၄. အဋ္ဌကထာကဏ္ဍ
တိကအတ္ထုဒ္ဓါရ
၁၃၈၄. ကတမေ ဓမ္မာ ကုသလာ? စတူသု ဘူမီသု ကုသလံ – ဣမေ ဓမ္မာ ကုသလာ။
၁၃၈၅. ကတမေ ဓမ္မာ အကုသလာ? ဒွါဒသ အကုသလစိတ္တုပ္ပါဒါ – ဣမေ ဓမ္မာ အကုသလာ။
၁၃၈၆. ကတမေ ဓမ္မာ အဗျာကတာ? စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ အဗျာကတာ။
၁၃၈၇. ကတမေ ဓမ္မာ သုခါယ ဝေဒနာယ သမ္ပယုတ္တာ? ကာမာဝစရကုသလတော စတ္တာရော သောမနဿသဟဂတစိတ္တုပ္ပါဒါ, အကုသလတော စတ္တာရော ကာမာဝစရကုသလဿ ဝိပါကတော စ ကိရိယတော စ ပဉ္စ, ရူပါဝစရတိကစတုက္ကဇ္ဈာနာ ကုသလတော စ ဝိပါကတော စ ကိရိယတော စ, လောကုတ္တရတိကစတုက္ကဇ္ဈာနာ ကုသလတော စ ဝိပါကတော စ, ဧတ္ထုပ္ပန္နံ သုခံ ဝေဒနံ ဌပေတွာ – ဣမေ ဓမ္မာ သုခါယ ဝေဒနာယ သမ္ပယုတ္တာ။
၁၃၈၈. ကတမေ ဓမ္မာ ဒုက္ခာယ ဝေဒနာယ သမ္ပယုတ္တာ? ဒွေ ဒေါမနဿသဟဂတစိတ္တုပ္ပါဒါ, ဒုက္ခသဟဂတံ ကာယဝိညာဏံ, ဧတ္ထုပ္ပန္နံ ဒုက္ခံ ဝေဒနံ ဌပေတွာ – ဣမေ ဓမ္မာ ဒုက္ခာယ ဝေဒနာယ သမ္ပယုတ္တာ။
၁၃၈၉. ကတမေ ဓမ္မာ အဒုက္ခမသုခါယ ဝေဒနာယ သမ္ပယုတ္တာ? ကာမာဝစရကုသလတော စတ္တာရော ဥပေက္ခာသဟဂတစိတ္တုပ္ပါဒါ, အကုသလတော ဆ, ကာမာဝစရကုသလဿ ဝိပါကတော ဒသ, အကုသလဿ ဝိပါကတော ဆ, ကိရိယတော ဆ, ရူပါဝစရံ စတုတ္ထံ ဈာနံ ကုသလတော စ ဝိပါကတော စ ကိရိယတော စ, စတ္တာရော အရူပါဝစရာ ကုသလတော စ ဝိပါကတော စ ကိရိယတော စ, လောကုတ္တရံ စတုတ္ထံ ဈာနံ ကုသလတော စ ဝိပါကတော စ, ဧတ္ထုပ္ပန္နံ အဒုက္ခမသုခံ ဝေဒနံ ဌပေတွာ – ဣမေ ဓမ္မာ အဒုက္ခမသုခါယ ဝေဒနာယ သမ္ပယုတ္တာ။ တိဿော စ ဝေဒနာ, ရူပဉ္စ, နိဗ္ဗာနဉ္စ – ဣမေ ဓမ္မာ န ဝတ္တဗ္ဗာ သုခါယ ဝေဒနာယ သမ္ပယုတ္တာတိပိ, ဒုက္ခာယ ဝေဒနာယ သမ္ပယုတ္တာတိပိ, ယ ဝေဒနာယ သမ္ပယုတ္တာတိပိ။
၁၃၉၀. ကတမေ ဓမ္မာ ဝိပါကာ? စတူသု ဘူမီသု ဝိပါကော – ဣမေ ဓမ္မာ ဝိပါကာ။
၁၃၉၁. ကတမေ ဓမ္မာ ဝိပါကဓမ္မဓမ္မာ? စတူသု ဘူမီသု ကုသလံ အကုသလံ – ဣမေ ဓမ္မာ ဝိပါကဓမ္မဓမ္မာ။
၁၃၉၂. ကတမေ ဓမ္မာ နေဝဝိပါကနဝိပါကဓမ္မဓမ္မာ? တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ နေဝဝိပါကနဝိပါကဓမ္မဓမ္မာ။
၁၃၉၃. ကတမေ ဓမ္မာ ဥပါဒိဏ္ဏုပါဒါနိယာ? တီသု ဘူမီသု ဝိပါကော, ယဉ္စ ရူပံ ကမ္မဿ ကတတ္တာ – ဣမေ ဓမ္မာ ဥပါဒိဏ္ဏုပါဒါနိယာ။
၁၃၉၄. ကတမေ ဓမ္မာ အနုပါဒိဏ္ဏုပါဒါနိယာ? တီသု ဘူမီသု ကုသလံ, အကုသလံ, တီသု ဘူမီသု ကိရိယာဗျာကတံ , ယဉ္စ ရူပံ န ကမ္မဿ ကတတ္တာ – ဣမေ ဓမ္မာ အနုပါဒိဏ္ဏုပါဒါနိယာ။
၁၃၉၅. ကတမေ ဓမ္မာ အနုပါဒိဏ္ဏအနုပါဒါနိယာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ အနုပါဒိဏ္ဏအနုပါဒါနိယာ။
၁၃၉၆. ကတမေ ဓမ္မာ သံကိလိဋ္ဌသံကိလေသိကာ? ဒွါဒသာကုသလစိတ္တုပ္ပါဒါ – ဣမေ ဓမ္မာ သံကိလိဋ္ဌသံကိလေသိကာ။
၁၃၉၇. ကတမေ ဓမ္မာ အသံကိလိဋ္ဌသံကိလေသိကာ? တီသု ဘူမီသု ကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ အသံကိလိဋ္ဌသံကိလေသိကာ။
၁၃၉၈. ကတမေ ဓမ္မာ အသံကိလိဋ္ဌအသံကိလေသိကာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ အသံကိလိဋ္ဌအသံကိလေသိကာ။
၁၃၉၉. ကတမေ ဓမ္မာ သဝိတက္ကသဝိစာရာ? ကာမာဝစရံ ကုသလံ, အကုသလံ, ကာမာဝစရကုသလဿ ဝိပါကတော ဧကာဒသ စိတ္တုပ္ပါဒါ, အကုသလဿ ဝိပါကတော ဒွေ, ကိရိယတော ဧကာဒသ, ရူပါဝစရံ ပဌမံ ဈာနံ ကုသလတော စ ဝိပါကတော စ ကိရိယတော စ, လောကုတ္တရံ ပဌမံ ဈာနံ ကုသလတော စ ဝိပါကတော စ, ဧတ္ထုပ္ပန္နေ ဝိတက္ကဝိစာရေ ဌပေတွာ – ဣမေ ဓမ္မာ သဝိတက္ကသဝိစာရာ။
၁၄၀၀. ကတမေ ဓမ္မာ အဝိတက္ကဝိစာရမတ္တာ? ရူပါဝစရပဉ္စကနယေ ဒုတိယံ ဈာနံ ကုသလတော စ ဝိပါကတော စ ကိရိယတော စ, လောကုတ္တရပဉ္စကနယေ ဒုတိယံ ဈာနံ ကုသလတော စ ဝိပါကတော စ, ဧတ္ထုပ္ပန္နံ ဝိစာရံ ဌပေတွာ, ဝိတက္ကော စ – ဣမေ ဓမ္မာ အဝိတက္ကဝိစာရမတ္တာ။
၁၄၀၁. ကတမေ ဓမ္မာ အဝိတက္ကအဝိစာရာ? ဒွေပဉ္စဝိညာဏာနိ, ရူပါဝစရတိကတိကဇ္ဈာနာ ကုသလတော စ ဝိပါကတော စ ကိရိယတော စ, စတ္တာရော အာရုပ္ပါ ကုသလတော စ ဝိပါကတော စ ကိရိယတော စ လောကုတ္တရတိကတိကဇ္ဈာနာ ကုသလတော စ ဝိပါကတော စ ပဉ္စကနယေ ဒုတိယေ ဈာနေ [ဒုတိယဇ္ဈာနေ (သီ.)], ဥပ္ပန္နော စ ဝိစာရော ရူပဉ္စ နိဗ္ဗာနဉ္စ – ဣမေ ဓမ္မာ အဝိတက္ကအဝိစာရာ။ ဝိတက္ကသဟဇာတော ဝိစာရော န ဝတ္တဗ္ဗော သဝိတက္ကသဝိစာရောတိပိ, အဝိတက္ကဝိစာရမတ္တောတိပိ, အဝိတက္ကအဝိစာရောတိပိ။
၁၄၀၂. ကတမေ ဓမ္မာ ဣတိသဟဂတာ? ကာမာဝစရကုသလတော စတ္တာရော သောမနဿသဟဂတစိတ္တုပ္ပါဒါ , အကုသလတော စတ္တာရော, ကာမာဝစရကုသလဿ ဝိပါကတော ပဉ္စ, ကိရိယတော ပဉ္စ, ရူပါဝစရဒုကတိကဇ္ဈာနာ ကုသလတော စ ဝိပါကတော စ ကိရိယတော စ, လောကုတ္တရဒုကတိကဇ္ဈာနာ ကုသလတော စ ဝိပါကတော စ, ဧတ္ထုပ္ပန္နံ ဣတိံ ဌပေတွာ – ဣမေ ဓမ္မာ ဣတိသဟဂတာ။
၁၄၀၃. ကတမေ ဓမ္မာ သုခသဟဂတာ? ကာမာဝစရကုသလတော စတ္တာရော သောမနဿသဟဂတစိတ္တုပ္ပါဒါ, အကုသလတော စတ္တာရော, ကာမာဝစရကုသလဿ ဝိပါကတော ဆ, ကိရိယတော ပဉ္စ, ရူပါဝစရတိကစတုက္ကဇ္ဈာနာ ကုသလတော စ ဝိပါကတော စ ကိရိယတော စ, လောကုတ္တရတိကစတုက္ကဇ္ဈာနာ ကုသလတော စ ဝိပါကတော စ, ဧတ္ထုပ္ပန္နံ သုခံ ဌပေတွာ – ဣမေ ဓမ္မာ သုခသဟဂတာ။
၁၄၀၄. ကတမေ ဓမ္မာ ဥပေက္ခာသဟဂတာ? ကာမာဝစရကုသလတော စတ္တာရော ဥပေက္ခာသဟဂတစိတ္တုပ္ပါဒါ, အကုသလတော ဆ, ကာမာဝစရကုသလဿ ဝိပါကတော ဒသ, အကုသလဿ ဝိပါကတော ဆ, ကိရိယတော ဆ, ရူပါဝစရံ စတုတ္ထံ ဈာနံ ကုသလတော စ ဝိပါကတော စ ကိရိယတော စ, စတ္တာရော အာရုပ္ပါ ကုသလတော စ ဝိပါကတော စ ကိရိယတော စ, လောကုတ္တရံ စတုတ္ထံ ဈာနံ ကုသလတော စ ဝိပါကတော စ, ဧတ္ထုပ္ပန္နံ ဥပေက္ခံ ဌပေတွာ – ဣမေ ဓမ္မာ ဥပေက္ခာသဟဂတာ။ ဣတိ န ဣတိသဟဂတာ, သုခသဟဂတာ, န ဥပေက္ခာသဟဂတာ။ သုခံ န သုခသဟဂတံ, သိယာ ဣတိသဟဂတံ, န ဥပေက္ခာသဟဂတံ, သိယာ န ဝတ္တဗ္ဗံ ဣတိသဟဂတန္တိ။ ဒွေ ဒေါမနဿသဟဂတစိတ္တုပ္ပါဒါ, ဒုက္ခသဟဂတကာယဝိညာဏံ, ယာ စ ဝေဒနာ ဥပေက္ခာ , ရူပဉ္စ နိဗ္ဗာနဉ္စ – ဣမေ ဓမ္မာ န ဝတ္တဗ္ဗာ ဣတိသဟဂတာတိပိ, သုခသဟဂတာတိပိ, ဥပေက္ခာသဟဂတာတိပိ။
၁၄၀၅. ကတမေ ဓမ္မာ ဒဿနေန ပဟာတဗ္ဗာ? စတ္တာရော ဒိဋ္ဌိဂတသမ္ပယုတ္တစိတ္တုပ္ပါဒါ, ဝိစိကိစ္ဆာသဟဂတော စိတ္တုပ္ပါဒေါ – ဣမေ ဓမ္မာ ဒဿနေန ပဟာတဗ္ဗာ။
၁၄၀၆. ကတမေ ဓမ္မာ ဘာဝနာယ ပဟာတဗ္ဗာ? ဥဒ္ဓစ္စသဟဂတော စိတ္တုပ္ပါဒေါ – ဣမေ ဓမ္မာ ဘာဝနာယ ပဟာတဗ္ဗာ။ စတ္တာရော ဒိဋ္ဌိဂတဝိပ္ပယုတ္တာ လောဘသဟဂတစိတ္တုပ္ပါဒါ, ဒွေ ဒေါမနဿသဟဂတစိတ္တုပ္ပါဒါ – ဣမေ ဓမ္မာ သိယာ ဒဿနေန ပဟာတဗ္ဗာ သိယာ ဘာဝနာယ ပဟာတဗ္ဗာ။
၁၄၀၇. ကတမေ ဓမ္မာ နေဝ ဒဿနေန န ဘာဝနာယ ပဟာတဗ္ဗာ? စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ နေဝ ဒဿနေန န ဘာဝနာယ ပဟာတဗ္ဗာ။
၁၄၀၈. ကတမေ ဓမ္မာ ဒဿနေန ပဟာတဗ္ဗဟေတုကာ? စတ္တာရော ဒိဋ္ဌိဂတသမ္ပယုတ္တစိတ္တုပ္ပါဒါ, ဝိစိကိစ္ဆာသဟဂတော စိတ္တုပ္ပါဒေါ, ဧတ္ထုပ္ပန္နံ မောဟံ ဌပေတွာ – ဣမေ ဓမ္မာ ဒဿနေန ပဟာတဗ္ဗဟေတုကာ။
၁၄၀၉. ကတမေ ဓမ္မာ ဘာဝနာယ ပဟာတဗ္ဗဟေတုကာ? ဥဒ္ဓစ္စသဟဂတော စိတ္တုပ္ပါဒေါ, ဧတ္ထုပ္ပန္နံ မောဟံ ဌပေတွာ – ဣမေ ဓမ္မာ ဘာဝနာယ ပဟာတဗ္ဗဟေတုကာ။ စတ္တာရော ဒိဋ္ဌိဂတဝိပ္ပယုတ္တာ လောဘသဟဂတစိတ္တုပ္ပါဒါ, ဒွေ ဒေါမနဿသဟဂတစိတ္တုပ္ပါဒါ – ဣမေ ဓမ္မာ သိယာ ဒဿနေန ပဟာတဗ္ဗဟေတုကာ, သိယာ ဘာဝနာယ ပဟာတဗ္ဗဟေတုကာ။
၁၄၁၀. ကတမေ ဓမ္မာ နေဝ ဒဿနေန န ဘာဝနာယ ပဟာတဗ္ဗဟေတုကာ? ဝိစိကိစ္ဆာသဟဂတော မောဟော, ဥဒ္ဓစ္စသဟဂတော မောဟော, စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ နေဝ ဒဿနေန န ဘာဝနာယ ပဟာတဗ္ဗဟေတုကာ။
၁၄၁၁. ကတမေ ဓမ္မာ အာစယဂါမိနော? တီသု ဘူမီသု ကုသလံ, အကုသလံ – ဣမေ ဓမ္မာ အာစယဂါမိနော။
၁၄၁၂. ကတမေ ဓမ္မာ အပစယဂါမိနော? စတ္တာရော မဂ္ဂါ အပရိယာပန္နာ – ဣမေ ဓမ္မာ အပစယဂါမိနော။
၁၄၁၃. ကတမေ ဓမ္မာ နေဝါစယဂါမိနာပစယဂါမိနော? စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ နေဝါစယဂါမိနာပစယဂါမိနော။
၁၄၁၄. ကတမေ ဓမ္မာ သေက္ခာ? စတ္တာရော မဂ္ဂါ အပရိယာပန္နာ, ဟေဋ္ဌိမာနိ စ တီဏိ သာမညဖလာနိ – ဣမေ ဓမ္မာ သေက္ခာ။
၁၄၁၅. ကတမေ ဓမ္မာ အသေက္ခာ? ဥပရိဋ္ဌိမံ အရဟတ္တဖလံ – ဣမေ ဓမ္မာ အသေက္ခာ။
၁၄၁၆. ကတမေ ဓမ္မာ နေဝသေက္ခနာသေက္ခာ? တီသု ဘူမီသု ကုသလံ, အကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ နေဝသေက္ခနာသေက္ခာ။
၁၄၁၇. ကတမေ ဓမ္မာ ပရိတ္တာ? ကာမာဝစရကုသလံ , အကုသလံ, သဗ္ဗော ကာမာဝစရဿ ဝိပါကော, ကာမာဝစရကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ ပရိတ္တာ။
၁၄၁၈. ကတမေ ဓမ္မာ မဟဂ္ဂတာ? ရူပါဝစရာ, အရူပါဝစရာ, ကုသလာဗျာကတာ – ဣမေ ဓမ္မာ မဟဂ္ဂတာ။
၁၄၁၉. ကတမေ ဓမ္မာ အပ္ပမာဏာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ အပ္ပမာဏာ။
၁၄၂၀. ကတမေ ဓမ္မာ ပရိတ္တာရမ္မဏာ? သဗ္ဗော ကာမာဝစရဿ ဝိပါကော, ကိရိယာမနောဓါတု, ကိရိယာဟေတုကမနောဝိညာဏဓါတု သောမနဿသဟဂတာ – ဣမေ ဓမ္မာ ပရိတ္တာရမ္မဏာ။
၁၄၂၁. ကတမေ ဓမ္မာ မဟဂ္ဂတာရမ္မဏာ? ဝိညာဏဉ္စာယတနံ, နေဝသညာနာသညာယတနံ – ဣမေ ဓမ္မာ မဟဂ္ဂတာရမ္မဏာ။
၁၄၂၂. ကတမေ ဓမ္မာ အပ္ပမာဏာရမ္မဏာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ – ဣမေ ဓမ္မာ အပ္ပမာဏာရမ္မဏာ။ ကာမာဝစရကုသလတော စတ္တာရော ဉာဏဝိပ္ပယုတ္တစိတ္တုပ္ပါဒါ, ကိရိယတော စတ္တာရော ဉာဏဝိပ္ပယုတ္တစိတ္တုပ္ပါဒါ, သဗ္ဗံ အကုသလံ – ဣမေ ဓမ္မာ သိယာ ပရိတ္တာရမ္မဏာ, သိယာ မဟဂ္ဂတာရမ္မဏာ, န အပ္ပမာဏာရမ္မဏာ, သိယာ န ဝတ္တဗ္ဗာ ပရိတ္တာရမ္မဏာတိပိ, မဟဂ္ဂတာရမ္မဏာတိပိ။ ကာမာဝစရကုသလတော စတ္တာရော ဉာဏသမ္ပယုတ္တစိတ္တုပ္ပါဒါ, ကိရိယတော စတ္တာရော ဉာဏသမ္ပယုတ္တစိတ္တုပ္ပါဒါ, ရူပါဝစရံ စတုတ္ထံ ဈာနံ ကုသလတော စ ကိရိယတော စ, ကိရိယာဟေတုကမနောဝိညာဏဓါတု ဥပေက္ခာသဟဂတာ – ဣမေ ဓမ္မာ သိယာ ပရိတ္တာရမ္မဏာ, သိယာ မဟဂ္ဂတာရမ္မဏာ, သိယာ အပ္ပမာဏာရမ္မဏာ, သိယာ န ဝတ္တဗ္ဗာ ပရိတ္တာရမ္မဏာတိပိ , မဟဂ္ဂတာရမ္မဏာတိပိ, အပ္ပမာဏာရမ္မဏာတိပိ။ ရူပါဝစရတိကစတုက္ကဇ္ဈာနာ ကုသလတော စ ဝိပါကတော စ ကိရိယတော စ, စတုတ္ထဿ ဈာနဿ ဝိပါကော, အာကာသာနဉ္စာယတနံ , အာကိဉ္စညာယတနံ – ဣမေ ဓမ္မာ န ဝတ္တဗ္ဗာ ပရိတ္တာရမ္မဏာတိပိ, မဟဂ္ဂတာရမ္မဏာတိပိ, အပ္ပမာဏာရမ္မဏာတိပိ။ ရူပဉ္စ နိဗ္ဗာနဉ္စ အနာရမ္မဏာ။
၁၄၂၃. ကတမေ ဓမ္မာ ဟီနာ? ဒွါဒသ အကုသလစိတ္တုပ္ပါဒါ – ဣမေ ဓမ္မာ ဟီနာ။
၁၄၂၄. ကတမေ ဓမ္မာ မဇ္ဈိမာ? တီသု ဘူမီသု ကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ မဇ္ဈိမာ။
၁၄၂၅. ကတမေ ဓမ္မာ ပဏီတာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ ပဏီတာ။
၁၄၂၆. ကတမေ ဓမ္မာ မိစ္ဆတ္တနိယတာ? စတ္တာရော ဒိဋ္ဌိဂတသမ္ပယုတ္တစိတ္တုပ္ပါဒါ, ဒွေ ဒေါမနဿသဟဂတစိတ္တုပ္ပါဒါ – ဣမေ ဓမ္မာ သိယာ မိစ္ဆတ္တနိယတာ, သိယာ အနိယတာ။
၁၄၂၇. ကတမေ ဓမ္မာ သမ္မတ္တနိယတာ? စတ္တာရော မဂ္ဂါ အပရိယာပန္နာ – ဣမေ ဓမ္မာ သမ္မတ္တနိယတာ။
၁၄၂၈. ကတမေ ဓမ္မာ အနိယတာ? စတ္တာရော ဒိဋ္ဌိဂတဝိပ္ပယုတ္တလောဘသဟဂတစိတ္တုပ္ပါဒါ, ဝိစိကိစ္ဆာသဟဂတော စိတ္တုပ္ပါဒေါ, ဥဒ္ဓစ္စသဟဂတော စိတ္တုပ္ပါဒေါ, တီသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ အနိယတာ။
၁၄၂၉. ကတမေ ဓမ္မာ မဂ္ဂါရမ္မဏာ? ကာမာဝစရကုသလတော စတ္တာရော ဉာဏသမ္ပယုတ္တစိတ္တုပ္ပါဒါ, ကိရိယတော စတ္တာရော ဉာဏသမ္ပယုတ္တစိတ္တုပ္ပါဒါ – ဣမေ ဓမ္မာ သိယာ မဂ္ဂါရမ္မဏာ, န မဂ္ဂဟေတုကာ; သိယာ မဂ္ဂါဓိပတိနော, သိယာ န ဝတ္တဗ္ဗာ မဂ္ဂါရမ္မဏာတိပိ, မဂ္ဂါဓိပတိနောတိပိ ။ စတ္တာရော အရိယမဂ္ဂါ န မဂ္ဂါရမ္မဏာ, မဂ္ဂဟေတုကာ; သိယာ မဂ္ဂါဓိပတိနော, သိယာ န ဝတ္တဗ္ဗာ မဂ္ဂါဓိပတိနောတိ။ ရူပါဝစရစတုတ္ထံ ဈာနံ ကုသလတော စ ကိရိယတော စ, ကိရိယာဟေတုကမနောဝိညာဏဓါတု ဥပေက္ခာသဟဂတာ – ဣမေ ဓမ္မာ သိယာ မဂ္ဂါရမ္မဏာ; န မဂ္ဂဟေတုကာ, န မဂ္ဂါဓိပတိနော; သိယာ န ဝတ္တဗ္ဗာ မဂ္ဂါရမ္မဏာတိ။ ကာမာဝစရကုသလတော စတ္တာရော ဉာဏဝိပ္ပယုတ္တစိတ္တုပ္ပါဒါ, သဗ္ဗံ အကုသလံ, သဗ္ဗော ကာမာဝစရဿ ဝိပါကော, ကိရိယတော ဆ စိတ္တုပ္ပါဒါ, ရူပါဝစရတိကစတုက္ကဇ္ဈာနာ ကုသလတော စ ဝိပါကတော စ ကိရိယတော စ, စတုတ္ထဿ ဈာနဿ ဝိပါကော, စတ္တာရော အာရုပ္ပါ ကုသလတော စ ဝိပါကတော စ ကိရိယတော စ, စတ္တာရိ စ သာမညဖလာနိ – ဣမေ ဓမ္မာ န ဝတ္တဗ္ဗာ မဂ္ဂါရမ္မဏာတိပိ, မဂ္ဂဟေတုကာတိပိ, မဂ္ဂါဓိပတိနောတိပိ။ ရူပဉ္စ နိဗ္ဗာနဉ္စ အနာရမ္မဏာ။
၁၄၃၀. ကတမေ ဓမ္မာ ဥပ္ပန္နာ? စတူသု ဘူမီသု ဝိပါကော, ယဉ္စ ရူပံ ကမ္မဿ ကတတ္တာ – ဣမေ ဓမ္မာ သိယာ ဥပ္ပန္နာ, သိယာ ဥပ္ပါဒိနော; န ဝတ္တဗ္ဗာ အနုပ္ပန္နာတိ။ စတူသု ဘူမီသု ကုသလံ, အကုသလံ, တီသု ဘူမီသု ကိရိယာဗျာကတံ, ယဉ္စ ရူပံ န ကမ္မဿ ကတတ္တာ – ဣမေ ဓမ္မာ သိယာ ဥပ္ပန္နာ, သိယာ အနုပ္ပန္နာ, န ဝတ္တဗ္ဗာ ဥပ္ပါဒိနောတိ။ နိဗ္ဗာနံ န ဝတ္တဗ္ဗံ ဥပ္ပန္နန္တိပိ, အနုပ္ပန္နန္တိပိ, ဥပ္ပါဒိနောတိပိ။
၁၄၃၁. နိဗ္ဗာနံ ဌပေတွာ သဗ္ဗေ ဓမ္မာ သိယာ အတီတာ, သိယာ အနာဂတာ, သိယာ ပစ္စုပ္ပန္နာ။ နိဗ္ဗာနံ န ဝတ္တဗ္ဗံ အတီတန္တိပိ, အနာဂတန္တိပိ , ပစ္စုပ္ပန္နန္တိပိ။
၁၄၃၂. ကတမေ ဓမ္မာ အတီတာရမ္မဏာ? ဝိညာဏဉ္စာယတနံ, နေဝသညာနာသညာယတနံ – ဣမေ ဓမ္မာ အတီတာရမ္မဏာ။
၁၄၃၃. နိယောဂါ အနာဂတာရမ္မဏာ နတ္ထိ။
၁၄၃၄. ကတမေ ဓမ္မာ ပစ္စုပ္ပန္နာရမ္မဏာ? ဒွေပဉ္စဝိညာဏာနိ, တိဿော စ မနောဓါတုယော – ဣမေ ဓမ္မာ ပစ္စုပ္ပန္နာရမ္မဏာ။ ကာမာဝစရကုသလဿ ဝိပါကတော ဒသ စိတ္တုပ္ပါဒါ, အကုသလဿ ဝိပါကတော မနောဝိညာဏဓါတု ဥပေက္ခာသဟဂတာ, ကိရိယာဟေတုကမနောဝိညာဏဓါတု သောမနဿသဟဂတာ – ဣမေ ဓမ္မာ သိယာ အတီတာရမ္မဏာ, သိယာ အနာဂတာရမ္မဏာ, သိယာ ပစ္စုပ္ပန္နာရမ္မဏာ။ ကာမာဝစရကုသလံ, အကုသလံ, ကိရိယတော နဝ စိတ္တုပ္ပါဒါ, ရူပါဝစရံ စတုတ္ထံ ဈာနံ ကုသလတော စ ကိရိယတော စ – ဣမေ ဓမ္မာ သိယာ အတီတာရမ္မဏာ, သိယာ အနာဂတာရမ္မဏာ, သိယာ ပစ္စုပ္ပန္နာရမ္မဏာ; သိယာ န ဝတ္တဗ္ဗာ အတီတာရမ္မဏာတိပိ, အနာဂတာရမ္မဏာတိပိ, ပစ္စုပ္ပန္နာရမ္မဏာတိပိ။ ရူပါဝစရတိကစတုက္ကဇ္ဈာနာ ကုသလတော စ ဝိပါကတော စ ကိရိယတော စ, စတုတ္ထဿ ဈာနဿ ဝိပါကော, အာကာသာနဉ္စာယတနံ, အာကိဉ္စညာယတနံ, စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ – ဣမေ ဓမ္မာ န ဝတ္တဗ္ဗာ အတီတာရမ္မဏာတိပိ, အနာဂတာရမ္မဏာတိပိ, ပစ္စုပ္ပန္နာရမ္မဏာတိပိ။ ရူပဉ္စ နိဗ္ဗာနဉ္စ အနာရမ္မဏာ။
၁၄၃၅. အနိန္ဒ္ရိယဗဒ္ဓရူပဉ္စ နိဗ္ဗာနဉ္စ ဌပေတွာ, သဗ္ဗေ ဓမ္မာ သိယာ အဇ္ဈတ္တာ, သိယာ ဗဟိဒ္ဓါ, သိယာ အဇ္ဈတ္တဗဟိဒ္ဓါ။ အနိန္ဒ္ရိယဗဒ္ဓရူပဉ္စ နိဗ္ဗာနဉ္စ ဗဟိဒ္ဓါ။
၁၄၃၆. ကတမေ ဓမ္မာ အဇ္ဈတ္တာရမ္မဏာ? ဝိညာဏဉ္စာယတနံ, နေဝသညာနာသညာယတနံ – ဣမေ ဓမ္မာ အဇ္ဈတ္တာရမ္မဏာ။
၁၄၃၇. ကတမေ ဓမ္မာ ဗဟိဒ္ဓါရမ္မဏာ? ရူပါဝစရတိကစတုက္ကဇ္ဈာနာ ကုသလတော စ ဝိပါကတော စ ကိရိယတော စ, စတုတ္ထဿ ဈာနဿ ဝိပါကော, အာကာသာနဉ္စာယတနံ, စတ္တာရော မဂ္ဂါ အပရိယာပန္နာ စတ္တာရိ စ သာမညဖလာနိ – ဣမေ ဓမ္မာ ဗဟိဒ္ဓါရမ္မဏာ။ ရူပံ ဌပေတွာ, သဗ္ဗေဝ ကာမာဝစရာ ကုသလာကုသလာဗျာကတာ ဓမ္မာ, ရူပါဝစရံ စတုတ္ထံ ဈာနံ ကုသလတော စ ကိရိယတော စ – ဣမေ ဓမ္မာ သိယာ အဇ္ဈတ္တာရမ္မဏာ, သိယာ ဗဟိဒ္ဓါရမ္မဏာ, သိယာ အဇ္ဈတ္တဗဟိဒ္ဓါရမ္မဏာ။ အာကိဉ္စညာယတနံ န ဝတ္တဗ္ဗံ အဇ္ဈတ္တာရမ္မဏန္တိပိ, ဗဟိဒ္ဓါရမ္မဏန္တိပိ, အဇ္ဈတ္တဗဟိဒ္ဓါရမ္မဏန္တိပိ။ ရူပဉ္စ နိဗ္ဗာနဉ္စ အနာရမ္မဏာ။
၁၄၃၈. ကတမေ ဓမ္မာ သနိဒဿနသပ္ပဋိဃာ? ရူပါယတနံ – ဣမေ ဓမ္မာ သနိဒဿနသပ္ပဋိဃာ။
၁၄၃၉. ကတမေ ဓမ္မာ အနိဒဿနသပ္ပဋိဃာ? စက္ခာယတနံ။ပေ.။ ဖောဋ္ဌဗ္ဗာယတနံ – ဣမေ ဓမ္မာ အနိဒဿနသပ္ပဋိဃာ။
၁၄၄၀. ကတမေ ဓမ္မာ အနိဒဿနအပ္ပဋိဃာ? စတူသု ဘူမီသု ကုသလံ, အကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ယဉ္စ ရူပံ အနိဒဿနံ အပ္ပဋိဃံ ဓမ္မာယတနပရိယာပန္နံ, နိဗ္ဗာနဉ္စ – ဣမေ ဓမ္မာ အနိဒဿနအပ္ပဋိဃာ။
တိကံ။
ဒုကအတ္ထုဒ္ဓါရော
ဟေတုဂေါစ္ဆကံ
၁၄၄၁. ကတမေ ဓမ္မာ ဟေတူ? တယော ကုသလဟေတူ, တယော အကုသလဟေတူ, တယော အဗျာကတဟေတူ။ အလောဘော ကုသလဟေတု, အဒေါသော ကုသလဟေတု, စတူသု ဘူမီသု ကုသလေသု ဥပ္ပဇ္ဇန္တိ။ အမောဟော ကုသလဟေတု, ကာမာဝစရကုသလတော စတ္တာရော ဉာဏဝိပ္ပယုတ္တေ စိတ္တုပ္ပါဒေ ဌပေတွာ, စတူသု ဘူမီသု ကုသလေသု ဥပ္ပဇ္ဇတိ။
လောဘော အဋ္ဌသု လောဘသဟဂတေသု စိတ္တုပ္ပါဒေသု ဥပ္ပဇ္ဇတိ။ ဒေါသော ဒွီသု ဒေါမနဿသဟဂတေသု စိတ္တုပ္ပါဒေသု ဥပ္ပဇ္ဇတိ။ မောဟော သဗ္ဗာကုသလေသု ဥပ္ပဇ္ဇတိ။
အလောဘော ဝိပါကဟေတု အဒေါသော ဝိပါကဟေတု, ကာမာဝစရဿ ဝိပါကတော အဟေတုကေ စိတ္တုပ္ပါဒေ ဌပေတွာ, စတူသု ဘူမီသု ဝိပါကေသု ဥပ္ပဇ္ဇန္တိ။ အမောဟော ဝိပါကဟေတု, ကာမာဝစရဿ ဝိပါကတော အဟေတုကေ စိတ္တုပ္ပါဒေ ဌပေတွာ, စတ္တာရော ဉာဏဝိပ္ပယုတ္တေ စိတ္တုပ္ပါဒေ ဌပေတွာ, စတူသု ဘူမီသု ဝိပါကေသု ဥပ္ပဇ္ဇတိ။
အလောဘော ကိရိယဟေတု အဒေါသော ကိရိယဟေတု, ကာမာဝစရကိရိယတော အဟေတုကေ စိတ္တုပ္ပါဒေ ဌပေတွာ, တီသု ဘူမီသု ကိရိယေသု ဥပ္ပဇ္ဇန္တိ ။ အမောဟော ကိရိယဟေတု, ကာမာဝစရကိရိယတော အဟေတုကေ စိတ္တုပ္ပါဒေ ဌပေတွာ, စတ္တာရော ဉာဏဝိပ္ပယုတ္တေ စိတ္တုပ္ပါဒေ ဌပေတွာ, တီသု ဘူမီသု ကိရိယေသု ဥပ္ပဇ္ဇတိ – ဣမေ ဓမ္မာ ဟေတူ။
၁၄၄၂. ကတမေ ဓမ္မာ န ဟေတူ? ဌပေတွာ ဟေတူ, စတူသု ဘူမီသု ကုသလံ, အကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ န ဟေတူ။
၁၄၄၃. ကတမေ ဓမ္မာ သဟေတုကာ? ဝိစိကိစ္ဆာသဟဂတံ ဥဒ္ဓစ္စသဟဂတံ မောဟံ ဌပေတွာ အဝသေသံ အကုသလံ, စတူသု ဘူမီသု ကုသလံ, ကာမာဝစရဿ ဝိပါကတော အဟေတုကေ စိတ္တုပ္ပါဒေ ဌပေတွာ စတူသု ဘူမီသု ဝိပါကော, ကာမာဝစရကိရိယတော အဟေတုကေ စိတ္တုပ္ပါဒေ ဌပေတွာ တီသု ဘူမီသု ကိရိယာဗျာကတံ – ဣမေ ဓမ္မာ သဟေတုကာ။
၁၄၄၄. ကတမေ ဓမ္မာ အဟေတုကာ? ဝိစိကိစ္ဆာသဟဂတော မောဟော, ဥဒ္ဓစ္စသဟဂတော မောဟော, ဒွေပဉ္စဝိညာဏာနိ, တိဿော စ မနောဓါတုယော, ပဉ္စ စ အဟေတုကမနောဝိညာဏဓါတုယော, ရူပဉ္စ, နိဗ္ဗာနဉ္စ – ဣမေ ဓမ္မာ အဟေတုကာ။
၁၄၄၅. ကတမေ ဓမ္မာ ဟေတုသမ္ပယုတ္တာ? ဝိစိကိစ္ဆာသဟဂတံ ဥဒ္ဓစ္စသဟဂတံ မောဟံ ဌပေတွာ အဝသေသံ အကုသလံ, စတူသု ဘူမီသု ကုသလံ, ကာမာဝစရဿ ဝိပါကတော အဟေတုကေ စိတ္တုပ္ပါဒေ ဌပေတွာ စတူသု ဘူမီသု ဝိပါကော, ကာမာဝစရကိရိယတော အဟေတုကေ စိတ္တုပ္ပါဒေ ဌပေတွာ တီသု ဘူမီသု ကိရိယာဗျာကတံ – ဣမေ ဓမ္မာ ဟေတုသမ္ပယုတ္တာ။
၁၄၄၆. ကတမေ ဓမ္မာ ဟေတုဝိပ္ပယုတ္တာ? ဝိစိကိစ္ဆာသဟဂတော မောဟော, ဥဒ္ဓစ္စသဟဂတော မောဟော, ဒွေပဉ္စဝိညာဏာနိ တိဿော စ မနောဓါတုယော ပဉ္စ စ အဟေတုကမနောဝိညာဏဓါတုယော, ရူပဉ္စ, နိဗ္ဗာနဉ္စ – ဣမေ ဓမ္မာ ဟေတုဝိပ္ပယုတ္တာ။
၁၄၄၇. ကတမေ ဓမ္မာ ဟေတူ စေဝ သဟေတုကာ စ? ယတ္ထ ဒွေ တယော ဟေတူ ဧကတော ဥပ္ပဇ္ဇန္တိ – ဣမေ ဓမ္မာ ဟေတူ စေဝ သဟေတုကာ စ။
၁၄၄၈. ကတမေ ဓမ္မာ သဟေတုကာ စေဝ န စ ဟေတူ? စတူသု ဘူမီသု ကုသလံ, အကုသလံ, ကာမာဝစရဿ ဝိပါကတော အဟေတုကေ စိတ္တုပ္ပါဒေ ဌပေတွာ စတူသု ဘူမီသု ဝိပါကော, ကာမာဝစရကိရိယတော အဟေတုကေ စိတ္တုပ္ပါဒေ ဌပေတွာ တီသု ဘူမီသု ကိရိယာဗျာကတံ, ဧတ္ထုပ္ပန္နေ ဟေတူ ဌပေတွာ – ဣမေ ဓမ္မာ သဟေတုကာ စေဝ န စ ဟေတူ။ အဟေတုကာ ဓမ္မာ န ဝတ္တဗ္ဗာ – ဟေတူ စေဝ သဟေတုကာ စာတိပိ, သဟေတုကာ စေဝ န စ ဟေတူတိပိ။
၁၄၄၉. ကတမေ ဓမ္မာ ဟေတူ စေဝ ဟေတုသမ္ပယုတ္တာ စ? ယတ္ထ ဒွေ တယော ဟေတူ ဧကတော ဥပ္ပဇ္ဇန္တိ – ဣမေ ဓမ္မာ ဟေတူ စေဝ ဟေတုသမ္ပယုတ္တာ စ။
၁၄၅၀. ကတမေ ဓမ္မာ ဟေတုသမ္ပယုတ္တာ စေဝ န စ ဟေတူ? စတူသု ဘူမီသု ကုသလံ, အကုသလံ, ကာမာဝစရဿ ဝိပါကတော အဟေတုကေ စိတ္တုပ္ပါဒေ ဌပေတွာ စတူသု ဘူမီသု ဝိပါကော, ကာမာဝစရကိရိယတော အဟေတုကေ စိတ္တုပ္ပါဒေ ဌပေတွာ တီသု ဘူမီသု ကိရိယာဗျာကတံ, ဧတ္ထုပ္ပန္နေ ဟေတူ ဌပေတွာ – ဣမေ ဓမ္မာ ဟေတုသမ္ပယုတ္တာ စေဝ န စ ဟေတူ။ ဟေတုဝိပ္ပယုတ္တာ ဓမ္မာ န ဝတ္တဗ္ဗာ – ဟေတူ စေဝ ဟေတုသမ္ပယုတ္တာ စာတိပိ, ဟေတုသမ္ပယုတ္တာ စေဝ န စ ဟေတူတိပိ။
၁၄၅၁. ကတမေ ဓမ္မာ န ဟေတူ သဟေတုကာ? စတူသု ဘူမီသု ကုသလံ, အကုသလံ, ကာမာဝစရဿ ဝိပါကတော အဟေတုကေ စိတ္တုပ္ပါဒေ ဌပေတွာ စတူသု ဘူမီသု ဝိပါကော, ကာမာဝစရကိရိယတော အဟေတုကေ စိတ္တုပ္ပါဒေ ဌပေတွာ တီသု ဘူမီသု ကိရိယာဗျာကတံ, ဧတ္ထုပ္ပန္နေ ဟေတူ ဌပေတွာ – ဣမေ ဓမ္မာ န ဟေတူ သဟေတုကာ။
၁၄၅၂. ကတမေ ဓမ္မာ န ဟေတူ အဟေတုကာ? ဒွေပဉ္စဝိညာဏာနိ, တိဿော စ မနောဓါတုယော, ပဉ္စ စ အဟေတုကမနောဝိညာဏဓါတုယော, ရူပဉ္စ, နိဗ္ဗာနဉ္စ – ဣမေ ဓမ္မာ န ဟေတူ အဟေတုကာ ။ ဟေတူ ဓမ္မာ န ဝတ္တဗ္ဗာ – န ဟေတူ သဟေတုကာတိပိ, န ဟေတူ အဟေတုကာတိပိ။
စူဠန္တရဒုကံ
၁၄၅၃. ကတမေ ဓမ္မာ သပ္ပစ္စယာ? စတူသု ဘူမီသု ကုသလံ, အကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ သပ္ပစ္စယာ။
၁၄၅၄. ကတမေ ဓမ္မာ အပ္ပစ္စယာ? နိဗ္ဗာနံ – ဣမေ ဓမ္မာ အပ္ပစ္စယာ။
၁၄၅၅. ကတမေ ဓမ္မာ သင်္ခတာ? စတူသု ဘူမီသု ကုသလံ, အကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ သင်္ခတာ။
၁၄၅၆. ကတမေ ဓမ္မာ အသင်္ခတာ? နိဗ္ဗာနံ – ဣမေ ဓမ္မာ အသင်္ခတာ။
၁၄၅၇. ကတမေ ဓမ္မာ သနိဒဿနာ? ရူပါယတနံ – ဣမေ ဓမ္မာ သနိဒဿနာ။
၁၄၅၈. ကတမေ ဓမ္မာ အနိဒဿနာ? စက္ခာယတနံ ။ပေ.။ ဖောဋ္ဌဗ္ဗာယတနံ, စတူသု ဘူမီသု ကုသလံ, အကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ယဉ္စ ရူပံ အနိဒဿနံ အပ္ပဋိဃံ ဓမ္မာယတနပရိယာပန္နံ, နိဗ္ဗာနဉ္စ – ဣမေ ဓမ္မာ အနိဒဿနာ။
၁၄၅၉. ကတမေ ဓမ္မာ သပ္ပဋိဃာ? စက္ခာယတနံ။ပေ.။ ဖောဋ္ဌဗ္ဗာယတနံ – ဣမေ ဓမ္မာ သပ္ပဋိဃာ။
၁၄၆၀. ကတမေ ဓမ္မာ အပ္ပဋိဃာ? စတူသု ဘူမီသု ကုသလံ, အကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ယဉ္စ ရူပံ အနိဒဿနံ အပ္ပဋိဃံ ဓမ္မာယတနပရိယာပန္နံ, နိဗ္ဗာနဉ္စ – ဣမေ ဓမ္မာ အပ္ပဋိဃာ။
၁၄၆၁. ကတမေ ဓမ္မာ ရူပိနော? စတ္တာရော စ မဟာဘူတာ, စတုန္နဉ္စ မဟာဘူတာနံ ဥပါဒါယ ရူပံ – ဣမေ ဓမ္မာ ရူပိနော။
၁၄၆၂. ကတမေ ဓမ္မာ အရူပိနော? စတူသု ဘူမီသု ကုသလံ, အကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, နိဗ္ဗာနဉ္စ – ဣမေ ဓမ္မာ အရူပိနော။
၁၄၆၃. ကတမေ ဓမ္မာ လောကိယာ? တီသု ဘူမီသု ကုသလံ, အကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ လောကိယာ။
၁၄၆၄. ကတမေ ဓမ္မာ လောကုတ္တရာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ လောကုတ္တရာ။ သဗ္ဗေ [သဗ္ဗေဝ (သျာ.)] ဓမ္မာ ကေနစိ ဝိညေယျာ, ကေနစိ န ဝိညေယျာ။
အာသဝဂေါစ္ဆကံ
၁၄၆၅. ကတမေ ဓမ္မာ အာသဝါ? စတ္တာရော အာသဝါ – ကာမာသဝေါ, ဘဝါသဝေါ, ဒိဋ္ဌာသဝေါ, အဝိဇ္ဇာသဝေါ။ ကာမာသဝေါ အဋ္ဌသု လောဘသဟဂတေသု စိတ္တုပ္ပါဒေသု ဥပ္ပဇ္ဇတိ ဘဝါသဝေါ စတူသု ဒိဋ္ဌိဂတဝိပ္ပယုတ္တလောဘသဟဂတေသု စိတ္တုပ္ပါဒေသု ဥပ္ပဇ္ဇတိ ဒိဋ္ဌာသဝေါ စတူသု ဒိဋ္ဌိဂတသမ္ပယုတ္တေသု စိတ္တုပ္ပါဒေသု ဥပ္ပဇ္ဇတိ။ အဝိဇ္ဇာသဝေါ သဗ္ဗာကုသလေသု ဥပ္ပဇ္ဇတိ – ဣမေ ဓမ္မာ အာသဝါ။
၁၄၆၆. ကတမေ ဓမ္မာ နော အာသဝါ? ဌပေတွာ အာသဝေ အဝသေသံ အကုသလံ, စတူသု ဘူမီသု ကုသလံ , စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ နော အာသဝါ။
၁၄၆၇. ကတမေ ဓမ္မာ သာသဝါ? တီသု ဘူမီသု ကုသလံ, အကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ သာသဝါ။
၁၄၆၈. ကတမေ ဓမ္မာ အနာသဝါ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ အနာသဝါ။
၁၄၆၉. ကတမေ ဓမ္မာ အာသဝသမ္ပယုတ္တာ? ဒွေ ဒေါမနဿသဟဂတစိတ္တုပ္ပါဒါ ဧတ္ထုပ္ပန္နံ မောဟံ ဌပေတွာ, ဝိစိကိစ္ဆာသဟဂတံ ဥဒ္ဓစ္စသဟဂတံ မောဟံ ဌပေတွာ, အဝသေသံ အကုသလံ – ဣမေ ဓမ္မာ အာသဝသမ္ပယုတ္တာ။
၁၄၇၀. ကတမေ ဓမ္မာ အာသဝဝိပ္ပယုတ္တာ? ဒွီသု ဒေါမနဿသဟဂတေသု စိတ္တုပ္ပါဒေသု ဥပ္ပန္နော မောဟော, ဝိစိကိစ္ဆာသဟဂတော မောဟော, ဥဒ္ဓစ္စသဟဂတော မောဟော, စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ အာသဝဝိပ္ပယုတ္တာ။
၁၄၇၁. ကတမေ ဓမ္မာ အာသဝါ စေဝ သာသဝါ စ? တေဝ အာသဝါ အာသဝါ စေဝ သာသဝါ စ။
၁၄၇၂. ကတမေ ဓမ္မာ သာသဝါ စေဝ နော စ အာသဝါ? ဌပေတွာ အာသဝေ, အဝသေသံ အကုသလံ, တီသု ဘူမီသု ကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ သာသဝါ စေဝ နော စ အာသဝါ။ အနာသဝါ ဓမ္မာ န ဝတ္တဗ္ဗာ – အာသဝါ စေဝ သာသဝါ စာတိပိ, သာသဝါ စေဝ နော စ အာသဝါတိပိ။
၁၄၇၃. ကတမေ ဓမ္မာ အာသဝါ စေဝ အာသဝသမ္ပယုတ္တာ စ? ယတ္ထ ဒွေ တယော အာသဝါ ဧကတော ဥပ္ပဇ္ဇန္တိ – ဣမေ ဓမ္မာ အာသဝါ စေဝ အာသဝသမ္ပယုတ္တာ စ။
၁၄၇၄. ကတမေ ဓမ္မာ အာသဝသမ္ပယုတ္တာ စေဝ နော စ အာသဝါ? ဌပေတွာ အာသဝေ, အဝသေသံ အကုသလံ – ဣမေ ဓမ္မာ အာသဝသမ္ပယုတ္တာ စေဝ နော စ အာသဝါ။ အာသဝဝိပ္ပယုတ္တာ ဓမ္မာ န ဝတ္တဗ္ဗာ – အာသဝါ စေဝ အာသဝသမ္ပယုတ္တာ စာတိပိ, အာသဝသမ္ပယုတ္တာ စေဝ နော စ အာသဝါတိပိ။
၁၄၇၅. ကတမေ ဓမ္မာ အာသဝဝိပ္ပယုတ္တာ သာသဝါ? ဒွီသု ဒေါမနဿသဟဂတေသု စိတ္တုပ္ပါဒေသု ဥပ္ပန္နော မောဟော, ဝိစိကိစ္ဆာသဟဂတော မောဟော, ဥဒ္ဓစ္စသဟဂတော မောဟော, တီသု ဘူမီသု ကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ အာသဝဝိပ္ပယုတ္တာ သာသဝါ။
၁၄၇၆. ကတမေ ဓမ္မာ အာသဝဝိပ္ပယုတ္တာ အနာသဝါ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ အာသဝဝိပ္ပယုတ္တာ အနာသဝါ။ အာသဝသမ္ပယုတ္တာ ဓမ္မာ န ဝတ္တဗ္ဗာ – အာသဝဝိပ္ပယုတ္တာ သာသဝါတိပိ, အာသဝဝိပ္ပယုတ္တာ အနာသဝါတိပိ။
သံယောဇနဂေါစ္ဆကံ
၁၄၇၇. ကတမေ ဓမ္မာ သံယောဇနာ? ဒသ သံယောဇနာနိ – ကာမရာဂသံယောဇနံ, ပဋိဃသံယောဇနံ, မာနသံယောဇနံ, ဒိဋ္ဌိသံယောဇနံ, ဝိစိကိစ္ဆာသံယောဇနံ, သီလဗ္ဗတပရာမာသသံယောဇနံ, ဘဝရာဂသံယောဇနံ, ဣဿာသံယောဇနံ, မစ္ဆရိယသံယောဇနံ, အဝိဇ္ဇာသံယောဇနံ။ ကာမရာဂသံယောဇနံ အဋ္ဌသု လောဘသဟဂတေသု စိတ္တုပ္ပါဒေသု ဥပ္ပဇ္ဇတိ။ ပဋိဃသံယောဇနံ ဒွီသု ဒေါမနဿသဟဂတေသု စိတ္တုပ္ပါဒေသု ဥပ္ပဇ္ဇတိ။ မာနသံယောဇနံ စတူသု ဒိဋ္ဌိဂတဝိပ္ပယုတ္တလောဘသဟဂတေသု စိတ္တုပ္ပါဒေသု ဥပ္ပဇ္ဇတိ။ ဒိဋ္ဌိသံယောဇနံ စတူသု ဒိဋ္ဌိဂတသမ္ပယုတ္တေသု စိတ္တုပ္ပါဒေသု ဥပ္ပဇ္ဇတိ။ ဝိစိကိစ္ဆာသံယောဇနံ ဝိစိကိစ္ဆာသဟဂတေသု စိတ္တုပ္ပါဒေသု ဥပ္ပဇ္ဇတိ။ သီလဗ္ဗတပရာမာသသံယောဇနံ စတူသု ဒိဋ္ဌိဂတသမ္ပယုတ္တေသု စိတ္တုပ္ပါဒေသု ဥပ္ပဇ္ဇတိ။ ဘဝရာဂသံယောဇနံ စတူသု ဒိဋ္ဌိဂတဝိပ္ပယုတ္တလောဘသဟဂတေသု စိတ္တုပ္ပါဒေသု ဥပ္ပဇ္ဇတိ။ ဣဿာသံယောဇနဉ္စ မစ္ဆရိယသံယောဇနဉ္စ ဒွီသု ဒေါမနဿသဟဂတေသု စိတ္တုပ္ပါဒေသု ဥပ္ပဇ္ဇန္တိ။ အဝိဇ္ဇာသံယောဇနံ သဗ္ဗာကုသလေသု ဥပ္ပဇ္ဇတိ – ဣမေ ဓမ္မာ သံယောဇနာ။
၁၄၇၈. ကတမေ ဓမ္မာ နော သံယောဇနာ။ ဌပေတွာ သံယောဇနေ အဝသေသံ အကုသလံ, စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ နော သံယောဇနာ။
၁၄၇၉. ကတမေ ဓမ္မာ သံယောဇနိယာ? တီသု ဘူမီသု ကုသလံ, အကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ သံယောဇနိယာ။
၁၄၈၀. ကတမေ ဓမ္မာ အသံယောဇနိယာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ အသံယောဇနိယာ။
၁၄၈၁. ကတမေ ဓမ္မာ သံယောဇနသမ္ပယုတ္တာ? ဥဒ္ဓစ္စသဟဂတံ မောဟံ ဌပေတွာ အဝသေသံ အကုသလံ – ဣမေ ဓမ္မာ သံယောဇနသမ္ပယုတ္တာ။
၁၄၈၂. ကတမေ ဓမ္မာ သံယောဇနဝိပ္ပယုတ္တာ? ဥဒ္ဓစ္စသဟဂတော မောဟော, စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ သံယောဇနဝိပ္ပယုတ္တာ။
၁၄၈၃. ကတမေ ဓမ္မာ သံယောဇနာ စေဝ သံယောဇနိယာ စ? တာနေဝ သံယောဇနာနိ သံယောဇနာ စေဝ သံယောဇနိယာ စ။
၁၄၈၄. ကတမေ ဓမ္မာ သံယောဇနိယာ စေဝ နော စ သံယောဇနာ? ဌပေတွာ သံယောဇနေ အဝသေသံ အကုသလံ, တီသု ဘူမီသု ကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ သံယောဇနိယာ စေဝ နော စ သံယောဇနာ။ အသံယောဇနိယာ ဓမ္မာ န ဝတ္တဗ္ဗာ – သံယောဇနာ စေဝ သံယောဇနိယာ စာတိပိ, သံယောဇနိယာ စေဝ နော စ သံယောဇနာတိပိ။
၁၄၈၅. ကတမေ ဓမ္မာ သံယောဇနာ စေဝ သံယောဇနသမ္ပယုတ္တာ စ? ယတ္ထ ဒွေ တီဏိ သံယောဇနာနိ ဧကတော ဥပ္ပဇ္ဇန္တိ – ဣမေ ဓမ္မာ သံယောဇနာ စေဝ သံယောဇနသမ္ပယုတ္တာ စ။
၁၄၈၆. ကတမေ ဓမ္မာ သံယောဇနသမ္ပယုတ္တာ စေဝ နော စ သံယောဇနာ? ဌပေတွာ သံယောဇနေ, အဝသေသံ အကုသလံ – ဣမေ ဓမ္မာ သံယောဇနသမ္ပယုတ္တာ စေဝ နော စ သံယောဇနာ။ သံယောဇနဝိပ္ပယုတ္တာ ဓမ္မာ န ဝတ္တဗ္ဗာ – သံယောဇနာ စေဝ သံယောဇနသမ္ပယုတ္တာ စာတိပိ, သံယောဇနသမ္ပယုတ္တာ စေဝ နော စ သံယောဇနာတိပိ။
၁၄၈၇. ကတမေ ဓမ္မာ သံယောဇနဝိပ္ပယုတ္တာ သံယောဇနိယာ? ဥဒ္ဓစ္စသဟဂတော မောဟော, တီသု ဘူမီသု ကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ သံယောဇနဝိပ္ပယုတ္တာ သံယောဇနိယာ။
၁၄၈၈. ကတမေ ဓမ္မာ သံယောဇနဝိပ္ပယုတ္တာ အသံယောဇနိယာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ သံယောဇနဝိပ္ပယုတ္တာ အသံယောဇနိယာ။ သံယောဇနသမ္ပယုတ္တာ ဓမ္မာ န ဝတ္တဗ္ဗာ – သံယောဇနဝိပ္ပယုတ္တာ သံယောဇနိယာတိပိ, သံယောဇနဝိပ္ပယုတ္တာ အသံယောဇနိယာတိပိ။
ဂန္ထဂေါစ္ဆကံ
၁၄၈၉. ကတမေ ဓမ္မာ ဂန္ထာ? စတ္တာရော ဂန္ထာ – အဘိဇ္ဈာကာယဂန္ထော, ဗျာပါဒေါ ကာယဂန္ထော, သီလဗ္ဗတပရာမာသော ကာယဂန္ထော, ဣဒံသစ္စာဘိနိဝေသော ကာယဂန္ထော။ အဘိဇ္ဈာကာယဂန္ထော အဋ္ဌသု လောဘသဟဂတေသု စိတ္တုပ္ပါဒေသု ဥပ္ပဇ္ဇတိ။ ဗျာပါဒေါ ကာယဂန္ထော ဒွီသု ဒေါမနဿသဟဂတေသု စိတ္တုပ္ပါဒေသု ဥပ္ပဇ္ဇတိ။ သီလဗ္ဗတပရာမာသော ကာယဂန္ထော စ ဣဒံသစ္စာဘိနိဝေသော ကာယဂန္ထော စ စတူသု ဒိဋ္ဌိဂတသမ္ပယုတ္တေသု စိတ္တုပ္ပါဒေသု ဥပ္ပဇ္ဇန္တိ – ဣမေ ဓမ္မာ ဂန္ထာ။
၁၄၉၀. ကတမေ ဓမ္မာ နော ဂန္ထာ? ဌပေတွာ ဂန္ထေ, အဝသေသံ အကုသလံ, စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ နော ဂန္ထာ။
၁၄၉၁. ကတမေ ဓမ္မာ ဂန္ထနိယာ? တီသု ဘူမီသု ကုသလံ, အကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ ဂန္ထနိယာ။
၁၄၉၂. ကတမေ ဓမ္မာ အဂန္ထနိယာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ အဂန္ထနိယာ။
၁၄၉၃. ကတမေ ဓမ္မာ ဂန္ထသမ္ပယုတ္တာ? စတ္တာရော ဒိဋ္ဌိဂတသမ္ပယုတ္တစိတ္တုပ္ပါဒါ , စတ္တာရော ဒိဋ္ဌိဂတဝိပ္ပယုတ္တလောဘသဟဂတစိတ္တုပ္ပါဒါ, ဧတ္ထုပ္ပန္နံ လောဘံ ဌပေတွာ, ဒွေ ဒေါမနဿသဟဂတစိတ္တုပ္ပါဒါ, ဧတ္ထုပ္ပန္နံ ပဋိဃံ ဌပေတွာ – ဣမေ ဓမ္မာ ဂန္ထသမ္ပယုတ္တာ။
၁၄၉၄. ကတမေ ဓမ္မာ ဂန္ထဝိပ္ပယုတ္တာ? စတူသု ဒိဋ္ဌိဂတဝိပ္ပယုတ္တလောဘသဟဂတေသု စိတ္တုပ္ပါဒေသု ဥပ္ပန္နော လောဘော, ဒွီသု ဒေါမနဿသဟဂတေသု စိတ္တုပ္ပါဒေသု ဥပ္ပန္နံ ပဋိဃံ, ဝိစိကိစ္ဆာသဟဂတော စိတ္တုပ္ပါဒေါ, ဥဒ္ဓစ္စသဟဂတော စိတ္တုပ္ပါဒေါ, စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ ဂန္ထဝိပ္ပယုတ္တာ။
၁၄၉၅. ကတမေ ဓမ္မာ ဂန္ထာ စေဝ ဂန္ထနိယာ စ? တေဝ ဂန္ထာ ဂန္ထာ စေဝ ဂန္ထနိယာ စ။
၁၄၉၆. ကတမေ ဓမ္မာ ဂန္ထနိယာ စေဝ နော စ ဂန္ထာ? ဌပေတွာ ဂန္ထေ အဝသေသံ အကုသလံ, တီသု ဘူမီသု ကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ ဂန္ထနိယာ စေဝ နော စ ဂန္ထာ။ အဂန္ထနိယာ ဓမ္မာ န ဝတ္တဗ္ဗာ – ဂန္ထာ စေဝ ဂန္ထနိယာ စာတိပိ, ဂန္ထနိယာ စေဝ နော စ ဂန္ထာတိပိ။
၁၄၉၇. ကတမေ ဓမ္မာ ဂန္ထာ စေဝ ဂန္ထသမ္ပယုတ္တာ စ? ယတ္ထ ဒိဋ္ဌိ စ လောဘော စ ဧကတော ဥပ္ပဇ္ဇန္တိ – ဣမေ ဓမ္မာ ဂန္ထာ စေဝ ဂန္ထသမ္ပယုတ္တာ စ။
၁၄၉၈. ကတမေ ဓမ္မာ ဂန္ထသမ္ပယုတ္တာ စေဝ နော စ ဂန္ထာ? အဋ္ဌ လောဘသဟဂတစိတ္တုပ္ပါဒါ ဒွေ ဒေါမနဿသဟဂတစိတ္တုပ္ပါဒါ, ဧတ္ထုပ္ပန္နေ ဂန္ထေ ဌပေတွာ – ဣမေ ဓမ္မာ ဂန္ထသမ္ပယုတ္တာ စေဝ နော စ ဂန္ထာ။ ဂန္ထဝိပ္ပယုတ္တာ ဓမ္မာ န ဝတ္တဗ္ဗာ – ဂန္ထာ စေဝ ဂန္ထသမ္ပယုတ္တာ စာတိပိ, ဂန္ထသမ္ပယုတ္တာ စေဝ နော စ ဂန္ထာတိပိ။
၁၄၉၉. ကတမေ ဓမ္မာ ဂန္ထဝိပ္ပယုတ္တာ ဂန္ထနိယာ? စတူသု ဒိဋ္ဌိဂတဝိပ္ပယုတ္တလောဘသဟဂတေသု စိတ္တုပ္ပါဒေသု ဥပ္ပန္နော လောဘော, ဒွီသု ဒေါမနဿသဟဂတေသု စိတ္တုပ္ပါဒေသု ဥပ္ပန္နံ ပဋိဃံ, ဝိစိကိစ္ဆာသဟဂတော စိတ္တုပ္ပါဒေါ, ဥဒ္ဓစ္စသဟဂတော စိတ္တုပ္ပါဒေါ, တီသု ဘူမီသု ကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ ဂန္ထဝိပ္ပယုတ္တာ ဂန္ထနိယာ။
၁၅၀၀. ကတမေ ဓမ္မာ ဂန္ထဝိပ္ပယုတ္တာ အဂန္ထနိယာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ ဂန္ထဝိပ္ပယုတ္တာ အဂန္ထနိယာ။ ဂန္ထသမ္ပယုတ္တာ ဓမ္မာ န ဝတ္တဗ္ဗာ – ဂန္ထဝိပ္ပယုတ္တာ ဂန္ထနိယာတိပိ, ဂန္ထဝိပ္ပယုတ္တာ အဂန္ထနိယာတိပိ။
ဩဃဂေါစ္ဆကံ
၁၅၀၁. ကတမေ ဓမ္မာ ဩဃာ။ပေ.။။
ယောဂဂေါစ္ဆကံ
၁၅၀၂. ကတမေ ဓမ္မာ ယောဂါ။ပေ.။။
နီဝရဏဂေါစ္ဆကံ
၁၅၀၃. ကတမေ ဓမ္မာ နီဝရဏာ? ဆ နီဝရဏာ – ကာမစ္ဆန္ဒနီဝရဏံ, ဗျာပါဒနီဝရဏံ, ထိနမိဒ္ဓနီဝရဏံ, ဥဒ္ဓစ္စကုက္ကုစ္စနီဝရဏံ, ဝိစိကိစ္ဆာနီဝရဏံ, အဝိဇ္ဇာနီဝရဏံ ။ ကာမစ္ဆန္ဒနီဝရဏံ အဋ္ဌသု လောဘသဟဂတေသု စိတ္တုပ္ပါဒေသု ဥပ္ပဇ္ဇတိ, ဗျာပါဒနီဝရဏံ ဒွီသု ဒေါမနဿသဟဂတေသု စိတ္တုပ္ပါဒေသု ဥပ္ပဇ္ဇတိ, ထိနမိဒ္ဓနီဝရဏံ သသင်္ခါရိကေသု အကုသလေသု ဥပ္ပဇ္ဇတိ, ဥဒ္ဓစ္စနီဝရဏံ ဥဒ္ဓစ္စသဟဂတေသု စိတ္တုပ္ပါဒေသု ဥပ္ပဇ္ဇတိ, ကုက္ကုစ္စနီဝရဏံ ဒွီသု ဒေါမနဿသဟဂတေသု စိတ္တုပ္ပါဒေသု ဥပ္ပဇ္ဇတိ, ဝိစိကိစ္ဆာနီဝရဏံ ဝိစိကိစ္ဆာသဟဂတေသု စိတ္တုပ္ပါဒေသု ဥပ္ပဇ္ဇတိ, အဝိဇ္ဇာနီဝရဏံ သဗ္ဗာကုသလေသု ဥပ္ပဇ္ဇတိ – ဣမေ ဓမ္မာ နီဝရဏာ။
၁၅၀၄. ကတမေ ဓမ္မာ နော နီဝရဏာ? ဌပေတွာ နီဝရဏေ အဝသေသံ အကုသလံ, စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ နော နီဝရဏာ။
၁၅၀၅. ကတမေ ဓမ္မာ နီဝရဏိယာ? တီသု ဘူမီသု ကုသလံ, အကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ နီဝရဏိယာ။
၁၅၀၆. ကတမေ ဓမ္မာ အနီဝရဏိယာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ အနီဝရဏိယာ။
၁၅၀၇. ကတမေ ဓမ္မာ နီဝရဏသမ္ပယုတ္တာ? ဒွါဒသ အကုသလစိတ္တုပ္ပါဒါ – ဣမေ ဓမ္မာ နီဝရဏသမ္ပယုတ္တာ။
၁၅၀၈. ကတမေ ဓမ္မာ နီဝရဏဝိပ္ပယုတ္တာ? စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ နီဝရဏဝိပ္ပယုတ္တာ။
၁၅၀၉. ကတမေ ဓမ္မာ နီဝရဏာ စေဝ နီဝရဏိယာ စ? တာနေဝ နီဝရဏာနိ နီဝရဏာ စေဝ နီဝရဏိယာ စ။
၁၅၁၀. ကတမေ ဓမ္မာ နီဝရဏိယာ စေဝ နော စ နီဝရဏာ? ဌပေတွာ နီဝရဏေ, အဝသေသံ အကုသလံ, တီသု ဘူမီသု ကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ နီဝရဏိယာ စေဝ နော စ နီဝရဏာ။ အနီဝရဏိယာ ဓမ္မာ န ဝတ္တဗ္ဗာ – နီဝရဏာ စေဝ နီဝရဏိယာ စာတိပိ, နီဝရဏိယာ စေဝ နော စ နီဝရဏာတိပိ။
၁၅၁၁. ကတမေ ဓမ္မာ နီဝရဏာ စေဝ နီဝရဏသမ္ပယုတ္တာ စ? ယတ္ထ ဒွေ တီဏိ နီဝရဏာနိ ဧကတော ဥပ္ပဇ္ဇန္တိ – ဣမေ ဓမ္မာ နီဝရဏာ စေဝ နီဝရဏသမ္ပယုတ္တာ စ။
၁၅၁၂. ကတမေ ဓမ္မာ နီဝရဏသမ္ပယုတ္တာ စေဝ နော စ နီဝရဏာ? ဌပေတွာ နီဝရဏေ, အဝသေသံ အကုသလံ – ဣမေ ဓမ္မာ နီဝရဏသမ္ပယုတ္တာ စေဝ နော စ နီဝရဏာ။ နီဝရဏဝိပ္ပယုတ္တာ ဓမ္မာ န ဝတ္တဗ္ဗာ – နီဝရဏာ စေဝ နီဝရဏသမ္ပယုတ္တာ စာတိပိ, နီဝရဏသမ္ပယုတ္တာ စေဝ နော စ နီဝရဏာတိပိ။
၁၅၁၃. ကတမေ ဓမ္မာ နီဝရဏဝိပ္ပယုတ္တာ နီဝရဏိယာ? တီသု ဘူမီသု ကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ နီဝရဏဝိပ္ပယုတ္တာ နီဝရဏိယာ။
၁၅၁၄. ကတမေ ဓမ္မာ နီဝရဏဝိပ္ပယုတ္တာ အနီဝရဏိယာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ နီဝရဏဝိပ္ပယုတ္တာ အနီဝရဏိယာ။ နီဝရဏသမ္ပယုတ္တာ ဓမ္မာ န ဝတ္တဗ္ဗာ – နီဝရဏဝိပ္ပယုတ္တာ နီဝရဏိယာတိပိ, နီဝရဏဝိပ္ပယုတ္တာ အနီဝရဏိယာတိပိ။
ပရာမာသဂေါစ္ဆကံ
၁၅၁၅. ကတမေ ဓမ္မာ ပရာမာသာ? ဒိဋ္ဌိပရာမာသော စတူသု ဒိဋ္ဌိဂတသမ္ပယုတ္တေသု စိတ္တုပ္ပါဒေသု ဥပ္ပဇ္ဇတိ – ဣမေ ဓမ္မာ ပရာမာသာ။
၁၅၁၆. ကတမေ ဓမ္မာ နော ပရာမာသာ? ဌပေတွာ ပရာမာသံ အဝသေသံ အကုသလံ, စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ နော ပရာမာသာ။
၁၅၁၇. ကတမေ ဓမ္မာ ပရာမဋ္ဌာ? တီသု ဘူမီသု ကုသလံ, အကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ ပရာမဋ္ဌာ။
၁၅၁၈. ကတမေ ဓမ္မာ အပရာမဋ္ဌာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ နိဗ္ဗာနဉ္စ – ဣမေ ဓမ္မာ အပရာမဋ္ဌာ။
၁၅၁၉. ကတမေ ဓမ္မာ ပရာမာသသမ္ပယုတ္တာ? စတ္တာရော ဒိဋ္ဌိဂတသမ္ပယုတ္တစိတ္တုပ္ပါဒါ, ဧတ္ထုပ္ပန္နံ ပရာမာသံ ဌပေတွာ – ဣမေ ဓမ္မာ ပရာမာသသမ္ပယုတ္တာ။
၁၅၂၀. ကတမေ ဓမ္မာ ပရာမာသဝိပ္ပယုတ္တာ? စတ္တာရော ဒိဋ္ဌိဂတဝိပ္ပယုတ္တလောဘသဟဂတစိတ္တုပ္ပါဒါ , ဒွေ ဒေါမနဿသဟဂတစိတ္တုပ္ပါဒါ, ဝိစိကိစ္ဆာသဟဂတော စိတ္တုပ္ပါဒေါ, ဥဒ္ဓစ္စသဟဂတော စိတ္တုပ္ပါဒေါ, စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ ပရာမာသဝိပ္ပယုတ္တာ။ ပရာမာသော န ဝတ္တဗ္ဗော – ပရာမာသသမ္ပယုတ္တောတိပိ, ပရာမာသဝိပ္ပယုတ္တောတိပိ။
၁၅၂၁. ကတမေ ဓမ္မာ ပရာမာသာ စေဝ ပရာမဋ္ဌာ စ? သော ဧဝ ပရာမာသော ပရာမာသော စေဝ ပရာမဋ္ဌော စ။
၁၅၂၂. ကတမေ ဓမ္မာ ပရာမဋ္ဌာ စေဝ နော စ ပရာမာသာ? ဌပေတွာ ပရာမာသံ အဝသေသံ အကုသလံ, တီသု ဘူမီသု ကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ ပရာမဋ္ဌာ စေဝ နော စ ပရာမာသာ။ အပရာမဋ္ဌာ ဓမ္မာ န ဝတ္တဗ္ဗာ – ပရာမာသာ စေဝ ပရာမဋ္ဌာ စာတိပိ, ပရာမဋ္ဌာ စေဝ နော စ ပရာမာသာတိပိ။
၁၅၂၃. ကတမေ ဓမ္မာ ပရာမာသဝိပ္ပယုတ္တာ ပရာမဋ္ဌာ? စတ္တာရော ဒိဋ္ဌိဂတဝိပ္ပယုတ္တလောဘသဟဂတစိတ္တုပ္ပါဒါ, ဒွေ ဒေါမနဿသဟဂတစိတ္တုပ္ပါဒါ, ဝိစိကိစ္ဆာသဟဂတော စိတ္တုပ္ပါဒေါ, ဥဒ္ဓစ္စသဟဂတော စိတ္တုပ္ပါဒေါ, တီသု ဘူမီသု ကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ ပရာမာသဝိပ္ပယုတ္တာ ပရာမဋ္ဌာ။
၁၅၂၄. ကတမေ ဓမ္မာ ပရာမာသဝိပ္ပယုတ္တာ အပရာမဋ္ဌာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ ပရာမာသဝိပ္ပယုတ္တာ အပရာမဋ္ဌာ။ ပရာမာသာ စ ပရာမာသသမ္ပယုတ္တာ စ ဓမ္မာ န ဝတ္တဗ္ဗာ – ပရာမာသဝိပ္ပယုတ္တာ ပရာမဋ္ဌာတိပိ, ပရာမာသဝိပ္ပယုတ္တာ အပရာမဋ္ဌာတိပိ။
မဟန္တရဒုကံ
၁၅၂၅. ကတမေ ဓမ္မာ သာရမ္မဏာ? စတူသု ဘူမီသု ကုသလံ, အကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ – ဣမေ ဓမ္မာ သာရမ္မဏာ။
၁၅၂၆. ကတမေ ဓမ္မာ အနာရမ္မဏာ? ရူပဉ္စ, နိဗ္ဗာနဉ္စ – ဣမေ ဓမ္မာ အနာရမ္မဏာ။
၁၅၂၇. ကတမေ ဓမ္မာ စိတ္တာ? စက္ခုဝိညာဏံ, သောတဝိညာဏံ, ဃာနဝိညာဏံ, ဇိဝှာဝိညာဏံ, ကာယဝိညာဏံ, မနောဓါတု, မနောဝိညာဏဓါတု – ဣမေ ဓမ္မာ စိတ္တာ။
၁၅၂၈. ကတမေ ဓမ္မာ နော စိတ္တာ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ရူပဉ္စ, နိဗ္ဗာနဉ္စ – ဣမေ ဓမ္မာ နော စိတ္တာ။
၁၅၂၉. ကတမေ ဓမ္မာ စေတသိကာ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော – ဣမေ ဓမ္မာ စေတသိကာ။
၁၅၃၀. ကတမေ ဓမ္မာ အစေတသိကာ? စိတ္တဉ္စ, ရူပဉ္စ, နိဗ္ဗာနဉ္စ – ဣမေ ဓမ္မာ အစေတသိကာ။
၁၅၃၁. ကတမေ ဓမ္မာ စိတ္တသမ္ပယုတ္တာ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော – ဣမေ ဓမ္မာ စိတ္တသမ္ပယုတ္တာ။
၁၅၃၂. ကတမေ ဓမ္မာ စိတ္တဝိပ္ပယုတ္တာ? ရူပဉ္စ, နိဗ္ဗာနဉ္စ – ဣမေ ဓမ္မာ စိတ္တဝိပ္ပယုတ္တာ။ စိတ္တံ န ဝတ္တဗ္ဗံ – စိတ္တေန သမ္ပယုတ္တန္တိပိ, စိတ္တေန ဝိပ္ပယုတ္တန္တိပိ။
၁၅၃၃. ကတမေ ဓမ္မာ စိတ္တသံသဋ္ဌာ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော – ဣမေ ဓမ္မာ စိတ္တသံသဋ္ဌာ။
၁၅၃၄. ကတမေ ဓမ္မာ စိတ္တဝိသံသဋ္ဌာ? ရူပဉ္စ, နိဗ္ဗာနဉ္စ – ဣမေ ဓမ္မာ စိတ္တဝိသံသဋ္ဌာ။ စိတ္တံ န ဝတ္တဗ္ဗံ – စိတ္တေန သံသဋ္ဌန္တိပိ, စိတ္တေန ဝိသံသဋ္ဌန္တိပိ။
၁၅၃၅. ကတမေ ဓမ္မာ စိတ္တသမုဋ္ဌာနာ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ကာယဝိညတ္တိ, ဝစီဝိညတ္တိ, ယံ ဝါ ပနညမ္ပိ အတ္ထိ ရူပံ စိတ္တဇံ စိတ္တဟေတုကံ စိတ္တသမုဋ္ဌာနံ – ရူပါယတနံ သဒ္ဒါယတနံ ဂန္ဓာယတနံ ရသာယတနံ ဖောဋ္ဌဗ္ဗာယတနံ အာကာသဓါတု အာပေါဓါတု ရူပဿ လဟုတာ ရူပဿ မုဒုတာ ရူပဿ ကမ္မညတာ ရူပဿ ဥပစယော ရူပဿ သန္တတိ ကဗဠီကာရော အာဟာရော – ဣမေ ဓမ္မာ စိတ္တသမုဋ္ဌာနာ။
၁၅၃၆. ကတမေ ဓမ္မာ နော စိတ္တသမုဋ္ဌာနာ? စိတ္တဉ္စ, အဝသေသဉ္စ ရူပံ, နိဗ္ဗာနဉ္စ – ဣမေ ဓမ္မာ နော စိတ္တသမုဋ္ဌာနာ။
၁၅၃၇. ကတမေ ဓမ္မာ စိတ္တသဟဘုနော? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ကာယဝိညတ္တိ, ဝစီဝိညတ္တိ – ဣမေ ဓမ္မာ စိတ္တသဟဘုနော။
၁၅၃၈. ကတမေ ဓမ္မာ နော စိတ္တသဟဘုနော? စိတ္တဉ္စ, အဝသေသဉ္စ ရူပံ, နိဗ္ဗာနဉ္စ – ဣမေ ဓမ္မာ နော စိတ္တသဟဘုနော။
၁၅၃၉. ကတမေ ဓမ္မာ စိတ္တာနုပရိဝတ္တိနော? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ကာယဝိညတ္တိ, ဝစီဝိညတ္တိ – ဣမေ ဓမ္မာ စိတ္တာနုပရိဝတ္တိနော။
၁၅၄၀. ကတမေ ဓမ္မာ နော စိတ္တာနုပရိဝတ္တိနော? စိတ္တဉ္စ, အဝသေသဉ္စ ရူပံ, နိဗ္ဗာနဉ္စ – ဣမေ ဓမ္မာ နော စိတ္တာနုပရိဝတ္တိနော။
၁၅၄၁. ကတမေ ဓမ္မာ စိတ္တသံသဋ္ဌသမုဋ္ဌာနာ? ဝေဒနာက္ခန္ဓော , သညာက္ခန္ဓော, သင်္ခါရက္ခန္ဓော – ဣမေ ဓမ္မာ စိတ္တသံသဋ္ဌသမုဋ္ဌာနာ။
၁၅၄၂. ကတမေ ဓမ္မာ နော စိတ္တသံသဋ္ဌသမုဋ္ဌာနာ? စိတ္တဉ္စ, ရူပဉ္စ, နိဗ္ဗာနဉ္စ – ဣမေ ဓမ္မာ နော စိတ္တသံသဋ္ဌသမုဋ္ဌာနာ။
၁၅၄၃. ကတမေ ဓမ္မာ စိတ္တသံသဋ္ဌသမုဋ္ဌာနသဟဘုနော? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော – ဣမေ ဓမ္မာ စိတ္တသံသဋ္ဌသမုဋ္ဌာနသဟဘုနော။
၁၅၄၄. ကတမေ ဓမ္မာ နော စိတ္တသံသဋ္ဌသမုဋ္ဌာနသဟဘုနော? စိတ္တဉ္စ, ရူပဉ္စ , နိဗ္ဗာနဉ္စ – ဣမေ ဓမ္မာ နော စိတ္တသံသဋ္ဌသမုဋ္ဌာနသဟဘုနော။
၁၅၄၅. ကတမေ ဓမ္မာ စိတ္တသံသဋ္ဌသမုဋ္ဌာနာနုပရိဝတ္တိနော? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော – ဣမေ ဓမ္မာ စိတ္တသံသဋ္ဌသမုဋ္ဌာနာနုပရိဝတ္တိနော။
၁၅၄၆. ကတမေ ဓမ္မာ နော စိတ္တသံသဋ္ဌသမုဋ္ဌာနာနုပရိဝတ္တိနော? စိတ္တဉ္စ, ရူပဉ္စ, နိဗ္ဗာနဉ္စ – ဣမေ ဓမ္မာ နော စိတ္တသံသဋ္ဌသမုဋ္ဌာနာနုပရိဝတ္တိနော။
၁၅၄၇. ကတမေ ဓမ္မာ အဇ္ဈတ္တိကာ? စက္ခာယတနံ။ပေ.။ မနာယတနံ – ဣမေ ဓမ္မာ အဇ္ဈတ္တိကာ။
၁၅၄၈. ကတမေ ဓမ္မာ ဗာဟိရာ? ရူပါယတနံ။ပေ.။ ဓမ္မာယတနံ – ဣမေ ဓမ္မာ ဗာဟိရာ။
၁၅၄၉. ကတမေ ဓမ္မာ ဥပါဒါ? စက္ခာယတနံ။ပေ.။ ကဗဠီကာရော အာဟာရော – ဣမေ ဓမ္မာ ဥပါဒါ။
၁၅၅၀. ကတမေ ဓမ္မာ နော ဥပါဒါ? စတူသု ဘူမီသု ကုသလံ, အကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, စတ္တာရော စ မဟာဘူတာ, နိဗ္ဗာနဉ္စ – ဣမေ ဓမ္မာ နော ဥပါဒါ။
၁၅၅၁. ကတမေ ဓမ္မာ ဥပါဒိဏ္ဏာ? တီသု ဘူမီသု ဝိပါကော, ယဉ္စ ရူပံ ကမ္မဿ ကတတ္တာ – ဣမေ ဓမ္မာ ဥပါဒိဏ္ဏာ။
၁၅၅၂. ကတမေ ဓမ္မာ အနုပါဒိဏ္ဏာ? တီသု ဘူမီသု ကုသလံ, အကုသလံ, တီသု ဘူမီသု ကိရိယာဗျာကတံ, ယဉ္စ ရူပံ န ကမ္မဿ ကတတ္တာ, စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ အနုပါဒိဏ္ဏာ။
ဥပါဒါနဂေါစ္ဆကံ
၁၅၅၃. ကတမေ ဓမ္မာ ဥပါဒါနာ? စတ္တာရိ ဥပါဒါနာနိ – ကာမုပါဒါနံ , ဒိဋ္ဌုပါဒါနံ, သီလဗ္ဗတုပါဒါနံ, အတ္တဝါဒုပါဒါနံ။ ကာမုပါဒါနံ အဋ္ဌသု လောဘသဟဂတေသု စိတ္တုပ္ပါဒေသု ဥပ္ပဇ္ဇတိ။ ဒိဋ္ဌုပါဒါနဉ္စ သီလဗ္ဗတုပါဒါနဉ္စ အတ္တဝါဒုပါဒါနဉ္စ စတူသု ဒိဋ္ဌိဂတသမ္ပယုတ္တေသု စိတ္တုပ္ပါဒေသု ဥပ္ပဇ္ဇန္တိ – ဣမေ ဓမ္မာ ဥပါဒါနာ။
၁၅၅၄. ကတမေ ဓမ္မာ နော ဥပါဒါနာ? ဌပေတွာ ဥပါဒါနေ အဝသေသံ အကုသလံ, စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ နော ဥပါဒါနာ။
၁၅၅၅. ကတမေ ဓမ္မာ ဥပါဒါနိယာ? တီသု ဘူမီသု ကုသလံ, အကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ ဥပါဒါနိယာ။
၁၅၅၆. ကတမေ ဓမ္မာ အနုပါဒါနိယာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ အနုပါဒါနိယာ။
၁၅၅၇. ကတမေ ဓမ္မာ ဥပါဒါနသမ္ပယုတ္တာ? စတ္တာရော ဒိဋ္ဌိဂတသမ္ပယုတ္တလောဘသဟဂတစိတ္တုပ္ပါဒါ, စတ္တာရော ဒိဋ္ဌိဂတဝိပ္ပယုတ္တလောဘသဟဂတစိတ္တုပ္ပါဒါ, ဧတ္ထုပ္ပန္နံ လောဘံ ဌပေတွာ – ဣမေ ဓမ္မာ ဥပါဒါနသမ္ပယုတ္တာ။
၁၅၅၈. ကတမေ ဓမ္မာ ဥပါဒါနဝိပ္ပယုတ္တာ? စတူသု ဒိဋ္ဌိဂတဝိပ္ပယုတ္တလောဘသဟဂတေသု စိတ္တုပ္ပါဒေသု ဥပ္ပန္နော လောဘော, ဒွေ ဒေါမနဿသဟဂတစိတ္တုပ္ပါဒါ, ဝိစိကိစ္ဆာသဟဂတော စိတ္တုပ္ပါဒေါ, ဥဒ္ဓစ္စသဟဂတော စိတ္တုပ္ပါဒေါ, စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ ဥပါဒါနဝိပ္ပယုတ္တာ။
၁၅၅၉. ကတမေ ဓမ္မာ ဥပါဒါနာ စေဝ ဥပါဒါနိယာ စ? တာနေဝ ဥပါဒါနာနိ ဥပါဒါနာ စေဝ ဥပါဒါနိယာ စ။
၁၅၆၀. ကတမေ ဓမ္မာ ဥပါဒါနိယာ စေဝ နော စ ဥပါဒါနာ? ဌပေတွာ ဥပါဒါနေ အဝသေသံ အကုသလံ, တီသု ဘူမီသု ကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ ဥပါဒါနိယာ စေဝ နော စ ဥပါဒါနာ ။ အနုပါဒါနိယာ ဓမ္မာ န ဝတ္တဗ္ဗာ – ဥပါဒါနာ စေဝ ဥပါဒါနိယာ စာတိပိ, ဥပါဒါနိယာ စေဝ နော စ ဥပါဒါနာတိပိ။
၁၅၆၁. ကတမေ ဓမ္မာ ဥပါဒါနာ စေဝ ဥပါဒါနသမ္ပယုတ္တာ စ? ယတ္ထ ဒိဋ္ဌိ စ လောဘော စ ဧကတော ဥပ္ပဇ္ဇန္တိ – ဣမေ ဓမ္မာ ဥပါဒါနာ စေဝ ဥပါဒါနသမ္ပယုတ္တာ စ။
၁၅၆၂. ကတမေ ဓမ္မာ ဥပါဒါနသမ္ပယုတ္တာ စေဝ နော စ ဥပါဒါနာ? အဋ္ဌ လောဘသဟဂတစိတ္တုပ္ပါဒါ, ဧတ္ထုပ္ပန္နေ ဥပါဒါနေ ဌပေတွာ – ဣမေ ဓမ္မာ ဥပါဒါနသမ္ပယုတ္တာ စေဝ နော စ ဥပါဒါနာ။ ဥပါဒါနဝိပ္ပယုတ္တာ ဓမ္မာ န ဝတ္တဗ္ဗာ – ဥပါဒါနာ စေဝ ဥပါဒါနသမ္ပယုတ္တာ စာတိပိ, ဥပါဒါနသမ္ပယုတ္တာ စေဝ နော စ ဥပါဒါနာတိပိ။
၁၅၆၃. ကတမေ ဓမ္မာ ဥပါဒါနဝိပ္ပယုတ္တာ ဥပါဒါနိယာ? စတူသု ဒိဋ္ဌိဂတဝိပ္ပယုတ္တလောဘသဟဂတေသု စိတ္တုပ္ပါဒေသု ဥပ္ပန္နော လောဘော, ဒွေ ဒေါမနဿသဟဂတစိတ္တုပ္ပါဒါ, ဝိစိကိစ္ဆာသဟဂတော စိတ္တုပ္ပါဒေါ, ဥဒ္ဓစ္စသဟဂတော စိတ္တုပ္ပါဒေါ, တီသု ဘူမီသု ကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ ဥပါဒါနဝိပ္ပယုတ္တာ ဥပါဒါနိယာ။
၁၅၆၄. ကတမေ ဓမ္မာ ဥပါဒါနဝိပ္ပယုတ္တာ အနုပါဒါနိယာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ ဥပါဒါနဝိပ္ပယုတ္တာ အနုပါဒါနိယာ။ ဥပါဒါနသမ္ပယုတ္တာ ဓမ္မာ န ဝတ္တဗ္ဗာ – ဥပါဒါနဝိပ္ပယုတ္တာ ဥပါဒါနိယာတိပိ, ဥပါဒါနဝိပ္ပယုတ္တာ အနုပါဒါနိယာတိပိ။
ကိလေသဂေါစ္ဆကံ
၁၅၆၅. ကတမေ ဓမ္မာ ကိလေသာ? ဒသ ကိလေသဝတ္ထူနိ – လောဘော, ဒေါသော, မောဟော, မာနော, ဒိဋ္ဌိ, ဝိစိကိစ္ဆာ, ထိနံ, ဥဒ္ဓစ္စံ, အဟိရိကံ, အနောတ္တပ္ပံ။ လောဘော အဋ္ဌသု လောဘသဟဂတေသု စိတ္တုပ္ပါဒေသု ဥပ္ပဇ္ဇတိ။ ဒေါသော ဒွီသု ဒေါမနဿသဟဂတေသု စိတ္တုပ္ပါဒေသု ဥပ္ပဇ္ဇတိ။ မောဟော သဗ္ဗာကုသလေသု ဥပ္ပဇ္ဇတိ။ မာနော စတူသု ဒိဋ္ဌိဂတဝိပ္ပယုတ္တလောဘသဟဂတေသု စိတ္တုပ္ပါဒေသု ဥပ္ပဇ္ဇတိ။ ဒိဋ္ဌိ စတူသု ဒိဋ္ဌိဂတသမ္ပယုတ္တေသု စိတ္တုပ္ပါဒေသု ဥပ္ပဇ္ဇတိ။ ဝိစိကိစ္ဆာ ဝိစိကိစ္ဆာသဟဂတေသု စိတ္တုပ္ပါဒေသု ဥပ္ပဇ္ဇတိ။ ထိနံ သသင်္ခါရိကေသု အကုသလေသု ဥပ္ပဇ္ဇတိ။ ဥဒ္ဓစ္စဉ္စ အဟိရိကဉ္စ အနောတ္တပ္ပဉ္စ သဗ္ဗာကုသလေသု ဥပ္ပဇ္ဇန္တိ – ဣမေ ဓမ္မာ ကိလေသာ။
၁၅၆၆. ကတမေ ဓမ္မာ နော ကိလေသာ? ဌပေတွာ ကိလေသေ အဝသေသံ အကုသလံ, စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ နော ကိလေသာ။
၁၅၆၇. ကတမေ ဓမ္မာ သံကိလေသိကာ? တီသု ဘူမီသု ကုသလံ, အကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ သဗ္ဗဉ္စ ရူပံ – ဣမေ ဓမ္မာ သံကိလေသိကာ။
၁၅၆၈. ကတမေ ဓမ္မာ အသံကိလေသိကာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ အသံကိလေသိကာ။
၁၅၆၉. ကတမေ ဓမ္မာ သံကိလိဋ္ဌာ? ဒွါဒသ အကုသလစိတ္တုပ္ပါဒါ – ဣမေ ဓမ္မာ သံကိလိဋ္ဌာ။
၁၅၇၀. ကတမေ ဓမ္မာ အသံကိလိဋ္ဌာ? စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ အသံကိလိဋ္ဌာ။
၁၅၇၁. ကတမေ ဓမ္မာ ကိလေသသမ္ပယုတ္တာ? ဒွါဒသ အကုသလစိတ္တုပ္ပါဒါ – ဣမေ ဓမ္မာ ကိလေသသမ္ပယုတ္တာ။
၁၅၇၂. ကတမေ ဓမ္မာ ကိလေသဝိပ္ပယုတ္တာ? စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ ကိလေသဝိပ္ပယုတ္တာ။
၁၅၇၃. ကတမေ ဓမ္မာ ကိလေသာ စေဝ သံကိလေသိကာ စ? တေဝ ကိလေသာ ကိလေသာ စေဝ သံကိလေသိကာ စ။
၁၅၇၄. ကတမေ ဓမ္မာ သံကိလေသိကာ စေဝ နော စ ကိလေသာ? ဌပေတွာ ကိလေသေ အဝသေသံ အကုသလံ, တီသု ဘူမီသု ကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ သံကိလေသိကာ စေဝ နော စ ကိလေသာ။ အသံကိလေသိကာ ဓမ္မာ န ဝတ္တဗ္ဗာ – ကိလေသာ စေဝ သံကိလေသိကာ စာတိပိ, သံကိလေသိကာ စေဝ နော စ ကိလေသာတိပိ။
၁၅၇၅. ကတမေ ဓမ္မာ ကိလေသာ စေဝ သံကိလိဋ္ဌာ စ? တေဝ ကိလေသာ ကိလေသာ စေဝ သံကိလိဋ္ဌာ စ။
၁၅၇၆. ကတမေ ဓမ္မာ သံကိလိဋ္ဌာ စေဝ နော စ ကိလေသာ? ဌပေတွာ ကိလေသေ အဝသေသံ အကုသလံ – ဣမေ ဓမ္မာ သံကိလိဋ္ဌာ စေဝ နော စ ကိလေသာ ။ အသံကိလိဋ္ဌာ ဓမ္မာ န ဝတ္တဗ္ဗာ – ကိလေသာ စေဝ သံကိလိဋ္ဌာ စာတိပိ, သံကိလိဋ္ဌာ စေဝ နော စ ကိလေသာတိပိ။
၁၅၇၇. ကတမေ ဓမ္မာ ကိလေသာ စေဝ ကိလေသသမ္ပယုတ္တာ စ? ယတ္ထ ဒွေ တယော ကိလေသာ ဧကတော ဥပ္ပဇ္ဇန္တိ – ဣမေ ဓမ္မာ ကိလေသာ စေဝ ကိလေသသမ္ပယုတ္တာ စ။
၁၅၇၈. ကတမေ ဓမ္မာ ကိလေသသမ္ပယုတ္တာ စေဝ နော စ ကိလေသာ? ဌပေတွာ ကိလေသေ အဝသေသံ အကုသလံ – ဣမေ ဓမ္မာ ကိလေသသမ္ပယုတ္တာ စေဝ နော စ ကိလေသာ။ ကိလေသဝိပ္ပယုတ္တာ ဓမ္မာ န ဝတ္တဗ္ဗာ – ကိလေသာ စေဝ ကိလေသသမ္ပယုတ္တာ စာတိပိ, ကိလေသသမ္ပယုတ္တာ စေဝ နော စ ကိလေသာတိပိ။
၁၅၇၉. ကတမေ ဓမ္မာ ကိလေသဝိပ္ပယုတ္တာ သံကိလေသိကာ? တီသု ဘူမီသု ကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ ကိလေသဝိပ္ပယုတ္တာ သံကိလေသိကာ။
၁၅၈၀. ကတမေ ဓမ္မာ ကိလေသဝိပ္ပယုတ္တာ အသံကိလေသိကာ? စတ္တာရော မဂ္ဂါ အပရိယာပန္နာ , စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ ကိလေသဝိပ္ပယုတ္တာ အသံကိလေသိကာ။ ကိလေသသမ္ပယုတ္တာ ဓမ္မာ န ဝတ္တဗ္ဗာ – ကိလေသဝိပ္ပယုတ္တာ သံကိလေသိကာတိပိ, ကိလေသဝိပ္ပယုတ္တာ အသံကိလေသိကာတိပိ။
ပိဋ္ဌိဒုကံ
၁၅၈၁. ကတမေ ဓမ္မာ ဒဿနေန ပဟာတဗ္ဗာ? စတ္တာရော ဒိဋ္ဌိဂတသမ္ပယုတ္တစိတ္တုပ္ပါဒါ, ဝိစိကိစ္ဆာသဟဂတော စိတ္တုပ္ပါဒေါ – ဣမေ ဓမ္မာ ဒဿနေန ပဟာတဗ္ဗာ။ စတ္တာရော ဒိဋ္ဌိဂတဝိပ္ပယုတ္တလောဘသဟဂတစိတ္တုပ္ပါဒါ, ဒွေ ဒေါမနဿသဟဂတစိတ္တုပ္ပါဒါ – ဣမေ ဓမ္မာ သိယာ ဒဿနေန ပဟာတဗ္ဗာ, သိယာ န ဒဿနေန ပဟာတဗ္ဗာ။
၁၅၈၂. ကတမေ ဓမ္မာ န ဒဿနေန ပဟာတဗ္ဗာ? ဥဒ္ဓစ္စသဟဂတော စိတ္တုပ္ပါဒေါ, စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ န ဒဿနေန ပဟာတဗ္ဗာ။
၁၅၈၃. ကတမေ ဓမ္မာ ဘာဝနာယ ပဟာတဗ္ဗာ? ဥဒ္ဓစ္စသဟဂတော စိတ္တုပ္ပါဒေါ – ဣမေ ဓမ္မာ ဘာဝနာယ ပဟာတဗ္ဗာ။ စတ္တာရော ဒိဋ္ဌိဂတဝိပ္ပယုတ္တလောဘသဟဂတစိတ္တုပ္ပါဒါ, ဒွေ ဒေါမနဿသဟဂတစိတ္တုပ္ပါဒါ – ဣမေ ဓမ္မာ သိယာ ဘာဝနာယ ပဟာတဗ္ဗာ, သိယာ န ဘာဝနာယ ပဟာတဗ္ဗာ။
၁၅၈၄. ကတမေ ဓမ္မာ န ဘာဝနာယ ပဟာတဗ္ဗာ? စတ္တာရော ဒိဋ္ဌိဂတသမ္ပယုတ္တစိတ္တုပ္ပါဒါ, ဝိစိကိစ္ဆာသဟဂတော စိတ္တုပ္ပါဒေါ, စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ န ဘာဝနာယ ပဟာတဗ္ဗာ။
၁၅၈၅. ကတမေ ဓမ္မာ ဒဿနေန ပဟာတဗ္ဗဟေတုကာ? စတ္တာရော ဒိဋ္ဌိဂတသမ္ပယုတ္တစိတ္တုပ္ပါဒါ, ဝိစိကိစ္ဆာသဟဂတော စိတ္တုပ္ပါဒေါ, ဧတ္ထုပ္ပန္နံ မောဟံ ဌပေတွာ – ဣမေ ဓမ္မာ ဒဿနေန ပဟာတဗ္ဗဟေတုကာ။ စတ္တာရော ဒိဋ္ဌိဂတဝိပ္ပယုတ္တလောဘသဟဂတစိတ္တုပ္ပါဒါ, ဒွေ ဒေါမနဿသဟဂတစိတ္တုပ္ပါဒါ – ဣမေ ဓမ္မာ သိယာ ဒဿနေန ပဟာတဗ္ဗဟေတုကာ, သိယာ န ဒဿနေန ပဟာတဗ္ဗဟေတုကာ။
၁၅၈၆. ကတမေ ဓမ္မာ န ဒဿနေန ပဟာတဗ္ဗဟေတုကာ? ဝိစိကိစ္ဆာသဟဂတော မောဟော, ဥဒ္ဓစ္စသဟဂတော စိတ္တုပ္ပါဒေါ, စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ န ဒဿနေန ပဟာတဗ္ဗဟေတုကာ။
၁၅၈၇. ကတမေ ဓမ္မာ ဘာဝနာယ ပဟာတဗ္ဗဟေတုကာ? ဥဒ္ဓစ္စသဟဂတော စိတ္တုပ္ပါဒေါ, ဧတ္ထုပ္ပန္နံ မောဟံ ဌပေတွာ – ဣမေ ဓမ္မာ ဘာဝနာယ ပဟာတဗ္ဗဟေတုကာ။ စတ္တာရော ဒိဋ္ဌိဂတဝိပ္ပယုတ္တလောဘသဟဂတစိတ္တုပ္ပါဒါ, ဒွေ ဒေါမနဿသဟဂတစိတ္တုပ္ပါဒါ – ဣမေ ဓမ္မာ သိယာ ဘာဝနာယ ပဟာတဗ္ဗဟေတုကာ, သိယာ န ဘာဝနာယ ပဟာတဗ္ဗဟေတုကာ။
၁၅၈၈. ကတမေ ဓမ္မာ န ဘာဝနာယ ပဟာတဗ္ဗဟေတုကာ? စတ္တာရော ဒိဋ္ဌိဂတသမ္ပယုတ္တစိတ္တုပ္ပါဒါ, ဝိစိကိစ္ဆာသဟဂတော စိတ္တုပ္ပါဒေါ, ဥဒ္ဓစ္စသဟဂတော မောဟော, စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ န ဘာဝနာယ ပဟာတဗ္ဗဟေတုကာ။
၁၅၈၉. ကတမေ ဓမ္မာ သဝိတက္ကာ? ကာမာဝစရကုသလံ, အကုသလံ, ကာမာဝစရကုသလဿ ဝိပါကတော ဧကာဒသ စိတ္တုပ္ပါဒါ, အကုသလဿ ဝိပါကတော ဒွေ, ကိရိယတော ဧကာဒသ, ရူပါဝစရံ ပဌမံ ဈာနံ ကုသလတော စ ဝိပါကတော စ ကိရိယတော စ လောကုတ္တရံ ပဌမံ ဈာနံ ကုသလတော စ ဝိပါကတော စ, ဧတ္ထုပ္ပန္နံ ဝိတက္ကံ ဌပေတွာ – ဣမေ ဓမ္မာ သဝိတက္ကာ။
၁၅၉၀. ကတမေ ဓမ္မာ အဝိတက္ကာ? ဒွေပဉ္စဝိညာဏာနိ, ရူပါဝစရတိကစတုက္ကဇ္ဈာနာ ကုသလတော စ ဝိပါကတော စ ကိရိယတော စ, စတ္တာရော အရူပါဝစရာ ကုသလတော စ ဝိပါကတော စ ကိရိယတော စ, လောကုတ္တရတိကစတုက္ကဇ္ဈာနာ ကုသလတော စ ဝိပါကတော စ, ဝိတက္ကော စ, ရူပဉ္စ, နိဗ္ဗာနဉ္စ – ဣမေ ဓမ္မာ အဝိတက္ကာ။
၁၅၉၁. ကတမေ ဓမ္မာ သဝိစာရာ? ကာမာဝစရကုသလံ , အကုသလံ, ကာမာဝစရကုသလဿ ဝိပါကတော ဧကာဒသ စိတ္တုပ္ပါဒါ, အကုသလဿ ဝိပါကတော ဒွေ ကိရိယတော ဧကာဒသ, ရူပါဝစရဧကကဒုကဇ္ဈာနာ ကုသလတော စ ဝိပါကတော စ ကိရိယတော စ, လောကုတ္တရဧကကဒုကဇ္ဈာနာ ကုသလတော စ ဝိပါကတော စ, ဧတ္ထုပ္ပန္နံ ဝိစာရံ ဌပေတွာ – ဣမေ ဓမ္မာ သဝိစာရာ။
၁၅၉၂. ကတမေ ဓမ္မာ အဝိစာရာ? ဒွေပဉ္စဝိညာဏာနိ, ရူပါဝစရတိကတိကဇ္ဈာနာ ကုသလတော စ ဝိပါကတော စ ကိရိယတော စ, စတ္တာရော အာရုပ္ပါ ကုသလတော စ ဝိပါကတော စ ကိရိယတော စ, လောကုတ္တရတိကတိကဇ္ဈာနာ ကုသလတော စ ဝိပါကတော စ, ဝိစာရော စ, ရူပဉ္စ, နိဗ္ဗာနဉ္စ – ဣမေ ဓမ္မာ အဝိစာရာ။
၁၅၉၃. ကတမေ ဓမ္မာ သပ္ပီတိကာ? ကာမာဝစရကုသလတော စတ္တာရော သောမနဿသဟဂတစိတ္တုပ္ပါဒါ, အကုသလတော စတ္တာရော, ကာမာဝစရကုသလဿ ဝိပါကတော ပဉ္စ, ကိရိယတော ပဉ္စ, ရူပါဝစရဒုကတိကဇ္ဈာနာ ကုသလတော စ ဝိပါကတော စ ကိရိယတော စ, လောကုတ္တရဒုကတိကဇ္ဈာနာ ကုသလတော စ ဝိပါကတော စ, ဧတ္ထုပ္ပန္နံ ဣတိံ ဌပေတွာ – ဣမေ ဓမ္မာ သပ္ပီတိကာ။
၁၅၉၄. ကတမေ ဓမ္မာ အပ္ပီတိကာ? ကာမာဝစရကုသလတော စတ္တာရော ဥပေက္ခာသဟဂတစိတ္တုပ္ပါဒါ, အကုသလတော အဋ္ဌ, ကာမာဝစရကုသလဿ ဝိပါကတော ဧကာဒသ, အကုသလဿ ဝိပါကတော သတ္တ, ကိရိယတော ဆ, ရူပါဝစရဒုကဒုကဇ္ဈာနာ ကုသလတော စ ဝိပါကတော စ ကိရိယတော စ, စတ္တာရော အာရုပ္ပါ ကုသလတော စ ဝိပါကတော စ ကိရိယတော စ, လောကုတ္တရဒုကဒုကဇ္ဈာနာ ကုသလတော စ ဝိပါကတော စ ဣတိ စ, ရူပဉ္စ, နိဗ္ဗာနဉ္စ – ဣမေ ဓမ္မာ အပ္ပီတိကာ။
၁၅၉၅. ကတမေ ဓမ္မာ ဣတိသဟဂတာ? ကာမာဝစရကုသလတော စတ္တာရော သောမနဿသဟဂတစိတ္တုပ္ပါဒါ, အကုသလတော စတ္တာရော, ကာမာဝစရကုသလဿ ဝိပါကတော ပဉ္စ, ကိရိယတော ပဉ္စ, ရူပါဝစရဒုကတိကဇ္ဈာနာ ကုသလတော စ ဝိပါကတော စ ကိရိယတော စ, လောကုတ္တရဒုကတိကဇ္ဈာနာ ကုသလတော စ ဝိပါကတော စ, ဧတ္ထုပ္ပန္နံ ဣတိံ ဌပေတွာ – ဣမေ ဓမ္မာ ဣတိသဟဂတာ။
၁၅၉၆. ကတမေ ဓမ္မာ န ဣတိသဟဂတာ? ကာမာဝစရကုသလတော စတ္တာရော ဥပေက္ခာသဟဂတစိတ္တုပ္ပါဒါ, အကုသလတော အဋ္ဌ, ကာမာဝစရကုသလဿ ဝိပါကတော ဧကာဒသ, အကုသလဿ ဝိပါကတော သတ္တ, ကိရိယတော ဆ, ရူပါဝစရဒုကဒုကဇ္ဈာနာ ကုသလတော စ ဝိပါကတော စ ကိရိယတော စ, စတ္တာရော အာရုပ္ပါ ကုသလတော စ ဝိပါကတော စ ကိရိယတော စ, လောကုတ္တရဒုကဒုကဇ္ဈာနာ ကုသလတော စ ဝိပါကတော စ, ဣတိ စ, ရူပဉ္စ, နိဗ္ဗာနဉ္စ – ဣမေ ဓမ္မာ န ဣတိသဟဂတာ။
၁၅၉၇. ကတမေ ဓမ္မာ သုခသဟဂတာ? ကာမာဝစရကုသလတော စတ္တာရော သောမနဿသဟဂတစိတ္တုပ္ပါဒါ, အကုသလတော စတ္တာရော, ကာမာဝစရကုသလဿ ဝိပါကတော ဆ, ကိရိယတော ပဉ္စ, ရူပါဝစရတိကစတုက္ကဇ္ဈာနာ ကုသလတော စ ဝိပါကတော စ ကိရိယတော စ လောကုတ္တရတိကစတုက္ကဇ္ဈာနာ ကုသလတော စ ဝိပါကတော စ, ဧတ္ထုပ္ပန္နံ သုခံ ဌပေတွာ – ဣမေ ဓမ္မာ သုခသဟဂတာ။
၁၅၉၈. ကတမေ ဓမ္မာ န သုခသဟဂတာ? ကာမာဝစရကုသလတော စတ္တာရော ဥပေက္ခာသဟဂတစိတ္တုပ္ပါဒါ, အကုသလတော အဋ္ဌ, ကာမာဝစရကုသလဿ ဝိပါကတော ဒသ, အကုသလဿ ဝိပါကတော သတ္တ, ကိရိယတော ဆ, ရူပါဝစရံ စတုတ္ထံ ဈာနံ ကုသလတော စ ဝိပါကတော စ ကိရိယတော စ, စတ္တာရော အာရုပ္ပါ ကုသလတော စ ဝိပါကတော စ ကိရိယတော စ လောကုတ္တရံ စတုတ္ထံ ဈာနံ ကုသလတော စ ဝိပါကတော စ, သုခဉ္စ, ရူပဉ္စ, နိဗ္ဗာနဉ္စ – ဣမေ ဓမ္မာ န သုခသဟဂတာ။
၁၅၉၉. ကတမေ ဓမ္မာ ဥပေက္ခာသဟဂတာ? ကာမာဝစရကုသလတော စတ္တာရော ဥပေက္ခာသဟဂတစိတ္တုပ္ပါဒါ, အကုသလတော ဆ, ကာမာဝစရကုသလဿ ဝိပါကတော ဒသ, အကုသလဿ ဝိပါကတော ဆ, ကိရိယတော ဆ , ရူပါဝစရံ စတုတ္ထံ ဈာနံ ကုသလတော စ ဝိပါကတော စ ကိရိယတော စ, စတ္တာရော အာရုပ္ပါ ကုသလတော စ ဝိပါကတော စ ကိရိယတော စ, လောကုတ္တရံ စတုတ္ထံ ဈာနံ ကုသလတော စ ဝိပါကတော စ, ဧတ္ထုပ္ပန္နံ ဥပေက္ခံ ဌပေတွာ – ဣမေ ဓမ္မာ ဥပေက္ခာသဟဂတာ။
၁၆၀၀. ကတမေ ဓမ္မာ န ဥပေက္ခာသဟဂတာ? ကာမာဝစရကုသလတော စတ္တာရော သောမနဿသဟဂတစိတ္တုပ္ပါဒါ, အကုသလတော ဆ, ကာမာဝစရကုသလဿ ဝိပါကတော ဆ, အကုသလဿ ဝိပါကတော ဧကော, ကိရိယတော ပဉ္စ, ရူပါဝစရတိကစတုက္ကဇ္ဈာနာ ကုသလတော စ ဝိပါကတော စ ကိရိယတော စ, လောကုတ္တရတိကစတုက္ကဇ္ဈာနာ ကုသလတော စ ဝိပါကတော စ, ဥပေက္ခာ စ, ရူပဉ္စ, နိဗ္ဗာနဉ္စ – ဣမေ ဓမ္မာ န ဥပေက္ခာသဟဂတာ။
၁၆၀၁. ကတမေ ဓမ္မာ ကာမာဝစရာ? ကာမာဝစရကုသလံ, အကုသလံ, သဗ္ဗော ကာမာဝစရဿ ဝိပါကော, ကာမာဝစရကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ ကာမာဝစရာ။
၁၆၀၂. ကတမေ ဓမ္မာ န ကာမာဝစရာ? ရူပါဝစရာ , အရူပါဝစရာ, အပရိယာပန္နာ – ဣမေ ဓမ္မာ န ကာမာဝစရာ။
၁၆၀၃. ကတမေ ဓမ္မာ ရူပါဝစရာ? ရူပါဝစရစတုက္ကပဉ္စကဇ္ဈာနာ ကုသလတော စ ဝိပါကတော စ ကိရိယတော စ – ဣမေ ဓမ္မာ ရူပါဝစရာ။
၁၆၀၄. ကတမေ ဓမ္မာ န ရူပါဝစရာ? ကာမာဝစရာ, အရူပါဝစရာ, အပရိယာပန္နာ – ဣမေ ဓမ္မာ န ရူပါဝစရာ။
၁၆၀၅. ကတမေ ဓမ္မာ အရူပါဝစရာ? စတ္တာရော အာရုပ္ပါ ကုသလတော စ ဝိပါကတော စ ကိရိယတော စ – ဣမေ ဓမ္မာ အရူပါဝစရာ။
၁၆၀၆. ကတမေ ဓမ္မာ န အရူပါဝစရာ? ကာမာဝစရာ, ရူပါဝစရာ, အပရိယာပန္နာ – ဣမေ ဓမ္မာ န အရူပါဝစရာ။
၁၆၀၇. ကတမေ ဓမ္မာ ပရိယာပန္နာ? တီသု ဘူမီသု ကုသလံ, အကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ ပရိယာပန္နာ။
၁၆၀၈. ကတမေ ဓမ္မာ အပရိယာပန္နာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ အပရိယာပန္နာ။
၁၆၀၉. ကတမေ ဓမ္မာ နိယျာနိကာ? စတ္တာရော မဂ္ဂါ အပရိယာပန္နာ – ဣမေ ဓမ္မာ နိယျာနိကာ။
၁၆၁၀. ကတမေ ဓမ္မာ အနိယျာနိကာ? တီသု ဘူမီသု ကုသလံ, အကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ အနိယျာနိကာ။
၁၆၁၁. ကတမေ ဓမ္မာ နိယတာ? စတ္တာရော ဒိဋ္ဌိဂတသမ္ပယုတ္တစိတ္တုပ္ပါဒါ, ဒွေ ဒေါမနဿသဟဂတစိတ္တုပ္ပါဒါ – ဣမေ ဓမ္မာ သိယာ နိယတာ သိယာ အနိယတာ။ စတ္တာရော မဂ္ဂါ အပရိယာပန္နာ – ဣမေ ဓမ္မာ နိယတာ။
၁၆၁၂. ကတမေ ဓမ္မာ အနိယတာ? စတ္တာရော ဒိဋ္ဌိဂတဝိပ္ပယုတ္တလောဘသဟဂတစိတ္တုပ္ပါဒါ, ဝိစိကိစ္ဆာသဟဂတော စိတ္တုပ္ပါဒေါ, ဥဒ္ဓစ္စသဟဂတော စိတ္တုပ္ပါဒေါ, တီသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ အနိယတာ။
၁၆၁၃. ကတမေ ဓမ္မာ သဥတ္တရာ? တီသု ဘူမီသု ကုသလံ, အကုသလံ, တီသု ဘူမီသု ဝိပါကော, တီသု ဘူမီသု ကိရိယာဗျာကတံ, သဗ္ဗဉ္စ ရူပံ – ဣမေ ဓမ္မာ သဥတ္တရာ။
၁၆၁၄. ကတမေ ဓမ္မာ အနုတ္တရာ? စတ္တာရော မဂ္ဂါ အပရိယာပန္နာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ အနုတ္တရာ။
၁၆၁၅. ကတမေ ဓမ္မာ သရဏာ? ဒွါဒသ အကုသလစိတ္တုပ္ပါဒါ – ဣမေ ဓမ္မာ သရဏာ။
၁၆၁၆. ကတမေ ဓမ္မာ အရဏာ? စတူသု ဘူမီသု ကုသလံ, စတူသု ဘူမီသု ဝိပါကော, တီသု ဘူမီသု ကိရိယာဗျာကတံ, ရူပဉ္စ, နိဗ္ဗာနဉ္စ – ဣမေ ဓမ္မာ အရဏာ။
အတ္ထုဒ္ဓါရော နိဋ္ဌိတော။
ဓမ္မသင်္ဂဏီပကရဏံ နိဋ္ဌိတံ။