နိက္ခေပကဏ္ဍ

၃. နိက္ခေပကဏ္ဍ

တိကနိက္ခေပ

၉၈၅. ကတမေ ဓမ္မာ ကုသလာ? တီဏိ ကုသလမူလာနိ – အလောဘော, အဒေါသော, အမောဟော; တံသမ္ပယုတ္တော ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော; တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ ကုသလာ။

၉၈၆. ကတမေ ဓမ္မာ အကုသလာ? တီဏိ အကုသလမူလာနိ – လောဘော, ဒေါသော, မောဟော; တဒေကဋ္ဌာ စ ကိလေသာ; တံသမ္ပယုတ္တော ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော; တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ အကုသလာ။

၉၈၇. ကတမေ ဓမ္မာ အဗျာကတာ? ကုသလာကုသလာနံ ဓမ္မာနံ ဝိပါကာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော; ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ အဗျာကတာ။

၉၈၈. ကတမေ ဓမ္မာ သုခါယ ဝေဒနာယ သမ္ပယုတ္တာ? သုခဘူမိယံ ကာမာဝစရေ, ရူပါဝစရေ, အပရိယာပန္နေ, သုခံ ဝေဒနံ ဌပေတွာ; တံသမ္ပယုတ္တော သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော – ဣမေ ဓမ္မာ သုခါယ ဝေဒနာယ သမ္ပယုတ္တာ။

၉၈၉. ကတမေ ဓမ္မာ ဒုက္ခာယ ဝေဒနာယ သမ္ပယုတ္တာ? ဒုက္ခဘူမိယံ ကာမာဝစရေ, ဒုက္ခံ ဝေဒနံ ဌပေတွာ; တံသမ္ပယုတ္တော သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော – ဣမေ ဓမ္မာ ဒုက္ခာယ ဝေဒနာယ သမ္ပယုတ္တာ ။

၉၉၀. ကတမေ ဓမ္မာ အဒုက္ခမသုခါယ ဝေဒနာယ သမ္ပယုတ္တာ? အဒုက္ခမသုခဘူမိယံ ကာမာဝစရေ, ရူပါဝစရေ, အရူပါဝစရေ, အပရိယာပန္နေ, အဒုက္ခမသုခံ ဝေဒနံ ဌပေတွာ; တံသမ္ပယုတ္တော သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော – ဣမေ ဓမ္မာ အဒုက္ခမသုခါယ ဝေဒနာယ သမ္ပယုတ္တာ။

၉၉၁. ကတမေ ဓမ္မာ ဝိပါကာ? ကုသလာကုသလာနံ ဓမ္မာနံ ဝိပါကာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဝိပါကာ။

၉၉၂. ကတမေ ဓမ္မာ ဝိပါကဓမ္မဓမ္မာ? ကုသလာကုသလာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဝိပါကဓမ္မဓမ္မာ။

၉၉၃. ကတမေ ဓမ္မာ နေဝဝိပါကနဝိပါကဓမ္မဓမ္မာ? ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ နေဝဝိပါကနဝိပါကဓမ္မဓမ္မာ။

၉၉၄. ကတမေ ဓမ္မာ ဥပါဒိဏ္ဏုပါဒါနိယာ? သာသဝါ ကုသလာကုသလာနံ ဓမ္မာနံ ဝိပါကာ ကာမာဝစရာ, ရူပါဝစရာ, အရူပါဝစရာ; ဝေဒနာက္ခန္ဓော။ပေ.။ ဝိညာဏက္ခန္ဓော; ယဉ္စ ရူပံ ကမ္မဿ ကတတ္တာ – ဣမေ ဓမ္မာ ဥပါဒိဏ္ဏုပါဒါနိယာ။

၉၉၅. ကတမေ ဓမ္မာ အနုပါဒိဏ္ဏုပါဒါနိယာ? သာသဝါ ကုသလာကုသလာ ဓမ္မာ ကာမာဝစရာ, ရူပါဝစရာ, အရူပါဝစရာ; ဝေဒနာက္ခန္ဓော။ပေ.။ ဝိညာဏက္ခန္ဓော; ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ; ယဉ္စ ရူပံ န ကမ္မဿ ကတတ္တာ – ဣမေ ဓမ္မာ အနုပါဒိဏ္ဏုပါဒါနိယာ။

၉၉၆. ကတမေ ဓမ္မာ အနုပါဒိဏ္ဏအနုပါဒါနိယာ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ အနုပါဒိဏ္ဏအနုပါဒါနိယာ။

၉၉၇. ကတမေ ဓမ္မာ သံကိလိဋ္ဌသံကိလေသိကာ? တီဏိ အကုသလမူလာနိ – လောဘော, ဒေါသော, မောဟော; တဒေကဋ္ဌာ စ ကိလေသာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော; တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ သံကိလိဋ္ဌသံကိလေသိကာ။

၉၉၈. ကတမေ ဓမ္မာ အသံကိလိဋ္ဌသံကိလေသိကာ? သာသဝါ ကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော, ဝေဒနာက္ခန္ဓော , သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော – ဣမေ ဓမ္မာ အသံကိလိဋ္ဌသံကိလေသိကာ။

၉၉၉. ကတမေ ဓမ္မာ အသံကိလိဋ္ဌအသံကိလေသိကာ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ အသံကိလိဋ္ဌအသံကိလေသိကာ။

၁၀၀၀. ကတမေ ဓမ္မာ သဝိတက္ကသဝိစာရာ? သဝိတက္ကသဝိစာရဘူမိယံ ကာမာဝစရေ, ရူပါဝစရေ, အပရိယာပန္နေ , ဝိတက္ကဝိစာရေ ဌပေတွာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ သဝိတက္ကသဝိစာရာ။

၁၀၀၁. ကတမေ ဓမ္မာ အဝိတက္ကဝိစာရမတ္တာ? အဝိတက္ကဝိစာရမတ္တဘူမိယံ ရူပါဝစရေ, အပရိယာပန္နေ, ဝိစာရံ ဌပေတွာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ အဝိတက္ကဝိစာရမတ္တာ။

၁၀၀၂. ကတမေ ဓမ္မာ အဝိတက္ကအဝိစာရာ? အဝိတက္ကအဝိစာရဘူမိယံ ကာမာဝစရေ, ရူပါဝစရေ , အရူပါဝစရေ, အပရိယာပန္နေ; ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ အဝိတက္ကအဝိစာရာ။

၁၀၀၃. ကတမေ ဓမ္မာ ဣတိသဟဂတာ? ဣတိဘူမိယံ ကာမာဝစရေ, ရူပါဝစရေ, အပရိယာပန္နေ , ဣတိံ ဌပေတွာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဣတိသဟဂတာ။

၁၀၀၄. ကတမေ ဓမ္မာ သုခသဟဂတာ? သုခဘူမိယံ ကာမာဝစရေ, ရူပါဝစရေ, အပရိယာပန္နေ, သုခံ ဌပေတွာ; တံသမ္ပယုတ္တော သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော – ဣမေ ဓမ္မာ သုခသဟဂတာ။

၁၀၀၅. ကတမေ ဓမ္မာ ဥပေက္ခာသဟဂတာ? ဥပေက္ခာဘူမိယံ ကာမာဝစရေ, ရူပါဝစရေ, အရူပါဝစရေ, အပရိယာပန္နေ, ဥပေက္ခံ ဌပေတွာ; တံသမ္ပယုတ္တော သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော – ဣမေ ဓမ္မာ ဥပေက္ခာသဟဂတာ။

၁၀၀၆. ကတမေ ဓမ္မာ ဒဿနေန ပဟာတဗ္ဗာ? တီဏိ သံယောဇနာနိ – သက္ကာယဒိဋ္ဌိ, ဝိစိကိစ္ဆာ, သီလဗ္ဗတပရာမာသော။

၁၀၀၇. တတ္ထ ကတမာ သက္ကာယဒိဋ္ဌိ? ဣဓ အဿုတဝါ ပုထုဇ္ဇနော အရိယာနံ အဒဿာဝီ အရိယဓမ္မဿ အကောဝိဒေါ အရိယဓမ္မေ အဝိနီတော သပ္ပုရိသာနံ အဒဿာဝီ သပ္ပုရိသဓမ္မဿ အကောဝိဒေါ သပ္ပုရိသဓမ္မေ အဝိနီတော ရူပံ အတ္တတော သမနုပဿတိ, ရူပဝန္တံ ဝါ အတ္တာနံ, အတ္တနိ ဝါ ရူပံ, ရူပသ္မိံ ဝါ အတ္တာနံ။ ဝေဒနံ အတ္တတော သမနုပဿတိ, ဝေဒနာဝန္တံ ဝါ အတ္တာနံ, အတ္တနိ ဝါ ဝေဒနံ, ဝေဒနာယ ဝါ အတ္တာနံ။ သညံ အတ္တတော သမနုပဿတိ, သညာဝန္တံ ဝါ အတ္တာနံ, အတ္တနိ ဝါ သညံ, သညာယ ဝါ အတ္တာနံ။ သင်္ခါရေ အတ္တတော သမနုပဿတိ, သင်္ခါရဝန္တံ ဝါ အတ္တာနံ, အတ္တနိ ဝါ သင်္ခါရေ, သင်္ခါရေသု ဝါ အတ္တာနံ။ ဝိညာဏံ အတ္တတော သမနုပဿတိ, ဝိညာဏဝန္တံ ဝါ အတ္တာနံ, အတ္တနိ ဝါ ဝိညာဏံ, ဝိညာဏသ္မိံ ဝါ အတ္တာနံ။ ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ [ဒိဋ္ဌိဝိသူကာယိတံ (သီ.)] ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပဋိဂ္ဂါဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – အယံ ဝုစ္စတိ သက္ကာယဒိဋ္ဌိ။

၁၀၀၈. တတ္ထ ကတမာ ဝိစိကိစ္ဆာ? သတ္ထရိ ကင်္ခတိ ဝိစိကိစ္ဆတိ, ဓမ္မေ ကင်္ခတိ ဝိစိကိစ္ဆတိ, သံဃေ ကင်္ခတိ ဝိစိကိစ္ဆတိ, သိက္ခာယ ကင်္ခတိ ဝိစိကိစ္ဆတိ, ပုဗ္ဗန္တေ ကင်္ခတိ ဝိစိကိစ္ဆတိ, အပရန္တေ ကင်္ခတိ ဝိစိကိစ္ဆတိ, ပုဗ္ဗန္တာပရန္တေ ကင်္ခတိ ဝိစိကိစ္ဆတိ, ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု ကင်္ခတိ ဝိစိကိစ္ဆတိ။ ယာ ဧဝရူပါ ကင်္ခါ ကင်္ခါယနာ ကင်္ခါယိတတ္တံ ဝိမတိ ဝိစိကိစ္ဆာ ဒွေဠှကံ ဒွေဓါပထော သံသယော အနေကံသဂ္ဂါဟော အာသပ္ပနာ ပရိသပ္ပနာ အပရိယောဂါဟနာ ထမ္ဘိတတ္တံ စိတ္တဿ မနောဝိလေခေါ – အယံ ဝုစ္စတိ ဝိစိကိစ္ဆာ။

၁၀၀၉. တတ္ထ ကတမော သီလဗ္ဗတပရာမာသော? ဣတော ဗဟိဒ္ဓါ သမဏဗြာဟ္မဏာနံ ‘သီလေန သုဒ္ဓိ, ဝတေန သုဒ္ဓိ, သီလဗ္ဗတေန သုဒ္ဓီ’တိ ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပဋိဂ္ဂါဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – အယံ ဝုစ္စတိ သီလဗ္ဗတပရာမာသော။

၁၀၁၀. ဣမာနိ တီဏိ သံယောဇနာနိ; တဒေကဋ္ဌာ စ ကိလေသာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော; တံသမုဋ္ဌာနံ ကာယကမ္မံ ဝစီကမ္မံ မနောကမ္မံ – ဣမေ ဓမ္မာ ဒဿနေန ပဟာတဗ္ဗာ။

၁၀၁၁. ကတမေ ဓမ္မာ ဘာဝနာယ ပဟာတဗ္ဗာ? အဝသေသော လောဘော, ဒေါသော, မောဟော; တဒေကဋ္ဌာ စ ကိလေသာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော; တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ ဘာဝနာယ ပဟာတဗ္ဗာ။

၁၀၁၂. ကတမေ ဓမ္မာ နေဝ ဒဿနေန န ဘာဝနာယ ပဟာတဗ္ဗာ? ကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော ; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ နေဝ ဒဿနေန န ဘာဝနာယ ပဟာတဗ္ဗာ။

၁၀၁၃. ကတမေ ဓမ္မာ ဒဿနေန ပဟာတဗ္ဗဟေတုကာ? တီဏိ သံယောဇနာနိ – သက္ကာယဒိဋ္ဌိ, ဝိစိကိစ္ဆာ, သီလဗ္ဗတပရာမာသော။

၁၀၁၄. တတ္ထ ကတမာ သက္ကာယဒိဋ္ဌိ။ပေ.။ အယံ ဝုစ္စတိ သက္ကာယဒိဋ္ဌိ။

၁၀၁၅. တတ္ထ ကတမာ ဝိစိကိစ္ဆာ။ပေ.။ အယံ ဝုစ္စတိ ဝိစိကိစ္ဆာ။

၁၀၁၆. တတ္ထ ကတမော သီလဗ္ဗတပရာမာသော။ပေ.။ အယံ ဝုစ္စတိ သီလဗ္ဗတပရာမာသော။

၁၀၁၇. ဣမာနိ တီဏိ သံယောဇနာနိ; တဒေကဋ္ဌာ စ ကိလေသာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော; တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ ဒဿနေန ပဟာတဗ္ဗဟေတုကာ။ တီဏိ သံယောဇနာနိ – သက္ကာယဒိဋ္ဌိ, ဝိစိကိစ္ဆာ, သီလဗ္ဗတပရာမာသော – ဣမေ ဓမ္မာ ဒဿနေန ပဟာတဗ္ဗာ။ တဒေကဋ္ဌော လောဘော, ဒေါသော, မောဟော – ဣမေ ဓမ္မာ ဒဿနေန ပဟာတဗ္ဗဟေတူ။ တဒေကဋ္ဌာ စ ကိလေသာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော; တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ ဒဿနေန ပဟာတဗ္ဗဟေတုကာ။

၁၀၁၈. ကတမေ ဓမ္မာ ဘာဝနာယ ပဟာတဗ္ဗဟေတုကာ? အဝသေသော လောဘော, ဒေါသော, မောဟော – ဣမေ ဓမ္မာ ဘာဝနာယ ပဟာတဗ္ဗဟေတူ။ တဒေကဋ္ဌာ စ ကိလေသာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော; တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ ဘာဝနာယ ပဟာတဗ္ဗဟေတုကာ။

၁၀၁၉. ကတမေ ဓမ္မာ နေဝ ဒဿနေန န ဘာဝနာယ ပဟာတဗ္ဗဟေတုကာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ နေဝ ဒဿနေန န ဘာဝနာယ ပဟာတဗ္ဗဟေတုကာ။

၁၀၂၀. ကတမေ ဓမ္မာ အာစယဂါမိနော? သာသဝါ ကုသလာကုသလာ ဓမ္မာ ကာမာဝစရာ, ရူပါဝစရာ, အရူပါဝစရာ; ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ အာစယဂါမိနော။

၁၀၂၁. ကတမေ ဓမ္မာ အပစယဂါမိနော? စတ္တာရော မဂ္ဂါ အပရိယာပန္နာ – ဣမေ ဓမ္မာ အပစယဂါမိနော။

၁၀၂၂. ကတမေ ဓမ္မာ နေဝ အာစယဂါမိ န အပစယဂါမိနော? ကုသလာကုသလာနံ ဓမ္မာနံ ဝိပါကာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ ; ဝေဒနာက္ခန္ဓော။ပေ.။ ဝိညာဏက္ခန္ဓော; ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ နေဝ အာစယဂါမိ န အပစယဂါမိနော။

၁၀၂၃. ကတမေ ဓမ္မာ သေက္ခာ? စတ္တာရော မဂ္ဂါ အပရိယာပန္နာ, ဟေဋ္ဌိမာနိ စ တီဏိ သာမညဖလာနိ – ဣမေ ဓမ္မာ သေက္ခာ။

၁၀၂၄. ကတမေ ဓမ္မာ အသေက္ခာ? ဥပရိဋ္ဌိမံ [ဥပရိမံ (သျာ.)] အရဟတ္တဖလံ – ဣမေ ဓမ္မာ အသေက္ခာ။

၁၀၂၅. ကတမေ ဓမ္မာ နေဝသေက္ခနာသေက္ခာ? တေ ဓမ္မေ ဌပေတွာ, အဝသေသာ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ နေဝသေက္ခနာသေက္ခာ။

၁၀၂၆. ကတမေ ဓမ္မာ ပရိတ္တာ? သဗ္ဗေဝ ကာမာဝစရာ ကုသလာကုသလာဗျာကတာ ဓမ္မာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ပရိတ္တာ။

၁၀၂၇. ကတမေ ဓမ္မာ မဟဂ္ဂတာ? ရူပါဝစရာ, အရူပါဝစရာ, ကုသလာဗျာကတာ ဓမ္မာ; ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ မဟဂ္ဂတာ။

၁၀၂၈. ကတမေ ဓမ္မာ အပ္ပမာဏာ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ အပ္ပမာဏာ။

၁၀၂၉. ကတမေ ဓမ္မာ ပရိတ္တာရမ္မဏာ? ပရိတ္တေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ ပရိတ္တာရမ္မဏာ။

၁၀၃၀. ကတမေ ဓမ္မာ မဟဂ္ဂတာရမ္မဏာ? မဟဂ္ဂတေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ မဟဂ္ဂတာရမ္မဏာ။

၁၀၃၁. ကတမေ ဓမ္မာ အပ္ပမာဏာရမ္မဏာ? အပ္ပမာဏေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ အပ္ပမာဏာရမ္မဏာ။

၁၀၃၂. ကတမေ ဓမ္မာ ဟီနာ? တီဏိ အကုသလမူလာနိ – လောဘော, ဒေါသော, မောဟော; တဒေကဋ္ဌာ စ ကိလေသာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော; တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ ဟီနာ။

၁၀၃၃. ကတမေ ဓမ္မာ မဇ္ဈိမာ? သာသဝါ ကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ မဇ္ဈိမာ။

၁၀၃၄. ကတမေ ဓမ္မာ ပဏီတာ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ ပဏီတာ။

၁၀၃၅. ကတမေ ဓမ္မာ မိစ္ဆတ္တနိယတာ? ပဉ္စ ကမ္မာနိ အာနန္တရိကာနိ, ယာ စ မိစ္ဆာဒိဋ္ဌိနိယတာ – ဣမေ ဓမ္မာ မိစ္ဆတ္တနိယတာ။

၁၀၃၆. ကတမေ ဓမ္မာ သမ္မတ္တနိယတာ? စတ္တာရော မဂ္ဂါ အပရိယာပန္နာ – ဣမေ ဓမ္မာ သမ္မတ္တနိယတာ။

၁၀၃၇. ကတမေ ဓမ္မာ အနိယတာ? တေ ဓမ္မေ ဌပေတွာ, အဝသေသာ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ အနိယတာ။

၁၀၃၈. ကတမေ ဓမ္မာ မဂ္ဂါရမ္မဏာ? အရိယမဂ္ဂံ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ မဂ္ဂါရမ္မဏာ။

၁၀၃၉. ကတမေ ဓမ္မာ မဂ္ဂဟေတုကာ? အရိယမဂ္ဂသမင်္ဂိဿ မဂ္ဂင်္ဂါနိ ဌပေတွာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ မဂ္ဂဟေတုကာ။ အရိယမဂ္ဂသမင်္ဂိဿ သမ္မာဒိဋ္ဌိ မဂ္ဂေါ စေဝ ဟေတု စ, သမ္မာဒိဋ္ဌိံ ဌပေတွာ, တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ မဂ္ဂဟေတုကာ။ အရိယမဂ္ဂသမင်္ဂိဿ အလောဘော, အဒေါသော, အမောဟော – ဣမေ ဓမ္မာ မဂ္ဂဟေတူ။ တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ မဂ္ဂဟေတုကာ။

၁၀၄၀. ကတမေ ဓမ္မာ မဂ္ဂါဓိပတိနော? အရိယမဂ္ဂံ အဓိပတိံ ကရိတွာ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ မဂ္ဂါဓိပတိနော။ အရိယမဂ္ဂသမင်္ဂိဿ ဝီမံသာဓိပတေယျံ မဂ္ဂံ ဘာဝယန္တဿ ဝီမံသံ ဌပေတွာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ မဂ္ဂါဓိပတိနော။

၁၀၄၁. ကတမေ ဓမ္မာ ဥပ္ပန္နာ? ယေ ဓမ္မာ ဇာတာ ဘူတာ သဉ္ဇာတာ နိဗ္ဗတ္တာ အဘိနိဗ္ဗတ္တာ ပါတုဘူတာ ဥပ္ပန္နာ သမုပ္ပန္နာ ဥဋ္ဌိတာ သမုဋ္ဌိတာ ဥပ္ပန္နာ ဥပ္ပန္နံသေန သင်္ဂဟိတာ, ရူပံ [ရူပါ (ဗဟူသု)], ဝေဒနာ, သညာ, သင်္ခါရာ, ဝိညာဏံ – ဣမေ ဓမ္မာ ဥပ္ပန္နာ။

၁၀၄၂. ကတမေ ဓမ္မာ အနုပ္ပန္နာ? ယေ ဓမ္မာ အဇာတာ အဘူတာ အသဉ္ဇာတာ အနိဗ္ဗတ္တာ အနဘိနိဗ္ဗတ္တာ အပါတုဘူတာ အနုပ္ပန္နာ အသမုပ္ပန္နာ အနုဋ္ဌိတာ အသမုဋ္ဌိတာ အနုပ္ပန္နာ အနုပ္ပန္နံသေန သင်္ဂဟိတာ, ရူပံ, ဝေဒနာ, သညာ, သင်္ခါရာ, ဝိညာဏံ – ဣမေ ဓမ္မာ အနုပ္ပန္နာ။

၁၀၄၃. ကတမေ ဓမ္မာ ဥပ္ပါဒိနော? ကုသလာကုသလာနံ ဓမ္မာနံ အဝိပက္ကဝိပါကာနံ ဝိပါကာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော; ယဉ္စ ရူပံ ကမ္မဿ ကတတ္တာ ဥပ္ပဇ္ဇိဿတိ – ဣမေ ဓမ္မာ ဥပ္ပါဒိနော။

၁၀၄၄. ကတမေ ဓမ္မာ အတီတာ? ယေ ဓမ္မာ အတီတာ နိရုဒ္ဓါ ဝိဂတာ ဝိပရိဏတာ အတ္ထင်္ဂတာ အဗ္ဘတ္ထင်္ဂတာ ဥပ္ပဇ္ဇိတွာ ဝိဂတာ အတီတာ အတီတံသေန သင်္ဂဟိတာ, ရူပံ, ဝေဒနာ, သညာ, သင်္ခါရာ, ဝိညာဏံ – ဣမေ ဓမ္မာ အတီတာ။

၁၀၄၅. ကတမေ ဓမ္မာ အနာဂတာ? ယေ ဓမ္မာ အဇာတာ အဘူတာ အသဉ္ဇာတာ အနိဗ္ဗတ္တာ အနဘိနိဗ္ဗတ္တာ အပါတုဘူတာ အနုပ္ပန္နာ အသမုပ္ပန္နာ အနုဋ္ဌိတာ အသမုဋ္ဌိတာ အနာဂတာ အနာဂတံသေန သင်္ဂဟိတာ, ရူပံ, ဝေဒနာ, သညာ, သင်္ခါရာ, ဝိညာဏံ – ဣမေ ဓမ္မာ အနာဂတာ။

၁၀၄၆. ကတမေ ဓမ္မာ ပစ္စုပ္ပန္နာ? ယေ ဓမ္မာ ဇာတာ ဘူတာ သဉ္ဇာတာ နိဗ္ဗတ္တာ အဘိနိဗ္ဗတ္တာ ပါတုဘူတာ ဥပ္ပန္နာ သမုပ္ပန္နာ ဥဋ္ဌိတာ သမုဋ္ဌိတာ ပစ္စုပ္ပန္နာ ပစ္စုပ္ပန္နံသေန သင်္ဂဟိတာ, ရူပံ, ဝေဒနာ, သညာ, သင်္ခါရာ, ဝိညာဏံ – ဣမေ ဓမ္မာ ပစ္စုပ္ပန္နာ။

၁၀၄၇. ကတမေ ဓမ္မာ အတီတာရမ္မဏာ? အတီတေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ အတီတာရမ္မဏာ။

၁၀၄၈. ကတမေ ဓမ္မာ အနာဂတာရမ္မဏာ? အနာဂတေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ အနာဂတာရမ္မဏာ။

၁၀၄၉. ကတမေ ဓမ္မာ ပစ္စုပ္ပန္နာရမ္မဏာ? ပစ္စုပ္ပန္နေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ ပစ္စုပ္ပန္နာရမ္မဏာ။

၁၀၅၀. ကတမေ ဓမ္မာ အဇ္ဈတ္တာ? ယေ ဓမ္မာ တေသံ တေသံ သတ္တာနံ အဇ္ဈတ္တံ ပစ္စတ္တံ နိယတာ ပါဋိပုဂ္ဂလိကာ ဥပါဒိဏ္ဏာ, ရူပံ, ဝေဒနာ, သညာ, သင်္ခါရာ, ဝိညာဏံ – ဣမေ ဓမ္မာ အဇ္ဈတ္တာ။

၁၀၅၁. ကတမေ ဓမ္မာ ဗဟိဒ္ဓါ? ယေ ဓမ္မာ တေသံ တေသံ ပရသတ္တာနံ ပရပုဂ္ဂလာနံ အဇ္ဈတ္တံ ပစ္စတ္တံ နိယတာ ပါဋိပုဂ္ဂလိကာ ဥပါဒိဏ္ဏာ, ရူပံ, ဝေဒနာ, သညာ, သင်္ခါရာ, ဝိညာဏံ – ဣမေ ဓမ္မာ ဗဟိဒ္ဓါ။

၁၀၅၂. ကတမေ ဓမ္မာ အဇ္ဈတ္တဗဟိဒ္ဓါ? တဒုဘယံ – ဣမေ ဓမ္မာ အဇ္ဈတ္တဗဟိဒ္ဓါ။

၁၀၅၃. ကတမေ ဓမ္မာ အဇ္ဈတ္တာရမ္မဏာ? အဇ္ဈတ္တေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ အဇ္ဈတ္တာရမ္မဏာ။

၁၀၅၄. ကတမေ ဓမ္မာ ဗဟိဒ္ဓါရမ္မဏာ? ဗဟိဒ္ဓါ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ ဗဟိဒ္ဓါရမ္မဏာ။

၁၀၅၅. ကတမေ ဓမ္မာ အဇ္ဈတ္တဗဟိဒ္ဓါရမ္မဏာ? အဇ္ဈတ္တဗဟိဒ္ဓါ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ အဇ္ဈတ္တဗဟိဒ္ဓါရမ္မဏာ။

၁၀၅၆. ကတမေ ဓမ္မာ သနိဒဿနသပ္ပဋိဃာ? ရူပါယတနံ – ဣမေ ဓမ္မာ သနိဒဿနသပ္ပဋိဃာ။

၁၀၅၇. ကတမေ ဓမ္မာ အနိဒဿနသပ္ပဋိဃာ? စက္ခာယတနံ, သောတာယတနံ, ဃာနာယတနံ, ဇိဝှာယတနံ, ကာယာယတနံ, သဒ္ဒါယတနံ, ဂန္ဓာယတနံ , ရသာယတနံ, ဖောဋ္ဌဗ္ဗာယတနံ – ဣမေ ဓမ္မာ အနိဒဿနသပ္ပဋိဃာ။

၁၀၅၈. ကတမေ ဓမ္မာ အနိဒဿနအပ္ပဋိဃာ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော; ယဉ္စ ရူပံ အနိဒဿနံ အပ္ပဋိဃံ ဓမ္မာယတနပရိယာပန္နံ; အသင်္ခတာ စ ဓါတု – ဣမေ ဓမ္မာ အနိဒဿနအပ္ပဋိဃာ။

တိကံ။

ဒုကနိက္ခေပံ

ဟေတုဂေါစ္ဆကံ

၁၀၅၉. ကတမေ ဓမ္မာ ဟေတူ? တယော ကုသလဟေတူ, တယော အကုသလဟေတူ, တယော အဗျာကတဟေတူ, နဝ ကာမာဝစရဟေတူ ဆ ရူပါဝစရဟေတူ, ဆ အရူပါဝစရဟေတူ, ဆ အပရိယာပန္နဟေတူ။

၁၀၆၀. တတ္ထ ကတမေ တယော ကုသလဟေတူ? အလောဘော, အဒေါသော, အမောဟော။

၁၀၆၁. တတ္ထ ကတမော အလောဘော? ယော အလောဘော အလုဗ္ဘနာ အလုဗ္ဘိတတ္တံ အသာရာဂေါ အသာရဇ္ဇနာ အသာရဇ္ဇိတတ္တံ အနဘိဇ္ဈာ အလောဘော ကုသလမူလံ – အယံ ဝုစ္စတိ အလောဘော။

၁၀၆၂. တတ္ထ ကတမော အဒေါသော? ယော အဒေါသော အဒုဿနာ အဒုဿိတတ္တံ မေတ္တိ မေတ္တာယနာ မေတ္တာယိတတ္တံ အနုဒ္ဒါ အနုဒ္ဒါယနာ အနုဒါယိတတ္တံ ဟိတေသိတာ အနုကမ္ပာ အဗျာပါဒေါ အဗျာပဇ္ဇော အဒေါသော ကုသလမူလံ – အယံ ဝုစ္စတိ အဒေါသော။

၁၀၆၃. တတ္ထ ကတမော အမောဟော? ဒုက္ခေ ဉာဏံ, ဒုက္ခသမုဒယေ ဉာဏံ, ဒုက္ခနိရောဓေ ဉာဏံ, ဒုက္ခနိရောဓဂါမိနိယာ ပဋိပဒါယ ဉာဏံ, ပုဗ္ဗန္တေ ဉာဏံ, အပရန္တေ ဉာဏံ, ပုဗ္ဗန္တာပရန္တေ ဉာဏံ, ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု ဉာဏံ, ယာ ဧဝရူပါ ပညာ ပဇာနနာ ဝိစယော ပဝိစယော ဓမ္မဝိစယော သလ္လက္ခဏာ ဥပလက္ခဏာ ပစ္စုပလက္ခဏာ ပဏ္ဍိစ္စံ ကောသလ္လံ နေပုညံ ဝေဘဗျာ စိန္တာ ဥပပရိက္ခာ ဘူရီ မေဓါ ပရိဏာယိကာ ဝိပဿနာ သမ္ပဇညံ ပတောဒေါ ပညာ ပညိန္ဒ္ရိယံ ပညာဗလံ ပညာသတ္ထံ ပညာပါသာဒေါ ပညာအာလောကော ပညာဩဘာသော ပညာပဇ္ဇောတော ပညာရတနံ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ အမောဟော။

ဣမေ တယော ကုသလဟေတူ။

၁၀၆၄. တတ္ထ ကတမေ တယော အကုသလဟေတူ? လောဘော, ဒေါသော, မောဟော။

၁၀၆၅. တတ္ထ ကတမော လောဘော? ယော ရာဂေါ သာရာဂေါ အနုနယော အနုရောဓေါ နန္ဒီ နန္ဒီရာဂေါ [နန္ဒိရာဂေါ (သီ.)] စိတ္တဿ သာရာဂေါ ဣစ္ဆာ မုစ္ဆာ အဇ္ဈောသာနံ ဂေဓေါ ပလိဂေဓေါ သင်္ဂေါ ပင္ကော ဧဇာ မာယာ ဇနိကာ သဉ္ဇနနီ သိဗ္ဗိနီ [သိဗ္ဗနီ (သီ.)] ဇာလိနီ သရိတာ ဝိသတ္တိကာ သုတ္တံ ဝိသဋာ အာယူဟိနီ [အာယူဟနီ (သီ. သျာ.)] ဒုတိယာ ပဏိဓိ ဘဝနေတ္တိ ဝနံ ဝနထော သန္ထဝေါ သိနေဟော အပေက္ခာ ပဋိဗန္ဓု အာသာ အာသိသနာ အာသိသိတတ္တံ [အာသိံသနာ အာသိံသိတတ္တံ (သီ. သျာ.)] ရူပါသာ သဒ္ဒါသာ ဂန္ဓာသာ ရသာသာ ဖောဋ္ဌဗ္ဗာသာ လာဘာသာ ဓနာသာ ပုတ္တာသာ ဇီဝိတာသာ ဇပ္ပါ ပဇပ္ပါ အဘိဇပ္ပါ ဇပ္ပါ ဇပ္ပနာ ဇပ္ပိတတ္တံ လောလုပ္ပံ လောလုပ္ပါယနာ လောလုပ္ပါယိတတ္တံ ပုစ္ဆဉ္ဇိကတာ [ပုဉ္စိကတာ (သျာ.) ပုစ္ဆိကတာ (သီ.)] သာဓုကမ္ယတာ အဓမ္မရာဂေါ ဝိသမလောဘော နိကန္တိ နိကာမနာ ပတ္ထနာ ပိဟနာ သမ္ပတ္ထနာ ကာမတဏှာ ဘဝတဏှာ ဝိဘဝတဏှာ ရူပတဏှာ အရူပတဏှာ နိရောဓတဏှာ ရူပတဏှာ သဒ္ဒတဏှာ ဂန္ဓတဏှာ ရသတဏှာ ဖောဋ္ဌဗ္ဗတဏှာ ဓမ္မတဏှာ ဩဃော ယောဂေါ ဂန္ထော ဥပါဒါနံ အာဝရဏံ နီဝရဏံ ဆာဒနံ ဗန္ဓနံ ဥပက္ကိလေသော အနုသယော ပရိယုဋ္ဌာနံ လတာ ဝေဝိစ္ဆံ ဒုက္ခမူလံ ဒုက္ခနိဒါနံ ဒုက္ခပ္ပဘဝေါ မာရပါသော မာရဗဠိသံ မာရဝိသယော တဏှာနဒီ တဏှာဇာလံ တဏှာဂဒ္ဒုလံ တဏှာသမုဒ္ဒေါ အဘိဇ္ဈာ လောဘော အကုသလမူလံ – အယံ ဝုစ္စတိ လောဘော။

၁၀၆၆. တတ္ထ ကတမော ဒေါသော? အနတ္ထံ မေ အစရီတိ အာဃာတော ဇာယတိ, အနတ္ထံ မေ စရတီတိ အာဃာတော ဇာယတိ, အနတ္ထံ မေ စရိဿတီတိ အာဃာတော ဇာယတိ, ပိယဿ မေ မနာပဿ အနတ္ထံ အစရိ။ပေ.။ အနတ္ထံ စရတိ။ပေ.။ အနတ္ထံ စရိဿတီတိ အာဃာတော ဇာယတိ, အပ္ပိယဿ မေ အမနာပဿ အတ္ထံ အစရိ။ပေ.။ အတ္ထံ စရတိ။ပေ.။ အတ္ထံ စရိဿတီတိ အာဃာတော ဇာယတိ, အဋ္ဌာနေ ဝါ ပန အာဃာတော ဇာယတိ။ ယော ဧဝရူပေါ စိတ္တဿ အာဃာတော ပဋိဃာတော ပဋိဃံ ပဋိဝိရောဓေါ ကောပေါ ပကောပေါ သမ္ပကောပေါ ဒေါသော ပဒေါသော သမ္ပဒေါသော စိတ္တဿ ဗျာပတ္တိ မနောပဒေါသော ကောဓေါ ကုဇ္ဈနာ ကုဇ္ဈိတတ္တံ ဒေါသော ဒုဿနာ ဒုဿိတတ္တံ ဗျာပတ္တိ ဗျာပဇ္ဇနာ ဗျာပဇ္ဇိတတ္တံ ဝိရောဓေါ ပဋိဝိရောဓေါ စဏ္ဍိက္ကံ အသုရောပေါ အနတ္တမနတာ စိတ္တဿ – အယံ ဝုစ္စတိ ဒေါသော။

၁၀၆၇. တတ္ထ ကတမော မောဟော? ဒုက္ခေ အညာဏံ, ဒုက္ခသမုဒယေ အညာဏံ, ဒုက္ခနိရောဓေ အညာဏံ, ဒုက္ခနိရောဓဂါမိနိယာ ပဋိပဒါယ အညာဏံ, ပုဗ္ဗန္တေ အညာဏံ, အပရန္တေ အညာဏံ, ပုဗ္ဗန္တာပရန္တေ အညာဏံ, ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု အညာဏံ, ယံ ဧဝရူပံ အညာဏံ အဒဿနံ အနဘိသမယော အနနုဗောဓေါ အသမ္ဗောဓေါ အပ္ပဋိဝေဓေါ အသံဂါဟနာ အပရိယောဂါဟနာ အသမပေက္ခနာ အပစ္စဝေက္ခဏာ အပစ္စက္ခကမ္မံ ဒုမ္မေဇ္ဈံ ဗာလ္ယံ အသမ္ပဇညံ မောဟော ပမောဟော သမ္မောဟော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာလင္ဂီ မောဟော အကုသလမူလံ – အယံ ဝုစ္စတိ မောဟော။

ဣမေ တယော အကုသလဟေတူ။

၁၀၆၈. တတ္ထ ကတမေ တယော အဗျာကတဟေတူ? ကုသလာနံ ဝါ ဓမ္မာနံ ဝိပါကတော ကိရိယာဗျာကတေသု ဝါ ဓမ္မေသု အလောဘော အဒေါသော အမောဟော – ဣမေ တယော အဗျာကတဟေတူ။

၁၀၆၉. တတ္ထ ကတမေ နဝ ကာမာဝစရဟေတူ? တယော ကုသလဟေတူ, တယော အကုသလဟေတူ, တယော အဗျာကတဟေတူ – ဣမေ နဝ ကာမာဝစရဟေတူ။

၁၀၇၀. တတ္ထ ကတမေ ဆ ရူပါဝစရဟေတူ? တယော ကုသလဟေတူ, တယော အဗျာကတဟေတူ – ဣမေ ဆ ရူပါဝစရဟေတူ။

၁၀၇၁. တတ္ထ ကတမေ ဆ အရူပါဝစရဟေတူ? တယော ကုသလဟေတူ, တယော အဗျာကတဟေတူ – ဣမေ ဆ အရူပါဝစရဟေတူ။

၁၀၇၂. တတ္ထ ကတမေ ဆ အပရိယာပန္နဟေတူ? တယော ကုသလဟေတူ, တယော အဗျာကတဟေတူ – ဣမေ ဆ အပရိယာပန္နဟေတူ။

၁၀၇၃. တတ္ထ ကတမေ တယော ကုသလဟေတူ? အလောဘော, အဒေါသော, အမောဟော။

၁၀၇၄. တတ္ထ ကတမော အလောဘော? ယော အလောဘော အလုဗ္ဘနာ အလုဗ္ဘိတတ္တံ အသာရာဂေါ အသာရဇ္ဇနာ အသာရဇ္ဇိတတ္တံ အနဘိဇ္ဈာ အလောဘော ကုသလမူလံ – အယံ ဝုစ္စတိ အလောဘော။

၁၀၇၅. တတ္ထ ကတမော အဒေါသော? ယော အဒေါသော အဒုဿနာ အဒုဿိတတ္တံ။ပေ.။ အဗျာပါဒေါ အဗျာပဇ္ဇော အဒေါသော ကုသလမူလံ – အယံ ဝုစ္စတိ အဒေါသော။

၁၀၇၆. တတ္ထ ကတမော အမောဟော ? ဒုက္ခေ ဉာဏံ, ဒုက္ခသမုဒယေ ဉာဏံ, ဒုက္ခနိရောဓေ ဉာဏံ, ဒုက္ခနိရောဓဂါမိနိယာ ပဋိပဒါယ ဉာဏံ, ပုဗ္ဗန္တေ ဉာဏံ, အပရန္တေ ဉာဏံ, ပုဗ္ဗန္တာပရန္တေ ဉာဏံ, ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု ဉာဏံ, ယာ ဧဝရူပါ ပညာ ပဇာနနာ ဝိစယော ပဝိစယော ဓမ္မဝိစယော သလ္လက္ခဏာ ဥပလက္ခဏာ ပစ္စုပလက္ခဏာ ပဏ္ဍိစ္စံ ကောသလ္လံ နေပုညံ ဝေဘဗျာ စိန္တာ ဥပပရိက္ခာ ဘူရီ မေဓါ ပရိဏာယိကာ ဝိပဿနာ သမ္ပဇညံ ပတောဒေါ ပညာ ပညိန္ဒ္ရိယံ ပညာဗလံ ပညာသတ္ထံ ပညာပါသာဒေါ ပညာအာလောကော ပညာဩဘာသော ပညာပဇ္ဇောတော ပညာရတနံ အမောဟော ဓမ္မဝိစယော သမ္မာဒိဋ္ဌိ ဓမ္မဝိစယသမ္ဗောဇ္ဈင်္ဂေါ မဂ္ဂင်္ဂံ မဂ္ဂပရိယာပန္နံ – အယံ ဝုစ္စတိ အမောဟော။

ဣမေ တယော ကုသလဟေတူ။

၁၀၇၇. တတ္ထ ကတမေ တယော အဗျာကတဟေတူ? ကုသလာနံ ဓမ္မာနံ ဝိပါကတော အလောဘော အဒေါသော အမောဟော – ဣမေ တယော အဗျာကတဟေတူ။ ဣမေ ဆ အပရိယာပန္နဟေတူ – ဣမေ ဓမ္မာ ဟေတူ။

၁၀၇၈. ကတမေ ဓမ္မာ န ဟေတူ? တေ ဓမ္မေ ဌပေတွာ, အဝသေသာ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ န ဟေတူ။

၁၀၇၉. ကတမေ ဓမ္မာ သဟေတုကာ? တေဟိ ဓမ္မေဟိ ယေ ဓမ္မာ သဟေတုကာ ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ သဟေတုကာ ။

၁၀၈၀. ကတမေ ဓမ္မာ အဟေတုကာ? တေဟိ ဓမ္မေဟိ ယေ ဓမ္မာ အဟေတုကာ ဝေဒနာက္ခန္ဓော။ပေ.။ ဝိညာဏက္ခန္ဓော, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ အဟေတုကာ။

၁၀၈၁. ကတမေ ဓမ္မာ ဟေတုသမ္ပယုတ္တာ? တေဟိ ဓမ္မေဟိ ယေ ဓမ္မာ သမ္ပယုတ္တာ ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဟေတုသမ္ပယုတ္တာ။

၁၀၈၂. ကတမေ ဓမ္မာ ဟေတုဝိပ္ပယုတ္တာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ ဝေဒနာက္ခန္ဓော။ပေ.။ ဝိညာဏက္ခန္ဓော, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ ဟေတုဝိပ္ပယုတ္တာ။

၁၀၈၃. ကတမေ ဓမ္မာ ဟေတူ စေဝ သဟေတုကာ စ? လောဘော မောဟေန ဟေတု စေဝ သဟေတုကော စ, မောဟော လောဘေန ဟေတု စေဝ သဟေတုကော စ, ဒေါသော မောဟေန ဟေတု စေဝ သဟေတုကော စ, မောဟော ဒေါသေန ဟေတု စေဝ သဟေတုကော စ; အလောဘော အဒေါသော အမောဟော, တေ အညမညံ ဟေတူ စေဝ သဟေတုကာ စ – ဣမေ ဓမ္မာ ဟေတူ စေဝ သဟေတုကာ စ။

၁၀၈၄. ကတမေ ဓမ္မာ သဟေတုကာ စေဝ န စ ဟေတူ? တေဟိ ဓမ္မေဟိ ယေ ဓမ္မာ သဟေတုကာ တေ ဓမ္မေ ဌပေတွာ, ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ သဟေတုကာ စေဝ န စ ဟေတူ။

၁၀၈၅. ကတမေ ဓမ္မာ ဟေတူ စေဝ ဟေတုသမ္ပယုတ္တာ စ? လောဘော မောဟေန ဟေတု စေဝ ဟေတုသမ္ပယုတ္တော စ, မောဟော လောဘေန ဟေတု စေဝ ဟေတုသမ္ပယုတ္တော စ, ဒေါသော မောဟေန ဟေတု စေဝ ဟေတုသမ္ပယုတ္တော စ, မောဟော ဒေါသေန ဟေတု စေဝ ဟေတုသမ္ပယုတ္တော စ; အလောဘော အဒေါသော အမောဟော , တေ အညမညံ ဟေတူ စေဝ ဟေတုသမ္ပယုတ္တာ စ – ဣမေ ဓမ္မာ ဟေတူ စေဝ ဟေတုသမ္ပယုတ္တာ စ။

၁၀၈၆. ကတမေ ဓမ္မာ ဟေတုသမ္ပယုတ္တာ စေဝ န စ ဟေတူ? တေဟိ ဓမ္မေဟိ ယေ ဓမ္မာ သမ္ပယုတ္တာ တေ ဓမ္မေ ဌပေတွာ, ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဟေတုသမ္ပယုတ္တာ စေဝ န စ ဟေတူ။

၁၀၈၇. ကတမေ ဓမ္မာ န ဟေတူ သဟေတုကာ? တေဟိ ဓမ္မေဟိ ယေ ဓမ္မာ န ဟေတူ သဟေတုကာ ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ န ဟေတူ သဟေတုကာ။

၁၀၈၈. ကတမေ ဓမ္မာ န ဟေတူ အဟေတုကာ? တေဟိ ဓမ္မေဟိ ယေ ဓမ္မာ န ဟေတူ အဟေတုကာ ဝေဒနာက္ခန္ဓော။ပေ.။ ဝိညာဏက္ခန္ဓော, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ န ဟေတူ အဟေတုကာ။

စူဠန္တရဒုကံ

၁၀၈၉. ကတမေ ဓမ္မာ သပ္ပစ္စယာ? ပဉ္စက္ခန္ဓာ – ရူပက္ခန္ဓော, ဝေဒနာက္ခန္ဓော, သညာက္ခန္ဓော , သင်္ခါရက္ခန္ဓော, ဝိညာဏက္ခန္ဓော – ဣမေ ဓမ္မာ သပ္ပစ္စယာ။

၁၀၉၀. ကတမေ ဓမ္မာ အပ္ပစ္စယာ? အသင်္ခတာ ဓါတု – ဣမေ ဓမ္မာ အပ္ပစ္စယာ။

၁၀၉၁. ကတမေ ဓမ္မာ သင်္ခတာ? ယေဝ တေ ဓမ္မာ သပ္ပစ္စယာ, တေဝ တေ ဓမ္မာ သင်္ခတာ။

၁၀၉၂. ကတမေ ဓမ္မာ အသင်္ခတာ? ယော ဧဝ သော ဓမ္မော အပ္ပစ္စယော, သော ဧဝ သော ဓမ္မော အသင်္ခတော။

၁၀၉၃. ကတမေ ဓမ္မာ သနိဒဿနာ? ရူပါယတနံ – ဣမေ ဓမ္မာ သနိဒဿနာ ။

၁၀၉၄. ကတမေ ဓမ္မာ အနိဒဿနာ? စက္ခာယတနံ။ပေ.။ ဖောဋ္ဌဗ္ဗာယတနံ, ဝေဒနာက္ခန္ဓော။ပေ.။ ဝိညာဏက္ခန္ဓော, ယဉ္စ ရူပံ အနိဒဿနံ အပ္ပဋိဃံ ဓမ္မာယတနပရိယာပန္နံ, အသင်္ခတာ စ ဓါတု – ဣမေ ဓမ္မာ အနိဒဿနာ။

၁၀၉၅. ကတမေ ဓမ္မာ သပ္ပဋိဃာ? စက္ခာယတနံ။ပေ.။ ဖောဋ္ဌဗ္ဗာယတနံ – ဣမေ ဓမ္မာ သပ္ပဋိဃာ။

၁၀၉၆. ကတမေ ဓမ္မာ အပ္ပဋိဃာ? ဝေဒနာက္ခန္ဓော။ပေ.။ ဝိညာဏက္ခန္ဓော, ယဉ္စ ရူပံ အနိဒဿနံ အပ္ပဋိဃံ ဓမ္မာယတနပရိယာပန္နံ, အသင်္ခတာ စ ဓါတု – ဣမေ ဓမ္မာ အပ္ပဋိဃာ။

၁၀၉၇. ကတမေ ဓမ္မာ ရူပိနော? စတ္တာရော စ မဟာဘူတာ စတုန္နဉ္စ မဟာဘူတာနံ ဥပါဒါယ ရူပံ – ဣမေ ဓမ္မာ ရူပိနော။

၁၀၉၈. ကတမေ ဓမ္မာ အရူပိနော? ဝေဒနာက္ခန္ဓော။ပေ.။ ဝိညာဏက္ခန္ဓော, အသင်္ခတာ စ ဓါတု – ဣမေ ဓမ္မာ အရူပိနော။

၁၀၉၉. ကတမေ ဓမ္မာ လောကိယာ? သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ လောကိယာ။

၁၁၀၀. ကတမေ ဓမ္မာ လောကုတ္တရာ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ လောကုတ္တရာ။

၁၁၀၁. ကတမေ ဓမ္မာ ကေနစိ ဝိညေယျာ, ကေနစိ န ဝိညေယျာ? ယေ တေ ဓမ္မာ စက္ခုဝိညေယျာ , န တေ ဓမ္မာ သောတဝိညေယျာ; ယေ ဝါ ပန တေ ဓမ္မာ သောတဝိညေယျာ, န တေ ဓမ္မာ စက္ခုဝိညေယျာ။ ယေ တေ ဓမ္မာ စက္ခုဝိညေယျာ, န တေ ဓမ္မာ ဃာနဝိညေယျာ; ယေ ဝါ ပန တေ ဓမ္မာ ဃာနဝိညေယျာ, န တေ ဓမ္မာ စက္ခုဝိညေယျာ။ ယေ တေ ဓမ္မာ စက္ခုဝိညေယျာ, န တေ ဓမ္မာ ဇိဝှာဝိညေယျာ; ယေ ဝါ ပန တေ ဓမ္မာ ဇိဝှာဝိညေယျာ, န တေ ဓမ္မာ စက္ခုဝိညေယျာ။ ယေ တေ ဓမ္မာ စက္ခုဝိညေယျာ, န တေ ဓမ္မာ ကာယဝိညေယျာ; ယေ ဝါ ပန တေ ဓမ္မာ ကာယဝိညေယျာ, န တေ ဓမ္မာ စက္ခုဝိညေယျာ။ ယေ တေ ဓမ္မာ သောတဝိညေယျာ, န တေ ဓမ္မာ ဃာနဝိညေယျာ; ယေ ဝါ ပန တေ ဓမ္မာ ဃာနဝိညေယျာ, န တေ ဓမ္မာ သောတဝိညေယျာ။ ယေ တေ ဓမ္မာ သောတဝိညေယျာ, န တေ ဓမ္မာ ဇိဝှာဝိညေယျာ; ယေ ဝါ ပန တေ ဓမ္မာ ဇိဝှာဝိညေယျာ, န တေ ဓမ္မာ သောတဝိညေယျာ။ ယေ တေ ဓမ္မာ သောတဝိညေယျာ, န တေ ဓမ္မာ ကာယဝိညေယျာ; ယေ ဝါ ပန တေ ဓမ္မာ ကာယဝိညေယျာ န တေ ဓမ္မာ သောတဝိညေယျာ။ ယေ တေ ဓမ္မာ သောတဝိညေယျာ, န တေ ဓမ္မာ စက္ခုဝိညေယျာ; ယေ ဝါ ပန တေ ဓမ္မာ စက္ခုဝိညေယျာ, န တေ ဓမ္မာ သောတဝိညေယျာ။ ယေ တေ ဓမ္မာ ဃာနဝိညေယျာ, န တေ ဓမ္မာ ဇိဝှာဝိညေယျာ; ယေ ဝါ ပန တေ ဓမ္မာ ဇိဝှာဝိညေယျာ, န တေ ဓမ္မာ ဃာနဝိညေယျာ။ ယေ တေ ဓမ္မာ ဃာနဝိညေယျာ, န တေ ဓမ္မာ ကာယဝိညေယျာ; ယေ ဝါ ပန တေ ဓမ္မာ ကာယဝိညေယျာ, န တေ ဓမ္မာ ဃာနဝိညေယျာ။ ယေ တေ ဓမ္မာ ဃာနဝိညေယျာ, န တေ ဓမ္မာ စက္ခုဝိညေယျာ; ယေ ဝါ ပန တေ ဓမ္မာ စက္ခုဝိညေယျာ, န တေ ဓမ္မာ ဃာနဝိညေယျာ။ ယေ တေ ဓမ္မာ ဃာနဝိညေယျာ, န တေ ဓမ္မာ သောတဝိညေယျာ; ယေ ဝါ ပန တေ ဓမ္မာ သောတဝိညေယျာ, န တေ ဓမ္မာ ဃာနဝိညေယျာ။ ယေ တေ ဓမ္မာ ဇိဝှာဝိညေယျာ, န တေ ဓမ္မာ ကာယဝိညေယျာ; ယေ ဝါ ပန တေ ဓမ္မာ ကာယဝိညေယျာ, န တေ ဓမ္မာ ဇိဝှာဝိညေယျာ။ ယေ တေ ဓမ္မာ ဇိဝှာဝိညေယျာ, န တေ ဓမ္မာ စက္ခုဝိညေယျာ; ယေ ဝါ ပန တေ ဓမ္မာ စက္ခုဝိညေယျာ, န တေ ဓမ္မာ ဇိဝှာဝိညေယျာ။ ယေ တေ ဓမ္မာ ဇိဝှာဝိညေယျာ, န တေ ဓမ္မာ သောတဝိညေယျာ; ယေ ဝါ ပန တေ ဓမ္မာ သောတဝိညေယျာ, န တေ ဓမ္မာ ဇိဝှာဝိညေယျာ။ ယေ တေ ဓမ္မာ ဇိဝှာဝိညေယျာ, န တေ ဓမ္မာ ဃာနဝိညေယျာ; ယေ ဝါ ပန တေ ဓမ္မာ ဃာနဝိညေယျာ, န တေ ဓမ္မာ ဇိဝှာဝိညေယျာ။ ယေ တေ ဓမ္မာ ကာယဝိညေယျာ, န တေ ဓမ္မာ စက္ခုဝိညေယျာ; ယေ ဝါ ပန တေ ဓမ္မာ စက္ခုဝိညေယျာ, န တေ ဓမ္မာ ကာယဝိညေယျာ။ ယေ တေ ဓမ္မာ ကာယဝိညေယျာ, န တေ ဓမ္မာ သောတဝိညေယျာ; ယေ ဝါ ပန တေ ဓမ္မာ သောတဝိညေယျာ, န တေ ဓမ္မာ ကာယဝိညေယျာ။ ယေ တေ ဓမ္မာ ကာယဝိညေယျာ, န တေ ဓမ္မာ ဃာနဝိညေယျာ; ယေ ဝါ ပန တေ ဓမ္မာ ဃာနဝိညေယျာ, န တေ ဓမ္မာ ကာယဝိညေယျာ။ ယေ တေ ဓမ္မာ ကာယဝိညေယျာ, န တေ ဓမ္မာ ဇိဝှာဝိညေယျာ; ယေ ဝါ ပန တေ ဓမ္မာ ဇိဝှာဝိညေယျာ, န တေ ဓမ္မာ ကာယဝိညေယျာ။ ဣမေ ဓမ္မာ ကေနစိ ဝိညေယျာ ကေနစိ န ဝိညေယျာ။

အာသဝဂေါစ္ဆကံ

၁၁၀၂. ကတမေ ဓမ္မာ အာသဝါ? စတ္တာရော အာသဝါ – ကာမာသဝေါ, ဘဝါသဝေါ, ဒိဋ္ဌာသဝေါ, အဝိဇ္ဇာသဝေါ။

၁၁၀၃. တတ္ထ ကတမော ကာမာသဝေါ? ယော ကာမေသု ကာမစ္ဆန္ဒော ကာမရာဂေါ ကာမနန္ဒီ ကာမတဏှာ ကာမသိနေဟော ကာမပရိဠာဟော ကာမမုစ္ဆာ ကာမဇ္ဈောသာနံ – အယံ ဝုစ္စတိ ကာမာသဝေါ။

၁၁၀၄. တတ္ထ ကတမော ဘဝါသဝေါ? ယော ဘဝေသု ဘဝဆန္ဒော [ဘဝစ္ဆန္ဒော (သီ. သျာ.)] ဘဝရာဂေါ ဘဝနန္ဒီ ဘဝတဏှာ ဘဝသိနေဟော ဘဝပရိဠာဟော ဘဝမုစ္ဆာ ဘဝဇ္ဈောသာနံ – အယံ ဝုစ္စတိ ဘဝါသဝေါ။

၁၁၀၅. တတ္ထ ကတမော ဒိဋ္ဌာသဝေါ? သဿတော လောကောတိ ဝါ, အသဿတော လောကောတိ ဝါ, အန္တဝါ လောကောတိ ဝါ, အနန္တဝါ လောကောတိ ဝါ, တံ ဇီဝံ တံ သရီရန္တိ ဝါ, အညံ ဇီဝံ အညံ သရီရန္တိ ဝါ, ဟောတိ တထာဂတော ပရံ မရဏာတိ ဝါ, န ဟောတိ တထာဂတော ပရံ မရဏာတိ ဝါ, ဟောတိ စ န စ ဟောတိ တထာဂတော ပရံ မရဏာတိ ဝါ, နေဝ ဟောတိ န န ဟောတိ တထာဂတော ပရံ မရဏာတိ ဝါ; ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပဋိဂ္ဂါဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – အယံ ဝုစ္စတိ ဒိဋ္ဌာသဝေါ။ သဗ္ဗာပိ မိစ္ဆာဒိဋ္ဌိ ဒိဋ္ဌာသဝေါ။

၁၁၀၆. တတ္ထ ကတမော အဝိဇ္ဇာသဝေါ? ဒုက္ခေ အညာဏံ, ဒုက္ခသမုဒယေ အညာဏံ, ဒုက္ခနိရောဓေ အညာဏံ, ဒုက္ခနိရောဓဂါမိနိယာ ပဋိပဒါယ အညာဏံ , ပုဗ္ဗန္တေ အညာဏံ, အပရန္တေ အညာဏံ, ပုဗ္ဗန္တာပရန္တေ အညာဏံ, ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု အညာဏံः ယံ ဧဝရူပံ အညာဏံ အဒဿနံ အနဘိသမယော အနနုဗောဓေါ အသမ္ဗောဓေါ အပ္ပဋိဝေဓေါ အသံဂါဟနာ အပရိယောဂါဟနာ အသမပေက္ခနာ အပစ္စဝေက္ခဏာ အပစ္စက္ခကမ္မံ ဒုမ္မေဇ္ဈံ ဗာလ္ယံ အသမ္ပဇညံ မောဟော ပမောဟော သမ္မောဟော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာလင္ဂီ မောဟော အကုသလမူလံ – အယံ ဝုစ္စတိ အဝိဇ္ဇာသဝေါ။

ဣမေ ဓမ္မာ အာသဝါ။

၁၁၀၇. ကတမေ ဓမ္မာ နော အာသဝါ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ အသင်္ခတာ စ ဓါတု – ဣမေ ဓမ္မာ နော အာသဝါ။

၁၁၀၈. ကတမေ ဓမ္မာ သာသဝါ? ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ သာသဝါ။

၁၁၀၉. ကတမေ ဓမ္မာ အနာသဝါ? အပရိယာပန္နာ မဂ္ဂါ စ မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ အနာသဝါ။

၁၁၁၀. ကတမေ ဓမ္မာ အာသဝသမ္ပယုတ္တာ? တေဟိ ဓမ္မေဟိ ယေ ဓမ္မာ သမ္ပယုတ္တာ ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ အာသဝသမ္ပယုတ္တာ။

၁၁၁၁. ကတမေ ဓမ္မာ အာသဝဝိပ္ပယုတ္တာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ အာသဝဝိပ္ပယုတ္တာ။

၁၁၁၂. ကတမေ ဓမ္မာ အာသဝါ စေဝ သာသဝါ စ? တေယေဝ အာသဝါ အာသဝါ စေဝ သာသဝါ စ။

၁၁၁၃. ကတမေ ဓမ္မာ သာသဝါ စေဝ နော စ အာသဝါ? တေဟိ ဓမ္မေဟိ ယေ ဓမ္မာ သာသဝါ, တေ ဓမ္မေ ဌပေတွာ အဝသေသာ သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ , အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ သာသဝါ စေဝ နော စ အာသဝါ။

၁၁၁၄. ကတမေ ဓမ္မာ အာသဝါ စေဝ အာသဝသမ္ပယုတ္တာ စ? ကာမာသဝေါ အဝိဇ္ဇာသဝေန အာသဝေါ စေဝ အာသဝသမ္ပယုတ္တော စ, အဝိဇ္ဇာသဝေါ ကာမာသဝေန အာသဝေါ စေဝ အာသဝသမ္ပယုတ္တော စ, ဘဝါသဝေါ အဝိဇ္ဇာသဝေန အာသဝေါ စေဝ အာသဝသမ္ပယုတ္တော စ, အဝိဇ္ဇာသဝေါ ဘဝါသဝေန အာသဝေါ စေဝ အာသဝသမ္ပယုတ္တော စ, ဒိဋ္ဌာသဝေါ အဝိဇ္ဇာသဝေန အာသဝေါ စေဝ အာသဝသမ္ပယုတ္တော စ, အဝိဇ္ဇာသဝေါ ဒိဋ္ဌာသဝေန အာသဝေါ စေဝ အာသဝသမ္ပယုတ္တော စ – ဣမေ ဓမ္မာ အာသဝါ စေဝ အာသဝသမ္ပယုတ္တာ စ။

၁၁၁၅. ကတမေ ဓမ္မာ အာသဝသမ္ပယုတ္တာ စေဝ နော စ အာသဝါ? တေဟိ ဓမ္မေဟိ ယေ ဓမ္မာ သမ္ပယုတ္တာ, တေ ဓမ္မေ ဌပေတွာ ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ အာသဝသမ္ပယုတ္တာ စေဝ နော စ အာသဝါ။

၁၁၁၆. ကတမေ ဓမ္မာ အာသဝဝိပ္ပယုတ္တာ သာသဝါ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ အာသဝဝိပ္ပယုတ္တာ သာသဝါ။

၁၁၁၇. ကတမေ ဓမ္မာ အာသဝဝိပ္ပယုတ္တာ အနာသဝါ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ အာသဝဝိပ္ပယုတ္တာ အနာသဝါ။

နိက္ခေပကဏ္ဍေ ပဌမဘာဏဝါရော။

သံယောဇနဂေါစ္ဆကံ

၁၁၁၈. ကတမေ ဓမ္မာ သံယောဇနာ? ဒသ သံယောဇနာနိ – ကာမရာဂသံယောဇနံ, ပဋိဃသံယောဇနံ , မာနသံယောဇနံ, ဒိဋ္ဌိသံယောဇနံ, ဝိစိကိစ္ဆာသံယောဇနံ, သီလဗ္ဗတပရာမာသသံယောဇနံ, ဘဝရာဂသံယောဇနံ, ဣဿာသံယောဇနံ, မစ္ဆရိယသံယောဇနံ, အဝိဇ္ဇာသံယောဇနံ။

၁၁၁၉. တတ္ထ ကတမံ ကာမရာဂသံယောဇနံ? ယော ကာမေသု ကာမစ္ဆန္ဒော ကာမရာဂေါ ကာမနန္ဒီ ကာမတဏှာ ကာမသိနေဟော ကာမပရိဠာဟော ကာမမုစ္ဆာ ကာမဇ္ဈောသာနံ – ဣဒံ ဝုစ္စတိ ကာမရာဂသံယောဇနံ။

၁၁၂၀. တတ္ထ ကတမံ ပဋိဃသံယောဇနံ? အနတ္ထံ မေ အစရီတိ အာဃာတော ဇာယတိ, အနတ္ထံ မေ စရတီတိ အာဃာတော ဇာယတိ, အနတ္ထံ မေ စရိဿတီတိ အာဃာတော ဇာယတိ, ပိယဿ မေ မနာပဿ အနတ္ထံ အစရိ။ပေ.။ အနတ္ထံ စရတိ။ပေ.။ အနတ္ထံ စရိဿတီတိ အာဃာတော ဇာယတိ, အပ္ပိယဿ မေ အမနာပဿ အတ္ထံ အစရိ။ပေ.။ အတ္ထံ စရတိ။ပေ.။ အတ္ထံ စရိဿတီတိ အာဃာတော ဇာယတိ, အဋ္ဌာနေ ဝါ ပန အာဃာတော ဇာယတိ။ ယော ဧဝရူပေါ စိတ္တဿ အာဃာတော ပဋိဃာတော ပဋိဃံ ပဋိဝိရောဓေါ ကောပေါ ပကောပေါ သမ္ပကောပေါ ဒေါသော ပဒေါသော သမ္ပဒေါသော စိတ္တဿ ဗျာပတ္တိ မနောပဒေါသော ကောဓေါ ကုဇ္ဈနာ ကုဇ္ဈိတတ္တံ ဒေါသော ဒုဿနာ ဒုဿိတတ္တံ ဗျာပတ္တိ ဗျာပဇ္ဇနာ ဗျာပဇ္ဇိတတ္တံ ဝိရောဓေါ ပဋိဝိရောဓေါ စဏ္ဍိက္ကံ အသုရောပေါ အနတ္တမနတာ စိတ္တဿ – ဣဒံ ဝုစ္စတိ ပဋိဃသံယောဇနံ။

၁၁၂၁. တတ္ထ ကတမံ မာနသံယောဇနံ? သေယျောဟမသ္မီတိ မာနော, သဒိသောဟမသ္မီတိ မာနော, ဟီနောဟမသ္မီတိ မာနော။ ယော ဧဝရူပေါ မာနော မညနာ မညိတတ္တံ ဥန္နတိ ဥန္နမော [ဥဏ္ဏတိ ဥဏ္ဏာမော (သျာ.)] ဓဇော သမ္ပဂ္ဂါဟော ကေတုကမ္ယတာ စိတ္တဿ – ဣဒံ ဝုစ္စတိ မာနသံယောဇနံ။

၁၁၂၂. တတ္ထ ကတမံ ဒိဋ္ဌိသံယောဇနံ? သဿတော လောကောတိ ဝါ, အသဿတော လောကောတိ ဝါ, အန္တဝါ လောကောတိ ဝါ, အနန္တဝါ လောကောတိ ဝါ, တံ ဇီဝံ တံ သရီရန္တိ ဝါ, အညံ ဇီဝံ အညံ သရီရန္တိ ဝါ, ဟောတိ တထာဂတော ပရံ မရဏာတိ ဝါ, န ဟောတိ တထာဂတော ပရံ မရဏာတိ ဝါ, ဟောတိ စ န စ ဟောတိ တထာဂတော ပရံ မရဏာတိ ဝါ, နေဝ ဟောတိ န န ဟောတိ တထာဂတော ပရံ မရဏာတိ ဝါ; ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပဋိဂ္ဂါဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – ဣဒံ ဝုစ္စတိ ဒိဋ္ဌိသံယောဇနံ။ ဌပေတွာ သီလဗ္ဗတပရာမာသသံယောဇနံ သဗ္ဗာပိ မိစ္ဆာဒိဋ္ဌိ ဒိဋ္ဌိသံယောဇနံ။

၁၁၂၃. တတ္ထ ကတမံ ဝိစိကိစ္ဆာသံယောဇနံ? သတ္ထရိ ကင်္ခတိ ဝိစိကိစ္ဆတိ, ဓမ္မေ ကင်္ခတိ ဝိစိကိစ္ဆတိ, သံဃေ ကင်္ခတိ ဝိစိကိစ္ဆတိ, သိက္ခာယ ကင်္ခတိ ဝိစိကိစ္ဆတိ, ပုဗ္ဗန္တေ ကင်္ခတိ ဝိစိကိစ္ဆတိ, အပရန္တေ ကင်္ခတိ ဝိစိကိစ္ဆတိ, ပုဗ္ဗန္တာပရန္တေ ကင်္ခတိ ဝိစိကိစ္ဆတိ, ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု ကင်္ခတိ ဝိစိကိစ္ဆတိः ယာ ဧဝရူပါ ကင်္ခါ ကင်္ခါယနာ ကင်္ခါယိတတ္တံ ဝိမတိ ဝိစိကိစ္ဆာ ဒွေဠှကံ ဒွေဓါပထော သံသယော အနေကံသဂ္ဂါဟော အာသပ္ပနာ ပရိသပ္ပနာ အပရိယောဂါဟနာ ထမ္ဘိတတ္တံ စိတ္တဿ မနောဝိလေခေါ – ဣဒံ ဝုစ္စတိ ဝိစိကိစ္ဆာသံယောဇနံ။

၁၁၂၄. တတ္ထ ကတမံ သီလဗ္ဗတပရာမာသသံယောဇနံ? ဣတော ဗဟိဒ္ဓါ သမဏဗြာဟ္မဏာနံ သီလေန သုဒ္ဓိ ဝတေန သုဒ္ဓိ သီလဗ္ဗတေန သုဒ္ဓီတိ; ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပတိဋ္ဌာဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – ဣဒံ ဝုစ္စတိ သီလဗ္ဗတပရာမာသသံယောဇနံ။

၁၁၂၅. တတ္ထ ကတမံ ဘဝရာဂသံယောဇနံ? ယော ဘဝေသု ဘဝဆန္ဒော ဘဝရာဂေါ ဘဝနန္ဒီ ဘဝတဏှာ ဘဝသိနေဟော ဘဝပရိဠာဟော ဘဝမုစ္ဆာ ဘဝဇ္ဈောသာနံ – ဣဒံ ဝုစ္စတိ ဘဝရာဂသံယောဇနံ။

၁၁၂၆. တတ္ထ ကတမံ ဣဿာသံယောဇနံ? ယာ ပရလာဘသက္ကာရဂရုကာရမာနနဝန္ဒနပူဇနာသု ဣဿာ ဣဿာယနာ ဣဿာယိတတ္တံ ဥသူယာ ဥသူယနာ ဥသူယိတတ္တံ [ဥဿုယာ ဥဿုယနာ ဥဿုယိတတ္တံ (က.)] – ဣဒံ ဝုစ္စတိ ဣဿာသံယောဇနံ။

၁၁၂၇. တတ္ထ ကတမံ မစ္ဆရိယသံယောဇနံ? ပဉ္စ မစ္ဆရိယာနိ – အာဝါသမစ္ဆရိယံ, ကုလမစ္ဆရိယံ, လာဘမစ္ဆရိယံ, ဝဏ္ဏမစ္ဆရိယံ, ဓမ္မမစ္ဆရိယံ။ ယံ ဧဝရူပံ မစ္ဆေရံ မစ္ဆရာယနာ မစ္ဆရာယိတတ္တံ ဝေဝိစ္ဆံ ကဒရိယံ ကဋုကဉ္စုကတာ အဂ္ဂဟိတတ္တံ စိတ္တဿ – ဣဒံ ဝုစ္စတိ မစ္ဆရိယသံယောဇနံ။

၁၁၂၈. တတ္ထ ကတမံ အဝိဇ္ဇာသံယောဇနံ? ဒုက္ခေ အညာဏံ, ဒုက္ခသမုဒယေ အညာဏံ, ဒုက္ခနိရောဓေ အညာဏံ, ဒုက္ခနိရောဓဂါမိနိယာ ပဋိပဒါယ အညာဏံ, ပုဗ္ဗန္တေ အညာဏံ, အပရန္တေ အညာဏံ, ပုဗ္ဗန္တာပရန္တေ အညာဏံ, ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု အညာဏံः ယံ ဧဝရူပံ အညာဏံ အဒဿနံ အနဘိသမယော အနနုဗောဓေါ အသမ္ဗောဓေါ အပ္ပဋိဝေဓေါ အသံဂါဟနာ အပရိယောဂါဟနာ အသမပေက္ခနာ အပစ္စဝေက္ခဏာ အပစ္စက္ခကမ္မံ ဒုမ္မေဇ္ဈံ ဗာလ္ယံ အသမ္ပဇညံ မောဟော ပမောဟော သမ္မောဟော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာလင္ဂီ မောဟော အကုသလမူလံ – ဣဒံ ဝုစ္စတိ အဝိဇ္ဇာသံယောဇနံ။

ဣမေ ဓမ္မာ သံယောဇနာ။

၁၁၂၉. ကတမေ ဓမ္မာ နော သံယောဇနာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ နော သံယောဇနာ။

၁၁၃၀. ကတမေ ဓမ္မာ သံယောဇနိယာ? သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ သံယောဇနိယာ။

၁၁၃၁. ကတမေ ဓမ္မာ အသံယောဇနိယာ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ အသံယောဇနိယာ။

၁၁၃၂. ကတမေ ဓမ္မာ သံယောဇနသမ္ပယုတ္တာ? တေဟိ ဓမ္မေဟိ ယေ ဓမ္မာ သမ္ပယုတ္တာ ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ သံယောဇနသမ္ပယုတ္တာ။

၁၁၃၃. ကတမေ ဓမ္မာ သံယောဇနဝိပ္ပယုတ္တာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ သံယောဇနဝိပ္ပယုတ္တာ။

၁၁၃၄. ကတမေ ဓမ္မာ သံယောဇနာ စေဝ သံယောဇနိယာ စ? တာနေဝ သံယောဇနာနိ သံယောဇနာ စေဝ သံယောဇနိယာ စ။

၁၁၃၅. ကတမေ ဓမ္မာ သံယောဇနိယာ စေဝ နော စ သံယောဇနာ? တေဟိ ဓမ္မေဟိ ယေ ဓမ္မာ သံယောဇနိယာ, တေ ဓမ္မေ ဌပေတွာ အဝသေသာ သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ သံယောဇနိယာ စေဝ နော စ သံယောဇနာ။

၁၁၃၆. ကတမေ ဓမ္မာ သံယောဇနာ စေဝ သံယောဇနသမ္ပယုတ္တာ စ? ကာမရာဂသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ, အဝိဇ္ဇာသံယောဇနံ ကာမရာဂသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ, ပဋိဃသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ, အဝိဇ္ဇာသံယောဇနံ ပဋိဃသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ, မာနသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ, အဝိဇ္ဇာသံယောဇနံ မာနသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ, ဒိဋ္ဌိသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ, အဝိဇ္ဇာသံယောဇနံ ဒိဋ္ဌိသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ, ဝိစိကိစ္ဆာသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ, အဝိဇ္ဇာသံယောဇနံ ဝိစိကိစ္ဆာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ, သီလဗ္ဗတပရာမာသသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ, အဝိဇ္ဇာသံယောဇနံ သီလဗ္ဗတပရာမာသသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ, ဘဝရာဂသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ, အဝိဇ္ဇာသံယောဇနံ ဘဝရာဂသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ, ဣဿာသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ, အဝိဇ္ဇာသံယောဇနံ ဣဿာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ, မစ္ဆရိယသံယောဇနံ အဝိဇ္ဇာသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ, အဝိဇ္ဇာသံယောဇနံ မစ္ဆရိယသံယောဇနေန သံယောဇနဉ္စေဝ သံယောဇနသမ္ပယုတ္တဉ္စ – ဣမေ ဓမ္မာ သံယောဇနာ စေဝ သံယောဇနသမ္ပယုတ္တာ စ။

၁၁၃၇. ကတမေ ဓမ္မာ သံယောဇနသမ္ပယုတ္တာ စေဝ နော စ သံယောဇနာ? တေဟိ ဓမ္မေဟိ ယေ ဓမ္မာ သမ္ပယုတ္တာ, တေ ဓမ္မေ ဌပေတွာ ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ သံယောဇနသမ္ပယုတ္တာ စေဝ နော စ သံယောဇနာ။

၁၁၃၈. ကတမေ ဓမ္မာ သံယောဇနဝိပ္ပယုတ္တာ သံယောဇနိယာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ သံယောဇနဝိပ္ပယုတ္တာ သံယောဇနိယာ။

၁၁၃၉. ကတမေ ဓမ္မာ သံယောဇနဝိပ္ပယုတ္တာ အသံယောဇနိယာ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ သံယောဇနဝိပ္ပယုတ္တာ အသံယောဇနိယာ။

ဂန္ထဂေါစ္ဆကံ

၁၁၄၀. ကတမေ ဓမ္မာ ဂန္ထာ? စတ္တာရော ဂန္ထာ – အဘိဇ္ဈာ ကာယဂန္ထော, ဗျာပါဒေါ ကာယဂန္ထော, သီလဗ္ဗတပရာမာသော ကာယဂန္ထော, ဣဒံ သစ္စာဘိနိဝေသော ကာယဂန္ထော။

၁၁၄၁. တတ္ထ ကတမော အဘိဇ္ဈာ ကာယဂန္ထော? ယော ရာဂေါ သာရာဂေါ အနုနယော အနုရောဓေါ နန္ဒီ နန္ဒီရာဂေါ စိတ္တဿ သာရာဂေါ ဣစ္ဆာ မုစ္ဆာ အဇ္ဈောသာနံ ဂေဓေါ ပလိဂေဓေါ သင်္ဂေါ ပင္ကော ဧဇာ မာယာ ဇနိကာ သဉ္ဇနနီ သိဗ္ဗိနီ ဇာလိနီ သရိတာ ဝိသတ္တိကာ သုတ္တံ ဝိသဋာ အာယူဟိနီ ဒုတိယာ ပဏိဓိ ဘဝနေတ္တိ ဝနံ ဝနထော သန္ထဝေါ သိနေဟော အပေက္ခာ ပဋိဗန္ဓု အာသာ အာသိသနာ အာသိသိတတ္တံ ရူပါသာ သဒ္ဒါသာ ဂန္ဓာသာ ရသာသာ ဖောဋ္ဌဗ္ဗာသာ လာဘာသာ ဓနာသာ ပုတ္တာသာ ဇီဝိတာသာ ဇပ္ပါ ပဇပ္ပါ အဘိဇပ္ပါ ဇပ္ပါ ဇပ္ပနာ ဇပ္ပိတတ္တံ လောလုပ္ပံ လောလုပ္ပါယနာ လောလုပ္ပါယိတတ္တံ ပုစ္ဆဉ္ဇိကတာ သာဓုကမ္ယတာ အဓမ္မရာဂေါ ဝိသမလောဘော နိကန္တိ နိကာမနာ ပတ္ထနာ ပိဟနာ သမ္ပတ္ထနာ ကာမတဏှာ ဘဝတဏှာ ဝိဘဝတဏှာ ရူပတဏှာ အရူပတဏှာ နိရောဓတဏှာ ရူပတဏှာ သဒ္ဒတဏှာ ဂန္ဓတဏှာ ရသတဏှာ ဖောဋ္ဌဗ္ဗတဏှာ ဓမ္မတဏှာ ဩဃော ယောဂေါ ဂန္ထော ဥပါဒါနံ အာဝရဏံ နီဝရဏံ ဆာဒနံ ဗန္ဓနံ ဥပက္ကိလေသော အနုသယော ပရိယုဋ္ဌာနံ လတာ ဝေဝိစ္ဆံ ဒုက္ခမူလံ ဒုက္ခနိဒါနံ ဒုက္ခပ္ပဘဝေါ မာရပါသော မာရဗဠိသံ မာရဝိသယော တဏှာနဒီ တဏှာဇာလံ တဏှာဂဒ္ဒုလံ တဏှာသမုဒ္ဒေါ အဘိဇ္ဈာ လောဘော အကုသလမူလံ – အယံ ဝုစ္စတိ အဘိဇ္ဈာ ကာယဂန္ထော။

၁၁၄၂. တတ္ထ ကတမော ဗျာပါဒေါ ကာယဂန္ထော? အနတ္ထံ မေ အစရီ တိ အာဃာတော ဇာယတိ, အနတ္ထံ မေ စရတီတိ အာဃာတော ဇာယတိ, အနတ္ထံ မေ စရိဿတီတိ အာဃာတော ဇာယတိ, ပိယဿ မေ မနာပဿ အနတ္ထံ အစရိ။ပေ.။ အနတ္ထံ စရတိ။ပေ.။ အနတ္ထံ စရိဿတီတိ အာဃာတော ဇာယတိ, အပ္ပိယဿ မေ အမနာပဿ အတ္ထံ အစရိ။ပေ.။ အတ္ထံ စရတိ။ပေ.။ အတ္ထံ စရိဿတီတိ အာဃာတော ဇာယတိ, အဋ္ဌာနေ ဝါ ပန အာဃာတော ဇာယတိ။ ယော ဧဝရူပေါ စိတ္တဿ အာဃာတော ပဋိဃာတော ပဋိဃံ ပဋိဝိရောဓေါ ကောပေါ ပကောပေါ သမ္ပကောပေါ ဒေါသော ပဒေါသော သမ္ပဒေါသော စိတ္တဿ ဗျာပတ္တိ မနောပဒေါသော ကောဓေါ ကုဇ္ဈနာ ကုဇ္ဈိတတ္တံ ဒေါသော ဒုဿနာ ဒုဿိတတ္တံ ဗျာပတ္တိ ဗျာပဇ္ဇနာ ဗျာပဇ္ဇိတတ္တံ ဝိရောဓေါ ပဋိဝိရောဓေါ စဏ္ဍိက္ကံ အသုရောပေါ အနတ္တမနတာ စိတ္တဿ – အယံ ဝုစ္စတိ ဗျာပါဒေါ ကာယဂန္ထော။

၁၁၄၃. တတ္ထ ကတမော သီလဗ္ဗတပရာမာသော ကာယဂန္ထော? ဣတော ဗဟိဒ္ဓါ သမဏဗြာဟ္မဏာနံ သီလေန သုဒ္ဓိ, ဝတေန သုဒ္ဓိ, သီလဗ္ဗတေန သုဒ္ဓီတိः ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပတိဋ္ဌာဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – အယံ ဝုစ္စတိ သီလဗ္ဗတပရာမာသော ကာယဂန္ထော။

၁၁၄၄. တတ္ထ ကတမော ဣဒံသစ္စာဘိနိဝေသော ကာယဂန္ထော? သဿတော လောကော, ဣဒမေဝ သစ္စံ မောဃမညန္တိ ဝါ; အသဿတော လောကော, ဣဒမေဝ သစ္စံ မောဃမညန္တိ ဝါ; အန္တဝါ လောကော, ဣဒမေဝ သစ္စံ မောဃမညန္တိ ဝါ; အနန္တဝါ လောကော, ဣဒမေဝ သစ္စံ မောဃမညန္တိ ဝါ; တံ ဇီဝံ တံ သရီရံ, ဣဒမေဝ သစ္စံ မောဃမညန္တိ ဝါ; အညံ ဇီဝံ အညံ သရီရံ, ဣဒမေဝ သစ္စံ မောဃမညန္တိ ဝါ; ဟောတိ တထာဂတော ပရံ မရဏာ, ဣဒမေဝ သစ္စံ မောဃမညန္တိ ဝါ; န ဟောတိ တထာဂတော ပရံ မရဏာ, ဣဒမေဝ သစ္စံ မောဃမညန္တိ ဝါ; ဟောတိ စ န စ ဟောတိ တထာဂတော ပရံ မရဏာ, ဣဒမေဝ သစ္စံ မောဃမညန္တိ ဝါ; နေဝ ဟောတိ န န ဟောတိ တထာဂတော ပရံ မရဏာ, ဣဒမေဝ သစ္စံ မောဃမညန္တိ ဝါः ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပတိဋ္ဌာဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – အယံ ဝုစ္စတိ ဣဒံသစ္စာဘိနိဝေသော ကာယဂန္ထော။ ဌပေတွာ သီလဗ္ဗတပရာမာသံ ကာယဂန္ထံ သဗ္ဗာပိ မိစ္ဆာဒိဋ္ဌိ ဣဒံသစ္စာဘိနိဝေသော ကာယဂန္ထော။

ဣမေ ဓမ္မာ ဂန္ထာ။

၁၁၄၅. ကတမေ ဓမ္မာ နော ဂန္ထာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ နော ဂန္ထာ။

၁၁၄၆. ကတမေ ဓမ္မာ ဂန္ထနိယာ? သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဂန္ထနိယာ။

၁၁၄၇. ကတမေ ဓမ္မာ အဂန္ထနိယာ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ အဂန္ထနိယာ။

၁၁၄၈. ကတမေ ဓမ္မာ ဂန္ထသမ္ပယုတ္တာ? တေဟိ ဓမ္မေဟိ ယေ ဓမ္မာ သမ္ပယုတ္တာ ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဂန္ထသမ္ပယုတ္တာ။

၁၁၄၉. ကတမေ ဓမ္မာ ဂန္ထဝိပ္ပယုတ္တာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ ဝေဒနာက္ခန္ဓော။ပေ.။ ဝိညာဏက္ခန္ဓော, သဗ္ဗဉ္စ ရူပံ အသင်္ခတာ စ ဓါတု – ဣမေ ဓမ္မာ ဂန္ထဝိပ္ပယုတ္တာ။

၁၁၅၀. ကတမေ ဓမ္မာ ဂန္ထာ စေဝ ဂန္ထနိယာ စ? တေဝ ဂန္ထာ ဂန္ထာ စေဝ ဂန္ထနိယာ စ။

၁၁၅၁. ကတမေ ဓမ္မာ ဂန္ထနိယာ စေဝ နော စ ဂန္ထာ? တေဟိ ဓမ္မေဟိ ယေ ဓမ္မာ ဂန္ထနိယာ, တေ ဓမ္မေ ဌပေတွာ အဝသေသာ သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဂန္ထနိယာ စေဝ နော စ ဂန္ထာ။

၁၁၅၂. ကတမေ ဓမ္မာ ဂန္ထာ စေဝ ဂန္ထသမ္ပယုတ္တာ စ? သီလဗ္ဗတပရာမာသော ကာယဂန္ထော အဘိဇ္ဈာကာယဂန္ထေန ဂန္ထော စေဝ ဂန္ထသမ္ပယုတ္တော စ, အဘိဇ္ဈာကာယဂန္ထော သီလဗ္ဗတပရာမာသေန ကာယဂန္ထေန ဂန္ထော စေဝ ဂန္ထသမ္ပယုတ္တော စ, ဣဒံသစ္စာဘိနိဝေသော ကာယဂန္ထော အဘိဇ္ဈာကာယဂန္ထေန ဂန္ထော စေဝ ဂန္ထသမ္ပယုတ္တော စ, အဘိဇ္ဈာကာယဂန္ထော ဣဒံသစ္စာဘိနိဝေသေန ကာယဂန္ထေန ဂန္ထော စေဝ ဂန္ထသမ္ပယုတ္တော စ – ဣမေ ဓမ္မာ ဂန္ထာ စေဝ ဂန္ထသမ္ပယုတ္တာ စ။

၁၁၅၃. ကတမေ ဓမ္မာ ဂန္ထသမ္ပယုတ္တာ စေဝ နော စ ဂန္ထာ? တေဟိ ဓမ္မေဟိ ယေ ဓမ္မာ သမ္ပယုတ္တာ, တေ ဓမ္မေ ဌပေတွာ ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဂန္ထသမ္ပယုတ္တာ စေဝ နော စ ဂန္ထာ။

၁၁၅၄. ကတမေ ဓမ္မာ ဂန္ထဝိပ္ပယုတ္တာ ဂန္ထနိယာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဂန္ထဝိပ္ပယုတ္တာ ဂန္ထနိယာ။

၁၁၅၅. ကတမေ ဓမ္မာ ဂန္ထဝိပ္ပယုတ္တာ အဂန္ထနိယာ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ ဂန္ထဝိပ္ပယုတ္တာ အဂန္ထနိယာ။

ဩဃဂေါစ္ဆကံ

၁၁၅၆. ကတမေ ဓမ္မာ ဩဃာ? စတ္တာရော ဩဃာ။ပေ.။ ဣမေ ဓမ္မာ ဩဃဝိပ္ပယုတ္တာ ဩဃနိယာ။

ယောဂဂေါစ္ဆကံ

၁၁၅၇. ကတမေ ဓမ္မာ ယောဂါ? စတ္တာရော ယောဂါ။ပေ.။ ဣမေ ဓမ္မာ ယောဂဝိပ္ပယုတ္တာ ယောဂနိယာ။

နီဝရဏဂေါစ္ဆကံ

၁၁၅၈. ကတမေ ဓမ္မာ နီဝရဏာ? ဆ နီဝရဏာ [နီဝရဏာနိ (သျာ.)] – ကာမစ္ဆန္ဒနီဝရဏံ, ဗျာပါဒနီဝရဏံ, ထိနမိဒ္ဓနီဝရဏံ, ဥဒ္ဓစ္စကုက္ကုစ္စနီဝရဏံ, ဝိစိကိစ္ဆာနီဝရဏံ, အဝိဇ္ဇာနီဝရဏံ။

၁၁၅၉. တတ္ထ ကတမံ ကာမစ္ဆန္ဒနီဝရဏံ? ယော ကာမေသု ကာမစ္ဆန္ဒော ကာမရာဂေါ ကာမနန္ဒီ ကာမတဏှာ ကာမသိနေဟော ကာမပရိဠာဟော ကာမမုစ္ဆာ ကာမဇ္ဈောသာနံ – ဣဒံ ဝုစ္စတိ ကာမစ္ဆန္ဒနီဝရဏံ။

၁၁၆၀. တတ္ထ ကတမံ ဗျာပါဒနီဝရဏံ? အနတ္ထံ မေ အစရီတိ အာဃာတော ဇာယတိ, အနတ္ထံ မေ စရတီတိ အာဃာတော ဇာယတိ; အနတ္ထံ မေ စရိဿတီတိ အာဃာတော ဇာယတိ; ပိယဿ မေ မနာပဿ အနတ္ထံ အစရိ။ပေ.။ အနတ္ထံ စရတိ။ပေ.။ အနတ္ထံ စရိဿတီတိ အာဃာတော ဇာယတိ, အပ္ပိယဿ မေ အမနာပဿ အတ္ထံ အစရိ။ပေ.။ အတ္ထံ စရတိ။ပေ.။ အတ္ထံ စရိဿတီတိ အာဃာတော ဇာယတိ, အဋ္ဌာနေ ဝါ ပန အာဃာတော ဇာယတိ။ ယော ဧဝရူပေါ စိတ္တဿ အာဃာတော ပဋိဃာတော ပဋိဃံ ပဋိဝိရောဓေါ ကောပေါ ပကောပေါ သမ္ပကောပေါ ဒေါသော ပဒေါသော သမ္ပဒေါသော စိတ္တဿ ဗျာပတ္တိ မနောပဒေါသော ကောဓေါ ကုဇ္ဈနာ ကုဇ္ဈိတတ္တံ ဒေါသော ဒုဿနာ ဒုဿိတတ္တံ ဗျာပတ္တိ ဗျာပဇ္ဇနာ ဗျာပဇ္ဇိတတ္တံ ဝိရောဓေါ ပဋိဝိရောဓေါ စဏ္ဍိက္ကံ အသုရောပေါ အနတ္တမနတာ စိတ္တဿ – ဣဒံ ဝုစ္စတိ ဗျာပါဒနီဝရဏံ။

၁၁၆၁. တတ္ထ ကတမံ ထိနမိဒ္ဓနီဝရဏံ? အတ္ထိ ထိနံ, အတ္ထိ မိဒ္ဓံ။

၁၁၆၂. တတ္ထ ကတမံ ထိနံ? ယာ စိတ္တဿ အကလ္လတာ အကမ္မညတာ ဩလီယနာ သလ္လီယနာ လီနံ လီယနာ လီယိတတ္တံ ထိနံ ထိယနာ ထိယိတတ္တံ စိတ္တဿ – ဣဒံ ဝုစ္စတိ ထိနံ။

၁၁၆၃. တတ္ထ ကတမံ မိဒ္ဓံ? ယာ ကာယဿ အကလ္လတာ အကမ္မညတာ ဩနာဟော ပရိယောနာဟော အန္တောသမောရောဓေါ မိဒ္ဓံ သောပ္ပံ ပစလာယိကာ သောပ္ပံ သုပနာ သုပိတတ္တံ – ဣဒံ ဝုစ္စတိ မိဒ္ဓံ။ ဣတိ ဣဒဉ္စ ထိနံ, ဣဒဉ္စ မိဒ္ဓံ – ဣဒံ ဝုစ္စတိ ထိနမိဒ္ဓနီဝရဏံ။

၁၁၆၄. တတ္ထ ကတမံ ဥဒ္ဓစ္စကုက္ကုစ္စနီဝရဏံ? အတ္ထိ ဥဒ္ဓစ္စံ, အတ္ထိ ကုက္ကုစ္စံ။

၁၁၆၅. တတ္ထ ကတမံ ဥဒ္ဓစ္စံ? ယံ စိတ္တဿ ဥဒ္ဓစ္စံ အဝူပသမော စေတသော ဝိက္ခေပေါ ဘန္တတ္တံ စိတ္တဿ – ဣဒံ ဝုစ္စတိ ဥဒ္ဓစ္စံ။

၁၁၆၆. တတ္ထ ကတမံ ကုက္ကုစ္စံ? အကပ္ပိယေ ကပ္ပိယသညိတာ, ကပ္ပိယေ အကပ္ပိယသညိတာ, အဝဇ္ဇေ ဝဇ္ဇသညိတာ, ဝဇ္ဇေ အဝဇ္ဇသညိတာ။ ယံ ဧဝရူပံ ကုက္ကုစ္စံ ကုက္ကုစ္စာယနာ ကုက္ကုစ္စာယိတတ္တံ စေတသော ဝိပ္ပဋိသာရော မနောဝိလေခေါ – ဣဒံ ဝုစ္စတိ ကုက္ကုစ္စံ။ ဣတိ ဣဒဉ္စ ဥဒ္ဓစ္စံ, ဣဒဉ္စ ကုက္ကုစ္စံ – ဣဒံ ဝုစ္စတိ ဥဒ္ဓစ္စကုက္ကုစ္စနီဝရဏံ။

၁၁၆၇. တတ္ထ ကတမံ ဝိစိကိစ္ဆာနီဝရဏံ? သတ္ထရိ ကင်္ခတိ ဝိစိကိစ္ဆတိ, ဓမ္မေ ကင်္ခတိ ဝိစိကိစ္ဆတိ, သံဃေ ကင်္ခတိ ဝိစိကိစ္ဆတိ, သိက္ခာယ ကင်္ခတိ ဝိစိကိစ္ဆတိ, ပုဗ္ဗန္တေ ကင်္ခတိ ဝိစိကိစ္ဆတိ, အပရန္တေ ကင်္ခတိ ဝိစိကိစ္ဆတိ, ပုဗ္ဗန္တာပရန္တေ ကင်္ခတိ ဝိစိကိစ္ဆတိ, ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု ကင်္ခတိ ဝိစိကိစ္ဆတိ။ ယာ ဧဝရူပါ ကင်္ခါ ကင်္ခါယနာ ကင်္ခါယိတတ္တံ ဝိမတိ ဝိစိကိစ္ဆာ ဒွေဠှကံ ဒွေဓါပထော သံသယော အနေကံသဂ္ဂါဟော အာသပ္ပနာ ပရိသပ္ပနာ အပရိယောဂါဟနာ ထမ္ဘိတတ္တံ စိတ္တဿ မနောဝိလေခေါ – ဣဒံ ဝုစ္စတိ ဝိစိကိစ္ဆာနီဝရဏံ။

၁၁၆၈. တတ္ထ ကတမံ အဝိဇ္ဇာနီဝရဏံ? ဒုက္ခေ အညာဏံ, ဒုက္ခသမုဒယေ အညာဏံ, ဒုက္ခနိရောဓေ အညာဏံ, ဒုက္ခနိရောဓဂါမိနိယာ ပဋိပဒါယ အညာဏံ, ပုဗ္ဗန္တေ အညာဏံ, အပရန္တေ အညာဏံ, ပုဗ္ဗန္တာပရန္တေ အညာဏံ, ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု အညာဏံः ယံ ဧဝရူပံ အညာဏံ အဒဿနံ အနဘိသမယော အနနုဗောဓေါ အသမ္ဗောဓေါ အပ္ပဋိဝေဓေါ အသံဂါဟနာ အပရိယောဂါဟနာ အသမပေက္ခနာ အပစ္စဝေက္ခဏာ အပစ္စက္ခကမ္မံ ဒုမ္မေဇ္ဈံ ဗာလ္ယံ အသမ္ပဇညံ မောဟော ပမောဟော သမ္မောဟော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာလင္ဂီ မောဟော အကုသလမူလံ – ဣဒံ ဝုစ္စတိ အဝိဇ္ဇာနီဝရဏံ။

ဣမေ ဓမ္မာ နီဝရဏာ။

၁၁၆၉. ကတမေ ဓမ္မာ နော နီဝရဏာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ နော နီဝရဏာ။

၁၁၇၀. ကတမေ ဓမ္မာ နီဝရဏိယာ? သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ နီဝရဏိယာ။

၁၁၇၁. ကတမေ ဓမ္မာ အနီဝရဏိယာ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ အနီဝရဏိယာ။

၁၁၇၂. ကတမေ ဓမ္မာ နီဝရဏသမ္ပယုတ္တာ? တေဟိ ဓမ္မေဟိ ယေ ဓမ္မာ သမ္ပယုတ္တာ ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ နီဝရဏသမ္ပယုတ္တာ။

၁၁၇၃. ကတမေ ဓမ္မာ နီဝရဏဝိပ္ပယုတ္တာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ နီဝရဏဝိပ္ပယုတ္တာ။

၁၁၇၄. ကတမေ ဓမ္မာ နီဝရဏာ စေဝ နီဝရဏိယာ စ? တာနေဝ နီဝရဏာနိ နီဝရဏာ စေဝ နီဝရဏိယာ စ။

၁၁၇၅. ကတမေ ဓမ္မာ နီဝရဏိယာ စေဝ နော စ နီဝရဏာ? တေဟိ ဓမ္မေဟိ ယေ ဓမ္မာ နီဝရဏိယာ, တေ ဓမ္မေ ဌပေတွာ အဝသေသာ သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ နီဝရဏိယာ စေဝ နော စ နီဝရဏာ။

၁၁၇၆. ကတမေ ဓမ္မာ နီဝရဏာ စေဝ နီဝရဏသမ္ပယုတ္တာ စ? ကာမစ္ဆန္ဒနီဝရဏံ အဝိဇ္ဇာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, အဝိဇ္ဇာနီဝရဏံ ကာမစ္ဆန္ဒနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, ဗျာပါဒနီဝရဏံ အဝိဇ္ဇာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, အဝိဇ္ဇာနီဝရဏံ ဗျာပါဒနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, ထိနမိဒ္ဓနီဝရဏံ အဝိဇ္ဇာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, အဝိဇ္ဇာနီဝရဏံ ထိနမိဒ္ဓနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, ဥဒ္ဓစ္စနီဝရဏံ အဝိဇ္ဇာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, အဝိဇ္ဇာနီဝရဏံ ဥဒ္ဓစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, ကုက္ကုစ္စနီဝရဏံ အဝိဇ္ဇာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, အဝိဇ္ဇာနီဝရဏံ ကုက္ကုစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, ဝိစိကိစ္ဆာနီဝရဏံ အဝိဇ္ဇာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, အဝိဇ္ဇာနီဝရဏံ ဝိစိကိစ္ဆာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, ကာမစ္ဆန္ဒနီဝရဏံ ဥဒ္ဓစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, ဥဒ္ဓစ္စနီဝရဏံ ကာမစ္ဆန္ဒနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, ဗျာပါဒနီဝရဏံ ဥဒ္ဓစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, ဥဒ္ဓစ္စနီဝရဏံ ဗျာပါဒနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, ထိနမိဒ္ဓနီဝရဏံ ဥဒ္ဓစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, ဥဒ္ဓစ္စနီဝရဏံ ထိနမိဒ္ဓနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, ကုက္ကုစ္စနီဝရဏံ ဥဒ္ဓစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, ဥဒ္ဓစ္စနီဝရဏံ ကုက္ကုစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, ဝိစိကိစ္ဆာနီဝရဏံ ဥဒ္ဓစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, ဥဒ္ဓစ္စနီဝရဏံ ဝိစိကိစ္ဆာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, အဝိဇ္ဇာနီဝရဏံ ဥဒ္ဓစ္စနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ, ဥဒ္ဓစ္စနီဝရဏံ အဝိဇ္ဇာနီဝရဏေန နီဝရဏဉ္စေဝ နီဝရဏသမ္ပယုတ္တဉ္စ – ဣမေ ဓမ္မာ နီဝရဏာ စေဝ နီဝရဏသမ္ပယုတ္တာ စ။

၁၁၇၇. ကတမေ ဓမ္မာ နီဝရဏသမ္ပယုတ္တာ စေဝ နော စ နီဝရဏာ? တေဟိ ဓမ္မေဟိ ယေ ဓမ္မာ သမ္ပယုတ္တာ, တေ ဓမ္မေ ဌပေတွာ ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ နီဝရဏသမ္ပယုတ္တာ စေဝ နော စ နီဝရဏာ။

၁၁၇၈. ကတမေ ဓမ္မာ နီဝရဏဝိပ္ပယုတ္တာ နီဝရဏိယာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ သာသဝါ ကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ နီဝရဏဝိပ္ပယုတ္တာ နီဝရဏိယာ။

၁၁၇၉. ကတမေ ဓမ္မာ နီဝရဏဝိပ္ပယုတ္တာ အနီဝရဏိယာ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ နီဝရဏဝိပ္ပယုတ္တာ အနီဝရဏိယာ။

ပရာမာသဂေါစ္ဆကံ

၁၁၈၀. ကတမေ ဓမ္မာ ပရာမာသာ? ဒိဋ္ဌိပရာမာသော။

၁၁၈၁. တတ္ထ ကတမော ဒိဋ္ဌိပရာမာသော? သဿတော လောကောတိ ဝါ, အသဿတော လောကောတိ ဝါ, အန္တဝါ လောကောတိ ဝါ, အနန္တဝါ လောကောတိ ဝါ, တံ ဇီဝံ တံ သရီရန္တိ ဝါ, အညံ ဇီဝံ အညံ သရီရန္တိ ဝါ, ဟောတိ တထာဂတော ပရံ မရဏာတိ ဝါ, န ဟောတိ တထာဂတော ပရံ မရဏာတိ ဝါ, ဟောတိ စ န စ ဟောတိ တထာဂတော ပရံ မရဏာတိ ဝါ, နေဝ ဟောတိ န န ဟောတိ တထာဂတော ပရံ မရဏာတိ ဝါः ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပတိဋ္ဌာဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – အယံ ဝုစ္စတိ ဒိဋ္ဌိပရာမာသော။ သဗ္ဗာပိ မိစ္ဆာဒိဋ္ဌိ ဒိဋ္ဌိပရာမာသော။

ဣမေ ဓမ္မာ ပရာမာသာ။

၁၁၈၂. ကတမေ ဓမ္မာ နော ပရာမာသာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ နော ပရာမာသာ။

၁၁၈၃. ကတမေ ဓမ္မာ ပရာမဋ္ဌာ? သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ပရာမဋ္ဌာ။

၁၁၈၄. ကတမေ ဓမ္မာ အပရာမဋ္ဌာ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ အပရာမဋ္ဌာ။

၁၁၈၅. ကတမေ ဓမ္မာ ပရာမာသသမ္ပယုတ္တာ? တေဟိ ဓမ္မေဟိ ယေ ဓမ္မာ သမ္ပယုတ္တာ ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ပရာမာသသမ္ပယုတ္တာ။

၁၁၈၆. ကတမေ ဓမ္မာ ပရာမာသဝိပ္ပယုတ္တာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ ပရာမာသဝိပ္ပယုတ္တာ။

၁၁၈၇. ကတမေ ဓမ္မာ ပရာမာသာ စေဝ ပရာမဋ္ဌာ စ? သွေဝ ပရာမာသော ပရာမာသော စေဝ ပရာမဋ္ဌော စ။

၁၁၈၈. ကတမေ ဓမ္မာ ပရာမဋ္ဌာ စေဝ နော စ ပရာမာသာ? တေဟိ ဓမ္မေဟိ ယေ ဓမ္မာ ပရာမဋ္ဌာ, တေ ဓမ္မေ ဌပေတွာ အဝသေသာ သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ပရာမဋ္ဌာ စေဝ နော စ ပရာမာသာ။

၁၁၈၉. ကတမေ ဓမ္မာ ပရာမာသဝိပ္ပယုတ္တာ ပရာမဋ္ဌာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ပရာမာသဝိပ္ပယုတ္တာ ပရာမဋ္ဌာ။

၁၁၉၀. ကတမေ ဓမ္မာ ပရာမာသဝိပ္ပယုတ္တာ အပရာမဋ္ဌာ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ ပရာမာသဝိပ္ပယုတ္တာ အပရာမဋ္ဌာ။

မဟန္တရဒုကံ

၁၁၉၁. ကတမေ ဓမ္မာ သာရမ္မဏာ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော – ဣမေ ဓမ္မာ သာရမ္မဏာ။

၁၁၉၂. ကတမေ ဓမ္မာ အနာရမ္မဏာ? သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ အနာရမ္မဏာ။

၁၁၉၃. ကတမေ ဓမ္မာ စိတ္တာ? စက္ခုဝိညာဏံ, သောတဝိညာဏံ, ဃာနဝိညာဏံ, ဇိဝှာဝိညာဏံ, ကာယဝိညာဏံ, မနောဓါတု, မနောဝိညာဏဓါတု – ဣမေ ဓမ္မာ စိတ္တာ။

၁၁၉၄. ကတမေ ဓမ္မာ နော စိတ္တာ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ နော စိတ္တာ။

၁၁၉၅. ကတမေ ဓမ္မာ စေတသိကာ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော – ဣမေ ဓမ္မာ စေတသိကာ။

၁၁၉၆. ကတမေ ဓမ္မာ အစေတသိကာ? စိတ္တဉ္စ, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ အစေတသိကာ။

၁၁၉၇. ကတမေ ဓမ္မာ စိတ္တသမ္ပယုတ္တာ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော – ဣမေ ဓမ္မာ စိတ္တသမ္ပယုတ္တာ။

၁၁၉၈. ကတမေ ဓမ္မာ စိတ္တဝိပ္ပယုတ္တာ? သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ စိတ္တဝိပ္ပယုတ္တာ။ စိတ္တံ န ဝတ္တဗ္ဗံ – စိတ္တေန သမ္ပယုတ္တန္တိပိ, စိတ္တေန ဝိပ္ပယုတ္တန္တိပိ။

၁၁၉၉. ကတမေ ဓမ္မာ စိတ္တသံသဋ္ဌာ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော – ဣမေ ဓမ္မာ စိတ္တသံသဋ္ဌာ။

၁၂၀၀. ကတမေ ဓမ္မာ စိတ္တဝိသံသဋ္ဌာ? သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ စိတ္တဝိသံသဋ္ဌာ။ စိတ္တံ န ဝတ္တဗ္ဗံ – စိတ္တေန သံသဋ္ဌန္တိပိ, စိတ္တေန ဝိသံသဋ္ဌန္တိပိ။

၁၂၀၁. ကတမေ ဓမ္မာ စိတ္တသမုဋ္ဌာနာ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော; ကာယဝိညတ္တိ ဝစီဝိညတ္တိ; ယံ ဝါ ပနညမ္ပိ အတ္ထိ ရူပံ စိတ္တဇံ စိတ္တဟေတုကံ စိတ္တသမုဋ္ဌာနံ ရူပါယတနံ သဒ္ဒါယတနံ ဂန္ဓာယတနံ ရသာယတနံ ဖောဋ္ဌဗ္ဗာယတနံ အာကာသဓါတု အာပေါဓါတု ရူပဿ လဟုတာ ရူပဿ မုဒုတာ ရူပဿ ကမ္မညတာ ရူပဿ ဥပစယော ရူပဿ သန္တတိ ကဗဠီကာရော အာဟာရော – ဣမေ ဓမ္မာ စိတ္တသမုဋ္ဌာနာ။

၁၂၀၂. ကတမေ ဓမ္မာ နော စိတ္တသမုဋ္ဌာနာ? စိတ္တဉ္စ, အဝသေသဉ္စ ရူပံ, အသင်္ခတာ စ ဓါတု – ဣမေ ဓမ္မာ နော စိတ္တသမုဋ္ဌာနာ။

၁၂၀၃. ကတမေ ဓမ္မာ စိတ္တသဟဘုနော? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ကာယဝိညတ္တိ, ဝစီဝိညတ္တိ – ဣမေ ဓမ္မာ စိတ္တသဟဘုနော။

၁၂၀၄. ကတမေ ဓမ္မာ နော စိတ္တသဟဘုနော? စိတ္တဉ္စ, အဝသေသဉ္စ ရူပံ, အသင်္ခတာ စ ဓါတု – ဣမေ ဓမ္မာ နော စိတ္တသဟဘုနော။

၁၂၀၅. ကတမေ ဓမ္မာ စိတ္တာနုပရိဝတ္တိနော? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ကာယဝိညတ္တိ, ဝစီဝိညတ္တိ – ဣမေ ဓမ္မာ စိတ္တာနုပရိဝတ္တိနော။

၁၂၀၆. ကတမေ ဓမ္မာ နော စိတ္တာနုပရိဝတ္တိနော? စိတ္တဉ္စ, အဝသေသဉ္စ ရူပံ, အသင်္ခတာ စ ဓါတု – ဣမေ ဓမ္မာ နော စိတ္တာနုပရိဝတ္တိနော။

၁၂၀၇. ကတမေ ဓမ္မာ စိတ္တသံသဋ္ဌသမုဋ္ဌာနာ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော – ဣမေ ဓမ္မာ စိတ္တသံသဋ္ဌသမုဋ္ဌာနာ။

၁၂၀၈. ကတမေ ဓမ္မာ နော စိတ္တသံသဋ္ဌသမုဋ္ဌာနာ? စိတ္တဉ္စ, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ နော စိတ္တသံသဋ္ဌသမုဋ္ဌာနာ။

၁၂၀၉. ကတမေ ဓမ္မာ စိတ္တသံသဋ္ဌသမုဋ္ဌာနသဟဘုနော? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော – ဣမေ ဓမ္မာ စိတ္တသံသဋ္ဌသမုဋ္ဌာနသဟဘုနော။

၁၂၁၀. ကတမေ ဓမ္မာ နော စိတ္တသံသဋ္ဌသမုဋ္ဌာနသဟဘုနော? စိတ္တဉ္စ, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ နော စိတ္တသံသဋ္ဌသမုဋ္ဌာနသဟဘုနော။

၁၂၁၁. ကတမေ ဓမ္မာ စိတ္တသံသဋ္ဌသမုဋ္ဌာနာနုပရိဝတ္တိနော? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော – ဣမေ ဓမ္မာ စိတ္တသံသဋ္ဌသမုဋ္ဌာနာနုပရိဝတ္တိနော။

၁၂၁၂. ကတမေ ဓမ္မာ နော စိတ္တသံသဋ္ဌသမုဋ္ဌာနာနုပရိဝတ္တိနော? စိတ္တဉ္စ, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ နော စိတ္တသံသဋ္ဌသမုဋ္ဌာနာနုပရိဝတ္တိနော။

၁၂၁၃. ကတမေ ဓမ္မာ အဇ္ဈတ္တိကာ? စက္ခာယတနံ။ပေ.။ မနာယတနံ – ဣမေ ဓမ္မာ အဇ္ဈတ္တိကာ။

၁၂၁၄. ကတမေ ဓမ္မာ ဗာဟိရာ? ရူပါယတနံ။ပေ.။ ဓမ္မာယတနံ – ဣမေ ဓမ္မာ ဗာဟိရာ။

၁၂၁၅. ကတမေ ဓမ္မာ ဥပါဒါ? စက္ခာယတနံ။ပေ.။ ကဗဠီကာရော အာဟာရော – ဣမေ ဓမ္မာ ဥပါဒါ။

၁၂၁၆. ကတမေ ဓမ္မာ နော ဥပါဒါ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော, စတ္တာရော စ မဟာဘူတာ, အသင်္ခတာ စ ဓါတု – ဣမေ ဓမ္မာ နော ဥပါဒါ။

၁၂၁၇. ကတမေ ဓမ္မာ ဥပါဒိဏ္ဏာ? သာသဝါ ကုသလာကုသလာနံ ဓမ္မာနံ ဝိပါကာ ကာမာဝစရာ, ရူပါဝစရာ, အရူပါဝစရာ; ဝေဒနာက္ခန္ဓော။ပေ.။ ဝိညာဏက္ခန္ဓော; ယဉ္စ ရူပံ ကမ္မဿ ကတတ္တာ – ဣမေ ဓမ္မာ ဥပါဒိဏ္ဏာ ။

၁၂၁၈. ကတမေ ဓမ္မာ အနုပါဒိဏ္ဏာ? သာသဝါ ကုသလာကုသလာ ဓမ္မာ ကာမာဝစရာ, ရူပါဝစရာ, အရူပါဝစရာ; ဝေဒနာက္ခန္ဓော။ပေ.။ ဝိညာဏက္ခန္ဓော; ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပါကာ, ယဉ္စ ရူပံ န ကမ္မဿ ကတတ္တာ, အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ အနုပါဒိဏ္ဏာ။

ဥပါဒါနဂေါစ္ဆကံ

၁၂၁၉. ကတမေ ဓမ္မာ ဥပါဒါနာ? စတ္တာရိ ဥပါဒါနာနိ – ကာမုပါဒါနံ, ဒိဋ္ဌုပါဒါနံ, သီလဗ္ဗတုပါဒါနံ, အတ္တဝါဒုပါဒါနံ [ကာမူပါဒါနံ ဒိဋ္ဌူပါဒါနံ သီလဗ္ဗတူပါဒါနံ အတ္တဝါဒူပါဒါနံ (သီ.)]။

၁၂၂၀. တတ္ထ ကတမံ ကာမုပါဒါနံ? ယော ကာမေသု ကာမစ္ဆန္ဒော ကာမရာဂေါ ကာမနန္ဒီ ကာမတဏှာ ကာမသိနေဟော ကာမပရိဠာဟော ကာမမုစ္ဆာ ကာမဇ္ဈောသာနံ – ဣဒံ ဝုစ္စတိ ကာမုပါဒါနံ။

၁၂၂၁. တတ္ထ ကတမံ ဒိဋ္ဌုပါဒါနံ? နတ္ထိ ဒိန္နံ, နတ္ထိ ယိဋ္ဌံ, နတ္ထိ ဟုတံ, နတ္ထိ သုကတဒုက္ကဋာနံ ကမ္မာနံ ဖလံ ဝိပါကော, နတ္ထိ အယံ လောကော, နတ္ထိ ပရော လောကော, နတ္ထိ မာတာ, နတ္ထိ ပိတာ, နတ္ထိ သတ္တာ ဩပပါတိကာ, နတ္ထိ လောကေ သမဏဗြာဟ္မဏာ သမ္မဂ္ဂတာ [သမဂ္ဂတာ (က.)] သမ္မာပဋိပန္နာ, ယေ ဣမဉ္စ လောကံ ပရဉ္စ လောကံ သယံ အဘိညာ သစ္ဆိကတွာ ပဝေဒေန္တီတိ – ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပတိဋ္ဌာဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – ဣဒံ ဝုစ္စတိ ဒိဋ္ဌုပါဒါနံ။ ဌပေတွာ သီလဗ္ဗတုပါဒါနဉ္စ အတ္တဝါဒုပါဒါနဉ္စ သဗ္ဗာပိ မိစ္ဆာဒိဋ္ဌိ ဒိဋ္ဌုပါဒါနံ။

၁၂၂၂. တတ္ထ ကတမံ သီလဗ္ဗတုပါဒါနံ? ဣတော ဗဟိဒ္ဓါ သမဏဗြာဟ္မဏာနံ သီလေန သုဒ္ဓိ, ဝတေန သုဒ္ဓိ, သီလဗ္ဗတေန သုဒ္ဓီတိ – ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပတိဋ္ဌာဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – ဣဒံ ဝုစ္စတိ သီလဗ္ဗတုပါဒါနံ။

၁၂၂၃. တတ္ထ ကတမံ အတ္တဝါဒုပါဒါနံ? ဣဓ အဿုတဝါ ပုထုဇ္ဇနော အရိယာနံ အဒဿာဝီ အရိယဓမ္မဿ အကောဝိဒေါ အရိယဓမ္မေ အဝိနီတော သပ္ပုရိသာနံ အဒဿာဝီ သပ္ပုရိသဓမ္မဿ အကောဝိဒေါ သပ္ပုရိသဓမ္မေ အဝိနီတော ရူပံ အတ္တတော သမနုပဿတိ, ရူပဝန္တံ ဝါ အတ္တာနံ, အတ္တနိ ဝါ ရူပံ, ရူပသ္မိံ ဝါ အတ္တာနံ။ ဝေဒနံ။ပေ.။ သညံ။ပေ.။ သင်္ခါရေ။ပေ.။ ဝိညာဏံ အတ္တတော သမနုပဿတိ, ဝိညာဏဝန္တံ ဝါ အတ္တာနံ, အတ္တနိ ဝါ ဝိညာဏံ ဝိညာဏသ္မိံ ဝါ အတ္တာနံ။ ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပတိဋ္ဌာဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – ဣဒံ ဝုစ္စတိ အတ္တဝါဒုပါဒါနံ။

ဣမေ ဓမ္မာ ဥပါဒါနာ။

၁၂၂၄. ကတမေ ဓမ္မာ နော ဥပါဒါနာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ နော ဥပါဒါနာ။

၁၂၂၅. ကတမေ ဓမ္မာ ဥပါဒါနိယာ? သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဥပါဒါနိယာ။

၁၂၂၆. ကတမေ ဓမ္မာ အနုပါဒါနိယာ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ အနုပါဒါနိယာ။

၁၂၂၇. ကတမေ ဓမ္မာ ဥပါဒါနသမ္ပယုတ္တာ? တေဟိ ဓမ္မေဟိ ယေ ဓမ္မာ သမ္ပယုတ္တာ ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဥပါဒါနသမ္ပယုတ္တာ။

၁၂၂၈. ကတမေ ဓမ္မာ ဥပါဒါနဝိပ္ပယုတ္တာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ ဥပါဒါနဝိပ္ပယုတ္တာ။

၁၂၂၉. ကတမေ ဓမ္မာ ဥပါဒါနာ စေဝ ဥပါဒါနိယာ စ? တာနေဝ ဥပါဒါနာနိ ဥပါဒါနာ စေဝ ဥပါဒါနိယာ စ။

၁၂၃၀. ကတမေ ဓမ္မာ ဥပါဒါနိယာ စေဝ နော စ ဥပါဒါနာ? တေဟိ ဓမ္မေဟိ ယေ ဓမ္မာ ဥပါဒါနိယာ , တေ ဓမ္မေ ဌပေတွာ အဝသေသာ သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဥပါဒါနိယာ စေဝ နော စ ဥပါဒါနာ။

၁၂၃၁. ကတမေ ဓမ္မာ ဥပါဒါနာ စေဝ ဥပါဒါနသမ္ပယုတ္တာ စ? ဒိဋ္ဌုပါဒါနံ ကာမုပါဒါနေန ဥပါဒါနဉ္စေဝ ဥပါဒါနသမ္ပယုတ္တဉ္စ, ကာမုပါဒါနံ ဒိဋ္ဌုပါဒါနေန ဥပါဒါနဉ္စေဝ ဥပါဒါနသမ္ပယုတ္တဉ္စ, သီလဗ္ဗတုပါဒါနံ ကာမုပါဒါနေန ဥပါဒါနဉ္စေဝ ဥပါဒါနသမ္ပယုတ္တဉ္စ, ကာမုပါဒါနံ သီလဗ္ဗတုပါဒါနေန ဥပါဒါနဉ္စေဝ ဥပါဒါနသမ္ပယုတ္တဉ္စ , အတ္တဝါဒုပါဒါနံ ကာမုပါဒါနေန ဥပါဒါနဉ္စေဝ ဥပါဒါနသမ္ပယုတ္တဉ္စ, ကာမုပါဒါနံ အတ္တဝါဒုပါဒါနေန ဥပါဒါနဉ္စေဝ ဥပါဒါနသမ္ပယုတ္တဉ္စ – ဣမေ ဓမ္မာ ဥပါဒါနာ စေဝ ဥပါဒါနသမ္ပယုတ္တာ စ။

၁၂၃၂. ကတမေ ဓမ္မာ ဥပါဒါနသမ္ပယုတ္တာ စေဝ နော စ ဥပါဒါနာ? တေဟိ ဓမ္မေဟိ ယေ ဓမ္မာ သမ္ပယုတ္တာ, တေ ဓမ္မေ ဌပေတွာ ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဥပါဒါနသမ္ပယုတ္တာ စေဝ နော စ ဥပါဒါနာ။

၁၂၃၃. ကတမေ ဓမ္မာ ဥပါဒါနဝိပ္ပယုတ္တာ ဥပါဒါနိယာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ သာသဝါ ကုသလာကုသလာဗျာကတာ ဓမ္မာ ကာမာဝစရာ , ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဥပါဒါနဝိပ္ပယုတ္တာ ဥပါဒါနိယာ။

၁၂၃၄. ကတမေ ဓမ္မာ ဥပါဒါနဝိပ္ပယုတ္တာ အနုပါဒါနိယာ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ ဥပါဒါနဝိပ္ပယုတ္တာ အနုပါဒါနိယာ။

နိက္ခေပကဏ္ဍေ ဒုတိယဘာဏဝါရော။

ကိလေသဂေါစ္ဆကံ

၁၂၃၅. ကတမေ ဓမ္မာ ကိလေသာ? ဒသ ကိလေသဝတ္ထူနိ – လောဘော, ဒေါသော, မောဟော, မာနော, ဒိဋ္ဌိ, ဝိစိကိစ္ဆာ, ထိနံ, ဥဒ္ဓစ္စံ, အဟိရီကံ, အနောတ္တပ္ပံ။

၁၂၃၆. တတ္ထ ကတမော လောဘော? ယော ရာဂေါ သာရာဂေါ အနုနယော အနုရောဓေါ နန္ဒီ နန္ဒီရာဂေါ စိတ္တဿ သာရာဂေါ ဣစ္ဆာ မုစ္ဆာ အဇ္ဈောသာနံ ဂေဓေါ ပလိဂေဓေါ သင်္ဂေါ ပင္ကော ဧဇာ မာယာ ဇနိကာ သဉ္ဇနနီ သိဗ္ဗိနီ ဇာလိနီ သရိတာ ဝိသတ္တိကာ သုတ္တံ ဝိသဋာ အာယူဟိနီ ဒုတိယာ ပဏိဓိ ဘဝနေတ္တိ ဝနံ ဝနထော သန္ထဝေါ သိနေဟော အပေက္ခာ ပဋိဗန္ဓု အာသာ အာသိသနာ အာသိသိတတ္တံ ရူပါသာ သဒ္ဒါသာ ဂန္ဓာသာ ရသာသာ ဖောဋ္ဌဗ္ဗာသာ လာဘာသာ ဓနာသာ ပုတ္တာသာ ဇီဝိတာသာ ဇပ္ပါ ပဇပ္ပါ အဘိဇပ္ပါ ဇပ္ပါ ဇပ္ပနာ ဇပ္ပိတတ္တံ လောလုပ္ပံ လောလုပ္ပါယနာ လောလုပ္ပါယိတတ္တံ ပုစ္ဆဉ္ဇိကတာ သာဓုကမ္ယတာ အဓမ္မရာဂေါ ဝိသမလောဘော နိကန္တိ နိကာမနာ ပတ္ထနာ ပိဟနာ သမ္ပတ္ထနာ ကာမတဏှာ ဘဝတဏှာ ဝိဘဝတဏှာ ရူပတဏှာ အရူပတဏှာ နိရောဓတဏှာ ရူပတဏှာ သဒ္ဒတဏှာ ဂန္ဓတဏှာ ရသတဏှာ ဖောဋ္ဌဗ္ဗတဏှာ ဓမ္မတဏှာ ဩဃော ယောဂေါ ဂန္ထော ဥပါဒါနံ အာဝရဏံ နီဝရဏံ ဆာဒနံ ဗန္ဓနံ ဥပက္ကိလေသော အနုသယော ပရိယုဋ္ဌာနံ လတာ ဝေဝိစ္ဆံ ဒုက္ခမူလံ ဒုက္ခနိဒါနံ ဒုက္ခပ္ပဘဝေါ မာရပါသော မာရဗဠိသံ မာရဝိသယော တဏှာနဒီ တဏှာဇာလံ တဏှာဂဒ္ဒုလံ တဏှာသမုဒ္ဒေါ အဘိဇ္ဈာ လောဘော အကုသလမူလံ – အယံ ဝုစ္စတိ လောဘော။

၁၂၃၇. တတ္ထ ကတမော ဒေါသော? အနတ္ထံ မေ အစရီတိ အာဃာတော ဇာယတိ, အနတ္ထံ မေ စရတီတိ အာဃာတော ဇာယတိ, အနတ္ထံ မေ စရိဿတီတိ အာဃာတော ဇာယတိ, ပိယဿ မေ မနာပဿ အနတ္ထံ အစရိ။ပေ.။ အနတ္ထံ စရတိ။ပေ.။ အနတ္ထံ စရိဿတီတိ အာဃာတော ဇာယတိ, အပ္ပိယဿ မေ အမနာပဿ အတ္ထံ အစရိ။ပေ.။ အတ္ထံ စရတိ။ပေ.။ အတ္ထံ စရိဿတီတိ အာဃာတော ဇာယတိ, အဋ္ဌာနေ ဝါ ပန အာဃာတော ဇာယတိ။ ယော ဧဝရူပေါ စိတ္တဿ အာဃာတော ပဋိဃာတော ပဋိဃံ ပဋိဝိရောဓေါ ကောပေါ ပကောပေါ သမ္ပကောပေါ ဒေါသော ပဒေါသော သမ္ပဒေါသော စိတ္တဿ ဗျာပတ္တိ မနောပဒေါသော ကောဓေါ ကုဇ္ဈနာ ကုဇ္ဈိတတ္တံ ဒေါသော ဒုဿနာ ဒုဿိတတ္တံ ဗျာပတ္တိ ဗျာပဇ္ဇနာ ဗျာပဇ္ဇိတတ္တံ ဝိရောဓေါ ပဋိဝိရောဓေါ စဏ္ဍိက္ကံ အသုရောပေါ အနတ္တမနတာ စိတ္တဿ – အယံ ဝုစ္စတိ ဒေါသော။

၁၂၃၈. တတ္ထ ကတမော မောဟော? ဒုက္ခေ အညာဏံ, ဒုက္ခသမုဒယေ အညာဏံ, ဒုက္ခနိရောဓေ အညာဏံ, ဒုက္ခနိရောဓဂါမိနိယာ ပဋိပဒါယ အညာဏံ, ပုဗ္ဗန္တေ အညာဏံ, အပရန္တေ အညာဏံ, ပုဗ္ဗန္တာပရန္တေ အညာဏံ, ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု အညာဏံ ။ ယံ ဧဝရူပံ အညာဏံ အဒဿနံ အနဘိသမယော အနနုဗောဓေါ အသမ္ဗောဓေါ အပ္ပဋိဝေဓေါ အသံဂါဟနာ အပရိယောဂါဟနာ အသမပေက္ခနာ အပစ္စဝေက္ခဏာ အပစ္စက္ခကမ္မံ ဒုမ္မေဇ္ဈံ ဗာလ္ယံ အသမ္ပဇညံ မောဟော ပမောဟော သမ္မောဟော အဝိဇ္ဇာ အဝိဇ္ဇောဃော အဝိဇ္ဇာယောဂေါ အဝိဇ္ဇာနုသယော အဝိဇ္ဇာပရိယုဋ္ဌာနံ အဝိဇ္ဇာလင္ဂီ မောဟော အကုသလမူလံ – အယံ ဝုစ္စတိ မောဟော။

၁၂၃၉. တတ္ထ ကတမော မာနော? သေယျောဟမသ္မီတိ မာနော, သဒိသောဟမသ္မီတိ မာနော, ဟီနောဟမသ္မီတိ မာနော; ယော ဧဝရူပေါ မာနော မညနာ မညိတတ္တံ ဥန္နတိ ဥန္နမော ဓဇော သမ္ပဂ္ဂါဟော ကေတုကမ္ယတာ စိတ္တဿ – အယံ ဝုစ္စတိ မာနော။

၁၂၄၀. တတ္ထ ကတမာ ဒိဋ္ဌိ? သဿတော လောကောတိ ဝါ, အသဿတော လောကောတိ ဝါ, အန္တဝါ လောကောတိ ဝါ, အနန္တဝါ လောကောတိ ဝါ, တံ ဇီဝံ တံ သရီရန္တိ ဝါ, အညံ ဇီဝံ အညံ သရီရန္တိ ဝါ, ဟောတိ တထာဂတော ပရံ မရဏာတိ ဝါ, န ဟောတိ တထာဂတော ပရံ မရဏာတိ ဝါ, ဟောတိ စ န စ ဟောတိ တထာဂတော ပရံ မရဏာတိ ဝါ, နေဝ ဟောတိ န န ဟောတိ တထာဂတော ပရံ မရဏာတိ ဝါः ယာ ဧဝရူပါ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂါဟော ပတိဋ္ဌာဟော အဘိနိဝေသော ပရာမာသော ကုမ္မဂ္ဂေါ မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂါဟော – အယံ ဝုစ္စတိ ဒိဋ္ဌိ။ သဗ္ဗာပိ မိစ္ဆာဒိဋ္ဌိ ဒိဋ္ဌိ။

၁၂၄၁. တတ္ထ ကတမာ ဝိစိကိစ္ဆာ? သတ္ထရိ ကင်္ခတိ ဝိစိကိစ္ဆတိ, ဓမ္မေ ကင်္ခတိ ဝိစိကိစ္ဆတိ, သံဃေ ကင်္ခတိ ဝိစိကိစ္ဆတိ သိက္ခာယ ကင်္ခတိ ဝိစိကိစ္ဆတိ, ပုဗ္ဗန္တေ ကင်္ခတိ ဝိစိကိစ္ဆတိ, အပရန္တေ ကင်္ခတိ ဝိစိကိစ္ဆတိ, ပုဗ္ဗန္တာပရန္တေ ကင်္ခတိ ဝိစိကိစ္ဆတိ, ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု ကင်္ခတိ ဝိစိကိစ္ဆတိः ယာ ဧဝရူပါ ကင်္ခါ ကင်္ခါယနာ ကင်္ခါယိတတ္တံ ဝိမတိ ဝိစိကိစ္ဆာ ဒွေဠှကံ ဒွေဓါပထော သံသယော, အနေကံသဂ္ဂါဟော အာသပ္ပနာ ပရိသပ္ပနာ အပရိယောဂါဟနာ ထမ္ဘိတတ္တံ စိတ္တဿ မနောဝိလေခေါ – အယံ ဝုစ္စတိ ဝိစိကိစ္ဆာ။

၁၂၄၂. တတ္ထ ကတမံ ထိနံ? ယာ စိတ္တဿ အကလ္လတာ အကမ္မညတာ ဩလီယနာ သလ္လီယနာ လီနံ လီယနာ လီယိတတ္တံ ထိနံ ထိယနာ ထိယိတတ္တံ စိတ္တဿ – ဣဒံ ဝုစ္စတိ ထိနံ။

၁၂၄၃. တတ္ထ ကတမံ ဥဒ္ဓစ္စံ? ယံ စိတ္တဿ ဥဒ္ဓစ္စံ အဝူပသမော စေတသော ဝိက္ခေပေါ ဘန္တတ္တံ စိတ္တဿ – ဣဒံ ဝုစ္စတိ ဥဒ္ဓစ္စံ။

၁၂၄၄. တတ္ထ ကတမံ အဟိရိကံ? ယံ န ဟိရီယတိ ဟိရိယိတဗ္ဗေန, န ဟိရီယတိ ပါပကာနံ အကုသလာနံ ဓမ္မာနံ သမာပတ္တိယာ – ဣဒံ ဝုစ္စတိ အဟိရိကံ။

၁၂၄၅. တတ္ထ ကတမံ အနောတ္တပ္ပံ? ယံ န ဩတ္တပ္ပတိ ဩတ္တပ္ပိတဗ္ဗေန, န ဩတ္တပ္ပတိ ပါပကာနံ အကုသလာနံ ဓမ္မာနံ သမာပတ္တိယာ – ဣဒံ ဝုစ္စတိ အနောတ္တပ္ပံ။

ဣမေ ဓမ္မာ ကိလေသာ။

၁၂၄၆. ကတမေ ဓမ္မာ နော ကိလေသာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော ။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ နော ကိလေသာ။

၁၂၄၇. ကတမေ ဓမ္မာ သံကိလေသိကာ? သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ သံကိလေသိကာ။

၁၂၄၈. ကတမေ ဓမ္မာ အသံကိလေသိကာ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ အသံကိလေသိကာ။

၁၂၄၉. ကတမေ ဓမ္မာ သံကိလိဋ္ဌာ? တီဏိ အကုသလမူလာနိ – လောဘော, ဒေါသော, မောဟော; တဒေကဋ္ဌာ စ ကိလေသာ, တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော, တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ သံကိလိဋ္ဌာ။

၁၂၅၀. ကတမေ ဓမ္မာ အသံကိလိဋ္ဌာ? ကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ အသံကိလိဋ္ဌာ။

၁၂၅၁. ကတမေ ဓမ္မာ ကိလေသသမ္ပယုတ္တာ? တေဟိ ဓမ္မေဟိ ယေ ဓမ္မာ သမ္ပယုတ္တာ ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ကိလေသသမ္ပယုတ္တာ။

၁၂၅၂. ကတမေ ဓမ္မာ ကိလေသဝိပ္ပယုတ္တာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ ဝေဒနာက္ခန္ဓော။ပေ.။ ဝိညာဏက္ခန္ဓော ; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ ကိလေသဝိပ္ပယုတ္တာ။

၁၂၅၃. ကတမေ ဓမ္မာ ကိလေသာ စေဝ သံကိလေသိကာ စ? တေဝ ကိလေသာ ကိလေသာ စေဝ သံကိလေသိကာ စ။

၁၂၅၄. ကတမေ ဓမ္မာ သံကိလေသိကာ စေဝ နော စ ကိလေသာ? တေဟိ ဓမ္မေဟိ ယေ ဓမ္မာ သံကိလေသိကာ, တေ ဓမ္မေ ဌပေတွာ အဝသေသာ သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ သံကိလေသိကာ စေဝ နော စ ကိလေသာ။

၁၂၅၅. ကတမေ ဓမ္မာ ကိလေသာ စေဝ သံကိလိဋ္ဌာ စ? တေဝ ကိလေသာ ကိလေသာ စေဝ သံကိလိဋ္ဌာ စ။

၁၂၅၆. ကတမေ ဓမ္မာ သံကိလိဋ္ဌာ စေဝ နော စ ကိလေသာ? တေဟိ ဓမ္မေဟိ ယေ ဓမ္မာ သံကိလိဋ္ဌာ, တေ ဓမ္မေ ဌပေတွာ ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ သံကိလိဋ္ဌာ စေဝ နော စ ကိလေသာ။

၁၂၅၇. ကတမေ ဓမ္မာ ကိလေသာ စေဝ ကိလေသသမ္ပယုတ္တာ စ? လောဘော မောဟေန ကိလေသော စေဝ ကိလေသသမ္ပယုတ္တော စ, မောဟော လောဘေန ကိလေသော စေဝ ကိလေသသမ္ပယုတ္တော စ, ဒေါသော မောဟေန ကိလေသော စေဝ ကိလေသသမ္ပယုတ္တော စ, မောဟော ဒေါသေန ကိလေသော စေဝ ကိလေသသမ္ပယုတ္တော စ, မာနော မောဟေန ကိလေသော စေဝ ကိလေသသမ္ပယုတ္တော စ, မောဟော မာနေန ကိလေသော စေဝ ကိလေသသမ္ပယုတ္တော စ, ဒိဋ္ဌိ မောဟေန ကိလေသော စေဝ ကိလေသသမ္ပယုတ္တာ စ, မောဟော ဒိဋ္ဌိယာ ကိလေသော စေဝ ကိလေသသမ္ပယုတ္တော စ , ဝိစိကိစ္ဆာ မောဟေန ကိလေသော စေဝ ကိလေသသမ္ပယုတ္တာ စ, မောဟော ဝိစိကိစ္ဆာယ ကိလေသော စေဝ ကိလေသသမ္ပယုတ္တော စ, ထိနံ မောဟေန ကိလေသော စေဝ ကိလေသသမ္ပယုတ္တဉ္စ, မောဟော ထိနေန ကိလေသော စေဝ ကိလေသသမ္ပယုတ္တော စ, ဥဒ္ဓစ္စံ မောဟေန ကိလေသော စေဝ ကိလေသသမ္ပယုတ္တဉ္စ, မောဟော ဥဒ္ဓစ္စေန ကိလေသော စေဝ ကိလေသသမ္ပယုတ္တော စ, အဟိရိကံ မောဟေန ကိလေသော စေဝ ကိလေသသမ္ပယုတ္တဉ္စ, မောဟော အဟိရိကေန ကိလေသော စေဝ ကိလေသသမ္ပယုတ္တော စ, အနောတ္တပ္ပံ မောဟေန ကိလေသော စေဝ ကိလေသသမ္ပယုတ္တဉ္စ, မောဟော အနောတ္တပ္ပေန ကိလေသော စေဝ ကိလေသသမ္ပယုတ္တော စ, လောဘော ဥဒ္ဓစ္စေန ကိလေသော စေဝ ကိလေသသမ္ပယုတ္တော စ, ဥဒ္ဓစ္စံ လောဘေန ကိလေသော စေဝ ကိလေသသမ္ပယုတ္တဉ္စ, ဒေါသော ဥဒ္ဓစ္စေန ကိလေသော စေဝ ကိလေသသမ္ပယုတ္တော စ, ဥဒ္ဓစ္စံ ဒေါသေန ကိလေသော စေဝ ကိလေသသမ္ပယုတ္တဉ္စ, မောဟော ဥဒ္ဓစ္စေန ကိလေသော စေဝ ကိလေသသမ္ပယုတ္တော စ, ဥဒ္ဓစ္စံ မောဟေန ကိလေသော စေဝ ကိလေသသမ္ပယုတ္တဉ္စ, မာနော ဥဒ္ဓစ္စေန ကိလေသော စေဝ ကိလေသသမ္ပယုတ္တော စ, ဥဒ္ဓစ္စံ မာနေန ကိလေသော စေဝ ကိလေသသမ္ပယုတ္တဉ္စ, ဒိဋ္ဌိ ဥဒ္ဓစ္စေန ကိလေသော စေဝ ကိလေသသမ္ပယုတ္တာ စ, ဥဒ္ဓစ္စံ ဒိဋ္ဌိယာ ကိလေသော စေဝ ကိလေသသမ္ပယုတ္တဉ္စ, ဝိစိကိစ္ဆာ ဥဒ္ဓစ္စေန ကိလေသော စေဝ ကိလေသသမ္ပယုတ္တာ စ, ဥဒ္ဓစ္စံ ဝိစိကိစ္ဆာယ ကိလေသော စေဝ ကိလေသသမ္ပယုတ္တဉ္စ, ထိနံ ဥဒ္ဓစ္စေန ကိလေသော စေဝ ကိလေသသမ္ပယုတ္တဉ္စ, ဥဒ္ဓစ္စံ ထိနေန ကိလေသော စေဝ ကိလေသသမ္ပယုတ္တဉ္စ, အဟိရိကံ ဥဒ္ဓစ္စေန ကိလေသော စေဝ ကိလေသသမ္ပယုတ္တဉ္စ, ဥဒ္ဓစ္စံ အဟိရိကေန ကိလေသော စေဝ ကိလေသသမ္ပယုတ္တဉ္စ, အနောတ္တပ္ပံ ဥဒ္ဓစ္စေန ကိလေသော စေဝ ကိလေသသမ္ပယုတ္တဉ္စ, ဥဒ္ဓစ္စံ အနောတ္တပ္ပေန ကိလေသော စေဝ ကိလေသသမ္ပယုတ္တဉ္စ, လောဘော အဟိရိကေန ကိလေသော စေဝ ကိလေသသမ္ပယုတ္တော စ, အဟိရိကံ လောဘေန ကိလေသော စေဝ ကိလေသသမ္ပယုတ္တဉ္စ, ဒေါသော အဟိရိကေန ကိလေသော စေဝ ကိလေသသမ္ပယုတ္တော စ, အဟိရိကံ ဒေါသေန ကိလေသော စေဝ ကိလေသသမ္ပယုတ္တဉ္စ, မောဟော အဟိရိကေန ကိလေသော စေဝ ကိလေသသမ္ပယုတ္တော စ, အဟိရိကံ မောဟေန ကိလေသော စေဝ ကိလေသသမ္ပယုတ္တဉ္စ, မာနော အဟိရိကေန ကိလေသော စေဝ ကိလေသသမ္ပယုတ္တော စ , အဟိရိကံ မာနေန ကိလေသော စေဝ ကိလေသသမ္ပယုတ္တဉ္စ, ဒိဋ္ဌိ အဟိရိကေန ကိလေသော စေဝ ကိလေသသမ္ပယုတ္တာ စ, အဟိရိကံ ဒိဋ္ဌိယာ ကိလေသော စေဝ ကိလေသသမ္ပယုတ္တဉ္စ, ဝိစိကိစ္ဆာ အဟိရိကေန ကိလေသော စေဝ ကိလေသသမ္ပယုတ္တာ စ, အဟိရိကံ ဝိစိကိစ္ဆာယ ကိလေသော စေဝ ကိလေသသမ္ပယုတ္တဉ္စ, ထိနံ အဟိရိကေန ကိလေသော စေဝ ကိလေသသမ္ပယုတ္တဉ္စ, အဟိရိကံ ထိနေန ကိလေသော စေဝ ကိလေသသမ္ပယုတ္တဉ္စ, ဥဒ္ဓစ္စံ အဟိရိကေန ကိလေသော စေဝ ကိလေသသမ္ပယုတ္တဉ္စ, အဟိရိကံ ဥဒ္ဓစ္စေန ကိလေသော စေဝ ကိလေသသမ္ပယုတ္တဉ္စ, အနောတ္တပ္ပံ အဟိရိကေန ကိလေသော စေဝ ကိလေသသမ္ပယုတ္တဉ္စ, အဟိရိကံ အနောတ္တပ္ပေန ကိလေသော စေဝ ကိလေသသမ္ပယုတ္တဉ္စ, လောဘော အနောတ္တပ္ပေန ကိလေသော စေဝ ကိလေသသမ္ပယုတ္တော စ, အနောတ္တပ္ပံ လောဘေန ကိလေသော စေဝ ကိလေသသမ္ပယုတ္တဉ္စ , ဒေါသော အနောတ္တပ္ပေန ကိလေသော စေဝ ကိလေသသမ္ပယုတ္တော စ, အနောတ္တပ္ပံ ဒေါသေန ကိလေသော စေဝ ကိလေသသမ္ပယုတ္တဉ္စ, မောဟော အနောတ္တပ္ပေန ကိလေသော စေဝ ကိလေသသမ္ပယုတ္တော စ, အနောတ္တပ္ပံ မောဟေန ကိလေသော စေဝ ကိလေသသမ္ပယုတ္တဉ္စ, မာနော အနောတ္တပ္ပေန ကိလေသော စေဝ ကိလေသသမ္ပယုတ္တော စ, အနောတ္တပ္ပံ မာနေန ကိလေသော စေဝ ကိလေသသမ္ပယုတ္တဉ္စ, ဒိဋ္ဌိ အနောတ္တပ္ပေန ကိလေသော စေဝ ကိလေသသမ္ပယုတ္တာ စ, အနောတ္တပ္ပံ ဒိဋ္ဌိယာ ကိလေသော စေဝ ကိလေသသမ္ပယုတ္တဉ္စ, ဝိစိကိစ္ဆာ အနောတ္တပ္ပေန ကိလေသော စေဝ ကိလေသသမ္ပယုတ္တာ စ, အနောတ္တပ္ပံ ဝိစိကိစ္ဆာယ ကိလေသော စေဝ ကိလေသသမ္ပယုတ္တဉ္စ, ထိနံ အနောတ္တပ္ပေန ကိလေသော စေဝ ကိလေသသမ္ပယုတ္တဉ္စ, အနောတ္တပ္ပံ ထိနေန ကိလေသော စေဝ ကိလေသသမ္ပယုတ္တဉ္စ, ဥဒ္ဓစ္စံ အနောတ္တပ္ပေန ကိလေသော စေဝ ကိလေသသမ္ပယုတ္တဉ္စ, အနောတ္တပ္ပံ ဥဒ္ဓစ္စေန ကိလေသော စေဝ ကိလေသသမ္ပယုတ္တဉ္စ, အဟိရိကံ အနောတ္တပ္ပေန ကိလေသော စေဝ ကိလေသသမ္ပယုတ္တဉ္စ, အနောတ္တပ္ပံ အဟိရိကေန ကိလေသော စေဝ ကိလေသသမ္ပယုတ္တဉ္စ – ဣမေ ဓမ္မာ ကိလေသာ စေဝ ကိလေသသမ္ပယုတ္တာ စ။

၁၂၅၈. ကတမေ ဓမ္မာ ကိလေသသမ္ပယုတ္တာ စေဝ နော စ ကိလေသာ? တေဟိ ဓမ္မေဟိ ယေ ဓမ္မာ သမ္ပယုတ္တာ တေ ဓမ္မေ ဌပေတွာ ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ကိလေသသမ္ပယုတ္တာ စေဝ နော စ ကိလေသာ။

၁၂၅၉. ကတမေ ဓမ္မာ ကိလေသဝိပ္ပယုတ္တာ သံကိလေသိကာ? တေဟိ ဓမ္မေဟိ ယေ ဓမ္မာ ဝိပ္ပယုတ္တာ သာသဝါ ကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ကိလေသဝိပ္ပယုတ္တာ သံကိလေသိကာ။

၁၂၆၀. ကတမေ ဓမ္မာ ကိလေသဝိပ္ပယုတ္တာ အသံကိလေသိကာ ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ ကိလေသဝိပ္ပယုတ္တာ အသံကိလေသိကာ။

ပိဋ္ဌိဒုကံ

၁၂၆၁. ကတမေ ဓမ္မာ ဒဿနေန ပဟာတဗ္ဗာ? တီဏိ သံယောဇနာနိ – သက္ကာယဒိဋ္ဌိ, ဝိစိကိစ္ဆာ, သီလဗ္ဗတပရာမာသော။

၁၂၆၂. တတ္ထ ကတမာ သက္ကာယဒိဋ္ဌိ? ဣဓ အဿုတဝါ ပုထုဇ္ဇနော အရိယာနံ အဒဿာဝီ အရိယဓမ္မဿ အကောဝိဒေါ အရိယဓမ္မေ အဝိနီတော သပ္ပုရိသာနံ အဒဿာဝီ သပ္ပုရိသဓမ္မဿ အကောဝိဒေါ သပ္ပုရိသဓမ္မေ အဝိနီတော ရူပံ အတ္တတော သမနုပဿတိ, ရူပဝန္တံ ဝါ အတ္တာနံ, အတ္တနိ ဝါ ရူပံ, ရူပသ္မိံ ဝါ အတ္တာနံ။ ဝေဒနံ။ပေ.။ သညံ။ပေ.။ သင်္ခါရေ။ပေ.။ ဝိညာဏံ အတ္တတော သမနုပဿတိ, ဝိညာဏဝန္တံ ဝါ အတ္တာနံ, အတ္တနိ ဝါ ဝိညာဏံ, ဝိညာဏသ္မိံ ဝါ အတ္တာနံ။ ယာ ဧဝရူပါ ဒိဋ္ဌိ ဒိဋ္ဌိဂတံ။ပေ.။ ဝိပရိယာသဂ္ဂါဟော – အယံ ဝုစ္စတိ သက္ကာယဒိဋ္ဌိ။

၁၂၆၃. တတ္ထ ကတမာ ဝိစိကိစ္ဆာ? သတ္ထရိ ကင်္ခတိ ဝိစိကိစ္ဆတိ။ပေ.။ ထမ္ဘိတတ္တံ စိတ္တဿ မနောဝိလေခေါ – အယံ ဝုစ္စတိ ဝိစိကိစ္ဆာ။

၁၂၆၄. တတ္ထ ကတမော သီလဗ္ဗတပရာမာသော? ဣတော ဗဟိဒ္ဓါ သမဏဗြာဟ္မဏာနံ သီလေန သုဒ္ဓိ ဝတေန သုဒ္ဓိ သီလဗ္ဗတေန သုဒ္ဓီတိ – ယာ ဧဝရူပါ ဒိဋ္ဌိ ဒိဋ္ဌိဂတံ။ပေ.။ ဝိပရိယာသဂ္ဂါဟော – အယံ ဝုစ္စတိ သီလဗ္ဗတပရာမာသော။ ဣမာနိ တီဏိ သံယောဇနာနိ, တဒေကဋ္ဌာ စ ကိလေသာ, တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော, တံသမုဋ္ဌာနံ ကာယကမ္မံ ဝစီကမ္မံ မနောကမ္မံ – ဣမေ ဓမ္မာ ဒဿနေန ပဟာတဗ္ဗာ။

၁၂၆၅. ကတမေ ဓမ္မာ န ဒဿနေန ပဟာတဗ္ဗာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ န ဒဿနေန ပဟာတဗ္ဗာ။

၁၂၆၆. ကတမေ ဓမ္မာ ဘာဝနာယ ပဟာတဗ္ဗာ? အဝသေသော လောဘော ဒေါသော မောဟော, တဒေကဋ္ဌာ စ ကိလေသာ, တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော, တံသမုဋ္ဌာနံ ကာယကမ္မံ, ဝစီကမ္မံ မနောကမ္မံ – ဣမေ ဓမ္မာ ဘာဝနာယ ပဟာတဗ္ဗာ။

၁၂၆၇. ကတမေ ဓမ္မာ န ဘာဝနာယ ပဟာတဗ္ဗာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော ။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ န ဘာဝနာယ ပဟာတဗ္ဗာ။

၁၂၆၈. ကတမေ ဓမ္မာ ဒဿနေန ပဟာတဗ္ဗဟေတုကာ? တီဏိ သံယောဇနာနိ – သက္ကာယဒိဋ္ဌိ, ဝိစိကိစ္ဆာ, သီလဗ္ဗတပရာမာသော။

၁၂၆၉. တတ္ထ ကတမာ သက္ကာယဒိဋ္ဌိ? ဣဓ အဿုတဝါ ပုထုဇ္ဇနော အရိယာနံ အဒဿာဝီ အရိယဓမ္မဿ အကောဝိဒေါ အရိယဓမ္မေ အဝိနီတော သပ္ပုရိသာနံ အဒဿာဝီ သပ္ပုရိသဓမ္မဿ အကောဝိဒေါ သပ္ပုရိသဓမ္မေ အဝိနီတော ရူပံ အတ္တတော သမနုပဿတိ, ရူပဝန္တံ ဝါ အတ္တာနံ, အတ္တနိ ဝါ ရူပံ, ရူပသ္မိံ ဝါ အတ္တာနံ။ ဝေဒနံ။ပေ.။ သညံ။ပေ.။ သင်္ခါရေ။ပေ.။ ဝိညာဏံ အတ္တတော သမနုပဿတိ, ဝိညာဏဝန္တံ ဝါ အတ္တာနံ, အတ္တနိ ဝါ ဝိညာဏံ, ဝိညာဏသ္မိံ ဝါ အတ္တာနံ။ ယာ ဧဝရူပါ ဒိဋ္ဌိ ဒိဋ္ဌိဂတံ။ပေ.။ ဝိပရိယာသဂ္ဂါဟော – အယံ ဝုစ္စတိ သက္ကာယဒိဋ္ဌိ။

၁၂၇၀. တတ္ထ ကတမာ ဝိစိကိစ္ဆာ? သတ္ထရိ ကင်္ခတိ ဝိစိကိစ္ဆတိ။ပေ.။ ထမ္ဘိတတ္တံ စိတ္တဿ မနောဝိလေခေါ – အယံ ဝုစ္စတိ ဝိစိကိစ္ဆာ။

၁၂၇၁. တတ္ထ ကတမော သီလဗ္ဗတပရာမာသော? ဣတော ဗဟိဒ္ဓါ သမဏဗြာဟ္မဏာနံ သီလေန သုဒ္ဓိ ဝတေန သုဒ္ဓိ သီလဗ္ဗတေန သုဒ္ဓီတိ – ယာ ဧဝရူပါ ဒိဋ္ဌိ ဒိဋ္ဌိဂတံ။ပေ.။ ဝိပရိယာသဂ္ဂါဟော – အယံ ဝုစ္စတိ သီလဗ္ဗတပရာမာသော။ ဣမာနိ တီဏိ သံယောဇနာနိ, တဒေကဋ္ဌာ စ ကိလေသာ, တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော, တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ ဒဿနေန ပဟာတဗ္ဗဟေတုကာ။ တီဏိ သံယောဇနာနိ – သက္ကာယဒိဋ္ဌိ, ဝိစိကိစ္ဆာ, သီလဗ္ဗတပရာမာသော – ဣမေ ဓမ္မာ ဒဿနေန ပဟာတဗ္ဗာ။ တဒေကဋ္ဌော လောဘော ဒေါသော မောဟော – ဣမေ ဓမ္မာ ဒဿနေန ပဟာတဗ္ဗဟေတူ။ တဒေကဋ္ဌာ စ ကိလေသာ, တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော, တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ ဒဿနေန ပဟာတဗ္ဗဟေတုကာ။

၁၂၇၂. ကတမေ ဓမ္မာ န ဒဿနေန ပဟာတဗ္ဗဟေတုကာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ , ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ န ဒဿနေန ပဟာတဗ္ဗဟေတုကာ။

၁၂၇၃. ကတမေ ဓမ္မာ ဘာဝနာယ ပဟာတဗ္ဗဟေတုကာ? အဝသေသော လောဘော ဒေါသော မောဟော – ဣမေ ဓမ္မာ ဘာဝနာယ ပဟာတဗ္ဗဟေတူ။ တဒေကဋ္ဌာ စ ကိလေသာ, တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော, တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ ဘာဝနာယ ပဟာတဗ္ဗဟေတုကာ။

၁၂၇၄. ကတမေ ဓမ္မာ န ဘာဝနာယ ပဟာတဗ္ဗဟေတုကာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ န ဘာဝနာယ ပဟာတဗ္ဗဟေတုကာ။

၁၂၇၅. ကတမေ ဓမ္မာ သဝိတက္ကာ? သဝိတက္ကဘူမိယံ ကာမာဝစရေ ရူပါဝစရေ အပရိယာပန္နေ, ဝိတက္ကံ ဌပေတွာ, တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ သဝိတက္ကာ။

၁၂၇၆. ကတမေ ဓမ္မာ အဝိတက္ကာ? အဝိတက္ကဘူမိယံ ကာမာဝစရေ ရူပါဝစရေ အရူပါဝစရေ အပရိယာပန္နေ; ဝေဒနာက္ခန္ဓော။ပေ.။ ဝိညာဏက္ခန္ဓော; ဝိတက္ကော စ, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ အဝိတက္ကာ။

၁၂၇၇. ကတမေ ဓမ္မာ သဝိစာရာ? သဝိစာရဘူမိယံ ကာမာဝစရေ ရူပါဝစရေ အပရိယာပန္နေ, ဝိစာရံ ဌပေတွာ, တံသမ္ပယုတ္တော ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော – ဣမေ ဓမ္မာ သဝိစာရာ။

၁၂၇၈. ကတမေ ဓမ္မာ အဝိစာရာ? အဝိစာရဘူမိယံ ကာမာဝစရေ ရူပါဝစရေ အရူပါဝစရေ အပရိယာပန္နေ; ဝေဒနာက္ခန္ဓော။ပေ.။ ဝိညာဏက္ခန္ဓော; ဝိစာရော စ, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ အဝိစာရာ။

၁၂၇၉. ကတမေ ဓမ္မာ သပ္ပီတိကာ? သပ္ပီတိကဘူမိယံ ကာမာဝစရေ ရူပါဝစရေ အပရိယာပန္နေ , ဣတိံ ဌပေတွာ, တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ သပ္ပီတိကာ။

၁၂၈၀. ကတမေ ဓမ္မာ အပ္ပီတိကာ? အပ္ပီတိကဘူမိယံ ကာမာဝစရေ ရူပါဝစရေ အရူပါဝစရေ အပရိယာပန္နေ; ဝေဒနာက္ခန္ဓော။ပေ.။ ဝိညာဏက္ခန္ဓော; ဣတိ စ, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ အပ္ပီတိကာ။

၁၂၈၁. ကတမေ ဓမ္မာ ဣတိသဟဂတာ? ဣတိဘူမိယံ ကာမာဝစရေ ရူပါဝစရေ အပရိယာပန္နေ, ဣတိံ ဌပေတွာ, တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဣတိသဟဂတာ။

၁၂၈၂. ကတမေ ဓမ္မာ န ဣတိသဟဂတာ? န ဣတိဘူမိယံ ကာမာဝစရေ ရူပါဝစရေ အရူပါဝစရေ အပရိယာပန္နေ; ဝေဒနာက္ခန္ဓော။ပေ.။ ဝိညာဏက္ခန္ဓော; ဣတိ စ, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ န ဣတိသဟဂတာ။

၁၂၈၃. ကတမေ ဓမ္မာ သုခသဟဂတာ? သုခဘူမိယံ ကာမာဝစရေ ရူပါဝစရေ အပရိယာပန္နေ, သုခံ ဌပေတွာ, တံသမ္ပယုတ္တော သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော – ဣမေ ဓမ္မာ သုခသဟဂတာ။

၁၂၈၄. ကတမေ ဓမ္မာ န သုခသဟဂတာ? န သုခဘူမိယံ ကာမာဝစရေ ရူပါဝစရေ အရူပါဝစရေ အပရိယာပန္နေ; ဝေဒနာက္ခန္ဓော။ပေ.။ ဝိညာဏက္ခန္ဓော; သုခဉ္စ, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ န သုခသဟဂတာ။

၁၂၈၅. ကတမေ ဓမ္မာ ဥပေက္ခာသဟဂတာ? ဥပေက္ခာဘူမိယံ ကာမာဝစရေ ရူပါဝစရေ အရူပါဝစရေ အပရိယာပန္နေ, ဥပေက္ခံ ဌပေတွာ, တံသမ္ပယုတ္တော သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော – ဣမေ ဓမ္မာ ဥပေက္ခာသဟဂတာ။

၁၂၈၆. ကတမေ ဓမ္မာ န ဥပေက္ခာသဟဂတာ? န ဥပေက္ခာဘူမိယံ ကာမာဝစရေ ရူပါဝစရေ အပရိယာပန္နေ, ဝေဒနာက္ခန္ဓော။ပေ.။ ဝိညာဏက္ခန္ဓော, ဥပေက္ခာ စ, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ န ဥပေက္ခာသဟဂတာ။

၁၂၈၇. ကတမေ ဓမ္မာ ကာမာဝစရာ? ဟေဋ္ဌတော အဝိစိနိရယံ ပရိယန္တံ ကရိတွာ, ဥပရိတော ပရနိမ္မိတဝသဝတ္တီ ဒေဝေ [ပရနိမ္မိတဝသဝတ္တိဒေဝေ (သီ. က.)] အန္တော ကရိတွာ, ယံ ဧတသ္မိံ အန္တရေ ဧတ္ထာဝစရာ ဧတ္ထ ပရိယာပန္နာ ခန္ဓဓါတု အာယတနာ, ရူပံ ဝေဒနာ သညာ သင်္ခါရာ ဝိညာဏံ – ဣမေ ဓမ္မာ ကာမာဝစရာ။

၁၂၈၈. ကတမေ ဓမ္မာ န ကာမာဝစရာ? ရူပါဝစရာ, အရူပါဝစရာ, အပရိယာပန္နာ – ဣမေ ဓမ္မာ န ကာမာဝစရာ။

၁၂၈၉. ကတမေ ဓမ္မာ ရူပါဝစရာ? ဟေဋ္ဌတော ဗြဟ္မလောကံ ပရိယန္တံ ကရိတွာ, ဥပရိတော အကနိဋ္ဌေ ဒေဝေ [အကနိဋ္ဌဒေဝေ (သီ. က.)] အန္တော ကရိတွာ, ယံ ဧတသ္မိံ အန္တရေ ဧတ္ထာဝစရာ ဧတ္ထ ပရိယာပန္နာ သမာပန္နဿ ဝါ ဥပပန္နဿ ဝါ ဒိဋ္ဌဓမ္မသုခဝိဟာရိဿ [ဒိဋ္ဌဓမ္မသုခဝိဟာရဿ (က.)] ဝါ စိတ္တစေတသိကာ ဓမ္မာ – ဣမေ ဓမ္မာ ရူပါဝစရာ ။

၁၂၉၀. ကတမေ ဓမ္မာ န ရူပါဝစရာ? ကာမာဝစရာ, အရူပါဝစရာ, အပရိယာပန္နာ – ဣမေ ဓမ္မာ န ရူပါဝစရာ။

၁၂၉၁. ကတမေ ဓမ္မာ အရူပါဝစရာ? ဟေဋ္ဌတော အာကာသာနဉ္စာယတနုပဂေ ဒေဝေ ပရိယန္တံ ကရိတွာ, ဥပရိတော နေဝသညာနာသညာယတနုပဂေ ဒေဝေ အန္တော ကရိတွာ, ယံ ဧတသ္မိံ အန္တရေ ဧတ္ထာဝစရာ ဧတ္ထ ပရိယာပန္နာ သမာပန္နဿ ဝါ ဥပပန္နဿ ဝါ ဒိဋ္ဌဓမ္မသုခဝိဟာရိဿ ဝါ စိတ္တစေတသိကာ ဓမ္မာ – ဣမေ ဓမ္မာ အရူပါဝစရာ။

၁၂၉၂. ကတမေ ဓမ္မာ န အရူပါဝစရာ? ကာမာဝစရာ, ရူပါဝစရာ, အပရိယာပန္နာ – ဣမေ ဓမ္မာ န အရူပါဝစရာ။

၁၂၉၃. ကတမေ ဓမ္မာ ပရိယာပန္နာ? သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ပရိယာပန္နာ။

၁၂၉၄. ကတမေ ဓမ္မာ အပရိယာပန္နာ? မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ အပရိယာပန္နာ။

၁၂၉၅. ကတမေ ဓမ္မာ နိယျာနိကာ? စတ္တာရော မဂ္ဂါ အပရိယာပန္နာ – ဣမေ ဓမ္မာ နိယျာနိကာ။

၁၂၉၆. ကတမေ ဓမ္မာ အနိယျာနိကာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ အနိယျာနိကာ။

၁၂၉၇. ကတမေ ဓမ္မာ နိယတာ? ပဉ္စ ကမ္မာနိ အာနန္တရိကာနိ, ယာ စ မိစ္ဆာဒိဋ္ဌိ နိယတာ, စတ္တာရော မဂ္ဂါ အပရိယာပန္နာ – ဣမေ ဓမ္မာ နိယတာ။

၁၂၉၈. ကတမေ ဓမ္မာ အနိယတာ? တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ အနိယတာ။

၁၂၉၉. ကတမေ ဓမ္မာ သဥတ္တရာ? သာသဝါ ကုသလာကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ သဥတ္တရာ။

၁၃၀၀. ကတမေ ဓမ္မာ အနုတ္တရာ? အပရိယာပန္နာ မဂ္ဂါ စ, မဂ္ဂဖလာနိ စ, အသင်္ခတာ စ ဓါတု – ဣမေ ဓမ္မာ အနုတ္တရာ။

၁၃၀၁. ကတမေ ဓမ္မာ သရဏာ? တီဏိ အကုသလမူလာနိ လောဘော, ဒေါသော, မောဟော; တဒေကဋ္ဌာ စ ကိလေသာ, တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော, တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ သရဏာ။

၁၃၀၂. ကတမေ ဓမ္မာ အရဏာ? ကုသလာဗျာကတာ ဓမ္မာ ကာမာဝစရာ, ရူပါဝစရာ, အရူပါဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော, သဗ္ဗဉ္စ ရူပံ, အသင်္ခတာ စ ဓါတု – ဣမေ ဓမ္မာ အရဏာ။

အဘိဓမ္မဒုကံ။

သုတ္တန္တိကဒုကနိက္ခေပံ

၁၃၀၃. ကတမေ ဓမ္မာ ဝိဇ္ဇာဘာဂိနော? ဝိဇ္ဇာယ သမ္ပယုတ္တကာ ဓမ္မာ – ဣမေ ဓမ္မာ ဝိဇ္ဇာဘာဂိနော။

၁၃၀၄. ကတမေ ဓမ္မာ အဝိဇ္ဇာဘာဂိနော? အဝိဇ္ဇာယ သမ္ပယုတ္တကာ ဓမ္မာ – ဣမေ ဓမ္မာ အဝိဇ္ဇာဘာဂိနော။

၁၃၀၅. ကတမေ ဓမ္မာ ဝိဇ္ဇူပမာ? ဟေဋ္ဌိမေသု တီသု အရိယမဂ္ဂေသု ပညာ – ဣမေ ဓမ္မာ ဝိဇ္ဇူပမာ။

၁၃၀၆. ကတမေ ဓမ္မာ ဝဇိရူပမာ? ဥပရိဋ္ဌိမေ အရဟတ္တမဂ္ဂေ ပညာ – ဣမေ ဓမ္မာ ဝဇိရူပမာ။

၁၃၀၇. ကတမေ ဓမ္မာ ဗာလာ? အဟိရီကဉ္စ အနောတ္တပ္ပဉ္စ – ဣမေ ဓမ္မာ ဗာလာ။ သဗ္ဗေပိ အကုသလာ ဓမ္မာ ဗာလာ။

၁၃၀၈. ကတမေ ဓမ္မာ ပဏ္ဍိတာ? ဟိရီ စ ဩတ္တပ္ပဉ္စ – ဣမေ ဓမ္မာ ပဏ္ဍိတာ။ သဗ္ဗေပိ ကုသလာ ဓမ္မာ ပဏ္ဍိတာ။

၁၃၀၉. ကတမေ ဓမ္မာ ကဏှာ? အဟိရီကဉ္စ အနောတ္တပ္ပဉ္စ – ဣမေ ဓမ္မာ ကဏှာ။ သဗ္ဗေပိ အကုသလာ ဓမ္မာ ကဏှာ။

၁၃၁၀. ကတမေ ဓမ္မာ သုက္ကာ? ဟိရီ စ ဩတ္တပ္ပဉ္စ – ဣမေ ဓမ္မာ သုက္ကာ? သဗ္ဗေပိ ကုသလာ ဓမ္မာ သုက္ကာ။

၁၃၁၁. ကတမေ ဓမ္မာ တပနီယာ? ကာယဒုစ္စရိတံ, ဝစီဒုစ္စရိတံ, မနောဒုစ္စရိတံ – ဣမေ ဓမ္မာ တပနီယာ။ သဗ္ဗေပိ အကုသလာ ဓမ္မာ တပနီယာ။

၁၃၁၂. ကတမေ ဓမ္မာ အတပနီယာ? ကာယသုစရိတံ, ဝစီသုစရိတံ, မနောသုစရိတံ – ဣမေ ဓမ္မာ အတပနီယာ။ သဗ္ဗေပိ ကုသလာ ဓမ္မာ အတပနီယာ။

၁၃၁၃. ကတမေ ဓမ္မာ အဓိဝစနာ? ယာ တေသံ တေသံ ဓမ္မာနံ သင်္ခါ သမညာ ပညတ္တိ ဝေါဟာရော နာမံ နာမကမ္မံ နာမဓေယျံ နိရုတ္တိ ဗျဉ္ဇနံ အဘိလာပေါ – ဣမေ ဓမ္မာ အဓိဝစနာ။ သဗ္ဗေဝ ဓမ္မာ အဓိဝစနပထာ။

၁၃၁၄. ကတမေ ဓမ္မာ နိရုတ္တိ? ယာ တေသံ တေသံ ဓမ္မာနံ သင်္ခါ သမညာ ပညတ္တိ ဝေါဟာရော နာမံ နာမကမ္မံ နာမဓေယျံ နိရုတ္တိ ဗျဉ္ဇနံ အဘိလာပေါ – ဣမေ ဓမ္မာ နိရုတ္တိ။ သဗ္ဗေဝ ဓမ္မာ နိရုတ္တိပထာ။

၁၃၁၅. ကတမေ ဓမ္မာ ပညတ္တိ? ယာ တေသံ တေသံ ဓမ္မာနံ သင်္ခါ သမညာ ပညတ္တိ ဝေါဟာရော နာမံ နာမကမ္မံ နာမဓေယျံ နိရုတ္တိ ဗျဉ္ဇနံ အဘိလာပေါ – ဣမေ ဓမ္မာ ပညတ္တိ။ သဗ္ဗေဝ ဓမ္မာ ပညတ္တိပထာ။

၁၃၁၆. တတ္ထ ကတမံ နာမံ? ဝေဒနာက္ခန္ဓော, သညာက္ခန္ဓော, သင်္ခါရက္ခန္ဓော, ဝိညာဏက္ခန္ဓော, အသင်္ခတာ စ ဓါတု – ဣဒံ ဝုစ္စတိ နာမံ။

၁၃၁၇. တတ္ထ ကတမံ ရူပံ? စတ္တာရော စ မဟာဘူတာ, စတုန္နဉ္စ မဟာဘူတာနံ ဥပါဒါယ ရူပံ – ဣဒံ ဝုစ္စတိ ရူပံ။

၁၃၁၈. တတ္ထ ကတမာ အဝိဇ္ဇာ? ယံ အညာဏံ အဒဿနံ။ပေ.။ အဝိဇ္ဇာလင္ဂီ မောဟော အကုသလမူလံ – အယံ ဝုစ္စတိ အဝိဇ္ဇာ။

၁၃၁၉. တတ္ထ ကတမာ ဘဝတဏှာ? ယော ဘဝေသု ဘဝဆန္ဒော။ပေ.။ ဘဝဇ္ဈောသာနံ – အယံ ဝုစ္စတိ ဘဝတဏှာ။

၁၃၂၀. တတ္ထ ကတမာ ဘဝဒိဋ္ဌိ? ဘဝိဿတိ အတ္တာ စ လောကော စာတိ, ယာ ဧဝရူပါ ဒိဋ္ဌိ ဒိဋ္ဌိဂတံ။ပေ.။ ဝိပရိယာသဂ္ဂါဟော – အယံ ဝုစ္စတိ ဘဝဒိဋ္ဌိ။

၁၃၂၁. တတ္ထ ကတမာ ဝိဘဝဒိဋ္ဌိ? န ဘဝိဿတိ အတ္တာ စ လောကော စာတိ, ယာ ဧဝရူပါ ဒိဋ္ဌိ ဒိဋ္ဌိဂတံ။ပေ.။ ဝိပရိယာသဂ္ဂါဟော – အယံ ဝုစ္စတိ ဝိဘဝဒိဋ္ဌိ။

၁၃၂၂. တတ္ထ ကတမာ သဿတဒိဋ္ဌိ? သဿတော အတ္တာ စ လောကော စာတိ, ယာ ဧဝရူပါ ဒိဋ္ဌိ ဒိဋ္ဌိဂတံ။ပေ.။ ဝိပရိယာသဂ္ဂါဟော – အယံ ဝုစ္စတိ သဿတဒိဋ္ဌိ။

၁၃၂၃. တတ္ထ ကတမာ ဥစ္ဆေဒဒိဋ္ဌိ? ဥစ္ဆိဇ္ဇိဿတိ အတ္တာ စ လောကော စာတိ, ယာ ဧဝရူပါ ဒိဋ္ဌိ ဒိဋ္ဌိဂတံ။ပေ.။ ဝိပရိယာသဂ္ဂါဟော – အယံ ဝုစ္စတိ ဥစ္ဆေဒဒိဋ္ဌိ။

၁၃၂၄. တတ္ထ ကတမာ အန္တဝါ ဒိဋ္ဌိ? အန္တဝါ အတ္တာ စ လောကော စာတိ, ယာ ဧဝရူပါ ဒိဋ္ဌိ ဒိဋ္ဌိဂတံ။ပေ.။ ဝိပရိယာသဂ္ဂါဟော – အယံ ဝုစ္စတိ အန္တဝါ ဒိဋ္ဌိ။

၁၃၂၅. တတ္ထ ကတမာ အနန္တဝါ ဒိဋ္ဌိ? အနန္တဝါ အတ္တာ စ လောကော စာတိ, ယာ ဧဝရူပါ ဒိဋ္ဌိ ဒိဋ္ဌိဂတံ။ပေ.။ ဝိပရိယာသဂ္ဂါဟော – အယံ ဝုစ္စတိ အနန္တဝါ ဒိဋ္ဌိ။

၁၃၂၆. တတ္ထ ကတမာ ပုဗ္ဗန္တာနုဒိဋ္ဌိ? ပုဗ္ဗန္တံ အာရဗ္ဘ ယာ ဥပ္ပဇ္ဇတိ ဒိဋ္ဌိ ဒိဋ္ဌိဂတံ။ပေ.။ ဝိပရိယာသဂ္ဂါဟော – အယံ ဝုစ္စတိ ပုဗ္ဗန္တာနုဒိဋ္ဌိ။

၁၃၂၇. တတ္ထ ကတမာ အပရန္တာနုဒိဋ္ဌိ? အပရန္တံ အာရဗ္ဘ ယာ ဥပ္ပဇ္ဇတိ ဒိဋ္ဌိ ဒိဋ္ဌိဂတံ။ပေ.။ ဝိပရိယာသဂ္ဂါဟော – အယံ ဝုစ္စတိ အပရန္တာနုဒိဋ္ဌိ။

၁၃၂၈. တတ္ထ ကတမံ အဟိရိကံ? ယံ န ဟိရီယတိ ဟိရိယိတဗ္ဗေန, န ဟိရီယတိ ပါပကာနံ အကုသလာနံ ဓမ္မာနံ သမာပတ္တိယာ – ဣဒံ ဝုစ္စတိ အဟိရိကံ။

၁၃၂၉. တတ္ထ ကတမံ အနောတ္တပ္ပံ? ယံ န ဩတ္တပ္ပတိ ဩတ္တပ္ပိတဗ္ဗေန, န ဩတ္တပ္ပတိ ပါပကာနံ အကုသလာနံ ဓမ္မာနံ သမာပတ္တိယာ – ဣဒံ ဝုစ္စတိ အနောတ္တပ္ပံ။

၁၃၃၀. တတ္ထ ကတမာ ဟိရီ? ယံ ဟိရီယတိ ဟိရိယိတဗ္ဗေန, ဟိရီယတိ ပါပကာနံ အကုသလာနံ ဓမ္မာနံ သမာပတ္တိယာ – အယံ ဝုစ္စတိ ဟိရီ။

၁၃၃၁. တတ္ထ ကတမံ ဩတ္တပ္ပံ? ယံ ဩတ္တပ္ပတိ ဩတ္တပ္ပိတဗ္ဗေန, ဩတ္တပ္ပတိ ပါပကာနံ အကုသလာနံ ဓမ္မာနံ သမာပတ္တိယာ – ဣဒံ ဝုစ္စတိ ဩတ္တပ္ပံ။

၁၃၃၂. တတ္ထ ကတမာ ဒေါဝစဿတာ? သဟဓမ္မိကေ ဝုစ္စမာနေ ဒေါဝစဿာယံ ဒေါဝစဿိယံ ဒေါဝစဿတာ ဝိပ္ပဋိကူလဂ္ဂါဟိတာ ဝိပစ္စနီကသာတတာ အနာဒရိယံ အနာဒရတာ အဂါရဝတာ အပ္ပဋိဿဝတာ – အယံ ဝုစ္စတိ ဒေါဝစဿတာ။

၁၃၃၃. တတ္ထ ကတမာ ပါပမိတ္တတာ? ယေ တေ ပုဂ္ဂလာ အဿဒ္ဓါ ဒုဿီလာ အပ္ပဿုတာ မစ္ဆရိနော ဒုပ္ပညာ, ယာ တေသံ သေဝနာ နိသေဝနာ သံသေဝနာ ဘဇနာ သမ္ဘဇနာ ဘတ္တိ သမ္ဘတ္တိ တံသမ္ပဝင်္ကတာ – အယံ ဝုစ္စတိ ပါပမိတ္တတာ။

၁၃၃၄. တတ္ထ ကတမာ သောဝစဿတာ? သဟဓမ္မိကေ ဝုစ္စမာနေ သောဝစဿာယံ သောဝစဿိယံ သောဝစဿတာ အပ္ပဋိကူလဂ္ဂါဟိတာ အဝိပစ္စနီကသာတတာ သဂါရဝတာ သာဒရိယံ သာဒရတာ သပ္ပဋိဿဝတာ – အယံ ဝုစ္စတိ သောဝစဿတာ။

၁၃၃၅. တတ္ထ ကတမာ ကလျာဏမိတ္တတာ? ယေ တေ ပုဂ္ဂလာ သဒ္ဓါ သီလဝန္တော ဗဟုဿုတာ စာဂဝန္တော ပညဝန္တော, ယာ တေသံ သေဝနာ နိသေဝနာ သံသေဝနာ ဘဇနာ သမ္ဘဇနာ ဘတ္တိ သမ္ဘတ္တိ တံသမ္ပဝင်္ကတာ – အယံ ဝုစ္စတိ ကလျာဏမိတ္တတာ။

၁၃၃၆. တတ္ထ ကတမာ အာပတ္တိကုသလတာ? ပဉ္စပိ အာပတ္တိက္ခန္ဓာ အာပတ္တိယော, သတ္တပိ အာပတ္တိက္ခန္ဓာ အာပတ္တိယော။ ယာ တာသံ အာပတ္တီနံ အာပတ္တိကုသလတာ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ အာပတ္တိကုသလတာ။

၁၃၃၇. တတ္ထ ကတမာ အာပတ္တိဝုဋ္ဌာနကုသလတာ? ယာ တာဟိ အာပတ္တီဟိ ဝုဋ္ဌာနကုသလတာ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ အာပတ္တိဝုဋ္ဌာနကုသလတာ။

၁၃၃၈. တတ္ထ ကတမာ သမာပတ္တိကုသလတာ? အတ္ထိ သဝိတက္ကသဝိစာရာ သမာပတ္တိ, အတ္ထိ အဝိတက္ကဝိစာရမတ္တာ သမာပတ္တိ, အတ္ထိ အဝိတက္ကအဝိစာရာ သမာပတ္တိ။ ယာ တာသံ သမာပတ္တီနံ သမာပတ္တိကုသလတာ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ သမာပတ္တိကုသလတာ။

၁၃၃၉. တတ္ထ ကတမာ သမာပတ္တိဝုဋ္ဌာနကုသလတာ? ယာ တာဟိ သမာပတ္တီဟိ ဝုဋ္ဌာနကုသလတာ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ သမာပတ္တိဝုဋ္ဌာနကုသလတာ။

၁၃၄၀. တတ္ထ ကတမာ ဓါတုကုသလတာ? အဋ္ဌာရသ ဓါတုယော စက္ခုဓါတု ရူပဓါတု စက္ခုဝိညာဏဓါတု, သောတဓါတု သဒ္ဒဓါတု သောတဝိညာဏဓါတု, ဃာနဓါတု ဂန္ဓဓါတု ဃာနဝိညာဏဓါတု, ဇိဝှာဓါတု ရသဓါတု ဇိဝှာဝိညာဏဓါတု, ကာယဓါတု ဖောဋ္ဌဗ္ဗဓါတု ကာယဝိညာဏဓါတု, မနောဓါတု ဓမ္မဓါတု မနောဝိညာဏဓါတု။ ယာ တာသံ ဓါတူနံ ဓါတုကုသလတာ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ဓါတုကုသလတာ။

၁၃၄၁. တတ္ထ ကတမာ မနသိကာရကုသလတာ? ယာ တာသံ ဓါတူနံ မနသိကာရကုသလတာ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ မနသိကာရကုသလတာ။

၁၃၄၂. တတ္ထ ကတမာ အာယတနကုသလတာ? ဒွါဒသာယတနာနိ – စက္ခာယတနံ, ရူပါယတနံ, သောတာယတနံ, သဒ္ဒါယတနံ, ဃာနာယတနံ, ဂန္ဓာယတနံ, ဇိဝှာယတနံ, ရသာယတနံ, ကာယာယတနံ, ဖောဋ္ဌဗ္ဗာယတနံ, မနာယတနံ, ဓမ္မာယတနံ။ ယာ တေသံ အာယတနာနံ အာယတနကုသလတာ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ အာယတနကုသလတာ။

၁၃၄၃. တတ္ထ ကတမာ ပဋိစ္စသမုပ္ပါဒကုသလတာ? အဝိဇ္ဇာပစ္စယာ သင်္ခါရာ, သင်္ခါရပစ္စယာ ဝိညာဏံ, ဝိညာဏပစ္စယာ နာမရူပံ, နာမရူပပစ္စယာ သဠာယတနံ, သဠာယတနပစ္စယာ ဖဿော, ဖဿပစ္စယာ ဝေဒနာ, ဝေဒနာပစ္စယာ တဏှာ, တဏှာပစ္စယာ ဥပါဒါနံ, ဥပါဒါနပစ္စယာ ဘဝေါ, ဘဝပစ္စယာ ဇာတိ, ဇာတိပစ္စယာ ဇရာမရဏံ သောကပရိဒေဝဒုက္ခဒေါမနဿုပါယာသာ သမ္ဘဝန္တိ; ဧဝမေတဿ ကေဝလဿ ဒုက္ခက္ခန္ဓဿ သမုဒယော ဟောတီတိ။ ယာ တတ္ထ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ပဋိစ္စသမုပ္ပါဒကုသလတာ။

၁၃၄၄. တတ္ထ ကတမာ ဌာနကုသလတာ? ယေ ယေ ဓမ္မာ ယေသံ ယေသံ ဓမ္မာနံ ဟေတူ ပစ္စယာ ဥပ္ပါဒါယ [ဥပါဒါယ (သီ. က.)] တံ တံ ဌာနန္တိ, ယာ တတ္ထ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ဌာနကုသလတာ။

၁၃၄၅. တတ္ထ ကတမာ အဋ္ဌာနကုသလတာ? ယေ ယေ ဓမ္မာ ယေသံ ယေသံ ဓမ္မာနံ န ဟေတူ န ပစ္စယာ ဥပ္ပါဒါယ တံ တံ အဋ္ဌာနန္တိ, ယာ တတ္ထ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ အဋ္ဌာနကုသလတာ။

၁၃၄၆. တတ္ထ ကတမော အဇ္ဇဝေါ? ယာ အဇ္ဇဝတာ အဇိမှတာ အဝင်္ကတာ အကုဋိလတာ – အယံ ဝုစ္စတိ အဇ္ဇဝေါ။

၁၃၄၇. တတ္ထ ကတမော မဒ္ဒဝေါ? ယာ မုဒုတာ မဒ္ဒဝတာ အကက္ခဠတာ အကထိနတာ နီစစိတ္တတာ – အယံ ဝုစ္စတိ မဒ္ဒဝေါ။

၁၃၄၈. တတ္ထ ကတမာ ခန္တိ? ယာ ခန္တိ ခမနတာ အဓိဝါသနတာ အစဏ္ဍိက္ကံ အနသုရောပေါ အတ္တမနတာ စိတ္တဿ – အယံ ဝုစ္စတိ ခန္တိ။

၁၃၄၉. တတ္ထ ကတမံ သောရစ္စံ? ယော ကာယိကော အဝီတိက္ကမော, ဝါစသိကော အဝီတိက္ကမော, ကာယိကဝါစသိကော အဝီတိက္ကမော – ဣဒံ ဝုစ္စတိ သောရစ္စံ။ သဗ္ဗောပိ သီလသံဝရော သောရစ္စံ။

၁၃၅၀. တတ္ထ ကတမံ သာခလ္ယံ? ယာ သာ ဝါစာ အဏ္ဍကာ ကက္ကသာ ပရကဋုကာ ပရာဘိသဇ္ဇနီ ကောဓသာမန္တာ အသမာဓိသံဝတ္တနိကာ, တထာရူပိံ ဝါစံ ပဟာယ ယာ သာ ဝါစာ နေဠာ ကဏ္ဏသုခါ ပေမနီယာ ဟဒယင်္ဂမာ ပေါရီ ဗဟုဇနကန္တာ ဗဟုဇနမနာပါ တထာရူပိံ ဝါစံ ဘာသိတာ ဟောတိ; ယာ တတ္ထ သဏှဝါစတာ သခိလဝါစတာ အဖရုသဝါစတာ – ဣဒံ ဝုစ္စတိ သာခလ္ယံ။

၁၃၅၁. တတ္ထ ကတမော ပဋိသန္ထာရော? ဒွေ ပဋိသန္ထာရာ – အာမိသပဋိသန္ထာရော စ ဓမ္မပဋိသန္ထာရော စ။ ဣဓေကစ္စော ပဋိသန္ထာရကော ဟောတိ အာမိသပဋိသန္ထာရေန ဝါ ဓမ္မပဋိသန္ထာရေန ဝါ – အယံ ဝုစ္စတိ ပဋိသန္ထာရော။

၁၃၅၂. တတ္ထ ကတမာ ဣန္ဒ္ရိယေသု အဂုတ္တဒွါရတာ? ဣဓေကစ္စော စက္ခုနာ ရူပံ ဒိသွာ နိမိတ္တဂ္ဂါဟီ ဟောတိ အနုဗျဉ္ဇနဂ္ဂါဟီ။ ယတွာဓိကရဏမေနံ စက္ခုန္ဒ္ရိယံ အသံဝုတံ ဝိဟရန္တံ အဘိဇ္ဈာဒေါမနဿာ ပါပကာ အကုသလာ ဓမ္မာ အနွာဿဝေယျုံ, တဿ သံဝရာယ န ပဋိပဇ္ဇတိ, န ရက္ခတိ စက္ခုန္ဒ္ရိယံ, စက္ခုန္ဒ္ရိယေ န သံဝရံ အာပဇ္ဇတိ။ သောတေန သဒ္ဒံ သုတွာ။ပေ.။ ဃာနေန ဂန္ဓံ ဃာယိတွာ။ပေ.။ ဇိဝှာယ ရသံ သာယိတွာ။ပေ.။ ကာယေန ဖောဋ္ဌဗ္ဗံ ဖုသိတွာ။ပေ.။ မနသာ ဓမ္မံ ဝိညာယ နိမိတ္တဂ္ဂါဟီ ဟောတိ အနုဗျဉ္ဇနဂ္ဂါဟီ။ ယတွာဓိကရဏမေနံ မနိန္ဒ္ရိယံ အသံဝုတံ ဝိဟရန္တံ အဘိဇ္ဈာဒေါမနဿာ ပါပကာ အကုသလာ ဓမ္မာ အနွာဿဝေယျုံ, တဿ သံဝရာယ န ပဋိပဇ္ဇတိ, န ရက္ခတိ မနိန္ဒ္ရိယံ, မနိန္ဒ္ရိယေ န သံဝရံ အာပဇ္ဇတိ။ ယာ ဣမေသံ ဆန္နံ ဣန္ဒ္ရိယာနံ အဂုတ္တိ အဂေါပနာ အနာရက္ခော အသံဝရော – အယံ ဝုစ္စတိ ဣန္ဒ္ရိယေသု အဂုတ္တဒွါရတာ။

၁၃၅၃. တတ္ထ ကတမာ ဘောဇနေ အမတ္တညုတာ? ဣဓေကစ္စော အပ္ပဋိသင်္ခါ အယောနိသော အာဟာရံ အာဟာရေတိ ဒဝါယ မဒါယ မဏ္ဍနာယ ဝိဘူသနာယ။ ယာ တတ္ထ အသန္တုဋ္ဌိတာ အမတ္တညုတာ အပ္ပဋိသင်္ခါ ဘောဇနေ – အယံ ဝုစ္စတိ ဘောဇနေ အမတ္တညုတာ။

၁၃၅၄. တတ္ထ ကတမာ ဣန္ဒ္ရိယေသု ဂုတ္တဒွါရတာ? ဣဓေကစ္စော စက္ခုနာ ရူပံ ဒိသွာ န နိမိတ္တဂ္ဂါဟီ ဟောတိ န အနုဗျဉ္ဇနဂ္ဂါဟီ။ ယတွာဓိကရဏမေနံ စက္ခုန္ဒ္ရိယံ အသံဝုတံ ဝိဟရန္တံ အဘိဇ္ဈာဒေါမနဿာ ပါပကာ အကုသလာ ဓမ္မာ အနွာဿဝေယျုံ, တဿ သံဝရာယ ပဋိပဇ္ဇတိ, ရက္ခတိ စက္ခုန္ဒ္ရိယံ, စက္ခုန္ဒ္ရိယေ သံဝရံ အာပဇ္ဇတိ။ သောတေန သဒ္ဒံ သုတွာ။ပေ.။ ဃာနေန ဂန္ဓံ ဃာယိတွာ။ပေ.။ ဇိဝှာယ ရသံ သာယိတွာ။ပေ.။ ကာယေန ဖောဋ္ဌဗ္ဗံ ဖုသိတွာ။ပေ.။ မနသာ ဓမ္မံ ဝိညာယ န နိမိတ္တဂ္ဂါဟီ ဟောတိ နာနုဗျဉ္ဇနဂ္ဂါဟီ။ ယတွာဓိကရဏမေနံ မနိန္ဒ္ရိယံ အသံဝုတံ ဝိဟရန္တံ အဘိဇ္ဈာဒေါမနဿာ ပါပကာ အကုသလာ ဓမ္မာ အနွာဿဝေယျုံ, တဿ သံဝရာယ ပဋိပဇ္ဇတိ, ရက္ခတိ မနိန္ဒ္ရိယံ, မနိန္ဒ္ရိယေ သံဝရံ အာပဇ္ဇတိ။ ယာ ဣမေသံ ဆန္နံ ဣန္ဒ္ရိယာနံ ဂုတ္တိ ဂေါပနာ အာရက္ခော သံဝရော – အယံ ဝုစ္စတိ ဣန္ဒ္ရိယေသု ဂုတ္တဒွါရတာ။

၁၃၅၅. တတ္ထ ကတမာ ဘောဇနေ မတ္တညုတာ? ဣဓေကစ္စော ပဋိသင်္ခါ ယောနိသော အာဟာရံ အာဟာရေတိ – နေဝ ဒဝါယ န မဒါယ န မဏ္ဍနာယ န ဝိဘူသနာယ ယာဝဒေဝ ဣမဿ ကာယဿ ဌိတိယာ ယာပနာယ ဝိဟိံသူပရတိယာ ဗြဟ္မစရိယာနုဂ္ဂဟာယ , ဣတိ ပုရာဏဉ္စ ဝေဒနံ ပဋိဟင်္ခါမိ, နဝဉ္စ ဝေဒနံ န ဥပ္ပါဒေဿာမိ, ယာတြာ စ မေ ဘဝိဿတိ အနဝဇ္ဇတာ စ ဖာသုဝိဟာရော စာတိ။ ယာ တတ္ထ သန္တုဋ္ဌိတာ မတ္တညုတာ ပဋိသင်္ခါ ဘောဇနေ – အယံ ဝုစ္စတိ ဘောဇနေ မတ္တညုတာ။

၁၃၅၆. တတ္ထ ကတမံ မုဋ္ဌသစ္စံ? ယာ အသတိ အနနုဿတိ အပ္ပဋိဿတိ အသတိ အသရဏတာ အဓါရဏတာ ပိလာပနတာ သမ္မုသနတာ – ဣဒံ ဝုစ္စတိ မုဋ္ဌသစ္စံ။

၁၃၅၇. တတ္ထ ကတမံ အသမ္ပဇညံ? ယံ အညာဏံ အဒဿနံ။ပေ.။ အဝိဇ္ဇာလင္ဂီ မောဟော အကုသလမူလံ – ဣဒံ ဝုစ္စတိ အသမ္ပဇညံ။

၁၃၅၈. တတ္ထ ကတမာ သတိ? ယာ သတိ အနုဿတိ ပဋိဿတိ သတိ သရဏတာ ဓါရဏတာ အပိလာပနတာ အသမ္မုသနတာ သတိ သတိန္ဒ္ရိယံ သတိဗလံ သမ္မာသတိ – အယံ ဝုစ္စတိ သတိ။

၁၃၅၉. တတ္ထ ကတမံ သမ္ပဇညံ? ယာ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ – ဣဒံ ဝုစ္စတိ သမ္ပဇညံ။

၁၃၆၀. တတ္ထ ကတမံ ပဋိသင်္ခါနဗလံ? ယာ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ – ဣဒံ ဝုစ္စတိ ပဋိသင်္ခါနဗလံ။

၁၃၆၁. တတ္ထ ကတမံ ဘာဝနာဗလံ? ယာ ကုသလာနံ ဓမ္မာနံ အာသေဝနာ ဘာဝနာ ဗဟုလီကမ္မံ – ဣဒံ ဝုစ္စတိ ဘာဝနာဗလံ။ သတ္တပိ ဗောဇ္ဈင်္ဂါ ဘာဝနာဗလံ။

၁၃၆၂. တတ္ထ ကတမော သမထော? ယာ စိတ္တဿ ဌိတိ။ပေ.။ သမ္မာသမာဓိ – အယံ ဝုစ္စတိ သမထော။

၁၃၆၃. တတ္ထ ကတမာ ဝိပဿနာ? ယာ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ဝိပဿနာ။

၁၃၆၄. တတ္ထ ကတမံ သမထနိမိတ္တံ? ယာ စိတ္တဿ ဌိတိ။ပေ.။ သမ္မာသမာဓိ – ဣဒံ ဝုစ္စတိ သမထနိမိတ္တံ။

၁၃၆၅. တတ္ထ ကတမံ ပဂ္ဂါဟနိမိတ္တံ? ယော စေတသိကော ဝီရိယာရမ္ဘော။ပေ.။ သမ္မာဝါယာမော – ဣဒံ ဝုစ္စတိ ပဂ္ဂါဟနိမိတ္တံ။

၁၃၆၆. တတ္ထ ကတမော ပဂ္ဂါဟော? ယော စေတသိကော ဝီရိယာရမ္ဘော။ပေ.။ သမ္မာဝါယာမော – အယံ ဝုစ္စတိ ပဂ္ဂါဟော။

၁၃၆၇. တတ္ထ ကတမော အဝိက္ခေပေါ? ယာ စိတ္တဿ ဌိတိ။ပေ.။ သမ္မာသမာဓိ – အယံ ဝုစ္စတိ အဝိက္ခေပေါ။

၁၃၆၈. တတ္ထ ကတမာ သီလဝိပတ္တိ? ယော ကာယိကော ဝီတိက္ကမော, ဝါစသိကော ဝီတိက္ကမော , ကာယိကဝါစသိကော ဝီတိက္ကမော – အယံ ဝုစ္စတိ သီလဝိပတ္တိ။ သဗ္ဗမ္ပိ ဒုဿိလ္ယံ သီလဝိပတ္တိ။

၁၃၆၉. တတ္ထ ကတမာ ဒိဋ္ဌိဝိပတ္တိ? နတ္ထိ ဒိန္နံ, နတ္ထိ ယိဋ္ဌံ, နတ္ထိ ဟုတံ, နတ္ထိ သုကတဒုက္ကဋာနံ ကမ္မာနံ ဖလံ ဝိပါကော, နတ္ထိ အယံ လောကော, နတ္ထိ ပရော လောကော, နတ္ထိ မာတာ, နတ္ထိ ပိတာ, နတ္ထိ သတ္တာ ဩပပါတိကာ, နတ္ထိ လောကေ သမဏဗြာဟ္မဏာ သမ္မဂ္ဂတာ သမ္မာပဋိပန္နာ ယေ ဣမဉ္စ လောကံ ပရဉ္စ လောကံ သယံ အဘိညာ သစ္ဆိကတွာ ပဝေဒေန္တီတိः ယာ ဧဝရူပါ ဒိဋ္ဌိ ဒိဋ္ဌိဂတံ။ပေ.။ ဝိပရိယာသဂ္ဂါဟော – အယံ ဝုစ္စတိ ဒိဋ္ဌိဝိပတ္တိ။ သဗ္ဗာပိ မိစ္ဆာဒိဋ္ဌိ ဒိဋ္ဌိဝိပတ္တိ။

၁၃၇၀. တတ္ထ ကတမာ သီလသမ္ပဒါ? ယော ကာယိကော အဝီတိက္ကမော, ဝါစသိကော အဝီတိက္ကမော, ကာယိကဝါစသိကော အဝီတိက္ကမော – အယံ ဝုစ္စတိ သီလသမ္ပဒါ။ သဗ္ဗောပိ သီလသံဝရော သီလသမ္ပဒါ။

၁၃၇၁. တတ္ထ ကတမာ ဒိဋ္ဌိသမ္ပဒါ? အတ္ထိ ဒိန္နံ, အတ္ထိ ယိဋ္ဌံ, အတ္ထိ ဟုတံ, အတ္ထိ သုကတဒုက္ကဋာနံ ကမ္မာနံ ဖလံ ဝိပါကော, အတ္ထိ အယံ လောကော, အတ္ထိ ပရော လောကော, အတ္ထိ မာတာ, အတ္ထိ ပိတာ, အတ္ထိ သတ္တာ ဩပပါတိကာ, အတ္ထိ လောကေ သမဏဗြာဟ္မဏာ သမ္မဂ္ဂတာ သမ္မာပဋိပန္နာ ယေ ဣမဉ္စ လောကံ ပရဉ္စ လောကံ သယံ အဘိညာ သစ္ဆိကတွာ ပဝေဒေန္တီတိः ယာ ဧဝရူပါ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ – အယံ ဝုစ္စတိ ဒိဋ္ဌိသမ္ပဒါ။ သဗ္ဗာပိ သမ္မာဒိဋ္ဌိ ဒိဋ္ဌိသမ္ပဒါ။

၁၃၇၂. တတ္ထ ကတမာ သီလဝိသုဒ္ဓိ? ယော ကာယိကော အဝီတိက္ကမော, ဝါစသိကော အဝီတိက္ကမော, ကာယိကဝါစသိကော အဝီတိက္ကမော – အယံ ဝုစ္စတိ သီလဝိသုဒ္ဓိ။ သဗ္ဗောပိ သီလသံဝရော သီလဝိသုဒ္ဓိ။

၁၃၇၃. တတ္ထ ကတမာ ဒိဋ္ဌိဝိသုဒ္ဓိ? ကမ္မဿကတဉာဏံ သစ္စာနုလောမိကဉာဏံ မဂ္ဂသမင်္ဂိဿ ဉာဏံ ဖလသမင်္ဂိဿ ဉာဏံ။

၁၃၇၄. ဒိဋ္ဌိဝိသုဒ္ဓိ ခေါ ပနာတိ – ယာ ပညာ ပဇာနနာ။ပေ.။ အမောဟော ဓမ္မဝိစယော သမ္မာဒိဋ္ဌိ။

၁၃၇၅. ယထာဒိဋ္ဌိဿ စ ပဓါနန္တိ – ယော စေတသိကော ဝီရိယာရမ္ဘော။ပေ.။ သမ္မာဝါယာမော။

၁၃၇၆. သံဝေဂေါတိ – ဇာတိဘယံ ဇရာဘယံ ဗျာဓိဘယံ မရဏဘယံ။ သံဝေဇနိယံ [သံဝေဇနီယံ (သီ.)] ဌာနန္တိ – ဇာတိ ဇရာ ဗျာဓိ မရဏံ။

၁၃၇၇. သံဝိဂ္ဂဿ စ ယောနိသော ပဓါနန္တိ – ဣဓ ဘိက္ခု အနုပ္ပန္နာနံ ပါပကာနံ အကုသလာနံ ဓမ္မာနံ အနုပ္ပါဒါယ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ, ဥပ္ပန္နာနံ ပါပကာနံ အကုသလာနံ ဓမ္မာနံ ပဟာနာယ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ, အနုပ္ပန္နာနံ ကုသလာနံ ဓမ္မာနံ ဥပ္ပါဒါယ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ, ဥပ္ပန္နာနံ ကုသလာနံ ဓမ္မာနံ ဌိတိယာ အသမ္မောသာယ ဘိယျောဘာဝါယ ဝေပုလ္လာယ ဘာဝနာယ ပါရိပူရိယာ ဆန္ဒံ ဇနေတိ ဝါယမတိ ဝီရိယံ အာရဘတိ စိတ္တံ ပဂ္ဂဏှာတိ ပဒဟတိ။

၁၃၇၈. အသန္တုဋ္ဌိတာ စ ကုသလေသု ဓမ္မေသူတိ – ယာ ကုသလာနံ ဓမ္မာနံ ဘာဝနာယ အသန္တုဋ္ဌဿ ဘိယျောကမ္ယတာ။

၁၃၇၉. အပ္ပဋိဝါနိတာ စ ပဓါနသ္မိန္တိ – ယာ ကုသလာနံ ဓမ္မာနံ ဘာဝနာယ သက္ကစ္စကိရိယတာ သာတစ္စကိရိယတာ အဋ္ဌိတကိရိယတာ အနောလီနဝုတ္တိတာ အနိက္ခိတ္တဆန္ဒတာ အနိက္ခိတ္တဓုရတာ အာသေဝနာ ဘာဝနာ ဗဟုလီကမ္မံ။

၁၃၈၀. ဝိဇ္ဇာတိ – တိဿော ဝိဇ္ဇာ – ပုဗ္ဗေနိဝါသာနုဿတိ ဉာဏံ ဝိဇ္ဇာ, သတ္တာနံ စုတူပပါတေ ဉာဏံ ဝိဇ္ဇာ, အာသဝါနံ ခယေ ဉာဏံ ဝိဇ္ဇာ။

၁၃၈၁. ဝိမုတ္တီတိ – ဒွေ ဝိမုတ္တိယော – စိတ္တဿ [စိတ္တဿ စ (သီ. သျာ.)] အဓိမုတ္တိ, နိဗ္ဗာနဉ္စ။

၁၃၈၂. ခယေ ဉာဏန္တိ – မဂ္ဂသမင်္ဂိဿ ဉာဏံ။

၁၃၈၃. အနုပ္ပါဒေ ဉာဏန္တိ – ဖလသမင်္ဂိဿ ဉာဏံ။

နိက္ခေပကဏ္ဍံ နိဋ္ဌိတံ။