စူဠသင်္ဂါမော

စူဠသင်္ဂါမော

၁. အနုဝိဇ္ဇကဿပဋိပတ္တိ

၃၆၅. [ပရိ. ၄၂၁] သင်္ဂါမာဝစရေ ဘိက္ခုနာ သံဃံဥပသင်ကမန္တေန နီစစိတ္တေန သံဃော ဥပသင်္ကမိတဗ္ဗော ရဇောဟရဏသမေန စိတ္တေန; အာသနကုသလေန ဘဝိတဗ္ဗံ နိသဇ္ဇကုသလေန; ထေရေ ဘိက္ခူ အနုပခဇ္ဇန္တေန, နဝေ ဘိက္ခူ အာသနေန အပ္ပဋိဗာဟန္တေန, ယထာပတိရူပေ အာသနေ နိသီဒိတဗ္ဗံ; အနာနာကထိကေန ဘဝိတဗ္ဗံ အတိရစ္ဆာနကထိကေန; သာမံ ဝါ ဓမ္မော ဘာသိတဗ္ဗော ပရော ဝါ အဇ္ဈေသိတဗ္ဗော အရိယော ဝါ တုဏှီဘာဝေါ နာတိမညိတဗ္ဗော။

သံဃေန အနုမတေန ပုဂ္ဂလေန အနုဝိဇ္ဇကေန အနုဝိဇ္ဇိတုကာမေန န ဥပဇ္ဈာယော ပုစ္ဆိတဗ္ဗော, န အာစရိယော ပုစ္ဆိတဗ္ဗော, န သဒ္ဓိဝိဟာရိကော ပုစ္ဆိတဗ္ဗော, န အန္တေဝါသိကော ပုစ္ဆိတဗ္ဗော, န သမာနုပဇ္ဈာယကော ပုစ္ဆိတဗ္ဗော, န သမာနာစရိယကော ပုစ္ဆိတဗ္ဗော, န ဇာတိ ပုစ္ဆိတဗ္ဗာ, န နာမံ ပုစ္ဆိတဗ္ဗံ, န ဂေါတ္တံ ပုစ္ဆိတဗ္ဗံ, န အာဂမော ပုစ္ဆိတဗ္ဗော, န ကုလပဒေသော ပုစ္ဆိတဗ္ဗော, န ဇာတိဘူမိ ပုစ္ဆိတဗ္ဗာ။ တံ ကိံ ကာရဏာ? အတြဿ ပေမံ ဝါ ဒေါသော ဝါ။ ပေမေ ဝါ သတိ ဒေါသေ ဝါ, ဆန္ဒာပိ ဂစ္ဆေယျ ဒေါသာပိ ဂစ္ဆေယျ မောဟာပိ ဂစ္ဆေယျ ဘယာပိ ဂစ္ဆေယျ။

သံဃေန အနုမတေန ပုဂ္ဂလေန အနုဝိဇ္ဇကေန အနုဝိဇ္ဇိတုကာမေန သံဃဂရုကေန ဘဝိတဗ္ဗံ နော ပုဂ္ဂလဂရုကေန, သဒ္ဓမ္မဂရုကေန ဘဝိတဗ္ဗံ နော အာမိသဂရုကေန, အတ္ထဝသိကေန ဘဝိတဗ္ဗံ နော ပရိသကပ္ပိကေန, ကာလေန အနုဝိဇ္ဇိတဗ္ဗံ နော အကာလေန, ဘူတေန အနုဝိဇ္ဇိတဗ္ဗံ နော အဘူတေန, သဏှေန အနုဝိဇ္ဇိတဗ္ဗံ နော ဖရုသေန, အတ္ထသံဟိတေန အနုဝိဇ္ဇိတဗ္ဗံ နော အနတ္ထသံဟိတေန, မေတ္တာစိတ္တေန အနုဝိဇ္ဇိတဗ္ဗံ နော ဒေါသန္တရေန, န ဥပကဏ္ဏကဇပ္ပိနာ ဘဝိတဗ္ဗံ, န ဇိမ္ဟံ ပေက္ခိတဗ္ဗံ, န အက္ခိ နိခဏိတဗ္ဗံ, န ဘမုကံ ဥက္ခိပိတဗ္ဗံ, န သီသံ ဥက္ခိပိတဗ္ဗံ, န ဟတ္ထဝိကာရော ကာတဗ္ဗော, န ဟတ္ထမုဒ္ဒါ ဒဿေတဗ္ဗာ။

အာသနကုသလေန ဘဝိတဗ္ဗံ နိသဇ္ဇကုသလေန, ယုဂမတ္တံ ပေက္ခန္တေန အတ္ထံ အနုဝိဓိယန္တေန သကေ အာသနေ နိသီဒိတဗ္ဗံ, န စ အာသနာ ဝုဋ္ဌာတဗ္ဗံ , န ဝီတိဟာတဗ္ဗံ, န ကုမ္မဂ္ဂေါ သေဝိတဗ္ဗော, န ဗာဟာဝိက္ခေပကံ [န ဝါစာ ဝိက္ခေပကံ (သျာ.)] ဘဏိတဗ္ဗံ, အတုရိတေန ဘဝိတဗ္ဗံ အသာဟသိကေန, အစဏ္ဍိကတေန ဘဝိတဗ္ဗံ ဝစနက္ခမေ , မေတ္တာစိတ္တေန ဘဝိတဗ္ဗံ ဟိတာနုကမ္ပိနာ, ကာရုဏိကေန ဘဝိတဗ္ဗံ ဟိတပရိသက္ကိနာ, အသမ္ဖပ္ပလာပိနာ ဘဝိတဗ္ဗံ ပရိယန္တဘာဏိနာ, အဝေရဝသိကေန ဘဝိတဗ္ဗံ အနသုရုတ္တေန, အတ္တာ ပရိဂ္ဂဟေတဗ္ဗော, ပရော ပရိဂ္ဂဟေတဗ္ဗော, စောဒကော ပရိဂ္ဂဟေတဗ္ဗော, စုဒိတကော ပရိဂ္ဂဟေတဗ္ဗော, အဓမ္မစောဒကော ပရိဂ္ဂဟေတဗ္ဗော, အဓမ္မစုဒိတကော ပရိဂ္ဂဟေတဗ္ဗော, ဓမ္မစောဒကော ပရိဂ္ဂဟေတဗ္ဗော, ဓမ္မစုဒိတကော ပရိဂ္ဂဟေတဗ္ဗော, ဝုတ္တံ အဟာပေန္တေန အဝုတ္တံ အပကာသေန္တေန ဩတိဏ္ဏာနိ ပဒဗျဉ္ဇနာနိ သာဓုကံ ပရိဂ္ဂဟေတွာ ပရော ပဋိပုစ္ဆိတွာ ယထာ ပဋိညာယ ကာရေတဗ္ဗော, မန္ဒော ဟာသေတဗ္ဗော [ဝေပေါ ပဟာသေတဗ္ဗော (သျာ.)], ဘီရူ အဿာသေတဗ္ဗော, စဏ္ဍော နိသေဓေတဗ္ဗော, အသုစိ ဝိဘာဝေတဗ္ဗော, ဥဇုမဒ္ဒဝေန န ဆန္ဒာဂတိံ ဂန္တဗ္ဗံ, န ဒေါသာဂတိံ ဂန္တဗ္ဗံ, န မောဟာဂတိံ ဂန္တဗ္ဗံ, န ဘယာဂတိံ ဂန္တဗ္ဗံ, မဇ္ဈတ္တေန ဘဝိတဗ္ဗံ ဓမ္မေသု စ ပုဂ္ဂလေသု စ။ ဧဝဉ္စ ပန အနုဝိဇ္ဇကော အနုဝိဇ္ဇမာနော သတ္ထု စေဝ သာသနကရော ဟောတိ, ဝိညူနဉ္စ သဗြဟ္မစာရီနံ ပိယော စ ဟောတိ မနာပေါ စ ဂရု စ ဘာဝနီယော စ။

၃၆၆. သုတ္တံ သံသန္ဒနတ္ထာယ, ဩပမ္မံ နိဒဿနတ္ထာယ, အတ္ထော ဝိညာပနတ္ထာယ, ပဋိပုစ္ဆာ ဌပနတ္ထာယ, ဩကာသကမ္မံ စောဒနတ္ထာယ, စောဒနာ သာရဏတ္ထာယ, သာရဏာ သဝစနီယတ္ထာယ, သဝစနီယံ ပလိဗောဓတ္ထာယ, ပလိဗောဓေါ ဝိနိစ္ဆယတ္ထာယ, ဝိနိစ္ဆယော သန္တီရဏတ္ထာယ, သန္တီရဏံ ဌာနာဌာနဂမနတ္ထာယ, ဌာနာဌာနဂမနံ ဒုမ္မင်္ကူနံ ပုဂ္ဂလာနံ နိဂ္ဂဟတ္ထာယ, ပေသလာနံ ဘိက္ခူနံ သမ္ပဂ္ဂဟတ္ထာယ, သံဃော သမ္ပရိဂ္ဂဟသမ္ပဋိစ္ဆနတ္ထာယ, သံဃေန အနုမတာ ပုဂ္ဂလာ ပစ္စေကဋ္ဌာယိနော အဝိသံဝါဒကဋ္ဌာယိနော။

ဝိနယော သံဝရတ္ထာယ, သံဝရော အဝိပ္ပဋိသာရတ္ထာယ, အဝိပ္ပဋိသာရော ပါမုဇ္ဇတ္ထာယ, ပါမုဇ္ဇံ ဣတတ္ထာယ, ဣတိ ပဿဒ္ဓတ္ထာယ, ပဿဒ္ဓိ သုခတ္ထာယ, သုခံ သမာဓတ္ထာယ, သမာဓိ ယထာဘူတဉာဏဒဿနတ္ထာယ, ယထာဘူတဉာဏဒဿနံ နိဗ္ဗိဒတ္ထာယ, နိဗ္ဗိဒါ ဝိရာဂတ္ထာယ, ဝိရာဂေါ ဝိမုတ္တတ္ထာယ, ဝိမုတ္တိ ဝိမုတ္တိဉာဏဒဿနတ္ထာယ, ဝိမုတ္တိဉာဏဒဿနံ အနုပါဒါပရိနိဗ္ဗာနတ္ထာယ။ ဧတဒတ္ထာ ကထာ, ဧတဒတ္ထာ မန္တနာ, ဧတဒတ္ထာ ဥပနိသာ, ဧတဒတ္ထံ သောတာဝဓါနံ – ယဒိဒံ အနုပါဒါစိတ္တဿ ဝိမောက္ခောတိ။

၃၆၇.

အနုယောဂဝတ္တံ နိသာမယ၊ ကုသလေန ဗုဒ္ဓိမတာ ကတံ။

သုဝုတ္တံ သိက္ခာပဒါနုလောမိကံ၊ ဂတိံ န နာသေန္တော သမ္ပရာယိကံ။

ဝတ္ထုံ ဝိပတ္တိံ အာပတ္တိံ၊ နိဒါနံ အာကာရအကောဝိဒေါ။

ပုဗ္ဗာပရံ န ဇာနာတိ၊ ကတာကတံ သမေန စ။

ကမ္မဉ္စ အဓိကရဏဉ္စ၊ သမထေ စာပိ အကောဝိဒေါ။

ရတ္တော ဒုဋ္ဌော စ မူဠ္ဟော စ၊ ဘယာ မောဟာ စ ဂစ္ဆတိ။

န စ သညတ္တိကုသလော၊ နိဇ္ဈတ္တိယာ စ အကောဝိဒေါ။

လဒ္ဓပက္ခော အဟိရိကော၊ ကဏှကမ္မော အနာဒရော။

သ ဝေ [သစေ (က.)] တာဒိသကော ဘိက္ခု၊ အပ္ပဋိက္ခောတိ ဝုစ္စတိ။

ဝတ္ထုံ ဝိပတ္တိံ အာပတ္တိံ၊ နိဒါနံ အာကာရကောဝိဒေါ။

ပုဗ္ဗာပရဉ္စ ဇာနာတိ၊ ကတာကတံ သမေန စ။

ကမ္မဉ္စ အဓိကရဏဉ္စ၊ သမထေ စာပိ ကောဝိဒေါ။

အရတ္တော အဒုဋ္ဌော အမူဠ္ဟော၊ ဘယာ မောဟာ န ဂစ္ဆတိ။

သညတ္တိယာ စ ကုသလော၊ နိဇ္ဈတ္တိယာ စ ကောဝိဒေါ။

လဒ္ဓပက္ခော ဟိရိမနော၊ သုက္ကကမ္မော သဂါရဝေါ။

သ ဝေ တာဒိသကော ဘိက္ခု၊ သပ္ပဋိက္ခောတိ ဝုစ္စတီတိ။

စူဠသင်္ဂါမော နိဋ္ဌိတော။

တဿုဒ္ဒါနံ –

နီစစိတ္တေန ပုစ္ဆေယျ၊ ဂရု သံဃေ န ပုဂ္ဂလေ။

သုတ္တံ သံသန္ဒနတ္ထာယ၊ ဝိနယာနုဂ္ဂဟေန စ။

ဥဒ္ဒါနံ စူဠသင်္ဂါမေ၊ ဧကုဒ္ဒေသော [ဧကုဒ္ဒေသံ (သီ. သျာ.)] ဣဒံ ကတန္တိ။