အာယတနဝိဘင်္ဂ‌

၂. အာယတနဝိဘင်္ဂ

‌

၁. သုတ္တန္တဘာဇနီယ

၁၅၄. ဒွါဒသာယတနာနိ – စက္ခာယတနံ, ရူပါယတနံ, သောတာယတနံ, သဒ္ဒါယတနံ, ဃာနာယတနံ, ဂန္ဓာယတနံ, ဇိဝှါယတနံ, ရသာယတနံ, ကာယာယတနံ, ဖောဋ္ဌဗ္ဗာယတနံ, မနာယတနံ, ဓမ္မာယတနံ။

စက္ခုံ အနိစ္စံ ဒုက္ခံ အနတ္တာ ဝိပရိဏာမဓမ္မံ။ ရူပါ အနိစ္စာ ဒုက္ခာ အနတ္တာ ဝိပရိဏာမဓမ္မာ။ သောတံ အနိစ္စံ ဒုက္ခံ အနတ္တာ ဝိပရိဏာမဓမ္မံ။ သဒ္ဒါ အနိစ္စာ ဒုက္ခာ အနတ္တာ ဝိပရိဏာမဓမ္မာ။ ဃာနံ အနိစ္စံ ဒုက္ခံ အနတ္တာ ဝိပရိဏာမဓမ္မံ။ ဂန္ဓာ အနိစ္စာ ဒုက္ခာ အနတ္တာ ဝိပရိဏာမဓမ္မာ။ ဇိဝှာ အနိစ္စာ ဒုက္ခာ အနတ္တာ ဝိပရိဏာမဓမ္မာ။ ရသာ အနိစ္စာ ဒုက္ခာ အနတ္တာ ဝိပရိဏာမဓမ္မာ။ ကာယော အနိစ္စော ဒုက္ခော အနတ္တာ ဝိပရိဏာမဓမ္မော။ ဖောဋ္ဌဗ္ဗာ အနိစ္စာ ဒုက္ခာ အနတ္တာ ဝိပရိဏာမဓမ္မာ။ မနော အနိစ္စော ဒုက္ခော အနတ္တာ ဝိပရိဏာမဓမ္မော။ ဓမ္မာ အနိစ္စာ ဒုက္ခာ အနတ္တာ ဝိပရိဏာမဓမ္မာ။

သုတ္တန္တဘာဇနီယံ။

၂. အဘိဓမ္မဘာဇနီယံ

၁၅၅. ဒွါဒသာယတနာနိ – စက္ခာယတနံ, သောတာယတနံ, ဃာနာယတနံ, ဇိဝှာယတနံ, ကာယာယတနံ, မနာယတနံ, ရူပါယတနံ, သဒ္ဒါယတနံ, ဂန္ဓာယတနံ, ရသာယတနံ, ဖောဋ္ဌဗ္ဗာယတနံ, ဓမ္မာယတနံ။

၁၅၆. တတ္ထ ကတမံ စက္ခာယတနံ? ယံ စက္ခု [စက္ခုံ (သီ. သျာ. က.) ဓ. သ. ၅၉၆-၅၉၉] စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော, ယေန စက္ခုနာ အနိဒဿနေန သပ္ပဋိဃေန ရူပံ သနိဒဿနံ သပ္ပဋိဃံ ပဿိ ဝါ ပဿတိ ဝါ ပဿိဿတိ ဝါ ပဿေ ဝါ, စက္ခုမ္ပေတံ စက္ခာယတနမ္ပေတံ စက္ခုဓါတုပေသာ စက္ခုန္ဒ္ရိယမ္ပေတံ လောကောပေသော ဒွါရာပေသာ သမုဒ္ဒေါပေသော ပဏ္ဍရမ္ပေတံ ခေတ္တမ္ပေတံ ဝတ္ထုမ္ပေတံ နေတ္တမ္ပေတံ နယနမ္ပေတံ ဩရိမံ တီရမ္ပေတံ သုညော ဂါမောပေသော။ ဣဒံ ဝုစ္စတိ ‘‘စက္ခာယတနံ’’ ။

၁၅၇. တတ္ထ ကတမံ သောတာယတနံ? ယံ သောတံ စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော, ယေန သောတေန အနိဒဿနေန သပ္ပဋိဃေန သဒ္ဒံ အနိဒဿနံ သပ္ပဋိဃံ သုဏိ ဝါ သုဏာတိ ဝါ သုဏိဿတိ ဝါ သုဏေ ဝါ, သောတမ္ပေတံ သောတာယတနမ္ပေတံ သောတဓါတုပေသာ သောတိန္ဒ္ရိယမ္ပေတံ လောကောပေသော ဒွါရာပေသာ သမုဒ္ဒေါပေသော ပဏ္ဍရမ္ပေတံ ခေတ္တမ္ပေတံ ဝတ္ထုမ္ပေတံ ဩရိမံ တီရမ္ပေတံ သုညော ဂါမောပေသော။ ဣဒံ ဝုစ္စတိ ‘‘သောတာယတနံ’’။

၁၅၈. တတ္ထ ကတမံ ဃာနာယတနံ? ယံ ဃာနံ စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော, ယေန ဃာနေန အနိဒဿနေန သပ္ပဋိဃေန ဂန္ဓံ အနိဒဿနံ သပ္ပဋိဃံ ဃာယိ ဝါ ဃာယတိ ဝါ ဃာယိဿတိ ဝါ ဃာယေ ဝါ, ဃာနမ္ပေတံ ဃာနာယတနမ္ပေတံ ဃာနဓါတုပေသာ ဃာနိန္ဒ္ရိယမ္ပေတံ လောကောပေသော ဒွါရာပေသာ သမုဒ္ဒေါပေသော ပဏ္ဍရမ္ပေတံ ခေတ္တမ္ပေတံ ဝတ္ထုမ္ပေတံ ဩရိမံ တီရမ္ပေတံ သုညော ဂါမောပေသော။ ဣဒံ ဝုစ္စတိ ‘‘ဃာနာယတနံ’’။

၁၅၉. တတ္ထ ကတမံ ဇိဝှာယတနံ? ယာ ဇိဝှာ စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော, ယာယ ဇိဝှာယ အနိဒဿနာယ သပ္ပဋိဃာယ ရသံ အနိဒဿနံ သပ္ပဋိဃံ သာယိ ဝါ သာယတိ ဝါ သာယိဿတိ ဝါ သာယေ ဝါ, ဇိဝှာပေသာ ဇိဝှာယတနမ္ပေတံ ဇိဝှာဓါတုပေသာ ဇီဝ္ဟိန္ဒ္ရိယမ္ပေတံ လောကောပေသော ဒွါရာပေသာ သမုဒ္ဒေါပေသော ပဏ္ဍရမ္ပေတံ ခေတ္တမ္ပေတံ ဝတ္ထုမ္ပေတံ ဩရိမံ တီရမ္ပေတံ သုညော ဂါမောပေသော။ ဣဒံ ဝုစ္စတိ ‘‘ဇိဝှာယတနံ’’။

၁၆၀. တတ္ထ ကတမံ ကာယာယတနံ? ယော ကာယော စတုန္နံ မဟာဘူတာနံ ဥပါဒါယ ပသာဒေါ အတ္တဘာဝပရိယာပန္နော အနိဒဿနော သပ္ပဋိဃော, ယေန ကာယေန အနိဒဿနေန သပ္ပဋိဃေန ဖောဋ္ဌဗ္ဗံ အနိဒဿနံ သပ္ပဋိဃံ ဖုသိ ဝါ ဖုသတိ ဝါ ဖုသိဿတိ ဝါ ဖုသေ ဝါ, ကာယောပေသော ကာယာယတနမ္ပေတံ ကာယဓါတုပေသာ ကာယိန္ဒ္ရိယမ္ပေတံ လောကောပေသော ဒွါရာပေသာ သမုဒ္ဒေါပေသော ပဏ္ဍရမ္ပေတံ ခေတ္တမ္ပေတံ ဝတ္ထုမ္ပေတံ ဩရိမံ တီရမ္ပေတံ သုညော ဂါမောပေသော။ ဣဒံ ဝုစ္စတိ ‘‘ကာယာယတနံ’’။

၁၆၁. တတ္ထ ကတမံ မနာယတနံ? ဧကဝိဓေန မနာယတနံ – ဖဿသမ္ပယုတ္တံ။

ဒုဝိဓေန မနာယတနံ – အတ္ထိ သဟေတုကံ, အတ္ထိ အဟေတုကံ။

တိဝိဓေန မနာယတနံ – အတ္ထိ ကုသလံ, အတ္ထိ အကုသလံ, အတ္ထိ အဗျာကတံ။

စတုဗ္ဗိဓေန မနာယတနံ – အတ္ထိ ကာမာဝစရံ, အတ္ထိ ရူပါဝစရံ, အတ္ထိ အရူပါဝစရံ, အတ္ထိ အပရိယာပန္နံ။

ပဉ္စဝိဓေန မနာယတနံ – အတ္ထိ သုခိန္ဒ္ရိယသမ္ပယုတ္တံ, အတ္ထိ ဒုက္ခိန္ဒ္ရိယသမ္ပယုတ္တံ, အတ္ထိ သောမနဿိန္ဒ္ရိယသမ္ပယုတ္တံ, အတ္ထိ ဒေါမနဿိန္ဒ္ရိယသမ္ပယုတ္တံ, အတ္ထိ ဥပေက္ခိန္ဒ္ရိယသမ္ပယုတ္တံ။

ဆဗ္ဗိဓေန မနာယတနံ – စက္ခုဝိညာဏံ, သောတဝိညာဏံ, ဃာနဝိညာဏံ, ဇိဝှာဝိညာဏံ, ကာယဝိညာဏံ, မနောဝိညာဏံ။ ဧဝံ ဆဗ္ဗိဓေန မနာယတနံ။

သတ္တဝိဓေန မနာယတနံ – စက္ခုဝိညာဏံ, သောတဝိညာဏံ, ဃာနဝိညာဏံ, ဇိဝှာဝိညာဏံ, ကာယဝိညာဏံ, မနောဓါတု, မနောဝိညာဏဓါတု။ ဧဝံ သတ္တဝိဓေန မနာယတနံ။

အဋ္ဌဝိဓေန မနာယတနံ – စက္ခုဝိညာဏံ, သောတဝိညာဏံ, ဃာနဝိညာဏံ, ဇိဝှာဝိညာဏံ, ကာယဝိညာဏံ အတ္ထိ သုခသဟဂတံ, အတ္ထိ ဒုက္ခသဟဂတံ, မနောဓါတု, မနောဝိညာဏဓါတု။ ဧဝံ အဋ္ဌဝိဓေန မနာယတနံ။

နဝဝိဓေန မနာယတနံ – စက္ခုဝိညာဏံ, သောတဝိညာဏံ, ဃာနဝိညာဏံ, ဇိဝှာဝိညာဏံ, ကာယဝိညာဏံ, မနောဓါတု, မနောဝိညာဏဓါတု အတ္ထိ ကုသလံ, အတ္ထိ အကုသလံ, အတ္ထိ အဗျာကတံ။ ဧဝံ နဝဝိဓေန မနာယတနံ။

ဒသဝိဓေန မနာယတနံ – စက္ခုဝိညာဏံ, သောတဝိညာဏံ, ဃာနဝိညာဏံ, ဇိဝှာဝိညာဏံ, ကာယဝိညာဏံ အတ္ထိ သုခသဟဂတံ, အတ္ထိ ဒုက္ခသဟဂတံ, မနောဓါတု, မနောဝိညာဏဓါတု အတ္ထိ ကုသလံ, အတ္ထိ အကုသလံ, အတ္ထိ အဗျာကတံ။ ဧဝံ ဒသဝိဓေန မနာယတနံ။

ဧကဝိဓေန မနာယတနံ – ဖဿသမ္ပယုတ္တံ။

ဒုဝိဓေန မနာယတနံ – အတ္ထိ သဟေတုကံ, အတ္ထိ အဟေတုကံ။

တိဝိဓေန မနာယတနံ – အတ္ထိ သုခါယ ဝေဒနာယ သမ္ပယုတ္တံ, အတ္ထိ ဒုက္ခာယ ဝေဒနာယ သမ္ပယုတ္တံ, အတ္ထိ အဒုက္ခမသုခါယ ဝေဒနာယ သမ္ပယုတ္တံ။ပေ.။။ ဧဝံ ဗဟုဝိဓေန မနာယတနံ။ ဣဒံ ဝုစ္စတိ ‘‘မနာယတနံ’’။

၁၆၂. တတ္ထ ကတမံ ရူပါယတနံ? ယံ ရူပံ စတုန္နံ မဟာဘူတာနံ ဥပါဒါယ ဝဏ္ဏနိဘာ သနိဒဿနံ သပ္ပဋိဃံ နီလံ ဣတကံ လောဟိတကံ [ဣတံ လောဟိတံ (သီ.)] ဩဒါတံ ကာဠကံ မဉ္ဇိဋ္ဌကံ [မဉ္ဇေဋ္ဌကံ (သီ. သျာ.)] ဟရိ ဟရိဝဏ္ဏံ အမ္ဗင္ကုရဝဏ္ဏံ ဒီဃံ ရဿံ အဏုံ ထူလံ ဝဋ္ဋံ ပရိမဏ္ဍလံ စတုရဿံ ဆဠံသံ အဋ္ဌံသံ သောဠသံသံ နိန္နံ ထလံ ဆာယာ အာတပေါ အာလောကော အန္ဓကာရော အဗ္ဘာ မဟိကာ ဓူမော ရဇော စန္ဒမဏ္ဍလဿ ဝဏ္ဏနိဘာ သူရိယမဏ္ဍလဿ [သုရိယမဏ္ဍလဿ (သီ. သျာ. ကံ.)] ဝဏ္ဏနိဘာ တာရကရူပါနံ ဝဏ္ဏနိဘာ အာဒါသမဏ္ဍလဿ ဝဏ္ဏနိဘာ မဏိသင်္ခမုတ္တဝေဠုရိယဿ ဝဏ္ဏနိဘာ ဇာတရူပရဇတဿ ဝဏ္ဏနိဘာ, ယံ ဝါ ပနညမ္ပိ အတ္ထိ ရူပံ စတုန္နံ မဟာဘူတာနံ ဥပါဒါယ ဝဏ္ဏနိဘာ သနိဒဿနံ သပ္ပဋိဃံ, ယံ ရူပံ သနိဒဿနံ သပ္ပဋိဃံ စက္ခုနာ အနိဒဿနေန သပ္ပဋိဃေန ပဿိ ဝါ ပဿတိ ဝါ ပဿိဿတိ ဝါ ပဿေ ဝါ, ရူပမ္ပေတံ ရူပါယတနမ္ပေတံ ရူပဓါတုပေသာ။ ဣဒံ ဝုစ္စတိ ‘‘ရူပါယတနံ’’။

၁၆၃. တတ္ထ ကတမံ သဒ္ဒါယတနံ? ယော သဒ္ဒေါ စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော ဘေရိသဒ္ဒေါ မုဒိင်္ဂသဒ္ဒေါ [မုတိင်္ဂသဒ္ဓေါ (သီ.)] သင်္ခသဒ္ဒေါ ပဏဝသဒ္ဒေါ ဂီတသဒ္ဒေါ ဝါဒိတသဒ္ဒေါ သမ္မသဒ္ဒေါ ပါဏိသဒ္ဒေါ သတ္တာနံ နိဂ္ဃောသသဒ္ဒေါ ဓါတူနံ သန္နိဃာတသဒ္ဒေါ ဝါတသဒ္ဒေါ ဥဒကသဒ္ဒေါ မနုဿသဒ္ဒေါ အမနုဿသဒ္ဒေါ, ယော ဝါ ပနညောပိ အတ္ထိ သဒ္ဒေါ စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော, ယံ သဒ္ဒံ အနိဒဿနံ သပ္ပဋိဃံ သောတေန အနိဒဿနေန သပ္ပဋိဃေန သုဏိ ဝါ သုဏာတိ ဝါ သုဏိဿတိ ဝါ သုဏေ ဝါ, သဒ္ဒေါပေသော သဒ္ဒါယတနမ္ပေတံ သဒ္ဒဓါတုပေသာ။ ဣဒံ ဝုစ္စတိ ‘‘သဒ္ဒါယတနံ’’။

၁၆၄. တတ္ထ ကတမံ ဂန္ဓာယတနံ? ယော ဂန္ဓော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော မူလဂန္ဓော သာရဂန္ဓော တစဂန္ဓော ပတ္တဂန္ဓော ပုပ္ဖဂန္ဓော ဖလဂန္ဓော အာမဂန္ဓော ဝိဿဂန္ဓော သုဂန္ဓော ဒုဂ္ဂန္ဓော, ယော ဝါ ပနညောပိ အတ္ထိ ဂန္ဓော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော , ယံ ဂန္ဓံ အနိဒဿနံ သပ္ပဋိဃံ ဃာနေန အနိဒဿနေန သပ္ပဋိဃေန ဃာယိ ဝါ ဃာယတိ ဝါ ဃာယိဿတိ ဝါ ဃာယေ ဝါ, ဂန္ဓောပေသော ဂန္ဓာယတနမ္ပေတံ ဂန္ဓဓါတုပေသာ။ ဣဒံ ဝုစ္စတိ ‘‘ဂန္ဓာယတနံ’’။

၁၆၅. တတ္ထ ကတမံ ရသာယတနံ? ယော ရသော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော မူလရသော ခန္ဓရသော တစရသော ပတ္တရသော ပုပ္ဖရသော ဖလရသော အမ္ဗိလံ မဓုရံ တိတ္တကံ ကဋုကံ လောဏိကံ [လပိလကံ (သီ.), လမ္ပိကံ (က. သီ.)] ခါရိကံ လမ္ဗိကံ ကသာဝေါ သာဒု အသာဒု, ယော ဝါ ပနညောပိ အတ္ထိ ရသော စတုန္နံ မဟာဘူတာနံ ဥပါဒါယ အနိဒဿနော သပ္ပဋိဃော, ယံ ရသံ အနိဒဿနံ သပ္ပဋိဃံ ဇိဝှာယ အနိဒဿနာယ သပ္ပဋိဃာယ သာယိ ဝါ သာယတိ ဝါ သာယိဿတိ ဝါ သာယေ ဝါ, ရသောပေသော ရသာယတနမ္ပေတံ ရသဓါတုပေသာ။ ဣဒံ ဝုစ္စတိ ‘‘ရသာယတနံ’’။

၁၆၆. တတ္ထ ကတမံ ဖောဋ္ဌဗ္ဗာယတနံ? ပထဝီဓါတု တေဇောဓါတု ဝါယောဓါတု ကက္ခဠံ မုဒုကံ သဏှံ ဖရုသံ သုခသမ္ဖဿံ ဒုက္ခသမ္ဖဿံ ဂရုကံ လဟုကံ, ယံ ဖောဋ္ဌဗ္ဗံ အနိဒဿနံ သပ္ပဋိဃံ ကာယေန အနိဒဿနေန သပ္ပဋိဃေန ဖုသိ ဝါ ဖုသတိ ဝါ ဖုသိဿတိ ဝါ ဖုသေ ဝါ, ဖောဋ္ဌဗ္ဗောပေသော ဖောဋ္ဌဗ္ဗာယတနမ္ပေတံ ဖောဋ္ဌဗ္ဗဓါတုပေသာ။ ဣဒံ ဝုစ္စတိ ‘‘ဖောဋ္ဌဗ္ဗာယတနံ’’။

၁၆၇. တတ္ထ ကတမံ ဓမ္မာယတနံ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ယဉ္စ ရူပံ အနိဒဿနအပ္ပဋိဃံ ဓမ္မာယတနပရိယာပန္နံ, အသင်္ခတာ စ ဓါတု။

တတ္ထ ကတမော ဝေဒနာက္ခန္ဓော? ဧကဝိဓေန ဝေဒနာက္ခန္ဓော – ဖဿသမ္ပယုတ္တော။ ဒုဝိဓေန ဝေဒနာက္ခန္ဓော – အတ္ထိ သဟေတုကော, အတ္ထိ အဟေတုကော။ တိဝိဓေန ဝေဒနာက္ခန္ဓော – အတ္ထိ ကုသလော, အတ္ထိ အကုသလော, အတ္ထိ အဗျာကတော။ပေ.။ ဧဝံ ဒသဝိဓေန ဝေဒနာက္ခန္ဓော။ပေ.။ ဧဝံ ဗဟုဝိဓေန ဝေဒနာက္ခန္ဓော။ အယံ ဝုစ္စတိ ‘‘ဝေဒနာက္ခန္ဓော’’။

တတ္ထ ကတမော သညာက္ခန္ဓော? ဧကဝိဓေန သညာက္ခန္ဓော – ဖဿသမ္ပယုတ္တော။ ဒုဝိဓေန သညာက္ခန္ဓော – အတ္ထိ သဟေတုကော, အတ္ထိ အဟေတုကော။ တိဝိဓေန သညာက္ခန္ဓော – အတ္ထိ ကုသလော, အတ္ထိ အကုသလော, အတ္ထိ အဗျာကတော။ပေ.။ ဧဝံ ဒသဝိဓေန သညာက္ခန္ဓော။ပေ.။ ဧဝံ ဗဟုဝိဓေန သညာက္ခန္ဓော။ အယံ ဝုစ္စတိ ‘‘သညာက္ခန္ဓော’’။

တတ္ထ ကတမော သင်္ခါရက္ခန္ဓော? ဧကဝိဓေန သင်္ခါရက္ခန္ဓော – စိတ္တသမ္ပယုတ္တော။ ဒုဝိဓေန သင်္ခါရက္ခန္ဓော – အတ္ထိ ဟေတု, အတ္ထိ န ဟေတု။ တိဝိဓေန သင်္ခါရက္ခန္ဓော – အတ္ထိ ကုသလော, အတ္ထိ အကုသလော, အတ္ထိ အဗျာကတော။ပေ.။ ဧဝံ ဒသဝိဓေန သင်္ခါရက္ခန္ဓော။ပေ.။ ဧဝံ ဗဟုဝိဓေန သင်္ခါရက္ခန္ဓော။ အယံ ဝုစ္စတိ ‘‘သင်္ခါရက္ခန္ဓော’’။

တတ္ထ ကတမံ ရူပံ အနိဒဿနအပ္ပဋိဃံ ဓမ္မာယတနပရိယာပန္နံ? ဣတ္ထိန္ဒ္ရိယံ ပုရိသိန္ဒ္ရိယံ။ပေ.။ ကဗဠီကာရော အာဟာရော။ ဣဒံ ဝုစ္စတိ ရူပံ ‘‘အနိဒဿနအပ္ပဋိဃံ ဓမ္မာယတနပရိယာပန္နံ’’။

တတ္ထ ကတမာ အသင်္ခတာ ဓါတု? ရာဂက္ခယော , ဒေါသက္ခယော, မောဟက္ခယော – အယံ ဝုစ္စတိ ‘‘အသင်္ခတာ ဓါတု’’။

ဣဒံ ဝုစ္စတိ ဓမ္မာယတနံ။

အဘိဓမ္မဘာဇနီယံ။

၃. ပဉှာပုစ္ဆကံ

၁၆၈. ဒွါဒသာယတနာနိ – စက္ခာယတနံ, ရူပါယတနံ, သောတာယတနံ, သဒ္ဒါယတနံ, ဃာနာယတနံ, ဂန္ဓာယတနံ, ဇိဝှာယတနံ, ရသာယတနံ, ကာယာယတနံ, ဖောဋ္ဌဗ္ဗာယတနံ, မနာယတနံ, ဓမ္မာယတနံ။

၁၆၉. ဒွါဒသန္နံ အာယတနာနံ ကတိ ကုသလာ, ကတိ အကုသလာ, ကတိ အဗျာကတာ။ပေ.။ ကတိ သရဏာ, ကတိ အရဏာ?

၁. တိကံ

၁၇၀. ဒသာယတနာ အဗျာကတာ။ ဒွါယတနာ သိယာ ကုသလာ, သိယာ အကုသလာ, သိယာ အဗျာကတာ။ ဒသာယတနာ န ဝတ္တဗ္ဗာ – ‘‘သုခါယ ဝေဒနာယ သမ္ပယုတ္တာ’’တိပိ, ‘‘ဒုက္ခာယ ဝေဒနာယ သမ္ပယုတ္တာ’’တိပိ, ‘‘အဒုက္ခမသုခါယ ဝေဒနာယ သမ္ပယုတ္တာ’’တိပိ။ မနာယတနံ သိယာ သုခါယ ဝေဒနာယ သမ္ပယုတ္တံ, သိယာ ဒုက္ခာယ ဝေဒနာယ သမ္ပယုတ္တံ, သိယာ အဒုက္ခမသုခါယ ဝေဒနာယ သမ္ပယုတ္တံ။ ဓမ္မာယတနံ သိယာ သုခါယ ဝေဒနာယ သမ္ပယုတ္တံ, သိယာ ဒုက္ခာယ ဝေဒနာယ သမ္ပယုတ္တံ, သိယာ အဒုက္ခမသုခါယ ဝေဒနာယ သမ္ပယုတ္တံ, သိယာ န ဝတ္တဗ္ဗံ – ‘‘သုခါယ ဝေဒနာယ သမ္ပယုတ္တ’’န္တိပိ, ‘‘ဒုက္ခာယ ဝေဒနာယ သမ္ပယုတ္တ’’န္တိပိ, ‘‘အဒုက္ခမသုခါယ ဝေဒနာယ သမ္ပယုတ္တ’’န္တိပိ။ ဒသာယတနာ နေဝဝိပါကနဝိပါကဓမ္မဓမ္မာ။ ဒွါယတနာ သိယာ ဝိပါကာ, သိယာ ဝိပါကဓမ္မဓမ္မာ, သိယာ နေဝဝိပါကနဝိပါကဓမ္မဓမ္မာ။

ပဉ္စာယတနာ ဥပါဒိန္နုပါဒါနိယာ။ သဒ္ဒါယတနံ အနုပါဒိန္နုပါဒါနိယံ။ စတ္တာရော အာယတနာ သိယာ ဥပါဒိန္နုပါဒါနိယာ, သိယာ အနုပါဒိန္နုပါဒါနိယာ, သိယာ အနုပါဒါနိယာ။ ဒွါယတနာ သိယာ ဥပါဒိန္နုပါဒါနိယာ, သိယာ အနုပါဒိန္နုပါဒါနိယာ, သိယာ အနုပါဒိန္နအနုပါဒါနိယာ။ ဒသာယတနာ အသံကိလိဋ္ဌသံကိလေသိကာ။ ဒွါယတနာ သိယာ သံကိလိဋ္ဌသံကိလေသိကာ, သိယာ အသံကိလိဋ္ဌသံကိလေသိကာ, သိယာ အသံကိလိဋ္ဌအသံကိလေသိကာ။ ဒသာယတနာ အဝိတက္ကအဝိစာရာ။ မနာယတနံ သိယာ သဝိတက္ကသဝိစာရံ, သိယာ အဝိတက္ကဝိစာရမတ္တံ, သိယာ အဝိတက္ကအဝိစာရံ။ ဓမ္မာယတနံ သိယာ သဝိတက္ကသဝိစာရံ, သိယာ အဝိတက္ကဝိစာရမတ္တံ, သိယာ အဝိတက္ကအဝိစာရံ , သိယာ န ဝတ္တဗ္ဗံ – ‘‘သဝိတက္ကသဝိစာရ’’န္တိပိ, ‘‘အဝိတက္ကဝိစာရမတ္တ’’န္တိပိ, ‘‘အဝိတက္ကအဝိစာရ’’န္တိပိ။ ဒသာယတနာ န ဝတ္တဗ္ဗာ – ‘‘ဣတိသဟဂတာ’’တိပိ, ‘‘သုခသဟဂတာ’’တိပိ, ‘‘ဥပေက္ခာသဟဂတာ’’တိပိ။ ဒွါယတနာ သိယာ ဣတိသဟဂတာ, သိယာ သုခသဟဂတာ, သိယာ ဥပေက္ခာသဟဂတာ, သိယာ န ဝတ္တဗ္ဗာ – ‘‘ဣတိသဟဂတာ’’တိပိ, ‘‘သုခသဟဂတာ’’တိပိ, ‘‘ဥပေက္ခာသဟဂတာ’’တိပိ။

ဒသာယတနာ နေဝ ဒဿနေန န ဘာဝနာယ ပဟာတဗ္ဗာ။ ဒွါယတနာ သိယာ ဒဿနေန ပဟာတဗ္ဗာ, သိယာ ဘာဝနာယ ပဟာတဗ္ဗာ, သိယာ နေဝ ဒဿနေန န ဘာဝနာယ ပဟာတဗ္ဗာ။ ဒသာယတနာ နေဝ ဒဿနေန န ဘာဝနာယ ပဟာတဗ္ဗဟေတုကာ။ ဒွါယတနာ သိယာ ဒဿနေန ပဟာတဗ္ဗဟေတုကာ, သိယာ ဘာဝနာယ ပဟာတဗ္ဗဟေတုကာ, သိယာ နေဝ ဒဿနေန န ဘာဝနာယ ပဟာတဗ္ဗဟေတုကာ။ ဒသာယတနာ နေဝါစယဂါမိနာပစယဂါမိနော။ ဒွါယတနာ သိယာ အာစယဂါမိနော, သိယာ အပစယဂါမိနော, သိယာ နေဝါစယဂါမိနာပစယဂါမိနော။ ဒသာယတနာ နေဝသေက္ခနာသေက္ခာ။ ဒွါယတနာ သိယာ သေက္ခာ, သိယာ အသေက္ခာ , သိယာ နေဝသေက္ခနာသေက္ခာ။ ဒသာယတနာ ပရိတ္တာ။ ဒွါယတနာ သိယာ ပရိတ္တာ, သိယာ မဟဂ္ဂတာ, သိယာ အပ္ပမာဏာ။ ဒသာယတနာ အနာရမ္မဏာ။ ဒွါယတနာ သိယာ ပရိတ္တာရမ္မဏာ, သိယာ မဟဂ္ဂတာရမ္မဏာ, သိယာ အပ္ပမာဏာရမ္မဏာ, သိယာ န ဝတ္တဗ္ဗာ – ‘‘ပရိတ္တာရမ္မဏာ’’တိပိ, ‘‘မဟဂ္ဂတာရမ္မဏာ’’တိပိ, ‘‘အပ္ပမာဏာရမ္မဏာ’’တိပိ။ ဒသာယတနာ မဇ္ဈိမာ။ ဒွါယတနာ သိယာ ဟီနာ, သိယာ မဇ္ဈိမာ, သိယာ ပဏီတာ။ ဒသာယတနာ အနိယတာ။ ဒွါယတနာ သိယာ မိစ္ဆတ္တနိယတာ, သိယာ သမ္မတ္တနိယတာ, သိယာ အနိယတာ။

ဒသာယတနာ အနာရမ္မဏာ။ ဒွါယတနာ သိယာ မဂ္ဂါရမ္မဏာ, သိယာ မဂ္ဂဟေတုကာ, သိယာ မဂ္ဂါဓိပတိနော, သိယာ န ဝတ္တဗ္ဗာ – ‘‘မဂ္ဂါရမ္မဏာ’’တိပိ, ‘‘မဂ္ဂဟေတုကာ’’တိပိ, ‘‘မဂ္ဂါဓိပတိနော’’တိပိ။ ပဉ္စာယတနာ သိယာ ဥပ္ပန္နာ, သိယာ ဥပ္ပါဒိနော, န ဝတ္တဗ္ဗာ – ‘‘အနုပ္ပန္နာ’’တိ။ သဒ္ဒါယတနံ သိယာ ဥပ္ပန္နံ, သိယာ အနုပ္ပန္နံ, န ဝတ္တဗ္ဗံ – ‘‘ဥပ္ပါဒီ’’တိ။ ပဉ္စာယတနာ သိယာ ဥပ္ပန္နာ, သိယာ အနုပ္ပန္နာ, သိယာ ဥပ္ပါဒိနော။ ဓမ္မာယတနံ သိယာ ဥပ္ပန္နံ, သိယာ အနုပ္ပန္နံ, သိယာ ဥပ္ပါဒိ, သိယာ န ဝတ္တဗ္ဗံ – ‘‘ဥပ္ပန္န’’န္တိပိ, ‘‘အနုပ္ပန္န’’န္တိပိ, ‘‘ဥပ္ပါဒီ’’တိပိ။ ဧကာဒသာယတနာ သိယာ အတီတာ, သိယာ အနာဂတာ, သိယာ ပစ္စုပ္ပန္နာ။ ဓမ္မာယတနံ သိယာ အတီတံ, သိယာ အနာဂတံ, သိယာ ပစ္စုပ္ပန္နံ, သိယာ န ဝတ္တဗ္ဗံ – ‘‘အတီတ’’န္တိပိ, ‘‘အနာဂတ’’န္တိပိ, ‘‘ပစ္စုပ္ပန္န’’န္တိပိ။ ဒသာယတနာ အနာရမ္မဏာ။ ဒွါယတနာ သိယာ အတီတာရမ္မဏာ, သိယာ အနာဂတာရမ္မဏာ , သိယာ ပစ္စုပ္ပန္နာရမ္မဏာ, သိယာ န ဝတ္တဗ္ဗာ – ‘‘အတီတာရမ္မဏာ’’တိပိ, ‘‘အနာဂတာရမ္မဏာ’’တိပိ, ‘‘ပစ္စုပ္ပန္နာရမ္မဏာ’’တိပိ; သိယာ အဇ္ဈတ္တာ, သိယာ ဗဟိဒ္ဓါ, သိယာ အဇ္ဈတ္တဗဟိဒ္ဓါ။ ဒသာယတနာ အနာရမ္မဏာ။ ဒွါယတနာ သိယာ အဇ္ဈတ္တာရမ္မဏာ, သိယာ ဗဟိဒ္ဓါရမ္မဏာ, သိယာ အဇ္ဈတ္တဗဟိဒ္ဓါရမ္မဏာ, သိယာ န ဝတ္တဗ္ဗာ – ‘‘အဇ္ဈတ္တာရမ္မဏာ’’တိပိ, ‘‘ဗဟိဒ္ဓါရမ္မဏာ’’တိပိ, ‘‘အဇ္ဈတ္တဗဟိဒ္ဓါရမ္မဏာ’’တိပိ။ ရူပါယတနံ သနိဒဿနသပ္ပဋိဃံ။ နဝါယတနာ အနိဒဿနသပ္ပဋိဃာ။ ဒွါယတနာ အနိဒဿနအပ္ပဋိဃာ။

၂. ဒုကံ

၁၇၁. ဧကာဒသာယတနာ န ဟေတူ။ ဓမ္မာယတနံ သိယာ ဟေတု, သိယာ န ဟေတု။ ဒသာယတနာ အဟေတုကာ။ ဒွါယတနာ သိယာ သဟေတုကာ, သိယာ အဟေတုကာ။ ဒသာယတနာ ဟေတုဝိပ္ပယုတ္တာ။ ဒွါယတနာ သိယာ ဟေတုသမ္ပယုတ္တာ, သိယာ ဟေတုဝိပ္ပယုတ္တာ။ ဒသာယတနာ န ဝတ္တဗ္ဗာ – ‘‘ဟေတူ စေဝ သဟေတုကာ စာ’’တိပိ, ‘‘သဟေတုကာ စေဝ န စ ဟေတူ’’တိပိ။ မနာယတနံ န ဝတ္တဗ္ဗံ – ‘‘ဟေတု စေဝ သဟေတုကဉ္စာ’’တိ, သိယာ သဟေတုကဉ္စေဝ န စ ဟေတု, သိယာ န ဝတ္တဗ္ဗံ – ‘‘သဟေတုကဉ္စေဝ န စ ဟေတူ’’တိ။ ဓမ္မာယတနံ သိယာ ဟေတု စေဝ သဟေတုကဉ္စ, သိယာ သဟေတုကဉ္စေဝ န စ ဟေတု, သိယာ န ဝတ္တဗ္ဗံ – ‘‘ဟေတု စေဝ သဟေတုကဉ္စာ’’တိပိ, ‘‘သဟေတုကဉ္စေဝ န စ ဟေတူ’’တိပိ။ ဒသာယတနာ န ဝတ္တဗ္ဗာ – ‘‘ဟေတူ စေဝ ဟေတုသမ္ပယုတ္တာ စာ’’တိပိ, ‘‘ဟေတုသမ္ပယုတ္တာ စေဝ န စ ဟေတူ’’တိပိ။ မနာယတနံ န ဝတ္တဗ္ဗံ – ‘‘ဟေတု စေဝ ဟေတုသမ္ပယုတ္တဉ္စာ’’တိ, သိယာ ဟေတုသမ္ပယုတ္တဉ္စေဝ န စ ဟေတု, သိယာ န ဝတ္တဗ္ဗံ – ‘‘ဟေတုသမ္ပယုတ္တဉ္စေဝ န စ ဟေတူ’’တိ။ ဓမ္မာယတနံ သိယာ ဟေတု စေဝ ဟေတုသမ္ပယုတ္တဉ္စ, သိယာ ဟေတုသမ္ပယုတ္တဉ္စေဝ န စ ဟေတု, သိယာ န ဝတ္တဗ္ဗံ – ‘‘ဟေတု စေဝ ဟေတုသမ္ပယုတ္တဉ္စာ’’တိပိ, ‘‘ဟေတုသမ္ပယုတ္တဉ္စေဝ န စ ဟေတူ’’တိပိ။ ဒသာယတနာ န ဟေတူအဟေတုကာ။ မနာယတနံ သိယာ န ဟေတုသဟေတုကံ, သိယာ န ဟေတုအဟေတုကံ။ ဓမ္မာယတနံ သိယာ န ဟေတုသဟေတုကံ, သိယာ န ဟေတုအဟေတုကံ, သိယာ န ဝတ္တဗ္ဗံ – ‘‘န ဟေတုသဟေတုက’’န္တိပိ, ‘‘န ဟေတုအဟေတုက’’န္တိပိ။

ဧကာဒသာယတနာ သပ္ပစ္စယာ။ ဓမ္မာယတနံ သိယာ သပ္ပစ္စယံ, သိယာ အပ္ပစ္စယံ။ ဧကာဒသာယတနာ သင်္ခတာ။ ဓမ္မာယတနံ သိယာ သင်္ခတံ, သိယာ အသင်္ခတံ။ ရူပါယတနံ သနိဒဿနံ။ ဧကာဒသာယတနာ အနိဒဿနာ။ ဒသာယတနာ သပ္ပဋိဃာ။ ဒွါယတနာ အပ္ပဋိဃာ။ ဒသာယတနာ ရူပါ။ မနာယတနံ အရူပံ။ ဓမ္မာယတနံ သိယာ ရူပံ, သိယာ အရူပံ။ ဒသာယတနာ လောကိယာ။ ဒွါယတနာ သိယာ လောကိယာ, သိယာ လောကုတ္တရာ; ကေနစိ ဝိညေယျာ, ကေနစိ န ဝိညေယျာ။

ဧကာဒသာယတနာ နော အာသဝါ။ ဓမ္မာယတနံ သိယာ အာသဝေါ, သိယာ နော အာသဝေါ။ ဒသာယတနာ သာသဝါ။ ဒွါယတနာ သိယာ သာသဝါ, သိယာ အနာသဝါ။ ဒသာယတနာ အာသဝဝိပ္ပယုတ္တာ။ ဒွါယတနာ သိယာ အာသဝသမ္ပယုတ္တာ, သိယာ အာသဝဝိပ္ပယုတ္တာ။ ဒသာယတနာ န ဝတ္တဗ္ဗာ – ‘‘အာသဝါ စေဝ သာသဝါ စာ’’တိ, ‘‘သာသဝါ စေဝ နော စ အာသဝါ’’။ မနာယတနံ န ဝတ္တဗ္ဗံ – ‘‘အာသဝေါ စေဝ သာသဝဉ္စာ’’တိ, သိယာ သာသဝဉ္စေဝ နော စ အာသဝေါ, သိယာ န ဝတ္တဗ္ဗံ – ‘‘သာသဝဉ္စေဝ နော စ အာသဝေါ’’တိ။ ဓမ္မာယတနံ သိယာ အာသဝေါ စေဝ သာသဝဉ္စ, သိယာ သာသဝဉ္စေဝ နော စ အာသဝေါ, သိယာ န ဝတ္တဗ္ဗံ – ‘‘အာသဝေါ စေဝ သာသဝဉ္စာ’’တိပိ, ‘‘သာသဝဉ္စေဝ နော စ အာသဝေါ’’တိပိ။ ဒသာယတနာ န ဝတ္တဗ္ဗာ – ‘‘အာသဝါ စေဝ အာသဝသမ္ပယုတ္တာ စာ’’တိပိ, ‘‘အာသဝသမ္ပယုတ္တာ စေဝ နော စ အာသဝါ’’တိပိ။ မနာယတနံ န ဝတ္တဗ္ဗံ – ‘‘အာသဝေါ စေဝ အာသဝသမ္ပယုတ္တဉ္စာ’’တိ, သိယာ အာသဝသမ္ပယုတ္တဉ္စေဝ နော စ အာသဝေါ, သိယာ န ဝတ္တဗ္ဗံ – ‘‘အာသဝသမ္ပယုတ္တဉ္စေဝ နော စ အာသဝေါ’’တိ။ ဓမ္မာယတနံ သိယာ အာသဝေါ စေဝ အာသဝသမ္ပယုတ္တဉ္စ, သိယာ အာသဝသမ္ပယုတ္တဉ္စေဝ နော စ အာသဝေါ, သိယာ န ဝတ္တဗ္ဗံ – ‘‘အာသဝေါ စေဝ အာသဝသမ္ပယုတ္တဉ္စာ’’တိပိ, ‘‘အာသဝသမ္ပယုတ္တဉ္စေဝ နော စ အာသဝေါ’’တိပိ။ ဒသာယတနာ အာသဝဝိပ္ပယုတ္တသာသဝါ။ ဒွါယတနာ သိယာ အာသဝဝိပ္ပယုတ္တသာသဝါ, သိယာ အာသဝဝိပ္ပယုတ္တအနာသဝါ, သိယာ န ဝတ္တဗ္ဗာ – ‘‘အာသဝဝိပ္ပယုတ္တသာသဝါ’’တိပိ, ‘‘အာသဝဝိပ္ပယုတ္တအနာသဝါ’’တိပိ။

ဧကာဒသာယတနာ နော သံယောဇနာ။ ဓမ္မာယတနံ သိယာ သံယောဇနံ, သိယာ နော သံယောဇနံ။ ဒသာယတနာ သံယောဇနိယာ။ ဒွါယတနာ သိယာ သံယောဇနိယာ, သိယာ အသံယောဇနိယာ။ ဒသာယတနာ သံယောဇနဝိပ္ပယုတ္တာ။ ဒွါယတနာ သိယာ သံယောဇနသမ္ပယုတ္တာ, သိယာ သံယောဇနဝိပ္ပယုတ္တာ။ ဒသာယတနာ န ဝတ္တဗ္ဗာ – ‘‘သံယောဇနာ စေဝ သံယောဇနိယာ စာ’’တိ, သံယောဇနိယာ စေဝ နော စ သံယောဇနာ။ မနာယတနံ န ဝတ္တဗ္ဗံ – ‘‘သံယောဇနဉ္စေဝ သံယောဇနိယဉ္စာ’’တိ, သိယာ သံယောဇနိယဉ္စေဝ နော စ သံယောဇနံ, သိယာ န ဝတ္တဗ္ဗံ – ‘‘သံယောဇနိယဉ္စေဝ နော စ သံယောဇန’’န္တိ။ ဓမ္မာယတနံ သိယာ သံယောဇနဉ္စေဝ သံယောဇနိယဉ္စ, သိယာ သံယောဇနိယဉ္စေဝ နော စ သံယောဇနံ, သိယာ န ဝတ္တဗ္ဗံ – ‘‘သံယောဇနဉ္စေဝ သံယောဇနိယ’’န္တိပိ, ‘‘သံယောဇနိယဉ္စေဝ နော စ သံယောဇန’’န္တိပိ။ ဒသာယတနာ န ဝတ္တဗ္ဗာ – ‘‘သံယောဇနာ စေဝ သံယောဇနသမ္ပယုတ္တာ စာ’’တိပိ, ‘‘သံယောဇနသမ္ပယုတ္တာ စေဝ နော စ သံယောဇနာ’’တိပိ။ မနာယတနံ န ဝတ္တဗ္ဗံ – ‘‘သံယောဇနဉ္စေဝ သံယောဇနသမ္ပယုတ္တဉ္စာ’’တိ, သိယာ သံယောဇနသမ္ပယုတ္တဉ္စေဝ နော စ သံယောဇနံ, သိယာ န ဝတ္တဗ္ဗံ – ‘‘သံယောဇနသမ္ပယုတ္တဉ္စေဝ နော စ သံယောဇန’’န္တိ။ ဓမ္မာယတနံ သိယာ သံယောဇနဉ္စေဝ သံယောဇနသမ္ပယုတ္တဉ္စ, သိယာ သံယောဇနသမ္ပယုတ္တဉ္စေဝ နော စ သံယောဇနံ, သိယာ န ဝတ္တဗ္ဗံ – ‘‘သံယောဇနဉ္စေဝ သံယောဇနသမ္ပယုတ္တဉ္စာ’’တိပိ, ‘‘သံယောဇနသမ္ပယုတ္တဉ္စေဝ နော စ သံယောဇန’’န္တိပိ။ ဒသာယတနာ သံယောဇနဝိပ္ပယုတ္တသံယောဇနိယာ ။ ဒွါယတနာ သိယာ သံယောဇနဝိပ္ပယုတ္တသံယောဇနိယာ, သိယာ သံယောဇနဝိပ္ပယုတ္တအသံယောဇနိယာ, သိယာ န ဝတ္တဗ္ဗာ – ‘‘သံယောဇနဝိပ္ပယုတ္တသံယောဇနိယာ’’တိပိ, ‘‘သံယောဇနဝိပ္ပယုတ္တအသံယောဇနိယာ’’တိပိ။

ဧကာဒသာယတနာ နော ဂန္ထာ။ ဓမ္မာယတနံ သိယာ ဂန္ထော, သိယာ နော ဂန္ထော။ ဒသာယတနာ ဂန္ထနိယာ။ ဒွါယတနာ သိယာ ဂန္ထနိယာ, သိယာ အဂန္ထနိယာ။ ဒသာယတနာ ဂန္ထဝိပ္ပယုတ္တာ။ ဒွါယတနာ သိယာ ဂန္ထသမ္ပယုတ္တာ, သိယာ ဂန္ထဝိပ္ပယုတ္တာ။ ဒသာယတနာ န ဝတ္တဗ္ဗာ – ‘‘ဂန္ထာ စေဝ ဂန္ထနိယာ စာ’’တိ, ဂန္ထနိယာ စေဝ နော စ ဂန္ထာ။ မနာယတနံ န ဝတ္တဗ္ဗံ – ‘‘ဂန္ထော စေဝ ဂန္ထနိယဉ္စာ’’တိ, သိယာ ဂန္ထနိယဉ္စေဝ နော စ ဂန္ထော, သိယာ န ဝတ္တဗ္ဗံ – ‘‘ဂန္ထနိယဉ္စေဝ နော စ ဂန္ထော’’တိ။ ဓမ္မာယတနံ သိယာ ဂန္ထော စေဝ ဂန္ထနိယဉ္စ, သိယာ ဂန္ထနိယဉ္စေဝ နော စ ဂန္ထော, သိယာ န ဝတ္တဗ္ဗံ – ‘‘ဂန္ထော စေဝ ဂန္ထနိယဉ္စာ’’တိပိ, ‘‘ဂန္ထနိယဉ္စေဝ နော စ ဂန္ထော’’တိပိ။ ဒသာယတနာ န ဝတ္တဗ္ဗာ – ‘‘ဂန္ထာ စေဝ ဂန္ထသမ္ပယုတ္တာ စာ’’တိပိ, ‘‘ဂန္ထသမ္ပယုတ္တာ စေဝ နော စ ဂန္ထာ’’တိပိ။ မနာယတနံ န ဝတ္တဗ္ဗံ – ‘‘ဂန္ထော စေဝ ဂန္ထသမ္ပယုတ္တဉ္စာ’’တိ, သိယာ ဂန္ထသမ္ပယုတ္တဉ္စေဝ နော စ ဂန္ထော, သိယာ န ဝတ္တဗ္ဗံ – ‘‘ဂန္ထသမ္ပယုတ္တဉ္စေဝ နော စ ဂန္ထော’’တိ။ ဓမ္မာယတနံ သိယာ ဂန္ထော စေဝ ဂန္ထသမ္ပယုတ္တဉ္စ, သိယာ ဂန္ထသမ္ပယုတ္တဉ္စေဝ နော စ ဂန္ထော, သိယာ န ဝတ္တဗ္ဗံ – ‘‘ဂန္ထော စေဝ ဂန္ထသမ္ပယုတ္တဉ္စာ’’တိပိ, ‘‘ဂန္ထသမ္ပယုတ္တဉ္စေဝ နော စ ဂန္ထော’’တိပိ။ ဒသာယတနာ ဂန္ထဝိပ္ပယုတ္တဂန္ထနိယာ။ ဒွါယတနာ သိယာ ဂန္ထဝိပ္ပယုတ္တဂန္ထနိယာ, သိယာ ဂန္ထဝိပ္ပယုတ္တအဂန္ထနိယာ, သိယာ န ဝတ္တဗ္ဗာ – ‘‘ဂန္ထဝိပ္ပယုတ္တဂန္ထနိယာ’’တိပိ, ‘‘ဂန္ထဝိပ္ပယုတ္တအဂန္ထနိယာ’’တိပိ။

ဧကာဒသာယတနာ နော ဩဃာ။ပေ.။ နော ယောဂါ။ပေ.။ နော နီဝရဏာ။ ဓမ္မာယတနံ သိယာ နီဝရဏံ, သိယာ နော နီဝရဏံ။ ဒသာယတနာ နီဝရဏိယာ။ ဒွါယတနာ သိယာ နီဝရဏိယာ, သိယာ အနီဝရဏိယာ။ ဒသာယတနာ နီဝရဏဝိပ္ပယုတ္တာ။ ဒွါယတနာ သိယာ နီဝရဏသမ္ပယုတ္တာ, သိယာ နီဝရဏဝိပ္ပယုတ္တာ။ ဒသာယတနာ န ဝတ္တဗ္ဗာ – ‘‘နီဝရဏာ စေဝ နီဝရဏိယာ စာ’’တိ, နီဝရဏိယာ စေဝ နော စ နီဝရဏာ။ မနာယတနံ န ဝတ္တဗ္ဗံ – ‘‘နီဝရဏဉ္စေဝ နီဝရဏိယဉ္စာ’’တိ , သိယာ နီဝရဏိယဉ္စေဝ နော စ နီဝရဏံ, သိယာ န ဝတ္တဗ္ဗံ – ‘‘နီဝရဏိယဉ္စေဝ နော စ နီဝရဏ’’န္တိ။ ဓမ္မာယတနံ သိယာ နီဝရဏဉ္စေဝ နီဝရဏိယဉ္စ, သိယာ နီဝရဏိယဉ္စေဝ နော စ နီဝရဏံ, သိယာ န ဝတ္တဗ္ဗံ – ‘‘နီဝရဏဉ္စေဝ နီဝရဏိယဉ္စာ’’တိပိ, ‘‘နီဝရဏိယဉ္စေဝ နော စ နီဝရဏ’’န္တိပိ။ ဒသာယတနာ န ဝတ္တဗ္ဗာ – ‘‘နီဝရဏာ စေဝ နီဝရဏသမ္ပယုတ္တာ စာ’’တိပိ, ‘‘နီဝရဏသမ္ပယုတ္တာ စေဝ နော စ နီဝရဏာ’’တိပိ။ မနာယတနံ န ဝတ္တဗ္ဗံ – ‘‘နီဝရဏဉ္စေဝ နီဝရဏသမ္ပယုတ္တဉ္စာ’’တိ, သိယာ နီဝရဏသမ္ပယုတ္တဉ္စေဝ နော စ နီဝရဏံ, သိယာ န ဝတ္တဗ္ဗံ – ‘‘နီဝရဏသမ္ပယုတ္တဉ္စေဝ နော စ နီဝရဏ’’န္တိ။ ဓမ္မာယတနံ သိယာ နီဝရဏဉ္စေဝ နီဝရဏသမ္ပယုတ္တဉ္စ, သိယာ နီဝရဏသမ္ပယုတ္တဉ္စေဝ နော စ နီဝရဏံ, သိယာ န ဝတ္တဗ္ဗံ – ‘‘နီဝရဏဉ္စေဝ နီဝရဏသမ္ပယုတ္တဉ္စာ’’တိပိ, ‘‘နီဝရဏသမ္ပယုတ္တဉ္စေဝ နော စ နီဝရဏ’’န္တိပိ။ ဒသာယတနာ နီဝရဏဝိပ္ပယုတ္တနီဝရဏိယာ။ ဒွါယတနာ သိယာ နီဝရဏဝိပ္ပယုတ္တနီဝရဏိယာ, သိယာ နီဝရဏဝိပ္ပယုတ္တအနီဝရဏိယာ, သိယာ န ဝတ္တဗ္ဗာ – ‘‘နီဝရဏဝိပ္ပယုတ္တနီဝရဏိယာ’’တိပိ, ‘‘နီဝရဏဝိပ္ပယုတ္တအနီဝရဏိယာ’’တိပိ။

ဧကာဒသာယတနာ နော ပရာမာသာ။ ဓမ္မာယတနံ သိယာ ပရာမာသော, သိယာ နော ပရာမာသော။ ဒသာယတနာ ပရာမဋ္ဌာ။ ဒွါယတနာ သိယာ ပရာမဋ္ဌာ, သိယာ အပရာမဋ္ဌာ။ ဒသာယတနာ ပရာမာသဝိပ္ပယုတ္တာ။ မနာယတနံ သိယာ ပရာမာသသမ္ပယုတ္တံ, သိယာ ပရာမာသဝိပ္ပယုတ္တံ။ ဓမ္မာယတနံ သိယာ ပရာမာသသမ္ပယုတ္တံ, သိယာ ပရာမာသဝိပ္ပယုတ္တံ, သိယာ န ဝတ္တဗ္ဗံ – ‘‘ပရာမာသသမ္ပယုတ္တ’’န္တိပိ, ‘‘ပရာမာသဝိပ္ပယုတ္တ’’န္တိပိ။ ဒသာယတနာ န ဝတ္တဗ္ဗာ – ‘‘ပရာမာသာ စေဝ ပရာမဋ္ဌာ စာ’’တိ, ‘‘ပရာမဋ္ဌာ စေဝ နော စ ပရာမာသာ’’။ မနာယတနံ န ဝတ္တဗ္ဗံ – ‘‘ပရာမာသော စေဝ ပရာမဋ္ဌဉ္စာ’’တိ, သိယာ ပရာမဋ္ဌဉ္စေဝ နော စ ပရာမာသော, သိယာ န ဝတ္တဗ္ဗံ – ‘‘ပရာမဋ္ဌဉ္စေဝ နော စ ပရာမာသော’’တိ။ ဓမ္မာယတနံ သိယာ ပရာမာသော စေဝ ပရာမဋ္ဌဉ္စ, သိယာ ပရာမဋ္ဌဉ္စေဝ နော စ ပရာမာသော, သိယာ န ဝတ္တဗ္ဗံ – ‘‘ပရာမာသော စေဝ ပရာမဋ္ဌဉ္စာ’’တိပိ, ‘‘ပရာမဋ္ဌဉ္စေဝ နော စ ပရာမာသော’’တိပိ။ ဒသာယတနာ ပရာမာသဝိပ္ပယုတ္တပရာမဋ္ဌာ။ ဒွါယတနာ သိယာ ပရာမာသဝိပ္ပယုတ္တပရာမဋ္ဌာ , သိယာ ပရာမာသဝိပ္ပယုတ္တအပရာမဋ္ဌာ, သိယာ န ဝတ္တဗ္ဗာ – ‘‘ပရာမာသဝိပ္ပယုတ္တပရာမဋ္ဌာ’’တိပိ , ‘‘ပရာမာသဝိပ္ပယုတ္တအပရာမဋ္ဌာ’’တိပိ။

ဒသာယတနာ အနာရမ္မဏာ။ မနာယတနံ သာရမ္မဏံ။ ဓမ္မာယတနံ သိယာ သာရမ္မဏံ, သိယာ အနာရမ္မဏံ။ မနာယတနံ စိတ္တံ။ ဧကာဒသာယတနာ နော စိတ္တာ။ ဧကာဒသာယတနာ အစေတသိကာ။ ဓမ္မာယတနံ သိယာ စေတသိကံ, သိယာ အစေတသိကံ။ ဒသာယတနာ စိတ္တဝိပ္ပယုတ္တာ။ ဓမ္မာယတနံ သိယာ စိတ္တသမ္ပယုတ္တံ, သိယာ စိတ္တဝိပ္ပယုတ္တံ။ မနာယတနံ န ဝတ္တဗ္ဗံ – ‘‘စိတ္တေန သမ္ပယုတ္တ’’န္တိပိ , ‘‘စိတ္တေန ဝိပ္ပယုတ္တ’’န္တိပိ။ ဒသာယတနာ စိတ္တဝိသံသဋ္ဌာ။ ဓမ္မာယတနံ သိယာ စိတ္တသံသဋ္ဌံ, သိယာ စိတ္တဝိသံသဋ္ဌံ။ မနာယတနံ န ဝတ္တဗ္ဗံ – ‘‘စိတ္တေန သံသဋ္ဌ’’န္တိပိ, ‘‘စိတ္တေန ဝိသံသဋ္ဌ’’န္တိပိ။ ဆာယတနာ နော စိတ္တသမုဋ္ဌာနာ။ ဆာယတနာ သိယာ စိတ္တသမုဋ္ဌာနာ, သိယာ နော စိတ္တသမုဋ္ဌာနာ။ ဧကာဒသာယတနာ နော စိတ္တသဟဘုနော။ ဓမ္မာယတနံ သိယာ စိတ္တသဟဘူ , သိယာ နော စိတ္တသဟဘူ။ ဧကာဒသာယတနာ နော စိတ္တာနုပရိဝတ္တိနော။ ဓမ္မာယတနံ သိယာ စိတ္တာနုပရိဝတ္တိ, သိယာ နော စိတ္တာနုပရိဝတ္တိ။ ဧကာဒသာယတနာ နော စိတ္တသံသဋ္ဌသမုဋ္ဌာနာ။ ဓမ္မာယတနံ သိယာ စိတ္တသံသဋ္ဌသမုဋ္ဌာနံ, သိယာ နော စိတ္တသံသဋ္ဌသမုဋ္ဌာနံ။ ဧကာဒသာယတနာ နော စိတ္တသံသဋ္ဌသမုဋ္ဌာနသဟဘုနော။ ဓမ္မာယတနံ သိယာ စိတ္တသံသဋ္ဌသမုဋ္ဌာနသဟဘူ, သိယာ နော စိတ္တသံသဋ္ဌသမုဋ္ဌာနသဟဘူ။ ဧကာဒသာယတနာ နော စိတ္တသံသဋ္ဌသမုဋ္ဌာနာနုပရိဝတ္တိနော။ ဓမ္မာယတနံ သိယာ စိတ္တသံသဋ္ဌသမုဋ္ဌာနာနုပရိဝတ္တိ, သိယာ နော စိတ္တသံသဋ္ဌသမုဋ္ဌာနာနုပရိဝတ္တိ။

ဆာယတနာ အဇ္ဈတ္တိကာ။ ဆာယတနာ ဗာဟိရာ။ နဝါယတနာ ဥပါဒါ။ ဒွါယတနာ နော ဥပါဒါ။ ဓမ္မာယတနံ သိယာ ဥပါဒါ, သိယာ နော ဥပါဒါ။ ပဉ္စာယတနာ ဥပါဒိန္နာ။ သဒ္ဒါယတနံ အနုပါဒိန္နံ။ ဆာယတနာ သိယာ ဥပါဒိန္နာ, သိယာ အနုပါဒိန္နာ။ ဧကာဒသာယတနာ နော ဥပါဒါနာ။ ဓမ္မာယတနံ သိယာ ဥပါဒါနံ, သိယာ နော ဥပါဒါနံ။ ဒသာယတနာ ဥပါဒါနိယာ။ ဒွါယတနာ သိယာ ဥပါဒါနိယာ, သိယာ အနုပါဒါနိယာ။ ဒသာယတနာ ဥပါဒါနဝိပ္ပယုတ္တာ။ ဒွါယတနာ သိယာ ဥပါဒါနသမ္ပယုတ္တာ, သိယာ ဥပါဒါနဝိပ္ပယုတ္တာ။ ဒသာယတနာ န ဝတ္တဗ္ဗာ – ‘‘ဥပါဒါနာ စေဝ ဥပါဒါနိယာ စာ’’တိ, ဥပါဒါနိယာ စေဝ နော စ ဥပါဒါနာ။ မနာယတနံ န ဝတ္တဗ္ဗံ – ‘‘ဥပါဒါနဉ္စေဝ ဥပါဒါနိယဉ္စာ’’တိ, သိယာ ဥပါဒါနိယဉ္စေဝ နော စ ဥပါဒါနံ, သိယာ န ဝတ္တဗ္ဗံ – ‘‘ဥပါဒါနိယဉ္စေဝ နော စ ဥပါဒါန’’န္တိ။ ဓမ္မာယတနံ သိယာ ဥပါဒါနဉ္စေဝ ဥပါဒါနိယဉ္စ, သိယာ ဥပါဒါနိယဉ္စေဝ နော စ ဥပါဒါနံ, သိယာ န ဝတ္တဗ္ဗံ – ‘‘ဥပါဒါနဉ္စေဝ ဥပါဒါနိယဉ္စာ’’တိပိ, ‘‘ဥပါဒါနိယဉ္စေဝ နော စ ဥပါဒါန’’န္တိပိ။ ဒသာယတနာ န ဝတ္တဗ္ဗာ – ‘‘ဥပါဒါနာ စေဝ ဥပါဒါနသမ္ပယုတ္တာ စာ’’တိပိ, ‘‘ဥပါဒါနသမ္ပယုတ္တာ စေဝ နော စ ဥပါဒါနာ’’တိပိ။ မနာယတနံ န ဝတ္တဗ္ဗံ – ‘‘ဥပါဒါနိယဉ္စေဝ ဥပါဒါနသမ္ပယုတ္တဉ္စာ’’တိ, သိယာ ဥပါဒါနသမ္ပယုတ္တဉ္စေဝ နော စ ဥပါဒါနံ, သိယာ န ဝတ္တဗ္ဗံ – ‘‘ဥပါဒါနသမ္ပယုတ္တဉ္စေဝ နော စ ဥပါဒါန’’န္တိ။ ဓမ္မာယတနံ သိယာ ဥပါဒါနဉ္စေဝ ဥပါဒါနသမ္ပယုတ္တဉ္စ, သိယာ ဥပါဒါနသမ္ပယုတ္တဉ္စေဝ နော စ ဥပါဒါနံ , သိယာ န ဝတ္တဗ္ဗံ – ‘‘ဥပါဒါနဉ္စေဝ ဥပါဒါနသမ္ပယုတ္တဉ္စာ’’တိပိ, ‘‘ဥပါဒါနသမ္ပယုတ္တဉ္စေဝ နော စ ဥပါဒါန’’န္တိပိ။ ဒသာယတနာ ဥပါဒါနဝိပ္ပယုတ္တဥပါဒါနိယာ။ ဒွါယတနာ သိယာ ဥပါဒါနသမ္ပယုတ္တဥပါဒါနိယာ, သိယာ ဥပါဒါနဝိပ္ပယုတ္တအနုပါဒါနိယာ, သိယာ န ဝတ္တဗ္ဗာ – ‘‘ဥပါဒါနဝိပ္ပယုတ္တဥပါဒါနိယာ’’တိပိ, ‘‘ဥပါဒါနဝိပ္ပယုတ္တအနုပါဒါနိယာ’’တိပိ။

ဧကာဒသာယတနာ နော ကိလေသာ။ ဓမ္မာယတနံ သိယာ ကိလေသော, သိယာ နော ကိလေသော။ ဒသာယတနာ သံကိလေသိကာ။ ဒွါယတနာ သိယာ သံကိလေသိကာ, သိယာ အသံကိလေသိကာ။ ဒသာယတနာ အသံကိလိဋ္ဌာ။ ဒွါယတနာ သိယာ သံကိလိဋ္ဌာ, သိယာ အသံကိလိဋ္ဌာ။ ဒသာယတနာ ကိလေသဝိပ္ပယုတ္တာ။ ဒွါယတနာ သိယာ ကိလေသသမ္ပယုတ္တာ, သိယာ ကိလေသဝိပ္ပယုတ္တာ။ ဒသာယတနာ န ဝတ္တဗ္ဗာ – ‘‘ကိလေသာ စေဝ သံကိလေသိကာ စာ’’တိ, ‘‘သံကိလေသိကာ စေဝ နော စ ကိလေသာ’’။ မနာယတနံ န ဝတ္တဗ္ဗံ – ‘‘ကိလေသော စေဝ သံကိလေသိကဉ္စာ’’တိ, သိယာ သံကိလေသိကဉ္စေဝ နော စ ကိလေသော, သိယာ န ဝတ္တဗ္ဗံ – ‘‘သံကိလေသိကဉ္စေဝ နော စ ကိလေသော’’တိ။ ဓမ္မာယတနံ သိယာ ကိလေသော စေဝ သံကိလေသိကဉ္စ, သိယာ သံကိလေသိကဉ္စေဝ နော စ ကိလေသော, သိယာ န ဝတ္တဗ္ဗံ – ‘‘ကိလေသော စေဝ သံကိလေသိကဉ္စာ’’တိပိ, ‘‘သံကိလေသိကဉ္စေဝ နော စ ကိလေသော’’တိပိ။ ဒသာယတနာ န ဝတ္တဗ္ဗာ – ‘‘ကိလေသာ စေဝ သံကိလိဋ္ဌာ စာ’’တိပိ, ‘‘သံကိလိဋ္ဌာ စေဝ နော စ ကိလေသာ’’တိပိ။ မနာယတနံ န ဝတ္တဗ္ဗံ – ‘‘ကိလေသော စေဝ သံကိလိဋ္ဌဉ္စာ’’တိ, သိယာ သံကိလိဋ္ဌဉ္စေဝ နော စ ကိလေသော, သိယာ န ဝတ္တဗ္ဗံ – ‘‘သံကိလိဋ္ဌဉ္စေဝ နော စ ကိလေသော’’တိ။ ဓမ္မာယတနံ သိယာ ကိလေသော စေဝ သံကိလိဋ္ဌဉ္စ, သိယာ သံကိလိဋ္ဌဉ္စေဝ နော စ ကိလေသော, သိယာ န ဝတ္တဗ္ဗံ – ‘‘ကိလေသော စေဝ သံကိလိဋ္ဌဉ္စာ’’တိပိ, ‘‘သံကိလိဋ္ဌဉ္စေဝ နော စ ကိလေသော’’တိပိ။

ဒသာယတနာ န ဝတ္တဗ္ဗာ – ‘‘ကိလေသာ စေဝ ကိလေသသမ္ပယုတ္တာ စာ’’တိပိ, ‘‘ကိလေသသမ္ပယုတ္တာ စေဝ နော စ န ကိလေသာ’’တိပိ။ မနာယတနံ န ဝတ္တဗ္ဗံ – ‘‘ကိလေသော စေဝ ကိလေသသမ္ပယုတ္တဉ္စာ’’တိ , သိယာ ကိလေသသမ္ပယုတ္တဉ္စေဝ နော စ ကိလေသော, သိယာ န ဝတ္တဗ္ဗံ – ‘‘ကိလေသသမ္ပယုတ္တဉ္စေဝ နော စ ကိလေသော’’တိ။ ဓမ္မာယတနံ သိယာ ကိလေသော စေဝ ကိလေသသမ္ပယုတ္တဉ္စ, သိယာ ကိလေသသမ္ပယုတ္တဉ္စေဝ နော စ ကိလေသော, သိယာ န ဝတ္တဗ္ဗံ – ‘‘ကိလေသော စေဝ ကိလေသသမ္ပယုတ္တဉ္စာ’’တိပိ, ‘‘ကိလေသသမ္ပယုတ္တဉ္စေဝ နော စ ကိလေသော’’တိပိ။ ဒသာယတနာ ကိလေသဝိပ္ပယုတ္တသံကိလေသိကာ။ ဒွါယတနာ သိယာ ကိလေသဝိပ္ပယုတ္တသံကိလေသိကာ, သိယာ ကိလေသဝိပ္ပယုတ္တအသံကိလေသိကာ , သိယာ န ဝတ္တဗ္ဗာ – ‘‘ကိလေသဝိပ္ပယုတ္တသံကိလေသိကာ’’တိပိ, ‘‘ကိလေသဝိပ္ပယုတ္တအသံကိလေသိကာ’’တိပိ ။

ဒသာယတနာ န ဒဿနေန ပဟာတဗ္ဗာ။ ဒွါယတနာ သိယာ ဒဿနေန ပဟာတဗ္ဗာ, သိယာ န ဒဿနေန ပဟာတဗ္ဗာ။ ဒသာယတနာ န ဘာဝနာယ ပဟာတဗ္ဗာ။ ဒွါယတနာ သိယာ ဘာဝနာယ ပဟာတဗ္ဗာ, သိယာ န ဘာဝနာယ ပဟာတဗ္ဗာ။ ဒသာယတနာ န ဒဿနေန ပဟာတဗ္ဗဟေတုကာ။ ဒွါယတနာ သိယာ ဒဿနေန ပဟာတဗ္ဗဟေတုကာ, သိယာ န ဒဿနေန ပဟာတဗ္ဗဟေတုကာ။ ဒသာယတနာ န ဘာဝနာယ ပဟာတဗ္ဗဟေတုကာ။ ဒွါယတနာ သိယာ ဘာဝနာယ ပဟာတဗ္ဗဟေတုကာ, သိယာ န ဘာဝနာယ ပဟာတဗ္ဗဟေတုကာ။ ဒသာယတနာ အဝိတက္ကာ။ ဒွါယတနာ သိယာ သဝိတက္ကာ, သိယာ အဝိတက္ကာ။ ဒသာယတနာ အဝိစာရာ။ ဒွါယတနာ သိယာ သဝိစာရာ, သိယာ အဝိစာရာ။ ဒသာယတနာ အပ္ပီတိကာ။ ဒွါယတနာ သိယာ သပ္ပီတိကာ, သိယာ အပ္ပီတိကာ။ ဒသာယတနာ န ဣတိသဟဂတာ။ ဒွါယတနာ သိယာ ဣတိသဟဂတာ, သိယာ န ဣတိသဟဂတာ။ ဒသာယတနာ န သုခသဟဂတာ။ ဒွါယတနာ သိယာ သုခသဟဂတာ, သိယာ န သုခသဟဂတာ။ ဒသာယတနာ န ဥပေက္ခာသဟဂတာ။ ဒွါယတနာ သိယာ ဥပေက္ခာသဟဂတာ, သိယာ န ဥပေက္ခာသဟဂတာ။

ဒသာယတနာ ကာမာဝစရာ။ ဒွါယတနာ သိယာ ကာမာဝစရာ, သိယာ န ကာမာဝစရာ။ ဒသာယတနာ န ရူပါဝစရာ။ ဒွါယတနာ သိယာ ရူပါဝစရာ, သိယာ န ရူပါဝစရာ။ ဒသာယတနာ န အရူပါဝစရာ။ ဒွါယတနာ သိယာ အရူပါဝစရာ, သိယာ န အရူပါဝစရာ။ ဒသာယတနာ ပရိယာပန္နာ။ ဒွါယတနာ သိယာ ပရိယာပန္နာ, သိယာ အပရိယာပန္နာ။ ဒသာယတနာ အနိယျာနိကာ။ ဒွါယတနာ သိယာ နိယျာနိကာ , သိယာ အနိယျာနိကာ။ ဒသာယတနာ အနိယတာ။ ဒွါယတနာ သိယာ နိယတာ, သိယာ အနိယတာ။ ဒသာယတနာ သဥတ္တရာ။ ဒွါယတနာ သိယာ သဥတ္တရာ, သိယာ အနုတ္တရာ။ ဒသာယတနာ အရဏာ။ ဒွါယတနာ သိယာ သရဏာ, သိယာ အရဏာတိ။

ပဉှာပုစ္ဆကံ။

အာယတနဝိဘင်္ဂေါ နိဋ္ဌိတော။