သမုဋ္ဌာနသီသသင်္ခေပ
သမုဋ္ဌာနဿုဒ္ဒါနံ
၂၅၇.
အနိစ္စာ သဗ္ဗေ သင်္ခါရာ၊ ဒုက္ခာနတ္တာ စ သင်ခတာ။
နိဗ္ဗာနဉ္စေဝ ပညတ္တိ၊ အနတ္တာ ဣတိ နိစ္ဆယာ။
ဗုဒ္ဓစန္ဒေ အနုပ္ပန္နေ၊ ဗုဒ္ဓါဒိစ္စေ အနုဂ္ဂတေ။
တေသံ သဘာဂဓမ္မာနံ၊ နာမမတ္တံ န နာယတိ။
ဒုက္ကရံ ဝိဝိဓံ ကတွာ၊ ပူရယိတွာန ပါရမီ။
ဥပ္ပဇ္ဇန္တိ မဟာဝီရာ၊ စက္ခုဘူတာ သဗြဟ္မကေ။
တေ ဒေသယန္တိ သဒ္ဓမ္မံ၊ ဒုက္ခဟာနိံ သုခါဝဟံ။
အင္ဂီရသော သကျမုနိ၊ သဗ္ဗဘူတာနုကမ္ပကော။
သဗ္ဗသတ္တုတ္တမော သီဟော၊ ပိဋကေ တီဏိ ဒေသယိ။
သုတ္တန္တမဘိဓမ္မဉ္စ၊ ဝိနယဉ္စ မဟာဂုဏံ။
ဧဝံ နီယတိ သဒ္ဓမ္မော၊ ဝိနယော ယဒိ တိဋ္ဌတိ။
ဥဘတော စ ဝိဘင်္ဂါနိ၊ ခန္ဓကာ ယာ စ မာတိကာ။
မာလာ သုတ္တဂုဏေနေဝ၊ ပရိဝါရေန ဂန္ထိတာ။
တဿေဝ ပရိဝါရဿ၊ သမုဋ္ဌာနံ နိယတော ကတံ။
သမ္ဘေဒံ နိဒါနံ စညံ၊ သုတ္တေ ဒိဿန္တိ ဥပရိ။
တသ္မာ သိက္ခေ ပရိဝါရံ၊ ဓမ္မကာမော သုပေသလောတိ။
တေရသသမုဋ္ဌာနံ
ဝိဘင်္ဂေ ဒွီသု ပညတ္တံ၊ ဥဒ္ဒိသန္တိ ဥပေါသထေ။
ပဝက္ခာမိ သမုဋ္ဌာနံ၊ ယထာဉာယံ သုဏာထ မေ။
ပါရာဇိကံ ယံ ပဌမံ၊ ဒုတိယဉ္စ တတော ပရံ။
သဉ္စရိတ္တာနုဘာသနဉ္စ၊ အတိရေကဉ္စ စီဝရံ။
လောမာနိ ပဒသောဓမ္မော၊ ဘူတံ သံဝိဓါနေန စ။
ထေယျဒေသနစောရီ စ၊ အနနုညာတာယ တေရသ။
တေရသေတေ သမုဋ္ဌာန နယာ၊ ဝိညူဟိ စိန္တိတာ။
ဧကေကသ္မိံ သမုဋ္ဌာနေ၊ သဒိသာ ဣဓ ဒိဿရေ။
၁. ပဌမပါရာဇိကသမုဋ္ဌာနံ
၂၅၈.
မေထုနံ သုက္ကသံသဂ္ဂေါ၊ အနိယတာ ပဌမိကာ။
ပုဗ္ဗူပပရိပါစိတာ၊ ရဟော ဘိက္ခုနိယာ သဟ။
သဘောဇနေ ရဟော ဒွေ စ၊ အင်္ဂုလိ ဥဒကေ ဟသံ။
ပဟာရေ ဥဂ္ဂိရေ စေဝ၊ တေပညာသာ စ သေခိယာ။
အဓက္ခဂါမာဝဿုတာ၊ တလမဋ္ဌဉ္စ သုဒ္ဓိကာ။
ဝဿံဝုဋ္ဌာ စ ဩဝါဒံ၊ နာနုဗန္ဓေ ပဝတ္တိနိံ။
ဆသတ္တတိ ဣမေ သိက္ခာ၊ ကာယမာနသိကာ ကတာ။
သဗ္ဗေ ဧကသမုဋ္ဌာနာ၊ ပဌမံ ပါရာဇိကံ ယထာ။
ပဌမပါရာဇိကသမုဋ္ဌာနံ နိဋ္ဌိတံ။
၂. ဒုတိယပါရာဇိကသမုဋ္ဌာနံ
၂၅၉.
အဒိန္နံ ဝိဂ္ဂဟုတ္တရိ၊ ဒုဋ္ဌုလ္လာ အတ္တကာမိနံ။
အမူလာ အညဘာဂိယာ၊ အနိယတာ ဒုတိယိကာ။
အစ္ဆိန္ဒေ ပရိဏာမနေ၊ မုသာ ဩမသပေသုဏာ။
ဒုဋ္ဌုလ္လာ ပထဝီခဏေ၊ ဘူတံ အညာယ ဥဇ္ဈာပေ။
နိက္ကဍ္ဎနံ သိဉ္စနဉ္စ၊ အာမိသဟေတု ဘုတ္တာဝီ။
ဧဟိ အနာဒရိ ဘိံသာ၊ အပနိဓေ စ ဇီဝိတံ။
ဇာနံ သပ္ပါဏကံ ကမ္မံ၊ ဦနသံဝါသနာသနာ။
သဟဓမ္မိကဝိလေခါ၊ မောဟော အမူလကေန စ။
ကုက္ကုစ္စံ ဓမ္မိကံ စီဝရံ၊ ဒတွာ [ကုက္ကုစ္စံ ဓမ္မိကံ စီဝရံ (သီ.)၊ ကုက္ကုစ္စံ ဓမ္မိကံ ဒတွာ (သျာ.)] ပရိဏာမေယျ ပုဂ္ဂလေ။
ကိံ တေ အကာလံ အစ္ဆိန္ဒေ၊ ဒုဂ္ဂဟီ နိရယေန စ။
ဂဏံ ဝိဘင်္ဂံ ဒုဗ္ဗလံ၊ ကထိနာဖာသုပဿယံ။
အက္ကောသစဏ္ဍီ မစ္ဆရီ၊ ဂဗ္ဘိနီ စ ပါယန္တိယာ။
ဒွေဝဿံ သိက္ခာ သံဃေန၊ တယော စေဝ ဂိဟီဂတာ။
ကုမာရိဘူတာ တိဿော စ၊ ဦနဒွါဒသသမ္မတာ။
အလံ တာဝ သောကာဝါသံ၊ ဆန္ဒာ အနုဝဿာ စ ဒွေ။
သိက္ခာပဒါ သတ္တတိမေ၊ သမုဋ္ဌာနာ တိကာ ကတာ။
ကာယစိတ္တေန န ဝါစာ၊ ဝါစာစိတ္တံ န ကာယိကံ။
တီဟိ ဒွါရေဟိ ဇာယန္တိ၊ ပါရာဇိကံ ဒုတိယံ ယထာ။
ဒုတိယပါရာဇိကသမုဋ္ဌာနံ နိဋ္ဌိတံ။
၃. သဉ္စရိတ္တသမုဋ္ဌာနံ
၂၆၀.
သဉ္စရီ ကုဋိ ဝိဟာရော၊ ဓေါဝနဉ္စ ပဋိဂ္ဂဟော။
ဝိညတ္တုတ္တရိ အဘိဟဋ္ဌုံ၊ ဥဘိန္နံ ဒူတကေန စ။
ကောသိယာ သုဒ္ဓဒွေဘာဂါ၊ ဆဗ္ဗဿာနိ နိသီဒနံ။
ရိဉ္စန္တိ ရူပိကာ စေဝ၊ ဥဘော နာနပ္ပကာရကာ။
ဦနဗန္ဓနဝဿိကာ၊ သုတ္တံ ဝိကပ္ပနေန စ။
ဒွါရဒါနသိဗ္ဗာနိ [ဒွါရဒါနသိဗ္ဗိနီ (သီ. သျာ.)] စ၊ ပူဝပစ္စယဇောတိ စ။
ရတနံ သူစိ မဉ္စော စ၊ တူလံ နိသီဒနကဏ္ဍု စ။
ဝဿိကာ စ သုဂတေန၊ ဝိညတ္တိ အညံ စေတာပနာ။
ဒွေ သံဃိကာ မဟာဇနိကာ၊ ဒွေ ပုဂ္ဂလလဟုကာ ဂရု။
ဒွေ ဝိဃာသာ သာဋိကာ စ၊ သမဏစီဝရေန စ။
သမပညာသိမေ ဓမ္မာ၊ ဆဟိ ဌာနေဟိ ဇာယရေ။
ကာယတော န ဝါစာစိတ္တာ၊ ဝါစတော န ကာယမနာ။
ကာယဝါစာ န စ စိတ္တာ [န စိတ္တတော (သီ. သျာ.)]၊ ကာယစိတ္တာ န ဝါစိကာ [န ဝါစတော (သီ. သျာ.)]။
ဝါစာစိတ္တာ န ကာယေန၊ တီဟိ ဒွါရေဟိ [တီဟိ ဌာနေဟိ (သျာ.)] ဇာယရေ။
ဆသမုဋ္ဌာနိကာ ဧတေ၊ သဉ္စရိတ္တေန သာဒိသာ။
သဉ္စရိတ္တသမုဋ္ဌာနံ နိဋ္ဌိတံ။
၄. သမနုဘာသနာသမုဋ္ဌာနံ
၂၆၁.
ဘေဒါနုဝတ္တဒုဗ္ဗစ ၊ ဒူသဒုဋ္ဌုလ္လဒိဋ္ဌိ စ။
ဆန္ဒံ ဥဇ္ဇဂ္ဃိကာ ဒွေ စ၊ ဒွေ စ သဒ္ဒါ န ဗျာဟရေ။
ဆမာ နီစာသနေ ဌာနံ၊ ပစ္ဆတော ဥပ္ပထေန စ။
ဝဇ္ဇာနုဝတ္တိဂဟဏာ၊ ဩသာရေ ပစ္စာစိက္ခနာ။
ကိသ္မိံ သံသဋ္ဌာ ဒွေ ဝဓိ၊ ဝိသိဗ္ဗေ ဒုက္ခိတာယ စ။
ပုန သံသဋ္ဌာ န ဝူပသမေ၊ အာရာမဉ္စ ပဝါရဏာ။
အန္ဝဒ္ဓံ [အန္ဝဒ္ဓမာသံ (သီ. သျာ.)] သဟ ဇီဝိနိံ၊ ဒွေ စီဝရံ အနုဗန္ဓနာ။
သတ္တတိံသ ဣမေ ဓမ္မာ၊ ကာယဝါစာယ စိတ္တတော။
သဗ္ဗေ ဧကသမုဋ္ဌာနာ၊ သမနုဘာသနာ ယထာ။
သမနုဘာသနာသမုဋ္ဌာနံ နိဋ္ဌိတံ။
၅. ကထိနသမုဋ္ဌာနံ
၂၆၂.
ဥဗ္ဘတံ ကထိနံ တီဏိ၊ ပဌမံ ပတ္တဘေသဇ္ဇံ။
အစ္စေကံ စာပိ သာသင်္ကံ၊ ပက္ကမန္တေန ဝါ ဒုဝေ။
ဥပဿယံ ပရမ္ပရာ၊ အနတိရိတ္တံ နိမန္တနာ။
ဝိကပ္ပံ ရညော ဝိကာလေ၊ ဝေါသာသာရညကေန စ။
ဥဿယာသန္နိစယဉ္စ၊ ပုရေ ပစ္ဆာ ဝိကာလေ စ။
ပဉ္စာဟိကာ သင်္ကမနီ၊ ဒွေပိ အာဝသထေန စ။
ပသာခေ အာသနေ စေဝ၊ တိံသ ဧကူနကာ ဣမေ။
ကာယဝါစာ န စ စိတ္တာ [န စိတ္တတော (သျာ.)]၊ တီဟိ ဒွါရေဟိ ဇာယရေ။
ဒွိသမုဋ္ဌာနိကာ သဗ္ဗေ၊ ကထိနေန သဟာသမာ။
ကထိနသမုဋ္ဌာနံ နိဋ္ဌိတံ။
၆. ဧဠကလောမသမုဋ္ဌာနံ
၂၆၃.
ဧဠကလောမာ ဒွေ သေယျာ၊ အာဟစ္စ ပိဏ္ဍဘောဇနံ။
ဂဏဝိကာလသန္နိဓိ၊ ဒန္တပေါနေန စေလကာ။
ဥယျုတ္တံ သေနံ [ဥယျုတ္တံ ဝသေ (သျာ.)] ဥယျောဓိ၊ သုရာ ဩရေန နှာယနာ။
ဒုဗ္ဗဏ္ဏေ ဒွေ ဒေသနိကာ၊ လသုဏုပတိဋ္ဌေ နစ္စနာ။
နှာနမတ္ထရဏံ သေယျာ၊ အန္တောရဋ္ဌေ တထာ ဗဟိ။
အန္တောဝဿံ စိတ္တာဂါရံ၊ အာသန္ဒိ သုတ္တကန္တနာ။
ဝေယျာဝစ္စံ သဟတ္ထာ စ၊ အဘိက္ခုကာဝါသေန စ။
ဆတ္တံ ယာနဉ္စ သံဃာဏိံ၊ အလင်္ကာရံ ဂန္ဓဝါသိတံ။
ဘိက္ခုနီ သိက္ခမာနာ စ၊ သာမဏေရီ ဂိဟိနိယာ။
အသံကစ္စိကာ အာပတ္တိ၊ စတ္တာရီသာ စတုတ္တရိ။
ကာယေန န ဝါစာစိတ္တေန၊ ကာယစိတ္တေန န ဝါစတော။
ဒွိသမုဋ္ဌာနိကာ သဗ္ဗေ၊ သမာ ဧဠကလောမိကာတိ။
ဧဠကလောမသမုဋ္ဌာနံ နိဋ္ဌိတံ။
၇. ပဒသောဓမ္မသမုဋ္ဌာနံ
၂၆၄.
ပဒညတြ အသမ္မတာ၊ တထာ အတ္ထင်္ဂတေန စ။
တိရစ္ဆာနဝိဇ္ဇာ ဒွေ ဝုတ္တာ၊ အနောကာသော [အနောကာသေ (သီ. သျာ.)] စ ပုစ္ဆနာ။
သတ္တ သိက္ခာပဒါ ဧတေ၊ ဝါစာ န ကာယစိတ္တတော [ကာယစိတ္တကာ (က.)]။
ဝါစာစိတ္တေန ဇာယန္တိ၊ န တု ကာယေန ဇာယရေ။
ဒွိသမုဋ္ဌာနိကာ သဗ္ဗေ၊ ပဒသောဓမ္မသဒိသာ။
ပဒသောဓမ္မသမုဋ္ဌာနံ နိဋ္ဌိတံ။
၈. အဒ္ဓါနသမုဋ္ဌာနံ
၂၆၅.
အဒ္ဓါနနာဝံ ပဏီတံ၊ မာတုဂါမေန သံဟရေ။
ဓညံ နိမန္တိတာ စေဝ၊ အဋ္ဌ စ ပါဋိဒေသနီ။
သိက္ခာ ပန္နရသ ဧတေ၊ ကာယာ န ဝါစာ န မနာ။
ကာယဝါစာဟိ ဇာယန္တိ၊ န တေ စိတ္တေန ဇာယရေ။
ကာယစိတ္တေန ဇာယန္တိ၊ န တေ ဇာယန္တိ ဝါစတော။
ကာယဝါစာဟိ စိတ္တေန၊ သမုဋ္ဌာနာ စတုဗ္ဗိဓါ။
ပညတ္တာ ဗုဒ္ဓဉာဏေန၊ အဒ္ဓါနေန သဟာ သမာ [သမာနယာ (သျာ.)]။
အဒ္ဓါနသမုဋ္ဌာနံ နိဋ္ဌိတံ။
၉. ထေယျသတ္ထသမုဋ္ဌာနံ
၂၆၆.
ထေယျသတ္ထံ ဥပဿုတိ၊ သူပဝိညာပနေန စ။
ရတ္တိဆန္နဉ္စ ဩကာသံ၊ ဧတေ ဗ္ယူဟေန သတ္တမာ။
ကာယစိတ္တေန ဇာယန္တိ၊ န တေ ဇာယန္တိ ဝါစတော။
တီဟိ ဒွါရေဟိ ဇာယန္တိ၊ ဒွိသမုဋ္ဌာနိကာ ဣမေ။
ထေယျသတ္ထသမုဋ္ဌာနာ၊ ဒေသိတာဒိစ္စဗန္ဓုနာ။
ထေယျသတ္ထသမုဋ္ဌာနံ နိဋ္ဌိတံ။
၁၀. ဓမ္မဒေသနာသမုဋ္ဌာနံ
၂၆၇.
ဆတ္တပါဏိဿ သဒ္ဓမ္မံ၊ န ဒေသေန္တိ တထာဂတာ။
ဧဝမေဝ [တထေဝ (သီ. သျာ.)] ဒဏ္ဍပါဏိဿ၊ သတ္ထအာဝုဓပါဏိနံ။
ပါဒုကုပါဟနာ ယာနံ၊ သေယျပလ္လတ္ထိကာယ စ။
ဝေဌိတောဂုဏ္ဌိတော စေဝ၊ ဧကာဒသမနူနကာ။
ဝါစာစိတ္တေန ဇာယန္တိ၊ န တေ ဇာယန္တိ ကာယတော။
သဗ္ဗေ ဧကသမုဋ္ဌာနာ၊ သမကာ ဓမ္မဒေသနေ။
ဓမ္မဒေသနာသမုဋ္ဌာနံ နိဋ္ဌိတံ။
၁၁. ဘူတာရောစနသမုဋ္ဌာနံ
၂၆၈.
ဘူတံ ကာယေန ဇာယတိ၊ န ဝါစာ န စ စိတ္တတော။
ဝါစတော စ သမုဋ္ဌာတိ၊ န ကာယာ န စ စိတ္တတော။
ကာယဝါစာယ ဇာယတိ၊ န တု ဇာယတိ စိတ္တတော။
ဘူတာရောစနကာ နာမ၊ တီဟိ ဌာနေဟိ ဇာယတိ။
ဘူတာရောစနသမုဋ္ဌာနံ နိဋ္ဌိတံ။
၁၂. စောရိဝုဋ္ဌာပနသမုဋ္ဌာနံ
၂၆၉.
စောရီ ဝါစာယ စိတ္တေန၊ န တံ ဇာယတိ ကာယတော။
ဇာယတိ တီဟိ ဒွါရေဟိ၊ စောရိဝုဋ္ဌာပနံ ဣဒံ။
အကတံ ဒွိသမုဋ္ဌာနံ၊ ဓမ္မရာဇေန ဘာသိတံ [ဌပိတံ (သျာ.)]။
စောရိဝုဋ္ဌာပနသမုဋ္ဌာနံ နိဋ္ဌိတံ။
၁၃. အနနုညာတသမုဋ္ဌာနံ
၂၇၀.
အနနုညာတံ ဝါစာယ၊ န ကာယာ န စ စိတ္တတော။
ဇာယတိ ကာယဝါစာယ၊ န တံ ဇာယတိ စိတ္တတော။
ဇာယတိ ဝါစာစိတ္တေန၊ န တံ ဇာယတိ ကာယတော။
ဇာယတိ တီဟိ ဒွါရေဟိ၊ အကတံ စတုဌာနိကံ။
အနနုညာတသမုဋ္ဌာနံ နိဋ္ဌိတံ။
သမုဋ္ဌာနဉှိ သင်္ခေပံ၊ ဒသ တီဏိ သုဒေသိတံ။
အသမ္မောဟကရံ ဌာနံ၊ နေတ္တိဓမ္မာနုလောမိကံ။
ဓါရယန္တော ဣမံ ဝိညူ၊ သမုဋ္ဌာနေ န မုယှတီတိ။
သမုဋ္ဌာနသီသသင်္ခေပေါ နိဋ္ဌိတော။