စမ္ပေယျက္ခန္ဓကော

၉. စမ္ပေယျက္ခန္ဓကော

၂၃၄. ကဿပဂေါတ္တဘိက္ခုဝတ္ထု

၃၈၀. တေန သမယေန ဗုဒ္ဓေါ ဘဂဝါ စမ္ပာယံ ဝိဟရတိ ဂဂ္ဂရာယ ပေါက္ခရဏိယာ တီရေ။ တေန ခေါ ပန သမယေန ကာသီသု ဇနပဒေ ဝါသဘဂါမော နာမ ဟောတိ။ တတ္ထ ကဿပဂေါတ္တော နာမ ဘိက္ခု အာဝါသိကော ဟောတိ တန္တိဗဒ္ဓေါ ဥဿုက္ကံ အာပန္နော – ကိန္တိ အနာဂတာ စ ပေသလာ ဘိက္ခူ အာဂစ္ဆေယျုံ, အာဂတာ စ ပေသလာ ဘိက္ခူ ဖာသု ဝိဟရေယျုံ, အယဉ္စ အာဝါသော ဝုဒ္ဓိံ ဝိရုဠှိံ ဝေပုလ္လံ အာပဇ္ဇေယျာတိ။ တေန ခေါ ပန သမယေန သမ္ဗဟုလာ ဘိက္ခူ ကာသီသု စာရိကံ စရမာနာ ယေန ဝါသဘဂါမော တဒဝသရုံ။ အဒ္ဒသာ ခေါ ကဿပဂေါတ္တော ဘိက္ခု တေ ဘိက္ခူ ဒူရတောဝ အာဂစ္ဆန္တေ, ဒိသွာန အာသနံ ပညပေသိ, ပါဒေါဒကံ ပါဒဣဌံ ပါဒကထလိကံ ဥပနိက္ခိပိ, ပစ္စုဂ္ဂန္တွာ ပတ္တစီဝရံ ပဋိဂ္ဂဟေသိ, ပါနီယေန အာပုစ္ဆိ, နဟာနေ ဥဿုက္ကံ အကာသိ, ဥဿုက္ကမ္ပိ အကာသိ ယာဂုယာ ခါဒနီယေ ဘတ္တသ္မိံ။ အထ ခေါ တေသံ အာဂန္တုကာနံ ဘိက္ခူနံ ဧတဒဟောသိ – ‘‘ဘဒ္ဒကော ခေါ အယံ, အာဝုသော, အာဝါသိကော ဘိက္ခု နဟာနေ ဥဿုက္ကံ ကရောတိ, ဥဿုက္ကမ္ပိ ကရောတိ ယာဂုယာ ခါဒနီယေ ဘတ္တသ္မိံ။ ဟန္ဒ, မယံ, အာဝုသော, ဣဓေဝ ဝါသဘဂါမေ နိဝါသံ ကပ္ပေမာ’’တိ။ အထ ခေါ တေ အာဂန္တုကာ ဘိက္ခူ တတ္ထေဝ ဝါသဘဂါမေ နိဝါသံ ကပ္ပေသုံ။

အထ ခေါ ကဿပဂေါတ္တဿ ဘိက္ခုနော ဧတဒဟောသိ – ‘‘ယော ခေါ ဣမေသံ အာဂန္တုကာနံ ဘိက္ခူနံ အာဂန္တုကကိလမထော သော ပဋိပ္ပဿဒ္ဓေါ။ ယေပိမေ ဂေါစရေ အပ္ပကတညုနော တေဒါနိမေ ဂေါစရေ ပကတညုနော။ ဒုက္ကရံ ခေါ ပန ပရကုလေသု ယာဝဇီဝံ ဥဿုက္ကံ ကာတုံ, ဝိညတ္တိ စ မနုဿာနံ အမနာပါ။ ယံနူနာဟံ န ဥဿုက္ကံ ကရေယျံ ယာဂုယာ ခါဒနီယေ ဘတ္တသ္မိ’’န္တိ။ သော န ဥဿုက္ကံ အကာသိ ယာဂုယာ ခါဒနီယေ ဘတ္တသ္မိံ။ အထ ခေါ တေသံ အာဂန္တုကာနံ ဘိက္ခူနံ ဧတဒဟောသိ – ‘‘ပုဗ္ဗေ ခွါယံ, အာဝုသော, အာဝါသိကော ဘိက္ခု နဟာနေ ဥဿုက္ကံ အကာသိ, ဥဿုက္ကမ္ပိ အကာသိ ယာဂုယာ ခါဒနီယေ ဘတ္တသ္မိံ။ သောဒါနာယံ န ဥဿုက္ကံ ကရောတိ ယာဂုယာ ခါဒနီယေ ဘတ္တသ္မိံ။ ဒုဋ္ဌောဒါနာယံ, အာဝုသော, အာဝါသိကော ဘိက္ခု။ ဟန္ဒ, မယံ, အာဝုသော, အာဝါသိကံ [ဣမံ အာဝါသိကံ (သျာ.)] ဘိက္ခုံ ဥက္ခိပါမာ’’တိ။ အထ ခေါ တေ အာဂန္တုကာ ဘိက္ခူ သန္နိပတိတွာ ကဿပဂေါတ္တံ ဘိက္ခုံ ဧတဒဝေါစုံ – ‘‘ပုဗ္ဗေ ခေါ တွံ, အာဝုသော, နဟာနေ ဥဿုက္ကံ ကရောသိ, ဥဿုက္ကမ္ပိ ကရောသိ ယာဂုယာ ခါဒနီယေ ဘတ္တသ္မိံ။ သောဒါနိ တွံ န ဥဿုက္ကံ ကရောသိ ယာဂုယာ ခါဒနီယေ ဘတ္တသ္မိံ။ အာပတ္တိံ တွံ, အာဝုသော, အာပန္နော။ ပဿသေတံ အာပတ္တိ’’န္တိ? ‘‘နတ္ထိ မေ, အာဝုသော, အာပတ္တိ, ယမဟံ ပဿေယျ’’န္တိ။ အထ ခေါ တေ အာဂန္တုကာ ဘိက္ခူ ကဿပဂေါတ္တံ ဘိက္ခုံ အာပတ္တိယာ အဒဿနေ ဥက္ခိပိံသု။

အထ ခေါ ကဿပဂေါတ္တဿ ဘိက္ခုနော ဧတဒဟောသိ – ‘‘အဟံ ခေါ ဧတံ န ဇာနာမိ ‘အာပတ္တိ ဝါ ဧသာ အနာပတ္တိ ဝါ, အာပန္နော စမှိ [ဝမှိ (?)] အနာပန္နော ဝါ, ဥက္ခိတ္တော စမှိ အနုက္ခိတ္တော ဝါ, ဓမ္မိကေန ဝါ အဓမ္မိကေန ဝါ, ကုပ္ပေန ဝါ အကုပ္ပေန ဝါ, ဌာနာရဟေန ဝါ အဋ္ဌာနာရဟေန ဝါ’။ ယံနူနာဟံ စမ္ပံ ဂန္တွာ ဘဂဝန္တံ ဧတမတ္ထံ ပုစ္ဆေယျ’’န္တိ။ အထ ခေါ ကဿပဂေါတ္တော ဘိက္ခု သေနာသနံ သံသာမေတွာ ပတ္တစီဝရမာဒါယ ယေန စမ္ပာ တေန ပက္ကာမိ။ အနုပုဗ္ဗေန ယေန စမ္ပာ ယေန ဘဂဝါ တေနုပသင်္ကမိ, ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ အာစိဏ္ဏံ ခေါ ပနေတံ ဗုဒ္ဓါနံ ဘဂဝန္တာနံ အာဂန္တုကေဟိ ဘိက္ခူဟိ သဒ္ဓိံ ပဋိသမ္မောဒိတုံ။ အထ ခေါ ဘဂဝါ ကဿပဂေါတ္တံ ဘိက္ခုံ ဧတဒဝေါစ – ‘‘ကစ္စိ, ဘိက္ခု, ခမနီယံ, ကစ္စိ ယာပနီယံ, ကစ္စိ အပ္ပကိလမထေန အဒ္ဓါနံ အာဂတော, ကုတော စ တွံ, ဘိက္ခု, အာဂစ္ဆသီ’’တိ? ‘‘ခမနီယံ, ဘဂဝါ; ယာပနီယံ, ဘဂဝါ; အပ္ပကိလမထေန စာဟံ, ဘန္တေ, အဒ္ဓါနံ အာဂတော။ အတ္ထိ, ဘန္တေ, ကာသီသု ဇနပဒေ ဝါသဘဂါမော နာမ။ တတ္ထာဟံ, ဘဂဝါ, အာဝါသိကော တန္တိဗဒ္ဓေါ ဥဿုက္ကံ အာပန္နော – ‘ကိန္တိ အနာဂတာ စ ပေသလာ ဘိက္ခူ အာဂစ္ဆေယျုံ, အာဂတာ စ ပေသလာ ဘိက္ခူ ဖာသု ဝိဟရေယျုံ, အယဉ္စ အာဝါသော ဝုဒ္ဓိံ ဝိရုဠှိံ ဝေပုလ္လံ အာပဇ္ဇေယျာ’တိ။ အထ ခေါ, ဘန္တေ, သမ္ဗဟုလာ ဘိက္ခူ ကာသီသု စာရိကံ စရမာနာ ယေန ဝါသဘဂါမော တဒဝသရုံ။ အဒ္ဒသံ ခေါ အဟံ, ဘန္တေ, တေ ဘိက္ခူ ဒူရတောဝ အာဂစ္ဆန္တေ, ဒိသွာန အာသနံ ပညပေသိံ, ပါဒေါဒကံ ပါဒဣဌံ ပါဒကထလိကံ ဥပနိက္ခိပိံ, ပစ္စုဂ္ဂန္တွာ ပတ္တစီဝရံ ပဋိဂ္ဂဟေသိံ, ပါနီယေန အပုစ္ဆိံ, နဟာနေ ဥဿုက္ကံ အကာသိံ, ဥဿုက္ကမ္ပိ အကာသိံ ယာဂုယာ ခါဒနီယေ ဘတ္တသ္မိံ ။ အထ ခေါ တေသံ, ဘန္တေ, အာဂန္တုကာနံ ဘိက္ခူနံ ဧတဒဟောသိ – ‘ဘဒ္ဒကော ခေါ အယံ အာဝုသော အာဝါသိကော ဘိက္ခု နဟာနေ ဥဿုက္ကံ ကရောတိ, ဥဿုက္ကမ္ပိ ကရောတိ ယာဂုယာ ခါဒနီယေ ဘတ္တသ္မိံ။ ဟန္ဒ, မယံ, အာဝုသော, ဣဓေဝ ဝါသဘဂါမေ နိဝါသံ ကပ္ပေမာ’တိ။ အထ ခေါ တေ, ဘန္တေ, အာဂန္တုကာ ဘိက္ခူ တတ္ထေဝ ဝါသဘဂါမေ နိဝါသံ ကပ္ပေသုံ။ တဿ မယှံ, ဘန္တေ, ဧတဒဟောသိ – ‘ယော ခေါ ဣမေသံ အာဂန္တုကာနံ ဘိက္ခူနံ အာဂန္တုကကိလမထော သော ပဋိပ္ပဿဒ္ဓေါ။ ယေပိမေ ဂေါစရေ အပ္ပကတညုနော တေဒါနိမေ ဂေါစရေ ပကတညုနော။ ဒုက္ကရံ ခေါ ပန ပရကုလေသု ယာဝဇီဝံ ဥဿုက္ကံ ကာတုံ, ဝိညတ္တိ စ မနုဿာနံ အမနာပါ။ ယံနူနာဟံ န ဥဿုက္ကံ ကရေယျံ ယာဂုယာ ခါဒနီယေ ဘတ္တသ္မိ’န္တိ။ သော ခေါ အဟံ, ဘန္တေ, န ဥဿုက္ကံ အကာသိံ ယာဂုယာ ခါဒနီယေ ဘတ္တသ္မိံ။ အထ ခေါ တေသံ, ဘန္တေ, အာဂန္တုကာနံ ဘိက္ခူနံ ဧတဒဟောသိ – ‘ပုဗ္ဗေ ခွါယံ, အာဝုသော, အာဝါသိကော ဘိက္ခု နဟာနေ ဥဿုက္ကံ ကရောတိ, ဥဿုက္ကမ္ပိ ကရောတိ ယာဂုယာ ခါဒနီယေ ဘတ္တသ္မိံ။ သောဒါနာယံ န ဥဿုက္ကံ ကရောတိ ယာဂုယာ ခါဒနီယေ ဘတ္တသ္မိံ။ ဒုဋ္ဌောဒါနာယံ, အာဝုသော, အာဝါသိကော ဘိက္ခု။ ဟန္ဒ, မယံ, အာဝုသော, အာဝါသိကံ ဘိက္ခုံ ဥက္ခိပါမာ’တိ။ အထ ခေါ တေ, ဘန္တေ, အာဂန္တုကာ ဘိက္ခူ သန္နိပတိတွာ မံ ဧတဒဝေါစုံ – ‘ပုဗ္ဗေ ခေါ တွံ, အာဝုသော, နဟာနေ ဥဿုက္ကံ ကရောသိ, ဥဿုက္ကမ္ပိ ကရောသိ ယာဂုယာ ခါဒနီယေ ဘတ္တသ္မိံ။ သောဒါနိ တွံ န ဥဿုက္ကံ ကရောသိ ယာဂုယာ ခါဒနီယေ ဘတ္တသ္မိံ။ အာပတ္တိံ တွံ, အာဝုသော, အာပန္နော။ ပဿသေတံ အာပတ္တိ’န္တိ ? ‘နတ္ထိ မေ, အာဝုသော, အာပတ္တိ ယမဟံ ပဿေယျ’န္တိ။ အထ ခေါ တေ, ဘန္တေ, အာဂန္တုကာ ဘိက္ခူ မံ အာပတ္တိယာ အဒဿနေ ဥက္ခိပိံသု။ တဿ မယှံ, ဘန္တေ, ဧတဒဟောသိ – ‘အဟံ ခေါ ဧတံ န ဇာနာမိ ‘အာပတ္တိ ဝါ ဧသာ အနာပတ္တိ ဝါ, အာပန္နော စမှိ အနာပန္နော ဝါ, ဥက္ခိတ္တော စမှိ အနုက္ခိတ္တော ဝါ, ဓမ္မိကေန ဝါ အဓမ္မိကေန ဝါ, ကုပ္ပေန ဝါ အကုပ္ပေန ဝါ, ဌာနာရဟေန ဝါ အဋ္ဌာနာရဟေန ဝါ’။ ယံနူနာဟံ စမ္ပံ ဂန္တွာ ဘဂဝန္တံ ဧတမတ္ထံ ပုစ္ဆေယျ’န္တိ။ တတော အဟံ, ဘဂဝါ, အာဂစ္ဆာမီ’’တိ။ ‘‘အနာပတ္တိ ဧသာ, ဘိက္ခု, နေသာ အာပတ္တိ။ အနာပန္နောသိ, နသိ အာပန္နော။ အနုက္ခိတ္တောသိ, နသိ ဥက္ခိတ္တော။ အဓမ္မိကေနာသိ ကမ္မေန ဥက္ခိတ္တော ကုပ္ပေန အဋ္ဌာနာရဟေန။ ဂစ္ဆ တွံ, ဘိက္ခု, တတ္ထေဝ ဝါသဘဂါမေ နိဝါသံ ကပ္ပေဟီ’’တိ။ ‘‘ဧဝံ, ဘန္တေ’’တိ ခေါ ကဿပဂေါတ္တော ဘိက္ခု ဘဂဝတော ပဋိဿုဏိတွာ ဥဋ္ဌာယာသနာ ဘဂဝန္တံ အဘိဝါဒေတွာ ပဒက္ခိဏံ ကတွာ ယေန ဝါသဘဂါမော တေန ပက္ကာမိ။

၃၈၁. အထ ခေါ တေသံ အာဂန္တုကာနံ ဘိက္ခူနံ အဟုဒေဝ ကုက္ကုစ္စံ, အဟု ဝိပ္ပဋိသာရော – ‘‘အလာဘာ ဝတ နော, န ဝတ နော လာဘာ, ဒုလ္လဒ္ဓံ ဝတ နော, န ဝတ နော သုလဒ္ဓံ, ယေ မယံ သုဒ္ဓံ ဘိက္ခုံ အနာပတ္တိကံ အဝတ္ထုသ္မိံ အကာရဏေ ဥက္ခိပိမှာ။ ဟန္ဒ, မယံ, အာဝုသော, စမ္ပံ ဂန္တွာ ဘဂဝတော သန္တိကေ အစ္စယံ အစ္စယတော ဒေသေမာ’’တိ။ အထ ခေါ တေ အာဂန္တုကာ ဘိက္ခူ သေနာသနံ သံသာမေတွာ ပတ္တစီဝရမာဒါယ ယေန စမ္ပာ တေန ပက္ကမိံသု။ အနုပုဗ္ဗေန ယေန စမ္ပာ ယေန ဘဂဝါ တေနုပသင်္ကမိံသု, ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိံသု။ အာစိဏ္ဏံ ခေါ ပနေတံ ဗုဒ္ဓါနံ ဘဂဝန္တာနံ အာဂန္တုကေဟိ ဘိက္ခူဟိ သဒ္ဓိံ ပဋိသမ္မောဒိတုံ။ အထ ခေါ ဘဂဝါ တေ ဘိက္ခူ ဧတဒဝေါစ – ‘‘ကစ္စိ, ဘိက္ခဝေ, ခမနီယံ, ကစ္စိ ယာပနီယံ, ကစ္စိတ္ထ အပ္ပကိလမထေန အဒ္ဓါနံ အာဂတာ, ကုတော စ တုမှေ, ဘိက္ခဝေ, အာဂစ္ဆထာ’’တိ ? ‘‘ခမနီယံ, ဘဂဝါ; ယာပနီယံ, ဘဂဝါ; အပ္ပကိလမထေန စ မယံ, ဘန္တေ, အဒ္ဓါနံ အာဂတာ။ အတ္ထိ, ဘန္တေ, ကာသီသု ဇနပဒေ ဝါသဘဂါမော နာမ။ တတော မယံ, ဘဂဝါ, အာဂစ္ဆာမာ’’တိ။ ‘‘တုမှေ, ဘိက္ခဝေ, အာဝါသိကံ ဘိက္ခုံ ဥက္ခိပိတ္ထာ’’တိ? ‘‘ဧဝံ, ဘန္တေ’’တိ။ ‘‘ကိသ္မိံ, ဘိက္ခဝေ, ဝတ္ထုသ္မိံ ကာရဏေ’’တိ? ‘‘အဝတ္ထုသ္မိံ, ဘဂဝါ, အကာရဏေ’’တိ။ ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ, မောဃပုရိသာ, အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ။ ကထံဟိ နာမ တုမှေ, မောဃပုရိသာ, သုဒ္ဓံ ဘိက္ခုံ အနာပတ္တိကံ အဝတ္ထုသ္မိံ အကာရဏေ ဥက္ခိပိဿထ။ နေတံ, မောဃပုရိသာ, အပ္ပသန္နာနံ ဝါ ပသာဒါယ။ပေ.။’’ ဝိဂရဟိတွာ ဓမ္မိံ ကထံ ကတွာ ဘိက္ခူ အာမန္တေသိ – ‘‘န, ဘိက္ခဝေ, သုဒ္ဓေါ ဘိက္ခု အနာပတ္တိကော အဝတ္ထုသ္မိံ အကာရဏေ ဥက္ခိပိတဗ္ဗော။ ယော ဥက္ခိပေယျ, အာပတ္တိ ဒုက္ကဋဿာ’’တိ။

အထ ခေါ တေ ဘိက္ခူ ဥဋ္ဌာယာသနာ ဧကံသံ ဥတ္တရာသင်္ဂံ ကရိတွာ ဘဂဝတော ပါဒေသု သိရသာ နိပတိတွာ ဘဂဝန္တံ ဧတဒဝေါစုံ – ‘‘အစ္စယော နော, ဘန္တေ, အစ္စဂမာ ယထာဗာလေ ယထာမူဠ္ဟေ ယထာအကုသလေ, ယေ မယံ သုဒ္ဓံ ဘိက္ခုံ အနာပတ္တိကံ အဝတ္ထုသ္မိံ အကာရဏေ ဥက္ခိပိမှာ။ တေသံ နော, ဘန္တေ, ဘဂဝါ အစ္စယံ အစ္စယတော ပဋိဂ္ဂဏှာတု အာယတိံ သံဝရာယာ’’တိ။ ‘‘တဂ္ဃ, တုမှေ, ဘိက္ခဝေ, အစ္စယော အစ္စဂမာ ယထာဗာလေ ယထာမူဠ္ဟေ ယထာအကုသလေ, ယေ တုမှေ သုဒ္ဓံ ဘိက္ခုံ အနာပတ္တိကံ အဝတ္ထုသ္မိံ အကာရဏေ ဥက္ခိပိတ္ထ။ ယတော စ ခေါ တုမှေ, ဘိက္ခဝေ, အစ္စယံ အစ္စယတော ဒိသွာ ယထာဓမ္မံ ပဋိကရောထ, တံ ဝေါ မယံ ပဋိဂ္ဂဏှာမ။ ဝုဒ္ဓိဟေသာ , ဘိက္ခဝေ, အရိယဿ ဝိနယေ ယော အစ္စယံ အစ္စယတော ဒိသွာ ယထာဓမ္မံ ပဋိကရောတိ, အာယတိံ [အာယတိံ စ (သီ.)] သံဝရံ အာပဇ္ဇတီ’’တိ။

ကဿပဂေါတ္တဘိက္ခုဝတ္ထု နိဋ္ဌိတံ။

၂၃၅. အဓမ္မေန ဝဂ္ဂါဒိကမ္မကထာ

၃၈၂. တေန ခေါ ပန သမယေန စမ္ပာယံ ဘိက္ခူ ဧဝရူပါနိ ကမ္မာနိ ကရောန္တိ – အဓမ္မေန ဝဂ္ဂကမ္မံ ကရောန္တိ, အဓမ္မေန သမဂ္ဂကမ္မံ ကရောန္တိ; ဓမ္မေန ဝဂ္ဂကမ္မံ ကရောန္တိ, ဓမ္မပတိရူပကေန ဝဂ္ဂကမ္မံ ကရောန္တိ; ဓမ္မပတိရူပကေန သမဂ္ဂကမ္မံ ကရောန္တိ; ဧကောပိ ဧကံ ဥက္ခိပတိ, ဧကောပိ ဒွေ ဥက္ခိပတိ, ဧကောပိ သမ္ဗဟုလေ ဥက္ခိပတိ, ဧကောပိ သသံဃံ ဥက္ခိပတိ; ဒွေပိ ဧကံ ဥက္ခိပန္တိ, ဒွေပိ ဒွေ ဥက္ခိပန္တိ, ဒွေပိ သမ္ဗဟုလေ ဥက္ခိပန္တိ, ဒွေပိ သသံဃံ ဥက္ခိပန္တိ ; သမ္ဗဟုလာပိ ဧကံ ဥက္ခိပန္တိ; သမ္ဗဟုလာပိ ဒွေ ဥက္ခိပန္တိ, သမ္ဗဟုလာပိ သမ္ဗဟုလေ ဥက္ခိပန္တိ, သမ္ဗဟုလာပိ သသံဃံ ဥက္ခိပန္တိ; သံဃောပိ သသံဃံ ဥက္ခိပတိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထံဟိ နာမ စမ္ပာယံ ဘိက္ခူ ဧဝရူပါနိ ကမ္မာနိ ကရိဿန္တိ – အဓမ္မေန ဝဂ္ဂကမ္မံ ကရိဿန္တိ, အဓမ္မေန သမဂ္ဂကမ္မံ ကရိဿန္တိ, ဓမ္မေန ဝဂ္ဂကမ္မံ ကရိဿန္တိ, ဓမ္မပတိရူပကေန ဝဂ္ဂကမ္မံ ကရိဿန္တိ, ဓမ္မပတိရူပကေန သမဂ္ဂကမ္မံ ကရိဿန္တိ, ဧကောပိ ဧကံ ဥက္ခိပိဿတိ, ဧကောပိ ဒွေ ဥက္ခိပိဿတိ, ဧကောပိ သမ္ဗဟုလေ ဥက္ခိပိဿတိ, ဧကောပိ သသံဃံ ဥက္ခိပိဿတိ, ဒွေပိ ဧကံ ဥက္ခိပိဿန္တိ, ဒွေပိ ဒွေ ဥက္ခိပိဿန္တိ, ဒွေပိ သမ္ဗဟုလေ ဥက္ခိပိဿန္တိ, ဒွေပိ သသံဃံ ဥက္ခိပိဿန္တိ, သမ္ဗဟုလာပိ ဧကံ ဥက္ခိပိဿန္တိ, သမ္ဗဟုလာပိ ဒွေ ဥက္ခိပိဿန္တိ, သမ္ဗဟုလာပိ သမ္ဗဟုလေ ဥက္ခိပိဿန္တိ, သမ္ဗဟုလာပိ သသံဃံ ဥက္ခိပိဿန္တိ, သံဃောပိ သသံဃံ ဥက္ခိပိဿတီ’’တိ။ အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ, ဘိက္ခဝေ, စမ္ပာယံ ဘိက္ခူ ဧဝရူပါနိ ကမ္မာနိ ကရောန္တိ – အဓမ္မေန ဝဂ္ဂကမ္မံ ကရောန္တိ။ပေ.။ သံဃောပိ သသံဃံ ဥက္ခိပတီ’’တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ, ဘိက္ခဝေ, တေသံ မောဃပုရိသာနံ အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ။ ကထံဟိ နာမ တေ, ဘိက္ခဝေ, မောဃပုရိသာ ဧဝရူပါနိ ကမ္မာနိ ကရိဿန္တိ – အဓမ္မေန ဝဂ္ဂကမ္မံ ကရိဿန္တိ။ပေ.။ သံဃောပိ သသံဃံ ဥက္ခိပိဿတိ။ နေတံ, ဘိက္ခဝေ, အပ္ပသန္နာနံ ဝါ ပသာဒါယ။ပေ.။ ဝိဂရဟိတွာ။ပေ.။ ဓမ္မိံ ကထံ ကတွာ ဘိက္ခူ အာမန္တေသိ –

၃၈၃. ‘‘အဓမ္မေန စေ, ဘိက္ခဝေ, ဝဂ္ဂကမ္မံ အကမ္မံ န စ ကရဏီယံ, အဓမ္မေန [အဓမ္မေန စေ ဘိက္ခဝေ (သျာ.)] သမဂ္ဂကမ္မံ အကမ္မံ န စ ကရဏီယံ, ဓမ္မေန ဝဂ္ဂကမ္မံ အကမ္မံ န စ ကရဏီယံ; ဓမ္မပတိရူပကေန ဝဂ္ဂကမ္မံ အကမ္မံ န စ ကရဏီယံ, ဓမ္မပတိရူပကေန သမဂ္ဂကမ္မံ အကမ္မံ န စ ကရဏီယံ; ဧကောပိ ဧကံ ဥက္ခိပတိ အကမ္မံ န စ ကရဏီယံ, ဧကောပိ ဒွေ ဥက္ခိပတိ အကမ္မံ န စ ကရဏီယံ, ဧကောပိ သမ္ဗဟုလေ ဥက္ခိပတိ အကမ္မံ န စ ကရဏီယံ, ဧကောပိ သသံဃံ ဥက္ခိပတိ အကမ္မံ န စ ကရဏီယံ; ဒွေပိ ဧကံ ဥက္ခိပန္တိ အကမ္မံ န စ ကရဏီယံ, ဒွေပိ ဒွေ ဥက္ခိပန္တိ အကမ္မံ န စ ကရဏီယံ, ဒွေပိ သမ္ဗဟုလေ ဥက္ခိပန္တိ အကမ္မံ န စ ကရဏီယံ, ဒွေပိ သသံဃံ ဥက္ခိပန္တိ အကမ္မံ န စ ကရဏီယံ; သမ္ဗဟုလာပိ ဧကံ ဥက္ခိပန္တိ အကမ္မံ န စ ကရဏီယံ, သမ္ဗဟုလာပိ ဒွေ ဥက္ခိပန္တိ အကမ္မံ န စ ကရဏီယံ, သမ္ဗဟုလာပိ သမ္ဗဟုလေ ဥက္ခိပန္တိ အကမ္မံ န စ ကရဏီယံ, သမ္ဗဟုလာပိ သသံဃံ ဥက္ခိပန္တိ အကမ္မံ န စ ကရဏီယံ; သံဃောပိ သသံဃံ ဥက္ခိပတိ အကမ္မံ န စ ကရဏီယံ။

၃၈၄. ‘‘စတ္တာရိမာနိ , ဘိက္ခဝေ, ကမ္မာနိ – အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မေန သမဂ္ဂကမ္မံ။ တတြ, ဘိက္ခဝေ, ယဒိဒံ အဓမ္မေန ဝဂ္ဂကမ္မံ, ဣဒံ, ဘိက္ခဝေ, ကမ္မံ အဓမ္မတ္တာ ဝဂ္ဂတ္တာ ကုပ္ပံ အဋ္ဌာနာရဟံ; န, ဘိက္ခဝေ, ဧဝရူပံ ကမ္မံ ကာတဗ္ဗံ, န စ မယာ ဧဝရူပံ ကမ္မံ အနုညာတံ။ တတြ, ဘိက္ခဝေ, ယဒိဒံ အဓမ္မေန သမဂ္ဂကမ္မံ, ဣဒံ, ဘိက္ခဝေ, ကမ္မံ အဓမ္မတ္တာ ကုပ္ပံ အဋ္ဌာနာရဟံ; န, ဘိက္ခဝေ, ဧဝရူပံ ကမ္မံ ကာတဗ္ဗံ, န စ မယာ ဧဝရူပံ ကမ္မံ အနုညာတံ။ တတြ, ဘိက္ခဝေ, ယဒိဒံ ဓမ္မေန ဝဂ္ဂကမ္မံ, ဣဒံ, ဘိက္ခဝေ, ကမ္မံ ဝဂ္ဂတ္တာ ကုပ္ပံ အဋ္ဌာနာရဟံ; န, ဘိက္ခဝေ, ဧဝရူပံ ကမ္မံ ကာတဗ္ဗံ, န စ မယာ ဧဝရူပံ ကမ္မံ အနုညာတံ။ တတြ, ဘိက္ခဝေ, ယဒိဒံ ဓမ္မေန သမဂ္ဂကမ္မံ, ဣဒံ, ဘိက္ခဝေ, ကမ္မံ ဓမ္မတ္တာ သမဂ္ဂတ္တာ အကုပ္ပံ ဌာနာရဟံ; ဧဝရူပံ, ဘိက္ခဝေ, ကမ္မံ ကာတဗ္ဗံ, ဧဝရူပဉ္စ မယာ ကမ္မံ အနုညာတံ။ တသ္မာတိဟ, ဘိက္ခဝေ, ဧဝရူပံ ကမ္မံ ကရိဿာမ ယဒိဒံ ဓမ္မေန သမဂ္ဂန္တိ – ဧဝဉှိ ဝေါ, ဘိက္ခဝေ, သိက္ခိတဗ္ဗ’’န္တိ။

အဓမ္မေန ဝဂ္ဂါဒိကမ္မကထာ နိဋ္ဌိတာ။

၂၃၆. ဉတ္တိဝိပန္နကမ္မာဒိကထာ

၃၈၅. တေန ခေါ ပန သမယေန ဆဗ္ဗဂ္ဂိယာ ဘိက္ခူ ဧဝရူပါနိ ကမ္မာနိ ကရောန္တိ – အဓမ္မေန ဝဂ္ဂကမ္မံ ကရောန္တိ, အဓမ္မေန သမဂ္ဂကမ္မံ ကရောန္တိ; ဓမ္မေန ဝဂ္ဂကမ္မံ ကရောန္တိ, ဓမ္မပတိရူပကေန ဝဂ္ဂကမ္မံ ကရောန္တိ, ဓမ္မပတိရူပကေန သမဂ္ဂကမ္မံ ကရောန္တိ; ဉတ္တိဝိပန္နမ္ပိ ကမ္မံ ကရောန္တိ အနုဿာဝနသမ္ပန္နံ, အနုဿာဝနဝိပန္နမ္ပိ ကမ္မံ ကရောန္တိ ဉတ္တိသမ္ပန္နံ, ဉတ္တိဝိပန္နမ္ပိ အနုဿာဝနဝိပန္နမ္ပိ ကမ္မံ ကရောန္တိ; အညတြာပိ ဓမ္မာ ကမ္မံ ကရောန္တိ, အညတြာပိ ဝိနယာ ကမ္မံ ကရောန္တိ, အညတြာပိ သတ္ထုသာသနာ ကမ္မံ ကရောန္တိ; ပဋိကုဋ္ဌကတမ္ပိ ကမ္မံ ကရောန္တိ အဓမ္မိကံ ကုပ္ပံ အဋ္ဌာနာရဟံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထံဟိ နာမ ဆဗ္ဗဂ္ဂိယာ ဘိက္ခူ ဧဝရူပါနိ ကမ္မာနိ ကရိဿန္တိ – အဓမ္မေန ဝဂ္ဂကမ္မံ ကရိဿန္တိ, အဓမ္မေန သမဂ္ဂကမ္မံ ကရိဿန္တိ; ဓမ္မေန ဝဂ္ဂကမ္မံ ကရိဿန္တိ, ဓမ္မပတိရူပကေန ဝဂ္ဂကမ္မံ ကရိဿန္တိ, ဓမ္မပတိရူပကေန သမဂ္ဂကမ္မံ ကရိဿန္တိ; ဉတ္တိဝိပန္နမ္ပိ ကမ္မံ ကရိဿန္တိ အနုဿာဝနသမ္ပန္နံ, အနုဿာဝနဝိပန္နမ္ပိ ကမ္မံ ကရိဿန္တိ ဉတ္တိသမ္ပန္နံ, ဉတ္တိဝိပန္နမ္ပိ အနုဿာဝနဝိပန္နမ္ပိ ကမ္မံ ကရိဿန္တိ; အညတြာပိ ဓမ္မာ ကမ္မံ ကရိဿန္တိ, အညတြာပိ ဝိနယာ ကမ္မံ ကရိဿန္တိ, အညတြာပိ သတ္ထုသာသနာ ကမ္မံ ကရိဿန္တိ; ပဋိကုဋ္ဌကတမ္ပိ ကမ္မံ ကရိဿန္တိ အဓမ္မိကံ ကုပ္ပံ အဋ္ဌာနာရဟ’’န္တိ။ အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခူ ဧဝရူပါနိ ကမ္မာနိ ကရောန္တိ – အဓမ္မေန ဝဂ္ဂကမ္မံ ကရောန္တိ။ပေ.။ ပဋိကုဋ္ဌကတမ္ပိ ကမ္မံ ကရောန္တိ အဓမ္မိကံ ကုပ္ပံ အဋ္ဌာနာရဟ’’န္တိ? ‘‘သစ္စံ, ဘဂဝါ’’တိ။ ဝိဂရဟိ ဗုဒ္ဓေါ ဘဂဝါ။ပေ.။ ဝိဂရဟိတွာ ဓမ္မိံ ကထံ ကတွာ ဘိက္ခူ အာမန္တေသိ –

၃၈၆. ‘‘အဓမ္မေန စေ, ဘိက္ခဝေ, ဝဂ္ဂကမ္မံ အကမ္မံ န စ ကရဏီယံ ; အဓမ္မေန သမဂ္ဂကမ္မံ အကမ္မံ န စ ကရဏီယံ; ဓမ္မေန ဝဂ္ဂကမ္မံ အကမ္မံ န စ ကရဏီယံ; ဓမ္မပတိရူပကေန ဝဂ္ဂကမ္မံ အကမ္မံ န စ ကရဏီယံ; ဓမ္မပတိရူပကေန သမဂ္ဂကမ္မံ အကမ္မံ န စ ကရဏီယံ။ ဉတ္တိဝိပန္နဉ္စေ, ဘိက္ခဝေ, ကမ္မံ အနုဿာဝနသမ္ပန္နံ အကမ္မံ န စ ကရဏီယံ; အနုဿာဝနဝိပန္နဉ္စေ, ဘိက္ခဝေ, ကမ္မံ ဉတ္တိသမ္ပန္နံ အကမ္မံ န စ ကရဏီယံ; ဉတ္တိဝိပန္နဉ္စေ, ဘိက္ခဝေ, ကမ္မံ အနုဿာဝနဝိပန္နံ အကမ္မံ န စ ကရဏီယံ; အညတြာပိ ဓမ္မာ ကမ္မံ အကမ္မံ န စ ကရဏီယံ; အညတြာပိ ဝိနယာ ကမ္မံ အကမ္မံ န စ ကရဏီယံ; အညတြာပိ သတ္ထုသာသနာ ကမ္မံ အကမ္မံ န စ ကရဏီယံ; ပဋိကုဋ္ဌကတဉ္စေ, ဘိက္ခဝေ, ကမ္မံ အဓမ္မိကံ ကုပ္ပံ အဋ္ဌာနာရဟံ အကမ္မံ န စ ကရဏီယံ။

၃၈၇. ဆယိမာနိ, ဘိက္ခဝေ, ကမ္မာနိ – အဓမ္မကမ္မံ, ဝဂ္ဂကမ္မံ, သမဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, ဓမ္မေန သမဂ္ဂကမ္မံ။

ကတမဉ္စ , ဘိက္ခဝေ, အဓမ္မကမ္မံ? ဉတ္တိဒုတိယေ စေ, ဘိက္ခဝေ, ကမ္မေ ဧကာယ ဉတ္တိယာ ကမ္မံ ကရောတိ, န စ ကမ္မဝါစံ အနုဿာဝေတိ – အဓမ္မကမ္မံ။ ဉတ္တိဒုတိယေ စေ, ဘိက္ခဝေ, ကမ္မေ ဒွီဟိ ဉတ္တီဟိ ကမ္မံ ကရောတိ, န စ ကမ္မဝါစံ အနုဿာဝေတိ – အဓမ္မကမ္မံ။ ဉတ္တိဒုတိယေ စေ, ဘိက္ခဝေ, ကမ္မေ ဧကာယ ကမ္မဝါစာယ ကမ္မံ ကရောတိ, န စ ဉတ္တိံ ဌပေတိ – အဓမ္မကမ္မံ။ ဉတ္တိဒုတိယေ စေ, ဘိက္ခဝေ, ကမ္မေ ဒွီဟိ ကမ္မဝါစာဟိ ကမ္မံ ကရောတိ, န စ ဉတ္တိံ ဌပေတိ – အဓမ္မကမ္မံ။ ဉတ္တိစတုတ္ထေ စေ, ဘိက္ခဝေ, ကမ္မေ ဧကာယ ဉတ္တိယာ ကမ္မံ ကရောတိ, န စ ကမ္မဝါစံ အနုဿာဝေတိ – အဓမ္မကမ္မံ ။ ဉတ္တိစတုတ္ထေ စေ, ဘိက္ခဝေ, ကမ္မေ ဒွီဟိ ဉတ္တီဟိ ကမ္မံ ကရောတိ, န စ ကမ္မဝါစံ အနုဿာဝေတိ – အဓမ္မကမ္မံ။ ဉတ္တိစတုတ္ထေ စေ, ဘိက္ခဝေ, ကမ္မေ တီဟိ ဉတ္တီဟိ ကမ္မံ ကရောတိ, န စ ကမ္မဝါစံ အနုဿာဝေတိ – အဓမ္မကမ္မံ။ ဉတ္တိစတုတ္ထေ စေ, ဘိက္ခဝေ, ကမ္မေ စတူဟိ ဉတ္တီဟိ ကမ္မံ ကရောတိ, န စ ကမ္မဝါစံ အနုဿာဝေတိ – အဓမ္မကမ္မံ။ ဉတ္တိစတုတ္ထေ စေ, ဘိက္ခဝေ, ကမ္မေ ဧကာယ ကမ္မဝါစာယ ကမ္မံ ကရောတိ, န စ ဉတ္တိံ ဌပေတိ – အဓမ္မကမ္မံ။ ဉတ္တိစတုတ္ထေ စေ, ဘိက္ခဝေ, ကမ္မေ ဒွီဟိ ကမ္မဝါစာဟိ ကမ္မံ ကရောတိ, န စ ဉတ္တိံ ဌပေတိ – အဓမ္မကမ္မံ။ ဉတ္တိစတုတ္ထေ စေ, ဘိက္ခဝေ, ကမ္မေ တီဟိ ကမ္မဝါစာဟိ ကမ္မံ ကရောတိ, န စ ဉတ္တိံ ဌပေတိ – အဓမ္မကမ္မံ။ ဉတ္တိစတုတ္ထေ စေ, ဘိက္ခဝေ, ကမ္မေ စတူဟိ ကမ္မဝါစာဟိ ကမ္မံ ကရောတိ, န စ ဉတ္တိံ ဌပေတိ – အဓမ္မကမ္မံ။ ဣဒံ ဝုစ္စတိ, ဘိက္ခဝေ, အဓမ္မကမ္မံ။

ကတမဉ္စ, ဘိက္ခဝေ, ဝဂ္ဂကမ္မံ? ဉတ္တိဒုတိယေ စေ, ဘိက္ခဝေ, ကမ္မေ ယာဝတိကာ ဘိက္ခူ ကမ္မပ္ပတ္တာ တေ အနာဂတာ ဟောန္တိ, ဆန္ဒာရဟာနံ ဆန္ဒော အနာဟဋော ဟောတိ, သမ္မုခီဘူတာ ပဋိက္ကောသန္တိ – ဝဂ္ဂကမ္မံ။ ဉတ္တိဒုတိယေ စေ, ဘိက္ခဝေ, ကမ္မေ ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အနာဟဋော ဟောတိ, သမ္မုခီဘူတာ ပဋိက္ကောသန္တိ – ဝဂ္ဂကမ္မံ။ ဉတ္တိဒုတိယေ စေ, ဘိက္ခဝေ, ကမ္မေ ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ ပဋိက္ကောသန္တိ – ဝဂ္ဂကမ္မံ။ ဉတ္တိစတုတ္ထေ စေ, ဘိက္ခဝေ, ကမ္မေ ယာဝတိကာ ဘိက္ခူ ကမ္မပ္ပတ္တာ တေ အနာဂတာ ဟောန္တိ, ဆန္ဒာရဟာနံ ဆန္ဒော အနာဟဋော ဟောတိ, သမ္မုခီဘူတာ ပဋိက္ကောသန္တိ – ဝဂ္ဂကမ္မံ။ ဉတ္တိစတုတ္ထေ စေ, ဘိက္ခဝေ, ကမ္မေ ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အနာဟဋော ဟောတိ, သမ္မုခီဘူတာ ပဋိက္ကောသန္တိ – ဝဂ္ဂကမ္မံ။ ဉတ္တိစတုတ္ထေ စေ, ဘိက္ခဝေ, ကမ္မေ ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ ပဋိက္ကောသန္တိ – ဝဂ္ဂကမ္မံ။ ဣဒံ ဝုစ္စတိ, ဘိက္ခဝေ, ဝဂ္ဂကမ္မံ။

ကတမဉ္စ, ဘိက္ခဝေ, သမဂ္ဂကမ္မံ? ဉတ္တိဒုတိယေ စေ, ဘိက္ခဝေ, ကမ္မေ ယာဝတိကာ ဘိက္ခူ ကမ္မပ္ပတ္တာ, တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ န ပဋိက္ကောသန္တိ – သမဂ္ဂကမ္မံ။ ဉတ္တိစတုတ္ထေ စေ, ဘိက္ခဝေ, ကမ္မေ ယာဝတိကာ ဘိက္ခူ ကမ္မပ္ပတ္တာ, တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ န ပဋိက္ကောသန္တိ – သမဂ္ဂကမ္မံ။ ဣဒံ ဝုစ္စတိ, ဘိက္ခဝေ, သမဂ္ဂကမ္မံ။

ကတမဉ္စ, ဘိက္ခဝေ, ဓမ္မပတိရူပကေန ဝဂ္ဂကမ္မံ? ဉတ္တိဒုတိယေ စေ, ဘိက္ခဝေ, ကမ္မေ ပဌမံ ကမ္မဝါစံ အနုဿာဝေတိ, ပစ္ဆာ ဉတ္တိံ ဌပေတိ, ယာဝတိကာ ဘိက္ခူ ကမ္မပ္ပတ္တာ တေ အနာဂတာ ဟောန္တိ, ဆန္ဒာရဟာနံ ဆန္ဒော အနာဟဋော ဟောတိ, သမ္မုခီဘူတာ ပဋိက္ကောသန္တိ – ဓမ္မပတိရူပကေန ဝဂ္ဂကမ္မံ။ ဉတ္တိဒုတိယေ စေ, ဘိက္ခဝေ, ကမ္မေ ပဌမံ ကမ္မဝါစံ အနုဿာဝေတိ, ပစ္ဆာ ဉတ္တိံ ဌပေတိ, ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အနာဟဋော ဟောတိ, သမ္မုခီဘူတာ ပဋိက္ကောသန္တိ – ဓမ္မပတိရူပကေန ဝဂ္ဂကမ္မံ။ ဉတ္တိဒုတိယေ စေ, ဘိက္ခဝေ , ကမ္မေ ပဌမံ ကမ္မဝါစံ အနုဿာဝေတိ, ပစ္ဆာ ဉတ္တိံ ဌပေတိ, ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ ပဋိက္ကောသန္တိ – ဓမ္မပတိရူပကေန ဝဂ္ဂကမ္မံ။ ဉတ္တိစတုတ္ထေ စေ, ဘိက္ခဝေ, ကမ္မေ ပဌမံ ကမ္မဝါစံ အနုဿာဝေတိ, ပစ္ဆာ ဉတ္တိံ ဌပေတိ, ယာဝတိကာ ဘိက္ခူ ကမ္မပ္ပတ္တာ တေ အနာဂတာ ဟောန္တိ, ဆန္ဒာရဟာနံ ဆန္ဒော အနာဟဋော ဟောတိ, သမ္မုခီဘူတာ ပဋိက္ကောသန္တိ – ဓမ္မပတိရူပကေန ဝဂ္ဂကမ္မံ။ ဉတ္တိစတုတ္ထေ စေ, ဘိက္ခဝေ, ကမ္မေ ပဌမံ ကမ္မဝါစံ အနုဿာဝေတိ, ပစ္ဆာ ဉတ္တိံ ဌပေတိ, ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အနာဟဋော ဟောတိ, သမ္မုခီဘူတာ ပဋိက္ကောသန္တိ – ဓမ္မပတိရူပကေန ဝဂ္ဂကမ္မံ။ ဉတ္တိစတုတ္ထေ စေ, ဘိက္ခဝေ, ကမ္မေ ပဌမံ ကမ္မဝါစံ အနုဿာဝေတိ, ပစ္ဆာ ဉတ္တိံ ဌပေတိ, ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ , သမ္မုခီဘူတာ ပဋိက္ကောသန္တိ – ဓမ္မပတိရူပကေန ဝဂ္ဂကမ္မံ။ ဣဒံ ဝုစ္စတိ, ဘိက္ခဝေ, ဓမ္မပတိရူပကေန ဝဂ္ဂကမ္မံ။

ကတမဉ္စ, ဘိက္ခဝေ, ဓမ္မပတိရူပကေန သမဂ္ဂကမ္မံ? ဉတ္တိဒုတိယေ စေ, ဘိက္ခဝေ, ကမ္မေ ပဌမံ ကမ္မဝါစံ အနုဿာဝေတိ, ပစ္ဆာ ဉတ္တိံ ဌပေတိ, ယာဝတိကာ ဘိက္ခူ ကမ္မပ္ပတ္တာ, တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ န ပဋိက္ကောသန္တိ – ဓမ္မပတိရူပကေန သမဂ္ဂကမ္မံ။ ဉတ္တိစတုတ္ထေ စေ, ဘိက္ခဝေ, ကမ္မေ ပဌမံ ကမ္မဝါစံ အနုဿာဝေတိ, ပစ္ဆာ ဉတ္တိံ ဌပေတိ, ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ န ပဋိက္ကောသန္တိ – ဓမ္မပတိရူပကေန သမဂ္ဂကမ္မံ။ ဣဒံ ဝုစ္စတိ, ဘိက္ခဝေ, ဓမ္မပတိရူပကေန သမဂ္ဂကမ္မံ။

ကတမဉ္စ, ဘိက္ခဝေ, ဓမ္မေန သမဂ္ဂကမ္မံ? ဉတ္တိဒုတိယေ စေ, ဘိက္ခဝေ, ကမ္မေ ပဌမံ ဉတ္တိံ ဌပေတိ, ပစ္ဆာ ဧကာယ ကမ္မဝါစာယ ကမ္မံ ကရောတိ, ယာဝတိကာ ဘိက္ခူ ကမ္မပ္ပတ္တာ တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ န ပဋိက္ကောသန္တိ – ဓမ္မေန သမဂ္ဂကမ္မံ။ ဉတ္တိစတုတ္ထေ စေ, ဘိက္ခဝေ, ကမ္မေ ပဌမံ ဉတ္တိံ ဌပေတိ, ပစ္ဆာ တီဟိ ကမ္မဝါစာဟိ ကမ္မံ ကရောတိ, ယာဝတိကာ ဘိက္ခူ ကမ္မပ္ပတ္တာ, တေ အာဂတာ ဟောန္တိ, ဆန္ဒာရဟာနံ ဆန္ဒော အာဟဋော ဟောတိ, သမ္မုခီဘူတာ န ပဋိက္ကောသန္တိ, ဓမ္မေန သမဂ္ဂကမ္မံ။ ဣဒံ ဝုစ္စတိ, ဘိက္ခဝေ, ဓမ္မေန သမဂ္ဂကမ္မံ။

ဉတ္တိဝိပန္နကမ္မာဒိကထာ နိဋ္ဌိတာ။

၂၃၇. စတုဝဂ္ဂကရဏာဒိကထာ

၃၈၈. ပဉ္စ သံဃာ – စတုဝဂ္ဂေါ ဘိက္ခုသံဃော ပဉ္စဝဂ္ဂေါ ဘိက္ခုသံဃော, ဒသဝဂ္ဂေါ ဘိက္ခုသံဃော, ဝီသတိဝဂ္ဂေါ ဘိက္ခုသံဃော, အတိရေကဝီသတိဝဂ္ဂေါ ဘိက္ခုသံဃော။ တတြ, ဘိက္ခဝေ, ယွာယံ စတုဝဂ္ဂေါ ဘိက္ခုသံဃော, ဌပေတွာ တီဏိ ကမ္မာနိ – ဥပသမ္ပဒံ ပဝါရဏံ အဗ္ဘာနံ, ဓမ္မေန သမဂ္ဂေါ သဗ္ဗကမ္မေသု ကမ္မပ္ပတ္တော။ တတြ, ဘိက္ခဝေ, ယွာယံ ပဉ္စဝဂ္ဂေါ ဘိက္ခုသံဃော, ဌပေတွာ ဒွေ ကမ္မာနိ – မဇ္ဈိမေသု ဇနပဒေသု ဥပသမ္ပဒံ အဗ္ဘာနံ, ဓမ္မေန သမဂ္ဂေါ သဗ္ဗကမ္မေသု ကမ္မပ္ပတ္တော။ တတြ, ဘိက္ခဝေ, ယွာယံ ဒသဝဂ္ဂေါ ဘိက္ခုသံဃော, ဌပေတွာ ဧကံ ကမ္မံ – အဗ္ဘာနံ, ဓမ္မေန သမဂ္ဂေါ သဗ္ဗကမ္မေသု ကမ္မပ္ပတ္တော။ တတြ, ဘိက္ခဝေ, ယွာယံ ဝီသတိဝဂ္ဂေါ ဘိက္ခုသံဃော ဓမ္မေန သမဂ္ဂေါ သဗ္ဗကမ္မေသု ကမ္မပ္ပတ္တော။ တတြ, ဘိက္ခဝေ, ယွာယံ အတိရေကဝီသတိဝဂ္ဂေါ ဘိက္ခုသံဃော ဓမ္မေန သမဂ္ဂေါ သဗ္ဗကမ္မေသု ကမ္မပ္ပတ္တော။

၃၈၉. စတုဝဂ္ဂကရဏဉ္စေ, ဘိက္ခဝေ, ကမ္မံ ဘိက္ခုနိစတုတ္ထော ကမ္မံ ကရေယျ – အကမ္မံ န စ ကရဏီယံ။ စတုဝဂ္ဂကရဏဉ္စေ, ဘိက္ခဝေ, ကမ္မံ သိက္ခမာနစတုတ္ထော ကမ္မံ ကရေယျ။ အကမ္မံ န စ ကရဏီယံ။ပေ.။။ သာမဏေရစတုတ္ထော ကမ္မံ ကရေယျ။ အကမ္မံ န စ ကရဏီယံ။ သာမဏေရိစတုတ္ထော ကမ္မံ ကရေယျ။ အကမ္မံ န စ ကရဏီယံ။ သိက္ခံ ပစ္စက္ခာတကစတုတ္ထော ကမ္မံ ကရေယျ။ အကမ္မံ န စ ကရဏီယံ။ အန္တိမဝတ္ထုံ အဇ္ဈာပန္နကစတုတ္ထော ကမ္မံ ကရေယျ။ အကမ္မံ န စ ကရဏီယံ။ အာပတ္တိယာ အဒဿနေ ဥက္ခိတ္တကစတုတ္ထော ကမ္မံ ကရေယျ။ အကမ္မံ န စ ကရဏီယံ။ အာပတ္တိယာ အပ္ပဋိကမ္မေ ဥက္ခိတ္တကစတုတ္ထော ကမ္မံ ကရေယျ။ အကမ္မံ န စ ကရဏီယံ။ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခိတ္တကစတုတ္ထော ကမ္မံ ကရေယျ။ အကမ္မံ န စ ကရဏီယံ။ ပဏ္ဍကစတုတ္ထော ကမ္မံ ကရေယျ။ အကမ္မံ န စ ကရဏီယံ။ ထေယျသံဝါသကစတုတ္ထော ကမ္မံ ကရေယျ။ အကမ္မံ န စ ကရဏီယံ။ တိတ္ထိယပက္ကန္တကစတုတ္ထော ကမ္မံ ကရေယျ။ အကမ္မံ န စ ကရဏီယံ။ တိရစ္ဆာနဂတစတုတ္ထော ကမ္မံ ကရေယျ။ အကမ္မံ န စ ကရဏီယံ။ မာတုဃာတကစတုတ္ထော ကမ္မံ ကရေယျ။ အကမ္မံ န စ ကရဏီယံ။ ပိတုဃာတကစတုတ္ထော ကမ္မံ ကရေယျ။ အကမ္မံ န စ ကရဏီယံ။ အရဟန္တဃာတကစတုတ္ထော ကမ္မံ ကရေယျ။ အကမ္မံ န စ ကရဏီယံ။ ဘိက္ခုနိဒူသကစတုတ္ထော ကမ္မံ ကရေယျ။ အကမ္မံ န စ ကရဏီယံ။ သံဃဘေဒကစတုတ္ထော ကမ္မံ ကရေယျ။ အကမ္မံ န စ ကရဏီယံ။ လောဟိတုပ္ပါဒကစတုတ္ထော ကမ္မံ ကရေယျ။ အကမ္မံ န စ ကရဏီယံ။ ဥဘတောဗျဉ္ဇနကစတုတ္ထော ကမ္မံ ကရေယျ။ အကမ္မံ န စ ကရဏီယံ။ နာနာသံဝါသကစတုတ္ထော ကမ္မံ ကရေယျ။ အကမ္မံ န စ ကရဏီယံ။ နာနာသီမာယ ဌိတစတုတ္ထော ကမ္မံ ကရေယျ။ အကမ္မံ န စ ကရဏီယံ။ ဣဒ္ဓိယာ ဝေဟာသေ ဌိတစတုတ္ထော ကမ္မံ ကရေယျ။ အကမ္မံ န စ ကရဏီယံ။ ယဿ သံဃော ကမ္မံ ကရောတိ, တံစတုတ္ထော ကမ္မံ ကရေယျ ။ အကမ္မံ န စ ကရဏီယံ။

စတုဝရဏံ။

၃၉၀. ပဉ္စဝဂ္ဂကရဏဉ္စေ, ဘိက္ခဝေ, ကမ္မံ ဘိက္ခုနိပဉ္စမော ကမ္မံ ကရေယျ။ အကမ္မံ န စ ကရဏီယံ။ ပဉ္စဝဂ္ဂကရဏဉ္စေ, ဘိက္ခဝေ, ကမ္မံ သိက္ခမာနပဉ္စမော ကမ္မံ ကရေယျ။ပေ.။။ သာမဏေရပဉ္စမော ကမ္မံ ကရေယျ။ သာမဏေရိပဉ္စမော ကမ္မံ ကရေယျ ။ သိက္ခံ ပစ္စက္ခာတကပဉ္စမော ကမ္မံ ကရေယျ။ အန္တိမဝတ္ထုံ အဇ္ဈာပန္နကပဉ္စမော ကမ္မံ ကရေယျ။ အာပတ္တိယာ အဒဿနေ ဥက္ခိတ္တကပဉ္စမော ကမ္မံ ကရေယျ။ အာပတ္တိယာ အပ္ပဋိကမ္မေ ဥက္ခိတ္တကပဉ္စမော ကမ္မံ ကရေယျ။ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခိတ္တကပဉ္စမော ကမ္မံ ကရေယျ။ ပဏ္ဍကပဉ္စမော ကမ္မံ ကရေယျ။ ထေယျသံဝါသကပဉ္စမော ကမ္မံ ကရေယျ။ တိတ္ထိယပက္ကန္တကပဉ္စမော ကမ္မံ ကရေယျ။ တိရစ္ဆာနဂတပဉ္စမော ကမ္မံ ကရေယျ။ မာတုဃာတကပဉ္စမော ကမ္မံ ကရေယျ။ ပိတုဃာတကပဉ္စမော ကမ္မံ ကရေယျ။ အရဟန္တဃာတကပဉ္စမော ကမ္မံ ကရေယျ။ ဘိက္ခုနိဒူသကပဉ္စမော ကမ္မံ ကရေယျ။ သံဃဘေဒကပဉ္စမော ကမ္မံ ကရေယျ။ လောဟိတုပ္ပါဒကပဉ္စမော ကမ္မံ ကရေယျ။ ဥဘတောဗျဉ္ဇနကပဉ္စမော ကမ္မံ ကရေယျ။ နာနာသံဝါသကပဉ္စမော ကမ္မံ ကရေယျ။ နာနာသီမာယ ဌိတပဉ္စမော ကမ္မံ ကရေယျ။ ဣဒ္ဓိယာ ဝေဟာသေ ဌိတပဉ္စမော ကမ္မံ ကရေယျ။ ယဿ သံဃော ကမ္မံ ကရောတိ, တံပဉ္စမော ကမ္မံ ကရေယျ – အကမ္မံ န စ ကရဏီယံ။

ပဉ္စဝဂ္ဂကရဏံ။

၃၉၁. ဒသဝဂ္ဂကရဏဉ္စေ, ဘိက္ခဝေ, ကမ္မံ ဘိက္ခုနိဒသမော ကမ္မံ ကရေယျ, အကမ္မံ န စ ကရဏီယံ။ ဒသဝဂ္ဂကရဏဉ္စေ, ဘိက္ခဝေ, ကမ္မံ သိက္ခမာနဒသမော ကမ္မံ ကရေယျ, အကမ္မံ န စ ကရဏီယံ။ပေ.။ ။ ဒသဝဂ္ဂကရဏဉ္စေ, ဘိက္ခဝေ, ကမ္မံ ယဿ သံဃော ကမ္မံ ကရောတိ, တံဒသမော ကမ္မံ ကရေယျ – အကမ္မံ န စ ကရဏီယံ။

ဒသဝဂ္ဂကရဏံ။

၃၉၂. ဝီသတိဝဂ္ဂကရဏဉ္စေ, ဘိက္ခဝေ, ကမ္မံ ဘိက္ခုနိဝီသော ကမ္မံ ကရေယျ – အကမ္မံ န စ ကရဏီယံ။ ဝီသတိဝဂ္ဂကရဏဉ္စေ, ဘိက္ခဝေ, ကမ္မံ သိက္ခမာနဝီသော ကမ္မံ ကရေယျ ။ပေ.။ သာမဏေရဝီသော ကမ္မံ ကရေယျ။ သာမဏေရိဝီသော ကမ္မံ ကရေယျ။ သိက္ခံ ပစ္စက္ခာတကဝီသော ကမ္မံ ကရေယျ။ အန္တိမဝတ္ထုံ အဇ္ဈာပန္နကဝီသော ကမ္မံ ကရေယျ။ အာပတ္တိယာ အဒဿနေ ဥက္ခိတ္တကဝီသော ကမ္မံ ကရေယျ။ အာပတ္တိယာ အပ္ပဋိကမ္မေ ဥက္ခိတ္တကဝီသော ကမ္မံ ကရေယျ။ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခိတ္တကဝီသော ကမ္မံ ကရေယျ။ ပဏ္ဍကဝီသော ကမ္မံ ကရေယျ။ ထေယျသံဝါသကဝီသော ကမ္မံ ကရေယျ။ တိတ္ထိယပက္ကန္တကဝီသော ကမ္မံ ကရေယျ။ တိရစ္ဆာနဂတဝီသော ကမ္မံ ကရေယျ။ မာတုဃာတကဝီသော ကမ္မံ ကရေယျ။ ပိတုဃာတကဝီသော ကမ္မံ ကရေယျ။ အရဟန္တဃာတကဝီသော ကမ္မံ ကရေယျ။ ဘိက္ခုနိဒူသကဝီသော ကမ္မံ ကရေယျ။ သံဃဘေဒကဝီသော ကမ္မံ ကရေယျ။ လောဟိတုပ္ပါဒကဝီသော ကမ္မံ ကရေယျ။ ဥဘတောဗျဉ္ဇနကဝီသော ကမ္မံ ကရေယျ။ နာနာသံဝါသကဝီသော ကမ္မံ ကရေယျ။ နာနာသီမာယ ဌိတဝီသော ကမ္မံ ကရေယျ။ ဣဒ္ဓိယာ ဝေဟာသေ ဌိတဝီသော ကမ္မံ ကရေယျ။ ယဿ သံဃော ကမ္မံ ကရောတိ, တံဝီသော ကမ္မံ ကရေယျ – အကမ္မံ န စ ကရဏီယံ။

ဝီသတိဝဂ္ဂကရဏံ။

စတုဝဂ္ဂကရဏာဒိကထာ နိဋ္ဌိတာ။

၂၃၈. ပါရိဝါသိကာဒိကထာ

၃၉၃. ပါရိဝါသိကစတုတ္ထော စေ, ဘိက္ခဝေ, ပရိဝါသံ ဒဒေယျ, မူလာယ ပဋိကဿေယျ, မာနတ္တံ ဒဒေယျ, တံဝီသော အဗ္ဘေယျ – အကမ္မံ န စ ကရဏီယံ။ မူလာယ ပဋိကဿနာရဟစတုတ္ထော စေ, ဘိက္ခဝေ, ပရိဝါသံ ဒဒေယျ, မူလာယ ပဋိကဿေယျ, မာနတ္တံ ဒဒေယျ, တံဝီသော အဗ္ဘေယျ – အကမ္မံ န စ ကရဏီယံ။ မာနတ္တာရဟစတုတ္ထော စေ, ဘိက္ခဝေ, ပရိဝါသံ ဒဒေယျ, မူလာယ ပဋိကဿေယျ, မာနတ္တံ ဒဒေယျ, တံဝီသော အဗ္ဘေယျ – အကမ္မံ န စ ကရဏီယံ။ မာနတ္တစာရိကစတုတ္ထော စေ, ဘိက္ခဝေ, ပရိဝါသံ ဒဒေယျ, မူလာယ ပဋိကဿေယျ, မာနတ္တံ ဒဒေယျ, တံဝီသော အဗ္ဘေယျ – အကမ္မံ န စ ကရဏီယံ။ အဗ္ဘာနာရဟစတုတ္ထော စေ, ဘိက္ခဝေ, ပရိဝါသံ ဒဒေယျ, မူလာယ ပဋိကဿေယျ, မာနတ္တံ ဒဒေယျ, တံဝီသော အဗ္ဘေယျ – အကမ္မံ န စ ကရဏီယံ။

၃၉၄. ဧကစ္စဿ, ဘိက္ခဝေ, သံဃမဇ္ဈေ ပဋိက္ကောသနာ ရုဟတိ, ဧကစ္စဿ န ရုဟတိ။ ကဿ စ, ဘိက္ခဝေ, သံဃမဇ္ဈေ ပဋိက္ကောသနာ န ရုဟတိ? ဘိက္ခုနိယာ, ဘိက္ခဝေ, သံဃမဇ္ဈေ ပဋိက္ကောသနာ န ရုဟတိ။ သိက္ခမာနာယ, ဘိက္ခဝေ။ပေ.။ သာမဏေရဿ, ဘိက္ခဝေ။ သာမဏေရိယာ, ဘိက္ခဝေ။ သိက္ခာပစ္စက္ခာတကဿ ဘိက္ခဝေ။ အန္တိမဝတ္ထုံ အဇ္ဈာပန္နကဿ, ဘိက္ခဝေ ။ ဥမ္မတ္တကဿ, ဘိက္ခဝေ။ ခိတ္တစိတ္တဿ, ဘိက္ခဝေ။ ဝေဒနာဋ္ဋဿ, ဘိက္ခဝေ။ အာပတ္တိယာ အဒဿနေ ဥက္ခိတ္တကဿ, ဘိက္ခဝေ။ အာပတ္တိယာ အပ္ပဋိကမ္မေ ဥက္ခိတ္တကဿ, ဘိက္ခဝေ။ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခိတ္တကဿ, ဘိက္ခဝေ။ ပဏ္ဍကဿ, ဘိက္ခဝေ။ ထေယျသံဝါသကဿ, ဘိက္ခဝေ။ တိတ္ထိယပက္ကန္တကဿ, ဘိက္ခဝေ ။ တိရစ္ဆာနဂတဿ ဘိက္ခဝေ။ မာတုဃာတကဿ, ဘိက္ခဝေ။ ပိတုဃာတကဿ, ဘိက္ခဝေ။ အရဟန္တဃာတကဿ, ဘိက္ခဝေ။ ဘိက္ခုနိဒူသကဿ, ဘိက္ခဝေ။ သံဃဘေဒကဿ, ဘိက္ခဝေ။ လောဟိတုပ္ပါဒကဿ, ဘိက္ခဝေ။ ဥဘတောဗျဉ္ဇနကဿ, ဘိက္ခဝေ။ နာနာသံဝါသကဿ, ဘိက္ခဝေ။ နာနာသီမာယ ဌိတဿ, ဘိက္ခဝေ။ ဣဒ္ဓိယာ ဝေဟာသေ ဌိတဿ, ဘိက္ခဝေ, ယဿ သံဃော ကမ္မံ ကရောတိ, တဿ စ [တဿ (သျာ.)], ဘိက္ခဝေ, သံဃမဇ္ဈေ ပဋိက္ကောသနာ န ရုဟတိ။ ဣမေသံ ခေါ, ဘိက္ခဝေ, သံဃမဇ္ဈေ ပဋိက္ကောသနာ န ရုဟတိ။

ကဿ စ, ဘိက္ခဝေ, သံဃမဇ္ဈေ ပဋိက္ကောသနာ ရုဟတိ? ဘိက္ခုဿ, ဘိက္ခဝေ, ပကတတ္တဿ

သမာနသံဝါသကဿ သမာနသီမာယ ဌိတဿ အန္တမသော အာနန္တရိကဿာပိ [အနန္တရိကဿာပိ (သျာ.)] ဘိက္ခုနော ဝိညာပေန္တဿ သံဃမဇ္ဈေ ပဋိက္ကောသနာ ရုဟတိ။ ဣမဿ ခေါ, ဘိက္ခဝေ, သံဃမဇ္ဈေ ပဋိက္ကောသနာ ရုဟတိ။

ပါရိဝါသိကာဒိကထာ နိဋ္ဌိတာ။

၂၃၉. ဒွေနိဿာရဏာဒိကထာ

၃၉၅. ဒွေမာ, ဘိက္ခဝေ, နိဿာရဏာ။ အတ္ထိ, ဘိက္ခဝေ, ပုဂ္ဂလော အပ္ပတ္တော နိဿာရဏံ။ တဉ္စေ သံဃော နိဿာရေတိ, ဧကစ္စော သုနိဿာရိတော, ဧကစ္စော ဒုန္နိဿာရိတော။ ကတမော စ, ဘိက္ခဝေ, ပုဂ္ဂလော အပ္ပတ္တော နိဿာရဏံ, တဉ္စေ သံဃော နိဿာရေတိ – ဒုန္နိဿာရိတော? ဣဓ ပန, ဘိက္ခဝေ, ဘိက္ခု သုဒ္ဓေါ ဟောတိ အနာပတ္တိကော။ တဉ္စေ သံဃော နိဿာရေတိ – ဒုန္နိဿာရိတော။ အယံ ဝုစ္စတိ, ဘိက္ခဝေ, ပုဂ္ဂလော အပ္ပတ္တော နိဿာရဏံ, တဉ္စေ သံဃော နိဿာရေတိ – ဒုန္နိဿာရိတော။

ကတမော စ, ဘိက္ခဝေ, ပုဂ္ဂလော အပ္ပတ္တော နိဿာရဏံ, တဉ္စေ သံဃော နိဿာရေတိ – သုနိဿာရိတော? ဣဓ ပန, ဘိက္ခဝေ, ဘိက္ခု ဗာလော ဟောတိ အဗျတ္တော အာပတ္တိဗဟုလော အနပဒါနော, ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ, တဉ္စေ သံဃော နိဿာရေတိ – သုနိဿာရိတော။ အယံ ဝုစ္စတိ, ဘိက္ခဝေ, ပုဂ္ဂလော အပ္ပတ္တော နိဿာရဏံ, တဉ္စေ သံဃော နိဿာရေတိ – သုနိဿာရိတော။

၃၉၆. ဒွေမာ , ဘိက္ခဝေ, ဩသာရဏာ။ အတ္ထိ, ဘိက္ခဝေ, ပုဂ္ဂလော အပ္ပတ္တော ဩသာရဏံ တဉ္စေ သံဃော ဩသာရေတိ, ဧကစ္စော သောသာရိတော, ဧကစ္စော ဒေါသာရိတော။ ကတမော စ, ဘိက္ခဝေ, ပုဂ္ဂလော အပ္ပတ္တော ဩသာရဏံ, တဉ္စေ သံဃော ဩသာရေတိ – ဒေါသာရိတော? ပဏ္ဍကော, ဘိက္ခဝေ, အပ္ပတ္တော ဩသာရဏံ, တဉ္စေ သံဃော ဩသာရေတိ – ဒေါသာရိတော။ ထေယျသံဝါသကော, ဘိက္ခဝေ, အပ္ပတ္တော ဩသာရဏံ, တဉ္စေ သံဃော ဩသာရေတိ – ဒေါသာရိတော။ တိတ္ထိယပက္ကန္တကော, ဘိက္ခဝေ။ပေ.။ တိရစ္ဆာနဂတော, ဘိက္ခဝေ။ မာတုဃာတကော, ဘိက္ခဝေ။ ပိတုဃာတကော, ဘိက္ခဝေ။ အရဟန္တဃာတကော, ဘိက္ခဝေ။ ဘိက္ခုနိဒူသကော, ဘိက္ခဝေ။ သံဃဘေဒကော, ဘိက္ခဝေ။ လောဟိတုပ္ပါဒကော, ဘိက္ခဝေ။ ဥဘတောဗျဉ္ဇနကော, ဘိက္ခဝေ, အပ္ပတ္တော, ဩသာရဏံ, တဉ္စေ သံဃော ဩသာရေတိ – ဒေါသာရိတော။ အယံ ဝုစ္စတိ, ဘိက္ခဝေ, ပုဂ္ဂလော အပ္ပတ္တော ဩသာရဏံ, တဉ္စေ သံဃော ဩသာရေတိ – ဒေါသာရိတော။ ဣမေ ဝုစ္စန္တိ, ဘိက္ခဝေ, ပုဂ္ဂလာ အပ္ပတ္တာ ဩသာရဏံ, တေ စေ သံဃော ဩသာရေတိ – ဒေါသာရိတာ။

ကတမော စ, ဘိက္ခဝေ, ပုဂ္ဂလော အပ္ပတ္တော ဩသာရဏံ, တဉ္စေ သံဃော ဩသာရေတိ – သောသာရိတော? ဟတ္ထစ္ဆိန္နော, ဘိက္ခဝေ, အပ္ပတ္တော ဩသာရဏံ, တဉ္စေ သံဃော ဩသာရေတိ, သောသာရိတော။ ပါဒစ္ဆိန္နော, ဘိက္ခဝေ။ပေ.။ ဟတ္ထပါဒစ္ဆိန္နော, ဘိက္ခဝေ။ ကဏ္ဏစ္ဆိန္နော , ဘိက္ခဝေ။ နာသစ္ဆိန္နော, ဘိက္ခဝေ။ ကဏ္ဏနာသစ္ဆိန္နော, ဘိက္ခဝေ။ အင်္ဂုလိစ္ဆိန္နော, ဘိက္ခဝေ။ အဠစ္ဆိန္နော, ဘိက္ခဝေ။ ကဏ္ဍရစ္ဆိန္နော, ဘိက္ခဝေ။ ဖဏဟတ္ထကော, ဘိက္ခဝေ။ ခုဇ္ဇော, ဘိက္ခဝေ။ ဝါမနော, ဘိက္ခဝေ။ ဂလဂဏ္ဍီ, ဘိက္ခဝေ။ လက္ခဏာဟတော, ဘိက္ခဝေ။ ကသာဟတော, ဘိက္ခဝေ။ လိခိတကော, ဘိက္ခဝေ။ သီပဒိကော, ဘိက္ခဝေ။ ပါပရောဂီ, ဘိက္ခဝေ။ ပရိသဒူသကော, ဘိက္ခဝေ။ ကာဏော, ဘိက္ခဝေ။ ကုဏီ, ဘိက္ခဝေ။ ခဉ္ဇော, ဘိက္ခဝေ။ ပက္ခဟတော, ဘိက္ခဝေ။ ဆိန္နိရိယာပထော, ဘိက္ခဝေ။ ဇရာဒုဗ္ဗလော, ဘိက္ခဝေ။ အန္ဓော, ဘိက္ခဝေ။ မူဂေါ, ဘိက္ခဝေ။ ဗဓိရော, ဘိက္ခဝေ။ အန္ဓမူဂေါ, ဘိက္ခဝေ။ အန္ဓဗဓိရော, ဘိက္ခဝေ။ မူဂဗဓိရော, ဘိက္ခဝေ။ အန္ဓမူဂဗဓိရော, ဘိက္ခဝေ, အပ္ပတ္တော ဩသာရဏံ, တဉ္စေ သံဃော ဩသာရေတိ – သောသာရိတော။ အယံ ဝုစ္စတိ, ဘိက္ခဝေ, ပုဂ္ဂလော အပ္ပတ္တော ဩသာရဏံ, တဉ္စေ သံဃော ဩသာရေတိ – သောသာရိတော။ ဣမေ ဝုစ္စန္တိ, ဘိက္ခဝေ, ပုဂ္ဂလာ အပ္ပတ္တာ ဩသာရဏံ, တေ စေ သံဃော ဩသာရေတိ – သောသာရိတာ။

ဒွေနိဿာရဏာဒိကထာ နိဋ္ဌိတာ။

ဝါသဘဂါမဘာဏဝါရော နိဋ္ဌိတော ပဌမော။

၂၄၀. အဓမ္မကမ္မာဒိကထာ

၃၉၇. ဣဓ ပန, ဘိက္ခဝေ, ဘိက္ခုဿ န ဟောတိ အာပတ္တိ ဒဋ္ဌဗ္ဗာ။ တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ, အာဝုသော, အာပန္နော, ပဿသေတံ အာပတ္တိ’’န္တိ? သော ဧဝံ ဝဒေတိ – ‘‘နတ္ထိ မေ, အာဝုသော, အာပတ္တိ, ယမဟံ ပဿေယျ’’န္တိ။ တံ သံဃော အာပတ္တိယာ အဒဿနေ ဥက္ခိပတိ – အဓမ္မကမ္မံ။

ဣဓ ပန, ဘိက္ခဝေ, ဘိက္ခုဿ န ဟောတိ အာပတ္တိ ပဋိကာတဗ္ဗာ။ တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ, အာဝုသော, အာပန္နော, ပဋိကရောဟိ တံ အာပတ္တိ’’န္တိ။ သော ဧဝံ ဝဒေတိ – ‘‘နတ္ထိ မေ, အာဝုသော, အာပတ္တိ, ယမယံ ပဋိကရေယျ’’န္တိ။ တံ သံဃော အာပတ္တိယာ အပ္ပဋိကမ္မေ ဥက္ခိပတိ – အဓမ္မကမ္မံ။

ဣဓ ပန, ဘိက္ခဝေ, ဘိက္ခုဿ န ဟောတိ ပါပိကာ ဒိဋ္ဌိ ပဋိနိဿဇ္ဇေတာ။ တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘ပါပိကာ တေ, အာဝုသော, ဒိဋ္ဌိ, ပဋိနိဿဇ္ဇေတံ ပါပိကံ ဒိဋ္ဌိ’’န္တိ။ သော ဧဝံ ဝဒေတိ – ‘‘နတ္ထိ မေ, အာဝုသော, ပါပိကာ ဒိဋ္ဌိ, ယမဟံ ပဋိနိဿဇ္ဇေယျ’’န္တိ။ တံ သံဃော ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခိပတိ – အဓမ္မကမ္မံ။

ဣဓ ပန, ဘိက္ခဝေ, ဘိက္ခုဿ န ဟောတိ အာပတ္တိ ဒဋ္ဌဗ္ဗာ, န ဟောတိ အာပတ္တိ ပဋိကာတဗ္ဗာ။ တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ, အာဝုသော, အာပန္နော, ပဿသေတံ အာပတ္တိ? ပဋိကရောဟိ တံ အာပတ္တိ’’န္တိ။ သော ဧဝံ ဝဒေတိ – ‘‘နတ္ထိ မေ, အာဝုသော, အာပတ္တိ, ယမဟံ ပဿေယျံ။ နတ္ထိ မေ, အာဝုသော, အာပတ္တိ, ယမဟံ ပဋိကရေယျ’’န္တိ။ တံ သံဃော အဒဿနေ ဝါ အပ္ပဋိကမ္မေ ဝါ ဥက္ခိပတိ – အဓမ္မကမ္မံ။

ဣဓ ပန, ဘိက္ခဝေ, ဘိက္ခုဿ န ဟောတိ အာပတ္တိ ဒဋ္ဌဗ္ဗာ, န ဟောတိ ပါပိကာ ဒိဋ္ဌိ ပဋိနိဿဇ္ဇေတာ။ တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ, အာဝုသော, အာပန္နော, ပဿသေတံ အာပတ္တိံ? ပါပိကာ တေ ဒိဋ္ဌိ, ပဋိနိဿဇ္ဇေတံ ပါပိကံ ဒိဋ္ဌိ’’န္တိ။ သော ဧဝံ ဝဒေတိ – ‘‘နတ္ထိ မေ, အာဝုသော, အာပတ္တိ, ယမဟံ ပဿေယျံ; နတ္ထိ မေ, အာဝုသော, ပါပိကာ ဒိဋ္ဌိ, ယမဟံ ပဋိနိဿဇ္ဇေယျ’’န္တိ။ တံ သံဃော အဒဿနေ ဝါ အပ္ပဋိနိဿဂ္ဂေ ဝါ ဥက္ခိပတိ – အဓမ္မကမ္မံ။

ဣဓ ပန, ဘိက္ခဝေ, ဘိက္ခုဿ န ဟောတိ အာပတ္တိ ပဋိကာတဗ္ဗာ, န ဟောတိ ပါပိကာ ဒိဋ္ဌိ ပဋိနိဿဇ္ဇေတာ။ တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ, အာဝုသော, အာပန္နော, ပဋိကရောဟိ တံ အာပတ္တိံ; ပါပိကာ တေ ဒိဋ္ဌိ, ပဋိနိဿဇ္ဇေတံ ပါပိကံ ဒိဋ္ဌိ’’န္တိ။ သော ဧဝံ ဝဒေတိ – ‘‘နတ္ထိ မေ, အာဝုသော, အာပတ္တိ, ယမဟံ ပဋိကရေယျံ။ နတ္ထိ မေ, အာဝုသော, ပါပိကာ ဒိဋ္ဌိ, ယမဟံ ပဋိနိဿဇ္ဇေယျ’’န္တိ။ တံ သံဃော အပ္ပဋိကမ္မေ ဝါ အပ္ပဋိနိဿဂ္ဂေ ဝါ ဥက္ခိပတိ – အဓမ္မကမ္မံ။

ဣဓ ပန, ဘိက္ခဝေ, ဘိက္ခုဿ န ဟောတိ အာပတ္တိ ဒဋ္ဌဗ္ဗာ, န ဟောတိ အာပတ္တိ ပဋိကာတဗ္ဗာ, န ဟောတိ ပါပိကာ ဒိဋ္ဌိ ပဋိနိဿဇ္ဇေတာ။ တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ, အာဝုသော, အာပန္နော, ပဿသေတံ အာပတ္တိံ? ပဋိကရောဟိ တံ အာပတ္တိံ; ပါပိကာ တေ ဒိဋ္ဌိ, ပဋိနိဿဇ္ဇေတံ ပါပိကံ ဒိဋ္ဌိ’’န္တိ။ သော ဧဝံ ဝဒေတိ – ‘‘နတ္ထိ မေ, အာဝုသော, အာပတ္တိ, ယမဟံ ပဿေယျံ။ နတ္ထိ မေ, အာဝုသော, အာပတ္တိ, ယမဟံ ပဋိကရေယျံ။ နတ္ထိ မေ, အာဝုသော, ပါပိကာ ဒိဋ္ဌိ, ယမဟံ ပဋိနိဿဇ္ဇေယျ’’န္တိ။ တံ သံဃော အဒဿနေ ဝါ အပ္ပဋိကမ္မေ ဝါ အပ္ပဋိနိဿဂ္ဂေ ဝါ ဥက္ခိပတိ – အဓမ္မကမ္မံ။

၃၉၈. ဣဓ ပန, ဘိက္ခဝေ, ဘိက္ခုဿ ဟောတိ အာပတ္တိ ဒဋ္ဌဗ္ဗာ။ တမေနံ စောဒေတိ။ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ , အာဝုသော, အာပန္နော, ပဿသေတံ အာပတ္တိ’’န္တိ? သော ဧဝံ ဝဒေတိ – ‘‘အာမာဝုသော, ပဿာမီ’’တိ။ တံ သံဃော အာပတ္တိယာ အဒဿနေ ဥက္ခိပတိ – အဓမ္မကမ္မံ။

ဣဓ ပန, ဘိက္ခဝေ, ဘိက္ခုဿ ဟောတိ အာပတ္တိ ပဋိကာတဗ္ဗာ။ တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ, အာဝုသော, အာပန္နော, ပဋိကရောဟိ တံ အာပတ္တိ’’န္တိ။ သော ဧဝံ ဝဒေတိ – ‘‘အာမာဝုသော, ပဋိကရိဿာမီ’’တိ။ တံ သံဃော အာပတ္တိယာ အပ္ပဋိကမ္မေ ဥက္ခိပတိ – အဓမ္မကမ္မံ။

ဣဓ ပန, ဘိက္ခဝေ, ဘိက္ခုဿ ဟောတိ ပါပိကာ ဒိဋ္ဌိ ပဋိနိဿဇ္ဇေတာ။ တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘ပါပိကာ တေ, အာဝုသော, ဒိဋ္ဌိ; ပဋိနိဿဇ္ဇေတံ ပါပိကံ ဒိဋ္ဌိ’’န္တိ။ သော ဧဝံ ဝဒေတိ – ‘‘အာမာဝုသော , ပဋိနိဿဇ္ဇိဿာမီ’’တိ။ တံ သံဃော ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခိပတိ – အဓမ္မကမ္မံ။

ဣဓ ပန, ဘိက္ခဝေ, ဘိက္ခုဿ ဟောတိ အာပတ္တိ ဒဋ္ဌဗ္ဗာ, ဟောတိ အာပတ္တိ ပဋိကာတဗ္ဗာ။ပေ.။ ဟောတိ အာပတ္တိ ဒဋ္ဌဗ္ဗာ, ဟောတိ ပါပိကာ ဒိဋ္ဌိ ပဋိနိဿဇ္ဇေတာ။ပေ.။ ဟောတိ အာပတ္တိ ပဋိကာတဗ္ဗာ, ဟောတိ ပါပိကာ ဒိဋ္ဌိ ပဋိနိဿဇ္ဇေတာ။ပေ.။ ဟောတိ အာပတ္တိ ဒဋ္ဌဗ္ဗာ, ဟောတိ အာပတ္တိ ပဋိကာတဗ္ဗာ, ဟောတိ ပါပိကာ ဒိဋ္ဌိ ပဋိနိဿဇ္ဇေတာ။ တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ, အာဝုသော, အာပန္နော, ပဿသေတံ အာပတ္တိံ? ပဋိကရောဟိ တံ အာပတ္တိံ; ပါပိကာ တေ ဒိဋ္ဌိ, ပဋိနိဿဇ္ဇေတံ ပါပိကံ ဒိဋ္ဌိ’’န္တိ။ သော ဧဝံ ဝဒေတိ – ‘‘အာမာဝုသော, ပဿာမိ, အာမ ပဋိကရိဿာမိ, အာမ ပဋိနိဿဇ္ဇိဿာမီ’’တိ ။ တံ သံဃော အဒဿနေ ဝါ အပ္ပဋိကမ္မေ ဝါ အပ္ပဋိနိဿဂ္ဂေ ဝါ ဥက္ခိပတိ – အဓမ္မကမ္မံ။

၃၉၉. ဣဓ ပန, ဘိက္ခဝေ, ဘိက္ခုဿ ဟောတိ အာပတ္တိ ဒဋ္ဌဗ္ဗာ။ တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ, အာဝုသော, အာပန္နော, ပဿသေတံ အာပတ္တိ’’န္တိ? သော ဧဝံ ဝဒေတိ – ‘‘နတ္ထိ မေ, အာဝုသော, အာပတ္တိ, ယမဟံ ပဿေယျ’’န္တိ။ တံ သံဃော အာပတ္တိယာ အဒဿနေ ဥက္ခိပတိ – ဓမ္မကမ္မံ။

ဣဓ ပန, ဘိက္ခဝေ, ဘိက္ခုဿ ဟောတိ အာပတ္တိ ပဋိကာတဗ္ဗာ။ တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ, အာဝုသော, အာပန္နော, ပဋိကရောဟိ တံ အာပတ္တိ’’န္တိ။ သော ဧဝံ ဝဒေတိ – ‘‘နတ္ထိ မေ, အာဝုသော, အာပတ္တိ, ယမဟံ ပဋိကရေယျ’’န္တိ။ တံ သံဃော အာပတ္တိယာ အပ္ပဋိကမ္မေ ဥက္ခိပတိ – ဓမ္မကမ္မံ။

ဣဓ ပန, ဘိက္ခဝေ, ဘိက္ခုဿ ဟောတိ ပါပိကာ ဒိဋ္ဌိ ပဋိနိဿဇ္ဇေတာ။ တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘ပါပိကာ တေ, အာဝုသော, ဒိဋ္ဌိ, ပဋိနိဿဇ္ဇေတံ ပါပိကံ ဒိဋ္ဌိ’’န္တိ။ သော ဧဝံ ဝဒေတိ – ‘‘နတ္ထိ မေ, အာဝုသော, ပါပိကာ ဒိဋ္ဌိ, ယမဟံ ပဋိနိဿဇ္ဇေယျ’’န္တိ။ တံ သံဃော ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခိပတိ – ဓမ္မကမ္မံ။

ဣဓ ပန, ဘိက္ခဝေ, ဘိက္ခုဿ ဟောတိ အာပတ္တိ ဒဋ္ဌဗ္ဗာ, ဟောတိ အာပတ္တိ ပဋိကာတဗ္ဗာ။ပေ.။

ဟောတိ အာပတ္တိ ဒဋ္ဌဗ္ဗာ, ဟောတိ ပါပိကာ ဒိဋ္ဌိ ပဋိနိဿဇ္ဇေတာ။ပေ.။ ဟောတိ အာပတ္တိ ပဋိကာတဗ္ဗာ, ဟောတိ ပါပိကာ ဒိဋ္ဌိ ပဋိနိဿဇ္ဇေတာ ။ပေ.။ ဟောတိ အာပတ္တိ ဒဋ္ဌဗ္ဗာ, ဟောတိ အာပတ္တိ ပဋိကာတဗ္ဗာ, ဟောတိ ပါပိကာ ဒိဋ္ဌိ ပဋိနိဿဇ္ဇေတာ။ တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ, အာဝုသော, အာပန္နော, ပဿသေတံ အာပတ္တိံ? ပဋိကရောဟိ တံ အာပတ္တိံ။ ပါပိကာ တေ ဒိဋ္ဌိ, ပဋိနိဿဇ္ဇေတံ ပါပိကံ ဒိဋ္ဌိ’’န္တိ။ သော ဧဝံ ဝဒေတိ – ‘‘နတ္ထိ မေ, အာဝုသော, အာပတ္တိ, ယမဟံ ပဿေယျံ။ နတ္ထိ မေ, အာဝုသော, အာပတ္တိ ယမဟံ ပဋိကရေယျံ။ နတ္ထိ မေ, အာဝုသော, ပါပိကာ ဒိဋ္ဌိ, ယမဟံ ပဋိနိဿဇ္ဇေယျ’’န္တိ။ တံ သံဃော အဒဿနေ ဝါ အပ္ပဋိကမ္မေ ဝါ အပ္ပဋိနိဿဂ္ဂေ ဝါ ဥက္ခိပတိ – ဓမ္မကမ္မန္တိ။

အဓမ္မကမ္မာဒိကထာ နိဋ္ဌိတာ။

၂၄၁. ဥပါလိပုစ္ဆာကထာ

၄၀၀. အထ ခေါ အာယသ္မာ ဥပါလိ ယေန ဘဂဝါ တေနုပသင်္ကမိ, ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ။ ဧကမန္တံ နိသိန္နော ခေါ အာယသ္မာ ဥပါလိ ဘဂဝန္တံ ဧတဒဝေါစ – ‘‘ယော နု ခေါ, ဘန္တေ, သမဂ္ဂေါ သံဃော သမ္မုခါကရဏီယံ ကမ္မံ အသမ္မုခါ ကရောတိ, ဓမ္မကမ္မံ နု ခေါ တံ, ဘန္တေ, ဝိနယကမ္မ’’န္တိ? ‘‘အဓမ္မကမ္မံ တံ, ဥပါလိ, အဝိနယကမ္မ’’န္တိ။ ‘‘ယော နု ခေါ, ဘန္တေ, သမဂ္ဂေါ သံဃော ပဋိပုစ္ဆာကရဏီယံ ကမ္မံ အပ္ပဋိပုစ္ဆာ ကရောတိ။ပေ.။ ပဋိညာယကရဏီယံ ကမ္မံ အပဋိညာယ ကရောတိ။ သတိဝိနယာရဟဿ အမူဠှဝိနယံ ဒေတိ။ အမူဠှဝိနယာရဟဿ တဿပါပိယသိကာကမ္မံ ကရောတိ။ တဿပါပိယသိကာကမ္မာရဟဿ တဇ္ဇနီယကမ္မံ ကရောတိ။ တဇ္ဇနီယကမ္မာရဟဿ နိယဿကမ္မံ ကရောတိ ။ နိယဿကမ္မာရဟဿ ပဗ္ဗာဇနီယကမ္မံ ကရောတိ။ ပဗ္ဗာဇနီယကမ္မာရဟဿ ပဋိသာရဏီယကမ္မံ ကရောတိ။ ပဋိသာရဏီယကမ္မာရဟဿ ဥက္ခေပနီယကမ္မံ ကရောတိ။ ဥက္ခေပနီယကမ္မာရဟဿ ပရိဝါသံ ဒေတိ။ ပရိဝါသာရဟံ မူလာယ ပဋိကဿတိ။ မူလာယပဋိကဿနာရဟဿ မာနတ္တံ ဒေတိ။ မာနတ္တာရဟံ အဗ္ဘေတိ။ အဗ္ဘာနာရဟံ ဥပသမ္ပာဒေတိ, ဓမ္မကမ္မံ နု ခေါ တံ, ဘန္တေ, ဝိနယကမ္မ’’န္တိ? ‘‘အဓမ္မကမ္မံ တံ, ဥပါလိ, အဝိနယကမ္မံ’’။

‘‘ယော ခေါ, ဥပါလိ, သမဂ္ဂေါ သံဃော သမ္မုခါကရဏီယံ ကမ္မံ အသမ္မုခါ ကရောတိ, ဧဝံ ခေါ, ဥပါလိ, အဓမ္မကမ္မံ ဟောတိ အဝိနယကမ္မံ, ဧဝဉ္စ ပန သံဃော သာတိသာရော ဟောတိ။ ယော ခေါ, ဥပါလိ, သမဂ္ဂေါ သံဃော ပဋိပုစ္ဆာကရဏီယံ ကမ္မံ အပ္ပဋိပုစ္ဆာ ကရောတိ။ပေ.။ ပဋိညာယကရဏီယံ ကမ္မံ အပဋိညာယ ကရောတိ။ သတိဝိနယာရဟဿ အမူဠှဝိနယံ ဒေတိ။ အမူဠှဝိနယာရဟဿ တဿပါပိယသိကာကမ္မံ ကရောတိ။ တဿပါပိယသိကာကမ္မာရဟဿ တဇ္ဇနီယကမ္မံ ကရောတိ။ တဇ္ဇနီယကမ္မာရဟဿ နိယဿကမ္မံ ကရောတိ။ နိယဿကမ္မာရဟဿ ပဗ္ဗာဇနီယကမ္မံ ကရောတိ။ ပဗ္ဗာဇနီယကမ္မာရဟဿ ပဋိသာရဏီယကမ္မံ ကရောတိ။ ပဋိသာရဏီယကမ္မာရဟဿ ဥက္ခေပနီယကမ္မံ ကရောတိ။ ဥက္ခေပနီယကမ္မာရဟဿ ပရိဝါသံ ဒေတိ။ ပရိဝါသာရဟံ မူလာယ ပဋိကဿတိ။ မူလာယပဋိကဿနာရဟဿ မာနတ္တံ ဒေတိ။ မာနတ္တာရဟံ အဗ္ဘေတိ။ အဗ္ဘာနာရဟံ ဥပသမ္ပာဒေတိ, ဧဝံ ခေါ, ဥပါလိ, အဓမ္မကမ္မံ ဟောတိ အဝိနယကမ္မံ။ ဧဝဉ္စ ပန သံဃော သာတိသာရော ဟောတီ’’တိ။

၄၀၁. ‘‘ယော နု ခေါ, ဘန္တေ, သမဂ္ဂေါ သံဃော သမ္မုခါကရဏီယံ ကမ္မံ သမ္မုခါ ကရောတိ, ဓမ္မကမ္မံ နု ခေါ တံ, ဘန္တေ, ဝိနယကမ္မ’’န္တိ? ‘‘ဓမ္မကမ္မံ တံ, ဥပါလိ, ဝိနယကမ္မ’’န္တိ။ ‘‘ယော နု ခေါ, ဘန္တေ, သမဂ္ဂေါ သံဃော ပဋိပုစ္ဆာကရဏီယံ ကမ္မံ ပဋိပုစ္ဆာ ကရောတိ။ပေ.။ ပဋိညာယကရဏီယံ ကမ္မံ ပဋိညာယ ကရောတိ။ သတိဝိနယာရဟဿ သတိဝိနယံ ဒေတိ။ အမူဠှဝိနယာရဟဿ အမူဠှဝိနယံ ဒေတိ။ တဿပါပိယသိကာကမ္မာရဟဿ တဿပါပိယသိကာကမ္မံ ကရောတိ။ တဇ္ဇနီယကမ္မာရဟဿ တဇ္ဇနီယကမ္မံ ကရောတိ။ နိယဿကမ္မာရဟဿ နိယဿကမ္မံ ကရောတိ။ ပဗ္ဗာဇနီယကမ္မာရဟဿ ပဗ္ဗာဇနီယကမ္မံ ကရောတိ။ ပဋိသာရဏီယကမ္မာရဟဿ ပဋိသာရဏီယကမ္မံ ကရောတိ။ ဥက္ခေပနီယကမ္မာရဟဿ ဥက္ခေပနီယကမ္မံ ကရောတိ။ ပရိဝါသာရဟဿ ပရိဝါသံ ဒေတိ မူလာယပဋိကဿနာရဟံ မူလာယ ပဋိကဿတိ။ မာနတ္တာရဟဿ မာနတ္တံ ဒေတိ။ အဗ္ဘာနာရဟံ အဗ္ဘေတိ။ ဥပသမ္ပဒါရဟံ ဥပသမ္ပာဒေတိ, ဓမ္မကမ္မံ နု ခေါ တံ, ဘန္တေ, ဝိနယကမ္မ’’န္တိ? ‘‘ဓမ္မကမ္မံ တံ, ဥပါလိ, ဝိနယကမ္မံ။

‘‘ယော ခေါ, ဥပါလိ, သမဂ္ဂေါ သံဃော သမ္မုခါကရဏီယံ ကမ္မံ သမ္မုခါ ကရောတိ, ဧဝံ ခေါ, ဥပါလိ, ဓမ္မကမ္မံ ဟောတိ ဝိနယကမ္မံ။ ဧဝဉ္စ ပန သံဃော အနတိသာရော ဟောတိ။ ယော ခေါ, ဥပါလိ, သမဂ္ဂေါ သံဃော ပဋိပုစ္ဆာကရဏီယံ ကမ္မံ ပဋိပုစ္ဆာ ကရောတိ။ ပဋိညာယကရဏီယံ ကမ္မံ ပဋိညာယ ကရောတိ။ သတိဝိနယာရဟဿ သတိဝိနယံ ဒေတိ။ အမူဠှဝိနယာရဟဿ အမူဠှဝိနယံ ဒေတိ။ တဿပါပိယသိကာကမ္မာရဟဿ တဿပါပိယသိကာကမ္မံ ကရောတိ။ တဇ္ဇနီယကမ္မာရဟဿ တဇ္ဇနီယကမ္မံ ကရောတိ။ နိယဿကမ္မာရဟဿ နိယဿကမ္မံ ကရောတိ။ ပဗ္ဗာဇနီယကမ္မာရဟဿ ပဗ္ဗာဇနီယကမ္မံ ကရောတိ ။ ပဋိသာရဏီယကမ္မာရဟဿ ပဋိသာရဏီယကမ္မံ ကရောတိ။ ဥက္ခေပနီယကမ္မာရဟဿ ဥက္ခေပနီယကမ္မံ ကရောတိ။ ပရိဝါသာရဟဿ ပရိဝါသံ ဒေတိ။ မူလာယပဋိကဿနာရဟံ မူလာယ ပဋိကဿတိ။ မာနတ္တာရဟဿ မာနတ္တံ ဒေတိ။ အဗ္ဘာနာရဟံ အဗ္ဘေတိ။ ဥပသမ္ပဒါရဟံ ဥပသမ္ပာဒေတိ, ဧဝံ ခေါ, ဥပါလိ, ဓမ္မကမ္မံ ဟောတိ ဝိနယကမ္မံ။ ဧဝဉ္စ ပန သံဃော အနတိသာရော ဟောတီ’’တိ။

၄၀၂. ‘‘ယော နု ခေါ, ဘန္တေ, သမဂ္ဂေါ သံဃော သတိဝိနယာရဟဿ အမူဠှဝိနယံ ဒေတိ, အမူဠှဝိနယာရဟဿ သတိဝိနယံ ဒေတိ, ဓမ္မကမ္မံ နု ခေါ တံ, ဘန္တေ, ဝိနယကမ္မ’’န္တိ? ‘‘အဓမ္မကမ္မံ တံ, ဥပါလိ, အဝိနယကမ္မ’’န္တိ။ ‘‘ယော နု ခေါ, ဘန္တေ, သမဂ္ဂေါ သံဃော အမူဠှဝိနယာရဟဿ တဿပါပိယသိကာကမ္မံ ကရောတိ, တဿပါပိယသိကာကမ္မာရဟဿ အမူဠှဝိနယံ ဒေတိ။ပေ.။ တဿပါပိယသိကာကမ္မာရဟဿ တဇ္ဇနီယကမ္မံ ကရောတိ, တဇ္ဇနီယကမ္မာရဟဿ တဿပါပိယသိကာကမ္မံ ကရောတိ။ တဇ္ဇနီယကမ္မာရဟဿ နိယဿကမ္မံ ကရောတိ, နိယဿကမ္မာရဟဿ တဇ္ဇနီယကမ္မံ ကရောတိ။ နိယဿကမ္မာရဟဿ ပဗ္ဗာဇနီယကမ္မံ ကရောတိ, ပဗ္ဗာဇနီယကမ္မာရဟဿ နိယဿကမ္မံ ကရောတိ။ ပဗ္ဗာဇနီယကမ္မာရဟဿ ပဋိသာရဏီယကမ္မံ ကရောတိ, ပဋိသာရဏီယကမ္မာရဟဿ ပဗ္ဗာဇနီယကမ္မံ ကရောတိ။ ပဋိသာရဏီယကမ္မာရဟဿ ဥက္ခေပနီယကမ္မံ ကရောတိ, ဥက္ခေပနီယကမ္မာရဟဿ ပဋိသာရဏီယကမ္မံ ကရောတိ။ ဥက္ခေပနီယကမ္မာရဟဿ ပရိဝါသံ ဒေတိ, ပရိဝါသာရဟဿ ဥက္ခေပနီယကမ္မံ ကရောတိ။ ပရိဝါသာရဟံ မူလာယ ပဋိကဿတိ, မူလာယပဋိကဿနာရဟဿ ပရိဝါသံ ဒေတိ။ မူလာယပဋိကဿနာရဟဿ မာနတ္တံ ဒေတိ, မာနတ္တာရဟံ မူလာယ ပဋိကဿတိ။ မာနတ္တာရဟံ အဗ္ဘေတိ, အဗ္ဘာနာရဟဿ မာနတ္တံ ဒေတိ။ အဗ္ဘာနာရဟံ ဥပသမ္ပာဒေတိ, ဥပသမ္ပဒါရဟံ အဗ္ဘေတိ, ဓမ္မကမ္မံ နု ခေါ တံ, ဘန္တေ, ဝိနယကမ္မ’’န္တိ? ‘‘အဓမ္မကမ္မံ တံ, ဥပါလိ, အဝိနယကမ္မ’’န္တိ။

‘‘ယော ခေါ, ဥပါလိ, သမဂ္ဂေါ သံဃော သတိဝိနယာရဟဿ အမူဠှဝိနယံ ဒေတိ, အမူဠှဝိနယာရဟဿ သတိဝိနယံ ဒေတိ, ဧဝံ ခေါ, ဥပါလိ, အဓမ္မကမ္မံ ဟောတိ အဝိနယကမ္မံ။ ဧဝဉ္စ ပန သံဃော သာတိသာရော ဟောတိ။ ယော ခေါ, ဥပါလိ, သမဂ္ဂေါ သံဃော အမူဠှဝိနယာရဟဿ တဿပါပိယသိကာကမ္မံ ကရောတိ, တဿပါပိယသိကာကမ္မာရဟဿ အမူဠှဝိနယံ ဒေတိ။ပေ.။ တဿပါပိယသိကာကမ္မာရဟဿ တဇ္ဇနီယကမ္မံ ကရောတိ, တဇ္ဇနီယကမ္မာရဟဿ တဿပါပိယသိကာကမ္မံ ကရောတိ။ တဇ္ဇနီယကမ္မာရဟဿ နိယဿကမ္မံ ကရောတိ , နိယဿကမ္မာရဟဿ တဇ္ဇနီယကမ္မံ ကရောတိ။ နိယဿကမ္မာရဟဿ ပဗ္ဗာဇနီယကမ္မံ ကရောတိ, ပဗ္ဗာဇနီယကမ္မာရဟဿ နိယဿကမ္မံ ကရောတိ။ ပဗ္ဗာဇနီယကမ္မာရဟဿ ပဋိသာရဏီယကမ္မံ ကရောတိ, ပဋိသာရဏီယကမ္မာရဟဿ ပဗ္ဗာဇနီယကမ္မံ ကရောတိ။ ပဋိသာရဏီယကမ္မာရဟဿ ဥက္ခေပနီယကမ္မံ ကရောတိ, ဥက္ခေပနီယကမ္မာရဟဿ ပဋိသာရဏီယကမ္မံ ကရောတိ။ ဥက္ခေပနီယကမ္မာရဟဿ ပရိဝါသံ ဒေတိ, ပရိဝါသာရဟဿ ဥက္ခေပနီယကမ္မံ ကရောတိ။ ပရိဝါသာရဟံ မူလာယ ပဋိကဿတိ, မူလာယပဋိကဿနာရဟဿ ပရိဝါသံ ဒေတိ။ မူလာယပဋိကဿနာရဟဿ မာနတ္တံ ဒေတိ, မာနတ္တာရဟံ မူလာယ ပဋိကဿတိ – မာနတ္တာရဟံ အဗ္ဘေတိ, အဗ္ဘာနာရဟဿ မာနတ္တံ ဒေတိ။ အဗ္ဘာနာရဟံ ဥပသမ္ပာဒေတိ, ဥပသမ္ပဒါရဟံ အဗ္ဘေတိ, ဧဝံ ခေါ, ဥပါလိ, အဓမ္မကမ္မံ ဟောတိ အဝိနယကမ္မံ။ ဧဝဉ္စ ပန သံဃော သာတိသာရော ဟောတီ’’တိ။

၄၀၃. ‘‘ယော နု ခေါ, ဘန္တေ, သမဂ္ဂေါ သံဃော သတိဝိနယာရဟဿ သတိဝိနယံ ဒေတိ, အမူဠှဝိနယာရဟဿ အမူဠှဝိနယံ ဒေတိ, ဓမ္မကမ္မံ နု ခေါ တံ, ဘန္တေ, ဝိနယကမ္မ’’န္တိ? ‘‘ဓမ္မကမ္မံ တံ, ဥပါလိ, ဝိနယကမ္မ’’န္တိ။ ‘‘ယော နု ခေါ, ဘန္တေ, သမဂ္ဂေါ သံဃော အမူဠှဝိနယာရဟဿ အမူဠှဝိနယံ ဒေတိ။ပေ.။ တဿပါပိယသိကာကမ္မာရဟဿ တဿပါပိယသိကာကမ္မံ ကရောတိ။ပေ.။ တဇ္ဇနီယကမ္မာရဟဿ တဇ္ဇနီယကမ္မံ ကရောတိ။ပေ.။ နိယဿကမ္မာရဟဿ နိယဿကမ္မံ ကရောတိ။ပေ.။ ပဗ္ဗာဇနီယကမ္မာရဟဿ ပဗ္ဗာဇနီယကမ္မံ ကရောတိ။ပေ.။ ပဋိသာရဏီယကမ္မာရဟဿ ပဋိသာရဏီယကမ္မံ ကရောတိ။ပေ.။ ဥက္ခေပနီယကမ္မာရဟဿ ဥက္ခေပနီယကမ္မံ ကရောတိ။ပေ.။ ပရိဝါသာရဟဿ ပရိဝါသံ ဒေတိ။ပေ.။ မူလာယပဋိကဿနာရဟံ မူလာယ ပဋိကဿတိ။ပေ.။ မာနတ္တာရဟဿ မာနတ္တံ ဒေတိ။ပေ.။ အဗ္ဘာနာရဟံ အဗ္ဘေတိ, ဥပသမ္ပဒါရဟံ ဥပသမ္ပာဒေတိ, ဓမ္မကမ္မံ နု ခေါ တံ, ဘန္တေ, ဝိနယကမ္မ’’န္တိ? ‘‘ဓမ္မကမ္မံ တံ, ဥပါလိ, ဝိနယကမ္မံ’’။

‘‘ယော ခေါ, ဥပါလိ, သမဂ္ဂေါ သံဃော သတိဝိနယာရဟဿ သတိဝိနယံ ဒေတိ, အမူဠှဝိနယာရဟဿ အမူဠှဝိနယံ ဒေတိ, ဧဝံ ခေါ, ဥပါလိ, ဓမ္မကမ္မံ ဟောတိ ဝိနယကမ္မံ။ ဧဝဉ္စ ပန သံဃော အနတိသာရော ဟောတိ ။ ယော ခေါ, ဥပါလိ, သမဂ္ဂေါ သံဃော အမူဠှဝိနယာရဟဿ အမူဠှဝိနယံ ဒေတိ ။ပေ.။ တဿပါပိယသိကာကမ္မာရဟဿ တဿပါပိယသိကာကမ္မံ ကရောတိ။ပေ.။ တဇ္ဇနီယကမ္မာရဟဿ တဇ္ဇနီယကမ္မံ ကရောတိ။ပေ.။ နိယဿကမ္မာရဟဿ နိယဿကမ္မံ ကရောတိ။ပေ.။ ပဗ္ဗာဇနီယကမ္မာရဟဿ ပဗ္ဗာဇနီယကမ္မံ ကရောတိ။ပေ.။ ပဋိသာရဏီယကမ္မာရဟဿ ပဋိသာရဏီယကမ္မံ ကရောတိ။ပေ.။ ဥက္ခေပနီယကမ္မာရဟဿ ဥက္ခေပနီယကမ္မံ ကရောတိ။ပေ.။ ပရိဝါသာရဟဿ ပရိဝါသံ ဒေတိ။ပေ.။ မူလာယ ပဋိကဿနာရဟံ မူလာယ ပဋိကဿတိ။ပေ.။ မာနတ္တာရဟဿ မာနတ္တံ ဒေတိ။ပေ.။ အဗ္ဘာနာရဟံ အဗ္ဘေတိ, ဥပသမ္ပဒါရဟံ ဥပသမ္ပာဒေတိ, ဧဝံ ခေါ, ဥပါလိ, ဓမ္မကမ္မံ ဟောတိ ဝိနယကမ္မံ။ ဧဝဉ္စ ပန သံဃော အနတိသာရော ဟောတီ’’တိ။

၄၀၄. အထ ခေါ ဘဂဝါ ဘိက္ခူ အာမန္တေသိ – ယော ခေါ, ဘိက္ခဝေ, သမဂ္ဂေါ သံဃော သတိဝိနယာရဟဿ အမူဠှဝိနယံ ဒေတိ, ဧဝံ ခေါ, ဘိက္ခဝေ, အဓမ္မကမ္မံ ဟောတိ အဝိနယကမ္မံ။ ဧဝဉ္စ ပန သံဃော သာတိသာရော ဟောတိ။ ယော ခေါ, ဘိက္ခဝေ, သမဂ္ဂေါ သံဃော သတိဝိနယာရဟဿ တဿပါပိယသိကာကမ္မံ ကရောတိ။ပေ.။ သတိဝိနယာရဟဿ တဇ္ဇနီယကမ္မံ ကရောတိ။ သတိဝိနယာရဟဿ နိယဿကမ္မံ ကရောတိ။ သတိဝိနယာရဟဿ ပဗ္ဗာဇနီယကမ္မံ ကရောတိ။ သတိဝိနယာရဟဿ ပဋိသာရဏီယကမ္မံ ကရောတိ။ သတိဝိနယာရဟဿ ဥက္ခေပနီယကမ္မံ ကရောတိ ။ သတိဝိနယာရဟဿ ပရိဝါသံ ဒေတိ။ သတိဝိနယာရဟံ မူလာယ ပဋိကဿတိ။ သတိဝိနယာရဟဿ မာနတ္တံ ဒေတိ။ သတိဝိနယာရဟံ အဗ္ဘေတိ။ သတိဝိနယာရဟံ ဥပသမ္ပာဒေတိ, ဧဝံ ခေါ , ဘိက္ခဝေ, အဓမ္မကမ္မံ ဟောတိ အဝိနယကမ္မံ။ ဧဝဉ္စ ပန သံဃော သာတိသာရော ဟောတိ။

၄၀၅. ယော ခေါ, ဘိက္ခဝေ, သမဂ္ဂေါ သံဃော အမူဠှဝိနယာရဟဿ တဿပါပိယသိကာကမ္မံ ကရောတိ, ဧဝံ ခေါ, ဘိက္ခဝေ, အဓမ္မကမ္မံ ဟောတိ အဝိနယကမ္မံ။ ဧဝဉ္စ ပန သံဃော သာတိသာရော ဟောတိ။ ယော ခေါ, ဘိက္ခဝေ, သမဂ္ဂေါ သံဃော အမူဠှဝိနယာရဟဿ တဇ္ဇနီယကမ္မံ ကရောတိ။ပေ.။ အမူဠှဝိနယာရဟဿ နိယဿကမ္မံ ကရောတိ။ အမူဠှဝိနယာရဟဿ ပဗ္ဗာဇနီယကမ္မံ ကရောတိ။ အမူဠှဝိနယာရဟဿ ပဋိသာရဏီယကမ္မံ ကရောတိ။ အမူဠှဝိနယာရဟဿ ဥက္ခေပနီယကမ္မံ ကရောတိ။ အမူဠှဝိနယာရဟဿ ပရိဝါသံ ဒေတိ။ အမူဠှဝိနယာရဟံ မူလာယ ပဋိကဿတိ။ အမူဠှဝိနယာရဟဿ မာနတ္တံ ဒေတိ။ အမူဠှဝိနယာရဟံ အဗ္ဘေတိ။ အမူဠှဝိနယာရဟံ ဥပသမ္ပာဒေတိ။ အမူဠှဝိနယာရဟဿ သတိဝိနယံ ဒေတိ, ဧဝံ ခေါ, ဘိက္ခဝေ, အဓမ္မကမ္မံ ဟောတိ အဝိနယကမ္မံ။ ဧဝဉ္စ ပန သံဃော သာတိသာရော ဟောတိ။

၄၀၆. ယော ခေါ, ဘိက္ခဝေ, သမဂ္ဂေါ သံဃော တဿပါပိယသိကာကမ္မာရဟဿ တဇ္ဇနီယကမ္မံ ကရောတိ။ပေ.။ တဇ္ဇနီယကမ္မာရဟဿ။ နိယဿကမ္မာရဟဿ။ ပဗ္ဗာဇနီယကမ္မာရဟဿ။ ပဋိသာရဏီယကမ္မာရဟဿ။ ဥက္ခေပနီယကမ္မာရဟဿ။ ပရိဝါသာရဟံ။ မူလာယပဋိကဿနာရဟဿ။ မာနတ္တာရဟံ။ အဗ္ဘာနာရဟံ။ ဥပသမ္ပဒါရဟဿ သတိဝိနယံ ဒေတိ, ဧဝံ ခေါ, ဘိက္ခဝေ, အဓမ္မကမ္မံ ဟောတိ အဝိနယကမ္မံ။ ဧဝဉ္စ ပန သံဃော သာတိသာရော ဟောတိ။ ယော ခေါ, ဘိက္ခဝေ, သမဂ္ဂေါ သံဃော ဥပသမ္ပဒါရဟဿ အမူဠှဝိနယံ ဒေတိ။ပေ.။ ဥပသမ္ပဒါရဟဿ တဿပါပိယသိကာကမ္မံ ကရောတိ။ ဥပသမ္ပဒါရဟဿ တဇ္ဇနီယကမ္မံ ကရောတိ။ ဥပသမ္ပဒါရဟဿ နိယဿကမ္မံ ကရောတိ။ ဥပသမ္ပဒါရဟဿ ပဗ္ဗာဇနီယကမ္မံ ကရောတိ။ ဥပသမ္ပဒါရဟဿ ပဋိသာရဏီယကမ္မံ ကရောတိ။ ဥပသမ္ပဒါရဟဿ ဥက္ခေပနီယကမ္မံ ကရောတိ။ ဥပသမ္ပဒါရဟဿ ပရိဝါသံ ဒေတိ။ ဥပသမ္ပဒါရဟံ မူလာယ ပဋိကဿတိ။ ဥပသမ္ပဒါရဟဿ မာနတ္တံ ဒေတိ။ ဥပသမ္ပဒါရဟံ အဗ္ဘေတိ, ဧဝံ ခေါ, ဘိက္ခဝေ, အဓမ္မကမ္မံ ဟောတိ အဝိနယကမ္မံ။ ဧဝဉ္စ ပန သံဃော သာတိသာရော ဟောတီတိ။

ဥပါလိပုစ္ဆာကထာ နိဋ္ဌိတာ။

ဥပါလိပုစ္ဆာဘာဏဝါရော နိဋ္ဌိတော ဒုတိယော။

၂၄၂. တဇ္ဇနီယကမ္မကထာ

၄၀၇. ဣဓ ပန, ဘိက္ခဝေ, ဘိက္ခု ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သံဃေ အဓိကရဏကာရကော။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု ဘဏ္ဍနကာရကော ကလဟကာရကော ဝိဝါဒကာရကော ဘဿကာရကော သံဃေ အဓိကရဏကာရကော။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – အဓမ္မေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော အဓမ္မေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – အဓမ္မေန သမဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော အဓမ္မေန သမဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော ဓမ္မေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မပတိရူပကေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော ဓမ္မပတိရူပကေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မပတိရူပကေန သမဂ္ဂါ။

၄၀၈. ဣဓ ပန, ဘိက္ခဝေ, ဘိက္ခု ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သံဃေ အဓိကရဏကာရကော။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု ဘဏ္ဍနကာရကော ကလဟကာရကော ဝိဝါဒကာရကော ဘဿကာရကော သံဃေ အဓိကရဏကာရကော။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – အဓမ္မေန သမဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော အဓမ္မေန သမဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော ဓမ္မေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မပတိရူပကေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော ဓမ္မပတိရူပကေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မပတိရူပကေန သမဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော ဓမ္မပတိရူပကေန သမဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’တိ။ တေ တဿ တဇ္ဇနီယကမ္မံ ကရောန္တိ – အဓမ္မေန ဝဂ္ဂါ။

၄၀၉. ဣဓ ပန, ဘိက္ခဝေ, ဘိက္ခု ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သံဃေ အဓိကရဏကာရကော။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု ဘဏ္ဍနကာရကော ကလဟကာရကော ဝိဝါဒကာရကော ဘဿကာရကော သံဃေ အဓိကရဏကာရကော။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော ဓမ္မေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မပတိရူပကေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော ဓမ္မပတိရူပကေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မပတိရူပကေန သမဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော ဓမ္မပတိရူပကေန သမဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – အဓမ္မေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော အဓမ္မေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – အဓမ္မေန သမဂ္ဂါ။

၄၁၀. ဣဓ ပန, ဘိက္ခဝေ, ဘိက္ခု ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သံဃေ အဓိကရဏကာရကော။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု ဘဏ္ဍနကာရကော ကလဟကာရကော ဝိဝါဒကာရကော ဘဿကာရကော သံဃေ အဓိကရဏကာရကော။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မပတိရူပကေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော ဓမ္မပတိရူပကေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မပတိရူပကေန သမဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော ဓမ္မပတိရူပကေန သမဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – အဓမ္မေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော အဓမ္မေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – အဓမ္မေန သမဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော အဓမ္မေန သမဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မေန ဝဂ္ဂါ။

၄၁၁. ဣဓ ပန, ဘိက္ခဝေ, ဘိက္ခု ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သံဃေ အဓိကရဏကာရကော။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု ဘဏ္ဍနကာရကော ကလဟကာရကော ဝိဝါဒကာရကော ဘဿကာရကော သံဃေ အဓိကရဏကာရကော။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မပတိရူပကေန သမဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော ဓမ္မပတိရူပကေန သမဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – အဓမ္မေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော အဓမ္မေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – အဓမ္မေန သမဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော အဓမ္မေန သမဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော ဓမ္မေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မပတိရူပကေန ဝဂ္ဂါ။

တဇ္ဇနီယကမ္မကထာ နိဋ္ဌိတာ။

၂၄၃. နိယဿကမ္မကထာ

၄၁၂. ဣဓ ပန, ဘိက္ခဝေ, ဘိက္ခု ဗာလော ဟောတိ အဗျတ္တော အာပတ္တိဗဟုလော အနပဒါနော, ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု ဗာလော အဗျတ္တော အာပတ္တိဗဟုလော အနပဒါနော, ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ။ ဟန္ဒဿ မယံ နိယဿကမ္မံ ကရောမာ’’တိ။ တေ တဿ နိယဿကမ္မံ ကရောန္တိ – အဓမ္မေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန နိယဿကမ္မကတော အဓမ္မေန ဝဂ္ဂေဟိ။ ဟန္ဒဿ မယံ နိယဿကမ္မံ ကရောမာ’’တိ။ တေ တဿ နိယဿကမ္မံ ကရောန္တိ – အဓမ္မေန သမဂ္ဂါ။ပေ.။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ပေ.။။

ယထာ ဟေဋ္ဌာ, တထာ စက္ကံ ကာတဗ္ဗံ။

နိယဿကမ္မကထာ နိဋ္ဌိတာ။

၂၄၄. ပဗ္ဗာဇနီယကမ္မကထာ

၄၁၃. ဣဓ ပန, ဘိက္ခဝေ, ဘိက္ခု ကုလဒူသကော ဟောတိ ပါပသမာစာရော။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု ကုလဒူသကော ပါပသမာစာရော။ ဟန္ဒဿ မယံ ပဗ္ဗာဇနီယကမ္မံ ကရောမာ’’တိ။ တေ တဿ ပဗ္ဗာဇနီယကမ္မံ ကရောန္တိ – အဓမ္မေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန ပဗ္ဗာဇနီယကမ္မကတော အဓမ္မေန ဝဂ္ဂေဟိ။ ဟန္ဒဿ မယံ ပဗ္ဗာဇနီယကမ္မံ ကရောမာ’’တိ။ တေ တဿ ပဗ္ဗာဇနီယကမ္မံ ကရောန္တိ – အဓမ္မေန သမဂ္ဂါ။ပေ.။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ပေ.။။

စက္ကံ ကာတဗ္ဗံ ။

ပဗ္ဗာဇနီယကမ္မကတာ နိဋ္ဌိတာ။

၂၄၅. ပဋိသာရဏီယကမ္မကထာ

၄၁၄. ဣဓ ပန, ဘိက္ခဝေ, ဘိက္ခု ဂိဟီ အက္ကောသတိ ပရိဘာသတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု ဂိဟီ အက္ကောသတိ ပရိဘာသတိ။ ဟန္ဒဿ မယံ ပဋိသာရဏီယကမ္မံ ကရောမာ’’တိ။ တေ တဿ ပဋိသာရဏီယကမ္မံ ကရောန္တိ – အဓမ္မေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန ပဋိသာရဏီယကမ္မကတော အဓမ္မေန ဝဂ္ဂေဟိ။ ဟန္ဒဿ မယံ ပဋိသာရဏီယကမ္မံ ကရောမာ’’တိ။ တေ တဿ ပဋိသာရဏီယကမ္မံ ကရောန္တိ – အဓမ္မေန သမဂ္ဂါ။ပေ.။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ပေ.။။

စက္ကံ ကာတဗ္ဗံ။

ပဋိသာရဏီယကမ္မကထာ နိဋ္ဌိတာ။

၂၄၆. အဒဿနေ ဥက္ခေပနီယကမ္မကထာ

၄၁၅. ဣဓ ပန, ဘိက္ခဝေ, ဘိက္ခု အာပတ္တိံ အာပဇ္ဇိတွာ န ဣစ္ဆတိ အာပတ္တိံ ပဿိတုံ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု အာပတ္တိံ အာပဇ္ဇိတွာ န ဣစ္ဆတိ အာပတ္တိံ ပဿိတုံ။ ဟန္ဒဿ မယံ အာပတ္တိယာ အဒဿနေ ဥက္ခေပနီယကမ္မံ ကရောမာ’’တိ။ တေ တဿ အာပတ္တိယာ အဒဿနေ ဥက္ခေပနီယကမ္မံ ကရောန္တိ – အဓမ္မေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန အာပတ္တိယာ အဒဿနေ ဥက္ခေပနီယကမ္မကတော အဓမ္မေန ဝဂ္ဂေဟိ။ ဟန္ဒဿ မယံ အာပတ္တိယာ အဒဿနေ ဥက္ခေပနီယကမ္မံ ကရောမာ’’တိ။ တေ တဿ အာပတ္တိယာ အဒဿနေ ဥက္ခေပနီယကမ္မံ ကရောန္တိ – အဓမ္မေန သမဂ္ဂါ။ပေ.။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ပေ.။။

စက္ကံ ကာတဗ္ဗံ။

အဒဿနေ ဥက္ခေပနီယကမ္မကထာ နိဋ္ဌိတာ။

၂၄၇. အပ္ပဋိကမ္မေ ဥက္ခေပနီယကမ္မကထာ

၄၁၆. ဣဓ ပန, ဘိက္ခဝေ, ဘိက္ခု အာပတ္တိံ အာပဇ္ဇိတွာ န ဣစ္ဆတိ အာပတ္တိံ ပဋိကာတုံ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု အာပတ္တိံ အာပဇ္ဇိတွာ န ဣစ္ဆတိ အာပတ္တိံ ပဋိကာတုံ။ ဟန္ဒဿ မယံ အာပတ္တိယာ အပ္ပဋိကမ္မေ ဥက္ခေပနီယကမ္မံ ကရောမာ’’တိ ။ တေ တဿ အာပတ္တိယာ အပ္ပဋိကမ္မေ ဥက္ခေပနီယကမ္မံ ကရောန္တိ – အဓမ္မေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန အာပတ္တိယာ အပ္ပဋိကမ္မေ ဥက္ခေပနီယကမ္မကတော အဓမ္မေန ဝဂ္ဂေဟိ။ ဟန္ဒဿ မယံ အာပတ္တိယာ အပ္ပဋိကမ္မေ ဥက္ခေပနီယကမ္မံ ကရောမာ’’တိ။ တေ တဿ အာပတ္တိယာ အပ္ပဋိကမ္မေ ဥက္ခေပနီယကမ္မံ ကရောန္တိ – အဓမ္မေန သမဂ္ဂါ။ပေ.။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ပေ.။။

စက္ကံ ကာတဗ္ဗံ။

အပ္ပဋိကမ္မေ ဥက္ခေပနီယကမ္မကထာ နိဋ္ဌိတာ။

၂၄၈. အပ္ပဋိနိဿဂ္ဂေ ဥက္ခေပနီယကမ္မကထာ

၄၁၇. ဣဓ ပန, ဘိက္ခဝေ, ဘိက္ခု န ဣစ္ဆတိ ပါပိကံ ဒိဋ္ဌိံ ပဋိနိဿဇ္ဇိတုံ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု န ဣစ္ဆတိ ပါပိကံ ဒိဋ္ဌိံ ပဋိနိဿဇ္ဇိတုံ။ ဟန္ဒဿ မယံ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ကရောမာ’’တိ။ တေ တဿ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ကရောန္တိ – အဓမ္မေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မကတော အဓမ္မေန ဝဂ္ဂေဟိ။ ဟန္ဒဿ မယံ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ကရောမာ’’တိ။ တေ တဿ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ကရောန္တိ – အဓမ္မေန သမဂ္ဂါ။ပေ.။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ပေ.။။

စက္ကံ ကာတဗ္ဗံ။

အပ္ပဋိနိဿဂ္ဂေ ဥက္ခေပနီယကမ္မကထာ နိဋ္ဌိတာ။

၂၄၉. တဇ္ဇနီယကမ္မပဋိပ္ပဿဒ္ဓိကထာ

၄၁၈. ဣဓ ပန, ဘိက္ခဝေ, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ အဓမ္မေန သမဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – အဓမ္မေန သမဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ အဓမ္မေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ ဓမ္မေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မပတိရူပကေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ ဓမ္မပတိရူပကေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မပတိရူပကေန သမဂ္ဂါ။

၄၁၉. ဣဓ ပန, ဘိက္ခဝေ, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – အဓမ္မေန သမဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ အဓမ္မေန သမဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ ဓမ္မေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မပတိရူပကေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ ဓမ္မပတိရူပကေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မပတိရူပကေန သမဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ ဓမ္မပတိရူပကေန သမဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။

၄၂၀. ဣဓ ပန, ဘိက္ခဝေ, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ ဓမ္မေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မပတိရူပကေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ ဓမ္မပတိရူပကေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မပတိရူပကေန သမဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ ဓမ္မပတိရူပကေန သမဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ အဓမ္မေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – အဓမ္မေန သမဂ္ဂါ။

၄၂၁. ဣဓ ပန, ဘိက္ခဝေ, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မပတိရူပကေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ ဓမ္မပတိရူပကေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မပတိရူပကေန သမဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ ဓမ္မပတိရူပကေန သမဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ အဓမ္မေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – အဓမ္မေန သမဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ အဓမ္မေန သမဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မေန ဝဂ္ဂါ။

၄၂၂. ဣဓ ပန, ဘိက္ခဝေ, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မပတိရူပကေန သမဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ ဓမ္မပတိရူပကေန သမဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ အဓမ္မေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – အဓမ္မေန သမဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ အဓမ္မေန သမဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မေန ဝဂ္ဂါ။ သော တမှာပိ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန တဇ္ဇနီယကမ္မံ ပဋိပ္ပဿဒ္ဓံ ဓမ္မေန ဝဂ္ဂေဟိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မပတိရူပကေန ဝဂ္ဂါ။

တဇ္ဇနီယကမ္မပဋိပ္ပဿဒ္ဓိကထာ နိဋ္ဌိတာ။

၂၅၀. နိယဿကမ္မပဋိပ္ပဿဒ္ဓိကထာ

၄၂၃. ဣဓ ပန, ဘိက္ခဝေ, ဘိက္ခု သံဃေန နိယဿကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, နိယဿဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန နိယဿကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, နိယဿဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ နိယဿကမ္မံ ပဋိပ္ပဿမ္ဘေမာ’’တိ။ တေ တဿ နိယဿကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန နိယဿကမ္မံ ပဋိပ္ပဿဒ္ဓံ အဓမ္မေန ဝဂ္ဂေဟိ။ ဟန္ဒဿ မယံ နိယဿကမ္မံ ပဋိပ္ပဿမ္ဘေမာ’’တိ။ တေ တဿ နိယဿကမ္မံ ပဋိပ္ပဿမ္ဘေန္တိ – အဓမ္မေန သမဂ္ဂါ။ပေ.။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ပေ.။။

စက္ကံ ကာတဗ္ဗံ။

နိယဿကမ္မပဋိပ္ပဿဒ္ဓိကထာ နိဋ္ဌိတာ။

၂၅၁. ပဗ္ဗာဇနီယကမ္မပဋိပ္ပဿဒ္ဓိကထာ

၄၂၄. ဣဓ ပန, ဘိက္ခဝေ, ဘိက္ခု သံဃေန ပဗ္ဗာဇနီယကမ္မကတော သမ္မာ ဝတ္တတိ, လောမံ ပါတေတိ , နေတ္ထာရံ ဝတ္တတိ, ပဗ္ဗာဇနီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန ပဗ္ဗာဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, ပဗ္ဗာဇနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ ပဗ္ဗာဇနီယကမ္မံ ပဋိပ္ပဿမ္ဘေမာ’’တိ။ တေ တဿ ပဗ္ဗာဇနီယကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန ပဗ္ဗာဇနီယကမ္မံ ပဋိပ္ပဿဒ္ဓံ အဓမ္မေန ဝဂ္ဂေဟိ။ ဟန္ဒဿ မယံ ပဗ္ဗာဇနီယကမ္မံ ပဋိပ္ပဿမ္ဘေမာ’’တိ။ တေ တဿ ပဗ္ဗာဇနီယကမ္မံ ပဋိပ္ပဿမ္ဘေန္တိ – အဓမ္မေန သမဂ္ဂါ။ပေ.။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ပေ.။။

စက္ကံ ကာတဗ္ဗံ။

ပဗ္ဗာဇနီယကမ္မပဋိပ္ပဿဒ္ဓိကထာ နိဋ္ဌိတာ။

၂၅၂. ပဋိသာရဏီယကမ္မပဋိပ္ပဿဒ္ဓိကထာ

၄၂၅. ဣဓ ပန, ဘိက္ခဝေ, ဘိက္ခု သံဃေန ပဋိသာရဏီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, ပဋိသာရဏီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန ပဋိသာရဏီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, ပဋိသာရဏီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ ပဋိသာရဏီယကမ္မံ ပဋိပ္ပဿမ္ဘေမာ’’တိ။ တေ တဿ ပဋိသာရဏီယကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန ပဋိသာရဏီယကမ္မံ ပဋိပ္ပဿဒ္ဓံ အဓမ္မေန ဝဂ္ဂေဟိ။ ဟန္ဒဿ မယံ ပဋိသာရဏီယကမ္မံ ပဋိပ္ပဿမ္ဘေမာ’’တိ။ တေ တဿ ပဋိသာရဏီယကမ္မံ ပဋိပ္ပဿမ္ဘေန္တိ – အဓမ္မေန သမဂ္ဂါ။ပေ.။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ပေ.။။

စက္ကံ ကာတဗ္ဗံ။

ပဋိသာရဏီယကမ္မပဋိပ္ပဿဒ္ဓိကထာ နိဋ္ဌိတာ။

၂၅၃. အဒဿနေ ဥက္ခေပနီယကမ္မပဋိပ္ပဿဒ္ဓိကထာ

၄၂၆. ဣဓ ပန, ဘိက္ခဝေ, ဘိက္ခု သံဃေန အာပတ္တိယာ အဒဿနေ ဥက္ခေပနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, အာပတ္တိယာ အဒဿနေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန အာပတ္တိယာ အဒဿနေ ဥက္ခေပနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, အာပတ္တိယာ အဒဿနေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ အာပတ္တိယာ အဒဿနေ ဥက္ခေပနီယကမ္မံ ပဋိပ္ပဿမ္ဘေမာ’’တိ။ တေ တဿ အာပတ္တိယာ အဒဿနေ ဥက္ခေပနီယကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန အာပတ္တိယာ အဒဿနေ ဥက္ခေပနီယကမ္မံ ပဋိပ္ပဿဒ္ဓံ အဓမ္မေန ဝဂ္ဂေဟိ။ ဟန္ဒဿ မယံ အာပတ္တိယာ အဒဿနေ ဥက္ခေပနီယကမ္မံ ပဋိပ္ပဿမ္ဘေမာ’’တိ။ တေ တဿ အာပတ္တိယာ အဒဿနေ ဥက္ခေပနီယကမ္မံ ပဋိပ္ပဿမ္ဘေန္တိ – အဓမ္မေန သမဂ္ဂါ။ပေ.။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ပေ.။။

စက္ကံ ကာတဗ္ဗံ။

အဒဿနေ ဥက္ခေပနီယကမ္မပဋိပ္ပဿဒ္ဓိကထာ နိဋ္ဌိတာ။

၂၅၄. အပ္ပဋိကမ္မေ ဥက္ခေပနီယကမ္မပဋိပ္ပဿဒ္ဓိကထာ

၄၂၇. ဣဓ ပန, ဘိက္ခဝေ, ဘိက္ခု သံဃေန အာပတ္တိယာ အပ္ပဋိကမ္မေ ဥက္ခေပနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, အာပတ္တိယာ အပ္ပဋိကမ္မေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန အာပတ္တိယာ အပ္ပဋိကမ္မေ ဥက္ခေပနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, အာပတ္တိယာ အပ္ပဋိကမ္မေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ အာပတ္တိယာ အပ္ပဋိကမ္မေ ဥက္ခေပနီယကမ္မံ ပဋိပ္ပဿမ္ဘေမာ’’တိ။ တေ တဿ အာပတ္တိယာ အပ္ပဋိကမ္မေ ဥက္ခေပနီယကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန အာပတ္တိယာ အပ္ပဋိကမ္မေ ဥက္ခေပနီယကမ္မံ ပဋိပ္ပဿဒ္ဓံ – အဓမ္မေန ဝဂ္ဂေဟိ။ ဟန္ဒဿ မယံ အာပတ္တိယာ အပ္ပဋိကမ္မေ ဥက္ခေပနီယကမ္မံ ပဋိပ္ပဿမ္ဘေမာ’’တိ။ တေ တဿ အာပတ္တိယာ အပ္ပဋိကမ္မေ ဥက္ခေပနီယကမ္မံ ပဋိပ္ပဿမ္ဘေန္တိ – အဓမ္မေန သမဂ္ဂါ။ပေ.။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ပေ.။။

စက္ကံ ကာတဗ္ဗံ။

အပ္ပဋိကမ္မေ ဥက္ခေပနီယကမ္မပဋိပ္ပဿဒ္ဓိကထာ နိဋ္ဌိတာ။

၂၅၅. အပ္ပဋိနိဿဂ္ဂေ ဥက္ခေပနီယကမ္မပဋိပ္ပဿဒ္ဓိကထာ

၄၂၈. ဣဓ ပန, ဘိက္ခဝေ, ဘိက္ခု သံဃေန ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ပဋိပ္ပဿမ္ဘေမာ’’တိ။ တေ တဿ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ သော တမှာ အာဝါသာ အညံ အာဝါသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘ဣမဿ ခေါ, အာဝုသော, ဘိက္ခုနော သံဃေန ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ပဋိပ္ပဿဒ္ဓံ – အဓမ္မေန ဝဂ္ဂေဟိ။ ဟန္ဒဿ မယံ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ပဋိပ္ပဿမ္ဘေမာ’’တိ။ တေ တဿ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ပဋိပ္ပဿမ္ဘေန္တိ။ အဓမ္မေန သမဂ္ဂါ။ပေ.။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ပေ.။။

စက္ကံ ကာတဗ္ဗံ။

အပ္ပဋိနိဿဂ္ဂေ ဥက္ခေပနီယကမ္မပဋိပ္ပဿဒ္ဓိကထာ နိဋ္ဌိတာ။

၂၅၆. တဇ္ဇနီယကမ္မဝိဝါဒကထာ

၄၂၉. ဣဓ ပန, ဘိက္ခဝေ, ဘိက္ခု ဘဏ္ဍနကာရကော ဟောတိ ကလဟကာရကော ဝိဝါဒကာရကော ဘဿကာရကော သံဃေ အဓိကရဏကာရကော။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု ဘဏ္ဍနကာရကော။ပေ.။ သံဃေ အဓိကရဏကာရကော။ ဟန္ဒဿ မယံ တဇ္ဇနီယကမ္မံ ကရောမာ’’တိ ။ တေ တဿ တဇ္ဇနီယကမ္မံ ကရောန္တိ – အဓမ္မေန ဝဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘အဓမ္မေန ဝဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။

၄၃၀. ဣဓ ပန, ဘိက္ခဝေ, ဘိက္ခု ဘဏ္ဍနကာရကော ဟောတိ။ပေ.။ သံဃေ အဓိကရဏကာရကော။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု ဘဏ္ဍနကာရကော။ပေ.။ သံဃေ အဓိကရဏကာရကော။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – အဓမ္မေန သမဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘အဓမ္မေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။

၄၃၁. ဣဓ ပန, ဘိက္ခဝေ, ဘိက္ခု ဘဏ္ဍနကာရကော ဟောတိ။ပေ.။ သံဃေ အဓိကရဏကာရကော။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု ဘဏ္ဍနကာရကော။ပေ.။ သံဃေ အဓိကရဏကာရကော ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မေန ဝဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မေန ဝဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။

၄၃၂. ဣဓ ပန, ဘိက္ခဝေ, ဘိက္ခု ဘဏ္ဍနကာရကော ဟောတိ။ပေ.။ သံဃေ အဓိကရဏကာရကော။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု ဘဏ္ဍနကာရကော။ပေ.။ သံဃေ အဓိကရဏကာရကော။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မပတိရူပကေန ဝဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။

၄၃၃. ဣဓ ပန, ဘိက္ခဝေ, ဘိက္ခု ဘဏ္ဍနကာရကော ဟောတိ။ပေ.။ သံဃေ အဓိကရဏကာရကော။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု ဘဏ္ဍနကာရကော ဟောတိ။ပေ.။ သံဃေ အဓိကရဏကာရကော။ ဟန္ဒဿ မယံ တဇ္ဇနီယကမ္မံ ကရောမာ’’တိ။ တေ တဿ တဇ္ဇနီယကမ္မံ ကရောန္တိ – ဓမ္မပတိရူပကေန သမဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။

တဇ္ဇနီယကမ္မဝိဝါဒကထာ နိဋ္ဌိတာ။

၂၅၇. နိယဿကမ္မဝိဝါဒကထာ

၄၃၄. ဣဓ ပန, ဘိက္ခဝေ, ဘိက္ခု ဗာလော ဟောတိ အဗျတ္တော အာပတ္တိဗဟုလော အနပဒါနော, ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု ဗာလော အဗျတ္တော အာပတ္တိဗဟုလော အနပဒါနော, ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ။ ဟန္ဒဿ မယံ နိယဿကမ္မံ ကရောမာ’’တိ။ တေ တဿ နိယဿကမ္မံ ကရောန္တိ – အဓမ္မေန ဝဂ္ဂါ။ပေ.။ အဓမ္မေန သမဂ္ဂါ။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ , ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။ ဣမေ ပဉ္စ ဝါရာ သံခိတ္တာ။

နိယဿကမ္မဝိဝါဒကထာ နိဋ္ဌိတာ။

၂၅၈. ပဗ္ဗာဇနီယကမ္မဝိဝါဒကထာ

၄၃၅. ဣဓ ပန, ဘိက္ခဝေ, ဘိက္ခု ကုလဒူသကော ဟောတိ ပါပသမာစာရော။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု ကုလဒူသကော ပါပသမာစာရော။ ဟန္ဒဿ မယံ ပဗ္ဗာဇနီယကမ္မံ ကရောမာ’’တိ။ တေ တဿ ပဗ္ဗာဇနီယကမ္မံ ကရောန္တိ – အဓမ္မေန ဝဂ္ဂါ။ပေ.။ အဓမ္မေန သမဂ္ဂါ။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။ ဣမေ ပဉ္စ ဝါရာ သံခိတ္တာ။

ပဗ္ဗာဇနီယကမ္မဝိဝါဒကထာ နိဋ္ဌိတာ။

၂၅၉. ပဋိသာရဏီယကမ္မဝိဝါဒကထာ

၄၃၆. ဣဓ ပန, ဘိက္ခဝေ, ဘိက္ခု ဂိဟီ အက္ကောသတိ ပရိဘာသတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု ဂိဟီ အက္ကောသတိ ပရိဘာသတိ။ ဟန္ဒဿ မယံ ပဋိသာရဏီယကမ္မံ ကရောမာ’’တိ။ တေ တဿ ပဋိသာရဏီယကမ္မံ ကရောန္တိ – အဓမ္မေန ဝဂ္ဂါ။ပေ.။ အဓမ္မေန သမဂ္ဂါ။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။ ဣမေ ပဉ္စ ဝါရာ သံခိတ္တာ။

ပဋိသာရဏီယကမ္မဝိဝါဒကထာ နိဋ္ဌိတာ။

၂၆၀. အဒဿနေ ဥက္ခေပနီယကမ္မဝိဝါဒကထာ

၄၃၇. ဣဓ ပန, ဘိက္ခဝေ, ဘိက္ခု အာပတ္တိံ အာပဇ္ဇိတွာ န ဣစ္ဆတိ အာပတ္တိံ ပဿိတုံ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု အာပတ္တိံ အာပဇ္ဇိတွာ န ဣစ္ဆတိ အာပတ္တိံ ပဿိတုံ။ ဟန္ဒဿ မယံ အာပတ္တိယာ အဒဿနေ ဥက္ခေပနီယကမ္မံ ကရောမာ’’တိ။ တေ တဿ အာပတ္တိယာ အဒဿနေ ဥက္ခေပနီယကမ္မံ ကရောန္တိ – အဓမ္မေန ဝဂ္ဂါ။ပေ.။ အဓမ္မေန သမဂ္ဂါ။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။ ဣမေ ပဉ္စ ဝါရာ သံခိတ္တာ။

အဒဿနေ ဥက္ခေပနီယကမ္မဝိဝါဒကထာ နိဋ္ဌိတာ။

၂၆၁. အပ္ပဋိကမ္မေ ဥက္ခေပနီယကမ္မဝိဝါဒကထာ

၄၃၈. ဣဓ ပန, ဘိက္ခဝေ, ဘိက္ခု အာပတ္တိံ အာပဇ္ဇိတွာ န ဣစ္ဆတိ အာပတ္တိံ ပဋိကာတုံ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု အာပတ္တိံ အာပဇ္ဇိတွာ န ဣစ္ဆတိ အာပတ္တိံ ပဋိကာတုံ။ ဟန္ဒဿ မယံ အာပတ္တိယာ အပ္ပဋိကမ္မေ ဥက္ခေပနီယကမ္မံ ကရောမာ’’တိ။ တေ တဿ အာပတ္တိယာ အပ္ပဋိကမ္မေ ဥက္ခေပနီယကမ္မံ ကရောန္တိ – အဓမ္မေန ဝဂ္ဂါ။ပေ.။ အဓမ္မေန သမဂ္ဂါ။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ; ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။ ဣမေ ပဉ္စ ဝါရာ သံခိတ္တာ။

အပ္ပဋိကမ္မေ ဥက္ခေပနီယကမ္မဝိဝါဒကထာ နိဋ္ဌိတာ။

၂၆၂. အပ္ပဋိနိဿဂ္ဂေ ဥက္ခေပနီယကမ္မဝိဝါဒကထာ

၄၃၉. ဣဓ ပန, ဘိက္ခဝေ, ဘိက္ခု န ဣစ္ဆတိ ပါပိကံ ဒိဋ္ဌိံ ပဋိနိဿဇ္ဇိတုံ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု န ဣစ္ဆတိ ပါပိကံ ဒိဋ္ဌိံ ပဋိနိဿဇ္ဇိတုံ။ ဟန္ဒဿ မယံ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ကရောမာ’’တိ။ တေ တဿ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ကရောန္တိ – အဓမ္မေန ဝဂ္ဂါ။ပေ.။ အဓမ္မေန သမဂ္ဂါ။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။ ဣမေ ပဉ္စ ဝါရာ သံခိတ္တာ။

အပ္ပဋိနိဿဂ္ဂေ ဥက္ခေပနီယကမ္မဝိဝါဒကထာ နိဋ္ဌိတာ။

၂၆၃. တဇ္ဇနီယကမ္မပဋိပ္ပဿဒ္ဓိကထာ

၄၄၀. ဣဓ ပန, ဘိက္ခဝေ, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘အဓမ္မေန ဝဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။

၄၄၁. ဣဓ ပန, ဘိက္ခဝေ, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – အဓမ္မေန သမဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘အဓမ္မေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။

၄၄၂. ဣဓ ပန, ဘိက္ခဝေ, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော , ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မေန ဝဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မေန ဝဂ္ဂကမ္မ’’န္တိ ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။

၄၄၃. ဣဓ ပန, ဘိက္ခဝေ, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မပတိရူပကေန ဝဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ , ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန ဝဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။

၄၄၄. ဣဓ ပန, ဘိက္ခဝေ, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန တဇ္ဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, တဇ္ဇနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ တဇ္ဇနီယကမ္မံ ပဋိပ္ပဿမ္ဘေမာ’’တိ။ တေ တဿ တဇ္ဇနီယကမ္မံ ပဋိပ္ပဿမ္ဘေန္တိ – ဓမ္မပတိရူပကေန သမဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။

တဇ္ဇနီယကမ္မပဋိပ္ပဿဒ္ဓိကထာ နိဋ္ဌိတာ။

၂၆၄. နိယဿကမ္မပဋိပ္ပဿဒ္ဓိကထာ

၄၄၅. ဣဓ ပန, ဘိက္ခဝေ, ဘိက္ခု သံဃေန နိယဿကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, နိယဿဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန နိယဿကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ , နိယဿဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ နိယဿကမ္မံ ပဋိပ္ပဿမ္ဘေမာ’’တိ။ တေ တဿ နိယဿကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ပေ.။ အဓမ္မေန သမဂ္ဂါ။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ , ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။ ဣမေပိ [ဣမေ (သီ. သျာ. ဧဝမုပရိပိ)] ပဉ္စ ဝါရာ သံခိတ္တာ။

နိယဿကမ္မပဋိပ္ပဿဒ္ဓိကထာ နိဋ္ဌိတာ။

၂၆၅. ပဗ္ဗာဇနီယကမ္မပဋိပ္ပဿဒ္ဓိကထာ

၄၄၆. ဣဓ ပန, ဘိက္ခဝေ, ဘိက္ခု သံဃေန ပဗ္ဗာဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, ပဗ္ဗာဇနီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန ပဗ္ဗာဇနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, ပဗ္ဗာဇနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ ပဗ္ဗာဇနီယကမ္မံ ပဋိပ္ပဿမ္ဘေမာ’’တိ။ တေ တဿ ပဗ္ဗာဇနီယကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ပေ.။ အဓမ္မေန သမဂ္ဂါ။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။ ဣမေပိ ပဉ္စ ဝါရာ သံခိတ္တာ။

ပဗ္ဗာဇနီယကမ္မပဋိပ္ပဿဒ္ဓိကထာ နိဋ္ဌိတာ။

၂၆၆. ပဋိသာရဏီယကမ္မပဋိပ္ပဿဒ္ဓိကထာ

၄၄၇. ဣဓ ပန, ဘိက္ခဝေ, ဘိက္ခု သံဃေန ပဋိသာရဏီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, ပဋိသာရဏီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန ပဋိသာရဏီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, ပဋိသာရဏီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ ပဋိသာရဏီယကမ္မံ ပဋိပ္ပဿမ္ဘေမာ’’တိ။ တေ တဿ ပဋိသာရဏီယကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ပေ.။ အဓမ္မေန သမဂ္ဂါ။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ , ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ ဣမေ တတ္ထ ဘိက္ခူ ဓမ္မဝါဒိနော။ ဣမေပိ ပဉ္စ ဝါရာ သံခိတ္တာ။

ပဋိသာရဏီယကမ္မပဋိပ္ပဿဒ္ဓိကထာ နိဋ္ဌိတာ။

၂၆၇. အဒဿနေ ဥက္ခေပနီယကမ္မပဋိပ္ပဿဒ္ဓိကထာ

၄၄၈. ဣဓ ပန, ဘိက္ခဝေ, ဘိက္ခု သံဃေန အာပတ္တိယာ အဒဿနေ ဥက္ခေပနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, အာပတ္တိယာ အဒဿနေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန အာပတ္တိယာ အဒဿနေ ဥက္ခေပနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, အာပတ္တိယာ အဒဿနေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ အာပတ္တိယာ အဒဿနေ ဥက္ခေပနီယကမ္မံ ပဋိပ္ပဿမ္ဘေမာ’’တိ။ တေ တဿ အာပတ္တိယာ အဒဿနေ ဥက္ခေပနီယကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ပေ.။ အဓမ္မေန သမဂ္ဂါ။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။ ဣမေပိ ပဉ္စ ဝါရာ သံခိတ္တာ။

အဒဿနေ ဥက္ခေပနီယကမ္မပဋိပ္ပဿဒ္ဓိကထာ နိဋ္ဌိတာ။

၂၆၈. အပ္ပဋိကမ္မေ ဥက္ခေပနီယကမ္မပဋိပ္ပဿဒ္ဓိကထာ

၄၄၉. ဣဓ ပန, ဘိက္ခဝေ, ဘိက္ခု သံဃေန အာပတ္တိယာ အပ္ပဋိကမ္မေ ဥက္ခေပနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, အာပတ္တိယာ အပ္ပဋိကမ္မေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန အာပတ္တိယာ အပ္ပဋိကမ္မေ ဥက္ခေပနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, အာပတ္တိယာ အပ္ပဋိကမ္မေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ အာပတ္တိယာ အပ္ပဋိကမ္မေ ဥက္ခေပနီယကမ္မံ ပဋိပ္ပဿမ္ဘေမာ’’တိ။ တေ တဿ အာပတ္တိယာ အပ္ပဋိကမ္မေ ဥက္ခေပနီယကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ပေ.။ အဓမ္မေန သမဂ္ဂါ။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။ ဣမေပိ ပဉ္စ ဝါရာ သံခိတ္တာ။

အပ္ပဋိကမ္မေ ဥက္ခေပနီယကမ္မပဋိပ္ပဿဒ္ဓိကထာ နိဋ္ဌိတာ။

၂၆၉. အပ္ပဋိနိဿဂ္ဂေ ဥက္ခေပနီယကမ္မပဋိပ္ပဿဒ္ဓိကထာ

၄၅၀. ဣဓ ပန, ဘိက္ခဝေ, ဘိက္ခု သံဃေန ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ တတြ စေ ဘိက္ခူနံ ဧဝံ ဟောတိ – ‘‘အယံ ခေါ, အာဝုသော, ဘိက္ခု သံဃေန ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မကတော သမ္မာ ဝတ္တတိ, လောမံ ပါတေတိ, နေတ္ထာရံ ဝတ္တတိ, ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယဿ ကမ္မဿ ပဋိပ္ပဿဒ္ဓိံ ယာစတိ။ ဟန္ဒဿ မယံ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ပဋိပ္ပဿမ္ဘေမာ’’တိ။ တေ တဿ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ပဋိပ္ပဿမ္ဘေန္တိ – အဓမ္မေန ဝဂ္ဂါ။ပေ.။ အဓမ္မေန သမဂ္ဂါ။ ဓမ္မေန ဝဂ္ဂါ။ ဓမ္မပတိရူပကေန ဝဂ္ဂါ။ ဓမ္မပတိရူပကေန သမဂ္ဂါ။ တတြဋ္ဌော သံဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတြ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝါဒိနော။ ဣမေပိ ပဉ္စ ဝါရာ သံခိတ္တာ။

အပ္ပဋိနိဿဂ္ဂေ ဥက္ခေပနီယကမ္မပဋိပ္ပဿဒ္ဓိကထာ နိဋ္ဌိတာ။

စမ္ပေယျက္ခန္ဓကော နဝမော။

၂၇၀. တဿုဒ္ဒါနံ

စမ္ပာယံ ဘဂဝါ အာသိ၊ ဝတ္ထု ဝါသဘဂါမကေ။

အာဂန္တုကာနမုဿုက္ကံ၊ အကာသိ ဣစ္ဆိတဗ္ဗကေ [ဣစ္ဆိတဗ္ဗကော (က.)]။

ပကတညုနောတိ ဉတွာ၊ ဥဿုက္ကံ န ကရီ တဒါ။

ဥက္ခိတ္တော န ကရောတီတိ၊ သာဂမာ ဇိနသန္တိကေ။

အဓမ္မေန ဝဂ္ဂကမ္မံ၊ သမဂ္ဂံ အဓမ္မေန စ။

ဓမ္မေန ဝဂ္ဂကမ္မဉ္စ၊ ပတိရူပကေန ဝဂ္ဂိကံ။

ပတိရူပကေန သမဂ္ဂံ၊ ဧကော ဥက္ခိပတေကကံ။

ဧကော စ ဒွေ သမ္ဗဟုလေ၊ သသံဃံ ဥက္ခိပတေကကော။

ဒုဝေပိ သမ္ဗဟုလာပိ၊ သံဃော သံဃဉ္စ ဥက္ခိပိ။

သဗ္ဗညုပဝရော သုတွာ၊ အဓမ္မန္တိ ပဋိက္ခိပိ။

ဉတ္တိဝိပန္နံ ယံ ကမ္မံ၊ သမ္ပန္နံ အနုသာဝနံ။

အနုဿာဝနဝိပန္နံ၊ သမ္ပန္နံ ဉတ္တိယာ စ ယံ။

ဥဘယေန ဝိပန္နဉ္စ၊ အညတြ ဓမ္မမေဝ စ။

ဝိနယာ သတ္ထု ပဋိကုဋ္ဌံ၊ ကုပ္ပံ အဋ္ဌာနာရဟိကံ။

အဓမ္မဝဂ္ဂံ သမဂ္ဂံ၊ ဓမ္မ ပတိရူပါနိ ယေ ဒုဝေ။

ဓမ္မေနေဝ စ သာမဂ္ဂိံ၊ အနုညာသိ တထာဂတော။

စတုဝဂ္ဂေါ ပဉ္စဝဂ္ဂေါ၊ ဒသဝဂ္ဂေါ စ ဝီသတိ။

ပရောဝီသတိဝဂ္ဂေါ စ [အတိရေကဝီသတိဝဂ္ဂေါ (သျာ.)]၊ သံဃော ပဉ္စဝိဓေါ တထာ။

ဌပေတွာ ဥပသမ္ပဒံ၊ ယဉ္စ ကမ္မံ ပဝါရဏံ။

အဗ္ဘာနကမ္မေန သဟ၊ စတုဝဂ္ဂေဟိ ကမ္မိကော။

ဒုဝေ ကမ္မေ ဌပေတွာန၊ မဇ္ဈဒေသူပသမ္ပဒံ။

အဗ္ဘာနံ ပဉ္စဝဂ္ဂိကော၊ သဗ္ဗကမ္မေသု ကမ္မိကော။

အဗ္ဘာနေကံ ဌပေတွာန၊ ယေ ဘိက္ခူ ဒသဝဂ္ဂိကာ။

သဗ္ဗကမ္မကရော သံဃော၊ ဝီသော သဗ္ဗတ္ထ ကမ္မိကော။

ဘိက္ခုနီ သိက္ခမာနာ၊ စ သာမဏေရော သာမဏေရီ။

ပစ္စက္ခာတန္တိမဝတ္ထူ၊ ဥက္ခိတ္တာပတ္တိဒဿနေ။

အပ္ပဋိကမ္မေ ဒိဋ္ဌိယာ၊ ပဏ္ဍကော ထေယျသံဝါသကံ။

တိတ္ထိယာ တိရစ္ဆာနဂတံ၊ မာတု ပိတု စ ဃာတကံ။

အရဟံ ဘိက္ခုနီဒူသိ၊ ဘေဒကံ လောဟိတုပ္ပါဒံ။

ဗျဉ္ဇနံ နာနာသံဝါသံ၊ နာနာသီမာယ ဣဒ္ဓိယာ။

ယဿ သံဃော ကရေ ကမ္မံ၊ ဟောန္တေတေ စတုဝီသတိ။

သမ္ဗုဒ္ဓေန ပဋိက္ခိတ္တာ၊ န ဟေတေ ဂဏပူရကာ။

ပါရိဝါသိကစတုတ္ထော၊ ပရိဝါသံ ဒဒေယျ ဝါ။

မူလာ မာနတ္တမဗ္ဘေယျ၊ အကမ္မံ န စ ကရဏံ။

မူလာ အရဟမာနတ္တာ၊ အဗ္ဘာနာရဟမေဝ စ။

န ကမ္မကာရကာ ပဉ္စ၊ သမ္ဗုဒ္ဓေန ပကာသိတာ။

ဘိက္ခုနီ သိက္ခမာနာ စ၊ သာမဏေရော သာမဏေရိကာ။

ပစ္စက္ခန္တိမဥမ္မတ္တာ၊ ခိတ္တာဝေဒနဒဿနေ။

အပ္ပဋိကမ္မေ ဒိဋ္ဌိယာ၊ ပဏ္ဍကာပိ စ ဗျဉ္ဇနာ [ဣတော ပရံ သျာမမူလေ ဒိယဍ္ဎဂါထာဟိ အဘဗ္ဗပုဂ္ဂလာ သမတ္တံ ဒဿိတာ]။

နာနာသံဝါသကာ သီမာ၊ ဝေဟာသံ ယဿ ကမ္မ စ။

အဋ္ဌာရသန္နမေတေသံ၊ ပဋိက္ကောသံ န ရုဟတိ။

ဘိက္ခုဿ ပကတတ္တဿ၊ ရုဟတိ ပဋိက္ကောသနာ။

သုဒ္ဓဿ ဒုန္နိသာရိတော၊ ဗာလော ဟိ သုနိဿာရိတော။

ပဏ္ဍကော ထေယျသံဝါသော၊ ပက္ကန္တော တိရစ္ဆာနဂတော။

မာတု ပိတု အရဟန္တ၊ ဒူသကော သံဃဘေဒကော။

လောဟိတုပ္ပါဒကော စေဝ၊ ဥဘတောဗျဉ္ဇနော စ ယော။

ဧကာဒသန္နံ ဧတေသံ၊ ဩသာရဏံ န ယုဇ္ဇတိ။

ဟတ္ထပါဒံ တဒုဘယံ၊ ကဏ္ဏနာသံ တဒူဘယံ။

အင်္ဂုလိ အဠကဏ္ဍရံ၊ ဖဏံ ခုဇ္ဇော စ ဝါမနော။

ဂဏ္ဍီ လက္ခဏကသာ၊ စ လိခိတကော စ သီပဒီ။

ပါပါ ပရိသကာဏော စ၊ ကုဏီ ခဉ္ဇော ဟတောပိ စ။

ဣရိယာပထဒုဗ္ဗလော၊ အန္ဓော မူဂေါ စ ဗဓိရော။

အန္ဓမူဂန္ဓဗဓိရော မူဂဗဓိရမေဝ စ။

အန္ဓမူဂဗဓိရော စ၊ ဒွတ္တိံသေတေ အနူနကာ။

တေသံ ဩသာရဏံ ဟောတိ၊ သမ္ဗုဒ္ဓေန ပကာသိတံ။

ဒဋ္ဌဗ္ဗာ ပဋိကာတဗ္ဗာ၊ နိဿဇ္ဇေတာ န ဝိဇ္ဇတိ။

တဿ ဥက္ခေပနာ ကမ္မာ၊ သတ္တ ဟောန္တိ အဓမ္မိကာ။

အာပန္နံ အနုဝတ္တန္တံ၊ သတ္တ တေပိ အဓမ္မိကာ။

အာပန္နံ နာနုဝတ္တန္တံ၊ သတ္တ ကမ္မာ သုဓမ္မိကာ။

သမ္မုခါ ပဋိပုစ္ဆာ စ၊ ပဋိညာယ စ ကာရဏာ။

သတိ အမူဠှပါပိကာ၊ တဇ္ဇနီနိယဿေန စ။

ပဗ္ဗာဇနီယ ပဋိသာရော၊ ဥက္ခေပပရိဝါသ စ။

မူလာ မာနတ္တအဗ္ဘာနာ၊ တထေဝ ဥပသမ္ပဒါ။

အညံ ကရေယျ အညဿ၊ သောဠသေတေ အဓမ္မိကာ။

တံ တံ ကရေယျ တံ တဿ၊ သောဠသေတေ သုဓမ္မိကာ။

ပစ္စာရောပေယျ အညညံ၊ သောဠသေတေ အဓမ္မိကာ။

ဒွေ ဒွေ တမ္မူလကံ တဿ [ဒွေ ဒွေ မူလာ ကတာ ကဿ (သျာ.)၊ ဒေါဒေါတမူလကန္တဿ (က.)]၊ တေပိ သောဠသ ဓမ္မိကာ။

ဧကေကမူလကံ စက္ကံ၊ ‘‘အဓမ္မ’’န္တိ ဇိနောဗ္ရ္ဝိ။

အကာသိ တဇ္ဇနီယံ ကမ္မံ၊ သံဃော ဘဏ္ဍနကာရကော။

အဓမ္မေန ဝဂ္ဂကမ္မံ၊ အညံ အာဝါသံ ဂစ္ဆိ သော။

တတ္ထာဓမ္မေန သမဂ္ဂါ၊ တဿ တဇ္ဇနီယံ ကရုံ။

အညတ္ထ ဝဂ္ဂါဓမ္မေန၊ တဿ တဇ္ဇနီယံ ကရုံ။

ပတိရူပေန ဝဂ္ဂါပိ၊ သမဂ္ဂါပိ တထာ ကရုံ။

အဓမ္မေန သမဂ္ဂါ စ၊ ဓမ္မေန ဝဂ္ဂမေဝ စ။

ပတိရူပကေန ဝဂ္ဂါ စ၊ သမဂ္ဂါ စ ဣမေ ပဒါ။

ဧကေကမူလကံ ကတွာ၊ စက္ကံ ဗန္ဓေ ဝိစက္ခဏော။

ဗာလာ ဗျတ္တဿ နိယဿံ၊ ပဗ္ဗာဇေ ကုလဒူသကံ။

ပဋိသာရဏီယံ ကမ္မံ၊ ကရေ အက္ကောသကဿ စ။

အဒဿနာပ္ပဋိကမ္မေ ၊ ယော စ ဒိဋ္ဌိံ န နိဿဇ္ဇေ။

တေသံ ဥက္ခေပနီယကမ္မံ၊ သတ္ထဝါဟေန ဘာသိတံ။

ဥပရိ နယကမ္မာနံ [ဥပဝိနယကမ္မာနံ (သျာ.)၊ ဥက္ခေပနီယကမ္မာနံ (က.)] ပညော တဇ္ဇနီယံ နယေ။

တေသံယေဝ အနုလောမံ၊ သမ္မာ ဝတ္တတိ ယာစိတေ [ယာစတိ (သျာ.)၊ ယာစိတော (သီ.)]။

ပဿဒ္ဓိ တေသံ ကမ္မာနံ၊ ဟေဋ္ဌာ ကမ္မနယေန စ။

တသ္မိံ တသ္မိံ တု ကမ္မေသု၊ တတြဋ္ဌော စ ဝိဝဒတိ။

အကတံ ဒုက္ကဋဉ္စေဝ၊ ပုနကာတဗ္ဗကန္တိ စ။

ကမ္မေ ပဿဒ္ဓိယာ စာပိ၊ တေ ဘိက္ခူ ဓမ္မဝါဒိနော။

ဝိပတ္တိဗျာဓိတေ ဒိသွာ၊ ကမ္မပ္ပတ္တေ မဟာမုနိ။

ပဋိပ္ပဿဒ္ဓိမက္ခာသိ၊ သလ္လကတ္တောဝ ဩသဓန္တိ။

ဣမမှိ ခန္ဓကေ ဝတ္ထူနိ ဆတ္တိံသာတိ။

စမ္ပေယျက္ခန္ဓကော နိဋ္ဌိတော။