သေဒမောစနဂါထာ
၁. အဝိပ္ပဝါသပဉှာ
၄၇၉.
အသံဝါသော ဘိက္ခူဟိ စ ဘိက္ခုနီဟိ စ။
သမ္ဘောဂေါ ဧကစ္စော တဟိံ န လဗ္ဘတိ။
အဝိပ္ပဝါသေန အနာပတ္တိ။
ပဉှာ မေသာ ကုသလေဟိ စိန္တိတာ။
အဝိဿဇ္ဇိယံ အဝေဘင်္ဂိယံ။
ပဉ္စ ဝုတ္တာ မဟေသိနာ။
ဝိဿဇ္ဇန္တဿ ပရိဘုဉ္ဇန္တဿ အနာပတ္တိ။
ပဉှာ မေသာ ကုသလေဟိ စိန္တိတာ။
ဒသ ပုဂ္ဂလေ န ဝဒါမိ၊ ဧကာဒသ ဝိဝဇ္ဇိယ။
ဝုဍ္ဎံ ဝန္ဒန္တဿ အာပတ္တိ၊ ပဉှာ မေသာ ကုသလေဟိ စိန္တိတာ။
န ဥက္ခိတ္တကော န စ ပန ပါရိဝါသိကော။
န သံဃဘိန္နော န စ ပန ပက္ခသင်္ကန္တော။
သမာနသံဝါသကဘူမိယာ ဌိတော။
ကထံ နု သိက္ခာယ အသာဓါရဏော သိယာ။
ပဉှာ မေသာ ကုသလေဟိ စိန္တိတာ။
ဥပေတိ ဓမ္မံ ပရိပုစ္ဆမာနော၊ ကုသလံ အတ္ထူပသဉှိတံ။
န ဇီဝတိ န မတော န နိဗ္ဗုတော၊ တံ ပုဂ္ဂလံ ကတမံ ဝဒန္တိ ဗုဒ္ဓါ။
ပဉှာ မေသာ ကုသလေဟိ စိန္တိတာ။
ဥဗ္ဘက္ခကေ န ဝဒါမိ၊ အဓေါ နာဘိံ ဝိဝဇ္ဇိယ။
မေထုနဓမ္မပစ္စယာ၊ ကထံ ပါရာဇိကော သိယာ။
ပဉှာ မေသာ ကုသလေဟိ စိန္တိတာ။
ဘိက္ခု သညာစိကာယ ကုဋိံ ကရောတိ။
အဒေသိတဝတ္ထုကံ ပမာဏာတိက္ကန္တံ။
သာရမ္ဘံ အပရိက္ကမနံ အနာပတ္တိ။
ပဉှာ မေသာ ကုသလေဟိ စိန္တိတာ။
ဘိက္ခု သညာစိကာယ ကုဋိံ ကရောတိ။
ဒေသိတဝတ္ထုကံ ပမာဏိကံ။
အနာရမ္ဘံ သပရိက္ကမနံ အာပတ္တိ။
ပဉှာ မေသာ ကုသလေဟိ စိန္တိတာ။
န ကာယိကံ ကိဉ္စိ ပယောဂမာစရေ။
န စာပိ ဝါစာယ ပရေ ဘဏေယျ။
အာပဇ္ဇေယျ ဂရုကံ ဆေဇ္ဇဝတ္ထုံ။
ပဉှာ မေသာ ကုသလေဟိ စိန္တိတာ။
န ကာယိကံ ဝါစသိကဉ္စ ကိဉ္စိ။
မနသာပိ သန္တော န ကရေယျ ပါပံ။
သော နာသိတော ကိန္တိ သုနာသိတော ဘဝေ။
ပဉှာ မေသာ ကုသလေဟိ စိန္တိတာ။
အနာလပန္တော မနုဇေန ကေနစိ။
ဝါစာဂိရံ နော စ ပရေ ဘဏေယျ။
အာပဇ္ဇေယျ ဝါစသိကံ န ကာယိကံ။
ပဉှာ မေသာ ကုသလေဟိ စိန္တိတာ။
သိက္ခာပဒါ ဗုဒ္ဓဝရေန ဝဏ္ဏိတာ။
သံဃာဒိသေသာ စတုရော ဘဝေယျုံ။
အာပဇ္ဇေယျ ဧကပယောဂေန သဗ္ဗေ။
ပဉှာ မေသာ ကုသလေဟိ စိန္တိတာ။
ဥဘော ဧကတော ဥပသမ္ပန္နာ။
ဥဘိန္နံ ဟတ္ထတော စီဝရံ ပဋိဂ္ဂဏှေယျ။
သိယာ အာပတ္တိယော နာနာ။
ပဉှာ မေသာ ကုသလေဟိ စိန္တိတာ။
စတုရော ဇနာ သံဝိဓါယ။
ဂရုဘဏ္ဍံ အဝါဟရုံ။
တယော ပါရာဇိကာ ဧကော န ပါရာဇိကော။
ပဉှာ မေသာ ကုသလေဟိ စိန္တိတာ။
၂. ပါရာဇိကာဒိပဉှာ
၄၈၀.
ဣတ္ထီ စ အဗ္ဘန္တရေ သိယာ၊
ဘိက္ခု စ ဗဟိဒ္ဓါ သိယာ။
ဆိဒ္ဒံ တသ္မိံ ဃရေ နတ္ထိ။
မေထုနဓမ္မပစ္စယာ။
ကထံ ပါရာဇိကော သိယာ။
ပဉှာ မေသာ ကုသလေဟိ စိန္တိတာ။
တေလံ မဓုံ ဖာဏိတဉ္စာပိ သပ္ပိံ။
သာမံ ဂဟေတွာန နိက္ခိပေယျ။
အဝီတိဝတ္တေ သတ္တာဟေ။
သတိ ပစ္စယေ ပရိဘုဉ္ဇန္တဿ အာပတ္တိ။
ပဉှာ မေသာ ကုသလေဟိ စိန္တိတာ။
နိဿဂ္ဂိယေန အာပတ္တိ။
သုဒ္ဓကေန ပါစိတ္တိယံ။
အာပဇ္ဇန္တဿ ဧကတော။
ပဉှာ မေသာ ကုသလေဟိ စိန္တိတာ။
ဘိက္ခူ သိယာ ဝီသတိယာ သမာဂတာ။
ကမ္မံ ကရေယျုံ သမဂ္ဂသညိနော။
ဘိက္ခု သိယာ ဒွါဒသယောဇနေ ဌိတော။
ကမ္မဉ္စ တံ ကုပ္ပေယျ ဝဂ္ဂပစ္စယာ။
ပဉှာ မေသာ ကုသလေဟိ စိန္တိတာ။
ပဒဝီတိဟာရမတ္တေန ဝါစာယ ဘဏိတေန စ။
သဗ္ဗာနိ ဂရုကာနိ သပ္ပဋိကမ္မာနိ။
စတုသဋ္ဌိ အာပတ္တိယော အာပဇ္ဇေယျ ဧကတော။
ပဉှာ မေသာ ကုသလေဟိ စိန္တိတာ။
နိဝတ္ထော အန္တရဝါသကေန။
ဒိဂုဏံ သံဃာဋိံ ပါရုတော။
သဗ္ဗာနိ တာနိ နိဿဂ္ဂိယာနိ ဟောန္တိ။
ပဉှာ မေသာ ကုသလေဟိ စိန္တိတာ။
န စာပိ ဉတ္တိ န စ ပန ကမ္မဝါစာ။
န စေဟိ ဘိက္ခူတိ ဇိနော အဝေါစ။
သရဏဂမနမ္ပိ န တဿ အတ္ထိ။
ဥပသမ္ပဒါ စဿ အကုပ္ပါ။
ပဉှာ မေသာ ကုသလေဟိ စိန္တိတာ။
ဣတ္ထိံ ဟနေ န မာတရံ၊ ပုရိသဉ္စ န ပိတရံ ဟနေ။
ဟနေယျ အနရိယံ မန္ဒော၊ တေန စာနန္တရံ ဖုသေ။
ပဉှာ မေသာ ကုသလေဟိ စိန္တိတာ။
ဣတ္ထိံ ဟနေ စ မာတရံ၊ ပုရိသဉ္စ ပိတရံ ဟနေ။
မာတရံ ပိတရံ ဟန္တွာ၊ န တေနာနန္တရံ ဖုသေ။
ပဉှာ မေသာ ကုသလေဟိ စိန္တိတာ။
အစောဒယိတွာ အဿာရယိတွာ။
အသမ္မုခီဘူတဿ ကရေယျ ကမ္မံ။
ကတဉ္စ ကမ္မံ သုကတံ ဘဝေယျ။
ကာရကော စ သံဃော အနာပတ္တိကော သိယာ။
ပဉှာ မေသာ ကုသလေဟိ စိန္တိတာ။
စောဒယိတွာ သာရယိတွာ။
သမ္မုခီဘူတဿ ကရေယျ ကမ္မံ။
ကတဉ္စ ကမ္မံ အကတံ ဘဝေယျ။
ကာရကော စ သံဃော သာပတ္တိကော သိယာ။
ပဉှာ မေသာ ကုသလေဟိ စိန္တိတာ။
ဆိန္ဒန္တဿ အာပတ္တိ၊ ဆိန္ဒန္တဿ အနာပတ္တိ။
ဆာဒေန္တဿ အာပတ္တိ၊ ဆာဒေန္တဿ အနာပတ္တိ။
ပဉှာ မေသာ ကုသလေဟိ စိန္တိတာ။
သစ္စံ ဘဏန္တော ဂရုကံ၊ မုသာ စ လဟု ဘာသတော။
မုသာ ဘဏန္တော ဂရုကံ၊ သစ္စဉ္စ လဟု ဘာသတော။
ပဉှာ မေသာ ကုသလေဟိ စိန္တိတာ။
၃. ပါစိတ္တိယာဒိပဉှာ
၄၈၁.
အဓိဋ္ဌိတံ ရဇနာယ ရတ္တံ။
ကပ္ပကတမ္ပိ သန္တံ။
ပရိဘုဉ္ဇန္တဿ အာပတ္တိ။
ပဉှာ မေသာ ကုသလေဟိ စိန္တိတာ။
အတ္ထင်္ဂတေ သူရိယေ ဘိက္ခု မံသာနိ ခါဒတိ။
န ဥမ္မတ္တကော န စ ပန ခိတ္တစိတ္တော။
န စာပိ သော ဝေဒနာဋ္ဋော ဘဝေယျ။
န စဿ ဟောတိ အာပတ္တိ။
သော စ ဓမ္မော သုဂတေန ဒေသိတော။
ပဉှာ မေသာ ကုသလေဟိ စိန္တိတာ။
န ရတ္တစိတ္တော န စ ပန ထေယျစိတ္တော။
န စာပိ သော ပရံ မရဏာယ စေတယိ။
သလာကံ ဒေန္တဿ ဟောတိ ဆေဇ္ဇံ။
ပဋိဂ္ဂဏှန္တဿ ထုလ္လစ္စယံ။
ပဉှာ မေသာ ကုသလေဟိ စိန္တိတာ။
န စာပိ အာရညကံ သာသင်္ကသမ္မတံ။
န စာပိ သံဃေန သမ္မုတိ ဒိန္နာ။
န စဿ ကထိနံ အတ္ထတံ တတ္ထေဝ။
စီဝရံ နိက္ခိပိတွာ ဂစ္ဆေယျ အဍ္ဎယောဇနံ။
တတ္ထေဝ အရုဏံ ဥဂ္ဂစ္ဆန္တဿ အနာပတ္တိ။
ပဉှာ မေသာ ကုသလေဟိ စိန္တိတာ။
ကာယိကာနိ န ဝါစသိကာနိ။
သဗ္ဗာနိ နာနာဝတ္ထုကာနိ။
အပုဗ္ဗံ အစရိမံ အာပဇ္ဇေယျ ဧကတော။
ပဉှာ မေသာ ကုသလေဟိ စိန္တိတာ။
ဝါစသိကာနိ န ကာယိကာနိ။
သဗ္ဗာနိ နာနာဝတ္ထုကာနိ။
အပုဗ္ဗံ အစရိမံ အာပဇ္ဇေယျ ဧကတော။
ပဉှာ မေသာ ကုသလေဟိ စိန္တိတာ။
တိဿိတ္ထိယော မေထုနံ တံ န သေဝေ။
တယော ပုရိသေ တယော အနရိယပဏ္ဍကေ။
န စာစရေ မေထုနံ ဗျဉ္ဇနသ္မိံ။
ဆေဇ္ဇံ သိယာ မေထုနဓမ္မပစ္စယာ။
ပဉှာ မေသာ ကုသလေဟိ စိန္တိတာ။
မာတရံ စီဝရံ ယာစေ၊ နော စ သံဃေ [နော သံဃဿ (က.)၊ နော စ သံဃဿ (သျာ.)၊ နော စေ သံဃဿ (သီ.)] ပရိဏတံ။
ကေနဿ ဟောတိ အာပတ္တိ၊ အနာပတ္တိ စ ဉာတကေ။
ပဉှာ မေသာ ကုသလေဟိ စိန္တိတာ။
ကုဒ္ဓေါ အာရာဓကော ဟောတိ၊ ကုဒ္ဓေါ ဟောတိ ဂရဟိယော။
အထ ကော နာမ သော ဓမ္မော၊ ယေန ကုဒ္ဓေါ ပသံသိယော။
ပဉှာ မေသာ ကုသလေဟိ စိန္တိတာ။
တုဋ္ဌော အာရာဓကော ဟောတိ၊ တုဋ္ဌော ဟောတိ ဂရဟိယော။
အထ ကော နာမ သော ဓမ္မော၊ ယေန တုဋ္ဌော ဂရဟိယော။
ပဉှာ မေသာ ကုသလေဟိ စိန္တိတာ။
သံဃာဒိသေသံ ထုလ္လစ္စယံ။
ပါစိတ္တိယံ ပါဋိဒေသနီယံ။
ဒုက္ကဋံ အာပဇ္ဇေယျ ဧကတော။
ပဉှာ မေသာ ကုသလေဟိ စိန္တိတာ။
ဥဘော ပရိပုဏ္ဏဝီသတိဝဿာ။
ဥဘိန္နံ ဧကုပဇ္ဈာယော။
ဧကာစရိယော ဧကာ ကမ္မဝါစာ။
ဧကော ဥပသမ္ပန္နော ဧကော အနုပသမ္ပန္နော။
ပဉှာ မေသာ ကုသလေဟိ စိန္တိတာ။
အကပ္ပကတံ နာပိ ရဇနာယ ရတ္တံ။
တေန နိဝတ္ထော ယေန ကာမံ ဝဇေယျ။
န စဿ ဟောတိ အာပတ္တိ။
သော စ ဓမ္မော သုဂတေန ဒေသိတော။
ပဉှာ မေသာ ကုသလေဟိ စိန္တိတာ။
န ဒေတိ န ပဋိဂ္ဂဏှာတိ၊ ပဋိဂ္ဂဟော တေန န ဝိဇ္ဇတိ။
အာပဇ္ဇတိ ဂရုကံ န လဟုကံ၊ တဉ္စ ပရိဘောဂပစ္စယာ။
ပဉှာ မေသာ ကုသလေဟိ စိန္တိတာ။
န ဒေတိ န ပဋိဂ္ဂဏှာတိ၊ ပဋိဂ္ဂဟော တေန န ဝိဇ္ဇတိ။
အာပဇ္ဇတိ လဟုကံ န ဂရုကံ၊ တဉ္စ ပရိဘောဂပစ္စယာ။
ပဉှာ မေသာ ကုသလေဟိ စိန္တိတာ။
အာပဇ္ဇတိ ဂရုကံ သာဝသေသံ။
ဆာဒေတိ အနာဒရိယံ ပဋိစ္စ။
န ဘိက္ခုနီ နော စ ဖုသေယျ ဝဇ္ဇံ။
ပဉှာ မေသာ ကုသလေဟိ စိန္တိတာ။
သေဒမောစနဂါထာ နိဋ္ဌိတာ။
တဿုဒ္ဒါနံ –
အသံဝါသော အဝိဿဇ္ဇိ၊ ဒသ စ အနုက္ခိတ္တကော။
ဥပေတိ ဓမ္မံ ဥဗ္ဘက္ခကံ၊ တတော သညာစိကာ စ ဒွေ။
န ကာယိကဉ္စ ဂရုကံ၊ န ကာယိကံ န ဝါစသိကံ [န ကာယိကံ သုနာသိတံ (သျာ.)]။
အနာလပန္တော သိက္ခာ စ၊ ဥဘော စ စတုရော ဇနာ။
ဣတ္ထီ တေလဉ္စ နိဿဂ္ဂိ၊ ဘိက္ခု စ ပဒဝီတိယော။
နိဝတ္ထော စ န စ ဉတ္တိ၊ န မာတရံ ပိတရံ ဟနေ။
အစောဒယိတွာ စောဒယိတွာ၊ ဆိန္ဒန္တံ သစ္စမေဝ စ။
အဓိဋ္ဌိတဉ္စတ္ထင်္ဂတေ၊ န ရတ္တံ န စာရညကံ။
ကာယိကာ ဝါစသိကာ စ၊ တိဿိတ္ထီ စာပိ မာတရံ။
ကုဒ္ဓေါ အာရာဓကော တုဋ္ဌော၊ သံဃာဒိသေသာ စ ဥဘော။
အကပ္ပကတံ န ဒေတိ၊ န ဒေတာပဇ္ဇတီ ဂရုံ။
သေဒမောစနိကာ ဂါထာ၊ ပဉှာ ဝိညူဟိ ဝိဘာဝိတာတိ [ဝိညူဝိဘာဝိတာ (သီ. သျာ.)]။