၅. ဣန္ဒြိယဝိဘင်္ဂ
၁. အဘိဓမ္မဘာဇနီယ
၂၁၉. ဗာဝီသတိန္ဒ္ရိယာနိ – စက္ခုန္ဒ္ရိယံ, သောတိန္ဒ္ရိယံ, ဃာနိန္ဒ္ရိယံ, ဇိဝ္ဟိန္ဒ္ရိယံ, ကာယိန္ဒ္ရိယံ, မနိန္ဒ္ရိယံ, ဣတ္ထိန္ဒ္ရိယံ, ပုရိသိန္ဒ္ရိယံ, ဇီဝိတိန္ဒ္ရိယံ, သုခိန္ဒ္ရိယံ, ဒုက္ခိန္ဒ္ရိယံ, သောမနဿိန္ဒ္ရိယံ, ဒေါမနဿိန္ဒ္ရိယံ, ဥပေက္ခိန္ဒ္ရိယံ, သဒ္ဓိန္ဒ္ရိယံ , ဝီရိယိန္ဒ္ရိယံ [ဝိရိယိန္ဒ္ရိယံ (သီ. သျာ.)], သတိန္ဒ္ရိယံ, သမာဓိန္ဒ္ရိယံ, ပညိန္ဒ္ရိယံ, အနညာတညဿာမီတိန္ဒ္ရိယံ, အညိန္ဒ္ရိယံ, အညာတာဝိန္ဒ္ရိယံ။
၂၂၀. တတ္ထ ကတမံ စက္ခုန္ဒ္ရိယံ? ယံ စက္ခု စတုန္နံ မဟာဘူတာနံ ဥပါဒါယ ပသာဒေါ။ပေ.။ သုညော ဂါမောပေသော – ဣဒံ ဝုစ္စတိ ‘‘စက္ခုန္ဒ္ရိယံ’’။
တတ္ထ ကတမံ သောတိန္ဒ္ရိယံ။ပေ.။ ဃာနိန္ဒ္ရိယံ။ပေ.။ ဇိဝ္ဟိန္ဒ္ရိယံ။ပေ.။ ကာယိန္ဒ္ရိယံ? ယော ကာယော စတုန္နံ မဟာဘူတာနံ ဥပါဒါယ ပသာဒေါ။ပေ.။ သုညော ဂါမောပေသော – ဣဒံ ဝုစ္စတိ ‘‘ကာယိန္ဒ္ရိယံ’’။
တတ္ထ ကတမံ မနိန္ဒ္ရိယံ? ဧကဝိဓေန မနိန္ဒ္ရိယံ – ဖဿသမ္ပယုတ္တံ။ ဒုဝိဓေန မနိန္ဒ္ရိယံ – အတ္ထိ သဟေတုကံ, အတ္ထိ အဟေတုကံ။ တိဝိဓေန မနိန္ဒ္ရိယံ – အတ္ထိ ကုသလံ, အတ္ထိ အကုသလံ, အတ္ထိ အဗျာကတံ။ စတုဗ္ဗိဓေန မနိန္ဒ္ရိယံ – အတ္ထိ ကာမာဝစရံ, အတ္ထိ ရူပါဝစရံ, အတ္ထိ အရူပါဝစရံ, အတ္ထိ အပရိယာပန္နံ။ ပဉ္စဝိဓေန မနိန္ဒ္ရိယံ – အတ္ထိ သုခိန္ဒ္ရိယသမ္ပယုတ္တံ, အတ္ထိ ဒုက္ခိန္ဒ္ရိယသမ္ပယုတ္တံ, အတ္ထိ သောမနဿိန္ဒ္ရိယသမ္ပယုတ္တံ, အတ္ထိ ဒေါမနဿိန္ဒ္ရိယသမ္ပယုတ္တံ, အတ္ထိ ဥပေက္ခိန္ဒ္ရိယသမ္ပယုတ္တံ ။ ဆဗ္ဗိဓေန မနိန္ဒ္ရိယံ – စက္ခုဝိညာဏံ။ပေ.။ မနောဝိညာဏံ။ ဧဝံ ဆဗ္ဗိဓေန မနိန္ဒ္ရိယံ။
သတ္တဝိဓေန မနိန္ဒ္ရိယံ – စက္ခုဝိညာဏံ။ပေ.။ ကာယဝိညာဏံ, မနောဓါတု, မနောဝိညာဏဓါတု။ ဧဝံ သတ္တဝိဓေန မနိန္ဒ္ရိယံ။
အဋ္ဌဝိဓေန မနိန္ဒ္ရိယံ – စက္ခုဝိညာဏံ။ပေ.။ ကာယဝိညာဏံ အတ္ထိ သုခသဟဂတံ, အတ္ထိ ဒုက္ခသဟဂတံ, မနောဓါတု, မနောဝိညာဏဓါတု။ ဧဝံ အဋ္ဌဝိဓေန မနိန္ဒ္ရိယံ။
နဝဝိဓေန မနိန္ဒ္ရိယံ – စက္ခုဝိညာဏံ။ပေ.။ ကာယဝိညာဏံ, မနောဓါတု, မနောဝိညာဏဓါတု အတ္ထိ ကုသလာ, အတ္ထိ အကုသလာ, အတ္ထိ အဗျာကတာ။ ဧဝံ နဝဝိဓေန မနိန္ဒ္ရိယံ။
ဒသဝိဓေန မနိန္ဒ္ရိယံ – စက္ခုဝိညာဏံ။ပေ.။ ကာယဝိညာဏံ အတ္ထိ သုခသဟဂတံ, အတ္ထိ ဒုက္ခသဟဂတံ, မနောဓါတု, မနောဝိညာဏဓါတု အတ္ထိ ကုသလာ, အတ္ထိ အကုသလာ, အတ္ထိ အဗျာကတာ။ ဧဝံ ဒသဝိဓေန မနိန္ဒ္ရိယံ။ပေ.။ ဧဝံ ဗဟုဝိဓေန မနိန္ဒ္ရိယံ။ ဣဒံ ဝုစ္စတိ ‘‘မနိန္ဒ္ရိယံ’’။
တတ္ထ ကတမံ ဣတ္ထိန္ဒ္ရိယံ? ယံ ဣတ္ထိယာ ဣတ္ထိလိင်္ဂံ ဣတ္ထိနိမိတ္တံ ဣတ္ထိကုတ္တံ ဣတ္ထာကပ္ပော ဣတ္ထတ္တံ ဣတ္ထိဘာဝေါ – ဣဒံ ဝုစ္စတိ ‘‘ဣတ္ထိန္ဒ္ရိယံ’’။
တတ္ထ ကတမံ ပုရိသိန္ဒ္ရိယံ? ယံ ပုရိသဿ ပုရိသလိင်္ဂံ ပုရိသနိမိတ္တံ ပုရိသကုတ္တံ ပုရိသာကပ္ပော ပုရိသတ္တံ ပုရိသဘာဝေါ – ဣဒံ ဝုစ္စတိ ‘‘ပုရိသိန္ဒ္ရိယံ’’။
တတ္ထ ကတမံ ဇီဝိတိန္ဒ္ရိယံ? ဇီဝိတိန္ဒ္ရိယံ ဒုဝိဓေန – အတ္ထိ ရူပဇီဝိတိန္ဒ္ရိယံ, အတ္ထိ အရူပဇီဝိတိန္ဒ္ရိယံ။
တတ္ထ ကတမံ ရူပဇီဝိတိန္ဒ္ရိယံ? ယော တေသံ ရူဣနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ ဇီဝိတံ ဇီဝိတိန္ဒ္ရိယံ – ဣဒံ ဝုစ္စတိ ‘‘ရူပဇီဝိတိန္ဒ္ရိယံ’’။
တတ္ထ ကတမံ အရူပဇီဝိတိန္ဒ္ရိယံ? ယော တေသံ အရူဣနံ ဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ ဇီဝိတံ ဇီဝိတိန္ဒ္ရိယံ – ဣဒံ ဝုစ္စတိ ‘‘အရူပဇီဝတိန္ဒ္ရိယံ’’။ ဣဒံ ဝုစ္စတိ ‘‘ဇီဝိတိန္ဒ္ရိယံ’’။
တတ္ထ ကတမံ သုခိန္ဒ္ရိယံ? ယံ ကာယိကံ သာတံ ကာယိကံ သုခံ ကာယသမ္ဖဿဇံ သာတံ သုခံ ဝေဒယိတံ ကာယသမ္ဖဿဇာ သာတာ သုခါ ဝေဒနာ – ဣဒံ ဝုစ္စတိ ‘‘သုခိန္ဒ္ရိယံ’’။
တတ္ထ ကတမံ ဒုက္ခိန္ဒ္ရိယံ? ယံ ကာယိကံ အသာတံ ကာယိကံ ဒုက္ခံ ကာယသမ္ဖဿဇံ အသာတံ ဒုက္ခံ ဝေဒယိတံ ကာယသမ္ဖဿဇာ အသာတာ ဒုက္ခာ ဝေဒနာ – ဣဒံ ဝုစ္စတိ ‘‘ဒုက္ခိန္ဒ္ရိယံ’’။
တတ္ထ ကတမံ သောမနဿိန္ဒ္ရိယံ? ယံ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – ဣဒံ ဝုစ္စတိ ‘‘သောမနဿိန္ဒ္ရိယံ’’။
တတ္ထ ကတမံ ဒေါမနဿိန္ဒ္ရိယံ? ယံ စေတသိကံ အသာတံ စေတသိကံ ဒုက္ခံ စေတောသမ္ဖဿဇံ အသာတံ ဒုက္ခံ ဝေဒယိတံ စေတောသမ္ဖဿဇာ အသာတာ ဒုက္ခာ ဝေဒနာ – ဣဒံ ဝုစ္စတိ ‘‘ဒေါမနဿိန္ဒ္ရိယံ’’။
တတ္ထ ကတမံ ဥပေက္ခိန္ဒ္ရိယံ? ယံ စေတသိကံ နေဝ သာတံ နာသာတံ စေတောသမ္ဖဿဇံ အဒုက္ခမသုခံ ဝေဒယိတံ စေတောသမ္ဖဿဇာ အဒုက္ခမသုခါ ဝေဒနာ – ဣဒံ ဝုစ္စတိ ‘‘ဥပေက္ခိန္ဒ္ရိယံ’’။
တတ္ထ ကတမံ သဒ္ဓိန္ဒ္ရိယံ? ယာ သဒ္ဓါ သဒ္ဒဟနာ ဩကပ္ပနာ အဘိပ္ပသာဒေါ သဒ္ဓါ သဒ္ဓိန္ဒ္ရိယံ သဒ္ဓါဗလံ – ဣဒံ ဝုစ္စတိ ‘‘သဒ္ဓိန္ဒ္ရိယံ’’။
တတ္ထ ကတမံ ဝီရိယိန္ဒ္ရိယံ? ယော စေတသိကော ဝီရိယာရမ္ဘော နိက္ကမော ပရက္ကမော ဥယျာမော ဝါယာမော ဥဿာဟော ဥဿောဠှီ ထာမော ဌိတိ အသိထိလပရက္ကမတာ အနိက္ခိတ္တဆန္ဒတာ အနိက္ခိတ္တဓုရတာ ဓုရသမ္ပဂ္ဂါဟော ဝီရိယံ ဝီရိယိန္ဒ္ရိယံ ဝီရိယဗလံ – ဣဒံ ဝုစ္စတိ ‘‘ဝီရိယိန္ဒ္ရိယံ’’။
တတ္ထ ကတမံ သတိန္ဒ္ရိယံ? ယာ သတိ အနုဿတိ ပဋိဿတိ သတိ သရဏတာ ဓါရဏတာ အပိလာပနတာ အသမ္မုဿနတာ သတိ သတိန္ဒ္ရိယံ သတိဗလံ သမ္မာသတိ – ဣဒံ ဝုစ္စတိ ‘‘သတိန္ဒ္ရိယံ’’။
တတ္ထ ကတမံ သမာဓိန္ဒ္ရိယံ? ယာ စိတ္တဿ ဌိတိ သဏ္ဌိတိ အဝဋ္ဌိတိ အဝိသာဟာရော အဝိက္ခေပေါ အဝိသာဟဋမာနသတာ သမထော သမာဓိန္ဒ္ရိယံ သမာဓိဗလံ သမ္မာသမာဓိ – ဣဒံ ဝုစ္စတိ ‘‘သမာဓိန္ဒ္ရိယံ’’။
တတ္ထ ကတမံ ပညိန္ဒ္ရိယံ? ယာ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ – ဣဒံ ဝုစ္စတိ ‘‘ပညိန္ဒ္ရိယံ’’။
တတ္ထ ကတမံ အနညာတညဿာမီတိန္ဒ္ရိယံ? ယာ တေသံ ဓမ္မာနံ အနညာတာနံ အဒိဋ္ဌာနံ အပ္ပတ္တာနံ အဝိဒိတာနံ အသစ္ဆိကတာနံ သစ္ဆိကိရိယာယ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ ဓမ္မဝိစယသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – ဣဒံ ဝုစ္စတိ ‘‘အနညာတညဿာမီတိန္ဒ္ရိယံ’’။
တတ္ထ ကတမံ အညိန္ဒ္ရိယံ? ယာ တေသံ ဓမ္မာနံ ဉာတာနံ ဒိဋ္ဌာနံ ပတ္တာနံ ဝိဒိတာနံ သစ္ဆိကတာနံ သစ္ဆိကိရိယာယ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ ဓမ္မဝိစယသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – ဣဒံ ဝုစ္စတိ အညိန္ဒ္ရိယံ။
တတ္ထ ကတမံ အညာတာဝိန္ဒ္ရိယံ? ယာ တေသံ ဓမ္မာနံ အညာတာဝီနံ ဒိဋ္ဌာနံ ပတ္တာနံ ဝိဒိတာနံ သစ္ဆိကတာနံ သစ္ဆိကိရိယာယ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ ဓမ္မဝိစယသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – ဣဒံ ဝုစ္စတိ ‘‘အညာတာဝိန္ဒ္ရိယံ’’။
အဘိဓမ္မဘာဇနီယံ။
၂. ပဉှာပုစ္ဆကံ
၂၂၁. ဗာဝီသတိန္ဒ္ရိယာနိ – စက္ခုန္ဒ္ရိယံ, သောတိန္ဒ္ရိယံ, ဃာနိန္ဒ္ရိယံ, ဇိဝ္ဟိန္ဒ္ရိယံ, ကာယိန္ဒ္ရိယံ, မနိန္ဒ္ရိယံ, ဣတ္ထိန္ဒ္ရိယံ, ပုရိသိန္ဒ္ရိယံ, ဇီဝိတိန္ဒ္ရိယံ, သုခိန္ဒ္ရိယံ, ဒုက္ခိန္ဒ္ရိယံ, သောမနဿိန္ဒ္ရိယံ, ဒေါမနဿိန္ဒ္ရိယံ, ဥပေက္ခိန္ဒ္ရိယံ, သဒ္ဓိန္ဒ္ရိယံ, ဝီရိယိန္ဒ္ရိယံ, သတိန္ဒ္ရိယံ, သမာဓိန္ဒ္ရိယံ, ပညိန္ဒ္ရိယံ , အနညာတညဿာမီတိန္ဒ္ရိယံ, အညိန္ဒ္ရိယံ, အညာတာဝိန္ဒ္ရိယံ။
၂၂၂. ဗာဝီသတီနံ ဣန္ဒ္ရိယာနံ ကတိ ကုသလာ, ကတိ အကုသလာ, ကတိ အဗျာကတာ။ပေ.။ ကတိ သရဏာ, ကတိ အရဏာ?
၁. တိကံ
၂၂၃. ဒသိန္ဒ္ရိယာ အဗျာကတာ။ ဒေါမနဿိန္ဒ္ရိယံ အကုသလံ။ အနညာတညဿာမီတိန္ဒ္ရိယံ ကုသလံ။ စတ္တာရိန္ဒ္ရိယာ သိယာ ကုသလာ, သိယာ အဗျာကတာ။ ဆ ဣန္ဒ္ရိယာ သိယာ ကုသလာ, သိယာ အကုသလာ, သိယာ အဗျာကတာ။
ဒွါဒသိန္ဒ္ရိယာ န ဝတ္တဗ္ဗာ – ‘‘သုခါယ ဝေဒနာယ သမ္ပယုတ္တာ’’တိပိ, ‘‘ဒုက္ခာယ ဝေဒနာယ သမ္ပယုတ္တာ’’တိပိ, ‘‘အဒုက္ခမသုခါယ ဝေဒနာယ သမ္ပယုတ္တာ’’တိပိ။ ဆ ဣန္ဒ္ရိယာ သိယာ သုခါယ ဝေဒနာယ သမ္ပယုတ္တာ, သိယာ အဒုက္ခမသုခါယ ဝေဒနာယ သမ္ပယုတ္တာ။ တီဏိန္ဒ္ရိယာ သိယာ သုခါယ ဝေဒနာယ သမ္ပယုတ္တာ, သိယာ ဒုက္ခာယ ဝေဒနာယ သမ္ပယုတ္တာ, သိယာ အဒုက္ခမသုခါယ ဝေဒနာယ သမ္ပယုတ္တာ။ ဇီဝိတိန္ဒ္ရိယံ သိယာ သုခါယ ဝေဒနာယ သမ္ပယုတ္တံ, သိယာ ဒုက္ခာယ ဝေဒနာယ သမ္ပယုတ္တံ, သိယာ အဒုက္ခမသုခါယ ဝေဒနာယ သမ္ပယုတ္တံ, သိယာ န ဝတ္တဗ္ဗံ – ‘‘သုခါယ ဝေဒနာယ သမ္ပယုတ္တ’’န္တိပိ , ‘‘ဒုက္ခာယ ဝေဒနာယ သမ္ပယုတ္တ’’န္တိပိ, ‘‘အဒုက္ခမသုခါယ ဝေဒနာယ သမ္ပယုတ္တ’’န္တိပိ။
သတ္တိန္ဒ္ရိယာ နေဝဝိပါကနဝိပါကဓမ္မဓမ္မာ။ တီဏိန္ဒ္ရိယာ ဝိပါကာ။ ဒွိန္ဒ္ရိယာ ဝိပါကဓမ္မဓမ္မာ။ အညိန္ဒ္ရိယံ သိယာ ဝိပါကံ, သိယာ ဝိပါကဓမ္မဓမ္မံ။ နဝိန္ဒ္ရိယာ သိယာ ဝိပါကာ, သိယာ ဝိပါကဓမ္မဓမ္မာ, သိယာ နေဝဝိပါကနဝိပါကဓမ္မဓမ္မာ။ နဝိန္ဒ္ရိယာ ဥပါဒိန္နုပါဒါနိယာ ။ ဒေါမနဿိန္ဒ္ရိယံ အနုပါဒိန္နုပါဒါနိယံ။ တီဏိန္ဒ္ရိယာ အနုပါဒိန္နအနုပါဒါနိယာ။ နဝိန္ဒ္ရိယာ သိယာ ဥပါဒိန္နုပါဒါနိယာ, သိယာ အနုပါဒိန္နုပါဒါနိယာ, သိယာ အနုပါဒိန္နအနုပါဒါနိယာ။
နဝိန္ဒ္ရိယာ အသံကိလိဋ္ဌသံကိလေသိကာ။ ဒေါမနဿိန္ဒ္ရိယံ သံကိလိဋ္ဌသံကိလေသိကံ။ တီဏိန္ဒ္ရိယာ အသံကိလိဋ္ဌအသံကိလေသိကာ။ တီဏိန္ဒ္ရိယာ သိယာ အသံကိလိဋ္ဌသံကိလေသိကာ, သိယာ အသံကိလိဋ္ဌအသံကိလေသိကာ။ ဆ ဣန္ဒ္ရိယာ သိယာ သံကိလိဋ္ဌသံကိလေသိကာ, သိယာ အသံကိလိဋ္ဌသံကိလေသိကာ, သိယာ အသံကိလိဋ္ဌအသံကိလေသိကာ။ နဝိန္ဒ္ရိယာ အဝိတက္ကအဝိစာရာ။ ဒေါမနဿိန္ဒ္ရိယံ သဝိတက္ကသဝိစာရံ။ ဥပေက္ခိန္ဒ္ရိယံ သိယာ သဝိတက္ကသဝိစာရံ, သိယာ အဝိတက္ကအဝိစာရံ။ ဧကာဒသိန္ဒ္ရိယာ သိယာ သဝိတက္ကသဝိစာရာ, သိယာ အဝိတက္ကဝိစာရမတ္တာ, သိယာ အဝိတက္ကအဝိစာရာ။
ဧကာဒသိန္ဒ္ရိယာ န ဝတ္တဗ္ဗာ – ‘‘ဣတိသဟဂတာ’’တိပိ, ‘‘သုခသဟဂတာ’’တိပိ, ‘‘ဥပေက္ခာသဟဂတာ’’တိပိ။ သောမနဿိန္ဒ္ရိယံ သိယာ ဣတိသဟဂတံ န သုခသဟဂတံ န ဥပေက္ခာသဟဂတံ, သိယာ န ဝတ္တဗ္ဗံ – ‘‘ဣတိသဟဂတ’’န္တိ။ ဆ ဣန္ဒ္ရိယာ သိယာ ဣတိသဟဂတာ, သိယာ သုခသဟဂတာ, သိယာ ဥပေက္ခာသဟဂတာ။ စတ္တာရိန္ဒ္ရိယာ သိယာ ဣတိသဟဂတာ, သိယာ သုခသဟဂတာ, သိယာ ဥပေက္ခာသဟဂတာ , သိယာ န ဝတ္တဗ္ဗာ – ‘‘ဣတိသဟဂတာ’’တိပိ, ‘‘သုခသဟဂတာ’’တိပိ, ‘‘ဥပေက္ခာသဟဂတာ’’တိပိ။
ပန္နရသိန္ဒ္ရိယာ နေဝ ဒဿနေန န ဘာဝနာယ ပဟာတဗ္ဗာ။ ဒေါမနဿိန္ဒ္ရိယံ သိယာ ဒဿနေန ပဟာတဗ္ဗံ, သိယာ ဘာဝနာယ ပဟာတဗ္ဗံ။ ဆ ဣန္ဒ္ရိယာ သိယာ ဒဿနေန ပဟာတဗ္ဗာ, သိယာ ဘာဝနာယ ပဟာတဗ္ဗာ, သိယာ နေဝ ဒဿနေန န ဘာဝနာယ ပဟာတဗ္ဗာ။ ပန္နရသိန္ဒ္ရိယာ နေဝ ဒဿနေန န ဘာဝနာယ ပဟာတဗ္ဗဟေတုကာ။ ဒေါမနဿိန္ဒ္ရိယံ သိယာ ဒဿနေန ပဟာတဗ္ဗဟေတုကံ, သိယာ ဘာဝနာယ ပဟာတဗ္ဗဟေတုကံ။ ဆ ဣန္ဒ္ရိယာ သိယာ ဒဿနေန ပဟာတဗ္ဗဟေတုကာ, သိယာ ဘာဝနာယ ပဟာတဗ္ဗဟေတုကာ, သိယာ နေဝ ဒဿနေန န ဘာဝနာယ ပဟာတဗ္ဗဟေတုကာ။
ဒသိန္ဒ္ရိယာ နေဝါစယဂါမိနာပစယဂါမိနော။ ဒေါမနဿိန္ဒ္ရိယံ အာစယဂါမိ။ အနညာတညဿာမီတိန္ဒ္ရိယံ အပစယဂါမိ။ အညိန္ဒ္ရိယံ သိယာ အပစယဂါမိ, သိယာ နေဝါစယဂါမိနာပစယဂါမိ ။ နဝိန္ဒ္ရိယာ သိယာ အာစယဂါမိနော, သိယာ အပစယဂါမိနော, သိယာ နေဝါစယဂါမိနာပစယဂါမိနော။ ဒသိန္ဒ္ရိယာ နေဝသေက္ခနာသေက္ခာ။ ဒွိန္ဒ္ရိယာ သေက္ခာ။ အညာတာဝိန္ဒ္ရိယံ အသေက္ခံ။ နဝိန္ဒ္ရိယာ သိယာ သေက္ခာ, သိယာ အသေက္ခာ, သိယာ နေဝသေက္ခနာသေက္ခာ။
ဒသိန္ဒ္ရိယာ ပရိတ္တာ။ တီဏိန္ဒ္ရိယာ အပ္ပမာဏာ။ နဝိန္ဒ္ရိယာ သိယာ ပရိတ္တာ, သိယာ မဟဂ္ဂတာ, သိယာ အပ္ပမာဏာ။ သတ္တိန္ဒ္ရိယာ အနာရမ္မဏာ။ ဒွိန္ဒ္ရိယာ ပရိတ္တာရမ္မဏာ။ တီဏိန္ဒ္ရိယာ အပ္ပမာဏာရမ္မဏာ။ ဒေါမနဿိန္ဒ္ရိယံ သိယာ ပရိတ္တာရမ္မဏံ သိယာ မဟဂ္ဂတာရမ္မဏံ, န အပ္ပမာဏာရမ္မဏံ, သိယာ န ဝတ္တဗ္ဗံ – ‘‘ပရိတ္တာရမ္မဏ’’န္တိပိ , ‘‘မဟဂ္ဂတာရမ္မဏ’’န္တိ ပိ။ နဝိန္ဒ္ရိယာ သိယာ ပရိတ္တာရမ္မဏာ, သိယာ မဟဂ္ဂတာရမ္မဏာ, သိယာ အပ္ပမာဏာရမ္မဏာ, သိယာ န ဝတ္တဗ္ဗာ – ‘‘ပရိတ္တာရမ္မဏာ’’တိပိ, ‘‘မဟဂ္ဂတာရမ္မဏာ’’တိပိ, ‘‘အပ္ပမာဏာရမ္မဏာ’’တိပိ။
နဝိန္ဒ္ရိယာ မဇ္ဈိမာ။ ဒေါမနဿိန္ဒ္ရိယံ ဟီနံ။ တီဏိန္ဒ္ရိယာ ပဏီတာ။ တီဏိန္ဒ္ရိယာ သိယာ မဇ္ဈိမာ, သိယာ ပဏီတာ။ ဆ ဣန္ဒ္ရိယာ သိယာ ဟီနာ, သိယာ မဇ္ဈိမာ, သိယာ ပဏီတာ။ ဒသိန္ဒ္ရိယာ အနိယတာ။ အနညာတညဿာမီတိန္ဒ္ရိယံ သမ္မတ္တနိယတံ။ စတ္တာရိန္ဒ္ရိယာ သိယာ သမ္မတ္တနိယတာ, သိယာ အနိယတာ။ ဒေါမနဿိန္ဒ္ရိယံ သိယာ မိစ္ဆတ္တနိယတံ, သိယာ အနိယတံ ။ ဆ ဣန္ဒ္ရိယာ သိယာ မိစ္ဆတ္တနိယတာ, သိယာ သမ္မတ္တနိယတာ, သိယာ အနိယတာ။ သတ္တိန္ဒ္ရိယာ အနာရမ္မဏာ။ စတ္တာရိန္ဒ္ရိယာ န ဝတ္တဗ္ဗာ – ‘‘မဂ္ဂါရမ္မဏာ’’တိပိ, ‘‘မဂ္ဂဟေတုကာ’’တိပိ, ‘‘မဂ္ဂါဓိပတိနော’’တိပိ။ အနညာတညဿာမီတိန္ဒ္ရိယံ န မဂ္ဂါရမ္မဏံ, သိယာ မဂ္ဂဟေတုကံ, သိယာ မဂ္ဂါဓိပတိ, သိယာ န ဝတ္တဗ္ဗံ – ‘‘မဂ္ဂဟေတုက’’န္တိပိ, ‘‘မဂ္ဂါဓိပတီ’’တိပိ။ အညိန္ဒ္ရိယံ န မဂ္ဂါရမ္မဏံ, သိယာ မဂ္ဂဟေတုကံ, သိယာ မဂ္ဂါဓိပတိ, သိယာ န ဝတ္တဗ္ဗံ – ‘‘မဂ္ဂဟေတုက’’န္တိပိ, ‘‘မဂ္ဂါဓိပတီ’’တိပိ။ နဝိန္ဒ္ရိယာ သိယာ မဂ္ဂါရမ္မဏာ, သိယာ မဂ္ဂဟေတုကာ, သိယာ မဂ္ဂါဓိပတိနော, သိယာ န ဝတ္တဗ္ဗာ – ‘‘မဂ္ဂါရမ္မဏာ’’တိပိ, ‘‘မဂ္ဂဟေတုကာ’’တိပိ, ‘‘မဂ္ဂါဓိပတိနော’’တိပိ။
ဒသိန္ဒ္ရိယာ သိယာ ဥပ္ပန္နာ, သိယာ ဥပ္ပါဒိနော, န ဝတ္တဗ္ဗာ – ‘‘အနုပ္ပန္နာ’’တိ။ ဒွိန္ဒ္ရိယာ သိယာ ဥပ္ပန္နာ, သိယာ အနုပ္ပန္နာ, န ဝတ္တဗ္ဗာ – ‘‘ဥပ္ပါဒိနော’’တိ။ ဒသိန္ဒ္ရိယာ သိယာ ဥပ္ပန္နာ, သိယာ အနုပ္ပန္နာ, သိယာ ဥပ္ပါဒိနော ; သိယာ အတီတာ, သိယာ အနာဂတာ, သိယာ ပစ္စုပ္ပန္နာ။ သတ္တိန္ဒ္ရိယာ အနာရမ္မဏာ။ ဒွိန္ဒ္ရိယာ ပစ္စုပ္ပန္နာရမ္မဏာ။ တီဏိန္ဒ္ရိယာ န ဝတ္တဗ္ဗာ – ‘‘အတီတာရမ္မဏာ’’တိပိ, ‘‘အနာဂတာရမ္မဏာ’’တိပိ , ‘‘ပစ္စုပ္ပန္နာရမ္မဏာ’’တိပိ။ ဒသိန္ဒ္ရိယာ သိယာ အတီတာရမ္မဏာ, သိယာ အနာဂတာရမ္မဏာ, သိယာ ပစ္စုပ္ပန္နာရမ္မဏာ, သိယာ န ဝတ္တဗ္ဗာ – ‘‘အတီတာရမ္မဏာ’’တိပိ, ‘‘အနာဂတာရမ္မဏာ’’တိပိ, ‘‘ပစ္စုပ္ပန္နာရမ္မဏာ’’တိပိ; သိယာ အဇ္ဈတ္တာ, သိယာ ဗဟိဒ္ဓါ, သိယာ အဇ္ဈတ္တဗဟိဒ္ဓါ။ သတ္တိန္ဒ္ရိယာ အနာရမ္မဏာ။ တီဏိန္ဒ္ရိယာ ဗဟိဒ္ဓါရမ္မဏာ။ စတ္တာရိန္ဒ္ရိယာ သိယာ အဇ္ဈတ္တာရမ္မဏာ, သိယာ ဗဟိဒ္ဓါရမ္မဏာ, သိယာ အဇ္ဈတ္တဗဟိဒ္ဓါရမ္မဏာ, အဋ္ဌိန္ဒ္ရိယာ သိယာ အဇ္ဈတ္တာရမ္မဏာ, သိယာ ဗဟိဒ္ဓါရမ္မဏာ, သိယာ အဇ္ဈတ္တဗဟိဒ္ဓါရမ္မဏာ, သိယာ န ဝတ္တဗ္ဗာ – ‘‘အဇ္ဈတ္တာရမ္မဏာ’’တိပိ, ‘‘ဗဟိဒ္ဓါရမ္မဏာ’’တိပိ, ‘‘အဇ္ဈတ္တဗဟိဒ္ဓါရမ္မဏာ’’တိပိ။ ပဉ္စိန္ဒ္ရိယာ အနိဒဿနသပ္ပဋိဃာ။ သတ္တရသိန္ဒ္ရိယာ အနိဒဿနအပ္ပဋိဃာ။
၂. ဒုကံ
၂၂၄. စတ္တာရိန္ဒ္ရိယာ ဟေတူ။ အဋ္ဌာရသိန္ဒ္ရိယာ န ဟေတူ။ သတ္တိန္ဒ္ရိယာ သဟေတုကာ။ နဝိန္ဒ္ရိယာ အဟေတုကာ။ ဆ ဣန္ဒ္ရိယာ သိယာ သဟေတုကာ, သိယာ အဟေတုကာ။ သတ္တိန္ဒ္ရိယာ ဟေတုသမ္ပယုတ္တာ။ နဝိန္ဒ္ရိယာ ဟေတုဝိပ္ပယုတ္တာ။ ဆ ဣန္ဒ္ရိယာ သိယာ ဟေတုသမ္ပယုတ္တာ, သိယာ ဟေတုဝိပ္ပယုတ္တာ။ စတ္တာရိန္ဒ္ရိယာ ဟေတူ စေဝ သဟေတုကာ စ။ နဝိန္ဒ္ရိယာ န ဝတ္တဗ္ဗာ – ‘‘ဟေတူ စေဝ သဟေတုကာ စာ’’တိပိ, ‘‘သဟေတုကာ စေဝ န စ ဟေတူ’’တိပိ။ တီဏိန္ဒ္ရိယာ န ဝတ္တဗ္ဗာ – ‘‘ဟေတူ စေဝ သဟေတုကာ စာ’’တိ။ သဟေတုကာ စေဝ န စ ဟေတူ။ ဆ ဣန္ဒ္ရိယာ န ဝတ္တဗ္ဗာ – ‘‘ဟေတူ စေဝ သဟေတုကာ စာ’’တိ, သိယာ သဟေတုကာ စေဝ န စ ဟေတူ, သိယာ န ဝတ္တဗ္ဗာ – ‘‘သဟေတုကာ စေဝ န စ ဟေတူ’’တိ။
စတ္တာရိန္ဒ္ရိယာ ဟေတူ စေဝ ဟေတုသမ္ပယုတ္တာ စ ။ နဝိန္ဒ္ရိယာ န ဝတ္တဗ္ဗာ – ‘‘ဟေတူ စေဝ ဟေတုသမ္ပယုတ္တာ စာ’’တိပိ, ‘‘ဟေတုသမ္ပယုတ္တာ စေဝ န စ ဟေတူ’’တိပိ။ တီဏိန္ဒ္ရိယာ န ဝတ္တဗ္ဗာ – ‘‘ဟေတူ စေဝ ဟေတုသမ္ပယုတ္တာ စာ’’တိ, ‘‘ဟေတုသမ္ပယုတ္တာ စေဝ န စ ဟေတူ’’။ ဆ ဣန္ဒ္ရိယာ န ဝတ္တဗ္ဗာ – ‘‘ဟေတူ စေဝ ဟေတုသမ္ပယုတ္တာ စာ’’တိ, သိယာ ဟေတုသမ္ပယုတ္တာ စေဝ န စ ဟေတူ, သိယာ န ဝတ္တဗ္ဗာ – ‘‘ဟေတုသမ္ပယုတ္တာ စေဝ န စ ဟေတူ’’တိ။
နဝိန္ဒ္ရိယာ န ဟေတူ အဟေတုကာ။ တီဏိန္ဒ္ရိယာ န ဟေတူ သဟေတုကာ။ စတ္တာရိန္ဒ္ရိယာ န ဝတ္တဗ္ဗာ – ‘‘န ဟေတူ သဟေတုကာ’’တိပိ, ‘‘န ဟေတူ အဟေတုကာ’’တိပိ ။ ဆ ဣန္ဒ္ရိယာ သိယာ န ဟေတူ သဟေတုကာ, သိယာ န ဟေတူ အဟေတုကာ။
သပ္ပစ္စယာ။ သင်္ခတာ။ အနိဒဿနာ။ ပဉ္စိန္ဒ္ရိယာ သပ္ပဋိဃာ။ သတ္တရသိန္ဒ္ရိယာ အပ္ပဋိဃာ။ သတ္တိန္ဒ္ရိယာ ရူပါ။ စုဒ္ဒသိန္ဒ္ရိယာ အရူပါ။ ဇီဝိတိန္ဒ္ရိယံ သိယာ ရူပံ, သိယာ အရူပံ။ ဒသိန္ဒ္ရိယာ လောကိယာ။ တီဏိန္ဒ္ရိယာ လောကုတ္တရာ။ နဝိန္ဒ္ရိယာ သိယာ လောကိယာ, သိယာ လောကုတ္တရာ; ကေနစိ ဝိညေယျာ, ကေနစိ န ဝိညေယျာ။
နော အာသဝါ။ ဒသိန္ဒ္ရိယာ သာသဝါ။ တီဏိန္ဒ္ရိယာ အနာသဝါ။ နဝိန္ဒ္ရိယာ သိယာ သာသဝါ, သိယာ အနာသဝါ။ ပန္နရသိန္ဒ္ရိယာ အာသဝဝိပ္ပယုတ္တာ။ ဒေါမနဿိန္ဒ္ရိယံ အာသဝသမ္ပယုတ္တံ။ ဆ ဣန္ဒ္ရိယာ သိယာ အာသဝသမ္ပယုတ္တာ, သိယာ အာသဝဝိပ္ပယုတ္တာ။ ဒသိန္ဒ္ရိယာ န ဝတ္တဗ္ဗာ – ‘‘အာသဝါ စေဝ သာသဝါ စာ’’တိ, ‘‘သာသဝါ စေဝ နော စ အာသဝါ’’။ တီဏိန္ဒ္ရိယာ န ဝတ္တဗ္ဗာ – ‘‘အာသဝါ စေဝ သာသဝါ စာ’’တိပိ, ‘‘သာသဝါ စေဝ နော စ အာသဝါ’’တိပိ။ နဝိန္ဒ္ရိယာ န ဝတ္တဗ္ဗာ – ‘‘အာသဝါ စေဝ သာသဝါ စာ’’တိ, သိယာ သာသဝါ စေဝ နော စ အာသဝါ, သိယာ န ဝတ္တဗ္ဗာ – ‘‘သာသဝါ စေဝ နော စ အာသဝါ’’တိ။
ပန္နရသိန္ဒ္ရိယာ န ဝတ္တဗ္ဗာ – ‘‘အာသဝါ စေဝ အာသဝသမ္ပယုတ္တာ စာ’’တိပိ, ‘‘အာသဝသမ္ပယုတ္တာ စေဝ နော စ အာသဝါ’’တိပိ။ ဒေါမနဿိန္ဒ္ရိယံ န ဝတ္တဗ္ဗံ – ‘‘အာသဝေါ စေဝ အာသဝသမ္ပယုတ္တဉ္စာ’’တိ, ‘‘အာသဝသမ္ပယုတ္တဉ္စေဝ နော စ အာသဝေါ’’။ ဆ ဣန္ဒ္ရိယာ န ဝတ္တဗ္ဗာ – ‘‘အာသဝါ စေဝ အာသဝသမ္ပယုတ္တာ စာ’’တိ, သိယာ အာသဝသမ္ပယုတ္တာ စေဝ နော စ အာသဝါ, သိယာ န ဝတ္တဗ္ဗာ – ‘‘အာသဝသမ္ပယုတ္တာ စေဝ နော စ အာသဝါ’’တိ။ နဝိန္ဒ္ရိယာ အာသဝဝိပ္ပယုတ္တသာသဝါ။ တီဏိန္ဒ္ရိယာ အာသဝဝိပ္ပယုတ္တအနာသဝါ။ ဒေါမနဿိန္ဒ္ရိယံ န ဝတ္တဗ္ဗံ – ‘‘အာသဝဝိပ္ပယုတ္တသာသဝ’’န္တိပိ, ‘‘အာသဝဝိပ္ပယုတ္တအနာသဝ’’န္တိပိ။ တီဏိန္ဒ္ရိယာ သိယာ အာသဝဝိပ္ပယုတ္တသာသဝါ, သိယာ အာသဝဝိပ္ပယုတ္တအနာသဝါ။ ဆ ဣန္ဒ္ရိယာ သိယာ အာသဝဝိပ္ပယုတ္တသာသဝါ, သိယာ အာသဝဝိပ္ပယုတ္တအနာသဝါ, သိယာ န ဝတ္တဗ္ဗာ – ‘‘အာသဝဝိပ္ပယုတ္တသာသဝါ’’တိပိ, ‘‘အာသဝဝိပ္ပယုတ္တအနာသဝါ’’တိပိ။
နော သံယောဇနာ။ ဒသိန္ဒ္ရိယာ သံယောဇနိယာ။ တီဏိန္ဒ္ရိယာ အသံယောဇနိယာ။ နဝိန္ဒ္ရိယာ သိယာ သံယောဇနိယာ, သိယာ အသံယောဇနိယာ။ ပန္နရသိန္ဒ္ရိယာ သံယောဇနဝိပ္ပယုတ္တာ။ ဒေါမနဿိန္ဒ္ရိယံ သံယောဇနသမ္ပယုတ္တံ ။ ဆ ဣန္ဒ္ရိယာ သိယာ သံယောဇနသမ္ပယုတ္တာ , သိယာ သံယောဇနဝိပ္ပယုတ္တာ။ ဒသိန္ဒ္ရိယာ န ဝတ္တဗ္ဗာ – ‘‘သံယောဇနာ စေဝ သံယောဇနိယာ စာ’’တိ, သံယောဇနိယာ စေဝ နော စ သံယောဇနာ။ တီဏိန္ဒ္ရိယာ န ဝတ္တဗ္ဗာ – ‘‘သံယောဇနာ စေဝ သံယောဇနိယာ စာ’’တိပိ, ‘‘သံယောဇနိယာ စေဝ နော စ သံယောဇနာ’’တိပိ။ နဝိန္ဒ္ရိယာ န ဝတ္တဗ္ဗာ – ‘‘သံယောဇနာ စေဝ သံယောဇနိယာ စာ’’တိ, သိယာ သံယောဇနိယာ စေဝ နော စ သံယောဇနာ, သိယာ န ဝတ္တဗ္ဗာ – ‘‘သံယောဇနိယာ စေဝ နော စ သံယောဇနာ’’တိ။
ပန္နရသိန္ဒ္ရိယာ န ဝတ္တဗ္ဗာ – ‘‘သံယောဇနာ စေဝ သံယောဇနသမ္ပယုတ္တာ စာ’’တိပိ, ‘‘သံယောဇနသမ္ပယုတ္တာ စေဝ နော စ သံယောဇနာ’’တိပိ။ ဒေါမနဿိန္ဒ္ရိယံ န ဝတ္တဗ္ဗံ – ‘‘သံယောဇနဉ္စေဝ သံယောဇနသမ္ပယုတ္တဉ္စာ’’တိ, သံယောဇနသမ္ပယုတ္တဉ္စေဝ နော စ သံယောဇနံ။ ဆ ဣန္ဒ္ရိယာ န ဝတ္တဗ္ဗာ – ‘‘သံယောဇနာ စေဝ သံယောဇနသမ္ပယုတ္တာ စာ’’တိ, သိယာ သံယောဇနသမ္ပယုတ္တာ စေဝ နော စ သံယောဇနာ, သိယာ န ဝတ္တဗ္ဗာ – ‘‘သံယောဇနသမ္ပယုတ္တာ စေဝ နော စ သံယောဇနာ’’တိ။
နဝိန္ဒ္ရိယာ သံယောဇနဝိပ္ပယုတ္တသံယောဇနိယာ။ တီဏိန္ဒ္ရိယာ သံယောဇနဝိပ္ပယုတ္တအသံယောဇနိယာ။ ဒေါမနဿိန္ဒ္ရိယံ န ဝတ္တဗ္ဗံ – ‘‘သံယောဇနဝိပ္ပယုတ္တသံယောဇနိယ’’န္တိပိ, ‘‘သံယောဇနဝိပ္ပယုတ္တအသံယောဇနိယ’’န္တိပိ။ တီဏိန္ဒ္ရိယာ သိယာ သံယောဇနဝိပ္ပယုတ္တသံယောဇနိယာ, သိယာ သံယောဇနဝိပ္ပယုတ္တအသံယောဇနိယာ။ ဆ ဣန္ဒ္ရိယာ သိယာ သံယောဇနဝိပ္ပယုတ္တသံယောဇနိယာ, သိယာ သံယောဇနဝိပ္ပယုတ္တအသံယောဇနိယာ, သိယာ န ဝတ္တဗ္ဗာ – ‘‘သံယောဇနဝိပ္ပယုတ္တသံယောဇနိယာ’’တိပိ, ‘‘သံယောဇနဝိပ္ပယုတ္တအသံယောဇနိယာ’’တိပိ ။
နော ဂန္ထာ။ ဒသိန္ဒ္ရိယာ ဂန္ထနိယာ။ တီဏိန္ဒ္ရိယာ အဂန္ထနိယာ။ နဝိန္ဒ္ရိယာ သိယာ ဂန္ထနိယာ, သိယာ အဂန္ထနိယာ။ ပန္နရသိန္ဒ္ရိယာ ဂန္ထဝိပ္ပယုတ္တာ။ ဒေါမနဿိန္ဒ္ရိယံ ဂန္ထသမ္ပယုတ္တံ။ ဆ ဣန္ဒ္ရိယာ သိယာ ဂန္ထသမ္ပယုတ္တာ, သိယာ ဂန္ထဝိပ္ပယုတ္တာ။ ဒသိန္ဒ္ရိယာ န ဝတ္တဗ္ဗာ – ‘‘ဂန္ထာ စေဝ ဂန္ထနိယာ စာ’’တိ, ဂန္ထနိယာ စေဝ နော စ ဂန္ထာ။ တီဏိန္ဒ္ရိယာ န ဝတ္တဗ္ဗာ – ‘‘ဂန္ထာ စေဝ ဂန္ထနိယာ စာ’’တိပိ, ‘‘ဂန္ထနိယာ စေဝ နော စ ဂန္ထာ’’တိပိ။ နဝိန္ဒ္ရိယာ န ဝတ္တဗ္ဗာ – ‘‘ဂန္ထာ စေဝ ဂန္ထနိယာ စာ’’တိ, သိယာ ဂန္ထနိယာ စေဝ နော စ ဂန္ထာ, သိယာ န ဝတ္တဗ္ဗာ – ‘‘ဂန္ထနိယာ စေဝ နော စ ဂန္ထာ’’တိ။
ပန္နရသိန္ဒ္ရိယာ န ဝတ္တဗ္ဗာ – ‘‘ဂန္ထာ စေဝ ဂန္ထသမ္ပယုတ္တာ စာ’’တိပိ, ‘‘ဂန္ထသမ္ပယုတ္တာ စေဝ နော စ ဂန္ထာ’’တိပိ။ ဒေါမနဿိန္ဒ္ရိယံ န ဝတ္တဗ္ဗံ – ‘‘ဂန္ထော စေဝ ဂန္ထသမ္ပယုတ္တ’’ဉ္စာတိ, ဂန္ထသမ္ပယုတ္တဉ္စေဝ နော စ ဂန္ထော။ ဆ ဣန္ဒ္ရိယာ န ဝတ္တဗ္ဗာ – ‘‘ဂန္ထာ စေဝ ဂန္ထသမ္ပယုတ္တာ စာ’’တိ, သိယာ ဂန္ထသမ္ပယုတ္တာ စေဝ နော စ ဂန္ထာ, သိယာ န ဝတ္တဗ္ဗာ – ‘‘ဂန္ထသမ္ပယုတ္တာ စေဝ နော စ ဂန္ထာ’’တိ။
နဝိန္ဒ္ရိယာ ဂန္ထဝိပ္ပယုတ္တဂန္ထနိယာ။ တီဏိန္ဒ္ရိယာ ဂန္ထဝိပ္ပယုတ္တအဂန္ထနိယာ ။ ဒေါမနဿိန္ဒ္ရိယံ န ဝတ္တဗ္ဗံ – ‘‘ဂန္ထဝိပ္ပယုတ္တဂန္ထနိယ’’န္တိပိ, ‘‘ဂန္ထဝိပ္ပယုတ္တအဂန္ထနိယ’’န္တိပိ။ တီဏိန္ဒ္ရိယာ သိယာ ဂန္ထဝိပ္ပယုတ္တဂန္ထနိယာ, သိယာ ဂန္ထဝိပ္ပယုတ္တအဂန္ထနိယာ။ ဆ ဣန္ဒ္ရိယာ သိယာ ဂန္ထဝိပ္ပယုတ္တဂန္ထနိယာ, သိယာ ဂန္ထဝိပ္ပယုတ္တအဂန္ထနိယာ, သိယာ န ဝတ္တဗ္ဗာ – ‘‘ဂန္ထဝိပ္ပယုတ္တဂန္ထနိယာ’’တိပိ, ‘‘ဂန္ထဝိပ္ပယုတ္တအဂန္ထနိယာ’’တိပိ။
နော ဩဃာ။ပေ.။ နော ယောဂါ။ပေ.။ နော နီဝရဏာ။ ဒသိန္ဒ္ရိယာ နီဝရဏိယာ။ တီဏိန္ဒ္ရိယာ အနီဝရဏိယာ။ နဝိန္ဒ္ရိယာ သိယာ နီဝရဏိယာ, သိယာ အနီဝရဏိယာ။ ပန္နရသိန္ဒ္ရိယာ နီဝရဏဝိပ္ပယုတ္တာ။ ဒေါမနဿိန္ဒ္ရိယံ နီဝရဏသမ္ပယုတ္တံ။ ဆ ဣန္ဒ္ရိယာ သိယာ နီဝရဏသမ္ပယုတ္တာ, သိယာ နီဝရဏဝိပ္ပယုတ္တာ။ ဒသိန္ဒ္ရိယာ န ဝတ္တဗ္ဗာ – ‘‘နီဝရဏာ စေဝ နီဝရဏိယာ စာ’’တိ, နီဝရဏိယာ စေဝ နော စ နီဝရဏာ။ တီဏိန္ဒ္ရိယာ န ဝတ္တဗ္ဗာ – ‘‘နီဝရဏာ စေဝ နီဝရဏိယာ စာ’’တိပိ, ‘‘နီဝရဏိယာ စေဝ နော စ နီဝရဏာ’’တိပိ။ နဝိန္ဒ္ရိယာ န ဝတ္တဗ္ဗာ – ‘‘နီဝရဏာ စေဝ နီဝရဏိယာ စာ’’တိ, သိယာ နီဝရဏိယာ စေဝ နော စ နီဝရဏာ, သိယာ န ဝတ္တဗ္ဗာ – ‘‘နီဝရဏိယာ စေဝ နော စ နီဝရဏာ’’တိ။
ပန္နရသိန္ဒ္ရိယာ န ဝတ္တဗ္ဗာ – ‘‘နီဝရဏာ စေဝ နီဝရဏသမ္ပယုတ္တာ စာ’’တိပိ, ‘‘နီဝရဏသမ္ပယုတ္တာ စေဝ နော စ နီဝရဏာ’’တိပိ။ ဒေါမနဿိန္ဒ္ရိယံ န ဝတ္တဗ္ဗံ – ‘‘နီဝရဏဉ္စေဝ နီဝရဏသမ္ပယုတ္တဉ္စာ’’တိ, နီဝရဏသမ္ပယုတ္တဉ္စေဝ နော စ နီဝရဏံ။ ဆ ဣန္ဒ္ရိယာ န ဝတ္တဗ္ဗာ – ‘‘နီဝရဏာ စေဝ နီဝရဏသမ္ပယုတ္တာ စာ’’တိ, သိယာ နီဝရဏသမ္ပယုတ္တာ စေဝ နော စ နီဝရဏာ, သိယာ န ဝတ္တဗ္ဗာ – ‘‘နီဝရဏသမ္ပယုတ္တာ စေဝ နော စ နီဝရဏာ’’တိ။
နဝိန္ဒ္ရိယာ နီဝရဏဝိပ္ပယုတ္တနီဝရဏိယာ။ တီဏိန္ဒ္ရိယာ နီဝရဏဝိပ္ပယုတ္တအနီဝရဏိယာ။ ဒေါမနဿိန္ဒ္ရိယံ န ဝတ္တဗ္ဗံ – ‘‘နီဝရဏဝိပ္ပယုတ္တနီဝရဏိယ’’န္တိပိ, ‘‘နီဝရဏဝိပ္ပယုတ္တအနီဝရဏိယ’’န္တိပိ။ တီဏိန္ဒ္ရိယာ သိယာ နီဝရဏဝိပ္ပယုတ္တနီဝရဏိယာ, သိယာ နီဝရဏဝိပ္ပယုတ္တအနီဝရဏိယာ ။ ဆ ဣန္ဒ္ရိယာ သိယာ နီဝရဏဝိပ္ပယုတ္တနီဝရဏိယာ , သိယာ နီဝရဏဝိပ္ပယုတ္တအနီဝရဏိယာ, သိယာ န ဝတ္တဗ္ဗာ – ‘‘နီဝရဏဝိပ္ပယုတ္တနီဝရဏိယာ’’တိပိ, ‘‘နီဝရဏဝိပ္ပယုတ္တအနီဝရဏိယာ’’တိပိ။
နော ပရာမာသာ။ ဒသိန္ဒ္ရိယာ ပရာမဋ္ဌာ။ တီဏိန္ဒ္ရိယာ အပရာမဋ္ဌာ။ နဝိန္ဒ္ရိယာ သိယာ ပရာမဋ္ဌာ, သိယာ အပရာမဋ္ဌာ။ သောဠသိန္ဒ္ရိယာ ပရာမာသဝိပ္ပယုတ္တာ။ ဆ ဣန္ဒ္ရိယာ သိယာ ပရာမာသသမ္ပယုတ္တာ, သိယာ ပရာမာသဝိပ္ပယုတ္တာ။ ဒသိန္ဒ္ရိယာ န ဝတ္တဗ္ဗာ – ‘‘ပရာမာသာ စေဝ ပရာမဋ္ဌာ စာ’’တိ, ပရာမဋ္ဌာ စေဝ နော စ ပရာမာသာ။ တီဏိန္ဒ္ရိယာ န ဝတ္တဗ္ဗာ – ‘‘ပရာမာသာ စေဝ ပရာမဋ္ဌာ စာ’’တိပိ, ‘‘ပရာမဋ္ဌာ စေဝ နော စ ပရာမာသာ’’တိပိ။ နဝိန္ဒ္ရိယာ န ဝတ္တဗ္ဗာ – ‘‘ပရာမာသာ စေဝ ပရာမဋ္ဌာ စာ’’တိ, သိယာ ပရာမဋ္ဌာ စေဝ နော စ ပရာမာသာ, သိယာ န ဝတ္တဗ္ဗာ – ‘‘ပရာမဋ္ဌာ စေဝ နော စ ပရာမာသာ’’တိ။ ဒသိန္ဒ္ရိယာ ပရာမာသဝိပ္ပယုတ္တပရာမဋ္ဌာ။ တီဏိန္ဒ္ရိယာ ပရာမာသဝိပ္ပယုတ္တအပရာမဋ္ဌာ။ တီဏိန္ဒ္ရိယာ သိယာ ပရာမာသဝိပ္ပယုတ္တပရာမဋ္ဌာ, သိယာ ပရာမာသဝိပ္ပယုတ္တအပရာမဋ္ဌာ။ ဆ ဣန္ဒ္ရိယာ သိယာ ပရာမာသဝိပ္ပယုတ္တပရာမဋ္ဌာ, သိယာ ပရာမာသဝိပ္ပယုတ္တအပရာမဋ္ဌာ, သိယာ န ဝတ္တဗ္ဗာ – ‘‘ပရာမာသဝိပ္ပယုတ္တပရာမဋ္ဌာ’’တိပိ, ‘‘ပရာမာသဝိပ္ပယုတ္တအပရာမဋ္ဌာ’’တိပိ။
သတ္တိန္ဒ္ရိယာ အနာရမ္မဏာ။ စုဒ္ဒသိန္ဒ္ရိယာ သာရမ္မဏာ။ ဇီဝိတိန္ဒ္ရိယံ သိယာ သာရမ္မဏံ, သိယာ အနာရမ္မဏံ။ ဧကဝီသတိန္ဒ္ရိယာ နော စိတ္တာ။ မနိန္ဒ္ရိယံ စိတ္တံ။ တေရသိန္ဒ္ရိယာ စေတသိကာ။ အဋ္ဌိန္ဒ္ရိယာ အစေတသိကာ။ ဇီဝိတိန္ဒ္ရိယံ သိယာ စေတသိကံ, သိယာ အစေတသိကံ။ တေရသိန္ဒ္ရိယာ စိတ္တသမ္ပယုတ္တာ။ သတ္တိန္ဒ္ရိယာ စိတ္တဝိပ္ပယုတ္တာ။ ဇီဝိတိန္ဒ္ရိယံ သိယာ စိတ္တသမ္ပယုတ္တံ, သိယာ စိတ္တဝိပ္ပယုတ္တံ။ မနိန္ဒ္ရိယံ န ဝတ္တဗ္ဗံ – ‘‘စိတ္တေန သမ္ပယုတ္တ’’န္တိပိ, ‘‘စိတ္တေန ဝိပ္ပယုတ္တ’’န္တိပိ။
တေရသိန္ဒ္ရိယာ စိတ္တသံသဋ္ဌာ။ သတ္တိန္ဒ္ရိယာ စိတ္တဝိသံသဋ္ဌာ။ ဇီဝိတိန္ဒ္ရိယံ သိယာ စိတ္တသံသဋ္ဌံ, သိယာ စိတ္တဝိသံသဋ္ဌံ။ မနိန္ဒ္ရိယံ န ဝတ္တဗ္ဗံ – ‘‘စိတ္တေန သံသဋ္ဌ’’န္တိပိ, ‘‘စိတ္တေန ဝိသံသဋ္ဌ’’န္တိပိ။ တေရသိန္ဒ္ရိယာ စိတ္တသမုဋ္ဌာနာ။ အဋ္ဌိန္ဒ္ရိယာ နော စိတ္တသမုဋ္ဌာနာ။ ဇီဝိတိန္ဒ္ရိယံ သိယာ စိတ္တသမုဋ္ဌာနံ, သိယာ နော စိတ္တသမုဋ္ဌာနံ။
တေရသိန္ဒ္ရိယာ စိတ္တသဟဘုနော။ အဋ္ဌိန္ဒ္ရိယာ နော စိတ္တသဟဘုနော။ ဇီဝိတိန္ဒ္ရိယံ သိယာ စိတ္တသဟဘူ, သိယာ နော စိတ္တသဟဘူ။ တေရသိန္ဒ္ရိယာ စိတ္တာနုပရိဝတ္တိနော။ အဋ္ဌိန္ဒ္ရိယာ နော စိတ္တာနုပရိဝတ္တိနော။ ဇီဝိတိန္ဒ္ရိယံ သိယာ စိတ္တာနုပရိဝတ္တိ, သိယာ နော စိတ္တာနုပရိဝတ္တိ။
တေရသိန္ဒ္ရိယာ စိတ္တသံသဋ္ဌသမုဋ္ဌာနာ။ အဋ္ဌိန္ဒ္ရိယာ နော စိတ္တသံသဋ္ဌသမုဋ္ဌာနာ။ ဇီဝိတိန္ဒ္ရိယံ သိယာ စိတ္တသံသဋ္ဌသမုဋ္ဌာနံ, သိယာ နော စိတ္တသံသဋ္ဌသမုဋ္ဌာနံ။ တေရသိန္ဒ္ရိယာ စိတ္တသံသဋ္ဌသမုဋ္ဌာနသဟဘုနော။ အဋ္ဌိန္ဒ္ရိယာ နော စိတ္တသံသဋ္ဌသမုဋ္ဌာနသဟဘုနော။ ဇီဝိတိန္ဒ္ရိယံ သိယာ စိတ္တသံသဋ္ဌသမုဋ္ဌာနသဟဘူ, သိယာ နော စိတ္တသံသဋ္ဌသမုဋ္ဌာနသဟဘူ။ တေရသိန္ဒ္ရိယာ စိတ္တသံသဋ္ဌသမုဋ္ဌာနာနုပရိဝတ္တိနော။ အဋ္ဌိန္ဒ္ရိယာ နော စိတ္တသံသဋ္ဌသမုဋ္ဌာနာနုပရိဝတ္တိနော။ ဇီဝိတိန္ဒ္ရိယံ သိယာ စိတ္တသံသဋ္ဌသမုဋ္ဌာနာနုပရိဝတ္တိ , သိယာ နော စိတ္တသံသဋ္ဌသမုဋ္ဌာနာနုပရိဝတ္တိ။ ဆ ဣန္ဒ္ရိယာ အဇ္ဈတ္တိကာ။ သောဠသိန္ဒ္ရိယာ ဗာဟိရာ။
သတ္တိန္ဒ္ရိယာ ဥပါဒါ။ စုဒ္ဒသိန္ဒ္ရိယာ နော ဥပါဒါ။ ဇီဝိတိန္ဒ္ရိယံ သိယာ ဥပါဒါ, သိယာ နော ဥပါဒါ။ နဝိန္ဒ္ရိယာ ဥပါဒိန္နာ။ စတ္တာရိန္ဒ္ရိယာ အနုပါဒိန္နာ။ နဝိန္ဒ္ရိယာ သိယာ ဥပါဒိန္နာ, သိယာ အနုပါဒိန္နာ။ နော ဥပါဒါနာ။ ဒသိန္ဒ္ရိယာ ဥပါဒါနိယာ။ တီဏိန္ဒ္ရိယာ အနုပါဒါနိယာ။ နဝိန္ဒ္ရိယာ သိယာ ဥပါဒါနိယာ, သိယာ အနုပါဒါနိယာ။ သောဠသိန္ဒ္ရိယာ ဥပါဒါနဝိပ္ပယုတ္တာ။ ဆ ဣန္ဒ္ရိယာ သိယာ ဥပါဒါနသမ္ပယုတ္တာ, သိယာ ဥပါဒါနဝိပ္ပယုတ္တာ။ ဒသိန္ဒ္ရိယာ န ဝတ္တဗ္ဗာ – ‘‘ဥပါဒါနာ စေဝ ဥပါဒါနိယာ စာ’’တိ, ဥပါဒါနိယာ စေဝ နော စ ဥပါဒါနာ။ တီဏိန္ဒ္ရိယာ န ဝတ္တဗ္ဗာ – ‘‘ဥပါဒါနာ စေဝ ဥပါဒါနိယာ စာ’’တိပိ, ‘‘ဥပါဒါနိယာ စေဝ နော စ ဥပါဒါနာ’’တိပိ။ နဝိန္ဒ္ရိယာ န ဝတ္တဗ္ဗာ – ‘‘ဥပါဒါနာ စေဝ ဥပါဒါနိယာ စာ’’တိ, သိယာ ဥပါဒါနိယာ စေဝ နော စ ဥပါဒါနာ။ ဒသိန္ဒ္ရိယာ သိယာ ဥပါဒါနိယာ စေဝ နော စ ဥပါဒါနာ, သိယာ န ဝတ္တဗ္ဗာ – ‘‘ဥပါဒါနိယာ စေဝ နော စ ဥပါဒါနာ’’တိ။
သောဠသိန္ဒ္ရိယာ န ဝတ္တဗ္ဗာ – ‘‘ဥပါဒါနာ စေဝ ဥပါဒါနသမ္ပယုတ္တာ စာ’’တိပိ, ‘‘ဥပါဒါနသမ္ပယုတ္တာ စေဝ နော စ ဥပါဒါနာ’’တိပိ။ ဆ ဣန္ဒ္ရိယာ န ဝတ္တဗ္ဗာ – ‘‘ဥပါဒါနာ စေဝ ဥပါဒါနသမ္ပယုတ္တာ စာ’’တိ, သိယာ ဥပါဒါနသမ္ပယုတ္တာ စေဝ နော စ ဥပါဒါနာ, သိယာ န ဝတ္တဗ္ဗာ – ‘‘ဥပါဒါနသမ္ပယုတ္တာ စေဝ နော စ ဥပါဒါနာ’’တိ။ ဒသိန္ဒ္ရိယာ ဥပါဒါနဝိပ္ပယုတ္တဥပါဒါနိယာ။ တီဏိန္ဒ္ရိယာ ဥပါဒါနဝိပ္ပယုတ္တအနုပါဒါနိယာ။ တီဏိန္ဒ္ရိယာ သိယာ ဥပါဒါနဝိပ္ပယုတ္တဥပါဒါနိယာ, သိယာ ဥပါဒါနဝိပ္ပယုတ္တအနုပါဒါနိယာ။ ဆ ဣန္ဒ္ရိယာ သိယာ ဥပါဒါနဝိပ္ပယုတ္တဥပါဒါနိယာ, သိယာ ဥပါဒါနဝိပ္ပယုတ္တအနုပါဒါနိယာ, သိယာ န ဝတ္တဗ္ဗာ – ‘‘ဥပါဒါနဝိပ္ပယုတ္တဥပါဒါနိယာ’’တိပိ, ‘‘ဥပါဒါနဝိပ္ပယုတ္တအနုပါဒါနိယာ’’တိပိ။
နော ကိလေသာ။ ဒသိန္ဒ္ရိယာ သံကိလေသိကာ။ တီဏိန္ဒ္ရိယာ အသံကိလေသိကာ။ နဝိန္ဒ္ရိယာ သိယာ သံကိလေသိကာ, သိယာ အသံကိလေသိကာ။ ပန္နရသိန္ဒ္ရိယာ အသံကိလိဋ္ဌာ။ ဒေါမနဿိန္ဒ္ရိယံ သံကိလိဋ္ဌံ။ ဆ ဣန္ဒ္ရိယာ သိယာ သံကိလိဋ္ဌာ, သိယာ အသံကိလိဋ္ဌာ။ ပန္နရသိန္ဒ္ရိယာ ကိလေသဝိပ္ပယုတ္တာ။ ဒေါမနဿိန္ဒ္ရိယံ ကိလေသသမ္ပယုတ္တံ။ ဆ ဣန္ဒ္ရိယာ သိယာ ကိလေသသမ္ပယုတ္တာ, သိယာ ကိလေသဝိပ္ပယုတ္တာ။ ဒသိန္ဒ္ရိယာ န ဝတ္တဗ္ဗာ – ‘‘ကိလေသာ စေဝ သံကိလေသိကာ စာ’’တိ, သံကိလေသိကာ စေဝ နော စ ကိလေသာ။ တီဏိန္ဒ္ရိယာ န ဝတ္တဗ္ဗာ – ‘‘ကိလေသာ စေဝ သံကိလေသိကာ စာ’’တိပိ, ‘‘သံကိလေသိကာ စေဝ နော စ ကိလေသာ’’တိပိ။ နဝိန္ဒ္ရိယာ န ဝတ္တဗ္ဗာ – ‘‘ကိလေသာ စေဝ သံကိလေသိကာ စာ’’တိ, သိယာ သံကိလေသိကာ စေဝ နော စ ကိလေသာ, သိယာ န ဝတ္တဗ္ဗာ – ‘‘သံကိလေသိကာ စေဝ နော စ ကိလေသာ’’တိ။
ပန္နရသိန္ဒ္ရိယာ န ဝတ္တဗ္ဗာ – ‘‘ကိလေသာ စေဝ သံကိလိဋ္ဌာ စာ’’တိပိ, ‘‘သံကိလိဋ္ဌာ စေဝ နော စ ကိလေသာ’’တိပိ။ ဒေါမနဿိန္ဒ္ရိယံ န ဝတ္တဗ္ဗံ – ‘‘ကိလေသော စေဝ သံကိလိဋ္ဌဉ္စာ’’တိ, သံကိလိဋ္ဌဉ္စေဝ နော စ ကိလေသော။ ဆ ဣန္ဒ္ရိယာ န ဝတ္တဗ္ဗာ – ‘‘ကိလေသာ စေဝ သံကိလိဋ္ဌာ စာ’’တိ, သိယာ သံကိလိဋ္ဌာ စေဝ နော စ ကိလေသာ, သိယာ န ဝတ္တဗ္ဗာ – ‘‘သံကိလိဋ္ဌာ စေဝ နော စ ကိလေသာ’’တိ။
ပန္နရသိန္ဒ္ရိယာ န ဝတ္တဗ္ဗာ – ‘‘ကိလေသာ စေဝ ကိလေသသမ္ပယုတ္တာ စာ’’တိပိ, ‘‘ကိလေသသမ္ပယုတ္တာ စေဝ နော စ ကိလေသာ’’တိပိ။ ဒေါမနဿိန္ဒ္ရိယံ န ဝတ္တဗ္ဗံ – ‘‘ကိလေသော စေဝ ကိလေသသမ္ပယုတ္တဉ္စာ’’တိ, ကိလေသသမ္ပယုတ္တဉ္စေဝ နော စ ကိလေသော။ ဆ ဣန္ဒ္ရိယာ န ဝတ္တဗ္ဗာ – ‘‘ကိလေသာ စေဝ ကိလေသသမ္ပယုတ္တာ စာ’’တိ, သိယာ ကိလေသသမ္ပယုတ္တာ စေဝ နော စ ကိလေသာ, သိယာ န ဝတ္တဗ္ဗာ – ‘‘ကိလေသသမ္ပယုတ္တာ စေဝ နော စ ကိလေသာ’’တိ။ နဝိန္ဒ္ရိယာ ကိလေသဝိပ္ပယုတ္တသံကိလေသိကာ။ တီဏိန္ဒ္ရိယာ ကိလေသဝိပ္ပယုတ္တအသံကိလေသိကာ။ ဒေါမနဿိန္ဒ္ရိယံ န ဝတ္တဗ္ဗံ – ‘‘ကိလေသဝိပ္ပယုတ္တသံကိလေသိက’’န္တိပိ, ‘‘ကိလေသဝိပ္ပယုတ္တအသံကိလေသိက’’န္တိပိ။ တီဏိန္ဒ္ရိယာ သိယာ ကိလေသဝိပ္ပယုတ္တသံကိလေသိကာ, သိယာ ကိလေသဝိပ္ပယုတ္တအသံကိလေသိကာ။ ဆ ဣန္ဒ္ရိယာ သိယာ ကိလေသဝိပ္ပယုတ္တသံကိလေသိကာ, သိယာ ကိလေသဝိပ္ပယုတ္တအသံကိလေသိကာ, သိယာ န ဝတ္တဗ္ဗာ – ‘‘ကိလေသဝိပ္ပယုတ္တသံကိလေသိကာ’’တိပိ, ‘‘ကိလေသဝိပ္ပယုတ္တအသံကိလေသိကာ’’တိပိ။
ပန္နရသိန္ဒ္ရိယာ န ဒဿနေန ပဟာတဗ္ဗာ။ သတ္တိန္ဒ္ရိယာ သိယာ ဒဿနေန ပဟာတဗ္ဗာ, သိယာ န ဒဿနေန ပဟာတဗ္ဗာ။ ပန္နရသိန္ဒ္ရိယာ န ဘာဝနာယ ပဟာတဗ္ဗာ။ သတ္တိန္ဒ္ရိယာ သိယာ ဘာဝနာယ ပဟာတဗ္ဗာ, သိယာ န ဘာဝနာယ ပဟာတဗ္ဗာ။ ပန္နရသိန္ဒ္ရိယာ န ဒဿနေန ပဟာတဗ္ဗဟေတုကာ။ သတ္တိန္ဒ္ရိယာ သိယာ ဒဿနေန ပဟာတဗ္ဗဟေတုကာ, သိယာ န ဒဿနေန ပဟာတဗ္ဗဟေတုကာ။ ပန္နရသိန္ဒ္ရိယာ န ဘာဝနာယ ပဟာတဗ္ဗဟေတုကာ။ သတ္တိန္ဒ္ရိယာ သိယာ ဘာဝနာယ ပဟာတဗ္ဗဟေတုကာ , သိယာ န ဘာဝနာယ ပဟာတဗ္ဗဟေတုကာ။
နဝိန္ဒ္ရိယာ အဝိတက္ကာ။ ဒေါမနဿိန္ဒ္ရိယံ သဝိတက္ကံ။ ဒွါဒသိန္ဒ္ရိယာ သိယာ သဝိတက္ကာ, သိယာ အဝိတက္ကာ။ နဝိန္ဒ္ရိယာ အဝိစာရာ။ ဒေါမနဿိန္ဒ္ရိယံ သဝိစာရံ။ ဒွါဒသိန္ဒ္ရိယာ သိယာ သဝိစာရာ, သိယာ အဝိစာရာ။ ဧကာဒသိန္ဒ္ရိယာ အပ္ပီတိကာ။ ဧကာဒသိန္ဒ္ရိယာ သိယာ သပ္ပီတိကာ, သိယာ အပ္ပီတိကာ။ ဧကာဒသိန္ဒ္ရိယာ န ဣတိသဟဂတာ။ ဧကာဒသိန္ဒ္ရိယာ သိယာ ဣတိသဟဂတာ, သိယာ န ဣတိသဟဂတာ။ ဒွါဒသိန္ဒ္ရိယာ န သုခသဟဂတာ။ ဒသိန္ဒ္ရိယာ သိယာ သုခသဟဂတာ, သိယာ န သုခသဟဂတာ။ ဒွါဒသိန္ဒ္ရိယာ န ဥပေက္ခာသဟဂတာ။ ဒသိန္ဒ္ရိယာ သိယာ ဥပေက္ခာသဟဂတာ, သိယာ န ဥပေက္ခာသဟဂတာ။
ဒသိန္ဒ္ရိယာ ကာမာဝစရာ။ တီဏိန္ဒ္ရိယာ န ကာမာဝစရာ။ နဝိန္ဒ္ရိယာ သိယာ ကာမာဝစရာ, သိယာ န ကာမာဝစရာ။ တေရသိန္ဒ္ရိယာ န ရူပါဝစရာ။ နဝိန္ဒ္ရိယာ သိယာ ရူပါဝစရာ, သိယာ န ရူပါဝစရာ။ စုဒ္ဒသိန္ဒ္ရိယာ န အရူပါဝစရာ။ အဋ္ဌိန္ဒ္ရိယာ သိယာ အရူပါဝစရာ, သိယာ န အရူပါဝစရာ။ ဒသိန္ဒ္ရိယာ ပရိယာပန္နာ။ တီဏိန္ဒ္ရိယာ အပရိယာပန္နာ။ နဝိန္ဒ္ရိယာ သိယာ ပရိယာပန္နာ, သိယာ အပရိယာပန္နာ။ ဧကာဒသိန္ဒ္ရိယာ အနိယျာနိကာ။ အနညာတညဿာမီတိန္ဒ္ရိယံ နိယျာနိကံ။ ဒသိန္ဒ္ရိယာ သိယာ နိယျာနိကာ, သိယာ အနိယျာနိကာ။ ဒသိန္ဒ္ရိယာ အနိယတာ။ အနညာတညဿာမီတိန္ဒ္ရိယံ နိယတံ။ ဧကာဒသိန္ဒ္ရိယာ သိယာ နိယတာ, သိယာ အနိယတာ။ ဒသိန္ဒ္ရိယာ သဥတ္တရာ။ တီဏိန္ဒ္ရိယာ အနုတ္တရာ။ နဝိန္ဒ္ရိယာ သိယာ သဥတ္တရာ, သိယာ အနုတ္တရာ။ ပန္နရသိန္ဒ္ရိယာ အရဏာ။ ဒေါမနဿိန္ဒ္ရိယံ သရဏံ။ ဆ ဣန္ဒ္ရိယာ သိယာ သရဏာ, သိယာ အရဏာတိ။
ပဉှာပုစ္ဆကံ။
ဣန္ဒ္ရိယဝိဘင်္ဂေါ နိဋ္ဌိတော။