ကထိနက္ခန္ဓကော

၇. ကထိနက္ခန္ဓကော

၁၈၇. ကထိနာနုဇာနနာ

၃၀၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ။ တေန ခေါ ပန သမယေန တိံသမတ္တာ ပါဝေယျကာ [ပါဌေယျကာ (သီ. သျာ.)] ဘိက္ခူ, သဗ္ဗေ အာရညိကာ သဗ္ဗေ ပိဏ္ဍပါတိကာ သဗ္ဗေ ပံသုကူလိကာ သဗ္ဗေ တေစီဝရိကာ သာဝတ္ထိံ အာဂစ္ဆန္တာ ဘဂဝန္တံ ဒဿနာယ ဥပကဋ္ဌာယ ဝဿူပနာယိကာယ နာသက္ခိံသု သာဝတ္ထိယံ ဝဿူပနာယိကံ သမ္ဘာဝေတုံ; အန္တရာမဂ္ဂေ သာကေတေ ဝဿံ ဥပဂစ္ဆိံသု။ တေ ဥက္ကဏ္ဌိတရူပါ ဝဿံ ဝသိံသု – အာသန္နေဝ နော ဘဂဝါ ဝိဟရတိ ဣတော ဆသု ယောဇနေသု, န စ မယံ လဘာမ ဘဂဝန္တံ ဒဿနာယာတိ။ အထ ခေါ တေ ဘိက္ခူ ဝဿံဝုဋ္ဌာ, တေမာသစ္စယေန ကတာယ ပဝါရဏာယ, ဒေဝေ ဝဿန္တေ, ဥဒကသင်္ဂဟေ ဥဒကစိက္ခလ္လေ ဩကပုဏ္ဏေဟိ စီဝရေဟိ ကိလန္တရူပါ ယေန သာဝတ္ထိ ဇေတဝနံ အနာထပိဏ္ဍိကဿ အာရာမော, ယေန ဘဂဝါ တေနုပသင်္ကမိံသု; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိံသု။ အာစိဏ္ဏံ ခေါ ပနေတံ ဗုဒ္ဓါနံ ဘဂဝန္တာနံ အာဂန္တုကေဟိ ဘိက္ခူဟိ သဒ္ဓိံ ပဋိသမ္မောဒိတုံ။ အထ ခေါ ဘဂဝါ တေ ဘိက္ခူ ဧတဒဝေါစ – ‘‘ကစ္စိ, ဘိက္ခဝေ, ခမနီယံ, ကစ္စိ ယာပနီယံ, ကစ္စိ သမဂ္ဂါ သမ္မောဒမာနာ အဝိဝဒမာနာ ဖာသုကံ ဝဿံ ဝသိတ္ထ, န စ ပိဏ္ဍကေန ကိလမိတ္ထာ’’တိ? ‘‘ခမနီယံ, ဘဂဝါ; ယာပနီယံ, ဘဂဝါ; သမဂ္ဂါ စ မယံ, ဘန္တေ, သမ္မောဒမာနာ အဝိဝဒမာနာ ဝဿံ ဝသိမှာ, န စ ပိဏ္ဍကေန ကိလမိမှာ ။ ဣဓ မယံ, ဘန္တေ, တိံသမတ္တာ ပါဝေယျကာ ဘိက္ခူ သာဝတ္ထိံ အာဂစ္ဆန္တာ ဘဂဝန္တံ ဒဿနာယ ဥပကဋ္ဌာယ ဝဿူပနာယိကာယ နာသက္ခိမှာ သာဝတ္ထိယံ ဝဿူပနာယိကံ သမ္ဘာဝေတုံ, အန္တရာမဂ္ဂေ သာကေတေ ဝဿံ ဥပဂစ္ဆိမှာ။ တေ မယံ, ဘန္တေ, ဥက္ကဏ္ဌိတရူပါ ဝဿံ ဝသိမှာ – ‘အာသန္နေဝ နော ဘဂဝါ ဝိဟရတိ ဣတော ဆသု ယောဇနေသု, န စ မယံ လဘာမ ဘဂဝန္တံ ဒဿနာယာ’တိ။ အထ ခေါ မယံ, ဘန္တေ, ဝဿံဝုဋ္ဌာ, တေမာသစ္စယေန ကတာယ ပဝါရဏာယ, ဒေဝေ ဝဿန္တေ, ဥဒကသင်္ဂဟေ ဥဒကစိက္ခလ္လေ ဩကပုဏ္ဏေဟိ စီဝရေဟိ ကိလန္တရူပါ အဒ္ဓါနံ အာဂတာတိ။ အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ဝဿံဝုဋ္ဌာနံ ဘိက္ခူနံ ကထိနံ [ကဌိနံ (သီ. သျာ.)] အတ္ထရိတုံ။ အတ္ထတကထိနာနံ ဝေါ, ဘိက္ခဝေ, ပဉ္စ ကပ္ပိဿန္တိ – အနာမန္တစာရော, အသမာဒါနစာရော, ဂဏဘောဇနံ, ယာဝဒတ္ထစီဝရံ, ယော စ တတ္ထ စီဝရုပ္ပါဒေါ သော နေသံ ဘဝိဿတီတိ။ အတ္ထတကထိနာနံ ဝေါ, ဘိက္ခဝေ, ဣမာနိ ပဉ္စ ကပ္ပိဿန္တိ။ ဧဝဉ္စ ပန, ဘိက္ခဝေ, ကထိနံ အတ္ထရိတဗ္ဗံ။ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၃၀၇. ‘‘သုဏာတု မေ, ဘန္တေ, သံဃော။ ဣဒံ သံဃဿ ကထိနဒုဿံ ဥပ္ပန္နံ။ ယဒိ သံဃဿ ပတ္တကလ္လံ, သံဃော ဣမံ ကထိနဒုဿံ ဣတ္ထန္နာမဿ ဘိက္ခုနော ဒဒေယျ ကထိနံ အတ္ထရိတုံ။ ဧသာ ဉတ္တိ။

‘‘သုဏာတု မေ, ဘန္တေ, သံဃော။ ဣဒံ သံဃဿ ကထိနဒုဿံ ဥပ္ပန္နံ။ သံဃော ဣမံ ကထိနဒုဿံ ဣတ္ထန္နာမဿ ဘိက္ခုနော ဒေတိ ကထိနံ အတ္ထရိတုံ။ ယဿာယသ္မတော ခမတိ ဣမဿ ကထိနဒုဿဿ ဣတ္ထန္နာမဿ ဘိက္ခုနော ဒါနံ ကထိနံ အတ္ထရိတုံ, သော တုဏှဿ; ယဿ နက္ခမတိ, သော ဘာသေယျ။

‘‘ဒိန္နံ ဣဒံ သံဃေန ကထိနဒုဿံ ဣတ္ထန္နာမဿ ဘိက္ခုနော ကထိနံ အတ္ထရိတုံ။ ခမတိ သံဃဿ, တသ္မာ တုဏှီ, ဧဝမေတံ ဓါရယာမီ’’တိ။

၃၀၈. ‘‘ဧဝံ ခေါ, ဘိက္ခဝေ, အတ္ထတံ ဟောတိ ကထိနံ, ဧဝံ အနတ္ထတံ။ ကထဉ္စ ပန, ဘိက္ခဝေ, အနတ္ထတံ ဟောတိ ကထိနံ? န ဥလ္လိခိတမတ္တေန အတ္ထတံ ဟောတိ ကထိနံ, န ဓေါဝနမတ္တေန အတ္ထတံ ဟောတိ ကထိနံ, န စီဝရဝိစာရဏမတ္တေန [န ဂဏ္ဋုသကရဏမတ္တေန (က.)] အတ္ထတံ ဟောတိ ကထိနံ, န ဆေဒနမတ္တေန အတ္ထတံ ဟောတိ ကထိနံ, န ဗန္ဓနမတ္တေန အတ္ထတံ ဟောတိ ကထိနံ, န ဩဝဋ္ဋိယကရဏမတ္တေန [န ဩဝဋ္ဋေယျကရဏမတ္တေန (သီ. သျာ.), န ဩဝဒေယျကရဏမတ္တေန (က.)] အတ္ထတံ ဟောတိ ကထိနံ, န ကဏ္ဍုသကရဏမတ္တေန အတ္ထတံ ဟောတိ ကထိနံ, န ဒဠှီကမ္မကရဏမတ္တေန အတ္ထတံ ဟောတိ ကထိနံ, န အနုဝါတကရဏမတ္တေန အတ္ထတံ ဟောတိ ကထိနံ, န ပရိဘဏ္ဍကရဏမတ္တေန အတ္ထတံ ဟောတိ ကထိနံ, န ဩဝဒ္ဓေယျကရဏမတ္တေန အတ္ထတံ ဟောတိ ကထိနံ, န ကမ္ဗလမဒ္ဒနမတ္တေန အတ္ထတံ ဟောတိ ကထိနံ, န နိမိတ္တကတေန အတ္ထတံ ဟောတိ ကထိနံ, န ပရိကထာကတေန အတ္ထတံ ဟောတိ ကထိနံ, န ကုက္ကုကတေန အတ္ထတံ ဟောတိ ကထိနံ, န သန္နိဓိကတေန အတ္ထတံ ဟောတိ ကထိနံ, န နိဿဂ္ဂိယေန အတ္ထတံ ဟောတိ ကထိနံ, န အကပ္ပကတေန အတ္ထတံ ဟောတိ ကထိနံ , န အညတြ သံဃာဋိယာ အတ္ထတံ ဟောတိ ကထိနံ, န အညတြ ဥတ္တရာသင်္ဂေန အတ္ထတံ ဟောတိ ကထိနံ, န အညတြ အန္တရဝါသကေန အတ္ထတံ ဟောတိ ကထိနံ, န အညတြ ပဉ္စကေန ဝါ အတိရေကပဉ္စကေန ဝါ တဒဟေဝ သဉ္ဆိန္နေန သမဏ္ဍလီကတေန အတ္ထတံ ဟောတိ ကထိနံ, န အညတြ ပုဂ္ဂလဿ အတ္ထာရာ အတ္ထတံ ဟောတိ ကထိနံ; သမ္မာ စေဝ အတ္ထတံ ဟောတိ ကထိနံ, တဉ္စေ နိဿီမဋ္ဌော အနုမောဒတိ, ဧဝမ္ပိ အနတ္ထတံ ဟောတိ ကထိနံ။ ဧဝံ ခေါ, ဘိက္ခဝေ, အနတ္ထတံ ဟောတိ ကထိနံ။

၃၀၉. ‘‘ကထဉ္စ, ဘိက္ခဝေ, အတ္ထတံ ဟောတိ ကထိနံ? အဟတေန အတ္ထတံ ဟောတိ ကထိနံ, အဟတကပ္ပေန အတ္ထတံ ဟောတိ ကထိနံ, ပိလောတိကာယ အတ္ထတံ ဟောတိ ကထိနံ, ပံသုကူလေန အတ္ထတံ ဟောတိ ကထိနံ, ပါပဏိကေန အတ္ထတံ ဟောတိ ကထိနံ, အနိမိတ္တကတေန အတ္ထတံ ဟောတိ ကထိနံ, အပရိကထာကတေန အတ္ထတံ ဟောတိ ကထိနံ, အကုက္ကုကတေန အတ္ထတံ ဟောတိ ကထိနံ, အသန္နိဓိကတေန အတ္ထတံ ဟောတိ ကထိနံ, အနိဿဂ္ဂိယေန အတ္ထတံ ဟောတိ ကထိနံ, ကပ္ပကတေန အတ္ထတံ ဟောတိ ကထိနံ, သံဃာဋိယာ အတ္ထတံ ဟောတိ ကထိနံ, ဥတ္တရာသင်္ဂေန အတ္ထတံ ဟောတိ ကထိနံ, အန္တရဝါသကေန အတ္ထတံ ဟောတိ ကထိနံ, ပဉ္စကေန ဝါ အတိရေကပဉ္စကေန ဝါ တဒဟေဝ သဉ္ဆိန္နေန သမဏ္ဍလီကတေန အတ္ထတံ ဟောတိ ကထိနံ, ပုဂ္ဂလဿ အတ္ထာရာ အတ္ထတံ ဟောတိ ကထိနံ; သမ္မာ စေ အတ္ထတံ ဟောတိ ကထိနံ, တဉ္စေ သီမဋ္ဌော အနုမောဒတိ, ဧဝမ္ပိ အတ္ထတံ ဟောတိ ကထိနံ ။ ဧဝံ ခေါ, ဘိက္ခဝေ, အတ္ထတံ ဟောတိ ကထိနံ။

၃၁၀. ‘‘ကထဉ္စ, ဘိက္ခဝေ, ဥဗ္ဘတံ ဟောတိ ကထိနံ? အဋ္ဌိမာ, ဘိက္ခဝေ, မာတိကာ ကထိနဿ ဥဗ္ဘာရာယ – ပက္ကမနန္တိကာ, နိဋ္ဌာနန္တိကာ, သန္နိဋ္ဌာနန္တိကာ, နာသနန္တိကာ, သဝနန္တိကာ, အာသာဝစ္ဆေဒိကာ, သီမာတိက္ကန္တိကာ, သဟုဗ္ဘာရာ’’တိ [သဥဗ္ဘာရာတိ (က.)]။

ကထိနာနုဇာနနာ နိဋ္ဌိတာ။

၁၈၈. အာဒါယသတ္တကံ

၃၁၁. ဘိက္ခု အတ္ထတကထိနော ကတစီဝရံ အာဒါယ ပက္ကမတိ – ‘‘န ပစ္စေဿ’’န္တိ။ တဿ ဘိက္ခုနော ပက္ကမနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ အာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ အာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ အာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ အာဒါယ ပက္ကမတိ – ‘‘ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော သုဏာတိ ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ။ တဿ ဘိက္ခုနော သဝနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ အာဒါယ ပက္ကမတိ – ‘‘ပစ္စေဿ’’န္တိ ။ သော ဗဟိသီမဂတော တံ စီဝရံ ကာရေတိ။ သော ကတစီဝရော – ‘‘ပစ္စေဿံ ပစ္စေဿ’’န္တိ – ဗဟိဒ္ဓါ ကထိနုဒ္ဓါရံ ဝီတိနာမေတိ။ တဿ ဘိက္ခုနော သီမာတိက္ကန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ အာဒါယ ပက္ကမတိ – ‘‘ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော – ‘‘ပစ္စေဿံ ပစ္စေဿ’’န္တိ – သမ္ဘုဏာတိ ကထိနုဒ္ဓါရံ။ တဿ ဘိက္ခုနော သဟ ဘိက္ခူဟိ ကထိနုဒ္ဓါရော။

အာဒါယသတ္တကံ နိဋ္ဌိတံ [။ဒုတိယံ နိဋ္ဌိတံ (က.)]။

၁၈၉. သမာဒါယသတ္တကံ

၃၁၂. ဘိက္ခု အတ္ထတကထိနော ကတစီဝရံ သမာဒါယ ပက္ကမတိ ‘‘န ပစ္စေဿ’’န္တိ။ တဿ ဘိက္ခုနော ပက္ကမနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ သမာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ သမာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ သမာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ သမာဒါယ ပက္ကမတိ – ‘‘ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော သုဏာတိ – ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ။ တဿ ဘိက္ခုနော သဝနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ သမာဒါယ ပက္ကမတိ – ‘‘ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော – ‘‘ပစ္စေဿံ ပစ္စေဿ’’န္တိ – ဗဟိဒ္ဓါ ကထိနုဒ္ဓါရံ ဝီတိနာမေတိ။ တဿ ဘိက္ခုနော သီမာတိက္ကန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ သမာဒါယ ပက္ကမတိ – ‘‘ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော – ‘‘ပစ္စေဿံ ပစ္စေဿ’’န္တိ – သမ္ဘုဏာတိ ကထိနုဒ္ဓါရံ။ တဿ ဘိက္ခုနော သဟ ဘိက္ခူဟိ ကထိနုဒ္ဓါရော။

သမာဒါယသတ္တကံ နိဋ္ဌိတံ။

၁၉၀. အာဒါယဆက္ကံ

၃၁၃. ဘိက္ခု အတ္ထတကထိနော ဝိပ္ပကတစီဝရံ အာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ အာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ အာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ န ပစ္စေဿ’’န္တိ။ သော တံ စီဝရံ ကာရေတိ။ တဿံ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ အာဒါယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော သုဏာတိ – ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ။ တဿ ဘိက္ခုနော သဝနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ အာဒါယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော ‘‘ပစ္စေဿံ ပစ္စေဿ’’န္တိ ဗဟိဒ္ဓါ ကထိနုဒ္ဓါရံ ဝီတိနာမေတိ။ တဿ ဘိက္ခုနော သီမာတိက္ကန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ အာဒါယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော ‘‘ပစ္စေဿံ ပစ္စေဿ’’န္တိ သမ္ဘုဏာတိ ကထိနုဒ္ဓါရံ။ တဿ ဘိက္ခုနော သဟ ဘိက္ခူဟိ ကထိနုဒ္ဓါရော။

အာဒါယဆက္ကံ နိဋ္ဌိတံ။

၁၉၁. သမာဒါယဆက္ကံ

၃၁၄. ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော သုဏာတိ – ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ။ တဿ ဘိက္ခုနော သဝနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော ‘‘ပစ္စေဿံ ပစ္စေဿ’’န္တိ ဗဟိဒ္ဓါ ကထိနုဒ္ဓါရံ ဝီတိနာမေတိ။ တဿ ဘိက္ခုနော သီမာတိက္ကန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော ‘‘ပစ္စေဿံ ပစ္စေဿ’’န္တိ သမ္ဘုဏာတိ ကထိနုဒ္ဓါရံ။ တဿ ဘိက္ခုနော သဟ ဘိက္ခူဟိ ကထိနုဒ္ဓါရော။

သမာဒါယဆက္ကံ နိဋ္ဌိတံ။

၁၉၂. အာဒါယပန္နရသကံ

၃၁၅. ဘိက္ခု အတ္ထတကထိနော စီဝရံ အာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ အာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ အာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ –

‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

တိကံ။

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘န ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘န ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘န ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿ’’န္တိ ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

တိကံ။

ဘိက္ခု အတ္ထတကထိနော စီဝရံ အာဒါယ ပက္ကမတိ အနဓိဋ္ဌိတေန; နေဝဿ ဟောတိ ‘‘ပစ္စေဿ’’န္တိ, န ပနဿ ဟောတိ ‘‘န ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ အာဒါယ ပက္ကမတိ အနဓိဋ္ဌိတေန; နေဝဿ ဟောတိ ‘‘ပစ္စေဿ’’န္တိ, န ပနဿ ဟောတိ ‘‘န ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ အာဒါယ ပက္ကမတိ အနဓိဋ္ဌိတေန; နေဝဿ ဟောတိ ‘‘ပစ္စေဿ’’န္တိ, န ပနဿ ဟောတိ ‘‘န ပစ္စေဿ’’န္တိ ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

တိကံ။

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော သုဏာတိ – ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ။ တဿ ဘိက္ခုနော သဝနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော ‘‘ပစ္စေဿံ ပစ္စေဿ’’န္တိ – ဗဟိဒ္ဓါ ကထိနုဒ္ဓါရံ ဝီတိနာမေတိ။ တဿ ဘိက္ခုနော သီမာတိက္ကန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရံ အာဒါယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော – ‘‘ပစ္စေဿံ ပစ္စေဿ’’န္တိ သမ္ဘုဏာတိ ကထိနုဒ္ဓါရံ။ တဿ ဘိက္ခုနော သဟ ဘိက္ခူဟိ ကထိနုဒ္ဓါရော။

ဆက္ကံ။

အာဒါယပန္နရသကံ နိဋ္ဌိတံ။

၁၉၃. သမာဒါယပန္နရသကာဒိ

၃၁၆. ဘိက္ခု အတ္ထတကထိနော စီဝရံ သမာဒါယ ပက္ကမတိ။ပေ.။။

(အာဒါယဝါရသဒိသံ ဧဝံ ဝိတ္ထာရေတဗ္ဗံ။)

ဘိက္ခု အတ္ထတကထိနော ဝိပ္ပကတစီဝရံ အာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။ပေ.။။

(သမာဒါယဝါရသဒိသံ ဧဝံ ဝိတ္ထာရေတဗ္ဗံ။)

သမာဒါယပန္နရသကာဒိ နိဋ္ဌိတာ။

၁၉၄. ဝိပ္ပကတသမာဒါယပန္နရသကံ

၃၁၇. ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

တိကံ။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ ‘‘န ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ ‘‘န ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ ‘‘န ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

တိကံ။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ အနဓိဋ္ဌိတေန; နေဝဿ ဟောတိ – ‘‘ပစ္စေဿ’’န္တိ, န ပနဿ ဟောတိ – ‘‘န ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ အနဓိဋ္ဌိတေန; နေဝဿ ဟောတိ – ‘‘ပစ္စေဿ’’န္တိ, န ပနဿ ဟောတိ – ‘‘န ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ အနဓိဋ္ဌိတေန; နေဝဿ ဟောတိ – ‘‘ပစ္စေဿ’’န္တိ, န ပနဿ ဟောတိ – ‘‘န ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

တိကံ။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ ‘‘ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ ‘‘ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ ‘‘ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော သုဏာတိ – ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ။ တဿ ဘိက္ခုနော သဝနန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော – ‘‘ပစ္စေဿံ ပစ္စေဿ’’န္တိ ဗဟိဒ္ဓါ ကထိနုဒ္ဓါရံ ဝီတိနာမေတိ။ တဿ ဘိက္ခုနော သီမာတိက္ကန္တိကော ကထိနုဒ္ဓါရော။

ဘိက္ခု အတ္ထတကထိနော ဝိပ္ပကတစီဝရံ သမာဒါယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော ‘‘ပစ္စေဿံ ပစ္စေဿ’’န္တိ သမ္ဘုဏာတိ ကထိနုဒ္ဓါရံ။ တဿ ဘိက္ခုနော သဟ ဘိက္ခူဟိ ကထိနုဒ္ဓါရော။

ဆက္ကံ။

ဝိပ္ပကတသမာဒါယပန္နရသကံ နိဋ္ဌိတံ။

အာဒါယဘာဏဝါရော။

၁၉၅. အနာသာဒေါဠသကံ

၃၁၈. ဘိက္ခု အတ္ထတကထိနော စီဝရာသာယ ပက္ကမတိ။ သော ဗဟိသီမဂတော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ။ သော ဗဟိသီမဂတော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ။ သော ဗဟိသီမဂတော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရာသံ ပယိရုပါသိဿံ, န ပစ္စေဿ’’န္တိ။ သော တံ စီဝရာသံ ပယိရုပါသတိ။ တဿ သာ စီဝရာသာ ဥပစ္ဆိဇ္ဇတိ ။ တဿ ဘိက္ခုနော အာသာဝစ္ဆေဒိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ ‘‘န ပစ္စေဿ’’န္တိ။ သော ဗဟိသီမဂတော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ ‘‘န ပစ္စေဿ’’န္တိ။ သော ဗဟိသီမဂတော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘နေဝိမံ စီဝရံ ကာရေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ ‘‘န ပစ္စေဿ’’န္တိ။ သော ဗဟိသီမဂတော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ ‘‘န ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရာသံ ပယိရုပါသိဿ’’န္တိ။ သော တံ စီဝရာသံ ပယိရုပါသတိ ။ တဿ သာ စီဝရာသာ ဥပစ္ဆိဇ္ဇတိ။ တဿ ဘိက္ခုနော အာသာဝစ္ဆေဒိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ အနဓိဋ္ဌိတေန; နေဝဿ ဟောတိ – ‘‘ပစ္စေဿန္တိ, န ပနဿ ဟောတိ – ‘‘န ပစ္စေဿ’’န္တိ။ သော ဗဟိသီမဂတော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ အနဓိဋ္ဌိတေန; နေဝဿ ဟောတိ – ‘‘ပစ္စေဿ’’န္တိ, န ပနဿ ဟောတိ – ‘‘န ပစ္စေဿ’’န္တိ။ သော ဗဟိသီမဂတော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ အနဓိဋ္ဌိတေန; နေဝဿ ဟောတိ – ‘‘ပစ္စေဿ’’န္တိ, န ပနဿ ဟောတိ – ‘‘န ပစ္စေဿ’’န္တိ။ သော ဗဟိသီမဂတော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ အနဓိဋ္ဌိတေန; နေဝဿ ဟောတိ – ‘‘ပစ္စေဿ’’န္တိ, န ပနဿ ဟောတိ – ‘‘န ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရာသံ ပယိရုပါသိဿံ, န ပစ္စေဿ’’န္တိ။ သော တံ စီဝရာသံ ပယိရုပါသတိ။ တဿ သာ စီဝရာသာ ဥပစ္ဆိဇ္ဇတိ။ တဿ ဘိက္ခုနော အာသာဝစ္ဆေဒိကော ကထိနုဒ္ဓါရော။

အနာသာဒေါဠသကံ [အနာသာဒွါဒသကံ (သီ.)] နိဋ္ဌိတံ။

၁၉၆. အာသာဒေါဠသကံ

၃၁၉. ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရာသံ ပယိရုပါသတိ။ အာသာယ လဘတိ, အနာသာယ န လဘတိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရာသံ ပယိရုပါသတိ။ အာသာယ လဘတိ, အနာသာယ န လဘတိ။ တဿ ဧဝံ ဟောတိ – ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရာသံ ပယိရုပါသတိ။ အာသာယ လဘတိ, အနာသာယ န လဘတိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရာသံ ပယိရုပါသိဿံ, န ပစ္စေဿ’’န္တိ။ သော တံ စီဝရာသံ ပယိရုပါသတိ။ တဿ သာ စီဝရာသာ ဥပစ္ဆိဇ္ဇတိ။ တဿ ဘိက္ခုနော အာသာဝစ္ဆေဒိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော သုဏာတိ – ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ။ တဿ ဧဝံ ဟောတိ – ‘‘ယတော တသ္မိံ အာဝါသေ ဥဗ္ဘတံ ကထိနံ, ဣဓေဝိမံ စီဝရာသံ ပယိရုပါသိဿ’’န္တိ။ သော တံ စီဝရာသံ ပယိရုပါသတိ။ အာသာယ လဘတိ , အနာသာယ န လဘတိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော သုဏာတိ – ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ။ တဿ ဧဝံ ဟောတိ – ‘‘ယတော တသ္မိံ အာဝါသေ ဥဗ္ဘတံ ကထိနံ, ဣဓေဝိမံ စီဝရာသံ ပယိရုပါသိဿ’’န္တိ။ သော တံ စီဝရာသံ ပယိရုပါသတိ။ အာသာယ လဘတိ, အနာသာယ န လဘတိ။ တဿ ဧဝံ ဟောတိ – ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော သုဏာတိ – ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ။ တဿ ဧဝံ ဟောတိ – ‘‘ယတော တသ္မိံ အာဝါသေ ဥဗ္ဘတံ ကထိနံ, ဣဓေဝိမံ စီဝရာသံ ပယိရုပါသိဿ’’န္တိ။ သော တံ စီဝရာသံ ပယိရုပါသတိ။ အာသာယ လဘတိ, အနာသာယ န လဘတိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော သုဏာတိ – ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ။ တဿ ဧဝံ ဟောတိ – ‘‘ယတော တသ္မိံ အာဝါသေ ဥဗ္ဘတံ ကထိနံ, ဣဓေဝိမံ စီဝရာသံ ပယိရုပါသိဿံ, န ပစ္စေဿ’’န္တိ။ သော တံ စီဝရာသံ ပယိရုပါသတိ။ တဿ သာ စီဝရာသာ ဥပစ္ဆိဇ္ဇတိ။ တဿ ဘိက္ခုနော အာသာဝစ္ဆေဒိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရာသံ ပယိရုပါသတိ။ အာသာယ လဘတိ, အနာသာယ န လဘတိ။ သော တံ စီဝရံ ကာရေတိ။ သော ကတစီဝရော သုဏာတိ – ‘‘ဥဗ္ဘတံ ကိရ တသ္မိံ အာဝါသေ ကထိန’’န္တိ။ တဿ ဘိက္ခုနော သဝနန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရာသံ ပယိရုပါသိဿံ, န ပစ္စေဿ’’န္တိ။ သော တံ စီဝရာသံ ပယိရုပါသတိ။ တဿ သာ စီဝရာသာ ဥပစ္ဆိဇ္ဇတိ။ တဿ ဘိက္ခုနော အာသာဝစ္ဆေဒိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရာသံ ပယိရုပါသတိ။ အာသာယ လဘတိ, အနာသာယ န လဘတိ။ သော တံ စီဝရံ ကာရေတိ။ သော ကတစီဝရော ‘‘ပစ္စေဿံ ပစ္စေဿ’’န္တိ – ဗဟိဒ္ဓါ ကထိနုဒ္ဓါရံ ဝီတိနာမေတိ။ တဿ ဘိက္ခုနော သီမာတိက္ကန္တိကော ကထိနုဒ္ဓါရော။

ဘိက္ခု အတ္ထတကထိနော စီဝရာသာယ ပက္ကမတိ ‘‘ပစ္စေဿ’’န္တိ။ သော ဗဟိသီမဂတော တံ စီဝရာသံ ပယိရုပါသတိ။ အာသာယ လဘတိ, အနာသာယ န လဘတိ။ သော တံ စီဝရံ ကာရေတိ။ သော ကတစီဝရော ‘‘ပစ္စေဿံ ပစ္စေဿ’’န္တိ – သမ္ဘုဏာတိ ကထိနုဒ္ဓါရံ။ တဿ ဘိက္ခုနော သဟ ဘိက္ခူဟိ ကထိနုဒ္ဓါရော။

အာသာဒေါဠသကံ နိဋ္ဌိတံ။

၁၉၇. ကရဏီယဒေါဠသကံ

၃၂၀. ဘိက္ခု အတ္ထတကထိနော ကေနစိဒေဝ ကရဏီယေန ပက္ကမတိ။ တဿ ဗဟိသီမဂတဿ စီဝရာသာ ဥပ္ပဇ္ဇတိ။ သော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ကေနစိဒေဝ ကရဏီယေန ပက္ကမတိ။ တဿ ဗဟိသီမဂတဿ စီဝရာသာ ဥပ္ပဇ္ဇတိ။ သော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ကေနစိဒေဝ ကရဏီယေန ပက္ကမတိ။ တဿ ဗဟိသီမဂတဿ စီဝရာသာ ဥပ္ပဇ္ဇတိ။ သော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

ဘိက္ခု အတ္ထတကထိနော ကေနစိဒေဝ ကရဏီယေန ပက္ကမတိ။ တဿ ဗဟိသီမဂတဿ စီဝရာသာ ဥပ္ပဇ္ဇတိ။ တဿ ဧဝံ ဟောတိ – ‘‘ဣဓေဝိမံ စီဝရာသံ ပယိရုပါသိဿံ, န ပစ္စေဿ’’န္တိ။ သော တံ စီဝရာသံ ပယိရုပါသတိ။ တဿ သာ စီဝရာသာ ဥပစ္ဆိဇ္ဇတိ။ တဿ ဘိက္ခုနော အာသာဝစ္ဆေဒိကော ကထိနုဒ္ဓါရော။

ဘိက္ခု အတ္ထတကထိနော ကေနစိဒေဝ ကရဏီယေန ပက္ကမတိ ‘‘န ပစ္စေဿ’’န္တိ။ တဿ ဗဟိသီမဂတဿ စီဝရာသာ ဥပ္ပဇ္ဇတိ။ သော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ကေနစိဒေဝ ကရဏီယေန ပက္ကမတိ ‘‘န ပစ္စေဿ’’န္တိ။ တဿ ဗဟိသီမဂတဿ စီဝရာသာ ဥပ္ပဇ္ဇတိ။ သော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘နေဝိမံ စီဝရံ ကာရေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ကေနစိဒေဝ ကရဏီယေန ပက္ကမတိ ‘‘န ပစ္စေဿ’’န္တိ။ တဿ ဗဟိသီမဂတဿ စီဝရာသာ ဥပ္ပဇ္ဇတိ။ သော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

ဘိက္ခု အတ္ထတကထိနော ကေနစိဒေဝ ကရဏီယေန ပက္ကမတိ ‘‘န ပစ္စေဿ’’န္တိ။ တဿ ဗဟိသီမဂတဿ စီဝရာသာ ဥပ္ပဇ္ဇတိ။ တဿ ဧဝံ ဟောတိ – ‘‘ဣဓေဝိမံ စီဝရာသံ ပယိရုပါသိဿ’’န္တိ။ သော တံ စီဝရာသံ ပယိရုပါသတိ။ တဿ သာ စီဝရာသာ ဥပစ္ဆိဇ္ဇတိ။ တဿ ဘိက္ခုနော အာသာဝစ္ဆေဒိကော ကထိနုဒ္ဓါရော။

ဘိက္ခု အတ္ထတကထိနော ကေနစိဒေဝ ကရဏီယေန ပက္ကမတိ အနဓိဋ္ဌိတေန; နေဝဿ ဟောတိ – ‘‘ပစ္စေဿ’’န္တိ, န ပနဿ ဟောတိ – ‘‘န ပစ္စေဿ’’န္တိ။ တဿ ဗဟိသီမဂတဿ စီဝရာသာ ဥပ္ပဇ္ဇတိ။ သော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ကေနစိဒေဝ ကရဏီယေန ပက္ကမတိ အနဓိဋ္ဌိတေန; နေဝဿ ဟောတိ – ‘‘ပစ္စေဿ’’န္တိ, န ပနဿ ဟောတိ – ‘‘န ပစ္စေဿ’’န္တိ။ တဿ ဗဟိသီမဂတဿ စီဝရာသာ ဥပ္ပဇ္ဇတိ။ သော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ကေနစိဒေဝ ကရဏီယေန ပက္ကမတိ အနဓိဋ္ဌိတေန; နေဝဿ ဟောတိ – ‘‘ပစ္စေဿ’’န္တိ, န ပနဿ ဟောတိ – ‘‘န ပစ္စေဿ’’န္တိ။ တဿ ဗဟိသီမဂတဿ စီဝရာသာ ဥပ္ပဇ္ဇတိ။ သော တံ စီဝရာသံ ပယိရုပါသတိ။ အနာသာယ လဘတိ, အာသာယ န လဘတိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

ဘိက္ခု အတ္ထတကထိနော ကေနစိဒေဝ ကရဏီယေန ပက္ကမတိ အနဓိဋ္ဌိတေန; နေဝဿ ဟောတိ – ‘‘ပစ္စေဿ’’န္တိ, န ပနဿ ဟောတိ – ‘‘န ပစ္စေဿ’’န္တိ။ တဿ ဗဟိသီမဂတဿ စီဝရာသာ ဥပ္ပဇ္ဇတိ။ တဿ ဧဝံ ဟောတိ – ‘‘ဣဓေဝိမံ စီဝရာသံ ပယိရုပါသိဿံ, န ပစ္စေဿ’’န္တိ။ သော တံ စီဝရာသံ ပယိရုပါသတိ။ တဿ သာ စီဝရာသာ ဥပစ္ဆိဇ္ဇတိ။ တဿ ဘိက္ခုနော အာသာဝစ္ဆေဒိကော ကထိနုဒ္ဓါရော။

ကရဏီယဒေါဠသကံ နိဋ္ဌိတံ။

၁၉၈. အပဝိလာယနနဝကံ

၃၂၁. ဘိက္ခု အတ္ထတကထိနော ဒိသံဂမိကော ပက္ကမတိ စီဝရပဋိဝီသံ အပဝိလာယမာနော [အပဝိနယမာနော (သီ.), အပစိနယမာနော (က.)]။ တမေနံ ဒိသင်္ဂတံ ဘိက္ခူ ပုစ္ဆန္တိ – ‘‘ကဟံ တွံ, အာဝုသော, ဝဿံဝုဋ္ဌော, ကတ္ထ စ တေ စီဝရပဋိဝီသော’’တိ? သော ဧဝံ ဝဒေတိ – ‘‘အမုကသ္မိံ အာဝါသေ ဝဿံဝုဋ္ဌောမှိ။ တတ္ထ စ မေ စီဝရပဋိဝီသော’’တိ။ တေ ဧဝံ ဝဒန္တိ – ‘‘ဂစ္ဆာဝုသော, တံ စီဝရံ အာဟရ, မယံ တေ ဣဓ စီဝရံ ကရိဿာမာ’’တိ။ သော တံ အာဝါသံ ဂန္တွာ ဘိက္ခူ ပုစ္ဆတိ – ‘‘ကဟံ မေ, အာဝုသော, စီဝရပဋိဝီသော’’တိ? တေ ဧဝံ ဝဒန္တိ – ‘‘အယံ တေ, အာဝုသော, စီဝရပဋိဝီသော; ကဟံ ဂမိဿသီ’’တိ? သော ဧဝံ ဝဒေတိ – ‘‘အမုကံ နာမ [အမုကဉ္စ (က.)] အာဝါသံ ဂမိဿာမိ, တတ္ထ မေ ဘိက္ခူ စီဝရံ ကရိဿန္တီ’’တိ။ တေ ဧဝံ ဝဒန္တိ – ‘‘အလံ, အာဝုသော, မာ အဂမာသိ။ မယံ တေ ဣဓ စီဝရံ ကရိဿာမာ’’တိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဒိသံဂမိကော ပက္ကမတိ။ပေ.။ ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဒိသံဂမိကော ပက္ကမတိ။ပေ.။ ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

၃၂၂. ဘိက္ခု အတ္ထတကထိနော ဒိသံဂမိကော ပက္ကမတိ စီဝရပဋိဝီသံ အပဝိလာယမာနော။ တမေနံ ဒိသံဂတံ ဘိက္ခူ ပုစ္ဆန္တိ – ‘‘ကဟံ တွံ, အာဝုသော, ဝဿံဝုဋ္ဌော , ကတ္ထ စ တေ စီဝရပဋိဝီသော’’တိ? သော ဧဝံ ဝဒေတိ – ‘‘အမုကသ္မိံ အာဝါသေ ဝဿံဝုဋ္ဌောမှိ, တတ္ထ စ မေ စီဝရပဋိဝီသော’’တိ။ တေ ဧဝံ ဝဒန္တိ – ‘‘ဂစ္ဆာဝုသော, တံ စီဝရံ အာဟရ, မယံ တေ ဣဓ စီဝရံ ကရိဿာမာ’’တိ။ သော တံ အာဝါသံ ဂန္တွာ ဘိက္ခူ ပုစ္ဆတိ – ‘‘ကဟံ မေ, အာဝုသော, စီဝရပဋိဝီသော’’တိ? တေ ဧဝံ ဝဒန္တိ – ‘‘အယံ တေ, အာဝုသော, စီဝရပဋိဝီသော’’တိ။ သော တံ စီဝရံ အာဒါယ တံ အာဝါသံ ဂစ္ဆတိ။ တမေနံ အန္တရာမဂ္ဂေ ဘိက္ခူ ပုစ္ဆန္တိ – ‘‘အာဝုသော, ကဟံ ဂမိဿသီ’’တိ? သော ဧဝံ ဝဒေတိ – ‘‘အမုကံ နာမ အာဝါသံ ဂမိဿာမိ, တတ္ထ မေ ဘိက္ခူ စီဝရံ ကရိဿန္တီ’’တိ။ တေ ဧဝံ ဝဒန္တိ – ‘‘အလံ, အာဝုသော, မာ အဂမာသိ, မယံ တေ ဣဓ စီဝရံ ကရိဿာမာ’’တိ။ တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဒိသံဂမိကော ပက္ကမတိ စီဝရပဋိဝီသံ အပဝိလာယမာနော။ တမေနံ ဒိသံဂတံ ဘိက္ခူ ပုစ္ဆန္တိ – ‘‘ကဟံ တွံ, အာဝုသော, ဝဿံဝုဋ္ဌော, ကတ္ထ စ တေ စီဝရပဋိဝီသော’’တိ? သော ဧဝံ ဝဒေတိ – ‘‘အမုကသ္မိံ အာဝါသေ ဝဿံဝုဋ္ဌောမှိ, တတ္ထ စ မေ စီဝရပဋိဝီသော’’တိ။ တေ ဧဝံ ဝဒန္တိ – ‘‘ဂစ္ဆာဝုသော, တံ စီဝရံ အာဟရ, မယံ တေ ဣဓ စီဝရံ ကရိဿာမာ’’တိ။ သော တံ အာဝါသံ ဂန္တွာ ဘိက္ခူ ပုစ္ဆတိ – ‘‘ကဟံ မေ, အာဝုသော, စီဝရပဋိဝီသော’’တိ? တေ ဧဝံ ဝဒန္တိ – ‘‘အယံ တေ, အာဝုသော, စီဝရပဋိဝီသော’’တိ။ သော တံ စီဝရံ အာဒါယ တံ အာဝါသံ ဂစ္ဆတိ။ တမေနံ အန္တရာမဂ္ဂေ ဘိက္ခူ ပုစ္ဆန္တိ – ‘‘အာဝုသော, ကဟံ ဂမိဿသီ’’တိ? သော ဧဝံ ဝဒေတိ – ‘‘အမုကံ နာမ အာဝါသံ ဂမိဿာမိ, တတ္ထ မေ ဘိက္ခူ စီဝရံ ကရိဿန္တီ’’တိ။ တေ ဧဝံ ဝဒန္တိ – ‘‘အလံ, အာဝုသော, မာ အဂမာသိ, မယံ တေ ဣဓ စီဝရံ ကရိဿာမာ’’တိ။ တဿ ဧဝံ ဟောတိ – ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဒိသံဂမိကော ပက္ကမတိ။ပေ.။ ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

၃၂၃. ဘိက္ခု အတ္ထတကထိနော ဒိသံဂမိကော ပက္ကမတိ စီဝရပဋိဝီသံ အပဝိလာယမာနော။ တမေနံ ဒိသံဂတံ ဘိက္ခူ ပုစ္ဆန္တိ – ‘‘ကဟံ တွံ, အာဝုသော, ဝဿံဝုဋ္ဌော, ကတ္ထ စ တေ စီဝရပဋိဝီသော’’တိ? သော ဧဝံ ဝဒေတိ – ‘‘အမုကသ္မိံ အာဝါသေ ဝဿံဝုဋ္ဌောမှိ, တတ္ထ စ မေ စီဝရပဋိဝီသော’’တိ။ တေ ဧဝံ ဝဒန္တိ – ‘‘ဂစ္ဆာဝုသော, တံ စီဝရံ အာဟရ, မယံ တေ ဣဓ စီဝရံ ကရိဿာမာ’’တိ။ သော တံ အာဝါသံ ဂန္တွာ ဘိက္ခူ ပုစ္ဆတိ – ‘‘ကဟံ မေ, အာဝုသော, စီဝရပဋိဝီသော’’တိ? တေ ဧဝံ ဝဒန္တိ – ‘‘အယံ တေ, အာဝုသော, စီဝရပဋိဝီသော’’တိ။ သော တံ စီဝရံ အာဒါယ တံ အာဝါသံ ဂစ္ဆတိ။ တဿ တံ အာဝါသံ ဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဒိသံဂမိကော ပက္ကမတိ။ပေ.။ ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဒိသံဂမိကော ပက္ကမတိ။ပေ.။ ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

အပဝိလာယနနဝကံ နိဋ္ဌိတံ။

၁၉၉. ဖာသုဝိဟာရပဉ္စကံ

၃၂၄. ဘိက္ခု အတ္ထတကထိနော ဖာသုဝိဟာရိကော စီဝရံ အာဒါယ ပက္ကမတိ – ‘‘အမုကံ နာမ အာဝါသံ ဂမိဿာမိ; တတ္ထ မေ ဖာသု ဘဝိဿတိ ဝသိဿာမိ, နော စေ မေ ဖာသု ဘဝိဿတိ, အမုကံ နာမ အာဝါသံ ဂမိဿာမိ; တတ္ထ မေ ဖာသု ဘဝိဿတိ ဝသိဿာမိ , နော စေ မေ ဖာသု ဘဝိဿတိ, အမုကံ နာမ အာဝါသံ ဂမိဿာမိ; တတ္ထ မေ ဖာသု ဘဝိဿတိ ဝသိဿာမိ, နော စေ မေ ဖာသု ဘဝိဿတိ, ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ ဘိက္ခုနော နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဖာသုဝိဟာရိကော စီဝရံ အာဒါယ ပက္ကမတိ – ‘‘အမုကံ နာမ အာဝါသံ ဂမိဿာမိ; တတ္ထ မေ ဖာသု ဘဝိဿတိ ဝသိဿာမိ, နော စေ မေ ဖာသု ဘဝိဿတိ, အမုကံ နာမ အာဝါသံ ဂမိဿာမိ; တတ္ထ မေ ဖာသု ဘဝိဿတိ ဝသိဿာမိ, နော စေ မေ ဖာသု ဘဝိဿတိ, အမုကံ နာမ အာဝါသံ ဂမိဿာမိ; တတ္ထ မေ ဖာသု ဘဝိဿတိ ဝသိဿာမိ, နော စေ မေ ဖာသု ဘဝိဿတိ, ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿံ, န ပစ္စေဿ’’န္တိ။ တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော။

ဘိက္ခု အတ္ထတကထိနော ဖာသုဝိဟာရိကော စီဝရံ အာဒါယ ပက္ကမတိ – ‘‘အမုကံ နာမ အာဝါသံ ဂမိဿာမိ; တတ္ထ မေ ဖာသု ဘဝိဿတိ ဝသိဿာမိ, နော စေ မေ ဖာသု ဘဝိဿတိ, အမုကံ နာမ အာဝါသံ ဂမိဿာမိ; တတ္ထ မေ ဖာသု ဘဝိဿတိ ဝသိဿာမိ, နော စေ မေ ဖာသု ဘဝိဿတိ, အမုကံ နာမ အာဝါသံ ဂမိဿာမိ; တတ္ထ မေ ဖာသု ဘဝိဿတိ ဝသိဿာမိ, နော စေ မေ ဖာသု ဘဝိဿတိ, ပစ္စေဿ’’န္တိ။ တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ, န ပစ္စေဿ’’န္တိ။ သော တံ စီဝရံ ကာရေတိ။ တဿ တံ စီဝရံ ကယိရမာနံ နဿတိ။ တဿ ဘိက္ခုနော နာသနန္တိကော ကထိနုဒ္ဓါရော။

ဘိက္ခု အတ္ထတကထိနော ဖာသုဝိဟာရိကော စီဝရံ အာဒါယ ပက္ကမတိ – ‘‘အမုကံ နာမ အာဝါသံ ဂမိဿာမိ; တတ္ထ မေ ဖာသု ဘဝိဿတိ ဝသိဿာမိ, နော စေ မေ ဖာသု ဘဝိဿတိ, အမုကံ နာမ အာဝါသံ ဂမိဿာမိ; တတ္ထ မေ ဖာသု ဘဝိဿတိ ဝသိဿာမိ, နော စေ မေ ဖာသု ဘဝိဿတိ, အမုကံ နာမ အာဝါသံ ဂမိဿာမိ; တတ္ထ မေ ဖာသု ဘဝိဿတိ ဝသိဿာမိ, နော စေ မေ ဖာသု ဘဝိဿတိ, ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော – ‘‘ပစ္စေဿံ ပစ္စေဿ’’န္တိ ဗဟိဒ္ဓါ ကထိနုဒ္ဓါရံ ဝီတိနာမေတိ။ တဿ ဘိက္ခုနော သီမာတိက္ကန္တိကော ကထိနုဒ္ဓါရော။

ဘိက္ခု အတ္ထတကထိနော ဖာသုဝိဟာရိကော စီဝရံ အာဒါယ ပက္ကမတိ – ‘‘အမုကံ နာမ အာဝါသံ ဂမိဿာမိ; တတ္ထ မေ ဖာသု ဘဝိဿတိ ဝသိဿာမိ, နော စေ မေ ဖာသု ဘဝိဿတိ, အမုကံ နာမ အာဝါသံ ဂမိဿာမိ; တတ္ထ မေ ဖာသု ဘဝိဿတိ ဝသိဿာမိ, နော စေ မေ ဖာသု ဘဝိဿတိ, အမုကံ နာမ အာဝါသံ ဂမိဿာမိ; တတ္ထ မေ ဖာသု ဘဝိဿတိ ဝသိဿာမိ, နော စေ မေ ဖာသု ဘဝိဿတိ, ပစ္စေဿ’’န္တိ။ သော ဗဟိသီမဂတော တံ စီဝရံ ကာရေတိ။ သော ကတစီဝရော ‘‘ပစ္စေဿံ ပစ္စေဿ’’န္တိ သမ္ဘုဏာတိ ကထိနုဒ္ဓါရံ။ တဿ ဘိက္ခုနော သဟ ဘိက္ခူဟိ ကထိနုဒ္ဓါရော။

ဖာသုဝိဟာရပဉ္စကံ နိဋ္ဌိတံ။

၂၀၀. ပလိဗောဓါပလိဗောဓကထာ

၃၂၅. ဒွေမေ , ဘိက္ခဝေ, ကထိနဿ ပလိဗောဓါ, ဒွေ အပလိဗောဓါ။ ကတမေ စ, ဘိက္ခဝေ, ဒွေ ကထိနဿ ပလိဗောဓါ? အာဝါသပလိဗောဓေါ စ စီဝရပလိဗောဓေါ စ။ ကထဉ္စ, ဘိက္ခဝေ, အာဝါသပလိဗောဓေါ ဟောတိ? ဣဓ, ဘိက္ခဝေ, ဘိက္ခု ဝသတိ ဝါ တသ္မိံ အာဝါသေ, သာပေက္ခော ဝါ ပက္ကမတိ ‘‘ပစ္စေဿ’’န္တိ။ ဧဝံ ခေါ, ဘိက္ခဝေ, အာဝါသပလိဗောဓေါ ဟောတိ။ ကထဉ္စ, ဘိက္ခဝေ, စီဝရပလိဗောဓေါ ဟောတိ? ဣဓ, ဘိက္ခဝေ, ဘိက္ခုနော စီဝရံ အကတံ ဝါ ဟောတိ ဝိပ္ပကတံ ဝါ, စီဝရာသာ ဝါ အနုပစ္ဆိန္နာ။ ဧဝံ ခေါ, ဘိက္ခဝေ, စီဝရပလိဗောဓေါ ဟောတိ။ ဣမေ ခေါ, ဘိက္ခဝေ, ဒွေ ကထိနဿ ပလိဗောဓါ။

ကတမေ စ, ဘိက္ခဝေ, ဒွေ ကထိနဿ အပလိဗောဓါ? အာဝါသအပလိဗောဓေါ စ စီဝရအပလိဗောဓေါ စ။ ကထဉ္စ, ဘိက္ခဝေ, အာဝါသအပလိဗောဓေါ ဟောတိ? ဣဓ, ဘိက္ခဝေ, ဘိက္ခု ပက္ကမတိ တမှာ အာဝါသာ စတ္တေန ဝန္တေန မုတ္တေန အနပေက္ခော [အနပေက္ခေန (က.)] ‘‘န ပစ္စေဿ’’န္တိ။ ဧဝံ ခေါ, ဘိက္ခဝေ, အာဝါသအပလိဗောဓေါ ဟောတိ။ ကထဉ္စ, ဘိက္ခဝေ, စီဝရအပလိဗောဓေါ ဟောတိ? ဣဓ, ဘိက္ခဝေ, ဘိက္ခုနော စီဝရံ ကတံ ဝါ ဟောတိ, နဋ္ဌံ ဝါ ဝိနဋ္ဌံ ဝါ ဒဍ္ဎံ ဝါ, စီဝရာသာ ဝါ ဥပစ္ဆိန္နာ။ ဧဝံ ခေါ, ဘိက္ခဝေ, စီဝရအပလိဗောဓေါ ဟောတိ။ ဣမေ ခေါ, ဘိက္ခဝေ, ဒွေ ကထိနဿ အပလိဗောဓါတိ။

ပလိဗောဓါပလိဗောဓကထာ နိဋ္ဌိတာ။

ကထိနက္ခန္ဓကော နိဋ္ဌိတော သတ္တမော။

၂၀၁. တဿုဒ္ဒါနံ

တိံသ ပါဝေယျကာ ဘိက္ခူ၊ သာကေတုက္ကဏ္ဌိတာ ဝသုံ။

ဝဿံဝုဋ္ဌောကပုဏ္ဏေဟိ၊ အဂမုံ ဇိနဒဿနံ။

ဣဒံ ဝတ္ထု ကထိနဿ၊ ကပ္ပိဿန္တိ စ ပဉ္စကာ။

အနာမန္တာ အသမာစာရာ၊ တထေဝ ဂဏဘောဇနံ။

ယာဝဒတ္ထဉ္စ ဥပ္ပါဒေါ၊ အတ္ထတာနံ ဘဝိဿတိ။

ဉတ္တိ ဧဝတ္ထတဉ္စေဝ၊ ဧဝဉ္စေဝ အနတ္ထတံ။

ဥလ္လိခိ ဓေါဝနာ စေဝ၊ ဝိစာရဏဉ္စ ဆေဒနံ။

ဗန္ဓနော ဝဋ္ဋိ ကဏ္ဍုသ၊ ဒဠှီကမ္မာနုဝါတိကာ။

ပရိဘဏ္ဍံ ဩဝဒ္ဓေယျံ၊ မဒ္ဒနာ နိမိတ္တံ ကထာ။

ကုက္ကု သန္နိဓိ နိဿဂ္ဂိ၊ န ကပ္ပညတြ တေ တယော။

အညတြ ပဉ္စာတိရေကေ၊ သဉ္ဆိန္နေန သမဏ္ဍလီ။

နာညတြ ပုဂ္ဂလာ သမ္မာ၊ နိဿီမဋ္ဌောနုမောဒတိ။

ကထိနာနတ္ထတံ ဟောတိ၊ ဧဝံ ဗုဒ္ဓေန ဒေသိတံ။

အဟတာကပ္ပပိလောတိ၊ ပံသု ပါပဏိကာယ စ။

အနိမိတ္တာပရိကထာ၊ အကုက္ကု စ အသန္နိဓိ။

အနိဿဂ္ဂိ ကပ္ပကတေ၊ တထာ တိစီဝရေန စ။

ပဉ္စကေ ဝါတိရေကေ ဝါ၊ ဆိန္နေ သမဏ္ဍလီကတေ။

ပုဂ္ဂလဿတ္ထာရာ သမ္မာ၊ သီမဋ္ဌော အနုမောဒတိ။

ဧဝံ ကထိနတ္ထရဏံ၊ ဥဗ္ဘာရဿဋ္ဌမာတိကာ။

ပက္ကမနန္တိ နိဋ္ဌာနံ၊ သန္နိဋ္ဌာနဉ္စ နာသနံ။

သဝနံ အာသာဝစ္ဆေဒိ၊ သီမာ သဟုဗ္ဘာရဋ္ဌမီ။

ကတစီဝရမာဒါယ၊ ‘‘န ပစ္စေဿ’’န္တိ ဂစ္ဆတိ။

တဿ တံ ကထိနုဒ္ဓါရာ၊ဧ ဟောတိ ပက္ကမနန္တိကော။

အာဒါယ စီဝရံ ယာတိ၊ နိဿီမေ ဣဒံ စိန္တယိ။

‘‘ကာရေဿံ န ပစ္စေဿ’’န္တိ၊ နိဋ္ဌာနေ ကထိနုဒ္ဓါရော။

အာဒါယ နိဿီမံ နေဝ၊ ‘‘န ပစ္စေဿ’’န္တိ မာနသော။

တဿ တံ ကထိနုဒ္ဓါရော၊ သန္နိဋ္ဌာနန္တိကော ဘဝေ။

အာဒါယ စီဝရံ ယာတိ၊ နိဿီမေ ဣဒံ စိန္တယိ။

‘‘ကာရေဿံ န ပစ္စေဿ’’န္တိ၊ ကယိရံ တဿ နဿတိ။

တဿ တံ ကထိနုဒ္ဓါရော၊ ဘဝတိ နာသနန္တိကော။

အာဒါယ ယာတိ ‘‘ပစ္စေဿံ’’၊ ဗဟိ ကာရေတိ စီဝရံ။

ကတစီဝရော သုဏာတိ၊ ဥဗ္ဘတံ ကထိနံ တဟိံ။

တဿ တံ ကထိနုဒ္ဓါရော၊ ဘဝတိ သဝနန္တိကော။

အာဒါယ ယာတိ ‘‘ပစ္စေဿံ’’၊ ဗဟိ ကာရေတိ စီဝရံ။

ကတစီဝရော ဗဟိဒ္ဓါ၊ နာမေတိ ကထိနုဒ္ဓါရံ။

တဿ တံ ကထိနုဒ္ဓါရော၊ သီမာတိက္ကန္တိကော ဘဝေ။

အာဒါယ ယာတိ ‘‘ပစ္စေဿံ’’၊ ဗဟိ ကာရေတိ စီဝရံ။

ကတစီဝရော ပစ္စေဿံ၊ သမ္ဘောတိ ကထိနုဒ္ဓါရံ။

တဿ တံ ကထိနုဒ္ဓါရော၊ သဟ ဘိက္ခူဟိ ဇာယတိ။

အာဒါယ စ သမာဒါယ၊ သတ္တ-သတ္တဝိဓါ ဂတိ။

ပက္ကမနန္တိကာ နတ္ထိ၊ ဆက္ကေ ဝိပ္ပကတေ [ဆဋ္ဌေ ဝိပ္ပကတာ (သီ.)၊ ဆစ္စာ ဝိပ္ပကထာ (က.)] ဂတိ။

အာဒါယ နိဿီမဂတံ၊ ကာရေဿံ ဣတိ ဇာယတိ။

နိဋ္ဌာနံ သန္နိဋ္ဌာနဉ္စ၊ နာသနဉ္စ ဣမေ တယော။

အာဒါယ ‘‘န ပစ္စေဿ’’န္တိ၊ ဗဟိသီမေ ကရောမိတိ။

နိဋ္ဌာနံ သန္နိဋ္ဌာနမ္ပိ၊ နာသနမ္ပိ ဣဒံ တယော။

အနဓိဋ္ဌိတေန နေဝဿ၊ ဟေဋ္ဌာ တီဏိ နယာဝိဓိ။

အာဒါယ ယာတိ ပစ္စေဿံ၊ ဗဟိသီမေ ကရောမိတိ။

‘‘န ပစ္စေဿ’’န္တိ ကာရေတိ၊ နိဋ္ဌာနေ ကထိနုဒ္ဓါရော။

သန္နိဋ္ဌာနံ နာသနဉ္စ၊ သဝနသီမာတိက္ကမာ။

သဟ ဘိက္ခူဟိ ဇာယေထ၊ ဧဝံ ပန္နရသံ ဂတိ။

သမာဒါယ ဝိပ္ပကတာ၊ သမာဒါယ ပုနာ တထာ။

ဣမေ တေ စတုရော ဝါရာ၊ သဗ္ဗေ ပန္နရသဝိဓိ။

အနာသာယ စ အာသာယ၊ ကရဏီယော စ တေ တယော။

နယတော တံ ဝိဇာနေယျ၊ တယော ဒွါဒသ ဒွါဒသ။

အပဝိလာနာ နဝေတ္ထ [အပဝိလာယမာနေဝ (သျာ.)၊ အပဝိနာ နဝ စေတ္ထ (သီ.)]၊ ဖာသု ပဉ္စဝိဓါ တဟိံ။

ပလိဗောဓါပလိဗောဓါ၊ ဥဒ္ဒါနံ နယတော ကတန္တိ။

ဣမမှိ ခန္ဓကေ ဝတ္ထူ ဒေါဠသကပေယျာလမုခါနိ ဧကသတံ အဋ္ဌာရသ။

ကထိနက္ခန္ဓကော နိဋ္ဌိတော။