ဂါထာသင်္ဂဏိကံ
၁. သတ္တနဂရေသု ပညတ္တသိက္ခာပဒံ
၃၃၅.
ဧကံသံ စီဝရံ ကတွာ၊ ပဂ္ဂဏှိတွာန အဉ္ဇလိံ။
အာသီသမာနရူပေါဝ [အာသိံသမာနရူပေါဝ (သီ. သျာ.)]၊ ကိဿ တွံ ဣဓ မာဂတော။
ဒွီသု ဝိနယေသု ယေ ပညတ္တာ။
ဥဒ္ဒေသံ အာဂစ္ဆန္တိ ဥပေါသထေသု။
ကတိ တေ သိက္ခာပဒါ ဟောန္တိ။
ကတိသု နဂရေသု ပညတ္တာ။
ဘဒ္ဒကော တေ ဥမ္မင်္ဂေါ၊ ယောနိသော ပရိပုစ္ဆသိ။
တဂ္ဃ တေ အဟမက္ခိဿံ၊ ယထာသိ ကုသလော တထာ။
ဒွီသု ဝိနယေသု ယေ ပညတ္တာ။
ဥဒ္ဒေသံ အာဂစ္ဆန္တိ ဥပေါသထေသု။
အဍ္ဎုဍ္ဎသတာနိ တေ ဟောန္တိ။
သတ္တသု နဂရေသု ပညတ္တာ။
ကတမေသု သတ္တသု နဂရေသု ပညတ္တာ။
ဣင်္ဃ မေ တွံ ဗျာကရ နံ [ဣင်္ဃ မေ တံ ဗျာကရ (က.)]။
တံ ဝစနပထံ [တဝ ဝစနပထံ (သျာ.)] နိသာမယိတွာ။
ပဋိပဇ္ဇေမ ဟိတာယ နော သိယာ။
ဝေသာလိယံ ရာဇဂဟေ၊ သာဝတ္ထိယဉ္စ အာဠဝိယံ။
ကောသမ္ဗိယဉ္စ သက္ကေသု၊ ဘဂ္ဂေသု စေဝ ပညတ္တာ။
ကတိ ဝေသာလိယံ ပညတ္တာ၊ ကတိ ရာဇဂဟေ ကတာ။
သာဝတ္ထိယံ ကတိ ဟောန္တိ၊ ကတိ အာဠဝိယံ ကတာ။
ကတိ ကောသမ္ဗိယံ ပညတ္တာ၊ ကတိ သက္ကေသု ဝုစ္စန္တိ။
ကတိ ဘဂ္ဂေသု ပညတ္တာ၊ တံ မေ အက္ခာဟိ ပုစ္ဆိတော။
ဒသ ဝေသာလိယံ ပညတ္တာ၊ ဧကဝီသ ရာဇဂဟေ ကတာ။
ဆဦန တီဏိသတာနိ၊ သဗ္ဗေ သာဝတ္ထိယံ ကတာ။
ဆ အာဠဝိယံ ပညတ္တာ၊ အဋ္ဌ ကောသမ္ဗိယံ ကတာ။
အဋ္ဌ သက္ကေသု ဝုစ္စန္တိ၊ တယော ဘဂ္ဂေသု ပညတ္တာ။
ယေ ဝေသာလိယံ ပညတ္တာ၊ တေ သုဏောဟိ ယထာတထံ [ယထာကထံ (သီ. သျာ. ဧဝမုပရိပိ)]။
မေထုနဝိဂ္ဂဟုတ္တရိ၊ အတိရေကဉ္စ ကာဠကံ။
ဘူတံ ပရမ္ပရဘတ္တံ၊ ဒန္တပေါနေန [ဒန္တပေါဏေန (က.)] အစေလကော။
ဘိက္ခုနီသု စ အက္ကောသော၊ ဒသေတေ ဝေသာလိယံ ကတာ။
ယေ ရာဇဂဟေ ပညတ္တာ၊ တေ သုဏောဟိ ယထာတထံ။
အဒိန္နာဒါနံ ရာဇဂဟေ၊ ဒွေ အနုဒ္ဓံသနာ ဒွေပိ စ ဘေဒါ။
အန္တရဝါသကံ ရူပိယံ သုတ္တံ၊ ဥဇ္ဈာပနေန စ ပါစိတပိဏ္ဍံ ။
ဂဏဘောဇနံ ဝိကာလေ စ၊ စာရိတ္တံ နဟာနံ ဦနဝီသတိ။
စီဝရံ ဒတွာ ဝေါသာသန္တိ၊ ဧတေ ရာဇဂဟေ ကတာ။
ဂိရဂ္ဂစရိယာ တတ္ထေဝ၊ ဆန္ဒဒါနေန ဧကဝီသတိ။
ယေ သာဝတ္ထိယံ ပညတ္တာ၊ တေ သုဏောဟိ ယထာတထံ။
ပါရာဇိကာနိ စတ္တာရိ၊ သံဃာဒိသေသာ ဘဝန္တိ သောဠသ။
အနိယတာ စ ဒွေ ဟောန္တိ၊ နိဿဂ္ဂိယာ စတုဝီသတိ။
ဆပညာသသတဉ္စေဝ၊ ခုဒ္ဒကာနိ ပဝုစ္စန္တိ။
ဒသယေဝ စ ဂါရယ္ဟာ၊ ဒွေသတ္တတိ စ သေခိယာ။
ဆဦန တီဏိသတာနိ၊ သဗ္ဗေ သာဝတ္ထိယံ ကတာ။
ယေ အာဠဝိယံ ပညတ္တာ၊ တေ သုဏောဟိ ယထာတထံ။
ကုဋိကောသိယသေယျာ စ၊ ခဏနေ ဂစ္ဆ ဒေဝတေ။
သပ္ပါဏကဉ္စ သိဉ္စန္တိ၊ ဆ ဧတေ အာဠဝိယံ ကတာ။
ယေ ကောသမ္ဗိယံ ပညတ္တာ၊ တေ သုဏောဟိ ယထာတထံ။
မဟာဝိဟာရော ဒေါဝစဿံ၊ အညံ ဒွါရံ သုရာယ စ။
အနာဒရိယံ သဟဓမ္မော၊ ပယောပါနေန အဋ္ဌမံ။
ယေ သက္ကေသု ပညတ္တာ၊ တေ သုဏောဟိ ယထာတထံ။
ဧဠကလောမာနိ ပတ္တော စ၊ ဩဝါဒေါ စေဝ ဘေသဇ္ဇံ။
သူစိ အာရညိကော စေဝ၊ အဋ္ဌေတေ [ဆ ဧတေ (သဗ္ဗတ္ထ)] ကာပိလဝတ္ထဝေ။
ဥဒကသုဒ္ဓိယာ ဩဝါဒေါ၊ ဘိက္ခုနီသု ပဝုစ္စန္တိ။
ယေ ဘဂ္ဂေသု ပညတ္တာ၊ တေ သုဏောဟိ ယထာတထံ။
သမာဒဟိတွာ ဝိသိဗ္ဗေန္တိ၊ သာမိသေန သသိတ္ထကံ။
ပါရာဇိကာနိ စတ္တာရိ၊ သံဃာဒိသေသာနိ ဘဝန္တိ။
သတ္တ စ နိဿဂ္ဂိယာနိ၊ အဋ္ဌ ဒွတ္တိံသ ခုဒ္ဒကာ။
ဒွေ ဂါရယ္ဟာ တယော သေက္ခာ၊ ဆပ္ပညာသ သိက္ခာပဒါ။
ဆသု နဂရေသု ပညတ္တာ၊ ဗုဒ္ဓေနာဒိစ္စဗန္ဓုနာ။
ဆဦန တီဏိသတာနိ၊ သဗ္ဗေ သာဝတ္ထိယံ ကတာ။
ကာရုဏိကေန ဗုဒ္ဓေန၊ ဂေါတမေန ယသဿိနာ။
၂. စတုဝိပတ္တိံ
၃၃၆.
ယံ တံ [ယံ ယံ (က.)] ပုစ္ဆိမှ အကိတ္တယိ နော။
တံ တံ ဗျာကတံ အနညထာ။
အညံ တံ ပုစ္ဆာမိ တဒိင်္ဃ ဗြူဟိ။
ဂရုက လဟုကဉ္စာပိ သာဝသေသံ။
အနဝသေသံ ဒုဋ္ဌုလ္လဉ္စ အဒုဋ္ဌုလ္လံ။
ယေ စ ယာဝတတိယကာ။
သာဓါရဏံ အသာဓါရဏံ။
ဝိဘတ္တိယော စ [ဝိပတ္တိယော စ (သီ. သျာ.)] ယေဟိ သမထေဟိ သမ္မန္တိ။
သဗ္ဗာနိပေတာနိ ဝိယာကရောဟိ။
ဟန္ဒ ဝါက္ယံ သုဏောမ တေ။
ဧကတိံသာ ယေ ဂရုကာ၊ အဋ္ဌေတ္ထ အနဝသေသာ။
ယေ ဂရုကာ တေ ဒုဋ္ဌုလ္လာ၊ ယေ ဒုဋ္ဌုလ္လာ သာ သီလဝိပတ္တိ။
ပါရာဇိကံ သံဃာဒိသေသော၊ ‘‘သီလဝိပတ္တီ’’တိ ဝုစ္စတိ။
ထုလ္လစ္စယံ ပါစိတ္တိယာ၊ ပါဋိဒေသနီယံ ဒုက္ကဋံ။
ဒုဗ္ဘာသိတံ ယော စာယံ၊ အက္ကောသတိ ဟသာဓိပ္ပါယော။
အယံ သာ အာစာရဝိပတ္တိသမ္မတာ။
ဝိပရီတဒိဋ္ဌိံ ဂဏှန္တိ၊ အသဒ္ဓမ္မေဟိ ပုရက္ခတာ။
အဗ္ဘာစိက္ခန္တိ သမ္ဗုဒ္ဓံ၊ ဒုပ္ပညာ မောဟပါရုတာ။
အယံ သာ ဒိဋ္ဌိဝိပတ္တိသမ္မတာ။
အာဇီဝဟေတု အာဇီဝကာရဏာ ပါပိစ္ဆော ဣစ္ဆာပကတော အသန္တံ အဘူတံ ဥတ္တရိမနုဿဓမ္မံ ဥလ္လပတိ, အာဇီဝဟေတု အာဇီဝကာရဏာ သဉ္စရိတ္တံ သမာပဇ္ဇတိ, အာဇီဝဟေတု အာဇီဝကာရဏာ – ‘‘ယော တေ ဝိဟာရေ ဝသတိ, သော ဘိက္ခု အရဟာ’’တိ ဘဏတိ, အာဇီဝဟေတု အာဇီဝကာရဏာ ဘိက္ခု ပဏီတဘောဇနာနိ အတ္တနော အတ္ထာယ ဝိညာပေတွာ ဘုဉ္ဇတိ, အာဇီဝဟေတု အာဇီဝကာရဏာ ဘိက္ခုနီ ပဏီတဘောဇနာနိ အတ္တနော အတ္ထာယ ဝိညာပေတွာ ဘုဉ္ဇတိ, အာဇီဝဟေတု အာဇီဝကာရဏာ သူပံ ဝါ ဩဒနံ ဝါ အဂိလာနော အတ္တနော အတ္ထာယ ဝိညာပေတွာ ဘုဉ္ဇတိ။ အယံ သာ အာဇီဝဝိပတ္တိ သမ္မတာ။
ဧကာဒသ ယာဝတတိယကာ၊ တေ သုဏောဟိ ယထာတထံ။
ဥက္ခိတ္တာနုဝတ္တိကာ၊ အဋ္ဌ ယာဝတတိယကာ။
အရိဋ္ဌော စဏ္ဍကာဠီ စ၊ ဣမေ တေ ယာဝတတိယကာ။
၃. ဆေဒနကာဒိ
၃၃၇. ကတိ ဆေဒနကာနိ? ကတိ ဘေဒနကာနိ? ကတိ ဥဒ္ဒါလနကာနိ? ကတိ အနညပါစိတ္တိယာနိ? ကတိ ဘိက္ခုသမ္မုတိယော? ကတိ သာမီစိယော? ကတိ ပရမာနိ?
ကတိ ဇာနန္တိ ပညတ္တာ၊ ဗုဒ္ဓေနာဒိစ္စဗန္ဓုနာ။
ဆ ဆေဒနကာနိ။ ဧကံ ဘေဒနကံ။ ဧကံ ဥဒ္ဒါလနကံ။ စတ္တာရိ အနညပါစိတ္တိယာနိ။ စတဿော ဘိက္ခုသမ္မုတိယော။ သတ္တ သာမီစိယော။ စုဒ္ဒသ ပရမာနိ။
သောဒသ [သောဠသ (သီ. သျာ.) အဋ္ဌကထာ ဩလောကေတဗ္ဗာ] ဇာနန္တိ ပညတ္တာ၊ ဗုဒ္ဓေနာဒိစ္စဗန္ဓုနာ။
၄. အသာဓါရဏာဒိ
၃၃၈.
ဝီသံ ဒွေ သတာနိ ဘိက္ခူနံ သိက္ခာပဒါနိ။
ဥဒ္ဒေသံ အာဂစ္ဆန္တိ ဥပေါသထေသု။
တီဏိ သတာနိ စတ္တာရိ ဘိက္ခုနီနံ သိက္ခာပဒါနိ။
ဥဒ္ဒေသံ အာဂစ္ဆန္တိ ဥပေါသထေသု။
ဆစတ္တာရီသာ ဘိက္ခူနံ၊ ဘိက္ခုနီဟိ အသာဓါရဏာ။
သတံ တိံသာ စ ဘိက္ခုနီနံ၊ ဘိက္ခူဟိ အသာဓါရဏာ။
သတံ သတ္တတိ ဆစ္စေဝ၊ ဥဘိန္နံ အသာဓါရဏာ။
သတံ သတ္တတိ စတ္တာရိ၊ ဥဘိန္နံ သမသိက္ခတာ။
ဝီသံ ဒွေ သတာနိ ဘိက္ခူနံ သိက္ခာပဒါနိ။
ဥဒ္ဒေသံ အာဂစ္ဆန္တိ ဥပေါသထေသု။
တေ သုဏောဟိ ယထာတထံ။
ပါရာဇိကာနိ စတ္တာရိ၊ သံဃာဒိသေသာနိ ဘဝန္တိ တေရသ။
အနိယတာ ဒွေ ဟောန္တိ။
နိဿဂ္ဂိယာနိ တိံသေဝ၊ ဒွေနဝုတိ စ ခုဒ္ဒကာ။
စတ္တာရော ပါဋိဒေသနီယာ၊ ပဉ္စသတ္တတိ သေခိယာ။
ဝီသံ ဒွေ သတာနိ စိမေ ဟောန္တိ ဘိက္ခူနံ သိက္ခာပဒါနိ။
ဥဒ္ဒေသံ အာဂစ္ဆန္တိ ဥပေါသထေသု။
တီဏိ သတာနိ စတ္တာရိ၊ ဘိက္ခုနီနံ သိက္ခာပဒါနိ။
ဥဒ္ဒေသံ အာဂစ္ဆန္တိ ဥပေါသထေသု၊ တေ သုဏောဟိ ယထာတထံ။
ပါရာဇိကာနိ အဋ္ဌ၊ သံဃာဒိသေသာနိ ဘဝန္တိ သတ္တရသ။
နိဿဂ္ဂိယာနိ တိံသေဝ၊ သတံ သဋ္ဌိ ဆ စေဝ ခုဒ္ဒကာနိ ပဝုစ္စန္တိ။
အဋ္ဌ ပါဋိဒေသနီယာ၊ ပဉ္စသတ္တတိ သေခိယာ။
တီဏိ သတာနိ စတ္တာရိ စိမေ ဟောန္တိ ဘိက္ခုနီနံ သိက္ခာပဒါနိ။
ဥဒ္ဒေသံ အာဂစ္ဆန္တိ ဥပေါသထေသု။
ဆစတ္တာရီသာ ဘိက္ခူနံ၊ ဘိက္ခုနီဟိ အသာဓါရဏာ။
တေ သုဏောဟိ ယထာတထံ။
သံဃာဒိသေသာ၊ ဒွေ အနိယတေဟိ အဋ္ဌ။
နိဿဂ္ဂိယာနိ ဒွါဒသ၊ တေဟိ တေ ဟောန္တိ ဝီသတိ။
ဒွေဝီသတိ ခုဒ္ဒကာ၊ စတုရော ပါဋိဒေသနီယာ။
ဆစတ္တာရီသာ စိမေ ဟောန္တိ၊ ဘိက္ခူနံ ဘိက္ခုနီဟိ အသာဓါရဏာ။
သတံ တိံသာ စ ဘိက္ခုနီနံ၊ ဘိက္ခူဟိ အသာဓါရဏာ။
တေ သုဏောဟိ ယထာတထံ။
ပါရာဇိကာနိ စတ္တာရိ၊ သံဃမှာ ဒသ နိဿရေ။
နိဿဂ္ဂိယာနိ ဒွါဒသ၊ ဆန္နဝုတိ စ ခုဒ္ဒကာ။
အဋ္ဌ ပါဋိဒေသနီယာ။
သတံ တိံသာ စိမေ ဟောန္တိ ဘိက္ခုနီနံ၊ ဘိက္ခူဟိ အသာဓါရဏာ။
သတံ သတ္တတိ ဆစ္စေဝ၊ ဥဘိန္နံ အသာဓါရဏာ။
တေ သုဏောဟိ ယထာတထံ။
ပါရာဇိကာနိ စတ္တာရိ၊ သံဃာဒိသေသာနိ ဘဝန္တိ သောဠသ။
အနိယတာ ဒွေ ဟောန္တိ၊ နိဿဂ္ဂိယာနိ စတုဝီသတိ။
သတံ အဋ္ဌာရသာ စေဝ၊ ခုဒ္ဒကာနိ ပဝုစ္စန္တိ။
ဒွါဒသ ပါဋိဒေသနီယာ။
သတံ သတ္တတိ ဆစ္စေဝိမေ ဟောန္တိ၊ ဥဘိန္နံ အသာဓါရဏာ။
သတံ သတ္တတိ စတ္တာရိ၊ ဥဘိန္နံ သမသိက္ခတာ။
တေ သုဏောဟိ ယထာတထံ။
ပါရာဇိကာနိ စတ္တာရိ၊ သံဃာဒိသေသာနိ ဘဝန္တိ သတ္တ။
နိဿဂ္ဂိယာနိ အဋ္ဌာရသ၊ သမသတ္တတိ ခုဒ္ဒကာ။
ပဉ္စသတ္တတိ သေခိယာနိ။
သတံ သတ္တတိ စတ္တာရိ စိမေ ဟောန္တိ၊ ဥဘိန္နံ သမသိက္ခတာ။
အဋ္ဌေ ပါရာဇိကာ ယေ ဒုရာသဒါ၊ တာလဝတ္ထုသမူပမာ။
ပဏ္ဍုပလာသော ပုထုသိလာ၊ သီသစ္ဆိန္နောဝ သော နရော။
တာလောဝ မတ္ထကစ္ဆိန္နော၊ အဝိရုဠှီ ဘဝန္တိ တေ။
တေဝီသတိ သံဃာဒိသေသာ၊ ဒွေ အနိယတာ။
ဒွေ စတ္တာရီသ နိဿဂ္ဂိယာ။
အဋ္ဌာသီတိသတံ ပါစိတ္တိယာ၊ ဒွါဒသ ပါဋိဒေသနီယာ။
ပဉ္စသတ္တတိ သေခိယာ၊ တီဟိ သမထေဟိ သမ္မန္တိ။
သမ္မုခါ စ ပဋိညာယ၊ တိဏဝတ္ထာရကေန စ။
ဒွေ ဥပေါသထာ ဒွေ ပဝါရဏာ။
စတ္တာရိ ကမ္မာနိ ဇိနေန ဒေသိတာ။
ပဉ္စေဝ ဥဒ္ဒေသာ စတုရော ဘဝန္တိ။
အနညထာ အာပတ္တိက္ခန္ဓာ စ ဘဝန္တိ သတ္တ။
အဓိကရဏာနိ စတ္တာရိ သတ္တဟိ သမထေဟိ သမ္မန္တိ။
ဒွီဟိ စတူဟိ တီဟိ ကိစ္စံ ဧကေန သမ္မတိ။
၅. ပါရာဇိကာဒိအာပတ္တိ
၃၃၉.
‘ပါရာဇိက’န္တိ ယံ ဝုတ္တံ၊ တံ သုဏောဟိ ယထာတထံ။
စုတော ပရဒ္ဓေါ ဘဋ္ဌော စ၊ သဒ္ဓမ္မာ ဟိ နိရင်္ကတော။
သံဝါသောပိ တဟိံ နတ္ထိ၊ တေနေတံ ဣတိ ဝုစ္စတိ။
‘သံဃာဒိသေသော’တိ ယံ ဝုတ္တံ၊ တံ သုဏောဟိ ယထာတထံ။
သံဃောဝ ဒေတိ ပရိဝါသံ၊ မူလာယ ပဋိကဿတိ။
မာနတ္တံ ဒေတိ အဗ္ဘေတိ၊ တေနေတံ ဣတိ ဝုစ္စတိ။
‘အနိယတော’တိ ယံ ဝုတ္တံ၊ တံ သုဏောဟိ ယထာတထံ။
အနိယတော န နိယတော၊ အနေကံသိကတံ ပဒံ။
တိဏ္ဏမညတရံ ဌာနံ၊ ‘အနိယတော’တိ ပဝုစ္စတိ။
‘ထုလ္လစ္စယ’န္တိ ယံ ဝုတ္တံ၊ တံ သုဏောဟိ ယထာတထံ။
ဧကဿ မူလေ ယော ဒေသေတိ၊ ယော စ တံ ပဋိဂဏှတိ။
အစ္စယော တေန သမော နတ္ထိ၊ တေနေတံ ဣတိ ဝုစ္စတိ။
‘နိဿဂ္ဂိယ’န္တိ ယံ ဝုတ္တံ၊ တံ သုဏောဟိ ယထာတထံ။
သံဃမဇ္ဈေ ဂဏမဇ္ဈေ၊ ဧကဿေဝ စ ဧကတော။
နိဿဇ္ဇိတွာန ဒေသေတိ၊ တေနေတံ ဣတိ ဝုစ္စတိ။
‘ပါစိတ္တိယ’န္တိ ယံ ဝုတ္တံ၊ တံ သုဏောဟိ ယထာတထံ။
ပါတေတိ ကုသလံ ဓမ္မံ၊ အရိယမဂ္ဂံ အပရဇ္ဈတိ။
စိတ္တသံမောဟနဋ္ဌာနံ၊ တေနေတံ ဣတိ ဝုစ္စတိ။
‘ပါဋိဒေသနီယ’န္တိ ယံ ဝုတ္တံ၊ တံ သုဏောဟိ ယထာတထံ။
ဘိက္ခု အညာတကော သန္တော၊ ကိစ္ဆာ လဒ္ဓါယ ဘောဇနံ။
သာမံ ဂဟေတွာ ဘုဉ္ဇေယျ၊ ‘ဂါရယှ’န္တိ ပဝုစ္စတိ။
နိမန္တနာသု ဘုဉ္ဇန္တာ ဆန္ဒာယ၊ ဝေါသာသတိ တတ္ထ ဘိက္ခုနိံ။
အနိဝါရေတွာ တဟိံ ဘုဉ္ဇေ၊ ဂါရယှန္တိ ပဝုစ္စတိ။
သဒ္ဓါစိတ္တံ ကုလံ ဂန္တွာ၊ အပ္ပဘောဂံ အနာဠိယံ [အနာဠှိယံ (သီ. သျာ.)]။
အဂိလာနော တဟိံ ဘုဉ္ဇေ၊ ဂါရယှန္တိ ပဝုစ္စတိ။
ယော စေ အရညေ ဝိဟရန္တော၊ သာသင်္ကေ သဘယာနကေ။
အဝိဒိတံ တဟိံ ဘုဉ္ဇေ၊ ဂါရယှန္တိ ပဝုစ္စတိ။
ဘိက္ခုနီ အညာတိကာ သန္တာ၊ ယံ ပရေသံ မမာယိတံ။
သပ္ပိ တေလံ မဓုံ ဖာဏိတံ၊ မစ္ဆမံသံ အထော ခီရံ။
ဒဓိံ သယံ ဝိညာပေယျ ဘိက္ခုနီ၊ ဂါရယှပတ္တာ သုဂတဿ သာသနေ။
‘ဒုက္ကဋ’န္တိ ယံ ဝုတ္တံ၊ တံ သုဏောဟိ ယထာတထံ။
အပရဒ္ဓံ ဝိရဒ္ဓဉ္စ၊ ခလိတံ ယဉ္စ ဒုက္ကဋံ။
ယံ မနုဿော ကရေ ပါပံ၊ အာဝိ ဝါ ယဒိ ဝါ ရဟော။
‘ဒုက္ကဋ’န္တိ ပဝေဒေန္တိ၊ တေနေတံ ဣတိ ဝုစ္စတိ။
‘ဒုဗ္ဘာသိတ’န္တိ ယံ ဝုတ္တံ၊ တံ သုဏောဟိ ယထာတထံ။
ဒုဗ္ဘာသိတံ ဒုရာဘဋ္ဌံ၊ သံကိလိဋ္ဌဉ္စ ယံ ပဒံ။
ယဉ္စ ဝိညူ ဂရဟန္တိ၊ တေနေတံ ဣတိ ဝုစ္စတိ။
‘သေခိယ’န္တိ ယံ ဝုတ္တံ၊ တံ သုဏောဟိ ယထာတထံ။
သေက္ခဿ သိက္ခမာနဿ၊ ဥဇုမဂ္ဂါနုသာရိနော။
အာဒိ စေတံ စရဏဉ္စ၊ မုခံ သညမသံဝရော။
သိက္ခာ ဧတာဒိသီ နတ္ထိ၊ တေနေတံ ဣတိ ဝုစ္စတိ။
[ဥဒါ. ၄၅ ဥဒါနေပိ] ဆန္နမတိဝဿတိ ၊ ဝိဝဋံ နာတိဝဿတိ။
တသ္မာ ဆန္နံ ဝိဝရေထ၊ ဧဝံ တံ နာတိဝဿတိ။
ဂတိ မိဂါနံ ပဝနံ၊ အာကာသော ပက္ခိနံ ဂတိ။
ဝိဘဝေါ ဂတိ ဓမ္မာနံ၊ နိဗ္ဗာနံ အရဟတော ဂတီတိ။
ဂါထာသင်္ဂဏိကံ။
တဿုဒ္ဒါနံ –
သတ္တနဂရေသု ပညတ္တာ၊ ဝိပတ္တိ စတုရောပိ စ။
ဘိက္ခူနံ ဘိက္ခုနီနဉ္စ၊ သာဓါရဏာ အသာဓါရဏာ။
သာသနံ အနုဂ္ဂဟာယ၊ ဂါထာသင်္ဂဏိကံ ဣဒန္တိ။
ဂါထာသင်္ဂဏိကံ နိဋ္ဌိတံ။