အပ္ပမညာဝိဘင်္ဂ‌

၁၃. အပ္ပမညာဝိဘင်္ဂ‌

၁. သုတ္တန္တဘာဇနီယ

၆၄၂. စတဿော အပ္ပမညာယော – ဣဓ ဘိက္ခု မေတ္တာသဟဂတေန စေတသာ ဧကံ ဒိသံ ဖရိတွာ ဝိဟရတိ, တထာ ဒုတိယံ, တထာ တတိယံ, တထာ စတုတ္ထံ [စတုတ္ထိံ (သီ.)]။ ဣတိ ဥဒ္ဓမဓေါ တိရိယံ သဗ္ဗဓိ သဗ္ဗတ္တတာယ သဗ္ဗာဝန္တံ လောကံ မေတ္တာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန [အဗျာပဇ္ဈေန (သီ. သျာ.)] ဖရိတွာ ဝိဟရတိ။ ကရုဏာသဟဂတေန စေတသာ ဧကံ ဒိသံ ဖရိတွာ ဝိဟရတိ, တထာ ဒုတိယံ, တထာ တတိယံ, တထာ စတုတ္ထံ။ ဣတိ ဥဒ္ဓမဓေါ တိရိယံ သဗ္ဗဓိ သဗ္ဗတ္တတာယ သဗ္ဗာဝန္တံ လောကံ ကရုဏာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန ဖရိတွာ ဝိဟရတိ။ မုဒိတာသဟဂတေန စေတသာ ဧကံ ဒိသံ ဖရိတွာ ဝိဟရတိ, တထာ ဒုတိယံ, တထာ တတိယံ, တထာ စတုတ္ထံ။ ဣတိ ဥဒ္ဓမဓေါ တိရိယံ သဗ္ဗဓိ သဗ္ဗတ္တတာယ သဗ္ဗာဝန္တံ လောကံ မုဒိတာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန ဖရိတွာ ဝိဟရတိ။ ဥပေက္ခာသဟဂတေန စေတသာ ဧကံ ဒိသံ ဖရိတွာ ဝိဟရတိ, တထာ ဒုတိယံ, တထာ တတိယံ, တထာ စတုတ္ထံ။ ဣတိ ဥဒ္ဓမဓေါ တိရိယံ သဗ္ဗဓိ သဗ္ဗတ္တတာယ သဗ္ဗာဝန္တံ လောကံ ဥပေက္ခာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန ဖရိတွာ ဝိဟရတိ။

၁. မေတ္တာ

၆၄၃. ကထဉ္စ ဘိက္ခု မေတ္တာသဟဂတေန စေတသာ ဧကံ ဒိသံ ဖရိတွာ ဝိဟရတိ? သေယျထာပိ နာမ ဧကံ ပုဂ္ဂလံ ပိယံ မနာပံ ဒိသွာ မေတ္တာယေယျ, ဧဝမေဝ သဗ္ဗေ သတ္တေ မေတ္တာယ ဖရတိ။

တတ္ထ ကတမာ မေတ္တာ? ယာ သတ္တေသု မေတ္တိ မေတ္တာယနာ မေတ္တာယိတတ္တံ မေတ္တာစေတောဝိမုတ္တိ – အယံ ဝုစ္စတိ ‘‘မေတ္တာ’’။

တတ္ထ ကတမံ စိတ္တံ? ယံ စိတ္တံ မနော မာနသံ ဟဒယံ ပဏ္ဍရံ မနော မနာယတနံ မနိန္ဒ္ရိယံ ဝိညာဏံ ဝိညာဏက္ခန္ဓော တဇ္ဇာမနောဝိညာဏဓါတု – ဣဒံ ဝုစ္စတိ ‘‘စိတ္တံ’’။ ဣဒံ စိတ္တံ ဣမာယ မေတ္တာယ သဟဂတံ ဟောတိ သဟဇာတံ သံသဋ္ဌံ သမ္ပယုတ္တံ။ တေန ဝုစ္စတိ ‘‘မေတ္တာသဟဂတေန စေတသာ’’တိ။

၆၄၄. ‘‘ဧကံ ဒိသ’’န္တိ ပုရတ္ထိမံ ဝါ ဒိသံ ပစ္ဆိမံ ဝါ ဒိသံ ဥတ္တရံ ဝါ ဒိသံ ဒက္ခိဏံ ဝါ ဒိသံ ဥဒ္ဓံ ဝါ အဓေါ ဝါ တိရိယံ ဝါ ဝိဒိသံ ဝါ။

၆၄၅. ‘‘ဖရိတွာ’’တိ ဖရိတွာ အဓိမုစ္စိတွာ။

၆၄၆. ‘‘ဝိဟရတီ’’တိ ဣရိယတိ ဝတ္တတိ ပါလေတိ ယပေတိ ယာပေတိ စရတိ ဝိဟရတိ။ တေန ဝုစ္စတိ ‘‘ဝိဟရတီ’’တိ။

၆၄၇. ‘‘တထာ ဒုတိယ’’န္တိ ယထေဝ ဧကံ ဒိသံ တထာ ဒုတိယံ ဒိသံ တထာ တတိယံ ဒိသံ တထာ စတုတ္ထံ ဒိသံ တထာ ဥဒ္ဓံ တထာ အဓေါ တထာ တိရိယံ တထာ ဝိဒိသံ။

၆၄၈. ‘‘သဗ္ဗဓိ သဗ္ဗတ္တတာယ သဗ္ဗာဝန္တံ လောက’’န္တိ သဗ္ဗေန သဗ္ဗံ သဗ္ဗထာ သဗ္ဗံ အသေသံ နိဿေသံ။ ပရိယာဒါယဝစနမေတံ – ‘‘သဗ္ဗဓိ သဗ္ဗတ္တတာယ သဗ္ဗာဝန္တံ လောက’’န္တိ။

၆၄၉. ‘‘မေတ္တာသဟဂတေန စေတသာ’’တိ တတ္ထ ကတမာ မေတ္တာ? ယာ သတ္တေသု မေတ္တိ မေတ္တာယနာ မေတ္တာယိတတ္တံ မေတ္တာစေတောဝိမုတ္တိ – အယံ ဝုစ္စတိ ‘‘မေတ္တာ’’။

တတ္ထ ကတမံ စိတ္တံ? ယံ စိတ္တံ မနော မာနသံ။ပေ.။ တဇ္ဇာမနောဝိညာဏဓါတု – ဣဒံ ဝုစ္စတိ ‘‘စိတ္တံ’’။ ဣဒံ စိတ္တံ ဣမာယ မေတ္တာယ သဟဂတံ ဟောတိ သဟဇာတံ သံသဋ္ဌံ သမ္ပယုတ္တံ။ တေန ဝုစ္စတိ ‘‘မေတ္တာသဟဂတေန စေတသာ’’တိ။

၆၅၀. ‘‘ဝိပုလေနာ’’တိ ယံ ဝိပုလံ တံ မဟဂ္ဂတံ, ယံ မဟဂ္ဂတံ တံ အပ္ပမာဏံ, ယံ အပ္ပမာဏံ သော အဝေရော, ယော အဝေရော သော အဗျာပဇ္ဇော [အဗျာပဇ္ဈော (သီ. သျာ.)]။

၆၅၁. ‘‘ဖရိတွာ’’တိ ဖရိတွာ အဓိမုစ္စိတွာ။

၆၅၂. ‘‘ဝိဟရတီ’’တိ။ပေ.။ တေန ဝုစ္စတိ ‘‘ဝိဟရတီ’’တိ။

၂. ကရုဏာ

၆၅၃. ကထဉ္စ ဘိက္ခု ကရုဏာသဟဂတေန စေတသာ ဧကံ ဒိသံ ဖရိတွာ ဝိဟရတိ? သေယျထာပိ နာမ ဧကံ ပုဂ္ဂလံ ဒုဂ္ဂတံ ဒုရူပေတံ ဒိသွာ ကရုဏာယေယျ, ဧဝမေဝ သဗ္ဗေ သတ္တေ ကရုဏာယ ဖရတိ။

တတ္ထ ကတမာ ကရုဏာ? ယာ သတ္တေသု ကရုဏာ ကရုဏာယနာ ကရုဏာယိတတ္တံ ကရုဏာစေတောဝိမုတ္တိ – အယံ ဝုစ္စတိ ‘‘ကရုဏာ’’။

တတ္ထ ကတမံ စိတ္တံ? ယံ စိတ္တံ မနော မာနသံ။ပေ.။ တဇ္ဇာမနောဝိညာဏဓါတု – ဣဒံ ဝုစ္စတိ ‘‘စိတ္တံ’’။ ဣဒံ စိတ္တံ ဣမာယ ကရုဏာယ သဟဂတံ ဟောတိ သဟဇာတံ သံသဋ္ဌံ သမ္ပယုတ္တံ။ တေန ဝုစ္စတိ ‘‘ကရုဏာသဟဂတေန စေတသာ’’တိ။

၆၅၄. ‘‘ဧကံ ဒိသ’’န္တိ ပုရတ္ထိမံ ဝါ ဒိသံ ပစ္ဆိမံ ဝါ ဒိသံ ဥတ္တရံ ဝါ ဒိသံ ဒက္ခိဏံ ဝါ ဒိသံ ဥဒ္ဓံ ဝါ အဓေါ ဝါ တိရိယံ ဝါ ဝိဒိသံ ဝါ။

၆၅၅. ‘‘ဖရိတွာ’’တိ ဖရိတွာ အဓိမုစ္စိတွာ။

၆၅၆. ‘‘ဝိဟရတီ’’တိ ဣရိယတိ ဝတ္တတိ ပါလေတိ ယပေတိ ယာပေတိ စရတိ ဝိဟရတိ။ တေန ဝုစ္စတိ ‘‘ဝိဟရတီ’’တိ။

၆၅၇. ‘‘တထာ ဒုတိယ’’န္တိ ယထေဝ ဧကံ ဒိသံ တထာ ဒုတိယံ ဒိသံ တထာ တတိယံ ဒိသံ တထာ စတုတ္ထံ ဒိသံ တထာ ဥဒ္ဓံ တထာ အဓေါ တထာ တိရိယံ တထာ ဝိဒိသံ။

၆၅၈. ‘‘သဗ္ဗဓိ သဗ္ဗတ္တတာယ သဗ္ဗာဝန္တံ လောက’’န္တိ သဗ္ဗေန သဗ္ဗံ သဗ္ဗထာ သဗ္ဗံ အသေသံ နိဿေသံ။ ပရိယာဒါယဝစနမေတံ – ‘‘သဗ္ဗဓိ သဗ္ဗတ္တတာယ သဗ္ဗာဝန္တံ လောက’’န္တိ။

၆၅၉. ‘‘ကရုဏာသဟဂတေန စေတသာ’’တိ တတ္ထ ကတမာ ကရုဏာ? ယာ သတ္တေသု ကရုဏာ ကရုဏာယနာ ကရုဏာယိတတ္တံ ကရုဏာစေတောဝိမုတ္တိ – အယံ ဝုစ္စတိ ‘‘ကရုဏာ’’။

တတ္ထ ကတမံ စိတ္တံ? ယံ စိတ္တံ မနော မာနသံ။ပေ.။ တဇ္ဇာမနောဝိညာဏဓါတု – ဣဒံ ဝုစ္စတိ ‘‘စိတ္တံ’’။ ဣဒံ စိတ္တံ ဣမာယ ကရုဏာယ သဟဂတံ ဟောတိ သဟဇာတံ သံသဋ္ဌံ သမ္ပယုတ္တံ။ တေန ဝုစ္စတိ ‘‘ကရုဏာသဟဂတေန စေတသာ’’တိ။

၆၆၀. ‘‘ဝိပုလေနာ’’တိ ယံ ဝိပုလံ တံ မဟဂ္ဂတံ, ယံ မဟဂ္ဂတံ တံ အပ္ပမာဏံ, ယံ အပ္ပမာဏံ သော အဝေရော, ယော အဝေရော သော အဗျာပဇ္ဇော။

၆၆၁. ‘‘ဖရိတွာ’’တိ ဖရိတွာ အဓိမုစ္စိတွာ။

၆၆၂. ‘‘ဝိဟရတီ’’တိ။ပေ.။ တေန ဝုစ္စတိ ‘‘ဝိဟရတီ’’တိ။

၃. မုဒိတာ

၆၆၃. ကထဉ္စ ဘိက္ခု မုဒိတာသဟဂတေန စေတသာ ဧကံ ဒိသံ ဖရိတွာ ဝိဟရတိ? သေယျထာပိ နာမ ဧကံ ပုဂ္ဂလံ ပိယံ မနာပံ ဒိသွာ မုဒိတော အဿ, ဧဝမေဝ သဗ္ဗေ သတ္တေ မုဒိတာယ ဖရတိ။

တတ္ထ ကတမာ မုဒိတာ? ယာ သတ္တေသု မုဒိတာ မုဒိတာယနာ မုဒိတာယိတတ္တံ မုဒိတာစေတောဝိမုတ္တိ – အယံ ဝုစ္စတိ ‘‘မုဒိတာ’’။

တတ္ထ ကတမံ စိတ္တံ? ယံ စိတ္တံ မနော မာနသံ။ပေ.။ တဇ္ဇာမနောဝိညာဏဓါတု – ဣဒံ ဝုစ္စတိ ‘‘စိတ္တံ’’။ ဣဒံ စိတ္တံ ဣမာယ မုဒိတာယ သဟဂတံ ဟောတိ သဟဇာတံ သံသဋ္ဌံ သမ္ပယုတ္တံ။ တေန ဝုစ္စတိ ‘‘မုဒိတာသဟဂတေန စေတသာ’’တိ။

၆၆၄. ‘‘ဧကံ ဒိသ’’န္တိ ပုရတ္ထိမံ ဝါ ဒိသံ ပစ္ဆိမံ ဝါ ဒိသံ ဥတ္တရံ ဝါ ဒိသံ ဒက္ခိဏံ ဝါ ဒိသံ ဥဒ္ဓံ ဝါ အဓေါ ဝါ တိရိယံ ဝါ ဝိဒိသံ ဝါ။

၆၆၅. ‘‘ဖရိတွာ’’တိ ဖရိတွာ အဓိမုစ္စိတွာ။

၆၆၆. ‘‘ဝိဟရတီ’’တိ။ပေ.။ တေန ဝုစ္စတိ ‘‘ဝိဟရတီ’’တိ။

၆၆၇. ‘‘တထာ ဒုတိယ’’န္တိ ယထေဝ ဧကံ ဒိသံ တထာ ဒုတိယံ ဒိသံ တထာ တတိယံ ဒိသံ တထာ စတုတ္ထံ ဒိသံ တထာ ဥဒ္ဓံ တထာ အဓေါ တထာ တိရိယံ တထာ ဝိဒိသံ။

၆၆၈. ‘‘သဗ္ဗဓိ သဗ္ဗတ္တတာယ သဗ္ဗာဝန္တံ လောက’’န္တိ သဗ္ဗေန သဗ္ဗံ သဗ္ဗထာ သဗ္ဗံ အသေသံ နိဿေသံ။ ပရိယာဒါယဝစနမေတံ – ‘‘သဗ္ဗဓိ သဗ္ဗတ္တတာယ သဗ္ဗာဝန္တံ လောက’’န္တိ။

၆၆၉. ‘‘မုဒိတာသဟဂတေန စေတသာ’’တိ တတ္ထ ကတမာ မုဒိတာ? ယာ သတ္တေသု မုဒိတာ မုဒိတာယနာ မုဒိတာယိတတ္တံ မုဒိတာစေတောဝိမုတ္တိ – အယံ ဝုစ္စတိ ‘‘မုဒိတာ’’။

တတ္ထ ကတမံ စိတ္တံ? ယံ စိတ္တံ မနော မာနသံ။ပေ.။ တဇ္ဇာမနောဝိညာဏဓါတု – ဣဒံ ဝုစ္စတိ ‘‘စိတ္တံ’’။ ဣဒံ စိတ္တံ ဣမာယ မုဒိတာယ သဟဂတံ ဟောတိ သဟဇာတံ သံသဋ္ဌံ သမ္ပယုတ္တံ။ တေန ဝုစ္စတိ ‘‘မုဒိတာသဟဂတေန စေတသာ’’တိ။

၆၇၀. ‘‘ဝိပုလေနာ’’တိ ယံ ဝိပုလံ တံ မဟဂ္ဂတံ, ယံ မဟဂ္ဂတံ တံ အပ္ပမာဏံ, ယံ အပ္ပမာဏံ သော အဝေရော, ယော အဝေရော သော အဗျာပဇ္ဇော။

၆၇၁. ‘‘ဖရိတွာ’’တိ ဖရိတွာ အဓိမုစ္စိတွာ။

၆၇၂. ‘‘ဝိဟရတီ’’တိ ။ပေ.။ တေန ဝုစ္စတိ ‘‘ဝိဟရတီ’’တိ။

၄. ဥပေက္ခာ

၆၇၃. ကထဉ္စ ဘိက္ခု ဥပေက္ခာသဟဂတေန စေတသာ ဧကံ ဒိသံ ဖရိတွာ ဝိဟရတိ? သေယျထာပိ နာမ ဧကံ ပုဂ္ဂလံ နေဝ မနာပံ န အမနာပံ ဒိသွာ ဥပေက္ခကော အဿ, ဧဝမေဝ သဗ္ဗေ သတ္တေ ဥပေက္ခာယ ဖရတိ။

တတ္ထ ကတမာ ဥပေက္ခာ? ယာ သတ္တေသု ဥပေက္ခာ ဥပေက္ခာယနာ ဥပေက္ခာယိတတ္တံ ဥပေက္ခာစေတောဝိမုတ္တိ – အယံ ဝုစ္စတိ ‘‘ဥပေက္ခာ’’။

တတ္ထ ကတမံ စိတ္တံ? ယံ စိတ္တံ မနော မာနသံ။ပေ.။ တဇ္ဇာမနောဝိညာဏဓါတု – ဣဒံ ဝုစ္စတိ ‘‘စိတ္တံ’’။ ဣဒံ စိတ္တံ ဣမာယ ဥပေက္ခာယ သဟဂတံ ဟောတိ သဟဇာတံ သံသဋ္ဌံ သမ္ပယုတ္တံ။ တေန ဝုစ္စတိ ‘‘ဥပေက္ခာသဟဂတေန စေတသာ’’တိ။

၆၇၄. ‘‘ဧကံ ဒိသ’’န္တိ ပုရတ္ထိမံ ဝါ ဒိသံ ပစ္ဆိမံ ဝါ ဒိသံ ဥတ္တရံ ဝါ ဒိသံ ဒက္ခိဏံ ဝါ ဒိသံ ဥဒ္ဓံ ဝါ အဓေါ ဝါ တိရိယံ ဝါ ဝိဒိသံ ဝါ။

၆၇၅. ‘‘ဖရိတွာ’’တိ ဖရိတွာ အဓိမုစ္စိတွာ။

၆၇၆. ‘‘ဝိဟရတီ’’တိ။ပေ.။ တေန ဝုစ္စတိ ‘‘ဝိဟရတီ’’တိ။

၆၇၇. ‘‘တထာ ဒုတိယ’’န္တိ ယထေဝ ဧကံ ဒိသံ တထာ ဒုတိယံ ဒိသံ တထာ တတိယံ ဒိသံ တထာ စတုတ္ထံ ဒိသံ တထာ ဥဒ္ဓံ တထာ အဓေါ တထာ တိရိယံ တထာ ဝိဒိသံ။

၆၇၈. ‘‘သဗ္ဗဓိ သဗ္ဗတ္တတာယ သဗ္ဗာဝန္တံ လောက’’န္တိ သဗ္ဗေန သဗ္ဗံ သဗ္ဗထာ သဗ္ဗံ အသေသံ နိဿေသံ။ ပရိယာဒါယဝစနမေတံ – ‘‘သဗ္ဗဓိ သဗ္ဗတ္တတာယ သဗ္ဗာဝန္တံ လောက’’န္တိ။

၆၇၉. ‘‘ဥပေက္ခာသဟဂတေန စေတသာ’’တိ, တတ္ထ ကတမာ ဥပေက္ခာ? ယာ သတ္တေသု ဥပေက္ခာ ဥပေက္ခာယနာ ဥပေက္ခာယိတတ္တံ ဥပေက္ခာစေတောဝိမုတ္တိ – အယံ ဝုစ္စတိ ‘‘ဥပေက္ခာ’’။

တတ္ထ ကတမံ စိတ္တံ? ယံ စိတ္တံ မနော မာနသံ။ပေ.။ တဇ္ဇာမနောဝိညာဏဓါတု – ဣဒံ ဝုစ္စတိ ‘‘စိတ္တံ’’။ ဣဒံ စိတ္တံ ဣမာယ ဥပေက္ခာယ သဟဂတံ ဟောတိ သဟဇာတံ သံသဋ္ဌံ သမ္ပယုတ္တံ။ တေန ဝုစ္စတိ ‘‘ဥပေက္ခာသဟဂတေန စေတသာ’’တိ။

၆၈၀. ‘‘ဝိပုလေနာ’’တိ ယံ ဝိပုလံ တံ မဟဂ္ဂတံ, ယံ မဟဂ္ဂတံ တံ အပ္ပမာဏံ, ယံ အပ္ပမာဏံ သော အဝေရော, ယော အဝေရော သော အဗျာပဇ္ဇော။

၆၈၁. ‘‘ဖရိတွာ’’တိ ဖရိတွာ အဓိမုစ္စိတွာ။

၆၈၂. ‘‘ဝိဟရတီ’’တိ။ပေ.။ တေန ဝုစ္စတိ ‘‘ဝိဟရတီ’’တိ။

သုတ္တန္တဘာဇနီယံ။

၂. အဘိဓမ္မဘာဇနီယံ

၆၈၃. စတဿော အပ္ပမညာယော – မေတ္တာ, ကရုဏာ, မုဒိတာ, ဥပေက္ခာ။

၆၈၄. တတ္ထ ကတမာ မေတ္တာ? ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ မေတ္တာသဟဂတံ , ယာ တသ္မိံ သမယေ မေတ္တိ မေတ္တာယနာ မေတ္တာယိတတ္တံ မေတ္တာစေတောဝိမုတ္တိ – အယံ ဝုစ္စတိ ‘‘မေတ္တာ’’။ အဝသေသာ ဓမ္မာ မေတ္တာယ သမ္ပယုတ္တာ။

တတ္ထ ကတမာ မေတ္တာ? ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိတက္ကဝိစာရာနံ ဝူပသမာ။ပေ.။ ဒုတိယံ ဈာနံ ဥပသမ္ပဇ္ဇ ဝိဟရတိ မေတ္တာသဟဂတံ, ယာ တသ္မိံ သမယေ မေတ္တိ မေတ္တာယနာ မေတ္တာယိတတ္တံ မေတ္တာစေတောဝိမုတ္တိ – အယံ ဝုစ္စတိ ‘‘မေတ္တာ’’။ အဝသေသာ ဓမ္မာ မေတ္တာယ သမ္ပယုတ္တာ။

တတ္ထ ကတမာ မေတ္တာ? ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဣတိယာ စ ဝိရာဂါ။ပေ.။ တတိယံ ဈာနံ ဥပသမ္ပဇ္ဇ ဝိဟရတိ မေတ္တာသဟဂတံ, ယာ တသ္မိံ သမယေ မေတ္တိ မေတ္တာယနာ မေတ္တာယိတတ္တံ မေတ္တာစေတောဝိမုတ္တိ – အယံ ဝုစ္စတိ ‘‘မေတ္တာ’’။ အဝသေသာ ဓမ္မာ မေတ္တာယ သမ္ပယုတ္တာ။

၆၈၅. ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ မေတ္တာသဟဂတံ, ယာ တသ္မိံ သမယေ မေတ္တိ မေတ္တာယနာ မေတ္တာယိတတ္တံ မေတ္တာစေတောဝိမုတ္တိ – အယံ ဝုစ္စတိ ‘‘မေတ္တာ’’။ အဝသေသာ ဓမ္မာ မေတ္တာယ သမ္ပယုတ္တာ။

ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိဝိစ္စေဝ ကာမေဟိ ဝိဝိစ္စ အကုသလေဟိ ဓမ္မေဟိ အဝိတက္ကံ ဝိစာရမတ္တံ ဝိဝေကဇံ ဣတိသုခံ ဒုတိယံ ဈာနံ ဥပသမ္ပဇ္ဇ ဝိဟရတိ မေတ္တာသဟဂတံ, ယာ တသ္မိံ သမယေ မေတ္တိ မေတ္တာယနာ မေတ္တာယိတတ္တံ မေတ္တာစေတောဝိမုတ္တိ – အယံ ဝုစ္စတိ ‘‘မေတ္တာ’’။ အဝသေသာ ဓမ္မာ မေတ္တာယ သမ္ပယုတ္တာ။

ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိတက္ကဝိစာရာနံ ဝူပသမာ။ပေ.။ တတိယံ ဈာနံ ဥပသမ္ပဇ္ဇ ဝိဟရတိ မေတ္တာသဟဂတံ, ယာ တသ္မိံ သမယေ မေတ္တိ မေတ္တာယနာ မေတ္တာယိတတ္တံ မေတ္တာစေတောဝိမုတ္တိ – အယံ ဝုစ္စတိ ‘‘မေတ္တာ’’။ အဝသေသာ ဓမ္မာ မေတ္တာယ သမ္ပယုတ္တာ။

ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဣတိယာ စ ဝိရာဂါ။ပေ.။ စတုတ္ထံ ဈာနံ ဥပသမ္ပဇ္ဇ ဝိဟရတိ မေတ္တာသဟဂတံ, ယာ တသ္မိံ သမယေ မေတ္တိ မေတ္တာယနာ မေတ္တာယိတတ္တံ မေတ္တာစေတောဝိမုတ္တိ – အယံ ဝုစ္စတိ ‘‘မေတ္တာ’’။ အဝသေသာ ဓမ္မာ မေတ္တာယ သမ္ပယုတ္တာ။

၆၈၆. တတ္ထ ကတမာ ကရုဏာ? ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ ကရုဏာသဟဂတံ, ယာ တသ္မိံ သမယေ ကရုဏာ ကရုဏာယနာ ကရုဏာယိတတ္တံ ကရုဏာစေတောဝိမုတ္တိ – အယံ ဝုစ္စတိ ‘‘ကရုဏာ’’။ အဝသေသာ ဓမ္မာ ကရုဏာယ သမ္ပယုတ္တာ။

တတ္ထ ကတမာ ကရုဏာ? ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဣတိယာ စ ဝိရာဂါ။ပေ.။ ဒုတိယံ ဈာနံ ဥပသမ္ပဇ္ဇ ဝိဟရတိ ကရုဏာသဟဂတံ, ယာ တသ္မိံ သမယေ ကရုဏာ ကရုဏာယနာ ကရုဏာယိတတ္တံ ကရုဏာစေတောဝိမုတ္တိ – အယံ ဝုစ္စတိ ‘‘ကရုဏာ’’။ အဝသေသာ ဓမ္မာ ကရုဏာယ သမ္ပယုတ္တာ။

တတ္ထ ကတမာ ကရုဏာ? ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဣတိယာ စ ဝိရာဂါ။ပေ.။ တတိယံ ဈာနံ ဥပသမ္ပဇ္ဇ ဝိဟရတိ ကရုဏာသဟဂတံ, ယာ တသ္မိံ သမယေ ကရုဏာ ကရုဏာယနာ ကရုဏာယိတတ္တံ ကရုဏာစေတောဝိမုတ္တိ – အယံ ဝုစ္စတိ ‘‘ကရုဏာ’’။ အဝသေသာ ဓမ္မာ ကရုဏာယ သမ္ပယုတ္တာ။

၆၈၇. ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ ကရုဏာသဟဂတံ, ယာ တသ္မိံ သမယေ ကရုဏာ ကရုဏာယနာ ကရုဏာယိတတ္တံ ကရုဏာစေတောဝိမုတ္တိ – အယံ ဝုစ္စတိ ‘‘ကရုဏာ’’။ အဝသေသာ ဓမ္မာ ကရုဏာယ သမ္ပယုတ္တာ။

ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိဝိစ္စေဝ ကာမေဟိ ဝိဝိစ္စ အကုသလေဟိ ဓမ္မေဟိ အဝိတက္ကံ ဝိစာရမတ္တံ ဝိဝေကဇံ ဣတိသုခံ ဒုတိယံ ဈာနံ ဥပသမ္ပဇ္ဇ ဝိဟရတိ ကရုဏာသဟဂတံ, ယာ တသ္မိံ သမယေ ကရုဏာ ကရုဏာယနာ ကရုဏာယိတတ္တံ ကရုဏာစေတောဝိမုတ္တိ – အယံ ဝုစ္စတိ ‘‘ကရုဏာ’’။ အဝသေသာ ဓမ္မာ ကရုဏာယ သမ္ပယုတ္တာ။

ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိတက္ကဝိစာရာနံ ဝူပသမာ။ပေ.။ တတိယံ ဈာနံ ဥပသမ္ပဇ္ဇ ဝိဟရတိ ကရုဏာသဟဂတံ, ယာ တသ္မိံ သမယေ ကရုဏာ ကရုဏာယနာ ကရုဏာယိတတ္တံ ကရုဏာစေတောဝိမုတ္တိ – အယံ ဝုစ္စတိ ‘‘ကရုဏာ’’။ အဝသေသာ ဓမ္မာ ကရုဏာယ သမ္ပယုတ္တာ။

ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဣတိယာ စ ဝိရာဂါ။ပေ.။ စတုတ္ထံ ဈာနံ ဥပသမ္ပဇ္ဇ ဝိဟရတိ ကရုဏာသဟဂတံ, ယာ တသ္မိံ သမယေ ကရုဏာ ကရုဏာယနာ ကရုဏာယိတတ္တံ ကရုဏာစေတောဝိမုတ္တိ – အယံ ဝုစ္စတိ ‘‘ကရုဏာ’’။ အဝသေသာ ဓမ္မာ ကရုဏာယ သမ္ပယုတ္တာ။

၆၈၈. တတ္ထ ကတမာ မုဒိတာ? ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ မုဒိတာသဟဂတံ, ယာ တသ္မိံ သမယေ မုဒိတာ မုဒိတာယနာ မုဒိတာယိတတ္တံ မုဒိတာစေတောဝိမုတ္တိ – အယံ ဝုစ္စတိ ‘‘မုဒိတာ’’။ အဝသေသာ ဓမ္မာ မုဒိတာယ သမ္ပယုတ္တာ။

တတ္ထ ကတမာ မုဒိတာ? ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိတက္ကဝိစာရာနံ ဝူပသမာ။ပေ.။ ဒုတိယံ ဈာနံ ဥပသမ္ပဇ္ဇ ဝိဟရတိ မုဒိတာသဟဂတံ, ယာ တသ္မိံ သမယေ မုဒိတာ မုဒိတာယတနာ မုဒိတာယိတတ္တံ မုဒိတာစေတောဝိမုတ္တိ – အယံ ဝုစ္စတိ ‘‘မုဒိတာ’’။ အဝသေသာ ဓမ္မာ မုဒိတာယ သမ္ပယုတ္တာ။

တတ္ထ ကတမာ မုဒိတာ? ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဣတိယာ စ ဝိရာဂါ။ပေ.။ တတိယံ ဈာနံ ဥပသမ္ပဇ္ဇ ဝိဟရတိ မုဒိတာသဟဂတံ, ယာ တသ္မိံ သမယေ မုဒိတာ မုဒိတာယနာ မုဒိတာယိတတ္တံ မုဒိတာစေတောဝိမုတ္တိ – အယံ ဝုစ္စတိ ‘‘မုဒိတာ’’။ အဝသေသာ ဓမ္မာ မုဒိတာယ သမ္ပယုတ္တာ။

၆၈၉. ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ မုဒိတာသဟဂတံ, ယာ တသ္မိံ သမယေ မုဒိတာ မုဒိတာယနာ မုဒိတာယိတတ္တံ မုဒိတာစေတောဝိမုတ္တိ – အယံ ဝုစ္စတိ ‘‘မုဒိတာ’’။ အဝသေသာ ဓမ္မာ မုဒိတာယ သမ္ပယုတ္တာ။

ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိဝိစ္စေဝ ကာမေဟိ ဝိဝိစ္စ အကုသလေဟိ ဓမ္မေဟိ အဝိတက္ကံ ဝိစာရမတ္တံ ဝိဝေကဇံ ဣတိသုခံ ဒုတိယံ ဈာနံ ဥပသမ္ပဇ္ဇ ဝိဟရတိ မုဒိတာသဟဂတံ, ယာ တသ္မိံ သမယေ မုဒိတာ မုဒိတာယနာ မုဒိတာယိတတ္တံ မုဒိတာစေတောဝိမုတ္တိ – အယံ ဝုစ္စတိ ‘‘မုဒိတာ’’။ အဝသေသာ ဓမ္မာ မုဒိတာယ သမ္ပယုတ္တာ။

ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိတက္ကဝိစာရာနံ ဝူပသမာ။ပေ.။ တတိယံ ဈာနံ ဥပသမ္ပဇ္ဇ ဝိဟရတိ မုဒိတာသဟဂတံ, ယာ တသ္မိံ သမယေ မုဒိတာ မုဒိတာယနာ မုဒိတာယိတတ္တံ မုဒိတာစေတောဝိမုတ္တိ – အယံ ဝုစ္စတိ ‘‘မုဒိတာ’’။ အဝသေသာ ဓမ္မာ မုဒိတာယ သမ္ပယုတ္တာ။

ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဣတိယာ စ ဝိရာဂါ။ပေ.။ စတုတ္ထံ ဈာနံ ဥပသမ္ပဇ္ဇ ဝိဟရတိ မုဒိတာသဟဂတံ, ယာ တသ္မိံ သမယေ မုဒိတာ မုဒိတာယနာ မုဒိတာယိတတ္တံ မုဒိတာစေတောဝိမုတ္တိ – အယံ ဝုစ္စတိ ‘‘မုဒိတာ’’။ အဝသေသာ ဓမ္မာ မုဒိတာယ သမ္ပယုတ္တာ။

၆၉၀. တတ္ထ ကတမာ ဥပေက္ခာ? ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ သုခဿ စ ပဟာနာ။ပေ.။ စတုတ္ထံ ဈာနံ ဥပသမ္ပဇ္ဇ ဝိဟရတိ ဥပေက္ခာသဟဂတံ, ယာ တသ္မိံ သမယေ ဥပေက္ခာ ဥပေက္ခာယနာ ဥပေက္ခာယိတတ္တံ ဥပေက္ခာစေတောဝိမုတ္တိ – အယံ ဝုစ္စတိ ‘‘ဥပေက္ခာ’’။ အဝသေသာ ဓမ္မာ ဥပေက္ခာယ သမ္ပယုတ္တာ။

၆၉၁. စတဿော အပ္ပမညာယော – မေတ္တာ, ကရုဏာ, မုဒိတာ, ဥပေက္ခာ။

၆၉၂. တတ္ထ ကတမာ မေတ္တာ? ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ မေတ္တာသဟဂတံ, တသ္မိံ သမယေ ဖဿော ဟောတိ။ပေ.။ အဝိက္ခေပေါ ဟောတိ။ ဣမေ ဓမ္မာ ကုသလာ။ တဿေဝ ရူပါဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ မေတ္တာသဟဂတံ, ယာ တသ္မိံ သမယေ မေတ္တိ မေတ္တာယနာ မေတ္တာယိတတ္တံ မေတ္တာစေတောဝိမုတ္တိ – အယံ ဝုစ္စတိ ‘‘မေတ္တာ’’။ အဝသေသာ ဓမ္မာ မေတ္တာယ သမ္ပယုတ္တာ။

တတ္ထ ကတမာ မေတ္တာ? ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိတက္ကဝိစာရာနံ ဝူပသမာ။ပေ.။ ဒုတိယံ ဈာနံ ဥပသမ္ပဇ္ဇ ဝိဟရတိ မေတ္တာသဟဂတံ , တသ္မိံ သမယေ ဖဿော ဟောတိ။ပေ.။ အဝိက္ခေပေါ ဟောတိ။ ဣမေ ဓမ္မာ ကုသလာ။ တဿေဝ ရူပါဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ ဝိတက္ကဝိစာရာနံ ဝူပသမာ။ပေ.။ ဒုတိယံ ဈာနံ။ပေ.။ တတိယံ ဈာနံ။ပေ.။ ပဌမံ ဈာနံ။ပေ.။ ဒုတိယံ ဈာနံ။ပေ.။ တတိယံ ဈာနံ။ပေ.။ စတုတ္ထံ ဈာနံ ဥပသမ္ပဇ္ဇ ဝိဟရတိ မေတ္တာသဟဂတံ, ယာ တသ္မိံ သမယေ မေတ္တိ မေတ္တာယနာ မေတ္တာယိတတ္တံ မေတ္တာစေတောဝိမုတ္တိ – အယံ ဝုစ္စတိ ‘‘မေတ္တာ’’။ အဝသေသာ ဓမ္မာ မေတ္တာယ သမ္ပယုတ္တာ။

၆၉၃. တတ္ထ ကတမာ ကရုဏာ? ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ ကရုဏာသဟဂတံ, တသ္မိံ သမယေ ဖဿော ဟောတိ။ပေ.။ အဝိက္ခေပေါ ဟောတိ။ ဣမေ ဓမ္မာ ကုသလာ။ တဿေဝ ရူပါဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ ကရုဏာသဟဂတံ, ယာ တသ္မိံ သမယေ ကရုဏာ ကရုဏာယနာ ကရုဏာယိတတ္တံ ကရုဏာစေတောဝိမုတ္တိ – အယံ ဝုစ္စတိ ‘‘ကရုဏာ’’။ အဝသေသာ ဓမ္မာ ကရုဏာယ သမ္ပယုတ္တာ။

တတ္ထ ကတမာ ကရုဏာ? ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိတက္ကဝိစာရာနံ ဝူပသမာ။ပေ.။ ဒုတိယံ ဈာနံ ဥပသမ္ပဇ္ဇ ဝိဟရတိ ကရုဏာသဟဂတံ, တသ္မိံ သမယေ ဖဿော ဟောတိ။ပေ.။ အဝိက္ခေပေါ ဟောတိ။ ဣမေ ဓမ္မာ ကုသလာ။ တဿေဝ ရူပါဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ ဝိတက္ကဝိစာရာနံ ဝူပသမာ။ပေ.။ ဒုတိယံ ဈာနံ။ပေ.။ တတိယံ ဈာနံ။ပေ.။ ပဌမံ ဈာနံ။ပေ.။ ဒုတိယံ ဈာနံ။ပေ.။ တတိယံ ဈာနံ။ပေ.။ စတုတ္ထံ ဈာနံ ဥပသမ္ပဇ္ဇ ဝိဟရတိ ကရုဏာသဟဂတံ, ယာ တသ္မိံ သမယေ ကရုဏာ ကရုဏာယနာ ကရုဏာယိတတ္တံ ကရုဏာစေတောဝိမုတ္တိ – အယံ ဝုစ္စတိ ‘‘ကရုဏာ’’။ အဝသေသာ ဓမ္မာ ကရုဏာယ သမ္ပယုတ္တာ။

၆၉၄. တတ္ထ ကတမာ မုဒိတာ? ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ မုဒိတာသဟဂတံ, တသ္မိံ သမယေ ဖဿော ဟောတိ။ပေ.။ အဝိက္ခေပေါ ဟောတိ။ ဣမေ ဓမ္မာ ကုသလာ။ တဿေဝ ရူပါဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ မုဒိတာသဟဂတံ, ယာ တသ္မိံ သမယေ မုဒိတာ မုဒိတာယနာ မုဒိတာယိတတ္တံ မုဒိတာစေတောဝိမုတ္တိ – အယံ ဝုစ္စတိ ‘‘မုဒိတာ’’။ အဝသေသာ ဓမ္မာ မုဒိတာယ သမ္ပယုတ္တာ။

တတ္ထ ကတမာ မုဒိတာ? ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ ဝိတက္ကဝိစာရာနံ ဝူပသမာ။ပေ.။ ဒုတိယံ ဈာနံ ဥပသမ္ပဇ္ဇ ဝိဟရတိ မုဒိတာသဟဂတံ, တသ္မိံ သမယေ ဖဿော ဟောတိ။ပေ.။ အဝိက္ခေပေါ ဟောတိ။ ဣမေ ဓမ္မာ ကုသလာ။ တဿေဝ ရူပါဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ ဝိတက္ကဝိစာရာနံ ဝူပသမာ။ပေ.။ ဒုတိယံ ဈာနံ။ပေ.။ တတိယံ ဈာနံ။ပေ.။ ပဌမံ ဈာနံ။ပေ.။ ဒုတိယံ ဈာနံ။ပေ.။ တတိယံ ဈာနံ။ပေ.။ စတုတ္ထံ ဈာနံ ဥပသမ္ပဇ္ဇ ဝိဟရတိ မုဒိတာသဟဂတံ, ယာ တသ္မိံ သမယေ မုဒိတာ မုဒိတာယနာ မုဒိတာယိတတ္တံ မုဒိတာစေတောဝိမုတ္တိ – အယံ ဝုစ္စတိ ‘‘မုဒိတာ’’။ အဝသေသာ ဓမ္မာ မုဒိတာယ သမ္ပယုတ္တာ။

၆၉၅. တတ္ထ ကတမာ ဥပေက္ခာ? ဣဓ ဘိက္ခု ယသ္မိံ သမယေ ရူပူပပတ္တိယာ မဂ္ဂံ ဘာဝေတိ သုခဿ စ ပဟာနာ။ပေ.။ စတုတ္ထံ ဈာနံ ဥပသမ္ပဇ္ဇ ဝိဟရတိ ဥပေက္ခာသဟဂတံ, တသ္မိံ သမယေ ဖဿော ဟောတိ။ပေ.။ အဝိက္ခေပေါ ဟောတိ။ ဣမေ ဓမ္မာ ကုသလာ။ တဿေဝ ရူပါဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ သုခဿ စ ပဟာနာ ဒုက္ခဿ စ ပဟာနာ။ပေ.။ စတုတ္ထံ ဈာနံ ဥပသမ္ပဇ္ဇ ဝိဟရတိ ဥပေက္ခာသဟဂတံ, ယာ တသ္မိံ သမယေ ဥပေက္ခာ ဥပေက္ခာယနာ ဥပေက္ခာယိတတ္တံ ဥပေက္ခာစေတောဝိမုတ္တိ – အယံ ဝုစ္စတိ ‘‘ဥပေက္ခာ’’။ အဝသေသာ ဓမ္မာ ဥပေက္ခာယ သမ္ပယုတ္တာ။

၆၉၆. စတဿော အပ္ပမညာယော – မေတ္တာ, ကရုဏာ, မုဒိတာ, ဥပေက္ခာ။

၆၉၇. တတ္ထ ကတမာ မေတ္တာ? ဣဓ ဘိက္ခု ယသ္မိံ သမယေ ရူပါဝစရံ ဈာနံ ဘာဝေတိ ကိရိယံ နေဝ ကုသလံ နာကုသလံ န စ ကမ္မဝိပါကံ ဒိဋ္ဌဓမ္မသုခဝိဟာရံ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ မေတ္တာသဟဂတံ, ယာ တသ္မိံ သမယေ မေတ္တိ မေတ္တာယနာ မေတ္တာယိတတ္တံ မေတ္တာစေတောဝိမုတ္တိ – အယံ ဝုစ္စတိ ‘‘မေတ္တာ’’။ အဝသေသာ ဓမ္မာ မေတ္တာယ သမ္ပယုတ္တာ။

တတ္ထ ကတမာ မေတ္တာ? ဣဓ ဘိက္ခု ယသ္မိံ သမယေ ရူပါဝစရံ ဈာနံ ဘာဝေတိ ကိရိယံ နေဝ ကုသလံ နာကုသလံ န စ ကမ္မဝိပါကံ ဒိဋ္ဌဓမ္မသုခဝိဟာရံ ဝိတက္ကဝိစာရာနံ ဝူပသမာ။ပေ.။ ဒုတိယံ ဈာနံ။ပေ.။ တတိယံ ဈာနံ။ပေ.။ ပဌမံ ဈာနံ။ပေ.။ ဒုတိယံ ဈာနံ။ပေ.။ တတိယံ ဈာနံ။ပေ.။ စတုတ္ထံ ဈာနံ ဥပသမ္ပဇ္ဇ ဝိဟရတိ မေတ္တာသဟဂတံ, ယာ တသ္မိံ သမယေ မေတ္တိ မေတ္တာယနာ မေတ္တာယိတတ္တံ မေတ္တာစေတောဝိမုတ္တိ – အယံ ဝုစ္စတိ ‘‘မေတ္တာ’’။ အဝသေသာ ဓမ္မာ မေတ္တာယ သမ္ပယုတ္တာ။

၆၉၈. တတ္ထ ကတမာ ကရုဏာ။ပေ.။ တတ္ထ ကတမာ မုဒိတာ။ပေ.။ တတ္ထ ကတမာ ဥပေက္ခာ? ဣဓ ဘိက္ခု ယသ္မိံ သမယေ ရူပါဝစရံ ဈာနံ ဘာဝေတိ ကိရိယံ နေဝ ကုသလံ နာကုသလံ န စ ကမ္မဝိပါကံ ဒိဋ္ဌဓမ္မသုခဝိဟာရံ သုခဿ စ ပဟာနာ ဒုက္ခဿ စ ပဟာနာ။ပေ.။ စတုတ္ထံ ဈာနံ ဥပသမ္ပဇ္ဇ ဝိဟရတိ ဥပေက္ခာသဟဂတံ, ယာ တသ္မိံ သမယေ ဥပေက္ခာ ဥပေက္ခာယနာ ဥပေက္ခာယိတတ္တံ ဥပေက္ခာစေတောဝိမုတ္တိ – အယံ ဝုစ္စတိ ‘‘ဥပေက္ခာ’’။ အဝသေသာ ဓမ္မာ ဥပေက္ခာယ သမ္ပယုတ္တာ။

အဘိဓမ္မဘာဇနီယံ။

၃. ပဉှာပုစ္ဆကံ

၆၉၉. စတဿော အပ္ပမညာယော – ဣဓ ဘိက္ခု မေတ္တာသဟဂတေန စေတသာ ဧကံ ဒိသံ ဖရိတွာ ဝိဟရတိ တထာ ဒုတိယံ တထာ တတိယံ တထာ စတုတ္ထံ, ဣတိ ဥဒ္ဓမဓေါ တိရိယံ သဗ္ဗဓိ သဗ္ဗတ္တတာယ သဗ္ဗာဝန္တံ လောကံ မေတ္တာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန ဖရိတွာ ဝိဟရတိ; ကရုဏာသဟဂတေန စေတသာ ဧကံ ဒိသံ ဖရိတွာ ဝိဟရတိ တထာ ဒုတိယံ တထာ တတိယံ တထာ စတုတ္ထံ, ဣတိ ဥဒ္ဓမဓေါ တိရိယံ သဗ္ဗဓိ သဗ္ဗတ္တတာယ သဗ္ဗာဝန္တံ လောကံ ကရုဏာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန ဖရိတွာ ဝိဟရတိ; မုဒိတာသဟဂတေန စေတသာ ဧကံ ဒိသံ ဖရိတွာ ဝိဟရတိ တထာ ဒုတိယံ တထာ တတိယံ တထာ စတုတ္ထံ, ဣတိ ဥဒ္ဓမဓေါ တိရိယံ သဗ္ဗဓိ သဗ္ဗတ္တတာယ သဗ္ဗာဝန္တံ လောကံ မုဒိတာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန ဖရိတွာ ဝိဟရတိ; ဥပေက္ခာသဟဂတေန စေတသာ ဧကံ ဒိသံ ဖရိတွာ ဝိဟရတိ တထာ ဒုတိယံ တထာ တတိယံ တထာ စတုတ္ထံ, ဣတိ ဥဒ္ဓမဓေါ တိရိယံ သဗ္ဗဓိ သဗ္ဗတ္တတာယ သဗ္ဗာဝန္တံ လောကံ ဥပေက္ခာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန ဖရိတွာ ဝိဟရတိ။

၇၀၀. စတုန္နံ အပ္ပမညာနံ ကတိ ကုသလာ, ကတိ အကုသလာ, ကတိ အဗျာကတာ။ပေ.။ ကတိ သရဏာ, ကတိ အရဏာ?

၁. တိကံ

၇၀၁. သိယာ ကုသလာ, သိယာ အဗျာကတာ။ တိဿော အပ္ပမညာယော သုခါယ ဝေဒနာယ သမ္ပယုတ္တာ, ဥပေက္ခာ အဒုက္ခမသုခါယ ဝေဒနာယ သမ္ပယုတ္တာ။ သိယာ ဝိပါကာ, သိယာ ဝိပါကဓမ္မဓမ္မာ, သိယာ နေဝဝိပါကနဝိပါကဓမ္မဓမ္မာ။ သိယာ ဥပါဒိန္နုပါဒါနိယာ, သိယာ အနုပါဒိန္နုပါဒါနိယာ။ အသံကိလိဋ္ဌသံကိလေသိကာ။ တိဿော အပ္ပမညာယော သိယာ သဝိတက္ကသဝိစာရာ, သိယာ အဝိတက္ကဝိစာရမတ္တာ, သိယာ အဝိတက္ကအဝိစာရာ; ဥပေက္ခာ အဝိတက္ကအဝိစာရာ။ တိဿော အပ္ပမညာယော သိယာ ဣတိသဟဂတာ, သိယာ သုခသဟဂတာ, န ဥပေက္ခာသဟဂတာ, သိယာ န ဝတ္တဗ္ဗာ ဣတိသဟဂတာတိ; ဥပေက္ခာ ဥပေက္ခာသဟဂတာ။ နေဝ ဒဿနေန န ဘာဝနာယ ပဟာတဗ္ဗာ။ နေဝ ဒဿနေန န ဘာဝနာယ ပဟာတဗ္ဗဟေတုကာ။ သိယာ အာစယဂါမိနော, သိယာ နေဝါစယဂါမိနာပစယဂါမိနော, နေဝသေက္ခနာသေက္ခာ, မဟဂ္ဂတာ, န ဝတ္တဗ္ဗာ ပရိတ္တာရမ္မဏာတိပိ, မဟဂ္ဂတာရမ္မဏာတိပိ, အပ္ပမာဏာရမ္မဏာတိပိ။ မဇ္ဈိမာ, အနိယတာ, န ဝတ္တဗ္ဗာ မဂ္ဂါရမ္မဏာတိပိ, မဂ္ဂဟေတုကာတိပိ , မဂ္ဂါဓိပတိနောတိပိ။ သိယာ ဥပ္ပန္နာ, သိယာ အနုပ္ပန္နာ, သိယာ ဥပ္ပါဒိနော။ သိယာ အတီတာ, သိယာ အနာဂတာ, သိယာ ပစ္စုပ္ပန္နာ။ န ဝတ္တဗ္ဗာ အတီတာရမ္မဏာတိပိ, အနာဂတာရမ္မဏာတိပိ, ပစ္စုပ္ပန္နာရမ္မဏာတိပိ။ သိယာ အဇ္ဈတ္တာ, သိယာ ဗဟိဒ္ဓါ, သိယာ အဇ္ဈတ္တဗဟိဒ္ဓါ, ဗဟိဒ္ဓါရမ္မဏာ, အနိဒဿနအပ္ပဋိဃာ။

၂. ဒုကံ

၇၀၂. မေတ္တာ ဟေတု, တိဿော အပ္ပမညာယော န ဟေတူ, သဟေတုကာ, ဟေတုသမ္ပယုတ္တာ။ မေတ္တာ ဟေတု စေဝ သဟေတုကာ စ; တိဿော အပ္ပမညာယော န ဝတ္တဗ္ဗာ ဟေတူ စေဝ သဟေတုကာ စာတိ, သဟေတုကာ စေဝ န စ ဟေတူ။ မေတ္တာ ဟေတု စေဝ ဟေတုသမ္ပယုတ္တာ စ; တိဿော အပ္ပမညာယော န ဝတ္တဗ္ဗာ ဟေတူ စေဝ ဟေတုသမ္ပယုတ္တာ စာတိ, ဟေတုသမ္ပယုတ္တာ စေဝ န စ ဟေတူ။ တိဿော အပ္ပမညာယော န ဟေတူ သဟေတုကာ; မေတ္တာ န ဝတ္တဗ္ဗာ န ဟေတု သဟေတုကာတိပိ, န ဟေတု အဟေတုကာတိပိ။

သပ္ပစ္စယာ, သင်္ခတာ, အနိဒဿနာ, အပ္ပဋိဃာ, အရူပါ, လောကိယာ, ကေနစိ ဝိညေယျာ, ကေနစိ န ဝိညေယျာ, နော အာသဝါ, သာသဝါ, အာသဝဝိပ္ပယုတ္တာ , န ဝတ္တဗ္ဗာ အာသဝါ စေဝ သာသဝါ စာတိ, သာသဝါ စေဝ နော စ အာသဝါ, န ဝတ္တဗ္ဗာ အာသဝါ စေဝ အာသဝသမ္ပယုတ္တာ စာတိပိ, အာသဝသမ္ပယုတ္တာ စေဝ နော စ အာသဝါတိပိ။ အာသဝဝိပ္ပယုတ္တာ သာသဝါ။

နော သံယောဇနာ။ပေ.။ နော ဂန္ထာ။ပေ.။ နော ဩဃာ။ပေ.။ နော ယောဂါ။ပေ.။ နော နီဝရဏာ။ပေ.။ နော ပရာမာသာ ။ပေ.။ သာရမ္မဏာ, နော စိတ္တာ, စေတသိကာ, စိတ္တသမ္ပယုတ္တာ, စိတ္တသံသဋ္ဌာ, စိတ္တသမုဋ္ဌာနာ, စိတ္တသဟဘုနော, စိတ္တာနုပရိဝတ္တိနော, စိတ္တသံသဋ္ဌသမုဋ္ဌာနာ, စိတ္တသံသဋ္ဌသမုဋ္ဌာနသဟဘုနော, စိတ္တသံသဋ္ဌသမုဋ္ဌာနာနုပရိဝတ္တိနော, ဗာဟိရာ, နော ဥပါဒါ, သိယာ ဥပါဒိန္နာ, သိယာ အနုပါဒိန္နာ။

နော ဥပါဒါနာ။ပေ.။ နော ကိလေသာ။ပေ.။ န ဒဿနေန ပဟာတဗ္ဗာ, န ဘာဝနာယ ပဟာတဗ္ဗာ, န ဒဿနေန ပဟာတဗ္ဗဟေတုကာ, န ဘာဝနာယ ပဟာတဗ္ဗဟေတုကာ။ တိဿော အပ္ပမညာယော သိယာ သဝိတက္ကာ, သိယာ အဝိတက္ကာ; ဥပေက္ခာ အဝိတက္ကာ။ တိဿော အပ္ပမညာယော သိယာ သဝိစာရာ, သိယာ အဝိစာရာ; ဥပေက္ခာ အဝိစာရာ။ တိဿော အပ္ပမညာယော သိယာ သပ္ပီတိကာ, သိယာ အပ္ပီတိကာ; ဥပေက္ခာ အပ္ပီတိကာ။ တိဿော အပ္ပမညာယော သိယာ ဣတိသဟဂတာ, သိယာ န ဣတိသဟဂတာ; ဥပေက္ခာ န ဣတိသဟဂတာ။ တိဿော အပ္ပမညာယော သုခသဟဂတာ, ဥပေက္ခာ န သုခသဟဂတာ။ ဥပေက္ခာ ဥပေက္ခာသဟဂတာ, တိဿော အပ္ပမညာယော န ဥပေက္ခာသဟဂတာ, န ကာမာဝစရာ, ရူပါဝစရာ, န အရူပါဝစရာ, ပရိယာပန္နာ, အနိယျာနိကာ, အနိယတာ, သဥတ္တရာ, အရဏာတိ။

ပဉှာပုစ္ဆကံ။

အပ္ပမညာဝိဘင်္ဂေါ နိဋ္ဌိတော။