အပရဂါထာသင်္ဂါဏိက
၁. စောဒနာဒိပုစ္ဆာဝိဿဇ္ဇနာ
၃၅၉.
စောဒနာ ကိမတ္ထာယ၊ သာရဏာ ကိဿ ကာရဏာ။
သံဃော ကိမတ္ထာယ၊ မတိကမ္မံ ပန ကိဿ ကာရဏာ။
စောဒနာ သာရဏတ္ထာယ၊ နိဂ္ဂဟတ္ထာယ သာရဏာ။
သံဃော ပရိဂ္ဂဟတ္ထာယ၊ မတိကမ္မံ ပန ပါဋိယေက္ကံ။
မာ ခေါ တုရိတော အဘဏိ၊ မာ ခေါ စဏ္ဍိကတော ဘဏိ။
မာ ခေါ ပဋိဃံ ဇနယိ၊ သစေ အနုဝိဇ္ဇကော တုဝံ။
မာ ခေါ သဟသာ အဘဏိ၊ ကထံ ဝိဂ္ဂါဟိကံ အနတ္ထသံဟိတံ။
သုတ္တေ ဝိနယေ အနုလောမေ၊ ပညတ္တေ အနုလောမိကေ။
အနုယောဂဝတ္တံ နိသာမယ၊ ကုသလေန ဗုဒ္ဓိမတာ ကတံ။
သုဝုတ္တံ သိက္ခာပဒါနုလောမိကံ၊ ဂတိံ န နာသေန္တော သမ္ပရာယိကံ။
ဟိတေသီ အနုယုဉ္ဇဿု၊ ကာလေနတ္ထူပသံဟိတံ။
စုဒိတဿ စ စောဒကဿ စ။
သဟသာ ဝေါဟာရံ မာ ပဓါရေသိ။
စောဒကော အာဟ အာပန္နောတိ။
စုဒိတကော အာဟ အနာပန္နောတိ။
ဥဘော အနုက္ခိပန္တော၊ ပဋိညာနုသန္ဓိတေန ကာရယေ။
ပဋိညာ လဇ္ဇီသု ကတာ၊ အလဇ္ဇီသု ဧဝံ န ဝိဇ္ဇတိ။
ဗဟုမ္ပိ အလဇ္ဇီ ဘာသေယျ၊ ဝတ္တာနုသန္ဓိတေန [ဝုတ္တာနုသန္ဓိတေန (သီ. သျာ. က.)] ကာရယေ။
အလဇ္ဇီ ကီဒိသော ဟောတိ၊ ပဋိညာ ယဿ န ရူဟတိ။
ဧတဉ္စ [ဧဝဉ္စ (က.)] တာဟံ ပုစ္ဆာမိ၊ ကီဒိသော ဝုစ္စတိ အလဇ္ဇီ ပုဂ္ဂလော။
သဉ္စိစ္စ အာပတ္တိံ အာပဇ္ဇတိ၊ အာပတ္တိံ ပရိဂူဟတိ။
အဂတိဂမနဉ္စ ဂစ္ဆတိ၊ ဧဒိသော ဝုစ္စတိ အလဇ္ဇီပုဂ္ဂလော။
သစ္စံ အဟမ္ပိ ဇာနာမိ၊ ဧဒိသော ဝုစ္စတိ အလဇ္ဇီပုဂ္ဂလော။
အညဉ္စ တာဟံ ပုစ္ဆာမိ၊ ကီဒိသော ဝုစ္စတိ လဇ္ဇီပုဂ္ဂလော။
သဉ္စိစ္စ အာပတ္တိံ နာပဇ္ဇတိ၊ အာပတ္တိံ န ပရိဂူဟတိ။
အဂတိဂမနံ န ဂစ္ဆတိ၊ ဧဒိသော ဝုစ္စတိ လဇ္ဇီပုဂ္ဂလော။
သစ္စံ အဟမ္ပိ ဇာနာမိ၊ ဧဒိသော ဝုစ္စတိ လဇ္ဇီပုဂ္ဂလော။
အညဉ္စ တာဟံ ပုစ္ဆာမိ၊ ကီဒိသော ဝုစ္စတိ အဓမ္မစောဒကော။
အကာလေ စောဒေတိ အဘူတေန။
ဖရုသေန အနတ္ထသံဟိတေန။
ဒေါသန္တရော စောဒေတိ နော မေတ္တာစိတ္တော။
ဧဒိသော ဝုစ္စတိ အဓမ္မစောဒကော။
သစ္စံ အဟမ္ပိ ဇာနာမိ၊ ဧဒိသော ဝုစ္စတိ အဓမ္မစောဒကော။
အညဉ္စ တာဟံ ပုစ္ဆာမိ၊ ကီဒိသော ဝုစ္စတိ ဓမ္မစောဒကော။
ကာလေန စောဒေတိ ဘူတေန၊ သဏှေန အတ္ထသံဟိတေန။
မေတ္တာစိတ္တော စောဒေတိ နော ဒေါသန္တရော။
ဧဒိသော ဝုစ္စတိ ဓမ္မစောဒကော။
သစ္စံ အဟမ္ပိ ဇာနာမိ၊ ဧဒိသော ဝုစ္စတိ ဓမ္မစောဒကော။
အညဉ္စ တာဟံ ပုစ္ဆာမိ၊ ကီဒိသော ဝုစ္စတိ ဗာလစောဒကော။
ပုဗ္ဗာပရံ န ဇာနာတိ၊ ပုဗ္ဗာပရဿ အကောဝိဒေါ။
အနုသန္ဓိဝစနပထံ န ဇာနာတိ။
အနုသန္ဓိဝစနပထဿ အကောဝိဒေါ။
ဧဒိသော ဝုစ္စတိ ဗာလစောဒကော။
သစ္စံ အဟမ္ပိ ဇာနာမိ၊ ဧဒိသော ဝုစ္စတိ ဗာလစောဒကော။
အညဉ္စ တာဟံ ပုစ္ဆာမိ၊ ကီဒိသော ဝုစ္စတိ ပဏ္ဍိတစောဒကော။
ပုဗ္ဗာပရမ္ပိ ဇာနာတိ၊ ပုဗ္ဗာပရဿ ကောဝိဒေါ။
အနုသန္ဓိဝစနပထံ ဇာနာတိ၊ အနုသန္ဓိဝစနပထဿ ကောဝိဒေါ။
ဧဒိသော ဝုစ္စတိ ပဏ္ဍိတစောဒကော။
သစ္စံ အဟမ္ပိ ဇာနာမိ၊ ဧဒိသော ဝုစ္စတိ ပဏ္ဍိတစောဒကော။
အညဉ္စ တာဟံ ပုစ္ဆာမိ၊ စောဒနာ ကိန္တိ ဝုစ္စတိ။
သီလဝိပတ္တိယာ စောဒေတိ၊ အထော အာစာရဒိဋ္ဌိယာ။
အာဇီဝေနပိ စောဒေတိ၊ စောဒနာ တေန ဝုစ္စတီတိ။
အပရံ ဂါထာသင်္ဂဏိကံ နိဋ္ဌိတံ။