ဒုတိယဂါထာသင်္ဂဏိကံ
၁. ကာယိကာဒိအာပတ္တိ
၄၇၄. ကတိ အာပတ္တိယော ကာယိကာ, ကတိ ဝါစသိကာ ကတာ။
ဆာဒေန္တဿ ကတိ အာပတ္တိယော၊ ကတိ သံသဂ္ဂပစ္စယာ။
ဆာပတ္တိယော ကာယိကာ၊ ဆ ဝါစသိကာ ကတာ။
ဆာဒေန္တဿ တိဿော အာပတ္တိယော၊ ပဉ္စ သံသဂ္ဂပစ္စယာ။
အရုဏုဂ္ဂေ ကတိ အာပတ္တိယော၊ ကတိ ယာဝတတိယကာ။
ကတေတ္ထ အဋ္ဌ ဝတ္ထုကာ၊ ကတိဟိ သဗ္ဗသင်္ဂဟော။
အရုဏုဂ္ဂေ တိဿော အာပတ္တိယော၊ ဒွေ ယာဝတတိယကာ။
ဧကေတ္ထ အဋ္ဌ ဝတ္ထုကာ၊ ဧကေန သဗ္ဗသင်္ဂဟော။
ဝိနယဿ ကတိ မူလာနိ၊ ယာနိ ဗုဒ္ဓေန ပညတ္တာ။
ဝိနယဂရုကာ ကတိ ဝုတ္တာ၊ ဒုဋ္ဌုလ္လစ္ဆာဒနာ ကတိ။
ဝိနယဿ ဒွေ မူလာနိ၊ ယာနိ ဗုဒ္ဓေန ပညတ္တာ။
ဝိနယဂရုကာ ဒွေ ဝုတ္တာ၊ ဒွေ ဒုဋ္ဌုလ္လစ္ဆာဒနာ။
ဂါမန္တရေ ကတိ အာပတ္တိယော၊ ကတိ နဒိပါရပစ္စယာ။
ကတိမံသေသု ထုလ္လစ္စယံ၊ ကတိမံသေသု ဒုက္ကဋံ။
ဂါမန္တရေ စတဿော အာပတ္တိယော၊ စတဿော နဒိပါရပစ္စယာ။
ဧကမံသေ ထုလ္လစ္စယံ၊ နဝမံသေသု ဒုက္ကဋံ။
ကတိ ဝါစသိကာ ရတ္တိံ၊ ကတိ ဝါစသိကာ ဒိဝါ။
ဒဒမာနဿ ကတိ အာပတ္တိယော၊ ပဋိဂ္ဂဏှန္တဿ ကိတ္တကာ။
ဒွေ ဝါစသိကာ ရတ္တိံ၊ ဒွေ ဝါစသိကာ ဒိဝါ။
ဒဒမာနဿ တိဿော အာပတ္တိယော၊ စတ္တာရော စ ပဋိဂ္ဂဟေ။
၂. ဒေသနာဂါမိနိယာဒိအာပတ္တိ
၄၇၅.
ကတိ ဒေသနာဂါမိနိယော၊ ကတိ သပ္ပဋိကမ္မာ ကတာ။
ကတေတ္ထ အပ္ပဋိကမ္မာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ပဉ္စ ဒေသနာဂါမိနိယော၊ ဆ သပ္ပဋိကမ္မာ ကတာ။
ဧကေတ္ထ အပ္ပဋိကမ္မာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယဂရုကာ ကတိ ဝုတ္တာ၊ ကာယဝါစသိကာနိ စ။
ကတိ ဝိကာလေ ဓညရသော၊ ကတိ ဉတ္တိစတုတ္ထေန သမ္မုတိ။
ဝိနယဂရုကာ ဒွေ ဝုတ္တာ၊ ကာယဝါစသိကာနိ စ။
ဧကော ဝိကာလေ ဓညရသော၊ ဧကာ ဉတ္တိစတုတ္ထေန သမ္မုတိ။
ပါရာဇိကာ ကာယိကာ ကတိ၊ ကတိ သံဝါသကဘူမိယော။
ကတိနံ ရတ္တိစ္ဆေဒေါ၊ ပညတ္တာ ဒွင်္ဂုလာ ကတိ။
ပါရာဇိကာ ကာယိကာ ဒွေ၊ ဒွေ သံဝါသကဘူမိယော။
ဒွိန္နံ ရတ္တိစ္ဆေဒေါ၊ ပညတ္တာ ဒွင်္ဂုလာ ဒုဝေ။
ကတတ္တာနံ ဝဓိတွာန၊ ကတိဟိ သံဃော ဘိဇ္ဇတိ။
ကတေတ္ထ ပဌမာပတ္တိကာ၊ ဉတ္တိယာ ကရဏာ ကတိ။
ဒွေ အတ္တာနံ ဝဓိတွာန၊ ဒွီဟိ သံဃော ဘိဇ္ဇတိ။
ဒွေတ္ထ ပဌမာပတ္တိကာ၊ ဉတ္တိယာ ကရဏာ ဒုဝေ။
ပါဏာတိပါတေ ကတိ အာပတ္တိယော၊ ဝါစာ ပါရာဇိကာ ကတိ။
ဩဘာသနာ ကတိ ဝုတ္တာ၊ သဉ္စရိတ္တေန ဝါ ကတိ။
ပါဏာတိပါတေ တိဿော အာပတ္တိယော။
ဝါစာ ပါရာဇိကာ တယော။
ဩဘာသနာ တယော ဝုတ္တာ။
သဉ္စရိတ္တေန ဝါ တယော။
ကတိ ပုဂ္ဂလာ န ဥပသမ္ပာဒေတဗ္ဗာ၊ ကတိ ကမ္မာနံ သင်္ဂဟာ။
နာသိတကာ ကတိ ဝုတ္တာ၊ ကတိနံ ဧကဝါစိကာ။
တယော ပုဂ္ဂလာ န ဥပသမ္ပာဒေတဗ္ဗာ၊ တယော ကမ္မာနံ သင်္ဂဟာ။
နာသိတကာ တယော ဝုတ္တာ၊ တိဏ္ဏန္နံ ဧကဝါစိကာ။
အဒိန္နာဒါနေ ကတိ အာပတ္တိယော၊ ကတိ မေထုနပစ္စယာ။
ဆိန္ဒန္တဿ ကတိ အာပတ္တိယော၊ ကတိ ဆဍ္ဍိတပစ္စယာ။
အဒိန္နာဒါနေ တိဿော အာပတ္တိယော၊ စတဿော မေထုနပစ္စယာ။
ဆိန္ဒန္တဿ တိဿော အာပတ္တိယော၊ ပဉ္စ ဆဍ္ဍိတပစ္စယာ။
ဘိက္ခုနောဝါဒကဝဂ္ဂသ္မိံ ၊ ပါစိတ္တိယေန ဒုက္ကဋာ။
ကတေတ္ထ နဝကာ ဝုတ္တာ၊ ကတိနံ စီဝရေန စ။
ဘိက္ခုနောဝါဒကဝဂ္ဂသ္မိံ ၊ ပါစိတ္တိယေန ဒုက္ကဋာ ကတာ။
စတုရေတ္ထ နဝကာ ဝုတ္တာ၊ ဒွိန္နံ စီဝရေန စ။
ဘိက္ခုနီနဉ္စ အက္ခာတာ၊ ပါဋိဒေသနိယာ ကတိ။
ဘုဉ္ဇန္တာမကဓညေန၊ ပါစိတ္တိယေန ဒုက္ကဋာ ကတိ။
ဘိက္ခုနီနဉ္စ အက္ခာတာ၊ အဋ္ဌ ပါဋိဒေသနီယာ ကတာ။
ဘုဉ္ဇန္တာမကဓညေန၊ ပါစိတ္တိယေန ဒုက္ကဋာ ကတာ။
ဂစ္ဆန္တဿ ကတိ အာပတ္တိယော၊ ဌိတဿ စာပိ ကိတ္တကာ။
နိသိန္နဿ ကတိ အာပတ္တိယော၊ နိပန္နဿာပိ ကိတ္တကာ။
ဂစ္ဆန္တဿ စတဿော အာပတ္တိယော၊ ဌိတဿ စာပိ တတ္တကာ။
နိသိန္နဿ စတဿော အာပတ္တိယော၊ နိပန္နဿာပိ တတ္တကာ။
၃. ပါစိတ္တိယံ
၄၇၆.
ကတိ ပါစိတ္တိယာနိ၊ သဗ္ဗာနိ နာနာဝတ္ထုကာနိ။
အပုဗ္ဗံ အစရိမံ၊ အာပဇ္ဇေယျ ဧကတော။
ပဉ္စ ပါစိတ္တိယာနိ၊ သဗ္ဗာနိ နာနာဝတ္ထုကာနိ။
အပုဗ္ဗံ အစရိမံ၊ အာပဇ္ဇေယျ ဧကတော။
ကတိ ပါစိတ္တိယာနိ၊ သဗ္ဗာနိ နာနာဝတ္ထုကာနိ။
အပုဗ္ဗံ အစရိမံ၊ အာပဇ္ဇေယျ ဧကတော။
န ပါစိတ္တိယာနိ၊ သဗ္ဗာနိ နာနာဝတ္ထုကာနိ။
အပုဗ္ဗံ အစရိမံ၊ အာပဇ္ဇေယျ ဧကတော။
ကတိ ပါစိတ္တိယာနိ၊ သဗ္ဗာနိ နာနာဝတ္ထုကာနိ။
ကတိ ဝါစာယ ဒေသေယျ၊ ဝုတ္တာ အာဒိစ္စဗန္ဓုနာ။
ပဉ္စ ပါစိတ္တိယာနိ၊ သဗ္ဗာနိ နာနာဝတ္ထုကာနိ။
ဧကဝါစာယ ဒေသေယျ၊ ဝုတ္တာ အာဒိစ္စဗန္ဓုနာ။
ကတိ ပါစိတ္တိယာနိ၊ သဗ္ဗာနိ နာနာဝတ္ထုကာနိ။
ကတိ ဝါစာယ ဒေသေယျ၊ ဝုတ္တာ အာဒိစ္စဗန္ဓုနာ။
နဝ ပါစိတ္တိယာနိ၊ သဗ္ဗာနိ နာနာဝတ္ထုကာနိ။
ဧကဝါစာယ ဒေသေယျ၊ ဝုတ္တာ အာဒိစ္စဗန္ဓုနာ။
ကတိ ပါစိတ္တိယာနိ၊ သဗ္ဗာနိ နာနာဝတ္ထုကာနိ။
ကိဉ္စ ကိတ္တေတွာ ဒေသေယျ၊ ဝုတ္တာ အာဒိစ္စဗန္ဓုနာ။
ပဉ္စ ပါစိတ္တိယာနိ၊ သဗ္ဗာနိ နာနာဝတ္ထုကာနိ။
ဝတ္ထုံ ကိတ္တေတွာ ဒေသေယျ၊ ဝုတ္တာ အာဒိစ္စဗန္ဓုနာ။
ကတိ ပါစိတ္တိယာနိ၊ သဗ္ဗာနိ နာနာဝတ္ထုကာနိ။
ကိဉ္စ ကိတ္တေတွာ ဒေသေယျ၊ ဝုတ္တာ အာဒိစ္စဗန္ဓုနာ။
နဝ ပါစိတ္တိယာနိ၊ သဗ္ဗာနိ နာနာဝတ္ထုကာနိ။
ဝတ္ထုံ ကိတ္တေတွာ ဒေသေယျ၊ ဝုတ္တာ အာဒိစ္စဗန္ဓုနာ။
ယာဝတတိယကေ ကတိ အာပတ္တိယော၊ ကတိ ဝေါဟာရပစ္စယာ။
ခါဒန္တဿ ကတိ အာပတ္တိယော၊ ကတိ ဘောဇနပစ္စယာ။
ယာဝတတိယကေ တိဿော အာပတ္တိယော၊ ဆ ဝေါဟာရပစ္စယာ။
ခါဒန္တဿ တိဿော အာပတ္တိယော၊ ပဉ္စ ဘောဇနပစ္စယာ။
သဗ္ဗာ ယာဝတတိယကာ၊ ကတိ ဌာနာနိ ဂစ္ဆန္တိ။
ကတိနဉ္စေဝ အာပတ္တိ၊ ကတိနံ အဓိကရဏေန စ။
သဗ္ဗာ ယာဝတတိယကာ၊ ပဉ္စ ဌာနာနိ ဂစ္ဆန္တိ။
ပဉ္စန္နဉ္စေဝ အာပတ္တိ၊ ပဉ္စန္နံ အဓိကရဏေန စ။
ကတိနံ ဝိနိစ္ဆယော ဟောတိ၊ ကတိနံ ဝူပသမေန စ။
ကတိနဉ္စေဝ အနာပတ္တိ၊ ကတိဟိ ဌာနေဟိ သောဘတိ။
ပဉ္စန္နံ ဝိနိစ္ဆယော ဟောတိ၊ ပဉ္စန္နံ ဝူပသမေန စ။
ပဉ္စန္နဉ္စေဝ အနာပတ္တိ၊ တီဟိ ဌာနေဟိ သောဘတိ။
ကတိ ကာယိကာ ရတ္တိံ၊ ကတိ ကာယိကာ ဒိဝါ။
နိဇ္ဈာယန္တဿ ကတိ အာပတ္တိ၊ ကတိ ပိဏ္ဍပါတပစ္စယာ။
ဒွေ ကာယိကာ ရတ္တိံ၊ ဒွေ ကာယိကာ ဒိဝါ။
နိဇ္ဈာယန္တဿ ဧကာ အာပတ္တိ၊ ဧကာ ပိဏ္ဍပါတပစ္စယာ။
ကတာနိသံသေ သမ္ပဿံ၊ ပရေသံ သဒ္ဓါယ ဒေသယေ။
ဥက္ခိတ္တကာ ကတိ ဝုတ္တာ၊ ကတိ သမ္မာဝတ္တနာ။
အဋ္ဌာနိသံသေ သမ္ပဿံ၊ ပရေသံ သဒ္ဓါယ ဒေသယေ။
ဥက္ခိတ္တကာ တယော ဝုတ္တာ၊ တေစတ္တာလီသ သမ္မာဝတ္တနာ။
ကတိ ဌာနေ မုသာဝါဒေါ၊ ကတိ ပရမန္တိ ဝုစ္စတိ။
ကတိ ပါဋိဒေသနီယာ၊ ကတိနံ ဒေသနာယ စ။
ပဉ္စ ဌာနေ မုသာဝါဒေါ၊ စုဒ္ဒသ ပရမန္တိ ဝုစ္စတိ။
ဒွါဒသ ပါဋိဒေသနီယာ၊ စတုန္နံ ဒေသနာယ စ။
ကတင်္ဂိကော မုသာဝါဒေါ၊ ကတိ ဥပေါသထင်္ဂါနိ။
ကတိ ဒူတေယျင်္ဂါနိ၊ ကတိ တိတ္ထိယဝတ္တနာ။
အဋ္ဌင်္ဂိကော မုသာဝါဒေါ၊ အဋ္ဌ ဥပေါသထင်္ဂါနိ။
အဋ္ဌ ဒူတေယျင်္ဂါနိ၊ အဋ္ဌ တိတ္ထိယဝတ္တနာ။
ကတိဝါစိကာ ဥပသမ္ပဒါ၊ ကတိနံ ပစ္စုဋ္ဌာတဗ္ဗံ။
ကတိနံ အာသနံ ဒါတဗ္ဗံ၊ ဘိက္ခုနောဝါဒကော ကတိဟိ။
အဋ္ဌဝါစိကာ ဥပသမ္ပဒါ၊ အဋ္ဌန္နံ ပစ္စုဋ္ဌာတဗ္ဗံ။
အဋ္ဌန္နံ အာသနံ ဒါတဗ္ဗံ၊ ဘိက္ခုနောဝါဒကော အဋ္ဌဟိ။
ကတိနံ ဆေဇ္ဇံ ဟောတိ၊ ကတိနံ ထုလ္လစ္စယံ။
ကတိနဉ္စေဝ အနာပတ္တိ၊ သဗ္ဗေသံ ဧကဝတ္ထုကာ။
ဧကဿ ဆေဇ္ဇံ ဟောတိ၊ စတုန္နံ ထုလ္လစ္စယံ။
စတုန္နဉ္စေဝ အနာပတ္တိ၊ သဗ္ဗေသံ ဧကဝတ္ထုကာ။
ကတိ အာဃာတဝတ္ထူနိ၊ ကတိဟိ သံဃော ဘိဇ္ဇတိ။
ကတေတ္ထ ပဌမာပတ္တိကာ၊ ဉတ္တိယာ ကရဏာ ကတိ။
နဝ အာဃာတဝတ္ထူနိ၊ နဝဟိ သံဃော ဘိဇ္ဇတိ။
နဝေတ္ထ ပဌမာပတ္တိကာ၊ ဉတ္တိယာ ကရဏာ နဝ။
၄. အဝန္ဒနီယပုဂ္ဂလာဒိ
၄၇၇.
ကတိ ပုဂ္ဂလာ နာဘိဝါဒေတဗ္ဗာ၊ အဉ္ဇလိသာမိစေန စ။
ကတိနံ ဒုက္ကဋံ ဟောတိ၊ ကတိ စီဝရဓါရဏာ။
ဒသ ပုဂ္ဂလာ နာဘိဝါဒေတဗ္ဗာ၊ အဉ္ဇလိသာမိစေန စ။
ဒသန္နံ ဒုက္ကဋံ ဟောတိ၊ ဒသ စီဝရဓါရဏာ။
ကတိနံ ဝဿံဝုဋ္ဌာနံ၊ ဒါတဗ္ဗံ ဣဓ စီဝရံ။
ကတိနံ ဘန္တေ ဒါတဗ္ဗံ၊ ကတိနဉ္စေဝ န ဒါတဗ္ဗံ။
ပဉ္စန္နံ ဝဿံဝုဋ္ဌာနံ၊ ဒါတဗ္ဗံ ဣဓ စီဝရံ။
သတ္တန္နံ သန္တေ ဒါတဗ္ဗံ၊ သောဠသန္နံ န ဒါတဗ္ဗံ။
ကတိသတံ ရတ္တိသတံ၊ အာပတ္တိယော ဆာဒယိတွာန။
ကတိ ရတ္တိယော ဝသိတွာန၊ မုစ္စေယျ ပါရိဝါသိကော။
ဒသသတံ ရတ္တိသတံ၊ အာပတ္တိယော ဆာဒယိတွာန။
ဒသ ရတ္တိယော ဝသိတွာန၊ မုစ္စေယျ ပါရိဝါသိကော။
ကတိ ကမ္မဒေါသာ ဝုတ္တာ၊ ဗုဒ္ဓေနာဒိစ္စဗန္ဓုနာ။
စမ္ပာယံ ဝိနယဝတ္ထုသ္မိံ၊ သဗ္ဗေဝ အဓမ္မိကာ [သဗ္ဗေ အဓမ္မိကာ (သီ. သျာ.)] ကတိ။
ဒွါဒသ ကမ္မဒေါသာ ဝုတ္တာ၊ ဗုဒ္ဓေနာဒိစ္စဗန္ဓုနာ။
စမ္ပာယံ ဝိနယဝတ္ထုသ္မိံ၊ သဗ္ဗေဝ အဓမ္မိကာ [သဗ္ဗေဝါဓမ္မိကာ (သီ.)၊ သဗ္ဗေ အဓမ္မိကာ (သျာ.)] ကတာ။
ကတိ ကမ္မသမ္ပတ္တိယော ဝုတ္တာ၊ ဗုဒ္ဓေနာဒိစ္စဗန္ဓုနာ။
စမ္ပာယံ ဝိနယဝတ္ထုသ္မိံ၊ သဗ္ဗေဝ ဓမ္မိကာ ကတိ။
စတဿော ကမ္မသမ္ပတ္တိယော ဝုတ္တာ၊ ဗုဒ္ဓေနာဒိစ္စဗန္ဓုနာ။
စမ္ပာယံ ဝိနယဝတ္ထုသ္မိံ၊ သဗ္ဗေဝ ဓမ္မိကာ ကတာ။
ကတိ ကမ္မာနိ ဝုတ္တာနိ၊ ဗုဒ္ဓေနာဒိစ္စဗန္ဓုနာ။
စမ္ပာယံ ဝိနယဝတ္ထုသ္မိံ၊ ဓမ္မိကာ အဓမ္မိကာ ကတိ။
ဆ ကမ္မာနိ ဝုတ္တာနိ၊ ဗုဒ္ဓေနာဒိစ္စဗန္ဓုနာ။
စမ္ပာယံ ဝိနယဝတ္ထုသ္မိံ၊ ဧကေတ္ထ ဓမ္မိကာ ကတာ။
ပဉ္စ အဓမ္မိကာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ကတိ ကမ္မာနိ ဝုတ္တာနိ၊ ဗုဒ္ဓေနာဒိစ္စဗန္ဓုနာ။
စမ္ပာယံ ဝိနယဝတ္ထုသ္မိံ၊ ဓမ္မိကာ အဓမ္မိကာ ကတိ။
စတ္တာရိ ကမ္မာနိ ဝုတ္တာနိ၊ ဗုဒ္ဓေနာဒိစ္စဗန္ဓုနာ။
စမ္ပာယံ ဝိနယဝတ္ထုသ္မိံ၊ ဧကေတ္ထ ဓမ္မိကာ ကတာ။
တယော အဓမ္မိကာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ယံ ဒေသိတံနန္တဇိနေန တာဒိနာ။
အာပတ္တိက္ခန္ဓာနိ ဝိဝေကဒဿိနာ။
ကတေတ္ထ သမ္မန္တိ ဝိနာ သမထေဟိ။
ပုစ္ဆာမိ တံ ဗြူဟိ ဝိဘင်္ဂကောဝိဒ။
ယံ ဒေသိတံနန္တဇိနေန တာဒိနာ။
အာပတ္တိက္ခန္ဓာနိ ဝိဝေကဒဿိနာ။
ဧကေတ္ထ သမ္မတိ ဝိနာ သမထေဟိ။
ဧတံ တေ အက္ခာမိ ဝိဘင်္ဂကောဝိဒ။
ကတိ အာပါယိကာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ [ဝိသယာနိ (သီ. သျာ. ဧဝမုပရိပိ)] သုဏောမ တေ။
ဆဦနဒိယဍ္ဎသတာ ဝုတ္တာ၊ ဗုဒ္ဓေနာဒိစ္စဗန္ဓုနာ။
အာပါယိကာ နေရယိကာ၊ ကပ္ပဋ္ဌာ သံဃဘေဒကာ။
ဝိနယံ ပဋိဇာနန္တဿ၊ ဝိနယာနိ သုဏောဟိ မေ။
ကတိ နာပါယိကာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောမ တေ။
အဋ္ဌာရသ နာပါယိကာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောဟိ မေ။
ကတိ အဋ္ဌကာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောမ တေ။
အဋ္ဌာရသ အဋ္ဌကာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောဟိ မေ။
၅. သောဠသကမ္မာဒိ
၄၇၈.
ကတိ ကမ္မာနိ ဝုတ္တာနိ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောမ တေ။
သောဠသ ကမ္မာနိ ဝုတ္တာနိ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောဟိ မေ။
ကတိ ကမ္မဒေါသာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောမ တေ။
ဒွါဒသ ကမ္မဒေါသာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောဟိ မေ။
ကတိ ကမ္မသမ္ပတ္တိယော ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောမ တေ။
စတဿော ကမ္မသမ္ပတ္တိယော ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောဟိ မေ။
ကတိ ကမ္မာနိ ဝုတ္တာနိ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောမ တေ။
ဆ ကမ္မာနိ ဝုတ္တာနိ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောဟိ မေ။
ကတိ ကမ္မာနိ ဝုတ္တာနိ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောမ တေ။
စတ္တာရိ ကမ္မာနိ ဝုတ္တာနိ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောဟိ မေ။
ကတိ ပါရာဇိကာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောမ တေ။
အဋ္ဌ ပါရာဇိကာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောဟိ မေ။
ကတိ သံဃာဒိသေသာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောမ တေ။
တေဝီသ သံဃာဒိသေသာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောဟိ မေ။
ကတိ အနိယတာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောမ တေ။
ဒွေ အနိယတာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောဟိ မေ။
ကတိ နိဿဂ္ဂိယာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောမ တေ။
ဒွေစတ္တာလီသ နိဿဂ္ဂိယာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောဟိ မေ။
ကတိ ပါစိတ္တိယာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောမ တေ။
အဋ္ဌာသီတိသတံ ပါစိတ္တိယာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောဟိ မေ။
ကတိ ပါဋိဒေသနီယာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောမ တေ။
ဒွါဒသ ပါဋိဒေသနီယာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောဟိ မေ။
ကတိ သေခိယာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောမ တေ။
ပဉ္စသတ္တတိ သေခိယာ ဝုတ္တာ၊ ဗုဒ္ဓေနာဒိစ္စဗန္ဓုနာ။
ဝိနယံ ပဋိဇာနန္တဿ၊ ဝိနယာနိ သုဏောဟိ မေ။
ယာဝ သုပုစ္ဆိတံ တယာ၊ ယာဝ သုဝိဿဇ္ဇိတံ မယာ။
ပုစ္ဆာဝိဿဇ္ဇနာယ ဝါ၊ နတ္ထိ ကိဉ္စိ အသုတ္တကန္တိ။
ဒုတိယဂါထာသင်္ဂဏိကံ နိဋ္ဌိတံ။