အဓိကရဏဘာဒေါ
၁. ဥက္ကောဋနဘေဒါဒိ
၃၄၀. [စူဠဝ. ၂၁၅; ပရိ. ၂၇၅] စတ္တာရိ အဓိကရဏာနိ။ ဝိဝါဒါဓိကရဏံ, အနုဝါဒါဓိကရဏံ, အာပတ္တာဓိကရဏံ, ကိစ္စာဓိကရဏံ – ဣမာနိ စတ္တာရိ အဓိကရဏာနိ။
ဣမေသံ စတုန္နံ အဓိကရဏာနံ ကတိ ဥက္ကောဋာ? ဣမေသံ စတုန္နံ အဓိကရဏာနံ ဒသ ဥက္ကောဋာ။ ဝိဝါဒါဓိကရဏဿ ဒွေ ဥက္ကောဋာ, အနုဝါဒါဓိကရဏဿ စတ္တာရော ဥက္ကောဋာ, အာပတ္တာဓိကရဏဿ တယော ဥက္ကောဋာ, ကိစ္စာဓိကရဏဿ ဧကော ဥက္ကောဋော – ဣမေသံ စတုန္နံ အဓိကရဏာနံ ဣမေ ဒသ ဥက္ကောဋာ။
ဝိဝါဒါဓိကရဏံ ဥက္ကောဋေန္တော ကတိ သမထေ ဥက္ကောဋေတိ? အနုဝါဒါဓိကရဏံ ဥက္ကောဋေန္တော ကတိ သမထေ ဥက္ကောဋေတိ? အာပတ္တာဓိကရဏံ ဥက္ကောဋေန္တော ကတိ သမထေ ဥက္ကောဋေတိ? ကိစ္စာဓိကရဏံ ဥက္ကောဋေန္တော ကတိ သမထေ ဥက္ကောဋေတိ?
ဝိဝါဒါဓိကရဏံ ဥက္ကောဋေန္တော ဒွေ သမထေ ဥက္ကောဋေတိ။ အနုဝါဒါဓိကရဏံ ဥက္ကောဋေန္တော စတ္တာရော သမထေ ဥက္ကောဋေတိ။ အာပတ္တာဓိကရဏံ ဥက္ကောဋေန္တော တယော သမထေ ဥက္ကောဋေတိ။ ကိစ္စာဓိကရဏံ ဥက္ကောဋေန္တော ဧကံ သမထံ ဥက္ကောဋေတိ။
၃၄၁. ကတိ ဥက္ကောဋာ? ကတိဟာကာရေဟိ ဥက္ကောဋနံ ပသဝတိ? ကတိဟင်္ဂေဟိ သမန္နာဂတော ပုဂ္ဂလော အဓိကရဏံ ဥက္ကောဋေတိ? ကတိ ပုဂ္ဂလာ အဓိကရဏံ ဥက္ကောဋေန္တာ အာပတ္တိံ အာပဇ္ဇန္တိ?
ဒွါဒသ ဥက္ကောဋာ။ ဒသဟာကာရေဟိ ဥက္ကောဋနံ ပသဝတိ။ စတူဟင်္ဂေဟိ သမန္နာဂတော ပုဂ္ဂလော အဓိကရဏံ ဥက္ကောဋေတိ။ စတ္တာရော ပုဂ္ဂလာ အဓိကရဏံ ဥက္ကောဋေန္တာ အာပတ္တိံ အာပဇ္ဇန္တိ?
ကတမေ ဒွါဒသ ဥက္ကောဋာ? အကတံ ကမ္မံ, ဒုက္ကဋံ ကမ္မံ, ပုန ကာတဗ္ဗံ ကမ္မံ, အနိဟတံ, ဒုန္နိဟတံ, ပုန နိဟနိတဗ္ဗံ, အဝိနိစ္ဆိတံ, ဒုဝိနိစ္ဆိတံ, ပုန ဝိနိစ္ဆိတဗ္ဗံ, အဝူပသန္တံ, ဒုဝူပသန္တံ, ပုန ဝူပသမေတဗ္ဗန္တိ – ဣမေ ဒွါဒသ ဥက္ကောဋာ။
ကတမေဟိ ဒသဟာကာရေဟိ ဥက္ကောဋနံ ပသဝတိ? တတ္ထ ဇာတကံ အဓိကရဏံ ဥက္ကောဋေတိ, တတ္ထ ဇာတကံ ဝူပသန္တံ အဓိကရဏံ ဥက္ကောဋေတိ, အန္တရာမဂ္ဂေ အဓိကရဏံ ဥက္ကောဋေတိ, အန္တရာမဂ္ဂေ ဝူပသန္တံ အဓိကရဏံ ဥက္ကောဋေတိ, တတ္ထ ဂတံ အဓိကရဏံ ဥက္ကောဋေတိ, တတ္ထ ဂတံ ဝူပသန္တံ အဓိကရဏံ ဥက္ကောဋေတိ, သတိဝိနယံ ဥက္ကောဋေတိ, အမူဠှဝိနယံ ဥက္ကောဋေတိ, တဿပါပိယသိကံ ဥက္ကောဋေတိ, တိဏဝတ္ထာရကံ ဥက္ကောဋေတိ – ဣမေဟိ ဒသဟာကာရေဟိ ဥက္ကောဋနံ ပသဝတိ။
ကတမေဟိ စတူဟင်္ဂေဟိ သမန္နာဂတော ပုဂ္ဂလော အဓိကရဏံ ဥက္ကောဋေတိ? ဆန္ဒာဂတိံ ဂစ္ဆန္တော အဓိကရဏံ ဥက္ကောဋေတိ, ဒေါသာဂတိံ ဂစ္ဆန္တော အဓိကရဏံ ဥက္ကောဋေတိ, မောဟာဂတိံ ဂစ္ဆန္တော အဓိကရဏံ ဥက္ကောဋေတိ, ဘယာဂတိံ ဂစ္ဆန္တော အဓိကရဏံ ဥက္ကောဋေတိ – ဣမေဟိ စတူဟင်္ဂေဟိ သမန္နာဂတော ပုဂ္ဂလော အဓိကရဏံ ဥက္ကောဋေတိ။
ကတမေ စတ္တာရော ပုဂ္ဂလာ အဓိကရဏံ ဥက္ကောဋေန္တာ အာပတ္တိံ အာပဇ္ဇန္တိ? တဒဟုပသမ္ပန္နော ဥက္ကောဋေတိ ဥက္ကောဋနကံ ပါစိတ္တိယံ, အာဂန္တုကော ဥက္ကောဋေတိ ဥက္ကောဋနကံ ပါစိတ္တိယံ, ကာရကော ဥက္ကောဋေတိ ဥက္ကောဋနကံ ပါစိတ္တိယံ, ဆန္ဒဒါယကော ဥက္ကောဋေတိ ဥက္ကောဋနကံ ပါစိတ္တိယံ – ဣမေ စတ္တာရော ပုဂ္ဂလာ အဓိကရဏံ ဥက္ကောဋေန္တာ အာပတ္တိံ အာပဇ္ဇန္တိ။
၂. အဓိကရဏနိဒါနာဒိ
၃၄၂. ဝိဝါဒါဓိကရဏံ ကိံနိဒါနံ, ကိံသမုဒယံ, ကိံဇာတိကံ, ကိံပဘဝံ, ကိံသမ္ဘာရံ, ကိံသမုဋ္ဌာနံ? အနုဝါဒါဓိကရဏံ ကိံနိဒါနံ, ကိံသမုဒယံ, ကိံဇာတိကံ, ကိံပဘဝံ, ကိံသမ္ဘာရံ, ကိံသမုဋ္ဌာနံ? အာပတ္တာဓိကရဏံ ကိံနိဒါနံ, ကိံသမုဒယံ, ကိံဇာတိကံ, ကိံပဘဝံ, ကိံသမ္ဘာရံ, ကိံသမုဋ္ဌာနံ ? ကိစ္စာဓိကရဏံ ကိံနိဒါနံ, ကိံသမုဒယံ, ကိံဇာတိကံ, ကိံပဘဝံ, ကိံသမ္ဘာရံ, ကိံသမုဋ္ဌာနံ?
ဝိဝါဒါဓိကရဏံ ဝိဝါဒနိဒါနံ ဝိဝါဒသမုဒယံ ဝိဝါဒဇာတိကံ ဝိဝါဒပဘဝံ ဝိဝါဒသမ္ဘာရံ ဝိဝါဒသမုဋ္ဌာနံ။ အနုဝါဒါဓိကရဏံ အနုဝါဒနိဒါနံ အနုဝါဒသမုဒယံ အနုဝါဒဇာတိကံ အနုဝါဒပဘဝံ အနုဝါဒသမ္ဘာရံ အနုဝါဒသမုဋ္ဌာနံ။ အာပတ္တာဓိကရဏံ အာပတ္တိနိဒါနံ အာပတ္တိသမုဒယံ အာပတ္တိဇာတိကံ အာပတ္တိပဘဝံ အာပတ္တိသမ္ဘာရံ အာပတ္တိသမုဋ္ဌာနံ။ ကိစ္စာဓိကရဏံ ကိစ္စယနိဒါနံ ကိစ္စယသမုဒယံ ကိစ္စယဇာတိကံ ကိစ္စယပဘဝံ ကိစ္စယသမ္ဘာရံ ကိစ္စယသမုဋ္ဌာနံ။
ဝိဝါဒါဓိကရဏံ ကိံနိဒါနံ, ကိံသမုဒယံ, ကိံဇာတိကံ, ကိံပဘဝံ, ကိံသမ္ဘာရံ, ကိံသမုဋ္ဌာနံ? အနုဝါဒါဓိကရဏံ။ပေ.။ အာပတ္တာဓိကရဏံ။ပေ.။ ကိစ္စာဓိကရဏံ ကိံနိဒါနံ, ကိံသမုဒယံ, ကိံဇာတိကံ, ကိံပဘဝံ, ကိံသမ္ဘာရံ, ကိံသမုဋ္ဌာနံ?
ဝိဝါဒါဓိကရဏံ ဟေတုနိဒါနံ, ဟေတုသမုဒယံ, ဟေတုဇာတိကံ, ဟေတုပဘဝံ, ဟေတုသမ္ဘာရံ, ဟေတုသမုဋ္ဌာနံ။ အနုဝါဒါဓိကရဏံ။ပေ.။ အာပတ္တာဓိကရဏံ။ပေ.။ ကိစ္စာဓိကရဏံ ဟေတုနိဒါနံ, ဟေတုသမုဒယံ, ဟေတုဇာတိကံ, ဟေတုပဘဝံ, ဟေတုသမ္ဘာရံ, ဟေတုသမုဋ္ဌာနံ။
ဝိဝါဒါဓိကရဏံ ကိံနိဒါနံ, ကိံသမုဒယံ, ကိံဇာတိကံ, ကိံပဘဝံ, ကိံသမ္ဘာရံ, ကိံသမုဋ္ဌာနံ? အနုဝါဒါဓိကရဏံ ။ပေ.။ အာပတ္တာဓိကရဏံ။ပေ.။ ကိစ္စာဓိကရဏံ ကိံနိဒါနံ, ကိံသမုဒယံ, ကိံဇာတိကံ, ကိံပဘဝံ, ကိံသမ္ဘာရံ, ကိံသမုဋ္ဌာနံ?
ဝိဝါဒါဓိကရဏံ ပစ္စယနိဒါနံ, ပစ္စယသမုဒယံ, ပစ္စယဇာတိကံ, ပစ္စယပဘဝံ, ပစ္စယသမ္ဘာရံ, ပစ္စယသမုဋ္ဌာနံ။ အနုဝါဒါဓိကရဏံ။ပေ.။ အာပတ္တာဓိကရဏံ။ပေ.။ ကိစ္စာဓိကရဏံ ပစ္စယနိဒါနံ, ပစ္စယသမုဒယံ, ပစ္စယဇာတိကံ, ပစ္စယပဘဝံ, ပစ္စယသမ္ဘာရံ, ပစ္စယသမုဋ္ဌာနံ။
၃. အဓိကရဏမူလာဒိ
၃၄၃. စတုန္နံ အဓိကရဏာနံ ကတိ မူလာနိ, ကတိ သမုဋ္ဌာနာ? စတုန္နံ အဓိကရဏာနံ တေတ္တိံသ မူလာနိ, တေတ္တိံသ သမုဋ္ဌာနာ။
စတုန္နံ အဓိကရဏာနံ ကတမာနိ တေတ္တိံသ မူလာနိ? ဝိဝါဒါဓိကရဏဿ ဒွါဒသ မူလာနိ, အနုဝါဒါဓိကရဏဿ စုဒ္ဒသ မူလာနိ, အာပတ္တာဓိကရဏဿ ဆ မူလာနိ, ကိစ္စာဓိကရဏဿ ဧကံ မူလံ, သံဃော – စတုန္နံ အဓိကရဏာနံ ဣမာနိ တေတ္တိံသ မူလာနိ။
စတုန္နံ အဓိကရဏာနံ ကတမေ တေတ္တိံသ သမုဋ္ဌာနာ? ဝိဝါဒါဓိကရဏဿ အဋ္ဌာရသဘေဒကရဝတ္ထူနိ သမုဋ္ဌာနာ, အနုဝါဒါဓိကရဏဿ စတဿော ဝိပတ္တိယော သမုဋ္ဌာနာ, အာပတ္တာဓိကရဏဿ သတ္တာပတ္တိက္ခန္ဓာ သမုဋ္ဌာနာ, ကိစ္စာဓိကရဏဿ စတ္တာရိ ကမ္မာနိ သမုဋ္ဌာနာ – စတုန္နံ အဓိကရဏာနံ ဣမေ တေတ္တိံသ သမုဋ္ဌာနာ။
၄. အဓိကရဏပစ္စယာပတ္တိ
၃၄၄. ဝိဝါဒါဓိကရဏံ အာပတ္တာနာပတ္တီတိ? ဝိဝါဒါဓိကရဏံ န အာပတ္တိ။ ကိံ ပန ဝိဝါဒါဓိကရဏပစ္စယာ အာပတ္တိံ အာပဇ္ဇေယျာတိ? အာမ, ဝိဝါဒါဓိကရဏပစ္စယာ အာပတ္တိံ အာပဇ္ဇေယျ။ ဝိဝါဒါဓိကရဏပစ္စယာ ကတိ အာပတ္တိယော အာပဇ္ဇတိ? ဝိဝါဒါဓိကရဏပစ္စယာ ဒွေ အာပတ္တိယော အာပဇ္ဇတိ။ ဥပသမ္ပန္နံ ဩမသတိ, အာပတ္တိ ပါစိတ္တိယဿ; အနုပသမ္ပန္နံ ဩမသတိ, အာပတ္တိ ဒုက္ကဋဿ – ဝိဝါဒါဓိကရဏပစ္စယာ ဣမာ ဒွေ အာပတ္တိယော အာပဇ္ဇတိ။
တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? ကတိဟိ အဓိကရဏေဟိ ကတိသု ဌာနေသု ကတိဟိ သမထေဟိ သမ္မန္တိ?
တာ အာပတ္တိယော စတုန္နံ ဝိပတ္တီနံ ဧကံ ဝိပတ္တိံ ဘဇန္တိ – အာစာရဝိပတ္တိံ။ စတုန္နံ အဓိကရဏာနံ , အာပတ္တာဓိကရဏံ။ သတ္တန္နံ အာပတ္တိက္ခန္ဓာနံ ဒွီဟိ အာပတ္တိက္ခန္ဓေဟိ သင်္ဂဟိတာ – သိယာ ပါစိတ္တိယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌန္တိ။ ဧကေန အဓိကရဏေန – ကိစ္စာဓိကရဏေန; တီသု ဌာနေသု – သံဃမဇ္ဈေ, ဂဏမဇ္ဈေ, ပုဂ္ဂလဿ သန္တိကေ; တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စ။
၃၄၅. အနုဝါဒါဓိကရဏံ အာပတ္တာနာပတ္တီတိ? အနုဝါဒါဓိကရဏံ န အာပတ္တိ။ ကိံ ပန အနုဝါဒါဓိကရဏပစ္စယာ အာပတ္တိံ အာပဇ္ဇေယျာတိ? အာမ, အနုဝါဒါဓိကရဏပစ္စယာ အာပတ္တိံ အာပဇ္ဇေယျ။ အနုဝါဒါဓိကရဏပစ္စယာ, ကတိ အာပတ္တိယော အာပဇ္ဇတိ? အနုဝါဒါဓိကရဏပစ္စယာ တိဿော အာပတ္တိယော အာပဇ္ဇတိ။ ဘိက္ခုံ အမူလကေန ပါရာဇိကေန ဓမ္မေန အနုဒ္ဓံသေတိ, အာပတ္တိ သံဃာဒိသေသဿ; အမူလကေန သံဃာဒိသေသေန အနုဒ္ဓံသေတိ, အာပတ္တိ ပါစိတ္တိယဿ; အမူလိကာယ အာစာရဝိပတ္တိယာ အနုဒ္ဓံသေတိ, အာပတ္တိ ဒုက္ကဋဿ – အနုဝါဒါဓိကရဏပစ္စယာ ဣမာ တိဿော အာပတ္တိယော အာပဇ္ဇတိ။
တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? ကတိဟိ အဓိကရဏေဟိ ကတိသု ဌာနေသု ကတိဟိ သမထေဟိ သမ္မန္တိ?
တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ, သိယာ အာစာရဝိပတ္တိံ။ စတုန္နံ အဓိကရဏာနံ, အာပတ္တာဓိကရဏံ။ သတ္တန္နံ အာပတ္တိက္ခန္ဓာနံ တီဟိ အာပတ္တိက္ခန္ဓေဟိ သင်္ဂဟိတာ – သိယာ သံဃာဒိသေသာပတ္တိက္ခန္ဓေန, သိယာ ပါစိတ္တိယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌန္တိ။ ယာ တာ အာပတ္တိယော ဂရုကာ တာ အာပတ္တိယော ဧကေန အဓိကရဏေန – ကိစ္စာဓိကရဏေန; ဧကမှိ ဌာနေ – သံဃမဇ္ဈေ; ဒွီဟိ သမထေဟိ သမ္မန္တိ – သမ္မုခါဝိနယေန စ ပဋိညာတကရဏေန စ။ ယာ တာ အာပတ္တိယော လဟုကာ တာ အာပတ္တိယော ဧကေန အဓိကရဏေန – ကိစ္စာဓိကရဏေန; တီသု ဌာနေသု – သံဃမဇ္ဈေ ဂဏမဇ္ဈေ ပုဂ္ဂလဿ သန္တိကေ; တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ , သိယာ သမ္မုခါဝိနယေန စ တိဏဝတ္ထာရကေန စ။
၃၄၆. အာပတ္တာဓိကရဏံ အာပတ္တာနာပတ္တီတိ? အာပတ္တာဓိကရဏံ အာပတ္တိ။ ကိံ ပန အာပတ္တာဓိကရဏပစ္စယာ အာပတ္တိံ အာပဇ္ဇေယျာတိ? အာမ, အာပတ္တာဓိကရဏပစ္စယာ အာပတ္တိံ အာပဇ္ဇေယျ။ အာပတ္တာဓိကရဏပစ္စယာ ကတိ အာပတ္တိယော အာပဇ္ဇတိ? အာပတ္တာဓိကရဏပစ္စယာ စတဿော အာပတ္တိယော အာပဇ္ဇတိ။ ဘိက္ခုနီ ဇာနံ ပါရာဇိကံ ဓမ္မံ [ပါရာဇိကံ ဓမ္မံ အဇ္ဈာပန္နံ (သျာ.)] ပဋိစ္ဆာဒေတိ, အာပတ္တိ ပါရာဇိကဿ; ဝေမတိကာ ပဋိစ္ဆာဒေတိ, အာပတ္တိ ထုလ္လစ္စယဿ; ဘိက္ခု သံဃာဒိသေသံ ပဋိစ္ဆာဒေတိ, အာပတ္တိ ပါစိတ္တိယဿ; အာစာရဝိပတ္တိံ ပဋိစ္ဆာဒေတိ, အာပတ္တိ ဒုက္ကဋဿ – အာပတ္တာဓိကရဏပစ္စယာ ဣမာ စတဿော အာပတ္တိယော အာပဇ္ဇတိ။
တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ ? ကတိဟိ အဓိကရဏေဟိ ကတိသု ဌာနေသု ကတိဟိ သမထေဟိ သမ္မန္တိ?
တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ သိယာ အာစာရဝိပတ္တိံ။ စတုန္နံ အဓိကရဏာနံ – အာပတ္တာဓိကရဏံ။ သတ္တန္နံ အာပတ္တိက္ခန္ဓာနံ စတူဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန, သိယာ ထုလ္လစ္စယာပတ္တိက္ခန္ဓေန, သိယာ ပါစိတ္တိယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ ဝါစတော စ စိတ္တတော စ သမုဋ္ဌန္တိ။ ယာ သာ အာပတ္တိ အနဝသေသာ သာ အာပတ္တိ န ကတမေန အဓိကရဏေန, န ကတမမှိ ဌာနေ, န ကတမေန သမထေန သမ္မတိ။ ယာ တာ အာပတ္တိယော လဟုကာ တာ အာပတ္တိယော ဧကေန အဓိကရဏေန – ကိစ္စာဓိကရဏေန; တီသု ဌာနေသု – သံဃမဇ္ဈေ, ဂဏမဇ္ဈေ, ပုဂ္ဂလဿ သန္တိကေ; တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စ။
၃၄၇. ကိစ္စာဓိကရဏံ အာပတ္တာနာပတ္တီတိ? ကိစ္စာဓိကရဏံ န အာပတ္တိ။ ကိံ ပန ကိစ္စာဓိကရဏပစ္စယာ အာပတ္တိံ အာပဇ္ဇေယျာတိ? အာမ, ကိစ္စာဓိကရဏပစ္စယာ အာပတ္တိံ အာပဇ္ဇေယျ။ ကိစ္စာဓိကရဏပစ္စယာ ကတိ အာပတ္တိယော အာပဇ္ဇတိ? ကိစ္စာဓိကရဏပစ္စယာ ပဉ္စ အာပတ္တိယော အာပဇ္ဇတိ။ ဥက္ခိတ္တာနုဝတ္တိကာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇတိ, ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ ပါရာဇိကဿ; ဘေဒကာနုဝတ္တကာ ဘိက္ခူ ယာဝတတိယံ သမနုဘာသနာယ န ပဋိနိဿဇ္ဇန္တိ, အာပတ္တိ သံဃာဒိသေသဿ; ပါပိကာယ ဒိဋ္ဌိယာ ယာဝတတိယံ သမနုဘာသနာယ န ပဋိနိဿဇ္ဇန္တိ, အာပတ္တိ ပါစိတ္တိယဿ – ကိစ္စာဓိကရဏပစ္စယာ ဣမာ ပဉ္စ အာပတ္တိယော အာပဇ္ဇတိ။
တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? ကတိဟိ အဓိကရဏေဟိ ကတိသု ဌာနေသု ကတိဟိ သမထေဟိ သမ္မန္တိ?
တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ သိယာ အာစာရဝိပတ္တိံ။ စတုန္နံ အဓိကရဏာနံ – အာပတ္တာဓိကရဏံ။ သတ္တန္နံ အာပတ္တိက္ခန္ဓာနံ ပဉ္စဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန, သိယာ သံဃာဒိသေသာပတ္တိက္ခန္ဓေန, သိယာ ထုလ္လစ္စယာပတ္တိက္ခန္ဓေန, သိယာ ပါစိတ္တိယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ ဝါစတော စ စိတ္တတော စ သမုဋ္ဌန္တိ။ ယာ သာ အာပတ္တိ အနဝသေသာ သာ အာပတ္တိ န ကတမေန အဓိကရဏေန, န ကတမမှိ ဌာနေ, န ကတမေန သမထေန သမ္မတိ။ ယာ သာ အာပတ္တိ ဂရုကာ သာ အာပတ္တိ ဧကေန အဓိကရဏေန – ကိစ္စာဓိကရဏေန; ဧကမှိ ဌာနေ – သံဃမဇ္ဈေ; ဒွီဟိ သမထေဟိ သမ္မတိ – သမ္မုခါဝိနယေန စ ပဋိညာတကရဏေန စ။ ယာ တာ အာပတ္တိယော လဟုကာ တာ အာပတ္တိယော ဧကေန အဓိကရဏေန – ကိစ္စာဓိကရဏေန; တီသု ဌာနေသု – သံဃမဇ္ဈေ, ဂဏမဇ္ဈေ, ပုဂ္ဂလဿ သန္တိကေ; တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စ။
၅. အဓိကရဏာဓိပ္ပါယော
၃၄၈. ဝိဝါဒါဓိကရဏံ ဟောတိ အနုဝါဒါဓိကရဏံ, ဟောတိ အာပတ္တာဓိကရဏံ, ဟောတိ ကိစ္စာဓိကရဏံ။ ဝိဝါဒါဓိကရဏံ န ဟောတိ အနုဝါဒါဓိကရဏံ, န ဟောတိ အာပတ္တာဓိကရဏံ, န ဟောတိ ကိစ္စာဓိကရဏံ; အပိ စ, ဝိဝါဒါဓိကရဏပစ္စယာ ဟောတိ အနုဝါဒါဓိကရဏံ, ဟောတိ အာပတ္တာဓိကရဏံ, ဟောတိ ကိစ္စာဓိကရဏံ။ ယထာ ကထံ ဝိယ? [စူဠဝ. ၂၁၅; ပရိ. ၃၁၄] ဣဓ ဘိက္ခူ ဝိဝဒန္တိ – ဓမ္မောတိ ဝါ အဓမ္မောတိ ဝါ ဒုဋ္ဌုလ္လာပတ္တီတိ ဝါ အဒုဋ္ဌုလ္လာပတ္တီတိ ဝါ။ ယံ တတ္ထ ဘဏ္ဍနံ ကလဟော ဝိဂ္ဂဟော ဝိဝါဒေါ နာနာဝါဒေါ အညထာဝါဒေါ ဝိပစ္စတာယ ဝေါဟာရော မေဓကံ, ဣဒံ ဝုစ္စတိ ဝိဝါဒါဓိကရဏံ။ ဝိဝါဒါဓိကရဏေ သံဃော ဝိဝဒတိ ဝိဝါဒါဓိကရဏံ။ ဝိဝဒမာနော အနုဝဒတိ အနုဝါဒါဓိကရဏံ။ အနုဝဒမာနော အာပတ္တိံ အာပဇ္ဇတိ အာပတ္တာဓိကရဏံ။ တာယ အာပတ္တိယာ သံဃော ကမ္မံ ကရောတိ ကိစ္စာဓိကရဏံ။ ဧဝံ ဝိဝါဒါဓိကရဏပစ္စယာ ဟောတိ အနုဝါဒါဓိကရဏံ, ဟောတိ အာပတ္တာဓိကရဏံ, ဟောတိ ကိစ္စာဓိကရဏံ။
အနုဝါဒါဓိကရဏံ ဟောတိ အာပတ္တာဓိကရဏံ, ဟောတိ ကိစ္စာဓိကရဏံ, ဟောတိ ဝိဝါဒါဓိကရဏံ။ အနုဝါဒါဓိကရဏံ န ဟောတိ အာပတ္တာဓိကရဏံ, န ဟောတိ ကိစ္စာဓိကရဏံ, န ဟောတိ ဝိဝါဒါဓိကရဏံ; အပိ စ, အနုဝါဒါဓိကရဏပစ္စယာ ဟောတိ အာပတ္တာဓိကရဏံ, ဟောတိ ကိစ္စာဓိကရဏံ, ဟောတိ ဝိဝါဒါဓိကရဏံ။ ယထာ ကထံ ဝိယ? ဣဓ ဘိက္ခူ ဘိက္ခုံ အနုဝဒန္တိ သီလဝိပတ္တိယာ ဝါ အာစာရဝိပတ္တိယာ ဝါ ဒိဋ္ဌိဝိပတ္တိယာ ဝါ အာဇီဝဝိပတ္တိယာ ဝါ။ ယော တတ္ထ အနုဝါဒေါ အနုဝဒနာ အနုလ္လပနာ အနုဘဏနာ အနုသမ္ပဝင်္ကတာ အဗ္ဘုဿဟနတာ အနုဗလပ္ပဒါနံ, ဣဒံ ဝုစ္စတိ အနုဝါဒါဓိကရဏံ။ အနုဝါဒါဓိကရဏေ သံဃော ဝိဝဒတိ, ဝိဝါဒါဓိကရဏံ။ ဝိဝဒမာနော အနုဝဒတိ, အနုဝါဒါဓိကရဏံ။ အနုဝဒမာနော အာပတ္တိံ အာပဇ္ဇတိ, အာပတ္တာဓိကရဏံ။ တာယ အာပတ္တိယာ သံဃော ကမ္မံ ကရောတိ, ကိစ္စာဓိကရဏံ။ ဧဝံ အနုဝါဒါဓိကရဏပစ္စယာ ဟောတိ အာပတ္တာဓိကရဏံ, ဟောတိ ကိစ္စာဓိကရဏံ, ဟောတိ ဝိဝါဒါဓိကရဏံ။
အာပတ္တာဓိကရဏံ ဟောတိ ကိစ္စာဓိကရဏံ, ဟောတိ ဝိဝါဒါဓိကရဏံ, ဟောတိ အနုဝါဒါဓိကရဏံ။ အာပတ္တာဓိကရဏံ န ဟောတိ ကိစ္စာဓိကရဏံ, န ဟောတိ ဝိဝါဒါဓိကရဏံ, န ဟောတိ အနုဝါဒါဓိကရဏံ; အပိ စ, အာပတ္တာဓိကရဏပစ္စယာ ဟောတိ ကိစ္စာဓိကရဏံ, ဟောတိ ဝိဝါဒါဓိကရဏံ, ဟောတိ အနုဝါဒါဓိကရဏံ။ ယထာ ကထံ ဝိယ? [စူဠဝ. ၂၁၅; ပရိ. ၃၄၈] ပဉ္စပိ အာပတ္တိက္ခန္ဓာ အာပတ္တာဓိကရဏံ, သတ္တပိ အာပတ္တိက္ခန္ဓာ အာပတ္တာဓိကရဏံ, ဣဒံ ဝုစ္စတိ အာပတ္တာဓိကရဏံ။ အာပတ္တာဓိကရဏေ သံဃော ဝိဝဒတိ ဝိဝါဒါဓိကရဏံ။ ဝိဝဒမာနော အနုဝဒတိ အနုဝါဒါဓိကရဏံ။ အနုဝဒမာနော အာပတ္တိံ အာပဇ္ဇတိ အာပတ္တာဓိကရဏံ။ တာယ အာပတ္တိယာ သံဃော ကမ္မံ ကရောတိ ကိစ္စာဓိကရဏံ။ ဧဝံ အာပတ္တာဓိကရဏပစ္စယာ ဟောတိ ကိစ္စာဓိကရဏံ, ဟောတိ ဝိဝါဒါဓိကရဏံ, ဟောတိ အနုဝါဒါဓိကရဏံ။
ကိစ္စာဓိကရဏံ ဟောတိ ဝိဝါဒါဓိကရဏံ, ဟောတိ အနုဝါဒါဓိကရဏံ, ဟောတိ အာပတ္တာဓိကရဏံ။ ကိစ္စာဓိကရဏံ န ဟောတိ ဝိဝါဒါဓိကရဏံ, န ဟောတိ အနုဝါဒါဓိကရဏံ, န ဟောတိ အာပတ္တာဓိကရဏံ; အပိ စ, ကိစ္စာဓိကရဏပစ္စယာ ဟောတိ ဝိဝါဒါဓိကရဏံ, ဟောတိ အနုဝါဒါဓိကရဏံ, ဟောတိ အာပတ္တာဓိကရဏံ။ ယထာ ကထံ ဝိယ? ယာ သံဃဿ ကိစ္စယတာ ကရဏီယတာ အပလောကနကမ္မံ ဉတ္တိကမ္မံ ဉတ္တိဒုတိယကမ္မံ ဉတ္တိစတုတ္ထကမ္မံ, ဣဒံ ဝုစ္စတိ ကိစ္စာဓိကရဏံ။ ကိစ္စာဓိကရဏေ သံဃော ဝိဝဒတိ ဝိဝါဒါဓိကရဏံ။ ဝိဝဒမာနော အနုဝဒတိ အနုဝါဒါဓိကရဏံ။ အနုဝဒမာနော အာပတ္တိံ အာပဇ္ဇတိ အာပတ္တာဓိကရဏံ။ တာယ အာပတ္တိယာ သံဃော ကမ္မံ ကရောတိ ကိစ္စာဓိကရဏံ။ ဧဝံ ကိစ္စာဓိကရဏပစ္စယာ ဟောတိ ဝိဝါဒါဓိကရဏံ, ဟောတိ အနုဝါဒါဓိကရဏံ, ဟောတိ အာပတ္တာဓိကရဏံ။
၆. ပုစ္ဆာဝါရော
၃၄၉. ယတ္ထ သတိဝိနယော တတ္ထ သမ္မုခါဝိနယော? ယတ္ထ သမ္မုခါဝိနယော တတ္ထ သတိဝိနယော? ယတ္ထ အမူဠှဝိနယော တတ္ထ သမ္မုခါဝိနယော? ယတ္ထ သမ္မုခါဝိနယော တတ္ထ အမူဠှဝိနယော? ယတ္ထ ပဋိညာတကရဏံ တတ္ထ သမ္မုခါဝိနယော? ယတ္ထ သမ္မုခါဝိနယော တတ္ထ ပဋိညာတကရဏံ? ယတ္ထ ယေဘုယျသိကာ တတ္ထ သမ္မုခါဝိနယော? ယတ္ထ သမ္မုခါဝိနယော တတ္ထ ယေဘုယျသိကာ? ယတ္ထ တဿပါပိယသိကာ တတ္ထ သမ္မုခါဝိနယော? ယတ္ထ သမ္မုခါဝိနယော တတ္ထ တဿပါပိယသိကာ? ယတ္ထ တိဏဝတ္ထာရကော တတ္ထ သမ္မုခါဝိနယော? ယတ္ထ သမ္မုခါဝိနယော တတ္ထ တိဏဝတ္ထာရကော?
၇. ဝိဿဇ္ဇနာဝါရော
၃၅၀. ယသ္မိံ သမယေ သမ္မုခါဝိနယေန စ သတိဝိနယေန စ အဓိကရဏံ ဝူပသမ္မတိ – ယတ္ထ သတိဝိနယော တတ္ထ သမ္မုခါဝိနယော, ယတ္ထ သမ္မုခါဝိနယော တတ္ထ သတိဝိနယော, န တတ္ထ အမူဠှဝိနယော, န တတ္ထ ပဋိညာတကရဏံ, န တတ္ထ ယေဘုယျသိကာ, န တတ္ထ တဿပါပိယသိကာ, န တတ္ထ တိဏဝတ္ထာရကော။ ယသ္မိံ သမယေ သမ္မုခါဝိနယေန စ အမူဠှဝိနယေန စ။ပေ.။ သမ္မုခါဝိနယေန စ ပဋိညာတကရဏေန စ။ပေ.။ သမ္မုခါဝိနယေန စ ယေဘုယျသိကာယ စ။ပေ.။ သမ္မုခါဝိနယေန စ တဿပါပိယသိကာယ စ။ပေ.။ သမ္မုခါဝိနယေန စ တိဏဝတ္ထာရကေန စ အဓိကရဏံ ဝူပသမ္မတိ – ယတ္ထ တိဏဝတ္ထာရကော တတ္ထ သမ္မုခါဝိနယော, ယတ္ထ သမ္မုခါဝိနယော တတ္ထ တိဏဝတ္ထာရကော, န တတ္ထ သတိဝိနယော, န တတ္ထ အမူဠှဝိနယော, န တတ္ထ ပဋိညာတကရဏံ, န တတ္ထ ယေဘုယျသိကာ, န တတ္ထ တဿပါပိယသိကာ။
၈. သံသဋ္ဌဝါရော
၃၅၁. သမ္မုခါဝိနယောတိ ဝါ သတိဝိနယောတိ ဝါ – ဣမေ ဓမ္မာ သံသဋ္ဌာ ဥဒါဟု ဝိသံသဋ္ဌာ? လဗ္ဘာ စ ပနိမေသံ ဓမ္မာနံ ဝိနိဗ္ဘုဇိတွာ ဝိနိဗ္ဘုဇိတွာ နာနာကရဏံ ပညာပေတုံ? သမ္မုခါဝိနယောတိ ဝါ အမူဠှဝိနယောတိ ဝါ။ပေ.။ သမ္မုခါဝိနယောတိ ဝါ ပဋိညာတကရဏန္တိ ဝါ။ သမ္မုခါဝိနယောတိ ဝါ ယေဘုယျသိကာတိ ဝါ။ သမ္မုခါဝိနယောတိ ဝါ တဿပါပိယသိကာတိ ဝါ။ သမ္မုခါဝိနယောတိ ဝါ တိဏဝတ္ထာရကောတိ – ဣမေ ဓမ္မာ သံသဋ္ဌာ ဥဒါဟု ဝိသံသဋ္ဌာ ? လဗ္ဘာ စ ပနိမေသံ ဓမ္မာနံ ဝိနိဗ္ဘုဇိတွာ ဝိနိဗ္ဘုဇိတွာ နာနာကရဏံ ပညာပေတုံ?
သမ္မုခါဝိနယောတိ ဝါ သတိဝိနယောတိ ဝါ – ဣမေ ဓမ္မာ သံသဋ္ဌာ, နော ဝိသံသဋ္ဌာ; န စ လဗ္ဘာ ဣမေသံ ဓမ္မာနံ ဝိနိဗ္ဘုဇိတွာ ဝိနိဗ္ဘုဇိတွာ နာနာကရဏံ ပညာပေတုံ။ သမ္မုခါဝိနယောတိ ဝါ အမူဠှဝိနယောတိ ဝါ။ပေ.။ သမ္မုခါဝိနယောတိ ဝါ ပဋိညာတကရဏန္တိ ဝါ။ သမ္မုခါဝိနယောတိ ဝါ ယေဘုယျသိကာတိ ဝါ။ သမ္မုခါဝိနယောတိ ဝါ တဿပါပိယသိကာတိ ဝါ။ သမ္မုခါဝိနယောတိ ဝါ တိဏဝတ္ထာရကောတိ ဝါ – ဣမေ ဓမ္မာ သံသဋ္ဌာ, နော ဝိသံသဋ္ဌာ; န စ လဗ္ဘာ ဣမေသံ ဓမ္မာနံ ဝိနိဗ္ဘုဇိတွာ ဝိနိဗ္ဘုဇိတွာ နာနာကရဏံ ပညာပေတုံ။
၉. သတ္တသမထနိဒါနံ
၃၅၂. သမ္မုခါဝိနယော ကိံနိဒါနော, ကိံသမုဒယော, ကိံဇာတိကော, ကိံပဘဝေါ, ကိံသမ္ဘာရော ကိံသမုဋ္ဌာနော? သတိဝိနယော ကိံနိဒါနော, ကိံသမုဒယော, ကိံဇာတိကော, ကိံပဘဝေါ, ကိံသမ္ဘာရော, ကိံသမုဋ္ဌာနော? အမူဠှဝိနယော ကိံနိဒါနော, ကိံသမုဒယော, ကိံဇာတိကော, ကိံပဘဝေါ, ကိံသမ္ဘာရော, ကိံသမုဋ္ဌာနော? ပဋိညာတကရဏံ ကိံနိဒါနံ, ကိံသမုဒယံ, ကိံဇာတိကံ, ကိံပဘဝံ, ကိံသမ္ဘာရံ, ကိံသမုဋ္ဌာနံ? ယေဘုယျသိကာ ကိံနိဒါနာ, ကိံသမုဒယာ, ကိံဇာတိကာ, ကိံပဘဝါ, ကိံသမ္ဘာရာ, ကိံသမုဋ္ဌာနာ? တဿပါပိယသိကာ ကိံနိဒါနာ, ကိံသမုဒယာ, ကိံဇာတိကာ, ကိံပဘဝါ, ကိံသမ္ဘာရာ, ကိံသမုဋ္ဌာနာ တိဏဝတ္ထာရကော ကိံနိဒါနော, ကိံသမုဒယော, ကိံဇာတိကော, ကိံပဘဝေါ, ကိံသမ္ဘာရော, ကိံသမုဋ္ဌာနော?
သမ္မုခါဝိနယော နိဒါနနိဒါနော, နိဒါနသမုဒယော, နိဒါနဇာတိကော, နိဒါနပဘဝေါ, နိဒါနသမ္ဘာရော, နိဒါနသမုဋ္ဌာနော။ သတိဝိနယော။ပေ.။ အမူဠှဝိနယော။ပေ.။ ပဋိညာတကရဏံ နိဒါနနိဒါနံ, နိဒါနသမုဒယံ, နိဒါနဇာတိကံ, နိဒါနပဘဝံ, နိဒါနသမ္ဘာရံ, နိဒါနသမုဋ္ဌာနံ။ ယေဘုယျသိကာ။ပေ.။ တဿပါပိယသိကာ နိဒါနနိဒါနာ, နိဒါနသမုဒယာ, နိဒါနဇာတိကာ, နိဒါနပဘဝါ, နိဒါနသမ္ဘာရာ , နိဒါနသမုဋ္ဌာနာ။ တိဏဝတ္ထာရကော နိဒါနနိဒါနော, နိဒါနသမုဒယော, နိဒါနဇာတိကော, နိဒါနပဘဝေါ, နိဒါနသမ္ဘာရော, နိဒါနသမုဋ္ဌာနော။
သမ္မုခါဝိနယော ကိံနိဒါနော, ကိံသမုဒယော, ကိံဇာတိကော, ကိံပဘဝေါ, ကိံသမ္ဘာရော, ကိံသမုဋ္ဌာနော ? သတိဝိနယော။ပေ.။ အမူဠှဝိနယော။ပေ.။ ပဋိညာတကရဏံ။ပေ.။ ယေဘုယျသိကာ။ပေ.။ တဿပါပိယသိကာ။ပေ.။ တိဏဝတ္ထာရကော ကိံနိဒါနော, ကိံသမုဒယော, ကိံဇာတိကော, ကိံပဘဝေါ, ကိံသမ္ဘာရော, ကိံသမုဋ္ဌာနော?
သမ္မုခါဝိနယော ဟေတုနိဒါနော, ဟေတုသမုဒယော, ဟေတုဇာတိကော, ဟေတုပဘဝေါ, ဟေတုသမ္ဘာရော, ဟေတုသမုဋ္ဌာနော ။ သတိဝိနယော။ပေ.။ အမူဠှဝိနယော။ပေ.။ ပဋိညာတကရဏံ ဟေတုနိဒါနံ, ဟေတုသမုဒယံ, ဟေတုဇာတိကံ, ဟေတုပဘဝံ, ဟေတုသမ္ဘာရံ, ဟေတုသမုဋ္ဌာနံ။ ယေဘုယျသိကာ။ပေ.။ တဿပါပိယသိကာ ဟေတုနိဒါနာ, ဟေတုသမုဒယာ, ဟေတုဇာတိကာ, ဟေတုပဘဝါ, ဟေတုသမ္ဘာရာ, ဟေတုသမုဋ္ဌာနာ။ တိဏဝတ္ထာရကော ဟေတုနိဒါနော, ဟေတုသမုဒယော, ဟေတုဇာတိကော, ဟေတုပဘဝေါ, ဟေတုသမ္ဘာရော, ဟေတုသမုဋ္ဌာနော။
သမ္မုခါဝိနယော ကိံနိဒါနော, ကိံသမုဒယော, ကိံဇာတိကော, ကိံပဘဝေါ, ကိံသမ္ဘာရော, ကိံသမုဋ္ဌာနော? သတိဝိနယော။ပေ.။ အမူဠှဝိနယော။ပေ.။ ပဋိညာတကရဏံ။ပေ.။ ယေဘုယျသိကာ။ပေ.။ တဿပါပိယသိကာ။ပေ.။ တိဏဝတ္ထာရကော ကိံနိဒါနော, ကိံသမုဒယော, ကိံဇာတိကော, ကိံပဘဝေါ, ကိံသမ္ဘာရော, ကိံသမုဋ္ဌာနော? သမ္မုခါဝိနယော ပစ္စယနိဒါနော, ပစ္စယသမုဒယော, ပစ္စယဇာတိကော, ပစ္စယပဘဝေါ, ပစ္စယသမ္ဘာရော, ပစ္စယသမုဋ္ဌာနော။ သတိဝိနယော။ပေ.။ အမူဠှဝိနယော။ပေ.။ ပဋိညာတကရဏံ ပစ္စယနိဒါနံ, ပစ္စယသမုဒယံ, ပစ္စယဇာတိကံ, ပစ္စယပဘဝံ, ပစ္စယသမ္ဘာရံ, ပစ္စယသမုဋ္ဌာနံ။ ယေဘုယျသိကာ။ပေ.။ တဿပါပိယသိကာ ပစ္စယနိဒါနာ, ပစ္စယသမုဒယာ, ပစ္စယဇာတိကာ, ပစ္စယပဘဝါ, ပစ္စယသမ္ဘာရာ, ပစ္စယသမုဋ္ဌာနာ။ တိဏဝတ္ထာရကော ပစ္စယနိဒါနော, ပစ္စယသမုဒယော, ပစ္စယဇာတိကော, ပစ္စယပဘဝေါ, ပစ္စယသမ္ဘာရော, ပစ္စယသမုဋ္ဌာနော။
၃၅၃. သတ္တန္နံ သမထာနံ ကတိ မူလာနိ, ကတိ သမုဋ္ဌာနာ? သတ္တန္နံ သမထာနံ ဆဗ္ဗီသ မူလာနိ, ဆတ္တိံသ သမုဋ္ဌာနာ။ သတ္တန္နံ သမထာနံ ကတမာနိ ဆဗ္ဗီ မူလာနိ? သမ္မုခါဝိနယဿ စတ္တာရိ မူလာနိ။ သံဃသမ္မုခတာ, ဓမ္မသမ္မုခတာ, ဝိနယသမ္မုခတာ, ပုဂ္ဂလသမ္မုခတာ; သတိဝိနယဿ စတ္တာရိ မူလာနိ; အမူဠှဝိနယဿ စတ္တာရိ မူလာနိ; ပဋိညာတကရဏဿ ဒွေ မူလာနိ – ယော စ ဒေသေတိ ယဿ စ ဒေသေတိ; ယေဘုယျသိကာယ စတ္တာရိ မူလာနိ; တဿပါပိယသိကာယ စတ္တာရိ မူလာနိ; တိဏဝတ္ထာရကဿ စတ္တာရိ မူလာနိ – သံဃသမ္မုခတာ, ဓမ္မသမ္မုခတာ, ဝိနယသမ္မုခတာ, ပုဂ္ဂလသမ္မုခတာ – သတ္တန္နံ သမထာနံ ဣမာနိ ဆဗ္ဗီသ မူလာနိ။
သတ္တန္နံ သမထာနံ ကတမေ ဆတ္တိံသ သမုဋ္ဌာနာ? သတိဝိနယဿ ကမ္မဿ ကိရိယာ, ကရဏံ, ဥပဂမနံ, အဇ္ဈုပဂမနံ, အဓိဝါသနာ, အပ္ပဋိက္ကောသနာ။ အမူဠှဝိနယဿ ကမ္မဿ။ပေ.။ ပဋိညာတကရဏဿ ကမ္မဿ။ ယေဘုယျသိကာယ ကမ္မဿ။ တဿပါပိယသိကာယ ကမ္မဿ။ တိဏဝတ္ထာရကဿ ကမ္မဿ ကိရိယာ, ကရဏံ, ဥပဂမနံ, အဇ္ဈုပဂမနံ, အဓိဝါသနာ, အပ္ပဋိက္ကောသနာ – သတ္တန္နံ သမထာနံ ဣမေ ဆတ္တိံသ သမုဋ္ဌာနာ။
၁၀. သတ္တသမထနာနတ္ထာဒိ
၃၅၄. သမ္မုခါဝိနယောတိ ဝါ သတိဝိနယောတိ ဝါ – ဣမေ ဓမ္မာ နာနတ္ထာ နာနာဗျဉ္ဇနာ ဥဒါဟု ဧကတ္ထာ ဗျဉ္ဇနမေဝ နာနံ? သမ္မုခါဝိနယောတိ ဝါ အမူဠှဝိနယောတိ ဝါ။ပေ.။ သမ္မုခါဝိနယောတိ ဝါ ပဋိညာတကရဏန္တိ ဝါ။ သမ္မုခါဝိနယောတိ ဝါ ယေဘုယျသိကာတိ ဝါ။ သမ္မုခါဝိနယောတိ ဝါ တဿပါပိယသိကာတိ ဝါ။ သမ္မုခါဝိနယောတိ ဝါ တိဏဝတ္ထာရကောတိ ဝါ – ဣမေ ဓမ္မာ နာနတ္ထာ နာနာဗျဉ္ဇနာ ဥဒါဟု ဧကတ္ထာ ဗျဉ္ဇနမေဝ နာနံ? သမ္မုခါဝိနယောတိ ဝါ သတိဝိနယောတိ ဝါ – ဣမေ ဓမ္မာ နာနတ္ထာ စေဝ နာနာဗျဉ္ဇနာ စ။ သမ္မုခါဝိနယောတိ ဝါ အမူဠှဝိနယောတိ ဝါ။ပေ.။ သမ္မုခါဝိနယောတိ ဝါ ပဋိညာတကရဏန္တိ ဝါ။ သမ္မုခါဝိနယောတိ ဝါ ယေဘုယျသိကာတိ ဝါ။ သမ္မုခါဝိနယောတိ ဝါ တဿပါပိယသိကာတိ ဝါ။ သမ္မုခါဝိနယောတိ ဝါ တိဏဝတ္ထာရကောတိ ဝါ – ဣမေ ဓမ္မာ နာနတ္ထာ စေဝ နာနာ ဗျဉ္ဇနာ စ။
၃၅၅. [စူဠဝ. ၂၂၄] ဝိဝါဒေါ ဝိဝါဒါဓိကရဏံ, ဝိဝါဒေါ နော အဓိကရဏံ, အဓိကရဏံ နော ဝိဝါဒေါ, အဓိကရဏဉ္စေဝ ဝိဝါဒေါ စ? သိယာ ဝိဝါဒေါ ဝိဝါဒါဓိကရဏံ, သိယာ ဝိဝါဒေါ နော အဓိကရဏံ, သိယာ အဓိကရဏံ နော ဝိဝါဒေါ, သိယာ အဓိကရဏဉ္စေဝ ဝိဝါဒေါ စ။
တတ္ထ ကတမော ဝိဝါဒေါ ဝိဝါဒါဓိကရဏံ? ဣဓ ဘိက္ခူ ဝိဝဒန္တိ ဓမ္မောတိ ဝါ အဓမ္မောတိ ဝါ။ပေ.။ ဒုဋ္ဌုလ္လာ အာပတ္တီတိ ဝါ အဒုဋ္ဌုလ္လာ အာပတ္တီတိ ဝါ။ ယံ တတ္ထ ဘဏ္ဍနံ, ကလဟော, ဝိဂ္ဂဟော, ဝိဝါဒေါ, နာနာဝါဒေါ, အညထာဝါဒေါ, ဝိပစ္စတာယ ဝေါဟာရော, မေဓကံ – အယံ ဝိဝါဒေါ ဝိဝါဒါဓိကရဏံ။
တတ္ထ ကတမော ဝိဝါဒေါ နော အဓိကရဏံ? မာတာပိ ပုတ္တေန ဝိဝဒတိ, ပုတ္တောပိ မာတရာ ဝိဝဒတိ, ပိတာပိ ပုတ္တေန ဝိဝဒတိ, ပုတ္တောပိ ပိတရာ ဝိဝဒတိ, ဘာတာပိ ဘာတရာ ဝိဝဒတိ, ဘာတာပိ ဘဂိနိယာ ဝိဝဒတိ, ဘဂိနီပိ ဘာတရာ ဝိဝဒတိ, သဟာယောပိ သဟာယေန ဝိဝဒတိ – အယံ ဝိဝါဒေါ နော အဓိကရဏံ။
တတ္ထ ကတမံ အဓိကရဏံ နော ဝိဝါဒေါ? အနုဝါဒါဓိကရဏံ, အာပတ္တာဓိကရဏံ, ကိစ္စာဓိကရဏံ – ဣဒံ အဓိကရဏံ နော ဝိဝါဒေါ။
တတ္ထ ကတမံ အဓိကရဏဉ္စေဝ ဝိဝါဒေါ စ? ဝိဝါဒါဓိကရဏံ အဓိကရဏဉ္စေဝ ဝိဝါဒေါ စ။
၃၅၆. [စူဠဝ. ၂၂၄ အာဒယော] အနုဝါဒေါ အနုဝါဒါဓိကရဏံ, အနုဝါဒေါ နော အဓိကရဏံ, အဓိကရဏံ နော အနုဝါဒေါ, အဓိကရဏဉ္စေဝ အနုဝါဒေါ စ? သိယာ အနုဝါဒေါ အနုဝါဒါဓိကရဏံ, သိယာ အနုဝါဒေါ နော အဓိကရဏံ, သိယာ အဓိကရဏံ နော အနုဝါဒေါ, သိယာ အဓိကရဏဉ္စေဝ အနုဝါဒေါ စ။
တတ္ထ ကတမော အနုဝါဒေါ အနုဝါဒါဓိကရဏံ? ဣဓ ဘိက္ခူ ဘိက္ခုံ အနုဝဒန္တိ သီလဝိပတ္တိယာ ဝါ အာစာရဝိပတ္တိယာ ဝါ ဒိဋ္ဌိဝိပတ္တိယာ ဝါ အာဇီဝဝိပတ္တိယာ ဝါ။ ယော တတ္ထ အနုဝါဒေါ, အနုဝဒနာ အနုလ္လပနာ အနုဘဏနာ အနုသမ္ပဝင်္ကတာ အဗ္ဘုဿဟနတာ အနုဗလပ္ပဒါနံ – အယံ အနုဝါဒေါ အနုဝါဒါဓိကရဏံ။
တတ္ထ ကတမော အနုဝါဒေါ နော အဓိကရဏံ? မာတာပိ ပုတ္တံ အနုဝဒတိ, ပုတ္တောပိ မာတရံ အနုဝဒတိ, ပိတာပိ ပုတ္တံ အနုဝဒတိ, ပုတ္တောပိ ပိတရံ အနုဝဒတိ, ဘာတာပိ ဘာတရံ အနုဝဒတိ, ဘာတာပိ ဘဂိနိံ အနုဝဒတိ, ဘဂိနီပိ ဘာတရံ အနုဝဒတိ, သဟာယောပိ သဟာယံ အနုဝဒတိ – အယံ အနုဝါဒေါ နော အဓိကရဏံ။
တတ္ထ ကတမံ အဓိကရဏံ နော အနုဝါဒေါ? အာပတ္တာဓိကရဏံ ကိစ္စာဓိကရဏံ ဝိဝါဒါဓိကရဏံ – ဣဒံ အဓိကရဏံ နော အနုဝါဒေါ။
တတ္ထ ကတမံ အဓိကရဏဉ္စေဝ အနုဝါဒေါ စ? အနုဝါဒါဓိကရဏံ အဓိကရဏဉ္စေဝ အနုဝါဒေါ စ။
၃၅၇. အာပတ္တိ အာပတ္တာဓိကရဏံ, အာပတ္တိ နော အဓိကရဏံ, အဓိကရဏံ နော အာပတ္တိ, အဓိကရဏဉ္စေဝ အာပတ္တိ စ? သိယာ အာပတ္တိ အာပတ္တာဓိကရဏံ, သိယာ အာပတ္တိ နော အဓိကရဏံ, သိယာ အဓိကရဏံ နော အာပတ္တိ, သိယာ အဓိကရဏဉ္စေဝ အာပတ္တိ စ။
တတ္ထ ကတမာ အာပတ္တိ အာပတ္တာဓိကရဏံ? ပဉ္စပိ အာပတ္တိက္ခန္ဓာ အာပတ္တာဓိကရဏံ ။ သတ္တပိ အာပတ္တိက္ခန္ဓာ အာပတ္တာဓိကရဏံ။ အယံ အာပတ္တိ အာပတ္တာဓိကရဏံ။
တတ္ထ ကတမာ အာပတ္တိ နော အဓိကရဏံ? သောတာပတ္တိ သမာပတ္တိ – အယံ အာပတ္တိ နော အဓိကရဏံ။
တတ္ထ ကတမံ အဓိကရဏံ နော အာပတ္တိ? ကိစ္စာဓိကရဏံ ဝိဝါဒါဓိကရဏံ အနုဝါဒါဓိကရဏံ – ဣဒံ အဓိကရဏံ နော အာပတ္တိ။
တတ္ထ ကတမံ အဓိကရဏဉ္စေဝ အာပတ္တိ စ? အာပတ္တာဓိကရဏံ အဓိကရဏဉ္စေဝ အာပတ္တိ စ။
၃၅၈. [စူဠဝ. ၂၂၃] ကိစ္စံ ကိစ္စာဓိကရဏံ, ကိစ္စံ နော အဓိကရဏံ, အဓိကရဏံ နော ကိစ္စံ, အဓိကရဏဉ္စေဝ ကိစ္စဉ္စ? သိယာ ကိစ္စံ ကိစ္စာဓိကရဏံ, သိယာ ကိစ္စံ နော အဓိကရဏံ, သိယာ အဓိကရဏံ နော ကိစ္စံ, သိယာ အဓိကရဏဉ္စေဝ ကိစ္စဉ္စ။
တတ္ထ ကတမံ ကိစ္စံ ကိစ္စာဓိကရဏံ? ယာ သံဃဿ ကိစ္စယတာ ကရဏီယတာ အပလောကနကမ္မံ ဉတ္တိကမ္မံ ဉတ္တိဒုတိယကမ္မံ ဉတ္တိစတုတ္ထကမ္မံ – ဣဒံ ကိစ္စံ ကိစ္စာဓိကရဏံ။
တတ္ထ ကတမံ ကိစ္စံ နော အဓိကရဏံ? အာစရိယကိစ္စံ ဥပဇ္ဈာယကိစ္စံ [ဥပဇ္ဈာယကိစ္စံ သကိစ္စံ (က.)] သမာနုပဇ္ဈာယကိစ္စံ သမာနာစရိယကိစ္စံ – ဣဒံ ကိစ္စံ နော အဓိကရဏံ။
တတ္ထ ကတမံ အဓိကရဏံ နော ကိစ္စံ? ဝိဝါဒါဓိကရဏံ အနုဝါဒါဓိကရဏံ အာပတ္တာဓိကရဏံ – ဣဒံ အဓိကရဏံ နော ကိစ္စံ။
တတ္ထ ကတမံ အဓိကရဏဉ္စေဝ ကိစ္စဉ္စ? ကိစ္စာဓိကရဏံ အဓိကရဏဉ္စေဝ ကိစ္စံ စာတိ။
အဓိကရဏဘေဒေါ နိဋ္ဌိတော။
တဿုဒ္ဒါနံ –
အဓိကရဏံ ဥက္ကောဋာ၊ အာကာရာ ပုဂ္ဂလေန စ။
နိဒါနဟေတုပစ္စယာ၊ မူလံ သမုဋ္ဌာနေန စ။
အာပတ္တိ ဟောတိ ယတ္ထ စ၊ သံသဋ္ဌာ နိဒါနေန စ [သံသဋ္ဌာ နိဒါနပဘဝါ (သီ.)]။
ဟေတုပစ္စယမူလာနိ၊ သမုဋ္ဌာနေန ဗျဉ္ဇနာ။
ဝိဝါဒေါ အဓိကရဏန္တိ၊ ဘေဒါဓိကရဏေ ဣဒန္တိ။