၄. သစ္စဝိဘင်္ဂ
၁. သုတ္တန္တဘာဇနီယ
၁၈၉. စတ္တာရိ အရိယသစ္စာနိ – ဒုက္ခံ အရိယသစ္စံ, ဒုက္ခသမုဒယံ [ဒုက္ခသမုဒယော (သျာ.)] အရိယသစ္စံ, ဒုက္ခနိရောဓံ [ဒုက္ခနိရောဓေါ (သျာ.)] အရိယသစ္စံ, ဒုက္ခနိရောဓဂါမိနီ ပဋိပဒါ အရိယသစ္စံ။
၁. ဒုက္ခသစ္စံ
၁၉၀. တတ္ထ ကတမံ ဒုက္ခံ အရိယသစ္စံ? ဇာတိပိ ဒုက္ခာ, ဇရာပိ ဒုက္ခာ, မရဏမ္ပိ ဒုက္ခံ, သောကပရိဒေဝဒုက္ခဒေါမနဿုပါယာသာပိ ဒုက္ခာ, အပ္ပိယေဟိ သမ္ပယောဂေါ ဒုက္ခော, ပိယေဟိ ဝိပ္ပယောဂေါ ဒုက္ခော, ယံ ပိစ္ဆံ န လဘတိ တမ္ပိ ဒုက္ခံ, သံခိတ္တေန ပဉ္စုပါဒါနက္ခန္ဓာ ဒုက္ခာ။
၁၉၁. တတ္ထ ကတမာ ဇာတိ? ယာ တေသံ တေသံ သတ္တာနံ တမှိ တမှိ သတ္တနိကာယေ ဇာတိ သဉ္ဇာတိ ဩက္ကန္တိ အဘိနိဗ္ဗတ္တိ ခန္ဓာနံ ပါတုဘာဝေါ အာယတနာနံ ပဋိလာဘော – အယံ ဝုစ္စတိ ‘‘ဇာတိ’’။
၁၉၂. တတ္ထ ကတမာ ဇရာ? ယာ တေသံ တေသံ သတ္တာနံ တမှိ တမှိ သတ္တနိကာယေ ဇရာ ဇီရဏတာ ခဏ္ဍိစ္စံ ပါလိစ္စံ ဝလိတ္တစတာ အာယုနော သံဟာနိ ဣန္ဒ္ရိယာနံ ပရိပါကော – အယံ ဝုစ္စတိ ‘‘ဇရာ’’။
၁၉၃. တတ္ထ ကတမံ မရဏံ? ယာ တေသံ တေသံ သတ္တာနံ တမှာ တမှာ သတ္တနိကာယာ စုတိ စဝနတာ ဘေဒေါ အန္တရဓါနံ မစ္စု မရဏံ ကာလကိရိယာ ခန္ဓာနံ ဘေဒေါ ကဠေဝရဿ နိက္ခေပေါ ဇီဝိတိန္ဒ္ရိယဿုပစ္ဆေဒေါ – ဣဒံ ဝုစ္စတိ ‘‘မရဏံ’’။
၁၉၄. တတ္ထ ကတမော သောကော? ဉာတိဗျသနေန ဝါ ဖုဋ္ဌဿ ဘောဂဗျသနေန ဝါ ဖုဋ္ဌဿ ရောဂဗျသနေန ဝါ ဖုဋ္ဌဿ သီလဗျသနေန ဝါ ဖုဋ္ဌဿ ဒိဋ္ဌိဗျသနေန ဝါ ဖုဋ္ဌဿ အညတရညတရေန ဗျသနေန သမန္နာဂတဿ အညတရညတရေန ဒုက္ခဓမ္မေန ဖုဋ္ဌဿ သောကော သောစနာ သောစိတတ္တံ အန္တောသောကော အန္တောပရိသောကော စေတသော ပရိဇ္ဈာယနာ ဒေါမနဿံ သောကသလ္လံ – အယံ ဝုစ္စတိ ‘‘သောကော’’။
၁၉၅. တတ္ထ ကတမော ပရိဒေဝေါ? ဉာတိဗျသနေန ဝါ ဖုဋ္ဌဿ ဘောဂဗျသနေန ဝါ ဖုဋ္ဌဿ ရောဂဗျသနေန ဝါ ဖုဋ္ဌဿ သီလဗျသနေန ဝါ ဖုဋ္ဌဿ ဒိဋ္ဌိဗျသနေန ဝါ ဖုဋ္ဌဿ အညတရညတရေန ဗျသနေန သမန္နာဂတဿ အညတရညတရေန ဒုက္ခဓမ္မေန ဖုဋ္ဌဿ အာဒေဝေါ ပရိဒေဝေါ အာဒေဝနာ ပရိဒေဝနာ အာဒေဝိတတ္တံ ပရိဒေဝိတတ္တံ ဝါစာ ပလာပေါ ဝိပ္ပလာပေါ လာလပ္ပော လာလပ္ပနာ လာလပ္ပိတတ္တံ [လာလပေါ လာလပနာ လာလပိတတ္တံ (သျာ.)] – အယံ ဝုစ္စတိ ‘‘ပရိဒေဝေါ’’။
၁၉၆. တတ္ထ ကတမံ ဒုက္ခံ? ယံ ကာယိကံ အသာတံ ကာယိကံ ဒုက္ခံ ကာယသမ္ဖဿဇံ အသာတံ ဒုက္ခံ ဝေဒယိတံ ကာယသမ္ဖဿဇာ အသာတာ ဒုက္ခာ ဝေဒနာ – ဣဒံ ဝုစ္စတိ ‘‘ဒုက္ခံ’’။
၁၉၇. တတ္ထ ကတမံ ဒေါမနဿံ? ယံ စေတသိကံ အသာတံ စေတသိကံ ဒုက္ခံ စေတောသမ္ဖဿဇံ အသာတံ ဒုက္ခံ ဝေဒယိတံ စေတောသမ္ဖဿဇာ အသာတာ ဒုက္ခာ ဝေဒနာ – ဣဒံ ဝုစ္စတိ ‘‘ဒေါမနဿံ’’။
၁၉၈. တတ္ထ ကတမော ဥပါယာသော? ဉာတိဗျသနေန ဝါ ဖုဋ္ဌဿ ဘောဂဗျသနေန ဝါ ဖုဋ္ဌဿ ရောဂဗျသနေန ဝါ ဖုဋ္ဌဿ သီလဗျသနေန ဝါ ဖုဋ္ဌဿ ဒိဋ္ဌိဗျသနေန ဝါ ဖုဋ္ဌဿ အညတရညတရေန ဗျသနေန သမန္နာဂတဿ အညတရညတရေန ဒုက္ခဓမ္မေန ဖုဋ္ဌဿ အာယာသော ဥပါယာသော အာယာသိတတ္တံ ဥပါယာသိတတ္တံ – အယံ ဝုစ္စတိ ‘‘ဥပါယာသော’’။
၁၉၉. တတ္ထ ကတမော အပ္ပိယေဟိ သမ္ပယောဂေါ ဒုက္ခော? ဣဓ ယဿ တေ ဟောန္တိ အနိဋ္ဌာ အကန္တာ အမနာပါ ရူပါ သဒ္ဒါ ဂန္ဓာ ရသာ ဖောဋ္ဌဗ္ဗာ, ယေ ဝါ ပနဿ တေ ဟောန္တိ အနတ္ထကာမာ အဟိတကာမာ အဖာသုကကာမာ အယောဂက္ခေမကာမာ; ယာ တေဟိ သင်္ဂတိ သမာဂမော သမောဓါနံ မိဿီဘာဝေါ – အယံ ဝုစ္စတိ ‘‘အပ္ပိယေဟိ သမ္ပယောဂေါ ဒုက္ခော’’။
၂၀၀. တတ္ထ ကတမော ပိယေဟိ ဝိပ္ပယောဂေါ ဒုက္ခော? ဣဓ ယဿ တေ ဟောန္တိ ဣဋ္ဌာ ကန္တာ မနာပါ ရူပါ သဒ္ဒါ ဂန္ဓာ ရသာ ဖောဋ္ဌဗ္ဗာ, ယေ ဝါ ပနဿ တေ ဟောန္တိ အတ္ထကာမာ ဟိတကာမာ ဖာသုကကာမာ ယောဂက္ခေမကာမာ မာတာ ဝါ ပိတာ ဝါ ဘာတာ ဝါ ဘဂိနီ ဝါ မိတ္တာ ဝါ အမစ္စာ ဝါ ဉာတီ ဝါ သာလောဟိတာ ဝါ; ယာ တေဟိ အသင်္ဂတိ အသမာဂမော အသမောဓါနံ အမိဿီဘာဝေါ – အယံ ဝုစ္စတိ ‘‘ပိယေဟိ ဝိပ္ပယောဂေါ ဒုက္ခော’’။
၂၀၁. တတ္ထ ကတမံ ယမ္ပိစ္ဆံ န လဘတိ တမ္ပိ ဒုက္ခံ? ဇာတိဓမ္မာနံ သတ္တာနံ ဧဝံ ဣစ္ဆာ ဥပ္ပဇ္ဇတိ – ‘‘အဟော ဝတ, မယံ န ဇာတိဓမ္မာ အဿာမ; န စ, ဝတ, နော ဇာတိ အာဂစ္ဆေယျာ’’တိ! န ခေါ ပနေတံ ဣစ္ဆာယ ပတ္တဗ္ဗံ။ ဣဒမ္ပိ ‘‘ယမ္ပိစ္ဆံ န လဘတိ တမ္ပိ ဒုက္ခံ’’။
ဇရာဓမ္မာနံ သတ္တာနံ။ပေ.။ ဗျာဓိဓမ္မာနံ သတ္တာနံ။ပေ.။ မရဏဓမ္မာနံ သတ္တာနံ။ပေ.။ သောကပရိဒေဝဒုက္ခဒေါမနဿုပါယာသဓမ္မာနံ သတ္တာနံ ဧဝံ ဣစ္ဆာ ဥပ္ပဇ္ဇတိ – ‘‘အဟော ဝတ, မယံ န သောကပရိဒေဝဒုက္ခဒေါမနဿုပါယာသဓမ္မာ အဿာမ; န စ, ဝတ, နော သောကပရိဒေဝဒုက္ခဒေါမနဿုပါယာသာ အာဂစ္ဆေယျု’’န္တိ! န ခေါ ပနေတံ ဣစ္ဆာယ ပတ္တဗ္ဗံ။ ဣဒမ္ပိ ‘‘ယမ္ပိစ္ဆံ န လဘတိ တမ္ပိ ဒုက္ခံ’’။
၂၀၂. တတ္ထ ကတမေ သံခိတ္တေန ပဉ္စုပါဒါနက္ခန္ဓာ ဒုက္ခာ? သေယျထိဒံ – ရူပုပါဒါနက္ခန္ဓော, ဝေဒနုပါဒါနက္ခန္ဓော, သညုပါဒါနက္ခန္ဓော, သင်္ခါရုပါဒါနက္ခန္ဓော, ဝိညာဏုပါဒါနက္ခန္ဓော။ ဣမေ ဝုစ္စန္တိ ‘‘သံခိတ္တေန ပဉ္စုပါဒါနက္ခန္ဓာ ဒုက္ခာ’’။
ဣဒံ ဝုစ္စတိ ‘‘ဒုက္ခံ အရိယသစ္စံ’’။
၂. သမုဒယသစ္စံ
၂၀၃. တတ္ထ ကတမံ ဒုက္ခသမုဒယံ အရိယသစ္စံ? ယာယံ တဏှာ ပေါနောဘဝိကာ [ပေါနောဗ္ဘဝိကာ (သျာ. က.)] နန္ဒိရာဂသဟဂတာ တတြတတြာဘိနန္ဒိနီ, သေယျထိဒံ – ကာမတဏှာ, ဘဝတဏှာ, ဝိဘဝတဏှာ။
သာ ခေါ ပနေသာ တဏှာ ကတ္ထ ဥပ္ပဇ္ဇမာနာ ဥပ္ပဇ္ဇတိ, ကတ္ထ နိဝိသမာနာ နိဝိသတိ? ယံ လောကေ ပိယရူပံ သာတရူပံ, ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။
ကိဉ္စ လောကေ ပိယရူပံ သာတရူပံ? စက္ခုံ လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။ သောတံ လောကေ။ပေ.။ ဃာနံ လောကေ။ ဇိဝှာ လောကေ။ ကာယော လောကေ။ မနော လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။
ရူပါ လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။ သဒ္ဒါ လောကေ။ပေ.။ ဂန္ဓာ လောကေ။ ရသာ လောကေ။ ဖောဋ္ဌဗ္ဗာ လောကေ။ ဓမ္မာ လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။
စက္ခုဝိညာဏံ လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။ သောတဝိညာဏံ လောကေ။ပေ.။ ဃာနဝိညာဏံ လောကေ။ ဇိဝှာဝိညာဏံ လောကေ။ ကာယဝိညာဏံ လောကေ။ မနောဝိညာဏံ လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။
စက္ခုသမ္ဖဿော လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။ သောတသမ္ဖဿော လောကေ။ပေ.။ ဃာနသမ္ဖဿော လောကေ။ ဇိဝှာသမ္ဖဿော လောကေ။ ကာယသမ္ဖဿော လောကေ။ မနောသမ္ဖဿော လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။
စက္ခုသမ္ဖဿဇာ ဝေဒနာ လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။ သောတသမ္ဖဿဇာ ဝေဒနာ လောကေ။ပေ.။ ဃာနသမ္ဖဿဇာ ဝေဒနာ လောကေ။ ဇိဝှာသမ္ဖဿဇာ ဝေဒနာ လောကေ။ ကာယသမ္ဖဿဇာ ဝေဒနာ လောကေ။ မနောသမ္ဖဿဇာ ဝေဒနာ လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။
ရူပသညာ လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။ သဒ္ဒသညာ လောကေ။ပေ.။ ဂန္ဓသညာ လောကေ။ ရသသညာ လောကေ။ ဖောဋ္ဌဗ္ဗသညာ လောကေ။ ဓမ္မသညာ လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။
ရူပသဉ္စေတနာ လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။ သဒ္ဒသဉ္စေတနာ လောကေ။ပေ.။ ဂန္ဓသဉ္စေတနာ လောကေ။ ရသသဉ္စေတနာ လောကေ။ ဖောဋ္ဌဗ္ဗသဉ္စေတနာ လောကေ။ ဓမ္မသဉ္စေတနာ လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။
ရူပတဏှာ လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။ သဒ္ဒတဏှာ လောကေ။ပေ.။ ဂန္ဓတဏှာ လောကေ။ ရသတဏှာ လောကေ။ ဖောဋ္ဌဗ္ဗတဏှာ လောကေ။ ဓမ္မတဏှာ လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။
ရူပဝိတက္ကော လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ ။ သဒ္ဒဝိတက္ကော လောကေ။ပေ.။ ဂန္ဓဝိတက္ကော လောကေ။ ရသဝိတက္ကော လောကေ။ ဖောဋ္ဌဗ္ဗဝိတက္ကော လောကေ။ ဓမ္မဝိတက္ကော လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။
ရူပဝိစာရော လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။ သဒ္ဒဝိစာရော လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ , ဧတ္ထ နိဝိသမာနာ နိဝိသတိ။ ဂန္ဓဝိစာရော လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။ ရသဝိစာရော လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။ ဖောဋ္ဌဗ္ဗဝိစာရော လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။ ဓမ္မဝိစာရော လောကေ ပိယရူပံ သာတရူပံ။ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ, ဧတ္ထ နိဝိသမာနာ နိဝိသတိ။
ဣဒံ ဝုစ္စတိ ‘‘ဒုက္ခသမုဒယံ အရိယသစ္စံ’’။
၃. နိရောဓသစ္စံ
၂၀၄. တတ္ထ ကတမံ ဒုက္ခနိရောဓံ အရိယသစ္စံ? ယော တဿာယေဝ တဏှာယ အသေသဝိရာဂနိရောဓေါ စာဂေါ ပဋိနိဿဂ္ဂေါ မုတ္တိ အနာလယော။
သာ ခေါ ပနေသာ တဏှာ ကတ္ထ ပဟီယမာနာ ပဟီယတိ, ကတ္ထ နိရုဇ္ဈမာနာ နိရုဇ္ဈတိ? ယံ လောကေ ပိယရူပံ သာတရူပံ, ဧတ္ထေသာ တဏှာ ပဟီယမာနာ ပဟီယတိ, ဧတ္ထ နိရုဇ္ဈမာနာ နိရုဇ္ဈတိ။
ကိဉ္စ လောကေ ပိယရူပံ သာတရူပံ? စက္ခုံ လောကေ ပိယရူပံ သာတရူပံ။ ဧတ္ထေသာ တဏှာ ပဟီယမာနာ ပဟီယတိ, ဧတ္ထ နိရုဇ္ဈမာနာ နိရုဇ္ဈတိ။ သောတံ လောကေ။ပေ.။ ဃာနံ လောကေ။ ဇိဝှာ လောကေ။ ကာယော လောကေ။ မနော လောကေ ပိယရူပံ သာတရူပံ။ ဧတ္ထေသာ တဏှာ ပဟီယမာနာ ပဟီယတိ, ဧတ္ထ နိရုဇ္ဈမာနာ နိရုဇ္ဈတိ။
ရူပါ လောကေ ပိယရူပံ သာတရူပံ။ ဧတ္ထေသာ တဏှာ ပဟီယမာနာ ပဟီယတိ, ဧတ္ထ နိရုဇ္ဈမာနာ နိရုဇ္ဈတိ။ သဒ္ဒါ လောကေ။ပေ.။ ဂန္ဓာ လောကေ။ ရသာ လောကေ။ ဖောဋ္ဌဗ္ဗာ လောကေ။ ဓမ္မာ လောကေ ပိယရူပံ သာတရူပံ။ ဧတ္ထေသာ တဏှာ ပဟီယမာနာ ပဟီယတိ, ဧတ္ထ နိရုဇ္ဈမာနာ နိရုဇ္ဈတိ။
စက္ခုဝိညာဏံ လောကေ ပိယရူပံ သာတရူပံ။ ဧတ္ထေသာ တဏှာ ပဟီယမာနာ ပဟီယတိ, ဧတ္ထ နိရုဇ္ဈမာနာ နိရုဇ္ဈတိ။ သောတဝိညာဏံ လောကေ။ပေ.။ ဃာနဝိညာဏံ လောကေ။ ဇိဝှာဝိညာဏံ လောကေ။ ကာယဝိညာဏံ လောကေ။ မနောဝိညာဏံ လောကေ ပိယရူပံ သာတရူပံ။ ဧတ္ထေသာ တဏှာ ပဟီယမာနာ ပဟီယတိ, ဧတ္ထ နိရုဇ္ဈမာနာ နိရုဇ္ဈတိ။
စက္ခုသမ္ဖဿော လောကေ ပိယရူပံ သာတရူပံ။ ဧတ္ထေသာ တဏှာ ပဟီယမာနာ ပဟီယတိ, ဧတ္ထ နိရုဇ္ဈမာနာ နိရုဇ္ဈတိ။ သောတသမ္ဖဿော လောကေ။ပေ.။ ဃာနသမ္ဖဿော လောကေ။ ဇိဝှာသမ္ဖဿော လောကေ။ ကာယသမ္ဖဿော လောကေ။ မနောသမ္ဖဿော လောကေ ပိယရူပံ သာတရူပံ။ ဧတ္ထေသာ တဏှာ ပဟီယမာနာ ပဟီယတိ, ဧတ္ထ နိရုဇ္ဈမာနာ နိရုဇ္ဈတိ။
စက္ခုသမ္ဖဿဇာ ဝေဒနာ လောကေ ပိယရူပံ သာတရူပံ။ ဧတ္ထေသာ တဏှာ ပဟီယမာနာ ပဟီယတိ, ဧတ္ထ နိရုဇ္ဈမာနာ နိရုဇ္ဈတိ။ သောတသမ္ဖဿဇာ ဝေဒနာ လောကေ။ပေ.။ ဃာနသမ္ဖဿဇာ ဝေဒနာ လောကေ။ ဇိဝှာသမ္ဖဿဇာ ဝေဒနာ လောကေ။ ကာယသမ္ဖဿဇာ ဝေဒနာ လောကေ။ မနောသမ္ဖဿဇာ ဝေဒနာ လောကေ ပိယရူပံ သာတရူပံ။ ဧတ္ထေသာ တဏှာ ပဟီယမာနာ ပဟီယတိ, ဧတ္ထ နိရုဇ္ဈမာနာ နိရုဇ္ဈတိ။
ရူပသညာ လောကေ။ သဒ္ဒသညာ လောကေ။ ဂန္ဓသညာ လောကေ။ ရသသညာ လောကေ။ ဖောဋ္ဌဗ္ဗသညာ လောကေ။ ဓမ္မသညာ လောကေ ပိယရူပံ သာတရူပံ။ ဧတ္ထေသာ တဏှာ ပဟီယမာနာ ပဟီယတိ, ဧတ္ထ နိရုဇ္ဈမာနာ နိရုဇ္ဈတိ။
ရူပသဉ္စေတနာ လောကေ။ သဒ္ဒသဉ္စေတနာ လောကေ။ ဂန္ဓသဉ္စေတနာ လောကေ။ ရသသဉ္စေတနာ လောကေ။ ဖောဋ္ဌဗ္ဗသဉ္စေတနာ လောကေ။ ဓမ္မသဉ္စေတနာ လောကေ ပိယရူပံ သာတရူပံ။ ဧတ္ထေသာ တဏှာ ပဟီယမာနာ ပဟီယတိ, ဧတ္ထ နိရုဇ္ဈမာနာ နိရုဇ္ဈတိ။
ရူပတဏှာ လောကေ။ သဒ္ဒတဏှာ လောကေ။ ဂန္ဓတဏှာ လောကေ။ ရသတဏှာ လောကေ။ ဖောဋ္ဌဗ္ဗတဏှာ လောကေ။ ဓမ္မတဏှာ လောကေ ပိယရူပံ သာတရူပံ။ ဧတ္ထေသာ တဏှာ ပဟီယမာနာ ပဟီယတိ, ဧတ္ထ နိရုဇ္ဈမာနာ နိရုဇ္ဈတိ။
ရူပဝိတက္ကော လောကေ။ သဒ္ဒဝိတက္ကော လောကေ။ ဂန္ဓဝိတက္ကော လောကေ။ ရသဝိတက္ကော လောကေ။ ဖောဋ္ဌဗ္ဗဝိတက္ကော လောကေ။ ဓမ္မဝိတက္ကော လောကေ ပိယရူပံ သာတရူပံ။ ဧတ္ထေသာ တဏှာ ပဟီယမာနာ ပဟီယတိ, ဧတ္ထ နိရုဇ္ဈမာနာ နိရုဇ္ဈတိ။
ရူပဝိစာရော လောကေ။ သဒ္ဒဝိစာရော လောကေ။ ဂန္ဓဝိစာရော လောကေ။ ရသဝိစာရော လောကေ။ ဖောဋ္ဌဗ္ဗဝိစာရော လောကေ။ ဓမ္မဝိစာရော လောကေ ပိယရူပံ သာတရူပံ။ ဧတ္ထေသာ တဏှာ ပဟီယမာနာ ပဟီယတိ, ဧတ္ထ နိရုဇ္ဈမာနာ နိရုဇ္ဈတိ။
ဣဒံ ဝုစ္စတိ ‘‘ဒုက္ခနိရောဓံ အရိယသစ္စံ’’။
၄. မဂ္ဂသစ္စံ
၂၀၅. တတ္ထ ကတမံ ဒုက္ခနိရောဓဂါမိနီ ပဋိပဒါ အရိယသစ္စံ? အယမေဝ အရိယော အဋ္ဌင်္ဂိကော မဂ္ဂေါ, သေယျထိဒံ – သမ္မာဒိဋ္ဌိ, သမ္မာသင်္ကပ္ပော, သမ္မာဝါစာ, သမ္မာကမ္မန္တော, သမ္မာအာဇီဝေါ, သမ္မာဝါယာမော, သမ္မာသတိ, သမ္မာသမာဓိ။
တတ္ထ ကတမာ သမ္မာဒိဋ္ဌိ? ဒုက္ခေ ဉာဏံ, ဒုက္ခသမုဒယေ ဉာဏံ, ဒုက္ခနိရောဓေ ဉာဏံ, ဒုက္ခနိရောဓဂါမိနိယာ ပဋိပဒါယ ဉာဏံ – အယံ ဝုစ္စတိ ‘‘သမ္မာဒိဋ္ဌိ’’။
တတ္ထ ကတမော သမ္မာသင်္ကပ္ပော? နေက္ခမ္မသင်္ကပ္ပော, အဗျာပါဒသင်္ကပ္ပော, အဝိဟိံသာသင်္ကပ္ပော – အယံ ဝုစ္စတိ ‘‘သမ္မာသင်္ကပ္ပော’’။
တတ္ထ ကတမာ သမ္မာဝါစာ? မုသာဝါဒါ ဝေရမဏီ, ပိသုဏာယ ဝါစာယ ဝေရမဏီ, ဖရုသာယ ဝါစာယ ဝေရမဏီ, သမ္ဖပ္ပလာပါ ဝေရမဏီ – အယံ ဝုစ္စတိ ‘‘သမ္မာဝါစာ’’။
တတ္ထ ကတမော သမ္မာကမ္မန္တော? ပါဏာတိပါတာ ဝေရမဏီ, အဒိန္နာဒါနာ ဝေရမဏီ, ကာမေသုမိစ္ဆာစာရာ ဝေရမဏီ – အယံ ဝုစ္စတိ ‘‘သမ္မာကမ္မန္တော’’။
တတ္ထ ကတမော သမ္မာအာဇီဝေါ? ဣဓ အရိယသာဝကော မိစ္ဆာအာဇီဝံ ပဟာယ သမ္မာအာဇီဝေန ဇီဝိကံ ကပ္ပေတိ – အယံ ဝုစ္စတိ ‘‘သမ္မာအာဇီဝေါ’’။
တတ္ထ ကတမော သမ္မာဝါယာမော? ဣဓ ဘိက္ခု အနုပ္ပန္နာနံ ပါပကာနံ အကုသလာနံ ဓမ္မာနံ အနုပ္ပါဒါယ ဆန္ဒံ ဇနေတိ, ဝါယမတိ, ဝီရိယံ အာရဘတိ, စိတ္တံ ပဂ္ဂဏှာတိ, ပဒဟတိ။ ဥပ္ပန္နာနံ ပါပကာနံ အကုသလာနံ ဓမ္မာနံ ပဟာနာယ ဆန္ဒံ ဇနေတိ, ဝါယမတိ, ဝီရိယံ အာရဘတိ, စိတ္တံ ပဂ္ဂဏှာတိ, ပဒဟတိ။ အနုပ္ပန္နာနံ ကုသလာနံ ဓမ္မာနံ ဥပ္ပါဒါယ ဆန္ဒံ ဇနေတိ, ဝါယမတိ, ဝီရိယံ အာရဘတိ, စိတ္တံ ပဂ္ဂဏှာတိ, ပဒဟတိ။ ဥပ္ပန္နာနံ ကုသလာနံ ဓမ္မာနံ ဌိတိယာ အသမ္မောသာယ ဘိယျောဘာဝါယ ဝေပုလ္လာယ ဘာဝနာယ ပါရိပူရိယာ ဆန္ဒံ ဇနေတိ, ဝါယမတိ, ဝီရိယံ အာရဘတိ, စိတ္တံ ပဂ္ဂဏှာတိ, ပဒဟတိ။ အယံ ဝုစ္စတိ ‘‘သမ္မာဝါယာမော’’။
တတ္ထ ကတမာ သမ္မာသတိ? ဣဓ ဘိက္ခု ကာယေ ကာယာနုပဿီ ဝိဟရတိ အာတာဣ သမ္ပဇာနော သတိမာ, ဝိနေယျ လောကေ အဘိဇ္ဈာဒေါမနဿံ။ ဝေဒနာသု။ပေ.။ စိတ္တေ။ပေ.။ ဓမ္မေသု ဓမ္မာနုပဿီ ဝိဟရတိ အာတာဣ သမ္ပဇာနော သတိမာ, ဝိနေယျ လောကေ အဘိဇ္ဈာဒေါမနဿံ။ အယံ ဝုစ္စတိ ‘‘သမ္မာသတိ’’။
တတ္ထ ကတမော သမ္မာသမာဓိ? ဣဓ ဘိက္ခု ဝိဝိစ္စေဝ ကာမေဟိ, ဝိဝိစ္စ အကုသလေဟိ ဓမ္မေဟိ, သဝိတက္ကံ သဝိစာရံ ဝိဝေကဇံ ဣတိသုခံ ပဌမံ ဈာနံ ဥပသမ္ပဇ္ဇ ဝိဟရတိ။ ဝိတက္ကဝိစာရာနံ ဝူပသမာ, အဇ္ဈတ္တံ သမ္ပသာဒနံ, စေတသော ဧကောဒိဘာဝံ အဝိတက္ကံ အဝိစာရံ သမာဓိဇံ ဣတိသုခံ ဒုတိယံ ဈာနံ ဥပသမ္ပဇ္ဇ ဝိဟရတိ။ ဣတိယာ စ ဝိရာဂါ, ဥပေက္ခကော စ ဝိဟရတိ, သတော စ သမ္ပဇာနော, သုခဉ္စ ကာယေန ပဋိသံဝေဒေတိ, ယံ တံ အရိယာ အာစိက္ခန္တိ – ‘‘ဥပေက္ခကော သတိမာ သုခဝိဟာရီ’’တိ, တတိယံ ဈာနံ ဥပသမ္ပဇ္ဇ ဝိဟရတိ။ သုခဿ စ ပဟာနာ, ဒုက္ခဿ စ ပဟာနာ, ပုဗ္ဗေဝ သောမနဿဒေါမနဿာနံ အတ္ထင်္ဂမာ, အဒုက္ခမသုခံ ဥပေက္ခာသတိပါရိသုဒ္ဓိံ စတုတ္ထံ ဈာနံ ဥပသမ္ပဇ္ဇ ဝိဟရတိ။ အယံ ဝုစ္စတိ ‘‘သမ္မာသမာဓိ’’။
ဣဒံ ဝုစ္စတိ ‘‘ဒုက္ခနိရောဓဂါမိနီ ပဋိပဒါ အရိယသစ္စံ’’။
သုတ္တန္တဘာဇနီယံ။
၂. အဘိဓမ္မဘာဇနီယံ
၂၀၆. စတ္တာရိ သစ္စာနိ – ဒုက္ခံ, ဒုက္ခသမုဒယော, ဒုက္ခနိရောဓေါ, ဒုက္ခနိရောဓဂါမိနီ ပဋိပဒါ။
တတ္ထ ကတမော ဒုက္ခသမုဒယော? တဏှာ – အယံ ဝုစ္စတိ ‘‘ဒုက္ခသမုဒယော’’။
တတ္ထ ကတမံ ဒုက္ခံ? အဝသေသာ စ ကိလေသာ, အဝသေသာ စ အကုသလာ ဓမ္မာ, တီဏိ စ ကုသလမူလာနိ သာသဝါနိ, အဝသေသာ စ သာသဝါ ကုသလာ ဓမ္မာ, သာသဝါ စ ကုသလာကုသလာနံ ဓမ္မာနံ ဝိပါကာ, ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ, သဗ္ဗဉ္စ ရူပံ – ဣဒံ ဝုစ္စတိ ‘‘ဒုက္ခံ’’။
တတ္ထ ကတမော ဒုက္ခနိရောဓေါ? တဏှာယ ပဟာနံ – အယံ ဝုစ္စတိ ‘‘ဒုက္ခနိရောဓေါ’’။
တတ္ထ ကတမာ ဒုက္ခနိရောဓဂါမိနီ ပဋိပဒါ? ဣဓ ဘိက္ခု ယသ္မိံ သမယေ လောကုတ္တရံ ဈာနံ ဘာဝေတိ နိယျာနိကံ အပစယဂါမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ, ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ, တသ္မိံ သမယေ အဋ္ဌင်္ဂိကော မဂ္ဂေါ ဟောတိ သမ္မာဒိဋ္ဌိ။ပေ.။ သမ္မာသမာဓိ။
တတ္ထ ကတမာ သမ္မာဒိဋ္ဌိ? ယာ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ ဓမ္မဝိစယသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သမ္မာဒိဋ္ဌိ’’။
တတ္ထ ကတမော သမ္မာသင်္ကပ္ပော? ယော တက္ကော ဝိတက္ကော။ပေ.။ သမ္မာသင်္ကပ္ပော မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သမ္မာသင်္ကပ္ပော’’။
တတ္ထ ကတမာ သမ္မာဝါစာ? ယာ စတူဟိ ဝစီဒုစ္စရိတေဟိ အာရတိ ဝိရတိ ပဋိဝိရတိ ဝေရမဏီ [ဝေရမဏိ (က.) ဧဝမုပရိပိ] အကိရိယာ အကရဏံ အနဇ္ဈာပတ္တိ ဝေလာအနတိက္ကမော သေတုဃာတော သမ္မာဝါစာ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သမ္မာဝါစာ’’။
တတ္ထ ကတမော သမ္မာကမ္မန္တော? ယာ တီဟိ ကာယဒုစ္စရိတေဟိ အာရတိ ဝိရတိ ပဋိဝိရတိ ဝေရမဏီ အကိရိယာ အကရဏံ အနဇ္ဈာပတ္တိ ဝေလာအနတိက္ကမော သေတုဃာတော သမ္မာကမ္မန္တော မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သမ္မာကမ္မန္တော’’။
တတ္ထ ကတမော သမ္မာအာဇီဝေါ? ယာ မိစ္ဆာ အာဇီဝါ အာရတိ ဝိရတိ ပဋိဝိရတိ ဝေရမဏီ အကိရိယာ အကရဏံ အနဇ္ဈာပတ္တိ ဝေလာအနတိက္ကမော သေတုဃာတော သမ္မာအာဇီဝေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သမ္မာအာဇီဝေါ’’။
တတ္ထ ကတမော သမ္မာဝါယာမော? ယော စေတသိကော ဝီရိယာရမ္ဘော [ဝိရိယာရမ္ဘော (သီ. သျာ.)] ။ပေ.။ သမ္မာဝါယာမော ဝီရိယသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သမ္မာဝါယာမော’’။
တတ္ထ ကတမာ သမ္မာသတိ? ယာ သတိ အနုဿတိ။ပေ.။ သမ္မာသတိ သတိသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သမ္မာသတိ’’။
တတ္ထ ကတမော သမ္မာသမာဓိ? ယာ စိတ္တဿ ဌိတိ သဏ္ဌိတိ။ပေ.။ သမ္မာသမာဓိ သမာဓိသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သမ္မာသမာဓိ’’။ အယံ ဝုစ္စတိ ‘‘ဒုက္ခနိရောဓဂါမိနီ ပဋိပဒါ’’။ အဝသေသာ ဓမ္မာ ဒုက္ခနိရောဓဂါမိနိယာ ပဋိပဒါယ သမ္ပယုတ္တာ။
၂၀၇. တတ္ထ ကတမော ဒုက္ခသမုဒယော? တဏှာ စ အဝသေသာ စ ကိလေသာ – အယံ ဝုစ္စတိ ‘‘ဒုက္ခသမုဒယော’’။
တတ္ထ ကတမံ ဒုက္ခံ? အဝသေသာ စ အကုသလာ ဓမ္မာ, တီဏိ စ ကုသလမူလာနိ သာသဝါနိ, အဝသေသာ စ သာသဝါ ကုသလာ ဓမ္မာ, သာသဝါ စ ကုသလာကုသလာနံ ဓမ္မာနံ ဝိပါကာ, ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ, သဗ္ဗဉ္စ ရူပံ – ဣဒံ ဝုစ္စတိ ‘‘ဒုက္ခံ’’။
တတ္ထ ကတမော ဒုက္ခနိရောဓေါ? တဏှာယ စ, အဝသေသာနဉ္စ ကိလေသာနံ ပဟာနံ – အယံ ဝုစ္စတိ ‘‘ဒုက္ခနိရောဓေါ’’။
တတ္ထ ကတမာ ဒုက္ခနိရောဓဂါမိနီ ပဋိပဒါ? ဣဓ ဘိက္ခု ယသ္မိံ သမယေ လောကုတ္တရံ ဈာနံ ဘာဝေတိ နိယျာနိကံ အပစယဂါမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ, ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ, တသ္မိံ သမယေ အဋ္ဌင်္ဂိကော မဂ္ဂေါ ဟောတိ – သမ္မာဒိဋ္ဌိ။ပေ.။ သမ္မာသမာဓိ။ အယံ ဝုစ္စတိ – ‘‘ဒုက္ခနိရောဓဂါမိနီ ပဋိပဒါ’’။ အဝသေသာ ဓမ္မာ ဒုက္ခနိရောဓဂါမိနိယာ ပဋိပဒါယ သမ္ပယုတ္တာ။
၂၀၈. တတ္ထ ကတမော ဒုက္ခသမုဒယော? တဏှာ စ အဝသေသာ စ ကိလေသာ, အဝသေသာ စ အကုသလာ ဓမ္မာ – အယံ ဝုစ္စတိ ‘‘ဒုက္ခသမုဒယော’’။
တတ္ထ ကတမံ ဒုက္ခံ? တီဏိ စ ကုသလမူလာနိ သာသဝါနိ, အဝသေသာ စ သာသဝါ ကုသလာ ဓမ္မာ, သာသဝါ စ ကုသလာကုသလာနံ ဓမ္မာနံ ဝိပါကာ, ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ, သဗ္ဗဉ္စ ရူပံ – ဣဒံ ဝုစ္စတိ ‘‘ဒုက္ခံ’’။
တတ္ထ ကတမော ဒုက္ခနိရောဓေါ? တဏှာယ စ, အဝသေသာနဉ္စ ကိလေသာနံ, အဝသေသာနဉ္စ အကုသလာနံ ဓမ္မာနံ ပဟာနံ – အယံ ဝုစ္စတိ ‘‘ဒုက္ခနိရောဓေါ’’။
တတ္ထ ကတမာ ဒုက္ခနိရောဓဂါမိနီ ပဋိပဒါ? ဣဓ ဘိက္ခု ယသ္မိံ သမယေ လောကုတ္တရံ ဈာနံ ဘာဝေတိ နိယျာနိကံ အပစယဂါမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ, တသ္မိံ သမယေ အဋ္ဌင်္ဂိကော မဂ္ဂေါ ဟောတိ – သမ္မာဒိဋ္ဌိ။ပေ.။ သမ္မာသမာဓိ။ အယံ ဝုစ္စတိ ‘‘ဒုက္ခနိရောဓဂါမိနီ ပဋိပဒါ’’။ အဝသေသာ ဓမ္မာ ဒုက္ခနိရောဓဂါမိနိယာ ပဋိပဒါယ သမ္ပယုတ္တာ။
၂၀၉. တတ္ထ ကတမော ဒုက္ခသမုဒယော? တဏှာ စ အဝသေသာ စ ကိလေသာ, အဝသေသာ စ အကုသလာ ဓမ္မာ, တီဏိ စ ကုသလမူလာနိ သာသဝါနိ – အယံ ဝုစ္စတိ ‘‘ဒုက္ခသမုဒယော’’။
တတ္ထ ကတမံ ဒုက္ခံ? အဝသေသာ စ သာသဝါ ကုသလာ ဓမ္မာ, သာသဝါ စ ကုသလာကုသလာနံ ဓမ္မာနံ ဝိပါကာ, ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ, သဗ္ဗဉ္စ ရူပံ – ဣဒံ ဝုစ္စတိ ‘‘ဒုက္ခံ’’။
တတ္ထ ကတမော ဒုက္ခနိရောဓေါ? တဏှာယ စ, အဝသေသာနဉ္စ ကိလေသာနံ, အဝသေသာနဉ္စ အကုသလာနံ ဓမ္မာနံ, တိဏ္ဏဉ္စ ကုသလမူလာနံ သာသဝါနံ ပဟာနံ – အယံ ဝုစ္စတိ ‘‘ဒုက္ခနိရောဓေါ’’။
တတ္ထ ကတမာ ဒုက္ခနိရောဓဂါမိနီ ပဋိပဒါ? ဣဓ ဘိက္ခု ယသ္မိံ သမယေ လောကုတ္တရံ ဈာနံ ဘာဝေတိ နိယျာနိကံ အပစယဂါမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ, တသ္မိံ သမယေ အဋ္ဌင်္ဂိကော မဂ္ဂေါ ဟောတိ – သမ္မာဒိဋ္ဌိ။ပေ.။ သမ္မာသမာဓိ။ အယံ ဝုစ္စတိ ‘‘ဒုက္ခနိရောဓဂါမိနီ ပဋိပဒါ’’။ အဝသေသာ ဓမ္မာ ဒုက္ခနိရောဓဂါမိနိယာ ပဋိပဒါယ သမ္ပယုတ္တာ။
၂၁၀. တတ္ထ ကတမော ဒုက္ခသမုဒယော? တဏှာ စ, အဝသေသာ စ ကိလေသာ, အဝသေသာ စ အကုသလာ ဓမ္မာ, တီဏိ စ ကုသလမူလာနိ သာသဝါနိ, အဝသေသာ စ သာသဝါ ကုသလာ ဓမ္မာ – အယံ ဝုစ္စတိ ‘‘ဒုက္ခသမုဒယော’’။
တတ္ထ ကတမံ ဒုက္ခံ? သာသဝါ ကုသလာကုသလာနံ ဓမ္မာနံ ဝိပါကာ, ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ, သဗ္ဗဉ္စ ရူပံ – ဣဒံ ဝုစ္စတိ ‘‘ဒုက္ခံ’’။
တတ္ထ ကတမော ဒုက္ခနိရောဓေါ? တဏှာယ စ, အဝသေသာနဉ္စ ကိလေသာနံ, အဝသေသာနဉ္စ အကုသလာနံ ဓမ္မာနံ, တိဏ္ဏဉ္စ ကုသလမူလာနံ သာသဝါနံ, အဝသေသာနဉ္စ သာသဝါနံ ကုသလာနံ ဓမ္မာနံ ပဟာနံ – အယံ ဝုစ္စတိ ‘‘ဒုက္ခနိရောဓေါ’’။
တတ္ထ ကတမာ ဒုက္ခနိရောဓဂါမိနီ ပဋိပဒါ? ဣဓ ဘိက္ခု ယသ္မိံ သမယေ လောကုတ္တရံ ဈာနံ ဘာဝေတိ နိယျာနိကံ အပစယဂါမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ, ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ, တသ္မိံ သမယေ အဋ္ဌင်္ဂိကော မဂ္ဂေါ ဟောတိ – သမ္မာဒိဋ္ဌိ။ပေ.။ သမ္မာသမာဓိ။ အယံ ဝုစ္စတိ ‘‘ဒုက္ခနိရောဓဂါမိနီ ပဋိပဒါ’’။ အဝသေသာ ဓမ္မာ ဒုက္ခနိရောဓဂါမိနိယာ ပဋိပဒါယ သမ္ပယုတ္တာ။
၂၁၁. စတ္တာရိ သစ္စာနိ – ဒုက္ခံ, ဒုက္ခသမုဒယော, ဒုက္ခနိရောဓေါ, ဒုက္ခနိရောဓဂါမိနီ ပဋိပဒါ။
တတ္ထ ကတမော ဒုက္ခသမုဒယော? တဏှာ – အယံ ဝုစ္စတိ ‘‘ဒုက္ခသမုဒယော’’။
တတ္ထ ကတမံ ဒုက္ခံ? အဝသေသာ စ ကိလေသာ, အဝသေသာ စ အကုသလာ ဓမ္မာ, တီဏိ စ ကုသလမူလာနိ သာသဝါနိ, အဝသေသာ စ သာသဝါ ကုသလာ ဓမ္မာ, သာသဝါ စ ကုသလာကုသလာနံ ဓမ္မာနံ ဝိပါကာ, ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ, သဗ္ဗဉ္စ ရူပံ – ဣဒံ ဝုစ္စတိ ‘‘ဒုက္ခံ’’။
တတ္ထ ကတမော ဒုက္ခနိရောဓေါ? တဏှာယ ပဟာနံ – အယံ ဝုစ္စတိ ‘‘ဒုက္ခနိရောဓေါ’’။
တတ္ထ ကတမာ ဒုက္ခနိရောဓဂါမိနီ ပဋိပဒါ? ဣဓ ဘိက္ခု ယသ္မိံ သမယေ လောကုတ္တရံ ဈာနံ ဘာဝေတိ နိယျာနိကံ အပစယဂါမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ, ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ, တသ္မိံ သမယေ ပဉ္စင်္ဂိကော မဂ္ဂေါ ဟောတိ – သမ္မာဒိဋ္ဌိ, သမ္မာသင်္ကပ္ပော, သမ္မာဝါယာမော, သမ္မာသတိ, သမ္မာသမာဓိ။
တတ္ထ ကတမာ သမ္မာဒိဋ္ဌိ? ယာ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ ဓမ္မဝိစယသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သမ္မာဒိဋ္ဌိ’’။
တတ္ထ ကတမော သမ္မာသင်္ကပ္ပော? ယော တက္ကော ဝိတက္ကော။ပေ.။ သမ္မာသင်္ကပ္ပော မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သမ္မာသင်္ကပ္ပော’’။
တတ္ထ ကတမော သမ္မာဝါယာမော? ယော စေတသိကော ဝီရိယာရမ္ဘော။ပေ.။ သမ္မာဝါယာမော ဝီရိယသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သမ္မာဝါယာမော’’။
တတ္ထ ကတမာ သမ္မာသတိ? ယာ သတိ အနုဿတိ။ပေ.။ သမ္မာသတိ သတိသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သမ္မာသတိ’’။
တတ္ထ ကတမော သမ္မာသမာဓိ? ယာ စိတ္တဿ ဌိတိ။ပေ.။ သမ္မာသမာဓိ သမာဓိသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ ‘‘သမ္မာသမာဓိ’’။ အယံ ဝုစ္စတိ ‘‘ဒုက္ခနိရောဓဂါမိနီ ပဋိပဒါ’’။ အဝသေသာ ဓမ္မာ ဒုက္ခနိရောဓဂါမိနိယာ ပဋိပဒါယ သမ္ပယုတ္တာ။
၂၁၂. တတ္ထ ကတမော ဒုက္ခသမုဒယော? တဏှာ စ, အဝသေသာ စ ကိလေသာ, အဝသေသာ စ အကုသလာ ဓမ္မာ, တီဏိ စ ကုသလမူလာနိ သာသဝါနိ , အဝသေသာ စ သာသဝါ ကုသလာ ဓမ္မာ – အယံ ဝုစ္စတိ ‘‘ဒုက္ခသမုဒယော’’။
တတ္ထ ကတမံ ဒုက္ခံ? သာသဝါ ကုသလာကုသလာနံ ဓမ္မာနံ ဝိပါကာ, ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ, သဗ္ဗဉ္စ ရူပံ – ဣဒံ ဝုစ္စတိ ‘‘ဒုက္ခံ’’။
တတ္ထ ကတမော ဒုက္ခနိရောဓေါ? တဏှာယ စ, အဝသေသာနဉ္စ ကိလေသာနံ, အဝသေသာနဉ္စ အကုသလာနံ ဓမ္မာနံ, တိဏ္ဏဉ္စ ကုသလမူလာနံ သာသဝါနံ, အဝသေသာနဉ္စ သာသဝါနံ ကုသလာနံ ဓမ္မာနံ ပဟာနံ – အယံ ဝုစ္စတိ ‘‘ဒုက္ခနိရောဓေါ’’။
တတ္ထ ကတမာ ဒုက္ခနိရောဓဂါမိနီ ပဋိပဒါ? ဣဓ ဘိက္ခု ယသ္မိံ သမယေ လောကုတ္တရံ ဈာနံ ဘာဝေတိ နိယျာနိကံ အပစယဂါမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ, ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ, တသ္မိံ သမယေ ပဉ္စင်္ဂိကော မဂ္ဂေါ ဟောတိ – သမ္မာဒိဋ္ဌိ, သမ္မာသင်္ကပ္ပော, သမ္မာဝါယာမော, သမ္မာသတိ, သမ္မာသမာဓိ။ အယံ ဝုစ္စတိ ‘‘ဒုက္ခနိရောဓဂါမိနီ ပဋိပဒါ’’။ အဝသေသာ ဓမ္မာ ဒုက္ခနိရောဓဂါမိနိယာ ပဋိပဒါယ သမ္ပယုတ္တာ။
၂၁၃. စတ္တာရိ သစ္စာနိ – ဒုက္ခံ, ဒုက္ခသမုဒယော, ဒုက္ခနိရောဓေါ, ဒုက္ခနိရောဓဂါမိနီ ပဋိပဒါ။
တတ္ထ ကတမော ဒုက္ခသမုဒယော? တဏှာ – အယံ ဝုစ္စတိ ‘‘ဒုက္ခသမုဒယော’’။
တတ္ထ ကတမံ ဒုက္ခံ? အဝသေသာ စ ကိလေသာ, အဝသေသာ စ အကုသလာ ဓမ္မာ, တီဏိ စ ကုသလမူလာနိ သာသဝါနိ, အဝသေသာ စ သာသဝါ ကုသလာ ဓမ္မာ, သာသဝါ စ ကုသလာကုသလာနံ ဓမ္မာနံ ဝိပါကာ, ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ, သဗ္ဗဉ္စ ရူပံ – ဣဒံ ဝုစ္စတိ ‘‘ဒုက္ခံ’’။
တတ္ထ ကတမော ဒုက္ခနိရောဓေါ? တဏှာယ ပဟာနံ – အယံ ဝုစ္စတိ ‘‘ဒုက္ခနိရောဓေါ’’။
တတ္ထ ကတမာ ဒုက္ခနိရောဓဂါမိနီ ပဋိပဒါ? ဣဓ ဘိက္ခု ယသ္မိံ သမယေ လောကုတ္တရံ ဈာနံ ဘာဝေတိ နိယျာနိကံ အပစယဂါမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ, တသ္မိံ သမယေ ဖဿော ဟောတိ။ပေ.။ အဝိက္ခေပေါ ဟောတိ။ အယံ ဝုစ္စတိ ‘‘ဒုက္ခနိရောဓဂါမိနီ ပဋိပဒါ’’။
၂၁၄. တတ္ထ ကတမော ဒုက္ခသမုဒယော? တဏှာ စ, အဝသေသာ စ ကိလေသာ, အဝသေသာ စ အကုသလာ ဓမ္မာ, တီဏိ စ ကုသလမူလာနိ သာသဝါနိ, အဝသေသာ စ သာသဝါ ကုသလာ ဓမ္မာ – အယံ ဝုစ္စတိ ‘‘ဒုက္ခသမုဒယော’’။
တတ္ထ ကတမံ ဒုက္ခံ? သာသဝါ ကုသလာကုသလာနံ ဓမ္မာနံ ဝိပါကာ, ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ, သဗ္ဗဉ္စ ရူပံ – ဣဒံ ဝုစ္စတိ ‘‘ဒုက္ခံ’’။
တတ္ထ ကတမော ဒုက္ခနိရောဓေါ? တဏှာယ စ, အဝသေသာနဉ္စ ကိလေသာနံ, အဝသေသာနဉ္စ အကုသလာနံ ဓမ္မာနံ, တိဏ္ဏဉ္စ ကုသလမူလာနံ သာသဝါနံ, အဝသေသာနဉ္စ သာသဝါနံ ကုသလာနံ ဓမ္မာနံ ပဟာနံ – အယံ ဝုစ္စတိ ‘‘ဒုက္ခနိရောဓေါ’’။
တတ္ထ ကတမာ ဒုက္ခနိရောဓဂါမိနီ ပဋိပဒါ? ဣဓ ဘိက္ခု ယသ္မိံ သမယေ လောကုတ္တရံ ဈာနံ ဘာဝေတိ နိယျာနိကံ အပစယဂါမိံ ဒိဋ္ဌိဂတာနံ ပဟာနာယ ပဌမာယ ဘူမိယာ ပတ္တိယာ ဝိဝိစ္စေဝ ကာမေဟိ။ပေ.။ ပဌမံ ဈာနံ ဥပသမ္ပဇ္ဇ ဝိဟရတိ ဒုက္ခပဋိပဒံ ဒန္ဓာဘိညံ, တသ္မိံ သမယေ ဖဿော ဟောတိ။ပေ.။ အဝိက္ခေပေါ ဟောတိ။ အယံ ဝုစ္စတိ ‘‘ဒုက္ခနိရောဓဂါမိနီ ပဋိပဒါ’’။
အဘိဓမ္မဘာဇနီယံ။
၃. ပဉှာပုစ္ဆကံ
၂၁၅. စတ္တာရိ အရိယသစ္စာနိ – ဒုက္ခံ အရိယသစ္စံ, ဒုက္ခသမုဒယံ အရိယသစ္စံ, ဒုက္ခနိရောဓံ အရိယသစ္စံ, ဒုက္ခနိရောဓဂါမိနီ ပဋိပဒါ အရိယသစ္စံ။
၂၁၆. စတုန္နံ အရိယသစ္စာနံ ကတိ ကုသလာ, ကတိ အကုသလာ, ကတိ အဗျာကတာ။ပေ.။ ကတိ သရဏာ, ကတိ အရဏာ?
၁. တိကံ
၂၁၇. သမုဒယသစ္စံ အကုသလံ။ မဂ္ဂသစ္စံ ကုသလံ။ နိရောဓသစ္စံ အဗျာကတံ။ ဒုက္ခသစ္စံ သိယာ ကုသလံ, သိယာ အကုသလံ, သိယာ အဗျာကတံ။ ဒွေ သစ္စာ သိယာ သုခါယ ဝေဒနာယ သမ္ပယုတ္တာ, သိယာ အဒုက္ခမသုခါယ ဝေဒနာယ သမ္ပယုတ္တာ။ နိရောဓသစ္စံ န ဝတ္တဗ္ဗံ – ‘‘သုခါယ ဝေဒနာယ သမ္ပယုတ္တ’’န္တိပိ, ‘‘ဒုက္ခာယ ဝေဒနာယ သမ္ပယုတ္တ’’န္တိပိ, ‘‘အဒုက္ခမသုခါယ ဝေဒနာယ သမ္ပယုတ္တ’’န္တိပိ။ ဒုက္ခသစ္စံ သိယာ သုခါယ ဝေဒနာယ သမ္ပယုတ္တံ, သိယာ ဒုက္ခာယ ဝေဒနာယ သမ္ပယုတ္တံ, သိယာ အဒုက္ခမသုခါယ ဝေဒနာယ သမ္ပယုတ္တံ, သိယာ န ဝတ္တဗ္ဗံ – ‘‘သုခါယ ဝေဒနာယ သမ္ပယုတ္တ’’န္တိပိ, ‘‘ဒုက္ခာယ ဝေဒနာယ သမ္ပယုတ္တ’’န္တိပိ, ‘‘အဒုက္ခမသုခါယ ဝေဒနာယ သမ္ပယုတ္တ’’န္တိပိ။ ဒွေ သစ္စာ ဝိပါကဓမ္မဓမ္မာ။ နိရောဓသစ္စံ နေဝဝိပါကနဝိပါကဓမ္မဓမ္မံ။ ဒုက္ခသစ္စံ သိယာ ဝိပါကံ, သိယာ ဝိပါကဓမ္မဓမ္မံ, သိယာ နေဝဝိပါကနဝိပါကဓမ္မဓမ္မံ။ သမုဒယသစ္စံ အနုပါဒိန္နုပါဒါနိယံ။ ဒွေ သစ္စာ အနုပါဒိန္နအနုပါဒါနိယာ။ ဒုက္ခသစ္စံ သိယာ ဥပါဒိန္နုပါဒါနိယံ, သိယာ အနုပါဒိန္နုပါဒါနိယံ။
သမုဒယသစ္စံ သံကိလိဋ္ဌသံကိလေသိကံ။ ဒွေ သစ္စာ အသံကိလိဋ္ဌအသံကိလေသိကာ။ ဒုက္ခသစ္စံ သိယာ သံကိလိဋ္ဌသံကိလေသိကံ, သိယာ အသံကိလိဋ္ဌသံကိလေသိကံ။ သမုဒယသစ္စံ သဝိတက္ကသဝိစာရံ။ နိရောဓသစ္စံ အဝိတက္ကအဝိစာရံ။ မဂ္ဂသစ္စံ သိယာ သဝိတက္ကသဝိစာရံ, သိယာ အဝိတက္ကဝိစာရမတ္တံ, သိယာ အဝိတက္ကအဝိစာရံ။ ဒုက္ခသစ္စံ သိယာ သဝိတက္ကသဝိစာရံ, သိယာ အဝိတက္ကဝိစာရမတ္တံ, သိယာ အဝိတက္ကအဝိစာရံ, သိယာ န ဝတ္တဗ္ဗံ – ‘‘သဝိတက္ကသဝိစာရ’’န္တိပိ, ‘‘အဝိတက္ကဝိစာရမတ္တ’’န္တိပိ, ‘‘အဝိတက္ကအဝိစာရ’’န္တိပိ။ ဒွေ သစ္စာ သိယာ ဣတိသဟဂတာ, သိယာ သုခသဟဂတာ, သိယာ ဥပေက္ခာသဟဂတာ။ နိရောဓသစ္စံ န ဝတ္တဗ္ဗံ – ‘‘ဣတိသဟဂတ’’န္တိပိ, ‘‘သုခသဟဂတ’’န္တိပိ, ‘‘ဥပေက္ခာသဟဂတ’’န္တိပိ။ ဒုက္ခသစ္စံ သိယာ ဣတိသဟဂတံ, သိယာ သုခသဟဂတံ, သိယာ ဥပေက္ခာသဟဂတံ, သိယာ န ဝတ္တဗ္ဗံ – ‘‘ဣတိသဟဂတ’’န္တိပိ, ‘‘သုခသဟဂတ’’န္တိပိ, ‘‘ဥပေက္ခာသဟဂတ’’န္တိပိ။
ဒွေ သစ္စာ နေဝ ဒဿနေန န ဘာဝနာယ ပဟာတဗ္ဗာ။ သမုဒယသစ္စံ သိယာ ဒဿနေန ပဟာတဗ္ဗံ, သိယာ ဘာဝနာယ ပဟာတဗ္ဗံ။ ဒုက္ခသစ္စံ သိယာ ဒဿနေန ပဟာတဗ္ဗံ, သိယာ ဘာဝနာယ ပဟာတဗ္ဗံ, သိယာ နေဝ ဒဿနေန န ဘာဝနာယ ပဟာတဗ္ဗံ။ ဒွေ သစ္စာ နေဝ ဒဿနေန န ဘာဝနာယ ပဟာတဗ္ဗဟေတုကာ။ သမုဒယသစ္စံ သိယာ ဒဿနေန ပဟာတဗ္ဗဟေတုကံ, သိယာ ဘာဝနာယ ပဟာတဗ္ဗဟေတုကံ ။ ဒုက္ခသစ္စံ သိယာ ဒဿနေန ပဟာတဗ္ဗဟေတုကံ, သိယာ ဘာဝနာယ ပဟာတဗ္ဗဟေတုကံ, သိယာ နေဝ ဒဿနေန န ဘာဝနာယ ပဟာတဗ္ဗဟေတုကံ။ သမုဒယသစ္စံ အာစယဂါမိ။ မဂ္ဂသစ္စံ အပစယဂါမိ။ နိရောဓသစ္စံ နေဝါစယဂါမိနာပစယဂါမိ။ ဒုက္ခသစ္စံ သိယာ အာစယဂါမိ, သိယာ နေဝါစယဂါမိနာပစယဂါမိ။ မဂ္ဂသစ္စံ သေက္ခံ။ တီဏိ သစ္စာနိ နေဝသေက္ခနာသေက္ခာ။ သမုဒယသစ္စံ ပရိတ္တံ ။ ဒွေ သစ္စာ အပ္ပမာဏာ။ ဒုက္ခသစ္စံ သိယာ ပရိတ္တံ, သိယာ မဟဂ္ဂတံ။ နိရောဓသစ္စံ အနာရမ္မဏံ။ မဂ္ဂသစ္စံ အပ္ပမာဏာရမ္မဏံ။ သမုဒယသစ္စံ သိယာ ပရိတ္တာရမ္မဏံ, သိယာ မဟဂ္ဂတာရမ္မဏံ န အပ္ပမာဏာရမ္မဏံ, သိယာ န ဝတ္တဗ္ဗံ – ‘‘ပရိတ္တာရမ္မဏ’’န္တိပိ, ‘‘မဟဂ္ဂတာရမ္မဏ’’န္တိပိ။ ဒုက္ခသစ္စံ သိယာ ပရိတ္တာရမ္မဏံ, သိယာ မဟဂ္ဂတာရမ္မဏံ, သိယာ အပ္ပမာဏာရမ္မဏံ, သိယာ န ဝတ္တဗ္ဗံ – ‘‘ပရိတ္တာရမ္မဏ’’န္တိပိ, ‘‘မဟဂ္ဂတာရမ္မဏ’’န္တိပိ, ‘‘အပ္ပမာဏာရမ္မဏ’’န္တိပိ။
သမုဒယသစ္စံ ဟီနံ။ ဒွေ သစ္စာ ပဏီတာ။ ဒုက္ခသစ္စံ သိယာ ဟီနံ, သိယာ မဇ္ဈိမံ။ နိရောဓသစ္စံ အနိယတံ။ မဂ္ဂသစ္စံ သမ္မတ္တနိယတံ။ ဒွေ သစ္စာ သိယာ မိစ္ဆတ္တနိယတာ, သိယာ အနိယတာ။ နိရောဓသစ္စံ အနာရမ္မဏံ။ သမုဒယသစ္စံ န ဝတ္တဗ္ဗံ – ‘‘မဂ္ဂါရမ္မဏ’’န္တိပိ, ‘‘မဂ္ဂဟေတုက’’န္တိပိ, ‘‘မဂ္ဂါဓိပတီ’’တိပိ။ မဂ္ဂသစ္စံ န မဂ္ဂါရမ္မဏံ မဂ္ဂဟေတုကံ, သိယာ မဂ္ဂါဓိပတိ, သိယာ န ဝတ္တဗ္ဗံ – ‘‘မဂ္ဂါဓိပတီ’’တိ။ ဒုက္ခသစ္စံ သိယာ မဂ္ဂါရမ္မဏံ န မဂ္ဂဟေတုကံ, သိယာ မဂ္ဂါဓိပတိ, သိယာ န ဝတ္တဗ္ဗံ – ‘‘မဂ္ဂါရမ္မဏ’’န္တိပိ, ‘‘မဂ္ဂါဓိပတီ’’တိပိ။ ဒွေ သစ္စာ သိယာ ဥပ္ပန္နာ, သိယာ အနုပ္ပန္နာ, န ဝတ္တဗ္ဗာ – ‘‘ဥပ္ပါဒိနော’’တိ။ နိရောဓသစ္စံ န ဝတ္တဗ္ဗံ – ‘‘ဥပ္ပန္န’’န္တိပိ, ‘‘အနုပ္ပန္န’’န္တိပိ, ‘‘ဥပ္ပါဒီ’’တိပိ။ ဒုက္ခသစ္စံ သိယာ ဥပ္ပန္နံ, သိယာ အနုပ္ပန္နံ, သိယာ ဥပ္ပါဒိ။ တီဏိ သစ္စာနိ သိယာ အတီတာ, သိယာ အနာဂတာ, သိယာ ပစ္စုပ္ပန္နာ။ နိရောဓသစ္စံ န ဝတ္တဗ္ဗံ – ‘‘အတီတ’’န္တိပိ, ‘‘အနာဂတ’’န္တိပိ, ‘‘ပစ္စုပ္ပန္န’’န္တိပိ။ နိရောဓသစ္စံ အနာရမ္မဏံ။ မဂ္ဂသစ္စံ န ဝတ္တဗ္ဗံ – ‘‘အတီတာရမ္မဏ’’န္တိပိ, ‘‘အနာဂတာရမ္မဏ’’န္တိပိ, ‘‘ပစ္စုပ္ပန္နာရမ္မဏ’’န္တိပိ။ ဒွေ သစ္စာ သိယာ အတီတာရမ္မဏာ, သိယာ အနာဂတာရမ္မဏာ, သိယာ ပစ္စုပ္ပန္နာရမ္မဏာ, သိယာ န ဝတ္တဗ္ဗာ – ‘‘အတီတာရမ္မဏာ’’တိပိ, ‘‘အနာဂတာရမ္မဏာ’’တိပိ, ‘‘ပစ္စုပ္ပန္နာရမ္မဏာ’’တိပိ။ နိရောဓသစ္စံ ဗဟိဒ္ဓါ။ တီဏိ သစ္စာနိ သိယာ အဇ္ဈတ္တာ, သိယာ ဗဟိဒ္ဓါ, သိယာ အဇ္ဈတ္တဗဟိဒ္ဓါ။ နိရောဓသစ္စံ အနာရမ္မဏံ။ မဂ္ဂသစ္စံ ဗဟိဒ္ဓါရမ္မဏံ။ သမုဒယသစ္စံ သိယာ အဇ္ဈတ္တာရမ္မဏံ, သိယာ ဗဟိဒ္ဓါရမ္မဏံ, သိယာ အဇ္ဈတ္တဗဟိဒ္ဓါရမ္မဏံ။ ဒုက္ခသစ္စံ သိယာ အဇ္ဈတ္တာရမ္မဏံ, သိယာ ဗဟိဒ္ဓါရမ္မဏံ, သိယာ အဇ္ဈတ္တဗဟိဒ္ဓါရမ္မဏံ , သိယာ န ဝတ္တဗ္ဗံ – ‘‘အဇ္ဈတ္တာရမ္မဏ’’န္တိပိ, ‘‘ဗဟိဒ္ဓါရမ္မဏ’’န္တိပိ, ‘‘အဇ္ဈတ္တဗဟိဒ္ဓါရမ္မဏ’’န္တိပိ။ တီဏိ သစ္စာနိ အနိဒဿနအပ္ပဋိဃာ။ ဒုက္ခသစ္စံ သိယာ သနိဒဿနသပ္ပဋိဃံ, သိယာ အနိဒဿနသပ္ပဋိဃံ, သိယာ အနိဒဿနအပ္ပဋိဃံ။
၂. ဒုကံ
၂၁၈. သမုဒယသစ္စံ ဟေတု။ နိရောဓသစ္စံ န ဟေတု။ ဒွေ သစ္စာ သိယာ ဟေတူ, သိယာ န ဟေတူ။ ဒွေ သစ္စာ သဟေတုကာ။ နိရောဓသစ္စံ အဟေတုကံ။ ဒုက္ခသစ္စံ သိယာ သဟေတုကံ, သိယာ အဟေတုကံ။ ဒွေ သစ္စာ ဟေတုသမ္ပယုတ္တာ။ နိရောဓသစ္စံ ဟေတုဝိပ္ပယုတ္တံ။ ဒုက္ခသစ္စံ သိယာ ဟေတုသမ္ပယုတ္တံ, သိယာ ဟေတုဝိပ္ပယုတ္တံ။ သမုဒယသစ္စံ ဟေတု စေဝ သဟေတုကဉ္စ။ နိရောဓသစ္စံ န ဝတ္တဗ္ဗံ – ‘‘ဟေတု စေဝ သဟေတုကဉ္စာ’’တိပိ, ‘‘သဟေတုကဉ္စေဝ န စ ဟေတူ’’တိပိ။ မဂ္ဂသစ္စံ သိယာ ဟေတု စေဝ သဟေတုကဉ္စ, သိယာ သဟေတုကဉ္စေဝ န စ ဟေတု။ ဒုက္ခသစ္စံ သိယာ ဟေတု စေဝ သဟေတုကဉ္စ, သိယာ သဟေတုကဉ္စေဝ န စ ဟေတု, သိယာ န ဝတ္တဗ္ဗံ – ‘‘ဟေတု စေဝ သဟေတုကဉ္စာ’’တိပိ, ‘‘သဟေတုကဉ္စေဝ န စ ဟေတူ’’တိပိ။ သမုဒယသစ္စံ ဟေတု စေဝ ဟေတုသမ္ပယုတ္တဉ္စ။ နိရောဓသစ္စံ န ဝတ္တဗ္ဗံ – ‘‘ဟေတု စေဝ ဟေတုသမ္ပယုတ္တဉ္စာ’’တိပိ, ‘‘ဟေတုသမ္ပယုတ္တဉ္စေဝ န စ ဟေတူ’’တိပိ။ မဂ္ဂသစ္စံ သိယာ ဟေတု စေဝ ဟေတုသမ္ပယုတ္တဉ္စ, သိယာ ဟေတုသမ္ပယုတ္တဉ္စေဝ န စ ဟေတု။ ဒုက္ခသစ္စံ သိယာ ဟေတု စေဝ ဟေတုသမ္ပယုတ္တဉ္စ, သိယာ ဟေတုသမ္ပယုတ္တဉ္စေဝ န စ ဟေတု, သိယာ န ဝတ္တဗ္ဗံ – ‘‘ဟေတု စေဝ ဟေတုသမ္ပယုတ္တဉ္စာ’’တိပိ, ‘‘ဟေတုသမ္ပယုတ္တဉ္စေဝ န စ ဟေတူ’’တိပိ။ နိရောဓသစ္စံ န ဟေတုအဟေတုကံ။ သမုဒယသစ္စံ န ဝတ္တဗ္ဗံ – ‘‘န ဟေတုသဟေတုက’’န္တိပိ, ‘‘န ဟေတုအဟေတုက’’န္တိပိ။ မဂ္ဂသစ္စံ သိယာ န ဟေတုသဟေတုကံ, သိယာ န ဝတ္တဗ္ဗံ – ‘‘န ဟေတုသဟေတုက’’န္တိပိ, ‘‘န ဟေတုအဟေတုက’’န္တိပိ။ ဒုက္ခသစ္စံ သိယာ န ဟေတုသဟေတုကံ, သိယာ န ဟေတုအဟေတုကံ, သိယာ န ဝတ္တဗ္ဗံ – ‘‘န ဟေတုသဟေတုက’’န္တိပိ, ‘‘န ဟေတုအဟေတုက’’န္တိပိ။
တီဏိ သစ္စာနိ သပ္ပစ္စယာ။ နိရောဓသစ္စံ အပ္ပစ္စယံ။ တီဏိ သစ္စာနိ သင်္ခတာ။ နိရောဓသစ္စံ အသင်္ခတံ။ တီဏိ သစ္စာနိ အနိဒဿနာ။ ဒုက္ခသစ္စံ သိယာ သနိဒဿနံ, သိယာ အနိဒဿနံ။ တီဏိ သစ္စာနိ အပ္ပဋိဃာ။ ဒုက္ခသစ္စံ သိယာ သပ္ပဋိဃံ, သိယာ အပ္ပဋိဃံ။ တီဏိ သစ္စာနိ အရူပါနိ။ ဒုက္ခသစ္စံ သိယာ ရူပံ, သိယာ အရူပံ။ ဒွေ သစ္စာ လောကိယာ။ ဒွေ သစ္စာ လောကုတ္တရာ; ကေနစိ ဝိညေယျာ, ကေနစိ န ဝိညေယျာ။
သမုဒယသစ္စံ အာသဝေါ။ ဒွေ သစ္စာ နော အာသဝါ။ ဒုက္ခသစ္စံ သိယာ အာသဝေါ, သိယာ နော အာသဝေါ။ ဒွေ သစ္စာ သာသဝါ။ ဒွေ သစ္စာ အနာသဝါ ။ သမုဒယသစ္စံ အာသဝသမ္ပယုတ္တံ။ ဒွေ သစ္စာ အာသဝဝိပ္ပယုတ္တာ။ ဒုက္ခသစ္စံ သိယာ အာသဝသမ္ပယုတ္တံ, သိယာ အာသဝဝိပ္ပယုတ္တံ။ သမုဒယသစ္စံ အာသဝေါ စေဝ သာသဝဉ္စ။ ဒွေ သစ္စာ န ဝတ္တဗ္ဗာ – ‘‘အာသဝါ စေဝ သာသဝါ စာ’’တိပိ, ‘‘သာသဝါ စေဝ နော စ အာသဝါ’’တိပိ။ ဒုက္ခသစ္စံ သိယာ အာသဝေါ စေဝ သာသဝဉ္စ, သိယာ သာသဝဉ္စေဝ နော စ အာသဝေါ။ သမုဒယသစ္စံ အာသဝေါ စေဝ အာသဝသမ္ပယုတ္တဉ္စ။ ဒွေ သစ္စာ န ဝတ္တဗ္ဗာ – ‘‘အာသဝါ စေဝ အာသဝသမ္ပယုတ္တာ စာ’’တိပိ, ‘‘အာသဝသမ္ပယုတ္တာ စေဝ နော စ အာသဝါ’’တိပိ။ ဒုက္ခသစ္စံ သိယာ အာသဝေါ စေဝ အာသဝသမ္ပယုတ္တဉ္စ , သိယာ အာသဝသမ္ပယုတ္တဉ္စေဝ နော စ အာသဝေါ, သိယာ န ဝတ္တဗ္ဗံ – ‘‘အာသဝေါ စေဝ အာသဝသမ္ပယုတ္တဉ္စာ’’တိပိ, ‘‘အာသဝသမ္ပယုတ္တဉ္စေဝ နော စ အာသဝေါ’’တိပိ။ ဒွေ သစ္စာ အာသဝဝိပ္ပယုတ္တအနာသဝါ။ သမုဒယသစ္စံ န ဝတ္တဗ္ဗံ – ‘‘အာသဝဝိပ္ပယုတ္တသာသဝ’’န္တိပိ, ‘‘အာသဝဝိပ္ပယုတ္တအနာသဝ’’န္တိပိ။ ဒုက္ခသစ္စံ သိယာ အာသဝဝိပ္ပယုတ္တသာသဝံ, သိယာ န ဝတ္တဗ္ဗံ – ‘‘အာသဝဝိပ္ပယုတ္တသာသဝ’’န္တိပိ, ‘‘အာသဝဝိပ္ပယုတ္တအနာသဝ’’န္တိပိ။
သမုဒယသစ္စံ သံယောဇနံ။ ဒွေ သစ္စာ နော သံယောဇနာ။ ဒုက္ခသစ္စံ သိယာ သံယောဇနံ, သိယာ နော သံယောဇနံ။ ဒွေ သစ္စာ သံယောဇနိယာ။ ဒွေ သစ္စာ အသံယောဇနိယာ။ သမုဒယသစ္စံ သံယောဇနသမ္ပယုတ္တံ။ ဒွေ သစ္စာ သံယောဇနဝိပ္ပယုတ္တာ။ ဒုက္ခသစ္စံ သိယာ သံယောဇနသမ္ပယုတ္တံ, သိယာ သံယောဇနဝိပ္ပယုတ္တံ။ သမုဒယသစ္စံ သံယောဇနဉ္စေဝ သံယောဇနိယဉ္စ။ ဒွေ သစ္စာ န ဝတ္တဗ္ဗာ – ‘‘သံယောဇနာ စေဝ သံယောဇနိယာ စာ’’တိပိ, ‘‘သံယောဇနိယာ စေဝ နော စ သံယောဇနာ’’တိပိ။ ဒုက္ခသစ္စံ သိယာ သံယောဇနဉ္စေဝ သံယောဇနိယဉ္စ, သိယာ သံယောဇနိယဉ္စေဝ နော စ သံယောဇနံ။ သမုဒယသစ္စံ သံယောဇနဉ္စေဝ သံယောဇနသမ္ပယုတ္တဉ္စ။ ဒွေ သစ္စာ န ဝတ္တဗ္ဗာ – ‘‘သံယောဇနာ စေဝ သံယောဇနသမ္ပယုတ္တာ စာ’’တိပိ, ‘‘သံယောဇနသမ္ပယုတ္တာ စေဝ နော စ သံယောဇနာ’’တိပိ။ ဒုက္ခသစ္စံ သိယာ သံယောဇနဉ္စေဝ သံယောဇနသမ္ပယုတ္တဉ္စ, သိယာ သံယောဇနသမ္ပယုတ္တဉ္စေဝ နော စ သံယောဇနံ, သိယာ န ဝတ္တဗ္ဗံ – ‘‘သံယောဇနဉ္စေဝ သံယောဇနသမ္ပယုတ္တဉ္စာ’’တိပိ, ‘‘သံယောဇနသမ္ပယုတ္တဉ္စေဝ နော စ သံယောဇန’’န္တိပိ ။ ဒွေ သစ္စာ သံယောဇနဝိပ္ပယုတ္တအသံယောဇနိယာ။ သမုဒယသစ္စံ န ဝတ္တဗ္ဗံ – ‘‘သံယောဇနဝိပ္ပယုတ္တသံယောဇနိယ’’န္တိပိ, ‘‘သံယောဇနဝိပ္ပယုတ္တအသံယောဇနိယ’’န္တိပိ။ ဒုက္ခသစ္စံ သိယာ သံယောဇနဝိပ္ပယုတ္တသံယောဇနိယံ, သိယာ န ဝတ္တဗ္ဗံ – ‘‘သံယောဇနဝိပ္ပယုတ္တသံယောဇနိယ’’န္တိပိ, ‘‘သံယောဇနဝိပ္ပယုတ္တအသံယောဇနိယ’’န္တိပိ။
သမုဒယသစ္စံ ဂန္ထော။ ဒွေ သစ္စာ နော ဂန္ထာ။ ဒုက္ခသစ္စံ သိယာ ဂန္ထော, သိယာ နော ဂန္ထော။ ဒွေ သစ္စာ ဂန္ထနိယာ။ ဒွေ သစ္စာ အဂန္ထနိယာ။ ဒွေ သစ္စာ ဂန္ထဝိပ္ပယုတ္တာ။ ဒွေ သစ္စာ သိယာ ဂန္ထသမ္ပယုတ္တာ, သိယာ ဂန္ထဝိပ္ပယုတ္တာ။ သမုဒယသစ္စံ ဂန္ထော စေဝ ဂန္ထနိယဉ္စ။ ဒွေ သစ္စာ န ဝတ္တဗ္ဗာ – ‘‘ဂန္ထာ စေဝ ဂန္ထနိယာ စာ’’တိပိ, ‘‘ဂန္ထနိယာ စေဝ နော စ ဂန္ထာ’’တိပိ။ ဒုက္ခသစ္စံ သိယာ ဂန္ထော စေဝ ဂန္ထနိယဉ္စ, သိယာ ဂန္ထနိယဉ္စေဝ နော စ ဂန္ထော။ သမုဒယသစ္စံ ဂန္ထော စေဝ ဂန္ထသမ္ပယုတ္တဉ္စ , သိယာ န ဝတ္တဗ္ဗံ – ‘‘ဂန္ထော စေဝ ဂန္ထသမ္ပယုတ္တဉ္စာ’’တိပိ, ‘‘ဂန္ထသမ္ပယုတ္တဉ္စေဝ နော စ ဂန္ထော’’တိပိ။ ဒွေ သစ္စာ န ဝတ္တဗ္ဗာ – ‘‘ဂန္ထာ စေဝ ဂန္ထသမ္ပယုတ္တာ စာ’’တိပိ, ‘‘ဂန္ထသမ္ပယုတ္တာ စေဝ နော စ ဂန္ထာ’’တိပိ။ ဒုက္ခသစ္စံ သိယာ ဂန္ထော စေဝ ဂန္ထသမ္ပယုတ္တဉ္စ, သိယာ ဂန္ထသမ္ပယုတ္တဉ္စေဝ နော စ ဂန္ထော, သိယာ န ဝတ္တဗ္ဗံ – ‘‘ဂန္ထော စေဝ ဂန္ထသမ္ပယုတ္တဉ္စာ’’တိပိ, ‘‘ဂန္ထသမ္ပယုတ္တဉ္စေဝ နော စ ဂန္ထော’’တိပိ။ ဒွေ သစ္စာ ဂန္ထဝိပ္ပယုတ္တအဂန္ထနိယာ။ ဒွေ သစ္စာ သိယာ ဂန္ထဝိပ္ပယုတ္တဂန္ထနိယာ, သိယာ န ဝတ္တဗ္ဗာ – ‘‘ဂန္ထဝိပ္ပယုတ္တဂန္ထနိယာ’’တိပိ, ‘‘ဂန္ထဝိပ္ပယုတ္တအဂန္ထနိယာ’’တိပိ။
သမုဒယသစ္စံ ဩဃော။ပေ.။ ယောဂေါ။ပေ.။ နီဝရဏံ။ ဒွေ သစ္စာ နော နီဝရဏာ။ ဒုက္ခသစ္စံ သိယာ နီဝရဏံ, သိယာ နော နီဝရဏံ။ ဒွေ သစ္စာ နီဝရဏိယာ ဒွေ သစ္စာ အနီဝရဏိယာ။ သမုဒယသစ္စံ နီဝရဏသမ္ပယုတ္တံ။ ဒွေ သစ္စာ နီဝရဏဝိပ္ပယုတ္တာ။ ဒုက္ခသစ္စံ သိယာ နီဝရဏသမ္ပယုတ္တံ, သိယာ နီဝရဏဝိပ္ပယုတ္တံ။ သမုဒယသစ္စံ နီဝရဏဉ္စေဝ နီဝရဏိယဉ္စ။ ဒွေ သစ္စာ န ဝတ္တဗ္ဗာ – ‘‘နီဝရဏာ စေဝ နီဝရဏိယာ စာ’’တိပိ, ‘‘နီဝရဏိယာ စေဝ နော စ နီဝရဏာ’’တိပိ။ ဒုက္ခသစ္စံ သိယာ နီဝရဏဉ္စေဝ နီဝရဏိယဉ္စ, သိယာ နီဝရဏိယဉ္စေဝ နော စ နီဝရဏံ။ သမုဒယသစ္စံ နီဝရဏဉ္စေဝ နီဝရဏသမ္ပယုတ္တဉ္စ။ ဒွေ သစ္စာ န ဝတ္တဗ္ဗာ – ‘‘နီဝရဏာ စေဝ နီဝရဏသမ္ပယုတ္တာ စာ’’တိပိ, ‘‘နီဝရဏသမ္ပယုတ္တာ စေဝ နော စ နီဝရဏာ’’တိပိ။ ဒုက္ခသစ္စံ သိယာ နီဝရဏဉ္စေဝ နီဝရဏသမ္ပယုတ္တဉ္စ, သိယာ နီဝရဏသမ္ပယုတ္တဉ္စေဝ နော စ နီဝရဏံ, သိယာ န ဝတ္တဗ္ဗံ – ‘‘နီဝရဏဉ္စေဝ နီဝရဏသမ္ပယုတ္တဉ္စာ’’တိပိ , ‘‘နီဝရဏသမ္ပယုတ္တဉ္စေဝ နော စ နီဝရဏ’’န္တိပိ။ ဒွေ သစ္စာ နီဝရဏဝိပ္ပယုတ္တအနီဝရဏိယာ။ သမုဒယသစ္စံ န ဝတ္တဗ္ဗံ – ‘‘နီဝရဏဝိပ္ပယုတ္တနီဝရဏိယ’’န္တိပိ, ‘‘နီဝရဏဝိပ္ပယုတ္တအနီဝရဏိယ’’န္တိပိ။ ဒုက္ခသစ္စံ သိယာ နီဝရဏဝိပ္ပယုတ္တနီဝရဏိယံ, သိယာ န ဝတ္တဗ္ဗံ – ‘‘နီဝရဏဝိပ္ပယုတ္တနီဝရဏိယ’’န္တိပိ, ‘‘နီဝရဏဝိပ္ပယုတ္တအနီဝရဏိယ’’န္တိပိ။
တီဏိ သစ္စာနိ နော ပရာမာသာ။ ဒုက္ခသစ္စံ သိယာ ပရာမာသော, သိယာ နော ပရာမာသော။ ဒွေ သစ္စာ ပရာမဋ္ဌာ။ ဒွေ သစ္စာ အပရာမဋ္ဌာ။ ဒွေ သစ္စာ ပရာမာသဝိပ္ပယုတ္တာ။ သမုဒယသစ္စံ သိယာ ပရာမာသသမ္ပယုတ္တံ, သိယာ ပရာမာသဝိပ္ပယုတ္တံ။ ဒုက္ခသစ္စံ သိယာ ပရာမာသသမ္ပယုတ္တံ, သိယာ ပရာမာသဝိပ္ပယုတ္တံ, သိယာ န ဝတ္တဗ္ဗံ – ‘‘ပရာမာသသမ္ပယုတ္တ’’န္တိပိ, ‘‘ပရာမာသဝိပ္ပယုတ္တ’’န္တိပိ။ သမုဒယသစ္စံ န ဝတ္တဗ္ဗံ – ‘‘ပရာမာသော စေဝ ပရာမဋ္ဌဉ္စာ’’တိ, ပရာမဋ္ဌဉ္စေဝ နော စ ပရာမာသော။ ဒွေ သစ္စာ န ဝတ္တဗ္ဗာ – ‘‘ပရာမာသာ စေဝ ပရာမဋ္ဌာ စာ’’တိပိ , ‘‘ပရာမဋ္ဌာ စေဝ နော စ ပရာမာသာ’’တိပိ။ ဒုက္ခသစ္စံ သိယာ ပရာမာသော စေဝ ပရာမဋ္ဌဉ္စ, သိယာ ပရာမဋ္ဌဉ္စေဝ နော စ ပရာမာသော။ ဒွေ သစ္စာ ပရာမာသဝိပ္ပယုတ္တအပရာမဋ္ဌာ။ ဒွေ သစ္စာ သိယာ ပရာမာသဝိပ္ပယုတ္တပရာမဋ္ဌာ, သိယာ န ဝတ္တဗ္ဗာ – ‘‘ပရာမာသဝိပ္ပယုတ္တပရာမဋ္ဌာ’’တိပိ, ‘‘ပရာမာသဝိပ္ပယုတ္တအပရာမဋ္ဌာ’’တိပိ။
ဒွေ သစ္စာ သာရမ္မဏာ။ နိရောဓသစ္စံ အနာရမ္မဏံ။ ဒုက္ခသစ္စံ သိယာ သာရမ္မဏံ, သိယာ အနာရမ္မဏံ။ တီဏိ သစ္စာနိ နော စိတ္တာ။ ဒုက္ခသစ္စံ သိယာ စိတ္တံ, သိယာ နော စိတ္တံ။ ဒွေ သစ္စာ စေတသိကာ။ နိရောဓသစ္စံ အစေတသိကံ။ ဒုက္ခသစ္စံ သိယာ စေတသိကံ, သိယာ အစေတသိကံ။ ဒွေ သစ္စာ စိတ္တသမ္ပယုတ္တာ ။ နိရောဓသစ္စံ စိတ္တဝိပ္ပယုတ္တံ။ ဒုက္ခသစ္စံ သိယာ စိတ္တသမ္ပယုတ္တံ, သိယာ စိတ္တဝိပ္ပယုတ္တံ, သိယာ န ဝတ္တဗ္ဗံ – ‘‘စိတ္တေန သမ္ပယုတ္တ’’န္တိပိ, ‘‘စိတ္တေန ဝိပ္ပယုတ္တ’’န္တိပိ။ ဒွေ သစ္စာ စိတ္တသံသဋ္ဌာ။ နိရောဓသစ္စံ စိတ္တဝိသံသဋ္ဌံ။ ဒုက္ခသစ္စံ သိယာ စိတ္တသံသဋ္ဌံ, သိယာ စိတ္တဝိသံသဋ္ဌံ, သိယာ န ဝတ္တဗ္ဗံ – ‘‘စိတ္တေန သံသဋ္ဌ’’န္တိပိ, ‘‘စိတ္တေန ဝိသံသဋ္ဌ’’န္တိပိ။ ဒွေ သစ္စာ စိတ္တသမုဋ္ဌာနာ။ နိရောဓသစ္စံ နော စိတ္တသမုဋ္ဌာနံ။ ဒုက္ခသစ္စံ သိယာ စိတ္တသမုဋ္ဌာနံ, သိယာ နော စိတ္တသမုဋ္ဌာနံ။ ဒွေ သစ္စာ စိတ္တသဟဘုနော။ နိရောဓသစ္စံ နော စိတ္တသဟဘူ။ ဒုက္ခသစ္စံ သိယာ စိတ္တသဟဘူ, သိယာ နော စိတ္တသဟဘူ။ ဒွေ သစ္စာ စိတ္တာနုပရိဝတ္တိနော။ နိရောဓသစ္စံ နော စိတ္တာနုပရိဝတ္တိ။ ဒုက္ခသစ္စံ သိယာ စိတ္တာနုပရိဝတ္တိ, သိယာ နော စိတ္တာနုပရိဝတ္တိ။ ဒွေ သစ္စာ စိတ္တသံသဋ္ဌသမုဋ္ဌာနာ။ နိရောဓသစ္စံ နော စိတ္တသံသဋ္ဌသမုဋ္ဌာနံ ။ ဒုက္ခသစ္စံ သိယာ စိတ္တသံသဋ္ဌသမုဋ္ဌာနံ, သိယာ နော စိတ္တသံသဋ္ဌသမုဋ္ဌာနံ။ ဒွေ သစ္စာ စိတ္တသံသဋ္ဌသမုဋ္ဌာနသဟဘုနော။ နိရောဓသစ္စံ နော စိတ္တသံသဋ္ဌသမုဋ္ဌာနသဟဘူ။ ဒုက္ခသစ္စံ သိယာ စိတ္တသံသဋ္ဌသမုဋ္ဌာနသဟဘူ, သိယာ နော စိတ္တသံသဋ္ဌသမုဋ္ဌာနသဟဘူ။ ဒွေ သစ္စာ စိတ္တသံသဋ္ဌသမုဋ္ဌာနာနုပရိဝတ္တိနော။ နိရောဓသစ္စံ နော စိတ္တသံသဋ္ဌသမုဋ္ဌာနာနုပရိဝတ္တိ ။ ဒုက္ခသစ္စံ သိယာ စိတ္တသံသဋ္ဌသမုဋ္ဌာနာနုပရိဝတ္တိ, သိယာ နော စိတ္တသံသဋ္ဌသမုဋ္ဌာနာနုပရိဝတ္တိ။ တီဏိ သစ္စာနိ ဗာဟိရာ။ ဒုက္ခသစ္စံ သိယာ အဇ္ဈတ္တံ, သိယာ ဗာဟိရံ။
တီဏိ သစ္စာနိ နော ဥပါဒါ။ ဒုက္ခသစ္စံ သိယာ ဥပါဒါ, သိယာ နော ဥပါဒါ။ တီဏိ သစ္စာနိ အနုပါဒိန္နာ။ ဒုက္ခသစ္စံ သိယာ ဥပါဒိန္နံ, သိယာ အနုပါဒိန္နံ။ သမုဒယသစ္စံ ဥပါဒါနံ။ ဒွေ သစ္စာ နော ဥပါဒါနာ။ ဒုက္ခသစ္စံ သိယာ ဥပါဒါနံ, သိယာ နော ဥပါဒါနံ။ ဒွေ သစ္စာ ဥပါဒါနိယာ။ ဒွေ သစ္စာ အနုပါဒါနိယာ။ ဒွေ သစ္စာ ဥပါဒါနဝိပ္ပယုတ္တာ။ ဒွေ သစ္စာ သိယာ ဥပါဒါနသမ္ပယုတ္တာ, သိယာ ဥပါဒါနဝိပ္ပယုတ္တာ။ သမုဒယသစ္စံ ဥပါဒါနဉ္စေဝ ဥပါဒါနိယဉ္စ။ ဒွေ သစ္စာ န ဝတ္တဗ္ဗာ – ‘‘ဥပါဒါနာ စေဝ ဥပါဒါနိယာ စာ’’တိပိ, ‘‘ဥပါဒါနိယာ စေဝ နော စ ဥပါဒါနာ’’တိပိ။ ဒုက္ခသစ္စံ သိယာ ဥပါဒါနဉ္စေဝ ဥပါဒါနိယဉ္စ, သိယာ ဥပါဒါနိယဉ္စေဝ နော စ ဥပါဒါနံ။ သမုဒယသစ္စံ သိယာ ဥပါဒါနဉ္စေဝ ဥပါဒါနသမ္ပယုတ္တဉ္စ, သိယာ န ဝတ္တဗ္ဗံ – ‘‘ဥပါဒါနဉ္စေဝ ဥပါဒါနသမ္ပယုတ္တဉ္စာ’’တိပိ, ‘‘ဥပါဒါနသမ္ပယုတ္တဉ္စေဝ နော စ ဥပါဒါန’’န္တိပိ။ ဒွေ သစ္စာ န ဝတ္တဗ္ဗာ – ‘‘ဥပါဒါနာ စေဝ ဥပါဒါနသမ္ပယုတ္တာ စာ’’တိပိ, ‘‘ဥပါဒါနသမ္ပယုတ္တာ စေဝ နော စ ဥပါဒါနာ’’တိပိ။ ဒုက္ခသစ္စံ သိယာ ဥပါဒါနဉ္စေဝ ဥပါဒါနသမ္ပယုတ္တဉ္စ, သိယာ ဥပါဒါနသမ္ပယုတ္တဉ္စေဝ နော စ ဥပါဒါနံ, သိယာ န ဝတ္တဗ္ဗံ – ‘‘ဥပါဒါနဉ္စေဝ ဥပါဒါနသမ္ပယုတ္တဉ္စာ’’ တိပိ, ‘‘ဥပါဒါနသမ္ပယုတ္တဉ္စေဝ နော စ ဥပါဒါန’’န္တိပိ။ ဒွေ သစ္စာ ဥပါဒါနဝိပ္ပယုတ္တအနုပါဒါနိယာ။ ဒွေ သစ္စာ သိယာ ဥပါဒါနဝိပ္ပယုတ္တဥပါဒါနိယာ, သိယာ န ဝတ္တဗ္ဗာ – ‘‘ဥပါဒါနဝိပ္ပယုတ္တဥပါဒါနိယာ’’တိပိ, ‘‘ဥပါဒါနဝိပ္ပယုတ္တအနုပါဒါနိယာ’’တိပိ။
သမုဒယသစ္စံ ကိလေသော။ ဒွေ သစ္စာ နော ကိလေသာ။ ဒုက္ခသစ္စံ သိယာ ကိလေသော, သိယာ နော ကိလေသော။ ဒွေ သစ္စာ သံကိလေသိကာ။ ဒွေ သစ္စာ အသံကိလေသိကာ။ သမုဒယသစ္စံ သံကိလိဋ္ဌံ။ ဒွေ သစ္စာ အသံကိလိဋ္ဌာ။ ဒုက္ခသစ္စံ သိယာ သံကိလိဋ္ဌံ, သိယာ အသံကိလိဋ္ဌံ။ သမုဒယသစ္စံ ကိလေသသမ္ပယုတ္တံ။ ဒွေ သစ္စာ ကိလေသဝိပ္ပယုတ္တာ။ ဒုက္ခသစ္စံ သိယာ ကိလေသသမ္ပယုတ္တံ, သိယာ ကိလေသဝိပ္ပယုတ္တံ။ သမုဒယသစ္စံ ကိလေသော စေဝ သံကိလေသိကဉ္စ။ ဒွေ သစ္စာ န ဝတ္တဗ္ဗာ – ‘‘ကိလေသာ စေဝ သံကိလေသိကာ စာ’’တိပိ, ‘‘သံကိလေသိကာ စေဝ နော စ ကိလေသာ’’တိပိ။ ဒုက္ခသစ္စံ သိယာ ကိလေသော စေဝ သံကိလေသိကဉ္စ, သိယာ သံကိလေသိကဉ္စေဝ နော စ ကိလေသော။ သမုဒယသစ္စံ ကိလေသော စေဝ သံကိလိဋ္ဌဉ္စ။ ဒွေ သစ္စာ န ဝတ္တဗ္ဗာ – ‘‘ကိလေသာ စေဝ သံကိလိဋ္ဌာ စာ’’တိပိ, ‘‘သံကိလိဋ္ဌာ စေဝ နော စ ကိလေသာ’’တိပိ။ ဒုက္ခသစ္စံ သိယာ ကိလေသော စေဝ သံကိလိဋ္ဌဉ္စ, သိယာ သံကိလိဋ္ဌဉ္စေဝ နော စ ကိလေသော, သိယာ န ဝတ္တဗ္ဗံ – ‘‘ကိလေသော စေဝ သံကိလိဋ္ဌဉ္စာ’’တိပိ, ‘‘သံကိလိဋ္ဌဉ္စေဝ နော စ ကိလေသော’’တိပိ။ သမုဒယသစ္စံ ကိလေသော စေဝ ကိလေသသမ္ပယုတ္တဉ္စ။ ဒွေ သစ္စာ န ဝတ္တဗ္ဗာ – ‘‘ကိလေသာ စေဝ ကိလေသသမ္ပယုတ္တာ စာ’’တိပိ, ‘‘ကိလေသသမ္ပယုတ္တာ စေဝ နော စ ကိလေသာ’’တိပိ။ ဒုက္ခသစ္စံ သိယာ ကိလေသော စေဝ ကိလေသသမ္ပယုတ္တဉ္စ , သိယာ ကိလေသသမ္ပယုတ္တဉ္စေဝ နော စ ကိလေသော, သိယာ န ဝတ္တဗ္ဗံ – ‘‘ကိလေသော စေဝ ကိလေသသမ္ပယုတ္တဉ္စာ’’ တိပိ, ‘‘ကိလေသသမ္ပယုတ္တဉ္စေဝ နော စ ကိလေသော’’တိပိ။ ဒွေ သစ္စာ ကိလေသဝိပ္ပယုတ္တအသံကိလေသိကာ။ သမုဒယသစ္စံ န ဝတ္တဗ္ဗံ – ‘‘ကိလေသဝိပ္ပယုတ္တသံကိလေသိက’’န္တိပိ, ‘‘ကိလေသဝိပ္ပယုတ္တအသံကိလေသိက’’န္တိပိ။ ဒုက္ခသစ္စံ သိယာ ကိလေသဝိပ္ပယုတ္တသံကိလေသိကံ, သိယာ န ဝတ္တဗ္ဗံ – ‘‘ကိလေသဝိပ္ပယုတ္တသံကိလေသိက’’န္တိပိ, ‘‘ကိလေသဝိပ္ပယုတ္တအသံကိလေသိက’’န္တိပိ။
ဒွေ သစ္စာ န ဒဿနေန ပဟာတဗ္ဗာ။ ဒွေ သစ္စာ သိယာ ဒဿနေန ပဟာတဗ္ဗာ, သိယာ န ဒဿနေန ပဟာတဗ္ဗာ။ ဒွေ သစ္စာ န ဘာဝနာယ ပဟာတဗ္ဗာ။ ဒွေ သစ္စာ သိယာ ဘာဝနာယ ပဟာတဗ္ဗာ, သိယာ န ဘာဝနာယ ပဟာတဗ္ဗာ။ ဒွေ သစ္စာ န ဒဿနေန ပဟာတဗ္ဗဟေတုကာ။ ဒွေ သစ္စာ သိယာ ဒဿနေန ပဟာတဗ္ဗဟေတုကာ, သိယာ န ဒဿနေန ပဟာတဗ္ဗဟေတုကာ။ ဒွေ သစ္စာ န ဘာဝနာယ ပဟာတဗ္ဗဟေတုကာ။ ဒွေ သစ္စာ သိယာ ဘာဝနာယ ပဟာတဗ္ဗဟေတုကာ, သိယာ န ဘာဝနာယ ပဟာတဗ္ဗဟေတုကာ။ သမုဒယသစ္စံ သဝိတက္ကံ။ နိရောဓသစ္စံ အဝိတက္ကံ။ ဒွေ သစ္စာ သိယာ သဝိတက္ကာ, သိယာ အဝိတက္ကာ။ သမုဒယသစ္စံ သဝိစာရံ။ နိရောဓသစ္စံ အဝိစာရံ။ ဒွေ သစ္စာ သိယာ သဝိစာရာ, သိယာ အဝိစာရာ။ နိရောဓသစ္စံ အပ္ပီတိကံ။ တီဏိ သစ္စာနိ သိယာ သပ္ပီတိကာ, သိယာ အပ္ပီတိကာ။ နိရောဓသစ္စံ န ဣတိသဟဂတံ။ တီဏိ သစ္စာနိ သိယာ ဣတိသဟဂတာ, သိယာ န ဣတိသဟဂတာ။ နိရောဓသစ္စံ န သုခသဟဂတံ။ တီဏိ သစ္စာနိ သိယာ သုခသဟဂတာ, သိယာ န သုခသဟဂတာ။ နိရောဓသစ္စံ န ဥပေက္ခာသဟဂတံ။ တီဏိ သစ္စာနိ သိယာ ဥပေက္ခာသဟဂတာ, သိယာ န ဥပေက္ခာသဟဂတာ။
သမုဒယသစ္စံ ကာမာဝစရံ။ ဒွေ သစ္စာ န ကာမာဝစရာ။ ဒုက္ခသစ္စံ သိယာ ကာမာဝစရံ, သိယာ န ကာမာဝစရံ။ တီဏိ သစ္စာနိ န ရူပါဝစရာ။ ဒုက္ခသစ္စံ သိယာ ရူပါဝစရံ, သိယာ န ရူပါဝစရံ။ တီဏိ သစ္စာနိ န အရူပါဝစရာ။ ဒုက္ခသစ္စံ သိယာ အရူပါဝစရံ, သိယာ န အရူပါဝစရံ။ ဒွေ သစ္စာ ပရိယာပန္နာ။ ဒွေ သစ္စာ အပရိယာပန္နာ။ မဂ္ဂသစ္စံ နိယျာနိကံ။ တီဏိ သစ္စာနိ အနိယျာနိကာ။ မဂ္ဂသစ္စံ နိယတံ။ နိရောဓသစ္စံ အနိယတံ။ ဒွေ သစ္စာ သိယာ နိယတာ, သိယာ အနိယတာ။ ဒွေ သစ္စာ သဥတ္တရာ။ ဒွေ သစ္စာ အနုတ္တရာ။ သမုဒယသစ္စံ သရဏံ။ ဒွေ သစ္စာ အရဏာ။ ဒုက္ခသစ္စံ သိယာ သရဏံ, သိယာ အရဏန္တိ။
ပဉှာပုစ္ဆကံ။
သစ္စဝိဘင်္ဂေါ နိဋ္ဌိတော။