ပရိဝါရ

။ နမော တဿ ဘဂဝတော အရဟတော သမ္မာသမ္ဗုဒ္ဓဿ။

ဝိနယပိဋကေ

ပရိဝါရပါဠိ

၁. ဘိက္ခုဝိဘင်္ဂေါ

သောဠသမဟာဝါရော

၁. ကတ္ထပညတ္တိဝါရော

၁. ပါရာဇိကကဏ္ဍံ

၁. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ပဌမံ ပါရာဇိကံ ကတ္ထ ပညတ္တံ, ကံ အာရဗ္ဘ, ကိသ္မိံ ဝတ္ထုသ္မိံ? အတ္ထိ တတ္ထ ပညတ္တိ, အနုပညတ္တိ, အနုပ္ပန္နပညတ္တိ? သဗ္ဗတ္ထပညတ္တိ, ပဒေသပညတ္တိ? သာဓါရဏပညတ္တိ, အသာဓါရဏပညတ္တိ? ဧကတောပညတ္တိ, ဥဘတောပညတ္တိ? ပဉ္စန္နံ ပါတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နံ? ကတမေန ဥဒ္ဒေသေန ဥဒ္ဒေသံ အာဂစ္ဆတိ? စတုန္နံ ဝိပတ္တီနံ ကတမာ ဝိပတ္တိ? သတ္တန္နံ အာပတ္တိက္ခန္ဓာနံ ကတမော အာပတ္တိက္ခန္ဓော? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ သမထာနံ ကတိဟိ သမထေဟိ သမ္မတိ? ကော တတ္ထ ဝိနယော, ကော တတ္ထ အဘိဝိနယော? ကိံ တတ္ထ ပါတိမောက္ခံ, ကိံ တတ္ထ အဓိပါတိမောက္ခံ? ကာ ဝိပတ္တိ? ကာ သမ္ပတ္တိ? ကာ ပဋိပတ္တိ? ကတိ အတ္ထဝသေ ပဋိစ္စ ဘဂဝတာ ပဌမံ ပါရာဇိကံ ပညတ္တံ? ကေ သိက္ခန္တိ? ကေ သိက္ခိတသိက္ခာ? ကတ္ထ ဌိတံ? ကေ ဓါရေန္တိ? ကဿ ဝစနံ? ကေနာဘတန္တိ?

၂. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ပဌမံ ပါရာဇိကံ ကတ္ထ ပညတ္တန္တိ? ဝေသာလိယံ ပညတ္တံ။ ကံ အာရဗ္ဘာတိ? သုဒိန္နံ ကလန္ဒပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? သုဒိန္နော ကလန္ဒပုတ္တော ပုရာဏဒုတိယိကာယ မေထုနံ ဓမ္မံ ပဋိသေဝိ, တသ္မိံ ဝတ္ထုသ္မိံ။ အတ္ထိ တတ္ထ ပညတ္တိ, အနုပညတ္တိ, အနုပ္ပန္နပညတ္တီတိ? ဧကာ ပညတ္တိ, ဒွေ အနုပညတ္တိယော။ အနုပ္ပန္နပညတ္တိ တသ္မိံ နတ္ထိ။ သဗ္ဗတ္ထပညတ္တိ, ပဒေသပညတ္တီတိ? သဗ္ဗတ္ထပညတ္တိ။ သာဓါရဏပညတ္တိ, အသာဓါရဏပညတ္တီတိ? သာဓါရဏပညတ္တိ။ ဧကတောပညတ္တိ, ဥဘတောပညတ္တီတိ? ဥဘတောပညတ္တိ။ ပဉ္စန္နံ ပါတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နန္တိ? နိဒါနောဂဓံ, နိဒါနပရိယာပန္နံ။ ကတမေန ဥဒ္ဒေသေန ဥဒ္ဒေသံ အာဂစ္ဆတီတိ? ဒုတိယေန ဥဒ္ဒေသေန ဥဒ္ဒေသံ အာဂစ္ဆတိ။ စတုန္နံ ဝိပတ္တီနံ ကတမာ ဝိပတ္တီတိ? သီလဝိပတ္တိ။ သတ္တန္နံ အာပတ္တိက္ခန္ဓာနံ ကတမော အာပတ္တိက္ခန္ဓောတိ? ပါရာဇိကာပတ္တိက္ခန္ဓော။ ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတီတိ? ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ စတုန္နံ အဓိကရဏာနံ ကတမံ အဓိကရဏန္တိ? အာပတ္တာဓိကရဏံ။ သတ္တန္နံ သမထာနံ ကတိဟိ သမထေဟိ သမ္မတီတိ? ဒွီဟိ သမထေဟိ သမ္မတိ – သမ္မုခါဝိနယေန စ ပဋိညာတကရဏေန စ။ ကော တတ္ထ ဝိနယော, ကော တတ္ထ အဘိဝိနယောတိ? ပညတ္တိ ဝိနယော, ဝိဘတ္တိ အဘိဝိနယော။ ကိံ တတ္ထ ပါတိမောက္ခံ, ကိံ တတ္ထ အဓိပါတိမောက္ခန္တိ? ပညတ္တိ ပါတိမောက္ခံ, ဝိဘတ္တိ အဓိပါတိမောက္ခံ။ ကာ ဝိပတ္တီတိ? အသံဝရော ဝိပတ္တိ။ ကာ သမ္ပတ္တီတိ? သံဝရော သမ္ပတ္တိ။ ကာ ပဋိပတ္တီတိ? န ဧဝရူပံ ကရိဿာမီတိ ယာဝဇီဝံ အာပါဏကောဋိကံ သမာဒါယ သိက္ခတိ သိက္ခာပဒေသု။ [အ. နိ. ၁၀.၃၁] ကတိ အတ္ထဝသေ ပဋိစ္စ ဘဂဝတာ ပဌမံ ပါရာဇိကံ ပညတ္တန္တိ? ဒသ အတ္ထဝသေ ပဋိစ္စ ဘဂဝတာ ပဌမံ ပါရာဇိကံ ပညတ္တံ – သံဃသုဋ္ဌုတာယ, သံဃဖာသုတာယ, ဒုမ္မင်္ကူနံ ပုဂ္ဂလာနံ နိဂ္ဂဟာယ, ပေသလာနံ ဘိက္ခူနံ ဖာသုဝိဟာရာယ, ဒိဋ္ဌဓမ္မိကာနံ အာသဝါနံ သံဝရာယ, သမ္ပရာယိကာနံ အာသဝါနံ ပဋိဃာတာယ, အပ္ပသန္နာနံ ပသာဒါယ, ပသန္နာနံ ဘိယျောဘာဝါယ, သဒ္ဓမ္မဋ္ဌိတိယာ, ဝိနယာနုဂ္ဂဟာယ။ ကေ သိက္ခန္တီတိ? သေက္ခာ စ ပုထုဇ္ဇနကလျာဏကာ စ သိက္ခန္တိ။ ကေ သိက္ခိတသိက္ခာတိ? အရဟန္တော သိက္ခိတသိက္ခာ ။ ကတ္ထ ဌိတန္တိ? သိက္ခာကာမေသု ဌိတံ။ ကေ ဓါရေန္တီတိ? ယေသံ ဝတ္တတိ တေ ဓါရေန္တိ။ ကဿ ဝစနန္တိ? ဘဂဝတော ဝစနံ အရဟတော သမ္မာသမ္ဗုဒ္ဓဿ။ ကေနာဘတန္တိ? ပရမ္ပရာဘတံ –

၃.ဥပါလိ ဒါသကော စေဝ၊ သောဏကော သိဂ္ဂဝေါ တထာ။

မောဂ္ဂလိပုတ္တေန [မောဂ္ဂလီပုတ္တေန (သျာ.)] ပဉ္စမာ၊ ဧတေ ဇမ္ဗုသိရိဝ္ဟယေ [ဇမ္ဗုသရိဝ္ဟယေ (သာရတ္ထ)]။

တတော မဟိန္ဒော ဣဋ္ဋိယော [ဣဋ္ဌိယော (သီ.)]၊ ဥတ္တိယော သမ္ဗလော [ဥဋ္ဋိယော သမ္ပလော (ဣတိပိ)] တထာ။

ဘဒ္ဒနာမော စ ပဏ္ဍိတော။

ဧတေ နာဂါ မဟာပညာ၊ ဇမ္ဗုဒီပါ ဣဓါဂတာ။

ဝိနယံ တေ ဝါစယိံသု၊ ပိဋကံ တမ္ဗပဏ္ဏိယာ။

နိကာယေ ပဉ္စ ဝါစေသုံ၊ သတ္တ စေဝ ပကရဏေ။

တတော အရိဋ္ဌော မေဓါဝီ၊ တိဿဒတ္တော စ ပဏ္ဍိတော။

ဝိသာရဒေါ ကာဠသုမနော၊ ထေရော စ ဒီဃနာမကော။

ဒီဃသုမနော စ ပဏ္ဍိတော။

ပုနဒေဝ [ပုနရေဝ (သျာ.)] ကာဠသုမနော၊ နာဂတ္ထေရော စ ဗုဒ္ဓရက္ခိတော။

တိဿတ္ထေရော စ မေဓါဝီ၊ ဒေဝတ္ထေရော [ရေဝတ္ထေရော (ဣတိပိ)] စ ပဏ္ဍိတော။

ပုနဒေဝ သုမနော မေဓါဝီ၊ ဝိနယေ စ ဝိသာရဒေါ။

ဗဟုဿုတော စူဠနာဂေါ၊ ဂဇောဝ ဒုပ္ပဓံသိယော။

ဓမ္မပါလိတနာမော စ၊ ရောဟဏေ [ရောဟဏော (သီ.)] သာဓုပူဇိတော။

တဿ သိဿော မဟာပညော ခေမနာမော တိပေဋကော။

ဒီပေ တာရကရာဇာဝ ပညာယ အတိရောစထ။

ဥပတိဿော စ မေဓါဝီ၊ ဖုဿဒေဝေါ မဟာကထီ။

ပုနဒေဝ သုမနော မေဓါဝီ၊ ပုပ္ဖနာမော ဗဟုဿုတော။

မဟာကထီ မဟာသိဝေါ၊ ပိဋကေ သဗ္ဗတ္ထ ကောဝိဒေါ။

ပုနဒေဝ ဥပါလိ မေဓါဝီ၊ ဝိနယေ စ ဝိသာရဒေါ။

မဟာနာဂေါ မဟာပညော၊ သဒ္ဓမ္မဝံသကောဝိဒေါ။

ပုနဒေဝ အဘယော မေဓါဝီ၊ ပိဋကေ သဗ္ဗတ္ထ ကောဝိဒေါ။

တိဿတ္ထေရော စ မေဓါဝီ၊ ဝိနယေ စ ဝိသာရဒေါ။

တဿ သိဿော မဟာပညော၊ ပုပ္ဖနာမော ဗဟုဿုတော။

သာသနံ အနုရက္ခန္တော၊ ဇမ္ဗုဒီပေ ပတိဋ္ဌိတော။

စူဠာဘယော စ မေဓါဝီ၊ ဝိနယေ စ ဝိသာရဒေါ။

တိဿတ္ထေရော စ မေဓါဝီ၊ သဒ္ဓမ္မဝံသကောဝိဒေါ။

စူဠဒေဝေါ [ဖုဿဒေဝေါ (သီ.)] စ မေဓါဝီ၊ ဝိနယေ စ ဝိသာရဒေါ။

သိဝတ္ထေရော စ မေဓါဝီ၊ ဝိနယေ သဗ္ဗတ္ထ ကောဝိဒေါ။

ဧတေ နာဂါ မဟာပညာ၊ ဝိနယညူ မဂ္ဂကောဝိဒါ။

ဝိနယံ ဒီပေ ပကာသေသုံ၊ ပိဋကံ တမ္ဗပဏ္ဏိယာတိ။

၄. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဒုတိယံ ပါရာဇိကံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? ဓနိယံ ကုမ္ဘကာရပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? ဓနိယော ကုမ္ဘကာရပုတ္တော ရညော ဒါရူနိ အဒိန္နံ အာဒိယိ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတီတိ? တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ , န ဝါစတော; သိယာ ဝါစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၅. တတိယံ ပါရာဇိကံ ကတ္ထ ပညတ္တန္တိ? ဝေသာလိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ အညမညံ ဇီဝိတာ ဝေါရောပေသုံ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတီတိ? တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ, န ဝါစတော; သိယာ ဝါစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၆. စတုတ္ထံ ပါရာဇိကံ ကတ္ထ ပညတ္တန္တိ? ဝေသာလိယံ ပညတ္တံ။ ကံ အာရဗ္ဘာတိ? ဝဂ္ဂုမုဒါတီရိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဝဂ္ဂုမုဒါတီရိယာ ဘိက္ခူ ဂိဟီနံ အညမညဿ ဥတ္တရိမနုဿဓမ္မဿ ဝဏ္ဏံ ဘာသိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတီတိ? တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ, န ဝါစတော; သိယာ ဝါစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

စတ္တာရော ပါရာဇိကာ နိဋ္ဌိတာ။

တဿုဒ္ဒါနံ –

မေထုနာဒိန္နာဒါနဉ္စ ၊ မနုဿဝိဂ္ဂဟုတ္တရိ။

ပါရာဇိကာနိ စတ္တာရိ၊ ဆေဇ္ဇဝတ္ထူ အသံသယာတိ။

၂. သံဃာဒိသေသကဏ္ဍံ

၇. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဥပက္ကမိတွာ အသုစိံ မောစေန္တဿ သံဃာဒိသေသော ကတ္ထ ပညတ္တော? ကံ အာရဗ္ဘ? ကိသ္မိံ ဝတ္ထုသ္မိံ? အတ္ထိ တတ္ထ ပညတ္တိ, အနုပညတ္တိ , အနုပ္ပန္နပညတ္တိ? သဗ္ဗတ္ထပညတ္တိ, ပဒေသပညတ္တိ? သာဓါရဏပညတ္တိ, အသာဓါရဏပညတ္တိ? ဧကတောပညတ္တိ, ဥဘတောပညတ္တိ? ပဉ္စန္နံ ပါတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နံ? ကတမေန ဥဒ္ဒေသေန ဥဒ္ဒေသံ အာဂစ္ဆတိ? စတုန္နံ ဝိပတ္တီနံ ကတမာ ဝိပတ္တိ? သတ္တန္နံ အာပတ္တိက္ခန္ဓာနံ ကတမော အာပတ္တိက္ခန္ဓော? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ သမထာနံ ကတိဟိ သမထေဟိ သမ္မတိ? ကော တတ္ထ ဝိနယော, ကော တတ္ထ အဘိဝိနယော? ကိံ တတ္ထ ပါတိမောက္ခံ, ကိံ တတ္ထ အဓိပါတိမောက္ခံ ? ကာ ဝိပတ္တိ, ကာ သမ္ပတ္တိ, ကာ ပဋိပတ္တိ? ကတိ အတ္ထဝသေ ပဋိစ္စ ဘဂဝတာ ဥပက္ကမိတွာ အသုစိံ မောစေန္တဿ သံဃာဒိသေသော ပညတ္တော? ကေ သိက္ခန္တိ, ကေ သိက္ခိတသိက္ခာ? ကတ္ထ ဌိတံ? ကေ ဓါရေန္တိ? ကဿ ဝစနံ? ကေနာဘတန္တိ?

၈. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဥပက္ကမိတွာ အသုစိံ မောစေန္တဿ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အာယသ္မန္တံ သေယျသကံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ သေယျသကော ဟတ္ထေန ဥပက္ကမိတွာ အသုစိံ မောစေသိ, တသ္မိံ ဝတ္ထုသ္မိံ။ အတ္ထိ တတ္ထ ပညတ္တိ, အနုပညတ္တိ, အနုပ္ပန္နပညတ္တီတိ? ဧကာ ပညတ္တိ, ဧကာ အနုပညတ္တိ။ အနုပ္ပန္နပညတ္တိ တသ္မိံ နတ္ထိ။ သဗ္ဗတ္ထ ပညတ္တိ, ပဒေသပညတ္တီတိ? သဗ္ဗတ္ထပညတ္တိ။ သာဓါရဏပညတ္တိ, အသာဓါရဏပညတ္တီတိ ? အသာဓါရဏပညတ္တိ။ ဧကတောပညတ္တိ, ဥဘတောပညတ္တီတိ? ဧကတောပညတ္တိ။ ပဉ္စန္နံ ပါတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နန္တိ? နိဒါနောဂဓံ နိဒါနပရိယာပန္နံ။ ကတမေန ဥဒ္ဒေသေန ဥဒ္ဒေသံ အာဂစ္ဆတီတိ? တတိယေ ဥဒ္ဒေသေန ဥဒ္ဒေသံ အာဂစ္ဆတိ ။ စတုန္နံ ဝိပတ္တီနံ ကတမာ ဝိပတ္တီတိ? သီလဝိပတ္တိ။ သတ္တန္နံ အာပတ္တိက္ခန္ဓာနံ ကတမော အာပတ္တိက္ခန္ဓောတိ? သံဃာဒိသေသော အာပတ္တိက္ခန္ဓော။ ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတီတိ? ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ စတုန္နံ အဓိကရဏာနံ ကတမံ အဓိကရဏန္တိ? အာပတ္တာဓိကရဏံ။ သတ္တန္နံ သမထာနံ ကတိဟိ သမထေဟိ သမ္မတီတိ? ဒွီဟိ သမထေဟိ သမ္မတိ – သမ္မုခါဝိနယေန စ ပဋိညာတကရဏေန စ။ ကော တတ္ထ ဝိနယော, ကော တတ္ထ အဘိဝိနယောတိ? ပညတ္တိ ဝိနယော, ဝိဘတ္တိ အဘိဝိနယော။ ကိံ တတ္ထ ပါတိမောက္ခံ, ကိံ တတ္ထ အဓိပါတိမောက္ခန္တိ? ပညတ္တိ ပါတိမောက္ခံ, ဝိဘတ္တိ အဓိပါတိမောက္ခံ။ ကာ ဝိပတ္တီတိ? အသံဝရော ဝိပတ္တိ။ ကာ သမ္ပတ္တီတိ? သံဝရော သမ္ပတ္တိ။ ကာ ပဋိပတ္တီတိ? န ဧဝရူပံ ကရိဿာမီတိ ယာဝဇီဝံ အာပါဏကောဋိကံ သမာဒါယ သိက္ခတိ သိက္ခာပဒေသု။ [အ. နိ. ၁၀.၃၁] ကတိ အတ္ထဝသေ ပဋိစ္စ ဘဂဝတာ ဥပက္ကမိတွာ အသုစိံ မောစေန္တဿ သံဃာဒိသေသော ပညတ္တောတိ? ဒသ အတ္ထဝသေ ပဋိစ္စ ဘဂဝတာ ဥပက္ကမိတွာ အသုစိံ မောစေန္တဿ သံဃာဒိသေသော ပညတ္တော – သံဃသုဋ္ဌုတာယ, သံဃဖာသုတာယ, ဒုမ္မင်္ကူနံ ပုဂ္ဂလာနံ နိဂ္ဂဟာယ, ပေသလာနံ ဘိက္ခူနံ ဖာသုဝိဟာရာယ, ဒိဋ္ဌဓမ္မိကာနံ အာသဝါနံ သံဝရာယ, သမ္ပရာယိကာနံ အာသဝါနံ ပဋိဃာတာယ, အပ္ပသန္နာနံ ပသာဒါယ, ပသန္နာနံ ဘိယျောဘာဝါယ, သဒ္ဓမ္မဋ္ဌိတိယာ, ဝိနယာနုဂ္ဂဟာယ။ ကေ သိက္ခန္တီတိ? သေက္ခာ စ ပုထုဇ္ဇနကလျာဏကာ စ သိက္ခန္တိ။ ကေ သိက္ခိတသိက္ခာတိ? အရဟန္တော သိက္ခိတသိက္ခာ။ ကတ္ထ ဌိတန္တိ? သိက္ခာကာမေသု ဌိတံ။ ကေ ဓါရေန္တီတိ? ယေသံ ဝတ္တတိ , တေ ဓါရေန္တိ။ ကဿ ဝစနန္တိ? ဘဂဝတော ဝစနံ အရဟတော သမ္မာသမ္ဗုဒ္ဓဿ။ ကေနာဘတန္တိ? ပရမ္ပရာဘတံ –

ဥပါလိ ဒါသကော စေဝ၊ သောဏကော သိဂ္ဂဝေါ တထာ။

မောဂ္ဂလိပုတ္တေန ပဉ္စမာ၊ ဧတေ ဇမ္ဗုသိရိဝ္ဟယေ။

တတော မဟိန္ဒော ဣဋ္ဋိယော၊ ဥတ္တိယော သမ္ဗလော တထာ။

ဘဒ္ဒနာမော စ ပဏ္ဍိတော။

ဧတေ နာဂါ မဟာပညာ၊ ဇမ္ဗုဒီပါ ဣဓါဂတာ။

ဝိနယံ တေ ဝါစယိံသု၊ ပိဋကံ တမ္ဗပဏ္ဏိယာ။

နိကာယေ ပဉ္စ ဝါစေသုံ၊ သတ္တ စေဝ ပကရဏေ။

တတော အရိဋ္ဌော မေဓါဝီ၊ တိဿဒတ္တော စ ပဏ္ဍိတော။

ဝိသာရဒေါ ကာဠသုမနော၊ ထေရော စ ဒီဃနာမကော။

ဒီဃသုမနော စ ပဏ္ဍိတော။

ပုနဒေဝ ကာဠသုမနော၊ နာဂတ္ထေရော စ ဗုဒ္ဓရက္ခိတော။

တိဿတ္ထေရော စ မေဓါဝီ၊ ဒေဝတ္ထေရော စ ပဏ္ဍိတော။

ပုနဒေဝ သုမနော မေဓါဝီ၊ ဝိနယေ စ ဝိသာရဒေါ။

ဗဟုဿုတော စူဠနာဂေါ၊ ဂဇောဝ ဒုပ္ပဓံသိယော။

ဓမ္မပါလိတနာမော စ၊ ရောဟဏေ သာဓုပူဇိတော။

တဿ သိဿော မဟာပညော၊ ခေမနာမော တိပေဋကော။

ဒီပေ တာရကရာဇာဝ၊ ပညာယ အတိရောစထ။

ဥပတိဿော စ မေဓါဝီ၊ ဖုဿဒေဝေါ မဟာကထီ။

ပုနဒေဝ သုမနော မေဓါဝီ၊ ပုပ္ဖနာမော ဗဟုဿုတော။

မဟာကထီ မဟာသိဝေါ၊ ပိဋကေ သဗ္ဗတ္ထ ကောဝိဒေါ။

ပုနဒေဝ ဥပါလိ မေဓါဝီ၊ ဝိနယေ စ ဝိသာရဒေါ။

မဟာနာဂေါ မဟာပညော၊ သဒ္ဓမ္မဝံသကောဝိဒေါ။

ပုနဒေဝ အဘယော မေဓါဝီ၊ ပိဋကေ သဗ္ဗတ္ထ ကောဝိဒေါ။

တိဿတ္ထေရော စ မေဓါဝီ၊ ဝိနယေ စ ဝိသာရဒေါ။

တဿ သိဿော မဟာပညော၊ ပုပ္ဖနာမော ဗဟုဿုတော။

သာသနံ အနုရက္ခန္တော၊ ဇမ္ဗုဒီပေ ပတိဋ္ဌိတော။

စူဠာဘယော စ မေဓါဝီ၊ ဝိနယေ စ ဝိသာရဒေါ။

တိဿတ္ထေရော စ မေဓါဝီ၊ သဒ္ဓမ္မဝံသကောဝိဒေါ။

စူဠဒေဝေါ စ မေဓါဝီ၊ ဝိနယေ စ ဝိသာရဒေါ။

သိဝတ္ထေရော စ မေဓါဝီ၊ ဝိနယေ သဗ္ဗတ္ထ ကောဝိဒေါ။

ဧတေ နာဂါ မဟာပညာ၊ ဝိနယညူ မဂ္ဂကောဝိဒေါ။

ဝိနယံ ဒီပေ ပကာသေသုံ၊ ပိဋကံ တမ္ဗပဏ္ဏိယာတိ။

၉. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန မာတုဂါမေန သဒ္ဓိံ ကာယသံသဂ္ဂံ သမာပဇ္ဇန္တဿ သံင္ဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အာယသ္မန္တံ ဥဒါယိံ အာရဗ္ဘ ။ ကိသ္မိံ ဝတ္ထုသ္မိန္တိ? အာယသ္မာ ဥဒါယီ မာတုဂါမေန သဒ္ဓိံ ကာယသံသဂ္ဂံ သမာပဇ္ဇိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

၁၀. မာတုဂါမံ ဒုဋ္ဌုလ္လာဟိ ဝါစာဟိ ဩဘာသန္တဿ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အာယသ္မန္တံ ဥဒါယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒါယီ မာတုဂါမံ ဒုဋ္ဌုလ္လာဟိ ဝါစာဟိ ဩဘာသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ, န ဝါစတော; သိယာ ဝါစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၁၁. မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ ဘာသန္တဿ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အာယသ္မန္တံ ဥဒါယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒါယီ မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ အဘာသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ, န ဝါစတော; သိယာ ဝါစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၁၂. သဉ္စရိတ္တံ သမာပဇ္ဇန္တဿ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အာယသ္မန္တံ ဥဒါယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒါယီ သဉ္စရိတ္တံ သမာပဇ္ဇိ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ – သိယာ ကာယတော သမုဋ္ဌာတိ, န ဝါစတော န စိတ္တတော; သိယာ ဝါစတော သမုဋ္ဌာတိ, န ကာယတော န စိတ္တတော; သိယာ ကာယတော စ ဝါစတော စ သမုဋ္ဌာတိ, န စိတ္တတော; သိယာ ကာယတော စ စိတ္တတော စ သမုဋ္ဌာတိ, န ဝါစတော ; သိယာ ဝါစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၁၃. သညာစိကာ ကုဋိံ ကာရာပေန္တဿ သံဃာဒိသေသော ကတ္ထ ပညတ္တောတိ? အာဠဝိယံ ပညတ္တော။ ကံ အာရဗ္ဘာတိ? အာဠဝကေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? အာဠဝကာ ဘိက္ခူ သညာစိကာယ ကုဋိယော ကာရာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၁၄. မဟလ္လကံ ဝိဟာရံ ကာရာပေန္တဿ သံဃာဒိသေသော ကတ္ထ ပညတ္တောတိ? ကောသမ္ဗိယံ ပညတ္တော။ ကံ အာရဗ္ဘာတိ? အာယသ္မန္တံ ဆန္နံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဆန္နော ဝိဟာရဝတ္ထုံ သောဓေန္တော အညတရံ စေတိယရုက္ခံ ဆေဒါပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၁၅. ဘိက္ခုံ အမူလကေန ပါရာဇိကေန ဓမ္မေန အနုဒ္ဓံသေန္တဿ သံဃာဒိသေသော ကတ္ထ ပညတ္တောတိ? ရာဇဂဟေ ပညတ္တော။ ကံ အာရဗ္ဘာတိ? မေတ္တိယဘူမဇကေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? မေတ္တိယဘူမဇကာ ဘိက္ခူ အာယသ္မန္တံ ဒဗ္ဗံ မလ္လပုတ္တံ အမူလကေန ပါရာဇိကေန ဓမ္မေန အနုဒ္ဓံသေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၁၆. ဘိက္ခုံ အညဘာဂိယဿ အဓိကရဏဿ ကိဉ္စိ ဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေန္တဿ သံဃာဒိသေသော ကတ္ထ ပညတ္တောတိ? ရာဇဂဟေ ပညတ္တော။ ကံ အာရဗ္ဘာတိ? မေတ္တိယဘူမဇကေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? မေတ္တိယဘူမဇကာ ဘိက္ခူ အာယသ္မန္တံ ဒဗ္ဗံ မလ္လပုတ္တံ အညဘာဂိယဿ အဓိကရဏဿ ကိဉ္စိ ဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၁၇. သံဃဘေဒကဿ ဘိက္ခုနော ယာဝတတိယံ သမနုဘာသနာယ န ပဋိနိဿဇ္ဇန္တဿ သံဃာဒိသေသော ကတ္ထ ပညတ္တောတိ? ရာဇဂဟေ ပညတ္တော။ ကံ အာရဗ္ဘာတိ? ဒေဝဒတ္တံ အာရဗ္ဘ။ ကိသ္မိံ ဝတ္ထုသ္မိန္တိ? ဒေဝဒတ္တော သမဂ္ဂဿ သံဃဿ ဘေဒါယ ပရက္ကမိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၁၈. ဘေဒါနုဝတ္တကာနံ ဘိက္ခူနံ ယာဝတတိယံ သမနုဘာသနာယ န ပဋိနိဿဇ္ဇန္တာနံ သံဃာဒိသေသော ကတ္ထ ပညတ္တောတိ? ရာဇဂဟေ ပညတ္တော။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ ဒေဝဒတ္တဿ သံဃဘေဒါယ ပရက္ကမန္တဿ အနုဝတ္တကာ အဟေသုံ ဝဂ္ဂဝါဒကာ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၁၉. ဒုဗ္ဗစဿ ဘိက္ခုနော ယာဝတတိယံ သမနုဘာသနာ န ပဋိနိဿဇ္ဇန္တဿ သံဃာဒိသေသော ကတ္ထ ပညတ္တောတိ? ကောသမ္ဗိယံ ပညတ္တော။ ကံ အာရဗ္ဘာတိ? အာယသ္မန္တံ ဆန္နံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဆန္နော ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ အကာသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၂၀. ကုလဒူသကဿ ဘိက္ခုနော ယာဝတတိယံ သမနုဘာသနာယ န ပဋိနိဿဇ္ဇန္တဿ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အဿဇိပုနဗ္ဗသုကေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? အဿဇိပုနဗ္ဗသုကာ ဘိက္ခူ သံဃေန ပဗ္ဗာဇနီယကမ္မကတာ ဘိက္ခူ ဆန္ဒဂါမိတာ ဒေါသဂါမိတာ မောဟဂါမိတာ ဘယဂါမိတာ ပါပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

တေရသ သံဃာဒိသေသာ နိဋ္ဌိတာ။

တဿုဒ္ဒါနံ –

ဝိဿဋ္ဌိ ကာယသံသဂ္ဂံ၊ ဒုဋ္ဌုလ္လံ အတ္တကာမဉ္စ။

သဉ္စရိတ္တံ ကုဋီ စေဝ၊ ဝိဟာရော စ အမူလကံ။

ကိဉ္စိဒေသဉ္စ ဘေဒေါ စ၊ တဿေဝ [တထေဝ (က.)] အနုဝတ္တကာ။

ဒုဗ္ဗစံ ကုလဒူသဉ္စ၊ သံဃာဒိသေသာ တေရသာတိ။

၃. အနိယတကဏ္ဍံ

၂၁. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ပဌမော အနိံယတော ကတ္ထ ပညတ္တော? ကံ အာရဗ္ဘ? ကိသ္မိံ ဝတ္ထုသ္မိံ? အတ္ထိ တတ္ထ ပညတ္တိ, အနုပညတ္တိ, အနုပ္ပန္နပညတ္တိ, သဗ္ဗတ္ထပညတ္တိ ပဒေသပညတ္တိ, သာဓါရဏပညတ္တိ အသာဓါရဏပညတ္တိ, ဧကတောပညတ္တိ ဥဘတောပညတ္တိ, ပဉ္စန္နံ ပါတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နံ, ကတမေန ဥဒ္ဒေသေန ဥဒ္ဒေသံ အာဂစ္ဆတိ, စတုန္နံ ဝိပတ္တီနံ ကတမာ ဝိပတ္တိ, သတ္တန္နံ အာပတ္တိက္ခန္ဓာနံ ကတမော အာပတ္တိက္ခန္ဓော, ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတိ, စတုန္နံ အဓိကရဏာနံ ကတမံ အဓိကရဏံ, သတ္တန္နံ သမထာနံ ကတိဟိ သမထေဟိ သမ္မတိ, ကော တတ္ထ ဝိနယော, ကော တတ္ထ အဘိဝိနယော, ကိံ တတ္ထ ပါတိမောက္ခံ, ကိံ တတ္ထ အဓိပါတိမောက္ခံ, ကာ ဝိပတ္တိ, ကာ သမ္ပတ္တိ, ကာ ပဋိပတ္တိ, ကတိ အတ္ထဝသေ ပဋိစ္စ ဘဂဝတာ ပဌမော အနိယတော ပညတ္တော, ကေ သိက္ခန္တိ, ကေ သိက္ခိတသိက္ခာ, ကတ္ထ ဌိတံ, ကေ ဓါရေန္တိ, ကဿ ဝစနံ ကေနာဘတန္တိ။

၂၂. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ပဌမော အနိယတော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အာယသ္မန္တံ ဥဒါယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒါယီ မာတုဂါမေန သဒ္ဓိံ ဧကော ဧကာယ ရဟော ပဋိစ္ဆန္နေ အာသနေ အလင်္ကမ္မနိယေ နိသဇ္ဇံ ကပ္ပေသိ, တသ္မိံ ဝတ္ထုသ္မိံ။ အတ္ထိ တတ္ထ ပညတ္တိ, အနုပညတ္တိ, အနုပ္ပန္နပညတ္တီတိ? ဧကာ ပညတ္တိ။ အနုပညတ္တိ အနုပ္ပန္နပညတ္တိ တသ္မိံ နတ္ထိ။ သဗ္ဗတ္ထပညတ္တိ, ပဒေသပညတ္တီတိ? သဗ္ဗတ္ထပညတ္တိ။ သာဓါရဏပညတ္တိ, အသာဓါရဏပညတ္တီတိ? အသာဓါရဏပညတ္တိ။ ဧကတောပညတ္တိ, ဥဘတောပညတ္တီတိ? ဧကတောပညတ္တိ။ ပဉ္စန္နံ ပါတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နန္တိ? နိဒါနောဂဓံ နိဒါနပရိယာပန္နံ။ ကတမေန ဥဒ္ဒေသေန ဥဒ္ဒေသံ အာဂစ္ဆတီတိ? စတုတ္ထေန ဥဒ္ဒေသေန ဥဒ္ဒေသံ အာဂစ္ဆတိ။ စတုန္နံ ဝိပတ္တီနံ ကတမာ ဝိပတ္တီတိ? သိယာ သီလဝိပတ္တိ သိယာ အာစာရဝိပတ္တိ။ သတ္တန္နံ အာပတ္တိက္ခန္ဓာနံ ကတမော အာပတ္တိက္ခန္ဓောတိ? သိယာ ပါရာဇိကာပတ္တိက္ခန္ဓော သိယာ သံဃာဒိသေသာပတ္တိက္ခန္ဓော သိယာ ပါစိတ္တိယာပတ္တိက္ခန္ဓော။ ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတီတိ? ဧကေ သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ စတုန္နံ အဓိကရဏာနံ ကတမံ အဓိကရဏန္တိ? အာပတ္တာဓိကရဏံ။ သတ္တန္နံ သမထာနံ ကတိဟိ သမထေဟိ သမ္မတီတိ? တီဟိ သမထေဟိ သမ္မတိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စ။ ကော တတ္ထ ဝိနယော, ကော တတ္ထ အဘိဝိနယောတိ? ပညတ္တိ ဝိနယော, ဝိဘတ္တိ အဘိဝိနယော။ ကိံ တတ္ထ ပါတိမောက္ခံ, ကိံ တတ္ထ အဓိပါတိမောက္ခန္တိ? ပညတ္တိ ပါတိမောက္ခံ, ဝိဘတ္တိ အဓိပါတိမောက္ခံ။ ကာ ဝိပတ္တီတိ? အသံဝရော ဝိပတ္တိ။ ကာ သမ္ပတ္တီတိ? သံဝရော သမ္ပတ္တိ။ ကာ ပဋိပတ္တီတိ? န ဧဝရူပံ ကရိဿာမီတိ ယာဝဇီဝံ အာပါဏကောဋိကံ သမာဒါယ သိက္ခတိ သိက္ခာပဒေသု။ [အ. နိ. ၁၀.၃၁] ကတိ အတ္ထဝသေ ပဋိစ္စ ဘဂဝတာ ပဌမော အနိယတော ပညတ္တောတိ ? ဒသ အတ္ထဝသေ ပဋိစ္စ ဘဂဝတာ ပဌမော အနိယတော ပညတ္တော – သံဃသုဋ္ဌုတာယ, သံဃဖာသုတာယ, ဒုမ္မင်္ကူနံ ပုဂ္ဂလာနံ နိဂ္ဂဟာယ, ပေသလာနံ ဘိက္ခူနံ ဖာသုဝိဟာရာယ, ဒိဋ္ဌဓမ္မိကာနံ အာသဝါနံ သံဝရာယ, သမ္ပရာယိကာနံ အာသဝါနံ ပဋိဃာတာယ, အပ္ပသန္နာနံ ပသာဒါယ, ပသန္နာနံ ဘိယျောဘာဝါယ, သဒ္ဓမ္မဋ္ဌိတိယာ, ဝိနယာနုဂ္ဂဟာယ။ ကေ သိက္ခန္တီတိ? သေက္ခာ စ ပုထုဇ္ဇနကလျာဏကာ စ သိက္ခန္တိ။ ကေ သိက္ခိတသိက္ခာတိ? အရဟန္တော သိက္ခိတသိက္ခာ။ ကတ္ထ ဌိတန္တိ? သိက္ခာကာမေသု ဌိတံ။ ကေ ဓါရေန္တီတိ? ယေသံ ဝတ္တတိ တေ ဓါရေန္တိ။ ကဿ ဝစနန္တိ? ဘဂဝတော ဝစနံ အရဟတော သမ္မာသမ္ဗုဒ္ဓဿ။ ကေနာဘတန္တိ? ပရမ္ပရာဘတံ –

ဥပါလိ ဒါသကော စေဝ၊ သောဏကော သိဂ္ဂဝေါ တထာ။

မောဂ္ဂလိပုတ္တေန ပဉ္စမာ၊ ဧတေ ဇမ္ဗုသိရိဝ္ဟယေ။

တတော မဟိန္ဒော ဣဋ္ဋိယော၊ ဥတ္တိယော သမ္ဗလော တထာ။

ဘဒ္ဒနာမော စ ပဏ္ဍိတော။

ဧတေ နာဂါ မဟာပညာ၊ ဇမ္ဗုဒီပါ ဣဓါဂတာ။

ဝိနယံ တေ ဝါစယိံသု၊ ပိဋကံ တမ္ဗပဏ္ဏိယာ။

နိကာယေ ပဉ္စ ဝါစေသုံ၊ သတ္တ စေဝ ပကရဏေ။

တတော အရိဋ္ဌော မေဓါဝီ၊ တိဿဒတ္တော စ ပဏ္ဍိတော။

ဝိသာရဒေါ ကာဠသုမနော၊ ထေရော စ ဒီဃနာမကော။

ဒီဃသုမနော စ ပဏ္ဍိတော။

ပုနဒေဝ ကာဠသုမနော၊ နာဂတ္ထေရော စ ဗုဒ္ဓရက္ခိတော။

တိဿတ္ထေရော စ မေဓါဝီ၊ ဒေဝတ္ထေရော စ ပဏ္ဍိတော။

ပုနဒေဝ သုမနော မေဓါဝီ၊ ဝိနယေ စ ဝိသာရဒေါ။

ဗဟုဿုတော စူဠနာဂေါ၊ ဂဇောဝ ဒုပ္ပဓံသိယော။

ဓမ္မပါလိတနာမော စ၊ ရောဟဏေ သာဓုပူဇိတော။

တဿ သိဿော မဟာပညော၊ ခေမနာမော တိပေဋကော။

ဒီပေ တာရကရာဇာဝ ပညာယ အတိရောစထ။

ဥပတိဿော စ မေဓါဝီ၊ ဖုဿဒေဝေါ မဟာကထီ။

ပုနဒေဝ သုမနော မေဓါဝီ၊ ပုပ္ဖနာမော ဗဟုဿုတော။

မဟာကထီ မဟာသိဝေါ၊ ပိဋကေ သဗ္ဗတ္ထ ကောဝိဒေါ။

ပုနဒေဝ ဥပါလိ မေဓါဝီ၊ ဝိနယေ စ ဝိသာရဒေါ။

မဟာနာဂေါ မဟာပညော၊ သဒ္ဓမ္မဝံသကောဝိဒေါ။

ပုနဒေဝ အဘယော မေဓါဝီ၊ ပိဋကေ သဗ္ဗတ္ထ ကောဝိဒေါ။

တိဿတ္ထေရော စ မေဓါဝီ၊ ဝိနယေ စ ဝိသာရဒေါ။

တဿ သိဿော မဟာပညော၊ ပုပ္ဖနာမော ဗဟုဿုတော။

သာသနံ အနုရက္ခန္တော၊ ဇမ္ဗုဒီပေ ပတိဋ္ဌိတော။

စူဠာဘယော စ မေဓါဝီ၊ ဝိနယေ စ ဝိသာရဒေါ။

တိဿတ္ထေရော စ မေဓါဝီ၊ သဒ္ဓမ္မဝံသကောဝိဒေါ။

စူဠဒေဝေါ စ မေဓါဝီ၊ ဝိနယေ စ ဝိသာရဒေါ။

သိဝတ္ထေရော စ မေဓါဝီ၊ ဝိနယေ သဗ္ဗတ္ထ ကောဝိဒေါ။

ဧတေ နာဂါ မဟာပညာ၊ ဝိနယညူ မဂ္ဂကောဝိဒါ။

ဝိနယံ ဒီပေ ပကာသေသုံ၊ ပိဋကံ တမ္ဗပဏ္ဏိယာတိ။

၂၃. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဒုတိယော အနိယတော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အာယသ္မန္တံ ဥဒါယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒါယီ မာတုဂါမေန သဒ္ဓိံ ဧကော ဧကာယ ရဟော နိသဇ္ဇံ ကပ္ပေသိ, တသ္မိံ ဝတ္ထုသ္မိံ။ အတ္ထိ တတ္ထ ပညတ္တိ, အနုပညတ္တိ အနုပ္ပန္နပညတ္တီတိ? ဧကာ ပညတ္တိ။ အနုပညတ္တိ အနုပ္ပန္နပညတ္တိ တသ္မိံ နတ္ထိ။ သဗ္ဗတ္ထပညတ္တိ, ပဒေသပညတ္တီတိ? သဗ္ဗတ္ထပညတ္တိ။ သာဓါရဏပညတ္တိ အသာဓါရဏပညတ္တီတိ? အသာဓါရဏပညတ္တိ။ ဧကတောပညတ္တိ ဥဘတောပညတ္တီတိ? ဧကတောပညတ္တိ။ ပဉ္စန္နံ ပါတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နန္တိ? နိဒါနောဂဓံ နိဒါနပရိယာပန္နံ။ ကတမေန ဥဒ္ဒေသေန ဥဒ္ဒေသံ အာဂစ္ဆတီတိ? စတုတ္ထေန ဥဒ္ဒေသေန ဥဒ္ဒေသံ အာဂစ္ဆတိ။ စတုန္နံ ဝိပတ္တီနံ ကတမာ ဝိပတ္တီတိ? သိယာ သီလဝိပတ္တိ, သိယာ အာစာရဝိပတ္တိ။ သတ္တန္နံ အာပတ္တိက္ခန္ဓာနံ ကတမော အာပတ္တိက္ခန္ဓောတိ? သိယာ သံဃာဒိသေသာပတ္တိက္ခန္ဓော, သိယာ ပါစိတ္တိယာပတ္တိက္ခန္ဓော။ ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတီတိ? တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ, န ဝါစတော; သိယာ ဝါစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ စတုန္နံ အဓိကရဏာနံ ကတမံ အဓိကရဏန္တိ? အာပတ္တာဓိကရဏံ။ သတ္တန္နံ သမထာနံ ကတိဟိ သမထေဟိ သမ္မတီတိ? တီဟိ သမထေဟိ သမ္မတိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စ။ပေ.။။

ဒွေ အနိယတာ နိဋ္ဌိတာ။

တဿုဒ္ဒါနံ –

အလင်္ကမ္မနိယဉ္စေဝ၊ တထေဝ စ န ဟေဝ ခေါ။

အနိယတာ သုပညတ္တာ၊ ဗုဒ္ဓသေဋ္ဌေန တာဒိနာတိ။

၄. နိဿဂ္ဂိယကဏ္ဍံ

၁. ကထိနဝဂ္ဂေါ

၂၄. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန အတိရေကစီဝရံ ဒသာဟံ အတိက္ကာမေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? ဝေသာလိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ အတိရေကစီဝရံ ဓါရေသုံ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ ဝါစတော စ သမုဋ္ဌာတိ, န စိတ္တတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၂၅. ဧကရတ္တံ တိစီဝရေန ဝိပ္ပဝသန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ ဘိက္ခူနံ ဟတ္ထေ စီဝရံ နိက္ခိပိတွာ သန္တရုတ္တရေန ဇနပဒစာရိကံ ပက္ကမိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ ဝါစတော စ သမုဋ္ဌာတိ, န စိတ္တတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၂၆. အကာလစီဝရံ ပဋိဂ္ဂဟေတွာ မာသံ အတိက္ကာမေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ အကာလစီဝရံ ပဋိဂ္ဂဟေတွာ မာသံ အတိက္ကာမေသုံ, တသ္မိံ ဝတ္ထုသ္မိံ။ ဧကာ ပညတ္တိ , ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ ဝါစတော စ သမုဋ္ဌာတိ, န စိတ္တတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၂၇. အညာတိကာယ ဘိက္ခုနိယာ ပုရာဏစီဝရံ ဓေါဝါပေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥဒါယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒါယီ အညာတိကာယ ဘိက္ခုနိယာ ပုရာဏစီဝရံ ဓေါဝါပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၂၈. အညာတိကာယ ဘိက္ခုနိယာ ဟတ္ထတော စီဝရံ ပဋိဂ္ဂဏှန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? အာယသ္မန္တံ ဥဒါယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒါယီ အညာတိကာယ ဘိက္ခုနိယာ ဟတ္ထတော စီဝရံ ပဋိဂ္ဂဟေသိ, တသ္မိံ ဝတ္ထုသ္မိံ။ ဧကာ ပညတ္တိ ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၂၉. အညာတကံ ဂဟပတိံ ဝါ ဂဟပတာနိံ ဝါ စီဝရံ ဝိညာပေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥပနန္ဒံ သကျပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥပနန္ဒော သကျပုတ္တော အညာတကံ သေဋ္ဌိပုတ္တံ စီဝရံ ဝိညာပေသိ, တသ္မိံ ဝတ္ထုသ္မိံ။ ဧကာ ပညတ္တိ ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၃၀. အညာတကံ ဂဟပတိံ ဝါ ဂဟပတာနိံ ဝါ တတုတ္တရိ စီဝရံ ဝိညာပေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ န မတ္တံ ဇာနိတွာ ဗဟုံ စီဝရံ ဝိညာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၃၁. ပုဗ္ဗေ အပ္ပဝါရိတဿ အညာတကံ ဂဟပတိကံ ဥပသင်္ကမိတွာ စီဝရေ ဝိကပ္ပံ အာပဇ္ဇန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥပနန္ဒံ သကျပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥပနန္ဒော သကျပုတ္တော ပုဗ္ဗေ အပ္ပဝါရိတော အညာတကံ ဂဟပတိကံ ဥပသင်္ကမိတွာ စီဝရေ ဝိကပ္ပံ အာပဇ္ဇိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၃၂. ပုဗ္ဗေ အပ္ပဝါရိတဿ အညာတကေ ဂဟပတိကေ ဥပသင်္ကမိတွာ စီဝရေ ဝိကပ္ပံ အာပဇ္ဇန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥပနန္ဒံ သကျပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥပနန္ဒော သကျပုတ္တော ပုဗ္ဗေ အပ္ပဝါရိတော အညာတကေ ဂဟပတိကေ ဥပသင်္ကမိတွာ စီဝရေ ဝိကပ္ပံ အာပဇ္ဇိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၃၃. အတိရေကတိက္ခတ္တုံ စောဒနာယ အတိရေကဆက္ခတ္တုံ ဌာနေန စီဝရံ အဘိနိပ္ဖာဒေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥပနန္ဒံ သကျပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥပနန္ဒော သကျပုတ္တော ဥပါသကေန – ‘‘အဇ္ဇဏှော, ဘန္တေ, အာဂမေဟီ’’တိ ဝုစ္စမာနော နာဂမေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

ကထိနဝဂ္ဂေါ ပဌမော။

၂. ကောသိယဝဂ္ဂေါ

၃၄. ကောသိယမိဿကံ သန္ထတံ ကာရာပေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? အာဠဝိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ကောသိယကာရကေ ဥပသင်္ကမိတွာ ဧဝမာဟံသု ‘‘ဗဟူ, အာဝုသော, ကောသကာရကေ ပစထ။ အမှာကမ္ပိ ဒဿထ။ မယမ္ပိ ဣစ္ဆာမ ကောသိယမိဿကံ သန္ထတံ ကာတု’’န္တိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၃၅. သုဒ္ဓကာဠကာနံ ဧဠကလောမာနံ သန္ထတံ ကာရာပေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? ဝေသာလိယံ ပညတ္တံ။ ကံ အာရဗ္ဘာတိ ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ သုဒ္ဓကာဠကာနံ ဧဠကလောမာနံ သန္ထတံ ကာရာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၃၆. အနာဒိယိတွာ တုလံ ဩဒါတာနံ တုလံ ဂေါစရိယာနံ နဝံ သန္ထတံ ကာရာပေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ထောကညေဝ ဩဒါတံ အန္တေ [ဩဒါတာနံ အန္တေ အန္တေ (သီ.), ဩဒါတာနံ အန္တေ (သျာ.)] အာဒိယိတွာ တထေဝ သုဒ္ဓကာဠကာနံ ဧဠကလောမာနံ သန္ထတံ ကာရာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၃၇. အနုဝဿံ သန္ထတံ ကာရာပေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ အနုဝဿံ သန္ထတံ ကာရာပေသုံ, တသ္မိံ ဝတ္ထုသ္မိံ ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၃၈. အနာဒိယိတွာ ပုရာဏသန္ထတဿ သာမန္တာ သုဂတဝိဒတ္ထိံ နဝံ နိသီဒနသန္ထတံ ကာရာပေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ သန္ထတာနိ ဥဇ္ဈိတွာ အာရညိကင်္ဂံ ပိဏ္ဍပါတိကင်္ဂံ ပံသုကူလိကင်္ဂံ သမာဒိယိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၃၉. ဧဠကလောမာနိ ပဋိဂ္ဂဟေတွာ တိယောဇနံ အတိက္ကာမေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုံ အာရဗ္ဘ။ ကိသ္မိံ ဝတ္ထုသ္မိန္တိ? အညတရော ဘိက္ခု ဧဠကလောမာနိ ပဋိဂ္ဂဟေတွာ တိယောဇနံ အတိက္ကာမေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော သမုဋ္ဌာတိ, န ဝါစတော န စိတ္တတော; သိယာ ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

၄၀. အညာတိကာယ ဘိက္ခုနိယာ ဧဠကလောမာနိ ဓေါဝါပေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သက္ကေသု ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ အညာတိကာဟိ ဘိက္ခုနီဟိ ဧဠကလောမာနိ ဓေါဝါပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၄၁. ရူပိယံ ပဋိဂ္ဂဏှန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? ရာဇဂဟေ ပညတ္တံ ။ ကံ အာရဗ္ဘာတိ? အာယသ္မန္တံ ဥပနန္ဒံ သကျပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥပနန္ဒော သကျပုတ္တော ရူပိယံ ပဋိဂ္ဂဟေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၄၂. နာနပ္ပကာရကံ ရူပိယသံဝေါဟာရံ သမာပဇ္ဇန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ နာနပ္ပကာရကံ ရူပိယသံဝေါဟာရံ သမာပဇ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၄၃. နာနပ္ပကာရကံ ကယဝိက္ကယံ သမာပဇ္ဇန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥပနန္ဒံ သကျပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥပနန္ဒော သကျပုတ္တော ပရိဗ္ဗာဇကေန သဒ္ဓိံ ကယဝိက္ကယံ သမာပဇ္ဇိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

ကောသိယဝဂ္ဂေါ ဒုတိယော။

၃. ပတ္တဝဂ္ဂေါ

၄၄. အတိရေကပတ္တံ ဒသာဟံ အတိက္ကာမေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ အတိရေကပတ္တံ ဓါရေသုံ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ ဝါစတော စ သမုဋ္ဌာတိ, န စိတ္တတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၄၅. ဦနပဉ္စဗန္ဓနေန ပတ္တေန အညံ နဝံ ပတ္တံ စေတာပေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သက္ကေသု ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ အပ္ပမတ္တကေနပိ ဘိန္နေန အပ္ပမတ္တကေနပိ ခဏ္ဍေန ဝိလိခိတမတ္တေနပိ ဗဟူ ပတ္တေ ဝိညာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၄၆. ဘေသဇ္ဇာနိ ပဋိဂ္ဂဟေတွာ သတ္တာဟံ အတိက္ကာမေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ ဘေသဇ္ဇာနိ ပဋိဂ္ဂဟေတွာ သတ္တာဟံ အတိက္ကာမေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ကထိနကေ။ပေ.။။

၄၇. အတိရေကမာသေ သေသေ ဂိမှာနေ ဝဿိကသာဋိကစီဝရံ ပရိယေသန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ အတိရေကမာသေ သေသေ ဂိမှာနေ ဝဿိကသာဋိကစီဝရံ ပရိယေသိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၄၈. ဘိက္ခုဿ သာမံ စီဝရံ ဒတွာ ကုပိတေန အနတ္တမနေန အစ္ဆိန္ဒန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥပနန္ဒံ သကျပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥပနန္ဒော သကျပုတ္တော ဘိက္ခုဿ သာမံ စီဝရံ ဒတွာ ကုပိတော အနတ္တမနော အစ္ဆိန္ဒိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၄၉. သာမံ သုတ္တံ ဝိညာပေတွာ တန္တဝါယေဟိ စီဝရံ ဝါယာပေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ သာမံ သုတ္တံ ဝိညာပေတွာ တန္တဝါယေဟိ စီဝရံ ဝါယာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၅၀. ပုဗ္ဗေ အပ္ပဝါရိတဿ အညာတကဿ ဂဟပတိကဿ တန္တဝါယေ ဥပသင်္ကမိတွာ စီဝရေ ဝိကပ္ပံ အာပဇ္ဇန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥပနန္ဒံ သကျပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥပနန္ဒော သကျပုတ္တော ပုဗ္ဗေ အပ္ပဝါရိတော အညာတကဿ ဂဟပတိကဿ တန္တဝါယေ ဥပသင်္ကမိတွာ စီဝရေ ဝိကပ္ပံ အာပဇ္ဇိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၅၁. အစ္စေကစီဝရံ ပဋိဂ္ဂဟေတွာ စီဝရကာလသမယံ အတိက္ကာမေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ အစ္စေကစီဝရံ ပဋိဂ္ဂဟေတွာ စီဝရကာလသမယံ အတိက္ကာမေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ကထိနကေ။ပေ.။။

၅၂. တိဏ္ဏံ စီဝရာနံ အညတရံ စီဝရံ အန္တရဃရေ နိက္ခိပိတွာ အတိရေကဆာရတ္တံ ဝိပ္ပဝသန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ တိဏ္ဏံ စီဝရာနံ အညတရံ စီဝရံ အန္တရဃရေ နိက္ခိပိတွာ အတိရေကဆာရတ္တံ ဝိပ္ပဝသိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ကထိနကေ။ပေ.။။

၅၃. ဇာနံ သံဃိကံ လာဘံ ပရိဏတံ အတ္တနော ပရိဏာမေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဇာနံ သံဃိကံ လာဘံ ပရိဏတံ အတ္တနော ပရိဏာမေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ပတ္တဝဂ္ဂေါ တတိယော။

တိံသ နိဿဂ္ဂိယာ ပါစိတ္တိယာ နိဋ္ဌိတာ။

တဿုဒ္ဒါနံ –

ဒသေကရတ္တိမာသော စ၊ ဓေါဝနဉ္စ ပဋိဂ္ဂဟော။

အညာတံ တဉ္စ [အညာတကဉ္စ (က.)] ဥဒ္ဒိဿ၊ ဥဘိန္နံ ဒူတကေန စ။

ကောသိယာ သုဒ္ဓဒွေဘာဂါ၊ ဆဗ္ဗဿာနိ နိသီဒနံ။

ဒွေ စ လောမာနိ ဥဂ္ဂဏှေ၊ ဥဘော နာနပ္ပကာရကာ။

ဒွေ စ ပတ္တာနိ ဘေသဇ္ဇံ၊ ဝဿိကာ ဒါနပဉ္စမံ။

သာမံ ဝါယာပနစ္စေကော၊ သာသင်္ကံ သံဃိကေန စာတိ။

၅. ပါစိတ္တိယကဏ္ဍံ

၁. မုသာဝါဒဝဂ္ဂေါ

၅၄. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန သမ္ပဇာနမုသာဝါဒေ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ ? ဟတ္ထကံ သကျပုတ္တံ အာရဗ္ဘ ။ ကိသ္မိံ ဝတ္ထုသ္မိန္တိ? အာယသ္မာ ဟတ္ထကော သကျပုတ္တော တိတ္ထိယေဟိ သဒ္ဓိံ သလ္လပန္တော အဝဇာနိတွာ ပဋိဇာနိ, ပဋိဇာနိတွာ အဝဇာနိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ, န ဝါစတော; သိယာ ဝါစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၅၅. ဩမသဝါဒေ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ပေသလေဟိ ဘိက္ခူဟိ သဒ္ဓိံ ဘဏ္ဍန္တာ [ဘဏ္ဍေန္တာ (က.)] ပေသလေ ဘိက္ခူ ဩမသိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၅၆. ဘိက္ခုပေသုညေ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဘိက္ခူနံ ဘဏ္ဍနဇာတာနံ ကလဟဇာတာနံ ဝိဝါဒါပန္နာနံ ပေသုညံ ဥပသံဟရိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၅၇. အနုပသမ္ပန္နံ ပဒသော ဓမ္မံ ဝါစေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဥပါသကေ ပဒသော ဓမ္မံ ဝါစေသုံ , တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ဝါစတော သမုဋ္ဌာတိ, န ကာယတော န စိတ္တတော; သိယာ ဝါစတော စ စိတ္တတော စ သမုဋ္ဌာတိ, န ကာယတော။ပေ.။။

၅၈. အနုပသမ္ပန္နေန ဥတ္တရိဒိရတ္တတိရတ္တံ သဟသေယျံ ကပ္ပေန္တဿ ပါစိတ္တိယံ ကတ္ထ ပညတ္တန္တိ? အာဠဝိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ အနုပသမ္ပန္နေန သဟသေယျံ ကပ္ပေသုံ, တသ္မိံ ဝတ္ထုသ္မိံ။ ဧကာ ပညတ္တိ , ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော သမုဋ္ဌာတိ, န ဝါစတော န စိတ္တတော; သိယာ ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

၅၉. မာတုဂါမေန သဟသေယျံ ကပ္ပေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ အနုရုဒ္ဓံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ အနုရုဒ္ဓေါ မာတုဂါမေန သဟသေယျံ ကပ္ပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ဧဠကလောမကေ။ပေ.။။

၆၀. မာတုဂါမဿ ဥတ္တရိဆပ္ပဉ္စဝါစာဟိ ဓမ္မံ ဒေသေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥဒါယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒါယီ မာတုဂါမဿ ဓမ္မံ ဒေသေသိ, တသ္မိံ ဝတ္ထုသ္မိံ။ ဧကာ ပညတ္တိ, ဒွေ အနုပညတ္တိယော။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ပဒသောဓမ္မေ။ပေ.။။

၆၁. အနုပသမ္ပန္နဿ ဥတ္တရိမနုဿဓမ္မံ ဘူတံ အာရောစေန္တဿ ပါစိတ္တိယံ ကတ္ထ ပညတ္တန္တိ? ဝေသာလိယံ ပညတ္တံ။ ကံ အာရဗ္ဘာတိ? ဝဂ္ဂုမုဒါတီရိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဝဂ္ဂုမုဒါတီရိယာ ဘိက္ခူ ဂိဟီနံ အညမညဿ ဥတ္တရိမနုဿဓမ္မဿ ဝဏ္ဏံ ဘာသိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ – သိယာ ကာယတော သမုဋ္ဌာတိ, န ဝါစတော န စိတ္တတော; သိယာ ဝါစတော သမုဋ္ဌာတိ, န ကာယတော န စိတ္တတော; သိယာ ကာယတော စ ဝါစတော စ သမုဋ္ဌာတိ, န စိတ္တတော။ပေ.။။

၆၂. ဘိက္ခုဿ ဒုဋ္ဌုလ္လာပတ္တိံ အနုပသမ္ပန္နဿ အာရောစေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဘိက္ခုဿ ဒုဋ္ဌုလ္လာပတ္တိံ အနုပသမ္ပန္နဿ အာရောစေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၆၃. ပထဝိံ ခဏန္တဿ ပါစိတ္တိယံ ကတ္ထ ပညတ္တန္တိ? အာဠဝိယံ ပညတ္တံ။ ကံ အာရဗ္ဘာတိ? အာဠဝကေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? အာဠဝကာ ဘိက္ခူ ပထဝိံ ခဏိံသု , တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

မုသာဝါဒဝဂ္ဂေါ ပဌမော။

၂. ဘူတဂါမဝဂ္ဂေါ

၆၄. ဘူတဂါမပါတဗျတာ ပါစိတ္တိယံ ကတ္ထ ပညတ္တန္တိ? အာဠဝိယံ ပညတ္တံ။ ကံ အာရဗ္ဘာတိ? အာဠဝကေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? အာဠဝကာ ဘိက္ခူ ရုက္ခံ ဆိန္ဒိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၆၅. အညဝါဒကေ ဝိဟေသကေ ပါစိတ္တိယံ ကတ္ထ ပညတ္တန္တိ? ကောသမ္ဗိယံ ပညတ္တံ။ ကံ အာရဗ္ဘာတိ? အာယသ္မန္တံ ဆန္နံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဆန္နော သံဃမဇ္ဈေ အာပတ္တိယာ အနုယုဉ္ဇိယမာနော အညေနညံ ပဋိစရိ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၆၆. ဥဇ္ဈာပနကေ ခိယျနကေ ပါစိတ္တိယံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? မေတ္တိယဘူမဇကေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? မေတ္တိယဘူမဇကာ ဘိက္ခူ အာယသ္မန္တံ ဒဗ္ဗံ မလ္လပုတ္တံ ဘိက္ခူ ဥဇ္ဈာပေသုံ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၆၇. သံဃိကံ မဉ္စံ ဝါ ဣဌံ ဝါ ဘိသိံ ဝါ ကောစ္ဆံ ဝါ အဇ္ဈောကာသေ သန္ထရိတွာ အနုဒ္ဓရိတွာ အနာပုစ္ဆာ ပက္ကမန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ သံဃိကံ သေနာသနံ အဇ္ဈောကာသေ သန္ထရိတွာ အနုဒ္ဓရိတွာ အနာပုစ္ဆာ ပက္ကမိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ကထိနကေ။ပေ.။။

၆၈. သံဃိကေ ဝိဟာရေ သေယျံ သန္ထရိတွာ အနုဒ္ဓရိတွာ အနာပုစ္ဆာ ပက္ကမန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သတ္တရသဝဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သတ္တရသဝဂ္ဂိယာ ဘိက္ခူ သံဃိကေ ဝိဟာရေ သေယျံ သန္ထရိတွာ အနုဒ္ဓရိတွာ အနာပုစ္ဆာ ပက္ကမိံသု, တသ္မိံ ဝတ္ထုသ္မိံ။ ဧကာ ပညတ္တိ ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ကထိနကေ။ပေ.။။

၆၉. သံဃိကေ ဝိဟာရေ ဇာနံ ပုဗ္ဗုပဂတံ ဘိက္ခုံ အနုပခဇ္ဇ သေယျံ ကပ္ပေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ထေရေ ဘိက္ခူ အနုပခဇ္ဇ သေယျံ ကပ္ပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

၇၀. ဘိက္ခုံ ကုပိတေန အနတ္တမနေန သံဃိကာ ဝိဟာရာ နိက္ကဍ္ဎန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ကုပိတာ အနတ္တမနာ ဘိက္ခူ သံဃိကာ ဝိဟာရာ နိက္ကဍ္ဎိံသု , တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၇၁. သံဃိကေ ဝိဟာရေ ဥပရိဝေဟာသကုဋိယာ အာဟစ္စပါဒကံ မဉ္စံ ဝါ ဣဌံ ဝါ အဘိနိသီဒန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုံ အာရဗ္ဘ။ ကိသ္မိံ ဝတ္ထုသ္မိန္တိ? အညတရော ဘိက္ခု သံဃိကေ ဝိဟာရေ ဥပရိဝေဟာသကုဋိယာ အာဟစ္စပါဒကံ မဉ္စံ သဟသာ အဘိနိသီဒိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော သမုဋ္ဌာတိ, န ဝါစတော န စိတ္တတော; သိယာ ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

၇၂. ဒွတ္တိပရိယာယေ အဓိဋ္ဌဟိတွာ တတုတ္တရိ အဓိဋ္ဌဟန္တဿ ပါစိတ္တိယံ ကတ္ထ ပညတ္တန္တိ? ကောသမ္ဗိယံ ပညတ္တံ။ ကံ အာရဗ္ဘာတိ? အာယသ္မန္တံ ဆန္နံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဆန္နော ကတပရိယောသိတံ ဝိဟာရံ ပုနပ္ပုနံ ဆာဒါပေသိ, ပုနပ္ပုနံ လိမ္ပာပေသိ, အတိဘာရိကော ဝိဟာရော ပရိပတိ , တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၇၃. ဇာနံ သပ္ပါဏကံ ဥဒကံ တိဏံ ဝါ မတ္တိကံ ဝါ သိဉ္စန္တဿ ပါစိတ္တိယံ ကတ္ထ ပညတ္တန္တိ? အာဠဝိယံ ပညတ္တံ။ ကံ အာရဗ္ဘာတိ? အာဠဝကေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ ? အာဠဝကာ ဘိက္ခူ ဇာနံ သပ္ပါဏကံ ဥဒကံ တိဏမ္ပိ မတ္တိကမ္ပိ သိဉ္စိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ဘူတဂါမဝဂ္ဂေါ ဒုတိယော။

၃. ဩဝါဒဝဂ္ဂေါ

၇၄. အသမ္မတေန ဘိက္ခုနိယော ဩဝဒန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ အသမ္မတာ ဘိက္ခုနိယော ဩဝဒိံသု, တသ္မိံ ဝတ္ထုသ္မိံ။ အတ္ထိ တတ္ထ ပညတ္တိ, အနုပညတ္တိ, အနုပ္ပန္နပညတ္တီတိ? ဧကာ ပညတ္တိ, ဧကာ အနုပညတ္တိ။ အနုပ္ပန္နပညတ္တိ တသ္မိံ နတ္ထိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ဝါစတော သမုဋ္ဌာတိ, န ကာယတော န စိတ္တတော; သိယာ ဝါစတော စ စိတ္တတော စ သမုဋ္ဌာတိ, န ကာယတော။ပေ.။။

၇၅. အတ္ထင်္ဂတေ သူရိယေ ဘိက္ခုနိယော ဩဝဒန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ စူဠပန္ထကံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ စူဠပန္ထကော အတ္ထင်္ဂတေ သူရိယေ ဘိက္ခုနိယော ဩဝဒိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ပဒသောဓမ္မေ။ပေ.။။

၇၆. ဘိက္ခုနုပဿယံ ဥပသင်္ကမိတွာ ဘိက္ခုနိယော ဩဝဒန္တဿ ပါစိတ္တိယံ ကတ္ထ ပညတ္တန္တိ? သက္ကေသု ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဘိက္ခုနုပဿယံ ဥပသင်္ကမိတွာ ဘိက္ခုနိယော ဩဝဒိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ကထိနကေ။ပေ.။။

၇၇. ‘‘အာမိသဟေတု ဘိက္ခူ ဘိက္ခုနိယော ဩဝဒန္တီ’’တိ ဘဏန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ‘‘အာမိသဟေတု ဘိက္ခူ ဘိက္ခုနိယော ဩဝဒန္တီ’’တိ ဘဏိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၇၈. အညာတိကာယ ဘိက္ခုနိယာ စီဝရံ ဒေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုံ အာရဗ္ဘ။ ကိသ္မိံ ဝတ္ထုသ္မိန္တိ? အညတရော ဘိက္ခု အညာတိကာယ ဘိက္ခုနိယာ စီဝရံ အဒါသိ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၇၉. အညာတိကာယ ဘိက္ခုနိယာ စီဝရံ သိဗ္ဗေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥဒါယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒါယီ အညာတိကာယ ဘိက္ခုနိယာ စီဝရံ သိဗ္ဗေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ ။ပေ.။။

၈၀. ဘိက္ခုနိယာ သဒ္ဓိံ သံဝိဓါယ ဧကဒ္ဓါနမဂ္ဂံ ပဋိပဇ္ဇန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဘိက္ခုနီဟိ သဒ္ဓိံ သံဝိဓါယ ဧကဒ္ဓါနမဂ္ဂံ ပဋိပဇ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌာတိ – သိယာ ကာယတော သမုဋ္ဌာတိ, န ဝါစတော န စိတ္တတော; သိယာ ကာယတော စ ဝါစတော စ သမုဋ္ဌာတိ, န စိတ္တတော; သိယာ ကာယတော စ စိတ္တတော စ သမုဋ္ဌာတိ, န ဝါစတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၈၁. ဘိက္ခုနိယာ သဒ္ဓိံ သံဝိဓါယ ဧကံ နာဝံ အဘိရုဟန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဘိက္ခုနီဟိ သဒ္ဓိံ သံဝိဓါယ ဧကံ နာဝံ အဘိရုဟိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌာတိ။ပေ.။။

၈၂. ဇာနံ ဘိက္ခုနိပရိပါစိတံ ပိဏ္ဍပါတံ ဘုဉ္ဇန္တဿ ပါစိတ္တိယံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? ဒေဝဒတ္တံ အာရဗ္ဘ။ ကိသ္မိံ ဝတ္ထုသ္မိန္တိ? ဒေဝဒတ္တော ဇာနံ ဘိက္ခုနိပရိပါစိတံ ပိဏ္ဍပါတံ ဘုဉ္ဇိ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

၈၃. ဘိက္ခုနိယာ သဒ္ဓိံ ဧကော ဧကာယ ရဟော နိသဇ္ဇံ ကပ္ပေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥဒါယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒါယီ ဘိက္ခုနိယာ သဒ္ဓိံ ဧကော ဧကာယ ရဟော နိသဇ္ဇံ ကပ္ပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

ဩဝါဒဝဂ္ဂေါ တတိယော။

၄. ဘောဇနဝဂ္ဂေါ

၈၄. တတုတ္တရိ အာဝသထပိဏ္ဍံ ဘုဉ္ဇန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ အနုဝသိတွာ အနုဝသိတွာ အာဝသထပိဏ္ဍံ ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ဧဠကလောမကေ။ပေ.။။

၈၅. ဂဏဘောဇနေ ပါစိတ္တိယံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? ဒေဝဒတ္တံ အာရဗ္ဘ။ ကိသ္မိံ ဝတ္ထုသ္မိန္တိ? ဒေဝဒတ္တော သပရိသော ကုလေသု ဝိညာပေတွာ ဝိညာပေတွာ ဘုဉ္ဇိ, တသ္မိံ ဝတ္ထုသ္မိံ။ ဧကာ ပညတ္တိ, သတ္တ အနုပညတ္တိယော။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ဧဠကလောမကေ။ပေ.။။

၈၆. ပရမ္ပရဘောဇနေ ပါစိတ္တိယံ ကတ္ထ ပညတ္တန္တိ? ဝေသာလိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ အညတြ နိမန္တိတာ အညတြ ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ, စတဿော အနုပညတ္တိယော။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ကထိနကေ။ပေ.။။

၈၇. ဒွတ္တိပတ္တပူရေ ပူဝေ ပဋိဂ္ဂဟေတွာ တတုတ္တရိ ပဋိဂ္ဂဏှန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ န မတ္တံ ဇာနိတွာ ပဋိဂ္ဂဟေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၈၈. ဘုတ္တာဝိနာ ပဝါရိတေန အနတိရိတ္တံ ခါဒနီယံ ဝါ ဘောဇနီယံ ဝါ ဘုဉ္ဇန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ ဘုတ္တာဝီ ပဝါရိတာ အညတြ ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ကထိနကေ။ပေ.။။

၈၉. ဘိက္ခုံ ဘုတ္တာဝိံ ပဝါရိတံ အနတိရိတ္တေန ခါဒနီယေန ဝါ ဘောဇနီယေန ဝါ အဘိဟဋ္ဌုံ ပဝါရေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုံ အာရဗ္ဘ။ ကိသ္မိံ ဝတ္ထုသ္မိန္တိ? အညတရော ဘိက္ခု ဘိက္ခုံ ဘုတ္တာဝိံ ပဝါရိတံ အနတိရိတ္တေန ဘောဇနီယေန အဘိဟဋ္ဌုံ ပဝါရေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၉၀. ဝိကာလေ ခါဒနီယံ ဝါ ဘောဇနီယံ ဝါ ဘုဉ္ဇန္တဿ ပါစိတ္တိယံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? သတ္တရသဝဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သတ္တရသဝဂ္ဂိယာ ဘိက္ခူ ဝိကာလေ ဘောဇနံ ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ဧဠကလောမကေ။ပေ.။။

၉၁. သန္နိဓိကာရကံ ခါဒနီယံ ဝါ ဘောဇနီယံ ဝါ ဘုဉ္ဇန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဗေလဋ္ဌသီသံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဗေလဋ္ဌသီသော သန္နိဓိကာရကံ ဘောဇနံ ဘုဉ္ဇိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ဧဠကလောမကေ။ပေ.။။

၉၂. ပဏီတဘောဇနာနိ အတ္တနော အတ္ထာယ ဝိညာပေတွာ ဘုဉ္ဇန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ပဏီတဘောဇနာနိ အတ္တနော အတ္ထာယ ဝိညာပေတွာ ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌာတိ။ပေ.။။

၉၃. အဒိန္နံ မုခဒွါရံ အာဟာရံ အာဟရန္တဿ ပါစိတ္တိယံ ကတ္ထ ပညတ္တန္တိ? ဝေသာလိယံ ပညတ္တံ။ ကံ အာရဗ္ဘာတိ? အညတရံ ဘိက္ခုံ အာရဗ္ဘ။ ကိသ္မိံ ဝတ္ထုသ္မိန္တိ? အညတရော ဘိက္ခု အဒိန္နံ မုခဒွါရံ အာဟာရံ အာဟရိ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ဧဠကလောမကေ။ပေ.။။

ဘောဇနဝဂ္ဂေါ စတုတ္ထော။

၅. အစေလကဝဂ္ဂေါ

၉၄. အစေလကဿ ဝါ ပရိဗ္ဗာဇကဿ ဝါ ပရိဗ္ဗာဇိကာယ ဝါ သဟတ္ထာ ခါဒနီယံ ဝါ ဘောဇနီယံ ဝါ ဒေန္တဿ ပါစိတ္တိယံ ကတ္ထ ပညတ္တန္တိ? ဝေသာလိယံ ပညတ္တံ။ ကံ အာရဗ္ဘာတိ? အာယသ္မန္တံ အာနန္ဒံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ အာနန္ဒော အညတရိဿာ ပရိဗ္ဗာဇိကာယ ဧကံ မညမာနော ဒွေ ပူဝေ အဒါသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ဧဠကလောမကေ။ပေ.။။

၉၅. ဘိက္ခုံ ‘‘ဧဟာဝုသော, ဂါမံ ဝါ နိဂမံ ဝါ ပိဏ္ဍာယ ပဝိသိဿာမာ’’တိ တဿ ဒါပေတွာ ဝါ အဒါပေတွာ ဝါ ဥယျောဇေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥပနန္ဒံ သကျပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ ? အာယသ္မာ ဥပနန္ဒော သကျပုတ္တော ဘိက္ခုံ ‘‘ဧဟာဝုသော, ဂါမံ ပိဏ္ဍာယ ပဝိသိဿာမာ’’တိ, တဿ အဒါပေတွာ ဥယျောဇေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၉၆. သဘောဇနေ ကုလေ အနုပခဇ္ဇ နိသဇ္ဇံ ကပ္ပေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥပနန္ဒံ သကျပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥပနန္ဒော သကျပုတ္တော သဘောဇနေ ကုလေ အနုပခဇ္ဇ နိသဇ္ဇံ ကပ္ပေသိ, တသ္မိံ ဝတ္ထုသ္မိံ။ ဧကာ ပညတ္တိ ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

၉၇. မာတုဂါမေန သဒ္ဓိံ ရဟော ပဋိစ္ဆန္နေ အာသနေ နိသဇ္ဇံ ကပ္ပေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥပနန္ဒံ သကျပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥပနန္ဒော သကျပုတ္တော မာတုဂါမေန သဒ္ဓိံ ရဟော ပဋိစ္ဆန္နေ အာသနေ နိသဇ္ဇံ ကပ္ပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

၉၈. မာတုဂါမေန သဒ္ဓိံ ဧကော ဧကာယ ရဟော နိသဇ္ဇံ ကပ္ပေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥပနန္ဒံ သကျပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥပနန္ဒော သကျပုတ္တော မာတုဂါမေန သဒ္ဓိံ ဧကော ဧကာယ ရဟော နိသဇ္ဇံ ကပ္ပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

၉၉. နိမန္တိတေန သဘတ္တေန သန္တံ ဘိက္ခုံ အနာပုစ္ဆာ ပုရေဘတ္တံ ပစ္ဆာဘတ္တံ ကုလေသု စာရိတ္တံ အာပဇ္ဇန္တဿ ပါစိတ္တိယံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? အာယသ္မန္တံ ဥပနန္ဒံ သကျပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥပနန္ဒော သကျပုတ္တော နိမန္တိတော သဘတ္တော သမာနော ပုရေဘတ္တံ ပစ္ဆာဘတ္တံ ကုလေသု စာရိတ္တံ အာပဇ္ဇိ, တသ္မိံ ဝတ္ထုသ္မိံ။ ဧကာ ပညတ္တိ, စတဿော အနုပညတ္တိယော။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ကထိနကေ။ပေ.။။

၁၀၀. တတုတ္တရိ ဘေသဇ္ဇံ ဝိညာပေန္တဿ ပါစိတ္တိယံ ကတ္ထ ပညတ္တန္တိ? သက္ကေသု ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ မဟာနာမေန သက္ကေန ‘‘အဇ္ဇဏှော, ဘန္တေ, အာဂမေထာ’’တိ ဝုစ္စမာနာ နာဂမေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၁၀၁. ဥယျုတ္တံ သေနံ ဒဿနာယ ဂစ္ဆန္တဿ ပါစိတ္တိယံ ကတ္ထ ပညတ္တန္တိ ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဥယျုတ္တံ သေနံ ဒဿနာယ အဂမံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ဧဠကလောမကေ။ပေ.။။

၁၀၂. အတိရေကတိရတ္တံ သေနာယ ဝသန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ အတိရေကတိရတ္တံ သေနာယ ဝသိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ဧဠကလောမကေ။ပေ.။။

၁၀၃. ဥယျောဓိကံ ဂစ္ဆန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဥယျောဓိကံ အဂမံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ဧဠကလောမကေ။ပေ.။။

အစေလကဝဂ္ဂေါ ပဉ္စမော။

၆. သုရာပါနဝဂ္ဂေါ

၁၀၄. သုရာမေရယပါနေ ပါစိတ္တိယံ ကတ္ထ ပညတ္တန္တိ? ကောသမ္ဗိယံ ပညတ္တံ။ ကံ အာရဗ္ဘာတိ? အာယသ္မန္တံ သာဂတံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ သာဂတော မဇ္ဇံ ပိဝိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော သမုဋ္ဌာတိ, န ဝါစတော န စိတ္တတော; သိယာ ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

၁၀၅. အင်္ဂုလိပတောဒကေ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဘိက္ခုံ အင်္ဂုလိပတောဒကေန ဟာသေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

၁၀၆. ဥဒကေ ဟသဓမ္မေ [ဟဿဓမ္မေ (သီ. သျာ.)] ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သတ္တရသဝဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သတ္တရသဝဂ္ဂိယာ ဘိက္ခူ အစိရဝတိယာ နဒိယာ ဥဒကေ ကီဠိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

၁၀၇. အနာဒရိယေ ပါစိတ္တိယံ ကတ္ထ ပညတ္တန္တိ? ကောသမ္ဗိယံ ပညတ္တံ။ ကံ အာရဗ္ဘာတိ? အာယသ္မန္တံ ဆန္နံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဆန္နော အနာဒရိယံ အကာသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၁၀၈. ဘိက္ခုံ ဘိံသာပေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဘိက္ခုံ ဘိံသာပေသုံ , တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၁၀၉. ဇောတိံ သမာဒဟိတွာ ဝိသိဗ္ဗေန္တဿ ပါစိတ္တိယံ ကတ္ထ ပညတ္တန္တိ? ဘဂ္ဂေသု ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ ဇောတိံ သမာဒဟိတွာ ဝိသိဗ္ဗေသုံ, တသ္မိံ ဝတ္ထုသ္မိံ။ ဧကာ ပညတ္တိ, ဒွေ အနုပညတ္တိယော။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၁၁၀. ဩရေနဒ္ဓမာသံ နဟာယန္တဿ ပါစိတ္တိယံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ ရာဇာနမ္ပိ ပဿိတွာ န မတ္တံ ဇာနိတွာ နဟာယိံသု, တသ္မိံ ဝတ္ထုသ္မိံ။ ဧကာ ပညတ္တိ, ဆ အနုပညတ္တိယော။ သဗ္ဗတ္ထပညတ္တိ, ပဒေသပညတ္တီတိ? ပဒေသပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ဧဠကလောမကေ။ပေ.။။

၁၁၁. အနာဒိယိတွာ တိဏ္ဏံ ဒုဗ္ဗဏ္ဏကရဏာနံ အညတရံ ဒုဗ္ဗဏ္ဏကရဏံ နဝံ စီဝရံ ပရိဘုဉ္ဇန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ အတ္တနော စီဝရံ န သဉ္ဇာနိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ဧဠကလောမကေ။ပေ.။။

၁၁၂. ဘိက္ခုဿ ဝါ ဘိက္ခုနိယာ ဝါ သိက္ခမာနာယ ဝါ သာမဏေရဿ ဝါ သာမဏေရိယာ ဝါ သာမံ စီဝရံ ဝိကပ္ပေတွာ အပ္ပစ္စုဒ္ဓါရဏံ ပရိဘုဉ္ဇန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥပနန္ဒံ သကျပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥပနန္ဒော သကျပုတ္တော ဘိက္ခုဿ သာမံ စီဝရံ ဝိကပ္ပေတွာ အပ္ပစ္စုဒ္ဓါရဏံ ပရိဘုဉ္ဇိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ကထိနကေ။ပေ.။။

၁၁၃. ဘိက္ခုဿ ပတ္တံ ဝါ စီဝရံ ဝါ နိသီဒနံ ဝါ သူစိဃရံ ဝါ ကာယဗန္ဓနံ ဝါ အပနိဓေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဘိက္ခူနံ ပတ္တမ္ပိ စီဝရမ္ပိ အပနိဓေသုံ , တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

သုရာမေရယဝဂ္ဂေါ ဆဋ္ဌော။

၇. သပ္ပါဏကဝဂ္ဂေါ

၁၁၄. သဉ္စိစ္စ ပါဏံ ဇီဝိတာ ဝေါရောပေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥဒါယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒါယီ သဉ္စိစ္စ ပါဏံ ဇီဝိတာ ဝေါရောပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၁၁၅. ဇာနံ သပ္ပါဏကံ ဥဒကံ ပရိဘုဉ္ဇန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ ? ဆဗ္ဗဂ္ဂိယာ ဘိက္ခူ ဇာနံ သပ္ပါဏကံ ဥဒကံ ပရိဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၁၁၆. ဇာနံ ယထာဓမ္မံ နိဟတာဓိကရဏံ ပုန ကမ္မာယ ဥက္ကောဋေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဇာနံ ယထာဓမ္မံ နိဟတာဓိကရဏံ ပုန ကမ္မာယ ဥက္ကောဋေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၁၁၇. ဘိက္ခုဿ ဇာနံ ဒုဋ္ဌုလ္လံ အာပတ္တိံ ပဋိစ္ဆာဒေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုံ အာရဗ္ဘ။ ကိသ္မိံ ဝတ္ထုသ္မိန္တိ? အညတရော ဘိက္ခု ဘိက္ခုဿ ဇာနံ ဒုဋ္ဌုလ္လံ အာပတ္တိံ ပဋိစ္ဆာဒေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၁၁၈. ဇာနံ ဦနဝီသတိဝဿံ ပုဂ္ဂလံ ဥပသမ္ပာဒေန္တဿ ပါစိတ္တိယံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ ဇာနံ ဦနဝီသတိဝဿံ ပုဂ္ဂလံ ဥပသမ္ပာဒေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၁၁၉. ဇာနံ ထေယျသတ္ထေန သဒ္ဓိံ သံဝိဓါယ ဧကဒ္ဓါနမဂ္ဂံ ပဋိပဇ္ဇန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုံ အာရဗ္ဘ။ ကိသ္မိံ ဝတ္ထုသ္မိန္တိ? အညတရော ဘိက္ခု ဇာနံ ထေယျသတ္ထေန သဒ္ဓိံ သံဝိဓါယ ဧကဒ္ဓါနမဂ္ဂံ ပဋိပဇ္ဇိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ, န ဝါစတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၁၂၀. မာတုဂါမေန သဒ္ဓိံ သံဝိဓါယ ဧကဒ္ဓါနမဂ္ဂံ ပဋိပဇ္ဇန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုံ အာရဗ္ဘ။ ကိသ္မိံ ဝတ္ထုသ္မိန္တိ? အညတရော ဘိက္ခု မာတုဂါမေန သဒ္ဓိံ သံဝိဓါယ ဧကဒ္ဓါနမဂ္ဂံ ပဋိပဇ္ဇိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌာတိ။ပေ.။။

၁၂၁. ပါပိကာယ ဒိဋ္ဌိယာ ယာဝတတိယံ သမနုဘာသနာယ န ပဋိနိဿဇ္ဇန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အရိဋ္ဌံ ဘိက္ခုံ ဂဒ္ဓဗာဓိပုဗ္ဗံ အာရဗ္ဘ။ ကိသ္မိံ ဝတ္ထုသ္မိန္တိ? အရိဋ္ဌော ဘိက္ခု ဂဒ္ဓဗာဓိပုဗ္ဗော ပါပိကာယ ဒိဋ္ဌိယာ ယာဝတတိယံ သမနုဘာသနာယ န ပဋိနိဿဇ္ဇိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ။ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၁၂၂. ဇာနံ တထာဝါဒိနာ ဘိက္ခုနာ [အရိဋ္ဌေန ဘိက္ခုနာ (က.)] အကဋာနုဓမ္မေန တံ ဒိဋ္ဌိံ အပ္ပဋိနိဿဋ္ဌေန သဒ္ဓိံ သမ္ဘုဉ္ဇန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဇာနံ တထာဝါဒိနာ အရိဋ္ဌေန ဘိက္ခုနာ အကဋာနုဓမ္မေန တံ ဒိဋ္ဌိံ အပ္ပဋိနိဿဋ္ဌေန သဒ္ဓိံ သမ္ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၁၂၃. ဇာနံ တထာနာသိတံ သမဏုဒ္ဒေသံ ဥပလာပေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဇာနံ တထာနာသိတံ ကဏ္ဋကံ သမဏုဒ္ဒေသံ ဥပလာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

သပ္ပါဏကဝဂ္ဂေါ သတ္တမော။

၈. သဟဓမ္မိကဝဂ္ဂေါ

၁၂၄. ဘိက္ခူဟိ သဟဓမ္မိကံ ဝုစ္စမာနေန ‘‘န တာဝါဟံ, အာဝုသော, ဧတသ္မိံ သိက္ခာပဒေ သိက္ခိဿာမိ ယာဝ န အညံ ဘိက္ခုံ ဗျတ္တံ ဝိနယဓရံ ပရိပုစ္ဆိဿာမီ’’တိ ဘဏန္တဿ ပါစိတ္တိယံ ကတ္ထ ပညတ္တန္တိ? ကောသမ္ဗိယံ ပညတ္တံ။ ကံ အာရဗ္ဘာတိ? အာယသ္မန္တံ ဆန္နံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဆန္နော ဘိက္ခူဟိ သဟဓမ္မိကံ ဝုစ္စမာနော ‘‘န တာဝါဟံ, အာဝုသော, ဧတသ္မိံ သိက္ခာပဒေ သိက္ခိဿာမိ ယာဝ န အညံ ဘိက္ခုံ ဗျတ္တံ ဝိနယဓရံ ပရိပုစ္ဆိဿာမီ’’တိ ဘဏိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၁၂၅. ဝိနယံ ဝိဝဏ္ဏေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဝိနယံ ဝိဝဏ္ဏေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၁၂၆. မောဟနကေ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ မောဟေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၁၂၇. ဘိက္ခုဿ ကုပိတေန အနတ္တမနေန ပဟာရံ ဒေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ကုပိတာ အနတ္တမနာ ဘိက္ခူနံ ပဟာရံ အဒံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

၁၂၈. ဘိက္ခုဿ ကုပိတေန အနတ္တမနေန တလသတ္တိကံ ဥဂ္ဂိရန္တဿ ပါစိတ္တိယံ ကတ္ထ ပညတ္တန္တိ ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ကုပိတာ အနတ္တမနာ ဘိက္ခူနံ တလသတ္တိကံ ဥဂ္ဂိရိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

၁၂၉. ဘိက္ခုံ အမူလကေန သံဃာဒိသေသေန အနုဒ္ဓံသေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဘိက္ခုံ အမူလကေန သံဃာဒိသေသေန အနုဒ္ဓံသေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၁၃၀. ဘိက္ခုဿ သဉ္စိစ္စ ကုက္ကုစ္စံ ဥပဒဟန္တဿ [ဥပ္ပါဒေန္တဿ (သျာ.)] ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဘိက္ခူနံ သဉ္စိစ္စ ကုက္ကုစ္စံ ဥပဒဟိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၁၃၁. ဘိက္ခူနံ ဘဏ္ဍနဇာတာနံ ကလဟဇာတာနံ ဝိဝါဒါပန္နာနံ ဥပဿုတိံ [ဥပဿုတိ (?)] တိဋ္ဌန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဘိက္ခူနံ ဘဏ္ဍနဇာတာနံ ကလဟဇာတာနံ ဝိဝါဒါပန္နာနံ ဥပဿုတိံ တိဋ္ဌဟိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ, န ဝါစတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၁၃၂. ဓမ္မိကာနံ ကမ္မာနံ ဆန္ဒံ ဒတွာ ပစ္ဆာ ခီယနဓမ္မံ [ခိယျဓမ္မံ (က.)] အာပဇ္ဇန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဓမ္မိကာနံ ကမ္မာနံ ဆန္ဒံ ဒတွာ ပစ္ဆာ ခီယနဓမ္မံ အာပဇ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၁၃၃. သံဃေ ဝိနိစ္ဆယကထာယ ဝတ္တမာနာယ ဆန္ဒံ အဒတွာ ဥဋ္ဌာယာသနာ ပက္ကမန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ ။ ကံ အာရဗ္ဘာတိ? အညတရံ ဘိက္ခုံ အာရဗ္ဘ ။ ကိသ္မိံ ဝတ္ထုသ္မိန္တိ? အညတရော ဘိက္ခု သံဃေ ဝိနိစ္ဆယကထာယ ဝတ္တမာနာယ ဆန္ဒံ အဒတွာ ဥဋ္ဌာယာသနာ ပက္ကာမိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၁၃၄. သမဂ္ဂေ သံဃေန စီဝရံ ဒတွာ ပစ္ဆာ ခီယနဓမ္မံ အာပဇ္ဇန္တဿ ပါစိတ္တိယံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ သမဂ္ဂေန သံဃေန စီဝရံ ဒတွာ ပစ္ဆာ ခီယနဓမ္မံ အာပဇ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၁၃၅. ဇာနံ သံဃိကံ လာဘံ ပရိဏတံ ပုဂ္ဂလဿ ပရိဏာမေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဇာနံ သံဃိကံ လာဘံ ပရိဏတံ ပုဂ္ဂလဿ ပရိဏာမေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

သဟဓမ္မိကဝဂ္ဂေါ အဋ္ဌမော။

၉. ရာဇဝဂ္ဂေါ

၁၃၆. ပုဗ္ဗေ အပ္ပဋိသံဝိဒိတေန ရညော အန္တေပုရံ ပဝိသန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ အာနန္ဒံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ အာနန္ဒော ပုဗ္ဗေ အပ္ပဋိသံဝိဒိတော ရညော အန္တေပုရံ ပါဝိသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ကထိနကေ။ပေ.။။

၁၃၇. ရတနံ ဥဂ္ဂဏှန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ ။ ကံ အာရဗ္ဘာတိ? အညတရံ ဘိက္ခုံ အာရဗ္ဘ။ ကိသ္မိံ ဝတ္ထုသ္မိန္တိ? အညတရော ဘိက္ခု ရတနံ ဥဂ္ဂဟေသိ, တသ္မိံ ဝတ္ထုသ္မိံ။ ဧကာ ပညတ္တိ, ဒွေ အနုပညတ္တိယော။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၁၃၈. သန္တံ ဘိက္ခုံ အနာပုစ္ဆာ ဝိကာလေ ဂါမံ ပဝိသန္တဿ ပါစိတ္တိယံ ကတ္ထ ပညတ္တန္တိ ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဝိကာလေ ဂါမံ ပဝိသိံသု, တသ္မိံ ဝတ္ထုသ္မိံ။ ဧကာ ပညတ္တိ, တိဿော အနုပညတ္တိယော။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ကထိနကေ။ပေ.။။

၁၃၉. အဋ္ဌိမယံ ဝါ ဒန္တမယံ ဝါ ဝိသာဏမယံ ဝါ သူစိဃရံ ကာရာပေန္တဿ ပါစိတ္တိယံ ကတ္ထ ပညတ္တန္တိ? သက္ကေသု ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ န မတ္တံ ဇာနိတွာ ဗဟူ သူစိဃရေ ဝိညာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၁၄၀. ပမာဏာတိက္ကန္တံ မဉ္စံ ဝါ ဣဌံ ဝါ ကာရာပေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ ဥပနန္ဒံ သကျပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥပနန္ဒော သကျပုတ္တော ဥစ္စေ မဉ္စေ သယိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၁၄၁. မဉ္စံ ဝါ ဣဌံ ဝါ တူလောနဒ္ဓံ ကာရာပေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ မဉ္စံ ဝါ ဣဌံ ဝါ တူလောနဒ္ဓံ ကာရာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၁၄၂. ပမာဏာတိက္ကန္တံ နိသီဒနံ ကာရာပေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ အပ္ပမာဏိကာနိ နိသီဒနာနိ ဓါရေသုံ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၁၄၃. ပမာဏာတိက္ကန္တံ ကဏ္ဍုပ္ပဋိစ္ဆာဒိံ ကာရာပေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ အပ္ပမာဏိကာယော ကဏ္ဍုပ္ပဋိစ္ဆာဒိယော ဓါရေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၁၄၄. ပမာဏာတိက္ကန္တံ ဝဿိကသာဋိကံ ကာရာပေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ အပ္ပမာဏိကာယော ဝဿိကသာဋိကာယော ဓါရေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

၁၄၅. သုဂတစီဝရပ္ပမာဏံ စီဝရံ ကာရာပေန္တဿ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အာယသ္မန္တံ နန္ဒံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ နန္ဒော သုဂတစီဝရပ္ပမာဏံ စီဝရံ ဓါရေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

ရာဇဝဂ္ဂေါ နဝမော။

ဒွေနဝုတိ ပါစိတ္တိယာ နိဋ္ဌိတာ။

ခုဒ္ဒကံ သမတ္တံ။

တဿုဒ္ဒါနံ –

မုသာ ဩမသပေသုညံ၊ ပဒသေယျာ စ ဣတ္ထိယာ။

အညတြ ဝိညုနာ ဘူတာ [ဒေသနာရောစနာ စေဝ (သီ. သျာ.)]၊ ဒုဋ္ဌုလ္လာပတ္တိ ခဏနာ။

ဘူတံ အညာယ ဥဇ္ဈာယိ [ဘူတညဝါဒဥဇ္ဈာယိ (သီ.)]၊ မဉ္စော သေယျော စ ဝုစ္စတိ။

ပုဗ္ဗေ နိက္ကဍ္ဎနာဟစ္စ၊ ဒွါရံ သပ္ပါဏကေန စ။

အသမ္မတာ အတ္ထင်္ဂတေ၊ ဥပဿယာမိသေန စ။

ဒဒေ သိဗ္ဗေ ဝိဓါနေန၊ နာဝါ ဘုဉ္ဇေယျ ဧကတော။

ပိဏ္ဍံ ဂဏံ ပရံ ပူဝံ၊ ပဝါရိတော ပဝါရိတံ။

ဝိကာလံ သန္နိဓိ ခီရံ၊ ဒန္တပေါနေန တေ ဒသ။

အစေလကံ ဥယျောခဇ္ဇ [အစေလကာနုပခဇ္ဇ (က.)]၊ ပဋိစ္ဆန္နံ ရဟေန စ။

နိမန္တိတော ပစ္စယေဟိ၊ သေနာဝသနုယျောဓိကံ။

သုရာ အင်္ဂုလိ ဟာသော စ၊ အနာဒရိယဉ္စ ဘိံသနံ။

ဇောတိ နဟာန ဒုဗ္ဗဏ္ဏံ၊ သာမံ အပနိဓေန စ။

သဉ္စိစ္စုဒကကမ္မာ စ၊ ဒုဋ္ဌုလ္လံ ဦနဝီသတိ။

ထေယျဣတ္ထိအဝဒေသံ [အရိဋ္ဌကံ (ဝိဘင်္ဂေ)]၊ သံဝါသေ နာသိတေန စ။

သဟဓမ္မိကဝိလေခါ၊ မောဟော ပဟာရေနုဂ္ဂိရေ။

အမူလကဉ္စ သဉ္စိစ္စ၊ သောဿာမိ ခိယျပက္ကမေ။

သံဃေန စီဝရံ ဒတွာ၊ ပရိဏာမေယျ ပုဂ္ဂလေ။

ရညဉ္စ ရတနံ သန္တံ၊ သူစိ မဉ္စော စ တူလိကာ။

နိသီဒနံ ကဏ္ဍုစ္ဆာဒိ၊ ဝဿိကာ သုဂတေန စာတိ။

တေသံ ဝဂ္ဂါနံ ဥဒ္ဒါနံ –

မုသာ ဘူတာ စ ဩဝါဒေါ၊ ဘောဇနာစေလကေန စ။

သုရာ သပ္ပါဏကာ ဓမ္မော၊ ရာဇဝဂ္ဂေန တေ နဝါတိ။

၆. ပါဋိဒေသနီယကဏ္ဍံ

၁၄၆. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန အညာတိကာယ ဘိက္ခုနိယာ အန္တရဃရံ ပဝိဋ္ဌာယ ဟတ္ထတော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ဘုဉ္ဇန္တဿ ပါဋိဒေသနီယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုံ အာရဗ္ဘ။ ကိသ္မိံ ဝတ္ထုသ္မိန္တိ? အညတရော ဘိက္ခု အညာတိကာယ ဘိက္ခုနိယာ အန္တရဃရံ ပဝိဋ္ဌာယ ဟတ္ထတော အာမိသံ ပဋိဂ္ဂဟေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော သမုဋ္ဌာတိ, န ဝါစတော န စိတ္တတော; သိယာ ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

၁၄၇. ဘိက္ခုနိယာ ဝေါသာသန္တိယာ န နိဝါရေတွာ ဘုဉ္ဇန္တဿ ပါဋိဒေသနီယံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဘိက္ခုနိယော ဝေါသာသန္တိယော န နိဝါရေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ ဝါစတော စ သမုဋ္ဌာတိ, န စိတ္တတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၁၄၈. သေက္ခသမ္မတေသု ကုလေသု ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ဘုဉ္ဇန္တဿ ပါဋိဒေသနီယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ န မတ္တံ ဇာနိတွာ ပဋိဂ္ဂဟေသုံ, တသ္မိံ ဝတ္ထုသ္မိံ။ ဧကာ ပညတ္တိ, ဒွေ အနုပညတ္တိယော။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော သမုဋ္ဌာတိ, န ဝါစတော န စိတ္တတော; သိယာ ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

၁၄၉. အာရညကေသု သေနာသနေသု ပုဗ္ဗေ အပ္ပဋိသံဝိဒိတံ ခါဒနီယံ ဝါ ဘောဇနီယံ ဝါ အဇ္ဈာရာမေ သဟတ္ထာ ပဋိဂ္ဂဟေတွာ ဘုဉ္ဇန္တဿ ပါဋိဒေသနီယံ ကတ္ထ ပညတ္တန္တိ? သက္ကေသု ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ။ သမ္ဗဟုလာ ဘိက္ခူ အာရာမေ စောရေ ပဋိဝသန္တေ နာရောစေသုံ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ ဝါစတော စ သမုဋ္ဌာတိ, န စိတ္တတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

စတ္တာရော ပါဋိဒေသနီယာ နိဋ္ဌိတာ။

တဿုဒ္ဒါနံ –

အညာတိကာယ ဝေါသာသံ၊ သေက္ခအာရညကေန စ။

ပါဋိဒေသနီယာ စတ္တာရော၊ သမ္ဗုဒ္ဓေန ပကာသိတာတိ။

၇. သေခိယကဏ္ဍံ

၁. ပရိမဏ္ဍလဝဂ္ဂေါ

၁၅၀. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန အနာဒရိယံ ပဋိစ္စ ပုရတော ဝါ ပစ္ဆတော ဝါ ဩလမ္ဗေန္တေန နိဝါသေန္တဿ ဒုက္ကဋံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ပုရတောပိ ပစ္ဆတောပိ ဩလမ္ဗေန္တာ နိဝါသေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ပုရတော ဝါ ပစ္ဆတော ဝါ ဩလမ္ဗေန္တေန ပါရုပန္တဿ ဒုက္ကဋံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ပုရတောပိ ပစ္ဆတောပိ ဩလမ္ဗေန္တာ ပါရုပိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ကာယံ ဝိဝရိတွာ အန္တရဃရေ ဂစ္ဆန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ကာယံ ဝိဝရိတွာ အန္တရဃရေ နိသီဒန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဟတ္ထံ ဝါ ပါဒံ ဝါ ကီဠာပေန္တေန အန္တရဃရေ ဂစ္ဆန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဟတ္ထံ ဝါ ပါဒံ ဝါ ကီဠာပေန္တေန အန္တရဃရေ နိသီဒန္တဿ ဒုက္ကဋံ ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ တဟံ တဟံ ဩလောကေန္တေန အန္တရဃရေ ဂစ္ဆန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ တဟံ တဟံ ဩလောကေန္တေန အန္တရဃရေ နိသီဒန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဥက္ခိတ္တကာယ အန္တရဃရေ ဂစ္ဆန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဥက္ခိတ္တကာယ အန္တရဃရေ နိသီဒန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

ပရိမဏ္ဍလဝဂ္ဂေါ ပဌမော။

၂. ဥဇ္ဇဂ္ဃိကဝဂ္ဂေါ

၁၅၁. အနာဒရိယံ ပဋိစ္စ ဥဇ္ဇဂ္ဃိကာယ အန္တရဃရေ ဂစ္ဆန္တဿ ဒုက္ကဋံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ မဟာဟသိတံ ဟသန္တာ အန္တရဃရေ ဂစ္ဆိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

အနာဒရိယံ ပဋိစ္စ ဥဇ္ဇဂ္ဃိကာယ အန္တရဃရေ နိသီဒန္တဿ ဒုက္ကဋံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ မဟာဟသိတံ ဟသန္တာ အန္တရဃရေ နိသီဒိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

အနာဒရိယံ ပဋိစ္စ ဥစ္စာသဒ္ဒံ မဟာသဒ္ဒံ ကရောန္တေန အန္တရဃရေ ဂစ္ဆန္တဿ ဒုက္ကဋံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဥစ္စာသဒ္ဒံ မဟာသဒ္ဒံ ကရောန္တာ အန္တရဃရေ ဂစ္ဆိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

အနာဒရိယံ ပဋိစ္စ ဥစ္စာသဒ္ဒံ မဟာသဒ္ဒံ ကရောန္တေန အန္တရဃရေ နိသီဒန္တဿ ဒုက္ကဋံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဥစ္စာသဒ္ဒံ မဟာသဒ္ဒံ ကရောန္တာ အန္တရဃရေ နိသီဒိံသု, တသ္မိံ ဝတ္ထုသ္မိံ။ ဧကာ ပညတ္တိ ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

အနာဒရိယံ ပဋိစ္စ ကာယပ္ပစာလကံ အန္တရဃရေ ဂစ္ဆန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ကာယပ္ပစာလကံ အန္တရဃရေ နိသီဒန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဗာဟုပ္ပစာလကံ အန္တရဃရေ ဂစ္ဆန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဗာဟုပ္ပစာလကံ အန္တရဃရေ နိသီဒန္တဿ ဒုက္ကဋံ။ပေ.။ ဧကာ ပညတ္တိ ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ သီသပ္ပစာလကံ အန္တရဃရေ ဂစ္ဆန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ သီသပ္ပစာလကံ အန္တရဃရေ နိသီဒန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

ဥဇ္ဇဂ္ဃိကဝဂ္ဂေါ ဒုတိယော။

၃. ခမ္ဘကတဝဂ္ဂေါ

၁၅၂. အနာဒရိယံ ပဋိစ္စ ခမ္ဘကတေန အန္တရဃရေ ဂစ္ဆန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ။ ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ခမ္ဘကတေန အန္တရဃရေ နိသီဒန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဩဂုဏ္ဌိတေန အန္တရဃရေ ဂစ္ဆန္တဿ ဒုက္ကဋံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ သသီသံ ပါရုပိတွာ အန္တရဃရေ ဂစ္ဆိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဩဂုဏ္ဌိတေန အန္တရဃရေ နိသီဒန္တဿ ဒုက္ကဋံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ သသီသံ ပါရုပိတွာ အန္တရဃရေ နိသီဒိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဥက္ကုဋိကာယ အန္တရဃရေ ဂစ္ဆန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ပလ္လတ္ထိကာယ [ပလ္လတ္တိကာယ (က.)] အန္တရဃရေ နိသီဒန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ အသက္ကစ္စံ ပိဏ္ဍပါတံ ပဋိဂ္ဂဏှန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ တဟံ တဟံ ဩလောကေန္တေန ပိဏ္ဍပါတံ ပဋိဂ္ဂဏှန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ သူပညေဝ ဗဟုံ ပဋိဂ္ဂဏှန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ထူဣကတံ ပိဏ္ဍပါတံ ပဋိဂ္ဂဏှန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

ခမ္ဘကတဝဂ္ဂေါ တတိယော။

၄. ပိဏ္ဍပါတဝဂ္ဂေါ

၁၅၃. အနာဒရိယံ ပဋိစ္စ အသက္ကစ္စံ ပိဏ္ဍပါတံ ဘုဉ္ဇန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ တဟံ တဟံ ဩလောကေန္တေန ပိဏ္ဍပါတံ ဘုဉ္ဇန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ တဟံ တဟံ ဩမသိတွာ ပိဏ္ဍပါတံ ဘုဉ္ဇန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ သူပညေဝ ဗဟုံ ဘုဉ္ဇန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ထူပကတော ဩမဒ္ဒိတွာ ပိဏ္ဍပါတံ ဘုဉ္ဇန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ သူပံ ဝါ ဗျဉ္ဇနံ ဝါ ဩဒနေန ပဋိစ္ဆာဒေန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ သူပံ ဝါ ဩဒနံ ဝါ အဂိလာနော အတ္တနော အတ္ထာယ ဝိညာပေတွာ ဘုဉ္ဇန္တဿ ဒုက္ကဋံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ သူပမ္ပိ ဩဒနမ္ပိ အတ္တနော အတ္ထာယ ဝိညာပေတွာ ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ, န ဝါစတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

အနာဒရိယံ ပဋိစ္စ ဥဇ္ဈာနသညိနာ ပရေသံ ပတ္တံ ဩလောကေန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ မဟန္တံ ကဗဠံ ကရောန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဒီဃံ အာလောပံ ကရောန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

ပိဏ္ဍပါတဝဂ္ဂေါ စတုတ္ထော။

၅. ကဗဠဝဂ္ဂေါ

၁၅၄. အနာဒရိယံ ပဋိစ္စ အနာဟဋေ ကဗဠေ မုခဒွါရံ ဝိဝရန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဘုဉ္ဇမာနေန သဗ္ဗံ ဟတ္ထံ မုခေ ပက္ခိပန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ သကဗဠေန မုခေန ဗျာဟရန္တဿ ဒုက္ကဋံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ သကဗဠေန မုခေန ဗျာဟရိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

အနာဒရိယံ ပဋိစ္စ ပိဏ္ဍုက္ခေပကံ ဘုဉ္ဇန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ကဗဠာဝစ္ဆေဒကံ ဘုဉ္ဇန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ အဝဂဏ္ဍကာရကံ ဘုဉ္ဇန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဟတ္ထနိဒ္ဓုနကံ ဘုဉ္ဇန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ သိတ္ထာဝကာရကံ ဘုဉ္ဇန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဇိဝှာနိစ္ဆာရကံ ဘုဉ္ဇန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ စပုစပုကာရကံ ဘုဉ္ဇန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

ကဗဠဝဂ္ဂေါ ပဉ္စမော။

၆. သုရုသုရုဝဂ္ဂေါ

၁၅၅. အနာဒရိယံ ပဋိစ္စ သုရုသုရုကာရကံ ဘုဉ္ဇန္တဿ ဒုက္ကဋံ ကတ္ထ ပညတ္တန္တိ? ကောသမ္ဗိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ သုရုသုရုကာရကံ ခီရံ ပိဝိံသု, တသ္မိံ ဝတ္ထုသ္မိံ ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဟတ္ထနိလ္လေဟကံ ဘုဉ္ဇန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ပတ္တနိလ္လေဟကံ ဘုဉ္ဇန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဩဋ္ဌနိလ္လေဟကံ ဘုဉ္ဇန္တဿ ဒုက္ကဋံ။ပေ.။ ဧကာ ပညတ္တိ။ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ သာမိသေန ဟတ္ထေန ပါနီယထာလကံ ပဋိဂ္ဂဏှန္တဿ ဒုက္ကဋံ ကတ္ထ ပညတ္တန္တိ? ဘဂ္ဂေသု ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ သာမိသေန ဟတ္ထေန ပါနီယထာလကံ ပဋိဂ္ဂဟေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ သသိတ္ထကံ ပတ္တဓေါဝနံ အန္တရဃရေ ဆဍ္ဍေန္တဿ ဒုက္ကဋံ ကတ္ထ ပညတ္တန္တိ? ဘဂ္ဂေသု ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ သသိတ္ထကံ ပတ္တဓေါဝနံ အန္တရဃရေ ဆဍ္ဍေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဆတ္တပါဏိဿ ဓမ္မံ ဒေသေန္တဿ ဒုက္ကဋံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဆတ္တပါဏိဿ ဓမ္မံ ဒေသေသုံ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဝါစတော စ စိတ္တတော စ သမုဋ္ဌာတိ, န ကာယတော။ပေ.။။

အနာဒရိယံ ပဋိစ္စ ဒဏ္ဍပါဏိဿ ဓမ္မံ ဒေသေန္တဿ ဒုက္ကဋံ။ပေ.။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဝါစတော စ စိတ္တတော စ သမုဋ္ဌာတိ, န ကာယတော။ပေ.။။

အနာဒရိယံ ပဋိစ္စ သတ္ထပါဏိဿ ဓမ္မံ ဒေသေန္တဿ ဒုက္ကဋံ။ပေ.။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဝါစတော စ စိတ္တတော စ သမုဋ္ဌာတိ, န ကာယတော။ပေ.။။

အနာဒရိယံ ပဋိစ္စ အာဝုဓပါဏိဿ ဓမ္မံ ဒေသေန္တဿ ဒုက္ကဋံ။ပေ.။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဝါစတော စ စိတ္တတော စ သမုဋ္ဌာတိ, န ကာယတော။ပေ.။။

သုရုသုရုဝဂ္ဂေါ ဆဋ္ဌော။

၇. ပါဒုကဝဂ္ဂေါ

၁၅၆. အနာဒရိယံ ပဋိစ္စ ပါဒုကာရုဠှဿ ဓမ္မံ ဒေသေန္တဿ ဒုက္ကဋံ။ပေ.။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဝါစတော စ စိတ္တတော စ သမုဋ္ဌာတိ, န ကာယတော။ပေ.။။

အနာဒရိယံ ပဋိစ္စ ဥပါဟနာရုဠှဿ ဓမ္မံ ဒေသေန္တဿ ဒုက္ကဋံ။ပေ.။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဝါစတော စ စိတ္တတော စ သမုဋ္ဌာတိ, န ကာယတော။ပေ.။။

အနာဒရိယံ ပဋိစ္စ ယာနဂတဿ ဓမ္မံ ဒေသေန္တဿ ဒုက္ကဋံ။ပေ.။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဝါစတော စ စိတ္တတော စ သမုဋ္ဌာတိ , န ကာယတော။ပေ.။။

အနာဒရိယံ ပဋိစ္စ သယနဂတဿ ဓမ္မံ ဒေသေန္တဿ ဒုက္ကဋံ။ပေ.။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဝါစတော စ စိတ္တတော စ သမုဋ္ဌာတိ, န ကာယတော။ပေ.။။

အနာဒရိယံ ပဋိစ္စ ပလ္လတ္ထိကာယ နိသိန္နဿ ဓမ္မံ ဒေသေန္တဿ ဒုက္ကဋံ။ပေ.။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေ သမုဋ္ဌာတိ – ဝါစတော စ စိတ္တတော စ သမုဋ္ဌာတိ, န ကာယတော။ပေ.။။

အနာဒရိယံ ပဋိစ္စ ဝေဌိတသီသဿ ဓမ္မံ ဒေသေန္တဿ ဒုက္ကဋံ။ပေ.။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဝါစတော စ စိတ္တတော စ သမုဋ္ဌာတိ, န ကာယတော။ပေ.။။

အနာဒရိယံ ပဋိစ္စ ဩဂုဏ္ဌိတသီသဿ ဓမ္မံ ဒေသေန္တဿ ဒုက္ကဋံ။ပေ.။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဝါစတော စ စိတ္တတော စ သမုဋ္ဌာတိ, န ကာယတော။ပေ.။။

အနာဒရိယံ ပဋိစ္စ ဆမာယံ နိသီဒိတွာ အာသနေ နိသိန္နဿ ဓမ္မံ ဒေသေန္တဿ ဒုက္ကဋံ။ပေ.။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

အနာဒရိယံ ပဋိစ္စ နီစေ အာသနေ နိသီဒိတွာ ဥစ္စေ အာသနေ နိသိန္နဿ ဓမ္မံ ဒေသေန္တဿ ဒုက္ကဋံ။ပေ.။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

အနာဒရိယံ ပဋိစ္စ ဌိတေန နိသိန္နဿ ဓမ္မံ ဒေသေန္တဿ ဒုက္ကဋံ။ပေ.။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

အနာဒရိယံ ပဋိစ္စ ပစ္ဆတော ဂစ္ဆန္တေန ပုရတော ဂစ္ဆန္တဿ ဓမ္မံ ဒေသေန္တဿ ဒုက္ကဋံ။ပေ.။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

အနာဒရိယံ ပဋိစ္စ ဥပ္ပထေန ဂစ္ဆန္တေန ပထေန ဂစ္ဆန္တဿ ဓမ္မံ ဒေသေန္တဿ ဒုက္ကဋံ။ပေ.။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

အနာဒရိယံ ပဋိစ္စ ဌိတေန ဥစ္စာရံ ဝါ ပဿာဝံ ဝါ ကရောန္တဿ ဒုက္ကဋံ။ပေ.။ ဧကာ ပညတ္တိ , ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေ သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဟရိတေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တဿ ဒုက္ကဋံ။ပေ.။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တဿ ဒုက္ကဋံ။ပေ.။ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဥဒကေ ဥစ္စာရမ္ပိ ပဿာဝမ္ပိ ခေဠမ္ပိ အကံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

ပါဒုကဝဂ္ဂေါ သတ္တမော။

ပဉ္စသတ္တတိ သေခိယာ နိဋ္ဌိတာ။

တဿုဒ္ဒါနံ –

ပရိမဏ္ဍလံ ပဋိစ္ဆန္နံ၊ သုသံဝုတောက္ခိတ္တစက္ခု။

ဥက္ခိတ္တောဇ္ဇဂ္ဃိကာ သဒ္ဒေါ၊ တယော စေဝ ပစာလနာ။

ခမ္ဘံ ဩဂုဏ္ဌိတော စေဝုက္ကုဋိပလ္လတ္ထိကာယ စ။

သက္ကစ္စံ ပတ္တသညီ စ၊ သမသူပံ သမတိတ္တိကံ [သမတိတ္ထိကံ (က.)]။

သက္ကစ္စံ ပတ္တသညီ စ၊ သပဒါနံ သမသူပကံ။

ထူပကတော ပဋိစ္ဆန္နံ၊ ဝိညတ္တုဇ္ဈာနသညိနာ။

န မဟန္တံ မဏ္ဍလံ ဒွါရံ၊ သဗ္ဗံ ဟတ္ထံ န ဗျာဟရေ။

ဥက္ခေပေါ ဆေဒနာ ဂဏ္ဍော၊ ဓုနံ သိတ္ထာဝကာရကံ။

ဇိဝှာနိစ္ဆာရကဉ္စေဝ ၊ စပုစပု သုရုသုရု။

ဟတ္ထော ပတ္တော စ ဩဋ္ဌော စ၊ သာမိသံ သိတ္ထကေန စ။

ဆတ္တပါဏိဿ သဒ္ဓမ္မံ၊ န ဒေသေန္တိ တထာဂတာ။

ဧဝမေဝ ဒဏ္ဍပါဏိဿ၊ သတ္ထအာဝုဓပါဏိနံ။

ပါဒုကာ ဥပါဟနာ စေဝ၊ ယာနသေယျာဂတဿ စ။

ပလ္လတ္ထိကာ နိသိန္နဿ၊ ဝေဌိတောဂုဏ္ဌိတဿ စ။

ဆမာ နီစာသနေ ဌာနေ၊ ပစ္ဆတော ဥပ္ပထေန စ။

ဌိတကေန န ကာတဗ္ဗံ၊ ဟရိတေ ဥဒကမှိ စာတိ။

တေသံ ဝဂ္ဂါနမုဒ္ဒါနံ –

ပရိမဏ္ဍလဥဇ္ဇဂ္ဃိ၊ ခမ္ဘံ ပိဏ္ဍံ တထေဝ စ။

ကဗဠာ သုရုသုရု စ၊ ပါဒုကေန စ သတ္တမာတိ။

မဟာဝိဘင်္ဂေ ကတ္ထပညတ္တိဝါရော နိဋ္ဌိတော။

၂. ကတာပတ္တိဝါရော

၁. ပါရာဇိကကဏ္ဍံ

၁၅၇. မေထုနံ ဓမ္မံ ပဋိသေဝန္တော ကတိ အာပတ္တိယော အာပဇ္ဇတိ? မေထုနံ ဓမ္မံ ပဋိသေဝန္တော တိဿော အာပတ္တိယော အာပဇ္ဇတိ။ အက္ခာယိတေ သရီရေ မေထုနံ ဓမ္မံ ပဋိသေဝတိ, အာပတ္တိ ပါရာဇိကဿ; ယေဘုယျေန ခါယိတေ သရီရေ မေထုနံ ဓမ္မံ ပဋိသေဝတိ, အာပတ္တိ ထုလ္လစ္စယဿ; ဝဋ္ဋကတေ [ဝိဝဋကတေ (သျာ.)] မုခေ အစ္ဆုပန္တံ အင်္ဂဇာတံ ပဝေသေတိ, အာပတ္တိ ဒုက္ကဋဿ – မေထုနံ ဓမ္မံ ပဋိသေဝန္တော ဣမာ တိဿော အာပတ္တိယော အာပဇ္ဇတိ။

၁၅၈. အဒိန္နံ အာဒိယန္တော ကတိ အာပတ္တိယော အာပဇ္ဇတိ? အဒိန္နံ အာဒိယန္တော တိဿော အာပတ္တိယော အာပဇ္ဇတိ။ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ အဒိန္နံ ထေယျသင်္ခါတံ အာဒိယတိ, အာပတ္တိ ပါရာဇိကဿ; အတိရေကမာသကံ ဝါ ဦနပဉ္စမာသကံ ဝါ အဂ္ဃနကံ အဒိန္နံ ထေယျသင်္ခါတံ အာဒိယတိ, အာပတ္တိ ထုလ္လစ္စယဿ; မာသကံ ဝါ ဦနမာသကံ ဝါ အဂ္ဃနကံ အဒိန္နံ ထေယျသင်္ခါတံ အာဒိယတိ, အာပတ္တိ ဒုက္ကဋဿ – အဒိန္နံ အာဒိယန္တော ဣမာ တိဿော အာပတ္တိယော အာပဇ္ဇတိ။

၁၅၉. သဉ္စိစ္စ မနုဿဝိဂ္ဂဟံ ဇီဝိတာ ဝေါရောပေန္တော ကတိ အာပတ္တိယော အာပဇ္ဇတိ? သဉ္စိစ္စ မနုဿဝိဂ္ဂဟံ ဇီဝိတာ ဝေါရောပေန္တော တိဿော အာပတ္တိယော အာပဇ္ဇတိ။ မနုဿံ ဩဒိဿ ဩပါတံ ခဏတိ ‘‘ပပတိတွာ မရိဿတီ’’တိ, အာပတ္တိ ဒုက္ကဋဿ; ပပတိတေ ဒုက္ခာ ဝေဒနာ ဥပ္ပဇ္ဇတိ, အာပတ္တိ ထုလ္လစ္စယဿ; မရတိ, အာပတ္တိ ပါရာဇိကဿ – သဉ္စိစ္စ မနုဿဝိဂ္ဂဟံ ဇီဝိတာ ဝေါရောပေန္တော ဣမာ တိဿော အာပတ္တိယော အာပဇ္ဇတိ။

၁၆၀. အသန္တံ အဘူတံ ဥတ္တရိမနုဿဓမ္မံ ဥလ္လပန္တော ကတိ အာပတ္တိယော အာပဇ္ဇတိ? အသန္တံ အဘူတံ ဥတ္တရိမနုဿဓမ္မံ ဥလ္လပန္တော တိဿော အာပတ္တိယော အာပဇ္ဇတိ။ ပါပိစ္ဆော ဣစ္ဆာပကတော အသန္တံ အဘူတံ ဥတ္တရိမနုဿဓမ္မံ ဥလ္လပတိ, အာပတ္တိ ပါရာဇိကဿ; ‘‘ယော တေ ဝိဟာရေ ဝသတိ, သော ဘိက္ခု အရဟာ’’တိ ဘဏတိ, ပဋိဝိဇာနန္တဿ အာပတ္တိ ထုလ္လစ္စယဿ; န ပဋိဝိဇာနန္တဿ အာပတ္တိ ဒုက္ကဋဿ – အသန္တံ အဘူတံ ဥတ္တရိမနုဿဓမ္မံ ဥလ္လပန္တော ဣမာ တိဿော အာပတ္တိယော အာပဇ္ဇတိ။

စတ္တာရော ပါရာဇိကာ နိဋ္ဌိတာ။

၂. သံဃာဒိသေသကဏ္ဍံ

၁၆၁. ဥပက္ကမိတွာ အသုစိံ မောစေန္တော တိဿော အာပတ္တိယော အာပဇ္ဇတိ။ စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ; စေတေတိ ဥပက္ကမတိ န မုစ္စတိ, အာပတ္တိ ထုလ္လစ္စယဿ; ပယောဂေ ဒုက္ကဋံ။

မာတုဂါမေန သဒ္ဓိံ ကာယသံသဂ္ဂံ သမာပဇ္ဇန္တော တိဿော အာပတ္တိယော အာပဇ္ဇတိ။ ကာယေန ကာယံ အာမသတိ, အာပတ္တိ သံဃာဒိသေသဿ; ကာယေန ကာယပဋိဗဒ္ဓံ အာမသတိ, အာပတ္တိ ထုလ္လစ္စယဿ; ကာယပဋိဗဒ္ဓေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ။

မာတုဂါမံ ဒုဋ္ဌုလ္လာဟိ ဝါစာဟိ ဩဘာသေန္တော တိဿော အာပတ္တိယော အာပဇ္ဇတိ။ ဝစ္စမဂ္ဂံ ပဿာဝမဂ္ဂံ အာဒိဿ ဝဏ္ဏမ္ပိ ဘဏတိ, အဝဏ္ဏမ္ပိ ဘဏတိ, အာပတ္တိ သံဃာဒိသေသဿ; ဝစ္စမဂ္ဂံ ပဿာဝမဂ္ဂံ ဌပေတွာ အဓက္ခကံ ဥဗ္ဘဇာဏုမဏ္ဍလံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ, အာပတ္တိ ထုလ္လစ္စယဿ; ကာယပဋိဗဒ္ဓံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ, အာပတ္တိ ဒုက္ကဋဿ။

အတ္တကာမပါရိစရိယာ ဝဏ္ဏံ ဘာသန္တော တိဿော အာပတ္တိယော အာပဇ္ဇတိ ။ မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ, အာပတ္တိ သံဃာဒိသေသဿ; ပဏ္ဍကဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ, အာပတ္တိ ထုလ္လစ္စယဿ; တိရစ္ဆာနဂတဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ, အာပတ္တိ ဒုက္ကဋဿ။

သဉ္စရိတ္တံ သမာပဇ္ဇန္တော တိဿော အာပတ္တိယော အာပဇ္ဇတိ။ ပဋိဂ္ဂဏှာတိ ဝီမံသတိ ပစ္စာဟရတိ , အာပတ္တိ သံဃာဒိသေသဿ; ပဋိဂ္ဂဏှာတိ ဝီမံသတိ န ပစ္စာဟရတိ, အာပတ္တိ ထုလ္လစ္စယဿ; ပဋိဂ္ဂဏှာတိ န ဝီမံသတိ န ပစ္စာဟရတိ, အာပတ္တိ ဒုက္ကဋဿ။

သညာစိကာယ ကုဋိံ ကာရာပေန္တော တိဿော အာပတ္တိယော အာပဇ္ဇတိ။ ကာရာပေတိ, ပယောဂေ ဒုက္ကဋံ; ဧကံ ပိဏ္ဍံ အနာဂတေ, အာပတ္တိ ထုလ္လစ္စယဿ; တသ္မိံ ပိဏ္ဍေ အာဂတေ, အာပတ္တိ သံဃာဒိသေသဿ။

မဟလ္လကံ ဝိဟာရံ ကာရာပေန္တော တိဿော အာပတ္တိယော အာပဇ္ဇတိ။ ကာရာပေတိ, ပယောဂေ ဒုက္ကဋံ; ဧကံ ပိဏ္ဍံ အနာဂတေ, အာပတ္တိ ထုလ္လစ္စယဿ; တသ္မိံ ပိဏ္ဍေ အာဂတေ, အာပတ္တိ သံဃာဒိသေသဿ။

ဘိက္ခုံ အမူလကေန ပါရာဇိကေန ဓမ္မေန အနုဒ္ဓံသေန္တော တိဿော အာပတ္တိယော အာပဇ္ဇတိ။ အနောကာသံ ကာရာပေတွာ စာဝနာဓိပ္ပါယော ဝဒေတိ, အာပတ္တိ သံဃာဒိသေသေန ဒုက္ကဋဿ; ဩကာသံ ကာရာပေတွာ အက္ကောသာဓိပ္ပါယော ဝဒေတိ, အာပတ္တိ ဩမသဝါဒဿ။

ဘိက္ခုံ အညဘာဂိယဿ အဓိကရဏဿ ကိဉ္စိ ဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေန္တော တိဿော အာပတ္တိယော အာပဇ္ဇတိ ။ အနောကာသံ ကာရာပေတွာ စာဝနာဓိပ္ပါယော ဝဒေတိ, အာပတ္တိ သံဃာဒိသေသေန ဒုက္ကဋဿ; ဩကာသံ ကာရာပေတွာ အက္ကောသာဓိပ္ပါယော ဝဒေတိ, အာပတ္တိ ဩမသဝါဒဿ။

သံဃဘေဒကော ဘိက္ခု ယာဝတတိယံ သမနုဘာသနာယ န ပဋိနိဿဇ္ဇန္တော တိဿော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

ဘေဒကာနုဝတ္တကာ ဘိက္ခူ ယာဝတတိယံ သမနုဘာသနာယ [သမနုဘာသိယမာနာ (သျာ.)] န ပဋိနိဿဇ္ဇန္တာ တိဿော အာပတ္တိယော အာပဇ္ဇန္တိ။ ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

ဒုဗ္ဗစော ဘိက္ခု ယာဝတတိယံ သမနုဘာသနာယ [သမနုဘာသိယမာနော (သျာ.)] န ပဋိနိဿဇ္ဇန္တော တိဿော အာပတ္တိယော အာပဇ္ဇတိ ။ ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

ကုလဒူသကော ဘိက္ခု ယာဝတတိယံ သမနုဘာသနာယ န ပဋိနိဿဇ္ဇန္တော တိဿော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

တေရသ သံဃာဒိသေသာ နိဋ္ဌိတာ။

၃. နိဿဂ္ဂိယကဏ္ဍံ

၁. ကထိနဝဂ္ဂေါ

၁၆၂. အတိရေကစီဝရံ ဒသာဟံ အတိက္ကာမေန္တော ဧကံ အာပတ္တိံ အာပဇ္ဇတိ။ နိဿဂ္ဂိယံ ပါစိတ္တိယံ။

ဧကရတ္တံ တိစီဝရေန ဝိပ္ပဝသန္တော ဧကံ အာပတ္တိံ အာပဇ္ဇတိ။ နိဿဂ္ဂိယံ ပါစိတ္တိယံ။

အကာလစီဝရံ ပဋိဂ္ဂဟေတွာ မာသံ အတိက္ကာမေန္တော ဧကံ အာပတ္တိံ အာပဇ္ဇတိ။ နိဿဂ္ဂိယံ ပါစိတ္တိယံ။

အညာတိကာယ ဘိက္ခုနိယာ ပုရာဏစီဝရံ ဓေါဝါပေန္တော ဒွေ အာပတ္တိယော အာပဇ္ဇတိ။ ဓေါဝါပေတိ, ပယောဂေ ဒုက္ကဋံ; ဓေါဝါပိတေ နိဿဂ္ဂိယံ ပါစိတ္တိယံ။

အညာတိကာယ ဘိက္ခုနိယာ ဟတ္ထတော စီဝရံ ပဋိဂ္ဂဏှန္တော ဒွေ အာပတ္တိယော အာပဇ္ဇတိ။ ဂဏှာတိ, ပယောဂေ ဒုက္ကဋံ; ဂဟိတေ နိဿဂ္ဂိယံ ပါစိတ္တိယံ။

အညာတကံ ဂဟပတိံ ဝါ ဂဟပတာနိံ ဝါ စီဝရံ ဝိညာပေန္တော ဒွေ အာပတ္တိယော အာပဇ္ဇတိ။ ဝိညာပေတိ, ပယောဂေ ဒုက္ကဋံ; ဝိညာပိတေ နိဿဂ္ဂိယံ ပါစိတ္တိယံ။

အညာတကံ ဂဟပတိံ ဝါ ဂဟပတာနိံ ဝါ တတုတ္တရိ စီဝရံ ဝိညာပေန္တော ဒွေ အာပတ္တိယော အာပဇ္ဇတိ။ ဝိညာပေတိ, ပယောဂေ ဒုက္ကဋံ; ဝိညာပိတေ နိဿဂ္ဂိယံ ပါစိတ္တိယံ။

ပုဗ္ဗေ အပ္ပဝါရိတော အညာတကံ ဂဟပတိကံ ဥပသင်္ကမိတွာ စီဝရေ ဝိကပ္ပံ အာပဇ္ဇန္တော ဒွေ အာပတ္တိယော အာပဇ္ဇတိ။ ဝိကပ္ပံ အာပဇ္ဇတိ , ပယောဂေ ဒုက္ကဋံ; ဝိကပ္ပံ အာပန္နေ နိဿဂ္ဂိယံ ပါစိတ္တိယံ။

ပုဗ္ဗေ အပ္ပဝါရိတော အညာတကေ ဂဟပတိကေ ဥပသင်္ကမိတွာ စီဝရေ ဝိကပ္ပံ အာပဇ္ဇန္တော ဒွေ အာပတ္တိယော အာပဇ္ဇတိ။ ဝိကပ္ပံ အာပဇ္ဇတိ, ပယောဂေ ဒုက္ကဋံ; ဝိကပ္ပံ အာပန္နေ နိဿဂ္ဂိယံ ပါစိတ္တိယံ။

အတိရေကတိက္ခတ္တုံ စောဒနာယ အတိရေကဆက္ခတ္တုံ ဌာနေန စီဝရံ အဘိနိပ္ဖာဒေန္တော ဒွေ အာပတ္တိယော အာပဇ္ဇတိ။ အဘိနိပ္ဖာဒေတိ, ပယောဂေ ဒုက္ကဋံ; အဘိနိပ္ဖာဒိတေ နိဿဂ္ဂိယံ ပါစိတ္တိယံ။

ကထိနဝဂ္ဂေါ ပဌမော။

၂. ကောသိယဝဂ္ဂေါ

၁၆၃. ကောသိယမိဿကံ သန္ထတံ ကာရာပေန္တော ဒွေ အာပတ္တိယော အာပဇ္ဇတိ။ ကာရာပေတိ, ပယောဂေ ဒုက္ကဋံ; ကာရာပိတေ နိဿဂ္ဂိယံ ပါစိတ္တိယံ။

သုဒ္ဓကာဠကာနံ ဧဠကလောမာနံ သန္ထတံ ကာရာပေန္တော ဒွေ အာပတ္တိယော အာပဇ္ဇတိ။ ကာရာပေတိ, ပယောဂေ ဒုက္ကဋံ; ကာရာပိတေ နိဿဂ္ဂိယံ ပါစိတ္တိယံ။

အနာဒိယိတွာ တုလံ ဩဒါတာနံ တုလံ ဂေါစရိယာနံ နဝံ သန္ထတံ ကာရာပေန္တော ဒွေ အာပတ္တိယော အာပဇ္ဇတိ။ ကာရာပေတိ, ပယောဂေ ဒုက္ကဋံ; ကာရာပိတေ နိဿဂ္ဂိယံ ပါစိတ္တိယံ။

အနုဝဿံ သန္ထတံ ကာရာပေန္တော ဒွေ အာပတ္တိယော အာပဇ္ဇတိ။ ကာရာပေတိ, ပယောဂေ ဒုက္ကဋံ; ကာရာပိတေ နိဿဂ္ဂိယံ ပါစိတ္တိယံ။

အနာဒိယိတွာ ပုရာဏသန္ထတဿ သာမန္တာ သုဂတဝိဒတ္ထိံ နဝံ နိသီဒနသန္ထတံ ကာရာပေန္တော ဒွေ အာပတ္တိယော အာပဇ္ဇတိ။ ကာရာပေတိ, ပယောဂေ ဒုက္ကဋံ; ကာရာပိတေ နိဿဂ္ဂိယံ ပါစိတ္တိယံ။

ဧဠကလောမာနိ ပဋိဂ္ဂဟေတွာ တိယောဇနံ အတိက္ကာမေန္တော ဒွေ အာပတ္တိယော အာပဇ္ဇတိ။ ပဌမံ ပါဒံ တိယောဇနံ အတိက္ကာမေတိ, အာပတ္တိ ဒုက္ကဋဿ; ဒုတိယံ ပါဒံ အတိက္ကာမေတိ, နိဿဂ္ဂိယံ ပါစိတ္တိယံ။

အညာတိကာယ ဘိက္ခုနိယာ ဧဠကလောမာနိ ဓေါဝါပေန္တော ဒွေ အာပတ္တိယော အာပဇ္ဇတိ။ ဓေါဝါပေတိ, ပယောဂေ ဒုက္ကဋံ; ဓေါဝါပိတေ နိဿဂ္ဂိယံ ပါစိတ္တိယံ။

ရူပိယံ ပဋိဂ္ဂဏှန္တော ဒွေ အာပတ္တိယော အာပဇ္ဇတိ။ ဂဏှာတိ, ပယောဂေ ဒုက္ကဋံ; ဂဟိတေ နိဿဂ္ဂိယံ ပါစိတ္တိယံ။

နာနပ္ပကာရကံ ရူပိယသံဝေါဟာရံ သမာပဇ္ဇန္တော ဒွေ အာပတ္တိယော အာပဇ္ဇတိ။ သမာပဇ္ဇတိ, ပယောဂေ ဒုက္ကဋံ; သမာပန္နေ နိဿဂ္ဂိယံ ပါစိတ္တိယံ။

နာနပ္ပကာရကံ ကယဝိက္ကယံ သမာပဇ္ဇန္တော ဒွေ အာပတ္တိယော အာပဇ္ဇတိ။ သမာပဇ္ဇတိ, ပယောဂေ ဒုက္ကဋံ; သမာပန္နေ နိဿဂ္ဂိယံ ပါစိတ္တိယံ။

ကောသိယဝဂ္ဂေါ ဒုတိယော။

၃. ပတ္တဝဂ္ဂေါ

၁၆၄. အတိရေကပတ္တံ ဒသာဟံ အတိက္ကာမေန္တော ဧကံ အာပတ္တိံ အာပဇ္ဇတိ။ နိဿဂ္ဂိယံ ပါစိတ္တိယံ။

ဦနပဉ္စဗန္ဓနေန ပတ္တေန အညံ နဝံ ပတ္တံ စေတာပေန္တော ဒွေ အာပတ္တိယော အာပဇ္ဇတိ။ စေတာပေတိ, ပယောဂေ ဒုက္ကဋံ; စေတာပိတေ နိဿဂ္ဂိယံ ပါစိတ္တိယံ။

ဘေသဇ္ဇာနိ ပဋိဂ္ဂဟေတွာ သတ္တာဟံ အတိက္ကာမေန္တော ဧကံ အာပတ္တိံ အာပဇ္ဇတိ။ နိဿဂ္ဂိယံ ပါစိတ္တိယံ။

အတိရေကမာသေ သေသေ ဂိမှာနေ ဝဿိကသာဋိကစီဝရံ ပရိယေသန္တော ဒွေ အာပတ္တိယော အာပဇ္ဇတိ။ ပရိယေသတိ, ပယောဂေ ဒုက္ကဋံ; ပရိယိဋ္ဌေ နိဿဂ္ဂိယံ ပါစိတ္တိယံ။

ဘိက္ခုဿ သာမံ စီဝရံ ဒတွာ ကုပိတော အနတ္တမနော အစ္ဆိန္ဒန္တော ဒွေ အာပတ္တိယော အာပဇ္ဇတိ။ အစ္ဆိန္ဒတိ, ပယောဂေ ဒုက္ကဋံ; အစ္ဆိန္နေ နိဿဂ္ဂိယံ ပါစိတ္တိယံ။

သာမံ သုတ္တံ ဝိညာပေတွာ တန္တဝါယေဟိ စီဝရံ ဝါယာပေန္တော ဒွေ အာပတ္တိယော အာပဇ္ဇတိ။ ဝါယာပေတိ, ပယောဂေ ဒုက္ကဋံ; ဝါယာပိတေ နိဿဂ္ဂိယံ ပါစိတ္တိယံ။

ပုဗ္ဗေ အပ္ပဝါရိတော အညာတကဿ ဂဟပတိကဿ တန္တဝါယေ ဥပသင်္ကမိတွာ စီဝရေ ဝိကပ္ပံ အာပဇ္ဇန္တော ဒွေ အာပတ္တိယော အာပဇ္ဇတိ။ ဝိကပ္ပံ အာပဇ္ဇတိ, ပယောဂေ ဒုက္ကဋံ; ဝိကပ္ပံ အာပန္နေ နိဿဂ္ဂိယံ ပါစိတ္တိယံ။

အစ္စေကစီဝရံ ပဋိဂ္ဂဟေတွာ စီဝရကာလသမယံ အတိက္ကာမေန္တော ဧကံ အာပတ္တိံ အာပဇ္ဇတိ။ နိဿဂ္ဂိယံ ပါစိတ္တိယံ။

တိဏ္ဏံ စီဝရာနံ အညတရံ စီဝရံ အန္တရဃရေ နိက္ခိပိတွာ အတိရေကဆာရတ္တံ ဝိပ္ပဝသန္တော ဧကံ အာပတ္တိံ အာပဇ္ဇတိ။ နိဿဂ္ဂိယံ ပါစိတ္တိယံ။

ဇာနံ သံဃိကံ လာဘံ ပရိဏတံ အတ္တနော ပရိဏာမေန္တော ဒွေ အာပတ္တိယော အာပဇ္ဇတိ။ ပရိဏာမေတိ, ပယောဂေ ဒုက္ကဋံ; ပရိဏာမိတေ နိဿဂ္ဂိယံ ပါစိတ္တိယံ။

ပတ္တဝဂ္ဂေါ တတိယော။

တိံသ နိဿဂ္ဂိယာ ပါစိတ္တိယာ နိဋ္ဌိတာ။

၄. ပါစိတ္တိယကဏ္ဍံ

၁. မုသာဝါဒဝဂ္ဂေါ

၁၆၅. သမ္ပဇာနမုသာဝါဒံ ဘာသန္တော ကတိ အာပတ္တိယော အာပဇ္ဇတိ? သမ္ပဇာနမုသာဝါဒံ ဘာသန္တော ပဉ္စ အာပတ္တိယော အာပဇ္ဇတိ။ ပါပိစ္ဆော ဣစ္ဆာပကတော အသန္တံ အဘူတံ ဥတ္တရိမနုဿဓမ္မံ ဥလ္လပတိ, အာပတ္တိ ပါရာဇိကဿ; ဘိက္ခုံ အမူလကေန ပါရာဇိကေန ဓမ္မေန အနုဒ္ဓံသေတိ, အာပတ္တိ သံဃာဒိသေသဿ; ‘‘ယော တေ ဝိဟာရေ ဝသတိ, သော ဘိက္ခု အရဟာ’’တိ ဘဏတိ, ပဋိဝိဇာနန္တဿ အာပတ္တိ ထုလ္လစ္စယဿ; န ပဋိဝိဇာနန္တဿ အာပတ္တိ ဒုက္ကဋဿ; သမ္ပဇာနမုသာဝါဒေ ပါစိတ္တိယံ – သမ္ပဇာနမုသာဝါဒံ ဘာသန္တော ဣမာ ပဉ္စ အာပတ္တိယော အာပဇ္ဇတိ။

ဩမသန္တော ဒွေ အာပတ္တိယော အာပဇ္ဇတိ။ ဥပသမ္ပန္နံ ဩမသတိ, အာပတ္တိ ပါစိတ္တိယဿ; အနုပသမ္ပန္နံ ဩမသတိ, အာပတ္တိ ဒုက္ကဋဿ။

ပေသုညံ ဥပသံဟရန္တော ဒွေ အာပတ္တိယော အာပဇ္ဇတိ။ ဥပသမ္ပန္နဿ ပေသုညံ ဥပသံဟရတိ, အာပတ္တိ ပါစိတ္တိယဿ; အနုပသမ္ပန္နဿ ပေသုညံ ဥပသံဟရတိ, အာပတ္တိ ဒုက္ကဋဿ။

အနုပသမ္ပန္နံ ပဒသော ဓမ္မံ ဝါစေန္တော ဒွေ အာပတ္တိယော အာပဇ္ဇတိ။ ဝါစေတိ, ပယောဂေ ဒုက္ကဋံ; ပဒေ ပဒေ အာပတ္တိ ပါစိတ္တိယဿ။

အနုပသမ္ပန္နေန ဥတ္တရိဒိရတ္တတိရတ္တံ သဟသေယျံ ကပ္ပေန္တော ဒွေ အာပတ္တိယော အာပဇ္ဇတိ။ နိပဇ္ဇတိ, ပယောဂေ ဒုက္ကဋံ; နိပန္နေ အာပတ္တိ ပါစိတ္တိယဿ။

မာတုဂါမေန သဟသေယျံ ကပ္ပေန္တော ဒွေ အာပတ္တိယော အာပဇ္ဇတိ။ နိပဇ္ဇတိ, ပယောဂေ ဒုက္ကဋံ; နိပန္နေ အာပတ္တိ ပါစိတ္တိယဿ။

မာတုဂါမဿ ဥတ္တရိဆပ္ပဉ္စဝါစာဟိ ဓမ္မံ ဒေသေန္တော ဒွေ အာပတ္တိယော အာပဇ္ဇတိ။ ဒေသေတိ, ပယောဂေ ဒုက္ကဋံ; ပဒေ ပဒေ အာပတ္တိ ပါစိတ္တိယဿ။

အနုပသမ္ပန္နဿ ဥတ္တရိမနုဿဓမ္မံ ဘူတံ အာရောစေန္တော ဒွေ အာပတ္တိယော အာပဇ္ဇတိ။ အာရောစေတိ, ပယောဂေ ဒုက္ကဋံ; အာရောစိတေ အာပတ္တိ ပါစိတ္တိယဿ။

ဘိက္ခုဿ ဒုဋ္ဌုလ္လံ အာပတ္တိံ အနုပသမ္ပန္နဿ အာရောစေန္တော ဒွေ အာပတ္တိယော အာပဇ္ဇတိ။ အာရောစေတိ, ပယောဂေ ဒုက္ကဋံ; အာရောစိတေ အာပတ္တိ ပါစိတ္တိယဿ။

ပထဝိံ ခဏန္တော ဒွေ အာပတ္တိယော အာပဇ္ဇတိ။ ခဏတိ, ပယောဂေ ဒုက္ကဋံ; ပဟာရေ ပဟာရေ အာပတ္တိ ပါစိတ္တိယဿ။

မုသာဝါဒဝဂ္ဂေါ ပဌမော။

၂. ဘူတဂါမဝဂ္ဂေါ

၁၆၆. ဘူတဂါမံ ပါတေန္တော ဒွေ အာပတ္တိယော အာပဇ္ဇတိ။ ပါတေတိ, ပယောဂေ ဒုက္ကဋံ; ပဟာရေ ပဟာရေ အာပတ္တိ ပါစိတ္တိယဿ။

အညေနညံ ပဋိစရန္တော ဒွေ အာပတ္တိယော အာပဇ္ဇတိ။ အနာရောပိတေ အညဝါဒကေ အညေနညံ ပဋိစရတိ, အာပတ္တိ ဒုက္ကဋဿ; အာရောပိတေ အညဝါဒကေ အညေနညံ ပဋိစရတိ, အာပတ္တိ ပါစိတ္တိယဿ။

ဘိက္ခုံ ဥဇ္ဈာပေန္တော ဒွေ အာပတ္တိယော အာပဇ္ဇတိ။ ဥဇ္ဈာပေတိ, ပယောဂေ ဒုက္ကဋံ; ဥဇ္ဈာပိတေ အာပတ္တိ ပါစိတ္တိယဿ။

သံဃိကံ မဉ္စံ ဝါ ဣဌံ ဝါ ဘိသိံ ဝါ ကောစ္ဆံ ဝါ အဇ္ဈောကာသေ သန္ထရိတွာ အနုဒ္ဓရိတွာ အနာပုစ္ဆာ ပက္ကမန္တော ဒွေ အာပတ္တိယော အာပဇ္ဇတိ။ ပဌမံ ပါဒံ လေဍ္ဍုပါတံ အတိက္ကာမေတိ, အာပတ္တိ ဒုက္ကဋဿ; ဒုတိယံ ပါဒံ အတိက္ကာမေတိ, အာပတ္တိ ပါစိတ္တိယဿ။

သံဃိကေ ဝိဟာရေ သေယျံ သန္ထရိတွာ အနုဒ္ဓရိတွာ အနာပုစ္ဆာ ပက္ကမန္တော ဒွေ အာပတ္တိယော အာပဇ္ဇတိ။ ပဌမံ ပါဒံ ပရိက္ခေပံ အတိက္ကာမေတိ, အာပတ္တိ ဒုက္ကဋဿ; ဒုတိယံ ပါဒံ အတိက္ကာမေတိ, အာပတ္တိ ပါစိတ္တိယဿ။

သံဃိကေ ဝိဟာရေ ဇာနံ ပုဗ္ဗုပဂတံ ဘိက္ခုံ အနုပခဇ္ဇ သေယျံ ကပ္ပေန္တော ဒွေ အာပတ္တိယော အာပဇ္ဇတိ။ နိပဇ္ဇတိ, ပယောဂေ ဒုက္ကဋံ; နိပန္နေ အာပတ္တိ ပါစိတ္တိယဿ။

ဘိက္ခုံ ကုပိတော အနတ္တမနော သံဃိကာ ဝိဟာရာ နိက္ကဍ္ဎေန္တော ဒွေ အာပတ္တိယော အာပဇ္ဇတိ။ နိက္ကဍ္ဎတိ, ပယောဂေ ဒုက္ကဋံ; နိက္ကဍ္ဎိတေ အာပတ္တိ ပါစိတ္တိယဿ။

သံဃိကေ ဝိဟာရေ ဥပရိဝေဟာသကုဋိယာ အာဟစ္စပါဒကံ မဉ္စံ ဝါ ဣဌံ ဝါ အဘိနိသီဒန္တော ဒွေ အာပတ္တိယော အာပဇ္ဇတိ။ အဘိနိသီဒတိ, ပယောဂေ ဒုက္ကဋံ; အဘိနိသိန္နေ အာပတ္တိ ပါစိတ္တိယဿ။

ဒွတ္တိပရိယာယေ အဓိဋ္ဌဟိတွာ တတုတ္တရိ အဓိဋ္ဌဟန္တော ဒွေ အာပတ္တိယော အာပဇ္ဇတိ။ အဓိဋ္ဌေတိ, ပယောဂေ ဒုက္ကဋံ; အဓိဋ္ဌိတေ အာပတ္တိ ပါစိတ္တိယဿ။

ဇာနံ သပ္ပါဏကံ ဥဒကံ တိဏံ ဝါ မတ္တိကံ ဝါ သိဉ္စန္တော ဒွေ အာပတ္တိယော အာပဇ္ဇတိ။ သိဉ္စတိ, ပယောဂေ ဒုက္ကဋံ; သိဉ္စိတေ အာပတ္တိ ပါစိတ္တိယဿ။

ဘူတဂါမဝဂ္ဂေါ ဒုတိယော။

၃. ဩဝါဒဝဂ္ဂေါ

၁၆၇. အသမ္မတော ဘိက္ခုနိယော ဩဝဒန္တော ဒွေ အာပတ္တိယော အာပဇ္ဇတိ။ ဩဝဒတိ, ပယောဂေ ဒုက္ကဋံ; ဩဝဒိတေ အာပတ္တိ ပါစိတ္တိယဿ။

အတ္ထင်္ဂတေ သူရိယေ ဘိက္ခုနိယော ဩဝဒန္တော ဒွေ အာပတ္တိယော အာပဇ္ဇတိ။ ဩဝဒတိ, ပယောဂေ ဒုက္ကဋံ; ဩဝဒိတေ အာပတ္တိ ပါစိတ္တိယဿ။

ဘိက္ခုနုပဿယံ ဥပသင်္ကမိတွာ ဘိက္ခုနိယော ဩဝဒန္တော ဒွေ အာပတ္တိယော အာပဇ္ဇတိ။ ဩဝဒတိ, ပယောဂေ ဒုက္ကဋံ; ဩဝဒိတေ အာပတ္တိ ပါစိတ္တိယဿ။

‘‘အာမိသဟေတု ဘိက္ခူ ဘိက္ခုနိယော ဩဝဒန္တီ’’တိ ဘဏန္တော ဒွေ အာပတ္တိယော အာပဇ္ဇတိ။ ဘဏတိ, ပယောဂေ ဒုက္ကဋံ; ဘဏိတေ အာပတ္တိ ပါစိတ္တိယဿ။

အညာတိကာယ ဘိက္ခုနိယာ စီဝရံ ဒေန္တော ဒွေ အာပတ္တိယော အာပဇ္ဇတိ။ ဒေတိ, ပယောဂေ ဒုက္ကဋံ; ဒိန္နေ အာပတ္တိ ပါစိတ္တိယဿ။

အညာတိကာ ဘိက္ခုနိယာ စီဝရံ သိဗ္ဗေန္တော ဒွေ အာပတ္တိယော အာပဇ္ဇတိ။ သိဗ္ဗေတိ, ပယောဂေ ဒုက္ကဋံ; အာရာပထေ အာရာပထေ အာပတ္တိ ပါစိတ္တိယဿ။

ဘိက္ခုနိယာ သဒ္ဓိံ သံဝိဓါယ ဧကဒ္ဓါနမဂ္ဂံ ပဋိပဇ္ဇန္တော ဒွေ အာပတ္တိယော အာပဇ္ဇတိ။ ပဋိပဇ္ဇတိ, ပယောဂေ ဒုက္ကဋံ; ပဋိပန္နေ အာပတ္တိ ပါစိတ္တိယဿ။

ဘိက္ခုနိယာ သဒ္ဓိံ သံဝိဓါယ ဧကံ နာဝံ အဘိရုဟန္တော ဒွေ အာပတ္တိယော အာပဇ္ဇတိ။ အဘိရုဟတိ, ပယောဂေ ဒုက္ကဋံ; အဘိရုဠ္ဟေ အာပတ္တိ ပါစိတ္တိယဿ။

ဇာနံ ဘိက္ခုနိပရိပါစိတံ ပိဏ္ဍပါတံ ဘုဉ္ဇန္တော ဒွေ အာပတ္တိယော အာပဇ္ဇတိ။ ‘‘ဘုဉ္ဇိဿာမီ’’တိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ။

ဘိက္ခုနိယာ သဒ္ဓိံ ဧကော ဧကာယ ရဟော နိသဇ္ဇံ ကပ္ပေန္တော ဒွေ အာပတ္တိယော အာပဇ္ဇတိ။ နိသီဒတိ, ပယောဂေ ဒုက္ကဋံ; နိသိန္နေ အာပတ္တိ ပါစိတ္တိယဿ။

ဩဝါဒဝဂ္ဂေါ တတိယော။

၄. ဘောဇနဝဂ္ဂေါ

၁၆၈. တတုတ္တရိ အာဝသထပိဏ္ဍံ ဘုဉ္ဇန္တော ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ။

ဂဏဘောဇနံ ဘုဉ္ဇန္တော ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ။

ပရမ္ပရဘောဇနံ ဘုဉ္ဇန္တော ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ။

ဒွတ္တိပတ္တပူရေ ပူဝေ ပဋိဂ္ဂဟေတွာ တတုတ္တရိ ပဋိဂ္ဂဏှန္တော ဒွေ အာပတ္တိယော အာပဇ္ဇတိ။ ဂဏှာတိ, ပယောဂေ ဒုက္ကဋံ; ဂဟိတေ အာပတ္တိ ပါစိတ္တိယဿ။

ဘုတ္တာဝီ ပဝါရိတော အနတိရိတ္တံ ခါဒနီယံ ဝါ ဘောဇနီယံ ဝါ ဘုဉ္ဇန္တော ဒွေ အာပတ္တိယော အာပဇ္ဇတိ ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ။

ဘိက္ခုံ ဘုတ္တာဝိံ ပဝါရိတံ အနတိရိတ္တေန ခါဒနီယေန ဝါ ဘောဇနီယေန ဝါ အဘိဟဋ္ဌုံ ပဝါရေန္တော ဒွေ အာပတ္တိယော အာပဇ္ဇတိ။ တဿ ဝစနေန ခါဒိဿာမိ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; ဘောဇနပရိယောသာနေ အာပတ္တိ ပါစိတ္တိယဿ။

ဝိကာလေ ခါဒနီယံ ဝါ ဘောဇနီယံ ဝါ ဘုဉ္ဇန္တော ဒွေ အာပတ္တိယော အာပဇ္ဇတိ။ ခါဒိဿာမိ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ။

သန္နိဓိကာရကံ ခါဒနီယံ ဝါ ဘောဇနီယံ ဝါ ဘုဉ္ဇန္တော ဒွေ အာပတ္တိယော အာပဇ္ဇတိ။ ခါဒိဿာမိ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ။

ပဏီတဘောဇနာနိ အတ္တနော အတ္ထာယ ဝိညာပေတွာ ဘုဉ္ဇန္တော ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ။

အဒိန္နံ မုခဒွါရံ အာဟာရံ အာဟရန္တော ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ။

ဘောဇနဝဂ္ဂေါ စတုတ္ထော။

၅. အစေလကဝဂ္ဂေါ

၁၆၉. အစေလကဿ, ဝါ ပရိဗ္ဗာဇကဿ ဝါ ပရိဗ္ဗာဇိကာယ ဝါ သဟတ္ထာ ခါဒနီယံ ဝါ ဘောဇနီယံ ဝါ ဒေန္တော ဒွေ အာပတ္တိယော အာပဇ္ဇတိ။ ဒေတိ, ပယောဂေ ဒုက္ကဋံ; ဒိန္နေ အာပတ္တိ ပါစိတ္တိယဿ။

ဘိက္ခုံ – ‘‘ဧဟာဝုသော, ဂါမံ ဝါ နိဂမံ ဝါ ပိဏ္ဍာယ ပဝိသိဿာမာ’’တိ တဿ ဒါပေတွာ ဝါ အဒါပေတွာ ဝါ ဥယျောဇေန္တော ဒွေ အာပတ္တိယော အာပဇ္ဇတိ။ ဥယျောဇေတိ, ပယောဂေ ဒုက္ကဋံ; ဥယျောဇိတေ အာပတ္တိ ပါစိတ္တိယဿ။

သဘောဇနေ ကုလေ အနုပခဇ္ဇ နိသဇ္ဇံ ကပ္ပေန္တော ဒွေ အာပတ္တိယော အာပဇ္ဇတိ။ နိသီဒတိ, ပယောဂေ ဒုက္ကဋံ; နိသိန္နေ အာပတ္တိ ပါစိတ္တိယဿ။

မာတုဂါမေန သဒ္ဓိံ ရဟော ပဋိစ္ဆန္နေ အာသနေ နိသဇ္ဇံ ကပ္ပေန္တော ဒွေ အာပတ္တိယော အာပဇ္ဇတိ။ နိသီဒတိ, ပယောဂေ ဒုက္ကဋံ; နိသိန္နေ အာပတ္တိ ပါစိတ္တိယဿ။

မာတုဂါမေန သဒ္ဓိံ ဧကော ဧကာယ ရဟော နိသဇ္ဇံ ကပ္ပေန္တော ဒွေ အာပတ္တိယော အာပဇ္ဇတိ။ နိသီဒတိ, ပယောဂေ ဒုက္ကဋံ; နိသိန္နေ အာပတ္တိ ပါစိတ္တိယဿ။

နိမန္တိတော သဘတ္တော သမာနော ပုရေဘတ္တံ ပစ္ဆာဘတ္တံ ကုလေသု စာရိတ္တံ အာပဇ္ဇန္တော ဒွေ အာပတ္တိယော အာပဇ္ဇတိ။ ပဌမံ ပါဒံ ဥမ္မာရံ အတိက္ကာမေတိ, အာပတ္တိ ဒုက္ကဋဿ; ဒုတိယံ ပါဒံ အတိက္ကာမေတိ, အာပတ္တိ ပါစိတ္တိယဿ။

တတုတ္တရိ ဘေသဇ္ဇံ ဝိညာပေန္တော ဒွေ အာပတ္တိယော အာပဇ္ဇတိ။ ဝိညာပေတိ, ပယောဂေ ဒုက္ကဋံ; ဝိညာပိတေ အာပတ္တိ ပါစိတ္တိယဿ။

ဥယျုတ္တံ သေနံ ဒဿနာယ ဂစ္ဆန္တော ဒွေ အာပတ္တိယော အာပဇ္ဇတိ ။ ဂစ္ဆတိ, အာပတ္တိ ဒုက္ကဋဿ; ယတ္ထ ဌိတော ပဿတိ, အာပတ္တိ ပါစိတ္တိယဿ။

အတိရေကတိရတ္တံ သေနာယ ဝသန္တော ဒွေ အာပတ္တိယော အာပဇ္ဇတိ။ ဝသတိ, ပယောဂေ ဒုက္ကဋံ; ဝသိတေ အာပတ္တိ ပါစိတ္တိယဿ။

ဥယျောဓိကံ ဂစ္ဆန္တော ဒွေ အာပတ္တိယော အာပဇ္ဇတိ။ ဂစ္ဆတိ, အာပတ္တိ ဒုက္ကဋဿ; ယတ္ထ ဌိတော ပဿတိ, အာပတ္တိ ပါစိတ္တိယဿ။

အစေလကဝဂ္ဂေါ ပဉ္စမော။

၆. သုရာမေရယဝဂ္ဂေါ

၁၇၀. မဇ္ဇံ ပိဝန္တော ဒွေ အာပတ္တိယော အာပဇ္ဇတိ။ ‘‘ပိဝိဿာမီ’’တိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ။

ဘိက္ခုံ အင်္ဂုလိပတောဒကေန ဟာသေန္တော ဒွေ အာပတ္တိယော အာပဇ္ဇတိ။ ဟာသေတိ, ပယောဂေ ဒုက္ကဋံ; ဟသိတေ အာပတ္တိ ပါစိတ္တိယဿ။

ဥဒကေ ကီဠန္တော ဒွေ အာပတ္တိယော အာပဇ္ဇတိ။ ဟေဋ္ဌာဂေါပ္ဖကေ ဥဒကေ ကီဠတိ, အာပတ္တိ ဒုက္ကဋဿ; ဥပရိဂေါပ္ဖကေ ကီဠတိ, အာပတ္တိ ပါစိတ္တိယဿ။

အနာဒရိယံ ကရောန္တော ဒွေ အာပတ္တိယော အာပဇ္ဇတိ။ ကရောတိ, ပယောဂေ ဒုက္ကဋံ; ကတေ အာပတ္တိ ပါစိတ္တိယဿ။

ဘိက္ခုံ ဘိံသာပေန္တော ဒွေ အာပတ္တိယော အာပဇ္ဇတိ။ ဘိံသာပေတိ, ပယောဂေ ဒုက္ကဋံ; ဘိံသာပိတေ အာပတ္တိ ပါစိတ္တိယဿ။

ဇောတိံ သမာဒဟိတွာ ဝိသိဗ္ဗေန္တော ဒွေ အာပတ္တိယော အာပဇ္ဇတိ။ သမာဒဟတိ , ပယောဂေ ဒုက္ကဋံ; သမာဒဟိတေ အာပတ္တိ ပါစိတ္တိယဿ။

ဩရေနဒ္ဓမာသံ နဟာယန္တော ဒွေ အာပတ္တိယော အာပဇ္ဇတိ။ နဟာယတိ, ပယောဂေ ဒုက္ကဋံ; နဟာနပရိယောသာနေ အာပတ္တိ ပါစိတ္တိယဿ။

အနာဒိယိတွာ တိဏ္ဏံ ဒုဗ္ဗဏ္ဏကရဏာနံ အညတရံ ဒုဗ္ဗဏ္ဏကရဏံ နဝံ စီဝရံ ပရိဘုဉ္ဇန္တော ဒွေ အာပတ္တိယော အာပဇ္ဇတိ။ ပရိဘုဉ္ဇတိ, ပယောဂေ ဒုက္ကဋံ; ပရိဘုတ္တေ အာပတ္တိ ပါစိတ္တိယဿ။

ဘိက္ခုဿ ဝါ ဘိက္ခုနိယာ ဝါ သိက္ခမာနာယ ဝါ သာမဏေရဿ ဝါ သာမဏေရိယာ ဝါ သာမံ စီဝရံ ဝိကပ္ပေတွာ အပ္ပစ္စုဒ္ဓါရဏံ ပရိဘုဉ္ဇန္တော ဒွေ အာပတ္တိယော အာပဇ္ဇတိ။ ပရိဘုဉ္ဇတိ, ပယောဂေ ဒုက္ကဋံ; ပရိဘုတ္တေ အာပတ္တိ ပါစိတ္တိယဿ။

ဘိက္ခုဿ ပတ္တံ ဝါ စီဝရံ ဝါ နိသီဒနံ ဝါ သူစိဃရံ ဝါ ကာယဗန္ဓနံ ဝါ အပနိဓေန္တော ဒွေ အာပတ္တိယော အာပဇ္ဇတိ။ အပနိဓေတိ, ပယောဂေ ဒုက္ကဋံ; အပနိဓိတေ အာပတ္တိ ပါစိတ္တိယဿ။

သုရာမေရယဝဂ္ဂေါ ဆဋ္ဌော။

၇. သပ္ပါဏကဝဂ္ဂေါ

၁၇၁. သဉ္စိစ္စ ပါဏံ ဇီဝိတာ ဝေါရောပေန္တော ကတိ အာပတ္တိယော အာပဇ္ဇတိ? သဉ္စိစ္စ ပါဏံ ဇီဝိတာ ဝေါရောပေန္တော စတဿော အာပတ္တိယော အာပဇ္ဇတိ။ အနောဒိဿ ဩပါတံ ခဏတိ – ‘‘ယော ကောစိ ပပတိတွာ မရိဿတီ’’တိ, အာပတ္တိ ဒုက္ကဋဿ; မနုဿော တသ္မိံ ပပတိတွာ မရတိ, အာပတ္တိ ပါရာဇိကဿ; ယက္ခော ဝါ ပေတော ဝါ တိရစ္ဆာနဂတမနုဿဝိဂ္ဂဟော ဝါ တသ္မိံ ပပတိတွာ မရတိ, အာပတ္တိ ထုလ္လစ္စယဿ; တိရစ္ဆာနဂတော တသ္မိံ ပပတိတွာ မရတိ, အာပတ္တိ ပါစိတ္တိယဿ – သဉ္စိစ္စ ပါဏံ ဇီဝိတာ ဝေါရောပေန္တော ဣမာ စတဿော အာပတ္တိယော အာပဇ္ဇတိ။

ဇာနံ သပ္ပါဏကံ ဥဒကံ ပရိဘုဉ္ဇန္တော ဒွေ အာပတ္တိယော အာပဇ္ဇတိ။ ပရိဘုဉ္ဇတိ, ပယောဂေ ဒုက္ကဋံ; ပရိဘုတ္တေ အာပတ္တိ ပါစိတ္တိယဿ။

ဇာနံ ယထာဓမ္မံ နိဟတာဓိကရဏံ ပုနကမ္မာယ ဥက္ကောဋေန္တော ဒွေ အာပတ္တိယော အာပဇ္ဇတိ။ ဥက္ကောဋေတိ, ပယောဂေ ဒုက္ကဋံ; ဥက္ကောဋိတေ အာပတ္တိ ပါစိတ္တိယဿ။

ဘိက္ခုဿ ဇာနံ ဒုဋ္ဌုလ္လံ အာပတ္တိံ ပဋိစ္ဆာဒေန္တော ဧကံ အာပတ္တိံ အာပဇ္ဇတိ။ ပါစိတ္တိယံ။

ဇာနံ ဦနဝီသတိဝဿံ ပုဂ္ဂလံ ဥပသမ္ပာဒေန္တော ဒွေ အာပတ္တိယော အာပဇ္ဇတိ။ ဥပသမ္ပာဒေတိ, ပယောဂေ ဒုက္ကဋံ; ဥပသမ္ပာဒိတေ အာပတ္တိ ပါစိတ္တိယဿ။

ဇာနံ ထေယျသတ္ထေန သဒ္ဓိံ သံဝိဓါယ ဧကဒ္ဓါနမဂ္ဂံ ပဋိပဇ္ဇန္တော ဒွေ အာပတ္တိယော အာပဇ္ဇတိ။ ပဋိပဇ္ဇတိ, ပယောဂေ ဒုက္ကဋံ; ပဋိပန္နေ အာပတ္တိ ပါစိတ္တိယဿ။

မာတုဂါမေန သဒ္ဓိံ သံဝိဓါယ ဧကဒ္ဓါနမဂ္ဂံ ပဋိပဇ္ဇန္တော ဒွေ အာပတ္တိယော အာပဇ္ဇတိ။ ပဋိပဇ္ဇတိ, ပယောဂေ ဒုက္ကဋံ; ပဋိပန္နေ အာပတ္တိ ပါစိတ္တိယဿ။

ပါပိကာယ ဒိဋ္ဌိယာ ယာဝတတိယံ သမနုဘာသနာယ န ပဋိနိဿဇ္ဇန္တော ဒွေ အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ကမ္မဝါစာပရိယောသာနေ အာပတ္တိ ပါစိတ္တိယဿ။

ဇာနံ တထာဝါဒိနာ ဘိက္ခုနာ အကဋာနုဓမ္မေန တံ ဒိဋ္ဌိံ အပ္ပဋိနိဿဋ္ဌေန သဒ္ဓိံ သမ္ဘုဉ္ဇန္တော ဒွေ အာပတ္တိယော အာပဇ္ဇတိ။ သမ္ဘုဉ္ဇတိ, ပယောဂေ ဒုက္ကဋံ; သမ္ဘုတ္တေ အာပတ္တိ ပါစိတ္တိယဿ။

ဇာနံ တထာနာသိတံ သမဏုဒ္ဒေသံ ဥပလာပေန္တော ဒွေ အာပတ္တိယော အာပဇ္ဇတိ။ ဥပလာပေတိ, ပယောဂေ ဒုက္ကဋံ; ဥပလာပိတေ အာပတ္တိ ပါစိတ္တိယဿ။

သပ္ပါဏကဝဂ္ဂေါ သတ္တမော။

၈. သဟဓမ္မိကဝဂ္ဂေါ

၁၇၂. ဘိက္ခူဟိ သဟဓမ္မိကံ ဝုစ္စမာနော – ‘‘န တာဝါဟံ, အာဝုသော, ဧတသ္မိံ သိက္ခာပဒေ သိက္ခိဿာမိ ယာဝ န အညံ ဘိက္ခုံ ဗျတ္တံ ဝိနယဓရံ ပရိပုစ္ဆိဿာမီ’’တိ ဘဏန္တော ဒွေ အာပတ္တိယော အာပဇ္ဇတိ။ ဘဏတိ, ပယောဂေ ဒုက္ကဋံ; ဘဏိတေ အာပတ္တိ ပါစိတ္တိယဿ။

ဝိနယံ ဝိဝဏ္ဏေန္တော ဒွေ အာပတ္တိယော အာပဇ္ဇတိ။ ဝိဝဏ္ဏေတိ, ပယောဂေ ဒုက္ကဋံ; ဝိဝဏ္ဏိတေ အာပတ္တိ ပါစိတ္တိယဿ။

မောဟေန္တော ဒွေ အာပတ္တိယော အာပဇ္ဇတိ။ အနာရောပိတေ မောဟေ မောဟေတိ, အာပတ္တိ ဒုက္ကဋဿ; အာရောပိတေ မောဟေ မောဟေတိ, အာပတ္တိ ပါစိတ္တိယဿ။

ဘိက္ခုဿ ကုပိတော အနတ္တမနော ပဟာရံ ဒေန္တော ဒွေ အာပတ္တိယော အာပဇ္ဇတိ။ ပဟရတိ, ပယောဂေ ဒုက္ကဋံ; ပဟတေ အာပတ္တိ ပါစိတ္တိယဿ ။

ဘိက္ခုဿ ကုပိတော အနတ္တမနော တလသတ္တိကံ ဥဂ္ဂိရန္တော ဒွေ အာပတ္တိယော အာပဇ္ဇတိ။ ဥဂ္ဂိရတိ, ပယောဂေ ဒုက္ကဋံ; ဥဂ္ဂိရိတေ အာပတ္တိ ပါစိတ္တိယဿ။

ဘိက္ခုံ အမူလကေန သံဃာဒိသေသေန အနုဒ္ဓံသေန္တော ဒွေ အာပတ္တိယော အာပဇ္ဇတိ။ အနုဒ္ဓံသေတိ, ပယောဂေ ဒုက္ကဋံ; အနုဒ္ဓံသိတေ အာပတ္တိ ပါစိတ္တိယဿ။

ဘိက္ခုဿ သဉ္စိစ္စ ကုက္ကုစ္စံ ဥပဒဟန္တော ဒွေ အာပတ္တိယော အာပဇ္ဇတိ။ ဥပဒဟတိ, ပယောဂေ ဒုက္ကဋံ; ဥပဒဟိတေ အာပတ္တိ ပါစိတ္တိယဿ။

ဘိက္ခူနံ ဘဏ္ဍနဇာတာနံ ကလဟဇာတာနံ ဝိဝါဒါပန္နာနံ ဥပဿုတိံ တိဋ္ဌန္တော ဒွေ အာပတ္တိယော အာပဇ္ဇတိ။ ‘‘သောဿာမီ’’တိ ဂစ္ဆတိ, အာပတ္တိ ဒုက္ကဋဿ; ယတ္ထ ဌိတော သုဏာတိ, အာပတ္တိ ပါစိတ္တိယဿ။

ဓမ္မိကာနံ ကမ္မာနံ ဆန္ဒံ ဒတွာ ပစ္ဆာ ခီယနဓမ္မံ အာပဇ္ဇန္တော ဒွေ အာပတ္တိယော အာပဇ္ဇတိ။ ခိယျတိ, ပယောဂေ ဒုက္ကဋံ; ခိယျိတေ အာပတ္တိ ပါစိတ္တိယဿ။

သံဃေ ဝိနိစ္ဆယကထာယ ဝတ္တမာနာယ ဆန္ဒံ အဒတွာ ဥဋ္ဌာယာသနာ ပက္ကမန္တော ဒွေ အာပတ္တိယော အာပဇ္ဇတိ။ ပရိသာယ ဟတ္ထပါသံ ဝိဇဟန္တဿ အာပတ္တိ ဒုက္ကဋဿ; ဝိဇဟိတေ အာပတ္တိ ပါစိတ္တိယဿ။

သမဂ္ဂေန သံဃေန စီဝရံ ဒတွာ ပစ္ဆာ ခီယနဓမ္မံ အာပဇ္ဇန္တော ဒွေ အာပတ္တိယော အာပဇ္ဇတိ။ ခိယျတိ, ပယောဂေ ဒုက္ကဋံ; ခိယျိတေ အာပတ္တိ ပါစိတ္တိယဿ။

ဇာနံ သံဃိကံ လာဘံ ပရိဏတံ ပုဂ္ဂလဿ ပရိဏာမေန္တော ဒွေ အာပတ္တိယော အာပဇ္ဇတိ။ ပရိဏာမေတိ, ပယောဂေ ဒုက္ကဋံ; ပရိဏာမိတေ အာပတ္တိ ပါစိတ္တိယဿ။

သဟဓမ္မိကဝဂ္ဂေါ အဋ္ဌမော။

၉. ရာဇဝဂ္ဂေါ

၁၇၃. ပုဗ္ဗေ အပ္ပဋိသံဝိဒိတော ရညော အန္တေပုရံ ပဝိသန္တော ဒွေ အာပတ္တိယော အာပဇ္ဇတိ။ ပဌမံ ပါဒံ ဥမ္မာရံ အတိက္ကာမေတိ, အာပတ္တိ ဒုက္ကဋဿ; ဒုတိယံ ပါဒံ အတိက္ကာမေတိ, အာပတ္တိ ပါစိတ္တိယဿ။

ရတနံ ဥဂ္ဂဏှန္တော ဒွေ အာပတ္တိယော အာပဇ္ဇတိ။ ဂဏှာတိ, ပယောဂေ ဒုက္ကဋံ; ဂဟိတေ အာပတ္တိ ပါစိတ္တိယဿ။

သန္တံ ဘိက္ခုံ အနာပုစ္ဆာ ဝိကာလေ ဂါမံ ပဝိသန္တော ဒွေ အာပတ္တိယော အာပဇ္ဇတိ။ ပဌမံ ပါဒံ ပရိက္ခေပံ အတိက္ကာမေတိ, အာပတ္တိ ဒုက္ကဋဿ; ဒုတိယံ ပါဒံ အတိက္ကာမေတိ, အာပတ္တိ ပါစိတ္တိယဿ။

အဋ္ဌိမယံ ဝါ ဒန္တမယံ ဝါ ဝိသာဏမယံ ဝါ သူစိဃရံ ကာရာပေန္တော ဒွေ အာပတ္တိယော အာပဇ္ဇတိ။ ကာရာပေတိ, ပယောဂေ ဒုက္ကဋံ; ကာရာပိတေ အာပတ္တိ ပါစိတ္တိယဿ။

ပမာဏာတိက္ကန္တံ မဉ္စံ ဝါ ဣဌံ ဝါ ကာရာပေန္တော ဒွေ အာပတ္တိယော အာပဇ္ဇတိ။ ကာရာပေတိ, ပယောဂေ ဒုက္ကဋံ; ကာရာပိတေ အာပတ္တိ ပါစိတ္တိယဿ။

မဉ္စံ ဝါ ဣဌံ ဝါ တူလောနဒ္ဓံ ကာရာပေန္တော ဒွေ အာပတ္တိယော အာပဇ္ဇတိ။ ကာရာပေတိ, ပယောဂေ ဒုက္ကဋံ; ကာရာပိတေ အာပတ္တိ ပါစိတ္တိယဿ။

ပမာဏာတိက္ကန္တံ နိသီဒနံ ကာရာပေန္တော ဒွေ အာပတ္တိယော အာပဇ္ဇတိ။ ကာရာပေတိ, ပယောဂေ ဒုက္ကဋံ; ကာရာပိတေ အာပတ္တိ ပါစိတ္တိယဿ။

ပမာဏာတိက္ကန္တံ ကဏ္ဍုပ္ပဋိစ္ဆာဒိံ ကာရာပေန္တော ဒွေ အာပတ္တိယော အာပဇ္ဇတိ။ ကာရာပေတိ, ပယောဂေ ဒုက္ကဋံ; ကာရာပိတေ အာပတ္တိ ပါစိတ္တိယဿ။

ပမာဏာတိက္ကန္တံ ဝဿိကသာဋိကံ ကာရာပေန္တော ဒွေ အာပတ္တိယော အာပဇ္ဇတိ။ ကာရာပေတိ, ပယောဂေ ဒုက္ကဋံ; ကာရာပိတေ အာပတ္တိ ပါစိတ္တိယဿ။

စီဝရံ ကာရာပေန္တော ကတိ အာပတ္တိယော အာပဇ္ဇတိ? သုဂတစီဝရပ္ပမာဏံ စီဝရံ ကာရာပေန္တော ဒွေ အာပတ္တိယော အာပဇ္ဇတိ။ ကာရာပေတိ , ပယောဂေ ဒုက္ကဋံ; ကာရာပိတေ အာပတ္တိ ပါစိတ္တိယဿ – သုဂတစီဝရပ္ပမာဏံ စီဝရံ ကာရာပေန္တော ဣမာ ဒွေ အာပတ္တိယော အာပဇ္ဇတိ။

ရာဇဝဂ္ဂေါ နဝမော။ ခုဒ္ဒကာ နိဋ္ဌိတာ။

၅. ပါဋိဒေသနီယကဏ္ဍံ

၁၇၄. အညာတိကာယ ဘိက္ခုနိယာ အန္တရဃရံ ပဝိဋ္ဌာယ ဟတ္ထတော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ဘုဉ္ဇန္တော ကတိ အာပတ္တိယော အာပဇ္ဇတိ? အညာတိကာယ ဘိက္ခုနိယာ အန္တရဃရံ ပဝိဋ္ဌာယ ဟတ္ထတော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ဘုဉ္ဇန္တော ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ – အညာတိကာယ ဘိက္ခုနိယာ အန္တရဃရံ ပဝိဋ္ဌာယ ဟတ္ထတော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ဘုဉ္ဇန္တော ဣမာ ဒွေ အာပတ္တိယော အာပဇ္ဇတိ။

ဘိက္ခုနိယာ ဝေါသာသန္တိယာ န နိဝါရေတွာ ဘုဉ္ဇန္တော ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ။

သေက္ခသမ္မတေသု ကုလေသု ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ဘုဉ္ဇန္တော ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ။

အာရညကေသု သေနာသနေသု ပုဗ္ဗေ အပ္ပဋိသံဝိဒိတံ ခါဒနီယံ ဝါ ဘောဇနီယံ ဝါ အဇ္ဈာရာမေ သဟတ္ထာ ပဋိဂ္ဂဟေတွာ ဘုဉ္ဇန္တော ကတိ အာပတ္တိယော အာပဇ္ဇတိ? အာရညကေသု သေနာသနေသု ပုဗ္ဗေ အပ္ပဋိသံဝိဒိတံ ခါဒနီယံ ဝါ ဘောဇနီယံ ဝါ အဇ္ဈာရာမေ သဟတ္ထာ ပဋိဂ္ဂဟေတွာ ဘုဉ္ဇန္တော ဒွေ အာပတ္တိယော အာပဇ္ဇတိ ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ – အာရညကေသု သေနာသနေသု ပုဗ္ဗေ အပ္ပဋိသံဝိဒိတံ ခါဒနီယံ ဝါ ဘောဇနီယံ ဝါ အဇ္ဈာရာမေ သဟတ္ထာ ပဋိဂ္ဂဟေတွာ ဘုဉ္ဇန္တော ဣမာ ဒွေ အာပတ္တိယော အာပဇ္ဇတိ။

စတ္တာရော ပါဋိဒေသနီယာ နိဋ္ဌိတာ။

၆. သေခိယကဏ္ဍံ

၁. ပရိမဏ္ဍလဝဂ္ဂေါ

၁၇၅. အနာဒရိယံ ပဋိစ္စ ပုရတော ဝါ ပစ္ဆတော ဝါ ဩလမ္ဗေန္တော နိဝါသေန္တော ကတိ အာပတ္တိယော အာပဇ္ဇတိ? အနာဒရိယံ ပဋိစ္စ ပုရတော ဝါ ပစ္ဆတော ဝါ ဩလမ္ဗေန္တော နိဝါသေန္တော ဧကံ အာပတ္တိံ အာပဇ္ဇတိ။ ဒုက္ကဋံ – အနာဒရိယံ ပဋိစ္စ ပုရတော ဝါ ပစ္ဆတော ဝါ ဩလမ္ဗေန္တော နိဝါသေန္တော ဣမံ ဧကံ အာပတ္တိံ အာပဇ္ဇတိ။

။အနာဒရိယံ ပဋိစ္စ ပုရတော ဝါ ပစ္ဆတော ဝါ ဩလမ္ဗေန္တော ပါရုပန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ကာယံ ဝိဝရိတွာ အန္တရဃရေ ဂစ္ဆန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ကာယံ ဝိဝရိတွာ အန္တရဃရေ နိသီဒန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဟတ္ထံ ဝါ ပါဒံ ဝါ ကီဠာပေန္တော အန္တရဃရေ ဂစ္ဆန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဟတ္ထံ ဝါ ပါဒံ ဝါ ကီဠာပေန္တော အန္တရဃရေ နိသီဒန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ တဟံ တဟံ ဩလောကေန္တော အန္တရဃရေ ဂစ္ဆန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ တဟံ တဟံ ဩလောကေန္တော အန္တရဃရေ နိသီဒန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဥက္ခိတ္တကာယ အန္တရဃရေ ဂစ္ဆန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဥက္ခိတ္တကာယ အန္တရဃရေ နိသီဒန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

ပရိမဏ္ဍလဝဂ္ဂေါ ပဌမော။

၂. ဥဇ္ဇဂ္ဃိကဝဂ္ဂေါ

၁၇၆. ။အနာဒရိယံ ပဋိစ္စ ဥဇ္ဇဂ္ဃိကာယ အန္တရဃရေ ဂစ္ဆန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဥဇ္ဇဂ္ဃိကာယ အန္တရဃရေ နိသီဒန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဥစ္စာသဒ္ဒံ မဟာသဒ္ဒံ ကရောန္တော အန္တရဃရေ ဂစ္ဆန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဥစ္စာသဒ္ဒံ မဟာသဒ္ဒံ ကရောန္တော အန္တရဃရေ နိသီဒန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ကာယပ္ပစာလကံ အန္တရဃရေ ဂစ္ဆန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ကာယပ္ပစာလကံ အန္တရဃရေ နိသီဒန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဗာဟုပ္ပစာလကံ အန္တရဃရေ ဂစ္ဆန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဗာဟုပ္ပစာလကံ အန္တရဃရေ နိသီဒန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ သီသပ္ပစာလကံ အန္တရဃရေ ဂစ္ဆန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ သီသပ္ပစာလကံ အန္တရဃရေ နိသီဒန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

ဥဇ္ဇဂ္ဃိကဝဂ္ဂေါ ဒုတိယော။

၃. ခမ္ဘကတဝဂ္ဂေါ

၁၇၇. ။အနာဒရိယံ ပဋိစ္စ ခမ္ဘကတော အန္တရဃရေ ဂစ္ဆန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ခမ္ဘကတော အန္တရဃရေ နိသီဒန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဩဂုဏ္ဌိတော အန္တရဃရေ ဂစ္ဆန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဩဂုဏ္ဌိတော အန္တရဃရေ နိသီဒန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဥက္ကုဋိကာယ အန္တရဃရေ ဂစ္ဆန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ပလ္လတ္ထိကာယ အန္တရဃရေ နိသီဒန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ အသက္ကစ္စံ ပိဏ္ဍပါတံ ပဋိဂ္ဂဏှန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ တဟံ တဟံ ဩလောကေန္တော ပိဏ္ဍပါတံ ပဋိဂ္ဂဏှန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ သူပညေဝ ဗဟုံ ပဋိဂ္ဂဏှန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ထူဣကတံ ပိဏ္ဍပါတံ ပဋိဂ္ဂဏှန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

ခမ္ဘကတဝဂ္ဂေါ တတိယော။

၄. ပိဏ္ဍပါတဝဂ္ဂေါ

၁၇၈. ။အနာဒရိယံ ပဋိစ္စ အသက္ကစ္စံ ပိဏ္ဍပါတံ ဘုဉ္ဇန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ တဟံ တဟံ ဩလောကေန္တော ပိဏ္ဍပါတံ ဘုဉ္ဇန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ တဟံ တဟံ ဩမသိတွာ ပိဏ္ဍပါတံ ဘုဉ္ဇန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ သူပညေဝ ဗဟုံ ဘုဉ္ဇန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ထူပကတော ဩမဒ္ဒိတွာ ပိဏ္ဍပါတံ ဘုဉ္ဇန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ သူပံ ဝါ ဗျဉ္ဇနံ ဝါ ဩဒနေန ပဋိစ္ဆာဒေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ သူပံ ဝါ ဩဒနံ ဝါ အဂိလာနော အတ္တနော အတ္ထာယ ဝိညာပေတွာ ဘုဉ္ဇန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဥဇ္ဈာနသညီ ပရေသံ ပတ္တံ ဩလောကေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ မဟန္တံ ကဗဠံ ကရောန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဒီဃံ အာလောပံ ကရောန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

ပိဏ္ဍပါတဝဂ္ဂေါ စတုတ္ထော။

၅. ကဗဠဝဂ္ဂေါ

၁၇၉. ။အနာဒရိယံ ပဋိစ္စ အနာဟဋေ ကဗဠေ မုခဒွါရံ ဝိဝရန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဘုဉ္ဇမာနော သဗ္ဗံ ဟတ္ထံ မုခေ ပက္ခိပန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ သကဗဠေန မုခေန ဗျာဟရန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ပိဏ္ဍုက္ခေပကံ ဘုဉ္ဇန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ကဗဠာဝစ္ဆေဒကံ ဘုဉ္ဇန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ အဝဂဏ္ဍကာရကံ ဘုဉ္ဇန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဟတ္ထနိဒ္ဓုနကံ ဘုဉ္ဇန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ သိတ္ထာဝကာရကံ ဘုဉ္ဇန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဇိဝှာနိစ္ဆာရကံ ဘုဉ္ဇန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ စပုစပုကာရကံ ဘုဉ္ဇန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

ကဗဠဝဂ္ဂေါ ပဉ္စမော။

၆. သုရုသုရုဝဂ္ဂေါ

၁၈၀. ။အနာဒရိယံ ပဋိစ္စ သုရုသုရုကာရကံ ဘုဉ္ဇန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဟတ္ထနိလ္လေဟကံ ဘုဉ္ဇန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ပတ္တနိလ္လေဟကံ ဘုဉ္ဇန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဩဋ္ဌနိလ္လေဟကံ ဘုဉ္ဇန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ သာမိသေန ဟတ္ထေန ပါနီယထာလကံ ပဋိဂ္ဂဏှန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ သသိတ္ထကံ ပတ္တဓေါဝနံ အန္တရဃရေ ဆဍ္ဍေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဆတ္တပါဏိဿ ဓမ္မံ ဒေသေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဒဏ္ဍပါဏိဿ ဓမ္မံ ဒေသေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ သတ္ထပါဏိဿ ဓမ္မံ ဒေသေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ အာဝုဓပါဏိဿ ဓမ္မံ ဒေသေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

သုရုသုရုဝဂ္ဂေါ ဆဋ္ဌော။

၇. ပါဒုကဝဂ္ဂေါ

၁၈၁. ။အနာဒရိယံ ပဋိစ္စ ပါဒုကာရုဠှဿ ဓမ္မံ ဒေသေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဥပါဟနာရုဠှဿ ဓမ္မံ ဒေသေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ယာနဂတဿ ဓမ္မံ ဒေသေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ သယနဂတဿ ဓမ္မံ ဒေသေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ပလ္လတ္ထိကာယ နိသိန္နဿ ဓမ္မံ ဒေသေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဝေဌိတသီသဿ ဓမ္မံ ဒေသေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဩဂုဏ္ဌိတသီသဿ ဓမ္မံ ဒေသေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဆမာယံ နိသီဒိတွာ အာသနေ နိသိန္နဿ ဓမ္မံ ဒေသေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ နီစေ အာသနေ နိသီဒိတွာ ဥစ္စေ အာသနေ နိသိန္နဿ ဓမ္မံ ဒေသေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဌိတော နိသိန္နဿ ဓမ္မံ ဒေသေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ပစ္ဆတော ဂစ္ဆန္တော ပုရတော ဂစ္ဆန္တဿ ဓမ္မံ ဒေသေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဥပ္ပထေန ဂစ္ဆန္တော ပထေန ဂစ္ဆန္တဿ ဓမ္မံ ဒေသေန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဌိတော ဥစ္စာရံ ဝါ ပဿာဝံ ဝါ ကရောန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

။အနာဒရိယံ ပဋိစ္စ ဟရိတေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တော ဧကံ အာပတ္တိံ အာပဇ္ဇတိ။ ဒုက္ကဋံ။။

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တော ကတိ အာပတ္တိယော အာပဇ္ဇတိ? အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တော ဧကံ အာပတ္တိံ အာပဇ္ဇတိ။ ဒုက္ကဋံ – အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တော ဣမံ ဧကံ အာပတ္တိံ အာပဇ္ဇတိ။

ပါဒုကဝဂ္ဂေါ သတ္တမော။

သေခိယာ နိဋ္ဌိတာ။

ကတာပတ္တိဝါရော နိဋ္ဌိတော ဒုတိယော။

၃. ဝိပတ္တိဝါရော

၁၈၂. မေထုနံ ဓမ္မံ ပဋိသေဝန္တဿ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? မေထုနံ ဓမ္မံ ပဋိသေဝန္တဿ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ, သိယာ အာစာရဝိပတ္တိံ။ပေ.။။

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တဿ အာပတ္တိ စတုန္နံ ဝိပတ္တီနံ ကတိ ဝိပတ္တိယော ဘဇတိ? အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တဿ အာပတ္တိ စတုန္နံ ဝိပတ္တီနံ ဧကံ ဝိပတ္တိံ ဘဇတိ – အာစာရဝိပတ္တိံ။

ဝိပတ္တိဝါရော နိဋ္ဌိတော တတိယော။

၄. သင်္ဂဟိတဝါရော

၁၈၃. မေထုနံ ဓမ္မံ ပဋိသေဝန္တဿ အာပတ္တိယော သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? မေထုနံ ဓမ္မံ ပဋိသေဝန္တဿ အာပတ္တိယော သတ္တန္နံ အာပတ္တိက္ခန္ဓာနံ တီဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန, သိယာ ထုလ္လစ္စယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ပေ.။။

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တဿ အာပတ္တိ သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တဿ အာပတ္တိ သတ္တန္နံ အာပတ္တိက္ခန္ဓာနံ ဧကေန အာပတ္တိက္ခန္ဓေန သင်္ဂဟိတာ – ဒုက္ကဋာပတ္တိက္ခန္ဓေန။

သင်္ဂဟိတဝါရော နိဋ္ဌိတော စတုတ္ထော။

၅. သမုဋ္ဌာနဝါရော

၁၈၄. မေထုနံ ဓမ္မံ ပဋိသေဝန္တဿ အာပတ္တိယော ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ [သမုဋ္ဌဟန္တိ (သီ. သျာ.)]? မေထုနံ ဓမ္မံ ပဋိသေဝန္တဿ အာပတ္တိယော ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ စိတ္တတော စ သမုဋ္ဌန္တိ, န ဝါစတော။ပေ.။။

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တဿ အာပတ္တိ ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတိ? အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တဿ အာပတ္တိ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။

သမုဋ္ဌာနဝါရော နိဋ္ဌိတော ပဉ္စမော။

၆. အဓိကရဏဝါရော

၁၈၅. မေထုနံ ဓမ္မံ ပဋိသေဝန္တဿ အာပတ္တိယော စတုန္နံ အဓိကရဏာနံ ကတမံ အဓိကရဏံ? မေထုနံ ဓမ္မံ ပဋိသေဝန္တဿ အာပတ္တိယော စတုန္နံ အဓိကရဏာနံ အာပတ္တာဓိကရဏံ။ပေ.။။

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တဿ အာပတ္တိ စတုန္နံ အဓိကရဏာနံ ကတမံ အဓိကရဏံ? အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တဿ အာပတ္တိ စတုန္နံ အဓိကရဏာနံ အာပတ္တာဓိကရဏံ။

အဓိကရဏဝါရော နိဋ္ဌိတော ဆဋ္ဌော။

၇. သမထဝါရော

၁၈၆. မေထုနံ ဓမ္မံ ပဋိသေဝန္တဿ အာပတ္တိယော သတ္တန္နံ သမထာနံ ကတိဟိ သမထေဟိ သမ္မန္တိ? မေထုနံ ဓမ္မံ ပဋိသေဝန္တဿ အာပတ္တိယော သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စ။ပေ.။။

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တဿ အာပတ္တိ သတ္တန္နံ သမထာနံ ကတိဟိ သမထေဟိ သမ္မတိ? အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တဿ အာပတ္တိ သတ္တန္နံ သမထာနံ တီဟိ သမထေဟိ သမ္မတိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စ။

သမထဝါရော နိဋ္ဌိတော သတ္တမော။

၈. သမုစ္စယဝါရော

၁၈၇. မေထုနံ ဓမ္မံ ပဋိသေဝန္တော ကတိ အာပတ္တိယော အာပဇ္ဇတိ? မေထုနံ ဓမ္မံ ပဋိသေဝန္တော တိဿော အာပတ္တိယော အာပဇ္ဇတိ။ အက္ခာယိတေ သရီရေ မေထုနံ ဓမ္မံ ပဋိသေဝတိ, အာပတ္တိ ပါရာဇိကဿ; ယေဘုယျေန ခါယိတေ သရီရေ မေထုနံ ဓမ္မံ ပဋိသေဝတိ, အာပတ္တိ ထုလ္လစ္စယဿ; ဝဋ္ဋကတေ မုခေ အစ္ဆုပန္တံ အင်္ဂဇာတံ ပဝေသေတိ, အာပတ္တိ ဒုက္ကဋဿ – မေထုနံ ဓမ္မံ ပဋိသေဝန္တော ဣမာ တိဿော အာပတ္တိယော အာပဇ္ဇတိ။

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ, သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ, ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ, စတုန္နံ အဓိကရဏာနံ ကတမံ အဓိကရဏံ, သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ, သိယာ အာစာရဝိပတ္တိံ။ သတ္တန္နံ အာပတ္တိက္ခန္ဓာနံ တီဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန, သိယာ ထုလ္လစ္စယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ စိတ္တတော စ သမုဋ္ဌန္တိ, န ဝါစတော။ စတုန္နံ အဓိကရဏာနံ, အာပတ္တာဓိကရဏံ။ သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စ။ပေ.။။

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တော ကတိ အာပတ္တိယော အာပဇ္ဇတိ? အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တော ဧကံ အာပတ္တိံ အာပဇ္ဇတိ။ ဒုက္ကဋံ – အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရောန္တော ဣမံ ဧကံ အာပတ္တိံ အာပဇ္ဇတိ။

သာ အာပတ္တိ စတုန္နံ ဝိပတ္တီနံ ကတိ ဝိပတ္တိယော ဘဇတိ, သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ, ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတိ, စတုန္နံ အဓိကရဏာနံ ကတမံ အဓိကရဏံ, သတ္တန္နံ, သမထာနံ ကတိဟိ သမထေဟိ သမ္မတိ? သာ အာပတ္တိ စတုန္နံ ဝိပတ္တီနံ ဧကံ ဝိပတ္တိံ ဘဇတိ – အာစာရဝိပတ္တိံ။ သတ္တန္နံ အာပတ္တိက္ခန္ဓာနံ ဧကေန အာပတ္တိက္ခန္ဓေန သင်္ဂဟိတာ – ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ စတုန္နံ အဓိကရဏာနံ, အာပတ္တာဓိကရဏံ။ သတ္တန္နံ သမထာနံ တီဟိ သမထေဟိ သမ္မတိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စ။

သမုစ္စယဝါရော နိဋ္ဌိတော အဋ္ဌမော။

ဣမေ အဋ္ဌ ဝါရာ သဇ္ဈာယမဂ္ဂေန လိခိတာ။

တဿုဒ္ဒါနံ –

ကတ္ထပညတ္တိ ကတိ စ၊ ဝိပတ္တိသင်္ဂဟေန စ။

သမုဋ္ဌာနာဓိကရဏာ သမထော၊ သမုစ္စယေန စာတိ။

၁. ကတ္ထပညတ္တိဝါရော

၁. ပါရာဇိကကဏ္ဍံ

၁၈၈. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန မေထုနံ ဓမ္မံ ပဋိသေဝနပစ္စယာ ပါရာဇိကံ ကတ္ထ ပညတ္တံ, ကံ အာရဗ္ဘ, ကိသ္မိံ ဝတ္ထုသ္မိံ။ပေ.။ ကေနာဘတန္တိ?

ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန မေထုနံ ဓမ္မံ ပဋိသေဝနပစ္စယာ ပါရာဇိကံ ကတ္ထ ပညတ္တန္တိ? ဝေသာလိယံ ပညတ္တံ။ ကံ အာရဗ္ဘာတိ? သုဒိန္နံ ကလန္ဒပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? သုဒိန္နော ကလန္ဒပုတ္တော ပုရာဏဒုတိယိကာယ မေထုနံ ဓမ္မံ ပဋိသေဝိ, တသ္မိံ ဝတ္ထုသ္မိံ။ အတ္ထိ တတ္ထ ပညတ္တိ, အနုပညတ္တိ, အနုပ္ပန္နပညတ္တီတိ? ဧကာ ပညတ္တိ, ဒွေ အနုပညတ္တိယော။ အနုပ္ပန္နပညတ္တိ တသ္မိံ နတ္ထိ။ သဗ္ဗတ္ထ ပညတ္တိ, ပဒေသပညတ္တီတိ? သဗ္ဗတ္ထပညတ္တိ။ သာဓါရဏပညတ္တိ, အသာဓါရဏပညတ္တီတိ? သာဓါရဏပညတ္တိ။ ဧကတောပညတ္တိ, ဥဘတောပညတ္တီတိ? ဥဘတောပညတ္တိ။ ပဉ္စန္နံ ပါတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နန္တိ? နိဒါနောဂဓံ နိဒါနပရိယာပန္နံ။ ကတမေန ဥဒ္ဒေသေန ဥဒ္ဒေသံ အာဂစ္ဆတီတိ? ဒုတိယေန ဥဒ္ဒေသေန ဥဒ္ဒေသံ အာဂစ္ဆတိ။ စတုန္နံ ဝိပတ္တီနံ ကတမာ ဝိပတ္တီတိ? သီလဝိပတ္တိ။ သတ္တန္နံ အာပတ္တိက္ခန္ဓာနံ ကတမော အာပတ္တိက္ခန္ဓောတိ? ပါရာဇိကာပတ္တိက္ခန္ဓော။ ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတီတိ? ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။ ကေနာဘတန္တိ? ပရမ္ပရာဘတံ –

ဥပါလိ ဒါသကော စေဝ၊ သောဏကော သိဂ္ဂဝေါ တထာ။

မောဂ္ဂလိပုတ္တေန ပဉ္စမာ၊ ဧတေ ဇမ္ဗုသိရိဝ္ဟယေ။ ။ပေ.။။

ဧတေ နာဂါ မဟာပညာ၊ ဝိနယညူ မဂ္ဂကောဝိဒါ။

ဝိနယံ ဒီပေ ပကာသေသုံ၊ ပိဋကံ တမ္ဗပဏ္ဏိယာတိ။

၁၈၉. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန အဒိန္နံ အာဒိယနပစ္စယာ ပါရာဇိကံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? ဓနိယံ ကုမ္ဘကာရပုတ္တံ အာရဗ္ဘ။ ကိသ္မိံ ဝတ္ထုသ္မိန္တိ? ဓနိယော ကုမ္ဘကာရပုတ္တော ရညော ဒါရူနိ အဒိန္နံ အာဒိယိ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ, န ဝါစတော; သိယာ ဝါစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၁၉၀. သဉ္စိစ္စ မနုဿဝိဂ္ဂဟံ ဇီဝိတာ ဝေါရောပနပစ္စယာ ပါရာဇိကံ ကတ္ထ ပညတ္တန္တိ? ဝေသာလိယံ ပညတ္တံ။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ အညမညံ ဇီဝိတာ ဝေါရောပေသုံ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ, န ဝါစတော; သိယာ ဝါစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၁၉၁. အသန္တံ အဘူတံ ဥတ္တရိမနုဿဓမ္မံ ဥလ္လပနပစ္စယာ ပါရာဇိကံ ကတ္ထ ပညတ္တန္တိ? ဝေသာလိယံ ပညတ္တံ။ ကံ အာရဗ္ဘာတိ? ဝဂ္ဂုမုဒါတီရိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဝဂ္ဂုမုဒါတီရိယာ ဘိက္ခူ ဂိဟီနံ အညမညဿ ဥတ္တရိမနုဿဓမ္မဿ ဝဏ္ဏံ ဘာသိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ, န ဝါစတော; သိယာ ဝါစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

စတ္တာရော ပါရာဇိကာ နိဋ္ဌိတာ။

၂. သံဃာဒိသေသကဏ္ဍာဒိ

၁၉၂. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဥပက္ကမိတွာအသုစိံ မောစနပစ္စယာ သံဃာဒိသေသော ကတ္ထ ပညတ္တော, ကံ အာရဗ္ဘ, ကိသ္မိံ ဝတ္ထုသ္မိံ။ပေ.။ ကေနာဘတန္တိ?

ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဥပက္ကမိတွာ အသုစိံ မောစနပစ္စယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အာယသ္မန္တံ သေယျသကံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ သေယျသကော ဥပက္ကမိတွာ အသုစိံ မောစေသိ, တသ္မိံ ဝတ္ထုသ္မိံ။ အတ္ထိ တတ္ထ ပညတ္တိ, အနုပညတ္တိ, အနုပ္ပန္နပညတ္တီတိ? ဧကာ ပညတ္တိ, ဧကာ အနုပညတ္တိ။ အနုပ္ပန္နပညတ္တိ တသ္မိံ နတ္ထိ။ သဗ္ဗတ္ထပညတ္တိ, ပဒေသပညတ္တီတိ? သဗ္ဗတ္ထပညတ္တိ။ သာဓါရဏပညတ္တိ, အသာဓါရဏပညတ္တီတိ? အသာဓါရဏပညတ္တိ။ ဧကတောပညတ္တိ, ဥဘတောပညတ္တီတိ? ဧကတောပညတ္တိ။ ပဉ္စန္နံ ပါတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နန္တိ? နိဒါနောဂဓံ နိဒါနပရိယာပန္နံ။ ကတမေန ဥဒ္ဒေသေန ဥဒ္ဒေသံ အာဂစ္ဆတီတိ? တတိယေန ဥဒ္ဒေသေန ဥဒ္ဒေသံ အာဂစ္ဆတိ။ စတုန္နံ ဝိပတ္တီနံ ကတမာ ဝိပတ္တီတိ? သီလဝိပတ္တိ။ သတ္တန္နံ အာပတ္တိက္ခန္ဓာနံ ကတမော အာပတ္တိက္ခန္ဓောတိ? သံဃာဒိသေသာပတ္တိက္ခန္ဓော။ ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတီတိ? ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။ ကေနာဘတန္တိ? ပရမ္ပရာဘတံ –

ဥပါလိ ဒါသကော စေဝ၊ သောဏကော သိဂ္ဂဝေါ တထာ။

မောဂ္ဂလိပုတ္တေန ပဉ္စမာ၊ ဧတေ ဇမ္ဗုသိရိဝ္ဟယေ။ ။ပေ.။။

ဧတေ နာဂါ မဟာပညာ၊ ဝိနယညူ မဂ္ဂကောဝိဒါ။

ဝိနယံ ဒီပေ ပကာသေသုံ၊ ပိဋကံ တမ္ဗပဏ္ဏိယာတိ။

မာတုဂါမေန သဒ္ဓိံ ကာယသံသဂ္ဂံ သမာပဇ္ဇနပစ္စယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အာယသ္မန္တံ ဥဒါယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒါယီ မာတုဂါမေန သဒ္ဓိံ ကာယသံသဂ္ဂံ သမာပဇ္ဇိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

မာတုဂါမံ ဒုဋ္ဌုလ္လာဟိ ဝါစာဟိ ဩဘာသနပစ္စယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အာယသ္မန္တံ ဥဒါယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒါယီ မာတုဂါမံ ဒုဋ္ဌုလ္လာဟိ ဝါစာဟိ ဩဘာသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ, န ဝါစတော; သိယာ ဝါစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ ဘာသနပစ္စယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အာယသ္မန္တံ ဥဒါယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒါယီ မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ ဘာသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

သဉ္စရိတ္တံ သမာပဇ္ဇနပစ္စယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အာယသ္မန္တံ ဥဒါယိံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဥဒါယီ သဉ္စရိတ္တံ သမာပဇ္ဇိ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ – သိယာ ကာယတော သမုဋ္ဌာတိ, န ဝါစတော န စိတ္တတော; သိယာ ဝါစတော သမုဋ္ဌာတိ, န ကာယတော န စိတ္တတော; သိယာ ကာယတော စ ဝါစတော စ သမုဋ္ဌာတိ, န စိတ္တတော; သိယာ ကာယတော စ စိတ္တတော စ သမုဋ္ဌာတိ, န ဝါစတော; သိယာ ဝါစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

သညာစိကာယ ကုဋိံ ကာရာပနပစ္စယာ သံဃာဒိသေသော ကတ္ထ ပညတ္တောတိ ? အာဠဝိယံ ပညတ္တော။ ကံ အာရဗ္ဘာတိ? အာဠဝကေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? အာဠဝကာ ဘိက္ခူ သညာစိကာယ ကုဋိယော ကာရာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

မဟလ္လကံ ဝိဟာရံ ကာရာပနပစ္စယာ သံဃာဒိသေသော ကတ္ထ ပညတ္တောတိ? ကောသမ္ဗိယံ ပညတ္တော။ ကံ အာရဗ္ဘာတိ? အာယသ္မန္တံ ဆန္နံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဆန္နော ဝိဟာရဝတ္ထုံ သောဓေန္တော အညတရံ စေတိယရုက္ခံ ဆေဒါပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

ဘိက္ခုံ အမူလကေန ပါရာဇိကေန ဓမ္မေန အနုဒ္ဓံသနပစ္စယာ သံဃာဒိသေသော ကတ္ထ ပညတ္တောတိ? ရာဇဂဟေ ပညတ္တော။ ကံ အာရဗ္ဘာတိ? မေတ္တိယဘူမဇကေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? မေတ္တိယဘူမဇကာ ဘိက္ခူ အာယသ္မန္တံ ဒဗ္ဗံ မလ္လပုတ္တံ အမူလကေန ပါရာဇိကေန ဓမ္မေန အနုဒ္ဓံသေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ဘိက္ခုံ အညဘာဂိယဿ အဓိကရဏဿ ကိဉ္စိဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသနပစ္စယာ သံဃာဒိသေသော ကတ္ထ ပညတ္တောတိ? ရာဇဂဟေ ပညတ္တော။ ကံ အာရဗ္ဘာတိ? မေတ္တိယဘူမဇကေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? မေတ္တိယဘူမဇကာ ဘိက္ခူ အာယသ္မန္တံ ဒဗ္ဗံ မလ္လပုတ္တံ အညဘာဂိယဿ အဓိကရဏဿ ကိဉ္စိ ဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

သံဃဘေဒကဿ ဘိက္ခုနော ယာဝတတိယံ သမနုဘာသနာယ န ပဋိနိဿဇ္ဇနပစ္စယာ သံဃာဒိသေသော ကတ္ထ ပညတ္တောတိ? ရာဇဂဟေ ပညတ္တော။ ကံ အာရဗ္ဘာတိ? ဒေဝဒတ္တံ အာရဗ္ဘ။ ကိသ္မိံ ဝတ္ထုသ္မိန္တိ? ဒေဝဒတ္တော သမဂ္ဂဿ သံဃဿ ဘေဒါယ ပရက္ကမိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

ဘေဒကာနုဝတ္တကာနံ ဘိက္ခူနံ ယာဝတတိယံ သမနုဘာသနာယ န ပဋိနိဿဇ္ဇနပစ္စယာ သံဃာဒိသေသော ကတ္ထ ပညတ္တောတိ? ရာဇဂဟေ ပညတ္တော။ ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ ဒေဝဒတ္တဿ သံဃဘေဒါယ ပရက္ကမန္တဿ အနုဝတ္တကာ အဟေသုံ ဝဂ္ဂဝါဒကာ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေ သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

ဒုဗ္ဗစဿ ဘိက္ခုနော ယာဝတတိယံ သမနုဘာသနာယ န ပဋိနိဿဇ္ဇနပစ္စယာ သံဃာဒိသေသော ကတ္ထ ပညတ္တောတိ? ကောသမ္ဗိယံ ပညတ္တော။ ကံ အာရဗ္ဘာတိ? အာယသ္မန္တံ ဆန္နံ အာရဗ္ဘ။ ကိသ္မိံ ဝတ္ထုသ္မိန္တိ? အာယသ္မာ ဆန္နော ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ အကာသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

ကုလဒူသကဿ ဘိက္ခုနော ယာဝတတိယံ သမနုဘာသနာယ န ပဋိနိဿဇ္ဇနပစ္စယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အဿဇိပုနဗ္ဗသုကေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? အဿဇိပုနဗ္ဗသုကာ ဘိက္ခူ သံဃေန ပဗ္ဗာဇနီယကမ္မကတာ ဘိက္ခူ ဆန္ဒဂါမိတာ ဒေါသဂါမိတာ မောဟဂါမိတာ ဘယဂါမိတာ ပါပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ ဒုက္ကဋံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဥဒကေ ဥစ္စာရမ္ပိ ပဿာဝမ္ပိ ခေဠမ္ပိ အကံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

ကတ္ထပညတ္တိဝါရော နိဋ္ဌိတော ပဌမော။

၂. ကတာပတ္တိဝါရော

၁. ပါရာဇိကကဏ္ဍံ

၁၉၃. မေထုနံ ဓမ္မံ ပဋိသေဝနပစ္စယာ ကတိ အာပတ္တိယော အာပဇ္ဇတိ ? မေထုနံ ဓမ္မံ ပဋိသေဝနပစ္စယာ စတဿော အာပတ္တိယော အာပဇ္ဇတိ – အက္ခာယိတေ သရီရေ မေထုနံ ဓမ္မံ ပဋိသေဝတိ, အာပတ္တိ ပါရာဇိကဿ; ယေဘုယျေန ခါယိတေ သရီရေ မေထုနံ ဓမ္မံ ပဋိသေဝတိ, အာပတ္တိ ထုလ္လစ္စယဿ ; ဝဋ္ဋကတေ မုခေ အစ္ဆုပန္တံ အင်္ဂဇာတံ ပဝေသေတိ, အာပတ္တိ ဒုက္ကဋဿ; ဇတုမဋ္ဌကေ ပါစိတ္တိယံ – မေထုနံ ဓမ္မံ ပဋိသေဝနပစ္စယာ ဣမာ စတဿော အာပတ္တိယော အာပဇ္ဇတိ။

အဒိန္နံ အာဒိယနပစ္စယာ ကတိ အာပတ္တိယော အာပဇ္ဇတိ? အဒိန္နံ အာဒိယနပစ္စယာ တိဿော အာပတ္တိယော အာပဇ္ဇတိ။ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ အဒိန္နံ ထေယျသင်္ခါတံ အာဒိယတိ, အာပတ္တိ ပါရာဇိကဿ; အတိရေကမာသကံ ဝါ ဦနပဉ္စမာသကံ ဝါ အဂ္ဃနကံ အဒိန္နံ ထေယျသင်္ခါတံ အာဒိယတိ, အာပတ္တိ ထုလ္လစ္စယဿ; မာသကံ ဝါ ဦနမာသကံ ဝါ အဂ္ဃနကံ အဒိန္နံ ထေယျသင်္ခါတံ အာဒိယတိ, အာပတ္တိ ဒုက္ကဋဿ – အဒိန္နံ အာဒိယနပစ္စယာ ဣမာ တိဿော အာပတ္တိယော အာပဇ္ဇတိ။

သဉ္စိစ္စ မနုဿဝိဂ္ဂဟံ ဇီဝိတာ ဝေါရောပနပစ္စယာ ကတိ အာပတ္တိယော အာပဇ္ဇတိ? သဉ္စိစ္စ မနုဿဝိဂ္ဂဟံ ဇီဝိတာ ဝေါရောပနပစ္စယာ တိဿော အာပတ္တိယော အာပဇ္ဇတိ။ မနုဿံ ဩဒိဿ ဩပါတံ ခဏတိ ‘‘ပပတိတွာ မရိဿတီ’’တိ, အာပတ္တိ ဒုက္ကဋဿ; ပပတိတေ ဒုက္ခာ ဝေဒနာ ဥပ္ပဇ္ဇတိ, အာပတ္တိ ထုလ္လစ္စယဿ; မရတိ, အာပတ္တိ ပါရာဇိကဿ – သဉ္စိစ္စ မနုဿဝိဂ္ဂဟံ ဇီဝိတာ ဝေါရောပနပစ္စယာ ဣမာ တိဿော အာပတ္တိယော အာပဇ္ဇတိ။

အသန္တံ အဘူတံ ဥတ္တရိမနုဿဓမ္မံ ဥလ္လပနပစ္စယာ ကတိ အာပတ္တိယော အာပဇ္ဇတိ? အသန္တံ အဘူတံ ဥတ္တရိမနုဿဓမ္မံ ဥလ္လပနပစ္စယာ တိဿော အာပတ္တိယော အာပဇ္ဇတိ – ပါပိစ္ဆော ဣစ္ဆာပကတော အသန္တံ အဘူတံ ဥတ္တရိမနုဿဓမ္မံ ဥလ္လပတိ, အာပတ္တိ ပါရာဇိကဿ, ‘‘ယော တေ ဝိဟာရေ ဝသတိ သော ဘိက္ခု အရဟာ’’တိ ဘဏတိ, ပဋိဝိဇာနန္တဿ အာပတ္တိ ထုလ္လစ္စယဿ; န ပဋိဝိဇာနန္တဿ အာပတ္တိ ဒုက္ကဋဿ – အသန္တံ အဘူတံ ဥတ္တရိမနုဿဓမ္မံ ဥလ္လပနပစ္စယာ ဣမာ တိဿော အာပတ္တိယော အာပဇ္ဇတိ။

စတ္တာရော ပါရာဇိကာ နိဋ္ဌိတာ။

၂. သံဃာဒိသေသကဏ္ဍာဒိ

၁၉၄. ဥပက္ကမိတွာ အသုစိံ မောစနပစ္စယာ ကတိ အာပတ္တိယော အာပဇ္ဇတိ? ဥပက္ကမိတွာ အသုစိမောစနပစ္စယာ တိဿော အာပတ္တိယော အာပဇ္ဇတိ – စေတေတိ ဥပက္ကမတိ မုစ္စတိ, အာပတ္တိ သံဃာဒိသေသဿ; စေတေတိ ဥပက္ကမတိ န မုစ္စတိ, အာပတ္တိ ထုလ္လစ္စယဿ; ပယောဂေ ဒုက္ကဋံ – ဥပက္ကမိတွာ အသုစိမောစနပစ္စယာ ဣမာ တိဿော အာပတ္တိယော အာပဇ္ဇတိ။

ကာယသံသဂ္ဂံ သမာပဇ္ဇနပစ္စယာ ကတိ အာပတ္တိယော အာပဇ္ဇတိ? ကာယသံသဂ္ဂံ သမာပဇ္ဇနပစ္စယာ ပဉ္စ အာပတ္တိယော အာပဇ္ဇတိ – အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ အဓက္ခကံ ဥဗ္ဘဇာဏုမဏ္ဍလံ ဂဟဏံ သာဒိယတိ, အာပတ္တိ ပါရာဇိကဿ; ဘိက္ခု ကာယေန ကာယံ အာမသတိ, အာပတ္တိ သံဃာဒိသေသဿ; ကာယေန ကာယပဋိဗဒ္ဓံ အာမသတိ, အာပတ္တိ ထုလ္လစ္စယဿ; ကာယပဋိဗဒ္ဓေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ; အင်္ဂုလိပတောဒကေ ပါစိတ္တိယံ – ကာယသံသဂ္ဂံ သမာပဇ္ဇနပစ္စယာ ဣမာ ပဉ္စ အာပတ္တိယော အာပဇ္ဇတိ။

မာတုဂါမံ ဒုဋ္ဌုလ္လာဟိ ဝါစာဟိ ဩဘာသနပစ္စယာ တိဿော အာပတ္တိယော အာပဇ္ဇတိ – ဝစ္စမဂ္ဂံ ပဿာဝမဂ္ဂံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ, အာပတ္တိ သံဃာဒိသေသဿ; ဝစ္စမဂ္ဂံ ပဿာဝမဂ္ဂံ ဌပေတွာ အဓက္ခကံ ဥဗ္ဘဇာဏုမဏ္ဍလံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ, အာပတ္တိ ထုလ္လစ္စယဿ; ကာယပဋိဗဒ္ဓံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ, အာပတ္တိ ဒုက္ကဋဿ။

အတ္တကာမပါရိစရိယာယ ဝဏ္ဏံ ဘာသနပစ္စယာ တိဿော အာပတ္တိယော အာပဇ္ဇတိ – မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ, အာပတ္တိ သံဃာဒိသေသဿ; ပဏ္ဍကဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ, အာပတ္တိ ထုလ္လစ္စယဿ; တိရစ္ဆာနဂတဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ, အာပတ္တိ ဒုက္ကဋဿ။

သဉ္စရိတ္တံ သမာပဇ္ဇနပစ္စယာ တိဿော အာပတ္တိယော အာပဇ္ဇတိ – ပဋိဂ္ဂဏှာတိ ဝီမံသတိ ပစ္စာဟရတိ, အာပတ္တိ သံဃာဒိသေသဿ; ပဋိဂ္ဂဏှာတိ ဝီမံသတိ န ပစ္စာဟရတိ, အာပတ္တိ ထုလ္လစ္စယဿ; ပဋိဂ္ဂဏှာတိ န ဝီမံသတိ န ပစ္စာဟရတိ, အာပတ္တိ ဒုက္ကဋဿ။

သညာစိကာယ ကုဋိံ ကာရာပနပစ္စယာ တိဿော အာပတ္တိယော အာပဇ္ဇတိ – ကာရာပေတိ, ပယောဂေ ဒုက္ကဋံ; ဧကံ ပိဏ္ဍံ [ဧကပိဏ္ဍေ (သျာ.)] အနာဂတေ အာပတ္တိ ထုလ္လစ္စယဿ; တသ္မိံ ပိဏ္ဍေ အာဂတေ အာပတ္တိ သံဃာဒိသေသဿ။

မဟလ္လကံ ဝိဟာရံ ကာရာပနပစ္စယာ တိဿော အာပတ္တိယော အာပဇ္ဇတိ – ကာရာပေတိ, ပယောဂေ ဒုက္ကဋံ; ဧကံ ပိဏ္ဍံ အနာဂတေ, အာပတ္တိ ထုလ္လစ္စယဿ; တသ္မိံ ပိဏ္ဍေ အာဂတေ အာပတ္တိ သံဃာဒိသေသဿ။

ဘိက္ခုံ အမူလကေန ပါရာဇိကေန ဓမ္မေန အနုဒ္ဓံသနပစ္စယာ တိဿော အာပတ္တိယော အာပဇ္ဇတိ – အနောကာသံ ကာရာပေတွာ စာဝနာဓိပ္ပါယော ဝဒေတိ, အာပတ္တိ သံဃာဒိသေသေန ဒုက္ကဋဿ; ဩကာသံ ကာရာပေတွာ အက္ကောသာဓိပ္ပါယော ဝဒေတိ, အာပတ္တိ ဩမသဝါဒဿ။

ဘိက္ခုံ အညဘာဂိယဿ အဓိကရဏဿ ကိဉ္စိ ဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသနပစ္စယာ တိဿော အာပတ္တိယော အာပဇ္ဇတိ – အနောကာသံ ကာရာပေတွာ စာဝနာဓိပ္ပါယော ဝဒေတိ, အာပတ္တိ သံဃာဒိသေသေန ဒုက္ကဋဿ; ဩကာသံ ကာရာပေတွာ အက္ကောသာဓိပ္ပါယော ဝဒေတိ, အာပတ္တိ ဩမသဝါဒဿ။

သံဃဘေဒကော ဘိက္ခု ယာဝတတိယံ သမနုဘာသနာယ န ပဋိနိဿဇ္ဇနပစ္စယာ တိဿော အာပတ္တိယော အာပဇ္ဇတိ – ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

ဘေဒကာနုဝတ္တကာ ဘိက္ခူ ယာဝတတိယံ သမနုဘာသနာယ န ပဋိနိဿဇ္ဇနပစ္စယာ တိဿော အာပတ္တိယော အာပဇ္ဇတိ – ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

ဒုဗ္ဗစော ဘိက္ခု ယာဝတတိယံ သမနုဘာသနာယ န ပဋိနိဿဇ္ဇနပစ္စယာ တိဿော အာပတ္တိယော အာပဇ္ဇတိ – ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

ကုလဒူသကော ဘိက္ခု ယာဝတတိယံ သမနုဘာသနာယ န ပဋိနိဿဇ္ဇနပစ္စယာ တိဿော အာပတ္တိယော အာပဇ္ဇတိ – ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။ပေ.။။

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ ကတိ အာပတ္တိယော အာပဇ္ဇတိ? အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ ဧကံ အာပတ္တိံ အာပဇ္ဇတိ။ ဒုက္ကဋံ – အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ ဣမံ ဧကံ အာပတ္တိံ အာပဇ္ဇတိ။

ကတာပတ္တိဝါရော နိဋ္ဌိတော ဒုတိယော။

၃. ဝိပတ္တိဝါရော

၁၉၅. မေထုနံ ဓမ္မံ ပဋိသေဝနပစ္စယာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? မေထုနံ ဓမ္မံ ပဋိသေဝနပစ္စယာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ သိယာ အာစာရဝိပတ္တိံ။ပေ.။။

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ အာပတ္တိ စတုန္နံ ဝိပတ္တီနံ ကတိ ဝိပတ္တိယော ဘဇတိ? အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ အာပတ္တိ စတုန္နံ ဝိပတ္တီနံ ဧကံ ဝိပတ္တိံ ဘဇတိ – အာစာရဝိပတ္တိံ။

ဝိပတ္တိဝါရော နိဋ္ဌိတော တတိယော။

၄. သင်္ဂဟိတဝါရော

၁၉၆. မေထုနံ ဓမ္မံ ပဋိသေဝနပစ္စယာ အာပတ္တိယော သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? မေထုနံ ဓမ္မံ ပဋိသေဝနပစ္စယာ အာပတ္တိယော သတ္တန္နံ အာပတ္တိက္ခန္ဓာနံ စတူဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန, သိယာ ထုလ္လစ္စယာပတ္တိက္ခန္ဓေန, သိယာ ပါစိတ္တိယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ပေ.။။

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ အာပတ္တိ သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ အာပတ္တိ သတ္တန္နံ အာပတ္တိက္ခန္ဓာနံ ဧကေန အာပတ္တိက္ခန္ဓေန သင်္ဂဟိတာ – ဒုက္ကဋာပတ္တိက္ခန္ဓေန။

သင်္ဂဟိတဝါရော နိဋ္ဌိတော စတုတ္ထော။

၅. သမုဋ္ဌာနဝါရော

၁၉၇. မေထုနံ ဓမ္မံ ပဋိသေဝနပစ္စယာ အာပတ္တိယော ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? မေထုနံ ဓမ္မံ ပဋိသေဝနပစ္စယာ အာပတ္တိယော ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ စိတ္တတော စ သမုဋ္ဌန္တိ, န ဝါစတော။ပေ.။။

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ အာပတ္တိ ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတိ? အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ အာပတ္တိ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

သမုဋ္ဌာနဝါရော နိဋ္ဌိတော ပဉ္စမော။

၆. အဓိကရဏဝါရော

၁၉၈. မေထုနံ ဓမ္မံ ပဋိသေဝနပစ္စယာ အာပတ္တိယော စတုန္နံ အဓိကရဏာနံ ကတမံ အဓိကရဏံ? မေထုနံ ဓမ္မံ ပဋိသေဝနပစ္စယာ အာပတ္တိယော စတုန္နံ အဓိကရဏာနံ အာပတ္တာဓိကရဏံ။ပေ.။။

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ အာပတ္တိ စတုန္နံ အဓိကရဏာနံ ကတမံ အဓိကရဏံ? အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ အာပတ္တိ စတုန္နံ အဓိကရဏာနံ အာပတ္တာဓိကရဏံ။

အဓိကရဏဝါရော နိဋ္ဌိတော ဆဋ္ဌော။

၇. သမထဝါရော

၁၉၉. မေထုနံ ဓမ္မံ ပဋိသေဝနပစ္စယာ အာပတ္တိယော သတ္တန္နံ သမထာနံ ကတိဟိ သမထေဟိ သမ္မန္တိ? မေထုနံ ဓမ္မံ ပဋိသေဝနပစ္စယာ အာပတ္တိယော သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ; သိယာ သမ္မုခါဝိနယေန တိဏဝတ္ထာရကေန စ။ပေ.။။

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ အာပတ္တိ သတ္တန္နံ သမထာနံ ကတိဟိ သမထေဟိ သမ္မတိ? အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ အာပတ္တိ သတ္တန္နံ သမထာနံ တီဟိ သမထေဟိ သမ္မတိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စာတိ။

သမထဝါရော နိဋ္ဌိတော သတ္တမော။

၈. သမုစ္စယဝါရော

၂၀၀. မေထုနံ ဓမ္မံ ပဋိသေဝနပစ္စယာ ကတိ အာပတ္တိယော အာပဇ္ဇတိ? မေထုနံ ဓမ္မံ ပဋိသေဝနပစ္စယာ စတဿော အာပတ္တိယော အာပဇ္ဇတိ။ အက္ခာယိတေ သရီရေ မေထုနံ ဓမ္မံ ပဋိသေဝတိ, အာပတ္တိ ပါရာဇိကဿ; ယေဘုယျေန ခါယိတေ သရီရေ မေထုနံ ဓမ္မံ ပဋိသေဝတိ, အာပတ္တိ ထုလ္လစ္စယဿ; ဝဋ္ဋကတေ မုခေ အစ္ဆုပန္တံ အင်္ဂဇာတံ ပဝေသေတိ, အာပတ္တိ ဒုက္ကဋဿ; ဇတုမဋ္ဌကေ ပါစိတ္တိယံ – မေထုနံ ဓမ္မံ ပဋိသေဝနပစ္စယာ ဣမာ စတဿော အာပတ္တိယော အာပဇ္ဇတိ။ တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ သိယာ အာစာရဝိပတ္တိံ။ သတ္တန္နံ အာပတ္တိက္ခန္ဓာနံ စတူဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန, သိယာ ထုလ္လစ္စယာပတ္တိက္ခန္ဓေန, သိယာ ပါစိတ္တိယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ စိတ္တတော စ သမုဋ္ဌန္တိ, န ဝါစတော။ စတုန္နံ အဓိကရဏာနံ, အာပတ္တာဓိကရဏံ။ သတ္တန္နံ သမထာနံ, တီဟိ သမထေဟိ သမ္မန္တိ – သိယာ သမ္မုခါဝိနယေန စ, ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စ။ပေ.။။

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ ကတိ အာပတ္တိယော အာပဇ္ဇတိ? အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ ဧကံ အာပတ္တိံ အာပဇ္ဇတိ။ ဒုက္ကဋံ – အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ ဣမံ ဧကံ အာပတ္တိံ အာပဇ္ဇတိ။ သာ အာပတ္တိ စတုန္နံ ဝိပတ္တီနံ ကတိ ဝိပတ္တိယော ဘဇတိ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ သမထာနံ ကတိဟိ သမထေဟိ သမ္မတိ? သာ အာပတ္တိ စတုန္နံ ဝိပတ္တီနံ ဧကံ ဝိပတ္တိံ ဘဇတိ – အာစာရဝိပတ္တိံ။ သတ္တန္နံ အာပတ္တိက္ခန္ဓာနံ ဧကေန အာပတ္တိက္ခန္ဓေန သင်္ဂဟိတာ – ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ စတုန္နံ အဓိကရဏာနံ, အာပတ္တာဓိကရဏံ။ သတ္တန္နံ သမထာနံ တီဟိ သမထေဟိ သမ္မတိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စာတိ။

သမုစ္စယဝါရော နိဋ္ဌိတော အဋ္ဌမော။

အဋ္ဌပစ္စယဝါရာ နိဋ္ဌိတာ။

မဟာဝိဘင်္ဂေ သောဠသမဟာဝါရာ နိဋ္ဌိတာ။

ဘိက္ခုဝိဘင်္ဂမဟာဝါရော နိဋ္ဌိတော။

ဘိက္ခုနီဝိဘင်္ဂေါ

၁. ကတ္ထပညတ္တိဝါရော

၁. ပါရာဇိကကဏ္ဍံ

၂၀၁. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဘိက္ခုနီနံ ပဉ္စမံ ပါရာဇိကံ ကတ္ထ ပညတ္တံ? ကံ အာရဗ္ဘ? ကိသ္မိံ ဝတ္ထုသ္မိံ? အတ္ထိ တတ္ထ ပညတ္တိ, အနုပညတ္တိ, အနုပ္ပန္နပညတ္တိ? သဗ္ဗတ္ထပညတ္တိ, ပဒေသပညတ္တိ? သာဓါရဏပညတ္တိ, အသာဓါရဏပညတ္တိ? ဧကတောပညတ္တိ, ဥဘတောပညတ္တိ? စတုန္နံ ပါတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နံ? ကတမေန ဥဒ္ဒေသေန ဥဒ္ဒေသံ အာဂစ္ဆတိ? စတုန္နံ ဝိပတ္တီနံ ကတမာ ဝိပတ္တိ? သတ္တန္နံ အာပတ္တိက္ခန္ဓာနံ ကတမော အာပတ္တိက္ခန္ဓော? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ သမထာနံ ကတိဟိ သမထေဟိ သမ္မတိ? ကော တတ္ထ ဝိနယော? ကော တတ္ထ အဘိဝိနယော? ကိံ တတ္ထ ပါတိမောက္ခံ? ကိံ တတ္ထ အဓိပါတိမောက္ခံ? ကာ ဝိပတ္တိ? ကာ သမ္ပတ္တိ? ကာ ပဋိပတ္တိ? ကတိ အတ္ထဝသေ ပဋိစ္စ ဘဂဝတာ ဘိက္ခုနီနံ ပဉ္စမံ ပါရာဇိကံ ပညတ္တံ? ကာ သိက္ခန္တိ? ကာ သိက္ခိတသိက္ခာ? ကတ္ထ ဌိတံ? ကာ ဓါရေန္တိ? ကဿ ဝစနံ? ကေနာဘတန္တိ?

၂၀၂. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဘိက္ခုနီနံ ပဉ္စမံ ပါရာဇိကံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သုန္ဒရီနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? သုန္ဒရီနန္ဒာ ဘိက္ခုနီ အဝဿုတာ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယိ, တသ္မိံ ဝတ္ထုသ္မိံ။ အတ္ထိ တတ္ထ ပညတ္တိ အနုပညတ္တိ အနုပ္ပန္နပညတ္တီတိ? ဧကာ ပညတ္တိ။ အနုပညတ္တိ အနုပ္ပန္နပညတ္တိ တသ္မိံ နတ္ထိ။ သဗ္ဗတ္ထပညတ္တိ , ပဒေသပညတ္တီတိ? သဗ္ဗတ္ထပညတ္တိ။ သာဓါရဏပညတ္တိ, အသာဓါရဏပညတ္တီတိ? အသာဓါရဏပညတ္တိ။ ဧကတောပညတ္တိ, ဥဘတောပညတ္တီတိ? ဧကတောပညတ္တိ။ စတုန္နံ ပါတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နန္တိ? နိဒါနောဂဓံ နိဒါနပရိယာပန္နံ။ ကတမေန ဥဒ္ဒေသေန ဥဒ္ဒေသံ အာဂစ္ဆတီတိ? ဒုတိယေန ဥဒ္ဒေသေန ဥဒ္ဒေသံ အာဂစ္ဆတိ။ စတုန္နံ ဝိပတ္တီနံ ကတမာ ဝိပတ္တီတိ? သီလဝိပတ္တိ။ သတ္တန္နံ အာပတ္တိက္ခန္ဓာနံ ကတမော အာပတ္တိက္ခန္ဓောတိ? ပါရာဇိကာပတ္တိက္ခန္ဓော။ ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတီတိ? ဧကေန သမုဋ္ဌာနေ သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ စတုန္နံ အဓိကရဏာနံ ကတမံ အဓိကရဏန္တိ? အာပတ္တာဓိကရဏံ? သတ္တန္နံ သမထာနံ ကတိဟိ သမထေဟိ သမ္မတီတိ? ဒွီဟိ သမထေဟိ သမ္မတိ – သမ္မုခါဝိနယေန စ ပဋိညာတကရဏေန စ။ ကော တတ္ထ ဝိနယော, ကော တတ္ထ အဘိဝိနယောတိ? ပညတ္တိ ဝိနယော, ဝိဘတ္တိ အဘိဝိနယော။ ကိံ တတ္ထ ပါတိမောက္ခံ, ကိံ တတ္ထ အဓိပါတိမောက္ခန္တိ? ပညတ္တိ ပါတိမောက္ခံ, ဝိဘတ္တိ အဓိပါတိမောက္ခံ။ ကာ ဝိပတ္တီတိ? အသံဝရော ဝိပတ္တိ။ ကာ သမ္ပတ္တီတိ ? သံဝရော သမ္ပတ္တိ။ ကာ ပဋိပတ္တီတိ? န ဧဝရူပံ ကရိဿာမီတိ ယာဝဇီဝံ အာပါဏကောဋိကံ သမာဒါယ သိက္ခတိ သိက္ခာပဒေသု။ [အ. နိ. ၁၀.၃၁] ကတိ အတ္ထဝသေ ပဋိစ္စ ဘဂဝတာ ဘိက္ခုနီနံ ပဉ္စမံ ပါရာဇိကံ ပညတ္တန္တိ? ဒသ အတ္ထဝသေ ပဋိစ္စ ဘဂဝတာ ဘိက္ခုနီနံ ပဉ္စမံ ပါရာဇိကံ ပညတ္တံ – သံဃသုဋ္ဌုတာယ, သံဃဖာသုတာယ, ဒုမ္မင်္ကူနံ ဘိက္ခုနီနံ နိဂ္ဂဟာယ, ပေသလာနံ ဘိက္ခုနီနံ ဖာသုဝိဟာရာယ, ဒိဋ္ဌဓမ္မိကာနံ အာသဝါနံ သံဝရာယ, သမ္ပရာယိကာနံ အာသဝါနံ ပဋိဃာတာယ, အပ္ပသန္နာနံ ပသာဒါယ, ပသန္နာနံ ဘိယျောဘာဝါယ, သဒ္ဓမ္မဋ္ဌိတိယာ, ဝိနယာနုဂ္ဂဟာယ။ ကာ သိက္ခန္တီတိ? သေက္ခာ စ ပုထုဇ္ဇနကလျာဏိကာ စ သိက္ခန္တိ။ ကာ သိက္ခိတသိက္ခာတိ? အရဟန္တိယော [အရဟန္တာ (က.)] သိက္ခိတသိက္ခာ။ ကတ္ထ ဌိတန္တိ? သိက္ခာကာမာသု ဌိတံ။ ကာ ဓါရေန္တီတိ? ယာသံ ဝတ္တတိ တာ ဓါရေန္တိ။ ကဿ ဝစနန္တိ? ဘဂဝတော ဝစနံ အရဟတော သမ္မာသမ္ဗုဒ္ဓဿ။ ကေနာဘတန္တိ? ပရမ္ပရာဘတံ –

ဥပါလိ ဒါသကော စေဝ၊ သောဏကော သိဂ္ဂဝေါ တထာ။

မောဂ္ဂလိပုတ္တေန ပဉ္စမာ၊ ဧတေ ဇမ္ဗုသိရိဝ္ဟယေ။

တတော မဟိန္ဒော ဣဋ္ဋိယော၊ ဥတ္တိယော သမ္ဗလော တထာ။

ဘဒ္ဒနာမော စ ပဏ္ဍိတော။

ဧတေ နာဂါ မဟာပညာ၊ ဇမ္ဗုဒီပါ ဣဓါဂတာ။

ဝိနယံ တေ ဝါစယိံသု၊ ပိဋကံ တမ္ဗပဏ္ဏိယာ။

နိကာယေ ပဉ္စ ဝါစေသုံ၊ သတ္တ စေဝ ပကရဏေ။

တတော အရိဋ္ဌော မေဓါဝီ၊ တိဿဒတ္တော စ ပဏ္ဍိတော။

ဝိသာရဒေါ ကာဠသုမနော၊ ထေရော စ ဒီဃနာမကော။

ဒီဃသုမနော စ ပဏ္ဍိတော။

ပုနဒေဝ ကာဠသုမနော၊ နာဂတ္ထေရော စ ဗုဒ္ဓရက္ခိတော။

တိဿတ္ထေရော စ မေဓါဝီ၊ ဒေဝတ္ထေရော စ ပဏ္ဍိတော။

ပုနဒေဝ သုမနော မေဓါဝီ၊ ဝိနယေ စ ဝိသာရဒေါ။

ဗဟုဿုတော စူဠနာဂေါ၊ ဂဇောဝ ဒုပ္ပဓံသိယော။

ဓမ္မပါလိတနာမော စ၊ ရောဟဏေ သာဓုပူဇိတော။

တဿ သိဿော မဟာပညော၊ ခေမနာမော တိပေဋကော။

ဒီပေ တာရကရာဇာဝ ပညာယ အတိရောစထ။

ဥပတိဿော စ မေဓါဝီ၊ ဖုဿဒေဝေါ မဟာကထီ။

ပုနဒေဝ သုမနော မေဓါဝီ၊ ပုပ္ဖနာမော ဗဟုဿုတော။

မဟာကထီ မဟာသိဝေါ၊ ပိဋကေ သဗ္ဗတ္ထ ကောဝိဒေါ။

ပုနဒေဝ ဥပါလိ မေဓါဝီ၊ ဝိနယေ စ ဝိသာရဒေါ။

မဟာနာဂေါ မဟာပညော၊ သဒ္ဓမ္မဝံသကောဝိဒေါ။

ပုနဒေဝ အဘယော မေဓါဝီ၊ ပိဋကေ သဗ္ဗတ္ထ ကောဝိဒေါ။

တိဿတ္ထေရော စ မေဓါဝီ၊ ဝိနယေ စ ဝိသာရဒေါ။

တဿ သိဿော မဟာပညော၊ ပုပ္ဖနာမော ဗဟုဿုတော။

သာသနံ အနုရက္ခန္တော၊ ဇမ္ဗုဒီပေ ပတိဋ္ဌိတော။

စူဠာဘယော စ မေဓါဝီ၊ ဝိနယေ စ ဝိသာရဒေါ။

တိဿတ္ထေရော စ မေဓါဝီ၊ သဒ္ဓမ္မဝံသကောဝိဒေါ။

စူဠဒေဝေါ စ မေဓါဝီ၊ ဝိနယေ စ ဝိသာရဒေါ။

သိဝတ္ထေရော စ မေဓါဝီ၊ ဝိနယေ သဗ္ဗတ္ထ ကောဝိဒေါ။

ဧတေ နာဂါ မဟာပညာ၊ ဝိနယညူ မဂ္ဂကောဝိဒါ။

ဝိနယံ ဒီပေ ပကာသေသုံ၊ ပိဋကံ တမ္ဗပဏ္ဏိယာတိ။

၂၀၃. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဘိက္ခုနီနံ ဆဋ္ဌံ ပါရာဇိကံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ဇာနံ ပါရာဇိကံ ဓမ္မံ အဇ္ဈာပန္နံ ဘိက္ခုနိံ နေဝတ္တနာ ပဋိစောဒေသိ ဂဏဿ အာရောစေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၂၀၄. ဘိက္ခုနီနံ သတ္တမံ ပါရာဇိကံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ သမဂ္ဂေန သံဃေန ဥက္ခိတ္တံ အရိဋ္ဌံ ဘိက္ခုံ ဂဒ္ဓဗာဓိပုဗ္ဗံ အနုဝတ္တိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

၂၀၅. ဘိက္ခုနီနံ အဋ္ဌမံ ပါရာဇိကံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော အဋ္ဌမံ ဝတ္ထုံ ပရိပူရေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

အဋ္ဌ ပါရာဇိကာ နိဋ္ဌိတာ။

တဿုဒ္ဒါနံ –

မေထုနာဒိန္နာဒါနဉ္စ ၊ မနုဿဝိဂ္ဂဟုတ္တရိ။

ကာယသံသဂ္ဂံ ဆာဒေတိ၊ ဥက္ခိတ္တာ အဋ္ဌ ဝတ္ထုကာ။

ပညာပေသိ မဟာဝီရော၊ ဆေဇ္ဇဝတ္ထူ အသံသယာတိ။

၂. သံဃာဒိသေသကဏ္ဍံ

၂၀၆. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဥဿယဝါဒိကာယ ဘိက္ခုနိယာ အဍ္ဍံ ကရောန္တိယာ သံဃာဒိသေသော ကတ္ထ ပညတ္တော? ကံ အာရဗ္ဘ? ကိသ္မိံ ဝတ္ထုသ္မိံ။ပေ.။ ကေနာဘတန္တိ?

၂၀၇. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဥဿယဝါဒိကာယ ဘိက္ခုနိယာ အဍ္ဍံ ကရောန္တိယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ဥဿယဝါဒိကာ ဝိဟရိ, တသ္မိံ ဝတ္ထုသ္မိံ။ အတ္ထိ တတ္ထ ပညတ္တိ, အနုပညတ္တိ, အနုပ္ပန္နပညတ္တီတိ? ဧကာ ပညတ္တိ။ အနုပညတ္တိ အနုပ္ပန္နပညတ္တိ တသ္မိံ နတ္ထိ။ သဗ္ဗတ္ထပညတ္တိ, ပဒေသပညတ္တီတိ? သဗ္ဗတ္ထပညတ္တိ။ သာဓါရဏပညတ္တိ, အသာဓါရဏပညတ္တီတိ? အသာဓါရဏပညတ္တိ။ ဧကတောပညတ္တိ, ဥဘတောပညတ္တီတိ? ဧကတောပညတ္တိ။ စတုန္နံ ပါတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နန္တိ? နိဒါနောဂဓံ နိဒါနပရိယာပန္နံ ။ ကတမေန ဥဒ္ဒေသေန ဥဒ္ဒေသံ အာဂစ္ဆတီတိ? တတိယေန ဥဒ္ဒေသေန ဥဒ္ဒေသံ အာဂစ္ဆတိ။ စတုန္နံ ဝိပတ္တီနံ ကတမာ ဝိပတ္တီတိ? သီလဝိပတ္တိ။ သတ္တန္နံ အာပတ္တိက္ခန္ဓာနံ ကတမော အာပတ္တိက္ခန္ဓောတိ? သံဃာဒိသေသာပတ္တိက္ခန္ဓော။ ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတီတိ? ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ ဝါစတော စ သမုဋ္ဌာတိ, န စိတ္တတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။ ကေနာဘတန္တိ? ပရမ္ပရာဘတံ –

ဥပါလိ ဒါသကော စေဝ၊ သောဏကော သိဂ္ဂဝေါ တထာ။

မောဂ္ဂလိပုတ္တေန ပဉ္စမာ၊ ဧတေ ဇမ္ဗုသိရိဝ္ဟယေ။ ။ပေ.။။

ဧတေ နာဂါ မဟာပညာ၊ ဝိနယညူ မဂ္ဂကောဝိဒါ။

ဝိနယံ ဒီပေ ပကာသေသုံ၊ ပိဋကံ တမ္ဗပဏ္ဏိယာတိ။

၂၀၈. စောရိံ ဝုဋ္ဌာပေန္တိယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ စောရိံ ဝုဋ္ဌာပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ဝါစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

၂၀၉. ဧကာယ ဂါမန္တရံ ဂစ္ဆန္တိယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ ဧကာ ဂါမန္တရံ ဂစ္ဆိ, တသ္မိံ ဝတ္ထုသ္မိံ။ ဧကာ ပညတ္တိ, တိဿော အနုပညတ္တိယော။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ပဌမပါရာဇိကေ။ပေ.။။

၂၁၀. သမဂ္ဂေန သံဃေန ဥက္ခိတ္တံ ဘိက္ခုနိံ ဓမ္မေန ဝိနယေန သတ္ထုသာသနေန အနပလောကေတွာ ကာရကသသံဃံ အနညာယ ဂဏဿ ဆန္ဒံ ဩသာရေန္တိယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ သမဂ္ဂေန သံဃေန ဥက္ခိတ္တံ ဘိက္ခုနိံ ဓမ္မေန ဝိနယေန သတ္ထုသာသနေန အနပလောကေတွာ ကာရကသသံဃံ အနညာယ ဂဏဿ ဆန္ဒံ ဩသာရေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

၂၁၁. အဝဿုတာယ ဘိက္ခုနိယာ အဝဿုတဿ ပုရိသပုဂ္ဂလဿ ဟတ္ထတော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ဘုဉ္ဇန္တိယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? သုန္ဒရီနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? သုန္ဒရီနန္ဒာ ဘိက္ခုနီ အဝဿုတာ အဝဿုတဿ ပုရိသပုဂ္ဂလဿ ဟတ္ထတော အာမိသံ ပဋိဂ္ဂဟေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ပဌမပါရာဇိကေ။ပေ.။။

၂၁၂. ‘‘ကိံ တေ, အယျေ, ဧသော ပုရိသပုဂ္ဂလော ကရိဿတိ အဝဿုတော ဝါ အနဝဿုတော ဝါ, ယတော တွံ အနဝဿုတာ! ဣင်္ဃ, အယျေ, ယံ တေ ဧသော ပုရိသပုဂ္ဂလော ဒေတိ ခါဒနီယံ ဝါ ဘောဇနီယံ ဝါ, တံ တွံ သဟတ္ထာ ပဋိဂ္ဂဟေတွာ ခါဒ ဝါ ဘုဉ္ဇ ဝါ’’တိ ဥယျောဇေန္တိယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အရဗ္ဘာတိ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ –‘‘ကိံ တေ, အယျေ, ဧသော ပုရိသပုဂ္ဂလော ကရိဿတိ အဝဿုတော ဝါ အနဝဿုတော ဝါ, ယတော တွံ အနဝဿုတာ! ဣင်္ဃ, အယျေ, ယံ တေ ဧသော ပုရိသပုဂ္ဂလော ဒေတိ ခါဒနီယံ ဝါ ဘောဇနီယံ ဝါ, တံ တွံ သဟတ္ထာ ပဋိဂ္ဂဟေတွာ ခါဒ ဝါ ဘုဉ္ဇ ဝါ’’တိ ဥယျောဇေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

၂၁၃. ကုပိတာယ အနတ္တမနာယ ဘိက္ခုနိယာ ယာဝတတိယံ သမနုဘာသနာယ န ပဋိနိဿဇ္ဇန္တိယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? စဏ္ဍကာဠိံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? စဏ္ဍကာဠီ ဘိက္ခုနီ ကုပိတာ အနတ္တမနာ ဧဝံ အဝစ – ‘‘ဗုဒ္ဓံ ပစ္စာစိက္ခာမိ, ဓမ္မံ ပစ္စာစိက္ခာမိ, သသံဃံ ပစ္စာစိက္ခာမိ, သိက္ခံ ပစ္စာစိက္ခာမီ’’တိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

၂၁၄. ကိသ္မိဉ္စိဒေဝ အဓိကရဏေ ပစ္စာကတာယ ဘိက္ခုနိယာ ယာဝတတိယံ သမနုဘာသနာယ န ပဋိနိဿဇ္ဇန္တိယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? စဏ္ဍကာဠိံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? စဏ္ဍကာဠီ ဘိက္ခုနီ ကိသ္မိဉ္စိဒေဝ အဓိကရဏေ ပစ္စာကတာ ကုပိတာ အနတ္တမနာ ဧဝံ အဝစ – ‘‘ဆန္ဒဂါမိနိယော စ ဘိက္ခုနိယော, ဒေါသဂါမိနိယော စ ဘိက္ခုနိယော, မောဟဂါမိနိယော စ ဘိက္ခုနိယော, ဘယဂါမိနိယော စ ဘိက္ခုနိယော’’တိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

၂၁၅. သံသဋ္ဌာနံ ဘိက္ခုနီနံ ယာဝတတိယံ သမနုဘာသနာယ န ပဋိနိဿဇ္ဇန္တီနံ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော သံသဋ္ဌာ ဝိဟရိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

၂၁၆. ‘‘သံသဋ္ဌာဝ, အယျေ, တုမှေ ဝိဟရထ။ မာ တုမှေ နာနာ ဝိဟရိတ္ထာ’’တိ ဥယျောဇေန္တိယာ ယာဝတတိယံ သမနုဘာသနာယ န ပဋိနိဿဇ္ဇန္တိယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ – ‘‘သံသဋ္ဌာဝ အယျေ, တုမှေ ဝိဟရထ, မာ တုမှေ နာနာ ဝိဟရိတ္ထာ’’တိ ဥယျောဇေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

ဒသ သံဃာဒိသေသာ နိဋ္ဌိတာ။

တဿုဒ္ဒါနံ –

ဥဿယစောရိ ဂါမန္တံ၊ ဥက္ခိတ္တံ ခါဒနေန စ။

ကိံ တေ ကုပိတာ ကိသ္မိဉ္စိ၊ သံသဋ္ဌာ ဉာယတေ ဒသာတိ။

၃. နိဿဂ္ဂိယကဏ္ဍံ

၂၁၇. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ပတ္တသန္နိစယံ ကရောန္တိယာ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော ပတ္တသန္နိစယံ အကံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ကထိနကေ။ပေ.။။

အကာလစီဝရံ ‘‘ကာလစီဝရ’’န္တိ အဓိဋ္ဌဟိတွာ ဘာဇာပေန္တိယာ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ အကာလစီဝရံ ‘‘ကာလစီဝရ’’န္တိ အဓိဋ္ဌဟိတွာ ဘာဇာပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ဘိက္ခုနိယာ သဒ္ဓိံ စီဝရံ ပရိဝတ္တေတွာ အစ္ဆိန္ဒန္တိယာ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ဘိက္ခုနိယာ သဒ္ဓိံ စီဝရံ ပရိဝတ္တေတွာ အစ္ဆိန္ဒိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

အညံ ဝိညာပေတွာ အညံ ဝိညာပေန္တိယာ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ အညံ ဝိညာပေတွာ အညံ ဝိညာပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

အညံ စေတာပေတွာ အညံ စေတာပေန္တိယာ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ အညံ စေတာပေတွာ အညံ စေတာပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

အညဒတ္ထိကေန ပရိက္ခာရေန အညုဒ္ဒိသိကေန သံဃိကေန အညံ စေတာပေန္တိယာ နိဿဂ္ဂိယံ ပါစိတ္တိယံ ကတ္ထံ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော အညဒတ္ထိကေန ပရိက္ခာရေန အညုဒ္ဒိသိကေန သံဃိကေန အညံ စေတာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

အညဒတ္ထိကေန ပရိက္ခာရေန အညုဒ္ဒိသိကေန သံဃိကေန သညာစိကေန အညံ စေတာပေန္တိယာ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော အညဒတ္ထိကေန ပရိက္ခာရေန အညုဒ္ဒိသိကေန သံဃိကေန သညာစိကေန အညံ စေတာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

အညဒတ္ထိကေန ပရိက္ခာရေန အညုဒ္ဒိသိကေန မဟာဇနိကေန အညံ စေတာပေန္တိယာ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော အညဒတ္ထိကေန ပရိက္ခာရေန အညုဒ္ဒိသိကေန မဟာဇနိကေန အညံ စေတာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

အညဒတ္ထိကေန ပရိက္ခာရေန အညုဒ္ဒိသိကေန မဟာဇနိကေန သညာစိကေန အညံ စေတာပေန္တိယာ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော အညဒတ္ထိကေန ပရိက္ခာရေန အညုဒ္ဒိသိကေန မဟာဇနိကေန သညာစိကေန အညံ စေတာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

အညဒတ္ထိကေန ပရိက္ခာရေန အညုဒ္ဒိသိကေန ပုဂ္ဂလိကေန သညာစိကေန အညံ စေတာပေန္တိယာ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ အညဒတ္ထိကေန ပရိက္ခာရေန အညုဒ္ဒိသိကေန ပုဂ္ဂလိကေန သညာစိကေန အညံ စေတာပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

အတိရေကစတုက္ကံသပရမံ ဂရုပါဝုရဏံ စေတာပေန္တိယာ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ရာဇာနံ ကမ္ဗလံ ဝိညာပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

အတိရေကအဍ္ဎတေယျကံသပရမံ လဟုပါဝုရဏံ စေတာပေန္တိယာ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ရာဇာနံ ခေါမံ ဝိညာပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ ။ပေ.။။

ဒွါဒသ နိဿဂ္ဂိယာ ပါစိတ္တိယာ နိဋ္ဌိတာ။

တဿုဒ္ဒါနံ –

ပတ္တံ အကာလံ ကာလဉ္စ၊ ပရိဝတ္တေ စ ဝိညာပေ။

စေတာပေတွာ အညဒတ္ထိ၊ သံဃိကဉ္စ မဟာဇနိကံ။

သညာစိကာ ပုဂ္ဂလိကာ၊ စတုက္ကံသဍ္ဎတေယျကာတိ။

၄. ပါစိတ္တိယကဏ္ဍံ

၁. လသုဏဝဂ္ဂေါ

၂၁၈. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန လသုဏံ ခါဒန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ န မတ္တံ ဇာနိတွာ လသုဏံ ဟရာပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ဧဠကလောမကေ။ပေ.။။

သမ္ဗာဓေ လောမံ သံဟရာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော သမ္ဗာဓေ လောမံ သံဟရာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌာတိ။ပေ.။။

တလဃာတကေ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဒွေ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ ? ဒွေ ဘိက္ခုနိယော တလဃာတကံ အကံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ပဌမပါရာဇိကေ။ပေ.။။

ဇတုမဋ္ဌကေ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ ဇတုမဋ္ဌကံ အာဒိယိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ပဌမပါရာဇိကေ။ပေ.။။

အတိရေကဒွင်္ဂုလပဗ္ဗပရမံ ဥဒကသုဒ္ဓိကံ အာဒိယန္တိယာ ပါစိတ္တိယံ ကတ္ထ ပညတ္တန္တိ? သက္ကေသု ပညတ္တံ။ ကံ အာရဗ္ဘာတိ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ အတိဂမ္ဘီရံ ဥဒကသုဒ္ဓိကံ အာဒိယိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ပဌမပါရာဇိကေ။ပေ.။။

ဘိက္ခုဿ ဘုဉ္ဇန္တဿ ပါနီယေန ဝါ ဝိဓူပနေန ဝါ ဥပတိဋ္ဌန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ ဘိက္ခုဿ ဘုဉ္ဇန္တဿ ပါနီယေန စ ဝိဓူပနေန စ ဥပတိဋ္ဌိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

အာမကဓညံ ဝိညာပေတွာ ဘုဉ္ဇန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော အာမကဓညံ ဝိညာပေတွာ ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌာတိ။ပေ.။။

ဥစ္စာရံ ဝါ ပဿာဝံ ဝါ သင်္ကာရံ ဝါ ဝိဃာသံ ဝါ တိရောကုဋ္ဋေ [တိရောကုဍ္ဍေ (သီ. သျာ.)] ဆဍ္ဍေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ ဥစ္စာရံ [ဥစ္စာရမ္ပိ ပဿာဝမ္ပိ သင်္ကာရမ္ပိ ဝိဃာသမ္ပိ (က.)] တိရောကုဋ္ဋေ ဆဍ္ဍေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

ဥစ္စာရံ ဝါ ပဿာဝံ ဝါ သင်္ကာရံ ဝါ ဝိဃာသံ ဝါ ဟရိတေ ဆဍ္ဍေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဥစ္စာရမ္ပိ ပဿာဝမ္ပိ သင်္ကာရမ္ပိ ဝိဃာသမ္ပိ ဟရိတေ ဆဍ္ဍေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

နစ္စံ ဝါ ဂီတံ ဝါ ဝါဒိတံ ဝါ ဒဿနာယ ဂစ္ဆန္တိယာ ပါစိတ္တိယံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော နစ္စမ္ပိ ဂီတမ္ပိ ဝါဒိတမ္ပိ ဒဿနာယ အဂမံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

လသုဏဝဂ္ဂေါ ပဌမော။

၂. ရတ္တန္ဓကာရဝဂ္ဂေါ

၂၁၉. ရတ္တန္ဓကာရေ အပ္ပဒီပေ ပုရိသေန သဒ္ဓိံ ဧကေနေကာယ သန္တိဋ္ဌန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ ရတ္တန္ဓကာရေ အပ္ပဒီပေ ပုရိသေန သဒ္ဓိံ ဧကေနေကာ သန္တိဋ္ဌိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ထေယျသတ္ထကေ။ပေ.။။

ပဋိစ္ဆန္နေ ဩကာသေ ပုရိသေန သဒ္ဓိံ ဧကေနေကာယ သန္တိဋ္ဌန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ ပဋိစ္ဆန္နေ ဩကာသေ ပုရိသေန သဒ္ဓိံ ဧကေနေကာ သန္တိဋ္ဌိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ထေယျသတ္ထကေ။ပေ.။။

အဇ္ဈောကာသေ ပုရိသေန သဒ္ဓိံ ဧကေနေကာယ သန္တိဋ္ဌန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ အဇ္ဈောကာသေ ပုရိသေန သဒ္ဓိံ ဧကေနေကာ သန္တိဋ္ဌိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ထေယျသတ္ထကေ။ပေ.။။

ရထိကာ ဝါ [ရထိယာယ ဝါ (က.)] ဗ္ယူဟေ ဝါ သိင္ဃာဋကေ ဝါ ပုရိသေန သဒ္ဓိံ ဧကေနေကာယ သန္တိဋ္ဌန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ရထိကာယပိ ဗ္ယူဟေပိ သိင္ဃာဋကေပိ ပုရိသေန သဒ္ဓိံ ဧကေနေကာ သန္တိဋ္ဌိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ထေယျသတ္ထကေ။ပေ.။။

ပုရေဘတ္တံ ကုလာနိ ဥပသင်္ကမိတွာ အာသနေ နိသီဒိတွာ သာမိကေ အနာပုစ္ဆာ ပက္ကမန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ ။ ကံ အာရဗ္ဘာတိ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ ပုရေဘတ္တံ ကုလာနိ ဥပသင်္ကမိတွာ အာသနေ နိသီဒိတွာ သာမိကေ အနာပုစ္ဆာ ပက္ကာမိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ကထိနကေ။ပေ.။။

ပစ္ဆာဘတ္တံ ကုလာနိ ဥပသင်္ကမိတွာ သာမိကေ အနာပုစ္ဆာ အာသနေ အဘိနိသီဒန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ပစ္ဆာဘတ္တံ ကုလာနိ ဥပသင်္ကမိတွာ သာမိကေ အနာပုစ္ဆာ အာသနေ အဘိနိသီဒိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ကထိနကေ။ပေ.။။

ဝိကာလေ ကုလာနိ ဥပသင်္ကမိတွာ သာမိကေ အနာပုစ္ဆာ သေယျံ သန္ထရိတွာ ဝါ သန္ထရာပေတွာ ဝါ အဘိနိသီဒန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဝိကာလေ ကုလာနိ ဥပသင်္ကမိတွာ သာမိကေ အနာပုစ္ဆာ သေယျံ သန္ထရိတွာ အဘိနိသီဒိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ကထိနကေ။ပေ.။။

ဒုဂ္ဂဟိတေန ဒူပဓါရိတေန ပရံ ဥဇ္ဈာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ ဒုဂ္ဂဟိတေန ဒူပဓါရိတေန ပရံ ဥဇ္ဈာပေသိ, တသ္မိံ ဝတ္ထုသ္မိံ။ ဧကာ ပညတ္တိ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

အတ္တာနံ ဝါ ပရံ ဝါ နိရယေန ဝါ ဗြဟ္မစရိယေန ဝါ အဘိသပန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? စဏ္ဍကာဠိံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? စဏ္ဍကာဠီ ဘိက္ခုနီ အတ္တာနမ္ပိ ပရမ္ပိ နိရယေနပိ ဗြဟ္မစရိယေနပိ အဘိသပိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

အတ္တာနံ ဝဓိတွာ ဝဓိတွာ ရောဒန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? စဏ္ဍကာဠိံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? စဏ္ဍကာဠီ ဘိက္ခုနီ အတ္တာနံ ဝဓိတွာ ဝဓိတွာ ရောဒိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

ရတ္တန္ဓကာရဝဂ္ဂေါ ဒုတိယော။

၃. နဟာနဝဂ္ဂေါ

၂၂၀. နဂ္ဂါယ နဟာယန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော နဂ္ဂါ နဟာယိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

ပမာဏာတိက္ကန္တံ ဥဒကသာဋိကံ ကာရာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော အပ္ပမာဏိကာယော ဥဒကသာဋိကာယော ဓါရေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

ဘိက္ခုနိယာ စီဝရံ ဝိသိဗ္ဗေတွာ ဝါ ဝိသိဗ္ဗာပေတွာ ဝါ နေဝ သိဗ္ဗေန္တိယာ န သိဗ္ဗာပနာယ ဥဿုက္ကံ ကရောန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ဘိက္ခုနိယာ စီဝရံ ဝိသိဗ္ဗာပေတွာ နေဝ သိဗ္ဗေသိ န သိဗ္ဗာပနာယ ဥဿုက္ကံ အကာသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

ပဉ္စာဟိကံ သံဃာဋိစာရံ အတိက္ကာမေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဘိက္ခုနီနံ ဟတ္ထေ စီဝရံ နိက္ခိပိတွာ သန္တရုတ္တရေန ဇနပဒစာရိကံ ပက္ကမိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ကထိနကေ။ပေ.။။

စီဝရသင်္ကမနီယံ ဓါရေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ အညတရာယ ဘိက္ခုနိယာ စီဝရံ အနာပုစ္ဆာ ပါရုပိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ကထိနကေ။ပေ.။။

ဂဏဿ စီဝရလာဘံ အန္တရာယံ ကရောန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ဂဏဿ စီဝရလာဘံ အန္တရာယံ အကာသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ဓမ္မိကံ စီဝရဝိဘင်္ဂံ ပဋိဗာဟန္တိယာ ပါစိတ္တိယံ ကတ္ထ ပညတ္တန္တိ။ သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ဓမ္မိကံ စီဝရဝိဘင်္ဂံ ပဋိဗာဟိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

အဂါရိကဿ ဝါ ပရိဗ္ဗာဇကဿ ဝါ ပရိဗ္ဗာဇိကာယ ဝါ သမဏစီဝရံ ဒေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ အဂါရိကဿ သမဏစီဝရံ အဒါသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ.။။

ဒုဗ္ဗလစီဝရပစ္စာသာယ စီဝရကာလသမယံ အတိက္ကာမေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ဒုဗ္ဗလစီဝရပစ္စာသာယ စီဝရကာလသမယံ အတိက္ကာမေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ဓမ္မိကံ ကထိနုဒ္ဓါရံ ပဋိဗာဟန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ဓမ္မိကံ ကထိနုဒ္ဓါရံ ပဋိဗာဟိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

နဟာနဝဂ္ဂေါ တတိယော။

၄. တုဝဋ္ဋဝဂ္ဂေါ

၂၂၁. ဒွိန္နံ ဘိက္ခုနီနံ ဧကမဉ္စေ တုဝဋ္ဋေန္တီနံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဒွေ ဧကမဉ္စေ တုဝဋ္ဋေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

ဒွိန္နံ ဘိက္ခုနီနံ ဧကတ္ထရဏပါဝုရဏေ တုဝဋ္ဋေန္တီနံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဒွေ ဧကတ္ထရဏပါဝုရဏာ တုဝဋ္ဋေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

ဘိက္ခုနိယာ သဉ္စိစ္စ အဖာသုံ ကရောန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ဘိက္ခုနိယာ သဉ္စိစ္စ အဖာသုံ အကာသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ဒုက္ခိတံ သဟဇီဝိနိံ နေဝ ဥပဋ္ဌေန္တိယာ န ဥပဋ္ဌာပနာယ ဥဿုက္ကံ ကရောန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ဒုက္ခိတံ သဟဇီဝိနိံ နေဝ ဥပဋ္ဌေသိ န ဥပဋ္ဌာပနာယ ဥဿုက္ကံ အကာသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

ဘိက္ခုနိယာ ဥပဿယံ ဒတွာ ကုပိတာယ အနတ္တမနာယ နိက္ကဍ္ဎန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ဘိက္ခုနိယာ ဥပဿယံ ဒတွာ ကုပိတာ အနတ္တမနာ နိက္ကဍ္ဎိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

သံသဋ္ဌာယ ဘိက္ခုနိယာ ယာဝတတိယံ သမနုဘာသနာယ န ပဋိနိဿဇ္ဇန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? စဏ္ဍကာဠိံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? စဏ္ဍကာဠီ ဘိက္ခုနီ သံသဋ္ဌာ ဝိဟရိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

အန္တောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာယ စာရိကံ စရန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော အန္တောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာယော စာရိကံ စရိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

တိရောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာယ စာရိကံ စရန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော တိရောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာယော စာရိကံ စရိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

အန္တောဝဿံ စာရိကံ စရန္တိယာ ပါစိတ္တိယံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော အန္တောဝဿံ စာရိကံ စရိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

ဝဿံဝုဋ္ဌာယ [ဝဿံဝုတ္ထာယ (သီ. သျာ.)] ဘိက္ခုနိယာ စာရိကံ န ပက္ကမန္တိယာ ပါစိတ္တိယံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဝဿံဝုဋ္ဌာ စာရိကံ န ပက္ကမိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ပဌမပါရာဇိကေ။ပေ.။။

တုဝဋ္ဋဝဂ္ဂေါ စတုတ္ထော။

၅. စိတ္တာဂါရဝဂ္ဂေါ

၂၂၂. ရာဇာဂါရံ ဝါ စိတ္တာဂါရံ ဝါ အာရာမံ ဝါ ဥယျာနံ ဝါ ပေါက္ခရဏိံ ဝါ ဒဿနာယ ဂစ္ဆန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော ရာဇာဂါရမ္ပိ စိတ္တာဂါရမ္ပိ ဒဿနာယ အဂမံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

အာသန္ဒိံ ဝါ ပလ္လင်္ကံ ဝါ ပရိဘုဉ္ဇန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော အာသန္ဒိမ္ပိ ပလ္လင်္ကမ္ပိ ပရိဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

သုတ္တံ ကန္တန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော သုတ္တံ ကန္တိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

ဂိဟိဝေယျာဝစ္စံ ကရောန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဂိဟိဝေယျာဝစ္စံ အကံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

ဘိက္ခုနိယာ ‘‘ဧဟာယျေ ဣမံ အဓိကရဏံ ဝူပသမေဟီ’’တိ ဝုစ္စမာနာယ ‘‘သာဓူ’’တိ ပဋိဿုဏိတွာ နေဝ ဝူပသမေန္တိယာ န ဝူပသမာယ ဥဿုက္ကံ ကရောန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ဘိက္ခုနိယာ – ‘‘ဧဟာယျေ, ဣမံ အဓိကရဏံ ဝူပသမေဟီ’’တိ ဝုစ္စမာနာ ‘‘သာဓူ’’တိ ပဋိဿုဏိတွာ နေဝ ဝူပသမေသိ န ဝူပသမာယ ဥဿုက္ကံ အကာသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

အဂါရိကဿ ဝါ ပရိဗ္ဗာဇကဿ ဝါ ပရိဗ္ဗာဇိကာယ ဝါ သဟတ္ထာ ခါဒနီယံ ဝါ ဘောဇနီယံ ဝါ ဒေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ အဂါရိကဿ သဟတ္ထာ ခါဒနီယမ္ပိ ဘောဇနီယမ္ပိ အဒါသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

အာဝသထစီဝရံ အနိဿဇ္ဇိတွာ ပရိဘုဉ္ဇန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ အာဝသထစီဝရံ အနိဿဇ္ဇိတွာ ပရိဘုဉ္ဇိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ကထိနကေ။ပေ.။။

အာဝသထံ အနိဿဇ္ဇိတွာ စာရိကံ ပက္ကမန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ အာဝသထံ အနိဿဇ္ဇိတွာ စာရိကံ ပက္ကာမိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ကထိနကေ။ပေ.။။

တိရစ္ဆာနဝိဇ္ဇံ ပရိယာပုဏန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော တိရစ္ဆာနဝိဇ္ဇံ ပရိယာပုဏိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ပဒသောဓမ္မေ။ပေ.။။

တိရစ္ဆာနဝိဇ္ဇံ ဝါစေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ။ ဆဗ္ဗဂ္ဂိယာ ဘိက္ခုနိယော တိရစ္ဆာနဝိဇ္ဇံ ဝါစေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ပဒသောဓမ္မေ။ပေ.။။

စိတ္တာဂါရဝဂ္ဂေါ ပဉ္စမော။

၆. အာရာမဝဂ္ဂေါ

၂၂၃. ဇာနံ သဘိက္ခုကံ အာရာမံ အနာပုစ္ဆာ ပဝိသန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော အာရာမံ အနာပုစ္ဆာ ပဝိသိံသု, တသ္မိံ ဝတ္ထုသ္မိံ။ ဧကာ ပညတ္တိ, ဒွေ အနုပညတ္တိယော။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

ဘိက္ခုံ အက္ကောသန္တိယာ ပရိဘာသန္တိယာ ပါစိတ္တိယံ ကတ္ထ ပညတ္တန္တိ? ဝေသာလိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော အာယသ္မန္တံ ဥပါလိံ အက္ကောသိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

စဏ္ဍီကတာယ ဂဏံ ပရိဘာသန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ စဏ္ဍီကတာယ ဂဏံ ပရိဘာသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

နိမန္တိတာယ ဝါ ပဝါရိတာယ ဝါ ခါဒနီယံ ဝါ ဘောဇနီယံ ဝါ အညတြ ဘုဉ္ဇန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဘုတ္တာဝိနိယော ပဝါရိတာ အညတြ ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌာတိ။ပေ.။။

ကုလံ မစ္ဆရာယန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ ကုလံ မစ္ဆရာယိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

အဘိက္ခုကေ အာဝါသေ ဝဿံ ဝသန္တိယာ ပါစိတ္တိယံ ကတ္ထ ပညတ္တန္တိ ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော အဘိက္ခုကေ အာဝါသေ ဝဿံ ဝသိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

ဝဿံဝုဋ္ဌာယ ဘိက္ခုနိယာ ဥဘတောသံဃေ တီဟိ ဌာနေဟိ န ပဝါရေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဝဿံဝုဋ္ဌာ ဘိက္ခုသသံဃံ [ဘိက္ခုနိသံဃေ (က.)] န ပဝါရေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

ဩဝါဒါယ ဝါ သံဝါသာယ ဝါ န ဂစ္ဆန္တိယာ ပါစိတ္တိယံ ကတ္ထ ပညတ္တန္တိ? သက္ကေသု ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော ဩဝါဒံ န ဂစ္ဆိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ပဌမပါရာဇိကေ။ပေ.။။

ဥပေါသထမ္ပိ န ပုစ္ဆန္တိယာ ဩဝါဒမ္ပိ န ယာစန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဥပေါသထမ္ပိ န ပုစ္ဆိံသု ဩဝါဒမ္ပိ န ယာစိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

ပသာခေ ဇာတံ ဂဏ္ဍံ ဝါ ရုဓိတံ [ရုဟိတံ (သီ. သျာ.)] ဝါ အနပလောကေတွာ သသံဃံ ဝါ ဂဏံ ဝါ ပုရိသေန သဒ္ဓိံ ဧကေနေကာယ ဘေဒါပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ ပသာခေ ဇာတံ ဂဏ္ဍံ ပုရိသေန သဒ္ဓိံ ဧကေနေကာ ဘေဒါပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ကထိနကေ။ပေ.။။

အာရာမဝဂ္ဂေါ ဆဋ္ဌော။

၇. ဂဗ္ဘိနီဝဂ္ဂေါ

၂၂၄. ဂဗ္ဘိနိံ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဂဗ္ဘိနိံ ဝုဋ္ဌာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ပါယန္တိံ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ပါယန္တိံ ဝုဋ္ဌာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ဒွေ ဝဿာနိ ဆသု ဓမ္မေသု အသိက္ခိတသိက္ခံ သိက္ခမာနံ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဒွေ ဝဿာနိ ဆသု ဓမ္မေသု အသိက္ခိတသိက္ခံ သိက္ခမာနံ ဝုဋ္ဌာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ဒွေ ဝဿာနိ ဆသု ဓမ္မေသု သိက္ခိတသိက္ခံ သိက္ခမာနံ သံဃေန အသမ္မတံ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဒွေ ဝဿာနိ ဆသု ဓမ္မေသု သိက္ခိတသိက္ခံ သိက္ခမာနံ သံဃေန အသမ္မတံ ဝုဋ္ဌာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ဦနဒွါဒသဝဿံ ဂိဟိဂတံ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဦနဒွါဒသဝဿံ ဂိဟိဂတံ ဝုဋ္ဌာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေသုံ , တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန အသမ္မတံ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန အသမ္မတံ ဝုဋ္ဌာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

သဟဇီဝိနိံ ဝုဋ္ဌာပေတွာ ဒွေ ဝဿာနိ နေဝ အနုဂ္ဂဏှန္တိယာ န အနုဂ္ဂဏှာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ သဟဇီဝိနိံ ဝုဋ္ဌာပေတွာ ဒွေ ဝဿာနိ နေဝ အနုဂ္ဂဟေသိ န အနုဂ္ဂဏှာပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

ဝုဋ္ဌာပိတံ ပဝတ္တိနိံ ဒွေ ဝဿာနိ နာနုဗန္ဓန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဝုဋ္ဌာပိတံ ပဝတ္တိနိံ ဒွေ ဝဿာနိ နာနုဗန္ဓိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ပဌမပါရာဇိကေ။ပေ.။။

သဟဇီဝိနိံ ဝုဋ္ဌာပေတွာ နေဝ ဝူပကာသေန္တိယာ န ဝူပကာသာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ သဟဇီဝိနိံ ဝုဋ္ဌာပေတွာ နေဝ ဝူပကာသေသိ န ဝူပကာသာပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

ဂဗ္ဘိနိဝဂ္ဂေါ သတ္တမော။

၈. ကုမာရီဘူတဝဂ္ဂေါ

၂၂၅. ဦနဝီသတိဝဿံ ကုမာရိဘူတံ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဦနဝီသတိဝဿံ ကုမာရိဘူတံ ဝုဋ္ဌာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန အသမ္မတံ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန အသမ္မတံ ဝုဋ္ဌာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ဦနဒွါဒသဝဿာယ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဦနဒွါဒသဝဿာ ဝုဋ္ဌာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ပရိပုဏ္ဏဒွါဒသဝဿာယ သံဃေန အသမ္မတာယ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ပရိပုဏ္ဏဒွါဒသဝဿာ သံဃေန အသမ္မတာ ဝုဋ္ဌာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ – ဒုတိယပါရာဇိကေ။ပေ.။။

‘‘အလံ တာဝ တေ, အယျေ, ဝုဋ္ဌာပိတေနာ’’တိ ဝုစ္စမာနာယ ‘‘သာဓူ’’တိ ပဋိဿုဏိတွာ ပစ္ဆာ ခီယနဓမ္မံ အာပဇ္ဇန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? စဏ္ဍကာဠိံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? စဏ္ဍကာဠီ ဘိက္ခုနီ ‘‘အလံ တာဝ တေ, အယျေ, ဝုဋ္ဌာပိတေနာ’’တိ ဝုစ္စမာနာ ‘‘သာဓူ’’တိ ပဋိဿုဏိတွာ ပစ္ဆာ ခီယနဓမ္မံ အာပဇ္ဇိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

သိက္ခမာနံ – ‘‘သစေ မေ တွံ, အယျေ, စီဝရံ ဒဿသိ, ဧဝါဟံ တံ ဝုဋ္ဌာပေဿာမီ’’တိ ဝတွာ နေဝ ဝုဋ္ဌာပေန္တိယာ န ဝုဋ္ဌာပနာယ ဥဿုက္ကံ ကရောန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ သိက္ခမာနံ – ‘‘သစေ မေ တွံ, အယျေ, စီဝရံ ဒဿသိ, ဧဝါဟံ တံ ဝုဋ္ဌာပေဿာမီ’’တိ ဝတွာ နေဝ ဝုဋ္ဌာပေသိ န ဝုဋ္ဌာပနာယ ဥဿုက္ကံ အကာသိ , တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

သိက္ခမာနံ – ‘‘သစေ မံ တွံ, အယျေ, ဒွေ ဝဿာနိ အနုဗန္ဓိဿသိ, ဧဝါဟံ တံ ဝုဋ္ဌာပေဿာမီ’’တိ ဝတွာ နေဝ ဝုဋ္ဌာပေန္တိယာ န ဝုဋ္ဌာပနာယ ဥဿုက္ကံ ကရောန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ သိက္ခမာနံ – ‘‘သစေ မံ တွံ, အယျေ, ဒွေ ဝဿာနိ အနုဗန္ဓိဿသိ, ဧဝါဟံ တံ ဝုဋ္ဌာပေဿာမီ’’တိ ဝတွာ နေဝ ဝုဋ္ဌာပေသိ န ဝုဋ္ဌာပနာယ ဥဿုက္ကံ အကာသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

ပုရိသသံသဋ္ဌံ ကုမာရကသံသဋ္ဌံ စဏ္ဍိံ သောကာဝါသံ သိက္ခမာနံ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ပုရိသသံသဋ္ဌံ ကုမာရကသံသဋ္ဌံ စဏ္ဍိံ သောကာဝါသံ သိက္ခမာနံ ဝုဋ္ဌာပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

မာတာပိတူဟိ ဝါ သာမိကေန ဝါ အနနုညာတံ သိက္ခမာနံ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ မာတာပိတူဟိပိ သာမိကေနာပိ အနနုညာတံ သိက္ခမာနံ ဝုဋ္ဌာပေသိ , တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌာတိ – သိယာ ဝါစတော သမုဋ္ဌာတိ, န ကာယတော န စိတ္တတော; သိယာ ကာယတော စ ဝါစတော စ သမုဋ္ဌာတိ, န စိတ္တတော; သိယာ ဝါစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

ပါရိဝါသိကဆန္ဒဒါနေန သိက္ခမာနံ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တန္တိ? ရာဇဂဟေ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ပါရိဝါသိကဆန္ဒဒါနေန သိက္ခမာနံ ဝုဋ္ဌာပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

အနုဝဿံ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော အနုဝဿံ ဝုဋ္ဌာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ဧကံ ဝဿံ ဒွေ ဝုဋ္ဌာပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဧကံ ဝဿံ ဒွေ ဝုဋ္ဌာပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ကုမာရီဘူတဝဂ္ဂေါ အဋ္ဌမော။

၉. ဆတ္တုပါဟနဝဂ္ဂေါ

၂၂၆. ဆတ္တုပါဟနံ ဓါရေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော ဆတ္တုပါဟနံ ဓါရေသုံ, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

ယာနေန ယာယန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော ယာနေန ယာယိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

သံဃာဏိံ ဓါရေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ သံဃာဏိံ ဓါရေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

ဣတ္ထာလင်္ကာရံ ဓါရေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော ဣတ္ထာလင်္ကာရံ ဓါရေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

ဂန္ဓဝဏ္ဏကေန နဟာယန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော ဂန္ဓဝဏ္ဏကေန နဟာယိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

ဝါသိတကေန ပိညာကေန နဟာယန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော ဝါသိတကေန ပိညာကေန နဟာယိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

ဘိက္ခုနိယာ ဥမ္မဒ္ဒါပေန္တိယာ ပရိမဒ္ဒါပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဘိက္ခုနိယာ ဥမ္မဒ္ဒါပေသုံ ပရိမဒ္ဒါပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

သိက္ခမာနာ ဥမ္မဒ္ဒါပေန္တိယာ ပရိမဒ္ဒါပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော သိက္ခမာနာယ ဥမ္မဒ္ဒါပေသုံ ပရိမဒ္ဒါပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

သာမဏေရိယာ ဥမ္မဒ္ဒါပေန္တိယာ ပရိမဒ္ဒါပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော သာမဏေရိယာ ဥမ္မဒ္ဒါပေသုံ ပရိမဒ္ဒါပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

ဂိဟိနိယာ ဥမ္မဒ္ဒါပေန္တိယာ ပရိမဒ္ဒါပေန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဂိဟိနိယာ ဥမ္မဒ္ဒါပေသုံ ပရိမဒ္ဒါပေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ဧဠကလောမကေ။ပေ.။။

ဘိက္ခုဿ ပုရတော အနာပုစ္ဆာ အာသနေ နိသီဒန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော ဘိက္ခုဿ ပုရတော အနာပုစ္ဆာ အာသနေ နိသီဒိံသု, တသ္မိံ ဝတ္ထုသ္မိံ ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ကထိနကေ။ပေ.။။

အနောကာသကတံ ဘိက္ခုံ ပဉ္ဟံ ပုစ္ဆန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော အနောကာသကတံ ဘိက္ခုံ ပဉ္ဟံ ပုစ္ဆိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – ပဒသောဓမ္မေ။ပေ.။။

အသင်္ကစ္စိကာယ [အသင်္ကစ္ဆိကာယ (သျာ.)] ဂါမံ ပဝိသန္တိယာ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ အသင်္ကစ္စိကာ ဂါမံ ပါဝိသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော သမုဋ္ဌာတိ, န ဝါစတော န စိတ္တတော; သိယာ ကာယတော စ စိတ္တတော စ သမုဋ္ဌာတိ, န ဝါစတော။ပေ.။။

ဆတ္တုပါဟနဝဂ္ဂေါ နဝမော။

နဝဝဂ္ဂခုဒ္ဒကာ နိဋ္ဌိတာ။

တဿုဒ္ဒါနံ –

လသုဏံ သံဟရေ လောမံ၊ တလမဋ္ဌဉ္စ သုဒ္ဓိကံ။

ဘုဉ္ဇန္တာမကဓညာနံ၊ ဒွေ ဝိဃာသေန ဒဿနာ။

အန္ဓကာရေ ပဋိစ္ဆန္နေ၊ အဇ္ဈောကာသေ ရထိကာယ စ။

ပုရေ ပစ္ဆာ ဝိကာလေ စ၊ ဒုဂ္ဂဟိ နိရယေ ဝဓိ။

နဂ္ဂေါဒကာ ဝိသိဗ္ဗေတွာ၊ ပဉ္စာဟိကံ သင်္ကမနီယံ။

ဂဏံ ဝိဘင်္ဂသမဏံ၊ ဒုဗ္ဗလံ ကထိနေန စ။

ဧကမဉ္စတ္ထရဏေန၊ သဉ္စိစ္စ သဟဇီဝိနီ။

ဒတွာ သံသဋ္ဌအန္တော စ၊ တိရောဝဿံ န ပက္ကမေ။

ရာဇာ အာသန္ဒိ သုတ္တဉ္စ၊ ဂိဟိ ဝူပသမေန စ။

ဒဒေ စီဝရာဝသထံ၊ ပရိယာပုဏဉ္စ ဝါစယေ။

အာရာမက္ကောသစဏ္ဍီ စ၊ ဘုဉ္ဇေယျ ကုလမစ္ဆရီ။

ဝါသေ ပဝါရဏောဝါဒံ၊ ဒွေ ဓမ္မာ ပသာခေန စ။

ဂဗ္ဘီ ပါယန္တီ ဆ ဓမ္မေ၊ အသမ္မတူနဒွါဒသ။

ပရိပုဏ္ဏဉ္စ သံဃေန၊ သဟ ဝုဋ္ဌာ ဆ ပဉ္စ စ။

ကုမာရီ ဒွေ စ သံဃေန၊ ဒွါဒသ သမ္မတေန စ။

အလံ သစေ စ ဒွေဝဿံ၊ သံသဋ္ဌာ သာမိကေန စ။

ပါရိဝါသိကာနုဝဿံ၊ ဒုဝေ ဝုဋ္ဌာပနေန စ။

ဆတ္တယာနေန သံဃာဏိ၊ ဣတ္ထာလင်္ကာရဝဏ္ဏကေ။

ပိညာကဘိက္ခုနီ စေဝ၊ သိက္ခာ စ သာမဏေရိကာ။

ဂိဟိ ဘိက္ခုဿ ပုရတော၊ အနောကာသံ သင်္ကစ္စိကာတိ။

တေသံ ဝဂ္ဂါနံ ဥဒ္ဒါနံ –

လသုဏန္ဓကာရာ နှာနာ၊ တုဝဋ္ဋာ စိတ္တဂါရကာ။

အာရာမံ ဂဗ္ဘိနီ စေဝ၊ ကုမာရီ ဆတ္တုပါဟနာတိ။

၅. ပါဋိဒေသနီယကဏ္ဍံ

၂၂၇. သပ္ပိံ ဝိညာပေတွာ ဘုဉ္ဇန္တိယာ ပါဋိဒေသနီယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော သပ္ပိံ ဝိညာပေတွာ ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌာတိ။ပေ.။။

တေလံ ဝိညာပေတွာ ဘုဉ္ဇန္တိယာ ပါဋိဒေသနီယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော တေလံ ဝိညာပေတွာ ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌာတိ။ပေ.။။

မဓုံ ဝိညာပေတွာ ဘုဉ္ဇန္တိယာ ပါဋိဒေသနီယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော မဓုံ ဝိညာပေတွာ ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌာတိ။ပေ.။။

ဖာဏိတံ ဝိညာပေတွာ ဘုဉ္ဇန္တိယာ ပါဋိဒေသနီယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော ဖာဏိတံ ဝိညာပေတွာ ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌာတိ။ပေ.။။

မစ္ဆံ ဝိညာပေတွာ ဘုဉ္ဇန္တိယာ ပါဋိဒေသနီယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော မစ္ဆံ ဝိညာပေတွာ ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌာတိ။ပေ.။။

မံသံ ဝိညာပေတွာ ဘုဉ္ဇန္တိယာ ပါဋိဒေသနီယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော။ မံသံ ဝိညာပေတွာ ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌာတိ။ပေ.။။

ခီရံ ဝိညာပေတွာ ဘုဉ္ဇန္တိယာ ပါဋိဒေသနီယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော ခီရံ ဝိညာပေတွာ ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌာတိ။ပေ.။။

ဒဓိံ ဝိညာပေတွာ ဘုဉ္ဇန္တိယာ ပါဋိဒေသနီယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော ဒဓိံ ဝိညာပေတွာ ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌာတိ – သိယာ ကာယတော သမုဋ္ဌာတိ, န ဝါစတော န စိတ္တတော; သိယာ ကာယတော စ ဝါစတော စ သမုဋ္ဌာတိ, န စိတ္တတော; သိယာ ကာယတော စ စိတ္တတော စ သမုဋ္ဌာတိ, န ဝါစတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

အဋ္ဌ ပါဋိဒေသနီယာ နိဋ္ဌိတာ။

တဿုဒ္ဒါနံ –

သပ္ပိံ တေလံ မဓုဉ္စေဝ၊ ဖာဏိတံ မစ္ဆမေဝ စ။

မံသံ ခီရံ ဒဓိဉ္စာပိ၊ ဝိညာပေတွာန ဘိက္ခုနီ။

ပါဋိဒေသနီယာ အဋ္ဌ၊ သယံ ဗုဒ္ဓေန ဒေသိတာတိ။

ယေ သိက္ခာပဒါ ဘိက္ခုဝိဘင်္ဂေ ဝိတ္ထာရိတာ တေ သံခိတ္တာ

ဘိက္ခုနိဝိဘင်္ဂေ။

ကတ္ထပညတ္တိဝါရော နိဋ္ဌိတော ပဌမော။

၂. ကတာပတ္တိဝါရော

၁. ပါရာဇိကကဏ္ဍံ

၂၂၈. အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တီ ကတိ အာပတ္တိယော အာပဇ္ဇတိ? အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တီ တိဿော အာပတ္တိယော အာပဇ္ဇတိ ။ အဓက္ခကံ ဥဗ္ဘဇာဏုမဏ္ဍလံ ဂဟဏံ သာဒိယတိ, အာပတ္တိ ပါရာဇိကဿ; ဥဗ္ဘက္ခကံ အဓေါဇာဏုမဏ္ဍလံ ဂဟဏံ သာဒိယတိ, အာပတ္တိ ထုလ္လစ္စယဿ; ကာယပဋိဗဒ္ဓံ ဂဟဏံ သာဒိယတိ, အာပတ္တိ ဒုက္ကဋဿ – အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တီ ဣမာ တိဿော အာပတ္တိယော အာပဇ္ဇတိ။

ဝဇ္ဇပ္ပဋိစ္ဆာဒိကာ ဘိက္ခုနီ ဝဇ္ဇံ ပဋိစ္ဆာဒေန္တီ ကတိ အာပတ္တိယော အာပဇ္ဇတိ? ဝဇ္ဇပ္ပဋိစ္ဆာဒိကာ ဘိက္ခုနီ ဝဇ္ဇံ ပဋိစ္ဆာဒေန္တီ တိဿော အာပတ္တိယော အာပဇ္ဇတိ။ ဇာနံ ပါရာဇိကံ ဓမ္မံ ပဋိစ္ဆာဒေတိ, အာပတ္တိ ပါရာဇိကဿ; ဝေမတိကာ ပဋိစ္ဆာဒေတိ, အာပတ္တိ ထုလ္လစ္စယဿ; အာစာရဝိပတ္တိံ ပဋိစ္ဆာဒေတိ, အာပတ္တိ ဒုက္ကဋဿ – ဝဇ္ဇပ္ပဋိစ္ဆာဒိကာ ဘိက္ခုနီ ဝဇ္ဇံ ပဋိစ္ဆာဒေန္တီ ဣမာ တိဿော အာပတ္တိယော အာပဇ္ဇတိ။

ဥက္ခိတ္တာနုဝတ္တိကာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇန္တီ ကတိ အာပတ္တိယော အာပဇ္ဇတိ? ဥက္ခိတ္တာနုဝတ္တိကာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇန္တီ တိဿော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ ပါရာဇိကဿ – ဥက္ခိတ္တာနုဝတ္တိကာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇန္တီ ဣမာ တိဿော အာပတ္တိယော အာပဇ္ဇတိ။

အဋ္ဌမံ ဝတ္ထုံ ပရိပူရေန္တီ ကတိ အာပတ္တိယော အာပဇ္ဇတိ? အဋ္ဌမံ ဝတ္ထုံ ပရိပူရေန္တီ တိဿော အာပတ္တိယော အာပဇ္ဇတိ။ ပုရိသေန – ‘‘ဣတ္ထန္နာမံ ဩကာသံ [ဣတ္ထန္နာမံ ဂဟနံ (သီ.), ဣတ္ထန္နာမံ ဂဗ္ဘံ (သျာ.)] အာဂစ္ဆာ’’တိ ဝုတ္တာ ဂစ္ဆတိ, အာပတ္တိ ဒုက္ကဋဿ; ပုရိသဿ ဟတ္ထပါသံ ဩက္ကန္တမတ္တေ အာပတ္တိ ထုလ္လစ္စယဿ; အဋ္ဌမံ ဝတ္ထုံ ပရိပူရေတိ, အာပတ္တိ ပါရာဇိကဿ – အဋ္ဌမံ ဝတ္ထုံ ပရိပူရေန္တီ ဣမာ တိဿော အာပတ္တိယော အာပဇ္ဇတိ။

ပါရာဇိကာ နိဋ္ဌိတာ။

၂. သံဃာဒိသေသကဏ္ဍံ

၂၂၉. ဥဿယဝါဒိကာ ဘိက္ခုနီ အဍ္ဍံ ကရောန္တီ တိဿော အာပတ္တိယော အာပဇ္ဇတိ။ ဧကဿ အာရောစေတိ, အာပတ္တိ ဒုက္ကဋဿ; ဒုတိယဿ အာရောစေတိ, အာပတ္တိ ထုလ္လစ္စယဿ; အဍ္ဍပရိယောသာနေ အာပတ္တိ သံဃာဒိသေသဿ။

စောရိံ ဝုဋ္ဌာပေန္တီ တိဿော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

ဧကာ ဂါမန္တရံ ဂစ္ဆန္တီ တိဿော အာပတ္တိယော အာပဇ္ဇတိ။ ဂစ္ဆတိ, အာပတ္တိ ဒုက္ကဋဿ; ပဌမံ ပါဒံ ပရိက္ခေပံ အတိက္ကာမေတိ, အာပတ္တိ ထုလ္လစ္စယဿ; ဒုတိယံ ပါဒံ အတိက္ကာမေတိ, အာပတ္တိ သံဃာဒိသေသဿ ။

သမဂ္ဂေန သံဃေန ဥက္ခိတ္တံ ဘိက္ခုနိံ ဓမ္မေန ဝိနယေန သတ္ထုသာသနေန အနပလောကေတွာ ကာရကသသံဃံ အနညာယ ဂဏဿ ဆန္ဒံ ဩသာရေန္တီ တိဿော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ ဟတ္ထတော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ဘုဉ္ဇန္တီ တိဿော အာပတ္တိယော အာပဇ္ဇတိ။ ‘‘ခါဒိဿာမိ ဘုဉ္ဇိဿာမီ’’တိ ပဋိဂ္ဂဏှာတိ, အာပတ္တိ ထုလ္လစ္စယဿ; အဇ္ဈောဟာရေ အဇ္ဈောဟာရေ အာပတ္တိ သံဃာဒိသေသဿ; ဥဒကဒန္တပေါနံ ပဋိဂ္ဂဏှာတိ, အာပတ္တိ ဒုက္ကဋဿ။

‘‘ကိံ တေ, အယျေ, ဧသော ပုရိသပုဂ္ဂလော ကရိဿတိ အဝဿုတော ဝါ အနဝဿုတော ဝါ, ယတော တွံ အနဝဿုတာ! ဣင်္ဃ, အယျေ, ယံ တေ ဧသော ပုရိသပုဂ္ဂလော ဒေတိ ခါဒနီယံ ဝါ ဘောဇနီယံ ဝါ, တံ တွံ သဟတ္ထာ ပဋိဂ္ဂဟေတွာ ခါဒ ဝါ ဘုဉ္ဇ ဝါ’’တိ ဥယျောဇေန္တီ တိဿော အာပတ္တိယော အာပဇ္ဇတိ။ တဿာ ဝစနေန ခါဒိဿာမိ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ထုလ္လစ္စယဿ; ဘောဇနပရိယောသာနေ အာပတ္တိ သံဃာဒိသေသဿ။

ကုပိတာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇန္တီ တိဿော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ ; ကမ္မဝါစာပရိယောသာနေ အာပတ္တိ သံဃာဒိသေသဿ။

ကိသ္မိဉ္စိဒေဝ အဓိကရဏေ ပစ္စာကတာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇန္တီ တိဿော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

သံသဋ္ဌာ ဘိက္ခုနိယော ယာဝတတိယံ သမနုဘာသနာယ န ပဋိနိဿဇ္ဇန္တိယော တိဿော အာပတ္တိယော အာပဇ္ဇန္တိ။ ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

‘‘သံသဋ္ဌာဝ, အယျေ, တုမှေ ဝိဟရထ။ မာ တုမှေ နာနာ ဝိဟရိတ္ထာ’’တိ ဥယျောဇေန္တီ ယာဝတတိယံ သမနုဘာသနာယ န ပဋိနိဿဇ္ဇန္တီ တိဿော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

သံဃာဒိသေသာ နိဋ္ဌိတာ။

၃. နိဿဂ္ဂိယကဏ္ဍံ

၂၃၀. ပတ္တသန္နိစယံ ကရောန္တီ ဧကံ အာပတ္တိံ အာပဇ္ဇတိ။ နိဿဂ္ဂိယံ ပါစိတ္တိယံ။

အကာလစီဝရံ ‘‘ကာလစီဝရ’’န္တိ အဓိဋ္ဌဟိတွာ ဘာဇာပေန္တီ ဒွေ အာပတ္တိယော အာပဇ္ဇတိ။ ဘာဇာပေတိ, ပယောဂေ ဒုက္ကဋံ; ဘာဇာပိတေ နိဿဂ္ဂိယံ ပါစိတ္တိယံ။

ဘိက္ခုနိယာ သဒ္ဓိံ စီဝရံ ပရိဝတ္တေတွာ အစ္ဆိန္ဒန္တီ ဒွေ အာပတ္တိယော အာပဇ္ဇတိ။ အစ္ဆိန္ဒတိ, ပယောဂေ ဒုက္ကဋံ; အစ္ဆိန္နေ နိဿဂ္ဂိယံ ပါစိတ္တိယံ။

အညံ ဝိညာပေတွာ အညံ ဝိညာပေန္တီ ဒွေ အာပတ္တိယော အာပဇ္ဇတိ။ ဝိညာပေတိ, ပယောဂေ ဒုက္ကဋံ; ဝိညာပိတေ နိဿဂ္ဂိယံ ပါစိတ္တိယံ။

အညံ စေတာပေတွာ အညံ စေတာပေန္တီ ဒွေ အာပတ္တိယော အာပဇ္ဇတိ။ စေတာပေတိ, ပယောဂေ ဒုက္ကဋံ; စေတာပိတေ နိဿဂ္ဂိယံ ပါစိတ္တိယံ။

အညဒတ္ထိကေန ပရိက္ခာရေန အညုဒ္ဒိသိကေန သံဃိကေန အညံ စေတာပေန္တီ ဒွေ အာပတ္တိယော အာပဇ္ဇတိ။ စေတာပေတိ, ပယောဂေ ဒုက္ကဋံ; စေတာပိတေ နိဿဂ္ဂိယံ ပါစိတ္တိယံ။

အညဒတ္ထိကေ ပရိက္ခာရေန အညုဒ္ဒိသိကေန သံဃိကေန သံယာစိကေန အညံ စေတာပေန္တီ ဒွေ အာပတ္တိယော အာပဇ္ဇတိ။ စေတာပေတိ, ပယောဂေ ဒုက္ကဋံ; စေတာပိတေ နိဿဂ္ဂိယံ ပါစိတ္တိယံ။

အညဒတ္ထိကေန ပရိက္ခာရေန အညုဒ္ဒိသိကေန မဟာဇနိကေန အညံ စေတာပေန္တီ ဒွေ အာပတ္တိယော အာပဇ္ဇတိ။ စေတာပေတိ, ပယောဂေ ဒုက္ကဋံ; စေတာပိတေ နိဿဂ္ဂိယံ ပါစိတ္တိယံ။

အညဒတ္ထိကေန ပရိက္ခာရေန အညုဒ္ဒိသိကေန မဟာဇနိကေန သံယာစိကေန အညံ စေတာပေန္တီ ဒွေ အာပတ္တိယော အာပဇ္ဇတိ။ စေတာပေတိ, ပယောဂေ ဒုက္ကဋံ; စေတာပိတေ နိဿဂ္ဂိယံ ပါစိတ္တိယံ။

အညဒတ္ထိကေန ပရိက္ခာရေန အညုဒ္ဒိသိကေ ပုဂ္ဂလိကေန သံယာစိကေန အညံ စေတာပေန္တီ ဒွေ အာပတ္တိယော အာပဇ္ဇတိ။ စေတာပေတိ, ပယောဂေ ဒုက္ကဋံ; စေတာပိတေ နိဿဂ္ဂိယံ ပါစိတ္တိယံ။

အတိရေကစတုက္ကံသပရမံ ဂရုပါဝုရဏံ စေတာပေန္တီ ဒွေ အာပတ္တိယော အာပဇ္ဇတိ။ စေတာပေတိ, ပယောဂေ ဒုက္ကဋံ; စေတာပိတေ နိဿဂ္ဂိယံ ပါစိတ္တိယံ။

အတိရေကအဍ္ဎတေယျကံသပရမံ လဟုပါဝုရဏံ စေတာပေန္တီ ဒွေ အာပတ္တိယော အာပဇ္ဇတိ။ စေတာပေတိ, ပယောဂေ ဒုက္ကဋံ; စေတာပိတေ နိဿဂ္ဂိယံ ပါစိတ္တိယံ။

နိဿဂ္ဂိယာ ပါစိတ္တိယာ နိဋ္ဌိတာ။

၄. ပါစိတ္တိယကဏ္ဍံ

၁. လသုဏဝဂ္ဂေါ

၂၃၁. လသုဏံ ခါဒန္တီ ဒွေ အာပတ္တိယော အာပဇ္ဇတိ။ ခါဒိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ။

သမ္ဗာဓေ လောမံ သံဟရာပေန္တီ ဒွေ အာပတ္တိယော အာပဇ္ဇတိ။ သံဟရာပေတိ, ပယောဂေ ဒုက္ကဋံ; သံဟရာပိတေ အာပတ္တိ ပါစိတ္တိယဿ။

တလဃာတကံ ကရောန္တီ ဒွေ အာပတ္တိယော အာပဇ္ဇတိ။ ကရောတိ, ပယောဂေ ဒုက္ကဋံ; ကတေ အာပတ္တိ ပါစိတ္တိယဿ။

ဇတုမဋ္ဌကံ အာဒိယန္တီ ဒွေ အာပတ္တိယော အာပဇ္ဇတိ။ အာဒိယတိ, ပယောဂေ ဒုက္ကဋံ, အာဒိန္နေ အာပတ္တိ ပါစိတ္တိယဿ။

အတိရေကဒွင်္ဂုလပဗ္ဗပရမံ ဥဒကသုဒ္ဓိကံ အာဒိယန္တီ ဒွေ အာပတ္တိယော အာပဇ္ဇတိ။ အာဒိယတိ, ပယောဂေ ဒုက္ကဋံ; အာဒိန္နေ အာပတ္တိ ပါစိတ္တိယဿ။

ဘိက္ခုဿ ဘုဉ္ဇန္တဿ ပါနီယေန ဝါ ဝိဓူပနေန ဝါ ဥပတိဋ္ဌန္တီ ဒွေ အာပတ္တိယော အာပဇ္ဇတိ။ ဟတ္ထပါသေ တိဋ္ဌတိ, အာပတ္တိ ပါစိတ္တိယဿ; ဟတ္ထပါသံ ဝိဇဟိတွာ တိဋ္ဌတိ, အာပတ္တိ ဒုက္ကဋဿ။

အာမကဓညံ ဝိညာပေတွာ ဘုဉ္ဇန္တီ ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ။

ဥစ္စာရံ ဝါ ပဿာဝံ ဝါ သင်္ကာရံ ဝါ ဝိဃာသံ ဝါ တိရောကုဋ္ဋေ ဝါ တိရောပါကာရေ ဝါ ဆဍ္ဍေန္တီ ဒွေ အာပတ္တိယော အာပဇ္ဇတိ။ ဆဍ္ဍေတိ, ပယောဂေ ဒုက္ကဋံ; ဆဍ္ဍိတေ အာပတ္တိ ပါစိတ္တိယဿ။

ဥစ္စာရံ ဝါ ပဿာဝံ ဝါ သင်္ကာရံ ဝါ ဝိဃာသံ ဝါ ဟရိတေ ဆဍ္ဍေန္တီ ဒွေ အာပတ္တိယော အာပဇ္ဇတိ။ ဆဍ္ဍေတိ, ပယောဂေ ဒုက္ကဋံ; ဆဍ္ဍိတေ အာပတ္တိ ပါစိတ္တိယဿ။

နစ္စံ ဝါ ဂီတံ ဝါ ဝါဒိတံ ဝါ ဒဿနာယ ဂစ္ဆန္တီ ဒွေ အာပတ္တိယော အာပဇ္ဇတိ။ ဂစ္ဆတိ, အာပတ္တိ ဒုက္ကဋဿ; ယတ္ထ ဌိတာ ပဿတိ ဝါ သုဏာတိ ဝါ, အာပတ္တိ ပါစိတ္တိယဿ။

လသုဏဝဂ္ဂေါ ပဌမော။

၂. ရတ္တန္ဓကာရဝဂ္ဂေါ

၂၃၂. ရတ္တန္ဓကာရေ အပ္ပဒီပေ ပုရိသေန သဒ္ဓိံ ဧကေနေကာ သန္တိဋ္ဌန္တီ ဒွေ အာပတ္တိယော အာပဇ္ဇတိ။ ဟတ္ထပါသေ တိဋ္ဌတိ, အာပတ္တိ ပါစိတ္တိယဿ; ဟတ္ထပါသံ ဝိဇဟိတွာ တိဋ္ဌတိ, အာပတ္တိ ဒုက္ကဋဿ။

ပဋိစ္ဆန္နေ ဩကာသေ ပုရိသေန သဒ္ဓိံ ဧကေနေကာ သန္တိဋ္ဌန္တီ ဒွေ အာပတ္တိယော အာပဇ္ဇတိ။ ဟတ္ထပါသေ တိဋ္ဌတိ, အာပတ္တိ ပါစိတ္တိယဿ; ဟတ္ထပါသံ ဝိဇဟိတွာ တိဋ္ဌတိ, အာပတ္တိ ဒုက္ကဋဿ။

အဇ္ဈောကာသေ ပုရိသေန သဒ္ဓိံ ဧကေနေကာ သန္တိဋ္ဌန္တီ ဒွေ အာပတ္တိယော အာပဇ္ဇတိ။ ဟတ္ထပါသေ တိဋ္ဌတိ, အာပတ္တိ ပါစိတ္တိယဿ; ဟတ္ထပါသံ ဝိဇဟိတွာ တိဋ္ဌတိ, အာပတ္တိ ဒုက္ကဋဿ။

ရထိကာယ ဝါ ဗ္ယူဟေ ဝါ သိင္ဃာဋကေ ဝါ ပုရိသေန သဒ္ဓိံ ဧကေနေကာ သန္တိဋ္ဌန္တီ ဒွေ အာပတ္တိယော အာပဇ္ဇတိ။ ဟတ္ထပါသေ တိဋ္ဌတိ, အာပတ္တိ ပါစိတ္တိယဿ; ဟတ္ထပါသံ ဝိဇဟိတွာ တိဋ္ဌတိ, အာပတ္တိ ဒုက္ကဋဿ။

ပုရေဘတ္တံ ကုလာနိ ဥပသင်္ကမိတွာ အာသနေ နိသီဒိတွာ သာမိကေ အနာပုစ္ဆာ ပက္ကမန္တီ ဒွေ အာပတ္တိယော အာပဇ္ဇတိ။ ပဌမံ ပါဒံ အနောဝဿကံ အတိက္ကာမေတိ, အာပတ္တိ ဒုက္ကဋဿ; ဒုတိယံ ပါဒံ အတိက္ကာမေတိ, အာပတ္တိ ပါစိတ္တိယဿ။

ပစ္ဆာဘတ္တံ ကုလာနိ ဥပသင်္ကမိတွာ သာမိကေ အနာပုစ္ဆာ အာသနေ နိသီဒန္တီ ဒွေ အာပတ္တိယော အာပဇ္ဇတိ။ နိသီဒတိ, ပယောဂေ ဒုက္ကဋံ; နိသိန္နေ အာပတ္တိ ပါစိတ္တိယဿ။

ဝိကာလေ ကုလာနိ ဥပသင်္ကမိတွာ သာမိကေ အနာပုစ္ဆာ သေယျံ သန္ထရိတွာ ဝါ သန္ထရာပေတွာ ဝါ အဘိနိသီဒန္တီ ဒွေ အာပတ္တိယော အာပဇ္ဇတိ။ အဘိနိသီဒတိ, ပယောဂေ ဒုက္ကဋံ; အဘိနိသိန္နေ အာပတ္တိ ပါစိတ္တိယဿ။

ဒုဂ္ဂဟိတေန ဒူပဓါရိတေန ပရံ ဥဇ္ဈာပေန္တီ ဒွေ အာပတ္တိယော အာပဇ္ဇတိ။ ဥဇ္ဈာပေတိ, ပယောဂေ ဒုက္ကဋံ; ဥဇ္ဈာပိတေ အာပတ္တိ ပါစိတ္တိယဿ။

အတ္တာနံ ဝါ ပရံ ဝါ နိရယေန ဝါ ဗြဟ္မစရိယေန ဝါ အဘိသပန္တီ ဒွေ အာပတ္တိယော အာပဇ္ဇတိ။ အဘိသပတိ, ပယောဂေ ဒုက္ကဋံ; အဘိသပိတေ အာပတ္တိ ပါစိတ္တိယဿ။

အတ္တာနံ ဝဓိတွာ ဝဓိတွာ ရောဒန္တီ ဒွေ အာပတ္တိယော အာပဇ္ဇတိ။ ဝဓတိ ရောဒတိ, အာပတ္တိ ပါစိတ္တိယဿ; ဝဓတိ န ရောဒတိ, အာပတ္တိ ဒုက္ကဋဿ။

ရတ္တန္ဓကာရဝဂ္ဂေါ ဒုတိယော။

၃. နဟာနဝဂ္ဂေါ

၂၃၃. နဂ္ဂါ နဟာယန္တီ ဒွေ အာပတ္တိယော အာပဇ္ဇတိ။ နဟာယတိ, ပယောဂေ ဒုက္ကဋံ; နဟာနပရိယောသာနေ အာပတ္တိ ပါစိတ္တိယဿ။

ပမာဏာတိက္ကန္တံ ဥဒကသာဋိကံ ကာရာပေန္တီ ဒွေ အာပတ္တိယော အာပဇ္ဇတိ။ ကာရာပေတိ, ပယောဂေ ဒုက္ကဋံ; ကာရာပိတေ, အာပတ္တိ ပါစိတ္တိယဿ။

ဘိက္ခုနိယာ စီဝရံ ဝိသိဗ္ဗေတွာ ဝါ ဝိသိဗ္ဗာပေတွာ ဝါ နေဝ သိဗ္ဗေန္တီ န သိဗ္ဗာပနာယ ဥဿုက္ကံ ကရောန္တီ ဧကံ အာပတ္တိံ အာပဇ္ဇတိ။ ပါစိတ္တိယံ။

ပဉ္စာဟိကံ သံဃာဋိစာရံ အတိက္ကာမေန္တီ ဧကံ အာပတ္တိံ အာပဇ္ဇတိ။ ပါစိတ္တိယံ။ စီဝရသင်္ကမနီယံ ဓါရေန္တီ ဒွေ အာပတ္တိယော အာပဇ္ဇတိ။ ဓါရေတိ, ပယောဂေ ဒုက္ကဋံ; ဓါရိတေ, အာပတ္တိ ပါစိတ္တိယဿ။

ဂဏဿ စီဝရလာဘံ အန္တရာယံ ကရောန္တီ ဒွေ အာပတ္တိယော အာပဇ္ဇတိ။ ကရောတိ, ပယောဂေ ဒုက္ကဋံ; ကတေ, အာပတ္တိ ပါစိတ္တိယဿ။

ဓမ္မိကံ စီဝရဝိဘင်္ဂံ ပဋိဗာဟန္တီ ဒွေ အာပတ္တိယော အာပဇ္ဇတိ။ ပဋိဗာဟတိ, ပယောဂေ ဒုက္ကဋံ; ပဋိဗာဟိတေ, အာပတ္တိ ပါစိတ္တိယဿ။

အဂါရိကဿ ဝါ ပရိဗ္ဗာဇကဿ ဝါ ပရိဗ္ဗာဇိကာယ ဝါ သမဏစီဝရံ ဒေန္တီ ဒွေ အာပတ္တိယော အာပဇ္ဇတိ။ ဒေတိ, ပယောဂေ ဒုက္ကဋံ; ဒိန္နေ, အာပတ္တိ ပါစိတ္တိယဿ။

ဒုဗ္ဗလစီဝရပစ္စာသာ စီဝရကာလသမယံ အတိက္ကာမေန္တီ ဒွေ အာပတ္တိယော အာပဇ္ဇတိ။ အတိက္ကာမေတိ, ပယောဂေ ဒုက္ကဋံ; အတိက္ကာမိတေ, အာပတ္တိ ပါစိတ္တိယဿ။

ဓမ္မိကံ ကထိနုဒ္ဓါရံ ပဋိဗာဟန္တီ ဒွေ အာပတ္တိယော အာပဇ္ဇတိ။ ပဋိဗာဟတိ, ပယောဂေ ဒုက္ကဋံ; ပဋိဗာဟိတေ, အာပတ္တိ ပါစိတ္တိယဿ။

နဟာနဝဂ္ဂေါ တတိယော။

၄. တုဝဋ္ဋဝဂ္ဂေါ

၂၃၄. ဒွေ ဘိက္ခုနိယော ဧကမဉ္စေ တုဝဋ္ဋေန္တိယော ဒွေ အာပတ္တိယော အာပဇ္ဇန္တိ။ နိပဇ္ဇန္တိ, ပယောဂေ ဒုက္ကဋံ; နိပန္နေ, အာပတ္တိ ပါစိတ္တိယဿ။

ဒွေ ဘိက္ခုနိယော ဧကတ္ထရဏပါဝုရဏာ တုဝဋ္ဋေန္တိယော ဒွေ အာပတ္တိယော အာပဇ္ဇန္တိ။ နိပဇ္ဇန္တိ, ပယောဂေ ဒုက္ကဋံ; နိပန္နေ, အာပတ္တိ ပါစိတ္တိယဿ။

ဘိက္ခုနိယာ သဉ္စိစ္စ အဖာသုံ ကရောန္တီ ဒွေ အာပတ္တိယော အာပဇ္ဇတိ။ ကရောတိ, ပယောဂေ ဒုက္ကဋံ; ကတေ, အာပတ္တိ ပါစိတ္တိယဿ။

ဒုက္ခိတံ သဟဇီဝိနိံ နေဝ ဥပဋ္ဌေန္တီ န ဥပဋ္ဌာပနာယ ဥဿုက္ကံ ကရောန္တီ ဧကံ အာပတ္တိံ အာပဇ္ဇတိ။ ပါစိတ္တိယံ။

ဘိက္ခုနိယာ ဥပဿယံ ဒတွာ ကုပိတာ အနတ္တမနာ နိက္ကဍ္ဎန္တီ ဒွေ အာပတ္တိယော အာပဇ္ဇတိ။ နိက္ကဍ္ဎတိ, ပယောဂေ ဒုက္ကဋံ; နိက္ကဍ္ဎိတေ, အာပတ္တိ ပါစိတ္တိယဿ။

သံသဋ္ဌာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇန္တီ ဒွေ အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ကမ္မဝါစာပရိယောသာနေ အာပတ္တိ ပါစိတ္တိယဿ။

အန္တောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာ စာရိကံ စရန္တီ ဒွေ အာပတ္တိယော အာပဇ္ဇတိ။ ပဋိပဇ္ဇတိ, ပယောဂေ ဒုက္ကဋံ; ပဋိပန္နေ, အာပတ္တိ ပါစိတ္တိယဿ။

တိရောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာ စာရိကံ စရန္တီ ဒွေ အာပတ္တိယော အာပဇ္ဇတိ။ ပဋိပဇ္ဇတိ, ပယောဂေ ဒုက္ကဋံ; ပဋိပန္နေ, အာပတ္တိ ပါစိတ္တိယဿ။

အန္တောဝဿံ စာရိကံ စရန္တီ ဒွေ အာပတ္တိယော အာပဇ္ဇတိ။ ပဋိပဇ္ဇတိ, ပယောဂေ ဒုက္ကဋံ; ပဋိပန္နေ, အာပတ္တိ ပါစိတ္တိယဿ။

ဝဿံဝုဋ္ဌာ ဘိက္ခုနီ စာရိကံ န ပက္ကမန္တီ ဧကံ အာပတ္တိံ အာပဇ္ဇတိ။ ပါစိတ္တိယံ။

တုဝဋ္ဋဝဂ္ဂေါ စတုတ္ထော။

၅. စိတ္တာဂါရဝဂ္ဂေါ

၂၃၅. ရာဇာဂါရံ ဝါ စိတ္တာဂါရံ ဝါ အာရာမံ ဝါ ဥယျာနံ ဝါ ပေါက္ခရဏိံ ဝါ ဒဿနာယ ဂစ္ဆန္တီ ဒွေ အာပတ္တိယော အာပဇ္ဇတိ။ ဂစ္ဆတိ, အာပတ္တိ ဒုက္ကဋဿ; ယတ္ထ ဌိတာ ပဿတိ, အာပတ္တိ ပါစိတ္တိယဿ။

အာသန္ဒိံ ဝါ ပလ္လင်္ကံ ဝါ ပရိဘုဉ္ဇန္တီ ဒွေ အာပတ္တိယော အာပဇ္ဇတိ။ ပရိဘုဉ္ဇတိ, ပယောဂေ ဒုက္ကဋံ; ပရိဘုတ္တေ, အာပတ္တိ ပါစိတ္တိယဿ။

သုတ္တံ ကန္တန္တီ ဒွေ အာပတ္တိယော အာပဇ္ဇတိ။ ကန္တတိ, ပယောဂေ ဒုက္ကဋံ; ဥဇ္ဇဝုဇ္ဇဝေ, အာပတ္တိ ပါစိတ္တိယဿ။

ဂိဟိဝေယျာဝစ္စံ ကရောန္တီ ဒွေ အာပတ္တိယော အာပဇ္ဇတိ။ ကရောတိ, ပယောဂေ ဒုက္ကဋံ; ကတေ, အာပတ္တိ ပါစိတ္တိယဿ။

ဘိက္ခုနိယာ – ‘‘ဧဟာယျေ ဣမံ အဓိကရဏံ ဝူပသမေဟီ’’တိ ဝုစ္စမာနာ – ‘‘သာဓူ’’တိ ပဋိဿုဏိတွာ နေဝ ဝူပသမေန္တီ န ဝူပသမာယ ဥဿုက္ကံ ကရောန္တီ ဧကံ အာပတ္တိံ အာပဇ္ဇတိ။ ပါစိတ္တိယံ။

အဂါရိကဿ ဝါ ပရိဗ္ဗာဇကဿ ဝါ ပရိဗ္ဗာဇိကာယ ဝါ သဟတ္ထာ ခါဒနီယံ ဝါ ဘောဇနီယံ ဝါ ဒေန္တီ ဒွေ အာပတ္တိယော အာပဇ္ဇတိ။ ဒေတိ, ပယောဂေ ဒုက္ကဋံ; ဒိန္နေ, အာပတ္တိ ပါစိတ္တိယဿ။

အာဝသထစီဝရံ အနိဿဇ္ဇိတွာ ပရိဘုဉ္ဇန္တီ ဒွေ အာပတ္တိယော အာပဇ္ဇတိ။ ပရိဘုဉ္ဇတိ, ပယောဂေ ဒုက္ကဋံ; ပရိဘုတ္တေ, အာပတ္တိ ပါစိတ္တိယဿ။

အာဝသထံ အနိဿဇ္ဇိတွာ စာရိကံ ပက္ကမန္တီ ဒွေ အာပတ္တိယော အာပဇ္ဇတိ။ ပဌမံ ပါဒံ ပရိက္ခေပံ အတိက္ကာမေတိ, အာပတ္တိ ဒုက္ကဋဿ; ဒုတိယံ ပါဒံ အတိက္ကာမေတိ, အာပတ္တိ ပါစိတ္တိယဿ။

တိရစ္ဆာနဝိဇ္ဇံ ပရိယာပုဏန္တီ ဒွေ အာပတ္တိယော အာပဇ္ဇတိ။ ပရိယာပုဏာတိ, ပယောဂေ ဒုက္ကဋံ; ပဒေ ပဒေ အာပတ္တိ ပါစိတ္တိယဿ။

တိရစ္ဆာနဝိဇ္ဇံ ဝါစေန္တီ ဒွေ အာပတ္တိယော အာပဇ္ဇတိ။ ဝါစေတိ, ပယောဂေ ဒုက္ကဋံ; ပဒေ ပဒေ အာပတ္တိ ပါစိတ္တိယဿ။

စိတ္တာဂါရဝဂ္ဂေါ ပဉ္စမော။

၆. အာရာမဝဂ္ဂေါ

၂၃၆. ဇာနံ သဘိက္ခုကံ အာရာမံ အနာပုစ္ဆာ ပဝိသန္တီ ဒွေ အာပတ္တိယော အာပဇ္ဇတိ။ ပဌမံ ပါဒံ ပရိက္ခေပံ အတိက္ကာမေတိ, အာပတ္တိ ဒုက္ကဋဿ; ဒုတိယံ ပါဒံ အတိက္ကာမေတိ, အာပတ္တိ ပါစိတ္တိယဿ။

ဘိက္ခုံ အက္ကောသန္တီ ပရိဘာသန္တီ ဒွေ အာပတ္တိယော အာပဇ္ဇတိ။ အက္ကောသတိ, ပယောဂေ ဒုက္ကဋံ; အက္ကောသိတေ, အာပတ္တိ ပါစိတ္တိယဿ။

စဏ္ဍီကတာ ဂဏံ ပရိဘာသန္တီ ဒွေ အာပတ္တိယော အာပဇ္ဇတိ။ ပရိဘာသတိ, ပယောဂေ ဒုက္ကဋံ; ပရိဘာသိတေ, အာပတ္တိ ပါစိတ္တိယဿ။

နိမန္တိတာ ဝါ ပဝါရိတာ ဝါ ခါဒနီယံ ဝါ ဘောဇနီယံ ဝါ ဘုဉ္ဇန္တီ ဒွေ အာပတ္တိယော အာပဇ္ဇတိ။ ‘‘ခါဒိဿာမိ ဘုဉ္ဇိဿာမီ’’တိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ။

ကုလံ မစ္ဆရာယန္တီ ဒွေ အာပတ္တိယော အာပဇ္ဇတိ။ မစ္ဆရာယတိ, ပယောဂေ ဒုက္ကဋံ; မစ္ဆရိတေ, အာပတ္တိ ပါစိတ္တိယဿ။

အဘိက္ခုကေ အာဝါသေ ဝဿံ ဝသန္တီ ဒွေ အာပတ္တိယော အာပဇ္ဇတိ။ ‘‘ဝဿံ ဝသိဿာမီ’’တိ သေနာသနံ ပညပေတိ ပါနီယံ ပရိဘောဇနီယံ ဥပဋ္ဌပေတိ ပရိဝေဏံ သမ္မဇ္ဇတိ, အာပတ္တိ ဒုက္ကဋဿ; သဟ အရုဏုဂ္ဂမနာ အာပတ္တိ ပါစိတ္တိယဿ။

ဝဿံဝုဋ္ဌာ ဘိက္ခုနီ ဥဘတောသံဃေ တီဟိ ဌာနေဟိ န ပဝါရေန္တီ ဧကံ အာပတ္တိံ အာပဇ္ဇတိ။ ပါစိတ္တိယံ။

ဩဝါဒါယ ဝါ သံဝါသာယ ဝါ န ဂစ္ဆန္တီ ဧကံ အာပတ္တိံ အာပဇ္ဇတိ။ ပါစိတ္တိယံ။

ဥပေါသထမ္ပိ န ပုစ္ဆန္တီ ဩဝါဒမ္ပိ န ယာစန္တီ ဧကံ အာပတ္တိံ အာပဇ္ဇတိ။ ပါစိတ္တိယံ။

ပသာခေ ဇာတံ ဂဏ္ဍံ ဝါ ရုဓိတံ ဝါ အနပလောကေတွာ သသံဃံ ဝါ ဂဏံ ဝါ ပုရိသေန သဒ္ဓိံ ဧကေနေကာ ဘေဒါပေန္တီ ဒွေ အာပတ္တိယော အာပဇ္ဇတိ။ ဘေဒါပေတိ, ပယောဂေ ဒုက္ကဋံ; ဘိန္နေ, အာပတ္တိ ပါစိတ္တိယဿ။

အာရာမဝဂ္ဂေါ ဆဋ္ဌော။

၇. ဂဗ္ဘိနီဝဂ္ဂေါ

၂၃၇. ဂဗ္ဘိနိံ ဝုဋ္ဌာပေန္တီ ဒွေ အာပတ္တိယော အာပဇ္ဇတိ။ ဝုဋ္ဌာပေတိ, ပယောဂေ ဒုက္ကဋံ; ဝုဋ္ဌာပိတေ, အာပတ္တိ ပါစိတ္တိယဿ။

ပါယန္တိံ ဝုဋ္ဌာပေန္တီ ဒွေ အာပတ္တိယော အာပဇ္ဇတိ။ ဝုဋ္ဌာပေတိ, ပယောဂေ ဒုက္ကဋံ; ဝုဋ္ဌာပိတေ, အာပတ္တိ ပါစိတ္တိယဿ။

ဒွေ ဝဿာနိ ဆသု ဓမ္မေသု အသိက္ခိတသိက္ခံ သိက္ခမာနံ ဝုဋ္ဌာပေန္တီ ဒွေ အာပတ္တိယော အာပဇ္ဇတိ။ ဝုဋ္ဌာပေတိ, ပယောဂေ ဒုက္ကဋံ; ဝုဋ္ဌာပိတေ, အာပတ္တိ ပါစိတ္တိယဿ။

ဒွေ ဝဿာနိ ဆသု ဓမ္မေသု သိက္ခိတသိက္ခံ သိက္ခမာနံ သံဃေန အသမ္မတံ ဝုဋ္ဌာပေန္တီ ဒွေ အာပတ္တိယော အာပဇ္ဇတိ။ ဝုဋ္ဌာပေတိ, ပယောဂေ ဒုက္ကဋံ; ဝုဋ္ဌာပိတေ, အာပတ္တိ ပါစိတ္တိယဿ။

ဦနဒွါဒသဝဿံ ဂိဟိဂတံ ဝုဋ္ဌာပေန္တီ ဒွေ အာပတ္တိယော အာပဇ္ဇတိ။ ဝုဋ္ဌာပေတိ, ပယောဂေ ဒုက္ကဋံ; ဝုဋ္ဌာပိတေ, အာပတ္တိ ပါစိတ္တိယဿ။

ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေန္တီ ဒွေ အာပတ္တိယော အာပဇ္ဇတိ။ ဝုဋ္ဌာပေတိ, ပယောဂေ ဒုက္ကဋံ; ဝုဋ္ဌာပိတေ, အာပတ္တိ ပါစိတ္တိယဿ။

ပရိပုဏ္ဏဒွါဒသဝဿံ ဂိဟိဂတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန အသမ္မတံ ဝုဋ္ဌာပေန္တီ ဒွေ အာပတ္တိယော အာပဇ္ဇတိ။ ဝုဋ္ဌာပေတိ, ပယောဂေ ဒုက္ကဋံ; ဝုဋ္ဌာပိတေ, အာပတ္တိ ပါစိတ္တိယဿ။

သဟဇီဝိနိံ ဝုဋ္ဌာပေတွာ ဒွေ ဝဿာနိ နေဝ အနုဂ္ဂဏှန္တီ နာနုဂ္ဂဏှာပေန္တီ ဧကံ အာပတ္တိံ အာပဇ္ဇတိ။ ပါစိတ္တိယံ။

ဝုဋ္ဌာပိတံ ပဝတ္တိနိံ ဒွေ ဝဿာနိ နာနုဗန္ဓန္တီ ဧကံ အာပတ္တိံ အာပဇ္ဇတိ။ ပါစိတ္တိယံ။

သဟဇီဝိနိံ ဝုဋ္ဌာပေတွာ နေဝ ဝူပကာသေန္တီ န ဝူပကာသာပေန္တီ ဧကံ အာပတ္တိံ အာပဇ္ဇတိ။ ပါစိတ္တိယံ။

ဂဗ္ဘိနီဝဂ္ဂေါ သတ္တမော။

၈. ကုမာရီဘူတဝဂ္ဂေါ

၂၃၈. ဦနဝီသတိဝဿံ ကုမာရိဘူတံ ဝုဋ္ဌာပေန္တီ ဒွေ အာပတ္တိယော အာပဇ္ဇတိ။ ဝုဋ္ဌာပေတိ, ပယောဂေ ဒုက္ကဋံ; ဝုဋ္ဌာပိတေ, အာပတ္တိ ပါစိတ္တိယဿ။

ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု အသိက္ခိတသိက္ခံ ဝုဋ္ဌာပေန္တီ ဒွေ အာပတ္တိယော အာပဇ္ဇတိ။ ဝုဋ္ဌာပေတိ, ပယောဂေ ဒုက္ကဋံ; ဝုဋ္ဌာပိတေ, အာပတ္တိ ပါစိတ္တိယဿ။

ပရိပုဏ္ဏဝီသတိဝဿံ ကုမာရိဘူတံ ဒွေ ဝဿာနိ ဆသု ဓမ္မေသု သိက္ခိတသိက္ခံ သံဃေန အသမ္မတံ ဝုဋ္ဌာပေန္တီ ဒွေ အာပတ္တိယော အာပဇ္ဇတိ ။ ဝုဋ္ဌာပေတိ, ပယောဂေ ဒုက္ကဋံ; ဝုဋ္ဌာပိတေ, အာပတ္တိ ပါစိတ္တိယဿ။

ဦနဒွါဒသဝဿာ ဝုဋ္ဌာပေန္တီ ဒွေ အာပတ္တိယော အာပဇ္ဇတိ။ ဝုဋ္ဌာပေတိ, ပယောဂေ ဒုက္ကဋံ; ဝုဋ္ဌာပိတေ, အာပတ္တိ ပါစိတ္တိယဿ။

ပရိပုဏ္ဏဒွါဒသဝဿာ သံဃေန အသမ္မတာ ဝုဋ္ဌာပေန္တီ ဒွေ အာပတ္တိယော အာပဇ္ဇတိ။ ဝုဋ္ဌာပေတိ, ပယောဂေ ဒုက္ကဋံ; ဝုဋ္ဌာပိတေ, အာပတ္တိ ပါစိတ္တိယဿ။

‘‘အလံ တာဝ တေ, အယျေ, ဝုဋ္ဌာပိတေနာ’’တိ ဝုစ္စမာနာ ‘‘သာဓူ’’တိ ပဋိဿုဏိတွာ ပစ္ဆာ ခီယနဓမ္မံ အာပဇ္ဇန္တီ ဒွေ အာပတ္တိယော အာပဇ္ဇတိ။ ခိယျတိ, ပယောဂေ ဒုက္ကဋံ; ခိယျိတေ, အာပတ္တိ ပါစိတ္တိယဿ။

သိက္ခမာနံ – ‘‘သစေ မေ တွံ, အယျေ, စီဝရံ ဒဿသိ, ဧဝါဟံ တံ ဝုဋ္ဌာပေဿာမီ’’တိ ဝတွာ နေဝ ဝုဋ္ဌာပေန္တီ န ဝုဋ္ဌာပနာယ ဥဿုက္ကံ ကရောန္တီ ဧကံ အာပတ္တိံ အာပဇ္ဇတိ။ ပါစိတ္တိယံ။

သိက္ခမာနံ – ‘‘သစေ မံ တွံ, အယျေ, ဒွေ ဝဿာနိ အနုဗန္ဓိဿသိ, ဧဝါဟံ တံ ဝုဋ္ဌာပေဿာမီ’’တိ ဝတွာ နေဝ ဝုဋ္ဌာပေန္တီ န ဝုဋ္ဌာပနာယ ဥဿုက္ကံ ကရောန္တီ ဧကံ အာပတ္တိံ အာပဇ္ဇတိ။ ပါစိတ္တိယံ။

ပုရိသသံသဋ္ဌံ ကုမာရကသံသဋ္ဌံ စဏ္ဍိံ သောကာဝါသံ သိက္ခမာနံ ဝုဋ္ဌာပေန္တီ ဒွေ အာပတ္တိယော အာပဇ္ဇတိ။ ဝုဋ္ဌာပေတိ, ပယောဂေ ဒုက္ကဋံ; ဝုဋ္ဌာပိတေ, အာပတ္တိ ပါစိတ္တိယဿ။

မာတာပိတူဟိ ဝါ သာမိကေန ဝါ အနနုညာတံ သိက္ခမာနံ ဝုဋ္ဌာပေန္တီ ဒွေ အာပတ္တိယော အာပဇ္ဇတိ။ ဝုဋ္ဌာပေတိ, ပယောဂေ ဒုက္ကဋံ; ဝုဋ္ဌာပိတေ, အာပတ္တိ ပါစိတ္တိယဿ။

ပါရိဝါသိကဆန္ဒဒါနေ သိက္ခမာနံ ဝုဋ္ဌာပေန္တီ ဒွေ အာပတ္တိယော အာပဇ္ဇတိ။ ဝုဋ္ဌာပေတိ, ပယောဂေ ဒုက္ကဋံ; ဝုဋ္ဌာပိတေ, အာပတ္တိ ပါစိတ္တိယဿ။

အနုဝဿံ ဝုဋ္ဌာပေန္တီ ဒွေ အာပတ္တိယော အာပဇ္ဇတိ။ ဝုဋ္ဌာပေတိ, ပယောဂေ ဒုက္ကဋံ; ဝုဋ္ဌာပိတေ, အာပတ္တိ ပါစိတ္တိယဿ။

ဧကံ ဝဿံ ဒွေ ဝုဋ္ဌာပေန္တီ ဒွေ အာပတ္တိယော အာပဇ္ဇတိ။ ဝုဋ္ဌာပေတိ, ပယောဂေ ဒုက္ကဋံ; ဝုဋ္ဌာပိတေ, အာပတ္တိ ပါစိတ္တိယဿ။

ကုမာရီဘူတဝဂ္ဂေါ အဋ္ဌမော။

၉. ဆတ္တုပါဟနဝဂ္ဂေါ

၂၃၉. ဆတ္တုပါဟနံ ဓါရေန္တီ ဒွေ အာပတ္တိယော အာပဇ္ဇတိ။ ဓါရေတိ, ပယောဂေ ဒုက္ကဋံ; ဓါရိတေ, အာပတ္တိ ပါစိတ္တိယဿ။

ယာနေန ယာယန္တီ ဒွေ အာပတ္တိယော အာပဇ္ဇတိ။ ယာယတိ, ပယောဂေ ဒုက္ကဋံ; ယာယိတေ, အာပတ္တိ ပါစိတ္တိယဿ။

သံဃာဏိံ ဓါရေန္တီ ဒွေ အာပတ္တိယော အာပဇ္ဇတိ။ ဓါရေတိ, ပယောဂေ ဒုက္ကဋံ; ဓါရိတေ, အာပတ္တိ ပါစိတ္တိယဿ။

ဣတ္ထာလင်္ကာရံ ဓါရေန္တီ ဒွေ အာပတ္တိယော အာပဇ္ဇတိ။ ဓါရေတိ, ပယောဂေ ဒုက္ကဋံ; ဓါရိတေ, အာပတ္တိ ပါစိတ္တိယဿ။

ဂန္ဓဝဏ္ဏကေန နဟာယန္တီ ဒွေ အာပတ္တိယော အာပဇ္ဇတိ။ နဟာယတိ , ပယောဂေ ဒုက္ကဋံ; နဟာနပရိယောသာနေ, အာပတ္တိ ပါစိတ္တိယဿ။

ဝါသိတကေန ပိညာကေန နဟာယန္တီ ဒွေ အာပတ္တိယော အာပဇ္ဇတိ။ နဟာယတိ, ပယောဂေ ဒုက္ကဋံ; နဟာနပရိယောသာနေ, အာပတ္တိ ပါစိတ္တိယဿ။

ဘိက္ခုနိယာ ဥမ္မဒ္ဒါပေန္တီ ပရိမဒ္ဒါပေန္တီ ဒွေ အာပတ္တိယော အာပဇ္ဇတိ။ ဥမ္မဒ္ဒါပေတိ, ပယောဂေ ဒုက္ကဋံ; ဥမ္မဒ္ဒိတေ, အာပတ္တိ ပါစိတ္တိယဿ။

သိက္ခမာနာယ ဥမ္မဒ္ဒါပေန္တီ ပရိမဒ္ဒါပေန္တီ ဒွေ အာပတ္တိယော အာပဇ္ဇတိ။ ဥမ္မဒ္ဒါပေတိ, ပယောဂေ ဒုက္ကဋံ; ဥမ္မဒ္ဒိတေ, အာပတ္တိ ပါစိတ္တိယဿ။

သာမဏေရိယာ ဥမ္မဒ္ဒါပေန္တီ ပရိမဒ္ဒါပေန္တီ ဒွေ အာပတ္တိယော အာပဇ္ဇတိ။ ဥမ္မဒ္ဒါပေတိ, ပယောဂေ ဒုက္ကဋံ; ဥမ္မဒ္ဒိတေ, အာပတ္တိ ပါစိတ္တိယဿ။

ဂိဟိနိယာ ဥမ္မဒ္ဒါပေန္တီ ပရိမဒ္ဒါပေန္တီ ဒွေ အာပတ္တိယော အာပဇ္ဇတိ။ ဥမ္မဒ္ဒါပေတိ, ပယောဂေ ဒုက္ကဋံ; ဥမ္မဒ္ဒိတေ, အာပတ္တိ ပါစိတ္တိယဿ။

ဘိက္ခုဿ ပုရတော အနာပုစ္ဆာ အာသနေ နိသီဒန္တီ ဒွေ အာပတ္တိယော အာပဇ္ဇတိ။ နိသီဒတိ, ပယောဂေ ဒုက္ကဋံ; နိသိန္နေ, အာပတ္တိ ပါစိတ္တိယဿ။

အနောကာသကတံ ဘိက္ခုံ ပဉ္ဟံ ပုစ္ဆန္တီ ဒွေ အာပတ္တိယော အာပဇ္ဇတိ။ ပုစ္ဆတိ, ပယောဂေ ဒုက္ကဋံ; ပုစ္ဆိတေ, အာပတ္တိ ပါစိတ္တိယဿ။

အသင်္ကစ္စိကာ ဂါမံ ပဝိသန္တီ ဒွေ အာပတ္တိယော အာပဇ္ဇတိ။ ပဌမံ ပါဒံ ပရိက္ခေပံ အတိက္ကာမေတိ, အာပတ္တိ ဒုက္ကဋဿ; ဒုတိယံ ပါဒံ အတိက္ကာမေတိ, အာပတ္တိ ပါစိတ္တိယဿ။

ဆတ္တုပါဟနဝဂ္ဂေါ နဝမော။

ခုဒ္ဒကံ နိဋ္ဌိတံ။

၅. ပါဋိဒေသနီယကဏ္ဍံ

၂၄၀. သပ္ပိံ ဝိညာပေတွာ ဘုဉ္ဇန္တီ ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ။

တေလံ ဝိညာပေတွာ ဘုဉ္ဇန္တီ ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ။

မဓုံ ဝိညာပေတွာ ဘုဉ္ဇန္တီ ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ။

ဖာဏိတံ ဝိညာပေတွာ ဘုဉ္ဇန္တီ ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ။

မစ္ဆံ ဝိညာပေတွာ ဘုဉ္ဇန္တီ ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ။

မံသံ ဝိညာပေတွာ ဘုဉ္ဇန္တီ ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ။

ခီရံ ဝိညာပေတွာ ဘုဉ္ဇန္တီ ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ။

ဒဓိံ ဝိညာပေတွာ ဘုဉ္ဇန္တီ ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ။

အဋ္ဌ ပါဋိဒေသနီယာ နိဋ္ဌိတာ။

ကတာပတ္တိဝါရော နိဋ္ဌိတော ဒုတိယော။

၃. ဝိပတ္တိဝါရော

၂၄၁. အဝဿုတာ ဘိက္ခုနိယာ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တိယာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? အဝဿုတာယ ဘိက္ခုနိယာ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တိယာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ, သိယာ အာစာရဝိပတ္တိံ။ပေ.။။

ဒဓိံ ဝိညာပေတွာ ဘုဉ္ဇန္တိယာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? ဒဓိံ ဝိညာပေတွာ ဘုဉ္ဇန္တိယာ အာပတ္တိယော စတုန္နံ ဝိပတ္တီနံ ဧကံ ဝိပတ္တိံ ဘဇန္တိ – အာစာရဝိပတ္တိံ။

ဝိပတ္တိဝါရော နိဋ္ဌိတော တတိယော။

၄. သင်္ဂဟဝါရော

၂၄၂. အဝဿုတာ ဘိက္ခုနိယာ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တိယာ အာပတ္တိယော သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? အဝဿုတာယ ဘိက္ခုနိယာ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တိယာ အာပတ္တိယော သတ္တန္နံ အာပတ္တိက္ခန္ဓာနံ တီဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန, သိယာ ထုလ္လစ္စယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ပေ.။။

ဒဓိံ ဝိညာပေတွာ ဘုဉ္ဇန္တိယာ အာပတ္တိယော သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဒဓိံ ဝိညာပေတွာ ဘုဉ္ဇန္တိယာ အာပတ္တိယော သတ္တန္နံ အာပတ္တိက္ခန္ဓာနံ ဒွီဟိ အာပတ္တိက္ခန္ဓေဟိ သင်္ဂဟိတာ – သိယာ ပါဋိဒေသနီယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။

သင်္ဂဟဝါရော နိဋ္ဌိတော စတုတ္ထော။

၅. သမုဋ္ဌာနဝါရော

၂၄၃. အဝဿုတာယ ဘိက္ခုနိယာ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တိယာ အာပတ္တိယော ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? အဝဿုတာယ ဘိက္ခုနိယာ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တိယာ အာပတ္တိယော ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ စိတ္တတော စ သမုဋ္ဌန္တိ, န ဝါစတော။ပေ.။။

ဒဓိံ ဝိညာပေတွာ ဘုဉ္ဇန္တိယာ အာပတ္တိယော ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? ဒဓိံ ဝိညာပေတွာ ဘုဉ္ဇန္တိယာ အာပတ္တိယော ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌန္တိ – သိယာ ကာယတော သမုဋ္ဌန္တိ, န ဝါစတော န စိတ္တတော; သိယာ ကာယတော စ ဝါစတော စ သမုဋ္ဌန္တိ, န စိတ္တတော; သိယာ ကာယတော စ စိတ္တတော စ သမုဋ္ဌန္တိ, န ဝါစတော; သိယာ ကာယတော စ ဝါစတော စ စိတ္တတော စ သမုဋ္ဌန္တိ။

သမုဋ္ဌာနဝါရော နိဋ္ဌိတော ပဉ္စမော။

၆. အဓိကရဏဝါရော

၂၄၄. အဝဿုတာ ဘိက္ခုနိယာ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တိယာ အာပတ္တိယော စတုန္နံ အဓိကရဏာနံ ကတမံ အဓိကရဏံ? အဝဿုတာယ ဘိက္ခုနိယာ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တိယာ အာပတ္တိယော စတုန္နံ အဓိကရဏာနံ – အာပတ္တာဓိကရဏံ။ပေ.။။

ဒဓိံ ဝိညာပေတွာ ဘုဉ္ဇန္တိယာ အာပတ္တိယော စတုန္နံ အဓိကရဏာနံ ကတမံ အဓိကရဏံ? ဒဓိံ ဝိညာပေတွာ ဘုဉ္ဇန္တိယာ အာပတ္တိယော စတုန္နံ အဓိကရဏာနံ – အာပတ္တာဓိကရဏံ။

အဓိကရဏဝါရော နိဋ္ဌိတော ဆဋ္ဌော။

၇. သမထဝါရော

၂၄၅. အဝဿုတာယ ဘိက္ခုနိယာ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တိယာ အာပတ္တိယော သတ္တန္နံ သမထာနံ ကတိဟိ သမထေဟိ သမ္မန္တိ? အဝဿုတာယ ဘိက္ခုနိယာ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တိယာ အာပတ္တိယော သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စ။ပေ.။။

ဒဓိံ ဝိညာပေတွာ ဘုဉ္ဇန္တိယာ အာပတ္တိယော သတ္တန္နံ သမထာနံ ကတိဟိ သမထေဟိ သမ္မန္တိ? ဒဓိံ ဝိညာပေတွာ ဘုဉ္ဇန္တိယာ အာပတ္တိယော သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စ။

သမထဝါရော နိဋ္ဌိတော သတ္တမော။

၈. သမုစ္စယဝါရော

၂၄၆. အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တီ ကတိ အာပတ္တိယော အာပဇ္ဇတိ? အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တီ တိဿော အာပတ္တိယော အာပဇ္ဇတိ။ အဓက္ခကံ ဥဗ္ဘဇာဏုမဏ္ဍလံ ဂဟဏံ သာဒိယတိ, အာပတ္တိ ပါရာဇိကဿ; ဥဗ္ဘက္ခကံ အဓေါဇာဏုမဏ္ဍလံ ဂဟဏံ သာဒိယတိ, အာပတ္တိ ထုလ္လစ္စယဿ; ကာယပဋိဗဒ္ဓံ ဂဟဏံ သာဒိယတိ, အာပတ္တိ ဒုက္ကဋဿ – အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တီ ဣမာ တိဿော အာပတ္တိယော အာပဇ္ဇတိ။

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ, သိယာ အာစာရဝိပတ္တိံ။ သတ္တန္နံ အာပတ္တိက္ခန္ဓာနံ တီဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန, သိယာ ထုလ္လစ္စယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ စိတ္တတော စ သမုဋ္ဌန္တိ, န ဝါစတော။ စတုန္နံ အဓိကရဏာနံ အာပတ္တာဓိကရဏံ။ သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စ။ပေ.။။

ဒဓိံ ဝိညာပေတွာ ဘုဉ္ဇန္တီ ကတိ အာပတ္တိယော အာပဇ္ဇတိ? ဒဓိံ ဝိညာပေတွာ ဘုဉ္ဇန္တီ ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ – ဒဓိံ ဝိညာပေတွာ ဘုဉ္ဇန္တီ ဣမာ ဒွေ အာပတ္တိယော အာပဇ္ဇတိ။

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဧကံ ဝိပတ္တိံ ဘဇန္တိ – အာစာရဝိပတ္တိံ။ သတ္တန္နံ အာပတ္တိက္ခန္ဓာနံ ဒွီဟိ အာပတ္တိက္ခန္ဓေဟိ သင်္ဂဟိတာ – သိယာ ပါဋိဒေသနီယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌန္တိ – သိယာ ကာယတော သမုဋ္ဌန္တိ န ဝါစတော န စိတ္တတော, သိယာ ကာယတော စ ဝါစတော စ သမုဋ္ဌန္တိ န စိတ္တတော, သိယာ ကာယတော စ စိတ္တတော စ သမုဋ္ဌန္တိ န ဝါစတော, သိယာ ကာယတော စ ဝါစတော စ စိတ္တတော စ သမုဋ္ဌန္တိ။ စတုန္နံ အဓိကရဏာနံ – အာပတ္တာဓိကရဏံ။ သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စ။

သမုစ္စယဝါရော နိဋ္ဌိတော အဋ္ဌမော။

၁. ကတ္ထပညတ္တိဝါရော

၁. ပါရာဇိကကဏ္ဍံ

၂၄၇. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ကာယသံသဂ္ဂံ သာဒိယနပစ္စယာ ပါရာဇိကံ ကတ္ထ ပညတ္တံ? ကံ အာရဗ္ဘ? ကိသ္မိံ ဝတ္ထုသ္မိံ။ပေ.။ ကေနာဘတန္တိ?

ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ကာယသံသဂ္ဂံ သာဒိယနပစ္စယာ ပါရာဇိကံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? သုန္ဒရီနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? သုန္ဒရီနန္ဒာ ဘိက္ခုနီ အဝဿုတာ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယိ, တသ္မိံ ဝတ္ထုသ္မိံ။ အတ္ထိ တတ္ထ ပညတ္တိ, အနုပညတ္တိ, အနုပ္ပန္နပညတ္တီတိ? ဧကာ ပညတ္တိ။ အနုပညတ္တိ အနုပ္ပန္နပညတ္တိ တသ္မိံ နတ္ထိ။ သဗ္ဗတ္ထပညတ္တိ, ပဒေသပညတ္တီတိ? သဗ္ဗတ္ထပညတ္တိ။ သာဓါရဏပညတ္တိ, အသာဓါရဏပညတ္တီတိ? အသာဓါရဏပညတ္တိ။ ဧကတောပညတ္တိ, ဥဘတောပညတ္တီတိ? ဧကတောပညတ္တိ။ စတုန္နံ ပါတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နန္တိ? နိဒါနောဂဓံ နိဒါနပရိယာပန္နံ? ကတမေန ဥဒ္ဒေသေန ဥဒ္ဒေသံ အာဂစ္ဆတီတိ? ဒုတိယေန ဥဒ္ဒေသေန ဥဒ္ဒေသံ အာဂစ္ဆတိ။ စတုန္နံ ဝိပတ္တီနံ ကတမာ ဝိပတ္တီတိ? သီလဝိပတ္တိ။ သတ္တန္နံ အာပတ္တိက္ခန္ဓာနံ ကတမော အာပတ္တိက္ခန္ဓောတိ ? ပါရာဇိကာပတ္တိက္ခန္ဓော။ ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတီတိ? ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ, န ဝါစတော။ပေ.။ ကေနာဘတန္တိ? ပရမ္ပရာဘတံ –

ဥပါလိ ဒါသကော စေဝ၊ သောဏကော သိဂ္ဂဝေါ တထာ။

မောဂ္ဂလိပုတ္တေန ပဉ္စမာ၊ ဧတေ ဇမ္ဗုသိရိဝ္ဟယေ။ ။ပေ.။။

ဧတေ နာဂါ မဟာပညာ၊ ဝိနယညူ မဂ္ဂကောဝိဒါ။

ဝိနယံ ဒီပေ ပကာသေသုံ၊ ပိဋကံ တမ္ဗပဏ္ဏိယာတိ။

ဝဇ္ဇပ္ပဋိစ္ဆာဒနပစ္စယာ ပါရာဇိကံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ဇာနံ ပါရာဇိကံ ဓမ္မံ အဇ္ဈာပန္နံ ဘိက္ခုနိံ နေဝတ္တနာ ပဋိစောဒေသိ န ဂဏဿ အာရောစေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

ယာဝတတိယံ သမနုဘာသနာယ န ပဋိနိဿဇ္ဇနပစ္စယာ ပါရာဇိကံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ သမဂ္ဂေန သံဃေန ဥက္ခိတ္တံ အရိဋ္ဌံ ဘိက္ခုံ ဂဒ္ဓဗာဓိပုဗ္ဗံ အနုဝတ္တိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

အဋ္ဌမံ ဝတ္ထုံ ပရိပူရဏပစ္စယာ ပါရာဇိကံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော အဋ္ဌမံ ဝတ္ထုံ ပရိပူရေသုံ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

ပါရာဇိကာ နိဋ္ဌိတာ။

၂. သံဃာဒိသေသကဏ္ဍာဒိ

၂၄၈. ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဥဿယဝါဒိကာယ ဘိက္ခုနိယာ အဍ္ဍံ ကရဏပစ္စယာ သံဃာဒိသေသော ကတ္ထ ပညတ္တော? ကံ အာရဗ္ဘ? ကိသ္မိံ ဝတ္ထုသ္မိံ။ပေ.။ ကေနာဘတန္တိ?

ယံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဥဿယဝါဒိကာယ ဘိက္ခုနိယာ အဍ္ဍံ ကရဏပစ္စယာ သံဃာဒိသေသော ကတ္ထ ပညတ္တောတိ ? သာဝတ္ထိယံ ပညတ္တော။ ကံ အာရဗ္ဘာတိ ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ ဥဿယဝါဒိကာ ဝိဟရိ, တသ္မိံ ဝတ္ထုသ္မိံ။ အတ္ထိ တတ္ထ ပညတ္တိ, အနုပညတ္တိ, အနုပ္ပန္နပညတ္တီတိ? ဧကာ ပညတ္တိ။ အနုပညတ္တိ အနုပ္ပန္နပညတ္တိ တသ္မိံ နတ္ထိ။ သဗ္ဗတ္ထပညတ္တိ, ပဒေသပညတ္တီတိ? သဗ္ဗတ္ထပညတ္တိ။ သာဓါရဏပညတ္တိ, အသာဓါရဏပညတ္တီတိ? အသာဓါရဏပညတ္တိ။ ဧကတောပညတ္တိ, ဥဘတောပညတ္တီတိ? ဧကတောပညတ္တိ။ စတုန္နံ ပါတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နန္တိ? နိဒါနောဂဓံ နိဒါနပရိယာပန္နံ။ ကတမေန ဥဒ္ဒေသေန ဥဒ္ဒေသံ အာဂစ္ဆတီတိ? တတိယေန ဥဒ္ဒေသေန ဥဒ္ဒေသံ အာဂစ္ဆတိ။ စတုန္နံ ဝိပတ္တီနံ ကတမာ ဝိပတ္တီတိ? သီလဝိပတ္တိ။ သတ္တန္နံ အာပတ္တိက္ခန္ဓာနံ ကတမော အာပတ္တိက္ခန္ဓောတိ? သံဃာဒိသေသာပတ္တိက္ခန္ဓော။ ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတီတိ? ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ ဝါစတော စ သမုဋ္ဌာတိ, န စိတ္တတော; သိယာ ကာယတော စ ဝါစတော စိတ္တတော စ သမုဋ္ဌာတိ။ပေ.။ ကေနာဘတန္တိ? ပရမ္ပရာဘတံ –

ဥပါလိ ဒါသကော စေဝ၊ သောဏကော သိဂ္ဂဝေါ တထာ။

မောဂ္ဂလိပုတ္တေန ပဉ္စမာ၊ ဧတေ ဇမ္ဗုသိရိဝ္ဟယေ။ ။ပေ.။။

ဧတေ နာဂါ မဟာပညာ၊ ဝိနယညူ မဂ္ဂကောဝိဒါ။

ဝိနယံ ဒီပေ ပကာသေသုံ၊ ပိဋကံ တမ္ဗပဏ္ဏိယာတိ။

စောရိံ ဝုဋ္ဌာပနပစ္စယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ စောရိံ ဝုဋ္ဌာပေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ဝါစတော စ စိတ္တတော စ သမုဋ္ဌာတိ, န ကာယတော; သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ.။။

ဧကာ ဂါမန္တရံ ဂမနပစ္စယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ ဧကာ ဂါမန္တရံ ဂစ္ဆိ, တသ္မိံ ဝတ္ထုသ္မိံ။ ဧကာ ပညတ္တိ, တိဿော အနုပညတ္တိယော။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ပဌမပါရာဇိကေ။ပေ.။။

သမဂ္ဂေန သံဃေန ဥက္ခိတ္တံ ဘိက္ခုနိံ ဓမ္မေန ဝိနယေန သတ္ထုသာသနေန အနပလောကေတွာ ကာရကသသံဃံ အနညာယ ဂဏဿ ဆန္ဒံ ဩသာရဏပစ္စယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ သမဂ္ဂေန သံဃေန ဥက္ခိတ္တံ ဘိက္ခုနိံ ဓမ္မေန ဝိနယေန သတ္ထုသာသနေန အနပလောကေတွာ ကာရကသသံဃံ အနညာယ ဂဏဿ ဆန္ဒံ ဩသာရေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

အဝဿုတာယ ဘိက္ခုနိယာ အဝဿုတဿ ပုရိသပုဂ္ဂလဿ ဟတ္ထတော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ဘုဉ္ဇနပစ္စယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? သုန္ဒရီနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? သုန္ဒရီနန္ဒာ ဘိက္ခုနီ အဝဿုတာ အဝဿုတဿ ပုရိသပုဂ္ဂလဿ ဟတ္ထတော အာမိသံ ပဋိဂ္ဂဟေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ပဌမပါရာဇိကေ။ပေ.။။

‘‘ကိံ တေ, အယျေ, ဧသော ပုရိသပုဂ္ဂလော ကရိဿတိ အဝဿုတော ဝါ အနဝဿုတော ဝါ, ယတော တွံ အနဝဿုတာ! ဣင်္ဃ, အယျေ, ယံ တေ ဧသော ပုရိသပုဂ္ဂလော ဒေတိ ခါဒနီယံ ဝါ ဘောဇနီယံ ဝါ တံ တွံ သဟတ္ထာ ပဋိဂ္ဂဟေတွာ ခါဒ ဝါ ဘုဉ္ဇ ဝါ’’တိ ဥယျောဇနပစ္စယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? အညတရံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? အညတရာ ဘိက္ခုနီ – ‘‘ကိံ တေ, အယျေ, ဧသော ပုရိသပုဂ္ဂလော ကရိဿတိ အဝဿုတော ဝါ အနဝဿုတော ဝါ, ယတော တွံ အနဝဿုတာ! ဣင်္ဃ, အယျေ, ယံ တေ ဧသော ပုရိသပုဂ္ဂလော ဒေတိ ခါဒနီယံ ဝါ ဘောဇနီယံ ဝါ တံ တွံ သဟတ္ထာ ပဋိဂ္ဂဟေတွာ ခါဒ ဝါ ဘုဉ္ဇ ဝါ’’တိ ဥယျောဇေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ.။။

ကုပိတာယ အနတ္တမနာယ ဘိက္ခုနိယာ ယာဝတတိယံ သမနုဘာသနာယ န ပဋိနိဿဇ္ဇနပစ္စယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? စဏ္ဍကာဠိံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? စဏ္ဍကာဠီ ဘိက္ခုနီ ကုပိတာ အနတ္တမနာ ဧဝံ အဝစ – ‘‘ဗုဒ္ဓံ ပစ္စာစိက္ခာမိ, ဓမ္မံ ပစ္စာစိက္ခာမိ, သသံဃံ ပစ္စာစိက္ခာမိ, သိက္ခံ ပစ္စာစိက္ခာမီ’’တိ, တသ္မိံ ဝတ္ထုသ္မိံ ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

ကိသ္မိဉ္စိဒေဝ အဓိကရဏေ ပစ္စာကတာယ ဘိက္ခုနိယာ ယာဝတတိယံ သမနုဘာသနာယ န ပဋိနိဿဇ္ဇနပစ္စယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? စဏ္ဍကာဠိံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? စဏ္ဍကာဠီ ဘိက္ခုနီ ကိသ္မိဉ္စိဒေဝ အဓိကရဏေ ပစ္စာကတာ ကုပိတာ အနတ္တမနာ ဧဝံ အဝစ – ‘‘ဆန္ဒဂါမိနိယော စ ဘိက္ခုနိယော, ဒေါသဂါမိနိယော စ ဘိက္ခုနိယော, မောဟဂါမိနိယော စ ဘိက္ခုနိယော, ဘယဂါမိနိယော စ ဘိက္ခုနိယော’’တိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

သံသဋ္ဌာနံ ဘိက္ခုနီနံ ယာဝတတိယံ သမနုဘာသနာယ န ပဋိနိဿဇ္ဇနပစ္စယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? သမ္ဗဟုလာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခုနိယော သံသဋ္ဌာ ဝိဟရိံသု, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

‘‘သံသဋ္ဌာ , အယျေ, တုမှေ ဝိဟရထ။ မာ တုမှေ နာနာ ဝိဟရိတ္ထာ’’တိ ဥယျောဇေန္တိယာ ယာဝတတိယံ သမနုဘာသနာယ န ပဋိနိဿဇ္ဇနပစ္စယာ သံဃာဒိသေသော ကတ္ထ ပညတ္တောတိ? သာဝတ္ထိယံ ပညတ္တော။ ကံ အာရဗ္ဘာတိ? ထုလ္လနန္ဒံ ဘိက္ခုနိံ အာရဗ္ဘ။ ကိသ္မိံ ဝတ္ထုသ္မိန္တိ? ထုလ္လနန္ဒာ ဘိက္ခုနီ – ‘‘သံသဋ္ဌာဝ အယျေ, တုမှေ ဝိဟရထ။ မာ တမှေ နာနာ ဝိဟရိတ္ထာ’’တိ ဥယျောဇေသိ, တသ္မိံ ဝတ္ထုသ္မိံ။ ဧကာ ပညတ္တိ။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ဓုရနိက္ခေပေ။ပေ.။။

ဒဓိံ ဝိညာပေတွာ ဘုဉ္ဇနပစ္စယာ ပါဋိဒေသနီယံ ကတ္ထ ပညတ္တန္တိ? သာဝတ္ထိယံ ပညတ္တံ။ ကံ အာရဗ္ဘာတိ? ဆဗ္ဗဂ္ဂိယာ ဘိက္ခုနိယော အာရဗ္ဘ။ ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခုနိယော ဒဓိံ ဝိညာပေတွာ ဘုဉ္ဇိံသု, တသ္မိံ ဝတ္ထုသ္မိံ။ ဧကာ ပညတ္တိ, ဧကာ အနုပညတ္တိ။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌာတိ။ပေ.။ ။

ကတ္ထပညတ္တိဝါရော နိဋ္ဌိတော ပဌမော။

၂. ကတာပတ္တိဝါရော

၁. ပါရာဇိကကဏ္ဍံ

၂၄၉. ကာယသံသဂ္ဂံ သာဒိယနပစ္စယာ ကတိ အာပတ္တိယော အာပဇ္ဇတိ? ကာယသံသဂ္ဂံ သာဒိယနပစ္စယာ ပဉ္စ အာပတ္တိယော အာပဇ္ဇတိ။ အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ အဓက္ခကံ ဥဗ္ဘဇာဏုမဏ္ဍလံ ဂဟဏံ သာဒိယတိ, အာပတ္တိ ပါရာဇိကဿ; ဘိက္ခု ကာယေန ကာယံ အာမသတိ, အာပတ္တိ သံဃာဒိသေသဿ; ကာယေန ကာယပဋိဗဒ္ဓံ အာမသတိ, အာပတ္တိ ထုလ္လစ္စယဿ; ကာယပဋိဗဒ္ဓေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ; အင်္ဂုလိပတောဒကေ ပါစိတ္တိယံ – ကာယသံသဂ္ဂံ သာဒိယနပစ္စယာ ဣမာ ပဉ္စ အာပတ္တိယော အာပဇ္ဇတိ။

ဝဇ္ဇပ္ပဋိစ္ဆာဒနပစ္စယာ ကတိ အာပတ္တိယော အာပဇ္ဇတိ? ဝဇ္ဇပ္ပဋိစ္ဆာဒနပစ္စယာ စတဿော အာပတ္တိယော အာပဇ္ဇတိ။ ဘိက္ခုနီ ဇာနံ ပါရာဇိကံ ဓမ္မံ [ဓမ္မံ အဇ္ဈာပန္နံ (သျာ.)] ပဋိစ္ဆာဒေတိ, အာပတ္တိ ပါရာဇိကဿ; ဝေမတိကာ ပဋိစ္ဆာဒေတိ, အာပတ္တိ ထုလ္လစ္စယဿ; ဘိက္ခု သံဃာဒိသေသံ ပဋိစ္ဆာဒေတိ, အာပတ္တိ ပါစိတ္တိယဿ; အာစာရဝိပတ္တိံ ပဋိစ္ဆာဒေတိ, အာပတ္တိ ဒုက္ကဋဿ – ဝဇ္ဇပ္ပဋိစ္ဆာဒနပစ္စယာ ဣမာ စတဿော အာပတ္တိယော အာပဇ္ဇတိ။

ယာဝတတိယံ သမနုဘာသနာယ န ပဋိနိဿဇ္ဇနပစ္စယာ ကတိ အာပတ္တိယော အာပဇ္ဇတိ? ယာဝတတိယံ သမနုဘာသနာယ န ပဋိနိဿဇ္ဇနပစ္စယာ ပဉ္စ အာပတ္တိယော အာပဇ္ဇတိ။ ဥက္ခိတ္တာနုဝတ္တိကာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇတိ, ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ ပါရာဇိကဿ; ဘေဒကာနုဝတ္တိကာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇတိ, အာပတ္တိ သံဃာဒိသေသဿ; ပါပိကာယ ဒိဋ္ဌိယာ ယာဝတတိယံ သမနုဘာသနာယ န ပဋိနိဿဇ္ဇတိ, အာပတ္တိ ပါစိတ္တိယဿ – ယာဝတတိယံ သမနုဘာသနာယ န ပဋိနိဿဇ္ဇနပစ္စယာ ဣမာ ပဉ္စ အာပတ္တိယော အာပဇ္ဇတိ။

အဋ္ဌမံ ဝတ္ထုံ ပရိပူရဏပစ္စယာ ကတိ အာပတ္တိယော အာပဇ္ဇတိ? အဋ္ဌမံ ဝတ္ထုံ ပရိပူရဏပစ္စယာ တိဿော အာပတ္တိယော အာပဇ္ဇတိ။ ပုရိသေန – ‘‘ဣတ္ထန္နာမံ ဩကာသံ အာဂစ္ဆာ’’တိ ဝုတ္တာ ဂစ္ဆတိ, အာပတ္တိ ဒုက္ကဋဿ; ပုရိသဿ ဟတ္ထပါသံ ဩက္ကန္တမတ္တေ အာပတ္တိ ထုလ္လစ္စယဿ; အဋ္ဌမံ ဝတ္ထုံ ပရိပူရေတိ, အာပတ္တိ ပါရာဇိကဿ – အဋ္ဌမံ ဝတ္ထုံ ပရိပူရဏပစ္စယာ ဣမာ တိဿော အာပတ္တိယော အာပဇ္ဇတိ။

ပါရာဇိကာ နိဋ္ဌိတာ။

၂. သံဃာဒိသေသကဏ္ဍာဒိ

၂၅၀. ဥဿယဝါဒိကာ ဘိက္ခုနီ အဍ္ဍံ ကရဏပစ္စယာ တိဿော အာပတ္တိယော အာပဇ္ဇတိ။ ဧကဿ အာရောစေတိ, အာပတ္တိ ဒုက္ကဋဿ; ဒုတိယဿ အာရောစေတိ, အာပတ္တိ ထုလ္လစ္စယဿ; အဍ္ဍပရိယောသာနေ အာပတ္တိ သံဃာဒိသေသဿ။

စောရိံ ဝုဋ္ဌာပနပစ္စယာ တိဿော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

ဧကာ ဂါမန္တရံ ဂမနပစ္စယာ တိဿော အာပတ္တိယော အာပဇ္ဇတိ။ ဂစ္ဆတိ, အာပတ္တိ ဒုက္ကဋဿ; ပဌမံ ပါဒံ ပရိက္ခေပံ အတိက္ကာမေတိ, အာပတ္တိ ထုလ္လစ္စယဿ; ဒုတိယံ ပါဒံ အတိက္ကာမေတိ, အာပတ္တိ သံဃာဒိသေသဿ။

သမဂ္ဂေန သံဃေန ဥက္ခိတ္တံ ဘိက္ခုနိံ ဓမ္မေန ဝိနယေန သတ္ထုသာသနေန အနပလောကေတွာ ကာရကသသံဃံ အနညာယ ဂဏဿ ဆန္ဒံ ဩသာရဏပစ္စယာ တိဿော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ ဟတ္ထတော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ဘုဉ္ဇနပစ္စယာ တိဿော အာပတ္တိယော အာပဇ္ဇတိ။ ‘‘ခါဒိဿာမိ ဘုဉ္ဇိဿာမီ’’တိ ပဋိဂ္ဂဏှာတိ, အာပတ္တိ ထုလ္လစ္စယဿ; အဇ္ဈောဟာရေ အဇ္ဈောဟာရေ အာပတ္တိ သံဃာဒိသေသဿ; ဥဒကဒန္တပေါနံ ပဋိဂ္ဂဏှာတိ, အာပတ္တိ ဒုက္ကဋဿ။

‘‘ကိံ တေ, အယျေ, ဧသော ပုရိသပုဂ္ဂလော ကရိဿတိ အဝဿုတော ဝါ အနဝဿုတော ဝါ, ယတော တွံ အနဝဿုတာ! ဣင်္ဃ, အယျေ, ယံ တေ ဧသော ပုရိသပုဂ္ဂလော ဒေတိ ခါဒနီယံ ဝါ ဘောဇနီယံ ဝါ တံ တွံ သဟတ္ထာ ပဋိဂ္ဂဟေတွာ ခါဒ ဝါ ဘုဉ္ဇ ဝါ’’တိ, ဥယျောဇနပစ္စယာ တိဿော အာပတ္တိယော အာပဇ္ဇတိ။ တဿာ ဝစနေန ခါဒိဿာမိ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ထုလ္လစ္စယဿ; ဘောဇနပရိယောသာနေ အာပတ္တိ သံဃာဒိသေသဿ။

ကုပိတာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇနပစ္စယာ တိဿော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

ကိသ္မိဉ္စိဒေဝ အဓိကရဏေ ပစ္စာကတာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇနပစ္စယာ တိဿော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

သံသဋ္ဌာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇနပစ္စယာ တိဿော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

‘‘သံသဋ္ဌာဝ, အယျေ, တုမှေ ဝိဟရထ, မာ တုမှေ နာနာ ဝိဟရိတ္ထာ’’တိ ဥယျောဇေန္တီ ယာဝတတိယံ သမနုဘာသနာယ န ပဋိနိဿဇ္ဇနပစ္စယာ တိဿော အာပတ္တိယော အာပဇ္ဇတိ။ ဉတ္တိယာ ဒုက္ကဋံ; ဒွီဟိ ကမ္မဝါစာဟိ ထုလ္လစ္စယာ; ကမ္မဝါစာပရိယောသာနေ အာပတ္တိ သံဃာဒိသေသဿ။

ဒသ သံဃာဒိသေသာ နိဋ္ဌိတာ။ပေ.။။

(ယထာ ဟေဋ္ဌာ တထာ ဝိတ္ထာရေတဗ္ဗာ ပစ္စယမေဝ နာနာကရဏံ)

ဒဓိံ ဝိညာပေတွာ ဘုဉ္ဇနပစ္စယာ ကတိ အာပတ္တိယော အာပဇ္ဇတိ? ဒဓိံ ဝိညာပေတွာ ဘုဉ္ဇနပစ္စယာ ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ – ဒဓိံ ဝိညာပေတွာ ဘုဉ္ဇနပစ္စယာ ဣမာ ဒွေ အာပတ္တိယော အာပဇ္ဇတိ။

ကတာပတ္တိဝါရော နိဋ္ဌိတော ဒုတိယော။

၃. ဝိပတ္တိဝါရော

၂၅၁. ကာယသံသဂ္ဂံ သာဒိယနပစ္စယာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? ကာယသံသဂ္ဂံ သာဒိယနပစ္စယာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ, သိယာ အာစာရဝိပတ္တိံ။ပေ.။ ဒဓိံ ဝိညာပေတွာ ဘုဉ္ဇနပစ္စယာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? ဒဓိံ ဝိညာပေတွာ ဘုဉ္ဇနပစ္စယာ အာပတ္တိယော စတုန္နံ ဝိပတ္တီနံ ဧကံ ဝိပတ္တိံ ဘဇန္တိ – အာစာရဝိပတ္တိံ။

ဝိပတ္တိဝါရော နိဋ္ဌိတော တတိယော။

၄. သင်္ဂဟဝါရော

၂၅၂. ကာယသံသဂ္ဂံ သာဒိယနပစ္စယာ အာပတ္တိယော သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ကာယသံသဂ္ဂံ သာဒိယနပစ္စယာ အာပတ္တိယော သတ္တန္နံ အာပတ္တိက္ခန္ဓာနံ ပဉ္စဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန, သိယာ သံဃာဒိသေသာပတ္တိက္ခန္ဓေန, သိယာ ထုလ္လစ္စယာပတ္တိက္ခန္ဓေန, သိယာ ပါစိတ္တိယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ပေ.။။

ဒဓိံ ဝိညာပေတွာ ဘုဉ္ဇနပစ္စယာ အာပတ္တိယော သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဒဓိံ ဝိညာပေတွာ ဘုဉ္ဇနပစ္စယာ အာပတ္တိယော သတ္တန္နံ အာပတ္တိက္ခန္ဓာနံ ဒွီဟိ အာပတ္တိက္ခန္ဓေဟိ သင်္ဂဟိတာ – သိယာ ပါဋိဒေသနီယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။

သင်္ဂဟဝါရော နိဋ္ဌိတော စတုတ္ထော။

၅. သမုဋ္ဌာနဝါရော

၂၅၃. ကာယသံသဂ္ဂံ သာဒိယနပစ္စယာ အာပတ္တိယော ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? ကာယသံသဂ္ဂံ သာဒိယနပစ္စယာ အာပတ္တိယော ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ စိတ္တတော စ သမုဋ္ဌန္တိ, န ဝါစတော။ပေ.။။

ဒဓိံ ဝိညာပေတွာ ဘုဉ္ဇနပစ္စယာ အာပတ္တိယော ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? ဒဓိံ ဝိညာပေတွာ ဘုဉ္ဇနပစ္စယာ အာပတ္တိယော ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌန္တိ – သိယာ ကာယတော သမုဋ္ဌန္တိ, န ဝါစတော န စိတ္တတော; သိယာ ကာယတော စ ဝါစတော စ သမုဋ္ဌန္တိ, န စိတ္တတော; သိယာ ကာယတော စ စိတ္တတော စ သမုဋ္ဌန္တိ, န ဝါစတော; သိယာ ကာယတော စ ဝါစတော စ စိတ္တတော စ သမုဋ္ဌန္တိ။

သမုဋ္ဌာနဝါရော နိဋ္ဌိတော ပဉ္စမော။

၆. အဓိကရဏဝါရော

၂၅၄. ကာယသံသဂ္ဂံ သာဒိယနပစ္စယာ အာပတ္တိယော စတုန္နံ အဓိကရဏာနံ ကတမံ အဓိကရဏံ? ကာယသံသဂ္ဂံ သာဒိယနပစ္စယာ အာပတ္တိယော စတုန္နံ အဓိကရဏာနံ, အာပတ္တာဓိကရဏံ။ပေ.။။

ဒဓိံ ဝိညာပေတွာ ဘုဉ္ဇနပစ္စယာ အာပတ္တိယော စတုန္နံ အဓိကရဏာနံ ကတမံ အဓိကရဏံ? ဒဓိံ ဝိညာပေတွာ ဘုဉ္ဇနပစ္စယာ အာပတ္တိယော စတုန္နံ အဓိကရဏာနံ – အာပတ္တာဓိကရဏံ။

အဓိကရဏဝါရော နိဋ္ဌိတော ဆဋ္ဌော။

၇. သမထဝါရော

၂၅၅. ကာယသံသဂ္ဂံ သာဒိယနပစ္စယာ အာပတ္တိယော သတ္တန္နံ သမထာနံ ကတိဟိ သမထေဟိ သမ္မန္တိ? ကာယသံသဂ္ဂံ သာဒိယနပစ္စယာ အာပတ္တိယော သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စ။ပေ.။။

ဒဓိံ ဝိညာပေတွာ ဘုဉ္ဇနပစ္စယာ အာပတ္တိယော သတ္တန္နံ သမထာနံ ကတိဟိ သမထေဟိ သမ္မန္တိ? ဒဓိံ ဝိညာပေတွာ ဘုဉ္ဇနပစ္စယာ အာပတ္တိယော သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စ။

သမထဝါရော နိဋ္ဌိတော သတ္တမော။

၈. သမုစ္စယဝါရော

၂၅၆. ကာယသံသဂ္ဂံ သာဒိယနပစ္စယာ ကတိ အာပတ္တိယော အာပဇ္ဇတိ? ကာယသံသဂ္ဂံ သာဒိယနပစ္စယာ ပဉ္စ အာပတ္တိယော အာပဇ္ဇတိ။ အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ အဓက္ခကံ ဥဗ္ဘဇာဏုမဏ္ဍလံ ဂဟဏံ သာဒိယတိ, အာပတ္တိ ပါရာဇိကဿ; ဘိက္ခု ကာယေန ကာယံ အာမသတိ, အာပတ္တိ သံဃာဒိသေသဿ; ကာယေန ကာယပဋိဗဒ္ဓံ အာမသတိ, အာပတ္တိ ထုလ္လစ္စယဿ ; ကာယပဋိဗဒ္ဓေန ကာယပဋိဗဒ္ဓံ အာမသတိ, အာပတ္တိ ဒုက္ကဋဿ; အင်္ဂုလိပတောဒကေ ပါစိတ္တိယံ – ကာယသံသဂ္ဂံ သာဒိယနပစ္စယာ ဣမာ ပဉ္စ အာပတ္တိယော အာပဇ္ဇတိ။

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ, သိယာ အာစာရဝိပတ္တိံ။ သတ္တန္နံ အာပတ္တိက္ခန္ဓာနံ ပဉ္စဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန, သိယာ သံဃာဒိသေသာပတ္တိက္ခန္ဓေန, သိယာ ထုလ္လစ္စယာပတ္တိက္ခန္ဓေန, သိယာ ပါစိတ္တိယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ စိတ္တတော စ သမုဋ္ဌန္တိ, န ဝါစတော။ စတုန္နံ အဓိကရဏာနံ အာပတ္တာဓိကရဏံ။ သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စ။ပေ.။။

ဒဓိံ ဝိညာပေတွာ ဘုဉ္ဇနပစ္စယာ ကတိ အာပတ္တိယော အာပဇ္ဇတိ? ဒဓိံ ဝိညာပေတွာ ဘုဉ္ဇနပစ္စယာ ဒွေ အာပတ္တိယော အာပဇ္ဇတိ။ ဘုဉ္ဇိဿာမီတိ ပဋိဂ္ဂဏှာတိ, အာပတ္တိ ဒုက္ကဋဿ; အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ – ဒဓိံ ဝိညာပေတွာ ဘုဉ္ဇနပစ္စယာ ဣမာ ဒွေ အာပတ္တိယော အာပဇ္ဇတိ။

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? စတုန္နံ အဓိကရဏာနံ ကတမံ အဓိကရဏံ ? သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဧကံ ဝိပတ္တိံ ဘဇန္တိ – အာစာရဝိပတ္တိံ။ သတ္တန္နံ အာပတ္တိက္ခန္ဓာနံ ဒွီဟိ အာပတ္တိက္ခန္ဓေဟိ သင်္ဂဟိတာ – သိယာ ပါဋိဒေသနီယာပတ္တိက္ခန္ဓေန, သိယာ ဒုက္ကဋာပတ္တိက္ခန္ဓေန။ ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌန္တိ – သိယာ ကာယတော သမုဋ္ဌန္တိ, န ဝါစတော န စိတ္တတော; သိယာ ကာယတော စ ဝါစတော စ သမုဋ္ဌန္တိ, န စိတ္တတော; သိယာ ကာယတော စ စိတ္တတော စ သမုဋ္ဌန္တိ န ဝါစတော; သိယာ ကာယတော စ ဝါစတော စ စိတ္တတော စ သမုဋ္ဌန္တိ။ စတုန္နံ အဓိကရဏာနံ, အာပတ္တာဓိကရဏံ။ သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ, သိယာ သမ္မုခါဝိနယေန စ တိဏဝတ္ထာရကေန စာတိ။

သမုစ္စယဝါရော နိဋ္ဌိတော အဋ္ဌမော။ [ဣမဿာနန္တရံ ပေါရာဏသီဟဠပေါတ္ထကေ ဧဝမ္ပိ§ဒိဿတိ –§‘‘တေသမုဒ္ဒါနံ –§ကတိဝါရော စ ဝိပတ္တိဝါရော စ, သင်္ဂဟဝါရော စ သမုဋ္ဌာနဝါရော။ အဓိကရဏဝါရော စ သမထဝါရော စ, သမုစ္စယဝါရော စ ဣမေ သတ္တ ဝါရာ။ အာဒိတော ပညတ္တိဝါရေန သဟ အဋ္ဌဝါရာတိ’’ဣတိ။]

အဋ္ဌ ပစ္စယဝါရာ နိဋ္ဌိတာ။

ဘိက္ခုနီဝိဘင်္ဂေ သောဠသ မဟာဝါရာ နိဋ္ဌိတာ။