ကထိနဘေဒေါ

စာဖတ်ချိန် 19 မိနစ်

၁. ကထိနအတ္ထတာဒိ

၄၀၃. ကဿ ကထိနံ [ကဌိနံ (သီ. သျာ.)] အနတ္ထတံ? ကဿ ကထိနံ အတ္ထတံ? ကိန္တိ ကထိနံ အနတ္ထတံ? ကိန္တိ ကထိနံ အတ္ထတံ?

ကဿ ကထိနံ အနတ္ထတန္တိ? ဒွိန္နံ ပုဂ္ဂလာနံ အနတ္ထတံ ဟောတိ ကထိနံ – အနတ္ထာရကဿ စ အနနုမောဒကဿ စ။ ဣမေသံ ဒွိန္နံ ပုဂ္ဂလာနံ အနတ္ထတံ ဟောတိ ကထိနံ။

ကဿ ကထိနံ အတ္ထတန္တိ? ဒွိန္နံ ပုဂ္ဂလာနံ အတ္ထတံ ဟောတိ ကထိနံ – အတ္ထာရကဿ စ အနုမောဒကဿ စ။ ဣမေသံ ဒွိန္နံ ပုဂ္ဂလာနံ အတ္ထတံ ဟောတိ ကထိနံ။

ကိန္တိ ကထိနံ အနတ္ထတန္တိ? စတုဝီသတိယာ အာကာရေဟိ အနတ္ထတံ ဟောတိ ကထိနံ, န ဥလ္လိခိတမတ္တေန အတ္ထတံ ဟောတိ ကထိနံ, န ဓေါဝနမတ္တေန အတ္ထတံ ဟောတိ ကထိနံ, န စီဝရဝိစာရဏမတ္တေန အတ္ထတံ ဟောတိ ကထိနံ, န ဆေဒနမတ္တေန အတ္ထတံ ဟောတိ ကထိနံ, န ဗန္ဓနမတ္တေန အတ္ထတံ ဟောတိ ကထိနံ, န ဩဝဋ္ဋိယကရဏမတ္တေန အတ္ထတံ ဟောတိ ကထိနံ, န ကဏ္ဍုသကရဏမတ္တေန [န ဂဏ္ဍုသကရဏမတ္တေန (က.)] အတ္ထတံ ဟောတိ ကထိနံ, န ဒဠှီကမ္မကရဏမတ္တေန အတ္ထတံ ဟောတိ ကထိနံ, န အနုဝါတကရဏမတ္တေန အတ္ထတံ ဟောတိ ကထိနံ, န ပရိဘဏ္ဍကရဏမတ္တေန အတ္ထတံ ဟောတိ ကထိနံ, န ဩဝဒ္ဓေယျကရဏမတ္တေန [န ဩဝဋ္ဋေယျကရဏမတ္တေန (သီ. သျာ.), န ဩဝဒေယျကရဏမတ္တေန (က.)] အတ္ထတံ ဟောတိ ကထိနံ, န ကမ္ဗလမဒ္ဒနမတ္တေန အတ္ထတံ ဟောတိ ကထိနံ, န နိမိတ္တကတေန အတ္ထတံ ဟောတိ ကထိနံ, န ပရိကထာကတေန အတ္ထတံ ဟောတိ ကထိနံ, န ကုက္ကုကတေန အတ္ထတံ ဟောတိ ကထိနံ, န သန္နိဓိကတေန အတ္ထတံ ဟောတိ ကထိနံ, န နိဿဂ္ဂိယေန အတ္ထတံ ဟောတိ ကထိနံ, န အကပ္ပကတေန အတ္ထတံ ဟောတိ ကထိနံ, န အညတြ သံဃာဋိယာ အတ္ထတံ ဟောတိ ကထိနံ, န အညတြ ဥတ္တရာသင်္ဂေန အတ္ထတံ ဟောတိ ကထိနံ, န အညတြ အန္တရဝါသကေန အတ္ထတံ ဟောတိ ကထိနံ , န အညတြ ပဉ္စကေန ဝါ အတိရေကပဉ္စကေန ဝါ တဒဟေဝ သဉ္ဆိန္နေန သမဏ္ဍလီကတေန အတ္ထတံ ဟောတိ ကထိနံ, န အညတြ ပုဂ္ဂလဿ အတ္ထာရာ အတ္ထတံ ဟောတိ ကထိနံ, သမ္မာ စေ အတ္ထတံ ဟောတိ ကထိနံ တံ စေ နိဿီမဋ္ဌော အနုမောဒတိ။ ဧဝမ္ပိ အနတ္ထတံ ဟောတိ ကထိနံ။

နိမိတ္တကမ္မံ နာမ နိမိတ္တံ ကရောတိ – ‘‘ဣမိနာ ဒုဿေန ကထိနံ အတ္ထရိဿာမီ’’တိ။ ပရိကထာ နာမ ပရိကထံ ကရောတိ – ‘‘ဣမာယ ပရိကထာယ ကထိနဒုဿံ နိဗ္ဗတ္တေဿာမီ’’တိ။ ကုက္ကုကတံ နာမ အနာဒိယဒါနံ ဝုစ္စတိ။ သန္နိဓိ နာမ ဒွေ သန္နိဓိယော – ကရဏသန္နိဓိ ဝါ နိစယသန္နိဓိ ဝါ။ နိဿဂ္ဂိယံ နာမ ကယိရမာနေ အရုဏံ ဥဋ္ဌဟတိ [ဥဒ္ရိယတိ (သီ. သျာ.)]။ ဣမေဟိ စတုဝီသတိယာ အာကာရေဟိ အနတ္ထတံ ဟောတိ ကထိနံ။

ကိန္တိ ကထိနံ အတ္ထတန္တိ? သတ္တရသဟိ အာကာရေဟိ အတ္ထတံ ဟောတိ ကထိနံ။ အဟတေန အတ္ထတံ ဟောတိ ကထိနံ, အဟတကပ္ပေန အတ္ထတံ ဟောတိ ကထိနံ, ပိလောတိကာယ အတ္ထတံ ဟောတိ ကထိနံ, ပံသုကူလေန အတ္ထတံ ဟောတိ ကထိနံ, ပါပဏိကေန အတ္ထတံ ဟောတိ ကထိနံ, အနိမိတ္တကတေန အတ္ထတံ ဟောတိ ကထိနံ, အပရိကထာကတေန အတ္ထတံ ဟောတိ ကထိနံ, အကုက္ကုကတေန အတ္ထတံ ဟောတိ ကထိနံ, အသန္နိဓိကတေန အတ္ထတံ ဟောတိ ကထိနံ, အနိဿဂ္ဂိယေန အတ္ထတံ ဟောတိ ကထိနံ, ကပ္ပကတေန အတ္ထတံ ဟောတိ ကထိနံ, သံဃာဋိယာ အတ္ထတံ ဟောတိ ကထိနံ, ဥတ္တရာသင်္ဂေန အတ္ထတံ ဟောတိ ကထိနံ, အန္တရဝါသကေန အတ္ထတံ ဟောတိ ကထိနံ, ပဉ္စကေန ဝါ အတိရေကပဉ္စကေန ဝါ တဒဟေဝ သဉ္ဆိန္နေန သမဏ္ဍလီကတေန အတ္ထတံ ဟောတိ ကထိနံ, ပုဂ္ဂလဿ အတ္ထာရာ အတ္ထတံ ဟောတိ ကထိနံ, သမ္မာ စေ အတ္ထတံ ဟောတိ ကထိနံ, တံ စေ သီမဋ္ဌော အနုမောဒတိ, ဧဝမ္ပိ အတ္ထတံ ဟောတိ ကထိနံ။ ဣမေဟိ သတ္တရသဟိ အာကာရေဟိ အတ္ထတံ ဟောတိ ကထိနံ။

သဟ ကထိနဿ အတ္ထာရာ ကတိ ဓမ္မာ ဇာယန္တိ? သဟ ကထိနဿ အတ္ထာရာ ပန္နရသ ဓမ္မာ ဇာယန္တိ – အဋ္ဌ မာတိကာ, ဒွေ ပလိဗောဓါ, ပဉ္စာနိသံသာ။ သဟ ကထိနဿ အတ္ထာရာ ဣမေ ပန္နရသ ဓမ္မာ ဇာယန္တိ။

၂. ကထိနအနန္တရပစ္စယာဒိ

၄၀၄. ပယောဂဿ ကတမေ ဓမ္မာ အနန္တရပစ္စယေန ပစ္စယော, သမနန္တရပစ္စယေန ပစ္စယော, နိဿယပစ္စယေန ပစ္စယော, ဥပနိဿယပစ္စယေန ပစ္စယော , ပုရေဇာတပစ္စယေန ပစ္စယော, ပစ္ဆာဇာတပစ္စယေန ပစ္စယော, သဟဇာတပစ္စယေန ပစ္စယော? ပုဗ္ဗကရဏဿ ကတမေ ဓမ္မာ အနန္တရပစ္စယေန ပစ္စယော။ပေ.။ ပစ္စုဒ္ဓါရဿ ကတမေ ဓမ္မာ။ အဓိဋ္ဌာနဿ ကတမေ ဓမ္မာ။ အတ္ထာရဿ ကတမေ ဓမ္မာ။ မာတိကာနဉ္စ ပလိဗောဓါနဉ္စ ကတမေ ဓမ္မာ။ ဝတ္ထုဿ ကတမေ ဓမ္မာ အနန္တရပစ္စယေန ပစ္စယော, သမနန္တရပစ္စယေန ပစ္စယော, နိဿယပစ္စယေန ပစ္စယော, ဥပနိဿယပစ္စယေန ပစ္စယော, ပုရေဇာတပစ္စယေန ပစ္စယော, ပစ္ဆာဇာတပစ္စယေန ပစ္စယော, သဟဇာတပစ္စယေန ပစ္စယော?

ပုဗ္ဗကရဏံ ပယောဂဿ အနန္တရပစ္စယေန ပစ္စယော, သမနန္တရပစ္စယေန ပစ္စယော, နိဿယပစ္စယေန ပစ္စယော, ဥပနိဿယပစ္စယေန ပစ္စယော။ ပယောဂေါ ပုဗ္ဗကရဏဿ ပုရေဇာတပစ္စယေန ပစ္စယော။ ပုဗ္ဗကရဏံ ပယောဂဿ ပစ္ဆာဇာတပစ္စယေန ပစ္စယော။ ပန္နရသ ဓမ္မာ သဟဇာတပစ္စယေန ပစ္စယော။ ပစ္စုဒ္ဓါရော ပုဗ္ဗကရဏဿ အနန္တရပစ္စယေန ပစ္စယော, သမနန္တရပစ္စယေန ပစ္စယော, နိဿယပစ္စယေန ပစ္စယော, ဥပနိဿယပစ္စယေန ပစ္စယော။ ပုဗ္ဗကရဏံ ပစ္စုဒ္ဓါရဿ ပုရေဇာတပစ္စယေန ပစ္စယော။ ပစ္စုဒ္ဓါရော ပုဗ္ဗကရဏဿ ပစ္ဆာဇာတပစ္စယေန ပစ္စယော။ ပန္နရသ ဓမ္မာ သဟဇာတပစ္စယေန ပစ္စယော။ အဓိဋ္ဌာနံ ပစ္စုဒ္ဓါရဿ အနန္တရပစ္စယေန ပစ္စယော, သမနန္တရပစ္စယေန ပစ္စယော, နိဿယပစ္စယေန ပစ္စယော, ဥပနိဿယပစ္စယေန ပစ္စယော။ ပစ္စုဒ္ဓါရော အဓိဋ္ဌာနဿ ပုရေဇာတပစ္စယေန ပစ္စယော။ အဓိဋ္ဌာနံ ပစ္စုဒ္ဓါရဿ ပစ္ဆာဇာတပစ္စယေန ပစ္စယော။ ပန္နရသ ဓမ္မာ သဟဇာတပစ္စယေန ပစ္စယော။ အတ္ထာရော အဓိဋ္ဌာနဿ အနန္တရပစ္စယေန ပစ္စယော, သမနန္တရပစ္စယေန ပစ္စယော, နိဿယပစ္စယေန ပစ္စယော, ဥပနိဿယပစ္စယေန ပစ္စယော။ အဓိဋ္ဌာနံ အတ္ထာရဿ ပုရေဇာတပစ္စယေန ပစ္စယော။ အတ္ထာရော အဓိဋ္ဌာနဿ ပစ္ဆာဇာတပစ္စယေန ပစ္စယော။ ပန္နရသ ဓမ္မာ သဟဇာတပစ္စယေန ပစ္စယော။ မာတိကာ စ ပလိဗောဓါ စ အတ္ထာရဿ အနန္တရပစ္စယေန ပစ္စယော, သမနန္တရပစ္စယေန ပစ္စယော, နိဿယပစ္စယေန ပစ္စယော, ဥပနိဿယပစ္စယေန ပစ္စယော။ အတ္ထာရော မာတိကာနဉ္စ ပလိဗောဓါနဉ္စ ပုရေဇာတပစ္စယေန ပစ္စယော။ မာတိကာ စ ပလိဗောဓါ စ အတ္ထာရဿ ပစ္ဆာဇာတပစ္စယေန ပစ္စယော။ ပန္နရသ ဓမ္မာ သဟဇာတပစ္စယေန ပစ္စယော။ အာသာ စ အနာသာ စ ဝတ္ထုဿ အနန္တရပစ္စယေန ပစ္စယော, သမနန္တရပစ္စယေန ပစ္စယော, နိဿယပစ္စယေန ပစ္စယော , ဥပနိဿယပစ္စယေန ပစ္စယော။ ဝတ္ထု အာသာနဉ္စ အနာသာနဉ္စ ပုရေဇာတပစ္စယေန ပစ္စယော။ အာသာ စ အနာသာ စ ဝတ္ထုဿ ပစ္ဆာဇာတပစ္စယေန ပစ္စယော။ ပန္နရသ ဓမ္မာ သဟဇာတပစ္စယေန ပစ္စယော။

၃. ပုဗ္ဗကရဏနိဒါနာဒိဝိဘာဂေါ

၄၀၅. ပုဗ္ဗကရဏံ ကိံနိဒါနံ, ကိံသမုဒယံ, ကိံဇာတိကံ, ကိံပဘဝံ, ကိံသမ္ဘာရံ, ကိံသမုဋ္ဌာနံ ? ပစ္စုဒ္ဓါရော ကိံနိဒါနော, ကိံသမုဒယော, ကိံဇာတိကော, ကိံပဘဝေါ, ကိံသမ္ဘာရော, ကိံသမုဋ္ဌာနော? အဓိဋ္ဌာနံ ကိံနိဒါနံ, ကိံသမုဒယံ, ကိံဇာတိကံ, ကိံပဘဝံ, ကိံသမ္ဘာရံ, ကိံသမုဋ္ဌာနံ? အတ္ထာရော ကိံနိဒါနော, ကိံသမုဒယော, ကိံဇာတိကော, ကိံပဘဝေါ, ကိံသမ္ဘာရော, ကိံသမုဋ္ဌာနော? မာတိကာ စ ပလိဗောဓါ စ ကိံနိဒါနာ, ကိံသမုဒယာ, ကိံဇာတိကာ, ကိံပဘဝါ, ကိံသမ္ဘာရာ ကိံသမုဋ္ဌာနာ? အာသာ စ အနာသာ စ ကိံနိဒါနာ, ကိံသမုဒယာ, ကိံဇာတိကာ, ကိံပဘဝါ, ကိံသမ္ဘာရာ, ကိံသမုဋ္ဌာနာ?

ပုဗ္ဗကရဏံ ပယောဂနိဒါနံ, ပယောဂသမုဒယံ, ပယောဂဇာတိကံ, ပယောဂပဘဝံ, ပယောဂသမ္ဘာရံ, ပယောဂသမုဋ္ဌာနံ။ ပစ္စုဒ္ဓါရော ပုဗ္ဗကရဏနိဒါနော, ပုဗ္ဗကရဏသမုဒယော, ပုဗ္ဗကရဏဇာတိကော, ပုဗ္ဗကရဏပဘဝေါ, ပုဗ္ဗကရဏသမ္ဘာရော, ပုဗ္ဗကရဏသမုဋ္ဌာနော။ အဓိဋ္ဌာနံ ပစ္စုဒ္ဓါရနိဒါနံ, ပစ္စုဒ္ဓါရသမုဒယံ, ပစ္စုဒ္ဓါရဇာတိကံ, ပစ္စုဒ္ဓါရပဘဝံ, ပစ္စုဒ္ဓါရသမ္ဘာရံ, ပစ္စုဒ္ဓါရသမုဋ္ဌာနံ။ အတ္ထာရော အဓိဋ္ဌာနနိဒါနော, အဓိဋ္ဌာနသမုဒယော, အဓိဋ္ဌာနဇာတိကော, အဓိဋ္ဌာနပဘဝေါ, အဓိဋ္ဌာနသမ္ဘာရော, အဓိဋ္ဌာနသမုဋ္ဌာနော။ မာတိကာ စ ပလိဗောဓါ စ အတ္ထာရနိဒါနာ, အတ္ထာရသမုဒယာ, အတ္ထာရဇာတိကာ, အတ္ထာရပဘဝါ, အတ္ထာရသမ္ဘာရာ, အတ္ထာရသမုဋ္ဌာနာ။ အာသာ စ အနာသာ စ ဝတ္ထုနိဒါနာ, ဝတ္ထုသမုဒယာ, ဝတ္ထုဇာတိကာ, ဝတ္ထုပဘဝါ, ဝတ္ထုသမ္ဘာရာ, ဝတ္ထုသမုဋ္ဌာနာ။

၄၀၆. ပယောဂေါ ကိံနိဒါနော, ကိံသမုဒယော, ကိံဇာတိကော, ကိံပဘဝေါ, ကိံသမ္ဘာရော, ကိံသမုဋ္ဌာနော, ပုဗ္ဗကရဏံ။ပေ.။ ပစ္စုဒ္ဓါရော။ အဓိဋ္ဌာနံ။ အတ္ထာရော။ မာတိကာ စ ပလိဗောဓါ စ။ ဝတ္ထု။ အာသာ စ အနာသာ စ ကိံနိဒါနာ, ကိံသမုဒယာ, ကိံဇာတိကာ, ကိံပဘဝါ, ကိံသမ္ဘာရာ, ကိံသမုဋ္ဌာနာ?

ပယောဂေါ ဟေတုနိဒါနော, ဟေတုသမုဒယော, ဟေတုဇာတိကော, ဟေတုပဘဝေါ, ဟေတုသမ္ဘာရော, ဟေတုသမုဋ္ဌာနော။ ပုဗ္ဗကရဏံ။ပေ.။ ပစ္စုဒ္ဓါရော။ အဓိဋ္ဌာနံ။ အတ္ထာရော ။ မာတိကာ စ ပလိဗောဓါ စ။ ဝတ္ထု။ အာသာ စ အနာသာ စ ဟေတုနိဒါနာ, ဟေတုသမုဒယာ, ဟေတုဇာတိကာ, ဟေတုပဘဝါ, ဟေတုသမ္ဘာရာ, ဟေတုသမုဋ္ဌာနာ။

၄၀၇. ပယောဂေါ ကိံနိဒါနော, ကိံသမုဒယော, ကိံဇာတိကော, ကိံပဘဝေါ, ကိံသမ္ဘာရော, ကိံသမုဋ္ဌာနော? ပုဗ္ဗကရဏံ။ပေ.။ ပစ္စုဒ္ဓါရော။ အဓိဋ္ဌာနံ။ အတ္ထာရော။ မာတိကာ စ ပလိဗောဓါ စ။ ဝတ္ထု။ အာသာ စ အနာသာ စ ကိံနိဒါနာ, ကိံသမုဒယာ, ကိံဇာတိကာ, ကိံပဘဝါ, ကိံသမ္ဘာရာ, ကိံသမုဋ္ဌာနာ?

ပယောဂေါ ပစ္စယနိဒါနော, ပစ္စယသမုဒယော, ပစ္စယဇာတိကော, ပစ္စယပဘဝေါ, ပစ္စယသမ္ဘာရော, ပစ္စယသမုဋ္ဌာနော။ ပုဗ္ဗကရဏံ။ပေ.။ ပစ္စုဒ္ဓါရော။ အဓိဋ္ဌာနံ။ အတ္ထာရော။ မာတိကာ စ ပလိဗောဓါ စ။ ဝတ္ထု။ အာသာ စ အနာသာ စ ပစ္စယနိဒါနာ, ပစ္စယသမုဒယာ, ပစ္စယဇာတိကာ, ပစ္စယပဘဝါ, ပစ္စယသမ္ဘာရာ, ပစ္စယသမုဋ္ဌာနာ။

၄၀၈. ပုဗ္ဗကရဏံ ကတိဟိ ဓမ္မေဟိ သင်္ဂဟိတံ? ပုဗ္ဗကရဏံ သတ္တဟိ ဓမ္မေဟိ သင်္ဂဟိတံ။ ဓေါဝနေန, ဝိစာရဏေန, ဆေဒနေန, ဗန္ဓနေန, သိဗ္ဗနေန, ရဇနေန, ကပ္ပကရဏေန – ပုဗ္ဗကရဏံ ဣမေဟိ သတ္တဟိ ဓမ္မေဟိ သင်္ဂဟိတံ။

ပစ္စုဒ္ဓါရော ကတိဟိ ဓမ္မေဟိ သင်္ဂဟိတော? ပစ္စုဒ္ဓါရော တီဟိ ဓမ္မေဟိ သင်္ဂဟိတော – သံဃာဋိယာ, ဥတ္တရာသင်္ဂေန, အန္တရဝါသကေန။

အဓိဋ္ဌာနံ ကတိဟိ ဓမ္မေဟိ သင်္ဂဟိတံ? အဓိဋ္ဌာနံ တီဟိ ဓမ္မေဟိ သင်္ဂဟိတံ – သံဃာဋိယာ, ဥတ္တရာသင်္ဂေန, အန္တရဝါသကေန။

အတ္ထာရော ကတိဟိ ဓမ္မေဟိ သင်္ဂဟိတော? အတ္ထာရော ဧကေန ဓမ္မေန သင်္ဂဟိတော – ဝစီဘေဒေန။

ကထိနဿ ကတိ မူလာနိ, ကတိ ဝတ္ထူနိ, ကတိ ဘူမိယော? ကထိနဿ ဧကံ မူလံ – သံဃော; တီဏိ ဝတ္ထူနိ – သံဃာဋိ, ဥတ္တရာသင်္ဂေါ, အန္တရဝါသကော, ဆ ဘူမိယော – ခေါမံ, ကပ္ပါသိကံ, ကောသေယျံ, ကမ္ဗလံ, သာဏံ, ဘင်္ဂံ။

ကထိနဿ ကော အာဒိ, ကိံ မဇ္ဈေ, ကိံ ပရိယောသာနံ? ကထိနဿ ပုဗ္ဗကရဏံ အာဒိ, က္ရိယာ မဇ္ဈေ, အတ္ထာရော ပရိယောသာနံ။

၄၀၉. ကတိဟင်္ဂေဟိ သမန္နာဂတော ပုဂ္ဂလော အဘဗ္ဗော ကထိနံ အတ္ထရိတုံ? ကတိဟင်္ဂေဟိ သမန္နာဂတော ပုဂ္ဂလော ဘဗ္ဗော ကထိနံ အတ္ထရိတုံ? အဋ္ဌဟင်္ဂေဟိ သမန္နာဂတော ပုဂ္ဂလော အဘဗ္ဗော ကထိနံ အတ္ထရိတုံ။ အဋ္ဌဟင်္ဂေဟိ သမန္နာဂတော ပုဂ္ဂလော ဘဗ္ဗော ကထိနံ အတ္ထရိတုံ။ ကတမေဟိ အဋ္ဌဟင်္ဂေဟိ သမန္နာဂတော ပုဂ္ဂလော အဘဗ္ဗော ကထိနံ အတ္ထရိတုံ? ပုဗ္ဗကရဏံ န ဇာနာတိ, ပစ္စုဒ္ဓါရံ န ဇာနာတိ, အဓိဋ္ဌာနံ န ဇာနာတိ, အတ္ထာရံ န ဇာနာတိ, မာတိကံ န ဇာနာတိ, ပလိဗောဓံ န ဇာနာတိ, ဥဒ္ဓါရံ န ဇာနာတိ, အာနိသံသံ န ဇာနာတိ – ဣမေဟိ အဋ္ဌဟင်္ဂေဟိ သမန္နာဂတော ပုဂ္ဂလော အဘဗ္ဗော ကထိနံ အတ္ထရိတုံ။ ကတမေဟိ အဋ္ဌဟင်္ဂေဟိ သမန္နာဂတော ပုဂ္ဂလော ဘဗ္ဗော ကထိနံ အတ္ထရိတုံ? ပုဗ္ဗကရဏံ ဇာနာတိ, ပစ္စုဒ္ဓါရံ ဇာနာတိ, အဓိဋ္ဌာနံ ဇာနာတိ, အတ္ထာရံ ဇာနာတိ, မာတိကံ ဇာနာတိ, ပလိဗောဓံ ဇာနာတိ, ဥဒ္ဓါရံ ဇာနာတိ, အာနိသံသံ ဇာနာတိ – ဣမေဟိ အဋ္ဌဟင်္ဂေဟိ သမန္နာဂတော ပုဂ္ဂလော ဘဗ္ဗော ကထိနံ အတ္ထရိတုံ။

၄၁၀. ကတိနံ ပုဂ္ဂလာနံ ကထိနတ္ထာရာ န ရုဟန္တိ? ကတိနံ ပုဂ္ဂလာနံ ကထိနတ္ထာရာ ရုဟန္တိ? တိဏ္ဏံ ပုဂ္ဂလာနံ ကထိနတ္ထာရာ န ရုဟန္တိ။ တိဏ္ဏံ ပုဂ္ဂလာနံ ကထိနတ္ထာရာ ရုဟန္တိ။ ကတမေသံ တိဏ္ဏံ ပုဂ္ဂလာနံ ကထိနတ္ထာရာ န ရုဟန္တိ? နိဿီမဋ္ဌော အနုမောဒတိ, အနုမောဒေန္တော န ဝါစံ ဘိန္ဒတိ, ဝါစံ ဘိန္ဒန္တော န ပရံ ဝိညာပေတိ – ဣမေသံ တိဏ္ဏံ ပုဂ္ဂလာနံ ကထိနတ္ထာရာ န ရုဟန္တိ။ ကတမေသံ တိဏ္ဏံ ပုဂ္ဂလာနံ ကထိနတ္ထာရာ ရုဟန္တိ? သီမဋ္ဌော အနုမောဒတိ, အနုမောဒေန္တော ဝါစံ ဘိန္ဒတိ, ဝါစံ ဘိန္ဒန္တော ပရံ ဝိညာပေတိ – ဣမေသံ တိဏ္ဏံ ပုဂ္ဂလာနံ ကထိနတ္ထာရာ ရုဟန္တိ။

၄၁၁. ကတိ ကထိနတ္ထာရာ န ရုဟန္တိ? ကတိ ကထိနတ္ထာရာ ရုဟန္တိ? တယော ကထိနတ္ထာရာ န ရုဟန္တိ။ တယော ကထိနတ္ထာရာ ရုဟန္တိ။ ကတမေ တယော ကထိနတ္ထာရာ န ရုဟန္တိ? ဝတ္ထုဝိပန္နဉ္စေဝ ဟောတိ, ကာလဝိပန္နဉ္စ, ကရဏဝိပန္နဉ္စ – ဣမေ တယော ကထိနတ္ထာရာ န ရုဟန္တိ။ ကတမေ တယော ကထိနတ္ထာရာ ရုဟန္တိ? ဝတ္ထုသမ္ပန္နဉ္စေဝ ဟောတိ, ကာလသမ္ပန္နဉ္စ, ကရဏသမ္ပန္နဉ္စ – ဣမေ တယော ကထိနတ္ထာရာ ရုဟန္တိ။

၄. ကထိနာဒိဇာနိတဗ္ဗဝိဘာဂေါ

၄၁၂. ကထိနံ ဇာနိတဗ္ဗံ, ကထိနတ္ထာရော ဇာနိတဗ္ဗော, ကထိနဿ အတ္ထာရမာသော ဇာနိတဗ္ဗော, ကထိနဿ အတ္ထာရဝိပတ္တိ ဇာနိတဗ္ဗာ, ကထိနဿ အတ္ထာရသမ္ပတ္တိ ဇာနိတဗ္ဗာ, နိမိတ္တကမ္မံ ဇာနိတဗ္ဗံ, ပရိကထာ ဇာနိတဗ္ဗာ, ကုက္ကုကတံ ဇာနိတဗ္ဗံ, သန္နိဓိ ဇာနိတဗ္ဗာ, နိဿဂ္ဂိယံ ဇာနိတဗ္ဗံ။

ကထိနံ ဇာနိတဗ္ဗန္တိ တေသညေဝ ဓမ္မာနံ သင်္ဂဟော သမဝါယော နာမံ နာမကမ္မံ နာမဓေယျံ နိရုတ္တိ ဗျဉ္ဇနံ အဘိလာပေါ ယဒိဒံ ကထိနန္တိ။

ကထိနဿ အတ္ထာရမာသော ဇာနိတဗ္ဗောတိ ဝဿာနဿ ပစ္ဆိမော မာသော ဇာနိတဗ္ဗော။

ကထိနဿ အတ္ထာရဝိပတ္တိ ဇာနိတဗ္ဗာတိ စတုဝီသတိယာ အာကာရေဟိ ကထိနဿ အတ္ထာရဝိပတ္တိ ဇာနိတဗ္ဗာ။

ကထိနဿ အတ္ထာရသမ္ပတ္တိ ဇာနိတဗ္ဗာတိ သတ္တရသဟိ အာကာရေဟိ ကထိနဿ အတ္ထာရသမ္ပတ္တိ ဇာနိတဗ္ဗာ။

နိမိတ္တကမ္မံ ဇာနိတဗ္ဗန္တိ နိမိတ္တံ ကရောတိ ဣမိနာ ဒုဿေန ကထိနံ အတ္ထရိဿာမီတိ။

ပရိကထာ ဇာနိတဗ္ဗာတိ ပရိကထံ ကရောတိ ဣမာယ ပရိကထာယ ကထိနဒုဿံ နိဗ္ဗတ္တေဿာမီတိ။

ကုက္ကုကတံ ဇာနိတဗ္ဗန္တိ အနာဒိယဒါနံ ဇာနိတဗ္ဗံ။

သန္နိဓိ ဇာနိတဗ္ဗာတိ ဒွေ သန္နိဓိယော ဇာနိတဗ္ဗာ – ကရဏသန္နိဓိ ဝါ နိစယသန္နိဓိ ဝါ။

နိဿဂ္ဂိယံ ဇာနိတဗ္ဗန္တိ ကရိယမာနေ အရုဏံ ဥဋ္ဌဟတိ။

ကထိနတ္ထာရော ဇာနိတဗ္ဗောတိ သစေ သံဃဿ ကထိနဒုဿံ ဥပ္ပန္နံ ဟောတိ, သံဃေန ကထံ ပဋိပဇ္ဇိတဗ္ဗံ, အတ္ထာရကေန ကထံ ပဋိပဇ္ဇိတဗ္ဗံ, အနုမောဒကေန ကထံ ပဋိပဇ္ဇိတဗ္ဗံ။

၄၁၃. သံဃေန ဉတ္တိဒုတိယေန ကမ္မေန ကထိနတ္ထာရကဿ ဘိက္ခုနော ဒါတဗ္ဗံ, တေန ကထိနတ္ထာရကေန ဘိက္ခုနာ တဒဟေဝ ဓေါဝိတွာ ဝိမဇ္ဇိတွာ ဝိစာရေတွာ ဆိန္ဒိတွာ သိဗ္ဗေတွာ ရဇိတွာ ကပ္ပံ ကတွာ ကထိနံ အတ္ထရိတဗ္ဗံ။ သစေ သံဃာဋိယာ ကထိနံ အတ္ထရိတုကာမော ဟောတိ, ပေါရာဏိကာ သံဃာဋိ ပစ္စုဒ္ဓရိတဗ္ဗာ , နဝါ သံဃာဋိ အဓိဋ္ဌာတဗ္ဗာ။ ဣမာယ သံဃာဋိယာ ကထိနံ အတ္ထရာမီတိ ဝါစာ ဘိန္ဒိတဗ္ဗာ။ သစေ ဥတ္တရာသင်္ဂေန ကထိနံ အတ္ထရိတုကာမော ဟောတိ, ပေါရာဏကော ဥတ္တရာသင်္ဂေါ ပစ္စုဒ္ဓရိတဗ္ဗော, နဝေါ ဥတ္တရာသင်္ဂေါ အဓိဋ္ဌာတဗ္ဗော။ ဣမိနာ ဥတ္တရာသင်္ဂေန ကထိနံ အတ္ထရာမီတိ ဝါစာ ဘိန္ဒိတဗ္ဗာ။ သစေ အန္တရဝါသကေန ကထိနံ အတ္ထရိတုကာမော ဟောတိ, ပေါရာဏကော အန္တရဝါသကော ပစ္စုဒ္ဓရိတဗ္ဗော, နဝေါ အန္တရဝါသကော အဓိဋ္ဌာတဗ္ဗော။ ဣမိနာ အန္တရဝါသကေန ကထိနံ အတ္ထရာမီတိ ဝါစာ ဘိန္ဒိတဗ္ဗာ။ တေန ကထိနတ္ထာရကေန ဘိက္ခုနာ သသံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အတ္ထတံ, ဘန္တေ, သံဃဿ ကထိနံ, ဓမ္မိကော ကထိနတ္ထာရော, အနုမောဒထာ’’တိ။ တေဟိ အနုမောဒကေဟိ ဘိက္ခူဟိ ဧကံသံ ဥတ္တရာသင်္ဂံ ကရိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အတ္ထတံ, အာဝုသော, သံဃဿ ကထိနံ, ဓမ္မိကော ကထိနတ္ထာရော, အနုမောဒါမာ’’တိ။ တေန ကထိနတ္ထာရကေန ဘိက္ခုနာ သမ္ဗဟုလေ ဘိက္ခူ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ အဉ္ဇလိံ ပဂ္ဂဟေတွာ ဧဝမဿု ဝစနီယာ – ‘‘အတ္ထတံ, ဘန္တေ, သံဃဿ ကထိနံ, ဓမ္မိကော ကထိနတ္ထာရော, အနုမောဒထာ’’တိ။ တေဟိ အနုမောဒကေဟိ ဘိက္ခူဟိ ဧကံသံ ဥတ္တရာသင်္ဂံ ကရိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အတ္ထတံ, အာဝုသော, သံဃဿ ကထိနံ, ဓမ္မိကော ကထိနတ္ထာရော အနုမောဒါမာ’’တိ။ တေန ကထိနတ္ထာရကေန ဘိက္ခုနာ ဧကံ ဘိက္ခုံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အတ္ထတံ, အာဝုသော, သံဃဿ ကထိနံ, ဓမ္မိကော ကထိနတ္ထာရော, အနုမောဒါဟီ’’တိ။ တေန အနုမောဒကေန ဘိက္ခုနာ ဧကံသံ ဥတ္တရာသင်္ဂံ ကရိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အတ္ထတံ, အာဝုသော, သံဃဿ ကထိနံ, ဓမ္မိကော ကထိနတ္ထာရော, အနုမောဒါမီ’’တိ။

၅. ပုဂ္ဂလဿေဝကထိနတ္ထာရော

၄၁၄. သံဃော ကထိနံ အတ္ထရတိ, ဂဏော ကထိနံ အတ္ထရတိ, ပုဂ္ဂလော ကထိနံ အတ္ထရတီတိ။ န သံဃော ကထိနံ အတ္ထရတိ, န ဂဏော ကထိနံ အတ္ထရတိ, ပုဂ္ဂလော ကထိနံ အတ္ထရတီတိ။ ဟဉ္စိ န သံဃော ကထိနံ အတ္ထရတိ, န ဂဏော ကထိနံ အတ္ထရတိ, ပုဂ္ဂလော ကထိနံ အတ္ထရတိ။ သံဃဿ အနတ္ထတံ ဟောတိ ကထိနံ, ဂဏဿ အနတ္ထတံ ဟောတိ ကထိနံ, ပုဂ္ဂလဿ အတ္ထတံ ဟောတိ ကထိနံ။ သံဃော ပါတိမောက္ခံ ဥဒ္ဒိသတိ ဂဏော ပါတိမောက္ခံ ဥဒ္ဒိသတိ ပုဂ္ဂလော ပါတိမောက္ခံ ဥဒ္ဒိသတီတိ န သံဃော ပါတိမောက္ခံ ဥဒ္ဒိသတိ, န ဂဏော ပါတိမောက္ခံ ဥဒ္ဒိသတိ, ပုဂ္ဂလော ပါတိမောက္ခံ ဥဒ္ဒိသတီတိ။ ဟဉ္စိ န သံဃော ပါတိမောက္ခံ ဥဒ္ဒိသတိ, န ဂဏော ပါတိမောက္ခံ ဥဒ္ဒိသတိ, ပုဂ္ဂလော ပါတိမောက္ခံ ဥဒ္ဒိသတိ။ သံဃဿ အနုဒ္ဒိဋ္ဌံ ဟောတိ ပါတိမောက္ခံ, ဂဏဿ အနုဒ္ဒိဋ္ဌံ ဟောတိ ပါတိမောက္ခံ, ပုဂ္ဂလဿ ဥဒ္ဒိဋ္ဌံ ဟောတိ ပါတိမောက္ခံ။ သံဃဿ သာမဂ္ဂိယာ ဂဏဿ သာမဂ္ဂိယာ ပုဂ္ဂလဿ ဥဒ္ဒေသာ သံဃဿ ဥဒ္ဒိဋ္ဌံ ဟောတိ ပါတိမောက္ခံ, ဂဏဿ ဥဒ္ဒိဋ္ဌံ ဟောတိ ပါတိမောက္ခံ, ပုဂ္ဂလဿ ဥဒ္ဒိဋ္ဌံ ဟောတိ ပါတိမောက္ခံ။ ဧဝမေဝ န သံဃော ကထိနံ အတ္ထရတိ, န ဂဏော ကထိနံ အတ္ထရတိ, ပုဂ္ဂလော ကထိနံ အတ္ထရတိ။ သံဃဿ အနုမောဒနာယ ဂဏဿ အနုမောဒနာယ ပုဂ္ဂလဿ အတ္ထာရာ သံဃဿ အတ္ထတံ ဟောတိ ကထိနံ, ဂဏဿ အတ္ထတံ ဟောတိ ကထိနံ, ပုဂ္ဂလဿ အတ္ထတံ ဟောတိ ကထိနန္တိ။

၆. ပလိဗောဓပဉှာဗျာကရဏံ

၄၁၅.

ပက္ကမနန္တိကော ကထိနုဒ္ဓါရော၊ ဝုတ္တော အာဒိစ္စဗန္ဓုနာ။