္တိ အာယုသင်္ခယာ။
နတ္ထိ ကောစိ ဘဝေါ နိစ္စော၊ ဣတိ ဝုတ္တံ မဟေသိနာ။
တသ္မာ ဟိ ဓီရာ နိပကာ၊ နိပုဏာ အတ္ထစိန္တကာ။
ဇရာမရဏမောက္ခာယ၊ ဘာဝေန္တိ မဂ္ဂမုတ္တမံ။
ဘာဝယိတွာ သုစိံ မဂ္ဂံ၊ နိဗ္ဗာနောဂဓဂါမိနံ။
သဗ္ဗာသဝေ ပရိညာယ၊ ပရိနိဗ္ဗန္တိ အနာသဝါတိ။
၇. အဘိညေယျာဒိဝါရော
၁၀၃၀. ပဉ္စန္နံ ခန္ဓာနံ ကတိ အဘိညေယျာ, ကတိ ပရိညေယျာ, ကတိ ပဟာတဗ္ဗာ, ကတိ ဘာဝေတဗ္ဗာ, ကတိ သစ္ဆိကာတဗ္ဗာ, ကတိ န ပဟာတဗ္ဗာ, န ဘာဝေတဗ္ဗာ, န သစ္ဆိကာတဗ္ဗာ။ပေ.။ သတ္တန္နံ စိတ္တာနံ ကတိ အဘိညေယျာ, ကတိ ပရိညေယျာ, ကတိ ပဟာတဗ္ဗာ, ကတိ ဘာဝေတဗ္ဗာ, ကတိ သစ္ဆိကာတဗ္ဗာ, ကတိ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ?
၁၀၃၁. ရူပက္ခန္ဓော အဘိညေယျော ပရိညေယျော န ပဟာတဗ္ဗော န ဘာဝေတဗ္ဗော န သစ္ဆိကာတဗ္ဗော။ စတ္တာရော ခန္ဓာ အဘိညေယျာ ပရိညေယျာ, သိယာ ပဟာတဗ္ဗာ, သိယာ ဘာဝေတဗ္ဗာ, သိယာ သစ္ဆိကာတဗ္ဗာ, သိယာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ။
ဒသာယတနာ အဘိညေယျာ ပရိညေယျာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ။ ဒွေ အာယတနာ အဘိညေယျာ ပရိညေယျာ, သိယာ ပဟာတဗ္ဗာ, သိယာ ဘာဝေတဗ္ဗာ, သိယာ သစ္ဆိကာတဗ္ဗာ, သိယာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ။
သောဠသ ဓါတုယော အဘိညေယျာ ပရိညေယျာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ။ ဒွေ ဓါတုယော အဘိညေယျာ ပရိညေယျာ, သိယာ ပဟာတဗ္ဗာ, သိယာ ဘာဝေတဗ္ဗာ, သိယာ သစ္ဆိကာတဗ္ဗာ, သိယာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ။
သမုဒယသစ္စံ အဘိညေယျံ ပရိညေယျံ ပဟာတဗ္ဗံ န ဘာဝေတဗ္ဗံ န သစ္ဆိကာတဗ္ဗံ။ မဂ္ဂသစ္စံ အဘိညေယျံ ပရိညေယျံ န ပဟာတဗ္ဗံ ဘာဝေတဗ္ဗံ န သစ္ဆိကာတဗ္ဗံ ။ နိရောဓသစ္စံ အဘိညေယျံ ပရိညေယျံ န ပဟာတဗ္ဗံ န ဘာဝေတဗ္ဗံ သစ္ဆိကာတဗ္ဗံ။ ဒုက္ခသစ္စံ အဘိညေယျံ ပရိညေယျံ, သိယာ ပဟာတဗ္ဗံ, န ဘာဝေတဗ္ဗံ, န သစ္ဆိကာတဗ္ဗံ, သိယာ န ပဟာတဗ္ဗံ။
နဝိန္ဒ္ရိယာ အဘိညေယျာ ပရိညေယျာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ။ ဒေါမနဿိန္ဒ္ရိယံ အဘိညေယျံ ပရိညေယျံ ပဟာတဗ္ဗံ န ဘာဝေတဗ္ဗံ န သစ္ဆိကာတဗ္ဗံ။ အနညာတညဿာမီတိန္ဒ္ရိယံ အဘိညေယျံ ပရိညေယျံ န ပဟာတဗ္ဗံ ဘာဝေတဗ္ဗံ န သစ္ဆိကာတဗ္ဗံ။ အညိန္ဒ္ရိယံ အဘိညေယျံ ပရိညေယျံ န ပဟာတဗ္ဗံ, သိယာ ဘာဝေတဗ္ဗံ, သိယာ သစ္ဆိကာတဗ္ဗံ။ အညာတာဝိန္ဒ္ရိယံ အဘိညေယျံ ပရိညေယျံ န ပဟာတဗ္ဗံ န ဘာဝေတဗ္ဗံ သစ္ဆိကာတဗ္ဗံ။ တီဏိန္ဒ္ရိယာ အဘိညေယျာ ပရိညေယျာ န ပဟာတဗ္ဗာ, သိယာ ဘာဝေတဗ္ဗာ, သိယာ သစ္ဆိကာတဗ္ဗာ, သိယာ န ဘာဝေတဗ္ဗာ, သစ္ဆိကာတဗ္ဗာ။ ဆ ဣန္ဒ္ရိယာ အဘိညေယျာ ပရိညေယျာ, သိယာ ပဟာတဗ္ဗာ, သိယာ ဘာဝေတဗ္ဗာ, သိယာ သစ္ဆိကာတဗ္ဗာ, သိယာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ။
တယော အကုသလဟေတူ အဘိညေယျာ ပရိညေယျာ ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ။ တယော ကုသလဟေတူ အဘိညေယျာ ပရိညေယျာ န ပဟာတဗ္ဗာ, သိယာ ဘာဝေတဗ္ဗာ, န သစ္ဆိကာတဗ္ဗာ, သိယာ န ဘာဝေတဗ္ဗာ။ တယော အဗျာကတဟေတူ အဘိညေယျာ ပရိညေယျာ န ပဟာတဗ္ဗာ န ဘာဝေတဗ္ဗာ, သိယာ သစ္ဆိကာတဗ္ဗာ , သိယာ န သစ္ဆိကာတဗ္ဗာ။
ကဗဠီကာရော အာဟာရော အဘိညေယျော ပရိညေယျော န ပဟာတဗ္ဗော န ဘာဝေတဗ္ဗော န သစ္ဆိကာတဗ္ဗော။ တယော အာဟာရာ အဘိညေယျာ ပရိညေယျာ, သိယာ ပဟာတဗ္ဗာ, သိယာ ဘာဝေတဗ္ဗာ, သိယာ သစ္ဆိကာတဗ္ဗာ, သိယာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ။
ဆ ဖဿာ အဘိညေယျာ ပရိညေယျာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ။ မနောဝိညာဏဓါတုသမ္ဖဿော အဘိညေယျော ပရိညေယျော, သိယာ ပဟာတဗ္ဗော, သိယာ ဘာဝေတဗ္ဗော, သိယာ သစ္ဆိကာတဗ္ဗော, သိယာ န ပဟာတဗ္ဗော န ဘာဝေတဗ္ဗော န သစ္ဆိကာတဗ္ဗော။
ဆ ဝေဒနာ။ပေ.။ ဆ သညာ။ ဆ စေတနာ။ ဆ စိတ္တာ အဘိညေယျာ ပရိညေယျာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ။ မနောဝိညာဏဓါတု အဘိညေယျာ ပရိညေယျာ, သိယာ ပဟာတဗ္ဗာ, သိယာ ဘာဝေတဗ္ဗာ, သိယာ သစ္ဆိကာတဗ္ဗာ , သိယာ န ပဟာတဗ္ဗာ န ဘာဝေတဗ္ဗာ န သစ္ဆိကာတဗ္ဗာ။
၈. သာရမ္မဏာနာရမ္မဏဝါရော
၁၀၃၂. ပဉ္စန္နံ ခန္ဓာနံ ကတိ သာရမ္မဏာ, ကတိ အနာရမ္မဏာ။ပေ.။ သတ္တန္နံ စိတ္တာနံ ကတိ သာရမ္မဏာ, ကတိ အနာရမ္မဏာ?
၁၀၃၃. ရူပက္ခန္ဓော အနာရမ္မဏော။ စတ္တာရော ခန္ဓာ သာရမ္မဏာ။
ဒသာယတနာ အနာရမ္မဏာ။ မနာယတနံ သာရမ္မဏံ။ ဓမ္မာယတနံ သိယာ သာရမ္မဏံ, သိယာ အနာရမ္မဏံ။
ဒသ ဓါတုယော အနာရမ္မဏာ။ သတ္တ ဓါတုယော သာရမ္မဏာ။ ဓမ္မဓါတု သိယာ သာရမ္မဏာ, သိယာ အနာရမ္မဏာ။
ဒွေ သစ္စာ သာရမ္မဏာ။ နိရောဓသစ္စံ အနာရမ္မဏံ။ ဒုက္ခသစ္စံ သိယာ သာရမ္မဏံ, သိယာ အနာရမ္မဏံ။
သတ္တိန္ဒ္ရိယာ အနာရမ္မဏာ။ စုဒ္ဒသိန္ဒ္ရိယာ သာရမ္မဏာ။ ဇီဝိတိန္ဒ္ရိယံ သိယာ သာရမ္မဏံ, သိယာ အနာရမ္မဏံ။ နဝ ဟေတူ သာရမ္မဏာ။ ကဗဠီကာရော အာဟာရော အနာရမ္မဏော။ တယော အာဟာရာ သာရမ္မဏာ။ သတ္တ ဖဿာ။ သတ္တ ဝေဒနာ။ သတ္တ သညာ။ သတ္တ စေတနာ။ သတ္တ စိတ္တာ သာရမ္မဏာ။
၁၀၃၄. ပဉ္စန္နံ ခန္ဓာနံ ကတိ သာရမ္မဏာရမ္မဏာ, ကတိ အနာရမ္မဏာရမ္မဏာ။ပေ.။ သတ္တန္နံ စိတ္တာနံ ကတိ သာရမ္မဏာရမ္မဏာ, ကတိ အနာရမ္မဏာရမ္မဏာ?
၁၀၃၅. ရူပက္ခန္ဓော အနာရမ္မဏော။ စတ္တာရော ခန္ဓာ သိယာ သာရမ္မဏာရမ္မဏာ, သိယာ အနာရမ္မဏာရမ္မဏာ။
ဒသာယတနာ အနာရမ္မဏာ။ မနာယတနံ သိယာ သာရမ္မဏာရမ္မဏံ, သိယာ အနာရမ္မဏာရမ္မဏံ။ ဓမ္မာယတနံ သိယာ သာရမ္မဏာရမ္မဏံ, သိယာ အနာရမ္မဏာရမ္မဏံ, သိယာ အနာရမ္မဏံ။
ဒသ ဓါတုယော အနာရမ္မဏာ။ ဆ ဓါတုယော အနာရမ္မဏာရမ္မဏာ။ မနောဝိညာဏဓါတု သိယာ သာရမ္မဏာရမ္မဏာ, သိယာ အနာရမ္မဏာရမ္မဏာ။ ဓမ္မဓါတု သိယာ သာရမ္မဏာရမ္မဏာ, သိယာ အနာရမ္မဏာရမ္မဏာ, သိယာ အနာရမ္မဏာ။
နိရောဓသစ္စံ အနာရမ္မဏံ။ မဂ္ဂသစ္စံ အနာရမ္မဏာရမ္မဏံ။ သမုဒယသစ္စံ သိယာ သာရမ္မဏာရမ္မဏံ, သိယာ အနာရမ္မဏာရမ္မဏံ။ ဒုက္ခသစ္စံ သိယာ သာရမ္မဏာရမ္မဏံ, သိယာ အနာရမ္မဏာရမ္မဏံ, သိယာ အနာရမ္မဏံ။
သတ္တိန္ဒ္ရိယာ အနာရမ္မဏာ။ ပဉ္စိန္ဒ္ရိယာ အနာရမ္မဏာရမ္မဏာ။ နဝိန္ဒ္ရိယာ သိယာ သာရမ္မဏာရမ္မဏာ, သိယာ အနာရမ္မဏာရမ္မဏာ။ ဇီဝိတိန္ဒ္ရိယံ သိယာ သာရမ္မဏာရမ္မဏံ, သိယာ အနာရမ္မဏာရမ္မဏံ, သိယာ အနာရမ္မဏံ။
နဝ ဟေတူ သိယာ သာရမ္မဏာရမ္မဏာ, သိယာ အနာရမ္မဏာရမ္မဏာ။ ကဗဠီကာရော အာဟာရော အနာရမ္မဏော။ တယော အာဟာရာ သိယာ သာရမ္မဏာရမ္မဏာ, သိယာ အနာရမ္မဏာရမ္မဏာ။ ဆ ဖဿာ အနာရမ္မဏာရမ္မဏာ ။ မနောဝိညာဏဓါတုသမ္ဖဿော သိယာ သာရမ္မဏာရမ္မဏော သိယာ အနာရမ္မဏာရမ္မဏော။ ဆ ဝေဒနာ။ ဆ သညာ။ ဆ စေတနာ။ ဆ စိတ္တာ အနာရမ္မဏာရမ္မဏာ။ မနောဝိညာဏဓါတု သိယာ သာရမ္မဏာရမ္မဏာ, သိယာ အနာရမ္မဏာရမ္မဏာ။
၉. ဒိဋ္ဌသုတာဒိဒဿနဝါရော
၁၀၃၆. ပဉ္စန္နံ ခန္ဓာနံ ကတိ ဒိဋ္ဌာ, ကတိ သုတာ, ကတိ မုတာ, ကတိ ဝိညာတာ, ကတိ န ဒိဋ္ဌာ န သုတာ န မုတာ န ဝိညာတာ။ပေ.။ သတ္တန္နံ စိတ္တာနံ ကတိ ဒိဋ္ဌာ, ကတိ သုတာ, ကတိ မုတာ, ကတိ ဝိညာတာ, ကတိ န ဒိဋ္ဌာ န သုတာ န မုတာ န ဝိညာတာ?
၁၀၃၇. ရူပက္ခန္ဓော သိယာ ဒိဋ္ဌော, သိယာ သုတော, သိယာ မုတော, သိယာ ဝိညာတော, သိယာ န ဒိဋ္ဌော န သုတော န မုတော, ဝိညာတော။ စတ္တာရော ခန္ဓာ န ဒိဋ္ဌာ န သုတာ န မုတာ, ဝိညာတာ။
ရူပါယတနံ ဒိဋ္ဌံ, န သုတံ န မုတံ, ဝိညာတံ။ သဒ္ဒါယတနံ န ဒိဋ္ဌံ, သုတံ, န မုတံ, ဝိညာတံ။ ဂန္ဓာယတနံ။ ရသာယတနံ။ ဖောဋ္ဌဗ္ဗာယတနံ န ဒိဋ္ဌံ န သုတံ, မုတံ, ဝိညာတံ။ သတ္တာယတနာ န ဒိဋ္ဌာ န သုတာ န မုတာ, ဝိညာတာ။
ရူပဓါတု ဒိဋ္ဌာ, န သုတာ န မုတာ, ဝိညာတာ။ သဒ္ဒဓါတု န ဒိဋ္ဌာ, သုတာ, န မုတာ, ဝိညာတာ။ ဂန္ဓဓါတု။ ရသဓါတု။ ဖောဋ္ဌဗ္ဗဓါတု န ဒိဋ္ဌာ န သုတာ, မုတာ, ဝိညာတာ။ တေရသ ဓါတုယော န ဒိဋ္ဌာ န သုတာ န မုတာ, ဝိညာတာ။
တီဏိ သစ္စာနိ န ဒိဋ္ဌာ န သုတာ န မုတာ, ဝိညာတာ။ ဒုက္ခသစ္စံ သိယာ ဒိဋ္ဌံ, သိယာ သုတံ, သိယာ မုတံ, သိယာ ဝိညာတံ, သိယာ န ဒိဋ္ဌံ န သုတံ န မုတံ, ဝိညာတံ။
ဗာဝီသတိန္ဒ္ရိယာ န ဒိဋ္ဌာ န သုတာ န မုတာ, ဝိညာတာ။ နဝ ဟေတူ န ဒိဋ္ဌာ န သုတာ န မုတာ, ဝိညာတာ။ စတ္တာရော အာဟာရာ န ဒိဋ္ဌာ န သုတာ န မုတာ, ဝိညာတာ။ သတ္တ ဖဿာ န ဒိဋ္ဌာ န သုတာ န မုတာ, ဝိညာတာ။ သတ္တ ဝေဒနာ။ သတ္တ သညာ။ သတ္တ စေတနာ။ သတ္တ စိတ္တာ န ဒိဋ္ဌာ န သုတာ န မုတာ, ဝိညာတာ။
၁၀. တိကာဒိဒဿနဝါရော
၁. ကုသလတ္တိကံ
၁၀၃၈. ပဉ္စန္နံ ခန္ဓာနံ ကတိ ကုသလာ, ကတိ အကုသလာ, ကတိ အဗျာကတာ။ပေ.။ သတ္တန္နံ စိတ္တာနံ ကတိ ကုသလာ, ကတိ အကုသလာ, ကတိ အဗျာကတာ?
ရူပက္ခန္ဓော အဗျာကတော။ စတ္တာရော ခန္ဓာ သိယာ ကုသလာ, သိယာ အကုသလာ, သိယာ အဗျာကတာ။ ဒသာယတနာ အဗျာကတာ။ ဒွါယတနာ သိယာ ကုသလာ, သိယာ အကုသလာ, သိယာ အဗျာကတာ။ သောဠသ ဓါတုယော အဗျာကတာ။ ဒွေ ဓါတုယော သိယာ ကုသလာ, သိယာ အကုသလာ, သိယာ အဗျာကတာ။ သမုဒယသစ္စံ အကုသလံ။ မဂ္ဂသစ္စံ ကုသလံ။ နိရောဓသစ္စံ အဗျာကတံ။ ဒုက္ခသစ္စံ သိယာ ကုသလံ, သိယာ အကုသလံ, သိယာ အဗျာကတံ။
ဒသိန္ဒ္ရိယာ အဗျာကတာ။ ဒေါမနဿိန္ဒ္ရိယံ အကုသလံ။ အနညာတညဿာမီတိန္ဒ္ရိယံ ကုသလံ။ စတ္တာရိန္ဒ္ရိယာ သိယာ ကုသလာ, သိယာ အဗျာကတာ။ ဆ ဣန္ဒ္ရိယာ သိယာ ကုသလာ, သိယာ အကုသလာ, သိယာ အဗျာကတာ။
တယော ကုသလဟေတူ ကုသလာ။ တယော အကုသလဟေတူ အကုသလာ။ တယော အဗျာကတဟေတူ အဗျာကတာ။ ကဗဠီကာရော အာဟာရော အဗျာကတော။ တယော အာဟာရာ သိယာ ကုသလာ, သိယာ အကုသလာ, သိယာ အဗျာကတာ။ ဆ ဖဿာ အဗျာကတာ။ မနောဝိညာဏဓါတုသမ္ဖဿော သိယာ ကုသလော, သိယာ အကုသလော, သိယာ အဗျာကတော။ ဆ ဝေဒနာ။ ဆ သညာ။ ဆ စေတနာ။ ဆ စိတ္တာ အဗျာကတာ။ မနောဝိညာဏဓါတု သိယာ ကုသလာ, သိယာ အကုသလာ, သိယာ အဗျာကတာ။
၂. ဝေဒနာတိကံ
၁၀၃၉. ပဉ္စန္နံ ခန္ဓာနံ ကတိ သုခါယ ဝေဒနာယ သမ္ပယုတ္တာ, ကတိ ဒုက္ခာယ ဝေဒနာယ သမ္ပယုတ္တာ, ကတိ အဒုက္ခမသုခါယ ဝေဒနာယ သမ္ပယုတ္တာ။ပေ.။ သတ္တန္နံ စိတ္တာနံ ကတိ သုခါယ ဝေဒနာယ သမ္ပယုတ္တာ, ကတိ ဒုက္ခာယ ဝေဒနာယ သမ္ပယုတ္တာ, ကတိ အဒုက္ခမသုခါယ ဝေဒနာယ သမ္ပယုတ္တာ?
ဒွေ ခန္ဓာ န ဝတ္တဗ္ဗာ သုခါယ ဝေဒနာယ သမ္ပယုတ္တာတိပိ, ဒုက္ခာယ ဝေဒနာယ သမ္ပယုတ္တာတိပိ, အဒုက္ခမသုခါယ ဝေဒနာယ သမ္ပယုတ္တာတိပိ။ တယော ခန္ဓာ သိယာ သုခါယ ဝေဒနာယ သမ္ပယုတ္တာ, သိယာ ဒုက္ခာယ ဝေဒနာယ သမ္ပယုတ္တာ, သိယာ အဒုက္ခမသုခါယ ဝေဒနာယ သမ္ပယုတ္တာ။
ဒသာယတနာ န ဝတ္တဗ္ဗာ သုခါယ ဝေဒနာယ သမ္ပယုတ္တာတိပိ, ဒုက္ခာယ ဝေဒနာယ သမ္ပယုတ္တာတိပိ, အဒုက္ခမသုခါယ ဝေဒနာယ သမ္ပယုတ္တာတိပိ။ မနာယတနံ သိယာ သုခါယ ဝေဒနာယ သမ္ပယုတ္တံ, သိယာ ဒုက္ခာယ ဝေဒနာယ သမ္ပယုတ္တံ, သိယာ အဒုက္ခမသုခါယ ဝေဒနာယ သမ္ပယုတ္တံ။ ဓမ္မာယတနံ သိယာ သုခါယ ဝေဒနာယ သမ္ပယုတ္တံ, သိယာ ဒုက္ခာယ ဝေဒနာယ သမ္ပယုတ္တံ, သိယာ အဒုက္ခမသုခါယ ဝေဒနာယ သမ္ပယုတ္တံ, သိယာ န ဝတ္တဗ္ဗံ သုခါယ ဝေဒနာယ သမ္ပယုတ္တန္တိပိ, ဒုက္ခာယ ဝေဒနာယ သမ္ပယုတ္တန္တိပိ, အဒုက္ခမသုခါယ ဝေဒနာယ သမ္ပယုတ္တန္တိပိ။
ဒသ ဓါတုယော န ဝတ္တဗ္ဗာ သုခါယ ဝေဒနာယ သမ္ပယုတ္တာတိပိ, ဒုက္ခာယ ဝေဒနာယ သမ္ပယုတ္တာတိပိ, အဒုက္ခမသုခါယ ဝေဒနာယ သမ္ပယုတ္တာတိပိ။ ပဉ္စ ဓါတုယော အဒုက္ခမသုခါယ ဝေဒနာယ သမ္ပယုတ္တာ, ကာယဝိညာဏဓါတု သိယာ သုခါယ ဝေဒနာယ သမ္ပယုတ္တာ, သိယာ ဒုက္ခာယ ဝေဒနာယ သမ္ပယုတ္တာ။ မနောဝိညာဏဓါတု သိယာ သုခါယ ဝေဒနာယ သမ္ပယုတ္တာ, သိယာ ဒုက္ခာယ ဝေဒနာယ သမ္ပယုတ္တာ, သိယာ အဒုက္ခမသုခါယ ဝေဒနာယ သမ္ပယုတ္တာ။ ဓမ္မဓါတု သိယာ သုခါယ ဝေဒနာယ သမ္ပယုတ္တာ, သိယာ ဒုက္ခာယ ဝေဒနာယ သမ္ပယုတ္တာ, သိယာ အဒုက္ခမသုခါယ ဝေဒနာယ သမ္ပယုတ္တာ, သိယာ န ဝတ္တဗ္ဗာ သုခါယ ဝေဒနာယ သမ္ပယုတ္တာတိပိ, ဒုက္ခာယ ဝေဒနာယ သမ္ပယုတ္တာတိပိ, အဒုက္ခမသုခါယ ဝေဒနာယ သမ္ပယုတ္တာတိပိ။
ဒွေ သစ္စာ သိယာ သုခါယ ဝေဒနာယ သမ္ပယုတ္တာ, သိယာ အဒုက္ခမသုခါယ ဝေဒနာယ သမ္ပယုတ္တာ။ နိရောဓသစ္စံ န ဝတ္တဗ္ဗံ သုခါယ ဝေဒနာယ သမ္ပယုတ္တန္တိပိ, ဒုက္ခာယ ဝေဒနာယ သမ္ပယုတ္တန္တိပိ, အဒုက္ခမသုခါယ ဝေဒနာယ သမ္ပယုတ္တန္တိပိ။ ဒုက္ခသစ္စံ သိယာ သုခါယ ဝေဒနာယ သမ္ပယုတ္တံ, သိယာ ဒုက္ခာယ ဝေဒနာယ သမ္ပယုတ္တံ, သိယာ အဒုက္ခမသုခါယ ဝေဒနာယ သမ္ပယုတ္တံ, သိယာ န ဝတ္တဗ္ဗံ သုခါယ ဝေဒနာယ သမ္ပယုတ္တန္တိပိ, ဒုက္ခာယ ဝေဒနာယ သမ္ပယုတ္တန္တိပိ, အဒုက္ခမသုခါယ ဝေဒနာယ သမ္ပယုတ္တန္တိပိ။
ဒွါဒသိန္ဒ္ရိယာ န ဝတ္တဗ္ဗာ သုခါယ ဝေဒနာယ သမ္ပယုတ္တာတိပိ, ဒုက္ခာယ ဝေဒနာယ သမ္ပယုတ္တာတိပိ, အဒုက္ခမသုခါယ ဝေဒနာယ သမ္ပယုတ္တာတိပိ။ ဆ ဣန္ဒ္ရိယာ သိယာ သုခါယ ဝေဒနာယ သမ္ပယုတ္တာ, သိယာ အဒုက္ခမသုခါယ ဝေဒနာယ သမ္ပယုတ္တာ။ တီဏိန္ဒ္ရိယာ သိယာ သုခါယ ဝေဒနာယ သမ္ပယုတ္တာ, သိယာ ဒုက္ခာယ ဝေဒနာယ သမ္ပယုတ္တာ , သိယာ အဒုက္ခမသုခါယ ဝေဒနာယ သမ္ပယုတ္တာ။ ဇီဝိတိန္ဒ္ရိယံ သိယာ သုခါယ ဝေဒနာယ သမ္ပယုတ္တံ, သိယာ ဒုက္ခာယ ဝေဒနာယ သမ္ပယုတ္တံ, သိယာ အဒုက္ခမသုခါယ ဝေဒနာယ သမ္ပယုတ္တံ, သိယာ န ဝတ္တဗ္ဗံ သုခါယ ဝေဒနာယ သမ္ပယုတ္တန္တိပိ, ဒုက္ခာယ ဝေဒနာယ သမ္ပယုတ္တန္တိပိ, အဒုက္ခမသုခါယ ဝေဒနာယ သမ္ပယုတ္တန္တိပိ။
ဒေါသော အကုသလဟေတု ဒုက္ခာယ ဝေဒနာယ သမ္ပယုတ္တော။ သတ္တ ဟေတူ သိယာ သုခါယ ဝေဒနာယ သမ္ပယုတ္တာ, သိယာ အဒုက္ခမသုခါယ ဝေဒနာယ သမ္ပယုတ္တာ။ မောဟော အကုသလဟေတု သိယာ သုခါယ ဝေဒနာယ သမ္ပယုတ္တော, သိယာ ဒုက္ခာယ ဝေဒနာယ သမ္ပယုတ္တော, သိယာ ဒုက္ခမသုခါယ ဝေဒနာယ သမ္ပယုတ္တော။
ကဗဠီကာရော အာဟာရော န ဝတ္တဗ္ဗော သုခါယ ဝေဒနာယ သမ္ပယုတ္တောတိ ပိ, ဒုက္ခာယ ဝေဒနာယ သမ္ပယုတ္တောတိပိ, အဒုက္ခမသုခါယ ဝေဒနာယ သမ္ပယုတ္တောတိပိ။ တယော အာဟာရာ သိယာ သုခါယ ဝေဒနာယ သမ္ပယုတ္တာ, သိယာ ဒုက္ခာယ ဝေဒနာယ သမ္ပယုတ္တာ, သိယာ အဒုက္ခမသုခါယ ဝေဒနာယ သမ္ပယုတ္တာ။
ပဉ္စ ဖဿာ အဒုက္ခမသုခါယ ဝေဒနာယ သမ္ပယုတ္တာ။ ကာယဝိညာဏဓါတုသမ္ဖဿော သိယာ သုခါယ ဝေဒနာယ သမ္ပယုတ္တော, သိယာ ဒုက္ခာယ ဝေဒနာယ သမ္ပယုတ္တော။ မနောဝိညာဏဓါတုသမ္ဖဿော သိယာ သုခါယ ဝေဒနာယ သမ္ပယုတ္တော, သိယာ ဒုက္ခာယ ဝေဒနာယ သမ္ပယုတ္တော, သိယာ အဒုက္ခမသုခါယ ဝေဒနာယ သမ္ပယုတ္တော။
သတ္တ ဝေဒနာ န ဝတ္တဗ္ဗာ သုခါယ ဝေဒနာယ သမ္ပယုတ္တာတိပိ, ဒုက္ခာယ ဝေဒနာယ သမ္ပယုတ္တာတိပိ, အဒုက္ခမသုခါယ ဝေဒနာယ သမ္ပယုတ္တာတိပိ။ ပဉ္စ သညာ။ ပဉ္စ စေတနာ။ ပဉ္စ စိတ္တာ အဒုက္ခမသုခါယ ဝေဒနာယ သမ္ပယုတ္တာ, ကာယဝိညာဏဓါတု သိယာ သုခါယ ဝေဒနာယ သမ္ပယုတ္တာ, သိယာ ဒုက္ခာယ ဝေဒနာယ သမ္ပယုတ္တာ။ မနောဝိညာဏဓါတု သိယာ သုခါယ ဝေဒနာယ သမ္ပယုတ္တာ, သိယာ ဒုက္ခာယ ဝေဒနာယ သမ္ပယုတ္တာ, သိယာ အဒုက္ခမသုခါယ ဝေဒနာယ သမ္ပယုတ္တာ။
၃. ဝိပါကတ္တိကံ
၁၀၄၀. ပဉ္စန္နံ ခန္ဓာနံ ကတိ ဝိပါကာ, ကတိ ဝိပါကဓမ္မဓမ္မာ, ကတိ နေဝဝိပါကနဝိပါကဓမ္မဓမ္မာ။ပေ.။ သတ္တန္နံ စိတ္တာနံ ကတိ ဝိပါကာ, ကတိ ဝိပါကဓမ္မဓမ္မာ, ကတိ နေဝဝိပါကနဝိပါကဓမ္မဓမ္မာ?
ရူပက္ခန္ဓော နေဝဝိပါကနဝိပါကဓမ္မဓမ္မော။ စတ္တာရော ခန္ဓာ သိယာ ဝိပါကာ, သိယာ ဝိပါကဓမ္မဓမ္မာ, သိယာ နေဝဝိပါကနဝိပါကဓမ္မဓမ္မာ။
ဒသာယတနာ နေဝဝိပါကနဝိပါကဓမ္မဓမ္မာ။ ဒွါယတနာ သိယာ ဝိပါကာ, သိယာ ဝိပါကဓမ္မဓမ္မာ, သိယာ နေဝဝိပါကနဝိပါကဓမ္မဓမ္မာ။
ဒသ ဓါတုယော နေဝဝိပါကနဝိပါကဓမ္မဓမ္မာ။ ပဉ္စ ဓါတုယော ဝိပါကာ။ မနောဓါတု သိယာ ဝိပါကာ, သိယာ နေဝဝိပါကနဝိပါကဓမ္မဓမ္မာ။ ဒွေ ဓါတုယော သိယာ ဝိပါကာ သိယာ ဝိပါကဓမ္မဓမ္မာ, သိယာ နေဝဝိပါကနဝိပါကဓမ္မဓမ္မာ။
ဒွေ သစ္စာ ဝိပါကဓမ္မဓမ္မာ။ နိရောဓသစ္စံ နေဝဝိပါကနဝိပါကဓမ္မဓမ္မံ။ ဒုက္ခသစ္စံ သိယာ ဝိပါကံ, သိယာ ဝိပါကဓမ္မဓမ္မံ, သိယာ နေဝဝိပါကနဝိပါကဓမ္မဓမ္မံ။
သတ္တိန္ဒ္ရိယာ နေဝဝိပါကနဝိပါကဓမ္မဓမ္မာ။ တီဏိန္ဒ္ရိယာ ဝိပါကာ။ ဒွိန္ဒ္ရိယာ ဝိပါကဓမ္မဓမ္မာ။ အညိန္ဒ္ရိယံ သိယာ ဝိပါကံ, သိယာ ဝိပါကဓမ္မဓမ္မံ။ နဝိန္ဒ္ရိယာ သိယာ ဝိပါကာ, သိယာ ဝိပါကဓမ္မဓမ္မာ, သိယာ နေဝဝိပါကနဝိပါကဓမ္မဓမ္မာ။
ဆ ဟေတူ ဝိပါကဓမ္မဓမ္မာ။ တယော အဗျာကတဟေတူ သိယာ ဝိပါကာ, သိယာ နေဝဝိပါကနဝိပါကဓမ္မဓမ္မာ။
ကဗဠီကာရော အာဟာရော နေဝဝိပါကနဝိပါကဓမ္မဓမ္မော။ တယော အာဟာရာ သိယာ ဝိပါကာ, သိယာ ဝိပါကဓမ္မဓမ္မာ, သိယာ နေဝဝိပါကနဝိပါကဓမ္မဓမ္မာ။ ပဉ္စ ဖဿာ ဝိပါကာ။ မနောဓါတုသမ္ဖဿော သိယာ ဝိပါကော, သိယာ နေဝဝိပါကနဝိပါကဓမ္မဓမ္မော။ မနောဝိညာဏဓါတုသမ္ဖဿော သိယာ ဝိပါကော, သိယာ ဝိပါကဓမ္မဓမ္မော, သိယာ နေဝဝိပါကနဝိပါကဓမ္မဓမ္မော။ ပဉ္စ ဝေဒနာ။ ပဉ္စ သညာ။ ပဉ္စ စေတနာ။ ပဉ္စ စိတ္တာ ဝိပါကာ။ မနောဓါတု သိယာ ဝိပါကာ, သိယာ နေဝဝိပါကနဝိပါကဓမ္မဓမ္မာ။ မနောဝိညာဏဓါတု သိယာ ဝိပါကာ, သိယာ ဝိပါကဓမ္မဓမ္မာ, သိယာ နေဝဝိပါကနဝိပါကဓမ္မဓမ္မာ။
၄. ဥပါဒိန္နတ္တိကံ
၁၀၄၁. ပဉ္စန္နံ ခန္ဓာနံ ကတိ ဥပါဒိန္နုပါဒါနိယာ, ကတိ အနုပါဒိန္နုပါဒါနိယာ, ကတိ အနုပါဒိန္နအနုပါဒါနိယာ။ပေ.။ သတ္တန္နံ စိတ္တာနံ ကတိ ဥပါဒိန္နုပါဒါနိယာ, ကတိ အနုပါဒိန္နုပါဒါနိယာ, ကတိ အနုပါဒိန္နအနုပါဒါနိယာ?
ရူပက္ခန္ဓော သိယာ ဥပါဒိန္နုပါဒါနိယော, သိယာ အနုပါဒိန္နုပါဒါနိယော ၄။ စတ္တာရော ခန္ဓာ သိယာ ဥပါဒိန္နုပါဒါနိယာ, သိယာ အနုပါဒိန္နုပါဒါနိယာ, သိယာ အနုပါဒိန္နအနုပါဒါနိယာ။
ပဉ္စာယတနာ ဥပါဒိန္နုပါဒါနိယာ။ သဒ္ဒါယတနံ အနုပါဒိန္နုပါဒါနိယံ။ စတ္တာရော အာယတနာ သိယာ ဥပါဒိန္နုပါဒါနိယာ, သိယာ အနုပါဒိန္နုပါဒါနိယာ။ ဒွါယတနာ သိယာ ဥပါဒိန္နုပါဒါနိယာ, သိယာ အနုပါဒိန္နုပါဒါနိယာ, သိယာ အနုပါဒိန္နအနုပါဒါနိယာ။
ဒသ ဓါတုယော ဥပါဒိန္နုပါဒါနိယာ။ သဒ္ဒဓါတု အနုပါဒိန္နုပါဒါနိယာ။ ပဉ္စ ဓါတုယော သိယာ ဥပါဒိန္နုပါဒါနိယာ, သိယာ အနုပါဒိန္နုပါဒါနိယာ။ ဒွေ ဓါတုယော သိယာ ဥပါဒိန္နုပါဒါနိယာ, သိယာ အနုပါဒိန္နုပါဒါနိယာ, သိယာ အနုပါဒိန္နအနုပါဒါနိယာ။
သမုဒယသစ္စံ အနုပါဒိန္နုပါဒါနိယံ။ ဒွေ သစ္စာ အနုပါဒိန္နအနုပါဒါနိယာ။ ဒုက္ခသစ္စံ သိယာ ဥပါဒိန္နုပါဒါနိယံ, သိယာ အနုပါဒိန္နုပါဒါနိယံ။
နဝိန္ဒ္ရိယာ ဥပါဒိန္နုပါဒါနိယာ။ ဒေါမနဿိန္ဒ္ရိယံ အနုပါဒိန္နုပါဒါနိယံ။ တီဏိန္ဒ္ရိယာ အနုပါဒိန္နအနုပါဒါနိယာ။ နဝိန္ဒ္ရိယာ သိယာ ဥပါဒိန္နုပါဒါနိယာ, သိယာ အနုပါဒိန္နုပါဒါနိယာ, သိယာ အနုပါဒိန္နအနုပါဒါနိယာ။ တယော အကုသလဟေတူ အနုပါဒိန္နုပါဒါနိယာ။ တယော ကုသလဟေတူ သိယာ အနုပါဒိန္နုပါဒါနိယာ, သိယာ အနုပါဒိန္နအနုပါဒါနိယာ။ တယော အဗျာကတဟေတူ သိယာ ဥပါဒိန္နုပါဒါနိယာ, သိယာ အနုပါဒိန္နုပါဒါနိယာ, သိယာ အနုပါဒိန္နအနုပါဒါနိယာ။
ကဗဠီကာရော အာဟာရော သိယာ ဥပါဒိန္နုပါဒါနိယော, သိယာ အနုပါဒိန္နုပါဒါနိယော။ တယော အာဟာရာ သိယာ ဥပါဒိန္နုပါဒါနိယာ, သိယာ အနုပါဒိန္နုပါဒါနိယာ, သိယာ အနုပါဒိန္နအနုပါဒါနိယာ ။
ပဉ္စ ဖဿာ ဥပါဒိန္နုပါဒါနိယာ။ မနောဓါတုသမ္ဖဿော သိယာ ဥပါဒိန္နုပါဒါနိယော, သိယာ အနုပါဒိန္နုပါဒါနိယော။ မနောဝိညာဏဓါတုသမ္ဖဿော သိယာ ဥပါဒိန္နုပါဒါနိယော, သိယာ အနုပါဒိန္နုပါဒါနိယော, သိယာ အနုပါဒိန္နအနုပါဒါနိယော။ ပဉ္စ ဝေဒနာ။ ပဉ္စ သညာ။ ပဉ္စ စေတနာ။ ပဉ္စ စိတ္တာ ဥပါဒိန္နုပါဒါနိယာ။ မနောဓါတု သိယာ ဥပါဒိန္နုပါဒါနိယာ, သိယာ အနုပါဒိန္နုပါဒါနိယာ။ မနောဝိညာဏဓါတု သိယာ ဥပါဒိန္နုပါဒါနိယာ, သိယာ အနုပါဒိန္နုပါဒါနိယာ, သိယာ အနုပါဒိန္နအနုပါဒါနိယာ။
၅. ဝိတက္ကတ္တိကံ
၁၀၄၂. ပဉ္စန္နံ ခန္ဓာနံ ကတိ သဝိတက္ကသဝိစာရာ, ကတိ အဝိတက္ကဝိစာရမတ္တာ, ကတိ အဝိတက္ကအဝိစာရာ။ပေ.။ သတ္တန္နံ စိတ္တာနံ ကတိ သဝိတက္ကသဝိစာရာ, ကတိ အဝိတက္ကဝိစာရမတ္တာ, ကတိ အဝိတက္ကအဝိစာရာ?
ရူပက္ခန္ဓော အဝိတက္ကအဝိစာရော။ တယော ခန္ဓာ သိယာ သဝိတက္ကသဝိစာရာ, သိယာ အဝိတက္ကဝိစာရမတ္တာ, သိယာ အဝိတက္ကအဝိစာရာ။ သင်္ခါရက္ခန္ဓော သိယာ သဝိတက္ကသဝိစာရော, သိယာ အဝိတက္ကဝိစာရမတ္တော, သိယာ အဝိတက္ကအဝိစာရော သိယာ န ဝတ္တဗ္ဗော သဝိတက္ကသဝိစာရောတိပိ , အဝိတက္ကဝိစာရမတ္တောတိပိ, အဝိတက္ကအဝိစာရောတိပိ။
ဒသာယတနာ အဝိတက္ကအဝိစာရာ။ မနာယတနံ သိယာ သဝိတက္ကသဝိစာရံ, သိယာ အဝိတက္ကဝိစာရမတ္တံ, သိယာ အဝိတက္ကအဝိစာရံ။ ဓမ္မာယတနံ သိယာ သဝိတက္ကသဝိစာရံ, သိယာ အဝိတက္ကဝိစာရမတ္တံ, သိယာ အဝိတက္ကအဝိစာရံ, သိယာ န ဝတ္တဗ္ဗံ သဝိတက္ကသဝိစာရန္တိပိ, အဝိတက္ကဝိစာရမတ္တန္တိပိ, အဝိတက္ကအဝိစာရန္တိပိ။
ပန္နရသ ဓါတုယော အဝိတက္ကအဝိစာရာ။ မနောဓါတု သဝိတက္ကသဝိစာရာ။ မနောဝိညာဏဓါတု သိယာ သဝိတက္ကသဝိစာရာ, သိယာ အဝိတက္ကဝိစာရမတ္တာ, သိယာ အဝိတက္ကအဝိစာရာ။ ဓမ္မဓါတု သိယာ သဝိတက္ကသဝိစာရာ, သိယာ အဝိတက္ကဝိစာရမတ္တာ, သိယာ အဝိတက္ကအဝိစာရာ, သိယာ န ဝတ္တဗ္ဗာ သဝိတက္ကသဝိစာရာတိပိ, အဝိတက္ကဝိစာရမတ္တာတိပိ, အဝိတက္ကအဝိစာရာတိပိ။
သမုဒယသစ္စံ သဝိတက္ကသဝိစာရံ။ နိရောဓသစ္စံ အဝိတက္ကအဝိစာရံ။ မဂ္ဂသစ္စံ သိယာ သဝိတက္ကသဝိစာရံ, သိယာ အဝိတက္ကဝိစာရမတ္တံ, သိယာ အဝိတက္ကအဝိစာရံ။ ဒုက္ခသစ္စံ သိယာ သဝိတက္ကသဝိစာရံ, သိယာ အဝိတက္ကဝိစာရမတ္တံ, သိယာ အဝိတက္ကအဝိစာရံ, သိယာ န ဝတ္တဗ္ဗံ သဝိတက္ကသဝိစာရန္တိပိ, အဝိတက္ကဝိစာရမတ္တန္တိပိ, အဝိတက္ကအဝိစာရန္တိပိ။
နဝိန္ဒ္ရိယာ အဝိတက္ကအဝိစာရာ။ ဒေါမနဿိန္ဒ္ရိယံ သဝိတက္ကသဝိစာရံ။ ဥပေက္ခိန္ဒ္ရိယံ သိယာ သဝိတက္ကသဝိစာရံ, သိယာ အဝိတက္ကအဝိစာရံ။ ဧကာဒသိန္ဒ္ရိယာ သိယာ သဝိတက္ကသဝိစာရာ, သိယာ အဝိတက္ကဝိစာရမတ္တာ, သိယာ အဝိတက္ကအဝိစာရာ။
တယော အကုသလဟေတူ သဝိတက္ကသဝိစာရာ။ ဆ ဟေတူ သိယာ သဝိတက္ကသဝိစာရာ, သိယာ အဝိတက္ကဝိစာရမတ္တာ, သိယာ အဝိတက္ကအဝိစာရာ။ ကဗဠီကာရော အာဟာရော အဝိတက္ကအဝိစာရော။ တယော အာဟာရာ သိယာ သဝိတက္ကသဝိစာရာ, သိယာ အဝိတက္ကဝိစာရမတ္တာ, သိယာ အဝိတက္ကအဝိစာရာ။ ပဉ္စ ဖဿာ အဝိတက္ကအဝိစာရာ။ မနောဓါတုသမ္ဖဿော သဝိတက္ကသဝိစာရော။ မနောဝိညာဏဓါတုသမ္ဖဿော သိယာ သဝိတက္ကသဝိစာရော, သိယာ အဝိတက္ကဝိစာရမတ္တော, သိယာ အဝိတက္ကအဝိစာရော။ ပဉ္စ ဝေဒနာ။ ပဉ္စ သညာ။ ပဉ္စ စေတနာ။ ပဉ္စ စိတ္တာ အဝိတက္ကအဝိစာရာ မနောဓါတု သဝိတက္ကသဝိစာရာ , မနောဝိညာဏဓါတု သိယာ သဝိတက္ကသဝိစာရာ, သိယာ အဝိတက္ကဝိစာရမတ္တာ, သိယာ အဝိတက္ကအဝိစာရာ။
(၁) ရူပဒုကံ
၁၀၄၃. ပဉ္စန္နံ ခန္ဓာနံ ကတိ ရူပါ, ကတိ အရူပါ။ပေ.။ သတ္တန္နံ စိတ္တာနံ ကတိ ရူပါ, ကတိ အရူပါ?
ရူပက္ခန္ဓော ရူပံ။ စတ္တာရော ခန္ဓာ အရူပါ။ ဒသာယတနာ ရူပါ။ မနာယတနံ အရူပံ။ ဓမ္မာယတနံ သိယာ ရူပံ, သိယာ အရူပံ။ ဒသ ဓါတုယော ရူပါ။ သတ္တ ဓါတုယော အရူပါ။ ဓမ္မဓါတု သိယာ ရူပါ, သိယာ အရူပါ။ တီဏိ သစ္စာနိ အရူပါ။ ဒုက္ခသစ္စံ သိယာ ရူပံ, သိယာ အရူပံ။ သတ္တိန္ဒ္ရိယာ ရူပါ။ စုဒ္ဒသိန္ဒ္ရိယာ အရူပါ။ ဇီဝိတိန္ဒ္ရိယံ သိယာ ရူပံ, သိယာ အရူပံ။ နဝ ဟေတူ အရူပါ။ ကဗဠီကာရော အာဟာရော ရူပံ။ တယော အာဟာရာ အရူပါ။ သတ္တ ဖဿာ အရူပါ။ သတ္တ ဝေဒနာ။ သတ္တ သညာ။ သတ္တ စေတနာ သတ္တ စိတ္တာ အရူပါ။
(၂) လောကိယဒုကံ
၁၀၄၄. ပဉ္စန္နံ ခန္ဓာနံ ကတိ လောကိယာ, ကတိ လောကုတ္တရာ? ဒွါဒသန္နံ အာယတနာနံ ကတိ လောကိယာ, ကတိ လောကုတ္တရာ? အဋ္ဌာရသန္နံ ဓါတူနံ ကတိ လောကိယာ, ကတိ လောကုတ္တရာ? စတုန္နံ သစ္စာနံ ကတိ လောကိယာ, ကတိ လောကုတ္တရာ။ပေ.။ သတ္တန္နံ စိတ္တာနံ ကတိ လောကိယာ, ကတိ လောကုတ္တရာ?
ရူပက္ခန္ဓော လောကိယော။ စတ္တာရော ခန္ဓာ သိယာ လောကိယာ, သိယာ လောကုတ္တရာ။ ဒသာယတနာ လောကိယာ ။ ဒွေ အာယတနာ သိယာ လောကိယာ , သိယာ လောကုတ္တရာ။ သောဠသ ဓါတုယော လောကိယာ။ ဒွေ ဓါတုယော သိယာ လောကိယာ, သိယာ လောကုတ္တရာ။ ဒွေ သစ္စာ လောကိယာ။ ဒွေ သစ္စာ လောကုတ္တရာ။
ဒသိန္ဒ္ရိယာ လောကိယာ။ တီဏိန္ဒ္ရိယာ လောကုတ္တရာ။ နဝိန္ဒ္ရိယာ သိယာ လောကိယာ, သိယာ လောကုတ္တရာ။ တယော အကုသလဟေတူ လောကိယာ။ ဆ ဟေတူ သိယာ လောကိယာ, သိယာ လောကုတ္တရာ။ ကဗဠီကာရော အာဟာရော လောကိယော။ တယော အာဟာရာ သိယာ လောကိယာ, သိယာ လောကုတ္တရာ ။ ဆ ဖဿာ လောကိယာ။ မနောဝိညာဏဓါတုသမ္ဖဿော သိယာ လောကိယော, သိယာ လောကုတ္တရော။ ဆ ဝေဒနာ လောကိယာ။ မနောဝိညာဏဓါတုသမ္ဖဿဇာ ဝေဒနာ သိယာ လောကိယာ, သိယာ လောကုတ္တရာ။ ဆ သညာ လောကိယာ။ မနောဝိညာဏဓါတုသမ္ဖဿဇာ သညာ သိယာ လောကိယာ, သိယာ လောကုတ္တရာ။ ဆ စေတနာ လောကိယာ။ မနောဝိညာဏဓါတုသမ္ဖဿဇာ စေတနာ သိယာ လောကိယာ, သိယာ လောကုတ္တရာ။ ဆ စိတ္တာ လောကိယာ။ မနောဝိညာဏဓါတု သိယာ လောကိယာ, သိယာ လောကုတ္တရာတိ။
အဘိညာ ဒွေ သာရမ္မဏာ၊ ဒိဋ္ဌာ ကုသလဝေဒနာ။
ဝိပါကာ စ ဥပါဒိန္နာ၊ ဝိတက္ကံ ရူပလောကိယာတိ။
ဓမ္မဟဒယဝိဘင်္ဂေါ နိဋ္ဌိတော။
ဝိဘင်္ဂပကရဏံ နိဋ္ဌိတံ။