မာတိကာ

ဘန္တေ နာဂသေန, ကတိဟင်္ဂေဟိ သမန္နာဂတော ဘိက္ခု အရဟတ္တံ သစ္ဆိကရောတီတိ?

ဣဓ, မဟာရာဇ, အရဟတ္တံ သစ္ဆိကာတုကာမေန ဘိက္ခုနာ –

ဂဒြဘဿ [ဃောရဿရဿ (သီ။ သျာ။ ဣ။)] ဧကံ အင်္ဂံ ဂဟေတဗ္ဗံ။

ကုက္ကုဋဿ ပဉ္စ အင်္ဂါနိ ဂဟေတဗ္ဗာနိ။

ကလန္ဒကဿ ဧကံ အင်္ဂံ ဂဟေတဗ္ဗံ။

ဒီပိနိယာ ဧကံ အင်္ဂံ ဂဟေတဗ္ဗံ။

ဒီပိကဿ ဒွေ အင်္ဂါနိ ဂဟေတဗ္ဗာနိ။

ကုမ္မဿ ပဉ္စ အင်္ဂါနိ ဂဟေတဗ္ဗာနိ။

ဝံသဿ ဧကံ အင်္ဂံ ဂဟေတဗ္ဗံ။

စာပဿ ဧကံ အင်္ဂံ ဂဟေတဗ္ဗံ။

ဝါယသဿ ဒွေ အင်္ဂါနိ ဂဟေတဗ္ဗာနိ။

မက္ကဋဿ ဒွေ အင်္ဂါနိ ဂဟေတဗ္ဗာနိ။

ဂဒြဘဝဂ္ဂေါ ပဌမော။

လာဗုလတာယ ဧကံ အင်္ဂံ ဂဟေတဗ္ဗံ။

ပဒုမဿ တီဏိ အင်္ဂါနိ ဂဟေတဗ္ဗာနိ။

ဗီဇဿ ဒွေ အင်္ဂါနိ ဂဟေတဗ္ဗာနိ။

သာလကလျာဏိကာယ ဧကံ အင်္ဂံ ဂဟေတဗ္ဗံ။

နာဝါယ တီဏိ အင်္ဂါနိ ဂဟေတဗ္ဗာနိ။

နာဝါလဂ္ဂနကဿ [နာဝါလဂနကဿ (သီ။ ဣ။)] ဒွေ အင်္ဂါနိ ဂဟေတဗ္ဗာနိ။

ကူပဿ [ကူပကဿ (က။)] ဧကံ အင်္ဂံ ဂဟေတဗ္ဗံ။

နိယာမကဿ တီဏိ အင်္ဂါနိ ဂဟေတဗ္ဗာနိ။

ကမ္မကာရဿ ဧကံ အင်္ဂံ ဂဟေတဗ္ဗံ။

သမုဒ္ဒဿ ပဉ္စ အင်္ဂါနိ ဂဟေတဗ္ဗာနိ။

သမုဒ္ဒဝဂ္ဂေါ ဒုတိယော။

ပထဝိယာ ပဉ္စ အင်္ဂါနိ ဂဟေတဗ္ဗာနိ။

အာပဿ ပဉ္စ အင်္ဂါနိ ဂဟေတဗ္ဗာနိ။

တေဇဿ ပဉ္စ အင်္ဂါနိ ဂဟေတဗ္ဗာနိ။

ဝါယုဿ ပဉ္စ အင်္ဂါနိ ဂဟေတဗ္ဗာနိ။

ပဗ္ဗတဿ ပဉ္စ အင်္ဂါနိ ဂဟေတဗ္ဗာနိ။

အာကာသဿ ပဉ္စ အင်္ဂါနိ ဂဟေတဗ္ဗာနိ။

စန္ဒဿ ပဉ္စ အင်္ဂါနိ ဂဟေတဗ္ဗာနိ။

သူရိယဿ သတ္တ အင်္ဂါနိ ဂဟေတဗ္ဗာနိ။

သက္ကဿ တီဏိ အင်္ဂါနိ ဂဟေတဗ္ဗာနိ။

စက္ကဝတ္တိဿ စတ္တာရိ အင်္ဂါနိ ဂဟေတဗ္ဗာနိ။

ပထဝီဝဂ္ဂေါ တတိယော။

ဥပစိကာယ ဧကံ အင်္ဂံ ဂဟေတဗ္ဗံ။

ဗိဠာရဿ ဒွေ အင်္ဂါနိ ဂဟေတဗ္ဗာနိ။

ဥန္ဒူရဿ ဧကံ အင်္ဂံ ဂဟေတဗ္ဗံ။

ဝိစ္ဆိကဿ ဧကံ အင်္ဂံ ဂဟေတဗ္ဗံ။

နကုလဿ ဧကံ အင်္ဂံ ဂဟေတဗ္ဗံ။

ဇရသိင်္ဂါလဿ ဒွေ အင်္ဂါနိ ဂဟေတဗ္ဗာနိ။

မိဂဿ တီဏိ အင်္ဂါနိ ဂဟေတဗ္ဗာနိ။

ဂေါရူပဿ စတ္တာရိ အင်္ဂါနိ ဂဟေတဗ္ဗာနိ။

ဝရာဟဿ ဒွေ အင်္ဂါနိ ဂဟေတဗ္ဗာနိ။

ဟတ္ထိဿ ပဉ္စ အင်္ဂါနိ ဂဟေတဗ္ဗာနိ။

ဥပစိကာဝဂ္ဂေါ စတုတ္ထော။

သီဟဿ သတ္တ အင်္ဂါနိ ဂဟေတဗ္ဗာနိ။

စက္ကဝါကဿ တီဏိ အင်္ဂါနိ ဂဟေတဗ္ဗာနိ။

ပေဏာဟိကာယ ဒွေ အင်္ဂါနိ ဂဟေတဗ္ဗာနိ။

ဃရကပေါတဿ ဧကံ အင်္ဂံ ဂဟေတဗ္ဗံ။

ဥလူကဿ ဒွေ အင်္ဂါနိ ဂဟေတဗ္ဗာနိ။

သတပတ္တဿ ဧကံ အင်္ဂံ ဂဟေတဗ္ဗံ။

ဝဂ္ဂုလိဿ ဒွေ အင်္ဂါနိ ဂဟေတဗ္ဗာနိ။

ဇလူကာယ ဧကံ အင်္ဂံ ဂဟေတဗ္ဗံ။

သပ္ပဿ တီဏိ အင်္ဂါနိ ဂဟေတဗ္ဗာနိ။

အဇဂရဿ ဧကံ အင်္ဂံ ဂဟေတဗ္ဗံ။

သီဟဝဂ္ဂေါ ပဉ္စမော။

ပန္ထမက္ကဋကဿ ဧကံ အင်္ဂံ ဂဟေတဗ္ဗံ။

ထနသိတဒါရကဿ [ထနဣတဒါရကဿ (သျာ။)] ဧကံ အင်္ဂံ ဂဟေတဗ္ဗံ။

စိတ္တကဓရကုမ္မဿ [စိတ္တကထလကုမ္မဿ (က။)] ဧကံ အင်္ဂံ ဂဟေတဗ္ဗံ။

ပဝနဿ ပဉ္စ အင်္ဂါနိ ဂဟေတဗ္ဗာနိ။

ရုက္ခဿ တီဏိ အင်္ဂါနိ ဂဟေတဗ္ဗာနိ။

မေဃဿ ပဉ္စ အင်္ဂါနိ ဂဟေတဗ္ဗာနိ။

မဏိရတနဿ တီဏိ အင်္ဂါနိ ဂဟေတဗ္ဗာနိ။

မာဂဝိကဿ စတ္တာရိ အင်္ဂါနိ ဂဟေတဗ္ဗာနိ။

ဗာဠိသိကဿ ဒွေ အင်္ဂါနိ ဂဟေတဗ္ဗာနိ။

တစ္ဆကဿ ဒွေ အင်္ဂါနိ ဂဟေတဗ္ဗာနိ။

မက္ကဋဝဂ္ဂေါ ဆဋ္ဌော။

ကုမ္ဘဿ ဧကံ အင်္ဂံ ဂဟေတဗ္ဗံ။

ကာဠာယသဿ [ကာဠဟံသဿ (က။)] ဒွေ အင်္ဂါနိ ဂဟေတဗ္ဗာနိ။

ဆတ္တဿ တီဏိ အင်္ဂါနိ ဂဟေတဗ္ဗာနိ။

ခေတ္တဿ တီဏိ အင်္ဂါနိ ဂဟေတဗ္ဗာနိ။

အဂဒဿ ဒွေ အင်္ဂါနိ ဂဟေတဗ္ဗာနိ။

ဘောဇနဿ တီဏိ အင်္ဂါနိ ဂဟေတဗ္ဗာနိ။

ဣဿာသဿ စတ္တာရိ အင်္ဂါနိ ဂဟေတဗ္ဗာနိ။

ကုမ္ဘဝဂ္ဂေါ သတ္တမော။

ရညော စတ္တာရိ အင်္ဂါနိ ဂဟေတဗ္ဗာနိ။

ဒေါဝါရိကဿ ဒွေ အင်္ဂါနိ ဂဟေတဗ္ဗာနိ။

နိသဒါယ ဧကံ အင်္ဂံ ဂဟေတဗ္ဗံ။

ပဒီပဿ ဒွေ အင်္ဂါနိ ဂဟေတဗ္ဗာနိ။

မယူရဿ ဒွေ အင်္ဂါနိ ဂဟေတဗ္ဗာနိ။

တုရင်္ဂဿ ဒွေ အင်္ဂါနိ ဂဟေတဗ္ဗာနိ။

သောဏ္ဍိကဿ ဒွေ အင်္ဂါနိ ဂဟေတဗ္ဗာနိ။

ဣန္ဒခီလဿ ဒွေ အင်္ဂါနိ ဂဟေတဗ္ဗာနိ။

တုလာယ ဧကံ အင်္ဂံ ဂဟေတဗ္ဗံ။

ခဂ္ဂဿ ဒွေ အင်္ဂါနိ ဂဟေတဗ္ဗာနိ။

မစ္ဆဿ ဒွေ အင်္ဂါနိ ဂဟေတဗ္ဗာနိ။

ဣဏဂ္ဂါဟကဿ ဧကံ အင်္ဂံ ဂဟေတဗ္ဗံ။

ဗျာဓိတဿ ဒွေ အင်္ဂါနိ ဂဟေတဗ္ဗာနိ။

မတဿ ဒွေ အင်္ဂါနိ ဂဟေတဗ္ဗာနိ။

နဒိယာ ဒွေ အင်္ဂါနိ ဂဟေတဗ္ဗာနိ။

ဥသဘဿ ဧကံ အင်္ဂံ ဂဟေတဗ္ဗံ။

မဂ္ဂဿ ဒွေ အင်္ဂါနိ ဂဟေတဗ္ဗာနိ။

သုင်္ကသာယိကဿ ဧကံ အင်္ဂံ ဂဟေတဗ္ဗံ။

စောရဿ တီဏိ အင်္ဂါနိ ဂဟေတဗ္ဗာနိ။

သကုဏဂ္ဃိယာ ဧကံ အင်္ဂံ ဂဟေတဗ္ဗံ။

သုနခဿ ဧကံ အင်္ဂံ ဂဟေတဗ္ဗံ။

တိကိစ္ဆကဿ တီဏိ အင်္ဂါနိ ဂဟေတဗ္ဗာနိ။

ဂဗ္ဘိနိယာ ဒွေ အင်္ဂါနိ ဂဟေတဗ္ဗာနိ။

စမရိယာ ဧကံ အင်္ဂံ ဂဟေတဗ္ဗံ။

ကိကိယာ ဒွေ အင်္ဂါနိ ဂဟေတဗ္ဗာနိ။

ကပေါတိကာယ တီဏိ အင်္ဂါနိ ဂဟေတဗ္ဗာနိ။

ဧကနယနဿ ဒွေ အင်္ဂါနိ ဂဟေတဗ္ဗာနိ။

ကဿကဿ တီဏိ အင်္ဂါနိ ဂဟေတဗ္ဗာနိ။

ဇမ္ဗုကသိင်္ဂါလိယာ ဧကံ အင်္ဂံ ဂဟေတဗ္ဗံ။

စင်္ဂဝါရကဿ ဒွေ အင်္ဂါနိ ဂဟေတဗ္ဗာနိ။

ဒဗ္ဗိယာ ဧကံ အင်္ဂံ ဂဟေတဗ္ဗံ။

ဣဏသာဓကဿ တီဏိ အင်္ဂါနိ ဂဟေတဗ္ဗာနိ။

အနုဝိစိနကဿ ဧကံ အင်္ဂံ ဂဟေတဗ္ဗံ။

သာရထိဿ ဒွေ အင်္ဂါနိ ဂဟေတဗ္ဗာနိ။

ဘောဇကဿ ဒွေ အင်္ဂါနိ ဂဟေတဗ္ဗာနိ။

တုန္နဝါယဿ ဧကံ အင်္ဂံ ဂဟေတဗ္ဗံ။

နာဝိကဿ ဧကံ အင်္ဂံ ဂဟေတဗ္ဗံ။

ဘမရဿ ဒွေ အင်္ဂါနိ ဂဟေတဗ္ဗာနီတိ။

မာတိကာ နိဋ္ဌိတာ။

၁။ ဂဒြဘဝဂ္ဂေါ

၁။ ဂဒြဘင်္ဂပဉ္ဟော

၁။ ‘‘ဘန္တေ နာဂသေန, ‘ဂဒြဘဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ဂဒြဘော နာမ သင်္ကာရကူဋေပိ စတုက္ကေပိ သိင်္ဃာဋကေပိ ဂါမဒွါရေပိ ထုသရာသိမှိပိ ယတ္ထ ကတ္ထစိ သယတိ, န သယနဗဟုလော ဟောတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန တိဏသန္ထာရေပိ ပဏ္ဏသန္ထာရေပိ ကဋ္ဌမဉ္စကေပိ ဆမာယပိ ယတ္ထ ကတ္ထစိ စမ္မခဏ္ဍံ ပတ္ထရိတွာ ယတ္ထ ကတ္ထစိ သယိတဗ္ဗံ, န သယနဗဟုလေန ဘဝိတဗ္ဗံ။ ဣဒံ, မဟာရာဇ, ဂဒြဘဿ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန ‘ကလိင်္ဂရူပဓါနာ, ဘိက္ခဝေ, ဧတရဟိ မမ သာဝကာ ဝိဟရန္တိ အပ္ပမတ္တာ အာတာပိနော ပဓါနသ္မိ’န္တိ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာပိ –

‘‘‘ပလ္လင်္ကေန နိသိန္နဿ၊ ဇဏ္ဏုကေနာဘိဝဿတိ။

အလံ ဖာသုဝိဟာရာယ၊ ပဟိတတ္တဿ ဘိက္ခုနော’’’တိ။

ဂဒြဘင်္ဂပဉ္ဟော ပဌမော။

၂။ ကုက္ကုဋင်္ဂပဉ္ဟော

၂။ ‘‘ဘန္တေ နာဂသေန, ‘ကုက္ကုဋဿ ပဉ္စ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ပဉ္စ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ကုက္ကုဋော ကာလေန သမယေန ပဋိသလ္လီယတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ကာလေန သမယေနေဝ စေတိယင်္ဂဏံ သမ္မဇ္ဇိတွာ ပါနီယံ ပရိဘောဇနီယံ ဥပဋ္ဌပေတွာ သရီရံ ပဋိဇဂ္ဂိတွာ နဟာယိတွာ စေတိယံ ဝန္ဒိတွာ ဝုဍ္ဎာနံ ဘိက္ခူနံ ဒဿနာယ ဂန္တွာ ကာလေန သမယေန သုညာဂါရံ ပဝိသိတဗ္ဗံ။ ဣဒံ, မဟာရာဇ, ကုက္ကုဋဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ကုက္ကုဋော ကာလေန သမယေနေဝ ဝုဋ္ဌာတိ။ ဧဝမေဝ ခေါ, မဟာရာဇ, ယောဂိနာ ယောဂါဝစရေန ကာလေန သမယေနေဝ ဝုဋ္ဌဟိတွာ စေတိယင်္ဂဏံ သမ္မဇ္ဇိတွာ ပါနီယံ ပရိဘောဇနီယံ ဥပဋ္ဌပေတွာ သရီရံ ပဋိဇဂ္ဂိတွာ စေတိယံ ဝန္ဒိတွာ ပုနဒေဝ သုညာဂါရံ ပဝိသိတဗ္ဗံ။ ဣဒံ, မဟာရာဇ, ကုက္ကုဋဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ကုက္ကုဋော ပထဝိံ ခဏိတွာ ခဏိတွာ အဇ္ဈောဟာရံ အဇ္ဈောဟရတိ။ ဧဝမေဝ ခေါ, မဟာရာဇ, ယောဂိနာ ယောဂါဝစရေန ပစ္စဝေက္ခိတွာ ပစ္စဝေက္ခိတွာ အဇ္ဈောဟာရံ အဇ္ဈောဟရိတဗ္ဗံ ‘နေဝ ဒဝါယ န မဒါယ န မဏ္ဍနာယ န ဝိဘူသနာယ, ယာဝဒေဝ ဣမဿ ကာယဿ ဌိတိယာ ယာပနာယ ဝိဟိံသူပရတိယာ ဗြဟ္မစရိယာနုဂ္ဂဟာယ, ဣတိ ပုရာဏဉ္စ ဝေဒနံ ပဋိဟင်္ခါမိ နဝဉ္စ ဝေဒနံ န ဥပ္ပါဒေဿာမိ, ယာတြာ စ မေ ဘဝိဿတိ အနဝဇ္ဇတာ စ ဖာသုဝိဟာရော စာ’တိ။ ဣဒံ, မဟာရာဇ, ကုက္ကုဋဿ တတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန –

‘‘‘ကန္တာရေ ပုတ္တမံသံဝ၊ အက္ခဿဗ္ဘဉ္ဇနံ ယထာ။

ဧဝံ အာဟရိ အာဟာရံ၊ ယာပနတ္ထမမုစ္ဆိတော’တိ။

‘‘ပုန စပရံ, မဟာရာဇ, ကုက္ကုဋော သစက္ခုကောပိ ရတ္တိံ အန္ဓော ဟောတိ။ ဧဝမေဝ ခေါ, မဟာရာဇ, ယောဂိနာ ယောဂါဝစရေန အနန္ဓေနေဝ အန္ဓေန ဝိယ ဘဝိတဗ္ဗံ, အရညေပိ ဂေါစရဂါမေ ပိဏ္ဍာယ စရန္တေနပိ ရဇနီယေသု ရူပသဒ္ဒဂန္ဓရသဖောဋ္ဌဗ္ဗဓမ္မေသု အန္ဓေန ဗဓိရေန မူဂေန ဝိယ ဘဝိတဗ္ဗံ, န နိမိတ္တံ ဂဟေတဗ္ဗံ, နာနုဗျဉ္ဇနံ ဂဟေတဗ္ဗံ။ ဣဒံ, မဟာရာဇ, ကုက္ကုဋဿ စတုတ္ထံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန မဟာကစ္စာယနေန –

‘စက္ခုမာဿ ယထာ အန္ဓော၊ သောတဝါ ဗဓိရော ယထာ။

ပညဝါဿ [ဇိဝှာဝဿ (သီ။ ဣ။)] ယထာ မူဂေါ၊ ဗလဝါ ဒုဗ္ဗလောရိဝ။

အတ္တအတ္ထေ [အထ အတ္ထေ (သီ။ ဣ။)] သမုပ္ပန္နေ၊ သယေထ မတသာယိက’န္တိ။

‘‘ပုန စပရံ, မဟာရာဇ, ကုက္ကုဋော လေဍ္ဍုဒဏ္ဍလဂုဠမုဂ္ဂရေဟိ ပရိပါတိယန္တောပိ သကံ ဂေဟံ န ဝိဇဟတိ။ ဧဝမေဝ ခေါ, မဟာရာဇ, ယောဂိနာ ယောဂါဝစရေန စီဝရကမ္မံ ကရောန္တေနပိ နဝကမ္မံ ကရောန္တေနပိ ဝတ္တပ္ပဋိဝတ္တံ ကရောန္တေနပိ ဥဒ္ဒိသန္တေနပိ ဥဒ္ဒိသာပေန္တေနပိ ယောနိသော မနသိကာရော န ဝိဇဟိတဗ္ဗော, သကံ ခေါ ပနေတံ, မဟာရာဇ, ယောဂိနော ဂေဟံ, ယဒိဒံ ယောနိသော မနသိကာရော ။ ဣဒံ, မဟာရာဇ, ကုက္ကုဋဿ ပဉ္စမံ အင်္ဂံ ဂဟေတဗ္ဗံ ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန ‘ကော စ, ဘိက္ခဝေ, ဘိက္ခုနော ဂေါစရော သကော ပေတ္တိကော ဝိသယော? ယဒိဒံ စတ္တာရော သတိပဋ္ဌာနာ’တိ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာပိ –

‘‘‘ယထာ သုဒန္တော မာတင်္ဂေါ၊ သကံ သောဏ္ဍံ န မဒ္ဒတိ။

ဘက္ခာဘက္ခံ ဝိဇာနာတိ၊ အတ္တနော ဝုတ္တိကပ္ပနံ။

‘‘‘တထေဝ ဗုဒ္ဓပုတ္တေန၊ အပ္ပမတ္တေန ဝါ ပန။

ဇိနဝစနံ န မဒ္ဒိတဗ္ဗံ၊ မနသိကာရဝရုတ္တမ’’’န္တိ။

ကုက္ကုဋင်္ဂပဉ္ဟော ဒုတိယော။

၃။ ကလန္ဒကင်္ဂပဉ္ဟော

၃။ ‘‘ဘန္တေ နာဂသေန, ‘ကလန္ဒကဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ကလန္ဒကော ပဋိသတ္တုမှိ ဩပတန္တေ နင်္ဂုဋ္ဌံ ပပ္ဖောဋေတွာ မဟန္တံ ကတွာ တေနေဝ နင်္ဂုဋ္ဌလဂုဠေန ပဋိသတ္တုံ ပဋိဗာဟတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ကိလေသသတ္တုမှိ ဩပတန္တေ သတိပဋ္ဌာနလဂုဠံ ပပ္ဖောဋေတွာ မဟန္တံ ကတွာ တေနေဝ သတိပဋ္ဌာနလဂုဠေန သဗ္ဗကိလေသာ ပဋိဗာဟိတဗ္ဗာ။ ဣဒံ, မဟာရာဇ, ကလန္ဒကဿ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန စူဠပန္ထကေန –

‘ယဒါ ကိလေသာ ဩပတန္တိ၊ သာမညဂုဏဓံသနာ။

သတိပဋ္ဌာနလဂုဠေန၊ ဟန္တဗ္ဗာ တေ ပုနပ္ပုန’’’န္တိ။

ကလန္ဒကင်္ဂပဉ္ဟော တတိယော။

၄။ ဒီပိနိယင်္ဂပဉ္ဟော

၄။ ‘‘ဘန္တေ နာဂသေန, ‘ဒီပိနိယာ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ဒီပိနီ သကိံ ယေဝ ဂဗ္ဘံ ဂဏှာတိ, န ပုနပ္ပုနံ ပုရိသံ ဥပေတိ? ဧဝမေဝ ခေါ, မဟာရာဇ, ယောဂိနာ ယောဂါဝစရေန အာယတိံ ပဋိသန္ဓိံ ဥပ္ပတ္တိံ ဂဗ္ဘသေယျံ စုတိံ ဘေဒံ ခယံ ဝိနာသံ သံသာရဘယံ ဒုဂ္ဂတိံ ဝိသမံ သမ္ပီဠိတံ ဒိသွာ ‘ပုနဗ္ဘဝေ နပ္ပဋိသန္ဒဟိဿာမီ’တိ ယောနိသော မနသိကာရော ကရဏီယော။ ဣဒံ, မဟာရာဇ, ဒီပိနိယာ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန သုတ္တနိပါတေ ဓနိယဂေါပါလကသုတ္တေ –

‘‘‘ဥသဘောရိဝ ဆေတွ ဗန္ဓနာနိ၊ နာဂေါ ပူတိလတံဝ ဒါလယိတွာ။

နာဟံ ပုနုပေဿံ ဂဗ္ဘသေယျံ၊ အထ စေ ပတ္ထယသီ ပဝဿ ဒေဝါ’’’တိ။

ဒီပိနိယင်္ဂပဉ္ဟော စတုတ္ထော။

၅။ ဒီပိကင်္ဂပဉ္ဟော

၅။ ‘‘ဘန္တေ နာဂသေန, ‘ဒီပိကဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဒီပိကော အရညေ တိဏဂဟနံ ဝါ ဝနဂဟနံ ဝါ ပဗ္ဗတဂဟနံ ဝါ နိဿာယ နိလီယိတွာ မိဂေ ဂဏှာတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဝိဝေကံ သေဝိတဗ္ဗံ အရညံ ရုက္ခမူလံ ပဗ္ဗတံ ကန္ဒရံ ဂိရိဂုဟံ သုသာနံ ဝနပတ္ထံ အဗ္ဘောကာသံ ပလာလပုဉ္ဇံ အပ္ပသဒ္ဒံ အပ္ပနိဂ္ဃောသံ ဝိဇနဝါတံ မနုဿရာဟသေယျကံ ပဋိသလ္လာနသာရုပ္ပံ; ဝိဝေကံ သေဝမာနော ဟိ, မဟာရာဇ, ယောဂီ ယောဂါဝစရော နစိရဿေဝ ဆဠဘိညာသု စ ဝသိဘာဝံ ပါပုဏာတိ။ ဣဒံ, မဟာရာဇ, ဒီပိကဿ ပဌမံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေဟိ ဓမ္မသင်္ဂါဟကေဟိ –

‘‘‘ယထာပိ ဒီပိကော နာမ၊ နိလီယိတွာ ဂဏှတေ [ဂဏှတီ (သီ။ ဣ။)] မိဂေ။

တထေဝါယံ ဗုဒ္ဓပုတ္တော၊ ယုတ္တယောဂေါ ဝိပဿကော။

အရညံ ပဝိသိတွာန၊ ဂဏှာတိ ဖလမုတ္တမ’န္တိ။

‘‘ပုန စပရံ, မဟာရာဇ, ဒီပိကော ယံ ကိဉ္စိ ပသုံ ဝဓိတွာ ဝါမေန ပဿေန ပတိတံ န ဘက္ခေတိ။ ဧဝမေဝ ခေါ, မဟာရာဇ, ယောဂိနာ ယောဂါဝစရေန ဝေဠုဒါနေန ဝါ ပတ္တဒါနေန ဝါ ပုပ္ဖဒါနေန ဝါ ဖလဒါနေန ဝါ သိနာနဒါနေန ဝါ မတ္တိကာဒါနေန ဝါ စုဏ္ဏဒါနေန ဝါ ဒန္တကဋ္ဌဒါနေန ဝါ မုခေါဒကဒါနေန ဝါ စာတုကမ္ယတာယ ဝါ မုဂ္ဂသုပ္ယတာယ [မုဂ္ဂသုပ္ပတာယ (သီ။ ဣ။)] ဝါ ပါရိဘဋ [ပါရိဘဋ္ဋတာယ (သီ။ ဣ။)] ယတာယ ဝါ ဇင်္ဃပေသနီယေန ဝါ ဝေဇ္ဇကမ္မေန ဝါ ဒူတကမ္မေန ဝါ ပဟိဏဂမနေန ဝါ ပိဏ္ဍပဋိပိဏ္ဍေန ဝါ ဒါနာနုပ္ပဒါနေန ဝါ ဝတ္ထုဝိဇ္ဇာယ ဝါ နက္ခတ္တဝိဇ္ဇာယ ဝါ အင်္ဂဝိဇ္ဇာယ [နဂဝိဇ္ဇာယ (က။)] ဝါ အညတရညတရေန ဝါ ဗုဒ္ဓပ္ပဋိကုဋ္ဌေန မိစ္ဆာဇီဝေန နိပ္ဖာဒိတံ ဘောဇနံ န ဘုဉ္ဇိတဗ္ဗံ [ပရိဘုဉ္ဇိတဗ္ဗံ (သီ။ ဣ။)] ဝါမေန ပဿေန ပတိတံ ပသုံ ဝိယ ဒီပိကော။ ဣဒံ, မဟာရာဇ, ဒီပိကဿ ဒုတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ –

‘‘‘ဝစီဝိညတ္တိဝိပ္ဖာရာ၊ ဥပ္ပန္နံ မဓုပါယသံ။

သစေ ဘုတ္တော ဘဝေယျာဟံ၊ သာဇီဝေါ ဂရဟိတော မမ။

‘‘‘ယဒိပိ မေ အန္တဂုဏံ၊ နိက္ခမိတွာ ဗဟီ စရေ။

နေဝ ဘိန္ဒေယျမာဇီဝံ၊ စဇမာနောပိ ဇီဝိတ’’’န္တိ။

ဒီပိကင်္ဂပဉ္ဟော ပဉ္စမော။

၆။ ကုမ္မင်္ဂပဉ္ဟော

၆။ ‘‘ဘန္တေ နာဂသေန, ‘ကုမ္မဿ ပဉ္စ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ပဉ္စ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ကုမ္မော ဥဒကစရော ဥဒကေယေဝ ဝါသံ ကပ္ပေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သဗ္ဗပါဏဘူတပုဂ္ဂလာနံ ဟိတာနုကမ္ပိနာ မေတ္တာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန သဗ္ဗာဝန္တံ လောကံ ဖရိတွာ ဝိဟရိတဗ္ဗံ။ ဣဒံ, မဟာရာဇ, ကုမ္မဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ကုမ္မော ဥဒကေ ဥပ္ပိလဝန္တော သီသံ ဥက္ခိပိတွာ ယဒိ ကောစိ ပဿတိ, တတ္ထေဝ နိမုဇ္ဇတိ ဂါဠှမောဂါဟတိ ‘မာ မံ တေ ပုန ပဿေယျု’န္တိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ကိလေသေသု ဩပတန္တေသု အာရမ္မဏသရေ နိမုဇ္ဇိတဗ္ဗံ ဂါဠှမောဂါဟိတဗ္ဗံ ‘မာ မံ ကိလေသာ ပုန ပဿေယျု’န္တိ။ ဣဒံ, မဟာရာဇ, ကုမ္မဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ , မဟာရာဇ, ကုမ္မော ဥဒကတော နိက္ခမိတွာ ကာယံ ဩတာပေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန နိသဇ္ဇဋ္ဌာနသယနစင်္ကမတော မာနသံ နီဟရိတွာ သမ္မပ္ပဓါနေ မာနသံ ဩတာပေတဗ္ဗံ။ ဣဒံ, မဟာရာဇ, ကုမ္မဿ တတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ကုမ္မော ပထဝိံ ခဏိတွာ ဝိဝိတ္တေ ဝါသံ ကပ္ပေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန လာဘသက္ကာရသိလောကံ ပဇဟိတွာ သုညံ ဝိဝိတ္တံ ကာနနံ ဝနပတ္ထံ ပဗ္ဗတံ ကန္ဒရံ ဂိရိဂုဟံ အပ္ပသဒ္ဒံ အပ္ပနိဂ္ဃောသံ ပဝိဝိတ္တမောဂါဟိတွာ ဝိဝိတ္တေ ယေဝ ဝါသံ ဥပဂန္တဗ္ဗံ။ ဣဒံ, မဟာရာဇ, ကုမ္မဿ စတုတ္ထံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန ဥပသေနေန ဝင်္ဂန္တပုတ္တေန –

‘‘‘ဝိဝိတ္တံ အပ္ပနိဂ္ဃောသံ၊ ဝါဠမိဂနိသေဝိတံ။

သေဝေ သေနာသနံ ဘိက္ခု၊ ပဋိသလ္လာနကာရဏာ’တိ။

‘‘ပုန စပရံ, မဟာရာဇ, ကုမ္မော စာရိကံ စရမာနော ယဒိ ကဉ္စိ ပဿတိ ဝါ, သဒ္ဒံ သုဏာတိ ဝါ, သောဏ္ဍိပဉ္စမာနိ အင်္ဂါနိ သကေ ကပါလေ နိဒဟိတွာ အပ္ပောဿုက္ကော တုဏှီဘူတော တိဋ္ဌတိ ကာယမနုရက္ခန္တော, ဧဝမေဝ ခေါ, မဟာရာဇ, ယောဂိနာ ယောဂါဝစရေန သဗ္ဗတ္ထ ရူပသဒ္ဒဂန္ဓရသဖောဋ္ဌဗ္ဗဓမ္မေသု အာပတန္တေသု ဆသု ဒွါရေသု သံဝရကဝါဋံ အနုဂ္ဃါဋေတွာ မာနသံ သမောဒဟိတွာ သံဝရံ ကတွာ သတေန သမ္ပဇာနေန ဝိဟာတဗ္ဗံ သမဏဓမ္မံ အနုရက္ခမာနေန။ ဣဒံ, မဟာရာဇ, ကုမ္မဿ ပဉ္စမံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန သံယုတ္တနိကာယဝရေ ကုမ္မူပမသုတ္တန္တေ –

‘‘‘ကုမ္မောဝ အင်္ဂါနိ သကေ ကပါလေ၊ သမောဒဟံ ဘိက္ခု မနောဝိတက္ကေ။

အနိဿိတော အညမဟေဌယာနော၊ ပရိနိဗ္ဗုတောနူပဝဒေယျ ကဉ္စီ’’’တိ။

ကုမ္မင်္ဂပဉ္ဟော ဆဋ္ဌော။

၇။ ဝံသင်္ဂပဉ္ဟော

၇။ ‘‘ဘန္တေ နာဂသေန, ‘ဝံသဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ဝံသော ယတ္ထ ဝါတော, တတ္ထ အနုလောမေတိ, နာညတ္ထမနုဓါဝတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ယံ ဗုဒ္ဓေန ဘဂဝတာ ဘာသိတံ နဝင်္ဂံ သတ္ထု သာသနံ, တံ အနုလောမယိတွာ ကပ္ပိယေ အနဝဇ္ဇေ ဌတွာ သမဏဓမ္မံ ယေဝ ပရိယေသိတဗ္ဗံ။ ဣဒံ, မဟာရာဇ, ဝံသဿ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ မဟာရာဇ ထေရေန ရာဟုလေန –

‘‘‘နဝင်္ဂံ ဗုဒ္ဓဝစနံ၊ အနုလောမေတွာန သဗ္ဗဒါ။

ကပ္ပိယေ အနဝဇ္ဇသ္မိံ၊ ဌတွာပါယံ သမုတ္တရိ’’’န္တိ။

ဝံသင်္ဂပဉ္ဟော သတ္တမော။

၈။ စာပင်္ဂပဉ္ဟော

၈။ ‘‘ဘန္တေ နာဂသေန, ‘စာပဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, စာပေါ သုတစ္ဆိတော နမိတော [မိတော (သီ။ ဣ။ က။)] ယာဝဂ္ဂမူလံ သမကမေဝ အနုနမတိ နပ္ပဋိတ္ထမ္ဘတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ထေရနဝမဇ္ဈိမသမကေသု အနုနမိတဗ္ဗံ နပ္ပဋိဖရိတဗ္ဗံ။ ဣဒံ, မဟာရာဇ, စာပဿ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန ဝိဓုရ [ပုဏ္ဏက] ဇာတကေ –

‘‘‘စာပေါဝူနုဒရော ဓီရော၊ ဝံသော ဝါပိ ပကမ္ပယေ [စာပေါ ဝါ နုန မေ ဓီရော၊ ဝံသောဝ အနုလောမယံ (သီ။ ဣ။ က။)]။

ပဋိလောမံ န ဝတ္တေယျ၊ သ ရာဇဝသတိံ ဝသေ’’’တိ။

စာပင်္ဂပဉ္ဟော အဋ္ဌမော။

၉။ ဝါယသင်္ဂပဉ္ဟော

၉။ ‘‘ဘန္တေ နာဂသေန, ‘ဝါယသဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဝါယသော အာသင်္ကိတပရိသင်္ကိတော ယတ္တပ္ပယတ္တော စရတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အာသင်္ကိတပရိသင်္ကိတေန ယတ္တပယတ္တေန ဥပဋ္ဌိတာယ သတိယာ သံဝုတေဟိ ဣန္ဒ္ရိယေဟိ စရိတဗ္ဗံ။ ဣဒံ, မဟာရာဇ, ဝါယသဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဝါယသော ယံ ကိဉ္စိ ဘောဇနံ ဒိသွာ ဉာတီဟိ သံဝိဘဇိတွာ ဘုဉ္ဇတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ယေ တေ လာဘာ ဓမ္မိကာ ဓမ္မလဒ္ဓါ အန္တမသော ပတ္တပရိယာပန္နမတ္တမ္ပိ, တထာရူပေဟိ လာဘေဟိ ပဋိဝိဘတ္တဘောဂိနာ ဘဝိတဗ္ဗံ သီလဝန္တေဟိ သဗြဟ္မစာရီဟိ။ ဣဒံ, မဟာရာဇ, ဝါယသဿ ဒုတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ –

‘‘‘သစေ မေ ဥပနာမေန္တိ၊ ယထာလဒ္ဓံ တပဿိနော။

သဗ္ဗေ သံဝိဘဇိတွာန၊ တတော ဘုဉ္ဇာမိ ဘောဇန’’’န္တိ။

ဝါယသင်္ဂပဉ္ဟော နဝမော။

၁၀။ မက္ကဋင်္ဂပဉ္ဟော

၁၀။ ‘‘ဘန္တေ နာဂသေန, ‘မက္ကဋဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, မက္ကဋော ဝါသမုပဂစ္ဆန္တော တထာရူပေ ဩကာသေ မဟတိမဟာရုက္ခေ ပဝိဝိတ္တေ သဗ္ဗဋ္ဌကသာခေ [သဗ္ဗတ္ထကသာခေ (သျာ။), သဗ္ဗဋ္ဌသာခေ (က။)] ဘီရုတ္တာဏေ ဝါသမုပဂစ္ဆတိ, ဧဝမေဝ ခေါ, မဟာရာဇ , ယောဂိနာ ယောဂါဝစရေန လဇ္ဇိံ ပေသလံ သီလဝန္တံ ကလျာဏဓမ္မံ ဗဟုဿုတံ ဓမ္မဓရံ ဝိနယဓရံ ပိယံ ဂရုဘာဝနီယံ ဝတ္တာရံ ဝစနက္ခမံ ဩဝါဒကံ ဝိညာပကံ သန္ဒဿကံ သမာဒပကံ သမုတ္တေဇကံ သမ္ပဟံသကံ ဧဝရူပံ ကလျာဏမိတ္တံ အာစရိယံ နိဿာယ ဝိဟရိတဗ္ဗံ။ ဣဒံ, မဟာရာဇ, မက္ကဋဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, မက္ကဋော ရုက္ခေ ယေဝ စရတိ တိဋ္ဌတိ နိသီဒတိ, ယဒိ နိဒ္ဒံ ဩက္ကမတိ, တတ္ထေဝ ရတ္တိံ ဝါသမနုဘဝတိ။ ဧဝမေဝ ခေါ, မဟာရာဇ, ယောဂိနာ ယောဂါဝစရေန ပဝနာဘိမုခေန ဘဝိတဗ္ဗံ, ပဝနေ ယေဝ ဌာနစင်္ကမနိသဇ္ဇာသယနံ နိဒ္ဒံ ဩက္ကမိတဗ္ဗံ, တတ္ထေဝ သတိပဋ္ဌာနမနုဘဝိတဗ္ဗံ။ ဣဒံ, မဟာရာဇ, မက္ကဋဿ ဒုတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ –

‘‘‘စင်္ကမန္တောပိ တိဋ္ဌန္တော၊ နိသဇ္ဇာသယနေန ဝါ။

ပဝနေ သောဘတေ ဘိက္ခု၊ ပဝနန္တံဝ ဝဏ္ဏိတ’’’န္တိ။

မက္ကဋင်္ဂပဉ္ဟော ဒသမော။

ဂဒြဘဝဂ္ဂေါ ပဌမော။

တဿုဒ္ဒါနံ –

ဂဒြဘော စေဝ [ဃောရဿရော စ (သီ။ သျာ။ ဣ။)] ကုက္ကုဋော၊ ကလန္ဒော ဒီပိနိ ဒီပိကော။

ကုမ္မော ဝံသော စ စာပေါ စ၊ ဝါယသော အထ မက္ကဋောတိ။

၂။ သမုဒ္ဒဝဂ္ဂေါ

၁။ လာဗုလတင်္ဂပဉ္ဟော

၁။ ‘‘ဘန္တေ နာဂသေန, ‘လာဗုလတာယ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, လာဗုလတာ တိဏေ ဝါ ကဋ္ဌေ ဝါ လတာယ ဝါ သောဏ္ဍိကာဟိ အာလမ္ဗိတွာ တဿူပရိ ဝဍ္ဎတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အရဟတ္တေ အဘိဝဍ္ဎိတုကာမေန မနသာ အာရမ္မဏံ အာလမ္ဗိတွာ အရဟတ္တေ အဘိဝဍ္ဎိတဗ္ဗံ။ ဣဒံ, မဟာရာဇ, လာဗုလတာယ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ –

‘‘‘ယထာ လာဗုလတာ နာမ၊ တိဏေ ကဋ္ဌေ လတာယ ဝါ။

အာလမ္ဗိတွာ သောဏ္ဍိကာဟိ၊ တတော ဝဍ္ဎတိ ဥပ္ပရိ။

‘‘‘တထေဝ ဗုဒ္ဓပုတ္တေန၊ အရဟတ္တဖလကာမိနာ။

အာရမ္မဏံ အာလမ္ဗိတွာ၊ ဝဍ္ဎိတဗ္ဗံ အသေက္ခဖလေ’’’တိ။

လာဗုလတင်္ဂပဉ္ဟော ပဌမော။

၂။ ပဒုမင်္ဂပဉ္ဟော

၂။ ‘‘ဘန္တေ နာဂသေန, ‘ပဒုမဿ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ တီဏိ အင်္ဂါနိ ဂဟေတဗ္ဗာနီ’’တိ ? ‘‘ယထာ, မဟာရာဇ, ပဒုမံ ဥဒကေ ဇာတံ ဥဒကေ သံဝဒ္ဓံ အနုပလိတ္တံ ဥဒကေန, ဧဝမေဝ ခေါ, မဟာရာဇ, ယောဂိနာ ယောဂါဝစရေန ကုလေ ဂဏေ လာဘေ ယသေ သက္ကာရေ သမ္မာနနာယ ပရိဘောဂပစ္စယေသု စ သဗ္ဗတ္ထ အနုပလိတ္တေန ဘဝိတဗ္ဗံ။ ဣဒံ, မဟာရာဇ, ပဒုမဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ပဒုမံ ဥဒကာ အစ္စုဂ္ဂမ္မ ဌာတိ။ ဧဝမေဝ ခေါ, မဟာရာဇ, ယောဂိနာ ယောဂါဝစရေန သဗ္ဗလောကံ အဘိဘဝိတွာ အစ္စုဂ္ဂမ္မ လောကုတ္တရဓမ္မေ ဌာတဗ္ဗံ။ ဣဒံ, မဟာရာဇ, ပဒုမဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ပဒုမံ အပ္ပမတ္တကေနပိ အနိလေန ဧရိတံ စလတိ။ ဧဝမေဝ ခေါ, မဟာရာဇ, ယောဂိနာ ယောဂါဝစရေန အပ္ပမတ္တကေသုပိ ကိလေသေသု သံယမော ကရဏီယော, ဘယဒဿာဝိနာ ဝိဟရိတဗ္ဗံ။ ဣဒံ, မဟာရာဇ, ပဒုမဿ တတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန ‘အဏုမတ္တေသု ဝဇ္ဇေသု ဘယဒဿာဝီ သမာဒါယ သိက္ခတိ သိက္ခာပဒေသူ’တိ။

ပဒုမင်္ဂပဉ္ဟော ဒုတိယော။

၃။ ဗီဇင်္ဂပဉ္ဟော

၃။ ‘‘ဘန္တေ နာဂသေန, ‘ဗီဇဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဗီဇံ အပ္ပကမ္ပိ သမာနံ ဘဒ္ဒကေ ခေတ္တေ ဝုတ္တံ ဒေဝေ သမ္မာ ဓါရံ ပဝေစ္ဆန္တေ သုဗဟူနိ ဖလာနိ အနုဒဿတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ယထာ ပဋိပါဒိတံ သီလံ ကေဝလံ သာမညဖလမနုဒဿတိ။ ဧဝံ သမ္မာ ပဋိပဇ္ဇိတဗ္ဗံ။ ဣဒံ, မဟာရာဇ, ဗီဇဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဗီဇံ သုပရိသောဓိတေ ခေတ္တေ ရောပိတံ ခိပ္ပမေဝ သံဝိရူဟတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန မာနသံ သုပရိဂ္ဂဟိတံ သုညာဂါရေ ပရိသောဓိတံ သတိပဋ္ဌာနခေတ္တဝရေ ခိတ္တံ ခိပ္ပမေဝ ဝိရူဟတိ။ ဣဒံ, မဟာရာဇ, ဗီဇဿ ဒုတိယံ အင်္ဂံ ဂဟေတဗ္ဗံ ။ ဘာသိတမ္ပေတံ, မဟာရာဇ, ထေရေန အနုရုဒ္ဓေန –

‘‘‘ယထာပိ ခေတ္တေ [ယထာ ခေတ္တေ (သီ။)] ပရိသုဒ္ဓေ၊ ဗီဇဉ္စဿ ပတိဋ္ဌိတံ။

ဝိပုလံ တဿ ဖလံ ဟောတိ၊ အပိ တောသေတိ ကဿကံ။

‘‘‘တထေဝ ယောဂိနော စိတ္တံ၊ သုညာဂါရေ ဝိသောဓိတံ။

သတိပဋ္ဌာနခေတ္တမှိ၊ ခိပ္ပမေဝ ဝိရူဟတီ’’’တိ။

ဗီဇင်္ဂပဉ္ဟော တတိယော။

၄။ သာလကလျာဏိကင်္ဂပဉ္ဟော

၄။ ‘‘ဘန္တေ နာဂသေန, ‘သာလကလျာဏိကာယ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, သာလကလျာဏိကာ နာမ အန္တောပထဝိယံ ယေဝ အဘိဝဍ္ဎတိ ဟတ္ထသတမ္ပိ ဘိယျောပိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန စတ္တာရိ သာမညဖလာနိ စတဿော ပဋိသမ္ဘိဒါ ဆဠဘိညာယော ကေဝလဉ္စ သမဏဓမ္မံ သုညာဂါရေ ယေဝ ပရိပူရယိတဗ္ဗံ။ ဣဒံ, မဟာရာဇ, သာလကလျာဏိကာယ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန ရာဟုလေန –

‘‘‘သာလကလျာဏိကာ နာမ၊ ပါဒပေါ ဓရဏီရုဟော။

အန္တောပထဝိယံ ယေဝ၊ သတဟတ္ထောပိ ဝဍ္ဎတိ။

‘‘‘ယထာ ကာလမှိ သမ္ပတ္တေ၊ ပရိပါကေန သော ဒုမော။

ဥဂ္ဂဉ္ဆိတွာန ဧကာဟံ၊ သတဟတ္ထောပိ ဝဍ္ဎတိ။

‘‘‘ဧဝမေဝါဟံ မဟာဝီရ၊ သာလကလျာဏိကာ ဝိယ။

အဗ္ဘန္တရေ သုညာဂါရေ၊ ဓမ္မတော အဘိဝဍ္ဎယိ’’’န္တိ။

သာလကလျာဏိကင်္ဂပဉ္ဟော စတုတ္ထော။

၅။ နာဝင်္ဂပဉ္ဟော

၅။ ‘‘ဘန္တေ နာဂသေန, ‘နာဝါယ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ တီဏိ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, နာဝါ ဗဟုဝိဓဒါရုသံဃာဋသမဝါယေန ဗဟုမ္ပိ ဇနံ တာရယတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အာစာရသီလဂုဏဝတ္တပ္ပဋိဝတ္တဗဟုဝိဓဓမ္မသံဃာဋသမဝါယေန သဒေဝကော လောကော တာရယိတဗ္ဗော။ ဣဒံ, မဟာရာဇ, နာဝါယ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, နာဝါ ဗဟုဝိဓဦမိတ္ထနိတဝေဂဝိသဋမာဝဋ္ဋဝေဂံ သဟတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဗဟုဝိဓကိလေသဦမိဝေဂံ လာဘသက္ကာရယသသိလောကပူဇနဝန္ဒနာ ပရကုလေသု နိန္ဒာပသံသာသုခဒုက္ခသမ္မာနနဝိမာနနဗဟုဝိဓဒေါသဦမိဝေဂဉ္စ သဟိတဗ္ဗံ။ ဣဒံ, မဟာရာဇ, နာဝါယ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, နာဝါ အပရိမိတမနန္တမပါရမက္ခောဘိတဂမ္ဘီရေ မဟတိမဟာဃောသေ တိမိတိမိင်္ဂလမကရမစ္ဆဂဏာကုလေ မဟတိမဟာသမုဒ္ဒေ စရတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန တိပရိဝဋ္ဋ ဒွါဒသာကာရ စတုသစ္စာဘိသမယပ္ပဋိဝေဓေ မာနသံ သဉ္စာရယိတဗ္ဗံ။ ဣဒံ, မဟာရာဇ, နာဝါယ တတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန သံယုတ္တနိကာယဝရေ သစ္စသံယုတ္တေ –

‘‘‘ဝိတက္ကေန္တာ စ ခေါ တုမှေ, ဘိက္ခဝေ, ‘‘ဣဒံ ဒုက္ခ’’န္တိ ဝိတက္ကေယျာထ, ‘‘အယံ ဒုက္ခသမုဒယော’’တိ ဝိတက္ကေယျာထ, ‘‘အယံ ဒုက္ခနိရောဓေါ’’တိ ဝိတက္ကေယျာထ, ‘‘အယံ ဒုက္ခနိရောဓဂါမိနီ ပဋိပဒါ’’တိ ဝိတက္ကေယျာထာ’’’တိ။

နာဝင်္ဂပဉ္ဟော ပဉ္စမော။

၆။ နာဝါလဂ္ဂနကင်္ဂပဉ္ဟော

၆။ ‘‘ဘန္တေ နာဂသေန, ‘နာဝါလဂ္ဂနကဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, နာဝါလဂ္ဂနကံ ဗဟုဦမိဇာလာကုလဝိက္ခောဘိတသလိလတလေ မဟတိမဟာသမုဒ္ဒေ နာဝံ လဂ္ဂေတိ ဌပေတိ, န ဒေတိ ဒိသာဝိဒိသံ ဟရိတုံ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ရာဂဒေါသမောဟူမိဇာလေ မဟတိမဟာဝိတက္ကသမ္ပဟာရေ စိတ္တံ လဂ္ဂေတဗ္ဗံ, န ဒါတဗ္ဗံ ဒိသာဝိဒိသံ ဟရိတုံ။ ဣဒံ, မဟာရာဇ, နာဝါလဂ္ဂနကဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, နာဝါလဂ္ဂနကံ န ပ္လဝတိ [န ပိလဝတိ (သီ။ ဣ။)] ဝိသီဒတိ, ဟတ္ထသတေပိ ဥဒကေ နာဝံ လဂ္ဂေတိ ဌာနမုပနေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန လာဘယသသက္ကာရမာနနဝန္ဒနပူဇနအပစိတီသု လာဘဂ္ဂယသဂ္ဂေပိ န ပ္လဝိတဗ္ဗံ, သရီရယာပနမတ္တကေ ယေဝ စိတ္တံ ဌပေတဗ္ဗံ။ ဣဒံ, မဟာရာဇ, နာဝါလဂ္ဂနကဿ ဒုတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ –

‘‘‘ယထာ သမုဒ္ဒေ လဂ္ဂနကံ၊ န ပ္လဝတိ ဝိသီဒတိ။

တထေဝ လာဘသက္ကာရေ၊ မာ ပ္လဝထ ဝိသီဒထာ’’’တိ။

နာဝါလဂ္ဂနကင်္ဂပဉ္ဟော ဆဋ္ဌော။

၇။ ကူပင်္ဂပဉ္ဟော

၇။ ‘‘ဘန္တေ နာဂသေန, ‘ကူပဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ကူပေါ ရဇ္ဇုဉ္စ ဝရတ္တဉ္စ လင်္ကာရဉ္စ ဓါရေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သတိသမ္ပဇညသမန္နာဂတေန ဘဝိတဗ္ဗံ, အဘိက္ကန္တေ ပဋိက္ကန္တေ အာလောကိတေ ဝိလောကိတေ သမိဉ္ဇိတေ ပသာရိတေ သံဃာဋိပတ္တစီဝရဓါရဏေ အသိတေ ဣတေ ခါယိတေ သာယိတေ ဥစ္စာရပဿာဝကမ္မေ ဂတေ ဌိတေ နိသိန္နေ သုတ္တေ ဇာဂရိတေ ဘာသိတေ တုဏှီဘာဝေ သမ္ပဇာနကာရိနာ ဘဝိတဗ္ဗံ။ ဣဒံ, မဟာရာဇ, ကူပဿ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန ‘သတော, ဘိက္ခဝေ, ဘိက္ခု ဝိဟရေယျ သမ္ပဇာနော, အယံ ဝေါ အမှာကံ အနုသာသနီ’’’တိ။

ကူပင်္ဂပဉ္ဟော သတ္တမော။

၈။ နိယာမကင်္ဂပဉ္ဟော

၈။ ‘‘ဘန္တေ နာဂသေန, ‘နိယာမကဿ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ တီဏိ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, နိယာမကော ရတ္တိန္ဒိဝံ သတတံ သမိတံ အပ္ပမတ္တော ယတ္တပ္ပယတ္တော နာဝံ သာရေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန စိတ္တံ နိယာမယမာနေန ရတ္တိန္ဒိဝံ သတတံ သမိတံ အပ္ပမတ္တေန ယတ္တပ္ပယတ္တေန ယောနိသော မနသိကာရေန စိတ္တံ နိယာမေတဗ္ဗံ။ ဣဒံ, မဟာရာဇ, နိယာမကဿ ပဌမံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန ဓမ္မပဒေ –

‘‘‘အပ္ပမာဒရတာ ဟောထ၊ သစိတ္တမနုရက္ခထ။

ဒုဂ္ဂါ ဥဒ္ဓရထတ္တာနံ၊ ပင်္ကေ သန္နောဝ [သတ္တောဝ (သီ။ ဣ။)] ကုဉ္ဇရော’တိ။

‘‘ပုန စပရံ, မဟာရာဇ, နိယာမကဿ ယံ ကိဉ္စိ မဟာသမုဒ္ဒေ ကလျာဏံ ဝါ ပါပကံ ဝါ, သဗ္ဗံ တံ ဝိဒိတံ ဟောတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ကုသလာကုသလံ သာဝဇ္ဇာနဝဇ္ဇံ ဟီနပ္ပဏီတံ ကဏှသုက္ကသပ္ပဋိဘာဂံ ဝိဇာနိတဗ္ဗံ။ ဣဒံ, မဟာရာဇ, နိယာမကဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, နိယာမကော ယန္တေ မုဒ္ဒိကံ ဒေတိ ‘မာ ကောစိ ယန္တံ အာမသိတ္ထာ’တိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန စိတ္တေ သံဝရမုဒ္ဒိကာ ဒါတဗ္ဗာ ‘မာ ကိဉ္စိ ပါပကံ အကုသလဝိတက္ကံ ဝိတက္ကေသီ’တိ, ဣဒံ, မဟာရာဇ, နိယာမကဿ တတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန သံယုတ္တနိကာယဝရေ ‘မာ, ဘိက္ခဝေ, ပါပကေ အကုသလေ ဝိတက္ကေ ဝိတက္ကေယျာထ, သေယျထီဒံ, ကာမဝိတက္ကံ ဗျာပါဒဝိတက္ကံ ဝိဟိံသာဝိတက္က’’’န္တိ။

နိယာမကင်္ဂပဉ္ဟော အဋ္ဌမော။

၉။ ကမ္မကာရင်္ဂပဉ္ဟော

၉။ ‘‘ဘန္တေ နာဂသေန, ‘ကမ္မကာရဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ကမ္မကာရော ဧဝံ စိန္တယတိ ‘ဘတကော အဟံ ဣမာယ နာဝါယ ကမ္မံ ကရောမိ, ဣမာယာဟံ နာဝါယ ဝါဟသာ ဘတ္တဝေတနံ လဘာမိ, န မေ ပမာဒေါ ကရဏီယော, အပ္ပမာဒေန မေ အယံ နာဝါ ဝါဟေတဗ္ဗာ’တိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဧဝံ စိန္တယိတဗ္ဗံ ‘ဣမံ ခေါ အဟံ စာတုမဟာဘူတိကံ ကာယံ သမ္မသန္တော သတတံ သမိတံ အပ္ပမတ္တော ဥပဋ္ဌိတဿတိ သတော သမ္ပဇာနော သမာဟိတော ဧကဂ္ဂစိတ္တော ဇာတိဇရာဗျာဓိမရဏသောကပရိဒေဝဒုက္ခဒေါမနဿုပါယာသေဟိ ပရိမုစ္စိဿာမီတိ အပ္ပမာဒေါ မေ ကရဏီယော’တိ, ဣဒံ, မဟာရာဇ, ကမ္မကာရဿ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ –

‘‘‘ကာယံ ဣမံ သမ္မသထ၊ ပရိဇာနာထ ပုနပ္ပုနံ။

ကာယေ သဘာဝံ ဒိသွာန၊ ဒုက္ခဿန္တံ ကရိဿထာ’တိ။

ကမ္မကာရင်္ဂပဉ္ဟော နဝမော။

၁၀။ သမုဒ္ဒင်္ဂပဉ္ဟော

၁၀။ ‘‘ဘန္တေ နာဂသေန, ‘သမုဒ္ဒဿ ပဉ္စ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ပဉ္စ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, မဟာသမုဒ္ဒေါ မတေန ကုဏပေန သဒ္ဓိံ န သံဝသတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ရာဂဒေါသမောဟမာနဒိဋ္ဌိမက္ခပဠာသဣဿာမစ္ဆရိယမာယာသာဌေယျကုဋိလဝိသမဒုစ္စရိတကိလေသမလေဟိ သဒ္ဓိံ န သံဝသိတဗ္ဗံ။ ဣဒံ, မဟာရာဇ, သမုဒ္ဒဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, မဟာသမုဒ္ဒေါ မုတ္တာမဏိဝေဠုရိယသင်္ခသိလာပဝါဠဖလိကမဏိဝိဝိဓရတနနိစယံ ဓါရေန္တော ပိဒဟတိ, န ဗဟိ ဝိကိရတိ။ ဧဝမေဝ ခေါ, မဟာရာဇ, ယောဂိနာ ယောဂါဝစရေန မဂ္ဂဖလဈာနဝိမောက္ခသမာဓိသမာပတ္တိဝိပဿနာဘိညာဝိဝိဓဂုဏရတနာနိ အဓိဂန္တွာ ပိဒဟိတဗ္ဗာနိ, န ဗဟိ နီဟရိတဗ္ဗာနိ။ ဣဒံ, မဟာရာဇ, သမုဒ္ဒဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, မဟာသမုဒ္ဒေါ မဟန္တေဟိ မဟာဘူတေဟိ သဒ္ဓိံ သံဝသတိ။ ဧဝမေဝ ခေါ, မဟာရာဇ, ယောဂိနာ ယောဂါဝစရေန အပ္ပိစ္ဆံ သန္တုဋ္ဌံ ဓုတဝါဒံ သလ္လေခဝုတ္တိံ အာစာရသမ္ပန္နံ လဇ္ဇိံ ပေသလံ ဂရုံ ဘာဝနီယံ ဝတ္တာရံ ဝစနက္ခမံ စောဒကံ ပါပဂရဟိံ ဩဝါဒကံ အနုသာသကံ ဝိညာပကံ သန္ဒဿကံ သမာဒပကံ သမုတ္တေဇကံ သမ္ပဟံသကံ ကလျာဏမိတ္တံ သဗြဟ္မစာရိံ နိဿာယ ဝသိတဗ္ဗံ။ ဣဒံ, မဟာရာဇ, မဟာသမုဒ္ဒဿ တတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, မဟာသမုဒ္ဒေါ နဝသလိလသမ္ပုဏ္ဏာဟိ ဂင်္ဂါယမုနာအစိရဝတီသရဘူမဟီအာဒီဟိ နဒီသတသဟဿေဟိ အန္တလိက္ခေ သလိလဓါရာဟိ စ ပူရိတောပိ သကံ ဝေလံ နာတိဝတ္တတိ။ ဧဝမေဝ ခေါ, မဟာရာဇ, ယောဂိနာ ယောဂါဝစရေန လာဘသက္ကာရသိလောကဝန္ဒနမာနနပူဇနကာရဏာ ဇီဝိတဟေတုပိ သဉ္စိစ္စ သိက္ခာပဒဝီတိက္ကမော န ကရဏီယော။ ဣဒံ, မဟာရာဇ, မဟာသမုဒ္ဒဿ စတုတ္ထံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန –

‘သေယျထာပိ, မဟာရာဇ [ပဟာရာဓ (သီ။ ဣ။)], မဟာသမုဒ္ဒေါ ဌိတဓမ္မော ဝေလံ နာတိက္ကမတိ, ဧဝမေဝ ခေါ, မဟာရာဇ, ယံ မဟာ သာဝကာနံ သိက္ခာပဒံ ပညတ္တံ, တံ မမ သာဝကာ ဇီဝိတဟေတုပိ နာတိက္ကမန္တီ’တိ။

‘‘ပုန စပရံ, မဟာရာဇ, မဟာသမုဒ္ဒေါ သဗ္ဗသဝန္တီဟိ ဂင်္ဂါယမုနာအစိရဝတီသရဘူမဟီဟိ အန္တလိက္ခေ ဥဒကဓါရာဟိပိ န ပရိပူရတိ။ ဧဝမေဝ ခေါ, မဟာရာဇ, ယောဂိနာ ယောဂါဝစရေန ဥဒ္ဒေသပရိပုစ္ဆာသဝနဓါရဏဝိနိစ္ဆယအဘိဓမ္မဝိနယဂါဠှသုတ္တန္တဝိဂ္ဂဟပဒနိက္ခေပပဒသန္ဓိ ပဒဝိဘတ္တိနဝင်္ဂဇိနသာသနဝရံ သုဏန္တေနာပိ န တပ္ပိတဗ္ဗံ။ ဣဒံ, မဟာရာဇ, မဟာသမုဒ္ဒဿ ပဉ္စမံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန သုတသောမဇာတကေ –

‘‘‘အဂ္ဂိ ယထာ တိဏကဋ္ဌံ ဒဟန္တော၊ န တပ္ပတိ သာဂရော ဝါ နဒီဟိ။

ဧဝမ္ပိ စေ [ဧဝမ္ပိ ဝေ (သျာ။)၊ ဧဝံ ဟိ မေ (က။) ဇာ။ ၁ အသီတိနိပါတေ] ပဏ္ဍိတာ ရာဇသေဋ္ဌ၊ သုတွာ န တပ္ပန္တိ သုဘာသိတေနာ’’’တိ။

သမုဒ္ဒင်္ဂပဉ္ဟော ဒသမော။သမုဒ္ဒဝဂ္ဂေါ ဒုတိယော။

တဿုဒ္ဒါနံ –

လာဗုလတာ စ ပဒုမံ၊ ဗီဇံ သာလကလျာဏိကာ။

နာဝါ စ နာဝါလဂ္ဂနံ၊ ကူပေါ နိယာမကော တထာ။

ကမ္မကာရော သမုဒ္ဒေါ စ၊ ဝဂ္ဂေါ တေန ပဝုစ္စတီတိ။

၃။ ပထဝီဝဂ္ဂေါ

၁။ ပထဝီအင်္ဂပဉ္ဟော

၁။ ‘‘ဘန္တေ နာဂသေန, ‘ပထဝိယာ ပဉ္စ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ပဉ္စ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ပထဝီ ဣဋ္ဌာနိဋ္ဌာနိ ကပ္ပူရာဂရုတဂရစန္ဒနကုင္ကုမာဒီနိ အာကိရန္တေပိ ပိတ္တသေမှပုဗ္ဗရုဟိရသေဒမေဒခေဠသိင်္ဃာဏိကလသိက- မုတ္တကရီသာဒီနိ အာကိရန္တေပိ တာဒိသာ ယေဝ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဣဋ္ဌာနိဋ္ဌေ လာဘာလာဘေ ယသာယသေ နိန္ဒာပသံသာယ သုခဒုက္ခေ သဗ္ဗတ္ထ တာဒိနာ ယေဝ ဘဝိတဗ္ဗံ။ ဣဒံ, မဟာရာဇ, ပထဝိယာ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ပထဝီ မဏ္ဍနဝိဘူသနာပဂတာ သကဂန္ဓပရိဘာဝိတာ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဝိဘူသနာပဂတေန သကသီလဂန္ဓပရိဘာဝိတေန ဘဝိတဗ္ဗံ။ ဣဒံ, မဟာရာဇ, ပထဝိယာ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ပထဝီ နိရန္တရာ အခဏ္ဍစ္ဆိဒ္ဒါ အသုသိရာ ဗဟလာ ဃနာ ဝိတ္ထိဏ္ဏာ, ဧဝမေဝ ခေါ, မဟာရာဇ, ယောဂိနာ ယောဂါဝစရေန နိရန္တရမခဏ္ဍစ္ဆိဒ္ဒမသုသိရဗဟလဃနဝိတ္ထိဏ္ဏသီလေန ဘဝိတဗ္ဗံ။ ဣဒံ, မဟာရာဇ, ပထဝိယာ တတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ပထဝီ ဂါမနိဂမနဂရဇနပဒရုက္ခပဗ္ဗတနဒီတဠာကပေါက္ခရဏီမိဂပက္ခိမနုဇနရနာရိဂဏံ ဓါရေန္တီပိ အကိလာသု ဟောတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဩဝဒန္တေနပိ အနုသာသန္တေနပိ ဝိညာပေန္တေနပိ သန္ဒဿေန္တေနပိ သမာဒပေန္တေနပိ သမုတ္တေဇေန္တေနပိ သမ္ပဟံသေန္တေနပိ ဓမ္မဒေသနာသု အကိလာသုနာ ဘဝိတဗ္ဗံ။ ဣဒံ, မဟာရာဇ, ပထဝိယာ စတုတ္ထံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ပထဝီ အနုနယပ္ပဋိဃဝိပ္ပမုတ္တာ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အနုနယပ္ပဋိဃဝိပ္ပမုတ္တေန ပထဝိသမေန စေတသာ ဝိဟရိတဗ္ဗံ။ ဣဒံ, မဟာရာဇ, ပထဝိယာ ပဉ္စမံ အင်္ဂံ ဂဟေတဗ္ဗံ။ ဘာသိတမ္ပေတံ , မဟာရာဇ, ဥပါသိကာယ စူဠသုဘဒ္ဒါယ သကသမဏေ ပရိကိတ္တယမာနာယ –

‘‘‘ဧကဉ္စေ ဗာဟံ ဝါသိယာ၊ တစ္ဆေ ကုပိတမာနသာ [ကုပိတမာနသော (က။)]။

ဧကဉ္စေဗာဟံ ဂန္ဓေန၊ အာလိမ္ပေယျ ပမောဒိတာ [ပမောဒိတော (က။)]။

‘‘‘အမုသ္မိံ ပဋိဃော နတ္ထိ၊ ရာဂေါ အသ္မိံ န ဝိဇ္ဇတိ။

ပထဝီသမစိတ္တာ တေ၊ တာဒိသာ သမဏာ မမာ’’’တိ။

ပထဝီအင်္ဂပဉ္ဟော ပဌမော။

၂။ အာပင်္ဂပဉ္ဟော

၂။ ‘‘ဘန္တေ နာဂသေန, ‘အာပဿ ပဉ္စ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ပဉ္စ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, အာပေါ သုသဏ္ဌိတမကမ္ပိတမလုဠိတသဘာဝပရိသုဒ္ဓေါ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ကုဟနလပနနေမိတ္တကနိပ္ပေသိကတံ အပနေတွာ သုသဏ္ဌိတမကမ္ပိတမလုဠိတသဘာဝပရိသုဒ္ဓါစာရေန ဘဝိတဗ္ဗံ။ ဣဒံ, မဟာရာဇ, အာပဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, အာပေါ သီတလသဘာဝသဏ္ဌိတော, ဧဝမေဝ ခေါ, မဟာရာဇ, ယောဂိနာ ယောဂါဝစရေန သဗ္ဗသတ္တေသု ခန္တိမေတ္တာနုဒ္ဒယသမ္ပန္နေန ဟိတေသိနာ အနုကမ္ပကေန ဘဝိတဗ္ဗံ။ ဣဒံ, မဟာရာဇ, အာပဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, အာပေါ အသုစိံ သုစိံ ကရောတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဂါမေ ဝါ အရညေ ဝါ ဥပဇ္ဈာယေ ဥပဇ္ဈာယမတ္တေသု အာစရိယေ အာစရိယမတ္တေသု သဗ္ဗတ္ထ အနဓိကရဏေန ဘဝိတဗ္ဗံ အနဝသေသကာရိနာ။ ဣဒံ, မဟာရာဇ, အာပဿ တတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, အာပေါ ဗဟုဇနပတ္ထိတော, ဧဝမေဝ ခေါ, မဟာရာဇ, ယောဂိနာ ယောဂါဝစရေန အပ္ပိစ္ဆသန္တုဋ္ဌပဝိဝိတ္တပဋိသလ္လာနေန သတတံ သဗ္ဗလောကမဘိပတ္ထိတေန ဘဝိတဗ္ဗံ။ ဣဒံ, မဟာရာဇ, အာပဿ စတုတ္ထံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, အာပေါ န ကဿစိ အဟိတမုပဒဟတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ပရဘဏ္ဍနကလဟဝိဂ္ဂဟဝိဝါဒရိတ္တဇ္ဈာနအရတိဇနနံ ကာယဝစီစိတ္တေဟိ ပါပကံ န ကရဏီယံ။ ဣဒံ, မဟာရာဇ, အာပဿ ပဉ္စမံ အင်္ဂံ ဂဟေတဗ္ဗံ။ ဘာသိတမ္ပေတံ မဟာရာဇ, ဘဂဝတာ, ဒေဝါတိဒေဝေန ကဏှဇာတကေ –

‘‘‘ဝရဉ္စေ မေ အဒေါ သက္က၊ သဗ္ဗဘူတာနမိဿရ။

န မနော ဝါ သရီရံ ဝါ၊ မံ-ကတေ သက္က ကဿစိ။

ကဒါစိ ဥပဟညေထ၊ ဧတံ သက္က ဝရံ ဝရေ’’’တိ။

အာပင်္ဂပဉ္ဟော ဒုတိယော။

၃။ တေဇင်္ဂပဉ္ဟော

၃။ ‘‘ဘန္တေ နာဂသေန, ‘တေဇဿ ပဉ္စ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ပဉ္စ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, တေဇော တိဏကဋ္ဌသာခါပလာသံ ဍဟတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ယေ တေ အဗ္ဘန္တရာ ဝါ ဗာဟိရာ ဝါ ကိလေသာ ဣဋ္ဌာနိဋ္ဌာရမ္မဏာနုဘဝနာ, သဗ္ဗေ တေ ဉာဏဂ္ဂိနာ ဍဟိတဗ္ဗာ။ ဣဒံ, မဟာရာဇ, တေဇဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, တေဇော နိဒ္ဒယော အကာရုဏိကော, ဧဝမေဝ ခေါ, မဟာရာဇ, ယောဂိနာ ယောဂါဝစရေန သဗ္ဗကိလေသေသု ကာရုညာနုဒ္ဒယာ န ကာတဗ္ဗာ။ ဣဒံ, မဟာရာဇ, တေဇဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, တေဇော သီတံ ပဋိဟနတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဝီရိယသန္တာပတေဇံ အဘိဇနေတွာ ကိလေသာ ပဋိဟန္တဗ္ဗာ။ ဣဒံ, မဟာရာဇ, တေဇဿ တတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, တေဇော အနုနယပ္ပဋိဃဝိပ္ပမုတ္တော ဥဏှမဘိဇနေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အနုနယပ္ပဋိဃဝိပ္ပမုတ္တေန တေဇောသမေန စေတသာ ဝိဟရိတဗ္ဗံ။ ဣဒံ, မဟာရာဇ, တေဇဿ စတုတ္ထံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, တေဇော အန္ဓကာရံ ဝိဓမိတွာ [ဝိဓမတိ (သီ။ ဣ။ က။)] အာလောကံ ဒဿယတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အဝိဇ္ဇန္ဓကာရံ ဝိဓမိတွာ ဉာဏာလောကံ ဒဿယိတဗ္ဗံ။ ဣဒံ, မဟာရာဇ, တေဇဿ ပဉ္စမံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန သကံ ပုတ္တံ ရာဟုလံ ဩဝဒန္တေန –

‘တေဇောသမံ [မ။ နိ။ ၂။၁၁၉], ရာဟုလ, ဘာဝနံ ဘာဝေဟိ, တေဇောသမံ ဟိ တေ, ရာဟုလ, ဘာဝနံ ဘာဝယတော ဥပ္ပန္နာ? မနာပါမနာပါ ဖဿာ စိတ္တံ န ပရိယာဒါယ ဌဿန္တီ’’’တိ။

တေဇင်္ဂပဉ္ဟော တတိယော။

၄။ ဝါယုင်္ဂပဉ္ဟော

၄။ ‘‘ဘန္တေ နာဂသေန, ‘ဝါယုဿ ပဉ္စ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ပဉ္စ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဝါယု သုပုပ္ဖိတဝနသဏ္ဍန္တရံ အဘိဝါယတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဝိမုတ္တိဝရကုသုမပုပ္ဖိတာရမ္မဏဝနန္တရေ ရမိတဗ္ဗံ။ ဣဒံ, မဟာရာဇ, ဝါယုဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဝါယု ဓရဏီရုဟပါဒပဂဏေ မထယတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဝနန္တရဂတေန သင်္ခါရေ ဝိစိနန္တေန ကိလေသာ မထယိတဗ္ဗာ။ ဣဒံ, မဟာရာဇ, ဝါယုဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဝါယု အာကာသေ စရတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန လောကုတ္တရဓမ္မေသု မာနသံ သဉ္စာရယိတဗ္ဗံ။ ဣဒံ, မဟာရာဇ, ဝါယုဿ တတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဝါယု ဂန္ဓံ အနုဘဝတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အတ္တနော သီလဝရသုရဘိဂန္ဓော [သီလသုရဘိဂန္ဒော (သီ။ ဣ။)] အနုဘဝိတဗ္ဗော။ ဣဒံ, မဟာရာဇ, ဝါယုဿ စတုတ္ထံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဝါယု နိရာလယော အနိကေတဝါသီ, ဧဝမေဝ ခေါ, မဟာရာဇ, ယောဂိနာ ယောဂါဝစရေန နိရာလယမနိကေတမသန္ထဝေန သဗ္ဗတ္ထ ဝိမုတ္တေန ဘဝိတဗ္ဗံ။ ဣဒံ, မဟာရာဇ, ဝါယုဿ ပဉ္စမံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန သုတ္တနိပါတေ –

‘‘‘သန္ထဝါတော ဘယံ ဇာတံ၊ နိကေတာ ဇာယတေ ရဇော။

အနိကေတမသန္ထဝံ၊ ဧတံ ဝေ မုနိဒဿန’’’န္တိ။

ဝါယုင်္ဂပဉ္ဟော စတုတ္ထော။

၅။ ပဗ္ဗတင်္ဂပဉ္ဟော

၅။ ‘‘ဘန္တေ နာဂသေန, ‘ပဗ္ဗတဿ ပဉ္စ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ပဉ္စ အင်္ဂါနိ ဂဟေတဗ္ဗာနီ’’တိ ? ‘‘ယထာ, မဟာရာဇ, ပဗ္ဗတော အစလော အကမ္ပိတော [အကမ္ပိယော (သီ။ ဣ။)] အသမ္ပဝေဓီ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သမ္မာနနေ ဝိမာနနေ သက္ကာရေ အသက္ကာရေ ဂရုကာရေ အဂရုကာရေ ယသေ အယသေ နိန္ဒာယ ပသံသာယ သုခေ ဒုက္ခေ ဣဋ္ဌာနိဋ္ဌေသု သဗ္ဗတ္ထ ရူပသဒ္ဒဂန္ဓရသဖောဋ္ဌဗ္ဗဓမ္မေသု ရဇနီယေသု န ရဇ္ဇိတဗ္ဗံ, ဒုဿနီယေသု န ဒုဿိတဗ္ဗံ, မုယှနီယေသု န မုယှိတဗ္ဗံ, န ကမ္ပိတဗ္ဗံ န စလိတဗ္ဗံ, ပဗ္ဗတေန ဝိယ အစလေန ဘဝိတဗ္ဗံ။ ဣဒံ, မဟာရာဇ, ပဗ္ဗတဿ ပဌမံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန –

‘‘‘သေလော ယထာ ဧကဃနော [ဧကဂ္ဃနော (က။) ဓ။ ပ။ ၈၁ ဓမ္မပဒေ]၊ ဝါတေန န သမီရတိ။

ဧဝံ နိန္ဒာပသံသာသု၊ န သမိဉ္ဇန္တိ ပဏ္ဍိတာ’တိ။

‘‘ပုန စပရံ, မဟာရာဇ, ပဗ္ဗတော ထဒ္ဓေါ န ကေနစိ သံသဋ္ဌော, ဧဝမေဝ ခေါ, မဟာရာဇ, ယောဂိနာ ယောဂါဝစရေန ထဒ္ဓေန အသံသဋ္ဌေန ဘဝိတဗ္ဗံ, န ကေနစိ သံသဂ္ဂေါ ကရဏီယော။ ဣဒံ, မဟာရာဇ, ပဗ္ဗတဿ ဒုတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန –

‘‘‘အသံသဋ္ဌံ ဂဟဋ္ဌေဟိ၊ အနာဂါရေဟိ စူဘယံ။

အနောကသာရိမပ္ပိစ္ဆံ၊ တမဟံ ဗြူမိ ဗြာဟ္မဏ’န္တိ။

‘‘ပုန စပရံ, မဟာရာဇ, ပဗ္ဗတေ ဗီဇံ န ဝိရူဟတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သကမာနသေ ကိလေသာ န ဝိရူဟာပေတဗ္ဗာ။ ဣဒံ, မဟာရာဇ, ပဗ္ဗတဿ တတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သုဘူတိနာ –

‘‘‘ရာဂူပသံဟိတံ စိတ္တံ၊ ယဒါ ဥပ္ပဇ္ဇတေ မမ။

သယံဝ ပစ္စဝေက္ခာမိ [ပစ္စဝေက္ခိတွာ (သဗ္ဗတ္ထ)]၊ ဧကဂ္ဂေါ [ဧကကော (သဗ္ဗတ္ထ)] တံ ဒမေမဟံ။

‘‘‘ရဇ္ဇသေ [ရဇ္ဇသိ (သီ။)၊ ရဉ္ဇသိ (ဣ။)] ရဇနီယေ စ၊ ဒုဿနီယေ စ ဒုဿသေ။

မုယှသေ [မုယှသိ (သီ။)] မောဟနီယေ စ၊ နိက္ခမဿု ဝနာ တုဝံ။

‘‘‘ဝိသုဒ္ဓါနံ အယံ ဝါသော၊ နိမ္မလာနံ တပဿိနံ။

မာ ခေါ ဝိသုဒ္ဓံ ဒူသေသိ၊ နိက္ခမဿု ဝနာ တုဝ’န္တိ။

‘‘ပုန စပရံ, မဟာရာဇ, ပဗ္ဗတော အစ္စုဂ္ဂတော, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဉာဏစ္စုဂ္ဂတေန ဘဝိတဗ္ဗံ။ ဣဒံ, မဟာရာဇ, ပဗ္ဗတဿ စတုတ္ထံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန –

‘‘‘ပမာဒံ အပ္ပမာဒေန၊ ယဒါ နုဒတိ ပဏ္ဍိတော။

ပညာပါသာဒမာရုယှ၊ အသောကော သောကိနိံ ပဇံ။

ပဗ္ဗတဋ္ဌောဝ ဘူမဋ္ဌေ [ဘုမ္မဋ္ဌေ (သီ။ ဣ။)]၊ ဓီရော ဗာလေ အဝေက္ခတီ’တိ။

‘‘ပုန စပရံ, မဟာရာဇ, ပဗ္ဗတော အနုန္နတော အနောနတော, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဥန္နတာဝနတိ န ကရဏီယာ။ ဣဒံ, မဟာရာဇ, ပဗ္ဗတဿ ပဉ္စမံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဥပါသိကာယ စူဠသုဘဒ္ဒါယ သကသမဏေ ပရိကိတ္တယမာနာယ –

‘‘‘လာဘေန ဥန္နတော လောကော၊ အလာဘေန စ ဩနတော။

လာဘာလာဘေန ဧကတ္ထာ [ဧကဋ္ဌာ (သီ။ ဣ။)]၊ တာဒိသာ သမဏာ မမာ’’’တိ။

ပဗ္ဗတင်္ဂပဉ္ဟော ပဉ္စမော။

၆။ အာကာသင်္ဂပဉ္ဟော

၆။ ‘‘ဘန္တေ နာဂသေန, ‘အာကာသဿ ပဉ္စ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ပဉ္စ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, အာကာသော သဗ္ဗသော အဂယှော, ဧဝမေဝ ခေါ, မဟာရာဇ, ယောဂိနာ ယောဂါဝစရေန သဗ္ဗသော ကိလေသေဟိ အဂယ္ဟေန ဘဝိတဗ္ဗံ။ ဣဒံ, မဟာရာဇ, အာကာသဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, အာကာသော ဣသိတာပသဘူတဒိဇဂဏာနုသဉ္စရိတော, ဧဝမေဝ ခေါ, မဟာရာဇ, ယောဂိနာ ယောဂါဝစရေန ‘အနိစ္စံ ဒုက္ခံ အနတ္တာ’တိ သင်္ခါရေသု မာနသံ သဉ္စာရယိတဗ္ဗံ။ ဣဒံ, မဟာရာဇ, အာကာသဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, အာကာသော သန္တာသနီယော, ဧဝမေဝ ခေါ, မဟာရာဇ , ယောဂိနာ ယောဂါဝစရေန သဗ္ဗဘဝပဋိသန္ဓီသု မာနသံ ဥဗ္ဗေဇယိတဗ္ဗံ, အဿာဒေါ န ကာတဗ္ဗော။ ဣဒံ, မဟာရာဇ, အာကာသဿ တတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, အာကာသော အနန္တော အပ္ပမာဏော အပရိမေယျော, ဧဝမေဝ ခေါ, မဟာရာဇ, ယောဂိနာ ယောဂါဝစရေန အနန္တသီလေန အပရိမိတဉာဏေန ဘဝိတဗ္ဗံ။ ဣဒံ, မဟာရာဇ, အာကာသဿ စတုတ္ထံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, အာကာသော အလဂ္ဂေါ အသတ္တော အပ္ပတိဋ္ဌိတော အပလိဗုဒ္ဓေါ, ဧဝမေဝ ခေါ , မဟာရာဇ, ယောဂိနာ ယောဂါဝစရေန ကုလေ ဂဏေ လာဘေ အာဝါသေ ပလိဗောဓေ ပစ္စယေ သဗ္ဗကိလေသေသု စ သဗ္ဗတ္ထ အလဂ္ဂေန ဘဝိတဗ္ဗံ, အနာသတ္တေန အပ္ပတိဋ္ဌိတေန အပလိဗုဒ္ဓေန ဘဝိတဗ္ဗံ။ ဣဒံ, မဟာရာဇ, အာကာသဿ ပဉ္စမံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန သကံ ပုတ္တံ ရာဟုလံ ဩဝဒန္တေန – ‘သေယျထာပိ, ရာဟုလ [မ။ နိ။ ၂။၁၁၉], အာကာသော န ကတ္ထစိ ပတိဋ္ဌိတော, ဧဝမေဝ ခေါ တွံ, ရာဟုလ, အာကာသသမံ ဘာဝနံ ဘာဝေဟိ, အာကာသသမံ ဟိ တေ, ရာဟုလ, ဘာဝနံ ဘာဝယတော ဥပ္ပန္နာ မနာပါမနာပါ ဖဿာ စိတ္တံ ပရိယာဒါယ ဌဿန္တီ’’’တိ။

အာကာသင်္ဂပဉ္ဟော ဆဋ္ဌော။

၇။ စန္ဒင်္ဂပဉ္ဟော

၇။ ‘‘ဘန္တေ နာဂသေန, ‘စန္ဒဿ ပဉ္စ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ပဉ္စ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, စန္ဒော သုက္ကပက္ခေ ဥဒယန္တော ဥတ္တရုတ္တရိံ ဝဍ္ဎတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အာစာရသီလဂုဏဝတ္တပ္ပဋိပတ္တိယာ အာဂမာဓိဂမေ ပဋိသလ္လာနေ သတိပဋ္ဌာနေ ဣန္ဒ္ရိယေသု ဂုတ္တဒွါရတာယ ဘောဇနေ မတ္တညုတာယ ဇာဂရိယာနုယောဂေ ဥတ္တရုတ္တရိံ ဝဍ္ဎိတဗ္ဗံ။ ဣဒံ, မဟာရာဇ, စန္ဒဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, စန္ဒော ဥဠာရာဓိပတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဥဠာရေန ဆန္ဒာဓိပတိနာ ဘဝိတဗ္ဗံ။ ဣဒံ, မဟာရာဇ, စန္ဒဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, စန္ဒော နိသာယ စရတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ပဝိဝိတ္တေန ဘဝိတဗ္ဗံ။ ဣဒံ, မဟာရာဇ, စန္ဒဿ တတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, စန္ဒော ဝိမာနကေတု, ဧဝမေဝ ခေါ, မဟာရာဇ, ယောဂိနာ ယောဂါဝစရေန သီလကေတုနာ ဘဝိတဗ္ဗံ။ ဣဒံ, မဟာရာဇ, စန္ဒဿ စတုတ္ထံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, စန္ဒော အာယာစိတပတ္ထိတော ဥဒေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အာယာစိတပတ္ထိတေန ကုလာနိ ဥပသင်္ကမိတဗ္ဗာနိ။ ဣဒံ, မဟာရာဇ, စန္ဒဿ ပဉ္စမံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန သံယုတ္တနိကာယဝရေ ‘စန္ဒူပမာ, ဘိက္ခဝေ, ကုလာနိ ဥပသင်္ကမထ, အပကဿေဝ ကာယံ အပကဿ စိတ္တံ နိစ္စနဝကာ ကုလေသု အပ္ပဂဗ္ဘာ’’’တိ [အပ္ပဂဗ္ဗာတိ (က။) သံ။ နိ။ ၂။၁၄၆]။

စန္ဒင်္ဂပဉ္ဟော သတ္တမော။

၈။ သူရိယင်္ဂပဉ္ဟော

၈။ ‘‘ဘန္တေ နာဂသေန, ‘သူရိယဿ [သုရိယဿ (သီ။ သျာ။ ဣ။)] သတ္တ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ သတ္တ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, သူရိယော သဗ္ဗံ ဥဒကံ ပရိသောသေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သဗ္ဗကိလေသာ အနဝသေသံ ပရိသောသေတဗ္ဗာ။ ဣဒံ, မဟာရာဇ, သူရိယဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, သူရိယော တမန္ဓကာရံ ဝိဓမတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သဗ္ဗံ ရာဂတမံ ဒေါသတမံ မောဟတမံ မာနတမံ ဒိဋ္ဌိတမံ ကိလေသတမံ သဗ္ဗံ ဒုစ္စရိတတမံ ဝိဓမယိတဗ္ဗံ။ ဣဒံ, မဟာရာဇ, သူရိယဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, သူရိယော အဘိက္ခဏံ စရတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အဘိက္ခဏံ ယောနိသော မနသိကာရော ကာတဗ္ဗော။ ဣဒံ, မဟာရာဇ, သူရိယဿ တတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, သူရိယော ရံသိမာလီ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အာရမ္မဏမာလိနာ ဘဝိတဗ္ဗံ။ ဣဒံ, မဟာရာဇ, သူရိယဿ စတုတ္ထံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, သူရိယော မဟာဇနကာယံ သန္တာပေန္တော စရတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အာစာရသီလဂုဏဝတ္တပ္ပဋိပတ္တိယာ ဈာနဝိမောက္ခသမာဓိသမာပတ္တိဣန္ဒ္ရိယဗလဗောဇ္ဈင်္ဂသတိပဋ္ဌာနသမ္မပ္ပဓါနဣဒ္ဓိပါဒေဟိ သဒေဝကော လောကော သန္တာပယိတဗ္ဗော။ ဣဒံ, မဟာရာဇ, သူရိယဿ ပဉ္စမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, သူရိယော ရာဟုဘယာ ဘီတော စရတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဒုစ္စရိတဒုဂ္ဂတိဝိသမကန္တာရဝိပါကဝိနိပါတကိလေသဇာလဇဋိတေ ဒိဋ္ဌိသံဃာဋပဋိမုက္ကေ ကုပထပက္ခန္ဒေ ကုမ္မဂ္ဂပဋိပန္နေ [ကုမဂ္ဂပဋိပန္နေ (သျာ။ က။)] သတ္တေ ဒိသွာ မဟတာ သံဝေဂဘယေန မာနသံ သံဝေဇေတဗ္ဗံ။ ဣဒံ, မဟာရာဇ, သူရိယဿ ဆဋ္ဌံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, သူရိယော ကလျာဏပါပကေ ဒဿေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဣန္ဒ္ရိယဗလဗောဇ္ဈင်္ဂသတိပဋ္ဌာနသမ္မပ္ပဓါနဣဒ္ဓိပါဒလောကိယလောကုတ္တရဓမ္မာ ဒဿေတဗ္ဗာ။ ဣဒံ, မဟာရာဇ, သူရိယဿ သတ္တမံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန ဝင်္ဂီသေန –

‘‘‘ယထာပိ သူရိယော ဥဒယန္တော၊ ရူပံ ဒဿေတိ ပါဏိနံ။

သုစိဉ္စ အသုစိဉ္စာပိ၊ ကလျာဏဉ္စာပိ ပါပကံ။

‘‘‘တထာ ဘိက္ခု ဓမ္မဓရော၊ အဝိဇ္ဇာပိဟိတံ ဇနံ။

ပထံ ဒဿေတိ ဝိဝိဓံ၊ အာဒိစ္စောဝုဒယံ ယထာ’’’တိ။

သူရိယင်္ဂပဉ္ဟော အဋ္ဌမော။

၉။ သက္ကင်္ဂပဉ္ဟော

၉။ ‘‘ဘန္တေ နာဂသေန, ‘သက္ကဿ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ တီဏိ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, သက္ကော ဧကန္တသုခသမပ္ပိတော, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဧကန္တပဝိဝေကသုခါဘိရတေန ဘဝိတဗ္ဗံ။ ဣဒံ, မဟာရာဇ, သက္ကဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, သက္ကော ဒေဝေ ဒိသွာ ပဂ္ဂဏှာတိ, ဟာသမဘိဇနေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ကုသလေသု ဓမ္မေသု အလီနမတန္ဒိတံ သန္တံ မာနသံ ပဂ္ဂဟေတဗ္ဗံ, ဟာသမဘိဇနေတဗ္ဗံ, ဥဋ္ဌဟိတဗ္ဗံ ဃဋိတဗ္ဗံ ဝါယမိတဗ္ဗံ ။ ဣဒံ, မဟာရာဇ, သက္ကဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, သက္ကဿ အနဘိရတိ နုပ္ပဇ္ဇတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သုညာဂါရေ အနဘိရတိ န ဥပ္ပါဒေတဗ္ဗာ။ ဣဒံ, မဟာရာဇ, သက္ကဿ တတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သုဘူတိနာ –

‘‘‘သာသနေ တေ မဟာဝီရ၊ ယတော ပဗ္ဗဇိတော အဟံ။

နာဘိဇာနာမိ ဥပ္ပန္နံ၊ မာနသံ ကာမသံဟိတ’’’န္တိ။

သက္ကင်္ဂပဉ္ဟော နဝမော။

၁၀။ စက္ကဝတ္တိင်္ဂပဉ္ဟော

၁၀။ ‘‘ဘန္တေ နာဂသေန, ‘စက္ကဝတ္တိဿ စတ္တာရိ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ စတ္တာရိ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ , စက္ကဝတ္တီ စတူဟိ သင်္ဂဟဝတ္ထူဟိ ဇနံ သင်္ဂဏှာတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန စတဿန္နံ ပရိသာနံ မာနသံ သင်္ဂဟေတဗ္ဗံ အနုဂ္ဂဟေတဗ္ဗံ သမ္ပဟံသေတဗ္ဗံ။ ဣဒံ, မဟာရာဇ, စက္ကဝတ္တိဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, စက္ကဝတ္တိဿ ဝိဇိတေ စောရာ န ဥဋ္ဌဟန္တိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ကာမရာဂဗျာပါဒဝိဟိံသာဝိတက္ကာ န ဥပ္ပါဒေတဗ္ဗာ။ ဣဒံ, မဟာရာဇ, စက္ကဝတ္တိဿ ဒုတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန –

‘‘‘ဝိတက္ကူပသမေ စ ယော ရတော၊ အသုဘံ ဘာဝယတေ [ဘာဝယတီ (သျာ။) ဓ။ ပ။ ၃၅၀ ဓမ္မပဒေ] သဒါ သတော။

ဧသ ခေါ ဗျန္တိကာဟိတိ၊ ဧသ ဆေစ္ဆတိ မာရဗန္ဓန’န္တိ။

‘‘ပုန စပရံ, မဟာရာဇ, စက္ကဝတ္တီ ဒိဝသေ ဒိဝသေ သမုဒ္ဒပရိယန္တံ မဟာပထဝိံ အနုယာယတိ ကလျာဏပါပကာနိ ဝိစိနမာနော, ဧဝမေဝ ခေါ, မဟာရာဇ, ယောဂိနာ ယောဂါဝစရေန ကာယကမ္မံ ဝစီကမ္မံ မနောကမ္မံ ဒိဝသေ ဒိဝသေ ပစ္စဝေက္ခိတဗ္ဗံ ‘ကိံ နု ခေါ မေ ဣမေဟိ တီဟိ ဌာနေဟိ အနုပဝဇ္ဇဿ ဒိဝသော ဝီတိဝတ္တတီ’တိ။ ဣဒံ, မဟာရာဇ, စက္ကဝတ္တိဿ တတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန အင်္ဂုတ္တရနိကာယဝရေ –

‘ကထမ္ဘူတဿ မေ ရတ္တိန္ဒိဝါ ဝီတိဝတ္တန္တီတိ [ဝီတိပတန္တီတိ (သီ။ ဣ။)] ပဗ္ဗဇိတေန အဘိဏှံ ပစ္စဝေက္ခိတဗ္ဗ’န္တိ။

‘‘ပုန စပရံ, မဟာရာဇ, စက္ကဝတ္တိဿ အဗ္ဘန္တရဗာဟိရာရက္ခာ သုသံဝိဟိတာ ဟောတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အဗ္ဘန္တရာနံ ဗာဟိရာနံ ကိလေသာနံ အာရက္ခာယ သတိဒေါဝါရိကော ဌပေတဗ္ဗော။ ဣဒံ , မဟာရာဇ, စက္ကဝတ္တိဿ စတုတ္ထံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန –

‘သတိဒေါဝါရိကော, ဘိက္ခဝေ, အရိယသာဝကော အကုသလံ ပဇဟတိ ကုသလံ ဘာဝေတိ, သာဝဇ္ဇံ ပဇဟတိ, အနဝဇ္ဇံ ဘာဝေတိ, သုဒ္ဓမတ္တာနံ ပရိဟရတီ’’’တိ။

စက္ကဝတ္တိင်္ဂပဉ္ဟော ဒသမော။

ပထဝီဝဂ္ဂေါ တတိယော။

တဿုဒ္ဒါနံ –

ပထဝီ အာပေါ စ တေဇော စ၊ ဝါယော စ ပဗ္ဗတေန စ။

အာကာသော စန္ဒသူရိယော စ၊ သက္ကော စ စက္ကဝတ္တိနာတိ။

၄။ ဥပစိကာဝဂ္ဂေါ

၁။ ဥပစိကင်္ဂပဉ္ဟော

၁။ ‘‘ဘန္တေ နာဂသေန, ‘ဥပစိကာယ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ဥပစိကာ ဥပရိ ဆဒနံ ကတွာ အတ္တာနံ ပိဒဟိတွာ ဂေါစရာယ စရတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သီလသံဝရဆဒနံ ကတွာ မာနသံ ပိဒဟိတွာ ပိဏ္ဍာယ စရိတဗ္ဗံ, သီလသံဝရဆဒနေန ခေါ, မဟာရာဇ, ယောဂီ ယောဂါဝစရော သဗ္ဗဘယသမတိက္ကန္တော ဟောတိ။ ဣဒံ, မဟာရာဇ, ဥပစိကာယ ဧကံ အင်္ဂံ ဂဟေတဗ္ဗံ, ဘာသိတမ္ပေတံ, မဟာရာဇ, ထေရေန ဥပသေနေန ဝင်္ဂန္တပုတ္တေန –

‘‘‘သီလသံဝရဆဒနံ၊ ယောဂီ ကတွာန မာနသံ။

အနုပလိတ္တော လောကေန၊ ဘယာ စ ပရိမုစ္စတီ’’’တိ။

ဥပစိကင်္ဂပဉ္ဟော ပဌမော။

၂။ ဗိဠာရင်္ဂပဉ္ဟော

၂။ ‘‘ဘန္တေ နာဂသေန, ‘ဗိဠာရဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဗိဠာရော ဂုဟာဂတောပိ သုသိရဂတောပိ ဟမ္မိယန္တရဂတောပိ ဥန္ဒူရံ ယေဝ ပရိယေသတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဂါမဂတေနာပိ အရညဂတေနာပိ ရုက္ခမူလဂတေနာပိ သုညာဂါရဂတေနာပိ သတတံ သမိတံ အပ္ပမတ္တေန ကာယဂတာသတိဘောဇနံ ယေဝ ပရိယေသိတဗ္ဗံ။ ဣဒံ, မဟာရာဇ, ဗိဠာရဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဗိဠာရော အာသန္နေ ယေဝ ဂေါစရံ ပရိယေသတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဣမေသု ယေဝ ပဉ္စသု ဥပါဒါနက္ခန္ဓေသု ဥဒယဗ္ဗယာနုပဿိနာ ဝိဟရိတဗ္ဗံ ‘ဣတိ ရူပံ ဣတိ ရူပဿ သမုဒယော ဣတိ ရူပဿ အတ္ထင်္ဂမော, ဣတိ ဝေဒနာ ဣတိ ဝေဒနာယ သမုဒယော ဣတိ ဝေဒနာယ အတ္ထင်္ဂမော, ဣတိ သညာ ဣတိ သညာယ သမုဒယော ဣတိ သညာယ အတ္ထင်္ဂမော, ဣတိ သင်္ခါရာ ဣတိ သင်္ခါရာနံ သမုဒယော ဣတိ သင်္ခါရာနံ အတ္ထင်္ဂမော, ဣတိ ဝိညာဏံ ဣတိ ဝိညာဏဿ သမုဒယော ဣတိ ဝိညာဏဿ အတ္ထင်္ဂမော’တိ။ ဣဒံ, မဟာရာဇ, ဗိဠာရဿ ဒုတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန –

‘‘‘န ဣတော ဒူရေ ဘဝိတဗ္ဗံ၊ ဘဝဂ္ဂံ ကိံ ကရိဿတိ။

ပစ္စုပ္ပန္နမှိ ဝေါဟာရေ၊ သကေ ကာယမှိ ဝိန္ဒထာ’’’တိ။

ဗိဠာရင်္ဂပဉ္ဟော ဒုတိယော။

၃။ ဥန္ဒူရင်္ဂပဉ္ဟော

၃။ ‘‘ဘန္တေ နာဂသေန, ‘ဥန္ဒူရဿ [ဥန္ဒုရဿ (သျာ။ က။)] ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ဥန္ဒူရော ဣတောစိတော စ ဝိစရန္တော အာဟာရူပါသီသကော ယေဝ စရတိ, ဧဝမေဝ ခေါ, မဟာရာဇ , ယောဂိနာ ယောဂါဝစရေန ဣတောစိတော စ ဝိစရန္တေန ယောနိသော မနသိကာရူပါသီသကေနေဝ ဘဝိတဗ္ဗံ။ ဣဒံ, မဟာရာဇ, ဥန္ဒူရဿ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန ဥပသေနေန ဝင်္ဂန္တပုတ္တေန –

‘‘‘ဓမ္မာသီသံ [ဓမ္မသီသံ (သီ။ ဣ။)] ကရိတွာန၊ ဝိဟရန္တော ဝိပဿကော။

အနောလီနော ဝိဟရတိ၊ ဥပသန္တော သဒါ သတော’’’တိ။

ဥန္ဒူရင်္ဂပဉ္ဟော တတိယော။

၄။ ဝိစ္ဆိကင်္ဂပဉ္ဟော

၄။ ‘‘ဘန္တေ နာဂသေန, ‘ဝိစ္ဆိကဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ဝိစ္ဆိကော နင်္ဂုလာဝုဓေါ နင်္ဂုလံ ဥဿာပေတွာ စရတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဉာဏာဝုဓေန ဘဝိတဗ္ဗံ, ဉာဏံ ဥဿာပေတွာ ဝိဟရိတဗ္ဗံ ။ ဣဒံ, မဟာရာဇ, ဝိစ္ဆိကဿ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန ဥပသေနေန ဝင်္ဂန္တပုတ္တေန –

‘‘‘ဉာဏခဂ္ဂံ ဂဟေတွာန၊ ဝိဟရန္တော ဝိပဿကော။

ပရိမုစ္စတိ သဗ္ဗဘယာ၊ ဒုပ္ပသဟော စ သော ဘဝေ’’’တိ။

ဝိစ္ဆိကင်္ဂပဉ္ဟော စတုတ္ထော။

၅။ နကုလင်္ဂပဉ္ဟော

၅။ ‘‘ဘန္တေ နာဂသေန, ‘နကုလဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, နကုလော ဥရဂမုပဂစ္ဆန္တော ဘေသဇ္ဇေန ကာယံ ပရိဘာဝေတွာ ဥရဂမုပဂစ္ဆတိ ဂဟေတုံ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ကောဓါဃာတဗဟုလံ ကလဟဝိဂ္ဂဟဝိဝါဒဝိရောဓါဘိဘူတံ လောကမုပဂစ္ဆန္တေန မေတ္တာဘေသဇ္ဇေန မာနသံ အနုလိမ္ပိတဗ္ဗံ။ ဣဒံ, မဟာရာဇ, နကုလဿ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ –

‘‘‘တသ္မာ သကံ ပရေသမ္ပိ၊ ကာတဗ္ဗာ မေတ္တဘာဝနာ။

မေတ္တစိတ္တေန ဖရိတဗ္ဗံ၊ ဧတံ ဗုဒ္ဓါန သာသန’’’န္တိ။

နကုလင်္ဂပဉ္ဟော ပဉ္စမော။

၆။ ဇရသိင်္ဂါလင်္ဂပဉ္ဟော

၆။ ‘‘ဘန္တေ နာဂသေန, ‘ဇရသိင်္ဂါလဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဇရသိင်္ဂါလော ဘောဇနံ ပဋိလဘိတွာ အဇိဂုစ္ဆမာနော ယာဝဒတ္ထံ အာဟရယတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဘောဇနံ ပဋိလဘိတွာ အဇိဂုစ္ဆမာနေန သရီရယာပနမတ္တမေဝ ပရိဘုဉ္ဇိတဗ္ဗံ။ ဣဒံ, မဟာရာဇ, ဇရသိင်္ဂါလဿ ပဌမံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန မဟာကဿပေန –

‘‘‘သေနာသနမှာ ဩရုယှ၊ ဂါမံ ပိဏ္ဍာယ ပါဝိသိံ။

ဘုဉ္ဇန္တံ ပုရိသံ ကုဋ္ဌိံ၊ သက္ကစ္စ နံ ဥပဋ္ဌဟိံ။

‘‘‘သော မေ ပက္ကေန ဟတ္ထေန၊ အာလောပံ ဥပနာမယိ။

အာလောပံ ပက္ခိပန္တဿ၊ အင်္ဂုလိပေတ္ထ ဆိဇ္ဇထ။

‘‘‘ကုဋ္ဋမူလဉ္စ နိဿာယ၊ အာလောပံ တံ အဘုဉ္ဇိသံ။

ဘုဉ္ဇမာနေ ဝါ ဘုတ္တေ ဝါ၊ ဇေဂုစ္ဆံ မေ န ဝိဇ္ဇတီ’တိ။

‘‘ပုန စပရံ, မဟာရာဇ, ဇရသိင်္ဂါလော ဘောဇနံ ပဋိလဘိတွာ န ဝိစိနာတိ လူခံ ဝါ ပဏီတံ ဝါတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဘောဇနံ ပဋိလဘိတွာ န ဝိစိနိတဗ္ဗံ ‘လူခံ ဝါ ပဏီတံ ဝါ သမ္ပန္နံ ဝါ အသမ္ပန္နံ ဝါ’တိ, ယထာလဒ္ဓေန သန္တုဿိတဗ္ဗံ။ ဣဒံ, မဟာရာဇ, ဇရသိင်္ဂါလဿ ဒုတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန ဥပသေနေန ဝင်္ဂန္တပုတ္တေန –

‘‘‘လူခေနပိ စ သန္တုဿေ၊ နာညံ ပတ္ထေ ရသံ ဗဟုံ။

ရသေသု အနုဂိဒ္ဓဿ၊ ဈာနေ န ရမတေ [ရမတီ (သီ။ ဣ။)] မနော။

ဣတရီတရေန သန္တုဋ္ဌော [သန္တုဋ္ဌေ (သီ။ ဣ။)]၊ သာမညံ ပရိပူရတီ’’’တိ။

ဇရသိင်္ဂါလင်္ဂပဉ္ဟော ဆဋ္ဌော။

၇။ မိဂင်္ဂပဉ္ဟော

၇။ ‘‘ဘန္တေ နာဂသေန, ‘မိဂဿ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ တီဏိ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, မိဂေါ ဒိဝါ အရညေ စရတိ, ရတ္တိံ အဗ္ဘောကာသေ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဒိဝါ အရညေ ဝိဟရိတဗ္ဗံ, ရတ္တိံ အဗ္ဘောကာသေ။ ဣဒံ, မဟာရာဇ, မိဂဿ ပဌမံ အင်္ဂံ ဂဟေတဗ္ဗံ။

‘‘ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန လောမဟံသနပရိယာယေ –

‘သော ခေါ အဟံ, သာရိပုတ္တ, ယာ တာ ရတ္တိယော သီတာ ဟေမန္တိကာ အန္တရဋ္ဌကာ ဟိမပါတသမယာ [အန္တရဋ္ဌကေ ဟိမပါတသမယေ (သီ။ ဣ။ က။)], တထာရူပါသု ရတ္တီသု ရတ္တိံ အဗ္ဘောကာသေ ဝိဟရာမိ, ဒိဝါ ဝနသဏ္ဍေ။ ဂိမှာနံ ပစ္ဆိမေ မာသေ ဒိဝါ အဗ္ဘောကာသေ ဝိဟရာမိ, ရတ္တိံ ဝနသဏ္ဍေ’တိ။

‘‘ပုန စပရံ, မဟာရာဇ, မိဂေါ သတ္တိမှိ ဝါ သရေ ဝါ ဩပတန္တေ ဝဉ္စေတိ [ဝဇ္ဇေတိ (က။)] ပလာယတိ, န ကာယမုပနေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ကိလေသေသု ဩပတန္တေသု ဝဉ္စယိတဗ္ဗံ [ဝဇ္ဇယိတဗ္ဗံ (က။)] ပလာယိတဗ္ဗံ, န စိတ္တမုပနေတဗ္ဗံ။ ဣဒံ, မဟာရာဇ, မိဂဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, မိဂေါ မနုဿေ ဒိသွာ ယေန ဝါ တေန ဝါ ပလာယတိ ‘မာ မံ တေ အဒ္ဒသံသူ’တိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဘဏ္ဍနကလဟဝိဂ္ဂဟဝိဝါဒသီလေ ဒုဿီလေ ကုသီတေ သင်္ဂဏိကာရာမေ ဒိသွာ ယေန ဝါ တေန ဝါ ပလာယိတဗ္ဗံ ‘မာ မံ တေ အဒ္ဒသံသု, အဟဉ္စ တေ မာ အဒ္ဒသ’န္တိ။ ဣဒံ, မဟာရာဇ, မိဂဿ တတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ –

‘‘‘မာ မေ ကဒါစိ ပါပိစ္ဆော၊ ကုသီတော ဟီနဝီရိယော။

အပ္ပဿုတော အနာစာရော၊ သမ္မတော [သမေတော (သီ။ ဣ။)] အဟု ကတ္ထစီ’’’တိ။

မိဂင်္ဂပဉ္ဟော သတ္တမော။

၈။ ဂေါရူပင်္ဂပဉ္ဟော

၈။ ‘‘ဘန္တေ နာဂသေန, ‘ဂေါရူပဿ စတ္တာရိ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ စတ္တာရိ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဂေါရူပေါ သကံ ဂေဟံ န ဝိဇဟတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သကော ကာယော န ဝိဇဟိတဗ္ဗော ‘အနိစ္စုစ္ဆာဒနပရိမဒ္ဒနဘေဒနဝိကိရဏဝိဒ္ဓံသနဓမ္မော အယံ ကာယော’တိ။ ဣဒံ, မဟာရာဇ, ဂေါရူပဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဂေါရူပေါ အာဒိန္နဓုရော သုခဒုက္ခေန ဓုရံ ဝဟတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အာဒိန္နဗြဟ္မစရိယေန သုခဒုက္ခေန ယာဝ ဇီဝိတပရိယာဒါနာ အာပါဏကောဋိကံ ဗြဟ္မစရိယံ စရိတဗ္ဗံ။ ဣဒံ, မဟာရာဇ, ဂေါရူပဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဂေါရူပေါ ဆန္ဒေန ဃာယမာနော ပါနီယံ ပိဝတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အာစရိယုပဇ္ဈာယာနံ အနုသိဋ္ဌိ ဆန္ဒေန ပေမေန ပသာဒေန ဃာယမာနေန ပဋိဂ္ဂဟေတဗ္ဗာ။ ဣဒံ, မဟာရာဇ, ဂေါရူပဿ တတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဂေါရူပေါ ယေန ကေနစိ ဝါဟိယမာနော ဝဟတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ထေရနဝမဇ္ဈိမဘိက္ခူနမ္ပိ ဂိဟိဥပါသကဿာပိ ဩဝါဒါနုသာသနီ သိရသာ သမ္ပဋိစ္ဆိတဗ္ဗာ။ ဣဒံ, မဟာရာဇ, ဂေါရူပဿ စတုတ္ထံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ –

‘‘‘တဒဟု ပဗ္ဗဇိတော သန္တော၊ ဇာတိယာ သတ္တဝဿိကော။

သောပိ မံ အနုသာသေယျ၊ သမ္ပဋိစ္ဆာမိ မတ္ထကေ [မုဒ္ဓနာ (သီ။)]။

‘‘‘တိဗ္ဗံ ဆန္ဒဉ္စ ပေမဉ္စ၊ တသ္မိံ ဒိသွာ ဥပဋ္ဌပေ။

ဌပေယျာစရိယဋ္ဌာနေ၊ သက္ကစ္စ နံ ပုနပ္ပုန’’’န္တိ။

ဂေါရူပင်္ဂပဉ္ဟော အဋ္ဌမော။

၉။ ဝရာဟင်္ဂပဉ္ဟော

၉။ ‘‘ဘန္တေ နာဂသေန, ‘ဝရာဟဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဝရာဟော သန္တတ္တကဌိတေ [သန္တတ္တကဌိနေ (သီ။ ဣ။)] ဂိမှသမယေ သမ္ပတ္တေ ဥဒကံ ဥပဂစ္ဆတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဒေါသေန စိတ္တေ အာလုဠိတခလိတဝိဗ္ဘန္တသန္တတ္တေ သီတလာမတပဏီတမေတ္တာဘာဝနံ ဥပဂန္တဗ္ဗံ။ ဣဒံ, မဟာရာဇ, ဝရာဟဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဝရာဟော စိက္ခလ္လမုဒကမုပဂန္တွာ နာသိကာယ ပထဝိံ ခဏိတွာ ဒေါဏိံ ကတွာ ဒေါဏိကာယ သယတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန မာနသေ ကာယံ နိက္ခိပိတွာ အာရမ္မဏန္တရဂတေန သယိတဗ္ဗံ။ ဣဒံ, မဟာရာဇ, ဝရာဟဿ ဒုတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန ပိဏ္ဍောလဘာရဒွါဇေန –

‘‘‘ကာယေ [ကာယေန (က။)] သဘာဝံ ဒိသွာန၊ ဝိစိနိတွာ ဝိပဿကော။

ဧကာကိယော အဒုတိယော၊ သေတိ အာရမ္မဏန္တရေ’’’တိ။

ဝရာဟင်္ဂပဉ္ဟော နဝမော။

၁၀။ ဟတ္ထိင်္ဂပဉ္ဟော

၁၀။ ‘‘ဘန္တေ နာဂသေန, ‘ဟတ္ထိဿ ပဉ္စ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ပဉ္စ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဟတ္ထီ နာမ စရန္တော ယေဝ ပထဝိံ ဒါလေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ကာယံ သမ္မသမာနေနေဝ သဗ္ဗေ ကိလေသာ ဒါလေတဗ္ဗာ။ ဣဒံ, မဟာရာဇ, ဟတ္ထိဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဟတ္ထီ သဗ္ဗကာယေနေဝ အပလောကေတိ, ဥဇုကံ ယေဝ ပေက္ခတိ, န ဒိသာဝိဒိသာ ဝိလောကေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သဗ္ဗကာယေန အပလောကိနာ ဘဝိတဗ္ဗံ, န ဒိသာဝိဒိသာ ဝိလောကေတဗ္ဗာ, န ဥဒ္ဓံ ဥလ္လောကေတဗ္ဗံ, န အဓေါ ဩလောကေတဗ္ဗံ, ယုဂမတ္တပေက္ခိနာ ဘဝိတဗ္ဗံ။ ဣဒံ, မဟာရာဇ, ဟတ္ထိဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဟတ္ထီ အနိဗဒ္ဓသယနော ဂေါစရာယမနုဂန္တွာ န တမေဝ ဒေသံ ဝါသတ္ထမုပဂစ္ဆတိ, န ဓုဝပ္ပတိဋ္ဌာလယော, ဧဝမေဝ ခေါ, မဟာရာဇ, ယောဂိနာ ယောဂါဝစရေန အနိဗဒ္ဓသယနေန ဘဝိတဗ္ဗံ, နိရာလယေန ပိဏ္ဍာယ ဂန္တဗ္ဗံ, ယဒိ ပဿတိ ဝိပဿကော မနုညံ ပတိရူပံ ရုစိရဒေသေ ဘဝံ မဏ္ဍပံ ဝါ ရုက္ခမူလံ ဝါ ဂုဟံ ဝါ ပဗ္ဘာရံ ဝါ, တတ္ထေဝ ဝါသမုပဂန္တဗ္ဗံ, ဓုဝပ္ပတိဋ္ဌာလယော န ကာတဗ္ဗော။ ဣဒံ, မဟာရာဇ, ဟတ္ထိဿ တတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဟတ္ထီ ဥဒကံ ဩဂါဟိတွာ သုစိဝိမလသီတလသလိလပရိပုဏ္ဏံ ကုမုဒုပ္ပလပဒုမပုဏ္ဍရီကသဉ္ဆန္နံ မဟတိမဟန္တံ ပဒုမသရံ ဩဂါဟိတွာ ကီဠတိ ဂဇဝရကီဠံ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သုစိဝိမလဝိပ္ပသန္နမနာဝိလဓမ္မဝရဝါရိပုဏ္ဏံ ဝိမုတ္တိကုသုမသဉ္ဆန္နံ မဟာသတိပဋ္ဌာနပေါက္ခရဏိံ ဩဂါဟိတွာ ဉာဏေန သင်္ခါရာ ဩဓုနိတဗ္ဗာ ဝိဓုနိတဗ္ဗာ, ယောဂါဝစရကီဠာ ကီဠိတဗ္ဗာ။ ဣဒံ, မဟာရာဇ, ဟတ္ထိဿ စတုတ္ထံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဟတ္ထီ သတော ပါဒံ ဥဒ္ဓရတိ, သတော ပါဒံ နိက္ခိပတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သတေန သမ္ပဇာနေန ပါဒံ ဥဒ္ဓရိတဗ္ဗံ, သတေန သမ္ပဇာနေန ပါဒံ နိက္ခိပိတဗ္ဗံ, အဘိက္ကမပဋိက္ကမေ သမိဉ္ဇနပသာရဏေ သဗ္ဗတ္ထ သတေန သမ္ပဇာနေန ဘဝိတဗ္ဗံ။ ဣဒံ, မဟာရာဇ, ဟတ္ထိဿ ပဉ္စမံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန သံယုတ္တနိကာယဝရေ –

‘‘‘ကာယေန သံဝရော သာဓု၊ သာဓု ဝါစာယ သံဝရော။

မနသာ သံဝရော သာဓု၊ သာဓု သဗ္ဗတ္ထ သံဝရော။

သဗ္ဗတ္ထ သံဝုတော လဇ္ဇီ၊ ရက္ခိတောတိ ပဝုစ္စတီ’’’တိ။

ဟတ္ထိင်္ဂပဉ္ဟော ဒသမော။ဥပစိကာဝဂ္ဂေါ စတုတ္ထော။

တဿုဒ္ဒါနံ –

ဥပစိကာ ဗိဠာရော စ၊ ဥန္ဒူရော ဝိစ္ဆိကေန စ။

နကုလော သိင်္ဂါလော မိဂေါ၊

ဂေါရူပေါ ဝရာဟော ဟတ္ထိနာ ဒသာတိ။

၅။ သီဟဝဂ္ဂေါ

၁။ သီဟင်္ဂပဉ္ဟော

၁။ ‘‘ဘန္တေ နာဂသေန, ‘သီဟဿ သတ္တ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ သတ္တ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, သီဟော နာမ သေတဝိမလပရိသုဒ္ဓပဏ္ဍရော, ဧဝမေဝ ခေါ, မဟာရာဇ, ယောဂိနာ ယောဂါဝစရေန သေတဝိမလပရိသုဒ္ဓပဏ္ဍရစိတ္တေန ဗျပဂတကုက္ကုစ္စေန ဘဝိတဗ္ဗံ။ ဣဒံ, မဟာရာဇ, သီဟဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, သီဟော စတုစရဏော ဝိက္ကန္တစာရီ, ဧဝမေဝ ခေါ, မဟာရာဇ, ယောဂိနာ ယောဂါဝစရေန စတုရိဒ္ဓိပါဒစရဏေန ဘဝိတဗ္ဗံ။ ဣဒံ, မဟာရာဇ, သီဟဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, သီဟော အဘိရူပရုစိရကေသရီ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အဘိရူပရုစိရသီလကေသရိနာ ဘဝိတဗ္ဗံ။ ဣဒံ, မဟာရာဇ, သီဟဿ တတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, သီဟော ဇီဝိတပရိယာဒါနေပိ န ကဿစိ ဩနမတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန စီဝရပိဏ္ဍပါတသေနာသနဂိလာနပစ္စယဘေသဇ္ဇပရိက္ခာရပရိယာဒါနေပိ န ကဿစိ ဩနမိတဗ္ဗံ။ ဣဒံ, မဟာရာဇ, သီဟဿ စတုတ္ထံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, သီဟော သပဒါနဘက္ခော ယသ္မိံ ဩကာသေ နိပတတိ, တတ္ထေဝ ယာဝဒတ္ထံ ဘက္ခယတိ, န ဝရမံသံ ဝိစိနာတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သပဒါနဘက္ခေန ဘဝိတဗ္ဗံ, န ကုလာနိ ဝိစိနိတဗ္ဗာနိ, န ပုဗ္ဗဂေဟံ ဟိတွာ ကုလာနိ ဥပသင်္ကမိတဗ္ဗာနိ, န ဘောဇနံ ဝိစိနိတဗ္ဗံ, ယသ္မိံ ဩကာသေ ကဗဠံ အာဒီယတိ, တသ္မိံ ယေဝ ဩကာသေ ဘုဉ္ဇိတဗ္ဗံ သရီရယာပနတ္ထံ [သရီရယာပနမတ္တံ (သီ။ ဣ။)], န ဝရဘောဇနံ ဝိစိနိတဗ္ဗံ။ ဣဒံ, မဟာရာဇ, သီဟဿ ပဉ္စမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, သီဟော အသန္နိဓိဘက္ခော, သကိံ ဂေါစရံ ဘက္ခယိတွာ န ပုန တံ ဥပဂစ္ဆတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အသန္နိဓိကာရပရိဘောဂိနာ ဘဝိတဗ္ဗံ။ ဣဒံ, မဟာရာဇ, သီဟဿ ဆဋ္ဌံ အင်္ဂံ ဂဟေတဗ္ဗံ။

‘‘ပုန စပရံ , မဟာရာဇ, သီဟော ဘောဇနံ အလဒ္ဓါ န ပရိတဿတိ, လဒ္ဓါပိ ဘောဇနံ အဂဓိတော [အဂထိတော (သီ။)] အမုစ္ဆိတော အနဇ္ဈောသန္နော ပရိဘုဉ္ဇတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဘောဇနံ အလဒ္ဓါ န ပရိတဿိတဗ္ဗံ, လဒ္ဓါပိ ဘောဇနံ အဂဓိတေန အမုစ္ဆိတေန အနဇ္ဈောသန္နေန အာဒီနဝဒဿာဝိနာ နိဿရဏပညေန ပရိဘုဉ္ဇိတဗ္ဗံ။ ဣဒံ, မဟာရာဇ, သီဟဿ သတ္တမံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန သံယုတ္တနိကာယဝရေ ထေရံ မဟာကဿပံ ပရိကိတ္တယမာနေန –

‘သန္တုဋ္ဌောယံ, ဘိက္ခဝေ, ကဿပေါ ဣတရီတရေန ပိဏ္ဍပါတေန, ဣတရီတရပိဏ္ဍပါတသန္တုဋ္ဌိယာ စ ဝဏ္ဏဝါဒီ, န စ ပိဏ္ဍပါတဟေတု အနေသနံ အပ္ပတိရူပံ အာပဇ္ဇတိ, အလဒ္ဓါ စ ပိဏ္ဍပါတံ န ပရိတဿတိ, လဒ္ဓါ စ ပိဏ္ဍပါတံ အဂဓိတော အမုစ္ဆိတော အနဇ္ဈောသန္နော အာဒီနဝဒဿာဝီ နိဿရဏပညော ပရိဘုဉ္ဇတီ’’’တိ။

သီဟင်္ဂပဉ္ဟော ပဌမော။

၂။ စက္ကဝါကင်္ဂပဉ္ဟော

၂။ ‘‘ဘန္တေ နာဂသေန, ‘စက္ကဝါကဿ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ တီဏိ အင်္ဂါနိ ဂဟေတဗ္ဗာနီတိ’’? ‘‘ယထာ, မဟာရာဇ, စက္ကဝါကော ယာဝ ဇီဝိတပရိယာဒါနာ ဒုတိယိကံ န ဝိဇဟတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ယာဝ ဇီဝိတပရိယာဒါနာ ယောနိသော မနသိကာရော န ဝိဇဟိတဗ္ဗော။ ဣဒံ, မဟာရာဇ, စက္ကဝါကဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, စက္ကဝါကော သေဝါလပဏကဘက္ခော, တေန စ သန္တုဋ္ဌိံ အာပဇ္ဇတိ, တာယ စ သန္တုဋ္ဌိယာ ဗလေန စ ဝဏ္ဏေန စ န ပရိဟာယတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ယထာလာဘသန္တောသော ကရဏီယော, ယထာလာဘသန္တုဋ္ဌော ခေါ, မဟာရာဇ, ယောဂီ ယောဂါဝစရော န ပရိဟာယတိ သီလေန, န ပရိဟာယတိ သမာဓိနာ, န ပရိဟာယတိ ပညာယ, န ပရိဟာယတိ ဝိမုတ္တိယာ, န ပရိဟာယတိ ဝိမုတ္တိဉာဏဒဿနေန, န ပရိဟာယတိ သဗ္ဗေဟိ ကုသလေဟိ ဓမ္မေဟိ။ ဣဒံ, မဟာရာဇ, စက္ကဝါကဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, စက္ကဝါကော ပါဏေ န ဝိဟေဌယတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန နိဟိတဒဏ္ဍေန နိဟိတသတ္ထေန လဇ္ဇိနာ ဒယာပန္နေန သဗ္ဗပါဏဘူတဟိတာနုကမ္ပိနာ ဘဝိတဗ္ဗံ။ ဣဒံ, မဟာရာဇ, စက္ကဝါကဿ တတိယံ အင်္ဂံ ဂဟေတဗ္ဗံ။ ဘာသတမ္ပေတံ, မဟာရာဇ, ဘဂဝတာ ဒေဝါတိဒေဝေန စက္ကဝါကဇာတကေ –

‘‘‘ယော န ဟန္တိ န ဃာတေတိ၊ န ဇိနာတိ န ဇာပယေ။

မေတ္တံသော [အဟိံသာ (သီ။ ဣ။)] သဗ္ဗဘူတေသု၊ ဝေရံ တဿ န ကေနစီ’’’တိ။

စက္ကဝါကင်္ဂပဉ္ဟော ဒုတိယော။

၃။ ပေဏာဟိကင်္ဂပဉ္ဟော

၃။ ‘‘ဘန္တေ နာဂသေန, ‘ပေဏာဟိကာယ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ပေဏာဟိကာ သကပတိမှိ ဥသူယာယ ဆာပကေ န ပေါသယတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သကမနေ [သကမနော (က။)] ကိလေသေ ဥပ္ပန္နေ ဥသူယာယိတဗ္ဗံ, သတိပဋ္ဌာနေန သမ္မာသံဝရသုသိရေ ပက္ခိပိတွာ မနောဒွါရေ ကာယဂတာသတိ ဘာဝေတဗ္ဗာ။ ဣဒံ, မဟာရာဇ, ပေဏာဟိကာယ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ပေဏာဟိကာ ပဝနေ ဒိဝသံ ဂေါစရံ စရိတွာ သာယံ ပက္ခိဂဏံ ဥပေတိ အတ္တနော ဂုတ္တိယာ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဧကကေန ပဝိဝေကံ သေဝိတဗ္ဗံ သံယောဇနပရိမုတ္တိယာ, တတြ ရတိံ အလဘမာနေန ဥပဝါဒဘယပရိရက္ခဏာယ သသံဃံ ဩသရိတွာ သံဃရက္ခိတေန ဝသိတဗ္ဗံ။ ဣဒံ, မဟာရာဇ, ပေဏာဟိကာယ ဒုတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဗြဟ္မုနာ သဟမ္ပတိနာ ဘဂဝတော သန္တိကေ –

‘‘‘သေဝေထ ပန္တာနိ သေနာသနာနိ၊ စရေယျ သံယောဇနဝိပ္ပမောက္ခာ။

သစေ ရတိံ နာဓိဂစ္ဆေယျ တတ္ထ၊ သံဃေ ဝသေ ရက္ခိတတ္တော သတီမာ’’’တိ။

ပေဏာဟိကင်္ဂပဉ္ဟော တတိယော။

၄။ ဃရကပေါတင်္ဂပဉ္ဟော

၄။ ‘‘ဘန္တေ နာဂသေန, ‘ဃရကပေါတဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ဃရကပေါတော ပရဂေဟေ ဝသမာနော န တေသံ ကိဉ္စိ ဘဏ္ဍဿ နိမိတ္တံ ဂဏှာတိ, မဇ္ဈတ္တော ဝသတိ သညာဗဟုလော, ဧဝမေဝ ခေါ, မဟာရာဇ, ယောဂိနာ ယောဂါဝစရေန ပရကုလံ ဥပဂတေန တသ္မိံ ကုလေ ဣတ္ထီနံ ဝါ ပုရိသာနံ ဝါ မဉ္စေ ဝါ ဣဌေ ဝါ ဝတ္ထေ ဝါ အလင်္ကာရေ ဝါ ဥပဘောဂေ ဝါ ပရိဘောဂေ ဝါ ဘောဇနဝိကတီသု ဝါ န နိမိတ္တံ ဂဟေတဗ္ဗံ, မဇ္ဈတ္တေန ဘဝိတဗ္ဗံ, သမဏသညာ ပစ္စုပဋ္ဌပေတဗ္ဗာ။ ဣဒံ, မဟာရာဇ, ဃရကပေါတဿ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန စူဠနာရဒဇာတကေ –

‘‘‘ပဝိသိတွာ ပရကုလံ၊ ပါနတ္ထံ ဘောဇနာယ ဝါ [ပါနေသု ဘောဇနေသု ဝါ (သီ။ ဣ။)]။

မိတံ ခါဒေ မိတံ ဘုဉ္ဇေ၊ န စ ရူပေ မနံ ကရေ’’’တိ။

ဃရကပေါတင်္ဂပဉ္ဟော စတုတ္ထော။

၅။ ဥလူကင်္ဂပဉ္ဟော

၅။ ‘‘ဘန္တေ နာဂသေန, ‘ဥလူကဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဥလူကော ကာကေဟိ ပဋိဝိရုဒ္ဓေါ, ရတ္တိံ ကာကသသံဃံ ဂန္တွာ ဗဟူပိ ကာကေ ဟနတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အညာဏေန ပဋိဝိရုဒ္ဓေါ ကာတဗ္ဗော, ဧကေန ရဟော နိသီဒိတွာ အညာဏံ သမ္ပမဒ္ဒိတဗ္ဗံ, မူလတော ဆိန္ဒိတဗ္ဗံ။ ဣဒံ, မဟာရာဇ, ဥလူကဿ ပဌမံ ဂဟေတဗ္ဗံ။

‘‘ပုန စပရံ, မဟာရာဇ, ဥလူကော သုပ္ပဋိသလ္လီနော ဟောတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ပဋိသလ္လာနာရာမေန ဘဝိတဗ္ဗံ ပဋိသလ္လာနရတေန။ ဣဒံ, မဟာရာဇ, ဥလူကဿ ဒုတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန သံယုတ္တနိကာယဝရေ –

‘‘‘ဣဓ, ဘိက္ခဝေ, ဘိက္ခု ပဋိသလ္လာနာရာမော ပဋိသလ္လာနရတော ‘‘ဣဒံ ဒုက္ခ’’န္တိ ယထာဘူတံ ပဇာနာတိ, ‘‘အယံ ဒုက္ခသမုဒယော’’တိ ယထာ ဘူထံ ပဇာနာတိ , ‘‘အယံ ဒုက္ခနိရောဓေါ’’တိ ယထာဘူတံ ပဇာနာတိ, ‘‘အယံ ဒုက္ခနိရောဓဂါမိနီ ပဋိပဒါ’’တိ ယထာဘူတံ ပဇာနာတီ’’’တိ။

ဥလူကင်္ဂပဉ္ဟော ပဉ္စမော။

၆။ သတပတ္တင်္ဂပဉ္ဟော

၆။ ‘‘ဘန္တေ နာဂသေန, ‘သတပတ္တဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, သတပတ္တော ရဝိတွာ ပရေသံ ခေမံ ဝါ ဘယံ ဝါ အာစိက္ခတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ပရေသံ ဓမ္မံ ဒေသယမာနေန ဝိနိပါတံ ဘယတော ဒဿယိတဗ္ဗံ, နိဗ္ဗာနံ ခေမတော ဒဿယိတဗ္ဗံ။ ဣဒံ, မဟာရာဇ, သတပတ္တဿ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန ပိဏ္ဍောလဘာရဒွါဇေန –

‘‘‘နိရယေ ဘယသန္တာသံ၊ နိဗ္ဗာနေ ဝိပုလံ သုခံ။

ဥဘယာနေတာနတ္ထာနိ ဒဿေတဗ္ဗာနိ ယောဂိနာ’’’တိ။

သတပတ္တင်္ဂပဉ္ဟော ဆဋ္ဌော။

၇။ ဝဂ္ဂုလိင်္ဂပဉ္ဟော

၇။ ‘‘ဘန္တေ နာဂသေန, ‘ဝဂ္ဂုလိဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဝဂ္ဂုလိ ဂေဟံ ပဝိသိတွာ ဝိစရိတွာ နိက္ခမတိ, န တတ္ထ ပလိဗုဒ္ဓတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဂါမံ ပိဏ္ဍာယ ပဝိသိတွာ သပဒါနံ ဝိစရိတွာ ပဋိလဒ္ဓလာဘေန ခိပ္ပမေဝ နိက္ခမိတဗ္ဗံ, န တတ္ထ ပလိဗုဒ္ဓေန ဘဝိတဗ္ဗံ။ ဣဒံ, မဟာရာဇ, ဝဂ္ဂုလိဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဝဂ္ဂုလိ ပရဂေဟေ ဝသမာနော န တေသံ ပရိဟာနိံ ကရောတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ကုလာနိ ဥပသင်္ကမိတွာ အတိယာစနာယ ဝါ ဝိညတ္တိဗဟုလတာယ ဝါ ကာယဒေါသဗဟုလတာယ ဝါ အတိဘာဏိတာယ ဝါ သမာနသုခဒုက္ခတာယ ဝါ န တေသံ ကောစိ ဝိပ္ပဋိသာရော ကရဏီယော, နပိ တေသံ မူလကမ္မံ ပရိဟာပေတဗ္ဗံ, သဗ္ဗထာ ဝဍ္ဎိ ယေဝ ဣစ္ဆိတဗ္ဗာ။ ဣဒံ, မဟာရာဇ, ဝဂ္ဂုလိဿ ဒုတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန ဒီဃနိကာယဝရေ လက္ခဏသုတ္တန္တေ –

‘‘‘သုဒ္ဓါယ သီလေန သုတေန ဗုဒ္ဓိယာ၊ စာဂေန ဓမ္မေန ဗဟူဟိ သာဓုဟိ။

ဓနေန ဓညေန စ ခေတ္တဝတ္ထုနာ၊ ပုတ္တေဟိ ဒါရေဟိ စတုပ္ပဒေဟိ စ။

‘‘‘ဉာတီဟိ မိတ္တေဟိ စ ဗန္ဓဝေဟိ၊ ဗလေန ဝဏ္ဏေန သုခေန စူဘယံ။

ကထံ န ဟာယေယျုံ ပရေတိ ဣစ္ဆတိ၊ အတ္ထသမိဒ္ဓိဉ္စ ပနာဘိကင်္ခတီ’’’တိ။

ဝဂ္ဂုလိင်္ဂပဉ္ဟော သတ္တမော။

၈။ ဇလူကင်္ဂပဉ္ဟော

၈။ ‘‘ဘန္တေ နာဂသေန, ‘ဇလူကာယ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ဇလူကာ ယတ္ထ အလ္လီယတိ, တတ္ထေဝ ဒဠှံ အလ္လီယိတွာ ရုဟိရံ ပိဝတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ယသ္မိံ အာရမ္မဏေ စိတ္တံ အလ္လီယတိ, တံ အာရမ္မဏံ ဝဏ္ဏတော စ သဏ္ဌာနတော စ ဒိသတော စ ဩကာသတော စ ပရိစ္ဆေဒတော စ လိင်္ဂတော စ နိမိတ္တတော စ ဒဠှံ ပတိဋ္ဌာပေတွာ တေနေဝါရမ္မဏေန ဝိမုတ္တိရသမသေစနကံ ပါတဗ္ဗံ။ ဣဒံ, မဟာရာဇ, ဇလူကာယ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန အနုရုဒ္ဓေန –

‘‘‘ပရိသုဒ္ဓေန စိတ္တေန၊ အာရမ္မဏေ ပတိဋ္ဌာယ။

တေန စိတ္တေန ပါတဗ္ဗံ၊ ဝိမုတ္တိရသမသေစန’’’န္တိ။

ဇလူကင်္ဂပဉ္ဟော အဋ္ဌမော။

၉။ သပ္ပင်္ဂပဉ္ဟော

၉။ ‘‘ဘန္တေ နာဂသေန, ‘သပ္ပဿ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ တီဏိ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, သပ္ပော ဥရေန ဂစ္ဆတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ပညာယ စရိတဗ္ဗံ, ပညာယ စရမာနဿ ခေါ, မဟာရာဇ, ယောဂိနော စိတ္တံ ဉာယေ စရတိ, ဝိလက္ခဏံ ဝိဝဇ္ဇေတိ, သလက္ခဏံ ဘာဝေတိ။ ဣဒံ, မဟာရာဇ , သပ္ပဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, သပ္ပော စရမာနော ဩသဓံ ပရိဝဇ္ဇေန္တော စရတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဒုစ္စရိတံ ပရိဝဇ္ဇေန္တေန စရိတဗ္ဗံ။ ဣဒံ, မဟာရာဇ, သပ္ပဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, သပ္ပော မနုဿေ ဒိသွာ တပ္ပတိ [မနုဿံ ဒိသွာ ကမ္ပတိ (က။)] သောစတိ စိန္တယတိ, ဧဝမေဝ ခေါ မဟာရာဇ ယောဂိနာ ယောဂါဝစရေန ကုဝိတက္ကေ, ဝိတက္ကေတွာ အရတိံ ဥပ္ပါဒယိတွာ တပ္ပိတဗ္ဗံ သောစိတဗ္ဗံ စိန္တယိတဗ္ဗံ ‘ပမာဒေန မေ ဒိဝသော ဝီတိနာမိတော, န သော ပုန သက္ကာ လဒ္ဓု’န္တိ။ ဣဒံ, မဟာရာဇ, သပ္ပဿ တတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဘလ္လာဋိယဇာတကေ ဒွိန္နံ ကိန္နရာနံ –

‘‘‘မယေကရတ္တံ [ယမေကရတ္တိံ (သီ။ ဣ။)] ဝိပ္ပဝသိမှ လုဒ္ဒ၊ အကာမကာ အညမညံ သရန္တာ။

တမေကရတ္တံ [တမေကရတ္တိံ (သီ။ ဣ။)] အနုတပ္ပမာနာ၊ သောစာမ ‘သာ ရတ္တိ ပုန နဟေဿတီ’’’တိ။

သပ္ပင်္ဂပဉ္ဟော နဝမော။

၁၀။ အဇဂရင်္ဂပဉ္ဟော

၁၀။ ‘‘ဘန္တေ နာဂသေန, ‘အဇဂရဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, အဇဂရော မဟတိမဟာကာယော ဗဟူပိ ဒိဝသေ ဦနူဒရော ဒီနတရော ကုစ္ဆိပူရံ အာဟာရံ န လဘတိ, အပရိပုဏ္ဏော ယေဝ ယာဝဒေဝ သရီရယာပနမတ္တကေန ယာပေတိ, ဧဝမေဝ ခေါ, မဟာရာဇ, ယောဂိနော ယောဂါဝစရဿ ဘိက္ခာစရိယပ္ပသုတဿ ပရပိဏ္ဍမုပဂတဿ ပရဒိန္နပ္ပါဋိကင္ခိဿ သယံဂါဟပ္ပဋိဝိရတဿ ဒုလ္လဘံ ဥဒရပရိပူရံ အာဟာရံ, အပိ စ အတ္ထဝသိကေန ကုလပုတ္တေန စတ္တာရော ပဉ္စ အာလောပေ အဘုဉ္ဇိတွာ အဝသေသံ ဥဒကေန ပရိပူရေတဗ္ဗံ။ ဣဒံ, မဟာရာဇ, အဇဂရဿ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ –

‘‘‘အလ္လံ သုက္ခံ ဝါ ဘုဉ္ဇန္တော၊ န ဗာဠှံ သုဟိတော သိယာ။

ဦနူဒရော မိတာဟာရော၊ သတော ဘိက္ခု ပရိဗ္ဗဇေ။

‘‘‘စတ္တာရော ပဉ္စ အာလောပေ၊ အဘုတွာ ဥဒကံ ပိဝေ။

အလံ ဖာသု ဝိဟာရာယ၊ ပဟိတတ္တဿ ဘိက္ခုနော’’’တိ။

အဇဂရင်္ဂပဉ္ဟော ဒသမော။

သီဟဝဂ္ဂေါ ပဉ္စမော။

တဿုဒ္ဒါနံ –

ကေသရီ စက္ကဝါကော စ၊ ပေဏာဟိ ဃရကပေါတကော။

ဥလူကော သတပတ္တော စ၊ ဝဂ္ဂုလိ စ ဇလူပိကာ။

သပ္ပော အဇဂရော စေဝ၊ ဝဂ္ဂေါ တေန ပဝုစ္စတီတိ။

၆။ မက္ကဋကဝဂ္ဂေါ

၁။ ပန္ထမက္ကဋကင်္ဂပဉ္ဟော

၁။ ‘‘ဘန္တေ နာဂသေန, ‘ပန္ထမက္ကဋကဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ပန္ထမက္ကဋကော ပန္ထေ မက္ကဋဇာလဝိတာနံ ကတွာ ယဒိ တတ္ထ ဇာလကေ လဂ္ဂတိ ကိမိ ဝါ မက္ခိကာ ဝါ ပဋင်္ဂေါ ဝါ, တံ ဂဟေတွာ ဘက္ခယတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဆသု ဒွါရေသု သတိပဋ္ဌာနဇာလဝိတာနံ ကတွာ ယဒိ တတ္ထ ကိလေသမက္ခိကာ ဗဇ္ဈန္တိ, တတ္ထေဝ ဃာတေတဗ္ဗာ။ ဣဒံ, မဟာရာဇ, ပန္ထမက္ကဋကဿ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန အနုရုဒ္ဓေန –

‘‘‘စိတ္တံ နိယမေ ဆသု ဒွါရေသု၊ သတိပဋ္ဌာနဝရုတ္တမေ။

ကိလေသာ တတ္ထ လဂ္ဂါ စေ၊ ဟန္တဗ္ဗာ တေ ဝိပဿိနာ’’’တိ။

ပန္ထမက္ကဋကင်္ဂပဉ္ဟော ပဌမော။

၂။ ထနဿိတဒါရကင်္ဂပဉ္ဟော

၂။ ‘‘ဘန္တေ နာဂသေန, ‘ထနဿိတဒါရကဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ ? ‘‘ယထာ, မဟာရာဇ, ထနဿိတဒါရကော သဒတ္ထေ လဂ္ဂတိ, ခီရတ္ထိကော ရောဒတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သဒတ္ထေ လဂ္ဂိတဗ္ဗံ, သဗ္ဗတ္ထ ဓမ္မဉာဏေန ဘဝိတဗ္ဗံ, ဥဒ္ဒေသေ ပရိပုစ္ဆာယ သမ္မပ္ပယောဂေ ပဝိဝေကေ ဂရုသံဝါသေ ကလျာဏမိတ္တသေဝနေ။ ဣဒံ, မဟာရာဇ, ထနဿိတဒါရကဿ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန ဒီဃနိကာယဝရေ ပရိနိဗ္ဗာနသုတ္တန္တေ –

‘‘‘ဣသံဃံ တုမှေ၊ အာနန္ဒ၊ သာရတ္ထေ [သဒတ္ထေ (သီ။ ဣ။)] ဃဋထ၊ သာရတ္ထေ အနုယုဉ္ဇထ။

သာရတ္ထေ အပ္ပမတ္တာ အာတာပိနော ပဟိတတ္တာ ဝိဟရထာ’’’တိ။

ထနဿိတဒါရကင်္ဂပဉ္ဟော ဒုတိယော။

၃။ စိတ္တကဓရကုမ္မင်္ဂပဉ္ဟော

၃။ ‘‘ဘန္တေ နာဂသေန, ‘စိတ္တကဓရကုမ္မဿ [စိတ္တကထလကုမ္မဿ (သီ။ ဣ။)] ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, စိတ္တကဓရကုမ္မော ဥဒကဘယာ ဥဒကံ ပရိဝဇ္ဇေတွာ ဝိစရတိ, တာယ စ ပန ဥဒကံ ပရိဝဇ္ဇနာယ အာယုနာ န ပရိဟာယတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ပမာဒေ ဘယဒဿာဝိနာ ဘဝိတဗ္ဗံ, အပ္ပမာဒေ ဂုဏဝိသေသဒဿာဝိနာ။ တာယ စ ပန ဘယဒဿာဝိတာယ န ပရိဟာယတိ သာမညာ, နိဗ္ဗာနဿ သန္တိကေ ဥပေတိ [ဌပေတိ (က။)]။ ဣဒံ, မဟာရာဇ, စိတ္တကဓရကုမ္မဿ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန ဓမ္မပဒေ –

‘‘‘အပ္ပမာဒရတော ဘိက္ခု၊ ပမာဒေ ဘယဒဿိ ဝါ။

အဘဗ္ဗော ပရိဟာနာယ၊ နိဗ္ဗာနဿေဝ သန္တိကေ’’’တိ။

စိတ္တကဓရကုမ္မင်္ဂပဉ္ဟော စတုတ္ထော။

၄။ ပဝနင်္ဂပဉ္ဟော

၄။ ‘‘ဘန္တေ နာဂသေန, ‘ပဝနဿ ပဉ္စ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ပဉ္စ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ပဝနံ နာမ အသုစိဇနံ ပဋိစ္ဆာဒေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ပရေသံ အပရဒ္ဓံ ခလိတံ ပဋိစ္ဆာဒေတဗ္ဗံ န ဝိဝရိတဗ္ဗံ။ ဣဒံ, မဟာရာဇ, ပဝနဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ပဝနံ သုညံ ပစုရဇနေဟိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ရာဂဒေါသမောဟမာနဒိဋ္ဌိဇာလေဟိ သဗ္ဗေဟိ စ ကိလေသေဟိ သုညေန ဘဝိတဗ္ဗံ။ ဣဒံ, မဟာရာဇ, ပဝနဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ပဝနံ ဝိဝိတ္တံ ဇနသမ္ဗာဓရဟိတံ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ပါပကေဟိ အကုသလေဟိ ဓမ္မေဟိ အနရိယေဟိ ပဝိဝိတ္တေန ဘဝိတဗ္ဗံ။ ဣဒံ, မဟာရာဇ, ပဝနဿ တတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ပဝနံ သန္တံ ပရိသုဒ္ဓံ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သန္တေန ပရိသုဒ္ဓေန ဘဝိတဗ္ဗံ, နိဗ္ဗုတေန ပဟီနမာနေန ပဟီနမက္ခေန ဘဝိတဗ္ဗံ။ ဣဒံ, မဟာရာဇ, ပဝနဿ စတုတ္ထံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ပဝနံ အရိယဇနသံသေဝိတံ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အရိယဇနသံသေဝိတေန ဘဝိတဗ္ဗံ။ ဣဒံ, မဟာရာဇ, ပဝနဿ ပဉ္စမံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန သံယုတ္တနိကာယဝရေ –

‘‘‘ပဝိဝိတ္တေဟိ အရိယေဟိ၊ ပဟိတတ္တေဟိ ဈာယိဘိ။

နိစ္စံ အာရဒ္ဓဝီရိယေဟိ၊ ပဏ္ဍိတေဟိ သဟာဝသေ’’’တိ။

ပဝနင်္ဂပဉ္ဟော စတုတ္ထော။

၅။ ရုက္ခင်္ဂပဉ္ဟော

၅။ ‘‘ဘန္တေ နာဂသေန, ‘ရုက္ခဿ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ တီဏိ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ရုက္ခော နာမ ပုပ္ဖဖလဓရော, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဝိမုတ္တိပုပ္ဖသာမညဖလဓါရိနာ ဘဝိတဗ္ဗံ။ ဣဒံ, မဟာရာဇ, ရုက္ခဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ရုက္ခော ဥပဂတာနမနုပ္ပဝိဋ္ဌာနံ ဇနာနံ ဆာယံ ဒေတိ, ဧဝမေဝ ခေါ , မဟာရာဇ, ယောဂိနာ ယောဂါဝစရေန ဥပဂတာနမနုပ္ပဝိဋ္ဌာနံ ပုဂ္ဂလာနံ အာမိသပ္ပဋိသန္ဓာရေန ဝါ ဓမ္မပ္ပဋိသန္ထာရေန ဝါ ပဋိသန္ထရိတဗ္ဗံ။ ဣဒံ, မဟာရာဇ, ရုက္ခဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ရုက္ခော ဆာယာဝေမတ္တံ န ကရောတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သဗ္ဗသတ္တေသု ဝေမတ္တတာ န ကာတဗ္ဗာ, စောရဝဓကပစ္စတ္ထိကေသုပိ အတ္တနိပိ သမသမာ မေတ္တာဘာဝနာ ကာတဗ္ဗာ, ‘ကိန္တိ ဣမေ သတ္တာ အဝေရာ အဗျာပဇ္ဇာ [အဗျာပဇ္ဈာ (သီ။)] အနီဃာ သုခီ အတ္တာနံ ပရိဟရေယျု’န္တိ။ ဣဒံ, မဟာရာဇ, ရုက္ခဿ တတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ –

‘‘‘ဝဓကေ ဒေဝဒတ္တမှိ၊ စောရေ အင်္ဂုလိမာလကေ။

ဓနပါလေ ရာဟုလေ စ၊ သဗ္ဗတ္ထ သမကော မုနီ’’’တိ။

ရုက္ခင်္ဂပဉ္ဟော ပဉ္စမော။

၆။ မေဃင်္ဂပဉ္ဟော

၆။ ‘‘ဘန္တေ နာဂသေန, ‘မေဃဿ ပဉ္စ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ပဉ္စ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, မေဃော ဥပ္ပန္နံ ရဇောဇလ္လံ ဝူပသမေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဥပ္ပန္နံ ကိလေသရဇောဇလ္လံ ဝူပသမေတဗ္ဗံ။ ဣဒံ, မဟာရာဇ, မေဃဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, မေဃော ပထဝိယာ ဥဏှံ နိဗ္ဗာပေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန မေတ္တာဘာဝနာယ သဒေဝကော လောကော နိဗ္ဗာပေတဗ္ဗော။ ဣဒံ, မဟာရာဇ, မေဃဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, မေဃော သဗ္ဗဗီဇာနိ ဝိရုဟာပေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သဗ္ဗသတ္တာနံ သဒ္ဓံ ဥပ္ပါဒေတွာ တံ သဒ္ဓါဗီဇံ တီသု သမ္ပတ္တီသု ရောပေတဗ္ဗံ, ဒိဗ္ဗမာနုသိကာသု သုခသမ္ပတ္တီသု ယာဝပရမတ္ထနိဗ္ဗာနသုခသမ္ပတ္တိ။ ဣဒံ, မဟာရာဇ, မေဃဿ တတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, မေဃော ဥတုတော သမုဋ္ဌဟိတွာ ဓရဏိတလရုဟေ တိဏရုက္ခလတာဂုမ္ဗဩသဓိဝနပ္ပတယော ပရိရက္ခတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ယောနိသော မနသိကာရံ နိဗ္ဗတ္တေတွာ တေန ယောနိသော မနသိကာရေန သမဏဓမ္မော ပရိရက္ခိတဗ္ဗော, ယောနိသော မနသိကာရမူလကာ သဗ္ဗေ ကုသလာ ဓမ္မာ။ ဣဒံ, မဟာရာဇ, မေဃဿ စတုတ္ထံ အင်္ဂံ ဂဟေတဗ္ဗံ။

‘‘ပုန စပရံ , မဟာရာဇ, မေဃော ဝဿမာနော နဒိတဠာကပေါက္ခရဏိယော ကန္ဒရပဒရသရသောဗ္ဘဥဒပါနာနိ စ ပရိပူရေတိ ဥဒကဓါရာဟိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အာဂမပရိယတ္တိယာ ဓမ္မမေဃမဘိဝဿယိတွာ အဓိဂမကာမာနံ မာနသံ ပရိပူရယိတဗ္ဗံ။ ဣဒံ, မဟာရာဇ, မေဃဿ ပဉ္စမံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ –

‘‘‘ဗောဓနေယျံ ဇနံ ဒိသွာ၊ သတသဟဿေပိ ယောဇနေ။

ခဏေန ဥပဂန္တွာန၊ ဗောဓေတိ တံ မဟာမုနီ’’’တိ။

မေဃင်္ဂပဉ္ဟော ဆဋ္ဌော။

၇။ မဏိရတနင်္ဂပဉ္ဟော

၇။ ‘‘ဘန္တေ နာဂသေန, ‘မဏိရတနဿ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ တီဏိ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, မဏိရတနံ ဧကန္တပရိသုဒ္ဓံ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဧကန္တပရိသုဒ္ဓါဇီဝေန ဘဝိတဗ္ဗံ။ ဣဒံ, မဟာရာဇ, မဏိရတနဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, မဏိရတနံ န ကေနစိ သဒ္ဓိံ မိဿီယတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ပါပေဟိ ပါပသဟာယေဟိ သဒ္ဓိံ န မိဿိတဗ္ဗံ။ ဣဒံ, မဟာရာဇ, မဏိရတနဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, မဏိရတနံ ဇာတိရတနေဟိ ယောဇီယတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဥတ္တမဝရဇာတိမန္တေဟိ သဒ္ဓိံ သံဝသိတဗ္ဗံ, ပဋိပန္နကဖလဋ္ဌသေက္ခဖလသမင်္ဂီဟိ သောတာပန္နသကဒါဂါမိအနာဂါမိအရဟန္တတေဝိဇ္ဇဆဠဘိညသမဏမဏိရတနေဟိ သဒ္ဓိံ သံဝသိတဗ္ဗံ။ ဣဒံ, မဟာရာဇ, မဏိရတနဿ တတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန သုတ္တနိပါတေ –

‘‘‘သုဒ္ဓါ သုဒ္ဓေဟိ သံဝါသံ၊ ကပ္ပယဝ္ဟော ပတိဿတာ။

တတော သမဂ္ဂါ နိပကာ၊ ဒုက္ခဿန္တံ ကရိဿထာ’’’တိ။

မဏိရတနပဉ္ဟော သတ္တမော။

၈။ မာဂဝိကင်္ဂပဉ္ဟော

၈။ ‘‘ဘန္တေ နာဂသေန, ‘မာဂဝိကဿ စတ္တာရိ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ စတ္တာရိ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, မာဂဝိကော အပ္ပမိဒ္ဓေါ ဟောတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အပ္ပမိဒ္ဓေန ဘဝိတဗ္ဗံ။ ဣဒံ, မဟာရာဇ, မာဂဝိကဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, မာဂဝိကော မိဂေသု ယေဝ စိတ္တံ ဥပနိဗန္ဓတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အာရမ္မဏေသု ယေဝ စိတ္တံ ဥပနိဗန္ဓိတဗ္ဗံ။ ဣဒံ, မဟာရာဇ, မာဂဝိကဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, မာဂဝိကော ကာလံ ကမ္မဿ ဇာနာတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ပဋိသလ္လာနဿ ကာလော ဇာနိတဗ္ဗော ‘အယံ ကာလော ပဋိသလ္လာနဿ, အယံ ကာလော နိက္ခမနာယာ’တိ။ ဣဒံ, မဟာရာဇ, မာဂဝိကဿ တတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, မာဂဝိကော မိဂံ ဒိသွာ ဟာသမဘိဇနေတိ ‘ဣမံ လစ္ဆာမီ’တိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အာရမ္မဏေ အဘိရမိတဗ္ဗံ, ဟာသမဘိဇနေတဗ္ဗံ ‘ဥတ္တရိံ ဝိသေသမဓိဂစ္ဆိဿာမီ’တိ။ ဣဒံ, မဟာရာဇ, မာဂဝိကဿ စတုတ္ထံ အင်္ဂံ ဂဟေတဗ္ဗံ။ ဘာသိတမ္ပေတံ မဟာရာဇ ထေရေန မောဃရာဇေန –

‘‘‘အာရမ္မဏေ လဘိတွာန၊ ပဟိတတ္တေန ဘိက္ခုနာ။

ဘိယျော ဟာသော ဇနေတဗ္ဗော၊ အဓိဂစ္ဆိဿာမိ ဥတ္တရိ’’’န္တိ။

မာဂဝိကင်္ဂပဉ္ဟော အဋ္ဌမော။

၉။ ဗာဠိသိကင်္ဂပဉ္ဟော

၉။ ‘‘ဘန္တေ နာဂသေန, ‘ဗာဠိသိကဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဗာဠိသိကော ဗဠိသေန မစ္ဆေ ဥဒ္ဓရတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဉာဏေန ဥတ္တရိံ သာမညဖလာနိ ဥဒ္ဓရိတဗ္ဗာနိ။ ဣဒံ, မဟာရာဇ, ဗာဠိသိကဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဗာဠိသိကော ပရိတ္တကံ ဝဓိတွာ ဝိပုလံ လာဘမဓိဂစ္ဆတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ပရိတ္တလောကာမိသမတ္တံ ပရိစ္စဇိတဗ္ဗံ။ လောကာမိသမတ္တံ, မဟာရာဇ, ပရိစ္စဇိတွာ ယောဂီ ယောဂါဝစရော ဝိပုလံ သာမညဖလံ အဓိဂစ္ဆတိ။ ဣဒံ, မဟာရာဇ, ဗာဠိသိကဿ ဒုတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန ရာဟုလေန –

‘‘‘သုညတဉ္စာနိမိတ္တဉ္စ၊ ဝိမောက္ခဉ္စာပ္ပဏိဟိတံ။

စတုရော ဖလေ ဆဠဘိညာ၊ စဇိတွာ လောကာမိသံ လဘေ’’’တိ။

ဗာဠိသိကင်္ဂပဉ္ဟော နဝမော။

၁၀။ တစ္ဆကင်္ဂပဉ္ဟော

၁၀။ ‘‘ဘန္တေ နာဂသေန, ‘တစ္ဆကဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, တစ္ဆကော ကာဠသုတ္တံ အနုလောမေတွာ ရုက္ခံ တစ္ဆတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဇိနသာသနမနုလောမယိတွာ သီလပထဝိယံ ပတိဋ္ဌဟိတွာ သဒ္ဓါဟတ္ထေန ပညာဝါသိံ ဂဟေတွာ ကိလေသာ တစ္ဆေတဗ္ဗာ။ ဣဒံ, မဟာရာဇ, တစ္ဆကဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, တစ္ဆကော ဖေဂ္ဂုံ အပဟရိတွာ သာရမာဒိယတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သဿတံ ဥစ္ဆေဒံ တံ ဇီဝံ တံ သရီရံ အညံ ဇီဝံ အညံ သရီရံ တဒုတ္တမံ အညဒုတ္တမံ အကတမဘဗ္ဗံ အပုရိသကာရံ အဗြဟ္မစရိယဝါသံ သတ္တဝိနာသံ နဝသတ္တပါတုဘာဝံ သင်္ခါရသဿတဘာဝံ ယော ကရောတိ, သော ပဋိသံဝေဒေတိ, အညော ကရောတိ, အညော ပဋိသံဝေဒေတိ, ကမ္မဖလဒဿနာ စ ကိရိယဖလဒိဋ္ဌိ စ ဣတိ ဧဝရူပါနိ စေဝ အညာနိ စ ဝိဝါဒပထာနိ အပနေတွာ သင်္ခါရာနံ သဘာဝံ ပရမသုညတံ နိရီဟနိဇ္ဇီဝတံ [နိသတ္တနိဇီဝတံ (က။)] အစ္စန္တံ သုညတံ အာဒိယိတဗ္ဗံ။ ဣဒံ, မဟာရာဇ, တစ္ဆကဿ ဒုတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန သုတ္တနိပါတေ –

‘‘‘ကာရဏ္ဍဝံ နိဒ္ဓမထ၊ ကသမ္ဗုံ အပကဿထ။

တတော ပလာပေ ဝါဟေထ၊ အဿမဏေ သမဏမာနိနေ။

‘‘‘နိဒ္ဓမိတွာန ပါပိစ္ဆေ၊ ပါပအာစာရဂေါစရေ။

သုဒ္ဓါ သုဒ္ဓေဟိ သံဝါသံ၊ ကပ္ပယဝ္ဟော ပတိဿတာ။

တတော သမဂ္ဂါ နိပကာ၊ ဒုက္ခဿန္တံ ကရိဿထာ’’’တိ။

တစ္ဆကင်္ဂပဉ္ဟော ဒသမော။

မက္ကဋကဝဂ္ဂေါ ဆဋ္ဌော။

တဿုဒ္ဒါနံ –

မက္ကဋော ဒါရကော ကုမ္မော၊ ဝနံ ရုက္ခော စ ပဉ္စမော။

မေဃော မဏိ မာဂဝိကော၊ ဗာဠိသီ တစ္ဆကေန စာတိ။

၇။ ကုမ္ဘဝဂ္ဂေါ

၁။ ကုမ္ဘင်္ဂပဉ္ဟော

၁။ ‘‘ဘန္တေ နာဂသေန, ‘ကုမ္ဘဿ ဧကံ အင်္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင်္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ကုမ္ဘော သမ္ပုဏ္ဏော န သဏတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန အာဂမေ အဓိဂမေ ပရိယတ္တိယံ သာမညေ ပါရမိံ ပတွာ န သဏိတဗ္ဗံ, န တေန မာနော ကရဏီယော, န ဒဗ္ဗော [ဒပ္ပော (သီ။)] ဒဿေတဗ္ဗော, နိဟတမာနေန နိဟတဒဗ္ဗေန ဘဝိတဗ္ဗံ, ဥဇုကေန အမုခရေန အဝိကတ္ထိနာ။ ဣဒံ, မဟာရာဇ, ကုမ္ဘဿ ဧကံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန သုတ္တနိပါတေ –

‘‘‘ယဒူနကံ တံ သဏတိ၊ ယံ ပူရံ သန္တမေဝ တံ။

အဍ္ဎကုမ္ဘူပမော [ရိတ္တကုမ္ဘူပမော (သီ။)] ဗာလော၊ ရဟဒေါ ပူရောဝ ပဏ္ဍိတော’’’တိ။

ကုမ္ဘင်္ဂပဉ္ဟော ပဌမော။

၂။ ကာဠာယသင်္ဂပဉ္ဟော

၂။ ‘‘ဘန္တေ နာဂသေန, ‘ကာဠာယသဿ [ကာဠဟံသဿ (က။)] ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ ? ‘‘ယထာ, မဟာရာဇ, ကာဠာယသော သုဣတော [သုထိတော (က။)] ဝမတိ [ဝဟတိ (သျာ။ က။)], ဧဝမေဝ ခေါ, မဟာရာဇ, ယောဂိနော ယောဂါဝစရဿ မာနသံ ယောနိသော မနသိကာရေန [ယောနိသော မနသိကာရေ (သီ။ သျာ။ က။)] အဣတံ ဝမတိ။ ဣဒံ, မဟာရာဇ, ကာဠာယသဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ကာဠာယသော သကိံ ဣတံ ဥဒကံ န ဝမတိ, ဧဝမေဝ ခေါ, မဟာရာဇ , ယောဂိနာ ယောဂါဝစရေန ယော သကိံ ဥပ္ပန္နော ပသာဒေါ, န ပုန သော ဝမိတဗ္ဗော ‘ဥဠာရော သော ဘဂဝါ သမ္မာသမ္ဗုဒ္ဓေါ, သွာက္ခာတော ဓမ္မော, သုပ္ပဋိပန္နော သံဃော’တိ။ ‘ရူပံ အနိစ္စံ, ဝေဒနာ အနိစ္စာ, သညာ အနိစ္စာ, သင်္ခါရာ အနိစ္စာ, ဝိညာဏံ အနိစ္စန္တိ ယံ သကိံ ဥပ္ပန္နံ ဉာဏံ, န ပုန တံ ဝမိတဗ္ဗံ။ ဣဒံ , မဟာရာဇ, ကာဠာယသဿ ဒုတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန –

‘‘‘ဒဿနမှိ ပရိသောဓိတော [ပရိသောဓိကေ (သီ။ က။)] နရော၊ အရိယဓမ္မေ နိယတော ဝိသေသဂူ။

နပ္ပဝေဓတိ အနေကဘာဂသော၊ သဗ္ဗသော စ မုခဘာဝမေဝ သော’’’တိ။

ကာဠာယသင်္ဂပဉ္ဟော ဒုတိယော။

၃။ ဆတ္တင်္ဂပဉ္ဟော

၃။ ‘‘ဘန္တေ နာဂသေန, ‘ဆတ္တဿ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ တီဏိ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဆတ္တံ ဥပရိ မုဒ္ဓနိ စရတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ကိလေသာနံ ဥပရိ မုဒ္ဓနိ စရေန ဘဝိတဗ္ဗံ။ ဣဒံ, မဟာရာဇ, ဆတ္တဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဆတ္တံ မုဒ္ဓနုပတ္ထမ္ဘံ ဟောတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ယောနိသော မနသိကာရုပတ္ထမ္ဘေန ဘဝိတဗ္ဗံ။ ဣဒံ, မဟာရာဇ, ဆတ္တဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဆတ္တံ ဝါတာတပမေဃဝုဋ္ဌိယော ပဋိဟနတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန နာနာဝိဓဒိဋ္ဌိပုထုသမဏဗြာဟ္မဏာနံ [မဟာဝါတ (က။)] မတဝါတတိဝိဓဂ္ဂိသန္တာပကိလေသဝုဋ္ဌိယော ပဋိဟန္တဗ္ဗာ ။ ဣဒံ, မဟာရာဇ, ဆတ္တဿ တတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ –

‘‘‘ယထာပိ ဆတ္တံ ဝိပုလံ၊ အစ္ဆိဒ္ဒံ ထိရသံဟိတံ။

ဝါတာတပံ နိဝါရေတိ၊ မဟတီ မေဃဝုဋ္ဌိယော။

‘‘‘တထေဝ ဗုဒ္ဓပုတ္တောပိ၊ သီလဆတ္တဓရော သုစိ။

ကိလေသဝုဋ္ဌိံ ဝါရေတိ၊ သန္တာပတိဝိဓဂ္ဂယော’’’တိ။

ဆတ္တင်္ဂပဉ္ဟော တတိယော။

၄။ ခေတ္တင်္ဂပဉ္ဟော

၄။ ‘‘ဘန္တေ နာဂသေန, ‘ခေတ္တဿ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ တီဏိ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ခေတ္တံ မာတိကာသမ္ပန္နံ ဟောတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သုစရိတဝတ္တပ္ပဋိဝတ္တမာတိကာသမ္ပန္နေန ဘဝိတဗ္ဗံ။ ဣဒံ, မဟာရာဇ, ခေတ္တဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ခေတ္တံ မရိယာဒါသမ္ပန္နံ ဟောတိ, တာယ စ မရိယာဒါယ ဥဒကံ ရက္ခိတွာ ဓညံ ပရိပါစေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သီလဟိရိမရိယာဒါသမ္ပန္နေန ဘဝိတဗ္ဗံ, တာယ စ သီလဟိရိမရိယာဒါယ သာမညံ ရက္ခိတွာ စတ္တာရိ သာမညဖလာနိ ဂဟေတဗ္ဗာနိ။ ဣဒံ, မဟာရာဇ, ခေတ္တဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ခေတ္တံ ဥဋ္ဌာနသမ္ပန္နံ ဟောတိ, ကဿကဿ ဟာသဇနကံ အပ္ပမ္ပိ ဗီဇံ ဝုတ္တံ ဗဟု ဟောတိ, ဗဟု ဝုတ္တံ ဗဟုတရံ ဟောတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဥဋ္ဌာနသမ္ပန္နေန ဝိပုလဖလဒါယိနာ ဘဝိတဗ္ဗံ, ဒါယကာနံ ဟာသဇနကေန ဘဝိတဗ္ဗံ, ယထာ အပ္ပံ ဒိန္နံ ဗဟု ဟောတိ, ဗဟု ဒိန္နံ ဗဟုတရံ ဟောတိ။ ဣဒံ, မဟာရာဇ, ခေတ္တဿ တတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန ဥပါလိနာ ဝိနယဓရေန –

‘‘‘ခေတ္တူပမေန ဘဝိတဗ္ဗံ၊ ဥဋ္ဌာနဝိပုလဒါယိနာ။

ဧသ ခေတ္တဝရော နာမ၊ ယော ဒဒါတိ ဝိပုလံ ဖလ’’’န္တိ။

ခေတ္တင်္ဂပဉ္ဟော စတုတ္ထော။

၅။ အဂဒင်္ဂပဉ္ဟော

၅။ ‘‘ဘန္တေ နာဂသေန, ‘အဂဒဿ ဒွေ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒွေ အင်္ဂါနိ ဂဟေတဗ္ဗာနီ’’တိ။ ‘‘ယထာ, မဟာရာဇ, အဂဒေ ကိမီ န သဏ္ဌဟန္တိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန မာနသေ ကိလေသာ န သဏ္ဌပေတဗ္ဗာ။ ဣဒံ, မဟာရာဇ, အဂဒဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, အဂဒေါ ဒဋ္ဌဖုဋ္ဌဒိဋ္ဌအသိတဣတခါယိတသာယိတံ သဗ္ဗံ ဝိသံ ပဋိဟနတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ရာဂဒေါသမောဟမာနဒိဋ္ဌိဝိသံ သဗ္ဗံ ပဋိဟနိတဗ္ဗံ။ ဣဒံ, မဟာရာဇ, အဂဒဿ ဒုတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန –

‘‘‘သင်္ခါရာနံ သဘာဝတ္ထံ၊ ဒဋ္ဌုကာမေန ယောဂိနာ။

အဂဒေနေဝ ဟောတဗ္ဗံ၊ ကိလေသဝိသနာသနေ’’’တိ။

အဂဒင်္ဂပဉ္ဟော ပဉ္စမော။

၆။ ဘောဇနင်္ဂပဉ္ဟော

၆။ ‘‘ဘန္တေ နာဂသေန, ‘ဘောဇနဿ တီဏိ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ တီဏိ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဘောဇနံ သဗ္ဗသတ္တာနံ ဥပတ္ထမ္ဘော, ဧဝမေဝ ခေါ, မဟာရာဇ, ယောဂိနာ ယောဂါဝစရေန သဗ္ဗသတ္တာနံ မဂ္ဂုပတ္ထမ္ဘေန ဘဝိတဗ္ဗံ။ ဣဒံ, မဟာရာဇ, ဘောဇနဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဘောဇနံ သဗ္ဗသတ္တာနံ ဗလံ ဝဍ္ဎေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ပုညဝဍ္ဎိယာ ဝဍ္ဎိတဗ္ဗံ။ ဣဒံ, မဟာရာဇ, ဘောဇနဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဘောဇနံ သဗ္ဗသတ္တာနံ အဘိပတ္ထိတံ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သဗ္ဗလောကာဘိပတ္ထိတေန ဘဝိတဗ္ဗံ။ ဣဒံ, မဟာရာဇ, ဘောဇနဿ တတိယံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန မဟာမောဂ္ဂလ္လာနေန –

‘‘‘သံယမေန နိယမေန၊ သီလေန ပဋိပတ္တိယာ။

ပတ္ထိတေန ဘဝိတဗ္ဗံ၊ သဗ္ဗလောကဿ ယောဂိနာ’’’တိ။

ဘောဇနင်္ဂပဉ္ဟော ဆဋ္ဌော။

၇။ ဣဿာသင်္ဂပဉ္ဟော

၇။ ‘‘ဘန္တေ နာဂသေန, ‘ဣဿာသဿ စတ္တာရိ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ စတ္တာရိ အင်္ဂါနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဣဿာသော သရေ ပါတယန္တော ဥဘော ပါဒေ ပထဝိယံ ဒဠှံ ပတိဋ္ဌာပေတိ, ဇဏ္ဏုအဝေကလ္လံ ကရောတိ, သရကလာပံ ကဋိသန္ဓိမှိ ဌပေတိ, ကာယံ ဥပတ္ထဒ္ဓံ ကရောတိ, ဒွေ ဟတ္ထေ သန္ဓိဋ္ဌာနံ အာရောပေတိ, မုဋ္ဌိံ ဣဠယတိ, အင်္ဂုလိယော နိရန္တရံ ကရောတိ, ဂီဝံ ပဂ္ဂဏှာတိ, စက္ခူနိ မုခဉ္စ ပိဒဟတိ, နိမိတ္တံ ဥဇုံ ကရောတိ, ဟာသမုပ္ပါဒေတိ ‘ဝိဇ္ဈိဿာမီ’တိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန သီလပထဝိယံ ဝီရိယပါဒေ ပတိဋ္ဌာပေတဗ္ဗံ, ခန္တိသောရစ္စံ အဝေကလ္လံ ကာတဗ္ဗံ, သံဝရေ စိတ္တံ ဌပေတဗ္ဗံ, သံယမနိယမေ အတ္တာ ဥပနေတဗ္ဗော, ဣစ္ဆာ မုစ္ဆာ ဣဠယိတဗ္ဗာ, ယောနိသော မနသိကာရေ စိတ္တံ နိရန္တရံ ကာတဗ္ဗံ, ဝီရိယံ ပဂ္ဂဟေတဗ္ဗံ, ဆ ဒွါရာ ပိဒဟိတဗ္ဗာ, သတိ ဥပဋ္ဌပေတဗ္ဗာ, ဟာသမုပ္ပါဒေတဗ္ဗံ ‘သဗ္ဗကိလေသေ ဉာဏနာရာစေန ဝိဇ္ဈိဿာမီ’တိ။ ဣဒံ, မဟာရာဇ, ဣဿာသဿ ပဌမံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဣဿာသော အာဠကံ ပရိဟရတိ ဝင်္ကဇိမှကုဋိလနာရာစဿ ဥဇုကရဏာယ။ ဧဝမေဝ ခေါ, မဟာရာဇ, ယောဂိနာ ယောဂါဝစရေန ဣမသ္မိံ ကာယေ သတိပဋ္ဌာနအာဠကံ ပရိဟရိတဗ္ဗံ ဝင်္ကဇိမှကုဋိလစိတ္တဿ ဥဇုကရဏာယ။ ဣဒံ, မဟာရာဇ, ဣဿာသဿ ဒုတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဣဿာသော လက္ခေ ဥပါသေတိ, ဧဝမေဝ ခေါ, မဟာရာဇ, ယောဂိနာ ယောဂါဝစရေန ဣမသ္မိံ ကာယေ ဥပါသိတဗ္ဗံ။ ကထံ မဟာရာဇ ယောဂိနာ ယောဂါဝစရေန ဣမသ္မိံ ကာယေ ဥပါသိတဗ္ဗံ? အနိစ္စတော ဥပါသိတဗ္ဗံ, ဒုက္ခတော ဥပါသိတဗ္ဗံ, အနတ္တတော ဥပါသိတဗ္ဗံ, ရောဂတော။ပေ။။ ဂဏ္ဍတော။ပေ။။ သလ္လတော။ပေ။။ အဃတော။ပေ။။ အာဗာဓတော။ပေ။။ ပရတော။ပေ။။ ပလောကတော။ပေ။။ ဤတိတော။ပေ။။ ဥပဒ္ဒဝတော။ပေ။။ ဘယတော။ပေ။။ ဥပသဂ္ဂတော။ပေ။။ စလတော။ပေ။။ ပဘင်္ဂုတော။ပေ။။ အဒ္ဓုဝတော။ပေ။။ အတာဏတော။ပေ။။ အလေဏတော။ပေ။။ အသရဏတော။ပေ။။ ရိတ္တတော။ပေ။။ တုစ္ဆတော။ပေ။။ သုညတော။ပေ။။ အာဒီနဝတော။ပေ။။ ဝိပရိဏာမဓမ္မတော။ပေ။။ အသာရတော ။ပေ။။ အဃမူလတော။ပေ။။ ဝဓကတော။ပေ။။ ဝိဘဝတော။ပေ။။ သာသဝတော။ပေ။။ သင်္ခတတော။ပေ။။ မာရာမိသတော။ပေ။။ ဇာတိဓမ္မတော။ပေ။။ ဇရာဓမ္မတော။ပေ။။ ဗျာဓိဓမ္မတော။ပေ။။ မရဏဓမ္မတော။ပေ။။ သောကဓမ္မတော။ပေ။။ ပရိဒေဝဓမ္မတော။ပေ။။ ဥပါယာသဓမ္မတော။ပေ။။ သံကိလေသဓမ္မတော။ပေ။။ ဧဝံ ခေါ, မဟာရာဇ, ယောဂိနာ ယောဂါဝစရေန ဣမသ္မိံ ကာယေ ဥပါသိတဗ္ဗံ။ ဣဒံ, မဟာရာဇ, ဣဿာသဿ တတိယံ အင်္ဂံ ဂဟေတဗ္ဗံ။

‘‘ပုန စပရံ, မဟာရာဇ, ဣဿာသော သာယံ ပါတံ ဥပါသတိ။ ဧဝမေဝ ခေါ, မဟာရာဇ, ယောဂိနာ ယောဂါဝစရေန သာယံ ပါတံ အာရမ္မဏေ ဥပါသိတဗ္ဗံ။ ဣဒံ, မဟာရာဇ, ဣဿာသဿ စတုတ္ထံ အင်္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ –

‘‘‘ယထာ ဣဿာသကော နာမ၊ သာယံ ပါတံ ဥပါသတိ။

ဥပါသနံ အရိဉ္စန္တော [န ရိစ္ဆန္တော (သီ။ က။)]၊ လဘတေ ဘတ္တဝေတနံ။

‘‘‘တထေဝ ဗုဒ္ဓပုတ္တောပိ၊ ကရောတိ ကာယုပါသနံ။

ကာယုပါသနံ အရိဉ္စန္တော၊ အရဟတ္တမဓိဂစ္ဆတီ’’’တိ။

ဣဿာသင်္ဂပဉ္ဟော သတ္တမော။

ကုမ္ဘဝဂ္ဂေါ သတ္တမော [ဣတော ပရံ ရာဇင်္ဂပဉှာဒိကာ အဋ္ဌတိံသ ပဉှာ ဝိနဋ္ဌာ, ယေဟိ တာ ဒိဋ္ဌာ,§တေဟိ နော အာရောစေတဗ္ဗာ ပုန မုဒ္ဒါပနကာလေ ပက္ခိပနတ္ထာယာတိ (န, ဗု, သ)]။

တဿုဒ္ဒါနံ –

ကုမ္ဘော စ ကာဠာယသော စ၊ ဆတ္တံ ခေတ္တဉ္စ အဂဒေါ။

ဘောဇနေန စ ဣဿာသော၊ ဝုတ္တံ ဒါနိ ဝိဒူဟီတိ။

ဩပမ္မကထာပဉ္ဟော နိဋ္ဌိတော။

နိဂမနံ

ဣတိ ဆသု ကဏ္ဍေသု ဗာဝီသတိဝဂ္ဂပတိမဏ္ဍိတေသု ဒွါသဋ္ဌိအဓိကာ ဒွေသတာ ဣမသ္မိံ ပေါတ္ထကေ အာဂတာ မိလိန္ဒပဉှာ သမတ္တာ, အနာဂတာ စ ပန ဒွါစတ္တာလီသာ ဟောန္တိ, အာဂတာ စ အနာဂတာ စ သဗ္ဗာ သမောဓါနေတွာ စတူဟိ အဓိကာ တိသတပဉှာ ဟောန္တိ, သဗ္ဗာဝ မိလိန္ဒပဉှာတိ သင်္ခံ ဂစ္ဆန္တိ။

ရညော စ ထေရဿ စ ပုစ္ဆာဝိသဇ္ဇနာဝသာနေ စတုရာသီတိသတသဟဿယောဇနဗဟလာ ဥဒကပရိယန္တံ ကတွာ အယံ မဟာပထဝီ ဆဓါ ကမ္ပိတ္ထ, ဝိဇ္ဇုလ္လတာ နိစ္ဆရိံသု, ဒေဝတာ ဒိဗ္ဗပုပ္ဖဝဿံ ပဝဿိံသု, မဟာဗြဟ္မာ သာဓုကာရမဒါသိ, မဟာသမုဒ္ဒကုစ္ဆိယံ မေဃတ္ထနိတနိဂ္ဃောသော ဝိယ မဟာဃောသော အဟောသိ, ဣတိ သော မိလိန္ဒော ရာဇာ စ ဩရောဓဂဏာ စ သိရသာ အဉ္ဇလိံ ပဏာမေတွာ ဝန္ဒိံသု။

မိလိန္ဒော ရာဇာ အတိဝိယ ပမုဒိတဟဒယော သုမထိတမာနဟဒယော ဗုဒ္ဓသာသနေ သာရမတိနော ရတနတ္တယေ သုနိက္ကင္ခော နိဂ္ဂုမ္ဗော နိတ္ထဒ္ဓေါ ဟုတွာ ထေရဿ ဂုဏေသု ပဗ္ဗဇ္ဇာသု ပဋိပဒါဣရိယာပထေသု စ အတိဝိယ ပသန္နော ဝိဿတ္ထော နိရာလယော နိဟတမာနတ္ထမ္ဘော ဥဒ္ဓဋဒါဌော ဝိယ ဘုဇဂိန္ဒော ဧဝမာဟ ‘‘သာဓု, ဘန္တေ နာဂသေန, ဗုဒ္ဓဝိသယော ပဉ္ဟော တယာ ဝိသဇ္ဇိတော, ဣမသ္မိံ ဗုဒ္ဓသာသနေ ဌပေတွာ ဓမ္မသေနာပတိံ သာရိပုတ္တတ္ထေရံ အညော တယာ သဒိသော ပဉ္ဟဝိသဇ္ဇနေ နတ္ထိ, ခမထ, ဘန္တေ နာဂသေန, မမ အစ္စယံ, ဥပါသကံ မံ, ဘန္တေ နာဂသေန, ဓါရေထ အဇ္ဇတဂ္ဂေ ပါဏုပေတံ သရဏံ ဂတ’’န္တိ။

တဒါ ရာဇာ သဟ ဗလကာယေဟိ နာဂသေနတ္ထေရံ ပယိရုပါသိတွာ မိလိန္ဒံ နာမ ဝိဟာရံ ကာရေတွာ ထေရဿ နိယျာတေတွာ စတူဟိ ပစ္စယေဟိ နာဂသေနံ ကောဋိသတေဟိ ဘိက္ခူဟိ သဒ္ဓိံ ပရိစရိ, ပုနပိ ထေရဿ ပညာယ ပသီဒိတွာ ပုတ္တဿ ရဇ္ဇံ နိယျာတေတွာ အဂါရသ္မာ အနဂါရိယံ ပဗ္ဗဇိတွာ ဝိပဿနံ ဝဍ္ဎေတွာ အရဟတ္တံ ပါပုဏိ, တေန ဝုတ္တံ –

‘‘ပညာ ပသတ္ထာ လောကသ္မိံ၊ ကတာ သဒ္ဓမ္မဋ္ဌိတိယာ။

ပညာယ ဝိမတိံ ဟန္တွာ၊ သန္တိံ ပပ္ပောန္တိ ပဏ္ဍိတာ။

ယသ္မိံ ခန္ဓေ ဌိတာ ပညာ၊ သတိ တတ္ထ အနူနကာ။

ပူဇာ ဝိသေသဿာဓါရော၊ အဂ္ဂေါ သေဋ္ဌော [သော ဝ (ဣ။)] အနုတ္တရော။

တသ္မာ ဟိ ပဏ္ဍိတော ပေါသော၊ သမ္ပဿံ ဟိတမတ္တနော [အတ္ထမတ္တနော (ဣ။)]။

ပညဝန္တံဘိပူဇေယျ၊ စေတိယံ ဝိယ သာဒရော’’တိ [ပူဇိယန္တိ (ဣ။) ဣတော ပရံ တိဿော ဂါထာယော သီ။ ဣ။ ပေါတ္ထကေသု နတ္ထိ]။

လင်္ကာယံ ဒေါဏိနဂရေ၊ ဝသတာ ဒေါဏိနာမိနာ။

မဟာထေရေန လေခိတွာ၊ သုဋ္ဌပိတံ ယထာသုတံ။

မိလိန္ဒရာဇပဉ္ဟော စ၊ နာဂသေနဝိသဇ္ဇနံ။

မိလိန္ဒော ဟိ မဟာပညော၊ နာဂသေနော သုပဏ္ဍိတော။

ဣမိနာ ပုညကမ္မေန၊ ဣတော ဂစ္ဆာမိ တုဿိတံ။

မေတ္တေယျံနာဂတေ ပဿေ၊ သုဏေယျံ ဓမ္မမုတ္တမန္တိ။

မိလိန္ဒပဉ္ဟော နိဋ္ဌိတော။

၁။ ဗုဒ္ဓဝဂ္ဂ

၁။ ဒွိန္နံ ဗုဒ္ဓါနံ အနုပ္ပဇ္ဇမာနပဥှ

၁။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘အဋ္ဌာနမေတံ, ဘိက္ခဝေ, အနဝကာသော, ယံ ဧကိဿာ လောကဓါတုယာ ဒွေ အရဟန္တော သမ္မာသမ္ဗုဒ္ဓေါ အပုဗ္ဗံ အစရိမံ ဥပ္ပဇ္ဇေယျုံ, နေတံ ဌာနံ ဝိဇ္ဇတီ’တိ။ ဒေသေန္တာ စ, ဘန္တေ နာဂသေန, သဗ္ဗေပိ တထာဂတာ သတ္တတိံသ ဗောဓိပက္ခိယဓမ္မေ ဒေသေန္တိ, ကထယမာနာ စ စတ္တာရိ အရိယသစ္စာနိ ကထေန္တိ, သိက္ခာပေန္တာ စ တီသု သိက္ခာသု သိက္ခာပေန္တိ, အနုသာသမာနာ စ အပ္ပမာဒပ္ပဋိပတ္တိယံ အနုသာသန္တိ။ ယဒိ, ဘန္တေ နာဂသေန, သဗ္ဗေသမ္ပိ တထာဂတာနံ ဧကာ ဒေသနာ ဧကာ ကထာ ဧကာ သိက္ခာ ဧကာ အနုသိဋ္ဌိ, ကေန ကာရဏေန ဒွေ တထာဂတာ ဧကက္ခဏေ နုပ္ပဇ္ဇန္တိ? ဧကေနပိ တာဝ ဗုဒ္ဓုပ္ပါဒေန အယံ လောကော ဩဘာသဇာတော, ယဒိ ဒုတိယော ဗုဒ္ဓေါ ဘဝေယျ, ဒွိန္နံ ပဘာယ အယံ လောကော ဘိယျောသောမတ္တာယ ဩဘာသဇာတော ဘဝေယျ, ဩဝဒမာနာ စ ဒွေ တထာဂတာ သုခံ ဩဝဒေယျုံ, အနုသာသမာနာ စ သုခံ အနုသာသေယျုံ, တတ္ထ မေ ကာရဏံ ဗြူဟိ, ယထာဟံ နိဿံသယော ဘဝေယျ’’န္တိ။

‘‘အယံ, မဟာရာဇ, ဒသသဟဿီ လောကဓါတု ဧကဗုဒ္ဓဓါရဏီ, ဧကဿေဝ တထာဂတဿ ဂုဏံ ဓါရေတိ, ယဒိ ဒုတိယော ဗုဒ္ဓေါ ဥပ္ပဇ္ဇေယျ, နာယံ ဒသသဟဿီ လောကဓါတု ဓါရေယျ, စလေယျ ကမ္ပေယျ နမေယျ ဩနမေယျ ဝိနမေယျ ဝိကိရေယျ ဝိဓမေယျ ဝိဒ္ဓံသေယျ, န ဌာနမုပဂစ္ဆေယျ။

‘‘ယထာ, မဟာရာဇ, နာဝါ ဧကပုရိသသန္ဓာရဏီ [ဧကပုရိသသန္တာရဏီ (သီ။ ဣ။)] ဘဝေယျ, ဧကသ္မိံ ပုရိသေ အဘိရူဠ္ဟေ သာ နာဝါ သမုပါဒိကာ [သမုဒကာ (က။)] ဘဝေယျ။ အထ ဒုတိယော ပုရိသော အာဂစ္ဆေယျ တာဒိသော အာယုနာ ဝဏ္ဏေန ဝယေန ပမာဏေန ကိသထူလေန သဗ္ဗင်္ဂပစ္စင်္ဂေန, သော တံ နာဝံ အဘိရူဟေယျ, အပိ နု သာ, မဟာရာဇ, နာဝါ ဒွိန္နမ္ပိ ဓါရေယျာ’’တိ? ‘‘န ဟိ, ဘန္တေ, စလေယျ ကမ္ပေယျ နမေယျ ဩနမေယျ ဝိနမေယျ ဝိကိရေယျ ဝိဓမေယျ ဝိဒ္ဓံသေယျ, န ဌာနမုပဂစ္ဆေယျ, ဩသီဒေယျ ဥဒကေ’’တိ။ ‘‘ဧဝမေဝ ခေါ, မဟာရာဇ, အယံ ဒသသဟဿီ လောကဓါတု ဧကဗုဒ္ဓဓါရဏီ, ဧကဿေဝ တထာဂတဿ ဂုဏံ ဓါရေတိ, ယဒိ ဒုတိယော ဗုဒ္ဓေါ ဥပ္ပဇ္ဇေယျ, နာယံ ဒသသဟဿီ လောကဓါတု ဓါရေယျ, စလေယျ ကမ္ပေယျ နမေယျ ဩနမေယျ ဝိနမေယျ ဝိကိရေယျ ဝိဓမေယျ ဝိဒ္ဓံသေယျ, န ဌာနမုပဂစ္ဆေယျ။

‘‘ယထာ ဝါ ပန, မဟာရာဇ, ပုရိသော ယာဝဒတ္ထံ ဘောဇနံ ဘုဉ္ဇေယျ ဆာဒေန္တံ ယာဝ ကဏ္ဌမဘိပူရယိတွာ, သော ဓါတော ဣဏိတော ပရိပုဏ္ဏော နိရန္တရော တန္ဒိကတော အနောနမိတဒဏ္ဍဇာတော ပုနဒေဝ တတ္တကံ ဘောဇနံ ဘုဉ္ဇေယျ, အပိ နု ခေါ သော, မဟာရာဇ, ပုရိသော သုခိတော ဘဝေယျာ’’တိ? ‘‘န ဟိ, ဘန္တေ, သကိံ ဘုတ္တောဝ မရေယျာ’’တိ [ဘုတ္တော ဝမေယျာတိ (က။)]။ ‘‘ဧဝမေဝ ခေါ, မဟာရာဇ, အယံ ဒသသဟဿီ လောကဓါတု ဧကဗုဒ္ဓဓါရဏီ, ဧကဿေဝ တထာဂတဿ ဂုဏံ ဓါရေတိ, ယဒိ ဒုတိယော ဗုဒ္ဓေါ ဥပ္ပဇ္ဇေယျ, နာယံ ဒသသဟဿီ လောကဓါတု ဓါရေယျ, စလေယျ ကမ္ပေယျ နမေယျ ဩနမေယျ ဝိနမေယျ ဝိကိရေယျ ဝိဓမေယျ ဝိဒ္ဓံသေယျ, န ဌာနမုပဂစ္ဆေယျာ’’တိ။

‘‘ကိံ နု ခေါ, ဘန္တေ နာဂသေန, အတိဓမ္မဘာရေန ပထဝီ စလတီ’’တိ? ‘‘ဣဓ, မဟာရာဇ, ဒွေ သကဋာ ရတနပရိပူရိတာ ဘဝေယျုံ ယာဝ မုခသမာ, ဧကသ္မာ သကဋတော ရတနံ ဂဟေတွာ ဧကသ္မိံ သကဋေ အာကိရေယျုံ, အပိ နု ခေါ တံ, မဟာရာဇ, သကဋံ ဒွိန္နမ္ပိ သကဋာနံ ရတနံ ဓါရေယျာ’’တိ? ‘‘န ဟိ, ဘန္တေ, နာဘိပိ တဿ ဖလေယျ, အရာပိ တဿ ဘိဇ္ဇေယျုံ, နေမိပိ တဿ ဩပတေယျ, အက္ခောပိ တဿ ဘိဇ္ဇေယျာ’’တိ။ ‘‘ကိံ နု ခေါ, မဟာရာဇ, အတိရတနဘာရေန သကဋံ ဘိဇ္ဇတီ’’တိ? ‘‘အာမ, ဘန္တေ’’တိ။ ‘‘ဧဝမေဝ ခေါ, မဟာရာဇ, အတိဓမ္မဘာရေန ပထဝီ စလတိ။

‘‘အပိ စ, မဟာရာဇ, ဣမံ ကာရဏံ ဗုဒ္ဓဗလပရိဒီပနာယ ဩသာရိတံ။ အညမ္ပိ တတ္ထ အဘိရူပံ ကာရဏံ သုဏောဟိ, ယေန ကာရဏေန ဒွေ သမ္မာသမ္ဗုဒ္ဓေါ ဧကက္ခဏေ နုပ္ပဇ္ဇန္တိ။ ယဒိ, မဟာရာဇ, ဒွေ သမ္မာသမ္ဗုဒ္ဓါ ဧကက္ခဏေ ဥပ္ပဇ္ဇေယျုံ, တေသံ ပရိသာယ ဝိဝါဒေါ ဥပ္ပဇ္ဇေယျ ‘တုမှာကံ ဗုဒ္ဓေါ, အမှာကံ ဗုဒ္ဓေါ’တိ, ဥဘတော ပက္ခဇာတာ ဘဝေယျုံ, ယထာ, မဟာရာဇ, ဒွိန္နံ ဗလဝါမစ္စာနံ ပရိသာယ ဝိဝါဒေါ ဥပ္ပဇ္ဇေယျ ‘တုမှာကံ အမစ္စော, အမှာကံ အမစ္စော’တိ, ဥဘတော ပက္ခဇာတာ ဟောန္တိ, ဧဝမေဝ ခေါ, မဟာရာဇ, ယဒိ ဒွေ သမ္မာသမ္ဗုဒ္ဓါ ဧကက္ခဏေ ဥပ္ပဇ္ဇေယျုံ, တေသံ ပရိသာယ ဝိဝါဒေါ ဥပ္ပဇ္ဇေယျ ‘တုမှာကံ ဗုဒ္ဓေါ, အမှာကံ ဗုဒ္ဓေါ’တိ, ဥဘတော ပက္ခဇာတာ ဘဝေယျုံ ။ ဣဒံ တာဝ, မဟာရာဇ, ဧကံ ကာရဏံ, ယေန ကာရဏေန ဒွေ သမ္မာသမ္ဗုဒ္ဓါ ဧကက္ခဏေ နုပ္ပဇ္ဇန္တိ။

‘‘အပရမ္ပိ, မဟာရာဇ, ဥတ္တရိံ ကာရဏံ သုဏောဟိ, ယေန ကာရဏေန ဒွေ သမ္မာသမ္ဗုဒ္ဓါ ဧကက္ခဏေ နုပ္ပဇ္ဇန္တိ။ ယဒိ, မဟာရာဇ, ဒွေ သမ္မာသမ္ဗုဒ္ဓါ ဧကက္ခဏေ ဥပ္ပဇ္ဇေယျုံ, ‘အဂ္ဂေါ ဗုဒ္ဓေါ’တိ ယံ ဝစနံ, တံ မိစ္ဆာ ဘဝေယျ, ‘ဇေဋ္ဌော ဗုဒ္ဓေါ’တိ ယံ ဝစနံ, တံ မိစ္ဆာ ဘဝေယျ, ‘သေဋ္ဌော ဗုဒ္ဓေါ’တိ, ‘ဝိသိဋ္ဌော ဗုဒ္ဓေါ’တိ, ‘ဥတ္တမော ဗုဒ္ဓေါ’တိ, ‘ပဝရော ဗုဒ္ဓေါ’တိ, ‘အသမော ဗုဒ္ဓေါ’တိ, ‘အသမသမော ဗုဒ္ဓေါ’တိ, ‘အပ္ပဋိမော ဗုဒ္ဓေါ’တိ, ‘အပ္ပဋိဘာဂေါ ဗုဒ္ဓေါ’တိ, ‘အပ္ပဋိပုဂ္ဂလော ဗုဒ္ဓေါ’တိ ယံ ဝစနံ, တံ မိစ္ဆာ ဘဝေယျ။ ဣဒမ္ပိ ခေါ တွံ, မဟာရာဇ, ကာရဏံ အတ္ထတော သမ္ပဋိစ္ဆ, ယေန ကာရဏေန ဒွေ သမ္မာသမ္ဗုဒ္ဓါ ဧကက္ခဏေ နုပ္ပဇ္ဇန္တိ။

‘‘အပိ စ ခေါ, မဟာရာဇ, ဗုဒ္ဓါနံ ဘဂဝန္တာနံ သဘာဝပကတိ ဧသာယံ, ဧကော ယေဝ ဗုဒ္ဓေါ လောကေ ဥပ္ပဇ္ဇတိ။ ကသ္မာ ကာရဏာ? မဟန္တတာယ သဗ္ဗညုဗုဒ္ဓဂုဏာနံ။ အညမ္ပိ, မဟာရာဇ, ယံ လောကေ မဟန္တံ, တံ ဧကံ ယေဝ ဟောတိ။ ပထဝီ, မဟာရာဇ, မဟန္တီ, သာ ဧကာ ယေဝ။ သာဂရော မဟန္တော, သော ဧကော ယေဝ။ သိနေရု ဂိရိရာဇာ မဟန္တော, သော ဧကော ယေဝ။ အာကာသော မဟန္တော, သော ဧကော ယေဝ။ သက္ကော မဟန္တော, သော ဧကော ယေဝ။ မာရော မဟန္တော, သော ဧကော ယေဝ။ မဟာဗြဟ္မာ မဟန္တော, သော ဧကော ယေဝ။ တထာဂတော အရဟံ သမ္မာသမ္ဗုဒ္ဓေါ မဟန္တော, သော ဧကော ယေဝ လောကသ္မိံ။ ယတ္ထ တေ ဥပ္ပဇ္ဇန္တိ, တတ္ထ အညဿ ဩကာသော န ဟောတိ, တသ္မာ, မဟာရာဇ, တထာဂတော အရဟံ သမ္မာသမ္ဗုဒ္ဓေါ ဧကော ယေဝ လောကသ္မိံ ဥပ္ပဇ္ဇတီ’’တိ။

‘‘သုကထိတော, ဘန္တေ နာဂသေန, ပဉ္ဟော ဩပမ္မေဟိ ကာရဏေဟိ။ အနိပုဏောပေတံ သုတွာ အတ္တမနော ဘဝေယျ, ကိံ ပန မာဒိသော မဟာပညော။ သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဒွိန္နံ ဗုဒ္ဓါနံ အနုပ္ပဇ္ဇမာနပဉ္ဟော ပဌမော။

၂။ ဂေါတမိဝတ္ထဒါနပဉ္ဟော

၂။ ‘‘ဘန္တေ နာဂသေန, ဘာသိတမ္ပေတံ ဘဂဝတာ မာတုစ္ဆာယ မဟာပဇာပတိယာ ဂေါတမိယာ ဝဿိကသာဋိကာယ ဒီယမာနာယ ‘သံဃေ ဂေါတမိ ဒေဟိ, သံဃေ တေ ဒိန္နေ အဟဉ္စေဝ ပူဇိတော ဘဝိဿာမိ သံဃော စာ’တိ။ ကိံ နု ခေါ, ဘန္တေ နာဂသေန, တထာဂတော သံဃရတနတော န ဘာရိကော န ဂရုကော န ဒက္ခိဏေယျော, ယံ တထာဂတော သကာယ မာတုစ္ဆာယ သယံ ပိဉ္ဇိတံ [ပိစ္ဆိတံ (သီ။ ဣ။)] သယံ လုဉ္စိတံ သယံ ပေါထိတံ သယံ ကန္တိတံ သယံ ဝါယိတံ ဝဿိကသာဋိကံ အတ္တနော ဒီယမာနံ သံဃဿ ဒါပေသိ။ ယဒိ, ဘန္တေ နာဂသေန, တထာဂတော သံဃရတနတော ဥတ္တရော ဘဝေယျ အဓိကော ဝါ ဝိသိဋ္ဌော ဝါ, ‘မယိ ဒိန္နေ မဟပ္ဖလံ ဘဝိဿတီ’တိ န တထာဂတော မာတုစ္ဆာယ သယံ ပိဉ္ဇိတံ သယံ လုဉ္စိတံ သယံ ပေါထိတံ ဝဿိကသာဋိကံ သံဃေ ဒါပေယျ, ယသ္မာ စ ခေါ ဘန္တေ နာဂသေန တထာဂတော အတ္တာနံ န ပတ္ထယတိ [န ပတ္ထီယတိ (သီ။ ဣ။)] န ဥပနိဿယတိ, တသ္မာ တထာဂတော မာတုစ္ဆာယ တံ ဝဿိကသာဋိကံ သံဃဿ ဒါပေသီ’’တိ။

‘‘ဘာသိတမ္ပေတံ, မဟာရာဇ, ဘဂဝတာ မာတုစ္ဆာယ မဟာပဇာပတိယာ ဂေါတမိယာ ဝဿိကသာဋိကာယ ဒီယမာနာယ ‘သံဃေ ဂေါတမိ ဒေဟိ, သံဃေ တေ ဒိန္နေ အဟဉ္စေဝ ပူဇိတော ဘဝိဿာမိ သံဃော စာ’တိ။ တံ ပန န အတ္တနော ပတိမာနနဿ အဝိပါကတာယ န အဒက္ခိဏေယျတာယ, အပိ စ ခေါ, မဟာရာဇ, ဟိတတ္ထာယ အနုကမ္ပာယ အနာဂတမဒ္ဓါနံ သံဃော မမစ္စယေန စိတ္တီကတော ဘဝိဿတီတိ ဝိဇ္ဇမာနေ ယေဝ ဂုဏေ ပရိကိတ္တယန္တော ဧဝမာဟ ‘သံဃေ ဂေါတမိ ဒေဟိ, သံဃေ တေ ဒိန္နေ အဟဉ္စေဝ ပူဇိတော ဘဝိဿာမိ သံဃော စာ’တိ။

‘‘ယထာ, မဟာရာဇ, ပိတာ ဓရမာနော ယေဝ အမစ္စဘဋဗလဒေါဝါရိကအနီကဋ္ဌပါရိသဇ္ဇဇနမဇ္ဈေ ရညော သန္တိကေ ပုတ္တဿ ဝိဇ္ဇမာနံ ယေဝ ဂုဏံ ပကိတ္တေတိ [ပရိကိတ္တေတိ (က။)] ‘ဣဓ ဌပိတော အနာဂတမဒ္ဓါနံ ဇနမဇ္ဈေ ပူဇိတော ဘဝိဿတီ’တိ။ ဧဝမေဝ ခေါ, မဟာရာဇ, တထာဂတော ဟိတတ္ထာယ အနုကမ္ပာယ အနာဂတမဒ္ဓါနံ သံဃော မမစ္စယေန စိတ္တီကတော ဘဝိဿတီတိ ဝိဇ္ဇမာနေ ယေဝ ဂုဏေ ပကိတ္တယန္တော ဧဝမာဟ ‘သံဃေ ဂေါတမိ ဒေဟိ, သံဃေ တေ ဒိန္နေ အဟဉ္စေဝ ပုဇိတော ဘဝိဿာမိ သံဃော စာ’တိ။

‘‘န ခေါ, မဟာရာဇ, တာဝတကေန ဝဿိကသာဋိကာနုပ္ပဒါနမတ္တကေန သံဃော တထာဂတတော အဓိကော နာမ ဟောတိ ဝိသိဋ္ဌော ဝါ။ ယထာ, မဟာရာဇ, မာတာပိတရော ပုတ္တာနံ ဥစ္ဆာဒေန္တိ ပရိမဒ္ဒန္တိ နဟာပေန္တိ သမ္ဗာဟေန္တိ, အပိ နု ခေါ, မဟာရာဇ, တာဝတကေန ဥစ္ဆာဒနပရိမဒ္ဒနနဟာပနသမ္ဗာဟနမတ္တကေန ‘ပုတ္တော မာတာပိတူဟိ အဓိကော နာမ ဟောတိ ဝိသိဋ္ဌော ဝါ’တိ? ‘‘န ဟိ, ဘန္တေ, အကာမကရဏီယာ ဘန္တေ ပုတ္တာ မာတာပိတူနံ, တသ္မာ မာတာပိတရော ပုတ္တာနံ ဥစ္ဆာဒနပရိမဒ္ဒနနဟာပနသမ္ဗာဟနံ ကရောန္တီ’’တိ။ ဧဝမေဝ ခေါ, မဟာရာဇ, န တာဝတကေန ဝဿိကသာဋိကာနုပ္ပဒါနမတ္တကေန သံဃော တထာဂတတော အဓိကော နာမ ဟောတိ ဝိသိဋ္ဌော ဝါတိ။ အပိ စ တထာဂတော အကာမကရဏီယံ ကရောန္တော မာတုစ္ဆာယ တံ ဝဿိကသာဋိကံ သံဃဿ ဒါပေသိ။

‘‘ယထာ ဝါ ပန, မဟာရာဇ, ကောစိဒေဝ ပုရိသော ရညော ဥပါယနံ အာဟရေယျ, တံ ရာဇာ ဥပါယနံ အညတရဿ ဘဋဿ ဝါ ဗလဿ ဝါ သေနာပတိဿ ဝါ ပုရောဟိတဿ ဝါ ဒဒေယျ။ အပိ နု ခေါ သော, မဟာရာဇ, ပုရိသော တာဝတကေန ဥပါယနပဋိလာဘမတ္တကေန ရညာ အဓိကော နာမ ဟောတိ ဝိသိဋ္ဌော ဝါ’’တိ? ‘‘န ဟိ, ဘန္တေ, ရာဇဘတ္တိကော, ဘန္တေ, သော ပုရိသော ရာဇူပဇီဝီ, တဋ္ဌာနေ ဌပေန္တော ရာဇာ ဥပါယနံ ဒေတီ’’တိ။ ‘‘ဧဝမေဝ ခေါ, မဟာရာဇ, န တာဝတကေန ဝဿိကသာဋိကာနုပ္ပဒါနမတ္တကေန သံဃော တထာဂတတော အဓိကော နာမ ဟောတိ ဝိသိဋ္ဌော ဝါ, အထ ခေါ တထာဂတဘတ္တိကော တထာဂတူပဇီဝီ။ တဋ္ဌာနေ ဌပေန္တော တထာဂတော သံဃဿ ဝဿိကသာဋိကံ ဒါပေသိ။

‘‘အပိ စ, မဟာရာဇ, တထာဂတဿ ဧဝံ အဟောသိ ‘သဘာဝပဋိပူဇနီယော သံဃော, မမ သန္တကေန သသံဃံ ပဋိပူဇေဿာမီ’တိ သံဃဿ ဝဿိကသာဋိကံ ဒါပေသိ, န, မဟာရာဇ, တထာဂတော အတ္တနော ယေဝ ပဋိပူဇနံ ဝဏ္ဏေတိ, အထ ခေါ ယေ လောကေ ပဋိပူဇနာရဟာ, တေသမ္ပိ တထာဂတော ပဋိပူဇနံ ဝဏ္ဏေတိ။

‘‘ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန မဇ္ဈိမနိကာယဝရလဉ္ဆကေ ဓမ္မဒါယာဒဓမ္မပရိယာယေ အပ္ပိစ္ဆပ္ပဋိပတ္တိံ ပကိတ္တယမာနေန ‘အသု ယေဝ မေ ပုရိမော ဘိက္ခု ပုဇ္ဇတရော စ ပါသံသတရော စာ’တိ။ ‘‘နတ္ထိ, မဟာရာဇ, ဘဝေသု ကောစိ သတ္တော တထာဂတတော ဒက္ခိဏေယျော ဝါ ဥတ္တရော ဝါ အဓိကော ဝါ ဝိသိဋ္ဌော ဝါ, တထာဂတောဝ ဥတ္တရော အဓိကော ဝိသိဋ္ဌော။

‘‘ဘာသိတမ္ပေတံ, မဟာရာဇ, သံယုတ္တနိကာယဝရေ မာဏဝဂါမိကေန ဒေဝပုတ္တေန ဘဂဝတော ပုရတော ဌတွာ ဒေဝမနုဿမဇ္ဈေ –

‘‘‘ဝိပုလော ရာဇဂဟီယာနံ [ရာဇဂဟိကာနံ (က။) သံ။ နိ။ ၁။၁၁၁ ပဿိတဗ္ဗံ]၊ ဂိရိ သေဋ္ဌော ပဝုစ္စတိ။

သေတော ဟိမဝတံ သေဋ္ဌော၊ အာဒိစ္စော အဃဂါမိနံ။

‘‘‘သမုဒ္ဒေါ ဥဒဓိနံ သေဋ္ဌော၊ နက္ခတ္တာနဉ္စ စန္ဒိမာ။

သဒေဝကဿ လောကဿ၊ ဗုဒ္ဓေါ အဂ္ဂေါ ပဝုစ္စတီ’တိ။

‘‘တာ ခေါ ပနေတာ, မဟာရာဇ, မာဏဝဂါမိကေန ဒေဝပုတ္တေန ဂါထာ သုဂီတာ န ဒုဂ္ဂီတာ, သုဘာသိတာ န ဒုဗ္ဘာသိတာ, အနုမတာ စ ဘဂဝတာ, နနု, မဟာရာဇ, ထေရေနပိ သာရိပုတ္တေန ဓမ္မသေနာပတိနာ ဘဏိတံ –

‘‘‘ဧကော မနောပသာဒေါ။ သရဏဂမနမဉ္ဇလိပဏာမော ဝါ။

ဥဿဟတေ တာရယိတုံ၊ မာရဗလနိသူဒနေ ဗုဒ္ဓေ’တိ။

‘‘ဘဂဝတာ စ ဘဏိတံ ဒေဝါတိဒေဝေန ‘ဧကပုဂ္ဂလော, ဘိက္ခဝေ, လောကေ ဥပ္ပဇ္ဇမာနော ဥပ္ပဇ္ဇတိ ဗဟုဇနဟိတာယ ဗဟုဇနသုခါယ လောကာနုကမ္ပာယ အတ္ထာယ ဟိတာယ သုခါယ ဒေဝမနုဿာနံ။ ကတမော ဧကပုဂ္ဂလော? တထာဂတော အရဟံ သမ္မာသမ္ဗုဒ္ဓေါ။ပေ။။ ဒေဝမနုဿာန’’’န္တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဂေါတမိဝတ္ထဒါနပဉ္ဟော ဒုတိယော။

၃။ ဂိဟိပဗ္ဗဇိတသမ္မာပဋိပတ္တိပဉ္ဟော

[၃] ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘ဂိဟိနော ဝါဟံ, ဘိက္ခဝေ, ပဗ္ဗဇိတဿ ဝါ သမ္မာပဋိပတ္တိံ ဝဏ္ဏေမိ, ဂိဟီ ဝါ ဘိက္ခဝေ ပဗ္ဗဇိတော ဝါ သမ္မာပဋိပန္နော သမ္မာပဋိပတ္တာဓိကရဏဟေတု အာရာဓကော ဟောတိ ဉာယံ ဓမ္မံ ကုသလ’’န္တိ။ ယဒိ, ဘန္တေ နာဂသေန, ဂိဟီ ဩဒါတဝသနော ကာမဘောဂီ ပုတ္တဒါရသမ္ဗာဓသယနံ အဇ္ဈာဝသန္တော ကာသိကစန္ဒနံ ပစ္စနုဘောန္တော မာလာဂန္ဓဝိလေပနံ ဓါရေန္တော ဇာတရူပရဇတံ သာဒိယန္တော မဏိကုဏ္ဍလ [မဏိကနက (သီ။ ဣ။)] ဝိစိတ္တမောဠိဗဒ္ဓေါ သမ္မာပဋိပန္နော အာရာဓကော ဟောတိ ဉာယံ ဓမ္မံ ကုသလံ, ပဗ္ဗဇိတောပိ ဘဏ္ဍုကာသာဝဝတ္ထဝသနော ပရပိဏ္ဍမဇ္ဈုပဂတော စတူသု သီလက္ခန္ဓေသု သမ္မာပရိပူရကာရီ ဒိယဍ္ဎေသု သိက္ခာပဒသတေသု သမာဒါယ ဝတ္တန္တော တေရသသု ဓုတဂုဏေသု အနဝသေသံ ဝတ္တန္တော သမ္မာပဋိပန္နော အာရာဓကော ဟောတိ ဉာယံ ဓမ္မံ ကုသလံ။ တတ္ထ, ဘန္တေ, ကော ဝိသေသော ဂိဟိနော ဝါ ပဗ္ဗဇိတဿ ဝါ? အဖလံ ဟောတိ တပေါကမ္မံ, နိရတ္ထကာ ပဗ္ဗဇ္ဇာ။ ဝဉ္ဈာ သိက္ခာပဒဂေါပနာ, မောဃံ ဓုတဂုဏသမာဒါနံ, ကိံ တတ္ထ ဒုက္ခမနုစိဏ္ဏေန, နနု နာမ သုခေနေဝ သုခံ အဓိဂန္တဗ္ဗ’’န္တိ။

‘‘ဘာသိတမ္ပေတံ, မဟာရာဇ, ဘဂဝတာ ‘ဂိဟိနော ဝါဟံ, ဘိက္ခဝေ, ပဗ္ဗဇိတဿ ဝါ သမ္မာပဋိပတ္တိံ ဝဏ္ဏေမိ, ဂိဟီ ဝါ, ဘိက္ခဝေ, ပဗ္ဗဇိတော ဝါ သမ္မာပဋိပန္နော သမ္မာပဋိပတ္တာဓိကရဏဟေတု အာရာဓကော ဟောတိ ဉာယံ ဓမ္မံ ကုသလ’’န္တိ။ ဧဝမေတံ, မဟာရာဇ, သမ္မာပဋိပန္နောဝ သေဋ္ဌော, ပဗ္ဗဇိတောပိ, မဟာရာဇ, ‘ပဗ္ဗဇိတောမှီ’တိ န သမ္မာ ပဋိပဇ္ဇေယျ, အထ ခေါ သော အာရကာဝ သာမညာ, အာရကာဝ ဗြဟ္မညာ, ပဂေဝ ဂိဟီ ဩဒါတဝသနော။ ဂိဟီပိ, မဟာရာဇ, သမ္မာပဋိပန္နော အာရာဓကော ဟောတိ ဉာယံ ဓမ္မံ ကုသလံ, ပဗ္ဗဇိတောပိ, မဟာရာဇ, သမ္မာပဋိပန္နော အာရာဓကော ဟောတိ ဉာယံ ဓမ္မံ ကုသလံ။

‘‘အပိ စ ခေါ, မဟာရာဇ, ပဗ္ဗဇိတောဝ သာမညဿ ဣဿရော အဓိပတိ; ပဗ္ဗဇ္ဇာ, မဟာရာဇ, ဗဟုဂုဏာ အနေကဂုဏာ အပ္ပမာဏဂုဏာ, န သက္ကာ ပဗ္ဗဇ္ဇာယ ဂုဏံ ပရိမာဏံ ကာတုံ။

‘‘ယထာ, မဟာရာဇ, ကာမဒဒဿ မဏိရတနဿ န သက္ကာ ဓနေန အဂ္ဃော ပရိမာဏံ ကာတုံ ‘ဧတ္တကံ မဏိရတနဿ မူလ’န္တိ, ဧဝမေဝ ခေါ, မဟာရာဇ, ပဗ္ဗဇ္ဇာ ဗဟုဂုဏာ အနေကဂုဏာ အပ္ပမာဏဂုဏာ, န သက္ကာ ပဗ္ဗဇ္ဇာယ ဂုဏံ ပရိမာဏံ ကာတုံ။

‘‘ယထာ ဝါ ပန, မဟာရာဇ, မဟာသမုဒ္ဒေ ဦမိယော န သက္ကာ ပရိမာဏံ ကာတုံ ‘ဧတ္တကာ မဟာသမုဒ္ဒေ ဦမိယော’တိ, ဧဝမေဝ ခေါ, မဟာရာဇ, ပဗ္ဗဇ္ဇာ ဗဟုဂုဏာ အနေကဂုဏာ အပ္ပမာဏဂုဏာ, န သက္ကာ ပဗ္ဗဇ္ဇာယ ဂုဏံ ပရိမာဏံ ကာတုံ။

‘‘ပဗ္ဗဇိတဿ, မဟာရာဇ, ယံ ကိဉ္စိ ကရဏီယံ, သဗ္ဗံ တံ ခိပ္ပမေဝ သမိဇ္ဈတိ နော စိရရတ္တာယ။ ကိံ ကာရဏာ? ပဗ္ဗဇိတော, မဟာရာဇ, အပ္ပိစ္ဆော ဟောတိ သန္တုဋ္ဌော ပဝိဝိတ္တော အသံသဋ္ဌော အာရဒ္ဓဝီရိယော နိရာလယော အနိကေတော ပရိပုဏ္ဏသီလော သလ္လေခိတာစာရော ဓုတပ္ပဋိပတ္တိကုသလော ဟောတိ, တံ ကာရဏာ ပဗ္ဗဇိတဿ ယံ ကိဉ္စိ ကရဏီယံ, သဗ္ဗံ တံ ခိပ္ပမေဝ သမိဇ္ဈတိ နော စိရရတ္တာယ။ ယထာ, မဟာရာဇ, နိဂ္ဂဏ္ဌိသမသုဓေါတဥဇုဝိမလနာရာစော သုသဇ္ဇိတော သမ္မာ ဝဟတိ, ဧဝမေဝ ခေါ, မဟာရာဇ, ပဗ္ဗဇိတဿ ယံ ကိဉ္စိ ကရဏီယံ, သဗ္ဗံ တံ ခိပ္ပမေဝ သမိဇ္ဈတိ နော စိရရတ္တာယာ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဂိဟိပဗ္ဗဇိတသမ္မာပဋိပတ္တိပဉ္ဟော တတိယော။

၄။ ပဋိပဒါဒေါသပဉ္ဟော

၄။ ‘‘ဘန္တေ နာဂသေန, ယဒါ ဗောဓိသတ္တော ဒုက္ကရကာရိကံ အကာသိ, နေတာဒိသော အညတြ အာရမ္ဘော အဟောသိ နိက္ကမော ကိလေသယုဒ္ဓံ မစ္စုသေနံ ဝိဓမနံ အာဟာရပရိဂ္ဂဟော ဒုက္ကရကာရိကာ, ဧဝရူပေ ပရက္ကမေ ကိဉ္စိ အဿာဒံ အလဘိတွာ တမေဝ စိတ္တံ ပရိဟာပေတွာ ဧဝမဝေါစ ‘န ခေါ ပနာဟံ ဣမာယ ကဋုကာယ ဒုက္ကရကာရိကာယ အဓိဂစ္ဆာမိ ဥတ္တရိမနုဿဓမ္မံ အလမရိယဉာဏဒဿနဝိသေသံ, သိယာ နု ခေါ အညော မဂ္ဂေါ ဗောဓါယာ’တိ, တတော နိဗ္ဗိန္ဒိတွာ အညေန မဂေန သဗ္ဗညုတံ ပတ္တော, ပုန တာယ ပဋိပဒါယ သာဝကေ အနုသာသတိ သမာဒပေတိ။

‘‘‘အာရမ္ဘထ နိက္ခမထ၊ ယုဉ္ဇထ ဗုဒ္ဓသာသနေ။

ဓုနာထ မစ္စုနော သေနံ၊ နဠာဂါရံဝ ကုဉ္ဇရော’တိ [သံ။ နိ။ ၁။၁၈၅]။

‘‘ကေန န ခေါ, ဘန္တေ နာဂသေန, ကာရဏေန တထာဂတော ယာယ ပဋိပဒါယ အတ္တနာ နိဗ္ဗိန္နော ဝိရတ္တရူပေါ, တတ္ထ သာဝကေ အနုသာသတိ သမာဒပေတီ’’တိ?

‘‘တဒါပိ , မဟာရာဇ, ဧတရဟိပိ သာ ယေဝ ပဋိပဒါ, တံ ယေဝ ပဋိပဒံ ပဋိပဇ္ဇိတွာ ဗောဓိသတ္တော သဗ္ဗညုတံ ပတ္တော။ အပိ စ, မဟာရာဇ, ဗောဓိသတ္တော အတိဝီရိယံ ကရောန္တော နိရဝသေသတော အာဟာရံ ဥပရုန္ဓိ။ တဿ အာဟာရူပရောဓေန စိတ္တဒုဗ္ဗလ္ယံ ဥပ္ပဇ္ဇိ။ သော တေန ဒုဗ္ဗလ္ယေန နာသက္ခိ သဗ္ဗညုတံ ပါပုဏိတုံ, သော မတ္တမတ္တံ ကဗဠီကာရာဟာရံ သေဝန္တော တာယေဝ ပဋိပဒါယ နစိရဿေဝ သဗ္ဗညုတံ ပါပုဏိ။ သော ယေဝ, မဟာရာဇ, ပဋိပဒါ သဗ္ဗေသံ တထာဂတာနံ သဗ္ဗညုတဉာဏပ္ပဋိလာဘာယ။

‘‘ယထာ, မဟာရာဇ, သဗ္ဗေသံ သတ္တာနံ အာဟာရော ဥပတ္ထမ္ဘော, အာဟာရူပနိဿိတာ သဗ္ဗေ သတ္တာ သုခံ အနုဘဝန္တိ, ဧဝမေဝ ခေါ, မဟာရာဇ, သာ ယေဝ ပဋိပဒါ သဗ္ဗေသံ တထာဂတာနံ သဗ္ဗညုတဉာဏပ္ပဋိလာဘာယ, နေသော, မဟာရာဇ, ဒေါသော အာရမ္ဘဿ, န နိက္ကမဿ, န ကိလေသယုဒ္ဓဿ, ယေန တထာဂတော တသ္မိံ သမယေ န ပါပုဏိ သဗ္ဗညုတဉာဏံ, အထ ခေါ အာဟာရူပရောဓဿေဝေသော ဒေါသော, သဒါ ပဋိယတ္တာ ယေဝေသာ ပဋိပဒါ။

‘‘ယထာ, မဟာရာဇ, ပုရိသော အဒ္ဓါနံ အတိဝေဂေန ဂစ္ဆေယျ, တေန သော ပက္ခဟတော ဝါ ဘဝေယျ ဣဌသပ္ပီ ဝါ အသဉ္စရော ပထဝိတလေ။ အပိ နု ခေါ, မဟာရာဇ, မဟာပထဝိယာ ဒေါသော အတ္ထိ, ယေန သော ပုရိသော ပက္ခဟတော အဟောသီ’’တိ? ‘‘န ဟိ, ဘန္တေ; သဒါ ပဋိယတ္တာ, ဘန္တေ, မဟာပထဝီ, ကုတော တဿာ ဒေါသော? ဝါယာမဿေဝေသော ဒေါသော, ယေန သော ပုရိသော ပက္ခဟတော အဟောသီ’’တိ။ ‘‘ဧဝမေဝ ခေါ, မဟာရာဇ, နေသော ဒေါသော အာရမ္ဘဿ, န နိက္ကမဿ, န ကိလေသယုဒ္ဓဿ, ယေန တထာဂတော တသ္မိံ သမယေ န ပါပုဏိ သဗ္ဗညုတဉာဏံ, အထ ခေါ အာဟာရူပရောဓဿေဝေသော ဒေါသော သဒါ ပဋိယတ္တာ ယေဝေသာ ပဋိပဒါ။

‘‘ယထာ ဝါ ပန, မဟာရာဇ, ပုရိသော ကိလိဋ္ဌံ သာဋကံ နိဝါသေယျ, န သော တံ ဓေါဝါပေယျ, နေသော ဒေါသော ဥဒကဿ, သဒါ ပဋိယတ္တံ ဥဒကံ။ ပုရိသဿေဝေသော ဒေါသော။ ဧဝမေဝ ခေါ, မဟာရာဇ, နေသော ဒေါသော အာရမ္ဘဿ, န နိက္ကမဿ, န ကိလေသယုဒ္ဓဿ, ယေန တထာဂတော တသ္မိံ သမယေ န ပါပုဏိ သဗ္ဗညုတဉာဏံ, အထ ခေါ အာဟာရူပရောဓဿေဝေသော ဒေါသော, သဒါ ပဋိယတ္တာ ယေဝေသာ ပဋိပဒါ, တသ္မာ တထာဂတော တာယေဝ ပဋိပဒါယ သာဝကေ အနုသာသတိ သမာဒပေတိ, ဧဝံ ခေါ, မဟာရာဇ, သဒါ ပဋိယတ္တာ အနဝဇ္ဇာ သာ ပဋိပဒါ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ပဋိပဒါဒေါသပဉ္ဟော စတုတ္ထော။

၅။ ဟီနာယာဝတ္တနပဉ္ဟော

၅။ ‘‘ဘန္တေ နာဂသေန, မဟန္တံ ဣဒံ တထာဂတသာသနံ သာရံ ဝရံ သေဋ္ဌံ ပဝရံ အနုပမံ ပရိသုဒ္ဓံ ဝိမလံ ပဏ္ဍရံ အနဝဇ္ဇံ, န ယုတ္တံ ဂိဟိံ တာဝတကံ ပဗ္ဗဇေတုံ, ဂိဟီ ယေဝ [ဂိဟိံ ယေဝ (သီ။ ဣ။)] ဧကသ္မိံ ဖလေ ဝိနေတွာ ယဒါ အပုနရာဝတ္တီ ဟောတိ တဒါ သော ပဗ္ဗာဇေတဗ္ဗော။ ကိံ ကာရဏာ? ဣမေ ဒုဇ္ဇနာ တာဝ တတ္ထ သာသနေ ဝိသုဒ္ဓေ ပဗ္ဗဇိတွာ ပဋိနိဝတ္တိတွာ ဟီနာယာဝတ္တန္တိ, တေသံ ပစ္စာဂမနေန အယံ မဟာဇနော ဧဝံ ဝိစိန္တေတိ ‘တုစ္ဆကံ ဝတ ဘော ဧတံ သမဏဿ ဂေါတမဿ သာသနံ ဘဝိဿတိ, ယံ ဣမေ ပဋိနိဝတ္တန္တီ’တိ, ဣဒမေတ္ထ ကာရဏ’’န္တိ။

‘‘ယထာ, မဟာရာဇ, တဠာကော ဘဝေယျ သမ္ပုဏ္ဏသုစိဝိမလသီတလသလိလော, အထ ယော ကောစိ ကိလိဋ္ဌော မလကဒ္ဒမဂတော တံ တဠာကံ ဂန္တွာ အနဟာယိတွာ ကိလိဋ္ဌောဝ ပဋိနိဝတ္တေယျ, တတ္ထ, မဟာရာဇ, ကတမံ ဇနော ဂရဟေယျ ကိလိဋ္ဌံ ဝါ တဠာကံ ဝါ’’တိ? ‘‘ကိလိဋ္ဌံ, ဘန္တေ, ဇနော ဂရဟေယျ ‘အယံ တဠာကံ ဂန္တွာ အနဟာယိတွာ ကိလိဋ္ဌောဝ ပဋိနိဝတ္တော, ကိံ ဣမံ အနဟာယိတုကာမံ တဠာကော သယံ နဟာပေဿတိ, ကော ဒေါသော တဠာကဿာ’တိ။ ဧဝမေဝ ခေါ, မဟာရာဇ , တထာဂတော ဝိမုတ္တိဝရသလိလသမ္ပုဏ္ဏံ သဒ္ဓမ္မဝရတဠာကံ မာပေသိ ‘ယေ ကေစိ ကိလေသမလကိလိဋ္ဌာ သစေတနာ ဗုဓါ, တေ ဣဓ နဟာယိတွာ သဗ္ဗကိလေသေ ပဝါဟယိဿန္တီ’တိ။ ယဒိ ကောစိ တံ သဒ္ဓမ္မဝရတဠာကံ ဂန္တွာ အနဟာယိတွာ သကိလေသောဝ ပဋိနိဝတ္တိတွာ ဟီနာယာဝတ္တတိ တံ ယေဝ ဇနော ဂရဟိဿတိ ‘အယံ ဇိနသာသနေ ပဗ္ဗဇိတွာ တတ္ထ ပတိဋ္ဌံ အလဘိတွာ ဟီနာယာဝတ္တော, ကိံ ဣမံ အပ္ပဋိပဇ္ဇန္တံ ဇိနသာသနံ သယံ ဗောဓေဿတိ, ကော ဒေါသော ဇိနသာသနဿာ’တိ?

‘‘ယထာ ဝါ ပန, မဟာရာဇ, ပုရိသော ပရမဗျာဓိတော ရောဂုပ္ပတ္တိကုသလံ အမောဃဓုဝသိဒ္ဓကမ္မံ ဘိသက္ကံ သလ္လကတ္တံ ဒိသွာ အတိကိစ္ဆာပေတွာ သဗျာဓိကောဝ ပဋိနိဝတ္တေယျ, တတ္ထ ကတမံ ဇနော ဂရဟေယျ အာတုရံ ဝါ ဘိသက္ကံ ဝါ’’တိ? ‘‘အာတုရံ, ဘန္တေ, ဇနော ဂရဟေယျ ‘အယံ ရောဂုပ္ပတ္တိကုသလံ အမောဃဓုဝသိဒ္ဓကမ္မံ ဘိသက္ကံ သလ္လကတ္တံ ဒိသွာ အတိကိစ္ဆာပေတွာ သဗျာဓိကောဝ ပဋိနိဝတ္တော, ကိံ ဣမံ အတိကိစ္ဆာပေန္တံ ဘိသက္ကော သယံ တိကိစ္ဆိဿတိ, ကော ဒေါသော ဘိသက္ကဿာ’’’တိ? ‘‘ဧဝမေဝ ခေါ, မဟာရာဇ, တထာဂတော အန္တောသာသနသမုဂ္ဂေ ကေဝလံ သကလကိလေသဗျာဓိဝူပသမနသမတ္ထံ အမတောသဓံ ပက္ခိပိ, ‘ယေ ကေစိ ကိလေသဗျာဓိဣဠိတာ သစေတနာ ဗုဓါ, တေ ဣမံ အမတောသဓံ ပိဝိတွာ သဗ္ဗကိလေသဗျာဓိံ ဝူပသမေဿန္တီ’တိ။ ယဒိ ကောစိ ယံ အမတောသဓံ အပိဝိတွာ သကိလေသောဝ ပဋိနိဝတ္တိတွာ ဟီနာယာဝတ္တတိ, တံ ယေဝ ဇနော ဂရဟိဿတိ ‘အယံ ဇိနသာသနေ ပဗ္ဗဇိတွာ တတ္ထ ပတိဋ္ဌံ အလဘိတွာ ဟီနာယာဝတ္တော, ကိံ ဣမံ အပ္ပဋိပဇ္ဇန္တံ ဇိနသာသနံ သယံ ဗောဓေဿတိ, ကော ဒေါသော ဇိနသာသနဿာ’တိ?

‘‘ယထာ ဝါ ပန, မဟာရာဇ, ဆာတော ပုရိသော မဟတိမဟာပုညဘတ္တပရိဝေသနံ ဂန္တွာ တံ ဘတ္တံ အဘုဉ္ဇိတွာ ဆာတောဝ ပဋိနိဝတ္တေယျ, တတ္ထ ကတမံ ဇနော ဂရဟေယျ ဆာတံ ဝါ ပုညဘတ္တံ ဝါ’’တိ? ‘‘ဆာတံ, ဘန္တေ, ဇနော ဂရဟေယျ ‘အယံ ခုဒါဣဠိတော ပုညဘတ္တံ ပဋိလဘိတွာ အဘုဉ္ဇိတွာ ဆာတောဝ ပဋိနိဝတ္တော, ကိံ ဣမဿ အဘုဉ္ဇန္တဿ ဘောဇနံ သယံ မုခံ ပဝိသိဿတိ, ကော ဒေါသော ဘောဇနဿာ’’’တိ? ‘‘ဧဝမေဝ ခေါ, မဟာရာဇ, တထာဂတော အန္တောသာသနသမုဂ္ဂေ ပရမပဝရံ သန္တံ သိဝံ ပဏီတံ အမတံ ပရမမဓုရံ ကာယဂတာသတိဘောဇနံ ဌပေသိ ‘ယေ ကေစိ ကိလေသဆာတဇ္ဈတ္တာ တဏှာပရေတမာနသာ သစေတနာ ဗုဓါ, တေ ဣမံ ဘောဇနံ ဘုဉ္ဇိတွာ ကာမရူပါရူပဘဝေသု သဗ္ဗံ တဏှမပနေဿန္တီ’တိ။ ယဒိ ကောစိ တံ ဘောဇနံ အဘုဉ္ဇိတွာ တဏှာသိတောဝ ပဋိနိဝတ္တိတွာ ဟီနာယာဝတ္တတိ, တညေဝ ဇနော ဂရဟိဿတိ ‘အယံ ဇိနသာသနေ ပဗ္ဗဇိတွာ တတ္ထ ပတိဋ္ဌံ အလဘိတွာ ဟီနာယာဝတ္တော, ကိံ ဣမံ အပ္ပဋိပဇ္ဇန္တံ ဇိနသာသနံ သယံ ဗောဓေဿသိ, ကော ဒေါသော ဇိနသာသနဿာ’တိ။

‘‘ယဒိ, မဟာရာဇ, တထာဂတော ဂိဟိံ ယေဝ ဧကသ္မိံ ဖလေ ဝိနီတံ ပဗ္ဗာဇေယျ, န နာမာယံ ပဗ္ဗဇ္ဇာ ကိလေသပ္ပဟာနာယ ဝိသုဒ္ဓိယာ ဝါ, နတ္ထိ ပဗ္ဗဇ္ဇာယ ကရဏီယံ။ ယထာ, မဟာရာဇ, ပုရိသော အနေကသတေန ကမ္မေန တဠာကံ ခဏာပေတွာ ပရိသာယ ဧဝမနုဿာဝေယျ ‘မာ မေ, ဘောန္တော, ကေစိ သံကိလိဋ္ဌာ ဣမံ တဠာကံ ဩတရထ, ပဝါဟိတရဇောဇလ္လာ ပရိသုဒ္ဓါ ဝိမလမဋ္ဌာ ဣမံ တဠာကံ ဩတရထာ’တိ။ အပိ နု ခေါ, မဟာရာဇ, တေသံ ပဝါဟိတရဇောဇလ္လာနံ ပရိသုဒ္ဓါနံ ဝိမလမဋ္ဌာနံ တေန တဠာကေန ကရဏီယံ ဘဝေယျာ’’တိ? ‘‘န ဟိ, ဘန္တေ, ယဿတ္ထာယ တေ တံ တဠာကံ ဥပဂစ္ဆေယျုံ, တံ အညတ္ရေဝ တေသံ ကတံ ကရဏီယံ, ကိံ တေသံ တေန တဠာကေနာ’’တိ? ‘‘ဧဝမေဝ ခေါ, မဟာရာဇ, ယဒိ တထာဂတော ဂိဟိံ ယေဝ ဧကသ္မိံ ဖလေ ဝိနီတံ ပဗ္ဗာဇေယျ, တတ္ထေဝ တေသံ ကတံ ကရဏီယံ, ကိံ တေသံ ပဗ္ဗဇ္ဇာယ။

‘‘ယထာ ဝါ ပန, မဟာရာဇ, သဘာဝဣသိဘတ္တိကော သုတမန္တပဒဓရော အတက္ကိကော ရောဂုပ္ပတ္တိကုသလော အမောဃဓုဝသိဒ္ဓကမ္မော ဘိသက္ကော သလ္လကတ္တော သဗ္ဗရောဂူပသမဘေသဇ္ဇံ သန္နိပါတေတွာ ပရိသာယ ဧဝမနုဿာဝေယျ ‘မာ ခေါ, ဘောန္တော , ကေစိ သဗျာဓိကာ မမ သန္တိကေ ဥပဂစ္ဆထ, အဗျာဓိကာ အရောဂါ မမ သန္တိကေ ဥပဂစ္ဆထာ’တိ။ အပိ နု ခေါ, မဟာရာဇ, တေသံ အဗျာဓိကာနံ အရောဂါနံ ပရိပုဏ္ဏာနံ ဥဒဂ္ဂါနံ တေန ဘိသက္ကေန ကရဏီယံ ဘဝေယျာ’’တိ? ‘‘န ဟိ, ဘန္တေ, ယဿတ္ထာယ တေ တံ ဘိသက္ကံ သလ္လကတ္တံ ဥပဂစ္ဆေယျုံ, တံ အညတ္ရေဝ တေသံ ကတံ ကရဏီယံ, ကိံ တေသံ တေန ဘိသက္ကေနာ’’တိ? ‘‘ဧဝမေဝ ခေါ, မဟာရာဇ, ယဒိ တထာဂတော ဂိဟိံ ယေဝ ဧကသ္မိံ ဖလေ ဝိနီတံ ပဗ္ဗာဇေယျ, တတ္ထေဝ တေသံ ကတံ ကရဏီယံ, ကိံ တေသံ ပဗ္ဗဇ္ဇာယ?

‘‘ယထာ ဝါ ပန, မဟာရာဇ, ကောစိ ပုရိသော အနေကထာလိပါကသတံ ဘောဇနံ ပဋိယာဒါပေတွာ ပရိသာယ ဧဝမနုဿာဝေယျ ‘မာ မေ, ဘောန္တော, ကေစိ ဆာတာ ဣမံ ပရိဝေသနံ ဥပဂစ္ဆထ, သုဘုတ္တာ တိတ္တာ သုဟိတာ ဓါတာ ဣဏိတာ ပရိပုဏ္ဏာ ဣမံ ပရိဝေသနံ ဥပဂစ္ဆထာ’’တိ။ အပိ နု ခေါ မဟာရာဇ, တေသံ ဘုတ္တာဝီနံ တိတ္တာနံ သုဟိတာနံ ဓါတာနံ ဣဏိတာနံ ပရိပုဏ္ဏာနံ တေန ဘောဇနေန ကရဏီယံ ဘဝေယျာ’’တိ? ‘‘န ဟိ, ဘန္တေ, ယဿတ္ထာယ တေ တံ ပရိဝေသနံ ဥပဂစ္ဆေယျုံ, တံ အညတ္ရေဝ တေသံ ကတံ ကရဏီယံ, ကိံ တေသံ တာယ ပရိဝေသနာယာ’’တိ? ‘‘ဧဝမေဝ ခေါ, မဟာရာဇ, ယဒိ တထာဂတော ဂိဟိံ ယေဝ ဧကသ္မိံ ဖလေ ဝိနီတံ ပဗ္ဗာဇေယျ, တတ္ထေဝ တေသံ ကတံ ကရဏီယံ, ကိံ တေသံ ပဗ္ဗဇ္ဇာယ?

‘‘အပိ စ, မဟာရာဇ, ယေ ဟီနာယာဝတ္တန္တိ, တေ ဇိနသာသနဿ ပဉ္စ အတုလိယေ ဂုဏေ ဒဿေန္တိ။ ကတမေ ပဉ္စ? ဘူမိမဟန္တဘာဝံ ဒဿေန္တိ, ပရိသုဒ္ဓဝိမလဘာဝံ ဒဿေန္တိ, ပါပေဟိ အသံဝါသိယဘာဝံ ဒဿေန္တိ, ဒုပ္ပဋိဝေဓဘာဝံ ဒဿေန္တိ, ဗဟုသံဝရရက္ခိယဘာဝံ ဒဿေန္တိ။

‘‘ကထံ ဘူမိမဟန္တဘာဝံ ဒဿေန္တိ? ယထာ, မဟာရာဇ, ပုရိသော အဓနော ဟီနဇစ္စော နိဗ္ဗိသေသော ဗုဒ္ဓိပရိဟီနော မဟာရဇ္ဇံ ပဋိလဘိတွာ န စိရဿေဝ ပရိပတတိ ပရိဓံသတိ ပရိဟာယတိ ယသတော, န သက္ကောတိ ဣဿရိယံ သန္ဓာရေတုံ။ ကိံ ကာရဏံ ? မဟန္တတ္တာ ဣဿရိယဿ။ ဧဝမေဝ ခေါ, မဟာရာဇ, ယေ ကေစိ နိဗ္ဗိသေသာ အကတပုညာ ဗုဒ္ဓိပရိဟီနာ ဇိနသာသနေ ပဗ္ဗဇန္တိ, တေ တံ ပဗ္ဗဇ္ဇံ ပဝရုတ္တမံ သန္ဓာရေတုံ အဝိသဟန္တာ န စိရဿေဝ ဇိနသာသနာ ပရိပတိတွာ ပရိဓံသိတွာ ပရိဟာယိတွာ ဟီနာယာဝတ္တန္တိ, န သက္ကောန္တိ ဇိနသာသနံ သန္ဓာရေတုံ။ ကိံ ကာရဏံ? မဟန္တတ္တာ ဇိနသာသနဘူမိယာ။ ဧဝံ ဘူမိမဟန္တဘာဝံ ဒဿေန္တိ။

‘‘ကထံ ပရိသုဒ္ဓဝိမလဘာဝံ ဒဿေန္တိ? ယထာ, မဟာရာဇ, ဝါရိ ပေါက္ခရပတ္တေ ဝိကိရတိ ဝိဓမတိ ဝိဓံသေတိ, န ဌာနမုပဂစ္ဆတိ နူပလိမ္ပတိ။ ကိံ ကာရဏံ? ပရိသုဒ္ဓဝိမလတ္တာ ပဒုမဿ။ ဧဝမေဝ ခေါ, မဟာရာဇ, ယေ ကေစိ သဌာ ကူဋာ ဝင်္ကာ ကုဋိလာ ဝိသမဒိဋ္ဌိနော ဇိနသာသနေ ပဗ္ဗဇန္တိ, တေ ပရိသုဒ္ဓဝိမလနိက္ကဏ္ဋကပဏ္ဍရဝရပ္ပဝရသာသနတော န စိရဿေဝ ဝိကိရိတွာ ဝိဓမိတွာ ဝိဓံသေတွာ အသဏ္ဌဟိတွာ အနုပလိမ္ပိတွာ ဟီနာယာဝတ္တန္တိ။ ကိံ ကာရဏံ? ပရိသုဒ္ဓဝိမလတ္တာ ဇိနသာသနဿ။ ဧဝံ ပရိသုဒ္ဓဝိမလဘာဝံ ဒဿေန္တိ။

‘‘ကထံ ပါပေဟိ အသံဝါသိယဘာဝံ ဒဿေန္တိ? ယထာ, မဟာရာဇ, မဟာသမုဒ္ဒေါ န မတေန ကုဏပေန သံဝသတိ, ယံ ဟောတိ မဟာသမုဒ္ဒေ မတံ ကုဏပံ, တံ ခိပ္ပမေဝ တီရံ ဥပနေတိ ထလံ ဝါ ဥဿာရေတိ။ ကိံ ကာရဏံ? မဟာဘူတာနံ ဘဝနတ္တာ မဟာသမုဒ္ဒဿ။ ဧဝမေဝ ခေါ, မဟာရာဇ, ယေ ကေစိ ပါပကာ အသံဝုတာ အဟိရိကာ အကိရိယာ ဩသန္နဝီရိယာ ကုသီတာ ကိလိဋ္ဌာ ဒုဇ္ဇနာ မနုဿာ ဇိနသာသနေ ပဗ္ဗဇန္တိ, တေ န စိရဿေဝ ဇိနသာသနတော အရဟန္တဝိမလခီဏာသဝမဟာဘူတဘဝနတော နိက္ခမိတွာ အသံဝသိတွာ ဟီနာယာဝတ္တန္တိ။ ကိံ ကာရဏံ? ပါပေဟိ အသံဝါသိယတ္တာ ဇိနသာသနဿ။ ဧဝံ ပါပေဟိ အသံဝါသိယဘာဝံ ဒဿေန္တိ။

‘‘ကထံ ဒုပ္ပဋိဝေဓဘာဝံ ဒဿေန္တိ? ယထာ, မဟာရာဇ, ယေ ကေစိ အဆေကာ အသိက္ခိတာ အသိပ္ပိနော မတိဝိပ္ပဟီနာ ဣဿာသာ [ဣဿတ္ထာ (သီ။ သျာ။ ဣ။)] ဝါလဂ္ဂဝေဓံ အဝိသဟန္တာ ဝိဂဠန္တိ ပက္ကမန္တိ။ ကိံ ကာရဏံ? သဏှသုခုမဒုပ္ပဋိဝေဓတ္တာ ဝါလဂ္ဂဿ ။ ဧဝမေဝ ခေါ, မဟာရာဇ, ယေ ကေစိ ဒုပ္ပညာ ဇဠာ ဧဠမူဂါ မူဠှာ ဒန္ဓဂတိကာ ဇနာ ဇိနသာသနေ ပဗ္ဗဇန္တိ, တေ တံ ပရမသဏှသုခုမစတုသစ္စပ္ပဋိဝေဓံ ပဋိဝိဇ္ဈိတုံ အဝိသဟန္တာ ဇိနသာသနာ ဝိဂဠိတွာ ပက္ကမိတွာ န စိရဿေဝ ဟီနာယာဝတ္တန္တိ။ ကိံ ကာရဏံ? ပရမသဏှသုခုမဒုပ္ပဋိဝေဓတာယ သစ္စာနံ။ ဧဝံ ဒုပ္ပဋိဝေဓဘာဝံ ဒဿေန္တိ။

‘‘ကထံ ဗဟုသံဝရရက္ခိယဘာဝံ ဒဿေန္တိ? ယထာ, မဟာရာဇ, ကောစိဒေဝ ပုရိသော မဟတိမဟာယုဒ္ဓဘူမိမုပဂတော ပရသေနာယ ဒိသာဝိဒိသာဟိ သမန္တာ ပရိဝါရိတော သတ္တိဟတ္ထံ ဇနမုပေန္တံ ဒိသွာ ဘီတော ဩသက္ကတိ ပဋိနိဝတ္တတိ ပလာယတိ။ ကိံ ကာရဏံ? ဗဟုဝိဓယုဒ္ဓမုခရက္ခဏဘယာ။ ဧဝမေဝ ခေါ, မဟာရာဇ, ယေ ကေစိ ပါပကာ အသံဝုတာ အဟိရိကာ အကိရိယာ အက္ခန္တီ စပလာ စလိတာ ဣတ္တရာ ဗာလဇနာ ဇိနသာသနေ ပဗ္ဗဇန္တိ, တေ ဗဟုဝိဓံ သိက္ခာပဒံ ပရိရက္ခိတုံ အဝိသဟန္တာ ဩသက္ကိတွာ ပဋိနိဝတ္တိတွာ ပလာယိတွာ န စိရဿေဝ ဟီနာယာဝတ္တန္တိ။ ကိံ ကာရဏံ? ဗဟုဝိဓသံဝရရက္ခိယဘာဝတ္တာ ဇိနသာသနဿ။ ဧဝံ ဗဟုဝိဓသံဝရရက္ခိယဘာဝံ ဒဿေန္တိ။

‘‘ထလဇုတ္တမေပိ, မဟာရာဇ, ဝဿိကာဂုမ္ဗေ ကိမိဝိဒ္ဓါနိ ပုပ္ဖာနိ ဟောန္တိ, တာနိ အင္ကုရာနိ သင္ကုဋိတာနိ အန္တရာ ယေဝ ပရိပတန္တိ, န စ တေသု ပရိပတိတေသု ဝဿိကာဂုမ္ဗော ဟီဠိတော နာမ ဟောတိ။ ယာနိ တတ္ထ ဌိတာနိ ပုပ္ဖာနိ, တာနိ သမ္မာ ဂန္ဓေန ဒိသာဝိဒိသံ အဘိဗျာပေန္တိ။ ဧဝမေဝ ခေါ, မဟာရာဇ, ယေ တေ ဇိနသာသနေ ပဗ္ဗဇိတွာ ဟီနာယာဝတ္တန္တိ, တေ ဇိနသာသနေ ကိမိဝိဒ္ဓါနိ ဝဿိကာပုပ္ဖာနိ ဝိယ ဝဏ္ဏဂန္ဓရဟိတာ နိဗ္ဗဏ္ဏာကာရသီလာ အဘဗ္ဗာ ဝေပုလ္လာယ, န စ တေသံ ဟီနာယာဝတ္တနေန ဇိနသာသနံ ဟီဠိတံ နာမ ဟောတိ။ ယေ တတ္ထ ဌိတာ ဘိက္ခူ, တေ သဒေဝကံ လောကံ သီလဝရဂန္ဓေန အဘိဗျာပေန္တိ။

‘‘သာလီနမ္ပိ, မဟာရာဇ, နိရာတင်္ကာနံ လောဟိတကာနံ အန္တရေ ကရုမ္ဘကံ နာမ သာလိဇာတိ ဥပ္ပဇ္ဇိတွာ အန္တရာ ယေဝ ဝိနဿတိ, န စ တဿာ ဝိနဋ္ဌတ္တာ လောဟိတကသာလီ ဟီဠိတာ နာမ ဟောန္တိ။ ယေ တတ္ထ ဌိတာ သာလီ, တေ ရာဇူပဘောဂါ ဟောန္တိ။ ဧဝမေဝ ခေါ, မဟာရာဇ, ယေ တေ ဇိနသာသနေ ပဗ္ဗဇိတွာ ဟီနာယာဝတ္တန္တိ, တေ လောဟိတကသာလီနမန္တရေ ကရုမ္ဘကာ ဝိယ ဇိနသာသနေ န ဝဍ္ဎိတွာ ဝေပုလ္လတံ န ပါပုဏိတွာ [ဝဍ္ဎိတွာ ဝေပုလ္လတံ အပါပုဏိတွာ (သီ။ က။)] အန္တရာ ယေဝ ဟီနာယာဝတ္တန္တိ, န စ တေသံ ဟီနာယာဝတ္တနေန ဇိနသာသနံ ဟီဠိတံ နာမ ဟောတိ။ ယေ တတ္ထ ဌိတာ ဘိက္ခူ တေ အရဟတ္တဿ အနုစ္ဆဝိကာ ဟောန္တိ။

‘‘ကာမဒဒဿာပိ , မဟာရာဇ, မဏိရတနဿ ဧကဒေသံ [ဧကဒေသေ (က။)] ကက္ကသံ ဥပ္ပဇ္ဇတိ, န စ တတ္ထ ကက္ကသုပ္ပန္နတ္တာ မဏိရတနံ ဟီဠိတံ နာမ ဟောတိ။ ယံ တတ္ထ ပရိသုဒ္ဓံ မဏိရတနဿ, တံ ဇနဿ ဟာသကရံ ဟောတိ။ ဧဝမေဝ ခေါ, မဟာရာဇ, ယေ တေ ဇိနသာသနေ ပဗ္ဗဇိတွာ ဟီနာယာဝတ္တန္တိ, ကက္ကသာ တေ ဇိနသာသနေ ပပဋိကာ, န စ တေသံ ဟီနာယာဝတ္တနေန ဇိနသာသနံ ဟီဠိတံ နာမ ဟောတိ။ ယေ တတ္ထ ဌိတာ ဘိက္ခူ, တေ ဒေဝမနုဿာနံ ဟာသဇနကာ ဟောန္တိ။

‘‘ဇာတိသမ္ပန္နဿပိ, မဟာရာဇ, လောဟိတစန္ဒနဿ ဧကဒေသံ ပူတိကံ ဟောတိ အပ္ပဂန္ဓံ။ န တေန လောဟိတစန္ဒနံ ဟီဠိတံ နာမ ဟောတိ။ ယံ တတ္ထ အပူတိကံ သုဂန္ဓံ, တံ သမန္တာ ဝိဓူပေတိ အဘိဗျာပေတိ။ ဧဝမေဝ ခေါ, မဟာရာဇ, ယေ တေ ဇိနသာသနေ ပဗ္ဗဇိတွာ ဟီနာယာဝတ္တန္တိ, တေ လောဟိတစန္ဒနသာရန္တရေ ပူတိကဒေသမိဝ ဆဍ္ဍနီယာ ဇိနသာသနေ, န စ တေသံ ဟီနာယာဝတ္တနေန ဇိနသာသနံ ဟီဠိတံ နာမ ဟောတိ။ ယေ တတ္ထ ဌိတာ ဘိက္ခူ, တေ သဒေဝကံ လောကံ သီလဝရစန္ဒနဂန္ဓေန အနုလိမ္ပယန္တီ’’တိ။

‘‘သာဓု, ဘန္တေ နာဂသေန, တေန တေန အနုစ္ဆဝိကေန တေန တေန သဒိသေန ကာရဏေန နိရဝဇ္ဇမနုပါပိတံ ဇိနသာသနံ သေဋ္ဌဘာဝေန ပရိဒီပိတံ, ဟီနာယာဝတ္တမာနာပိ တေ ဇိနသာသနဿ သေဋ္ဌဘာဝံ ယေဝ ပရိဒီပေန္တီ’’တိ။

ဟီနာယာဝတ္တနပဉ္ဟော ပဉ္စမော။

၆။ အရဟန္တဝေဒနာဝေဒိယနပဉ္ဟော

၆။ ‘‘ဘန္တေ နာဂသေန, တုမှေ ဘဏထ ‘အရဟာ ဧကံ ဝေဒနံ ဝေဒယတိ ကာယိကံ, န စေတသိက’န္တိ။ ကိံ နု ခေါ, ဘန္တေ နာဂသေန, အရဟတော စိတ္တံ ယံ ကာယံ နိဿာယ ပဝတ္တတိ, တတ္ထ အရဟာ အနိဿရော အဿာမီ အဝသဝတ္တီ’’တိ ? ‘‘အာမ, မဟာရာဇာ’’တိ။ ‘‘န ခေါ, ဘန္တေ နာဂသေန, ယုတ္တမေတံ, ယံ သော သကစိတ္တဿ ပဝတ္တမာနေ ကာယေ အနိဿရော ဟောတိ အဿာမီ အဝသဝတ္တီ; သကုဏောပိ တာဝ, ဘန္တေ, ယသ္မိံ ကုလာဝကေ ပဋိဝသတိ, တတ္ထ သော ဣဿရော ဟောတိ သာမီ ဝသဝတ္တီ’’တိ။

‘‘ဒသယိမေ, မဟာရာဇ, ကာယာနုဂတာ ဓမ္မာ ဘဝေ ဘဝေ ကာယံ အနုဓါဝန္တိ အနုပရိဝတ္တန္တိ။ ကတမေ ဒသ? သီတံ ဥဏှံ ဇိဃစ္ဆာ ပိပါသာ ဥစ္စာရော ပဿာဝေါ မိဒ္ဓံ ဇရာ ဗျာဓိ မရဏံ။ ဣမေ ခေါ, မဟာရာဇ, ဒသ ကာယာနုဂတာ ဓမ္မာ ဘဝေ ဘဝေ ကာယံ အနုဓါဝန္တိ အနုပရိဝတ္တန္တိ, တတ္ထ အရဟာ အနိဿရော အဿာမီ အဝသဝတ္တီ’’တိ။

‘‘ဘန္တေ နာဂသေန, ကေန ကာရဏေန အရဟတော ကာယေ အာဏာ နပ္ပဝတ္တတိ ဣဿရိယံ ဝါ, တတ္ထ မေ ကာရဏံ ဗြူဟီ’’တိ? ‘‘ယထာ, မဟာရာဇ, ယေ ကေစိ ပထဝိနိဿိတာ သတ္တာ, သဗ္ဗေ တေ ပထဝိံ နိဿာယ စရန္တိ ဝိဟရန္တိ ဝုတ္တိံ ကပ္ပေန္တိ, အပိ နု ခေါ, မဟာရာဇ, တေသံ ပထဝိယာ အာဏာ ပဝတ္တတိ ဣဿရိယံ ဝါ’’တိ? ‘‘န ဟိ, ဘန္တေ’’တိ။ ‘‘ဧဝမေဝ ခေါ, မဟာရာဇ, အရဟတော စိတ္တံ ကာယံ နိဿာယ ပဝတ္တတိ, န စ အရဟတော ကာယေ အာဏာ ပဝတ္တတိ ဣဿရိယံ ဝါ’’တိ။

‘‘ဘန္တေ နာဂသေန, ကေန ကာရဏေန ပုထုဇ္ဇနော ကာယိကမ္ပိ စေတသိကမ္ပိ ဝေဒနံ ဝေဒယတီ’’တိ? ‘‘အဘာဝိတတ္တာ, မဟာရာဇ, စိတ္တဿ ပုထုဇ္ဇနော ကာယိကမ္ပိ စေတသိကမ္ပိ ဝေဒနံ ဝေဒယတိ။ ယထာ, မဟာရာဇ, ဂေါဏော ဆာတော ပရိတသိတော အဗလဒုဗ္ဗလပရိတ္တကတိဏေသု ဝါ လတာယ ဝါ ဥပနိဗဒ္ဓေါ အဿ, ယဒါ သော ဂေါဏော ပရိကုပိတော ဟောတိ, တဒါ သဟ ဥပနိဗန္ဓနေန ပက္ကမတိ။ ဧဝမေဝ ခေါ, မဟာရာဇ, အဘာဝိတစိတ္တဿ ဝေဒနာ ဥပ္ပဇ္ဇိတွာ စိတ္တံ ပရိကောပေတိ, စိတ္တံ ပရိကုပိတံ ကာယံ အာဘုဇတိ နိဗ္ဘုဇတိ သမ္ပရိဝတ္တကံ ကရောတိ။ အထ ခေါ သော အဘာဝိတစိတ္တော တသတိ ရဝတိ ဘေရဝရာဝမဘိရဝတိ, ဣဒမေတ္ထ, မဟာရာဇ, ကာရဏံ, ယေန ကာရဏေန ပုထုဇ္ဇနော ကာယိကမ္ပိ စေတသိကမ္ပိ ဝေဒနံ ဝေဒယတီ’’တိ။

‘‘ကိံ ပန တံ ကာရဏံ, ယေန ကာရဏေန အရဟာ ဧကံ ဝေဒနံ ဝေဒယတိ ကာယိကံ, န စေတသိက’’န္တိ? ‘‘အရဟတော, မဟာရာဇ, စိတ္တံ ဘာဝိတံ ဟောတိ သုဘာဝိတံ ဒန္တံ သုဒန္တံ အဿဝံ ဝစနကရံ, သော ဒုက္ခာယ ဝေဒနာယ ဖုဋ္ဌော သမာနော ‘အနိစ္စ’န္တိ ဒဠှံ ဂဏှာတိ, သမာဓိထမ္ဘေ စိတ္တံ ဥပနိဗန္ဓတိ, တဿ တံ စိတ္တံ သမာဓိထမ္ဘေ ဥပနိဗန္ဓနံ န ဝေဓတိ န စလတိ, ဌိတံ ဟောတိ အဝိက္ခိတ္တံ, တဿ ဝေဒနာဝိကာရဝိပ္ဖာရေန ကာယော အာဘုဇတိ နိဗ္ဘုဇတိ သမ္ပရိဝတ္တတိ, ဣဒမေတ္ထ, မဟာရာဇ, ကာရဏံ, ယေန ကာရဏေန အရဟာ ဧကံ ဝေဒနံ ဝေဒယတိ ကာယိကံ, န စေတသိက’’န္တိ။

‘‘ဘန္တေ နာဂသေန, တံ နာမ လောကေ အစ္ဆရိယံ ယံ ကာယေ စလမာနေ စိတ္တံ န စလတိ, တတ္ထ မေ ကာရဏံ ဗြူဟီ’’တိ။ ‘‘ယထာ, မဟာရာဇ, မဟတိမဟာရုက္ခေ ခန္ဓသာခါပလာသသမ္ပန္နေ အနိလဗလသမာဟတေ သာခါ စလတိ, အပိ နု တဿ ခန္ဓောပိ စလတီ’’တိ? ‘‘န ဟိ, ဘန္တေ’’တိ ။ ‘‘ဧဝမေဝ ခေါ, မဟာရာဇ, အရဟာ ဒုက္ခာယ ဝေဒနာယ ဖုဋ္ဌော သမာနော ‘အနိစ္စ’န္တိ ဒဠှံ ဂဏှာတိ, သမာဓိထမ္ဘေ စိတ္တံ ဥပနိဗန္ဓတိ, တဿ တံ စိတ္တံ သမာဓိထမ္ဘေ ဥပနိဗန္ဓနံ န ဝေဓတိ န စလတိ, ဌိတံ ဟောတိ အဝိက္ခိတ္တံ, တဿ ဝေဒနာဝိကာရဝိပ္ဖာရေန ကာယော အာဘုဇတိ နိဗ္ဘုဇတိ သမ္ပရိဝတ္တတိ, စိတ္တံ ပန တဿ န ဝေဓတိ န စလတိ ခန္ဓော ဝိယ မဟာရုက္ခဿာ’’တိ။ ‘‘အစ္ဆရိယံ, ဘန္တေ နာဂသေန, အဗ္ဘုတံ, ဘန္တေ နာဂသေန, န မေ ဧဝရူပေါ သဗ္ဗကာလိကော ဓမ္မပဒီပေါ ဒိဋ္ဌပုဗ္ဗော’’တိ။

အရဟန္တဝေဒနာဝေဒိယနပဉ္ဟော ဆဋ္ဌော။

၇။ အဘိသမယန္တရာယကရပဉ္ဟော

၇။ ‘‘ဘန္တေ နာဂသေန, ဣဓ ယော ကောစိ ဂိဟီ ပါရာဇိကံ အဇ္ဈာပန္နော ဘဝေယျ, သော အပရေန သမယေန ပဗ္ဗာဇေယျ, အတ္တနာပိ သော န ဇာနေယျ ‘ဂိဟိပါရာဇိကံ အဇ္ဈာပန္နောသ္မီ’တိ, နပိ တဿ အညော ကောစိ အာစိက္ခေယျ ‘ဂိဟိပါရာဇိကံ အဇ္ဈာပန္နောသီ’တိ။ သော စ တထတ္တာယ ပဋိပဇ္ဇေယျ, အပိ နု တဿ ဓမ္မာဘိသမယော ဘဝေယျာ’’တိ? ‘‘န ဟိ, မဟာရာဇာ’’တိ။ ‘‘ကေန, ဘန္တေ, ကာရဏေနာ’’တိ? ‘‘ယော တဿ ဟေတု ဓမ္မာဘိသမယာယ, သော တဿ သမုစ္ဆိန္နော, တသ္မာ ဓမ္မာဘိသမယော န ဘဝတီ’’တိ။

‘‘ဘန္တေ နာဂသေန, တုမှေ ဘဏထ ‘ဇာနန္တဿ ကုက္ကုစ္စံ ဟောတိ, ကုက္ကုစ္စေ သတိ အာဝရဏံ ဟောတိ, အာဝဋေ စိတ္တေ ဓမ္မာဘိသမယော န ဟောတီ’တိ။ ဣမဿ ပန အဇာနန္တဿ အကုက္ကုစ္စဇာတဿ သန္တစိတ္တဿ ဝိဟရတော ကေန ကာရဏေန ဓမ္မာဘိသမယော န ဟောတိ, ဝိသမေန ဝိသမေနေသော ပဉ္ဟော ဂစ္ဆတိ, စိန္တေတွာ ဝိသဇ္ဇေထာ’’တိ။

‘‘ရုဟတိ , မဟာရာဇ, သုကဋ္ဌေ သုကလလေ မဏ္ဍခေတ္တေ သာရဒံ သုခသယိတံ ဗီဇ’’န္တိ? ‘‘အာမ, ဘန္တေ’’တိ။ ‘‘အပိ နု, မဟာရာဇ, တညေဝ ဗီဇံ ဃနသေလသိလာတလေ ရုဟေယျာ’’တိ? ‘‘န ဟိ, ဘန္တေ’’တိ။ ‘‘ကိဿ ပန, မဟာရာဇ, တညေဝ ဗီဇံ ကလလေ ရုဟတိ, ကိဿ ဃနသေလေ န ရုဟတီ’’တိ? ‘‘နတ္ထိ, ဘန္တေ, တဿ ဗီဇဿ ရုဟနာယ ဃနသေလေ ဟေတု, အဟေတုနာ ဗီဇံ န ရုဟတီ’’တိ။ ‘‘ဧဝမေဝ ခေါ, မဟာရာဇ, ယေန ဟေတုနာ တဿ ဓမ္မာဘိသမယော ဘဝေယျ, သော တဿ ဟေတု သမုစ္ဆိန္နော, အဟေတုနာ ဓမ္မာဘိသမယော န ဟောတိ။

‘‘ယထာ ဝါ ပန, မဟာရာဇ, ဒဏ္ဍလေဍ္ဍုလဂုဠမုဂ္ဂရာ ပထဝိယာ ဌာနမုပဂစ္ဆန္တိ, အပိ နု, မဟာရာဇ, တေ ယေဝ ဒဏ္ဍလေဍ္ဍုလဂုဠမုဂ္ဂရာ ဂဂနေ ဌာနမုပဂစ္ဆန္တီ’’တိ? ‘‘န ဟိ ဘန္တေ’’တိ။ ‘‘ကိံ ပနေတ္ထ, မဟာရာဇ, ကာရဏံ, ယေန ကာရဏေန တေ ယေဝ ဒဏ္ဍလေဍ္ဍုလဂုဠမုဂ္ဂရာ ပထဝိယာ ဌာနမုပဂစ္ဆန္တိ, ကေန ကာရဏေန ဂဂနေ န တိဋ္ဌန္တီ’’တိ? ‘‘နတ္ထိ, ဘန္တေ, တေသံ ဒဏ္ဍလေဍ္ဍုလဂုဠမုဂ္ဂရာနံ ပတိဋ္ဌာနာယ အာကာသေ ဟေတု, အဟေတုနာ န တိဋ္ဌန္တီ’’တိ ။ ‘‘ဧဝမေဝ ခေါ, မဟာရာဇ, တဿ တေန ဒေါသေန အဘိသမယဟေတု သမုစ္ဆိန္နော, ဟေတုသမုဂ္ဃါတေ အဟေတုနာ အဘိသမယော န ဟောတီတိ။

‘‘ယထာ ဝါ ပန, မဟာရာဇ, ထလေ အဂ္ဂိ ဇလတိ, အပိ နု ခေါ, မဟာရာဇ, သော ယေဝ အဂ္ဂိ ဥဒကေ ဇလတီ’’တိ? ‘‘န ဟိ, ဘန္တေ’’တိ။ ‘‘ကိံ ပနေတ္ထ, မဟာရာဇ, ကာရဏံ, ယေန ကာရဏေန သော ယေဝ အဂ္ဂိ ထလေ ဇလတိ, ကေန ကာရဏေန ဥဒကေ န ဇလတီ’’တိ? ‘‘နတ္ထိ, ဘန္တေ, အဂ္ဂိဿ ဇလနာယ ဥဒကေ ဟေတု, အဟေတုနာ န ဇလတီ’’တိ။ ‘‘ဧဝမေဝ ခေါ, မဟာရာဇ, တဿ တေန ဒေါသေန အဘိသမယဟေတု သမုစ္ဆိန္နော, ဟေတုသမုဂ္ဃါတေ အဟေတုနာ ဓမ္မာဘိသမယော န ဟောတီ’’တိ။

‘‘ဘန္တေ နာဂသေန, ပုနပေတံ အတ္ထံ စိန္တေဟိ, န မေ တတ္ထ စိတ္တသညတ္တိ ဘဝတိ, အဇာနန္တဿ အသတိ ကုက္ကုစ္စေ အာဝရဏံ ဟောတီတိ, ကာရဏေန မံ သညာပေဟီ’’တိ။ ‘‘အပိ နု, မဟာရာဇ, ဝိသံ ဟလာဟလံ အဇာနန္တေန ခါယိတံ ဇီဝိတံ ဟရတီ’’တိ? ‘‘အာမ, ဘန္တေ’’တိ။ ‘‘ဧဝမေဝ ခေါ, မဟာရာဇ, အဇာနန္တေနပိ ကတံ ပါပံ အဘိသမယန္တရာယကရံ ဟောတိ။

‘‘အပိ နု, မဟာရာဇ, အဂ္ဂိ အဇာနိတွာ အက္ကမန္တံ ဍဟတီ’’တိ? ‘‘အာမ, ဘန္တေ’’တိ။ ‘‘ဧဝမေဝ ခေါ, မဟာရာဇ, အဇာနန္တေနပိ ကတံ ပါပံ အဘိသမယန္တရာယကရံ ဟောတိ။

‘‘အပိ နု, မဟာရာဇ, အဇာနန္တံ အာသီဝိသော ဍံသိတွာ ဇီဝိတံ ဟရတီ’’တိ? ‘‘အာမ, ဘန္တေ’’တိ။ ‘‘ဧဝမေဝ ခေါ, မဟာရာဇ, အဇာနန္တေနပိ ကတံ ပါပံ အဘိသမယန္တရာယကရံ ဟောတိ။

‘‘နနု, မဟာရာဇ, ကာလိင်္ဂရာဇာ သမဏကောလညော သတ္တရတနပရိကိဏ္ဏော ဟတ္ထိရတနမဘိရုယှ ကုလဒဿနာယ ဂစ္ဆန္တော အဇာနန္တောပိ နာသက္ခိ ဗောဓိမဏ္ဍဿ ဥပရိတော ဂန္တုံ, ဣဒမေတ္ထ, မဟာရာဇ, ကာရဏံ, ယေန ကာရဏေန အဇာနန္တေနပိ ကတံ ပါပံ အဘိသမယန္တရာယကရံ ဟောတီ’’တိ? ‘‘ဇိနဘာသိတံ , ဘန္တေ နာဂသေန, ကာရဏံ န သက္ကာ ပဋိက္ကောသိတုံ, ဧသောဝေတဿ အတ္ထော တထာ သမ္ပဋိစ္ဆာမီ’’တိ။

အဘိသမယန္တရာယကရပဉ္ဟော သတ္တမော။

၈။ ဒုဿီလပဉ္ဟော

၈။ ‘‘ဘန္တေ နာဂသေန, ဂိဟိဒုဿီလဿ စ သမဏဒုဿီလဿ စ ကော ဝိသေသော, ကိံ နာနာကရဏံ, ဥဘောပေတေ သမသမဂတိကာ, ဥဘိန္နမ္ပိ သမသမော ဝိပါကော ဟောတိ, ဥဒါဟု ကိဉ္စိ နာနာကာရဏံ အတ္ထီ’’တိ?

‘‘ဒသ ယိမေ, မဟာရာဇ, ဂုဏာ သမဏဒုဿီလဿ ဂိဟိဒုဿီလတော ဝိသေသေန အတိရေကာ, ဒသဟိ စ ကာရဏေဟိ ဥတ္တရိံ ဒက္ခိဏံ ဝိသောဓေတိ။

‘‘ကတမေ ဒသ ဂုဏာ သမဏဒုဿီလဿ ဂိဟိဒုဿီလတော ဝိသေသေန အတိရေကာ? ဣဓ, မဟာရာဇ, သမဏဒုဿီလော ဗုဒ္ဓေ သဂါရဝေါ ဟောတိ, ဓမ္မေ သဂါရဝေါ ဟောတိ, သံဃေ သဂါရဝေါ ဟောတိ, သဗြဟ္မစာရီသု သဂါရဝေါ ဟောတိ, ဥဒ္ဒေသပရိပုစ္ဆာယ ဝါယမတိ, သဝနဗဟုလော ဟောတိ, ဘိန္နသီလောပိ, မဟာရာဇ, ဒုဿီလော ပရိသဂတော အာကပ္ပံ ဥပဋ္ဌပေတိ, ဂရဟဘယာ ကာယိကံ ဝါစသိကံ ရက္ခတိ, ပဓါနာဘိမုခဉ္စဿ ဟောတိ စိတ္တံ, ဘိက္ခုသာမညံ ဥပဂတော ဟောတိ။ ကရောန္တောပိ, မဟာရာဇ, သမဏဒုဿီလော ပါပံ ပဋိစ္ဆန္နံ အာစရတိ။ ယထာ, မဟာရာဇ, ဣတ္ထီ သပတိကာ နိလီယိတွာ ရဟဿေနေဝ ပါပမာစရတိ; ဧဝမေဝ ခေါ, မဟာရာဇ, ကရောန္တောပိ သမဏဒုဿီလော ပါပံ ပဋိစ္ဆန္နံ အာစရတိ။ ဣမေ ခေါ, မဟာရာဇ, ဒသ ဂုဏာ သမဏဒုဿီလဿ ဂိဟိဒုဿီလတော ဝိသေသေန အတိရေကာ။

‘‘ကတမေဟိ ဒသဟိ ကာရဏေဟိ ဥတ္တရိံ ဒက္ခိဏံ ဝိသောဓေတိ? အနဝဇ္ဇကဝစဓါရဏတာယပိ ဒက္ခိဏံ ဝိသောဓေတိ, ဣသိသာမညဘဏ္ဍုလိင်္ဂဓါရဏတောပိ ဒက္ခိဏံ ဝိသောဓေတိ, သံဃသမယမနုပ္ပဝိဋ္ဌတာယပိ ဒက္ခိဏံ ဝိသောဓေတိ, ဗုဒ္ဓဓမ္မသံဃသရဏဂတတာယပိ ဒက္ခိဏံ ဝိသောဓေတိ, ပဓါနာသယနိကေတဝါသိတာယပိ ဒက္ခိဏံ ဝိသောဓေတိ, ဇိနသာသနဓရ [ဇိနသာသနဓန (သီ။ ဣ။)] ပရိယေသနတောပိ ဒက္ခိဏံ ဝိသောဓေတိ, ပဝရဓမ္မဒေသနတောပိ ဒက္ခိဏံ ဝိသောဓေတိ, ဓမ္မဒီပဂတိပရာယဏတာယပိ ဒက္ခိဏံ ဝိသောဓေတိ, ‘အဂ္ဂေါ ဗုဒ္ဓေါ’တိ ဧကန္တဥဇုဒိဋ္ဌိတာယပိ ဒက္ခိဏံ ဝိသောဓေတိ, ဥပေါသထသမာဒါနတောပိ ဒက္ခိဏံ ဝိသောဓေတိ။ ဣမေဟိ ခေါ, မဟာရာဇ, ဒသဟိ ကာရဏေဟိ ဥတ္တရိံ ဒက္ခိဏံ ဝိသောဓေတိ ။

‘‘သုဝိပန္နောပိ ဟိ, မဟာရာဇ, သမဏဒုဿီလော ဒါယကာနံ ဒက္ခိဏံ ဝိသောဓေတိ။ ယထာ, မဟာရာဇ, ဥဒကံ သုဗဟလမ္ပိ ကလလကဒ္ဒမရဇောဇလ္လံ အပနေတိ; ဧဝမေဝ ခေါ, မဟာရာဇ, သုဝိပန္နောပိ သမဏဒုဿီလော ဒါယကာနံ ဒက္ခိဏံ ဝိသောဓေတိ။

‘‘ယထာ ဝါ ပန, မဟာရာဇ, ဥဏှောဒကံ သုကုဓိတမ္ပိ [သုကဌိတမ္ပိ (သီ။ ဣ), သုခုဌိတမ္ပိ (သျာ။)] ဇ္ဇလန္တံ မဟန္တံ အဂ္ဂိက္ခန္ဓံ နိဗ္ဗာပေတိ, ဧဝမေဝ ခေါ, မဟာရာဇ, သုဝိပန္နောပိ သမဏဒုဿီလော ဒါယကာနံ ဒက္ခိဏံ ဝိသောဓေတိ။

‘‘ယထာ ဝါ ပန, မဟာရာဇ, ဘောဇနံ ဝိရသမ္ပိ ခုဒါဒုဗ္ဗလ္ယံ အပနေတိ, ဧဝမေဝ ခေါ, မဟာရာဇ, သုဝိပန္နောပိ သမဏဒုဿီလော ဒါယကာနံ ဒက္ခိဏံ ဝိသောဓေတိ။

‘‘ဘာသိတမ္ပေတံ, မဟာရာဇ, တထာဂတေန ဒေဝါတိဒေဝေန မဇ္ဈိမနိကာယဝရလဉ္ဆကေ ဒက္ခိဏဝိဘင်္ဂေ ဝေယျာကရဏေ –

‘‘‘ယော သီလဝါ ဒုဿီလေသု ဒဒါတိ ဒါနံ၊ ဓမ္မေန လဒ္ဓံ သုပသန္နစိတ္တော။

အဘိသဒ္ဒဟံ ကမ္မဖလံ ဥဠာရံ၊ သာ ဒက္ခိဏာ ဒါယကတော ဝိသုဇ္ဈတီ’’’တိ [မ။ နိ။ ၃။၃၈၂]။

‘‘အစ္ဆရိယံ , ဘန္တေ နာဂသေန, အဗ္ဘုတံ, ဘန္တေ နာဂသေန, တာဝတကံ မယံ ပဉ္ဟံ အပုစ္ဆိမှ, တံ တွံ ဩပမ္မေဟိ ကာရဏေဟိ ဝိဘာဝေန္တော အမတမဓုရံ သဝနူပဂံ အကာသိ။ ယထာ နာမ, ဘန္တေ, သူဒေါ ဝါ သူဒန္တေဝါသီ ဝါ တာဝတကံ မံသံ လဘိတွာ နာနာဝိဓေဟိ သမ္ဘာရေဟိ သမ္ပာဒေတွာ ရာဇူပဘောဂံ ကရောတိ; ဧဝမေဝ ခေါ, ဘန္တေ နာဂသေန, တာဝတကံ မယံ ပဉ္ဟံ အပုစ္ဆိမှ, တံ တွံ ဩပမ္မေဟိ ကာရဏေဟိ ဝိဘာဝေတွာ အမတမဓုရံ သဝနူပဂံ အကာသီ’’တိ။

ဒုဿီလပဉ္ဟော အဋ္ဌမော။

၉။ ဥဒကသတ္တဇီဝပဉ္ဟော

၉။ ‘‘ဘန္တေ နာဂသေန, ဣမံ ဥဒကံ အဂ္ဂိမှိ တပ္ပမာနံ စိစ္စိဋာယတိ စိဋိစိဋာယတိ သဒ္ဒါယတိ ဗဟုဝိဓံ, ကိံ နု ခေါ, ဘန္တေ နာဂသေန, ဥဒကံ ဇီဝတိ, ကိံ ကီဠမာနံ သဒ္ဒါယတိ, ဥဒါဟု အညေန ပဋိဣဠိတံ သဒ္ဒါယတီ’’တိ? ‘‘န ဟိ, မဟာရာဇ, ဥဒကံ ဇီဝတိ, နတ္ထိ ဥဒကေ ဇီဝေါ ဝါ သတ္တော ဝါ, အပိ စ, မဟာရာဇ, အဂ္ဂိသန္တာပဝေဂဿ မဟန္တတာယ ဥဒကံ စိစ္စိဋာယတိ စိဋိစိဋာယတိ သဒ္ဒါယတိ ဗဟုဝိဓ’’န္တိ။

‘‘ဘန္တေ နာဂသေန, ဣဓေကစ္စေ တိတ္ထိယာ ဥဒကံ ဇီဝတီတိ သီတောဒကံ ပဋိက္ခိပိတွာ ဥဒကံ တာပေတွာ ဝေကတိကဝေကတိကံ ပရိဘုဉ္ဇန္တိ, တေ တုမှေ ဂရဟန္တိ ပရိဘဝန္တိ ‘ဧကိန္ဒ္ရိယံ သမဏာ သကျပုတ္တိယာ ဇီဝံ ဝိဟေဌေန္တီ’တိ, တံ တေသံ ဂရဟံ ပရိဘဝံ ဝိနောဒေဟိ အပနေဟိ နိစ္ဆာရေဟီ’’တိ။ ‘‘န ဟိ, မဟာရာဇ, ဥဒကံ ဇီဝတိ, နတ္ထိ, မဟာရာဇ, ဥဒကေ ဇီဝေါ ဝါ သတ္တော ဝါ, အပိ စ, မဟာရာဇ, အဂ္ဂိသန္တာပဝေဂဿ မဟန္တတာယ ဥဒကံ စိစ္စိဋာယတိ စိဋိစိဋာယတိ သဒ္ဒါယတိ ဗဟုဝိဓံ။

‘‘ယထာ, မဟာရာဇ, ဥဒကံ သောဗ္ဘသရသရိတဒဟတဠာကကန္ဒရပဒရဥဒပါနနိန္နပေါက္ခရဏိဂတံ ဝါတာတပဝေဂဿ မဟန္တတာယ ပရိယာဒိယတိ ပရိက္ခယံ ဂစ္ဆတိ, အပိ နု တတ္ထ ဥဒကံ စိစ္စိဋာယတိ စိဋိစိဋာယတိ သဒ္ဒါယတိ ဗဟုဝိဓ’’န္တိ? ‘‘န ဟိ, ဘန္တေ’’တိ။ ‘‘ယဒိ, မဟာရာဇ, ဥဒကံ ဇီဝေယျ, တတ္ထာပိ ဥဒကံ သဒ္ဒါယေယျ, ဣမိနာပိ, မဟာရာဇ, ကာရဏေန ဇာနာဟိ ‘နတ္ထိ ဥဒကေ ဇီဝေါ ဝါ သတ္တော ဝါ, အဂ္ဂိသန္တာပဝေဂဿ မဟန္တတာယ ဥဒကံ စိစ္စိဋာယတိ စိဋိစိဋာယတိ သဒ္ဒါယတိ ဗဟုဝိဓ’န္တိ။

‘‘အပရမ္ပိ , မဟာရာဇ, ဥတ္တရိံ ကာရဏံ သုဏောဟိ ‘နတ္ထိ ဥဒကေ ဇီဝေါ ဝါ သတ္တော ဝါ, အဂ္ဂိသန္တာပဝေဂဿ မဟန္တတာယ ဥဒကံ သဒ္ဒါယတီ’တိ။ ယဒါ ပန, မဟာရာဇ, ဥဒကံ တဏ္ဍုလေဟိ သမ္မိဿိတံ ဘာဇနဂတံ ဟောတိ ပိဟိတံ ဥဒ္ဓနေ အဌပိတံ, အပိ နု တတ္ထ ဥဒကံ သဒ္ဒါယတီ’’တိ? ‘‘န ဟိ, ဘန္တေ, အစလံ ဟောတိ သန္တသန္တ’’န္တိ။ ‘‘တံ ယေဝ ပန, မဟာရာဇ, ဥဒကံ ဘာဇနဂတံ အဂ္ဂိံ ဥဇ္ဇာလေတွာ ဥဒ္ဓနေ ဌပိတံ ဟောတိ, အပိ နု တတ္ထ ဥဒကံ အစလံ ဟောတိ သန္တသန္တ’’န္တိ? ‘‘န ဟိ, ဘန္တေ, စလတိ ခုဗ္ဘတိ လုဠတိ အာဝိလတိ ဦမိဇာတံ ဟောတိ, ဥဒ္ဓမဓေါ ဒိသာဝိဒိသံ ဂစ္ဆတိ, ဥတ္တရတိ ပတရတိ ဖေဏမာလီ ဟောတီတိ။ ကိဿ ပန တံ, မဟာရာဇ , ပါကတိကံ ဥဒကံ န စလတိ သန္တသန္တံ ဟောတိ, ကိဿ ပန အဂ္ဂိဂတံ စလတိ ခုဗ္ဘတိ လုဠတိ အာဝိလတိ ဦမိဇာတံ ဟောတိ, ဥဒ္ဓမဓေါ ဒိသာဝိဒိသံ ဂစ္ဆတိ, ဥတ္တရတိ ပတရတိ ဖေဏမာလီ ဟောတီ’’တိ? ‘‘ပါကတိကံ, ဘန္တေ, ဥဒကံ န စလတိ, အဂ္ဂိကတံ ပန ဥဒကံ အဂ္ဂိသန္တာပဝေဂဿ မဟန္တတာယ စိစ္စိဋာယတိ စိဋိစိဋာယတိ သဒ္ဒါယတိ ဗဟုဝိဓ’’န္တိ။ ‘‘ဣမိနာပိ မဟာရာဇ, ကာရဏေန ဇာနာဟိ ‘နတ္ထိ ဥဒကေ ဇီဝေါ ဝါ သတ္တော ဝါ, အဂ္ဂိသန္တာပဝေဂဿ မဟန္တတာယ ဥဒကံ သဒ္ဒါယတီ’တိ။

‘‘အပရမ္ပိ, မဟာရာဇ, ဥတ္တရံ ကာရဏံ သုဏောဟိ, နတ္ထိ ဥဒကေ ဇီဝေါ ဝါ သတ္တော ဝါ, အဂ္ဂိသန္တာပဝေဂဿ မဟန္တတာယ ဥဒကံ သဒ္ဒါယတိ။ ဟောတိ တံ, မဟာရာဇ, ဥဒကံ ဃရေ ဃရေ ဥဒကဝါရကဂတံ ပိဟိတ’’န္တိ? ‘‘အာမ, ဘန္တေ’’တိ။ ‘‘အပိ နု တံ, မဟာရာဇ, ဥဒကံ စလတိ ခုဗ္ဘတိ လုဠတိ အာဝိလတိ ဦမိဇာတံ ဟောတိ, ဥဒ္ဓမဓေါ ဒိသာဝိဒိသံ ဂစ္ဆတိ, ဥတ္တရတိ ပတရတိ ဖေဏမာလီ ဟောတီ’’တိ။ ‘‘န ဟိ, ဘန္တေ, အစလံ တံ ဟောတိ ပါကတိကံ ဥဒကဝါရကဂတံ ဥဒက’’န္တိ။

‘‘သုတပုဗ္ဗံ ပန တယာ, မဟာရာဇ, ‘မဟာသမုဒ္ဒေ ဥဒကံ စလတိ ခုဗ္ဘတိ လုဠတိ အာဝိလတိ ဦမိဇာတံ ဟောတိ, ဥဒ္ဓမဓေါ ဒိသာဝိဒိသံ ဂစ္ဆတိ, ဥတ္တရတိ ပတရတိ ဖေဏမာလီ ဟောတိ, ဥဿက္ကိတွာ ဩဿက္ကိတွာ [ဩဿက္ကိတွာ’’တိ ပဒံ သီ။ ဣ။ ပေါတ္ထကေသု နတ္ထိ] ဝေလာယ ပဟရတိ သဒ္ဒါယတိ ဗဟုဝိဓ’’’န္တိ? ‘‘အာမ, ဘန္တေ, သုတပုဗ္ဗံ ဧတံ မယာ ဒိဋ္ဌပုဗ္ဗဉ္စ ‘မဟာသမုဒ္ဒေ ဥဒကံ ဟတ္ထသတမ္ပိ ဒွေပိ ဟတ္ထသတာနိ ဂဂနေ ဥဿက္ကတီ’’’တိ။ ‘‘ကိဿ, မဟာရာဇ, ဥဒကဝါရကဂတံ ဥဒကံ န စလတိ န သဒ္ဒါယတိ, ကိဿ ပန မဟာသမုဒ္ဒေ ဥဒကံ စလတိ သဒ္ဒါယတီ’’တိ? ‘‘ဝါတဝေဂဿ မဟန္တတာယ, ဘန္တေ, မဟာသမုဒ္ဒေ ဥဒကံ စလတိ သဒ္ဒါယတိ, ဥဒကဝါရကဂတံ ဥဒကံ အဃဋ္ဋိတံ ကေဟိစိ န စလတိ န သဒ္ဒါယတီ’’တိ။ ‘‘ယထာ, မဟာရာဇ, ဝါတဝေဂဿ မဟန္တတာယ မဟာသမုဒ္ဒေ ဥဒကံ စလတိ သဒ္ဒါယတိ ဧဝမေဝ အဂ္ဂိသန္တာပဝေဂဿ မဟန္တတာယ ဥဒကံ သဒ္ဒါယတီ’’တိ။

‘‘နနု, မဟာရာဇ, ဘေရိပေါက္ခရံ သုက္ခံ သုက္ခေန ဂေါစမ္မေန ဩနန္ဓန္တီ’’တိ? ‘‘အာမ, ဘန္တေ’’။ ‘‘အပိ နု, မဟာရာဇ, ဘေရိယာ ဇီဝေါ ဝါ သတ္တော ဝါ အတ္ထီ’’တိ။ ‘‘န ဟိ, ဘန္တေ’’တိ။ ‘‘ကိဿ ပန, မဟာရာဇ, ဘေရီ သဒ္ဒါယတီ’’တိ? ‘‘ဣတ္ထိယာ ဝါ, ဘန္တေ, ပုရိသဿ ဝါ တဇ္ဇေန ဝါယာမေနာ’’တိ။ ‘‘ယထာ, မဟာရာဇ, ဣတ္ထိယာ ဝါ ပုရိသဿ ဝါ တဇ္ဇေန ဝါယာမေန ဘေရီ သဒ္ဒါယတိ, ဧဝမေဝ အဂ္ဂိသန္တာပဝေဂဿ မဟန္တတာယ ဥဒကံ သဒ္ဒါယတိ။ ဣမိနာပိ, မဟာရာဇ , ကာရဏေန ဇာနာဟိ ‘နတ္ထိ ဥဒကေ ဇီဝေါ ဝါ သတ္တော ဝါ, အဂ္ဂိသန္တာပဝေဂဿ မဟန္တတာယ ဥဒကံ သဒ္ဒါယတီ’တိ။

‘‘မယှမ္ပိ တာဝ, မဟာရာဇ, တဝ ပုစ္ဆိတဗ္ဗံ အတ္ထိ, ဧဝမေသော ပဉ္ဟော သုဝိနိစ္ဆိတော ဟောတိ, ကိံ နု ခေါ, မဟာရာဇ, သဗ္ဗေဟိပိ ဘာဇနေဟိ ဥဒကံ တပ္ပမာနံ သဒ္ဒါယတိ, ဥဒါဟု ဧကစ္စေဟိ ယေဝ ဘာဇနေဟိ တပ္ပမာနံ သဒ္ဒါယတီ’’တိ? ‘‘န ဟိ, ဘန္တေ, သဗ္ဗေဟိပိ ဘာဇနေဟိ ဥဒကံ တပ္ပမာနံ သဒ္ဒါယတိ, ဧကစ္စေဟိ ယေဝ ဘာဇနေဟိ ဥဒကံ တပ္ပမာနံ သဒ္ဒါယတီ’’တိ။ ‘‘တေန ဟိ, မဟာရာဇ, ဇဟိတောသိ သကသမယံ, ပစ္စာဂတောသိ မမ ဝိသယံ, နတ္ထိ ဥဒကေ ဇီဝေါ ဝါ သတ္တော ဝါ။ ယဒိ, မဟာရာဇ, သဗ္ဗေဟိပိ ဘာဇနေဟိ ဥဒကံ တပ္ပမာနံ သဒ္ဒါယေယျ, ယုတ္တမိဒံ ‘ဥဒကံ ဇီဝတီ’တိ ဝတ္တုံ။ န ဟိ, မဟာရာဇ, ဥဒကံ ဒွယံ ဟောတိ, ယံ သဒ္ဒါယတိ, တံ ဇီဝတိ, ယံ န သဒ္ဒါယတိ, တံ န ဇီဝတီတိ။ ယဒိ, မဟာရာဇ, ဥဒကံ ဇီဝေယျ, မဟန္တာနံ ဟတ္ထိနာဂါနံ ဥဿန္နကာယာနံ ပဘိန္နာနံ သောဏ္ဍာယ ဥဿိဉ္စိတွာ မုခေ ပက္ခိပိတွာ ကုစ္ဆိံ ပဝေသယန္တာနံ, တမ္ပိ ဥဒကံ တေသံ ဒန္တန္တရေ စိပ္ပိယမာနံ သဒ္ဒါယေယျ။ ဟတ္ထသတိကာပိ မဟာနာဝါ ဂရုကာ ဘာရိကာ အနေကသတသဟဿဘာရပရိပူရာ မဟာသမုဒ္ဒေ ဝိစရန္တိ, တာဟိပိ စိပ္ပိယမာနံ ဥဒကံ သဒ္ဒါယေယျ။ မဟတိမဟန္တာပိ မစ္ဆာ အနေကသတယောဇနိကကာယာ တိမီ တိမိင်္ဂလာ တိမိရပိင်္ဂလာ အဗ္ဘန္တရေ နိမုဂ္ဂါ မဟာသမုဒ္ဒေ နိဝါသဋ္ဌာနတာယ ပဋိဝသန္တာ မဟာဥဒကဓါရာ အာစမန္တိ ဓမန္တိ စ, တေသမ္ပိ တံ ဒန္တန္တရေပိ ဥဒရန္တရေပိ စိပ္ပိယမာနံ ဥဒကံ သဒ္ဒါယေယျ။ ယသ္မာ စ ခေါ, မဟာရာဇ, ဧဝရူပေဟိ ဧဝရူပေဟိ မဟန္တေဟိ ပဋိဣဠနေဟိ ပဋိဣဠိတံ ဥဒကံ န သဒ္ဒါယတိ တသ္မာပိ နတ္ထိ ဥဒကေ ဇီဝေါ ဝါ သတ္တော ဝါတိ, ဧဝမေတံ, မဟာရာဇ, ဓါရေဟီ’’တိ။

‘‘သာဓု , ဘန္တေ နာဂသေန, ဒေါသာဂတော ပဉ္ဟော အနုစ္ဆဝိကာယ ဝိဘတ္တိယာ ဝိဘတ္တော, ယထာ နာမ, ဘန္တေ နာဂသေန, မဟဂ္ဃံ မဏိရတနံ ဆေကံ အာစရိယံ ကုသလံ သိက္ခိတံ မဏိကာရံ ပါပုဏိတွာ ကိတ္တိံ လဘေယျ ထောမနံ ပသံသံ, မုတ္တာရတနံ ဝါ မုတ္တိကံ ဒုဿရတနံ ဝါ ဒုဿိကံ, လောဟိတစန္ဒနံ ဝါ ဂန္ဓိကံ ပါပုဏိတွာ ကိတ္တိံ လဘေယျ ထောမနံ ပသံသံ။ ဧဝမေဝ ခေါ, ဘန္တေ နာဂသေန, ဒေါသာဂတော [ဒေသာဂတော (သီ။ ဣ။)] ပဉ္ဟော အနုစ္ဆဝိကာယ ဝိဘတ္တိယာ ဝိဘတ္တော, ဧဝမေတံ တထာ သမ္ပဋိစ္ဆာမီ’’တိ။

ဥဒကသတ္တဇီဝပဉ္ဟော နဝမော။

ဗုဒ္ဓဝဂ္ဂေါ ပဌမော။

ဣမသ္မိံ ဝဂ္ဂေ နဝ ပဉှာ။

၂။ နိပ္ပပဉ္စဝဂ္ဂေါ

၁။ နိပ္ပပဉ္စပဉ္ဟော

၁။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘နိပ္ပပဉ္စာရာမာ, ဘိက္ခဝေ, ဝိဟရထ နိပ္ပပဉ္စရတိနော’တိ, ကတမံ တံ နိပ္ပပဉ္စ’’န္တိ? ‘‘သောတာပတ္တိဖလံ, မဟာရာဇ, နိပ္ပပဉ္စံ, သကဒါဂါမိဖလံ နိပ္ပပဉ္စံ, အနာဂါမိဖလံ နိပ္ပပဉ္စံ, အရဟတ္တဖလံ နိပ္ပပဉ္စ’’န္တိ။

‘‘ယဒိ, ဘန္တေ နာဂသေန, သောတာပတ္တိဖလံ နိပ္ပပဉ္စံ, သကဒါဂါမိအနာဂါမိအရဟတ္တဖလံ နိပ္ပပဉ္စံ , ကိဿ ပန ဣမေ ဘိက္ခူ ဥဒ္ဒိသန္တိ ပရိပုစ္ဆန္တိ သုတ္တံ ဂေယျံ ဝေယျာကရဏံ ဂါထံ ဥဒါနံ ဣတိဝုတ္တကံ ဇာတကံ အဗ္ဘုတဓမ္မံ ဝေဒလ္လံ, နဝကမ္မေန ပလိဗုဇ္ဈန္တိ ဒါနေန စ ပူဇာယ စ, နနု တေ ဇိနပ္ပဋိက္ခိတ္တံ ကမ္မံ ကရောတီ’’တိ?

‘‘ယေ တေ, မဟာရာဇ, ဘိက္ခူ ဥဒ္ဒိသန္တိ ပရိပုစ္ဆန္တိ သုတ္တံ ဂေယျံ ဝေယျာကရဏံ ဂါထံ ဥဒါနံ ဣတိဝုတ္တကံ ဇာတကံ အဗ္ဘုတဓမ္မံ ဝေဒလ္လံ, နဝကမ္မေန ပလိဗုဇ္ဈန္တိ ဒါနေန စ ပူဇာယ စ, သဗ္ဗေ တေ နိပ္ပပဉ္စဿ ပတ္တိယာ ကရောန္တိ။ ယေ တေ, မဟာရာဇ, သဘာဝပရိသုဒ္ဓါ ပုဗ္ဗေ ဝါသိတဝါသနာ, တေ ဧကစိတ္တက္ခဏေန နိပ္ပပစ ဟောန္တိ။ ယေ ပန တေ ဘိက္ခူ မဟာရဇက္ခာ, တေ ဣမေဟိ ပယောဂေဟိ နိပ္ပပဉ္စာ ဟောန္တိ။

‘‘ယထာ, မဟာရာဇ, ဧကော ပုရိသော ခေတ္တေ ဗီဇံ ရောပေတွာ အတ္တနော ယထာဗလဝီရိယေန ဝိနာ ပါကာရဝတိယာ ဓညံ ဥဒ္ဓရေယျ, ဧကော ပုရိသော ခေတ္တေ ဗီဇံ ရောပေတွာ ဝနံ ပဝိသိတွာ ကဋ္ဌဉ္စ သာခဉ္စ ဆိန္ဒိတွာ ဝတိပါကာရံ ကတွာ ဓညံ ဥဒ္ဓရေယျ။ ယာ တတ္ထ တဿ ဝတိပါကာရပရိယေသနာ, သာ ဓညတ္ထာယ။ ဧဝမေဝ ခေါ, မဟာရာဇ, ယေ တေ သဘာဝပရိသုဒ္ဓါ ပုဗ္ဗေ ဝါသိတဝါသနာ, တေ ဧကစိတ္တက္ခဏေန နိပ္ပပဉ္စာ ဟောန္တိ, ဝိနာ ဝတိပါကာရံ ပုရိသော ဝိယ ဓညုဒ္ဓါရော။ ယေ ပန တေ ဘိက္ခူ မဟာရဇက္ခာ, တေ ဣမေဟိ ပယောဂေဟိ နိပ္ပပဉ္စာ ဟောန္တိ, ဝတိပါကာရံ ကတွာ ပုရိသော ဝိယ ဓညုဒ္ဓါရော။

‘‘ယထာ ဝါ ပန, မဟာရာဇ, ပုရိသော မဟတိမဟန္တေ အမ္ဗရုက္ခမတ္ထကေ ဖလပိဏ္ဍိ ဘဝေယျ, အထ တတ္ထ ယော ကောစိ ဣဒ္ဓိမာ အာဂန္တွာ တဿ ဖလံ ဟရေယျ, ယော ပန တတ္ထ အနိဒ္ဓိမာ, သော ကဋ္ဌဉ္စ ဝလ္လိဉ္စ ဆိန္ဒိတွာ နိဿေဏိံ ဗန္ဓိတွာ တာယ တံ ရုက္ခံ အဘိရုဟိတွာ ဖလံ ဟရေယျ။ ယာ တတ္ထ တဿ နိဿေဏိပရိယေသနာ, သာ ဖလတ္ထာယ။ ဧဝမေဝ ခေါ, မဟာရာဇ, ယေ တေ သဘာဝပရိသုဒ္ဓါ ပုဗ္ဗေ ဝါသိတဝါသနာ, တေ ဧကစိတ္တက္ခဏေန နိပ္ပပဉ္စာ ဟောန္တိ, ဣဒ္ဓိမာ ဝိယ ရုက္ခဖလံ ဟရန္တော။ ယေ ပန တေ ဘိက္ခူ မဟာရဇက္ခာ, တေ ဣမိနာ ပယောဂေန သစ္စာနိ အဘိသမေန္တိ, နိဿေဏိယာ ဝိယ ပုရိသော ရုက္ခဖလံ ဟရန္တော ။

‘‘ယထာ ဝါ ပန, မဟာရာဇ, ဧကော ပုရိသော အတ္ထကရဏိကော ဧကကော ယေဝ သာမိကံ ဥပဂန္တွာ အတ္ထံ သာဓေတိ။ ဧကော ဓနဝါ ဓနဝသေန ပရိသံ ဝဍ္ဎေတွာ ပရိသာယ အတ္ထံ သာဓေတိ။ ယာ တတ္ထ တဿ ပရိသပရိယေသနာ, သာ အတ္ထတ္ထာယ။ ဧဝမေဝ ခေါ, မဟာရာဇ, ယေ တေ သဘာဝပရိသုဒ္ဓါ ပုဗ္ဗေ ဝါသိတဝါသနာ, တေ ဧကစိတ္တက္ခဏေန ဆသု အဘိညာသု ဝသိဘာဝံ ပါပုဏန္တိ, ပုရိသော ဝိယ ဧကကော အတ္ထသိဒ္ဓိံ ကရောန္တော။ ယေ ပန တေ ဘိက္ခူ မဟာရဇက္ခာ, တေ ဣမေဟိ ပယောဂေဟိ သာမညတ္ထမဘိသာဓေန္တိ, ပရိသာယ ဝိယ ပုရိသော အတ္ထသိဒ္ဓိံ ကရောန္တော။

‘‘ဥဒ္ဒေသောပိ, မဟာရာဇ, ဗဟုကာရော, ပရိပုစ္ဆာပိ ဗဟုကာရာ, နဝကမ္မမ္ပိ ဗဟုကာရံ, ဒါနမ္ပိ ဗဟုကာရံ, ပူဇာပိ ဗဟုကာရာ တေသု တေသု ကရဏီယေသု။ ယထာ, မဟာရာဇ, ပုရိသော ရာဇူပသေဝီ ကတာဝီ အမစ္စဘဋဗလဒေါဝါရိကအနီကဋ္ဌပါရိသဇ္ဇဇနေဟိ, တေ တဿ ကရဏီယေ အနုပ္ပတ္တေ သဗ္ဗေပိ ဥပကာရာ ဟောန္တိ။ ဧဝမေဝ ခေါ, မဟာရာဇ, ဥဒ္ဒေသောပိ ဗဟုကာရော, ပရိပုစ္ဆာပိ ဗဟုကာရာ, နဝကမ္မမ္ပိ ဗဟုကာရံ, ဒါနမ္ပိ ဗဟုကာရံ, ပူဇာပိ ဗဟုကာရာ တေသု တေသု ကရဏီယေသု။ ယဒိ, မဟာရာဇ, သဗ္ဗေပိ အဘိဇာတိပရိသုဒ္ဓါ ဘဝေယျုံ, အနုသာသနေန [အနုသာသကေန (သီ။ ဣ။)] ကရဏီယံ န ဘဝေယျ။ ယသ္မာ စ ခေါ, မဟာရာဇ, သဝနေန ကရဏီယံ ဟောတိ, ထေရော, မဟာရာဇ, သာရိပုတ္တော အပရိမိတမသင်္ခေယျကပ္ပံ ဥပါဒါယ ဥပစိတကုသလမူလော ပညာယ ကောဋိံ ဂတော, သောပိ ဝိနာ သဝနေန နာသက္ခိ အာသဝက္ခယံ ပါပုဏိတုံ။ တသ္မာ, မဟာရာဇ, ဗဟုကာရံ သဝနံ, တထာ ဥဒ္ဒေသောပိ ပရိပုစ္ဆာပိ။ တသ္မာ ဥဒ္ဒေသပရိပုစ္ဆာပိ နိပ္ပပဉ္စာ သင်္ခတာ’’တိ။ ‘‘သုနိဇ္ဈာပိတော, ဘန္တေ နာဂသေန, ပဉ္ဟော, ဧဝမေတံ တထာ သမ္ပဋိစ္ဆာမီ’’တိ။

နိပ္ပပဉ္စပဉ္ဟော ပဌမော။

၂။ ခီဏာသဝဘာဝပဉ္ဟော

၂။ ‘‘ဘန္တေ နာဂသေန, တုမှေ ဘဏထ ‘ယော ဂိဟီ အရဟတ္တံ ပတ္တော, ဒွေ ဝါဿ ဂတိယော ဘဝန္တိ အနညာ, တသ္မိံ ယေဝ ဒိဝသေ ပဗ္ဗဇတိ ဝါ ပရိနိဗ္ဗာယတိ ဝါ။ န သော ဒိဝသော သက္ကာ အတိက္ကမေတု’န္တိ။ သစေ သော, ဘန္တေ နာဂသေန, တသ္မိံ ဒိဝသေ အာစရိယံ ဝါ ဥပဇ္ဈာယံ ဝါ ပတ္တစီဝရံ ဝါ န လဘေထ, အပိ နု ခေါ သော အရဟာ သယံ ဝါ ပဗ္ဗဇေယျ ဒိဝသံ ဝါ အတိက္ကမေယျ, အညော ကောစိ အရဟာ ဣဒ္ဓိမာ အာဂန္တွာ တံ ပဗ္ဗာဇေယျ ဝါ ပရိနိဗ္ဗာယေယျ ဝါ’’တိ? ‘‘န သော, မဟာရာဇ, အရဟာ သယံ ပဗ္ဗဇေယျ, သယံ ပဗ္ဗဇန္တော ထေယျံ အာပဇ္ဇတိ, န စ ဒိဝသံ အတိက္ကမေယျ, အညဿ အရဟန္တဿ အာဂမနံ ဘဝေယျ ဝါ န ဝါ ဘဝေယျ, တသ္မိံ ယေဝ ဒိဝသေ ပရိနိဗ္ဗာယေယျာ’’တိ။ ‘‘တေန ဟိ, ဘန္တေ နာဂသေန, အရဟတ္တဿ သန္တဘာဝေါ ဝိဇဟိတော ဟောတိ, ယေန အဓိဂတဿ ဇီဝိတဟာရော ဘဝတီ’’တိ။

‘‘ဝိသမံ, မဟာရာဇ, ဂိဟိလိင်္ဂံ, ဝိသမေ လိင်္ဂေ လိင်္ဂဒုဗ္ဗလတာယ အရဟတ္တံ ပတ္တော ဂိဟီ တသ္မိံ ယေဝ ဒိဝသေ ပဗ္ဗဇတိ ဝါ ပရိနိဗ္ဗာယတိ ဝါ။ နေသော, မဟာရာဇ, ဒေါသော အရဟတ္တဿ, ဂိဟိလိင်္ဂဿေဝေသော ဒေါသော ယဒိဒံ လိင်္ဂဒုဗ္ဗလတာ။

‘‘ယထာ, မဟာရာဇ, ဘောဇနံ သဗ္ဗသတ္တာနံ အာယုပါလကံ ဇီဝိတရက္ခကံ ဝိသမကောဋ္ဌဿ မန္ဒဒုဗ္ဗလဂဟဏိကဿ အဝိပါကေန ဇီဝိတံ ဟရတိ။ နေသော, မဟာရာဇ, ဒေါသော ဘောဇနဿ, ကောဋ္ဌဿေဝေသော ဒေါသော ယဒိဒံ အဂ္ဂိဒုဗ္ဗလတာ။ ဧဝမေဝ ခေါ, မဟာရာဇ, ဝိသမေ လိင်္ဂေ လိင်္ဂဒုဗ္ဗလတာယ အရဟတ္တံ ပတ္တော ဂိဟီ တသ္မိံ ယေဝ ဒိဝသေ ပဗ္ဗဇတိ ဝါ ပရိနိဗ္ဗာယတိ ဝါ။ နေသော, မဟာရာဇ, ဒေါသော အရဟတ္တဿ, ဂိဟိလိင်္ဂဿေဝေသော ဒေါသော ယဒိဒံ လိင်္ဂဒုဗ္ဗလတာ။

‘‘ယထာ ဝါ ပန, မဟာရာဇ, ပရိတ္တံ တိဏသလာကံ ဥပရိ ဂရုကေ ပါသာဏေ ဌပိတေ ဒုဗ္ဗလတာယ ဘိဇ္ဇိတွာ ပတတိ။ ဧဝမေဝ ခေါ, မဟာရာဇ, အရဟတ္တံ ပတ္တော ဂိဟီ တေန လိင်္ဂေန အရဟတ္တံ ဓါရေတုံ အသက္ကောန္တော တသ္မိံ ယေဝ ဒိဝသေ ပဗ္ဗဇတိ ဝါ ပရိနိဗ္ဗာယတိ ဝါ။

‘‘ယထာ ဝါ ပန, မဟာရာဇ, ပုရိသော အဗလော ဒုဗ္ဗလော နိဟီနဇစ္စော ပရိတ္တပုညော မဟတိမဟာရဇ္ဇံ လဘိတွာ ခဏေန ပရိပတတိ ပရိဓံသတိ ဩသက္ကတိ, န သက္ကောတိ ဣဿရိယံ ဓါရေတုံ, ဧဝမေဝ ခေါ, မဟာရာဇ, အရဟတ္တံ ပတ္တော ဂိဟီ တေန လိင်္ဂေန အရဟတ္တံ ဓါရေတုံ န သက္ကောတိ , တေန ကာရဏေန တသ္မိံ ယေဝ ဒိဝသေ ပဗ္ဗဇတိ ဝါ ပရိနိဗ္ဗာယတိ ဝါ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ခီဏာသဝဘာဝပဉ္ဟော ဒုတိယော။

၃။ ခီဏာသဝသတိသမ္မောသပဉ္ဟော

၃။ ‘‘ဘန္တေ နာဂသေန, အတ္ထိ အရဟတော သတိသမ္မောသော’’တိ? ‘‘ဝိဂတသတိသမ္မောသာ ခေါ, မဟာရာဇ, အရဟန္တော, နတ္ထိ အရဟန္တာနံ သတိသမ္မောသော’’တိ။ ‘‘အာပဇ္ဇေယျ ပန, ဘန္တေ, အရဟာ အာပတ္တိ’’န္တိ? ‘‘အာမ, မဟာရာဇာ’’တိ။ ‘‘ကိသ္မိံ ဝတ္ထုသ္မိ’’န္တိ? ‘‘ကုဋိကာရေ, မဟာရာဇ, သဉ္စရိတ္တေ, ဝိကာလေ ကာလသညာယ, ပဝါရိတေ အပ္ပဝါရိတသညာယ, အနတိရိတ္တေ အတိရိတ္တသညာယာ’’တိ။

‘‘ဘန္တေ နာဂသေန, တုမှေ ဘဏထ ‘ယေ အာပတ္တိံ အာပဇ္ဇန္တိ, တေ ဒွီဟိ ကာရဏေဟိ အာပဇ္ဇန္တိ အနာဒရိယေန ဝါ အဇာနနေန ဝါ’တိ။ အပိ နု ခေါ, ဘန္တေ, အရဟတော အနာဒရိယံ ဟောတိ, ယံ အရဟာ အာပတ္တိံ အာပဇ္ဇတီ’’တိ? ‘‘န ဟိ, မဟာရာဇာ’’တိ။

‘‘ယဒိ, ဘန္တေ နာဂသေန, အရဟာ အာပတ္တိံ အာပဇ္ဇတိ, နတ္ထိ စ အရဟတော အနာဒရိယံ, တေန ဟိ အတ္ထိ အရဟတော သတိသမ္မောသော’’တိ? ‘‘နတ္ထိ, မဟာရာဇ, အရဟတော သတိသမ္မောသော, အာပတ္တိဉ္စ အရဟာ အာပဇ္ဇတီ’’တိ။

‘‘တေန ဟိ, ဘန္တေ, ကာရဏေန မံ သညာပေဟိ, ကိံ တတ္ထ ကာရဏ’’န္တိ? ‘‘ဒွေမေ, မဟာရာဇ, ကိလေသာ လောကဝဇ္ဇံ ပဏ္ဏတ္တိဝဇ္ဇဉ္စာတိ။ ကတမံ, မဟာရာဇ, လောကဝဇ္ဇံ? ဒသ အကုသလကမ္မပထာ, ဣဒံ ဝုစ္စတိ လောကဝဇ္ဇံ။ ကတမံ ပဏ္ဏတ္တိဝဇ္ဇံ? ယံ လောကေ အတ္ထိ သမဏာနံ အနနုစ္ဆဝိကံ အနနုလောမိကံ, ဂိဟီနံ အနဝဇ္ဇံ။ တတ္ထ ဘဂဝါ သာဝကာနံ သိက္ခာပဒံ ပညပေတိ ‘ယာဝဇီဝံ အနတိက္ကမနီယ’န္တိ။ ဝိကာလဘောဇနံ, မဟာရာဇ, လောကဿ အနဝဇ္ဇံ, တံ ဇိနသာသနေ ဝဇ္ဇံ။ ဘူတဂါမဝိကောပနံ, မဟာရာဇ, လောကဿ အနဝဇ္ဇံ, တံ ဇိနသာသနေ ဝဇ္ဇံ။ ဥဒကေ ဟဿဓမ္မံ, မဟာရာဇ, လောကဿ အနဝဇ္ဇံ, တံ ဇိနသာသနေ ဝဇ္ဇံ။ ဣတိ ဧဝရူပါနိ ဧဝရူပါနိ, မဟာရာဇ , ဇိနသာသနေ ဝဇ္ဇာနိ, ဣဒံ ဝုစ္စတိ ပဏ္ဏတ္တိဝဇ္ဇံ။

‘‘လောကဝဇ္ဇံ အဘဗ္ဗော ခီဏာသဝေါ တံ အဇ္ဈာစရိတုံ, ယံ ကိလေသံ ပဏ္ဏတ္တိဝဇ္ဇံ, တံ အဇာနန္တော အာပဇ္ဇေယျ။ အဝိသယော, မဟာရာဇ, ဧကစ္စဿ အရဟတော သဗ္ဗံ ဇာနိတုံ, န ဟိ တဿ ဗလံ အတ္ထိ သဗ္ဗံ ဇာနိတုံ။ အနညာတံ, မဟာရာဇ, အရဟတော ဣတ္ထိပုရိသာနံ နာမမ္ပိ ဂေါတ္တမ္ပိ, မဂ္ဂေါပိ တဿ မဟိယာ အနညာတော; ဝိမုတ္တိံ ယေဝ, မဟာရာဇ, ဧကစ္စော အရဟာ ဇာနေယျ; ဆဠဘိညော အရဟာ သကဝိသယံ ဇာနေယျ; သဗ္ဗညူ, မဟာရာဇ, တထာဂတောဝ သဗ္ဗံ ဇာနာတီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ခီဏာသဝသတိသမ္မောသပဉ္ဟော တတိယော။

၄။ လောကေ နတ္ထိဘာဝပဉ္ဟော

၄။ ‘‘ဘန္တေ နာဂသေန, ဒိဿန္တိ လောကေ ဗုဒ္ဓါ, ဒိဿန္တိ ပစ္စေကဗုဒ္ဓါ, ဒိဿန္တိ တထာဂတဿ သာဝကာ, ဒိဿန္တိ စက္ကဝတ္တိရာဇာနော, ဒိဿန္တိ ပဒေသရာဇာနော, ဒိဿန္တိ ဒေဝမနုဿာ, ဒိဿန္တိ သဓနာ, ဒိဿန္တိ အဓနာ, ဒိဿန္တိ သုဂတာ, ဒိဿန္တိ ဒုဂ္ဂတာ, ဒိဿတိ ပုရိသဿ ဣတ္ထိလိင်္ဂံ ပါတုဘူတံ, ဒိဿတိ ဣတ္ထိယာ ပုရိသလိင်္ဂံ ပါတုဘူတံ, ဒိဿတိ သုကတံ ဒုက္ကတံ ကမ္မံ, ဒိဿန္တိ ကလျာဏပါပကာနံ ကမ္မာနံ ဝိပါကူပဘောဂိနော သတ္တာ, အတ္ထိ လောကေ သတ္တာ အဏ္ဍဇာ ဇလာဗုဇာ သံသေဒဇာ ဩပပါတိကာ, အတ္ထိ သတ္တာ အပဒါ ဒွိပဒါ စတုပ္ပဒါ ဗဟုပ္ပဒါ, အတ္ထိ လောကေ ယက္ခာ ရက္ခသာ ကုမ္ဘဏ္ဍာ အသုရာ ဒါနဝါ ဂန္ဓဗ္ဗာ ပေတာ ပိသာစာ, အတ္ထိ ကိန္နရာ မဟောရဂါ နာဂါ သုပဏ္ဏာ သိဒ္ဓါ ဝိဇ္ဇာဓရာ, အတ္ထိ ဟတ္ထီ အဿာ ဂါဝေါ မဟိံသာ [မဟိသာ (သီ။ ဣ။)] ဩဋ္ဌာ ဂဒြဘာ အဇာ ဧဠကာ မိဂါ သူကရာ သီဟာ ဗျဂ္ဃါ ဒီဣ အစ္ဆာ ကောကာ တရစ္ဆာ သောဏာ သိင်္ဂါလာ, အတ္ထိ ဗဟုဝိဓါ သကုဏာ, အတ္ထိ သုဝဏ္ဏံ ရဇတံ မုတ္တာ မဏိ သင္ခော သိလာ ပဝါဠံ လောဟိတင်္ကော မသာရဂလ္လံ ဝေဠုရိယော ဝဇိရံ ဖလိကံ ကာဠလောဟံ တမ္ဗလောဟံ ဝဋ္ဋလောဟံ ကံသလောဟံ, အတ္ထိ ခေါမံ ကောသေယျံ ကပ္ပါသိကံ သာဏံ ဘင်္ဂံ ကမ္ဗလံ, အတ္ထိ သာလိ ဝီဟိ ယဝေါ ကင်္ဂု ကုဒ္ရူသော ဝရကော ဂေါဓူမော မုဂ္ဂေါ, မာသော တိလံ ကုလတ္ထံ, အတ္ထိ မူလဂန္ဓော သာရဂန္ဓော ဖေဂ္ဂုဂန္ဓော တစဂန္ဓော ပတ္တဂန္ဓော ပုပ္ဖဂန္ဓော ဖလဂန္ဓော သဗ္ဗဂန္ဓော, အတ္ထိ တိဏ လတာ ဂစ္ဆ ရုက္ခ ဩသဓိ ဝနပ္ပတိ နဒီ ပဗ္ဗတ သမုဒ္ဒ မစ္ဆကစ္ဆပါ သဗ္ဗံ လောကေ အတ္ထိ။ ယံ, ဘန္တေ, လောကေ နတ္ထိ, တံ မေ ကထေဟီ’’တိ။

‘‘တီဏိမာနိ, မဟာရာဇ, လောကေ နတ္ထိ။ ကတမာနိ တီဏိ? သစေတနာ ဝါ အစေတနာ ဝါ အဇရာမရာ လောကေ နတ္ထိ, သင်္ခါရာနံ နိစ္စတာ နတ္ထိ, ပရမတ္ထေန သတ္တူပလဒ္ဓိ နတ္ထိ, ဣမာနိ ခေါ, မဟာရာဇ, တီဏိ လောကေ နတ္ထီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

လောကေ နတ္ထိဘာဝပဉ္ဟော စတုတ္ထော။

၅။ အကမ္မဇာဒိပဉ္ဟော

၅။ ‘‘ဘန္တေ နာဂသေန, ဒိဿန္တိ လောကေ ကမ္မနိဗ္ဗတ္တာ, ဒိဿန္တိ ဟေတုနိဗ္ဗတ္တာ, ဒိဿန္တိ ဥတုနိဗ္ဗတ္တာ, ယံ လောကေ အကမ္မဇံ အဟေတုဇံ အနုတုဇံ, တံ မေ ကထေဟီ’’တိ။ ‘‘ဒွေမေ, မဟာရာဇ, လောကသ္မိံ အကမ္မဇာ အဟေတုဇာ အနုတုဇာ။ ကတမေ ဒွေ? အာကာသော, မဟာရာဇ, အကမ္မဇော အဟေတုဇော အနုတုဇော; နိဗ္ဗာနံ, မဟာရာဇ, အကမ္မဇံ အဟေတုဇံ အနုတုဇံ။ ဣမေ ခေါ, မဟာရာဇ, ဒွေ အကမ္မဇာ အဟေတုဇာ အနုတုဇာ’’တိ။

‘‘မာ, ဘန္တေ နာဂသေန, ဇိနဝစနံ မက္ခေဟိ, မာ အဇာနိတွာ ပဉ္ဟံ ဗျာကရောဟီ’’တိ။ ‘‘ကိံ ခေါ, မဟာရာဇ, အဟံ ဝဒါမိ, ယံ မံ တွံ ဧဝံ ဝဒေသိ ‘မာ, ဘန္တေ နာဂသေန, ဇိနဝစနံ မက္ခေဟိ, မာ အဇာနိတွာ ပဉ္ဟံ ဗျာကရောဟီ’’’တိ? ‘‘ဘန္တေ နာဂသေန, ယုတ္တမိဒံ တာဝ ဝတ္တုံ ‘အာကာသော အကမ္မဇော အဟေတုဇော အနုတုဇော’တိ။ အနေကသတေဟိ ပန, ဘန္တေ နာဂသေန, ကာရဏေဟိ ဘဂဝတာ သာဝကာနံ နိဗ္ဗာနဿ သစ္ဆိကိရိယာယ မဂ္ဂေါ အက္ခာတော, အထ စ ပန တွံ ဧဝံ ဝဒေသိ ‘အဟေတုဇံ နိဗ္ဗာန’’’န္တိ။ ‘‘သစ္စံ, မဟာရာဇ, ဘဂဝတာ အနေကသတေဟိ ကာရဏေဟိ သာဝကာနံ နိဗ္ဗာနဿ သစ္ဆိကိရိယာယ မဂ္ဂေါ အက္ခာတော, န စ ပန နိဗ္ဗာနဿ ဥပ္ပါဒါယ ဟေတု အက္ခာတော’’တိ။

‘‘ဧတ္ထ မယံ, ဘန္တေ နာဂသေန, အန္ဓကာရတော အန္ဓကာရတရံ ပဝိသာမ, ဝနတော ဝနတရံ ပဝိသာမ, ဂဟနတော ဂဟနတရံ [ဂဟနန္တရတော ဂဟနန္တရံ (က။)] ပဝိသာမ, ယတြ ဟိ နာမ နိဗ္ဗာနဿ သစ္ဆိကိရိယာယ ဟေတု အတ္ထိ, တဿ ပန ဓမ္မဿ ဥပ္ပါဒါယ ဟေတု နတ္ထိ။ ယဒိ, ဘန္တေ နာဂသေန, နိဗ္ဗာနဿ သစ္ဆိကိရိယာယ ဟေတု အတ္ထိ, တေန ဟိ နိဗ္ဗာနဿ ဥပ္ပါဒါယပိ ဟေတု ဣစ္ဆိတဗ္ဗော။

‘‘ယထာ ပန, ဘန္တေ နာဂသေန, ပုတ္တဿ ပိတာ အတ္ထိ, တေန ကာရဏေန ပိတုနောပိ ပိတာ ဣစ္ဆိတဗ္ဗော။ ယထာ အန္တေဝါသိကဿ အာစရိယော အတ္ထိ, တေန ကာရဏေန အာစရိယဿပိ အာစရိယော ဣစ္ဆိတဗ္ဗော ။ ယထာ အင္ကုရဿ ဗီဇံ အတ္ထိ, တေန ကာရဏေန ဗီဇဿပိ ဗီဇံ ဣစ္ဆိတဗ္ဗံ။ ဧဝမေဝ ခေါ, ဘန္တေ နာဂသေန, ယဒိ နိဗ္ဗာနဿ သစ္ဆိကိရိယာယ ဟေတု အတ္ထိ, တေန ကာရဏေန နိဗ္ဗာနဿ ဥပ္ပါဒါယပိ ဟေတု ဣစ္ဆိတဗ္ဗော။

‘‘ယထာ ရုက္ခဿ ဝါ လတာယ ဝါ အဂ္ဂေ သတိ တေန ကာရဏေန မဇ္ဈမ္ပိ အတ္ထိ, မူလမ္ပိ အတ္ထိ။ ဧဝမေဝ ခေါ, ဘန္တေ နာဂသေန, ယဒိ နိဗ္ဗာနဿ သစ္ဆိကိရိယာယ ဟေတု အတ္ထိ, တေန ကာရဏေန နိဗ္ဗာနဿ ဥပ္ပါဒါယပိ ဟေတု ဣစ္ဆိတဗ္ဗော’’’တိ။

‘‘အနုပ္ပါဒနီယံ, မဟာရာဇ, နိဗ္ဗာနံ, တသ္မာ န နိဗ္ဗာနဿ ဥပ္ပါဒါယ ဟေတု အက္ခာတော’’တိ။ ‘‘ဣင်္ဃ, ဘန္တေ နာဂသေန, ကာရဏံ ဒဿေတွာ ကာရဏေန မံ သညာပေဟိ, ယထာဟံ ဇာနေယျံ နိဗ္ဗာနဿ သစ္ဆိကိရိယာယ ဟေတု အတ္ထိ, နိဗ္ဗာနဿ ဥပ္ပါဒါယ ဟေတု နတ္ထီ’’တိ။

‘‘တေန ဟိ, မဟာရာဇ, သက္ကစ္စံ သောတံ ဩဒဟ, သာဓုကံ သုဏောဟိ, ဝက္ခာမိ တတ္ထ ကာရဏံ, သက္ကုဏေယျ, မဟာရာဇ, ပုရိသော ပါကတိကေန ဗလေန ဣတော ဟိမဝန္တံ ပဗ္ဗတရာဇံ ဥပဂန္တု’’န္တိ? ‘‘အာမ, ဘန္တေ’’တိ။ ‘‘သက္ကုဏေယျ ပန သော, မဟာရာဇ, ပုရိသော ပါကတိကေန ဗလေန ဟိမဝန္တံ ပဗ္ဗတရာဇံ ဣဓ အာဟရိတု’’န္တိ? ‘‘န ဟိ, ဘန္တေ’’တိ။ ‘‘ဧဝမေဝ ခေါ, မဟာရာဇ, သက္ကာ နိဗ္ဗာနဿ သစ္ဆိကိရိယာယ မဂ္ဂေါ အက္ခာတုံ, န သက္ကာ နိဗ္ဗာနဿ ဥပ္ပါဒါယ ဟေတု ဒဿေတုံ။

‘‘သက္ကုဏေယျ, မဟာရာဇ, ပုရိသော ပါကတိကေန ဗလေန မဟာသမုဒ္ဒံ နာဝါယ ဥတ္တရိတွာ ပါရိမတီရံ ဂန္တု’’န္တိ? ‘‘အာမ, ဘန္တေ’’တိ? ‘‘သက္ကုဏေယျ ပန သော, မဟာရာဇ , ပုရိသော ပါကတိကေန ဗလေန မဟာသမုဒ္ဒဿ ပါရိမတီရံ ဣဓ အာဟရိတု’’န္တိ? ‘‘န ဟိ ဘန္တေ’’တိ။ ‘‘ဧဝမေဝ ခေါ, မဟာရာဇ, သက္ကာ နိဗ္ဗာနဿ သစ္ဆိကိရိယာယ မဂ္ဂေါ အက္ခာတုံ, န သက္ကာ နိဗ္ဗာနဿ ဥပ္ပါဒါယ ဟေတု ဒဿေတုံ။ ကိံ ကာရဏာ? အသင်္ခတတ္တာ ဓမ္မဿာ’’တိ။

‘‘အသင်္ခတံ , ဘန္တေ နာဂသေန, နိဗ္ဗာန’’န္တိ? ‘‘အာမ, မဟာရာဇ, အသင်္ခတံ နိဗ္ဗာနံ န ကေဟိစိ ကတံ, နိဗ္ဗာနံ, မဟာရာဇ, န ဝတ္တဗ္ဗံ ဥပ္ပန္နန္တိ ဝါ အနုပ္ပန္နန္တိ ဝါ ဥပ္ပါဒနီယန္တိ ဝါ အတီတန္တိ ဝါ အနာဂတန္တိ ဝါ ပစ္စုပ္ပန္နန္တိ ဝါ စက္ခုဝိညေယျန္တိ ဝါ သောတဝိညေယျန္တိ ဝါ ဃာနဝိညေယျန္တိ ဝါ ဇိဝှာဝိညေယျန္တိ ဝါ ကာယဝိညေယျန္တိ ဝါ’’တိ။ ‘‘ယဒိ, ဘန္တေ နာဂသေန, နိဗ္ဗာနံ န ဥပ္ပန္နံ န အနုပ္ပန္နံ န ဥပ္ပါဒနီယံ န အတီတံ န အနာဂတံ န ပစ္စုပ္ပန္နံ န စက္ခုဝိညေယျံ န သောတဝိညေယျံ န ဃာနဝိညေယျံ န ဇိဝှာဝိညေယျံ န ကာယဝိညေယျံ, တေန ဟိ, ဘန္တေ နာဂသေန, တုမှေ နတ္ထိဓမ္မံ နိဗ္ဗာနံ အပဒိသထ ‘နတ္ထိ နိဗ္ဗာန’န္တိ။ ‘‘အတ္ထိ, မဟာရာဇ, နိဗ္ဗာနံ, မနောဝိညေယျံ နိဗ္ဗာနံ, ဝိသုဒ္ဓေန မာနသေန ပဏီတေန ဥဇုကေန အနာဝရဏေန နိရာမိသေန သမ္မာပဋိပန္နော အရိယသာဝကော နိဗ္ဗာနံ ပဿတီ’’တိ။

‘‘ကီဒိသံ ပန တံ, ဘန္တေ, နိဗ္ဗာနံ, ယံ တံ ဩပမ္မေဟိ အာဒီပနီယံ ကာရဏေဟိ မံ သညာပေဟိ, ယထာ အတ္ထိဓမ္မံ ဩပမ္မေဟိ အာဒီပနီယ’’န္တိ။ ‘‘အတ္ထိ, မဟာရာဇ, ဝါတော နာမာ’’တိ? ‘‘အာမ, ဘန္တေ’’တိ။ ‘‘ဣင်္ဃ, မဟာရာဇ, ဝါတံ ဒဿေဟိ ဝဏ္ဏတော ဝါ သဏ္ဌာနတော ဝါ အဏုံ ဝါ ထူလံ ဝါ ဒီဃံ ဝါ ရဿံ ဝါ’’တိ။ ‘‘န သက္ကာ, ဘန္တေ နာဂသေန, ဝါတော ဥပဒဿယိတုံ, န သော ဝါတော ဟတ္ထဂ္ဂဟဏံ ဝါ နိမ္မဒ္ဒနံ ဝါ ဥပေတိ, အပိ စ အတ္ထိ သော ဝါတော’’တိ။ ‘‘ယဒိ, မဟာရာဇ, န သက္ကာ ဝါတော ဥပဒဿယိတုံ, တေန ဟိ နတ္ထိ ဝါတော’’တိ? ‘‘ဇာနာမဟံ, ဘန္တေ နာဂသေန, ဝါတော အတ္ထီတိ မေ ဟဒယေ အနုပဝိဋ္ဌံ, န စာဟံ သက္ကောမိ ဝါတံ ဥပဒဿယိတု’’န္တိ။ ‘‘ဧဝမေဝ ခေါ, မဟာရာဇ, အတ္ထိ နိဗ္ဗာနံ, န စ သက္ကာ နိဗ္ဗာနံ ဥပဒဿယိတုံ ဝဏ္ဏေန ဝါ သဏ္ဌာနေန ဝါ’’တိ။ ‘‘သာဓု, ဘန္တေ နာဂသေန, သူပဒဿိတံ ဩပမ္မံ, သုနိဒ္ဒိဋ္ဌံ ကာရဏံ, ဧဝမေတံ တထာ သမ္ပဋိစ္ဆာမိ ‘အတ္ထိ နိဗ္ဗာန’’’န္တိ။

အကမ္မဇာဒိပဉ္ဟော ပဉ္စမော။

၆။ ကမ္မဇာဒိပဉ္ဟော

၆။ ‘‘ဘန္တေ နာဂသေန, ကတမေ ဧတ္ထ ကမ္မဇာ, ကတမေ ဟေတုဇာ, ကတမေ ဥတုဇာ, ကတမေ န ကမ္မဇာ, န ဟေတုဇာ, န ဥတုဇာ’’တိ? ‘‘ယေ ကေစိ, မဟာရာဇ, သတ္တာ သစေတနာ, သဗ္ဗေ တေ ကမ္မဇာ; အဂ္ဂိ စ သဗ္ဗာနိ စ ဗီဇဇာတာနိ ဟေတုဇာနိ; ပထဝီ စ ပဗ္ဗတာ စ ဥဒကဉ္စ ဝါတော စ, သဗ္ဗေ တေ ဥတုဇာ; အာကာသော စ နိဗ္ဗာနဉ္စ ဣမေ ဒွေ အကမ္မဇာ အဟေတုဇာ အနုတုဇာ။ နိဗ္ဗာနံ ပန, မဟာရာဇ, န ဝတ္တဗ္ဗံ ကမ္မဇန္တိ ဝါ ဟေတုဇန္တိ ဝါ ဥတုဇန္တိ ဝါ ဥပ္ပန္နန္တိ ဝါ အနုပ္ပန္နန္တိ ဝါ ဥပ္ပါဒနီယန္တိ ဝါ အတီတန္တိ ဝါ အနာဂတန္တိ ဝါ ပစ္စုပ္ပန္နန္တိ ဝါ စက္ခုဝိညေယျန္တိ ဝါ သောတဝိညေယျန္တိ ဝါ ဃာနဝိညေယျန္တိ ဝါ ဇိဝှာဝိညေယျန္တိ ဝါ ကာယဝိညေယျန္တိ ဝါ, အပိ စ, မဟာရာဇ, မနောဝိညေယျံ နိဗ္ဗာနံ, ယံ သော သမ္မာပဋိပန္နော အရိယသာဝကော ဝိသုဒ္ဓေန ဉာဏေန ပဿတီ’’တိ။ ‘‘ရမဏီယော, ဘန္တေ နာဂသေန, ပဉ္ဟော သုဝိနိစ္ဆိတော နိဿံသယော ဧကန္တဂတော, ဝိမတိ ဥပ္ပစ္ဆိန္နာ, တွံ ဂဏိဝရပဝရမာသဇ္ဇာ’’တိ။

ကမ္မဇာဒိပဉ္ဟော ဆဋ္ဌော။

၇။ ယက္ခပဉ္ဟော

၇။ ‘‘ဘန္တေ နာဂသေန, အတ္ထိ လောကေ ယက္ခာ နာမာ’’တိ? ‘‘အာမ, မဟာရာဇ, အတ္ထိ လောကေ ယက္ခာ နာမာ’’တိ။ ‘‘စဝန္တိ ပန တေ, ဘန္တေ, ယက္ခာ တမှာ ယောနိယာ’’တိ? ‘‘အာမ, မဟာရာဇ, စဝန္တိ တေ ယက္ခာ တမှာ ယောနိယာ’’တိ။ ‘‘ကိဿ ပန, ဘန္တေ နာဂသေန, တေသံ မတာနံ ယက္ခာနံ သရီရံ န ဒိဿတိ, ကုဏပဂန္ဓောပိ န ဝါယတီ’’တိ? ‘‘ဒိဿတိ, မဟာရာဇ, မတာနံ ယက္ခာနံ သရီရံ, ကုဏပဂန္ဓောပိ တေသံ ဝါယတိ, မတာနံ, မဟာရာဇ, ယက္ခာနံ သရီရံ ကီဋဝဏ္ဏေန ဝါ ဒိဿတိ, ကိမိဝဏ္ဏေန ဝါ ဒိဿတိ, ကိပိလ္လိကဝဏ္ဏေန ဝါ ဒိဿတိ, ပဋင်္ဂဝဏ္ဏေန ဝါ ဒိဿတိ, အဟိဝဏ္ဏေန ဝါ ဒိဿတိ, ဝိစ္ဆိကဝဏ္ဏေန ဝါ ဒိဿတိ, သတပဒိဝဏ္ဏေန ဝါ ဒိဿတိ, ဒိဇဝဏ္ဏေန ဝါ ဒိဿတိ, မိဂဝဏ္ဏေန ဝါ ဒိဿတီ’’တိ။ ‘‘ကော ဟိ, ဘန္တေ နာဂသေန, အညော ဣဒံ ပဉ္ဟံ ပုဋ္ဌော ဝိသဇ္ဇေယျ အညတြ တဝါဒိသေန ဗုဒ္ဓိမတာ’’တိ။

ယက္ခပဉ္ဟော သတ္တမော။

၈။ အနဝသေသသိက္ခာပဒပဉ္ဟော

၈။ ‘‘ဘန္တေ နာဂသေန, ယေ တေ အဟေသုံ တိကိစ္ဆကာနံ ပုဗ္ဗကာ အာစရိယာ သေယျထိဒံ, နာရဒေါ ဓမ္မန္တရီ [ဓနွန္တရီ (?)] အင်္ဂိရသော ကပိလော ကဏ္ဍရဂ္ဂိ သာမော အတုလော ပုဗ္ဗကစ္စာယနော, သဗ္ဗေပေတေ အာစရိယာ သကိံ ယေဝ ရောဂုပ္ပတ္တိဉ္စ နိဒါနဉ္စ သဘာဝဉ္စ သမုဋ္ဌာနဉ္စ တိကိစ္ဆဉ္စ ကိရိယဉ္စ သိဒ္ဓါသိဒ္ဓဉ္စ သဗ္ဗံ တံ [သန္တံ (က။)] နိရဝသေသံ ဇာနိတွာ ‘ဣမသ္မိံ ကာယေ ဧတ္တကာ ရောဂါ ဥပ္ပဇ္ဇိဿန္တီ’တိ ဧကပ္ပဟာရေန ကလာပဂ္ဂါဟံ ကရိတွာ သုတ္တံ ဗန္ဓိံသု, အသဗ္ဗညုနော ဧတေ သဗ္ဗေ, ကိဿ ပန တထာဂတော သဗ္ဗညူ သမာနော အနာဂတံ ကိရိယံ ဗုဒ္ဓဉာဏေန ဇာနိတွာ ‘ဧတ္တကေ နာမ ဝတ္ထုသ္မိံ ဧတ္တကံ နာမ သိက္ခာပဒံ ပညပေတဗ္ဗံ ဘဝိဿတီ’တိ ပရိစ္ဆိန္ဒိတွာ အနဝသေသတော သိက္ခာပဒံ န ပညပေသိ, ဥပ္ပန္နုပ္ပန္နေ ဝတ္ထုသ္မိံ အယသေ ပါကဋေ ဒေါသေ ဝိတ္ထာရိကေ ပုထုဂတေ ဥဇ္ဈာယန္တေသု မနုဿေသု တသ္မိံ တသ္မိံ ကာလေ သာဝကာနံ သိက္ခာပဒံ ပညပေသီ’’တိ?

‘‘ဉာတမေတံ, မဟာရာဇ, တထာဂတဿ ‘ဣမသ္မိံ သမယေ ဣမေသု မနုဿေသု သာဓိကံ ဒိယဍ္ဎသိက္ခာပဒသတံ ပညပေတဗ္ဗံ ဘဝိဿတီ’တိ, အပိ စ တထာဂတဿ ဧဝံ အဟောသိ ‘သစေ ခေါ အဟံ သာဓိကံ ဒိယဍ္ဎသိက္ခာပဒသတံ ဧကပ္ပဟာရံ ပညပေဿာမိ, မဟာဇနော သန္တာသမာပဇ္ဇိဿတိ ‘ဗဟုကံ ဣဓ ရက္ခိတဗ္ဗံ, ဒုက္ကရံ ဝတ ဘော သမဏဿ ဂေါတမဿ သာသနေ ပဗ္ဗဇိတု’န္တိ, ပဗ္ဗဇိတုကာမာပိ န ပဗ္ဗဇိဿန္တိ, ဝစနဉ္စ မေ န သဒ္ဒဟိဿန္တိ, အသဒ္ဒဟန္တာ တေ မနုဿာ အပါယဂါမိနော ဘဝိဿန္န-တိ ဥပ္ပန္နုပ္ပန္နေ ဝတ္ထုသ္မိံ ဓမ္မဒေသနာယ ဝိညာပေတွာ ပါကဋေ ဒေါသေ သိက္ခာပဒံ ပညပေဿာမီ’’’တိ။ ‘‘အစ္ဆရိယံ, ဘန္တေ နာဂသေန, ဗုဒ္ဓါနံ, အဗ္ဘုတံ, ဘန္တေ နာဂသေန, ဗုဒ္ဓါနံ, ယာဝ မဟန္တံ တထာဂတဿ သဗ္ဗညုတဉာဏံ, ဧဝမေတံ, ဘန္တေ နာဂသေန, သုနိဒ္ဒိဋ္ဌော ဧသော အတ္ထော တထာဂတေန, ‘ဗဟုကံ ဣဓ သိက္ခိတဗ္ဗ’န္တိ သုတွာ သတ္တာနံ သန္တာသော ဥပ္ပဇ္ဇေယျ, ဧကောပိ ဇိနသာသနေ န ပဗ္ဗဇေယျ, ဧဝမေတံ တထာ သမ္ပဋိစ္ဆာမီ’’တိ။

အနဝသေသသိက္ခာပဒပဉ္ဟော အဋ္ဌမော။

၉။ သူရိယတပနပဉ္ဟော

၉။ ‘‘ဘန္တေ နာဂသေန, အယံ သူရိယော သဗ္ဗကာလံ ကဌိနံ တပတိ, ဥဒါဟု ကိဉ္စိကာလံ မန္ဒံ တပတီ’’တိ? ‘‘သဗ္ဗကာလံ, မဟာရာဇ, သူရိယော ကဌိနံ တပတိ , န ကိဉ္စိကာလံ မန္ဒံ တပတီ’’တိ။ ‘‘ယဒိ, ဘန္တေ နာဂသေန, သူရိယော သဗ္ဗကာလံ ကဌိနံ တပတိ, ကိဿ ပန အပ္ပေကဒါ သူရိယော ကဌိနံ တပတိ, အပ္ပေကဒါ မန္ဒံ တပတီ’’တိ? ‘‘စတ္တာရောမေ, မဟာရာဇ, သူရိယဿ ရောဂါ, ယေသံ အညတရေန ရောဂေန ပဋိဣဠိတော သူရိယော မန္ဒံ တပတိ။ ကတမေ စတ္တာရော? အဗ္ဘံ, မဟာရာဇ, သူရိယဿ ရောဂေါ, တေန ရောဂေန ပဋိဣဠိတော သူရိယော မန္ဒံ တပတိ။ မဟိကာ, မဟာရာဇ, သူရိယဿ ရောဂေါ, တေန ရောဂေန ပဋိဣဠိတော သူရိယော မန္ဒံ တပတိ။ မေဃော, မဟာရာဇ, သူရိယဿ ရောဂေါ, တေန ရောဂေန ပဋိဣဠိတော သူရိယော မန္ဒံ တပတိ။ ရာဟု, မဟာရာဇ, သူရိယဿ ရောဂေါ, တေန ရောဂေန ပဋိဣဠိတော သူရိယော မန္ဒံ တပတိ။ ဣမေ ခေါ, မဟာရာဇ, စတ္တာရော သူရိယဿ ရောဂါ, ယေသံ အညတရေန ရောဂေန ပဋိဣဠိတော သူရိယော မန္ဒံ တပတီ’’တိ။ ‘‘အစ္ဆရိယံ, ဘန္တေ နာဂသေန, အဗ္ဘုတံ, ဘန္တေ နာဂသေန, သူရိယဿပိ တာဝ တေဇောသမ္ပန္နဿ ရောဂေါ ဥပ္ပဇ္ဇိဿတိ, ကိမင်္ဂံ ပန အညေသံ သတ္တာနံ, နတ္ထိ, ဘန္တေ, ဧသာ ဝိဘတ္တိ အညဿ အညတြ တဝါဒိသေန ဗုဒ္ဓိမတာ’’တိ။

သူရိယတပနပဉ္ဟော နဝမော။

၁၀။ ကဌိနတပနပဉ္ဟော

၁၀။ ‘‘ဘန္တေ နာဂသေန, ကိဿ ဟေမန္တေ သူရိယော ကဌိနံ တပတိ, နော တထာ ဂိမှေ’’တိ? ‘‘ဂိမှေ, မဟာရာဇ, အနုပဟတံ ဟောတိ ရဇောဇလ္လံ, ဝါတက္ခုဘိတာ ရေဏူ ဂဂနာနုဂတာ ဟောန္တိ, အာကာသေပိ အဗ္ဘာ သုဗဟလာ ဟောန္တိ, မဟာဝါတော စ အဓိမတ္တံ ဝါယတိ, တေ သဗ္ဗေ နာနာကုလာ သမာယုတာ သူရိယရံသိယော ပိဒဟန္တိ, တေန ဂိမှေ သူရိယော မန္ဒံ တပတိ။

‘‘ဟေမန္တေ ပန, မဟာရာဇ, ဟေဋ္ဌာ ပထဝီ နိဗ္ဗုတာ ဟောတိ, ဥပရိ မဟာမေဃော ဥပဋ္ဌိတော ဟောတိ, ဥပသန္တံ ဟောတိ ရဇောဇလ္လံ, ရေဏု စ သန္တသန္တံ ဂဂနေ စရတိ, ဝိဂတဝလာဟကော စ ဟောတိ အာကာသော, ဝါတော စ မန္ဒမန္ဒံ ဝါယတိ, ဧတေသံ ဥပရတိယာ ဝိသုဒ္ဓါ [ဝိသဒါ (သီ။ ဣ။)] ဟောန္တိ သူရိယရံသိယော, ဥပဃာတဝိမုတ္တဿ သူရိယဿ တာပေါ အတိ ဝိယ တပတိ။ ဣဒမေတ္ထ, မဟာရာဇ, ကာရဏံ, ယေန ကာရဏေန သူရိယော ဟေမန္တေ ကဌိနံ တပတိ, နော တထာ ဂိမှေ’’တိ။ ‘‘သဗ္ဗီတိမုတ္တော, ဘန္တေ, သူရိယော ကဌိနံ တပတိ, မေဃာဒိသဟဂတော ကဌိနံ န တပတီ’’တိ။

ကဌိနတပနပဉ္ဟော ဒသမော။

နိပ္ပပဉ္စဝဂ္ဂေါ ဒုတိယော။

ဣမသ္မိံ ဝဂ္ဂေ ဒသ ပဉှာ။

၃။ ဝေဿန္တရဝဂ္ဂေါ

၁။ ဝေဿန္တရပဉ္ဟော

၁။ ‘‘ဘန္တေ နာဂသေန, သဗ္ဗေဝ ဗောဓိသတ္တာ ပုတ္တဒါရံ ဒေန္တိ, ဥဒါဟု ဝေဿန္တရေနေဝ ရညာ ပုတ္တဒါရံ ဒိန္န’’န္တိ? ‘‘သဗ္ဗေပိ, မဟာရာဇ, ဗောဓိသတ္တာ ပုတ္တဒါရံ ဒေန္တိ, န ဝေဿန္တရေနေဝ ရညာ ပုတ္တဒါရံ ဒိန္န’’န္တိ။ ‘‘အပိ စ ခေါ, ဘန္တေ နာဂသေန, တေသံ အနုမတေန ဒေန္တီ’’တိ။ ‘‘ဘရိယာ, မဟာရာဇ, အနုမတာ, ဒါရကာ ပန ဗာလတာယ ဝိလပိံသု [လာလပိံသု (သီ။ ဣ။)], ယဒိ တေ အတ္ထတော ဇာနေယျုံ, တေပိ အနုမောဒေယျုံ, န တေ ဝိလပေယျု’’န္တိ။

‘‘ဒုက္ကရံ, ဘန္တေ နာဂသေန, ဗောဓိသတ္တေန ကတံ, ယံ သော အတ္တနော ဩရသေ ပိယေ ပုတ္တေ ဗြာဟ္မဏဿ ဒါသတ္ထာယ အဒါသိ။

‘‘ဣဒမ္ပိ ဒုတိယံ ဒုက္ကရတော ဒုက္ကရတရံ, ယံ သော အတ္တနော ဩရသေ ပိယေ ပုတ္တေ ဗာလကေ တရုဏကေ လတာယ ဗန္ဓိတွာ တေန ဗြာဟ္မဏေန လတာယ အနုမဇ္ဇီယန္တေ ဒိသွာ အဇ္ဈုပေက္ခိ။

‘‘ဣဒမ္ပိ တတိယံ ဒုက္ကရတော ဒုက္ကရတရံ, ယံ သော သကေန ဗလေန ဗန္ဓနာ မုစ္စိတွာ အာဂတေ ဒါရကေ သာရဇ္ဇမုပဂတေ ပုနဒေဝ လတာယ ဗန္ဓိတွာ အဒါသိ။

‘‘ဣဒမ္ပိ စတုတ္ထံ ဒုက္ကရတော ဒုက္ကရတရံ, ယံ သော ဒါရကေ ‘အယံ ခေါ, တာတ, ယက္ခော ခါဒိတုံ နေတိ အမှေ’တိ ဝိလပန္တေ ‘မာ ဘာယိတ္ထာ’တိ န အဿာသေသိ။

‘‘ဣဒမ္ပိ ပဉ္စမံ ဒုက္ကရတော ဒုက္ကရတရံ, ယံ သော ဇာလိဿ ကုမာရဿ ရုဒမာနဿ ပါဒေသု နိပတိတွာ ‘အလံ, တာတ, ကဏှာဇိနံ နိဝတ္တေဟိ, အဟမေဝ ဂစ္ဆာမိ ယက္ခေန သဟ, ခါဒတု မံ ယက္ခော’တိ ယာစမာနဿ ဧဝံ န သမ္ပဋိစ္ဆိ။

‘‘ဣဒမ္ပိ ဆဋ္ဌံ ဒုက္ကရတော ဒုက္ကရတရံ, ယံ သော ဇာလိဿ ကုမာရဿ ‘ပါသာဏသမံ နူန တေ, တာတ, ဟဒယံ, ယံ တွံ အမှာကံ ဒုက္ခိတာနံ ပေက္ခမာနော နိမ္မနုဿကေ ဗြဟာရညေ ယက္ခေန နီယမာနေ န နိဝါရေသီ’တိ ဝိလပမာနဿ ကာရုညံ နာကာသိ။

‘‘ဣဒမ္ပိ သတ္တမံ ဒုက္ကရတော ဒုက္ကရတရံ, ယံ တဿ ရုဠရုဠဿ ဘီမဘီမဿ နီတေ ဒါရကေ အဒဿနံ ဂမိတေ န ဖလိ ဟဒယံ သတဓါ ဝါ သဟဿဓါ ဝါ, ပုညကာမေန မနုဇေန ကိံ ပရဒုက္ခာပနေန, နနု နာမ သကဒါနံ ဒါတဗ္ဗံ ဟောတီ’’တိ?

‘‘ဒုက္ကရဿ, မဟာရာဇ, ကတတ္တာ ဗောဓိသတ္တဿ ကိတ္တိသဒ္ဒေါ ဒသသဟဿိယာ လောကဓါတုယာ သဒေဝမနုဿေသု အဗ္ဘုဂ္ဂတော, ဒေဝါ ဒေဝဘဝနေ ပကိတ္တေန္တိ, အသုရာ အသုရဘဝနေ ပကိတ္တေန္တိ, ဂရုဠာ ဂရုဠဘဝနေ ပကိတ္တေန္တိ, နာဂါ နာဂဘဝနေ ပကိတ္တေန္တိ, ယက္ခာ ယက္ခဘဝနေ ပကိတ္တေန္တိ, အနုပုဗ္ဗေန တဿ ကိတ္တိသဒ္ဒေါ ပရမ္ပရာယ အဇ္ဇေတရဟိ ဣဓ အမှာကံ သမယံ အနုပ္ပတ္တော, တံ မယံ ဒါနံ ပကိတ္တေန္တာ ဝိကောပေန္တာ နိသိန္နာ သုဒိန္နံ, ဥဒါဟု ဒုဒ္ဒိန္နန္တိ။ သော ခေါ ပနာယံ, မဟာရာဇ, ကိတ္တိသဒ္ဒေါ နိပုဏာနံ ဝိညူနံ ဝိဒူနံ ဝိဘာဝီနံ ဗောဓိသတ္တာနံ ဒသ ဂုဏေ အနုဒဿတိ။ ကတမေ ဒသ? အဂေဓတာ နိရာလယတာ စာဂေါ ပဟာနံ အပုနရာဝတ္တိတာ သုခုမတာ မဟန္တတာ ဒုရနုဗောဓတာ ဒုလ္လဘတာ အသဒိသတာ ဗုဒ္ဓဓမ္မဿ, သော ခေါ ပနာယံ, မဟာရာဇ, ကိတ္တိသဒ္ဒေါ နိပုဏာနံ ဝိညူနံ ဝိဒူနံ ဝိဘာဝီနံ ဗောဓိသတ္တာနံ ဣမေ ဒသ ဂုဏေ အနုဒဿတီ’’တိ။

‘‘ဘန္တေ နာဂသေန, ယော ပရံ ဒုက္ခာပေတွာ ဒါနံ ဒေတိ, အပိ နု တံ ဒါနံ သုခဝိပါကံ ဟောတိ သဂ္ဂသံဝတ္တနိက’’န္တိ? ‘‘အာမ, မဟာရာဇ, ကိံ ဝတ္တဗ္ဗ’’န္တိ။ ‘‘ဣင်္ဃ, ဘန္တေ နာဂသေန, ကာရဏံ ဥပဒဿေဟီ’’တိ။ ‘‘ဣဓ, မဟာရာဇ, ကောစိ သမဏော ဝါ ဗြာဟ္မဏော ဝါ သီလဝါ ဟောတိ ကလျာဏဓမ္မော, သော ဘဝေယျ ပက္ခဟတော ဝါ ဣဌသပ္ပီ ဝါ အညတရံ ဝါ ဗျာဓိံ အာပန္နော, တမေနံ ယော ကောစိ ပုညကာမော ယာနံ အာရောပေတွာ ပတ္ထိတံ ဒေသမနုပါပေယျ, အပိ နု ခေါ, မဟာရာဇ, တဿ ပုရိသဿ တတောနိဒါနံ ကိဉ္စိ သုခံ နိဗ္ဗတ္တေယျ သဂ္ဂသံဝတ္တနိကံ တံ ကမ္မ’’န္တိ? ‘‘အာမ, ဘန္တေ, ကိံ ဝတ္တဗ္ဗံ? ဟတ္ထိယာနံ ဝါ သော, ဘန္တေ, ပုရိသော လဘေယျ အဿယာနံ ဝါ ရထယာနံ ဝါ, ထလေ ထလယာနံ ဇလေ ဇလယာနံ ဒေဝေသု ဒေဝယာနံ မနုဿေသု မနုဿယာနံ, တဒနုစ္ဆဝိကံ တဒနုလောမိကံ ဘဝေ ဘဝေ နိဗ္ဗတ္တေယျ, တဒနုစ္ဆဝိကာနိ တဒနုလောမိကာနိ စဿ သုခါနိ နိဗ္ဗတ္တေယျုံ, သုဂတိတော သုဂတိံ ဂစ္ဆေယျ, တေနေဝ ကမ္မာဘိသန္ဒေန ဣဒ္ဓိယာနံ အဘိရုယှ ပတ္ထိတံ နိဗ္ဗာနနဂရံ ပါပုဏေယျာ’’တိ။ ‘‘တေန ဟိ, မဟာရာဇ, ပရဒုက္ခာပနေန ဒိန္နဒါနံ သုခဝိပါကံ ဟောတိ သဂ္ဂသံဝတ္တနိကံ , ယံ သော ပုရိသော ဗလီဗဒ္ဒေ ဒုက္ခာပေတွာ ဧဝရူပံ သုခံ အနုဘဝတိ။

‘‘အပရမ္ပိ , မဟာရာဇ, ဥတ္တရိံ ကာရဏံ သုဏောဟိ, ယထာ ပရဒုက္ခာပနေန ဒိန္နဒါနံ သုခဝိပါကံ ဟောတိ သဂ္ဂသံဝတ္တနိကံ။ ဣဓ, မဟာရာဇ, ယော ကောစိ ရာဇာ ဇနပဒတော ဓမ္မိကံ ဗလိံ ဥဒ္ဓရာပေတွာ အာဏာပဝတ္တနေန ဒါနံ ဒဒေယျ, အပိ နု ခေါ သော, မဟာရာဇ, ရာဇာ တတောနိဒါနံ ကိဉ္စိ သုခံ အနုဘဝေယျ သဂ္ဂသံဝတ္တနိကံ တံ ဒါန’’န္တိ? ‘‘အာမ, ဘန္တေ, ကိံ ဝတ္တဗ္ဗံ, တတောနိဒါနံ သော, ဘန္တေ, ရာဇာ ဥတ္တရိံ အနေကသတသဟဿဂုဏံ လဘေယျ။ ရာဇူနံ အတိရာဇာ ဘဝေယျ, ဒေဝါနံ အတိဒေဝေါ ဘဝေယျ, ဗြဟ္မာနံ အတိဗြဟ္မာ ဘဝေယျ, သမဏာနံ အတိသမဏော ဘဝေယျ, ဗြာဟ္မဏာနံ အတိဗြာဟ္မဏော ဘဝေယျ, အရဟန္တာနံ အတိအရဟာ [အတိအရဟန္တော (သျာ။ က။)] ဘဝေယျာ’’တိ။ ‘‘တေန ဟိ, မဟာရာဇ, ပရဒုက္ခာပနေန ဒိန္နဒါနံ သုခဝိပါကံ ဟောတိ သဂ္ဂသံဝတ္တနိကံ, ယံ သော ရာဇာ ဗလိနာ ဇနံ ဣဠေတွာ ဒိန္နဒါနေန ဧဝရူပံ ဥတ္တရိံ ယသသုခံ အနုဘဝတီ’’တိ။

‘‘အတိဒါနံ, ဘန္တေ နာဂသေန, ဝေဿန္တရေန ရညာ ဒိန္နံ, ယံ သော သကံ ဘရိယံ ပရဿ ဘရိယတ္ထာယ အဒါသိ, သကေ ဩရသေ ပုတ္တေ ဗြာဟ္မဏဿ ဒါသတ္ထာယ အဒါသိ, အတိဒါနံ နာမ, ဘန္တေ နာဂသေန, လောကေ ဝိဒူဟိ နိန္ဒိတံ ဂရဟိတံ, ယထာ နာမ, ဘန္တေ နာဂသေန, အတိဘာရေန သကဋဿ အက္ခော ဘိဇ္ဇတိ, အတိဘာရေန နာဝါ ဩသီဒတိ, အတိဘုတ္တေန ဘောဇနံ ဝိသမံ ပရိဏမတိ, အတိဝဿေန ဓညံ ဝိနဿတိ, အတိဒါနေန ဘောဂက္ခယံ ဥပေတိ, အတိတာပေန ပထဝီ ဥပဍယှတိ, အတိရာဂေန ဥမ္မတ္တကော ဟောတိ, အတိဒေါသေန ဝဇ္ဈော ဟောတိ, အတိမောဟေန အနယံ အာပဇ္ဇတိ, အတိလောဘေန စောရဂ္ဂဟဏမုပဂစ္ဆတိ, အတိဘယေန နိရုဇ္ဈတိ, အတိပူရေန နဒီ ဥတ္တရတိ, အတိဝါတေန အသနိ ပတတိ, အတိအဂ္ဂိနာ ဩဒနံ ဥတ္တရတိ, အတိသဉ္စရဏေန န စိရံ ဇီဝတိ။ ဧဝမေဝ ခေါ, ဘန္တေ နာဂသေန, အတိဒါနံ နာမ လောကေ ဝိဒူဟိ နိန္ဒိတံ ဂရဟိတံ, အတိဒါနံ, ဘန္တေ နာဂသေန, ဝေဿန္တရေန ရညာ ဒိန္နံ, န တတ္ထ ကိဉ္စိ ဖလံ ဣစ္ဆိတဗ္ဗ’’န္တိ။

‘‘အတိဒါနံ, မဟာရာဇ, လောကေ ဝိဒူဟိ ဝဏ္ဏိတံ ထုတံ ပသတ္ထံ, ယေ ကေစိ ယာဒိသံ ကီဒိသံ ဒါနံ ဒေန္တိ [ကေစိ ယာဒိသံ တာဒိသံ ဒါနံ ဒေန္တိ (သျာ။)], အတိဒါနဒါယီ လောကေ ကိတ္တိံ ပါပုဏာတိ။ ယထာ , မဟာရာဇ, အတိပဝရတာယ ဒိဗ္ဗံ ဝနမူလံ ဂဟိတမ္ပိ ဟတ္ထပါသေ ဌိတာနံ ပရဇနာနံ န ဒဿယတိ, အဂဒေါ အတိဇစ္စတာယ [အတိဥသဘတာယ (က။)] ဣဠာယ သမုဂ္ဃါတကော ရောဂါနံ အန္တကရော, အဂ္ဂိ အတိဇောတိတာယ ဍဟတိ, ဥဒကံ အတိသီတတာယ နိဗ္ဗာပေတိ, ပဒုမံ ပရိသုဒ္ဓတာယ န ဥပလိမ္ပတိ ဝါရိကဒ္ဒမေန, မဏိ အတိဂုဏတာယ ကာမဒဒေါ, ဝဇိရံ အတိတိခိဏတာယ ဝိဇ္ဈတိ မဏိမုတ္တာဖလိကံ, ပထဝီ အတိမဟန္တတာယ နရောရဂမိဂပက္ခိဇလသေလပဗ္ဗတဒုမေ ဓါရေတိ, သမုဒ္ဒေါ အတိမဟန္တတာယ အပရိပူရဏော, သိနေရု အတိဘာရတာယ အစလော, အာကာသော အတိဝိတ္ထာရတာယ အနန္တော, သူရိယော အတိပ္ပဘတာယ တိမိရံ ဃာတေတိ, သီဟော အတိဇာတိတာယ ဝိဂတဘယော, မလ္လော အတိဗလဝတာယ ပဋိမလ္လံ ခိပ္ပံ ဥက္ခိပတိ , ရာဇာ အတိပုညတာယ အဓိပတိ, ဘိက္ခု အတိသီလဝန္တတာယ နာဂယက္ခနရမရူဟိ နမဿနီယော, ဗုဒ္ဓေါ အတိအဂ္ဂတာယ [အတိဝိသိဋ္ဌတာယ (သျာ။)] အနုပမော။ ဧဝမေဝ ခေါ, မဟာရာဇ, အတိဒါနံ နာမ လောကေ ဝိဒူဟိ ဝဏ္ဏိတံ ထုတံ ပသတ္ထံ, ယေ ကေစိ ယာဒိသံ ကီဒိသံ ဒါနံ ဒေန္တိ, အတိဒါနဒါယီ လောကေ ကိတ္တိံ ပါပုဏာတိ, အတိဒါနေန ဝေဿန္တရော ရာဇာ ဒသသဟဿိယာ လောကဓါတုယာ ဝဏ္ဏိတော ထုတော ပသတ္ထော မဟိတော ကိတ္တိတော, တေနေဝ အတိဒါနေန ဝေဿန္တရော ရာဇာ အဇ္ဇေတရဟိ ဗုဒ္ဓေါ ဇာတော အဂ္ဂေါ သဒေဝကေ လောကေ။

‘‘အတ္ထိ ပန, မဟာရာဇ, လောကေ ဌပနီယံ ဒါနံ, ယံ ဒက္ခိဏေယျေ အနုပ္ပတ္တေ န ဒါတဗ္ဗ’’န္တိ? ‘‘ဒသ ခေါ ပနိမာနိ, ဘန္တေ နာဂသေန, ဒါနာနိ, ယာနိ လောကေ အဒါနသမ္မတာနိ, ယော တာနိ ဒါနာနိ ဒေတိ, သော အပါယဂါမီ ဟောတိ။ ကတမာနိ ဒသ? မဇ္ဇဒါနံ, ဘန္တေ နာဂသေန, လောကေ အဒါနသမ္မတံ, ယော တံ ဒါနံ ဒေတိ, သော အပါယဂါမီ ဟောတိ။ သမဇ္ဇဒါနံ။ပေ။။ ဣတ္ထိဒါနံ။ပေ။။ ဥသဘဒါနံ။ပေ။။ စိတ္တကမ္မဒါနံ။ပေ။။ သတ္ထဒါနံ ။ပေ။။ ဝိသဒါနံ။ပေ။။ သင်္ခလိကဒါနံ။ပေ။။ ကုက္ကုဋသူကရဒါနံ။ပေ။။ တုလာကူဋမာနကူဋဒါနံ, ဘန္တေ နာဂသေန, လောကေ အဒါနသမ္မတံ ဟောတိ, ယော တံ ဒါနံ ဒေတိ, သော အပါယဂါမီ ဟောတိ။ ဣမာနိ ခေါ, ဘန္တေ နာဂသေန, ဒသ ဒါနာနိ လောကေ အဒါနသမ္မတာနိ, ယော တာနိ ဒါနာနိ ဒေတိ, သော အပါယဂါမီ ဟောတီ’’တိ။

‘‘နာဟံ တံ, မဟာရာဇ, အဒါနသမ္မတံ ပုစ္ဆာမိ, ဣမံ ခွါဟံ, မဟာရာဇ, တံ ပုစ္ဆာမိ ‘အတ္ထိ ပန, မဟာရာဇ, လောကေ ဌပနီယံ ဒါနံ, ယံ ဒက္ခိဏေယျေ အနုပ္ပတ္တေ န ဒါတဗ္ဗ’န္တိ။ ‘‘နတ္ထိ, ဘန္တေ နာဂသေန, လောကေ ဌပနီယံ ဒါနံ။ ယံ ဒက္ခိဏေယျေ အနုပ္ပတ္တေ န ဒါတဗ္ဗံ, စိတ္တပ္ပသာဒေ ဥပ္ပန္နေ ကေစိ ဒက္ခိဏေယျာနံ ဘောဇနံ ဒေန္တိ, ကေစိ အစ္ဆာဒနံ, ကေစိ သယနံ, ကေစိ အာဝသထံ, ကေစိ အတ္ထရဏပါဝုရဏံ, ကေစိ ဒါသိဒါသံ, ကေစိ ခေတ္တဝတ္ထုံ, ကေစိ ဒွိပဒစတုပ္ပဒံ, ကေစိ သတံ သဟဿံ သတသဟဿံ, ကေစိ မဟာရဇ္ဇံ, ကေစိ ဇီဝိတမ္ပိ ဒေန္တီ’’တိ။ ‘‘ယဒိ ပန, မဟာရာဇ, ကေစိ ဇီဝိတမ္ပိ ဒေန္တိ, ကိံ ကာရဏာ ဝေဿန္တရံ ဒါနပတိံ အတိဗာဠှံ ပရိပါတေသိ သုဒိန္နေ ပုတ္တေ စ ဒါရေ စ?

‘‘အပိ နု ခေါ, မဟာရာဇ, အတ္ထိ လောကပကတိ လောကာစိဏ္ဏံ, လဘတိ ပိတာ ပုတ္တံ ဣဏဋ္ဋော ဝါ အာဇီဝိကပကတော ဝါ အာဝပိတုံ ဝါ [အာဓါပေတုံ ဝါ (သျာ။), အာဓပိတုံ ဝါ (က။)] ဝိက္ကိဏိတုံ ဝါ’’တိ? ‘‘အာမ, ဘန္တေ, လဘတိ ပိတာ ပုတ္တံ ဣဏဋ္ဋော ဝါ အာဇီဝိကပကတော ဝါ အာဝပိတုံ ဝါ ဝိက္ကိဏိတုံ ဝါ’’တိ။ ‘‘ယဒိ, မဟာရာဇ, လဘတိ ပိတာ ပုတ္တံ ဣဏဋ္ဋော ဝါ အာဇီဝိကပကတော ဝါ အာဝပိတုံ ဝါ ဝိက္ကိဏိတုံ ဝါ , ဝေဿန္တရောပိ, မဟာရာဇ, ရာဇာ အလဘမာနော သဗ္ဗညုတဉာဏံ ဥပဒ္ဒုတော ဒုက္ခိတော တဿ ဓမ္မဓနဿ ပဋိလာဘာယ ပုတ္တဒါရံ အာဝပေသိ စ ဝိက္ကိဏိ စ။ ဣတိ, မဟာရာဇ, ဝေဿန္တရေန ရညာ အညေသံ ဒိန္နံ ယေဝ ဒိန္နံ, ကတံ ယေဝ ကတံ။ ကိဿ ပန တွံ, မဟာရာဇ, တေန ဒါနေန ဝေဿန္တရံ ဒါနပတိံ အတိဗာဠှံ အပသာဒေသီ’’တိ?

‘‘နာဟံ, ဘန္တေ နာဂသေန, ဝေဿန္တရဿ ဒါနပတိနော ဒါနံ ဂရဟာမိ, အပိ စ ပုတ္တဒါရံ ယာစန္တေ နိမိနိတွာ အတ္တာနံ ဒါတဗ္ဗ’’န္တိ။ ‘‘ဧတံ ခေါ, မဟာရာဇ, အသဗ္ဘိကာရဏံ, ယံ ပုတ္တဒါရံ ယာစန္တေ အတ္တာနံ ဒဒေယျ, ယံ ယံ ဟိ ယာစန္တေ တံ တဒေဝ ဒါတဗ္ဗံ, ဧတံ သပ္ပုရိသာနံ ကမ္မံ။ ယထာ, မဟာရာဇ, ကောစိ ပုရိသော ပါနီယံ အာဟရာပေယျ, တဿ ယော ဘောဇနံ ဒဒေယျ, အပိ နု သော, မဟာရာဇ, ပုရိသော တဿ ကိစ္စကာရီ အဿာ’’တိ? ‘‘န ဟိ, ဘန္တေ, ယံ သော အာဟရာပေတိ, တမေဝ တဿ ဒေန္တော ကိစ္စကာရီ အဿာ’’တိ။ ‘‘ဧဝမေဝ ခေါ, မဟာရာဇ, ဝေဿန္တရော ရာဇာ ဗြာဟ္မဏေ ပုတ္တဒါရံ ယာစန္တေ ပုတ္တဒါရံ ယေဝ အဒါသိ။ သစေ, မဟာရာဇ, ဗြာဟ္မဏော ဝေဿန္တရဿ သရီရံ ယာစေယျ, န သော, မဟာရာဇ, အတ္တာနံ ရက္ခေယျ န ကမ္ပေယျ န ရဇ္ဇေယျ, တဿ ဒိန္နံ ပရိစ္စတ္တံ ယေဝ သရီရံ ဘဝေယျ။ သစေ, မဟာရာဇ, ကောစိ ဝေဿန္တရံ ဒါနပတိံ ဥပဂန္တွာ ယာစေယျ ‘ဒါသတ္တံ မေ ဥပေဟီ’တိ, ဒိန္နံ ပရိစ္စတ္တံ ယေဝဿ သရီရံ ဘဝေယျ, န သော ဒတွာ တပေယျ [ဌပေယျ (သီ။)], ရညော, မဟာရာဇ, ဝေဿန္တရဿ ကာယော ဗဟုသာဓါရဏော။

‘‘ယထာ, မဟာရာဇ, ပက္ကာ မံသပေသိ ဗဟုသာဓါရဏာ, ဧဝမေဝ ခေါ, မဟာရာဇ, ရညော ဝေဿန္တရဿ ကာယော ဗဟုသာဓါရဏော။ ယထာ ဝါ ပန, မဟာရာဇ, ဖလိတော [ဖလိနော (?)] ရုက္ခော နာနာဒိဇဂဏသာဓါရဏော, ဧဝမေဝ ခေါ, မဟာရာဇ, ရညော ဝေဿန္တရဿ ကာယော ဗဟုသာဓါရဏော။ ကိံ ကာရဏာ? ‘ဧဝါဟံ ပဋိပဇ္ဇန္တော သမ္မာသမ္ဗောဓိံ ပါပုဏိဿာမီ’တိ။

‘‘ယထာ, မဟာရာဇ, ပုရိသော အဓနော ဓနတ္ထိကော ဓနပရိယေသနံ စရမာနော အဇပထံ သင္ကုပထံ ဝေတ္တပထံ ဂစ္ဆတိ, ဇလထလဝါဏိဇ္ဇံ ကရောတိ, ကာယေန ဝါစာယ မနသာ ဓနံ အာရာဓေတိ, ဓနပ္ပဋိလာဘာယ ဝါယမတိ။ ဧဝမေဝ ခေါ, မဟာရာဇ, ဝေဿန္တရော ဒါနပတိ အဓနော ဗုဒ္ဓဓနေန သဗ္ဗညုတဉာဏရတနပ္ပဋိလာဘာယ ယာစကာနံ ဓနဓညံ ဒါသိဒါသံ ယာနဝါဟနံ သကလသာပတေယျံ သကံ ပုတ္တဒါရံ အတ္တာနဉ္စ စဇိတွာ သမ္မာသမ္ဗောဓိံ ယေဝ ပရိယေသတိ။

‘‘ယထာ ဝါ ပန, မဟာရာဇ, အမစ္စော မုဒ္ဒကာမော မုဒ္ဒါဓိကရဏံ ယံ ကိဉ္စိ ဂေဟေ ဓနဓညံ ဟိရညသုဝဏ္ဏံ, တံ သဗ္ဗံ ဒတွာပိ မုဒ္ဒပ္ပဋိလာဘာယ ဝါယမတိ။ ဧဝမေဝ ခေါ, မဟာရာဇ, ဝေဿန္တရော ဒါနပတိ သဗ္ဗံ တံ ဗာဟိရဗ္ဘန္တရဓနံ ဒတွာ ဇီဝိတမ္ပိ ပရေသံ ဒတွာ သမ္မာသမ္ဗောဓိံ ယေဝ ပရိယေသတိ။

‘‘အပိ စ, မဟာရာဇ, ဝေဿန္တရဿ ဒါနပတိနော ဧဝံ အဟောသိ ‘ယံ သော ဗြာဟ္မဏော ယာစတိ, တမေဝါဟံ တဿ ဒေန္တော ကိစ္စကာရီ နာမ ဟောမီ’တိ, ဧဝံ သော တဿ ပုတ္တဒါရမဒါသိ။ န ခေါ, မဟာရာဇ, ဝေဿန္တရော ဒါနပတိ ဒေဿတာယ ဗြာဟ္မဏဿ ပုတ္တဒါရမဒါသိ, န အဒဿနကာမတာယ ပုတ္တဒါရမဒါသိ, န အတိဗဟုကာ မေ ပုတ္တဒါရာ, ‘န သက္ကောမိ တေ ပေါသေတု’န္တိ ပုတ္တဒါရမဒါသိ, န ဥက္ကဏ္ဌိတော ‘အပ္ပိယာ မေ’တိ နီဟရိတုကာမတာယ ပုတ္တဒါရမဒါသိ။ အထ ခေါ သဗ္ဗညုတဉာဏရတနဿေဝ ပိယတ္တာ သဗ္ဗညုတဉာဏဿ ကာရဏာ ဝေဿန္တရော ရာဇာ ဧဝရူပံ အတုလံ ဝိပုလမနုတ္တရံ ပိယံ မနာပံ ဒယိတံ ပါဏသမံ ပုတ္တဒါရဒါနဝရံ ဗြာဟ္မဏဿ အဒါသိ။

‘‘ဘာသိတမ္ပေတံ , မဟာရာဇ, ဘဂဝတာ ဒေဝါတိဒေဝေန စရိယာပိဋကေ –

‘‘‘န မေ ဒေဿာ ဥဘော ပုတ္တာ၊ မဒ္ဒီ ဒေဝီ န ဒေဿိယာ။

သဗ္ဗညုတံ ပိယံ မယှံ၊ တသ္မာ ပိယေ အဒါသဟ’န္တိ။

‘‘တသ္မာ, မဟာရာဇ, ဝေဿတရော ရာဇာ ပုတ္တဒါနံ [ပုတ္တဒါရံ (က။)] ဒတွာ ပဏ္ဏသာလံ ပဝိသိတွာ နိပဇ္ဇိ။ တဿ အတိပေမေန ဒုက္ခိတဿ ဗလဝသောကော ဥပ္ပဇ္ဇိ, ဟဒယဝတ္ထု ဥဏှမဟောသိ။ နာသိကာယ အပ္ပဟောန္တိယာ မုခေန ဥဏှေ အဿာသပဿာသေ ဝိဿဇ္ဇေသိ, အဿူနိ ပရိဝတ္တိတွာ လောဟိတဗိန္ဒူနိ ဟုတွာ နေတ္တေဟိ နိက္ခမိံသု။ ဧဝမေဝ ခေါ, မဟာရာဇ, ဒုက္ခေန ဝေဿန္တရော ရာဇာ ဗြာဟ္မဏဿ ပုတ္တဒါရမဒါသိ ‘မာ မေ ဒါနပထော ပရိဟာယီ’တိ။

‘‘အပိ စ, မဟာရာဇ, ဝေဿန္တရော ရာဇာ ဒွေ အတ္ထဝသေ ပဋိစ္စ ဗြာဟ္မဏဿ ဒွေ ဒါရကေ အဒါသိ။ ကတမေ ဒွေ? ဒါနပထော စ မေ အပရိဟီနော ဘဝိဿတိ, ဒုက္ခိတေ စ မေ ပုတ္တကေ ဝနမူလဖလေဟိ ဣတောနိဒါနံ အယျကော မောစေဿတီတိ။ ဇာနာတိ ဟိ, မဟာရာဇ, ဝေဿန္တရော ရာဇာ ‘န မေ ဒါရကာ သက္ကာ ကေနစိ ဒါသဘောဂေန ဘုဉ္ဇိတုံ, ဣမေ စ ဒါရကေ အယျကော နိက္ကိဏိဿတိ, ဧဝံ အမှာကမ္ပိ ဂမနံ ဘဝိဿတီ’တိ။ ဣမေ ခေါ, မဟာရာဇ, ဒွေ အတ္ထဝသေ ပဋိစ္စ ဗြာဟ္မဏဿ ဒွေ ဒါရကေ အဒါသိ။

‘‘အပိ စ, မဟာရာဇ, ဝေဿန္တရော ရာဇာ ဇာနာတိ ‘အယံ ခေါ ဗြာဟ္မဏော ဇိဏ္ဏော ဝုဍ္ဎော မဟလ္လကော ဒုဗ္ဗလော ဘဂ္ဂေါ ဒဏ္ဍပရာယဏော ခီဏာယုကော ပရိတ္တပုညော, နေသော သမတ္ထော ဣမေ ဒါရကေ ဒါသဘောဂေန ဘုဉ္ဇိတု’န္တိ။ သက္ကုဏေယျ ပန, မဟာရာဇ, ပုရိသော ပါကတိကေန ဗလေန ဣမေ စန္ဒိမသူရိယေ ဧဝံမဟိဒ္ဓိကေ ဧဝံမဟာနုဘာဝေ ဂဟေတွာ ပေဠာယ ဝါ သမုဂ္ဂေ ဝါ ပက္ခိပိတွာ နိပ္ပဘေ ကတွာ ထာလကပရိဘောဂေန [ပဒီပပရိဘောဂေန (သျာ။)] ပရိဘုဉ္ဇိတု’’န္တိ? ‘‘န ဟိ, ဘန္တေ’’တိ။ ‘‘ဧဝမေဝ ခေါ, မဟာရာဇ, ဣမသ္မိံ လောကေ စန္ဒိမသူရိယပ္ပဋိဘာဂဿ ဝေဿန္တရဿ ဒါရကာ န သက္ကာ ကေနစိ ဒါသဘောဂေန ဘုဉ္ဇိတုန္တိ။

‘‘အပရမ္ပိ, မဟာရာဇ, ဥတ္တရိံ ကာရဏံ သုဏောဟိ, ယေန ကာရဏေန ဝေဿန္တရဿ ဒါရကာ န သက္ကာ ကေနစိ ဒါသဘောဂေန ဘုဉ္ဇိတုံ။ ယထာ, မဟာရာဇ, ရညော စက္ကဝတ္တိဿ မဏိရတနံ သုဘံ ဇာတိမန္တံ အဋ္ဌံသံ သုပရိကမ္မကတံ စတုဟတ္ထာယာမံ သကဋနာဘိပရိဏာဟံ န သက္ကာ ကေနစိ ပိလောတိကာယ ဝေဌေတွာ ပေဠာယ ပက္ခိပိတွာ သတ္ထကနိသာနပရိဘောဂေန ပရိဘုဉ္ဇိတုံ, ဧဝမေဝ ခေါ, မဟာရာဇ, လောကေ စက္ကဝတ္တိရညော မဏိရတနပ္ပဋိဘာဂဿ ဝေဿန္တရဿ ဒါရကာ န သက္ကာ ကေနစိ ဒါသဘောဂေန ဘုဉ္ဇိတုံ။

‘‘အပရမ္ပိ, မဟာရာဇ, ဥတ္တရိံ ကာရဏံ သုဏောဟိ, ယေန ကာရဏေန ဝေဿန္တရဿ ဒါရကာ န သက္ကာ ကေနစိ ဒါသဘောဂေန ဘုဉ္ဇိတုံ။ ယထာ, မဟာရာဇ, တိဓါ ပဘိန္နော သဗ္ဗသေတော သတ္တပ္ပတိဋ္ဌိတော အဋ္ဌရတနုဗ္ဗေဓေါ နဝရတနာယာမပရိဏာဟော ပါသာဒိကော ဒဿနီယော ဥပေါသထော နာဂရာဇာ န သက္ကာ ကေနစိ သုပ္ပေန ဝါ သရာဝေန ဝါ ပိဒဟိတုံ, ဂေါဝစ္ဆကော ဝိယ ဝစ္ဆကသာလာယ ပက္ခိပိတွာ ပရိဟရိတုံ ဝါ, ဧဝမေဝ ခေါ, မဟာရာဇ, လောကေ ဥပေါသထနာဂရာဇပ္ပဋိဘာဂဿ ဝေဿန္တရဿ ဒါရကာ န သက္ကာ ကေနစိ ဒါသဘောဂေန ဘုဉ္ဇိတုံ။

‘‘အပရမ္ပိ, မဟာရာဇ, ဥတ္တရိံ ကာရဏံ သုဏောဟိ, ယေန ကာရဏေန ဝေဿန္တရဿ ဒါရကာ န သက္ကာ ကေနစိ ဒါသဘောဂေန ဘုဉ္ဇိတုံ။ ယထာ, မဟာရာဇ, မဟာသမုဒ္ဒေါ ဒီဃပုထုလဝိတ္ထိဏ္ဏော ဂမ္ဘီရော အပ္ပမေယျော ဒုရုတ္တရော အပရိယောဂါဠ္ဟော အနာဝဋော န သက္ကာ ကေနစိ သဗ္ဗတ္ထ ပိဒဟိတွာ ဧကတိတ္ထေန ပရိဘောဂံ ကာတုံ, ဧဝမေဝ ခေါ, မဟာရာဇ, လောကေ မဟာသမုဒ္ဒပ္ပဋိဘာဂဿ ဝေဿန္တရဿ ဒါရကာ န သက္ကာ ကေနစိ ဒါသဘောဂေန ဘုဉ္ဇိတုံ။

‘‘အပရမ္ပိ, မဟာရာဇ, ဥတ္တရိံ ကာရဏံ သုဏောဟိ, ယေန ကာရဏေန ဝေဿန္တရဿ ဒါရကာ န သက္ကာ ကေနစိ ဒါသဘောဂေန ဘုဉ္ဇိတုံ။ ယထာ, မဟာရာဇ, ဟိမဝန္တော ပဗ္ဗတရာဇာ ပဉ္စယောဇနသတံ အစ္စုဂ္ဂတော နဘေ တိသဟဿယောဇနာယာမဝိတ္ထာရော စတုရာသီတိကူဋသဟဿပ္ပဋိမဏ္ဍိတော ပဉ္စန္နံ မဟာနဒီသတာနံ ပဘဝေါ မဟာဘူတဂဏာလယော နာနာဝိဓဂန္ဓဓရော ဒိဗ္ဗောသဓသတသမလင်္ကတော နဘေ ဝလာဟကော ဝိယ အစ္စုဂ္ဂတော ဒိဿတိ, ဧဝမေဝ ခေါ, မဟာရာဇ, လောကေ ဟိမဝန္တပဗ္ဗတရာဇပ္ပဋိဘာဂဿ ဝေဿန္တရဿ ဒါရကာ န သက္ကာ ကေနစိ ဒါသဘောဂေန ဘုဉ္ဇိတုံ။

‘‘အပရမ္ပိ, မဟာရာဇ, ဥတ္တရိံ ကာရဏံ သုဏောဟိ, ယေန ကာရဏေန ဝေဿန္တရဿ ဒါရကာ န သက္ကာ ကေနစိ ဒါသဘောဂေန ဘုဉ္ဇိတုံ။ ယထာ, မဟာရာဇ, ရတ္တန္ဓကာရတိမိသာယံ ဥပရိပဗ္ဗတဂ္ဂေ ဇလမာနော မဟာအဂ္ဂိက္ခန္ဓော သုဝိဒူရေပိ ပညာယတိ, ဧဝမေဝ ခေါ, မဟာရာဇ, ဝေဿန္တရော ရာဇာ ပဗ္ဗတဂ္ဂေ ဇလမာနော မဟာအဂ္ဂိက္ခန္ဓော ဝိယ သုဝိဒူရေပိ ပါကဋော ပညာယတိ, တဿ ဒါရကာ န သက္ကာ ကေနစိ ဒါသဘောဂေန ဘုဉ္ဇိတုံ။

‘‘အပရမ္ပိ, မဟာရာဇ, ဥတ္တရိံ ကာရဏံ သုဏောဟိ, ယေန ကာရဏေန ဝေဿန္တရဿ ဒါရကာ န သက္ကာ ကေနစိ ဒါသဘောဂေန ဘုဉ္ဇိတုံ။ ယထာ, မဟာရာဇ, ဟိမဝန္တေ ပဗ္ဗတေ နာဂပုပ္ဖသမယေ ဥဇုဝါတေ ဝါယန္တေ ဒသ ဒွါဒသ ယောဇနာနိ ပုပ္ဖဂန္ဓော ဝါယတိ, ဧဝမေဝ ခေါ , မဟာရာဇ, ဝေဿန္တရဿ ရညော အပိ ယောဇနသဟဿေဟိပိ ယာဝ အကနိဋ္ဌဘဝနံ ဧတ္ထန္တရေ သုရာသုရဂရုဠဂန္ဓဗ္ဗယက္ခရက္ခသမဟောရဂကိန္နရဣန္ဒဘဝနေသု ကိတ္တိသဒ္ဒေါ အဗ္ဘုဂ္ဂတော, သီလဝရဂန္ဓော စဿ သမ္ပဝါယတိ, တေန တဿ ဒါရကာ န သက္ကာ ကေနစိ ဒါသဘောဂေန ဘုဉ္ဇိတုံ။ အနုသိဋ္ဌော, မဟာရာဇ, ဇာလီ ကုမာရော ပိတရာ ဝေဿန္တရေန ရညာ ‘အယျကော တေ, တာတ, တုမှေ ဗြာဟ္မဏဿ ဓနံ ဒတွာ နိက္ကိဏန္တော တံ နိက္ခသဟဿံ ဒတွာ နိက္ကိဏာတု, ကဏှာဇိနံ နိက္ကိဏန္တော ဒါသသတံ ဒါသိသတံ ဟတ္ထိသတံ အဿသတံ ဓေနုသတံ ဥသဘသတံ နိက္ခသတန္တိ သဗ္ဗသတံ ဒတွာ နိက္ကိဏာတု, ယဒိ တေ, တာတ, အယျကော တုမှေ ဗြာဟ္မဏဿ ဟတ္ထတော အာဏာယ ဗလသာ မုဓါ ဂဏှာတိ, မာ တုမှေ အယျကဿ ဝစနံ ကရိတ္ထ, ဗြာဟ္မဏဿေဝ အနုယာယိနော ဟောထာ’တိ, ဧဝမနုသာသိတွာ ပုတ္တေ ပေသေသိ, တတော ဇာလီကုမာရော ဂန္တွာ အယျကေန ပုဋ္ဌော ကထေသိ –

‘‘‘သဟဿဂ္ဃံ ဟိ မံ တာတ၊ ဗြာဟ္မဏဿ ပိတာ အဒါ။

အထော ကဏှာဇိနံ ကညံ၊ ဟတ္ထီနဉ္စ သတေန စာ’’’တိ။

‘‘သုနိဗ္ဗေဌိတော, ဘန္တေ နာဂသေန, ပဉ္ဟော; သုဘိန္နံ ဒိဋ္ဌိဇာလံ; သုမဒ္ဒိတော ပရဝါဒေါ; သကသမယော သုဒီပိတော; ဗျဉ္ဇနံ သုပရိသောဓိတံ; သုဝိဘတ္တော အတ္ထော; ဧဝမေတံ တထာ သမ္ပဋိစ္ဆာမီ’’တိ။

ဝေဿန္တရပဉ္ဟော ပဌမော။

၂။ ဒုက္ကရကာရိကပဉ္ဟော

၂။ ‘‘ဘန္တေ နာဂသေန, သဗ္ဗေဝ ဗောဓိသတ္တာ ဒုက္ကရကာရိကံ ကရောန္တိ, ဥဒါဟု ဂေါတမေနေဝ ဗောဓိသတ္တေန ဒုက္ကရကာရိကာ ကတာ’’တိ? ‘‘နတ္ထိ, မဟာရာဇ , သဗ္ဗေသံ ဗောဓိသတ္တာနံ ဒုက္ကရကာရိကာ, ဂေါတမေနေဝ ဗောဓိသတ္တေန ဒုက္ကရကာရိကာ ကတာ’’တိ။

‘‘ဘန္တေ နာဂသေန, ယဒိ ဧဝံ အယုတ္တံ, ယံ ဗောဓိသတ္တာနံ ဗောဓိသတ္တေဟိ ဝေမတ္တတာ ဟောတီ’’တိ။ ‘‘စတူဟိ , မဟာရာဇ, ဌာနေဟိ ဗောဓိသတ္တာနံ ဗောဓိသတ္တေဟိ ဝေမတ္တတာ ဟောတိ။ ကတမေဟိ စတူဟိ? ကုလဝေမတ္တတာ ပဓါနဝေမတ္တတာ [အဒ္ဓါနဝေမတ္တတာ (သီ။ သျာ။ ဣ။)] အာယုဝေမတ္တတာ ပမာဏဝေမတ္တတာတိ။ ဣမေဟိ ခေါ, မဟာရာဇ, စတူဟိ ဌာနေဟိ ဗောဓိသတ္တာနံ ဗောဓိသတ္တေဟိ ဝေမတ္တတာ ဟောတိ။ သဗ္ဗေသမ္ပိ, မဟာရာဇ, ဗုဒ္ဓါနံ ရူပေ သီလေ သမာဓိမှိ ပညာယ ဝိမုတ္တိယာ ဝိမုတ္တိဉာဏဒဿနေ စတုဝေသာရဇ္ဇေ ဒသတထာဂတဗလေ ဆအသာဓါရဏဉာဏေ စုဒ္ဒသဗုဒ္ဓဉာဏေ အဋ္ဌာရသဗုဒ္ဓဓမ္မေ ကေဝလေ စ ဗုဒ္ဓဂုဏေ [ဗုဒ္ဓဓမ္မေ (သီ။ ဣ။)] နတ္ထိ ဝေမတ္တတာ, သဗ္ဗေပိ ဗုဒ္ဓါ ဗုဒ္ဓဓမ္မေဟိ သမသမာ’’တိ။

‘‘ယဒိ, ဘန္တေ နာဂသေန, သဗ္ဗေပိ ဗုဒ္ဓါ ဗုဒ္ဓဓမ္မေဟိ သမသမာ, ကေန ကာရဏေန ဂေါတမေနေဝ ဗောဓိသတ္တေန ဒုက္ကရကာရိကာ ကတာ’’တိ? ‘‘အပရိပက္ကေ, မဟာရာဇ, ဉာဏေ အပရိပက္ကာယ ဗောဓိယာ ဂေါတမော ဗောဓိသတ္တော နေက္ခမ္မမဘိနိက္ခန္တော အပရိပက္ကံ ဉာဏံ ပရိပါစယမာနေန ဒုက္ကရကာရိကာ ကတာ’’တိ။

‘‘ဘန္တေ နာဂသေန, ကေန ကာရဏေန ဗောဓိသတ္တော အပရိပက္ကေ ဉာဏေ အပရိပက္ကာယ ဗောဓိယာ မဟာဘိနိက္ခမနံ နိက္ခန္တော, နနု နာမ ဉာဏံ ပရိပါစေတွာ ပရိပက္ကေ ဉာဏေ နိက္ခမိတဗ္ဗ’’န္တိ?

‘‘ဗောဓိသတ္တော, မဟာရာဇ, ဝိပရီတံ ဣတ္ထာဂါရံ ဒိသွာ ဝိပ္ပဋိသာရီ အဟောသိ, တဿ ဝိပ္ပဋိသာရိဿ အရတိ ဥပ္ပဇ္ဇိ, အရတိစိတ္တံ ဥပ္ပန္နံ ဒိသွာ အညတရော မာရကာယိကော ဒေဝပုတ္တော ‘အယံ ခေါ ကာလော အရတိစိတ္တဿ ဝိနောဒနာယာ’တိ ဝေဟာသေ ဌတွာ ဣဒံ ဝစနမဗြဝိ –

‘‘မာရိသ, မာ ခေါ တွံ ဥက္ကဏ္ဌိတော အဟောသိ, ဣတော တေ သတ္တမေ ဒိဝသေ ဒိဗ္ဗံ စက္ကရတနံ ပါတုဘဝိဿတိ သဟဿာရံ သနေမိကံ သနာဘိကံ သဗ္ဗာကာရပရိပူရံ, ပထဝိဂတာနိ စ တေ ရတနာနိ အာကာသဋ္ဌာနိ စ သယမေဝ ဥပဂစ္ဆိဿန္တိ, ဒွိသဟဿပရိတ္တဒီပပရိဝါရေသု စတူသု မဟာဒီပေသု ဧကမုခေန အာဏာ ပဝတ္တိဿတိ, ပရောသဟဿဉ္စ တေ ပုတ္တာ ဘဝိဿန္တိ သူရာ ဝီရင်္ဂရူပါ ပရသေနပ္ပမဒ္ဒနာ , တေဟိ ပုတ္တေဟိ ပရိကိဏ္ဏော သတ္တရတနသမန္နာဂတော စတုဒ္ဒီပမနုသာသိဿသီ’တိ။

‘‘ယထာ နာမ ဒိဝသသန္တတ္တံ အယောသူလံ သဗ္ဗတ္ထ ဥပဍဟန္တံ ကဏ္ဏသောတံ ပဝိသေယျ, ဧဝမေဝ ခေါ, မဟာရာဇ, ဗောဓိသတ္တဿ တံ ဝစနံ ကဏ္ဏသောတံ ပဝိသိတ္ထ, ဣတိ သော ပကတိယာဝ ဥက္ကဏ္ဌိတော တဿာ ဒေဝတာယ ဝစနေန ဘိယျောသောမတ္တာယ ဥဗ္ဗိဇ္ဇိ သံဝိဇ္ဇိ သံဝေဂမာပဇ္ဇိ။

‘‘ယထာ ပန, မဟာရာဇ, မဟတိမဟာအဂ္ဂိက္ခန္ဓော ဇလမာနော အညေန ကဋ္ဌေန ဥပဍဟိတော ဘိယျောသောမတ္တာယ ဇလေယျ, ဧဝမေဝ ခေါ, မဟာရာဇ, ဗောဓိသတ္တော ပကတိယာဝ ဥက္ကဏ္ဌိတော တဿာ ဒေဝတာယ ဝစနေန ဘိယျောသောမတ္တာယ ဥဗ္ဗိဇ္ဇိ သံဝိဇ္ဇိ သံဝေဂမာပဇ္ဇိ။

‘‘ယထာ ဝါ ပန, မဟာရာဇ, မဟာပထဝီ ပကတိတိန္တာ နိဗ္ဗတ္တဟရိတသဒ္ဒလာ အာသိတ္တောဒကာ စိက္ခလ္လဇာတာ ပုနဒေဝ မဟာမေဃေ အဘိဝုဋ္ဌေ ဘိယျောသောမတ္တာယ စိက္ခလ္လတရာ အဿ, ဧဝမေဝ ခေါ, မဟာရာဇ, ဗောဓိသတ္တော ပကတိယာဝ ဥက္ကဏ္ဌိတော တဿာ ဒေဝတာယ ဝစနေန ဘိယျောသောမတ္တာယ ဥဗ္ဗိဇ္ဇိ သံဝိဇ္ဇိ သံဝေဂမာပဇ္ဇီ’’တိ။

‘‘အပိ နု ခေါ, ဘန္တေ နာဂသေန, ဗောဓိသတ္တဿ ယဒိ သတ္တမေ ဒိဝသေ ဒိဗ္ဗံ စက္ကရတနံ နိဗ္ဗတ္တေယျ, ပဋိနိဝတ္တေယျ ဗောဓိသတ္တော ဒိဗ္ဗေ စက္ကရတနေ နိဗ္ဗတ္တေ’’တိ? ‘‘န ဟိ, မဟာရာဇ, သတ္တမေ ဒိဝသေ ဗောဓိသတ္တဿ ဒိဗ္ဗံ စက္ကရတနံ နိဗ္ဗတ္တေယျ, အပိ စ ပလောဘနတ္ထာယ တာယ ဒေဝတာယ မုသာ ဘဏိတံ, ယဒိပိ, မဟာရာဇ, သတ္တမေ ဒိဝသေ ဒိဗ္ဗံ စက္ကရတနံ နိဗ္ဗတ္တေယျ, ဗောဓိသတ္တော န နိဝတ္တေယျ။ ကိံ ကာရဏံ? ‘အနိစ္စ’န္တိ, မဟာရာဇ, ဗောဓိသတ္တော ဒဠှံ အဂ္ဂဟေသိ, ‘ဒုက္ခံ အနတ္တာ’တိ ဒဠှံ အဂ္ဂဟေသိ, ဥပါဒါနက္ခယံ ပတ္တော။

‘‘ယထာ, မဟာရာဇ, အနောတတ္တဒဟတော ဥဒကံ ဂင်္ဂံ နဒိံ ပဝိသတိ, ဂင်္ဂါယ နဒိယာ မဟာသမုဒ္ဒံ ပဝိသတိ, မဟာသမုဒ္ဒတော ပါတာလမုခံ ပဝိသတိ, အပိ နု, မဟာရာဇ, တံ ဥဒကံ ပါတာလမုခဂတံ ပဋိနိဝတ္တိတွာ မဟာသမုဒ္ဒံ ပဝိသေယျ, မဟာသမုဒ္ဒတော ဂင်္ဂံ နဒိံ ပဝိသေယျ, ဂင်္ဂါယ နဒိယာ ပုန အနောတတ္တံ ပဝိသေယျာ’’တိ? ‘‘န ဟိ, ဘန္တေ’’တိ။ ‘‘ဧဝမေဝ ခေါ, မဟာရာဇ, ဗောဓိသတ္တေန ကပ္ပါနံ သတသဟဿံ စတုရော စ အသင္ခ္ယေယျေ ကုသလံ ပရိပါစိတံ ဣမဿ ဘဝဿ ကာရဏာ, သောယံ အန္တိမဘဝေါ အနုပ္ပတ္တော ပရိပက္ကံ ဗောဓိဉာဏံ ဆဟိ ဝဿေဟိ ဗုဒ္ဓေါ ဘဝိဿတိ သဗ္ဗညူ လောကေ အဂ္ဂပုဂ္ဂလော, အပိ နု ခေါ, မဟာရာဇ, ဗောဓိသတ္တော စက္ကရတနကာရဏာ [စက္ကရတနဿ ကာရဏာ (သီ။ သျာ။ ဣ။)] ပဋိနိဝတ္တေယျာ’’တိ [ပရိနိဝတ္တေယျာတိ (သီ။ ဣ။ က။)]? ‘‘န ဟိ, ဘန္တေ’’တိ။

‘‘အပိ စ, မဟာရာဇ, မဟာပထဝီ ပရိဝတ္တေယျ သကာနနာ သပဗ္ဗတာ, နတွေဝ ဗောဓိသတ္တော ပဋိနိဝတ္တေယျ အပတွာ သမ္မာသမ္ဗောဓိံ။ အာရောဟေယျပိ စေ, မဟာရာဇ, ဂင်္ဂါယ ဥဒကံ ပဋိသောတံ, နတွေဝ ဗောဓိသတ္တော ပဋိနိဝတ္တေယျ အပတွာ သမ္မာသမ္ဗောဓိံ; ဝိသုဿေယျပိ စေ, မဟာရာဇ, မဟာသမုဒ္ဒေါ အပရိမိတဇလဓရော ဂေါပဒေ ဥဒကံ ဝိယ, နတွေဝ ဗောဓိသတ္တော ပဋိနိဝတ္တေယျ အပတွာ သမ္မာသမ္ဗောဓိံ; ဖလေယျပိ စေ, မဟာရာဇ, သိနေရုပဗ္ဗတရာဇာ သတဓါ ဝါ သဟဿဓါ ဝါ, နတွေဝ ဗောဓိသတ္တော ပဋိနိဝတ္တေယျ အပတွာ သမ္မာသမ္ဗောဓိံ; ပတေယျုမ္ပိ စေ, မဟာရာဇ, စန္ဒိမသူရိယာ သတာရကာ လေဍ္ဍု ဝိယ ဆမာယံ, နတွေဝ ဗောဓိသတ္တော ပဋိနိဝတ္တေယျ အပတွာ သမ္မာသမ္ဗောဓိံ; သံဝတ္တေယျပိ စေ, မဟာရာဇ, အာကာသော ကိလဉ္ဇမိဝ, နတွေဝ ဗောဓိသတ္တော ပဋိနိဝတ္တေယျ အပတွာ သမ္မာသမ္ဗောဓိံ။ ကိံ ကာရဏာ? ပဒါလိတတ္တာ သဗ္ဗဗန္ဓနာန’’န္တိ။

‘‘ဘန္တေ နာဂသေန, ကတိ လောကေ ဗန္ဓနာနီ’’တိ? ‘‘ဒသ ခေါ ပနိမာနိ, မဟာရာဇ, လောကေ ဗန္ဓနာနိ, ယေဟိ ဗန္ဓနေဟိ ဗဒ္ဓါ သတ္တာ န နိက္ခမန္တိ, နိက္ခမိတွာပိ ပဋိနိဝတ္တန္တိ။ ကတမာနိ ဒသ? မာတာ, မဟာရာဇ, လောကေ ဗန္ဓနံ, ပိတာ, မဟာရာဇ, လောကေ ဗန္ဓနံ, ဘရိယာ, မဟာရာဇ, လောကေ ဗန္ဓနံ, ပုတ္တာ, မဟာရာဇ, လောကေ ဗန္ဓနံ, ဉာတီ, မဟာရာဇ, လောကေ ဗန္ဓနံ, မိတ္တံ, မဟာရာဇ, လောကေ ဗန္ဓနံ, ဓနံ, မဟာရာဇ, လောကေ ဗန္ဓနံ, လာဘသက္ကာရော, မဟာရာဇ , လောကေ ဗန္ဓနံ, ဣဿရိယံ, မဟာရာဇ, လောကေ ဗန္ဓနံ, ပဉ္စ ကာမဂုဏာ, မဟာရာဇ, လောကေ ဗန္ဓနံ, ဣမာနိ ခေါ မဟာရာဇ ဒသ လောကေ ဗန္ဓနာနိ, ယေဟိ ဗန္ဓနေဟိ ဗဒ္ဓါ သတ္တာ န နိက္ခမန္တိ, နိက္ခမိတွာပိ ပဋိနိဝတ္တန္တိ, တာနိ ဒသ ဗန္ဓနာနိ ဗောဓိသတ္တဿ ဆိန္နာနိ ပဒါလိတာနိ, တသ္မာ, မဟာရာဇ, ဗောဓိသတ္တော န ပဋိနိဝတ္တတီ’’တိ။

‘‘ဘန္တေ နာဂသေန, ယဒိ ဗောဓိသတ္တော ဥပ္ပန္နေ အရတိစိတ္တေ ဒေဝတာယ ဝစနေန အပရိပက္ကေ ဉာဏေ အပရိပက္ကာယ ဗောဓိယာ နေက္ခမ္မမဘိနိက္ခန္တော, ကိံ တဿ ဒုက္ကရကာရိကာယ ကတာယ, နနု နာမ သဗ္ဗဘက္ခေန ဘဝိတဗ္ဗံ ဉာဏပရိပါကံ အာဂမယမာနေနာ’’တိ?

‘‘ဒသ ခေါ ပနိမေ, မဟာရာဇ, ပုဂ္ဂလာ လောကသ္မိံ ဩညာတာ အဝညာတာ ဟီဠိတာ ခီဠိတာ ဂရဟိတာ ပရိဘူတာ အစိတ္တီကတာ။ ကတမေ ဒသ? ဣတ္ထီ, မဟာရာဇ, ဝိဓဝါ လောကသ္မိံ ဩညာတာ အဝညာတာ ဟီဠိတာ ခီဠိတာ ဂရဟိတာ ပရိဘူတာ အစိတ္တီကတာ။ ဒုဗ္ဗလော, မဟာရာဇ, ပုဂ္ဂလော။ပေ။။ အမိတ္တဉာတိ, မဟာရာဇ, ပုဂ္ဂလော။ပေ။။ မဟဂ္ဃသော, မဟာရာဇ, ပုဂ္ဂလော။ပေ။။ အဂရုကုလဝါသိကော, မဟာရာဇ, ပုဂ္ဂလော။ပေ။။ ပါပမိတ္တော, မဟာရာဇ, ပုဂ္ဂလော။ပေ။။ ဓနဟီနော, မဟာရာဇ, ပုဂ္ဂလော။ပေ။။ အာစာရဟီနော, မဟာရာဇ, ပုဂ္ဂလော။ပေ။။ ကမ္မဟီနော, မဟာရာဇ, ပုဂ္ဂလော။ပေ။။ ပယောဂဟီနော, မဟာရာဇ, ပုဂ္ဂလော လောကသ္မိံ ဩညာတော အဝညာတော ဟီဠိတော ခီဠိတော ဂရဟိတော ပရိဘူတော အစိတ္တီကတော။ ဣမေ ခေါ, မဟာရာဇ, ဒသ ပုဂ္ဂလာ လောကသ္မိံ ဩညာတာ အဝညာတာ ဟီဠိတာ ခီဠိတာ ဂရဟိတာ ပရိဘူတာ အစိတ္တီကတာ။ ဣမာနိ ခေါ, မဟာရာဇ, ဒသ ဌာနာနိ အနုဿရမာနဿ ဗောဓိသတ္တဿ ဧဝံ သညာ ဥပ္ပဇ္ဇိ ‘မာဟံ ကမ္မဟီနော အဿံ ပယောဂဟီနော ဂရဟိတော ဒေဝမနုဿာနံ, ယံနူနာဟံ ကမ္မဿာမီ အဿံ ကမ္မဂရု ကမ္မာဓိပတေယျော ကမ္မသီလော ကမ္မဓေါရယှော ကမ္မနိကေတဝါ အပ္ပမတ္တော ဝိဟရေယျ’န္တိ, ဧဝံ ခေါ, မဟာရာဇ, ဗောဓိသတ္တော ဉာဏံ ပရိပါစေန္တော ဒုက္ကရကာရိကံ အကာသီ’’တိ။

‘‘ဘန္တေ နာဂသေန, ဗောဓိသတ္တော ဒုက္ကရကာရိကံ ကရောန္တော ဧဝမာဟ ‘န ခေါ ပနာဟံ ဣမာယ ကဋုကာယ ဒုက္ကရကာရိကာယ အဓိဂစ္ဆာမိ ဥတ္တရိမနုဿဓမ္မံ အလမရိယဉာဏဒဿနဝိသေသံ, သိယာ နု ခေါ အညော မဂ္ဂေါ ဗောဓါယာ’တိ။ အပိ နု တသ္မိံ သမယေ ဗောဓိသတ္တဿ မဂ္ဂံ အာရဗ္ဘ သတိသမ္မောသော အဟောသီ’’တိ?

‘‘ပဉ္စဝီသတိ ခေါ ပနိမေ, မဟာရာဇ, စိတ္တဒုဗ္ဗလီကရဏာ ဓမ္မာ, ယေဟိ ဒုဗ္ဗလီကတံ စိတ္တံ န သမ္မာ သမာဓိယတိ အာသဝါနံ ခယာယ။ ကတမေ ပဉ္စဝီသတိ? ကောဓေါ, မဟာရာဇ, စိတ္တဒုဗ္ဗလီကရဏော ဓမ္မော, ယေန ဒုဗ္ဗလီကတံ စိတ္တံ န သမ္မာ သမာဓိယတိ အာသဝါနံ ခယာယ, ဥပနာဟော။ပေ။။ မက္ခော။ပေ။။ ပဠာသော။ပေ။။ ဣဿာ။ပေ။။ မစ္ဆရိယံ။ပေ။။ မာယာ။ပေ။။ သာဌေယျံ။ပေ။။ ထမ္ဘော။ပေ။။ သာရမ္ဘော။ပေ။။ မာနော။ပေ။။ အတိမာနော ။ပေ။။ မဒေါ။ပေ။။ ပမာဒေါ။ပေ။။ ထိနမိဒ္ဓံ။ပေ။။ တန္ဒိ [နန္ဒီ (ဣ။ က။)] ။ပေ။။ အာလဿံ။ပေ။။ ပါပမိတ္တတာ။ပေ။။ ရူပါ။ပေ။။ သဒ္ဒါ။ပေ။။ ဂန္ဓာ။ပေ။။ ရသာ။ပေ။။ ဖောဋ္ဌဗ္ဗာ။ပေ။။ ခုဒါပိပါသာ။ပေ။။ အရတိ, မဟာရာဇ, စိတ္တဒုဗ္ဗလီကရဏော ဓမ္မော, ယေန ဒုဗ္ဗလီကတံ စိတ္တံ န သမ္မာ သမာဓိယတိ အာသဝါနံ ခယာယ။ ဣမေ ခေါ, မဟာရာဇ, ပဉ္စဝီသတိ စိတ္တဒုဗ္ဗလီကရဏာ ဓမ္မာ, ယေဟိ ဒုဗ္ဗလီကတံ စိတ္တံ န သမ္မာ သမာဓိယတိ အာသဝါနံ ခယာယ။

ဗောဓိသတ္တဿ ခေါ, မဟာရာဇ, ခုဒါပိပါသာ [ခုဒါပိပါသာ (သီ။ ဣ။ က။)] ကာယံ ပရိယာဒိယိံသု, ကာယေ ပရိယာဒိန္နေ စိတ္တံ န သမ္မာ သမာဓိယတိ အာသဝါနံ ခယာယ။ သတသဟဿံ, မဟာရာဇ, ကပ္ပါနံ [ကပ္ပေ (က။)] စတုရော စ အသင္ခ္ယေယျေ ကပ္ပေ ဗောဓိသတ္တော စတုန္နံ ယေဝ အရိယသစ္စာနံ အဘိသမယံ အန္ဝေသိ တာသု တာသု ဇာတီသု, ကိံ ပနဿ ပစ္ဆိမေ ဘဝေ အဘိသမယဇာတိယံ မဂ္ဂံ အာရဗ္ဘ သတိသမ္မောသော ဟေဿတိ? အပိ စ, မဟာရာဇ, ဗောဓိသတ္တဿ သညာမတ္တံ ဥပ္ပဇ္ဇိ ‘သိယာ နု ခေါ အညော မဂ္ဂေါ ဗောဓါယာ’တိ။ ပုဗ္ဗေ ခေါ, မဟာရာဇ, ဗောဓိသတ္တော ဧကမာသိကော သမာနော ပိတု သက္ကဿ ကမ္မန္တေ သီတာယ ဇမ္ဗုစ္ဆာယာယ သိရိသယနေ ပလ္လင်္ကံ အာဘုဇိတွာ နိသိန္နော ဝိဝိစ္စေဝ ကာမေဟိ ဝိစိစ္စ အကုသလေဟိ ဓမ္မေဟိ သဝိတက္ကံ သဝိစာရံ ဝိဝေကဇံ ဣတိသုခံ ပဌမံ ဈာနံ ဥပသမ္ပဇ္ဇ ဝိဟာသိ။ပေ။။ စတုတ္ထံ ဈာနံ ဥပသမ္ပဇ္ဇ ဝိဟာသီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမိ, ဉာဏံ ပရိပါစေန္တော ဗောဓိသတ္တော ဒုက္ကရကာရိကံ အကာသီ’’တိ။

ဒုက္ကရကာရိကပဉ္ဟော ဒုတိယော။

၃။ ကုသလာကုသလဗလဝတရပဉ္ဟော

၃။ ‘‘ဘန္တေ နာဂသေန, ကတမံ အဓိမတ္တံ ဗလဝတရံ ကုသလံ ဝါ အကုသလံ ဝါ’’တိ? ‘‘ကုသလံ, မဟာရာဇ, အဓိမတ္တံ ဗလဝတရံ, နော တထာ အကုသလ’န္တိ။ ‘‘နာဟံ, ဘန္တေ နာဂသေန, တံ ဝစနံ သမ္ပဋိစ္ဆာမိ ‘ကုသလံ အဓိမတ္တံ ဗလဝတရံ, နော တထာ အကုသလ’န္တိ, ဒိဿန္တိ, ဘန္တေ နာဂသေန, ဣဓ ပါဏာတိပါတိနော အဒိန္နာဒါယိနော ကာမေသုမိစ္ဆာစာရိနော မုသာဝါဒိနော ဂါမဃာတိကာ ပန္ထဒူသကာ နေကတိကာ ဝဉ္စနိကာ, သဗ္ဗေ တေ တာဝတကေန ပါပေန လဘန္တိ ဟတ္ထစ္ဆေဒံ ပါဒစ္ဆေဒံ ဟတ္ထပါဒစ္ဆေဒံ ကဏ္ဏစ္ဆေဒံ နာသစ္ဆေဒံ ကဏ္ဏနာသစ္ဆေဒံ ဗိလင်္ဂထာလိကံ သင်္ခမုဏ္ဍိကံ ရာဟုမုခံ ဇောတိမာလိကံ ဟတ္ထပဇ္ဇောတိကံ ဧရကဝတ္တိကံ စီရကဝါသိကံ ဧဏေယျကံ ဗဠိသမံသိကံ ကဟာပဏိကံ ခါရာပတစ္ဆိကံ ပလိဃပရိဝတ္တိကံ ပလာလဣဌကံ တတ္တေနပိ တေလေန ဩသိဉ္စနံ သုနခေဟိပိ ခါဒါပနံ ဇီဝသူလာရောပနံ အသိနာပိ သီသစ္ဆေဒံ, ကေစိ ရတ္တိံ ပါပံ ကတွာ ရတ္တိံ ယေဝ ဝိပါကံ အနုဘဝန္တိ, ကေစိ ရတ္တိံ ကတွာ ဒိဝါ ယေဝ အနုဘဝန္တိ, ကေစိ ဒိဝါ ကတွာ ဒိဝါ ယေဝ အနုဘဝန္တိ, ကေစိ ဒိဝါ ကတွာ ရတ္တိံ ယေဝ အနုဘဝန္တိ, ကေစိ ဒွေ တယော ဒိဝသေ ဝီတိဝတ္တေ အနုဘဝန္တိ, သဗ္ဗေပိ တေ ဒိဋ္ဌေဝ ဓမ္မေ ဝိပါကံ အနုဘဝန္တိ။ အတ္ထိ ပန, ဘန္တေ နာဂသေန, ကောစိ ဧကဿ ဝါ ဒွိန္နံ ဝါ တိဏ္ဏံ ဝါ စတုန္နံ ဝါ ပဉ္စန္နံ ဝါ ဒသန္နံ ဝါ သတဿ ဝါ သဟဿဿ ဝါ သတသဟဿဿ ဝါ သပရိဝါရံ ဒါနံ ဒတွာ ဒိဋ္ဌဓမ္မိကံ ဘောဂံ ဝါ ယသံ ဝါ သုခံ ဝါ အနုဘဝိတာ သီလေန ဝါ ဥပေါသထကမ္မေန ဝါ’’တိ?

‘‘အတ္ထိ, မဟာရာဇ , စတ္တာရော ပုရိသာ ဒါနံ ဒတွာ သီလံ သမာဒိယိတွာ ဥပေါသထကမ္မံ ကတွာ ဒိဋ္ဌေဝ ဓမ္မေ တေနေဝ သရီရဒေဟေန တိဒသပုရေ သမနုပ္ပတ္တာ’’တိ [ယသမနုပတ္တာတိ (သီ။ ဣ။)]။ ‘‘ကော စ ကော စ ဘန္တေ’’တိ? ‘‘မန္ဓာတာ, မဟာရာဇ, ရာဇာ, နိမိ ရာဇာ, သာဓီနော ရာဇာ, ဂုတ္တိလော စ ဂန္ဓဗ္ဗော’’တိ။

‘‘ဘန္တေ နာဂသေန, အနေကေဟိ တံ ဘဝသဟဿေဟိ အန္တရိတံ, ဒွိန္နမ္ပေတံ အမှာကံ [ဒီပိတံ, အမှာကမ္ပေတံ (က။)] ပရောက္ခံ, ယဒိ သမတ္ထောသိ ဝတ္တမာနကေ ဘဝေ ဘဂဝတော ဓရမာနကာလေ ကထေဟီ’’တိ? ‘‘ဝတ္တမာနကေပိ, မဟာရာဇ, ဘဝေ ပုဏ္ဏကော ဒါသော ထေရဿ သာရိပုတ္တဿ ဘောဇနံ ဒတွာ တဒဟေဝ သေဋ္ဌိဋ္ဌာနံ အဇ္ဈုပဂတော, သော ဧတရဟိ ပုဏ္ဏကော သေဋ္ဌီတိ ပညာယိ, ဂေါပါလမာတာ ဒေဝီ အတ္တနော ကေသေ ဝိက္ကိဏိတွာ လဒ္ဓေဟိ အဋ္ဌဟိ ကဟာပဏေဟိ ထေရဿ မဟာကစ္စာယနဿ အတ္တဋ္ဌမကဿ ပိဏ္ဍပါတံ ဒတွာ တဒဟေဝ ရညော စန္ဒပဇ္ဇောတဿ [ဥဒေနဿ (သီ။ ဣ။)] အဂ္ဂမဟေသိဋ္ဌာနံ ပတ္တာ။ သုပ္ပိယာ ဥပါသိကာ အညတရဿ ဂိလာနဘိက္ခုနော အတ္တနော ဦရုမံသေန ပဋိစ္ဆာဒနီယံ ဒတွာ ဒုတိယဒိဝသေ ယေဝ ရူဠှဝဏာ သဉ္ဆဝီ [သစ္ဆဝီ (သီ။ ဣ။)] အရောဂါ ဇာတာ။ မလ္လိကာ ဒေဝီ ဘဂဝတော အာဘိဒေါသိကံ ကုမ္မာသပိဏ္ဍံ ဒတွာ တဒဟေဝ ရညော ကောသလဿ အဂ္ဂမဟေသီ ဇာတာ။ သုမနော မာလာကာရော အဋ္ဌဟိ သုမနပုပ္ဖမုဋ္ဌီဟိ ဘဂဝန္တံ ပူဇေတွာ တံ ဒိဝသံ ယေဝ မဟာသမ္ပတ္တိံ ပတ္တော။ ဧကသာဋကော ဗြာဟ္မဏော ဥတ္တရသာဋကေန ဘဂဝန္တံ ပူဇေတွာ တံ ဒိဝသံ ယေဝ သဗ္ဗဋ္ဌကံ လဘိ, သဗ္ဗေပေတေ, မဟာရာဇ, ဒိဋ္ဌဓမ္မိကံ ဘောဂဉ္စ ယသဉ္စ အနုဘဝိံသူ’’တိ။

‘‘ဘန္တေ နာဂသေန, ဝိစိနိတွာ ပရိယေသိတွာ ဆ ဇနေ ယေဝ အဒ္ဒသာသီ’’တိ။ ‘‘အာမ, မဟာရာဇာ’’တိ။ ‘‘တေန ဟိ, ဘန္တေ နာဂသေန, အကုသလံ ယေဝ အဓိမတ္တံ ဗလဝတရံ, နော တထာ ကုသလံ။ အဟဉှိ, ဘန္တေ နာဂသေန, ဧကဒိဝသံ ယေဝ ဒသပိ ပုရိသေ ပဿာမိ ပါပဿ ကမ္မဿ ဝိပါကေန သူလေသု အာရောပေန္တေ, ဝီသမ္ပိ တိံသမ္ပိ စတ္တာလီသမ္ပိ ပညာသမ္ပိ ပုရိသသတမ္ပိ ပုရိသသဟဿမ္ပိ ပဿာမိ ပါပဿ ကမ္မဿ ဝိပါကေန သူလေသု အာရောပေန္တေ။ နန္ဒကုလဿ, ဘန္တေ နာဂသေန, ဘဒ္ဒသာလော နာမ သေနာပတိပုတ္တော အဟောသိ။ တေန စ ရညာ စန္ဒဂုတ္တေန သင်္ဂါမော သမုပဗ္ယူဠ္ဟော အဟောသိ။ တသ္မိံ ခေါ ပန, ဘန္တေ နာဂသေန, သင်္ဂါမေ ဥဘတော ဗလကာယေ အသီတိကဗန္ဓရူပါနိ အဟေသုံ, ဧကသ္မိံ ကိရ သီသကဗန္ဓေ ပရိပါတေ [ပရိပုဏ္ဏေ (သဗ္ဗတ္ထ)] ဧကံ ကဗန္ဓရူပံ ဥဋ္ဌဟတိ, သဗ္ဗေပေတေ ပါပဿေဝ ကမ္မဿ ဝိပါကေန အနယဗျသနံ အာပန္နာ။ ဣမိနာပိ, ဘန္တေ နာဂသေန, ကာရဏေန ဘဏာမိ အကုသလံ ယေဝ အဓိမတ္တံ ဗလဝတရံ, နော တထာ ကုသလ’’န္တိ။

‘‘သုယျတိ, ဘန္တေ နာဂသေန, ဣမသ္မိံ ဗုဒ္ဓသာသနေ ကောသလေန ရညာ အသဒိသဒါနံ ဒိန္န’’န္တိ? ‘‘အာမ, မဟာရာဇ, သုယျတီ’’တိ။ ‘‘အပိ နု ခေါ, ဘန္တေ နာဂသေန, ကောသလရာဇာ တံ အသဒိသံ ဒါနံ ဒတွာ တတောနိဒါနံ ကဉ္စိ ဒိဋ္ဌဓမ္မိကံ ဘောဂံ ဝါ ယသံ ဝါ သုခံ ဝါ ပဋိလဘီ’’တိ [ပဋိလဘတီတိ (က။)]? ‘‘န ဟိ, မဟာရာဇာ’’တိ။ ‘‘ယဒိ, ဘန္တေ နာဂသေန, ကောသလရာဇာ ဧဝရူပံ အနုတ္တရံ ဒါနံ ဒတွာပိ န လဘိ [န လဘတိ (က။)] တတောနိဒါနံ ကဉ္စိ ဒိဋ္ဌဓမ္မိကံ ဘောဂံ ဝါ ယသံ ဝါ သုခံ ဝါ, တေန ဟိ, ဘန္တေ နာဂသေန, အကုသလံ ယေဝ အဓိမတ္တံ ဗလဝတရံ, နော တထာ ကုသလ’’န္တိ။

‘‘ပရိတ္တတ္တာ, မဟာရာဇ, အကုသလံ ခိပ္ပံ ပရိဏမတိ, ဝိပုလတ္တာ ကုသလံ ဒီဃေန ကာလေန ပရိဏမတိ, ဥပမာယပိ, မဟာရာဇ, ဧတံ ဥပပရိက္ခိတဗ္ဗံ။ ယထာ, မဟာရာဇ, အပရန္တေ ဇနပဒေ ကုမုဒဘဏ္ဍိကာ နာမ ဓညဇာတိ မာသလူနာ [မာသပူရာ (က။)] အန္တောဂေဟဂတာ ဟောတိ, သာလယော ဆပ္ပဉ္စမာသေဟိ ပရိဏမန္တိ , ကိံ ပနေတ္ထ, မဟာရာဇ, အန္တရံ ကော ဝိသေသော ကုမုဒဘဏ္ဍိကာယ စ သာလီနဉ္စာ’’တိ? ‘‘ပရိတ္တတ္တာ, ဘန္တေ, ကုမုဒဘဏ္ဍိကာယ, ဝိပုလတ္တာ စ သာလီနံ။ သာလယော, ဘန္တေ နာဂသေန, ရာဇာရဟာ ရာဇဘောဇနံ, ကုမုဒဘဏ္ဍိကာ ဒါသကမ္မကရာနံ ဘောဇန’’န္တိ။ ‘‘ဧဝမေဝ ခေါ, မဟာရာဇ, ပရိတ္တတ္တာ အကုသလံ ခိပ္ပံ ပရိဏမတိ, ဝိပုလတ္တာ ကုသလံ ဒီဃေန ကာလေန ပရိဏမတီ’’တိ။

‘‘ယံ တတ္ထ, ဘန္တေ နာဂသေန, ခိပ္ပံ ပရိဏမတိ, တံ နာမ လောကေ အဓိမတ္တံ ဗလဝတရံ, တသ္မာ အကုသလံ ဗလဝတရံ, နော တထာ ကုသလံ။ ယထာ နာမ, ဘန္တေ နာဂသေန, ယော ကောစိ ယောဓေါ မဟတိမဟာယုဒ္ဓံ ပဝိသိတွာ ပဋိသတ္တုံ ဥပကစ္ဆကေ ဂဟေတွာ အာကဍ္ဎိတွာ ခိပ္ပတရံ သာမိနော ဥပနေယျ, သော ယောဓေါ လောကေ သမတ္ထော သူရော နာမ။ ယော စ ဘိသက္ကော ခိပ္ပံ သလ္လံ ဥဒ္ဓရတိ ရောဂမပနေတိ, သော ဘိသက္ကော ဆေကော နာမ။ ယော ဂဏကော သီဃသီဃံ ဂဏေတွာ ခိပ္ပံ ဒဿယတိ, သော ဂဏကော ဆေကော နာမ။ ယော မလ္လော ခိပ္ပံ ပဋိမလ္လံ ဥက္ခိပိတွာ ဥတ္တာနကံ ပါတေတိ, သော မလ္လော သမတ္ထော သူရော နာမ။ ဧဝမေဝ ခေါ, ဘန္တေ နာဂသေန, ယံ ခိပ္ပံ ပရိဏမတိ ကုသလံ ဝါ အကုသလံ ဝါ, တံ လောကေ အဓိမတ္တံ ဗလဝတရ’’န္တိ။

‘‘ဥဘယမ္ပိ တံ, မဟာရာဇ, ကမ္မံ သမ္ပရာယဝေဒနီယမေဝ, အပိ စ ခေါ အကုသလံ သာဝဇ္ဇတာယ ခဏေန ဒိဋ္ဌဓမ္မဝေဒနီယံ ဟောတိ, ပုဗ္ဗကေဟိ, မဟာရာဇ, ခတ္တိယေဟိ ဌပိတော ဧသော နိယမော ‘ယော ပါဏံ ဟနတိ, သော ဒဏ္ဍာရဟော။ပေ။။ ယော အဒိန္နံ အာဒိယတိ။ပေ။။ ယော ပရဒါရံ ဂစ္ဆတိ။ပေ။။ ယော မုသာ ဘဏတိ။ပေ။။ ယော ဂါမံ ဃာတေတိ။ပေ။။ ယော ပန္ထံ ဒူသေတိ။ပေ။။ ယော နိကတိံ ကရောတိ။ပေ။။ ယော ဝဉ္စနံ ကရောတိ, သော ဒဏ္ဍာရဟော ဝဓိတဗ္ဗော ဆေတ္တဗ္ဗော ဘေတ္တဗ္ဗော ဟန္တဗ္ဗော’တိ။ တံ တေ ဥပါဒါယ ဝိစိနိတွာ ဝိစိနိတွာ ဒဏ္ဍေန္တိ ဝဓေန္တိ ဆိန္ဒန္တိ ဘိန္ဒန္တိ ဟနန္တိ စ, အပိ နု, မဟာရာဇ, အတ္ထိ ကေဟိစိ ဌပိတော နိယမော ‘ယော ဒါနံ ဝါ ဒေတိ, သီလံ ဝါ ရက္ခတိ, ဥပေါသထကမ္မံ ဝါ ကရောတိ, တဿ ဓနံ ဝါ ယသံ ဝါ ဒါတဗ္ဗ’န္တိ; အပိ နု တံ ဝိစိနိတွာ ဝိစိနိတွာ ဓနံ ဝါ ယသံ ဝါ ဒေန္တိ, စောရဿ ကတကမ္မဿ ဝဓဗန္ဓနံ ဝိယာ’’တိ? ‘‘န ဟိ, ဘန္တေ’’တိ။ ‘‘ယဒိ, မဟာရာဇ, ဒါယကာနံ ဝိစိနိတွာ ဝိစိနိတွာ ဓနံ ဝါ ယသံ ဝါ ဒဒေယျုံ, ကုသလမ္ပိ ဒိဋ္ဌဓမ္မဝေဒနီယံ ဘဝေယျ, ယသ္မာ စ ခေါ, မဟာရာဇ, ဒါယကေ န ဝိစိနန္တိ ‘ဓနံ ဝါ ယသံ ဝါ ဒဿာမာ’တိ, တသ္မာ ကုသလံ န ဒိဋ္ဌဓမ္မဝေဒနီယံ။ ဣမိနာ, မဟာရာဇ, ကာရဏေန အကုသလံ ဒိဋ္ဌဓမ္မဝေဒနီယံ, သမ္ပရာယေဝ သော အဓိမတ္တံ ဗလဝတရံ ဝေဒနံ ဝေဒယတီ’’တိ။ ‘‘သာဓု, ဘန္တေ နာဂသေန, တဝါဒိသေန ဗုဒ္ဓိမန္တေန ဝိနာ နေသော ပဉ္ဟော သုနိဗ္ဗေဌိယော, လောကိကံ, ဘန္တေ နာဂသေန, လောကုတ္တရေန ဝိညာပိတ’’န္တိ။

ကုသလာကုသလဗလဝတရပဉ္ဟော တတိယော။

၄။ ပုဗ္ဗပေတာဒိသပဉ္ဟော

၄။ ‘‘ဘန္တေ နာဂသေန, ဣမေ ဒါယကာ ဒါနံ ဒတွာ ပုဗ္ဗပေတာနံ အာဒိသန္တိ [ဥဒ္ဒိသန္တိ (က။ သီ။)] ‘ဣဒံ တေသံ ပါပုဏာတူ’တိ, အပိ နု တေ ကိဉ္စိ တတောနိဒါနံ ဝိပါကံ ပဋိလဘန္တီ’’တိ? ‘‘ကေစိ, မဟာရာဇ, ပဋိလဘန္တိ, ကေစိ နပ္ပဋိလဘန္တီ’’တိ။ ‘‘ကေ, ဘန္တေ, ပဋိလဘန္တိ, ကေ နပ္ပဋိလဘန္တီ’’တိ? ‘‘နိရယူပပန္နာ, မဟာရာဇ, နပ္ပဋိလဘန္တိ, သဂ္ဂဂတာ နပ္ပဋိလဘန္တိ, တိရစ္ဆာနယောနိဂတာ နပ္ပဋိလဘန္တိ, စတုန္နံ ပေတာနံ တယော ပေတာ နပ္ပဋိလဘန္တိ ဝန္တာသိကာ ခုပ္ပိပါသိနော နိဇ္ဈာမတဏှိကာ, လဘန္တိ ပေတာ ပရဒတ္တူပဇီဝိနော, တေပိ သရမာနာ ယေဝ လဘန္တီ’’တိ။

‘‘တေန ဟိ, ဘန္တေ နာဂသေန, ဒါယကာနံ ဒါနံ ဝိသောသိတံ [ဝိသောတံ (သီ။ ဣ။)] ဟောတိ အဖလံ, ယေသံ ဥဒ္ဒိဿ ကတံ ယဒိ တေ နပ္ပဋိလဘန္တီ’’တိ? ‘‘န ဟိ တံ, မဟာရာဇ, ဒါနံ အဖလံ ဟောတိ အဝိပါကံ, ဒါယကာ ယေဝ တဿ ဖလံ အနုဘဝန္တီ’’တိ။ ‘‘တေန ဟိ, ဘန္တေ နာဂသေန, ကာရဏေန မံ သညာပေဟီ’’တိ။ ‘‘ဣဓ, မဟာရာဇ, ကေစိ မနုဿာ မစ္ဆမံသသုရာဘတ္တခဇ္ဇကာနိ ပဋိယာဒေတွာ ဉာတိကုလံ ဂစ္ဆန္တိ, ယဒိ တေ ဉာတကာ တံ ဥပါယနံ န သမ္ပဋိစ္ဆေယျုံ, အပိ နု တံ ဥပါယနံ ဝိသောသိတံ ဂစ္ဆေယျ ဝိနဿေယျ ဝါ’’တိ? ‘‘န ဟိ, ဘန္တေ, သာမိကာနံ ယေဝ တံ ဟောတီ’’တိ။ ‘‘ဧဝမေဝ ခေါ, မဟာရာဇ, ဒါယကာ ယေဝ တဿ ဖလံ အနုဘဝန္တိ။ ယထာ ပန , မဟာရာဇ, ပုရိသော ဂဗ္ဘံ ပဝိဋ္ဌော အသတိ ပုရတော နိက္ခမနမုခေ ကေန နိက္ခမေယျာ’’တိ။ ‘‘ပဝိဋ္ဌေနေဝ ဘန္တေ’’တိ။ ‘‘ဧဝမေဝ ခေါ, မဟာရာဇ, ဒါယကာ ယေဝ တဿ ဖလံ အနုဘဝန္တီ’’တိ။ ‘‘ဟောတု, ဘန္တေ နာဂသေန, ဧဝမေတံ တထာ သမ္ပဋိစ္ဆာမိ, ဒါယကာ ယေဝ တဿ ဖလံ အနုဘဝန္တိ, န မယံ တံ ကာရဏံ ဝိလောမေမာတိ။

‘‘ဘန္တေ နာဂသေန, ယဒိ ဣမေသံ ဒါယကာနံ ဒိန္နဒါနံ ပုဗ္ဗပေတာနံ ပါပုဏာတိ, တေ စ တဿ ဝိပါကံ အနုဘဝန္တိ။ တေန ဟိ ယော ပါဏာတိပါတီ လုဒ္ဒေါ လောဟိတပါဏီ ပဒုဋ္ဌမနသင်္ကပ္ပော မနုဿေ ဃာတေတွာ ဒါရုဏံ ကမ္မံ ကတွာ ပုဗ္ဗပေတာနံ အာဒိသေယျ ‘ဣမဿ မေ ကမ္မဿ ဝိပါကော ပုဗ္ဗပေတာနံ ပါပုဏာတူ’တိ, အပိ နု တဿ ဝိပါကော ပုဗ္ဗပေတာနံ ပါပုဏာတီ’’တိ? ‘‘န ဟိ, မဟာရာဇာ’’တိ။

‘‘ဘန္တေ နာဂသေန, ကော တတ္ထ ဟေတု ကိံ ကာရဏံ, ယေန ကုသလံ ပါပုဏာတိ အကုသလံ န ပါပုဏာတီ’’တိ? ‘‘နေသော, မဟာရာဇ, ပဉ္ဟော ပုစ္ဆိတဗ္ဗော, မာ စ တွံ, မဟာရာဇ, ‘ဝိသဇ္ဇကော အတ္ထီ’တိ အပုစ္ဆိတဗ္ဗံ ပုစ္ဆိ, ‘ကိဿ အာကာသော နိရာလမ္ဗော, ကိဿ ဂင်္ဂါ ဥဒ္ဓမ္မုခါ န သန္ဒတိ, ကိဿ ဣမေ မနုဿာ စ ဒိဇာ စ ဒွိပဒါ မိဂါ စတုပ္ပဒါ’တိ တမ္ပိ မံ တွံ ပုစ္ဆိဿသီ’’တိ။ ‘‘နာဟံ တံ, ဘန္တေ နာဂသေန, ဝိဟေသာပေက္ခော ပုစ္ဆာမိ, အပိ စ နိဗ္ဗာဟနတ္ထာယ [နိဗ္ဗာနတ္ထာယ (က။)] သန္ဒေဟဿ ပုစ္ဆာမိ, ဗဟူ မနုဿာ လောကေ ဝါမဂါမိနော [ပါပဂါဟိနော (သျာ။)] ဝိစက္ခုကာ, ‘ကိန္တိ တေ ဩတာရံ န လဘေယျု’န္တိ ဧဝါဟံ တံ ပုစ္ဆာမီ’’တိ။ ‘‘န သက္ကာ, မဟာရာဇ, သဟ အကတေန အနနုမတေန သဟ ပါပံ ကမ္မံ သံဝိဘဇိတုံ။

‘‘ယထာ, မဟာရာဇ, မနုဿာ ဥဒကနိဗ္ဗာဟနေန ဥဒကံ သုဝိဒူရမ္ပိ ဟရန္တိ, အပိ နု, မဟာရာဇ, သက္ကာ ဃနမဟာသေလပဗ္ဗတော [ပဗ္ဗတတော (က။)] နိဗ္ဗာဟနေန ယထိစ္ဆိတံ ဟရိတု’’န္တိ? ‘‘န ဟိ, ဘန္တေ’’တိ။ ‘‘ဧဝမေဝ ခေါ, မဟာရာဇ, သက္ကာ ကုသလံ သံဝိဘဇိတုံ, န သက္ကာ အကုသလံ သံဝိဘဇိတုံ။ ယထာ ဝါ ပန, မဟာရာဇ, သက္ကာ တေလေန ပဒီပေါ ဇာလေတုံ, အပိ နု, မဟာရာဇ, သက္ကာ ဥဒကေန ပဒီပေါ ဇာလေတု’’န္တိ? ‘‘န ဟိ, ဘန္တေ’’တိ။ ‘‘ဧဝမေဝ ခေါ, မဟာရာဇ, သက္ကာ ကုသလံ သံဝိဘဇိတုံ, န သက္ကာ အကုသလံ သံဝိဘဇိတုံ။ ယထာ ဝါ ပန, မဟာရာဇ, ကဿကာ တဠာကတော ဥဒကံ နီဟရိတွာ ဓညံ ပရိပါစေန္တိ, အပိ နု ခေါ, မဟာရာဇ, သက္ကာ မဟာသမုဒ္ဒတော ဥဒကံ နီဟရိတွာ ဓညံ ပရိပါစေတု’’န္တိ? ‘‘န ဟိ, ဘန္တေ’’တိ။ ‘‘ဧဝမေဝ ခေါ, မဟာရာဇ, သက္ကာ ကုသလံ သံဝိဘဇိတုံ, န သက္ကာ အကုသလံ သံဝိဘဇိတု’’န္တိ။

‘‘ဘန္တေ နာဂသေန, ကေန ကာရဏေန သက္ကာ ကုသလံ သံဝိဘဇိတုံ, န သက္ကာ အကုသလံ သံဝိဘဇိတုံ။ ကာရဏေန မံ သညာပေဟိ, နာဟံ အန္ဓော အနာလောကော သုတွာ ဝေဒိဿာမီ’’တိ။ ‘‘အကုသလံ, မဟာရာဇ, ထောကံ, ကုသလံ ဗဟုကံ, ထောကတ္တာ အကုသလံ ကတ္တာရံ ယေဝ ပရိယာဒိယတိ, ဗဟုကတ္တာ ကုသလံ သဒေဝကံ လောကံ အဇ္ဈောတ္ထရတီ’’တိ။ ‘‘ဩပမ္မံ ကရောဟီ’’တိ။

‘‘ယထာ, မဟာရာဇ, ပရိတ္တံ ဧကံ ဥဒကဗိန္ဒု ပထဝိယံ နိပတေယျ, အပိ နု ခေါ တံ, မဟာရာဇ, ဥဒကဗိန္ဒု ဒသပိ ဒွါဒသပိ ယောဇနာနိ အဇ္ဈောတ္ထရေယျာ’’တိ? ‘‘န ဟိ, ဘန္တေ, ယတ္ထ တံ ဥဒကဗိန္ဒု နိပတိတံ, တတ္ထေဝ ပရိယာဒိယတီ’’တိ။ ‘‘ကေန ကာရဏေန, မဟာရာဇာ’’တိ? ‘‘ပရိတ္တတ္တာ, ဘန္တေ, ဥဒကဗိန္ဒုဿာ’’တိ။ ‘‘ဧဝမေဝ ခေါ, မဟာရာဇ, ပရိတ္တံ အကုသလံ ပရိတ္တတ္တာ ကတ္တာရံ ယေဝ ပရိယာဒိယတိ, န သက္ကာ သံဝိဘဇိတုံ။

‘‘ယထာ ဝါ ပန, မဟာရာဇ, မဟတိမဟာမေဃော အဘိဝဿေယျ တပ္ပယန္တော ဓရဏိတလံ, အပိ နု ခေါ သော, မဟာရာဇ, မဟာမေဃော သမန္တတော ဩတ္ထရေယျာ’’တိ။ ‘‘အာမ, ဘန္တေ, ပူရယိတွာ သော မဟာမေဃော သောဗ္ဘသရ သရိတသာခါကန္ဒရပဒရဒဟတဠာက [မာတိကာတဠာက (က။)] ဥဒပါနပေါက္ခရဏိယော ဒသပိ ဒွါဒသပိ ယောဇနာနိ အဇ္ဈောတ္ထရေယျာ’’တိ။ ‘‘ကေန ကာရဏေန, မဟာရာဇာ’’တိ? ‘‘မဟန္တတ္တာ, ဘန္တေ, မေဃဿာ’’တိ။ ‘‘ဧဝမေဝ ခေါ, မဟာရာဇ, ကုသလံ ဗဟုကံ, ဗဟုကတ္တာ သက္ကာ ဒေဝမနုဿေဟိပိ သံဝိဘဇိတု’’န္တိ။

‘‘ဘန္တေ နာဂသေန, ကေန ကာရဏေန အကုသလံ ထောကံ ကုသလံ ဗဟုတရ’’န္တိ? ‘‘ဣဓ, မဟာရာဇ, ယော ကောစိ ဒါနံ ဒေတိ, သီလံ သမာဒိယတိ, ဥပေါသထကမ္မံ ကရောတိ, သော ဟဋ္ဌော ပဟဋ္ဌော ဟသိတော ပမုဒိတော ပသန္နမာနသော ဝေဒဇာတော ဟောတိ, တဿ အပရာပရံ ဣတိ ဥပ္ပဇ္ဇတိ, ဣတိမနဿ ဘိယျော ဘိယျော ကုသလံ ပဝဍ္ဎတိ။

‘‘ယထာ, မဟာရာဇ, ဥဒပါနေ ဗဟုသလိလသမ္ပုဏ္ဏေ ဧကေန ဒေသေန ဥဒကံ ပဝိသေယျ, ဧကေန နိက္ခမေယျ, နိက္ခမန္တေပိ အပရာပရံ ဥပ္ပဇ္ဇတိ, န သက္ကာ ဟောတိ ခယံ ပါပေတုံ။ ဧဝမေဝ ခေါ , မဟာရာဇ, ကုသလံ ဘိယျော ဘိယျော ပဝဍ္ဎတိ။ ဝဿသတေပိ စေ, မဟာရာဇ, ပုရိသော ကတံ ကုသလံ အာဝဇ္ဇေယျ, အာဝဇ္ဇိတေ အာဝဇ္ဇိတေ ဘိယျော ဘိယျော ကုသလံ ပဝဍ္ဎတိ။ တဿ တံ ကုသလံ သက္ကာ ဟောတိ ယထိစ္ဆကေဟိ သဒ္ဓိံ သံဝိဘဇိတုံ, ဣဒမေတ္ထ, မဟာရာဇ, ကာရဏံ, ယေန ကာရဏေန ကုသလံ ဗဟုတရံ။

‘‘အကုသလံ ပန, မဟာရာဇ, ကရောန္တော ပစ္ဆာ ဝိပ္ပဋိသာရီ ဟောတိ, ဝိပ္ပဋိသာရိနော စိတ္တံ ပဋိလီယတိ ပဋိကုဋတိ ပဋိဝတ္တတိ န သမ္ပသာရီယတိ သောစတိ တပ္ပတိ ဟာယတိ ခီယတိ န ပရိဝဍ္ဎတိ တတ္ထေဝ ပရိယာဒိယတိ။ ယထာ, မဟာရာဇ, သုက္ခာယ နဒိယာ မဟာပုဠိနာယ ဥန္နတာဝနတာယ ကုဋိလသင္ကုဋိလာယ ဥပရိတော ပရိတ္တံ ဥဒကံ အာဂစ္ဆန္တံ ဟာယတိ ခီယတိ န ပရိဝဍ္ဎတိ တတ္ထေဝ ပရိယာဒိယတိ။ ဧဝမေဝ ခေါ, မဟာရာဇ, အကုသလံ ကရောန္တဿ စိတ္တံ ပဋိလီယတိ ပဋိကုဋတိ ပဋိဝတ္တတိ န သမ္ပသာရီယတိ သောစတိ တပ္ပတိ ဟာယတိ ခီယတိ န ပရိဝဍ္ဎတိ တတ္ထေဝ ပရိယာဒိယတိ, ဣဒမေတ္ထ, မဟာရာဇ, ကာရဏံ, ယေန ကာရဏေန အကုသလံ ထောက’’န္တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ပုဗ္ဗပေတာဒိသပဉ္ဟော စတုတ္ထော။

၅။ သုပိနပဉ္ဟော

၅။ ‘‘ဘန္တေ နာဂသေန, ဣမသ္မိံ လောကေ နရနာရိယော သုပိနံ ပဿန္တိ ကလျာဏမ္ပိ ပါပကမ္ပိ, ဒိဋ္ဌပုဗ္ဗမ္ပိ အဒိဋ္ဌပုဗ္ဗမ္ပိ, ကတပုဗ္ဗမ္ပိ အကတပုဗ္ဗမ္ပိ, ခေမမ္ပိ သဘယမ္ပိ, ဒူရေပိ သန္တိကေပိ, ဗဟုဝိဓါနိပိ အနေကဝဏ္ဏသဟဿာနိ ဒိဿန္တိ, ကိဉ္စေတံ သုပိနံ နာမ, ကော စေတံ ပဿတီ’’တိ? ‘‘နိမိတ္တမေတံ, မဟာရာဇ, သုပိနံ နာမ, ယံ စိတ္တဿ အာပါတ [အာပါထ (သီ။ ဣ။)] မုပဂစ္ဆတိ။ ဆယိမေ, မဟာရာဇ, သုပိနံ ပဿန္တိ, ဝါတိကော သုပိနံ ပဿတိ, ပိတ္တိကော သုပိနံ ပဿတိ, သေမှိကော သုပိနံ ပဿတိ, ဒေဝတူပသံဟာရတော သုပိနံ ပဿတိ, သမုဒါစိဏ္ဏတော သုပိနံ ပဿတိ, ပုဗ္ဗနိမိတ္တတော သုပိနံ ပဿတိ, တတြ, မဟာရာဇ, ယံ ပုဗ္ဗနိမိတ္တတော သုပိနံ ပဿတိ, တံ ယေဝ သစ္စံ, အဝသေသံ မိစ္ဆာ’’တိ။

‘‘ဘန္တေ နာဂသေန, ယော ပုဗ္ဗနိမိတ္တတော သုပိနံ ပဿတိ, ကိံ တဿ စိတ္တံ သယံ ဂန္တွာ တံ နိမိတ္တံ ဝိစိနာတိ, တံ ဝါ နိမိတ္တံ စိတ္တဿ အာပါတမုပဂစ္ဆတိ, အညော ဝါ အာဂန္တွာ တဿ အာရောစေတီ’’တိ? ‘‘န, မဟာရာဇ, တဿ စိတ္တံ သယံ ဂန္တွာ တံ နိမိတ္တံ ဝိစိနာတိ, နာပိ အညော ကောစိ အာဂန္တွာ တဿ အာရောစေတိ, အထ ခေါ တံ ယေဝ နိမိတ္တံ စိတ္တဿ အာပါတမုပဂစ္ဆတိ။ ယထာ, မဟာရာဇ, အာဒါသော န သယံ ကုဟိဉ္စိ ဂန္တွာ ဆာယံ ဝိစိနာတိ, နာပိ အညော ကောစိ ဆာယံ အာနေတွာ အာဒါသံ အာရောပေတိ [အာရောစေတိ (က။)], အထ ခေါ ယတော ကုတောစိ ဆာယာ အာဂန္တွာ အာဒါသဿ အာပါတမုပဂစ္ဆတိ, ဧဝမေဝ ခေါ, မဟာရာဇ, န တဿ စိတ္တံ သယံ ဂန္တွာ တံ နိမိတ္တံ ဝိစိနာတိ, နာပိ အညော ကောစိ အာဂန္တွာ အာရောစေတိ, အထ ခေါ ယတော ကုတောစိ နိမိတ္တံ အာဂန္တွာ စိတ္တဿ အာပါတမုပဂစ္ဆတီ’’တိ။

‘‘ဘန္တေ နာဂသေန, ယံ တံ စိတ္တံ သုပိနံ ပဿတိ, အပိ နု တံ စိတ္တံ ဇာနာတိ ‘ဧဝံ နာမ ဝိပါကော ဘဝိဿတိ ခေမံ ဝါ ဘယံ ဝါ’တိ? ‘‘န ဟိ, မဟာရာဇ, တံ စိတ္တံ ဇာနာတိ ‘ဧဝံဝိပါကော ဘဝိဿတိ ခေမံ ဝါ ဘယံ ဝါ’တိ, နိမိတ္တေ ပန ဥပ္ပန္နေ အညေသံ ကထေတိ, တတော တေ အတ္ထံ ကထေန္တီ’’တိ။

‘‘ဣင်္ဃ, ဘန္တေ နာဂသေန, ကာရဏံ မေ ဒဿေဟီ’’တိ။ ‘‘ယထာ, မဟာရာဇ, သရီရေ တိလကာ ဣဠကာ ဒဒ္ဒူနိ ဥဋ္ဌဟန္တိ လာဘာယ ဝါ အလာဘာယ ဝါ, ယသာယ ဝါ အယသာယ ဝါ, နိန္ဒာယ ဝါ ပသံသာယ ဝါ, သုခါယ ဝါ ဒုက္ခာယ ဝါ, အပိ နု တာ, မဟာရာဇ, ဣဠကာ ဇာနိတွာ ဥပ္ပဇ္ဇန္တိ ‘ဣမံ နာမ မယံ အတ္ထံ နိပ္ဖာဒေဿာမာ’’’တိ? ‘‘န ဟိ, ဘန္တေ, ယာဒိသေ တာ ဩကာသေ ဣဠကာ သမ္ဘဝန္တိ, တတ္ထ တာ ဣဠကာ ဒိသွာ နေမိတ္တကာ ဗျာကရောန္တိ ‘ဧဝံ နာမ ဝိပါကော ဘဝိဿတီ’’’တိ။ ‘‘ဧဝမေဝ ခေါ, မဟာရာဇ, ယံ တံ စိတ္တံ သုပိနံ ပဿတိ, န တံ စိတ္တံ ဇာနာတိ ‘ဧဝံ နာမ ဝိပါကော ဘဝိဿတိ ခေမံ ဝါ ဘယံ ဝါ’တိ, နိမိတ္တေ ပန ဥပ္ပန္နေ အညေသံ ကထေတိ, တတော တေ အတ္ထံ ကထေန္တီ’’တိ။

‘‘ဘန္တေ နာဂသေန, ယော သုပိနံ ပဿတိ, သော နိဒ္ဒါယန္တော, ဥဒါဟု ဇာဂရန္တော [ဇဂ္ဂန္တော (သီ။ ဣ။)] ပဿတီ’’တိ? ‘‘ယော သော, မဟာရာဇ, သုပိနံ ပဿတိ, န သော နိဒ္ဒါယန္တော ပဿတိ, နာပိ ဇာဂရန္တော ပဿတိ။ အပိ စ ဩက္ကန္တေ မိဒ္ဓေ အသမ္ပတ္တေ ဘဝင်္ဂေ ဧတ္ထန္တရေ သုပိနံ ပဿတိ။ မိဒ္ဓသမာရူဠှဿ, မဟာရာဇ, စိတ္တံ ဘဝင်္ဂဂတံ ဟောတိ, ဘဝင်္ဂဂတံ စိတ္တံ နပ္ပဝတ္တတိ, အပ္ပဝတ္တံ စိတ္တံ သုခဒုက္ခံ နပ္ပဇာနာတိ, အပ္ပဋိဝိဇာနန္တဿ သုပိနော န ဟောတိ, ပဝတ္တမာနေ စိတ္တေ သုပိနံ ပဿတိ။

‘‘ယထာ, မဟာရာဇ, တိမိရေ အန္ဓကာရေ အပ္ပဘာသေ သုပရိသုဒ္ဓေပိ အာဒါသေ ဆာယာ န ဒိဿတိ , ဧဝမေဝ ခေါ, မဟာရာဇ, မိဒ္ဓသမာရူဠ္ဟေ စိတ္တေ ဘဝင်္ဂဂတေ တိဋ္ဌမာနေပိ သရီရေ စိတ္တံ အပ္ပဝတ္တံ ဟောတိ, အပ္ပဝတ္တေ စိတ္တေ သုပိနံ န ပဿတိ ။ ယထာ, မဟာရာဇ, အာဒါသော, ဧဝံ သရီရံ ဒဋ္ဌဗ္ဗံ; ယထာ အန္ဓကာရော, ဧဝံ မိဒ္ဓံ ဒဋ္ဌဗ္ဗံ; ယထာ အာလောကော, ဧဝံ စိတ္တံ ဒဋ္ဌဗ္ဗံ။

‘‘ယထာ ဝါ ပန, မဟာရာဇ, မဟိကောတ္ထဋဿ သူရိယဿ ပဘာ န ဒိဿတိ သန္တာ ယေဝ သူရိယရသ္မိ အပ္ပဝတ္တာ ဟောတိ, အပ္ပဝတ္တာယ သူရိယရသ္မိယာ အာလောကော န ဟောတိ, ဧဝမေဝ ခေါ, မဟာရာဇ, မိဒ္ဓသမာရူဠှဿ စိတ္တံ ဘဝင်္ဂဂတံ ဟောတိ, ဘဝင်္ဂဂတံ စိတ္တံ နပ္ပဝတ္တတိ, အပ္ပဝတ္တေ စိတ္တေ သုပိနံ န ပဿတိ။ ယထာ, မဟာရာဇ, သူရိယော, ဧဝံ သရီရံ ဒဋ္ဌဗ္ဗံ; ယထာ မဟိကောတ္ထရဏံ, ဧဝံ မိဒ္ဓံ ဒဋ္ဌဗ္ဗံ; ယထာ သူရိယရသ္မိ, ဧဝံ စိတ္တံ ဒဋ္ဌဗ္ဗံ။

‘‘ဒွိန္နံ, မဟာရာဇ, သန္တေပိ သရီရေ စိတ္တံ အပ္ပဝတ္တံ ဟောတိ, မိဒ္ဓသမာရူဠှဿ ဘဝင်္ဂဂတဿ သန္တေပိ သရီရေ စိတ္တံ အပ္ပဝတ္တံ ဟောတိ, နိရောဓသမာပန္နဿ သန္တေပိ သရီရေ စိတ္တံ အပ္ပဝတ္တံ ဟောတိ, ဇာဂရန္တဿ, မဟာရာဇ, စိတ္တံ လောလံ ဟောတိ ဝိဝဋံ ပါကဋံ အနိဗဒ္ဓံ, ဧဝရူပဿ စိတ္တေ နိမိတ္တံ အာပါတံ န ဥပေတိ။ ယထာ, မဟာရာဇ, ပုရိသံ ဝိဝဋံ ပါကဋံ အကိရိယံ အရဟဿံ ရဟဿကာမာ ပရိဝဇ္ဇေန္တိ, ဧဝမေဝ ခေါ, မဟာရာဇ, ဇာဂရန္တဿ ဒိဗ္ဗော အတ္ထော အာပါတံ န ဥပေတိ, တသ္မာ ဇာဂရန္တော သုပိနံ န ပဿတိ။ ယထာ ဝါ ပန, မဟာရာဇ, ဘိက္ခုံ ဘိန္နာဇီဝံ အနာစာရံ ပါပမိတ္တံ ဒုဿီလံ ကုသီတံ ဟီနဝီရိယံ ကုသလာ ဗောဓိပက္ခိယာ ဓမ္မာ အာပါတံ န ဥပေန္တိ, ဧဝမေဝ ခေါ, မဟာရာဇ, ဇာဂရန္တဿ ဒိဗ္ဗော အတ္ထော အာပါတံ န ဥပေတိ, တသ္မာ ဇာဂရန္တော သုပိနံ န ပဿတီ’’တိ။

‘‘ဘန္တေ နာဂသေန, အတ္ထိ မိဒ္ဓဿ အာဒိမဇ္ဈပရိယောသာန’’န္တိ? ‘‘အာမ, မဟာရာဇ, အတ္ထိ မိဒ္ဓဿ အာဒိမဇ္ဈပရိယောသာန’’န္တိ။ ‘‘ကတမံ အာဒိ, ကတမံ မဇ္ဈံ, ကတမံ ပရိယောသာန’’န္တိ? ‘‘ယော, မဟာရာဇ, ကာယဿ ဩနာဟော ပရိယောနာဟော ဒုဗ္ဗလ္ယံ မန္ဒတာ အကမ္မညတာ ကာယဿ, အယံ မိဒ္ဓဿ အာဒိ; ယော, မဟာရာဇ, ကပိနိဒ္ဒါပရေတော ဝေါကိဏ္ဏကံ ဇဂ္ဂတိ [ဝေါကိဏ္ဏတံ ဂစ္ဆတိ (နိသ္ယ)], ဣဒံ မိဒ္ဓဿ မဇ္ဈံ; ဘဝင်္ဂဂတိ ပရိယောသနံ။ မဇ္ဈူပဂတော, မဟာရာဇ, ကပိနိဒ္ဒါပရေတော သုပိနံ ပဿတိ။ ယထာ, မဟာရာဇ, ကောစိ ယတစာရီ သမာဟိတစိတ္တော ဌိတဓမ္မော အစလဗုဒ္ဓိ ပဟီနကောတူဟလသဒ္ဒံ ဝနမဇ္ဈောဂါဟိတွာ သုခုမံ အတ္ထံ စိန္တယတိ, န စ သော တတ္ထ မိဒ္ဓံ ဩက္ကမတိ, သော တတ္ထ သမာဟိတော ဧကဂ္ဂစိတ္တော သုခုမံ အတ္ထံ ပဋိဝိဇ္ဈတိ, ဧဝမေဝ ခေါ, မဟာရာဇ, ဇာဂရော န မိဒ္ဓသမာပန္နော , မဇ္ဈူပဂတော ကပိနိဒ္ဒါပရေတော သုပိနံ ပဿတိ။ ယထာ, မဟာရာဇ, ကောတူဟလသဒ္ဒေါ, ဧဝံ ဇာဂရံ ဒဋ္ဌဗ္ဗံ; ယထာ ဝိဝိတ္တံ ဝနံ, ဧဝံ ကပိနိဒ္ဒါပရေတော ဒဋ္ဌဗ္ဗော ; ယထာ သော ကောတူဟလသဒ္ဒံ ဩဟာယ မိဒ္ဓံ ဝိဝဇ္ဇေတွာ မဇ္ဈတ္တဘူတော သုခုမံ အတ္ထံ ပဋိဝိဇ္ဈတိ, ဧဝံ ဇာဂရော န မိဒ္ဓသမာပန္နော ကပိနိဒ္ဒါပရေတော သုပိနံ ပဿတီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

သုပိနပဉ္ဟော ပဉ္စမော။

၆။ အကာလမရဏပဉ္ဟော

၆။ ‘‘ဘန္တေ နာဂသေန, ယေ တေ သတ္တာ မရန္တိ, သဗ္ဗေ တေ ကာလေ ယေဝ မရန္တိ, ဥဒါဟု အကာလေပိ မရန္တီ’’တိ? ‘‘အတ္ထိ, မဟာရာဇ, ကာလေပိ မရဏံ, အတ္ထိ အကာလေပိ မရဏ’’န္တိ။

‘‘ဘန္တေ နာဂသေန, ကေ ကာလေ မရန္တိ, ကေ အကာလေ မရန္တီ’’တိ? ‘‘ဒိဋ္ဌပုဗ္ဗာ ပန, မဟာရာဇ, တယာ အမ္ဗရုက္ခာ ဝါ ဇမ္ဗုရုက္ခာ ဝါ, အညသ္မာ ဝါ ပန ဖလရုက္ခာ ဖလာနိ ပတန္တာနိ အာမာနိ စ ပက္ကာနိ စာ’’တိ? ‘‘အာမ, ဘန္တေ’’တိ။ ‘‘ယာနိ တာနိ, မဟာရာဇ, ဖလာနိ ရုက္ခတော ပတန္တိ, သဗ္ဗာနိ တာနိ ကာလေ ယေဝ ပတန္တိ, ဥဒါဟု အကာလေဣ’’တိ? ‘‘ယာနိ တာနိ, ဘန္တေ နာဂသေန, ဖလာနိ ပရိပက္ကာနိ ဝိလီနာနိ ပတန္တိ, သဗ္ဗာနိ တာနိ ကာလေ ပတန္တိ။ ယာနိ ပန တာနိ အဝသေသာနိ ဖလာနိ တေသု ကာနိစိ ကိမိဝိဒ္ဓါနိ ပတန္တိ, ကာနိစိ လဂုဠဟတာနိ [သကုဏပဟတာ (သျာ။), လကုဋဟတာနိ (သီ။ ဣ။ က။)] ပတန္တိ, ကာနိစိ ဝါတပ္ပဟတာနိ ပတန္တိ, ကာနိစိ အန္တောပူတိကာနိ ဟုတွာ ပတန္တိ, သဗ္ဗာနိ တာနိ အကာလေ ပတန္တီ’’တိ။ ‘‘ဧဝမေဝ ခေါ, မဟာရာဇ, ယေ တေ ဇရာဝေဂဟတာ မရန္တိ, တေ ယေဝ ကာလေ မရန္တိ, အဝသေသာ ကေစိ ကမ္မပ္ပဋိဗာဠှာ မရန္တိ, ကေစိ ဂတိပ္ပဋိဗာဠှာ မရန္တိ, ကေစိ ကိရိယပ္ပဋိဗာဠှာ မရန္တီ’’တိ။

‘‘ဘန္တေ နာဂသေန, ယေ တေ ကမ္မပ္ပဋိဗာဠှာ မရန္တိ, ယေပိ တေ ဂတိပ္ပဋိဗာဠှာ မရန္တိ, ယေပိ တေ ကိရိယပ္ပဋိဗာဠှာ မရန္တိ, ယေပိ တေ ဇရာဝေဂပ္ပဋိဗာဠှာ မရန္တိ, သဗ္ဗေ တေ ကာလေ ယေဝ မရန္တိ, ယောပိ မာတုကုစ္ဆိဂတော မရတိ, သော တဿ ကာလော, ကာလေ ယေဝ သော မရတိ။ ယောပိ ဝိဇာတဃရေ မရတိ, သော တဿ ကာလော , သောပိ ကာလေ ယေဝ မရတိ။ ယောပိ မာသိကော မရတိ။ပေ။။ ယောပိ ဝဿသတိကော မရတိ, သော တဿ ကာလော, ကာလေ ယေဝ သော မရတိ, တေန ဟိ, ဘန္တေ နာဂသေန, အကာလေ မရဏံ နာမ န ဟောတိ, ယေ ကေစိ မရန္တိ, သဗ္ဗေ တေ ကာလေ ယေဝ မရန္တီ’’တိ။

‘‘သတ္တိမေ , မဟာရာဇ, ဝိဇ္ဇမာနေပိ ဥတ္တရိံ အာယုသ္မိံ အကာလေ မရန္တိ။ ကတမေ သတ္တ? ဇိဃစ္ဆိတော, မဟာရာဇ, ဘောဇနံ အလဘမာနော ဥပဟတဗ္ဘန္တရော ဝိဇ္ဇမာနေပိ ဥတ္တရိံ အာယုသ္မိံ အကာလေ မရတိ, ပိပါသိတော, မဟာရာဇ, ပါနီယံ အလဘမာနော ပရိသုက္ခဟဒယော ဝိဇ္ဇမာနေပိ ဥတ္တရိံ အာယုသ္မိံ အကာလေ မရတိ, အဟိနာ ဒဋ္ဌော, မဟာရာဇ, ဝိသဝေဂါဘိဟတော တိကိစ္ဆကံ အလဘမာနော ဝိဇ္ဇမာနေပိ ဥတ္တရိံ အာယုသ္မိံ အကာလေ မရတိ, ဝိသမာသိတော, မဟာရာဇ, ဍယှန္တေသု အင်္ဂပစ္စင်္ဂေသု အဂဒံ အလဘမာနော ဝိဇ္ဇမာနေပိ ဥတ္တရိံ အာယုသ္မိံ အကာလေ မရတိ, အဂ္ဂိဂတော, မဟာရာဇ, ဈာယမာနော နိဗ္ဗာပနံ အလဘမာနော ဝိဇ္ဇမာနေပိ ဥတ္တရိံ အာယုသ္မိံ အကာလေ မရတိ, ဥဒကဂတော, မဟာရာဇ, ပတိဋ္ဌံ အလဘမာနော ဝိဇ္ဇမာနေပိ ဥတ္တရိံ အာယုသ္မိံ အကာလေ မရတိ, သတ္တိဟတော, မဟာရာဇ, အာဗာဓိကော ဘိသက္ကံ အလဘမာနော ဝိဇ္ဇမာနေပိ ဥတ္တရိံ အာယုသ္မိံ အကာလေ မရတိ, ဣမေ ခေါ, မဟာရာဇ, သတ္တ ဝိဇ္ဇမာနေပိ ဥတ္တရိံ အာယုသ္မိံ အကာလေ မရန္တိ။ တတြာပါဟံ, မဟာရာဇ, ဧကံသေန ဝဒါမိ။

‘‘အဋ္ဌဝိဓေန, မဟာရာဇ, သတ္တာနံ ကာလင်္ကိရိယာ ဟောတိ, ဝါတသမုဋ္ဌာနေန ပိတ္တသမုဋ္ဌာနေန သေမှသမုဋ္ဌာနေန သန္နိပါတိကေန ဥတုဝိပရိဏာမေန ဝိသမပရိဟာရေန ဩပက္ကမိကေန ကမ္မဝိပါကေန, မဟာရာဇ, သတ္တာနံ ကာလင်္ကိရိယာ ဟောတိ။ တတြ, မဟာရာဇ, ယဒိဒံ ကမ္မဝိပါကေန ကာလင်္ကိရိယာ, သာ ယေဝ တတ္ထ သာမယိကာ [သာမာယိကာ (က။)] ကာလင်္ကိရိယာ, အဝသေသာ အသာမယိကာ ကာလင်္ကိရိယာတိ။ ဘဝတိ စ –

‘‘‘ဇိဃစ္ဆာယ ပိပါသာယ၊ အဟိဒဋ္ဌာ [အဟိဒဋ္ဌော (သီ။)၊ အဟိနာ ဒဋ္ဌော (ဣ။)] ဝိသေန စ။

အဂ္ဂိဥဒကသတ္တီဟိ၊ အကာလေ တတ္ထ မီယတိ။

ဝါတပိတ္တေန သေမှေန၊ သန္နိပါတေနုတူဟိ စ။

ဝိသမောပက္ကမကမ္မေဟိ၊ အကာလေ တတ္ထ မီယတီ’တိ။

‘‘ကေစိ , မဟာရာဇ, သတ္တာ ပုဗ္ဗေ ကတေန တေန တေန အကုသလကမ္မဝိပါကေန မရန္တိ။ ဣဓ, မဟာရာဇ, ယော ပုဗ္ဗေ ပရေ ဇိဃစ္ဆာယ မာရေတိ, သော ဗဟူနိ ဝဿသတသဟဿာနိ ဇိဃစ္ဆာယ ပရိဣဠိတော ဆာတော ပရိကိလန္တော သုက္ခမိလာတဟဒယော ဗုဘုက္ခိတော [သုက္ခိတော (သီ။ ဣ။ က။)] ဝိသုက္ခိတော ဈာယန္တော အဗ္ဘန္တရံ ပရိဍယှန္တော ဇိဃစ္ဆာယ ယေဝ မရတိ ဒဟရောပိ မဇ္ဈိမောပိ မဟလ္လကောပိ, ဣဒမ္ပိ တဿ သာမယိကမရဏံ။

‘‘ယော ပုဗ္ဗေ ပရေ ပိပါသာယ မာရေတိ, သော ဗဟူနိ ဝဿသတသဟဿာနိ ပေတော ဟုတွာ နိဇ္ဈာမတဏှိကော သမာနော လူခေါ ကိသော ပရိသုက္ခိတဟဒယော ပိပါသာယ ယေဝ မရတိ ဒဟရောပိ မဇ္ဈိမောပိ မဟလ္လကောပိ, ဣဒမ္ပိ တဿ သာမယိကမရဏံ။

‘‘ယော ပုဗ္ဗေ ပရေ အဟိနာ ဍံသာပေတွာ မာရေတိ, သော ဗဟူနိ ဝဿသတသဟဿာနိ အဇဂရမုခေနေဝ အဇဂရမုခံ ကဏှသပ္ပမုခေနေဝ ကဏှသပ္ပမုခံ ပရိဝတ္တိတွာ တေဟိ ခါယိတခါယိတော အဟီဟိ ဒဋ္ဌော ယေဝ မရတိ ဒဟရောပိ မဇ္ဈိမောပိ မဟလ္လကောပိ, ဣဒမ္ပိ တဿ သာမယိကမရဏံ။

‘‘ယော ပုဗ္ဗေ ပရေ ဝိသံ ဒတွာ မာရေတိ, သော ဗဟူနိ ဝဿသတသဟဿာနိ ဍယှန္တေဟိ အင်္ဂပစ္စင်္ဂေဟိ ဘိဇ္ဇမာနေန သရီရေန ကုဏပဂန္ဓံ ဝါယန္တော ဝိသေနေဝ မရတိ ဒဟရောပိ မဇ္ဈိမောပိ မဟလ္လကောပိ, ဣဒမ္ပိ တဿ သာမယိကမရဏံ။

‘‘ယော ပုဗ္ဗေ ပရေ အဂ္ဂိနာ မာရေတိ, သော ဗဟူနိ ဝဿသတသဟဿာနိ အင်္ဂါရပဗ္ဗတေနေဝ အင်္ဂါရပဗ္ဗတံ ယမဝိသယေနေဝ ယမဝိသယံ ပရိဝတ္တိတွာ ဒဍ္ဎဝိဒဍ္ဎဂတ္တော အဂ္ဂိနာ ယေဝ မရတိ ဒဟရောပိ မဇ္ဈိမောပိ မလလ္လကောပိ, ဣဒမ္ပိ တဿ သာမယိကမရဏံ။

‘‘ယော ပုဗ္ဗေ ပရေ ဥဒကေန မာရေတိ, သော ဗဟူနိ ဝဿသတသဟဿာနိ ဟတဝိလုတ္တဘဂ္ဂဒုဗ္ဗလဂတ္တော ခုဗ္ဘိတစိတ္တော [ခုဘိတစိတ္တော (သီ။ ဣ။)] ဥဒကေနေဝ [ဥဒကေ ယေဝ (ဗဟူသု)] မရတိ ဒဟရောပိ မဇ္ဈိမောပိ မဟလ္လကောပိ, ဣဒမ္ပိ တဿ သာမယိကမရဏံ။

‘‘ယော ပုဗ္ဗေ ပရေ သတ္တိယာ မာရေတိ, သော ဗဟူနိ ဝဿသတသဟဿာနိ ဆိန္နဘိန္နကောဋ္ဋိတဝိကောဋ္ဋိတော သတ္တိမုခသမာဟတော သတ္တိယာ ယေဝ မရတိ ဒဟရောပိ မဇ္ဈိမောပိ မဟလ္လကောပိ, ဣဒမ္ပိ တဿ သာမယိကမရဏံ’’။

‘‘ဘန္တေ နာဂသေန, အကာလေ မရဏံ အတ္ထီတိ ယံ ဝဒေတိ, ဣင်္ဃ မေ တွံ တတ္ထ ကာရဏံ အတိဒိသာတိ’’။ ‘‘ယထာ, မဟာရာဇ, မဟတိမဟာအဂ္ဂိက္ခန္ဓော အာဒိန္နတိဏကဋ္ဌသာခါပလာသော ပရိယာဒိန္နဘက္ခော ဥပါဒါနသင်္ခယာ နိဗ္ဗာယတိ, သော အဂ္ဂိ ဝုစ္စတိ ‘အနီတိကော အနုပဒ္ဒဝေါ သမယေ နိဗ္ဗုတော နာမာ’တိ, ဧဝမေဝ ခေါ, မဟာရာဇ, ယော ကောစိ ဗဟူနိ ဒိဝသသဟဿာနိ ဇီဝိတွာ ဇရာဇိဏ္ဏော အာယုက္ခယာ အနီတိကော အနုပဒ္ဒဝေါ မရတိ, သော ဝုစ္စတိ ‘သမယေ မရဏမုပဂတော’တိ။

‘‘ယထာ ဝါ ပန, မဟာရာဇ, မဟတိမဟာအဂ္ဂိက္ခန္ဓော အာဒိန္နတိဏကဋ္ဌသာခါပလာသော အဿ, တံ အပရိယာဒိန္နေ ယေဝ တိဏကဋ္ဌသာခါပလာသေ မဟတိမဟာမေဃော အဘိပ္ပဝဿိတွာ နိဗ္ဗာပေယျ, အပိ နု ခေါ, မဟာရာဇ, မဟာအဂ္ဂိက္ခန္ဓော သမယေ နိဗ္ဗုတော နာမ ဟောတီ’’တိ? ‘‘န ဟိ, ဘန္တေ’’တိ။ ‘‘ကိဿ ပန သော, မဟာရာဇ, ပစ္ဆိမော အဂ္ဂိက္ခန္ဓော ပုရိမကေန အဂ္ဂိက္ခန္ဓေန သမသမဂတိကော နာဟောသီ’’တိ? ‘‘အာဂန္တုကေန, ဘန္တေ, မေဃေန ပဋိဣဠိတော သော အဂ္ဂိက္ခန္ဓော အသမယေ နိဗ္ဗုတော’’တိ။ ဧဝမေဝ ခေါ, မဟာရာဇ, ယော ကောစိ အကာလေ မရတိ, သော အာဂန္တုကေန ရောဂေန ပဋိဣဠိတော ဝါတသမုဋ္ဌာနေန ဝါ ပိတ္တသမုဋ္ဌာနေန ဝါ သေမှသမုဋ္ဌာနေန ဝါ သန္နိပါတိကေန ဝါ ဥတုပရိဏာမဇေန ဝါ ဝိသမပရိဟာရဇေန ဝါ ဩပက္ကမိကေန ဝါ ဇိဃစ္ဆာယ ဝါ ပိပါသာယ ဝါ သပ္ပဒဋ္ဌေန ဝါ ဝိသမာသိတေန ဝါ အဂ္ဂိနာ ဝါ ဥဒကေန ဝါ သတ္တိဝေဂပ္ပဋိဣဠိတော ဝါ အကာလေ မရတိ။ ဣဒမေတ္ထ, မဟာရာဇ, ကာရဏံ, ယေန ကာရဏေန အကာလေ မရဏံ အတ္ထိ။

‘‘ယထာ ဝါ ပန, မဟာရာဇ, ဂဂနေ မဟတိမဟာဝလာဟကော ဥဋ္ဌဟိတွာ နိန္နဉ္စ ထလဉ္စ ပရိပူရယန္တော အဘိဝဿတိ, သော ဝုစ္စတိ ‘မေဃော အနီတိကော အနုပဒ္ဒဝေါ ဝဿတီ’တိ။ ဧဝမေဝ ခေါ, မဟာရာဇ, ယော ကောစိ စိရံ ဇီဝိတွာ ဇရာဇိဏ္ဏော အာယုက္ခယာ အနီတိကော အနုပဒ္ဒဝေါ မရတိ, သော ဝုစ္စတိ ‘သမယေ မရဏမုပဂတော’တိ။

‘‘ယထာ ဝါ ပန, မဟာရာဇ, ဂဂနေ မဟတိမဟာဝလာဟကော ဥဋ္ဌဟိတွာ အန္တရာယေဝ မဟတာ ဝါတေန အဗ္ဘတ္ထံ ဂစ္ဆေယျ, အပိ နု ခေါ သော, မဟာရာဇ, မဟာဝလာဟကော သမယေ ဝိဂတော နာမ ဟောတီ’’တိ? ‘‘န ဟိ, ဘန္တေ’’တိ။ ‘‘ကိဿ ပန သော, မဟာရာဇ, ပစ္ဆိမော ဝလာဟကော ပုရိမေန ဝလာဟကေန သမသမဂတိကော နာဟောသီ’’တိ? ‘‘အာဂန္တုကေန, ဘန္တေ, ဝါတေန ပဋိဣဠိတော သော ဝလာဟကော အသမယပ္ပတ္တော ယေဝ ဝိဂတော’’တိ ။ ‘‘ဧဝမေဝ ခေါ, မဟာရာဇ, ယော ကောစိ အကာလေ မရတိ, သော အာဂန္တုကေန ရောဂေန ပဋိဣဠိတော ဝါတသမုဋ္ဌာနေန ဝါ။ပေ။။ သတ္တိဝေဂပ္ပဋိဣဠိတော ဝါ အကာလေ မရတိ။ ဣဒမေတ္ထ, မဟာရာဇ, ကာရဏံ, ယေန ကာရဏေန အကာလေ မရဏံ အတ္ထီတိ။

‘‘ယထာ ဝါ ပန, မဟာရာဇ, ဗလဝါ အာသီဝိသော ကုပိတော ကိဉ္စိဒေဝ ပုရိသံ ဍံသေယျ, တဿ တံ ဝိသံ အနီတိကံ အနုပဒ္ဒဝံ မရဏံ ပါပေယျ, တံ ဝိသံ ဝုစ္စတိ ‘အနီတိကမနုပဒ္ဒဝံ ကောဋိဂတ’န္တိ။ ဧဝမေဝ ခေါ, မဟာရာဇ, ယော ကောစိ စိရံ ဇီဝိတွာ ဇရာဇိဏ္ဏော အာယုက္ခယာ အနီတိကော အနုပဒ္ဒဝေါ မရတိ, သော ဝုစ္စတိ ‘အနီတိကော အနုပဒ္ဒဝေါ ဇီဝိတကောဋိဂတော သာမယိကံ မရဏမုပဂတော’တိ။

‘‘ယထာ ဝါ ပန, မဟာရာဇ, ဗလဝတာ အာသီဝိသေန ဒဋ္ဌဿ အန္တရာယေဝ အာဟိတုဏ္ဍိကော အဂဒံ ဒတွာ အဝိသံ ကရေယျ, အပိ နု ခေါ တံ, မဟာရာဇ, ဝိသံ သမယေ ဝိဂတံ နာမ ဟောတီ’’တိ? ‘‘န ဟိ ဘန္တေ’’တိ။ ‘‘ကိဿ ပန တံ, မဟာရာဇ, ပစ္ဆိမံ ဝိသံ ပုရိမကေန ဝိသေန သမသမဂတိကံ နာဟောသီ’’တိ? ‘‘အာဂန္တုကေန, ဘန္တေ, အဂဒေန ပဋိဣဠိတံ ဝိသံ အကောဋိဂတံ ယေဝ ဝိဂတ’’န္တိ။ ‘‘ဧဝမေဝ ခေါ, မဟာရာဇ, ယော ကောစိ အကာလေ မရတိ, သော အာဂန္တုကေန ရောဂေန ပဋိဣဠိတော ဝါတသမုဋ္ဌာနေန ဝါ။ပေ။။ သတ္တိဝေဂပ္ပဋိဣဠိတော ဝါ အကာလေ မရတိ။ ဣဒမေတ္ထ, မဟာရာဇ, ကာရဏံ, ယေန ကာရဏေန အကာလေ မရဏံ အတ္ထီတိ။

‘‘ယထာ ဝါ ပန, မဟာရာဇ, ဣဿာသော သရံ ပါတေယျ, သစေ သော သရော ယထာဂတိဂမနပထမတ္ထကံ ဂစ္ဆတိ, သော သရော ဝုစ္စတိ ‘အနီတိကော အနုပဒ္ဒဝေါ ယထာဂတိဂမနပထမတ္ထကံ ဂတော နာမာ’တိ။ ဧဝမေဝ ခေါ, မဟာရာဇ, ယော ကောစိ စိရံ ဇီဝိတွာ ဇရာဇိဏ္ဏော အာယုက္ခယာ အနီတိကော အနုပဒ္ဒဝေါ မရတိ, သော ဝုစ္စတိ ‘အနီတိကော အနုပဒ္ဒဝေါ သမယေ မရဏမုပဂတော’တိ။

‘‘ယထာ ဝါ ပန, မဟာရာဇ, ဣဿာသော သရံ ပါတေယျ, တဿ တံ သရံ တသ္မိံ ယေဝ ခဏေ ကောစိ ဂဏှေယျ, အပိ နု ခေါ သော, မဟာရာဇ, သရော ယထာဂတိဂမနပထမတ္ထကံ ဂတော နာမ ဟောတီ’’တိ? ‘‘န ဟိ, ဘန္တေ’’တိ။ ‘‘ကိဿ ပန သော, မဟာရာဇ, ပစ္ဆိမော သရော ပုရိမကေန သရေန သမသမဂတိကော နာဟောသီ’’တိ? ‘‘အာဂန္တုကေန, ဘန္တေ, ဂဟဏေန တဿ သရဿ ဂမနံ ဥပစ္ဆိန္န’’န္တိ။ ‘‘ဧဝမေဝ ခေါ, မဟာရာဇ, ယော ကောစိ အကာလေ မရတိ, သော အာဂန္တုကေန ရောဂေန ပဋိဣဠိတော ဝါတသမုဋ္ဌာနေန ဝါ။ပေ။။ သတ္တိဝေဂပ္ပဋိဣဠိတော ဝါ အကာလေ မရတိ။ ဣဒမေတ္ထ, မဟာရာဇ, ကာရဏံ, ယေန ကာရဏေန အကာလေ မရဏံ အတ္ထီတိ။

‘‘ယထာ ဝါ ပန, မဟာရာဇ, ယော ကောစိ လောဟမယံ ဘာဇနံ အာကောဋေယျ, တဿ အာကောဋနေန သဒ္ဒေါ နိဗ္ဗတ္တိတွာ ယထာဂတိဂမနပထမတ္ထကံ ဂစ္ဆတိ, သော သဒ္ဒေါ ဝုစ္စတိ ‘အနီတိကော အနုပဒ္ဒဝေါ ယထာဂတိဂမနပထမတ္ထကံ ဂတော နာမာ’တိ။ ဧဝမေဝ ခေါ, မဟာရာဇ, ယော ကောစိ ဗဟူနိ ဒိဝသသဟဿာနိ ဇီဝိတွာ ဇရာဇိဏ္ဏော အာယုက္ခယာ အနီတိကော အနုပဒ္ဒဝေါ မရတိ, သော ဝုစ္စတိ ‘အနီတိကော အနုပဒ္ဒဝေါ သမယေ မရဏမုပါဂတော’တိ။

‘‘ယထာ ဝါ ပန, မဟာရာဇ, ယော ကောစိ လောဟမယံ ဘာဇနံ အာကောဋေယျ, တဿ အာကောဋနေန သဒ္ဒေါ နိဗ္ဗတ္တေယျ, နိဗ္ဗတ္တေ သဒ္ဒေ အဒူရဂတေ ကောစိ အာမသေယျ, သဟ အာမသနေန သဒ္ဒေါ နိရုဇ္ဈေယျ , အပိ နု ခေါ သော, မဟာရာဇ, သဒ္ဒေါ ယထာဂတိဂမနပထမတ္ထကံ ဂတော နာမ ဟောတီ’’တိ? ‘‘န ဟိ, ဘန္တေ’’တိ။ ‘‘ကိဿ ပန, မဟာရာဇ, ပစ္ဆိမော သဒ္ဒေါ ပုရိမကေန သဒ္ဒေန သမသမဂတိကော နာဟောသီ’’တိ? ‘‘အာဂန္တုကေန, ဘန္တေ, အာမသနေန သော သဒ္ဒေါ ဥပရတော’’တိ ။ ‘‘ဧဝမေဝ ခေါ, မဟာရာဇ, ယော ကောစိ အကာလေ မရတိ, သော အာဂန္တုကေန ရောဂေန ပဋိဣဠိတော ဝါတသမုဋ္ဌာနေန ဝါ။ပေ။။ သတ္တိဝေဂပ္ပဋိဣဠိတော ဝါ အကာလေ မရတိ။ ဣဒမေတ္ထ မဟာရာဇ ကာရဏံ, ယေန ကာရဏေန အကာလေ မရဏံ အတ္ထီတိ။

‘‘ယထာ ဝါ ပန, မဟာရာဇ, ခေတ္တေ သုဝိရူဠှံ ဓညဗီဇံ သမ္မာ ပဝတ္တမာနေန ဝဿေန ဩတတဝိတတအာကိဏ္ဏဗဟုဖလံ ဟုတွာ [ဥဋ္ဌိတအာကိဏ္ဏဗဟုဖလံ ဘဝိတွာ (သျာ။)] သဿုဋ္ဌာနသမယံ ပါပုဏာတိ, တံ ဓညံ ဝုစ္စတိ ‘အနီတိကမနုပဒ္ဒဝံ သမယသမ္ပတ္တံ နာမ ဟောတီ’တိ။ ဧဝမေဝ ခေါ, မဟာရာဇ, ယော ကောစိ ဗဟူနိ ဒိဝသသဟဿာနိ ဇီဝိတွာ ဇရာဇိဏ္ဏော အာယုက္ခယာ အနီတိကော အနုပဒ္ဒဝေါ မရတိ, သော ဝုစ္စတိ ‘အနီတိကော အနုပဒ္ဒဝေါ သမယေ မရဏမုပဂတော’တိ။

‘‘ယထာ ဝါ ပန, မဟာရာဇ, ခေတ္တေ သုဝိရူဠှံ ဓညဗီဇံ ဥဒကေန ဝိကလံ မရေယျ, အပိ နု ခေါ တံ, မဟာရာဇ, ဓညံ အသမယသမ္ပတ္တံ နာမ ဟောတီ’’တိ? ‘‘န ဟိ, ဘန္တေ’’တိ။ ‘‘ကိဿ ပန တံ, မဟာရာဇ, ပစ္ဆိမံ ဓညံ ပုရိမကေန ဓညေန သမသမဂတိကံ နာဟောသီ’’တိ? ‘‘အာဂန္တုကေန, ဘန္တေ, ဥဏှေန ပဋိဣဠိတံ တံ ဓညံ မတ’’န္တိ။ ‘‘ဧဝမေဝ ခေါ, မဟာရာဇ, ယော ကောစိ အကာလေ မရတိ, သော အာဂန္တုကေန ရောဂေန ပဋိဣဠိတော ဝါတသမုဋ္ဌာနေန ဝါ။ပေ။။ သတ္တိဝေဂပ္ပဋိဣဠိတော ဝါ အကာလေ မရတိ။ ဣဒမေတ္ထ, မဟာရာဇ, ကာရဏံ, ယေန ကာရဏေန အကာလေ မရဏံ အတ္ထီတိ။

‘‘သုတပုဗ္ဗံ ပန တယာ, မဟာရာဇ, ‘သမ္ပန္နတရုဏသဿံ ကိမယော ဥဋ္ဌဟိတွာ သမူလံ နာသေန္တီ’’’တိ? ‘‘သုတပုဗ္ဗဉ္စေဝ တံ, ဘန္တေ, အမှေဟိ ဒိဋ္ဌပုဗ္ဗဉ္စာ’’တိ။ ‘‘ကိံ နု ခေါ တံ, မဟာရာဇ, သဿံ ကာလေ နဋ္ဌံ, ဥဒါဟု အကာလေ နဋ္ဌ’’န္တိ? ‘‘အကာလေ, ဘန္တေ, ယဒိ ခေါ တံ, ဘန္တေ, သဿံ ကိမယော န ခါဒေယျုံ, သဿုဒ္ဓရဏသမယံ ပါပုဏေယျာ’’တိ။ ‘‘ကိံ ပန, မဟာရာဇ, အာဂန္တုကေန ဥပဃာတေန သဿံ ဝိနဿတိ, နိရုပဃာတံ သဿံ သဿုဒ္ဓရဏသမယံ ပါပုဏာတီ’’တိ? ‘‘အာမ, ဘန္တေ’’တိ။ ‘‘ဧဝမေဝ ခေါ, မဟာရာဇ, ယော ကောစိ အကာလေ မရတိ, သော အာဂန္တုကေန ရောဂေန ပဋိဣဠိတော ဝါတသမုဋ္ဌာနေန ဝါ။ပေ။။ သတ္တိဝေဂပ္ပဋိဣဠိတော ဝါ မရတိ။ ဣဒမေတ္ထ, မဟာရာဇ, ကာရဏံ, ယေန ကာရဏေန အကာလေ မရဏံ အတ္ထီတိ။

‘‘သုတပုဗ္ဗံ ပန တယာ, မဟာရာဇ, ‘သမ္ပန္နေ သဿေ ဖလဘာရနမိတေ မဉ္စရိတပတ္တေ ကရကဝဿံ နာမ ဝဿဇာတိ နိပတိတွာ ဝိနာသေတိ အဖလံ ကရောတီ’တိ? ‘‘သုတပုဗ္ဗဉ္စေဝ တံ, ဘန္တေ, အမှေဟိ ဒိဋ္ဌပုဗ္ဗဉ္စာ’’တိ။ ‘‘အပိ နု ခေါ တံ, မဟာရာဇ, သဿံ ကာလေ နဋ္ဌံ, ဥဒါဟု အကာလေ နဋ္ဌ’’န္တိ? ‘‘အကာလေ, ဘန္တေ, ယဒိ ခေါ တံ, ဘန္တေ, သဿံ ကရကဝဿံ န ဝဿေယျ သဿုဒ္ဓရဏသမယံ ပါပုဏေယျာ’’တိ။ ‘‘ကိံ ပန, မဟာရာဇ, အာဂန္တုကေန ဥပဃာတေန သဿံ ဝိနဿတိ, နိရုပဃာတံ သဿံ သဿုဒ္ဓရဏသမယံ ပါပုဏာတီ’’တိ? ‘‘အာမ, ဘန္တေ’’တိ။ ‘‘ဧဝမေဝ ခေါ, မဟာရာဇ, ယော ကောစိ အကာလေ မရတိ, သော အာဂန္တုကေန ရောဂေန ပဋိဣဠိတော ဝါတသမုဋ္ဌာနေန ဝါ ပိတ္တသမုဋ္ဌာနေန ဝါ သေမှသမုဋ္ဌာနေန ဝါ သန္နိပါတိကေန ဝါ ဥတုပရိဏာမဇေန ဝါ ဝိသမပရိဟာရဇေန ဝါ ဩပက္ကမိကေန ဝါ ဇိဃစ္ဆာယ ဝါ ပိပါသာယ ဝါ သပ္ပဒဋ္ဌေန ဝါ ဝိသမာသိတေန ဝါ အဂ္ဂိနာ ဝါ ဥဒကေန ဝါ သတ္တိဝေဂပ္ပဋိဣဠိတော ဝါ အကာလေ မရတိ။ ယဒိ ပန အာဂန္တုကေန ရောဂေန ပဋိဣဠိတော န ဘဝေယျ, သမယေဝ မရဏံ ပါပုဏေယျ။ ဣဒမေတ္ထ, မဟာရာဇ, ကာရဏံ, ယေန ကာရဏေန အကာလေ မရဏံ အတ္ထီ’’တိ။

‘‘အစ္ဆရိယံ , ဘန္တေ နာဂသေန, အဗ္ဘုတံ ဘန္တေ နာဂသေန, သုဒဿိတံ ကာရဏံ, သုဒဿိတံ ဩပမ္မံ အကာလေ မရဏဿ ပရိဒီပနာယ, ‘အတ္ထိ အကာလေ မရဏ’န္တိ ဥတ္တာနီကတံ ပါကဋံ ကတံ ဝိဘူတံ ကတံ, အစိတ္တဝိက္ခိတ္တကောပိ, ဘန္တေ နာဂသေန, မနုဇော ဧကမေကေနပိ တာဝ ဩပမ္မေန နိဋ္ဌံ ဂစ္ဆေယျ ‘အတ္ထိ အကာလေ မရဏ’န္တိ , ကိံ ပန မနုဇော သစေတနော? ပဌမောပမ္မေနေဝါဟံ, ဘန္တေ, သညတ္တော ‘အတ္ထိ အကာလေ မရဏ’န္တိ, အပိ စ အပရာပရံ နိဗ္ဗာဟနံ သောတုကာမော န သမ္ပဋိစ္ဆိ’’န္တိ။

အကာလမရဏပဉ္ဟော ဆဋ္ဌော။

၇။ စေတိယပါဋိဟာရိယပဉ္ဟော

၇။ ‘‘ဘန္တေ နာဂသေန, သဗ္ဗေသံ ပရိနိဗ္ဗုတာနံ စေတိယေ ပါဋိဟီရံ ဟောတိ, ဥဒါဟု ဧကစ္စာနံ ယေဝ ဟောတီ’’တိ? ‘‘ဧကစ္စာနံ, မဟာရာဇ, ဟောတိ, ဧကစ္စာနံ န ဟောတီ’’တိ။ ‘‘ကတမေသံ, ဘန္တေ, ဟောတိ, ကတမေသံ န ဟောတီ’’တိ? ‘‘တိဏ္ဏန္နံ, မဟာရာဇ, အညတရဿ အဓိဋ္ဌာနာ ပရိနိဗ္ဗုတဿ စေတိယေ ပါဋိဟီရံ ဟောတိ။ ကတမေသံ တိဏ္ဏန္နံ? ဣဓ, မဟာရာဇ, အရဟာ ဒေဝမနုဿာနံ အနုကမ္ပာယ တိဋ္ဌန္တောဝ အဓိဋ္ဌာတိ ‘ဧဝံနာမ စေတိယေ ပါဋိဟီရံ ဟောတူ’တိ, တဿ အဓိဋ္ဌာနဝသေန စေတိယေ ပါဋိဟီရံ ဟောတိ, ဧဝံ အရဟတော အဓိဋ္ဌာနဝသေန ပရိနိဗ္ဗုတဿ စေတိယေ ပါဋိဟီရံ ဟောတိ။

‘‘ပုန စပရံ, မဟာရာဇ, ဒေဝတာ မနုဿာနံ အနုကမ္ပာယ ပရိနိဗ္ဗုတဿ စေတိယေ ပါဋိဟီရံ ဒဿေန္တိ ‘ဣမိနာ ပါဋိဟီရေန သဒ္ဓမ္မော နိစ္စသမ္ပဂ္ဂဟိတော ဘဝိဿတိ, မနုဿာ စ ပသန္နာ ကုသလေန အဘိဝဍ္ဎိဿန္တီ’တိ, ဧဝံ ဒေဝတာနံ အဓိဋ္ဌာနဝသေန ပရိနိဗ္ဗုတဿ စေတိယေ ပါဋိဟီရံ ဟောတိ။

‘‘ပုန စပရံ, မဟာရာဇ, ဣတ္ထီ ဝါ ပုရိသော ဝါ သဒ္ဓေါ ပသန္နော ပဏ္ဍိတော ဗျတ္တော မေဓါဝီ ဗုဒ္ဓိသမ္ပန္နော ယောနိသော စိန္တယိတွာ ဂန္ဓံ ဝါ မာလံ ဝါ ဒုဿံ ဝါ အညတရံ ဝါ ကိဉ္စိ အဓိဋ္ဌဟိတွာ စေတိယေ ဥက္ခိပတိ ‘ဧဝံနာမ ဟောတူ’တိ, တဿပိ အဓိဋ္ဌာနဝသေန ပရိနိဗ္ဗုတဿ စေတိယေ ပါဋိဟီရံ ဟောတိ, ဧဝံ မနုဿာနံ အဓိဋ္ဌာနဝသေန ပရိနိဗ္ဗုတဿ စေတိယေ ပါဋိဟီရံ ဟောတိ။

‘‘ဣမေသံ ခေါ, မဟာရာဇ, တိဏ္ဏန္နံ အညတရဿ အဓိဋ္ဌာနဝသေန ပရိနိဗ္ဗုတဿ စေတိယေ ပါဋိဟီရံ ဟောတိ။

‘‘ယဒိ, မဟာရာဇ, တေသံ အဓိဋ္ဌာနံ န ဟောတိ, ခီဏာသဝဿပိ ဆဠဘိညဿ စေတောဝသိပ္ပတ္တဿ စေတိယေ ပါဋိဟီရံ န ဟောတိ, အသတိပိ , မဟာရာဇ, ပါဋိဟီရေ စရိတံ ဒိသွာ သုပရိသုဒ္ဓံ ဩကပ္ပေတဗ္ဗံ နိဋ္ဌံ ဂန္တဗ္ဗံ သဒ္ဒဟိတဗ္ဗံ ‘သုပရိနိဗ္ဗုတော အယံ ဗုဒ္ဓပုတ္တော’’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

စေတိယပါဋိဟာရိယပဉ္ဟော သတ္တမော။

၈။ ဓမ္မာဘိသမယပဉ္ဟော

၈။ ‘‘ဘန္တေ နာဂသေန, ယေ တေ သမ္မာ ပဋိပဇ္ဇန္တိ, တေသံ သဗ္ဗေသံ ယေဝ ဓမ္မာဘိသမယော ဟောတိ, ဥဒါဟု ကဿစိ န ဟောတီ’’တိ? ‘‘ကဿစိ, မဟာရာဇ, ဟောတိ, ကဿစိ န ဟောတီ’’တိ။ ‘‘ကဿ ဘန္တေ ဟောတိ, ကဿ န ဟောတီ’’တိ? ‘‘တိရစ္ဆာနဂတဿ, မဟာရာဇ, သုပ္ပဋိပန္နဿာပိ ဓမ္မာဘိသမယော န ဟောတိ, ပေတ္တိဝိသယူပပန္နဿ။ပေ။။ မိစ္ဆာဒိဋ္ဌိကဿ။ပေ။။ ကုဟကဿ။ပေ။။ မာတုဃာတကဿ။ပေ။။ ပိတုဃာတကဿ။ပေ။။ အရဟန္တဃာတကဿ။ပေ။။ သံဃဘေဒကဿ။ပေ။။ လောဟိတုပ္ပါဒကဿ။ပေ။။ ထေယျသံဝါသကဿ။ပေ။။ တိတ္ထိယပက္ကန္တဿ။ပေ။။ ဘိက္ခုနိဒူသကဿ။ပေ။။ တေရသန္နံ ဂရုကာပတ္တီနံ အညတရံ အာပဇ္ဇိတွာ အဝုဋ္ဌိတဿ။ပေ။။ ပဏ္ဍကဿ။ပေ။။ ဥဘတောဗျဉ္ဇနကဿ သုပ္ပဋိပန္နဿာပိ ဓမ္မာဘိသမယော န ဟောတိ။ပေ။။ ယောပိ မနုဿဒဟရကော ဦနကသတ္တဝဿိကော, တဿ သုပ္ပဋိပန္နဿာပိ ဓမ္မာဘိသမယော န ဟောတိ။ ဣမေသံ ခေါ, မဟာရာဇ, သောဠသန္နံ ပုဂ္ဂလာနံ သုပ္ပဋိပန္နာနမ္ပိ ဓမ္မာဘိသမယော န ဟောတီ’’တိ။

‘‘ဘန္တေ နာဂသေန, ယေ တေ ပန္နရသ ပုဂ္ဂလာ ဝိရုဒ္ဓါ ယေဝ, တေသံ ဓမ္မာဘိသမယော ဟောတု ဝါ မာ ဝါ ဟောတု, အထ ကေန ကာရဏေန မနုဿဒဟရကဿ ဦနကသတ္တဝဿိကဿ သုပ္ပဋိပန္နဿာပိ ဓမ္မာဘိသမယော န ဟောတိ? ဧတ္ထ တာဝ ပဉ္ဟော ဘဝတိ ‘နနု နာမ ဒဟရကဿ န ရာဂေါ ဟောတိ, န ဒေါသော ဟောတိ, န မောဟော ဟောတိ, န မာနော ဟောတိ, န မိစ္ဆာဒိဋ္ဌိ ဟောတိ, န အရတိ ဟောတိ, န ကာမဝိတက္ကော ဟောတိ, အမိဿိတော ကိလေသေဟိ, သော နာမ ဒဟရကော ယုတ္တော စ ပတ္တော စ အရဟတိ စ စတ္တာရိ သစ္စာနိ ဧကပဋိဝေဓေန ပဋိဝိဇ္ဈိတု’’’န္တိ။

‘‘တညေဝေတ္ထ , မဟာရာဇ, ကာရဏံ, ယေနာဟံ ကာရဏေန ဘဏာမိ ‘ဦနကသတ္တဝဿိကဿ သုပ္ပဋိပန္နဿာပိ ဓမ္မာဘိသမယော န ဟောတီ’တိ။ ယဒိ, မဟာရာဇ, ဦနကသတ္တဝဿိကော ရဇနီယေ ရဇ္ဇေယျ, ဒုဿနီယေ ဒုဿေယျ, မောဟနီယေ မုယ္ဟေယျ, မဒနီယေ မဇ္ဇေယျ, ဒိဋ္ဌိံ ဝိဇာနေယျ, ရတိဉ္စ အရတိဉ္စ ဝိဇာနေယျ, ကုသလာကုသလံ ဝိတက္ကေယျ, ဘဝေယျ တဿ ဓမ္မာဘိသမယော, အပိ စ, မဟာရာဇ, ဦနကသတ္တဝဿိကဿ စိတ္တံ အဗလံ ဒုဗ္ဗလံ ပရိတ္တံ အပ္ပံ ထောကံ မန္ဒံ အဝိဘူတံ, အသင်္ခတာ နိဗ္ဗာနဓါတု ဂရုကာ ဘာရိကာ ဝိပုလာ မဟတီ။ ဦနကသတ္တဝဿိကော, မဟာရာဇ, တေန ဒုဗ္ဗလေန စိတ္တေန ပရိတ္တကေန မန္ဒေန အဝိဘူတေန န သက္ကောတိ ဂရုကံ ဘာရိကံ ဝိပုလံ မဟတိံ အသင်္ခတံ နိဗ္ဗာနဓါတုံ ပဋိဝိဇ္ဈိတုံ။

‘‘ယထာ, မဟာရာဇ, သိနေရုပဗ္ဗတရာဇာ ဂရုကော ဘာရိကော ဝိပုလော မဟန္တော, အပိ နု ခေါ တံ, မဟာရာဇ, ပုရိသော အတ္တနော ပါကတိကေန ထာမဗလဝီရိယေန သက္ကုဏေယျ သိနေရုပဗ္ဗတရာဇာနံ ဥဒ္ဓရိတု’’န္တိ? ‘‘န ဟိ, ဘန္တေ’’တိ။ ‘‘ကေန ကာရဏေန မဟာရာဇာ’’တိ? ‘‘ဒုဗ္ဗလတ္တာ, ဘန္တေ, ပုရိသဿ, မဟန္တတ္တာ သိနေရုပဗ္ဗတရာဇဿာ’’တိ။ ‘‘ဧဝမေဝ ခေါ, မဟာရာဇ, ဦနကသတ္တဝဿိကဿ စိတ္တံ အဗလံ ဒုဗ္ဗလံ ပရိတ္တံ အပ္ပံ ထောကံ မန္ဒံ အဝိဘူတံ, အသင်္ခတာ နိဗ္ဗာနဓါတု ဂရုကာ ဘာရိကာ ဝိပုလာ မဟတီ။ ဦနကသတ္တဝဿိကော တေန ဒုဗ္ဗလေန စိတ္တေန ပရိတ္တေန မန္ဒေန အဝိဘူတေန န သက္ကောတိ ဂရုကံ ဘာရိကံ ဝိပုလံ မဟတိံ အသင်္ခတံ နိဗ္ဗာနဓါတုံ ပဋိဝိဇ္ဈိတုံ, တေန ကာရဏေန ဦနကသတ္တဝဿိကဿ သုပ္ပဋိပန္နဿာပိ ဓမ္မာဘိသမယော န ဟောတိ။

‘‘ယထာ ဝါ ပန, မဟာရာဇ, အယံ မဟာပထဝီ ဒီဃာ အာယတာ ပုထုလာ ဝိတ္ထတာ ဝိသာလာ ဝိတ္ထိဏ္ဏာ ဝိပုလာ မဟန္တာ, အပိ နု ခေါ တံ, မဟာရာဇ, မဟာပထဝိံ သက္ကာ ပရိတ္တကေန ဥဒကဗိန္ဒုကေန တေမေတွာ ဥဒကစိက္ခလ္လံ ကာတု’’န္တိ? ‘‘န ဟိ, ဘန္တေ’’တိ။ ‘‘ကေန ကာရဏေန, မဟာရာဇာ’’တိ? ‘‘ပရိတ္တတ္တာ, ဘန္တေ, ဥဒကဗိန္ဒုဿ, မဟန္တတ္တာ မဟာပထဝိယာ’’တိ။ ‘‘ဧဝမေဝ ခေါ, မဟာရာဇ, ဦနကသတ္တဝဿိကဿ စိတ္တံ အဗလံ ဒုဗ္ဗလံ ပရိတ္တံ အပ္ပံ ထောကံ မန္ဒံ အဝိဘူတံ, အသင်္ခတာ နိဗ္ဗာနဓါတု ဒီဃာ အာယတာ ပုထုလာ ဝိတ္ထတာ ဝိသာလာ ဝိတ္ထိဏ္ဏာ ဝိပုလာ မဟန္တာ။ ဦနကသတ္တဝဿိကော တေန ဒုဗ္ဗလေန စိတ္တေန ပရိတ္တကေန မန္ဒေန အဝိဘူတေန န သက္ကောတိ မဟတိံ အသင်္ခတံ နိဗ္ဗာနဓါတုံ ပဋိဝိဇ္ဈိတုံ, တေန ကာရဏေန ဦနကသတ္တဝဿိကဿ သုပ္ပဋိပန္နဿာပိ ဓမ္မာဘိသမယော န ဟောတိ။

‘‘ယထာ ဝါ ပန, မဟာရာဇ, အဗလဒုဗ္ဗလပရိတ္တအပ္ပထောကမန္ဒဂ္ဂိ ဘဝေယျ, အပိ နု ခေါ, မဟာရာဇ, တာဝတကေန မန္ဒေန အဂ္ဂိနာ သက္ကာ သဒေဝကေ လောကေ အန္ဓကာရံ ဝိဓမိတွာ အာလောကံ ဒဿေတု’’န္တိ? ‘‘န ဟိ, ဘန္တေ’’တိ။ ‘‘ကေန ကာရဏေန မဟာရာဇာ’’တိ? ‘‘မန္ဒတ္တာ, ဘန္တေ, အဂ္ဂိဿ, လောကဿ မဟန္တတ္တာ’’တိ။ ‘‘ဧဝမေဝ ခေါ, မဟာရာဇ, ဦနကသတ္တဝဿိကဿ စိတ္တံ အဗလံ ဒုဗ္ဗလံ ပရိတ္တံ အပ္ပံ ထောကံ မန္ဒံ အဝိဘူတံ, မဟတာ စ အဝိဇ္ဇန္ဓကာရေန ပိဟိတံ။ တသ္မာ ဒုက္ကရံ ဉာဏာလောကံ ဒဿယိတုံ, တေန ကာရဏေန ဦနကသတ္တဝဿိကဿ သုပ္ပဋိပန္နဿာပိ ဓမ္မာဘိသမယော န ဟောတိ။

‘‘ယထာ ဝါ ပန, မဟာရာဇ, အာတုရော ကိသော အဏုပရိမိတကာယော သာလကကိမိ ဟတ္ထိနာဂံ တိဓါ ပဘိန္နံ နဝါယတံ တိဝိတ္ထတံ ဒသပရိဏာဟံ အဋ္ဌရတနိကံ သကဋ္ဌာနမုပဂတံ ဒိသွာ ဂိလိတုံ ပရိကဍ္ဎေယျ, အပိ နု ခေါ သော, မဟာရာဇ, သာလကကိမိ သက္ကုဏေယျ တံ ဟတ္ထိနာဂံ ဂိလိတု’’န္တိ? ‘‘န ဟိ, ဘန္တေ’’တိ။ ‘‘ကေန ကာရဏေန, မဟာရာဇာ’’တိ? ‘‘ပရိတ္တတ္တာ, ဘန္တေ, သာလကကိမိဿ, မဟန္တတ္တာ ဟတ္ထိနာဂဿာ’’တိ။ ‘‘ဧဝမေဝ ခေါ, မဟာရာဇ, ဦနကသတ္တဝဿိကဿ စိတ္တံ အဗလံ ဒုဗ္ဗလံ ပရိတ္တံ အပ္ပံ ထောကံ မန္ဒံ အဝိဘူတံ, မဟတီ အသင်္ခတာ နိဗ္ဗာနဓါတု။ သော တေန ဒုဗ္ဗလေန စိတ္တေန ပရိတ္တကေန မန္ဒေန အဝိဘူတေန န သက္ကောတိ မဟတိံ အသင်္ခတံ နိဗ္ဗာနဓါတုံ ပဋိဝိဇ္ဈိတုံ, တေန ကာရဏေန ဦနကသတ္တဝဿိကဿ သုပ္ပဋိပန္နဿာပိ ဓမ္မာဘိသမယော န ဟောတီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဓမ္မာဘိသမယပဉ္ဟော အဋ္ဌမော။

၉။ ဧကန္တသုခနိဗ္ဗာနပဉ္ဟော

၉။ ‘‘ဘန္တေ နာဂသေန, ကိံ ဧကန္တသုခံ နိဗ္ဗာနံ, ဥဒါဟု ဒုက္ခေန မိဿ’’န္တိ? ‘‘ဧကန္တသုခံ, မဟာရာဇ, နိဗ္ဗာနံ, ဒုက္ခေန အမိဿ’’န္တိ။

‘‘န မယံ တံ, ဘန္တေ နာဂသေန, ဝစနံ သဒ္ဒဟာမ ‘ဧကန္တသုခံ နိဗ္ဗာန’န္တိ, ဧဝမေတ္ထ မယံ, ဘန္တေ နာဂသေန, ပစ္စေမ ‘နိဗ္ဗာနံ ဒုက္ခေန မိဿ’န္တိ, ကာရဏဉ္စေတ္ထ ဥပလဘာမ ‘နိဗ္ဗာနံ ဒုက္ခေန မိဿ’န္တိ။ ကတမံ ဧတ္ထ ကာရဏံ ? ယေ တေ, ဘန္တေ နာဂသေန, နိဗ္ဗာနံ ပရိယေသန္တိ, တေသံ ဒိဿတိ ကာယဿ စ စိတ္တဿ စ အာတာပေါ ပရိတာပေါ ဌာနစင်္ကမနိသဇ္ဇာသယနာဟာရပရိဂ္ဂဟော မိဒ္ဓဿ စ ဥပရောဓေါ အာယတနာနဉ္စ ပဋိဣဠနံ ဓနဓညပိယဉာတိမိတ္တပ္ပဇဟနံ။ ယေ ကေစိ လောကေ သုခိတာ သုခသမပ္ပိတာ, တေ သဗ္ဗေပိ ပဉ္စဟိ ကာမဂုဏေဟိ အာယတနေ ရမေန္တိ ဗြူဟေန္တိ, မနာပိကမနာပိကဗဟုဝိဓသုဘနိမိတ္တေန ရူပေန စက္ခုံ ရမေန္တိ ဗြူဟေန္တိ, မနာပိကမနာပိကဂီတဝါဒိတဗဟုဝိဓသုဘနိမိတ္တေန သဒ္ဒေန သောတံ ရမေန္တိ ဗြူဟေန္တိ, မနာပိကမနာပိကပုပ္ဖဖလပတ္တတစမူလသာရဗဟုဝိဓသုဘနိမိတ္တေန ဂန္ဓေန ဃာနံ ရမေန္တိ ဗြူဟေန္တိ, မနာပိကမနာပိကခဇ္ဇဘောဇ္ဇလေယျပေယျသာယနီယဗဟုဝိဓသုဘနိမိတ္တေန ရသေန ဇိဝှံ ရမေန္တိ ဗ္ရုဟေန္တိ, မနာပိကမနာပိကသဏှသုခုမမုဒုမဒ္ဒဝဗဟုဝိဓသုဘနိမိတ္တေန ဖဿေန ကာယံ ရမေန္တိ ဗြူဟေန္တိ, မနာပိကမနာပိကကလျာဏပါပကသုဘာသုဘဗဟုဝိဓဝိတက္ကမနသိကာရေန မနံ ရမေန္တိ ဗြူဟေန္တိ။ တုမှေ တံ စက္ခုသောတဃာနဇိဝှာကာယမနောဗြူဟနံ ဟနထ ဥပဟနထ, ဆိန္ဒထ ဥပစ္ဆိန္ဒထ, ရုန္ဓထ ဥပရုန္ဓထ။ တေန ကာယောပိ ပရိတပတိ, စိတ္တမ္ပိ ပရိတပတိ, ကာယေ ပရိတတ္တေ ကာယိကဒုက္ခဝေဒနံ ဝေဒိယတိ, စိတ္တေ ပရိတတ္တေ စေတသိကဒုက္ခဝေဒနံ ဝေဒယတိ။ နနု မာဂဏ္ဍိယောပိ [မာဂန္ဒိယောပိ (သီ။ ဣ။)] ပရိဗ္ဗာဇကော ဘဂဝန္တံ ဂရဟမာနော ဧဝမာဟ ‘ဘူနဟု [ဘူတဟစ္စော (ဣ။), ဘူနဟစ္စော (က။)] သမဏော ဂေါတမော’တိ။ ဣဒမေတ္ထ ကာရဏံ, ယေနာဟံ ကာရဏေန ဗြူမိ ‘နိဗ္ဗာနံ ဒုက္ခေန မိဿ’’’န္တိ။

‘‘န ဟိ, မဟာရာဇ, နိဗ္ဗာနံ ဒုက္ခေန မိဿံ, ဧကန္တသုခံ နိဗ္ဗာနံ။ ယံ ပန တွံ, မဟာရာဇ , ဗြူသိ ‘နိဗ္ဗာနံ ဒုက္ခ’န္တိ, နေတံ ဒုက္ခံ နိဗ္ဗာနံ နာမ, နိဗ္ဗာနဿ ပန သစ္ဆိကိရိယာယ ပုဗ္ဗဘာဂေါ ဧသော, နိဗ္ဗာနပရိယေသနံ ဧတံ, ဧကန္တသုခံ ယေဝ, မဟာရာဇ, နိဗ္ဗာနံ, န ဒုက္ခေန မိဿံ။ ဧတ္ထ ကာရဏံ ဝဒါမိ။ အတ္ထိ, မဟာရာဇ, ရာဇူနံ ရဇ္ဇသုခံ နာမာ’’တိ? ‘‘အာမ, ဘန္တေ, အတ္ထိ ရာဇူနံ ရဇ္ဇသုခ’’န္တိ။ ‘‘အပိ နု ခေါ တံ, မဟာရာဇ, ရဇ္ဇသုခံ ဒုက္ခေန မိဿ’’န္တိ? ‘‘န ဟိ, ဘန္တေ’’တိ။ ‘‘ကိဿ ပန တေ, မဟာရာဇ, ရာဇာနော ပစ္စန္တေ ကုပိတေ တေသံ ပစ္စန္တနိဿိတာနံ ပဋိသေဓါယ အမစ္စေဟိ ပရိဏာယကေဟိ ဘဋေဟိ ဗလတ္ထေဟိ ပရိဝုတာ ပဝါသံ ဂန္တွာ ဍံသမကသဝါတာတပပဋိဣဠိတာ သမဝိသမေ ပရိဓါဝန္တိ, မဟာယုဒ္ဓဉ္စ ကရောန္တိ, ဇီဝိတသံသယဉ္စ ပါပုဏန္တီ’’တိ? ‘‘နေတံ, ဘန္တေ နာဂသေန, ရဇ္ဇသုခံ နာမ, ရဇ္ဇသုခဿ ပရိယေသနာယ ပုဗ္ဗဘာဂေါ ဧသော, ဒုက္ခေန, ဘန္တေ နာဂသေန, ရာဇာနော ရဇ္ဇံ ပရိယေသိတွာ ရဇ္ဇသုခံ အနုဘဝန္တိ, ဧဝံ, ဘန္တေ နာဂသေန, ရဇ္ဇသုခံ ဒုက္ခေန အမိဿံ, အညံ တံ ရဇ္ဇသုခံ, အညံ ဒုက္ခ’’န္တိ။ ‘‘ဧဝမေဝ ခေါ, မဟာရာဇ, ဧကန္တသုခံ နိဗ္ဗာနံ, န ဒုက္ခေန မိဿံ။ ယေ ပန တံ နိဗ္ဗာနံ ပရိယေသန္တိ, တေ ကာယဉ္စ စိတ္တဉ္စ အာတာပေတွာ ဌာနစင်္ကမနိသဇ္ဇာသယနာဟာရံ ပရိဂ္ဂဟေတွာ မိဒ္ဓံ ဥပရုန္ဓိတွာ အာယတနာနိ ပဋိဣဠေတွာ ကာယဉ္စ ဇီဝိတဉ္စ ပရိစ္စဇိတွာ ဒုက္ခေန နိဗ္ဗာနံ ပရိယေသိတွာ ဧကန္တသုခံ နိဗ္ဗာနံ အနုဘဝန္တိ, နိဟတပစ္စာမိတ္တာ ဝိယ ရာဇာနော ရဇ္ဇသုခံ။ ဧဝံ, မဟာရာဇ, ဧကန္တသုခံ နိဗ္ဗာနံ, န ဒုက္ခေန မိဿံ, အညံ နိဗ္ဗာနံ, အညံ ဒုက္ခန္တိ။

‘‘အပရမ္ပိ , မဟာရာဇ, ဥတ္တရိံ ကာရဏံ သုဏောဟိ ဧကန္တသုခံ နိဗ္ဗာနံ, န ဒုက္ခေန မိဿံ, အညံ ဒုက္ခံ, အညံ နိဗ္ဗာနန္တိ။ အတ္ထိ, မဟာရာဇ, အာစရိယာနံ သိပ္ပဝန္တာနံ သိပ္ပသုခံ နာမာ’’တိ? ‘‘အာမ, ဘန္တေ, အတ္ထိ အာစရိယာနံ သိပ္ပဝန္တာနံ သိပ္ပသုခ’’န္တိ။ ‘‘အပိ နု ခေါ တံ, မဟာရာဇ, သိပ္ပသုခံ ဒုက္ခေန မိဿ’’န္တိ? ‘‘န ဟိ, ဘန္တေ’’တိ။ ‘‘ကိဿ ပန တေ, မဟာရာဇ, အာစရိယာ [ဣဒံ ပဒံ သီ။ ဣ။ ပေါတ္ထကေသု နတ္ထိ] အာစရိယာနံ အဘိဝါဒနပစ္စုဋ္ဌာနေန ဥဒကာဟရဏဃရသမ္မဇ္ဇနဒန္တကဋ္ဌမုခေါဒကာနုပ္ပဒါနေန ဥစ္ဆိဋ္ဌပဋိဂ္ဂဟဏဥစ္ဆာဒနနဟာပနပါဒပရိကမ္မေန သကစိတ္တံ နိက္ခိပိတွာ ပရစိတ္တာနုဝတ္တနေန ဒုက္ခသေယျာယ ဝိသမဘောဇနေန ကာယံ အာတာပေန္တီ’’တိ? ‘‘နေတံ, ဘန္တေ နာဂသေန, သိပ္ပသုခံ နာမ, သိပ္ပပရိယေသနာယ ပုဗ္ဗဘာဂေါ ဧသော, ဒုက္ခေန, ဘန္တေ နာဂသေန, အာစရိယာ သိပ္ပံ ပရိယေသိတွာ သိပ္ပသုခံ အနုဘဝန္တိ, ဧဝံ, ဘန္တေ နာဂသေန, သိပ္ပသုခံ ဒုက္ခေန အမိဿံ, အညံ တံ သိပ္ပသုခံ, အညံ ဒုက္ခ’’န္တိ။ ‘‘ဧဝမေဝ ခေါ, မဟာရာဇ, ဧကန္တသုခံ နိဗ္ဗာနံ, န ဒုက္ခေန မိဿံ။ ယေ ပန တံ နိဗ္ဗာနံ ပရိယေသန္တိ, တေ ကာယဉ္စ စိတ္တဉ္စ အာတာပေတွာ ဌာနစင်္ကမနိသဇ္ဇာသယနာဟာရံ ပရိဂ္ဂဟေတွာ မိဒ္ဓံ ဥပရုန္ဓိတွာ အာယတနာနိ ပဋိဣဠေတွာ ကာယဉ္စ ဇီဝိတဉ္စ ပရိစ္စဇိတွာ ဒုက္ခေန နိဗ္ဗာနံ ပရိယေသိတွာ ဧကန္တသုခံ နိဗ္ဗာနံ အနုဘဝန္တိ, အာစရိယာ ဝိယ သိပ္ပသုခံ။ ဧဝံ, မဟာရာဇ, ဧကန္တသုခံ နိဗ္ဗာနံ, န ဒုက္ခေန မိဿံ, အညံ ဒုက္ခံ, အညံ နိဗ္ဗာန’’န္တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဧကန္တသုခနိဗ္ဗာနပဉ္ဟော နဝမော။

၁၀။ နိဗ္ဗာနရူပသဏ္ဌာနပဉ္ဟော

၁၀။ ‘‘ဘန္တေ နာဂသေန, ‘နိဗ္ဗာနံ နိဗ္ဗာန’န္တိ ယံ ဝဒေသိ, သက္ကာ ပန တဿ နိဗ္ဗာနဿ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတု’’န္တိ? ‘‘အပ္ပဋိဘာဂံ, မဟာရာဇ, နိဗ္ဗာနံ, န သက္ကာ နိဗ္ဗာနဿ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတု’’န္တိ။ ‘‘ဧတမ္ပာဟံ, ဘန္တေ နာဂသေန, န သမ္ပဋိစ္ဆာမိ, ယံ အတ္ထိဓမ္မဿ နိဗ္ဗာနဿ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ အပညာပနံ, ကာရဏေန မံ သညာပေဟီ’’တိ။ ‘‘ဟောတု, မဟာရာဇ, ကာရဏေန တံ သညာပေဿာမိ။ အတ္ထိ, မဟာရာဇ, မဟာသမုဒ္ဒေါ နာမာ’’တိ? ‘‘အာမ, ဘန္တေ, အတ္ထေသော မဟာသမုဒ္ဒေါ’’တိ။ ‘‘သစေ တံ, မဟာရာဇ, ကောစိ ဧဝံ ပုစ္ဆေယျ ‘ကိတ္တကံ, မဟာရာဇ, မဟာသမုဒ္ဒေ ဥဒကံ, ကတိ ပန တေ သတ္တာ, ယေ မဟာသမုဒ္ဒေ ပဋိဝသန္တီ’တိ, ဧဝံ ပုဋ္ဌော တွံ, မဟာရာဇ, ကိန္တိ တဿ ဗျာကရေယျာသီ’’တိ? ‘‘သစေ မံ, ဘန္တေ, ကောစိ ဧဝံ ပုစ္ဆေယျ ‘ကိတ္တကံ, မဟာရာဇ, မဟာသမုဒ္ဒေ ဥဒကံ, ကတိ ပန တေ သတ္တာ, ယေ မဟာသမုဒ္ဒေ ပဋိဝသန္တီ’တိ, တမဟံ, ဘန္တေ, ဧဝံ ဝဒေယျံ ‘အပုစ္ဆိတဗ္ဗံ မံ တွံ အမ္ဘော ပုရိသ ပုစ္ဆသိ, နေသာ ပုစ္ဆာ ကေနစိ ပုစ္ဆိတဗ္ဗာ, ဌပနီယော ဧသော ပဉ္ဟော။ အဝိဘတ္တော လောကက္ခာယိကေဟိ မဟာသမုဒ္ဒေါ, န သက္ကာ မဟာသမုဒ္ဒေ ဥဒကံ ပရိမိနိတုံ သတ္တာ ဝါ ယေ တတ္ထ ဝါသမုပဂတာတိ ဧဝါဟံ ဘန္တေ တဿ ပဋိဝစနံ ဒဒေယျ’’’န္တိ။

‘‘ကိဿ ပန, တွံ မဟာရာဇ, အတ္ထိဓမ္မေ မဟာသမုဒ္ဒေ ဧဝံ ပဋိဝစနံ ဒဒေယျာသိ, နနု ဝိဂဏေတွာ [မိနိတွာ (က။)] တဿ အာစိက္ခိတဗ္ဗံ ‘ဧတ္တကံ မဟာသမုဒ္ဒေ ဥဒကံ, ဧတ္တကာ စ သတ္တာ မဟာသမုဒ္ဒေ ပဋိဝသန္တီ’’တိ? ‘‘န သက္ကာ, ဘန္တေ, အဝိသယော ဧသော ပဉ္ဟော’’တိ။

‘‘ယထာ , မဟာရာဇ, အတ္ထိဓမ္မေ ယေဝ မဟာသမုဒ္ဒေ န သက္ကာ ဥဒကံ ပရိဂဏေတုံ [ပရိမိနိတုံ (က။)] သတ္တာ ဝါ ယေ တတ္ထ ဝါသမုပဂတာ, ဧဝမေဝ ခေါ, မဟာရာဇ, အတ္ထိဓမ္မဿေဝ နိဗ္ဗာနဿ န သက္ကာ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတုံ, ဝိဂဏေယျ, မဟာရာဇ, ဣဒ္ဓိမာ စေတောဝသိပ္ပတ္တော မဟာသမုဒ္ဒေ ဥဒကံ တတြာသယေ စ သတ္တေ, န တွေဝ သော ဣဒ္ဓိမာ စေတောဝသိပ္ပတ္တော သက္ကုဏေယျ နိဗ္ဗာနဿ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတုံ။

‘‘အပရမ္ပိ, မဟာရာဇ, ဥတ္တရိံ ကာရဏံ သုဏောဟိ, အတ္ထိဓမ္မဿေဝ နိဗ္ဗာနဿ န သက္ကာ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတုန္တိ။ အတ္ထိ, မဟာရာဇ, ဒေဝေသု အရူပကာယိကာ နာမ ဒေဝါ’’တိ။ ‘‘အာမ, ဘန္တေ, သုယျတိ ‘အတ္ထိ ဒေဝေသု အရူပကာယိကာ နာမ ဒေဝါ’’’တိ။ ‘‘သက္ကာ ပန, မဟာရာဇ, တေသံ အရူပကာယိကာနံ ဒေဝါနံ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတု’’န္တိ? ‘‘န ဟိ, ဘန္တေ’’တိ။ ‘‘တေန ဟိ, မဟာရာဇ, နတ္ထိ အရူပကာယိကာ ဒေဝါ’’တိ? ‘‘အတ္ထိ, ဘန္တေ, အရူပကာယိကာ ဒေဝါ, န စ သက္ကာ တေသံ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတု’’န္တိ။ ‘‘ယထာ, မဟာရာဇ, အတ္ထိသတ္တာနံ ယေဝ အရူပကာယိကာနံ ဒေဝါနံ န သက္ကာ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတုံ, ဧဝမေဝ ခေါ, မဟာရာဇ, အတ္ထိဓမ္မဿေဝ နိဗ္ဗာနဿ န သက္ကာ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတု’’န္တိ။

‘‘ဘန္တေ နာဂသေန, ဟောတု ဧကန္တသုခံ နိဗ္ဗာနံ, န စ သက္ကာ တဿ ရူပံ ဝါ သဏ္ဌာနံ ဝါ ဝယံ ဝါ ပမာဏံ ဝါ ဩပမ္မေန ဝါ ကာရဏေန ဝါ ဟေတုနာ ဝါ နယေန ဝါ ဥပဒဿယိတုံ။ အတ္ထိ ပန, ဘန္တေ, နိဗ္ဗာနဿ ဂုဏံ အညေဟိ အနုပဝိဋ္ဌံ ကိဉ္စိ ဩပမ္မနိဒဿနမတ္တ’’န္တိ? ‘‘သရူပတော, မဟာရာဇ, နတ္ထိ, ဂုဏတော ပန သက္ကာ ကိဉ္စိ ဩပမ္မနိဒဿနမတ္တံ ဥပဒဿယိတု’’န္တိ။ ‘‘သာဓု, ဘန္တေ နာဂသေန, ယထာဟံ လဘာမိ နိဗ္ဗာနဿ ဂုဏတောပိ ဧကဒေသပရိဒီပနမတ္တံ, တထာ သီဃံ ဗြူဟိ, နိဗ္ဗာပေဟိ မေ ဟဒယပရိဠာဟံ ဝိနယ သီတလမဓုရဝစနမာလုတေနာ’’တိ။

‘‘ပဒုမဿ, မဟာရာဇ, ဧကော ဂုဏော နိဗ္ဗာနံ အနုပဝိဋ္ဌော, ဥဒကဿ ဒွေ ဂုဏာ, အဂဒဿ တယော ဂုဏာ, မဟာသမုဒ္ဒဿ စတ္တာရော ဂုဏာ, ဘောဇနဿ ပဉ္စ ဂုဏာ, အာကာသဿ ဒသ ဂုဏာ, မဏိရတနဿ တယော ဂုဏာ , လောဟိတစန္ဒနဿ တယော ဂုဏာ, သပ္ပိမဏ္ဍဿ တယော ဂုဏာ, ဂိရိသိခရဿ ပဉ္စ ဂုဏာ နိဗ္ဗာနံ အနုပဝိဋ္ဌာ’’တိ။

‘‘ဘန္တေ နာဂသေန, ‘ပဒုမဿ ဧကော ဂုဏော နိဗ္ဗာနံ အနုပဝိဋ္ဌော’တိ ယံ ဝဒေသိ, ကတမော ပဒုမဿ ဧကော ဂုဏော နိဗ္ဗာနံ အနုပဝိဋ္ဌော’’တိ? ‘‘ယထာ, မဟာရာဇ, ပဒုမံ အနုပလိတ္တံ ဥဒကေန, ဧဝမေဝ ခေါ, မဟာရာဇ, နိဗ္ဗာနံ သဗ္ဗကိလေသေဟိ အနုပလိတ္တံ။ အယံ, မဟာရာဇ, ပဒုမဿ ဧကော ဂုဏော နိဗ္ဗာနံ အနုပဝိဋ္ဌော’’တိ။

‘‘ဘန္တေ နာဂသေန, ‘ဥဒကဿ ဒွေ ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ ဥဒကဿ ဒွေ ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, ဥဒကံ သီတလံ ပရိဠာဟနိဗ္ဗာပနံ, ဧဝမေဝ ခေါ, မဟာရာဇ, နိဗ္ဗာနံ သီတလံ သဗ္ဗကိလေသပရိဠာဟနိဗ္ဗာပနံ။ အယံ, မဟာရာဇ, ဥဒကဿ ပဌမော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဥဒကံ ကိလန္တတသိတပိပါသိတဃမ္မာဘိတတ္တာနံ ဇနပသုပဇာနံ ပိပါသာဝိနယနံ, ဧဝမေဝ ခေါ, မဟာရာဇ, နိဗ္ဗာနံ ကာမတဏှာဘဝတဏှာဝိဘဝတဏှာပိပါသာဝိနယနံ။ အယံ, မဟာရာဇ, ဥဒကဿ ဒုတိယော ဂုဏော နိဗ္ဗာနံ အနုပဝိဋ္ဌော။ ဣမေ ခေါ, မဟာရာဇ, ဥဒကဿ ဒွေ ဂုဏာ နိဗ္ဗာနံ အနုပဝိဋ္ဌာ’’တိ။

‘‘ဘန္တေ နာဂသေန, ‘အဂဒဿ တယော ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ အဂဒဿ တယော ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, အဂဒေါ ဝိသဣဠိတာနံ သတ္တာနံ ပဋိသရဏံ, ဧဝမေဝ ခေါ, မဟာရာဇ, နိဗ္ဗာနံ ကိလေသဝိသဣဠိတာနံ သတ္တာနံ ပဋိသရဏံ။ အယံ, မဟာရာဇ, အဂဒဿ ပဌမော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, အဂဒေါ ရောဂါနံ အန္တကရော, ဧဝမေဝ ခေါ, မဟာရာဇ, နိဗ္ဗာနံ သဗ္ဗဒုက္ခာနံ အန္တကရံ။ အယံ, မဟာရာဇ, အဂဒဿ ဒုတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, အဂဒေါ အမတံ, ဧဝမေဝ ခေါ, မဟာရာဇ, နိဗ္ဗာနံ အမတံ။ အယံ, မဟာရာဇ, အဂဒဿ တတိယော ဂုဏော နိဗ္ဗာနံ အနုပဝိဋ္ဌော။ ဣမေ ခေါ, မဟာရာဇ, အဂဒဿ တယော ဂုဏာ နိဗ္ဗာနံ အနုပဝိဋ္ဌာ’’တိ။

‘‘ဘန္တေ နာဂသေန, ‘မဟာသမုဒ္ဒဿ စတ္တာရော ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ မဟာသမုဒ္ဒဿ စတ္တာရော ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, မဟာသမုဒ္ဒေါ သုညော သဗ္ဗကုဏပေဟိ, ဧဝမေဝ ခေါ, မဟာရာဇ , နိဗ္ဗာနံ သုညံ သဗ္ဗကိလေသကုဏပေဟိ။ အယံ, မဟာရာဇ , မဟာသမုဒ္ဒဿ ပဌမော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, မဟာသမုဒ္ဒေါ မဟန္တော အနောရပါရော, န ပရိပူရတိ သဗ္ဗသဝန္တီဟိ, ဧဝမေဝ ခေါ, မဟာရာဇ, နိဗ္ဗာနံ မဟန္တံ အနောရပါရံ, န ပူရတိ သဗ္ဗသတ္တေဟိ။ အယံ, မဟာရာဇ, မဟာသမုဒ္ဒဿ ဒုတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, မဟာသမုဒ္ဒေါ မဟန္တာနံ ဘူတာနံ အာဝါသော, ဧဝမေဝ ခေါ, မဟာရာဇ, နိဗ္ဗာနံ မဟန္တာနံ အရဟန္တာနံ ဝိမလခီဏာသဝဗလပ္ပတ္တဝသီဘူတမဟာဘူတာနံ အာဝါသော။ အယံ, မဟာရာဇ, မဟာသမုဒ္ဒဿ တတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, မဟာသမုဒ္ဒေါ အပရိမိတဝိဝိဓဝိပုလဝီစိပုပ္ဖသံကုသုမိတော, ဧဝမေဝ ခေါ, မဟာရာဇ, နိဗ္ဗာနံ အပရိမိတဝိဝိဓဝိပုလပရိသုဒ္ဓဝိဇ္ဇာဝိမုတ္တိပုပ္ဖသံကုသုမိတံ။ အယံ, မဟာရာဇ, မဟာသမုဒ္ဒဿ စတုတ္ထော ဂုဏော နိဗ္ဗာနံ အနုပဝိဋ္ဌော။ ဣမေ ခေါ, မဟာရာဇ, မဟာသမုဒ္ဒဿ စတ္တာရော ဂုဏာ နိဗ္ဗာနံ အနုပဝိဋ္ဌာ’’တိ။

‘‘ဘန္တေ နာဂသေန, ‘ဘောဇနဿ ပဉ္စ ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ ဘောဇနဿ ပဉ္စ ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, ဘောဇနံ သဗ္ဗသတ္တာနံ အာယုဓါရဏံ, ဧဝမေဝ ခေါ, မဟာရာဇ, နိဗ္ဗာနံ သစ္ဆိကတံ ဇရာမရဏနာသနတော အာယုဓါရဏံ။ အယံ, မဟာရာဇ, ဘောဇနဿ ပဌမော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဘောဇနံ သဗ္ဗသတ္တာနံ ဗလဝဍ္ဎနံ, ဧဝမေဝ ခေါ, မဟာရာဇ, နိဗ္ဗာနံ သစ္ဆိကတံ သဗ္ဗသတ္တာနံ ဣဒ္ဓိဗလဝဍ္ဎနံ။ အယံ, မဟာရာဇ, ဘောဇနဿ ဒုတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဘောဇနံ သဗ္ဗသတ္တာနံ ဝဏ္ဏဇနနံ, ဧဝမေဝ ခေါ, မဟာရာဇ, နိဗ္ဗာနံ သစ္ဆိကတံ သဗ္ဗသတ္တာနံ ဂုဏဝဏ္ဏဇနနံ။ အယံ, မဟာရာဇ, ဘောဇနဿ တတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဘောဇနံ သဗ္ဗသတ္တာနံ ဒရထဝူပသမနံ, ဧဝမေဝ ခေါ, မဟာရာဇ, နိဗ္ဗာနံ သစ္ဆိကတံ သဗ္ဗသတ္တာနံ သဗ္ဗကိလေသဒရထဝူပသမနံ။ အယံ, မဟာရာဇ, ဘောဇနဿ စတုတ္ထော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဘောဇနံ သဗ္ဗသတ္တာနံ ဇိဃစ္ဆာဒုဗ္ဗလ္ယပဋိဝိနောဒနံ, ဧဝမေဝ ခေါ, မဟာရာဇ, နိဗ္ဗာနံ သစ္ဆိကတံ သဗ္ဗသတ္တာနံ သဗ္ဗဒုက္ခဇိဃစ္ဆာဒုဗ္ဗလ္ယပဋိဝိနောဒနံ။ အယံ, မဟာရာဇ, ဘောဇနဿ ပဉ္စမော ဂုဏော နိဗ္ဗာနံ အနုပဝိဋ္ဌော။ ဣမေ ခေါ, မဟာရာဇ, ဘောဇနဿ ပဉ္စ ဂုဏာ နိဗ္ဗာနံ အနုပဝိဋ္ဌာ’’တိ။

‘‘ဘန္တေ နာဂသေန, ‘အာကာသဿ ဒသ ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ အာကာသဿ ဒသ ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, အာကာသော န ဇာယတိ, န ဇီယတိ, န မီယတိ, န စဝတိ, န ဥပ္ပဇ္ဇတိ, ဒုပ္ပသဟော, အစောရာဟရဏော, အနိဿိတော, ဝိဟဂဂမနော, နိရာဝရဏော, အနန္တော။ ဧဝမေဝ ခေါ, မဟာရာဇ, နိဗ္ဗာနံ န ဇာယတိ, န ဇီယတိ , န မီယတိ, န စဝတိ, န ဥပ္ပဇ္ဇတိ, ဒုပ္ပသဟံ, အစောရာဟရဏံ, အနိဿိတံ, အရိယဂမနံ, နိရာဝရဏံ, အနန္တံ။ ဣမေ ခေါ, မဟာရာဇ, အာကာသဿ ဒသ ဂုဏာ နိဗ္ဗာနံ အနုပဝိဋ္ဌာ’’တိ။

‘‘ဘန္တေ နာဂသေန, ‘မဏိရတနဿ တယော ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ မဏိရတနဿ တယော ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, မဏိရတနံ ကာမဒဒံ, ဧဝမေဝ ခေါ, မဟာရာဇ, နိဗ္ဗာနံ ကာမဒဒံ။ အယံ, မဟာရာဇ, မဏိရတနဿ ပဌမော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, မဏိရတနံ ဟာသကရံ, ဧဝမေဝ ခေါ, မဟာရာဇ, နိဗ္ဗာနံ ဟာသကရံ။ အယံ, မဟာရာဇ, မဏိရတနဿ ဒုတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, မဏိရတနံ ဥဇ္ဇောတတ္တကရံ, ဧဝမေဝ ခေါ, မဟာရာဇ, နိဗ္ဗာနံ ဥဇ္ဇောတတ္တကရံ [ဥဇ္ဇောတတ္ထကရံ (သီ။ ဣ။), ဥဇ္ဇောတိတတ္ထကရံ (သျာ။)]။ အယံ, မဟာရာဇ, မဏိရတနဿ တတိယော ဂုဏော နိဗ္ဗာနံ အနုပဝိဋ္ဌော။ ဣမေ ခေါ, မဟာရာဇ, မဏိရတနဿ တယော ဂုဏာ နိဗ္ဗာနံ အနုပဝိဋ္ဌာ’’တိ။

‘‘ဘန္တေ နာဂသေန, ‘လောဟိတစန္ဒနဿ တယော ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ လောဟိတစန္ဒနဿ တယော ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, လောဟိတစန္ဒနံ ဒုလ္လဘံ, ဧဝမေဝ ခေါ, မဟာရာဇ, နိဗ္ဗာနံ ဒုလ္လဘံ။ အယံ, မဟာရာဇ, လောဟိတစန္ဒနဿ ပဌမော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, လောဟိတစန္ဒနံ အသမသုဂန္ဓံ, ဧဝမေဝ ခေါ, မဟာရာဇ, နိဗ္ဗာနံ အသမသုဂန္ဓံ။ အယံ, မဟာရာဇ, လောဟိတစန္ဒနဿ ဒုတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, လောဟိတစန္ဒနံ သဇ္ဇနပသတ္ထံ [သဗ္ဗဇနပသတ္ထံ (သျာ။)], ဧဝမေဝ ခေါ, မဟာရာဇ, နိဗ္ဗာနံ အရိယသဇ္ဇနပသတ္ထံ။ အယံ, မဟာရာဇ, လောဟိတစန္ဒနဿ တတိယော ဂုဏော နိဗ္ဗာနံ အနုပဝိဋ္ဌော။ ဣမေ ခေါ, မဟာရာဇ, လောဟိတစန္ဒနဿ တယော ဂုဏာ နိဗ္ဗာနံ အနုပဝိဋ္ဌာ’’တိ။

‘‘ဘန္တေ နာဂသေန, ‘သပ္ပိမဏ္ဍဿ တယော ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ သပ္ပိမဏ္ဍဿ တယော ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, သပ္ပိမဏ္ဍော ဝဏ္ဏသမ္ပန္နော, ဧဝမေဝ ခေါ, မဟာရာဇ, နိဗ္ဗာနံ ဂုဏဝဏ္ဏသမ္ပန္နံ။ အယံ, မဟာရာဇ, သပ္ပိမဏ္ဍဿ ပဌမော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, သပ္ပိမဏ္ဍော ဂန္ဓသမ္ပန္နော, ဧဝမေဝ ခေါ, မဟာရာဇ, နိဗ္ဗာနံ သီလဂန္ဓသမ္ပန္နံ။ အယံ, မဟာရာဇ, သပ္ပိမဏ္ဍဿ ဒုတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, သပ္ပိမဏ္ဍော ရသသမ္ပန္နော, ဧဝမေဝ ခေါ , မဟာရာဇ, နိဗ္ဗာနံ ရသသမ္ပန္နံ။ အယံ, မဟာရာဇ, သပ္ပိမဏ္ဍဿ တတိယော ဂုဏော နိဗ္ဗာနံ အနုပဝိဋ္ဌော။ ဣမေ ခေါ, မဟာရာဇ, သပ္ပိမဏ္ဍဿ တယော ဂုဏာ နိဗ္ဗာနံ အနုပဝိဋ္ဌာ’’တိ။

‘‘ဘန္တေ နာဂသေန, ‘ဂိရိသိခရဿ ပဉ္စ ဂုဏာ နိဗ္ဗာနံ အနုပဝိဋ္ဌာ’တိ ယံ ဝဒေသိ, ကတမေ ဂိရိသိခရဿ ပဉ္စ ဂုဏာ နိဗ္ဗာနံ အနုပဝိဋ္ဌာ’’တိ? ‘‘ယထာ, မဟာရာဇ, ဂိရိသိခရံ အစ္စုဂ္ဂတံ, ဧဝမေဝ ခေါ, မဟာရာဇ, နိဗ္ဗာနံ အစ္စုဂတံ။ အယံ, မဟာရာဇ, ဂိရိသိခရဿ ပဌမော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဂိရိသိခရံ အစလံ, ဧဝမေဝ ခေါ, မဟာရာဇ, နိဗ္ဗာနံ အစလံ။ အယံ, မဟာရာဇ, ဂိရိသိခရဿ ဒုတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဂိရိသိခရံ ဒုရဓိရောဟံ, ဧဝမေဝ ခေါ, မဟာရာဇ, နိဗ္ဗာနံ ဒုရဓိရောဟံ သဗ္ဗကိလေသာနံ။ အယံ, မဟာရာဇ, ဂိရိသိခရဿ တတိယော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဂိရိသိခရံ သဗ္ဗဗီဇာနံ အဝိရူဟနံ, ဧဝမေဝ ခေါ, မဟာရာဇ, နိဗ္ဗာနံ သဗ္ဗကိလေသာနံ အဝိရူဟနံ။ အယံ, မဟာရာဇ, ဂိရိသိခရဿ စတုတ္ထော ဂုဏော နိဗ္ဗာနံ အနုပဝိဋ္ဌော။ ပုန စပရံ, မဟာရာဇ, ဂိရိသိခရံ အနုနယပ္ပဋိဃဝိပ္ပမုတ္တံ, ဧဝမေဝ ခေါ, မဟာရာဇ, နိဗ္ဗာနံ အနုနယပ္ပဋိဃဝိပ္ပမုတ္တံ။ အယံ, မဟာရာဇ, ဂိရိသိခရဿ ပဉ္စမော ဂုဏော နိဗ္ဗာနံ အနုပဝိဋ္ဌော ။ ဣမေ ခေါ, မဟာရာဇ, ဂိရိသိခရဿ ပဉ္စ ဂုဏာ နိဗ္ဗာနံ အနုပဝိဋ္ဌာ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

နိဗ္ဗာနရူပသဏ္ဌာနပဉ္ဟော ဒသမော။

၁၁။ နိဗ္ဗာနသစ္ဆိကရဏပဉ္ဟော

၁၁။ ‘‘ဘန္တေ နာဂသေန, တုမှေ ဘဏထ ‘နိဗ္ဗာနံ န အတီတံ, န အနာဂတံ, န ပစ္စုပ္ပန္နံ, န ဥပ္ပန္နံ န အနုပ္ပန္နံ န ဥပ္ပါဒနီယ’န္တိ။ ဣဓ, ဘန္တေ နာဂသေန, ယော ကောစိ သမ္မာပဋိပန္နော နိဗ္ဗာနံ သစ္ဆိကရောတိ, သော ဥပ္ပန္နံ သစ္ဆိကရောတိ, ဥဒါဟု ဥပ္ပါဒေတွာ သစ္ဆိကရောတီ’’တိ? ‘‘ယော ကောစိ, မဟာရာဇ, သမ္မာပဋိပန္နော နိဗ္ဗာနံ သစ္ဆိကရောတိ, သော န ဥပ္ပန္နံ သစ္ဆိကရောတိ, န ဥပ္ပါဒေတွာ သစ္ဆိကရောတိ, အပိ စ, မဟာရာဇ, အတ္ထေသာ နိဗ္ဗာနဓါတု, ယံ သော သမ္မာပဋိပန္နော သစ္ဆိကရောတီ’’တိ။

‘‘မာ, ဘန္တေ နာဂသေန, ဣမံ ပဉ္ဟံ ပဋိစ္ဆန္နံ ကတွာ ဒီပေဟိ, ဝိဝဋံ ပါကဋံ ကတွာ ဒီပေဟိ ဆန္ဒဇာတော ဥဿာဟဇာတော, ယံ တေ သိက္ခိတံ, တံ သဗ္ဗံ ဧတ္ထေဝါကိရာဟိ, ဧတ္ထာယံ ဇနော သမ္မူဠ္ဟော ဝိမတိဇာတော သံသယပက္ခန္ဒော, ဘိန္ဒေတံ အန္တောဒေါသသလ္လ’’န္တိ။ ‘‘အတ္ထေသာ, မဟာရာဇ, နိဗ္ဗာနဓါတု သန္တာ သုခါ ပဏီတာ, တံ သမ္မာပဋိပန္နော ဇိနာနုသိဋ္ဌိယာ သင်္ခါရေ သမ္မသန္တော ပညာယ သစ္ဆိကရောတိ။ ယထာ, မဟာရာဇ, အန္တေဝါသိကော အာစရိယာနုသိဋ္ဌိယာ ဝိဇ္ဇံ ပညာယ သစ္ဆိကရောတိ, ဧဝမေဝ ခေါ, မဟာရာဇ, သမ္မာပဋိပန္နော ဇိနာနုသိဋ္ဌိယာ ပညာယ နိဗ္ဗာနံ သစ္ဆိကရောတိ။

‘‘ကထံ ပန တံ နိဗ္ဗာနံ ဒဋ္ဌဗ္ဗန္တိ? အနီတိတော နိရုပဒ္ဒဝတော အဘယတော ခေမတော သန္တတော သုခတော သာတတော ပဏီတတော သုစိတော သီတလတော ဒဋ္ဌဗ္ဗံ။

‘‘ယထာ, မဟာရာဇ, ပုရိသော ဗဟုကဋ္ဌပုဉ္ဇေန ဇလိတကဋ္ဌိတေန အဂ္ဂိနာ ဒယှမာနော ဝါယာမေန တတော မုဉ္စိတွာ နိရဂ္ဂိကောကာသံ ပဝိသိတွာ တတ္ထ ပရမသုခံ လဘေယျ, ဧဝမေဝ ခေါ, မဟာရာဇ, ယော သမ္မာပဋိပန္နော, သော ယောနိသော မနသိကာရေန ဗျပဂတတိဝိဓဂ္ဂိသန္တာပံ ပရမသုခံ နိဗ္ဗာနံ သစ္ဆိကရောတိ။ ယထာ, မဟာရာဇ, အဂ္ဂိ, ဧဝံ တိဝိဓဂ္ဂိ ဒဋ္ဌဗ္ဗော; ယထာ အဂ္ဂိဂတော ပုရိသော, ဧဝံ သမ္မာပဋိပန္နော ဒဋ္ဌဗ္ဗော; ယထာ နိရဂ္ဂိကောကာသော, ဧဝံ နိဗ္ဗာနံ ဒဋ္ဌဗ္ဗံ။

‘‘ယထာ ဝါ ပန, မဟာရာဇ, ပုရိသော အဟိကုက္ကုရမနုဿကုဏပသရီရဝဠဉ္ဇကောဋ္ဌာသရာသိဂတော ကုဏပဇဋာဇဋိတန္တရမနုပဝိဋ္ဌော ဝါယာမေန တတော မုဉ္စိတွာ နိက္ကုဏပေါကာသံ ပဝိသိတွာ တတ္ထ ပရမသုခံ လဘေယျ, ဧဝမေဝ ခေါ, မဟာရာဇ, ယော သမ္မာပဋိပန္နော, သော ယောနိသော မနသိကာရေန ဗျပဂတကိလေသကုဏပံ ပရမသုခံ နိဗ္ဗာနံ သစ္ဆိကရောတိ။ ယထာ, မဟာရာဇ, ကုဏပံ, ဧဝံ ပဉ္စ ကာမဂုဏာ ဒဋ္ဌဗ္ဗာ; ယထာ ကုဏပဂတော ပုရိသော, ဧဝံ သမ္မာပဋိပန္နော ဒဋ္ဌဗ္ဗော; ယထာ နိက္ကုဏပေါကာသော, ဧဝံ နိဗ္ဗာနံ ဒဋ္ဌဗ္ဗံ။

‘‘ယထာ ဝါ ပန, မဟာရာဇ, ပုရိသော ဘီတော တသိတော ကမ္ပိတော ဝိပရီတဝိဗ္ဘန္တစိတ္တော ဝါယာမေန တတော မုဉ္စိတွာ ဒဠှံ ထိရံ အစလံ အဘယဋ္ဌာနံ ပဝိသိတွာ တတ္ထ ပရမသုခံ လဘေယျ, ဧဝမေဝ ခေါ, မဟာရာဇ, ယော သမ္မာပဋိပန္နော, သော ယောနိသော မနသိကာရေန ဗျပဂတဘယသန္တာသံ ပရမသုခံ နိဗ္ဗာနံ သစ္ဆိကရောတိ။ ယထာ, မဟာရာဇ, ဘယံ, ဧဝံ ဇာတိဇရာဗျာဓိမရဏံ ပဋိစ္စ အပရာပရံ ပဝတ္တဘယံ ဒဋ္ဌဗ္ဗံ; ယထာ ဘီတော ပုရိသော, ဧဝံ သမ္မာပဋိပန္နော ဒဋ္ဌဗ္ဗော; ယထာ အဘယဋ္ဌာနံ, ဧဝံ နိဗ္ဗာနံ ဒဋ္ဌဗ္ဗံ။

‘‘ယထာ ဝါ ပန, မဟာရာဇ, ပုရိသော ကိလိဋ္ဌမလိနကလလကဒ္ဒမဒေသေ ပတိတော ဝါယာမေန တံ ကလလကဒ္ဒမံ အပဝါဟေတွာ ပရိသုဒ္ဓဝိမလဒေသမုပဂန္တွာ တတ္ထ ပရမသုခံ လဘေယျ, ဧဝမေဝ ခေါ, မဟာရာဇ, ယော သမ္မာပဋိပန္နော, သော ယောနိသော မနသိကာရေန ဗျပဂတကိလေသမလကဒ္ဒမံ ပရမသုခံ နိဗ္ဗာနံ သစ္ဆိကရောတိ။ ယထာ, မဟာရာဇ, ကလလံ, ဧဝံ လာဘသက္ကာရသိလောကော ဒဋ္ဌဗ္ဗော; ယထာ ကလလဂတော ပုရိသော, ဧဝံ သမ္မာပဋိပန္နော ဒဋ္ဌဗ္ဗော; ယထာ ပရိသုဒ္ဓဝိမလဒေသော, ဧဝံ နိဗ္ဗာနံ ဒဋ္ဌဗ္ဗံ။

‘‘တဉ္စ ပန နိဗ္ဗာနံ သမ္မာပဋိပန္နော ကိန္တိ သစ္ဆိကရောတိ? ယော သော, မဟာရာဇ, သမ္မာပဋိပန္နော, သော သင်္ခါရာနံ ပဝတ္တံ သမ္မသတိ။ ပဝတ္တံ သမ္မသမာနော တတ္ထ ဇာတိံ ပဿတိ ဇရံ ပဿတိ ဗျာဓိံ ပဿတိ မရဏံ ပဿတိ, န တတ္ထ ကိဉ္စိ သုခံ သာတံ ပဿတိ အာဒိတောပိ မဇ္ဈတောပိ ပရိယောသာနတောပိ။ သော တတ္ထ ကိဉ္စိ န ဂယ္ဟူပဂံ ပဿတိ။ ယထာ, မဟာရာဇ, ပုရိသော ဒိဝသသန္တတ္တေ အယောဂုဠေ ဇလိတေ တတ္တေ ကဌိတေ အာဒိတောပိ မဇ္ဈတောပိ ပရိယောသာနတောပိ န ကိဉ္စိ ဂယ္ဟူပဂံ ပဒေသံ ပဿတိ, ဧဝမေဝ ခေါ, မဟာရာဇ, ယော သင်္ခါရာနံ ပဝတ္တံ သမ္မသတိ, သော ပဝတ္တံ သမ္မသမာနော တတ္ထ ဇာတိံ ပဿတိ ဇရံ ပဿတိ ဗျာဓိံ ပဿတိ မရဏံ ပဿတိ, န တတ္ထ ကိဉ္စိ သုခံ သာတံ ပဿတိ အာဒိတောပိ မဇ္ဈတောပိ ပရိယောသာနတောပိ။ သော တတ္ထ [ဣဒံ ပဒဒွယံ သီ။ ဣ။ ပေါတ္ထကေသု နတ္ထိ] န ကိဉ္စိ ဂယ္ဟူပဂံ ပဿတိ, တဿ ဂယ္ဟူပဂံ အပဿန္တဿ စိတ္တေ အရတိ သဏ္ဌာတိ, ကာယသ္မိံ ဍာဟော ဩက္ကမတိ, သော အတာဏော အသရဏော အသရဏီဘူတော ဘဝေသု နိဗ္ဗိန္ဒတိ။

‘‘ယထာ, မဟာရာဇ, ပုရိသော ဇလိတဇာလံ မဟန္တံ အဂ္ဂိက္ခန္ဓံ ပဝိသေယျ, သော တတ္ထ အတာဏော အသရဏော အသရဏီဘူတော အဂ္ဂိမှိ နိဗ္ဗိန္ဒေယျ, ဧဝမေဝ ခေါ, မဟာရာဇ, တဿ ဂယ္ဟူပဂံ အပဿန္တဿ စိတ္တေ အရတိ သဏ္ဌာတိ, ကာယသ္မိံ ဍာဟော ဩက္ကမတိ, သော အတာဏော အသရဏော အသရဏီဘူတော ဘဝေသု နိဗ္ဗိန္ဒတိ။

‘‘တဿ ပဝတ္တေ ဘယဒဿာဝိဿ ဧဝံ စိတ္တံ ဥပ္ပဇ္ဇတိ ‘သန္တတ္တံ ခေါ ပနေတံ ပဝတ္တံ သမ္ပဇ္ဇလိတံ ဗဟုဒုက္ခံ ဗဟူပါယာသံ, ယဒိ ကောစိ လဘေထ အပ္ပဝတ္တံ ဧတံ သန္တံ ဧတံ ပဏီတံ, ယဒိဒံ သဗ္ဗသင်္ခါရသမထော သဗ္ဗူပဓိပဋိနိဿဂ္ဂေါ တဏှက္ခယော ဝိရာဂေါ နိရောဓေါ နိဗ္ဗာန’န္တိ။ ဣတိ ဟေတံ [ဟိတံ (သီ။), ဟိ ဣဒံ (ဣ။)] တဿ အပ္ပဝတ္တေ စိတ္တံ ပက္ခန္ဒတိ ပသီဒတိ ပဟံသယတိ တုသယတိ [ပဟံသီယတိ ကုဟီယတိ (သီ။ ဣ။)]‘ပဋိလဒ္ဓံ ခေါ မေ နိဿရဏ’န္တိ။

‘‘ယထာ, မဟာရာဇ, ပုရိသော ဝိပ္ပနဋ္ဌော ဝိဒေသပက္ခန္ဒော နိဗ္ဗာဟနမဂ္ဂံ ဒိသွာ တတ္ထ ပက္ခန္ဒတိ ပသီဒတိ ပဟံသယတိ တုသယတိ [ပဟံသီယတိ ကုဟီယတိ (သီ။ ဣ။)] ‘ပဋိလဒ္ဓေါ မေ နိဗ္ဗာဟနမဂ္ဂေါ’တိ, ဧဝမေဝ ခေါ, မဟာရာဇ, ပဝတ္တေ ဘယဒဿာဝိဿ အပ္ပဝတ္တေ စိတ္တံ ပက္ခန္ဒတိ ပသီဒတိ ပဟံသယတိ တုသယတိ [ပဟံသီယတိ ကုဟီယတိ (သီ။ ဣ။)] ‘ပဋိလဒ္ဓံ ခေါ မေ နိဿရဏ’န္တိ။

‘‘သော အပ္ပဝတ္တတ္ထာယ မဂ္ဂံ အာယူဟတိ ဂဝေသတိ ဘာဝေတိ ဗဟုလီကရောတိ, တဿ တဒတ္ထံ သတိ သန္တိဋ္ဌတိ, တဒတ္ထံ ဝီရိယံ သန္တိဋ္ဌတိ, တဒတ္ထံ ဣတိ သန္တိဋ္ဌတိ, တဿ တံ စိတ္တံ အပရာပရံ မနသိကရောတော ပဝတ္တံ သမတိက္ကမိတွာ အပ္ပဝတ္တံ ဩက္ကမတိ, အပ္ပဝတ္တမနုပ္ပတ္တော, မဟာရာဇ, သမ္မာပဋိပန္နော ‘နိဗ္ဗာနံ သစ္ဆိကရောတီ’တိ ဝုစ္စတီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

နိဗ္ဗာနသစ္ဆိကရဏပဉ္ဟော ဧကာဒသမော။

၁၂။ နိဗ္ဗာနသန္နိဟိတပဉ္ဟော

၁၂။ ‘‘ဘန္တေ နာဂသေန, အတ္ထိ သော ပဒေသော ပုရတ္ထိမာယ ဝါ ဒိသာယ ဒက္ခိဏာယ ဝါ ဒိသာယ ပစ္ဆိမာယ ဝါ ဒိသာယ ဥတ္တရာယ ဝါ ဒိသာယ ဥဒ္ဓံ ဝါ အဓေါ ဝါ တိရိယံ ဝါ, ယတ္ထ နိဗ္ဗာနံ သန္နိဟိတ’’န္တိ? ‘‘နတ္ထိ, မဟာရာဇ, သော ပဒေသော ပုရတ္ထိမာယ ဝါ ဒိသာယ ဒက္ခိဏာယ ဝါ ဒိသာယ ပစ္ဆိမာယ ဝါ ဒိသာယ ဥတ္တရာယ ဝါ ဒိသာယ ဥဒ္ဓံ ဝါ အဓေါ ဝါ တိရိယံ ဝါ, ယတ္ထ နိဗ္ဗာနံ သန္နိဟိတ’’န္တိ။

‘‘ယဒိ, ဘန္တေ နာဂသေန, နတ္ထိ နိဗ္ဗာနဿ သန္နိဟိတောကာသော, တေန ဟိ နတ္ထိ နိဗ္ဗာနံ? ယေသဉ္စ တံ နိဗ္ဗာနံ သစ္ဆိကတံ, တေသမ္ပိ သစ္ဆိကိရိယာ မိစ္ဆာ, ကာရဏံ တတ္ထ ဝက္ခာမိ, ယထာ, ဘန္တေ နာဂသေန, မဟိယာ ဓညုဋ္ဌာနံ ခေတ္တံ အတ္ထိ, ဂန္ဓုဋ္ဌာနံ ပုပ္ဖံ အတ္ထိ, ပုပ္ဖုဋ္ဌာနံ ဂုမ္ဗော အတ္ထိ, ဖလုဋ္ဌာနံ ရုက္ခော အတ္ထိ, ရတနုဋ္ဌာနံ အာကရော အတ္ထိ, တတ္ထ ယော ကောစိ ယံ ယံ ဣစ္ဆတိ, သော တတ္ထ ဂန္တွာ တံ တံ ဟရတိ, ဧဝမေဝ ခေါ, ဘန္တေ နာဂသေန, ယဒိ နိဗ္ဗာနံ အတ္ထိ, တဿ နိဗ္ဗာနဿ ဥဋ္ဌာနောကာသောပိ ဣစ္ဆိတဗ္ဗော, ယသ္မာ စ ခေါ, ဘန္တေ နာဂသေန, နိဗ္ဗာနဿ ဥဋ္ဌာနောကာသော နတ္ထိ, တသ္မာ နတ္ထိ နိဗ္ဗာနန္တိ ဗြူမိ, ယေသဉ္စ နိဗ္ဗာနံ သစ္ဆိကတံ, တေသမ္ပိ သစ္ဆိကိရိယာ မိစ္ဆာ’’တိ။

‘‘နတ္ထိ , မဟာရာဇ, နိဗ္ဗာနဿ သန္နိဟိတောကာသော, အတ္ထိ စေတံ နိဗ္ဗာနံ, သမ္မာပဋိပန္နော ယောနိသော မနသိကာရေန နိဗ္ဗာနံ သစ္ဆိကရောတိ။ ယထာ ပန, မဟာရာဇ, အတ္ထိ အဂ္ဂိ နာမ, နတ္ထိ တဿ သန္နိဟိတောကာသော, ဒွေ ကဋ္ဌာနိ သံဃဋ္ဋေန္တော အဂ္ဂိံ အဓိဂစ္ဆတိ။ ဧဝမေဝ ခေါ, မဟာရာဇ, အတ္ထိ နိဗ္ဗာနံ, နတ္ထိ တဿ သန္နိဟိတောကာသော, သမ္မာပဋိပန္နော ယောနိသော မနသိကာရေန နိဗ္ဗာနံ သစ္ဆိကရောတိ။

‘‘ယထာ ဝါ ပန, မဟာရာဇ, အတ္ထိ သတ္တ ရတနာနိ နာမ။ သေယျထိဒံ, စက္ကရတနံ ဟတ္ထိရတနံ အဿရတနံ မဏိရတနံ ဣတ္ထိရတနံ ဂဟပတိရတနံ ပရိဏာယကရတနံ။ န စ တေသံ ရတနာနံ သန္နိဟိတောကာသော အတ္ထိ, ခတ္တိယဿ ပန သမ္မာပဋိပန္နဿ ပဋိပတ္တိဗလေန တာနိ ရတနာနိ ဥပဂစ္ဆန္တိ။ ဧဝမေဝ ခေါ, မဟာရာဇ, အတ္ထိ နိဗ္ဗာနံ, နတ္ထိ တဿ သန္နိဟိတောကာသော, သမ္မာပဋိပန္နော ယောနိသော မနသိကာရေန နိဗ္ဗာနံ သစ္ဆိကရောတီ’’တိ။

‘‘ဘန္တေ နာဂသေန, နိဗ္ဗာနဿ သန္နိဟိတောကာသော မာ ဟောတု, အတ္ထိ ပန တံ ဌာနံ, ယတ္ထ ဌိတော သမ္မာပဋိပန္နော နိဗ္ဗာနံ သစ္ဆိကရောတီ’’တိ? ‘‘အာမ, မဟာရာဇ , အတ္ထိ တံ ဌာနံ, ယတ္ထ ဌိတော သမ္မာပဋိပန္နော နိဗ္ဗာနံ သစ္ဆိကရောတီ’’တိ။

‘‘ကတမံ ပန, ဘန္တေ, တံ ဌာနံ, ယတ္ထ ဌိတော သမ္မာပဋိပန္နော နိဗ္ဗာနံ သစ္ဆိကရောတီ’’တိ? ‘‘သီလံ, မဟာရာဇ, ဌာနံ, သီလေ ပတိဋ္ဌိတော ယောနိသော မနသိကရောန္တော သက္ကယဝနေပိ စီနဝိလာတေပိ အလသန္ဒေပိ နိဂုမ္ဗေပိ [နိကုမ္ဗေပိ (သီ။ သျာ။ ဣ။)] ကာသိကောသလေပိ ကသ္မီရေပိ ဂန္ဓာရေပိ နဂမုဒ္ဓနိပိ ဗြဟ္မလောကေပိ ယတ္ထ ကတ္ထစိပိ ဌိတော သမ္မာပဋိပန္နော နိဗ္ဗာနံ သစ္ဆိကရောတိ။ ယထာ, မဟာရာဇ, ယော ကောစိ စက္ခုမာ ပုရိသော သကယဝနေပိ စီနဝိလာတေပိ အလသန္ဒေပိ နိဂုမ္ဗေပိ ကာသိကောသလေပိ ကသ္မီရေပိ ဂန္ဓာရေပိ နဂမုဒ္ဓနိပိ ဗြဟ္မလောကေပိ ယတ္ထ ကတ္ထစိပိ ဌိတော အာကာသံ ပဿတိ, ဧဝမေဝ ခေါ, မဟာရာဇ, သီလေ ပတိဋ္ဌိတော ယောနိသော မနသိကရောန္တော သကယဝနေပိ။ပေ။။ ယတ္ထ ကတ္ထစိပိ ဌိတော သမ္မာပဋိပန္နော နိဗ္ဗာနံ သစ္ဆိကရောတိ။

‘‘ယထာ ဝါ ပန, မဟာရာဇ, သကယဝနေပိ။ပေ။။ ယတ္ထ ကတ္ထစိပိ ဌိတဿ ပုဗ္ဗဒိသာ အတ္ထိ, ဧဝမေဝ ခေါ, မဟာရာဇ, သီလေ ပတိဋ္ဌိတဿ ယောနိသော မနသိကရောန္တဿ သက္ကယဝနေပိ။ပေ။။ ယတ္ထ ကတ္ထစိပိ ဌိတဿ သမ္မာပဋိပန္နဿ အတ္ထိ နိဗ္ဗာနသစ္ဆိကိရိယာ’’တိ။ ‘‘သာဓု, ဘန္တေ နာဂသေန, ဒေသိတံ တယာ နိဗ္ဗာနံ, ဒေသိတာ နိဗ္ဗာနသစ္ဆိကိရိယာ, ပရိက္ခတာ သီလဂုဏာ, ဒဿိတာ သမ္မာပဋိပတ္တိ, ဥဿာပိတော ဓမ္မဒ္ဓဇော, သဏ္ဌပိတာ ဓမ္မနေတ္တိ, အဝဉ္ဈော သုပ္ပယုတ္တာနံ သမ္မာပယောဂေါ, ဧဝမေတံ ဂဏိဝရပဝရ တထာ သမ္ပဋိစ္ဆာမီ’’တိ။

နိဗ္ဗာနသန္နိဟိတပဉ္ဟော ဒွါဒသမော။

ဝေဿန္တရဝဂ္ဂေါ တတိယော။

ဣမသ္မိံ ဝဂ္ဂေ ဒွါဒသ ပဉှာ။

၄။ အနုမာနဝဂ္ဂေါ

၁။ အနုမာနပဉ္ဟော

၁။ အထ ခေါ မိလိန္ဒော ရာဇာ ယေနာယသ္မာ နာဂသေနော တေနုပသင်္ကမိ, ဥပသင်္ကမိတွာ အာယသ္မန္တံ နာဂသေနံ အဘိဝါဒေတွာ ဧကမန္တံ နိသီဒိ, ဧကမန္တံ နိသိန္နော ခေါ မိလိန္ဒော ရာဇာ ဉာတုကာမော သောတုကာမော ဓါရေတုကာမော ဉာဏာလောကံ ဒဋ္ဌုကာမော အညာဏံ ဘိန္ဒိတုကာမော ဉာဏာလောကံ ဥပ္ပါဒေတုကာမော အဝိဇ္ဇန္ဓကာရံ နာသေတုကာမော အဓိမတ္တံ ဓိတိဉ္စ ဥဿာဟဉ္စ သတိဉ္စ သမ္ပဇညဉ္စ ဥပဋ္ဌပေတွာ အာယသ္မန္တံ နာဂသေနံ ဧတဒဝေါစ ‘‘ဘန္တေ နာဂသေန, ကိံ ပန ဗုဒ္ဓေါ တယာ ဒိဋ္ဌော’’တိ။ ‘‘န ဟိ, မဟာရာဇာ’’တိ။ ‘‘ကိံ ပန တေ အာစရိယေဟိ ဗုဒ္ဓေါ ဒိဋ္ဌော’’တိ? ‘‘န ဟိ, မဟာရာဇာ’’တိ။ ‘‘ဘန္တေ နာဂသေန, န ကိရ တယာ ဗုဒ္ဓေါ ဒိဋ္ဌော, နာပိ ကိရ တေ အာစရိယေဟိ ဗုဒ္ဓေါ ဒိဋ္ဌော, တေန ဟိ, ဘန္တေ နာဂသေန, နတ္ထိ ဗုဒ္ဓေါ, န ဟေတ္ထ ဗုဒ္ဓေါ ပညာယတီ’’တိ။

‘‘အတ္ထိ ပန တေ, မဟာရာဇ, ပုဗ္ဗကာ ခတ္တိယာ, ယေ တေ တဝ ခတ္တိယဝံသဿ ပုဗ္ဗင်္ဂမာ’’တိ? ‘‘အာမ, ဘန္တေ။ ကော သံသယော, အတ္ထိ ပုဗ္ဗကာ ခတ္တိယာ, ယေ မမ ခတ္တိယဝံသဿ ပုဗ္ဗင်္ဂမာ’’တိ။ ‘‘ဒိဋ္ဌပုဗ္ဗာ တယာ, မဟာရာဇ, ပုဗ္ဗကာ ခတ္တိယာ’’တိ? ‘‘န ဟိ ဘန္တေ’’တိ။ ‘‘ယေ ပန တံ, မဟာရာဇ, အနုသာသန္တိ ပုရောဟိတာ သေနာပတိနော အက္ခဒဿာ မဟာမတ္တာ, တေဟိ ပုဗ္ဗကာ ခတ္တိယာ ဒိဋ္ဌပုဗ္ဗာ’’တိ? ‘‘န ဟိ ဘန္တေ’’တိ။ ‘‘ယဒိ ပန တေ, မဟာရာဇ, ပုဗ္ဗကာ ခတ္တိယာ န ဒိဋ္ဌာ, နာပိ ကိရ တေ အနုသာသကေဟိ ပုဗ္ဗကာ ခတ္တိယာ ဒိဋ္ဌာ, တေန ဟိ နတ္ထိ ပုဗ္ဗကာ ခတ္တိယာ, န ဟေတ္ထ ပုဗ္ဗကာ ခတ္တိယာ ပညာယန္တီ’’တိ။

‘‘ဒိဿန္တိ, ဘန္တေ နာဂသေန, ပုဗ္ဗကာနံ ခတ္တိယာနံ အနုဘူတာနိ ပရိဘောဂဘဏ္ဍာနိ။ သေယျထိဒံ, သေတစ္ဆတ္တံ ဥဏှီသံ ပါဒုကာ ဝါလဗီဇနီ ခဂ္ဂရတနံ မဟာရဟာနိ စ သယနာနိ။ ယေဟိ မယံ ဇာနေယျာမ သဒ္ဒဟေယျာမ ‘အတ္ထိ ပုဗ္ဗကာ ခတ္တိယာ’တိ။ ‘‘ဧဝမေဝ ခေါ, မဟာရာဇ, မယမ္ပေတံ ဘဂဝန္တံ ဇာနေယျာမ သဒ္ဒဟေယျာမ။ အတ္ထိ တံ ကာရဏံ, ယေန မယံ ကာရဏေန ဇာနေယျာမ သဒ္ဒဟေယျာမ ‘အတ္ထိ သော ဘဂဝါ’တိ။ ကတမံ တံ ကာရဏံ? အတ္ထိ ခေါ, မဟာရာဇ, တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန အနုဘူတာနိ ပရိဘောဂဘဏ္ဍာနိ။ သေယျထိဒံ, စတ္တာရော သတိပဋ္ဌာနာ စတ္တာရော သမ္မပ္ပဓါနာ စတ္တာရော ဣဒ္ဓိပါဒါ ပဉ္စိန္ဒ္ရိယာနိ ပဉ္စ ဗလာနိ သတ္တ ဗောဇ္ဈင်္ဂါ အရိယော အဋ္ဌင်္ဂိကော မဂ္ဂေါ, ယေဟိ သဒေဝကော လောကော ဇာနာတိ သဒ္ဒဟတိ ‘အတ္ထိ သော ဘဂဝါ’တိ။ ဣမိနာ, မဟာရာဇ, ကာရဏေန ဣမိနာ ဟေတုနာ ဣမိနာ နယေန ဣမိနာ အနုမာနေန ဉာတဗ္ဗော ‘အတ္ထိ သော ဘဂဝါ’တိ။

‘‘‘ဗဟူ ဇနေ တာရယိတွာ၊ နိဗ္ဗုတော ဥပဓိက္ခယေ။

အနုမာနေန ဉာတဗ္ဗံ၊ အတ္ထိ သော ဒွိပဒုတ္တမော’’’တိ။

‘‘ဘန္တေ နာဂသေန, ဩပမ္မံ ကရောဟီ’’တိ။ ‘‘ယထာ, မဟာရာဇ, နဂရဝဍ္ဎကီ နဂရံ မာပေတုကာမော ပဌမံ တာဝ သမံ အနုန္နတမနောနတံ အသက္ခရပါသာဏံ နိရုပဒ္ဒဝမနဝဇ္ဇံ ရမဏီယံ ဘူမိဘာဂံ အနုဝိလောကေတွာ ယံ တတ္ထ ဝိသမံ, တံ သမံ ကာရာပေတွာ ခါဏုကဏ္ဋကံ ဝိသောဓါပေတွာ တတ္ထ နဂရံ မာပေယျ သောဘနံ ဝိဘတ္တံ ဘာဂသော မိတံ ဥက္ကိဏ္ဏပရိခါပါကာရံ ဒဠှဂေါပုရဋ္ဋာလကောဋ္ဋကံ ပုထုစစ္စရစတုက္ကသန္ဓိသိင်္ဃာဋကံ သုစိသမတလရာဇမဂ္ဂံ သုဝိဘတ္တအန္တရာပဏံ အာရာမုယျာနတဠာကပေါက္ခရဏိဥဒပါနသမ္ပန္နံ ဗဟုဝိဓဒေဝဋ္ဌာနပ္ပဋိမဏ္ဍိတံ သဗ္ဗဒေါသဝိရဟိတံ, သော တသ္မိံ နဂရေ သဗ္ဗထာ ဝေပုလ္လတ္တံ ပတ္တေ အညံ ဒေသံ ဥပဂစ္ဆေယျ, အထ တံ နဂရံ အပရေန သမယေန ဣဒ္ဓံ ဘဝေယျ ဖီတံ သုဘိက္ခံ ခေမံ သမိဒ္ဓံ သိဝံ အနီတိကံ နိရုပဒ္ဒဝံ နာနာဇနသမာကုလံ, ပုထူ ခတ္တိယာ ဗြာဟ္မဏာ ဝေဿာ သုဒ္ဒါ ဟတ္ထာရောဟာ အဿာရောဟာ ရထိကာ ပတ္တိကာ ဓနုဂ္ဂဟာ ထရုဂ္ဂဟာ စေလကာ စလကာ ပိဏ္ဍဒါယကာ ဥဂ္ဂါ ရာဇပုတ္တာ ပက္ခန္ဒိနော မဟာနာဂါ သူရာ ဝမ္မိနော ယောဓိနော ဒါသိကပုတ္တာ ဘဋိပုတ္တာ [ဒါသပုတ္တာ ဘဋ္ဋိပုတ္တာ (သီ။ ဣ။)] မလ္လကာ ဂဏကာ အာဠာရိကာ သူဒါ ကပ္ပကာ နဟာပကာ စုန္ဒာ မာလာကာရာ သုဝဏ္ဏကာရာ သဇ္ဈုကာရာ သီသကာရာ တိပုကာရာ လောဟကာရာ ဝဋ္ဋကာရာ အယောကာရာ မဏိကာရာ ပေသကာရာ ကုမ္ဘကာရာ ဝေဏုကာရာ လောဏကာရာ စမ္မကာရာ ရထကာရာ ဒန္တကာရာ ရဇ္ဇုကာရာ ကောစ္ဆကာရာ သုတ္တကာရာ ဝိလီဝကာရာ ဓနုကာရာ ဇိယကာရာ ဥသုကာရာ စိတ္တကာရာ ရင်္ဂကာရာ ရဇကာ တန္တဝါယာ တုန္နဝါယာ ဟေရညိကာ ဒုဿိကာ ဂန္ဓိကာ တိဏဟာရကာ ကဋ္ဌဟာရကာ ဘတကာ ပဏ္ဏိကာ ဖလိကာ [ဖလ္လိကာ (သီ။ ဣ။)] မူလိကာ ဩဒနိကာ ပူဝိကာ မစ္ဆိကာ မံသိကာ မဇ္ဇိကာ နဋကာ နစ္စကာ လင်္ဃကာ ဣန္ဒဇာလိကာ ဝေတာလိကာ မလ္လာ ဆဝဍာဟကာ ပုပ္ဖဆဍ္ဍကာ ဝေနာ နေသာဒါ ဂဏိကာ လာသိကာ ကုမ္ဘဒါသိယော သက္ကယဝနစီနဝိလာတာ ဥဇ္ဇေနကာ ဘာရုကစ္ဆကာ ကာသိကောသလာ ပရန္တကာ မာဂဓကာ သာကေတကာ သောရေယျကာ [သောရဋ္ဌကာ (သီ။ ဣ။)] ပါဝေယျကာ ကောဋုမ္ဗရမာထုရကာ အလသန္ဒကသ္မီရဂန္ဓာရာ တံ နဂရံ ဝါသာယ ဥပဂတာ နာနာဝိသယိနော ဇနာ နဝံ သုဝိဘတ္တံ အဒေါသမနဝဇ္ဇံ ရမဏီယံ တံ နဂရံ ပဿိတွာ အနုမာနေန ဇာနန္တိ ‘ဆေကော ဝတ ဘော သော နဂရဝဍ္ဎကီ, ယော ဣမဿ နဂရဿ မာပေတာ’တိ။ ဧဝမေဝ ခေါ, မဟာရာဇ, သော ဘဂဝါ အသမော အသမသမော အပ္ပဋိသမော အသဒိသော အတုလော အသင္ခ္ယေယော အပ္ပမေယျော အပရိမေယျော အမိတဂုဏော ဂုဏပါရမိပ္ပတ္တော အနန္တဓိတိ အနန္တတေဇော အနန္တဝီရိယော အနန္တဗလော ဗုဒ္ဓဗလပါရမိံ ဂတော သသေနမာရံ ပရာဇေတွာ ဒိဋ္ဌိဇာလံ ပဒါလေတွာ အဝိဇ္ဇံ ခေပေတွာ ဝိဇ္ဇံ ဥပ္ပါဒေတွာ ဓမ္မုက္ကံ ဓါရယိတွာ သဗ္ဗညုတံ ပါပုဏိတွာ ဝိဇိတသင်္ဂါမော ဓမ္မနဂရံ မာပေသိ။

‘‘ဘဂဝတော ခေါ, မဟာရာဇ, ဓမ္မနဂရံ သီလပါကာရံ ဟိရိပရိခံ ဉာဏဒွါရကောဋ္ဌကံ ဝီရိယအဋ္ဋာလကံ သဒ္ဓါဧသိကံ သတိဒေါဝါရိကံ ပညာပါသာဒံ သုတ္တန္တစစ္စရံ အဘိဓမ္မသိင်္ဃာဋကံ ဝိနယဝိနိစ္ဆယံ သတိပဋ္ဌာနဝီထိကံ, တဿ ခေါ ပန, မဟာရာဇ, သတိပဋ္ဌာနဝီထိယံ ဧဝရူပါ အာပဏာ ပသာရိတာ ဟောန္တိ။ သေယျထီဒံ, ပုပ္ဖာပဏံ ဂန္ဓာပဏံ ဖလာပဏံ အဂဒါပဏံ ဩသဓါပဏံ အမတာပဏံ ရတနာပဏံ သဗ္ဗာပဏ’’န္တိ။

‘‘ဘန္တေ နာဂသေန, ကတမံ ဗုဒ္ဓဿ ဘဂဝတော ပုပ္ဖာပဏ’’န္တိ? ‘‘အတ္ထိ ခေါ ပန, မဟာရာဇ, တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန အာရမ္မဏဝိဘတ္တိယော အက္ခာတာ။ သေယျထီဒံ, အနိစ္စသညာ ဒုက္ခသညာ အနတ္တသညာ အသုဘသညာ အာဒီနဝသညာ ပဟာနသညာ ဝိရာဂသညာ နိရောဓသညာ သဗ္ဗလောကေ အနဘိရတိသညာ သဗ္ဗသင်္ခါရေသု အနိစ္စသညာ အာနာပါနဿတိ ဥဒ္ဓုမာတကသညာ ဝိနီလကသညာ ဝိပုဗ္ဗကသညာ ဝိစ္ဆိဒ္ဒကသညာ ဝိက္ခာယိတကသညာ ဝိက္ခိတ္တကသညာ ဟတဝိက္ခိတ္တကသညာ လောဟိတကသညာ ပုဠဝကသညာ အဋ္ဌိကသညာ မေတ္တာသညာ ကရုဏာသညာ မုဒိတာသညာ ဥပေက္ခာသညာ မရဏာနုဿတိ ကာယဂတာသတိ, ဣမေ ခေါ, မဟာရာဇ, ဗုဒ္ဓေန ဘဂဝတာ အာရမ္မဏဝိဘတ္တိယော အက္ခာတာ။ တတ္ထ ယော ကောစိ ဇရာမရဏာ မုစ္စိတုကာမော, သော တေသု အညတရံ အာရမ္မဏံ ဂဏှာတိ, တေန အာရမ္မဏေန ရာဂါ ဝိမုစ္စတိ, ဒေါသာ ဝိမုစ္စတိ, မောဟာ ဝိမုစ္စတိ, မာနတော ဝိမုစ္စတိ, ဒိဋ္ဌိတော ဝိမုစ္စတိ, သံသာရံ တရတိ, တဏှာသောတံ နိဝါရေတိ, တိဝိဓံ မလံ ဝိသောဓေတိ, သဗ္ဗကိလေသေ ဥပဟန္တွာ အမလံ ဝိရဇံ သုဒ္ဓံ ပဏ္ဍရံ အဇာတိံ အဇရံ အမရံ သုခံ သီတိဘူတံ အဘယံ နဂရုတ္တမံ နိဗ္ဗာနနဂရံ ပဝိသိတွာ အရဟတ္တေ စိတ္တံ ဝိမောစေတိ, ဣဒံ ဝုစ္စတိ မဟာရာဇ ‘ဘဂဝတော ပုပ္ဖာပဏ’န္တိ။

‘‘‘ကမ္မမူလံ ဂဟေတွာန၊ အာပဏံ ဥပဂစ္ဆထ။

အာရမ္မဏံ ကိဏိတွာန၊ တတော မုစ္စထ မုတ္တိယာ’’’တိ။

‘‘ဘန္တေ နာဂသေန, ကတမံ ဗုဒ္ဓဿ ဘဂဝတော ဂန္ဓာပဏ’’န္တိ? ‘‘အတ္ထိ ခေါ ပန, မဟာရာဇ, တေန ဘဂဝတာ သီလဝိဘတ္တိယော အက္ခာတာ, ယေန သီလဂန္ဓေန အနုလိတ္တာ ဘဂဝတော ပုတ္တာ သဒေဝကံ လောကံ သီလဂန္ဓေန ဓူပေန္တိ သမ္ပဓူပေန္တိ, ဒိသမ္ပိ အနုဒိသမ္ပိ အနုဝါတမ္ပိ ပဋိဝါတမ္ပိ ဝါယန္တိ အတိဝါယန္တိ, ဖရိတွာ တိဋ္ဌန္တိ။ ကတမာ တာ သီလဝိဘတ္တိယော? သရဏသီလံ ပဉ္စင်္ဂသီလံ အဋ္ဌင်္ဂသီလံ ဒသင်္ဂသီလံ ပဉ္စုဒ္ဒေသပရိယာပန္နံ ပါတိမောက္ခသံဝရသီလံ။ ဣဒံ ဝုစ္စတိ, မဟာရာဇ, ‘ဘဂဝတော ဂန္ဓာပဏ’န္တိ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန –

‘‘‘န ပုပ္ဖဂန္ဓော ပဋိဝါတမေတိ၊ န စန္ဒနံ တဂ္ဂရမလ္လိကာ ဝါ။

သတဉ္စ ဂန္ဓော ပဋိဝါတမေတိ၊ သဗ္ဗာ ဒိသာ သပ္ပုရိသော ပဝါယတိ [ပဝါတိ (သီ။ ဣ။) ဓ။ ပ။ ၅၄ ပဿိတဗ္ဗံ]။

‘‘‘စန္ဒနံ တဂရံ ဝါပိ၊ ဥပ္ပလံ အထ ဝဿိကီ။

ဧတေသံ ဂန္ဓဇာတာနံ၊ သီလဂန္ဓော အနုတ္တရော။

‘‘‘အပ္ပမတ္တော အယံ ဂန္ဓော၊ ယွာယံ တဂရစန္ဒနံ။

ယော စ သီလဝတံ ဂန္ဓော၊ ဝါတိ ဒေဝေသု ဥတ္တမော’’’တိ။

‘‘ဘန္တေ နာဂသေန, ကတမံ ဗုဒ္ဓဿ ဘဂဝတော ဖလာပဏ’’န္တိ? ‘‘ဖလာနိ ခေါ, မဟာရာဇ, ဘဂဝတာ အက္ခာတာနိ။ သေယျထီဒံ, သောတာပတ္တိဖလံ သကဒါဂါမိဖလံ အနာဂါမိဖလံ အရဟတ္တဖလံ သုညတဖလသမာပတ္တိ အနိမိတ္တဖလသမာပတ္တိ အပ္ပဏိဟိတဖလသမာပတ္တိ ။ တတ္ထ ယော ကောစိ ယံ ဖလံ ဣစ္ဆတိ, သော ကမ္မမူလံ ဒတွာ ပတ္ထိတံ ဖလံ ကိဏာတိ။ ယဒိ သောတာပတ္တိဖလံ, ယဒိ သကဒါဂါမိဖလံ, ယဒိ အနာဂါမိဖလံ, ယဒိ အရဟတ္တဖလံ, ယဒိ သုညတဖလသမာပတ္တိံ, ယဒိ အနိမိတ္တဖလသမာပတ္တိံ, ယဒိ အပ္ပဏိဟိတဖလသမာပတ္တိံ။ ယထာ, မဟာရာဇ, ကဿစိ ပုရိသဿ ဓုဝဖလော အမ္ဗော ဘဝေယျ, သော န တာဝ တတော ဖလာနိ ပါတေတိ, ယာဝ ကယိကာ န အာဂစ္ဆန္တိ, အနုပ္ပတ္တေ ပန ကယိကေ မူလံ ဂဟေတွာ ဧဝံ အာစိက္ခတိ ‘အမ္ဘော ပုရိသ ဧသော ခေါ ဓုဝဖလော အမ္ဗော, တတော ယံ ဣစ္ဆသိ, ဧတ္တကံ ဖလံ ဂဏှာဟိ သလာဋုကံ ဝါ ဒေါဝိလံ ဝါ ကေသိကံ ဝါ အာမံ ဝါ ပက္ကံ ဝါ’တိ, သော တေန အတ္တနာ ဒိန္နမူလေန ယဒိ သလာဋုကံ ဣစ္ဆတိ, သလာဋုကံ ဂဏှာတိ, ယဒိ ဒေါဝိလံ ဣစ္ဆတိ, ဒေါဝိလံ ဂဏှာတိ, ယဒိ ကေသိကံ ဣစ္ဆတိ, ကေသိကံ ဂဏှာတိ, ယဒိ အာမကံ ဣစ္ဆတိ, အာမကံ ဂဏှာတိ, ယဒိ ပက္ကံ ဣစ္ဆတိ, ပက္ကံ ဂဏှာတိ။ ဧဝမေဝ ခေါ, မဟာရာဇ, ယော ယံ ဖလံ ဣစ္ဆတိ, သော ကမ္မမူလံ ဒတွာ ပတ္ထိတံ ဖလံ ဂဏှာတိ, ယဒိ သောတာပတ္တိဖလံ။ပေ။။ ယဒိ အပ္ပဏိဟိတဖလသမာပတ္တိံ, ဣဒံ ဝုစ္စတိ, မဟာရာဇ, ‘ဘဂဝတော ဖလာပဏ’န္တိ။

‘‘‘ကမ္မမူလံ ဇနာ ဒတွာ၊ ဂဏှန္တိ အမတမ္ဖလံ။

တေန တေ သုခိတာ ဟောန္တိ၊ ယေ ကီတာ အမတပ္ဖလ’’’န္တိ။

‘‘ဘန္တေ နာဂသေန, ကတမံ ဗုဒ္ဓဿ ဘဂဝတော အဂဒါပဏ’’န္တိ? ‘‘အဂဒါနိ ခေါ, မဟာရာဇ, ဘဂဝတာ အက္ခာတာနိ, ယေဟိ အဂဒေဟိ သော ဘဂဝါ သဒေဝကံ လောကံ ကိလေသဝိသတော ပရိမောစေတိ။ ကတမာနိ ပန တာနိ အဂဒါနိ? ယာနိမာနိ, မဟာရာဇ, ဘဂဝတာ စတ္တာရိ အရိယသစ္စာနိ အက္ခာတာနိ။ သေယျထီဒံ, ဒုက္ခံ အရိယသစ္စံ ဒုက္ခသမုဒယံ အရိယသစ္စံ ဒုက္ခနိရောဓံ အရိယသစ္စံ ဒုက္ခနိရောဓဂါမိနီ ပဋိပဒါ အရိယသစ္စံ, တတ္ထ ယေ ကေစိ အညာပေက္ခာ စတုသစ္စံ ဓမ္မံ သုဏန္တိ, တေ ဇာတိယာ ပရိမုစ္စန္တိ , ဇရာယ ပရိမုစ္စန္တိ, မရဏာ ပရိမုစ္စန္တိ, သောကပရိဒေဝဒုက္ခဒေါမနဿုပါယာသေဟိ ပရိမုစ္စန္တိ, ဣဒံ ဝုစ္စတိ မဟာရာဇ ‘ဘဂဝတော အဂဒါပဏ’န္တိ။

‘‘‘ယေ ကေစိ အဂဒါ လောကေ [လောကေ အဂဒါ (ဣ။)]၊ ဝိသာနံ ပဋိဗာဟကာ။

ဓမ္မာဂဒသမံ နတ္ထိ၊ ဧတံ ပိဝထ ဘိက္ခဝေါ’’’တိ။

‘‘ဘန္တေ နာဂသေန, ကတမံ ဗုဒ္ဓဿ ဘဂဝတော ဩသဓါပဏ’’န္တိ? ‘‘ဩသဓါနိ ခေါ, မဟာရာဇ, ဘဂဝတာ အက္ခာတာနိ, ယေဟိ ဩသဓေဟိ သော ဘဂဝါ ဒေဝမနုဿေ တိကိစ္ဆတိ။ သေယျထီဒံ, စတ္တာရော သတိပဋ္ဌာနာ စတ္တာရော သမ္မပ္ပဓါနာ စတ္တာရော ဣဒ္ဓိပါဒါ ပဉ္စိန္ဒ္ရိယာနိ ပဉ္စ ဗလာနိ သတ္တ ဗောဇ္ဈင်္ဂါ အရိယော အဋ္ဌင်္ဂိကော မဂ္ဂေါ, ဧတေဟိ ဩသဓေဟိ ဘဂဝါ မိစ္ဆာဒိဋ္ဌိံ ဝိရေစေတိ, မိစ္ဆာသင်္ကပ္ပံ ဝိရေစေတိ, မိစ္ဆာဝါစံ ဝိရေစေတိ, မိစ္ဆာကမ္မန္တံ ဝိရေစေတိ, မိစ္ဆာအာဇီဝံ ဝိရေစေတိ, မိစ္ဆာဝါယာမံ ဝိရေစေတိ, မိစ္ဆာသတိံ ဝိရေစေတိ, မိစ္ဆာသမာဓိံ ဝိရေစေတိ, လောဘဝမနံ ကာရေတိ, ဒေါသဝမနံ ကာရေတိ, မောဟဝမနံ ကာရေတိ, မာနဝမနံ ကာရေတိ, ဒိဋ္ဌိဝမနံ ကာရေတိ, ဝိစိကိစ္ဆာဝမနံ ကာရေတိ, ဥဒ္ဓစ္စဝမနံ ကာရေတိ, ထိနမိဒ္ဓဝမနံ ကာရေတိ, အဟိရိကာနောတ္တပ္ပဝမနံ ကာရေတိ, သဗ္ဗကိလေသဝမနံ ကာရေတိ, ဣဒံ ဝုစ္စတိ, မဟာရာဇ, ‘ဘဂဝတော ဩသဓါပဏ’န္တိ။

‘‘‘ယေ ကေစိ ဩသဓါ လောကေ၊ ဝိဇ္ဇန္တိ ဝိဝိဓါ ဗဟူ။

ဓမ္မောသဓသမံ နတ္ထိ၊ ဧတံ ပိဝထ ဘိက္ခဝေါ။

‘‘‘ဓမ္မောသဓံ ပိဝိတွာန၊ အဇရာမရဏာ သိယုံ။

ဘာဝယိတွာ စ ပဿိတွာ၊ နိဗ္ဗုတာ ဥပဓိက္ခယေ’’’တိ။

‘‘ဘန္တေ နာဂသေန, ကတမံ ဗုဒ္ဓဿ ဘဂဝတော အမတာပဏ’’န္တိ? ‘‘အမတံ ခေါ, မဟာရာဇ, ဘဂဝတာ အက္ခာတံ, ယေန အမတေန သော ဘဂဝါ သဒေဝကံ လောကံ အဘိသိဉ္စိ , ယေန အမတေန အဘိသိတ္တာ ဒေဝမနုဿာ ဇာတိဇရာဗျာဓိမရဏသောကပရိဒေဝဒုက္ခဒေါမနဿုပါယာသေဟိ ပရိမုစ္စိံသု။ ကတမံ တံ အမတံ? ယဒိဒံ ကာယဂတာသတိ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန ‘အမတံ တေ, ဘိက္ခဝေ, ပရိဘုဉ္ဇန္တိ, ယေ ကာယဂတာသတိံ ပရိဘုဉ္ဇန္တီ’တိ။ ဣဒံ ဝုစ္စတိ, မဟာရာဇ, ‘ဘဂဝတော အမတာပဏ’န္တိ။

‘‘‘ဗျာဓိတံ ဇနတံ ဒိသွာ၊ အမတာပဏံ ပသာရယိ။

ကမ္မေန တံ ကိဏိတွာန၊ အမတံ အာဒေထ ဘိက္ခဝေါ’’’တိ။

‘‘ဘန္တေ နာဂသေန, ကတမံ ဗုဒ္ဓဿ ဘဂဝတော ရတနာပဏ’’န္တိ? ‘‘ရတနာနိ ခေါ, မဟာရာဇ, ဘဂဝတာ အက္ခာတာနိ, ယေဟိ ရတနေဟိ ဝိဘူသိတာ ဘဂဝတော ပုတ္တာ သဒေဝကံ လောကံ ဝိရောစန္တိ ဩဘာသေန္တိ ပဘာသေန္တိ ဇလန္တိ ပဇ္ဇလန္တိ ဥဒ္ဓံ အဓေါ တိရိယံ အာလောကံ ဒဿေန္တိ။ ကတမာနိ တာနိ ရတနာနိ? သီလရတနံ သမာဓိရတနံ ပညာရတနံ ဝိမုတ္တိရတနံ ဝိမုတ္တိဉာဏဒဿနရတနံ ပဋိသမ္ဘိဒါရတနံ ဗောဇ္ဈင်္ဂရတနံ။

‘‘ကတမံ, မဟာရာဇ, ဘဂဝတော သီလရတနံ? ပါတိမောက္ခသံဝရသီလံ ဣန္ဒ္ရိယသံဝရသီလံ အာဇီဝပါရိသုဒ္ဓိသီလံ ပစ္စယသန္နိဿိတသီလံ စူဠသီလံ မဇ္ဈိမသီလံ မဟာသီလံ မဂ္ဂသီလံ ဖလသီလံ။ သီလရတနေန ခေါ, မဟာရာဇ, ဝိဘူသိတဿ ပုဂ္ဂလဿ သဒေဝကော လောကော သမာရကော သဗြဟ္မကော သဿမဏဗြာဟ္မဏီ ပဇာ ပိဟယတိ ပတ္ထေတိ, သီလရတနပိဠန္ဓော ခေါ, မဟာရာဇ, ဘိက္ခု ဒိသမ္ပိ အနုဒိသမ္ပိ ဥဒ္ဓမ္ပိ အဓေါပိ တိရိယမ္ပိ ဝိရောစတိ အတိဝိရောစတိ [အတိရောစတိ (သီ။ ဣ။)], ဟေဋ္ဌတော အဝီစိံ ဥပရိတော ဘဝဂ္ဂံ ဥပါဒါယ ဧတ္ထန္တရေ သဗ္ဗရတနာနိ အတိက္ကမိတွာ [အတိသယိတွာ (သီ။ ဣ။)] အဘိဘဝိတွာ အဇ္ဈောတ္ထရိတွာ တိဋ္ဌတိ, ဧဝရူပါနိ ခေါ, မဟာရာဇ, သီလရတနာနိ ဘဂဝတော ရတနာပဏေ ပသာရိတာနိ, ဣဒံ ဝုစ္စတိ မဟာရာဇ ‘ဘဂဝတော သီလရတန’န္တိ။

‘‘‘ဧဝရူပါနိ သီလာနိ၊ သန္တိ ဗုဒ္ဓဿ အာပဏေ။

ကမ္မေန တံ ကိဏိတွာန၊ ရတနံ ဝေါ ပိဠန္ဓထာ’တိ။

‘‘ကတမံ, မဟာရာဇ, ဘဂဝတော သမာဓိရတနံ? သဝိတက္ကသဝိစာရော သမာဓိ, အဝိတက္ကဝိစာရမတ္တော သမာဓိ, အဝိတက္ကအဝိစာရော သမာဓိ, သုညတော သမာဓိ, အနိမိတ္တော သမာဓိ, အပ္ပဏိဟိတော သမာဓိ။ သမာဓိရတနံ ခေါ, မဟာရာဇ, ပိဠန္ဓဿ ဘိက္ခုနော ယေ တေ ကာမဝိတက္ကဗျာပါဒဝိတက္ကဝိဟိံသာဝိတက္ကမာနုဒ္ဓစ္စဒိဋ္ဌိဝိစိကိစ္ဆာကိလေသဝတ္ထူနိ ဝိဝိဓါနိ စ ကုဝိတက္ကာနိ, တေ သဗ္ဗေ သမာဓိံ အာသဇ္ဇ ဝိကိရန္တိ ဝိဓမန္တိ ဝိဒ္ဓံသန္တိ န သဏ္ဌန္တိ [န သဏ္ဌဟန္တိ (သီ။)] န ဥပလိမ္ပန္တိ [န ဥပလိပ္ပန္တိ (သီ။ ဣ။)]။ ယထာ, မဟာရာဇ, ဝါရိ ပေါက္ခရပတ္တေ ဝိကိရတိ ဝိဓမတိ ဝိဒ္ဓံသတိ န သဏ္ဌာတိ န ဥပလိမ္ပတိ။ တံ ကိဿ ဟေတု? ပရိသုဒ္ဓတ္တာ ပဒုမဿ။ ဧဝမေဝ ခေါ, မဟာရာဇ, သမာဓိရတနံ ပိဠန္ဓဿ ဘိက္ခုနော ယေ တေ ကာမဝိတက္ကဗျာပါဒဝိတက္ကဝိဟိံသာဝိတက္ကမာနုဒ္ဓစ္စ ဒိဋ္ဌိဝိစိကိစ္ဆာကိလေသဝတ္ထူနိ ဝိဝိဓါနိ စ ကုဝိတက္ကာနိ, တေ သဗ္ဗေ သမာဓိံ အာသဇ္ဇ ဝိကိရန္တိ ဝိဓမန္တိ ဝိဒ္ဓံသန္တိ န သဏ္ဌန္တိ န ဥပလိမ္ပန္တိ။ တံ ကိဿ ဟေတု? ပရိသုဒ္ဓတ္တာ သမာဓိဿ။ ဣဒံ ဝုစ္စတိ, မဟာရာဇ, ‘ဘဂဝတော သမာဓိရတန’န္တိ, ဧဝရူပါနိ ခေါ, မဟာရာဇ, သမာဓိရတနာနိ ဘဂဝတော ရတနာပဏေ ပသာရိတာနိ။

‘‘‘သမာဓိရတနမာလဿ ၊ ကုဝိတက္ကာ န ဇာယရေ။

န စ ဝိက္ခိပတေ စိတ္တံ၊ ဧတံ တုမှေ ပိဠန္ဓထာ’တိ။

‘‘ကတမံ, မဟာရာဇ, ဘဂဝတော ပညာရတနံ? ယာယ, မဟာရာဇ, ပညာယ အရိယသာဝကော ‘ဣဒံ ကုသလ’န္တိ ယထာဘူတံ ပဇာနာတိ, ‘ဣဒံ အကုသလ’န္တိ ယထာဘူတံ ပဇာနာတိ, ‘ဣဒံ သာဝဇ္ဇံ, ဣဒံ အနဝဇ္ဇံ, ဣဒံ သေဝိတဗ္ဗံ, ဣဒံ န သေဝိတဗ္ဗံ, ဣဒံ ဟီနံ, ဣဒံ ပဏီတံ, ဣဒံ ကဏှံ, ဣဒံ သုက္ကံ, ဣဒံ ကဏှသုက္ကသပ္ပဋိဘာဂ’န္တိ ယထာဘူတံ ပဇာနာတိ, ‘ဣဒံ ဒုက္ခ’န္တိ ယထာဘူတံ ပဇာနာတိ, ‘အယံ ဒုက္ခသမုဒယော’တိ ယထာဘူတံ ပဇာနာတိ, ‘အယံ ဒုက္ခနိရောဓေါ’တိ ယထာဘူတံ ပဇာနာတိ, ‘အယံ ဒုက္ခနိရောဓဂါမိနီ ပဋိပဒါ’တိ ယထာဘူတံ ပဇာနာတိ။ ဣဒံ ဝုစ္စတိ မဟာရာဇ ‘ဘဂဝတော ပညာရတန’န္တိ။

‘‘‘ပညာရတနမာလဿ၊ န စိရံ ဝတ္တတေ ဘဝေါ။

ခိပ္ပံ ဖဿေတိ [ဖုဿေတိ (သျာ။)၊ ပဿတိ (က။)] အမတံ၊ န စ သော ရောစတေ ဘဝေ’တိ။

‘‘ကတမံ , မဟာရာဇ, ဘဂဝတော ဝိမုတ္တိရတနံ’’? ‘‘ဝိမုတ္တိရတနံ [ဝိမုတ္တိရတနန္တိ (သီ။ ဣ။)] ခေါ, မဟာရာဇ, အရဟတ္တံ ဝုစ္စတိ, အရဟတ္တံ ပတ္တော ခေါ, မဟာရာဇ, ဘိက္ခု ‘ဝိမုတ္တိရတနံ ပိဠန္ဓော’တိ ဝုစ္စတိ။ ယထာ, မဟာရာဇ, ပုရိသော မုတ္တာကလာပမဏိကလာပပဝါဠကလာပါဘရဏပ္ပဋိမဏ္ဍိတော [ပဝါဠာဘရဏပဋိပဏ္ဍိတော (သီ။ ဣ။)] အဂလုတဂရတာလီသကလောဟိတစန္ဒနာနုလိတ္တဂတ္တော နာဂပုန္နာဂသာလသလဠစမ္ပကယူထိကာတိမုတ္တကပါဋလုပ္ပလဝဿိကမလ္လိကာဝိစိတ္တော သေသဇနေ အတိက္ကမိတွာ ဝိရောစတိ အတိဝိရောစတိ ဩဘာသတိ ပဘာသတိ သမ္ပဘာသတိ ဇလတိ ပဇ္ဇလတိ အဘိဘဝတိ အဇ္ဈောတ္ထရတိ မာလာဂန္ဓရတနာဘရဏေဟိ, ဧဝမေဝ ခေါ, မဟာရာဇ, အရဟတ္တံ ပတ္တော ခီဏာသဝေါ ဝိမုတ္တိရတနပိဠန္ဓော ဥပါဒါယုပါဒါယ ဝိမုတ္တာနံ ဘိက္ခူနံ အတိက္ကမိတွာ သမတိက္ကမိတွာ ဝိရောစတိ အတိဝိရောစတိ ဩဘာသတိ ပဘာသတိ သမ္ပဘာသတိ ဇလတိ ပဇ္ဇလတိ အဘိဘဝတိ အဇ္ဈောတ္ထရတိ ဝိမုတ္တိယာ။ တံ ကိဿ ဟေတု? အဂ္ဂံ, မဟာရာဇ, ဧတံ ပိဠန္ဓနံ သဗ္ဗပိဠန္ဓနာနံ, ယဒိဒံ ဝိမုတ္တိပိဠန္ဓနံ။ ဣဒံ ဝုစ္စတိ, မဟာရာဇ, ‘ဘဂဝတော ဝိမုတ္တိရတန’န္တိ။

‘‘‘မဏိမာလာဓရံ ဂေဟ၊ ဇနော [ဂေဟံ၊ ဇနော (က။)] သာမိံ ဥဒိက္ခတိ။

ဝိမုတ္တိရတနမာလန္တု၊ ဥဒိက္ခန္တိ သဒေဝကာ’တိ။

‘‘ကတမံ မဟာရာဇ, ဘဂဝတော ဝိမုတ္တိဉာဏဒဿနရတနံ? ပစ္စဝေက္ခဏဉာဏံ, မဟာရာဇ, ဘဂဝတော ဝိမုတ္တိဉာဏဒဿနရတနန္တိ ဝုစ္စတိ, ယေန ဉာဏေန အရိယသာဝကော မဂ္ဂဖလနိဗ္ဗာနာနိ ပဟီနကိလေသာဝသိဋ္ဌကိလေသေ စ ပစ္စဝေက္ခတိ။

‘‘‘ယေ ဉာဏေန ဗုဇ္ဈန္တိ၊ အရိယာ ကတကိစ္စတံ။

တံ ဉာဏရတနံ လဒ္ဓုံ၊ ဝါယမေထ ဇိနောရသာ’တိ။

‘‘ကတမံ, မဟာရာဇ, ဘဂဝတော ပဋိသမ္ဘိဒါရတနံ? စတဿော ခေါ, မဟာရာဇ, ပဋိသမ္ဘိဒါယော အတ္ထပဋိသမ္ဘိဒါ ဓမ္မပဋိသမ္ဘိဒါ နိရုတ္တိပဋိသမ္ဘိဒါ ပဋိဘာနပဋိသမ္ဘိဒါတိ။ ဣမေဟိ ခေါ, မဟာရာဇ, စတူဟိ ပဋိသမ္ဘိဒါရတနေဟိ သမလင်္ကတော ဘိက္ခု ယံ ယံ ပရိသံ ဥပသင်္ကမတိ, ယဒိ ခတ္တိယပရိသံ, ယဒိ ဗြာဟ္မဏပရိသံ, ယဒိ ဂဟပတိပရိသံ, ယဒိ သမဏပရိသံ, ဝိသာရဒေါ ဥပသင်္ကမတိ အမင္ကုဘူတော အဘီရု အစ္ဆမ္ဘီ အနုတြာသီ ဝိဂတလောမဟံသော ပရိသံ ဥပသင်္ကမတိ။

‘‘ယထာ, မဟာရာဇ, ယောဓေါ သင်္ဂါမသူရော သန္နဒ္ဓပဉ္စာဝုဓေါ အစ္ဆမ္ဘိတော [အသမ္ဘီတော (သီ။ ဣ။)] သင်္ဂါမံ ဩတရတိ, ‘သစေ အမိတ္တာ ဒူရေ ဘဝိဿန္တိ ဥသုနာ ပါတယိဿာမိ, တတော ဩရတော ဘဝိဿန္တိ သတ္တိယာ ပဟရိဿာမိ, တတော ဩရတော ဘဝိဿန္တိ ကဏယေန ပဟရိဿာမိ, ဥပဂတံ သန္တံ မဏ္ဍလဂ္ဂေန ဒွိဓါ ဆိန္ဒိဿာမိ, ကာယူပဂတံ ဆုရိကာယ ဝိနိဝိဇ္ဈိဿာမီ’တိ [ဝိဇ္ဈိဿာမီတိ (သီ။)], ဧဝမေဝ ခေါ, မဟာရာဇ, စတုပဋိသမ္ဘိဒါရတနမဏ္ဍိတော ဘိက္ခု အစ္ဆမ္ဘိတော ပရိသံ ဥပသင်္ကမတိ။ ယော ကောစိ မံ အတ္ထပဋိသမ္ဘိဒေ ပဉ္ဟံ ပုစ္ဆိဿတိ, တဿ အတ္ထေန အတ္ထံ ကထယိဿာမိ, ကာရဏေန ကာရဏံ ကထယိဿာမိ, ဟေတုနာ ဟေတုံ ကထယိဿာမိ, နယေန နယံ ကထယိဿာမိ, နိဿံသယံ ကရိဿာမိ, ဝိမတိံ ဝိဝေစေဿာမိ, တောသယိဿာမိ ပဉ္ဟဝေယျာကရဏေန။

‘‘ယော ကောစိ မံ ဓမ္မပဋိသမ္ဘိဒေ ပဉ္ဟံ ပုစ္ဆိဿတိ, တဿ ဓမ္မေန ဓမ္မံ ကထယိဿာမိ, အမတေန အမတံ ကထယိဿာမိ, အသင်္ခတေန အသင်္ခတံ ကထယိဿာမိ, နိဗ္ဗာနေန နိဗ္ဗာနံ ကထယိဿာမိ, သုညတေန သုညတံ ကထယိဿာမိ , အနိမိတ္တေန အနိမိတ္တံ ကထယိဿာမိ, အပ္ပဏိဟိတေန အပ္ပဏိဟိတံ ကထယိဿာမိ, အနေဇေန အနေဇံ ကထယိဿာမိ, နိဿံသယံ ကရိဿာမိ, ဝိမတိံ ဝိဝေစေဿာမိ, တောသယိဿာမိ ပဉှာဝေယျာကရဏေန။

‘‘ယော ကောစိ မံ နိရုတ္တိပဋိသမ္ဘိဒေ ပဉ္ဟံ ပုစ္ဆိဿတိ, တဿ နိရုတ္တိယာ နိရုတ္တိံ ကထယိဿာမိ, ပဒေန ပဒံ ကထယိဿာမိ, အနုပဒေန အနုပဒံ ကထယိဿာမိ, အက္ခရေန အက္ခရံ ကထယိဿာမိ, သန္ဓိယာ သန္ဓိံ ကထယိဿာမိ, ဗျဉ္ဇနေန ဗျဉ္ဇနံ ကထယိဿာမိ, အနုဗျဉ္ဇနေန အနုဗျဉ္ဇနံ ကထယိဿာမိ, ဝဏ္ဏေန ဝဏ္ဏံ ကထယိဿာမိ, သရေန သရံ ကထယိဿာမိ, ပညတ္တိယာ ပညတ္တိံ ကထယိဿာမိ, ဝေါဟာရေန ဝေါဟာရံ ကထယိဿာမိ, နိဿံသယံ ကရိဿာမိ, ဝိမတိံ ဝိဝေစေဿာမိ, တောသယိဿာမိ ပဉ္ဟဝေယျာကရဏေန။

‘‘ယော ကောစိ မံ ပဋိဘာနပဋိသမ္ဘိဒေ ပဉ္ဟံ ပုစ္ဆိဿတိ, တဿ ပဋိဘာနေန ပဋိဘာနံ ကထယိဿာမိ, ဩပမ္မေန ဩပမ္မံ ကထယိဿာမိ, လက္ခဏေန လက္ခဏံ ကထယိဿာမိ, ရသေန ရသံ ကထယိဿာမိ, နိဿံသယံ ကရိဿာမိ, ဝိမတိံ ဝိဝေစေဿာမိ, တောသယိဿာမိ ပဉ္ဟဝေယျာကရဏေနာတိ, ဣဒံ ဝုစ္စတိ, မဟာရာဇ, ‘ဘဂဝတော ပဋိသမ္ဘိဒါရတန’န္တိ။

‘‘‘ပဋိသမ္ဘိဒါ ကိဏိတွာန၊ ဉာဏေန ဖဿယေယျ ယော။

အစ္ဆမ္ဘိတော အနုဗ္ဗိဂ္ဂေါ၊ အတိရောစတိ သဒေဝကေ’တိ။

‘‘ကတမံ, မဟာရာဇ, ဘဂဝတော ဗောဇ္ဈင်္ဂရတနံ? သတ္တိမေ, မဟာရာဇ, ဗောဇ္ဈင်္ဂါ, သတိသမ္ဗောဇ္ဈင်္ဂေါ ဓမ္မဝိစယသမ္ဗောဇ္ဈင်္ဂေါ ဝီရိယသမ္ဗောဇ္ဈင်္ဂေါ ဣတိသမ္ဗောဇ္ဈင်္ဂေါ ပဿဒ္ဓိသမ္ဗောဇ္ဈင်္ဂေါ သမာဓိသမ္ဗောဇ္ဈင်္ဂေါ ဥပေက္ခာသမ္ဗောဇ္ဈင်္ဂေါ။ ဣမေဟိ ခေါ, မဟာရာဇ, သတ္တဟိ ဗောဇ္ဈင်္ဂရတနေဟိ ပဋိမဏ္ဍိတော ဘိက္ခု သဗ္ဗံ တမံ အဘိဘုယျ သဒေဝကံ လောကံ ဩဘာသေတိ ပဘာသေတိ အာလောကံ ဇနေတိ။ ဣဒံ ဝုစ္စတိ, မဟာရာဇ, ‘ဘဂဝတော ဗောဇ္ဈင်္ဂရတန’န္တိ။

‘‘‘ဗောဇ္ဈင်္ဂရတနမာလဿ ၊ ဥဋ္ဌဟန္တိ [ဥပဋ္ဌဟန္တိ (က။)၊ ဥဒိက္ခန္တိ (သျာ။)] သဒေဝကာ။

ကမ္မေန တံ ကိဏိတွာန၊ ရတနံ ဝေါ ပိဠန္ဓထာ’’’တိ။

‘‘ဘန္တေ နာဂသေန, ကတမံ ဗုဒ္ဓဿ ဘဂဝတော သဗ္ဗာပဏ’’န္တိ? ‘‘သဗ္ဗာပဏံ ခေါ, မဟာရာဇ, ဘဂဝတော နဝင်္ဂံ ဗုဒ္ဓဝစနံ သာရီရိကာနိ ပါရိဘောဂိကာနိ စေတိယာနိ သံဃရတနဉ္စ။ သဗ္ဗာပဏေ, မဟာရာဇ, ဘဂဝတာ ဇာတိသမ္ပတ္တိ ပသာရိတာ, ဘောဂသမ္ပတ္တိ ပသာရိတာ, အာယုသမ္ပတ္တိ ပသာရိတာ, အာရောဂ္ယသမ္ပတ္တိ ပသာရိတာ, ဝဏ္ဏသမ္ပတ္တိ ပသာရိတာ, ပညာသမ္ပတ္တိ ပသာရိတာ, မာနုသိကသမ္ပတ္တိ ပသာရိတာ, ဒိဗ္ဗသမ္ပတ္တိ ပသာရိတာ, နိဗ္ဗာနသမ္ပတ္တိ ပသာရိတာ။ တတ္ထ ယေ တံ တံ သမ္ပတ္တိံ ဣစ္ဆန္တိ, တေ ကမ္မမူလံ ဒတွာ ပတ္ထိတပတ္ထိတံ သမ္ပတ္တိံ ကိဏန္တိ, ကေစိ သီလသမာဒါနေန ကိဏန္တိ, ကေစိ ဥပေါသထကမ္မေန ကိဏန္တိ, အပ္ပမတ္တကေနပိ ကမ္မမူလေန ဥပါဒါယုပါဒါယ သမ္ပတ္တိယော ပဋိလဘန္တိ။ ယထာ, မဟာရာဇ, အာပဏိကဿ အာပဏေ တိလမုဂ္ဂမာသေ ပရိတ္တကေနပိ တဏ္ဍုလမုဂ္ဂမာသေန အပ္ပကေနပိ မူလေန ဥပါဒါယုပါဒါယ ဂဏှန္တိ, ဧဝမေဝ ခေါ, မဟာရာဇ, ဘဂဝတော သဗ္ဗာပဏေ အပ္ပမတ္တကေနပိ ကမ္မမူလေန ဥပါဒါယုပါဒါယ သမ္ပတ္တိယော ပဋိလဘန္တိ။ ဣဒံ ဝုစ္စတိ, မဟာရာဇ, ‘ဘဂဝတော သဗ္ဗာပဏ’န္တိ။

‘‘‘အာယု အရောဂတာ ဝဏ္ဏံ၊ သဂ္ဂံ ဥစ္စာကုလီနတာ။

အသင်္ခတဉ္စ အမတံ၊ အတ္ထိ သဗ္ဗာပဏေ ဇိနေ။

‘‘‘အပ္ပေန ဗဟုကေနာပိ၊ ကမ္မမူလေန ဂယှတိ။

ကိဏိတွာ သဒ္ဓါမူလေန၊ သမိဒ္ဓါ ဟောထ ဘိက္ခဝေါ’တိ။

‘‘ဘဂဝတော ခေါ, မဟာရာဇ, ဓမ္မနဂရေ ဧဝရူပါ ဇနာ ပဋိဝသန္တိ, သုတ္တန္တိကာ ဝေနယိကာ အာဘိဓမ္မိကာ ဓမ္မကထိကာ ဇာတကဘာဏကာ ဒီဃဘာဏကာ မဇ္ဈိမဘာဏကာ သံယုတ္တဘာဏကာ အင်္ဂုတ္တရဘာဏကာ ခုဒ္ဒကဘာဏကာ သီလသမ္ပန္နာ သမာဓိသမ္ပန္နာ ပညာသမ္ပန္နာ ဗောဇ္ဈင်္ဂဘာဝနာရတာ ဝိပဿကာ သဒတ္ထမနုယုတ္တာ အာရညိကာ ရုက္ခမူလိကာ အဗ္ဘောကာသိကာ ပလာလပုဉ္ဇိကာ သောသာနိကာ နေသဇ္ဇိကာ ပဋိပန္နကာ ဖလဋ္ဌာ သေက္ခာ ဖလသမင်္ဂိနော သောတာပန္နာ သကဒါဂါမိနော အနာဂါမိနော အရဟန္တော တေဝိဇ္ဇာ ဆဠဘိညာ ဣဒ္ဓိမန္တော ပညာယ ပါရမိံဂတာ သတိပဋ္ဌာနသမ္မပ္ပဓါနဣဒ္ဓိပါဒဣန္ဒ္ရိယဗလဗောဇ္ဈင်္ဂမဂ္ဂဝရဈာနဝိမောက္ခရူ ပါရူပသန္တသုခသမာပတ္တိကုသလာ, တေဟိ အရဟန္တေဟိ အာကုလံ သမာကုလံ အာကိဏ္ဏံ သမာကိဏ္ဏံ နဠဝနသရဝနမိဝ ဓမ္မနဂရံ အဟောသိ။ ဘဝတီဟ –

‘‘‘ဝီတရာဂါ ဝီတဒေါသာ၊ ဝီတမောဟာ အနာသဝါ။

ဝီတတဏှာ အနာဒါနာ၊ ဓမ္မနဂရေ ဝသန္တိ တေ။

‘‘‘အာရညိကာ ဓုတဓရာ၊ ဈာယိနော လူခစီဝရာ။

ဝိဝေကာဘိရတာ ဓီရာ၊ ဓမ္မနဂရေ ဝသန္တိ တေ။

‘‘‘နေသဇ္ဇိကာ သန္ထတိကာ၊ အထောပိ ဌာနစင်္ကမာ။

ပံသုကူလဓရာ သဗ္ဗေ၊ ဓမ္မနဂရေ ဝသန္တိ တေ။

‘‘‘တိစီဝရဓရာ သန္တာ၊ စမ္မခဏ္ဍစတုတ္ထကာ။

ရတာ ဧကာသနေ ဝိညူ၊ ဓမ္မနဂရေ ဝသန္တိ တေ။

‘‘‘အပ္ပိစ္ဆာ နိပကာ ဓီရာ၊ အပ္ပါဟာရာ အလောလုပါ။

လာဘာလာဘေန သန္တုဋ္ဌာ၊ ဓမ္မနဂရေ ဝသန္တိ တေ။

‘‘‘ဈာယီ ဈာနရတာ ဓီရာ၊ သန္တစိတ္တာ သမာဟိတာ။

အာကိဉ္စညံ ပတ္ထယာနာ၊ ဓမ္မနဂရေ ဝသန္တိ တေ။

‘‘‘ပဋိပန္နာ ဖလဋ္ဌာ စ၊ သေက္ခာ ဖလသမင်္ဂိနော။

အာသီသကာ [အာသိံသကာ (သီ။ ဣ။)] ဥတ္တမတ္ထံ၊ ဓမ္မနဂရေ ဝသန္တိ တေ။

‘‘‘သောတာပန္နာ စ ဝိမလာ၊ သကဒါဂါမိနော စ ယေ။

အနာဂါမီ စ အရဟန္တော၊ ဓမ္မနဂရေ ဝသန္တိ တေ။

‘‘‘သတိပဋ္ဌာနကုသလာ ၊ ဗောဇ္ဈင်္ဂဘာဝနာရတာ။

ဝိပဿကာ ဓမ္မဓရာ၊ ဓမ္မနဂရေ ဝသန္တိ တေ။

‘‘‘ဣဒ္ဓိပါဒေသု ကုသလာ၊ သမာဓိဘာဝနာရတာ။

သမ္မပ္ပဓါနာနုယုတ္တာ၊ ဓမ္မနဂရေ ဝသန္တိ တေ။

‘‘‘အဘိညာပါရမိပ္ပတ္တာ၊ ပေတ္တိကေ ဂေါစရေ ရတာ။

အန္တလိက္ခမှိ စရဏာ၊ ဓမ္မနဂရေ ဝသန္တိ တေ။

‘‘‘ဩက္ခိတ္တစက္ခူ မိတဘာဏီ၊ ဂုတ္တဒွါရာ သုသံဝုတာ။

သုဒန္တာ ဥတ္တမေ ဒမ္မေ [ဓမ္မေ (သီ။ ဣ။)]၊ ဓမ္မနဂရေ ဝသန္တိ တေ။

‘‘‘တေဝိဇ္ဇာ ဆဠဘိညာ စ၊ ဣဒ္ဓိယာ ပါရမိံ ဂတာ။

ပညာယ ပါရမိပ္ပတ္တာ၊ ဓမ္မနဂရေ ဝသန္တိ တေ’တိ။

‘‘ယေ ခေါ တေ, မဟာရာဇ, ဘိက္ခူ အပရိမိတဉာဏဝရဓရာ အသင်္ဂါ အတုလဂုဏာ [အတုလိယဂုဏာ (သီ။ ဣ။ က။)] အတုလယသာ အတုလဗလာ အတုလတေဇာ ဓမ္မစက္ကာနုပ္ပဝတ္တကာ ပညာပါရမိံ ဂတာ, ဧဝရူပါ ခေါ, မဟာရာဇ, ဘိက္ခူ ဘဂဝတော ဓမ္မနဂရေ ‘ဓမ္မသေနာပတိနော’တိ ဝုစ္စန္တိ။

‘‘ယေ ပန တေ, မဟာရာဇ, ဘိက္ခူ ဣဒ္ဓိမန္တော အဓိဂတပ္ပဋိသမ္ဘိဒါပတ္တဝေသာရဇ္ဇာ ဂဂနစရာ ဒုရာသဒါ ဒုပ္ပသဟာ အနာလမ္ဗစရာ သသာဂရမဟိဓရပထဝိကမ္ပကော စန္ဒသူရိယပရိမဇ္ဇကာ ဝိကုဗ္ဗနာဓိဋ္ဌာနာဘိနီဟာရကုသလာ ဣဒ္ဓိယာ ပါရမိံ ဂတာ, ဧဝရူပါ ခေါ, မဟာရာဇ, ဘိက္ခူ ဘဂဝတော ဓမ္မနဂရေ ‘ပုရောဟိတာ’တိ ဝုစ္စန္တိ။

‘‘ယေ ပန တေ, မဟာရာဇ, ဘိက္ခူ ဓုတင်္ဂမနုဂတာ အပ္ပိစ္ဆာ သန္တုဋ္ဌာ ဝိညတ္တိမနေသနဇိဂုစ္ဆကာ ပိဏ္ဍာယ သပဒါနစာရိနော ဘမရာဝ ဂန္ဓမနုဃာယိတွာ ပဝိသန္တိ ဝိဝိတ္တကာနနံ, ကာယေ စ ဇီဝိတေ စ နိရပေက္ခာ အရဟတ္တမနုပ္ပတ္တာ ဓုတင်္ဂဂုဏေ အဂ္ဂနိက္ခိတ္တာ, ဧဝရူပါ ခေါ, မဟာရာဇ, ဘိက္ခူ ဘဂဝတော ဓမ္မနဂရေ ‘အက္ခဒဿာ’တိ ဝုစ္စန္တိ။

‘‘ယေ ပန တေ, မဟာရာဇ, ဘိက္ခူ ပရိသုဒ္ဓါ ဝိမလာ နိက္ကိလေသာ စုတူပပါတကုသလာ ဒိဗ္ဗစက္ခုမှိ ပါရမိံ ဂတာ, ဧဝရူပါ ခေါ, မဟာရာဇ, ဘိက္ခူ ဘဂဝတော ဓမ္မနဂရေ ‘နဂရဇောတကာ’တိ ဝုစ္စန္တိ။

‘‘ယေ ပန တေ, မဟာရာဇ, ဘိက္ခူ ဗဟုဿုတာ အာဂတာဂမာ ဓမ္မဓရာ ဝိနယဓရာ မာတိကာဓရာ သိထိလဓနိတဒီဃရဿဂရုကလဟုကက္ခရပရိစ္ဆေဒကုသလာ နဝင်္ဂသာသနဓရာ, ဧဝရူပါ ခေါ, မဟာရာဇ, ဘိက္ခူ ဘဂဝတော ဓမ္မနဂရေ ‘ဓမ္မရက္ခာ’တိ ဝုစ္စန္တိ။

‘‘ယေ ပန တေ, မဟာရာဇ, ဘိက္ခူ ဝိနယညူ ဝိနယကောဝိဒါ ဌာနာဋ္ဌာနကုသလာ [နိဒါနပဌနကုသလာ (သီ။ ဣ။), နိဒါနဝတ္ထုကုသလာ (သျာ။)] အာပတ္တာနာပတ္တိဂရုကလဟုကသတေကိစ္ဆအတေကိစ္ဆဝုဋ္ဌာနဒေသနာနိဂ္ဂဟ- ပဋိကမ္မဩသာရဏနိဿာရဏပဋိသာရဏကုသလာ ဝိနယေ ပါရမိံ ဂတာ, ဧဝရူပါ ခေါ, မဟာရာဇ, ဘိက္ခူ ဘဂဝတော ဓမ္မနဂရေ ‘ရူပရက္ခာ’တိ [ရူပဒက္ခာတိ (သီ။ သျာ။ ဣ။)] ဝုစ္စန္တိ။

‘‘ယေ ပန တေ, မဟာရာဇ, ဘိက္ခူ ဝိမုတ္တိဝရကုသုမမာလဗဒ္ဓါ ဝရပဝရမဟဂ္ဃသေဋ္ဌဘာဝမနုပ္ပတ္တာ ဗဟုဇနကန္တမဘိပတ္ထိတာ, ဧဝရူပါ ခေါ, မဟာရာဇ, ဘိက္ခူ ဘဂဝတော ဓမ္မနဂရေ ‘ပုပ္ဖာပဏိကာ’တိ ဝုစ္စန္တိ။

‘‘ယေ ပန တေ, မဟာရာဇ, ဘိက္ခူ စတုသစ္စာဘိသမယပ္ပဋိဝိဒ္ဓါ ဒိဋ္ဌသစ္စာ ဝိညာတသာသနာ စတူသု သာမညဖလေသု တိဏ္ဏဝိစိကိစ္ဆာ ပဋိလဒ္ဓဖလသုခါ အညေသမ္ပိ ပဋိပန္နာနံ တေ ဖလေ သံဝိဘဇန္တိ, ဧဝရူပါ ခေါ, မဟာရာဇ, ဘိက္ခူ ဘဂဝတော ဓမ္မနဂရေ ‘ဖလာပဏိကာ’တိ ဝုစ္စန္တိ။

‘‘ယေ ပန တေ, မဟာရာဇ, ဘိက္ခူ သီလသံဝရဂန္ဓမနုလိတ္တာ [သီလဝရသုဂန္ဓမနုလိတ္တာ (သီ။ ဣ။)] အနေကဝိဓဗဟုဂုဏဓရာ ကိလေသမလဒုဂ္ဂန္ဓဝိဓမကာ, ဧဝရူပါ ခေါ, မဟာရာဇ, ဘိက္ခူ ဘဂဝတော ဓမ္မနဂရေ ‘ဂန္ဓာပဏိကာ’တိ ဝုစ္စန္တိ။

‘‘ယေ ပန တေ, မဟာရာဇ, ဘိက္ခူ ဓမ္မကာမာ ပိယသမုဒါဟာရာ အဘိဓမ္မေ အဘိဝိနယေ ဥဠာရပါမောဇ္ဇာ အရညဂတာပိ ရုက္ခမူလဂတာပိ သုညာဂါရဂတာပိ ဓမ္မဝရရသံ ပိဝန္တိ, ကာယေန ဝါစာယ မနသာ ဓမ္မဝရရသမောဂါဠှာ အဓိမတ္တပဋိဘာနာ ဓမ္မေသု ဓမ္မေသနပ္ပဋိပန္နာ ဣတော ဝါ တတော ဝါ ယတ္ထ ယတ္ထ အပ္ပိစ္ဆကထာ သန္တုဋ္ဌိကထာ ပဝိဝေကကထာ အသံသဂ္ဂကထာ ဝီရိယာရမ္ဘကထာ သီလကထာ သမာဓိကထာ ပညာကထာ ဝိမုတ္တိကထာ ဝိမုတ္တိဉာဏဒဿနကထာ , တတ္ထ တတ္ထ ဂန္တွာ တံ တံ ကထာရသံ ပိဝန္တိ, ဧဝရူပါ ခေါ, မဟာရာဇ, ဘိက္ခူ ဘဂဝတော ဓမ္မနဂရေ ‘သောဏ္ဍာ ပိပါသာ’တိ ဝုစ္စန္တိ။

‘‘ယေ ပန တေ, မဟာရာဇ, ဘိက္ခူ ပုဗ္ဗရတ္တာပရရတ္တံ ဇာဂရိယာနုယောဂမနုယုတ္တာ နိသဇ္ဇဋ္ဌာနစင်္ကမေဟိ ရတ္တိန္ဒိဝံ ဝီတိနာမေန္တိ, ဘာဝနာနုယောဂမနုယုတ္တာ ကိလေသပဋိဗာဟနာယ သဒတ္ထပ္ပသုတာ, ဧဝရူပါ ခေါ, မဟာရာဇ, ဘိက္ခူ ဘဂဝတော ဓမ္မနဂရေ ‘နဂရဂုတ္တိကာ’တိ ဝုစ္စန္တိ။

‘‘ယေ ပန တေ, မဟာရာဇ, ဘိက္ခူ နဝင်္ဂံ ဗုဒ္ဓဝစနံ အတ္ထတော စ ဗျဉ္ဇနတော စ နယတော စ ကာရဏတော စ ဟေတုတော စ ဥဒါဟရဏတော စ ဝါစေန္တိ အနုဝါစေန္တိ ဘာသန္တိ အနုဘာသန္တိ, ဧဝရူပါ ခေါ, မဟာရာဇ, ဘိက္ခူ ဘဂဝတော ဓမ္မနဂရေ ‘ဓမ္မာပဏိကာ’တိ ဝုစ္စန္တိ။

‘‘ယေ ပန တေ, မဟာရာဇ, ဘိက္ခူ ဓမ္မရတနဘောဂေန အာဂမပရိယတ္တိသုတဘောဂေန ဘောဂိနော ဓနိနော နိဒ္ဒိဋ္ဌသရဗျဉ္ဇနလက္ခဏပ္ပဋိဝေဓါ ဝိညူ ဖရဏာ, ဧဝရူပါ ခေါ, မဟာရာဇ, ဘိက္ခူ ဘဂဝတော ဓမ္မနဂရေ ‘ဓမ္မသေဋ္ဌိနော’တိ ဝုစ္စန္တိ။

‘‘ယေ ပန တေ, မဟာရာဇ, ဘိက္ခူ ဥဠာရဒေသနာပဋိဝေဓါ ပရိစိဏ္ဏာရမ္မဏဝိဘတ္တိနိဒ္ဒေသာ သိက္ခာဂုဏပါရမိပ္ပတ္တာ, ဧဝရူပါ ခေါ, မဟာရာဇ, ဘိက္ခူ ဘဂဝတော ဓမ္မနဂရေ ‘ဝိဿုတဓမ္မိကာ’တိ ဝုစ္စန္တိ။

‘‘ဧဝံ သုဝိဘတ္တံ ခေါ, မဟာရာဇ, ဘဂဝတော ဓမ္မနဂရံ ဧဝံ သုမာပိတံ ဧဝံ သုဝိဟိတံ ဧဝံ သုပရိပူရိတံ ဧဝံ သုဝဝတ္ထာပိတံ ဧဝံ သုရက္ခိတံ ဧဝံ သုဂေါပိတံ ဧဝံ ဒုပ္ပသယှံ ပစ္စတ္ထိကေဟိ ပစ္စာမိတ္တေဟိ, ဣမိနာ, မဟာရာဇ, ကာရဏေန ဣမိနာ ဟေတုနာ ဣမိနာ နယေန ဣမိနာ အနုမာနေန ဉာတဗ္ဗံ အတ္ထိ သော ဘဂဝါတိ။

‘‘‘ယထာပိ နဂရံ ဒိသွာ၊ သုဝိဘတ္တံ မနောရမံ။

အနုမာနေန ဇာနန္တိ၊ ဝဍ္ဎကိဿ မဟတ္တနံ။

‘‘‘တထေဝ လောကနာထဿ၊ ဒိသွာ ဓမ္မပုရံ ဝရံ။

အနုမာနေန ဇာနန္တိ၊ အတ္ထိ သော ဘဂဝါ ဣတိ။

‘‘‘အနုမာနေန ဇာနန္တိ၊ ဦမိံ ဒိသွာန သာဂရေ။

ယထာယံ ဒိဿတေ ဦမိ၊ မဟန္တော သော ဘဝိဿတိ။

‘‘‘တထာ ဗုဒ္ဓံ သောကနုဒံ၊ သဗ္ဗတ္ထမပရာဇိတံ။

တဏှက္ခယမနုပ္ပတ္တံ၊ ဘဝသံသာရမောစနံ။

‘‘‘အနုမာနေန ဉာတဗ္ဗံ၊ ဦမိံ ဒိသွာ သဒေဝကေ။

ယထာ ဓမ္မူမိဝိပ္ဖာရော၊ အဂ္ဂေါ ဗုဒ္ဓေါ ဘဝိဿတိ။

‘‘‘အနုမာနေန ဇာနန္တိ၊ ဒိသွာ အစ္စုဂ္ဂတံ ဂိရိံ။

ယထာ အစ္စုဂ္ဂတော ဧသော၊ ဟိမဝါ သော ဘဝိဿတိ။

‘‘‘တထာ ဒိသွာ ဓမ္မဂိရိံ၊ သီတီဘူတံ နိရူပဓိံ။

အစ္စုဂ္ဂတံ ဘဂဝတော၊ အစလံ သုပ္ပတိဋ္ဌိတံ။

‘‘‘အနုမာနေန ဉာတဗ္ဗံ၊ ဒိသွာန ဓမ္မပဗ္ဗတံ။

တထာ ဟိ သော မဟာဝီရော၊ အဂ္ဂေါ ဗုဒ္ဓေါ ဘဝိဿတိ။

‘‘‘ယထာပိ ဂဇရာဇဿ၊ ပဒံ ဒိသွာန မာနုသာ။

အနုမာနေန ဇာနန္တိ၊ မဟာ ဧသော ဂဇော ဣတိ။

‘‘‘တထေဝ ဗုဒ္ဓနာဂဿ၊ ပဒံ ဒိသွာ ဝိဘာဝိနော။

အနုမာနေန ဇာနန္တိ၊ ဥဠာရော သော ဘဝိဿတိ။

‘‘‘အနုမာနေန ဇာနန္တိ၊ ဘီတေ ဒိသွာန ကုမ္မိဂေ။

မိဂရာဇဿ သဒ္ဒေန၊ ဘီတာမေ ကုမ္မိဂါ ဣတိ။

‘‘‘တထေဝ တိတ္ထိယေ ဒိသွာ၊ ဝိတ္ထတေ ဘီတမာနသေ။

အနုမာနေန ဉာတဗ္ဗံ၊ ဓမ္မရာဇေန ဂဇ္ဇိတံ။

‘‘‘နိဗ္ဗုတံ ပထဝိံ ဒိသွာ၊ ဟရိတပတ္တံ မဟောဒိကံ။

အနုမာနေန ဇာနန္တိ၊ မဟာမေဃေန နိဗ္ဗုတံ။

‘‘‘တထေဝိမံ ဇနံ ဒိသွာ၊ အာမောဒိတပမောဒိတံ။

အနုမာနေန ဉာတဗ္ဗံ၊ ဓမ္မမေဃေန တပ္ပိတံ။

‘‘‘လဂ္ဂံ ဒိသွာ ဘုသံ ပင်္ကံ၊ ကလလဒ္ဒဂတံ မဟိံ။

အနုမာနေန ဇာနန္တိ၊ ဝါရိက္ခန္ဓော မဟာ ဂတော။

‘‘‘တထေဝိမံ ဇနံ ဒိသွာ၊ ရဇပင်္ကသမောဟိတံ။

ဝဟိတံ ဓမ္မနဒိယာ၊ ဝိသဋ္ဌံ ဓမ္မသာဂရေ။

‘‘‘ဓမ္မာမတဂတံ ဒိသွာ၊ သဒေဝကမိမံ မဟိံ။

အနုမာနေန ဉာတဗ္ဗံ၊ ဓမ္မက္ခန္ဓော မဟာ ဂတော။

‘‘‘အနုမာနေန ဇာနန္တိ၊ ဃာယိတွာ ဂန္ဓမုတ္တမံ။

ယထာယံ ဝါယတေ ဂန္ဓော၊ ဟေဿန္တိ ပုပ္ဖိတာ ဒုမာ။

‘‘‘တထေဝါယံ သီလဂန္ဓော၊ ပဝါယတိ သဒေဝကေ။

အနုမာနေန ဉာတဗ္ဗံ၊ အတ္ထိ ဗုဒ္ဓေါ အနုတ္တရော’တိ။

‘‘ဧဝရူပေန ခေါ, မဟာရာဇ, ကာရဏသတေန ကာရဏသဟဿေန ဟေတုသတေန ဟေတုသဟဿေန နယသတေန နယသဟဿေန ဩပမ္မသတေန ဩပမ္မသဟဿေန သက္ကာ ဗုဒ္ဓဗလံ ဥပဒဿယိတုံ။ ယထာ, မဟာရာဇ, ဒက္ခော မာလာကာရော နာနာပုပ္ဖရာသိမှာ အာစရိယာနုသိဋ္ဌိယာ ပစ္စတ္တပုရိသကာရေန ဝိစိတ္တံ မာလာဂုဏရာသိံ ကရေယျ, ဧဝမေဝ ခေါ, မဟာရာဇ, သော ဘဂဝါ ဝိစိတ္တပုပ္ဖရာသိ ဝိယ အနန္တဂုဏော အပ္ပမေယျဂုဏော, အဟမေတရဟိ ဇိနသာသနေ မာလာကာရော ဝိယ ပုပ္ဖဂန္ထကော ပုဗ္ဗကာနံ အာစရိယာနံ မဂ္ဂေနပိ မယှံ ဗုဒ္ဓိဗလေနပိ အသင္ခ္ယေယျေနပိ ကာရဏေန အနုမာနေန ဗုဒ္ဓဗလံ ဒီပယိဿာမိ, တွံ ပနေတ္ထ ဆန္ဒံ ဇနေဟိ သဝနာယာ’’တိ။

‘‘ဒုက္ကရံ , ဘန္တေ နာဂသေန, အညေသံ ဧဝရူပေန ကာရဏေန အနုမာနေန ဗုဒ္ဓဗလံ ဥပဒဿယိတုံ, နိဗ္ဗုတောသ္မိ, ဘန္တေ နာဂသေန, တုမှာကံ ပရမဝိစိတ္တေန ပဉ္ဟဝေယျာကရဏေနာ’’တိ။

အနုမာနပဉ္ဟော ပဌမော။

၂။ ဓုတင်္ဂပဉ္ဟော

‘‘ပဿတာရညကေ ဘိက္ခူ၊ အဇ္ဈောဂါဠ္ဟေ ဓုတေ ဂုဏေ။

ပုန ပဿတိ ဂိဟီ ရာဇာ၊ အနာဂါမိဖလေ ဌိတေ။

‘‘ဥဘောပိ တေ ဝိလောကေတွာ၊ ဥပ္ပဇ္ဇိ သံသယော မဟာ။

ဗုဇ္ဈေယျ စေ ဂိဟီ ဓမ္မေ၊ ဓုတင်္ဂံ နိပ္ဖလံ သိယာ။

‘‘ပရဝါဒိဝါဒမထနံ၊ နိပုဏံ ပိဋကတ္တယေ။

ဟန္ဒ ပုစ္ဆေ ကထိသေဋ္ဌံ၊ သော မေ ကင်္ခံ ဝိနေဿတီ’’တိ။

အထ ခေါ မိလိန္ဒော ရာဇာ ယေနာယသ္မာ နာဂသေနော တေနုပသင်္ကမိ, ဥပသင်္ကမိတွာ အာယသ္မန္တံ နာဂသေနံ အဘိဝါဒေတွာ ဧကမန္တံ နိသီဒိ, ဧကမန္တံ နိသိန္နော ခေါ မိလိန္ဒော ရာဇာ အာယသ္မန္တံ နာဂသေနံ ဧတဒဝေါစ ‘‘ဘန္တေ နာဂသေန, အတ္ထိ ကောစိ ဂိဟီ အဂါရိကော ကာမဘောဂီ ပုတ္တဒါရသမ္ဗာဓသယနံ အဇ္ဈာဝသန္တော ကာသိကစန္ဒနံ ပစ္စနုဘောန္တော မာလာဂန္ဓဝိလေပနံ ဓါရယန္တော ဇာတရူပရဇတံ သာဒိယန္တော မဏိမုတ္တာကဉ္စနဝိစိတ္တမောဠိဗဒ္ဓေါ ယေန သန္တံ ပရမတ္ထံ နိဗ္ဗာနံ သစ္ဆိကတ’’န္တိ?

‘‘န, မဟာရာဇ, ဧကညေဝ သတံ န ဒွေ သတာနိ န တီဏိ စတ္တာရိ ပဉ္စ သတာနိ န သဟဿံ န သတသဟဿံ န ကောဋိသတံ န ကောဋိသဟဿံ န ကောဋိသတသဟဿံ, တိဋ္ဌတု မဟာရာဇ ဒသန္နံ ဝီသတိယာ သတဿ သဟဿဿ အဘိသမယော, ကတမေန တေ ပရိယာယေန အနုယောဂံ ဒမ္မီ’’တိ။

‘‘တွမေဝေတံ ဗြူဟီ’’တိ။ ‘‘တေနဟိ တေ, မဟာရာဇ, ကထယိဿာမိ သတေန ဝါ သဟဿေန ဝါ သတသဟဿေန ဝါ ကောဋိယာ ဝါ ကောဋိသတေန ဝါ ကောဋိသဟဿေန ဝါ ကောဋိသတသဟဿေန ဝါ, ယာ ကာစိ နဝင်္ဂေ ဗုဒ္ဓဝစနေ သလ္လေခိတာစာရပ္ပဋိပတ္တိဓုတဝရင်္ဂဂုဏနိဿိတာ [ဓုတဝရင်္ဂဂုဏနိဿိတာ (သီ။ သျာ။ ဣ။)] ထာ, တာ သဗ္ဗာ ဣဓ သမောသရိဿန္တိ။ ယထာ, မဟာရာဇ, နိန္နုန္နတသမဝိသမထလာထလဒေသဘာဂေ အဘိဝုဋ္ဌံ ဥဒကံ, သဗ္ဗံ တံ တတော ဝိနိဂဠိတွာ မဟောဒဓိံ သာဂရံ သမောသရတိ, ဧဝမေဝ ခေါ, မဟာရာဇ, သမ္ပာဒကေ သတိ ယာ ကာစိ နဝင်္ဂေ ဗုဒ္ဓဝစနေ သလ္လေခိတာစာရပ္ပဋိပတ္တိဓုတင်္ဂဂုဏဓရနိဿိတာ ကထာ, တာ သဗ္ဗာ ဣဓ သမောသရိဿန္တိ။

‘‘မယှမ္ပေတ္ထ , မဟာရာဇ, ပရိဗျတ္တတာယ ဗုဒ္ဓိယာ ကာရဏပရိဒီပနံ သမောသရိဿတိ, တေနေသော အတ္ထော သုဝိဘတ္တော ဝိစိတ္တော ပရိပုဏ္ဏော ပရိသုဒ္ဓေါ သမာနီတော ဘဝိဿတိ။ ယထာ, မဟာရာဇ, ကုသလော လေခါစရိယော အနုသိဋ္ဌော လေခံ ဩသာရေန္တော အတ္တနော ဗျတ္တတာယ ဗုဒ္ဓိယာ ကာရဏပရိဒီပနေန လေခံ ပရိပူရေတိ, ဧဝံ သာ လေခါ သမတ္တာ ပရိပုဏ္ဏာ အနူနိကာ ဘဝိဿတိ။ ဧဝမေဝ မယှမ္ပေတ္ထ ပရိဗျတ္တတာယ ဗုဒ္ဓိယာ ကာရဏပရိဒီပနံ သမောသရိဿတိ, တေနေသော အတ္ထော သုဝိဘတ္တော ဝိစိတ္တော ပရိပုဏ္ဏော ပရိသုဒ္ဓေါ သမာနီတော ဘဝိဿတိ။

‘‘နဂရေ, မဟာရာဇ, သာဝတ္ထိယာ ပဉ္စကောဋိမတ္တာ အရိယသာဝကာ ဘဂဝတော ဥပါသကဥပါသိကာယော သတ္တပဏ္ဏာသသဟဿာနိ တီဏိ စ သတသဟဿာနိ အနာဂါမိဖလေ ပတိဋ္ဌိတာ, တေ သဗ္ဗေပိ ဂိဟီ ယေဝ, န ပဗ္ဗဇိတာ။ ပုန တတ္ထေဝ ကဏ္ဍမ္ဗမူလေ ယမကပါဋိဟာရိယေ ဝီသတိ ပါဏကောဋိယော အဘိသမိံသု, ပုန စူဠရာဟုလောဝါဒေ [မဟာရာဟုလောဝါဒေ (သီ။ ဣ။)], မဟာမင်္ဂလသုတ္တန္တေ, သမစိတ္တပရိယာယေ, ပရာဘဝသုတ္တန္တေ, ပုရာဘေဒသုတ္တန္တေ, ကလဟဝိဝါဒသုတ္တန္တေ, စူဠဗ္ယူဟသုတ္တန္တေ, မဟာဗ္ယူဟသုတ္တန္တေ, တုဝဋကသုတ္တန္တေ, သာရိပုတ္တသုတ္တန္တေ ဂဏနပထမတီတာနံ ဒေဝတာနံ ဓမ္မာဘိသမယော အဟောသိ။

‘‘နဂရေ ရာဇဂဟေ ပညာသသဟဿာနိ တီဏိ စ သတသဟဿာနိ အရိယသာဝကာ ဘဂဝတော ဥပါသကဥပါသိကာယော, ပုန တတ္ထေဝ ဓနပါလဟတ္ထိနာဂဒမနေ နဝုတိ ပါဏကောဋိယော, ပါရာယနသမာဂမေ ပါသာဏကစေတိယေ စုဒ္ဒသ ပါဏကောဋိယော, ပုန ဣန္ဒသာလဂုဟာယံ အသီတိ ဒေဝတာကောဋိယော, ပုန ဗာရာဏသိယံ ဣသိပတနေ မိဂဒါယေ ပဌမေ ဓမ္မဒေသနေ အဋ္ဌာရသ ဗြဟ္မကောဋိယော အပရိမာဏာ စ ဒေဝတာယော, ပုန တာဝတိံသဘဝနေ ပဏ္ဍုကမ္ဗလသိလာယံ အဘိဓမ္မဒေသနာယ အသီတိ ဒေဝတာကောဋိယော, ဒေဝေါရောဟဏေ သင်္ကဿနဂရဒွါရေ လောကဝိဝရဏပါဋိဟာရိယေ ပသန္နာနံ နရမရူနံ တိံသ ကောဋိယော အဘိသမိံသု။

ပုန သက္ကေသု ကပိလဝတ္ထုသ္မိံ နိဂြောဓါရာမေ ဗုဒ္ဓဝံသဒေသနာယ မဟာသမယသုတ္တန္တဒေသနာယ စ ဂဏနပထမတီတာနံ ဒေဝတာနံ ဓမ္မာဘိသမယော အဟောသိ ။ ပုန သုမနမာလာကာရသမာဂမေ, ဂရဟဒိန္နသမာဂမေ, အာနန္ဒသေဋ္ဌိသမာဂမေ, ဇမ္ဗုကာဇီဝကသမာဂမေ, မဏ္ဍုကဒေဝပုတ္တသမာဂမေ, မဋ္ဌကုဏ္ဍလိဒေဝပုတ္တသမာဂမေ, သုလသာနဂရသောဘိနိသမာဂမေ, သိရိမာနဂရသောဘိနိသမာဂမေ, ပေသကာရဓီတုသမာဂမေ, စူဠသုဘဒ္ဒါသမာဂမေ, သာကေတဗြာဟ္မဏဿ အာဠာဟနဒဿနသမာဂမေ, သူနာပရန္တကသမာဂမေ, သက္ကပဉ္ဟသမာဂမေ, တိရောကုဋ္ဋသမာဂမေ [တိရောကုဍ္ဍသမာဂမေ (သီ။ ဣ။)], ရတနသုတ္တသမာဂမေ ပစ္စေကံ စတုရာသီတိယာ ပါဏသဟဿာနံ ဓမ္မာဘိသမယော အဟောသိ, ယာဝတာ, မဟာရာဇ, ဘဂဝါ လောကေ အဋ္ဌာသိ, တာဝ တီသု မဏ္ဍလေသု သောဠသသု မဟာဇနပဒေသု ယတ္ထ ယတ္ထ ဘဂဝါ ဝိဟာသိ, တတ္ထ တတ္ထ ယေဘုယျေန ဒွေ တယော စတ္တာရော ပဉ္စ သတံ သဟဿံ သတသဟဿံ ဒေဝါ စ မနုဿာ စ သန္တံ ပရမတ္ထံ နိဗ္ဗာနံ သစ္ဆိကရိံသု။ ယေ တေ, မဟာရာဇ, ဒေဝါ ဂိဟီ ယေဝ, န တေ ပဗ္ဗဇိတာ, ဧတာနိ စေဝ, မဟာရာဇ, အညာနိ စ အနေကာနိ ဒေဝတာကောဋိသတသဟဿာနိ ဂိဟီ အဂါရိကာ ကာမဘောဂိနော သန္တံ ပရမတ္ထံ နိဗ္ဗာနံ သစ္ဆိကရိံသူ’’တိ။

‘‘ယဒိ, ဘန္တေ နာဂသေန, ဂိဟီ အဂါရိကာ ကာမဘောဂိနော သန္တံ ပရမတ္ထံ နိဗ္ဗာနံ သစ္ဆိကရောန္တိ, အထ ဣမာနိ ဓုတင်္ဂါနိ ကိမတ္ထံ သာဓေန္တိ, တေန ကာရဏေန ဓုတင်္ဂါနိ အကိစ္စကရာနိ ဟောန္တိ။ ယဒိ, ဘန္တေ နာဂသေန, ဝိနာ မန္တောသဓေဟိ ဗျာဓယော ဝူပသမန္တိ, ကိံ ဝမနဝိရေစနာဒိနာ သရီရဒုဗ္ဗလကရဏေန? ယဒိ မုဋ္ဌီဟိ ပဋိသတ္တုနိဂ္ဂဟော ဘဝတိ, ကိံ အသိသတ္တိသရဓနုကောဒဏ္ဍလဂုဠမုဂ္ဂရေဟိ? ယဒိ ဂဏ္ဌိကုဋိလသုသိရကဏ္ဋလတာသာခါ အာလမ္ဗိတွာ ရုက္ခမဘိရူဟနံ ဘဝတိ, ကိံ ဒီဃဒဠှနိဿေဏိပရိယေသနေန? ယဒိ ထဏ္ဍိလသေယျာယ ဓါတုသမတာ ဘဝတိ, ကိံ သုခသမ္ဖဿမဟတိမဟာသိရိသယနပရိယေသနေန? ယဒိ ဧကကော သာသင်္ကသပ္ပဋိဘယဝိသမကန္တာရတရဏသမတ္ထော ဘဝတိ, ကိံ သန္နဒ္ဓသဇ္ဇမဟတိမဟာသတ္ထပရိယေသနေန? ယဒိ နဒိသရံ ဗာဟုနာ တရိတုံ သမတ္ထော ဘဝတိ, ကိံ ဓုဝသေတုနာဝါပရိယေသနေန? ယဒိ သကသန္တကေန ဃာသစ္ဆာဒနံ ကာတုံ ပဟောတိ, ကိံ ပရူပသေဝနပိယသမုလ္လာပပစ္ဆာပုရေဓါဝနေန? ယဒိ အခါတတဠာကေ ဥဒကံ လဘတိ, ကိံ ဥဒပါနတဠာကပေါက္ခရဏိခဏနေန? ဧဝမေဝ ခေါ, ဘန္တေ နာဂသေန, ယဒိ ဂိဟီ အဂါရိကာ ကာမဘောဂိနော သန္တံ ပရမတ္ထံ နိဗ္ဗာနံ သစ္ဆိကရောန္တိ, ကိံ ဓုတဂုဏဝရသမာဒိယနေနာ’’တိ?

‘‘အဋ္ဌဝီသတိ ခေါ ပနိမေ, မဟာရာဇ, ဓုတင်္ဂဂုဏာ ယထာဘုစ္စဂုဏာ, ယေဟိ ဂုဏေဟိ ဓုတင်္ဂါနိ သဗ္ဗဗုဒ္ဓါနံ ပိဟယိတာနိ ပတ္ထိတာနိ။ ကတမေ အဋ္ဌဝီသတိ? ဣဓ, မဟာရာဇ, ဓုတင်္ဂံ သုဒ္ဓါဇီဝံ သုခဖလံ အနဝဇ္ဇံ န ပရဒုက္ခာပနံ အဘယံ အသမ္ပီဠနံ ဧကန္တဝဍ္ဎိကံ အပရိဟာနိယံ အမာယံ အာရက္ခာ ပတ္ထိတဒဒံ သဗ္ဗသတ္တဒမနံ သံဝရဟိတံ ပတိရူပံ အနိဿိတံ ဝိပ္ပမုတ္တံ ရာဂက္ခယံ ဒေါသက္ခယံ မောဟက္ခယံ မာနပ္ပဟာနံ ကုဝိတက္ကစ္ဆေဒနံ ကင်္ခါဝိတရဏံ ကောသဇ္ဇဝိဒ္ဓံသနံ အရတိပ္ပဟာနံ ခမနံ အတုလံ အပ္ပမာဏံ သဗ္ဗဒုက္ခက္ခယဂမနံ, ဣမေ ခေါ, မဟာရာဇ, အဋ္ဌဝီသတိ ဓုတင်္ဂဂုဏာ ယထာဘုစ္စဂုဏာ ယေဟိ ဂုဏေဟိ ဓုတင်္ဂါနိ သဗ္ဗဗုဒ္ဓါနံ ပိဟယိတာနိ ပတ္ထိတာနိ။

‘‘ယေ ခေါ တေ, မဟာရာဇ, ဓုတဂုဏေ သမ္မာ ဥပသေဝန္တိ, တေ အဋ္ဌာရသဟိ ဂုဏေဟိ သမုပေတာ ဘဝန္တိ။ ကတမေဟိ အဋ္ဌာရသဟိ? အာစာရော တေသံ သုဝိသုဒ္ဓေါ ဟောတိ, ပဋိပဒါ သုပူရိတာ ဟောတိ, ကာယိကံ ဝါစသိကံ သုရက္ခိတံ ဟောတိ, မနောသမာစာရော သုဝိသုဒ္ဓေါ ဟောတိ, ဝီရိယံ သုပဂ္ဂဟိတံ ဟောတိ, ဘယံ ဝူပသမ္မတိ, အတ္တာနုဒိဋ္ဌိဗျပဂတာ ဟောတိ, အာဃာတော ဥပရတော ဟောတိ, မေတ္တာ ဥပဋ္ဌိတာ ဟောတိ, အာဟာရော ပရိညာတော ဟောတိ, သဗ္ဗသတ္တာနံ ဂရုကတော ဟောတိ, ဘောဇနေ မတ္တညူ ဟောတိ, ဇာဂရိယမနုယုတ္တော ဟောတိ, အနိကေတော ဟောတိ, ယတ္ထ ဖာသု တတ္ထ ဝိဟာရီ ဟောတိ, ပါပဇေဂုစ္ဆီ ဟောတိ, ဝိဝေကာရာမော ဟောတိ, သတတံ အပ္ပမတ္တော ဟောတိ, ယေ တေ, မဟာရာဇ, ဓုတဂုဏေ သမ္မာ ဥပသေဝန္တိ, တေ ဣမေဟိ အဋ္ဌာရသဟိ ဂုဏေဟိ သမုပေတာ ဘဝန္တိ။

‘‘ဒသ ဣမေ, မဟာရာဇ, ပုဂ္ဂလာ ဓုတဂုဏာရဟာ။ ကတမေ ဒသ? သဒ္ဓေါ ဟောတိ ဟိရိမာ ဓိတိမာ အကုဟော အတ္ထဝသီ အလောလော သိက္ခာကာမော ဒဠှသမာဒါနော အနုဇ္ဈာနဗဟုလော မေတ္တာဝိဟာရီ, ဣမေ ခေါ, မဟာရာဇ, ဒသ ပုဂ္ဂလာ ဓုတဂုဏာရဟာ။

‘‘ယေ တေ, မဟာရာဇ, ဂိဟီ အဂါရိကာ ကာမဘောဂိနော သန္တံ ပရမတ္ထံ နိဗ္ဗာနံ သစ္ဆိကရောန္တိ, သဗ္ဗေ တေ ပုရိမာသု ဇာတီသု တေရသသု ဓုတဂုဏေသု ကတူပါသနာ ကတဘူမိကမ္မာ, တေ တတ္ထ စာရဉ္စ ပဋိပတ္တိဉ္စ သောဓယိတွာ အဇ္ဇေတရဟိ ဂိဟီ ယေဝ သန္တာ သန္တံ ပရမတ္တံ နိဗ္ဗာနံ သစ္ဆိကရောန္တိ။

‘‘ယထာ , မဟာရာဇ, ကုသလော ဣဿာသော အန္တေဝါသိကေ ပဌမံ တာဝ ဥပါသနသာလာယံ စာပဘေဒစာပါရောပနဂ္ဂဟဏမုဋ္ဌိပ္ပဋိဣဠနအင်္ဂုလိဝိနာမနပါဒဌပနသရဂ္ဂဟဏသန္နဟနအာကဍ္ဎန သဒ္ဓါရဏလက္ခနိယမနခိပနေ တိဏပုရိသကဆကဏ [ခဏက (သီ။ ဣ။)] တိဏပလာလမတ္တိကာပုဉ္ဇဖလကလက္ခဝေဓေ အနုသိက္ခာပေတွာ ရညော သန္တိကေ ဥပါသနံ အာရာဓယိတွာ အာဇညရထဂဇတုရင်္ဂဓနဓညဟိရညသုဝဏ္ဏဒါသိဒါသဘရိယဂါမဝရံ လဘတိ , ဧဝမေဝ ခေါ, မဟာရာဇ, ယေ တေ ဂိဟီ အဂါရိကာ ကာမဘောဂိနော သန္တံ ပရမတ္ထံ နိဗ္ဗာနံ သစ္ဆိကရောန္တိ, တေ သဗ္ဗေ ပုရိမာသု ဇာတီသု တေရသသု ဓုတဂုဏေသု ကတူပါသနာ ကတဘူမိကမ္မာ, တေ တတ္ထေဝ စာရဉ္စ ပဋိပတ္တိဉ္စ သောဓယိတွာ အဇ္ဇေတရဟိ ဂိဟီ ယေဝ သန္တာ သန္တံ ပရမတ္ထံ နိဗ္ဗာနံ သစ္ဆိကရောန္တိ။ န, မဟာရာဇ, ဓုတဂုဏေသု ပုဗ္ဗာသေဝနံ ဝိနာ ဧကိဿာ ယေဝ ဇာတိယာ အရဟတ္တံ သစ္ဆိကိရိယာ ဟောတိ, ဥတ္တမေန ပန ဝီရိယေန ဥတ္တမာယ ပဋိပတ္တိယာ တထာရူပေန အာစရိယေန ကလျာဏမိတ္တေန အရဟတ္တံ သစ္ဆိကိရိယာ ဟောတိ။

‘‘ယထာ ဝါ ပန, မဟာရာဇ, ဘိသက္ကော သလ္လကတ္တော အာစရိယံ ဓနေန ဝါ ဝတ္တပ္ပဋိပတ္တိယာ ဝါ အာရာဓေတွာ သတ္တဂ္ဂဟဏဆေဒနလေခနဝေဓနသလ္လုဒ္ဓရဏဝဏဓေါဝနသောသနဘေသဇ္ဇာနုလိမ္ပနဝမန ဝိရေစနာနုဝါသနကိရိယမနုသိက္ခိတွာ ဝိဇ္ဇာသု ကတသိက္ခော ကတူပါသနော ကတဟတ္ထော အာတုရေ ဥပသင်္ကမတိ တိကိစ္ဆာယ, ဧဝမေဝ ခေါ, မဟာရာဇ, ယေ တေ ဂိဟီ အဂါရိကာ ကာမဘောဂိနော သန္တံ ပရမတ္ထံ နိဗ္ဗာနံ သစ္ဆိကရောန္တိ, တေ သဗ္ဗေ ပုရိမာသု ဇာတီသု တေရသသု ဓုတဂုဏေသု ကတူပါသနာ ကတဘူမိကမ္မာ, တေ တတ္ထေဝ စာရဉ္စ ပဋိပတ္တိဉ္စ သောဓယိတွာ အဇ္ဇေတရဟိ ဂိဟီ ယေဝ သန္တာ သန္တံ ပရမတ္ထံ နိဗ္ဗာနံ သစ္ဆိကရောန္တိ, န, မဟာရာဇ, ဓုတဂုဏေဟိ အဝိသုဒ္ဓါနံ ဓမ္မာဘိသမယော ဟောတိ။

‘‘ယထာ, မဟာရာဇ, ဥဒကဿ အသေစနေန ဗီဇာနံ အဝိရူဟနံ ဟောတိ, ဧဝမေဝ ခေါ, မဟာရာဇ, ဓုတဂုဏေဟိ အဝိသုဒ္ဓါနံ ဓမ္မာဘိသမယော န ဟောတိ။

‘‘ယထာ ဝါ ပန, မဟာရာဇ, အကတကုသလာနံ အကတကလျာဏာနံ သုဂတိဂမနံ န ဟောတိ, ဧဝမေဝ ခေါ, မဟာရာဇ, ဓုတဂုဏေဟိ အဝိသုဒ္ဓါနံ ဓမ္မာဘိသမယော န ဟောတိ။

‘‘ပထဝိသမံ , မဟာရာဇ, ဓုတဂုဏံ ဝိသုဒ္ဓိကာမာနံ ပတိဋ္ဌာနဋ္ဌေန။ အာပေါသမံ, မဟာရာဇ, ဓုတဂုဏံ ဝိသုဒ္ဓိကာမာနံ သဗ္ဗကိလေသမလဓေါဝနဋ္ဌေန။ တေဇောသမံ, မဟာရာဇ, ဓုတဂုဏံ ဝိသုဒ္ဓိကာမာနံ သဗ္ဗကိလေသဝနဇ္ဈာပနဋ္ဌေန ။ ဝါယောသမံ, မဟာရာဇ, ဓုတဂုဏံ ဝိသုဒ္ဓိကာမာနံ သဗ္ဗကိလေသမလရဇောပဝါဟနဋ္ဌေန။ အဂဒသမံ, မဟာရာဇ, ဓုတဂုဏံ ဝိသုဒ္ဓိကာမာနံ သဗ္ဗကိလေသဗျာဓိဝူပသမနဋ္ဌေန။ အမတသမံ, မဟာရာဇ, ဓုတဂုဏံ ဝိသုဒ္ဓိကာမာနံ သဗ္ဗကိလေသဝိသနာသနဋ္ဌေန။ ခေတ္တသမံ, မဟာရာဇ, ဓုတဂုဏံ ဝိသုဒ္ဓိကာမာနံ သဗ္ဗသာမညဂုဏသဿဝိရူဟနဋ္ဌေန။ မနောဟရသမံ, မဟာရာဇ, ဓုတဂုဏံ ဝိသုဒ္ဓိကာမာနံ ပတ္ထိတိစ္ဆိတသဗ္ဗသမ္ပတ္တိဝရဒဒဋ္ဌေန။ နာဝါသမံ, မဟာရာဇ, ဓုတဂုဏံ ဝိသုဒ္ဓိကာမာနံ သံသာရမဟဏ္ဏဝပါရဂမနဋ္ဌေန။ ဘီရုတ္တာဏသမံ, မဟာရာဇ, ဓုတဂုဏံ ဝိသုဒ္ဓိကာမာနံ ဇရာမရဏဘီတာနံ အဿာသကရဏဋ္ဌေန။ မာတုသမံ, မဟာရာဇ, ဓုတဂုဏံ ဝိသုဒ္ဓိကာမာနံ ကိလေသဒုက္ခပ္ပဋိဣဠိတာနံ အနုဂ္ဂါဟကဋ္ဌေန။ ပိတုသမံ, မဟာရာဇ, ဓုတဂုဏံ ဝိသုဒ္ဓိကာမာနံ ကုသလဝဍ္ဎိကာမာနံ သဗ္ဗသာမညဂုဏဇနကဋ္ဌေန။ မိတ္တသမံ, မဟာရာဇ, ဓုတဂုဏံ ဝိသုဒ္ဓိကာမာနံ သဗ္ဗသာမညဂုဏပရိယေသနအဝိသံဝါဒကဋ္ဌေန။ ပဒုမသမံ, မဟာရာဇ, ဓုတဂုဏံ ဝိသုဒ္ဓိကာမာနံ သဗ္ဗကိလေသမလေဟိ အနုပလိတ္တဋ္ဌေန။ စတုဇ္ဇာတိယဝရဂန္ဓသမံ , မဟာရာဇ, ဓုတဂုဏံ ဝိသုဒ္ဓိကာမာနံ ကိလေသဒုဂ္ဂန္ဓပဋိဝိနောဒနဋ္ဌေန။ ဂိရိရာဇဝရသမံ, မဟာရာဇ, ဓုတဂုဏံ ဝိသုဒ္ဓိကာမာနံ အဋ္ဌလောကဓမ္မဝါတေဟိ အကမ္ပိယဋ္ဌေန။ အာကာသသမံ, မဟာရာဇ, ဓုတဂုဏံ ဝိသုဒ္ဓိကာမာနံ သဗ္ဗတ္ထ ဂဟဏာပဂတဥရုဝိသဋဝိတ္ထတမဟန္တဋ္ဌေန။ နဒီသမံ, မဟာရာဇ, ဓုတဂုဏံ ဝိသုဒ္ဓိကာမာနံ ကိလေသမလပဝါဟနဋ္ဌေန။ သုဒေသကသမံ, မဟာရာဇ, ဓုတဂုဏံ ဝိသုဒ္ဓိကာမာနံ ဇာတိကန္တာရကိလေသဝနဂဟနနိတ္ထရဏဋ္ဌေန။ မဟာသတ္ထဝါဟသမံ, မဟာရာဇ, ဓုတဂုဏံ ဝိသုဒ္ဓိကာမာနံ သဗ္ဗဘယသုညခေမအဘယဝရပဝရနိဗ္ဗာနနဂရသမ္ပာပနဋ္ဌေန ။ သုမဇ္ဇိတဝိမလာဒါသသမံ, မဟာရာဇ, ဓုတဂုဏံ ဝိသုဒ္ဓိကာမာနံ သင်္ခါရာနံ သဘာဝဒဿနဋ္ဌေန။ ဖလကသမံ, မဟာရာဇ, ဓုတဂုဏံ ဝိသုဒ္ဓိကာမာနံ ကိလေသလဂုဠသရသတ္တိပဋိဗာဟနဋ္ဌေန။ ဆတ္တသမံ, မဟာရာဇ, ဓုတဂုဏံ ဝိသုဒ္ဓိကာမာနံ ကိလေသဝဿတိဝိဓဂ္ဂိသန္တာပါတပပဋိဗာဟနဋ္ဌေန။ စန္ဒသမံ, မဟာရာဇ, ဓုတဂုဏံ ဝိသုဒ္ဓိကာမာနံ ပိဟယိတပတ္ထိတဋ္ဌေန။ သူရိယသမံ, မဟာရာဇ, ဓုတဂုဏံ ဝိသုဒ္ဓိကာမာနံ မောဟတမတိမိရနာသနဋ္ဌေန။ သာဂရသမံ, မဟာရာဇ, ဓုတဂုဏံ ဝိသုဒ္ဓိကာမာနံ အနေကဝိဓသာမညဂုဏဝရရတနုဋ္ဌာနဋ္ဌေန, အပရိမိတအသင္ခ္ယေယျအပ္ပမေယျဋ္ဌေန စ။ ဧဝံ ခေါ, မဟာရာဇ, ဓုတဂုဏံ ဝိသုဒ္ဓိကာမာနံ ဗဟူပကာရံ သဗ္ဗဒရထပရိဠာဟနုဒံ အရတိနုဒံ ဘယနုဒံ ဘဝနုဒံ ခီလနုဒံ မလနုဒံ သောကနုဒံ ဒုက္ခနုဒံ ရာဂနုဒံ ဒေါသနုဒံ မောဟနုဒံ မာနနုဒံ ဒိဋ္ဌိနုဒံ သဗ္ဗာကုသလဓမ္မနုဒံ ယသာဝဟံ ဟိတာဝဟံ သုခါဝဟံ ဖာသုကရံ ဣတိကရံ ယောဂက္ခေမကရံ အနဝဇ္ဇံ ဣဋ္ဌသုခဝိပါကံ ဂုဏရာသိဂုဏပုဉ္ဇံ အပရိမိတအသင္ခ္ယေယျ အပ္ပမေယျဂုဏံ ဝရံ ပဝရံ အဂ္ဂံ။

‘‘ယထာ , မဟာရာဇ, မနုဿာ ဥပတ္ထမ္ဘဝသေန ဘောဇနံ ဥပသေဝန္တိ, ဟိတဝသေန ဘေသဇ္ဇံ ဥပသေဝန္တိ, ဥပကာရဝသေန မိတ္တံ ဥပသေဝန္တိ, တာရဏဝသေန နာဝံ ဥပသေဝန္တိ, သုဂန္ဓဝသေန မာလာဂန္ဓံ ဥပသေဝန္တိ, အဘယဝသေန ဘီရုတ္တာဏံ ဥပသေဝန္တိ, ပတိဋ္ဌာဝသေန [ပတိဋ္ဌာနဝသေန (က။)] ပထဝိံ ဥပသေဝန္တိ, သိပ္ပဝသေန အာစရိယံ ဥပသေဝန္တိ, ယသဝသေန ရာဇာနံ ဥပသေဝန္တိ, ကာမဒဒဝသေန မဏိရတနံ ဥပသေဝန္တိ, ဧဝမေဝ ခေါ, မဟာရာဇ, သဗ္ဗသာမညဂုဏဒဒဝသေန အရိယာ ဓုတဂုဏံ ဥပသေဝန္တိ။

‘‘ယထာ ဝါ ပန, မဟာရာဇ, ဥဒကံ ဗီဇဝိရူဟနာယ, အဂ္ဂိ ဈာပနာယ, အာဟာရော ဗလာဟရဏာယ, လတာ ဗန္ဓနာယ, သတ္ထံ ဆေဒနာယ, ပါနီယံ ပိပါသာဝိနယနာယ, နိဓိ အဿာသကရဏာယ, နာဝါ တီရသမ္ပာပနာယ, ဘေသဇ္ဇံ ဗျာဓိဝူပသမနာယ, ယာနံ သုခဂမနာယ, ဘီရုတ္တာဏံ ဘယဝိနောဒနာယ, ရာဇာ အာရက္ခတ္ထာယ, ဖလကံ ဒဏ္ဍလေဍ္ဍုလဂုဠသရသတ္တိပဋိဗာဟနာယ, အာစရိယော အနုသာသနာယ, မာတာ ပေါသနာယ, အာဒါသော ဩလောကနာယ, အလင်္ကာရော သောဘနာယ, ဝတ္ထံ ပဋိစ္ဆာဒနာယ, နိဿေဏီ အာရောဟနာယ, တုလာ ဝိသမဝိက္ခေပနာယ [နိက္ခေပနာယ (သီ။ ဣ။)], မန္တံ ပရိဇပ္ပနာယ, အာဝုဓံ တဇ္ဇနီယပဋိဗာဟနာယ , ပဒီပေါ အန္ဓကာရဝိဓမနာယ, ဝါတော ပရိဠာဟနိဗ္ဗာပနာယ, သိပ္ပံ ဝုတ္တိနိပ္ဖာဒနာယ, အဂဒံ ဇီဝိတရက္ခဏာယ, အာကရော ရတနုပ္ပါဒနာယ, ရတနံ အလင်္ကရာယ, အာဏာ အနတိက္ကမနာယ, ဣဿရိယံ ဝသဝတ္တနာယ, ဧဝမေဝ ခေါ, မဟာရာဇ, ဓုတဂုဏံ သာမညဗီဇဝိရူဟနာယ, ကိလေသမလဈာပနာယ, ဣဒ္ဓိဗလာဟရဏာယ, သတိသံဝရနိဗန္ဓနာယ, ဝိမတိဝိစိကိစ္ဆာသမုစ္ဆေဒနာယ, တဏှာပိပါသာဝိနယနာယ, အဘိသမယအဿာသကရဏာယ, စတုရောဃနိတ္ထရဏာယ, ကိလေသဗျာဓိဝူပသမာယ, နိဗ္ဗာနသုခပ္ပဋိလာဘာယ, ဇာတိဇရာဗျာဓိမရဏသောကပရိဒေဝဒုက္ခဒေါမနဿုပါယာသဘယဝိနောဒနာယ, သာမညဂုဏပရိရက္ခဏာယ, အရတိကုဝိတက္ကပဋိဗာဟနာယ, သကလသာမညတ္ထာနုသာသနာယ, သဗ္ဗသာမညဂုဏပေါသနာယ, သမထဝိပဿနာမဂ္ဂဖလနိဗ္ဗာနဒဿနာယ, သကလလောကထုတထောမိတမဟတိမဟာသောဘနကရဏာယ, သဗ္ဗာပါယပိဒဟနာယ, သာမညတ္ထသေလသိခရမုဒ္ဓနိ အဘိရူဟနာယ, ဝင်္ကကုဋိလဝိသမစိတ္တဝိက္ခေပနာယ [စိတ္တနိက္ခေပနာယ (သီ။ ဣ။)], သေဝိတဗ္ဗာသေဝိတဗ္ဗဓမ္မေ သာဓုသဇ္ဈာယကရဏာယ, သဗ္ဗကိလေသပဋိသတ္တုတဇ္ဇနာယ , အဝိဇ္ဇန္ဓကာရဝိဓမနာယ, တိဝိဓဂ္ဂိသန္တာပပရိဠာဟနိဗ္ဗာပနာယ, သဏှသုခုမသန္တသမာပတ္တိနိပ္ဖာဒနာယ, သကလသာမညဂုဏပရိရက္ခဏာယ, ဗောဇ္ဈင်္ဂဝရရတနုပ္ပါဒနာယ, ယောဂိဇနာလင်္ကရဏာယ, အနဝဇ္ဇနိပုဏသုခုမသန္တိသုခမနတိက္ကမနာယ , သကလသာမညအရိယဓမ္မဝသဝတ္တနာယ။ ဣတိ, မဟာရာဇ, ဣမေသံ ဂုဏာနံ အဓိဂမာယ ယဒိဒံ ဧကမေကံ ဓုတဂုဏံ, ဧဝံ, မဟာရာဇ, အတုလိယံ ဓုတဂုဏံ အပ္ပမေယျံ အသမံ အပ္ပဋိသမံ အပ္ပဋိဘာဂံ အပ္ပဋိသေဋ္ဌံ ဥတ္တရံ သေဋ္ဌံ ဝိသိဋ္ဌံ အဓိကံ အာယတံ ပုထုလံ ဝိသဋံ ဝိတ္ထတံ ဂရုကံ ဘာရိယံ မဟန္တံ။

‘‘ယော ခေါ, မဟာရာဇ, ပုဂ္ဂလော ပါပိစ္ဆော ဣစ္ဆာပကတော ကုဟကော လုဒ္ဓေါ ဩဒရိကော လာဘကာမော ယသကာမော ကိတ္တိကာမော အယုတ္တော အပ္ပတ္တော အနနုစ္ဆဝိကော အနရဟော အပ္ပတိရူပေါ ဓုတင်္ဂံ [တဓုဂုဏံ (က။) ဧဝမုပရိပိ] သမာဒိယတိ, သော ဒိဂုဏံ ဒဏ္ဍမာပဇ္ဇတိ, သဗ္ဗဂုဏဃာတမာပဇ္ဇတိ, ဒိဋ္ဌဓမ္မိကံ ဟီဠနံ ခီဠနံ ဂရဟနံ ဥပ္ပဏ္ဍနံ ခိပနံ အသမ္ဘောဂံ နိဿာရဏံ နိစ္ဆုဘနံ ပဝါဟနံ ပဗ္ဗာဇနံ ပဋိလဘတိ, သမ္ပရာယေပိ သတယောဇနိကေ အဝီစိမဟာနိရယေ ဥဏှကဌိတတတ္တသန္တတ္တအစ္စိဇာလာမာလကေ အနေကဝဿကောဋိသတသဟဿာနိ ဥဒ္ဓမဓေါ တိရိယံ ဖေဏုဒ္ဒေဟကံ သမ္ပရိဝတ္တကံ ပစ္စတိ, တတော မုစ္စိတွာ [မုစ္စိတွာ (သီ။ ဣ။)] ကိသဖရုသကာဠင်္ဂပစ္စင်္ဂေါ သူနုဒ္ဓုမာတသုသိရုတ္တမင်္ဂေါ [သူနုဒ္ဓုမာတသူစိမုခပမာဏသုသိရုတ္တမင်္ဂေါ (သီ။ ဣ။)] ဆာတော ပိပါသိတော ဝိသမဘီမရူပဝဏ္ဏော ဘဂ္ဂကဏ္ဏသောတော ဥမ္မီလိတနိမီလိတနေတ္တနယနော အရုဂတ္တပက္ကဂတ္တော ပုဠဝါကိဏ္ဏသဗ္ဗကာယော ဝါတမုခေ ဇလမာနော ဝိယ အဂ္ဂိက္ခန္ဓော အန္တော ဇလမာနော ပဇ္ဇလမာနော အတာဏော အသရဏော အာရုဏ္ဏရုဏ္ဏကာရုညရဝံ ပရိဒေဝမာနော နိဇ္ဈာမတဏှိကော သမဏမဟာပေတော ဟုတွာ အာဟိဏ္ဍမာနော မဟိယာ အဋ္ဋဿရံ ကရောတိ။

‘‘ယထာ , မဟာရာဇ, ကောစိ အယုတ္တော အပ္ပတ္တော အနနုစ္ဆဝိကော အနရဟော အပ္ပတိရူပေါ ဟီနော ကုဇာတိကော ခတ္တိယာဘိသေကေန အဘိသိဉ္စတိ, သော လဘတိ ဟတ္ထစ္ဆေဒံ ပါဒစ္ဆေဒံ ဟတ္ထပါဒစ္ဆေဒံ ကဏ္ဏစ္ဆေဒံ နာသစ္ဆေဒံ ကဏ္ဏနာသစ္ဆေဒံ ဗိလင်္ဂထာလိကံ သင်္ခမုဏ္ဍိကံ ရာဟုမုခံ ဇောတိမာလိကံ ဟတ္ထပဇ္ဇောတိကံ ဧရကဝတ္တိကံ စီရကဝါသိကံ ဧဏေယျကံ ဗဠိသမံသိကံ ကဟာပဏကံ ခါရာပတစ္ဆိကံ ပလိဃပရိဝတ္တိကံ ပလာလဣဌကံ တတ္တေန တေလေန ဩသိဉ္စနံ သုနခေဟိ ခါဒါပနံ ဇီဝသူလာရောပနံ အသိနာ သီသစ္ဆေဒံ အနေကဝိဟိတမ္ပိ ကမ္မကာရဏံ အနုဘဝတိ။ ကိံ ကာရဏာ? အယုတ္တော အပ္ပတ္တော အနနုစ္ဆဝိကော အနရဟော အပ္ပတိရူပေါ ဟီနော ကုဇာတိကော မဟန္တေ ဣဿရိယေ ဌာနေ အတ္တာနံ ဌပေသိ, ဝေလံ ဃာတေသိ, ဧဝမေဝ ခေါ, မဟာရာဇ, ယော ကောစိ ပုဂ္ဂလော ပါပိစ္ဆော။ပေ။။ မဟိယာ အဋ္ဋဿရံ ကရောတိ။

‘‘ယော ပန, မဟာရာဇ, ပုဂ္ဂလော ယုတ္တော ပတ္တော အနုစ္ဆဝိကော အရဟော ပတိရူပေါ အပ္ပိစ္ဆော သန္တုဋ္ဌော ပဝိဝိတ္တော အသံသဋ္ဌော အာရဒ္ဓဝီရိယော ပဟိတတ္တော အသဌော အမာယော အနောဒရိကော အလာဘကာမော အယသကာမော အကိတ္တိကာမော သဒ္ဓေါ သဒ္ဓါပဗ္ဗဇိတော ဇရာမရဏာ မုစ္စိတုကာမော ‘သာသနံ ပဂ္ဂဏှိဿာမီ’တိ ဓုတင်္ဂံ သမာဒိယတိ, သော ဒိဂုဏံ ပူဇံ အရဟတိ ဒေဝါနဉ္စ ပိယော ဟောတိ မနာပေါ ပိဟယိတော ပတ္ထိတော, ဇာတိသုမနမလ္လိကာဒီနံ ဝိယ ပုပ္ဖံ နဟာတာနုလိတ္တဿ, ဇိဃစ္ဆိတဿ ဝိယ ပဏီတဘောဇနံ, ပိပါသိတဿ ဝိယ သီတလဝိမလသုရဘိပါနီယံ, ဝိသဂတဿ ဝိယ ဩသဓဝရံ, သီဃဂမနကာမဿ ဝိယ အာဇညရထဝရုတ္တမံ, အတ္ထကာမဿ ဝိယ မနောဟရမဏိရတနံ, အဘိသိဉ္စိတုကာမဿ ဝိယ ပဏ္ဍရဝိမလသေတစ္ဆတ္တံ, ဓမ္မကာမဿ ဝိယ အရဟတ္တဖလာဓိဂမမနုတ္တရံ။ တဿ စတ္တာရော သတိပဋ္ဌာနာ ဘာဝနာပါရိပူရိံ ဂစ္ဆန္တိ, စတ္တာရော သမ္မပ္ပဓါနာ စတ္တာရော ဣဒ္ဓိပါဒါ ပဉ္စိန္ဒ္ရိယာနိ ပဉ္စ ဗလာနိ သတ္တ ဗောဇ္ဈင်္ဂါ အရိယော အဋ္ဌင်္ဂိကော မဂ္ဂေါ ဘာဝနာပါရိပူရိံ ဂစ္ဆတိ, သမထဝိပဿနာ အဓိဂစ္ဆတိ, အဓိဂမပ္ပဋိပတ္တိ ပရိဏမတိ, စတ္တာရိ သာမညဖလာနိ စတဿော ပဋိသမ္ဘိဒါ တိဿော ဝိဇ္ဇာ ဆဠဘိညာ ကေဝလော စ သမဏဓမ္မော သဗ္ဗေ တဿာဓေယျာ ဟောန္တိ, ဝိမုတ္တိပဏ္ဍရဝိမလသေတစ္ဆတ္တေန အဘိသိဉ္စတိ။

‘‘ယထာ, မဟာရာဇ, ရညော ခတ္တိယဿ အဘိဇာတကုလကုလီနဿ ခတ္တိယာဘိသေကေန အဘိသိတ္တဿ ပရိစရန္တိ သရဋ္ဌနေဂမဇာနပဒဘဋဗလာ [ဗလတ္ထာ (သီ။ ဣ။)] အဋ္ဌတ္တိံသာ စ ရာဇပရိသာ နဋနစ္စကာ မုခမင်္ဂလိကာ သောတ္ထိဝါစကာ သမဏဗြာဟ္မဏသဗ္ဗပါသဏ္ဍဂဏာ အဘိဂစ္ဆန္တိ, ယံ ကိဉ္စိ ပထဝိယာ ပဋ္ဋနရတနာကရနဂရသုင်္ကဋ္ဌာနဝေရဇ္ဇကဆေဇ္ဇဘေဇ္ဇဇနမနုသာသနံ သဗ္ဗတ္ထ သာမိကော ဘဝတိ, ဧဝမေဝ ခေါ , မဟာရာဇ, ယော ကောစိ ပုဂ္ဂလော ယုတ္တော ပတ္တော။ပေ။။ ဝိမုတ္တိပဏ္ဍရဝိမလသေတစ္ဆတ္တေန အဘိသိဉ္စတိ။

‘‘တေရသိမာနိ , မဟာရာဇ, ဓုတင်္ဂါနိ, ယေဟိ သုဒ္ဓိကတော နိဗ္ဗာနမဟာသမုဒ္ဒံ ပဝိသိတွာ ဗဟုဝိဓံ ဓမ္မကီဠမဘိကီဠတိ, ရူပါရူပအဋ္ဌသမာပတ္တိယော ဝဠဉ္ဇေတိ, ဣဒ္ဓိဝိဓံ ဒိဗ္ဗသောတဓါတုံ ပရစိတ္တဝိဇာနနံ ပုဗ္ဗေနိဝါသာနုဿတိံ ဒိဗ္ဗစက္ခုံ သဗ္ဗာသဝက္ခယဉ္စ ပါပုဏာတိ။ ကတမေ တေရသ? ပံသုကူလိကင်္ဂံ တေစီဝရိကင်္ဂံ ပိဏ္ဍပါတိကင်္ဂံ သပဒါနစာရိကင်္ဂံ ဧကာသနိကင်္ဂံ ပတ္တပိဏ္ဍိကင်္ဂံ ခလုပစ္ဆာဘတ္တိကင်္ဂံ အာရညိကင်္ဂံ ရုက္ခမူလိကင်္ဂံ အဗ္ဘောကာသိကင်္ဂံ သောသာနိကင်္ဂံ ယထာသန္ထတိကင်္ဂံ နေသဇ္ဇိကင်္ဂံ, ဣမေဟိ ခေါ, မဟာရာဇ, တေရသဟိ ဓုတဂုဏေဟိ ပုဗ္ဗေ အာသေဝိတေဟိ နိသေဝိတေဟိ စိဏ္ဏေဟိ ပရိစိဏ္ဏေဟိ စရိတေဟိ ဥပစရိတေဟိ ပရိပူရိတေဟိ ကေဝလံ သာမညံ ပဋိလဘတိ, တဿာဓေယျာ ဟောန္တိ ကေဝလာ သန္တာ သုခါ သမာပတ္တိယော။

‘‘ယထာ, မဟာရာဇ, သဓနော နာဝိကော ပဋ္ဋနေ သုဋ္ဌု ကတသုင်္ကော မဟာသမုဒ္ဒံ ပဝိသိတွာ ဝင်္ဂံ တက္ကောလံ စီနံ သောဝီရံ သုရဋ္ဌံ အလသန္ဒံ ကောလပဋ္ဋနံ သုဝဏ္ဏဘူမိံ ဂစ္ဆတိ အညမ္ပိ ယံ ကိဉ္စိ နာဝါသဉ္စရဏံ, ဧဝမေဝ ခေါ, မဟာရာဇ, ဣမေဟိ တေရသဟိ ဓုတဂုဏေဟိ ပုဗ္ဗေ အာသေဝိတေဟိ နိသေဝိတေဟိ စိဏ္ဏေဟိ ပရိစိဏ္ဏေဟိ စရိတေဟိ ဥပစရိတေဟိ ပရိပူရိတေဟိ ကေဝလံ သာမညံ ပဋိလဘတိ, တဿာဓေယျာ ဟောန္တိ ကေဝလာ သန္တာ သုခါ သမာပတ္တိယော။

‘‘ယထာ, မဟာရာဇ, ကဿကော ပဌမံ ခေတ္တဒေါသံ တိဏကဋ္ဌပါသာဏံ အပနေတွာ ကသိတွာ ဝပိတွာ သမ္မာ ဥဒကံ ပဝေသေတွာ ရက္ခိတွာ ဂေါပေတွာ လဝနမဒ္ဒနေန ဗဟုဓညကော ဟောတိ, တဿာဓေယျာ ဘဝန္တိ ယေ ကေစိ အဓနာ ကပဏာ ဒလိဒ္ဒါ ဒုဂ္ဂတဇနာ, ဧဝမေဝ ခေါ, မဟာရာဇ, ဣမေဟိ တေရသဟိ ဓုတဂုဏေဟိ ပုဗ္ဗေ အာသေဝိတေဟိ။ပေ။။ ကေဝလာ သန္တာ သုခါ သမာပတ္တိယော။

‘‘ယထာ ဝါ ပန, မဟာရာဇ, ခတ္တိယော မုဒ္ဓါဝသိတ္တော အဘိဇာတကုလီနော ဆေဇ္ဇဘေဇ္ဇဇနမနုသာသနေ ဣဿရော ဟောတိ ဝသဝတ္တီ သာမိကော ဣစ္ဆာကရဏော, ကေဝလာ စ မဟာပထဝီ တဿာဓေယျာ ဟောတိ, ဧဝမေဝ ခေါ, မဟာရာဇ, ဣမေဟိ တေရသဟိ ဓုတဂုဏေဟိ ပုဗ္ဗေ အာသေဝိတေဟိ နိသေဝိတေဟိ စိဏ္ဏေဟိ ပရိစိဏ္ဏေဟိ စရိတေဟိ ဥပစရိတေဟိ ပရိပူရိတေဟိ ဇိနသာသနဝရေ ဣဿရော ဟောတိ ဝသဝတ္တီ သာမိကော ဣစ္ဆာကရဏော, ကေဝလာ စ သမဏဂုဏာ တဿာဓေယျာ ဟောန္တိ။

‘‘နနု , မဟာရာဇ, ထေရော ဥပသေနော ဝင်္ဂန္တပုတ္တော သလ္လေခဓုတဂုဏေ ပရိပူရကာရိတာယ အနာဒိယိတွာ သာဝတ္ထိယာ သံဃဿ ကတိကံ သပရိသော နရဒမ္မသာရထိံ ပဋိသလ္လာနဂတံ ဥပသင်္ကမိတွာ ဘဂဝတော ပါဒေ သိရသာ ဝန္ဒိတွာ ဧကမန္တံ နိသီဒိ, ဘဂဝါ စ တံ သုဝိနီတံ ပရိသံ ဩလောကေတွာ ဟဋ္ဌတုဋ္ဌော ပမုဒိတော ဥဒဂ္ဂေါ ပရိသာယ သဒ္ဓိံ သလ္လာပံ သလ္လပိတွာ အသမ္ဘိန္နေန ဗြဟ္မဿရေန ဧတဒဝေါစ ‘ပါသာဒိကာ ခေါ ပန တျာယံ ဥပသေန ပရိသာ, ကတံ တွံ ဥပသေန ပရိသံ ဝိနေသီ’တိ။ သောပိ သဗ္ဗညုနာ ဒသဗလေန ဒေဝါတိဒေဝေန ပုဋ္ဌော ယထာဘူတသဘာဝဂုဏဝသေန ဘဂဝန္တံ ဧတဒဝေါစ –

‘‘ယော ကောစိ မံ, ဘန္တေ, ဥပသင်္ကမိတွာ ပဗ္ဗဇ္ဇံ ဝါ နိဿယံ ဝါ ယာစတိ, တမဟံ ဧဝံ ဝဒါမိ ‘‘အဟံ ခေါ အာဝုသော အာရညိကော ပိဏ္ဍပါတိကော ပံသုကူလိကော တေစီဝရိကော။ သစေ တွမ္ပိ အာရညိကော ဘဝိဿသိ ပိဏ္ဍပါတိကော ပံသုကူလိကော တေစီဝရိကော, ဧဝါဟံ တံ ပဗ္ဗာဇေဿာမိ နိဿယံ ဒဿာမီ’’တိ, သစေ သော မေ, ဘန္တေ, ပဋိဿုဏိတွာ နန္ဒတိ ဩရမတိ, ဧဝါဟံ တံ ပဗ္ဗာဇေမိ နိဿယံ ဒေမိ, သစေ န နန္ဒတိ န ဩရမတိ, န တံ ပဗ္ဗာဇေမိ, န နိဿယံ ဒေမိ, ဧဝါဟံ, ဘန္တေ, ပရိသံ ဝိနေမီ’’တိ။ ဧဝံ ခေါ [ဧဝမ္ပိ (က။)], မဟာရာဇ, ဓုတဂုဏဝရသမာဒိဏ္ဏော ဇိနသာသနဝရေ ဣဿရော ဟောတိ။ ဝသဝတ္တီ သာမိကော ဣစ္ဆာကရဏော, တဿာဓေယျာ ဟောန္တိ ကေဝလာ သန္တာ သုခါ သမာပတ္တိယော။

‘‘ယထာ, မဟာရာဇ, ပဒုမံ အဘိဝုဒ္ဓပရိသုဒ္ဓဥဒိစ္စဇာတိပ္ပဘဝံ သိနိဒ္ဓံ မုဒု လောဘနီယံ သုဂန္ဓံ ပိယံ ပတ္ထိတံ ပသတ္ထံ ဇလကဒ္ဒမမနုပလိတ္တံ အဏုပတ္တကေသရကဏ္ဏိကာဘိမဏ္ဍိတံ ဘမရဂဏသေဝိတံ သီတလသလိလသံဝဒ္ဓံ, ဧဝမေဝ ခေါ, မဟာရာဇ, ဣမေဟိ တေရသဟိ ဓုတဂုဏေဟိ ပုဗ္ဗေ အာသေဝိတေဟိ နိသေဝိတေဟိ စိဏ္ဏေဟိ ပရိစိဏ္ဏေဟိ စရိတေဟိ ဥပစရိတေဟိ ပရိပူရိတေဟိ အရိယသာဝကော တိံသဂုဏဝရေဟိ သမုပေတော ဟောတိ။

‘‘ကတမေဟိ တိံသဂုဏဝရေဟိ? သိနိဒ္ဓမုဒုမဒ္ဒဝမေတ္တစိတ္တော ဟောတိ, ဃာတိတဟတဝိဟတကိလေသော ဟောတိ, ဟတနိဟတမာနဒဗ္ဗော ဟောတိ, အစလဒဠှနိဝိဋ္ဌနိဗ္ဗေမတိကသဒ္ဓေါ ဟောတိ, ပရိပုဏ္ဏဣဏိတပဟဋ္ဌလောဘနီယသန္တသုခသမာပတ္တိလာဘီ ဟောတိ, သီလဝရပဝရအသမသုစိဂန္ဓပရိဘာဝိတော ဟောတိ, ဒေဝမနုဿာနံ ပိယော ဟောတိ မနာပေါ, ခီဏာသဝအရိယဝရပုဂ္ဂလပတ္ထိတော, ဒေဝမနုဿာနံ ဝန္ဒိတပူဇိတော, ဗုဓဝိဗုဓပဏ္ဍိတဇနာနံ ထုတထဝိတထောမိတပသတ္ထော , ဣဓ ဝါ ဟုရံ ဝါ လောကေန အနုပလိတ္တော, အပ္ပထောကဝဇ္ဇေပိ [အပ္ပသာဝဇ္ဇေပိ (က။)] ဘယဒဿာဝီ, ဝိပုလဝရသမ္ပတ္တိကာမာနံ မဂ္ဂဖလဝရတ္ထသာဓနော, အာယာစိတဝိပုလပဏီတပစ္စယဘာဂီ, အနိကေတသယနော, ဈာနဇ္ဈောသိတတပ္ပဝရဝိဟာရီ , ဝိဇဋိတကိလေသဇာလဝတ္ထု, ဘိန္နဘဂ္ဂသင္ကုဋိတသဉ္ဆိန္နဂတိနီဝရဏော, အကုပ္ပဓမ္မော, အဘိနီတဝါသော, အနဝဇ္ဇဘောဂီ , ဂတိဝိမုတ္တော, ဥတ္တိဏ္ဏသဗ္ဗဝိစိကိစ္ဆော, ဝိမုတ္တိဇ္ဈောသိတတ္ထော [ဝိမုတ္တိဇ္ဈာသိတတ္တော (သီ။ ဣ။)], ဒိဋ္ဌဓမ္မော, အစလဒဠှဘီရုတ္တာဏမုပဂတော, သမုစ္ဆိန္နာနုသယော, သဗ္ဗာသဝက္ခယံ ပတ္တော, သန္တသုခသမာပတ္တိဝိဟာရဗဟုလော, သဗ္ဗသမဏဂုဏသမုပေတော, ဣမေဟိ တိံသဂုဏဝရေဟိ သမုပေတော ဟောတိ။

‘‘နနု, မဟာရာဇ, ထေရော သာရိပုတ္တော ဒသသဟဿိလောကဓါတုယာ အဂ္ဂပုရိသော ဌပေတွာ ဒသဗလံ လောကာစရိယံ, သောပိ အပရိမိတမသင္ခ္ယေယျကပ္ပေ သမာစိတကုသလမူလော [သမာစိဏ္ဏကုသလမူလော (က။)] ဗြာဟ္မဏကုလကုလီနော မနာပိကံ ကာမရတိံ အနေကသတသင်္ခံ ဓနဝရဉ္စ ဩဟာယ ဇိနသာသနေ ပဗ္ဗဇိတွာ ဣမေဟိ တေရသဟိ ဓုတဂုဏေဟိ ကာယဝစီစိတ္တံ ဒမယိတွာ အဇ္ဇေတရဟိ အနန္တဂုဏသမန္နာဂတော ဂေါတမဿ ဘဂဝတော သာသနဝရေ ဓမ္မစက္ကမနုပ္ပဝတ္တကော ဇာတော။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန ဧကင်္ဂုတ္တရနိကာယဝရလဉ္ဆကေ –

‘‘နာဟံ, ဘိက္ခဝေ, အညံ ဧကပုဂ္ဂလမ္ပိ သမနုပဿာမိ, ယော ဧဝံ တထာဂတေန အနုတ္တရံ ဓမ္မစက္ကံ ပဝတ္တိတံ သမ္မဒေဝ အနုပ္ပဝတ္တေတိ, ယထယိဒံ ဘိက္ခဝေ, သာရိပုတ္တော, သာရိပုတ္တော။ ဘိက္ခဝေ, တထာဂတေန အနုတ္တရံ ဓမ္မစက္ကံ ပဝတ္တိတံ သမ္မဒေဝ အနုပ္ပဝတ္တေတီ’’’တိ။

‘‘သာဓု, ဘန္တေ နာဂသေန, ယံ ကိဉ္စိ နဝင်္ဂံ ဗုဒ္ဓဝစနံ, ယာ စ လောကုတ္တရာ ကိရိယာ, ယာ စ လောကေ အဓိဂမဝိပုလဝရသမ္ပတ္တိယော, သဗ္ဗံ တံ တေရသသု ဓုတဂုဏေသု သမောဓါနောပဂတ’’ [သမောဓါနေတဗ္ဗံ (က။)] န္တိ။

ဓုတင်္ဂပဉ္ဟော ဒုတိယော။

အနုမာနဝဂ္ဂေါ စတုတ္ထော။

၁။ ဣဒ္ဓိဗလဝဂ္ဂ

၁။ ကတာဓိကာရသဖလပဥှ

၁။ အထ ခေါ မိလိန္ဒော ရာဇာ ကတာဝကာသော နိပစ္စ ဂရုနော ပါဒေ သိရသိ အဉ္ဇလိံ ကတွာ ဧတဒဝေါစ ‘‘ဘန္တေ နာဂသေန, ဣမေ တိတ္ထိယာ ဧဝံ ဘဏန္တိ [ဝဉ္စော ဘဝတိ အဖလော (သီ။ ဣ။ က။)] ‘ယဒိ ဗုဒ္ဓေါ ပူဇံ သာဒိယတိ, န ပရိနိဗ္ဗုတော ဗုဒ္ဓေါ သံယုတ္တော လောကေန အန္တောဘဝိကော လောကသ္မိံ လောကသာဓါရဏော, တသ္မာ တဿ ကတော အဓိကာရော အဝဉ္ဈော ဘဝတိ သဖလော။ ယဒိ ပရိနိဗ္ဗုတော ဝိသံယုတ္တော လောကေန နိဿဋော သဗ္ဗဘဝေဟိ, တဿ ပူဇာ နုပ္ပဇ္ဇတိ, ပရိနိဗ္ဗုတော န ကိဉ္စိ သာဒိယတိ, အသာဒိယန္တဿ ကတော အဓိကာရော ဝဉ္ဈော ဘဝတိ အဖလော’တိ ဥဘတော ကောဋိကော ဧသော ပဉ္ဟော, နေသော ဝိသယော အပ္ပတ္တမာနသာနံ, မဟန္တာနံ ယေဝေသော ဝိသယော, ဘိန္ဒေတံ ဒိဋ္ဌိဇာလံ ဧကံသေ ဌပယ, တဝေသော ပဉ္ဟော အနုပ္ပတ္တော, အနာဂတာနံ ဇိနပုတ္တာနံ စက္ခုံ ဒေဟိ ပရဝါဒနိဂ္ဂဟာယာ’’တိ။

ထေရော အာဟ ‘‘ပရိနိဗ္ဗုတော, မဟာရာဇ, ဘဂဝါ, န စ ဘဂဝါ ပူဇံ သာဒိယတိ, ဗောဓိမူလေ ယေဝ တထာဂတဿ သာဒိယနာ ပဟီနာ, ကိံ ပန အနုပါဒိသေသာယ နိဗ္ဗာနဓါတုယာ ပရိနိဗ္ဗုတဿ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ –

‘‘‘ပူဇိယန္တာ [ပူဇိတာ (သျာ။)] အသမသမာ၊ သဒေဝမာနုသေဟိ တေ။

န သာဒိယန္တိ သက္ကာရံ၊ ဗုဒ္ဓါနံ ဧသ ဓမ္မတာ’’’တိ။

ရာဇာ အာဟ ‘‘ဘန္တေ နာဂသေန, ပုတ္တော ဝါ ပိတုနော ဝဏ္ဏံ ဘာသတိ, ပိတာ ဝါ ပုတ္တဿ ဝဏ္ဏံ ဘာသတိ, န စေတံ ကာရဏံ ပရဝါဒါနံ နိဂ္ဂဟာယ, ပသာဒပ္ပကာသနံ နာမေတံ, ဣင်္ဃ မေ တွံ တတ္ထ ကာရဏံ သမ္မာ ဗြူဟိ သကဝါဒဿ ပတိဋ္ဌာပနာယ ဒိဋ္ဌိဇာလဝိနိဝေဌနာယာ’’တိ။

ထေရော အာဟ ‘‘ပရိနိဗ္ဗုတော, မဟာရာဇ, ဘဂဝါ, န စ ဘဂဝါ ပူဇံ သာဒိယတိ, အသာဒိယန္တဿေဝ တထာဂတဿ ဒေဝမနုဿာ ဓါတုရတနံ ဝတ္ထုံ ကရိတွာ တထာဂတဿ ဉာဏရတနာရမ္မဏေန သမ္မာပဋိပတ္တိံ သေဝန္တာ တိဿော သမ္ပတ္တိယော ပဋိလဘန္တိ။

‘‘ယထာ , မဟာရာဇ, မဟတိမဟာအဂ္ဂိက္ခန္ဓော ပဇ္ဇလိတွာ နိဗ္ဗာယေယျ, အပိ နု ခေါ သော, မဟာရာဇ, မဟာအဂ္ဂိက္ခန္ဓော သာဒိယတိ တိဏကဋ္ဌုပါဒါန’’န္တိ? ‘‘ဇလမာနောပိ သော, ဘန္တေ, မဟာအဂ္ဂိက္ခန္ဓော တိဏကဋ္ဌုပါဒါနံ န သာဒိယတိ, ကိံ ပန နိဗ္ဗုတော ဥပသန္တော အစေတနော သာဒိယတိ? ‘‘တသ္မိံ ပန, မဟာရာဇ, အဂ္ဂိက္ခန္ဓေ ဥပရတေ ဥပသန္တေ လောကေ အဂ္ဂိ သုညော ဟောတီ’’တိ။ ‘‘န ဟိ, ဘန္တေ, ကဋ္ဌံ အဂ္ဂိဿ ဝတ္ထု ဟောတိ ဥပါဒါနံ, ယေ ကေစိ မနုဿာ အဂ္ဂိကာမာ, တေ အတ္တနော ထာမဗလဝီရိယေန ပစ္စတ္တပုရိသကာရေန ကဋ္ဌံ မန္ထယိတွာ [မဒ္ဒိတွာ (က။)] အဂ္ဂိံ နိဗ္ဗတ္တေတွာ တေန အဂ္ဂိနာ အဂ္ဂိကရဏီယာနိ ကမ္မာနိ ကရောန္တီ’’တိ။ ‘‘တေန ဟိ, မဟာရာဇ, တိတ္ထိယာနံ ဝစနံ မိစ္ဆာ ဘဝတိ ‘အသာဒိယန္တဿ ကတော အဓိကာရော ဝဉ္ဈော ဘဝတိ အဖလော’တိ။

‘‘ယထာ, မဟာရာဇ, မဟတိမဟာအဂ္ဂိက္ခန္ဓော ပဇ္ဇလိ, ဧဝမေဝ ဘဂဝါ ဒသသဟဿိယာ [ဒသသဟဿိမှိ (သီ။ ဣ။ က။)] လောကဓါတုယာ ဗုဒ္ဓသိရိယာ ပဇ္ဇလိ။ ယထာ, မဟာရာဇ, မဟတိမဟာအဂ္ဂိက္ခန္ဓော ပဇ္ဇလိတွာ နိဗ္ဗုတော, ဧဝမေဝ ဘဂဝါ ဒသသဟဿိယာ လောကဓါတုယာ ဗုဒ္ဓသိရိယာ ပဇ္ဇလိတွာ အနုပါဒိသေသာယ နိဗ္ဗာနဓါတုယာ ပရိနိဗ္ဗုတော။ ယထာ, မဟာရာဇ, နိဗ္ဗုတော အဂ္ဂိက္ခန္ဓော တိဏကဋ္ဌုပါဒါနံ န သာဒိယတိ, ဧဝမေဝ ခေါ လောကဟိတဿ သာဒိယနာ ပဟီနာ ဥပသန္တာ။ ယထာ, မဟာရာဇ, မနုဿာ နိဗ္ဗုတေ အဂ္ဂိက္ခန္ဓေ အနုပါဒါနေ အတ္တနော ထာမဗလဝီရိယေန ပစ္စတ္တပုရိသကာရေန ကဋ္ဌံ မန္ထယိတွာ အဂ္ဂိံ နိဗ္ဗတ္တေတွာ တေန အဂ္ဂိနာ အဂ္ဂိကရဏီယာနိ ကမ္မာနိ ကရောန္တိ, ဧဝမေဝ ခေါ ဒေဝမနုဿာ တထာဂတဿ ပရိနိဗ္ဗုတဿ အသာဒိယန္တဿေဝ ဓါတုရတနံ ဝတ္ထုံ ကရိတွာ တထာဂတဿ ဉာဏရတနာရမ္မဏေန သမ္မာပဋိပတ္တိံ သေဝန္တာ တိဿော သမ္ပတ္တိယော ပဋိလဘန္တိ, ဣမိနာပိ, မဟာရာဇ, ကာရဏေန တထာဂတဿ ပရိနိဗ္ဗုတဿ အသာဒိယန္တဿေဝ ကတော အဓိကာရော အဝဉ္ဈော ဘဝတိ သဖလော။

‘‘အပရမ္ပိ, မဟာရာဇ, ဥတ္တရိံ ကာရဏံ သုဏောဟိ ယေန ကာရဏေန တထာဂတဿ ပရိနိဗ္ဗုတဿ အသာဒိယန္တဿေဝ ကတော အဓိကာရော အဝဉ္ဈော ဘဝတိ သဖလော။ ယထာ, မဟာရာဇ, မဟတိမဟာဝါတော ဝါယိတွာ ဥပရမေယျ, အပိ နု ခေါ သော, မဟာရာဇ, ဥပရတော ဝါတော သာဒိယတိ ပုန နိဗ္ဗတ္တာပန’’န္တိ? ‘‘န ဟိ, ဘန္တေ, ဥပရတဿ ဝါတဿ အာဘောဂေါ ဝါ မနသိကာရော ဝါ ပုန နိဗ္ဗတ္တာပနာယ’’။ ‘‘ကိံ ကာရဏံ’’? ‘‘အစေတနာ သာ ဝါယောဓါတူ’’တိ။ ‘‘အပိ နု တဿ, မဟာရာဇ, ဥပရတဿ ဝါတဿ ဝါတောတိ သမညာ အပဂစ္ဆတီ’’တိ? ‘‘န ဟိ, ဘန္တေ, တာလဝဏ္ဋဝိဓူပနာနိ ဝါတဿ ဥပ္ပတ္တိယာ ပစ္စယာ, ယေ ကေစိ မနုဿာ ဥဏှာဘိတတ္တာ ပရိဠာဟပရိဣဠိတာ, တေ တာလဝဏ္ဋေန ဝါ ဝိဓူပနေန ဝါ အတ္တနော ထာမဗလဝီရိယေန ပစ္စတ္တပုရိသကာရေန တံ နိဗ္ဗတ္တေတွာ တေန ဝါတေန ဥဏှံ နိဗ္ဗာပေန္တိ ပရိဠာဟံ ဝူပသမေန္တီ’’တိ။ ‘‘တေန ဟိ, မဟာရာဇ, တိတ္ထိယာနံ ဝစနံ မိစ္ဆာ ဘဝတိ ‘အသာဒိယန္တဿ ကတော အဓိကာရော ဝဉ္ဈော ဘဝတိ အဖလော’တိ။

‘‘ယထာ, မဟာရာဇ, မဟတိမဟာဝါတော ဝါယိ, ဧဝမေဝ ဘဂဝါ ဒသသဟဿိယာ လောကဓါတုယာ သီတလမဓုရသန္တသုခုမမေတ္တာဝါတေန ဥပဝါယိ။ ယထာ, မဟာရာဇ, မဟတိမဟာဝါတော ဝါယိတွာ ဥပရတော, ဧဝမေဝ ဘဂဝါ သီတလမဓုရသန္တသုခုမမေတ္တာဝါတေန ဥပဝါယိတွာ အနုပါဒိသေသာယ နိဗ္ဗာနဓါတုယာ ပရိနိဗ္ဗုတော။ ယထာ, မဟာရာဇ, ဥပရတော ဝါတော ပုန နိဗ္ဗတ္တာပနံ န သာဒိယတိ, ဧဝမေဝ လောကဟိတဿ သာဒိယနာ ပဟီနာ ဥပသန္တာ။ ယထာ, မဟာရာဇ, တေ မနုဿာ ဥဏှာဘိတတ္တာ ပရိဠာဟပရိဣဠိတာ, ဧဝမေဝ ဒေဝမနုဿာ တိဝိဓဂ္ဂိသန္တာပပရိဠာဟပရိဣဠိတာ။ ယထာ တာလဝဏ္ဋဝိဓူပနာနိ ဝါတဿ နိဗ္ဗတ္တိယာ ပစ္စယာ ဟောန္တိ, ဧဝမေဝ တထာဂတဿ ဓါတု စ ဉာဏရတနဉ္စ ပစ္စယော ဟောတိ တိဿန္နံ သမ္ပတ္တီနံ ပဋိလာဘာယ။ ယထာ မနုဿာ ဥဏှာဘိတတ္တာ ပရိဠာဟပရိဣဠိတာ တာလဝဏ္ဋေန ဝါ ဝိဓူပနေန ဝါ ဝါတံ နိဗ္ဗတ္တေတွာ ဥဏှံ နိဗ္ဗာပေန္တိ ပရိဠာဟံ ဝူပသမေန္တိ, ဧဝမေဝ ဒေဝမနုဿာ တထာဂတဿ ပရိနိဗ္ဗုတဿ အသာဒိယန္တဿေဝ ဓါတုဉ္စ ဉာဏရတနဉ္စ ပူဇေတွာ ကုသလံ နိဗ္ဗတ္တေတွာ တေန ကုသလေန တိဝိဓဂ္ဂိသန္တာပပရိဠာဟံ နိဗ္ဗာပေန္တိ ဝူပသမေန္တိ။ ဣမိနာပိ, မဟာရာဇ, ကာရဏေန တထာဂတဿ ပရိနိဗ္ဗုတဿ အသာဒိယန္တဿေဝ ကတော အဓိကာရော အဝဉ္ဈော ဘဝတိ သဖလောတိ။

‘‘အပရမ္ပိ, မဟာရာဇ, ဥတ္တရိံ ကာရဏံ သုဏောဟိ ပရဝါဒါနံ နိဂ္ဂဟာယ။ ယထာ, မဟာရာဇ, ပုရိသော ဘေရိံ အာကောဋေတွာ သဒ္ဒံ နိဗ္ဗတ္တေယျ, ယော သော ဘေရိသဒ္ဒေါ ပုရိသေန နိဗ္ဗတ္တိတော, သော သဒ္ဒေါ အန္တရဓါယေယျ, အပိ နု ခေါ သော, မဟာရာဇ, သဒ္ဒေါ သာဒိယတိ ပုန နိဗ္ဗတ္တာပန’’န္တိ? ‘‘န ဟိ, ဘန္တေ, အန္တရဟိတော သော သဒ္ဒေါ, နတ္ထိ တဿ ပုန ဥပ္ပါဒါယ အာဘောဂေါ ဝါ မနသိကာရော ဝါ, သကိံ နိဗ္ဗတ္တေ ဘေရိသဒ္ဒေ အန္တရဟိတေ သော ဘေရိသဒ္ဒေါ သမုစ္ဆိန္နော ဟောတိ။ ဘေရီ ပန, ဘန္တေ, ပစ္စယော ဟောတိ သဒ္ဒဿ နိဗ္ဗတ္တိယာ, အထ ပုရိသော ပစ္စယေ သတိ အတ္တဇေန ဝါယာမေန ဘေရိံ အကောဋေတွာ သဒ္ဒံ နိဗ္ဗတ္တေတီ’’တိ။ ‘‘ဧဝမေဝ ခေါ, မဟာရာဇ, ဘဂဝါ သီလသမာဓိပညာဝိမုတ္တိဝိမုတ္တိဉာဏဒဿနပရိဘာဝိတံ ဓါတုရတနဉ္စ ဓမ္မဉ္စ ဝိနယဉ္စ အနုသိဋ္ဌဉ္စ [အနုသတ္ထိဉ္စ (သီ။ ဣ။)] သတ္ထာရံ ဌပယိတွာ သယံ အနုပါဒိသေသာယ နိဗ္ဗာနဓါတုယာ ပရိနိဗ္ဗုတော, န စ ပရိနိဗ္ဗုတေ ဘဂဝတိ သမ္ပတ္တိလာဘော ဥပစ္ဆိန္နော ဟောတိ, ဘဝဒုက္ခပဋိဣဠိတာ သတ္တာ ဓါတုရတနဉ္စ ဓမ္မဉ္စ ဝိနယဉ္စ အနုသိဋ္ဌဉ္စ ပစ္စယံ ကရိတွာ သမ္ပတ္တိကာမာ သမ္ပတ္တိယော ပဋိလဘန္တိ, ဣမိနာပိ, မဟာရာဇ, ကာရဏေန တထာဂတဿ ပရိနိဗ္ဗုတဿ အသာဒိယန္တဿေဝ ကတော အဓိကာရော အဝဉ္ဈော ဘဝတိ သဖလောတိ။

‘‘ဒိဋ္ဌဉ္စေတံ, မဟာရာဇ, ဘဂဝတာ အနာဂတမဒ္ဓါနံ။ ကထိတဉ္စ ဘဏိတဉ္စ အာစိက္ခိတဉ္စ ‘သိယာ ခေါ ပနာနန္ဒ, တုမှာကံ ဧဝမဿ အတီတသတ္ထုကံ ပါဝစနံ နတ္ထိ နော သတ္ထာတိ, န ခေါ ပနေတံ, အာနန္ဒ, ဧဝံ ဒဋ္ဌဗ္ဗံ, ယော ဝေါ, အာနန္ဒ, မယာ ဓမ္မော စ ဝိနယော စ ဒေသိတော ပညတ္တော, သော ဝေါ မမစ္စယေန သတ္ထာ’တိ။ ပရိနိဗ္ဗုတဿ တထာဂတဿ အသာဒိယန္တဿ ကတော အဓိကာရော ဝဉ္ဈော ဘဝတိ အဖလောတိ, တံ တေသံ တိတ္ထိယာနံ ဝစနံ မိစ္ဆာ အဘူတံ ဝိတထံ အလိကံ ဝိရုဒ္ဓံ ဝိပရီတံ ဒုက္ခဒါယကံ ဒုက္ခဝိပါကံ အပါယဂမနီယန္တိ။

‘‘အပရမ္ပိ, မဟာရာဇ, ဥတ္တရိံ ကာရဏံ သုဏောဟိ ယေန ကာရဏေန တထာဂတဿ ပရိနိဗ္ဗုတဿ အသာဒိယန္တဿေဝ ကတော အဓိကာရော အဝဉ္ဈော ဘဝတိ သဖလော။ သာဒိယတိ နု ခေါ, မဟာရာဇ, အယံ မဟာပထဝီ ‘သဗ္ဗဗီဇာနိ မယိ သံဝိရုဟန္တူ’’’တိ? ‘‘န ဟိ, ဘန္တေ’’တိ။ ‘‘ကိဿ ပန တာနိ, မဟာရာဇ, ဗီဇာနိ အသာဒိယန္တိယာ မဟာပထဝိယာ သံဝိရုဟိတွာ ဒဠှမူလဇဋာပတိဋ္ဌိတာ ခန္ဓသာရသာခါပရိဝိတ္ထိဏ္ဏာ ပုပ္ဖဖလဓရာ ဟောန္တီ’’တိ? ‘‘အသာဒိယန္တီပိ, ဘန္တေ, မဟာပထဝီ တေသံ ဗီဇာနံ ဝတ္ထုံ ဟောတိ ပစ္စယံ ဒေတိ ဝိရုဟနာယ, တာနိ ဗီဇာနိ တံ ဝတ္ထုံ နိဿာယ တေန ပစ္စယေန သံဝိရုဟိတွာ ဒဠှမူလဇဋာပတိဋ္ဌိတာ ခန္ဓသာရသာခါပရိဝိတ္ထိဏ္ဏာ ပုပ္ဖဖလဓရာ ဟောန္တီ’’တိ။ ‘‘တေန ဟိ, မဟာရာဇ, တိတ္ထိယာ သကေ ဝါဒေ နဋ္ဌာ ဟောန္တိ ဟတာ ဝိရုဒ္ဓါ, သစေ တေ ဘဏန္တိ ‘အသာဒိယန္တဿ ကတော အဓိကာရော ဝဉ္ဈော ဘဝတိ အဖလော’ တိ။

‘‘ယထာ, မဟာရာဇ, မဟာပထဝီ, ဧဝံ တထာဂတော အရဟံ သမ္မာသမ္ဗုဒ္ဓေါ။ ယထာ, မဟာရာဇ, မဟာပထဝီ န ကိဉ္စိ သာဒိယတိ, ဧဝံ တထာဂတော န ကိဉ္စိ သာဒိယတိ။ ယထာ, မဟာရာဇ, တာနိ ဗီဇာနိ ပထဝိံ နိဿာယ သံဝိရုဟိတွာ ဒဠှမူလဇဋာပတိဋ္ဌိတာ ခန္ဓသာရသာခါပရိဝိတ္ထိဏ္ဏာ ပုပ္ဖဖလဓရာ ဟောန္တိ, ဧဝံ ဒေဝမနုဿာ တထာဂတဿ ပရိနိဗ္ဗုတဿ အသာဒိယန္တဿေဝ ဓါတုဉ္စ ဉာဏရတနဉ္စ နိဿာယ ဒဠှကုသလမူလပတိဋ္ဌိတာ သမာဓိက္ခန္ဓဓမ္မသာရသီလသာခါပရိဝိတ္ထိဏ္ဏာ ဝိမုတ္တိပုပ္ဖသာမညဖလဓရာ ဟောန္တိ, ဣမိနာပိ, မဟာရာဇ , ကာရဏေန တထာဂတဿ ပရိနိဗ္ဗုတဿ အသာဒိယန္တဿေဝ ကတော အဓိကာရော အဝဉ္ဈော ဘဝတိ သဖလောတိ။

‘‘အပရမ္ပိ, မဟာရာဇ, ဥတ္တရိံ ကာရဏံ သုဏောဟိ ယေန ကာရဏေန တထာဂတဿ ပရိနိဗ္ဗုတဿ အသာဒိယန္တဿေဝ ကတော အဓိကာရော အဝဉ္ဈော ဘဝတိ သဖလော။ သာဒိယန္တိ နု ခေါ, မဟာရာဇ, ဣမေ ဩဋ္ဌာ ဂေါဏာ ဂဒြဘာ အဇာ ပသူ မနုဿာ အန္တောကုစ္ဆိသ္မိံ ကိမိကုလာနံ သမ္ဘဝ’’န္တိ? ‘‘န ဟိ, ဘန္တေ’’တိ။ ‘‘ကိဿ ပန တေ, မဟာရာဇ, ကိမယော တေသံ အသာဒိယန္တာနံ အန္တောကုစ္ဆိသ္မိံ သမ္ဘဝိတွာ ဗဟုပုတ္တနတ္တာ ဝေပုလ္လတံ ပါပုဏန္တီ’’တိ? ‘‘ပါပဿ, ဘန္တေ, ကမ္မဿ ဗလဝတာယ အသာဒိယန္တာနံ ယေဝ တေသံ သတ္တာနံ အန္တောကုစ္ဆိသ္မိံ ကိမယော သမ္ဘဝိတွာ ဗဟုပုတ္တနတ္တာ ဝေပုလ္လတံ ပါပုဏန္တီ’’တိ။ ‘‘ဧဝမေဝ ခေါ, မဟာရာဇ, တထာဂတဿ ပရိနိဗ္ဗုတဿ အသာဒိယန္တဿေဝ ဓါတုဿ စ ဉာဏာရမ္မဏဿ စ ဗလဝတာယ တထာဂတေ ကတော အဓိကာရော အဝဉ္ဈော ဘဝတိ သဖလောတိ။

‘‘အပရမ္ပိ, မဟာရာဇ, ဥတ္တရိံ ကာရဏံ သုဏောဟိ ယေန ကာရဏေန တထာဂတဿ ပရိနိဗ္ဗုတဿ အသာဒိယန္တဿေဝ ကတော အဓိကာရော အဝဉ္ဈော ဘဝတိ သဖလော။ သာဒိယန္တိ နု ခေါ, မဟာရာဇ, ဣမေ မနုဿာ ဣမေ အဋ္ဌနဝုတိ ရောဂါ ကာယေ နိဗ္ဗတ္တန္တူ’’တိ? ‘‘န ဟိ, ဘန္တေ’’တိ။ ‘‘ကိဿ ပန တေ, မဟာရာဇ, ရောဂါ အသာဒိယန္တာနံ ကာယေ နိပတန္တီ’’တိ? ‘‘ပုဗ္ဗေ ကတေန, ဘန္တေ, ဒုစ္စရိတေနာ’’တိ။ ‘‘ယဒိ, မဟာရာဇ, ပုဗ္ဗေ ကတံ အကုသလံ ဣဓ ဝေဒနီယံ ဟောတိ, တေန ဟိ, မဟာရာဇ, ပုဗ္ဗေ ကတမ္ပိ ဣဓ ကတမ္ပိ ကုသလာကုသလံ ကမ္မံ အဝဉ္ဈံ ဘဝတိ သဖလန္တိ။ ဣမိနာပိ, မဟာရာဇ, ကာရဏေန တထာဂတဿ ပရိနိဗ္ဗုတဿ အသာဒိယန္တဿေဝ ကတော အဓိကာရော အဝဉ္ဈော ဘဝတိ သဖလောတိ။

‘‘သုတပုဗ္ဗံ ပန တယာ, မဟာရာဇ, နန္ဒကော နာမ ယက္ခော ထေရံ သာရိပုတ္တံ အာသာဒယိတွာ ပထဝိံ ပဝိဋ္ဌော’’တိ? ‘‘အာမ, ဘန္တေ, သုယျတိ, လောကေ ပါကဋော ဧသော’’တိ။ ‘‘အပိ နု ခေါ, မဟာရာဇ, ထေရော သာရိပုတ္တော သာဒိယိ နန္ဒကဿ ယက္ခဿ မဟာပထဝိဂိလန’’န္တိ [ပဝတ္တမာနေပိ (သျာ။)]။ ‘‘ဥဗ္ဗတ္တိယန္တေပိ, ဘန္တေ, သဒေဝကေ လောကေ ပတမာနေပိ ဆမာယံ စန္ဒိမသူရိယေ ဝိကိရန္တေပိ သိနေရုပဗ္ဗတရာဇေ ထေရော သာရိပုတ္တော န ပရဿ ဒုက္ခံ သာဒိယေယျ။ တံ ကိဿ ဟေတု? ယေန ဟေတုနာ ထေရော သာရိပုတ္တော ကုဇ္ဈေယျ ဝါ ဒုဿေယျ ဝါ, သော ဟေတု ထေရဿ သာရိပုတ္တဿ သမူဟတော သမုစ္ဆိန္နော, ဟေတုနော သမုဂ္ဃါတိတတ္တာ, ဘန္တေ, ထေရော သာရိပုတ္တော ဇီဝိတဟာရကေပိ ကောပံ န ကရေယျာ’’တိ။ ‘‘ယဒိ, မဟာရာဇ , ထေရော သာရိပုတ္တော နန္ဒကဿ ယက္ခဿ ပထဝိဂိလနံ န သာဒိယိ, ကိဿ ပန နန္ဒကော ယက္ခော ပထဝိံ ပဝိဋ္ဌော’’တိ? ‘‘အကုသလဿ, ဘန္တေ, ကမ္မဿ ဗလဝတာယာ’’တိ။ ‘‘ယဒိ, မဟာရာဇ, အကုသလဿ ကမ္မဿ ဗလဝတာယ နန္ဒကော ယက္ခော ပထဝိံ ပဝိဋ္ဌော, အသာဒိယန္တဿာပိ ကတော အပရာဓေါ အဝဉ္ဈော ဘဝတိ သဖလော။ တေန ဟိ, မဟာရာဇ, အကုသလဿပိ ကမ္မဿ ဗလဝတာယ အသာဒိယန္တဿ ကတော အဓိကာရော အဝဉ္ဈော ဘဝတိ သဖလောတိ။ ဣမိနာပိ, မဟာရာဇ, ကာရဏေန တထာဂတဿ ပရိနိဗ္ဗုတဿ အသာဒိယန္တဿေဝ ကတော အဓိကာရော အဝဉ္ဈော ဘဝတိ သဖလောတိ။

‘‘ကတိ နု ခေါ တေ, မဟာရာဇ, မနုဿာ, ယေ ဧတရဟိ မဟာပထဝိံ ပဝိဋ္ဌာ, အတ္ထိ တေ တတ္ထ သဝဏ’’န္တိ? ‘‘အာမ, ဘန္တေ, သုယျတီ’’တိ။ ‘‘ဣင်္ဃ တွံ, မဟာရာဇ, သာဝေဟီ’’တိ? ‘‘စိဉ္စမာဏဝိကာ, ဘန္တေ, သုပ္ပဗုဒ္ဓေါ စ သက္ကော, ဒေဝဒတ္တော စ ထေရော, နန္ဒကော စ ယက္ခော, နန္ဒော စ မာဏဝကောတိ။ သုတမေတံ, ဘန္တေ, ဣမေ ပဉ္စ ဇနာ မဟာပထဝိံ ပဝိဋ္ဌာ’’တိ။ ‘‘ကိသ္မိံ တေ, မဟာရာဇ, အပရဒ္ဓါ’’တိ? ‘‘ဘဂဝတိ စ, ဘန္တေ, သာဝကေသု စာ’’တိ။ ‘‘အပိ နု ခေါ, မဟာရာဇ , ဘဂဝါ ဝါ သာဝကာ ဝါ သာဒိယိံသု ဣမေသံ မဟာပထဝိပဝိသန’’န္တိ? ‘‘န ဟိ ဘန္တေ’’တိ။ ‘‘တေန ဟိ, မဟာရာဇ, တထာဂတဿ ပရိနိဗ္ဗုတဿ အသာဒိယန္တဿေဝ ကတော အဓိကာရော အဝဉ္ဈော ဘဝတိ သဖလော’’တိ။ ‘‘သုဝိညာပိတော, ဘန္တေ နာဂသေန, ပဉ္ဟော ဂမ္ဘီရော ဥတ္တာနီကတော, ဂုယှံ ဝိဒံသိတံ , ဂဏ္ဌိ ဘိန္နော, ဂဟနံ အဂဟနံ ကတံ, နဋ္ဌာ ပရဝါဒါ, ဘဂ္ဂါ ကုဒိဋ္ဌီ, နိပ္ပဘာ ဇာတာ ကုတိတ္ထိယာ, တွံ ဂဏီဝရပဝရမာသဇ္ဇာ’’တိ။

ကတာဓိကာရသဖလပဉ္ဟော ပဌမော။

၂။ သဗ္ဗညုဘာဝပဉ္ဟော

၂။ ‘‘ဘန္တေ နာဂသေန, ဗုဒ္ဓေါ သဗ္ဗညူ’’တိ? ‘‘အာမ, မဟာရာဇ, ဘဂဝါ သဗ္ဗညူ, န စ ဘဂဝတော သတတံ သမိတံ ဉာဏဒဿနံ ပစ္စုပဋ္ဌိတံ, အာဝဇ္ဇနပဋိဗဒ္ဓံ ဘဂဝတော သဗ္ဗညုတဉာဏံ, အာဝဇ္ဇိတွာ ယဒိစ္ဆကံ ဇာနာတီ’’တိ။ ‘‘တေန ဟိ, ဘန္တေ နာဂသေန, ဗုဒ္ဓေါ အသဗ္ဗညူတိ။ ယဒိ တဿ ပရိယေသနာယ သဗ္ဗညုတဉာဏံ ဟောတီ’’တိ။ ‘‘ဝါဟသတံ ခေါ, မဟာရာဇ, ဝီဟီနံ အဍ္ဎစူဠဉ္စ ဝါဟာ ဝီဟိသတ္တမ္ဗဏာနိ ဒွေ စ တုမ္ဗာ ဧကစ္ဆရာက္ခဏေ ပဝတ္တစိတ္တဿ ဧတ္တကာ ဝီဟီ လက္ခံ ဌဣယမာနာ [ဌဣယမာနေ (သီ။ ဣ။)] ပရိက္ခယံ ပရိယာဒါနံ ဂစ္ဆေယျုံ?

‘‘တတ္ရိမေ သတ္တဝိဓါ စိတ္တာ ပဝတ္တန္တိ, ယေ တေ, မဟာရာဇ, သရာဂါ သဒေါသာ သမောဟာ သကိလေသာ အဘာဝိတကာယာ အဘာဝိတသီလာ အဘာဝိတစိတ္တာ အဘာဝိတပညာ, တေသံ တံ စိတ္တံ ဂရုကံ ဥပ္ပဇ္ဇတိ ဒန္ဓံ ပဝတ္တတိ။ ကိံ ကာရဏာ? အဘာဝိတတ္တာ စိတ္တဿ။ ယထာ, မဟာရာဇ, ဝံသနာဠဿ ဝိတတဿ ဝိသာလဿ ဝိတ္ထိဏ္ဏဿ သံသိဗ္ဗိတဝိသိဗ္ဗိတဿ သာခါဇဋာဇဋိတဿ အာကဍ္ဎိယန္တဿ ဂရုကံ ဟောတိ အာဂမနံ ဒန္ဓံ။ ကိံ ကာရဏာ? သံသိဗ္ဗိတဝိသိဗ္ဗိတတ္တာ သာခါနံ။ ဧဝမေဝ ခေါ, မဟာရာဇ, ယေ တေ သရာဂါ သဒေါသာ သမောဟာ သကိလေသာ အဘာဝိတကာယာ အဘာဝိတသီလာ အဘာဝိတစိတ္တာ အဘာဝိတပညာ, တေသံ တံ စိတ္တံ ဂရုကံ ဥပ္ပဇ္ဇတိ ဒန္ဓံ ပဝတ္တတိ။ ကိံ ကာရဏာ? သံသိဗ္ဗိတဝိသိဗ္ဗိတတ္တာ ကိလေသေဟိ, ဣဒံ ပဌမံ စိတ္တံ။

‘‘တတ္ရိဒံ ဒုတိယံ စိတ္တံ ဝိဘတ္တမာပဇ္ဇတိ – ယေ တေ, မဟာရာဇ, သောတာပန္နာ ပိဟိတာပါယာ ဒိဋ္ဌိပ္ပတ္တာ ဝိညာတသတ္ထုသာသနာ, တေသံ တံ စိတ္တံ တီသု ဌာနေသု လဟုကံ ဥပ္ပဇ္ဇတိ လဟုကံ ပဝတ္တတိ။ ဥပရိဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ။ ကိံ ကာရဏာ? တီသု ဌာနေသု စိတ္တဿ ပရိသုဒ္ဓတ္တာ ဥပရိ ကိလေသာနံ အပ္ပဟီနတ္တာ။ ယထာ, မဟာရာဇ, ဝံသနာဠဿ တိပဗ္ဗဂဏ္ဌိပရိသုဒ္ဓဿ ဥပရိ သာခါဇဋာဇဋိတဿ အာကဍ္ဎိယန္တဿ ယာဝ တိပဗ္ဗံ တာဝ လဟုကံ ဧတိ, တတော ဥပရိ ထဒ္ဓံ။ ကိံ ကာရဏာ? ဟေဋ္ဌာ ပရိသုဒ္ဓတ္တာ ဥပရိ သာခါဇဋာဇဋိတတ္တာ။ ဧဝမေဝ ခေါ, မဟာရာဇ, ယေ တေ သောတာပန္နာ ပိဟိတာပါယာ ဒိဋ္ဌိပ္ပတ္တာ ဝိညာတသတ္ထုသာသနာ, တေသံ တံ စိတ္တံ တီသု ဌာနေသု လဟုကံ ဥပ္ပဇ္ဇတိ လဟုကံ ပဝတ္တတိ, ဥပရိဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ။ ကိံ ကာရဏာ? တီသု ဌာနေသု စိတ္တဿ ပရိသုဒ္ဓတ္တာ ဥပရိ ကိလေသာနံ အပ္ပဟီနတ္တာ, ဣဒံ ဒုတိယံ စိတ္တံ။

‘‘တတ္ရိဒံ တတိယံ စိတ္တံ ဝိဘတ္တမာပဇ္ဇတိ – ယေ တေ, မဟာရာဇ, သကဒါဂါမိနော, ယေသံ ရာဂဒေါသမောဟာ တနုဘူတာ, တေသံ တံ စိတ္တံ ပဉ္စသု ဌာနေသု လဟုကံ ဥပ္ပဇ္ဇတိ လဟုကံ ပဝတ္တတိ, ဥပရိဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ။ ကိံ ကာရဏာ? ပဉ္စသု ဌာနေသု စိတ္တဿ ပရိသုဒ္ဓတ္တာ ဥပရိ ကိလေသာနံ အပ္ပဟီနတ္တာ။ ယထာ, မဟာရာဇ, ဝံသနာဠဿ ပဉ္စပဗ္ဗဂဏ္ဌိပရိသုဒ္ဓဿ ဥပရိ သာခါဇဋာဇဋိတဿ အာကဍ္ဎိယန္တဿ ယာဝ ပဉ္စပဗ္ဗံ တာဝ လဟုကံ ဧတိ, တတော ဥပရိ ထဒ္ဓံ။ ကိံ ကာရဏာ? ဟေဋ္ဌာ ပရိသုဒ္ဓတ္တာ ဥပရိ သာခါဇဋာဇဋိတတ္တာ။ ဧဝမေဝ ခေါ, မဟာရာဇ, ယေ တေ သကဒါဂါမိနော, ယေသံ ရာဂဒေါသမောဟာ တနုဘူတာ, တေသံ တံ စိတ္တံ ပဉ္စသု ဌာနေသု လဟုကံ ဥပ္ပဇ္ဇတိ လဟုကံ ပဝတ္တတိ, ဥပရိဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ။ ကိံ ကာရဏာ? ပဉ္စသု ဌာနေသု စိတ္တဿ ပရိသုဒ္ဓတ္တာ ဥပရိ ကိလေသာနံ အပ္ပဟီနတ္တာ, ဣဒံ တတိယံ စိတ္တံ။

‘‘တတ္ရိဒံ စတုတ္ထံ စိတ္တံ ဝိဘတ္တမာပဇ္ဇတိ – ယေ တေ, မဟာရာဇ, အနာဂါမိနော, ယေသံ ပဉ္စောရမ္ဘာဂိယာနိ သညောဇနာနိ ပဟီနာနိ, တေသံ တံ စိတ္တံ ဒသသု ဌာနေသု လဟုကံ ဥပ္ပဇ္ဇတိ လဟုကံ ပဝတ္တတိ, ဥပရိဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ။ ကိံ ကာရဏာ? ဒသသု ဌာနေသု စိတ္တဿ ပရိသုဒ္ဓတ္တာ ဥပရိ ကိလေသာနံ အပ္ပဟီနတ္တာ။ ယထာ, မဟာရာဇ, ဝံသနာဠဿ ဒသပဗ္ဗဂဏ္ဌိပရိသုဒ္ဓဿ ဥပရိ သာခါဇဋာဇဋိတဿ အာကဍ္ဎိယန္တဿ ယာဝ ဒသပဗ္ဗံ တာဝ လဟုကံ ဧတိ, တတော ဥပရိ ထဒ္ဓံ။ ကိံ ကာရဏာ? ဟေဋ္ဌာ ပရိသုဒ္ဓတ္တာ ဥပရိ သာခါဇဋာဇဋိတတ္တာ။ ဧဝမေဝ ခေါ, မဟာရာဇ, ယေ တေ အနာဂါမိနော, ယေသံ ပဉ္စောရမ္ဘာဂိယာနိ သညောဇနာနိ ပဟီနာနိ, တေသံ တံ စိတ္တံ ဒသသု ဌာနေသု လဟုကံ ဥပ္ပဇ္ဇတိ လဟုကံ ပဝတ္တတိ, ဥပရိဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ။ ကိံ ကာရဏာ? ဒသသု ဌာနေသု စိတ္တဿ ပရိသုဒ္ဓတ္တာ ဥပရိ ကိလေသာနံ အပ္ပဟီနတ္တာ, ဣဒံ စတုတ္ထံ စိတ္တံ။

‘‘တတ္ရိဒံ ပဉ္စမံ စိတ္တံ ဝိဘတ္တမာပဇ္ဇတိ – ယေ တေ, မဟာရာဇ, အရဟန္တော ခီဏာသဝါ ဓေါတမလာ ဝန္တကိလေသာ ဝုသိတဝန္တော ကတကရဏီယာ ဩဟိတဘာရာ အနုပ္ပတ္တသဒတ္ထာ ပရိက္ခီဏဘဝသညောဇနာ ပတ္တပဋိသမ္ဘိဒါ သာဝကဘူမီသု ပရိသုဒ္ဓါ, တေသံ တံ စိတ္တံ သာဝကဝိသယေ လဟုကံ ဥပ္ပဇ္ဇတိ လဟုကံ ပဝတ္တတိ, ပစ္စေကဗုဒ္ဓဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ။ ကိံ ကာရဏာ? ပရိသုဒ္ဓတ္တာ သာဝကဝိသယေ, အပရိသုဒ္ဓတ္တာ ပစ္စေကဗုဒ္ဓဝိသယေ။ ယထာ, မဟာရာဇ, ဝံသနာဠဿ သဗ္ဗပဗ္ဗဂဏ္ဌိပရိသုဒ္ဓဿ အာကဍ္ဎိယန္တဿ လဟုကံ ဟောတိ အာဂမနံ အဒန္ဓံ။ ကိံ ကာရဏာ? သဗ္ဗပဗ္ဗဂဏ္ဌိပရိသုဒ္ဓတ္တာ အဂဟနတ္တာ ဝံသဿ။ ဧဝမေဝ ခေါ, မဟာရာဇ, ယေ တေ အရဟန္တော ခီဏာသဝါ ဓေါတမလာ ဝန္တကိလေသာ ဝုသိတဝန္တော ကတကရဏီယာ ဩဟိတဘာရာ အနုပ္ပတ္တသဒတ္ထာ ပရိက္ခီဏဘဝသညောဇနာ ပတ္တပဋိသမ္ဘိဒါ သာဝကဘူမီသု ပရိသုဒ္ဓါ, တေသံ တံ စိတ္တံ သာဝကဝိသယေ လဟုကံ ဥပ္ပဇ္ဇတိ လဟုကံ ပဝတ္တတိ, ပစ္စေကဗုဒ္ဓဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ။ ကိံ ကာရဏာ? ပရိသုဒ္ဓတ္တာ သာဝကဝိသယေ, အပရိသုဒ္ဓတ္တာ ပစ္စေကဗုဒ္ဓဝိသယေ, ဣဒံ ပဉ္စမံ စိတ္တံ။

‘‘တတ္ရိဒံ ဆဋ္ဌံ စိတ္တံ ဝိဘတ္တမာပဇ္ဇတိ – ယေ တေ, မဟာရာဇ, ပစ္စေကဗုဒ္ဓါ သယမ္ဘုနော အနာစရိယကာ ဧကစာရိနော ခဂ္ဂဝိသာဏကပ္ပါ သကဝိသယေ ပရိသုဒ္ဓဝိမလစိတ္တာ, တေသံ တံ စိတ္တံ သကဝိသယေ လဟုကံ ဥပ္ပဇ္ဇတိ လဟုကံ ပဝတ္တတိ, သဗ္ဗညုဗုဒ္ဓဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ။ ကိံ ကာရဏာ? ပရိသုဒ္ဓတ္တာ သကဝိသယေ မဟန္တတ္တာ သဗ္ဗညုဗုဒ္ဓဝိသယဿ။ ယထာ, မဟာရာဇ, ပုရိသော သကဝိသယံ ပရိတ္တံ နဒိံ ရတ္တိမ္ပိ ဒိဝါပိ ယဒိစ္ဆက အစ္ဆမ္ဘိတော ဩတရေယျ, အထ ပရတော မဟာသမုဒ္ဒံ ဂမ္ဘီရံ ဝိတ္ထတံ အဂါဓမပါရံ ဒိသွာ ဘာယေယျ, ဒန္ဓာယေယျ န ဝိသဟေယျ ဩတရိတုံ။ ကိံ ကာရဏာ? တိဏ္ဏတ္တာ [စိဏ္ဏတ္တာ (သီ။ သျာ။ ဣ။)] သကဝိသယဿ, မဟန္တတ္တာ စ မဟာသမုဒ္ဒဿ။ ဧဝမေဝ ခေါ, မဟာရာဇ, ယေ တေ ပစ္စေကဗုဒ္ဓါ သယမ္ဘုနော အနာစရိယကာ ဧကစာရိနော ခဂ္ဂဝိသာဏကပ္ပါ သကဝိသယေ ပရိသုဒ္ဓဝိမလစိတ္တာ, တေသံ တံ စိတ္တံ သကဝိသယေ လဟုကံ ဥပ္ပဇ္ဇတိ လဟုကံ ပဝတ္တတိ, သဗ္ဗညုဗုဒ္ဓဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ။ ကိံ ကာရဏာ? ပရိသုဒ္ဓတ္တာ သကဝိသယေ မဟန္တတ္တာ သဗ္ဗညုဗုဒ္ဓဝိသယဿ, ဣဒံ ဆဋ္ဌံ စိတ္တံ။

‘‘တတ္ရိဒံ သတ္တမံ စိတ္တံ ဝိဘတ္တမာပဇ္ဇတိ – ယေ တေ, မဟာရာဇ, သမ္မာသမ္ဗုဒ္ဓါ သဗ္ဗညုနော ဒသဗလဓရာ စတုဝေသာရဇ္ဇဝိသာရဒါ အဋ္ဌာရသဟိ ဗုဒ္ဓဓမ္မေဟိ သမန္နာဂတာ အနန္တဇိနာ အနာဝရဏဉာဏာ, တေသံ တံ စိတ္တံ သဗ္ဗတ္ထ လဟုကံ ဥပ္ပဇ္ဇတိ လဟုကံ ပဝတ္တတိ။ ကိံ ကာရဏာ? သဗ္ဗတ္ထ ပရိသုဒ္ဓတ္တာ။ အပိ နု ခေါ, မဟာရာဇ, နာရာစဿ သုဓေါတဿ ဝိမလဿ နိဂ္ဂဏ္ဌိဿ သုခုမဓါရဿ အဇိမှဿ အဝင်္ကဿ အကုဋိလဿ ဒဠှစာပသမာရူဠှဿ ခေါမသုခုမေ ဝါ ကပ္ပါသသုခုမေ ဝါ ကမ္ဗလသုခုမေ ဝါ ဗလဝနိပါတိတဿ ဒန္ဓာယိတတ္တံ ဝါ လဂ္ဂနံ ဝါ ဟောတီ’’တိ? ‘‘န ဟိ, ဘန္တေ, ‘‘ကိံ ကာရဏာ’’? ‘‘သုခုမတ္တာ ဝတ္ထာနံ သုဓေါတတ္တာ နာရာစဿ နိပါတဿ စ ဗလဝတ္တာ’’တိ , ဧဝမေဝ ခေါ, မဟာရာဇ, ယေ တေ သမ္မာသမ္ဗုဒ္ဓါ သဗ္ဗညုနော ဒသဗလဓရာ စတုဝေသာရဇ္ဇဝိသာရဒါ အဋ္ဌာရသဟိ ဗုဒ္ဓဓမ္မေဟိ သမန္နာဂတာ အနန္တဇိနာ အနာဝရဏဉာဏာ, တေသံ တံ စိတ္တံ သဗ္ဗတ္ထ လဟုကံ ဥပ္ပဇ္ဇတိ လဟုကံ ပဝတ္တတိ။ ကိံ ကာရဏာ? သဗ္ဗတ္ထ ပရိသုဒ္ဓတ္တာ, ဣဒံ သတ္တမံ စိတ္တံ။

‘‘တတြ, မဟာရာဇ, ယဒိဒံ သဗ္ဗညုဗုဒ္ဓါနံ စိတ္တံ, တံ ဆန္နမ္ပိ စိတ္တာနံ ဂဏနံ အတိက္ကမိတွာ အသင္ခ္ယေယျေန ဂုဏေန ပရိသုဒ္ဓဉ္စ လဟုကဉ္စ။ ယသ္မာ စ ဘဂဝတော စိတ္တံ ပရိသုဒ္ဓဉ္စ လဟုကဉ္စ, တသ္မာ, မဟာရာဇ, ဘဂဝါ ယမကပါဋိဟီရံ ဒဿေတိ။ ယမကပါဋိဟီရေ, မဟာရာဇ, ဉာတဗ္ဗံ ဗုဒ္ဓါနံ ဘဂဝန္တာနံ စိတ္တံ ဧဝံ လဟုပရိဝတ္တန္တိ, န တတ္ထ သက္ကာ ဥတ္တရိံ ကာရဏံ ဝတ္တုံ, တေပိ, မဟာရာဇ, ပါဋိဟီရာ သဗ္ဗညုဗုဒ္ဓါနံ စိတ္တံ ဥပါဒါယ ဂဏနမ္ပိ သင်္ခမ္ပိ ကလမ္ပိ ကလဘာဂမ္ပိ န ဥပေန္တိ, အာဝဇ္ဇနပဋိဗဒ္ဓံ, မဟာရာဇ, ဘဂဝတော သဗ္ဗညုတဉာဏံ, အာဝဇ္ဇေတွာ ယဒိစ္ဆကံ ဇာနာတိ။

‘‘ယထာ, မဟာရာဇ, ပုရိသော ဟတ္ထေ ဌပိတံ ယံ ကိဉ္စိ ဒုတိယေ ဟတ္ထေ ဌပေယျ ဝိဝဋေန မုခေန ဝါစံ နိစ္ဆာရေယျ, မုခဂတံ ဘောဇနံ ဂိလေယျ, ဥမ္မီလေတွာ ဝါ နိမီလေယျ, နိမီလေတွာ ဝါ ဥမ္မီလေယျ, သမိဉ္ဇိတံ ဝါ ဗာဟံ ပသာရေယျ, ပသာရိတံ ဝါ ဗာဟံ သမိဉ္ဇေယျ, စိရတရံ ဧတံ, မဟာရာဇ, လဟုတရံ ဘဂဝတော သဗ္ဗညုတဉာဏံ, လဟုတရံ အာဝဇ္ဇနံ, အာဝဇ္ဇေတွာ ယဒိစ္ဆကံ ဇာနာတိ , အာဝဇ္ဇနဝိကလမတ္တကေန န တာဝတာ ဗုဒ္ဓါ ဘဂဝန္တော အသဗ္ဗညုနော နာမ ဟောန္တီ’’တိ။

‘‘အာဝဇ္ဇနမ္ပိ , ဘန္တေ နာဂသေန, ပရိယေသနာယ ကာတဗ္ဗံ, ဣင်္ဃ မံ တတ္ထ ကာရဏေန သညာပေဟီ’’တိ။ ‘‘ယထာ, မဟာရာဇ, ပုရိသဿ အဍ္ဎဿ မဟဒ္ဓနဿ မဟာဘောဂဿ ပဟူတဇာတရူပရဇတဿ ပဟူတဝိတ္တူပကရဏဿ ပဟူတဓနဓညဿ သာလိဝီဟိယဝတဏ္ဍုလတိလမုဂ္ဂမာသပုဗ္ဗဏ္ဏာပရဏ္ဏသပ္ပိတေလနဝနီတခီရဒဓိမဓုဂုဠဖာဏိတာ စ ခဠောပိကုမ္ဘိဣဌရကောဋ္ဌဘာဇနဂတာ ဘဝေယျုံ, တဿ စ ပုရိသဿ ပါဟုနကော အာဂစ္ဆေယျ ဘတ္တာရဟော ဘတ္တာဘိကင္ခီ, တဿ စ ဂေဟေ ယံ ရန္ဓံ ဘောဇနံ, တံ ပရိနိဋ္ဌိတံ ဘဝေယျ, ကုမ္ဘိတော တဏ္ဍုလေ နီဟရိတွာ ဘောဇနံ ရန္ဓေယျ, အပိ စ ခေါ သော, မဟာရာဇ, တာဝတကေန ဘောဇနဝေကလ္လမတ္တကေန အဓနော နာမ ကပဏော နာမ ဘဝေယျာ’’တိ? ‘‘န ဟိ, ဘန္တေ, စက္ကဝတ္တိရညော ဃရေပိ, ဘန္တေ, အကာလေ ဘောဇနဝေကလ္လံ ဟောတိ, ကိံ ပန ဂဟပတိကဿာ’’တိ? ‘‘ဧဝမေဝ ခေါ, မဟာရာဇ, တထာဂတဿ အာဝဇ္ဇနဝိကလမတ္တကံ သဗ္ဗညုတဉာဏံ အာဝဇ္ဇေတွာ ယဒိစ္ဆကံ ဇာနာတိ။

‘‘ယထာ ဝါ ပန, မဟာရာဇ, ရုက္ခော အဿ ဖလိတော ဩဏတဝိနတော ပိဏ္ဍိဘာရဘရိတော, န ကိဉ္စိ တတ္ထ ပတိတံ ဖလံ ဘဝေယျ, အပိ နု ခေါ သော, မဟာရာဇ, ရုက္ခော တာဝတကေန ပတိတဖလဝေကလ္လမတ္တကေန အဖလော နာမ ဘဝေယျာ’’တိ? ‘‘န ဟိ, ဘန္တေ, ပတနပဋိဗဒ္ဓါနိ တာနိ ရုက္ခဖလာနိ, ပတိတေ ယဒိစ္ဆကံ လဘတီ’’တိ။ ‘‘ဧဝမေဝ ခေါ, မဟာရာဇ, တထာဂတဿ အာဝဇ္ဇနပဋိဗဒ္ဓံ သဗ္ဗညုတဉာဏံ အာဝဇ္ဇေတွာ ယဒိစ္ဆကံ ဇာနာတီ’’တိ။

‘‘ဘန္တေ နာဂသေန, အာဝဇ္ဇေတွာ အာဝဇ္ဇေတွာ ဗုဒ္ဓေါ ယဒိစ္ဆကံ ဇာနာတီ’’တိ? ‘‘အာမ, မဟာရာဇ, ဘဂဝါ အာဝဇ္ဇေတွာ အာဝဇ္ဇေတွာ ယဒိစ္ဆကံ ဇာနာတီ’’တိ။

‘‘ယထာ, မဟာရာဇ, စက္ကဝတ္တီ ရာဇာ ယဒါ စက္ကရတနံ သရတိ ‘ဥပေတု မေ စက္ကရတန’န္တိ, သရိတေ စက္ကရတနံ ဥပေတိ, ဧဝမေဝ ခေါ, မဟာရာဇ, တထာဂတော အာဝဇ္ဇေတွာ အာဝဇ္ဇေတွာ ယဒိစ္ဆကံ ဇာနာတီ’’တိ။ ‘‘ဒဠှံ, ဘန္တေ နာဂသေန, ကာရဏံ, ဗုဒ္ဓေါ သဗ္ဗညူ, သမ္ပဋိစ္ဆာမ ဗုဒ္ဓေါ သဗ္ဗညူ’’တိ။

ဗုဒ္ဓသဗ္ဗညုဘာဝပဉ္ဟော ဒုတိယော။

၃။ ဒေဝဒတ္တပဗ္ဗဇ္ဇပဉ္ဟော

၃။ ‘‘ဘန္တေ နာဂသေန, ဒေဝဒတ္တော ကေန ပဗ္ဗာဇိတော’’တိ? ‘‘ဆ ယိမေ, မဟာရာဇ, ခတ္တိယကုမာရာ ဘဒ္ဒိယော စ အနုရုဒ္ဓေါ စ အာနန္ဒော စ ဘဂု စ ကိမိလော [ကိမ္ဗိလော (သီ။ ဣ။) မ။ နိ။ ၂။၁၆၆ ပဿိတဗ္ဗံ] စ ဒေဝဒတ္တော စ ဥပါလိကပ္ပကော သတ္တမော အဘိသမ္ဗုဒ္ဓေ သတ္ထရိ သကျကုလာနန္ဒဇနနေ ဘဂဝန္တံ အနုပဗ္ဗဇန္တာ နိက္ခမိံသု, တေ ဘဂဝါ ပဗ္ဗာဇေသီ’’တိ။ ‘‘နနု, ဘန္တေ, ဒေဝဒတ္တေန ပဗ္ဗဇိတွာ သံဃော ဘိန္နော’’တိ? ‘‘အာမ, မဟာရာဇ, ဒေဝဒတ္တေန ပဗ္ဗဇိတွာ သံဃော ဘိန္နော, န ဂိဟီ သသံဃံ ဘိန္ဒတိ, န ဘိက္ခုနီ, န သိက္ခမာနာ, န သာမဏေရော, န သာမဏေရီ သသံဃံ ဘိန္ဒတိ, ဘိက္ခု ပကတတ္တော သမာနသံဝါသကော သမာနသီမာယံ ဌိတော သသံဃံ ဘိန္ဒတီတိ။ သံဃဘေဒကော, ဘန္တေ, ပုဂ္ဂလော ကိံ ကမ္မံ ဖုသတီ’’တိ? ‘‘ကပ္ပဋ္ဌိတိကံ, မဟာရာဇ, ကမ္မံ ဖုသတီ’’တိ။

‘‘ကိံ ပန, ဘန္တေ နာဂသေန, ဗုဒ္ဓေါ ဇာနာတိ ‘ဒေဝဒတ္တော ပဗ္ဗဇိတွာ သသံဃံ ဘိန္ဒိဿတိ, သသံဃံ ဘိန္ဒိတွာ ကပ္ပံ နိရယေ ပစ္စိဿတီ’’’တိ? ‘‘အာမ, မဟာရာဇ, တထာဂတော ဇာနာတိ ‘ဒေဝဒတ္တော ပဗ္ဗဇိတွာ သသံဃံ ဘိန္ဒိဿတိ, သသံဃံ ဘိန္ဒိတွာ ကပ္ပံ နိရယေ ပစ္စိဿတီ’’’တိ။ ‘‘ယဒိ, ဘန္တေ နာဂသေန, ဗုဒ္ဓေါ ဇာနာတိ ‘ဒေဝဒတ္တော ပဗ္ဗဇိတွာ သသံဃံ ဘိန္ဒိဿတိ, သသံဃံ ဘိန္ဒိတွာ ကပ္ပံ နိရယေ ပစ္စိဿတီ’တိ, တေန ဟိ, ဘန္တေ နာဂသေန, ဗုဒ္ဓေါ ကာရုဏိကော အနုကမ္ပကော ဟိတေသီ သဗ္ဗသတ္တာနံ အဟိတံ အပနေတွာ ဟိတမုပဒဟတီတိ ယံ ဝစနံ, တံ မိစ္ဆာ။ ယဒိ တံ အဇာနိတွာ ပဗ္ဗာဇေသိ, တေန ဟိ ဗုဒ္ဓေါ အသဗ္ဗညူတိ, အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, ဝိဇဋေဟိ ဧတံ မဟာဇဋံ, ဘိန္ဒ ပရာပဝါဒံ, အနာဂတေ အဒ္ဓါနေ တယာ သဒိသာ ဗုဒ္ဓိမန္တော ဘိက္ခူ ဒုလ္လဘာ ဘဝိဿန္တိ, ဧတ္ထ တဝ ဗလံ ပကာသေဟီ’’တိ။

‘‘ကာရုဏိကော, မဟာရာဇ, ဘဂဝါ သဗ္ဗညူ စ, ကာရုညေန, မဟာရာဇ, ဘဂဝါ သဗ္ဗညုတဉာဏေန ဒေဝဒတ္တဿ ဂတိံ ဩလောကေန္တော အဒ္ဒသ ဒေဝဒတ္တံ အာပါယိကံ ကမ္မံ [အပရာပရိယကမ္မံ (သီ။ သျာ။ ဣ။)] အာယူဟိတွာ အနေကာနိ ကပ္ပကောဋိသတသဟဿာနိ နိရယေန နိရယံ ဝိနိပါတေန ဝိနိပါတံ ဂစ္ဆန္တံ, တံ ဘဂဝါ သဗ္ဗညုတဉာဏေန ဇာနိတွာ ဣမဿ အပရိယန္တကတံ ကမ္မံ မမ သာသနေ ပဗ္ဗဇိတဿ ပရိယန္တကတံ ဘဝိဿတိ, ပုရိမံ ဥပါဒါယ ပရိယန္တကတံ ဒုက္ခံ ဘဝိဿတိ, အပဗ္ဗဇိတောပိ အယံ မောဃပုရိသော ကပ္ပဋ္ဌိယမေဝ ကမ္မံ အာယူဟိဿတီတိ ကာရုညေန ဒေဝဒတ္တံ ပဗ္ဗာဇေသီ’’တိ။

‘‘တေန ဟိ, ဘန္တေ နာဂသေန, ဗုဒ္ဓေါ ဝဓိတွာ တေလေန မက္ခေတိ, ပပါတေ ပါတေတွာ ဟတ္ထံ ဒေတိ, မာရေတွာ ဇီဝိတံ ပရိယေသတိ, ယံ သော ပဌမံ ဒုက္ခံ ဒတွာ ပစ္ဆာ သုခံ ဥပဒဟတီ’’တိ? ‘‘ဝဓေတိပိ, မဟာရာဇ, တထာဂတော သတ္တာနံ ဟိတဝသေန, ပါတေတိပိ သတ္တာနံ ဟိတဝသေန, မာရေတိပိ သတ္တာနံ ဟိတဝသေန, ဝဓိတွာပိ, မဟာရာဇ, တထာဂတော သတ္တာနံ ဟိတမေဝ ဥပဒဟတိ, ပါတေတွာပိ သတ္တာနံ ဟိတမေဝ ဥပဒဟတိ, မာရေတွာပိ သတ္တာနံ ဟိတမေဝ ဥပဒဟတိ။ ယထာ, မဟာရာဇ, မာတာပိတရော နာမ ဝဓိတွာပိ ပါတယိတွာပိ ပုတ္တာနံ ဟိတမေဝ ဥပဒဟန္တိ, ဧဝမေဝ ခေါ, မဟာရာဇ, တထာဂတော ဝဓေတိပိ သတ္တာနံ ဟိတဝသေန, ပါတေတိပိ သတ္တာနံ ဟိတဝသေန, မာရေတိပိ သတ္တာနံ ဟိတဝသေန, ဝဓိတွာပိ, မဟာရာဇ, တထာဂတော သတ္တာနံ ဟိတမေဝ ဥပဒဟတိ, ပါတေတွာပိ သတ္တာနံ ဟိတမေဝ ဥပဒဟတိ, မာရေတွာပိ သတ္တာနံ ဟိတမေဝ ဥပဒဟတိ, ယေန ယေန ယောဂေန သတ္တာနံ ဂုဏဝုဍ္ဎိ ဟောတိ, တေန တေန ယောဂေန သဗ္ဗသတ္တာနံ ဟိတမေဝ ဥပဒဟတိ။ သစေ, မဟာရာဇ, ဒေဝဒတ္တော န ပဗ္ဗာဇေယျ, ဂိဟိဘူတော သမာနော နိရယသံဝတ္တနိကံ ဗဟုံ ပါပကမ္မံ ကတွာ အနေကာနိ ကပ္ပကောဋိသတသဟဿာနိ နိရယေန နိရယံ ဝိနိပါတေန ဝိနိပါတံ ဂစ္ဆန္တော ဗဟုံ ဒုက္ခံ ဝေဒယိဿတိ, တံ ဘဂဝါ ဇာနမာနော ကာရုညေန ဒေဝဒတ္တံ ပဗ္ဗာဇေသိ, ‘မမ သာသနေ ပဗ္ဗဇိတဿ ဒုက္ခံ ပရိယန္တကတံ ဘဝိဿတီ’တိ ကာရုညေန ဂရုကံ ဒုက္ခံ လဟုကံ အကာသိ။

‘‘ယထာ ဝါ, မဟာရာဇ, ဓနယသသိရိဉာတိဗလေန ဗလဝါ ပုရိသော အတ္တနော ဉာတိံ ဝါ မိတ္တံ ဝါ ရညာ ဂရုကံ ဒဏ္ဍံ ဓါရေန္တံ အတ္တနော ဗဟုဝိဿတ္ထဘာဝေန သမတ္ထတာယ ဂရုကံ ဒဏ္ဍံ လဟုကံ အကာသိ, ဧဝမေဝ ခေါ, မဟာရာဇ, ဘဂဝါ ဗဟူနိ ကပ္ပကောဋိသတသဟဿာနိ ဒုက္ခံ ဝေဒယမာနံ ဒေဝဒတ္တံ ပဗ္ဗာဇေတွာ သီလသမာဓိပညာဝိမုတ္တိဗလသမတ္ထဘာဝေန ဂရုကံ ဒုက္ခံ လဟုကံ အကာသိ။

‘‘ယထာ ဝါ ပန, မဟာရာဇ, ကုသလော ဘိသက္ကော သလ္လကတ္တော ဂရုကံ ရောဂံ ဗလဝေါသဓဗလေန လဟုကံ ကရောတိ, ဧဝမေဝ ခေါ, မဟာရာဇ, ဗဟူနိ ကပ္ပကောဋိသတသဟဿာနိ ဒုက္ခံ ဝေဒယမာနံ ဒေဝဒတ္တံ ဘဂဝါ ရောဂညုတာယ ပဗ္ဗာဇေတွာ ကာရုညဗလော ပတ္ထဒ္ဓဓမ္မောသဓဗလေန ဂရုကံ ဒုက္ခံ လဟုကံ အကာသိ။ အပိ နု ခေါ သော, မဟာရာဇ, ဘဂဝါ ဗဟုဝေဒနီယံ ဒေဝဒတ္တံ အပ္ပဝေဒနီယံ ကရောန္တော ကိဉ္စိ အပုညံ အာပဇ္ဇေယျာ’’တိ? ‘‘န ကိဉ္စိ, ဘန္တေ, အပုညံ အာပဇ္ဇေယျ အန္တမသော ဂဒ္ဒူဟနမတ္တမ္ပီ’’တိ။ ‘‘ဣမမ္ပိ ခေါ, မဟာရာဇ, ကာရဏံ အတ္ထတော သမ္ပဋိစ္ဆ, ယေန ကာရဏေန ဘဂဝါ ဒေဝဒတ္တံ ပဗ္ဗာဇေသိ။

‘‘အပရမ္ပိ , မဟာရာဇ, ဥတ္တရိံ ကာရဏံ သုဏောဟိ, ယေန ကာရဏေန ဘဂဝါ ဒေဝဒတ္တံ ပဗ္ဗာဇေသိ။ ယထာ, မဟာရာဇ, စောရံ အာဂုစာရိံ ဂဟေတွာ ရညော ဒဿေယျုံ, ‘အယံ ခေါ, ဒေဝ, စောရော အာဂုစာရီ, ဣမဿ ယံ ဣစ္ဆသိ, တံ ဒဏ္ဍံ ပဏေဟီ’တိ။ တမေနံ ရာဇာ ဧဝံ ဝဒေယျ ‘တေန ဟိ , ဘဏေ, ဣမံ စောရံ ဗဟိနဂရံ နီဟရိတွာ အာဃာတနေ သီသံ ဆိန္ဒထာ’’တိ, ‘ဧဝံ ဒေဝါ’တိ ခေါ တေ ရညော ပဋိဿုတွာ တံ ဗဟိနဂရံ နီဟရိတွာ အာဃာတနံ နယေယျုံ။ တမေနံ ပဿေယျ ကောစိဒေဝ ပုရိသော ရညော သန္တိကာ လဒ္ဓဝရော လဒ္ဓယသဓနဘောဂေါ အာဒေယျဝစနော ဗလဝိစ္ဆိတကာရီ, သော တဿ ကာရုညံ ကတွာ တေ ပုရိသေ ဧဝံ ဝဒေယျ ‘အလံ, ဘော, ကိံ တုမှာကံ ဣမဿ သီသစ္ဆေဒနေန, တေန ဟိ ဘော ဣမဿ ဟတ္ထံ ဝါ ပါဒံ ဝါ ဆိန္ဒိတွာ ဇီဝိတံ ရက္ခထ, အဟမေတဿ ကာရဏာ ရညော သန္တိကေ ပဋိဝစနံ ကရိဿာမီ’တိ။ တေ တဿ ဗလဝတော ဝစနေန တဿ စောရဿ ဟတ္ထံ ဝါ ပါဒံ ဝါ ဆိန္ဒိတွာ ဇီဝိတံ ရက္ခေယျုံ။ အပိ နု ခေါ သော, မဟာရာဇ, ပုရိသော ဧဝံ ကာရီ တဿ စောရဿ ကိစ္စကာရီ အဿာ’’တိ? ‘‘ဇီဝိတဒါယကော သော, ဘန္တေ, ပုရိသော တဿ စောရဿ, ဇီဝိတေ ဒိန္နေ ကိံ တဿ အကတံ နာမ အတ္ထီ’’တိ? ‘‘ယာ ပန ဟတ္ထပါဒစ္ဆေဒနေ ဝေဒနာ, သော တာယ ဝေဒနာယ ကိဉ္စိ အပုညံ အာပဇ္ဇေယျာ’’တိ? ‘‘အတ္တနော ကတေန သော, ဘန္တေ, စောရော ဒုက္ခဝေဒနံ ဝေဒယတိ, ဇီဝိတဒါယကော ပန ပုရိသော န ကိဉ္စိ အပုညံ အာပဇ္ဇေယျာ’’တိ။ ‘‘ဧဝမေဝ ခေါ, မဟာရာဇ, ဘဂဝါ ကာရုညေန ဒေဝဒတ္တံ ပဗ္ဗာဇေသိ ‘မမ သာသနေ ပဗ္ဗဇိတဿ ဒုက္ခံ ပရိယန္တကတံ ဘဝိဿတီ’တိ။ ပရိယန္တကတဉ္စ, မဟာရာဇ, ဒေဝဒတ္တဿ ဒုက္ခံ, ဒေဝဒတ္တော, မဟာရာဇ, မရဏကာလေ –

‘‘‘ဣမေဟိ အဋ္ဌီဟိ တမဂ္ဂပုဂ္ဂလံ၊ ဒေဝါတိဒေဝံ နရဒမ္မသာရထိံ။

သမန္တစက္ခုံ သတပုညလက္ခဏံ၊ ပါဏေဟိ ဗုဒ္ဓံ သရဏံ ဥပေမီ’တိ။

‘‘ပါဏုပေတံ သရဏမဂမာသိ။ ဒေဝဒတ္တော, မဟာရာဇ, ဆ ကောဋ္ဌာသေ ကတေ ကပ္ပေ အတိက္ကန္တေ ပဌမကောဋ္ဌာသေ သသံဃံ ဘိန္ဒိ, ပဉ္စ ကောဋ္ဌာသေ နိရယေ ပစ္စိတွာ တတော မုစ္စိတွာ အဋ္ဌိဿရော နာမ ပစ္စေကဗုဒ္ဓေါ ဘဝိဿတိ။ အပိ နု ခေါ သော, မဟာရာဇ, ဘဂဝါ ဧဝံ ကာရီ ဒေဝဒတ္တဿ ကိစ္စကာရီ အဿာ’’တိ? ‘‘သဗ္ဗဒဒေါ, ဘန္တေ နာဂသေန, တထာဂတော ဒေဝဒတ္တဿ, ယံ တထာဂတော ဒေဝဒတ္တံ ပစ္စေကဗောဓိံ ပါပေဿတိ, ကိံ တထာဂတေန ဒေဝဒတ္တဿ အကတံ နာမ အတ္ထီ’’တိ? ‘‘ယံ ပန, မဟာရာဇ, ဒေဝဒတ္တော သသံဃံ ဘိန္ဒိတွာ နိရယေ ဒုက္ခဝေဒနံ ဝေဒယတိ, အပိ နု ခေါ ဘဂဝါ တတောနိဒါနံ ကိဉ္စိ အပုညံ အာပဇ္ဇေယျာ’’တိ? ‘‘န ဟိ, ဘန္တေ, အတ္တနာ ကတေန, ဘန္တေ, ဒေဝဒတ္တော ကပ္ပံ နိရယေ ပစ္စတိ, ဒုက္ခပရိယန္တကာရကော သတ္ထာ န ကိဉ္စိ အပုညံ အာပဇ္ဇတီ’’တိ။ ‘‘ဣမမ္ပိ ခေါ, တွံ မဟာရာဇ, ကာရဏံ အတ္ထတော သမ္ပဋိစ္ဆ, ယေန ကာရဏေန ဘဂဝါ ဒေဝဒတ္တံ ပဗ္ဗာဇေသိ။

‘‘အပရမ္ပိ, မဟာရာဇ, ဥတ္တရိံ ကာရဏံ သုဏောဟိ, ယေန ကာရဏေန ဘဂဝါ ဒေဝဒတ္တံ ပဗ္ဗာဇေသိ ။ ယထာ, မဟာရာဇ, ကုသလော ဘိသက္ကော သလ္လကတ္တော ဝါတပိတ္တသေမှသန္နိပါတဥတုပရိဏာမဝိသမပရိဟာရဩပက္ကမိကောပက္ကန္တံ ပူတိကုဏပဒုဂ္ဂန္ဓာဘိသဉ္ဆန္နံ အန္တောသလ္လံ သုသိရဂတံ ပုဗ္ဗရုဟိရသမ္ပုဏ္ဏံ ဝဏံ ဝူပသမေန္တော ဝဏမုခံ ကက္ခဠတိခိဏခါရကဋုကေန ဘေသဇ္ဇေန အနုလိမ္ပတိ ပရိပစ္စနာယ, ပရိပစ္စိတွာ မုဒုဘာဝမုပဂတံ သတ္ထေန ဝိကန္တယိတွာ ဍဟတိ သလာကာယ, ဒဍ္ဎေ ခါရလဝဏံ ဒေတိ, ဘေသဇ္ဇေန အနုလိမ္ပတိ ဝဏရုဟနာယ ဗျာဓိတဿ သောတ္ထိဘာဝမနုပ္ပတ္တိယာ, အပိ နု ခေါ သော, မဟာရာဇ, ဘိသက္ကော သလ္လကတ္တော အဟိတစိတ္တော ဘေသဇ္ဇေန အနုလိမ္ပတိ, သတ္ထေန ဝိကန္တေတိ, ဍဟတိ သလာကာယ, ခါရလဝဏံ ဒေတီ’’တိ? ‘‘န ဟိ, ဘန္တေ, ဟိတစိတ္တော သောတ္ထိကာမော တာနိ ကိရိယာနိ ကရောတီ’’တိ။ ‘‘ယာ ပနဿ ဘေသဇ္ဇကိရိယာကရဏေန ဥပ္ပန္နာ ဒုက္ခဝေဒနာ, တတောနိဒါနံ သော ဘိသက္ကော သလ္လကတ္တော ကိဉ္စိ အပုညံ အာပဇ္ဇေယျာ’’တိ? ‘‘ဟိတစိတ္တော, ဘန္တေ, သောတ္ထိကာမော ဘိသက္ကော သလ္လကတ္တော တာနိ ကိရိယာနိ ကရောတိ, ကိံ သော တတောနိဒါနံ အပုညံ အာပဇ္ဇေယျ, သဂ္ဂဂါမီ သော, ဘန္တေ, ဘိသက္ကော သလ္လကတ္တော’’တိ။ ‘‘ဧဝမေဝ ခေါ, မဟာရာဇ, ကာရုညေန ဘဂဝါ ဒေဝဒတ္တံ ပဗ္ဗာဇေသိ ဒုက္ခပရိမုတ္တိယာ။

‘‘အပရမ္ပိ, မဟာရာဇ, ဥတ္တရိံ ကာရဏံ သုဏောဟိ, ယေန ကာရဏေန ဘဂဝါ ဒေဝဒတ္တံ ပဗ္ဗာဇေသိ။ ယထာ, မဟာရာဇ, ပုရိသော ကဏ္ဋကေန ဝိဒ္ဓေါ အဿ, အထညတရော ပုရိသော တဿ ဟိတကာမော သောတ္ထိကာမော တိဏှေန ကဏ္ဋကေနဝါ သတ္ထမုခေန ဝါ သမန္တတော ဆိန္ဒိတွာ ပဂ္ဃရန္တေန လောဟိတေန တံ ကဏ္ဋကံ နီဟရေယျ, အပိ နု ခေါ သော, မဟာရာဇ, ပုရိသော အဟိတကာမော တံ ကဏ္ဋကံ နီဟရတီ’’တိ? ‘‘န ဟိ, ဘန္တေ, ဟိတကာမော သော, ဘန္တေ, ပုရိသော သောတ္ထိကာမော တံ ကဏ္ဋကံ နီဟရတိ။ သစေ သော, ဘန္တေ, တံ ကဏ္ဋကံ န နီဟရေယျ, မရဏံ ဝါ သော တေန ပါပုဏေယျ မရဏမတ္တံ ဝါ ဒုက္ခ’’န္တိ။ ‘‘ဧဝမေဝ ခေါ, မဟာရာဇ, တထာဂတော ကာရုညေန ဒေဝဒတ္တံ ပဗ္ဗာဇေသိ ဒုက္ခပရိမုတ္တိယာ။ သစေ မဟာရာဇ, ဘဂဝါ ဒေဝဒတ္တံ န ပဗ္ဗာဇေယျ, ကပ္ပကောဋိသတသဟဿမ္ပိ ဒေဝဒတ္တော ဘဝပရမ္ပရာယ နိရယေ ပစ္စေယျာ’’တိ။

‘‘အနုသောတဂါမိံ, ဘန္တေ နာဂသေန, ဒေဝဒတ္တံ တထာဂတော ပဋိသောတံ ပါပေသိ, ဝိပန္ထပဋိပန္နံ ဒေဝဒတ္တံ ပန္ထေ ပဋိပါဒေသိ, ပပါတေ ပတိတဿ ဒေဝဒတ္တဿ ပတိဋ္ဌံ အဒါသိ, ဝိသမဂတံ ဒေဝဒတ္တံ တထာဂတော သမံ အာရောပေသိ, ဣမေ စ, ဘန္တေ နာဂသေန, ဟေတူ ဣမာနိ စ ကာရဏာနိ န သက္ကာ အညေန သန္ဒဿေတုံ အညတြ တဝါဒိသေန ဗုဒ္ဓိမတာ’’တိ။

ဒေဝဒတ္တပဗ္ဗဇ္ဇပဉ္ဟော တတိယော။

၄။ ပထဝိစလနပဉ္ဟော

၄။ ‘‘ဘန္တေ နာဂသေန, ဘာသိတမ္ပေတံ ဘဂဝတာ – ‘အဋ္ဌိမေ, ဘိက္ခဝေ [အဋ္ဌိမေ အာနန္ဒ (အ။ နိ။ ၈။၇၀)], ဟေတူ အဋ္ဌ ပစ္စယာ မဟတော ဘူမိစာလဿ ပါတုဘာဝါယာ’တိ။ အသေသဝစနံ ဣဒံ, နိဿေသဝစနံ ဣဒံ, နိပ္ပရိယာယဝစနံ ဣဒံ, နတ္ထညော နဝမော ဟေတု မဟတော ဘူမိစာလဿ ပါတုဘာဝါယ။ ယဒိ, ဘန္တေ နာဂသေန, အညော နဝမော ဟေတု ဘဝေယျ မဟတော ဘူမိစာလဿ ပါတုဘာဝါယ, တမ္ပိ ဟေတုံ ဘဂဝါ ကထေယျ။ ယသ္မာ စ ခေါ, ဘန္တေ နာဂသေန, နတ္ထညော နဝမော ဟေတု မဟတော ဘူမိစာလဿ ပါတုဘာဝါယ, တသ္မာ အနာစိက္ခိတော ဘဂဝတာ, အယဉ္စ နဝမော ဟေတု ဒိဿတိ မဟတော ဘူမိစာလဿ ပါတုဘာဝါယ, ယံ ဝေဿန္တရေန ရညာ မဟာဒါနေ ဒီယမာနေ သတ္တက္ခတ္တုံ မဟာပထဝီ ကမ္ပိတာတိ။ ယဒိ, ဘန္တေ နာဂသေန, အဋ္ဌေဝ ဟေတူ အဋ္ဌ ပစ္စယာ မဟတော ဘူမိစာလဿ ပါတုဘာဝါယ, တေန ဟိ ဝေဿန္တရေန ရညာ မဟာဒါနေ ဒီယမာနေ သတ္တက္ခတ္တုံ မဟာပထဝီ ကမ္ပိတာတိ ယံ ဝစနံ, တံ မိစ္ဆာ။ ယဒိ ဝေဿန္တရေန ရညာ မဟာဒါနေ ဒီယမာနေ သတ္တက္ခတ္တုံ မဟာပထဝီ ကမ္ပိတာ, တေန ဟိ အဋ္ဌေဝ ဟေတူ အဋ္ဌ ပစ္စယာ မဟတော ဘူမိစာလဿ ပါတုဘာဝါယာတိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော သုခုမော ဒုန္နိဝေဌိယော အန္ဓကရဏော စေဝ ဂမ္ဘီရော စ, သော တဝါနုပ္ပတ္တော, နေသော အညေန ဣတ္တရပညေန သက္ကာ ဝိသဇ္ဇေတုံ အညတြ တဝါဒိသေန ဗုဒ္ဓိမတာ’’တိ။

‘‘ဘာသိတမ္ပေတံ, မဟာရာဇ, ဘဂဝတာ – ‘အဋ္ဌိမေ, ဘိက္ခဝေ, ဟေတူ အဋ္ဌ ပစ္စယာ မဟတော ဘူမိစာလဿ ပါတုဘာဝါယာ’တိ။ ယံ ဝေဿန္တရေန ရညာ မဟာဒါနေ ဒီယမာနေ သတ္တက္ခတ္တုံ မဟာပထဝီ ကမ္ပိတာ, တဉ္စ ပန အကာလိကံ ကဒါစုပ္ပတ္တိကံ အဋ္ဌဟိ ဟေတူဟိ ဝိပ္ပမုတ္တံ, တသ္မာ အဂဏိတံ အဋ္ဌဟိ ဟေတူဟိ။

‘‘ယထာ, မဟာရာဇ, လောကေ တယော ယေဝ မေဃာ ဂဏီယန္တိ ဝဿိကော ဟေမန္တိကော ပါဝုသကောတိ။ ယဒိ တေ မုဉ္စိတွာ အညော မေဃော ပဝဿတိ, န သော မေဃော ဂဏီယတိ သမ္မတေဟိ မေဃေဟိ, အကာလမေဃောတွေဝ သင်္ခံ ဂစ္ဆတိ။ ဧဝမေဝ ခေါ, မဟာရာဇ, ဝေဿန္တရေန ရညာ မဟာဒါနေ ဒီယမာနေ ယံ သတ္တက္ခတ္တုံ မဟာပထဝီ ကမ္ပိတာ, အကာလိကံ ဧတံ ကဒါစုပ္ပတ္တိကံ အဋ္ဌဟိ ဟေတူဟိ ဝိပ္ပမုတ္တံ, န တံ ဂဏီယတိ အဋ္ဌဟိ ဟေတူဟိ။

‘‘ယထာ ဝါ ပန, မဟာရာဇ, ဟိမဝန္တာ ပဗ္ဗတာ ပဉ္စ နဒိသတာနိ သန္ဒန္တိ, တေသံ, မဟာရာဇ, ပဉ္စန္နံ နဒိသတာနံ ဒသေဝ နဒိယော နဒိဂဏနာယ ဂဏီယန္တိ။ သေယျထီဒံ, ဂင်္ဂါ ယမုနာ အစိရဝတီ သရဘူ မဟီ သိန္ဓု သရဿတီ ဝေတြဝတီ ဝီတံသာ စန္ဒဘာဂါတိ, အဝသေသာ နဒိယော နဒိဂဏနာယ အဂဏိတာ။ ကိံ ကာရဏာ? န တာ နဒိယော ဓုဝသလိလာ။ ဧဝမေဝ ခေါ, မဟာရာဇ, ဝေဿန္တရေန ရညာ မဟာဒါနေ ဒီယမာနေ ယံ သတ္တက္ခတ္တုံ မဟာပထဝီ ကမ္ပိတာ, အကာလိကံ ဧတံ ကဒါစုပ္ပတ္တိကံ အဋ္ဌဟိ ဟေတူဟိ ဝိပ္ပမုတ္တံ, န တံ ဂဏီယတိ အဋ္ဌဟိ ဟေတူဟိ။

‘‘ယထာ ဝါ ပန, မဟာရာဇ, ရညော သတမ္ပိ ဒွိသတမ္ပိ တိသတမ္ပိ အမစ္စာ ဟောန္တိ, တေသံ ဆ ယေဝ ဇနာ အမစ္စဂဏနာယ ဂဏီယန္တိ။ သေယျထီဒံ, သေနာပတိ ပုရောဟိတော အက္ခဒဿော ဘဏ္ဍာဂါရိကော ဆတ္တဂ္ဂါဟကော ခဂ္ဂဂ္ဂါဟကော။ ဧတေ ယေဝ အမစ္စဂဏနာယ ဂဏီယန္တိ။ ကိံ ကာရဏာ? ယုတ္တတ္တာ ရာဇဂုဏေဟိ, အဝသေသာ အဂဏိတာ, သဗ္ဗေ အမစ္စာတွေဝ သင်္ခံ ဂစ္ဆန္တိ ။ ဧဝမေဝ ခေါ, မဟာရာဇ, ဝေဿန္တရေန ရညာ မဟာဒါနေ ဒီယမာနေ ယံ သတ္တက္ခတ္တုံ မဟာပထဝီ ကမ္ပိတာ, အကာလိကံ ဧတံ ကဒါစုပ္ပတ္တိကံ အဋ္ဌဟိ ဟေတူဟိ ဝိပ္ပမုတ္တံ, န တံ ဂဏီယတိ အဋ္ဌဟိ ဟေတူဟိ။

‘‘သုယျတိ နု ခေါ, မဟာရာဇ, ဧတရဟိ ဇိနသာသနေ ကတာဓိကာရာနံ ဒိဋ္ဌဓမ္မသုခဝေဒနီယကမ္မံ, ကိတ္တိ စ ယေသံ အဗ္ဘုဂ္ဂတာ ဒေဝမနုဿေသူ’’တိ? ‘‘အာမ, ဘန္တေ, သုယျတိ ဧတရဟိ ဇိနသာသနေ ကတာဓိကာရာနံ ဒိဋ္ဌဓမ္မသုခဝေဒနီယကမ္မံ, ကိတ္တိ စ ယေသံ အဗ္ဘုဂ္ဂတာ ဒေဝမနုဿေသု သတ္တ ဇနာတိ’’။ ‘‘ကေ စ တေ, မဟာရာဇာ’’တိ? ‘‘သုမနော စ, ဘန္တေ, မာလာကာရော, ဧကသာဋကော စ ဗြာဟ္မဏော, ပုဏ္ဏော စ ဘတကော, မလ္လိကာ စ ဒေဝီ, ဂေါပါလမာတာ စ ဒေဝီ, သုပ္ပိယာ စ ဥပါသိကာ, ပုဏ္ဏာ စ ဒါသီတိ ဣမေ သတ္တ ဒိဋ္ဌဓမ္မသုခဝေဒနီယာ သတ္တာ, ကိတ္တိ စ ဣမေသံ အဗ္ဘုဂ္ဂတာ ဒေဝမနုဿေသူ’’တိ။

‘‘အပရေပိ သုယျန္တိ နု ခေါ အတီတေ မာနုသကေနေဝ သရီရဒေဟေန တိဒသဘဝနံ ဂတာ’’တိ? ‘‘အာမ, ဘန္တေ, သုယျန္တီ’’တိ။ ‘‘ကေ စ တေ, မဟာရာဇာ’’တိ? ‘‘ဂုတ္တိလော စ ဂန္ဓဗ္ဗော, သာဓီနော စ ရာဇာ, နိမိ စ ရာဇာ, မန္ဓာတာ စ ရာဇာတိ ဣမေ စတုရော ဇနာ သုယျန္တိ, တေနေဝ မာနုသကေန သရီရဒေဟေန တိဒသဘဝနံ ဂတာ’’တိ။ ‘‘သုစိရမ္ပိ ကတံ သုယျတိ သုကတဒုက္ကဋန္တိ? သုတပုဗ္ဗံ ပန တယာ, မဟာရာဇ, အတီတေ ဝါ အဒ္ဓါနေ ဝတ္တမာနေ ဝါ အဒ္ဓါနေ ဣတ္ထန္နာမဿ ဒါနေ ဒီယမာနေ သကိံ ဝါ ဒွိက္ခတ္တုံ ဝါ တိက္ခတ္တုံ ဝါ မဟာပထဝီ ကမ္ပိတာ’’တိ? ‘‘န ဟိ ဘန္တေ’’တိ။ ‘‘အတ္ထိ မေ, မဟာရာဇ, အာဂမော အဓိဂမော ပရိယတ္တိ သဝနံ သိက္ခာဗလံ သုဿူသာ ပရိပုစ္ဆာ အာစရိယုပါသနံ, မယာပိ န သုတပုဗ္ဗံ ‘ဣတ္ထန္နာမဿ ဒါနေ ဒီယမာနေ သကိံ ဝါ ဒွိက္ခတ္တုံ ဝါ တိက္ခတ္တုံ ဝါ မဟာပထဝီ ကမ္ပိတာ’တိ ဌပေတွာ ဝေဿန္တရဿ ရာဇဝသဘဿ ဒါနဝရံ ။ ဘဂဝတော စ, မဟာရာဇ, ကဿပဿ, ဘဂဝတော စ သကျမုနိနောတိ ဒွိန္နံ ဗုဒ္ဓါနံ အန္တရေ ဂဏနပထံ ဝီတိဝတ္တာ ဝဿကောဋိယော အတိက္ကန္တာ, တတ္ထပိ မေ သဝနံ နတ္ထိ ‘ဣတ္ထန္နာမဿ ဒါနေ ဒီယမာနေ သကိံ ဝါ ဒွိက္ခတ္တုံ ဝါ တိက္ခတ္တုံ ဝါ မဟာပထဝီ ကမ္ပိတာ’တိ။ န, မဟာရာဇ, တာဝတကေန ဝီရိယေန တာဝတကေန ပရက္ကမေန မဟာပထဝီ ကမ္ပတိ, ဂုဏဘာရဘရိတာ, မဟာရာဇ, သဗ္ဗသောစေယျကိရိယဂုဏဘာရဘရိတာ ဓါရေတုံ န ဝိသဟန္တီ မဟာပထဝီ စလတိ ကမ္ပတိ ပဝေဓတိ။

‘‘ယထာ, မဟာရာဇ, သကဋဿ အတိဘာရဘရိတဿ နာဘိယော စ နေမိယော စ ဖလန္တိ အက္ခော ဘိဇ္ဇတိ, ဧဝမေဝ ခေါ, မဟာရာဇ, သဗ္ဗသောစေယျကိရိယဂုဏဘာရဘရိတာ မဟာပထဝီ ဓါရေတုံ န ဝိသဟန္တီ စလတိ ကမ္ပတိ ပဝေဓတိ။

‘‘ယထာ ဝါ ပန, မဟာရာဇ, ဂဂနံ အနိလဇလဝေဂသဉ္ဆာဒိတံ ဥဿန္နဇလဘာရဘရိတံ အတိဝါတေန ဖုဋိတတ္တာ နဒတိ ရဝတိ ဂဠဂဠာယတိ, ဧဝမေဝ ခေါ, မဟာရာဇ, မဟာပထဝီ ရညော ဝေဿန္တရဿ ဒါနဗလဝိပုလဥဿန္နဘာရဘရိတာ ဓါရေတုံ န ဝိသဟန္တီ စလတိ ကမ္ပတိ ပဝေဓတိ။ န ဟိ, မဟာရာဇ, ရညော ဝေဿန္တရဿ စိတ္တံ ရာဂဝသေန ပဝတ္တတိ, န ဒေါသဝသေန ပဝတ္တတိ, န မောဟဝသေန ပဝတ္တတိ, န မာနဝသေန ပဝတ္တတိ, န ဒိဋ္ဌိဝသေန ပဝတ္တတိ, န ကိလေသဝသေန ပဝတ္တတိ, န ဝိတက္ကဝသေန ပဝတ္တတိ, န အရတိဝသေန ပဝတ္တတိ, အထ ခေါ ဒါနဝသေန ဗဟုလံ ပဝတ္တတိ ‘ကိန္တိ အနာဂတာ ယာစကာ မမ သန္တိကေ အာဂစ္ဆေယျုံ, အာဂတာ စ ယာစကာ ယထာကာမံ လဘိတွာ အတ္တမနာ ဘဝေယျု’န္တိ သတတံ သမိတံ ဒါနံ ပတိ မာနသံ ဌပိတံ ဟောတိ။ ရညော, မဟာရာဇ, ဝေဿန္တရဿ သတတံ သမိတံ ဒသသု ဌာနေသု မာနသံ ဌပိတံ ဟောတိ ဒမေ သမေ ခန္တိယံ သံဝရေ ယမေ နိယမေ အက္ကောဓေ အဝိဟိံသာယံ သစ္စေ သောစေယျေ။ ရညော, မဟာရာဇ, ဝေဿန္တရဿ ကာမေသနာ ပဟီနာ, ဘဝေသနာ ပဋိပ္ပဿဒ္ဓါ, ဗြဟ္မစရိယေသနာယ ယေဝ ဥဿုက္ကံ အာပန္နော, ရညော, မဟာရာဇ, ဝေဿန္တရဿ အတ္တရက္ခာ [ပရရက္ခာယ (သီ။ ဣ။)] ပဟီနာ, သဗ္ဗသတ္တရက္ခာယ ဥဿုက္ကံ အာပန္နော ‘ကိန္တိ ဣမေ သတ္တာ သမဂ္ဂါ အဿု အရောဂါ သဓနာ ဒီဃာယုကာ’တိ ဗဟုလံ ယေဝ မာနသံ ပဝတ္တတိ။ ဒဒမာနော စ, မဟာရာဇ, ဝေဿန္တရော ရာဇာ တံ ဒါနံ န ဘဝသမ္ပတ္တိဟေတု ဒေတိ, န ဓနဟေတု ဒေတိ, န ပဋိဒါနဟေတု ဒေတိ, န ဥပလာပနဟေတု ဒေတိ, န အာယုဟေတု ဒေတိ, န ဝဏ္ဏဟေတု ဒေတိ, န သုခဟေတု ဒေတိ, န ဗလဟေတု ဒေတိ, န ယသဟေတု ဒေတိ, န ပုတ္တဟေတု ဒေတိ, န ဓီတုဟေတု ဒေတိ, အထ ခေါ သဗ္ဗညုတဉာဏဟေတု သဗ္ဗညုတဉာဏရတနဿ ကာရဏာ ဧဝရူပေ အတုလဝိပုလာနုတ္တရေ ဒါနဝရေ အဒါသိ, သဗ္ဗညုတံ ပတ္တော စ ဣမံ ဂါထံ အဘာသိ –

‘‘‘ဇာလိံ ကဏှာဇိနံ ဓီတံ၊ မဒ္ဒိဒေဝိံ ပတိဗ္ဗတံ။

စဇမာနော န စိန္တေသိံ၊ ဗောဓိယာ ယေဝ ကာရဏာ’တိ။

‘‘ဝေဿန္တရော, မဟာရာဇ, ရာဇာ အက္ကောဓေန ကောဓံ ဇိနာတိ, အသာဓုံ သာဓုနာ ဇိနာတိ, ကဒရိယံ ဒါနေန ဇိနာတိ, အလိကဝါဒိနံ သစ္စေန ဇိနာတိ, သဗ္ဗံ အကုသလံ ကုသလေန ဇိနာတိ။ တဿ ဧဝံ ဒဒမာနဿ ဓမ္မာနုဂတဿ ဓမ္မသီသကဿ [ဓမ္မာသီသကဿ (က။)] ဒါနနိဿန္ဒဗလဝ [ဒါနနိဿန္ဒဗလ (သီ။ ဣ။)] ဝီရိယဝိပုလဝိပ္ဖာရေန ဟေဋ္ဌာ မဟာဝါတာ သဉ္စလန္တိ သဏိကံ သဏိကံ သကိံ သကိံ အာကုလာကုလာ ဝါယန္တိ ဩနမန္တိ ဥန္နမန္တိ ဝိနမန္တိ, ဆိန္နပတ္တပါဒပါ [သီန္နပ္ပတ္တပါဒပါ (သီ။)] ပပတန္တိ, ဂုမ္ဗံ ဂုမ္ဗံ ဝလာဟကာ ဂဂနေ သန္ဓာဝန္တိ, ရဇောသဉ္စိတာ ဝါတာ ဒါရုဏာ ဟောန္တိ, ဂဂနံ ဥပ္ပီဠိတာ ဝါတာ ဝါယန္တိ, သဟသာ ဓမဓမာယန္တိ, မဟာဘီမော သဒ္ဒေါ နိစ္ဆရတိ, တေသု ဝါတေသု ကုပိတေသု ဥဒကံ သဏိကံ သဏိကံ စလတိ, ဥဒကေ စလိတေ ခုဗ္ဘန္တိ မစ္ဆကစ္ဆပါ, ယမကယမကာ ဦမိယော ဇာယန္တိ, ဇလစရာ သတ္တာ တသန္တိ, ဇလဝီစိ ယုဂနဒ္ဓေါ ဝတ္တတိ, ဝီစိနာဒေါ ပဝတ္တတိ, ဃောရာ ဗုဗ္ဗုဠာ [ပုဗ္ဗုဠာ (က။)] ဥဋ္ဌဟန္တိ, ဖေဏမာလာ ဘဝန္တိ, ဥတ္တရတိ မဟာသမုဒ္ဒေါ, ဒိသာဝိဒိသံ ဓါဝတိ ဥဒကံ, ဥဒ္ဓံသောတပဋိသောတမုခါ သန္ဒန္တိ သလိလဓါရာ, တသန္တိ အသုရာ ဂရုဠာ နာဂါ ယက္ခာ, ဥဗ္ဗိဇ္ဇန္တိ ‘ကိံ နု ခေါ, ကထံ နု ခေါ, သာဂရော ဝိပရိဝတ္တတီ’တိ, ဂမနပထမေသန္တိ ဘီတစိတ္တာ, ခုဘိတေ လုဠိတေ ဇလဓါရေ ပကမ္ပတိ မဟာပထဝီ သနဂါ သသာဂရာ , ပရိဝတ္တတိ သိနေရုဂိရိ ကူဋသေလသိခရော ဝိနမမာနော ဟောတိ, ဝိမနာ ဟောန္တိ အဟိနကုလဗိဠာရကောဋ္ဌုကသူကရမိဂပက္ခိနော, ရုဒန္တိ ယက္ခာ အပ္ပေသက္ခာ, ဟသန္တိ ယက္ခာ မဟေသက္ခာ ကမ္ပမာနာယ မဟာပထဝိယာ။

‘‘ယထာ, မဟာရာဇ, မဟတိ မဟာပရိယောဂေ ဥဒ္ဓနဂတေ ဥဒကသမ္ပုဏ္ဏေ အာကိဏ္ဏတဏ္ဍုလေ ဟေဋ္ဌတော အဂ္ဂိ ဇလမာနော ပဌမံ တာဝ ပရိယောဂံ သန္တာပေတိ, ပရိယောဂေါ သန္တတ္တော ဥဒကံ သန္တာပေတိ, ဥဒကံ သန္တတ္တံ တဏ္ဍုလံ သန္တာပေတိ, တဏ္ဍုလံ သန္တတ္တံ ဥမ္မုဇ္ဇတိ နိမုဇ္ဇတိ, ဗုဗ္ဗုဠကဇာတံ ဟောတိ, ဖေဏမာလာ ဥတ္တရတိ; ဧဝမေဝ ခေါ, မဟာရာဇ, ဝေဿန္တရော ရာဇာ ယံ လောကေ ဒုစ္စဇံ, တံ စဇိ, တဿ တံ ဒုစ္စဇံ စဇန္တဿ ဒါနဿ သဘာဝနိဿန္ဒေန ဟေဋ္ဌာ မဟာဝါတာ ဓါရေတုံ န ဝိသဟန္တာ ပရိကုပ္ပိံသု [ပရိကမ္ပိံသု (က။)], မဟာဝါတေသု ပရိကုပိတေသု [ပရိခုဗ္ဘိတေသု (သျာ။)] ဥဒကံ ကမ္ပိ, ဥဒကေ ကမ္ပိတေ မဟာပထဝီ ကမ္ပိ, ဣတိ တဒါ မဟာဝါတာ စ ဥဒကဉ္စ မဟာပထဝီ စာတိ ဣမေ တယော ဧကမနာ ဝိယ အဟေသုံ မဟာဒါနနိဿန္ဒေန ဝိပုလဗလဝီရိယေန နတ္ထေဒိသော, မဟာရာဇ, အညဿ ဒါနာနုဘာဝေါ, ယထာ ဝေဿန္တရဿ ရညော မဟာဒါနာနုဘာဝေါ။ ယထာ, မဟာရာဇ, မဟိယာ ဗဟုဝိဓါ မဏယော ဝိဇ္ဇန္တိ။ သေယျထီဒံ, ဣန္ဒနီလော မဟာနီလော ဇောတိရသော ဝေဠုရိယော ဥမ္မာပုပ္ဖော သိရီသပုပ္ဖော မနောဟရော သူရိယကန္တော စန္ဒကန္တော ဝဇိရော ခဇ္ဇောပနကော ဖုဿရာဂေါ လောဟိတင်္ဂေါ မသာရဂလ္လောတိ, ဧတေ သဗ္ဗေ အတိက္ကမ္မ စက္ကဝတ္တိမဏိ အဂ္ဂမက္ခာယတိ, စက္ကဝတ္တိမဏိ, မဟာရာဇ, သမန္တာ ယောဇနံ ဩဘာသေတိ။ ဧဝမေဝ ခေါ, မဟာရာဇ, ယံ ကိဉ္စိ မဟိယာ ဒါနံ ဝိဇ္ဇတိ အပိ အသဒိသဒါနံ ပရမံ, တံ သဗ္ဗံ အတိက္ကမ္မ ဝေဿန္တရဿ ရညော မဟာဒါနံ အဂ္ဂမက္ခာယတိ, ဝေဿန္တရဿ, မဟာရာဇ, ရညော မဟာဒါနေ ဒီယမာနေ သတ္တက္ခတ္တုံ မဟာပထဝီ ကမ္ပိတာ’’တိ။

‘‘အစ္ဆရိယံ, ဘန္တေ နာဂသေန, ဗုဒ္ဓါနံ, အဗ္ဘုတံ, ဘန္တေ နာဂသေန, ဗုဒ္ဓါနံ, ယံ တထာဂတော ဗောဓိသတ္တော သမာနော အသမော လောကေန ဧဝံခန္တိ ဧဝံစိတ္တော ဧဝံအဓိမုတ္တိ ဧဝံအဓိပ္ပါယော, ဗောဓိသတ္တာနံ, ဘန္တေ နာဂသေန, ပရက္ကမော ဒက္ခာပိတော, ပါရမီ စ ဇိနာနံ ဘိယျော ဩဘာသိတာ, စရိယံ စရတောပိ တာဝ တထာဂတဿ သဒေဝကေ လောကေ သေဋ္ဌဘာဝေါ အနုဒဿိတော။ သာဓု, ဘန္တေ နာဂသေန, ထောမိတံ ဇိနသာသနံ, ဇောတိတာ ဇိနပါရမီ, ဆိန္နော တိတ္ထိယာနံ ဝါဒဂဏ္ဌိ, ဘိန္နော ပရာပဝါဒကုမ္ဘော [ဂုမ္ဗော တယာ ဝိဒ္ဓံသိတော (သျာ။)], ပဉ္ဟော ဂမ္ဘီရော ဥတ္တာနီကတော, ဂဟနံ အဂဟနံ ကတံ, သမ္မာ လဒ္ဓံ ဇိနပုတ္တာနံ နိဗ္ဗာဟနံ [နိဗ္ဗာယနံ (က။)], ဧဝမေတံ ဂဏိဝရပဝရ တထာ သမ္ပဋိစ္ဆာမာ’’တိ။

ပထဝိစလနပဉ္ဟော စတုတ္ထော။

၅။ သိဝိရာဇစက္ခုဒါနပဉ္ဟော

၅။ ‘‘ဘန္တေ နာဂသေန, တုမှေ ဧဝံ ဘဏထ ‘သိဝိရာဇေန ယာစကဿ စက္ခူနိ ဒိန္နာနိ, အန္ဓဿ သတော ပုန ဒိဗ္ဗစက္ခူနိ ဥပ္ပန္နာနီ’တိ, ဧတမ္ပိ ဝစနံ သကသဋံ သနိဂ္ဂဟံ သဒေါသံ ‘ဟေတုသမုဂ္ဃါတေ အဟေတုသ္မိံ အဝတ္ထုသ္မိံ နတ္ထိ ဒိဗ္ဗစက္ခုဿ ဥပ္ပါဒေါ’တိ သုတ္တေ ဝုတ္တံ, ယဒိ, ဘန္တေ နာဂသေန, သိဝိရာဇေန ယာစကဿ စက္ခူနိ ဒိန္နာနိ, တေန ဟိ ‘ပုန ဒိဗ္ဗစက္ခူနိ ဥပ္ပန္နာနီ’တိ ယံ ဝစနံ, တံ မိစ္ဆာ; ယဒိ ဒိဗ္ဗစက္ခူနိ ဥပ္ပန္နာနိ, တေန ဟိ ‘သိဝိရာဇေန ယာစကဿ စက္ခူနိ ဒိန္နာနီ’တိ ယံ ဝစနံ, တမ္ပိ မိစ္ဆာ။ အယမ္ပိ ဥဘတော ကောဋိကော ပဉ္ဟော ဂဏ္ဌိတောပိ ဂဏ္ဌိတရော ဝေဌတောပိ ဝေဌတရော ဂဟနတောပိ ဂဟနတရော, သော တဝါနုပ္ပတ္တော, တတ္ထ ဆန္ဒမဘိဇနေဟိ နိဗ္ဗာဟနာယ ပရဝါဒါနံ နိဂ္ဂဟာယာ’’တိ။

‘‘ဒိန္နာနိ , မဟာရာဇ, သိဝိရာဇေန ယာစကဿ စက္ခူနိ, တတ္ထ မာ ဝိမတိံ ဥပ္ပါဒေဟိ, ပုန ဒိဗ္ဗာနိ စ စက္ခူနိ ဥပ္ပန္နာနိ, တတ္ထာပိ မာ ဝိမတိံ ဇနေဟီ’’တိ။ ‘‘အပိ နု ခေါ, ဘန္တေ နာဂသေန, ဟေတုသမုဂ္ဃါတေ အဟေတုသ္မိံ အဝတ္ထုသ္မိံ ဒိဗ္ဗစက္ခု ဥပ္ပဇ္ဇတီ’’တိ? ‘‘န ဟိ, မဟာရာဇာ’’တိ။ ‘‘ကိံ ပန, ဘန္တေ, ဧတ္ထ ကာရဏံ, ယေန ကာရဏေန ဟေတုသမုဂ္ဃါတေ အဟေတုသ္မိံ အဝတ္ထုသ္မိံ ဒိဗ္ဗစက္ခု ဥပ္ပဇ္ဇတိ, ဣင်္ဃ တာဝ ကာရဏေန မံ သညာပေဟီ’’တိ?

‘‘ကိံ ပန, မဟာရာဇ, အတ္ထိ လောကေ သစ္စံ နာမ, ယေန သစ္စဝါဒိနော သစ္စကိရိယံ ကရောန္တီ’’တိ? ‘‘အာမ, ဘန္တေ, အတ္ထိ လောကေ သစ္စံ နာမ, သစ္စေန, ဘန္တေ နာဂသေန, သစ္စဝါဒိနော သစ္စကိရိယံ ကတွာ ဒေဝံ ဝဿာပေန္တိ, အဂ္ဂိံ နိဗ္ဗာပေန္တိ, ဝိသံ ပဋိဟနန္တိ, အညမ္ပိ ဝိဝိဓံ ကတ္တဗ္ဗံ ကရောန္တီ’’တိ။ ‘‘တေန ဟိ, မဟာရာဇ, ယုဇ္ဇတိ သမေတိ သိဝိရာဇဿ သစ္စဗလေန ဒိဗ္ဗစက္ခူနိ ဥပ္ပန္နာနီတိ, သစ္စဗလေန, မဟာရာဇ, အဝတ္ထုသ္မိံ ဒိဗ္ဗစက္ခု ဥပ္ပဇ္ဇတိ, သစ္စံ ယေဝ တတ္ထ ဝတ္ထု ဘဝတိ ဒိဗ္ဗစက္ခုဿ ဥပ္ပါဒါယ။

‘‘ယထာ, မဟာရာဇ, ယေ ကေစိ သတ္တာ သစ္စမနုဂါယန္တိ ‘မဟာမေဃော ပဝဿတူ’တိ, တေသံ သဟ သစ္စမနုဂီတေန မဟာမေဃော ပဝဿတိ, အပိ နု ခေါ, မဟာရာဇ, အတ္ထိ အာကာသေ ဝဿဟေတု သန္နိစိတော ‘ယေန ဟေတုနာ မဟာမေဃော ပဝဿတီ’’’တိ? ‘‘န ဟိ, ဘန္တေ, သစ္စံ ယေဝ တတ္ထ ဟေတု ဘဝတိ မဟတော မေဃဿ ပဝဿနာယာ’’တိ။ ‘‘ဧဝမေဝ ခေါ, မဟာရာဇ, နတ္ထိ တဿ ပကတိဟေတု, သစ္စံ ယေဝေတ္ထ ဝတ္ထု ဘဝတိ ဒိဗ္ဗစက္ခုဿ ဥပ္ပါဒါယာတိ။

‘‘ယထာ ဝါ ပန, မဟာရာဇ, ယေ ကေစိ သတ္တာ သစ္စမနုဂါယန္တိ ‘ဇလိတပဇ္ဇလိတမဟာအဂ္ဂိက္ခန္ဓော ပဋိနိဝတ္တတူ’တိ, တေသံ သဟ သစ္စမနုဂီတေန ဇလိတပဇ္ဇလိတမဟာအဂ္ဂိက္ခန္ဓော ခဏေန ပဋိနိဝတ္တတိ။ အပိ နု ခေါ, မဟာရာဇ, အတ္ထိ တသ္မိံ ဇလိတပဇ္ဇလိတေ မဟာအဂ္ဂိက္ခန္ဓေ ဟေတု သန္နိစိတော ‘ယေန ဟေတုနာ ဇလိတပဇ္ဇလိတမဟာအဂ္ဂိက္ခန္ဓော ခဏေန ပဋိနိဝတ္တတီ’’တိ? ‘‘န ဟိ, ဘန္တေ, သစ္စံ ယေဝ တတ္ထ ဝတ္ထု ဟောတိ တဿ ဇလိတပဇ္ဇလိတဿ မဟာအဂ္ဂိက္ခန္ဓဿ ခဏေန ပဋိနိဝတ္တနာယာ’’တိ။ ‘‘ဧဝမေဝ ခေါ, မဟာရာဇ, နတ္ထိ တဿ ပကတိဟေတု, သစ္စံ ယေဝေတ္ထ ဝတ္ထု ဘဝတိ ဒိဗ္ဗစက္ခုဿ ဥပ္ပါဒါယာတိ။

‘‘ယထာ ဝါ ပန, မဟာရာဇ, ယေ ကေစိ သတ္တာ သစ္စမနုဂါယန္တိ ‘ဝိသံ ဟလာဟလံ အဂဒံ ဘဝတူ’တိ။ တေသံ သဟ သစ္စမနုဂီတေန ဝိသံ ဟလာဟလံ ခဏေန အဂဒံ ဘဝတိ, အပိ နု ခေါ, မဟာရာဇ, အတ္ထိ တသ္မိံ ဟလာဟလဝိသေ ဟေတု သန္နိစိတော ‘ယေန ဟေတုနာ ဝိသံ ဟလာဟလံ ခဏေန အဂဒံ ဘဝတီ’’’တိ? ‘‘န ဟိ, ဘန္တေ, သစ္စံ ယေဝ တတ္ထ ဟေတု ဘဝတိ ဝိသဿ ဟလာဟလဿ ခဏေန ပဋိဃာတာယာ’’တိ။ ‘‘ဧဝမေဝ ခေါ, မဟာရာဇ, ဝိနာ ပကတိဟေတုံ သစ္စံ ယေဝေတ္ထ ဝတ္ထု ဘဝတိ ဒိဗ္ဗစက္ခုဿ ဥပ္ပါဒါယာတိ။

‘‘စတုန္နမ္ပိ, မဟာရာဇ, အရိယသစ္စာနံ ပဋိဝေဓါယ နတ္ထညံ ဝတ္ထု, သစ္စံ ဝတ္ထုံ ကတွာ စတ္တာရိ အရိယသစ္စာနိ ပဋိဝိဇ္ဈန္တီတိ။ အတ္ထိ, မဟာရာဇ, စီနဝိသယေ စီနရာဇာ, သော မဟာသမုဒ္ဒေ ကီဠိတုကာမော [ဗလိံ ကာတုကာမော (သီ။ ဣ။)] စတုမာသေ စတုမာသေ သစ္စကိရိယံ ကတွာ သဟ ရထေန အန္တောမဟာသမုဒ္ဒေ ယောဇနံ ပဝိသတိ, တဿ ရထသီသဿ ပုရတော ပုရတော မဟာဝါရိက္ခန္ဓော ပဋိက္ကမတိ, နိက္ခန္တဿ ပုန ဩတ္ထရတိ, အပိ နု ခေါ, မဟာရာဇ, သော မဟာသမုဒ္ဒေါ သဒေဝမနုဿေနပိ လောကေန ပကတိကာယဗလေန သက္ကာ ပဋိက္ကမာပေတု’’န္တိ? ‘‘အတိပရိတ္တကေပိ, ဘန္တေ, တဠာကေ ဥဒကံ န သက္ကာ သဒေဝမနုဿေနပိ လောကေန ပကတိကာယဗလေန ပဋိက္ကမာပေတုံ, ကိံ ပန မဟာသမုဒ္ဒေ ဥဒက’’န္တိ? ‘‘ဣမိနာပိ, မဟာရာဇ, ကာရဏေန သစ္စဗလံ ဉာတဗ္ဗံ ‘နတ္ထိ တံ ဌာနံ, ယံ သစ္စေန န ပတ္တဗ္ဗ’န္တိ။

‘‘နဂရေ, မဟာရာဇ, ပါဋလိပုတ္တေ အသောကော ဓမ္မရာဇာ သနေဂမဇာနပဒအမစ္စဘဋဗလမဟာမတ္တေဟိ ပရိဝုတော ဂင်္ဂံ နဒိံ [ဂင်္ဂါနဒိံ (သီ။)] နဝသလိလသမ္ပုဏ္ဏံ သမတိတ္ထိကံ သမ္ဘရိတံ ပဉ္စယောဇနသတာယာမံ ယောဇနပုထုလံ သန္ဒမာနံ ဒိသွာ အမစ္စေ ဧဝမာဟ ‘အတ္ထိ ကောစိ, ဘဏေ, သမတ္ထော, ယော ဣမံ မဟာဂင်္ဂံ ပဋိသောတံ သန္ဒာပေတု’န္တိ။ အမစ္စာ အာဟံသု ‘ဒုက္ကရံ ဒေဝါ’တိ။

‘‘တသ္မိံ ယေဝ ဂင်္ဂါကူလေ ဌိတာ ဗန္ဓုမတီ နာမ ဂဏိကာ အဿောသိ ရညာ ကိရ ဧဝံ ဝုတ္တံ ‘သက္ကာ နု ခေါ ဣမံ မဟာဂင်္ဂံ ပဋိသောတံ သန္ဒာပေတု’န္တိ, သာ ဧဝမာဟ ‘အဟဉှိ နဂရေ ပါဋလိပုတ္တေ ဂဏိကာ ရူပူပဇီဝိနီ အန္တိမဇီဝိကာ, မမ တာဝ ရာဇာ သစ္စကိရိယံ ပဿတူ’တိ။ အထ သာ သစ္စကိရိယံ အကာသိ, သဟ တဿာ သစ္စကိရိယာယ ခဏေန သာ မဟာဂင်္ဂါ ဂဠဂဠာယန္တီ ပဋိသောတံ သန္ဒိတ္ထ မဟတော ဇနကာယဿ ပဿတော။

‘‘အထ ရာဇာ ဂင်္ဂါယ အာဝဋ္ဋဦမိဝေဂဇနိတံ ဟလာဟလသဒ္ဒံ သုတွာ ဝိမှိတော အစ္ဆရိယဗ္ဘုတဇာတော အမစ္စေ ဧဝမာဟ ‘ကိဿာယံ, ဘဏေ, မဟာဂင်္ဂါ ပဋိသောတံ သန္ဒတီ’တိ? ‘ဗန္ဓုမတီ, မဟာရာဇ, ဂဏိကာ တဝ ဝစနံ သုတွာ သစ္စကိရိယံ အကာသိ, တဿာ သစ္စကိရိယာယ မဟာဂင်္ဂါ ဥဒ္ဓံမုခါ သန္ဒတီ’တိ။

‘‘အထ သံဝိဂ္ဂဟဒယော ရာဇာ တုရိတတုရိတော သယံ ဂန္တွာ တံ ဂဏိကံ ပုစ္ဆိ ‘သစ္စံ ကိရ, ဇေ , တယာ သစ္စကိရိယာယ အယံ ဂင်္ဂါ ပဋိသောတံ သန္ဒာပိတာ’တိ? ‘အာမ ဒေဝါ’တိ။ ရာဇာ အာဟ ‘ကိံ တေ တတ္ထ ဗလံ အတ္ထိ, ကော ဝါ တေ ဝစနံ အာဒိယတိ အနုမ္မတ္တော, ကေန တွံ ဗလေန ဣမံ မဟာဂင်္ဂံ ပဋိသောတံ သန္ဒာပေသီ’တိ? သာ အာဟ ‘သစ္စဗလေနာဟံ, မဟာရာဇ, ဣမံ မဟာဂင်္ဂံ ပဋိသောတံ သန္ဒာပေသိ’န္တိ။ ရာဇာ အာဟ ‘ကိံ တေ သစ္စဗလံ အတ္ထိ စောရိယာ ဓုတ္တိယာ အသတိယာ ဆိန္နိကာယ ပါပိယာ ဘိန္နသီလာယ [ပါပိကာယ ဘိန္နသီမာယ (သီ။)] ဟိရိအတိက္ကန္တိကာယ အန္ဓဇနပလောဘိကာယာ’တိ။ ‘သစ္စံ, မဟာရာဇ, တာဒိသိကာ အဟံ, တာဒိသိကာယပိ မေ, မဟာရာဇ, သစ္စကိရိယာ အတ္ထိ, ယာယာဟံ ဣစ္ဆမာနာ သဒေဝကမ္ပိ လောကံ ပရိဝတ္တေယျ’န္တိ။ ရာဇာ အာဟ ‘ကတမာ ပန သာ ဟောတိ သစ္စကိရိယာ, ဣင်္ဃ မံ သာဝေဟီ’တိ။ ‘ယော မေ, မဟာရာဇ, ဓနံ ဒေတိ ခတ္တိယော ဝါ ဗြာဟ္မဏော ဝါ ဝေဿော ဝါ သုဒ္ဒေါ ဝါ အညော ဝါ ကောစိ, တေသံ သမကံ ယေဝ ဥပဋ္ဌဟာမိ, ‘‘ခတ္တိယော’’တိ ဝိသေသော နတ္ထိ, ‘‘သုဒ္ဒေါ’’တိ အတိမညနာ [အတိမညမာနော (က။)] နတ္ထိ, အနုနယပ္ပဋိဃဝိပ္ပမုတ္တာ ဓနဿာမိကံ ပရိစရာမိ, ဧသာ မေ ဒေဝ သစ္စကိရိယာ, ယာယာဟံ ဣမံ မဟာဂင်္ဂံ ပဋိသောတံ သန္ဒာပေသိ’န္တိ။

‘‘ဣတိပိ, မဟာရာဇ, သစ္စေ ဌိတာ န ကိဉ္စိ အတ္ထံ န ဝိန္ဒန္တိ။ ဒိန္နာနိ စ, မဟာရာဇ, သိဝိရာဇေန ယာစကဿ စက္ခူနိ , ဒိဗ္ဗစက္ခူနိ စ ဥပ္ပန္နာနိ, တဉ္စ သစ္စကိရိယာယ။ ယံ ပန သုတ္တေ ဝုတ္တံ ‘မံသစက္ခုသ္မိံ နဋ္ဌေ အဟေတုသ္မိံ အဝတ္ထုသ္မိံ နတ္ထိ ဒိဗ္ဗစက္ခုဿ ဥပ္ပါဒေါ’တိ။ တံ ဘာဝနာမယံ စက္ခုံ သန္ဓာယ ဝုတ္တံ, ဧဝမေတံ, မဟာရာဇ, ဓါရေဟီ’’တိ။ ‘‘သာဓု, ဘန္တေ နာဂသေန, သုနိဗ္ဗေဌိတော ပဉ္ဟော, သုနိဒ္ဒိဋ္ဌော နိဂ္ဂဟော, သုမဒ္ဒိတာ ပရဝါဒါ, ဧဝမေတံ တထာ သမ္ပဋိစ္ဆာမီ’’တိ။

သိဝိရာဇစက္ခုဒါနပဉ္ဟော ပဉ္စမော။

၆။ ဂဗ္ဘာဝက္ကန္တိပဉ္ဟော

၆။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘တိဏ္ဏံ ခေါ ပန, ဘိက္ခဝေ, သန္နိပါတာ ဂဗ္ဘဿ အဝက္ကန္တိ [ဂဗ္ဘဿာဝက္ကန္တိ (မ။ နိ။ ၁။၄၀၈)] ဟောတိ, ဣဓ မာတာပိတရော စ သန္နိပတိတာ ဟောန္တိ, မာတာ စ ဥတုနီ ဟောတိ, ဂန္ဓဗ္ဗော စ ပစ္စုပဋ္ဌိတော ဟောတိ, ဣမေသံ ခေါ, ဘိက္ခဝေ, တိဏ္ဏံ သန္နိပါတာ ဂဗ္ဘဿ အဝက္ကန္တိ ဟောတီ’တိ, အသေသဝစနမေတံ, နိဿေသဝစနမေတံ, နိပ္ပရိယာယဝစနမေတံ, အရဟဿဝစနမေတံ, သဒေဝမနုဿာနံ မဇ္ဈေ နိသီဒိတွာ ဘဏိတံ, အယဉ္စ ဒွိန္နံ သန္နိပါတာ ဂဗ္ဘဿ အဝက္ကန္တိ ဒိဿတိ, ဒုကူလေန တာပသေန ပါရိကာယ တာပသိယာ ဥတုနိကာလေ ဒက္ခိဏေန ဟတ္ထင်္ဂုဋ္ဌေန နာဘိ ပရာမဋ္ဌာ, တဿ တေန နာဘိပရာမသနေန သာမကုမာရော နိဗ္ဗတ္တော။ မာတင်္ဂေနာပိ ဣသိနာ ဗြာဟ္မဏကညာယ ဥတုနိကာလေ ဒက္ခိဏေန ဟတ္ထင်္ဂုဋ္ဌေန နာဘိ ပရာမဋ္ဌာ, တဿ တေန နာဘိပရာမသနေန မဏ္ဍဗ္ယော နာမ မာဏဝကော နိဗ္ဗတ္တောတိ။ ယဒိ, ဘန္တေ နာဂသေန, ဘဂဝတာ ဘဏိတံ ‘တိဏ္ဏံ ခေါ ပန, ဘိက္ခဝေ, သန္နိပါတာ ဂဗ္ဘဿ အဝက္ကန္တိ ဟောတီ’တိ။ တေန ဟိ သာမော စ ကုမာရော မဏ္ဍဗ္ယော စ မာဏဝကော ဥဘောပိ တေ နာဘိပရာမသနေန နိဗ္ဗတ္တာတိ ယံ ဝစနံ, တံ မိစ္ဆာ။ ယဒိ, ဘန္တေ, တထာဂတေန ဘဏိတံ ‘သာမော စ ကုမာရော မဏ္ဍဗ္ယော စ မာဏဝကော နာဘိပရာမသနေန နိဗ္ဗတ္တာ’’တိ, တေန ဟိ ‘တိဏ္ဏံ ခေါ ပန, ဘိက္ခဝေ, သန္နိပါတာ ဂဗ္ဘဿ အဝက္ကန္တိ ဟောတီ’တိ ယံ ဝစနံ, တမ္ပိ မိစ္ဆာ။ အယမ္ပိ ဥဘတော ကောဋိကော ပဉ္ဟော သုဂမ္ဘီရော သုနိပုဏော ဝိသယော ဗုဒ္ဓိမန္တာနံ, သော တဝါနုပ္ပတ္တော, ဆိန္ဒ ဝိမတိပထံ, ဓါရေဟိ ဉာဏဝရပ္ပဇ္ဇောတ’’န္တိ။

‘‘ဘာသိတမ္ပေတံ, မဟာရာဇ, ဘဂဝတာ ‘တိဏ္ဏံ ခေါ ပန, ဘိက္ခဝေ, သန္နိပါတာ ဂဗ္ဘဿ အဝက္ကန္တိ ဟောတိ, ဣဓ မာတာပိတရော စ သန္နိပတိတာ ဟောန္တိ, မာတာ စ ဥတုနီ ဟောတိ, ဂန္ဓဗ္ဗော စ ပစ္စုပဋ္ဌိတော ဟောတိ, ဧဝံ တိဏ္ဏံ သန္နိပါတာ ဂဗ္ဘဿ အဝက္ကန္တိ ဟောတီ’တိ။ ဘဏိတဉ္စ ‘သာမော စ ကုမာရော မဏ္ဍဗ္ယော စ မာဏဝကော နာဘိပရာမသနေန နိဗ္ဗတ္တာ’’တိ။ ‘‘တေန ဟိ, ဘန္တေ နာဂသေန, ယေန ကာရဏေန ပဉ္ဟော သုဝိနိစ္ဆိတော ဟောတိ, တေန ကာရဏေန မံ သညာပေဟီ’’တိ။

‘‘သုတပုဗ္ဗံ ပန တယာ, မဟာရာဇ, သံကိစ္စော စ ကုမာရော ဣသိသိင်္ဂေါ စ တာပသော ထေရော စ ကုမာရကဿပေါ ‘ဣမိနာ နာမ တေ နိဗ္ဗတ္တာ’’တိ? ‘‘အာမ, ဘန္တေ, သုယျတိ, အဗ္ဘုဂ္ဂတာ တေသံ ဇာတိ, ဒွေ မိဂဓေနုယော တာဝ ဥတုနိကာလေ ဒွိန္နံ တာပသာနံ ပဿာဝဋ္ဌာနံ အာဂန္တွာ သသမ္ဘဝံ ပဿာဝံ ပိဝိံသု, တေန ပဿာဝသမ္ဘဝေန သံကိစ္စော စ ကုမာရော ဣသိသိင်္ဂေါ စ တာပသော နိဗ္ဗတ္တာ။ ထေရဿ ဥဒါယိဿ ဘိက္ခုနုပဿယံ ဥပဂတဿ ရတ္တစိတ္တေန ဘိက္ခုနိယာ အင်္ဂဇာတံ ဥပနိဇ္ဈာယန္တဿ သမ္ဘဝံ ကာသာဝေ မုစ္စိ။ အထ ခေါ အာယသ္မာ ဥဒါယိ တံ ဘိက္ခုနိံ ဧတဒဝေါစ ‘ဂစ္ဆ ဘဂိနိ, ဥဒကံ အာဟရ အန္တရဝါသကံ ဓေါဝိဿာမီ’တိ။ ‘အာဟရယျ အဟမေဝ ဓေါဝိဿာမီ’တိ။ တတော သာ ဘိက္ခုနီ ဥတုနိသမယေ တံ သမ္ဘဝံ ဧကဒေသံ မုခေန အဂ္ဂဟေသိ, ဧကဒေသံ အင်္ဂဇာတေ ပက္ခိပိ, တေန ထေရော ကုမာရကဿပေါ နိဗ္ဗတ္တောတိ ဧတံ ဇနော အာဟာ’’တိ။

‘‘အပိ နု ခေါ တွံ, မဟာရာဇ, သဒ္ဒဟသိ တံ ဝစန’’န္တိ? ‘‘အာမ ဘန္တေ, ဗလဝံ တတ္ထ မယံ ကာရဏံ ဥပလဘာမ, ယေန မယံ ကာရဏေန သဒ္ဒဟာမ ‘ဣမိနာ ကာရဏေန နိဗ္ဗတ္တာ’’တိ။ ‘‘ကိံ ပနေတ္ထ, မဟာရာဇ, ကာရဏ’’န္တိ? ‘‘သုပရိကမ္မကတေ , ဘန္တေ, ကလလေ ဗီဇံ နိပတိတွာ ခိပ္ပံ သံဝိရုဟတီ’’တိ ။ ‘‘အာမ မဟာရာဇာ’’တိ။ ‘‘ဧဝမေဝ ခေါ, ဘန္တေ, သာ ဘိက္ခုနီ ဥတုနီ သမာနာ သဏ္ဌိတေ ကလလေ ရုဟိရေ ပစ္ဆိန္နဝေဂေ ဌိတာယ ဓါတုယာ တံ သမ္ဘဝံ ဂဟေတွာ တသ္မိံ ကလလေ ပက္ခိပိ, တေန တဿာ ဂဗ္ဘော သဏ္ဌာသိ, ဧဝံ တတ္ထ ကာရဏံ ပစ္စေမ တေသံ နိဗ္ဗတ္တိယာ’’တိ။ ‘‘ဧဝမေတံ, မဟာရာဇ, တထာ သမ္ပဋိစ္ဆာမိ, ယောနိပ္ပဝေသေန ဂဗ္ဘော သမ္ဘဝတီတိ။ သမ္ပဋိစ္ဆသိ ပန, တွံ မဟာရာဇ, ထေရဿ ကုမာရကဿပဿ ဂဗ္ဘာဝက္ကမန’’န္တိ? ‘‘အာမ ဘန္တေ’’တိ။ ‘‘သာဓု, မဟာရာဇ, ပစ္စာဂတောသိ မမ ဝိသယံ, ဧကဝိဓေနပိ ဂဗ္ဘာဝက္ကန္တိံ ကထယန္တော မမာနုဗလံ ဘဝိဿသိ, အထ ယာ ပန တာ ဒွေ မိဂဓေနုယော ပဿာဝံ ပိဝိတွာ ဂဗ္ဘံ ပဋိလဘိံသု, တာသံ တွံ သဒ္ဒဟသိ ဂဗ္ဘဿာဝက္ကမန’’န္တိ? ‘‘အာမ, ဘန္တေ, ယံ ကိဉ္စိ ဘုတ္တံ ဣတံ ခါယိတံ လေဟိတံ, သဗ္ဗံ တံ ကလလံ ဩသရတိ, ဌာနဂတံ ဝုဍ္ဎိမာပဇ္ဇတိ။ ယထာ, ဘန္တေ နာဂသေန, ယာ ကာစိ သရိတာ နာမ, သဗ္ဗာ တာ မဟာသမုဒ္ဒံ ဩသရန္တိ, ဌာနဂတာ ဝုဍ္ဎိမာပဇ္ဇန္တိ။ ဧဝမေဝ ခေါ, ဘန္တေ နာဂသေန, ယံ ကိဉ္စိ ဘုတ္တံ ဣတံ ခါယိတံ လေဟိတံ, သဗ္ဗံ တံ ကလလံ ဩသရတိ, ဌာနဂတံ ဝုဍ္ဎိမာပဇ္ဇတိ, တေနာဟံ ကာရဏေန သဒ္ဒဟာမိ မုခဂတေနပိ ဂဗ္ဘဿ အဝက္ကန္တိ ဟောတီ’’တိ။ ‘‘သာဓု, မဟာရာဇ, ဂါဠှတရံ ဥပဂတောသိ မမ ဝိသယံ, မုခပါနေနပိ ဒွယသန္နိပါတော ဘဝတိ။ သံကိစ္စဿ စ, မဟာရာဇ, ကုမာရဿ ဣသိသိင်္ဂဿ စ တာပသဿ ထေရဿ စ ကုမာရကဿပဿ ဂဗ္ဘာဝက္ကမနံ သမ္ပဋိစ္ဆသီ’’တိ? ‘‘အာမ, ဘန္တေ, သန္နိပါတော ဩသရတီ’’တိ။

‘‘သာမောပိ, မဟာရာဇ, ကုမာရော မဏ္ဍဗ္ယောပိ မာဏဝကော တီသု သန္နိပါတေသု အန္တောဂဓါ, ဧကရသာ ယေဝ ပုရိမေန, တတ္ထ ကာရဏံ ဝက္ခာမိ။ ဒုကူလော စ, မဟာရာဇ, တာပသော ပါရိကာ စ တာပသီ ဥဘောပိ တေ အရညဝါသာ အဟေသုံ ပဝိဝေကာဓိမုတ္တာ ဥတ္တမတ္ထဂဝေသကာ, တပတေဇေန ယာဝ ဗြဟ္မလောကံ သန္တာပေသုံ ။ တေသံ တဒါ သက္ကော ဒေဝါနမိန္ဒော သာယံ ပါတံ ဥပဋ္ဌာနံ အာဂစ္ဆတိ။ သော တေသံ ဂရုကတမေတ္တတာယ ဥပဓါရေန္တော အဒ္ဒသ အနာဂတမဒ္ဓါနေ ဒွိန္နမ္ပိ တေသံ စက္ခူနံ အန္တရဓါနံ, ဒိသွာ တေ ဧဝမာဟ ‘ဧကံ မေ, ဘောန္တော, ဝစနံ ကရောထ, သာဓု ဧကံ ပုတ္တံ ဇနေယျာထ, သော တုမှာကံ ဥပဋ္ဌာကော ဘဝိဿတိ အာလမ္ဗနော စာ’တိ။ ‘အလံ, ကောသိယ, မာ ဧဝံ ဘဏီ’တိ။ တေ တဿ တံ ဝစနံ န သမ္ပဋိစ္ဆိံသု။ အနုကမ္ပကော အတ္ထကာမော သက္ကော ဒေဝါနမိန္ဒော ဒုတိယမ္ပိ။ပေ။။ တတိယမ္ပိ တေ ဧဝမာဟ ‘ဧကံ မေ, ဘောန္တော, ဝစနံ ကရောထ, သာဓု ဧကံ ပုတ္တံ ဇနေယျာထ, သော တုမှာကံ ဥပဋ္ဌာကော ဘဝိဿတိ အာလမ္ဗနော စာ’တိ။ တတိယမ္ပိ တေ အာဟံသု ‘အလံ, ကောသိယ, မာ တွံ ခေါ အမှေ အနတ္ထေ နိယောဇေဟိ, ကဒါယံ ကာယော န ဘိဇ္ဇိဿတိ, ဘိဇ္ဇတု အယံ ကာယော ဘေဒနဓမ္မော, ဘိဇ္ဇန္တိယာပိ ဓရဏိယာ ပတန္တေပိ သေလသိခရေ ဖလန္တေပိ အာကာသေ ပတန္တေပိ စန္ဒိမသူရိယေ နေဝ မယံ လောကဓမ္မေဟိ မိဿယိဿာမ, မာ တွံ အမှာကံ သမ္မုခဘာဝံ ဥပဂစ္ဆ, ဥပဂတဿ တေ ဧသော ဝိဿာသော, အနတ္ထစရော တွံ မညေ’တိ။

တတော သက္ကော ဒေဝါနမိန္ဒော တေသံ မနံ အလဘမာနော ဂရုကတော ပဉ္ဇလိကော ပုန ယာစိ ‘ယဒိ မေ ဝစနံ န ဥဿဟထ ကာတုံ, ယဒါ တာပသီ ဥတုနီ ဟောတိ ပုပ္ဖဝတီ, တဒါ တွံ, ဘန္တေ, ဒက္ခိဏေန ဟတ္ထင်္ဂုဋ္ဌေန နာဘိံ ပရာမသေယျာသိ, တေန သာ ဂဗ္ဘံ လစ္ဆတိ, သန္နိပါတော ယေဝေသ ဂဗ္ဘာဝက္ကန္တိယာ’တိ။ ‘သက္ကောမဟံ, ကောသိယ, တံ ဝစနံ ကာတုံ, န တာဝတကေန အမှာကံ တပေါ ဘိဇ္ဇတိ, ဟောတူ’တိ သမ္ပဋိစ္ဆိံသု။ တာယ စ ပန ဝေလာယ ဒေဝဘဝနေ အတ္ထိ ဒေဝပုတ္တော ဥဿန္နကုသလမူလော ခီဏာယုကော အာယုက္ခယပ္ပတ္တော ယဒိစ္ဆကံ သမတ္ထော ဩက္ကမိတုံ အပိ စက္ကဝတ္တိကုလေပိ။ အထ သက္ကော ဒေဝါနမိန္ဒော တံ ဒေဝပုတ္တံ ဥပသင်္ကမိတွာ ဧဝမာဟ ‘ဧဟိ ခေါ, မာရိသ, သုပဘာတော တေ ဒိဝသော, အတ္ထသိဒ္ဓိ ဥပဂတာ, ယမဟံ တေ ဥပဋ္ဌာနမာဂမိံ, ရမဏီယေ တေ ဩကာသေ ဝါသော ဘဝိဿတိ, ပတိရူပေ ကုလေ ပဋိသန္ဓိ ဘဝိဿတိ, သုန္ဒရေဟိ မာတာပိတူဟိ ဝဍ္ဎေတဗ္ဗော, ဧဟိ မေ ဝစနံ ကရောဟီ’တိ ယာစိ။ ဒုတိယမ္ပိ။ပေ။။ တတိယမ္ပိ ယာစိ သိရသိ ပဉ္ဇလိကတော။

တတော သော ဒေဝပုတ္တော ဧဝမာဟ ‘ကတမံ တံ, မာရိသ, ကုလံ, ယံ တွံ အဘိက္ခဏံ ကိတ္တယသိ ပုနပ္ပုန’န္တိ။ ‘ဒုကူလော စ တာပသော ပါရိကာ စ တာပသီ’တိ။ သော တဿ ဝစနံ သုတွာ တုဋ္ဌော သမ္ပဋိစ္ဆိ ‘သာဓု, မာရိသ, ယော တဝ ဆန္ဒော, သော ဟောတု, အာကင်္ခမာနော အဟံ, မာရိသ, ပတ္ထိတေ ကုလေ ဥပ္ပဇ္ဇေယျံ, ကိမှိ ကုလေ ဥပ္ပဇ္ဇာမိ အဏ္ဍဇေ ဝါ ဇလာဗုဇေ ဝါ သံသေဒဇေ ဝါ ဩပပါတိကေ ဝါ’တိ? ‘ဇလာဗုဇာယ, မာရိသ, ယောနိယာ ဥပ္ပဇ္ဇာဟီ’တိ။ အထ သက္ကော ဒေဝါနမိန္ဒော ဥပ္ပတ္တိဒိဝသံ ဝိဂဏေတွာ ဒုကူလဿ တာပသဿ အာရောစေသိ ‘အသုကသ္မိံ နာမ ဒိဝသေ တာပသီ ဥတုနီ ဘဝိဿတိ ပုပ္ဖဝတီ, တဒါ တွံ, ဘန္တေ, ဒက္ခိဏေန ဟတ္ထင်္ဂုဋ္ဌေန နာဘိံ ပရာမသေယျာသီ’တိ။ တသ္မိံ, မဟာရာဇ, ဒိဝသေ တာပသီ စ ဥတုနီ ပုပ္ဖဝတီ အဟောသိ, ဒေဝပုတ္တော စ တတ္ထူပဂေါ ပစ္စုပဋ္ဌိတော အဟောသိ, တာပသော စ ဒက္ခိဏေန ဟတ္ထင်္ဂုဋ္ဌေန တာပသိယာ နာဘိံ ပရာမသိ, ဣတိ တေ တယော သန္နိပါတာ အဟေသုံ, နာဘိပရာမသနေန တာပသိယာ ရာဂေါ ဥဒပါဒိ, သော ပနဿာ ရာဂေါ နာဘိပရာမသနံ ပဋိစ္စ မာ တွံ သန္နိပါတံ အဇ္ဈာစာရမေဝ မညိ, ဦဟသနမ္ပိ [ဟသနမ္ပိ (က။)] သန္နိပါတော, ဥလ္လပနမ္ပိ သန္နိပါတော, ဥပနိဇ္ဈာယနမ္ပိ သန္နိပါတော, ပုဗ္ဗဘာဂဘာဝတော ရာဂဿ ဥပ္ပါဒါယ အာမသနေန သန္နိပါတော ဇာယတိ, သန္နိပါတာ ဩက္ကမနံ ဟောတီတိ။

‘‘အနဇ္ဈာစာရေပိ, မဟာရာဇ, ပရာမသနေန ဂဗ္ဘာဝက္ကန္တိ ဟောတိ။ ယထာ, မဟာရာဇ, အဂ္ဂိ ဇလမာနော အပရာမသနောပိ ဥပဂတဿ သီတံ ဗျပဟန္တိ, ဧဝမေဝ ခေါ, မဟာရာဇ, အနဇ္ဈာစာရေပိ ပရာမသနေန ဂဗ္ဘာဝက္ကန္တိ ဟောတိ။

‘‘စတုန္နံ, မဟာရာဇ, ဝသေန သတ္တာနံ ဂဗ္ဘာဝက္ကန္တိ ဟောတိ ကမ္မဝသေန ယောနိဝသေန ကုလဝသေန အာယာစနဝသေန, အပိ စ သဗ္ဗေပေတေ သတ္တာ ကမ္မသမ္ဘဝါ ကမ္မသမုဋ္ဌာနာ ။

‘‘ကထံ, မဟာရာဇ, ကမ္မဝသေန သတ္တာနံ ဂဗ္ဘာဝက္ကန္တိ ဟောတိ? ဥဿန္နကုသလမူလာ, မဟာရာဇ, သတ္တာ ယဒိစ္ဆကံ ဥပ္ပဇ္ဇန္တိ ခတ္တိယမဟာသာလကုလေ ဝါ ဗြာဟ္မဏမဟာသာလကုလေ ဝါ ဂဟပတိမဟာသာလကုလေ ဝါ ဒေဝေသု ဝါ အဏ္ဍဇာယ ဝါ ယောနိယာ ဇလာဗုဇာယ ဝါ ယောနိယာ သံသေဒဇာယ ဝါ ယောနိယာ ဩပပါတိကာယ ဝါ ယောနိယာ။ ယထာ, မဟာရာဇ, ပုရိသော အဍ္ဎော မဟဒ္ဓနော မဟာဘောဂေါ ပဟူတဇာတရူပရဇတော ပဟူတဝိတ္တူပကရဏော ပဟူတဓနဓညော ပဟူတဉာတိပက္ခော ဒါသိံ ဝါ ဒါသံ ဝါ ခေတ္တံ ဝါ ဝတ္ထုံ ဝါ ဂါမံ ဝါ နိဂမံ ဝါ ဇနပဒံ ဝါ ယံ ကိဉ္စိ မနသာ အဘိပတ္ထိတံ, ယဒိစ္ဆကံ ဒွိဂုဏတိဂုဏမ္ပိ ဓနံ ဒတွာ ကိဏာတိ, ဧဝမေဝ ခေါ, မဟာရာဇ, ဥဿန္နကုသလမူလာ သတ္တာ ယဒိစ္ဆကံ ဥပ္ပဇ္ဇန္တိ ခတ္တိယမဟာသာလကုလေ ဝါ ဗြာဟ္မဏမဟာသာလကုလေ ဝါ ဂဟပတိမဟာသာလကုလေ ဝါ ဒေဝေသု ဝါ အဏ္ဍဇာယ ဝါ ယောနိယာ ဇလာဗုဇာယ ဝါ ယောနိယာ သံသေဒဇယ ဝါ ယောနိယာ ဩပပါတိကာယ ဝါ ယောနိယာ။ ဧဝံ ကမ္မဝသေန သတ္တာနံ ဂဗ္ဘာဝက္ကန္တိ ဟောတိ။

‘‘ကထံ ယောနိဝသေန သတ္တာနံ ဂဗ္ဘာဝက္ကန္တိ ဟောတိ? ကုက္ကုဋာနံ, မဟာရာဇ, ဝါတေန ဂဗ္ဘာဝက္ကန္တိ ဟောတိ။ ဗလာကာနံ မေဃသဒ္ဒေန ဂဗ္ဘာဝက္ကန္တိ ဟောတိ။ သဗ္ဗေပိ ဒေဝါ အဂဗ္ဘသေယျကာ သတ္တာ ယေဝ, တေသံ နာနာဝဏ္ဏေန ဂဗ္ဘာဝက္ကန္တိ ဟောတိ။ ယထာ, မဟာရာဇ, မနုဿာ နာနာဝဏ္ဏေန မဟိယာ စရန္တိ, ကေစိ ပုရတော ပဋိစ္ဆာဒေန္တိ, ကေစိ ပစ္ဆတော ပဋိစ္ဆာဒေန္တိ, ကေစိ နဂ္ဂါ ဟောန္တိ, ကေစိ ဘဏ္ဍူ ဟောန္တိ သေတပဋဓရာ, ကေစိ မောဠိဗဒ္ဓါ ဟောန္တိ, ကေစိ ဘဏ္ဍူ ကာသာဝဝသနာ ဟောန္တိ, ကေစိ ကာသာဝဝသနာ မောဠိဗဒ္ဓါ ဟောန္တိ, ကေစိ ဇဋိနော ဝါကစီရဓရာ [ဝါကစီရာ (က။)] ဟောန္တိ, ကေစိ စမ္မဝသနာ ဟောန္တိ, ကေစိ ရသ္မိယော နိဝါသေန္တိ, သဗ္ဗေပေတေ မနုဿာ နာနာဝဏ္ဏေန မဟိယာ စရန္တိ, ဧဝမေဝ ခေါ, မဟာရာဇ, သတ္တာ ယေဝ တေ သဗ္ဗေ, တေသံ နာနာဝဏ္ဏေန ဂဗ္ဘာဝက္ကန္တိ ဟောတိ။ ဧဝံ ယောနိဝသေန သတ္တာနံ ဂဗ္ဘာဝက္ကန္တိ ဟောတိ။

‘‘ကထံ ကုလဝသေန သတ္တာနံ ဂဗ္ဘာဝက္ကန္တိ ဟောတိ? ကုလံ နာမ, မဟာရာဇ, စတ္တာရိ ကုလာနိ အဏ္ဍဇံ ဇလာဗုဇံ သံသေဒဇံ ဩပပါတိကံ။ ယဒိ တတ္ထ ဂန္ဓဗ္ဗော ယတော ကုတောစိ အာဂန္တွာ အဏ္ဍဇေ ကုလေ ဥပ္ပဇ္ဇတိ, သော တတ္ထ အဏ္ဍဇော ဟောတိ။ပေ။။ ဇလာဗုဇေ ကုလေ။ပေ။။ သံသေဒဇေ ကုလေ။ပေ။။ ဩပပါတိကေ ကုလေ ဥပ္ပဇ္ဇတိ, သော တတ္ထ ဩပပါတိကော ဟောတိ။ တေသု တေသု ကုလေသု တာဒိသာ ယေဝ သတ္တာ သမ္ဘဝန္တိ။ ယထာ, မဟာရာဇ, ဟိမဝတိ နေရုပဗ္ဗတံ ယေ ကေစိ မိဂပက္ခိနော ဥပေန္တိ, သဗ္ဗေ တေ သကဝဏ္ဏံ ဝိဇဟိတွာ သုဝဏ္ဏဝဏ္ဏာ ဟောန္တိ, ဧဝမေဝ ခေါ, မဟာရာဇ, ယော ကောစိ ဂန္ဓဗ္ဗော ယတော ကုတောစိ အာဂန္တွာ အဏ္ဍဇံ ယောနိံ ဥပဂန္တွာ သဘာဝဝဏ္ဏံ ဝိဇဟိတွာ အဏ္ဍဇော ဟောတိ။ပေ။။ ဇလာဗုဇံ။ပေ။။ သံသေဒဇံ။ပေ။။ ဩပပါတိကံ ယောနိံ ဥပဂန္တွာ သဘာဝဝဏ္ဏံ ဝိဇဟိတွာ ဩပပါတိကော ဟောတိ, ဧဝံ ကုလဝသေန သတ္တာနံ ဂဗ္ဘာဝက္ကန္တိ ဟောတိ။

‘‘ကထံ အာယာစနဝသေန သတ္တာနံ ဂဗ္ဘာဝက္ကန္တိ ဟောတိ? ဣဓ, မဟာရာဇ, ကုလံ ဟောတိ အပုတ္တကံ ဗဟုသာပတေယျံ သဒ္ဓံ ပသန္နံ သီလဝန္တံ ကလျာဏဓမ္မံ တပနိဿိတံ, ဒေဝပုတ္တော စ ဥဿန္နကုသလမူလော စဝနဓမ္မော ဟောတိ။ အထ သက္ကော ဒေဝါနမိန္ဒော တဿ ကုလဿ အနုကမ္ပာယ တံ ဒေဝပုတ္တံ အာယာစတိ ‘ပဏိဓေဟိ, မာရိသ, အသုကဿ ကုလဿ မဟေသိယာ ကုစ္ဆိ’န္တိ။ သော တဿ အာယာစနဟေတု တံ ကုလံ ပဏိဓေတိ။ ယထာ, မဟာရာဇ, မနုဿာ ပုညကာမာ သမဏံ မနောဘာဝနီယံ အာယာစိတွာ ဂေဟံ ဥပနေန္တိ, အယံ ဥပဂန္တွာ သဗ္ဗဿ ကုလဿ သုခါဝဟော ဘဝိဿတီတိ။ ဧဝမေဝ ခေါ, မဟာရာဇ, သက္ကော ဒေဝါနမိန္ဒော တံ ဒေဝပုတ္တံ အာယာစိတွာ တံ ကုလံ ဥပနေတိ။ ဧဝံ အာယာစနဝသေန သတ္တာနံ ဂဗ္ဘာဝက္ကန္တိ ဟောတိ။

‘‘သာမော, မဟာရာဇ, ကုမာရော သက္ကေန ဒေဝါနမိန္ဒေန အာယာစိတော ပါရိကာယ တာပသိယာ ကုစ္ဆိံ ဩက္ကန္တော။ သာမော, မဟာရာဇ, ကုမာရော ကတပုညော, မာတာပိတရော သီလဝန္တော ကလျာဏဓမ္မာ, အာယာစကော သက္ကော, တိဏ္ဏံ စေတောပဏိဓိယာ သာမော ကုမာရော နိဗ္ဗတ္တော။ ဣဓ, မဟာရာဇ, နယကုသလော ပုရိသော သုကဋ္ဌေ အနူပခေတ္တေ ဗီဇံ ရောပေယျ, အပိ နု တဿ ဗီဇဿ အန္တရာယံ ဝိဝဇ္ဇေန္တဿ ဝုဍ္ဎိယာ ကောစိ အန္တရာယော ဘဝေယျာ’’တိ ? ‘‘န ဟိ, ဘန္တေ, နိရုပဃာတံ ဗီဇံ ခိပ္ပံ သံဝိရုဟေယျာ’’တိ။ ‘‘ဧဝမေဝ ခေါ, မဟာရာဇ, သာမော ကုမာရော မုတ္တော ဥပ္ပန္နန္တရာယေဟိ တိဏ္ဏံ စေတောပဏိဓိယာ နိဗ္ဗတ္တော။

‘‘အပိ နု ခေါ, မဟာရာဇ, သုတပုဗ္ဗံ တယာ ဣသီနံ မနောပဒေါသေန ဣဒ္ဓေါ ဖီတော မဟာဇနပဒေါ သဇနော သမုစ္ဆိန္နော’’တိ? ‘‘အာမ, ဘန္တေ, သုယျတိ။ မဟိယာ ဒဏ္ဍကာရညံ [ဒဏ္ဍကီရညံ (မ။ နိ။ ၂။၆၅)] မဇ္ဈာရညံ ကာလိင်္ဂါရညံ မာတင်္ဂါရညံ, သဗ္ဗံ တံ အရညံ အရညဘူတံ, သဗ္ဗေပေတေ ဇနပဒါ ဣသီနံ မနောပဒေါသေန ခယံ ဂတာ’’တိ။ ‘‘ယဒိ , မဟာရာဇ, တေသံ မနောပဒေါသေန သုသမိဒ္ဓါ ဇနပဒါ ဥစ္ဆိဇ္ဇန္တိ, အပိ နု ခေါ တေသံ မနောပသာဒေန ကိဉ္စိ နိဗ္ဗတ္တေယျာ’’တိ? ‘‘အာမ ဘန္တေ’’တိ။ ‘‘တေန ဟိ, မဟာရာဇ, သာမော ကုမာရော တိဏ္ဏံ ဗလဝန္တာနံ စေတောပသာဒေန နိဗ္ဗတ္တော ဣသိနိမ္မိတော ဒေဝနိမ္မိတော ပုညနိမ္မိတောတိ။ ဧဝမေတံ, မဟာရာဇ, ဓါရေဟိ။

‘‘တယောမေ, မဟာရာဇ, ဒေဝပုတ္တာ သက္ကေန ဒေဝါနမိန္ဒေန အာယာစိတာ ကုလံ ဥပ္ပန္နာ။ ကတမေ တယော? သာမော ကုမာရော မဟာပနာဒေါ ကုသရာဇာ, တယောပေတေ ဗောဓိသတ္တာ’’တိ။ ‘‘သုနိဒ္ဒိဋ္ဌာ, ဘန္တေ နာဂသေန, ဂဗ္ဘာဝက္ကန္တိ, သုကထိတံ ကာရဏံ, အန္ဓကာရော အာလောကော ကတော, ဇဋာ ဝိဇဋိတာ, နိစ္ဆုဒ္ဓါ ပရဝါဒါ, ဧဝမေတံ တထာ သမ္ပဋိစ္ဆာမီ’’တိ။

ဂဗ္ဘာဝက္ကန္တိပဉ္ဟော ဆဋ္ဌော။

၇။ သဒ္ဓမ္မန္တရဓါနပဉ္ဟော

၇။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘ပဉ္စေဝ ဒါနိ, အာနန္ဒ, ဝဿသတာနိ [ဝဿသဟဿာနိ (သီ။) ပဿ အ။ နိ။ ၈။၅၁] သဒ္ဓမ္မော ဌဿတီ’တိ။ ပုန စ ပရိနိဗ္ဗာနသမယေ သုဘဒ္ဒေန ပရိဗ္ဗာဇကေန ပဉ္ဟံ ပုဋ္ဌေန ဘဂဝတာ ဘဏိတံ ‘ဣမေ စ, သုဘဒ္ဒ [ဒီ။ နိ။ ၂။၂၁၄ ပဿိတဗ္ဗံ], ဘိက္ခူ သမ္မာ ဝိဟရေယျုံ, အသုညော လောကော အရဟန္တေဟိ အဿာ’တိ, အသေသဝစနမေတံ, နိဿေသဝစနမေတံ, နိပ္ပရိယာယဝစနမေတံ။ ယဒိ, ဘန္တေ နာဂသေန, တထာဂတေန ဘဏိတံ ‘ပဉ္စေဝ ဒါနိ, အာနန္ဒ, ဝဿသတာနိ သဒ္ဓမ္မော ဌဿတီ’တိ, တေန ဟိ ‘အသုညော လောကော အရဟန္တေဟိ အဿာ’တိ ယံ ဝစနံ, တံ မိစ္ဆာ။ ယဒိ တထာဂတေန ဘဏိတံ ‘အသုညော လောကော အရဟန္တေဟိ အဿာ’တိ, တေန ဟိ ‘ပဉ္စေဝ ဒါနိ, အာနန္ဒ, ဝဿသတာနိ သဒ္ဓမ္မော ဌဿတီ’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော ဂဟနတောပိ ဂဟနတရော ဗလဝတောပိ ဗလဝတရော ဂဏ္ဌိတောပိ ဂဏ္ဌိတရော, သော တဝါနုပ္ပတ္တော, တတ္ထ တေ ဉာဏဗလဝိပ္ဖာရံ ဒဿေဟိ မကရော ဝိယ သာဂရဗ္ဘန္တရဂတော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘ပဉ္စေဝ ဒါနိ, အာနန္ဒ, ဝဿသတာနိ သဒ္ဓမ္မော ဌဿတီ’တိ။ ပရိနိဗ္ဗာနသမယေ စ သုဘဒ္ဒဿ ပရိဗ္ဗာဇကဿ ဘဏိတံ ‘ဣမေ စ, သုဘဒ္ဒ, ဘိက္ခူ သမ္မာ ဝိဟရေယျုံ, အသုညော လောကော အရဟန္တေဟိ အဿာ’တိ။ တဉ္စ ပန, မဟာရာဇ, ဘဂဝတော ဝစနံ နာနတ္ထဉ္စေဝ ဟောတိ နာနာဗျဉ္ဇနဉ္စ, အယံ သာသနပရိစ္ဆေဒေါ, အယံ ပဋိပတ္တိ ပရိဒီပနာတိ ဒူရံ ဝိဝဇ္ဇိတာ တေ ဥဘော အညမညံ။ ယထာ, မဟာရာဇ, နဘံ ပထဝိတော ဒူရံ ဝိဝဇ္ဇိတံ , နိရယံ သဂ္ဂတော ဒူရံ ဝိဝဇ္ဇိတံ, ကုသလံ အကုသလတော ဒူရံ ဝိဝဇ္ဇိတံ, သုခံ ဒုက္ခတော ဒူရံ ဝိဝဇ္ဇိတံ။ ဧဝမေဝ ခေါ, မဟာရာဇ, တေ ဥဘော အညမညံ ဒူရံ ဝိဝဇ္ဇိတာ။

‘‘အပိ စ, မဟာရာဇ, မာ တေ ပုစ္ဆာ မောဃာ အဿ [အဿု (သီ။ သျာ။)], ရသတော တေ သံသန္ဒိတွာ ကထယိဿာမိ ‘ပဉ္စေဝ ဒါနိ, အာနန္ဒ, ဝဿသတာနိ သဒ္ဓမ္မော ဌဿတီ’တိ ယံ ဘဂဝါ အာဟ, တံ ခယံ ပရိဒီပယန္တော သေသကံ ပရိစ္ဆိန္ဒိ, ဝဿသဟဿံ, အာနန္ဒ, သဒ္ဓမ္မော တိဋ္ဌေယျ, သစေ ဘိက္ခုနိယော န ပဗ္ဗာဇေယျုံ။ ပဉ္စေဝ ဒါနိ, အာနန္ဒ, ဝဿသတာနိ သဒ္ဓမ္မော ဌဿတီတိ။ အပိ နု ခေါ, မဟာရာဇ, ဘဂဝါ ဧဝံ ဝဒန္တော သဒ္ဓမ္မဿ အန္တရဓါနံ ဝါ ဝဒေတိ အဘိသမယံ ဝါ ပဋိက္ကောသတီ’’တိ? ‘‘န ဟိ ဘန္တေ’’တိ။ ‘‘နဋ္ဌံ, မဟာရာဇ, ပရိကိတ္တယန္တော သေသကံ ပရိဒီပယန္တော ပရိစ္ဆိန္ဒိ။ ယထာ, မဟာရာဇ, ပုရိသော နဋ္ဌာယိကော သဗ္ဗသေသကံ ဂဟေတွာ ဇနဿ ပရိဒီပေယျ ‘ဧတ္တကံ မေ ဘဏ္ဍံ နဋ္ဌံ, ဣဒံ သေသက’န္တိ ။ ဧဝမေဝ ခေါ, မဟာရာဇ, ဘဂဝါ နဋ္ဌံ ပရိဒီပယန္တော သေသကံ ဒေဝမနုဿာနံ ကထေသိ ‘ပဉ္စေဝ ဒါနိ, အာနန္ဒ, ဝဿသတာနိ သဒ္ဓမ္မော ဌဿတီ’တိ။ ယံ ပန, မဟာရာဇ, ဘဂဝတာ ဘဏိတံ ‘ပဉ္စေဝ ဒါနိ, အာနန္ဒ, ဝဿသတာနိ သဒ္ဓမ္မော ဌဿတီ’တိ, သာသနပရိစ္ဆေဒေါ ဧသော။

‘‘ယံ ပန ပရိနိဗ္ဗာနသမယေ သုဘဒ္ဒဿ ပရိဗ္ဗာဇကဿ သမဏေ ပရိကိတ္တယန္တော အာဟ ‘ဣမေ စ, သုဘဒ္ဒ, ဘိက္ခူ သမ္မာ ဝိဟရေယျုံ, အသုညော လောကော အရဟန္တေဟိ အဿာ’တိ, ပဋိပတ္တိပရိဒီပနာ ဧသာ, တွံ ပန တံ ပရိစ္ဆေဒဉ္စ ပရိဒီပနဉ္စ ဧကရသံ ကရောသိ။ ယဒိ ပန တေ ဆန္ဒော, ဧကရသံ ကတွာ ကထယိဿာမိ, သာဓုကံ သုဏောဟိ မနသိကရောဟိ အဝိက္ခိတ္တမာနသော [အဝိစလမာနသော (သီ။) အဝိမာနသော (ဣ။ က။)]။

‘‘ဣဓ, မဟာရာဇ, တဠာကော ဘဝေယျ နဝသလိလသမ္ပုဏ္ဏော သမ္မုခမုတ္တရိယမာနော ပရိစ္ဆိန္နော ပရိဝဋုမကတော, အပရိယာဒိဏ္ဏေ ယေဝ တသ္မိံ တဠာကေ ဥဒကူပရိ မဟာမေဃော အပရာပရံ အနုပ္ပဗန္ဓော အဘိဝဿေယျ, အပိ နု ခေါ, မဟာရာဇ, တသ္မိံ တဠာကေ ဥဒကံ ပရိက္ခယံ ပရိယာဒါနံ ဂစ္ဆေယျာ’’တိ? ‘‘န ဟိ ဘန္တေ’’တိ။ ‘‘ကေန ကာရဏေန မဟာရာဇာ’’တိ? ‘‘မေဃဿ, ဘန္တေ, အနုပ္ပဗန္ဓတာယာ’’တိ။ ‘‘ဧဝမေဝ ခေါ, မဟာရာဇ, ဇိနသာသနဝရသဒ္ဓမ္မတဠာကော အာစာရသီလဂုဏဝတ္တပဋိပတ္တိဝိမလနဝသလိလသမ္ပုဏ္ဏော ဥတ္တရိယမာနော ဘဝဂ္ဂမဘိဘဝိတွာ ဌိတော။ ယဒိ တတ္ထ ဗုဒ္ဓပုတ္တာ အာစာရသီလဂုဏဝတ္တပဋိပတ္တိမေဃဝဿံ အပရာပရံ အနုပ္ပဗန္ဓာပေယျုံ အဘိဝဿာပေယျုံ။ ဧဝမိဒံ ဇိနသာသနဝရသဒ္ဓမ္မတဠာကော စိရံ ဒီဃမဒ္ဓါနံ တိဋ္ဌေယျ, အရဟန္တေဟိ လောကော အသုညော ဘဝေယျ, ဣမမတ္ထံ ဘဂဝတာ သန္ဓာယ ဘာသိတံ ‘ဣမေ စ, သုဘဒ္ဒ, ဘိက္ခူ သမ္မာ ဝိဟရေယျုံ, အသုညော လောကော အရဟန္တေဟိ အဿာ’တိ။

‘‘ဣဓ ပန, မဟာရာဇ, မဟတိ မဟာအဂ္ဂိက္ခန္ဓေ ဇလမာနေ အပရာပရံ သုက္ခတိဏကဋ္ဌဂေါမယာနိ ဥပသံဟရေယျုံ, အပိ နု ခေါ သော, မဟာရာဇ, အဂ္ဂိက္ခန္ဓော နိဗ္ဗာယေယျာ’’တိ ? ‘‘န ဟိ, ဘန္တေ, ဘိယျော ဘိယျော သော အဂ္ဂိက္ခန္ဓော ဇလေယျ, ဘိယျော ဘိယျော ပဘာသေယျာ’’တိ။ ‘‘ဧဝမေဝ ခေါ, မဟာရာဇ, ဒသသဟဿိယာ [ဒသသဟဿိမှိ (ဗဟူသု)] လောကဓါတုယာ ဇိနသာသနဝရမ္ပိ အာစာရသီလဂုဏဝတ္တပဋိပတ္တိယာ ဇလတိ ပဘာသတိ။ ယဒိ ပန, မဟာရာဇ, တဒုတ္တရိံ ဗုဒ္ဓပုတ္တာ ပဉ္စဟိ ပဓါနိယင်္ဂေဟိ သမန္နာဂတာ သတတမပ္ပမတ္တာ ပဒဟေယျုံ, တီသု သိက္ခာသု ဆန္ဒဇာတာ သိက္ခေယျုံ, စာရိတ္တဉ္စ သီလံ သမတ္တံ ပရိပူရေယျုံ, ဧဝမိဒံ ဇိနသာသနဝရံ ဘိယျော ဘိယျော စိရံ ဒီဃမဒ္ဓါနံ တိဋ္ဌေယျ, အသုညော လောကော အရဟန္တေဟိ အဿာတိ ဣမမတ္ထံ ဘဂဝတာ သန္ဓာယ ဘာသိတံ ‘ဣမေ စ, သုဘဒ္ဒ, ဘိက္ခူ သမ္မာ ဝိဟရေယျုံ, အသုညော လောကော အရဟန္တေဟိ အဿာ’တိ။

‘‘ဣဓ ပန, မဟာရာဇ, သိနိဒ္ဓသမသုမဇ္ဇိတသပ္ပဘာသဝိမလာဒါသံ [သပ္ပဘံ သုဝိမလာဒါသံ (သီ။)] သဏှသုခုမဂေရုကစုဏ္ဏေန အပရာပရံ မဇ္ဇေယျုံ, အပိ နု ခေါ, မဟာရာဇ, တသ္မိံ အာဒါသေ မလကဒ္ဒမရဇောဇလ္လံ ဇာယေယျာ’’တိ? ‘‘န ဟိ, ဘန္တေ, အညဒတ္ထု ဝိမလတရံ ယေဝ ဘဝေယျာ’’တိ။ ‘‘ဧဝမေဝ ခေါ, မဟာရာဇ, ဇိနသာသနဝရံ ပကတိနိမ္မလံ ဗျပဂတကိလေသမလရဇောဇလ္လံ, ယဒိ တံ ဗုဒ္ဓပုတ္တာ အာစာရသီလဂုဏဝတ္တပဋိပတ္တိသလ္လေခဓုတဂုဏေန ဇိနသာသနဝရံ သလ္လက္ခေယျုံ [သလ္လိက္ခေယျုံ (သီ။ ဣ။)], ဧဝမိဒံ ဇိနသာသနဝရံ စိရံ ဒီဃမဒ္ဓါနံ တိဋ္ဌေယျ, အသုညော စ လောကော အရဟန္တေဟိ အဿာတိ ဣမမတ္ထံ ဘဂဝတာ သန္ဓာယ ဘာသိတံ ‘ဣမေ စ, သုဘဒ္ဒ, ဘိက္ခူ သမ္မာ ဝိဟရေယျုံ, အသုညော လောကော အရဟန္တေဟိ အဿာ’တိ။ ပဋိပတ္တိမူလကံ, မဟာရာဇ, သတ္ထုသာသနံ ပဋိပတ္တိကာရဏံ ပဋိပတ္တိယာ အနန္တရဟိတာယ တိဋ္ဌတီ’’တိ။

‘‘ဘန္တေ နာဂသေန, ‘သဒ္ဓမ္မန္တရဓါန’န္တိ ယံ ဝဒေသိ, ကတမံ တံ သဒ္ဓမ္မန္တရဓါန’’န္တိ? ‘‘တီဏိမာနိ, မဟာရာဇ, သာသနန္တရဓါနာနိ။ ကတမာနိ တီဏိ? အဓိဂမန္တရဓါနံ ပဋိပတ္တန္တရဓါနံ လိင်္ဂန္တရဓါနံ , အဓိဂမေ, မဟာရာဇ, အန္တရဟိတေ သုပ္ပဋိပန္နဿာပိ ဓမ္မာဘိသမယော န ဟောတိ, ပဋိပတ္တိယာ အန္တရဟိတာယ သိက္ခာပဒပညတ္တိ အန္တရဓါယတိ, လိင်္ဂံယေဝ တိဋ္ဌတိ, လိင်္ဂေ အန္တရဟိတေ ပဝေဏုပစ္ဆေဒေါ ဟောတိ, ဣမာနိ ခေါ, မဟာရာဇ, တီဏိ အန္တရဓါနာနီ’’တိ။

‘‘သုဝိညာပိတော, ဘန္တေ နာဂသေန, ပဉ္ဟော, ဂမ္ဘီရော ဥတ္တာနီကတော, ဂဏ္ဌိ ဘိန္နော, နဋ္ဌာ ပရဝါဒါ ဘဂ္ဂါ နိပ္ပဘာ ကတာ, တွံ ဂဏိဝရဝသဘမာသဇ္ဇာတိ။

သဒ္ဓမ္မန္တရဓါနပဉ္ဟော သတ္တမော။

၈။ အကုသလစ္ဆေဒနပဉ္ဟော

၈။ ‘‘ဘန္တေ နာဂသေန, တထာဂတော သဗ္ဗံ အကုသလံ ဈာပေတွာ သဗ္ဗညုတံ ပတ္တော, ဥဒါဟု သာဝသေသေ အကုသလေ သဗ္ဗညုတံ ပတ္တော’’တိ? ‘‘သဗ္ဗံ, မဟာရာဇ, အကုသလံ ဈာပေတွာ ဘဂဝါ သဗ္ဗညုတံ ပတ္တော, နတ္ထိ ဘဂဝတော သေသေကံ အကုသလ’’န္တိ။

‘‘ကိံ ပန, ဘန္တေ, ဒုက္ခာ ဝေဒနာ တထာဂတဿ ကာယေ ဥပ္ပန္နပုဗ္ဗာ’’တိ? ‘‘အာမ, မဟာရာဇ, ရာဇဂဟေ ဘဂဝတော ပါဒေါ သကလိကာယ [သက္ခလိကာယ (သျာ။ က။)] ခတော, လောဟိတပက္ခန္ဒိကာဗာဓေါ ဥပ္ပန္နော, ကာယေ အဘိသန္နေ ဇီဝကေန ဝိရေကော ကာရိတော, ဝါတာဗာဓေ ဥပ္ပန္နေ ဥပဋ္ဌာကေန ထေရေန ဥဏှောဒကံ ပရိယိဋ္ဌ’’န္တိ။

‘‘ယဒိ , ဘန္တေ နာဂသေန, တထာဂတော သဗ္ဗံ အကုသလံ ဈာပေတွာ သဗ္ဗညုတံ ပတ္တော, တေန ဟိ ဘဂဝတော ပါဒေါ သကလိကာယ ခတော, လောဟိတပက္ခန္ဒိကာ စ အာဗာဓေါ ဥပ္ပန္နောတိ ယံ ဝစနံ, တံ မိစ္ဆာ။ ယဒိ တထာဂတဿ ပါဒေါ သကလိကာယ ခတော, လောဟိတပက္ခန္ဒိကာ စ အာဗာဓေါ ဥပ္ပန္နော, တေန ဟိ တထာဂတော သဗ္ဗံ အကုသလံ ဈာပေတွာ သဗ္ဗညုတံ ပတ္တောတိ တမ္ပိ ဝစနံ မိစ္ဆာ။ နတ္ထိ, ဘန္တေ, ဝိနာ ကမ္မေန ဝေဒယိတံ, သဗ္ဗံ တံ ဝေဒယိတံ ကမ္မမူလကံ, တံ ကမ္မေနေဝ ဝေဒယတိ, အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ [နိဗ္ဗာယိတဗ္ဗောတိ (က။)]။

‘‘န ဟိ, မဟာရာဇ, သဗ္ဗံ တံ ဝေဒယိတံ ကမ္မမူလကံ။ အဋ္ဌဟိ, မဟာရာဇ, ကာရဏေဟိ ဝေဒယိတာနိ ဥပ္ပဇ္ဇန္တိ, ယေဟိ ကာရဏေဟိ ပုထူ သတ္တာ ဝေဒနာ ဝေဒိယန္တိ။ ကတမေဟိ အဋ္ဌဟိ? ဝါတသမုဋ္ဌာနာနိပိ ခေါ, မဟာရာဇ, ဣဓေကစ္စာနိ ဝေဒယိတာနိ ဥပ္ပဇ္ဇန္တိ, ပိတ္တသမုဋ္ဌာနာနိပိ ခေါ, မဟာရာဇ။ပေ။။ သေမှသမုဋ္ဌာနာနိပိ ခေါ, မဟာရာဇ။ပေ။။ သန္နိပါတိကာနိပိ ခေါ, မဟာရာဇ။ပေ။။ ဥတုပရိဏာမဇာနိပိ ခေါ, မဟာရာဇ။ပေ။။ ဝိသမပရိဟာရဇာနိပိ ခေါ, မဟာရာဇ။ပေ။။ ဩပက္ကမိကာနိပိ ခေါ, မဟာရာဇ။ပေ။။ ကမ္မဝိပါကဇာနိပိ ခေါ, မဟာရာဇ, ဣဓေကစ္စာနိ ဝေဒယိတာနိ ဥပ္ပဇ္ဇန္တိ။ ဣမေဟိ ခေါ, မဟာရာဇ, အဋ္ဌဟိ ကာရဏေဟိ ပုထူ သတ္တာ ဝေဒနာ ဝေဒယန္တိ။ တတ္ထ ယေ တေ ပုဂ္ဂလာ ‘သတ္တေ ကမ္မံ ဝိဗာဓတီ’တိ ဝဒေယျုံ, တေ ဣမေ ပုဂ္ဂလာ သတ္တကာရဏံ ပဋိဗာဟန္တိ။ တေသံ တံ ဝစနံ မိစ္ဆာ’’တိ။ ‘‘ဘန္တေ နာဂသေန, ယဉ္စ ဝါတိကံ ယဉ္စ ပိတ္တိကံ ယဉ္စ သေမှိကံ ယဉ္စ သန္နိပါတိကံ ယဉ္စ ဥတုပရိဏာမဇံ ယဉ္စ ဝိသမပရိဟာရဇံ ယဉ္စ ဩပက္ကမိကံ, သဗ္ဗေတေ ကမ္မသမုဋ္ဌာနာ ယေဝ, ကမ္မေနေဝ တေ သဗ္ဗေ သမ္ဘဝန္တီ’’တိ။

‘‘ယဒိ, မဟာရာဇ, တေပိ သဗ္ဗေ ကမ္မသမုဋ္ဌာနာဝ အာဗာဓါ ဘဝေယျုံ, န တေသံ ကောဋ္ဌာသတော လက္ခဏာနိ ဘဝေယျုံ။ ဝါတော ခေါ, မဟာရာဇ, ကုပ္ပမာနော ဒသဝိဓေန ကုပ္ပတိ သီတေန ဥဏှေန ဇိဃစ္ဆာယ ဝိပါသာယ အတိဘုတ္တေန ဌာနေန ပဓါနေန အာဓါဝနေန ဥပက္ကမေန ကမ္မဝိပါကေန။ တတြ ယေ တေ နဝ ဝိဓါ, န တေ အတီတေ, န အနာဂတေ, ဝတ္တမာနကေ ဘဝေ ဥပ္ပဇ္ဇန္တိ, တသ္မာ န ဝတ္တဗ္ဗာ ‘ကမ္မသမ္ဘဝါ သဗ္ဗာ ဝေဒနာ’တိ။ ပိတ္တံ, မဟာရာဇ, ကုပ္ပမာနံ တိဝိဓေန ကုပ္ပတိ သီတေန ဥဏှေန ဝိသမဘောဇနေန။ သေမှံ, မဟာရာဇ, ကုပ္ပမာနံ တိဝိဓေန ကုပ္ပတိ သီတေန ဥဏှေန အန္နပါနေန။ ယော စ, မဟာရာဇ, ဝါတော ယဉ္စ ပိတ္တံ ယဉ္စ သေမှံ, တေဟိ တေဟိ ကောပေဟိ ကုပ္ပိတွာ မိဿီ ဟုတွာ သကံ သကံ ဝေဒနံ အာကဍ္ဎတိ။ ဥတုပရိဏာမဇာ, မဟာရာဇ, ဝေဒနာ ဥတုပရိယာမေန ဥပ္ပဇ္ဇတိ။ ဝိသမပရိဟာရဇာ ဝေဒနာ ဝိသမပရိဟာရေန ဥပ္ပဇ္ဇတိ။ ဩပက္ကမိကာ, မဟာရာဇ, ဝေဒနာ အတ္ထိ ကိရိယာ, အတ္ထိ ကမ္မဝိပါကာ, ကမ္မဝိပါကဇာ ဝေဒနာ ပုဗ္ဗေ ကတေန ကမ္မေန ဥပ္ပဇ္ဇတိ။ ဣတိ ခေါ, မဟာရာဇ, အပ္ပံ ကမ္မဝိပါကဇံ, ဗဟုတရံ အဝသေသံ။ တတ္ထ ဗာလာ ‘သဗ္ဗံ ကမ္မဝိပါကဇံ ယေဝါ’တိ အတိဓါဝန္တိ။ တံ ကမ္မံ န သက္ကာ ဝိနာ ဗုဒ္ဓဉာဏေန ဝဝတ္ထာနံ ကာတုံ။

‘‘ယံ ပန, မဟာရာဇ, ဘဂဝတော ပါဒေါ သကလိကာယ ခတော, တံ ဝေဒယိတံ နေဝ ဝါတသမုဋ္ဌာနံ, န ပိတ္တသမုဋ္ဌာနံ, န သေမှသမုဋ္ဌာနံ, န သန္နိပါတိကံ, န ဥတုပရိဏာမဇံ, န ဝိသမပရိဟာရဇံ, န ကမ္မဝိပါကဇံ, ဩပက္ကမိကံ ယေဝ။ ဒေဝဒတ္တော ဟိ, မဟာရာဇ, ဗဟူနိ ဇာတိသတသဟဿာနိ တထာဂတေ အာဃာတံ ဗန္ဓိ, သော တေန အာဃာတေန မဟတိံ ဂရုံ သိလံ ဂဟေတွာ ‘မတ္ထကေ ပါတေဿာမီ’တိ မုဉ္စိ, အထညေ ဒွေ သေလာ အာဂန္တွာ တံ သိလံ တထာဂတံ အသမ္ပတ္တံ ယေဝ သမ္ပဋိစ္ဆိံသု, တာသံ ပဟာရေန ပပဋိကာ ဘိဇ္ဇိတွာ ဘဂဝတော ပါဒေ ပတိတွာ ရုဟိရံ [နိပတိတွာ ရုဓိရံ (သျာ။)] ဥပ္ပါဒေသိ, ကမ္မဝိပါကတော ဝါ, မဟာရာဇ, ဘဂဝတော ဧသာ ဝေဒနာ နိဗ္ဗတ္တာ ကိရိယတော ဝါ, တတုဒ္ဓံ နတ္ထညာ ဝေဒနာ။

‘‘ယထာ, မဟာရာဇ, ခေတ္တဒုဋ္ဌတာယ ဝါ ဗီဇံ န သမ္ဘဝတိ ဗီဇဒုဋ္ဌတာယ ဝါ။ ဧဝမေဝ ခေါ, မဟာရာဇ, ကမ္မဝိပါကတော ဝါ ဘဂဝတော ဧသာ ဝေဒနာ နိဗ္ဗတ္တာ ကိရိယတော ဝါ, တတုဒ္ဓံ နတ္ထညာ ဝေဒနာ။

‘‘ယထာ ဝါ ပန, မဟာရာဇ, ကောဋ္ဌဒုဋ္ဌတာယ ဝါ ဘောဇနံ ဝိသမံ ပရိဏမတိ အာဟာရဒုဋ္ဌတာယ ဝါ, ဧဝမေဝ ခေါ, မဟာရာဇ, ကမ္မဝိပါကတော ဝါ ဘဂဝတော ဧသာ ဝေဒနာ နိဗ္ဗတ္တာ ကိရိယတော ဝါ, တတုဒ္ဓံ နတ္ထညာ ဝေဒနာ။ အပိ စ, မဟာရာဇ, နတ္ထိ ဘဂဝတော ကမ္မဝိပါကဇာ ဝေဒနာ, နတ္ထိ ဝိသမပရိဟာရဇာ ဝေဒနာ, အဝသေသေဟိ သမုဋ္ဌာနေဟိ ဘဂဝတော ဝေဒနာ ဥပ္ပဇ္ဇတိ, တာယ စ ပန ဝေဒနာယ န သက္ကာ ဘဂဝန္တံ ဇီဝိတာ ဝေါရောပေတုံ။

‘‘နိပတန္တိ , မဟာရာဇ, ဣမသ္မိံ စာတုမဟာဘူတိကေ [စာတုမ္မဟာဘူတိကေ (သီ။)] ကာယေ ဣဋ္ဌာနိဋ္ဌာ သုဘာသုဘဝေဒနာ။ ဣဓ, မဟာရာဇ, အာကာသေ ခိတ္တော လေဍ္ဍု မဟာပထဝိယာ နိပတတိ, အပိ နု ခေါ သော, မဟာရာဇ, လေဍ္ဍု ပုဗ္ဗေ ကတေန မဟာပထဝိယာ နိပတီ’’တိ? ‘‘န ဟိ, ဘန္တေ, နတ္ထိ သော, ဘန္တေ, ဟေတု မဟာပထဝိယာ, ယေန ဟေတုနာ မဟာပထဝီ ကုသလာကုသလဝိပါကံ ပဋိသံဝေဒေယျ, ပစ္စုပ္ပန္နေန , ဘန္တေ, အကမ္မကေန ဟေတုနာ သော လေဍ္ဍု မဟာပထဝိယံ နိပတတိ။ ယထာ, မဟာရာဇ, မဟာပထဝီ, ဧဝံ တထာဂတော ဒဋ္ဌဗ္ဗော။ ယထာ လေဍ္ဍု ပုဗ္ဗေ အကတေန မဟာပထဝိယံ နိပတတိ, ဧဝမေဝ ခေါ, မဟာရာဇ, တထာဂတဿ ပုဗ္ဗေ အကတေန သာ သကလိကာပါဒေ နိပတိတာ။

‘‘ဣဓ ပန, မဟာရာဇ, မနုဿာ မဟာပထဝိံ ဘိန္ဒန္တိ စ ခဏန္တိ စ, အပိ နု ခေါ, မဟာရာဇ, တေ မနုဿာ ပုဗ္ဗေ ကတေန မဟာပထဝိံ ဘိန္ဒန္တိ စ ခဏန္တိ စာ’’တိ? ‘‘န ဟိ ဘန္တေ’’တိ။ ‘‘ဧဝမေဝ ခေါ, မဟာရာဇ, ယာ သာ သကလိကာ ဘဂဝတော ပါဒေ နိပတိတာ, န သာ သကလိကာ ပုဗ္ဗေ ကတေန ဘဂဝတော ပါဒေ နိပတိတာ။ ယောပိ, မဟာရာဇ, ဘဂဝတော လောဟိတပက္ခန္ဒိကာဗာဓေါ ဥပ္ပန္နော, သောပိ အာဗာဓေါ န ပုဗ္ဗေ ကတေန ဥပ္ပန္နော, သန္နိပါတိကေနေဝ ဥပ္ပန္နော, ယေ ကေစိ, မဟာရာဇ, ဘဂဝတော ကာယိကာ အာဗာဓါ ဥပ္ပန္နာ, န တေ ကမ္မာဘိနိဗ္ဗတ္တာ, ဆန္နံ ဧတေသံ သမုဋ္ဌာနာနံ အညတရတော နိဗ္ဗတ္တာ။

‘‘ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန သံယုတ္တနိကာယဝရလဉ္ဆကေ မောဠိယသီဝကေ [မောလိယသိဝကေ (သျာ။ က။) သံ။ နိ။ ၄။၂၆၉ ပဿိတဗ္ဗံ] ဝေယျာကရဏေ –

‘‘‘ပိတ္တသမုဋ္ဌာနာနိပိ ခေါ, သီဝက, ဣဓေကစ္စာနိ ဝေဒယိတာနိ ဥပ္ပဇ္ဇန္တိ။ သာမမ္ပိ ခေါ ဧတံ, သီဝက, ဝေဒိတဗ္ဗံ, ယထာ ပိတ္တသမုဋ္ဌာနာနိပိ ဣဓေကစ္စာနိ ဝေဒယိတာနိ ဥပ္ပဇ္ဇန္တိ။ လောကဿပိ ခေါ ဧတံ, သီဝက, သစ္စသမ္မတံ, ယထာ ပိတ္တသမုဋ္ဌာနာနိပိ ဣဓေကစ္စာနိ ဝေဒယိတာနိ ဥပ္ပဇ္ဇန္တိ။ တတြ, သီဝက, ယေ တေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော ‘‘ယံ ကိဉ္စာယံ ပုရိသပုဂ္ဂလော ပဋိသံဝေဒေတိ သုခံ ဝါ ဒုက္ခံ ဝါ အဒုက္ခမသုခံ ဝါ, သဗ္ဗံ တံ ပုဗ္ဗေ ကတဟေတူ’’တိ ။ ယဉ္စ သာမံ ဉာတံ, တဉ္စ အတိဓါဝန္တိ, ယဉ္စ လောကေ သစ္စသမ္မတံ, တဉ္စ အတိဓါဝန္တိ။ တသ္မာ တေသံ သမဏဗြာဟ္မဏာနံ မိစ္ဆာတိ ဝဒါမိ။

‘‘‘သေမှသမုဋ္ဌာနာနိပိ ခေါ, သီဝက, ဣဓေကစ္စာနိ ဝေဒယိတာနိ ဥပ္ပဇ္ဇန္တိ။ ဝါတသမုဋ္ဌာနာနိပိ ခေါ, သီဝက။ပေ။။ သန္နိပါတိကာနိပိ ခေါ, သီဝက။ပေ။။ ဥတုပရိဏာမဇာနိပိ ခေါ, သီဝက။ပေ။။ ဝိသမပရိဟာရဇာနိပိ ခေါ , သီဝက။ပေ။။ ဩပက္ကမိကာနိပိ ခေါ, သီဝက။ပေ။။ ကမ္မဝိပါကဇာနိပိ ခေါ, သီဝက, ဣဓေကစ္စာနိ ဝေဒယိတာနိ ဥပ္ပဇ္ဇန္တိ။ သာမမ္ပိ ခေါ ဧတံ, သီဝက, ဝေဒိတဗ္ဗံ, ယထာ ကမ္မဝိပါကဇာနိပိ ဣဓေကစ္စာနိ ဝေဒယိတာနိ ဥပ္ပဇ္ဇန္တိ။ လောကဿပိ ခေါ ဧတံ, သီဝက, သစ္စသမ္မတံ, ယထာ ကမ္မဝိပါကဇာနိပိ ဣဓေကစ္စာနိ ဝေဒယိတာနိ ဥပ္ပဇ္ဇန္တိ။ တတြ, သီဝက, ယေ တေ သမဏဗြာဟ္မဏာ ဧဝံဝါဒိနော ဧဝံဒိဋ္ဌိနော ‘‘ယံ ကိဉ္စာယံ ပုရိသပုဂ္ဂလော ပဋိသံဝေဒေတိ သုခံ ဝါ ဒုက္ခံ ဝါ အဒုက္ခမသုခံ ဝါ, သဗ္ဗံ တံ ပုဗ္ဗေ ကတဟေတူ’’တိ။ ယဉ္စ သာမံ ဉာတံ, တဉ္စ အတိဓါဝန္တိ, ယဉ္စ လောကေ သစ္စသမ္မတံ, တဉ္စ အတိဓါဝန္တိ။ တသ္မာ တေသံ သမဏဗြာဟ္မဏာနံ မိစ္ဆာတိ ဝဒါမီ’’’တိ။

‘‘ဣတိပိ, မဟာရာဇ, န သဗ္ဗာ ဝေဒနာ ကမ္မဝိပါကဇာ, သဗ္ဗံ, မဟာရာဇ, အကုသလံ ဈာပေတွာ ဘဂဝါ သဗ္ဗညုတံ ပတ္တောတိ ဧဝမေတံ ဓါရေဟီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

အကုသလစ္ဆေဒနပဉ္ဟော အဋ္ဌမော။

၉။ ဥတ္တရိကရဏီယပဉ္ဟော

၉။ ‘‘ဘန္တေ နာဂသေန, တုမှေ ဘဏထ ‘ယံ ကိဉ္စိ ကရဏီယံ တထာဂတဿ, သဗ္ဗံ တံ ဗောဓိယာ ယေဝ မူလေ ပရိနိဋ္ဌိတံ, နတ္ထိ တထာဂတဿ ဥတ္တရိံ ကရဏီယံ, ကတဿ ဝါ ပတိစယော’တိ, ဣဒဉ္စ တေမာသံ ပဋိသလ္လာနံ ဒိဿတိ။ ယဒိ, ဘန္တေ နာဂသေန, ယံ ကိဉ္စိ ကရဏီယံ တထာဂတဿ, သဗ္ဗံ တံ ဗောဓိယာ ယေဝ မူလေ ပရိနိဋ္ဌိတံ, နတ္ထိ တထာဂတဿ ဥတ္တရိံ ကရဏီယံ, ကတဿ ဝါ ပတိစယော, တေန ဟိ ‘တေမာသံ ပဋိသလ္လီနော’တိ ယံ ဝစနံ, တံ မိစ္ဆာ။ ယဒိ တေမာသံ ပဋိသလ္လီနော, တေန ဟိ ‘ယံ ကိဉ္စိ ကရဏီယံ, တထာဂတဿ, သဗ္ဗံ တံ ဗောဓိယာ ယေဝ မူလေ ပရိနိဋ္ဌိတ’န္တိ တမ္ပိ ဝစနံ မိစ္ဆာ ။ နတ္ထိ ကတကရဏီယဿ ပဋိသလ္လာနံ, သကရဏီယဿေဝ ပဋိသလ္လာနံ ယထာ နာမ ဗျာဓိတဿေဝ ဘေသဇ္ဇေန ကရဏီယံ ဟောတိ, အဗျာဓိတဿ ကိံ ဘေသဇ္ဇေန။ ဆာတဿေဝ ဘောဇနေန ကရဏီယံ ဟောတိ, အဆာတဿ ကိံ ဘောဇနေန။ ဧဝမေဝ ခေါ, ဘန္တေ နာဂသေန, နတ္ထိ ကတကရဏီယဿ ပဋိသလ္လာနံ, သကရဏီယဿေဝ ပဋိသလ္လာနံ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ယံ ကိဉ္စိ, မဟာရာဇ, ကရဏီယံ တထာဂတဿ, သဗ္ဗံ တံ ဗောဓိယာ ယေဝ မူလေ ပရိနိဋ္ဌိတံ, နတ္ထိ တထာဂတဿ ဥတ္တရိံ ကရဏီယံ, ကတဿ ဝါ ပတိစယော, ဘဂဝါ စ တေမာသံ ပဋိသလ္လီနော, ပဋိသလ္လာနံ ခေါ, မဟာရာဇ, ဗဟုဂုဏံ, သဗ္ဗေပိ တထာဂတာ ပဋိသလ္လီယိတွာ သဗ္ဗညုတံ ပတ္တာ, တံ တေ သုကတဂုဏမနုဿရန္တာ ပဋိသလ္လာနံ သေဝန္တိ။ ယထာ, မဟာရာဇ, ပုရိသော ရညော သန္တိကာ လဒ္ဓဝရော ပဋိလဒ္ဓဘောဂေါ တံ သုကတဂုဏမနုဿရန္တော အပရာပရံ ရညော ဥပဋ္ဌာနံ ဧတိ။ ဧဝမေဝ ခေါ, မဟာရာဇ, သဗ္ဗေပိ တထာဂတာ ပဋိသလ္လီယိတွာ သဗ္ဗညုတံ ပတ္တာ, တံ တေ သုကတဂုဏမနုဿရန္တာ ပဋိသလ္လာနံ သေဝန္တိ။

‘‘ယထာ ဝါ ပန, မဟာရာဇ, ပုရိသော အာတုရော ဒုက္ခိတော ဗာဠှဂိလာနော ဘိသက္ကမုပသေဝိတွာ သောတ္ထိမနုပ္ပတ္တော တံ သုကတဂုဏမနုဿရန္တော အပရာပရံ ဘိသက္ကမုပသေဝတိ။ ဧဝမေဝ ခေါ, မဟာရာဇ, သဗ္ဗေပိ တထာဂတာ ပဋိသလ္လီယိတွာ သဗ္ဗညုတံ ပတ္တာ, တံ တေ သုကတဂုဏမနုဿရန္တာ ပဋိသလ္လာနံ သေဝန္တိ။

‘‘အဋ္ဌဝီသတိ ခေါ ပနိမေ, မဟာရာဇ, ပဋိသလ္လာနဂုဏာ, ယေ ဂုဏေ သမနုဿရန္တာ [သမနုပဿန္တာ (သီ။ ဣ။)] တထာဂတာ ပဋိသလ္လာနံ သေဝန္တိ။ ကတမေ အဋ္ဌဝီသတိ? ဣဓ, မဟာရာဇ, ပဋိသလ္လာနံ ပဋိသလ္လီယမာနံ အတ္တာနံ ရက္ခတိ, အာယုံ ဝဍ္ဎေတိ, ဗလံ ဒေတိ, ဝဇ္ဇံ ပိဒဟတိ, အယသမပနေတိ, ယသမုပနေတိ, အရတိံ ဝိနောဒေတိ, ရတိမုပဒဟတိ, ဘယမပနေတိ, ဝေသာရဇ္ဇံ ကရောတိ, ကောသဇ္ဇမပနေတိ, ဝီရိယမဘိဇနေတိ, ရာဂမပနေတိ, ဒေါသမပနေတိ, မောဟမပနေတိ, မာနံ နိဟန္တိ, ဝိတက္ကံ ဘဉ္ဇတိ, စိတ္တံ ဧကဂ္ဂံ ကရောတိ, မာနသံ သ္နေဟယတိ [သောဘယတိ (သီ။)], ဟာသံ ဇနေတိ, ဂရုကံ ကရောတိ, လာဘမုပ္ပါဒယတိ, နမဿိယံ ကရောတိ , ဣတိံ ပါပေတိ, ပါမောဇ္ဇံ ကရောတိ, သင်္ခါရာနံ သဘာဝံ ဒဿယတိ, ဘဝပ္ပဋိသန္ဓိံ ဥဂ္ဃါဋေတိ, သဗ္ဗသာမညံ ဒေတိ။ ဣမေ ခေါ, မဟာရာဇ, အဋ္ဌဝီသတိ ပဋိသလ္လာနဂုဏာ, ယေ ဂုဏေ သမနုဿရန္တာ တထာဂတာ ပဋိသလ္လာနံ သေဝန္တိ။

‘‘အပိ စ ခေါ, မဟာရာဇ, တထာဂတာ သန္တံ သုခံ သမာပတ္တိရတိံ အနုဘဝိတုကာမာ ပဋိသလ္လာနံ သေဝန္တိ ပရိယောသိတသင်္ကပ္ပါ။ စတူဟိ ခေါ, မဟာရာဇ, ကာရဏေဟိ တထာဂတာ ပဋိသလ္လာနံ သေဝန္တိ။ ကတမေဟိ စတူဟိ? ဝိဟာရဖာသုတာယပိ, မဟာရာဇ, တထာဂတာ ပဋိသလ္လာနံ သေဝန္တိ, အနဝဇ္ဇဂုဏဗဟုလတာယပိ တထာဂတာ ပဋိသလ္လာနံ သေဝန္တိ, အသေသအရိယဝီထိတောပိ တထာဂတာ ပဋိသလ္လာနံ သေဝန္တိ, သဗ္ဗဗုဒ္ဓါနံ ထုတထောမိတဝဏ္ဏိတပသတ္ထတောပိ တထာဂတာ ပဋိသလ္လာနံ သေဝန္တိ။ ဣမေဟိ ခေါ, မဟာရာဇ, စတူဟိ ကာရဏေဟိ တထာဂတာ ပဋိသလ္လာနံ သေဝန္တိ။ ဣတိ ခေါ, မဟာရာဇ, တထာဂတာ ပဋိသလ္လာနံ သေဝန္တိ န သကရဏီယတာယ, န ကတဿ ဝါ ပတိစယာယ, အထ ခေါ ဂုဏဝိသေသဒဿာဝိတာယ တထာဂတာ ပဋိသလ္လာနံ သေဝန္တီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဥတ္တရိကရဏီယပဉ္ဟော နဝမော။

၁၀။ ဣဒ္ဓိဗလဒဿနပဉ္ဟော

၁၀။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘တထာဂတဿ ခေါ, အာနန္ဒ, စတ္တာရော ဣဒ္ဓိပါဒါ ဘာဝိတာ ဗဟုလီကတာ ယာနီကတာ ဝတ္ထုကတာ အနုဋ္ဌိတာ ပရိစိတာ သုသမာရဒ္ဓါ, သော အာကင်္ခမာနော, အာနန္ဒ, တထာဂတော ကပ္ပံ ဝါ တိဋ္ဌေယျ ကပ္ပါဝသေသံ ဝါ’တိ။ ပုန စ ဘဏိတံ ‘ဣတော တိဏ္ဏံ မာသာနံ အစ္စယေန တထာဂတော ပရိနိဗ္ဗာယိဿတီ’တိ။ ယဒိ, ဘန္တေ နာဂသေန, ဘဂဝတာ ဘဏိတံ ‘တထာဂတဿ ခေါ, အာနန္ဒ, စတ္တာရော ဣဒ္ဓိပါဒါ ဘာဝိတာ။ပေ။။ ကပ္ပါဝသေသံ ဝါ’တိ, တေန ဟိ တေမာသပရိစ္ဆေဒေါ မိစ္ဆာ။ ယဒိ, ဘန္တေ, တထာဂတေန ဘဏိတံ ‘ဣတော တိဏ္ဏံ မာသာနံ အစ္စယေန တထာဂတော ပရိနိဗ္ဗာယိဿတီ’တိ, တေန ဟိ ‘‘တထာဂတဿ ခေါ, အာနန္ဒ, စတ္တာရော ဣဒ္ဓိပါဒါ ဘာဝိတာ။ပေ။။ ကပ္ပါဝသေသံ ဝါ’တိ တမ္ပိ ဝစနံ မိစ္ဆာ။ နတ္ထိ တထာဂတာနံ အဋ္ဌာနေ ဂဇ္ဇိတံ။ အမောဃဝစနာ ဗုဒ္ဓါ ဘဂဝန္တော တထဝစနာ အဒွေဇ္ဈဝစနာ။ အယမ္ပိ ဥဘတော ကောဋိကော ပဉ္ဟော ဂမ္ဘီရော သုနိပုဏော ဒုန္နိဇ္ဈာပယော တဝါနုပ္ပတ္တော, ဘိန္ဒေတံ ဒိဋ္ဌိဇာလံ, ဧကံသေ ဌပယ, ဘိန္ဒ ပရဝါဒ’’န္တိ။

‘‘ဘာသိတမ္ပေတံ, မဟာရာဇ, ဘဂဝတာ ‘တထာဂတဿ ခေါ, အာနန္ဒ, စတ္တာရော ဣဒ္ဓိပါဒါ ဘာဝိတာ။ပေ။။ ကပ္ပါဝသေသံ ဝါ’တိ, တေမာသပရိစ္ဆေဒေါ စ ဘဏိတော, သော စ ပန ကပ္ပော အာယုကပ္ပော ဝုစ္စတိ။ န, မဟာရာဇ, ဘဂဝါ အတ္တနော ဗလံ ကိတ္တယမာနော ဧဝမာဟ, ဣဒ္ဓိဗလံ ပန မဟာရာဇ, ဘဂဝါ ပရိကိတ္တယမာနော ဧဝမာဟ ‘တထာဂတဿ ခေါ, အာနန္ဒ, စတ္တာရော ဣဒ္ဓိပါဒါ ဘာဝိတာ။ပေ။။ ကပ္ပါဝသေသံ ဝါ’တိ။

‘‘ယထာ, မဟာရာဇ, ရညော အဿာဇာနီယော ဘဝေယျ သီဃဂတိ အနိလဇဝေါ, တဿ ရာဇာ ဇဝဗလံ ပရိကိတ္တယန္တော သနေဂမဇာနပဒဘဋဗလဗြာဟ္မဏဂဟပတိကအမစ္စဇနမဇ္ဈေ ဧဝံ ဝဒေယျ ‘အာကင်္ခမာနော မေ, ဘော, အယံ ဟယဝရော သာဂရဇလပရိယန္တံ မဟိံ အနုဝိစရိတွာ ခဏေန ဣဓါဂစ္ဆေယျာ’တိ, န စ တံ ဇဝဂတိံ တဿံ ပရိသာယံ ဒဿေယျ, ဝိဇ္ဇတိ စ သော ဇဝေါ တဿ, သမတ္ထော စ သော ခဏေန သာဂရဇလပရိယန္တံ မဟိံ အနုဝိစရိတုံ။ ဧဝမေဝ ခေါ, မဟာရာဇ, ဘဂဝါ အတ္တနော ဣဒ္ဓိဗလံ ပရိကိတ္တယမာနော ဧဝမာဟ, တမ္ပိ တေဝိဇ္ဇာနံ ဆဠဘိညာနံ အရဟန္တာနံ ဝိမလခီဏာသဝါနံ ဒေဝမနုဿာနဉ္စ မဇ္ဈေ နိသီဒိတွာ ဘဏိတံ ‘တထာဂတဿ ခေါ, အာနန္ဒ, စတ္တာရော ဣဒ္ဓိပါဒါ ဘာဝိတာ ဗဟုလီကတာ ယာနီကတာ ဝတ္ထုကတာ အနုဋ္ဌိတာ ပရိစိတာ သုသမာရဒ္ဓါ, သော အာကင်္ခမာနော, အာနန္ဒ, တထာဂတော ကပ္ပံ ဝါ တိဋ္ဌေယျ ကပ္ပါဝသေသံ ဝါ’တိ။ ဝိဇ္ဇတိ စ တံ, မဟာရာဇ, ဣဒ္ဓိဗလံ ဘဂဝတော, သမတ္ထော စ ဘဂဝါ ဣဒ္ဓိဗလေန ကပ္ပံ ဝါ ဌာတုံ ကပ္ပါဝသေသံ ဝါ, န စ ဘဂဝါ တံ ဣဒ္ဓိဗလံ တဿံ ပရိသာယံ ဒဿေတိ, အနတ္ထိကော, မဟာရာဇ, ဘဂဝါ သဗ္ဗဘဝေဟိ, ဂရဟိတာ စ တထာဂတဿ သဗ္ဗဘဝါ။ ဘာသိတမ္ပေတံ, မဟာရာဇ, ဘဂဝတာ ‘သေယျထာပိ, ဘိက္ခဝေ, အပ္ပမတ္တကောပိ ဂူထော ဒုဂ္ဂန္ဓော ဟောတိ ။ ဧဝမေဝ ခေါ အဟံ, ဘိက္ခဝေ, အပ္ပမတ္တကမ္ပိ ဘဝံ န ဝဏ္ဏေမိ အန္တမသော အစ္ဆရာသံဃာတမတ္တမ္ပီ’တိ အပိ နု ခေါ, မဟာရာဇ, ဘဂဝါ သဗ္ဗဘဝဂတိယောနိယော ဂူထသမံ ဒိသွာ ဣဒ္ဓိဗလံ နိဿာယ ဘဝေသု ဆန္ဒရာဂံ ကရေယျာ’’တိ? ‘‘န ဟိ ဘန္တေ’’တိ။ ‘‘တေန ဟိ, မဟာရာဇ, ဘဂဝါ ဣဒ္ဓိဗလံ ပရိကိတ္တယမာနော ဧဝရူပံ ဗုဒ္ဓသီဟနာဒမဘိနဒီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဣဒ္ဓိဗလဒဿနပဉ္ဟော ဒသမော။

ဣဒ္ဓိဗလဝဂ္ဂေါ ပဌမော။

ဣမသ္မိံ ဝဂ္ဂေ ဒသ ပဉှာ။

၂။ အဘေဇ္ဇဝဂ္ဂေါ

၁။ ခုဒ္ဒါနုခုဒ္ဒကပဉ္ဟော

၁။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘အဘိညာယာဟံ, ဘိက္ခဝေ, ဓမ္မံ ဒေသေမိ နော အနဘိညာယာ’တိ။ ပုန စ ဝိနယပညတ္တိယာ ဧဝံ ဘဏိတံ ‘အာကင်္ခမာနော, အာနန္ဒ, သံဃော မမစ္စယေန ခုဒ္ဒါနုခုဒ္ဒကာနိ သိက္ခာပဒါနိ သမူဟနတူ’တိ။ ကိံ နု ခေါ, ဘန္တေ နာဂသေန, ခုဒ္ဒါနုခုဒ္ဒကာနိ သိက္ခာပဒါနိ ဒုပ္ပညတ္တာနိ, ဥဒါဟု အဝတ္ထုသ္မိံ အဇာနိတွာ ပညတ္တာနိ, ယံ ဘဂဝါ အတ္တနော အစ္စယေန ခုဒ္ဒါနုခုဒ္ဒကာနိ သိက္ခာပဒါနိ သမူဟနာပေတိ? ယဒိ, ဘန္တေ နာဂသေန, ဘဂဝတာ ဘဏိတံ ‘အဘိညာယာဟံ, ဘိက္ခဝေ, ဓမ္မံ ဒေသေမိ နော အနဘိညာယာ’တိ, တေန ဟိ ‘အာကင်္ခမာနော, အာနန္ဒ, သံဃော မမစ္စယေန ခုဒ္ဒါနုခုဒ္ဒကာနိ သိက္ခာပဒါနိ သမူဟနတူ’တိ ယံ ဝစနံ, တံ မိစ္ဆာ။ ယဒိ တထာဂတေ ဝိနယပညတ္တိယာ ဧဝံ ဘဏိတံ ‘အာကင်္ခမာနော, အာနန္ဒ, သံဃော မမစ္စယေန ခုဒ္ဒါနုခုဒ္ဒကာနိ သိက္ခာပဒါနိ သမူဟနတူ’တိ တေန ဟိ ‘အဘိညာယာဟံ, ဘိက္ခဝေ, ဓမ္မံ ဒေသေမိ နော အနဘိညာယာ’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော သုခုမော နိပုဏော ဂမ္ဘီရော သုဂမ္ဘီရော ဒုန္နိဇ္ဈာပယော, သော တဝါနုပ္ပတ္တော, တတ္ထ တေ ဉာဏဗလဝိပ္ဖာရံ ဒဿေဟီ’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘အဘိညာယာဟံ, ဘိက္ခဝေ, ဓမ္မံ ဒေသေမိ နော အနဘိညာယာ’တိ, ဝိနယပညတ္တိယာပိ ဧဝံ ဘဏိတံ ‘အာကင်္ခမာနော, အာနန္ဒ, သံဃော မမစ္စယေန ခုဒ္ဒါနုခုဒ္ဒကာနိ သိက္ခာပဒါနိ သမူဟနတူ’တိ, တံ ပန, မဟာရာဇ, တထာဂတော ဘိက္ခူ ဝီမံသမာနော အာဟ ‘ဥက္ကလေဿန္တိ [ဥက္ကဍ္ဎိဿန္တိ (သီ။), ဥဿက္ကိဿန္တိ (သျာ။)] နု ခေါ မမ သာဝကာ မယာ ဝိဿဇ္ဇာဣယမာနာ မမစ္စယေန ခုဒ္ဒါနုခုဒ္ဒကာနိ သိက္ခာပဒါနိ, ဥဒါဟု အာဒိယိဿန္တီ’တိ။

‘‘ယထာ, မဟာရာဇ, စက္ကဝတ္တီ ရာဇာ ပုတ္တေ ဧဝံ ဝဒေယျ ‘အယံ ခေါ, တာတာ, မဟာဇနပဒေါ သဗ္ဗဒိသာသု သာဂရပရိယန္တော, ဒုက္ကရော, တာတာ, တာဝတကေန ဗလေန ဓါရေတုံ, ဧထ တုမှေ, တာတာ, မမစ္စယေန ပစ္စန္တေ ပစ္စန္တေ ဒေသေ ပဇဟထာ’တိ။ အပိ နု ခေါ တေ, မဟာရာဇ, ကုမာရာ ပိတုအစ္စယေန ဟတ္ထဂတေ ဇနပဒေ သဗ္ဗေ တေ ပစ္စန္တေ ပစ္စန္တေ ဒေသေ မုဉ္စေယျု’’န္တိ? ‘‘န ဟိ ဘန္တေ, ရာဇတော [ရာဇာနော (သီ။ ဣ။)], ဘန္တေ, လုဒ္ဓတရာ [လဒ္ဓတရာ (က။)] ကုမာရာ ရဇ္ဇလောဘေန တဒုတ္တရိံ ဒိဂုဏတိဂုဏံ ဇနပဒံ ပရိဂ္ဂဏှေယျုံ [ပရိကဍ္ဎေယျုံ (သီ။ ဣ။)], ကိံ ပန တေ ဟတ္ထဂတံ ဇနပဒံ မုဉ္စေယျု’’န္တိ? ‘‘ဧဝမေဝ ခေါ, မဟာရာဇ, တထာဂတော ဘိက္ခူ ဝီမံသမာနော ဧဝမာဟ ‘အာကင်္ခမာနော, အာနန္ဒ, သံဃော မမစ္စယေန ခုဒ္ဒါနုခုဒ္ဒကာနိ သိက္ခာပဒါနိ သမူဟနတူ’တိ။ ဒုက္ခပရိမုတ္တိယာ, မဟာရာဇ, ဗုဒ္ဓပုတ္တာ ဓမ္မလောဘေန အညမ္ပိ ဥတ္တရိံ ဒိယဍ္ဎသိက္ခာပဒသတံ ဂေါပေယျုံ, ကိံ ပန ပကတိပညတ္တံ သိက္ခာပဒံ မုဉ္စေယျု’’န္တိ?

‘‘ဘန္တေ နာဂသေန, ယံ ဘဂဝါ အာဟ ‘ခုဒ္ဒါနုခုဒ္ဒကာနိ သိက္ခာပဒါနီ’တိ, ဧတ္ထာယံ ဇနော သမ္မူဠ္ဟော ဝိမတိဇာတော အဓိကတော သံသယပက္ခန္ဒော။ ကတမာနိ တာနိ ခုဒ္ဒကာနိ သိက္ခာပဒါနိ, ကတမာနိ အနုခုဒ္ဒကာနိ သိက္ခာပဒါနီတိ? ဒုက္ကဋံ, မဟာရာဇ, ခုဒ္ဒကံ သိက္ခာပဒံ, ဒုဗ္ဘာသိတံ အနုခုဒ္ဒကံ သိက္ခာပဒံ, ဣမာနိ ဒွေ ခုဒ္ဒါနုခုဒ္ဒကာနိ သိက္ခာပဒါနိ, ပုဗ္ဗကေဟိပိ, မဟာရာဇ, မဟာထေရေဟိ ဧတ္ထ ဝိမတိ ဥပ္ပါဒိတာ, တေဟိပိ ဧကဇ္ဈံ န ကတော ဓမ္မသဏ္ဌိတိပရိယာယေ ဘဂဝတာ ဧသော ပဉ္ဟော ဥပဒိဋ္ဌောတိ။ စိရနိက္ခိတ္တံ, ဘန္တေ နာဂသေန, ဇိနရဟဿံ အဇ္ဇေတရဟိ လောကေ ဝိဝဋံ ပါကဋံ ကတ’’န္တိ။

ခုဒ္ဒါနုခုဒ္ဒကပဉ္ဟော ပဌမော။

၂။ အဗျာကရဏီယပဉ္ဟော

၂။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘နတ္ထာနန္ဒ တထာဂတဿ ဓမ္မေသု အာစရိယမုဋ္ဌီ’တိ, ပုန စ ထေရေန မာလုကျပုတ္တေန [မာလုင္က္ယပုတ္တေန (သီ။ သျာ။ ဣ။) သံ။ နိ။ ၄။၉၅; အ။ နိ။ ၁။၄။၂၅၇ ပဿိတဗ္ဗံ] ပဉ္ဟံ ပုဋ္ဌော န ဗျာကာသိ။ ဧသော ခေါ, ဘန္တေ နာဂသေန, ပဉ္ဟော ဒွယန္တော [ဒွယတော (သီ။)] ဧကန္တနိဿိတော ဘဝိဿတိ အဇာနနေန ဝါ ဂုယှကရဏေန ဝါ။ ယဒိ, ဘန္တေ နာဂသေန, ဘဂဝတာ ဘဏိတံ ‘နတ္ထာနန္ဒ တထာဂတဿ ဓမ္မေသု အာစရိယမုဋ္ဌီ’တိ, တေန ဟိ ထေရဿ မာလုကျပုတ္တဿ အဇာနန္တေန န ဗျာကတံ။ ယဒိ ဇာနန္တေန န ဗျာကတံ, တေန ဟိ အတ္ထိ တထာဂတဿ ဓမ္မေသု အာစရိယမုဋ္ဌိ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘နတ္ထာနန္ဒ တထာဂတဿ ဓမ္မေသု အာစရိယမုဋ္ဌီ’တိ, အဗျာကတော စ ထေရေန မာလုကျပုတ္တေန ပုစ္ဆိတော ပဉ္ဟော, တဉ္စ ပန န အဇာနန္တေန န ဂုယှကရဏေန။ စတ္တာရိမာနိ, မဟာရာဇ, ပဉ္ဟဗျာကရဏာနိ။ ကတမာနိ စတ္တာရိ? ဧကံသဗျာကရဏီယော ပဉ္ဟော ဝိဘဇ္ဇဗျာကရဏီယော ပဉ္ဟော ပဋိပုစ္ဆာဗျာကရဏီယော ပဉ္ဟော ဌပနီယော ပဉ္ဟောတိ။

‘‘ကတမော စ, မဟာရာဇ, ဧကံသဗျာကရဏီယော ပဉ္ဟော? ‘ရူပံ အနိစ္စ’န္တိ ဧကံသဗျာကရဏီယော ပဉ္ဟော, ‘ဝေဒနာ အနိစ္စာ’တိ။ပေ။။ ‘သညာ အနိစ္စာ’တိ။ပေ။။ ‘သင်္ခါရာ အနိစ္စာ’တိ။ပေ။။ ‘ဝိညာဏံ အနိစ္စ’’န္တိ ဧကံသဗျာကရဏီယော ပဉ္ဟော, အယံ ဧကံသဗျာကရဏီယော ပဉ္ဟော။

‘‘ကတမော ဝိဘဇ္ဇဗျာကရဏီယော ပဉ္ဟော? ‘အနိစ္စံ ပန ရူပ’န္တိ ဝိဘဇ္ဇဗျာကရဏီယော ပဉ္ဟော, ‘အနိစ္စာ ပန ဝေဒနာ’တိ။ပေ။။ ‘အနိစ္စာ ပန သညာ’တိ။ပေ။။ ‘အနိစ္စာ ပန သင်္ခါရာ’တိ။ပေ။။ ‘အနိစ္စံ ပန ဝိညာဏ’န္တိ ဝိဘဇ္ဇဗျာကရဏီယော ပဉ္ဟော, အယံ ဝိဘဇ္ဇဗျာကရဏီယော ပဉ္ဟော။

‘‘ကတမော ပဋိပုစ္ဆာဗျာကရဏီယော ပဉ္ဟော? ‘ကိံ နု ခေါ စက္ခုနာ သဗ္ဗံ ဝိဇာနာတီ’တိ အယံ ပဋိပုစ္ဆာဗျာကရဏီယော ပဉ္ဟော။

‘‘ကတမော ဌပနီယော ပဉ္ဟော? ‘သဿတော လောကော’တိ ဌပနီယော ပဉ္ဟော, ‘အသဿတော လောကော’တိ။ ‘အန္တဝါ လောကော’တိ။ ‘အနန္တဝါ လောကော’တိ။ ‘အန္တဝါ စ အနန္တဝါ စ လောကော’တိ။ ‘နေဝန္တဝါ နာနန္တဝါ လောကော’တိ။ ‘တံ ဇီဝံ တံ သရီရ’န္တိ။ ‘အညံ ဇီဝံ အညံ သရီရ’န္တိ။ ‘ဟောတိ တထာဂတော ပရံ မရဏာ’တိ။ ‘န ဟောတိ တထာဂတော ပရံ မရဏာ’တိ။ ‘ဟောတိ စ န စ ဟောတိ တထာဂတော ပရံ မရဏာ’တိ။ ‘နေဝ ဟောတိ န န ဟောတိ တထာဂတော ပရံ မရဏာ’တိ ဌပနီယော ပဉ္ဟော, အယံ ဌပနီယော ပဉ္ဟော။

‘‘ဘဂဝါ, မဟာရာဇ, ထေရဿ မာလုကျပုတ္တဿ တံ ဌပနီယံ ပဉ္ဟံ န ဗျာကာသိ။ သော ပန ပဉ္ဟော ကိံ ကာရဏာ ဌပနီယော? န တဿ ဒီပနာယ ဟေတု ဝါ ကာရဏံ ဝါ အတ္ထိ, တသ္မာ သော ပဉ္ဟော ဌပနီယော။ နတ္ထိ ဗုဒ္ဓါနံ ဘဂဝန္တာနံ အကာရဏမဟေတုကံ ဂိရမုဒီရဏ’’န္တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

အဗျာကရဏီယပဉ္ဟော ဒုတိယော။

၃။ မစ္စုဘာယနာဘာယနပဉ္ဟော

၃။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘သဗ္ဗေ တသန္တိ ဒဏ္ဍဿ, သဗ္ဗေ ဘာယန္တိ မစ္စုနော’တိ, ပုန ဘဏိတံ ‘အရဟာ သဗ္ဗဘယမတိက္ကန္တော’တိ။ ကိံ နု ခေါ, ဘန္တေ နာဂသေန, အရဟာ ဒဏ္ဍဘယာ တသတိ , နိရယေ ဝါ နေရယိကာ သတ္တာ ဇလိတာ ကုထိတာ တတ္တာ သန္တတ္တာ တမှာ ဇလိတဂ္ဂိဇာလကာ မဟာနိရယာ စဝမာနာ မစ္စုနော ဘာယန္တိ။ ယဒိ, ဘန္တေ နာဂသေန, ဘဂဝတာ ဘဏိတံ ‘သဗ္ဗေ တသန္တိ ဒဏ္ဍဿ, သဗ္ဗေ ဘာယန္တိ မစ္စုနော’တိ, တေန ဟိ ‘အရဟာ သဗ္ဗဘယမတိက္ကန္တော’တိ ယံ ဝစနံ, တံ မိစ္ဆာ။ ယဒိ ဘဂဝတာ ဘဏိတံ ‘အရဟာ သဗ္ဗဘယမတိက္ကန္တော’တိ, တေန ဟိ ‘သဗ္ဗေ တသန္တိ ဒဏ္ဍဿ, သဗ္ဗေ ဘာယန္တိ မစ္စုနော’တိ တမ္ပိ ဝစနံ မိစ္ဆာ။ အယံ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘နေတံ, မဟာရာဇ, ဝစနံ ဘဂဝတာ အရဟန္တေ ဥပါဒါယ ဘဏိတံ ‘သဗ္ဗေ တသန္တိ ဒဏ္ဍဿ, သဗ္ဗေ ဘာယန္တိ မစ္စုနော’တိ။ ဌပိတော အရဟာ တသ္မိံ ဝတ္ထုသ္မိံ, သမူဟတော ဘယဟေတု အရဟတော။ ယေ တေ, မဟာရာဇ, သတ္တာ သကိလေသာ, ယေသဉ္စ အဓိမတ္တာ အတ္တာနုဒိဋ္ဌိ, ယေ စ သုခဒုက္ခေသု ဥန္နတာဝနတာ, တေ ဥပါဒါယ ဘဂဝတာ ဘဏိတံ ‘သဗ္ဗေ တသန္တိ ဒဏ္ဍဿ, သဗ္ဗေ ဘာယန္တိ မစ္စုနော’တိ။ အရဟတော, မဟာရာဇ, သဗ္ဗဂတိ ဥပစ္ဆိန္နာ, ယောနိ ဝိဒ္ဓံသိတာ, ပဋိသန္ဓိ ဥပဟတာ, ဘဂ္ဂါ ဖာသုကာ, သမူဟတာ သဗ္ဗဘဝါလယာ, သမုစ္ဆိန္နာ သဗ္ဗသင်္ခါရာ, ဟတံ ကုသလာကုသလံ, ဝိဟတာ အဝိဇ္ဇာ, အဗီဇံ ဝိညာဏံ ကတံ, ဒဍ္ဎာ သဗ္ဗကိလေသာ, အတိဝတ္တာ လောကဓမ္မာ, တသ္မာ အရဟာ န တသတိ သဗ္ဗဘယေဟိ။

‘‘ဣဓ, မဟာရာဇ, ရညော စတ္တာရော မဟာမတ္တာ ဘဝေယျုံ အနုရက္ခာ လဒ္ဓယသာ ဝိဿာသိကာ ဌပိတာ မဟတိ ဣဿရိယေ ဌာနေ။ အထ ရာဇာ ကိသ္မိဉ္စိ ဒေဝ ကရဏီယေ သမုပ္ပန္နေ ယာဝတာ သကဝိဇိတေ သဗ္ဗဇနဿ အာဏာပေယျ ‘သဗ္ဗေဝ မေ ဗလိံ ကရောန္တု, သာဓေထ တုမှေ စတ္တာရော မဟာမတ္တာ တံ ကရဏီယ’န္တိ။ အပိ နု ခေါ, မဟာရာဇ, တေသံ စတုန္နံ မဟာမတ္တာနံ ဗလိဘယာ သန္တာသော ဥပ္ပဇ္ဇေယျာ’’တိ? ‘‘န ဟိ ဘန္တေ’’တိ။ ‘‘ကေန ကာရဏေန မဟာရာဇာ’’တိ။ ‘‘ဌပိတာ တေ, ဘန္တေ, ရညာ ဥတ္တမဋ္ဌာနေ, နတ္ထိ တေသံ ဗလိ, သမတိက္ကန္တဗလိနော တေ, အဝသေသေ ဥပါဒါယ ရညာ အာဏာပိတံ ‘သဗ္ဗေဝ မေ ဗလိံ ကရောန္တူ’တိ။ ‘‘ဧဝမေဝ ခေါ, မဟာရာဇ, နေတံ ဝစနံ ဘဂဝတာ အရဟန္တေ ဥပါဒါယ ဘဏိတံ, ဌပိတော အရဟာ တသ္မိံ ဝတ္ထုသ္မိံ, သမူဟတော ဘယဟေတု အရဟတော, ယေ တေ, မဟာရာဇ, သတ္တာ သကိလေသာ, ယေသဉ္စ အဓိမတ္တာ အတ္တာနုဒိဋ္ဌိ, ယေ စ သုခဒုက္ခေသု ဥန္နတာဝနတာ , တေ ဥပါဒါယ ဘဂဝတာ ဘဏိတံ ‘သဗ္ဗေ တသန္တိ ဒဏ္ဍဿ, သဗ္ဗေ ဘာယန္တိ မစ္စုနော’တိ။ တသ္မာ အရဟာ န တသတိ သဗ္ဗဘယေဟီ’’တိ။

‘‘နေတံ, ဘန္တေ နာဂသေန, ဝစနံ သာဝသေသံ, နိရဝသေသဝစနမေတံ ‘သဗ္ဗေ’တိ။ တတ္ထ မေ ဥတ္တရိံ ကာရဏံ ဗြူဟိ တံ ဝစနံ ပတိဋ္ဌာပေတု’’န္တိ။

‘‘ဣဓ, မဟာရာဇ, ဂါမေ ဂါမဿာမိကော အာဏာပကံ အာဏာပေယျ ‘ဧဟိ, ဘော အာဏာပက, ယာဝတာ ဂါမေ ဂါမိကာ, တေ သဗ္ဗေ သီဃံ မမ သန္တိကေ သန္နိပါတေဟီ’တိ။ သော ‘သာဓု သာမီ’တိ သမ္ပဋိစ္ဆိတွာ ဂါမမဇ္ဈေ ဌတွာ တိက္ခတ္တုံ သဒ္ဒမနုဿာဝေယျ ‘ယာဝတာ ဂါမေ ဂါမိကာ, တေ သဗ္ဗေ သီဃသီဃံ သာမိနော သန္တိကေ သန္နိပတန္တူ’တိ။ တတော တေ ဂါမိကာ အာဏာပကဿ ဝစနေန တုရိတတုရိတာ သန္နိပတိတွာ ဂါမဿာမိကဿ အာရောစေန္တိ ‘သန္နိပတိတာ, သာမိ, သဗ္ဗေ ဂါမိကာ, ယံ တေ ကရဏီယံ တံ ကရောဟီ’တိ။ ဣတိ သော, မဟာရာဇ, ဂါမဿာမိကော ကုဋိပုရိသေ သန္နိပါတေန္တော သဗ္ဗေ ဂါမိကေ အာဏာပေတိ, တေ စ အာဏတ္တာ န သဗ္ဗေ သန္နိပတန္တိ, ကုဋိပုရိသာ ယေဝ သန္နိပတန္တိ, ‘ဧတ္တကာ ယေဝ မေ ဂါမိကာ’တိ ဂါမဿာမိကော စ တထာ သမ္ပဋိစ္ဆတိ, အညေ ဗဟုတရာ အနာဂတာ ဣတ္ထိပုရိသာ ဒါသိဒါသာ ဘတကာ ကမ္မကရာ ဂါမိကာ ဂိလာနာ ဂေါမဟိံသာ အဇေဠကာ သုဝါနာ, ယေ အနာဂတာ, သဗ္ဗေ တေ အဂဏိတာ, ကုဋိပုရိသေ ယေဝ ဥပါဒါယ အာဏာပိတတ္တာ ‘သဗ္ဗေ သန္နိပတန္တူ’တိ။ ဧဝမေဝ ခေါ, မဟာရာဇ, နေတံ ဝစနံ ဘဂဝတာ အရဟန္တေ ဥပါဒါယ ဘဏိတံ, ဌပိတော အရဟာ တသ္မိံ ဝတ္ထုသ္မိံ, သမူဟတော ဘယဟေတု အရဟတော, ယေ တေ, မဟာရာဇ, သတ္တာ သကိလေသာ, ယေသဉ္စ အဓိမတ္တာ အတ္တာနုဒိဋ္ဌိ, ယေ စ သုခဒုက္ခေသု ဥန္နတာဝနတာ, တေ ဥပါဒါယ ဘဂဝတာ ဘဏိတံ ‘သဗ္ဗေ တသန္တိ ဒဏ္ဍဿ, သဗ္ဗေ ဘာယန္တိ မစ္စုနော’တိ ။ တသ္မာ အရဟာ န တသတိ သဗ္ဗဘယေဟိ။

‘‘အတ္ထိ, မဟာရာဇ, သာဝသေသံ ဝစနံ သာဝသေသော အတ္ထော, အတ္ထိ သာဝသေသံ ဝစနံ နိရဝသေသော အတ္ထော, အတ္ထိ နိရဝသေသံ ဝစနံ သာဝသေသော အတ္ထော, အတ္ထိ နိရဝသေသံ ဝစနံ နိရဝသေသော အတ္ထော။ တေန တေန အတ္ထော သမ္ပဋိစ္ဆိတဗ္ဗော။

‘‘ပဉ္စဝိဓေဟိ, မဟာရာဇ, ကာရဏေဟိ အတ္ထော သမ္ပဋိစ္ဆိတဗ္ဗော အာဟစ္စပဒေန ရသေန အာစရိယဝံသေန [အာစရိယဝံသတာယ (ဣ။ က။)] အဓိပ္ပါယာ ကာရဏုတ္တရိယတာယ။ ဧတ္ထ ဟိ အာဟစ္စပဒန္တိ သုတ္တံ အဓိပ္ပေတံ။ ရသောတိ သုတ္တာနုလောမံ။ အာစရိယဝံသောတိ အာစရိယဝါဒေါ။ အဓိပ္ပါယောတိ အတ္တနော မတိ။ ကာရဏုတ္တရိယတာတိ ဣမေဟိ စတူဟိ သမေန္တံ [သမေတံ (သီ။)] ကာရဏံ။ ဣမေဟိ ခေါ, မဟာရာဇ, ပဉ္စဟိ ကာရဏေဟိ အတ္ထော သမ္ပဋိစ္ဆိတဗ္ဗော။ ဧဝမေသော ပဉ္ဟော သုဝိနိစ္ဆိတော ဟောတီ’’တိ။

‘‘ဟောတု, ဘန္တေ နာဂသေန, တထာ တံ သမ္ပဋိစ္ဆာမိ။ ဌပိတော ဟောတု အရဟာ တသ္မိံ ဝတ္ထုသ္မိံ, တသန္တု အဝသေသာ သတ္တာ, နိရယေ ပန နေရယိကာ သတ္တာ ဒုက္ခာ တိဗ္ဗာ ကဋုကာ ဝေဒနာ ဝေဒယမာနာ ဇလိတပဇ္ဇလိတသဗ္ဗင်္ဂပစ္စင်္ဂါ ရုဏ္ဏကာရုညကန္ဒိတပရိဒေဝိတလာလပ္ပိတမုခါ အသယှတိဗ္ဗဒုက္ခာဘိဘူတာ အတာဏာ အသရဏာ အသရဏီဘူတာ အနပ္ပသောကာတုရာ အန္တိမပစ္ဆိမဂတိကာ ဧကန္တသောကပရာယဏာ ဥဏှတိခိဏစဏ္ဍခရတပနတေဇဝန္တော ဘီမဘယဇနကနိနာဒမဟာသဒ္ဒါ သံသိဗ္ဗိတဆဗ္ဗိဓဇာလာမာလာကုလာ သမန္တာ သတယောဇနာနုဖရဏစ္စိဝေဂါ ကဒရိယာ တပနာ မဟာနိရယာ စဝမာနာ မစ္စုနော ဘာယန္တီ’’တိ? ‘‘အာမ, မဟာရာဇာ’’တိ။

‘‘နနု, ဘန္တေ နာဂသေန, နိရယော ဧကန္တဒုက္ခဝေဒနီယော, ကိဿ ပန တေ နေရယိကာ သတ္တာ ဧကန္တဒုက္ခဝေဒနီယာ နိရယာ စဝမာနာ မစ္စုနော ဘာယန္တိ, ကိဿ နိရယေ ရမန္တီ’’တိ? ‘‘န တေ, မဟာရာဇ, နေရယိကာ သတ္တာ နိရယေ ရမန္တိ, မုဉ္စိတုကာမာဝ တေ နိရယာ။ မရဏဿေဝ သော [မရဏဿေသော (သီ။ ဣ။)], မဟာရာဇ, အာနုဘာဝေါ, ယေန တေသံ သန္တာသော ဥပ္ပဇ္ဇတီ’’တိ။ ‘‘ဧတံ ခေါ, ဘန္တေ နာဂသေန, န သဒ္ဒဟာမိ, ယံ မုစ္စိတုကာမာနံ စုတိယာ သန္တာသော ဥပ္ပဇ္ဇတီတိ, ဟာသနီယံ , ဘန္တေ နာဂသေန, တံ ဌာနံ, ယံ တေ ပတ္ထိတံ လဘန္တိ, ကာရဏေန မံ သညာပေဟီ’’တိ။

‘‘မရဏန္တိ ခေါ, မဟာရာဇ, ဧတံ အဒိဋ္ဌသစ္စာနံ တာသနီယဋ္ဌာနံ, ဧတ္ထာယံ ဇနော တသတိ စ ဥဗ္ဗိဇ္ဇတိ စ။ ယော စ, မဟာရာဇ, ကဏှသပ္ပဿ ဘာယတိ, သော မရဏဿ ဘာယန္တော ကဏှသပ္ပဿ ဘာယတိ။ ယော စ ဟတ္ထိဿ ဘာယတိ။ပေ။။ သီဟဿ။ပေ။။ ဗျဂ္ဃဿ။ပေ။။ ဒီပိဿ။ပေ။။ အစ္ဆဿ။ပေ။။ တရစ္ဆဿ။ပေ။။ မဟိံသဿ။ပေ။။ ဂဝယဿ။ပေ။။ အဂ္ဂိဿ။ပေ။။ ဥဒကဿ။ပေ။။ ခါဏုကဿ။ပေ။။ ကဏ္ဋကဿ ဘာယတိ။ ယော စ သတ္တိယာ ဘာယတိ, သော မရဏဿ ဘာယန္တော သတ္တိယာ ဘာယတိ။ မရဏဿေဝ သော [မရဏဿေသော (သီ။ ဣ။)], မဟာရာဇ, သရသသဘာဝတေဇော [သရသဘာဝတေဇော (သီ။ ဣ။)], တဿ သရသသဘာဝတေဇေန သကိလေသာ သတ္တာ မရဏဿ တသန္တိ ဘာယန္တိ, မုစ္စိတုကာမာပိ, မဟာရာဇ, နေရယိကာ သတ္တာ မရဏဿ တသန္တိ ဘာယန္တိ။

‘‘ဣဓ, မဟာရာဇ, ပုရိသဿ ကာယေ မေဒေါ ဂဏ္ဌိ ဥပ္ပဇ္ဇေယျ။ သော တေန ရောဂေန ဒုက္ခိတော ဥပဒ္ဒဝါ ပရိမုစ္စိတုကာမော ဘိသက္ကံ သလ္လကတ္တံ အာမန္တာပေယျ။ တဿ ဝစနံ သော ဘိသက္ကော သလ္လကတ္တော သမ္ပဋိစ္ဆိတွာ တဿ ရောဂဿ ဥဒ္ဓရဏာယ ဥပကရဏံ ဥပဋ္ဌာပေယျ, သတ္ထကံ တိခိဏံ ကရေယျ , ယမကသလာကာ [ဒဟနသလာကံ (က။)] အဂ္ဂိမှိ ပက္ခိပေယျ, ခါရလဝဏံ နိသဒါယ ပိသာပေယျ, အပိ နု ခေါ, မဟာရာဇ, တဿ အာတုရဿ တိခိဏသတ္ထကစ္ဆေဒနေန ယမကသလာကာဒဟနေန ခါရလောဏပ္ပဝေသနေန တာသော ဥပ္ပဇ္ဇေယျာ’’တိ? ‘‘အာမ ဘန္တေ’’တိ။ ‘‘ဣတိ, မဟာရာဇ, တဿ အာတုရဿ ရောဂါ မုစ္စိတုကာမဿာပိ ဝေဒနာဘယာ သန္တာသော ဥပ္ပဇ္ဇတိ။ ဧဝမေဝ ခေါ, မဟာရာဇ, နိရယာ မုစ္စိတုကာမာနမ္ပိ နေရယိကာနံ သတ္တာနံ မရဏဘယာ သန္တာသော ဥပ္ပဇ္ဇတိ။

‘‘ဣဓ, မဟာရာဇ, ပုရိသော ဣဿရာပရာဓိကော ဗဒ္ဓေါ သင်္ခလိကဗန္ဓနေန ဂဗ္ဘေ ပက္ခိတ္တော ပရိမုစ္စိတုကာမော အဿ, တမေနံ သော ဣဿရော မောစေတုကာမော ပက္ကောသာပေယျ။ အပိ နု ခေါ, မဟာရာဇ, တဿ ဣဿရာပရာဓိကဿ ပုရိသဿ ‘ကတဒေါသော အဟ’န္တိ ဇာနန္တဿ ဣဿရဒဿနေန သန္တာသော ဥပ္ပဇ္ဇေယျာ’’တိ? ‘‘အာမ ဘန္တေ’’တိ။ ‘‘ဣတိ, မဟာရာဇ, တဿ ဣဿရာပရာဓိကဿ ပုရိသဿ ပရိမုစ္စိတုကာမာဿာပိ ဣဿရဘယာ သန္တာသော ဥပ္ပဇ္ဇတိ။ ဧဝမေဝ ခေါ, မဟာရာဇ, နိရယာ မုစ္စိတုကာမာနမ္ပိ နေရယိကာနံ သတ္တာနံ မရဏဘယာ သန္တာသော ဥပ္ပဇ္ဇတီ’’တိ။

‘‘အပရမ္ပိ , ဘန္တေ, ဥတ္တရိံ ကာရဏံ ဗြူဟိ, ယေနာဟံ ကာရဏေန ဩကပ္ပေယျ’’န္တိ။ ‘‘ဣဓ, မဟာရာဇ, ပုရိသော ဒဋ္ဌဝိသေန အာသီဝိသေန ဒဋ္ဌော ဘဝေယျ, သော တေန ဝိသဝိကာရေန ပတေယျ ဥပ္ပတေယျ ဝဋ္ဋေယျ ပဝဋ္ဋေယျ, အထညတရော ပုရိသော ဗလဝန္တေန မန္တပဒေန တံ ဒဋ္ဌဝိသံ အာသီဝိသံ အာနေတွာ တံ ဒဋ္ဌဝိသံ ပစ္စာစမာပေယျ, အပိ နု ခေါ, မဟာရာဇ, တဿ ဝိသဂတဿ ပုရိသဿ တသ္မိံ ဒဋ္ဌဝိသေ သပ္ပေ သောတ္ထိဟေတု ဥပဂစ္ဆန္တေ သန္တာသော ဥပ္ပဇ္ဇေယျာ’’တိ? ‘‘အာမ ဘန္တေ’’တိ။ ဣတိ, မဟာရာဇ, တထာရူပေ အဟိမှိ သောတ္ထိဟေတုပိ ဥပဂစ္ဆန္တေ တဿ သန္တာသော ဥပ္ပဇ္ဇတိ။ ဧဝမေဝ ခေါ, မဟာရာဇ, နိရယာ မုစ္စိတုကာမာနမ္ပိ နေရယိကာနံ သန္တာနံ မရဏဘယာ သန္တာသော ဥပ္ပဇ္ဇတိ။ အနိဋ္ဌံ, မဟာရာဇ, သဗ္ဗသတ္တာနံ မရဏံ, တသ္မာ နေရယိကာ သတ္တာ နိရယာ ပရိမုစ္စိတုကာမာပိ မစ္စုနော ဘာယန္တီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

မစ္စုဘာယနာဘာယနပဉ္ဟော တတိယော။

၄။ မစ္စုပါသမုတ္တိပဉ္ဟော

၄။ ‘‘ဘန္တေ နာဂသေန, ဘာသိတမ္ပေတံ ဘဂဝတာ –

‘‘‘န အန္တလိက္ခေ န သမုဒ္ဒမဇ္ဈေ၊ န ပဗ္ဗတာနံ ဝိဝရံ ပဝိဿ။

န ဝိဇ္ဇတီ သော ဇဂတိပ္ပဒေသော၊ ယတ္ထဋ္ဌိတော မုစ္စေယျ မစ္စုပါသာ’တိ။

‘‘ပုန ဘဂဝတာ ပရိတ္တာ စ ဥဒ္ဒိဋ္ဌာ။ သေယျထိဒံ, ရတနသုတ္တံ မေတ္တသုတ္တံ ခန္ဓပရိတ္တံ မောရပရိတ္တံ ဓဇဂ္ဂပရိတ္တံ အာဋာနာဋိယပရိတ္တံ အင်္ဂုလိမာလပရိတ္တံ။ ယဒိ, ဘန္တေ နာဂသေန, အာကာသဂတောပိ သမုဒ္ဒမဇ္ဈဂတောပိ ပါသာဒကုဋိလေဏဂုဟာပဗ္ဘာရဒရိဗိလဂိရိ ဝိဝရပဗ္ဗတန္တရဂတောပိ န မုစ္စတိ မစ္စုပါသာ, တေန ဟိ ပရိတ္တကမ္မံ မိစ္ဆာ။ ယဒိ ပရိတ္တကရဏေန မစ္စုပါသာ ပရိမုတ္တိ ဘဝတိ, တေန ဟိ ‘န အန္တလိက္ခေ။ပေ။။ မစ္စုပါသာ’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော ဂဏ္ဌိတောပိ ဂဏ္ဌိတရော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ , မဟာရာဇ, ဘဂဝတာ ‘န အန္တလိက္ခေ။ပေ။။ မစ္စုပါသာ’တိ, ပရိတ္တာ စ ဘဂဝတာ ဥဒ္ဒိဋ္ဌာ, တဉ္စ ပန သာဝသေသာယုကဿ ဝယသမ္ပန္နဿ အပေတကမ္မာဝရဏဿ, နတ္ထိ, မဟာရာဇ, ခီဏာယုကဿ ဌိတိယာ ကိရိယာ ဝါ ဥပက္ကမော ဝါ။

‘‘ယထာ မဟာရာဇ မတဿ ရုက္ခဿ သုက္ခဿ ကောဠာပဿ နိသ္နေဟဿ ဥပရုဒ္ဓဇီဝိတဿ ဂတာယုသင်္ခါရဿ ကုမ္ဘသဟဿေနပိ ဥဒကေ အာကိရန္တေ အလ္လတ္တံ ဝါ ပလ္လဝိတဟရိတဘာဝေါ ဝါ န ဘဝေယျ။ ဧဝမေဝ ခေါ, မဟာရာဇ, ဘေသဇ္ဇပရိတ္တကမ္မေန နတ္ထိ ခီဏာယုကဿ ဌိတိယာ ကိရိယာ ဝါ ဥပက္ကမော ဝါ, ယာနိ တာနိ, မဟာရာဇ, မဟိယာ ဩသဓါနိ ဘေသဇ္ဇာနိ, တာနိပိ ခီဏာယုကဿ အကိစ္စကရာနိ ဘဝန္တိ။ သာဝသေသာယုကံ, မဟာရာဇ, ဝယသမ္ပန္နံ အပေတကမ္မာဝရဏံ ပရိတ္တံ ရက္ခတိ ဂေါပေတိ, တဿတ္ထာယ ဘဂဝတာ ပရိတ္တာ ဥဒ္ဒိဋ္ဌာ။

‘‘ယထာ, မဟာရာဇ, ကဿကော ပရိပက္ကေ ဓညေ မတေ သဿနာဠေ ဥဒကပ္ပဝေသနံ ဝါရေယျ, ယံ ပန သဿံ တရုဏံ မေဃသန္နိဘံ ဝယသမ္ပန္နံ, တံ ဥဒကဝဍ္ဎိယာ ဝဍ္ဎတိ။ ဧဝမေဝ ခေါ, မဟာရာဇ, ခီဏာယုကဿ ဘေသဇ္ဇပရိတ္တကိရိယာ ဌပိတာ ပဋိက္ခိတ္တာ , ယေ ပန တေ မနုဿာ သာဝသေသာယုကာ ဝယသမ္ပန္နာ, တေသံ အတ္ထာယ ပရိတ္တဘေသဇ္ဇာနိ ဘဏိတာနိ, တေ ပရိတ္တဘေသဇ္ဇေဟိ ဝဍ္ဎန္တီ’’တိ။

‘‘ယဒိ, ဘန္တေ နာဂသေန, ခီဏာယုကော မရတိ, သာဝသေသာယုကော ဇီဝတိ, တေန ဟိ ပရိတ္တဘေသဇ္ဇာနိ နိရတ္ထကာနိ ဟောန္တီ’’တိ? ‘‘ဒိဋ္ဌပုဗ္ဗော ပန တယာ, မဟာရာဇ, ကောစိ ရောဂေါ ဘေသဇ္ဇေဟိ ပဋိနိဝတ္တိတော’’တိ? ‘‘အာမ, ဘန္တေ, အနေကသတာနိ ဒိဋ္ဌာနီ’’တိ။ ‘‘တေန ဟိ, မဟာရာဇ, ‘ပရိတ္တဘေသဇ္ဇကိရိယာ နိရတ္ထကာ’တိ ယံ ဝစနံ, တံ မိစ္ဆာ ဘဝတီ’’တိ။

‘‘ဒိဿန္တိ , ဘန္တေ နာဂသေန, ဝေဇ္ဇာနံ ဥပက္ကမာ ဘေသဇ္ဇပါနာနုလေပါ, တေန တေသံ ဥပက္ကမေန ရောဂေါ ပဋိနိဝတ္တတီ’’တိ။ ‘‘ပရိတ္တာနမ္ပိ, မဟာရာဇ, ပဝတ္တီယမာနာနံ သဒ္ဒေါ သုယျတိ, ဇိဝှာ သုက္ခတိ, ဟဒယံ ဗျာဝဋ္ဋတိ, ကဏ္ဌော အာတုရတိ။ တေန တေသံ ပဝတ္တေန သဗ္ဗေ ဗျာဓယော ဝူပသမန္တိ, သဗ္ဗာ ဤတိယော အပဂစ္ဆန္တီတိ။

‘‘ဒိဋ္ဌပုဗ္ဗော ပန တယာ, မဟာရာဇ, ကောစိ အဟိနာ ဒဋ္ဌော မန္တပဒေန ဝိသံ ပါတီယမာနော ဝိသံ စိက္ခဿန္တော ဥဒ္ဓမဓေါ အာစမယမာနော’’တိ? ‘‘အာမ, ဘန္တေ , အဇ္ဇေတရဟိပိ တံ လောကေ ဝတ္တတီ’’တိ။ ‘‘တေန ဟိ, မဟာရာဇ, ‘ပရိတ္တဘေသဇ္ဇကိရိယာ နိရတ္ထကာ’တိ ယံ ဝစနံ, တံ မိစ္ဆာ ဘဝတိ။ ကတပရိတ္တဉှိ, မဟာရာဇ, ပုရိသံ ဍံသိတုကာမော အဟိ န ဍံသတိ, ဝိဝဋံ မုခံ ပိဒဟတိ, စောရာနံ ဥက္ခိတ္တလဂုဠမ္ပိ န သမ္ဘဝတိ, တေ လဂုဠံ မုဉ္စိတွာ ပေမံ ကရောန္တိ, ကုပိတောပိ ဟတ္ထိနာဂေါ သမာဂန္တွာ ဥပရမတိ, ပဇ္ဇလိတမဟာအဂ္ဂိက္ခန္ဓောပိ ဥပဂန္တွာ နိဗ္ဗာယတိ, ဝိသံ ဟလာဟလမ္ပိ ခါယိတံ အဂဒံ သမ္ပဇ္ဇတိ, အာဟာရတ္ထံ ဝါ ဖရတိ, ဝဓကာ ဟန္တုကာမာ ဥပဂန္တွာ ဒါသဘူတာ သမ္ပဇ္ဇန္တိ, အက္ကန္တောပိ ပါသော န သံဝရတိ [န သံစရတိ (သီ။)]။

‘‘သုတပုဗ္ဗံ ပန တယာ, မဟာရာဇ, ‘မောရဿ ကတပရိတ္တဿ သတ္တဝဿသတာနိ လုဒ္ဒကော နာသက္ခိ ပါသံ ဥပနေတုံ, အကတပရိတ္တဿ တံ ယေဝ ဒိဝသံ ပါသံ ဥပနေသီ’’တိ ? ‘‘အာမ, ဘန္တေ, သုယျတိ, အဗ္ဘုဂ္ဂတော သော သဒ္ဒေါ သဒေဝကေ လောကေ’’တိ။ ‘‘တေန ဟိ, မဟာရာဇ ‘ပရိတ္တဘေသဇ္ဇကိရိယာ နိရတ္ထကာ’တိ ယံ ဝစနံ, တံ မိစ္ဆာ ဘဝတိ။

‘‘သုတပုဗ္ဗံ ပန တယာ, မဟာရာဇ, ‘ဒါနဝေါ ဘရိယံ ပရိရက္ခန္တော သမုဂ္ဂေ ပက္ခိပိတွာ ဂိလိတွာ ကုစ္ဆိနာ ပရိဟရတိ, အထေကော ဝိဇ္ဇာဓရော တဿ ဒါနဝဿ မုခေန ပဝိသိတွာ တာယ သဒ္ဓိံ အဘိရမတိ, ယဒါ သော ဒါနဝေါ အညာသိ, အထ သမုဂ္ဂံ ဝမိတွာ ဝိဝရိ, သဟ သမုဂ္ဂေ ဝိဝဋေ ဝိဇ္ဇာဓရော ယထာကာမံ [ယေန ကာမံ (က။)] ပက္ကာမီ’’တိ? ‘‘အာမ, ဘန္တေ, သုယျတိ, အဗ္ဘုဂ္ဂတော သောပိ သဒ္ဒေါ သဒေဝကေ လောကေ’’တိ။ ‘‘နနု သော, မဟာရာဇ, ဝိဇ္ဇာဓရော ပရိတ္တဗလေန [မန္တဗလေန (?)] ဂဟဏာ မုတ္တော’’တိ။ ‘‘အာမ ဘန္တေ’’တိ။ ‘‘တေန ဟိ, မဟာရာဇ, အတ္ထိ ပရိတ္တဗလံ။

‘‘သုတပုဗ္ဗံ ပန တယာ, မဟာရာဇ, ‘အပရောပိ ဝိဇ္ဇာဓရော ဗာရာဏသိရညော အန္တေပုရေ မဟေသိယာ သဒ္ဓိံ သမ္ပဒုဋ္ဌော [သံသဋ္ဌော (သီ။)] ဂဟဏပ္ပတ္တော သမာနော ခဏေန အဒဿနံ ဂတော မန္တဗလေနာ’’တိ။ ‘‘အာမ, ဘန္တေ, သုယျတီ’’တိ။ ‘‘နနု သော, မဟာရာဇ, ဝိဇ္ဇာဓရော ပရိတ္တဗလေန ဂဟဏာ မုတ္တော’’တိ? ‘‘အာမ ဘန္တေ’’တိ။ ‘‘တေန ဟိ, မဟာရာဇ, အတ္ထိ ပရိတ္တဗလ’’န္တိ။

‘‘ဘန္တေ နာဂသေန, ‘ကိံ သဗ္ဗေ ယေဝ ပရိတ္တံ ရက္ခတီ’တိ? ‘‘ဧကစ္စေ, မဟာရာဇ, ရက္ခတိ, ဧကစ္စေ န ရက္ခတီ’’တိ။ ‘‘တေန ဟိ, ဘန္တေ နာဂသေန, ပရိတ္တံ န သဗ္ဗတ္ထိက’’န္တိ? ‘‘အပိ နု ခေါ, မဟာရာဇ, ဘောဇနံ သဗ္ဗေသံ ဇီဝိတံ ရက္ခတီ’’တိ? ‘‘ဧကစ္စေ, ဘန္တေ , ရက္ခတိ, ဧကစ္စေ န ရက္ခတီ’’တိ။ ‘‘ကိံ ကာရဏာ’’တိ။ ‘‘ယတော, ဘန္တေ, ဧကစ္စေ တံ ယေဝ ဘောဇနံ အတိဘုဉ္ဇိတွာ ဝိသူစိကာယ မရန္တီ’’တိ။ ‘‘တေန ဟိ, မဟာရာဇ, ဘောဇနံ န သဗ္ဗေသံ ဇီဝိတံ ရက္ခတီ’’တိ? ‘‘ဒွီဟိ, ဘန္တေ နာဂသေန, ကာရဏေဟိ ဘောဇနံ ဇီဝိတံ ဟရတိ အတိဘုတ္တေန ဝါ ဥသ္မာဒုဗ္ဗလတာယ ဝါ, အာယုဒဒံ, ဘန္တေ နာဂသေန, ဘောဇနံ ဒုရုပစာရေန ဇီဝိတံ ဟရတီ’’တိ။ ‘‘ဧဝမေဝ ခေါ, မဟာရာဇ, ပရိတ္တံ ဧကစ္စေ ရက္ခတိ, ဧကစ္စေ န ရက္ခတိ။

‘‘တီဟိ, မဟာရာဇ, ကာရဏေဟိ ပရိတ္တံ န ရက္ခတိ ကမ္မာဝရဏေန, ကိလေသာဝရဏေန, အသဒ္ဒဟနတာယ။ သတ္တာနုရက္ခဏံ, မဟာရာဇ, ပရိတ္တံ အတ္တနာ ကတေန အာရက္ခံ ဇဟတိ, ယထာ, မဟာရာဇ, မာတာ ပုတ္တံ ကုစ္ဆိဂတံ ပေါသေတိ, ဟိတေန ဥပစာရေန ဇနေတိ, ဇနယိတွာ အသုစိမလသိင်္ဃာဏိကမပနေတွာ ဥတ္တမဝရသုဂန္ဓံ ဥပလိမ္ပတိ, သော အပရေန သမယေန ပရေသံ ပုတ္တေ အက္ကောသန္တေ ဝါ ပဟရန္တေ ဝါ ပဟာရံ ဒေတိ။ တေ တဿ ကုဇ္ဈိတွာ ပရိသာယ အာကဍ္ဎိတွာ တံ ဂဟေတွာ သာမိနော ဥပနေန္တိ, ယဒိ ပန တဿာ ပုတ္တော အပရဒ္ဓေါ ဟောတိ ဝေလာတိဝတ္တော။ အထ နံ သာမိနော မနုဿာ အာကဍ္ဎယမာနာ ဒဏ္ဍမုဂ္ဂရဇာဏုမုဋ္ဌီဟိ တာဠေန္တိ ပေါထေန္တိ, အပိ နု ခေါ, မဟာရာဇ, တဿ မာတာ လဘတိ အာကဍ္ဎနပရိကဍ္ဎနံ ဂါဟံ သာမိနော ဥပနယနံ ကာတု’’န္တိ? ‘‘န ဟိ ဘန္တေ’’တိ။ ‘‘ကေန ကာရဏေန, မဟာရာဇာ’’တိ။ ‘‘အတ္တနော, ဘန္တေ, အပရာဓေနာ’’တိ။ ‘‘ဧဝမေဝ ခေါ, မဟာရာဇ, သတ္တာနံ အာရက္ခံ ပရိတ္တံ အတ္တနော အပရာဓေန ဝဉ္ဈံ ကရောတီ’’တိ [ကာရေတီတိ (သီ။)]။ ‘‘သာဓု, ဘန္တေ နာဂသေန, သုဝိနိစ္ဆိတော ပဉ္ဟော, ဂဟနံ အဂဟနံ ကတံ, အန္ဓကာရော အာလောကော ကတော, ဝိနိဝေဌိတံ ဒိဋ္ဌိဇာလံ, တွံ ဂဏိဝရပဝရမာသဇ္ဇာ’’တိ။

မစ္စုပါသမုတ္တိပဉ္ဟော စတုတ္ထော။

၅။ ဗုဒ္ဓလာဘန္တရာယပဉ္ဟော

၅။ ‘‘ဘန္တေ နာဂသေန, တုမှေ ဘဏထ ‘လာဘီ တထာဂတော စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရာန’န္တိ။ ပုန စ တထာဂတော ပဉ္စသာလံ ဗြာဟ္မဏဂါမံ ပိဏ္ဍာယ ပဝိသိတွာ ကိဉ္စိဒေဝ အလဘိတွာ ယထာဓေါတေန ပတ္တေန နိက္ခန္တောတိ။ ယဒိ, ဘန္တေ နာဂသေန, တထာဂတော လာဘီ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရာနံ, တေန ဟိ ပဉ္စသာလံ ဗြာဟ္မဏဂါမံ ပိဏ္ဍာယ ပဝိသိတွာ ကိဉ္စိဒေဝ အလဘိတွာ ယထာဓေါတေန ပတ္တေန နိက္ခန္တောတိ ယံ ဝစနံ, တံ မိစ္ဆာ။ ယဒိ ပဉ္စသာလံ ဗြာဟ္မဏဂါမံ ပိဏ္ဍာယ ပဝိသိတွာ ကိဉ္စိဒေဝ အလဘိတွာ ယထာဓေါတေန ပတ္တေန နိက္ခန္တော, တေန ဟိ လာဘီ တထာဂတော စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရာနန္တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော သုမဟန္တော ဒုန္နိဗ္ဗေဌော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘လာဘီ, မဟာရာဇ, တထာဂတော စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရာနံ, ပဉ္စသာလဉ္စ ဗြာဟ္မဏဂါမံ ပိဏ္ဍာယ ပဝိသိတွာ ကိဉ္စိဒေဝ အလဘိတွာ ယထာဓေါတေန ပတ္တေန နိက္ခန္တော, တဉ္စ ပန မာရဿ ပါပိမတော ကာရဏာ’’တိ။ ‘‘တေန ဟိ, ဘန္တေ နာဂသေန, ဘဂဝတော ဂဏနပထံ ဝီတိဝတ္တကပ္ပေ [ဂဏနပထဝီတိဝတ္တေ ကပ္ပေ (သီ။)] အဘိသင်္ခတံ ကုသလံ ကိန္တိ နိဋ္ဌိတံ, အဓုနုဋ္ဌိတေန မာရေန ပါပိမတာ တဿ ကုသလဿ ဗလဝေဂံ [တံ ကုသလဗလဝေဂဝိပ္ဖာရံ (သီ။)] ကိန္တိ ပိဟိတံ, တေန ဟိ, ဘန္တေ နာဂသေန, တသ္မိံ ဝတ္ထုသ္မိံ ဒွီသု ဌာနေသု ဥပဝါဒေါ အာဂစ္ဆတိ, ကုသလတောပိ အကုသလံ ဗလဝတရံ ဟောတိ, ဗုဒ္ဓဗလတောပိ မာရဗလံ ဗလဝတရံ ဟောတီတိ, တေန ဟိ ရုက္ခဿ မူလတောပိ အဂ္ဂံ ဘာရတရံ ဟောတိ, ဂုဏသမ္ပရိကိဏ္ဏတောပိ ပါပိယံ ဗလဝတရံ ဟောတီ’’တိ။ ‘‘န, မဟာရာဇ, တာဝတကေန ကုသလတောပိ အကုသလံ ဗလဝတရံ နာမ ဟောတိ, န ဗုဒ္ဓဗလတောပိ မာရဗလံ ဗလဝတရံ နာမ ဟောတိ။ အပိ စေတ္ထ ကာရဏံ ဣစ္ဆိတဗ္ဗံ။

‘‘ယထာ, မဟာရာဇ, ပုရိသော ရညော စက္ကဝတ္တိဿ မဓုံ ဝါ မဓုပိဏ္ဍိကံ ဝါ အညံ ဝါ ဥပါယနံ အဘိဟရေယျ, တမေနံ ရညော ဒွါရပါလော ဧဝံ ဝဒေယျ ‘အကာလော, ဘော, အယံ ရညော ဒဿနာယ, တေန ဟိ, ဘော, တဝ ဥပါယနံ ဂဟေတွာ သီဃသီဃံ ပဋိနိဝတ္တ, ပုရေ တဝ ရာဇာ ဒဏ္ဍံ ဓါရေဿတီ’တိ [မာ တေ ရာဇာ ဒဏ္ဍံ ပါပေယျာတိ (သီ။)]။ တတော သော ပုရိသော ဒဏ္ဍဘယာ တသိတော ဥဗ္ဗိဂ္ဂေါ တံ ဥပါယနံ အာဒါယ သီဃသီဃံ ပဋိနိဝတ္တေယျ, အပိ နု ခေါ သော, မဟာရာဇ, ရာဇာ စက္ကဝတ္တီ တာဝတကေန ဥပါယနဝိကလမတ္တကေန ဒွါရပါလတော ဒုဗ္ဗလတရော နာမ ဟောတိ , အညံ ဝါ ပန ကိဉ္စိ ဥပါယနံ န လဘေယျာ’’တိ? ‘‘န ဟိ, ဘန္တေ, ဣဿာပကတော သော, ဘန္တေ, ဒွါရပါလော ဥပါယနံ နိဝါရေသိ, အညေန ပန ဒွါရေန သတသဟဿဂုဏမ္ပိ ရညော ဥပါယနံ ဥပေတီ’’တိ ။ ‘‘ဧဝမေဝ ခေါ, မဟာရာဇ, ဣဿာပကတော မာရော ပါပိမာ ပဉ္စသာလကေ ဗြာဟ္မဏဂဟပတိကေ အနွာဝိသိ, အညာနိ ပန အနေကာနိ ဒေဝတာသတသဟဿာနိ အမတံ ဒိဗ္ဗံ ဩဇံ ဂဟေတွာ ဥပဂတာနိ ‘ဘဂဝတော ကာယေ ဩဇံ ဩဒဟိဿာမာ’တိ ဘဂဝန္တံ နမဿမာနာနိ ပဉ္ဇလိကာနိ ဌိတာနီ’’တိ။

‘‘ဟောတု, ဘန္တေ နာဂသေန, သုလဘာ ဘဂဝတော စတ္တာရော ပစ္စယာ လောကေ ဥတ္တမပုရိသဿ, ယာစိတောဝ ဘဂဝါ ဒေဝမနုဿောဟိ စတ္တာရော ပစ္စယေ ပရိဘုဉ္ဇတိ, အပိ စ ခေါ ပန မာရဿ ယော အဓိပ္ပါယော, သော တာဝတကေန သိဒ္ဓေါ, ယံ သော ဘဂဝတော ဘောဇနဿ အန္တရာယမကာသိ။ ဧတ္ထ မေ, ဘန္တေ, ကင်္ခါ န ဆိဇ္ဇတိ, ဝိမတိဇာတောဟံ တတ္ထ သံသယပက္ခန္ဒော။ န မေ တတ္ထ မာနသံ ပက္ခန္ဒတိ, ယံ တထာဂတဿ အရဟတော သမ္မာသမ္ဗုဒ္ဓဿ သဒေဝကေ လောကေ အဂ္ဂပုဂ္ဂလဝရဿ ကုသလဝရပုညသမ္ဘဝဿ အသမသမဿ အနုပမဿ အပ္ပဋိသမဿ ဆဝကံ လာမကံ ပရိတ္တံ ပါပံ အနရိယံ ဝိပန္နံ မာရော လာဘန္တရာယမကာသီ’’တိ။

‘‘စတ္တာရော ခေါ, မဟာရာဇ, အန္တရာယာ အဒိဋ္ဌန္တရာယော ဥဒ္ဒိဿ ကတန္တရာယော ဥပက္ခဋန္တရာယော ပရိဘောဂန္တရာယောတိ။ တတ္ထ ကတမော အဒိဋ္ဌန္တရာယော? အနောဒိဿ အဒဿနေန အနဘိသင်္ခတံ ကောစိ အန္တရာယံ ကရောတိ ‘ကိံ ပရဿ ဒိန္နေနာ’တိ, အယံ အဒိဋ္ဌန္တရာယော နာမ။

‘‘ကတမော ဥဒ္ဒိဿ ကတန္တရာယော? ဣဓေကစ္စံ ပုဂ္ဂလံ ဥပဒိသိတွာ ဥဒ္ဒိဿ ဘောဇနံ ပဋိယတ္တံ ဟောတိ, တံ ကောစိ အန္တရာယံ ကရောတိ, အယံ ဥဒ္ဒိဿ ကတန္တရာယော နာမ။

‘‘ကတမော ဥပက္ခဋန္တရာယော? ဣဓ ယံ ကိဉ္စိ ဥပက္ခဋံ ဟောတိ အပ္ပဋိဂ္ဂဟိတံ, တတ္ထ ကောစိ အန္တရာယံ ကရောတိ, အယံ ဥပက္ခဋန္တရာယော နာမ။

‘‘ကတမော ပရိဘောဂန္တရာယော? ဣဓ ယံ ကိဉ္စိ ပရိဘောဂံ, တတ္ထ ကောစိ အန္တရာယံ ကရောတိ, အယံ ပရိဘောဂန္တရာယော နာမ။ ဣမေ ခေါ, မဟာရာဇ, စတ္တာရော အန္တရာယာ။

‘‘ယံ ပန မာရော ပါပိမာ ပဉ္စသာလကေ ဗြာဟ္မဏဂဟပတိကေ အနွာဝိသိ, တံ နေဝ ဘဂဝတော ပရိဘောဂံ န ဥပက္ခဋံ န ဥဒ္ဒိဿကတံ, အနာဂတံ အသမ္ပတ္တံ အဒဿနေန အန္တရာယံ ကတံ, တံ ပန နေကဿ ဘဂဝတော ယေဝ, အထ ခေါ ယေ တေ တေန သမယေန နိက္ခန္တာ အဗ္ဘာဂတာ, သဗ္ဗေပိ တေ တံ ဒိဝသံ ဘောဇနံ န လဘိံသု, နာဟံ တံ, မဟာရာဇ, ပဿာမိ သဒေဝကေ လောကေ သမာရကေ သဗြဟ္မကေ သဿမဏဗြာဟ္မဏိယာ ပဇာယ သဒေဝမနုဿာယ, ယော တဿ ဘဂဝတော ဥဒ္ဒိဿ ကတံ ဥပက္ခဋံ ပရိဘောဂံ အန္တရာယံ ကရေယျ။ သစေ ကောစိ ဣဿာယ ဥဒ္ဒိဿ ကတံ ဥပက္ခဋံ ပရိဘောဂံ အန္တရာယံ ကရေယျ, ဖလေယျ တဿ မုဒ္ဓါ သတဓါ ဝါ သဟဿဓါ ဝါ။

‘‘စတ္တာရောမေ, မဟာရာဇ, တထာဂတဿ ကေနစိ အနာဝရဏီယာ ဂုဏာ။ ကတမေ စတ္တာရော? လာဘော, မဟာရာဇ, ဘဂဝတော ဥဒ္ဒိဿ ကတော ဥပက္ခဋော န သက္ကာ ကေနစိ အန္တရာယံ ကာတုံ; သရီရာနုဂတာ , မဟာရာဇ, ဘဂဝတော ဗျာမပ္ပဘာ န သက္ကာ ကေနစိ အန္တရာယံ ကာတုံ; သဗ္ဗညုတံ, မဟာရာဇ, ဘဂဝတော ဉာဏရတနံ န သက္ကာ ကေနစိ အန္တရာယံ ကာတုံ; ဇီဝိတံ, မဟာရာဇ, ဘဂဝတော န သက္ကာ ကေနစိ အန္တရာယံ ကာတုံ။ ဣမေ ခေါ, မဟာရာဇ, စတ္တာရော တထာဂတဿ ကေနစိ အနာဝရဏီယာ ဂုဏာ, သဗ္ဗေပေတေ, မဟာရာဇ, ဂုဏာ ဧကရသာ အရောဂါ အကုပ္ပါ အပရူပက္ကမာ အဖုသာနိ ကိရိယာနိ။ အဒဿနေန, မဟာရာဇ, မာရော ပါပိမာ နိလီယိတွာ ပဉ္စသာလကေ ဗြာဟ္မဏဂဟပတိကေ အနွာဝိသိ။

‘‘ယထာ, မဟာရာဇ, ရညော ပစ္စန္တေ ဒေသေ ဝိသမေ အဒဿနေန နိလီယိတွာ စောရာ ပန္ထံ ဒူသေန္တိ။ ယဒိ ပန ရာဇာ တေ စောရေ ပဿေယျ, အပိ နု ခေါ တေ စောရာ သောတ္ထိံ လဘေယျု’’န္တိ? ‘‘န ဟိ, ဘန္တေ, ဖရသုနာ ဖာလာပေယျ သတဓါ ဝါ သဟဿဓါ ဝါ’’တိ။ ‘‘ဧဝမေဝ ခေါ, မဟာရာဇ, အဒဿနေန မာရော ပါပိမာ နိလီယိတွာ ပဉ္စသာလကေ ဗြာဟ္မဏဂဟပတိကေ အနွာဝိသိ။

‘‘ယထာ ဝါ ပန, မဟာရာဇ, ဣတ္ထီ သပတိကာ အဒဿနေန နိလီယိတွာ ပရပုရိသံ သေဝတိ, ဧဝမေဝ ခေါ, မဟာရာဇ, အဒဿနေန မာရော ပါပိမာ နိလီယိတွာ ပဉ္စသာလကေ ဗြာဟ္မဏဂဟပတိကေ အနွာဝိသိ။ ယဒိ, မဟာရာဇ, ဣတ္ထီ သာမိကဿ သမ္မုခါ ပရပုရိသံ သေဝတိ, အပိ နု ခေါ သာ ဣတ္ထီ သောတ္ထိံ လဘေယျာ’’တိ? ‘‘န ဟိ, ဘန္တေ, ဟနေယျာပိ တံ, ဘန္တေ, သာမိကော ဝဓေယျာပိ ဗန္ဓေယျာပိ ဒါသိတ္တံ ဝါ ဥပနေယျာ’’တိ။ ‘‘ဧဝမေဝ ခေါ, မဟာရာဇ, အဒဿနေန မာရော ပါပိမာ နိလီယိတွာ ပဉ္စသာလကေ ဗြာဟ္မဏဂဟပတိကေ အနွာဝိသိ။ ယဒိ, မဟာရာဇ, မာရော ပါပိမာ ဘဂဝတော ဥဒ္ဒိဿ ကတံ ဥပက္ခဋံ ပရိဘောဂံ အန္တရာယံ ကရေယျ, ဖလေယျ တဿ မုဒ္ဓါ သတဓါ ဝါ သဟဿဓါ ဝါ’’တိ။ ‘‘ဧဝမေတံ, ဘန္တေ နာဂသေန, စောရိကာယ ကတံ မာရေန ပါပိမတာ, နိလီယိတွာ မာရော ပါပိမာ ပဉ္စသာလကေ ဗြာဟ္မဏဂဟပတိကေ အနွာဝိသိ။ သစေ သော, ဘန္တေ, မာရော ပါပိမာ ဘဂဝတော ဥဒ္ဒိဿ ကတံ ဥပက္ခဋံ ပရိဘောဂံ အန္တရာယံ ကရေယျ, မုဒ္ဓါ ဝါဿ ဖလေယျ သတဓါ ဝါ သဟဿဓါ ဝါ, ကာယော ဝါဿ ဘုသမုဋ္ဌိ ဝိယ ဝိကိရေယျ, သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဗုဒ္ဓလာဘန္တရာယပဉ္ဟော ပဉ္စမော။

၆။ အပုညပဉ္ဟော

၆။ ‘‘ဘန္တေ နာဂသေန, တုမှေ ဘဏထ ‘ယော အဇာနန္တော ပါဏာတိပါတံ ကရောတိ, သော ဗလဝတရံ အပုညံ ပသဝတီ’တိ။ ပုန စ ဘဂဝတာ ဝိနယပညတ္တိယာ ဘဏိတံ ‘အနာပတ္တိ အဇာနန္တဿာ’တိ။ ယဒိ, ဘန္တေ နာဂသေန, အဇာနိတွာ ပါဏာတိပါတံ ကရောန္တော ဗလဝတရံ အပုညံ ပသဝတိ, တေန ဟိ ‘အနာပတ္တိ အဇာနန္တဿာ’တိ ယံ ဝစနံ, တံ မိစ္ဆာ။ ယဒိ အနာပတ္တိ အဇာနန္တဿ, တေန ဟိ ‘အဇာနိတွာ ပါဏာတိပါတံ ကရောန္တော ဗလဝတရံ အပုညံ ပသဝတီ’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော ဒုရုတ္တရော ဒုရတိက္ကမော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘ယော အဇာနန္တော ပါဏာတိပါတံ ကရောတိ, သော ဗလဝတရံ အပုညံ ပသဝတီ’တိ။ ပုန စ ဝိနယပညတ္တိယာ ဘဂဝတာ ဘဏိတံ ‘အနာပတ္တိ အဇာနန္တဿာ’တိ။ တတ္ထ အတ္ထန္တရံ အတ္ထိ။ ကတမံ အတ္ထန္တရံ ? အတ္ထိ, မဟာရာဇ, အာပတ္တိ သညာဝိမောက္ခာ, အတ္ထိ အာပတ္တိ နောသညာဝိမောက္ခာ။ ယာယံ, မဟာရာဇ, အာပတ္တိ သညာဝိမောက္ခာ, တံ အာပတ္တိံ အာရဗ္ဘ ဘဂဝတာ ဘဏိတံ ‘အနာပတ္တိ အဇာနန္တဿာ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

အပုညပဉ္ဟော ဆဋ္ဌော။

၇။ ဘိက္ခုသံဃပရိဟရဏပဉ္ဟော

၇။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘တထာဂတဿ ခေါ, အာနန္ဒ, န ဧဝံ ဟောတိ ‘‘အဟံ ဘိက္ခုသသံဃံ ပရိဟရိဿာမီ’’’တိ ဝါ, ‘‘မမုဒ္ဒေသိကော ဘိက္ခုသံဃော’’တိ ဝါ’တိ။ ပုန စ မေတ္တေယျဿ ဘဂဝတော သဘာဝဂုဏံ ပရိဒီပယမာနေန ဘဂဝတာ ဧဝံ ဘဏိတံ ‘‘သော အနေကသဟဿံ ဘိက္ခုသသံဃံ ပရိဟရိဿတိ, သေယျထာပိ အဟံ ဧတရဟိ အနေကသတံ ဘိက္ခုသသံဃံ ပရိဟရာမီ’’တိ။ ယဒိ, ဘန္တေ နာဂသေန, ဘဂဝတာ ဘဏိတံ ‘တထာဂတဿ ခေါ, အာနန္ဒ, န ဧဝံ ဟောတိ ‘‘အဟံ ဘိက္ခုသသံဃံ ပရိဟရိဿာမီ’’တိ ဝါ, ‘‘မမုဒ္ဒေသိကော ဘိက္ခုသံဃော’’တိ ဝါ’တိ, တေန ဟိ အနေကသတံ ဘိက္ခုသသံဃံ ပရိဟရာမီတိ ယံ ဝစနံ, တံ မိစ္ဆာ။ ယဒိ တထာဂတေန ဘဏိတံ ‘သော အနေကသဟဿံ ဘိက္ခုသသံဃံ ပရိဟရိဿတိ, သေယျထာပိ အဟံ ဧတရဟိ အနေကသတံ ဘိက္ခုသသံဃံ ပရိဟရာမီ’တိ, တေန ဟိ တထာဂတဿ ခေါ, အာနန္ဒ, န ဧဝံ ဟောတိ ‘အဟံ ဘိက္ခုသသံဃံ ပရိဟရိဿာမီ’တိ ဝါ, ‘မမုဒ္ဒေသိကော ဘိက္ခုသံဃော’တိ ဝါတိ တမ္ပိ ဝစနံ မိစ္ဆာ, အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘တထာဂတဿ ခေါ, အာနန္ဒ, န ဧဝံ ဟောတိ ‘‘အဟံ ဘိက္ခုသသံဃံ ပရိဟရိဿာမီ’’တိ ဝါ, ‘‘မမုဒ္ဒေသိကော ဘိက္ခုသံဃော’’တိ ဝါ’တိ။ ပုန စ မေတ္တေယျဿာပိ ဘဂဝတော သဘာဝဂုဏံ ပရိဒီပယမာနေန ဘဂဝတာ ဘဏိတံ ‘သော အနေကသဟဿံ ဘိက္ခုသသံဃံ ပရိဟရိဿတိ, သေယျထာပိ အဟံ ဧတရဟိ အနေကသတံ ဘိက္ခုသသံဃံ ပရိဟရာမီ’တိ။ ဧတသ္မိဉ္စ, မဟာရာဇ, ပဉ္ဟေ ဧကော အတ္ထော သာဝသေသော, ဧကော အတ္ထော နိရဝသေသော။ န, မဟာရာဇ, တထာဂတော ပရိသာယ အနုဂါမိကော, ပရိသာ ပန တထာဂတဿ အနုဂါမိကာ ။ သမ္မုတိ, မဟာရာဇ, ဧသာ ‘အဟ’န္တိ ‘မမာ’တိ, န ပရမတ္ထော ဧသော, ဝိဂတံ, မဟာရာဇ, တထာဂတဿ ပေမံ, ဝိဂတော သိနေဟော, ‘မယှ’န္တိပိ တထာဂတဿ ဂဟဏံ နတ္ထိ, ဥပါဒါယ ပန အဝဿယော ဟောတိ။

‘‘ယထာ, မဟာရာဇ, ပထဝီ ဘူမဋ္ဌာနံ သတ္တာနံ ပတိဋ္ဌာ ဟောတိ ဥပဿယံ, ပထဝိဋ္ဌာ စေတေ သတ္တာ, န စ မဟာပထဝိယာ ‘မယ္ဟေတေ’တိ အပေက္ခာ ဟောတိ, ဧဝမေဝ ခေါ, မဟာရာဇ, တထာဂတော သဗ္ဗသတ္တာနံ ပတိဋ္ဌာ ဟောတိ ဥပဿယံ, တထာဂတဋ္ဌာ [တထာဂတပတိဋ္ဌာ ဧဝ (သီ။)] စေတေ သတ္တာ, န စ တထာဂတဿ ‘မယ္ဟေတေ’တိ အပေက္ခာ ဟောတိ။ ယထာ ဝါ ပန, မဟာရာဇ, မဟတိမဟာမေဃော အဘိဝဿန္တော တိဏရုက္ခပသုမနုဿာနံ ဝုဍ္ဎိံ ဒေတိ သန္တတိံ အနုပါလေတိ။ ဝုဋ္ဌူပဇီဝိနော စေတေ သတ္တာ သဗ္ဗေ, န စ မဟာမေဃဿ ‘မယ္ဟေတေ’တိ အပေက္ခာ ဟောတိ။ ဧဝမေဝ ခေါ, မဟာရာဇ, တထာဂတော သဗ္ဗသတ္တာနံ ကုသလဓမ္မေ ဇနေတိ အနုပါလေတိ, သတ္ထူပဇီဝိနော စေတေ သတ္တာ သဗ္ဗေ, န စ တထာဂတဿ ‘မယ္ဟေတေ’တိ အပေက္ခာ ဟောတိ။ တံ ကိဿ ဟေတု? အတ္တာနုဒိဋ္ဌိယာ ပဟီနတ္တာ’’တိ။

‘‘သာဓု, ဘန္တေ နာဂသေန, သုနိဗ္ဗေဌိတော ပဉ္ဟော ဗဟုဝိဓေဟိ ကာရဏေဟိ, ဂမ္ဘီရော ဥတ္တာနီကတော, ဂဏ္ဌိ ဘိန္နော, ဂဟနံ အဂဟနံ ကတံ, အန္ဓကာရော အာလောကော ကတော, ဘဂ္ဂါ ပရဝါဒါ, ဇိနပုတ္တာနံ စက္ခုံ ဥပ္ပါဒိတ’’န္တိ။

ဘိက္ခုသံဃပရိဟရဏပဉ္ဟော သတ္တမော။

၈။ အဘေဇ္ဇပရိသပဉ္ဟော

၈။ ‘‘ဘန္တေ နာဂသေန, တုမှေ ဘဏထ ‘တထာဂတော အဘေဇ္ဇပရိသော’တိ, ပုန စ ဘဏထ ‘ဒေဝဒတ္တေန ဧကပ္ပဟာရံ ပဉ္စ ဘိက္ခုသတာနိ ဘိန္နာနီ’တိ။ ယဒိ, ဘန္တေ နာဂသေန, တထာဂတော အဘေဇ္ဇပရိသော, တေန ဟိ ဒေဝဒတ္တေန ဧကပ္ပဟာရံ ပဉ္စ ဘိက္ခုသတာနိ ဘိန္နာနီတိ ယံ ဝစနံ, တံ မိစ္ဆာ။ ယဒိ ဒေဝဒတ္တေန ဧကပ္ပဟာရံ ပဉ္စ ဘိက္ခုသတာနိ ဘိန္နာနိ, တေန ဟိ ‘တထာဂတော အဘေဇ္ဇပရိသော’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, ဂမ္ဘီရော ဒုန္နိဝေဌိယော, ဂဏ္ဌိတောပိ ဂဏ္ဌိတရော, ဧတ္ထာယံ ဇနော အာဝဋော နိဝုတော ဩဝုတော ပိဟိတော ပရိယောနဒ္ဓေါ, ဧတ္ထ တဝ ဉာဏဗလံ ဒဿေဟိ ပရဝါဒေသူ’’တိ။

‘‘အဘေဇ္ဇပရိသော, မဟာရာဇ, တထာဂတော, ဒေဝဒတ္တေန စ ဧကပ္ပဟာရံ ပဉ္စ ဘိက္ခုသတာနိ ဘိန္နာနိ, တဉ္စ ပန ဘေဒကဿ ဗလေန, ဘေဒကေ ဝိဇ္ဇမာနေ နတ္ထိ, မဟာရာဇ, အဘေဇ္ဇံ နာမ။ ဘေဒကေ သတိ မာတာပိ ပုတ္တေန ဘိဇ္ဇတိ, ပုတ္တောပိ မာတရာ ဘိဇ္ဇတိ, ပိတာပိ ပုတ္တေန ဘိဇ္ဇတိ, ပုတ္တောပိ ပိတရာ ဘိဇ္ဇတိ, ဘာတာပိ ဘဂိနိယာ ဘိဇ္ဇတိ, ဘဂိနီပိ ဘာတရာ ဘိဇ္ဇတိ, သဟာယောပိ သဟာယေန ဘိဇ္ဇတိ, နာဝါပိ နာနာဒါရုသံဃဋိတာ ဦမိဝေဂသမ္ပဟာရေန ဘိဇ္ဇတိ, ရုက္ခောပိ မဓုကပ္ပသမ္ပန္နဖလော အနိလဗလဝေဂါဘိဟတော ဘိဇ္ဇတိ, သုဝဏ္ဏမ္ပိ ဇာတိမန္တံ [ဇာတရူပမ္ပိ (သီ။)] လောဟေန ဘိဇ္ဇတိ။ အပိ စ, မဟာရာဇ, နေသော အဓိပ္ပါယော ဝိညူနံ, နေသာ ဗုဒ္ဓါနံ အဓိမုတ္တိ, နေသော ပဏ္ဍိတာနံ ဆန္ဒော ‘တထာဂတော ဘေဇ္ဇပရိသော’တိ။ အပိ စေတ္ထ ကာရဏံ အတ္ထိ, ယေန ကာရဏေန တထာဂတော ဝုစ္စတိ ‘အဘေဇ္ဇပရိသော’တိ။ ကတမံ ဧတ္ထ ကာရဏံ? တထာဂတဿ, မဟာရာဇ, ကတေန အဒါနေန ဝါ အပ္ပိယဝစနေန ဝါ အနတ္ထစရိယာယ ဝါ အသမာနတ္တတာယ ဝါ ယတော ကုတောစိ စရိယံ စရန္တဿပိ ပရိသာ ဘိန္နာတိ န သုတပုဗ္ဗံ, တေန ကာရဏေန တထာဂတော ဝုစ္စတိ ‘အဘေဇ္ဇပရိသော’တိ။ တယာပေတံ, မဟာရာဇ, ဉာတဗ္ဗံ ‘အတ္ထိ ကိဉ္စိ နဝင်္ဂေ ဗုဒ္ဓဝစနေ သုတ္တာဂတံ, ဣမိနာ နာမ ကာရဏေန ဗောဓိသတ္တဿ ကတေန တထာဂတဿ ပရိသာ ဘိန္နာ’တိ? ‘‘နတ္ထိ ဘန္တေ, နော စေတံ လောကေ ဒိဿတိ နောပိ သုယျတိ။ သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

အဘေဇ္ဇပရိသပဉ္ဟော အဋ္ဌမော။

အဘေဇ္ဇဝဂ္ဂေါ ဒုတိယော။

ဣမသ္မိံ ဝဂ္ဂေ အဋ္ဌ ပဉှာ။

၃။ ပဏာမိတဝဂ္ဂေါ

၁။ သေဋ္ဌဓမ္မပဉ္ဟော

၁။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘ဓမ္မော ဟိ, ဝါသေဋ္ဌ, သေဋ္ဌော ဇနေတသ္မိံ ဒိဋ္ဌေ စေဝ ဓမ္မေ အဘိသမ္ပရာယေ စာ’တိ။ ပုန စ ‘ဥပါသကော ဂိဟီ သောတာပန္နော ပိဟိတာပါယော ဒိဋ္ဌိပ္ပတ္တော ဝိညာတသာသနော ဘိက္ခုံ ဝါ သာမဏေရံ ဝါ ပုထုဇ္ဇနံ အဘိဝါဒေတိ ပစ္စုဋ္ဌေတီ’တိ။ ယဒိ, ဘန္တေ နာဂသေန, ဘဂဝတာ ဘဏိတံ ‘ဓမ္မော ဟိ, ဝါသေဋ္ဌ, သေဋ္ဌော ဇနေတသ္မိံ ဒိဋ္ဌေ စေဝ ဓမ္မေ အဘိသမ္ပရာယေ စာ’တိ, တေန ဟိ ‘ဥပါသကော ဂိဟီ သောတာပန္နော ပိဟိတာပါယော ဒိဋ္ဌိပ္ပတ္တော ဝိညာတသာသနော ဘိက္ခုံ ဝါ သာမဏေရံ ဝါ ပုထုဇ္ဇနံ အဘိဝါဒေတိ ပစ္စုဋ္ဌေတီ’တိ ယံ ဝစနံ, တံ မိစ္ဆာ။ ယဒိ ‘ဥပါသကော ဂိဟီ သောတာပန္နော ပိဟိတာပါယော ဒိဋ္ဌိပ္ပတ္တော ဝိညာတသာသနော ဘိက္ခုံ ဝါ သာမဏေရံ ဝါ ပုထုဇ္ဇနံ အဘိဝါဒေတိ ပစ္စုဋ္ဌေတိ’, တေန ဟိ ‘ဓမ္မော ဟိ, ဝါသေဋ္ဌ, သေဋ္ဌော ဇနေတသ္မိံ ဒိဋ္ဌေ စေဝ ဓမ္မေ အဘိသမ္ပရာယေ စာတိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘ဓမ္မော ဟိ, ဝါသေဋ္ဌ, သေဋ္ဌော ဇနေတသ္မိံ ဒိဋ္ဌေ စေဝ ဓမ္မေ အဘိသမ္ပရာယေ စာ’တိ, ‘ဥပါသကော စ ဂိဟီ သောတာပန္နော ပိဟိတာပါယော ဒိဋ္ဌိပ္ပတ္တော ဝိညာတသာသနော ဘိက္ခုံ ဝါ သာမဏေရံ ဝါ ပုထုဇ္ဇနံ အဘိဝါဒေတိ ပစ္စုဋ္ဌေတိ’။ တတ္ထ ပန ကာရဏံ အတ္ထိ။ ကတမံ တံ ကာရဏံ?

‘‘ဝီသတိ ခေါ ပနိမေ, မဟာရာဇ, သမဏဿ သမဏကရဏာ ဓမ္မာ ဒွေ စ လိင်္ဂါနိ, ယေဟိ သမဏော အဘိဝါဒနပစ္စုဋ္ဌာနသမာနနပူဇနာရဟော ဟောတိ။ ကတမေ ဝီသတိ သမဏဿ သမဏကရဏာ ဓမ္မာ ဒွေ စ လိင်္ဂါနိ? သေဋ္ဌော [သေဋ္ဌဘူမိသယော (သီ။ သျာ။), သေဋ္ဌော ယမော (ဣ။)] ဓမ္မာရာမော, အဂ္ဂေါ နိယမော, စာရော ဝိဟာရော သံယမော သံဝရော ခန္တိ သောရစ္စံ ဧကတ္တစရိယာ ဧကတ္တာဘိရတိ ပဋိသလ္လာနံ ဟိရိဩတ္တပ္ပံ ဝီရိယံ အပ္ပမာဒေါ သိက္ခာသမာဒါနံ [သိက္ခာပဓါနံ (သီ။ သျာ။), သုက္ကာဝဒါနံ (က။)] ဥဒ္ဒေသော ပရိပုစ္ဆာ သီလာဒိအဘိရတိ နိရာလယတာ သိက္ခာပဒပါရိပူရိတာ, ကာသာဝဓါရဏံ , ဘဏ္ဍုဘာဝေါ ။ ဣမေ ခေါ , မဟာရာဇ, ဝီသတိ သမဏဿ သမဏကရဏာ ဓမ္မာ ဒွေ စ လိင်္ဂါနိ။ ဧတေ ဂုဏေ ဘိက္ခု သမာဒါယ ဝတ္တတိ, သော တေသံ ဓမ္မာနံ အနူနတ္တာ ပရိပုဏ္ဏတ္တာ သမ္ပန္နတ္တာ သမန္နာဂတတ္တာ အသေက္ခဘူမိံ အရဟန္တဘူမိံ ဩက္ကမတိ, သေဋ္ဌံ ဘူမန္တရံ ဩက္ကမတိ, အရဟတ္တာသန္နဂတောတိ အရဟတိ ဥပါသကော သောတာပန္နော ဘိက္ခုံ ပုထုဇ္ဇနံ အဘိဝါဒေတုံ ပစ္စုဋ္ဌာတုံ။

‘‘‘ခီဏာသဝေဟိ သော သာမညံ ဥပဂတော, နတ္ထိ မေ သော သမယော’တိ [တံ သာမည’’န္တိ (?)] အရဟတိ ဥပါသကော သောတာပန္နော ဘိက္ခုံ ပုထုဇ္ဇနံ အဘိဝါဒေတုံ ပစ္စုဋ္ဌာတုံ။

‘‘‘အဂ္ဂပရိသံ သော ဥပဂတော, နာဟံ တံ ဌာနံ ဥပဂတော’တိ အရဟတိ ဥပါသကော သောတာပန္နော ဘိက္ခုံ ပုထုဇ္ဇနံ အဘိဝါဒေတုံ ပစ္စုဋ္ဌာတုံ။

‘‘‘လဘတိ သော ပါတိမောက္ခုဒ္ဒေသံ သောတုံ, နာဟံ တံ လဘာမိ သောတု’န္တိ အရဟတိ ဥပါသကော သောတာပန္နော ဘိက္ခုံ ပုထုဇ္ဇနံ အဘိဝါဒေတုံ ပစ္စုဋ္ဌာတုံ။

‘‘‘သော အညေ ပဗ္ဗာဇေတိ ဥပသမ္ပာဒေတိ ဇိနသာသနံ ဝဍ္ဎေတိ, အဟမေတံ န လဘာမိ ကာတု’န္တိ အရဟတိ ဥပါသကော သောတာပန္နော ဘိက္ခုံ ပုထုဇ္ဇနံ အဘိဝါဒေတုံ ပစ္စုဋ္ဌာတုံ။

‘‘‘အပ္ပမာဏေသု သော သိက္ခာပဒေသု သမတ္တကာရီ, နာဟံ တေသု ဝတ္တာမီ’တိ အရဟတိ ဥပါသကော သောတာပန္နော ဘိက္ခုံ ပုထုဇ္ဇနံ အဘိဝါဒေတုံ ပစ္စုဋ္ဌာတုံ။

‘‘‘ဥပဂတော သော သမဏလိင်္ဂံ, ဗုဒ္ဓါဓိပ္ပါယေ ဌိတော, တေနာဟံ လိင်္ဂေန ဒူရမပဂတော’တိ အရဟတိ ဥပါသကော သောတာပန္နော ဘိက္ခုံ ပုထုဇ္ဇနံ အဘိဝါဒေတုံ ပစ္စုဋ္ဌာတုံ။

‘‘‘ပရူဠှကစ္ဆလောမော သော အနဉ္ဇိတအမဏ္ဍိတော အနုလိတ္တသီလဂန္ဓော, အဟံ ပန မဏ္ဍနဝိဘူသနာဘိရတော’တိ အရဟတိ ဥပါသကော သောတာပန္နော ဘိက္ခုံ ပုထုဇ္ဇနံ အဘိဝါဒေတုံ ပစ္စုဋ္ဌာတုံ။

‘‘အပိ စ, မဟာရာဇ, ‘ယေ တေ ဝီသတိ သမဏကရဏာ ဓမ္မာ ဒွေ စ လိင်္ဂါနိ, သဗ္ဗေပေတေ ဓမ္မာ ဘိက္ခုဿ သံဝိဇ္ဇန္တိ, သော ယေဝ တေ ဓမ္မေ ဓါရေတိ, အညေပိ တတ္ထ သိက္ခာပေတိ, သော မေ အာဂမော သိက္ခာပနဉ္စ နတ္ထီ’တိ အရဟတိ ဥပါသကော သောတာပန္နော ဘိက္ခုံ ပုထုဇ္ဇနံ အဘိဝါဒေတုံ ပစ္စုဋ္ဌာတုံ ။

‘‘ယထာ, မဟာရာဇ, ရာဇကုမာရော ပုရောဟိတဿ သန္တိကေ ဝိဇ္ဇံ အဓီယတိ, ခတ္တိယဓမ္မံ သိက္ခတိ, သော အပရေန သမယေန အဘိသိတ္တော အာစရိယံ အဘိဝါဒေတိ ပစ္စုဋ္ဌေတိ ‘သိက္ခာပကော မေ အယ’န္တိ, ဧဝမေဝ ခေါ, မဟာရာဇ, ‘ဘိက္ခု သိက္ခာပကော ဝံသဓရော’တိ အရဟတိ ဥပါသကော သောတာပန္နော ဘိက္ခုံ ပုထုဇ္ဇနံ အဘိဝါဒေတုံ ပစ္စုဋ္ဌာတုံ။

‘‘အပိ စ, မဟာရာဇ, ဣမိနာပေတံ ပရိယာယေန ဇာနာဟိ ဘိက္ခုဘူမိယာ မဟန္တတံ အသမဝိပုလဘာဝံ။ ယဒိ, မဟာရာဇ, ဥပါသကော သောတာပန္နော အရဟတ္တံ သစ္ဆိကရောတိ, ဒွေဝ တဿ ဂတိယော ဘဝန္တိ အနညာ တသ္မိံ ယေဝ ဒိဝသေ ပရိနိဗ္ဗာယေယျ ဝါ, ဘိက္ခုဘာဝံ ဝါ ဥပဂစ္ဆေယျ။ အစလာ ဟိ သာ, မဟာရာဇ, ပဗ္ဗဇ္ဇာ, မဟတီ အစ္စုဂ္ဂတာ, ယဒိဒံ ဘိက္ခုဘူမီ’’တိ။ ‘‘ဉာဏဂတော, ဘန္တေ နာဂသေန, ပဉ္ဟော သုနိဗ္ဗေဌိတော ဗလဝတာ အတိဗုဒ္ဓိနာ တယာ, န ယိမံ ပဉ္ဟံ သမတ္ထော အညော ဧဝံ ဝိနိဝေဌေတုံ အညတြ တဝါဒိသေန ဗုဒ္ဓိမတာ’’တိ။

သေဋ္ဌဓမ္မပဉ္ဟော ပဌမော။

၂။ သဗ္ဗသတ္တဟိတဖရဏပဉ္ဟော

၂။ ‘‘ဘန္တေ နာဂသေန, တုမှေ ဘဏထ ‘တထာဂတော သဗ္ဗသတ္တာနံ အဟိတမပနေတွာ ဟိတမုပဒဟတီ’တိ။ ပုန စ ဘဏထ အဂ္ဂိက္ခန္ဓူပမေ ဓမ္မပရိယာယေ ဘညမာနေ ‘သဋ္ဌိမတ္တာနံ ဘိက္ခူနံ ဥဏှံ လောဟိတံ မုခတော ဥဂ္ဂတ’န္တိ။ အဂ္ဂိက္ခန္ဓူပမံ, ဘန္တေ, ဓမ္မပရိယာယံ ဒေသေန္တေန တထာဂတေန သဋ္ဌိမတ္တာနံ ဘိက္ခူနံ ဟိတမပနေတွာ အဟိတမုပဒဟိတံ။ ယဒိ, ဘန္တေ နာဂသေန, တထာဂတော သဗ္ဗသတ္တာနံ အဟိတမပနေတွာ ဟိတမုပဒဟတိ, တေန ဟိ အဂ္ဂိက္ခန္ဓူပမေ ဓမ္မပရိယာယေ ဘညမာနေ သဋ္ဌိမတ္တာနံ ဘိက္ခူနံ ဥဏှံ လောဟိတံ မုခတော ဥဂ္ဂတန္တိ ယံ ဝစနံ, တံ မိစ္ဆာ။ ယဒိ အဂ္ဂိက္ခန္ဓူပမေ ဓမ္မပရိယာယေ ဘညမာနေ သဋ္ဌိမတ္တာနံ ဘိက္ခူနံ ဥဏှံ လောဟိတံ မုခတော ဥဂ္ဂတံ, တေန ဟိ တထာဂတော သဗ္ဗသတ္တာနံ အဟိတမပနေတွာ ဟိတမုပဒဟတီတိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘တထာဂတော , မဟာရာဇ, သဗ္ဗသတ္တာနံ အဟိတမပနေတွာ ဟိတမုပဒဟတိ, အဂ္ဂိက္ခန္ဓူပမေ ဓမ္မပရိယာယေ ဘညမာနေ သဋ္ဌိမတ္တာနံ ဘိက္ခူနံ ဥဏှံ လောဟိတံ မုခတော ဥဂ္ဂတံ, တဉ္စ ပန န တထာဂတဿ ကတေန, တေသံ ယေဝ အတ္တနော ကတေနာ’’တိ။

‘‘ယဒိ, ဘန္တေ နာဂသေန, တထာဂတော အဂ္ဂိက္ခန္ဓူပမံ ဓမ္မပရိယာယံ န ဘာသေယျ, အပိ နု တေသံ ဥဏှံ လောဟိတံ မုခတော ဥဂ္ဂစ္ဆေယျာတိ, န ဟိ, မဟာရာဇ, မိစ္ဆာပဋိပန္နာနံ တေသံ ဘဂဝတော ဓမ္မပရိယာယံ သုတွာ ပရိဠာဟော ကာယေ ဥပ္ပဇ္ဇိ, တေန တေသံ ပရိဠာဟေန ဥဏှံ လောဟိတံ မုခတော ဥဂ္ဂတ’’န္တိ။ ‘‘တေန ဟိ, ဘန္တေ နာဂသေန, တထာဂတဿေဝ ကတေန တေသံ ဥဏှံ လောဟိတံ မုခတော ဥဂ္ဂတံ, တထာဂတော ယေဝ တတ္ထ အဓိကာရော တေသံ နာသနာယ, ယထာ နာမ, ဘန္တေ နာဂသေန, အဟိ ဝမ္မိကံ ပဝိသေယျ, အထညတရော ပံသုကာမော ပုရိသော ဝမ္မိကံ ဘိန္ဒိတွာ ပံသုံ ဟရေယျ, တဿ ပံသုဟရဏေန ဝမ္မိကဿ သုသိရံ ပိဒဟေယျ, အထ တတ္ထေဝ သော အဿာသံ အလဘမာနော မရေယျ, နနု သော, ဘန္တေ, အဟိ တဿ ပုရိသဿ ကတေန မရဏပ္ပတ္တော’’တိ။ ‘‘အာမ မဟာရာဇာ’’တိ။ ‘‘ဧဝမေဝ ခေါ, ဘန္တေ နာဂသေန, တထာဂတော ယေဝ တတ္ထ အဓိကာရော တေသံ နာသနာယာ’’တိ။

‘‘တထာဂတော, မဟာရာဇ, ဓမ္မံ ဒေသယမာနော အနုနယပ္ပဋိဃံ န ကရောတိ, အနုနယပ္ပဋိဃဝိပ္ပမုတ္တော ဓမ္မံ ဒေသေတိ, ဧဝံ ဓမ္မေ ဒေသီယမာနေ ယေ တတ္ထ သမ္မာပဋိပန္နာ, တေ ဗုဇ္ဈန္တိ။ ယေ ပန မိစ္ဆာပဋိပန္နာ, တေ ပတန္တိ။ ယထာ, မဟာရာဇ, ပုရိသဿ အမ္ဗံ ဝါ ဇမ္ဗုံ ဝါ မဓုကံ ဝါ စာလယမာနဿ ယာနိ တတ္ထ ဖလာနိ သာရာနိ ဒဠှဗန္ဓနာနိ, တာနိ တတ္ထေဝ အစ္စုတာနိ တိဋ္ဌန္တိ, ယာနိ တတ္ထ ဖလာနိ ပူတိဝဏ္ဋမူလာနိ ဒုဗ္ဗလဗန္ဓနာနိ, တာနိ ပတန္တိ။ ဧဝမေဝ ခေါ, မဟာရာဇ, တထာဂတော ဓမ္မံ ဒေသယမာနော အနုနယပ္ပဋိဃံ န ကရောတိ, အနုနယပ္ပဋိဃဝိပ္ပမုတ္တော ဓမ္မံ ဒေသေတိ, ဧဝံ ဓမ္မေ ဒေသီယမာနေ ယေ တတ္ထ သမ္မာပဋိပန္နာ, တေ ဗုဇ္ဈန္တိ။ ယေ ပန မိစ္ဆာပဋိပန္နာ, တေ ပတန္တိ။

‘‘ယထာ ဝါ ပန, မဟာရာဇ, ကဿကော ဓညံ ရောပေတုကာမော ခေတ္တံ ကသတိ, တဿ ကသန္တဿ အနေကသတသဟဿာနိ တိဏာနိ မရန္တိ။ ဧဝမေဝ ခေါ, မဟာရာဇ, တထာဂတော ပရိပက္ကမာနသေ သတ္တေ ဗောဓေန္တော [ဗောဓေတုံ (သီ။)] အနုနယပ္ပဋိဃဝိပ္ပမုတ္တော ဓမ္မံ ဒေသေတိ, ဧဝံ ဓမ္မေ ဒေသီယမာနေ ယေ တတ္ထ သမ္မာပဋိပန္နာ, တေ ဗုဇ္ဈန္တိ။ ယေ ပန မိစ္ဆာပဋိပန္နာ, တေ တိဏာနိ ဝိယ မရန္တိ။

‘‘ယထာ ဝါ ပန, မဟာရာဇ, မနုဿာ ရသဟေတု ယန္တေန ဥစ္ဆုံ ဣဠယန္တိ, တေသံ ဥစ္ဆုံ ဣဠယမာနာနံ ယေ တတ္ထ ယန္တမုခဂတာ ကိမယော, တေ ဣဠိယန္တိ။ ဧဝမေဝ ခေါ, မဟာရာဇ, တထာဂတော ပရိပက္ကမာနသေ သတ္တေ ဗောဓေန္တော ဓမ္မယန္တမဘိဣဠယတိ [ဓမ္မယန္တမတိဣဠယတိ (က။)], ယေ တတ္ထ မိစ္ဆာပဋိပန္နာ, တေ ကိမီ ဝိယ မရန္တီ’’တိ။

‘‘နနု, ဘန္တေ နာဂသေန, တေ ဘိက္ခူ တာယ ဓမ္မဒေသနာယ ပတိတာ’’တိ? ‘‘အပိ နု ခေါ, မဟာရာဇ, တစ္ဆကော ရုက္ခံ တစ္ဆန္တော [ရက္ခန္တော (သီ။ ဣ။] ဥဇုကံ ပရိသုဒ္ဓံ ကရောတီ’’တိ? ‘‘န ဟိ, ဘန္တေ, ဝဇ္ဇနီယံ အပနေတွာ တစ္ဆကော ရုက္ခံ ဥဇုကံ ပရိသုဒ္ဓံ ကရောတီ’’တိ။ ‘‘ဧဝမေဝ ခေါ, မဟာရာဇ, တထာဂတော ပရိသံ ရက္ခန္တော န သက္ကောတိ ဗောဓနေယျေ [အဗောဓနီယေ (သျာ။)] သတ္တေ ဗောဓေတုံ, မိစ္ဆာပဋိပန္နေ ပန သတ္တေ အပနေတွာ ဗောဓနေယျေ သတ္တေ ဗောဓေတိ, အတ္တကတေန ပန တေ, မဟာရာဇ, မိစ္ဆာပဋိပန္နာ ပတန္တိ။

‘‘ယထာ, မဟာရာဇ, ကဒလီ ဝေဠု အဿတရီ အတ္တဇေန [အတ္တဇေန ဖလေန (သီ။)] ဟညတိ, ဧဝမေဝ ခေါ, မဟာရာဇ, ယေ တေ မိစ္ဆာပဋိပန္နာ, တေ အတ္တကတေန ဟညန္တိ ပတန္တိ။

‘‘ယထာ, မဟာရာဇ, စောရာ အတ္တကတေန စက္ခုပ္ပါဋနံ သူလာရောပနံ သီသစ္ဆေဒနံ ပါပုဏန္တိ, ဧဝမေဝ ခေါ, မဟာရာဇ, ယေ တေ မိစ္ဆာပဋိပန္နာ, တေ အတ္တကတေန ဟညန္တိ ပတန္တိ [ဇိနသာသနာ ပတန္တိ (သီ။ ဣ။)]။ ယေသံ, မဟာရာဇ, သဋ္ဌိမတ္တာနံ ဘိက္ခူနံ ဥဏှံ လောဟိတံ မုခတော ဥဂ္ဂတံ, တေသံ တံ နေဝ ဘဂဝတော ကတေန, န ပရေသံ ကတေန, အထ ခေါ အတ္တနော ယေဝ ကတေန။

‘‘ယထာ, မဟာရာဇ, ပုရိသော သဗ္ဗဇနဿ အမတံ ဒဒေယျ, တေ တံ အမတံ အသိတွာ အရောဂါ ဒီဃာယုကာ သဗ္ဗီတိတော [သဗ္ဗီတိယာ (သီ။)] ပရိမုစ္စေယျုံ, အထညတရော ပုရိသော ဒုရုပစာရေန တံ အသိတွာ မရဏံ ပါပုဏေယျ, အပိ နု ခေါ သော, မဟာရာဇ, အမတဒါယကော ပုရိသော တတောနိဒါနံ ကိဉ္စိ အပုညံ အာပဇ္ဇေယျာ’’တိ? ‘‘န ဟိ, ဘန္တေ’’တိ။ ‘‘ဧဝမေဝ ခေါ, မဟာရာဇ, တထာဂတော ဒသသဟဿိယာ လောကဓါတုယာ ဒေဝမနုဿာနံ အမတံ ဓမ္မဒါနံ ဒေတိ, ယေ တေ သတ္တာ ဘဗ္ဗာ, တေ ဓမ္မာမတေန ဗုဇ္ဈန္တိ။ ယေ ပန တေ သတ္တာ အဘဗ္ဗာ, တေ ဓမ္မာမတေန ဟညန္တိ ပတန္တိ။ ဘောဇနံ, မဟာရာဇ, သဗ္ဗသတ္တာနံ ဇီဝိတံ ရက္ခတိ, တမေကစ္စေ ဘုဉ္ဇိတွာ ဝိသူစိကာယ မရန္တိ, အပိ နု ခေါ သော, မဟာရာဇ, ဘောဇနဒါယကော ပုရိသော တတောနိဒါနံ ကိဉ္စိ အပုညံ အာပဇ္ဇေယျာ’’တိ? ‘‘န ဟိ, ဘန္တေ’’တိ။ ‘‘ဧဝမေဝ ခေါ, မဟာရာဇ, တထာဂတော ဒသသဟဿိယာ လောကဓါတုယာ ဒေဝမနုဿာနံ အမတံ ဓမ္မဒါနံ ဒေတိ, ယေ တေ သတ္တာ ဘဗ္ဗာ, တေ ဓမ္မာမတေန ဗုဇ္ဈန္တိ။ ယေ ပန တေ သတ္တာ အဘဗ္ဗာ, တေ ဓမ္မာမတေန ဟညန္တိ ပတန္တီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

သဗ္ဗသတ္တဟိတဖရဏပဉ္ဟော ဒုတိယော။

၃။ ဝတ္ထဂုယှနိဒဿနပဉ္ဟော

၃။ ‘‘ဘန္တေ နာဂသေန, ဘာသိတမ္ပေတံ တထာဂတေန –

‘‘‘ကာယေန သံဝရော သာဓု [ဓ။ ပ။ ၃၆၁]၊ သာဓု ဝါစာယ သံဝရော။

မနသာ သံဝရော သာဓု၊ သာဓု သဗ္ဗတ္ထ သံဝရော’တိ။

‘‘ပုန စ တထာဂတော စတုန္နံ ပရိသာနံ မဇ္ဈေ နိသီဒိတွာ ပုရတော ဒေဝမနုဿာနံ သေလဿ ဗြာဟ္မဏဿ ကောသောဟိတံ ဝတ္ထဂုယှံ ဒဿေသိ။ ယဒိ, ဘန္တေ နာဂသေန, ဘဂဝတာ ဘဏိတံ ‘ကာယေန သံဝရော သာဓူ’တိ, တေန ဟိ သေလဿ ဗြာဟ္မဏဿ ကောသောဟိတံ ဝတ္ထဂုယှံ ဒဿေသီတိ ယံ ဝစနံ, တံ မိစ္ဆာ။ ယဒိ သေလဿ ဗြာဟ္မဏဿ ကောသောဟိတံ ဝတ္ထဂုယှံ ဒဿေတိ, တေန ဟိ ‘ကာယေန သံဝရော သာဓူ’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘ကာယေန သံဝရော သာဓူ’တိ, သေလဿ စ ဗြာဟ္မဏဿ ကောသောဟိတံ ဝတ္ထဂုယှံ ဒဿိတံ။ ယဿ ခေါ, မဟာရာဇ, တထာဂတေ ကင်္ခါ ဥပ္ပန္နာ, တဿ ဗောဓနတ္ထာယ ဘဂဝါ ဣဒ္ဓိယာ တပ္ပဋိဘာဂံ ကာယံ ဒဿေတိ, သော ယေဝ တံ ပါဋိဟာရိယံ ပဿတီ’’တိ။

‘‘ကော ပနေတံ, ဘန္တေ နာဂသေန, သဒ္ဒဟိဿတိ, ယံ ပရိသဂတော ဧကော ယေဝ တံ ဂုယှံ ပဿတိ, အဝသေသာ တတ္ထေဝ ဝသန္တာ န ပဿန္တီတိ။ ဣင်္ဃ မေ တွံ တတ္ထ ကာရဏံ ဥပဒိသ, ကာရဏေန မံ သညာပေဟီ’’တိ။ ‘‘ဒိဋ္ဌပုဗ္ဗော ပန တယာ, မဟာရာဇ, ကောစိ ဗျာဓိတော ပုရိသော ပရိကိဏ္ဏော ဉာတိမိတ္တေဟီ’’တိ။ ‘‘အာမ ဘန္တေ’’တိ။ ‘‘အပိ နု ခေါ သာ, မဟာရာဇ, ပရိသာ ပဿတေတံ ဝေဒနံ, ယာယ သော ပုရိသော ဝေဒနာယ ဝေဒယတီ’’တိ။ ‘‘န ဟိ ဘန္တေ, အတ္တနာ ယေဝ သော, ဘန္တေ, ပုရိသော ဝေဒယတီ’’တိ။ ‘‘ဧဝမေဝ ခေါ, မဟာရာဇ, ယဿေဝ တထာဂတေ ကင်္ခါ ဥပ္ပန္နာ, တဿေဝ တထာဂတော ဗောဓနတ္ထာယ ဣဒ္ဓိယာ တပ္ပဋိဘာဂံ ကာယံ ဒဿေတိ, သော ယေဝ တံ ပါဋိဟာရိယံ ပဿတိ။

‘‘ယထာ ဝါ ပန, မဟာရာဇ, ကဉ္စိဒေဝ ပုရိသံ ဘူတော အာဝိသေယျ, အပိ နု ခေါ သာ, မဟာရာဇ, ပရိသာ ပဿတိ တံ ဘူတာဂမန’’န္တိ? ‘‘န ဟိ, ဘန္တေ, သော ယေဝ အာတုရော တဿ ဘူတဿ အာဂမနံ ပဿတီ’’တိ။ ‘‘ဧဝမေဝ ခေါ, မဟာရာဇ, ယဿေဝ တထာဂတေ ကင်္ခါ ဥပ္ပန္နာ, တဿေဝ တထာဂတော ဗောဓနတ္ထာယ ဣဒ္ဓိယာ တပ္ပဋိဘာဂံ ကာယံ ဒဿေတိ, သော ယေဝ တံ ပါဋိဟာရိယံ ပဿတီ’’တိ။

‘‘ဒုက္ကရံ, ဘန္တေ နာဂသေန, ဘဂဝတာ ကတံ, ယံ ဧကဿပိ အဒဿနီယံ, တံ ဒဿေန္တေနာ’’တိ။ ‘‘န, မဟာရာဇ, ဘဂဝါ ဂုယှံ ဒဿေသိ , ဣဒ္ဓိယာ ပန ဆာယံ ဒဿေသီ’’တိ။ ‘‘ဆာယာယပိ, ဘန္တေ, ဒိဋ္ဌာယ ဒိဋ္ဌံ ယေဝ ဟောတိ ဂုယှံ, ယံ ဒိသွာ နိဋ္ဌံ ဂတော’’တိ။ ‘‘ဒုက္ကရဉ္စာပိ, မဟာရာဇ, တထာဂတော ကရောတိ ဗောဓနေယျေ သတ္တေ ဗောဓေတုံ။ ယဒိ, မဟာရာဇ, တထာဂတော ကိရိယံ ဟာပေယျ, ဗောဓနေယျာ သတ္တာ န ဗုဇ္ဈေယျုံ။ ယသ္မာ စ ခေါ, မဟာရာဇ, ယောဂညူ တထာဂတော ဗောဓနေယျေ သတ္တေ ဗောဓေတုံ, တသ္မာ တထာဂတော ယေန ယေန ယောဂေန ဗောဓနေယျာ ဗုဇ္ဈန္တိ, တေန တေန ယောဂေန ဗောဓနေယျေ ဗောဓေတိ။

‘‘ယထာ, မဟာရာဇ, ဘိသက္ကော သလ္လကတ္တော ယေန ယေန ဘေသဇ္ဇေန အာတုရော အရောဂေါ ဟောတိ, တေန တေန ဘေသဇ္ဇေန အာတုရံ ဥပသင်္ကမတိ, ဝမနီယံ ဝမေတိ, ဝိရေစနီယံ ဝိရေစေတိ, အနုလေပနီယံ အနုလိမ္ပေတိ, အနုဝါသနီယံ အနုဝါသေတိ။ ဧဝမေဝ ခေါ, မဟာရာဇ, တထာဂတော ယေန ယေန ယောဂေန ဗောဓနေယျာ သတ္တာ ဗုဇ္ဈန္တိ, တေန တေန ယောဂေန ဗောဓေတိ။

‘‘ယထာ ဝါ ပန, မဟာရာဇ, ဣတ္ထီ မူဠှဂဗ္ဘာ ဘိသက္ကဿ အဒဿနီယံ ဂုယှံ ဒဿေတိ, ဧဝမေဝ ခေါ, မဟာရာဇ, တထာဂတော ဗောဓနေယျေ သတ္တေ ဗောဓေတုံ အဒဿနီယံ ဂုယှံ ဣဒ္ဓိယာ ဆာယံ ဒဿေသိ။ နတ္ထိ, မဟာရာဇ, အဒဿနီယော နာမ ဩကာသော ပုဂ္ဂလံ ဥပါဒါယ။ ယဒိ, မဟာရာဇ, ကောစိ ဘဂဝတော ဟဒယံ ဒိသွာ ဗုဇ္ဈေယျ, တဿပိ ဘဂဝါ ယောဂေန ဟဒယံ ဒဿေယျ, ယောဂညူ, မဟာရာဇ, တထာဂတော ဒေသနာကုသလော။

‘‘နနု, မဟာရာဇ, တထာဂတော ထေရဿ နန္ဒဿ အဓိမုတ္တိံ ဇာနိတွာ တံ ဒေဝဘဝနံ နေတွာ ဒေဝကညာယော ဒဿေသိ ‘ဣမိနာယံ ကုလပုတ္တော ဗုဇ္ဈိဿတီ’တိ, တေန စ သော ကုလပုတ္တော ဗုဇ္ဈိ။ ဣတိ ခေါ, မဟာရာဇ, တထာဂတော အနေကပရိယာယေန သုဘနိမိတ္တံ ဟီဠေန္တော ဂရဟန္တော ဇိဂုစ္ဆန္တော တဿ ဗောဓနဟေတု ကကုဋပါဒိနိယော အစ္ဆရာယော ဒဿေသိ။ ဧဝမ္ပိ တထာဂတော ယောဂညူ ဒေသနာကုသလော။

‘‘ပုန စပရံ, မဟာရာဇ, တထာဂတော ထေရဿ စူဠပန္ထကဿ ဘာတရာ နိက္ကဍ္ဎိတဿ ဒုက္ခိတဿ ဒုမ္မနဿ ဥပဂန္တွာ သုခုမံ စောဠခဏ္ဍံ အဒါသိ ‘ဣမိနာယံ ကုလပုတ္တော ဗုဇ္ဈိဿတီ’တိ , သော စ ကုလပုတ္တော တေန ကာရဏေန ဇိနသာသနေ ဝသီဘာဝံ ပါပုဏိ။ ဧဝမ္ပိ, မဟာရာဇ, တထာဂတော ယောဂညူ ဒေသနာကုသလော။

‘‘ပုန စပရံ, မဟာရာဇ, တထာဂတော ဗြာဟ္မဏဿ မောဃရာဇဿ ယာဝ တတိယံ ပဉ္ဟံ ပုဋ္ဌော န ဗျာကာသိ ‘ဧဝမိမဿ ကုလပုတ္တဿ မာနော ဥပသမိဿတိ, မာနူပသမာ အဘိသမယော ဘဝိဿတီ’တိ, တေန စ တဿ ကုလပုတ္တဿ မာနော ဥပသမိ, မာနူပသမာ သော ဗြာဟ္မဏော ဆသု အဘိညာသု ဝသီဘာဝံ ပါပုဏိ။ ဧဝမ္ပိ, မဟာရာဇ, တထာဂတော ယောဂညူ ဒေသနာကုသလော’’တိ။

‘‘သာဓု, ဘန္တေ နာဂသေန, သုနိဗ္ဗေဌိတော ပဉ္ဟော ဗဟုဝိဓေဟိ ကာရဏေဟိ, ဂဟနံ အဂဟနံ ကတံ, အန္ဓကာရော အာလောကော ကတော, ဂဏ္ဌိ ဘိန္နော, ဘဂ္ဂါ ပရဝါဒါ, ဇိနပုတ္တာနံ စက္ခုံ တယာ ဥပ္ပါဒိတံ, နိပ္ပဋိဘာနာ တိတ္ထိယာ, တွံ ဂဏိဝရပဝရမာသဇ္ဇာ’’တိ။

ဝတ္ထဂုယှနိဒဿနပဉ္ဟော တတိယော။

၄။ ဖရုသဝါစာဘာဝပဉ္ဟော

၄။ ‘‘ဘန္တေ နာဂသေန, ဘာသိတမ္ပေတံ ထေရေန သာရိပုတ္တေန ဓမ္မသေနာပတိနာ ‘ပရိသုဒ္ဓဝစီသမာစာရော အာဝုသော တထာဂတော, နတ္ထိ တထာဂတဿ ဝစီဒုစ္စရိတံ, ယံ တထာဂတော ရက္ခေယျ ‘မာ မေ ဣဒံ ပရော အညာသီ’တိ။ ပုန စ တထာဂတော ထေရဿ သုဒိန္နဿ ကလန္ဒပုတ္တဿ အပရာဓေ ပါရာဇိကံ ပညပေန္တော ဖရုသာဟိ ဝါစာဟိ မောဃပုရိသဝါဒေန သမုဒါစရိ, တေန စ သော ထေရော မောဃပုရိသဝါဒေန မင္ကုစိတ္တဝသေန ရုန္ဓိတတ္တာ ဝိပ္ပဋိသာရီ နာသက္ခိ အရိယမဂ္ဂံ ပဋိဝိဇ္ဈိတုံ။ ယဒိ, ဘန္တေ နာဂသေန, ပရိသုဒ္ဓဝစီသမာစာရော တထာဂတော, နတ္ထိ တထာဂတဿ ဝစီဒုစ္စရိတံ, တေန ဟိ တထာဂတေန ထေရဿ သုဒိန္နဿ ကလန္ဒပုတ္တဿ အပရာဓေ မောဃပုရိသဝါဒေန သမုဒါစိဏ္ဏန္တိ ယံ ဝစနံ, တံ မိစ္ဆာ။ ယဒိ ဘဂဝတာ ထေရဿ သုဒိန္နဿ ကလန္ဒပုတ္တဿ အပရာဓေ မောဃပုရိသဝါဒေန သမုဒါစိဏ္ဏံ, တေန ဟိ ပရိသုဒ္ဓဝစီသမာစာရော တထာဂတော, နတ္ထိ တထာဂတဿ ဝစီဒုစ္စရိတန္တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ ‘ပရိသုဒ္ဓဝစီသမာစာရော အာဝုသော တထာဂတော, နတ္ထိ တထာဂတဿ ဝစီဒုစ္စရိတံ, ယံ တထာဂတော ရက္ခေယျ ‘မာ မေ ဣဒံ ပရော အညာသီ’တိ။ အာယသ္မတော စ သုဒိန္နဿ ကလန္ဒပုတ္တဿ အပရာဓေ ပါရာဇိကံ ပညပေန္တေန ဘဂဝတာ မောဃပုရိသဝါဒေန သမုဒါစိဏ္ဏံ, တဉ္စ ပန အဒုဋ္ဌစိတ္တေန အသာရမ္ဘေန ယာထာဝလက္ခဏေန။ ကိဉ္စ တတ္ထ ယာထာဝလက္ခဏံ, ယဿ, မဟာရာဇ, ပုဂ္ဂလဿ ဣမသ္မိံ အတ္တဘာဝေ စတုသစ္စာဘိသမယော န ဟောတိ, တဿ ပုရိသတ္တနံ မောဃံ အညံ ကယိရမာနံ အညေန သမ္ဘဝတိ, တေန ဝုစ္စတိ ‘မောဃပုရိသော’တိ။ ဣတိ, မဟာရာဇ, ဘဂဝတာ အာယသ္မတော သုဒိန္နဿ ကလန္ဒပုတ္တဿ သတာဝဝစနေန သမုဒါစိဏ္ဏံ, နော အဘူတဝါဒေနာ’’တိ။

‘‘သဘာဝမ္ပိ, ဘန္တေ နာဂသေန, ယော အက္ကောသန္တော ဘဏတိ, တဿ မယံ ကဟာပဏံ ဒဏ္ဍံ ဓါရေမ, အပရာဓေါ ယေဝ သော ဝတ္ထုံ နိဿာယ ဝိသုံ ဝေါဟာရံ အာစရန္တော အက္ကောသတီ’’တိ။ ‘‘အတ္ထိ ပန, မဟာရာဇ, သုတပုဗ္ဗံ တယာ ခလိတဿ အဘိဝါဒနံ ဝါ ပစ္စုဋ္ဌာနံ ဝါ သက္ကာရံ ဝါ ဥပါယနာနုပ္ပဒါနံ ဝါ’’တိ? ‘‘န ဟိ, ဘန္တေ, ယတော ကုတောစိ ယတ္ထ ကတ္ထစိ ခလိတော, သော ပရိဘာသနာရဟော ဟောတိ တဇ္ဇနာရဟော, ဥတ္တမင်္ဂမ္ပိဿ ဆိန္ဒန္တိ ဟနန္တိပိ ဗန္ဓန္တိပိ ဃာတေန္တိပိ ဈာပေန္တိဣ’’တိ [ဇာပေန္တိဣတိ (သီ။ ဣ။)]။ ‘‘တေန ဟိ, မဟာရာဇ, ဘဂဝတာ ကိရိယာ ယေဝ ကတာ, နော အကိရိယာ’’တိ။

‘‘ကိရိယမ္ပိ, ဘန္တေ နာဂသေန, ကုရုမာနေန ပတိရူပေန ကာတဗ္ဗံ အနုစ္ဆဝိကေန, သဝနေနပိ, ဘန္တေ နာဂသေန, တထာဂတဿ သဒေဝကော လောကော ဩတ္တပ္ပတိ ဟိရိယတိ ဘိယျော ဒဿနေန တတုတ္တရိံ ဥပသင်္ကမနေန ပယိရုပါသနေနာ’’တိ။ ‘‘အပိ နု ခေါ, မဟာရာဇ, တိကိစ္ဆကော အဘိသန္နေ ကာယေ ကုပိတေ ဒေါသေ သိနေဟနီယာနိ ဘေသဇ္ဇာနိ ဒေတီ’’တိ? ‘‘န ဟိ, ဘန္တေ, တိဏှာနိ လေခနီယာနိ ဘေသဇ္ဇာနိ ဒေတီ’’တိ။ ‘‘ဧဝမေဝ ခေါ, မဟာရာဇ, တထာဂတော သဗ္ဗကိလေသဗျာဓိဝူပသမာယ အနုသိဋ္ဌိံ ဒေတိ, ဖရုသာပိ, မဟာရာဇ, တထာဂတဿ ဝါစာ သတ္တေ သိနေဟယတိ, မုဒုကေ ကရောတိ။ ယထာ, မဟာရာဇ, ဥဏှမ္ပိ ဥဒကံ ယံ ကိဉ္စိ သိနေဟနီယံ သိနေဟယတိ, မုဒုကံ ကရောတိ, ဧဝမေဝ ခေါ, မဟာရာဇ, ဖရုသာပိ တထာဂတဿ ဝါစာ အတ္ထဝတီ ဟောတိ ကရုဏာသဟဂတာ။ ယထာ, မဟာရာဇ, ပိတုဝစနံ ပုတ္တာနံ အတ္ထဝန္တံ ဟောတိ ကရုဏာသဟဂတံ, ဧဝမေဝ ခေါ, မဟာရာဇ, ဖရုသာပိ တထာဂတဿ ဝါစာ အတ္ထဝတီ ဟောတိ ကရုဏာသဟဂတာ။ ဖရုသာပိ, မဟာရာဇ, တထာဂတဿ ဝါစာ သတ္တာနံ ကိလေသပ္ပဟာနာ [ကိလေသပ္ပဟာနာယ (သီ။)] ဟောတိ။ ယထာ, မဟာရာဇ, ဒုဂ္ဂန္ဓမ္ပိ ဂေါမုတ္တံ ဣတံ ဝိရသမ္ပိ အဂဒံ ခါယိတံ သတ္တာနံ ဗျာဓိံ ဟနတိ, ဧဝမေဝ ခေါ, မဟာရာဇ, ဖရုသာပိ တထာဂတဿ ဝါစာ အတ္ထဝတီ ကရုဏာသဟဂတာ။ ယထာ, မဟာရာဇ, မဟန္တောပိ တူလပုဉ္ဇော [တူလပိစု (သီ။ သျာ။)] ပရဿ ကာယေ နိပတိတွာ ရုဇံ န ကရောတိ, ဧဝမေဝ ခေါ, မဟာရာဇ, ဖရုသာပိ တထာဂတဿ ဝါစာ န ကဿစိ ဒုက္ခံ ဥပ္ပါဒေတီ’’တိ။ ‘‘သုဝိနိစ္ဆိတော, ဘန္တေ နာဂသေန, ပဉ္ဟော ဗဟူဟိ ကာရဏေဟိ, သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဖရုသဝါစာဘာဝပဉ္ဟော စတုတ္ထော။

၅။ ရုက္ခအစေတနာဘာဝပဉ္ဟော

၅။ ‘‘ဘန္တေ နာဂသေန, ဘာသိတမ္ပေတံ တထာဂတေန –

‘‘‘အစေတနံ ဗြာဟ္မဏ အဿုဏန္တံ၊ ဇာနော အဇာနန္တမိမံ ပလာသံ။

အာရဒ္ဓဝီရိယော ဓုဝံ အပ္ပမတ္တော၊ သုခသေယျံ ပုစ္ဆသိ ကိဿ ဟေတူ’တိ [ဇာ။ ၁။၄။၂၅]။

ပုန စ ဘဏိတံ –

‘‘‘ဣတိ ဖန္ဒနရုက္ခောပိ၊ တာဝဒေ အဇ္ဈဘာသထ။

မယှမ္ပိ ဝစနံ အတ္ထိ၊ ဘာရဒွါဇ သုဏောဟိ မေ’တိ [ဇာ။ ၁။၁၃။၂၀]။

‘‘ယဒိ, ဘန္တေ နာဂသေန, ရုက္ခော အစေတနော, တေန ဟိ ဖန္ဒနေန ရုက္ခေန ဘာရဒွါဇေန သဟ သလ္လပိတန္တိ ယံ ဝစနံ, တံ မိစ္ဆာ။ ယဒိ ဖန္ဒနေန ရုက္ခေန ဘာရဒွါဇေန သဒ္ဓိံ သလ္လပိတံ, တေန ဟိ ရုက္ခော အစေတနောတိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘ရုက္ခော အစေတနော’တိ, ဖန္ဒနေန စ ရုက္ခေန ဘာရဒွါဇေန သဒ္ဓိံ သလ္လပိတံ, တဉ္စ ပန ဝစနံ လောကသမညာယ ဘဏိတံ။ နတ္ထိ, မဟာရာဇ, အစေတနဿ ရုက္ခဿ သလ္လာပေါ နာမ, အပိ စ, မဟာရာဇ, တသ္မိံ ရုက္ခေ အဓိဝတ္ထာယ ဒေဝတာယေတံ အဓိဝစနံ ရုက္ခောတိ, ရုက္ခော သလ္လပတီတိ စေသာ လောကပဏ္ဏတ္တိ, ယထာ, မဟာရာဇ, သကဋံ ဓညဿ ပရိပူရိတံ ဓညသကဋန္တိ ဇနော ဝေါဟရတိ, န စ တံ ဓညမယံ သကဋံ, ရုက္ခမယံ သကဋံ, တသ္မိံ သကဋေ ဓညဿ ပန အာကိရိတတ္တာ ဓညသကဋန္တိ ဇနော ဝေါဟရတိ, ဧဝမေဝ ခေါ, မဟာရာဇ, န ရုက္ခော သလ္လပတိ, ရုက္ခော အစေတနော, ယာ ပန တသ္မိံ ရုက္ခေ အဓိဝတ္ထာ ဒေဝတာ, တဿာ ယေဝ တံ အဓိဝစနံ ရုက္ခောတိ, ရုက္ခော သလ္လပတီတိ စေသာ လောကပဏ္ဏတ္တိ။

‘‘ယထာ ဝါ ပန, မဟာရာဇ, ဒဓိံ မန္ထယမာနော တက္ကံ မန္ထေမီတိ ဝေါဟရတိ, န တံ တက္ကံ, ယံ သော မန္ထေတိ, ဒဓိံ ယေဝ သော မန္ထေန္တော တက္ကံ မန္ထေမီတိ ဝေါဟရတိ, ဧဝမေဝ ခေါ, မဟာရာဇ, န ရုက္ခော သလ္လပတိ, ရုက္ခော အစေတနော ။ ယာ ပန တသ္မိံ ရုက္ခေ အဓိဝတ္ထာ ဒေဝတာ, တဿာယေဝ တံ အဓိဝစနံ ရုက္ခောတိ, ရုက္ခော သလ္လပတီတိ စေသာ လောကပဏ္ဏတ္တိ။

‘‘ယထာ ဝါ ပန, မဟာရာဇ, အသန္တံ သာဓေတုကာမော သန္တံ သာဓေမီတိ ဝေါဟရတိ , အသိဒ္ဓံ သိဒ္ဓန္တိ ဝေါဟရတိ, ဧဝမေသာ လောကသမညာ, ဧဝမေဝ ခေါ, မဟာရာဇ, န ရုက္ခော သလ္လပတိ, ရုက္ခော အစေတနော။ ယာ ပန တသ္မိံ ရုက္ခေ အဓိဝတ္ထာ ဒေဝတာ, တဿာယေဝ တံ အဓိဝစနံ ရုက္ခောတိ, ရုက္ခော သလ္လပတီတိ စေသာ လောကပဏ္ဏတ္တိ, ယာယ, မဟာရာဇ, လောကသမညာယ ဇနော ဝေါဟရတိ, တထာဂတောပိ တာယေဝ လောကသမညာယ သတ္တာနံ ဓမ္မံ ဒေသေတီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ရုက္ခအစေတနာဘာဝပဉ္ဟော ပဉ္စမော။

၆။ ပိဏ္ဍပါတမဟပ္ဖလပဉ္ဟော

၆။ ‘‘ဘန္တေ နာဂသေန, ဘာသိတမ္ပေတံ ဓမ္မသင်္ဂီတိကာရကေဟိ ထေရေဟိ –

‘‘‘စုန္ဒဿ ဘတ္တံ ဘုဉ္ဇိတွာ၊ ကမ္မာရဿာတိ မေ သုတံ။

အာဗာဓံ သမ္ဖုသီ ဓီရော၊ ပဗာဠှံ မာရဏန္တိက’န္တိ [ဒီ။ နိ။ ၂။၁၉၀]။

‘‘ပုန စ ဘဂဝတာ ဘဏိတံ ‘ဒွေမေ, အာနန္ဒ, ပိဏ္ဍပါတာ သမသမဖလာ သမဝိပါကာ အတိဝိယ အညေဟိ ပိဏ္ဍပါတေဟိ မဟပ္ဖလတရာ စ မဟာနိသံသတရာ စ။ ကတမေ ဒွေ? ယဉ္စ ပိဏ္ဍပါတံ ပရိဘုဉ္ဇိတွာ တထာဂတော အနုတ္တရံ သမ္မာသမ္ဗောဓိံ အဘိသမ္ဗုဇ္ဈိ, ယဉ္စ ပိဏ္ဍပါတံ ပရိဘုဉ္ဇိတွာ တထာဂတော အနုပါဒိသေသာယ နိဗ္ဗာနဓါတုယာ ပရိနိဗ္ဗာယတိ။ ဣမေ ဒွေ ပိဏ္ဍပါတာ သမသမဖလာ သမဝိပါကာ, အတိဝိယ အညေဟိ ပိဏ္ဍပါတေဟိ မဟပ္ဖလတရာ စ မဟာနိသံသတရာ စာ’တိ။ ယဒိ, ဘန္တေ နာဂသေန, ဘဂဝတော စုန္ဒဿ ဘတ္တံ ဘုတ္တာဝိဿ [ဘုဉ္ဇိတွာ (သီ။)] ခရော အာဗာဓေါ ဥပ္ပန္နော, ပဗာဠှာ စ ဝေဒနာ ပဝတ္တာ မာရဏန္တိကာ, တေန ဟိ ‘ဒွေမေ, အာနန္ဒ, ပိဏ္ဍပါတာ သမသမဖလာ သမဝိပါကာ အတိဝိယ အညေဟိ ပိဏ္ဍပါတေဟိ မဟပ္ဖလတရာ စ မဟာနိသံသတရာ စာ’တိ ယံ ဝစနံ, တံ မိစ္ဆာ။ ယဒိ ဒွေမေ ပိဏ္ဍပါတာ သမသမဖလာ သမဝိပါကာ အတိဝိယ အညေဟိ ပိဏ္ဍပါတေဟိ မဟပ္ဖလတရာ စ မဟာနိသံသတရာ စ, တေန ဟိ ဘဂဝတော စုန္ဒဿ ဘတ္တံ ဘုတ္တာဝိဿ [ဘုဉ္ဇိတွာ (သီ။)] ခရော အာဗာဓေါ ဥပ္ပန္နော, ပဗာဠှာ စ ဝေဒနာ ပဝတ္တာ မာရဏန္တိကာတိ တမ္ပိ ဝစနံ မိစ္ဆာ။ ကိံနု ခေါ, ဘန္တေ နာဂသေန, သော ပိဏ္ဍပါတော ဝိသဂတတာယ မဟပ္ဖလော, ရောဂုပ္ပါဒကတာယ မဟပ္ဖလော , အာယုဝိနာသကတာယ မဟပ္ဖလော, ဘဂဝတော ဇီဝိတဟရဏတာယ မဟပ္ဖလော? တတ္ထ မေ ကာရဏံ ဗြူဟိ ပရဝါဒါနံ နိဂ္ဂဟာယ, ဧတ္ထာယံ ဇနော သမ္မူဠ္ဟော လောဘဝသေန အတိဗဟုံ ခါယိတေန လောဟိတပက္ခန္ဒိကာ ဥပ္ပန္နာတိ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဓမ္မသင်္ဂီတိကာရကေဟိ ထေရေဟိ –

‘‘‘စုန္ဒဿ ဘတ္တံ ဘုဉ္ဇိတွာ၊ ကမ္မာရဿာတိ မေ သုတံ။

အာဗာဓံ သမ္ဖုသီ ဓီရော၊ ပဗာဠှံ မာရဏန္တိက’န္တိ။

‘‘ဘဂဝတာ စ ဘဏိတံ ‘ဒွေမေ, အာနန္ဒ, ပိဏ္ဍပါတာ သမသမဖလာ သမဝိပါကာ အတိဝိယ အညေဟိ ပိဏ္ဍပါတေဟိ မဟပ္ဖလတရာ စ မဟာနိသံသတရာ စ။ ကတမေ ဒွေ? ယဉ္စ ပိဏ္ဍပါတံ ပရိဘုဉ္ဇိတွာ တထာဂတော အနုတ္တရံ သမ္မာသမ္ဗောဓိံ အဘိသမ္ဗုဇ္ဈိ, ယဉ္စ ပိဏ္ဍပါတံ ပရိဘုဉ္ဇိတွာ တထာဂတော အနုပါဒိသေသာယ နိဗ္ဗာနဓါတုယာ ပရိနိဗ္ဗာယတိ [ပရိနိဗ္ဗာယိ (သီ။)], ဣမေ ဒွေ ပိဏ္ဍပါတာ သမသမဖလာ သမဝိပါကာ, အတိဝိယ အညေဟိ ပိဏ္ဍပါတေဟိ မဟပ္ဖလတရာ စ မဟာနိသံသတရာ စာ’တိ။

‘‘သော ပန ပိဏ္ဍပါတော ဗဟုဂုဏော အနေကာနိသံသော။ ဒေဝတာ, မဟာရာဇ, ဟဋ္ဌာ ပသန္နမာနသာ ‘အယံ ဘဂဝတော ပစ္ဆိမော ပိဏ္ဍပါတော’တိ ဒိဗ္ဗံ ဩဇံ သူကရမဒ္ဒဝေ အာကိရိံသု။ တဉ္စ ပန သမ္မာပါကံ လဟုပါကံ [ဗဟုပါကံ (သီ။)] မနုညံ ဗဟုရသံ ဇဋ္ဌရဂ္ဂိတေဇဿ ဟိတံ။ န, မဟာရာဇ, တတောနိဒါနံ ဘဂဝတော ကောစိ အနုပ္ပန္နော ရောဂေါ ဥပ္ပန္နော, အပိ စ, မဟာရာဇ, ဘဂဝတော ပကတိဒုဗ္ဗလေ သရီရေ ခီဏေ အာယုသင်္ခါရေ ဥပ္ပန္နော ရောဂေါ ဘိယျော အဘိဝဍ္ဎိ။

‘‘ယထာ, မဟာရာဇ, ပကတိယာ ဇလမာနော အဂ္ဂိ အညသ္မိံ ဥပါဒါနေ ဒိန္နေ ဘိယျော ပဇ္ဇလတိ, ဧဝမေဝ ခေါ, မဟာရာဇ, ဘဂဝတော ပကတိဒုဗ္ဗလေ သရီရေ ခီဏေ အာယုသင်္ခါရေ ဥပ္ပန္နော ရောဂေါ ဘိယျော အဘိဝဍ္ဎိ။

‘‘ယထာ ဝါ ပန, မဟာရာဇ, သောတော ပကတိယာ သန္ဒမာနော အဘိဝုဋ္ဌေ မဟာမေဃေ ဘိယျော မဟောဃော ဥဒကဝါဟကော ဟောတိ, ဧဝမေဝ ခေါ, မဟာရာဇ, ဘဂဝတော ပကတိဒုဗ္ဗလေ သရီရေ ခီဏေ အာယုသင်္ခါရေ ဥပ္ပန္နော ရောဂေါ ဘိယျော အဘိဝဍ္ဎိ။

‘‘ယထာ ဝါ ပန, မဟာရာဇ, ပကတိယာ အဘိသန္နဓါတု ကုစ္ဆိ အညသ္မိံ အဇ္ဈောဟရိတေ ဘိယျော အာယမေယျ [အာမယေယျ (သီ။)], ဧဝမေဝ ခေါ, မဟာရာဇ, ဘဂဝတော ပကတိဒုဗ္ဗလေ သရီရေ ခီဏေ အာယုသင်္ခါရေ ဥပ္ပန္နော ရောဂေါ ဘိယျော အဘိဝဍ္ဎိ, နတ္ထိ, မဟာရာဇ, တသ္မိံ ပိဏ္ဍပါတေ ဒေါသော, န စ တဿ သက္ကာ ဒေါသံ အာရောပေတု’’န္တိ။

‘‘ဘန္တေ နာဂသေန, ကေန ကာရဏေန တေ ဒွေ ပိဏ္ဍပါတာ သမသမဖလာ သမဝိပါကာ အတိဝိယ အညေဟိ ပိဏ္ဍပါတေဟိ မဟပ္ဖလတရာ စ မဟာနိသံသတရာ စာ’’တိ? ‘‘ဓမ္မာနုမဇ္ဇနသမာပတ္တိဝသေန, မဟာရာဇ, တေ ဒွေ ပိဏ္ဍပါတာ သမသမဖလာ သမဝိပါကာ အတိဝိယ အညေဟိ ပိဏ္ဍပါတေဟိ မဟပ္ဖလတရာ စ မဟာနိသံသတရာ စာ’’တိ။

‘‘ဘန္တေ နာဂသေန, ကတမေသံ ဓမ္မာနံ အနုမဇ္ဇနသမာပတ္တိဝသေန တေ ဒွေ ပိဏ္ဍပါတာ သမသမဖလာ သမဝိပါကာ အတိဝိယ အညေဟိ ပိဏ္ဍပါတေဟိ မဟပ္ဖလတရာ စ မဟာနိသံသတရာ စာ’’တိ? ‘‘နဝန္နံ, မဟာရာဇ, အနုပုဗ္ဗဝိဟာရသမာပတ္တီနံ အနုလောမပ္ပဋိလောမသမာပဇ္ဇနဝသေန တေ ဒွေ ပိဏ္ဍပါတာ သမသမဖလာ သမဝိပါကာ အတိဝိယ အညေဟိ ပိဏ္ဍပါတေဟိ မဟပ္ဖလတရာ စ မဟာနိသံသတရာ စာ’’တိ။

‘‘ဘန္တေ နာဂသေန, ဒွီသု ယေဝ ဒိဝသေသု အဓိမတ္တံ တထာဂတော နဝါနုပုဗ္ဗဝိဟာရသမာပတ္တိယော အနုလောမပ္ပဋိလောမံ သမာပဇ္ဇီ’’တိ? ‘‘အာမ, မဟာရာဇာ’’တိ။ ‘‘အစ္ဆရိယံ, ဘန္တေ နာဂသေန, အဗ္ဘုတံ ဘန္တေ နာဂသေန။ ယံ ဣမသ္မိံ ဗုဒ္ဓက္ခေတ္တေ အသဒိသံ ပရမဒါနံ, တမ္ပိ ဣမေဟိ ဒွီဟိ ပိဏ္ဍပါတေဟိ အဂဏိတံ။ အစ္ဆရိယံ, ဘန္တေ နာဂသေန, အဗ္ဘုတံ, ဘန္တေ နာဂသေန။ ယာဝ မဟန္တာ နဝါနုပုဗ္ဗဝိဟာရသမာပတ္တိယော, ယတြ ဟိ နာမ နဝါနုပုဗ္ဗဝိဟာရသမာပတ္တိဝသေန ဒါနံ မဟပ္ဖလတရံ ဟောတိ မဟာနိသံသတရဉ္စ။ သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ပိဏ္ဍပါတမဟပ္ဖလပဉ္ဟော ဆဋ္ဌော။

၇။ ဗုဒ္ဓပူဇနပဉ္ဟော

၇။ ‘‘ဘန္တေ နာဂသေန, ဘာသိတမ္ပေတံ တထာဂတေန ‘အဗျာဝဋာ တုမှေ, အာနန္ဒ, ဟောထ တထာဂတဿ သရီရပူဇာယာ’တိ။ ပုန စ ဘဏိတံ –

‘‘‘ပူဇေထ နံ ပူဇနိယဿ ဓါတုံ။

ဧဝံ ကရာ သဂ္ဂမိတော ဂမိဿထာ’တိ။

‘‘ယဒိ, ဘန္တေ နာဂသေန, တထာဂတေန ဘဏိတံ ‘အဗျာဝဋာ တုမှေ, အာနန္ဒ, ဟောထ တထာဂတဿ သရီရပူဇာယာ’တိ, တေန ဟိ ‘ပူဇေထ နံ ပူဇနိယဿ ဓါတုံ, ဧဝံ ကရာ သဂ္ဂမိတော ဂမိဿထာ’တိ ယံ ဝစနံ, တံ မိစ္ဆာ။ ယဒိ တထာဂတေန ဘဏိတံ ‘ပူဇေထ နံ ပူဇနိယဿ ဓါတုံ, ဧဝံ ကရာ သဂ္ဂမိတော ဂမိဿထာ’တိ, တေန ဟိ ‘အဗျာဝဋာ တုမှေ အာနန္ဒ, ဟောထ တထာဂတဿ သရီရပူဇာယာ’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘အဗျာဝဋာ တုမှေ, အာနန္ဒ, ဟောထ တထာဂတဿ သရီရပူဇာယာ’တိ, ပုန စ ဘဏိတံ ‘ပူဇေထ နံ ပူဇနိယဿ ဓါတုံ, ဧဝံ ကရာ သဂ္ဂမိတော ဂမိဿထာ’တိ, တဉ္စ ပန န သဗ္ဗေသံ ဇိနပုတ္တာနံ ယေဝ အာရဗ္ဘ ဘဏိတံ ‘အဗျာဝဋာ တုမှေ, အာနန္ဒ, ဟောထ တထာဂတဿ သရီရပူဇာယာ’တိ။ အကမ္မံ ဟေတံ, မဟာရာဇ, ဇိနပုတ္တာနံ ယဒိဒံ ပူဇာ, သမ္မသနံ သင်္ခါရာနံ, ယောနိသော မနသိကာရော, သတိပဋ္ဌာနာနုပဿနာ, အာရမ္မဏသာရဂ္ဂါဟော, ကိလေသယုဒ္ဓံ, သဒတ္ထမနုယုဉ္ဇနာ, ဧတံ ဇိနပုတ္တာနံ ကရဏီယံ, အဝသေသာနံ ဒေဝမနုဿာနံ ပူဇာ ကရဏီယာ။

‘‘ယထာ, မဟာရာဇ, မဟိယာ ရာဇပုတ္တာနံ ဟတ္ထိအဿရထဓနုထရုလေခမုဒ္ဒါသိက္ခာခဂ္ဂမန္တသုတိ- သမ္မုတိယုဒ္ဓယုဇ္ဈာပနကိရိယာ ကရဏီယာ, အဝသေသာနံ ပုထုဝေဿသုဒ္ဒါနံ ကသိ ဝဏိဇ္ဇာ ဂေါရက္ခာ ကရဏီယာ, ဧဝမေဝ ခေါ, မဟာရာဇ, အကမ္မံ ဟေတံ ဇိနပုတ္တာနံ ယဒိဒံ ပူဇာ, သမ္မသနံ သင်္ခါရာနံ, ယောနိသော မနသိကာရော, သတိပဋ္ဌာနာနုပဿနာ, အာရမ္မဏသာရဂ္ဂါဟော, ကိလေသယုဒ္ဓံ, သဒတ္ထမနုယုဉ္ဇနာ, ဧတံ ဇိနပုတ္တာနံ ကရဏီယံ, အဝသေသာနံ ဒေဝမနုဿာနံ ပူဇာ ကရဏီယာ။

‘‘ယထာ ဝါ ပန, မဟာရာဇ, ဗြာဟ္မဏမာဏဝကာနံ ဣရုဝေဒံ ယဇုဝေဒံ သာမဝေဒံ အထဗ္ဗဏဝေဒံ လက္ခဏံ ဣတိဟာသံ ပုရာဏံ နိဃဏ္ဍု ကေဋုဘံ အက္ခရပ္ပဘေဒံ ပဒံ ဝေယျာကရဏံ ဘာသမဂ္ဂံ ဥပ္ပါတံ သုပိနံ နိမိတ္တံ ဆဠင်္ဂံ စန္ဒဂ္ဂါဟံ သူရိယဂ္ဂါဟံ သုက္ကရာဟုစရိတံ ဥဠုဂ္ဂဟယုဒ္ဓံ [ဩဠုဂ္ဂဟယုဒ္ဓံ (က။)] ဒေဝဒုန္ဒုဘိဿရံ ဩက္ကန္တိ ဥက္ကာပါတံ ဘူမိကမ္မံ [ဘူမိကမ္ပံ (သီ။ ဣ။)] ဒိသာဒါဟံ ဘုမ္မန္တလိက္ခံ ဇောတိသံ လောကာယတိကံ သာစက္ကံ မိဂစက္ကံ အန္တရစက္ကံ မိဿကုပ္ပါဒံ သကုဏရုတရဝိတံ [သကုဏရုတံ (သီ။)] သိက္ခာ ကရဏီယာ, အဝသေသာနံ ပုထုဝေဿသုဒ္ဒါနံ ကသိ ဝဏိဇ္ဇာ ဂေါရက္ခာ ကရဏီယာ, ဧဝမေဝ ခေါ, မဟာရာဇ, အကမ္မံ ဟေတံ ဇိနပုတ္တာနံ ယဒိဒံ ပူဇာ, သမ္မသနံ သင်္ခါရာနံ, ယောနိသော မနသိကာရော, သတိပဋ္ဌာနာနုပဿနာ, အာရမ္မဏသာရဂ္ဂါဟော, ကိလေသယုဒ္ဓံ, သဒတ္ထမနုယုဉ္ဇနာ, ဧတံ ဇိနပုတ္တာနံ ကရဏီယံ, အဝသေသာနံ ဒေဝမနုဿာနံ ပူဇာ ကရဏီယာ, တသ္မာ, မဟာရာဇ, တထာဂတော ‘မာ ဣမေ အကမ္မေ ယုဉ္ဇန္တု, ကမ္မေ ဣမေ ယုဉ္ဇန္တူ’တိ အာဟ ‘အဗျာဝဋာ တုမှေ, အာနန္ဒ, ဟောထ တထာဂတဿ သရီရပူဇာယာ’တိ။ ယဒေတံ, မဟာရာဇ, တထာဂတော န ဘဏေယျ, ပတ္တစီဝရမ္ပိ အတ္တနော ပရိယာဒါပေတွာ ဘိက္ခူ ဗုဒ္ဓပူဇံ ယေဝ ကရေယျု’’န္တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဗုဒ္ဓပူဇနပဉ္ဟော သတ္တမော။

၈။ ပါဒသကလိကာဟတပဉ္ဟော

၈။ ‘‘ဘန္တေ နာဂသေန, တုမှေ ဘဏထ ‘ဘဂဝတော ဂစ္ဆန္တဿ အယံ အစေတနာ မဟာပထဝီ နိန္နံ ဥန္နမတိ, ဥန္နတံ ဩနမတီ’တိ, ပုန စ ဘဏထ ‘ဘဂဝတော ပါဒေါ သကလိကာယ ခတော’တိ။ ယာ သာ သကလိကာ ဘဂဝတော ပါဒေ ပတိတာ, ကိဿ ပန သာ သကလိကာ ဘဂဝတော ပါဒါ န နိဝတ္တာ။ ယဒိ, ဘန္တေ နာဂသေန, ဘဂဝတော ဂစ္ဆန္တဿ အယံ အစေတနာ မဟာပထဝီ နိန္နံ ဥန္နမတိ, ဥန္နတံ ဩနမတိ, တေန ဟိ ‘ဘဂဝတော ပါဒေါ သကလိကာယ ခတော’တိ ယံ ဝစနံ, တံ မိစ္ဆာ။ ယဒိ ဘဂဝတော ပါဒေါ သကလိကာယ ခတော, တေန ဟိ ‘ဘဂဝတော ဂစ္ဆန္တဿ အယံ အစေတနာ မဟာပထဝီ နိန္နံ ဥန္နမတိ ဥန္နတံ ဩနမတီ’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘သစ္စံ , မဟာရာဇ, အတ္ထေတံ ဘဂဝတော ဂစ္ဆန္တဿ အယံ အစေတနာ မဟာပထဝီ နိန္နံ ဥန္နမတိ ဥန္နတံ ဩနမတိ, ဘဂဝတော စ ပါဒေါ သကလိကာယ ခတော, န စ ပန သာ သကလိကာ အတ္တနော ဓမ္မတာယ ပတိတာ, ဒေဝဒတ္တဿ ဥပက္ကမေန ပတိတာ။ ဒေဝဒတ္တော, မဟာရာဇ, ဗဟူနိ ဇာတိသတသဟဿာနိ ဘဂဝတိ အာဃာတံ ဗန္ဓိ, သော တေန အာဃာတေန ‘မဟန္တံ ကူဋာဂါရပ္ပမာဏံ ပါသာဏံ ဘဂဝတော ဥပရိ ပါတေဿာမီ’တိ မုဉ္စိ။ အထ ဒွေ သေလာ ပထဝိတော ဥဋ္ဌဟိတွာ တံ ပါသာဏံ သမ္ပဋိစ္ဆိံသု, အထ နေသံ သမ္ပဟာရေန ပါသာဏတော ပပဋိကာ ဘိဇ္ဇိတွာ ယေန ဝါ တေန ဝါ ပတန္တီ ဘဂဝတော ပါဒေ ပတိတာ’’တိ။

‘‘ယထာ စ, ဘန္တေ နာဂသေန, ဒွေ သေလာ ပါသာဏံ သမ္ပဋိစ္ဆိံသု, တထေဝ ပပဋိကာပိ သမ္ပဋိစ္ဆိတဗ္ဗာ’’တိ? ‘‘သမ္ပဋိစ္ဆိတမ္ပိ, မဟာရာဇ, ဣဓေကစ္စံ ပဂ္ဃရတိ ပသဝတိ န ဌာနမုပဂစ္ဆတိ, ယထာ, မဟာရာဇ, ဥဒကံ ပါဏိနာ ဂဟိတံ အင်္ဂုလန္တရိကာဟိ ပဂ္ဃရတိ ပသဝတိ န ဌာနမုပဂစ္ဆတိ, ခီရံ တက္ကံ မဓုံ သပ္ပိ တေသံ မစ္ဆရသံ မံသရသံ ပါဏိနာ ဂဟိတံ အင်္ဂုလန္တရိကာဟိ ပဂ္ဃရတိ ပသဝတိ န ဌာနမုပဂစ္ဆတိ, ဧဝမေဝ ခေါ, မဟာရာဇ, သမ္ပဋိစ္ဆနတ္ထံ ဥပဂတာနံ ဒွိန္နံ သေလာနံ သမ္ပဟာရေန ပါသာဏတော ပပဋိကာ ဘိဇ္ဇိတွာ ယေန ဝါ တေန ဝါ ပတန္တီ ဘဂဝတော ပါဒေ ပတိတာ။

‘‘ယထာ ဝါ ပန, မဟာရာဇ, သဏှသုခုမအဏုရဇသမံ ပုဠိနံ မုဋ္ဌိနာ ဂဟိတံ အင်္ဂုလန္တရိကာဟိ ပဂ္ဃရတိ ပသဝတိ န ဌာနမုပဂစ္ဆတိ, ဧဝမေဝ ခေါ, မဟာရာဇ, သမ္ပဋိစ္ဆနတ္ထံ ဥပဂတာနံ ဒွိန္နံ သေလာနံ သမ္ပဟာရေန ပါသာဏတော ပပဋိကာ ဘိဇ္ဇိတွာ ယေန ဝါ တေန ဝါ ပတန္တီ ဘဂဝတော ပါဒေ ပတိတာ။

‘‘ယထာ ဝါ ပန, မဟာရာဇ, ကဗဠော မုခေန ဂဟိတော ဣဓေကစ္စဿ မုခတော မုစ္စိတွာ ပဂ္ဃရတိ ပသဝတိ န ဌာနမုပဂစ္ဆတိ, ဧဝမေဝ ခေါ, မဟာရာဇ, သမ္ပဋိစ္ဆနတ္ထံ ဥပဂတာနံ ဒွိန္နံ သေလာနံ သမ္ပဟာရေန ပါသာဏတော ပပဋိကာ ဘိဇ္ဇိတွာ ယေန ဝါ တေန ဝါ ပတန္တီ ဘဂဝတော ပါဒေ ပတိတာ’’တိ။

‘‘ဟောတု, ဘန္တေ နာဂသေန, သေလေဟိ ပါသာဏော သမ္ပဋိစ္ဆိတော, အထ ပပဋိကာယပိ အပစိတိ ကာတဗ္ဗာ ယထေဝ မဟာပထဝိယာ’’တိ? ‘‘ဒွါဒသိမေ, မဟာရာဇ, အပစိတိံ န ကရောန္တိ။ ကတမေ ဒွါဒသ? ရတ္တော ရာဂဝသေန အပစိတိံ န ကရောတိ, ဒုဋ္ဌော ဒေါသဝသေန, မူဠ္ဟော မောဟဝသေန, ဥန္နတော မာနဝသေန, နိဂ္ဂုဏော အဝိသေသတာယ, အတိထဒ္ဓေါ အနိသေဓနတာယ, ဟီနော ဟီနသဘာဝတာယ, ဝစနကရော အနိဿရတာယ, ပါပေါ ကဒရိယတာယ, ဒုက္ခာပိတော ပဋိဒုက္ခာပနတာယ, လုဒ္ဓေါ လောဘာဘိဘူတတာယ, အာယူဟိတော အတ္ထသာဓနတာယ [အတ္ထသာဓနေန (သျာ။ ဣ။ က။)] အပစိတိံ န ကရောတိ။ ဣမေ ခေါ မဟာရာဇ ဒွါဒသ အပစိတိံ န ကရောန္တိ။ သာ စ ပန ပပဋိကာ ပါသာဏသမ္ပဟာရေန ဘိဇ္ဇိတွာ အနိမိတ္တကတဒိသာ ယေန ဝါ တေန ဝါ ပတမာနာ ဘဂဝတော ပါဒေ ပတိတာ။

‘‘ယထာ ဝါ ပန, မဟာရာဇ, သဏှသုခုမအဏုရဇော အနိလဗလသမာဟတော အနိမိတ္တကတဒိသော ယေန ဝါ တေန ဝါ အဘိကိရတိ, ဧဝမေဝ ခေါ, မဟာရာဇ, သာ ပပဋိကာ ပါသာဏသမ္ပဟာရေန ဘိဇ္ဇိတွာ အနိမိတ္တကတဒိသာ ယေန ဝါ တေန ဝါ ပတမာနာ ဘဂဝတော ပါဒေ ပတိတာ။ ယဒိ ပန, မဟာရာဇ, သာ ပပဋိကာ ပါသာဏတော ဝိသုံ န ဘဝေယျ, တမ္ပိ တေ သေလာ ပါသာဏပပဋိကံ ဥပ္ပတိတွာ ဂဏှေယျုံ။ ဧသာ ပန, မဟာရာဇ, ပပဋိကာ န ဘူမဋ္ဌာ န အာကာသဋ္ဌာ, ပါသာဏသမ္ပဟာရဝေဂေန ဘိဇ္ဇိတွာ အနိမိတ္တကတဒိသာ ယေန ဝါ တေန ဝါ ပတမာနာ ဘဂဝတော ပါဒေ ပတိတာ။

‘‘ယထာ ဝါ ပန, မဟာရာဇ, ဝါတမဏ္ဍလိကာယ ဥက္ခိတ္တံ ပုရာဏပဏ္ဏံ အနိမိတ္တကတဒိသံ ယေန ဝါ တေန ဝါ ပတတိ, ဧဝမေဝ ခေါ, မဟာရာဇ, ဧသာ ပပဋိကာ ပါသာဏသမ္ပဟာရဝေဂေန အနိမိတ္တကတဒိသာ ယေန ဝါ တေန ဝါ ပတမာနာ ဘဂဝတော ပါဒေ ပတိတာ။ အပိ စ, မဟာရာဇ, အကတညုဿ ကဒရိယဿ ဒေဝဒတ္တဿ ဒုက္ခာနုဘဝနာယ ပပဋိကာ ဘဂဝတော ပါဒေ ပတိတာ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ပါဒသကလိကာဟတပဉ္ဟော အဋ္ဌမော။

၉။ အဂ္ဂဂ္ဂသမဏပဉ္ဟော

၉။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘အာသဝါနံ ခယာ သမဏော ဟောတီ’တိ။ ပုန စ ဘဏိတံ –

‘‘‘စတုဗ္ဘိ ဓမ္မေဟိ သမင်္ဂိဘူတံ၊ တံ ဝေ နရံ သမဏံ အာဟု လောကေ’တိ။

တတ္ရိမေ စတ္တာရော ဓမ္မာ ခန္တိ အပ္ပါဟာရတာ ရတိဝိပ္ပဟာနံ အာကိဉ္စညံ။ သဗ္ဗာနိ ပနေတာနိ အပရိက္ခီဏာသဝဿ သကိလေသဿေဝ ဟောန္တိ။ ယဒိ, ဘန္တေ နာဂသေန, အာသဝါနံ ခယာ သမဏော ဟောတိ, တေန ဟိ ‘စတုဗ္ဘိ ဓမ္မေဟိ သမင်္ဂိဘူတံ, တံ ဝေ နရံ သမဏံ အာဟု လောကေ’တိ ယံ ဝစနံ, တံ မိစ္ဆာ။ ယဒိ စတုဗ္ဘိ ဓမ္မေဟိ သမင်္ဂိဘူတော သမဏော ဟောတိ, တေန ဟိ ‘အာသဝါနံ ခယာ သမဏော ဟောတီ’တိ တမ္ပိ ဝစနံ မိစ္ဆာ, အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘အာသဝါနံ ခယာ သမဏော ဟောတီ’တိ။ ပုန စ ဘဏိတံ ‘စတုဗ္ဘိ ဓမ္မေဟိ သမင်္ဂိဘူတံ, တံ ဝေ နရံ သမဏံ အာဟု လောကေ’တိ။ တဒိဒံ, မဟာရာဇ, ဝစနံ တေသံ တေသံ ပုဂ္ဂလာနံ ဂုဏဝသေန ဘဏိတံ ‘စတုဗ္ဘိ ဓမ္မေဟိ သမင်္ဂိဘူတံ, တံ ဝေ နရံ သမဏံ အာဟု လောကေ’တိ, ဣဒံ ပန နိရဝသေသဝစနံ ‘အာသဝါနံ ခယာ သမဏော ဟောတီ’တိ။

‘‘အပိ စ, မဟာရာဇ, ယေ ကေစိ ကိလေသူပသမာယ ပဋိပန္နာ, တေ သဗ္ဗေ ဥပါဒါယုပါဒါယ သမဏော ခီဏာသဝေါ အဂ္ဂမက္ခာယတိ။ ယထာ, မဟာရာဇ, ယာနိ ကာနိစိ ဇလဇထလဇပုပ္ဖာနိ, ဝဿိကံ တေသံ အဂ္ဂမက္ခာယတိ, အဝသေသာနိ ယာနိ ကာနိစိ ဝိဝိဓါနိ ပုပ္ဖဇာတာနိ, သဗ္ဗာနိ တာနိ ပုပ္ဖာနိ ယေဝ, ဥပါဒါယုပါဒါယ ပန ဝဿိကံ ယေဝ ပုပ္ဖံ ဇနဿ ပတ္ထိတံ ပိဟယိတံ။ ဧဝမေဝ ခေါ, မဟာရာဇ, ယေ ကေစိ ကိလေသူပသမာယ ပဋိပန္နာ, တေ သဗ္ဗေ ဥပါဒါယုပါဒါယ သမဏော ခီဏာသဝေါ အဂ္ဂမက္ခာယတိ။

‘‘ယထာ ဝါ ပန, မဟာရာဇ, သဗ္ဗဓညာနံ သာလိ အဂ္ဂမက္ခာယတိ, ယာ ကာစိ အဝသေသာ ဝိဝိဓါ ဓညဇာတိယော, တာ သဗ္ဗာ ဥပါဒါယုပါဒါယ ဘောဇနာနိ သရီရယာပနာယ, သာလိ ယေဝ တေသံ အဂ္ဂမက္ခာယတိ။ ဧဝမေဝ ခေါ, မဟာရာဇ, ယေ ကေစိ ကိလေသူပသမာယ ပဋိပန္နာ, တေ သဗ္ဗေ ဥပါဒါယုပါဒါယ သမဏော ခီဏာသဝေါ အဂ္ဂမက္ခာယတီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

အဂ္ဂဂ္ဂသမဏပဉ္ဟော နဝမော။

၁၀။ ဝဏ္ဏဘဏနပဉ္ဟော

၁၀။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘မမံ ဝါ, ဘိက္ခဝေ, ပရေ ဝဏ္ဏံ ဘာသေယျုံ, ဓမ္မဿ ဝါ, သံဃဿ ဝါ ဝဏ္ဏံ ဘာသေယျုံ, တတြ တုမှေဟိ န အာနန္ဒော, န သောမနဿံ, န စေတသော ဥပ္ပိလာဝိတတ္တံ ကရဏီယ’န္တိ ပုန စ တထာဂတော သေလဿ ဗြာဟ္မဏဿ ယထာဘုစ္စေ ဝဏ္ဏေ ဘညမာနေ အာနန္ဒိတော သုမနော ဥပ္ပိလာဝိတော ဘိယျော ဥတ္တရိံ သကဂုဏံ ပကိတ္တေသိ –

‘‘‘ရာဇာဟမသ္မိ သေလာတိ၊ ဓမ္မရာဇာ အနုတ္တရော။

ဓမ္မေန စက္ကံ ဝတ္တေမိ၊ စက္ကံ အပ္ပဋိဝတ္တိယ’န္တိ [မ။ နိ။ ၂။၃၉၉]။

‘‘ယဒိ, ဘန္တေ နာဂသေန, ဘဂဝတာ ဘဏိတံ ‘မမံ ဝါ, ဘိက္ခဝေ, ပရေ ဝဏ္ဏံ ဘာသေယျုံ, ဓမ္မဿ ဝါ သံဃဿ ဝါ ဝဏ္ဏံ ဘာသေယျုံ, တတြ တုမှေဟိ န အာနန္ဒော, န သောမနဿံ, န စေတသော ဥပ္ပိလာဝိတတ္တံ ကရဏီယ’န္တိ, တေန ဟိ သေလဿ ဗြာဟ္မဏဿ ယထာဘုစ္စေ ဝဏ္ဏေ ဘညမာနေ အာနန္ဒိတော သုမနော ဥပ္ပိလာဝိတော ဘိယျော ဥတ္တရိံ သကဂုဏံ ပကိတ္တေသီတိ ယံ ဝစနံ, တံ မိစ္ဆာ။ ယဒိ သေလဿ ဗြာဟ္မဏဿ ယထာဘုစ္စေ ဝဏ္ဏေ ဘညမာနေ အာနန္ဒိတော သုမနော ဥပ္ပိလာဝိတော ဘိယျော ဥတ္တရိံ သကဂုဏံ ပကိတ္တေသိ, တေန ဟိ ‘မမံ ဝါ, ဘိက္ခဝေ, ပရေ ဝဏ္ဏံ ဘာသေယျုံ, ဓမ္မဿ ဝါ သံဃဿ ဝါ ဝဏ္ဏံ ဘာသေယျုံ, တတြ တုမှေဟိ န အာနန္ဒော, န သောမနဿံ, န စေတသော ဥပ္ပိလာဝိတတ္တံ ကရဏီယ’န္တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ , မဟာရာဇ, ဘဂဝတာ ‘မမံ ဝါ, ဘိက္ခဝေ, ပရေ ဝဏ္ဏံ ဘာသေယျုံ, ဓမ္မဿ ဝါ သံဃဿ ဝါ ဝဏ္ဏံ ဘာသေယျုံ, တတြ တုမှေဟိ န အာနန္ဒော, န သောမနဿံ, န စေတသော ဥပ္ပိလာဝိတတ္တံ ကရဏီယ’န္တိ။ သေလဿ စ ဗြာဟ္မဏဿ ယထာဘုစ္စေ ဝဏ္ဏေ ဘညမာနေ ဘိယျော ဥတ္တရိံ သကဂုဏံ ပကိတ္တိတံ –

‘‘‘ရာဇာဟမသ္မိ သေလာတိ၊ ဓမ္မရာဇာ အနုတ္တရော။

ဓမ္မေန စက္ကံ ဝတ္တေမိ၊ စက္ကံ အပ္ပဋိဝတ္တိယ’န္တိ။

‘‘ပဌမံ, မဟာရာဇ, ဘဂဝတာ ဓမ္မဿ သဘာဝသရသလက္ခဏံ သဘာဝံ အဝိတထံ ဘူတံ တစ္ဆံ တထတ္ထံ ပရိဒီပယမာနေန ဘဏိတံ ‘မမံ ဝါ ဘိက္ခဝေ, ပရေ ဝဏ္ဏံ ဘာသေယျုံ, ဓမ္မဿ ဝါ သံဃဿ ဝါ ဝဏ္ဏံ ဘာသေယျုံ, တတြ တုမှေဟိ န အာနန္ဒော, န သောမနဿံ, န စေတသော ဥပ္ပိလာဝိတတ္တံ ကရဏီယ’န္တိ။ ယံ ပန ဘဂဝတာ သေလဿ ဗြာဟ္မဏဿ ယထာဘုစ္စေ ဝဏ္ဏေ ဘညမာနေ ဘိယျော ဥတ္တရိံ သကဂုဏံ ပကိတ္တိတံ ‘ရာဇာဟမသ္မိ သေလာတိ, ဓမ္မရာဇာ အနုတ္တရော’တိ တံ န လာဘဟေတု, န ယသဟေတု, န အတ္တဟေတု, န ပက္ခဟေတု, န အန္တေဝါသိကမ္ယတာယ, အထ ခေါ အနုကမ္ပာယ ကာရုညေန ဟိတဝသေန ဧဝံ ဣမဿ ဓမ္မာဘိသမယော ဘဝိဿတိ တိဏ္ဏဉ္စ မာဏဝကသတာနန္တိ, ဧဝံ ဘိယျော ဥတ္တရိံ သကဂုဏံ ဘဏိတံ ‘ရာဇာဟမသ္မိ သေလာတိ, ဓမ္မရာဇာ အနုတ္တရော’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဝဏ္ဏဘဏနပဉ္ဟော ဒသမော။

၁၁။ အဟိံသာနိဂ္ဂဟပဉ္ဟော

၁၁။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘အဟိံသယံ ပရံ လောကေ, ပိယော ဟောဟိသိ မာမကော’တိ။ ပုန စ ဘဏိတံ ‘နိဂ္ဂဏှေ နိဂ္ဂဟာရဟံ, ပဂ္ဂဏှေ ပဂ္ဂဟာရဟ’န္တိ။ နိဂ္ဂဟော နာမ, ဘန္တေ နာဂသေန, ဟတ္ထစ္ဆေဒေါ ပါဒစ္ဆေဒေါ ဝဓေါ ဗန္ဓနံ ကာရဏာ မာရဏံ သန္တတိဝိကောပနံ, န ဧတံ ဝစနံ ဘဂဝတော ယုတ္တံ, န စ ဘဂဝါ အရဟတိ ဧတံ ဝစနံ ဝတ္တုံ။ ယဒိ, ဘန္တေ နာဂသေန, ဘဂဝတာ ဘဏိတံ ‘အဟိံသယံ ပရံ လောကေ, ပိယော ဟောဟိသိ မာမကော’’တိ, တေန ဟိ ‘‘နိဂ္ဂဏှေ နိဂ္ဂဟာရဟံ, ပဂ္ဂဏှေ ပဂ္ဂဟာရဟ’’န္တိ ယံ ဝစနံ, တံ မိစ္ဆာ။ ယဒိ တထာဂတေန ဘဏိတံ ‘‘နိဂ္ဂဏှေ နိဂ္ဂဟာရဟံ, ပဂ္ဂဏှေ ပဂ္ဂဟာရဟ’’န္တိ, တေန ဟိ ‘‘အဟိံသယံ ပရံ လောကေ, ပိယော ဟောဟိသိ မာမကော’’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘အဟိံသယံ ပရံ လောကေ, ပိယော ဟောဟိသိ မာမကော’တိ, ဘဏိတဉ္စ ‘နိဂ္ဂဏှေ နိဂ္ဂဟာရဟံ, ပဂ္ဂဏှေ ပဂ္ဂဟာရဟ’န္တိ ။ ‘အဟိံသယံ ပရံ လောကေ, ပိယော ဟောဟိသိ မာမကော’တိ သဗ္ဗေသံ, မဟာရာဇ, တထာဂတာနံ အနုမတံ ဧတံ, ဧသာ အနုသိဋ္ဌိ, ဧသာ ဓမ္မဒေသနာ, ဓမ္မော ဟိ, မဟာရာဇ, အဟိံသာလက္ခဏော, သဘာဝဝစနံ ဧတံ။ ယံ ပန, မဟာရာဇ, တထာဂတော အာဟ ‘နိဂ္ဂဏှေ နိဂ္ဂဟာရဟံ, ပဂ္ဂဏှေ ပဂ္ဂဟာရဟ’န္တိ, ဘာသာ ဧသာ, ဥဒ္ဓတံ, မဟာရာဇ, စိတ္တံ နိဂ္ဂဟေတဗ္ဗံ, လီနံ စိတ္တံ ပဂ္ဂဟေတဗ္ဗံ။ အကုသလံ စိတ္တံ နိဂ္ဂဟေတဗ္ဗံ, ကုသလံ စိတ္တံ ပဂ္ဂဟေတဗ္ဗံ။ အယောနိသော မနသိကာရော နိဂ္ဂဟေတဗ္ဗော, ယောနိသော မနသိကာရော ပဂ္ဂဟေတဗ္ဗော။ မိစ္ဆာပဋိပန္နော နိဂ္ဂဟေတဗ္ဗော, သမ္မာပဋိပန္နော ပဂ္ဂဟေတဗ္ဗော။ အနရိယော နိဂ္ဂဟေတဗ္ဗော အရိယော ပဂ္ဂဟေတဗ္ဗော။ စောရော နိဂ္ဂဟေတဗ္ဗော, အစောရော ပဂ္ဂဟေတဗ္ဗော’’တိ။

‘‘ဟောတု, ဘန္တေ နာဂသေန, ဣဒါနိ တွံ ပစ္စာဂတောသိ မမ ဝိသယံ, ယမဟံ ပုစ္ဆာမိ, သော မေ အတ္ထော ဥပဂတော။ စောရော ပန, ဘန္တေ နာဂသေန, နိဂ္ဂဏှန္တေန ကထံ နိဂ္ဂဟေတဗ္ဗော’’တိ? ‘‘စောရော, မဟာရာဇ, နိဂ္ဂဏှန္တေန ဧဝံ နိဂ္ဂဟေတဗ္ဗော, ပရိဘာသနီယော ပရိဘာသိတဗ္ဗော, ဒဏ္ဍနီယော ဒဏ္ဍေတဗ္ဗော, ပဗ္ဗာဇနီယော ပဗ္ဗာဇေတဗ္ဗော, ဗန္ဓနီယော ဗန္ဓိတဗ္ဗော, ဃာတနီယော ဃာတေတဗ္ဗော’’တိ။ ‘‘ယံ ပန, ဘန္တေ နာဂသေန, စောရာနံ ဃာတနံ, တံ တထာဂတာနံ အနုမတ’’န္တိ? ‘‘န ဟိ, မဟာရာဇာ’’တိ။ ‘‘ကိဿ ပန စောရော အနုသာသနီယော အနုမတော တထာဂတာန’’န္တိ? ‘‘ယော သော, မဟာရာဇ, ဃာတီယတိ, န သော တထာဂတာနံ အနုမတိယာ ဃာတီယတိ, သယံကတေန သော ဃာတီယတိ, အပိ စ ဓမ္မာနုသိဋ္ဌိယာ အနုသာသီယတိ, သက္ကာ ပန, မဟာရာဇ, တယာ ပုရိသံ အကာရကံ အနပရာဓံ ဝီထိယံ စရန္တံ ဂဟေတွာ ဃာတယိတု’’န္တိ? ‘‘န သက္ကာ, ဘန္တေ’’တိ။ ‘‘ကေန ကာရဏေန, မဟာရာဇာ’’တိ? ‘‘အကာရကတ္တာ, ဘန္တေ’’တိ။ ‘‘ဧဝမေဝ ခေါ, မဟာရာဇ, န စောရော တထာဂတာနံ အနုမတိယာ ဟညတိ, သယံကတေန သော ဟညတိ, ကိံ ပနေတ္ထ အနုသာသကော ကိဉ္စိ ဒေါသံ အာပဇ္ဇတီ’’တိ? ‘‘န ဟိ ဘန္တေ’’တိ။ ‘‘တေန ဟိ, မဟာရာဇ, တထာဂတာနံ အနုသိဋ္ဌိ သမ္မာနုသိဋ္ဌိ ဟောတီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

အဟိံသာနိဂ္ဂဟပဉ္ဟော ဧကာဒသမော။

၁၂။ ဘိက္ခုပဏာမိတပဉ္ဟော

၁၂။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘အက္ကောဓနော ဝိဂတခိလောဟမသ္မီ’တိ, ပုန စ တထာဂတော ထေရေ သာရိပုတ္တမောဂ္ဂလ္လာနေ သပရိသေ ပဏာမေသိ, ကိံ နု ခေါ, ဘန္တေ နာဂသေန, တထာဂတော ကုပိတော ပရိသံ ပဏာမေသိ, ဥဒါဟု တုဋ္ဌော ပဏာမေသိ, ဧတံ တာဝ ဇာနာဟိ ဣမံ နာမာတိ? ယဒိ, ဘန္တေ နာဂသေန, ကုပိတော ပရိသံ ပဏာမေသိ, တေန ဟိ တထာဂတဿ ကောဓေါ အပ္ပဋိဝတ္တိတော, ယဒိ တုဋ္ဌော ပဏာမေသိ, တေန ဟိ အဝတ္ထုသ္မိံ အဇာနန္တေန ပဏာမိတာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘အက္ကောဓနော ဝိဂတခိလောဟမသ္မီ’တိ, ပဏာမိတာ စ ထေရာ သာရိပုတ္တမောဂ္ဂလ္လာနာ သပရိသာ, တဉ္စ ပန န ကောပေန, ဣဓ, မဟာရာဇ, ကောစိဒေဝ ပုရိသော မဟာပထဝိယာ မူလေ ဝါ ခါဏုကေ ဝါ ပါသာဏေ ဝါ ကဌလေ ဝါ ဝိသမေ ဝါ ဘူမိဘာဂေ ခလိတွာ ပတတိ, အပိ နု ခေါ, မဟာရာဇ, မဟာပထဝီ ကုပိတာ တံ ပါတေတီ’’တိ? ‘‘န ဟိ, ဘန္တေ, နတ္ထိ မဟာပထဝိယာ ကောပေါ ဝါ ပသာဒေါ ဝါ, အနုနယပ္ပဋိဃဝိပ္ပမုတ္တာ မဟာပထဝီ, သယမေဝ သော အလသော ခလိတွာ ပတိတောတိ။ ဧဝမေဝ ခေါ, မဟာရာဇ, နတ္ထိ တထာဂတာနံ ကောပေါ ဝါ ပသာဒေါ ဝါ, အနုနယပ္ပဋိဃဝိပ္ပမုတ္တာ တထာဂတာ အရဟန္တော သမ္မာသမ္ဗုဒ္ဓါ, အထ ခေါ သယံ ကတေနေဝ တေ အတ္တနော အပရာဓေန ပဏာမိတာ။

‘‘ဣဓ ပန, မဟာရာဇ, မဟာသမုဒ္ဒေါ န မတေန ကုဏပေန သံဝသတိ, ယံ ဟောတိ မဟာသမုဒ္ဒေ မတံ ကုဏပံ, တံ ခိပ္ပမေဝ နိစ္ဆုဘတိ ထလံ ဥဿာရေတိ။ အပိ နု ခေါ, မဟာရာဇ, မဟာသမုဒ္ဒေါ ကုပိတော တံ ကုဏပံ နိစ္ဆုဘတီ’’တိ? ‘‘န ဟိ, ဘန္တေ, နတ္ထိ မဟာသမုဒ္ဒဿ ကောပေါ ဝါ ပသာဒေါ ဝါ, အနုနယပ္ပဋိဃဝိပ္ပမုတ္တော မဟာသမုဒ္ဒေါ’’တိ။ ‘‘ဧဝမေဝ ခေါ, မဟာရာဇ, နတ္ထိ တထာဂတာနံ ကောပေါ ဝါ ပသာဒေါ ဝါ, အနုနယပ္ပဋိဃဝိပ္ပမုတ္တာ တထာဂတာ အရဟန္တော သမ္မာသမ္ဗုဒ္ဓါ, အထ ခေါ သယံ ကတေနေဝ တေ အတ္တနော အပရာဓေန ပဏာမိတာ။

‘‘ယထာ, မဟာရာဇ, ပထဝိယာ ခလိတော ပတီယတိ, ဧဝံ ဇိနသာသနဝရေ ခလိတော ပဏာမီယတိ။ ယထာ, မဟာရာဇ, သမုဒ္ဒေ မတံ ကုဏပံ နိစ္ဆုဘီယတိ , ဧဝံ ဇိနသာသနဝရေ ခလိတော ပဏာမီယတိ။ ယံ ပန တေ, မဟာရာဇ, တထာဂတော ပဏာမေသိ, တေသံ အတ္ထကာမော ဟိတကာမော သုခကာမော ဝိသုဒ္ဓိကာမော ‘ဧဝံ ဣမေ ဇာတိဇရာဗျာဓိမရဏေဟိ ပရိမုစ္စိဿန္တီ’တိ ပဏာမေသီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဘိက္ခုပဏာမိတပဉ္ဟော ဒွါဒသမော။

ပဏာမိတဝဂ္ဂေါ တတိယော။

ဣမသ္မိံ ဝဂ္ဂေ ဒွါဒသ ပဉှာ။

၄။ သဗ္ဗညုတဉာဏဝဂ္ဂေါ

၁။ ဣဒ္ဓိကမ္မဝိပါကပဉ္ဟော

၁။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘ဧတဒဂ္ဂံ, ဘိက္ခဝေ, မမ သာဝကာနံ ဘိက္ခူနံ ဣဒ္ဓိမန္တာနံ ယဒိဒံ မဟာမောဂ္ဂလ္လာနော’တိ။ ပုန စ ကိရ သော လဂုဠေဟိ ပရိပေါထိတော ဘိန္နသီသော သဉ္စုဏ္ဏိတဋ္ဌိမံသဓမနိဆိန္နပရိဂတ္တော ပရိနိဗ္ဗုတော [ဓမနိမဇ္ဇပရိကတ္တော (သီ။ ဣ။), ဓမ္မနိမိဉ္ဇပရိဂတ္တော (သျာ။)]။ ယဒိ, ဘန္တေ နာဂသေန, ထေရော မဟာမောဂ္ဂလ္လာနော ဣဒ္ဓိယာ ကောဋိံ ဂတော, တေန ဟိ လဂုဠေဟိ ပေါထိတော ပရိနိဗ္ဗုတောတိ ယံ ဝစနံ, တံ မိစ္ဆာ။ ယဒိ လဂုဠေဟိ ပရိပေါထိတော ပရိနိဗ္ဗုတော, တေန ဟိ ဣဒ္ဓိယာ ကောဋိံ ဂတောတိ တမ္ပိ ဝစနံ မိစ္ဆာ။ ကိံ န သမတ္ထော ဣဒ္ဓိယာ အတ္တနော ဥပဃာတံ အပနယိတုံ, သဒေဝကဿပိ လောကဿ ပဋိသရဏံ ဘဝိတုံ အရဟောတိ? အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘ဧတဒဂ္ဂံ, ဘိက္ခဝေ, မမ သာဝကာနံ ဘိက္ခူနံ ဣဒ္ဓိမန္တာနံ ယဒိဒံ မဟာမောဂ္ဂလ္လာနော’တိ။ အာယသ္မာ စ မဟာမောဂ္ဂလ္လာနော လဂုဠဟတော ပရိနိဗ္ဗုတော, တဉ္စ ပန ကမ္မာဓိဂ္ဂဟိတေနာ’’တိ။

‘‘နနု, ဘန္တေ နာဂသေန, ဣဒ္ဓိမတော ဣဒ္ဓိဝိသယောပိ ကမ္မဝိပါကောပိ ဒွေ အစိန္တိယာ, အစိန္တိယေန အစိန္တိယံ အပနယိတဗ္ဗံ။ ယထာ နာမ, ဘန္တေ, ကေစိ ဖလကာမာ ကပိတ္ထေန ကပိတ္ထံ ပေါထေန္တိ, အမ္ဗေန အမ္ဗံ ပေါထေန္တိ, ဧဝမေဝ ခေါ, ဘန္တေ နာဂသေန, အစိန္တိယေန အစိန္တိယံ ပေါထယိတွာ အပနေတဗ္ဗ’’န္တိ? ‘‘အစိန္တိယာနမ္ပိ, မဟာရာဇ, ဧကံ အဓိမတ္တံ ဗလဝတရံ, ယထာ, မဟာရာဇ, မဟိယာ ရာဇာနော ဟောန္တိ သမဇစ္စာ, သမဇစ္စာနမ္ပိ တေသံ ဧကော သဗ္ဗေ အဘိဘဝိတွာ အာဏံ ပဝတ္တေတိ။ ဧဝမေဝ ခေါ, မဟာရာဇ, တေသံ အစိန္တိယာနံ ကမ္မဝိပါကံ ယေဝ အဓိမတ္တံ ဗလဝတရံ, ကမ္မဝိပါကံ ယေဝ သဗ္ဗေ အဘိဘဝိယ အာဏံ ပဝတ္တေတိ, ကမ္မာဓိဂ္ဂဟိတဿ အဝသေသာ ကိရိယာ ဩကာသံ န လဘန္တိ။

‘‘ဣဓ ပန, မဟာရာဇ, ကောစိ ပုရိသော ကိသ္မိဉ္စိဒေဝ ပကရဏေ အပရဇ္ဈတိ, န တဿ မာတာ ဝါ ပိတာ ဝါ ဘဂိနီ ဝါ ဘာတရော ဝါ သခီ ဝါ သဟာယကာ ဝါ [ဘဂိနိဘာတရော ဝါ သခိသဟာယကာ ဝါ (သီ။ ဣ။ က။)] တာယန္တိ, အထ ခေါ ရာဇာ ယေဝ တတ္ထ အဘိဘဝိယ အာဏံ ပဝတ္တေတိ။ ကိံ တတ္ထ ကာရဏံ? အပရာဓိကတာ။ ဧဝမေဝ ခေါ, မဟာရာဇ, တေသံ အစိန္တိယာနံ ကမ္မဝိပါကံ ယေဝ အဓိမတ္တံ ဗလဝတရံ, ကမ္မဝိပါကံ ယေဝ သဗ္ဗေ အဘိဘဝိယ အာဏံ ပဝတ္တေတိ, ကမ္မာဓိဂ္ဂဟိတဿ အဝသေသာ ကိရိယာ ဩကာသံ န လဘန္တိ။

‘‘ယထာ ဝါ ပန, မဟာရာဇ, မဟိယာ ဒဝဍာဟေ သမုဋ္ဌိတေ ဃဋသဟဿမ္ပိ ဥဒကံ န သက္ကောတိ နိဗ္ဗာပေတုံ, အထ ခေါ အဂ္ဂိ ယေဝ တတ္ထ အဘိဘဝိယ အာဏံ ပဝတ္တေတိ။ ကိံ တတ္ထ ကာရဏံ? ဗလဝတာ တေဇဿ။ ဧဝမေဝ ခေါ, မဟာရာဇ, တေသံ အစိန္တိယာနံ ကမ္မဝိပါကံ ယေဝ အဓိမတ္တံ ဗလဝတရံ, ကမ္မဝိပါကံ ယေဝ သဗ္ဗေ အဘိဘဝိယ အာဏံ ပဝတ္တေတိ, ကမ္မာဓိဂ္ဂဟိတဿ အဝသေသာ ကိရိယာ ဩကာသံ န လဘန္တိ, တသ္မာ, မဟာရာဇ, အာယသ္မတော မဟာမောဂ္ဂလ္လာနဿ ကမ္မာဓိဂ္ဂဟိတဿ လဂုဠေဟိ ပေါထိယမာနဿ ဣဒ္ဓိယာ သမန္နာဟာရော နာဟောသီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဣဒ္ဓိကမ္မဝိပါကပဉ္ဟော ပဌမော။

၂။ ဓမ္မဝိနယပဋိစ္ဆန္နာပဋိစ္ဆန္နပဉ္ဟော

၂။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘တထာဂတပ္ပဝေဒိတော, ဘိက္ခဝေ, ဓမ္မဝိနယော ဝိဝဋော ဝိရောစတိ နော ပဋိစ္ဆန္နော’တိ။ ပုန စ ပါတိမောက္ခုဒ္ဒေသော ကေဝလဉ္စ ဝိနယပိဋကံ ပိဟိတံ ပဋိစ္ဆန္နံ။ ယဒိ, ဘန္တေ နာဂသေန, ဇိနသာသနေ ယုတ္တံ ဝါ ပတ္တံ ဝါ သမယံ လဘေထ, ဝိနယပဏ္ဏတ္တိ ဝိဝဋာ သောဘေယျ။ ကေန ကာရဏေန? ကေဝလံ တတ္ထ သိက္ခာ သံယမော နိယမော သီလဂုဏအာစာရပဏ္ဏတ္တိ အတ္ထရသော ဓမ္မရသော ဝိမုတ္တိရသော။ ယဒိ, ဘန္တေ နာဂသေန, ဘဂဝတာ ဘဏိတံ ‘တထာဂတပ္ပဝေဒိတော, ဘိက္ခဝေ, ဓမ္မဝိနယော ဝိဝဋော ဝိရောစတိ နော ပဋိစ္ဆန္နော’တိ, တေန ဟိ ‘ပါတိမောက္ခုဒ္ဒေသော ကေဝလဉ္စ ဝိနယပိဋကံ ပိဟိတံ ပဋိစ္ဆန္န’န္တိ ယံ ဝစနံ, တံ မိစ္ဆာ။ ယဒိ ပါတိမောက္ခုဒ္ဒေသော ကေဝလဉ္စ ဝိနယပိဋကံ ပိဟိတံ ပဋိစ္ဆန္နံ, တေန ဟိ ‘တထာဂတပ္ပဝေဒိတော, ဘိက္ခဝေ, ဓမ္မဝိနယော ဝိဝဋော ဝိရောစတိ နော ပဋိစ္ဆန္နော’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ , မဟာရာဇ, ဘဂဝတာ ‘တထာဂတပ္ပဝေဒိတော, ဘိက္ခဝေ, ဓမ္မဝိနယော ဝိဝဋော ဝိရောစတိ နော ပဋိစ္ဆန္နော’တိ။ ပုန စ ပါတိမောက္ခုဒ္ဒေသော ကေဝလဉ္စ ဝိနယပိဋကံ ပိဟိတံ ပဋိစ္ဆန္နံ, တဉ္စ ပန န သဗ္ဗေသံ, သီမံ ကတွာ ပိဟိတံ။

‘‘တိဝိဓေန, မဟာရာဇ, ဘဂဝတာ ပါတိမောက္ခုဒ္ဒေသော သီမံ ကတွာ ပိဟိတော, ပုဗ္ဗကာနံ တထာဂတာနံ ဝံသဝသေန ပါတိမောက္ခုဒ္ဒေသော သီမံ ကတွာ ပိဟိတော, ဓမ္မဿ ဂရုကတ္တာ ပိဟိတော, ဘိက္ခုဘူမိယာ ဂရုကတ္တာ ပိဟိတော။

‘‘ကထံ ပုဗ္ဗကာနံ တထာဂတာနံ ဝံသဝသေန ပါတိမောက္ခုဒ္ဒေသော သီမံ ကတွာ ပိဟိတော, ဧသော ဝံသော, မဟာရာဇ, သဗ္ဗေသံ ပုဗ္ဗကာနံ တထာဂတာနံ ယဒိဒံ ဘိက္ခုမဇ္ဈေ ပါတိမောက္ခုဒ္ဒေသော အဝသေသာနံ ပိဟိတော။ ယထာ, မဟာရာဇ, ခတ္တိယာနံ ခတ္တိယမာယာ ခတ္တိယေသု ယေဝ စရတိ, ဧဝမေတံ ခတ္တိယာနံ လောကဿ ပဝေဏီ အဝသေသာနံ ပိဟိတာ။ ဧဝမေဝ ခေါ, မဟာရာဇ, ဧသော ဝံသော သဗ္ဗေသံ ပုဗ္ဗကာနံ တထာဂတာနံ ယဒိဒံ ဘိက္ခုမဇ္ဈေ ပါတိမောက္ခုဒ္ဒေသော အဝသေသာနံ ပိဟိတော။

‘‘ယထာ ဝါ ပန, မဟာရာဇ, မဟိယာ ဂဏာ ဝတ္တန္တိ, သေယျထိဒံ, မလ္လာ အတောဏာ ပဗ္ဗတာ ဓမ္မဂိရိယာ ဗြဟ္မဂိရိယာ နဋကာ နစ္စကာ လင်္ဃကာ ပိသာစာ မဏိဘဒ္ဒါ ပုဏ္ဏဗဒ္ဓါ စန္ဒိမသူရိယာ သိရိဒေဝတာ ကာလိဒေဝတာ, သိဝါ ဝသုဒေဝါ ဃနိကာ အသိပါသာ ဘဒ္ဒိပုတ္တာတိ, တေသံ တေသံ ရဟဿံ တေသု တေသု ဂဏေသု ယေဝ စရတိ, အဝသေသာနံ ပိဟိတံ။ ဧဝမေဝ ခေါ, မဟာရာဇ, ဧသော ဝံသော သဗ္ဗေသံ ပုဗ္ဗကာနံ တထာဂတာနံ ယဒိဒံ ဘိက္ခုမဇ္ဈေ ပါတိမောက္ခုဒ္ဒေသော အဝသေသာနံ ပိဟိတော။ ဧဝံ ပုဗ္ဗကာနံ တထာဂတာနံ ဝံသဝသေန ပါတိမောက္ခုဒ္ဒေသော သီမံ ကတွာ ပိဟိတော။

‘‘ကထံ ဓမ္မဿ ဂရုကတ္တာ ပါတိမောက္ခုဒ္ဒေသော သီမံ ကတွာ ပိဟိတော? ဓမ္မော, မဟာရာဇ, ဂရုကော ဘာရိယော, တတ္ထ သမ္မတ္တကာရီ အညံ အာရာဓေတိ, တံ တတ္ထ ပရမ္ပရာသမ္မတ္တကာရိတာယ ပါပုဏာတိ, န တံ တတ္ထ ပရမ္ပရာသမ္မတ္တကာရိတာယ ပါပုဏာတိ, မာ စာယံ သာရဓမ္မော ဝရဓမ္မော အသမ္မတ္တကာရီနံ ဟတ္ထဂတော ဩညာတော အဝညာတော ဟီဠိတော ခီဠိတော ဂရဟိတော ဘဝတု, မာ စာယံ သာရဓမ္မော ဝရဓမ္မော ဒုဇ္ဇနဂတော ဩညာတော အဝညာတော ဟီဠိတော ခီဠိတော ဂရဟိတော ဘဝတူတိ။ ဧဝံ ဓမ္မဿ ဂရုကတ္တာ ပါတိမောက္ခုဒ္ဒေသော သီမံ ကတွာ ပိဟိတော။

‘‘ယထာ, မဟာရာဇ, သာရဝရပဝရအဘိဇာတဇာတိမန္တရတ္တလောဟိတစန္ဒနံ နာမ သဝရပုရမနုဂတံ ဩညာတံ အဝညာတံ ဟီဠိတံ ခီဠိတံ ဂရဟိတံ ဘဝတိ, ဧဝမေဝ ခေါ, မဟာရာဇ, မာ စာယံ သာရဓမ္မော ဝရဓမ္မော ပရမ္ပရာအသမ္မတ္တကာရီနံ ဟတ္ထဂတော ဩညာတော အဝညာတော ဟီဠိတော ခီဠိတော ဂရဟိတော ဘဝတု, မာ စာယံ သာရဓမ္မော ဝရဓမ္မော ဒုဇ္ဇနဂတော ဩညာတော အဝညာတော ဟီဠိတော ခီဠိတော ဂရဟိတော ဘဝတူတိ။ ဧဝံ ဓမ္မဿ ဂရုကတ္တာ ပါတိမောက္ခုဒ္ဒေသော သီမံ ကတွာ ပိဟိတော ။

‘‘ကထံ ဘိက္ခုဘူမိယာ ဂရုကတ္တာ ပါတိမောက္ခုဒ္ဒေသော သီမံ ကတွာ ပိဟိတော, ဘိက္ခုဘာဝေါ ခေါ, မဟာရာဇ, လောကေ အတုလိယော အပ္ပမာဏော အနဂ္ဃိယော, န သက္ကာ ကေနစိ အဂ္ဃါပေတုံ တုလေတုံ ပရိမေတုံ, မာယံ ဧဝရူပေ ဘိက္ခုဘာဝေ ဌိတော လောကေန သမသမော ဘဝတူတိ ဘိက္ခူနံ ယေဝ အန္တရေ ပါတိမောက္ခုဒ္ဒေသော စရတိ။ ယထာ, မဟာရာဇ, လောကေ ဝရပဝရဘဏ္ဍံ ဝတ္ထံ ဝါ အတ္ထရဏံ ဝါ ဂဇတုရင်္ဂရထသုဝဏ္ဏရဇတမဏိမုတ္တာဣတ္ထိရတနာဒီနိ ဝါ ဝိဇိတကမ္မသူရာ ဝါ [နိဇ္ဇိတကမ္မသူရာ ဝါ (သီ။ ဣ။)] သဗ္ဗေ တေ ရာဇာနမုပဂစ္ဆန္တိ, ဧဝမေဝ ခေါ, မဟာရာဇ, ယာဝတာ လောကေ [လောကေ သိက္ခာ (သီ။ ဣ။)] သုဂတာဂမပရိယတ္တိအာစာရသံယမသီလသံဝရဂုဏာ, သဗ္ဗေ တေ ဘိက္ခုသံဃမုပဂတာ ဘဝန္တိ။ ဧဝံ ဘိက္ခုဘူမိယာ ဂရုကတ္တာ ပါတိမောက္ခုဒ္ဒေသော သီမံ ကတွာ ပိဟိတော’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပိဋိစ္ဆာမီ’’တိ။

ဓမ္မဝိနယပဋိစ္ဆန္နာပဋိစ္ဆန္နပဉ္ဟော ဒုတိယော။

၃။ မုသာဝါဒဂရုလဟုဘာဝပဉ္ဟော

၃။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘သမ္ပဇာနမုသာဝါဒေ ပါရာဇိကော ဟောတီ’တိ။ ပုန စ ဘဏိတံ ‘သမ္ပဇာနမုသာဝါဒေ လဟုကံ အာပတ္တိံ အာပဇ္ဇတိ ဧကဿ သန္တိကေ ဒေသနာဝတ္ထုက’န္တိ။ ဘန္တေ နာဂသေန, ကော ပနေတ္ထ ဝိသေသော, ကိံ ကာရဏံ, ယဉ္စေကေန မုသာဝါဒေန ဥစ္ဆိဇ္ဇတိ, ယဉ္စေကေန မုသာဝါဒေန သတေကိစ္ဆော ဟောတိ? ယဒိ, ဘန္တေ နာဂသေန, ဘဂဝတာ ဘဏိတံ ‘သမ္ပဇာနမုသာဝါဒေ ပါရာဇိကော ဟောတီ’တိ, တေန ဟိ ‘သမ္ပဇာနမုသာဝါဒေ လဟုကံ အာပတ္တိံ အာပဇ္ဇတိ ဧကဿ သန္တိကေ ဒေသနာဝတ္ထုက’န္တိ ယံ ဝစနံ, တံ မိစ္ဆာ။ ယဒိ တထာဂတေန ဘဏိတံ ‘သမ္ပဇာနမုသာဝါဒေ လဟုကံ အာပတ္တိံ အာပဇ္ဇတိ ဧကဿ သန္တိကေ ဒေသနာဝတ္ထုက’န္တိ, တေန ဟိ ‘သမ္ပဇာနမုသာဝါဒေ ပါရာဇိကော ဟောတီ’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ , မဟာရာဇ, ဘဂဝတာ ‘သမ္ပဇာနမုသာဝါဒေ ပါရာဇိကော ဟောတီ’တိ။ ဘဏိတဉ္စ ‘သမ္ပဇာနမုသာဝါဒေ လဟုကံ အာပတ္တိံ အာပဇ္ဇတိ ဧကဿ သန္တိကေ ဒေသနာဝတ္ထုက’န္တိ, တဉ္စ ပန ဝတ္ထုဝသေန ဂရုကလဟုကံ ဟောတိ။ တံ ကိံ မညသိ, မဟာရာဇ, ဣဓ ကောစိ ပုရိသော ပရဿ ပါဏိနာ ပဟာရံ ဒဒေယျ, တဿ တုမှေ ကိံ ဒဏ္ဍံ ဓါရေထာ’’တိ? ‘‘ယဒိ သော, ဘန္တေ, အာဟ ‘နက္ခမာမီ’တိ, တဿ မယံ အက္ခမမာနေ ကဟာပဏံ ဟရာပေမာ’’တိ ‘‘ဣဓ ပန, မဟာရာဇ, သော ယေဝ ပုရိသော တဝ ပါဏိနာ ပဟာရံ ဒဒေယျ, တဿ ပန ကော ဒဏ္ဍော’’တိ? ‘‘ဟတ္ထမ္ပိဿ, ဘန္တေ, ဆေဒါပေယျာမ, ပါဒမ္ပိ ဆေဒါပေယျာမ, ယာဝ သီသံ ကဠီရစ္ဆေဇ္ဇံ ဆေဒါပေယျာမ, သဗ္ဗမ္ပိ တံ ဂေဟံ ဝိလုမ္ပာပေယျာမ, ဥဘတောပက္ခေ [ဥဘတောပဿေ (သီ။ ဣ။ က။)] ယာဝ သတ္တမံ ကုလံ သမုဂ္ဃါတာပေယျာမာ’’တိ။ ‘‘ကော ပနေတ္ထ, မဟာရာဇ, ဝိသေသော, ကိံ ကာရဏံ, ယံ ဧကဿ ပါဏိပ္ပဟာရေ သုခုမော ကဟာပဏော ဒဏ္ဍော, ယံ တဝ ပါဏိပ္ပဟာရေ ဟတ္ထစ္ဆေဇ္ဇံ ပါဒစ္ဆေဇ္ဇံ ယာဝ ကဠီရစ္ဆေဇ္ဇံ သဗ္ဗဂေဟာဒါနံ ဥဘတောပက္ခေ ယာဝ သတ္တမကုလာ သမုဂ္ဃါတော’’တိ? ‘‘မနုဿန္တရေန, ဘန္တေ’’တိ။ ‘‘ဧဝမေဝ ခေါ, မဟာရာဇ, သမ္ပဇာနမုသာဝါဒေါ ဝတ္ထုဝသေန ဂရုကလဟုကော ဟောတီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

မုသာဝါဒဂရုလဟုဘာဝပဉ္ဟော တတိယော။

၄။ ဗောဓိသတ္တဓမ္မတာပဉ္ဟော

၄။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ဓမ္မတာဓမ္မပရိယာယေ ‘ပုဗ္ဗေဝ ဗောဓိသတ္တာနံ မာတာပိတရော နိယတာ ဟောန္တိ, ဗောဓိ နိယတာ ဟောတိ, အဂ္ဂသာဝကာ နိယတာ ဟောန္တိ, ပုတ္တော နိယတော ဟောတိ, ဥပဋ္ဌာကော နိယတော ဟောတီ’တိ။ ပုန စ တုမှေ ဘဏထ ‘တုသိတေ ကာယေ ဌိတော ဗောဓိသတ္တော အဋ္ဌ မဟာဝိလောကနာနိ ဝိလောကေတိ, ကာလံ ဝိလောကေတိ, ဒီပံ ဝိလောကေတိ, ဒေသံ ဝိလောကေတိ, ကုလံ ဝိလောကေတိ, ဇနေတ္တိံ ဝိလောကေတိ, အာယုံ ဝိလောကေတိ, မာသံ ဝိလောကေတိ, နေက္ခမ္မံ ဝိလောကေတီ’တိ။ ဘန္တေ နာဂသေန, အပရိပက္ကေ ဉာဏေ ဗုဇ္ဈနံ နတ္ထိ, ပရိပက္ကေ ဉာဏေ န သက္ကာ နိမေသန္တရမ္ပိ အာဂမေတုံ, အနတိက္ကမနီယံ ပရိပက္ကမာနသံ။ ကသ္မာ ဗောဓိသတ္တော ကာလံ ဝိလောကေဟိ ‘ကမှိ ကာလေ ဥပ္ပဇ္ဇာမီ’တိ။ အပရိပက္ကေ ဉာဏေ ဗုဇ္ဈနံ နတ္ထိ, ပရိပက္ကေ ဉာဏေ န သက္ကာ နိမေသန္တရမ္ပိ အာဂမေတုံ, ကသ္မာ ဗောဓိသတ္တော ကုလံ ဝိလောကေတိ ‘ကုမှိ ကုလေ ဥပ္ပဇ္ဇာမီ’တိ။ ယဒိ, ဘန္တေ နာဂသေန, ပုဗ္ဗေဝ ဗောဓိသတ္တဿ မာတာပိတရော နိယတာ, တေန ဟိ ‘ကုလံ ဝိလောကေတီ’တိ ယံ ဝစနံ, တံ မိစ္ဆာ။ ယဒိ ကုလံ ဝိလောကေတိ, တေန ဟိ ‘ပုဗ္ဗေဝ ဗောဓိသတ္တဿ မာတာပိတရော နိယတာ’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘နိယတာ, မဟာရာဇ, ပုဗ္ဗေဝ ဗောဓိသတ္တဿ မာတာပိတရော, ကုလဉ္စ ဗောဓိသတ္တော ဝိလောကေတိ။ ကိန္တိ ပန ကုလံ ဝိလောကေတိ ‘ယေ မေ မာတာပိတရော, တေ ခတ္တိယာ ဥဒါဟု ဗြာဟ္မဏာ’တိ။ ဧဝံ ကုလံ ဝိလောကေတိ။

‘‘အဋ္ဌန္နံ, မဟာရာဇ, ပုဗ္ဗေဝ အနာဂတံ ဩလောကေတဗ္ဗံ ဟောတိ။ ကတမေသံ အဋ္ဌန္နံ? ဝါဏိဇဿ, မဟာရာဇ, ပုဗ္ဗေဝ ဝိက္ကယဘဏ္ဍံ ဩလောကေတဗ္ဗံ ဟောတိ, ဟတ္ထိနာဂဿ ပုဗ္ဗေဝ သောဏ္ဍာယ အနာဂတော မဂ္ဂေါ ဩလောကေတဗ္ဗော ဟောတိ, သာကဋိကဿ ပုဗ္ဗေဝ အနာဂတံ တိတ္ထံ ဩလောကေတဗ္ဗံ ဟောတိ, နိယာမကဿ ပုဗ္ဗေဝ အနာဂတံ တီရံ ဩလောကေတွာ နာဝါ ပေသေတဗ္ဗာ ဟောတိ, ဘိသက္ကဿ ပုဗ္ဗေဝ အာယုံ ဩလောကေတွာ အာတုရော ဥပသင်္ကမိတဗ္ဗော ဟောတိ, ဥတ္တရသေတုဿ ပုဗ္ဗေဝ ထိရာထိရဘာဝံ ဇာနိတွာ အဘိရုဟိတဗ္ဗံ ဟောတိ, ဘိက္ခုဿ ပုဗ္ဗေဝ အနာဂတံ ကာလံ ပစ္စဝေက္ခိတွာ ဘောဇနံ ဘုဉ္ဇိတဗ္ဗံ ဟောတိ, ဗောဓိသတ္တာနံ ပုဗ္ဗေဝ ကုလံ ဩလောကေတဗ္ဗံ ဟောတိ ‘ခတ္တိယကုလံ ဝါ ဗြာဟ္မဏကုလံ ဝါ’တိ။ ဣမေသံ ခေါ, မဟာရာဇ, အဋ္ဌန္နံ ပုဗ္ဗေဝ အနာဂတံ ဩလောကေတဗ္ဗံ ဟောတီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဗောဓိသတ္တဓမ္မတာပဉ္ဟော စတုတ္ထော။

၅။ အတ္တနိပါတနပဉ္ဟော

၅။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘န, ဘိက္ခဝေ, အတ္တာနံ ပါတေတဗ္ဗံ, ယော ပါတေယျ, ယထာဓမ္မော ကာရေတဗ္ဗော’တိ။ ပုန စ တုမှေ ဘဏထ ‘ယတ္ထ ကတ္ထစိ ဘဂဝါ သာဝကာနံ ဓမ္မံ ဒေသယမာနော အနေကပရိယာယေန ဇာတိယာ ဇရာယ ဗျာဓိနော မရဏဿ သမုစ္ဆေဒါယ ဓမ္မံ ဒေသေတိ, ယော ဟိ ကောစိ ဇာတိဇရာဗျာဓိမရဏံ သမတိက္ကမတိ, တံ ပရမာယ ပသံသာယ ပသံသတီ’တိ။ ယဒိ, ဘန္တေ နာဂသေန, ဘဂဝတာ ဘဏိတံ ‘န, ဘိက္ခဝေ, အတ္တာနံ ပါတေတဗ္ဗံ, ယော ပါတေယျ, ယထာဓမ္မော ကာရေတဗ္ဗော’တိ, တေန ဟိ ‘ဇာတိယာ ဇရာယ ဗျာဓိနော မရဏဿ သမုစ္ဆေဒါယ ဓမ္မံ ဒေသေတီ’တိ ယံ ဝစနံ, တံ မိစ္ဆာ။ ယဒိ ဇာတိယာ ဇရာယ ဗျာဓိနော မရဏဿ သမုစ္ဆေဒါယ ဓမ္မံ ဒေသေတိ, တေန ဟိ ‘န, ဘိက္ခဝေ, အတ္တာနံ ပါတေတဗ္ဗံ, ယော ပါတေယျ, ယထာဓမ္မော ကာရေတဗ္ဗော’’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘န, ဘိက္ခဝေ, အတ္တာနံ ပါတေတဗ္ဗံ, ယော ပါတေယျ, ယထာဓမ္မော ကာရေတဗ္ဗော’တိ။ ယတ္ထ ကတ္ထစိ ဘဂဝတာ သာဝကာနံ ဓမ္မံ ဒေသယာမာနေန စ အနေကပရိယာယေန ဇာတိယာ ဇရာယ ဗျာဓိနော မရဏဿ သမုစ္ဆေဒါယ ဓမ္မော ဒေသိတော, တတ္ထ ပန ကာရဏံ အတ္ထိ, ယေန ဘဂဝါ ကာရဏေန ပဋိက္ခိပိ သမာဒပေသိ စာ’’တိ။

‘‘ကိံ ပနေတ္ထ, ဘန္တေ နာဂသေန, ကာရဏံ, ယေန ဘဂဝါ ကာရဏေန ပဋိက္ခိပိ သမာဒပေသိ စာ’’တိ? ‘‘သီလဝါ, မဟာရာဇ, သီလသမ္ပန္နော အဂဒသမော သတ္တာနံ ကိလေသဝိသဝိနာသနေ, ဩသဓသမော သတ္တာနံ ကိလေသဗျာဓိဝူပသမေ, ဥဒကသမော သတ္တာနံ ကိလေသရဇောဇလ္လာပဟရဏေ, မဏိရတနသမော သတ္တာနံ သဗ္ဗသမ္ပတ္တိဒါနေ, နာဝါသမော သတ္တာနံ စတုရောဃပါရဂမနေ, သတ္ထဝါဟသမော သတ္တာနံ ဇာတိကန္တာရတာရဏေ, ဝါတသမော သတ္တာနံ တိဝိဓဂ္ဂိသန္တာပနိဗ္ဗာပနေ, မဟာမေဃသမော သတ္တာနံ မာနသပရိပူရဏေ, အာစရိယသမော သတ္တာနံ ကုသလသိက္ခာပနေ, သုဒေသကသမော သတ္တာနံ ခေမပထမာစိက္ခဏေ။ ဧဝရူပေါ, မဟာရာဇ, ဗဟုဂုဏော အနေကဂုဏော အပ္ပမာဏဂုဏော ဂုဏရာသိ ဂုဏပုဉ္ဇော သတ္တာနံ ဝဍ္ဎိကရော သီလဝါ ‘မာ ဝိနဿီ’တိ သတ္တာနံ အနုကမ္ပာယ ဘဂဝါ သိက္ခာပဒံ ပညပေသိ ‘န, ဘိက္ခဝေ, အတ္တာနံ ပါတေတဗ္ဗံ, ယော ပါတေယျ, ယထာဓမ္မော ကာရေတဗ္ဗော’တိ။ ဣဒမေတ္ထ, မဟာရာဇ, ကာရဏံ, ယေန ကာရဏေန ဘဂဝါ ပဋိက္ခိပိ။ ဘာသိတမ္ပေတံ, မဟာရာဇ, ထေရေန ကုမာရကဿပေန ဝိစိတြကထိကေန ပါယာသိရာဇညဿ ပရလောကံ ဒီပယမာနေန ‘ယထာ ယထာ ခေါ ရာဇည သမဏဗြာဟ္မဏာ သီလဝန္တော ကလျာဏဓမ္မာ စိရံ ဒီဃမဒ္ဓါနံ တိဋ္ဌန္တိ, တထာ တထာ ဗဟုံ ပုညံ ပသဝန္တိ, ဗဟုဇနဟိတာယ စ ပဋိပဇ္ဇန္တိ ဗဟုဇနသုခါယ လောကာနုကမ္ပာယ အတ္ထာယ ဟိတာယ သုခါယ ဒေဝမနုဿာန’န္တိ။

‘‘ကေန ပန ကာရဏေန ဘဂဝါ သမာဒပေသိ? ဇာတိပိ, မဟာရာဇ, ဒုက္ခာ, ဇရာပိ ဒုက္ခာ, ဗျာဓိပိ ဒုက္ခော, မရဏမ္ပိ ဒုက္ခံ, သောကောပိ ဒုက္ခော, ပရိဒေဝေါပိ ဒုက္ခော, ဒုက္ခမ္ပိ ဒုက္ခံ, ဒေါမနဿမ္ပိ ဒုက္ခံ, ဥပါယာသောပိ ဒုက္ခော, အပ္ပိယေဟိ သမ္ပယောဂေါပိ ဒုက္ခော, ပိယေဟိ ဝိပ္ပယောဂေါပိ ဒုက္ခော, မာတုမရဏမ္ပိ ဒုက္ခံ, ပိတုမရဏမ္ပိ ဒုက္ခံ, ဘာတုမရဏမ္ပိ ဒုက္ခံ, ဘဂိနိမရဏမ္ပိ ဒုက္ခံ, ပုတ္တမရဏမ္ပိ ဒုက္ခံ, ဒါရမရဏမ္ပိ ဒုက္ခံ, ဒါသမရဏမ္ပိ ဒုက္ခံ [ဣဒံ ဝါက္ယံ သီ။ ဣ။ ပေါတ္ထကေသု နတ္ထိ], ဉာတိမရဏမ္ပိ ဒုက္ခံ, ဉာတိဗျသနမ္ပိ ဒုက္ခံ, ရောဂဗျသနမ္ပိ ဒုက္ခံ, ဘောဂဗျသနမ္ပိ ဒုက္ခံ, သီလဗျသနမ္ပိ ဒုက္ခံ, ဒိဋ္ဌိဗျသနမ္ပိ ဒုက္ခံ, ရာဇဘယမ္ပိ ဒုက္ခံ, စောရဘယမ္ပိ ဒုက္ခံ, ဝေရိဘယမ္ပိ ဒုက္ခံ, ဒုဗ္ဘိက္ခဘယမ္ပိ ဒုက္ခံ, အဂ္ဂိဘယမ္ပိ ဒုက္ခံ, ဥဒကဘယမ္ပိ ဒုက္ခံ, ဦမိဘယမ္ပိ ဒုက္ခံ, အာဝဋ္ဋဘယမ္ပိ ဒုက္ခံ, ကုမ္ဘီလဘယမ္ပိ ဒုက္ခံ, သုသုကာဘယမ္ပိ ဒုက္ခံ, အတ္တာနုဝါဒဘယမ္ပိ ဒုက္ခံ, ပရာနုဝါဒဘယမ္ပိ ဒုက္ခံ, ဒဏ္ဍဘယမ္ပိ ဒုက္ခံ, ဒုဂ္ဂတိဘယမ္ပိ ဒုက္ခံ, ပရိသာသာရဇ္ဇဘယမ္ပိ ဒုက္ခံ, အာဇီဝကဘယမ္ပိ ဒုက္ခံ, မရဏဘယမ္ပိ ဒုက္ခံ, ဝေတ္တေဟိ တာဠနမ္ပိ ဒုက္ခံ, ကသာဟိ တာဠနမ္ပိ ဒုက္ခံ, အဒ္ဓဒဏ္ဍကေဟိ တာဠနမ္ပိ ဒုက္ခံ, ဟတ္ထစ္ဆေဒနမ္ပိ ဒုက္ခံ, ပါဒစ္ဆေဒနမ္ပိ ဒုက္ခံ, ဟတ္ထပါဒစ္ဆေဒနမ္ပိ ဒုက္ခံ, ကဏ္ဏစ္ဆေဒနမ္ပိ ဒုက္ခံ, နာသစ္ဆေဒနမ္ပိ ဒုက္ခံ, ကဏ္ဏနာသစ္ဆေဒနမ္ပိ ဒုက္ခံ, ဗိလင်္ဂထာလိကမ္ပိ ဒုက္ခံ, သင်္ခမုဏ္ဍိကမ္ပိ ဒုက္ခံ, ရာဟုမုခမ္ပိ ဒုက္ခံ, ဇောတိမာလိကမ္ပိ ဒုက္ခံ, ဟတ္ထပဇ္ဇောတိကမ္ပိ ဒုက္ခံ, ဧရကဝတ္တိကမ္ပိ ဒုက္ခံ, စီရကဝါသိကမ္ပိ ဒုက္ခံ, ဧဏေယျကမ္ပိ ဒုက္ခံ , ဗဠိသမံသိကမ္ပိ ဒုက္ခံ, ကဟာပဏိကမ္ပိ ဒုက္ခံ, ခါရာပတစ္ဆိကမ္ပိ ဒုက္ခံ, ပလိဃပရိဝတ္တိကမ္ပိ ဒုက္ခံ, ပလာလဣဌကမ္ပိ ဒုက္ခံ, တတ္တေန တေလေန ဩသိဉ္စနမ္ပိ ဒုက္ခံ, သုနခေဟိ ခါဒါပနမ္ပိ ဒုက္ခံ, ဇီဝသူလာရောပနမ္ပိ ဒုက္ခံ, အသိနာ သီသစ္ဆေဒနမ္ပိ ဒုက္ခံ, ဧဝရူပါနိ, မဟာရာဇ, ဗဟုဝိဓါနိ အနေကဝိဓါနိ ဒုက္ခာနိ သံသာရဂတော အနုဘဝတိ။

‘‘ယထာ, မဟာရာဇ, ဟိမဝန္တပဗ္ဗတေ အဘိဝုဋ္ဌံ ဥဒကံ ဂင်္ဂါယ နဒိယာ ပါသာဏ သက္ခရ ခရ မရုမ္ဗ အာဝဋ္ဋ ဂဂ္ဂလက ဦမိကဝင်္ကစဒိက အာဝရဏနီဝရဏမူလကသာခါသု ပရိယောတ္ထရတိ, ဧဝမေဝ ခေါ, မဟာရာဇ, ဧဝရူပါနိ ဗဟုဝိဓါနိ အနေကဝိဓါနိ ဒုက္ခာနိ သံသာရဂတော အနုဘဝတိ။ ပဝတ္တံ, မဟာရာဇ, ဒုက္ခံ, အပ္ပဝတ္တံ သုခံ။ အပ္ပဝတ္တဿ ဂုဏံ ပဝတ္တဿ [ပဝတ္တေ (သီ။ ဣ။ က။)] စ ဘယံ ဒီပယမာနော, မဟာရာဇ, ဘဂဝါ အပ္ပဝတ္တဿ သစ္ဆိကိရိယာယ ဇာတိဇရာဗျာဓိမရဏသမတိက္ကမာယ သမာဒပေသိ, ဣဒမေတ္ထ, မဟာရာဇ, ကာရဏံ, ယေန ကာရဏေန ဘဂဝါ သမာဒပေသီ’’တိ။ ‘‘သာဓု, ဘန္တေ နာဂသေန, သုနိဗ္ဗေဌိတော ပဉ္ဟော, သုကထိတံ ကာရဏံ, ဧဝမေတံ တထာ သမ္ပဋိစ္ဆာမီ’’တိ။

အတ္တနိပါတနပဉ္ဟော ပဉ္စမော။

၆။ မေတ္တာဘာဝနာနိသံသပဉ္ဟော

၆။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘မေတ္တာယ, ဘိက္ခဝေ, စေတောဝိမုတ္တိယာ အာသေဝိတာယ ဘာဝိတာယ ဗဟုလီကတာယ ယာနီကတာယ ဝတ္ထုကတာယ အနုဋ္ဌိတာယ ပရိစိတာယ သုသမာရဒ္ဓါယ ဧကာဒသာနိသံသာ ပါဋိကင်္ခါ။ ကတမေ ဧကာဒသ? သုခံ သုပတိ, သုခံ ပဋိဗုဇ္ဈတိ , န ပါပကံ သုပိနံ ပဿတိ, မနုဿာနံ ပိယော ဟောတိ, အမနုဿာနံ ပိယော ဟောတိ, ဒေဝတာ ရက္ခန္တိ, နာဿ အဂ္ဂိ ဝါ ဝိသံ ဝါ သတ္ထံ ဝါ ကမတိ [သတ္ထံ ကမတိ (သျာ။) အ။ နိ။ ၁၁။၁၅ ပဿိတဗ္ဗံ], တုဝဋံ စိတ္တံ သမာဓိယတိ, မုခဝဏ္ဏော ဝိပ္ပသီဒတိ, အသမ္မူဠ္ဟော ကာလံ ကရောတိ, ဥတ္တရိံ အပ္ပဋိဝိဇ္ဈန္တော ဗြဟ္မလောကူပဂေါ ဟောတီ’တိ။ ပုန စ တုမှေ ဘဏထ ‘သာမော ကုမာရော မေတ္တာဝိဟာရီ မိဂသံဃေန ပရိဝုတော ပဝနေ ဝိစရန္တော ဣဠိယက္ခေန ရညာ ဝိဒ္ဓေါ ဝိသဣတေန သလ္လေန တတ္ထေဝ မုစ္ဆိတော ပတိတော’တိ။

‘‘ယဒိ , ဘန္တေ နာဂသေန, ဘဂဝတာ ဘဏိတံ ‘မေတ္တာယ ဘိက္ခဝေ။ပေ။။ ဗြဟ္မလောကူပဂေါ ဟောတီ’တိ, တေန ဟိ ‘‘သာမော ကုမာရော မေတ္တာဝိဟာရီ မိဂသံဃေန ပရိဝုတော ပဝနေ ဝိစရန္တော ဣဠိယက္ခေန ရညာ ဝိဒ္ဓေါ ဝိသဣတေန သလ္လေန တတ္ထေဝ မုစ္ဆိတော ပတိတော’တိ ယံ ဝစနံ, တံ မိစ္ဆာ။ ယဒိ သာမော ကုမာရော မေတ္တာဝိဟာရီ မိဂသံဃေန ပရိဝုတော ပဝနေ ဝိစရန္တော ဣဠိယက္ခေန ရညာ ဝိဒ္ဓေါ ဝိသဣတေန သလ္လေန တတ္ထေဝ မုစ္ဆိတော ပတိတော, တေန ဟိ ‘မေတ္တာယ, ဘိက္ခဝေ။ပေ။။ သတ္ထံ ဝါ ကမတီ’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော သုနိပုဏော ပရိသဏှော သုခုမော ဂမ္ဘီရော, အပိ သုနိပုဏာနံ မနုဇာနံ ဂတ္တေ သေဒံ မောစေယျ, သော တဝါနုပ္ပတ္တော, ဝိဇဋေဟိ တံ မဟာဇဋာဇဋိတံ, အနာဂတာနံ ဇိနပုတ္တာနံ စက္ခုံ ဒေဟိ နိဗ္ဗာဟနာယာ’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘မေတ္တာယ ဘိက္ခဝေ။ပေ။။။ သတ္ထံ ဝါ ကမတီ’တိ။ သာမော စ ကုမာရော မေတ္တာဝိဟာရီ မိဂသံဃေန ပရိဝုတော ပဝနေ ဝိစရန္တော ဣဠိယက္ခေန ရညာ ဝိဒ္ဓေါ ဝိသဣတေန သလ္လေန တတ္ထေဝ မုစ္ဆိတော ပတိတော, တတ္ထ ပန, မဟာရာဇ, ကာရဏံ အတ္ထိ။ ကတမံ တတ္ထ ကာရဏံ? နေတေ, မဟာရာဇ, ဂုဏာ ပုဂ္ဂလဿ, မေတ္တာဘာဝနာယေတေ ဂုဏာ, သာမော, မဟာရာဇ, ကုမာရော ဃဋံ ဥက္ခိပန္တော တသ္မိံ ခဏေ မေတ္တာဘာဝနာယ ပမတ္တော အဟောသိ။

‘‘ယသ္မိံ, မဟာရာဇ, ခဏေ ပုဂ္ဂလော မေတ္တံ သမာပန္နော ဟောတိ, န တဿ ပုဂ္ဂလဿ တသ္မိံ ခဏေ အဂ္ဂိ ဝါ ဝိသံ ဝါ သတ္ထံ ဝါ ကမတိ။ တဿ ယေ ကေစိ အဟိတကာမာ ဥပဂန္တွာ တံ န ပဿန္တိ, န တသ္မိံ ဩကာသံ လဘန္တိ။ နေတေ, မဟာရာဇ, ဂုဏာ ပုဂ္ဂလဿ, မေတ္တာဘာဝနာယေတေ ဂုဏာ။ ဣဓ, မဟာရာဇ, ပုရိသော သင်္ဂါမသူရော အဘေဇ္ဇကဝစဇာလိကံ သန္နယှိတွာ သင်္ဂါမံ ဩတရေယျ, တဿ သရာ ခိတ္တာ ဥပဂန္တွာ ပတန္တိ ဝိကိရန္တိ, န တသ္မိံ ဩကာသံ လဘန္တိ, နေသော, မဟာရာဇ, ဂုဏော သင်္ဂါမသူရဿ, အဘေဇ္ဇကဝစဇာလိကာယေသော ဂုဏော, ယဿ သရာ ခိတ္တာ ဥပဂန္တွာ ပတန္တိ ဝိကိရန္တိ။ ဧဝမေဝ ခေါ, မဟာရာဇ, နေတေ ဂုဏာ ပုဂ္ဂလဿ, မေတ္တာဘာဝနာယေတေ ဂုဏာ။

‘‘ယသ္မိံ , မဟာရာဇ, ခဏေ ပုဂ္ဂလော မေတ္တံ သမာပန္နော ဟောတိ, န တဿ ပုဂ္ဂလဿ တသ္မိံ ခဏေ အဂ္ဂိ ဝါ ဝိသံ ဝါ သတ္ထံ ဝါ ကမတိ။ တဿ ယေ ကေစိ အဟိတကာမာ ဥပဂန္တွာ တံ န ပဿန္တိ, တသ္မိံ ဩကာသံ န လဘန္တိ, နေတေ , မဟာရာဇ, ဂုဏာ ပုဂ္ဂလဿ, မေတ္တာဘာဝနာယေတေ ဂုဏာ။ ဣဓ ပန, မဟာရာဇ, ပုရိသော ဒိဗ္ဗံ အန္တရဓါနံ မူလံ ဟတ္ထေ ကရေယျ, ယာဝ တံ မူလံ တဿ ဟတ္ထဂတံ ဟောတိ, တာဝ န အညော ကောစိ ပကတိမနုဿော တံ ပုရိသံ ပဿတိ။ နေသော, မဟာရာဇ, ဂုဏော ပုရိသဿ, မူလဿေသော ဂုဏော အန္တရဓါနဿ, ယံ သော ပကတိမနုဿာနံ စက္ခုပထေ န ဒိဿတိ။ ဧဝမေဝ ခေါ, မဟာရာဇ, နေတေ ဂုဏာ ပုဂ္ဂလဿ, မေတ္တာဘာဝနာယေတေ ဂုဏာ။

‘‘ယသ္မိံ, မဟာရာဇ, ခဏေ ပုဂ္ဂလော မေတ္တံ သမာပန္နော ဟောတိ, န တဿ ပုဂ္ဂလဿ တသ္မိံ ခဏေ အဂ္ဂိ ဝါ ဝိသံ ဝါ သတ္ထံ ဝါ ကမတိ။ တဿ ယေ ကေစိ အဟိတကာမာ ဥပဂန္တွာ တံ န ပဿန္တိ, န တသ္မိံ ဩကာသံ လဘန္တိ။ နေတေ, မဟာရာဇ, ဂုဏာ ပုဂ္ဂလဿ, မေတ္တာဘာဝနာယေတေ ဂုဏာ။ ယထာ ဝါ ပန, မဟာရာဇ, ပုရိသံ သုကတံ မဟာလေဏမနုပ္ပဝိဋ္ဌံ မဟတိမဟာမေဃော အဘိဝဿန္တော န သက္ကောတိ တေမယိတုံ, နေသော, မဟာရာဇ, ဂုဏော ပုရိသဿ, မဟာလေဏဿေသော ဂုဏော, ယံ မဟာမေဃော အဘိဝဿမာနော န တံ တေမေတိ။ ဧဝမေဝ ခေါ, မဟာရာဇ, နေတေ ဂုဏာ ပုဂ္ဂလဿ, မေတ္တာဘာဝနာယေတေ ဂုဏာ။

‘‘ယသ္မိံ, မဟာရာဇ, ခဏေ ပုဂ္ဂလော မေတ္တံ သမာပန္နော ဟောတိ, န တဿ ပုဂ္ဂလဿ တသ္မိံ ခဏေ အဂ္ဂိ ဝါ ဝိသံ ဝါ သတ္ထံ ဝါ ကမတိ။ တဿ ယေ ကေစိ အဟိတကာမာ ဥပဂန္တွာ တံ န ပဿန္တိ, န တဿ သက္ကောန္တိ အဟိတံ ကာတုံ နေတေ, မဟာရာဇ, ဂုဏာ ပုဂ္ဂလဿ, မေတ္တာဘာဝနာယေတေ ဂုဏာ’’တိ။ ‘‘အစ္ဆရိယံ, ဘန္တေ နာဂသေန, အဗ္ဘုတံ ဘန္တေ နာဂသေန, သဗ္ဗပါပနိဝါရဏာ မေတ္တာဘာဝနာ’’တိ။ ‘‘သဗ္ဗကုသလဂုဏာဝဟာ, မဟာရာဇ, မေတ္တာဘာဝနာ ဟိတာနမ္ပိ အဟိတာနမ္ပိ, ယေ တေ သတ္တာ ဝိညာဏဗဒ္ဓါ, သဗ္ဗေသံ မဟာနိသံသာ မေတ္တာဘာဝနာ သံဝိဘဇိတဗ္ဗာ’’တိ။

မေတ္တာဘာဝနာနိသံသပဉ္ဟော ဆဋ္ဌော။

၇။ ကုသလာကုသလသမဝိသမပဉ္ဟော

၇။ ‘‘ဘန္တေ နာဂသေန ‘ကုသလကာရိဿပိ အကုသလကာရိဿပိ ဝိပါကော သမသမော, ဥဒါဟု ကောစိ ဝိသေသော အတ္ထီ’တိ? ‘‘အတ္ထိ, မဟာရာဇ, ကုသလဿ စ အကုသလဿ စ ဝိသေသော, ကုသလံ, မဟာရာဇ, သုခဝိပါကံ သဂ္ဂသံဝတ္တနိကံ, အကုသလံ ဒုက္ခဝိပါကံ နိရယသံဝတ္တနိက’’န္တိ။

‘‘ဘန္တေ နာဂသေန, တုမှေ ဘဏထ ‘ဒေဝဒတ္တော ဧကန္တကဏှော, ဧကန္တကဏှေဟိ ဓမ္မေဟိ သမန္နာဂတော, ဗောဓိသတ္တော ဧကန္တသုက္ကော, ဧကန္တသုက္ကေဟိ ဓမ္မေဟိ သမန္နာဂတော’တိ။ ပုန စ ဒေဝဒတ္တော ဘဝေ ဘဝေ ယသေန စ ပက္ခေန စ ဗောဓိသတ္တေန သမသမော ဟောတိ, ကဒါစိ အဓိကတရော ဝါ။ ယဒါ ဒေဝဒတ္တော နဂရေ ဗာရာဏသိယံ ဗြဟ္မဒတ္တဿ ရညော ပုရောဟိတပုတ္တော အဟောသိ, တဒါ ဗောဓိသတ္တော ဆဝကစဏ္ဍာလော အဟောသိ ဝိဇ္ဇာဓရော, ဝိဇ္ဇံ ပရိဇပ္ပိတွာ အကာလေ အမ္ဗဖလာနိ နိဗ္ဗတ္တေသိ, ဧတ္ထ တာဝ ဗောဓိသတ္တော ဒေဝဒတ္တတော ဇာတိယာ နိဟီနော ယသေန စ နိဟီနော။

‘‘ပုန စပရံ ယဒါ ဒေဝဒတ္တော ရာဇာ အဟောသိ မဟာ မဟီပတိ သဗ္ဗကာမသမင်္ဂီ, တဒါ ဗောဓိသတ္တော တဿူပဘောဂေါ အဟောသိ ဟတ္ထိနာဂေါ သဗ္ဗလက္ခဏသမ္ပန္နော, တဿ စာရုဂတိဝိလာသံ အသဟမာနော ရာဇာ ဝဓမိစ္ဆန္တော ဟတ္ထာစရိယံ ဧဝမဝေါစ ‘အသိက္ခိတော တေ, အာစရိယ, ဟတ္ထိနာဂေါ, တဿ အာကာသဂမနံ နာမ ကာရဏံ ကရောဟီ’တိ, တတ္ထပိ တာဝ ဗောဓိသတ္တော ဒေဝဒတ္တတော ဇာတိယာ နိဟီနော လာမကော တိရစ္ဆာနဂတော။

‘‘ပုန စပရံ ယဒါ ဒေဝဒတ္တော မနုဿော အဟောသိ ပဝနေ နဋ္ဌာယိကော, တဒါ ဗောဓိသတ္တော မဟာပထဝီ နာမ မက္ကဋော အဟောသိ, ဧတ္ထပိ တာဝ ဒိဿတိ ဝိသေသော မနုဿဿ စ တိရစ္ဆာနဂတဿ စ, တတ္ထပိ တာဝ ဗောဓိသတ္တော ဒေဝဒတ္တတော ဇာတိယာ နိဟီနော။

‘‘ပုန စပရံ ယဒါ ဒေဝဒတ္တော မနုဿော အဟောသိ သောဏုတ္တရော နာမ နေသာဒေါ ဗလဝါ ဗလဝတရော နာဂဗလော, တဒါ ဗောဓိသတ္တော ဆဒ္ဒန္တော နာမ နာဂရာဇာ အဟောသိ။ တဒါ သော လုဒ္ဒကော တံ ဟတ္ထိနာဂံ ဃာတေသိ, တတ္ထပိ တာဝ ဒေဝဒတ္တောဝ အဓိကတရော။

‘‘ပုန စပရံ ယဒါ ဒေဝဒတ္တော မနုဿော အဟောသိ ဝနစရကော အနိကေတဝါသီ, တဒါ ဗောဓိသတ္တော သကုဏော အဟောသိ တိတ္တိရော မန္တဇ္ဈာယီ, တဒါပိ သော ဝနစရကော တံ သကုဏံ ဃာတေသိ, တတ္ထပိ တာဝ ဒေဝဒတ္တောဝ ဇာတိယာ အဓိကတရော။

‘‘ပုန စပရံ ယဒါ ဒေဝဒတ္တော ကလာဗု နာမ ကာသိရာဇာ [ကာသိကရာဇာ (က။)] အဟောသိ, တဒါ ဗောဓိသတ္တော တာပသော အဟောသိ ခန္တိဝါဒီ။ တဒါ သော ရာဇာ တဿ တာပသဿ ကုဒ္ဓေါ ဟတ္ထပါဒေ ဝံသကဠီရေ ဝိယ ဆေဒါပေသိ, တတ္ထပိ တာဝ ဒေဝဒတ္တော ယေဝ အဓိကတရော ဇာတိယာ စ ယသေန စ။

‘‘ပုန စပရံ ယဒါ ဒေဝဒတ္တော မနုဿော အဟောသိ ဝနစရော, တဒါ ဗောဓိသတ္တော နန္ဒိယော နာမ ဝါနရိန္ဒော အဟောသိ, တဒါပိ သော ဝနစရော တံ ဝါနရိန္ဒံ ဃာတေသိ သဒ္ဓိံ မာတရာ ကနိဋ္ဌဘာတိကေန စ, တတ္ထပိ တာဝ ဒေဝဒတ္တော ယေဝ အဓိကတရော ဇာတိယာ။

‘‘ပုန စပရံ ယဒါ ဒေဝဒတ္တော မနုဿော အဟောသိ အစေလကော ကာရမ္ဘိယော နာမ, တဒါ ဗောဓိသတ္တော ပဏ္ဍရကော နာမ နာဂရာဇာ အဟောသိ, တတ္ထပိ တာဝ ဒေဝဒတ္တော ယေဝ အဓိကတရော ဇာတိယာ။

‘‘ပုန စပရံ ယဒါ ဒေဝဒတ္တော မနုဿော အဟောသိ ပဝနေ ဇဋိလကော, တဒါ ဗောဓိသတ္တော တစ္ဆကော နာမ မဟာသူကရော အဟောသိ, တတ္ထပိ တာဝ ဒေဝဒတ္တော ယေဝ ဇာတိယာ အဓိကတရော။

‘‘ပုန စပရံ ယဒါ ဒေဝဒတ္တော စေတီသု သူရပရိစရော နာမ ရာဇာ အဟောသိ ဥပရိ ပုရိသမတ္တေ ဂဂနေ ဝေဟာသင်္ဂမော, တဒါ ဗောဓိသတ္တော ကပိလော နာမ ဗြာဟ္မဏော အဟောသိ, တတ္ထပိ တာဝ ဒေဝဒတ္တော ယေဝ အဓိကတရော ဇာတိယာ စ ယသေန စ။

‘‘ပုန စပရံ ယဒါ ဒေဝဒတ္တော မနုဿော အဟောသိ သာမော နာမ, တဒါ ဗောဓိသတ္တော ရုရု နာမ မိဂရာဇာ အဟောသိ, တတ္ထပိ တာဝ ဒေဝဒတ္တော ယေဝ ဇာတိယာ အဓိကတရော။

‘‘ပုန စပရံ ယဒါ ဒေဝဒတ္တော မနုဿော အဟောသိ လုဒ္ဒကော ပဝနစရော, တဒါ ဗောဓိသတ္တော ဟတ္ထိနာဂေါ အဟောသိ, သော လုဒ္ဒကော တဿ ဟတ္ထိနာဂဿ သတ္တက္ခတ္တုံ ဒန္တေ ဆိန္ဒိတွာ ဟရိ, တတ္ထပိ တာဝ ဒေဝဒတ္တော ယေဝ ယောနိယာ အဓိကတရော။

‘‘ပုန စပရံ ယဒါ ဒေဝဒတ္တော သိင်္ဂါလော အဟောသိ ခတ္တိယဓမ္မော, သော ယာဝတာ ဇမ္ဗုဒီပေ ပဒေသရာဇာနော တေ သဗ္ဗေ အနုယုတ္တေ အကာသိ, တဒါ ဗောဓိသတ္တော ဝိဓုရော နာမ ပဏ္ဍိတော အဟောသိ, တတ္ထပိ တာဝ ဒေဝဒတ္တော ယေဝ ယသေန အဓိကတရော။

‘‘ပုန စပရံ ယဒါ ဒေဝဒတ္တော ဟတ္ထိနာဂေါ ဟုတွာ လဋုကိကာယ သကုဏိကာယ ပုတ္တကေ ဃာတေသိ, တဒါ ဗောဓိသတ္တောပိ ဟတ္ထိနာဂေါ အဟောသိ ယူထပတိ, တတ္ထ တာဝ ဥဘောပိ တေ သမသမာ အဟေသုံ။

‘‘ပုန စပရံ ယဒါ ဒေဝဒတ္တော ယက္ခော အဟောသိ အဓမ္မော နာမ, တဒါ ဗောဓိသတ္တောပိ ယက္ခော အဟောသိ ဓမ္မော နာမ, တတ္ထပိ တာဝ ဥဘောပိ သမသမာ အဟေသုံ။

‘‘ပုန စပရံ ယဒါ ဒေဝဒတ္တော နာဝိကော အဟောသိ ပဉ္စန္နံ ကုလသတာနံ ဣဿရော, တဒါ ဗောဓိသတ္တောပိ နာဝိကော အဟောသိ ပဉ္စန္နံ ကုလသတာနံ ဣဿရော, တတ္ထပိ တာဝ ဥဘောပိ သမသမာ အဟေသုံ။

‘‘ပုန စပရံ ယဒါ ဒေဝဒတ္တော သတ္ထဝါဟော အဟောသိ ပဉ္စန္နံ သကဋသတာနံ ဣဿရော, တဒါ ဗောဓိသတ္တောပိ သတ္ထဝါဟော အဟောသိ ပဉ္စန္နံ သကဋသတာနံ ဣဿရော, တတ္ထပိ တာဝ ဥဘောပိ သမသမာ အဟေသုံ။

‘‘ပုန စပရံ ယဒါ ဒေဝဒတ္တော သာခေါ နာမ မိဂရာဇာ အဟောသိ, တဒါ ဗောဓိသတ္တောပိ နိဂြောဓေါ နာမ မိဂရာဇာ အဟောသိ, တတ္ထပိ တာဝ ဥဘောပိ သမသမာ အဟေသုံ။

‘‘ပုန စပရံ ယဒါ ဒေဝဒတ္တော သာခေါ နာမ သေနာပတိ အဟောသိ, တဒါ ဗောဓိသတ္တောပိ နိဂြောဓေါ နာမ ရာဇာ အဟောသိ, တတ္ထပိ တာဝ ဥဘောပိ သမသမာ အဟေသုံ။

‘‘ပုန စပရံ ယဒါ ဒေဝဒတ္တော ခဏ္ဍဟာလော နာမ ဗြာဟ္မဏော အဟောသိ, တဒါ ဗောဓိသတ္တော စန္ဒော နာမ ရာဇကုမာရော အဟောသိ, တဒါ သော ခဏ္ဍဟာလော ယေဝ အဓိကတရော။

‘‘ပုန စပရံ ယဒါ ဒေဝဒတ္တော ဗြဟ္မဒတ္တော နာမ ရာဇာ အဟောသိ, တဒါ ဗောဓိသတ္တော တဿ ပုတ္တော မဟာပဒုမော နာမ ကုမာရော အဟောသိ, တဒါ သော ရာဇာ သကပုတ္တံ စောရပပါတေ ခိပါပေသိ, ယတော ကုတောစိ ပိတာဝ ပုတ္တာနံ အဓိကတရော ဟောတိ ဝိသိဋ္ဌောတိ, တတ္ထပိ တာဝ ဒေဝဒတ္တော ယေဝ အဓိကတရော။

‘‘ပုန စပရံ ယဒါ ဒေဝဒတ္တော မဟာပတာပေါ နာမ ရာဇာ အဟောသိ, တဒါ ဗောဓိသတ္တော တဿ ပုတ္တော ဓမ္မပါလော နာမ ကုမာရော အဟောသိ, တဒါ သော ရာဇာ သကပုတ္တဿ ဟတ္ထပါဒေ သီသဉ္စ ဆေဒါပေသိ, တတ္ထပိ တာဝ ဒေဝဒတ္တော ယေဝ ဥတ္တရော အဓိကတရော။

အဇ္ဇေတရဟိ ဥဘောပိ သကျကုလေ ဇာယိံသု။ ဗောဓိသတ္တော ဗုဒ္ဓေါ အဟောသိ သဗ္ဗညူ လောကနာယကော, ဒေဝဒတ္တော တဿ ဒေဝါတိဒေဝဿ သာသနေ ပဗ္ဗဇိတွာ ဣဒ္ဓိံ နိဗ္ဗတ္တေတွာ ဗုဒ္ဓါလယံ အကာသိ။ ကိံ နု ခေါ, ဘန္တေ နာဂသေန, ယံ မယာ ဘဏိတံ, တံ သဗ္ဗံ တထံ ဥဒါဟု ဝိတထ’’န္တိ?

‘‘ယံ တွံ, မဟာရာဇ, ဗဟုဝိဓံ ကာရဏံ ဩသာရေသိ, သဗ္ဗံ တံ တထေဝ, နော အညထာ’’တိ။ ‘‘ယဒိ, ဘန္တေ နာဂသေန, ကဏှောပိ သုက္ကောပိ သမသမဂတိကာ ဟောန္တိ, တေန ဟိ ကုသလမ္ပိ အကုသလမ္ပိ သမသမဝိပါကံ ဟောတီ’’တိ? ‘‘န ဟိ, မဟာရာဇ, ကုသလမ္ပိ အကုသလမ္ပိ သမသမဝိပါကံ ဟောတိ, န ဟိ, မဟာရာဇ, ဒေဝဒတ္တော သဗ္ဗဇနေဟိ ပဋိဝိရုဒ္ဓေါ, ဗောဓိသတ္တေနေဝ ပဋိဝိရုဒ္ဓေါ။ ယော တဿ ဗောဓိသတ္တေန ပဋိဝိရုဒ္ဓေါ, သော တသ္မိံ တသ္မိံ ယေဝ ဘဝေ ပစ္စတိ ဖလံ ဒေတိ။ ဒေဝဒတ္တောပိ, မဟာရာဇ, ဣဿရိယေ ဌိတော ဇနပဒေသု အာရက္ခံ ဒေတိ, သေတုံ သဘံ ပုညသာလံ ကာရေတိ, သမဏဗြာဟ္မဏာနံ ကပဏဒ္ဓိကဝဏိဗ္ဗကာနံ နာထာနာထာနံ ယထာပဏိဟိတံ ဒါနံ ဒေတိ။ တဿ သော ဝိပါကေန ဘဝေ ဘဝေ သမ္ပတ္တိယော ပဋိလဘတိ။ ကဿေတံ, မဟာရာဇ, သက္ကာ ဝတ္တုံ ဝိနာ ဒါနေန ဒမေန သံယမေန ဥပေါသထကမ္မေန သမ္ပတ္တိံ အနုဘဝိဿတီတိ?

‘‘ယံ ပန တွံ, မဟာရာဇ, ဧဝံ ဝဒေသိ ‘ဒေဝဒတ္တော စ ဗောဓိသတ္တော စ ဧကတော အနုပရိဝတ္တန္တီ’တိ, သော န ဇာတိသတဿ အစ္စယေန သမာဂမော အဟောသိ, န ဇာတိသဟဿဿ အစ္စယေန, န ဇာတိသတသဟဿဿ အစ္စယေန, ကဒါစိ ကရဟစိ ဗဟူနံ အဟောရတ္တာနံ အစ္စယေန သမာဂမော အဟောသိ။ ယံ ပနေတံ, မဟာရာဇ, ဘဂဝတာ ကာဏကစ္ဆပေါပမံ ဥပဒဿိတံ မနုဿတ္တပ္ပဋိလာဘာယ, တထူပမံ, မဟာရာဇ, ဣမေသံ သမာဂမံ ဓါရေဟိ။

‘‘န, မဟာရာဇ, ဗောဓိသတ္တဿ ဒေဝဒတ္တေနေဝ သဒ္ဓိံ သမာဂမော အဟောသိ, ထေရောပိ, မဟာရာဇ, သာရိပုတ္တော အနေကေသု ဇာတိသတသဟဿေသု ဗောဓိသတ္တဿ ပိတာ အဟောသိ, မဟာပိတာ အဟောသိ, စူဠပိတာ အဟောသိ , ဘာတာ အဟောသိ, ပုတ္တော အဟောသိ, ဘာဂိနေယျော အဟောသိ, မိတ္တော အဟောသိ။

‘‘ဗောဓိသတ္တောပိ, မဟာရာဇ, အနေကေသု ဇာတိသတသဟဿေသု ထေရဿ သာရိပုတ္တဿ ပိတာ အဟောသိ, မဟာပိတာ အဟောသိ, စူဠပိတာ အဟောသိ, ဘာတာ အဟောသိ, ပုတ္တော အဟောသိ, ဘာဂိနေယျော အဟောသိ , မိတ္တော အဟောသိ, သဗ္ဗေပိ, မဟာရာဇ, သတ္တနိကာယပရိယာပန္နာ သံသာရသောတမနုဂတာ သံသာရသောတေန ဝုယှန္တာ အပ္ပိယေဟိပိ ပိယေဟိပိ သမာဂစ္ဆန္တိ။ ယထာ, မဟာရာဇ, ဥဒကံ သောတေန ဝုယှမာနံ သုစိအသုစိကလျာဏပါပကေန သမာဂစ္ဆတိ, ဧဝမေဝ ခေါ, မဟာရာဇ, သဗ္ဗေပိ သတ္တနိကာယပရိယာပန္နာ သံသာရသောတမနုဂတာ သံသာရသောတေန ဝုယှန္တာ အပ္ပိယေဟိပိ ပိယေဟိပိ သမာဂစ္ဆန္တိ။ ဒေဝဒတ္တော, မဟာရာဇ, ယက္ခော သမာနော အတ္တနာ အဓမ္မော ပရေ အဓမ္မေ နိယောဇေတွာ သတ္တပညာသဝဿကောဋိယော သဋ္ဌိ စ ဝဿသတသဟဿာနိ မဟာနိရယေ ပစ္စိ , ဗောဓိသတ္တောပိ, မဟာရာဇ, ယက္ခော သမာနော အတ္တနာ ဓမ္မော ပရေ ဓမ္မေ နိယောဇေတွာ သတ္တပညာသဝဿကောဋိယော သဋ္ဌိ စ ဝဿသတသဟဿာနိ သဂ္ဂေ မောဒိ သဗ္ဗကာမသမင်္ဂီ, အပိ စ, မဟာရာဇ, ဒေဝဒတ္တော ဣမသ္မိံ ဘဝေ ဗုဒ္ဓံ အနာသာဒနီယမာသာဒယိတွာ သမဂ္ဂဉ္စ သသံဃံ ဘိန္ဒိတွာ ပထဝိံ ပါဝိသိ, တထာဂတော ဗုဇ္ဈိတွာ သဗ္ဗဓမ္မေ ပရိနိဗ္ဗုတော ဥပဓိသင်္ခယေ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ကုသလာကုသလသမဝိသမပဉ္ဟော သတ္တမော။

၈။ အမရာဒေဝီပဉ္ဟော

၈။ ‘‘ဘန္တေ နာဂသေန, ဘာသိတမ္ပေတံ ဘဂဝတာ –

‘‘‘သစေ လဘေထ ခဏံ ဝါ ရဟော ဝါ၊ နိမန္တကံ [နိဝါတကံ (ကုဏာလဇာတကေ)] ဝါပိ လဘေထ တာဒိသံ။

သဗ္ဗာဝ [သဗ္ဗာပိ (သီ။ ဣ။)] ဣတ္ထီ ကယိရုံ [ကရေယျုံ (သီ။ ဣ။ က။)] နု ပါပံ၊ အညံ အလဒ္ဓါ ဣဌသပ္ပိနာ သဒ္ဓိ’န္တိ။

‘‘ပုန စ ကထီယတိ ‘မဟောသဓဿ ဘရိယာ အမရာ နာမ ဣတ္ထီ ဂါမကေ ဌပိတာ ပဝုတ္ထပတိကာ ရဟော နိသိန္နာ ဝိဝိတ္တာ ရာဇပ္ပဋိသမံ သာမိကံ ကရိတွာ သဟဿေန နိမန္တီယမာနာ ပါပံ နာကာသီ’တိ။ ယဒိ, ဘန္တေ နာဂသေန, ဘဂဝတာ ဘဏိတံ ‘သစေ။ပေ။။ သဒ္ဓိ’န္တိ တေန ဟိ ‘မဟောသဓဿ ဘရိယာ။ပေ။။ နာကာသီ’တိ ယံ ဝစနံ, တံ မိစ္ဆာ။ ယဒိ မဟောသဓဿ ဘရိယာ။ပေ။။ နာကာသိ, တေန ဟိ ‘သစေ။ပေ။။ သဒ္ဓိ’န္တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘သစေ။ပေ။။ သဒ္ဓိ’န္တိ။ ကထီယတိ စ ‘မဟောသဓဿ ဘရိယာ ။ပေ။။ နာကာသီ’တိ။ ကရေယျ သာ, မဟာရာဇ, ဣတ္ထီ သဟဿံ လဘမာနာ တာဒိသေန ပုရိသေန သဒ္ဓိံ ပါပကမ္မံ, န သာ ကရေယျ သစေ ခဏံ ဝါ ရဟော ဝါ နိမန္တကံ ဝါပိ တာဒိသံ လဘေယျ, ဝိစိနန္တီ သာ, မဟာရာဇ, အမရာ ဣတ္ထီ န အဒ္ဒသ ခဏံ ဝါ ရဟော ဝါ နိမန္တကံ ဝါပိ တာဒိသံ။

‘‘ဣဓ လောကေ ဂရဟဘယာ ခဏံ န ပဿိ, ပရလောကေ နိရယဘယာ ခဏံ န ပဿိ, ကဋုကဝိပါကံ ပါပန္တိ ခဏံ န ပဿိ, ပိယံ အမုဉ္စိတုကာမာ ခဏံ န ပဿိ, သာမိကဿ ဂရုကတာယ ခဏံ န ပဿိ, ဓမ္မံ အပစာယန္တီ ခဏံ န ပဿိ, အနရိယံ ဂရဟန္တီ ခဏံ န ပဿိ, ကိရိယံ အဘိန္ဒိတုကာမာ ခဏံ န ပဿိ။ ဧဝရူပေဟိ ဗဟူဟိ ကာရဏေဟိ ခဏံ န ပဿိ။

‘‘ရဟောပိ သာ လောကေ ဝိစိနိတွာ အပဿန္တီ ပါပံ နာကာသိ။ သစေ သာ မနုဿေဟိ ရဟော လဘေယျ, အထ အမနုဿေဟိ ရဟော န လဘေယျ။ သစေ အမနုဿေဟိ ရဟော လဘေယျ, အထ ပရစိတ္တဝိဒူဟိ ပဗ္ဗဇိတေဟိ ရဟော န လဘေယျ။ သစေ ပရစိတ္တဝိဒူဟိ ပဗ္ဗဇိတေဟိ ရဟော လဘေယျ, အထ ပရစိတ္တဝိဒူနီဟိ ဒေဝတာဟိ ရဟော န လဘေယျ။ သစေ ပရစိတ္တဝိဒူနီဟိ ဒေဝတာဟိ ရဟော လဘေယျ, အတ္တနာဝ ပါပေဟိ ရဟော န လဘေယျ။ သစေ အတ္တနာဝ ပါပေဟိ ရဟော လဘေယျ, အထ အဓမ္မေန ရဟော န လဘေယျ။ ဧဝရူပေဟိ ဗဟုဝိဓေဟိ ကာရဏေဟိ ရဟော အလဘိတွာ ပါပံ နာကာသိ။

‘‘နိမန္တကမ္ပိ သာ လောကေ ဝိစိနိတွာ တာဒိသံ အလဘန္တီ ပါပံ နာကာသိ။ မဟောသဓေါ, မဟာရာဇ, ပဏ္ဍိတော အဋ္ဌဝီသတိယာ အင်္ဂေဟိ သမန္နာဂတော။ ကတမေဟိ အဋ္ဌဝီသတိယာ အင်္ဂေဟိ သမန္နာဂတော? မဟောသဓေါ, မဟာရာဇ, သူရော ဟိရိမာ ဩတ္တပ္ပီ သပက္ခော မိတ္တသမ္ပန္နော ခမော သီလဝါ သစ္စဝါဒီ သောစေယျသမ္ပန္နော အက္ကောဓနော အနတိမာနီ အနုသူယကော ဝီရိယဝါ အာယူဟကော သင်္ဂါဟကော သံဝိဘာဂီ သခိလော နိဝါတဝုတ္တိ သဏှော အသဌော အမာယာဝီ အတိဗုဒ္ဓိသမ္ပန္နော ကိတ္တိမာ ဝိဇ္ဇာသမ္ပန္နော ဟိတေသီ ဥပနိဿိတာနံ ပတ္ထိတော သဗ္ဗဇနဿ ဓနဝါ ယသဝါ။ မဟောသဓေါ, မဟာရာဇ, ပဏ္ဍိတော ဣမေဟိ အဋ္ဌဝီသတိယာ အင်္ဂေဟိ သမန္နာဂတော။ သာ အညံ တာဒိသံ နိမန္တကံ အလဘိတွာ ပါပံ နာကာသီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

အမရာဒေဝီပဉ္ဟော အဋ္ဌမော။

၉။ အရဟန္တအဘာယနပဉ္ဟော

၉။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘ဝိဂတဘယသန္တာသာ အရဟန္တော’တိ။ ပုန စ နဂရေ ရာဇဂဟေ ဓနပါလကံ ဟတ္ထိံ ဘဂဝတိ ဩပတန္တံ ဒိသွာ ပဉ္စ ခီဏာသဝသတာနိ ပရိစ္စဇိတွာ ဇိနဝရံ ပက္ကန္တာနိ ဒိသာဝိဒိသံ ဧကံ ဌပေတွာ ထေရံ အာနန္ဒံ။ ကိံ နု ခေါ, ဘန္တေ နာဂသေန, တေ အရဟန္တော ဘယာ ပက္ကန္တာ, ပညာယိဿတိ သကေန ကမ္မေနာတိ ဒသဗလံ ပါတေတုကာမာ ပက္ကန္တာ , ဥဒါဟု တထာဂတဿ အတုလံ ဝိပုလမသမံ ပါဋိဟာရိယံ ဒဋ္ဌုကာမာ ပက္ကန္တာ? ယဒိ, ဘန္တေ နာဂသေန, ဘဂဝတာ ဘဏိတံ ‘ဝိဂတဘယသန္တာသာ အရဟန္တော’တိ, တေန ဟိ ‘နဂရေ။ပေ။။ အာနန္ဒ’န္တိ ယံ ဝစနံ တံ မိစ္ဆာ။ ယဒိ နဂရေ ရာဇဂဟေ ဓနပါလကံ ဟတ္ထိံ ဘဂဝတိ ဩပတန္တံ ဒိသွာ ပဉ္စ ခီဏာသဝသတာနိ ပရိစ္စဇိတွာ ဇိနဝရံ ပက္ကန္တာနိ ဒိသာဝိဒိသံ ဧကံ ဌပေတွာ ထေရံ အာနန္ဒံ, တေန ဟိ ‘ဝိဂတဘယသန္တာသာ အရဟန္တော’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘ဝိဂတဘယသန္တာသာ အရဟန္တော’တိ, နဂရေ ရာဇဂဟေ ဓနပါလကံ ဟတ္ထိံ ဘဂဝတိ ဩပတန္တံ ဒိသွာ ပဉ္စ ခီဏာသဝသတာနိ ပရိစ္စဇိတွာ ဇိနဝရံ ပက္ကန္တာနိ ဒိသာဝိဒိသံ ဧကံ ဌပေတွာ ထေရံ အာနန္ဒံ, တဉ္စ ပန န ဘယာ, နာပိ ဘဂဝန္တံ ပါတေတုကာမတာယ။

‘‘ယေန ပန, မဟာရာဇ, ဟေတုနာ အရဟန္တော ဘာယေယျုံ ဝါ တာသေယျုံ ဝါ, သော ဟေတု အရဟန္တာနံ သမုစ္ဆိန္နော, တသ္မာ ဝိဂတဘယသန္တာသာ အရဟန္တော, ဘာယတိ နု, မဟာရာဇ, မဟာပထဝီ ခဏန္တေပိ ဘိန္ဒန္တေပိ ဓါရေန္တေပိ သမုဒ္ဒပဗ္ဗတဂိရိသိခရေတိ? ‘‘န ဟိ, ဘန္တေ’’တိ။ ‘‘ကေန ကာရဏေန မဟာရာဇာ’’တိ? ‘‘နတ္ထိ, ဘန္တေ, မဟာပထဝိယာ သော ဟေတု, ယေန ဟေတုနာ မဟာပထဝီ ဘာယေယျ ဝါ တာသေယျ ဝါ’’တိ။ ‘‘ဧဝမေဝ ခေါ, မဟာရာဇ, နတ္ထိ အရဟန္တာနံ သော ဟေတု, ယေန ဟေတုနာ အရဟန္တော ဘာယေယျုံ ဝါ တာသေယျုံ ဝါ။

‘‘ဘာယတိ နု, မဟာရာဇ, ဂိရိသိခရံ ဆိန္ဒန္တေ ဝါ ဘိန္ဒန္တေ ဝါ ပတန္တေ ဝါ အဂ္ဂိနာ ဒဟန္တေ ဝါ’’တိ? ‘‘န ဟိ, ဘန္တေ’’တိ။ ‘‘ကေန ကာရဏေန မဟာရာဇာ’’တိ? ‘‘နတ္ထိ, ဘန္တေ, ဂိရိသိခရဿ သော ဟေတု, ယေန ဟေတုနာ ဂိရိသိခရံ ဘာယေယျ ဝါ တာသေယျ ဝါ’’တိ။ ‘‘ဧဝမေဝ ခေါ, မဟာရာဇ, နတ္ထိ အရဟန္တာနံ သော ဟေတု, ယေန ဟေတုနာ အရဟန္တော ဘာယေယျုံ ဝါ တာသေယျုံ ဝါ။

‘‘ယဒိပိ , မဟာရာဇ, လောကဓါတုသတသဟဿေသု ယေ ကေစိ သတ္တနိကာယပရိယာပန္နာ သဗ္ဗေပိ တေ သတ္တိဟတ္ထာ ဧကံ အရဟန္တံ ဥပဓါဝိတွာ တာသေယျုံ, န ဘဝေယျ အရဟတော စိတ္တဿ ကိဉ္စိ အညထတ္တံ။ ကိံ ကာရဏံ? အဋ္ဌာနမနဝကာသတာယ။

‘‘အပိ စ, မဟာရာဇ, တေသံ ခီဏာသဝါနံ ဧဝံ စေတောပရိဝိတက္ကော အဟောသိ ‘အဇ္ဇ နရဝရပဝရေ ဇိနဝရဝသဘေ နဂရဝရမနုပ္ပဝိဋ္ဌေ ဝီထိယာ ဓနပါလကော ဟတ္ထီ အာပတိဿတိ, အသံသယမတိဒေဝဒေဝံ ဥပဋ္ဌာကော န ပရိစ္စဇိဿတိ, ယဒိ မယံ သဗ္ဗေပိ ဘဂဝန္တံ န ပရိစ္စဇိဿာမ, အာနန္ဒဿ ဂုဏော ပါကဋော န ဘဝိဿတိ, န ဟေဝ စ တထာဂတံ သမုပဂမိဿတိ ဟတ္ထိနာဂေါ, ဟန္ဒ မယံ အပဂစ္ဆာမ, ဧဝမိဒံ မဟတော ဇနကာယဿ ကိလေသဗန္ဓနမောက္ခော ဘဝိဿတိ, အာနန္ဒဿ စ ဂုဏော ပါကဋော ဘဝိဿတီ’တိ။ ဧဝံ တေ အရဟန္တော အာနိသံသံ ဒိသွာ ဒိသာဝိဒိသံ ပက္ကန္တာ’’တိ။ ‘‘သုဝိဘတ္တော, ဘန္တေ နာဂသေန, ပဉ္ဟော, ဧဝမေတံ နတ္ထိ အရဟန္တာနံ ဘယံ ဝါ သန္တာသော ဝါ, အာနိသံသံ ဒိသွာ အရဟန္တော ပက္ကန္တာ ဒိသာဝိဒိသ’’န္တိ။

အရဟန္တအဘာယနပဉ္ဟော နဝမော။

၁၀။ ဗုဒ္ဓသဗ္ဗညုဘာဝပဉ္ဟော

၁၀။ ‘‘ဘန္တေ နာဂသေန, တုမှေ ဘဏထ ‘တထာဂတော သဗ္ဗညူ’တိ။ ပုန စ ဘဏထ ‘တထာဂတေန သာရိပုတ္တမောဂ္ဂလ္လာနပ္ပမုခေ ဘိက္ခုသံဃေ ပဏာမိတေ စာတုမေယျကာ စ သက္ယာ ဗြဟ္မာ စ သဟမ္ပတိ ဗီဇူပမဉ္စ ဝစ္ဆတရုဏူပမဉ္စ ဥပဒဿေတွာ ဘဂဝန္တံ ပသာဒေသုံ ခမာပေသုံ နိဇ္ဈတ္တံ အကံသူ’တိ။ ကိံ နု ခေါ, ဘန္တေ နာဂသေန, အညာတာ တာ ဥပမာ တထာဂတဿ, ယာဟိ တထာဂတော ဥပမာဟိ ဩရတော ခမိတော ဥပသန္တော နိဇ္ဈတ္တံ ဂတော? ယဒိ, ဘန္တေ နာဂသေန, တထာဂတဿ တာ ဥပမာ အညာတာ, တေန ဟိ ဗုဒ္ဓေါ အသဗ္ဗညူ, ယဒိ ဉာတာ, တေန ဟိ ဩကဿ ပသယှ ဝီမံသာပေက္ခော ပဏာမေသိ, တေန ဟိ တဿ အကာရုညတာ သမ္ဘဝတိ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘သဗ္ဗညူ, မဟာရာဇ, တထာဂတော, တာဟိ စ ဥပမာဟိ ဘဂဝါ ပသန္နော ဩရတော ခမိတော ဥပသန္တော နိဇ္ဈတ္တံ ဂတော။ ဓမ္မဿာမီ, မဟာရာဇ, တထာဂတော, တထာဂတပ္ပဝေဒိတေဟေဝ တေ ဩပမ္မေဟိ တထာဂတံ အာရာဓေသုံ တောသေသုံ ပသာဒေသုံ, တေသဉ္စ တထာဂတော ပသန္နော ‘သာဓူ’တိ အဗ္ဘာနုမောဒိ။

‘‘ယထာ, မဟာရာဇ, ဣတ္ထီ သာမိကဿ သန္တကေနေဝ ဓနေန သာမိကံ အာရာဓေတိ တောသေတိ ပသာဒေတိ, တဉ္စ သာမိကော ‘သာဓူ’တိ အဗ္ဘာနုမောဒတိ, ဧဝမေဝ ခေါ, မဟာရာဇ, စာတုမေယျကာ စ သက္ယာ ဗြဟ္မာ စ သဟမ္ပတိ တထာဂတပ္ပဝေဒိတေဟေဝ ဩပမ္မေဟိ တထာဂတံ အာရာဓေသုံ တောသေသုံ ပသာဒေသုံ, တေသဉ္စ တထာဂတော ပသန္နော ‘သာဓူ’တိ အဗ္ဘာနုမောဒိ။

‘‘ယထာ ဝါ ပန, မဟာရာဇ, ကပ္ပကော ရညော သန္တကေနေဝ သုဝဏ္ဏဖဏကေန ရညော ဥတ္တမင်္ဂံ ပသာဓယမာနော ရာဇာနံ အာရာဓေတိ တောသေတိ ပသာဒေတိ, တဿ စ ရာဇာ ပသန္နော ‘သာဓူ’တိ အဗ္ဘာနုမောဒတိ, ယထိစ္ဆိတမနုပ္ပဒေတိ, ဧဝမေဝ ခေါ, မဟာရာဇ, စာတုမေယျကာ စ သက္ယာ ဗြဟ္မာ စ သဟမ္ပတိ တထာဂတပ္ပဝေဒိတေဟေဝ ဩပမ္မေဟိ တထာဂတံ အာရာဓေသုံ တောသေသုံ ပသာဒေသုံ, တေသဉ္စ တထာဂတော ပသန္နော ‘သာဓူ’တိ အဗ္ဘာနုမောဒိ။

‘‘ယထာ ဝါ ပန, မဟာရာဇ, သဒ္ဓိဝိဟာရိကော ဥပဇ္ဈာယာဘတံ ပိဏ္ဍပါတံ ဂဟေတွာ ဥပဇ္ဈာယဿ ဥပနာမေန္တော ဥပဇ္ဈာယံ အာရာဓေတိ တောသေတိ ပသာဒေတိ, တဉ္စ ဥပဇ္ဈာယော ပသန္နော ‘သာဓူ’တိ အဗ္ဘာနုမောဒတိ, ဧဝမေဝ ခေါ, မဟာရာဇ, စာတုမေယျကာ စ သက္ယာ ဗြဟ္မာ စ သဟမ္ပတိ တထာဂတပ္ပဝေဒိတေဟေဝ ဩပမ္မေဟိ တထာဂတံ အာရာဓေသုံ တောသေသုံ ပသာဒေသုံ, တေသဉ္စ တထာဂတော ပသန္နော ‘သာဓူ’တိ အဗ္ဘာနုမောဒိတွာ သဗ္ဗဒုက္ခပရိမုတ္တိယာ ဓမ္မံ ဒေသေသီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီတိ။

ဗုဒ္ဓသဗ္ဗညုဘာဝပဉ္ဟော ဒသမော။

သဗ္ဗညုတဉာဏဝဂ္ဂေါ စတုတ္ထော။

ဣမသ္မိံ ဝဂ္ဂေ ဒသ ပဉှာ။

၅။ သန္ထဝဝဂ္ဂေါ

၁။ သန္ထဝပဉ္ဟော

၁။ ‘‘ဘန္တေ နာဂသေန, ဘာသိတမ္ပေတံ ဘဂဝတာ –

‘‘‘သန္ထဝတော ဘယံ ဇာတံ၊ နိကေတာ ဇာယတေ ရဇော။

အနိကေတမသန္ထဝံ၊ ဧတံ ဝေ မုနိဒဿန’န္တိ။

‘‘ပုန စ ဘဂဝတာ ဘဏိတံ ‘ဝိဟာရေ ကာရယေ ရမ္မေ, ဝါသယေတ္ထ ဗဟုဿုတေ’တိ။ ယဒိ, ဘန္တေ နာဂသေန, တထာဂတေန ဘဏိတံ ‘သန္ထဝတော ဘယံ ဇာတံ, နိကေတာ ဇာယတေ ရဇော။ အနိကေတမသန္ထဝံ, ဧတံ ဝေ မုနိဒဿန’န္တိ, တေန ဟိ ‘ဝိဟာရေ ကာရယေ ရမ္မေ, ဝါသယေတ္ထ ဗဟုဿုတေ’တိ ယံ ဝစနံ, တံ မိစ္ဆာ။ ယဒိ တထာဂတေန ဘဏိတံ ‘ဝိဟာရေ ကာရယေ ရမ္မေ, ဝါသယေတ္ထ ဗဟုဿုတေ’တိ, တေန ဟိ ‘သန္ထဝတော ဘယံ ဇာတံ, နိကေတာ ဇာယတေ ရဇော။ အနိကေတမသန္ထဝံ, ဧတံ ဝေ မုနိဒဿန’န္တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ , မဟာရာဇ, ဘဂဝတာ ‘သန္ထဝတော ဘယံ ဇာတံ, နိကေတာ ဇာယတေ ရဇော။ အနိကေတမသန္ထဝံ, ဧတံ ဝေ မုနိဒဿန’န္တိ။ ဘဏိတဉ္စ ‘ဝိဟာရေ ကာရယေ ရမ္မေ, ဝါသယေတ္ထ ဗဟုဿုတေ’တိ။ ယံ, မဟာရာဇ, ဘဂဝတာ ဘဏိတံ ‘သန္ထဝတော ဘယံ ဇာတံ, နိကေတာ ဇာယတေ ရဇော။ အနိကေတမသန္ထဝံ, ဧတံ ဝေ မုနိဒဿန’န္တိ, တံ သဘာဝဝစနံ အသေသဝစနံ နိဿေသဝစနံ နိပ္ပရိယာယဝစနံ သမဏာနုစ္ဆဝံ သမဏသာရုပ္ပံ သမဏပ္ပတိရူပံ သမဏာရဟံ သမဏဂေါစရံ သမဏပ္ပဋိပဒါ သမဏပ္ပဋိပတ္တိ။ ယထာ, မဟာရာဇ, အာရညကော မိဂေါ အရညေ ပဝနေ စရမာနော နိရာလယော အနိကေတော ယထိစ္ဆကံ သယတိ, ဧဝမေဝ ခေါ, မဟာရာဇ, ဘိက္ခုနာ ‘သန္ထဝတော ဘယံ ဇာတံ, နိကေတာ ဇာယတေ ရဇော။ အနိကေတမသန္ထဝံ, ဧတံ ဝေ မုနိဒဿန’န္တိ စိန္တေတဗ္ဗံ။

‘‘ယံ ပန, မဟာရာဇ, ဘဂဝတာ ဘဏိတံ ‘ဝိဟာရေ ကာရယေ ရမ္မေ, ဝါသယေတ္ထ ဗဟုဿုတေ’တိ, တံ ဒွေ အတ္ထဝသေ သမ္ပဿမာနေန ဘဂဝတာ ဘဏိတံ။ ကတမေ ဒွေ? ဝိဟာရဒါနံ နာမ သဗ္ဗဗုဒ္ဓေဟိ ဝဏ္ဏိတံ အနုမတံ ထောမိတံ ပသတ္ထံ, တံ တေ ဝိဟာရဒါနံ ဒတွာ ဇာတိဇရာမရဏာ ပရိမုစ္စိဿန္တီတိ။ အယံ တာဝ ပဌမော အာနိသံသော ဝိဟာရဒါနေ။

‘‘ပုန စပရံ ဝိဟာရေ ဝိဇ္ဇမာနေ ဘိက္ခုနိယော ဗျတ္တသင်္ကေတာ ဘဝိဿန္တိ, သုလဘံ ဒဿနံ ဒဿနကာမာနံ, အနိကေတေ ဒုဒ္ဒဿနာ ဘဝိဿန္တီတိ။ အယံ ဒုတိယော အာနိသံသော ဝိဟာရဒါနေ။ ဣမေ ဒွေ အတ္ထဝသေ သမ္ပဿမာနေန ဘဂဝတာ ဘဏိတံ ‘ဝိဟာရေ ကာရယေ ရမ္မေ, ဝါသယေတ္ထ ဗဟုဿုတေ’တိ, န တတ္ထ ဗုဒ္ဓပုတ္တေန အာလယော ကရဏီယော နိကေတေ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

သန္ထဝပဉ္ဟော ပဌမော။

၂။ ဥဒရသံယတပဉ္ဟော

၂။ ‘‘ဘန္တေ နာဂသေန, ဘာသိတမ္ပေတံ ဘဂဝတာ –

‘‘‘ဥတ္တိဋ္ဌေ နပ္ပမဇ္ဇေယျ၊ ဥဒရေ သံယတော သိယာ’တိ။

‘‘ပုန စ ဘဂဝတာ ဘဏိတံ ‘အဟံ ခေါ ပနုဒါယိ, အပ္ပေကဒါ ဣမိနာ ပတ္တေန သမတိတ္တိကမ္ပိ ဘုဉ္ဇာမိ, ဘိယျောပိ ဘုဉ္ဇာမီ’တိ။ ယဒိ, ဘန္တေ နာဂသေန, ဘဂဝတာ ဘဏိတံ ‘ဥတ္တိဋ္ဌေ နပ္ပမဇ္ဇေယျ, ဥဒရေ သံယတော သိယာ’တိ, တေန ဟိ ‘အဟံ ခေါ ပနုဒါယိ, အပ္ပေကဒါ ဣမိနာ ပတ္တေန သမတိတ္ထိကမ္ပိ ဘုဉ္ဇာမိ, ဘိယျောပိ ဘုဉ္ဇာမီ’တိ ယံ ဝစနံ, တံ မိစ္ဆာ။ ယဒိ တထာဂတေန ဘဏိတံ ‘အဟံ ခေါ ပနုဒါယိ, အပ္ပေကဒါ ဣမိနာ ပတ္တေန သမတိတ္ထိကမ္ပိ ဘုဉ္ဇာမိ, ဘိယျောပိ ဘုဉ္ဇာမီ’တိ, တေန ဟိ ‘ဥတ္တိဋ္ဌေ နပ္ပမဇ္ဇေယျ, ဥဒရေ သံယတော သိယာ’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘ဥတ္တိဋ္ဌေ နပ္ပမဇ္ဇေယျ, ဥဒရေ သံယတော သိယာ’တိ, ဘဏိတဉ္စ ‘အဟံ ခေါ ပနုဒါယိ, အပ္ပေကဒါ ဣမိနာ ပတ္တေန သမတိတ္တိကမ္ပိ ဘုဉ္ဇာမိ, ဘိယျောပိ ဘုဉ္ဇာမီ’တိ ။ ယံ, မဟာရာဇ, ဘဂဝတာ ဘဏိတံ ‘ဥတ္တိဋ္ဌေ နပ္ပမဇ္ဇေယျ, ဥဒရေ သံယတော သိယာ’တိ, တံ သဘာဝဝစနံ အသေသဝစနံ နိဿေသဝစနံ နိပ္ပရိယာယဝစနံ ဘူတဝစနံ တစ္ဆဝစနံ ယာထာဝဝစနံ အဝိပရီတဝစနံ ဣသိဝစနံ မုနိဝစနံ ဘဂဝန္တဝစနံ အရဟန္တဝစနံ ပစ္စေကဗုဒ္ဓဝစနံ ဇိနဝစနံ သဗ္ဗညုဝစနံ တထာဂတဿ အရဟတော သမ္မာသမ္ဗုဒ္ဓဿ ဝစနံ။

‘‘ဥဒရေ အသံယတော, မဟာရာဇ, ပါဏမ္ပိ ဟနတိ, အဒိန္နမ္ပိ အာဒိယတိ, ပရဒါရမ္ပိ ဂစ္ဆတိ, မုသာပိ ဘဏတိ, မဇ္ဇမ္ပိ ပိဝတိ, မာတရမ္ပိ ဇီဝိတာ ဝေါရောပေတိ, ပိတရမ္ပိ ဇီဝိတာ ဝေါရောပေတိ, အရဟန္တမ္ပိ ဇီဝိတာ ဝေါရောပေတိ, သံဃမ္ပိ ဘိန္ဒတိ, ဒုဋ္ဌေန စိတ္တေန တထာဂတဿ လောဟိတမ္ပိ ဥပ္ပါဒေတိ။ နနု, မဟာရာဇ, ဒေဝဒတ္တော ဥဒရေ အသံယတော သသံဃံ ဘိန္ဒိတွာ ကပ္ပဋ္ဌိယံ ကမ္မံ အာယူဟိ [အာယူဟတိ (က။)]။ ဧဝရူပါနိ, မဟာရာဇ, အညာနိပိ ဗဟုဝိဓါနိ ကာရဏာနိ ဒိသွာ ဘဂဝတာ ဘဏိတံ ‘ဥတ္တိဋ္ဌေ နပ္ပမဇ္ဇေယျ, ဥဒရေ သံယတော သိယာ’တိ။

‘‘ဥဒရေ သံယတော, မဟာရာဇ, စတုသစ္စာဘိသမယံ အဘိသမေတိ, စတ္တာရိ သာမညဖလာနိ သစ္ဆိကရောတိ, စတူသု ပဋိသမ္ဘိဒါသု အဋ္ဌသု သမာပတ္တီသု ဆသု အဘိညာသု ဝသီဘာဝံ ပါပုဏာတိ, ကေဝလဉ္စ သမဏဓမ္မံ ပူရေတိ။ နနု, မဟာရာဇ, သုကပေါတကော ဥဒရေ သံယတော ဟုတွာ ယာဝ တာဝတိံသဘဝနံ ကမ္ပေတွာ သက္ကံ ဒေဝါနမိန္ဒံ ဥပဋ္ဌာနမုပနေသိ, ဧဝရူပါနိ, မဟာရာဇ, အညာနိပိ ဗဟုဝိဓါနိ ကာရဏာနိ ဒိသွာ ဘဂဝတာ ဘဏိတံ ‘ဥတ္တိဋ္ဌေ နပ္ပမဇ္ဇေယျ, ဥဒရေ သံယတော သိယာ’တိ။

‘‘ယံ ပန, မဟာရာဇ, ဘဂဝတာ ဘဏိတံ ‘အဟံ ခေါ ပနုဒါယိ အပ္ပေကဒါ ဣမိနာ ပတ္တေန သမတိတ္တိကမ္ပိ ဘုဉ္ဇာမိ, ဘိယျောပိ ဘုဉ္ဇာမီ’တိ, တံ ကတကိစ္စေန နိဋ္ဌိတကိရိယေန သိဒ္ဓတ္ထေန ဝုသိတဝေါသာနေန နိရာဝရဏေန သဗ္ဗညုနာ သယမ္ဘုနာ တထာဂတေန အတ္တာနံ ဥပါဒါယ ဘဏိတံ။

‘‘ယထာ, မဟာရာဇ, ဝန္တဿ ဝိရိတ္တဿ အနုဝါသိတဿ အာတုရဿ သပ္ပါယကိရိယာ ဣစ္ဆိတဗ္ဗာ ဟောတိ, ဧဝမေဝ ခေါ, မဟာရာဇ, သကိလေသဿ အဒိဋ္ဌသစ္စဿ ဥဒရေ သံယမော ကရဏီယော ဟောတိ။ ယထာ, မဟာရာဇ, မဏိရတနဿ သပ္ပဘာသဿ ဇာတိမန္တဿ အဘိဇာတိပရိသုဒ္ဓဿ မဇ္ဇနနိဃံသနပရိသောဓနေန ကရဏီယံ န ဟောတိ, ဧဝမေဝ ခေါ, မဟာရာဇ, တထာဂတဿ ဗုဒ္ဓဝိသယေ ပါရမိံ ဂတဿ ကိရိယာကရဏေသု အာဝရဏံ န ဟောတီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဥဒရသံယတပဉ္ဟော ဒုတိယော။

၃။ ဗုဒ္ဓအပ္ပါဗာဓပဉ္ဟော

၃။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘အဟမသ္မိ, ဘိက္ခဝေ, ဗြာဟ္မဏော ယာစယောဂေါ သဒါ ပယတပါဏိ အန္တိမဒေဟဓရော အနုတ္တရော ဘိသက္ကော သလ္လကတ္တော’တိ။ ပုန စ ဘဏိတံ ဘဂဝတာ ‘ဧတဒဂ္ဂံ, ဘိက္ခဝေ, မမ သာဝကာနံ ဘိက္ခူနံ အပ္ပါဗာဓါနံ ယဒိဒံ ဗာကုလော’တိ။ ဘဂဝတော စ သရီရေ ဗဟုက္ခတ္တုံ အာဗာဓေါ ဥပ္ပန္နော ဒိဿတိ။ ယဒိ, ဘန္တေ နာဂသေန, တထာဂတော အနုတ္တရော, တေန ဟိ ‘ဧတဒဂ္ဂံ။ပေ။။ ဗာကုလော’တိ ယံ ဝစနံ, တံ မိစ္ဆာ။ ယဒိ ထေရော ဗာကုလော အပ္ပါဗာဓါနံ အဂ္ဂေါ, တေန ဟိ ‘အဟမသ္မိ။ပေ။။ သလ္လကတ္တော’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘အဟမသ္မိ။ပေ။။ သလ္လကတ္တော’တိ, ဘဏိတဉ္စ ‘ဧတဒဂ္ဂံ။ပေ။။ ဗာကုလော’တိ, တဉ္စ ပန ဗာဟိရာနံ အာဂမာနံ အဓိဂမာနံ ပရိယတ္တီနံ အတ္တနိ ဝိဇ္ဇမာနတံ သန္ဓာယ ဘာသိတံ။

‘‘သန္တိ ခေါ ပန, မဟာရာဇ, ဘဂဝတော သာဝကာ ဌာနစင်္ကမိကာ, တေ ဌာနေန စင်္ကမေန ဒိဝါရတ္တိံ ဝီတိနာမေန္တိ, ဘဂဝါ ပန, မဟာရာဇ, ဌာနေန စင်္ကမေန နိသဇ္ဇာယ သယနေန ဒိဝါရတ္တိံ ဝီတိနာမေတိ, ယေ တေ, မဟာရာဇ, ဘိက္ခူ ဌာနစင်္ကမိကာ, တေ တေန အင်္ဂေန အတိရေကာ။

‘‘သန္တိ ခေါ ပန, မဟာရာဇ, ဘဂဝတော သာဝကာ ဧကာသနိကာ, တေ ဇီဝိတဟေတုပိ ဒုတိယံ ဘောဇနံ န ဘုဉ္ဇန္တိ, ဘဂဝါ ပန, မဟာရာဇ, ဒုတိယမ္ပိ ယာဝ တတိယမ္ပိ ဘောဇနံ ဘုဉ္ဇတိ, ယေ တေ, မဟာရာဇ, ဘိက္ခူ ဧကာသနိကာ, တေ တေန အင်္ဂေန အတိရေကာ, အနေကဝိဓါနိ, မဟာရာဇ, တာနိ ကာရဏာနိ တေသံ တေသံ တံ တံ သန္ဓာယ ဘဏိတာနိ။ ဘဂဝါ ပန, မဟာရာဇ, အနုတ္တရော သီလေန သမာဓိနာ ပညာယ ဝိမုတ္တိယာ ဝိမုတ္တိဉာဏဒဿနေန ဒသဟိ စ ဗလေဟိ စတူဟိ ဝေသာရဇ္ဇေဟိ အဋ္ဌာရသဟိ ဗုဒ္ဓဓမ္မေဟိ ဆဟိ အသာဓါရဏေဟိ ဉာဏေဟိ, ကေဝလေ စ ဗုဒ္ဓဝိသယေ တံ သန္ဓာယ ဘဏိတံ ‘အဟမသ္မိ။ပေ။။ သလ္လကတ္တော’တိ။

‘‘ဣဓ, မဟာရာဇ, မနုဿေသု ဧကော ဇာတိမာ ဟောတိ, ဧကော ဓနဝါ, ဧကော ဝိဇ္ဇဝါ, ဧကော သိပ္ပဝါ, ဧကော သူရော, ဧကော ဝိစက္ခဏော, သဗ္ဗေပေတေ အဘိဘဝိယ ရာဇာ ယေဝ တေသံ ဥတ္တမော ဟောတိ, ဧဝမေဝ ခေါ, မဟာရာဇ, ဘဂဝါ သဗ္ဗသတ္တာနံ အဂ္ဂေါ ဇေဋ္ဌော သေဋ္ဌော။

‘‘ယံ ပန အာယသ္မာ ဗာကုလော အပ္ပါဗာဓေါ အဟောသိ, တံ အဘိနီဟာရဝသေန, သော ဟိ, မဟာရာဇ, အနောမဒဿိဿ ဘဂဝတော ဥဒရဝါတာဗာဓေ ဥပ္ပန္နေ ဝိပဿိဿ စ ဘဂဝတော အဋ္ဌသဋ္ဌိယာ စ ဘိက္ခုသတသဟဿာနံ တိဏပုပ္ဖကရောဂေ ဥပ္ပန္နေ သယံ တာပသော သမာနော နာနာဘေသဇ္ဇေဟိ တံ ဗျာဓိံ အပနေတွာ အပ္ပါဗာဓတံ ပတ္တော, ဘဏိတော စ ‘ဧတဒဂ္ဂံ။ပေ။။ ဗာကုလော’တိ။

‘‘ဘဂဝတော, မဟာရာဇ, ဗျာဓိမှိ ဥပ္ပဇ္ဇန္တေပိ အနုပ္ပဇ္ဇန္တေပိ ဓုတင်္ဂံ အာဒိယန္တေပိ အနာဒိယန္တေပိ နတ္ထိ ဘဂဝတာ သဒိသော ကောစိ သတ္တော။ ဘာသိတမ္ပေတံ မဟာရာဇ ဘဂဝတာ ဒေဝါတိဒေဝေန သံယုတ္တနိကာယဝရလဉ္ဆကေ –

‘‘‘ယာဝတာ, ဘိက္ခဝေ, သတ္တာ အပဒါ ဝါ ဒွိပဒါ ဝါ စတုပ္ပဒါ ဝါ ဗဟုပ္ပဒါ ဝါ ရူပိနော ဝါ အရူပိနော ဝါ သညိနော ဝါ အသညိနော ဝါ နေဝသညီနာသညိနော ဝါ, တထာဂတော တေသံ အဂ္ဂမက္ခာယတိ အရဟံ သမ္မာသမ္ဗုဒ္ဓေါ’တိ။ ‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’’တိ။

ဗုဒ္ဓအပ္ပါဗာဓပဉ္ဟော တတိယော။

၄။ မဂ္ဂုပ္ပါဒနပဉ္ဟော

၄။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘တထာဂတော ဘိက္ခဝေ, အရဟံ သမ္မာသမ္ဗုဒ္ဓေါ အနုပ္ပန္နဿ မဂ္ဂဿ ဥပ္ပါဒေတာ’တိ။ ပုန စ ဘဏိတံ ‘အဒ္ဒသံ ခွါဟံ, ဘိက္ခဝေ, ပုရာဏံ မဂ္ဂံ ပုရာဏံ အဉ္ဇသံ ပုဗ္ဗကေဟိ သမ္မာသမ္ဗုဒ္ဓေဟိ အနုယာတ’န္တိ။ ယဒိ, ဘန္တေ နာဂသေန, တထာဂတော အနုပ္ပန္နဿ မဂ္ဂဿ ဥပ္ပါဒေတာ, တေန ဟိ ‘အဒ္ဒသံ ခွါဟံ, ဘိက္ခဝေ, ပုရာဏံ မဂ္ဂံ ပုရာဏံ အဉ္ဇသံ ပုဗ္ဗကေဟိ သမ္မာသမ္ဗုဒ္ဓေဟိ အနုယာတ’န္တိ ယံ ဝစနံ, တံ မိစ္ဆာ။ ယဒိ တထာဂတေန ဘဏိတံ ‘အဒ္ဒသံ ခွါဟံ, ဘိက္ခဝေ, ပုရာဏံ မဂ္ဂံ ပုရာဏံ အဉ္ဇသံ ပုဗ္ဗကေဟိ သမ္မာသမ္ဗုဒ္ဓေဟိ အနုယာတ’န္တိ, တေန ဟိ ‘တထာဂတော, ဘိက္ခဝေ, အရဟံ သမ္မာသမ္ဗုဒ္ဓေါ အနုပ္ပန္နဿ မဂ္ဂဿ ဥပ္ပါဒေတာ’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ , မဟာရာဇ, ဘဂဝတာ ‘တထာဂတော, ဘိက္ခဝေ, အရဟံ သမ္မာသမ္ဗုဒ္ဓေါ အနုပ္ပန္နဿ မဂ္ဂဿ ဥပ္ပါဒေတာ’တိ။ ဘဏိတဉ္စ ‘အဒ္ဒသံ ခွါဟံ, ဘိက္ခဝေ, ပုရာဏံ မဂ္ဂံ ပုရာဏံ အဉ္ဇသံ ပုဗ္ဗကေဟိ သမ္မာသမ္ဗုဒ္ဓေဟိ အနုယာတ’န္တိ, တံ ဒွယမ္ပိ သဘာဝဝစနမေဝ, ပုဗ္ဗကာနံ, မဟာရာဇ, တထာဂတာနံ အန္တရဓါနေန အသတိ အနုသာသကေ မဂ္ဂေါ အန္တရဓါယိ, တံ [သော တံ (သီ။ ဣ။ က။)] တထာဂတော မဂ္ဂံ လုဂ္ဂံ ပလုဂ္ဂံ ဂူဠှံ ပိဟိတံ ပဋိစ္ဆန္နံ အသဉ္စရဏံ ပညာစက္ခုနာ သမ္ပဿမာနော [သမ္မသမာနော (သီ။ ဣ။)] အဒ္ဒသ ပုဗ္ဗကေဟိ သမ္မာသမ္ဗုဒ္ဓေဟိ အနုယာတံ, တံကာရဏာ အာဟ ‘အဒ္ဒသံ ခွါဟံ, ဘိက္ခဝေ, ပုရာဏံ မဂ္ဂံ ပုရာဏံ အဉ္ဇသံ ပုဗ္ဗကေဟိ သမ္မာသမ္ဗုဒ္ဓေဟိ အနုယာတ’န္တိ။

‘‘ပုဗ္ဗကာနံ, မဟာရာဇ, တထာဂတာနံ အန္တရဓါနေန အသတိ အနုသာသကေ လုဂ္ဂံ ပလုဂ္ဂံ ဂူဠှံ ပိဟိတံ ပဋိစ္ဆန္နံ အသဉ္စရဏံ မဂ္ဂံ ယံ ဒါနိ တထာဂတော သဉ္စရဏံ အကာသိ, တံကာရဏာ အာဟ ‘တထာဂတော, ဘိက္ခဝေ, အရဟံ သမ္မာသမ္ဗုဒ္ဓေါ အနုပ္ပန္နဿ မဂ္ဂဿ ဥပ္ပါဒေတာ’တိ။

‘‘ဣဓ, မဟာရာဇ, ရညော စက္ကဝတ္တိဿ အန္တရဓါနေန မဏိရတနံ ဂိရိသိခန္တရေ နိလီယတိ, အပရဿ စက္ကဝတ္တိဿ သမ္မာပဋိပတ္တိယာ ဥပဂစ္ဆတိ, အပိ နု ခေါ တံ, မဟာရာဇ, မဏိရတနံ တဿ ပကတ’’န္တိ? ‘‘န ဟိ, ဘန္တေ, ပါကတိကံ ယေဝ တံ မဏိရတနံ, တေန ပန နိဗ္ဗတ္တိတ’’န္တိ [နိဗ္ဗတ္တန္တိ (သီ။ ဣ။)]။ ‘‘ဧဝမေဝ ခေါ, မဟာရာဇ, ပါကတိကံ ပုဗ္ဗကေဟိ တထာဂတေဟိ အနုစိဏ္ဏံ အဋ္ဌင်္ဂိကံ သိဝံ မဂ္ဂံ အသတိ အနုသာသကေ လုဂ္ဂံ ပလုဂ္ဂံ ဂူဠှံ ပိဟိတံ ပဋိစ္ဆန္နံ အသဉ္စရဏံ ဘဂဝါ ပညာစက္ခုနာ သမ္ပဿမာနော ဥပ္ပါဒေသိ, သဉ္စရဏံ အကာသိ, တံကာရဏာ အာဟ ‘တထာဂတော, ဘိက္ခဝေ, အရဟံ သမ္မာသမ္ဗုဒ္ဓေါ အနုပ္ပန္နဿ မဂ္ဂဿ ဥပ္ပါဒေတာ’တိ။

‘‘ယထာ ဝါ ပန, မဟာရာဇ, သန္တံ ယေဝ ပုတ္တံ ယောနိယာ ဇနယိတွာ မာတာ ‘ဇနိကာ’တိ ဝုစ္စတိ, ဧဝမေဝ ခေါ, မဟာရာဇ, တထာဂတော သန္တံ ယေဝ မဂ္ဂံ လုဂ္ဂံ ပလုဂ္ဂံ ဂူဠှံ ပိဟိတံ ပဋိစ္ဆန္နံ အသဉ္စရဏံ ပညာစက္ခုနာ သမ္ပဿမာနော ဥပ္ပါဒေသိ, သဉ္စရဏံ အကာသိ, တံကာရဏာ အာဟ ‘တထာဂတော, ဘိက္ခဝေ, အရဟံ သမ္မာသမ္ဗုဒ္ဓေါ အနုပ္ပန္နဿ မဂ္ဂဿ ဥပ္ပါဒေတာ’တိ။

‘‘ယထာ ဝါ ပန, မဟာရာဇ, ကောစိ ပုရိသော ယံ ကိဉ္စိ နဋ္ဌံ ပဿတိ, ‘တေန တံ ဘဏ္ဍံ နိဗ္ဗတ္တိတ’န္တိ ဇနော ဝေါဟရတိ, ဧဝမေဝ ခေါ, မဟာရာဇ, တထာဂတော သန္တံ ယေဝ မဂ္ဂံ လုဂ္ဂံ ပလုဂ္ဂံ ဂူဠှံ ပိဟိတံ ပဋိစ္ဆန္နံ အသဉ္စရဏံ ပညာစက္ခုနာ သမ္ပဿမာနော ဥပ္ပါဒေသိ, သဉ္စရဏံ အကာသိ, တံကာရဏာ အာဟ ‘တထာဂတော, ဘိက္ခဝေ, အရဟံ သမ္မာသမ္ဗုဒ္ဓေါ အနုပ္ပန္နဿ မဂ္ဂဿ ဥပ္ပါဒေတာ’တိ။

‘‘ယထာ ဝါ ပန, မဟာရာဇ, ကောစိ ပုရိသော ဝနံ သောဓေတွာ ဘူမိံ နီဟရတိ, ‘တဿ သာ ဘူမီ’တိ ဇနော ဝေါဟရတိ, န စေသာ ဘူမိ တေန ပဝတ္တိတာ, တံ ဘူမိံ ကာရဏံ ကတွာ ဘူမိသာမိကော နာမ ဟောတိ, ဧဝမေဝ ခေါ, မဟာရာဇ, တထာဂတော သန္တံ ယေဝ မဂ္ဂံ လုဂ္ဂံ ပလုဂ္ဂံ ဂူဠှံ ပိဟိတံ ပဋိစ္ဆန္နံ အသဉ္စရဏံ ပညာယ သမ္ပဿမာနော ဥပ္ပါဒေသိ, သဉ္စရဏံ အကာသိ, တံကာရဏာ အာဟ ‘တထာဂတော, ဘိက္ခဝေ, အရဟံ သမ္မာသမ္ဗုဒ္ဓေါ အနုပ္ပန္နဿ မဂ္ဂဿ ဥပ္ပါဒေတာ’’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

မဂ္ဂုပ္ပါဒနပဉ္ဟော စတုတ္ထော။

၅။ ဗုဒ္ဓအဝိဟေဌကပဉ္ဟော

၅။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘ပုဗ္ဗေ ဝါဟံ မနုဿဘူတော သမာနော သတ္တာနံ အဝိဟေဌကဇာတိကော အဟောသိ’န္တိ။ ပုန စ ဘဏိတံ ‘လောမသကဿပေါ နာမ ဣသိ သမာနော အနေကသတေ ပါဏေ ဃာတယိတွာ ဝါဇပေယျံ မဟာယညံ ယဇီ’တိ။ ယဒိ, ဘန္တေ နာဂသေန, ဘဂဝတာ ဘဏိတံ ‘ပုဗ္ဗေ ဝါဟံ မနုဿဘူတော သမာနော သတ္တာနံ အဝိဟေဌကဇာတိကော အဟောသိ’န္တိ, တေန ဟိ ‘လောမသကဿပေန ဣသိနာ အနေကသတေ ပါဏေ ဃာတယိတွာ ဝါဇပေယျံ မဟာယညံ ယဇိတ’န္တိ ယံ ဝစနံ, တံ မိစ္ဆာ။ ယဒိ ‘လောမသကဿပေန ဣသိနာ အနေကသတေ ပါဏေ ဃာတယိတွာ ဝါဇပေယျံ မဟာယညံ ယဇိတံ’, တေန ဟိ ‘ပုဗ္ဗေ ဝါဟံ မနုဿဘူတော သမာနော သတ္တာနံ အဝိဟေဌကဇာတိကော အဟောသိ’န္တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘ပုဗ္ဗေ ဝါဟံ မနုဿဘူတော သမာနော သတ္တာနံ အဝိဟေဌကဇာတိကော အဟောသိ’န္တိ, ‘လောမသကဿပေန ဣသိနာ အနေကသတေ ပါဏေ ဃာတယိတွာ ဝါဇပေယျံ မဟာယညံ ယဇိတံ’, တဉ္စ ပန ရာဂဝသေန ဝိသညိနာ, နော သစေတနေနာ’’တိ။

‘‘အဋ္ဌိမေ , ဘန္တေ နာဂသေန, ပုဂ္ဂလာ ပါဏံ ဟနန္တိ။ ကတမေ အဋ္ဌ? ရတ္တော ရာဂဝသေန ပါဏံ ဟနတိ, ဒုဋ္ဌော ဒေါသဝသေန ပါဏံ ဟနတိ, မူဠ္ဟော မောဟဝသေန ပါဏံ ဟနတိ, မာနီ မာနဝသေန ပါဏံ ဟနတိ, လုဒ္ဓေါ လောဘဝသေန ပါဏံ ဟနတိ, အကိဉ္စနော ဇီဝိကတ္ထာယ ပါဏံ ဟနတိ, ဗာလော ဟဿဝသေန [အညာဏဝသေန (က။ သီ။)] ပါဏံ ဟနတိ, ရာဇာ ဝိနယနဝသေန ပါဏံ ဟနတိ။ ဣမေ ခေါ, ဘန္တေ နာဂသေန, အဋ္ဌ ပုဂ္ဂလာ ပါဏံ ဟနန္တိ။ ပါကတိကံ ယေဝ, ဘန္တေ နာဂသေန, ဗောဓိသတ္တေန ကတ’’န္တိ ။ ‘‘န, မဟာရာဇ, ပါကတိကံ ဗောဓိသတ္တေန ကတံ, ယဒိ, မဟာရာဇ, ဗောဓိသတ္တော ပကတိဘာဝေန ဩနမေယျ မဟာယညံ ယဇိတုံ, န ယိမံ ဂါထံ ဘဏေယျ –

‘‘‘သသမုဒ္ဒပရိယာယံ၊ မဟိံ သာဂရကုဏ္ဍလံ။

န ဣစ္ဆေ သဟ နိန္ဒာယ၊ ဧဝံ သေယှ [သယှ (သီ။ ဣ။)] ဝိဇာနဟီ’တိ။

‘‘ဧဝံဝါဒီ, မဟာရာဇ, ဗောဓိသတ္တော သဟ ဒဿနေန စန္ဒဝတိယာ ရာဇကညာယ ဝိသညီ အဟောသိ ခိတ္တစိတ္တော ရတ္တော ဝိသညိဘူတော အာကုလာကုလော တုရိတတုရိတော တေန ဝိက္ခိတ္တဘန္တလုဠိတစိတ္တေန မဟတိမဟာပသုဃာတဂလရုဟိရသဉ္စယံ ဝါဇပေယျံ မဟာယညံ ယဇိ။

‘‘ယထာ, မဟာရာဇ, ဥမ္မတ္တကော ခိတ္တစိတ္တော ဇလိတမ္ပိ ဇာတဝေဒံ အက္ကမတိ, ကုပိတမ္ပိ အာသီဝိသံ ဂဏှာတိ, မတ္တမ္ပိ ဟတ္ထိံ ဥပေတိ, သမုဒ္ဒမ္ပိ အတီရဒဿိံ ပက္ခန္ဒတိ, စန္ဒနိကမ္ပိ ဩဠိဂလ္လမ္ပိ ဩမဒ္ဒတိ, ကဏ္ဋကာဓါနမ္ပိ အဘိရုဟတိ, ပပါတေပိ ပတတိ, အသုစိမ္ပိ ဘက္ခေတိ, နဂ္ဂေါပိ ရထိယာ စရတိ, အညမ္ပိ ဗဟုဝိဓံ အကိရိယံ ကရောတိ။ ဧဝမေဝ ခေါ, မဟာရာဇ, ဗောဓိသတ္တော သဟ ဒဿနေန စန္ဒဝတိယာ ရာဇကညာယ ဝိသညီ အဟောသိ ခိတ္တစိတ္တော ရတ္တော ဝိသညိဘူတော အာကုလာကုလော တုရိတတုရိတော, တေန ဝိက္ခိတ္တဘန္တလုဠိတစိတ္တေန မဟတိမဟာပသုဃာတဂလရုဟိရသဉ္စယံ ဝါဇပေယျံ မဟာယညံ ယဇိ။

‘‘ခိတ္တစိတ္တေန, မဟာရာဇ, ကတံ ပါပံ ဒိဋ္ဌဓမ္မေပိ န မဟာသာဝဇ္ဇံ ဟောတိ, သမ္ပရာယေ ဝိပါကေနပိ နော တထာ။ ဣဓ, မဟာရာဇ, ကောစိ ဥမ္မတ္တကော ဝဇ္ဈမာပဇ္ဇေယျ, တဿ တုမှေ ကိံ ဒဏ္ဍံ ဓါရေထာ’’တိ? ‘‘ကော, ဘန္တေ, ဥမ္မတ္တကဿ ဒဏ္ဍော ဘဝိဿတိ, တံ မယံ ပေါထာပေတွာ နီဟရာပေမ, ဧသောဝ တဿ ဒဏ္ဍော’’တိ။ ‘‘ဣတိ ခေါ, မဟာရာဇ, ဥမ္မတ္တကဿ အပရာဓေ ဒဏ္ဍောပိ န ဘဝတိ , တသ္မာ ဥမ္မတ္တကဿ ကတေပိ န ဒေါသော ဘဝတိ သတေကိစ္ဆော။ ဧဝမေဝ ခေါ, မဟာရာဇ, လောမသကဿပေါ ဣသိ သဟ ဒဿနေန စန္ဒဝတိယာ ရာဇကညာယ ဝိသညီ အဟောသိ ခိတ္တစိတ္တော ရတ္တော ဝိသညိဘူတော ဝိသဋပယာတော အာကုလာကုလော တုရိတတုရိတော, တေန ဝိက္ခိတ္တဘန္တလုဠိတစိတ္တေန မဟတိမဟာပသုဃာတဂလရုဟိရသဉ္စယံ ဝါဇပေယျံ မဟာယညံ ယဇိ။ ယဒါ စ ပန ပကတိစိတ္တော အဟောသိ ပဋိလဒ္ဓဿတိ, တဒါ ပုနဒေဝ ပဗ္ဗဇိတွာ ပဉ္စာဘိညာယော နိဗ္ဗတ္တေတွာ ဗြဟ္မလောကူပဂေါ အဟောသီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဗုဒ္ဓအဝိဟေဌကပဉ္ဟော ပဉ္စမော။

၆။ ဆဒ္ဒန္တဇောတိပါလာရဗ္ဘပဉ္ဟော

၆။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ဆဒ္ဒန္တော နာဂရာဇာ –

‘‘‘ဝဓိဿမေတန္တိ ပရာမသန္တော၊ ကာသာဝမဒ္ဒက္ခိ ဓဇံ ဣသီနံ။

ဒုက္ခေန ဖုဋ္ဌဿုဒပါဒိ သညာ၊ အရဟဒ္ဓဇော သဗ္ဘိ အဝဇ္ဈရူပေါ’တိ။

‘‘ပုန စ ဘဏိတံ ‘ဇောတိပါလမာဏဝေါ သမာနော ကဿပံ ဘဂဝန္တံ အရဟန္တံ သမ္မာသမ္ဗုဒ္ဓံ မုဏ္ဍကဝါဒေန သမဏကဝါဒေန အသဗ္ဘာဟိ ဖရုသာဟိ ဝါစာဟိ အက္ကောသိ ပရိဘာသီ’တိ။ ယဒိ, ဘန္တေ နာဂသေန, ဗောဓိသတ္တော တိရစ္ဆာနဂတော သမာနော ကာသာဝံ အဘိပူဇယိ, တေန ဟိ ‘ဇောတိပါလေန မာဏဝေန ကဿပေါ ဘဂဝါ အရဟံ သမ္မာသမ္ဗုဒ္ဓေါ မုဏ္ဍကဝါဒေန သမဏကဝါဒေန အသဗ္ဘာဟိ ဖရုသာဟိ ဝါစာဟိ အက္ကုဋ္ဌော ပရိဘာသိတော’တိ ယံ ဝစနံ, တံ မိစ္ဆာ။ ယဒိ ဇောတိပါလေန မာဏဝေန ကဿပေါ ဘဂဝါ အရဟံ သမ္မာသမ္ဗုဒ္ဓေါ မုဏ္ဍကဝါဒေန သမဏကဝါဒေန အသဗ္ဘာဟိ ဖရုသာဟိ ဝါစာဟိ အက္ကုဋ္ဌော ပရိဘာသိတော, တေန ဟိ ‘ဆဒ္ဒန္တေန နာဂရာဇေန ကာသာဝံ ပူဇိတ’န္တိ တမ္ပိ ဝစနံ မိစ္ဆာ။ ယဒိ တိရစ္ဆာနဂတေန ဗောဓိသတ္တေန ကက္ခဠခရကဋုကဝေဒနံ ဝေဒယမာနေန လုဒ္ဒကေန နိဝတ္ထံ ကာသာဝံ ပူဇိတံ, ကိံ မနုဿဘူတော သမာနော ပရိပက္ကဉာဏော ပရိပက္ကာယ ဗောဓိယာ ကဿပံ ဘဂဝန္တံ အရဟန္တံ သမ္မာသမ္ဗုဒ္ဓံ ဒသဗလံ လောကနာယကံ ဥဒိတောဒိတံ ဇလိတဗျာမောဘာသံ ပဝရုတ္တမံ ပဝရရုစိရကာသိကကာသာဝမဘိပါရုတံ ဒိသွာ န ပူဇယိ? အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗောတိ။

‘‘ဘာသိတမ္ပေတံ, မဟာရာဇ, ဘဂဝတာ ဆဒ္ဒန္တော နာဂရာဇာ ‘ဝဓိဿမေတန္တိ။ပေ။။ အဝဇ္ဈရူပေါ’တိ။ ဇောတိပါလေန စ မာဏဝေန ကဿပေါ ဘဂဝါ အရဟံ သမ္မာသမ္ဗုဒ္ဓေါ မုဏ္ဍကဝါဒေန သမဏကဝါဒေန အသဗ္ဘာဟိ ဖရုသာဟိ ဝါစာဟိ အက္ကုဋ္ဌော ပရိဘာသိတော, တဉ္စ ပန ဇာတိဝသေန ကုလဝသေန။ ဇောတိပါလော, မဟာရာဇ, မာဏဝေါ အဿဒ္ဓေ အပ္ပသန္နေ ကုလေ ပစ္စာဇာတော, တဿ မာတာပိတရော ဘဂိနိဘာတရော ဒါသိဒါသစေဋကပရိဝါရကမနုဿာ ဗြဟ္မဒေဝတာ ဗြဟ္မဂရုကာ, တေ ‘ဗြာဟ္မဏာ ဧဝ ဥတ္တမာ ပဝရာ’တိ အဝသေသေ ပဗ္ဗဇိတေ ဂရဟန္တိ ဇိဂုစ္ဆန္တိ, တေသံ တံ ဝစနံ သုတွာ ဇောတိပါလော မာဏဝေါ ဃဋိကာရေန ကုမ္ဘကာရေန သတ္ထာရံ ဒဿနာယ ပက္ကောသိတော ဧဝမာဟ ‘ကိံ ပန တေန မုဏ္ဍကေန သမဏကေန ဒိဋ္ဌေနာ’တိ။

‘‘ယထာ , မဟာရာဇ , အမတံ ဝိသမာသဇ္ဇ တိတ္တကံ ဟောတိ, ယထာ စ သီတောဒကံ အဂ္ဂိမာသဇ္ဇ ဥဏှံ ဟောတိ, ဧဝမေဝ ခေါ, မဟာရာဇ, ဇောတိပါလော မာဏဝေါ အဿဒ္ဓေ အပ္ပသန္နေ ကုလေ ပစ္စာဇာတော, သော ကုလဝသေန အန္ဓော ဟုတွာ [သော ကုလဇာတိဝသေန အန္ဓော ဘဝိတွာ (သျာ။)] တထာဂတံ အက္ကောသိ ပရိဘာသိ။

‘‘ယထာ, မဟာရာဇ, ဇလိတပဇ္ဇလိတော မဟာအဂ္ဂိက္ခန္ဓော သပ္ပဘာသော ဥဒကမာသဇ္ဇ ဥပဟတပ္ပဘာတေဇော သီတလော ကာဠကော ဘဝတိ ပရိပက္ကနိဂ္ဂုဏ္ဍိဖလသဒိသော, ဧဝမေဝ ခေါ, မဟာရာဇ, ဇောတိပါလော မာဏဝေါ ပုညဝါ သဒ္ဓေါ ဉာဏဝိပုလသပ္ပဘာသော အဿဒ္ဓေ အပ္ပသန္နေ ကုလေ ပစ္စာဇာတော, သော ကုလဝသေန အန္ဓော ဟုတွာ တထာဂတံ အက္ကောသိ ပရိဘာသိ, ဥပဂန္တွာ စ ဗုဒ္ဓဂုဏမညာယ စေဋကဘူတော ဝိယ အဟောသိ, ဇိနသာသနေ ပဗ္ဗဇိတွာ အဘိညာ စ သမာပတ္တိယော စ နိဗ္ဗတ္တေတွာ ဗြဟ္မလောကူပဂေါ အဟောသီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဆဒ္ဒန္တဇောတိပါလာရဗ္ဘပဉ္ဟော ဆဋ္ဌော။

၇။ ဃဋိကာရပဉ္ဟော

၇။ ‘‘ဘန္တေ နာဂသေန, ဘာသိတမ္ပေတံ ဘဂဝတာ ‘ဃဋိကာရဿ ကုမ္ဘကာရဿ အာဝေသနံ သဗ္ဗံ တေမာသံ အာကာသစ္ဆဒနံ အဋ္ဌာသိ, န ဒေဝေါတိဝဿီ’တိ။ ပုန စ ဘဏိတံ ‘ကဿပဿ တထာဂတဿ [ဘဂဝတော အရဟတော သမ္မာသမ္ဗုဒ္ဓဿ (မ။ နိ။ ၂။၂၈၉)] ကုဋိ ဩဝဿတီ’တိ။ ကိဿ ပန, ဘန္တေ နာဂသေန, တထာဂတဿ ဧဝမုဿန္နကုသလမူလဿ [ဧဝရူပဿ ဥဿန္နကုသလမူလဿ (က။)] ကုဋိ ဩဝဿတိ, တထာဂတဿ နာမ သော အာနုဘာဝေါ ဣစ္ဆိတဗ္ဗော? ယဒိ, ဘန္တေ နာဂသေန, ဃဋိကာရဿ ကုမ္ဘကာရဿ အာဝေသနံ အနောဝဿံ အာကာသစ္ဆဒနံ အဟောသိ, တေန ဟိ ‘တထာဂတဿ ကုဋိ ဩဝဿတီ’တိ ယံ ဝစနံ, တံ မိစ္ဆာ။ ယဒိ တထာဂတဿ ကုဋိ ဩဝဿတိ, တေန ဟိ ‘ဃဋိကာရဿ ကုမ္ဘကာရဿ အာဝေသနံ အနောဝဿကံ အဟောသိ အာကာသစ္ဆဒန’န္တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘ဃဋိကာရဿ ကုမ္ဘကာရဿ အာဝေသနံ သဗ္ဗံ တေမာသံ အာကာသစ္ဆဒနံ အဋ္ဌာသိ, န ဒေဝေါတိဝဿီ’တိ။ ဘဏိတဉ္စ ‘ကဿပဿ တထာဂတဿ ကုဋိ ဩဝဿတီ’တိ။ ဃဋိကာရော, မဟာရာဇ, ကုမ္ဘကာရော သီလဝါ ကလျာဏဓမ္မော ဥဿန္နကုသလမူလော အန္ဓေ ဇိဏ္ဏေ မာတာပိတရော ပေါသေတိ, တဿ အသမ္မုခါ အနာပုစ္ဆာယေဝဿ ဃရေ တိဏံ ဟရိတွာ ဘဂဝတော ကုဋိံ ဆာဒေသုံ, သော တေန တိဏဟရဏေန အကမ္ပိတံ အသဉ္စလိတံ သုသဏ္ဌိတံ ဝိပုလမသမံ ဣတိံ ပဋိလဘတိ, ဘိယျော သောမနဿဉ္စ အတုလံ ဥပ္ပါဒေသိ ‘အဟော ဝတ မေ ဘဂဝါ လောကုတ္တမော သုဝိဿတ္ထော’တိ, တေန တဿ ဒိဋ္ဌဓမ္မိကော ဝိပါကော နိဗ္ဗတ္တော။ န ဟိ, မဟာရာဇ, တထာဂတော တာဝတကေန ဝိကာရေန စလတိ။

‘‘ယထာ, မဟာရာဇ, သိနေရု ဂိရိရာဇာ အနေကသတသဟဿဝါတသမ္ပဟာရေနပိ န ကမ္ပတိ န စလတိ, မဟောဒဓိ ဝရပ္ပဝရသာဂရော အနေကသတနဟုတမဟာဂင်္ဂါသတသဟဿေဟိပိ န ပူရတိ န ဝိကာရမာပဇ္ဇတိ, ဧဝမေဝ ခေါ, မဟာရာဇ, တထာဂတော န တာဝတကေန ဝိကာရေန စလတိ။

‘‘ယံ ပန, မဟာရာဇ, တထာဂတဿ ကုဋိ ဩဝဿတိ, တံ မဟတော ဇနကာယဿ အနုကမ္ပာယ။ ဒွေမေ, မဟာရာဇ, အတ္ထဝသေ သမ္ပဿမာနာ တထာဂတာ သယံ နိမ္မိတံ ပစ္စယံ နပ္ပဋိသေဝန္တိ, ‘အယံ အဂ္ဂဒက္ခိဏေယျော သတ္ထာ’တိ ဘဂဝတော ပစ္စယံ ဒတွာ ဒေဝမနုဿာ သဗ္ဗဒုဂ္ဂတိတော ပရိမုစ္စိဿန္တီတိ, ဒဿေတွာ ဝုတ္တိံ ပရိယေသန္တီတိ ‘မာ အညေ ဥပဝဒေယျု’န္တိ။ ဣမေ ဒွေ အတ္ထဝသေ သမ္ပဿမာနာ တထာဂတာ သယံ နိမ္မိတံ ပစ္စယံ နပ္ပဋိသေဝန္တိ။ ယဒိ, မဟာရာဇ, သက္ကော ဝါ တံ ကုဋိံ အနောဝဿံ ကရေယျ ဗြဟ္မာ ဝါ သယံ ဝါ, သာဝဇ္ဇံ ဘဝေယျ တံ ယေဝ ကရဏံ [ကာရဏံ (သီ။ ဣ။)] သဒေါသံ သနိဂ္ဂဟံ, ဣမေ ဝိဘူတံ [ဝိဘူသံ (သီ။ ဣ။)] ကတွာ လောကံ သမ္မောဟေန္တိ အဓိကတံ ကရောန္တီတိ, တသ္မာ တံ ကရဏံ ဝဇ္ဇနီယံ။ န, မဟာရာဇ, တထာဂတာ ဝတ္ထုံ ယာစန္တိ, တာယ အဝတ္ထုယာစနာယ အပရိဘာသိယာ ဘဝန္တီ’’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဃဋိကာရပဉ္ဟော သတ္တမော။

၈။ ဗြာဟ္မဏရာဇဝါဒပဉ္ဟော

၈။ ‘‘ဘန္တေ နာဂသေန, ဘာသိတမ္ပေတံ တထာဂတေန ‘အဟမသ္မိ, ဘိက္ခဝေ, ဗြာဟ္မဏော ယာစယောဂေါ’တိ။ ပုန စ ဘဏိတံ ‘ရာဇာဟမသ္မိ သေလာ’တိ။ ယဒိ, ဘန္တေ နာဂသေန, ဘဂဝတာ ဘဏိတံ ‘အဟမသ္မိ, ဘိက္ခဝေ , ဗြာဟ္မဏော ယာစယောဂေါ’တိ, တေန ဟိ ‘ရာဇာဟမသ္မိ သေလာ’တိ ယံ ဝစနံ, တံ မိစ္ဆာ။ ယဒိ တထာဂတေန ဘဏိတံ ‘ရာဇာဟမသ္မိ သေလာ’တိ, တေန ဟိ ‘အဟမသ္မိ, ဘိက္ခဝေ, ဗြာဟ္မဏော ယာစယောဂေါ’တိ တမ္ပိ ဝစနံ မိစ္ဆာ။ ခတ္တိယော ဝါ ဟိ ဘဝေယျ ဗြာဟ္မဏော ဝါ, နတ္ထိ ဧကာယ ဇာတိယာ ဒွေ ဝဏ္ဏာ နာမ, အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘အဟမသ္မိ, ဘိက္ခဝေ, ဗြာဟ္မဏော ယာစယောဂေါ’တိ, ပုန စ ဘဏိတံ ‘ရာဇာဟမသ္မိ သေလာ’တိ, တတ္ထ ကာရဏံ အတ္ထိ, ယေန ကာရဏေန တထာဂတော ဗြာဟ္မဏော စ ရာဇာ စ ဟောတီ’’တိ။

‘‘ကိံ ပန တံ, ဘန္တေ နာဂသေန, ကာရဏံ, ယေန ကာရဏေန တထာဂတော ဗြာဟ္မဏော စ ရာဇာ စ ဟောတိ’’? ‘‘သဗ္ဗေ, မဟာရာဇ, ပါပကာ အကုသလာ ဓမ္မာ တထာဂတဿ ဗာဟိတာ ပဟီနာ အပဂတာ ဗျပဂတာ ဥစ္ဆိန္နာ ခီဏာ ခယံ ပတ္တာ နိဗ္ဗုတာ ဥပသန္တာ, တသ္မာ တထာဂတော ‘ဗြာဟ္မဏော’တိ ဝုစ္စတိ။

‘‘ဗြာဟ္မဏော နာမ သံသယမနေကံသံ ဝိမတိပထံ ဝီတိဝတ္တော, ဘဂဝါပိ, မဟာရာဇ, သံသယမနေကံသံ ဝိမတိပထံ ဝီတိဝတ္တော, တေန ကာရဏေန တထာဂတော ‘ဗြာဟ္မဏော’တိ ဝုစ္စတိ။

‘‘ဗြာဟ္မဏော နာမ သဗ္ဗဘဝဂတိယောနိနိဿဋော မလရဇဂတဝိပ္ပမုတ္တော အသဟာယော, ဘဂဝါပိ, မဟာရာဇ, သဗ္ဗဘဝဂတိယောနိနိဿဋော မလရဇဂတဝိပ္ပမုတ္တော အသဟာယော, တေန ကာရဏေန တထာဂတော ‘ဗြာဟ္မဏော’တိ ဝုစ္စတိ။

‘‘ဗြာဟ္မဏာ နာမ အဂ္ဂသေဋ္ဌဝရပဝရဒိဗ္ဗဝိဟာရဗဟုလော, ဘဂဝါပိ, မဟာရာဇ, အဂ္ဂသေဋ္ဌဝရပဝရဒိဗ္ဗဝိဟာရဗဟုလော, တေနာပိ ကပရဏေန တထာဂတော ‘‘ဗြာဟ္မဏော’’တိ ဝုစ္စတိ။

‘‘ဗြာဟ္မဏော နာမ အဇ္ဈယန အဇ္ဈာပန ဒါနပ္ပဋိဂ္ဂဟဏ ဒမ သံယမနိယမပုဗ္ဗမနုသိဋ္ဌိ ပဝေဏိ ဝံသ ဓရဏော, ဘဂဝါပိ, မဟာရာဇ, အဇ္ဈယန အဇ္ဈာပန ဒါနပ္ပဋိဂ္ဂဟဏ ဒမ သံယမ နိယမ ပုဗ္ဗဇိနာစိဏ္ဏ အနုသိဋ္ဌိ ပဝေဏိ ဝံသ ဓရဏော တေနာပိ ကာရဏေန တထာဂတော ‘ဗြာဟ္မဏော’တိ ဝုစ္စတိ။

‘‘ဗြာဟ္မဏော နာမ ဗြဟာသုခဝိဟာရဇ္ဈာနဈာယီ; ဘဂဝါပိ, မဟာရာဇ, ဗြဟာသုခဝိဟာရဇ္ဈာနဈာယီ, တေနာပိ ကာရဏေန တထာဂတော ‘ဗြာဟ္မဏော’တိ ဝုစ္စတိ။

‘‘ဗြာဟ္မဏော နာမ သဗ္ဗဘဝါဘဝဂတီသု အဘိဇာတိဝတ္တိတမနုစရိတံ ဇာနာတိ, ဘဂဝါပိ, မဟာရာဇ, သဗ္ဗဘဝါဘဝဂတီသု အဘိဇာတိဝတ္တိတမနုစရိတံ ဇာနာတိ, တေနာပိ ကာရဏေန တထာဂတော ‘ဗြာဟ္မဏော’တိ ဝုစ္စတိ။

‘‘ဗြာဟ္မဏောတိ, မဟာရာဇ, ဘဂဝတော နေတံ နာမံ မာတရာ ကတံ, န ပိတရာ ကတံ, န ဘာတရာ ကတံ, န ဘဂိနိယာ ကတံ, န မိတ္တာမစ္စေဟိ ကတံ, န ဉာတိသာလောဟိတေဟိ ကတံ, န သမဏဗြာဟ္မဏေဟိ ကတံ, န ဒေဝတာဟိ ကတံ, ဝိမောက္ခန္တိကမေတံ ဗုဒ္ဓါနံ ဘဂဝန္တာနံ နာမံ ဗောဓိယာ ယေဝ မူလေ မာရသေနံ ဝိဓမိတွာ အတီတာနာဂတပစ္စုပ္ပန္နေ ပါပကေ အကုသလေ ဓမ္မေ ဗာဟေတွာ သဟ သဗ္ဗညုတဉာဏဿ ပဋိလာဘာ ပဋိလဒ္ဓပါတုဘူတသမုပ္ပန္နမတ္တေ သစ္ဆိကာ ပညတ္တိ ယဒိဒံ ဗြာဟ္မဏောတိ, တေန ကာရဏေန တထာဂတော ဝုစ္စတိ ‘ဗြာဟ္မဏော’’’တိ။

‘‘ကေန ပန, ဘန္တေ နာဂသေန, ကာရဏေန တထာဂတော ဝုစ္စတိ ‘ရာဇာ’’’တိ? ‘‘ရာဇာ နာမ, မဟာရာဇ, ယော ကောစိ ရဇ္ဇံ ကာရေတိ လောကမနုသာသတိ, ဘဂဝါပိ, မဟာရာဇ, ဒသသဟဿိယာ လောကဓါတုယာ ဓမ္မေန ရဇ္ဇံ ကာရေတိ, သဒေဝကံ လောကံ သမာရကံ သဗြဟ္မကံ သဿမဏဗြာဟ္မဏိံ ပဇံ သဒေဝမနုဿံ အနုသာသတိ, တေနာပိ ကာရဏေန တထာဂတော ဝုစ္စတိ ‘ရာဇာ’တိ။

‘‘ရာဇာ နာမ, မဟာရာဇ, သဗ္ဗဇနမနုဿေ အဘိဘဝိတွာ နန္ဒယန္တော ဉာတိသသံဃံ, သောစယန္တော အမိတ္တသသံဃံ, မဟတိမဟာယသသိရိဟရံ ထိရသာရဒဏ္ဍံ အနူနသတသလာကာလင်္ကတံ ဥဿာပေတိ ပဏ္ဍရဝိမလသေတစ္ဆတ္တံ, ဘဂဝါပိ, မဟာရာဇ, သောစယန္တော မာရသေနံ မိစ္ဆာပဋိပန္နံ, နန္ဒယန္တော ဒေဝမနုဿေ သမ္မာပဋိပန္နေ ဒသသဟဿိယာ လောကဓါတုယာ မဟတိမဟာယသသိရိဟရံ ခန္တိထိရသာရဒဏ္ဍံ ဉာဏဝရသတသလာကာလင်္ကတံ ဥဿာပေတိ အဂ္ဂဝရဝိမုတ္တိပဏ္ဍရဝိမလသေတစ္ဆတ္တံ, တေနာပိ ကာရဏေန တထာဂတော ဝုစ္စတိ ‘ရာဇာ’တိ။

‘‘ရာဇာ နာမ ဥပဂတသမ္ပတ္တဇနာနံ ဗဟူနမဘိဝန္ဒနီယော ဘဝတိ, ဘဂဝါပိ, မဟာရာဇ, ဥပဂတသမ္ပတ္တဒေဝမနုဿာနံ ဗဟူနမဘိဝန္ဒနီယော, တေနာပိ ကာရဏေန တထာဂတော ဝုစ္စတိ ‘ရာဇာ’တိ။

‘‘ရာဇာ နာမ ယဿ ကဿစိ အာရာဓကဿ ပသီဒိတွာ ဝရိတံ ဝရံ ဒတွာ ကာမေန တပ္ပယတိ, ဘဂဝါပိ, မဟာရာဇ, ယဿ ကဿစိ ကာယေန ဝါစာယ မနသာ အာရာဓကဿ ပသီဒိတွာ ဝရိတံ ဝရမနုတ္တရံ သဗ္ဗဒုက္ခပရိမုတ္တိံ ဒတွာ အသေသကာမဝရေန စ တပ္ပယတိ, တေနာပိ ကာရဏေန တထာဂတော ဝုစ္စတိ ‘ရာဇာ’တိ။

‘‘ရာဇာ နာမ အာဏံ ဝီတိက္ကမန္တံ ဝိဂရဟတိ ဈာပေတိ [ဇာပေတိ (သီ။ ဣ။)] ဓံသေတိ, ဘဂဝတောပိ, မဟာရာဇ, သာသနဝရေ အာဏံ အတိက္ကမန္တော အလဇ္ဇီ မင္ကုဘာဝေန ဩညာတော ဟီဠိတော ဂရဟိတော ဘဝိတွာ ဝဇ္ဇတိ ဇိနသာသနဝရမှာ, တေနာပိ ကာရဏေန တထာဂတော ဝုစ္စတိ ‘ရာဇာ’တိ။

‘‘ရာဇာ နာမ ပုဗ္ဗကာနံ ဓမ္မိကာနံ ရာဇူနံ ပဝေဏိမနုသိဋ္ဌိယာ ဓမ္မာဓမ္မမနုဒီပယိတွာ ဓမ္မေန ရဇ္ဇံ ကာရယမာနော ပိဟယိတော ပိယော ပတ္ထိတော ဘဝတိ ဇနမနုဿာနံ, စိရံ ရာဇကုလဝံသံ ဌပယတိ ဓမ္မဂုဏဗလေန, ဘဂဝါပိ, မဟာရာဇ, ပုဗ္ဗကာနံ သယမ္ဘူနံ ပဝေဏိမနုသိဋ္ဌိယာ ဓမ္မာဓမ္မမနုဒီပယိတွာ ဓမ္မေန လောကမနုသာသမာနော ပိဟယိတော ပိယော ပတ္ထိတော ဒေဝမနုဿာနံ စိရံ သာသနံ ပဝတ္တေတိ ဓမ္မဂုဏဗလေန, တေနာပိ ကာရဏေန တထာဂတော ဝုစ္စတိ ‘ရာဇာ’တိ။ ဧဝမနေကဝိဓံ, မဟာရာဇ, ကာရဏံ, ယေန ကာရဏေန တထာဂတော ဗြာဟ္မဏောပိ ဘဝေယျ ရာဇာပိ ဘဝေယျ, သုနိပုဏော ဘိက္ခု ကပ္ပမ္ပိ နော နံ သမ္ပာဒေယျ, ကိံ အတိဗဟုံ ဘဏိတေန, သံခိတ္တံ သမ္ပဋိစ္ဆိတဗ္ဗ’’န္တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဗြာဟ္မဏရာဇဝါဒပဉ္ဟော အဋ္ဌမော။

၉။ ဂါထာဘိဂီတဘောဇနကထာပဉ္ဟော

၉။ ‘‘ဘန္တေ နာဂသေန, ဘာသိတမ္ပေတံ ဘဂဝတာ –

‘‘‘ဂါထာဘိဂီတံ မေ အဘောဇနေယျံ [အဘောဇနီယံ (က။) သု။ နိ။ ၈၁ ပဿိတဗ္ဗံ]၊ သမ္ပဿတံ ဗြာဟ္မဏ နေသ ဓမ္မာ။

ဂါထာဘိဂီတံ ပနုဒန္တိ ဗုဒ္ဓါ၊ ဓမ္မေ သတီ ဗြာဟ္မဏ ဝုတ္တိရေသာ’တိ။

‘‘ပုန စ ဘဂဝါ ပရိသာယ ဓမ္မံ ဒေသေန္တော ကထေန္တော အနုပုဗ္ဗိကထံ ပဌမံ တာဝ ဒါနကထံ ကထေတိ, ပစ္ဆာ သီလကထံ, တဿ ဘဂဝတော သဗ္ဗလောကိဿရဿ ဘာသိတံ သုတွာ ဒေဝမနုဿာ အဘိသင်္ခရိတွာ ဒါနံ ဒေန္တိ, တဿ တံ ဥယျောဇိတံ ဒါနံ သာဝကာ ပရိဘုဉ္ဇန္တိ။ ယဒိ, ဘန္တေ နာဂသေန, ဘဂဝတာ ဘဏိတံ ‘ဂါထာဘိဂီတံ မေ အဘောဇနေယျ’န္တိ, တေန ဟိ ‘ဘဂဝါ ဒါနကထံ ပဌမံ ကထေတီ’တိ ယံ ဝစနံ, တံ မိစ္ဆာ။ ယဒိ ဒါနကထံ ပဌမံ ကထေတိ, တေန ဟိ ‘ဂါထာဘိဂီတံ မေ အဘောဇနေယျ’န္တိ တမ္ပိ ဝစနံ မိစ္ဆာ။ ကိံ ကာရဏံ? ယော သော, ဘန္တေ, ဒက္ခိဏေယျော ဂိဟီနံ ပိဏ္ဍပါတဒါနဿ ဝိပါကံ ကထေတိ, တဿ တေ ဓမ္မကထံ သုတွာ ပသန္နစိတ္တာ အပရာပရံ ဒါနံ ဒေန္တိ, ယေ တံ ဒါနံ ပရိဘုဉ္ဇန္တိ, သဗ္ဗေ တေ ဂါထာဘိဂီတံ ပရိဘုဉ္ဇန္တိ။ အယမ္ပိ ဥဘတော ကောဋိကော ပဉ္ဟော နိပုဏော ဂမ္ဘီရော တပါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ, မဟာရာဇ, ဘဂဝတာ ‘ဂါထာဘိဂီတံ မေ အဘောဇနေယျံ, သမ္ပဿတံ ဗြာဟ္မဏ နေသ ဓမ္မော။ ဂါထာဘိဂီတံ ပနုဒန္တိ ဗုဒ္ဓါ, ဓမ္မေ သတီ ဗြာဟ္မဏ ဝုတ္တိရေသာ’တိ, ကထေတိ စ ဘဂဝါ ပဌမံ ဒါနကထံ, တဉ္စ ပန ကိရိယံ သဗ္ဗေသံ တထာဂတာနံ ပဌမံ ဒါနကထာယ, တတ္ထ စိတ္တံ အဘိရမာပေတွာ ပစ္ဆာ သီလေ နိယောဇေန္တိ။ ယထာ, မဟာရာဇ, မနုဿာ တရုဏဒါရကာနံ ပဌမံ တာဝ ကီဠာဘဏ္ဍကာနိ ဒေန္တိ။ သေယျထိဒံ, ဝင်္ကကံ ဃဋိကံ စိင်္ဂုလကံ ပတ္တာဠှကံ ရထကံ ဓနုကံ, ပစ္ဆာ တေ သကေ သကေ ကမ္မေ နိယောဇေန္တိ။ ဧဝမေဝ ခေါ, မဟာရာဇ, တထာဂတော ပဌမံ ဒါနကထာယ စိတ္တံ အဘိရမာပေတွာ ပစ္ဆာ သီလေ နိယောဇေတိ။

‘‘ယထာ ဝါ ပန, မဟာရာဇ, ဘိသက္ကော နာမ အာတုရာနံ ပဌမံ တာဝ စတူဟပဉ္စာဟံ တေလံ ပါယေတိ ဗလကရဏာယ သိနေဟနာယ, ပစ္ဆာ ဝိရေစေတိ။ ဧဝမေဝ ခေါ, မဟာရာဇ, တထာဂတော ပဌမံ တာဝ ဒါနကထာယ စိတ္တံ အဘိရမာပေတွာ ပစ္ဆာ သီလေ နိယောဇေတိ။ ဒါယကာနံ, မဟာရာဇ, ဒါနပတီနံ စိတ္တံ မုဒုကံ ဟောတိ မဒ္ဒဝံ သိနိဒ္ဓံ, တေန တေ ဒါနသေတုသင်္ကမေန ဒါနနာဝါယ သံသာရသာဂရပါရမနုဂစ္ဆန္တိ, တသ္မာ တေသံ ပဌမံ ကမ္မဘူမိမနုသာသတိ, န စ ကေနစိ [တေန (သီ။ ဣ။)] ဝိညတ္တိမာပဇ္ဇတီ’’တိ။

‘‘ဘန္တေ နာဂသေန, ‘ဝိညတ္တိ’န္တိ ယံ ဝဒေသိ, ကတိ ပန တာ ဝိညတ္တိယော’’တိ? ‘‘ဒွေမာ, မဟာရာဇ, ဝိညတ္တိယော ကာယဝိညတ္တိ ဝစီဝိညတ္တိ စာတိ။ တတ္ထ အတ္ထိ ကာယဝိညတ္တိ သာဝဇ္ဇာ, အတ္ထိ အနဝဇ္ဇာ။ အတ္ထိ ဝစီဝိညတ္တိ သာဝဇ္ဇာ, အတ္ထိ အနဝဇ္ဇာ။

‘‘ကတမာ ကာယဝိညတ္တိ သာဝဇ္ဇာ? ဣဓေကစ္စော ဘိက္ခု ကုလာနိ ဥပဂန္တွာ အနောကာသေ ဌိတော ဌာနံ ဘဉ္ဇတိ, အယံ ကာယဝိညတ္တိ သာဝဇ္ဇာ။ တာယ စ ဝိညာပိတံ အရိယာ န ပရိဘုဉ္ဇန္တိ, သော စ ပုဂ္ဂလော အရိယာနံ သမယေ ဩညာတော ဟောတိ ဟီဠိတော ခီဠိတော ဂရဟိတော ပရိဘူတော အစိတ္တီကတော, ဘိန္နာဇီဝေါတွေဝ သင်္ခံ ဂစ္ဆတိ။

‘‘ပုန စပရံ, မဟာရာဇ, ဣဓေကစ္စော ဘိက္ခု ကုလာနိ ဥပဂန္တွာ အနောကာသေ ဌိတော ဂလံ ပဏာမေတွာ မောရပေက္ခိတံ ပေက္ခတိ ‘ဧဝံ ဣမေ ပဿန္တီ’တိ, တေန စ တေ ပဿန္တိ။ အယမ္ပိ ကာယဝိညတ္တိ သာဝဇ္ဇာ။ တာယ စ ဝိညာပိတံ အရိယာ န ပရိဘုဉ္ဇန္တိ, သော စ ပုဂ္ဂလော အရိယာနံ သမယေ ဩညာတော ဟောတိ ဟီဠိတော ခီဠိတော ဂရဟိတော ပရိဘူတော အစိတ္တီကတော, ဘိန္နာဇီဝေါတွေဝ သင်္ခံ ဂစ္ဆတိ။

‘‘ပုန စပရံ, မဟာရာဇ, ဣဓေကစ္စော ဘိက္ခု ဟနုကာယ ဝါ ဘမုကာယ ဝါ အင်္ဂုဋ္ဌေန ဝါ ဝိညာပေတိ, အယမ္ပိ ကာယဝိညတ္တိ သာဝဇ္ဇာ, တာယ စ ဝိညာပိတံ အရိယာ န ပရိဘုဉ္ဇန္တိ, သော စ ပုဂ္ဂလော အရိယာနံ သမယေ ဩညာတော ဟောတိ ဟီဠိတော ခီဠိတော ဂရဟိတော ပရိဘူတော အစိတ္တီကတော, ဘိန္နာဇီဝေါတွေဝ သင်္ခံ ဂစ္ဆတိ။

‘‘ကတမာ ကာယဝိညတ္တိ အနဝဇ္ဇာ? ဣဓ ဘိက္ခု ကုလာနိ ဥပဂန္တွာ သတော သမာဟိတော သမ္ပဇာနော ဌာနေပိ အဋ္ဌာနေပိ ယထာနုသိဋ္ဌိံ ဂန္တွာ ဌာနေ တိဋ္ဌတိ, ဒါတုကာမေသု တိဋ္ဌတိ, အဒါတုကာမေသု ပက္ကမတိ။ အယံ ကာယဝိညတ္တိ အနဝဇ္ဇာ, တာယ စ ဝိညာပိတံ အရိယာ ပရိဘုဉ္ဇန္တိ, သော စ ပုဂ္ဂလော အရိယာနံ သမယေ ဝဏ္ဏိတော ဟောတိ ထုတော ပသတ္ထော သလ္လေခိတာစာရော, ပရိသုဒ္ဓါဇီဝေါတွေဝ သင်္ခံ ဂစ္ဆတိ။ ဘာသိတမ္ပေတံ, မဟာရာဇ, ဘဂဝတာ ဒေဝါတိဒေဝေန –

‘န ဝေ ယာစန္တိ သပ္ပညာ၊ ဓီရော စ ဝေဒိတုမရဟတိ [အရိယာ ဂရဟန္တိ ယာစနံ (သီ။ ဣ။)]။

ဥဒ္ဒိဿ အရိယာ တိဋ္ဌန္တိ၊ ဧသာ အရိယာန ယာစနာ’တိ။

‘‘ကတမာ ဝစီဝိညတ္တိ သာဝဇ္ဇာ? ဣဓ, မဟာရာဇ, ဘိက္ခု ဝါစာယ ဗဟုဝိဓံ ဝိညာပေတိ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရံ, အယံ ဝစီဝိညတ္တိ သာဝဇ္ဇာ, တာယ စ ဝိညာပိတံ အရိယာ န ပရိဘုဉ္ဇန္တိ, သော စ ပုဂ္ဂလော အရိယာနံ သမယေ ဩညာတော ဟောတိ ဟီဠိတော ခီဠိတော ဂရဟိတော ပရိဘူတော အစိတ္တီကတော, ဘိန္နာဇီဝေါတွေဝ သင်္ခံ ဂစ္ဆတိ။

‘‘ပုန စပရံ, မဟာရာဇ, ဣဓေကစ္စော ဘိက္ခု ပရေသံ သာဝေန္တော ဧဝံ ဘဏတိ ‘ဣမိနာ မေ အတ္ထော’တိ, တာယ စ ဝါစာယ ပရေသံ သာဝိတာယ တဿ လာဘော ဥပ္ပဇ္ဇတိ, အယမ္ပိ ဝစီဝိညတ္တိ သာဝဇ္ဇာ, တာယ စ ဝိညာပိတံ အရိယာ န ပရိဘုဉ္ဇန္တိ, သော စ ပုဂ္ဂလော အရိယာနံ သမယေ ဩညာတော ဟောတိ ဟီဠိတော ခီဠိတော ဂရဟိတော ပရိဘူတော အစိတ္တီကတော, ဘိန္နာဇီဝေါတွေဝ သင်္ခံ ဂစ္ဆတိ။

‘‘ပုန စပရံ, မဟာရာဇ, ဣဓေကစ္စော ဘိက္ခု ဝစီဝိပ္ဖာရေန ပရိသာယ သာဝေတိ ‘ဧဝဉ္စ ဧဝဉ္စ ဘိက္ခူနံ ဒါတဗ္ဗ’န္တိ, တဉ္စ တေ ဝစနံ သုတွာ ပရိကိတ္တိတံ အဘိဟရန္တိ, အယမ္ပိ ဝစီဝိညတ္တိ သာဝဇ္ဇာ, တာယ စ ဝိညာပိတံ အရိယာ န ပရိဘုဉ္ဇန္တိ, သော စ ပုဂ္ဂလော အရိယာနံ သမယေ ဩညာတော ဟောတိ ဟီဠိတော ခီဠိတော ဂရဟိတော ပရိဘူတော အစိတ္တီကတော, ဘိန္နာဇီဝေါတွေဝ သင်္ခံ ဂစ္ဆတိ။

‘‘နနု, မဟာရာဇ, ထေရောပိ သာရိပုတ္တော အတ္ထင်္ဂတေ သူရိယေ ရတ္တိဘာဂေ ဂိလာနော သမာနော ထေရေန မဟာမောဂ္ဂလ္လာနေန ဘေသဇ္ဇံ ပုစ္ဆီယမာနော ဝါစံ ဘိန္ဒိ, တဿ တေန ဝစီဘေဒေန ဘေသဇ္ဇံ ဥပ္ပဇ္ဇိ။ အထ ထေရော သာရိပုတ္တော ‘ဝစီဘေဒေန မေ ဣမံ ဘေသဇ္ဇံ ဥပ္ပန္နံ, မာ မေ အာဇီဝေါ ဘိဇ္ဇီ’တိ အာဇီဝဘေဒဘယာ တံ ဘေသဇ္ဇံ ပဇဟိ န ဥပဇီဝိ။ ဧဝမ္ပိ ဝစီဝိညတ္တိ သာဝဇ္ဇာ, တာယ စ ဝိညာပိတံ အရိယာ န ပရိဘုဉ္ဇန္တိ။ သော စ ပုဂ္ဂလော အရိယာနံ သမယေ ဩညာတော ဟောတိ ဟီဠိတော ခီဠိတော ဂရဟိတော ပရိဘူတော အစိတ္တီကတော, ဘိန္နာဇီဝေါတွေဝ သင်္ခံ ဂစ္ဆတိ။

‘‘ကတမာ ဝစီဝိညတ္တိ အနဝဇ္ဇာ? ဣဓ, မဟာရာဇ, ဘိက္ခု သတိ ပစ္စယေ ဘေသဇ္ဇံ ဝိညာပေတိ ဉာတိပဝါရိတေသု ကုလေသု, အယံ ဝစီဝိညတ္တိ အနဝဇ္ဇာ, တာယ စ ဝိညာပိတံ အရိယာ ပရိဘုဉ္ဇန္တိ, သော စ ပုဂ္ဂလော အရိယာနံ သမယေ ဝဏ္ဏိတော ဟောတိ ထောမိတော ပသတ္ထော, ပရိသုဒ္ဓါဇီဝေါတွေဝ သင်္ခံ ဂစ္ဆတိ, အနုမတော တထာဂတေဟိ အရဟန္တေဟိ သမ္မာသမ္ဗုဒ္ဓေဟိ။

‘‘ယံ ပန, မဟာရာဇ, တထာဂတော ကသိဘာရဒွါဇဿ ဗြာဟ္မဏဿ ဘောဇနံ ပဇဟိ [ပဇဟတိ (က။)], တံ အာဝေဌနဝိနိဝေဌနကဍ္ဎနနိဂ္ဂဟပ္ပဋိကမ္မေန နိဗ္ဗတ္တိ, တသ္မာ တထာဂတော တံ ပိဏ္ဍပါတံ ပဋိက္ခိပိ န ဥပဇီဝီ’’တိ။

‘‘သဗ္ဗကာလံ, ဘန္တေ နာဂသေန, တထာဂတေ ဘုဉ္ဇမာနေ ဒေဝတာ ဒိဗ္ဗံ ဩဇံ ပတ္တေ အာကိရန္တိ, ဥဒါဟု ‘သူကရမဒ္ဒဝေ စ မဓုပါယာသေ စာ’တိ ဒွီသု ယေဝ ပိဏ္ဍပါတေသု အာကိရိံသူ’’တိ? ‘‘သဗ္ဗကာလံ, မဟာရာဇ, တထာဂတေ ဘုဉ္ဇမာနေ ဒေဝတာ ဒိဗ္ဗံ ဩဇံ ဂဟေတွာ ဥပတိဋ္ဌိတွာ ဥဒ္ဓဋုဒ္ဓဋေ အာလောပေ အာကိရန္တိ။

‘‘ယထာ , မဟာရာဇ, ရညော သူဒေါ ရညော ဘုဉ္ဇန္တဿ သူပံ ဂဟေတွာ ဥပတိဋ္ဌိတွာ ကဗဠေ ကဗဠေ သူပံ အာကိရတိ, ဧဝမေဝ ခေါ, မဟာရာဇ, သဗ္ဗကာလံ တထာဂတေ ဘုဉ္ဇမာနေ ဒေဝတာ ဒိဗ္ဗံ ဩဇံ ဂဟေတွာ ဥပတိဋ္ဌိတွာ ဥဒ္ဓဋုဒ္ဓဋေ အာလောပေ ဒိဗ္ဗံ ဩဇံ အာကိရန္တိ။ ဝေရဉ္ဇာယမ္ပိ, မဟာရာဇ , တထာဂတဿ သုက္ခယဝပုလကေ [သုက္ခယဝမူလကေ (က။)] ဘုဉ္ဇမာနဿ ဒေဝတာ ဒိဗ္ဗေန ဩဇေန တေမယိတွာ တေမယိတွာ ဥပသံဟရိံသု, တေန တထာဂတဿ ကာယော ဥပစိတော အဟောသီ’’တိ။ ‘‘လာဘာ ဝတ, ဘန္တေ နာဂသေန, တာသံ ဒေဝတာနံ, ယာ တထာဂတဿ သရီရပ္ပဋိဇဂ္ဂနေ သတတံ သမိတံ ဥဿုက္ကမာပန္နာ။ သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

ဂါထာဘိဂီတဘောဇနကထာပဉ္ဟော နဝမော။

၁၀။ ဓမ္မဒေသနာယ အပ္ပောဿုက္ကပဉ္ဟော

၁၀။ ‘‘ဘန္တေ နာဂသေန, တုမှေ ဘဏထ ‘တထာဂတေန စတူဟိ စ အသင္ခ္ယေယျေဟိ ကပ္ပါနံ သတသဟဿေန စ ဧတ္ထန္တရေ သဗ္ဗညုတဉာဏံ ပရိပါစိတံ မဟတော ဇနကာယဿ သမုဒ္ဓရဏာယာ’တိ။ ပုန စ ‘သဗ္ဗညုတံ ပတ္တဿ အပ္ပောဿုက္ကတာယ စိတ္တံ နမိ, နော ဓမ္မဒေသနာယာ’တိ။

‘‘ယထာ နာမ, ဘန္တေ နာဂသေန, ဣဿာသော ဝါ ဣဿာသန္တေဝါသီ ဝါ ဗဟုကေ ဒိဝသေ သင်္ဂါမတ္ထာယ ဥပါသနံ သိက္ခိတွာ သမ္ပတ္တေ မဟာယုဒ္ဓေ ဩသက္ကေယျ, ဧဝမေဝ ခေါ, ဘန္တေ နာဂသေန, တထာဂတေန စတူဟိ စ အသင္ခ္ယေယျေဟိ ကပ္ပါနံ သတသဟဿေန စ ဧတ္ထန္တရေ သဗ္ဗညုတဉာဏံ ပရိပါစေတွာ မဟတော ဇနကာယဿ သမုဒ္ဓရဏာယ သဗ္ဗညုတံ ပတ္တေန ဓမ္မဒေသနာယ ဩသက္ကိတံ။

‘‘ယထာ ဝါ ပန, ဘန္တေ နာဂသေန, မလ္လော ဝါ မလ္လန္တေဝါသီ ဝါ ဗဟုကေ ဒိဝသေ နိဗ္ဗုဒ္ဓံ သိက္ခိတွာ သမ္ပတ္တေ မလ္လယုဒ္ဓေ ဩသက္ကေယျ, ဧဝမေဝ ခေါ, ဘန္တေ နာဂသေန, တထာဂတေန စတူဟိ စ အသင္ခ္ယေယျေဟိ ကပ္ပါနံ သတသဟဿေန စ ဧတ္ထန္တရေ သဗ္ဗညုတဉာဏံ ပရိပါစေတွာ မဟတော ဇနကာယဿ သမုဒ္ဓရဏာယ သဗ္ဗညုတံ ပတ္တေန ဓမ္မဒေသနာယ ဩသက္ကိတံ။

‘‘ကိံ နု ခေါ, ဘန္တေ နာဂသေန, တထာဂတေန ဘယာ ဩသက္ကိတံ, ဥဒါဟု အပါကဋတာယ ဩသက္ကိတံ, ဥဒါဟု ဒုဗ္ဗလတာယ ဩသက္ကိတံ, ဥဒါဟု အသဗ္ဗညုတာယ ဩသက္ကိတံ, ကိံ တတ္ထ ကာရဏံ, ဣင်္ဃ မေ တွံ ကာရဏံ ဗြူဟိ ကင်္ခါဝိတရဏာယ။ ယဒိ, ဘန္တေ နာဂသေန, တထာဂတေန စတူဟိ စ အသင္ခ္ယေယျေဟိ ကပ္ပါနံ သတသဟဿေန စ ဧတ္ထန္တရေ သဗ္ဗညုတဉာဏံ ပရိပါစိတံ မဟတော ဇနကာယဿ သမုဒ္ဓရဏာယ, တေန ဟိ ‘သဗ္ဗညုတံ ပတ္တဿ အပ္ပောဿုက္ကတာယ စိတ္တံ နမိ, နော ဓမ္မဒေသနာယာ’တိ ယံ ဝစနံ, တံ မိစ္ဆာ။ ယဒိ သဗ္ဗညုတံ ပတ္တဿ အပ္ပောဿုက္ကတာယ စိတ္တံ နမိ နော ဓမ္မဒေသနာယ, တေန ဟိ ‘တထာဂတေန စတူဟိ စ အသင္ခ္ယေယျေတိ ကပ္ပါနံ သတသဟဿေန စ ဧတ္ထန္တရေ သဗ္ဗညုတဉာဏံ ပရိပါစိတံ မဟတော ဇနကာယဿ သမုဒ္ဓရဏာယာ’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော ဂမ္ဘီရော ဒုန္နိဗ္ဗေဌော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ပရိပါစိတဉ္စ, မဟာရာဇ, တထာဂတေန စတူဟိ စ အသင္ခ္ယေယျေဟိ ကပ္ပါနံ သတသဟဿေန စ ဧတ္ထန္တရေ သဗ္ဗညုတဉာဏံ မဟတော ဇနကာယဿ သမုဒ္ဓရဏာယ, ပတ္တသဗ္ဗညုတဿ စ အပ္ပောဿုက္ကတာယ စိတ္တံ နမိ, နော ဓမ္မဒေသနာယ။ တဉ္စ ပန ဓမ္မဿ ဂမ္ဘီရနိပုဏဒုဒ္ဒသဒုရနုဗောဓသုခုမဒုပ္ပဋိဝေဓတံ သတ္တာနဉ္စ အာလယာရာမတံ သက္ကာယဒိဋ္ဌိယာ ဒဠှသုဂ္ဂဟိတတဉ္စ ဒိသွာ ‘ကိံ နု ခေါ, ကထံ နု ခေါ’တိ အပ္ပောဿုက္ကတာယ စိတ္တံ နမိ, နော ဓမ္မဒေသနာယ, သတ္တာနံ ပဋိဝေဓစိန္တနမာနသံ ယေဝေတံ။

‘‘ယထာ, မဟာရာဇ, ဘိသက္ကော သလ္လကတ္တော အနေကဗျာဓိပရိဣဠိတံ နရံ ဥပသင်္ကမိတွာ ဧဝံ စိန္တယတိ ‘ကေန နု ခေါ ဥပက္ကမေန ကတမေန ဝါ ဘေသဇ္ဇေန ဣမဿ ဗျာဓိ ဝူပသမေယျာ’တိ, ဧဝမေဝ ခေါ, မဟာရာဇ, တထာဂတဿ သဗ္ဗကိလေသဗျာဓိပရိဣဠိတံ ဇနံ ဓမ္မဿ စ ဂမ္ဘီရနိပုဏဒုဒ္ဒသဒုရနုဗောဓသုခုမဒုပ္ပဋိဝေဓတံ ဒိသွာ ‘ကိံ နု ခေါ, ကထံ နု ခေါ’တိ အပ္ပောဿုက္ကတာယ စိတ္တံ နမိ, နော ဓမ္မဒေသနာယ, သတ္တာနံ ပဋိဝေဓစိန္တနမာနသံ ယေဝေတံ။

‘‘ယထာ, မဟာရာဇ, ရညော ခတ္တိယဿ မုဒ္ဓါဝသိတ္တဿ ဒေါဝါရိကအနီကဋ္ဌပါရိသဇ္ဇနေဂမဘဋဗလ [ဗလတ္ထ (သီ။ ဣ။)] အမစ္စရာဇညရာဇူပဇီဝိနေ ဇနေ ဒိသွာ ဧဝံ စိတ္တမုပ္ပဇ္ဇေယျ ‘ကိံ နု ခေါ, ကထံ နု ခေါ ဣမေ သင်္ဂဏှိဿာမီ’တိ, ဧဝမေဝ ခေါ, မဟာရာဇ, တထာဂတဿ ဓမ္မဿ ဂမ္ဘီရနိပုဏဒုဒ္ဒသဒုရနုဗောဓသုခုမဒုပ္ပဋိဝေဓတံ သတ္တာနဉ္စ အာလယာရာမတံ သက္ကာယဒိဋ္ဌိယာ ဒဠှသုဂ္ဂဟိတတဉ္စ ဒိသွာ ‘ကိံ နု ခေါ, ကထံ နု ခေါ’တိ အပ္ပောဿုက္ကတာယ စိတ္တံ နမိ, နော ဓမ္မဒေသနာယ, သတ္တာနံ ပဋိဝေဓစိန္တနမာနသံ ယေဝေတံ။

‘‘အပိ စ, မဟာရာဇ, သဗ္ဗေသံ တထာဂတာနံ ဓမ္မတာ ဧသာ, ယံ ဗြဟ္မုနာ အာယာစိတာ ဓမ္မံ ဒေသေန္တိ။ တတ္ထ ပန ကိံ ကာရဏံ? ယေ တေန သမယေန မနုဿာ တာပသပရိဗ္ဗာဇကာ သမဏဗြာဟ္မဏာ, သဗ္ဗေတေ ဗြဟ္မဒေဝတာ ဟောန္တိ ဗြဟ္မဂရုကာ ဗြဟ္မပရာယဏာ, တသ္မာ တဿ ဗလဝတော ယသဝတော ဉာတဿ ပညာတဿ ဥတ္တရဿ အစ္စုဂ္ဂတဿ ဩနမနေန သဒေဝကော လောကော ဩနမိဿတိ ဩကပ္ပေဿတိ အဓိမုစ္စိဿတီတိ ဣမိနာ စ, မဟာရာဇ, ကာရဏေန တထာဂတာ ဗြဟ္မုနာ အာယာစိတာ ဓမ္မံ ဒေသေန္တိ။

‘‘ယထာ, မဟာရာဇ, ကောစိ ရာဇာ ဝါ ရာဇမဟာမတ္တော ဝါ ယဿ ဩနမတိ အပစိတိံ ကရောတိ, ဗလဝတရဿ တဿ ဩနမနေန အဝသေသာ ဇနတာ ဩနမတိ အပစိတိံ ကရောတိ, ဧဝမေဝ ခေါ, မဟာရာဇ, ဗြဟ္မေ ဩနမိတေ တထာဂတာနံ သဒေဝကော လောကော ဩနမိဿတိ, ပူဇိတပူဇကော မဟာရာဇ, လောကော, တသ္မာ သော ဗြဟ္မာ သဗ္ဗေသံ တထာဂတာနံ အာယာစတိ ဓမ္မဒေသနာယ, တေန စ ကာရဏေန တထာဂတာ ဗြဟ္မုနာ အာယာစိတာ ဓမ္မံ ဒေသေန္တီ’’တိ။ ‘‘သာဓု, ဘန္တေ နာဂသေန, သုနိဗ္ဗေဌိတော ပဉ္ဟော, အတိဘဒြကံ ဝေယျာကရဏံ, ဧဝမေတံ တထာ သမ္ပဋိစ္ဆာမီ’’တိ။

ဓမ္မဒေသနာယ အပ္ပောဿုက္ကပဉ္ဟော ဒသမော။

၁၁။ အာစရိယာနာစရိယပဉ္ဟော

၁၁။ ‘‘ဘန္တေ, နာဂသေန, ဘာသိတမ္ပေတံ ဘဂဝတာ –

‘‘‘န မေ အာစရိယော အတ္ထိ၊ သဒိသော မေ န ဝိဇ္ဇတိ။

သဒေဝကသ္မိံ လောကသ္မိံ၊ နတ္ထိ မေ ပဋိပုဂ္ဂလော’တိ [မဟာဝ။ ၁၁]။

‘‘ပုန စ ဘဏိတံ ‘ဣတိ ခေါ, ဘိက္ခဝေ, အာဠာရော ကာလာမော အာစရိယော မေ သမာနော အန္တေဝါသိံ မံ သမာနံ အတ္တနာ သမသမံ ဌပေသိ, ဥဠာရာယ စ မံ ပူဇာယ ပူဇေသီ’တိ။ ယဒိ, ဘန္တေ နာဂသေန, တထာဂတေန ဘဏိတံ ‘န မေ အာစရိယော အတ္ထိ, သဒိသော မေ န ဝိဇ္ဇတိ။ သဒေဝကသ္မိံ လောကသ္မိံ, နတ္ထိ မေ ပဋိပုဂ္ဂလော’တိ, တေန ဟိ ‘ဣတိ ခေါ, ဘိက္ခဝေ, အာဠာရော ကာလာမော အာစရိယော မေ သမာနော အန္တေဝါသိံ မံ သမာနံ အတ္တနာ သမသမံ ဌပေသီ’တိ ယံ ဝစနံ, တံ မိစ္ဆာ။ ယဒိ တထာဂတေန ဘဏိတံ ‘ဣတိ ခေါ, ဘိက္ခဝေ, အာဠာရော ကာလာမော အာစရိယော မေ သမာနော အန္တေဝါသိံ မံ သမာနံ အတ္တနာ သမသမံ ဌပေသီ’တိ, တေန ဟိ ‘န မေ အာစရိယော အတ္ထိ, သဒိသော မေ န ဝိဇ္ဇတိ။ သဒေဝကသ္မိံ လောကသ္မိံ, နတ္ထိ မေ ပဋိပုဂ္ဂလော’တိ တမ္ပိ ဝစနံ မိစ္ဆာ။ အယမ္ပိ ဥဘတော ကောဋိကော ပဉ္ဟော တဝါနုပ္ပတ္တော, သော တယာ နိဗ္ဗာဟိတဗ္ဗော’’တိ။

‘‘ဘာသိတမ္ပေတံ , မဟာရာဇ, တထာဂတေန ‘န မေ အာစရိယော အတ္ထိ, သဒိသော မေ န ဝိဇ္ဇတိ။ သဒေဝကသ္မိံ လောကသ္မိံ, နတ္ထိ မေ ပဋိပုဂ္ဂလော’တိ, ဘဏိတဉ္စ ‘ဣတိ ခေါ, ဘိက္ခဝေ, အာဠာရော ကာလာမော အာစရိယော မေ သမာနော အန္တေဝါသိံ မံ သမာနံ အတ္တနာ သမသမံ ဌပေသိ, ဥဠာရာယ စ မံ ပူဇာယ ပူဇေသီ’တိ။

‘‘တဉ္စ ပန ဝစနံ ပုဗ္ဗေဝ သမ္ဗောဓါ အနဘိသမ္ဗုဒ္ဓဿ ဗောဓိသတ္တဿေဝ သတော အာစရိယဘာဝံ သန္ဓာယ ဘာသိတံ။

‘ပဉ္စိမေ, မဟာရာဇ, ပုဗ္ဗေဝ သမ္ဗောဓါ အနဘိသမ္ဗုဒ္ဓဿ ဗောဓိသတ္တဿ သတော အာစရိယာ, ယေဟိ အနုသိဋ္ဌော ဗောဓိသတ္တော တတ္ထ တတ္ထ ဒိဝသံ ဝီတိနာမေသိ။ ကတမေ ပဉ္စ? ယေ တေ, မဟာရာဇ, အဋ္ဌ ဗြာဟ္မဏာ ဇာတမတ္တေ ဗောဓိသတ္တေ လက္ခဏာနိ ပရိဂ္ဂဏ္ဟိံသု, သေယျထီဒံ, ရာမော ဓဇော လက္ခဏော မန္တီ ယညော သုယာမော သုဘောဇော သုဒတ္တောတိ။ တေ တဿ သောတ္ထိံ ပဝေဒယိတွာ ရက္ခာကမ္မံ အကံသု, တေ စ ပဌမံ အာစရိယာ။

‘‘ပုန စပရံ, မဟာရာဇ, ဗောဓိသတ္တဿ ပိတာ သုဒ္ဓေါဒနော ရာဇာ ယံ တေန သမယေန အဘိဇာတံ ဥဒိစ္စဇာတိမန္တံ ပဒကံ ဝေယျာကရဏံ ဆဠင်္ဂဝန္တံ သဗ္ဗမိတ္တံ နာမ ဗြာဟ္မဏံ ဥပနေတွာ သောဝဏ္ဏေန ဘိင်္ဂါရေန [ဘိင်္ကာရေန (သီ။ ဣ။)] ဥဒကံ ဩဏောဇေတွာ ‘ဣမံ ကုမာရံ သိက္ခာပေဟီ’တိ အဒါသိ, အယံ ဒုတိယော အာစရိယော။

‘‘ပုန စပရံ, မဟာရာဇ, ယာ သာ ဒေဝတာ ဗောဓိသတ္တံ သံဝေဇေသီ, ယဿာ ဝစနံ သုတွာ ဗောဓိသတ္တော သံဝိဂ္ဂေါ ဥဗ္ဗိဂ္ဂေါ တသ္မိံ ယေဝ ခဏေ နေက္ခမ္မံ နိက္ခမိတွာ ပဗ္ဗဇိ, အယံ တတိယော အာစရိယော။

‘‘ပုန စပရံ, မဟာရာဇ, အာဠာရော ကာလာမော အာကိဉ္စညာယတနဿ ပရိကမ္မံ အာစိက္ခိ, အယံ စတုတ္ထော အာစရိယော။

‘‘ပုန စပရံ, မဟာရာဇ, ဥဒကော ရာမပုတ္တော နေဝသညာနာသညာယတနဿ ပရိကမ္မံ အာစိက္ခိ [အာစိက္ခတိ (က။)], အယံ ပဉ္စမော အာစရိယော။ ဣမေ ခေါ, မဟာရာဇ, ပုဗ္ဗေဝ သမ္ဗောဓါ အနဘိသမ္ဗုဒ္ဓဿ ဗောဓိသတ္တဿ သတော ပဉ္စ အာစရိယာ။ တေ စ ပန အာစရိယာ လောကိယေ ဓမ္မေ။ ဣမသ္မိဉ္စ ပန, မဟာရာဇ, လောကုတ္တရေ ဓမ္မေ သဗ္ဗညုတဉာဏပ္ပဋိဝေဓါယ နတ္ထိ တထာဂတဿ အနုတ္တရော အနုသာသကော, သယမ္ဘူ , မဟာရာဇ, တထာဂတော အနာစရိယကော, တသ္မာ ကာရဏာ တထာဂတေန ဘဏိတံ ‘န မေ အာစရိယော အတ္ထိ, သဒိသော မေ န ဝိဇ္ဇတိ။ သဒေဝကသ္မိံ လောကသ္မိံ, နတ္ထိ မေ ပဋိပုဂ္ဂလော’တိ။ ‘‘သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ’’တိ။

အာစရိယာနာစရိယပဉ္ဟော ဧကာဒသမော။

သန္ထဝဝဂ္ဂေါ ပဉ္စမော။

ဣမသ္မိံ ဝဂ္ဂေ ဧကာဒသ ပဉ္ဟော။

မေဏ္ဍကပဉ္ဟော နိဋ္ဌိတော။

၁။ မဟာဝဂ္ဂ

၁။ ပညတ္တိပဥှ

၁။ အထ ခေါ မိလိန္ဒော ရာဇာ ယေနာယသ္မာ နာဂသေနော တေနုပသင်္ကမိ, ဥပသင်္ကမိတွာ အာယသ္မတာ နာဂသေနေန သဒ္ဓိံ သမ္မောဒိ, သမ္မောဒနီယံ ကထံ သာရဏီယံ ဝီတိသာရေတွာ ဧကမန္တံ နိသီဒိ။ အာယသ္မာပိ ခေါ နာဂသေနော ပဋိသမ္မောဒနီယေနေဝ [ပဋိသမ္မောဒိ, တေနေဝ (သီ။)] မိလိန္ဒဿ ရညော စိတ္တံ အာရာဓေသိ။ အထ ခေါ မိလိန္ဒော ရာဇာ အာယသ္မန္တံ နာဂသေနံ ဧတဒဝေါစ ‘‘ကထံ ဘဒန္တော ဉာယတိ, ကိန္နာမောသိ ဘန္တေ’’တိ? ‘‘နာဂသေနော’’တိ ခေါ အဟံ, မဟာရာဇ, ဉာယာမိ, ‘‘နာဂသေနော’’တိ ခေါ မံ, မဟာရာဇ, သဗြဟ္မစာရီ သမုဒါစရန္တိ, အပိ စ မာတာပိတရော နာမံ ကရောန္တိ ‘‘နာဂသေနော’’တိ ဝါ ‘‘သူရသေနော’’တိ ဝါ ‘‘ဝီရသေနော’’တိ ဝါ ‘‘သီဟသေနော’’တိ ဝါ, အပိ စ ခေါ, မဟာရာဇ, သင်္ခါ သမညာ ပညတ္တိ ဝေါဟာရော နာမမတ္တံ ယဒိဒံ နာဂသေနောတိ, န ဟေတ္ထ ပုဂ္ဂလော ဥပလဗ္ဘတီတိ။

အထ ခေါ မိလိန္ဒော ရာဇာ ဧဝမာဟ ‘‘သုဏန္တု မေ ဘောန္တော ပဉ္စသတာ ယောနကာ အသီတိသဟဿာ စ ဘိက္ခူ, အယံ နာဂသေနော ဧဝမာဟ ‘န ဟေတ္ထ ပုဂ္ဂလော ဥပလဗ္ဘတီ’တိ, ကလ္လံ နု ခေါ တဒဘိနန္ဒိတု’’န္တိ။ အထ ခေါ မိလိန္ဒော ရာဇာ အာယသ္မန္တံ နာဂသေနံ ဧတဒဝေါစ ‘‘သစေ, ဘန္တေ နာဂသေန, ပုဂ္ဂလော နူပလဗ္ဘတိ, ကော စရဟိ တုမှာကံ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရံ ဒေတိ, ကော တံ ပရိဘုဉ္ဇတိ, ကော သီလံ ရက္ခတိ, ကော ဘာဝနမနုယုဉ္ဇတိ, ကော မဂ္ဂဖလနိဗ္ဗာနာနိ သစ္ဆိကရောတိ, ကော ပါဏံ ဟနတိ, ကော အဒိန္နံ အာဒိယတိ, ကော ကာမေသုမိစ္ဆာစာရံ စရတိ, ကော မုသာ ဘဏတိ, ကော မဇ္ဇံ ပိဝတိ, ကော ပဉ္စာနန္တရိယကမ္မံ ကရောတိ, တသ္မာ နတ္ထိ ကုသလံ, နတ္ထိ အကုသလံ, နတ္ထိ ကုသလာကုသလာနံ ကမ္မာနံ ကတ္တာ ဝါ ကာရေတာ ဝါ, နတ္ထိ သုကတဒုက္ကဋာနံ ကမ္မာနံ ဖလံ ဝိပါကော, သစေ , ဘန္တေ နာဂသေန, ယော တုမှေ မာရေတိ, နတ္ထိ တဿာပိ ပါဏာတိပါတော, တုမှာကမ္ပိ, ဘန္တေ နာဂသေန, နတ္ထိ အာစရိယော, နတ္ထိ ဥပဇ္ဈာယော, နတ္ထိ ဥပသမ္ပဒါ။ ‘နာဂသေနောတိ မံ, မဟာရာဇ, သဗြဟ္မစာရီ သမုဒါစရန္တီ’တိ ယံ ဝဒေသိ, ‘ကတမော ဧတ္ထ နာဂသေနော ? ကိန္နု ခေါ, ဘန္တေ, ကေသာ နာဂသေနော’’တိ? ‘‘န ဟိ မဟာရာဇာ’’တိ။ ‘‘လောမာ နာဂသေနော’’တိ? ‘‘န ဟိ မဟာရာဇာ’’တိ။ ‘‘နခါ။ပေ။။ ဒန္တာ။ပေ။။ တစော။ပေ။။ မံသံ။ပေ။။ နှာရု။ပေ။။ အဋ္ဌိ။ပေ။။ အဋ္ဌိမိဉ္ဇံ။ပေ။။ ဝက္ကံ။ပေ။။ ဟဒယံ။ပေ။။ ယကနံ။ပေ။။ ကိလောမကံ။ပေ။။ ပိဟကံ။ပေ။။ ပပ္ဖာသံ။ပေ။။ အန္တံ။ပေ။။ အန္တဂုဏံ။ပေ။။ ဥဒရိယံ။ပေ။။ ကရီသံ။ပေ။။ ပိတ္တံ။ပေ။။ သေမှံ။ပေ။။ ပုဗ္ဗော။ပေ။။ လောဟိတံ။ပေ။။ သေဒေါ။ပေ။။ မေဒေါ။ပေ။။ အဿု။ပေ။။ ဝသာ။ပေ။။ ခေဠော။ပေ။။ သိင်္ဃာဏိကာ။ပေ။။ လသိကာ။ပေ။။ မုတ္တံ။ပေ။။ မတ္ထကေ မတ္ထလုင်္ဂံ နာဂသေနော’’တိ? ‘‘န ဟိမဟာရာဇာ’’တိ။ ‘‘ကိံ နု ခေါ, ဘန္တေ, ရူပံ နာဂသေနော’’တိ? ‘‘နဟိ မဟာရာဇာ’’တိ။ ‘‘ဝေဒနာ နာဂသေနော’’တိ?‘‘န ဟိ မဟာရာဇာ’’တိ။ ‘‘သညာ နာဂသေနော’’တိ? ‘‘န ဟိ မဟာရာဇာ’’တိ။ ‘‘သင်္ခါရာ နာဂသေနော’’တိ? ‘‘န ဟိ မဟာရာဇာ’’တိ။ ‘‘ဝိညာဏံ နာဂသေနော’’တိ? ‘‘န ဟိ မဟာရာဇာ’’တိ။ ‘‘ကိံ ပန, ဘန္တေ, ရူပဝေဒနာသညာသင်္ခါရဝိညာဏံ နာဂသေနော’’တိ? ‘‘န ဟိ မဟာရာဇာ’’တိ။ ‘‘ကိံ ပန, ဘန္တေ, အညတြ ရူပဝေဒနာသညာသင်္ခါရဝိညာဏံ နာဂသေနော’’တိ? ‘‘န ဟိ မဟာရာဇာ’’တိ။ ‘‘တမဟံ ဘန္တေ, ပုစ္ဆန္တော ပုစ္ဆန္တော န ပဿာမိ နာဂသေနံ။ နာဂသေနသဒ္ဒေါ ယေဝ နု ခေါ, ဘန္တေ, နာဂသေနော’’တိ? ‘‘န ဟိ မဟာရာဇာ’’တိ။ ‘‘ကော ပနေတ္ထ နာဂသေနော, အလိကံ တွံ, ဘန္တေ, ဘာသသိ မုသာဝါဒံ, နတ္ထိ နာဂသေနော’’တိ။

အထ ခေါ အာယသ္မာ နာဂသေနော မိလိန္ဒံ ရာဇာနံ ဧတဒဝေါစ ‘‘တွံ ခေါသိ, မဟာရာဇ, ခတ္တိယသုခုမာလော အစ္စန္တသုခုမာလော, တဿ တေ, မဟာရာဇ, မဇ္ဈန္ဟိကသမယံ တတ္တာယ ဘူမိယာ ဥဏှာယ ဝါလိကာယ ခရာယ သက္ခရကထလိကာယ [ခရာ သက္ခရကဌလဝါလိကာ (သီ။ ဣ။)] မဒ္ဒိတွာ ပါဒေနာဂစ္ဆန္တဿ ပါဒါ ရုဇ္ဇန္တိ, ကာယော ကိလမတိ, စိတ္တံ ဥပဟညတိ, ဒုက္ခသဟဂတံ ကာယဝိညာဏံ ဥပ္ပဇ္ဇတိ, ကိံ နု ခေါ တွံ ပါဒေနာဂတောသိ, ဥဒါဟု ဝါဟနေနာ’’တိ? ‘‘နာဟံ, ဘန္တေ, ပါဒေနာဂစ္ဆာမိ, ရထေနာဟံ အာဂတောသ္မီ’’တိ။ ‘‘သစေ, တွံ မဟာရာဇ, ရထေနာဂတောသိ, ရထံ မေ အာရောစေဟိ, ကိံ နု ခေါ, မဟာရာဇ, ဤသာ ရထော’’တိ? ‘‘န ဟိ ဘန္တေ’’တိ။ ‘‘အက္ခော ရထော’’တိ? ‘‘န ဟိ ဘန္တေ’’တိ။ ‘‘စက္ကာနိ ရထော’’တိ? ‘‘န ဟိ ဘန္တေ’’တိ။ ‘‘ရထပဉ္ဇရံ ရထော’’တိ? ‘‘န ဟိ ဘန္တေ’’တိ။ ‘‘ရထဒဏ္ဍကော ရထော’’တိ? ‘‘န ဟိ ဘန္တေ’’တိ။ ‘‘ယုဂံ ရထော’’တိ? ‘‘န ဟိ ဘန္တေ’’တိ။ ‘‘ရသ္မိယော ရထော’’တိ? ‘‘န ဟိ ဘန္တေ’’တိ။ ‘‘ပတောဒလဋ္ဌိ ရထော’’တိ? ‘‘န ဟိ ဘန္တေ’’တိ။ ‘‘ကိံ နု ခေါ, မဟာရာဇ, ဤသာအက္ခစက္ကရထပဉ္ဇရရထဒဏ္ဍယုဂရသ္မိပတောဒါ ရထော’’တိ? ‘‘န ဟိ ဘန္တေ’’တိ။ ‘‘ကိံ ပန, မဟာရာဇ , အညတြ ဤသာအက္ခစက္ကရထပဉ္ဇရရထဒဏ္ဍယုဂရသ္မိပတောဒါ ရထော’’တိ? ‘‘န ဟိ ဘန္တေ’’တိ။ ‘‘တမဟံ, မဟာရာဇ, ပုစ္ဆန္တော ပုစ္ဆန္တော န ပဿာမိ ရထံ။ ရထသဒ္ဒေါယေဝ နု ခေါ, မဟာရာဇ, ရထော’’တိ? ‘‘န ဟိ ဘန္တေ’’တိ။ ‘‘ကော ပနေတ္ထ ရထော, အလိကံ, တွံ မဟာရာဇ, ဘာသသိ မုသာဝါဒံ, နတ္ထိ ရထော, တွံသိ, မဟာရာဇ, သကလဇမ္ဗုဒီပေ အဂ္ဂရာဇာ, ကဿ ပန တွံ ဘာယိတွာ မုသာဝါဒံ ဘာသသိ, သုဏန္တု မေ ဘောန္တော ပဉ္စသတာ ယောနကာ အသီတိသဟဿာ စ ဘိက္ခူ, အယံ မိလိန္ဒော ရာဇာ ဧဝမာဟ ‘ရထေနာဟံ အာဂတောသ္မီ’တိ, သစေ တွံ, မဟာရာဇ, ရထေနာဂတော‘သိ, ရထံ မေ အာရောစေဟီ’တိ ဝုတ္တော သမာနော ရထံ န သမ္ပာဒေတိ, ကလ္လံ နု ခေါ တဒဘိနန္ဒိတု’’န္တိ။ ဧဝံ ဝုတ္တေ ပဉ္စသတာ ယောနကာ အာယသ္မတော နာဂသေနဿ သာဓုကာရံ ဒတွာ မိလိန္ဒံ ရာဇာနံ ဧတဒဝေါစုံ ‘‘ဣဒါနိ ခေါ တွံ, မဟာရာဇ, သက္ကောန္တော ဘာသဿူ’’တိ။

အထ ခေါ မိလိန္ဒော ရာဇာ အာယသ္မန္တံ နာဂသေနံ ဧတဒဝေါစ ‘‘နာဟံ, ဘန္တေ နာဂသေန, မုသာ ဘဏာမိ, ဤသဉ္စ ပဋိစ္စ အက္ခဉ္စ ပဋိစ္စ စက္ကာနိ စ ပဋိစ္စ ရထပဉ္ဇရဉ္စ ပဋိစ္စ ရထဒဏ္ဍကဉ္စ ပဋိစ္စ ‘ရထော’တိ သင်္ခါ သမညာ ပညတ္တိ ဝေါဟာရော နာမမတ္တံ ပဝတ္တတီ’’တိ။

‘‘သာဓု ခေါ, တွံ မဟာရာဇ, ရထံ ဇာနာသိ, ဧဝမေဝ ခေါ, မဟာရာဇ, မယှမ္ပိ ကေသေ စ ပဋိစ္စ လောမေ စ ပဋိစ္စ။ပေ။။ မတ္ထကေ မတ္ထလုင်္ဂဉ္စ ပဋိစ္စ ရူပဉ္စ ပဋိစ္စ ဝေဒနဉ္စ ပဋိစ္စ သညဉ္စ ပဋိစ္စ သင်္ခါရေ စ ပဋိစ္စ ဝိညာဏဉ္စ ပဋိစ္စ ‘နာဂသေနော’တိ သင်္ခါ သမညာ ပညတ္တိ ဝေါဟာရော နာမမတ္တံ ပဝတ္တတိ, ပရမတ္ထတော ပနေတ္ထ ပုဂ္ဂလော နူပလဗ္ဘတိ။ ဘာသိတမ္ပေတံ, မဟာရာဇ, ဝဇိရာယ ဘိက္ခုနိယာ ဘဂဝတော သမ္မုခါ –

‘‘‘ယထာ ဟိ အင်္ဂသမ္ဘာရာ၊ ဟောတိ သဒ္ဒေါ ရထော ဣတိ။

ဧဝံ ခန္ဓေသု သန္တေသု၊ ဟောတိ ‘‘သတ္တော’’တိ သမ္မုတီ’’’တိ [ပဿ သံ။ နိ။ ၁။၁၇၁]။

‘‘အစ္ဆရိယံ, ဘန္တေ နာဂသေန, အဗ္ဘုတံ, ဘန္တေ နာဂသေန, အတိစိတြာနိ ပဉ္ဟပဋိဘာနာနိ ဝိသဇ္ဇိတာနိ, ယဒိ ဗုဒ္ဓေါ တိဋ္ဌေယျ သာဓုကာရံ ဒဒေယျ, သာဓု သာဓု နာဂသေန, အတိစိတြာနိ ပဉ္ဟပဋိဘာနာနိ ဝိသဇ္ဇိတာနီ’’တိ။

ပညတ္တိပဉ္ဟော ပဌမော။

၂။ ဝဿဂဏနပဉ္ဟော

၂။ ‘‘ကတိဝဿောသိ တွံ, ဘန္တေ နာဂသေနာ’’တိ? ‘‘သတ္တဝဿောဟံ, မဟာရာဇာ’’တိ။ ‘‘ကေ တေ, ဘန္တေ, သတ္တ, တွံ ဝါ သတ္တ, ဂဏနာ ဝါ သတ္တာ’’တိ?

တေန ခေါ ပန သမယေန မိလိန္ဒဿ ရညော သဗ္ဗာဘရဏပဋိမဏ္ဍိတဿ အလင်္ကတပဋိယတ္တဿ ပထဝိယံ ဆာယာ ဒိဿတိ, ဥဒကမဏိကေ စ ဆာယာ ဒိဿတိ။ အထ ခေါ အာယသ္မာ နာဂသေနော မိလိန္ဒံ ရာဇာနံ ဧတဒဝေါစ ‘‘အယံ တေ, မဟာရာဇ, ဆာယာ ပထဝိယံ ဥဒကမဏိကေ စ ဒိဿတိ, ကိံ ပန, မဟာရာဇ, တွံ ဝါ ရာဇာ, ဆာယာ ဝါ ရာဇာ’’တိ? ‘‘အဟံ, ဘန္တေ နာဂသေန, ရာဇာ, နာယံ ဆာယာ ရာဇာ, မံ ပန နိဿာယ ဆာယာ ပဝတ္တတီ’’တိ။ ‘‘ဧဝမေဝ ခေါ, မဟာရာဇ, ဝဿာနံ ဂဏနာ သတ္တ, န ပနာဟံ သတ္တ, မံ ပန နိဿာယ သတ္တ ပဝတ္တတိ, ဆာယူပမံ မဟာရာဇာ’’တိ။ ‘‘အစ္ဆရိယံ, ဘန္တေ နာဂသေန, အဗ္ဘုတံ, ဘန္တေ နာဂသေန, အတိစိတြာနိ ပဉ္ဟပဋိဘာနာနိ ဝိသဇ္ဇိတာနီ’’တိ။

ဝဿဂဏနပဉ္ဟော ဒုတိယော။

၃။ ဝီမံသနပဉ္ဟော

၃။ ရာဇာ အာဟ ‘‘ဘန္တေ နာဂသေန, သလ္လပိဿသိ မယာ သဒ္ဓိ’’န္တိ? ‘‘သစေ, တွံ မဟာရာဇ, ပဏ္ဍိတဝါဒံ [ပဏ္ဍိတဝါဒါ (သီ။ ဣ။)] သလ္လပိဿသိ သလ္လပိဿာမိ, သစေ ပန ရာဇဝါဒံ သလ္လပိဿသိ န သလ္လပိဿာမီ’’တိ။ ‘‘ကထံ, ဘန္တေ နာဂသေန, ပဏ္ဍိတာ သလ္လပန္တီ’’တိ? ‘‘ပဏ္ဍိတာနံ ခေါ, မဟာရာဇ, သလ္လာပေ အာဝေဌနမ္ပိ ကယိရတိ, နိဗ္ဗေဌနမ္ပိ ကယိရတိ, နိဂ္ဂဟောပိ ကယိရတိ, ပဋိကမ္မမ္ပိ ကယိရတိ, ဝိဿာသောပိ [ဝိသေသောပိ (သီ။ ဣ။)] ကယိရတိ, ပဋိဝိဿာသောပိ ကယိရတိ, န စ တေန ပဏ္ဍိတာ ကုပ္ပန္တိ, ဧဝံ ခေါ, မဟာရာဇ, ပဏ္ဍိတာ သလ္လပန္တီ’’တိ။ ‘‘ကထံ ပန, ဘန္တေ, ရာဇာနော သလ္လပန္တီ’’တိ? ‘‘ရာဇာနော ခေါ, မဟာရာဇ, သလ္လာပေ ဧကံ ဝတ္ထုံ ပဋိဇာနန္တိ, ယော တံ ဝတ္ထုံ ဝိလောမေတိ, တဿ ဒဏ္ဍံ အာဏာပေန္တိ ‘ဣမဿ ဒဏ္ဍံ ပဏေထာ’တိ, ဧဝံ ခေါ, မဟာရာဇ, ရာဇာနော သလ္လပန္တီ’’တိ။ ‘‘ပဏ္ဍိတဝါဒါဟံ, ဘန္တေ, သလ္လပိဿာမိ, နော ရာဇဝါဒံ, ဝိဿဋ္ဌော ဘဒန္တော သလ္လပတု ယထာ ဘိက္ခုနာ ဝါ သာမဏေရေန ဝါ ဥပါသကေန ဝါ အာရာမိကေန ဝါ သဒ္ဓိံ သလ္လပတိ , ဧဝံ ဝိဿဋ္ဌော ဘဒန္တော သလ္လပတု မာ ဘာယတူ’’တိ။ ‘‘သုဋ္ဌု မဟာရာဇာ’’တိ ထေရော အဗ္ဘာနုမောဒိ။

ရာဇာ အာဟ ‘‘ဘန္တေ နာဂသေန, ပုစ္ဆိဿာမီ’’တိ။ ‘‘ပုစ္ဆ မဟာရာဇာ’’တိ။ ‘‘ပုစ္ဆိတောသိ မေ ဘန္တေ’’တိ။ ‘‘ဝိသဇ္ဇိတံ မဟာရာဇာ’’တိ။ ‘‘ကိံ ပန, ဘန္တေ, တယာ ဝိသဇ္ဇိတ’’န္တိ? ‘‘ကိံ ပန, မဟာရာဇ, တယာ ပုစ္ဆိတ’’န္တိ။

ဝီမံသနပဉ္ဟော တတိယော။

၄။ အနန္တကာယပဉ္ဟော

၄။ အထ ခေါ မိလိန္ဒဿ ရညော ဧတဒဟောသိ ‘‘ပဏ္ဍိတော ခေါ အယံ ဘိက္ခု ပဋိဗလော မယာ သဒ္ဓိံ သလ္လပိတုံ, ဗဟုကာနိ စ မေ ဌာနာနိ ပုစ္ဆိတဗ္ဗာနိ ဘဝိဿန္တိ, ယာဝ အပုစ္ဆိတာနိ ယေဝ တာနိ ဌာနာနိ ဘဝိဿန္တိ, အထ သူရိယော အတ္ထံ ဂမိဿတိ, ယံနူနာဟံ သွေ အန္တေပုရေ သလ္လပေယျ’’န္တိ။ အထ ခေါ ရာဇာ ဒေဝမန္တိယံ ဧတဒဝေါစ ‘‘တေန ဟိ, တွံ ဒေဝမန္တိယ, ဘဒန္တဿ အာရောစေယျာသိ ‘သွေ အန္တေပုရေ ရညာ သဒ္ဓိံ သလ္လာပေါ ဘဝိဿတီ’’’တိ။ ဣဒံ ဝတွာ မိလိန္ဒော ရာဇာ ဥဋ္ဌာယာသနာ ထေရံ နာဂသေနံ အာပုစ္ဆိတွာ ရထံ အဘိရူဟိတွာ ‘‘နာဂသေနော နာဂသေနော’’တိ သဇ္ဈာယံ ကရောန္တော ပက္ကာမိ။

အထ ခေါ ဒေဝမန္တိယော အာယသ္မန္တံ နာဂသေနံ ဧတဒဝေါစ ‘‘ရာဇာ, ဘန္တေ, မိလိန္ဒော ဧဝမာဟ ‘သွေ အန္တေပုရေ ရညာ သဒ္ဓိံ သလ္လာပေါ ဘဝိဿတီ’’’တိ။ ‘‘သုဋ္ဌူ’’တိ ထေရော အဗ္ဘာနုမောဒိ။ အထ ခေါ တဿာ ရတ္တိယာ အစ္စယေန ဒေဝမန္တိယော စ အနန္တကာယော စ မင္ကုရော စ သဗ္ဗဒိန္နော စ ယေန မိလိန္ဒော ရာဇာ တေနုပသင်္ကမိံသု, ဥပသင်္ကမိတွာ ရာဇာနံ မိလိန္ဒံ ဧတဒဝေါစုံ ‘‘အာဂစ္ဆတု, မဟာရာဇ, ဘဒန္တော နာဂသေနော’’တိ ? ‘‘အာမ အာဂစ္ဆတူ’’တိ။ ‘‘ကိတ္တကေဟိ ဘိက္ခူဟိ သဒ္ဓိံ အာဂစ္ဆတူ’’တိ? ‘‘ယတ္တကေ ဘိက္ခူ ဣစ္ဆတိ, တတ္တကေဟိ ဘိက္ခူဟိ သဒ္ဓိံ အာဂစ္ဆတူ’’တိ။

အထ ခေါ သဗ္ဗဒိန္နော အာဟ ‘‘အာဂစ္ဆတု, မဟာရာဇ, ဒသဟိ ဘိက္ခူဟိ သဒ္ဓိ’’န္တိ, ဒုတိယမ္ပိ ခေါ ရာဇာ အာဟ ‘‘ယတ္တကေ ဘိက္ခူ ဣစ္ဆတိ, တတ္တကေဟိ ဘိက္ခူဟိ သဒ္ဓိံ အာဂစ္ဆတူ’’တိ ။ ဒုတိယမ္ပိ ခေါ သဗ္ဗဒိန္နော အာဟ ‘‘အာဂစ္ဆတု, မဟာရာဇ, ဒသဟိ ဘိက္ခူဟိ သဒ္ဓိ’’န္တိ။ တတိယမ္ပိ ခေါ ရာဇာ အာဟ ‘‘ယတ္တကေ ဘိက္ခူ ဣစ္ဆတိ, တတ္တကေဟိ ဘိက္ခူဟိ သဒ္ဓိံ အာဂစ္ဆတူ’’တိ။ တတိယမ္ပိ ခေါ သဗ္ဗဒိန္နော အာဟ ‘‘အာဂစ္ဆတု, မဟာရာဇ, ဒသဟိ ဘိက္ခူဟိ သဒ္ဓိ’’န္တိ။ ‘‘သဗ္ဗော ပနာယံ သက္ကာရော ပဋိယာဒိတော, အဟံ ဘဏာမိ ‘ယတ္တကေ ဘိက္ခူ ဣစ္ဆတိ, တတ္တကေဟိ ဘိက္ခူဟိ သဒ္ဓိံ အာဂစ္ဆတူ’တိ။ အယံ, ဘဏေ သဗ္ဗဒိန္နော, အညထာ ဘဏတိ, ကိံ နု မယံ နပ္ပဋိဗလာ ဘိက္ခူနံ ဘောဇနံ ဒါတု’’န္တိ? ဧဝံ ဝုတ္တေ သဗ္ဗဒိန္နော မင္ကု အဟောသိ။

အထ ခေါ ဒေဝမန္တိယော စ အနန္တကာယော စ မင္ကုရော စ ယေနာယသ္မာ နာဂသေနော တေနုပသင်္ကမိံသု, ဥပသင်္ကမိတွာ အာယသ္မန္တံ နာဂသေနံ ဧတဒဝေါစုံ ‘‘ရာဇာ, ဘန္တေ, မိလိန္ဒော ဧဝမာဟ ‘ယတ္တကေ ဘိက္ခူ ဣစ္ဆတိ, တတ္တကေဟိ ဘိက္ခူဟိ သဒ္ဓိံ အာဂစ္ဆတူ’’’တိ။ အထ ခေါ အာယသ္မာ နာဂသေနော ပုဗ္ဗဏှသမယံ နိဝါသေတွာ ပတ္တစီဝရမာဒါယ အသီတိယာ ဘိက္ခုသဟဿေဟိ သဒ္ဓိံ သာဂလံ ပါဝိသိ။

အထ ခေါ အနန္တကာယော အာယသ္မန္တံ နာဂသေနံ နိဿာယ ဂစ္ဆန္တော အာယသ္မန္တံ နာဂသေနံ ဧတဒဝေါစ ‘‘ဘန္တေ နာဂသေန, ယံ ပနေတံ ဗြူသိ ‘နာဂသေနော’တိ, ကတမော ဧတ္ထ, နာဂသေနော’’တိ? ထေရော အာဟ ‘‘ကော ပနေတ္ထ ‘နာဂသေနော’တိ မညသီ’’တိ? ‘‘ယော သော, ဘန္တေ, အဗ္ဘန္တရေ ဝါတော ဇီဝေါ ပဝိသတိ စ နိက္ခမတိ စ, သော ‘နာဂသေနော’တိ မညာမီ’’တိ။ ‘‘ယဒိ ပနေသော ဝါတော နိက္ခမိတွာ နပ္ပဝိသေယျ, ပဝိသိတွာ န နိက္ခမေယျ, ဇီဝေယျ နု ခေါ သော ပုရိသော’’တိ? ‘‘န ဟိ ဘန္တေ’’တိ ။ ‘‘ယေ ပနိမေ သင်္ခဓမကာ သင်္ခံ ဓမေန္တိ, တေသံ ဝါတော ပုန ပဝိသတီ’’တိ? ‘‘န ဟိ ဘန္တေ’’တိ။ ‘‘ယေ ပနိမေ ဝံသဓမကာ ဝံသံ ဓမေန္တိ, တေသံ ဝါတော ပုန ပဝိသတီ’’တိ? ‘‘န ဟိ ဘန္တေ’’တိ။ ‘‘ယေ ပနိမေ သိင်္ဂဓမကာ သိင်္ဂံ ဓမေန္တိ, တေသံ ဝါတော ပုန ပဝိသတီ’’တိ? ‘‘န ဟိ ဘန္တေ’’တိ။ ‘‘အထ ကိဿ ပန တေန န မရန္တီ’’တိ။ ‘‘နာဟံ ပဋိဗလော တယာ ဝါဒိနာ သဒ္ဓိံ သလ္လပိတုံ, သာဓု, ဘန္တေ, အတ္ထံ ဇပ္ပေဟီ’’တိ။ ‘‘နေသော ဇီဝေါ, အဿာသပဿာသာ နာမေတေ ကာယသင်္ခါရာ’’တိ ထေရော အဘိဓမ္မကထံ ကထေသိ။ အထ အနန္တကာယော ဥပါသကတ္တံ ပဋိဝေဒေသီတိ။

အနန္တကာယပဉ္ဟော စတုတ္ထော။

၅။ ပဗ္ဗဇ္ဇပဉ္ဟော

၅။ အထ ခေါ အာယသ္မာ နာဂသေနော ယေန မိလိန္ဒဿ ရညော နိဝေသနံ တေနုပသင်္ကမိ, ဥပသင်္ကမိတွာ ပညတ္တေ အာသနေ နိသီဒိ။ အထ ခေါ မိလိန္ဒော ရာဇာ အာယသ္မန္တံ နာဂသေနံ သပရိသံ ပဏီတေန ခါဒနီယေန ဘောဇနီယေန သဟတ္ထာ သန္တပ္ပေတွာ သမ္ပဝါရေတွာ ဧကမေကံ ဘိက္ခုံ ဧကမေကေန ဒုဿယုဂေန အစ္ဆာဒေတွာ အာယသ္မန္တံ နာဂသေနံ တိစီဝရေန အစ္ဆာဒေတွာ အာယသ္မန္တံ နာဂသေနံ ဧတဒဝေါစ ‘‘ဘန္တေ နာဂသေန ဒသဟိ, ဘိက္ခူဟိ သဒ္ဓိံ ဣဓ နိသီဒထ, အဝသေသာ ဂစ္ဆန္တူ’’တိ။

အထ ခေါ မိလိန္ဒော ရာဇာ အာယသ္မန္တံ နာဂသေနံ ဘုတ္တာဝိံ ဩနီတပတ္တပါဏိံ ဝိဒိတွာ အညတရံ နီစံ အာသနံ ဂဟေတွာ ဧကမန္တံ နိသီဒိ, ဧကမန္တံ နိသိန္နော ခေါ မိလိန္ဒော ရာဇာ အာယသ္မန္တံ နာဂသေနံ ဧတဒဝေါစ ‘‘ဘန္တေ နာဂသေန, ကိမှိ ဟောတိ ကထာသလ္လာပေါ’’တိ? ‘‘အတ္ထေန မယံ, မဟာရာဇ, အတ္ထိကာ, အတ္ထေ ဟောတု ကထာသလ္လာပေါ’’တိ။

ရာဇာ အာဟ ‘‘ကိမတ္ထိယာ, ဘန္တေ နာဂသေန, တုမှာကံ ပဗ္ဗဇ္ဇာ, ကော စ တုမှာကံ ပရမတ္ထော’’တိ။ ထေရော အာဟ ‘‘ကိန္တိ, မဟာရာဇ, ဣဒံ ဒုက္ခံ နိရုဇ္ဈေယျ, အညဉ္စ ဒုက္ခံ န ဥပ္ပဇ္ဇေယျာတိ။ ဧတဒတ္ထာ, မဟာရာဇ, အမှာကံ ပဗ္ဗဇ္ဇာ, အနုပါဒါ ပရိနိဗ္ဗာနံ ခေါ ပန အမှာကံ ပရမတ္ထော’’တိ။

‘‘ကိံ ပန, ဘန္တေ နာဂသေန, သဗ္ဗေ ဧတဒတ္ထာယ ပဗ္ဗဇန္တီ’’တိ? ‘‘န ဟိ, မဟာရာဇ, ကေစိ ဧတဒတ္ထာယ ပဗ္ဗဇန္တိ, ကေစိ ရာဇာဘိနီတာ [ရာဇဘီတိတာ (သီ။)] ပဗ္ဗဇန္တိ, ကေစိ စောရာဘိနီတာ [စောရဘီတိတာ (သီ။)] ပဗ္ဗဇန္တိ, ကေစိ ဣဏဋ္ဋာ ပဗ္ဗဇန္တိ, ကေစိ အာဇီဝိကတ္ထာယ ပဗ္ဗဇန္တိ, ယေ ပန သမ္မာ ပဗ္ဗဇန္တိ, တေ ဧတဒတ္ထာယ ပဗ္ဗဇန္တီ’’တိ။

‘‘တွံ ပန, ဘန္တေ, ဧတဒတ္ထာယ ပဗ္ဗဇိတောသီ’’တိ? ‘‘အဟံ ခေါ, မဟာရာဇ, ဒဟရကော သန္တော ပဗ္ဗဇိတော, န ဇာနာမိ ဣမဿ နာမတ္ထာယ ပဗ္ဗဇာမီတိ, အပိ စ ခေါ မေ ဧဝံ အဟောသိ ‘ပဏ္ဍိတာ ဣမေ သမဏာ သကျပုတ္တိယာ, တေ မံ သိက္ခာပေဿန္တီ’တိ, သွာဟံ တေဟိ သိက္ခာပိတော ဇာနာမိ စ ပဿာမိ စ ‘ဣမဿ နာမတ္ထာယ ပဗ္ဗဇ္ဇာ’’’တိ။

‘‘ကလ္လောသိ , ဘန္တေ နာဂသေနာ’’တိ။

ပဗ္ဗဇ္ဇပဉ္ဟော ပဉ္စမော။

၆။ ပဋိသန္ဓိပဉ္ဟော

၆။ ရာဇာ အာဟ ‘‘ဘန္တေ နာဂသေန, အတ္ထိ ကောစိ မတော န ပဋိသန္ဒဟတီ’’တိ။ ထေရော အာဟ ‘‘ကောစိ ပဋိသန္ဒဟတိ, ကောစိ န ပဋိသန္ဒဟတီ’’တိ။ ‘‘ကော ပဋိသန္ဒဟတိ, ကော န ပဋိသန္ဒဟတီ’’တိ? ‘‘သကိလေသော, မဟာရာဇ, ပဋိသန္ဒဟတိ, နိက္ကိလေသော န ပဋိသန္ဒဟတီ’’တိ။ ‘‘တွံ ပန, ဘန္တေ နာဂသေန, ပဋိသန္ဒဟိဿသီ’’တိ? ‘‘သစေ, မဟာရာဇ, သဥပါဒါနော ဘဝိဿာမိ ပဋိသန္ဒဟိဿာမိ, သစေ အနုပါဒါနော ဘဝိဿာမိ န ပဋိသန္ဒဟိဿာမီ’’တိ။

‘‘ကလ္လောသိ, ဘန္တေ နာဂသေနာ’’တိ။

ပဋိသန္ဓိပဉ္ဟော ဆဋ္ဌော။

၇။ ယောနိသောမနသိကာရပဉ္ဟော

၇။ ရာဇာ အာဟ ‘‘ဘန္တေ နာဂသေန, ယော န ပဋိသန္ဒဟတိ, နနု သော ယောနိသော မနသိကာရေန န ပဋိသန္ဒဟတီ’’တိ? ‘‘ယောနိသော စ မဟာရာဇ, မနသိကာရေန ပညာယ စ အညေဟိ စ ကုသလေဟိ ဓမ္မေဟီ’’တိ။ ‘‘နနု, ဘန္တေ, ယောနိသော မနသိကာရော ယေဝ ပညာ’’တိ? ‘‘န ဟိ, မဟာရာဇ, အညော မနသိကာရော, အညာ ပညာ, ဣမေသံ ခေါ, မဟာရာဇ, အဇေဠကဂေါဏမဟိံသဩဋ္ဌဂဒြဘာနမ္ပိ မနသိကာရော အတ္ထိ, ပညာ ပန တေသံ နတ္ထီ’’တိ။

‘‘ကလ္လောသိ, ဘန္တေ နာဂသေနာ’’တိ။

ယောနိသောမနသိကာရပဉ္ဟော သတ္တမော။

၈။ မနသိကာရလက္ခဏပဉ္ဟော

၈။ ရာဇာ အာဟ ‘‘ကိံလက္ခဏော, ဘန္တေ နာဂသေန, မနသိကာရော, ကိံလက္ခဏာ ပညာ’’တိ? ‘‘ဦဟနလက္ခဏော ခေါ, မဟာရာဇ, မနသိကာရော, ဆေဒနလက္ခဏာ ပညာ’’တိ။

‘‘ကထံ ဦဟနလက္ခဏော မနသိကာရော, ကထံ ဆေဒနလက္ခဏာ ပညာ, ဩပမ္မံ ကရောဟီ’’တိ။ ‘‘ဇာနာသိ, တွံ မဟာရာဇ, ယဝလာဝကေ’’တိ။ ‘‘အာမ , ဘန္တေ, ဇာနာမီ’’တိ ။ ‘‘ကထံ, မဟာရာဇ, ယဝလာဝကာ ယဝံ လုနန္တီ’’တိ? ‘‘ဝါမေန, ဘန္တေ, ဟတ္ထေန ယဝကလာပံ ဂဟေတွာ ဒက္ခိဏေန ဟတ္ထေန ဒါတ္တံ ဂဟေတွာ ဒါတ္တေန ဆိန္ဒန္တီ’’တိ။

‘‘ယထာ, မဟာရာဇ, ယဝလာဝကော ဝါမေန ဟတ္ထေန ယဝကလာပံ ဂဟေတွာ ဒက္ခိဏေန ဟတ္ထေန ဒါတ္တံ ဂဟေတွာ ယဝံ ဆိန္ဒတိ, ဧဝမေဝ ခေါ, မဟာရာဇ, ယောဂါဝစရော မနသိကာရေန မာနသံ ဂဟေတွာ ပညာယ ကိလေသေ ဆိန္ဒတိ, ဧဝံ ခေါ, မဟာရာဇ, ဦဟနလက္ခဏော မနသိကာရော, ဧဝံ ဆေဒနလက္ခဏာ ပညာ’’တိ။

‘‘ကလ္လောသိ, ဘန္တေ နာဂသေနာ’’တိ။

မနသိကာရလက္ခဏပဉ္ဟော အဋ္ဌမော။

၉။ သီလလက္ခဏပဉ္ဟော

၉။ ရာဇာ အာဟ ‘‘ဘန္တေ နာဂသေန, ယံ ပနေတံ ဗြူသိ ‘အညေဟိ စ ကုသလေဟိ ဓမ္မေဟီ’တိ, ကတမေ တေ ကုသလာ ဓမ္မာ’’တိ? ‘‘သီလံ, မဟာရာဇ, သဒ္ဓါ ဝီရိယံ သတိ သမာဓိ, ဣမေ တေ ကုသလာ ဓမ္မာ’’တိ။ ‘‘ကိံလက္ခဏံ, ဘန္တေ, သီလ’’န္တိ? ‘‘ပတိဋ္ဌာနလက္ခဏံ, မဟာရာဇ, သီလံ သဗ္ဗေသံ ကုသလာနံ ဓမ္မာနံ, ဣန္ဒ္ရိယဗလဗောဇ္ဈင်္ဂမဂ္ဂင်္ဂသတိပဋ္ဌာနသမ္မပ္ပဓါနဣဒ္ဓိပါဒဈာနဝိမောက္ခသ- မာဓိသမာပတ္တီနံ သီလံ ပတိဋ္ဌံ, သီလေ ပတိဋ္ဌိတော ခေါ, မဟာရာဇ, ယောဂါဝစရော သီလံ နိဿာယ သီလေ ပတိဋ္ဌာယ ပဉ္စိန္ဒ္ရိယာနိ ဘာဝေတိ သဒ္ဓိန္ဒ္ရိယံ ဝီရိယိန္ဒ္ရိယံ သတိန္ဒ္ရိယံ သမာဓိန္ဒ္ရိယံ ပညိန္ဒ္ရိယန္တိ, သဗ္ဗေ ကုသလာ ဓမ္မာ န ပရိဟာယန္တီ’’တိ။ ‘‘ဩပမ္မံ ကရောဟီ’’တိ။ ‘‘ယထာ, မဟာရာဇ , ယေ ကေစိ ဗီဇဂါမဘူတဂါမာ ဝုဍ္ဎိံ ဝိရူဠှိံ ဝေပုလ္လံ အာပဇ္ဇန္တိ, သဗ္ဗေ တေ ပထဝိံ နိဿာယ ပထဝိယံ ပတိဋ္ဌာယ ဝုဍ္ဎိံ ဝိရူဠှိံ ဝေပုလ္လံ အာပဇ္ဇန္တိ။ ဧဝမေဝ ခေါ, မဟာရာဇ, ယောဂါဝစရော သီလံ နိဿာယ သီလေ ပတိဋ္ဌာယ ပဉ္စိန္ဒ္ရိယာနိ ဘာဝေတိ သဒ္ဓိန္ဒ္ရိယံ ဝီရိယိန္ဒ္ရိယံ သတိန္ဒ္ရိယံ သမာဓိန္ဒ္ရိယံ ပညိန္ဒ္ရိယ’’န္တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, ယေ ကေစိ ဗလကရဏီယာ ကမ္မန္တာ ကယိရန္တိ, သဗ္ဗေ တေ ပထဝိံ နိဿာယ ပထဝိယံ ပတိဋ္ဌာယ ကယိရန္တိ။ ဧဝမေဝ ခေါ, မဟာရာဇ, ယောဂါဝစရော သီလံ နိဿာယ သီလေ ပတိဋ္ဌာယ ပဉ္စိန္ဒ္ရိယာနိ ဘာဝေတိ သဒ္ဓိန္ဒ္ရိယံ ဝီရိယိန္ဒ္ရိယံ သတိန္ဒ္ရိယံ သမာဓိန္ဒ္ရိယံ ပညိန္ဒ္ရိယ’’န္တိ ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, နဂရဝဍ္ဎကီ နဂရံ မာပေတုကာမော ပဌမံ နဂရဋ္ဌာနံ သောဓါပေတွာ ခါဏုကဏ္ဋကံ အပကဍ္ဎာပေတွာ ဘူမိံ သမံ ကာရာပေတွာ တတော အပရဘာဂေ ဝီထိစတုက္ကသိင်္ဃာဋကာဒိပရိစ္ဆေဒေန ဝိဘဇိတွာ နဂရံ မာပေတိ။ ဧဝမေဝ ခေါ, မဟာရာဇ, ယောဂါဝစရော သီလံ နိဿာယ သီလေ ပတိဋ္ဌာယ ပဉ္စိန္ဒ္ရိယာနိ ဘာဝေတိ သဒ္ဓိန္ဒ္ရိယံ ဝီရိယိန္ဒ္ရိယံ သတိန္ဒ္ရိယံ သမာဓိန္ဒ္ရိယံ ပညိန္ဒ္ရိယ’’န္တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, လင်္ဃကော သိပ္ပံ ဒဿေတုကာမော ပထဝိံ ခဏာပေတွာ သက္ခရကထလံ အပကဍ္ဎာပေတွာ ဘူမိံ သမံ ကာရာပေတွာ မုဒုကာယ ဘူမိယာ သိပ္ပံ ဒဿေတိ။ ဧဝမေဝ ခေါ, မဟာရာဇ, ယောဂါဝစရော သီလံ နိဿာယ သီလေ ပတိဋ္ဌာယ ပဉ္စိန္ဒ္ရိယာနိ ဘာဝေတိ သဒ္ဓိန္ဒ္ရိယံ ဝီရိယိန္ဒ္ရိယံ သတိန္ဒ္ရိယံ သမာဓိန္ဒ္ရိယံ ပညိန္ဒ္ရိယန္တိ။ ဘာသိတမ္ပေတံ, မဟာရာဇ, ဘဂဝတာ –

‘‘‘သီလေ ပတိဋ္ဌာယ နရော သပညော၊ စိတ္တံ ပညဉ္စ ဘာဝယံ။

အာတာဣ နိပကော ဘိက္ခု၊ သော ဣမံ ဝိဇဋယေ ဇဋ’န္တိ [ပဿ သံ။ နိ။ ၁။၂၃]။

‘‘‘အယံ ပတိဋ္ဌာ ဓရဏီဝ ပါဏိနံ၊ ဣဒဉ္စ မူလံ ကုသလာဘိဝုဍ္ဎိယာ။

မုခဉ္စိဒံ သဗ္ဗဇိနာနုသာသနေ၊ ယော သီလက္ခန္ဓော ဝရပါတိမောက္ခိယော’’’တိ။

‘‘ကလ္လောသိ, ဘန္တေ နာဂသေနာ’’တိ။

သီလလက္ခဏပဉ္ဟော နဝမော။

၁၀။ သမ္ပသာဒနလက္ခဏသဒ္ဓါပဉ္ဟော

၁၀။ ရာဇာ အာဟ ‘‘ဘန္တေ နာဂသေန, ကိံလက္ခဏာ သဒ္ဓါ’’တိ? ‘‘သမ္ပသာဒနလက္ခဏာ စ, မဟာရာဇ, သဒ္ဓါ, သမ္ပက္ခန္ဒနလက္ခဏာ စာ’’တိ။ ‘‘ကထံ, ဘန္တေ, သမ္ပသာဒနလက္ခဏာ သဒ္ဓါ’’တိ? ‘‘သဒ္ဓါ ခေါ, မဟာရာဇ, ဥပ္ပဇ္ဇမာနာ နီဝရဏေ ဝိက္ခမ္ဘေတိ, ဝိနီဝရဏံ စိတ္တံ ဟောတိ အစ္ဆံ ဝိပ္ပသန္နံ အနာဝိလံ။ ဧဝံ ခေါ, မဟာရာဇ, သမ္ပသာဒနလက္ခဏာ သဒ္ဓါ’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ရာဇာ စက္ကဝတ္တီ စတုရင်္ဂိနိယာ သေနာယ သဒ္ဓိံ အဒ္ဓါနမဂ္ဂပ္ပဋိပန္နော ပရိတ္တံ ဥဒကံ တရေယျ, တံ ဥဒကံ ဟတ္ထီဟိ စ အဿေဟိ စ ရထေဟိ စ ပတ္တီဟိ စ ခုဘိတံ ဘဝေယျ အာဝိလံ လုဠိတံ ကလလီဘူတံ။ ဥတ္တိဏ္ဏော စ ရာဇာ စက္ကဝတ္တီ မနုဿေ အာဏာပေယျ ‘ပါနီယံ, ဘဏေ, အာဟရထ, ပိဝိဿာမီ’တိ, ရညော စ ဥဒကပ္ပသာဒကော မဏိ ဘဝေယျ။ ‘ဧဝံ ဒေဝါ’တိ ခေါ တေ မနုဿာ ရညော စက္ကဝတ္တိဿ ပဋိဿုတွာ တံ ဥဒကပ္ပသာဒကံ မဏိံ ဥဒကေ ပက္ခိပေယျုံ, တသ္မိံ ဥဒကေ ပက္ခိတ္တမတ္တေ သင်္ခသေဝါလပဏကံ ဝိဂစ္ဆေယျ, ကဒ္ဒမော စ သန္နိသီဒေယျ, အစ္ဆံ ဘဝေယျ ဥဒကံ ဝိပ္ပသန္နံ အနာဝိလံ။ တတော ရညော စက္ကဝတ္တိဿ ပါနီယံ ဥပနာမေယျုံ ‘ပိဝတု, ဒေဝ, ပါနီယ’န္တိ။

‘‘ယထာ, မဟာရာဇ, ဥဒကံ, ဧဝံ စိတ္တံ ဒဋ္ဌဗ္ဗံ, ယထာ တေ မနုဿာ, ဧဝံ ယောဂါဝစရော ဒဋ္ဌဗ္ဗော, ယထာ သင်္ခသေဝါလပဏကံ ကဒ္ဒမော စ, ဧဝံ ကိလေသာ ဒဋ္ဌဗ္ဗာ။ ယထာ ဥဒကပ္ပသာဒကော မဏိ, ဧဝံ သဒ္ဓါ ဒဋ္ဌဗ္ဗာ, ယထာ ဥဒကပ္ပသာဒကေ မဏိမှိ ဥဒကေ ပက္ခိတ္တမတ္တေ သင်္ခသေဝါလပဏကံ ဝိဂစ္ဆေယျ, ကဒ္ဒမော စ သန္နိသီဒေယျ, အစ္ဆံ ဘဝေယျ ဥဒကံ ဝိပ္ပသန္နံ အနာဝိလံ, ဧဝမေဝ ခေါ, မဟာရာဇ, သဒ္ဓါ ဥပ္ပဇ္ဇမာနာ နီဝရဏေ ဝိက္ခမ္ဘေတိ, ဝိနီဝရဏံ စိတ္တံ ဟောတိ အစ္ဆံ ဝိပ္ပသန္နံ အနာဝိလံ, ဧဝံ ခေါ, မဟာရာဇ, သမ္ပသာဒနလက္ခဏာ သဒ္ဓါ’’တိ။

‘‘ကလ္လောသိ, ဘန္တေ နာဂသေနာ’’တိ။

သမ္ပသာဒနလက္ခဏသဒ္ဓါပဉ္ဟော ဒသမော။

၁၁။ သမ္ပက္ခန္ဒနလက္ခဏသဒ္ဓါပဉ္ဟော

၁၁။ ‘‘ကထံ , ဘန္တေ, သမ္ပက္ခန္ဒနလက္ခဏာ သဒ္ဓါ’’တိ,? ‘‘ယထာ, မဟာရာဇ, ယောဂါဝစရော အညေသံ စိတ္တံ ဝိမုတ္တံ ပဿိတွာ သောတာပတ္တိဖလေ ဝါ သကဒါဂါမိဖလေ ဝါ အနာဂါမိဖလေ ဝါ အရဟတ္တေ ဝါ သမ္ပက္ခန္ဒတိ ယောဂံ ကရောတိ အပ္ပတ္တဿ ပတ္တိယာ အနဓိဂတဿ အဓိဂမာယ အသစ္ဆိကတဿ သစ္ဆိကိရိယာယ။ ဧဝံ ခေါ, မဟာရာဇ, သမ္ပက္ခန္ဒနလက္ခဏာ သဒ္ဓါ’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ဥပရိပဗ္ဗတေ မဟာမေဃော အဘိပ္ပဝဿေယျ, တံ ဥဒကံ ယထာနိန္နံ ပဝတ္တမာနံ ပဗ္ဗတကန္ဒရပဒရသာခါ ပရိပူရေတွာ နဒိံ ပရိပူရေယျ, သာ ဥဘတော ကူလာနိ သံဝိဿန္ဒန္တီ ဂစ္ဆေယျ, အထ မဟာဇနကာယော အာဂန္တွာ တဿာ နဒိယာ ဥတ္တာနတံ ဝါ ဂမ္ဘီရတံ ဝါ အဇာနန္တော ဘီတော ဝိတ္ထတော တီရေ တိဋ္ဌေယျ, အထညတရော ပုရိသော အာဂန္တွာ အတ္တနော ထာမဉ္စ ဗလဉ္စ သမ္ပဿန္တော ဂါဠှံ ကစ္ဆံ ဗန္ဓိတွာ ပက္ခန္ဒိတွာ တရေယျ, တံ တိဏ္ဏံ ပဿိတွာ မဟာဇနကာယောပိ တရေယျ။ ဧဝမေဝ ခေါ, မဟာရာဇ, ယောဂါဝစရော အညေသံ စိတ္တံ ဝိမုတ္တံ ပဿိတွာ သောတာပတ္တိဖလေ ဝါ သကဒါဂါမိဖလေ ဝါ အနာဂါမိဖလေ ဝါ အရဟတ္တေ ဝါ သမ္ပက္ခန္ဒတိ ယောဂံ ကရောတိ အပ္ပတ္တဿ ပတ္တိယာ အနဓိဂတဿ အဓိဂမာယ အသစ္ဆိကတဿ သစ္ဆိကိရိယာယ။ ဧဝံ ခေါ, မဟာရာဇ, သမ္ပက္ခန္ဒနလက္ခဏာ သဒ္ဓါတိ။ ဘာသိတမ္ပေတံ, မဟာရာဇ, ဘဂဝတာ သံယုတ္တနိကာယဝရေ –

‘‘‘သဒ္ဓါယ တရတီ ဩဃံ၊ အပ္ပမာဒေန အဏ္ဏဝံ။

ဝီရိယေန ဒုက္ခမစ္စေတိ၊ ပညာယ ပရိသုဇ္ဈတီ’’’တိ [ပဿ သံ။ နိ။ ၁။၂၄၆]။

‘‘ကလ္လောသိ, ဘန္တေ နာဂသေနာ’’တိ။

သမ္ပက္ခန္ဒနလက္ခဏသဒ္ဓါပဉ္ဟော ဧကာဒသမော။

၁၂။ ဝီရိယလက္ခဏပဉ္ဟော

၁၂။ ရာဇာ အာဟ ‘‘ဘန္တေ နာဂသေန, ကိံလက္ခဏံ ဝီရိယ’’န္တိ? ‘‘ဥပတ္ထမ္ဘနလက္ခဏံ, မဟာရာဇ, ဝီရိယံ, ဝီရိယူပတ္ထမ္ဘိတာ သဗ္ဗေ ကုသလာ ဓမ္မာ န ပရိဟာယန္တီ’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ပုရိသော ဂေဟေ ပတန္တေ အညေန ဒါရုနာ ဥပတ္ထမ္ဘေယျ, ဥပတ္ထမ္ဘိတံ သန္တံ ဧဝံ တံ ဂေဟံ န ပတေယျ။ ဧဝမေဝ ခေါ, မဟာရာဇ, ဥပတ္ထမ္ဘနလက္ခဏံ ဝီရိယံ, ဝီရိယူပတ္ထမ္ဘိတာ သဗ္ဗေ ကုသလာ ဓမ္မာ န ပရိဟာယန္တီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, ပရိတ္တကံ သေနံ မဟတီ သေနာ ဘဉ္ဇေယျ, တတော ရာဇာ အညမညံ အနုဿာရေယျ အနုပေသေယျ အတ္တနော ပရိတ္တကာယ သေနာယ ဗလံ အနုပဒံ ဒဒေယျ, တာယ သဒ္ဓိံ ပရိတ္တကာ သေနာ မဟတိံ သေနံ ဘဉ္ဇေယျ။ ဧဝမေဝ ခေါ, မဟာရာဇ, ဥပတ္ထမ္ဘနလက္ခဏံ ဝီရိယံ, ဝီရိယူပတ္ထမ္ဘိတာ သဗ္ဗေ ကုသလာ ဓမ္မာ န ပရိဟာယန္တိ။ ဘာသိတမ္ပေတံ , မဟာရာဇ, ဘဂဝတာ – ‘ဝီရိယဝါ ခေါ, ဘိက္ခဝေ, အရိယသာဝကော အကုသလံ ပဇဟတိ, ကုသလံ ဘာဝေတိ။ သာဝဇ္ဇံ ပဇဟတိ, အနဝဇ္ဇံ ဘာဝေတိ။ သုဒ္ဓမတ္တာနံ ပရိဟရတီ’’’တိ။

‘‘ကလ္လောသိ, ဘန္တေ နာဂသေနာ’’တိ။

ဝီရိယလက္ခဏပဉ္ဟော ဒွါဒသမော။

၁၃။ သတိလက္ခဏပဉ္ဟော

၁၃။ ရာဇာ အာဟ ‘‘ဘန္တေ နာဂသေန, ကိံလက္ခဏာ သတီ’’တိ? ‘‘အပိလာပနလက္ခဏာ, မဟာရာဇ, သတိ, ဥပဂ္ဂဏှနလက္ခဏာ စာ’’တိ။ ‘‘ကထံ, ဘန္တေ, အပိလာပနလက္ခဏာ သတီ’’တိ? ‘‘သတိ, မဟာရာဇ, ဥပ္ပဇ္ဇမာနာ ကုသလာကုသလသာဝဇ္ဇာနဝဇ္ဇဟီနပ္ပဏီတကဏှသုက္ကသပ္ပဋိဘာဂဓမ္မေ အပိလာပေတိ ‘ဣမေ စတ္တာရော သတိပဋ္ဌာနာ, ဣမေ စတ္တာရော သမ္မပ္ပဓါနာ, ဣမေ စတ္တာရော ဣဒ္ဓိပါဒါ, ဣမာနိ ပဉ္စိန္ဒ္ရိယာနိ, ဣမာနိ ပဉ္စ ဗလာနိ, ဣမေ သတ္တ ဗောဇ္ဈင်္ဂါ, အယံ အရိယော အဋ္ဌင်္ဂိကော မဂ္ဂေါ, အယံ သမထော, အယံ ဝိပဿနာ, အယံ ဝိဇ္ဇာ, အယံ ဝိမုတ္တီ’တိ။ တတော ယောဂါဝစရော သေဝိတဗ္ဗေ ဓမ္မေ သေဝတိ, အသေဝိတဗ္ဗေ ဓမ္မေ န သေဝတိ။ ဘဇိတဗ္ဗေ ဓမ္မေ ဘဇတိ အဘဇိတ္တဗ္ဗေ ဓမ္မေ န ဘဇတိ။ ဧဝံ ခေါ, မဟာရာဇ, အပိလာပနလက္ခဏာ သတီ’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ရညော စက္ကဝတ္တိဿ ဘဏ္ဍာဂါရိကော ရာဇာနံ စက္ကဝတ္တိံ သာယံ ပါတံ ယသံ သရာပေတိ ‘ဧတ္တကာ, ဒေဝ, တေ ဟတ္ထီ, ဧတ္တကာ အဿာ, ဧတ္တကာ ရထာ, ဧတ္တကာ ပတ္တီ, ဧတ္တကံ ဟိရညံ, ဧတ္တကံ သုဝဏ္ဏံ, ဧတ္တကံ သာပတေယျံ, တံ ဒေဝေါ သရတူ’တိ ရညော သာပတေယျံ အပိလာပေတိ။ ဧဝမေဝ ခေါ, မဟာရာဇ, သတိ ဥပ္ပဇ္ဇမာနာ ကုသလာကုသလသာဝဇ္ဇာနဝဇ္ဇဟီနပ္ပဏီတကဏှသုက္ကသပ္ပဋိဘာဂဓမ္မေ အပိလာပေတိ ‘ဣမေ စတ္တာရော သတိပဋ္ဌာနာ, ဣမေ စတ္တာရော သမ္မပ္ပဓါနာ, ဣမေ စတ္တာရော ဣဒ္ဓိပါဒါ, ဣမာနိ ပဉ္စိန္ဒ္ရိယာနိ, ဣမာနိ ပဉ္စ ဗလာနိ, ဣမေ သတ္တ ဗောဇ္ဈင်္ဂါ, အယံ အရိယော အဋ္ဌင်္ဂိကော မဂ္ဂေါ, အယံ သမထော, အယံ ဝိပဿနာ, အယံ ဝိဇ္ဇာ, အယံ ဝိမုတ္တီ’တိ။ တတော ယောဂါဝစရော သေဝိတဗ္ဗေ ဓမ္မေ သေဝတိ, အသေဝိတဗ္ဗေ ဓမ္မေ န သေဝတိ။ ဘဇိတဗ္ဗေ ဓမ္မေ ဘဇတိ, အဘဇိတဗ္ဗေ ဓမ္မေ န ဘဇတိ။ ဧဝံ ခေါ, မဟာရာဇ, အပိလာပနလက္ခဏာ သတီ’’တိ။

‘‘ကထံ, ဘန္တေ, ဥပဂ္ဂဏှနလက္ခဏာ သတီ’’တိ? ‘‘သတိ, မဟာရာဇ, ဥပ္ပဇ္ဇမာနာ ဟိတာဟိတာနံ ဓမ္မာနံ ဂတိယော သမန္ဝေတိ ‘ဣမေ ဓမ္မာ ဟိတာ, ဣမေ ဓမ္မာ အဟိတာ။ ဣမေ ဓမ္မာ ဥပကာရာ, ဣမေ ဓမ္မာ အနုပကာရာ’တိ။ တတော ယောဂါဝစရော အဟိတေ ဓမ္မေ အပနုဒေတိ, ဟိတေ ဓမ္မေ ဥပဂ္ဂဏှာတိ။ အနုပကာရေ ဓမ္မေ အပနုဒေတိ, ဥပကာရေ ဓမ္မေ ဥပဂ္ဂဏှာတိ။ ဧဝံ ခေါ, မဟာရာဇ, ဥပဂ္ဂဏှနလက္ခဏာ သတီ’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ရညော စက္ကဝတ္တိဿ ပရိဏာယကရတနံ ရညော ဟိတာဟိတေ ဇာနာတိ ‘ဣမေ ရညော ဟိတာ, ဣမေ အဟိတာ။ ဣမေ ဥပကာရာ, ဣမေ အနုပကာရာ’တိ။ တတော အဟိတေ အပနုဒေတိ, ဟိတေ ဥပဂ္ဂဏှာတိ။ အနုပကာရေ အပနုဒေတိ, ဥပကာရေ ဥပဂ္ဂဏှာတိ။ ဧဝမေဝ ခေါ, မဟာရာဇ, သတိ ဥပ္ပဇ္ဇမာနာ ဟိတာဟိတာနံ ဓမ္မာနံ ဂတိယော သမန္ဝေတိ ‘ဣမေ ဓမ္မာ ဟိတာ, ဣမေ ဓမ္မာ အဟိတာ။ ဣမေ ဓမ္မာ ဥပကာရာ, ဣမေ ဓမ္မာ အနုပကာရာ’တိ။ တတော ယောဂါဝစရော အဟိတေ ဓမ္မေ အပနုဒေတိ, ဟိတေ ဓမ္မေ ဥပဂ္ဂဏှာ’တိ။ အနုပကာရေ ဓမ္မေ အပနုဒေတိ, ဥပကာရေ ဒမ္မေ ဥပဂ္ဂဏှာတိ။ ဧဝံ ခေါ, မဟာရာဇ, ဥပဂ္ဂဏှနလက္ခဏာ သတိ။ ဘာသိတမ္ပေတံ, မဟာရာဇ, ဘဂဝတာ – ‘သတိဉ္စ ခွါဟံ, ဘိက္ခဝေ, သဗ္ဗတ္ထိကံ ဝဒါမီ’’’တိ။

‘‘ကလ္လောသိ , ဘန္တေ နာဂသေနာ’’တိ။

သတိလက္ခဏပဉ္ဟော တေရသမော။

၁၄။ သမာဓိပဉ္ဟော

၁၄။ ရာဇာ အာဟ ‘‘ဘန္တေ နာဂသေန, ကိံလက္ခဏော သမာဓီ’’တိ? ‘‘ပမုခလက္ခဏော, မဟာရာဇ, သမာဓိ, ယေ ကေစိ ကုသလာ ဓမ္မာ, သဗ္ဗေ တေ သမာဓိပမုခါ ဟောန္တိ သမာဓိနိန္နာ သမာဓိပေါဏာ သမာဓိပဗ္ဘာရာ’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကူဋာဂါရဿ ယာ ယာစိ ဂေါပါနသိယော, သဗ္ဗာ တာ ကူဋင်္ဂမာ ဟောန္တိ ကူဋနိန္နာ ကူဋသမောသရဏာ, ကူဋံ တာသံ အဂ္ဂမက္ခာယတိ။ ဧဝမေဝ ခေါ, မဟာရာဇ, ယေ ကေစိ ကုသလာ ဓမ္မာ, သဗ္ဗေ တေ သမာဓိပမုခါ ဟောန္တိ သမာဓိနိန္နာ သမာဓိပေါဏာ သမာဓိပဗ္ဘာရာတိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, ကောစိ ရာဇာ စတုရင်္ဂိနိယာ သေနာယ သဒ္ဓိံ သင်္ဂါမံ ဩတရေယျ, သဗ္ဗာဝ သေနာ ဟတ္ထီ စ အဿာ စ ရထာ စ ပတ္တီ စ တပ္ပမုခါ [တမ္ပမုခါ (သျာ။ က။)] ဘဝေယျုံ တန္နိန္နာ တပ္ပောဏာ တပ္ပဗ္ဘာရာ တံ ယေဝ အနုပရိယာယေယျုံ။ ဧဝမေဝ ခေါ, မဟာရာဇ, ယေ ကေစိ ကုသလာ ဓမ္မာ, သဗ္ဗေ တေ သမာဓိပမုခါ ဟောန္တိ သမာဓိနိန္နာ သမာဓိပေါဏာ သမာဓိပဗ္ဘာရာ။ ဧဝံ ခေါ, မဟာရာဇ, ပမုခလက္ခဏော သမာဓိ။ ဘာသိတမ္ပေတံ, မဟာရာဇ, ဘဂဝတာ – ‘‘သမာဓိံ, ဘိက္ခဝေ, ဘာဝေထ, သမာဟိတော, ဘိက္ခဝေ, ဘိက္ခု ယထာဘူတံ ပဇာနာတီ’’တိ။

‘‘ကလ္လောသိ, ဘန္တေ နာဂသေနာ’’တိ။

သမာဓိပဉ္ဟော စုဒ္ဒသမော။

၁၅။ ပညာလက္ခဏပဉ္ဟော

၁၅။ ရာဇာ အာဟ ‘‘ဘန္တေ နာဂသေန, ကိံလက္ခဏာ ပညာ’’တိ? ‘‘ပုဗ္ဗေဝ ခေါ, မဟာရာဇ, မယာ ဝုတ္တံ ‘ဆေဒနလက္ခဏာ ပညာ’တိ, အပိ စ ဩဘာသနလက္ခဏာ ပညာ’’တိ။ ‘‘ကထံ, ဘန္တေ, ဩဘာသနလက္ခဏာ ပညာ’’တိ? ‘‘ပညာ, မဟာရာဇ, ဥပ္ပဇ္ဇမာနာ အဝိဇ္ဇန္ဓကာရံ ဝိဓမေတိ, ဝိဇ္ဇောဘာသံ ဇနေတိ, ဉာဏာလောကံ ဝိဒံသေတိ, အရိယသစ္စာနိ ပါကဋာနိ ကရောတိ။ တတော ယောဂါဝစရော ‘အနိစ္စ’န္တိ ဝါ ‘ဒုက္ခ’န္တိ ဝါ ‘အနတ္တာ’တိ ဝါ သမ္မပ္ပညာယ ပဿတီ’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ပုရိသော အန္ဓကာရေ ဂေဟေ ပဒီပံ ပဝေသေယျ, ပဝိဋ္ဌော ပဒီပေါ အန္ဓကာရံ ဝိဓမေတိ, ဩဘာသံ ဇနေတိ, အာလောကံ ဝိဒံသေတိ, ရူပါနိ ပါကဋာနိ ကရောတိ။ ဧဝမေဝ ခေါ, မဟာရာဇ, ပညာ ဥပ္ပဇ္ဇမာနာ အဝိဇ္ဇန္ဓကာရံ ဝိဓမေတိ, ဝိဇ္ဇောဘာသံ ဇနေတိ, ဉာဏာလောကံ ဝိဒံသေတိ, အရိယသစ္စာနိ ပါကဋာနိ ကရောတိ။ တတော ယောဂါဝစရော ‘အနိစ္စ’န္တိ ဝါ ‘ဒုက္ခ’န္တိ ဝါ ‘အနတ္တာ’တိ ဝါ သမ္မပ္ပညာယ ပဿတိ။ ဧဝံ ခေါ, မဟာရာဇ, ဩဘာသနလက္ခဏာ ပညာ’’တိ။

‘‘ကလ္လောသိ, ဘန္တေ နာဂသေနာ’’တိ။

ပညာလက္ခဏပဉ္ဟော ပန္နရသမော။

၁၆။ နာနာဓမ္မာနံ ဧကကိစ္စအဘိနိပ္ဖာဒနပဉ္ဟော

၁၆။ ရာဇာ အာဟ ‘‘ဘန္တေ နာဂသေန, ဣမေ ဓမ္မာ နာနာ သန္တာ ဧကံ အတ္ထံ အဘိနိပ္ဖာဒေန္တီ’’တိ? ‘‘အာမ, မဟာရာဇ, ဣမေ ဓမ္မာ နာနာ သန္တာ ဧကံ အတ္ထံ အဘိနိပ္ဖာဒေန္တိ, ကိလေသေ ဟနန္တီ’’တိ။

‘‘ကထံ, ဘန္တေ, ဣမေ ဓမ္မာ နာနာ သန္တာ ဧကံ အတ္ထံ အဘိနိပ္ဖာဒေန္တိ, ကိလေသေ ဟနန္တိ? ဩပမ္မံ ကရောဟီ’’တိ။ ‘‘ယထာ, မဟာရာဇ, သေနာ နာနာ သန္တာ ဟတ္ထီ စ အဿာ စ ရထာ စ ပတ္တီ စ ဧကံ အတ္ထံ အဘိနိပ္ဖာဒေန္တိ, သင်္ဂါမေ ပရသေနံ အဘိဝိဇိနန္တိ။ ဧဝမေဝ ခေါ, မဟာရာဇ, ဣမေ ဓမ္မာ နာနာ သန္တာ ဧကံ အတ္ထံ အဘိနိပ္ဖာဒေန္တိ, ကိလေသေ ဟနန္တီ’’တိ။

‘‘ကလ္လောသိ, ဘန္တေ နာဂသေနာ’’တိ။

နာနာဓမ္မာနံ ဧကကိစ္စအဘိနိပ္ဖာဒနပဉ္ဟော သောဠသမော။

မဟာဝဂ္ဂေါ ပဌမော။

ဣမသ္မိံ ဝဂ္ဂေ သောဠသ ပဉှာ။

၂။ အဒ္ဓါနဝဂ္ဂေါ

၁။ ဓမ္မသန္တတိပဉ္ဟော

၁။ ရာဇာ အာဟ ‘‘ဘန္တေ နာဂသေန, ယော ဥပ္ပဇ္ဇတိ, သော ဧဝ သော, ဥဒါဟု အညော’’တိ? ထေရော အာဟ ‘‘န စ သော, န စ အညော’’တိ။

‘‘ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, ယဒါ တွံ ဒဟရော တရုဏော မန္ဒော ဥတ္တာနသေယျကော အဟောသိ, သော ယေဝ တွံ ဧတရဟိ မဟန္တော’’တိ? ‘‘န ဟိ, ဘန္တေ, အညော သော ဒဟရော တရုဏော မန္ဒော ဥတ္တာနသေယျကော အဟောသိ, အညော အဟံ ဧတရဟိ မဟန္တော’’တိ။ ‘‘ဧဝံ သန္တေ ခေါ, မဟာရာဇ, မာတာတိပိ န ဘဝိဿတိ, ပိတာတိပိ န ဘဝိဿတိ, အာစရိယောတိပိ န ဘဝိဿတိ, သိပ္ပဝါတိပိ န ဘဝိဿတိ, သီလဝါတိပိ န ဘဝိဿတိ, ပညဝါတိပိ န ဘဝိဿတိ။ ကိံ နု ခေါ, မဟာရာဇ, အညာ ဧဝ ကလလဿ မာတာ, အညာ အဗ္ဗုဒဿ မာတာ, အညာ ပေသိယာ မာတာ, အညာ ဃနဿ မာတာ, အညာ ခုဒ္ဒကဿ မာတာ, အညာ မဟန္တဿ မာတာ, အညော သိပ္ပံ သိက္ခတိ, အညော သိက္ခိတော ဘဝတိ, အညော ပါပကမ္မံ ကရောတိ, အညဿ ဟတ္ထပါဒါ ဆိဇ္ဇန္တီ’’တိ? ‘‘န ဟိ, ဘန္တေ။ တွံ ပန, ဘန္တေ, ဧဝံ ဝုတ္တေ ကိံ ဝဒေယျာသီ’’တိ? ထေရော အာဟ ‘‘အဟညေဝ ခေါ, မဟာရာဇ, ဒဟရော အဟောသိံ တရုဏော မန္ဒော ဥတ္တာနသေယျကော, အဟညေဝ ဧတရဟိ မဟန္တော, ဣမမေဝ ကာယံ နိဿာယ သဗ္ဗေ တေ ဧကသင်္ဂဟိတာ’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, ကောစိဒေဝ ပုရိသော ပဒီပံ ပဒီပေယျ, ကိံ သော သဗ္ဗရတ္တိံ ပဒီပေယျာ’’တိ? ‘‘အာမ, ဘန္တေ, သဗ္ဗရတ္တိံ ပဒီပေယျာ’’တိ။ ‘‘ကိံ နု ခေါ, မဟာရာဇ, ယာ ပုရိမေ ယာမေ အစ္စိ, သာ မဇ္ဈိမေ ယာမေ အစ္စီ’’တိ? ‘‘န ဟိ ဘန္တေ’’တိ။ ‘‘ယာ မဇ္ဈိမေ ယာမေ အစ္စိ, သာ ပစ္ဆိမေ ယာမေ အစ္စီ’’တိ? ‘‘န ဟိ ဘန္တေ’’တိ။ ‘‘ကိံ နု ခေါ, မဟာရာဇ, အညော သော အဟောသိ ပုရိမေ ယာမေ ပဒီပေါ, အညော မဇ္ဈိမေ ယာမေ ပဒီပေါ, အညော ပစ္ဆိမေ ယာမေ ပဒီပေါ’’တိ? ‘‘န ဟိ ဘန္တေ, တံ ယေဝ နိဿာယ သဗ္ဗရတ္တိံ ပဒီပိတော’’တိ။ ‘‘ဧဝမေဝ ခေါ, မဟာရာဇ, ဓမ္မသန္တတိ သန္ဒဟတိ, အညော ဥပ္ပဇ္ဇတိ, အညော နိရုဇ္ဈတိ, အပုဗ္ဗံ အစရိမံ ဝိယ သန္ဒဟတိ, တေန န စ သော, န စ အညော, ပုရိမဝိညာဏေ ပစ္ဆိမဝိညာဏံ သင်္ဂဟံ ဂစ္ဆတီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, ခီရံ ဒုယှမာနံ ကာလန္တရေန ဒဓိ ပရိဝတ္တေယျ, ဒဓိတော နဝနီတံ, နဝနီတတော ဃတံ ပရိဝတ္တေယျ, ယော နု ခေါ, မဟာရာဇ, ဧဝံ ဝဒေယျ ‘ယံ ယေဝ ခီရံ တံ ယေဝ ဒဓိ, ယံ ယေဝ ဒဓိ တံ ယေဝ နဝနီတံ, ယံ ယေဝ နဝနီတံ တံ ယေဝ ဃတ’န္တိ, သမ္မာ နု ခေါ သော, မဟာရာဇ, ဝဒမာနော ဝဒေယျာ’’တိ? ‘‘န ဟိ ဘန္တေ, တံယေဝ နိဿာယ သမ္ဘူတ’’န္တိ။ ‘‘ဧဝမေဝ ခေါ, မဟာရာဇ, ဓမ္မသန္တတိ သန္ဒဟတိ, အညော ဥပ္ပဇ္ဇတိ, အညော နိရုဇ္ဈတိ, အပုဗ္ဗံ အစရိမံ ဝိယ သန္ဒဟတိ, တေန န စ သော, န စ အညော, ပုရိမဝိညာဏေ ပစ္ဆိမဝိညာဏံ သင်္ဂဟံ ဂစ္ဆတီ’’တိ။

‘‘ကလ္လောသိ, ဘန္တေ နာဂသေနာ’’တိ။

ဓမ္မသန္တတိပဉ္ဟော ပဌမော။

၂။ ပဋိသန္ဒဟနပဉ္ဟော

၂။ ရာဇာ အာဟ ‘‘ဘန္တေ နာဂသေန, ယော န ပဋိသန္ဒဟတိ, ဇာနာတိ သော ‘န ပဋိသန္ဒဟိဿာမီ’တိ? ‘‘အာမ, မဟာရာဇ, ယော န ပဋိသန္ဒဟတိ, ဇာနာတိ သော ‘န ပဋိသန္ဒဟိဿာမီ’တိ။ ‘‘ကထံ, ဘန္တေ, ဇာနာတီ’’တိ? ‘‘ယော ဟေတု ယော ပစ္စယော, မဟာရာဇ, ပဋိသန္ဒဟနာယ, တဿ ဟေတုဿ တဿ ပစ္စယဿ ဥပရမာ ဇာနာတိ သော ‘န ပဋိသန္ဒဟိဿာမီ’’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကဿကော ဂဟပတိကော ကသိတွာ စ ဝပိတွာ စ ဓညာဂါရံ ပရိပူရေယျ။ သော အပရေန သမယေန နေဝ ကဿေယျ န ဝပ္ပေယျ, ယထာသမ္ဘတဉ္စ ဓညံ ပရိဘုဉ္ဇေယျ ဝါ ဝိသဇ္ဇေယျ ဝါ ယထာ ပစ္စယံ ဝါ ကရေယျ, ဇာနေယျ သော, မဟာရာဇ, ကဿကော ဂဟပတိကော ‘န မေ ဓညာဂါရံ ပရိပူရေဿတီ’တိ? ‘‘အာမ, ဘန္တေ, ဇာနေယျာ’’တိ။ ‘‘ကထံ ဇာနေယျာ’’တိ? ‘‘ယော ဟေတု ယော ပစ္စယော ဓညာဂါရဿ ပရိပူရဏာယ, တဿ ဟေတုဿ တဿ ပစ္စယဿ ဥပရမာ ဇာနာတိ ‘န မေ ဓညာဂါရံ ပရိပူရေဿတီ’’’တိ။ ‘‘ဧဝမေဝ ခေါ, မဟာရာဇ, ယော ဟေတု ယော ပစ္စယော ပဋိသန္ဒဟနာယ, တဿ ဟေတုဿ တဿ ပစ္စယဿ ဥပရမာ ဇာနာတိ သော ‘န ပဋိသန္ဒဟိဿာမီ’တိ။

‘‘ကလ္လောသိ, ဘန္တေ နာဂသေနာ’’တိ။

ပဋိသန္ဒဟနပဉ္ဟော ဒုတိယော။

၃။ ဉာဏပညာပဉ္ဟော

၃။ ရာဇာ အာဟ ‘‘ဘန္တေ နာဂသေန, ယဿ ဉာဏံ ဥပ္ပန္နံ, တဿ ပညာ ဥပ္ပန္နာ’’တိ? ‘‘အာမ, မဟာရာဇ, ယဿ ဉာဏံ ဥပ္ပန္နံ, တဿ ပညာ ဥပ္ပန္နာ’’တိ။ ‘‘ကိံ, ဘန္တေ, ယညေဝ ဉာဏံ သာ ယေဝ ပညာ’’တိ? ‘‘အာမ, မဟာရာဇ, ယညေဝ ဉာဏံ သာ ယေဝ ပညာ’’တိ။ ‘‘ယဿ ပန, ဘန္တေ, တညေဝ ဉာဏံ သာ ယေဝ ပညာ ဥပ္ပန္နာ, ကိံ သမ္မုယ္ဟေယျ သော, ဥဒါဟု န သမ္မုယ္ဟေယျာ’’တိ? ‘‘ကတ္ထစိ, မဟာရာဇ, သမ္မုယ္ဟေယျ, ကတ္ထစိ န သမ္မုယ္ဟေယျာ’’တိ။ ‘‘ကုဟိံ, ဘန္တေ, သမ္မုယ္ဟေယျာ’’တိ? ‘‘အညာတပုဗ္ဗေသု ဝါ, မဟာရာဇ, သိပ္ပဋ္ဌာနေသု, အဂတပုဗ္ဗာယ ဝါ ဒိသာယ, အဿုတပုဗ္ဗာယ ဝါ နာမပညတ္တိယာ သမ္မုယ္ဟေယျာ’’တိ။ ‘‘ကုဟိံ န သမ္မုယ္ဟေယျာ’’တိ? ‘‘ယံ ခေါ ပန, မဟာရာဇ, တာယ ပညာယ ကတံ ‘အနိစ္စ’န္တိ ဝါ ‘ဒုက္ခ’န္တိ ဝါ ‘အနတ္တာ’တိ ဝါ, တဟိံ န သမ္မုယ္ဟေယျာ’’တိ။ ‘‘မောဟော ပနဿ, ဘန္တေ, ကုဟိံ ဂစ္ဆတီ’’တိ? ‘‘မောဟော ခေါ, မဟာရာဇ, ဉာဏေ ဥပ္ပန္နမတ္တေ တတ္ထေဝ နိရုဇ္ဈတီ’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကောစိဒေဝ ပုရိသော အန္ဓကာရဂေဟေ ပဒီပံ အာရောပေယျ, တတော အန္ဓကာရော နိရုဇ္ဈေယျ, အာလောကော ပါတုဘဝေယျ။ ဧဝမေဝ ခေါ, မဟာရာဇ, ဉာဏေ ဥပ္ပန္နမတ္တေ မောဟော တတ္ထေဝ နိရုဇ္ဈတီ’’တိ။

‘‘ပညာ ပန, ဘန္တေ, ကုဟိံ ဂစ္ဆတီ’’တိ? ‘‘ပညာပိ ခေါ, မဟာရာဇ, သကိစ္စယံ ကတွာ တတ္ထေဝ နိရုဇ္ဈတိ, ယံ ပန တာယ ပညာယ ကတံ ‘အနိစ္စ’န္တိ ဝါ ‘ဒုက္ခ’န္တိ ဝါ ‘အနတ္တာ’တိ ဝါ, တံ န နိရုဇ္ဈတီ’’တိ။

‘‘ဘန္တေ နာဂသေန, ယံ ပနေတံ ဗြူသိ ‘ပညာ သကိစ္စယံ ကတွာ တတ္ထေဝ နိရုဇ္ဈတိ, ယံ ပန တာယ ပညာယ ကတံ ‘အနိစ္စ’န္တိ ဝါ ‘ဒုက္ခ’န္တိ ဝါ ‘အနတ္တာ’တိ ဝါ, တံ န နိရုဇ္ဈတီ’တိ, တဿ ဩပမ္မံ ကရောဟီ’’တိ။ ‘‘ယထာ, မဟာရာဇ, ယော ကောစိ ပုရိသော ရတ္တိံ လေခံ ပေသေတုကာမော လေခကံ ပက္ကောသာပေတွာ ပဒီပံ အာရောပေတွာ လေခံ လိခါပေယျ, လိခိတေ ပန လေခေ ပဒီပံ ဝိဇ္ဈာပေယျ, ဝိဇ္ဈာပိတေပိ ပဒီပေ လေခံ န ဝိနဿေယျ။ ဧဝမေဝ ခေါ, မဟာရာဇ, ပညာ သကိစ္စယံ ကတွာ တတ္ထေဝ နိရုဇ္ဈတိ, ယံ ပန တာယ ပညာယ ကတံ ‘အနိစ္စ’န္တိ ဝါ ‘ဒုက္ခ’န္တိ ဝါ ‘အနတ္တာ’တိ ဝါ, တံ န နိရုဇ္ဈတီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, ပုရတ္ထိမေသု ဇနပဒေသု မနုဿာ အနုဃရံ ပဉ္စ ပဉ္စ ဥဒကဃဋကာနိ ဌပေန္တိ အာလိမ္ပနံ ဝိဇ္ဈာပေတုံ, ဃရေ ပဒိတ္တေ တာနိ ပဉ္စ ဥဒကဃဋကာနိ ဃရဿူပရိ ခိပန္တိ, တတော အဂ္ဂိ ဝိဇ္ဈာယတိ, ကိံ နု ခေါ, မဟာရာဇ, တေသံ မနုဿာနံ ဧဝံ ဟောတိ ‘ပုန တေဟိ ဃဋေဟိ ဃဋကိစ္စံ ကရိဿာမာ’’’တိ? ‘‘န ဟိ, ဘန္တေ, အလံ တေဟိ ဃဋေဟိ, ကိံ တေဟိ ဃဋေဟီ’’တိ? ‘‘ယထာ, မဟာရာဇ, ပဉ္စ ဥဒကဃဋကာနိ, ဧဝံ ပဉ္စိန္ဒ္ရိယာနိ ဒဋ္ဌဗ္ဗာနိ သဒ္ဓိန္ဒ္ရိယံ ဝီရိယိန္ဒ္ရိယံ သတိန္ဒ္ရိယံ သမာဓိန္ဒ္ရိယံ ပညိန္ဒ္ရိယံ။ ယထာ တေ မနုဿာ, ဧဝံ ယောဂါဝစရော ဒဋ္ဌဗ္ဗော။ ယထာ အဂ္ဂိ, ဧဝံ ကိလေသာ ဒဋ္ဌဗ္ဗာ။ ယထာ ပဉ္စဟိ ဥဒကဃဋကေဟိ အဂ္ဂိ ဝိဇ္ဈာဣယတိ, ဧဝံ ပဉ္စိန္ဒ္ရိယေဟိ ကိလေသာ ဝိဇ္ဈာပိယန္တိ, ဝိဇ္ဈာပိတာပိ ကိလေသာ န ပုန သမ္ဘဝန္တိ။ ဧဝမေဝ ခေါ, မဟာရာဇ, ပညာ သကိစ္စယံ ကတွာ တတ္ထေဝ နိရုဇ္ဈတိ, ယံ ပန တာယ ပညာယ ကတံ ‘အနိစ္စ’န္တိ ဝါ ‘ဒုက္ခ’န္တိ ဝါ ‘အနတ္တာ’တိ ဝါ, တံ န နိရုဇ္ဈတီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, ဝေဇ္ဇော ပဉ္စမူလဘေသဇ္ဇာနိ ဂဟေတွာ ဂိလာနကံ ဥပသင်္ကမိတွာ တာနိ ပဉ္စမူလဘေသဇ္ဇာနိ ပိသိတွာ [ပိံသိတွာ (သီ။ ဣ။)] ဂိလာနကံ ပါယေယျ, တေဟိ စ ဒေါသာ နိဒ္ဓမေယျုံ, ကိံ နု ခေါ, မဟာရာဇ, တဿ ဝေဇ္ဇဿ ဧဝံ ဟောတိ ‘ပုန တေဟိ ပဉ္စမူလဘေသဇ္ဇေဟိ ဘေသဇ္ဇကိစ္စံ ကရိဿာမီ’’’တိ? ‘‘န ဟိ, ဘန္တေ, အလံ တေဟိ ပဉ္စမူလဘေသဇ္ဇေဟိ, ကိံ တေဟိ ပဉ္စမူလဘေသဇ္ဇေဟီ’’တိ? ‘‘ယထာ, မဟာရာဇ, ပဉ္စမူလဘေသဇ္ဇာနိ, ဧဝံ ပဉ္စိန္ဒ္ရိယာနိ ဒဋ္ဌဗ္ဗာနိ သဒ္ဓိန္ဒ္ရိယံ ဝီရိယိန္ဒ္ရိယံ သတိန္ဒ္ရိယံ သမာဓိန္ဒ္ရိယံ ပညိန္ဒ္ရိယံ, ယထာ ဝေဇ္ဇော, ဧဝံ ယောဂါဝစရော ဒဋ္ဌဗ္ဗော။ ယထာ ဗျာဓိ, ဧဝံ ကိလေသာ ဒဋ္ဌဗ္ဗာ။ ယထာ ဗျာဓိတော ပုရိသော, ဧဝံ ပုထုဇ္ဇနော ဒဋ္ဌဗ္ဗော။ ယထာ ပဉ္စမူလဘေသဇ္ဇေဟိ ဂိလာနဿ ဒေါသာ နိဒ္ဓန္တာ, ဒေါသေ နိဒ္ဓန္တေ ဂိလာနော အရောဂေါ ဟောတိ, ဧဝံ ပဉ္စိန္ဒ္ရိယေဟိ ကိလေသာ နိဒ္ဓမီယန္တိ, နိဒ္ဓမိတာ စ ကိလေသာ န ပုန သမ္ဘဝန္တိ။ ဧဝမေဝ ခေါ, မဟာရာဇ, ပညာ သကိစ္စယံ ကတွာ တတ္ထေဝ နိရုဇ္ဈတိ, ယံ ပန တာယ ပညာယ ကတံ ‘အနိစ္စ’န္တိ ဝါ ‘ဒုက္ခ’န္တိ ဝါ ‘အနတ္တာ’တိ ဝါ, တံ န နိရုဇ္ဈတီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, သင်္ဂါမာဝစရော ယောဓေါ ပဉ္စ ကဏ္ဍာနိ ဂဟေတွာ သင်္ဂါမံ ဩတရေယျ ပရသေနံ ဝိဇေတုံ, သော သင်္ဂါမဂတော တာနိ ပဉ္စ ကဏ္ဍာနိ ခိပေယျ, တေဟိ စ ပရသေနာ ဘိဇ္ဇေယျ , ကိံ နု ခေါ, မဟာရာဇ, တဿ သင်္ဂါမာဝစရဿ ယောဓဿ ဧဝံ ဟောတိ ‘ပုန တေဟိ ကဏ္ဍေဟိ ကဏ္ဍကိစ္စံ ကရိဿာမီ’’’တိ? ‘‘န ဟိ, ဘန္တေ, အလံ တေဟိ ကဏ္ဍေဟိ, ကိံ တေဟိ ကဏ္ဍေဟီ’’တိ? ‘‘ယထာ, မဟာရာဇ, ပဉ္စ ကဏ္ဍာနိ, ဧဝံ ပဉ္စိန္ဒ္ရိယာနိ ဒဋ္ဌဗ္ဗာနိ သဒ္ဓိန္ဒ္ရိယံ ဝီရိယိန္ဒ္ရိယံ သတိန္ဒ္ရိယံ သမာဓိန္ဒ္ရိယံ ပညိန္ဒ္ရိယံ။ ယထာ, မဟာရာဇ, သင်္ဂါမာဝစရော ယောဓေါ, ဧဝံ ယောဂါဝစရော ဒဋ္ဌဗ္ဗော။ ယထာ ပရသေနာ, ဧဝံ ကိလေသာ ဒဋ္ဌဗ္ဗာ။ ယထာ ပဉ္စဟိ ကဏ္ဍေဟိ ပရသေနာ ဘိဇ္ဇတိ, ဧဝံ ပဉ္စိန္ဒ္ရိယေဟိ ကိလေသာ ဘိဇ္ဇန္တိ, ဘဂ္ဂါ စ ကိလေသာ န ပုန သမ္ဘဝန္တိ။ ဧဝမေဝ ခေါ, မဟာရာဇ, ပညာ သကိစ္စယံ ကတွာ တတ္ထေဝ နိရုဇ္ဈတိ, ယံ ပန တာယ ပညာယ ကတံ ‘အနိစ္စ’န္တိ ဝါ ‘ဒုက္ခ’န္တိ ဝါ ‘အနတ္တာ’တိ ဝါ, တံ န နိရုဇ္ဈတီ’’တိ။

‘‘ကလ္လောသိ, ဘန္တေ နာဂသေနာ’’တိ။

ဉာဏပညာပဉ္ဟော တတိယော။

၄။ ပဋိသန္ဒဟနပုဂ္ဂလဝေဒိယနပဉ္ဟော

၄။ ရာဇာ အာဟ ‘‘ဘန္တေ နာဂသေန, ယော န ပဋိသန္ဒဟတိ, ဝေဒေတိ သော ကိဉ္စိ ဒုက္ခံ ဝေဒန’’န္တိ? ထေရော အာဟ ‘‘ကိဉ္စိ ဝေဒေတိ, ကိဉ္စိ န ဝေဒေတီ’’တိ။ ‘‘ကိံ ဝေဒေတိ, ကိံ န ဝေဒေတီ’’တိ? ‘‘ကာယိကံ, မဟာရာဇ, ဝေဒနံ ဝေဒေတိ, စေတသိကံ ဝေဒနံ န ဝေဒေတီ’’တိ။ ‘‘ကထံ, ဘန္တေ, ကာယိကံ ဝေဒနံ ဝေဒေတိ, ကထံ စေတသိကံ ဝေဒနံ န ဝေဒေတီ’’တိ? ‘‘ယော ဟေတု ယော ပစ္စယော ကာယိကာယ ဒုက္ခဝေဒနာယ ဥပ္ပတ္တိယာ, တဿ ဟေတုဿ တဿ ပစ္စယဿ အနုပရမာ ကာယိကံ ဒုက္ခဝေဒနံ ဝေဒေတိ, ယော ဟေတု ယော ပစ္စယော စေတသိကာယ ဒုက္ခဝေဒနာယ ဥပ္ပတ္တိယာ, တဿ ဟေတုဿ တဿ ပစ္စယဿ ဥပရမာ စေတသိကံ ဒုက္ခဝေဒနံ န ဝေဒေတိ။ ဘာသိတမ္ပေတံ, မဟာရာဇ, ဘဂဝတာ – ‘သော ဧကံ ဝေဒနံ ဝေဒေတိ ကာယိကံ န စေတသိက’’’န္တိ။

‘‘ဘန္တေ နာဂသေန, ယော ဒုက္ခံ ဝေဒနံ ဝေဒေတိ, ကသ္မာ သော န ပရိနိဗ္ဗာယတီ’’တိ? ‘‘နတ္ထိ, မဟာရာဇ, အရဟတော အနုနယော ဝါ ပဋိဃော ဝါ, န စ အရဟန္တော အပက္ကံ ပါတေန္တိ ပရိပါကံ အာဂမေန္တိ ပဏ္ဍိတာ။ ဘာသိတမ္ပေတံ , မဟာရာဇ, ထေရေန သာရိပုတ္တေန ဓမ္မသေနာပတိနာ –

‘‘‘နာဘိနန္ဒာမိ မရဏံ၊ နာဘိနန္ဒာမိ ဇီဝိတံ။

ကာလဉ္စ ပဋိကင်္ခါမိ၊ နိဗ္ဗိသံ ဘတကော ယထာ။

‘‘‘နာဘိနန္ဒာမိ မရဏံ၊ နာဘိနန္ဒာမိ ဇီဝိတံ။

ကာလဉ္စ ပဋိကင်္ခါမိ၊ သမ္ပဇာနော ပတိဿတော’’’တိ။

‘‘ကလ္လောသိ, ဘန္တေ နာဂသေနာ’’တိ [ပဿ ထေရဂါ။ ၆၅၄]။

ပဋိသန္ဒဟနပုဂ္ဂလဝေဒိယနပဉ္ဟော စတုတ္ထော။

၅။ ဝေဒနာပဉ္ဟော

၅။ ရာဇာ အာဟ ‘‘ဘန္တေ နာဂသေန, သုခါ ဝေဒနာ ကုသလာ ဝါ အကုသလာ ဝါ အဗျာကတာ ဝါ’’တိ? ‘‘သိယာ, မဟာရာဇ, ကုသလာ, သိယာ အကုသလာ, သိယာ အဗျာကတာ’’တိ။ ‘‘ယဒိ, ဘန္တေ, ကုသလာ န ဒုက္ခာ, ယဒိ ဒုက္ခာ န ကုသလာ, ကုသလံ ဒုက္ခန္တိ နုပ္ပဇ္ဇတီ’’တိ။ ‘‘တံ ကိံ မညသိ, မဟာရာဇ, ဣဓ ပုရိသဿ ဟတ္ထေ တတ္တံ အယောဂုဠံ နိက္ခိပေယျ, ဒုတိယေ ဟတ္ထေ သီတံ ဟိမပိဏ္ဍံ နိက္ခိပေယျ, ကိံ နု ခေါ, မဟာရာဇ, ဥဘောပိ တေ ဒဟေယျု’’န္တိ? ‘‘အာမ, ဘန္တေ, ဥဘောပိ တေ ဒဟေယျု’’န္တိ။ ‘‘ကိံ နု ခေါ, တေ မဟာရာဇ, ဥဘောပိ ဥဏှာ’’တိ? ‘‘န ဟိ ဘန္တေ’’တိ။ ‘‘ကိံ ပန တေ, မဟာရာဇ, ဥဘောပိ သီတလာ’’တိ? ‘‘န ဟိ ဘန္တေ’’တိ။ ‘‘အာဇာနာဟိ နိဂ္ဂဟံ ယဒိ တတ္တံ ဒဟတိ, န စ တေ ဥဘောပိ ဥဏှာ, တေန နုပ္ပဇ္ဇတိ။ ယဒိ သီတလံ ဒဟတိ, န စ တေ ဥဘောပိ သီတလာ, တေန နုပ္ပဇ္ဇတိ။ ကိဿ ပန တေ, မဟာရာဇ, ဥဘောပိ ဒဟန္တိ, န စ တေ ဥဘောပိ ဥဏှာ, န စ တေ ဥဘောပိ သီတလာ? ဧကံ ဥဏှံ, ဧကံ သီတလံ, ဥဘောပိ တေ ဒဟန္တိ, တေန နုပ္ပဇ္ဇတီ’’တိ။ ‘‘နာဟံ ပဋိဗလော တယာ ဝါဒိနာ သဒ္ဓိံ သလ္လပိတုံ, သာဓု အတ္ထံ ဇပ္ပေဟီ’’တိ။ တတော ထေရော အဘိဓမ္မသံယုတ္တာယ ကထာယ ရာဇာနံ မိလိန္ဒံ သညာပေသိ –

‘‘ဆယိမာနိ , မဟာရာဇ, ဂေဟနိဿိတာနိ သောမနဿာနိ, ဆ နေက္ခမ္မနိဿိတာနိ သောမနဿာနိ, ဆ ဂေဟနိဿိတာနိ ဒေါမနဿာနိ, ဆ နေက္ခမ္မနိဿိတာနိ ဒေါမနဿာနိ, ဆ ဂေဟနိဿိတာ ဥပေက္ခာ, ဆ နေက္ခမ္မနိဿိတာ ဥပေက္ခာတိ, ဣမာနိ ဆ ဆက္ကာနိ, အတီတာပိ ဆတ္တိံသဝိဓါ ဝေဒနာ, အနာဂတာပိ ဆတ္တိံသဝိဓါ ဝေဒနာ, ပစ္စုပ္ပန္နာပိ ဆတ္တိံသဝိဓါ ဝေဒနာ, တဒေကဇ္ဈံ အဘိသညုဟိတွာ အဘိသမ္ပိဏ္ဍေတွာ အဋ္ဌသတံ ဝေဒနာ ဟောန္တီ’’တိ။

‘‘ကလ္လောသိ, ဘန္တေ နာဂသေနာ’’တိ။

ဝေဒနာပဉ္ဟော ပဉ္စမော။

၆။ နာမရူပဧကတ္တနာနတ္တပဉ္ဟော

၆။ ရာဇာ အာဟ ‘‘ဘန္တေ နာဂသေန, ကော ပဋိသန္ဒဟတီ’’တိ? ထေရော အာဟ ‘‘နာမရူပံ ခေါ, မဟာရာဇ, ပဋိသန္ဒဟတီ’’တိ။ ‘‘ကိံ ဣမံ ယေဝ နာမရူပံ ပဋိသန္ဒဟတီ’’တိ? ‘‘န ခေါ, မဟာရာဇ, ဣမံ ယေဝ နာမရူပံ ပဋိသန္ဒဟတိ, ဣမိနာ ပန, မဟာရာဇ, နာမရူပေန ကမ္မံ ကရောတိ သောဘနံ ဝါ ပါပကံ ဝါ, တေန ကမ္မေန အညံ နာမရူပံ ပဋိသန္ဒဟတီ’’တိ။ ‘‘ယဒိ, ဘန္တေ, န ဣမံ ယေဝ နာမရူပံ ပဋိသန္ဒဟတိ, နနု သော မုတ္တော ဘဝိဿတိ ပါပကေဟိ ကမ္မေဟီ’’တိ? ထေရော အာဟ ‘‘ယဒိ န ပဋိသန္ဒဟေယျ, မုတ္တော ဘဝေယျ ပါပကေဟိ ကမ္မေဟိ။ ယသ္မာ စ ခေါ, မဟာရာဇ, ပဋိသန္ဒဟတိ, တသ္မာ န မုတ္တော ပါပကေဟိ ကမ္မေဟီ’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကောစိဒေဝ ပုရိသော အညတရဿ ပုရိသဿ အမ္ဗံ အဝဟရေယျ, တမေနံ အမ္ဗသာမိကော ဂဟေတွာ ရညော ဒဿေယျ ‘ဣမိနာ ဒေဝ ပုရိသေန မယှံ အမ္ဗာ အဝဟဋာ’တိ, သော ဧဝံ ဝဒေယျ ‘နာဟံ, ဒေဝ, ဣမဿ အမ္ဗေ အဝဟရာမိ, အညေ တေ အမ္ဗာ, ယေ ဣမိနာ ရောပိတာ, အညေ တေ အမ္ဗာ, ယေ မယာ အဝဟဋာ, နာဟံ ဒဏ္ဍပ္ပတ္တော’တိ။ ကိံ နု ခေါ သော, မဟာရာဇ, ပုရိသော ဒဏ္ဍပ္ပတ္တော ဘဝေယျာ’’တိ? ‘‘အာမ, ဘန္တေ, ဒဏ္ဍပ္ပတ္တော ဘဝေယျာ’’တိ။ ‘‘ကေန ကာရဏေနာ’’တိ? ‘‘ကိဉ္စာပိ သော ဧဝံ ဝဒေယျ, ပုရိမံ, ဘန္တေ, အမ္ဗံ အပ္ပစ္စက္ခာယ ပစ္ဆိမေန အမ္ဗေန သော ပုရိသော ဒဏ္ဍပ္ပတ္တော ဘဝေယျာ’’တိ။ ‘‘ဧဝမေဝ ခေါ, မဟာရာဇ, ဣမိနာ နာမရူပေန ကမ္မံ ကရောတိ သောဘနံ ဝါ ပါပကံ ဝါ, တေန ကမ္မေန အညံ နာမရူပံ ပဋိသန္ဒဟတိ, တသ္မာ န မုတ္တော ပါပကေဟိ ကမ္မေဟီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, ကောစိဒေဝ ပုရိသော အညတရဿ ပုရိသဿ သာလိံ အဝဟရေယျ။ပေ။။ ဥစ္ဆုံ အဝဟရေယျ။ပေ။။ ယထာ မဟာရာဇ ကောစိ ပုရိသော ဟေမန္တကာလေ အဂ္ဂိံ ဇာလေတွာ ဝိသိဗ္ဗေတွာ [ဝိသီဝေတွာ (သီ။ ဣ။)] အဝိဇ္ဈာပေတွာ ပက္ကမေယျ, အထ ခေါ သော အဂ္ဂိ အညတရဿ ပုရိသဿ ခေတ္တံ ဍဟေယျ [ဥပဍဟေယျ (က။)], တမေနံ ခေတ္တသာမိကော ဂဟေတွာ ရညော ဒဿေယျ ‘ဣမိနာ, ဒေဝ, ပုရိသေန မယှံ ခေတ္တံ ဒဍ္ဎ’န္တိ။ သော ဧဝံ ဝဒေယျ ‘နာဟံ, ဒေဝ, ဣမဿ ခေတ္တံ ဈာပေမိ, အညော သော အဂ္ဂိ, ယော မယာ အဝိဇ္ဈာပိတော, အညော သော အဂ္ဂိ, ယေနိမဿ ခေတ္တံ ဒဍ္ဎံ, နာဟံ ဒဏ္ဍပ္ပတ္တော’တိ။ ကိံ နု ခေါ သော, မဟာရာဇ, ပုရိသော ဒဏ္ဍပ္ပတ္တော ဘဝေယျာ’’တိ? ‘‘အာမ, ဘန္တေ, ဒဏ္ဍပ္ပတ္တော ဘဝေယျာ’’တိ။ ‘‘ကေန ကာရဏေနာ’’တိ? ‘‘ကိဉ္စာပိ သော ဧဝံ ဝဒေယျ, ပုရိမံ, ဘန္တေ, အဂ္ဂိံ အပ္ပစ္စက္ခာယ ပစ္ဆိမေန အဂ္ဂိနာ သော ပုရိသော ဒဏ္ဍပ္ပတ္တော ဘဝေယျာ’’တိ။ ‘‘ဧဝမေဝ ခေါ, မဟာရာဇ, ဣမိနာ နာမရူပေန ကမ္မံ ကရောတိ သောဘနံ ဝါ ပါပကံ ဝါ, တေန ကမ္မေန အညံ နာမရူပံ ပဋိသန္ဒဟတိ, တသ္မာ န မုတ္တော ပါပကေဟိ ကမ္မေဟီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, ကောစိဒေဝ ပုရိသော ပဒီပံ အာဒါယ ပါသာဒံ အဘိရူဟိတွာ ဘုဉ္ဇေယျ, ပဒီပေါ ဈာယမာနော တိဏံ ဈာပေယျ, တိဏံ ဈာယမာနံ ဃရံ ဈာပေယျ, ဃရံ ဈာယမာနံ ဂါမံ ဈာပေယျ, ဂါမဇနော တံ ပုရိသံ ဂဟေတွာ ဧဝံ ဝဒေယျ ‘ကိဿ တွံ, ဘော ပုရိသ, ဂါမံ ဈာပေသီ’တိ, သော ဧဝံ ဝဒေယျ ‘နာဟံ, ဘော, ဂါမံ ဈာပေမိ, အညော သော ပဒီပဂ္ဂိ, ယဿာဟံ အာလောကေန ဘုဉ္ဇိံ, အညော သော အဂ္ဂိ, ယေန ဂါမော ဈာပိတော’တိ, တေ ဝိဝဒမာနာ တဝ သန္တိကေ အာဂစ္ဆေယျုံ, ကဿ တွံ, မဟာရာဇ, အဋ္ဋံ [အတ္ထံ (သီ။ ဣ။)] ဓါရေယျာသီ’’တိ? ‘‘ဂါမဇနဿ ဘန္တေ’’တိ။ ‘‘ကိံ ကာရဏာ’’တိ? ‘‘ကိဉ္စာပိ သော ဧဝံ ဝဒေယျ, အပိ စ တတော ဧဝ သော အဂ္ဂိ နိဗ္ဗတ္တော’’တိ။ ‘‘ဧဝမေဝ ခေါ, မဟာရာဇ, ကိဉ္စာပိ အညံ မာရဏန္တိကံ နာမရူပံ, အညံ ပဋိသန္ဓိသ္မိံ နာမရူပံ, အပိ စ တတော ယေဝ တံ နိဗ္ဗတ္တံ, တသ္မာ န မုတ္တော ပါပကေဟိ ကမ္မေဟီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, ကောစိဒေဝ ပုရိသော ဒဟရိံ ဒါရိကံ ဝါရေတွာ သုင်္ကံ ဒတွာ ပက္ကမေယျ။ သာ အပရေန သမယေန မဟတီ အဿ ဝယပ္ပတ္တာ, တတော အညော ပုရိသော သုင်္ကံ ဒတွာ ဝိဝါဟံ ကရေယျ, ဣတရော အာဂန္တွာ ဧဝံ ဝဒေယျ ‘ကိဿ ပန မေ တွံ, အမ္ဘော ပုရိသ, ဘရိယံ နေသီ’တိ? သော ဧဝံ ဝဒေယျ ‘နာဟံ တဝ ဘရိယံ နေမိ, အညာ သာ ဒါရိကာ ဒဟရီ တရုဏီ, ယာ တယာ ဝါရိတာ စ ဒိန္နသုင်္ကာ စ, အညာယံ ဒါရိကာ မဟတီ ဝယပ္ပတ္တာ မယာ ဝါရိတာ စ ဒိန္နသုင်္ကာ စာ’တိ, တေ ဝိဝဒမာနာ တဝ သန္တိကေ အာဂစ္ဆေယျုံ။ ကဿ တွံ, မဟာရာဇ, အဋ္ဋံ ဓါရေယျာသီ’’တိ? ‘‘ပုရိမဿ ဘန္တေ’’တိ။ ‘‘ကိံ ကာရဏာ’’တိ? ‘‘ကိဉ္စာပိ သော ဧဝံ ဝဒေယျ, အပိ စ တတော ယေဝ သာ မဟတီ နိဗ္ဗတ္တာ’’တိ။ ‘‘ဧဝမေဝ ခေါ, မဟာရာဇ, ကိဉ္စာပိ အညံ မာရဏန္တိကံ နာမရူပံ, အညံ ပဋိသန္ဓိသ္မိံ နာမရူပံ, အပိ စ တတော ယေဝ တံ နိဗ္ဗတ္တံ, တသ္မာ နပရိမုတ္တော ပါပကေဟိ ကမ္မေဟီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, ကောစိဒေဝ ပုရိသော ဂေါပါလကဿ ဟတ္ထတော ခီရဃဋံ ကိဏိတွာ တဿေဝ ဟတ္ထေ နိက္ခိပိတွာ ပက္ကမေယျ ‘သွေ ဂဟေတွာ ဂမိဿာမီ’တိ, တံ အပရဇ္ဇု ဒဓိ သမ္ပဇ္ဇေယျ။ သော အာဂန္တွာ ဧဝံ ဝဒေယျ ‘ဒေဟိ မေ ခီရဃဋ’န္တိ။ သော ဒဓိံ ဒဿေယျ။ ဣတရော ဧဝံ ဝဒေယျ ‘နာဟံ တဝ ဟတ္ထတော ဒဓိံ ကိဏာမိ, ဒေဟိ မေ ခီရဃဋ’န္တိ။ သော ဧဝံ ဝဒေယျ ‘အဇာနတော တေ ခီရံ ဒဓိဘူတ’န္တိ တေ ဝိဝဒမာနာ တဝ သန္တိကေ အာဂစ္ဆေယျုံ, ကဿ တွံ မဟာရာဇ, အဋ္ဋံ ဓါရေယျာသီ’’တိ? ‘‘ဂေါပါလကဿ ဘန္တေ’’တိ။ ‘‘ကိံ ကာရဏာ’’တိ? ‘‘ကိဉ္စာပိ သော ဧဝံ ဝဒေယျ, အပိ စ တတော ယေဝ တံ နိဗ္ဗတ္တ’’န္တိ။ ‘‘ဧဝမေဝ ခေါ, မဟာရာဇ, ကိဉ္စာပိ အညံ မာရဏန္တိကံ နာမရူပံ, အညံ ပဋိသန္ဓိသ္မိံ နာမရူပံ, အပိ စ တတော ယေဝ တံ နိဗ္ဗတ္တံ, တသ္မာ န ပရိမုတ္တော ပါပကေဟိ ကမ္မေဟီ’’တိ။

‘‘ကလ္လောသိ, ဘန္တေ နာဂသေနာ’’တိ။

နာမရူပဧကတ္တနာနတ္တပဉ္ဟော ဆဋ္ဌော။

၇။ ထေရပဋိသန္ဒဟနာပဋိသန္ဒဟနပဉ္ဟော

၇။ ရာဇာ အာဟ ‘‘ဘန္တေ နာဂသေန, တွံ ပန ပဋိသန္ဒဟိဿသီ’’တိ? ‘‘အလံ, မဟာရာဇ, ကိံ တေ တေန ပုစ္ဆိတေန, နနု မယာ ပဋိကစ္စေဝ အက္ခာတံ ‘သစေ, မဟာရာဇ, သဥပါဒါနော ဘဝိဿာမိ , ပဋိသန္ဒဟိဿာမိ, သစေ အနုပါဒါနော ဘဝိဿာမိ, န ပဋိသန္ဒဟိဿာမီ’’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကောစိဒေဝ ပုရိသော ရညော အဓိကာရံ ကရေယျ။ ရာဇာ တုဋ္ဌော အဓိကာရံ ဒဒေယျ, သော တေန အဓိကာရေန ပဉ္စဟိ ကာမဂုဏေဟိ သမပ္ပိတော သမင်္ဂိဘူတော ပရိစရေယျ, သော စေ ဇနဿ အာရောစေယျ ‘န မေ ရာဇာ ကိဉ္စိ ပဋိကရောတီ’ တိ။ ကိံ နု ခေါ သော, မဟာရာဇ, ပုရိသော ယုတ္တကာရီ ဘဝေယျာ’’တိ? ‘‘န ဟိ ဘန္တေ’’တိ။ ‘‘ဧဝမေဝ ခေါ, မဟာရာဇ , ကိံ တေ တေန ပုစ္ဆိတေန, နနု မယာ ပဋိကစ္စေဝ အက္ခာတံ ‘သစေ သဥပါဒါနော ဘဝိဿာမိ, ပဋိသန္ဒဟိဿာမိ, သစေ အနုပါဒါနော ဘဝိဿာမိ, န ပဋိသန္ဒဟိဿာမီ’’’တိ။

‘‘ကလ္လောသိ, ဘန္တေ နာဂသေနာ’’တိ။

ထေရပဋိသန္ဒဟနာပဋိသန္ဒဟနပဉ္ဟော သတ္တမော။

၈။ နာမရူပပဋိသန္ဒဟနပဉ္ဟော

၈။ ရာဇာ အာဟ ‘‘ဘန္တေ နာဂသေန, ယံ ပနေတံ ဗြူသိ ‘နာမရူပ’န္တိ, တတ္ထ ကတမံ နာမံ, ကတမံ ရူပ’’န္တိ။ ‘‘ယံ တတ္ထ, မဟာရာဇ, ဩဠာရိကံ, ဧတံ ရူပံ, ယေ တတ္ထ သုခုမာ စိတ္တစေတသိကာ ဓမ္မာ, ဧတံ နာမ’’န္တိ။ ‘‘ဘန္တေ နာဂသေန, ကေန ကာရဏေန နာမံ ယေဝ န ပဋိသန္ဒဟတိ, ရူပံ ယေဝ ဝါ’’တိ? ‘‘အညမညူပနိဿိတာ, မဟာရာဇ, ဧတေ ဓမ္မာ ဧကတောဝ ဥပ္ပဇ္ဇန္တီ’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကုက္ကုဋိယာ ကလလံ န ဘဝေယျ, အဏ္ဍမ္ပိ န ဘဝေယျ, ယဉ္စ တတ္ထ ကလလံ, ယဉ္စ အဏ္ဍံ, ဥဘောပေတေ အညမညူပနိဿိတာ, ဧကတောဝ နေသံ ဥပ္ပတ္တိ ဟောတိ။ ဧဝမေဝ ခေါ, မဟာရာဇ, ယဒိ တတ္ထ နာမံ န ဘဝေယျ, ရူပမ္ပိ န ဘဝေယျ, ယဉ္စေဝ တတ္ထ နာမံ, ယဉ္စေဝ ရူပံ, ဥဘောပေတေ အညမညူပနိဿိတာ, ဧကတောဝ နေသံ ဥပ္ပတ္တိ ဟောတိ။ ဧဝမေတံ ဒီဃမဒ္ဓါနံ သန္ဓာဝိတ’’န္တိ။

‘‘ကလ္လောသိ, ဘန္တေ နာဂသေနာ’’တိ။

နာမရူပပဋိသန္ဒဟနပဉ္ဟော အဋ္ဌမော။

၉။ အဒ္ဓါနပဉ္ဟော

၉။ ရာဇာ အာဟ ‘‘ဘန္တေ နာဂသေန, ယံ ပနေတံ ဗြူသိ ‘ဒီဃမဒ္ဓါန’န္တိ, ကိမေတံ အဒ္ဓါနံ နာမာ’’တိ ? ‘‘အတီတော, မဟာရာဇ, အဒ္ဓါ, အနာဂတော အဒ္ဓါ, ပစ္စုပ္ပန္နော အဒ္ဓါ’’တိ။ ‘‘ကိံ ပန, ဘန္တေ, သဗ္ဗေ အဒ္ဓါ အတ္ထီ’’တိ? ‘‘ကောစိ, မဟာရာဇ , အဒ္ဓါ အတ္ထိ, ကောစိ နတ္ထီ’’တိ။ ‘‘ကတမော ပန, ဘန္တေ, အတ္ထိ, ကတမော နတ္ထီ’’တိ? ‘‘ယေ တေ, မဟာရာဇ, သင်္ခါရာ အတီတာ ဝိဂတာ နိရုဒ္ဓါ ဝိပရိဏတာ, သော အဒ္ဓါ နတ္ထိ, ယေ ဓမ္မာ ဝိပါကာ, ယေ စ ဝိပါကဓမ္မဓမ္မာ, ယေ စ အညတြ ပဋိသန္ဓိံ ဒေန္တိ, သော အဒ္ဓါ အတ္ထိ။ ယေ သတ္တာ ကာလင်္ကတာ အညတြ ဥပ္ပန္နာ, သော စ အဒ္ဓါ အတ္ထိ။ ယေ သတ္တာ ကာလင်္ကတာ အညတြ အနုပ္ပန္နာ, သော အဒ္ဓါ နတ္ထိ။ ယေ စ သတ္တာ ပရိနိဗ္ဗုတာ, သော စ အဒ္ဓါ နတ္ထိ ပရိနိဗ္ဗုတတ္တာ’’တိ။

‘‘ကလ္လောသိ, ဘန္တေ နာဂသေနာ’’တိ။

အဒ္ဓါနပဉ္ဟော နဝမော။

အဒ္ဓါနဝဂ္ဂေါ ဒုတိယော။

ဣမသ္မိံ ဝဂ္ဂေ နဝ ပဉှာ။

၃။ ဝိစာရဝဂ္ဂေါ

၁။ အဒ္ဓါနမူလပဉ္ဟော

၁။ ရာဇာ အာဟ ‘‘ဘန္တေ နာဂသေန, အတီတဿ အဒ္ဓါနဿ ကိံ မူလံ, အနာဂတဿ အဒ္ဓါနဿ ကိံ မူလံ, ပစ္စုပ္ပန္နဿ အဒ္ဓါနဿ ကိံ မူလ’’န္တိ? ‘‘အတီတဿ စ, မဟာရာဇ, အဒ္ဓါနဿ အနာဂတဿ စ အဒ္ဓါနဿ ပစ္စုပ္ပန္နဿ စ အဒ္ဓါနဿ အဝိဇ္ဇာ မူလံ။ အဝိဇ္ဇာပစ္စယာ သင်္ခါရာ, သင်္ခါရပစ္စယာ ဝိညာဏံ, ဝိညာဏပစ္စယာ နာမရူပံ, နာမရူပပစ္စယာ သဠာယတနံ, သဠာယတနပစ္စယာ ဖဿော, ဖဿပစ္စယာ ဝေဒနာ, ဝေဒနာပစ္စယာ တဏှာ, တဏှာပစ္စယာ ဥပါဒါနံ, ဥပါဒါနပစ္စယာ ဘဝေါ, ဘဝပစ္စယာ ဇာတိ, ဇာတိပစ္စယာ ဇရာမရဏံ သောကပရိဒေဝဒုက္ခဒေါမနဿုပါယာသာ သမ္ဘဝန္တိ။ ဧဝမေတဿ ကေဝလဿ ဒုက္ခက္ခန္ဓဿ အဒ္ဓါနဿ [ဒုက္ခက္ခန္ဓဿ အဒ္ဓါနဿ (သီ။)] ပုရိမာ ကောဋိ န ပညာယတီ’’တိ။

‘‘ကလ္လောသိ, ဘန္တေ နာဂသေနာ’’တိ။

အဒ္ဓါနမူလပဉ္ဟော ပဌမော။

၂။ ပုရိမကောဋိပဉ္ဟော

၂။ ရာဇာ အာဟ ‘‘ဘန္တေ နာဂသေန, ယံ ပနေတံ ဗြူသိ ‘ပုရိမာ ကောဋိ န ပညာယတီ’တိ, တဿ ဩပမ္မံ ကရောဟီ’’တိ။ ‘‘ယထာ, မဟာရာဇ, ပုရိသော ပရိတ္တံ [ပရိပက္ကံ (က။)] ဗီဇံ ပထဝိယံ နိက္ခိပေယျ, တတော အင္ကုရော ဥဋ္ဌဟိတွာ အနုပုဗ္ဗေန ဝုဍ္ဎိံ ဝိရူဠှိံ ဝေပုလ္လံ အာပဇ္ဇိတွာ ဖလံ ဒဒေယျ။ တတော ဗီဇံ ဂဟေတွာ ပုန ရောပေယျ, တတောပိ အင္ကုရော ဥဋ္ဌဟိတွာ အနုပုဗ္ဗေန ဝုဍ္ဎိံ ဝိရူဠှိံ ဝေပုလ္လံ အာပဇ္ဇိတွာ ဖလံ ဒဒေယျ။ ဧဝမေတိဿာ သန္တတိယာ အတ္ထိ အန္တော’’တိ? ‘‘နတ္ထိ ဘန္တေ’’တိ။ ‘‘ဧဝမေဝ ခေါ, မဟာရာဇ, အဒ္ဓါနဿာပိ ပုရိမာ ကောဋိ န ပညာယတီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, ကုက္ကုဋိယာ အဏ္ဍံ ဘဝေယျ, အဏ္ဍတော ကုက္ကုဋီ ကုက္ကုဋိယာ အဏ္ဍန္တိ။ ဧဝမေတိဿာ သန္တတိယာ အတ္ထိ အန္တော’’တိ? ‘‘နတ္ထိ ဘန္တေ’’တိ။ ‘‘ဧဝမေဝ ခေါ, မဟာရာဇ, အဒ္ဓါနဿာပိ ပုရိမာ ကောဋိ န ပညာယတီ’’တိ။

‘‘ဘိယျော ဩပမ္မံ ကရောဟီ’’တိ။ ထေရော ပထဝိယာ စက္ကံ လိခိတွာ မိလိန္ဒံ ရာဇာနံ ဧတဒဝေါစ ‘‘အတ္ထိ, မဟာရာဇ, ဣမဿ စက္ကဿ အန္တော’’တိ? ‘‘နတ္ထိ ဘန္တေ’’တိ။ ‘‘ဧဝမေဝ ခေါ, မဟာရာဇ, ဣမာနိ စက္ကာနိ ဝုတ္တာနိ ဘဂဝတာ ‘စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏံ, တိဏ္ဏံ သင်္ဂတိ ဖဿော, ဖဿပစ္စယာ ဝေဒနာ, ဝေဒနာပစ္စယာ တဏှာ, တဏှာပစ္စယာ ဥပါဒါနံ, ဥပါဒါနပစ္စယာ ကမ္မံ, ကမ္မတော ပုန စက္ခုံ ဇာယတီ’တိ။ ဧဝမေတိဿာ သန္တတိယာ အတ္ထိ အန္တော’’တိ? ‘‘နတ္ထိ ဘန္တေ’’တိ။

‘‘‘သောတဉ္စ ပဋိစ္စ သဒ္ဒေ စ။ပေ။။ မနဉ္စ ပဋိစ္စ ဓမ္မေ စ ဥပ္ပဇ္ဇတိ မနောဝိညာဏံ, တိဏ္ဏံ သင်္ဂတိ ဖဿော, ဖဿပစ္စယာ ဝေဒနာ, ဝေဒနာပစ္စယာ တဏှာ, တဏှာပစ္စယာ ဥပါဒါနံ, ဥပါဒါနပစ္စယာ ကမ္မံ, ကမ္မတော ပုန မနော ဇာယတီ’တိ။ ဧဝမေတိဿာ သန္တတိယာ အတ္ထိ အန္တော’’တိ? ‘‘နတ္ထိ ဘန္တေ’’တိ။ ‘‘ဧဝမေဝ ခေါ, မဟာရာဇ, အဒ္ဓါနဿာပိ ပုရိမာ ကောဋိ န ပညာယတီ’’တိ။

‘‘ကလ္လောသိ, ဘန္တေ နာဂသေနာ’’တိ။

ပုရိမကောဋိပဉ္ဟော ဒုတိယော။

၃။ ကောဋိပညာယနပဉ္ဟော

၃။ ရာဇာ အာဟ ‘‘ဘန္တေ နာဂသေန, ယံ ပနေတံ ဗြူသိ ‘ပုရိမာ ကောဋိ န ပညာယတီ’တိ, ကတမာ စ သာ ပုရိမာ ကောဋီ’’တိ? ‘‘ယော ခေါ, မဟာရာဇ, အတီတော အဒ္ဓါ, ဧသာ ပုရိမာ ကောဋီ’’တိ။ ‘‘ဘန္တေ နာဂသေန, ယံ ပနေတံ ဗြူသိ ‘ပုရိမာ ကောဋိ န ပညာယတီ’တိ, ကိံ ပန, ဘန္တေ , သဗ္ဗာပိ ပုရိမာ ကောဋိ န ပညာယတီ’’တိ? ‘‘ကာစိ, မဟာရာဇ, ပညာယတိ, ကာစိ န ပညာယတီ’’တိ။ ‘‘ကတမာ, ဘန္တေ, ပညာယတိ, ကတမာ န ပညာယတီ’’တိ? ‘‘ဣတော ပုဗ္ဗေ, မဟာရာဇ, သဗ္ဗေန သဗ္ဗံ သဗ္ဗထာ သဗ္ဗံ အဝိဇ္ဇာ နာဟောသီတိ ဧသာ ပုရိမာ ကောဋိ န ပညာယတိ, ယံ အဟုတွာ သမ္ဘောတိ, ဟုတွာ ပဋိဝိဂစ္ဆတိ, ဧသပ ပုရိမာ ကောဋိ ပညာယတီ’’တိ ။

‘‘ဘန္တေ နာဂသေန, ယံ အဟုတွာ သမ္ဘောတိ, ဟုတွာ ပဋိဝိဂစ္ဆတိ, နနု တံ ဥဘတော ဆိန္နံ အတ္ထံ ဂစ္ဆတီ’’တိ? ‘‘ယဒိ, မဟာရာဇ, ဥဘတော ဆိန္နံ အတ္ထံ ဂစ္ဆတိ, ဥဘတော ဆိန္နာ သက္ကာ ဝဍ္ဎေတု’’န္တိ? ‘‘အာမ, သာပိ သက္ကာ ဝဍ္ဎေတု’’န္တိ။’’နာဟံ, ဘန္တေ, ဧတံ ပုစ္ဆာမိ ကောဋိတော သက္ကာ ဝဍ္ဎေတု’’န္တိ? ‘‘အာမ သက္ကာ ဝဍ္ဎေတု’’န္တိ။

‘‘ဩပမ္မံ ကရောဟီ’’တိ။ ထေရော တဿ ရုက္ခူပမံ အကာသိ, ခန္ဓာ စ ကေဝလဿ ဒုက္ခက္ခန္ဓဿ ဗီဇာနီ’’တိ။

‘‘ကလ္လောသိ, ဘန္တေ နာဂသေနာ’’တိ။

ကောဋိပညာယနပဉ္ဟော တတိယော။

၄။ သင်္ခါရဇာယမာနပဉ္ဟော

၄။ ရာဇာ အာဟ ‘‘ဘန္တေ နာဂသေန, အတ္ထိ ကေစိ သင်္ခါရာ, ယေ ဇာယန္တီ’’တိ? ‘‘အာမ, မဟာရာဇ, အတ္ထိ သင်္ခါရာ, ယေ ဇာယန္တီ’’တိ။ ‘‘ကတမေ တေ, ဘန္တေ’’တိ? ‘‘စက္ခုသ္မိဉ္စ ခေါ, မဟာရာဇ, သတိ ရူပေသု စ စက္ခုဝိညာဏံ ဟောတိ, စက္ခုဝိညာဏေ သတိ စက္ခုသမ္ဖဿော ဟောတိ, စက္ခုသမ္ဖဿေ သတိ ဝေဒနာ ဟောတိ, ဝေဒနာယ သတိ တဏှာ ဟောတိ, တဏှာယ သတိ ဥပါဒါနံ ဟောတိ, ဥပါဒါနေ သတိ ဘဝေါ ဟောတိ, ဘဝေ သတိ ဇာတိ ဟောတိ, ဇာတိယာ သတိ ဇရာမရဏံ သောကပရိဒေဝဒုက္ခဒေါမနဿုပါယာသာ သမ္ဘဝန္တိ, ဧဝမေတဿ ကေဝလဿ ဒုက္ခက္ခန္ဓဿ သမုဒယော ဟောတိ။ စက္ခုသ္မိဉ္စ ခေါ, မဟာရာဇ, အသတိ ရူပေသု စ အသတိ စက္ခုဝိညာဏံ န ဟောတိ, စက္ခုဝိညာဏေ အသတိ စက္ခုသမ္ဖဿော န ဟောတိ, စက္ခုသမ္ဖဿေ အသတိ ဝေဒနာ န ဟောတိ, ဝေဒနာယ အသတိ တဏှာ န ဟောတိ, တဏှာယ အသတိ ဥပါဒါနံ န ဟောတိ, ဥပါဒါနေ အသတိ ဘဝေါ န ဟောတိ, ဘဝေ အသတိ ဇာတိ န ဟောတိ, ဇာတိယာ အသတိ ဇရာမရဏံ သောကပရိဒေဝဒုက္ခဒေါမနဿုပါယာသာ န ဟောန္တိ, ဧဝမေတဿ ကေဝလဿ ဒုက္ခက္ခန္ဓဿ နိရောဓေါ ဟောတီ’’တိ။

‘‘ကလ္လောသိ, ဘန္တေ နာဂသေနာ’’တိ။

သင်္ခါရဇာယမာနပဉ္ဟော စတုတ္ထော။

၅။ ဘဝန္တသင်္ခါရဇာယမာနပဉ္ဟော

၅။ ရာဇာ အာဟ ‘‘ဘန္တေ နာဂသေန, အတ္ထိ ကေစိ သင်္ခါရာ, ယေ အဘဝန္တာ ဇာယန္တီ’’တိ? ‘‘နတ္ထိ, မဟာရာဇ, ကေစိ သင်္ခါရာ, ယေ အဘဝန္တာ ဇာယန္တိ, ဘဝန္တာ ယေဝ ခေါ, မဟာရာဇ, သင်္ခါရာ ဇာယန္တီ’’တိ။

‘‘ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, ဣဒံ ဂေဟံ အဘဝန္တံ ဇာတံ, ယတ္ထ တွံ နိသိန္နောသီ’’တိ? ‘‘နတ္ထိ ကိဉ္စိ, ဘန္တေ, ဣဓ အဘဝန္တံ ဇာတံ, ဘဝန္တံ ယေဝ ဇာတံ, ဣမာနိ ခေါ, ဘန္တေ, ဒါရူနိ ဝနေ အဟေသုံ, အယဉ္စ မတ္တိကာ ပထဝိယံ အဟောသိ, ဣတ္ထီနဉ္စ ပုရိသာနဉ္စ တဇ္ဇေန ဝါယာမေန ဧဝမိဒံ ဂေဟံ နိဗ္ဗတ္တ’’န္တိ။ ‘‘ဧဝမေဝ ခေါ, မဟာရာဇ, နတ္ထိ ကေစိ သင်္ခါရာ, ယေ အဘဝန္တာ ဇာယန္တိ, ဘဝန္တာ ယေဝ သင်္ခါရာ ဇာယန္တီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, ယေ ကေစိ ဗီဇဂါမဘူတဂါမာ ပထဝိယံ နိက္ခိတ္တာ အနုပုဗ္ဗေန ဝုဍ္ဎိံ ဝိရူဠှိံ ဝေပုလ္လံ အာပဇ္ဇမာနာ ပုပ္ဖာနိ စ ဖလာနိ စ ဒဒေယျုံ, န တေ ရုက္ခာ အဘဝန္တာ ဇာတာ, ဘဝန္တာ ယေဝ တေ ရုက္ခာ ဇာတာ။ ဧဝမေဝ ခေါ, မဟာရာဇ, နတ္ထိ ကေစိ သင်္ခါရာ, ယေ အဘဝန္တာ ဇာယန္တိ, ဘဝန္တာ ယေဝ တေ သင်္ခါရာ ဇာယန္တီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, ကုမ္ဘကာရော ပထဝိယာ မတ္တိကံ ဥဒ္ဓရိတွာ နာနာဘာဇနာနိ ကရောတိ, န တာနိ ဘာဇနာနိ အဘဝန္တာနိ ဇာတာနိ, ဘဝန္တာနိ ယေဝ ဇာတာနိ။ ဧဝမေဝ ခေါ, မဟာရာဇ, နတ္ထိ ကေစိ သင်္ခါရာ, ယေ အဘဝန္တာ ဇာယန္တိ, ဘဝန္တာ ယေဝ သင်္ခါရာ ဇာယန္တီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, ဝီဏာယ ပတ္တံ န သိယာ, စမ္မံ န သိယာ, ဒေါဏိ န သိယာ, ဒဏ္ဍော န သိယာ, ဥပဝီဏော န သိယာ, တန္တိယော န သိယုံ, ကောဏော န သိယာ, ပုရိသဿ စ တဇ္ဇော ဝါယာမော န သိယာ, ဇာယေယျ သဒ္ဒေါ’’တိ? ‘‘န ဟိ ဘန္တေ’’တိ။ ‘‘ယတော စ ခေါ, မဟာရာဇ, ဝီဏာယ ပတ္တံ သိယာ, စမ္မံ သိယာ, ဒေါဏိ သိယာ, ဒဏ္ဍော သိယာ, ဥပဝီဏော သိယာ, တန္တိယော သိယုံ, ကောဏော သိယာ, ပုရိသဿ စ တဇ္ဇော ဝါယာမော သိယာ, ဇာယေယျ သဒ္ဒေါ’’တိ? ‘‘အာမ, ဘန္တေ, ဇာယေယျာ’’တိ။ ‘‘ဧဝမေဝ ခေါ, မဟာရာဇ, နတ္ထိ ကေစိ သင်္ခါရာ, ယေ အဘဝန္တာ ဇာယန္တိ, ဘဝန္တာ ယေဝ ခေါ သင်္ခါရာ ဇာယန္တီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, အရဏိ န သိယာ, အရဏိပေါတကော န သိယာ, အရဏိယောတ္တကံ န သိယာ, ဥတ္တရာရဏိ န သိယာ, စောဠကံ န သိယာ, ပုရိသဿ စ တဇ္ဇော ဝါယာမော န သိယာ, ဇာယေယျ သော အဂ္ဂီ’’တိ? ‘‘န ဟိ ဘန္တေ’’တိ။ ‘‘ယတော စ ခေါ, မဟာရာဇ, အရဏိ သိယာ, အရဏိပေါတကော သိယာ, အရဏိယောတ္တကံ သိယာ, ဥတ္တရာရဏိ သိယာ, စောဠကံ သိယာ, ပုရိသဿ စ တဇ္ဇော ဝါယာမော သိယာ, ဇာယေယျ သော အဂ္ဂီ’’တိ? ‘‘အာမ, ဘန္တေ , ဇာယေယျာ’’တိ။ ‘‘ဧဝမေဝ ခေါ, မဟာရာဇ, နတ္ထိ ကေစိ သင်္ခါရာ, ယေ အဘဝန္တာ ဇာယန္တိ, ဘဝန္တာ ယေဝ ခေါ သင်္ခါရာ ဇာယန္တီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, မဏိ န သိယာ, အာတပေါ န သိယာ, ဂေါမယံ န သိယာ, ဇာယေယျ သော အဂ္ဂီ’’တိ? ‘‘န ဟိ ဘန္တေ’’တိ။ ‘‘ယတော စ ခေါ, မဟာရာဇ, မဏိ သိယာ, အာတပေါ သိယာ, ဂေါမယံ သိယာ, ဇာယေယျ သော အဂ္ဂီ’’တိ? ‘‘အာမ, ဘန္တေ, ဇာယေယျာ’’တိ။ ‘‘ဧဝမေဝ ခေါ, မဟာရာဇ, နတ္ထိ ကေစိ သင်္ခါရာ ယေ အဘဝန္တာ ဇာယန္တိ, ဘဝန္တာ ယေဝ ခေါ သင်္ခါရာ ဇာယန္တီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, အာဒါသော န သိယာ, အာဘာ န သိယာ, မုခံ န သိယာ, ဇာယေယျ အတ္တာ’’တိ? ‘‘န ဟိ, ဘန္တေ’’တိ။ ‘‘ယတော စ ခေါ, မဟာရာဇ, အာဒါသော သိယာ, အာဘာ သိယာ, မုခံ သိယာ, ဇာယေယျ အတ္တာ’’တိ? ‘‘အာမ, ဘန္တေ, ဇာယေယျာ’’တိ။ ‘‘ဧဝမေဝ ခေါ, မဟာရာဇ, နတ္ထိ ကေစိ သင်္ခါရာ, ယေ အဘဝန္တာ ဇာယန္တိ, ဘဝန္တာ ယေဝ ခေါ သင်္ခါရာ ဇာယန္တီ’’တိ။

‘‘ကလ္လောသိ , ဘန္တေ နာဂသေနာ’’တိ။

ဘဝန္တသင်္ခါရဇာယမာနပဉ္ဟော ပဉ္စမော။

၆။ ဝေဒဂူပဉ္ဟော

၆။ ရာဇာ အာဟ ‘‘ဘန္တေ နာဂသေန, ဝေဒဂူ ဥပလဗ္ဘတီ’’တိ? ‘‘ကော ပနေသ, မဟာရာဇ, ဝေဒဂူ နာမာ’’တိ? ‘‘ယော, ဘန္တေ, အဗ္ဘန္တရေ ဇီဝေါ စက္ခုနာ ရူပံ ပဿတိ, သောတေန သဒ္ဒံ သုဏာတိ, ဃာနေန ဂန္ဓံ ဃာယတိ, ဇိဝှာယ ရသံ သာယတိ, ကာယေန ဖောဋ္ဌဗ္ဗံ ဖုသတိ, မနသာ ဓမ္မံ ဝိဇာနာတိ, ယထာ မယံ ဣဓ ပါသာဒေ နိသိန္နာ ယေန ယေန ဝါတပါနေန ဣစ္ဆေယျာမ ပဿိတုံ, တေန တေန ဝါတပါနေန ပဿေယျာမ, ပုရတ္ထိမေနပိ ဝါတပါနေန ပဿေယျာမ, ပစ္ဆိမေနပိ ဝါတပါနေန ပဿေယျာမ, ဥတ္တရေနပိ ဝါတပါနေန ပဿေယျာမ, ဒက္ခိဏေနပိ ဝါတပါနေန ပဿေယျာမ။ ဧဝမေဝ ခေါ, ဘန္တေ, အယံ အဗ္ဘန္တရေ ဇီဝေါ ယေန ယေန ဒွါရေန ဣစ္ဆတိ ပဿိတုံ, တေန တေန ဒွါရေန ပဿတီ’’တိ။

ထေရော အာဟ ‘‘ပဉ္စဒွါရံ, မဟာရာဇ, ဘဏိဿာမိ, တံ သုဏောဟိ, သာဓုကံ မနသိကရောဟိ, ယဒိ အဗ္ဘန္တရေ ဇီဝေါ စက္ခုနာ ရူပံ ပဿတိ, ယထာ မယံ ဣဓ ပါသာဒေ နိသိန္နာ ယေန ယေန ဝါတပါနေန ဣစ္ဆေယျာမ ပဿိတုံ, တေန တေန ဝါတပါနေန ရူပံ ယေဝ ပဿေယျာမ, ပုရတ္ထိမေနပိ ဝါတပါနေန ရူပံ ယေဝ ပဿေယျာမ, ပစ္ဆိမေနပိ ဝါတပါနေန ရူပံ ယေဝ ပဿေယျာမ, ဥတ္တရေနပိ ဝါတပါနေန ရူပံ ယေဝ ပဿေယျာမ, ဒက္ခိဏေနပိ ဝါတပါနေန ရူပံ ယေဝ ပဿေယျာမ, ဧဝမေတေန အဗ္ဘန္တရေ ဇီဝေန သောတေနပိ ရူပံ ယေဝ ပဿိတဗ္ဗံ, ဃာနေနပိ ရူပံ ယေဝ ပဿိတဗ္ဗံ, ဇိဝှာယပိ ရူပံ ယေဝ ပဿိတဗ္ဗံ, ကာယေနပိ ရူပံ ယေဝ ပဿိတဗ္ဗံ, မနသာပိ ရူပံ ယေဝ ပဿိတဗ္ဗံ; စက္ခုနာပိ သဒ္ဒေါ ယေဝ သောတဗ္ဗော, ဃာနေနပိ သဒ္ဒေါ ယေဝ သောတဗ္ဗော, ဇိဝှာယပိ သဒ္ဒေါ ယေဝ သောတဗ္ဗော, ကာယေနပိ သဒ္ဒေါ ယေဝ သောတဗ္ဗော, မနသာပိ သဒ္ဒေါ ယေဝ သောတဗ္ဗော; စက္ခုနာပိ ဂန္ဓော ယေဝ ဃာယိတဗ္ဗော, သောတေနပိ ဂန္ဓော ယေဝ ဃာယိတဗ္ဗော, ဇိဝှာယပိ ဂန္ဓော ယေဝ ဃာယိတဗ္ဗော, ကာယေနပိ ဂန္ဓော ယေဝ ဃာယိတဗ္ဗော, မနသာပိ ဂန္ဓော ယေဝ ဃာယိတဗ္ဗော; စက္ခုနာပိ ရသော ယေဝ သာယိတဗ္ဗော, သောတေနပိ ရသော ယေဝ သာယိတဗ္ဗော, ဃာနေနပိ ရသော ယေဝ သာယိတဗ္ဗော, ကာယေနပိ ရသော ယေဝ သာယိတဗ္ဗော, မနသာပိ ရသော ယေဝ သာယိတဗ္ဗော; စက္ခုနာပိ ဖောဋ္ဌဗ္ဗံ ယေဝ ဖုသိတဗ္ဗံ, သောတေနပိ ဖောဋ္ဌဗ္ဗံ ယေဝ ဖုသိတဗ္ဗံ, ဃာနေနပိ ဖောဋ္ဌဗ္ဗံ ယေဝ ဖုသိတဗ္ဗံ, ဇိဝှာယပိ ဖောဋ္ဌဗ္ဗံ ယေဝ ဖုသိတဗ္ဗံ, မနသာပိ ဖောဋ္ဌဗ္ဗံ ယေဝ ဖုသိတဗ္ဗံ; စက္ခုနာပိ ဓမ္မံ ယေဝ ဝိဇာနိတဗ္ဗံ, သောတေနပိ ဓမ္မံ ယေဝ ဝိဇာနိတဗ္ဗံ, ဃာနေနပိ ဓမ္မံ ယေဝ ဝိဇာနိတဗ္ဗံ, ဇိဝှာယပိ ဓမ္မံ ယေဝ ဝိဇာနိတဗ္ဗံ, ကာယေနပိ ဓမ္မံ ယေဝ ဝိဇာနိတဗ္ဗ’’န္တိ? ‘‘န ဟိ ဘန္တေ’’တိ။

‘‘န ခေါ တေ, မဟာရာဇ, ယုဇ္ဇတိ ပုရိမေန ဝါ ပစ္ဆိမံ, ပစ္ဆိမေန ဝါ ပုရိမံ, ယထာ ဝါ ပန, မဟာရာဇ, မယံ ဣဓ ပါသာဒေ နိသိန္နာ ဣမေသု ဇာလဝါတပါနေသု ဥဂ္ဃါဋိတေသု မဟန္တေန အာကာသေန ဗဟိမုခါ သုဋ္ဌုတရံ ရူပံ ပဿာမ, ဧဝမေတေန အဗ္ဘန္တရေ ဇီဝေနာပိ စက္ခုဒွါရေသု ဥဂ္ဃါဋိတေသု မဟန္တေန အာကာသေန သုဋ္ဌုတရံ ရူပံ ပဿိတဗ္ဗံ, သောတေသု ဥဂ္ဃါဋိတေသု။ပေ။။ ဃာနေ ဥဂ္ဃါဋိတေ။ပေ။။ ဇိဝှာယ ဥဂ္ဃါဋိတာယ။ပေ။။ ကာယေ ဥဂ္ဃါဋိတေ မဟန္တေန အာကာသေန သုဋ္ဌုတရံ သဒ္ဒေါ သောတဗ္ဗော, ဂန္ဓော ဃာယိတဗ္ဗော, ရသော သာယိတဗ္ဗော, ဖောဋ္ဌဗ္ဗော ဖုသိတဗ္ဗော’’တိ? ‘‘န ဟိ ဘန္တေ’’တိ ။

‘‘န ခေါ တေ, မဟာရာဇ, ယုဇ္ဇတိ ပုရိမေန ဝါ ပစ္ဆိမံ, ပစ္ဆိမေန ဝါ ပုရိမံ, ယထာ ဝါ ပန, မဟာရာဇ, အယံ ဒိန္နော နိက္ခမိတွာ ဗဟိဒွါရကောဋ္ဌကေ တိဋ္ဌေယျ, ဇာနာသိ တွံ, မဟာရာဇ, ‘အယံ ဒိန္နော နိက္ခမိတွာ ဗဟိဒွါရကောဋ္ဌကေ ဌိတော’’’တိ? ‘‘အာမ, ဘန္တေ, ဇာနာမီ’’တိ။ ‘‘ယထာ ဝါ ပန, မဟာရာဇ, အယံ ဒိန္နော အန္တော ပဝိသိတွာ တဝ ပုရတော တိဋ္ဌေယျ, ဇာနာသိ တွံ, မဟာရာဇ, ‘အယံ ဒိန္နော အန္တော ပဝိသိတွာ မမ ပုရတော ဌိတော’’’တိ? ‘‘အာမ, ဘန္တေ, ဇာနာမီ’’တိ။ ‘‘ဧဝမေဝ ခေါ, မဟာရာဇ, အဗ္ဘန္တရေ သော ဇီဝေါ ဇိဝှာယ ရသေ နိက္ခိတ္တေ ဇာနေယျ အမ္ဗိလတ္တံ ဝါ လဝဏတ္တံ ဝါ တိတ္တကတ္တံ ဝါ ကဋုကတ္တံ ဝါ ကသာယတ္တံ ဝါ မဓုရတ္တံ ဝါ’’တိ? ‘‘အာမ, ဘန္တေ, ဇာနေယျာ’’တိ။ ‘‘တေ ရသေ အန္တော ပဝိဋ္ဌေ ဇာနေယျ အမ္ဗိလတ္တံ ဝါ လဝဏတ္တံ ဝါ တိတ္တကတ္တံ ဝါ ကဋုကတ္တံ ဝါ ကသာယတ္တံ ဝါ မဓုရတ္တံ ဝါ’’တိ။ ‘‘န ဟိ ဘန္တေ’’တိ။

‘‘န ခေါ တေ, မဟာရာဇ, ယုဇ္ဇတိ ပုရိမေန ဝါ ပစ္ဆိမံ, ပစ္ဆိမေန ဝါ ပုရိမံ, ယထာ, မဟာရာဇ, ကောစိဒေဝ ပုရိသော မဓုဃဋသတံ အာဟရာပေတွာ မဓုဒေါဏိံ ပူရာပေတွာ ပုရိသဿ မုခံ ပိဒဟိတွာ [ပိဒဟိတွာဝ (က။)] မဓုဒေါဏိယာ ပက္ခိပေယျ, ဇာနေယျ, မဟာရာဇ, သော ပုရိသော မဓုံ သမ္ပန္နံ ဝါ န သမ္ပန္နံ ဝါ’’တိ? ‘‘န ဟိ ဘန္တေ’’တိ။ ‘‘ကေန ကာရဏေနာ’’တိ။ ‘‘န ဟိ တဿ, ဘန္တေ, မုခေ မဓု ပဝိဋ္ဌ’’န္တိ။

‘‘န ခေါ တေ, မဟာရာဇ, ယုဇ္ဇတိ ပုရိမေန ဝါ ပစ္ဆိမံ, ပစ္ဆိမေန ဝါ ပုရိမ’’န္တိ။ ‘‘နာဟံ ပဋိဗလော တယာ ဝါဒိနာ သဒ္ဓိံ သလ္လပိတုံ; သာဓု, ဘန္တေ, အတ္ထံ ဇပ္ပေဟီ’’တိ။

ထေရော အဘိဓမ္မသံယုတ္တာယ ကထာယ ရာဇာနံ မိလိန္ဒံ သညာပေသိ – ‘‘ဣဓ, မဟာရာဇ, စက္ခုဉ္စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏံ, တံသဟဇာတာ ဖဿော ဝေဒနာ သညာ စေတနာ ဧကဂ္ဂတာ ဇီဝိတိန္ဒ္ရိယံ မနသိကာရောတိ ဧဝမေတေ ဓမ္မာ ပစ္စယတော ဇာယန္တိ, န ဟေတ္ထ ဝေဒဂူ ဥပလဗ္ဘတိ, သောတဉ္စ ပဋိစ္စ သဒ္ဒေ စ။ပေ။။ မနဉ္စ ပဋိစ္စ ဓမ္မေ စ ဥပ္ပဇ္ဇတိ မနောဝိညာဏံ, တံသဟဇာတာ ဖဿော ဝေဒနာ သညာ စေတနာ ဧကဂ္ဂတာ ဇီဝိတိန္ဒ္ရိယံ မနသိကာရောတိ ဧဝမေတေ ဓမ္မာ ပစ္စယတော ဇာယန္တိ, န ဟေတ္ထ ဝေဒဂူ ဥပလဗ္ဘတီ’’တိ။

‘‘ကလ္လောသိ, ဘန္တေ နာဂသေနာ’’တိ။

ဝေဒဂူပဉ္ဟော ဆဋ္ဌော။

၇။ စက္ခုဝိညာဏာဒိပဉ္ဟော

၇။ ရာဇာ အာဟ ‘‘ဘန္တေ နာဂသေန, ယတ္ထ စက္ခုဝိညာဏံ ဥပ္ပဇ္ဇတိ, တတ္ထ မနောဝိညာဏမ္ပိ ဥပ္ပဇ္ဇတီ’’တိ? ‘‘အာမ, မဟာရာဇ, ယတ္ထ စက္ခုဝိညာဏံ ဥပ္ပဇ္ဇတိ, တတ္ထ မနောဝိညာဏမ္ပိ ဥပ္ပဇ္ဇတီ’’တိ။

‘‘ကိံ နု ခေါ, ဘန္တေ နာဂသေန, ပဌမံ စက္ခုဝိညာဏံ ဥပ္ပဇ္ဇတိ, ပစ္ဆာ မနောဝိညာဏံ, ဥဒါဟု မနောဝိညာဏံ ပဌမံ ဥပ္ပဇ္ဇတိ, ပစ္ဆာ စက္ခုဝိညာဏ’’န္တိ? ‘‘ပဌမံ, မဟာရာဇ, စက္ခုဝိညာဏံ ဥပ္ပဇ္ဇတိ, ပစ္ဆာ မနောဝိညာဏ’’န္တိ။

‘‘ကိံ နု ခေါ, ဘန္တေ နာဂသေန, စက္ခုဝိညာဏံ မနောဝိညာဏံ အာဏာပေတိ ‘ယတ္ထာဟံ ဥပ္ပဇ္ဇာမိ, တွမ္ပိ တတ္ထ ဥပ္ပဇ္ဇာဟီ’တိ, ဥဒါဟု မနောဝိညာဏံ စက္ခုဝိညာဏံ အာဏာပေတိ ‘ယတ္ထ တွံ ဥပ္ပဇ္ဇိဿသိ, အဟမ္ပိ တတ္ထ ဥပ္ပဇ္ဇိဿာမီ’’’တိ? ‘‘န ဟိ, မဟာရာဇ, အနာလာပေါ တေသံ အညမညေဟီ’’တိ။

‘‘ကထံ , ဘန္တေ နာဂသေန, ယတ္ထ စက္ခုဝိညာဏံ ဥပ္ပဇ္ဇတိ, တတ္ထ မနောဝိညာဏမ္ပိ ဥပ္ပဇ္ဇတီ’’တိ? ‘‘နိန္နတ္တာ စ, မဟာရာဇ, ဒွါရတ္တာ စ စိဏ္ဏတ္တာ စ သမုဒါစရိတတ္တာ စာ’’တိ။

‘‘ကထံ, ဘန္တေ နာဂသေန, နိန္နတ္တာ ယတ္ထ စက္ခုဝိညာဏံ ဥပ္ပဇ္ဇတိ, တတ္ထ မနောဝိညာဏမ္ပိ ဥပ္ပဇ္ဇတိ? ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, ဒေဝေ ဝဿန္တေ ကတမေန ဥဒကံ ဂစ္ဆေယျာ’’တိ? ‘‘ယေန, ဘန္တေ, နိန္နံ, တေန ဂစ္ဆေယျာ’’တိ။ ‘‘အထာပရေန သမယေန ဒေဝေါ ဝဿေယျ, ကတမေန တံ ဥဒကံ ဂစ္ဆေယျာ’’တိ။ ‘‘ယေန, ဘန္တေ, ပုရိမံ ဥဒကံ ဂတံ, တမ္ပိ တေန ဂစ္ဆေယျာ’’တိ။

‘‘ကိံ နုံ ခေါ, မဟာရာဇ, ပုရိမံ ဥဒကံ ပစ္ဆိမံ ဥဒကံ အာဏာပေတိ ‘ယေနာဟံ ဂစ္ဆာမိ, တွမ္ပိ တေန ဂစ္ဆာဟီ’တိ, ပစ္ဆိမံ ဝါ ဥဒကံ ပုရိမံ ဥဒကံ အာဏာပေတိ ‘ယေန တွံ ဂစ္ဆိဿသိ, အဟမ္ပိ တေန ဂစ္ဆိဿာမီ’’’တိ။ ‘‘န ဟိ, ဘန္တေ, အနာလာပေါ တေသံ အညမညေဟိ, နိန္နတ္တာ ဂစ္ဆန္တီ’’တိ။ ‘‘ဧဝမေဝ ခေါ, မဟာရာဇ, နိန္နတ္တာ ယတ္ထ စက္ခုဝိညာဏံ ဥပ္ပဇ္ဇတိ, တတ္ထ မနောဝိညာဏမ္ပိ ဥပ္ပဇ္ဇတိ, န စက္ခုဝိညာဏံ မနောဝိညာဏံ အာဏာပေတိ ‘ယတ္ထာဟံ ဥပ္ပဇ္ဇာမိ, တွမ္ပိ တတ္ထ ဥပ္ပဇ္ဇာဟီ’တိ, နာပိ မနောဝိညာဏံ စက္ခုဝိညာဏံ အာဏာပေတိ ‘ယတ္ထ တွံ ဥပ္ပဇ္ဇိဿသိ, အဟမ္ပိ တတ္ထ ဥပ္ပဇ္ဇိဿာမီ’တိ, အနာလာပေါ တေသံ အညမညေဟိ, နိန္နတ္တာ ဥပ္ပဇ္ဇန္တီ’’’တိ။

‘‘ကထံ, ဘန္တေ နာဂသေန, ဒွါရတ္တာ ယတ္ထ စက္ခုဝိညာဏံ ဥပ္ပဇ္ဇတိ, တတ္ထ မနောဝိညာဏမ္ပိ ဥပ္ပဇ္ဇတိ? အပေပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, ရညော ပစ္စန္တိမံ နဂရံ အဿ ဒဠှပါကာရတောရဏံ ဧကဒွါရံ, တတော ပုရိသော နိက္ခမိတုကာမော ဘဝေယျ, ကတမေန နိက္ခမေယျာ’’တိ? ‘‘ဒွါရေန, ဘန္တေ, နိက္ခမေယျာ’’တိ။ ‘‘အထာပရော ပုရိသော နိက္ခမိတုကာမော ဘဝေယျ, ကတမေန သော နိက္ခမေယျာ’’တိ? ‘‘ယေန, ဘန္တေ, ပုရိမော ပုရိသော နိက္ခန္တော, သောပိ တေန နိက္ခမေယျာ’’တိ။

‘‘ကိံ နု ခေါ, မဟာရာဇ, ပုရိမော ပုရိသော ပစ္ဆိမံ ပုရိသံ အာဏာပေတိ ‘ယေနာဟံ ဂစ္ဆာမိ, တွမ္ပိ တေန ဂစ္ဆာဟီ’တိ, ပစ္ဆိမော ဝါ ပုရိသော ပုရိမံ ပုရိသံ အာဏာပေတိ ‘ယေန တွံ ဂစ္ဆိဿသိ, အဟမ္ပိ တေန ဂစ္ဆိဿာမီ’တိ။ ‘‘န ဟိ, ဘန္တေ, အနာလာပေါ တေသံ အညမညေဟိ, ဒွါရတ္တာ ဂစ္ဆန္တီ’’တိ။ ‘‘ဧဝမေဝ ခေါ, မဟာရာဇ, ဒွါရတ္တာ ယတ္ထ စက္ခုဝိညာဏံ ဥပ္ပဇ္ဇတိ, တတ္ထ မနောဝိညာဏမ္ပိ ဥပ္ပဇ္ဇတိ, န စက္ခုဝိညာဏံ မနောဝိညာဏံ အာဏာပေတိ ‘ယတ္ထာဟံ ဥပ္ပဇ္ဇာမိ , တွမ္ပိ တတ္ထ ဥပ္ပဇ္ဇာဟီ’တိ, နာပိ မနောဝိညာဏံ စက္ခုဝိညာဏံ အာဏာပေတိ ‘ယတ္ထ တွံ ဥပ္ပဇ္ဇိဿသိ, အဟမ္ပိ တတ္ထ ဥပ္ပဇ္ဇိဿာမီ’တိ, အနာလာပေါ တေသံ အညမညေဟိ, ဒွါရတ္တာ ဥပ္ပဇ္ဇန္တီ’’တိ။

‘‘ကထံ, ဘန္တေ နာဂသေန, စိဏ္ဏတ္တာ ယတ္ထ စက္ခုဝိညာဏံ ဥပ္ပဇ္ဇတိ, တတ္ထ မနောဝိညာဏမ္ပိ ဥပ္ပဇ္ဇတိ?ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, ပဌမံ ဧကံ သကဋံ ဂစ္ဆေယျ, အထ ဒုတိယံ သကဋံ ကတမေန ဂစ္ဆေယျာ’’တိ? ‘‘ယေန, ဘန္တေ, ပုရိမံ သကဋံ ဂတံ, တမ္ပိ တေန ဂစ္ဆေယျာ’’တိ။

‘‘ကိံ နု ခေါ, မဟာရာဇ, ပုရိမံ သကဋံ ပစ္ဆိမံ သကဋံ အာဏာပေတိ ‘ယေနာဟံ ဂစ္ဆာမိ, တွမ္ပိ တေန ဂစ္ဆာဟီ’တိ, ပစ္ဆိမံ ဝါ သကဋံ ပုရိမံ သကဋံ အာဏာပေတိ ‘ယေန တွံ ဂစ္ဆိဿသိ, အဟမ္ပိ တေန ဂစ္ဆိဿာမီ’’’တိ။ ‘‘န ဟိ, ဘန္တေ, အနာလာပေါ တေသံ အညမညေဟိ, စိဏ္ဏတ္တာ ဂစ္ဆန္တီ’’တိ။ ‘‘ဧဝမေဝ ခေါ, မဟာရာဇ, စိဏ္ဏတ္တာ ယတ္ထ စက္ခုဝိညာဏံ ဥပ္ပဇ္ဇတိ, တတ္ထ မနောဝိညာဏမ္ပိ ဥပ္ပဇ္ဇတိ, န စက္ခုဝိညာဏံ မနောဝိညာဏံ အာဏာပေတိ ‘ယတ္ထာဟံ ဥပ္ပဇ္ဇာမိ, တွမ္ပိ တတ္ထ ဥပ္ပဇ္ဇာဟီ’တိ, နာပိ မနောဝိညာဏံ စက္ခုဝိညာဏံ အာဏာပေတိ ‘ယတ္ထ တွံ ဥပ္ပဇ္ဇိဿသိ, အဟမ္ပိ တတ္ထ ဥပ္ပဇ္ဇိဿာမီ’တိ, အနာလာပေါ တေသံ အညမညေဟိ, စိဏ္ဏတ္တာ ဥပ္ပဇ္ဇန္တီ’’တိ။

‘‘ကထံ, ဘန္တေ နာဂသေန, သမုဒါစရိတတ္တာ ယတ္ထ စက္ခုဝိညာဏံ ဥပ္ပဇ္ဇတိ, တတ္ထ မနောဝိညာဏမ္ပိ ဥပ္ပဇ္ဇတိ? ဩပမ္မံ ကရောဟီ’’တိ။ ‘‘ယထာ, မဟာရာဇ, မုဒ္ဒါဂဏနာသင်္ချာလေခါသိပ္ပဋ္ဌာနေသု အာဒိကမ္မိကဿ ဒန္ဓာယနာ ဘဝတိ, အထာပရေန သမယေန နိသမ္မကိရိယာယ သမုဒါစရိတတ္တာ အဒန္ဓာယနာ ဘဝတိ။ ဧဝမေဝ ခေါ, မဟာရာဇ, သမုဒါစရိတတ္တာ ယတ္ထ စက္ခုဝိညာဏံ ဥပ္ပဇ္ဇတိ, တတ္ထ မနောဝိညာဏမ္ပိ ဥပ္ပဇ္ဇတိ, န စက္ခုဝိညာဏံ မနောဝိညာဏံ အာဏာပေတိ ‘ယတ္ထာဟံ ဥပ္ပဇ္ဇာမိ, တွမ္ပိ တတ္ထ ဥပ္ပဇ္ဇာဟီ’တိ, နာပိ မနောဝိညာဏံ စက္ခုဝိညာဏံ အာဏာပေတိ ‘ယတ္ထ တွံ ဥပ္ပဇ္ဇိဿသိ, အဟမ္ပိ တတ္ထ ဥပ္ပဇ္ဇိဿာမီ’တိ, အနာလာပေါ တေသံ အညမညေဟိ, သမုဒါစရိတတ္တာ ဥပ္ပဇ္ဇန္တီ’’တိ။

‘‘ဘန္တေ နာဂသေန, ယတ္ထ သောတဝိညာဏံ ဥပ္ပဇ္ဇတိ, တတ္ထ မနောဝိညာဏမ္ပိ ဥပ္ပဇ္ဇတီတိ။ပေ။။ ယတ္ထ ဃာနဝိညာဏံ ဥပ္ပဇ္ဇတိ။ပေ။။ ယတ္ထ ဇိဝှာဝိညာဏံ ဥပ္ပဇ္ဇတိ ။ပေ။။ ယတ္ထ ကာယဝိညာဏံ ဥပ္ပဇ္ဇတိ, တတ္ထ မနောဝိညာဏမ္ပိ ဥပ္ပဇ္ဇတီ’’တိ? ‘‘အာမ, မဟာရာဇ, ယတ္ထ ကာယဝိညာဏံ ဥပ္ပဇ္ဇတိ, တတ္ထ မနောဝိညာဏမ္ပိ ဥပ္ပဇ္ဇတီ’’တိ။

‘‘ကိံ နု ခေါ, ဘန္တေ နာဂသေန, ပဌမံ ကာယဝိညာဏံ ဥပ္ပဇ္ဇတိ, ပစ္ဆာ မနောဝိညာဏံ, ဥဒါဟု မနောဝိညာဏံ ပဌမံ ဥပ္ပဇ္ဇတိ, ပစ္ဆာ ကာယဝိညာဏ’’န္တိ? ‘‘ကာယဝိညာဏံ, မဟာရာဇ, ပဌမံ ဥပ္ပဇ္ဇတိ, ပစ္ဆာ မနောဝိညာဏ’’န္တိ။

‘‘ကိံ နု ခေါ, ဘန္တေ နာဂသေန,။ပေ။။ အနာလာပေါ တေသံ အညမညေဟိ, သမုဒါစရိတတ္တာ ဥပ္ပဇ္ဇန္တီ’’တိ။

‘‘ကလ္လောသိ, ဘန္တေ နာဂသေနာ’’တိ။

စက္ခုဝိညာဏာဒိပဉ္ဟော သတ္တမော။

၈။ ဖဿလက္ခဏပဉ္ဟော

၈။ ရာဇာ အာဟ ‘‘ဘန္တေ နာဂသေန, ယတ္ထ မနောဝိညာဏံ ဥပ္ပဇ္ဇတိ, ဖဿောပိ ဝေဒနာပိ တတ္ထ ဥပ္ပဇ္ဇတီ’’တိ? ‘‘အာမ, မဟာရာဇ, ယတ္ထ မနောဝိညာဏံ ဥပ္ပဇ္ဇတိ, ဖဿောပိ တတ္ထ ဥပ္ပဇ္ဇတိ, ဝေဒနာပိ တတ္ထ ဥပ္ပဇ္ဇတိ, သညာပိ တတ္ထ ဥပ္ပဇ္ဇတိ, စေတနာပိ တတ္ထ ဥပ္ပဇ္ဇတိ, ဝိတက္ကောပိ တတ္ထ ဥပ္ပဇ္ဇတိ, ဝိစာရောပိ တတ္ထ ဥပ္ပဇ္ဇတိ, သဗ္ဗေပိ ဖဿပ္ပမုခါ ဓမ္မာ တတ္ထ ဥပ္ပဇ္ဇန္တီ’’တိ။

‘‘ဘန္တေ နာဂသေန, ကိံလက္ခဏော ဖဿော’’တိ? ‘‘ဖုသနလက္ခဏော, မဟာရာဇ, ဖဿော’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ဒွေ မေဏ္ဍာ ယုဇ္ဈေယျုံ, တေသု ယထာ ဧကော မေဏ္ဍော, ဧဝံ စက္ခု ဒဋ္ဌဗ္ဗံ ယထာ ဒုတိယော မေဏ္ဍော, ဧဝံ ရူပံ ဒဋ္ဌဗ္ဗံ။ ယထာ တေသံ သန္နိပါတော, ဧဝံ ဖဿော ဒဋ္ဌဗ္ဗော’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, ဒွေ ပါဏီ ဝဇ္ဇေယျုံ, တေသု ယထာ ဧကော ပါဏိ, ဧဝံ စက္ခု ဒဋ္ဌဗ္ဗံ။ ယထာ ဒုတိယော ပါဏိ, ဧဝံ ရူပံ ဒဋ္ဌဗ္ဗံ။ ယထာ တေသံ သန္နိပါတော, ဧဝံ ဖဿော ဒဋ္ဌဗ္ဗော’’တိ။

‘‘ဘိယျော ဩပမ္မံ ကရောဟီ’’တိ။ ‘‘ယထာ, မဟာရာဇ, ဒွေ သမ္မာ ဝဇ္ဇေယျုံ, တေသု ယထာ ဧကော သမ္မော, ဧဝံ စက္ခု ဒဋ္ဌဗ္ဗံ။ ယထာ ဒုတိယော သမ္မော, ဧဝံ ရူပံ ဒဋ္ဌဗ္ဗံ။ ယထာ တေသံ သန္နိပါတော, ဧဝံ ဖဿော ဒဋ္ဌဗ္ဗော’’တိ။

‘‘ကလ္လောသိ, ဘန္တေ နာဂသေနာ’’တိ။

ဖဿလက္ခဏပဉ္ဟော အဋ္ဌမော။

၉။ ဝေဒနာလက္ခဏပဉ္ဟော

၉။ ‘‘ဘန္တေ နာဂသေန, ကိံလက္ခဏာ ဝေဒနာ’’တိ? ‘‘ဝေဒယိတလက္ခဏာ, မဟာရာဇ, ဝေဒနာ အနုဘဝနလက္ခဏာ စာ’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကောစိဒေဝ ပုရိသော ရညော အဓိကာရံ ကရေယျ, တဿ ရာဇာ တုဋ္ဌော အဓိကာရံ ဒဒေယျ, သော တေန အဓိကာရေန ပဉ္စဟိ ကာမဂုဏေဟိ သမပ္ပိတော သမင်္ဂိဘူတော ပရိစရေယျ, တဿ ဧဝမဿ ‘မယာ ခေါ ပုဗ္ဗေ ရညော အဓိကာရော ကတော, တဿ မေ ရာဇာ တုဋ္ဌော အဓိကာရံ အဒါသိ, သွာဟံ တတောနိဒါနံ ဣမံ ဧဝရူပံ ဝေဒနံ ဝေဒယာမီ’တိ။

‘‘ယထာ ဝါ ပန, မဟာရာဇ, ကောစိဒေဝ ပုရိသော ကုသလံ ကမ္မံ ကတွာ ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇေယျ, သော စ တတ္ထ ဒိဗ္ဗေဟိ ပဉ္စဟိ ကာမဂုဏေဟိ သမပ္ပိတော သမင်္ဂိဘူတော ပရိစရေယျ, တဿ ဧဝမဿ ‘သွာဟံ ခေါ ပုဗ္ဗေ ကုသလံ ကမ္မံ အကာသိံ, သောဟံ တတောနိဒါနံ ဣမံ ဧဝရူပံ ဝေဒနံ ဝေဒယာမီ’တိ, ဧဝံ ခေါ, မဟာရာဇ, ဝေဒယိတလက္ခဏာ ဝေဒနာ အနုဘဝနလက္ခဏာ စာ’’တိ။

‘‘ကလ္လောသိ , ဘန္တေ နာဂသေနာ’’တိ။

ဝေဒနာလက္ခဏပဉ္ဟော နဝမော။

၁၀။ သညာလက္ခဏပဉ္ဟော

၁၀။ ‘‘ဘန္တေ နာဂသေန, ကိံလက္ခဏာ သညာ’’တိ? ‘‘သဉ္ဇာနနလက္ခဏာ, မဟာရာဇ, သညာ။ ကိံ သဉ္ဇာနာတိ? နီလမ္ပိ သဉ္ဇာနာတိ, ဣတမ္ပိ သဉ္ဇာနာတိ, လောဟိတမ္ပိ သဉ္ဇာနာတိ, ဩဒါတမ္ပိ သဉ္ဇာနာတိ, မဉ္ဇိဋ္ဌမ္ပိ [မဉ္ဇေဋ္ဌမ္ပိ (သီ။ ဣ။)] သဉ္ဇာနာတိ။ ဧဝံ ခေါ, မဟာရာဇ, သဉ္ဇာနနလက္ခဏာ သညာ’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ရညော ဘဏ္ဍာဂါရိကော ဘဏ္ဍာဂါရံ ပဝိသိတွာ နီလဣတလောဟိတောဒါတမဉ္ဇိဋ္ဌာနိ [မဉ္ဇေဋ္ဌာနိ (သီ။ ဣ။)] ရာဇဘောဂါနိ ရူပါနိ ပဿိတွာ သဉ္ဇာနာတိ။ ဧဝံ ခေါ, မဟာရာဇ, သဉ္ဇာနနလက္ခဏာ သညာ’’တိ။

‘‘ကလ္လောသိ, ဘန္တေ နာဂသေနာ’’တိ။

သညာလက္ခဏပဉ္ဟော ဒသမော။

၁၁။ စေတနာလက္ခဏပဉ္ဟော

၁၁။ ‘‘ဘန္တေ နာဂသေန, ကိံလက္ခဏာ စေတနာ’’တိ? ‘‘စေတယိတလက္ခဏာ, မဟာရာဇ, စေတနာ အဘိသင်္ခရဏလက္ခဏာ စာ’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကောစိဒေဝ ပုရိသော ဝိသံ အဘိသင်္ခရိတွာ အတ္တနာ စ ပိဝေယျ, ပရေ စ ပါယေယျ, သော အတ္တနာပိ ဒုက္ခိတော ဘဝေယျ, ပရေပိ ဒုက္ခိတာ ဘဝေယျုံ။ ဧဝမေဝ ခေါ, မဟာရာဇ, ဣဓေကစ္စော ပုဂ္ဂလော အကုသလံ ကမ္မံ စေတနာယ စေတယိတွာ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇေယျ။ ယေပိ တဿ အနုသိက္ခန္တိ , တေပိ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇန္တိ။

‘‘ယထာ ဝါ ပန, မဟာရာဇ, ကောစိဒေဝ ပုရိသော သပ္ပိနဝနီတတေလမဓုဖာဏိတံ ဧကဇ္ဈံ အဘိသင်္ခရိတွာ အတ္တနာ စ ပိဝေယျ, ပရေ စ ပါယေယျ, သော အတ္တနာ သုခိတော ဘဝေယျ, ပရေပိ သုခိတာ ဘဝေယျုံ။ ဧဝမေဝ ခေါ, မဟာရာဇ, ဣဓေကစ္စော ပုဂ္ဂလော ကုသလံ ကမ္မံ စေတနာယ စေတယိတွာ ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတိ။ ယေပိ တဿ အနုသိက္ခန္တိ, တေပိ ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇန္တိ။ ဧဝံ ခေါ, မဟာရာဇ, စေတယိတလက္ခဏာ စေတနာ အဘိသင်္ခရဏလက္ခဏာ စာ’’တိ။

‘‘ကလ္လောသိ, ဘန္တေ နာဂသေနာ’’တိ။

စေတနာလက္ခဏပဉ္ဟော ဧကာဒသမော။

၁၂။ ဝိညာဏလက္ခဏပဉ္ဟော

၁၂။ ‘‘ဘန္တေ နာဂသေန, ကိံလက္ခဏံ ဝိညာဏ’’န္တိ? ‘‘ဝိဇာနနလက္ခဏံ, မဟာရာဇ, ဝိညာဏ’’န္တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, နဂရဂုတ္တိကော မဇ္ဈေ နဂရသိင်္ဃာဋကေ နိသိန္နော ပဿေယျ ပုရတ္ထိမဒိသတော ပုရိသံ အာဂစ္ဆန္တံ, ပဿေယျ ဒက္ခိဏဒိသတော ပုရိသံ အာဂစ္ဆန္တံ, ပဿေယျ ပစ္ဆိမဒိသတော ပုရိသံ အာဂစ္ဆန္တံ, ပဿေယျ ဥတ္တရဒိသတော ပုရိသံ အာဂစ္ဆန္တံ။ ဧဝမေဝ ခေါ, မဟာရာဇ, ယဉ္စ ပုရိသော စက္ခုနာ ရူပံ ပဿတိ, တံ ဝိညာဏေန ဝိဇာနာတိ။ ယဉ္စ သောတေန သဒ္ဒံ သုဏာတိ, တံ ဝိညာဏေန ဝိဇာနာတိ။ ယဉ္စ ဃာနေန ဂန္ဓံ ဃာယတိ, တံ ဝိညာဏေန ဝိဇာနာတိ။ ယဉ္စ ဇိဝှာယ ရသံ သာယတိ, တံ ဝိညာဏေန ဝိဇာနာတိ။ ယဉ္စ ကာယေန ဖောဋ္ဌဗ္ဗံ ဖုသတိ, တံ ဝိညာဏေန ဝိဇာနာတိ, ယဉ္စ မနသာ ဓမ္မံ ဝိဇာနာတိ, တံ ဝိညာဏေန ဝိဇာနာတိ။ ဧဝံ ခေါ, မဟာရာဇ, ဝိဇာနနလက္ခဏံ ဝိညာဏ’’န္တိ။

‘‘ကလ္လောသိ , ဘန္တေ နာဂသေနာ’’တိ။

ဝိညာဏလက္ခဏပဉ္ဟော ဒွါဒသမော။

၁၃။ ဝိတက္ကလက္ခဏပဉ္ဟော

၁၃။ ‘‘ဘန္တေ နာဂသေန, ကိံလက္ခဏော ဝိတက္ကော’’တိ? ‘‘အပ္ပနာလက္ခဏော မဟာရာဇ, ဝိတက္ကော’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ဝဍ္ဎကီ သုပရိကမ္မကတံ ဒါရုံ သန္ဓိသ္မိံ အပ္ပေတိ, ဧဝမေဝ ခေါ, မဟာရာဇ, အပ္ပနာလက္ခဏော ဝိတက္ကော’’တိ။

‘‘ကလ္လောသိ, ဘန္တေ နာဂသေနာ’’တိ။

ဝိတက္ကလက္ခဏပဉ္ဟော တေရသမော။

၁၄။ ဝိစာရလက္ခဏပဉ္ဟော

၁၄။ ‘‘ဘန္တေ နာဂသေန, ကိံလက္ခဏော ဝိစာရော’’တိ? ‘‘အနုမဇ္ဇနလက္ခဏော, မဟာရာဇ, ဝိစာရော’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကံသထာလံ အာကောဋိတံ ပစ္ဆာ အနုရဝတိ အနုသန္ဒဟတိ [အနုသဒ္ဒါယတိ (က။)], ယထာ, မဟာရာဇ, အာကောဋနာ, ဧဝံ ဝိတက္ကော ဒဋ္ဌဗ္ဗော။ ယထာ အနုရဝနာ [အနုမဇ္ဇနာ (က။)], ဧဝံ ဝိစာရော ဒဋ္ဌဗ္ဗော’’တိ။

‘‘ကလ္လောသိ , ဘန္တေ နာဂသေနာ’’တိ။

ဝိစာရလက္ခဏပဉ္ဟော စုဒ္ဒသမော။

ဝိစာရဝဂ္ဂေါ တတိယော။

ဣမသ္မိံ ဝဂ္ဂေ စုဒ္ဒသ ပဉှာ။

၄။ နိဗ္ဗာနဝဂ္ဂေါ

၁။ ဖဿာဒိဝိနိဗ္ဘုဇနပဉ္ဟော

၁။ ရာဇာ အာဟ ‘‘ဘန္တေ နာဂသေန, သက္ကာ ဣမေသံ ဓမ္မာနံ ဧကတောဘာဝဂတာနံ ဝိနိဗ္ဘုဇိတွာ ဝိနိဗ္ဘုဇိတွာ နာနာကရဏံ ပညာပေတုံ ‘အယံ ဖဿော, အယံ ဝေဒနာ, အယံ သညာ, အယံ စေတနာ, ဣဒံ ဝိညာဏံ, အယံ ဝိတက္ကော, အယံ ဝိစာရော’တိ’’? ‘‘န သက္ကာ, မဟာရာဇ, ဣမေသံ ဓမ္မာနံ ဧကတောဘာဝဂတာနံ ဝိနိဗ္ဘုဇိတွာ ဝိနိဗ္ဘုဇိတွာ နာနာကရဏံ ပညာပေတုံ ‘အယံ ဖဿော, အယံ ဝေဒနာ, အယံ သညာ, အယံ စေတနာ, ဣဒံ ဝိညာဏံ, အယံ ဝိတက္ကော, အယံ ဝိစာရော’’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ရညော သူဒေါ အရသံ ဝါ ရသံ ဝါ [ယူသံ ဝါ ရသံ ဝါ (သီ။ သျာ။ ဣ။)] ကရေယျ, သော တတ္ထ ဒဓိမ္ပိ ပက္ခိပေယျ, လောဏမ္ပိ ပက္ခိပေယျ, သိင်္ဂိဝေရမ္ပိ ပက္ခိပေယျ, ဇီရကမ္ပိ ပက္ခိပေယျ, မရိစမ္ပိ ပက္ခိပေယျ, အညာနိပိ ပကာရာနိ ပက္ခိပေယျ, တမေနံ ရာဇာ ဧဝံ ဝဒေယျ, ‘ဒဓိဿ မေ ရသံ အာဟရ, လောဏဿ မေ ရသံ အာဟရ, သိင်္ဂိဝေရဿ မေ ရသံ အာဟရ, ဇီရကဿ မေ ရသံ အာဟရ, မရိစဿ မေ ရသံ အာဟရ, သဗ္ဗေသံ မေ ပက္ခိတ္တာနံ ရသံ အာဟရာ’တိ။ သက္ကာ နု ခေါ, မဟာရာဇ, တေသံ ရသာနံ ဧကတောဘာဝဂတာနံ ဝိနိဗ္ဘုဇိတွာ ဝိနိဗ္ဘုဇိတွာ ရသံ အာဟရိတုံ အမ္ဗိလတ္တံ ဝါ လဝဏတ္တံ ဝါ တိတ္တကတ္တံ ဝါ ကဋုကတ္တံ ဝါ ကသာယတ္တံ ဝါ မဓုရတ္တံ ဝါ’’တိ? ‘‘န ဟိ, ဘန္တေ, သက္ကာ တေသံ ရသာနံ ဧကတောဘာဝဂတာနံ ဝိနိဗ္ဘုဇိတွာ ဝိနိဗ္ဘုဇိတွာ ရသံ အာဟရိတုံ အမ္ဗိလတ္တံ ဝါ လဝဏတ္တံ ဝါ တိတ္တကတ္တံ ဝါ ကဋုကတ္တံ ဝါ ကသာယတ္တံ ဝါ မဓုရတ္တံ ဝါ, အပိ စ ခေါ ပန သကေန သကေန လက္ခဏေန ဥပဋ္ဌဟန္တီ’’တိ။ ‘‘ဧဝမေဝ ခေါ, မဟာရာဇ, န သက္ကာ ဣမေသံ ဓမ္မာနံ ဧကတောဘာဝဂတာနံ ဝိနိဗ္ဘုဇိတွာ ဝိနိဗ္ဘုဇိတွာ နာနာကရဏံ ပညာပေတုံ ‘အယံ ဖဿော, အယံ ဝေဒနာ, အယံ သညာ, အယံ စေတနာ, ဣဒံ ဝိညာဏံ, အယံ ဝိတက္ကော, အယံ ဝိစာရော’တိ, အပိ စ ခေါ ပန သကေန သကေန လက္ခဏေန ဥပဋ္ဌဟန္တီ’’တိ။

‘‘ကလ္လောသိ , ဘန္တေ နာဂသေနာ’’တိ။

ဖဿာဒိဝိနိဗ္ဘုဇနပဉ္ဟော ပဌမော။

၂။ နာဂသေနပဉ္ဟော

၂။ ထေရော အာဟ ‘‘လောဏံ, မဟာရာဇ, စက္ခုဝိညေယျ’’န္တိ။ ‘‘အာမ, ဘန္တေ, စက္ခုဝိညေယျ’’န္တိ။ ‘‘သုဋ္ဌု ခေါ, မဟာရာဇ, ဇာနာဟီ’’တိ။ ‘‘ကိံ ပန, ဘန္တေ, ဇိဝှာဝိညေယျ’’န္တိ? ‘‘အာမ, မဟာရာဇ, ဇိဝှာဝိညေယျ’’န္တိ။ ‘‘ကိံ ပန, ဘန္တေ, သဗ္ဗံ လောဏံ ဇိဝှာယ ဝိဇာနာတီ’’တိ? ‘‘အာမ, မဟာရာဇ, သဗ္ဗံ လောဏံ ဇိဝှာယ ဝိဇာနာတိ’’။

‘‘ယဒိ, ဘန္တေ, သဗ္ဗံ လောဏံ ဇိဝှာယ ဝိဇာနာတိ, ကိဿ ပန တံ သကဋေဟိ ဗလီဗဒ္ဒါ [ဗလိဗဒ္ဒါ (သီ။ ဣ။)] အာဟရန္တိ, နနု လောဏမေဝ အာဟရိတဗ္ဗ’’န္တိ? ‘‘န သက္ကာ, မဟာရာဇ, လောဏမေဝ အာဟရိတုံ ဧကတောဘာဝဂတာ ဧတေ ဓမ္မာ ဂေါစရနာနတ္တဂတာ လောဏံ ဂရုဘာဝေါ စာတိ။ သက္ကာ ပန, မဟာရာဇ, လောဏံ တုလာယ တုလယိတု’’န္တိ? ‘‘အာမ, ဘန္တေ, သက္ကာ’’တိ။ ‘‘န သက္ကာ, မဟာရာဇ, လောဏံ တုလာယ တုလယိတုံ, ဂရုဘာဝေါ တုလာယ တုလိယတီ’’တိ။

‘‘ကလ္လောသိ, ဘန္တေ နာဂသေနာ’’တိ။

နာဂသေနပဉ္ဟော ဒုတိယော။

၃။ ပဉ္စာယတနကမ္မနိဗ္ဗတ္တပဉ္ဟော

၃။ ရာဇာ အာဟ ‘‘ဘန္တေ နာဂသေန, ယာနိမာနိ ပဉ္စာယတနာနိ, ကိံ နု တာနိ နာနာကမ္မေဟိ နိဗ္ဗတ္တာနိ, ဥဒါဟု ဧကေန ကမ္မေနာ’’တိ? ‘‘နာနာကမ္မေဟိ, မဟာရာဇ, နိဗ္ဗတ္တာနိ, န ဧကေန ကမ္မေနာ’’တိ။

‘‘ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, ဧကသ္မိံ ခေတ္တေ နာနာဗီဇာနိ ဝပ္ပေယျုံ , တေသံ နာနာဗီဇာနံ နာနာဖလာနိ နိဗ္ဗတ္တေယျု’’န္တိ? ‘‘အာမ, ဘန္တေ, နိဗ္ဗတ္တေယျု’’န္တိ။ ‘‘ဧဝမေဝ ခေါ, မဟာရာဇ, ယာနိ ယာနိ ပဉ္စာယတနာနိ, တာနိ တာနိ နာနာကမ္မေဟိ နိဗ္ဗတ္တာနိ, န ဧကေန ကမ္မေနာ’’တိ။

‘‘ကလ္လောသိ, ဘန္တေ နာဂသေနာ’’တိ။

ပဉ္စာယတနကမ္မနိဗ္ဗတ္တပဉ္ဟော တတိယော။

၄။ ကမ္မနာနာကရဏပဉ္ဟော

၄။ ရာဇာ အာဟ ‘‘ဘန္တေ နာဂသေန, ကေန ကာရဏေန မနုဿာ န သဗ္ဗေ သမကာ, အညေ အပ္ပါယုကာ, အညေ ဒီဃာယုကာ, အညေ ဗဟ္ဝာဗာဓါ အညေ အပ္ပါဗာဓါ, အညေ ဒုဗ္ဗဏ္ဏာ, အညေ ဝဏ္ဏဝန္တော, အညေ အပ္ပေသက္ခာ, အညေ မဟေသက္ခာ, အညေ အပ္ပဘောဂါ, အညေ မဟာဘောဂါ, အညေ နီစကုလီနာ, အညေ မဟာကုလီနာ, အညေ ဒုပ္ပညာ, အညေ ပညဝန္တော’’တိ?

ထေရော အာဟ ‘‘ကိဿ ပန, မဟာရာဇ, ရုက္ခာ န သဗ္ဗေ သမကာ, အညေ အမ္ဗိလာ, အညေ လဝဏာ, အညေ တိတ္တကာ, အညေ ကဋုကာ, အညေ ကသာဝါ, အညေ မဓုရာ’’တိ? ‘‘မညာမိ, ဘန္တေ, ဗီဇာနံ နာနာကရဏေနာ’’တိ။ ‘‘ဧဝမေဝ ခေါ, မဟာရာဇ, ကမ္မာနံ နာနာကရဏေန မနုဿာ န သဗ္ဗေ သမကာ, အညေ အပ္ပါယုကာ, အညေ ဒီဃာယုကာ, အညေ ဗဟ္ဝာဗာဓါ, အညေ အပ္ပါဗာဓါ, အညေ ဒုဗ္ဗဏ္ဏာ, အညေ ဝဏ္ဏဝန္တော, အညေ အပ္ပေသက္ခာ, အညေ မဟေသက္ခာ, အညေ အပ္ပဘောဂါ, အညေ မဟာဘောဂါ, အညေ နီစကုလီနာ, အညေ မဟာကုလီနာ, အညေ ဒုပ္ပညာ, အညေ ပညဝန္တော။ ဘာသိတမ္ပေတံ မဟာရာဇ ဘဂဝတာ – ‘ကမ္မဿကာ, မာဏဝ, သတ္တာ ကမ္မဒါယာဒါ ကမ္မယောနီ ကမ္မဗန္ဓူ ကမ္မပ္ပဋိသရဏာ, ကမ္မံ သတ္တေ ဝိဘဇတိ ယဒိဒံ ဟီနပ္ပဏီတတာယာ’’’တိ။

‘‘ကလ္လောသိ, ဘန္တေ နာဂသေနာ’’တိ။

ကမ္မနာနာကရဏပဉ္ဟော စတုတ္ထော။

၅။ ဝါယာမကရဏပဉ္ဟော

၅။ ရာဇာ အာဟ ‘‘ဘန္တေ နာဂသေန, တုမှေ ဘဏထ ‘ကိန္တိ ဣမံ ဒုက္ခံ နိရုဇ္ဈေယျ, အညဉ္စ ဒုက္ခံ နုပ္ပဇ္ဇေယျာ’တိ ။ ဧတဒတ္ထာ, မဟာရာဇ, အမှာကံ ပဗ္ဗဇ္ဇာ’’တိ။ ‘‘ကိံ ပဋိကစ္စေဝ ဝါယမိတေန, နနု သမ္ပတ္တေ ကာလေ ဝါယမိတဗ္ဗ’’န္တိ? ထေရော အာဟ ‘‘သမ္ပတ္တေ ကာလေ, မဟာရာဇ, ဝါယာမော အကိစ္စကရော ဘဝတိ, ပဋိကစ္စေဝ ဝါယာမော ကိစ္စကရော ဘဝတီ’’တိ။

‘‘ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, ယဒါ တွံ ပိပါသိတော ဘဝေယျာသိ, တဒါ တွံ ဥဒပါနံ ခဏာပေယျာသိ, တဠာကံ ခဏာပေယျာသိ ‘ပါနီယံ ပိဝိဿာမီ’တိ? ‘‘န ဟိ, ဘန္တေ’’တိ။ ‘‘ဧဝမေဝ ခေါ, မဟာရာဇ, သမ္ပတ္တေ ကာလေ ဝါယာမော အကိစ္စကရော ဘဝတိ, ပဋိကစ္စေဝ ဝါယာမော ကိစ္စကရော ဘဝတီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, ယဒါ တွံ ဗုဘုက္ခိတော ဘဝေယျာသိ, တဒါ တွံ ခေတ္တံ ကသာပေယျာသိ, သာလိံ ရောပါပေယျာသိ, ဓညံ အတိဟရာပေယျာသိ ‘ဘတ္တံ ဘုဉ္ဇိဿာမီ’တိ? ‘‘န ဟိ, ဘန္တေ’’တိ။ ‘‘ဧဝမေဝ ခေါ, မဟာရာဇ, သမ္ပတ္တေ ကာလေ ဝါယာမော အကိစ္စကရော ဘဝတိ, ပဋိကစ္စေဝ ဝါယာမော ကိစ္စကရော ဘဝတီတိ။

‘‘ဘိယျော ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, ယဒါ တေ သင်္ဂါမော ပစ္စုပဋ္ဌိတော ဘဝေယျ, တဒါ တွံ ပရိခံ ခဏာပေယျာသိ, ပါကာရံ ကာရာပေယျာသိ, ဂေါပုရံ ကာရာပေယျာသိ, အဋ္ဋာလကံ ကာရာပေယျာသိ, ဓညံ အတိဟရာပေယျာသိ, တဒါ တွံ ဟတ္ထိသ္မိံ သိက္ခေယျာသိ, အဿသ္မိံ သိက္ခေယျာသိ, ရထသ္မိံ သိက္ခေယျာသိ, ဓနုသ္မိံ သိက္ခေယျာသိ, ထရုသ္မိံ သိက္ခေယျာသီ’’တိ? ‘‘န ဟိ, ဘန္တေ’’တိ။ ‘‘ဧဝမေဝ ခေါ, မဟာရာဇ, သမ္ပတ္တေ ကာလေ ဝါယာမော အကိစ္စကရော ဘဝတိ, ပဋိကစ္စေဝ ဝါယာမော ကိစ္စကရော ဘဝတိ။ ဘာသိတမ္ပေတံ မဟာရာဇ ဘဂဝတာ –

‘‘‘ပဋိကစ္စေဝ တံ ကယိရာ၊ ယံ ဇညာ ဟိတမတ္တနော။

န သာကဋိကစိန္တာယ၊ မန္တာ ဓီရော ပရက္ကမေ။

‘‘‘ယထာ သာကဋိကော မဋ္ဌံ [နာမ (သီ။ ဣ။ က။) သံ။ နိ။ ၁။၁၀၃]၊ သမံ ဟိတွာ မဟာပထံ။

ဝိသမံ မဂ္ဂမာရုယှ၊ အက္ခစ္ဆိန္နောဝ ဈာယတိ။

‘‘‘ဧဝံ ဓမ္မာ အပက္ကမ္မ၊ အဓမ္မမနုဝတ္တိယ။

မန္ဒော မစ္စု မုခံ ပတ္တော၊ အက္ခစ္ဆိန္နောဝ ဈာယတီ’’’တိ [သောစတီတိ (သဗ္ဗတ္ထ)]။

‘‘ကလ္လောသိ, ဘန္တေ နာဂသေနာ’’တိ။

ဝါယာမကရဏပဉ္ဟော ပဉ္စမော။

၆။ နေရယိကဂ္ဂိဥဏှဘာဝပဉ္ဟော

၆။ ရာဇာ အာဟ ‘‘ဘန္တေ နာဂသေန, တုမှေ ဘဏထ ‘ပါကတိကအဂ္ဂိတော နေရယိကော အဂ္ဂိ မဟာဘိတာပတရော ဟောတိ, ခုဒ္ဒကောပိ ပါသာဏော ပါကတိကေ အဂ္ဂိမှိ ပက္ခိတ္တော ဒိဝသမ္ပိ ပစ္စမာနော [ဓမမာနော (သီ။ ဣ။)] န ဝိလယံ ဂစ္ဆတိ, ကူဋာဂါရမတ္တောပိ ပါသာဏော နေရယိကဂ္ဂိမှိ ပက္ခိတ္တော ခဏေန ဝိလယံ ဂစ္ဆတီ’တိ, ဧတံ ဝစနံ န သဒ္ဒဟာမိ, ဧဝဉ္စ ပန ဝဒေထ ‘ယေ စ တတ္ထ ဥပ္ပန္နာ သတ္တာ, တေ အနေကာနိပိ ဝဿသဟဿာနိ နိရယေ ပစ္စမာနာ န ဝိလယံ ဂစ္ဆန္တီ’တိ, တမ္ပိ ဝစနံ န သဒ္ဒဟာမီ’’တိ။

ထေရော အာဟ ‘‘တံ ကိံ မညသိ, မဟာရာဇ, ယာ တာ သန္တိ မကရိနိယောပိ သုသုမာရိနိယောပိ ကစ္ဆပိနိယောပိ မောရိနိယောပိ ကပေါတိနိယောပိ, ကိံနု တာ ကက္ခဠာနိ ပါသာဏာနိ သက္ခရာယော စ ခါဒန္တီ’’တိ? ‘‘အာမ, ဘန္တေ, ခါဒန္တီ’’တိ။ ‘‘ကိံ ပန တာနိ တာသံ ကုစ္ဆိယံ ကောဋ္ဌဗ္ဘန္တရဂတာနိ ဝိလယံ ဂစ္ဆန္တီ’’တိ? ‘‘အာမ, ဘန္တေ, ဝိလယံ ဂစ္ဆန္တီ’’တိ။ ‘‘ယော ပန တာသံ ကုစ္ဆိယံ ဂဗ္ဘော, သောပိ ဝိလယံ ဂစ္ဆတီ’’တိ? ‘‘န ဟိ ဘန္တေ’’တိ။ ‘‘ကေန ကာရဏေနာ’’တိ? ‘‘မညာမိ, ဘန္တေ, ကမ္မာဓိကတေန န ဝိလယံ ဂစ္ဆတီ’’တိ။ ‘‘ဧဝမေဝ ခေါ, မဟာရာဇ, ကမ္မာဓိကတေန နေရယိကာ သတ္တာ အနေကာနိပိ ဝဿသဟဿာနိ နိရယေ ပစ္စမာနာ န ဝိလယံ ဂစ္ဆန္တိ။ ဘာသိတမ္ပေတံ, မဟာရာဇ, ဘဂဝတာ – ‘သော န တာဝ ကာလံ ကရောတိ, ယာဝ န တံ ပါပကမ္မံ ဗျန္တီဟောတီ’’’တိ။

‘‘ဘိယျော ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, ယာ တာ သန္တိ သီဟိနိယောပိ ဗျဂ္ဃိနိယောပိ ဒီပိနိယောပိ ကုက္ကုရိနိယောပိ, ကိံနု တာ ကက္ခဠာနိ အဋ္ဌိကာနိ မံသာနိ ခါဒန္တီတိ? ‘‘အာမ, ဘန္တေ, ခါဒန္တီ’’တိ။ ‘‘ကိံ ပန တာနိ တာသံ ကုစ္ဆိယံ ကောဋ္ဌဗ္ဘန္တရဂတာနိ ဝိလယံ ဂစ္ဆန္တီ’’တိ? ‘‘အာမ, ဘန္တေ, ဝိလယံ ဂစ္ဆန္တီ’’တိ။ ‘‘ယော ပန တာသံ ကုစ္ဆိယံ ဂဗ္ဘော, သောပိ ဝိလယံ ဂစ္ဆတီ’’တိ? ‘‘န ဟိ ဘန္တေ’’တိ။ ‘‘ကေန ကာရဏေနာ’’တိ? ‘‘မညာမိ, ဘန္တေ, ကမ္မာဓိကတေန န ဝိလယံ ဂစ္ဆတီ’’တိ။ ‘‘ဧဝမေဝ ခေါ, မဟာရာဇ, ကမ္မာဓိကတေန နေရယိကာ သတ္တာ အနေကာနိပိ ဝဿသဟဿာနိ နိရယေ ပစ္စမာနာ န ဝိလယံ ဂစ္ဆန္တီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, ယာ တာ သန္တိ ယောနကသုခုမာလိနိယောပိ ခတ္တိယသုခုမာလိနိယောပိ ဗြာဟ္မဏသုခုမာလိနိယောပိ ဂဟပတိသုခုမာလိနိယောပိ, ကိံနု တာ ကက္ခဠာနိ ခဇ္ဇကာနိ မံသာနိ ခါဒန္တီ’’တိ? ‘‘အာမ, ဘန္တေ, ခါဒန္တီ’’တိ။ ‘‘ကိံ ပန တာနိ တာသံ ကုစ္ဆိယံ ကောဋ္ဌဗ္ဘန္တရဂတာနိ ဝိလယံ ဂစ္ဆန္တီ’’တိ? ‘‘အာမ, ဘန္တေ, ဝိလယံ ဂစ္ဆန္တီ’’တိ။ ‘‘ယော ပန တာသံ ကုစ္ဆိယံ ဂဗ္ဘော သောပိ ဝိလယံ ဂစ္ဆတီ’’တိ? ‘‘န ဟိ ဘန္တေ’’တိ။ ‘‘ကေန ကာရဏေနာ’’တိ။ ‘‘မညာမိ, ဘန္တေ, ကမ္မာဓိကတေန န ဝိလယံ ဂစ္ဆတီ’’တိ။ ‘‘ဧဝမေဝ ခေါ, မဟာရာဇ, ကမ္မာဓိကတေန နေရယိကာ သတ္တာ အနေကာနိပိ ဝဿသဟဿာနိ နိရယေ ပစ္စမာနာ န ဝိလယံ ဂစ္ဆန္တိ။ ဘာသိတမ္ပေတံ, မဟာရာဇ, ဘဂဝတာ – ‘‘သော န တာဝ ကာလံ ကရောတိ, ယာဝ န တံ ပါပကမ္မံ ဗျန္တီဟောတီ’’တိ။

‘‘ကလ္လောသိ, ဘန္တေ နာဂသေနာ’’တိ။

နေရယိကဂ္ဂိဥဏှဘာဝပဉ္ဟော ဆဋ္ဌော။

၇။ ပထဝိသန္ဓာရကပဉ္ဟော

၇။ ရာဇာ အာဟ ‘‘ဘန္တေ နာဂသေန, တုမှေ ဘဏထ ‘အယံ မဟာ ပထဝီ ဥဒကေ ပတိဋ္ဌိတာ, ဥဒကံ ဝါတေ ပတိဋ္ဌိတံ, ဝါတော အာကာသေ ပတိဋ္ဌိတော’တိ, ဧတမ္ပိ ဝစနံ န သဒ္ဒဟာမီ’’တိ။ ထေရော ဓမ္မကရကေန [ဓမ္မကရဏေန (က။)] ဥဒကံ ဂဟေတွာ ရာဇာနံ မိလိန္ဒံ သညာပေသိ ‘‘ယထာ, မဟာရာဇ, ဣမံ ဥဒကံ ဝါတေန အာဓါရိတံ, ဧဝံ တမ္ပိ ဥဒကံ ဝါတေန အာဓါရိတ’’န္တိ။

‘‘ကလ္လောသိ , ဘန္တေ နာဂသေနာ’’တိ။

ပထဝိသန္ဓာရကပဉ္ဟော သတ္တမော။

၈။ နိရောဓနိဗ္ဗာနပဉ္ဟော

၈။ ရာဇာ အာဟ ‘‘ဘန္တေ နာဂသေန, နိရောဓေါ နိဗ္ဗာန’’န္တိ? ‘‘အာမ, မဟာရာဇ, နိရောဓေါ နိဗ္ဗာန’’န္တိ။ ‘‘ကထံ, ဘန္တေ , နာဂသေန, နိရောဓေါ နိဗ္ဗာန’’န္တိ? ‘‘သဗ္ဗေ ဗာလပုထုဇ္ဇနာ ခေါ, မဟာရာဇ, အဇ္ဈတ္တိကဗာဟိရေ အာယတနေ အဘိနန္ဒန္တိ အဘိဝဒန္တိ အဇ္ဈောသာယ တိဋ္ဌန္တိ, တေ တေန သောတေန ဝုယှန္တိ, န ပရိမုစ္စန္တိ ဇာတိယာ ဇရာယ မရဏေန သောကေန ပရိဒေဝေန ဒုက္ခေဟိ ဒေါမနဿေဟိ ဥပါယာသေဟိ န ပရိမုစ္စန္တိ ဒုက္ခသ္မာတိ ဝဒါမိ။ သုတဝါ စ ခေါ, မဟာရာဇ, အရိယသာဝကော အဇ္ဈတ္တိကဗာဟိရေ အာယတနေ နာဘိနန္ဒတိ နာဘိဝဒတိ နာဇ္ဈောသာယ တိဋ္ဌတိ, တဿ တံ အနဘိနန္ဒတော အနဘိဝဒတော အနဇ္ဈောသာယ တိဋ္ဌတော တဏှာ နိရုဇ္ဈတိ, တဏှာနိရောဓါ ဥပါဒါနနိရောဓေါ, ဥပါဒါနနိရောဓါ ဘဝနိရောဓေါ, ဘဝနိရောဓါ ဇာတိနိရောဓေါ, ဇာတိနိရောဓါ ဇရာမရဏံ သောကပရိဒေဝဒုက္ခဒေါမနဿုပါယာသာ နိရုဇ္ဈန္တိ, ဧဝမေတဿ ကေဝလဿ ဒုက္ခက္ခန္ဓဿ နိရောဓေါ ဟောတိ, ဧဝံ ခေါ, မဟာရာဇ, နိရောဓေါ နိဗ္ဗာန’’န္တိ။

‘‘ကလ္လောသိ, ဘန္တေ နာဂသေနာ’’တိ။

နိရောဓနိဗ္ဗာနပဉ္ဟော အဋ္ဌမော။

၉။ နိဗ္ဗာနလဘနပဉ္ဟော

၉။ ရာဇာ အာဟ ‘‘ဘန္တေ နာဂသေန, သဗ္ဗေဝ လဘန္တိ နိဗ္ဗာန’’န္တိ? ‘‘န ခေါ, မဟာရာဇ, သဗ္ဗေဝ လဘန္တိ နိဗ္ဗာနံ, အပိ စ ခေါ, မဟာရာဇ, ယော သမ္မာ ပဋိပန္နော အဘိညေယျေ ဓမ္မေ အဘိဇာနာတိ, ပရိညေယျေ ဓမ္မေ ပရိဇာနာတိ, ပဟာတဗ္ဗေ ဓမ္မေ ပဇဟတိ, ဘာဝေတဗ္ဗေ ဓမ္မေ ဘာဝေတိ, သစ္ဆိကာတဗ္ဗေ ဓမ္မေ သစ္ဆိကရောတိ, သော လဘတိ နိဗ္ဗာန’’န္တိ။

‘‘ကလ္လောသိ , ဘန္တေ နာဂသေနာ’’တိ။

နိဗ္ဗာနလဘနပဉ္ဟော နဝမော။

၁၀။ နိဗ္ဗာနသုခဇာနနပဉ္ဟော

၁၀။ ရာဇာ အာဟ ‘‘ဘန္တေ နာဂသေန, ယော န လဘတိ နိဗ္ဗာနံ, ဇာနာတိ သော ‘သုခံ နိဗ္ဗာန’’’န္တိ? ‘‘အာမ, မဟာရာဇ, ယော န လဘတိ နိဗ္ဗာနံ, ဇာနာတိ သော ‘သုခံ နိဗ္ဗာန’’’န္တိ။ ‘‘ကထံ, ဘန္တေ နာဂသေန, အလဘန္တော ဇာနာတိ ‘သုခံ နိဗ္ဗာန’’’န္တိ? ‘‘တံ ကိံ မညသိ, မဟာရာဇ, ယေသံ နစ္ဆိန္နာ ဟတ္ထပါဒါ , ဇာနေယျုံ တေ, မဟာရာဇ, ‘ဒုက္ခံ ဟတ္ထပါဒစ္ဆေဒန’’’န္တိ? ‘‘အာမ, ဘန္တေ, ဇာနေယျု’’န္တိ။ ‘‘ကထံ ဇာနေယျု’’န္တိ? ‘‘အညေသံ, ဘန္တေ, ဆိန္နဟတ္ထပါဒါနံ ပရိဒေဝိတသဒ္ဒံ သုတွာ ဇာနန္တိ ‘ဒုက္ခံ ဟတ္ထပါဒစ္ဆေဒန’’’န္တိ ။ ‘‘ဧဝမေဝ ခေါ, မဟာရာဇ, ယေသံ ဒိဋ္ဌံ နိဗ္ဗာနံ, တေသံ သဒ္ဒံ သုတွာ ဇာနာတိ ‘သုခံ နိဗ္ဗာန’’’န္တိ။

‘‘ကလ္လောသိ, ဘန္တေ နာဂသေနာ’’တိ။

နိဗ္ဗာနသုခဇာနနပဉ္ဟော ဒသမော။

နိဗ္ဗာနဝဂ္ဂေါ စတုတ္ထော။

ဣမသ္မိံ ဝဂ္ဂေ ဒသ ပဉှာ။

၅။ ဗုဒ္ဓဝဂ္ဂေါ

၁။ ဗုဒ္ဓဿ အတ္ထိနတ္ထိဘာဝပဉ္ဟော

၁။ ရာဇာ အာဟ ‘‘ဘန္တေ နာဂသေန, ဗုဒ္ဓေါ တယာ ဒိဋ္ဌော’’တိ? ‘‘န ဟိ, မဟာရာဇာ’’တိ။ ‘‘အထ တေ အာစရိယေဟိ ဗုဒ္ဓေါ ဒိဋ္ဌော’’တိ? ‘‘န ဟိ, မဟာရာဇာ’’တိ။ ‘‘တေန ဟိ, ဘန္တေ နာဂသေန, နတ္ထိ ဗုဒ္ဓေါ’’တိ။ ‘‘ကိံ ပန, မဟာရာဇ, ဟိမဝတိ ဦဟာ နဒီ တယာ ဒိဋ္ဌာ’’တိ? ‘‘န ဟိ, ဘန္တေ’’တိ။ ‘‘အထ တေ ပိတရာ ဦဟာ နဒီ ဒိဋ္ဌာ’’တိ? ‘‘န ဟိ, ဘန္တေ’’တိ။ ‘‘တေန ဟိ, မဟာရာဇ, နတ္ထိ ဦဟာ နဒီ’’တိ။ ‘‘အတ္ထိ, ဘန္တေ, ကိဉ္စာပိ မယာ ဦဟာ နဒီ န ဒိဋ္ဌာ, ပိတရာပိ မေ ဦဟာ နဒီ န ဒိဋ္ဌာ, အပိ စ အတ္ထိ ဦဟာ နဒီ’’တိ။ ‘‘ဧဝမေဝ ခေါ, မဟာရာဇ, ကိဉ္စာပိ မယာ ဘဂဝါ န ဒိဋ္ဌော, အာစရိယေဟိပိ မေ ဘဂဝါ န ဒိဋ္ဌော, အပိ စ အတ္ထိ ဘဂဝါ’’တိ။

‘‘ကလ္လောသိ, ဘန္တေ နာဂသေနာ’’တိ။

ဗုဒ္ဓဿ အတ္ထိနတ္ထိဘာဝပဉ္ဟော ပဌမော။

၂။ ဗုဒ္ဓဿ အနုတ္တရဘာဝပဉ္ဟော

၂။ ရာဇာ အာဟ ‘‘ဘန္တေ နာဂသေန, ဗုဒ္ဓေါ အနုတ္တရော’’တိ? ‘‘အာမ, မဟာရာဇ, ဘဂဝါ အနုတ္တရော’’တိ။ ‘‘ကထံ, ဘန္တေ နာဂသေန, အဒိဋ္ဌပုဗ္ဗံ ဇာနာသိ ‘ဗုဒ္ဓေါ အနုတ္တရော’’’တိ? ‘‘တံ ကိံ မညသိ, မဟာရာဇ, ယေဟိ အဒိဋ္ဌပုဗ္ဗော မဟာသမုဒ္ဒေါ, ဇာနေယျုံ တေ, မဟာရာဇ, မဟန္တော ခေါ မဟာသမုဒ္ဒေါ ဂမ္ဘီရော အပ္ပမေယျော ဒုပ္ပရိယောဂါဟော, ယတ္ထိမာ ပဉ္စ မဟာနဒိယော သတတံ သမိတံ အပ္ပေန္တိ, သေယျထိဒံ, ဂင်္ဂါ ယမုနာ အစိရဝတီ သရဘူ မဟီ, နေဝ တဿ ဦနတ္တံ ဝါ ပူရတ္တံ ဝါ ပညာယတီ’’တိ ? ‘‘အာမ, ဘန္တေ, ဇာနေယျု’’န္တိ။ ‘‘ဧဝမေဝ ခေါ, မဟာရာဇ, သာဝကေ မဟန္တေ ပရိနိဗ္ဗုတေ ပဿိတွာ ဇာနာမိ ‘ဘဂဝါ အနုတ္တရော’’’တိ။

‘‘ကလ္လောသိ, ဘန္တေ နာဂသေနာ’’တိ။

ဗုဒ္ဓဿ အနုတ္တရဘာဝပဉ္ဟော ဒုတိယော။

၃။ ဗုဒ္ဓဿ အနုတ္တရဘာဝဇာနနပဉ္ဟော

၃။ ရာဇာ အာဟ ‘‘ဘန္တေ နာဂသေန, သက္ကာ ဇာနိတုံ ‘ဗုဒ္ဓေါ အနုတ္တရော’’’တိ? ‘‘အာမ, မဟာရာဇ, သက္ကာ ဇာနိတုံ ‘ဘဂဝါ အနုတ္တရော’’’တိ။ ‘‘ကထံ, ဘန္တေ နာဂသေန, သက္ကာ ဇာနိတုံ ‘ဗုဒ္ဓေါ အနုတ္တရော’’’တိ။ ‘‘ဘူတပုဗ္ဗံ, မဟာရာဇ, တိဿတ္ထေရော နာမ လေခါစရိယော အဟောသိ, ဗဟူနိ ဝဿာနိ အဗ္ဘတီတာနိ ကာလင်္ကတဿ ကထံ သော ဉာယတီ’’တိ။ ‘‘လေခေန ဘန္တေ’’တိ။ ‘‘ဧဝမေဝ ခေါ, မဟာရာဇ, ယော ဓမ္မံ ပဿတိ, သော ဘဂဝန္တံ ပဿတိ, ဓမ္မော ဟိ, မဟာရာဇ, ဘဂဝတာ ဒေသိတော’’တိ။

‘‘ကလ္လောသိ, ဘန္တေ နာဂသေနာ’’တိ။

ဗုဒ္ဓဿ အနုတ္တရဘာဝဇာနနပဉ္ဟော တတိယော။

၄။ ဓမ္မဒိဋ္ဌပဉ္ဟော

၄။ ရာဇာ အာဟ ‘‘ဘန္တေ နာဂသေန, ဓမ္မော တယာ ဒိဋ္ဌော’’တိ။ ‘‘ဗုဒ္ဓနေတ္တိယာ ခေါ, မဟာရာဇ, ဗုဒ္ဓပညတ္တိယာ ယာဝဇီဝံ သာဝကေဟိ ဝတ္တိတဗ္ဗ’’န္တိ။

‘‘ကလ္လောသိ, ဘန္တေ နာဂသေနာ’’တိ။

ဓမ္မဒိဋ္ဌပဉ္ဟော စတုတ္ထော။

၅။ အသင်္ကမနပဋိသန္ဒဟနပဉ္ဟော

၅။ ရာဇာ အာဟ ‘‘ဘန္တေ နာဂသေန, န စ သင်္ကမတိ ပဋိသန္ဒဟတိ စာ’’တိ? ‘‘အာမ, မဟာရာဇ, န စ သင်္ကမတိ ပဋိသန္ဒဟတိ စာ’’တိ။ ‘‘ကထံ, ဘန္တေ နာဂသေန, န စ သင်္ကမတိ ပဋိသန္ဒဟတိ စ, ဩပမ္မံ ကရောဟီ’’တိ? ‘‘ယထာ, မဟာရာဇ, ကောစိဒေဝ ပုရိသော ပဒီပတော ပဒီပံ ပဒီပေယျ, ကိံနု ခေါ သော, မဟာရာဇ, ပဒီပေါ ပဒီပမှာ သင်္ကန္တော’’တိ? ‘‘န ဟိ, ဘန္တေ’’တိ။ ‘‘ဧဝမေဝ ခေါ, မဟာရာဇ, န စ သင်္ကမတိ ပဋိသန္ဒဟတိ စာ’’တိ။

‘‘ဘိယျော ဩပမ္မံ ကရောဟီ’’တိ။ ‘‘အဘိဇာနာသိ နု, တွံ မဟာရာဇ, ဒဟရကော သန္တော သိလောကာစရိယဿ သန္တိကေ ကိဉ္စိ သိလောကံ ဂဟိတ’’န္တိ? ‘‘အာမ, ဘန္တေ’’တိ ။ ‘‘ကိံနု ခေါ, မဟာရာဇ, သော သိလောကော အာစရိယမှာ သင်္ကန္တော’’တိ? ‘‘န ဟိ, ဘန္တေ’’တိ။ ‘‘ဧဝမေဝ ခေါ, မဟာရာဇ, န စ သင်္ကမတိ ပဋိသန္ဒဟတိ စာတိ။

‘‘ကလ္လောသိ, ဘန္တေ နာဂသေနာ’’တိ။

အသင်္ကမနပဋိသန္ဒဟနပဉ္ဟော ပဉ္စမော။

၆။ ဝေဒဂူပဉ္ဟော

၆။ ရာဇာ အာဟ ‘‘ဘန္တေ နာဂသေန, ဝေဒဂူ ဥပလဗ္ဘတီ’’တိ? ထေရော အာဟ ‘‘ပရမတ္ထေန ခေါ, မဟာရာဇ, ဝေဒဂူ နုပလဗ္ဘတီ’’တိ။

‘‘ကလ္လောသိ, ဘန္တေ နာဂသေနာ’’တိ။

ဝေဒဂူပဉ္ဟော ဆဋ္ဌော။

၇။ အညကာယသင်္ကမနပဉ္ဟော

၇။ ရာဇာ အာဟ ‘‘ဘန္တေ နာဂသေန, အတ္ထိ ကောစိ သတ္တော ယော ဣမမှာ ကာယာ အညံ ကာယံ သင်္ကမတီ’’တိ? ‘‘န ဟိ, မဟာရာဇာ’’တိ။ ‘‘ယဒိ, ဘန္တေ နာဂသေန, ဣမမှာ ကာယာ အညံ ကာယံ သင်္ကမန္တော နတ္ထိ, နနု မုတ္တော ဘဝိဿတိ ပါပကေဟိ ကမ္မေဟီ’’တိ? ‘‘အာမ, မဟာရာဇ, ယဒိ န ပဋိသန္ဒဟေယျ, မုတ္တော ဘဝိဿတိ ပါပကေဟိ ကမ္မေဟီတိ, ယသ္မာ စ ခေါ, မဟာရာဇ, ပဋိသန္ဒဟတိ, တသ္မာ န ပရိမုတ္တော ပါပကေဟိ ကမ္မေဟီ’’တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကောစိဒေဝ ပုရိသော အညတရဿ ပုရိသဿ အမ္ဗံ အဝဟရေယျ, ကိံ သော ဒဏ္ဍပ္ပတ္တော ဘဝေယျာ’’တိ? ‘‘အာမ, ဘန္တေ, ဒဏ္ဍပ္ပတ္တော ဘဝေယျာ’’တိ။ ‘‘န ခေါ သော, မဟာရာဇ, တာနိ အမ္ဗာနိ အဝဟရိ, ယာနိ တေန ရောပိတာနိ, ကသ္မာ ဒဏ္ဍပ္ပတ္တော ဘဝေယျာ’’တိ? ‘‘တာနိ, ဘန္တေ, အမ္ဗာနိ နိဿာယ ဇာတာနိ, တသ္မာ ဒဏ္ဍပ္ပတ္တော ဘဝေယျာ’’တိ။ ‘‘ဧဝမေဝ ခေါ, မဟာရာဇ, ဣမိနာ နာမရူပေန ကမ္မံ ကရောတိ သောဘနံ ဝါ အသောဘနံ ဝါ, တေန ကမ္မေန အညံ နာမရူပံ ပဋိသန္ဒဟတိ, တသ္မာ န ပရိမုတ္တော ပါပကေဟိ ကမ္မေဟီ’’တိ။

‘‘ကလ္လောသိ, ဘန္တေ နာဂသေနာ’’တိ။

အညကာယသင်္ကမနပဉ္ဟော သတ္တမော။

၈။ ကမ္မဖလအတ္ထိဘာဝပဉ္ဟော

၈။ ရာဇာ အာဟ ‘‘ဘန္တေ နာဂသေန, ဣမိနာ နာမရူပေန ကမ္မံ ကတံ ကုသလံ ဝါ အကုသလံ ဝါ, ကုဟိံ တာနိ ကမ္မာနိ တိဋ္ဌန္တီ’’တိ? ‘‘အနုဗန္ဓေယျုံ ခေါ, မဟာရာဇ, တာနိ ကမ္မာနိ ဆာယာဝ အနပါယိနီ’’တိ [အနုပါယိနီတိ (က။)]။ ‘‘သက္ကာ ပန, ဘန္တေ, တာနိ ကမ္မာနိ ဒဿေတုံ ‘ဣဓ ဝါ ဣဓ ဝါ တာနိ ကမ္မာနိ တိဋ္ဌန္တီ’’’တိ? ‘‘န သက္ကာ, မဟာရာဇ, တာနိ ကမ္မာနိ ဒဿေတုံ ‘ဣဓ ဝါ ဣဓ ဝါ တာနိ ကမ္မာနိ တိဋ္ဌန္တီ’’’တိ။

‘‘ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, ယာနိမာနိ ရုက္ခာနိ အနိဗ္ဗတ္တဖလာနိ, သက္ကာ တေသံ ဖလာနိ ဒဿေတုံ ‘ဣဓ ဝါ ဣဓ ဝါ တာနိ ဖလာနိ တိဋ္ဌန္တီ’’’တိ။ ‘‘န ဟိ, ဘန္တေ’’တိ။ ‘‘ဧဝမေဝ ခေါ, မဟာရာဇ, အဗ္ဗောစ္ဆိန္နာယ သန္တတိယာ န သက္ကာ တာနိ ကမ္မာနိ ဒဿေတုံ ‘ဣဓ ဝါ ဣဓ ဝါ တာနိ ကမ္မာနိ တိဋ္ဌန္တီ’တိ။

‘‘ကလ္လောသိ, ဘန္တေ နာဂသေနာ’’တိ။

ကမ္မဖလအတ္ထိဘာဝပဉ္ဟော အဋ္ဌမော။

၉။ ဥပ္ပဇ္ဇတိဇာနနပဉ္ဟော

၉။ ရာဇာ အာဟ ‘‘ဘန္တေ နာဂသေန, ယော ဥပ္ပဇ္ဇတိ, ဇာနာတိ သော ‘ဥပ္ပဇ္ဇိဿာမီ’’’တိ? ‘‘အာမ, မဟာရာဇ, ယော ဥပ္ပဇ္ဇတိ ဇာနာတိ သော ‘ဥပ္ပဇ္ဇိဿာမီ’’’တိ။ ‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကဿကော ဂဟပတိကော ဗီဇာနိ ပထဝိယံ နိက္ခိပိတွာ သမ္မာ ဒေဝေ ဝဿန္တေ ဇာနာတိ ‘ဓညံ နိဗ္ဗတ္တိဿတီ’’’တိ? ‘‘အာမ, ဘန္တေ, ဇာနေယျာ’’တိ။ ‘‘ဧဝမေဝ ခေါ, မဟာရာဇ, ယော ဥပ္ပဇ္ဇတိ, ဇာနာတိ သော ‘ဥပ္ပဇ္ဇိဿာမီ’’’တိ။

‘‘ကလ္လောသိ, ဘန္တေ နာဂသေနာ’’တိ။

ဥပ္ပဇ္ဇတိဇာနနပဉ္ဟော နဝမော။

၁၀။ ဗုဒ္ဓနိဒဿနပဉ္ဟော

၁၀။ ရာဇာ အာဟ ‘‘ဘန္တေ နာဂသေန, ဗုဒ္ဓေါ အတ္ထီ’’တိ? ‘‘အာမ, မဟာရာဇ, ဘဂဝါ အတ္ထီ’’တိ။ ‘‘သက္ကာ ပန, ဘန္တေ နာဂသေန, ဗုဒ္ဓေါ နိဒဿေတုံ ဣဓဝါ ဣဓဝါ’’တိ? ‘‘ပရိနိဗ္ဗုတော, မဟာရာဇ, ဘဂဝါ အနုပါဒိသေသာယ နိဗ္ဗာနဓါတုယာ, န သက္ကာ ဘဂဝါ နိဒဿေတုံ ‘ဣဓ ဝါ ဣဓ ဝါ’’’တိ။

‘‘ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, မဟတော အဂ္ဂိက္ခန္ဓဿ ဇလမာနဿ ယာ အစ္စိ အတ္ထင်္ဂတာ, သက္ကာ သာ အစ္စိ ဒဿေတုံ ‘ဣဓ ဝါ ဣဓ ဝါ’’’တိ? ‘‘န ဟိ, ဘန္တေ, နိရုဒ္ဓါ သာ အစ္စိ အပ္ပညတ္တိံ ဂတာ’’တိ။ ‘‘ဧဝမေဝ ခေါ, မဟာရာဇ, ဘဂဝါ အနုပါဒိသေသာယ နိဗ္ဗာနဓါတုယာ ပရိနိဗ္ဗုတော အတ္ထင်္ဂတော, န သက္ကာ ဘဂဝါ နိဒဿေတုံ ‘ဣဓ ဝါ ဣဓ ဝါ’ တိ, ဓမ္မကာယေန ပန ခေါ, မဟာရာဇ, သက္ကာ ဘဂဝါ နိဒဿေတုံ။ ဓမ္မော ဟိ, မဟာရာဇ, ဘဂဝတာ ဒေသိတော’’တိ။

‘‘ကလ္လောသိ, ဘန္တေ နာဂသေနာ’’တိ။

ဗုဒ္ဓနိဒဿနပဉ္ဟော ဒသမော။

ဗုဒ္ဓဝဂ္ဂေါ ပဉ္စမော။

ဣမသ္မိံ ဝဂ္ဂေ ဒသ ပဉှာ။

၆။ သတိဝဂ္ဂေါ

၁။ ကာယပိယာယနပဉ္ဟော

၁။ ရာဇာ အာဟ ‘‘ဘန္တေ နာဂသေန, ပိယော ပဗ္ဗဇိတာနံ ကာယော’’တိ? ‘‘န ခေါ, မဟာရာဇ, ပိယော ပဗ္ဗဇိတာနံ ကာယော’’တိ။ ‘‘အထ ကိဿ နု ခေါ, ဘန္တေ, ကေလာယထ မမာယထာ’’တိ? ‘‘ကိံ ပန တေ, မဟာရာဇ, ကဒါစိ ကရဟစိ သင်္ဂါမဂတဿ ကဏ္ဍပ္ပဟာရော ဟောတီ’’တိ? ‘‘အာမ, ဘန္တေ, ဟောတီ’’တိ။ ‘‘ကိံနု ခေါ , မဟာရာဇ, သော ဝဏော အာလေပေန စ အာလိမ္ပီယတိ တေလေန စ မက္ခီယတိ သုခုမေန စ စောဠပဋ္ဋေန ပလိဝေဌီယတီ’’တိ? ‘‘အာမ, ဘန္တေ, အာလေပေန စ အာလိမ္ပီယတိ တေလေန စ မက္ခီယတိ သုခုမေန စ စောဠပဋ္ဋေန ပလိဝေဌီယတီ’’တိ။ ‘‘ကိံနု ခေါ, မဟာရာဇ, ပိယော တေ ဝဏော, တေန အာလေပေန စ အာလိမ္ပီယတိ တေလေန စ မက္ခီယတိ သုခုမေန စ စောဠပဋ္ဋေန ပလိဝေဌီယတီ’’တိ? ‘‘န မေ, ဘန္တေ, ပိယော ဝဏော, အပိ စ မံသဿ ရုဟနတ္ထာယ အာလေပေန စ အာလိမ္ပီယတိ တေလေန စ မက္ခီယတိ သုခုမေန စ စောဠပဋ္ဋေန ပလိဝေဌီယတီ’’တိ။ ‘‘ဧဝမေဝ ခေါ, မဟာရာဇ, အပ္ပိယော ပဗ္ဗဇိတာနံ ကာယော, အထ စ ပဗ္ဗဇိတာ အနဇ္ဈောသိတာ ကာယံ ပရိဟရန္တိ ဗြဟ္မစရိယာနုဂ္ဂဟာယ။ အပိ စ ခေါ, မဟာရာဇ, ဝဏူပမော ကာယော ဝုတ္တော ဘဂဝတာ, တေန ပဗ္ဗဇိတာ ဝဏမိဝ ကာယံ ပရိဟရန္တိ အနဇ္ဈောသိတာ။ ဘာသိတမ္ပေတံ မဟာရာဇ ဘဂဝတာ –

‘‘‘အလ္လစမ္မပဋိစ္ဆန္နော၊ နဝဒွါရော မဟာဝဏော။

သမန္တတော ပဂ္ဃရတိ၊ အသုစိပူတိဂန္ဓိယော’’’တိ။

‘‘ကလ္လောသိ, ဘန္တေ နာဂသေနာ’’တိ။

ကာယပိယာယနပဉ္ဟော ပဌမော။

၂။ သဗ္ဗညူဘာဝပဉ္ဟော

၂။ ရာဇာ အာဟ ‘‘ဘန္တေ နာဂသေန, ဗုဒ္ဓေါ သဗ္ဗညူ သဗ္ဗဒဿာဝီ’’တိ? ‘‘အာမ, မဟာရာဇ, ဘဂဝါ သဗ္ဗညူ သဗ္ဗဒဿာဝီ’’တိ။ ‘‘အထ ကိဿ နု ခေါ, ဘန္တေ နာဂသေန, သာဝကာနံ အနုပုဗ္ဗေန သိက္ခာပဒံ ပညပေသီ’’တိ? ‘‘အတ္ထိ ပန တေ မဟာရာဇ, ကောစိ ဝေဇ္ဇော, ယော ဣမိဿံ ပထဝိယံ သဗ္ဗဘေသဇ္ဇာနိ ဇာနာတီ’’တိ? ‘‘အာမ, ဘန္တေ, အတ္ထီ’’တိ။ ‘‘ကိံနု ခေါ, မဟာရာဇ, သော ဝေဇ္ဇော ဂိလာနကံ သမ္ပတ္တေ ကာလေ ဘေသဇ္ဇံ ပါယေတိ, ဥဒါဟု အသမ္ပတ္တေ ကာလေ’’တိ? ‘‘သမ္ပတ္တေ ကာလေ, ဘန္တေ, ဂိလာနကံ ဘေသဇ္ဇံ ပါယေတိ, နော အသမ္ပတ္တေ ကာလေ’’တိ? ‘‘ဧဝမေဝ ခေါ, မဟာရာဇ, ဘဂဝါ သဗ္ဗညူ သဗ္ဗဒဿာဝီ န အသမ္ပတ္တေ ကာလေ သာဝကာနံ သိက္ခာပဒံ ပညာပေတိ, သမ္ပတ္တေ ကာလေ သာဝကာနံ သိက္ခာပဒံ ပညာပေတိ ယာဝဇီဝံ အနတိက္ကမနီယ’’န္တိ။

‘‘ကလ္လောသိ, ဘန္တေ နာဂသေနာ’’တိ။

သဗ္ဗညူဘာဝပဉ္ဟော ဒုတိယော။

၃။ မဟာပုရိသလက္ခဏပဉ္ဟော

၃။ ရာဇာ အာဟ ‘‘ဘန္တေ နာဂသေန, ဗုဒ္ဓေါ ဒွတ္တိံသမဟာပုရိသလက္ခဏေဟိ သမန္နာဂတော အသီတိယာ စ အနုဗျဉ္ဇနေဟိ ပရိရဉ္ဇိတော သုဝဏ္ဏဝဏ္ဏော ကဉ္စနသန္နိဘတ္တစော ဗျာမပ္ပဘော’’တိ? ‘‘အာမ, မဟာရာဇ, ဘဂဝါ ဒွတ္တိံသမဟာပုရိသလက္ခဏေဟိ သမန္နာဂတော အသီတိယာ စ အနုဗျဉ္ဇနေဟိ ပရိရဉ္ဇိတော သုဝဏ္ဏဝဏ္ဏော ကဉ္စနသန္နိဘတ္တစော ဗျာမပ္ပဘော’’တိ။

‘‘ကိံ ပနဿ, ဘန္တေ, မာတာပိတရောပိ ဒွတ္တိံသမဟာပုရိသလက္ခဏေဟိ သမန္နာဂတာ အသီတိယာ စ အနုဗျဉ္ဇနေဟိ ပရိရဉ္ဇိတာ သုဝဏ္ဏဝဏ္ဏာ ကဉ္စနသန္နိဘတ္တစာ ဗျာမပ္ပဘာ’’တိ? ‘‘နော စဿ, မဟာရာဇ, မာတာပိတရော ဒွတ္တိံသမဟာပုရိသလက္ခဏေဟိ သမန္နာဂတာ အသီတိယာ စ အနုဗျဉ္ဇနေဟိ ပရိရဉ္ဇိတာ သုဝဏ္ဏဝဏ္ဏာ ကဉ္စနသန္နိဘတ္တစာ ဗျာမပ္ပဘာ’’တိ။

‘‘ဧဝံ သန္တေ ခေါ, ဘန္တေ နာဂသေန, န ဥပ္ပဇ္ဇတိ ဗုဒ္ဓေါ ဒွတ္တိံသမဟာပုရိသလက္ခဏေဟိ သမန္နာဂတော အသီတိယာ စ အနုဗျဉ္ဇနေဟိ ပရိရဉ္ဇိတော သုဝဏ္ဏဝဏ္ဏော ကဉ္စနသန္နိဘတ္တစော ဗျာမပ္ပဘောတိ, အပိ စ မာတုသဒိသော ဝါ ပုတ္တော ဟောတိ မာတုပက္ခော ဝါ, ပိတုသဒိသော ဝါ ပုတ္တော ဟောတိ ပိတုပက္ခော ဝါ’’တိ။ ထေရော အာဟ ‘‘အတ္ထိ ပန, မဟာရာဇ, ကိဉ္စိ ပဒုမံ သတပတ္တ’’န္တိ? ‘‘အာမ, ဘန္တေ, အတ္ထီ’’တိ။ ‘‘တဿ ပန ကုဟိံ သမ္ဘဝေါ’’တိ? ‘‘ကဒ္ဒမေ ဇာယတိ ဥဒကေ အာသီယတီ’’တိ ။ ‘‘ကိံနု ခေါ, မဟာရာဇ, ပဒုမံ ကဒ္ဒမေန သဒိသံ ဝဏ္ဏေန ဝါ ဂန္ဓေန ဝါ ရသေန ဝါ’’တိ? ‘‘န ဟိ, ဘန္တေ’’တိ။ ‘‘အထ ဥဒကေန ဝါ ဂန္ဓေန ဝါ ရသေန ဝါ’’တိ? ‘‘န ဟိ, ဘန္တေ’’တိ။ ‘‘ဧဝမေဝ ခေါ, မဟာရာဇ, ဘဂဝါ ဒွတ္တိံသမဟာပုရိသလက္ခဏေဟိ သမန္နာဂတော အသီတိယာ စ အနုဗျဉ္ဇနေဟိ ပရိရဉ္ဇိတော သုဝဏ္ဏဝဏ္ဏော ကဉ္စနသန္နိဘတ္တစော ဗျာမပ္ပဘော, နော စဿ မာတာပိတရော ဒွတ္တိံသမဟာပုရိသလက္ခဏေဟိ သမန္နာဂတာ အသီတိယာ စ အနုဗျဉ္ဇနေဟိ ပရိရဉ္ဇိတာ သုဝဏ္ဏဝဏ္ဏာ ကဉ္စနသန္နိဘတ္တစာ ဗျာမပ္ပဘာ’’တိ။

‘‘ကလ္လောသိ, ဘန္တေ နာဂသေနာ’’တိ။

မဟာပုရိသလက္ခဏပဉ္ဟော တတိယော။

၄။ ဘဂဝတော ဗြဟ္မစာရိပဉ္ဟော

၄။ ရာဇာ အာဟ ‘‘ဘန္တေ နာဂသေန, ဗုဒ္ဓေါ ဗြဟ္မစာရီ’’တိ? ‘‘အာမ, မဟာရာဇ, ဘဂဝါ ဗြဟ္မစာရီ’’တိ။ ‘‘တေန ဟိ, ဘန္တေ နာဂသေန, ဗုဒ္ဓေါ ဗြဟ္မုနော သိဿော’’တိ? ‘‘အတ္ထိ ပန တေ, မဟာရာဇ, ဟတ္ထိပါမောက္ခော’’တိ? ‘‘အတ္ထိ , ဘန္တေ’’တိ။ ‘‘ကိံနု ခေါ, မဟာရာဇ, သော ဟတ္ထီ ကဒါစိ ကရဟစိ ကောဉ္စနာဒံ နဒတီတိ? ‘‘အာမ, ဘန္တေ, နဒတီ’’တိ ‘‘တေန ဟိ, မဟာရာဇ, သော ဟတ္ထီ ကောဉ္စသကုဏဿ သိဿော’’တိ? ‘‘န ဟိ, ဘန္တေ’’တိ။ ‘‘ကိံ ပန, မဟာရာဇ, ဗြဟ္မာ သဗုဒ္ဓိကော အဗုဒ္ဓိကော’’တိ? ‘‘သဗုဒ္ဓိကော, ဘန္တေ’’တိ။ ‘‘တေန ဟိ, မဟာရာဇ, ဗြဟ္မာ ဘဂဝတော သိဿော’’တိ။

‘‘ကလ္လောသိ, ဘန္တေ နာဂသေနာ’’တိ။

ဘဂဝတော ဗြဟ္မစာရိပဉ္ဟော စတုတ္ထော။

၅။ ဘဂဝတော ဥပသမ္ပဒါပဉ္ဟော

၅။ ရာဇာ အာဟ ‘‘ဘန္တေ နာဂသေန, ဥပသမ္ပဒါ သုန္ဒရာ’’တိ? ‘‘အာမ, မဟာရာဇ, ဥပသမ္ပဒါ သုန္ဒရာ’’တိ။ ‘‘အတ္ထိ ပန, ဘန္တေ, ဗုဒ္ဓဿ ဥပသမ္ပဒါ, ဥဒါဟု နတ္ထီ’’တိ? ‘‘ဥပသမ္ပန္နော ခေါ, မဟာရာဇ , ဘဂဝါ ဗောဓိရုက္ခမူလေ သဟ သဗ္ဗညုတဉာဏေန, နတ္ထိ ဘဂဝတော ဥပသမ္ပဒါ အညေဟိ ဒိန္နာ, ယထာ သာဝကာနံ, မဟာရာဇ, ဘဂဝါ သိက္ခာပဒံ ပညပေတိ ယာဝဇီဝံ အနတိက္ကမနီယ’’န္တိ။

‘‘ကလ္လောသိ, ဘန္တေ နာဂသေနာ’’တိ။

ဘဂဝတော ဥပသမ္ပဒါပဉ္ဟော ပဉ္စမော။

၆။ အဿုဘေသဇ္ဇာဘေသဇ္ဇပဉ္ဟော

၆။ ရာဇာ အာဟ ‘‘ဘန္တေ နာဂသေန, ယော စ မာတရိ မတာယ ရောဒတိ, ယော စ ဓမ္မပေမေန ရောဒတိ, ဥဘိန္နံ တေသံ ရောဒန္တာနံ ကဿ အဿု ဘေသဇ္ဇံ, ကဿ န ဘေသဇ္ဇ’’န္တိ? ‘‘ဧကဿ ခေါ, မဟာရာဇ, အဿု ရာဂဒေါသမောဟေဟိ သမလံ ဥဏှံ, ဧကဿ ဣတိသောမနဿေန ဝိမလံ သီတလံ။ ယံ ခေါ, မဟာရာဇ, သီတလံ, တံ ဘေသဇ္ဇံ, ယံ ဥဏှံ, တံ န ဘေသဇ္ဇ’’န္တိ။

‘‘ကလ္လောသိ, ဘန္တေ နာဂသေနာ’’တိ။

အဿုဘေသဇ္ဇာဘေသဇ္ဇပဉ္ဟော ဆဋ္ဌော။

၇။ သရာဂဝီတရာဂနာနာကရဏပဉ္ဟော

၇။ ရာဇာ အာဟ ‘‘ဘန္တေ နာဂသေန, ကိံ နာနာကရဏံ သရာဂဿ စ ဝီတရာဂဿ စာ’’တိ? ‘‘ဧကော ခေါ, မဟာရာဇ, အဇ္ဈောသိတော, ဧကော အနဇ္ဈောသိတော’’တိ။ ‘‘ကိံ ဧတံ, ဘန္တေ, အဇ္ဈောသိတော အနဇ္ဈောသိတော နာမာ’’တိ? ‘‘ဧကော ခေါ, မဟာရာဇ, အတ္ထိကော, ဧကော အနတ္ထိကော’’တိ။ ‘‘ပဿာမဟံ, ဘန္တေ, ဧဝရူပံ ယော စ သရာဂေါ, ယော စ ဝီတရာဂေါ, သဗ္ဗောပေသော သောဘနံ ယေဝ ဣစ္ဆတိ ခါဒနီယံ ဝါ ဘောဇနီယံ ဝါ, န ကောစိ ပါပကံ ဣစ္ဆတီ’’တိ။ ‘‘အဝီတရာဂေါ ခေါ, မဟာရာဇ, ရသပဋိသံဝေဒီ စ ရသရာဂပဋိသံဝေဒီ စ ဘောဇနံ ဘုဉ္ဇတိ, ဝီတရာဂေါ ပန ရသပဋိသံဝေဒီ ဘောဇနံ ဘုဉ္ဇတိ, နော စ ခေါ ရသရာဂပဋိသံဝေဒီ’’တိ။

‘‘ကလ္လောသိ , ဘန္တေ နာဂသေနာ’’တိ။

သရာဂဝီတရာဂနာနာကရဏပဉ္ဟော သတ္တမော။

၈။ ပညာပတိဋ္ဌာနပဉ္ဟော

၈။ ရာဇာ အာဟ ‘‘ဘန္တေ နာဂသေန, ပညာ ကုဟိံ ပဋိဝသတီ’’တိ? ‘‘န ကတ္ထစိ မဟာရာဇာ’’တိ။ ‘‘တေန ဟိ, ဘန္တေ နာဂသေန, နတ္ထိ ပညာ’’တိ။ ‘‘ဝါတော, မဟာရာဇ, ကုဟိံ ပဋိဝသတီ’’တိ? ‘‘န ကတ္ထစိ ဘန္တေ’’တိ။ ‘‘တေန ဟိ, မဟာရာဇ, နတ္ထိ ဝါတော’’တိ။

‘‘ကလ္လောသိ, ဘန္တေ နာဂသေနာ’’တိ။

ပညာပတိဋ္ဌာနပဉ္ဟော အဋ္ဌမော။

၉။ သံသာရပဉ္ဟော

၉။ ရာဇာ အာဟ ‘‘ဘန္တေ နာဂသေန, ယံ ပနေတံ ဗြူသိ ‘သံသာရော’တိ, ကတမော သော သံသာရော’’တိ? ‘‘ဣဓ, မဟာရာဇ, ဇာတော ဣဓေဝ မရတိ, ဣဓ မတော အညတြ ဥပ္ပဇ္ဇတိ, တဟိံ ဇာတော တဟိံ ယေဝ မရတိ, တဟိံ မတော အညတြ ဥပ္ပဇ္ဇတိ, ဧဝံ ခေါ, မဟာရာဇ, သံသာရော ဟောတီ’’တိ။ ‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကောစိဒေဝ ပုရိသော ပက္ကံ အမ္ဗံ ခါဒိတွာ အဋ္ဌိံ ရောပေယျ, တတော မဟန္တော အမ္ဗရုက္ခော နိဗ္ဗတ္တိတွာ ဖလာနိ ဒဒေယျ, အထ သော ပုရိသော တတောပိ ပက္ကံ အမ္ဗံ ခါဒိတွာ အဋ္ဌိံ ရောပေယျ, တတောပိ မဟန္တော အမ္ဗရုက္ခော နိဗ္ဗတ္တိတွာ ဖလာနိ ဒဒေယျ, ဧဝမေတေသံ ရုက္ခာနံ ကောဋိ န ပညာယတိ, ဧဝမေဝ ခေါ, မဟာရာဇ, ဣဓ ဇာတော ဣဓေဝ မရတိ, ဣဓ မတော အညတြ ဥပ္ပဇ္ဇတိ, တဟိံ ဇာတော တဟိံ ယေဝ မရတိ, တဟိံ မတော အညတြ ဥပ္ပဇ္ဇတိ, ဧဝံ ခေါ, မဟာရာဇ, သံသာရော ဟောတီ’’တိ။

‘‘ကလ္လောသိ, ဘန္တေ နာဂသေနာ’’တိ။

သံသာရပဉ္ဟော နဝမော။

၁၀။ စိရကတသရဏပဉ္ဟော

၁၀။ ရာဇာ အာဟ ‘‘ဘန္တေ နာဂသေန, ကေန အတီတံ စိရကတံ သရတီ’’တိ? ‘‘သတိယာ, မဟာရာဇာ’’တိ။ ‘‘နနု, ဘန္တေ နာဂသေန, စိတ္တေန သရတိ နော သတိယာ’’တိ? ‘‘အဘိဇာနာသိ နု, တွံ မဟာရာဇ, ကိဉ္စိဒေဝ ကရဏီယံ ကတွာ ပမုဋ္ဌ’’န္တိ? ‘‘အာမ ဘန္တေ’’တိ။ ‘‘ကိံ နု ခေါ, တွံ မဟာရာဇ, တသ္မိံ သမယေ အစိတ္တကော အဟောသီ’’တိ? ‘‘န ဟိ, ဘန္တေ, သတိ တသ္မိံ သမယေ နာဟောသီ’’တိ။ ‘‘အထ ကသ္မာ, တွံ မဟာရာဇ, ဧဝမာဟ ‘စိတ္တေန သရတိ, နော သတိယာ’’’တိ?

‘‘ကလ္လောသိ, ဘန္တေ နာဂသေနာ’’တိ။

စိရကတသရဏပဉ္ဟော ဒသမော။

၁၁။ အဘိဇာနန္တသတိပဉ္ဟော

၁၁။ ရာဇာ အာဟ ‘‘ဘန္တေ နာဂသေန, သဗ္ဗာ သတိ အဘိဇာနန္တီ ဥပ္ပဇ္ဇတိ , ဥဒါဟု ကဋုမိကာဝ သတီ’’တိ? ‘‘အဘိဇာနန္တီပိ, မဟာရာဇ, ကဋုမိကာပိ သတီ’’တိ။ ‘‘ဧဝဉှိ ခေါ, ဘန္တေ နာဂသေန, သဗ္ဗာ သတိ အဘိဇာနန္တီ, နတ္ထိ ကဋုမိကာ သတီ’’တိ? ‘‘ယဒိ နတ္ထိ, မဟာရာဇ, ကဋုမိကာ သတိ, နတ္ထိ ကိဉ္စိ သိပ္ပိကာနံ ကမ္မာယတနေဟိ ဝါ သိပ္ပါယတနေဟိ ဝါ ဝိဇ္ဇာဋ္ဌာနေဟိ ဝါ ကရဏီယံ, နိရတ္ထကာ အာစရိယာ, ယသ္မာ စ ခေါ, မဟာရာဇ, အတ္ထိ ကဋုမိကာ သတိ, တသ္မာ အတ္ထိ ကမ္မာယတနေဟိ ဝါ သိပ္ပါယတနေဟိ ဝါ ဝိဇ္ဇာဋ္ဌာနေဟိ ဝါ ကရဏီယံ, အတ္ထော စ အာစရိယေဟီ’’တိ။

‘‘ကလ္လောသိ, ဘန္တေ နာဂသေနာ’’တိ။

အဘိဇာနန္တသတိပဉ္ဟော ဧကာဒသမော။

သတိဝဂ္ဂေါ ဆဋ္ဌော။

ဣမသ္မိံ ဝဂ္ဂေ ဧကာဒသ ပဉှာ။

၇။ အရူပဓမ္မဝဝတ္တနဝဂ္ဂေါ

၁။ သတိဥပ္ပဇ္ဇနပဉ္ဟော

၁။ ရာဇာ အာဟ ‘‘ဘန္တေ နာဂသေန, ကတိဟာကာရေဟိ သတိ ဥပ္ပဇ္ဇတီ’’တိ? ‘‘သတ္တရသဟာကာရေဟိ, မဟာရာဇ, သတိ ဥပ္ပဇ္ဇတီ’’တိ။ ‘‘ကတမေဟိ သတ္တရသဟာကာရေဟီ’’တိ? ‘‘အဘိဇာနတောပိ, မဟာရာဇ, သတိ ဥပ္ပဇ္ဇတိ, ကဋုမိကာယပိ သတိ ဥပ္ပဇ္ဇတိ, ဩဠာရိကဝိညာဏတောပိ သတိ ဥပ္ပဇ္ဇတိ, ဟိတဝိညာဏတောပိ သတိ ဥပ္ပဇ္ဇတိ, အဟိတဝိညာဏတောပိ သတိ ဥပ္ပဇ္ဇတိ, သဘာဂနိမိတ္တတောပိ သတိ ဥပ္ပဇ္ဇတိ, ဝိသဘာဂနိမိတ္တတောပိ သတိ ဥပ္ပဇ္ဇတိ, ကထာဘိညာဏတောပိ သတိ ဥပ္ပဇ္ဇတိ, လက္ခဏတောပိ သတိ ဥပ္ပဇ္ဇတိ, သာရဏတောပိ သတိ ဥပ္ပဇ္ဇတိ, မုဒ္ဒါတောပိ သတိ ဥပ္ပဇ္ဇတိ, ဂဏနာတောပိ သတိ ဥပ္ပဇ္ဇတိ, ဓါရဏတောပိ သတိ ဥပ္ပဇ္ဇတိ, ဘာဝနတောပိ သတိ ဥပ္ပဇ္ဇတိ, ပေါတ္ထကနိဗန္ဓနတောပိ သတိ ဥပ္ပဇ္ဇတိ, ဥပနိက္ခေပတောပိ သတိ ဥပ္ပဇ္ဇတိ, အနုဘူတတောပိ သတိ ဥပ္ပဇ္ဇတီတိ။

‘‘ကထံ အဘိဇာနတော သတိ ဥပ္ပဇ္ဇတိ? ယထာ, မဟာရာဇ, အာယသ္မာ စ အာနန္ဒော ခုဇ္ဇုတ္တရာ စ ဥပါသိကာ, ယေ ဝါ ပန အညေပိ ကေစိ ဇာတိဿရာ ဇာတိံ သရန္တိ, ဧဝံ အဘိဇာနတော သတိ ဥပ္ပဇ္ဇတိ။

‘‘ကထံ ကဋုမိကာယ သတိ ဥပ္ပဇ္ဇတိ? ယော ပကတိယာ မုဋ္ဌဿတိကော, ပရေ စ တံ သရာပနတ္ထံ နိဗန္ဓန္တိ, ဧဝံ ကဋုမိကာယ သတိ ဥပ္ပဇ္ဇတိ။

‘‘ကထံ ဩဠာရိကဝိညာဏတော သတိ ဥပ္ပဇ္ဇတိ? ယဒါ ရဇ္ဇေ ဝါ အဘိသိတ္တော ဟောတိ, သောတာပတ္တိဖလံ ဝါ ပတ္တော ဟောတိ, ဧဝံ ဩဠာရိကဝိညာဏတော သတိ ဥပ္ပဇ္ဇတိ။

‘‘ကထံ ဟိတဝိညာဏတော သတိ ဥပ္ပဇ္ဇတိ? ယမှိ သုခါပိတော, ‘အမုကသ္မိံ ဧဝံ သုခါပိတော’တိ သရတိ, ဧဝံ ဟိတဝိညာဏတော သတိ ဥပ္ပဇ္ဇတိ။

‘‘ကထံ အဟိတဝိညာဏတော သတိ ဥပ္ပဇ္ဇတိ? ယမှိ ဒုက္ခာပိတော, ‘အမုကသ္မိံ ဧဝံ ဒုက္ခာပိတော’တိ သရတိ, ဧဝံ အဟိတဝိညာဏတော သတိ ဥပ္ပဇ္ဇတိ။

‘‘ကထံ သဘာဂနိမိတ္တတော သတိ ဥပ္ပဇ္ဇတိ? သဒိသံ ပုဂ္ဂလံ ဒိသွာ မာတရံ ဝါ ပိတရံ ဝါ ဘာတရံ ဝါ ဘဂိနိံ ဝါ သရတိ, ဩဋ္ဌံ ဝါ ဂေါဏံ ဝါ ဂဒြဘံ ဝါ ဒိသွာ အညံ တာဒိသံ ဩဋ္ဌံ ဝါ ဂေါဏံ ဝါ ဂဒြဘံ ဝါ သရတိ, ဧဝံ သဘာဂနိမိတ္တတော သတိ ဥပ္ပဇ္ဇတိ။

‘‘ကထံ ဝိသဘာဂနိမတ္တတော သတိ ဥပ္ပဇ္ဇတိ? အသုကဿ နာမ ဝဏ္ဏော ဧဒိသော, သဒ္ဒေါ ဧဒိသော, ဂန္ဓော ဧဒိသော, ရသော ဧဒိသော, ဖောဋ္ဌဗ္ဗော ဧဒိသောတိ သရတိ, ဧဝမ္ပိ ဝိသဘာဂနိမိတ္တတောပိ ံသတိ ဥပ္ပဇ္ဇတိ။

‘‘ကထံ ကထာဘိညာဏတော သတိ ဥပ္ပဇ္ဇတိ? ယော ပကတိယာ မုဋ္ဌဿတိကော ဟောတိ, တံ ပရေ သရာပေန္တိ, တေန သော သရတိ, ဧဝံ ကထာဘိညာဏတော သတိ ဥပ္ပဇ္ဇတိ။

‘‘ကထံ လက္ခဏတော သတိ ဥပ္ပဇ္ဇတိ? ယော ပကတိယာ ဗလီဗဒ္ဒါနံ အင်္ဂေန ဇာနာတိ, လက္ခဏေန ဇာနာတိ, ဧဝံ လက္ခဏတော သတိ ဥပ္ပဇ္ဇတိ။

‘‘ကထံ သာရဏတော သတိ ဥပ္ပဇ္ဇတိ? ယော ပကတိယာ မုဋ္ဌဿတိကော ဟောတိ, ယော တံ ‘သရာဟိ ဘော, သရာဟိ ဘော’တိ ပုနပ္ပုနံ သရာပေတိ, ဧဝံ သာရဏတော သတိ ဥပ္ပဇ္ဇတိ။

‘‘ကထံ မုဒ္ဒါတော သတိ ဥပ္ပဇ္ဇတိ? လိပိယာ သိက္ခိတတ္တာ ဇာနာတိ ‘ဣမဿ အက္ခရဿ အနန္တရံ ဣမံ အက္ခရံ ကာတဗ္ဗ’န္တိ ဧဝံ မုဒ္ဒါတော သတိ ဥပ္ပဇ္ဇတိ။

‘‘ကထံ ဂဏနာတော သတိ ဥပ္ပဇ္ဇတိ? ဂဏနာယ သိက္ခိတတ္တာ ဂဏကာ ဗဟုမ္ပိ ဂဏေန္တိ, ဧဝံ ဂဏနာတော သတိ ဥပ္ပဇ္ဇတိ။

‘‘ကထံ ဓါရဏတော သတိ ဥပ္ပဇ္ဇတိ? ဓါရဏာယ သိက္ခိတတ္တာ ဓါရဏကာ ဗဟုမ္ပိ ဓါရေန္တိ , ဧဝံ ဓါရဏတော သတိ ဥပ္ပဇ္ဇတိ။

‘‘ကထံ ဘာဝနာတော သတိ ဥပ္ပဇ္ဇတိ? ဣဓ ဘိက္ခု အနေကဝိဟိတံ ပုဗ္ဗေနိဝါသံ အနုဿရတိ, သေယျထီဒံ, ဧကမ္ပိ ဇာတိံ ဒွေပိ ဇာတိယော။ပေ။။ ဣတိ သာကာရံ သဥဒ္ဒေသံ ပုဗ္ဗေနိဝါသံ အနုဿရတိ, ဧဝံ ဘာဝနာတော သတိ ဥပ္ပဇ္ဇတိ။

‘‘ကထံ ပေါတ္ထကနိဗန္ဓနတော သတိ ဥပ္ပဇ္ဇတိ? ရာဇာနော အနုသာသနိယံ အဿရန္တာ [အနုဿရန္တာ (သဗ္ဗတ္ထ)] ဧတံ ပေါတ္ထကံ အာဟရထာတိ, တေန ပေါတ္ထကေန အနုဿရန္တိ, ဧဝံ ပေါတ္ထကနိဗန္ဓနတော သတိ ဥပ္ပဇ္ဇတိ။

‘‘ကထံ ဥပနိက္ခေပတော သတိ ဥပ္ပဇ္ဇတိ? ဥပနိက္ခိတ္တံ ဘဏ္ဍံ ဒိသွာ သရတိ, ဧဝံ ဥပနိက္ခေပတော သတိ ဥပ္ပဇ္ဇတိ။

‘‘ကထံ အနုဘူတတော သတိ ဥပ္ပဇ္ဇတိ? ဒိဋ္ဌတ္တာ ရူပံ သရတိ, သုတတ္တာ သဒ္ဒံ သရတိ, ဃာယိတတ္တာ ဂန္ဓံ သရတိ, သာယိတတ္တာ ရသံ သရတိ, ဖုဋ္ဌတ္တာ ဖောဋ္ဌဗ္ဗံ သရတိ, ဝိညာတတ္တာ ဓမ္မံ သရတိ, ဧဝံ အနုဘူတတော သတိ ဥပ္ပဇ္ဇတိ။ ဣမေဟိ ခေါ, မဟာရာဇ, သတ္တရသဟာကာရေဟိ သတိ ဥပ္ပဇ္ဇတီ’’တိ။

‘‘ကလ္လောသိ, ဘန္တေ နာဂသေနာ’’တိ။

သတိဥပ္ပဇ္ဇနပဉ္ဟော ပဌမော။

၂။ ဗုဒ္ဓဂုဏသတိပဋိလာဘပဉ္ဟော

၂။ ရာဇာ အာဟ ‘‘ဘန္တေ နာဂသေန, တုမှေ ဧတံ ဘဏထ ‘ယော ဝဿသတံ အကုသလံ ကရေယျ, မရဏကာလေ စ ဧကံ ဗုဒ္ဓဂုဏံ သတိံ ပဋိလဘေယျ, သော ဒေဝေသု ဥပ္ပဇ္ဇေယျာ’တိ ဧတံ န သဒ္ဒဟာမိ, ဧဝဉ္စ ပန ဝဒေထ ‘ဧတေန ပါဏာတိပါတေန နိရယေ ဥပ္ပဇ္ဇေယျာ’တိ ဧတမ္ပိ န သဒ္ဒဟာမီ’’တိ။

‘‘တံ ကိံ မညသိ, မဟာရာဇ, ခုဒ္ဒကောပိ ပါသာဏော ဝိနာ နာဝါယ ဥဒကေ ဥပ္ပိလဝေယျာ’’တိ ။ ‘‘န ဟိ, ဘန္တေ’’တိ။ ‘‘ကိံ နု ခေါ, မဟာရာဇ, ဝါဟသတမ္ပိ ပါသာဏာနံ နာဝါယ အာရောပိတံ ဥဒကေ ဥပ္ပိလဝေယျာ’’တိ? ‘‘အာမ, ဘန္တေ’’တိ။ ‘‘ယထာ, မဟာရာဇ, နာဝါ, ဧဝံ ကုသလာနိ ကမ္မာနိ ဒဋ္ဌဗ္ဗာနီ’’တိ။

‘‘ကလ္လောသိ, ဘန္တေ နာဂသေနာ’’တိ။

ဗုဒ္ဓဂုဏသတိပဋိလာဘပဉ္ဟော ဒုတိယော။

၃။ ဒုက္ခပ္ပဟာနဝါယမပဉ္ဟော

၃။ ရာဇာ အာဟ ‘‘ဘန္တေ နာဂသေန, ကိံ တုမှေ အတီတဿ ဒုက္ခဿ ပဟာနာယ ဝါယမထာ’’တိ? ‘‘န ဟိ, မဟာရာဇာ’’တိ။ ‘‘ကိံ ပန, ဘန္တေ, အနာဂတဿ ဒုက္ခဿ ပဟာနာယ ဝါယမထာ’’တိ? ‘‘န ဟိ, မဟာရာဇာ’’တိ။ ‘‘ကိံ ပန ပစ္စုပ္ပန္နဿ ဒုက္ခဿ ပဟာနာယ ဝါယမထာ’’တိ? ‘‘န ဟိ, မဟာရာဇာ’’တိ။ ‘‘ယဒိ တုမှေ န အတီတဿ ဒုက္ခဿ ပဟာနာယ ဝါယမထ, န အနာဂတဿ ဒုက္ခဿ ပဟာနာယ ဝါယမထ, န ပစ္စုပ္ပန္နဿ ဒုက္ခဿ ပဟာနာယ ဝါယမထ, အထ ကိမတ္ထာယ ဝါယမထာ’’တိ။ ထေရော အာဟ ‘ကိန္တိ, မဟာရာဇ, ဣဒဉ္စ ဒုက္ခံ နိရုဇ္ဈေယျ, အညဉ္စ ဒုက္ခံ နုပ္ပဇ္ဇေယျာ’တိ ဧတဒတ္ထာယ ဝါယမာမာ’’တိ။

‘‘အတ္ထိ ပန တေ, ဘန္တေ နာဂသေန, အနာဂတံ ဒုက္ခ’’န္တိ? ‘‘နတ္ထိ [ကထာ။ ၈၂၈, ၈၂၉ ပဿိတဗ္ဗံ], မဟာရာဇာ’’တိ ‘‘တုမှေ ခေါ, ဘန္တေ နာဂသေန, အတိပဏ္ဍိတာ, ယေ တုမှေ အသန္တာနံ အနာဂတာနံ ဒုက္ခာနံ ပဟာနာယ ဝါယမထာ’’တိ? ‘‘အတ္ထိ ပန တေ, မဟာရာဇ, ကေစိ ပဋိရာဇာနော ပစ္စတ္ထိကာ ပစ္စာမိတ္တာ ပစ္စုပဋ္ဌိတာ ဟောန္တီ’’တိ? ‘‘အာမ, ဘန္တေ, အတ္ထီ’’တိ။ ‘‘ကိံနု ခေါ, မဟာရာဇ, တဒါ တုမှေ ပရိခံ ခဏာပေယျာထ, ပါကာရံ စိနာပေယျာထ ဂေါပုရံ ကာရာပေယျာထ, အဋ္ဋာလကံ ကာရာပေယျာထ, ဓညံ အတိဟရာပေယျာထာ’’တိ? ‘‘န ဟိ, ဘန္တေ, ပဋိကစ္စေဝ တံ ပဋိယတ္တံ ဟောတီ’’တိ။ ‘‘ကိံ တုမှေ, မဟာရာဇ, တဒါ ဟတ္ထိသ္မိံ သိက္ခေယျာထ, အဿသ္မိံ သိက္ခေယျာထ, ရထသ္မိံ သိက္ခေယျာထ, ဓနုသ္မိံ သိက္ခေယျာထ, ထရုသ္မိံ သိက္ခေယျာထာ’’တိ? ‘‘န ဟိ, ဘန္တေ, ပဋိကစ္စေဝ တံ သိက္ခိတံ ဟောတီ’’တိ။ ‘‘ကိဿတ္ထာယာ’’တိ? ‘‘အနာဂတာနံ, ဘန္တေ, ဘယာနံ ပဋိဗာဟနတ္ထာယာ’’တိ။ ‘‘ကိံ နု ခေါ, မဟာရာဇ, အတ္ထိ အနာဂတံ ဘယ’’န္တိ? ‘‘နတ္ထိ, ဘန္တေ’’တိ ။ ‘‘တုမှေ စ ခေါ, မဟာရာဇ, အတိပဏ္ဍိတာ, ယေ တုမှေ အသန္တာနံ အနာဂတာနံ ဘယာနံ ပဋိဗာဟနတ္ထာယ ပဋိယာဒေထာ’’တိ။

‘‘ဘိယျော ဩပမ္မံ ကရောဟီတိ။ ‘‘တံ ကိံ မညသိ, မဟာရာဇ, ယဒါ တွံ ပိပါသိတော ဘဝေယျာသိ, တဒါ တွံ ဥဒပါနံ ခဏာပေယျာသိ, ပေါက္ခရဏိံ ခဏာပေယျာသိ, တဠာကံ ခဏာပေယျာသိ ‘ပါနီယံ ပိဝိဿာမီ’’’တိ? ‘‘န ဟိ, ဘန္တေ, ပဋိကစ္စေဝ တံ ပဋိယတ္တံ ဟောတီ’’တိ။ ‘‘ကိဿတ္ထာယာ’’တိ? ‘‘အနာဂတာနံ, ဘန္တေ, ပိပါသာနံ ပဋိဗာဟနတ္ထာယ ပဋိယတ္တံ ဟောတီ’’တိ။ ‘‘အတ္ထိ ပန, မဟာရာဇ, အနာဂတာ ပိပါသာ’’တိ? ‘‘နတ္ထိ, ဘန္တေ’’တိ။ ‘‘တုမှေ ခေါ, မဟာရာဇ, အတိပဏ္ဍိတာ , ယေ တုမှေ အသန္တာနံ အနာဂတာနံ ပိပါသာနံ ပဋိဗာဟနတ္ထာယ တံ ပဋိယာဒေထာ’’တိ။

‘‘ဘိယျော ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, ယဒါ တွံ ဗုဘုက္ခိတော ဘဝေယျာသိ, တဒါ တွံ ခေတ္တံ ကသာပေယျာသိ, သာလိံ ဝပါပေယျာသိ ‘ဘတ္တံ ဘုဉ္ဇိဿာမီ’’’တိ? ‘‘န ဟိ, ဘန္တေ, ပဋိကစ္စေဝ တံ ပဋိယတ္တံ ဟောတီ’’တိ။ ‘‘ကိဿတ္ထာယာ’’တိ။ ‘‘အနာဂတာနံ, ဘန္တေ, ဗုဘုက္ခာနံ ပဋိဗာဟနတ္ထာယာ’’တိ။ ‘‘အတ္ထိ ပန, မဟာရာဇ, အနာဂတာ ဗုဘုက္ခာ’’တိ? ‘‘နတ္ထိ, ဘန္တေ’’တိ။ ‘‘တုမှေ ခေါ, မဟာရာဇ, အတိပဏ္ဍိတာ, ယေ တုမှေ အသန္တာနံ အနာဂတာနံ ဗုဘုက္ခာနံ ပဋိဗာဟနတ္ထာယ ပဋိယာဒေထာ’’တိ။

‘‘ကလ္လောသိ, ဘန္တေ နာဂသေနာ’’တိ။

ဒုက္ခပ္ပဟာနဝါယမပဉ္ဟော တတိယော။

၄။ ဗြဟ္မလောကပဉ္ဟော

၄။ ရာဇာ အာဟ ‘‘ဘန္တေ နာဂသေန, ကီဝဒူရော ဣတော ဗြဟ္မလောကော’’တိ? ‘‘ဒူရော ခေါ, မဟာရာဇ, ဣတော ဗြဟ္မလောကော ကူဋာဂါရမတ္တာ သိလာ တမှာ ပတိတာ အဟောရတ္တေန အဋ္ဌစတ္တာလီသယောဇနသဟဿာနိ ဘဿမာနာ စတူဟိ မာသေဟိ ပထဝိယံ ပတိဋ္ဌဟေယျာ’’တိ။

‘‘ဘန္တေ နာဂသေန, တုမှေ ဧဝံ ဘဏထ ‘သေယျထာပိ ဗလဝါ ပုရိသော သမိဉ္ဇိတံ ဝါ ဗာဟံ ပသာရေယျ , ပသာရိတံ ဝါ ဗာဟံ သမိဉ္ဇေယျ, ဧဝမေဝ ဣဒ္ဓိမာ ဘိက္ခု စေတောဝသိပ္ပတ္တော ဇမ္ဗုဒီပေ အန္တရဟိတော ဗြဟ္မလောကေ ပါတုဘဝေယျာ’တိ ဧတံ ဝစနံ န သဒ္ဒဟာမိ, ဧဝံ အတိသီဃံ တာဝ ဗဟူနိ ယောဇနသတာနိ ဂစ္ဆိဿတီ’’တိ။

ထေရော အာဟ ‘‘ကုဟိံ ပန, မဟာရာဇ, တဝ ဇာတဘူမီ’’တိ? ‘‘အတ္ထိ, ဘန္တေ, အလသန္ဒော နာမ ဒီပေါ, တတ္ထာဟံ ဇာတော’’တိ။ ‘‘ကီဝ ဒူရော, မဟာရာဇ, ဣတော အလသန္ဒော ဟောတီ’’တိ? ‘‘ဒွိမတ္တာနိ, ဘန္တေ, ယောဇနသတာနီ’’တိ။ ‘‘အဘိဇာနာသိ နု တွံ, မဟာရာဇ, တတ္ထ ကိဉ္စိဒေဝ ကရဏီယံ ကရိတွာ သရိတာ’’တိ? ‘‘အာမ, ဘန္တေ, သရာမီ’’တိ။ ‘‘လဟုံ ခေါ တွံ, မဟာရာဇ, ဂတောသိ ဒွိမတ္တာနိ ယောဇနသတာနီ’’တိ။

‘‘ကလ္လောသိ, ဘန္တေ နာဂသေနာ’’တိ။

ဗြဟ္မလောကပဉ္ဟော စတုတ္ထော။

၅။ ဒွိန္နံ လောကုပ္ပန္နာနံ သမကဘာဝပဉ္ဟော

၅။ ရာဇာ အာဟ ‘‘ဘန္တေ နာဂသေန, ယော ဣဓ ကာလင်္ကတော ဗြဟ္မလောကေ ဥပ္ပဇ္ဇေယျ, ယော စ ဣဓ ကာလင်္ကတော ကသ္မီရေ ဥပ္ပဇ္ဇေယျ, ကော စိရတရံ ကော သီဃတရ’’န္တိ? ‘‘သမကံ, မဟာရာဇာ’’တိ။

‘‘ဩပမ္မံ ကရောဟီ’’တိ။ ‘‘ကုဟိံ ပန, မဟာရာဇ, တဝ ဇာတနဂရ’’န္တိ? ‘‘အတ္ထိ, ဘန္တေ, ကလသိဂါမော နာမ, တတ္ထာဟံ ဇာတော’’တိ။ ‘‘ကီဝ ဒူရော, မဟာရာဇ, ဣတော ကလသိဂါမော ဟောတီ’’တိ။ ‘‘ဒွိမတ္တာနိ, ဘန္တေ, ယောဇနသတာနီ’’တိ။ ‘‘ကီဝ ဒူရံ, မဟာရာဇ, ဣတော ကသ္မီရံ ဟောတီ’’တိ? ‘‘ဒွါဒသ, ဘန္တေ, ယောဇနာနီ’’တိ။ ‘‘ဣင်္ဃ, တွံ မဟာရာဇ, ကလသိဂါမံ စိန္တေဟီ’’တိ။ ‘‘စိန္တိတော, ဘန္တေ’’တိ။ ‘‘ဣင်္ဃ, တွံ မဟာရာဇ, ကသ္မီရံ စိန္တေဟီ’’တိ။ ‘‘စိန္တိတံ ဘန္တေ’’တိ။ ‘‘ကတမံ နု ခေါ, မဟာရာဇ, စိရေန စိန္တိတံ, ကတမံ သီဃတရ’’န္တိ? ‘‘သမကံ ဘန္တေ’’တိ။ ‘‘ဧဝမေဝ ခေါ, မဟာရာဇ, ယော ဣဓ ကာလင်္ကတော ဗြဟ္မလောကေ ဥပ္ပဇ္ဇေယျ, ယော စ ဣဓ ကာလင်္ကတော ကသ္မီရေ ဥပ္ပဇ္ဇေယျ, သမကံ ယေဝ ဥပ္ပဇ္ဇန္တီ’’တိ။

‘‘ဘိယျော ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, ဒွေ သကုဏာ အာကာသေန ဂစ္ဆေယျုံ , တေသု ဧကော ဥစ္စေ ရုက္ခေ နိသီဒေယျ, ဧကော နီစေ ရုက္ခေ နိသီဒေယျ, တေသံ သမကံ ပတိဋ္ဌိတာနံ ကတမဿ ဆာယာ ပဌမတရံ ပထဝိယံ ပတိဋ္ဌဟေယျ, ကတမဿ ဆာယာ စိရေန ပထဝိယံ ပတိဋ္ဌဟေယျာ’’တိ? ‘‘သမကံ, ဘန္တေ’’တိ။ ‘‘ဧဝမေဝ ခေါ, မဟာရာဇ, ယော ဣဓ ကာလင်္ကတော ဗြဟ္မလောကေ ဥပ္ပဇ္ဇေယျ, ယော စ ဣဓ ကာလင်္ကတော ကသ္မီရေ ဥပ္ပဇ္ဇေယျ, သမကံ ယေဝ ဥပ္ပဇ္ဇန္တီ’’တိ။

‘‘ကလ္လောသိ, ဘန္တေ နာဂသေနာ’’တိ။

ဒွိန္နံ လောကုပ္ပန္နာနံ သမကဘာဝပဉ္ဟော ပဉ္စမော။

၆။ ဗောဇ္ဈင်္ဂပဉ္ဟော

၆။ ရာဇာ အာဟ ‘‘ကတိ နု ခေါ, ဘန္တေ နာဂသေန, ဗောဇ္ဈင်္ဂါ’’တိ? ‘‘သတ္တ ခေါ, မဟာရာဇ, ဗောဇ္ဈင်္ဂါ’’တိ။ ‘‘ကတိဟိ ပန, ဘန္တေ, ဗောဇ္ဈင်္ဂေဟိ ဗုဇ္ဈတီ’’တိ? ‘‘ဧကေန ခေါ, မဟာရာဇ, ဗောဇ္ဈင်္ဂေန ဗုဇ္ဈတိ ဓမ္မဝိစယသမ္ဗောဇ္ဈင်္ဂေနာ’’တိ။ ‘‘အထ ကိဿ နု ခေါ, ဘန္တေ, ဝုစ္စန္တိ ‘သတ္တ ဗောဇ္ဈင်္ဂါ’’’တိ? ‘‘တံ ကိံ မညသိ, မဟာရာဇ, အသိ ကောသိယာ ပက္ခိတ္တော အဂ္ဂဟိတော ဟတ္ထေန ဥဿဟတိ ဆေဇ္ဇံ ဆိန္ဒိတု’’န္တိ။ ‘‘န ဟိ, ဘန္တေ’’တိ။ ‘‘ဧဝမေဝ ခေါ, မဟာရာဇ, ဓမ္မဝိစယသမ္ဗောဇ္ဈင်္ဂေန ဝိနာ ဆဟိ ဗောဇ္ဈင်္ဂေဟိ န ဗုဇ္ဈတီ’’တိ။

‘‘ကလ္လောသိ, ဘန္တေ နာဂသေနာ’’တိ။

ဗောဇ္ဈင်္ဂပဉ္ဟော ဆဋ္ဌော။

၇။ ပါပပုညာနံ အပ္ပါနပ္ပဘာဝပဉ္ဟော

၇။ ရာဇာ အာဟ ‘‘ဘန္တေ နာဂသေန, ကတရံ နု ခေါ ဗဟုတရံ ပုညံ ဝါ အပုညံ ဝါ’’တိ? ‘‘ပုညံ ခေါ, မဟာရာဇ , ဗဟုတရံ, အပုညံ ထောက’’န္တိ။ ‘‘ကေန ကာရဏေနာ’’တိ? ‘‘အပုညံ ခေါ, မဟာရာဇ, ကရောန္တော ဝိပ္ပဋိသာရီ ဟောတိ ‘ပါပကမ္မံ မယာ ကတ’န္တိ, တေန ပါပံ န ဝဍ္ဎတိ။ ပုညံ ခေါ, မဟာရာဇ, ကရောန္တော အဝိပ္ပဋိသာရီ ဟောတိ, အဝိပ္ပဋိသာရိနော ပါမောဇ္ဇံ ဇာယတိ, ပမုဒိတဿ ဣတိ ဇာယတိ, ဣတိမနဿ ကာယော ပဿမ္ဘတိ, ပဿဒ္ဓကာယော သုခံ ဝေဒေတိ, သုခိနော စိတ္တံ သမာဓိယတိ, သမာဟိတော ယထာဘူတံ ပဇာနာတိ, တေန ကာရဏေန ပုညံ ဝဍ္ဎတိ။ ပုရိသော ခေါ, မဟာရာဇ, ဆိန္နဟတ္ထပါဒေါ ဘဂဝတော ဧကံ ဥပ္ပလဟတ္ထံ ဒတွာ ဧကနဝုတိကပ္ပါနိ ဝိနိပါတံ န ဂစ္ဆိဿတိ။ ဣမိနာပိ, မဟာရာဇ, ကာရဏေန ဘဏာမိ ‘ပုညံ ဗဟုတရံ, အပုညံ ထောက’’’န္တိ။

‘‘ကလ္လောသိ, ဘန္တေ နာဂသေနာ’’တိ။

ပါပပုညာနံ အပ္ပါနပ္ပဘာဝပဉ္ဟော သတ္တမော။

၈။ ဇာနန္တာဇာနန္တပါပကရဏပဉ္ဟော

၈။ ရာဇာ အာဟ ‘‘ဘန္တေ နာဂသေန, ယော ဇာနန္တော ပါပကမ္မံ ကရောတိ, ယော အဇာနန္တော ပါပကမ္မံ ကရောတိ, ကဿ ဗဟုတရံ အပုည’’န္တိ? ထေရော အာဟ ‘‘ယော ခေါ, မဟာရာဇ, အဇာနန္တော ပါပကမ္မံ ကရောတိ, တဿ ဗဟုတရံ အပုည’’န္တိ။ ‘‘တေန ဟိ, ဘန္တေ နာဂသေန, ယော အမှာကံ ရာဇပုတ္တော ဝါ ရာဇမဟာမတ္တော ဝါ အဇာနန္တော ပါပကမ္မံ ကရောတိ, တံ မယံ ဒိဂုဏံ ဒဏ္ဍေမာ’’တိ? ‘‘တံ ကိံ မညသိ, မဟာရာဇ, တတ္တံ အယောဂုဠံ အာဒိတ္တံ သမ္ပဇ္ဇလိတံ သဇောတိဘူတံ ဧကော ဇာနန္တော ဂဏှေယျ, ဧကော အဇာနန္တော ဂဏှေယျ, ကတမော [ကဿ (က။)] ဗလဝတရံ ဍယ္ဟေယျာ’’တိ။ ‘‘ယော ခေါ, ဘန္တေ, အဇာနန္တော ဂဏှေယျ, သော [တဿ (ဣ။ က။)] ဗလဝတရံ ဍယ္ဟေယျာ’’တိ။ ‘‘ဧဝမေဝ ခေါ, မဟာရာဇ, ယော အဇာနန္တော ပါပကမ္မံ ကရောတိ, တဿ ဗဟုတရံ အပုည’’န္တိ။

‘‘ကလ္လောသိ, ဘန္တေ နာဂသေနာ’’တိ။

ဇာနန္တာဇာနန္တပါပကရဏပဉ္ဟော အဋ္ဌမော။

၉။ ဥတ္တရကုရုကာဒိဂမနပဉ္ဟော

၉။ ရာဇာ အာဟ ‘‘ဘန္တေ နာဂသေန, အတ္ထိ ကောစိ, ယော ဣမိနာ သရီရေန ဥတ္တရကုရုံ ဝါ ဂစ္ဆေယျ, ဗြဟ္မလောကံ ဝါ, အညံ ဝါ ပန ဒီပ’’န္တိ? ‘‘အတ္ထိ, မဟာရာဇ, ယော ဣမိနာ စာတုမ္မဟာဘူတိကေန ကာယေန ဥတ္တရကုရုံ ဝါ ဂစ္ဆေယျ, ဗြဟ္မလောကံ ဝါ, အညံ ဝါ ပန ဒီပ’’န္တိ။

‘‘ကထံ, ဘန္တေ နာဂသေန, ဣမိနာ စာတုမ္မဟာဘူတိကေန ကာယေန ဥတ္တရကုရုံ ဝါ ဂစ္ဆေယျ, ဗြဟ္မလောကံ ဝါ, အညံ ဝါ ပန ဒီပ’’န္တိ? ‘‘အဘိဇာနာသိ နု, တွံ မဟာရာဇ, ဣမိဿာ ပထဝိယာ ဝိဒတ္ထိံ ဝါ ရတနံ ဝါ လင္ဃိတာ’’တိ? ‘‘အာမ, ဘန္တေ, အဘိဇာနာမိ ‘အဟံ, ဘန္တေ နာဂသေန, အဋ္ဌပိ ရတနိယော လင္ဃေမီ’’’တိ။ ‘‘ကထံ, တွံ မဟာရာဇ, အဋ္ဌပိ ရတနိယော လင္ဃေသီ’’တိ? ‘‘အဟဉှိ, ဘန္တေ, စိတ္တံ ဥပ္ပါဒေမိ ‘ဧတ္ထ နိပတိဿာမီ’တိ သဟ စိတ္တုပ္ပါဒေန ကာယော မေ လဟုကော ဟောတီ’’တိ။ ‘‘ဧဝမေဝ ခေါ, မဟာရာဇ, ဣဒ္ဓိမာ ဘိက္ခု စေတောဝသိပ္ပတ္တော ကာယံ စိတ္တေ သမာရောပေတွာ စိတ္တဝသေန ဝေဟာသံ ဂစ္ဆတီ’’တိ။

‘‘ကလ္လောသိ, ဘန္တေ နာဂသေနာ’’တိ။

ဥတ္တရကုရုကာဒိဂမနပဉ္ဟော နဝမော။

၁၀။ ဒီဃဋ္ဌိပဉ္ဟော

၁၀။ ရာဇာ အာဟ ‘‘ဘန္တေ နာဂသေန, တုမှေ ဧဝံ ဘဏထ ‘အဋ္ဌိကာနိ ဒီဃာနိ ယောဇနသတိကာနိဣ’တိ, ရုက္ခောပိ တာဝ နတ္ထိ ယောဇနသတိကော, ကုတော ပန အဋ္ဌိကာနိ ဒီဃာနိ ယောဇနသတိကာနိ ဘဝိဿန္တီ’’တိ?

‘‘တံ ကိံ မညသိ, မဟာရာဇ, သုတံ တေ ‘မဟာသမုဒ္ဒေ ပဉ္စယောဇနသတိကာပိ မစ္ဆာ အတ္ထီ’’’တိ? ‘‘အာမ, ဘန္တေ, သုတ’’န္တိ။ ‘‘နနု မဟာရာဇ, ပဉ္စယောဇနသတိကဿ မစ္ဆဿ အဋ္ဌိကာနိ ဒီဃာနိ ဘဝိဿန္တိ ယောဇနသတိကာနိဣ’’တိ?

‘‘ကလ္လောသိ , ဘန္တေ နာဂသေနာ’’တိ။

ဒီဃဋ္ဌိပဉ္ဟော ဒသမော။

၁၁။ အဿာသပဿာသနိရောဓပဉ္ဟော

၁၁။ ရာဇာ အာဟ ‘‘ဘန္တေ နာဂသေန, တုမှေ ဧဝံ ဘဏထ ‘သက္ကာ အဿာသပဿာသေ နိရောဓေတု’’’န္တိ? ‘‘အာမ, မဟာရာဇ, သက္ကာ အဿာသပဿာသေ နိရောဓေတု’’န္တိ။ ‘‘ကထံ, ဘန္တေ နာဂသေန, သက္ကာ အဿာသပဿာသေ နိရောဓေတု’’န္တိ။ ‘‘တံ ကိံ မညသိ, မဟာရာဇ, သုတပုဗ္ဗော တေ ကောစိ ကာကစ္ဆမာနော’’တိ။ ‘‘အာမ, ဘန္တေ, သုတပုဗ္ဗော’’တိ။ ‘‘ကိံ နု ခေါ, မဟာရာဇ, သော သဒ္ဒေါ ကာယေ နမိတေ ဝိရမေယျာ’’တိ။ ‘‘အာမ, ဘန္တေ, ဝိရမေယျာ’’တိ။ ‘‘သော ဟိ နာမ, မဟာရာဇ, သဒ္ဒေါ အဘာဝိတကာယဿ အဘာဝိတသီလဿ အဘာဝိတစိတ္တဿ အဘာဝိတပညဿ ကာယေ နမိတေ ဝိရမိဿတိ, ကိံ ပန ဘာဝိတကာယဿ ဘာဝိတသီလဿ ဘာဝိတစိတ္တဿ ဘာဝိတပညဿ စတုတ္ထဇ္ဈာနံ သမာပန္နဿ အဿာသပဿာသာ န နိရုဇ္ဈိဿန္တီ’’တိ။

‘‘ကလ္လောသိ, ဘန္တေ နာဂသေနာ’’တိ။

အဿာသပဿာသနိရောဓပဉ္ဟော ဧကာဒသမော။

၁၂။ သမုဒ္ဒပဉ္ဟော

၁၂။ ရာဇာ အာဟ ‘‘ဘန္တေ နာဂသေန, ‘သမုဒ္ဒေါ သမုဒ္ဒေါ’တိ ဝုစ္စတိ, ကေန ကာရဏေန ဥဒကံ ‘သမုဒ္ဒေါ’တိ ဝုစ္စတီ’’တိ? ထေရော အာဟ ‘‘ယတ္တကံ, မဟာရာဇ, ဥဒကံ, တတ္တကံ လောဏံ။ ယတ္တကံ လောဏံ, တတ္တကံ ဥဒကံ။ တသ္မာ ‘သမုဒ္ဒေါ’တိ ဝုစ္စတီ’’တိ။

‘‘ကလ္လောသိ, ဘန္တေ နာဂသေနာ’’တိ။

သမုဒ္ဒပဉ္ဟော ဒွါဒသမော။

၁၃။ သမုဒ္ဒဧကရသပဉ္ဟော

၁၃။ ရာဇာ အာဟ ‘‘ဘန္တေ နာဂသေန, ကေန ကာရဏေန သမုဒ္ဒေါ ဧကရသော လောဏရသော’’တိ? ‘‘စိရသဏ္ဌိတတ္တာ ခေါ, မဟာရာဇ, ဥဒကဿ သမုဒ္ဒေါ ဧကရသော လောဏရသော’’တိ။

‘‘ကလ္လောသိ, ဘန္တေ နာဂသေနာ’’တိ။

သမုဒ္ဒဧကရသပဉ္ဟော တေရသမော။

၁၄။ သုခုမပဉ္ဟော

၁၄။ ရာဇာ အာဟ ‘‘ဘန္တေ နာဂသေန, သက္ကာ သဗ္ဗံ သုခုမံ ဆိန္ဒိတု’’န္တိ? ‘‘အာမ, မဟာရာဇ, သက္ကာ သဗ္ဗံ သုခုမံ ဆိန္ဒိတု’’န္တိ။ ‘‘ကိံ ပန, ဘန္တေ, သဗ္ဗံ သုခုမ’’န္တိ? ‘‘ဓမ္မော ခေါ, မဟာရာဇ, သဗ္ဗသုခုမော, န ခေါ, မဟာရာဇ, ဓမ္မာ သဗ္ဗေ သုခုမာ, ‘သုခုမ’န္တိ ဝါ ‘ထူလ’န္တိ ဝါ ဓမ္မာနမေတမဓိဝစနံ။ ယံ ကိဉ္စိ ဆိန္ဒိတဗ္ဗံ, သဗ္ဗံ တံ ပညာယ ဆိန္ဒတိ, နတ္ထိ ဒုတိယံ ပညာယ ဆေဒန’’န္တိ။

‘‘ကလ္လောသိ, ဘန္တေ နာဂသေနာ’’တိ။

သုခုမပဉ္ဟော စုဒ္ဒသမော။

၁၅။ ဝိညာဏနာနတ္ထပဉ္ဟော

၁၅။ ရာဇာ အာဟ ‘‘ဘန္တေ နာဂသေန, ‘ဝိညာဏ’န္တိ ဝါ ‘ပညာ’တိ ဝါ ‘ဘူတသ္မိံ ဇီဝေါ’တိ ဝါ ဣမေ ဓမ္မာ နာနတ္ထာ စေဝ နာနာဗျဉ္ဇနာ စ, ဥဒါဟု ဧကတ္ထာ ဗျဉ္ဇနမေဝ နာန’’န္တိ ? ‘‘ဝိဇာနနလက္ခဏံ, မဟာရာဇ, ဝိညာဏံ, ပဇာနနလက္ခဏာ ပညာ, ဘူတသ္မိံ ဇီဝေါ နုပလဗ္ဘတီ’’တိ။ ‘‘ယဒိ ဇီဝေါ နုပလဗ္ဘတိ, အထ ကော စရဟိ စက္ခုနာ ရူပံ ပဿတိ, သောတေန သဒ္ဒံ သုဏာတိ, ဃာနေန ဂန္ဓံ ဃာယတိ, ဇိဝှာယ ရသံ သာယတိ, ကာယေန ဖောဋ္ဌဗ္ဗံ ဖုသတိ, မနသာ ဓမ္မံ ဝိဇာနာတီ’’တိ? ထေရော အာဟ ‘‘ယဒိ ဇီဝေါ စက္ခုနာ ရူပံ ပဿတိ။ပေ။။ မနသာ ဓမ္မံ ဝိဇာနာတိ, သော ဇီဝေါ စက္ခုဒွါရေသု ဥပ္ပါဋိတေသု မဟန္တေန အာကာသေန ဗဟိမုခေါ သုဋ္ဌုတရံ ရူပံ ပဿေယျ, သောတေသု ဥပ္ပါဋိတေသု, ဃာနေ ဥပ္ပါဋိတေ, ဇိဝှာယ ဥပ္ပါဋိတာယ, ကာယေ ဥပ္ပါဋိတေ မဟန္တေန အာကာသေန သုဋ္ဌုတရံ သဒ္ဒံ သုဏေယျ, ဂန္ဓံ ဃာယေယျ, ရသံ သာယေယျ, ဖောဋ္ဌဗ္ဗံ ဖုသေယျာ’’တိ? ‘‘န ဟိ , ဘန္တေ’’တိ။ ‘‘တေန ဟိ, မဟာရာဇ, ဘူတသ္မိံ ဇီဝေါ နုပလဗ္ဘတီ’’တိ။

‘‘ကလ္လောသိ, ဘန္တေ နာဂသေနာ’’တိ။

ဝိညာဏနာနတ္ထပဉ္ဟော ပန္နရသမော။

၁၆။ အရူပဓမ္မဝဝတ္ထာနဒုက္ကရပဉ္ဟော

၁၆။ ရာဇာ အာဟ ‘‘ဘန္တေ နာဂသေန, ဒုက္ကရံ နု ခေါ ဘဂဝတာ ကတ’’န္တိ? ထေရော အာဟ ‘‘ဒုက္ကရံ, မဟာရာဇ, ဘဂဝတာ ကတ’’န္တိ။ ‘‘ကိံ ပန, ဘန္တေ နာဂသေန, ဘဂဝတာ ဒုက္ကရံ ကတ’’န္တိ။ ‘‘ဒုက္ကရံ, မဟာရာဇ, ဘဂဝတာ ကတံ ဣမေသံ အရူဣနံ စိတ္တစေတသိကာနံ ဓမ္မာနံ ဧကာရမ္မဏေ ဝတ္တမာနာနံ ဝဝတ္ထာနံ အက္ခာတံ ‘အယံ ဖဿော, အယံ ဝေဒနာ, အယံ သညာ, အယံ စေတနာ, ဣဒံ စိတ္တ’’’န္တိ။

‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကောစိဒေဝ ပုရိသော နာဝါယ မဟာသမုဒ္ဒံ အဇ္ဈောဂါဟေတွာ ဟတ္ထပုဋေန ဥဒကံ ဂဟေတွာ ဇိဝှာယ သာယိတွာ ဇာနေယျ နု ခေါ, မဟာရာဇ, သော ပုရိသော ‘‘ဣဒံ ဂင်္ဂါယ ဥဒကံ, ဣဒံ ယမုနာယ ဥဒကံ, ဣဒံ အစိရဝတိယာ ဥဒကံ, ဣဒံ သရဘုယာ ဥဒကံ, ဣဒံ မဟိယာ ဥဒက’’’န္တိ? ‘‘ဒုက္ကရံ, ဘန္တေ, ဇာနိတု’’န္တိ။ ‘‘ဣတော ဒုက္ကရတရံ ခေါ, မဟာရာဇ, ဘဂဝတာ ကတံ ဣမေသံ အရူဣနံ စိတ္တစေတသိကာနံ ဓမ္မာနံ ဧကာရမ္မဏေ ဝတ္တမာနာနံ ဝဝတ္ထာနံ အက္ခာတံ ‘အယံ ဖဿော, အယံ ဝေဒနာ, အယံ သညာ, အယံ စေတနာ, ဣဒံ စိတ္တ’’’န္တိ။ ‘‘သုဋ္ဌု, ဘန္တေ’’တိ ရာဇာ အဗ္ဘာနုမောဒီတိ။

အရူပဓမ္မဝဝတ္ထာနဒုက္ကရပဉ္ဟော သောဠသမော။

အရူပဓမ္မဝဝတ္ထာနဝဂ္ဂေါ သတ္တမော။

ဣမသ္မိံ ဝဂ္ဂေ သောဠသ ပဉှာ။

မိလိန္ဒပဉ္ဟပုစ္ဆာဝိသဇ္ဇနာ

ထေရော အာဟ ‘‘ဇာနာသိ ခေါ, မဟာရာဇ, သမ္ပတိ ကာ ဝေလာ’’တိ? ‘‘အာမ, ဘန္တေ, ဇာနာမိ ‘သမ္ပတိ ပဌမော ယာမော အတိက္ကန္တော, မဇ္ဈိမော ယာမော ပဝတ္တတိ, ဥက္ကာ ပဒီဣယန္တိ, စတ္တာရိ ပဋာကာနိ အာဏတ္တာနိ ဂမိဿန္တိ ဘဏ္ဍတော ရာဇဒေယျာနီ’’’တိ။

ယောနကာ ဧဝမာဟံသု ‘‘ကလ္လောသိ, မဟာရာဇ, ပဏ္ဍိတော ထေရော’’တိ။ ‘‘အာမ, ဘဏေ, ပဏ္ဍိတော ထေရော, ဧဒိသော အာစရိယော ဘဝေယျ မာဒိသော စ အန္တေဝါသီ, နစိရဿေဝ ပဏ္ဍိတော ဓမ္မံ အာဇာနေယျာ’’တိ။ တဿ ပဉ္ဟဝေယျာကရဏေန တုဋ္ဌော ရာဇာ ထေရံ နာဂသေနံ သတသဟဿဂ္ဃနကေန ကမ္ဗလေန အစ္ဆာဒေတွာ ‘‘ဘန္တေ နာဂသေန, အဇ္ဇတဂ္ဂေ တေ အဋ္ဌသတံ ဘတ္တံ ပညပေမိ, ယံ ကိဉ္စိ အန္တေပုရေ ကပ္ပိယံ, တေန စ ပဝါရေမီ’’တိ အာဟ။ အလံ မဟာရာဇ ဇီဝါမီ’’တိ။ ‘‘ဇာနာမိ, ဘန္တေ နာဂသေန, ဇီဝသိ, အပိ စ အတ္တာနဉ္စ ရက္ခ, မမဉ္စ ရက္ခာဟီ’’တိ။ ‘‘ကထံ အတ္တာနံ ရက္ခသိ, ‘နာဂသေနော မိလိန္ဒံ ရာဇာနံ ပသာဒေတိ, န စ ကိဉ္စိ အလဘီ’တိ ပရာပဝါဒေါ [ပရပ္ပဝါဒေါ (က။)] အာဂစ္ဆေယျာတိ, ဧဝံ အတ္တာနံ ရက္ခ။ ကထံ မမံ ရက္ခသိ, ‘မိလိန္ဒော ရာဇာ ပသန္နော ပသန္နာကာရံ န ကရောတီ’တိ ပရာပဝါဒေါ အာဂစ္ဆေယျာတိ, ဧဝံ မမံ ရက္ခာဟီ’’တိ။ ‘‘တထာ ဟောတု, မဟာရာဇာ’’တိ။ ‘‘သေယျထာပိ, ဘန္တေ, သီဟော မိဂရာဇာ သုဝဏ္ဏပဉ္ဇရေ ပက္ခိတ္တောပိ ဗဟိမုခေါ ယေဝ ဟောတိ, ဧဝမေဝ ခေါ အဟံ, ဘန္တေ, ကိဉ္စာပိ အဂါရံ အဇ္ဈာဝသာမိ ဗဟိမုခေါ ယေဝ ပန အစ္ဆာမိ။ သစေ အဟံ, ဘန္တေ, အဂါရသ္မာ အနာဂါရိယံ ပဗ္ဗဇေယျံ, န စိရံ ဇီဝေယျံ, ဗဟူ မေ ပစ္စတ္ထိကာ’’တိ။

အထ ခေါ အာယသ္မာ နာဂသေနော မိလိန္ဒဿ ရညော ပဉ္ဟံ ဝိသဇ္ဇေတွာ ဥဋ္ဌာယာသနာ သံဃာရာမံ အဂမာသိ။ အစိရပက္ကန္တေ စ အာယသ္မန္တေ နာဂသေနေ မိလိန္ဒဿ ရညော ဧတဒဟောသိ ‘‘ကိံ မယာ ပုစ္ဆိတံ, ကိံ ဘဒန္တေန နာဂသေနေန ဝိသဇ္ဇိတ’’န္တိ? အထ ခေါ မိလိန္ဒဿ ရညော ဧတဒဟောသိ ‘‘သဗ္ဗံ မယာ သုပုစ္ဆိတံ, သဗ္ဗံ ဘဒန္တေန နာဂသေနေန သုဝိသဇ္ဇိတ’’န္တိ။ အာယသ္မတောပိ နာဂသေနဿ သံဃာရာမဂတဿ ဧတဒဟောသိ ‘‘ကိံ မိလိန္ဒေန ရညာ ပုစ္ဆိတံ, ကိံ မယာ ဝိသဇ္ဇိတ’’န္တိ။ အထ ခေါ အာယသ္မတော နာဂသေနဿ ဧတဒဟောသိ ‘‘သဗ္ဗံ မိလိန္ဒေန ရညာ သုပုစ္ဆိတံ, သဗ္ဗံ မယာ သုဝိသဇ္ဇိတ’’န္တိ။

အထ ခေါ အာယသ္မာ နာဂသေနော တဿာ ရတ္တိယာ အစ္စယေန ပုဗ္ဗဏှသမယံ နိဝါသေတွာ ပတ္တစီဝရမာဒါယ ယေန မိလိန္ဒဿ ရညော နိဝေသနံ တေနုပသင်္ကမိ, ဥပသင်္ကမိတွာ ပညတ္တေ အာသနေ နိသီဒိ။ အထ ခေါ မိလိန္ဒော ရာဇာ အာယသ္မန္တံ နာဂသေနံ အဘိဝါဒေတွာ ဧကမန္တံ နိသီဒိ, ဧကမန္တံ နိသိန္နော ခေါ မိလိန္ဒော ရာဇာ အာယသ္မန္တံ နာဂသေနံ ဧတဒဝေါစ –

‘‘မာ ခေါ ဘဒန္တဿ ဧဝံ အဟောသိ ‘နာဂသေနော မယာ ပဉ္ဟံ ပုစ္ဆိတော’တိ တေနေဝ သောမနဿေန တံ ရတ္တာဝသေသံ ဝီတိနာမေသီတိ န တေ ဧဝံ ဒဋ္ဌဗ္ဗံ။ တဿ မယှံ, ဘန္တေ, တံ ရတ္တာဝသေသံ ဧတဒဟောသိ ‘ကိံ မယာ ပုစ္ဆိတံ, ကိံ ဘဒန္တေန ဝိသဇ္ဇိတ’န္တိ, ‘သဗ္ဗံ မယာ သုပုစ္ဆိတံ, သဗ္ဗံ ဘဒန္တေန သုဝိသဇ္ဇိတ’’’န္တိ။

ထေရောပိ ဧဝမာဟ – ‘‘မာ ခေါ မဟာရာဇဿ ဧဝံ အဟောသိ ‘မိလိန္ဒဿ ရညော မယာ ပဉ္ဟော ဝိသဇ္ဇိတော’တိ တေနေဝ သောမနဿေန တံ ရတ္တာဝသေသံ ဝီတိနာမေသီတိ န တေ ဧဝံ ဒဋ္ဌဗ္ဗံ။ တဿ မယှံ, မဟာရာဇ, တံ ရတ္တာဝသေသံ ဧတဒဟောသိ ‘ကိံ မိလိန္ဒေန ရညာ ပုစ္ဆိတံ, ကိံ မယာ ဝိသဇ္ဇိတ’န္တိ, ‘သဗ္ဗံ မိလိန္ဒေန ရညာ သုပုစ္ဆိတံ, သဗ္ဗံ မယာ သုဝိသဇ္ဇိတ’’’န္တိ ဣတိဟ တေ မဟာနာဂါ အညမညဿ သုဘာသိတံ သမနုမောဒိံသူတိ။

မိလိန္ဒပဉ္ဟပုစ္ဆာဝိသဇ္ဇနာ နိဋ္ဌိတာ။

မေဏ္ဍကပဉှာရမ္ဘကထာ

အဋ္ဌမန္တပရိဝဇ္ဇနီယဋ္ဌာနာနိ

ဘဿပ္ပဝါဒေါ [ဘဿပ္ပဝေဒီ (သီ။ ဣ။)] ဝေတဏ္ဍီ၊ အတိဗုဒ္ဓိ ဝိစက္ခဏော။

မိလိန္ဒော ဉာဏဘေဒါယ၊ နာဂသေနမုပါဂမိ။

ဝသန္တော တဿ ဆာယာယ၊ ပရိပုစ္ဆံ ပုနပ္ပုနံ။

ပဘိန္နဗုဒ္ဓိ ဟုတွာန၊ သောပိ အာသိ တိပေဋကော။

နဝင်္ဂံ အနုမဇ္ဇန္တော၊ ရတ္တိဘာဂေ ရဟောဂတော။

အဒ္ဒက္ခိ မေဏ္ဍကေ ပဉ္ဟေ၊ ဒုန္နိဝေဌေ သနိဂ္ဂဟေ။

‘‘ပရိယာယဘာသိတံ အတ္ထိ၊ အတ္ထိ သန္ဓာယဘာသိတံ။

သဘာဝဘာသိတံ အတ္ထိ၊ ဓမ္မရာဇဿ သာသနေ။

‘‘တေသမတ္ထံ အဝိညာယ၊ မေဏ္ဍကေ ဇိနဘာသိတေ။

အနာဂတမှိ အဒ္ဓါနေ၊ ဝိဂ္ဂဟော တတ္ထ ဟေဿတိ။

‘‘ဟန္ဒ ကထိံ ပသာဒေတွာ၊ ဆေဇ္ဇာပေဿာမိ မေဏ္ဍကေ။

တဿ နိဒ္ဒိဋ္ဌမဂ္ဂေန၊ နိဒ္ဒိသိဿန္တ္ယနာဂတေ’’တိ။

အထ ခေါ မိလိန္ဒော ရာဇာ ပဘာတာယ ရတ္တိယာ ဥဒ္ဓသ္တေ [ဥဋ္ဌိတေ (သျာ။), ဥဂ္ဂတေ (သီ။ ဣ။)] အရုဏေ သီသံ နှတွာ သိရသိ အဉ္ဇလိံ ပဂ္ဂဟေတွာ အတီတာနာဂတပစ္စုပ္ပန္နေ သမ္မာသမ္ဗုဒ္ဓေ အနုဿရိတွာ အဋ္ဌ ဝတ္တပဒါနိ သမာဒိယိ ‘‘ဣတော မေ အနာဂတာနိ သတ္တ ဒိဝသာနိ အဋ္ဌ ဂုဏေ သမာဒိယိတွာ တပေါ စရိတဗ္ဗော ဘဝိဿတိ , သောဟံ စိဏ္ဏတပေါ သမာနော အာစရိယံ အာရာဓေတွာ မေဏ္ဍကေ ပဉ္ဟေ ပုစ္ဆိဿာမီ’’တိ။ အထ ခေါ မိလိန္ဒော ရာဇာ ပကတိဒုဿယုဂံ အပနေတွာ အာဘရဏာနိ စ ဩမုဉ္စိတွာ ကာသာဝံ နိဝါသေတွာ မုဏ္ဍကပဋိသီသကံ သီသေ ပဋိမုဉ္စိတွာ မုနိဘာဝမုပဂန္တွာ အဋ္ဌ ဂုဏေ သမာဒိယိ ‘‘ဣမံ သတ္တာဟံ မယာ န ရာဇတ္ထော အနုသာသိတဗ္ဗော, န ရာဂူပသဉှိတံ စိတ္တံ ဥပ္ပါဒေတဗ္ဗံ, န ဒေါသူပသဉှိတံ စိတ္တံ ဥပ္ပါဒေတဗ္ဗံ, န မောဟူပသဉှိတံ စိတ္တံ ဥပ္ပါဒေတဗ္ဗံ, ဒါသကမ္မကရပေါရိသေ ဇနေပိ နိဝါတဝုတ္တိနာ ဘဝိတဗ္ဗံ, ကာယိကံ ဝါစသိကံ အနုရက္ခိတဗ္ဗံ, ဆပိ အာယတနာနိ နိရဝသေသတော အနုရက္ခိတဗ္ဗာနိ, မေတ္တာဘာဝနာယ မာနသံ ပက္ခိပိတဗ္ဗ’’န္တိ။ ဣမေ အဋ္ဌ ဂုဏေ သမာဒိယိတွာ တေသွေဝ အဋ္ဌသု ဂုဏေသု မာနသံ ပတိဋ္ဌပေတွာ ဗဟိ အနိက္ခမိတွာ သတ္တာဟံ ဝီတိနာမေတွာ အဋ္ဌမေ ဒိဝသေ ပဘာတာယ ရတ္တိယာ ပဂေဝ ပါတရာသံ ကတွာ ဩက္ခိတ္တစက္ခု မိတဘာဏီ သုသဏ္ဌိတေန ဣရိယာပထေန အဝိက္ခိတ္တေန စိတ္တေန ဟဋ္ဌေန ဥဒဂ္ဂေန ဝိပ္ပသန္နေန ထေရံ နာဂသေနံ ဥပသင်္ကမိတွာ ထေရဿ ပါဒေ သိရသာ ဝန္ဒိတွာ ဧကမန္တံ ဌိတော ဣဒမဝေါစ –

‘‘အတ္ထိ မေ, ဘန္တေ နာဂသေန, ကောစိ အတ္ထော တုမှေဟိ သဒ္ဓိံ မန္တယိတဗ္ဗော, န တတ္ထ အညော ကောစိ တတိယော ဣစ္ဆိတဗ္ဗော, သုညေ ဩကာသေ ပဝိဝိတ္တေ အရညေ အဋ္ဌင်္ဂုပါဂတေ သမဏသာရုပ္ပေ။ တတ္ထ သော ပဉ္ဟော ပုစ္ဆိတဗ္ဗော ဘဝိဿတိ, တတ္ထ မေ ဂုယှံ န ကာတဗ္ဗံ န ရဟဿကံ, အရဟာမဟံ ရဟဿကံ သုဏိတုံ သုမန္တနေ ဥပဂတေ, ဥပမာယပိ သော အတ္ထော ဥပပရိက္ခိတဗ္ဗော, ယထာ ကိံ ဝိယ, ယထာ နာမ, ဘန္တေ နာဂသေန, မဟာပထဝီ နိက္ခေပံ အရဟတိ နိက္ခေပေ ဥပဂတေ။ ဧဝမေဝ ခေါ, ဘန္တေ နာဂသေန, အရဟာမဟံ ရဟဿကံ သုဏိတုံ သုမန္တနေ ဥပဂတေ’’တိ။ ဂရုနာ သဟ ပဝိဝိတ္တပဝနံ ပဝိသိတွာ ဣဒမဝေါစ – ‘‘ဘန္တေ နာဂသေန, ဣဓ ပုရိသေန မန္တယိတုကာမေန အဋ္ဌ ဌာနာနိ ပရိဝဇ္ဇယိတဗ္ဗာနိ ဘဝန္တိ, န တေသု ဌာနေသု ဝိညူ ပုရိသော အတ္ထံ မန္တေတိ, မန္တိတောပိ အတ္ထော ပရိပတတိ န သမ္ဘဝတိ။ ကတမာနိ အဋ္ဌ ဌာနာနိ? ဝိသမဋ္ဌာနံ ပရိဝဇ္ဇနီယံ, သဘယံ ပရိဝဇ္ဇနီယံ, အတိဝါတဋ္ဌာနံ ပရိဝဇ္ဇနီယံ, ပဋိစ္ဆန္နဋ္ဌာနံ ပရိဝဇ္ဇနီယံ, ဒေဝဋ္ဌာနံ ပရိဝဇ္ဇနီယံ, ပန္ထော ပရိဝဇ္ဇနီယော, သင်္ဂါမော [သင်္ကမော (သီ။ ဣ။)] ပရိဝဇ္ဇနီယော, ဥဒကတိတ္ထံ ပရိဝဇ္ဇနီယံ။ ဣမာနိ အဋ္ဌ ဌာနာနိ ပရိဝဇ္ဇနီယာနီ’’တိ။

ထေရော အာဟ ‘‘ကော ဒေါသော ဝိသမဋ္ဌာနေ, သဘယေ, အတိဝါတေ, ပဋိစ္ဆန္နေ, ဒေဝဋ္ဌာနေ, ပန္ထေ, သင်္ဂါမေ, ဥဒကတိတ္ထေ’’တိ? ‘‘ဝိသမေ, ဘန္တေ နာဂသေန, မန္တိတော အတ္ထော ဝိကိရတိ ဝိဓမတိ ပဂ္ဃရတိ န သမ္ဘဝတိ, သဘယေ မနော သန္တဿတိ, သန္တဿိတော န သမ္မာ အတ္ထံ သမနုပဿတိ, အတိဝါတေ သဒ္ဒေါ အဝိဘူတော ဟောတိ, ပဋိစ္ဆန္နေ ဥပဿုတိံ တိဋ္ဌန္တိ, ဒေဝဋ္ဌာနေ မန္တိတော အတ္ထော ဂရုကံ ပရိဏမတိ, ပန္ထေ မန္တိတော အတ္ထော တုစ္ဆော ဘဝတိ, သင်္ဂါမေ စဉ္စလော ဘဝတိ, ဥဒကတိတ္ထေ ပါကဋော ဘဝတိ။ ဘဝတီဟ –

‘‘‘ဝိသမံ သဘယံ အတိဝါတော၊ ပဋိစ္ဆန္နံ ဒေဝနိဿိတံ။

ပန္ထော စ သင်္ဂါမော တိတ္ထံ၊ အဋ္ဌေတေ ပရိဝဇ္ဇိယာ’’’တိ။

အဋ္ဌ မန္တနဿ ပရိဝဇ္ဇနီယဋ္ဌာနာနိ။

အဋ္ဌမန္တဝိနာသကပုဂ္ဂလာ

‘‘ဘန္တေ နာဂသေန, အဋ္ဌိမေ ပုဂ္ဂလာ မန္တိယမာနာ မန္တိတံ အတ္ထံ ဗျာပါဒေန္တိ။ ကတမေ အဋ္ဌ? ရာဂစရိတော ဒေါသစရိတော မောဟစရိတော မာနစရိတော လုဒ္ဓေါ အလသော ဧကစိန္တီ ဗာလောတိ။ ဣမေ အဋ္ဌ ပုဂ္ဂလာ မန္တိတံ အတ္ထံ ဗျာပါဒေန္တီ’’တိ။

ထေရော အာဟ ‘‘တေသံ ကော ဒေါသော’’တိ? ‘‘ရာဂစရိတော, ဘန္တေ နာဂသေန, ရာဂဝသေန မန္တိတံ အတ္ထံ ဗျာပါဒေတိ, ဒေါသစရိတော ဒေါသဝသေန မန္တိတံ အတ္ထံ ဗျာပါဒေတိ, မောဟစရိတော မောဟဝသေန မန္တိတံ အတ္ထံ ဗျာပါဒေတိ, မာနစရိတော မာနဝသေန မန္တိတံ အတ္ထံ ဗျာပါဒေတိ, လုဒ္ဓေါ လောဘဝသေန မန္တိတံ အတ္ထံ ဗျာပါဒေတိ, အလသော အလသတာယ မန္တိတံ အတ္ထံ ဗျာပါဒေတိ, ဧကစိန္တီ ဧကစိန္တိတာယ မန္တိတံ အတ္ထံ ဗျာပါဒေတိ, ဗာလော ဗာလတာယ မန္တိတံ အတ္ထံ ဗျာပါဒေတိ။ ဘဝတီဟ –

‘‘‘ရတ္တော ဒုဋ္ဌော စ မူဠ္ဟော စ၊ မာနီ လုဒ္ဓေါ တထာလသော။

ဧကစိန္တီ စ ဗာလော စ၊ ဧတေ အတ္ထဝိနာသကာ’’’တိ။

အဋ္ဌ မန္တဝိနာသကပုဂ္ဂလာ။

နဝဂုယှမန္တဝိဓံသကံ

‘‘ဘန္တေ နာဂသေန, နဝိမေ ပုဂ္ဂလာ မန္တိတံ ဂုယှံ ဝိဝရန္တိ န ဓါရေန္တိ။ ကတမေ နဝ? ရာဂစရိတော ဒေါသစရိတော မောဟစရိတော ဘီရုကော အာမိသဂရုကော ဣတ္ထီ သောဏ္ဍော ပဏ္ဍကော ဒါရကော’’တိ။

ထေရော အာဟ ‘‘တေသံ ကော ဒေါသော’’တိ? ‘‘ရာဂစရိတော, ဘန္တေ နာဂသေန, ရာဂဝသေန မန္တိတံ ဂုယှံ ဝိဝရတိ န ဓါရေတိ, ဒေါသစရိတော, ဘန္တေ , ဒေါသဝသေန မန္တိတံ ဂုယှံ ဝိဝရတိ န ဓါရေတိ, မူဠ္ဟော မောဟဝသေန မန္တိတံ ဂုယှံ ဝိဝရတိ န ဓါရေတိ, ဘီရုကော ဘယဝသေန မန္တိတံ ဂုယှံ ဝိဝရတိ န ဓါရေတိ, အာမိသဂရုကော အာမိသဟေတု မန္တိတံ ဂုယှံ ဝိဝရတိ န ဓါရေတိ, ဣတ္ထီ ပညာယ ဣတ္တရတာယ မန္တိတံ ဂုယှံ ဝိဝရတိ န ဓါရေတိ, သောဏ္ဍိကော သုရာလောလတာယ မန္တိတံ ဂုယှံ ဝိဝရတိ န ဓါရေတိ, ပဏ္ဍကော အနေကံသိကတာယ မန္တိတံ ဂုယှံ ဝိဝရတိ န ဓါရေတိ, ဒါရကော စပလတာယ မန္တိတံ ဂုယှံ ဝိဝရတိ န ဓါရေတိ။ ဘဝတီဟ –

‘‘‘ရတ္တော ဒုဋ္ဌော စ မူဠ္ဟော စ၊ ဘီရု အာမိသဂရုကော [အာမိသစက္ခုကော (သီ။ ဣ။)]။

ဣတ္ထီ သောဏ္ဍော ပဏ္ဍကော စ၊ နဝမော ဘဝတိ ဒါရကော။

‘‘နဝေတေ ပုဂ္ဂလာ လောကေ၊ ဣတ္တရာ စလိတာ စလာ။

ဧတေဟိ မန္တိတံ ဂုယှံ၊ ခိပ္ပံ ဘဝတိ ပါကဋ’’’န္တိ။

နဝ ဂုယှမန္တဝိဓံသကာ ပုဂ္ဂလာ။

အဋ္ဌ ပညာပဋိလာဘကာရဏံ

‘‘ဘန္တေ နာဂသေန, အဋ္ဌဟိ ကာရဏေဟိ ဗုဒ္ဓိ ပရိဏမတိ ပရိပါကံ ဂစ္ဆတိ။ ကတမေဟိ အဋ္ဌဟိ? ဝယပရိဏာမေန ဗုဒ္ဓိ ပရိဏမတိ ပရိပါကံ ဂစ္ဆတိ, ယသပရိဏာမေန ဗုဒ္ဓိ ပရိဏမတိ ပရိပါကံ ဂစ္ဆတိ, ပရိပုစ္ဆာယ ဗုဒ္ဓိ ပရိဏမတိ ပရိပါကံ ဂစ္ဆတိ, တိတ္ထသံဝါသေန ဗုဒ္ဓိ ပရိဏမတိ ပရိပါကံ ဂစ္ဆတိ, ယောနိသော မနသိကာရေန ဗုဒ္ဓိ ပရိဏမတိ ပရိပါကံ ဂစ္ဆတိ, သာကစ္ဆာယ ဗုဒ္ဓိ ပရိဏမတိ ပရိပါကံ ဂစ္ဆတိ, သ္နေဟူပသေဝနေန ဗုဒ္ဓိ ပရိဏမတိ ပရိပါကံ ဂစ္ဆတိ, ပတိရူပဒေသဝါသေန ဗုဒ္ဓိ ပရိဏမတိ ပရိပါကံ ဂစ္ဆတိ။ ဘဝတီဟ –

‘‘‘ဝယေန ယသပုစ္ဆာဟိ၊ တိတ္ထဝါသေန ယောနိသော။

သာကစ္ဆာ သ္နေဟသံသေဝါ၊ ပတိရူပဝသေန စ။

‘‘ဧတာနိ အဋ္ဌ ဌာနာနိ၊ ဗုဒ္ဓိဝိသဒကာရဏာ။

ယေသံ ဧတာနိ သမ္ဘောန္တိ၊ တေသံ ဗုဒ္ဓိ ပဘိဇ္ဇတီ’’’တိ။

အဋ္ဌ ပညာပဋိလာဘကာရဏာနိ။

အာစရိယဂုဏံ

‘‘ဘန္တေ နာဂသေန, အယံ ဘူမိဘာဂေါ အဋ္ဌ မန္တဒေါသဝိဝဇ္ဇိတော, အဟဉ္စ လောကေ ပရမော မန္တိသဟာယော [မန္တသဟာယော (သီ။)], ဂုယှမနုရက္ခီ စာဟံ ယာဝါဟံ ဇီဝိဿာမိ တာဝ ဂုယှမနုရက္ခိဿာမိ, အဋ္ဌဟိ စ မေ ကာရဏေဟိ ဗုဒ္ဓိ ပရိဏာမံ ဂတာ, ဒုလ္လဘော ဧတရဟိ မာဒိသော အန္တေဝါသီ, သမ္မာ ပဋိပန္နေ အန္တေဝါသိကေ ယေ အာစရိယာနံ ပဉ္စဝီသတိ အာစရိယဂုဏာ, တေဟိ ဂုဏေဟိ အာစရိယေန သမ္မာ ပဋိပဇ္ဇိတဗ္ဗံ။ ကတမေ ပဉ္စဝီသတိ ဂုဏာ?

‘‘ဣဓ, ဘန္တေ နာဂသေန, အာစရိယေန အန္တေဝါသိမှိ သတတံ သမိတံ အာရက္ခာ ဥပဋ္ဌပေတဗ္ဗာ, အသေဝနသေဝနာ ဇာနိတဗ္ဗာ, ပမတ္တာပ္ပမတ္တာ ဇာနိတဗ္ဗာ, သေယျဝကာသော ဇာနိတဗ္ဗော, ဂေလညံ ဇာနိတဗ္ဗံ, ဘောဇနဿ [ဘောဇနီယံ (သျာ။)] လဒ္ဓါလဒ္ဓံ ဇာနိတဗ္ဗံ, ဝိသေသော ဇာနိတဗ္ဗော, ပတ္တဂတံ သံဝိဘဇိတဗ္ဗံ, အဿာသိတဗ္ဗော ‘မာ ဘာယိ, အတ္ထော တေ အဘိက္ကမတီ’တိ, ‘ဣမိနာ ပုဂ္ဂလေန ပဋိစရတီ’တိ [ပဋိစရာဟီတိ (က။)] ပဋိစာရော ဇာနိတဗ္ဗော, ဂါမေ ပဋိစာရော ဇာနိတဗ္ဗော, ဝိဟာရေ ပဋိစာရော ဇာနိတဗ္ဗော, န တေန ဟာသော ဒဝေါ ကာတဗ္ဗော [န တေန သဟ သလ္လာပေါ ကာတဗ္ဗော (သီ။ ဣ။)], တေန သဟ အာလာပေါ ကာတဗ္ဗော, ဆိဒ္ဒံ ဒိသွာ အဓိဝါသေတဗ္ဗံ, သက္ကစ္စကာရိနာ ဘဝိတဗ္ဗံ, အခဏ္ဍကာရိနာ ဘဝိတဗ္ဗံ, အရဟဿကာရိနာ ဘဝိတဗ္ဗံ, နိရဝသေသကာရိနာ ဘဝိတဗ္ဗံ, ‘ဇနေမိမံ [ဇာနေမိမံ (သျာ။)] သိပ္ပေသူ’တိ ဇနကစိတ္တံ ဥပဋ္ဌပေတဗ္ဗံ, ‘ကထံ အယံ န ပရိဟာယေယျာ’တိ ဝဍ္ဎိစိတ္တံ ဥပဋ္ဌပေတဗ္ဗံ, ‘ဗလဝံ ဣမံ ကရောမိ သိက္ခာဗလေနာ’တိ စိတ္တံ ဥပဋ္ဌပေတဗ္ဗံ, မေတ္တစိတ္တံ ဥပဋ္ဌပေတဗ္ဗံ, အာပဒါသု န ဝိဇဟိတဗ္ဗံ, ကရဏီယေ နပ္ပမဇ္ဇိတဗ္ဗံ, ခလိတေ ဓမ္မေန ပဂ္ဂဟေတဗ္ဗောတိ။ ဣမေ ခေါ, ဘန္တေ, ပဉ္စဝီသတိ အာစရိယဿ အာစရိယဂုဏာ, တေဟိ ဂုဏေဟိ မယိ သမ္မာ ပဋိပဇ္ဇဿု, သံသယော မေ, ဘန္တေ, ဥပ္ပန္နော, အတ္ထိ မေဏ္ဍကပဉှာ ဇိနဘာသိတာ , အနာဂတေ အဒ္ဓါနေ တတ္ထ ဝိဂ္ဂဟော ဥပ္ပဇ္ဇိဿတိ, အနာဂတေ စ အဒ္ဓါနေ ဒုလ္လဘာ ဘဝိဿန္တိ တုမှာဒိသာ ဗုဒ္ဓိမန္တော, တေသု မေ ပဉ္ဟေသု စက္ခုံ ဒေဟိ ပရဝါဒါနံ နိဂ္ဂဟာယာ’’တိ။

ဥပါသကဂုဏံ

ထေရော ‘‘သာဓူ’’တိ သမ္ပဋိစ္ဆိတွာ ဒသ ဥပါသကဿ ဥပါသကဂုဏေ ပရိဒီပေသိ။ ‘‘ဒသ ဣမေ, မဟာရာဇ, ဥပါသကဿ ဥပါသကဂုဏာ။ ကတမေ ဒသ , ဣဓ, မဟာရာဇ, ဥပါသကော သံဃေန သမာနသုခဒုက္ခော ဟောတိ, ဓမ္မာဓိပတေယျော ဟောတိ, ယထာဗလံ သံဝိဘာဂရတော ဟောတိ, ဇိနသာသနပရိဟာနိံ ဒိသွာ အဘိဝဍ္ဎိယာ ဝါယမတိ။ သမ္မာဒိဋ္ဌိကော ဟောတိ, အပဂတကောတူဟလမင်္ဂလိကော ဇီဝိတဟေတုပိ န အညံ သတ္ထာရံ ဥဒ္ဒိသတိ, ကာယိကဝါစသိကဉ္စဿ ရက္ခိတံ ဟောတိ, သမဂ္ဂါရာမော ဟောတိ သမဂ္ဂရတော, အနုသူယကော ဟောတိ, န စ ကုဟနဝသေန သာသနေ စရတိ, ဗုဒ္ဓံ သရဏံ ဂတော ဟောတိ, ဓမ္မံ သရဏံ ဂတော ဟောတိ, သသံဃံ သရဏံ ဂတော ဟောတိ။ ဣမေ ခေါ, မဟာရာဇ, ဒသ ဥပါသကဿ ဥပါသကဂုဏာ, တေ သဗ္ဗေ ဂုဏာ တယိ သံဝိဇ္ဇန္တိ, တံ တေ ယုတ္တံ ပတ္တံ အနုစ္ဆဝိကံ ပတိရူပံ ယံ တွံ ဇိနသာသနပရိဟာနိံ ဒိသွာ အဘိဝဍ္ဎိံ ဣစ္ဆသိ, ကရောမိ တေ ဩကာသံ, ပုစ္ဆ မံ တွံ ယထာသုခ’’န္တိ။

မေဏ္ဍကပဉှာရမ္ဘကထာ နိဋ္ဌိတာ။

မိလိန္ဒပဥှပါဠိ

နမော တဿ ဘဂဝတော အရဟတော သမ္မာသမ္ဗုဒ္ဓဿ

၁။

မိလိန္ဒော နာမ သော ရာဇာ၊ သာဂလာယံ ပုရုတ္တမေ။

ဥပဂဉ္ဆိ နာဂသေနံ၊ ဂင်္ဂါ စ [ဂင်္ဂါဝ (သီ။ ဣ။)] ယထာ သာဂရံ။

အာသဇ္ဇ ရာဇာ စိတြကထိံ၊ ဥက္ကာဓါရံ တမောနုဒံ။

အပုစ္ဆိ နိပုဏေ ပဉ္ဟေ၊ ဌာနာဋ္ဌာနဂတေ ပုထူ။

ပုစ္ဆာ ဝိသဇ္ဇနာ [ဝိဿဇ္ဇနာ (သီ။ ဣ။)] စေဝ၊ ဂမ္ဘီရတ္ထူပနိဿိတာ။

ဟဒယင်္ဂမာ ကဏ္ဏသုခါ၊ အဗ္ဘုတာ လောမဟံသနာ။

အဘိဓမ္မဝိနယောဂါဠှာ၊ သုတ္တဇာလသမတ္တိတာ။

နာဂသေနကထာ စိတြာ၊ ဩပမ္မေဟိ နယေဟိ စ။

တတ္ထ ဉာဏံ ပဏိဓါယ၊ ဟာသယိတွာန မာနသံ။

သုဏာထ နိပုဏေ ပဉ္ဟေ၊ ကင်္ခါဋ္ဌာနဝိဒါလနေတိ။

၂။ တံ ယထာနုသူယတေ – အတ္ထိ ယောနကာနံ နာနာပုဋဘေဒနံ သာဂလံ နာမ နဂရံ နဒီပဗ္ဗတသောဘိတံ ရမဏီယဘူမိပ္ပဒေသဘာဂံ အာရာမုယျာနောပဝနတဠာကပေါက္ခရဏိသမ္ပန္နံ နဒီပဗ္ဗတဝနရာမဏေယျကံ သုတဝန္တနိမ္မိတံ နိဟတပစ္စတ္ထိကံ [နိပ္ပစ္စတ္ထိကံ (က။)] ပစ္စာမိတ္တာနုပဣဠိတံ ဝိဝိဓဝိစိတြဒဠှမဋ္ဋာလကောဋ္ဌကံ ဝရပဝရဂေါပုရ [ပဝရပစုရဂေါပုရ (သီ။)] တောရဏံ ဂမ္ဘီရပရိခါပဏ္ဍရပါကာရပရိက္ခိတ္တန္တေပုရံ။ သုဝိဘတ္တဝီထိစစ္စရစတုက္ကသိင်္ဃာဋကံ သုပ္ပသာရိတာနေကဝိဓဝရဘဏ္ဍပရိပူရိတန္တရာပဏံ ဝိဝိဓဒါနဂ္ဂသတသမုပသောဘိတံ [သတသမုပသောဘိတံ (သီ။ ဣ။)] ဟိမဂိရိသိခရသင်္ကာသဝရဘဝနသတသဟဿပ္ပဋိမဏ္ဍိတံ ဂဇဟယရထပတ္တိသမာကုလံ အဘိရူပနရနာရိဂဏာနုစရိတံ အာကိဏ္ဏဇနမနုဿံ ပုထုခတ္တိယဗြာဟ္မဏဝေဿသုဒ္ဒံ ဝိဝိဓသမဏဗြာဟ္မဏသဘာဇန [သဘာဇန (သီ။ ဣ။), သမ္မာဘာဇန (က။)] သံဃဋိတံ ဗဟုဝိဓဝိဇ္ဇာဝန္တ [ဝိဇ္ဇာဓရ (က။)] နရစိရ [နရဝိရ (သီ။ ဣ။)] နိသေဝိတံ ကာသိကကောဋုမ္ဗရိကာဒိနာနာဝိဓဝတ္ထာပဏသမ္ပန္နံ သုပ္ပသာရိတရုစိရဗဟုဝိဓပုပ္ဖဂန္ဓာပဏံ ဂန္ဓဂန္ဓိတံ အာသီသနီယဗဟုရတနပရိပူရိတံ ဒိသာမုခသုပ္ပသာရိတာပဏံ သိင်္ဂါရဝါဏိဇဂဏာနုစရိတံ ကဟာပဏရဇတသုဝဏ္ဏကံသပတ္ထရပရိပူရံ ပဇ္ဇောတမာနနိဓိနိကေတံ ပဟူတဓနဓညဝိတ္တူပကရဏံ ပရိပုဏ္ဏကောသကောဋ္ဌာဂါရံ ဗဟ္ဝန္နပါနံ ဗဟုဝိဓခဇ္ဇဘောဇ္ဇလေယျပေယျသာယနီယံ ဥတ္တရကုရုသင်္ကာသံ သမ္ပန္နသဿံ အာဠကမန္ဒာ ဝိယ ဒေဝပုရံ။

ဧတ္ထ ဌတွာ တေသံ ပုဗ္ဗကမ္မံ ကထေတဗ္ဗံ, ကထေန္တေန စ ဆဓါ ဝိဘဇိတွာ ကထေတဗ္ဗံ။ သေယျထီဒံ – ပုဗ္ဗယောဂေါ မိလိန္ဒပဉ္ဟံ လက္ခဏပဉ္ဟံ မေဏ္ဍကပဉ္ဟံ အနုမာနပဉ္ဟံ ဩပမ္မကထာပဉ္ဟန္တိ။

တတ္ထ မိလိန္ဒပဉ္ဟော လက္ခဏပဉ္ဟော, ဝိမတိစ္ဆေဒနပဉ္ဟောတိ ဒုဝိဓေါ။ မေဏ္ဍကပဉ္ဟောပိ မဟာဝဂ္ဂေါ, ယောဂိကထာပဉ္ဟောတိ ဒုဝိဓေါ။

ပုဗ္ဗယောဂေါတိ တေသံ ပုဗ္ဗကမ္မံ။

၁။ ဗာဟိရကထာ

ပုဗ္ဗယောဂါဒိ

၃။ အတီတေ ကိရ ကဿပဿ ဘဂဝတော သာသနေ ဝတ္တမာနေ ဂင်္ဂါယ သမီပေ ဧကသ္မိံ အာဝါသေ မဟာဘိက္ခုသံဃော ပဋိဝသတိ, တတ္ထ ဝတ္တသီလသမ္ပန္နာ ဘိက္ခူ ပါတောဝ ဥဋ္ဌာယ ယဋ္ဌိသမ္မဇ္ဇနိယော [ယဋ္ဌိသမ္မုဉ္ဇနိယော (သီ။ ဣ။)] အာဒါယ ဗုဒ္ဓဂုဏေ အာဝဇ္ဇေန္တာ အင်္ဂဏံ သမ္မဇ္ဇိတွာ ကစဝရဗ္ယူဟံ ကရောန္တိ။ အထေကော ဘိက္ခု ဧကံ သာမဏေရံ ‘‘ဧဟိ သာမဏေရ, ဣမံ ကစဝရံ ဆဍ္ဍေဟီ’’တိ အာဟ, သော အသုဏန္တော ဝိယ ဂစ္ဆတိ, သော ဒုတိယမ္ပိ။ပေ။။ တတိယမ္ပိ အာမန္တိယမာနော အသုဏန္တော ဝိယ ဂစ္ဆတေဝ။ တတော သော ဘိက္ခု ‘‘ဒုဗ္ဗစော ဝတာယံ သာမဏေရော’’တိ ကုဒ္ဓေါ သမ္မဇ္ဇနိဒဏ္ဍေန ပဟာရံ အဒါသိ။ တတော သော ရောဒန္တော ဘယေန ကစဝရံ ဆဍ္ဍေန္တော ‘‘ဣမိနာ ကစဝရဆဍ္ဍနပုညကမ္မေန ယာဝါဟံ နိဗ္ဗာနံ ပါပုဏာမိ [န ပါပုဏာမိ (သျာ။)], ဧတ္ထန္တရေ နိဗ္ဗတ္တနိဗ္ဗတ္တဋ္ဌာနေ မဇ္ဈန္ဟိကသူရိယော [သုရိယော (သီ။ ဣ။)] ဝိယ မဟေသက္ခော မဟာတေဇော ဘဝေယျ’’န္တိ ပဌမံ ပတ္ထနံ ပဋ္ဌပေသိ။ ကစဝရံ ဆဍ္ဍေတွာ နဟာနတ္ထာယ ဂင်္ဂါတိတ္ထံ ဂတော ဂင်္ဂါယ ဦမိဝေဂံ ဂဂ္ဂရာယမာနံ ဒိသွာ ‘‘ယာဝါဟံ နိဗ္ဗာနံ ပါပုဏာမိ [န ပါပုဏာမိ (သျာ။)], ဧတ္ထန္တရေ နိဗ္ဗတ္တနိဗ္ဗတ္တဋ္ဌာနေ အယံ ဦမိဝေဂေါ ဝိယ ဌာနုပ္ပတ္တိကပဋိဘာနော ဘဝေယျံ အက္ခယပဋိဘာနော’’တိ ဒုတိယမ္ပိ ပတ္ထနံ ပဋ္ဌပေသိ။

သောပိ ဘိက္ခု သမ္မဇ္ဇနိသာလာယ သမ္မဇ္ဇနိံ ဌပေတွာ နဟာနတ္ထာယ ဂင်္ဂါတိတ္ထံ ဂစ္ဆန္တော သာမဏေရဿ ပတ္ထနံ သုတွာ ‘‘ဧသ မယာ ပယောဇိတောပိ တာဝ ဧဝံ ပတ္ထေတိ, မယှံ ကိံ န သမိဇ္ဈိဿတီ’’တိ စိန္တေတွာ ‘‘ယာဝါဟံ နိဗ္ဗာနံ ပါပုဏာမိ [န ပါပုဏာမိ (သျာ။)], ဧတ္ထန္တရေ နိဗ္ဗတ္တနိဗ္ဗတ္တဋ္ဌာနေ အယံ ဂင်္ဂါဦမိဝေဂေါ ဝိယ အက္ခယပဋိဘာနော ဘဝေယျံ, ဣမိနာ ပုစ္ဆိတပုစ္ဆိတံ သဗ္ဗံ ပဉ္ဟပဋိဘာနံ ဝိဇဋေတုံ နိဗ္ဗေဌေတုံ သမတ္ထော ဘဝေယျ’’န္တိ ပတ္ထနံ ပဋ္ဌပေသိ။

တေ ဥဘောပိ ဒေဝေသု စ မနုဿေသု စ သံသရန္တာ ဧကံ ဗုဒ္ဓန္တရံ ခေပေသုံ။ အထ အမှာကံ ဘဂဝတာပိ ယထာ မောဂ္ဂလိပုတ္တတိဿတ္ထေရော ဒိဿတိ, ဧဝမေတေပိ ဒိဿန္တိ မမ ပရိနိဗ္ဗာနတော ပဉ္စဝဿသတေ အတိက္ကန္တေ ဧတေ ဥပ္ပဇ္ဇိဿန္တိ, ယံ မယာ သုခုမံ ကတွာ ဒေသိတံ ဓမ္မဝိနယံ, တံ ဧတေ ပဉ္ဟပုစ္ဆနဩပမ္မယုတ္တိဝသေန နိဇ္ဇဋံ နိဂ္ဂုမ္ဗံ ကတွာ ဝိဘဇိဿန္တီတိ နိဒ္ဒိဋ္ဌာ။

၄။ တေသု သာမဏေရော ဇမ္ဗုဒီပေ သာဂလနဂရေ မိလိန္ဒော နာမ ရာဇာ အဟောသိ ပဏ္ဍိတော ဗျတ္တော မေဓါဝီ ပဋိဗလော အတီတာနာဂတပစ္စုပ္ပန္နာနံ မန္တယောဂဝိဓါနကိရိယာနံ [သမန္တယောဂ ။ (သီ။ ဣ။)], ကရဏကာလေ နိသမ္မကာရီ ဟောတိ, ဗဟူနိ စဿ သတ္ထာနိ ဥဂ္ဂဟိတာနိ ဟောန္တိ။ သေယျထိဒံ, သုတိ သမ္မုတိ သင်္ချာ ယောဂါ နီတိ ဝိသေသိကာ ဂဏိကာ ဂန္ဓဗ္ဗာ တိကိစ္ဆာ ဓနုဗ္ဗေဒါ [စတုဗ္ဗေဒါ (သီ။ ဣ။)] ပုရာဏာ ဣတိဟာသာ ဇောတိသာ မာယာ ကေတု [ဟေတု (သီ။ ဣ။)] မန္တနာ ယုဒ္ဓါ ဆန္ဒသာ ဗုဒ္ဓဝစနေန [ဆန္ဒသာမုဒ္ဒဝစနေန (သီ။ ဣ။)] ဧကူနဝီသတိ, ဝိတဏ္ဍဝါဒီ [ဝါဒီ (သီ။ ဣ။)] ဒုရာသဒေါ ဒုပ္ပသဟော ပုထုတိတ္ထကရာနံ အဂ္ဂမက္ခာယတိ, သကလဇမ္ဗုဒီပေ မိလိန္ဒေန ရညာ သမော ကောစိ နာဟောသိ ယဒိဒံ ထာမေန ဇဝေန သူရေန ပညာယ, အဍ္ဎော မဟဒ္ဓနော မဟာဘောဂေါ အနန္တဗလဝါဟနော။

၅။ အထေကဒိဝသံ မိလိန္ဒော ရာဇာ အနန္တဗလဝါဟနံ စတုရင်္ဂိနိံ ဗလဂ္ဂသေနာဗ္ယူဟံ ဒဿနကမ္ယတာယ နဂရာ နိက္ခမိတွာ ဗဟိနဂရေ သေနင်္ဂဒဿနံ ကတွာ [သေနာဂဏနံ ကာရေတွာ (သီ။ ဣ။)] သာရေတွာ သော ရာဇာ ဘဿပ္ပဝါဒကော လောကာယတဝိတဏ္ဍ [ပဝတ္တ (သီ။ ဣ။)] ဇနသလ္လာပပ္လဝ စိတ္တကောတူဟလော ဝိသာရဒေါ ဝိဇမ္ဘကော သူရိယံ ဩလောကေတွာ အမစ္စေ အာမန္တေသိ ‘‘ဗဟု ဘဏေ တာဝ ဒိဝသာဝသေသော ကိံ ကရိဿာမ, ဣဒါနေဝ နဂရံ ပဝိသိတွာ အတ္ထိ ကောစိ ပဏ္ဍိတော သမဏော ဝါ ဗြာဟ္မဏော ဝါ သင်္ဃီ ဂဏီ ဂဏာစရိယော အပိ အရဟန္တံ သမ္မာသမ္ဗုဒ္ဓံ ပဋိဇာနမာနော, ယော မယာ သဒ္ဓိံ သလ္လပိတုံ သက္ကောတိ ကင်္ခံ ပဋိဝိနေတုံ, တံ ဥပသင်္ကမိတွာ ပဉ္ဟံ ပုစ္ဆိဿာမ, ကင်္ခံ ပဋိဝိနယိဿာမာ’’တိ။

ဧဝံ ဝုတ္တေ ပဉ္စသတာ ယောနကာ ရာဇာနံ မိလိန္ဒံ ဧတဒဝေါစုံ ‘‘အတ္ထိ, မဟာရာဇ, ဆ သတ္ထာရော ပူရဏော ကဿပေါ မက္ခလိဂေါသာလော နိဂဏ္ဌော နာဋပုတ္တော [နာထပုတ္တော (သီ။ ဣ။)] သဉ္ဇယော ဗေလဋ္ဌပုတ္တော အဇိတော ကေသကမ္ဗလော ပကုဓေါ ကစ္စာယနော, တေ သံဃိနော ဂဏိနော ဂဏာစရိယကာ ဉာတာ ယသဿိနော တိတ္ထကရာ သာဓုသမ္မတာ ဗဟုဇနဿ, ဂစ္ဆ တွံ မဟာရာဇ, တေ ပဉ္ဟံ ပုစ္ဆဿု, ကင်္ခံ ပဋိဝိနယဿူ’’တိ။

၆။ အထ ခေါ မိလိန္ဒော ရာဇာ ပဉ္စဟိ ယောနကသတေဟိ ပရိဝုတော ဘဒြဝါဟနံ ရထဝရမာရုယှ ယေန ပူရဏော ကဿပေါ တေနုပသင်္ကမိ, ဥပသင်္ကမိတွာ ပူရဏေန ကဿပေန သဒ္ဓိံ သမ္မောဒိ, သမ္မောဒနီယံ ကထံ သာရဏီယံ ဝီတိသာရေတွာ ဧကမန္တံ နိသီဒိ, ဧကမန္တံ နိသိန္နော ခေါ မိလိန္ဒော ရာဇာ ပူရဏံ ကဿပံ ဧတဒဝေါစ ‘‘ကော, ဘန္တေ ကဿပ, လောကံ ပါလေတီ’’တိ? ‘‘ပထဝီ, မဟာရာဇ , လောကံ ပါလေတီ’’တိ။ ‘‘ယဒိ, ဘန္တေ ကဿပ, ပထဝီ [ပဌဝီ (သီ။ သျာ။ ဣ။)] လောကံ ပါလေတိ, အထ ကသ္မာ အဝီစိနိရယံ ဂစ္ဆန္တာ သတ္တာ ပထဝိံ အတိက္ကမိတွာ ဂစ္ဆန္တီ’’တိ? ဧဝံ ဝုတ္တေ ပူရဏော ကဿပေါ နေဝ သက္ခိ ဩဂိလိတုံ, နော သက္ခိ ဥဂ္ဂိလိတုံ, အဓေါမုခေါ ပတ္တက္ခန္ဓော တုဏှီဘူတော ပဇ္ဈာယန္တော နိသီဒိ။

၇။ အထ ခေါ မိလိန္ဒော ရာဇာ မက္ခလိံ ဂေါသာလံ ဧတဒဝေါစ ‘‘အတ္ထိ, ဘန္တေ ဂေါသာလ, ကုသလာကုသလာနိ ကမ္မာနိ, အတ္ထိ သုကတဒုက္ကဋာနံ ကမ္မာနံ ဖလံ ဝိပါကော’’တိ? ‘‘နတ္ထိ, မဟာရာဇ, ကုသလာကုသလာနိ ကမ္မာနိ, နတ္ထိ သုကတဒုက္ကဋာနံ ကမ္မာနံ ဖလံ ဝိပါကော။ ယေ တေ, မဟာရာဇ, ဣဓ လောကေ ခတ္တိယာ, တေ ပရလောကံ ဂန္တွာပိ ပုန ခတ္တိယာဝ ဘဝိဿန္တိ, ယေ တေ ဗြာဟ္မဏာ ဝေဿာ သုဒ္ဒါ စဏ္ဍာလာ ပုက္ကုသာ, တေ ပရလောကံ ဂန္တွာပိ ပုန ဗြာဟ္မဏာ ဝေဿာ သုဒ္ဒါ စဏ္ဍာလာ ပုက္ကုသာဝ ဘဝိဿန္တိ။ ကိံ ကုသလာကုသလေဟိ ကမ္မေဟီ’’တိ? ‘‘ယဒိ, ဘန္တေ ဂေါသာလ, ဣဓ လောကေ ခတ္တိယာ ဗြာဟ္မဏာ ဝေဿာ သုဒ္ဒါ စဏ္ဍာလာ ပုက္ကုသာ, တေ ပရလောကံ ဂန္တွာပိ ပုန ခတ္တိယာ ဗြာဟ္မဏာ ဝေဿာ သုဒ္ဒါ စဏ္ဍာလာ ပုက္ကုသာဝ ဘဝိဿန္တိ, နတ္ထိ ကုသလာကုသလေဟိ ကမ္မေဟိ ကရဏီယံ။ တေန ဟိ, ဘန္တေ ဂေါသာလ, ယေ တေ ဣဓ လောကေ ဟတ္ထစ္ဆိန္နာ, တေ ပရလောကံ ဂန္တွာပိ ပုန ဟတ္ထစ္ဆိန္နာဝ ဘဝိဿန္တိ။ ယေ ပါဒစ္ဆိန္နာ, တေ ပါဒစ္ဆိန္နာဝ ဘဝိဿန္တိ။ ယေ ဟတ္ထပါဒစ္ဆိန္နာ, တေ ဟတ္ထပါဒစ္ဆိန္နာဝ ဘဝိဿန္တိ။ ယေ ကဏ္ဏစ္ဆိန္နာ, တေ ကဏ္ဏစ္ဆိန္နာဝ ဘဝိဿန္တိ။ ယေ နာသစ္ဆိန္နာ, တေ နာသစ္ဆိန္နာဝ ဘဝိဿန္တိ။ ယေ ကဏ္ဏနာသစ္ဆိန္နာ, တေ ကဏ္ဏနာသစ္ဆိန္နာဝ ဘဝိဿန္တီ’’တိ။ ဧဝံ ဝုတ္တေ ဂေါသာလော တုဏှီ အဟောသိ။

အထ ခေါ မိလိန္ဒဿ ရညော ဧတဒဟောသိ ‘‘တုစ္ဆော ဝတ ဘော ဇမ္ဗုဒီပေါ, ပလာပေါ ဝတ ဘော ဇမ္ဗုဒီပေါ, နတ္ထိ ကောစိ သမဏော ဝါ ဗြာဟ္မဏော ဝါ, ယော မယာ သဒ္ဓိံ သလ္လပိတုံ သက္ကောတိ ကင်္ခံ ပဋိဝိနေတု’’န္တိ။

အထ ခေါ မိလိန္ဒော ရာဇာ အမစ္စေ အာမန္တေသိ ‘‘ရမဏီယာ ဝတ ဘော ဒေါသိနာ ရတ္တိ, ကံ နု ခွဇ္ဇ သမဏံ ဝါ ဗြာဟ္မဏံ ဝါ ဥပသင်္ကမေယျာမ ပဉ္ဟံ ပုစ္ဆိတုံ, ကော မယာ သဒ္ဓိံ သလ္လပိတုံ သက္ကောတိ ကင်္ခံ ပဋိဝိနေတု’’န္တိ? ဧဝံ ဝုတ္တေ အမစ္စာ တုဏှီဘူတာ ရညော မုခံ ဩလောကယမာနာ အဋ္ဌံသု။

တေန ခေါ ပန သမယေန သာဂလနဂရံ ဒွါဒသ ဝဿာနိ သုညံ အဟောသိ သမဏဗြာဟ္မဏဂဟပတိပဏ္ဍိတေဟိ, ယတ္ထ သမဏဗြာဟ္မဏဂဟပတိပဏ္ဍိတာ ပဋိဝသန္တီတိ သုဏာတိ, တတ္ထ ဂန္တွာ ရာဇာ တေ ပဉ္ဟံ ပုစ္ဆတိ, တေ သဗ္ဗေပိ ပဉ္ဟဝိသဇ္ဇနေန ရာဇာနံ အာရာဓေတုံ အသက္ကောန္တာ ယေန ဝါ တေန ဝါ ပက္ကမန္တိ။ ယေ အညံ ဒိသံ န ပက္ကမန္တိ, တေ သဗ္ဗေ တုဏှီဘူတာ အစ္ဆန္တိ။ ဘိက္ခူ ပန ယေဘုယျေန ဟိမဝန္တမေဝ ဂစ္ဆန္တိ။

၈။ တေန ခေါ ပန သမယေန ကောဋိသတာ အရဟန္တော ဟိမဝန္တေ ပဗ္ဗတေ ရက္ခိတတလေ ပဋိဝသန္တိ။ အထ ခေါ အာယသ္မာ အဿဂုတ္တော ဒိဗ္ဗာယ သောတဓါတုယာ မိလိန္ဒဿ ရညော ဝစနံ သုတွာ ယုဂန္ဓရမတ္ထကေ ဘိက္ခုသသံဃံ သန္နိပါတေတွာ ဘိက္ခူ ပုစ္ဆိ ‘‘အတ္ထာဝုသော ကောစိ ဘိက္ခု ပဋိဗလော မိလိန္ဒေန ရညာ သဒ္ဓိံ သလ္လပိတုံ ကင်္ခံ ပဋိဝိနေတု’’န္တိ?

ဧဝံ ဝုတ္တေ ကောဋိသတာ အရဟန္တော တုဏှီ အဟေသုံ။ ဒုတိယမ္ပိ တတိယမ္ပိ ပုဋ္ဌာ တုဏှီ အဟေသုံ။ အထ ခေါ အာယသ္မာ အဿဂုတ္တော ဘိက္ခုသသံဃံ ဧတဒဝေါစ ‘‘အတ္ထာဝုသော တာဝတိံသဘဝနေ ဝေဇယန္တဿ ပါစီနတော ကေတုမတီ နာမ ဝိမာနံ, တတ္ထ မဟာသေနော နာမ ဒေဝပုတ္တော ပဋိဝသတိ, သော ပဋိဗလော တေန မိလိန္ဒေန ရညာ သဒ္ဓိံ သလ္လပိတုံ ကင်္ခံ ပဋိဝိနေတု’’န္တိ။

အထ ခေါ ကောဋိသတာ အရဟန္တော ယုဂန္ဓရပဗ္ဗတေ အန္တရဟိတာ တာဝတိံသဘဝနေ ပါတုရဟေသုံ။ အဒ္ဒသာ ခေါ သက္ကော ဒေဝါနမိန္ဒော တေ ဘိက္ခူ ဒူရတောဝ အာဂစ္ဆန္တေ, ဒိသွာန ယေနာယသ္မာ အဿဂုတ္တော တေနုပသင်္ကမိ, ဥပသင်္ကမိတွာ အာယသ္မန္တံ အဿဂုတ္တံ အဘိဝါဒေတွာ ဧကမန္တံ အဋ္ဌာသိ, ဧကမန္တံ ဌိတော ခေါ သက္ကော ဒေဝါနမိန္ဒော အာယသ္မန္တံ အဿဂုတ္တံ ဧတဒဝေါစ ‘‘မဟာ ခေါ, ဘန္တေ, ဘိက္ခုသံဃော အနုပ္ပတ္တော, အဟံ သံဃဿ အာရာမိကော, ကေနတ္ထော, ကိံ မယာ ကရဏီယ’’န္တိ?

အထ ခေါ အာယသ္မာ အဿဂုတ္တော သက္ကံ ဒေဝါနမိန္ဒံ ဧတဒဝေါစ ‘‘အယံ ခေါ, မဟာရာဇ, ဇမ္ဗုဒီပေ သာဂလနဂရေ မိလိန္ဒော နာမ ရာဇာ ဝိတဏ္ဍဝါဒီ ဒုရာသဒေါ ဒုပ္ပသဟော ပုထုတိတ္ထကရာနံ အဂ္ဂမက္ခာယတိ, သော ဘိက္ခုသသံဃံ ဥပသင်္ကမိတွာ ဒိဋ္ဌိဝါဒေန ပဉ္ဟံ ပုစ္ဆိတွာ ဘိက္ခုသသံဃံ ဝိဟေဌေတီ’’တိ။

အထ ခေါ သက္ကော ဒေဝါနမိန္ဒော အာယသ္မန္တံ အဿဂုတ္တံ ဧတဒဝေါစ ‘‘အယံ ခေါ, ဘန္တေ, မိလိန္ဒော ရာဇာ ဣတော စုတော မနုဿေသု ဥပ္ပန္နော, ဧသော ခေါ, ဘန္တေ, ကေတုမတိဝိမာနေ မဟာသေနော နာမ ဒေဝပုတ္တော ပဋိဝသတိ, သော ပဋိဗလော တေန မိလိန္ဒေန ရညာ သဒ္ဓိံ သလ္လပိတုံ ကင်္ခံ ပဋိဝိနေတုံ, တံ ဒေဝပုတ္တံ ယာစိဿာမ မနုဿလောကူပပတ္တိယာ’’တိ။

အထ ခေါ သက္ကော ဒေဝါနမိန္ဒော ဘိက္ခုသသံဃံ ပုရက္ခတွာ ကေတုမတိဝိမာနံ ပဝိသိတွာ မဟာသေနံ ဒေဝပုတ္တံ အာလိင်္ဂိတွာ ဧတဒဝေါစ ‘‘ယာစတိ တံ, မာရိသ, ဘိက္ခုသံဃော မနုဿလောကူပပတ္တိယာ’’တိ။ ‘‘န မေ, ဘန္တေ, မနုဿလောကေနတ္ထော ကမ္မဗဟုလေန, တိဗ္ဗော မနုဿလောကော, ဣဓေဝါဟံ, ဘန္တေ, ဒေဝလောကေ ဥပရူပရူပပတ္တိကော ဟုတွာ ပရိနိဗ္ဗာယိဿာမီ’’တိ။ ဒုတိယမ္ပိ။ပေ။။ တတိယမ္ပိ ခေါ သက္ကေန ဒေဝါနမိန္ဒေန ယာစိတော မဟာသေနော ဒေဝပုတ္တော ဧဝမာဟ ‘‘န မေ, ဘန္တေ, မနုဿလောကေနတ္ထော ကမ္မဗဟုလေန, တိဗ္ဗော မနုဿလောကော, ဣဓေဝါဟံ, ဘန္တေ, ဒေဝလောကေ ဥပရူပရူပပတ္တိကော ဟုတွာ ပရိနိဗ္ဗာယိဿာမီ’’တိ။

အထ ခေါ အာယသ္မာ အဿဂုတ္တော မဟာသေနံ ဒေဝပုတ္တံ ဧတဒဝေါစ ‘‘ဣဓ မယံ, မာရိသ, သဒေဝကံ လောကံ အနုဝိလောကယမာနာ အညတြ တယာ မိလိန္ဒဿ ရညော ဝါဒံ ဘိန္ဒိတွာ သာသနံ ပဂ္ဂဟေတုံ သမတ္ထံ အညံ ကဉ္စိ န ပဿာမ, ယာစတိ တံ, မာရိသ, ဘိက္ခုသံဃော, သာဓု သပ္ပုရိသ မနုဿလောကေ နိဗ္ဗတ္တိတွာ ဒသဗလဿ သာသနံ ပဂ္ဂဏှာဟီ’’တိ။ ဧဝံ ဝုတ္တေ မဟာသေနော ဒေဝပုတ္တော ‘‘အဟံ ကိရ မိလိန္ဒဿ ရညော ဝါဒံ ဘိန္ဒိတွာ ဗုဒ္ဓသာသနံ ပဂ္ဂဟေတုံ သမတ္ထော ဘဝိဿာမီ’’တိ ဟဋ္ဌပဟဋ္ဌော ဥဒဂ္ဂုဒဂ္ဂေါ ဟုတွာ ‘‘သာဓု, ဘန္တေ, မနုဿလောကေ ဥပ္ပဇ္ဇိဿာမီ’’တိ ပဋိညံ အဒါသိ။

၉။ အထ ခေါ တေ ဘိက္ခူ ဒေဝလောကေ တံ ကရဏီယံ တီရေတွာ ဒေဝေသု တာဝတိံသေသု အန္တရဟိတာ ဟိမဝန္တေ ပဗ္ဗတေ ရက္ခိတတလေ ပါတုရဟေသုံ။

အထ ခေါ အာယသ္မာ အဿဂုတ္တော ဘိက္ခုသသံဃံ ဧတဒဝေါစ ‘‘အတ္ထာဝုသော, ဣမသ္မိံ ဘိက္ခုသံဃေ ကောစိ ဘိက္ခု သန္နိပါတံ အနာဂတော’’တိ။ ဧဝံ ဝုတ္တေ အညတရော ဘိက္ခု အာယသ္မန္တံ အဿဂုတ္တံ ဧတဒဝေါစ ‘‘အတ္ထိ, ဘန္တေ , အာယသ္မာ ရောဟဏော ဣတော သတ္တမေ ဒိဝသေ ဟိမဝန္တံ ပဗ္ဗတံ ပဝိသိတွာ နိရောဓံ သမာပန္နော, တဿ သန္တိကေ ဒူတံ ပါဟေထာ’’တိ။ အာယသ္မာပိ ရောဟဏော တင်္ခဏညေဝ နိရောဓါ ဝုဋ္ဌာယ ‘‘သံဃော မံ ပဋိမာနေတီ’’တိ ဟိမဝန္တေ ပဗ္ဗတေ အန္တရဟိတော ရက္ခိတတလေ ကောဋိသတာနံ အရဟန္တာနံ ပုရတော ပါတုရဟောသိ။

အထ ခေါ အာယသ္မာ အဿဂုတ္တော အာယသ္မန္တံ ရောဟဏံ ဧတဒဝေါစ ‘‘ကိံ နု ခေါ, အာဝုသော, ရောဟဏ ဗုဒ္ဓသာသနေ ဘိဇ္ဇန္တေ [ပလုဇ္ဇန္တေ (သီ။ ဣ။)] န ပဿသိ သံဃဿ ကရဏီယာနီ’’တိ။ ‘‘အမနသိကာရော မေ, ဘန္တေ, အဟောသီ’’တိ။

‘‘တေန , ဟာဝုသော ရောဟဏ, ဒဏ္ဍကမ္မံ ကရောဟီ’’တိ။ ‘‘ကိံ, ဘန္တေ, ကရောမီ’’တိ? ‘‘အတ္ထာဝုသော ရောဟဏ, ဟိမဝန္တပဗ္ဗတပဿေ ဂဇင်္ဂလံ [ကဇင်္ဂလံ (သီ။ ဣ။)] နာမ ဗြာဟ္မဏဂါမော, တတ္ထ သောဏုတ္တရော နာမ ဗြာဟ္မဏော ပဋိဝသတိ, တဿ ပုတ္တော ဥပ္ပဇ္ဇိဿတိ နာဂသေနောတိ နာမ ဒါရကော, တေန ဟိ တွံ, အာဝုသော ရောဟဏ, ဒသမာသာဓိကာနိ သတ္တ ဝဿာနိ တံ ကုလံ ပိဏ္ဍာယ ပဝိသိတွာ နာဂသေနံ ဒါရကံ နီဟရိတွာ ပဗ္ဗာဇေဟိ, ပဗ္ဗဇိတေဝ တသ္မိံ ဒဏ္ဍကမ္မတော မုစ္စိဿသီ’’တိ။ အာယသ္မာပိ ခေါ ရောဟဏော ‘‘သာဓူ’’တိ သမ္ပဋိစ္ဆိ။

၁၀။ မဟာသေနောပိ ခေါ ဒေဝပုတ္တော ဒေဝလောကာ စဝိတွာ သောဏုတ္တရဗြာဟ္မဏဿ ဘရိယာယ ကုစ္ဆိသ္မိံ ပဋိသန္ဓိံ အဂ္ဂဟေသိ, သဟ ပဋိသန္ဓိဂ္ဂဟဏာ တယော အစ္ဆရိယာ အဗ္ဘုတာ ဓမ္မာ ပါတုရဟေသုံ, အာဝုဓဘဏ္ဍာနိ ပဇ္ဇလိံသု, အဂ္ဂသဿံ အဘိနိပ္ဖန္နံ, မဟာမေဃော အဘိပ္ပဝဿိ။ အာယသ္မာပိ ခေါ ရောဟဏော တဿ ပဋိသန္ဓိဂ္ဂဟဏတော ပဋ္ဌာယ ဒသမာသာဓိကာနိ သတ္တ ဝဿာနိ တံ ကုလံ ပိဏ္ဍာယ ပဝိသန္တော ဧကဒိဝသမ္ပိ ကဋစ္ဆုမတ္တံ ဘတ္တံ ဝါ ဥဠုင်္ကမတ္တံ ယာဂုံ ဝါ အဘိဝါဒနံ ဝါ အဉ္ဇလိကမ္မံ ဝါ သာမီစိကမ္မံ ဝါ နာလတ္ထ, အထ ခေါ အက္ကောသညေဝ ပရိဘာသညေဝ ပဋိလဘတိ ‘‘အတိစ္ဆထ ဘန္တေ’’တိ ဝစနမတ္တမ္ပိ ဝတ္တာ နာမ နာဟောသိ, ဒသမာသာဓိကာနံ ပန သတ္တန္နံ ဝဿာနံ အစ္စယေန ဧကဒိဝသံ ‘‘အတိစ္ဆထ ဘန္တေ’’တိ ဝစနမတ္တံ အလတ္ထ။ တံ ဒိဝသမေဝ ဗြာဟ္မဏောပိ ဗဟိ ကမ္မန္တာ အာဂစ္ဆန္တော ပဋိပထေ ထေရံ ဒိသွာ ‘‘ကိံ, ဘော ပဗ္ဗဇိတ, အမှာကံ ဂေဟံ အဂမိတ္ထာ’’တိ အာဟ။ ‘‘အာမ, ဗြာဟ္မဏ, အဂမမှာ’’တိ။ ‘‘အပိ ကိဉ္စိ လဘိတ္ထာ’’တိ။ ‘‘အာမ, ဗြာဟ္မဏ, လဘိမှာ’’တိ။ သော အနတ္တမနော ဂေဟံ ဂန္တွာ ပုစ္ဆိ ‘‘တဿ ပဗ္ဗဇိတဿ ကိဉ္စိ အဒတ္ထာ’’တိ။ ‘‘န ကိဉ္စိ အဒမှာ’’တိ။ ဗြာဟ္မဏော ဒုတိယဒိဝသေ ဃရဒွါရေ ယေဝ နိသီဒိ ‘‘အဇ္ဇ ပဗ္ဗဇိတံ မုသာဝါဒေန နိဂ္ဂဟေဿာမီ’’တိ။ ထေရော ဒုတိယဒိဝသေ ဗြာဟ္မဏဿ ဃရဒွါရံ သမ္ပတ္တော။

ဗြာဟ္မဏော ထေရံ ဒိသွာဝ ဧဝမာဟ ‘‘တုမှေ ဟိယျော အမှာကံ ဂေဟေ ကိဉ္စိ အလဘိတွာဝ ‘‘လဘိမှာ’’တိ အဝေါစုတ္ထ, ဝဋ္ဋတိ နု ခေါ တုမှာကံ မုသာဝါဒေါ’’တိ။ ထေရော အာဟ ‘‘မယံ, ဗြာဟ္မဏ, တုမှာကံ ဂေဟေ ( ) [(ပဝိသန္တာ) (က။)] ဒသမာသာဓိကာနိ သတ္တ ဝဿာနိ ‘အတိစ္ဆထာ’တိ ဝစနမတ္တမ္ပိ အလဘိတွာ ဟိယျော ‘အတိစ္ဆထာ’တိ ဝစနမတ္တံ လဘိမှာ, အထေတံ ဝါစာပဋိသန္ဓာရံ [ပဋိသန္တာရံ (သီ။ ဣ။)] ဥပါဒါယ ဧဝမဝေါစုမှာ’’တိ။

ဗြာဟ္မဏော စိန္တေသိ ‘‘ဣမေ ဝါစာပဋိသန္ဓာရမတ္တမ္ပိ လဘိတွာ ဇနမဇ္ဈေ ‘လဘိမှာ’တိ ပသံသန္တိ, အညံ ကိဉ္စိ ခါဒနီယံ ဝါ ဘောဇနီယံ ဝါ လဘိတွာ ကသ္မာ နပ္ပသံသန္တီ’’တိ ပသီဒိတွာ အတ္တနော အတ္ထာယ ပဋိယာဒိတဘတ္တတော ကဋစ္ဆုဘိက္ခံ, တဒုပိယဉ္စ ဗျဉ္ဇနံ ဒါပေတွာ ‘‘ဣမံ ဘိက္ခံ သဗ္ဗကာလံ တုမှေ လဘိဿထာ’’တိ အာဟ။

သော ပုနဒိဝသတော ပဘုတိ ဥပသင်္ကမန္တဿ ထေရဿ ဥပသမံ ဒိသွာ ဘိယျောသော မတ္တာယ ပသီဒိတွာ ထေရံ နိစ္စကာလံ အတ္တနော ဃရေ ဘတ္တဝိဿဂ္ဂကရဏတ္ထာယ ယာစိ။ ထေရော တုဏှီဘာဝေန အဓိဝါသေတွာ ဒိဝသေ ဒိဝသေ ဘတ္တကိစ္စံ ကတွာ ဂစ္ဆန္တော ထောကံ ထောကံ ဗုဒ္ဓဝစနံ ကထေတွာ ဂစ္ဆတိ။ သာပိ ခေါ ဗြာဟ္မဏီ ဒသမာသစ္စယေန ပုတ္တံ ဝိဇာယိ, ‘‘နာဂသေနော’’တိဿ နာမမကံသု, သော အနုက္ကမေန ဝဍ္ဎန္တော သတ္တဝဿိကော ဇာတော။

၁၁။ အထ ခေါ နာဂသေနဿ ဒါရကဿ ပိတာ နာဂသေနံ ဒါရကံ ဧတဒဝေါစ ‘‘ဣမသ္မိံ ခေါ , တာတ နာဂသေန, ဗြာဟ္မဏကုလေ သိက္ခာနိ သိက္ခေယျာသီ’’တိ။ ‘‘ကတမာနိ, တာတ, ဣမသ္မိံ ဗြာဟ္မဏကုလေ သိက္ခာနိ နာမာ’’တိ? ‘‘တယော ခေါ, တာတ နာဂသေန, ဝေဒါ သိက္ခာနိ နာမ, အဝသေသာနိ သိပ္ပါနိ သိပ္ပံ နာမာ’’တိ။ ‘‘တေန ဟိ, တာတ, သိက္ခိဿာမီ’’တိ။

အထ ခေါ သောဏုတ္တရော ဗြာဟ္မဏော အာစရိယဗြာဟ္မဏဿ အာစရိယဘာဂံ သဟဿံ ဒတွာ အန္တောပါသာဒေ ဧကသ္မိံ ဂဗ္ဘေ ဧကတော မဉ္စကံ ပညပေတွာ အာစရိယဗြာဟ္မဏံ ဧတဒဝေါစ ‘‘သဇ္ဈာပေဟိ ခေါ, တွံ ဗြာဟ္မဏ, ဣမံ ဒါရကံ မန္တာနီတိ။ တေန ဟိ ‘တာတ ဒါရက’ ဥဂ္ဂဏှာဟိ မန္တာနီ’’တိ။ အာစရိယဗြာဟ္မဏော သဇ္ဈာယတိ နာဂသေနဿ ဒါရကဿ ဧကေနေဝ ဥဒ္ဒေသေန တယော ဝေဒါ ဟဒယင်္ဂတာ ဝါစုဂ္ဂတာ သူပဓါရိတာ သုဝဝတ္ထာပိတာ သုမနသိကတာ အဟေသုံ, သကိမေဝ စက္ခုံ ဥဒပါဒိ တီသု ဝေဒေသု သနိဃဏ္ဍုကေဋုဘေသု [သနိဃဏ္ဋုကေဋုဘေသု (က။)] သာက္ခရပ္ပဘေဒေသု ဣတိဟာသပဉ္စမေသု ပဒကော ဝေယျာကရဏော လောကာယတမဟာပုရိသလက္ခဏေသု အနဝယော အဟောသိ။

အထ ခေါ နာဂသေနော ဒါရကော ပိတရံ ဧတဒဝေါစ ‘‘အတ္ထိ နု ခေါ, တာတ, ဣမသ္မိံ ဗြာဟ္မဏကုလေ ဣတော ဥတ္တရိမ္ပိ သိက္ခိတဗ္ဗာနိ, ဥဒါဟု ဧတ္တကာနေဝါ’’တိ။ ‘‘နတ္ထိ, တာတ နာဂသေန, ဣမသ္မိံ ဗြာဟ္မဏကုလေ ဣတော ဥတ္တရိံ သိက္ခိတဗ္ဗာနိ, ဧတ္တကာနေဝ သိက္ခိတဗ္ဗာနီ’’တိ။

အထ ခေါ နာဂသေနော ဒါရကော အာစရိယဿ အနုယောဂံ ဒတွာ ပါသာဒါ ဩရုယှ ပုဗ္ဗဝါသနာယ စောဒိတဟဒယော ရဟောဂတော ပဋိသလ္လီနော အတ္တနော သိပ္ပဿ အာဒိမဇ္ဈပရိယောသာနံ ဩလောကေန္တော အာဒိမှိ ဝါ မဇ္ဈေ ဝါ ပရိယောသာနေ ဝါ အပ္ပမတ္တကမ္ပိ သာရံ အဒိသွာ ‘‘တုစ္ဆာ ဝတ ဘော ဣမေ ဝေဒါ, ပလာပါ ဝတ ဘော ဣမေ ဝေဒါ အသာရာ နိဿာရာ’’တိ ဝိပ္ပဋိသာရီ အနတ္တမနော အဟောသိ။

၁၂။ တေန ခေါ ပန သမယေန အာယသ္မာ ရောဟဏော ဝတ္တနိယေ သေနာသနေ နိသိန္နော နာဂသေနဿ ဒါရကဿ စေတသာ စေတောပရိဝိတက္ကမညာယ နိဝါသေတွာ ပတ္တစီဝရမာဒါယ ဝတ္တနိယေ သေနာသနေ အန္တရဟိတော ဂဇင်္ဂလဗြာဟ္မဏဂါမဿ ပုရတော ပါတုရဟောသိ။ အဒ္ဒသာ ခေါ နာဂသေနော ဒါရကော အတ္တနော ဒွါရကောဋ္ဌကေ ဌိတော အာယသ္မန္တံ ရောဟဏံ ဒူရတောဝ အာဂစ္ဆန္တံ, ဒိသွာန အတ္တမနော ဥဒဂ္ဂေါ ပမုဒိတော ဣတိသောမနဿဇာတော ‘‘အပ္ပေဝ နာမာယံ ပဗ္ဗဇိတော ကဉ္စိ သာရံ ဇာနေယျာ’’တိ ယေနာယသ္မာ ရောဟဏော တေနုပသင်္ကမိ, ဥပသင်္ကမိတွာ အာယသ္မန္တံ ရောဟဏံ ဧတဒဝေါစ ‘‘ကော နု ခေါ, တွံ မာရိသ, ဧဒိသော ဘဏ္ဍုကာသာဝဝသနော’’တိ။ ‘‘ပဗ္ဗဇိတော [ပါပကာနံ မလာနံ ပဗ္ဗာဇေတုံ ပဗ္ဗဇိတော (သီ။ ဣ။)] နာမာဟံ ဒါရကာ’’တိ။ ‘‘ကေန, တွံ မာရိသ, ပဗ္ဗဇိတော နာမာသီ’’တိ? ‘‘ပါပကာနိ မလာနိ ပဗ္ဗာဇေတိ, တသ္မာဟံ, ဒါရက, ပဗ္ဗဇိတော နာမာ’’တိ။ ‘‘ကိံကာရဏာ, မာရိသ, ကေသာ တေ န ယထာ အညေသ’’န္တိ ? ‘‘သောဠသိမေ, ဒါရက, ပလိဗောဓေ ဒိသွာ ကေသမဿုံ ဩဟာရေတွာ ပဗ္ဗဇိတော။ ‘‘ကတမေ သောဠသ’’? ‘‘အလင်္ကာရပလိဗောဓေါ မဏ္ဍနပလိဗောဓေါ တေလမက္ခနပလိဗောဓေါ ဓေါဝနပလိဗောဓေါ မာလာပလိဗောဓေါ ဂန္ဓပလိဗောဓေါ ဝါသနပလိဗောဓေါ ဟရီဋကပလိဗောဓေါ အာမလကပလိဗောဓေါ ရင်္ဂပလိဗောဓေါ ဗန္ဓနပလိဗောဓေါ ကောစ္ဆပလိဗောဓေါ ကပ္ပကပလိဗောဓေါ ဝိဇဋနပလိဗောဓေါ ဦကာပလိဗောဓေါ, ကေသေသု ဝိလူနေသု သောစန္တိ ကိလမန္တိ ပရိဒေဝန္တိ ဥရတ္တာဠိံ ကန္ဒန္တိ သမ္မောဟံ အာပဇ္ဇန္တိ, ဣမေသု ခေါ, ဒါရက, သောဠသသု ပလိဗောဓေသု ပလိဂုဏ္ဌိတာ မနုဿာ သဗ္ဗာနိ အတိသုခုမာနိ သိပ္ပါနိ နာသေန္တီ’’တိ။ ‘‘ကိံကာရဏာ, မာရိသ, ဝတ္ထာနိပိ တေ န ယထာ အညေသ’’န္တိ? ‘‘ကာမနိဿိတာနိ ခေါ, ဒါရက, ဝတ္ထာနိ, ကာမနိဿိတာနိ ဂိဟိဗျဉ္ဇနဘဏ္ဍာနိ [ကမနီယာနိ ဂိဟိဗျဉ္ဇနာနိ (သီ။ ဣ။)], ယာနိ ကာနိစိ ခေါ ဘယာနိ ဝတ္ထတော ဥပ္ပဇ္ဇန္တိ, တာနိ ကာသာဝဝသနဿ န ဟောန္တိ, တသ္မာ ဝတ္ထာနိပိ မေ န ယထာ အညေသ’’န္တိ။ ‘‘ဇာနာသိ ခေါ, တွံ မာရိသ, သိပ္ပါနိ နာမာ’’တိ? ‘‘အာမ, ဒါရက, ဇာနာမဟံ သိပ္ပါနိ, ယံ လောကေ ဥတ္တမံ မန္တံ, တမ္ပိ ဇာနာမီ’’တိ။ ‘‘မယှမ္ပိ တံ, မာရိသ, ဒါတုံ သက္ကာ’’တိ? ‘‘အာမ, ဒါရက, သက္ကာ’’တိ။ ‘‘တေန ဟိ မေ ဒေဟီ’’တိ။ ‘‘အကာလော ခေါ, ဒါရက, အန္တရဃရံ ပိဏ္ဍာယ ပဝိဋ္ဌမှာ’’တိ။

အထ ခေါ နာဂသေနော ဒါရကော အာယသ္မတော ရောဟဏဿ ဟတ္ထတော ပတ္တံ ဂဟေတွာ ဃရံ ပဝေသေတွာ ပဏီတေန ခါဒနီယေန ဘောဇနီယေန သဟတ္ထာ သန္တပ္ပေတွာ သမ္ပဝါရေတွာ အာယသ္မန္တံ ရောဟဏံ ဘုတ္တာဝိံ ဩနီတပတ္တပါဏိံ ဧတဒဝေါစ ‘‘ဒေဟိ မေ ဒါနိ, မာရိသ, မန္တ’’န္တိ။ ‘‘ယဒါ ခေါ တွံ, ဒါရက, နိပ္ပလိဗောဓေါ ဟုတွာ မာတာပိတရော အနုဇာနာပေတွာ မယာ ဂဟိတံ ပဗ္ဗဇိတဝေသံ ဂဏှိဿသိ, တဒါ ဒဿာမီ’’တိ အာဟ။

အထ ခေါ နာဂသေနော ဒါရကော မာတာပိတရော ဥပသင်္ကမိတွာ အာဟ ‘‘အမ္မတာတာ, အယံ ပဗ္ဗဇိတော ‘ယံ လောကေ ဥတ္တမံ မန္တံ, တံ ဇာနာမီ’တိ ဝဒတိ, န စ အတ္တနော သန္တိကေ အပဗ္ဗဇိတဿ ဒေတိ, အဟံ ဧတဿ သန္တိကေ ပဗ္ဗဇိတွာ တံ ဥတ္တမံ မန္တံ ဥဂ္ဂဏှိဿာမီ’’တိ။ အထဿ မာတာပိတရော ‘‘ပဗ္ဗဇိတွာပိ နော ပုတ္တော မန္တံ ဂဏှတု, ဂဟေတွာ ပုန အာဂစ္ဆိဿတီ’’တိ မညမာနာ ‘‘ဂဏှ ပုတ္တာ’’တိ အနုဇာနိံသု။

၁၃။ အထ ခေါ အာယသ္မာ ရောဟဏော နာဂသေနံ ဒါရကံ အာဒါယ ယေန ဝတ္တနိယံ သေနာသနံ, ယေန ဝိဇမ္ဘဝတ္ထု တေနုပသင်္ကမိ, ဥပသင်္ကမိတွာ ဝိဇမ္ဘဝတ္ထုသ္မိံ သေနာသနေ ဧကရတ္တံ ဝသိတွာ ယေန ရက္ခိတတလံ တေနုပသင်္ကမိ, ဥပသင်္ကမိတွာ ကောဋိသတာနံ အရဟန္တာနံ မဇ္ဈေ နာဂသေနံ ဒါရကံ ပဗ္ဗာဇေသိ။ ပဗ္ဗဇိတော စ ပနာယသ္မာ နာဂသေနော အာယသ္မန္တံ ရောဟဏံ ဧတဒဝေါစ ‘‘ဂဟိတော မေ, ဘန္တေ, တဝ ဝေသော, ဒေထ မေ ဒါနိ မန္တ’’န္တိ။ အထ ခေါ အာယသ္မာ ရောဟဏော ‘‘ကိမှိ နု ခေါဟံ နာဂသေနံ ဝိနေယျံ ပဌမံ ဝိနယေ ဝါ သုတ္တန္တေ ဝါ အဘိဓမ္မေ ဝါ’’တိ စိန္တေတွာ ‘‘ပဏ္ဍိတော ခေါ အယံ နာဂသေနော, သက္ကောတိ သုခေနေဝ အဘိဓမ္မံ ပရိယာပုဏိတု’’န္တိ ပဌမံ အဘိဓမ္မေ ဝိနေသိ။

အာယသ္မာ စ နာဂသေနော ‘‘ကုသလာ ဓမ္မာ, အကုသလာ ဓမ္မာ, အဗျာကတာ ဓမ္မာ’’တိ တိကဒုကပဋိမဏ္ဍိတံ ဓမ္မသင်္ဂဏီပကရဏံ, ခန္ဓဝိဘင်္ဂါဒိ အဋ္ဌာရသ ဝိဘင်္ဂပဋိမဏ္ဍိတံ ဝိဘင်္ဂပ္ပကရဏံ, ‘‘သင်္ဂဟော အသင်္ဂဟော’’တိ အာဒိနာ စုဒ္ဒသဝိဓေန ဝိဘတ္တံ ဓါတုကထာပကရဏံ, ‘‘ခန္ဓပညတ္တိ အာယတနပညတ္တီ’’တိ အာဒိနာ ဆဗ္ဗိဓေန ဝိဘတ္တံ ပုဂ္ဂလပညတ္တိပ္ပကရဏံ, သကဝါဒေ ပဉ္စသုတ္တသတာနိ ပရဝါဒေ ပဉ္စသုတ္တသတာနီတိ သုတ္တသဟဿံ သမောဓါနေတွာ ဝိဘတ္တံ ကထာဝတ္ထုပ္ပကရဏံ, ‘‘မူလယမကံ ခန္ဓယမက’’န္တိ အာဒိနာ ဒသဝိဓေန ဝိဘတ္တံ ယမကပ္ပကရဏံ, ‘‘ဟေတုပစ္စယော အာရမ္မဏပစ္စယော’’တိ အာဒိနာ စတုဝီသတိဝိဓေန ဝိဘတ္တံ ပဋ္ဌာနပ္ပကရဏန္တိ သဗ္ဗံ တံ အဘိဓမ္မပိဋကံ ဧကေနေဝ သဇ္ဈာယေန ပဂုဏံ ကတွာ ‘‘တိဋ္ဌထ ဘန္တေ, န ပုန ဩသာရေထ, ဧတ္တကေနေဝါဟံ သဇ္ဈာယိဿာမီ’’တိ အာဟ။

၁၄။ အထ ခေါ အာယသ္မာ နာဂသေနော ယေန ကောဋိသတာ အရဟန္တော တေနုပသင်္ကမိ, ဥပသင်္ကမိတွာ ကောဋိသတေ အရဟန္တေ ဧတဒဝေါစ ‘‘အဟံ ခေါ ဘန္တေ ‘ကုသလာ ဓမ္မာ, အကုသလာ ဓမ္မာ , အဗျာကတာ ဓမ္မာ’တိ ဣမေသု တီသု ပဒေသု ပက္ခိပိတွာ သဗ္ဗံ တံ အဘိဓမ္မပိဋကံ ဝိတ္ထာရေန ဩသာရေဿာမီ’’တိ။ ‘‘သာဓု, နာဂသေန, ဩသာရေဟီ’’တိ။

အထ ခေါ အာယသ္မာ နာဂသေနော သတ္တ မာသာနိ သတ္တ ပကရဏာနိ ဝိတ္ထာရေန ဩသာရေသိ, ပထဝီ ဥန္နဒိ, ဒေဝတာ သာဓုကာရမဒံသု, ဗြဟ္မာနော အပ္ဖောဋေသုံ, ဒိဗ္ဗာနိ စန္ဒနစုဏ္ဏာနိ ဒိဗ္ဗာနိ စ မန္ဒာရဝပုပ္ဖာနိ အဘိပ္ပဝဿိံသု။

၁၅။ အထ ခေါ ကောဋိသတာ အရဟန္တော အာယသ္မန္တံ နာဂသေနံ ပရိပုဏ္ဏဝီသတိဝဿံ ရက္ခိတတလေ ဥပသမ္ပာဒေသုံ။ ဥပသမ္ပန္နော စ ပနာယသ္မာ နာဂသေနော တဿာ ရတ္တိယာ အစ္စယေန ပုဗ္ဗဏှသမယံ နိဝါသေတွာ ပတ္တစီဝရမာဒါယ ဥပဇ္ဈာယေန သဒ္ဓိံ ဂါမံ ပိဏ္ဍာယ ပဝိသန္တော ဧဝရူပံ ပရိဝိတက္ကံ ဥပ္ပါဒေသိ ‘‘တုစ္ဆော ဝတ မေ ဥပဇ္ဈာယော, ဗာလော ဝတ မေ ဥပဇ္ဈာယော, ဌပေတွာ အဝသေသံ ဗုဒ္ဓဝစနံ ပဌမံ မံ အဘိဓမ္မေ ဝိနေသီ’’တိ။

အထ ခေါ အာယသ္မာ ရောဟဏော အာယသ္မတော နာဂသေနဿ စေတသာ စေတောပရိဝိတက္ကမညာယ အာယသ္မန္တံ နာဂသေနံ ဧတဒဝေါစ ‘‘အနနုစ္ဆဝိကံ ခေါ နာဂသေန ပရိဝိတက္ကံ ဝိတက္ကေသိ, န ခေါ ပနေတံ နာဂသေန တဝါနုစ္ဆဝိက’’န္တိ။

အထ ခေါ အာယသ္မတော နာဂသေနဿ ဧတဒဟောသိ ‘‘အစ္ဆရိယံ ဝတ ဘော, အဗ္ဘုတံ ဝတ ဘော, ယတြ ဟိ နာမ မေ ဥပဇ္ဈာယော စေတသာ စေတောပရိဝိတက္ကံ ဇာနိဿတိ, ပဏ္ဍိတော ဝတ မေ ဥပဇ္ဈာယော, ယံနူနာဟံ ဥပဇ္ဈာယံ ခမာပေယျ’’န္တိ။ အထ ခေါ အာယသ္မာ နာဂသေနော အာယသ္မန္တံ ရောဟဏံ ဧတဒဝေါစ ‘‘ခမထ မေ, ဘန္တေ, န ပုန ဧဝရူပံ ဝိတက္ကေဿာမီ’’တိ။

အထ ခေါ အာယသ္မာ ရောဟဏော အာယသ္မန္တံ နာဂသေနံ ဧတဒဝေါစ ‘‘န ခေါ တျာဟံ နာဂသေန ဧတ္တာဝတာ ခမာမိ, အတ္ထိ ခေါ နာဂသေန သာဂလံ နာမ နဂရံ, တတ္ထ မိလိန္ဒော နာမ ရာဇာ ရဇ္ဇံ ကာရေတိ, သော ဒိဋ္ဌိဝါဒေန ပဉ္ဟံ ပုစ္ဆိတွာ ဘိက္ခုသသံဃံ ဝိဟေဌေတိ, သစေ တွံ တတ္ထ ဂန္တွာ တံ ရာဇာနံ ဒမေတွာ ဗုဒ္ဓသာသနေ ပသာဒေဿသိ, ဧဝါဟံ တံ ခမိဿာမီ’’တိ။

‘‘တိဋ္ဌတု, ဘန္တေ, ဧကော မိလိန္ဒော ရာဇာ; သစေ, ဘန္တေ, သကလဇမ္ဗုဒီပေ သဗ္ဗေ ရာဇာနော အာဂန္တွာ မံ ပဉ္ဟံ ပုစ္ဆေယျုံ, သဗ္ဗံ တံ ဝိသဇ္ဇေတွာ သမ္ပဒါလေဿာမိ, ‘ခမထ မေ ဘန္တေ’တိ ဝတွာ, ‘န ခမာမီ’တိ ဝုတ္တေ ‘တေန ဟိ, ဘန္တေ, ဣမံ တေမာသံ ကဿ သန္တိကေ ဝသိဿာမီ’တိ အာဟ’’ ။ အယံ ခေါ, နာဂသေန, အာယသ္မာ အဿဂုတ္တော ဝတ္တနိယေ သေနာသနေ ဝိဟရတိ, ဂစ္ဆ တွံ, နာဂသေန, ယေနာယသ္မာ အဿဂုတ္တော တေနုပသင်္ကမ, ဥပသင်္ကမိတွာ မမ ဝစနေန အာယသ္မတော အဿဂုတ္တဿ ပါဒေ သိရသာ ဝန္ဒ, ဧဝဉ္စ နံ ဝဒေဟိ ‘ဥပဇ္ဈာယော မေ, ဘန္တေ, တုမှာကံ ပါဒေ သိရသာ ဝန္ဒတိ, အပ္ပါဗာဓံ အပ္ပါတင်္ကံ လဟုဋ္ဌာနံ ဗလံ ဖာသုဝိဟာရံ ပုစ္ဆတိ, ဥပဇ္ဈာယော မေ, ဘန္တေ, ဣမံ တေမာသံ တုမှာကံ သန္တိကေ ဝသိတုံ မံ ပဟိဏီ’တိ , ‘ကောနာမော တေ ဥပဇ္ဈာယော’တိ စ ဝုတ္တေ ‘ရောဟဏတ္ထေရော နာမ ဘန္တေ’’တိ ဝဒေယျာသိ, ‘အဟံ ကောနာမော’တိ ဝုတ္တေ ဧဝံ ဝဒေယျာသိ ‘မမ ဥပဇ္ဈာယော, ဘန္တေ, တုမှာကံ နာမံ ဇာနာတီ’’’တိ။ ‘‘ဧဝံ ဘန္တေ’’တိ ခေါ အာယသ္မာ နာဂသေနော အာယသ္မန္တံ ရောဟဏံ အဘိဝါဒေတွာ ပဒက္ခိဏံ ကတွာ ပတ္တစီဝရမာဒါယ အနုပုဗ္ဗေန စာရိကံ စရမာနော ယေန ဝတ္တနိယံ သေနာသနံ, ယေနာယသ္မာ အဿဂုတ္တော တေနုပသင်္ကမိ, ဥပသင်္ကမိတွာ အာယသ္မန္တံ အဿဂုတ္တံ အဘိဝါဒေတွာ ဧကမန္တံ အဋ္ဌာသိ, ဧကမန္တံ ဌိတော ခေါ အာယသ္မာ နာဂသေနော အာယသ္မန္တံ အဿဂုတ္တံ ဧတဒဝေါစ ‘‘ဥပဇ္ဈာယော မေ, ဘန္တေ, တုမှာကံ ပါဒေ သိရသာ ဝန္ဒတိ, ဧဝဉ္စ ဝဒေတိ အပ္ပါဗာဓံ အပ္ပါတင်္ကံ လဟုဋ္ဌာနံ ဗလံ ဖာသုဝိဟာရံ ပုစ္ဆတိ, ဥပဇ္ဈာယော မေ, ဘန္တေ, ဣမံ တေမာသံ တုမှာကံ သန္တိကေ ဝသိတုံ မံ ပဟိဏီ’’တိ။

အထ ခေါ အာယသ္မာ အဿဂုတ္တော အာယသ္မန္တံ နာဂသေနံ ဧတဒဝေါစ ‘‘တွံ ကိန္နာမောသီ’’တိ။ ‘‘အဟံ, ဘန္တေ, နာဂသေနော နာမာ’’တိ။ ‘‘ကောနာမော တေ ဥပဇ္ဈာယော’’တိ? ‘‘ဥပဇ္ဈာယော မေ, ဘန္တေ, ရောဟဏော နာမာ’’တိ။ ‘‘အဟံ ကောနာမော’’တိ။ ‘‘ဥပဇ္ဈာယော မေ, ဘန္တေ, တုမှာကံ နာမံ ဇာနာတီ’’တိ။

‘‘သာဓု, နာဂသေန, ပတ္တစီဝရံ ပဋိသာမေဟီ’’တိ။ ‘‘သာဓု ဘန္တေ’’တိ ပတ္တစီဝရံ ပဋိသာမေတွာ ပုနဒိဝသေ ပရိဝေဏံ သမ္မဇ္ဇိတွာ မုခေါဒကံ ဒန္တပေါဏံ ဥပဋ္ဌပေသိ။ ထေရော သမ္မဇ္ဇိတဋ္ဌာနံ ပဋိသမ္မဇ္ဇိ, တံ ဥဒကံ ဆဍ္ဍေတွာ အညံ ဥဒကံ အာဟရိ, တဉ္စ ဒန္တကဋ္ဌံ အပနေတွာ အညံ ဒန္တကဋ္ဌံ ဂဏှိ, န အာလာပသလ္လာပံ အကာသိ, ဧဝံ သတ္တ ဒိဝသာနိ ကတွာ သတ္တမေ ဒိဝသေ ပုန ပုစ္ဆိတွာ ပုန တေန တထေဝ ဝုတ္တေ ဝဿဝါသံ အနုဇာနိ။

၁၆။ တေန ခေါ ပန သမယေန ဧကာ မဟာဥပါသိကာ အာယသ္မန္တံ အဿဂုတ္တံ တိံသမတ္တာနိ ဝဿာနိ ဥပဋ္ဌာသိ။ အထ ခေါ သာ မဟာဥပါသိကာ တေမာသစ္စယေန ယေနာယသ္မာ အဿဂုတ္တော တေနုပသင်္ကမိ, ဥပသင်္ကမိတွာ အာယသ္မန္တံ အဿဂုတ္တံ ဧတဒဝေါစ ‘‘အတ္ထိ နု ခေါ, တာတ, တုမှာကံ သန္တိကေ အညော ဘိက္ခူ’’တိ။ ‘‘အတ္ထိ, မဟာဥပါသိကေ, အမှာကံ သန္တိကေ နာဂသေနော နာမ ဘိက္ခူ’’တိ ။ ‘‘တေန ဟိ, တာတ အဿဂုတ္တ, အဓိဝါသေဟိ နာဂသေနေန သဒ္ဓိံ သွာတနာယ ဘတ္တ’’န္တိ။ အဓိဝါသေသိ ခေါ အာယသ္မာ အဿဂုတ္တော တုဏှီဘာဝေန။

အထ ခေါ အာယသ္မာ အဿဂုတ္တော တဿာ ရတ္တိယာ အစ္စယေန ပုဗ္ဗဏှသမယံ နိဝါသေတွာ ပတ္တစီဝရမာဒါယ အာယသ္မတာ နာဂသေနေန သဒ္ဓိံ ပစ္ဆာသမဏေန ယေန မဟာဥပါသိကာယ နိဝေသနံ တေနုပသင်္ကမိ, ဥပသင်္ကမိတွာ ပညတ္တေ အာသနေ နိသီဒိ။ အထ ခေါ သာ မဟာဥပါသိကာ အာယသ္မန္တံ အဿဂုတ္တံ အာယသ္မန္တဉ္စ နာဂသေနံ ပဏီတေန ခါဒနီယေန ဘောဇနီယေန သဟတ္ထာ သန္တပ္ပေသိ သမ္ပဝါရေသိ။ အထ ခေါ အာယသ္မာ အဿဂုတ္တော ဘုတ္တာဝိံ ဩနီတပတ္တပါဏိံ အာယသ္မန္တံ နာဂသေနံ ဧတဒဝေါစ ‘‘တွံ, နာဂသေန, မဟာဥပါသိကာယ အနုမောဒနံ ကရောဟီ’’တိ ဣဒံ ဝတွာ ဥဋ္ဌာယာသနာ ပက္ကာမိ။

အထ ခေါ သာ မဟာဥပါသိကာ အာယသ္မန္တံ နာဂသေနံ ဧတဒဝေါစ ‘‘မဟလ္လိကာ ခေါဟံ, တာတ နာဂသေန, ဂမ္ဘီရာယ ဓမ္မကထာယ မယှံ အနုမောဒနံ ကရောဟီ’’တိ။ အထ ခေါ အာယသ္မာ နာဂသေနော တဿာ မဟာဥပါသိကာယ ဂမ္ဘီရာယ ဓမ္မကထာယ လောကုတ္တရာယ သုညတပ္ပဋိသံယုတ္တာယ အနုမောဒနံ အကာသိ။ အထ ခေါ တဿာ မဟာဥပါသိကာယ တသ္မိံယေဝ အာသနေ ဝိရဇံ ဝီတမလံ ဓမ္မစက္ခုံ ဥဒပါဒိ ‘‘ယံ ကိဉ္စိ သမုဒယဓမ္မံ, သဗ္ဗံ တံ နိရောဓဓမ္မ’’န္တိ။ အာယသ္မာပိ ခေါ နာဂသေနော တဿာ မဟာဥပါသိကာယ အနုမောဒနံ ကတွာ အတ္တနာ ဒေသိတံ ဓမ္မံ ပစ္စဝေက္ခန္တော ဝိပဿနံ ပဋ္ဌပေတွာ တသ္မိံယေဝ အာသနေ နိသိန္နော သောတာပတ္တိဖလေ ပတိဋ္ဌာသိ။

အထ ခေါ အာယသ္မာ အဿဂုတ္တော မဏ္ဍလမာဠေ နိသိန္နော ဒွိန္နမ္ပိ ဓမ္မစက္ခုပဋိလာဘံ ဉတွာ သာဓုကာရံ ပဝတ္တေသိ ‘‘သာဓု သာဓု နာဂသေန, ဧကေန ကဏ္ဍပ္ပဟာရေန ဒွေ မဟာကာယာ ပဒါလိတာ’’တိ, အနေကာနိ စ ဒေဝတာသဟဿာနိ သာဓုကာရံ ပဝတ္တေသုံ။

၁၇။ အထ ခေါ အာယသ္မာ နာဂသေနော ဥဋ္ဌာယာသနာ ယေနာယသ္မာ အဿဂုတ္တော တေနုပသင်္ကမိ, ဥပသင်္ကမိတွာ အာယသ္မန္တံ အဿဂုတ္တံ အဘိဝါဒေတွာ ဧကမန္တံ နိသီဒိ, ဧကမန္တံ နိသိန္နံ ခေါ အာယသ္မန္တံ နာဂသေနံ အာယသ္မာ အဿဂုတ္တော ဧတဒဝေါစ ‘‘ဂစ္ဆ, တွံ နာဂသေန, ပါဋလိပုတ္တံ, ပါဋလိပုတ္တနဂရေ အသောကာရာမေ အာယသ္မာ ဓမ္မရက္ခိတော ပဋိဝသတိ, တဿ သန္တိကေ ဗုဒ္ဓဝစနံ ပရိယာပုဏာဟီ’’တိ။ ‘‘ကီဝ ဒူရော, ဘန္တေ, ဣတော ပါဋလိပုတ္တနဂရ’’န္တိ? ‘‘ယောဇနသတာနိ ခေါ နာဂသေနာ’’တိ။ ‘‘ဒူရော ခေါ, ဘန္တေ, မဂ္ဂေါ ။ အန္တရာမဂ္ဂေ ဘိက္ခာ ဒုလ္လဘာ, ကထာဟံ ဂမိဿာမီ’’တိ? ‘‘ဂစ္ဆ, တွံ နာဂသေန, အန္တရာမဂ္ဂေ ပိဏ္ဍပါတံ လဘိဿသိ သာလီနံ ဩဒနံ ဝိဂတကာဠကံ အနေကသူပံ အနေကဗျဉ္ဇန’’န္တိ။ ‘‘ဧဝံ ဘန္တေ’’တိ ခေါ အာယသ္မာ နာဂသေနော အာယသ္မန္တံ အဿဂုတ္တံ အဘိဝါဒေတွာ ပဒက္ခိဏံ ကတွာ ပတ္တစီဝရမာဒါယ ယေန ပါဋလိပုတ္တံ တေန စာရိကံ ပက္ကာမိ။

၁၈။ တေန ခေါ ပန သမယေန ပါဋလိပုတ္တကော သေဋ္ဌိ ပဉ္စဟိ သကဋသတေဟိ ပါဋလိပုတ္တဂါမိမဂ္ဂံ ပဋိပန္နော ဟောတိ။ အဒ္ဒသာ ခေါ ပါဋလိပုတ္တကော သေဋ္ဌိ အာယသ္မန္တံ နာဂသေနံ ဒူရတောဝ အာဂစ္ဆန္တံ, ဒိသွာန ယေနာယသ္မာ နာဂသေနော တေနုပသင်္ကမိ, ဥပသင်္ကမိတွာ အာယသ္မန္တံ နာဂသေနံ အဘိဝါဒေတွာ ‘‘ကုဟိံ ဂစ္ဆသိ တာတာ’’တိ အာဟ။ ‘‘ပါဋလိပုတ္တံ ဂဟပတီ’’တိ။ ‘‘သာဓု တာတ, မယမ္ပိ ပါဋလိပုတ္တံ ဂစ္ဆာမ။ အမှေဟိ သဒ္ဓိံ သုခံ ဂစ္ဆထာ’’တိ။

အထ ခေါ ပါဋလိပုတ္တကော သေဋ္ဌိ အာယသ္မတော နာဂသေနဿ ဣရိယာပထေ ပသီဒိတွာ အာယသ္မန္တံ နာဂသေနံ ပဏီတေန ခါဒနီယေန ဘောဇနီယေန သဟတ္ထာ သန္တပ္ပေတွာ သမ္ပဝါရေတွာ အာယသ္မန္တံ နာဂသေနံ ဘုတ္တာဝိံ ဩနီတပတ္တပါဏိံ အညတရံ နီစံ အာသနံ ဂဟေတွာ ဧကမန္တံ နိသီဒိ, ဧကမန္တံ နိသိန္နော ခေါ ပါဋလိပုတ္တကော သေဋ္ဌိ အာယသ္မန္တံ နာဂသေနံ ဧတဒဝေါစ ‘‘ကိန္နာမောသိ တွံ တာတာ’’တိ။ ‘‘အဟံ, ဂဟပတိ, နာဂသေနော နာမာ’’တိ။ ‘‘ဇာနာသိ ခေါ, တွံ တာတ, ဗုဒ္ဓဝစနံ နာမာ’’တိ? ‘‘ဇာနာမိ ခေါဟံ, ဂဟပတိ, အဘိဓမ္မပဒါနီ’’တိ။ ‘‘လာဘာ နော တာတ, သုလဒ္ဓံ နော တာတ, အဟမ္ပိ ခေါ, တာတ, အာဘိဓမ္မိကော, တွမ္ပိ အာဘိဓမ္မိကော, ဘဏ, တာတ, အဘိဓမ္မပဒါနီ’’တိ။ အထ ခေါ အာယသ္မာ နာဂသေနော ပါဋလိပုတ္တကဿ သေဋ္ဌိဿ အဘိဓမ္မံ ဒေသေသိ, ဒေသေန္တေ ယေဝ ပါဋလိပုတ္တကဿ သေဋ္ဌိဿ ဝိရဇံ ဝီတမလံ ဓမ္မစက္ခုံ ဥဒပါဒိ ‘‘ယံ ကိဉ္စိ သမုဒယဓမ္မံ, သဗ္ဗံ တံ နိရောဓဓမ္မ’’န္တိ။

အထ ခေါ ပါဋလိပုတ္တကော သေဋ္ဌိ ပဉ္စမတ္တာနိ သကဋသတာနိ ပုရတော ဥယျောဇေတွာ သယံ ပစ္ဆတော ဂစ္ဆန္တော ပါဋလိပုတ္တဿ အဝိဒူရေ ဒွေဓါပထေ ဌတွာ အာယသ္မန္တံ နာဂသေနံ ဧတဒဝေါစ ‘‘အယံ ခေါ, တာတ နာဂသေန, အသောကာရာမဿ မဂ္ဂေါ, ဣဒံ ခေါ, တာတ, အမှာကံ ကမ္ဗလရတနံ သောဠသဟတ္ထံ အာယာမေန, အဋ္ဌဟတ္ထံ ဝိတ္ထာရေန, ပဋိဂ္ဂဏှာဟိ ခေါ, တာတ, ဣဒံ ကမ္ဗလရတနံ အနုကမ္ပံ ဥပါဒါယာ’’တိ။ ပဋိဂ္ဂဟေသိ ခေါ အာယသ္မာ နာဂသေနော တံ ကမ္ဗလရတနံ အနုကမ္ပံ ဥပါဒါယ။ အထ ခေါ ပါဋလိပုတ္တကော သေဋ္ဌိ အတ္တမနော ဥဒဂ္ဂေါ ပမုဒိတော ဣတိသောမနဿဇာတော အာယသ္မန္တံ နာဂသေနံ အဘိဝါဒေတွာ ပဒက္ခိဏံ ကတွာ ပက္ကာမိ။

၁၉။ အထ ခေါ အာယသ္မာ နာဂသေနော ယေန အသောကာရာမော ယေနာယသ္မာ ဓမ္မရက္ခိတော တေနုပသင်္ကမိ , ဥပသင်္ကမိတွာ အာယသ္မန္တံ ဓမ္မရက္ခိတံ အဘိဝါဒေတွာ အတ္တနော အာဂတကာရဏံ ကထေတွာ အာယသ္မတော ဓမ္မရက္ခိတဿ သန္တိကေ တေပိဋကံ ဗုဒ္ဓဝစနံ ဧကေနေဝ ဥဒ္ဒေသေန တီဟိ မာသေဟိ ဗျဉ္ဇနသော ပရိယာပုဏိတွာ ပုန တီဟိ မာသေဟိ အတ္ထသော မနသာကာသိ။

အထ ခေါ အာယသ္မာ ဓမ္မရက္ခိတော အာယသ္မန္တံ နာဂသေနံ ဧတဒဝေါစ ‘‘သေယျထာပိ, နာဂသေန, ဂေါပါလကော ဂါဝေါ ရက္ခတိ, အညေ ဂေါရသံ ပရိဘုဉ္ဇန္တိ။ ဧဝမေဝ ခေါ, တွံ နာဂသေန, တေပိဋကံ ဗုဒ္ဓဝစနံ ဓါရေန္တောပိ န ဘာဂီ သာမညဿာ’’တိ။ ‘‘ဟောတု, ဘန္တေ, အလံ ဧတ္တကေနာ’’တိ။ တေနေဝ ဒိဝသဘာဂေန တေန ရတ္တိဘာဂေန သဟ ပဋိသမ္ဘိဒါဟိ အရဟတ္တံ ပါပုဏိ, သဟ သစ္စပ္ပဋိဝေဓေန အာယသ္မတော နာဂသေနဿ သဗ္ဗေ ဒေဝါ သာဓုကာရမဒံသု, ပထဝီ ဥန္နဒိ, ဗြဟ္မာနော အပ္ဖောဋေသုံ, ဒိဗ္ဗာနိ စန္ဒနစုဏ္ဏာနိ ဒိဗ္ဗာနိ စ မန္ဒာရဝပုပ္ဖာနိ အဘိပ္ပဝဿိံသု။

၂၀။ တေန ခေါ ပန သမယေန ကောဋိသတာ အရဟန္တော ဟိမဝန္တေ ပဗ္ဗတေ ရက္ခိတတလေ သန္နိပတိတွာ အာယသ္မတော နာဂသေနဿ သန္တိကေ ဒူတံ ပါဟေသုံ ‘‘အာဂစ္ဆတု နာဂသေနော, ဒဿနကာမာ မယံ နာဂသေန’’န္တိ။ အထ ခေါ အာယသ္မာ နာဂသေနော ဒူတဿ ဝစနံ သုတွာ အသောကာရာမေ အန္တရဟိတော ဟိမဝန္တေ ပဗ္ဗတေ ရက္ခိတတလေ ကောဋိသတာနံ အရဟန္တာနံ ပုရတော ပါတုရဟောသိ။

အထ ခေါ ကောဋိသတာ အရဟန္တော အာယသ္မန္တံ နာဂသေနံ ဧတဒဝေါစုံ ‘‘ဧသော ခေါ, နာဂသေန, မိလိန္ဒော ရာဇာ ဘိက္ခုသသံဃံ ဝိဟေဌေတိ ဝါဒပ္ပဋိဝါဒေန ပဉ္ဟပုစ္ဆာယ။ သာဓု, နာဂသေန, ဂစ္ဆ တွံ မိလိန္ဒံ ရာဇာနံ ဒမေဟီ’’တိ။ ‘‘တိဋ္ဌတု, ဘန္တေ, ဧကော မိလိန္ဒော ရာဇာ; သစေ, ဘန္တေ, သကလဇမ္ဗုဒီပေ ရာဇာနော အာဂန္တွာ မံ ပဉ္ဟံ ပုစ္ဆေယျုံ, သဗ္ဗံ တံ ဝိသဇ္ဇေတွာ သမ္ပဒါလေဿာမိ, ဂစ္ဆထ ဝေါ, ဘန္တေ, အစ္ဆမ္ဘိတာ သာဂလနဂရ’’န္တိ။ အထ ခေါ ထေရာ ဘိက္ခူ သာဂလနဂရံ ကာသာဝပ္ပဇ္ဇောတံ ဣသိဝါတပဋိဝါတံ အကံသု။

၂၁။ တေန ခေါ ပန သမယေန အာယသ္မာ အာယုပါလော သင္ခ္ယေယျပရိဝေဏေ ပဋိဝသတိ။ အထ ခေါ မိလိန္ဒော ရာဇာ အမစ္စေ ဧတဒဝေါစ ‘‘ရမဏီယာ ဝတ ဘော ဒေါသိနာ ရတ္တိ, ကန္နု ခွဇ္ဇ သမဏံ ဝါ ဗြာဟ္မဏံ ဝါ ဥပသင်္ကမေယျာမ သာကစ္ဆာယ ပဉ္ဟပုစ္ဆနာယ, ကော မယာ သဒ္ဓိံ သလ္လပိတုံ ဥဿဟတိ ကင်္ခံ ပဋိဝိနေတု’’န္တိ။ ဧဝံ ဝုတ္တေ ပဉ္စသတာ ယောနကာ ရာဇာနံ မိလိန္ဒံ ဧတဒဝေါစုံ ‘‘အတ္ထိ, မဟာရာဇ, အာယုပါလော နာမ ထေရော တေပိဋကော ဗဟုဿုတော အာဂတာဂမော, သော ဧတရဟိ သင္ခ္ယေယျပရိဝေဏေ ပဋိဝသတိ; ဂစ္ဆ, တွံ မဟာရာဇ, အာယသ္မန္တံ အာယုပါလံ ပဉ္ဟံ ပုစ္ဆဿူ’’တိ။ ‘‘တေန ဟိ, ဘဏေ, ဘဒန္တဿ အာရောစေထာ’’တိ။

အထ ခေါ နေမိတ္တိကော အာယသ္မတော အာယုပါလဿ သန္တိကေ ဒူတံ ပါဟေသိ ‘‘ရာဇာ, ဘန္တေ, မိလိန္ဒော အာယသ္မန္တံ အာယုပါလံ ဒဿနကာမော’’တိ။ အာယသ္မာပိ ခေါ အာယုပါလော ဧဝမာဟ ‘‘တေန ဟိ အာဂစ္ဆတူ’’တိ။ အထ ခေါ မိလိန္ဒော ရာဇာ ပဉ္စမတ္တေဟိ ယောနကသတေဟိ ပရိဝုတော ရထဝရမာရုယှ ယေန သင္ခ္ယေယျပရိဝေဏံ ယေနာယသ္မာ အာယုပါလော တေနုပသင်္ကမိ, ဥပသင်္ကမိတွာ အာယသ္မတာ အာယုပါလေန သဒ္ဓိံ သမ္မောဒိ, သမ္မောဒနီယံ ကထံ သာရဏီယံ ဝီတိသာရေတွာ ဧကမန္တံ နိသီဒိ, ဧကမန္တံ နိသိန္နော ခေါ မိလိန္ဒော ရာဇာ အာယသ္မန္တံ အာယုပါလံ ဧတဒဝေါစ ‘‘ကိမတ္ထိယာ, ဘန္တေ အာယုပါလ, တုမှာကံ ပဗ္ဗဇ္ဇာ, ကော စ တုမှာကံ ပရမတ္ထော’’တိ။ ထေရော အာဟ ‘‘ဓမ္မစရိယသမစရိယတ္ထာ ခေါ, မဟာရာဇ, ပဗ္ဗဇ္ဇာ, သာမညဖလံ ခေါ ပန အမှာကံ ပရမတ္ထော’’တိ။ ‘‘အတ္ထိ ပန, ဘန္တေ, ကောစိ ဂိဟီပိ ဓမ္မစာရီ သမစာရီ’’တိ? ‘‘အာမ, မဟာရာဇ, အတ္ထိ ဂိဟီပိ ဓမ္မစာရီ သမစာရီ, ဘဂဝတိ ခေါ, မဟာရာဇ, ဗာရာဏသိယံ ဣသိပတနေ မိဂဒါယေ ဓမ္မစက္ကံ ပဝတ္တေန္တေ အဋ္ဌာရသန္နံ ဗြဟ္မကောဋီနံ ဓမ္မာဘိသမယော အဟောသိ, ဒေဝတာနံ ပန ဓမ္မာဘိသမယော ဂဏနပထံ ဝီတိဝတ္တော, သဗ္ဗေတေ ဂိဟိဘူတာ, န ပဗ္ဗဇိတာ။

‘‘ပုန စပရံ, မဟာရာဇ, ဘဂဝတာ ခေါ မဟာသမယသုတ္တန္တေ ဒေသိယမာနေ, မဟာမင်္ဂလသုတ္တန္တေ ဒေသိယမာနေ, သမစိတ္တပရိယာယသုတ္တန္တေ ဒေသိယမာနေ, ရာဟုလောဝါဒသုတ္တန္တေ ဒေသိယမာနေ, ပရာဘဝသုတ္တန္တေ ဒေသိယမာနေ ဂဏနပထံ ဝီတိဝတ္တာနံ ဒေဝတာနံ ဓမ္မာဘိသမယော အဟောသိ, သဗ္ဗေတေ ဂိဟိဘူတာ, န ပဗ္ဗဇိတာ’’တိ။ ‘‘တေန ဟိ, ဘန္တေ အာယုပါလ, နိရတ္ထိကာ တုမှာကံ ပဗ္ဗဇ္ဇာ, ပုဗ္ဗေ ကတဿ ပါပကမ္မဿ နိဿန္ဒေန သမဏာ သကျပုတ္တိယာ ပဗ္ဗဇန္တိ ဓုတင်္ဂါနိ စ ပရိဟရန္တိ။ ယေ ခေါ တေ, ဘန္တေ အာယုပါလ, ဘိက္ခူ ဧကာသနိကာ, နူန တေ ပုဗ္ဗေ ပရေသံ ဘောဂဟာရကာ စောရာ, တေ ပရေသံ ဘောဂေ အစ္ဆိန္ဒိတွာ တဿ ကမ္မဿ နိဿန္ဒေန ဧတရဟိ ဧကာသနိကာ ဘဝန္တိ, န လဘန္တိ ကာလေန ကာလံ ပရိဘုဉ္ဇိတုံ, နတ္ထိ တေသံ သီလံ, နတ္ထိ တပေါ, နတ္ထိ ဗြဟ္မစရိယံ။ ယေ ခေါ ပန တေ, ဘန္တေ အာယုပါလ, ဘိက္ခူ အဗ္ဘောကာသိကာ, နူန တေ ပုဗ္ဗေ ဂါမဃာတကာ စောရာ, တေ ပရေသံ ဂေဟာနိ ဝိနာသေတွာ တဿ ကမ္မဿ နိဿန္ဒေန ဧတရဟိ အဗ္ဘောကာသိကာ ဘဝန္တိ, န လဘန္တိ သေနာသနာနိ ပရိဘုဉ္ဇိတုံ, နတ္ထိ တေသံ သီလံ, နတ္ထိ တပေါ, နတ္ထိ ဗြဟ္မစရိယံ။ ယေ ခေါ ပန တေ, ဘန္တေ အာယုပါလ, ဘိက္ခူ နေသဇ္ဇိကာ, နူန တေ ပုဗ္ဗေ ပန္ထဒူသကာ စောရာ, တေ ပရေသံ ပထိကေ ဇနေ ဂဟေတွာ ဗန္ဓိတွာ နိသီဒါပေတွာ တဿ ကမ္မဿ နိဿန္ဒေန ဧတရဟိ နေသဇ္ဇိကာ ဘဝန္တိ, န လဘန္တိ သေယျံ ကပ္ပေတုံ, နတ္ထိ တေသံ သီလံ, နတ္ထိ တပေါ, နတ္ထိ ဗြဟ္မစရိယ’’န္တိ အာဟ။

ဧဝံ ဝုတ္တေ အာယသ္မာ အာယုပါလော တုဏှီ အဟောသိ, န ကိဉ္စိ ပဋိဘာသိ။ အထ ခေါ ပဉ္စသတာ ယောနကာ ရာဇာနံ မိလိန္ဒံ ဧတဒဝေါစုံ ‘‘ပဏ္ဍိတော, မဟာရာဇ, ထေရော, အပိ စ ခေါ အဝိသာရဒေါ န ကိဉ္စိ ပဋိဘာသတီ’’တိ။

အထ ခေါ မိလိန္ဒော ရာဇာ အာယသ္မန္တံ အာယုပါလံ တုဏှီဘူတံ ဒိသွာ အပ္ဖောဋေတွာ ဥက္ကုဋ္ဌိံ ကတွာ ယောနကေ ဧတဒဝေါစ ‘‘တုစ္ဆော ဝတ ဘော ဇမ္ဗုဒီပေါ, ပလာပေါ ဝတ ဘော ဇမ္ဗုဒီပေါ, နတ္ထိ ကောစိ သမဏော ဝါ ဗြာဟ္မဏော ဝါ, ယော မယာ သဒ္ဓိံ သလ္လပိတုံ ဥဿဟတိ ကင်္ခံ ပဋိဝိနေတု’’န္တိ။

၂၂။ အထ ခေါ မိလိန္ဒဿ ရညော သဗ္ဗံ တံ ပရိသံ အနုဝိလောကေန္တဿ အဘီတေ အမင္ကုဘူတေ ယောနကေ ဒိသွာ ဧတဒဟောသိ ‘‘နိဿံသယံ အတ္ထိ မညေ အညော ကောစိ ပဏ္ဍိတော ဘိက္ခု, ယော မယာ သဒ္ဓိံ သလ္လပိတုံ ဥဿဟတိ, ယေနိမေ ယောနကာ န မင္ကုဘူတာ’’တိ။ အထ ခေါ မိလိန္ဒော ရာဇာ ယောနကေ ဧတဒဝေါစ ‘‘အတ္ထိ, ဘဏေ, အညော ကောစိ ပဏ္ဍိတော ဘိက္ခု, ယော မယာ သဒ္ဓိံ သလ္လပိတုံ ဥဿဟတိ ကင်္ခံ ပဋိဝိနေတု’’န္တိ။

တေန ခေါ ပန သမယေန အာယသ္မာ နာဂသေနော သမဏဂဏပရိဝုတော သင်္ဃီ ဂဏီ ဂဏာစရိယော ဉာတော ယသဿီ သာဓုသမ္မတော ဗဟုဇနဿ ပဏ္ဍိတော ဗျတ္တော မေဓါဝီ နိပုဏော ဝိညူ ဝိဘာဝီ ဝိနီတော ဝိသာရဒေါ ဗဟုဿုတော တေပိဋကော ဝေဒဂူ ပဘိန္နဗုဒ္ဓိမာ အာဂတာဂမော ပဘိန္နပဋိသမ္ဘိဒေါ နဝင်္ဂသတ္ထုသာသနေ ပရိယတ္တိဓရော ပါရမိပ္ပတ္တော ဇိနဝစနေ ဓမ္မတ္ထဒေသနာပဋိဝေဓကုသလော အက္ခယဝိစိတြပဋိဘာနော စိတြကထီ ကလျာဏဝါက္ကရဏော ဒုရာသဒေါ ဒုပ္ပသဟော ဒုရုတ္တရော ဒုရာဝရဏော ဒုန္နိဝါရယော, သာဂရော ဝိယ အက္ခောဘော, ဂိရိရာဇာ ဝိယ နိစ္စလော, ရဏဉ္ဇဟော တမောနုဒေါ ပဘင်္ကရော မဟာကထီ ပရဂဏိဂဏမထနော ပရတိတ္ထိယမဒ္ဒနော ဘိက္ခူနံ ဘိက္ခုနီနံ ဥပါသကာနံ ဥပါသိကာနံ ရာဇူနံ ရာဇမဟာမတ္တာနံ သက္ကတော ဂရုကတော မာနိတော ပူဇိတော အပစိတော လာဘီ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရာနံ လာဘဂ္ဂယသဂ္ဂပ္ပတ္တော ဝုဒ္ဓါနံ ဝိညူနံ သောတာဝဓါနေန သမန္နာဂတာနံ သန္ဒဿေန္တော နဝင်္ဂံ ဇိနသာသနရတနံ, ဥပဒိသန္တော ဓမ္မမဂ္ဂံ, ဓါရေန္တော ဓမ္မပ္ပဇ္ဇောတံ, ဥဿာပေန္တော ဓမ္မယူပံ, ယဇန္တော ဓမ္မယာဂံ, ပဂ္ဂဏှန္တော ဓမ္မဒ္ဓဇံ, ဥဿာပေန္တော ဓမ္မကေတုံ, ဓမေန္တော [ဥပ္ပဠာသေန္တော (သီ။ ဣ။)] ဓမ္မသင်္ခံ, အာဟနန္တော ဓမ္မဘေရိံ, နဒန္တော သီဟနာဒံ , ဂဇ္ဇန္တော ဣန္ဒဂဇ္ဇိတံ, မဓုရဂိရဂဇ္ဇိတေန ဉာဏဝရဝိဇ္ဇုဇာလပရိဝေဌိတေန ကရုဏာဇလဘရိတေန မဟတာ ဓမ္မာမတမေဃေန သကလလောကမဘိတပ္ပယန္တော ဂါမနိဂမရာဇဓါနီသု စာရိကံ စရမာနော အနုပုဗ္ဗေန သာဂလနဂရံ အနုပ္ပတ္တော ဟောတိ။ တတြ သုဒံ အာယသ္မာ နာဂသေနော အသီတိယာ ဘိက္ခုသဟဿေဟိ သဒ္ဓိံ သင္ခ္ယေယျပရိဝေဏေ ပဋိဝသတိ။ တေနာဟု ပေါရာဏာ –

‘‘ဗဟုဿုတော စိတြကထီ၊ နိပုဏော စ ဝိသာရဒေါ။

သာမယိကော စ ကုသလော၊ ပဋိဘာနေ စ ကောဝိဒေါ။

‘‘တေ စ တေပိဋကာ ဘိက္ခူ၊ ပဉ္စနေကာယိကာပိ စ။

စတုနေကာယိကာ စေဝ၊ နာဂသေနံ ပုရက္ခရုံ။

‘‘ဂမ္ဘီရပညော မေဓါဝီ၊ မဂ္ဂါမဂ္ဂဿ ကောဝိဒေါ။

ဥတ္တမတ္ထံ အနုပ္ပတ္တော၊ နာဂသေနော ဝိသာရဒေါ။

‘‘တေဟိ ဘိက္ခူဟိ ပရိဝုတော၊ နိပုဏေဟိ သစ္စဝါဒိဘိ။

စရန္တော ဂါမနိဂမံ၊ သာဂလံ ဥပသင်္ကမိ။

‘‘သင္ခ္ယေယျပရိဝေဏသ္မိံ ၊ နာဂသေနော တဒါ ဝသိ။

ကထေတိ သော မနုဿေဟိ၊ ပဗ္ဗတေ ကေသရီ ယထာ’’တိ။

၂၃။ အထ ခေါ ဒေဝမန္တိယော ရာဇာနံ မိလိန္ဒံ ဧတဒဝေါစ ‘‘အာဂမေဟိ, တွံ မဟာရာဇ; အတ္ထိ, မဟာရာဇ, နာဂသေနော နာမ ထေရော ပဏ္ဍိတော ဗျတ္တော မေဓါဝီ ဝိနီတော ဝိသာရဒေါ ဗဟုဿုတော စိတြကထီ ကလျာဏပဋိဘာနော အတ္ထဓမ္မနိရုတ္တိပဋိဘာနပဋိသမ္ဘိဒါသု ပါရမိပ္ပတ္တော, သော ဧတရဟိ သင္ခ္ယေယျပရိဝေဏေ ပဋိဝသတိ, ဂစ္ဆ, တွံ မဟာရာဇ, အာယသ္မန္တံ နာဂသေနံ ပဉ္ဟံ ပုစ္ဆဿု, ဥဿဟတိ သော တယာ သဒ္ဓိံ သလ္လပိတုံ ကင်္ခံ ပဋိဝိနေတု’’န္တိ။ အထ ခေါ မိလိန္ဒဿ ရညော သဟသာ ‘‘နာဂသေနော’’တိ သဒ္ဒံ သုတွာဝ အဟုဒေဝ ဘယံ, အဟုဒေဝ ဆမ္ဘိတတ္တံ, အဟုဒေဝ လောမဟံသော။ အထ ခေါ မိလိန္ဒော ရာဇာ ဒေဝမန္တိယံ ဧတဒဝေါစ ‘‘ဥဿဟတိ ဘော နာဂသေနော ဘိက္ခု မယာ သဒ္ဓိံ သလ္လပိတု’’န္တိ? ‘‘ဥဿဟတိ, မဟာရာဇ, အပိ ဣန္ဒယမဝရုဏကုဝေရပဇာပတိ သုယာမ သန္တုသိတလောကပါလေဟိပိ ပိတုပိတာမဟေန မဟာဗြဟ္မုနာပိ သဒ္ဓိံ သလ္လပိတုံ, ကိမင်္ဂံ ပန မနုဿဘူတေနာ’’တိ။

အထ ခေါ မိလိန္ဒော ရာဇာ ဒေဝမန္တိယံ ဧတဒဝေါစ ‘‘တေန ဟိ, တွံ ဒေဝမန္တိယ, ဘဒန္တဿ သန္တိကေ ဒူတံ ပေသေဟီ’’တိ။ ‘‘ဧဝံ ဒေဝါ’’တိ ခေါ ဒေဝမန္တိယော အာယသ္မတော နာဂသေနဿ သန္တိကေ ဒူတံ ပါဟေသိ ‘‘ရာဇာ, ဘန္တေ, မိလိန္ဒော အာယသ္မန္တံ ဒဿနကာမော’’တိ။ အာယသ္မာပိ ခေါ နာဂသေနော ဧဝမာဟ ‘‘တေန ဟိ အာဂစ္ဆတူ’’တိ။

အထ ခေါ မိလိန္ဒော ရာဇာ ပဉ္စမတ္တေဟိ ယောနကသတေဟိ ပရိဝုတော ရထဝရမာရုယှ မဟတာ ဗလကာယေန သဒ္ဓိံ ယေန သင္ခ္ယေယျပရိဝေဏံ ယေနာယသ္မာ နာဂသေနော တေနုပသင်္ကမိ။ တေန ခေါ ပန သမယေန အာယသ္မာ နာဂသေနော အသီတိယာ ဘိက္ခုသဟဿေဟိ သဒ္ဓိံ မဏ္ဍလမာဠေ နိသိန္နော ဟောတိ။ အဒ္ဒသာ ခေါ မိလိန္ဒော ရာဇာ အာယသ္မတော နာဂသေနဿ ပရိသံ ဒူရတောဝ, ဒိသွာန ဒေဝမန္တိယံ ဧတဒဝေါစ ‘‘ကဿေသာ, ဒေဝမန္တိယ, မဟတီ ပရိသာ’’တိ? ‘‘အာယသ္မတော ခေါ, မဟာရာဇ, နာဂသေနဿ ပရိသာ’’တိ။

အထ ခေါ မိလိန္ဒဿ ရညော အာယသ္မတော နာဂသေနဿ ပရိသံ ဒူရတောဝ ဒိသွာ အဟုဒေဝ ဘယံ, အဟုဒေဝ ဆမ္ဘိတတ္တံ, အဟုဒေဝ လောမဟံသော။ အထ ခေါ မိလိန္ဒော ရာဇာ ခဂ္ဂပရိဝါရိတော ဝိယ ဂဇော, ဂရုဠပရိဝါရိတော ဝိယ နာဂေါ, အဇဂရပရိဝါရိတော ဝိယ ကောတ္ထုကော [ကောတ္ထုကော (သီ။ ဣ။)], မဟိံသပရိဝုတော ဝိယ အစ္ဆော, နာဂါနုဗဒ္ဓေါ ဝိယ မဏ္ဍူကော, သဒ္ဒူလာနုဗဒ္ဓေါ ဝိယ မိဂေါ, အဟိတုဏ္ဍိကသမာဂတော [အဘိဂုဏ္ဌိကသမာဂတော (သီ။ ဣ။)] ဝိယ ပန္နဂေါ, မဇ္ဇာရသမာဂတော ဝိယ ဥန္ဒူရော, ဘူတဝေဇ္ဇသမာဂတော ဝိယ ပိသာစော, ရာဟုမခဂတော ဝိယ စန္ဒော, ပန္နဂေါ ဝိယ ပေဠန္တရဂတော, သကုဏော ဝိယ ပဉ္ဇရန္တရဂတော, မစ္ဆော ဝိယ ဇာလန္တရဂတော, ဝါဠဝနမနုပ္ပဝိဋ္ဌော ဝိယ ပုရိသော, ဝေဿဝဏာပရာဓိကော ဝိယ ယက္ခော, ပရိက္ခီဏာယုကော ဝိယ ဒေဝပုတ္တော ဘီတော ဥဗ္ဗိဂ္ဂေါ ဥတြသ္တော သံဝိဂ္ဂေါ လောမဟဋ္ဌဇာတော ဝိမနော ဒုမ္မနော ဘန္တစိတ္တော ဝိပရိဏတမာနသော ‘‘မာ မံ အယံ ပရိဇနော ပရိဘဝီ’’တိ သတိံ [ဓီတိံ (သီ။ ဣ။)] ဥပဋ္ဌပေတွာ ဒေဝမန္တိယံ ဧတဒဝေါစ – ‘‘မာ ခေါ, တွံ ဒေဝမန္တိယ , အာယသ္မန္တံ နာဂသေနံ မယှံ အာစိက္ခေယျာသိ, အနက္ခာတညေဝါဟံ နာဂသေနံ ဇာနိဿာမီ’’တိ။ ‘‘သာဓု, မဟာရာဇ, တွညေဝ ဇာနာဟီ’’တိ။

တေန ခေါ ပန သမယေန အာယသ္မာ နာဂသေနော တဿာ ဘိက္ခုပရိသာယ ပုရတော စတ္တာလီသာယ ဘိက္ခုသဟဿာနံ နဝကတရော ဟောတိ ပစ္ဆတော စတ္တာလီသာယ ဘိက္ခုသဟဿာနံ ဝုဍ္ဎတရော။

အထ ခေါ မိလိန္ဒော ရာဇာ သဗ္ဗံ တံ ဘိက္ခုသသံဃံ ပုရတော စ ပစ္ဆတော စ မဇ္ဈတော စ အနုဝိလောကေန္တော အဒ္ဒသာ ခေါ အာယသ္မန္တံ နာဂသေနံ ဒူရတောဝ ဘိက္ခုသံဃဿ မဇ္ဈေ နိသိန္နံ ကေသရသီဟံ ဝိယ ဝိဂတဘယဘေရဝံ ဝိဂတလောမဟံသံ ဝိဂတဘယသာရဇ္ဇံ, ဒိသွာန အာကာရေနေဝ အညာသိ ‘‘ဧသော ခေါ ဧတ္ထ နာဂသေနော’’တိ။

အထ ခေါ မိလိန္ဒော ရာဇာ ဒေဝမန္တိယံ ဧတဒဝေါစ ‘‘ဧသော ခေါ, ဒေဝမန္တိယ, အာယသ္မာ နာဂသေနော’’တိ။ ‘‘အာမ, မဟာရာဇ, ဧသော ခေါ နာဂသေနော, သုဋ္ဌု ခေါ, တွံ မဟာရာဇ, နာဂသေနံ အညာသီ’’တိ ။ တတော ရာဇာ တုဋ္ဌော အဟောသိ ‘‘အနက္ခာတောဝ မယာ နာဂသေနော အညာတော’’တိ။ အထ ခေါ မိလိန္ဒဿ ရညော အာယသ္မန္တံ နာဂသေနံ ဒိသွာဝ အဟုဒေဝ ဘယံ, အဟုဒေဝ ဆမ္ဘိတတ္တံ, အဟုဒေဝ လောမဟံသော။

တေနာဟု –

‘‘စရဏေန စ သမ္ပန္နံ၊ သုဒန္တံ ဥတ္တမေ ဒမေ။

ဒိသွာ ရာဇာ နာဂသေနံ၊ ဣဒံ ဝစနမဗြဝိ။

‘‘ကထိတာ [ကထိကာ (သီ။ ဣ။)] မယာ ဗဟူ ဒိဋ္ဌာ၊ သာကစ္ဆာ ဩသဋာ ဗဟူ။

န တာဒိသံ ဘယံ အာသိ၊ အဇ္ဇ တာသော ယထာ မမ။

‘‘နိဿံသယံ ပရာဇယော၊ မမ အဇ္ဇ ဘဝိဿတိ။

ဇယော စ နာဂသေနဿ၊ ယထာ စိတ္တံ န သဏ္ဌိတ’’န္တိ။

ဗာဟိရကထာ နိဋ္ဌိတာ။

၁၁၈။ ပုဗ္ဗာ ကောဋိ န ပညာယတိ အဝိဇ္ဇာယ စ ဘဝတဏှာယ စ။ တတ္ထ အဝိဇ္ဇာနီဝရဏာနံ တဏှာသံယောဇနာနံ သတ္တာနံ ပုဗ္ဗကောဋိ န ပညာယတိ။ တတ္ထ ယေ သတ္တာ တဏှာသံယောဇနာ, တေ အဇ္ဈောသာနဗဟုလာ မန္ဒဝိပဿကာ။ ယေ ပန ဥဿန္နဒိဋ္ဌိကာ သတ္တာ, တေ ဝိပဿနာဗဟုလာ မန္ဒဇ္ဈောသာနာ။

တတ္ထ တဏှာစရိတာ သတ္တာ သတ္တသညာဘိနိဝိဋ္ဌာ အနုပ္ပါဒဝယဒဿိနော။ တေ ပဉ္စသု ခန္ဓေသု အတ္တာနံ သမနုပဿန္တိ ‘‘ရူပဝန္တံ ဝါ အတ္တာနံ, အတ္တနိ ဝါ ရူပံ, ရူပသ္မိံ ဝါ အတ္တာန’’န္တိ။ ဧဝံ ပဉ္စက္ခန္ဓာ။ အညေဟိ ခန္ဓေဟိ အတ္တာနံ သမနုပဿန္တိ တဿ ဥဿန္နဒိဋ္ဌိကာ သတ္တာ ဝိပဿမာနာ ခန္ဓေ ဥဇုံ အတ္တတော သမနုပဿန္တိ။ တေ ရူပံ အတ္တကော သမနုပဿန္တိ။ ယံ ရူပံ, သော အတ္တာ။ ယော အဟံ, တံ ရူပံ။ သော ရူပဝိနာသံ ပဿတိ, အယံ ဥစ္ဆေဒဝါဒီ ။ ဣတိ ပဉ္စန္နံ ခန္ဓာနံ ပဌမာဘိနိပါတာ သက္ကာယဒိဋ္ဌိယော ပဉ္စ ဥစ္ဆေဒံ ဘဇန္တိ ‘‘တံ ဇီဝံ တံ သရီရ’’န္တိ။ ဧကမေကမှိ ခန္ဓေ တီဟိ ပဒေဟိ ပစ္ဆိမကေဟိ သဿတံ ဘဇတိ ‘‘အညံ ဇီဝံ အညံ သရီရ’’န္တိ။ ဣတော ဗဟိဒ္ဓါတေ ပဗ္ဗဇိတာ တဏှာစရိတာ ကာမသုခလ္လိကာနုယောဂမနုယုတ္တာ ဝိဟရန္တိ။ တေန ယေ စ နိဿန္ဒေန ဒိဋ္ဌိစရိတာ အတ္တကိလမထာနုယောဂမနုယုတ္တာ ဝိဟရန္တိ။ တေန ယေဝ ဒိဋ္ဌိသုခေန ဧတ္တာဝတာ ဗာဟိရကော ပယောဂေါ။

တတ္ထ ဒိဋ္ဌိစရိတာ သတ္တာ ယေ အရိယဓမ္မဝိနယံ ဩတရန္တိ, တေ ဓမ္မာနုသာရိနော ဟောန္တိ။ ယေ တဏှာစရိတာ သတ္တာ အရိယံ ဓမ္မဝိနယံ ဩတရန္တိ, တေ သဒ္ဓါနုသာရိနော ဟောန္တိ။

တတ္ထ ယေ ဒိဋ္ဌိစရိတာ သတ္တာ, တေ ကာမေသု ဒေါသဒိဋ္ဌီ, န စ ယေ ကာမေသု အနုသယာ သမူဟတာ, တေ အတ္တကိလမထာနုယောဂမနုယုတ္တာ ဝိဟရန္တိ။ တေသံ သတ္ထာ ဓမ္မံ ဒေသေတိ။ အညော ဝါ သာဝကော ကာမေဟိ နတ္ထိ အတ္ထောတိ တေ စ ပုဗ္ဗေယေဝ ကာမေဟိ အနတ္ထိကာ ဣတိ ကာမေ အပ္ပကသိရေန ပဋိနိဿဇ္ဇန္တိ။ တေ စေတသိကေန ဒုက္ခေန အနဇ္ဈောသိတာ။ တေန ဝုစ္စတိ ‘‘သုခါ ပဋိပဒါ’’တိ ။ ယေ ပန တဏှာစရိတာ သတ္တာ, တေ ကာမေသု အဇ္ဈောသိတာ, တေသံ သတ္ထာ ဝါ ဓမ္မံ ဒေသေတိ။ အညတရော ဝါ ဘိက္ခု ကာမေဟိ နတ္ထိ အတ္ထောတိ, တေ ပိယရူပံ ဒုက္ခေန ပဋိနိဿဇ္ဇန္တိ။ တေန ဝုစ္စတိ ‘‘ဒုက္ခာ ပဋိပဒါ’’တိ။ ဣတိ ဣမေ သဗ္ဗသတ္တာ ဒွီသု ပဋိပဒါသု သမောသရဏံ ဂစ္ဆန္တိ ဒုက္ခာယဉ္စ သုခါယဉ္စ။

တတ္ထ ယေ ဒိဋ္ဌိစရိတာ သတ္တာ, တေ ဒွိဓါ မုဒိန္ဒ္ရိယာ စ တိက္ခိန္ဒ္ရိယာ စ။ တတ္ထ ယေ ဒိဋ္ဌိစရိတာ သတ္တာ တိက္ခိန္ဒ္ရိယာ သုခေန ပဋိနိဿဇ္ဇန္တိ, ခိပ္ပဉ္စ အဘိသမေန္တိ, တေန ဝုစ္စတိ ‘‘ခိပ္ပါဘိညာ သုခါ ပဋိပဒါ’’တိ။ တတ္ထ ယေ ဒိဋ္ဌိစရိတာ သတ္တာ မုဒိန္ဒ္ရိယာ ပဌမံ တိက္ခိန္ဒ္ရိယံ ဥပါဒါယ ဒန္ဓတရံ အဘိသမေန္တိ, တေ သုခေန ပဋိနိဿဇ္ဇန္တိ, ဒန္ဓဉ္စ အဘိသမေန္တိ။ တေန ဝုစ္စတိ ‘‘သုခါ ပဋိပဒါ ဒန္ဓာဘိညာ’’တိ။ တတ္ထ တဏှာစရိတာ သတ္တာ ဒွိဓါ တိက္ခိန္ဒ္ရိယာ စ မုဒိန္ဒ္ရိယာ စ။ တတ္ထ ယေ တဏှာစရိတာ သတ္တာ တိက္ခိန္ဒ္ရိယာ ဒုက္ခေန ပဋိနိဿဇ္ဇန္တိ, ခိပ္ပဉ္စ အဘိသမေန္တိ။ တေန ဝုစ္စတိ ‘‘ဒုက္ခာ ပဋိပဒါ ခိပ္ပါဘိညာ’’တိ။ တတ္ထ ယေ တဏှာစရိတာ သတ္တာ မုဒိန္ဒ္ရိယာ ပဌမံ တိက္ခိန္ဒ္ရိယံ ဥပါဒါယ ဒန္ဓတရံ အဘိသမေန္တိ, တေ ဒုက္ခေန ပဋိနိဿဇ္ဇန္တိ, ဒန္ဓဉ္စ အဘိသမေန္တိ။ တေန ဝုစ္စတိ ‘‘ဒုက္ခာ ပဋိပဒါ ဒန္ဓာဘိညာ’’တိ။ ဣမာ စတဿော ပဋိပဒါယော အပဉ္စမာ အဆဋ္ဌာ။ ယေ ဟိ ကေစိ နိဗ္ဗုတာ နိဗ္ဗာယိဿန္တိ ဝါ ဣမာဟိ စတူဟိ ပဋိပဒါဟိ အနညာဟိ အယံ ပဋိပဒါစတုက္ကေန ကိလေသေ နိဒ္ဒိသတိ။ ယာ စတုက္ကမဂ္ဂေန အရိယဓမ္မေသု နိဒ္ဒိသိတဗ္ဗာ, အယံ ဝုစ္စတိ သီဟဝိက္ကီဠိတော နာမ နယော။

၁၁၉။ တတ္ရိမေ စတ္တာရော အာဟာရာ။ စတ္တာရော ဝိပလ္လာသာ ဥပါဒါနာ ယောဂါ ဂန္ထာ အာသဝါ ဩဃာ သလ္လာ ဝိညာဏဋ္ဌိတိယော အဂတိဂမနာတိ, ဧဝံ ဣမာနိ သဗ္ဗာနိ ဒသ ပဒါနိ။ အယံ သုတ္တဿ သံသန္ဒနာ။

စတ္တာရော အာဟာရာ။ တတ္ထ ယော စ ကဗဠီကာရော အာဟာရော ယော စ ဖဿော အာဟာရော, ဣမေ တဏှာစရိတေန ပဟာတဗ္ဗာ။ တတ္ထ ယော စ မနောသဉ္စေတနာဟာရော ယော စ ဝိညာဏာဟာရော, ဣမေ ဒိဋ္ဌိစရိတေန ပဟာတဗ္ဗာ။

ပဌမော အာဟာရော ပဌမော ဝိပလ္လာသော, ဒုတိယော အာဟာရော ဒုတိယော ဝိပလ္လာသော, တတိယော အာဟာရော တတိယော ဝိပလ္လာသော, စတုတ္ထော အာဟာရော စတုတ္ထော ဝိပလ္လာသော။ ဣမေ စတ္တာရော ဝိပလ္လာသာ အပဉ္စမာ အဆဋ္ဌာ။ ဣဒဉ္စ ပမာဏာ စတ္တာရော အာဟာရာ။

တတ္ထ ပဌမေ ဝိပလ္လာသေ ဌိတော ကာမေ ဥပါဒိယတိ, ဣဒံ ကာမုပါဒါနံ။ ဒုတိယေ ဝိပလ္လာသေ ဌိတော အနာဂတံ ဘဝံ ဥပါဒိယတိ, ဣဒံ သီလဗ္ဗတုပါဒါနံ။ တတိယေ ဝိပလ္လာသေ ဌိတော ဝိပရီတော ဒိဋ္ဌိံ ဥပါဒိယတိ, ဣဒံ ဒိဋ္ဌုပါဒါနံ။ စတုတ္ထေ ဝိပလ္လာသေ ဌိတော ခန္ဓေ အတ္တတော ဥပါဒိယတိ, ဣဒံ အတ္တဝါဒုပါဒါနံ။

တတ္ထ ကာမုပါဒါနေ ဌိတော ကာမေ အဘိဇ္ဈာယတိ ဂန္ထတိ, အယံ အဘိဇ္ဈာကာယဂန္ထော။ သီလဗ္ဗတုပါဒါနေ ဌိတော ဗျာပါဒံ ဂန္ထတိ, အယံ ဗျာပါဒကာယဂန္ထော။ ဒိဋ္ဌုပါဒါနေ ဌိတော ပရာမာသံ ဂန္ထတိ, အယံ ပရာမာသကာယဂန္ထော။ အတ္တဝါဒုပါဒါနေ ဌိတော ပပဉ္စန္တော ဂန္ထတိ, အယံ ဣဒံသစ္စာဘိနိဝေသော ကာယဂန္ထော။

တဿ ဂန္ထိတာ ကိလေသာ အာသဝန္တိ။ ကိဉ္စိ ပန ဝုစ္စတိ ဝိပ္ပဋိသာရော။ ယေ ဝိပ္ပဋိသာရာ [ယော ဝိပ္ပဋိသာရော (ဣ။ က။)] တေ အနုသယာ။ တတ္ထ အဘိဇ္ဈာကာယဂန္ထေန ကာမာသဝေါ, ဗျာပါဒကာယဂန္ထေန ဘဝါသဝေါ, ပရာမာသကာယဂန္ထေန ဒိဋ္ဌာသဝေါ, ဣဒံ သစ္စာဘိနိဝေသကာယဂန္ထေန အဝိဇ္ဇာသဝေါ။

တေ စတ္တာရော အာသဝါ ဝေပုလ္လဘာဝံ ဂတာ ဩဃာ ဟောန္တိ, တေန ဝုစ္စန္တိ ‘‘ဩဃာ’’တိ။ တတ္ထ ကာမာသဝေါ ကာမောဃော, ဘဝါသဝေါ ဘဝေါဃော, အဝိဇ္ဇာသဝေါ အဝိဇ္ဇောဃော, ဒိဋ္ဌာသဝေါ ဒိဋ္ဌောဃော။

တေ စတ္တာရော ဩဃာ အာသယမနုပဝိဋ္ဌာ အနုသယသဟဂတာ ဝုစ္စန္တိ။ သလ္လာတိ ဟဒယမာဟစ္စ တိဋ္ဌန္တာ။ တတ္ထ ကာမောဃော ရာဂသလ္လံ, ဘဝေါဃော ဒေါသသလ္လံ, အဝိဇ္ဇောဃော မောဟသလ္လံ, ဒိဋ္ဌောဃော ဒိဋ္ဌိသလ္လံ။

ဣမေဟိ စတူဟိ သလ္လေဟိ ပရိယာဒိန္နံ ဝိညာဏံ စတူသု ဓမ္မေသု တိဋ္ဌတိ ရူပေ ဝေဒနာယ သညာယ သင်္ခါရေသု။ ဣမာ စတဿော ဝိညာဏဋ္ဌိတိယော။ တတ္ထ ရာဂသလ္လေန နန္ဒူပသေစနံ ရူပူပဂံ ဝိညာဏံ တိဋ္ဌတိ။ ဒေါသသလ္လေန ဝေဒနူပဂံ မောဟသလ္လေန သညူပဂံ ဒိဋ္ဌိသလ္လေန နန္ဒူပသေစနံ သင်္ခါရူပဂံ ဝိညာဏံ တိဋ္ဌတိ။

စတူဟိ ဝိညာဏဋ္ဌိတီဟိ စတုဗ္ဗိဓံ အဂတိံ ဂစ္ဆန္တိ ဆန္ဒာ ဒေါသာ ဘယာ မောဟာ။ ရာဂေန ဆန္ဒာ အဂတိံ ဂစ္ဆတိ, ဒေါသေန ဒေါသာ အဂတိံ ဂစ္ဆတိ, မောဟေန မောဟာ အဂတိံ ဂစ္ဆတိ, ဒိဋ္ဌိယာ ဘယာ အဂတိံ ဂစ္ဆတိ။ ဣတိ ဣဒဉ္စ ကမ္မံ ဣမေ စ ကိလေသာ။ အယံ သံသာရဿ ဟေတု။

၁၂၀။ တတ္ထိမာ စတဿော ဒိသာ ကဗဠီကာရာဟာရော ‘‘အသုဘေ သုဘ’’န္တိ ဝိပလ္လာသော ကာမုပါဒါနံ ကာမယောဂေါ အဘိဇ္ဈာကာယဂန္ထော ကာမာသဝေါ ကာမောဃော ရာဂသလ္လံ ရူပူပဂါ ဝိညာဏဋ္ဌိတိ ဆန္ဒာ အဂတိဂမနံ။ အယံ ပဌမာ ဒိသာ။

ဖဿော အာဟာရော ‘‘ဒုက္ခေ သုခ’’န္တိ ဝိပလ္လာသော သီလဗ္ဗတုပါဒါနံ ဘဝယောဂေါဗျာပါဒေါ ကာယဂန္ထော ဘဝါသဝေါ ဘဝေါဃော ဒေါသသလ္လံ ဝေဒနူပဂါ ဝိညာဏဋ္ဌိတိ ဒေါသာ အဂတိဂမနံ, အယံ ဒုတိယာ ဒိသာ။

မနောသဉ္စေတနာဟာရော ‘‘အနတ္တနိ အတ္တာ’’တိ ဝိပလ္လာသော ဒိဋ္ဌုပါဒါနံ ဒိဋ္ဌိယောဂေါ ပရာမာသကာယဂန္ထော ဒိဋ္ဌာသဝေါ ဒိဋ္ဌောဃော ဒိဋ္ဌိသလ္လံ သညူပဂါ ဝိညာဏဋ္ဌိတိ ဘယာ အဂတိဂမနံ။ အယံ တတိယာ ဒိသာ။

ဝိညာဏာဟာရော ‘‘အနိစ္စေ နိစ္စ’’န္တိ ဝိပလ္လာသော အတ္တဝါဒုပါဒါနံ အဝိဇ္ဇာယောဂေါ ဣဒံသစ္စာဘိနိဝေသော ကာယဂန္ထော အဝိဇ္ဇာသဝေါ အဝိဇ္ဇောဃော မောဟသလ္လံ သင်္ခါရူပဂါ ဝိညာဏဋ္ဌိတိ မောဟာ အဂတိဂမနံ, အယံ စတုတ္ထီ ဒိသာ။ ဣတိ ဣမေသံ ဒသန္နံ သုတ္တာနံ ပဌမေန ပဒေန ပဌမာယ ဒိသာယ အာလောကနံ။ အယံ ဝုစ္စတိ ဒိသာလောကနာ။

စတူဟိ ဝိပလ္လာသေဟိ အကုသလပက္ခေ ဒိသာဝိလောကနာ ကိလေသံ သံယောဇေတွာ အယံ အကုသလပက္ခေ ဒိသာဝိလောကနာယ ဘူမိ ပဉ္စန္နံ ဒသန္နံ သုတ္တာနံ ယာနိ ပဌမာနိ ပဒါနိ ဣမေသံ ဓမ္မာနံ ကော အတ္ထော? ဧကော အတ္ထော, ဗျဉ္ဇနမေဝ နာနံ။ ဧဝံ ဒုတိယာ ဧဝံ တတိယာ ဧဝံ စတုတ္ထီ။ အယံ ပဌမာ သံသန္ဒနာ။

ဣမိနာ ပေယျာလေန သဗ္ဗေ ကိလေသာ စတူသု ပဒေသု ပက္ခိပိတဗ္ဗာ။ တတော ကုသလပက္ခေ စတဿော ပဋိပဒါ စတ္တာရိ ဈာနာနိ စတ္တာရော သတိပဋ္ဌာနာ စတ္တာရော ဝိဟာရာ ဒိဗ္ဗော ဗြဟ္မာ အရိယော အာနေဉ္ဇော စတ္တာရော သမ္မပ္ပဓါနာ စတ္တာရော အစ္ဆရိယာ အဗ္ဘုတဓမ္မာ စတ္တာရော အဓိဋ္ဌာနာ စတ္တာရော သမာဓယော ဆန္ဒသမာဓိ ဝီရိယသမာဓိ စိတ္တသမာဓိ ဝီမံသာသမာဓိ။ စတ္တာရော ဓမ္မာ သုခဘာဂိယာ နာညတြ ဗောဇ္ဈင်္ဂါ နာညတြ တပသာ နာညတိန္ဒ္ရိယသံဝရာ နာညတြ သဗ္ဗနိဿဂ္ဂါ စတ္တာရိ အပ္ပမာဏာနိ။

တတ္ထ ဒုက္ခာ ပဋိပဒါ ဒန္ဓာဘိညာ ဘာဝိယမာနာ ဗဟုလီကရိယမာနာ ပဌမံ ဈာနံ ပရိပူရေတိ, ပဌမံ ဈာနံ ပရိပုဏ္ဏံ ပဌမံ သတိပဋ္ဌာနံ ပရိပူရေတိ , ပဌမံ သတိပဋ္ဌာနံ ပရိပုဏ္ဏံ ပဌမံ ဝိဟာရံ ပရိပူရေတိ, ပဌမော ဝိဟာရော ပရိပုဏ္ဏော ပဌမံ သမ္မပ္ပဓါနံ ပရိပူရေတိ, ပဌမံ သမ္မပ္ပဓါနံ ပရိပုဏ္ဏံ ပဌမံ အစ္ဆရိယံ အဗ္ဘုတဓမ္မံ ပရိပူရေတိ, ပဌမော အစ္ဆရိယော အဗ္ဘုတော ဓမ္မော ပရိပုဏ္ဏော ပဌမံ အဓိဋ္ဌာနံ ပရိပူရေတိ, ပဌမံ အဓိဋ္ဌာနံ ပရိပုဏ္ဏံ ဆန္ဒသမာဓိံ ပရိပူရေတိ, ဆန္ဒသမာဓိ ပရိပုဏ္ဏော ဣန္ဒ္ရိယသံဝရံ ပရိပူရေတိ, ဣန္ဒ္ရိယသံဝရော ပရိပုဏ္ဏော ပဌမံ မေတ္တာအပ္ပမာဏံ ပရိပူရေတိ။ ဧဝံ ယာဝ သဗ္ဗနိဿဂ္ဂေါ စတုတ္ထံ အပ္ပမာဏံ ပရိပူရေတိ။

တတ္ထ ပဌမာ စ ပဋိပဒါ ပဌမဉ္စ ဈာနံ ပဌမဉ္စ သတိပဋ္ဌာနံ ပဌမော စ ဝိဟာရော ပဌမဉ္စ သမ္မပ္ပဓါနံ ပဌမော စ အစ္ဆရိယော အဗ္ဘုတော ဓမ္မော သစ္စာဓိဋ္ဌာနဉ္စ ဆန္ဒသမာဓိ စ ဣန္ဒ္ရိယသံဝရော စ မေတ္တာ စ အပ္ပမာဏံ။ အယံ ပဌမာ ဒိသာ။

ဒုက္ခာ စ [ဒုတိယာ စ (က။)] ပဋိပဒါ ခိပ္ပါဘိညာ ဒုတိယံ ဈာနံ ဒုတိယဉ္စ သတိပဋ္ဌာနံ ဒုတိယော စ ဝိဟာရော ဒုတိယဉ္စ သမ္မပ္ပဓါနံ ဒုတိယော စ အစ္ဆရိယော အဗ္ဘုတော ဓမ္မော စာဂါဓိဋ္ဌာနံ စိတ္တသမာဓိ စတ္တာရော ဣဒ္ဓိပါဒါ ကရုဏာ စ အပ္ပမာဏံ, အယံ ဒုတိယာ ဒိသာ။

သုခါ စ [တတိယာ စ (က။)] ပဋိပဒါ ဒန္ဓာဘိညာ တတိယဉ္စ ဈာနံ တတိယဉ္စ သတိပဋ္ဌာနံ တတိယော စ ဝိဟာရော တတိယဉ္စ သမ္မပ္ပဓါနံ တတိယော စ အစ္ဆရိယော အဗ္ဘုတော ဓမ္မော ပညာဓိဋ္ဌာနဉ္စ ဝီရိယသမာဓိ စ ဗောဇ္ဈင်္ဂါ စ မုဒိတာ စ အပ္ပမာဏံ။ အယံ တတိယာ ဒိသာ။

သုခါ စ [စတုတ္ထီ စ (က။)] ပဋိပဒါ ခိပ္ပါဘိညာ စတုတ္ထံ ဈာနံ စတုတ္ထဉ္စ သတိပဋ္ဌာနံ စတုတ္ထော စ ဝိဟာရော စတုတ္ထဉ္စ သမ္မပ္ပဓါနံ စတုတ္ထော စ အစ္ဆရိယော အဗ္ဘုတော ဓမ္မော ဥပသမာဓိဋ္ဌာနဉ္စ ဝီမံသာသမာဓိ စ သဗ္ဗနိဿဂ္ဂေါ စ ဥပေက္ခာ အပ္ပမာဏဉ္စ။ အယံ စတုတ္ထီ ဒိသာ။ ဣမာသံ စတဿန္နံ ဒိသာနံ အာလောကနာ။ အယံ ဝုစ္စတိ ဒိသာလောကနော နာမ နယော။

တတ္ထာယံ ယောဇနာ။ စတ္တာရော စ အာဟာရာ စတဿော စ ပဋိပဒါ, စတ္တာရော စ ဝိပလ္လာသာ စတ္တာရော စ သတိပဋ္ဌာနာ, စတ္တာရိ စ ဥပါဒါနာနိ စတ္တာရိ စ ဈာနာနိ စတ္တာရော စ ယောဂါ ဝိဟာရာ စ, ဂန္ထာ စ သမ္မပ္ပဓါနာ စ, အာသဝါ စ အစ္ဆရိယာ အဗ္ဘုတဓမ္မာ စ, ဩဃာ စ အဓိဋ္ဌာနာနိ စ, သလ္လာ စ သမာဓယော, ဝိညာဏဋ္ဌိတိယော စတ္တာရော စ သုခဘာဂိယာ ဓမ္မာ, စတ္တာရိ စ အဂတိဂမနာနိ စတ္တာရိ စ အပ္ပမာဏာနိ ဣတိ ကုသလာကုသလာနံ ပဋိပက္ခဝသေန ယောဇနာ, အယံ ဝုစ္စတိ ဒိသာလောကနော နယော။

တဿ စတ္တာရိ သာမညဖလာနိ ပရိယောသာနံ, ယော စ ဓမ္မော ကုသလာကုသလနိဒ္ဒေသေ ပဌမော ဒိသာနိဒ္ဒေသော, ဣမဿ သောတာပတ္တိဖလံ ပရိယောသာနံ ဒုတိယံ သကဒါဂါမိဖလံ, တတိယံ အနာဂါမိဖလံ, စတုတ္ထံ အရဟတ္တဖလံ။

တတ္ထ ကတမော တိပုက္ခလော နယော? ယေ စ ဒုက္ခာယ ပဋိပဒါယ ဒန္ဓာဘိညာယ ခိပ္ပါဘိညာယ စ နိယျန္တိ ဒွေ ပုဂ္ဂလာ, ယေ စ သုခါယ ပဋိပဒါယ ဒန္ဓာဘိညာယ ခိပ္ပါဘိညာယ စ နိယျန္တိ ဒွေ ပုဂ္ဂလာ။

ဣမေသံ စတုန္နံ ပုဂ္ဂလာနံ ယော ပုဂ္ဂလော သုခါယ ပဋိပဒါယ ဒန္ဓာဘိညာယ နိယျာတိ, ယော စ ပုဂ္ဂလော ဒုက္ခာယ ပဋိပဒါယ ခိပ္ပါဘိညာယ နိယျာတိ။ ဣမေ ဒွေ ပုဂ္ဂလာ ဘဝန္တိ။ တတ္ထ ယော သုခါယ ပဋိပဒါယ ခိပ္ပါဘိညာယ နိယျာတိ , အယံ ဥဂ္ဃဋိတညူ။ ယော ပစ္ဆိမော ပုဂ္ဂလော သာဓါရဏော, အယံ ဝိပဉ္စိတညူ။ ယော ပုဂ္ဂလော ဒန္ဓာဘိညာယ ဒုက္ခာယ ပဋိပဒါယ နိယျာတိ, အယံ နေယျော။ ဣမေ စတ္တာရော ဘဝိတွာ တီဏိ ဟောန္တိ, တတ္ထ ဥဂ္ဃဋိတညုဿ သမထပုဗ္ဗင်္ဂမာ ဝိပဿနာ, နေယျဿ ဝိပဿနာပုဗ္ဗင်္ဂမော သမထော, ဝိပဉ္စိတညုဿ သမထဝိပဿနာ ယုဂနဒ္ဓါ။ ဥဂ္ဃဋိတညုဿ မုဒုကာ ဒေသနာ, နေယျဿ တိက္ခာ ဒေသနာ, ဝိပဉ္စိတညုဿ တိက္ခမုဒုကာ ဒေသနာ။

ဥဂ္ဃဋိတညုဿ အဓိပညာသိက္ခာ, နေယျဿ အဓိစိတ္တသိက္ခာ, ဝိပဉ္စိတညုဿ အဓိသီလသိက္ခာ။ ဣတိ ဣမေသံ ပုဂ္ဂလာနံ စတူဟိ ပဋိပဒါဟိ နိယျာနံ။

တတ္ထ အယံ သံကိလေသော, တီဏိ အကုသလမူလာနိ တယော ဖဿာ တိဿော ဝေဒနာ တယော ဥပဝိစာရာ တယော သံကိလေသာ တယော ဝိတက္ကာ တယော ပရိဠာဟာ တီဏိ သင်္ခတလက္ခဏာနိ တိဿော ဒုက္ခတာတိ။

တီဏိ အကုသလမူလာနီတိ လောဘော အကုသလမူလံ, ဒေါသော အကုသလမူလံ, မောဟော အကုသလမူလံ။ တယော ဖဿာတိ သုခဝေဒနီယော ဖဿော, ဒုက္ခဝေဒနီယော ဖဿော, အဒုက္ခမသုခဝေဒနီယော ဖဿော။ တိဿော ဝေဒနာတိ သုခါ ဝေဒနာ ဒုက္ခာ ဝေဒနာ အဒုက္ခမသုခါ ဝေဒနာ။ တယော ဥပဝိစာရာတိ သောမနဿောပဝိစာရော ဒေါမနဿောပဝိစာရော ဥပေက္ခောပဝိစာရော။ တယော သံကိလေသာတိ ရာဂေါ ဒေါသော မောဟော။ တယော ဝိတက္ကာတိ ကာမဝိတက္ကော ဗျာပါဒဝိတက္ကော ဝိဟိံသာဝိတက္ကော။ တယော ပရိဠာဟာတိ ရာဂဇော ဒေါသဇော မောဟဇော။ တီဏိ သင်္ခတလက္ခဏာနီတိ ဥပ္ပါဒေါ ဌိတိ ဝယော။ တိဿော ဒုက္ခတာတိ ဒုက္ခဒုက္ခတာ ဝိပရိဏာမဒုက္ခတာ သင်္ခတဒုက္ခတာ။

တတ္ထ လောဘော အကုသလမူလံ ကုတော သမုဋ္ဌိတံ? တိဝိဓံ အာရမ္မဏံ မနာပိကံ အမနာပိကံ ဥပေက္ခာဌာနိယဉ္စ။ တတ္ထ မနာပိကေန အာရမ္မဏေန လောဘော အကုသလမူလံ သမုဋ္ဌဟတိ။ ဣတိ မနာပိကာ အာရမ္မဏာ သုခဝေဒနီယော ဖဿော, သုခဝေဒနီယံ ဖဿံ ပဋိစ္စ ဥပ္ပဇ္ဇတေ သုခဝေဒနာ, သုခဝေဒနံ ပဋိစ္စ ဥပ္ပဇ္ဇတေ သောမနဿူပဝိစာရော, သောမနဿူပဝိစာရံ ပဋိစ္စ ဥပ္ပဇ္ဇတေ ရာဂေါ, ရာဂံ ပဋိစ္စ ဥပ္ပဇ္ဇတေ ကာမဝိတက္ကော, ကာမဝိတက္ကံ ပဋိစ္စ ဥပ္ပဇ္ဇတေ ရာဂဇော ပရိဠာဟော ရာဂဇံ ပရိဠာဟံ ပဋိစ္စ ဥပ္ပဇ္ဇတေ ဥပ္ပါဒေါ သင်္ခတလက္ခဏော, ဥပ္ပါဒံ သင်္ခတလက္ခဏံ ပဋိစ္စ ဥပ္ပဇ္ဇတေ ဝိပရိဏာမဒုက္ခတာ။

ဒေါသော အကုသလမူလံ ကုတော သမုဋ္ဌိတံ? အမနာပိကေန အာရမ္မဏေန ဒေါသော အကုသလမူလံ သမုဋ္ဌိတံ။ ဣတိ အမနာပိကာ အာရမ္မဏာ ဒုက္ခဝေဒနီယော ဖဿော, ဒုက္ခဝေဒနီယံ ဖဿံ ပဋိစ္စ ဥပ္ပဇ္ဇတေ ဒုက္ခဝေဒနာ, ဒုက္ခဝေဒနံ ပဋိစ္စ ဥပ္ပဇ္ဇတေ ဒေါမနဿူပဝိစာရော, ဒေါမနဿူပဝိစာရံ ပဋိစ္စ ဥပ္ပဇ္ဇတေ ဒေါသော, ဒေါသံ ပဋိစ္စ ဥပ္ပဇ္ဇတေ ဗျာပါဒဝိတက္ကော, ဗျာပါဒဝိတက္ကံ ပဋိစ္စ ဥပ္ပဇ္ဇတေ ဒေါသဇော ပရိဠာဟော, ဒေါသဇံ ပရိဠာဟံ ပဋိစ္စ ဥပ္ပဇ္ဇတေ ဌိတဿ အညထတ္တံ သင်္ခတလက္ခဏံ, ဌိတဿ အညထတ္တံ သင်္ခတလက္ခဏံ ပဋိစ္စ ဥပ္ပဇ္ဇတေ ဒုက္ခဒုက္ခတာ ဝေဒနာ။

မောဟော အကုသလမူလံ ကုတော သမုဋ္ဌိတံ? ဥပေက္ခာဌာနိယေန အာရမ္မဏေန မောဟော အကုသလမူလံ သမုဋ္ဌိတံ။ ဣတိ ဥပေက္ခာဌာနိယာ အာရမ္မဏာ အဒုက္ခမသုခဝေဒနီယော ဖဿော, အဒုက္ခမသုခဝေဒနီယံ ဖဿံ ပဋိစ္စ ဥပ္ပဇ္ဇတေ အဒုက္ခမသုခါ ဝေဒနာ, အဒုက္ခမသုခဝေဒနံ ပဋိစ္စ ဥပ္ပဇ္ဇတေ ဥပေက္ခူပဝိစာရော, ဥပေက္ခူပဝိစာရံ ပဋိစ္စ ဥပ္ပဇ္ဇတေ မောဟော, မောဟံ ပဋိစ္စ ဥပ္ပဇ္ဇတေ ဝိဟိံသာဝိတက္ကော, ဝိဟိံသာဝိတက္ကံ ပဋိစ္စ ဥပ္ပဇ္ဇတေ မောဟဇော ပရိဠာဟော, မောဟဇံ ပရိဠာဟံ ပဋိစ္စ ဥပ္ပဇ္ဇတေ ဝယော သင်္ခတလက္ခဏံ, ဝယံ သင်္ခတလက္ခဏံ ပဋိစ္စ ဥပ္ပဇ္ဇတေ သင်္ခတဒုက္ခတာ, ဣတိ အယံ တိဏ္ဏံ ကိလေသာနံ နိဒ္ဒေသော, အယံ ဝုစ္စတေ ကုသလပက္ခေ တိပုက္ခလော နယော။

ဣတိ တီဏိ အကုသလမူလာနိ န စတုတ္ထာနိ န ပဉ္စမာနိ, တယော ဖဿာတိ တိဿော ဝေဒနာ ယာဝ သင်္ခတဒုက္ခတာတိ, ယော ကောစိ အကုသလပက္ခော, သဗ္ဗော သော တီသု အကုသလမူလေသု သမောသရတိ။

တတ္ထ ကတမော ကုသလပက္ခော? တီဏိ ကုသလမူလာနိ, တိဿော ပညာ သုတမယီ ပညာ စိန္တာမယီ ပညာ ဘာဝနာမယီ ပညာ။ တယော သမာဓီ သဝိတက္ကသဝိစာရော။ပေ။။ တိဿော သိက္ခာ အဓိသီလသိက္ခာ။ပေ။။ သိက္ခာ။ တီဏိ နိမိတ္တာနိ သမထနိမိတ္တံ ပဂ္ဂဟနိမိတ္တံ ဥပေက္ခာနိမိတ္တံ။ တယော ဝိတက္ကာ နေက္ခမ္မဝိတက္ကော။ပေ။။ အဝိဟိံသာဝိတက္ကော။ တီဏိ ဣန္ဒ္ရိယာနိ အနညာတညဿာမီတိန္ဒ္ရိယန္တိ ဝိတ္ထာရော။ တယော ဥပဝိစာရာ နေက္ခမ္မူပဝိစာရော အဗျာပါဒူပဝိစာရော အဝိဟိံသူပဝိစာရော။ တိဿော ဧသနာ ကာမေသနာ ဘဝေသနာ ဗြဟ္မစရိယေသနာ။ တယော ခန္ဓာ သီလက္ခန္ဓော သမာဓိက္ခန္ဓော ပညာက္ခန္ဓော။

တတ္ထ ယံ အလောဘော ကုသလမူလံ, တံ သုတမယိပညံ ပရိပူရေတိ, သုတမယီ ပညာ ပရိပုဏ္ဏာ သဝိတက္ကံ သဝိစာရံ သမာဓိံ ပရိပူရေတိ, သဝိတက္ကော သဝိစာရော သမာဓိ ပရိပုဏ္ဏော အဓိစိတ္တသိက္ခံ ပရိပူရေတိ, အဓိစိတ္တသိက္ခာ ပရိပုဏ္ဏာ သမထနိမိတ္တံ ပရိပူရေတိ, သမထနိမိတ္တံ ပရိပုဏ္ဏံ နေက္ခမ္မဝိတက္ကံ ပရိပူရေတိ, နေက္ခမ္မဝိတက္ကော ပရိပုဏ္ဏော အနညာတညဿာမီတိန္ဒ္ရိယံ ပရိပူရေတိ, အနညာတညဿာမီတိန္ဒ္ရိယံ ပရိပုဏ္ဏံ နေက္ခမ္မူပဝိစာရံ ပရိပူရေတိ, နေက္ခမ္မူပဝိစာရော ပရိပုဏ္ဏော ကာမေသနံ ပဇဟတိ, ကာမေသနပ္ပဟာနံ သမာဓိက္ခန္ဓံ ပရိပူရေတိ။

အဒေါသော ကုသလမူလံ စိန္တာမယိပညံ ပရိပူရေတိ, စိန္တာမယီ ပညာ ပရိပုဏ္ဏာ အဝိတက္ကဝိစာရမတ္တံ သမာဓိံ ပရိပူရေတိ ။ အဝိတက္ကဝိစာရမတ္တော သမာဓိ ပရိပုဏ္ဏော အဓိသီလသိက္ခံ ပရိပူရေတိ, အဓိသီလသိက္ခာ ပရိပုဏ္ဏာ ဥပေက္ခာနိမိတ္တံ ပရိပူရေတိ, ဥပေက္ခာနိမိတ္တံ ပရိပုဏ္ဏံ အဗျာပါဒဝိတက္ကံ ပရိပူရေတိ, အဗျာပါဒဝိတက္ကော ပရိပုဏ္ဏော အညိန္ဒ္ရိယံ ပရိပူရေတိ, အညိန္ဒ္ရိယံ ပရိပုဏ္ဏံ အဗျာပါဒူပဝိစာရံ ပရိပူရေတိ, အဗျာပါဒူပဝိစာရော ပရိပုဏ္ဏော ဘဝေသနံ ပဇဟတိ, ဘဝေသနပ္ပဟာနံ သီလက္ခန္ဓံ ပရိပူရေတိ။

အမောဟော ကုသလမူလံ ဘာဝနာမယိပညံ ပရိပူရေတိ, ဘာဝနာမယီပညာ ပရိပုဏ္ဏာ အဝိတက္ကအဝိစာရံ သမာဓိံ ပရိပူရေတိ, အဝိတက္ကော အဝိစာရော သမာဓိ ပရိပုဏ္ဏော အဓိပညာသိက္ခံ ပရိပူရေတိ, အဓိပညာသိက္ခာ ပရိပုဏ္ဏာ ပဂ္ဂဟနိမိတ္တံ ပရိပူရေတိ, ပဂ္ဂဟနိမိတ္တံ ပရိပုဏ္ဏံ အညာတာဝိနော ဣန္ဒ္ရိယံ ပရိပူရေတိ, အညာတာဝိနော ဣန္ဒ္ရိယံ ပရိပုဏ္ဏံ အဝိဟိံသူပဝိစာရံ ပရိပူရေတိ, အဝိဟိံသူပဝိစာရော ပရိပုဏ္ဏော ဗြဟ္မစရိယေသနံ ပရိပူရေတိ, ဗြဟ္မစရိယေသနာ ပရိပုဏ္ဏာ ပညာက္ခန္ဓံ ပရိပူရေတိ။

ဣတိ ဣမေ တယော ဓမ္မာ ကုသလပက္ခိကာ သဗ္ဗေ ကုသလာ ဓမ္မာ တီဟိ တိကနိဒ္ဒေသေဟိ နိဒ္ဒိသိယန္တိ တီဏိ ဝိမောက္ခမုခါနိ တဿ ပရိယောသာနံ။ တတ္ထ ပဌမေန အပ္ပဏိဟိတံ, ဒုတိယေန သုညတံ, တတိယေန အနိမိတ္တံ။ အယံ ဝုစ္စတိ ဒုတိယော တိပုက္ခလော နာမ နယော။

တတ္ထ ယေ ဣမေ တယော ပုဂ္ဂလာ ဥဂ္ဃဋိတညူ ဝိပဉ္စိတညူ နေယျောတိ။ ဣမေသံ တိဏ္ဏံ ပုဂ္ဂလာနံ ယေ စ ပုဂ္ဂလာ သုခါယ ပဋိပဒါယ ခိပ္ပါဘိညာယ, သုခါယ ပဋိပဒါယ ဒန္ဓာဘိညာယ စ နိယျန္တိ, တေ ဒွေ ပုဂ္ဂလာ။ ယေ စ ဒွေ ပုဂ္ဂလာ ဒုက္ခာယ ပဋိပဒါယ ခိပ္ပါဘိညာယ, ဒုက္ခာယ ပဋိပဒါယ ဒန္ဓာဘိညာယ စ နိယျန္တိ , ဣမေ စတ္တာရော တေန ဝိသေသေန ဒွေ ဘဝန္တိ ဒိဋ္ဌိစရိတော စ တဏှာစရိတော စ။ ဣမေ စတ္တာရော ဘဝိတွာ တယော ဘဝန္တိ, တယော ဘဝိတွာ ဒွေ ဘဝန္တိ။ ဣမေသံ ဒွိန္နံ ပုဂ္ဂလာနံ အယံ သံကိလေသော, အဝိဇ္ဇာ စ တဏှာ စ, အဟိရိကဉ္စ အနောတ္တပ္ပဉ္စ, အဿတိ စ အသမ္ပဇညဉ္စ, နီဝရဏာနိ စ သံယောဇနာနိ စ, အဇ္ဈောသာနဉ္စ အဘိနိဝေသော စ, အဟံကာရော စ မမံကာရော စ, အဿဒ္ဓိယဉ္စ ဒေါဝစဿဉ္စ, ကောသဇ္ဇဉ္စ အယောနိသော စ မနသိကာရော, ဝိစိကိစ္ဆာ စ အဘိဇ္ဈာ စ, အသဒ္ဓမ္မဿဝနဉ္စ အသမာပတ္တိ စ။

တတ္ထ အဝိဇ္ဇာ စ အဟိရိကဉ္စ အဿတိ စ နီဝရဏာနိ စ အဇ္ဈောသာနဉ္စ အဟံကာရော စ အဿဒ္ဓိယဉ္စ ကောသဇ္ဇဉ္စ ဝိစိကိစ္ဆာ စ အသဒ္ဓမ္မဿဝနဉ္စ, အယံ ဧကာ ဒိသာ။

တဏှာ စ အနောတ္တပ္ပဉ္စ အသမ္ပဇညဉ္စ သံယောဇနာနိ စ အဘိနိဝေသော စ မမံကာရော စ ဒေါဝစဿတာ စ အယောနိသော မနသိကာရော စ အဘိဇ္ဈာ စ အသမာပတ္တိ စ, အယံ ဒုတိယာ ဒိသာ။ ဒသန္နံ ဒုကာနံ ဒသ ပဒါနိ ပဌမာနိ ကာတဗ္ဗာနိ။ သံခိတ္တေန အတ္ထံ ဉာပေန္တိ ပဋိပက္ခေ ကဏှပက္ခဿ သဗ္ဗေသံ ဒုကာနံ ဒသ ပဒါနိ ဒုတိယကာနိ, အယံ ဒုတိယာ ဒိသာ။

ဣတိ အကုသလာနံ ဓမ္မာနံ ဒုက္ခနိဒ္ဒေသော, အယံ သမုဒယော။ ယံ တံ ဓမ္မံ အဇ္ဈာဝသတိ နာမဉ္စ ရူပဉ္စ ဣဒံ ဒုက္ခံ ဣတိ အယဉ္စ သမုဒယော, ဣဒဉ္စ ဒုက္ခံ, ဣမာနိ ဒွေ သစ္စာနိ ဒုက္ခဉ္စ သမုဒယော စ နန္ဒိယာဝဋ္ဋဿ နယဿ ပဌမနိဒ္ဒေသော။

တတ္ထ ကတမော ကုသလပက္ခော? သမထော စ ဝိပဿနာ စ, ဝိဇ္ဇာ စ စရဏဉ္စ, သတိ စ သမ္ပဇညဉ္စ, ဟိရီ စ ဩတ္တပ္ပဉ္စ, အဟံကာရပ္ပဟာနဉ္စ မမံကာရပ္ပဟာနဉ္စ, သမ္မာဝါယာမော စ ယောနိသော စ မနသိကာရော, သမ္မာသတိ စ သမ္မာသမာဓိ စ, ပညာ စ နိဗ္ဗိဒါ စ, သမာပတ္တိ စ သဒ္ဓမ္မဿဝနဉ္စ, သောမနဿဉ္စ ဓမ္မာနုဓမ္မပ္ပဋိပတ္တိ စ။

တတ္ထ သမထော စ ဝိဇ္ဇာ စ သတိ စ ဟိရီ စ အဟံကာရပ္ပဟာနဉ္စ သမ္မာဝါယာမော စ သမ္မာသတိ စ ပညာ စ သမာပတ္တိ စ သောမနဿဉ္စ, ဣမေ ဓမ္မာ ဧကာ ဒိသာ။ ဝိပဿနာ စ စရဏဉ္စ သမ္ပဇညဉ္စ ဩတ္တပ္ပဉ္စ မမံကာရပ္ပဟာနဉ္စ ယောနိသော မနသိကာရော စ သမ္မာသမာဓိ စ နိဗ္ဗိဒါ စ သဒ္ဓမ္မဿဝနဉ္စ ဓမ္မာနုဓမ္မပ္ပဋိပတ္တိ စ, အယံ ဒုတိယာ ဒိသာ။ ဣတိ ကုသလပက္ခေ စ အကုသလပက္ခေ စ နန္ဒိယာဝဋ္ဋဿ ပန နယဿ စတဿော ဒိသာ။

တာသု ယာနိ အကုသလပက္ခဿ ပဌမာနိ ပဒါနိ အကုသလာနိ ကုသလေဟိ ပဟာနံ ဂစ္ဆန္တိ, တာနိ ကုသလပက္ခေ ဒုတိယေဟိ ပဒေဟိ ပဟာနံ ဂစ္ဆန္တိ။ တေသံ ပဟာနာ ရာဂဝိရာဂါ စေတောဝိမုတ္တိ ယာနိ အကုသလပက္ခဿ ဒုတိယာနိ အကုသလပဒါနိ ပဟာနံ ဂစ္ဆန္တိ, တာနိ ကုသလပက္ခဿ ပဌမေဟိ ပဒေဟိ ပဟာနံ ဂစ္ဆန္တိ။ တေသံ ပဟာနာ အဝိဇ္ဇာဝိရာဂါ ပညာဝိမုတ္တိ ပရိယောသာနံ။ ဣမေသံ တိဏ္ဏံ နယာနံ ပဌမော နယော သီဟဝိက္ကီဠိတော နာမ။ အဋ္ဌ ပဒါနိ စတ္တာရိ စ ကုသလာနိ စတ္တာရိ စ အကုသလာနိ ဣမာနိ အဋ္ဌ ပဒါနိ မူလပဒါနိ, အတ္ထနယေန ဒုတိယော တိပုက္ခလော။ သော ဆဟိ ဓမ္မေဟိ နေတိ ကုသလမူလာနိ စ နေတိ အကုသလမူလာနိ စ, ဣတိ ဣမာနိ ဆ ပဒါနိ ပုရိမကာနိ စ အဋ္ဌ မူလပဒါနိ ဣမာနိ စုဒ္ဒသ ပဒါနိ အဋ္ဌာရသန္နံ မူလပဒါနံ။ တတ္ထ ယော ပစ္ဆိမကော နယော နန္ဒိယာဝဋ္ဋော, သော စတူဟိ ဓမ္မေဟိ နေတိ။ အဝိဇ္ဇာယ စ တဏှာယ စ သမထေန စ ဝိပဿနာယ စ, ဣမေ စတ္တာရော ဓမ္မာ ဣမာနိ အဋ္ဌာရသ မူလပဒါနိ တီသု နယေသု နိဒ္ဒိဋ္ဌာနိ။

တတ္ထ ယာနိ နဝ ပဒါနိ ကုသလာနိ, တတ္ထ သဗ္ဗံ ကုသလံ သမောသရတိ။ တေသဉ္စ နဝန္နံ မူလာနံ စတ္တာရိ ပဒါနိ သီဟဝိက္ကီဠိတနယေ တီဏိ တိပုက္ခလေ ဒွေ နန္ဒိယာဝဋ္ဋေ, ဣစ္စေတေ ကုသလဿ ပက္ခာ။ တတ္ထ ယာနိ နဝ ပဒါနိ ကုသလာနိ, တတ္ထ သဗ္ဗံ ကုသလံ ယုဇ္ဇတိ။ တတ္ထ သီဟဝိက္ကီဠိတေ နယေ စတ္တာရိ ပဒါနိ တီဏိ တိပုက္ခလေ ဒွေ နန္ဒိယာဝဋ္ဋေ ဣမာနိ နဝ ပဒါနိ ကုသလာနိ နိဒ္ဒိဋ္ဌာနိ။

တတ္ထ ယာနိ နန္ဒိယာဝဋ္ဋေ နယေ စတ္တာရိ ပဒါနိ, တတ္ထ အဋ္ဌာရသ မူလပဒါနိ သမောသရန္တိ။ ယထာ ကထံ, သမထော စ အလောဘော စ အဒေါသော စ အသုဘသညာ စ ဒုက္ခသညာ စ ဣမာနိ ကုသလပက္ခေ ပဉ္စ ပဒါနိ သမထံ ဘဇန္တိ။ ဝိပဿနာ စ အမောဟော စ အနိစ္စသညာ စ အနတ္တသညာ စ ဣမာနိ စတ္တာရိ ပဒါနိ ဝိပဿနံ ဘဇန္တိ။ ဣမာနိ နဝ ပဒါနိ ကုသလာနိ ဒွီသု ပဒေသု ယောဇိတာနိ, တတ္ထ အကုသလပက္ခေ နဝန္နံ အကုသလမူလပဒါနံ ယာ စ တဏှာ ယော စ လောဘော ယော စ ဒေါသော ယာ စ သုဘသညာ ယာ စ သုခသညာ, ဣမာနိ ပဉ္စ ပဒါနိ တဏှံ ဘဇန္တိ ။ ယာ စ အဝိဇ္ဇာ ယော စ မောဟော ယာ စ နိစ္စသညာ ယာ စ အတ္တသညာ, ဣမာနိ စတ္တာရိ ပဒါနိ အဝိဇ္ဇံ ဘဇန္တိ။ ဧတာနိ နဝ ပဒါနိ အကုသလာနိ သုသံခိတ္တာနိ။ ဣတိ တယော နယာ ဧကံ နယံ န ပဝိဋ္ဌာ။ ဧဝံ အဋ္ဌာရသ မူလပဒါနိ နန္ဒိယာဝဋ္ဋနယေ နိဒ္ဒိသိတဗ္ဗာနိ။

ကထံ အဋ္ဌာရသ မူလပဒါနိ, တိပုက္ခလေ နယေ ယုဇ္ဇန္တိ? နဝန္နံ ပဒါနံ ကုသလာနံ, ဝိပဿနာ စ အမောဟော စ အနိစ္စသညာ စ အနတ္တသညာ စ, ဣမာနိ စတ္တာရိ ပဒါနိ; အမောဟော စ သမထော စ အလောဘော စ အသုဘသညာ စ, ဣမာနိ စတ္တာရိ ပဒါနိ; လောဘော စ ဒေါသော စ, ဧဝံ ဣမာနိ နဝ ပဒါနိ တီသု ကုသလေသု ယောဇေတဗ္ဗာနိ။ တတ္ထ နဝန္နံ ပဒါနံ အကုသလာနံ တဏှာ စ လောဘော စ သုဘသညာ စ သုခသညာ စ, ဣမာနိ စတ္တာရိ ပဒါနိ လောဘော အကုသလမူလံ; အဝိဇ္ဇာ စ မောဟော စ နိစ္စသညာ စ အတ္တသညာ စ အယံ မောဟော အယံ ဒေါသော, ယေ စ ဣမာနိ နဝ ပဒါနိ တီသု အကုသလေသု ယောဇိတာနိ။ ဧဝံ အဋ္ဌာရသ မူလပဒါနိ ကုသလမူလေသု စ ယောဇေတွာ တိပုက္ခလေန နယေန နိဒ္ဒိသိတဗ္ဗာနိ။

ကထံ အဋ္ဌာရသ မူလပဒါနိ သီဟဝိက္ကီဠိတေ နယေ ယုဇ္ဇန္တိ? တဏှာ စ သုဘသညာ စ, အယံ ပဌမော ဝိပလ္လာသော။ လောဘော စ သုခသညာ စ, အယံ ဒုတိယော ဝိပလ္လာသော။ အဝိဇ္ဇာ စ နိစ္စသညာ စ, အယံ တတိယော ဝိပလ္လာသော။ မောဟော စ အတ္တသညာ စ, အယံ စတုတ္ထော ဝိပလ္လာသော။ ဣတိ နဝ ပဒါနိ အကုသလမူလာနိ စတူသု ပဒေသု ယောဇိတာနိ။ တတ္ထ နဝန္နံ မူလပဒါနံ ကုသလာနံ သမထော စ အသုဘသညာ စ, ဣဒံ ပဌမံ သတိပဋ္ဌာနံ။ အလောဘော စ ဒုက္ခသညာ စ, ဣဒံ ဒုတိယံ သတိပဋ္ဌာနံ။ ဝိပဿနာ စ အနိစ္စသညာ စ, ဣဒံ တတိယံ သတိပဋ္ဌာနံ။ အမောဟော စ အနတ္တသညာ စ, ဣဒံ စတုတ္ထံ သတိပဋ္ဌာနံ။ ဣမာနိ အဋ္ဌာရသ မူလပဒါနိ သီဟဝိက္ကီဠိတနယံ အနုပဝိဋ္ဌာနိ။ ဣမေသံ တိဏ္ဏံ နယာနံ ယာ ဘူမိ စ ယော ရာဂေါ စ ယော ဒေါသော စ ဧကံ နယံ ပဝိသတိ။ ဧကဿ နယဿ အကုသလေ ဝါ ဓမ္မေ ကုသလေ ဝါ ဓမ္မေ ဝိညာတေ ပဋိပက္ခော အန္ဝေသိတဗ္ဗော, ပဋိပက္ခေ အန္ဝေသိတွာ သော နယော နိဒ္ဒိသိတဗ္ဗော, တမှိ နယေ နိဒ္ဒိဋ္ဌော။ ယထာ ဧကမှိ နယေ သဗ္ဗေ နယာ ပဝိဋ္ဌာ တထာ နိဒ္ဒိသိတဗ္ဗာ။ ဧကမှိ စ နယေ အဋ္ဌာရသ မူလပဒါနိ ပဝိဋ္ဌာနိ, တမှိ ဓမ္မေ ဝိညာတေ သဗ္ဗေ ဓမ္မာ ဝိညာတာ ဟောန္တိ။ ဣမေသံ တိဏ္ဏံ နယာနံ သီဟဝိက္ကီဠိတနယဿ စတ္တာရိ ဖလာနိ ပရိယောသာနံ။ ပဌမာယ ဒိသာယ ပဌမံ ဖလံ, ဒုတိယာယ ဒိသာယ ဒုတိယံ ဖလံ, တတိယာယ ဒိသာယ တတိယံ ဖလံ, စတုတ္ထာယ ဒိသာယ စတုတ္ထံ ဖလံ။ တိပုက္ခလဿ နယဿ တီဏိ ဝိမောက္ခမုခါနိ ပရိယောသာနံ။ ပဌမာယ ဒိသာယ အပ္ပဏိဟိတံ, ဒုတိယာယ ဒိသာယ သုညတံ, တတိယာယ ဒိသာယ အနိမိတ္တံ။ နန္ဒိယာဝဋ္ဋဿ နယဿ ရာဂဝိရာဂါ စေတောဝိမုတ္တိ အဝိဇ္ဇာဝိရာဂါ စ ပညာဝိမုတ္တိ ပရိယောသာနံ ။ ပဌမာယ ဒိသာယ ရာဂဝိရာဂါ စေတောဝိမုတ္တိ, ဒုတိယာယ ဒိသာယ အဝိဇ္ဇာဝိရာဂါ ပညာဝိမုတ္တိ။ ဣမေ တယော နယာ ဣမေသံ တိဏ္ဏံ နယာနံ အဋ္ဌာရသန္နံ မူလပဒါနံ အာလောကနာ, အယံ ဝုစ္စတိ ဒိသာလောကနော [ဒိသာလောစနော (က။)] နယော။ အာလောကေတွာန ဇာနာတိ ‘‘အယံ ဓမ္မော ဣမံ ဓမ္မံ ဘဇတီ’’တိ သမ္မာ ယောဇနာ။ ကုသလပက္ခေ အကုသလပက္ခေ စ အယံ နယော အင္ကုသော နာမ။ ဣမေ ပဉ္စ နယာ။

တတ္ထိမာ ဥဒ္ဒါနဂါထာ

တဏှာ စ အဝိဇ္ဇာပိ စ၊ လောဘော ဒေါသော တထေဝ မောဟော စ။

စတ္တာရော စ ဝိပလ္လာသာ၊ ကိလေသဘူမီ နဝ ပဒါနိ။

ယေ စ သတိပဋ္ဌာနာ၊ သမထော စ ဝိပဿနာ ကုသလမူလာ။

ဧတံ သဗ္ဗံ ကုသလံ၊ ဣန္ဒ္ရိယဘူမီ နဝ ပဒါနိ။

သဗ္ဗကုသလံ နဝဟိ ပဒေဟိ ယုဇ္ဇတိ၊ နဝဟိ စေဝ အကုသလံ။

ဧတေ တေ မူလပဒါ၊ ဥဘတော အဋ္ဌာရသ ပဒါနိ။

တဏှာ စေဝ အဝိဇ္ဇာ စ၊ သမထော စ ဝိပဿနာ။

ယော နေတိ သဗ္ဗေသု ယောဂယုတ္တော၊ အယံ နယော နန္ဒိယာဝဋ္ဋော။

ယံ ကုသလမူလေဟိ၊ နယတိ ကုသလအကုသလမူလေဟိ။

ဘူတံ တထံ အဝိတထံ၊ တိပုက္ခလံ တံ နယံ အာဟု။

သော နေတိ ဝိပလ္လာသေဟိ၊ ကိလေသဣန္ဒ္ရိယေဟိ စ။

ဓမ္မေ တံ နယံ ဝိနယမာဟု၊ သီဟဝိက္ကီဠိတံ နာမ။

ဝေယျာကရဏေ ဝုတ္တေ၊ ကုသလတာဟိ အကုသလတာဟိ စ။

တယော အာလောကယတိ၊ အယံ နယော ဒိသာလောစနော နာမ။

ဩလောကေတွာ ဒိသာလောစနေန၊ ဥက္ခိပိယ ယံ သမာနေတိ။

သဗ္ဗေ ကုသလာကုသလေ၊ အယံ နယော အင္ကုသော နာမ။

နယသမုဋ္ဌာနံ။

ပေဋကောပဒေသေ မဟာကစ္စာယနဿ ထေရဿ သုတ္တဝိဘင်္ဂဿ

[ဝေဘင်္ဂိဿ (ဣ။ က။)] ဒဿနံ သမတ္တံ။

ယာနိ စတုက္ကာနိ အကုသလာနိ ကုသလာနိ စ သီဟဝိက္ကီဠိတေ နယေ နိဒ္ဒိဋ္ဌာနိ, တိကာနိ ကုသလာနိ စ အကုသလာနိ စ တိပုက္ခလေ နယေ နိဒ္ဒိဋ္ဌာနိ, ဒုကာနိ ကုသလာနိ စ အကုသလာနိ စ နန္ဒိယာဝဋ္ဋေ နယေ နိဒ္ဒိဋ္ဌာနိ။ ယေသု ဒွီသု ဓမ္မေသု [ဝိသုဒ္ဓီသု (က။)] ကုသလေသု သော အတ္ထော တိကေသု ဝိဘဇ္ဇမာနဿ ဘဝဘူမိ, အထ စ သဗ္ဗော [ပုဗ္ဗော (က။)] စ အတ္ထော တီဟိ ဗျဉ္ဇနေဟိ နိဒ္ဒိသတိ။ တတ္တကာနိ ဝုစ္စတိ။ ယော အတ္ထော စတူဟိ ပဒေဟိ အဋ္ဌဝီသတိဘာဂေဟိ နတ္ထိဘူမိ နိဒ္ဒိသိတုံ, အဝစရန္တောဝ စတူဟိ ပဒေဟိ နိဒ္ဒိသတိ။ ဣတိ ယံ ယထာနိဒ္ဒိဋ္ဌဿ အဝိကောသနာ ဣဒံ ပမာဏံ။ ယထာ သဗ္ဗေ သမာဓယော တီသု သမာဓီသု ပရိယေသိတဗ္ဗာ, သဝိတက္ကသဝိစာရေ အဝိတက္ကဝိစာရမတ္တေ အဝိတက္ကအဝိစာရေ ဣဒံ ပမာဏံ, နတ္ထိ စတုတ္ထော သမာဓိ။ တထာ တိဿော ပညာ စိန္တာမယီ သုတမယီ ဘာဝနာမယီ သဗ္ဗာသု ပညာသု နိဒ္ဒိသတိ, နတ္ထိ စတုတ္ထီ ပညာ န စိန္တာမယီ န သုတမယီ န ဘာဝနာမယီ, ပညာ နာဿ အတ္ထိ ဣမေသံ ဓမ္မာနံ ယာ အဝိက္ခေပနာ, ဣဒံ ဝုစ္စတိ ပမာဏန္တိ။

ထေရဿ မဟာကစ္စာယနဿ ဇမ္ဗုဝနဝါသိနော ပေဋကောပဒေသော

သမတ္တော။

ပေဋကောပဒေသပကရဏံ နိဋ္ဌိတံ။

၇၂။ ဈာနံ ဝိရာဂေါ။ စတ္တာရိ ဈာနာနိ ဝိတ္ထာရေန ကာတဗ္ဗာနိ။ တာနိ ဒုဝိဓါနိ; ဗောဇ္ဈင်္ဂဝိပ္ပယုတ္တာနိ စ ဗောဇ္ဈင်္ဂသမ္ပယုတ္တာနိ စ။ တတ္ထ ဗောဇ္ဈင်္ဂဝိပ္ပယုတ္တာနိ ဗာဟိရကာနိ, ဗောဇ္ဈင်္ဂသမ္ပယုတ္တာနိ အရိယပုဂ္ဂလာနိ။ တတ္ထ ယေန ဆ ပုဂ္ဂလမူလာနိ တေသံ နိက္ခိပေတွာ ရာဂစရိတော, ဒေါသစရိတော, မောဟစရိတော, ရာဂဒေါသစရိတော, ရာဂမောဟစရိတော, ဒေါသမောဟစရိတော, သမဘာဂစရိတော, ဣတိ ဣမေသံ ပုဂ္ဂလာနံ ဈာနံ သမာပဇ္ဇိတာနံ ပဉ္စ နီဝရဏာနိ ပဋိပက္ခော တေသံ ပဋိဃာတာယ ယထာ အသမတ္ထော တီဏိ အကုသလမူလာနိ နိဂ္ဂဏှာတိ။ လောဘေန အကုသလမူလေန အဘိဇ္ဈာ စ ဥဒ္ဓစ္စဉ္စ ဥပ္ပိလဝတံ အလောဘေန ကုသလမူလေန နိဂ္ဂဏှာတိ, ကုက္ကုစ္စဉ္စ ဝိစိကိစ္ဆာ စ မောဟပက္ခော, တံ အမောဟေန နိဂ္ဂဏှာတိ။ ဒေါသော စ ထိနမိဒ္ဓဉ္စ ဒေါသပက္ခော, တံ အဒေါသေန နိဂ္ဂဏှာတိ။

တတ္ထ အလောဘဿ ပါရိပူရိယာ နေက္ခမ္မဝိတက္ကံ ဝိတက္ကေတိ။ တတ္ထ အဒေါသဿ ပါရိပူရိယာ အဗျာပါဒဝိတက္ကံ ဝိတက္ကေတိ။ တတ္ထ အမောဟဿ ပါရိပူရိယာ အဝိဟိံသာဝိတက္ကံ ဝိတက္ကေတိ။ တတ္ထ အလောဘဿ ပါရိပူရိယာ ဝိဝိတ္တော ဟောတိ ကာမေဟိ။ တတ္ထ အဒေါသဿ ပါရိပူရိယာ အမောဟဿ ပါရိပူရိယာ စ ဝိဝိတ္တော ဟောတိ ပါပကေဟိ အကုသလေဟိ ဓမ္မေဟိ, သဝိတက္ကံ သဝိစာရံ ဝိဝေကဇံ ဣတိသုခံ ပဌမံ ဈာနံ ဥပသမ္ပဇ္ဇ ဝိဟရတိ။

ဝိတက္ကာတိ တယော ဝိတက္ကာ – နေက္ခမ္မဝိတက္ကော အဗျာပါဒဝိတက္ကော အဝိဟိံသာဝိတက္ကော။ တတ္ထ ပဌမာဘိနိပါတော ဝိတက္ကော, ပဋိလဒ္ဓဿ ဝိစရဏံ ဝိစာရော။ ယထာ ပုရိသော ဒူရတော ပုရိသံ ပဿတိ အာဂစ္ဆန္တံ, န စ တာဝ ဇာနာတိ ဧသော ဣတ္ထီတိ ဝါ ပုရိသောတိ ဝါ ယဒါ တု ပဋိလဘတိ ဣတ္ထီတိ ဝါ ပုရိသောတိ ဝါ ဧဝံ ဝဏ္ဏောတိ ဝါ ဧဝံ သဏ္ဌာနောတိ ဝါ ဣမေ ဝိတက္ကယန္တော ဥတ္တရိ ဥပပရိက္ခန္တိ ကိံ နု ခေါ အယံ သီလဝါ ဥဒါဟု ဒုဿီလော အဍ္ဎော ဝါ ဒုဂ္ဂတောတိ ဝါ။ ဧဝံ ဝိစာရော ဝိတက္ကေ အပ္ပေတိ, ဝိစာရော စရိယတိ စ အနုဝတ္တတိ စ။ ယထာ ပက္ခီ ပုဗ္ဗံ အာယူဟတိ ပစ္ဆာ နာယူဟတိ ယထာ အာယူဟနာ ဧဝံ ဝိတက္ကော, ယထာ ပက္ခာနံ ပသာရဏံ ဧဝံ ဝိစာရော အနုပါလတိ ဝိတက္ကေတိ ဝိစရတိ ဝိစာရေတိ။ ဝိတက္ကယတိ ဝိတက္ကေတိ, အနုဝိစရတိ ဝိစာရေတိ။ ကာမသညာယ ပဋိပက္ခော ဝိတက္ကော, ဗျာပါဒသညာယ ဝိဟိံသသညာယ စ ပဋိပက္ခော ဝိစာရော။ ဝိတက္ကာနံ ကမ္မံ အကုသလဿ အမနသိကာရော, ဝိစာရာနံ ကမ္မံ ဇေဋ္ဌာနံ သံဝါရဏာ။ ယထာ ပလိကော တုဏှိကော သဇ္ဈာယံ ကရောတိ ဧဝံ ဝိတက္ကော, ယထာ တံယေဝ အနုပဿတိ ဧဝံ ဝိစာရော။ ယထာ အပရိညာ ဧဝံ ဝိတက္ကော။ ယထာ ပရိညာ ဧဝံ ဝိစာရော။ နိရုတ္တိပဋိသမ္ဘိဒါယဉ္စ ပဋိဘာနပဋိသမ္ဘိဒါယဉ္စ ဝိတက္ကော, ဓမ္မပဋိသမ္ဘိဒါယဉ္စ အတ္ထပဋိသမ္ဘိဒါယဉ္စ ဝိစာရော။ ကလ္လိတာ ကောသလ္လတ္တံ စိတ္တဿ ဝိတက္ကော, အဘိနီဟာရကောသလ္လံ စိတ္တဿ ဝိစာရော ။ ဣဒံ ကုသလံ ဣဒံ အကုသလံ ဣဒံ ဘာဝေတဗ္ဗံ ဣဒံ ပဟာတဗ္ဗံ ဣဒံ သစ္ဆိကာတဗ္ဗန္တိ ဝိတက္ကော, ယထာ ပဟာနဉ္စ ဘာဝနာ စ သစ္ဆိကိရိယာ စ ဧဝံ ဝိစာရော။ ဣမေသု ဝိတက္ကဝိစာရေသု ဌိတဿ ဒုဝိဓံ ဒုက္ခံ န ဥပ္ပဇ္ဇတိ ကာယိကဉ္စ စေတသိကဉ္စ; ဒုဝိဓံ သုခံ ဥပ္ပဇ္ဇတိ ကာယိကဉ္စ စေတသိကဉ္စ။ ဣတိ ဝိတက္ကဇနိတံ စေတသိကံ သုခံ ဣတိ ကာယိကံ သုခံ ကာယိကောယေဝ။ ယာ တတ္ထ စိတ္တဿ ဧကဂ္ဂတာ, အယံ သမာဓိ။ ဣတိ ပဌမံ ဈာနံ ပဉ္စင်္ဂဝိပ္ပဟီနံ ပဉ္စင်္ဂသမန္နာဂတံ။

တေသံယေဝ ဝိတက္ကဝိစာရာနံ အဘိက္ခဏံ အာသေဝနာယ တဿ တပ္ပောဏမာနသံ ဟောတိ။ တဿ ဝိတက္ကဝိစာရာ ဩဠာရိကာ ခါယန္တိ။ ယဉ္စ ဣတိသုခဉ္စ နေက္ခမ္မဉ္စ ဩဠာရိကံ ဘဝတိ။ အပိ စ သမာဓိဇာ ဣတိ ရတိ စ ဇာယတိ။ တဿ ဝိစာရာရမ္မဏံ။ တေသံ ဝူပသမာ အဇ္ဈတ္တံ စေတော သမ္ပသီဒတိ။ ယေ ဝိတက္ကဝိစာရာ ဒွေ ဓမ္မာနုဿရိတဗ္ဗာ။ ပစ္စုပ္ပန္နာ ဒရဏိတဗ္ဗံ။ တေသံ ဝူပသမာ ဧကောဒိဘာဝံ စိတ္တေကဂ္ဂတံ ဟောတိ။ တဿ ဧကောဒိဘာဝေန ဣတိ ပါရိပူရိံ ဂစ္ဆတိ။ ယာ ဣတိ, တံ သောမနဿိန္ဒ္ရိယံ, ယံ သုခံ, တံ သုခိန္ဒ္ရိယံ။ ယာ စိတ္တေကဂ္ဂတာ, အယံ သမာဓိ။ တံ ဒုတိယံ ဈာနံ စတုရင်္ဂသမန္နာဂတံ။ သော ဣတိယာ ဝိရာဂါ ယာတိ ဩဇဟိ ဇလ္လသဟဂတံ။

၇၃။ တတ္ထ သောမနဿစိတ္တမုပါဒါနန္တိ စ သော တံ ဝိစိနန္တော ဥပေက္ခမေဝ မနသိကရောတိ။ သော ဣတိယာ ဝိရာဂါ ဥပေက္ခကော ဝိဟရတိ။ ယထာ စ ဣတိယာ သုခမာနိတံ, တံ ကာယေန ပဋိသံဝေဒေတိ သမ္ပဇာနော ဝိဟရတိ။ ယေန သတိသမ္ပဇညေန ဥပေက္ခာပါရိပူရိံ ဂစ္ဆတိ။ ဣဒံ တတိယံ ဈာနံ စတုရင်္ဂသမန္နာဂတံ။

တထာ ကာယိကဿ သုခဿ ပဟာနာယ ပဌမေ ဈာနေ သောမနဿိန္ဒ္ရိယံ နိရုဇ္ဈတိ။ ဒုတိယေ ဈာနေ ဒုက္ခိန္ဒ္ရိယံ နိရုဇ္ဈတိ။ သော သုခဿ စ ပဟာနာ ဒုက္ခဿ စ ပဟာနာ ပုဗ္ဗေဝ သောမနဿဒေါမနဿာနံ အတ္ထင်္ဂမာ အဒုက္ခမသုခံ ဥပေက္ခာသတိပါရိသုဒ္ဓိံ စတုတ္ထံ ဈာနံ ဥပသမ္ပဇ္ဇ ဝိဟရတိ ။ တတ္ထ စတူဟိ ဣန္ဒ္ရိယေဟိ ဥပေက္ခာ ပသာဒါ ဟောတိ, ဒုက္ခိန္ဒ္ရိယေန ဒေါမနဿိန္ဒ္ရိယေန သုခိန္ဒ္ရိယေန သောမနဿိန္ဒ္ရိယေန စ။ တေသံ နိရောဓါ ဥပေက္ခာသမ္ပဇညံ ဟောတိ, တတ္ထ သုခိန္ဒ္ရိယေန သောမနဿိန္ဒ္ရိယေန စ အသတိ ဟောတိ, တေသံ နိရောဓါ သတိမာ ဟောတိ, ဒုက္ခိန္ဒ္ရိယေန ဒေါမနဿိန္ဒ္ရိယေန စ အသမ္ပဇညံ, တေသံ နိရောဓါ သမ္ပဇညံ ဟောတိ, ဣတိ ဥပေက္ခာယ စ သညာ, သတော သမ္ပဇာနော စိတ္တေကဂ္ဂတာ စ ဣဒံ ဝုစ္စတေ စ စတုတ္ထံ ဈာနံ။

တတ္ထ ယော ရာဂစရိတော ပုဂ္ဂလော တဿ သုခိန္ဒ္ရိယဉ္စ သောမနဿိန္ဒ္ရိယဉ္စ; ယော ဒေါသစရိတော ပုဂ္ဂလော တဿ ဒုက္ခိန္ဒ္ရိယဉ္စ ဒေါမနဿိန္ဒ္ရိယဉ္စ; ယော မောဟစရိတော ပုဂ္ဂလော တဿ အသတိ စ အသမ္ပဇညဉ္စ။

တတ္ထ ရာဂစရိတဿ ပုဂ္ဂလဿ တတိယေ ဈာနေ စတုတ္ထေ စ အနုနယော နိရုဇ္ဈတိ, ဒေါသစရိတဿ ပဌမေ ဈာနေ ဒုတိယေ စ ပဋိဃံ နိရုဇ္ဈတိ, မောဟစရိတဿ ပုဂ္ဂလဿ ပဌမေ ဈာနေ ဒုတိယေ စ အသမ္ပဇညံ နိရုဇ္ဈတိ။ တတိယေ ဈာနေ စတုတ္ထေ စ အသတိ နိရုဇ္ဈတိ, ဧဝမေဝ တေသံ တိဏ္ဏံ ပုဂ္ဂလာနံ စတ္တာရိ ဈာနာနိ ဝေါဒါနံ ဂမိဿန္တိ။

တတ္ထ ရာဂဒေါသစရိတဿ ပုဂ္ဂလဿ အသမ္ပဇညဉ္စ အနုနယော စ ပဋိဃဉ္စ, တေန ဟာနဘာဂိယံ [ပဟာနဘာဂိယံ (ဣ။ က။)] ဈာနံ ဟောတိ။ တတ္ထ ရာဂမောဟစရိတဿ ပုဂ္ဂလဿ အနုနယတ္တံ စ အာဒီနဝံ ဒဿိတာ, တံ တဿ ဟာနဘာဂိယံ ဈာနံ ဟောတိ။ တတ္ထ ဒေါသမောဟစရိတဿ ပုဂ္ဂလဿ ပဋိဃော စ အသတိ စ အသမ္ပဇညဉ္စ အာဒီနဝံ ဒဿိတာ တေန တဿ ဟာနဘာဂိယံ ဈာနံ ဟောတိ။

တတ္ထ ရာဂဒေါသမောဟသမဘာဂစရိတဿ ပုဂ္ဂလဿ ဝိသေသဘာဂိယံ ဈာနံ ဟောတိ, ဣမာနိ စတ္တာရိ ဈာနာနိ သတ္တသု ပုဂ္ဂလေသု နိဒ္ဒိသိတဗ္ဗာနိ။ စတူသု စ သမာဓီသု ဆန္ဒသမာဓိနာ ပဌမံ ဈာနံ, ဝီရိယသမာဓိနာ ဒုတိယံ ဈာနံ, စိတ္တသမာဓိနာ တတိယံ ဈာနံ, ဝီမံသာသမာဓိနာ စတုတ္ထံ ဈာနံ။ အပ္ပဏိဟိတေန ပဌမံ ဈာနံ, သုညတာယ ဒုတိယံ ဈာနံ, အနိမိတ္တေန တတိယံ ဈာနံ, အာနာပါနဿတိယာ စတုတ္ထံ ဈာနံ။ ကာမဝိတက္ကဗျာပါဒါနဉ္စ တံ တံ ဝူပသမေန ပဌမံ ဈာနံ ဟောတိ, ဝိတက္ကဝိစာရာနံ ဝူပသမေန ဒုတိယံ ဈာနံ, သုခိန္ဒ္ရိယသောမနဿိန္ဒ္ရိယာနံ ဝူပသမေန တတိယံ ဈာနံ, ကာယသင်္ခါရာနံ ဝူပသမေန စတုတ္ထံ ဈာနဉ္စ။ စာဂါဓိဋ္ဌာနေန ပဌမံ ဈာနံ, သစ္စာဓိဋ္ဌာနေန ဒုတိယံ ဈာနံ, ပညာဓိဋ္ဌာနေန တတိယံ ဈာနံ, ဥပသမာဓိဋ္ဌာနေန စတုတ္ထံ ဈာနံ။ ဣမာနိ စတ္တာရိ ဈာနာနိ သင်္ခေပနိဒ္ဒေသေန နိဒ္ဒိဋ္ဌာနိ, တတ္ထ သမာဓိန္ဒ္ရိယံ ပါရိပူရိံ ဂစ္ဆတိ။ အနုဝတ္တနကာနိ စတ္တာရိ, တတ္ထ ယော ပဌမံ ဈာနံ နိဿာယ အာသဝက္ခယံ ပါပုဏာတိ, သော သုခါယ ပဋိပဒါယ ဒန္ဓာဘိညာယ ဒေါမနဿိန္ဒ္ရိယပဋိပက္ခေန။ ယော ဒုတိယံ ဈာနံ နိဿာယ အာသဝါနံ ခယံ ပါပုဏာတိ, သော သုခါယ ပဋိပဒါယ ခိပ္ပါဘိညာယ ဒုက္ခိန္ဒ္ရိယပဋိပက္ခေန။ ယော တတိယံ ဈာနံ နိဿာယ အာသဝါနံ ခယံ ပါပုဏာတိ, သော သုခါယ ပဋိပဒါယ ဒန္ဓာဘိညာယ သောမနဿိန္ဒ္ရိယပဋိပက္ခေန။ ယော စတုတ္ထံ ဈာနံ နိဿာယ အာသဝါနံ ခယံ ပါပုဏာတိ, သော သုခါယ ပဋိပဒါယ ခိပ္ပါဘိညာယ သုခိန္ဒ္ရိယပဋိပက္ခေန ဂတော။

ပကိဏ္ဏကနိဒ္ဒေသော။

၇၄။ ယာနိ စတ္တာရိ ဈာနာနိ, တေသံ ဈာနာနံ ဣမာနိ အင်္ဂါနိ, တေသံ အင်္ဂါနံ သမူဟော [သမ္မောဟော (ဣ။ က။)] အဿ အင်္ဂါ, အယံ ဈာနဘူမိ ကော ဝိသေသောတိ အဿ ဝိသေသော။ ဣမေ သမ္ဘာရာ တေဟိ အယံ သမုဒါဂမော, တဿ သမုဒါဂမဿ အယံ ဥပနိသာ, တာယ ဥပနိသာယ အယံ ဘာဝနာ။ တဿာ ဘာဝနာယ အယံ အာဒီနဝေါ။ တေန အယံ ပရိဟာနိ။ ကဿ ပရိဟာနီတိ တဒုပဂဇ္ဈာယိနော [တဒုပကဇ္ဈာယိနော (ဣ။ က။)]။ တံ ယထာ ဘဏိတံ ပစ္စဝေက္ခန္တော အယံ ဝိသေသော။ တေန ဝိသေသေန အယံ အဿာဒေါ, သော ကဿ အဿာဒေါ အဈာနိယာ ဈာယိနော, တဿာ အဈာနိယာ ဈာယိနော, ဣဒံ ကလ္လိတာ ကောသလ္လေ ဌိတဇ္ဈာနံ အနောမဒ္ဒိယတံ ဂစ္ဆတိ ဈာနဗလံ, ဈာနဗလေ ဌိတဿ အယံ ပါရမိပ္ပတ္တဿ ဣမာနိ ဈာနင်္ဂါနိ အနာဝိလသင်္ကပ္ပော ပဌမေ ဈာနေ ဈာနင်္ဂါနိ ဘာဝီ။ သော ဣတိ တဒနုသာရိတ္တာဝ ပဌမေ ဈာနေ ဈာနင်္ဂံ တဿင်္ဂုနော စ ဓမ္မာ တဒဘိသန္နိတာယ စ။ ဣတိ ဒုတိယေ ဈာနေ ဈာနင်္ဂဓမ္မတာ ခေါ ပန တထာ ပဝတ္တဿ သဟဂတံ ဈာနင်္ဂဓမ္မံ သသုခတာယ အဇ္ဈတ္တံ သမ္ပသာဒေါ ဒုတိယေ ဈာနေ ဈာနင်္ဂံ မနောသမ္ပသာဒနတာယ တဒဘိသန္နိတာယ စ။ ဣတိ ဒုတိယေ ဈာနေ ဈာနင်္ဂံ အဇ္ဈတ္တံ သမ္ပသာဒနံ သမာဓိတာ [သမာဓိကာ (ဣ။)] ဣတိ ဒုတိယေ ဈာနေ ဈာနင်္ဂံ, စေတသော ဧကောဒိဘာဝေါ ဒုတိယေ ဈာနေ ဈာနင်္ဂံ, ဥပေက္ခာ ဖဿတာ တတိယေ ဈာနေ ဈာနင်္ဂံ, သုခံ တဿ အင်္ဂန္တိ စ။ စေတသော ဧကောဒိဘာဝေါ စတုတ္ထေ ဈာနေ ဈာနင်္ဂံ, ဥပေက္ခာ အဒုက္ခမသုခါ စတုတ္ထေ ဈာနေ ဈာနင်္ဂံ, အဘိနိသာဘူမိ ဥပေက္ခာသတိပါရိသုဒ္ဓိ စတုတ္ထေ ဈာနေ ဈာနင်္ဂံ။ သတိပါရိသုဒ္ဓိ စ အနေကဇ္ဈာဘူမီသု ဈာနင်္ဂသမာယုတ္တာ ဣတိ စေတသော ဧကောဒိဘာဝေါ စတုတ္ထေ ဈာနေ ဈာနင်္ဂံ။

တတ္ထ ကတမာ ဈာနဘူမိ? သဝိတက္ကေ သဝိစာရေ ဝိဝေကာ အနုဂတာ ပဌမေ ဈာနေ ဈာနဘူမိ။ အဝိတက္ကေ အဝိစာရေ အဇ္ဈတ္တံ သမ္ပသာဒနံ ဇနိတံ ဣတိမနုဂတာ ဒုတိယေ ဈာနေ ဈာနဘူမိ။ သုခသာတသမောဟိတာ သပ္ပီတိကာ တတိယေ ဈာနေ ဈာနဘူမိ။ တဿ သုခဒုက္ခသဟဂတာ အဘိနီဟာရသဟဂတာ စတုတ္ထေ ဈာနေ ဈာနဘူမိ။ အပ္ပမာဏသဟဂတာ သတ္တာရမ္မဏာ ပဌမေ ဈာနေ ဈာနဘူမိ။ အဘိဘူမိအာယတနသဟဂတာ ရူပသညီသု ဒုတိယေ ဈာနေ ဈာနဘူမိ။ ဝိမောက္ခသဟဂတာနံ ဝိမောက္ခေသု တတိယေ ဈာနေ ဈာနဘူမိ။ အနုပဿနာသဟဂတာ ကာယသင်္ခါရာ သမ္မာ စတုတ္ထဿ ဈာနဿ ဘူမိ။

၇၅။ တတ္ထ ကတမေ ဈာနဝိသေသာ? ဝိဝိစ္စေဝ ကာမေဟိ ဝိဝိစ္စ ပါပကေဟိ အကုသလေဟိ ဓမ္မေဟိ စိတ္တစေတသိကသဟဂတာ ကာမဓါတုသမတိက္ကမနတာပိ, အယံ ဈာနဝိသေသော။ အဝိတက္ကာ စေဝ အဝိစာရာ စ သပ္ပီတိကာယ သတိသဟဂတာယ ဣတိသဟဂတာ သညာမနသိကာရာ သမုဒါစရန္တိ။ အယံ ဈာနဝိသေသော။ အဝိတက္ကာယ ဘူမိယာ အဝိစာရေယေဝ သတိ အနုဂတာ ဥပေက္ခာသဟဂတာ မနသိကာရာ သမုဒါစရန္တိ။ တဒနုဓမ္မတာယ စ သတိ သဏ္ဍဟတိ [သန္ဒဟတိ (ဣ။)]။ တဉ္စ ဘူမိံ ဥပသမ္ပဇ္ဇ ဝိဟရတိ, အယံ ဈာနဝိသေသော။ သတိပါရိသုဒ္ဓိသဟဂတာ သညာမနသိကာရာ သမုဒါစရန္တိ, တဉ္စ ဘူမိံ ဥပသမ္ပဇ္ဇ ဝိဟရတိ, အယံ ဈာနဝိသေသော။ ဝိညာဏဉ္စာယတနသဟဂတာယ ဘူမိယံ အာကိဉ္စညာယတနသဟဂတာ သညာမနသိကာရာ သမုဒါစရန္တိ, တဉ္စ ဘူမိံ ဥပသမ္ပဇ္ဇ ဝိဟရတိ, အယံ ဈာနဝိသေသော။

ဈာနသမ္ဘာရာ နေက္ခမ္မဝိတက္ကော သမ္ဘာရော ကာမဝိတက္ကဝိနောဒနာဓိပ္ပါယတာ။ အဗျာပါဒဝိတက္ကော သမ္ဘာရော ဗျာပါဒဝိတက္ကပဋိဝိနောဒနာဓိပ္ပါယတာ။ အဝိဟိံသာဝိတက္ကော သမ္ဘာရော ဝိဟိံသာဝိတက္ကပဋိဝိနောဒနာဓိပ္ပါယတာ။ ဣန္ဒ္ရိယေသု ဂုတ္တဒွါရတာ အပ္ပိစ္ဆတာ သမ္ဘာရော ပရိသုဒ္ဓါဇီဝေါ စတုန္နံ သမာပတ္တီနံ သမ္ဘာရော အကမ္မဿ ဝိဟာရိတာ။ မဂ္ဂသမ္ဘာရော သမာပတ္တိပဇ္ဇနတာ။ ဖလသမ္ဘာရော ဈာနနိဗ္ဗတ္တိတာယ ဈာနသမုဒါဂမော။ ကုသလဟေတု ယံ ဈာနံ သမုဒယံ ဂစ္ဆန္တိ ကော စ [ကောစိ (က။)] န ကုတောစိ နေက္ခမ္မပ္ပတ္တာ သမုဒါဂစ္ဆန္တိ။ အာလမ္ဗနိရောဓသမာဓိ သန္တော သမုဒါဂစ္ဆန္တိ။ အဝီတိက္ကန္တာ သမုဒါဂစ္ဆန္တိ။ သုခိန္ဒ္ရိယံ သောမနဿိန္ဒ္ရိယံ ပဟာနာယ တေ စ အဗျာပဇ္ဇတာယ သမုဒါဂစ္ဆန္တိ။ တံ ပန သန္ဓာယ သမုဒါဂစ္ဆန္တိ။ အပရိဒါဟနာယ သမုဒါဂစ္ဆန္တိ။ အယံ ဉာဏသမုဒါဂမော။

၇၆။ တတ္ထ ကတမာ ဥပနိသာ? ကလျာဏမိတ္တတာ ဈာနဿ ဥပနိသာ။ ကလျာဏသမ္ပဝင်္ကတာ ဈာနဿ ဥပနိသာ။ ဣန္ဒ္ရိယေသု ဂုတ္တဒွါရတာ ဈာနဿ ဥပနိသာ။ အသန္တုဋ္ဌိတာ ကုသလေသု ဓမ္မေသု ဈာနဿ ဥပနိသာ။ သဒ္ဓမ္မဿဝနံ ဈာနဿ ဥပနိသာ။ သံဝေဇနိယေ ဌာနေ သံဝိဂ္ဂဿ ယောနိသော ပဓါနံ။ အယံ ဈာနောပနိသာ။

တတ္ထ ကတမာ ဘာဝနာ? မေတ္တာသေဝနာ အဗျာပါဒဝိတက္ကဘာဝနာ။ ကရုဏာသေဝနာ အဝိဟိံသာဝိတက္ကဘာဝနာ။ မုဒိတာဘာဝနာ ဣတိသုခသမ္ပဇညာ ကာရိတာ။ ဥပေက္ခာဘာဝနာ ပဿဝတာ ဥပေက္ခာဘာဝနာ အပဿဝတာ ဥပေက္ခာ စ အဇ္ဈုပေက္ခာ စ, အသုဘသညာဘာဝနာ ဒုက္ခာပဋိပဒါ ဒန္ဓာဘိညာ ဘဝသန္ဓာဘိညာ ဘဝသန္ဓာနံ, သာ ဆဗ္ဗိဓါ ဘာဝနာ ဘာဝိတာ ဗဟုလီကတာ အနုဋ္ဌိတာ ဝတ္ထုကတာ ယာနီကတာ ပရိစိတာ သုသမာရဒ္ဓါ။ အယံ ဘာဝနာ။

ဧဝံ ဘာဝယန္တဿ အယံ အာဒီနဝေါ။ ပဌမေ ဈာနေ သင်္ခါရသမန္နာဂတော ဧသော ဓမ္မော အဿုတော သာသဝေါ။ သစေ ဧသ ဓမ္မော အယံ သီလော အာသန္နပဋိပက္ခော စ ဧသ ဓမ္မော ကာမော ပတိစာရော ပတိဝိစာရော သမာပတ္တီနံ စ သဗ္ဗောဠာရိကော ဧသ ဓမ္မော ဝိတက္ကဝိစာရော စ။ တတ္ထ စိတ္တံ ခေါဘေန္တိ, ကာယော စေတ္ထ ကိလမတိ, ကာယမှိ စေတ္ထ ကိလန္တေ စိတ္တံ ဝိဟညတိ။ အနဘိနီဟာရက္ခမောဝ အဘိညာနံ ဣမေ အာဒီနဝါ ပဌမေ ဈာနေ။

ဒုတိယေ ဈာနေ ဣမေ အာဒီနဝါ ဣတိဖရဏသဟဂတော စ ဧသော ဓမ္မော, န သမုဒါစာရဿေတိ စိတ္တံ။ အသောဓယံ ဥပဂမော စေသ ဓမ္မော ဥပဂမိပရိဿယော [ဥပဂမိပရိစယော (ဣ။)] ဒေါမနဿပစ္စတ္ထိကော စေသ ဓမ္မော။ တတ္ထ တတ္ထ ယုတ္တီနံ ဣတိ ပရဇ္ဇတော စေသ ဓမ္မော ဒုက္ကရံ ဟောတိ, အဝတ္တသန္တာသဘူမိပရိဝဇ္ဇယန္တော စတူသု ဒုက္ခတာသု ဧသ ဓမ္မော အနုဝိဒ္ဓါပနသဒ္ဓါယ [အနုဝိဒ္ဓါ ပဿတိယာ (ဣ။)] ဒုက္ခတာယ စ န ပလိဗောဓဒုက္ခတာယ စ အဘိညာဒုက္ခတာယ စ ရောဂဒုက္ခတာယ စ, ဣမေ အာဒီနဝါ ဒုတိယေ ဈာနေ။

တတ္ထ ကတမေ အာဒီနဝါ တတိယေ ဈာနေ? ဥပေက္ခာသုခသဟဂတာယ တတ္ထ သာတာဝီနံ ပဉ္စန္နံ ဥပေက္ခာသုခံ ပရိဝတ္တိတော ဧသ ဓမ္မော တေန နိစ္စသညိတာနဉ္စ ယံ ဟောတိ။ ဒုက္ခောပနိယံ သုခံ စိတ္တဿ သင္ခောဘတံ ဥပါဒါယ သုခဒုက္ခာယ ဂတော သဝတိ။ သုခဒုက္ခာနုကတဉ္စ ဥပါဒါယ အနဘိဟာရက္ခမံ စိတ္တံ ဟောတိ။ အဘိညာယ သစ္ဆိကိရိယာသု သဗ္ဗေပိ စေတေ ဓမ္မာ တီသု ဈာနသမာပတ္တီသု စတူဟိ စ ဒုက္ခတာဟိ အနုဝိဒ္ဓါနံ သာ ဘယာ ဒုက္ခတာယ ပလိဗောဓဒုက္ခတာယ စ အဘိညာယ ဒုက္ခတာယ စ ဣမေ အာဒီနဝါ တတိယေ ဈာနေ။

တတ္ထ ကတမေ အာဒီနဝါ စတုတ္ထေ ဈာနေ? အာကိဉ္စညာသမာပတ္တိကာ တေ ဓမ္မာနုသမာပတ္တိကာ ဧတိဿာ စ ဘူမိယံ သာတာနံ ဗာလပုထုဇ္ဇနာနံ အနေကဝိဓါနိ ဒိဋ္ဌိဂတာနိ ဥပ္ပဇ္ဇန္တိ။ ဩဠာရိကာ သုခုမေဟိ စ ရူပသညာဟိ အနုဝိဓါနိ ဧတာနိ ဈာနာနိ သဒါ အနုဒယမေတ္တာဈာနကလာနုဒနုကလာယ သာဓါရဏာ, ဒုက္ကရာ စ သဗ္ဗေ စတ္တာရော မဟာသမ္ဘာရာ သမုဒါဂတာနိ စ ဧတာနိ ဈာနာနိ အညမညံ နိဿာယ သမုဒါဂစ္ဆန္တိ။ ဧတ္ထ သမုဒါဂတာ စ ဧတေ ဓမ္မာ န သမတ္တာ ဟောန္တိ။ အသမုဂ္ဂဟိတနိမိတ္တာ စ ဧတေ ဓမ္မာ ပရိဟာယန္တိ။ နိရုဇ္ဈန္တိ စ ဧတေ ဓမ္မာ န ဥပါဒိယန္တိ နိရုဇ္ဈင်္ဂါနိ စ, ဧတေသံ ဓမ္မာနံ ဈာနာနိ နိမိတ္တာနိ န ဈာနနိမိတ္တသညာ ဝေါကိရတိ။ အပ္ပဋိလဒ္ဓပုဗ္ဗာ စ ဈာယီဝသေန စ ဘဝတိ [ဈာယီ စ ဝသေန စ ဘဝတိ (ဣ။ က။)]။ ဣမေဟိ အာဒီနဝေဟိ အယံ ဈာနပရိဟာနိ။

၇၇။ နိရောဓသမာပတ္တိယာ အပဋိသင်္ခါယ အဝသေသသညိနော အာကိဉ္စညာယတနသဟဂတာ သညာမနသိကာရာ သမုဒါစရန္တိ, သော နိရောဓသမာပတ္တိတော ပရိဟာယတိ။ အာနေဉ္ဇသညိနော အသညာယတနံ သမာပန္နဿ အာကိဉ္စညာယတနသဟဂတာ မနသိကာရာ သမုဒါစရန္တိ, တဉ္စ ဘူမိံ န ပဇာနာတိ, သော တတော ပရိဟာယတိ။ အာကိဉ္စညာယတနံ သမာပန္နဿ ဝိညာဏဉ္စာယတနသညာ မနသိကာရာ သမုဒါစရန္တိ, တဉ္စ ဘူမိံ န ပဇာနာတိ, သော တတော ပရိဟာယတိ။ ဝိညာဏဉ္စာယတနံ သမာပန္နဿ ရူပသညာသဟဂတာ။ ဝိတ္ထာရေန။ပေ။။ ယာဝ ပဌမေ ဈာနေ ကာမသညာသဟဂတာ ကာတဗ္ဗာ။ သကဿ [သာ တဿ (ဣ။ က။)] ပရိဟာယတိ, ကလင်္ကဇ္ဈာနေ ကလင်္ကံ ဈာယတိ, ပရိသမန္တတော ဈာယတိ, ဘိန္ဒန္တော ဈာယတိ, န သဇ္ဈာယတိ, အာယူဟန္တော ဈာယတိ, ကိဉ္စိ စ နိပရိစိတော ဈာယတိ။ အတိဝိဓါဝန္တော ဈာယတိ, အတိမညန္တော ဈာယတိ, ကာယသင်္ခါရေ အပ္ပဋိသမ္ဘာရေ ဈာယတိ, ပရိယုဋ္ဌာနဿ နိဿရဏံ အဇာနန္တော ဈာယတိ, နီဝရဏာဘိဘူတော ဈာယတိ, အဿာပတ္တိမနသိကရောန္တော ဈာနဿ အဿာဒေါ ကာမရာဂပရိယုဋ္ဌာနံ ပဟာနံ ဈာနဿ အဿာဒေါ ကာမရာဂဟေတူနံ ဓမ္မာနံ ဥဒယန္တိ, နိရုဇ္ဈင်္ဂါနိ ဧတေသံ ဓမ္မာနံ ဈာနာနိ ဥပရိမာ သုခုပေက္ခာ ကာမကမ္မကိလေသာနံ ပဟာနံ အဿာဒေါ, ဧဝံ ခေါ ပုန ဈာနဿ အဿာဒေါ မဟာသံဝါသမပ္ပီဠိတေ လောကသံနိဝါသေ အသမ္ဗောဓေါကာသာ ဝိဂမေဿမိဒံ ဈာနပ္ပဟာနာ။ အယံ ပလိရောဓမပ္ပလိရောဓလောကသန္နိဝါသေ ဧသနိဓမိဒံ ဈာနံ အနမတဂ္ဂသံသာရသမာပန္နာနံ သတ္တာနံ သံသာရပ္ပဟာနနာ အာနိသံသော, ယမိဒံ ဈာနဿ အဿာဒေါ ကာယဿ အဈာနိယဈာယိနော ဘဝတိ။ အဈာနိယဈာနိယဈာယီဟိ အပရာမသန္တော အဈာနိယဈာယိတံ ဈာယတိ, ယာနိ ကလင်္ကဇ္ဈာယိနော ပဒါနိ, တာနိ အနုဓိတာနိ ပဋိပက္ခေ။

၇၈။ တတ္ထ ကတမံ ဈာနကောသလ္လံ? သမာပတ္တိကောသလ္လံ ဈာနကောသလ္လံ, ဈာနဝိသေသကောသလ္လံ ဈာနကောသလ္လံ, ဈာနန္တရိကကောသလ္လံ ဈာနကောသလ္လံ, သမာပတ္တိဝုဋ္ဌာနကောသလ္လံ ဈာနကောသလ္လံ, ဈာနေ သဘာဝကောသလ္လံ ဈာနကောသလ္လံ, ဈာနေ အာဒီနဝကောသလ္လံ ဈာနကောသလ္လံ, ဈာနေ နိဿရဏကောသလ္လံ ဈာနကောသလ္လံ, ဈာနဖလေန ဥပါဒါယ ကောသလ္လံ, ဈာနဖလေန ပဋိသင်္ခါနဖလေ အပရိဟာနဓမ္မတာ နိဗ္ဗတ္တိဈာနေ စ ကီဠိတာပိ ဝိသေသဘာဂိယံ ဈာနံ ပဋိလဗ္ဘတိ။ ဣဒံ ပနဿာတိ ဘဝဟာရိတာ စ အာရမ္မဏာနိမိတ္တဂ္ဂါဟော အနဘိနီဟာရဗလံ, စိတ္တေကဂ္ဂတာ နိမိတ္တာသု ဂတိသဟိတာ သမထဗလေန အသံသီဒနဉ္စ ဈာနေ မဂ္ဂဖလံ သမထံ ပဝတ္တေ သမာဓိနော ဥပေက္ခာပလိပုဗ္ဗာပရနိမိတ္တာသယော ပဂ္ဂါဟိနော [မဂ္ဂါဟိနော (ဣ။)] သတိဗလံ တံ ပဝတ္တိတာနဉ္စ ဝိပဿနာနံ သမညာဗလေ။

တတ္ထ ကတမာ ဈာနပါရမိတာ? သုပါရမိတာ မေတ္တာ ကာမေသု သတ္တာ ကာမသင်္ဂသတ္တာတိ [ဥဒါ။ ၆၃ ဥဒါနေ ပဿိတဗ္ဗံ] ယမှိ သုတ္တေ ဒေသနာယ ဝေါဟာရေန ဒွေ သစ္စာနိ နိဒ္ဒိဋ္ဌာနိ, ဒုက္ခဉ္စ သမုဒယော စ, ဝိစယေန ဟာရေန ယေ သံယောဇနီယေသု ဓမ္မေသု ဝဇ္ဇံ န ပဿန္တိ, တေ ဩဃံ တရိဿန္တီတိ နေတံ ဌာနံ ဝိဇ္ဇတိ။ န တရိဿန္တီတိ အတ္ထိ ဧသာ ယုတ္တိ စ ဝိစယော စ ဣဒံ နု ကိဿ ပဒဋ္ဌာနံ, ကာမေသု သတ္တာတိ ပဉ္စ ကာမဂုဏာ, တံ ကာမတဏှာယ ပဒဋ္ဌာနံ။ သံယောဇနေ ဝဇ္ဇမပဿမာနာတိ အဝိဇ္ဇာယ ပဒဋ္ဌာနံ, န ဟိ ဇာတု သံယောဇနသင်္ဂသတ္တာ ဩဃံ တရေယျုံ ဝိပုလံ မဟန္တန္တိ ဥပါဒါနဿ ပဒဋ္ဌာနံ။ ကာမေသု သတ္တာတိ ကာမာ ဒွိဓါ – ဝတ္ထုကာမာ စ ကိလေသကာမာ စ, တတ္ထ ကိလေသကာမာ ကာမတဏှာ ကာမတဏှာယ ယုတ္တာ ဘဝန္တိ ရူပတဏှာ ဘဝတဏှာ လက္ခဏေန ဟာရေန, သံယောဇနေ ဝဇ္ဇမပဿမာနာတိ သံယောဇနဿ။ ယော တတ္ထ ဆန္ဒရာဂေါ တဿ ကိံ ပဒဋ္ဌာနံ? သုခါ ဝေဒနာ ဒွေ စ ဣန္ဒ္ရိယာနိ – သုခိန္ဒ္ရိယဉ္စ သောမနဿိန္ဒ္ရိယဉ္စ။ ဣတိ သုခါယ ဝေဒနာယ ဂဟိတာယ တယောပိ ဝေဒနာ ဂဟိတာ ဟောန္တိ။ ဝေဒနာက္ခန္ဓေ ဂဟိတေ သဗ္ဗေ ပဉ္စက္ခန္ဓာ ဂဟိတာ ဟောန္တိ။ ရူပသဒ္ဒဂန္ဓရသဖောဋ္ဌဗ္ဗာ ဂဟိတာ, ဝတ္ထုကာမေသု ဂဟိတေသု သဗ္ဗာနိ ဆ ဗာဟိရာနိ အာယတနာနိ ဂဟိတာနိ ဟောန္တိ။ အဇ္ဈတ္တိကဗာဟိရေသု အာယတနေသု ယော သတော, အယံ ဝုစ္စတေ လက္ခဏော ဟာရော, တတ္ထ ယော ဩဠာရိကမှိ ကိလေသေ အဇ္ဈာဝသိတော သဗ္ဗကိလေသေသု ယော န တတော သုခုမတရေသု န ဝီတရာဂေါ ဘဝတိ။ တတ္ထ ဗာဟိရသံယောဇနံ မမန္တိ အဇ္ဈတ္တသံယောဇနံ အဟန္တိ။ တတ္ထ ဘဂဝတော ကော အဓိပ္ပါယော? ယေ ဩဃံ တရိတုကာမာ တေ သံယောဇနီယေသု ဓမ္မေသု အာဒီနဝါနုပဿိနော ဝိဟရိဿန္တီတိ အယမေတ္ထ ဘဂဝတော အဓိပ္ပါယော။ ကာမေသု သတ္တာတိ ယေသု စ သတ္တာ ယေန စ သတ္တာ ယေသဉ္စ သတ္တာ အယံ စတုဗ္ဗိဓေါ အာကာရော သဗ္ဗေသံ ဟာရဘာဂိယော။

၇၉။ တတ္ထ ကတမာနိ တီဏိ ဝိပလ္လာသာနိ ပဒဋ္ဌာနာနိ စ? စိတ္တဝိပလ္လာသဿ ဒိဋ္ဌိဝိပလ္လာသဿ သညာဝိပလ္လာသဿ တယော ဝိပလ္လာသာ တီဏိ အကုသလမူလာနိ ပဒဋ္ဌာနံ။ တီဏိ အကုသလမူလာနိ ဟီနပ္ပဏီတကာရိယကမ္မဿ ပဒဋ္ဌာနံ။ စတုန္နဉ္စ ဥပါဒါနာနံ ဒေါသော အကုသလမူလံ ဒိဿတိ။ ဟီနပ္ပဏီတကာရိယကမ္မဿ ပဒဋ္ဌာနံ။ ယထာ မာတုယာ ဝါ ပိတုနော ဝါ အညတရဿ ဝါ ပုန ဥဠာရဿ ဘိက္ခုနော အဘယံ ဒေတိ။ တတ္ထ အညော မိစ္ဆာ ပဋိပဇ္ဇေယျ ကာယေန ဝါ ဝါစာယ ဝါ။ တတ္ထ သော ဗျာပါဒမုပါဒါယ တေသံ ဥဠာရာနံ ရက္ခာဝရဏဂုတ္တိယာ အနုပါလယန္တော ယော ဥဠာရာနံ အဘယံ ဒေတိ။ တေသံ အဘယေ ဒိန္နေ ယော တတ္ထ မိစ္ဆာ ပဋိပဇ္ဇေယျ။ တတ္ထ သော ဗျာပါဒံ ဥပါဒါယန္တော ဒေါသဇံ ကမ္မံ ကရောတိ။ ယော တတ္ထ အသာဓု ဣန္ဒ္ရိယာ နီဝရဏံ ယံ တေသံ အဘယံ ဒက္ခိဏတော သညံ ဣဒံ ပဏီတံ ကာရဏံ မယာ ပုန တတ္ထ မိစ္ဆာပဋိပတ္တိ အယံ ဗျာပါဒေါ ဟီနဂမိဝကမ္မံ လောဘော မောဟော စ ဣမာနိ နီဝရဏာနိ ဝစနာနိ တာနိ စတ္တာရိ ဥပါဒါနာနိ တေဟိ စတူဟိ ဥပါဒါနေဟိ ယော သော ဥပါဒါနော ဣတ္ထီ ဝါ ပုရိသော ဝါ တေသံ ပဉ္စက္ခန္ဓာနံ တေယေဝ ဥပါဒါနော သမုဒယော ဣဒံ ဒုက္ခဉ္စ သမုဒယော စ သောယေဝ ဒေသနာဟာရော။

တတ္ထ ကာမေသု ယေ န ပဇ္ဇန္တိ, တေ အာဒီနဝါနုပဿနာယ ပဇ္ဇန္တိ။ ဣတိဿာ ကာမဓါတုယာ နိက္ခမိတုကာမတာ, အယံ ဝုစ္စတိ နေက္ခမ္မစ္ဆန္ဒော။ ယော တတ္ထ အနဘိသင်္ခါရာနံ ကိဉ္စိ ဝိသောဓေတိ တဿ ဓါဝရာ ဝါ, အယံ အဗျာပါဒစ္ဆန္ဒော။ ကိဉ္စိ ဝိဟိံသတိ, အယံ ဝိဟိံသာဆန္ဒော။ ဣတိ နေက္ခမ္မာဘိနီဟတာ တယော ဆန္ဒာ – နေက္ခမ္မစ္ဆန္ဒော အဗျာပါဒစ္ဆန္ဒော အဝိဟိံသာဆန္ဒော။ တတ္ထ နေက္ခမ္မစ္ဆန္ဒော အလောဘော; အဗျာပါဒစ္ဆန္ဒော အဒေါသော; အဝိဟိံသာဆန္ဒော အမောဟော။ ဣမာနိ တီဏိ ကုသလမူလာနိ အဋ္ဌသု သမ္ပတ္တေသု ပရဟိတာနိ, တေသံယေဝ စတုန္နံ ဥပါဒါနာနံ နိရောဓါယ သံဝတ္တန္တိ။ သစေ ဝါ ပုန ကမ္မံ ကရေယျ ကဏှံ ဝါ သုက္ကံ ဝါ တဿ ဝိပါကဟာနာယ သံဝတ္တန္တိ။ ဣဒံ ကမ္မံ အကဏှံ အသုက္ကံ ကမ္မက္ခယာယ သံဝတ္တတိ။ တတ္ထ ယော တိဏ္ဏံ အကုသလမူလာနံ နိရောဓေါ, အယံ နိရောဓေါ။ သောယေဝ မဂ္ဂေါ တတ္ထ ပဋိပဒါနိ ဣမာနိ ဒွေ သစ္စာနိ ဣမာနိ စတ္တာရိ သစ္စာနိ အာဝဋ္ဋော ဟာရော။

ကာမေသု သတ္တာတိ ယေ သေက္ခာ, တေ ဧကေနေဝါကာရေန သတ္တာ။ ယေ ပုထုဇ္ဇနာ, တေ ဒွီဟာကာရေဟိ သတ္တာ, တဿာယံ ပဉ္ဟော ဝိဘဇ္ဇဗျာကရဏီယော ဝတ္တဗ္ဗော။ ကိဉ္စာပိ သောတာပန္နော ပဋိသေဝနာယ, နော စ ခေါ အဘိနိဝေသေ သတ္တော ယော ဟိ အပစယာယ ပဒဟတိ, န ဥပစယာယ။ သေက္ခော ဟိ ကိလေသဝသေန ကာမေ ပဋိသေဝတိ။ ပုထုဇ္ဇနော ပန ကိလေသသမုဋ္ဌာနာယ ကာမေ ပဋိသေဝတိ။ တတ္ထ ကာမေသု သတ္တာနံ စတုဩဃံ တရိဿတီတိ ဝိဘဇ္ဇဗျာကရဏီယော, အယံ ဝိဘတ္တိ။

၈၀။ ပရိဝတ္တနောတိ ကာမေ ယေ နေဝ သဇ္ဇန္တိ န စ သံယောဇနေဟိ သံယုတ္တာ, တေ ဩဃံ တရိဿန္တိ ဝိပုလံ မဟန္တန္တိ။ အယံ သုတ္တဿ ပဋိပက္ခော။

ဝေဝစနန္တိ ယော ကာမေသု သတ္တော ယော စ တတ္ထ ကာမာနံ ဂုဏော, တတ္ထ ဝိသော သတ္တော။ ယေပိ ကာမာနံ အာဟာရာ ဓမ္မာ, တတ္ထ ဝိသော သတ္တော။ တတ္ထိမံ ကာမာနံ ဝေဝစနံ ပါကော ရဇော သလ္လံ ဂဏ္ဍော ဤတိ ဥပဒ္ဒဝေါတိ။ ယာနိ ဝါ ပန အညာနိ ဝေဝစနာနိ တတ္ထ ဝိသော သတ္တောတိ ဝေဝစနံ။ သတ္တော ဗန္ဓော မုစ္ဆိတော ဂဓိတော အဇ္ဈောသိတော ကာမေ အဇ္ဈာပန္နာ ပရိမုတ္တော တဗ္ဗဟုလဝိဟာရီတိ။ ယာနိ ဝါ ပန အညာနိ ဝေဝစနာနိ, အယံ ဝေဝစနော နာမ။ ကာမပ္ပစာရပညတ္တိယာ ကိလေသဂေါစရပညတ္တိယာ ပညတ္တာ စိတ္တန္တိ ဝေဝစနံ။ သတ္တော တဗ္ဗဟုလဝိဟာရီတိ ယာနိ ဝါ ပန အညာနိ။ ဣမေ ကာမပ္ပစာရပညတ္တိယာ ကိလေသဂေါစရ ပညတ္တိယာ ပညတ္တာ, ဗီဇပညတ္တိယာ ပညတ္တာ, သင်္ခါရာ သံယောဇနပညတ္တိယာ ပညတ္တာ, ဥပါဒါနံ ဟေတုပညတ္တိယာ ပညတ္တံ, ပုဂ္ဂလော ပုထုပညတ္တိယာ ပညတ္တော။

ဩတရဏောတိ ဣမာယ ပဋိစ္စသမုပ္ပါဒေါ ဒုက္ခဉ္စ သမုဒယော စ။ ယေ ကိလေသာ ယေ သင်္ခါရာ သံယောဇနာနိ စ ပဉ္စသု ခန္ဓေသု သင်္ခါရက္ခန္ဓော ဓမ္မာယတနေသု အကုသလာ ဓမ္မာယတနာနိ ဣန္ဒ္ရိယေသု သုခိန္ဒ္ရိယဉ္စ, သောမနဿိန္ဒ္ရိယဉ္စ, အယံ ဣန္ဒ္ရိယောတရဏော။

သောဓနောတိ ဧတ္တကော။ ဧသေဝ အာရမ္ဘော နိဒ္ဒိသိတဗ္ဗော သုတ္တတ္ထော။

အဓိဋ္ဌာနောတိ ဣမေ ဓမ္မာ အတ္ထိ ဧကတ္တတာယ ပညတ္တာ အတ္ထိ ဝေမတ္တတာယ။ ယေ သညာ ဗာဟိရော ကာမေ, တေ ဝေမတ္တတာယ ပညတ္တာ။ ပဉ္စသု ကာမဂုဏေသု သတ္တာတိ ပရိယုဋ္ဌာနဝိပလ္လာသာ ဝေမတ္တတာယ ပညတ္တာ ဩဃံ တရေယျုံ။ ဝိပုလံ မဟန္တန္တိ အဝိဇ္ဇာ ဧကတ္တတာယ ပညတ္တာ။

ပရိက္ခာရောတိ တဿ ကော ဟေတု ကော ပစ္စယော? အာရမ္မဏပစ္စယတာယ ပစ္စယော။ အယောနိသော စ မနသိကာရော သန္နိဿယဿ ပစ္စယတာယ ပစ္စယော။ အဝိဇ္ဇာ သမနန္တရပစ္စယတာယ ပစ္စယော။ ရာဂါနုသယော ဟေတုပစ္စယတာယ ပစ္စယော။ အယံ ဟေတု, အယံ ပစ္စယော။

သမာရောပနော ပစ္စယောတိ ယေ ကာမေသု သတ္တာ သုဂတာ သုရူပါတိ အယံ ကာမဓါတုယာ ဆန္ဒော ရာဂေါ တေ အပုညမယာ သင်္ခါရာ။ တေ ကိံ ပစ္စယာ? အဝိဇ္ဇာ ပစ္စယာ။ တေ ကိဿ ပစ္စယာ? ဝိညာဏဿ ပစ္စယာ။ ဣတိ အဝိဇ္ဇာပစ္စယာ သင်္ခါရာ။ သင်္ခါရပစ္စယာ ဝိညာဏံ ယာဝ ဇရာမရဏံ ဧဝမေတဿ ကေဝလဿ မဟတော ဒုက္ခက္ခန္ဓဿ သမုဒယော ဟောတိ ဧကံ သုတ္တံ ဂတံ။ ပဉ္စနီဝရဏိကံ သုတ္တံ ကာတဗ္ဗံ။

၈၁။ တတ္ထ ကတမော ဒေသနာဟာရော နာမ? ယာ စ အဘိဇ္ဈာ ယော စ ဗျာပါဒေါ ယဉ္စ ဥဒ္ဓစ္စံ, အယံ တဏှာ။ ယဉ္စ ထိနမိဒ္ဓံ, ယဉ္စ ကုက္ကုစ္စံ ယာ စ ဝိစိကိစ္ဆာ, အယံ ဒိဋ္ဌိ။ ယာ ပန ကာယဿ အကမ္မနိယတာ ကိဉ္စာပိ တံ မိဒ္ဓံ နော တု သဘာဝကိလေသတာယ ကိလေသော, ဣတိ ယာ စ စိတ္တသလ္လီယနာ ယာ စ ကာယာကမ္မနိယတာ, အယံ ပက္ခောပကိလေသော န တု သဘာဝကိလေသော။ တတ္ထ အတ္တသညာနုပစိတ္တံ ကိလမထော ကုက္ကုစ္စာနုပစိတ္တံ ထိနံ ယာ စိတ္တဿ လီယနာ, ဣတိ ဣမေ ပဉ္စ နီဝရဏာ စတ္တာရိ နီဝရဏာနိ သဘာဝကိလေသာ ထိနမိဒ္ဓံ နီဝရဏပက္ခောပကိလေသော။ ယထာ စတ္တာရော အာသဝါ သဘာဝအာသဝတာယ အာသဝါ နော တု စိတ္တသာသဝတာယ အာသဝါ။ သဘာဝတာယ အာသဝါ။ ပက္ခေ အာသဝတာယ အာသဝါ။ အထ ပနာဟ သုတ္တန္တံ ယေန တေ သမ္ပယုတ္တာ ဝါ ဝိပ္ပယုတ္တာ ဝါ အာသဝါ, တေယေဝ ဧတေ ဝတ္တဗ္ဗာ သာသဝါ ဝါ အနာသဝါ ဝါ။

တတ္ထ ကတမော ဝိစယော။ အဘိဇ္ဈာ ကာမတဏှာ ရူပတဏှာ ဘဝတဏှာ။ ယံ ဝါ ပန ကိဉ္စိ အဇ္ဈောသာနဂတံ သာသဝါ အဘိဇ္ဈိတဿ မေတ္တာနုပဿိယ ယော အနတ္ထံ စရတိ။ တတ္ထ ယော ဗျာပါဒံ ဥပ္ပါဒေတိ, အစရိ စရိဿတီတိ။ ဧဝံ နဝ အာဃာတဝတ္ထူနိ ကတ္တဗ္ဗာနိ, တဿေဝံ ဗျာပါဒါနုပဿိဿ ကိလေသော ယော ပရိဒါဟော ကာယကိလမထော အကမ္မနိယတာ မိဒ္ဓံ။ စိတ္တာနုပဿိဿ ပဋိဃာတေန ခိယနာ, ဣဒံ ထိနမိဒ္ဓံ။ တတ္ထ အဓိကရဏအဝူပသမော, ဣဒံ ဥဒ္ဓစ္စံ။ ယံ ကိံ ကသထမီတိ [ကရထမီတိ (ဣ။ က။)] ဣဒံ ကုက္ကုစ္စံ။ ယံ ယထာ ဣဒံ သန္တီရဏံ, အယံ ဝိစိကိစ္ဆာ။ တတ္ထ အဝိဇ္ဇာ စ တဏှာ စ အတ္ထိ, ဣဒံ ပရိယုဋ္ဌာနံ။ အာဝရဏံ နီဝရဏံ ဆဒနံ ဥပက္ကိလေသော စ အတ္ထိ, ဣဒံ ကာမစ္ဆန္ဒော ကာမရာဂပရိယုဋ္ဌာနဿ ပဒဋ္ဌာနံ။ ဗျာပါဒေါ ဗျာပါဒပရိယုဋ္ဌာနဿ ပဒဋ္ဌာနံ။ ထိနမိဒ္ဓံ ထိနမိဒ္ဓပရိယုဋ္ဌာနဿ ပဒဋ္ဌာနံ။ ဥဒ္ဓစ္စကုက္ကုစ္စံ အဝိဇ္ဇာပရိယုဋ္ဌာနဿ ပဒဋ္ဌာနံ။ ဝိစိကိစ္ဆာ ဝိစိကိစ္ဆာပရိယုဋ္ဌာနဿ ပဒဋ္ဌာနံ။ ကာမရာဂပရိယုဋ္ဌာနံ အနုသယသံယောဇနဿ ပဒဋ္ဌာနံ။ ဗျာပါဒပရိယုဋ္ဌာနံ ပဋိဃသံယောဇနဿ ပဒဋ္ဌာနံ။ ထိနမိဒ္ဓပရိယုဋ္ဌာနံ မာနသံယောဇနဿ ပဒဋ္ဌာနံ။ အဝိဇ္ဇာပရိယုဋ္ဌာနဉ္စ ဝိစိကိစ္ဆာပရိယုဋ္ဌာနဉ္စ ဒိဋ္ဌိသံယောဇနဿ ပဒဋ္ဌာနံ။

တတ္ထ ကတမော လက္ခဏော ဟာရော? ကာမရာဂပရိယုဋ္ဌာနေ ဝုတ္တေ သဗ္ဗာနိ ပရိယုဋ္ဌာနာနိ ဝုတ္တာနိ ဟောန္တီတိ။ သံယောဇနေသု ဝုတ္တေသု သဗ္ဗသံယောဇနာနိ ဝုတ္တာနိ ဟောန္တိ။ အယံ လက္ခဏော ဟာရော။

၈၂။ တတ္ထ ကတမော စတုဗ္ယူဟော ဟာရော? ယေ ဣမေ ပဉ္စ နီဝရဏာ ဈာနပဋိပက္ခော သော ဒုက္ခသမုဒယော။ ယံ ဖလံ, ဣဒံ ဒုက္ခံ။ တတ္ထ ကာမစ္ဆန္ဒဿ နေက္ခမ္မဝိတက္ကော ပဋိပက္ခော; ဗျာပါဒဿ အဗျာပါဒဝိတက္ကော ပဋိပက္ခော; တိဏ္ဏံ နီဝရဏာနံ အဝိဟိံသာဝိတက္ကော ပဋိပက္ခော။ ဣတိ ဣမေ တယော ဝိတက္ကာ။ နေက္ခမ္မဝိတက္ကော သမာဓိက္ခန္ဓံ ဘဇတိ။ အဗျာပါဒဝိတက္ကော သီလက္ခန္ဓံ ဘဇတိ။ အဝိဟိံသာဝိတက္ကော ပညာက္ခန္ဓံ ဘဇတိ။ ဣမေ တယော ခန္ဓာ။ အရိယော အဋ္ဌင်္ဂိကော မဂ္ဂေါ နီဝရဏပ္ပဟာနာယ သံဝတ္တတိ။ ယံ နီဝရဏပ္ပဟာနံ, အယံ နိရောဓေါ။ ဣမာနိ စတ္တာရိ သစ္စာနိ။ အယံ စတုဗ္ယူဟော ဟာရော။

တတ္ထ ကတမော အာဝဋ္ဋော ဟာရော? ပဉ္စ နီဝရဏာနိ ဒသ ဘဝန္တိ။ ယဒပိ အဇ္ဈတ္တံ သာရဇ္ဇတိ , တဒပိ နီဝရဏံ။ ယဒပိ ဗဟိဒ္ဓါ သာရဇ္ဇတိ, တဒပိ နီဝရဏံ, ဧဝံ ယာဝ ဝိစိကိစ္ဆာ ဣမေ ဒသ နီဝရဏာ။ အဇ္ဈတ္တဗဟိဒ္ဓါ ကိလေသာ ဣမာနိ ဒွေ သံယောဇနာနိ အဇ္ဈတ္တသံယောဇနဉ္စ ဗဟိဒ္ဓါသံယောဇနဉ္စ။ တတ္ထ အဟန္တိ အဇ္ဈတ္တံ, မမန္တိ ဗဟိဒ္ဓါ။ သက္ကာယဒိဋ္ဌိ အဇ္ဈတ္တံ, ဧကသဋ္ဌိ ဒိဋ္ဌိဂတာနိ ဗဟိဒ္ဓါ။ ယော အဇ္ဈတ္တံ ဆန္ဒရာဂေါ ရူပေသု အဝီတရာဂေါ ဘဝတိ အဝီတစ္ဆန္ဒော။ ဧဝံ ယာဝ ဝိညာဏေ, အယံ အဇ္ဈတ္တာ တဏှာ။ ယံ ဆသု ဗာဟိရေသု အာယတနေသု တီသု စ ဘဝေသု အဇ္ဈောသာနံ, အယံ ဗဟိဒ္ဓါ တဏှာ။ ဣမာနိ ဒွေ သစ္စာနိ သံယောဇနာနိ သံယောဇနီယာ စ ဓမ္မာ။ တတ္ထ သံယောဇနေသု ဓမ္မေသု ယာ နိဗ္ဗိဒါနုပဿနာ စ, အယံ မဂ္ဂေါ။ ယံ သံယောဇနပ္ပဟာနံ, အယံ နိရောဓေါ။ အယံ အာဝဋ္ဋော ဟာရော။

တတ္ထ ကတမော ဝိဘတ္တိဟာရော? သံယောဇနန္တိ န ဧတံ ဧကံသေန။ မာနသံယောဇနံ ဒိဋ္ဌိဘာဂိယန္တိ န တံ ဧကံသေန အဒိဋ္ဌမာနံ နိဿာယမာနံ န ပဇဟတိ။ ယော ပဉ္စ ဥဒ္ဓမ္ဘာဂိယော မာနော ကိဉ္စာပိ သော ဒိဋ္ဌိပက္ခေ သိယာ။ န တု ဩရမ္ဘာဂိယံ သံယောဇနံ တဿ ပဟာနာယ သံဝတ္တတီတိ။ ယော စ အဟံကာရော န ပဝိဒ္ဓေါယံ ပနဿ ဧဝံ ဟောတိ။ ကဒါသု နာမာဟံ တံ သန္တံ အာယတနံ သစ္ဆိကတွာ ဥပသမ္ပဇ္ဇ ဝိဟရိဿာမိ, ယံ အရိယာ သန္တံ အာယတနံ ဥပသမ္ပဇ္ဇ ဝိဟရိဿန္တီတိ, အယံ အဘိဇ္ဈာ န စ တံ နီဝရဏံ။ အတ္ထိ ပန အရဟတော ကာယကိလေသမိဒ္ဓဉ္စ ဩက္ကမတိ န စ တံ နီဝရဏံ တဿ ထိနမိဒ္ဓံ နီဝရဏန္တိ။ န ဧကံသေန။ အယံ ဝိဘတ္တိဟာရော။

ပရိဝတ္တနောတိ ပဉ္စ နီဝရဏာ ပဉ္စင်္ဂိကေန ဈာနေန ပဟာနံ ဂစ္ဆန္တိ။ အယံ တေသံ ပဋိပက္ခော နီဝရဏော အသုကဿ ပဟီနာတိ န အညာနုမိနိတဗ္ဗံ, ပရမတ္ထမဇ္ဈတ္တံ, အယံ ပရိဝတ္တနာ။

တတ္ထ ကတမော ဝေဝစနော? ကာမစ္ဆန္ဒော ဆန္ဒရာဂေါ ပေမံ နိကန္တီတိ ဝေဝစနံ။ နီဝရဏံ ဆဒနံ ဥပက္ကိလေသော ပရိယုဋ္ဌာနန္တိ ဝေဝစနံ။

ပညတ္တီတိ အဝိဇ္ဇာပစ္စယာ ကိစ္စပညတ္တိယာ [ပစ္စာပညတ္တိယာ (က။)] ပညတ္တိ, ဗျာပါဒေါ ဝိက္ခေပပညတ္တိယာ ပညတ္တိ, ထိနမိဒ္ဓံ အသမုဂ္ဃါတပညတ္တိယာ ပညတ္တိ။ ဧဝံ သဗ္ဗေပိ ဧတေ ပဉ္စ နီဝရဏာ ဣမမှိ သုတ္တေ ဝိက္ခေပပညတ္တိယာ ပညတ္တိ။

တတ္ထ ကတမော ဩတရဏော? ဣမေ ပဉ္စ နီဝရဏာ အဝိဇ္ဇာ စ တဏှာ စ တတ္ထ အဝိဇ္ဇာမူလာ နီဝရဏာ။ ယာ တဏှာ ဣမေ သင်္ခါရာ, တေ အဝိဇ္ဇာပစ္စယာ ဣမေ ဒွေ ဓမ္မာ ပဉ္စသု ခန္ဓေသု သင်္ခါရက္ခန္ဓပရိယာပန္နာ, အာယတနေသု ဓမ္မာယတနံ, ဓါတူသု ဓမ္မဓါတု, ဣန္ဒ္ရိယေသု ဣမေသံ ဓမ္မာနံ ပဒဋ္ဌာနံ သုခိန္ဒ္ရိယဿ စ သောမနဿိန္ဒ္ရိယဿ စ ဣတ္ထိန္ဒ္ရိယဿ စ ပုရိသိန္ဒ္ရိယဿ စ။

တတ္ထ ကတမော သောဓနော ဟာရော? ဣဒံ သုတ္တံ ယထာ အာရဗ္ဘ နိက္ခိတ္တံ သော အတ္ထော ဘာသိတော ဣမေဟိ ပဉ္စဟိ ပဒေဟိ။

တတ္ထ ကာမစ္ဆန္ဒော စ ဗျာပါဒေါ စ ဝိစိကိစ္ဆာ စ န ဧကတ္တတာယ ပညတ္တာ, ကာမာတိ န ဧကတ္တတာယ ပညတ္တာ, အထ ခလု ဝေမတ္တတာယ ပညတ္တာ။ အယံ အဓိဋ္ဌာနော ဟာရော။

တတ္ထ ကတမော ပရိက္ခာရော? ကာမစ္ဆန္ဒဿ အယောနိသော မနသိကာရော သုဘာရမ္မဏပစ္စယော; သုဘနိမိတ္တဉ္စ ဟေတု။ ဗျာပါဒဿ အယောနိသော မနသိကာရော အာဃာတဝတ္ထူနိ စ ပစ္စယော; ပဋိဃာနုသယော ဟေတု။ ထိနမိဒ္ဓဿ ပဋိသံဟာရော ပစ္စယော; ပဝတ္တိယာ ကိလမထာ စလနာ တဉ္စ ဟေတု။ ဥဒ္ဓစ္စကုက္ကုစ္စဿ ရဇနီယံ အာရမ္မဏိယံ အဿာဒိယာကိန္ဒ္ရိယံ တာဝ အပရိပုဏ္ဏဉ္စ ဉာဏံ ပစ္စယော; ကာမသညာ စ ဒိဋ္ဌိအနုသယော စ ဟေတု။ ဝိစိကိစ္ဆာယ နဝ မာနဝိဓါ အာရမ္မဏံ မာနာနုသယော, သောဝ ပစ္စယော; ဝိစိကိစ္ဆာနုသယော ဟေတု။ ဧတေ ပဉ္စ ဓမ္မာ သဟေတု သပ္ပစ္စယာ ဥပ္ပဇ္ဇန္တိ။

တတ္ထ ကတမော သမာရောပနော ဟာရော? ဣမေ ပဉ္စ နီဝရဏာ စတ္တာရောပိ ဧတေ အာသဝါ ဂဏ္ဍာပိ [တဏှာပိ (ဣ။)] ဧတေ သလ္လာပိ ဧတေ ဥပါဒါနာနိ ဧတေ။ တေသု ဧဝ ဗာဟိရေသု ဓမ္မေသု သံကိလေသဘာဂိယံ သုတ္တန္တိ ပညတ္တိံ ဂစ္ဆတိ။ အယံ သမာရောပနော ဟာရော။

နိဒ္ဒိဋ္ဌံ သံကိလေသိကဘာဂိယံ သုတ္တံ။

၈၃။ မနောပုဗ္ဗင်္ဂမာ ဓမ္မာတိ ဂါထာ။

တတ္ထ ကတမော ဒေသနာ ဟာရော? ဣမမှိ သုတ္တေ ကော အတ္ထော ခန္ဓဝဝတ္ထာနေန ဝိညာဏက္ခန္ဓံ ဒေသေတိ, ဓါတုဝဝတ္ထာနေန မနောဝိညာဏဓါတုံ, အာယတနဝဝတ္ထာနေန မနာယတနံ, ဣန္ဒ္ရိယဝဝတ္ထာနေန မနိန္ဒ္ရိယံ။ တဿ ကိံ ပုဗ္ဗင်္ဂမာ ဓမ္မာ? သံခိတ္တေန ဆ ဓမ္မာ ပုဗ္ဗင်္ဂမာ ဓမ္မာ ကုသလမူလာနိ စ အကုသလမူလာနိ စ အနိမိတ္တံ ဣမမှိ သုတ္တေ ကုသလမူလံ ဒေသိတံ။ တတ္ထ ကတမာ မနောပုဗ္ဗင်္ဂမာ ဓမ္မာ? မနော တေသံ ပုဗ္ဗင်္ဂမံ, ယထာပိ ဗလဿ ရာဇာ ပုဗ္ဗင်္ဂမော, ဧဝမေဝ ဓမ္မာနံ မနောပုဗ္ဗင်္ဂမာ။ တတ္ထ တိဝိဓါနံ ပုဗ္ဗင်္ဂမာနံ နေက္ခမ္မစ္ဆန္ဒေန အဗျာပါဒစ္ဆန္ဒေန အဝိဟိံသာဆန္ဒေန။ အလောဘဿ နေက္ခမ္မစ္ဆန္ဒေန ပုဗ္ဗင်္ဂမာ။ အဒေါသဿ အဗျာပါဒစ္ဆန္ဒေန ပုဗ္ဗင်္ဂမာ။ အမောဟဿ အဝိဟိံသာဆန္ဒေန ပုဗ္ဗင်္ဂမာ။ တတ္ထ မနောသေဋ္ဌာတိ မနသာ ဣမေ ဓမ္မာ ဥဿဋာ မနေန ဝါ နိမ္မိတာ။ မနောဝ ဣမေသံ ဓမ္မာနံ သေဋ္ဌောတိ မနောဝ ဣမေသံ ဓမ္မာနံ သေဋ္ဌဇေဋ္ဌောတိ မနောဝ ဣမေသံ ဓမ္မာနံ အာဓိပစ္စံ ကရောတီတိ မနောသေဋ္ဌာ။ မနောဇဝါတိ ယတ္ထ မနော ဂစ္ဆတိ။ တတ္ထ ဣမေ ဓမ္မာ ဂစ္ဆန္တီတိ မနောဇဝါ။ ယထာ ဝါတော သီဃံ ဂစ္ဆတိ အညော ဝါ ကောစိ သီဃံ ဂါမကော ဝုစ္စတေ ဝါတဇဝေါတိ ပက္ခိဂါမိကောတိ, ဧဝမေဝ ဣမေ ဓမ္မာ မနေန သမ္ပဇာယမာနာ ဂစ္ဆန္တိ, တတ္ထ ဣမေ ဓမ္မာ ဂစ္ဆန္တီတိ မနောဇဝါတိ။ တေ တိဝိဓါ ဆန္ဒသမုဒါနိတာ အနာဝိလတာ စ သင်္ကပ္ပော။ သတ္တဝိဓါ စ ကာယိကံ သုစရိတံ ဝါစသိကံ သုစရိတံ, တေ ဒသ ကုသလကမ္မပထာ။ တတ္ထ မနသာ စေ ပသန္နေနာတိ မနောကမ္မံ။ ဘာသတိ ဝါတိ ဝစီကမ္မံ။ ကရောတိ ဝါတိ ကာယကမ္မံ။ ဣမေဟိ ဣမသ္မိံ သုတ္တေ ဒသ ကုသလကမ္မပထာ ပရမာပိ သန္တာ သီလဝတာ ပရမာ။ သော ဘဝတိ ဝိဝတ္တိယံ န လောကနိယျာနာယ ဝါသနာဘာဂိယံ သုတ္တံ ဘဝတိ။ အယံ ဒေသနာ။

တတ္ထ ကတမော ဝိစယော ဟာရော? မနောပုဗ္ဗင်္ဂမာ ဓမ္မာတိ ကုသလမူလာနိ စ အဋ္ဌင်္ဂသမ္မတ္တာနိ။ ဣဒံ သုတ္တံ။

ယုတ္တီတိ ဒသန္နံ ကုသလကမ္မပထာနံ ယော ဝိပါကော, သော သုခဝေဒနီယော အဗျာပါဒဿင်္ဂမာနော။ ဆာယာဝ အနပါယိနီတိ အနုဂစ္ဆတိ အတ္ထိ ဧသာ ယုတ္တိ။

ပဒဋ္ဌာနန္တိ အဋ္ဌာရသန္နံ မနောပဝိစာရာနံ ပဒဋ္ဌာနံ။ မနောပုဗ္ဗင်္ဂမာ ဓမ္မာတိ သဗ္ဗကုသလပက္ခဿ ဣမေ ဓမ္မာ ပဒဋ္ဌာနံ။ မနသာ စေ ပသန္နေနာတိ ယော စေတသော ပသာဒေါ, ဣဒံ သဒ္ဓိန္ဒ္ရိယဿ ပဒဋ္ဌာနံ။ ဘာသတိ ဝါတိ သမ္မာဝါစာယ။ ကရောတိ ဝါတိ သမ္မာကမ္မန္တဿ စ သမ္မာဝါယာမဿ စ ပဒဋ္ဌာနံ။

လက္ခဏောတိ ဣတိ ပုဗ္ဗင်္ဂမာ ဓမ္မာတိ ဝေဒနာပုဗ္ဗင်္ဂမာပိ ဧတေ, သညာပုဗ္ဗင်္ဂမာပိ ဧတေ, သင်္ခါရပုဗ္ဗင်္ဂမာပိ ဧတေ။ ယေ ကေစိ ဓမ္မာ သဟဇာတာ သဗ္ဗေ ပုဗ္ဗင်္ဂမာ ဧတေသံ ဓမ္မာနံ။ တတော နံ သုခမန္ဝေတီတိ သောမနဿမပိ နံ အန္ဝေတိ ယံ သုသုခစ္ဆာယာ တဒါပိ နံ သုခံ တဒပိ အန္ဝေတိ။

၈၄။ တတ္ထ ကတမော စတုဗ္ယူဟော ဟာရော? မနောပုဗ္ဗင်္ဂမာတိ န ဣဒံ ဧကာဒိဝစနံ။ ကိံ ကာရဏာ? သဗ္ဗေ ယေဝ ဣမေ ဆဝိညာဏကာယာ, ဣမမှိ ဘဂဝတော ကော အဓိပ္ပါယော? ယေ သုခေန အတ္ထိကာ, တေ မနံ ပသာဒေန္တီတိ အယံ ဣမမှိ သုတ္တေ ဘဂဝတော အဓိပ္ပါယော။ အတ္ထော ပုဗ္ဗေယေဝ နိဒ္ဒိဋ္ဌော။

ယာနိ ဟိ ကုသလမူလာနိ, တာနိ အဋ္ဌာနိသံသမတ္တာ ဟေတု, အယံ အဋ္ဌင်္ဂိကော မဂ္ဂေါ။ ဒသ ဌာနာနိ ဒေသနာဟေတူနိ ဒေသနာပစ္စယာ နိဒ္ဒေသနာ စ။ တတ္ထ ယံ မညေ ဒုက္ခေန သဟ နာမရူပံ ဝိညာဏသစ္စန္တိ အင်္ဂေန ကုသလမူလံ ပဟီယတိ, အယံ အပ္ပဟီနဘူမိယံ သမုဒယော။ ယံ တေသံ ပဟာနာ, အယံ နိရောဓေါ။ ဣမာနိ စတ္တာရိ သစ္စာနိ။ အယံ အာဝဋ္ဋော ဟာရော။

ဝိဘတ္တီတိ –

မနောပုဗ္ဗင်္ဂမာ ဓမ္မာ၊ မနောသေဋ္ဌာ မနောမယာ။

မနသာ စေ ပသန္နေန၊ ဘာသတိ ဝါ ကရောတိ ဝါ။

တတော နံ သုခမန္ဝေတိ၊ ဆာယာဝ အနပါယိနီတိ။

တံ န ဧကံသေန သမဏဿ ဝါ ဗြာဟ္မဏဿ ဝါ ပန ဟောတိ။ တဿ ဝါ မိစ္ဆာဒိဋ္ဌိကဿ သကသတ္ထေ စိတ္တံ ပသာဒေတိ, တေန စ ပသန္နေန စိတ္တေန ဘာသတိ ဗျာကရောတိ န တံ သုခမန္ဝေတိ န ဆာယာဝ အနုဂါမိနီ, ဒုက္ခမေဝ တံ အန္ဝေတိ။ ယထာ ဝဟန္တံ စက္ကံ ပဒမန္ဝေတိ, ဣဒံ တံ ဝိဘဇ္ဇဗျာကရဏီယံ။ မနသာ စေ ပသန္နေန ကာယကမ္မံ ဝစီကမ္မံ သုခဝေဒနီယန္တိ သမဂ္ဂတေ သုခဝေဒနီယံ မိစ္ဆဂ္ဂတေ ဒုက္ခဝေဒနီယံ, အယံ ဝိဘတ္တိ။

တတ္ထ ကတမော ပရိဝတ္တနော ဟာရော? မနောပုဗ္ဗင်္ဂမာ ဓမ္မာတိ ယံ မနသာ ပဒုဋ္ဌေန ဘာသတိ ဝါ ကရောတိ ဝါ ဒုက္ခမဿာနုဂါမိနီ, ဧတာနိယေဝ ဒွေ သုတ္တာနိ ဘာသိတာနိ ဧသ ဧဝ စ ပဋိပက္ခော။ ဝေဝစနန္တိ ယဒိဒံ မနောစိတ္တံ ဝိညာဏံ မနိန္ဒ္ရိယံ မနောဝိညာဏဓါတု။

ပညတ္တီတိ မနောပုဗ္ဗင်္ဂမာ ဓမ္မာတိ အယံ မနော ကိဉ္စိ ပညတ္တိယာ ပညတ္တံ။ ဓမ္မာတိ ကုသလကမ္မပထပညတ္တိယာ ပညတ္တံ။ မနောသေဋ္ဌာတိ ဝိသိဋ္ဌပညတ္တိယာ ပညတ္တံ။ မနောဇဝါတိ သဟပညတ္တိယာ ပညတ္တံ။ စိတ္တန္တိ နေက္ခမ္မပညတ္တိယာ ပညတ္တံ။ မနသာ စေ ပသန္နေနာတိ သဒ္ဓိန္ဒ္ရိယပညတ္တိယာ ပညတ္တံ။ မနသာ စေ ပသန္နေနာတိ အနာဝိလသင်္ကပ္ပဒုတိယဇ္ဈာနပညတ္တိယာ ပညတ္တံ ။ မနသာ စေ ပသန္နေနာတိ အဿဒ္ဓါနံ ပဋိပက္ခပညတ္တိယာ ပညတ္တံ။ ဘာသတိ ဝါတိ သမ္မာဝါစာပညတ္တိယာ ပညတ္တံ။ ကရောတိ ဝါတိ သမ္မာကမ္မန္တပညတ္တိယာ ပညတ္တံ။ တတော နံ သုခမန္ဝေတီတိ ဈာနသမာဓါနံ။ ဣန္ဒ္ရိယေသု မနိန္ဒ္ရိယံ။ ပဋိစ္စသမုပ္ပါဒေ ဝိညာဏံ။ မနောပုဗ္ဗင်္ဂမာ ဓမ္မာတိ မေတ္တာ စ မုဒုတာ စ ဈာနေသု ဒုတိယံ ဈာနံ တတိယဉ္စ။ ခန္ဓေသု သင်္ခါရက္ခန္ဓပရိယာပန္နော။ ဓါတူသု ဓမ္မဓါတု, အာယတနေသု ဓမ္မာယတနံ။ ယံ ကုသလံ ဣန္ဒ္ရိယေသု သုခိန္ဒ္ရိယဉ္စ သောမနဿိန္ဒ္ရိယဉ္စ ပဒဋ္ဌာနံ။ ဣမေသံ ဓမ္မာနံ ပဋိစ္စသမုပ္ပန္နာနံ ဖဿပစ္စယာ သုခဝေဒနီယော ဖဿော သုခဝေဒနာ မနောပဝိစာရေသု သောမနဿဝိစာရော ဆတ္တိံသေသု ပဌမပဒေသု ဆ သောမနဿနေက္ခမ္မဿိတာ။ ဣတိ အယံ ဩတရဏော ဟာရော။

တတ္ထ ကတမော သောဓနော ဟာရော? ယံ အတ္ထံ အာရဗ္ဘ ဣဒံ သုတ္တံ ဘာသိတံ။ သော အတ္ထော နိယုတ္တော ဧတမတ္ထံ အာရဗ္ဘ သုတ္တံ။ အယံ သောဓနော ဟာရော။

၈၅။ တတ္ထ ကတမော အဓိဋ္ဌာနော ဟာရော? မနောပုဗ္ဗင်္ဂမာ ဓမ္မာတိ ဝေဝစနပညတ္တိ, န ဧကတ္တပညတ္တိ။ ဓမ္မာတိ ဧကတော န ဝေဝစနပညတ္တိ။ မနသာ စေ ပသန္နေနာတိ သော ပသာဒေါ ဒွိဓေါ အဇ္ဈတ္တဉ္စ အဗျာပါဒါဝိက္ခမ္ဘနဗဟိဒ္ဓါ စ ဩကပ္ပနတော။ သော အဇ္ဈတ္တပသာဒေါ ဒွိဓေါ။ သမုဂ္ဃါတပသာဒေါ စ ဝိက္ခမ္ဘနပသာဒေါ စ ဗျာပါဒပရိယုဋ္ဌာနံ။ ဝိဃာတော န မူလပသာဒေါ ဇာတမူလမ္ပိ ဝါ။ ပသာဒေါ သဗျာပါဒံ ဝိဃာတေန။ တတော နံ သုခမန္ဝေတီတိ သုခံ ကာယိကဉ္စ စေတသိကဉ္စ အပ္ပိယဝိပ္ပယောဂေါပိ ပိယသမ္ပယောဂေါပိ နေက္ခမ္မသုခမ္ပိ ပုထုဇ္ဇနသုခမ္ပိ ဣတိသမ္ဗောဇ္ဈင်္ဂမ္ပိ စေတသိကံ သုခံ ။ ယမ္ပိ ပဿဒ္ဓကာယော သုခံ ဝေဒေတိ, တမ္ပိ ကာယိကံ သုခံ ဗောဇ္ဈင်္ဂါ စ စေတသိကံ သုခံ။ ယမ္ပိ ပဿဒ္ဓကာယော သုခံ ဝေဒေသိ, တမ္ပိ တဉ္စ သုခပဒဋ္ဌာနံ ပညတ္တိယာ ယထာဝုတ္တံ တံ အပရာမဋ္ဌံ ကုသလာနံ ဓမ္မာနံ။ အန္ဝေတီတိ အပ္ပနာ သန္ဒိဿတိ န စာယံ ဝါ ပတ္တဘူတော အန္ဝေတိ။ တဒိဒံ သုတ္တံ ဒွီဟိ အာကာရေဟိ အဓိဋ္ဌာတဗ္ဗံ။ ဟေတုနာ စ ယော ပသန္နမာနသော ဝိပါကေန စ ယော ဒုက္ခဝေဒနီယော။

ပရိက္ခာရောတိ ဘဂဝါ ပဉ္စသတေန ဘိက္ခုသံဃေန နဂရံ ပဝိသတိ ရာဇဂဟံ။ တတ္ထ မနုဿော ပုဂ္ဂလော ဘဂဝန္တံ ပရိဝိသတိ, တဿ ပသာဒေါ ဥပ္ပန္နော ကုသလမူလပုဗ္ဗယောဂါဝစရောပိ။ သော အညေသဉ္စ အက္ခာတိ, ဣဒံ ဝါစံ ဘာသတိ လာဘာ တေသံ, ယေသံ နိဝေသနံ ဘဂဝါ ပဝိသတိ, အမှာကမ္ပိ ယဒိ ဘဝေယျ မယမ္ပိ ဘဂဝတော သံပသာဒံ လစ္ဆမှာတိ။ ယေန ဘဂဝါ တေနဉ္ဇလိံ ပဏာမေတွာ ‘‘နမော ဘဂဝတော နမော ဘဂဝတော’’တိ အဗျာပါဒမာနော ဧကမန္တေ အဋ္ဌာသိ။ တဒနန္တရေ ဘဂဝါ ဣမံ သုတ္တံ အဘာသိတ္ထ ‘‘မနောပုဗ္ဗင်္ဂမာ ဓမ္မာ’’တိ။ သဗ္ဗံ သုတ္တံ တထာ ယံ ပရေသံ ဘာသတိ ဣဒံ ဝါစာကမ္မံ။ ယံ အဉ္ဇလိံ ပဏာမေတိ, ဣဒံ ကာယကမ္မံ။ ယော မနောပသာဒေါ, ဣဒံ မနောကမ္မံ။ တတ္ထ ယံ ပရေသံ ပကာသေတိ ဘာသတိ ဝဏ္ဏံ။ ယေသံ ဘဂဝါ နိဝေသနံ ဂစ္ဆတီတိ။ သဗ္ဗံ တဿ အလောဘော ကုသလမူလံ။ ယံ ဘဂဝတိ မေတ္တစိတ္တော, တဿ အဒေါသော ကုသလမူလံ ။ ယံ အဉ္ဇလိံ ပဏာမေတိ မာနဉ္စ နိဂ္ဂဏှာတိ, တတ္ထဿ အမောဟော ကုသလမူလံ ပါတုဘဝတိ။ ယံ ဥဠာရပညံ ပဋိလဘတိ, ဣဒမဿ ဒိဋ္ဌိဝိပလ္လာသပ္ပဟာနံ။ ယံ တထာယေဝ သံဝရော ဟောတိ, ဣဒမဿ သညာဝိပလ္လာသပ္ပဟာနံ။ ယံ မနဿ ပသာဒနံ, ဣဒမဿ စိတ္တဝိပလ္လာသပ္ပဟာနန္တိ အကုသလဝိပလ္လာသာနံ ဝိက္ခမ္ဘနံ ပဟာနံ ပစ္စယော။ တီဏိ ကုသလမူလာနိ ယော အနာဝိလစိတ္တသင်္ကပ္ပော, သော တဿ မနသိကာရောတိ ဝုစ္စတိ။ ယံ ကိလေသေဟိ ဝိက္ခမ္ဘနံ ဣတိ ဝိပလ္လာသာ စ အာရမ္မဏာ သပ္ပစ္စယတာယ ပစ္စယော ကုသလမူလာနိ စ သန္ဒိဿယတာယ ပစ္စယော, သော စ မနသိကာရော ဟေတုနာ ဣမိနာ ပစ္စယေန စိတ္တံ ဥပ္ပန္နံ။ တတ္ထ ယံ သသတ္ထာရမ္မဏံ စိတ္တံ ပဝတ္တံ အယံ ဗုဒ္ဓါနုဿတိ။ ယမ္ပိ ဘဂဝတော ဂုဏေ မနသိ ကရောတိ, အယမဿ ဓမ္မာနုဿတိ။ တတ္ထ သတိသမ္ပဇညံ ဟေတု, အယဉ္စ ပစ္စယော။ ဝါစာ ပညာ ဟေတု ဝိတက္ကဝိစာရာ ပစ္စယော။ ကာယသင်္ခါရာ ကမ္မဿ အဘိသင်္ခါရော နာမ ဟေတု ဝါ အပ္ပစ္စယော သုခဝေဒနီယဿ ကမ္မဿ ဥပစယော ဟေတုကာ ကမ္မဿ ပစ္စယော။

၈၆။ တတ္ထ ကတမော သမာရောပနော ဟာရော? မနသာယေဝ ပသန္နေန သတောယေဝေတ္ထ ပသန္နော အပိ စ စိတ္တဝေါဒါနာ သတ္တာ ဝိမုစ္စန္တီတိ တေန သတ္တာ စိတ္တပုဗ္ဗင်္ဂမာ စိတ္တေန ပသန္နေန စေတနာပိ တတ္ထ စိတ္တဘူတာ ဘဝန္တီတိ ပဋိဃာ အယံ စေတနာနံ ပသာဒေန ကာယော စဿ ပသာဒေါ , သော စ အာရဘတိ ပသာဒေန ပသန္နော သညာနန္တိ စဿ အဝိပရီတာ, သော ပဉ္စဝိဓေါ ဝိက္ခမ္ဘနာ, ကာယပဿမ္ဘနာယေဝါ ပသာဒေါ စိတ္တသိတော စိတ္တံ ပန ပုဗ္ဗံယေဝ ပသန္နံ။ အယံ သမာရောပနာ။ ဧဝံ ပဉ္စန္နမ္ပိ ပသာဒေါ။ တတော နံ သုခမန္ဝေတီတိ ကတမံ ဘဂဝါ နိဒ္ဒိသတိ? န ဟိ အတ္တသစ္စံ တဿ ကမ္မဿ ဝိပါကော အန္ဝေတိ။ တဿ ဥပါယော အနုဂစ္ဆတိ ယဒါ သိတပစ္စယာ ဥပ္ပဇ္ဇတေ သောမနဿံ အဝိပ္ပဋိသာရောပိ အန္ဝေတိ။ အယံ သမာရောပနော ဟာရော။

မဟာနာမ သက္ကဿ သုတ္တံ [ပဿ သံ။ နိ။ ၅။၁၀၁၇]။ တသ္မိံ စေ သမယေ အဿတော အသမ္ပဇာနော ကာလံ ကရေယျ ကာမေ ဘဝတိ။ အဿတော အဘိသမာဟာရော ယော မာ ဘာယိ, မဟာနာမ, ယံ တံ စိတ္တံ ဒီဃရတ္တံ သဒ္ဓါပရိဘာဝိတံ သီလပရိဘာဝိတံ သုတစာဂပရိဘာဝိတန္တိ ဝိတ္ထာရေန ကာတဗ္ဗံ။ စာဂေန စ ပညာယ စ ကိံ ဒဿေတိ? ယာ သဒ္ဓါ, သာ စေတသော ပသာဒေါ။ ယာ အနာဝိလသင်္ကပ္ပိတာ, သာ သဒ္ဓါ။ ကိံ ကာရဏာ? အနာဝိလလက္ခဏာ။ အနာဝိလလက္ခဏာ ဟိ သဒ္ဓါ။ အပရေ အာဟု ဂုဏပရိသုဒ္ဓိနိဋ္ဌာဂမနလက္ခဏာ, ယဉ္စ အပရေ ဝါ ဝစနပဋိဂ္ဂဟလက္ခဏာ သဒ္ဓါ။ အပရော ပရိယာယော အတ္တာနံ ယဒိ ဧဝံ ဩကပ္ပေတိ ‘‘နာဟံ ကိဉ္စိ ဇာနာမီတိ ဧသာ အဟံ တတ္ထ အနုညတ္တာ အနညတာ’’တိ။ အယံ သဒ္ဓါတိ။ အပရော ပရိယာယော ဧကသဋ္ဌိယာ ဒိဋ္ဌိဂတာနံ အာဒီနဝါနုပဿနာ အနိစ္စံ ဒုက္ခမနတ္တာတိ။ တေန စ ပဒိဋ္ဌံ ဘဝတိ ယထာ ဂမ္ဘီရေ ဥဒပါနေ ဥဒကံ စက္ခုနာ ပဿတိ န စ ကာယေန အဘိသမ္ဘုနာတိ။ ဧဝမဿ အရိယာ နိဇ္ဈာနက္ခန္တိယာ ဒိဋ္ဌိ ဘဝတိ, န စ သစ္ဆိကတာ။ အယံ ဝုစ္စတိ သဒ္ဓါ။ သာ စ လောကိကာ။ အပရော ပရိယာယော ခမတိ ပုထုဇ္ဇနဘူတဿ ဝီသတိ စာတိ ကော သက္ကာယာဓီနာ န နိဝေသော။ န ဧတံ ဧကန္တိ နယသညာ ယထာဘူတံ ဒိဋ္ဌိယာ တု ခလု မုဒူဟိ ပဉ္စဟိ ဣန္ဒ္ရိယေဟိ ဒဿနမဂ္ဂေန ပဟီနာ ဘဝန္တိ။ ဒိဋ္ဌေကဋ္ဌာ စ ကိလေသာ, အယံ သဒ္ဓါ။

သောတာပတ္တင်္ဂမဒုက္ခာယံ ဘူမိယံ ပရိပုဏ္ဏာ ဝုစ္စတိ။ တသ္မိံယေဝ ဘူမိယံ သေက္ခသီလံ အရိယာ ဓါရန္တိ ဝုစ္စတိ။ တသ္မိံယေဝ ဘူမိယံ မုဒုပညာ ပညိန္ဒ္ရိယန္တိ ဝုစ္စတိ။ တသ္မိံယေဝ ဘူမိယံ ခန္ဓေဟိ အနတ္ထိကတာ, အယံ စာဂေါ။ တသ္မာ သဒ္ဓါ စာဂါဓိဋ္ဌာနေန နိဒ္ဒိသိတဗ္ဗာ။ ယတိကေန [တေန (က။)] ဘိယျော မနေန သာ ဟိဿ ဝိပရီတာ ဒိဋ္ဌိကာ အဿဒ္ဓါ, သာ နယနဥပဓီသု ပမတ္တာ သမာဒိန္နာ။ တတ္ထ သဒ္ဓိန္ဒ္ရိယံ ယော ကာမံ ပရိဝိဿန္တိ ဣတိ သန္တပါပပဋိနိဿဂ္ဂါ န စာဂါဓိဋ္ဌာနံ ပညိန္ဒ္ရိယေန ပညာဓိဋ္ဌာနံ, သီလေန ဥပသမာဓိဋ္ဌာနံ။ ဣမေ စတ္တာရော ဓမ္မာ သီလံ ပရိဘာဝယန္တိ သဒ္ဓါ သီလံ စာဂေါ စ ပညာတိ။ တတ္ထ သဒ္ဓါယ ဩဃံ တရတိ။ ယံ သီလံ, အယံ အပ္ပမာဒေါ။ ယော စာဂေါ, ဣဒံ ပညာယ ကမ္မံ။ ယာ ပညာ, ဣဒံ ပညိန္ဒ္ရိယံ, တတ္ထ ယံ သဒ္ဓိန္ဒ္ရိယံ။ တံ တီသု အဝေစ္စပ္ပသာဒေသု။ ယံ သီလံ, တံ သဒ္ဓိန္ဒ္ရိယေသု။ ယော စာဂေါ, သော စတူသု ဈာနေသု။ ယာ ပညာ, သာ သစ္စေသု, သတိ သဗ္ဗတ္ထဂါမိနီ။ တဿ သေက္ခဿ ဘဒ္ဒိကာ ဘတိ, ဘဒ္ဒိကော အဘိသမ္ပရာယော။ တဿ သမ္မုဋ္ဌဿတိကဿ သီလံ ကရောန္တဿ န ကာယသမ္မုဋ္ဌဿတိတာယ တာနိ ဝါ ဣန္ဒ္ရိယာနိ တံ ဝါ ကုသလမူလံ ကမ္မဝိပါကံ ဘဝတိ။ တဿ တိကဿ အတ္ထနိဒ္ဒေသော။ တတ္ထ သဒ္ဓါ သီလံ စာဂေါ ပညာ စတ္တာရော ဓမ္မာ။ ယာ သဒ္ဓါ ယာ စ ပညာ, ဣဒံ မနောသုစရိတံ။ ယံ သီလံ, ဣဒံ ကာယိကံ ဝါစသိကံ သုစရိတံ။ ယော စာဂေါ, ဣဒံ စေတသိကံ အလောဘော သုစရိတံ။ ဣတိ စိတ္တေ ဂဟိတေ ပဉ္စက္ခန္ဓာ ဂဟိတာ ဘဝန္တိ။ ဣမေဟိ ဓမ္မေဟိ သုစရိတံ ဣဒံ ဒုက္ခဉ္စ အရိယသစ္စံ ပဒဋ္ဌာနံ မဂ္ဂဿ။

၈၇။ တတ္ထ ကတမော ဝိစယော ဟာရော? ယာ စ သဒ္ဓါ ယဉ္စ သီလံ။ တံ ကိဿ ကရောတိ? ယာ သဒ္ဓါ တာယ ဘဂဝန္တံ အနုဿရတိ မတ္တေနပိ ဟတ္ထိနာ သမာဂတာ, အဿ ဘော ကုက္ကုရာ သဗ္ဗံ သီလေန နပ္ပဋိပဇ္ဇတိ ကာယေန ဝါ ဝါစာယ ဝါ ဌာနံ ဝိသာရဒေါ ဘဝတီတိ အဝိပ္ပဋိသာရီ ပညာ ယဿ ပညတ္တံ ဥပဋ္ဌပေတိ။ တဿ အခဏ္ဍဿ သီလံ ယံ န ပစ္ဆိ တဿံ မောဟဿ အကုသလစိတ္တံ ဥပ္ပဇ္ဇတိ မိစ္ဆာဒိဋ္ဌိသဟဂတံ ဝါ, အယံ ဝိစယော ဟာရော။ ဓမ္မဝါဒိနော ဘဒ္ဒိကာရာတိ ဘဝိဿတိ အတ္ထိ ဧသာ ယုတ္တိ။

တတ္ထ ကတမော ပဒဋ္ဌာနော ဟာရော? ယမိဒံ စိတ္တံ ဒီဃရတ္တံ ပရိဘာဝိတံ သဒ္ဓါယ သီလေန စာဂေန ပညာယ သမာဓိနာ ပဌမဇ္ဈာနဿ ပဒဋ္ဌာနံ။ ယာ သဒ္ဓါ အဿ အနာဝိလသင်္ကပ္ပော, တံ ဒုတိယဇ္ဈာနဿ ပဒဋ္ဌာနံ။ တီဏိ စ အဝေစ္စပ္ပသာဒါ ယံ သီလံ, တံ အရိယကန္တံ, တံ သီလက္ခန္ဓဿ ပဒဋ္ဌာနံ။ ယာ ပညာ, သာ ပညာက္ခန္ဓဿ ပဒဋ္ဌာနံ။ ဣမေ စ ဓမ္မာ ဣဒဉ္စ စိတ္တံ ဧကောဒိဘူတသမာဓိဿ ပဒဋ္ဌာနံ။ သဒ္ဓါ သဒ္ဓိန္ဒ္ရိယဿ ပဒဋ္ဌာနံ။ စာဂေါ သမာဓိန္ဒ္ရိယဿ ပဒဋ္ဌာနံ။ ပညာ ပညိန္ဒ္ရိယဿ ပဒဋ္ဌာနံ။ သဒ္ဓါ စ ပညာ စ ဝိပဿနာ ပဒဋ္ဌာနံ။ သီလဉ္စ စာဂေါ စ သမထဿ ပဒဋ္ဌာနံ။ သဒ္ဓါ စ ပညာ စ အဝိဇ္ဇာ ဝိရာဂါယ ပညာဝိမုတ္တိယာ ပဒဋ္ဌာနံ။ သီလဉ္စ စာဂေါ စ ရာဂဝိရာဂါယ စေတောဝိမုတ္တိယာ ပဒဋ္ဌာနံ။

တတ္ထ ကတမော လက္ခဏော ဟာရော? ဝိညာဏေ ဝုတ္တေ သဒ္ဓါသတိဘာဝိတေ သဗ္ဗေ ပဉ္စက္ခန္ဓာ ဝုတ္တာ ဘဝန္တိ။ သဒ္ဓါယ ဘဏိတာယ သဗ္ဗာနိ သတ္တ ဓနာနိ ဘဏိတာနိ ဟောန္တိ သဒ္ဓါဓနံ။ပေ။။ သီလက္ခန္ဓေ ဝုတ္တေ သမာဓိက္ခန္ဓော စ ပညာက္ခန္ဓော စ ဝုတ္တာ ဘဝန္တိ။ ယံ တံ စိတ္တံ ဒီဃရတ္တံ ပရိဘာဝိတံ ပစ္ဆိမကေ ကာလေ န တဒနုပရိဝတ္တိ ဘဝိဿတီတိ နေတံ ဌာနံ ဝိဇ္ဇတိ။ တတ္ထ သညာပိ တဒနုပရိဝတ္တိနီ ဘဝတိ။ ယေပိ တဇ္ဇာတိကာ ဓမ္မာ, တေပိ တဒနုပရိဝတ္တိနော ဘဝန္တိ။ ရူပသညာ ရူပသဉ္စေတနာနုပဿနမနသိကာရော ဧဝံ ဆန္နံ အာယတနာနံ ဝိညာဏကာယေ, အယံ လက္ခဏော ဟာရော။

တတ္ထ ကတမော စတုဗ္ယူဟော ဟာရော? ဣဓ သုတ္တေ ဘဂဝတော ကော အဓိပ္ပါယော? ယေ ဘဒ္ဒိကံ ဘတိံ အာကင်္ခေယျ ဘဒ္ဒိကဉ္စ အဘိသမ္ပရာယံ, တေ သဒ္ဓံ သီလံ စာဂံ ပညဉ္စ မနသိ ကရိဿန္တိ, အယံ အဓိပ္ပါယော။ ယေ စညေပိ သတ္တာ တထာဂတဿ သမ္မုခံ န ပဋိယုဇ္ဈန္တေ, ဣမံ ဓမ္မံ သောတာ အဝိပ္ပဋိသာရတော ကာလံ ကရိဿန္တီတိ, အယံ အဓိပ္ပါယော။

၈၈။ တတ္ထ ကတမော အာဝဋ္ဋော ဟာရော? ဣဒမ္ပိ စတ္တာရော ဓမ္မာ သဒ္ဓါ စ ပညာ စ အဿဒ္ဓိယဉ္စ အဝိဇ္ဇဉ္စ ဟနန္တိ။ သီလဉ္စ စာဂေါ စ တဏှာ စ ဒေါသဉ္စ ဟနန္တိ။ တဿ ဒွေ မူလာနိ ပဟီယန္တိ။ ဒုက္ခံ နိဝတ္တေတိ အပ္ပဟီနဘူမိယဉ္စ ဒွိမူလာနိ ပဉ္စက္ခန္ဓာ။ ဒွေ အရိယသစ္စာနိ သမထော စ ဝိပဿနာ စ။ ဒွိန္နံ မူလာနံ ပဟာနံ။ ဣမာနိ ဒွေ သစ္စာနိ နိရောဓေါ စ မဂ္ဂေါ စ။ အယံ အာဝဋ္ဋော ဟာရော။

တတ္ထ ကတမော ဝိဘတ္တိ? ယံ တံ စိတ္တံ သဒ္ဓါပရိဘာဝိတံ။ပေ။။ သစေ ပုထုဇ္ဇနဿ တဿပိ ဘဒ္ဒိကာ ဘတိ ဘဝိဿတီတိ န ဧကံသေန တဿ ကမ္မံ ဒိဋ္ဌေယေဝ ဓမ္မေ ဝိပါကန္တိ ပစ္စေဿတိ, အပရမှိ ဝါ ပရိယာယေ ဘဝိဿတိ။ ယံ ဝါ အတီတံ ဝိပါကာယ ပစ္စုပဋ္ဌိတံ, တပ္ပစ္စယာနိ စေတာနိ, ယေ ယထာ မဟာကမ္မဝိဘင်္ဂေ ‘‘တေနာယံ ဝိဘဇ္ဇဗျာကရဏိယော နိဒ္ဒေသော ဓမ္မစာရိနော ယာ ဘဒ္ဒိကာ ဘတီ’’တိ။

တတ္ထ ကတမာ ပရိဝတ္တနာ? အဿဒ္ဓိယံ ဒုဿီလ္ယံ ယံ မစ္ဆေရံ ဒုပ္ပညံ စ [ဒုပ္ပညိယံ (က။)] ယဉ္စ ပဋိပက္ခေန ပဟီနာ ဘဝန္တိ, အယံ ပရိဝတ္တနာ။

တတ္ထ ကတမံ ဝေဝစနံ? ယံ တံ စိတ္တံ ဒီဃရတ္တံ ပရိဘာဝိတံ စိတ္တံ မနောဝိညာဏံ။ပေ။။ ယံ သဒ္ဓါဗလံ သဒ္ဓိန္ဒ္ရိယံ, ယံ သီလံ တံ သုစရိတံ, သံယမော နိယမော ဒမော ခန္ဓတာ ဣမာနိ တဿ ဝေဝစနာနိ။ ယော စာဂေါ သော ပဋိနိဿဂ္ဂေါ အလောဘော ဝေါသဂ္ဂေါ စာဂေါယိဋ္ဌာနံ။ ယာ ပညာ သာ ပညတ္တာ ပညပ္ပဘာ ပညိန္ဒ္ရိယံ ပညာဗလံ။

တတ္ထ ကတမာ ပညတ္တိ? ယံ တံ စိတ္တံ ဗီဇံ ပညတ္တိယာ ပညတ္တံ။ ပရိဘာဝနာ ဝါသနာ ပညတ္တိယာ ပညတ္တိ။ သဒ္ဓါ ပသာဒပညတ္တိယာ ပညတ္တာ။ သီလံ သုစရိတပညတ္တိယာ ပညတ္တံ။ စာဂေါ ပုညကိရိယပညတ္တိယာ ပညတ္တော။ ပညာ ဝီမံသပညတ္တိယာ ပညတ္တာ။ ဣမေ တယော ဓမ္မာ သဒ္ဓါ သီလံ စာဂေါ ပညဝတော ပါရိသုဒ္ဓိံ ဂစ္ဆန္တိ။

တတ္ထ ကတမော ဩတရဏော? ယံ စိတ္တံ, တံ ခန္ဓေသု ဝိညာဏက္ခန္ဓော, ဓါတူသု မနောဝိညာဏဓါတု, အာယတနေသု မနာယတနံ။ ယေ စတ္တာရော ဓမ္မာ, တေ ခန္ဓေသု သင်္ခါရက္ခန္ဓေ ပရိယာပန္နာ။ပေ။။ ဓါတူသု အာယတနေသု။

တတ္ထ ကတမော သောဓနော ဟာရော? ဣဒံ ဘဂဝတော ဘာသိတံ မဟာနာမေန သက္ကေန ပုစ္ဆိတေန သဗ္ဗံ တံ နိယုတ္တံ။

တတ္ထ ကတမော အဓိဋ္ဌာနော? ဣဒံ စိတ္တံ ဝေမတ္တတာယ ပညတ္တံ အကုသလေဟိ စိတ္တေဟိ အပရိဘာဝိတေဟိ ပရိဘာဝိတန္တိ ယာနိ ပုန ပရိဘာဝိတာနိ အညေသမ္ပိ တတ္ထ ဥပါဒါယ ပညတ္တံ သဗ္ဗေပိမေ စတ္တာရော ဓမ္မာ ဧကတ္တတာယ ပညတ္တာ။ ဘဒ္ဒိကာ ဘတီတိ ကာမဘောဂိနော တေဝ ရူပဓါတု အရူပဓါတု မနုဿာတိ သဗ္ဗာ ဘဒ္ဒိကာ ဘတိ တဒေဝ ကထာယ ပညတ္တံ, အယံ ပညတ္တိ။

တတ္ထ ကတမော ပရိက္ခာရော? စိတ္တဿ ဣန္ဒ္ရိယာနိ ပစ္စယော အာဓိပတေယျပစ္စယတာယ မနသိကာရော။ ဟေတုပစ္စယတာယ ပစ္စယော။ သဒ္ဓါယ လောကိကာ ပညာ ဟေတုပစ္စယတာယ ပစ္စယော။ ယောနိသော စ မနသိကာရော ပစ္စယော။ သီလဿ ပတိရူပဒေသဝါသော ပစ္စယော။ အတ္တသမ္မာပဏိဓါနဉ္စ ဟေတု။ စာဂဿ အလောဘော ဟေတု။ အဝိပ္ပဋိသာရော စ ဟေတုပစ္စယော။ ပညာ ပရတော စ ဃောသော အဇ္ဈတ္တဉ္စ ယောနိသော မနသိကာရော ဟေတုပစ္စယော စ။

တတ္ထ ကတမော သမာရောပနော? ယံ တံ စိတ္တံ ဒီဃရတ္တံ ပရိဘာဝိတန္တိ စေတသိကာပိ။ ဧတ္ထ သဗ္ဗေ ဓမ္မာ ပရိဘာဝိတာ ဘဒ္ဒိကာ တေ ဘတိ ဘဝိဿတိ, ဘဒ္ဒိကာ ဥပပတ္တိကော အဘိသမ္ပရာယော။ ဣတိ ယေ ကေစိ မနုဿကာ ဥပဘောဂပရိဘောဂါ သဗ္ဗေ ဘဒ္ဒိကာ ဘတိယေဝ, အယံ သမာရောပနော။

၈၉။ ဥဒ္ဓံ အဓေါ သဗ္ဗဓိ ဝီတရာဂေါတိ ဂါထာ [ပဿ ဥဒါ။ ၆၁ ဥဒါနေ]။ တတ္ထ ကိံ ဥဒ္ဓံ နာမ? ယံ ဣတော ဥဒ္ဓံ ဘဝိဿတိ အနာဂါမီ, ဣဒံ ဥဒ္ဓံ။ အဓေါ နာမ ယမတိက္ကန္တမတီတံ, ဣဒမဝေါစ အပဒါနတန္တိ ဥဒ္ဓံ။ တတ္ထ အတီတေန သဿတဒိဋ္ဌိ ပုဗ္ဗန္တာကပ္ပိကာနံ အပရန္တဒိဋ္ဌိ ကေသဉ္စိ, ဥစ္ဆေဒဒိဋ္ဌိံ ယံ [ဥစ္ဆေဒဒိဋ္ဌိယံ (က။)] ဝုတ္တကပ္ပိကာနံ ဣမာ စေဝ ဒိဋ္ဌိယော ဥစ္ဆေဒဒိဋ္ဌိ စ သဿတဒိဋ္ဌိ စ။ တတ္ထာယံ သဿတဒိဋ္ဌိ ဣမာနိ ပန္နရသ ပဒါနိ သက္ကာယဒိဋ္ဌိ သဿတံ ဘဇန္တိ။ ရူပဝန္တံ မေ အတ္တာ, အတ္တနိ မေ ရူပံ, ရူပံ မေ အတ္တာတိ ယဒုစ္စတေ ပညံ ပရိဒဟန္တိ။ ယာ ဥစ္ဆေဒဒိဋ္ဌိ သာ ပဉ္စသတာနိ ဥစ္ဆေဒံ ဘဇန္တိ။ တေ ‘‘တံ ဇီဝံ တံ သရီရ’’န္တိ ပဿန္တိ, ရူပံ မေ အတ္တာတိ တထာရူပါ စတုဗ္ဗိဓါ သက္ကာယဒိဋ္ဌိ ဥစ္ဆေဒေန စ သဿတေန စ။ ဧဝံ ပဉ္စသု ခန္ဓေသု ဝီသတိဝတ္ထုကာယ ဒိဋ္ဌိယာ ပန္နရသ ပဒါနိ ပုဗ္ဗန္တံ ဘဇန္တိ။ သဿတဒိဋ္ဌိယာ ပဉ္စ ပဒါနိ အပရန္တံ ဘဇန္တိ ဥစ္ဆေဒဒိဋ္ဌိယာ။ တတ္ထ ‘‘အယမဟမသ္မီ’’တိ ပဿန္တာ ရူပံ အတ္တတော သမနုပဿတိ, သော ဥစ္ဆေဒဝါဒီ ရူပဝန္တဉ္စ အတ္တာနံ, အတ္တနိ စ ရူပံ, ရူပသ္မိံ ဝါ အတ္တာတိ သော ပဿတိ စာတိ ဣတိ ဥစ္ဆေဒဒိဋ္ဌိ စ, အတ္တတော ပဋိဿရတိ သဿတဒိဋ္ဌိ ပုဗ္ဗန္တတော စ ပဋိဿရတိ။ ‘‘အယမဟမသ္မီ’’တိ န သမနုပဿတိ။ တဿ ဒိဋ္ဌာသဝါ ပဟာနံ ဂစ္ဆန္တိ။ ယော တီသု အဒ္ဓါသု ပုဗ္ဗန္တေ စ အပရန္တေ စ တေန တေန နိဒ္ဒိဋ္ဌာနေန ဥဒ္ဓံ အဓေါ သဗ္ဗဓိ ဝီတရာဂေါ ‘‘အဟမသ္မီ’’တိ န အနုပဿတီတိ ဣမိနာ ဒွါရေန ဣမိနာ ပယောဂေန ဣမိနာ ဥပါယေန ဣဒံ ဒဿနဘူမိ စ သောတာပတ္တိဖလဉ္စ သော အရိယော ပယောဂေါ အနဘာဝံဂတေန သံသာရေန အပုနဗ္ဘဝါတိ ယော ကောစိ အရိယော ပယောဂေါ ပုနဗ္ဘဝါယ မုဒူနိ ဝါ ပဉ္စိန္ဒ္ရိယာနိ မဇ္ဈာနိ အဓိမတ္တာနိ ဝါ သဗ္ဗံ အပုနဗ္ဘဝပ္ပဟာနာယ သံဝတ္တန္တိ။ အဟန္တိ ဒိဋ္ဌောဃော ကာမောဃော ဘဝေါဃော အဝိဇ္ဇောဃော စ ဩဓိသော။ တတ္ထ ဒေသနာဟာရေန စတ္တာရိ သစ္စာနိ ပဉ္စဟိ ဣန္ဒ္ရိယေဟိ သောတာပတ္တိဖလေန စ ဒွေ သစ္စာနိ မဂ္ဂေါ စ နိရောဓေါ စ။ သက္ကာယသမုဒယေန ဒွေ သစ္စာနိ ဒုက္ခဉ္စ သမုဒယော စ, အယံ ဒေသနာ ဟာရော။

တတ္ထ ကတမော ဝိစယော? ‘‘အယမဟမသ္မီ’’တိ အသမနုပဿန္တော တီဏိ ဒဿနပ္ပဟာတဗ္ဗာနိ သံယောဇနာနိ ပဇဟတိ။ အယံ ဝိစယော။

တတ္ထ ကတမာ ယုတ္တိ? တိဝိဓါ ပုဂ္ဂလာ ကောစိ ဥဂ္ဃဋိတညူ ကောစိ ဝိပဉ္စိတညူ ကောစိ နေယျော။ ဥဂ္ဃဋိတညူ တိက္ခိန္ဒ္ရိယော စ တတော ဝိပဉ္စိတညူ မုဒိန္ဒ္ရိယော တတော မုဒိန္ဒ္ရိယေဟိ နေယျော။ တတ္ထ ဥဂ္ဃဋိတညူ တိက္ခိန္ဒ္ရိယတာယ ဒဿနဘူမိမာဂမ္မ သောတာပတ္တိဖလံ ပါပုဏာတိ, ဧကဗီဇကော ဘဝတိ။ အယံ ပဌမော သောတာပန္နော။ ဝိပဉ္စိတညူ မုဒူဟိ ဣန္ဒ္ရိယေဟိ ဒဿနဘူမိမာဂမ္မ သောတာပတ္တိဖလံ ပါပုဏာတိ, ကောလံကောလော စ ဟောတိ။ အယံ ဒုတိယော သောတာပန္နော။ တတ္ထ နေယျော ဒဿနဘူမိမာဂမ္မ သောတာပတ္တိဖလံ ပါပုဏာတိ, သတ္တက္ခတ္တုပရမော စ ဘဝတိ။ အယံ တတိယော သောတာပန္နော။

အတ္ထိ ဧသာ ယုတ္တိ မုဒုမဇ္ဈာဓိမတ္တေဟိ ဣန္ဒ္ရိယေဟိ မုဒုမဇ္ဈာဓိမတ္တံ ဘူမိံ သစ္ဆိကရေယျ သက္ကာယဒိဋ္ဌိပ္ပဟာနေန ဝါ ဒိဋ္ဌိဂတာနိ ပဇဟတိ။ အယံ ယုတ္တိ။

တတ္ထ ကတမော ပဒဋ္ဌာနော? တတ္ထ သက္ကာယဒိဋ္ဌိ သဗ္ဗမိစ္ဆာဒိဋ္ဌိယာ ပဒဋ္ဌာနံ။ သက္ကာယော နာမရူပဿ ပဒဋ္ဌာနံ။ နာမရူပံ သက္ကာယဒိဋ္ဌိယာ ပဒဋ္ဌာနံ။ ပဉ္စ ဣန္ဒ္ရိယာနိ ရူဣနိ ရူပရာဂဿ ပဒဋ္ဌာနံ။ သဠာယတနံ အဟံကာရဿ ပဒဋ္ဌာနံ။ တတ္ထ ကတမော လက္ခဏော? ဒွီသု ဒိဋ္ဌီသု ပဟီနာသု တတ္ထ ဧကာ ဒိဋ္ဌိ ဒိဋ္ဌိဂတာနိ ပဟာနံ ဂစ္ဆန္တိ။ ဥဒ္ဓံ စ အဓေါ စ ဝီတရာဂေါ သဗ္ဗရဇနီယေသု ဝီတရာဂေါ ဟောတိ။ တဇ္ဇာ ပရဘူမိယံ, ဣဒံ ပစ္စယန္တိ ယထာဘူတံ ပဿတိ။ သော သဗ္ဗပဋိစ္စသမုပ္ပါဒံ အာမသတိ။ အယံ လက္ခဏော ဟာရော။

၉၀။ တတ္ထ ကတမော စတုဗ္ယူဟော ဟာရော? ဣမမှိ သုတ္တေ ဘဂဝတော ကော အဓိပ္ပါယော? ယေ သတ္တာ ယေ နာဘိရမိဿန္တိ, တေ ဒိဋ္ဌိပ္ပဟာနာယ ဝါယမိဿန္တိ။ အယမေတ္ထ ဘဂဝတော အဓိပ္ပါယော။ အယံ စတုဗ္ယူဟော ဟာရော။

တတ္ထ ကတမော အာဝဋ္ဋော ဟာရော? ယာနိမာနိ မုဒူနိ ပဉ္စိန္ဒ္ရိယာနိ တာနိ ဩရမ္ဘာဂိယာနိ ပဉ္စိန္ဒ္ရိယာနိ။ သဗ္ဗေန သဗ္ဗံ သမူဟနန္တိ အဘိဇ္ဈာဗျာပါဒေါ စ ဘာဝနာကာရေန သေက္ခာယ ဝိမုတ္တိယာ ဗလံ သဒ္ဓါ, ဥဒ္ဓမ္ဘာဂိယာနိ ဒိဋ္ဌိဝသေန ဗလံ သဒ္ဓါ, ဝီရိယိန္ဒ္ရိယံ အာရဘိတတ္တာ သတိန္ဒ္ရိယံ ပဂ္ဂဟိတတ္တာ အစ္စန္တံ နိဋ္ဌံ ဂစ္ဆန္တိ။ တတ္ထ ယာနိ ဣန္ဒ္ရိယာနိ, အယံ မဂ္ဂေါ သံကိလေသပ္ပဟာနံ။ အယံ နိရောဓေါ အာယတိံ အနုပ္ပါဒဓမ္မော, ဣဒံ ဒုက္ခံ။ အယံ အာဝဋ္ဋော ဟာရော။

တတ္ထ ကတမော ဝိဘတ္တိ ဟာရော? ‘‘အယမဟမသ္မီ’’တိ ယော သမနုပဿတိ, သော စ ခေါ အဓိမတ္တေန လောကိကာ ယံ ဘူမိယံ န တု အရိယေန ပယောဂေန သော သက္ကာယဒိဋ္ဌိ ပဇဟတိ။ ယံ ဝုစ္စတိ တဇ္ဇာယ ဘူမိယာ အဓိမတ္တာယ။ တတ္ထ တဇ္ဇာယ ဘူမိယံ ပဉ္စဟိ အာကာရေဟိ အဓိမတ္တတံ ပဋိလဘတိ သီလေန ဝတေန ဗာဟုဿစ္စေန သမာဓိနာ နေက္ခမ္မသုခေန။ တတ္ထ အပ္ပတ္တေ ပတ္တသညီ အဓိမာနံ ဂဏှာတိ။ ဧတသ္မိံယေဝ ဝတ္ထုပ္ပတ္တိယံ ဘဂဝါ ဣဒံ သုတ္တံ ဘာသတိ။ သီလဝါ ဝတမတ္တေနာတိ။ တတ္ထ ယော အပ္ပတ္တေ ပတ္တသညီ တဿ ယော သမာဓိ, သော သာမိသော ကာပုရိသသေဝိတော ပန သော ကာပုရိသာ ဝုစ္စန္တိ ပုထုဇ္ဇနာ။ အာမိသံ ယဉ္စ အရိယမဂ္ဂမာဂမ္မ လောကိကာ အနရိယံ တေန သမာဓိ ဟောတိ အနရိယော ကာပုရိသသေဝိတော။ ယော ပန အရိယာကာရေန ယထာဘူတံ န ဇာနာတိ န ပဿတိ [ဇာနာတိ ပဿတိ (ဣ။)], သော အဓိဂမနံ ပဇဟတိ ယော အရိယေန သမာဓိနာ အကာပုရိသသေဝိတေန နိရာမိသေန နီယတိ, တတ္ထ အကာပုရိသာ ဝုစ္စန္တိ အရိယပုဂ္ဂလာ။ ယော တေဟိ သေဝိတော သမာဓိ, သော အကာပုရိသသေဝိတော။ တသ္မာ ဧကံ ဝိဘဇ္ဇဗျာကရဏီယံ ‘‘အယမဟမသ္မီ’’တိ အသမနုပဿန္တော တထာ ပါတေတိ။

တတ္ထ ကတမာ ပရိဝတ္တနာ? ဣမာယ ဒဿနဘူမိယာ ကိလေသာ ပဟာတဗ္ဗာ, တေဟိ ပဟီယန္တိ အနိဒ္ဒိဋ္ဌာပိ ဘဂဝတာ နိဒ္ဒိသိတဗ္ဗာ ယော။

တတ္ထ ကတမံ ဝေဝစနံ? ယာ သက္ကာယဒိဋ္ဌိယာ အတ္တဒိဋ္ဌိယာ။ အယံ ဘူမိ။ ယေ ကိလေသာ ပဟာတဗ္ဗာ။ တေ အပ္ပဟီယန္တိ အနိဒ္ဒိဋ္ဌာပိ ဘဂဝတာ သဿတဒိဋ္ဌိ စ ဥစ္ဆေဒဒိဋ္ဌိ စ, သာ ပရိယန္တဒိဋ္ဌိ စ။ ယာ အပရိယန္တဒိဋ္ဌိ စ, သာ သဿတဒိဋ္ဌိ စ။ ယာ ဥစ္ဆေဒဒိဋ္ဌိ, သာ နတ္ထိကာ ဒိဋ္ဌိ။ ယာ သဿတဒိဋ္ဌိ, သာ အကိရိယဒိဋ္ဌိ။ ဣဒံ ဝေဝစနံ။

တတ္ထ ကတမာ ပညတ္တိ? တဏှာ သံယောဇနပညတ္တိယာ ပညတ္တာ။ မဂ္ဂေါ ပဋိလာဘပညတ္တိယာ ပညတ္တော။ ဣန္ဒ္ရိယာ ပဋိလာဘပညတ္တိယာ ပညတ္တာတိ။ တတ္ထ ကတမော ဩတရဏော? သက္ကာယော ဒုက္ခံ ဒဿနပ္ပဟာတဗ္ဗော။ သမုဒယော မဂ္ဂေါ။ ဣန္ဒ္ရိယာနိ တာနိ စ နိဒ္ဒိဋ္ဌာနိ ခန္ဓဓါတုအာယတနေသု။

တတ္ထ ကတမော သောဓနော ဟာရော? ယဉှိ အာရဗ္ဘ ဘဂဝတာ ဣဒံ သုတ္တံ ဘာသိတံ, သော အာရဗ္ဘ နိဒ္ဒိဋ္ဌော။ တတ္ထ ကတမော ပရိက္ခာရော? နာမရူပဿ ဟေတုပစ္စယောပိ ဝိညာဏံ ဟေတု ဗီဇံ။ တေန အဝိဇ္ဇာ စ သင်္ခါရာ စ ပစ္စယော။ နိဝတ္တိနယော န အပရော ပရိယာယော သဗ္ဗဘဝေါ, ယေ စ သဗ္ဗဘဝဿ ဟေတု ပရဘဏ္ဍပစ္စယော ဣတိ သမ္မာဒိဋ္ဌိ ပရတော စ ဃောသော ယောနိသော စ မနသိကာရော ပစ္စယော ။ ယာ ပညာ ဥပ္ပါဒေတိ, ဧသာ ဟေတု သမ္မာဒိဋ္ဌိယာ သမ္မာသင်္ကပ္ပော ဘဝတိ, ယာ သမ္မာသမာဓိ [သမ္မာဒိဋ္ဌိ (ဣ။)], အယံ ပရိက္ခာရော။

တတ္ထ ကတမော သမာရောပနော? ‘‘အယမဟမသ္မီ’’တိ အသမနုပဿီ ဒုက္ခတော ရောဂတော။ပေ။။ ပန္နရသ ပဒါနိ။ သီလာနိ ဘဂဝါ ကိမတ္ထိယာနိ ကိမာနိသံသာနိ။ သီလာနိ, အာနန္ဒ, အဝိပ္ပဋိသာရတ္ထာနိ ယာဝ ဝိမုတ္တိ။ တတ္ထ ဒုဝိဓေါ အတ္ထော – ပုရိသတ္ထော စ ဝစနတ္ထော စ။

၉၁။ တတ္ထ ကတမော ပုရိသတ္ထော? ယာယံ န ပစ္ဆာနုတာပိတာ အယံ အဝိပ္ပဋိသာရော, အယံ ပုရိသတ္ထော။ ယထာ ကောစိ ဗြူဟယတိ ဣမတ္ထမာသေဝတိ သော ဘဏေယျ, ကိဉ္စိ မမေတ္ထ အဓီနံ တဿတ္ထာယ ဣဒံ ကိရိယံ အာရဘာမီတိ။ အယံ ပုရိသတ္ထော။

တတ္ထ ကတမော ဝစနတ္ထော? သီလာနိ ကာယိကံ ဝါ ဝါစသိကံ ဝါ သုစရိတံ အဝိပ္ပဋိသာရောတိ။ တတ္ထ သီလဿ ဝတဿ စ ဘာသောယေဝ။ အနညာ သုဂတကမ္မတာ သုစရိတံ အယံ အဝိပ္ပဋိသာရော။ ဧဝံ ယာဝ ဝိမုတ္တီတိ ဧကမေကသ္မိံ ပဒေ ဒွေ အတ္ထာ – ပုရိသတ္ထော စ ဝစနတ္ထော စ, ယထာ ဣမမှိ သုတ္တေ ဧဝံ သဗ္ဗေသု သုတ္တေသု ဒွေ ဒွေ အတ္ထာ။ အယံ ဟိ ပရမတ္ထော ဥတ္တမတ္ထော စ။ ယံ နိဗ္ဗာနသစ္ဆိကံ နိဿာယ ယံ သကံ သစ္ဆိကာတဗ္ဗံ ဘဝတိ, သော ဝုစ္စတိ ကတဿ [သတဿ (က။)] ကတ္ထောတိ။ အယံ ပုန ဝေဝစနံ သမ္ပဇာနာတိ။ ဣမိနာ နိယုတ္တတ္ထမဘိလဗ္ဘန္တိ ဝစနတ္ထော။ တတ္ထ ယံ အတ္ထံ သာဝကော အဘိကင်္ခတိ။ တဿ ယော ပဋိလာဘော, အယံ ပုရိသတ္ထော။ ယံ ယံ ဘဂဝါ ဓမ္မံ ဒေသေတိ, တဿ တဿ ဓမ္မဿ ယာ အတ္ထဝိညတ္တိ။ အယံ အတ္ထော, တတ္ထ သီလာနံ အဝိပ္ပဋိသာရော အတ္ထောပိ အာနိသံသောပိ။ ဧသော စ အာနိသံသော ယံ ဒုဂ္ဂတိံ န ဂစ္ဆတိ။ ယထာ တံ ဘဂဝတာ ဧသာနိသံသော ဓမ္မေ သုစိဏ္ဏေ န ဒုဂ္ဂတိံ ဂစ္ဆတိ ဓမ္မစာရီ, အယံ အတ္ထော။

ယံ ပုရိသော ဘာဝနာဘူမိယံ သီလာနိ အာရဗ္ဘ သီလေန သံယုတ္တော ဟောတိ ဧဝံ ယာဝ ဝိမုတ္တိ တထာ သီလက္ခန္ဓော။ တတ္ထ ယော စ အဝိပ္ပဋိသာရော အနုသယဝသေန နိဒ္ဒိဋ္ဌော, တဉ္စ သီလံ အယံ သီလက္ခန္ဓော။ ပါမောဇ္ဇဣတိပဿဒ္ဓီတိ စ သမာဓိန္ဒ္ရိယေန, အယံ သမာဓိက္ခန္ဓော။ ယံ သမာဟိတော ယထာဘူတံ ပဇာနာတိ, အယံ ပညာက္ခန္ဓော။ ဣမေ တယော ခန္ဓာ သီလံ သမာဓိ ပညာ စ တထာ သီလံ ပရိပူရေတိ ယံ ဝီရိယိန္ဒ္ရိယံ တေန ကာရဏေန သော သီလံ ပရိပူရေတိ, အနုပ္ပန္နဿ စ အကုသလဿ အနုပ္ပါဒါယ ဝါယမတိ, ဥပ္ပန္နဿ စ ပဟာနာယ အနုပ္ပန္နဿ စ ကုသလဿ ဥပ္ပါဒါယ, ဥပ္ပန္နဿ စ ကုသလဿ ဘိယျောဘာဝါယ ဣတိ ဝီရိယိန္ဒ္ရိယံ နိဒ္ဒိဋ္ဌံ။ တတ္ထ ယော သမာဓိက္ခန္ဓော , ဣဒံ သမာဓိန္ဒ္ရိယံ။ ပညာက္ခန္ဓော ပညိန္ဒ္ရိယံ, တံ စတူသု သမ္မပ္ပဓါနေသု ဒဋ္ဌဗ္ဗံ။ တထာ ယော အနုပ္ပန္နဿ စ အကုသလဿ အနုပ္ပါဒါယ ဝါယမတိ, ဣဒံ ပဌမံ သမ္မပ္ပဓါနံ။ ယံ ဥပ္ပန္နဿ, ဣဒံ ဒုတိယံ။ စတ္တာရိ သမ္မပ္ပဓါနာနိ စတူသု ဈာနေသု ပဿိတဗ္ဗာနိ။ တထာ သီလက္ခန္ဓေန နေက္ခမ္မဓါတု စ အဓိကာ [အာဒိကာ (ဣ။)], တယော စ ဝိတက္ကာ နေက္ခမ္မဝိတက္ကော အဗျာပါဒဝိတက္ကော အဝိဟိံသာဝိတက္ကော စ။ သာဓါရဏဘူတာ။ ယာ ပိယာယမာနဿ ပါမောဇ္ဇေန ဣဒံ ကာယိကံ သုခံ အာနိတံ အနိယမီတိပေမေန, ဣဒံ ဒုက္ခံ။ ယော တတ္ထ အဝိက္ခေပေါ, အယံ သမာဓိ။ ဣဒံ ပဉ္စင်္ဂိကံ ပဌမံ ဈာနံ။ ယာ စေတသိကာ ပဿဒ္ဓိ သဝိတက္ကံ သဝိစာရံ ဝိရောဓနံ, ယော ကိလေသော စ ပရိဒါဟော, သော ပဌမေ ဈာနေ နိရုဒ္ဓေါ။ တထာ ယာ စ ကိလေသပဿဒ္ဓိ ယာ စ ဝိတက္ကဝိစာရာနံ ပဿဒ္ဓိ, ဥဘယေပိ ဧတေ ဓမ္မေ ပဿဒ္ဓါယံ။ တတ္ထ ကာယဿ စိတ္တဿ စ သုခံ သုခါယနာ, ဣဒံ ဣတိသုခိနော ပဿဒ္ဓိ။ ယောပိ ဧကောဒိဘာဝေါ စိတ္တဿ, တေန ဧကောဒိဘာဝေန ယံ စိတ္တဿ အဇ္ဈတ္တံ သမ္ပသာဒနံ, ဣဒံ စတုတ္ထံ ဈာနင်္ဂံ။ ဣတိ အဇ္ဈတ္တဉ္စ သမ္ပသာဒေါ စေတသော စ ဧကောဒိဘာဝေါ ဣတိ စ သုခဉ္စ, ဣဒံ ဒုတိယံ ဈာနံ စတုရင်္ဂိကံ။ ယော ပဿဒ္ဓကာယော သုခံ ဝေဒေတိ, တေန အဓိမတ္တေန သုခေန ဖရိတွာ သုခံ စေတသိကံ ယံ, သော ဣတိဝီတရာဂေါ ဧဝံ တဿ ဣတိဝီတရာဂတာယ ဥပေက္ခံ ပဋိလဘတိ။ သော ဣတိယာ စ ဝိရာဂါ ဥပေက္ခံ ပဋိလဘတိ။ သုခဉ္စ ပဋိသံဝေဒေတိ။ သတိ စ သမ္မာ ပညာယ ပဋိလဘတိ။ သစေ သတိ ဧကဂ္ဂတာ ဣဒံ ပဉ္စင်္ဂိကံ တတိယံ ဈာနံ။ ယံ သုခိနော စိတ္တံ သမာဓိယတိ, အယံ ဧကဂ္ဂတာယ ပရာဝိဓါနဘာဂိယာ, ပဌမေ ဈာနေ အတ္ထိ စိတ္တေကဂ္ဂတာ နော စက္ခုဿ ဝေဒနာ သဗ္ဗံ ပါရိပူရိံ ဂစ္ဆတိ။ ယထာ စတုတ္ထေ ဈာနေ, တထာ ယာ ဥပေက္ခာ ပဿမ္ဘယံ သတိသမ္ပဇညံ စိတ္တေကဂ္ဂတာ စ, ဣဒံ စတုတ္ထံ ဈာနံ။

၉၂။ ယထာ သမာဓိ ဒဿယိတဗ္ဗံ, တထာ ပညိန္ဒ္ရိယံ တံ စတူသု အရိယသစ္စေသု ပဿိတဗ္ဗံ။ ယံ သမာဟိတော ယထာဘူတံ ပဇာနာတိ, သာ ပဇာနနာ စတုဗ္ဗိဓါ အသုဘတော ဒုက္ခတော အနတ္တတော စ, ယဒါရမ္မဏံ တံ ဒုက္ခံ အရိယသစ္စံ, ယံ ပဇာနန္တော နိဗ္ဗိန္ဒတိ ဝိမုစ္စတိ တထာ ယံ ကာမာသဝဿ ပဟာနံ ဘဝါသဝဿ ဒိဋ္ဌာသဝဿ အဝိဇ္ဇာသဝဿ, အယံ နိရောဓေါ အပ္ပဟီနဘူမိယံ အာသဝသမုဒယော။ ဣမာနိ စတ္တာရိ အရိယသစ္စာနိ ယထာ ပညိန္ဒ္ရိယံ ပဿိတဗ္ဗံ။ ယထာယံ သမာဟိတော ယထာဘူတံ ပဇာနာတိ, အယံ ဒဿနဘူမိ။ သောတာပတ္တိဖလဉ္စ ယထာဘူတံ ပဇာနန္တော နိဗ္ဗိန္ဒတီတိ, ဣဒံ တနုကဉ္စ။ ကာမရာဂဗျာပါဒံ သကဒါဂါမိဖလဉ္စ ယံ နိဗ္ဗိန္ဒတိ ဝိရဇ္ဇတိ, အယံ ပဌမဇ္ဈာနဘာဝနာဘူမိ စ ရာဂဝိရာဂါ စေတောဝိမုတ္တိ အနာဂါမိဖလဉ္စ။ ယံ ဝိမုတ္တိ ဝိမုစ္စတိ, အယံ အဝိဇ္ဇာဝိရာဂါ ပညာဝိမုတ္တိ အရဟတ္တဉ္စ။ ဣမေ အဝိပ္ပဋိသာရာ စ ဝီရိယိန္ဒ္ရိယဉ္စ စတ္တာရော သမ္မပ္ပဓါနာ အဝိပ္ပဋိသာရာ တဉ္စ ဥပရိ ယာဝ သမာဓိ, ဧဝံ တေ စတ္တာရိ ဈာနာနိ သမာဓိန္ဒ္ရိယဉ္စ ယံ သမာဟိတော ယထာဘူတံ ပဇာနာတိ။ ဣမေ စတ္တာရော သတိပဋ္ဌာနာ သီလပါရိပူရိမုပါဒါယ စာဂသံဟိတေန စ နိဗ္ဗေဓိကာနဉ္စ နိမိတ္တာနံ အနာဝိလမနာ, ဣဒံ သတိန္ဒ္ရိယံ စတ္တာရော သတိပဋ္ဌာနာ။ ယံ ပုန ဣမာယ ဓမ္မဒေသနာယ တီသု ဌာနေသု ဒိဋ္ဌောဂမနကိန္ဒ္ရိယံ ကိလေသပဟာနေန စ သေက္ခသီလံ, ဣဒံ သဒ္ဓိန္ဒ္ရိယံ။ စတ္တာရိ စ သောတာပတ္တိယင်္ဂါနိ ဖလာနိ။ သမာဓိန္ဒ္ရိယာနိ သောပနိယာဟာရီနိ သဗ္ဗသုတ္တေသု နိဒ္ဒိသိတဗ္ဗာနိ။ ယံ ဈာနံ ပဋိလဘနံ ဝီရိယဂဟိတံယေဝ ဉာဏံ ပဋိဿရတော, အယံ သုတမယီ ပညာ။ ယော သမာဓိ ပုဗ္ဗာပရနိမိတ္တာဘာသော အနောမဂတိတာယ ယထာကာမော, အယံ စိန္တာမယီ ပညာ, ယံ တထာသမာဟိတော ယထာဘူတံ ပဇာနာတိ, အယံ ဘာဝနာမယီ ပညာ။ အယံ သုတ္တနိဒ္ဒေသော။

ဣမံ သုတ္တံ နိဗ္ဗေဓဘာဂိယံ ဗုဇ္ဈကာရဓိကံ ဗုဇ္ဈိတဗ္ဗံ။ ယေဟိ အင်္ဂေဟိ သမန္နာဂတံ တံ ဗုဇ္ဈိဿန္တိ တဿ အင်္ဂါနိ ဗုဇ္ဈိဿန္တိ, တေန ဗောဇ္ဈင်္ဂါ။ တထာ အာဒိတော ယာဝ သီလံ ဝတံ စေတနာ ကရဏီယာ, ကိဿ သီလာနိ ပါရိပူရေတိ။ အနုပ္ပန္နဿ စ အကုသလဿ အနုပ္ပါဒါယ ဥပ္ပန္နဿ စ အကုသလဿ ပဟာနာယ အနုပ္ပန္နဿ ကုသလဿ ဥပ္ပါဒါယ ဥပ္ပန္နဿ စ ကုသလဿ ဘိယျောဘာဝါယ, ဣဒံ ဝီရိယံ တဿ တဿ ဗုဇ္ဈိတဿ အင်္ဂန္တိ။ အယံ ဝီရိယသမ္ဗောဇ္ဈင်္ဂေါ။ ဣမိနာ ဝီရိယေန ဒွေ ဓမ္မာ အာဒိတော အဝိပ္ပဋိသာရော ပါမောဇ္ဇဉ္စ ယာ ပုန ဣတိ အဝိပ္ပဋိသာရပစ္စယာ ပါမောဇ္ဇပစ္စယာ, အယံ ဣတိသမ္ဗောဇ္ဈင်္ဂေါ။ ယံ ဣတိမနဿ ကာယော ပဿမ္ဘတိ။ အယံ ပဿဒ္ဓိသမ္ဗောဇ္ဈင်္ဂေါ။ တေန ကာယိကသုခမာနိတံ ယံ သုခိနော စိတ္တံ သမာဓိယတိ, အယံ သမာဓိသမ္ဗောဇ္ဈင်္ဂေါ။ ယံ သမာဟိတော ယထာဘူတံ ပဇာနာတိ, အယံ ဓမ္မဝိစယသမ္ဗောဇ္ဈင်္ဂေါ။ ယာ သီလမုပါဒါယ ပဉ္စန္နံ ဗောဇ္ဈင်္ဂါနံ ဥပါဒါယာနုလောမတာ နိမိတ္တာယနာ ဣတိဘာဂိယာနဉ္စ ဝိသေသဘာဂိယာနဉ္စ အပိလာပနတာ သဟဂတာ ဟောတိ အနဝမဂ္ဂေါ, အယံ သတိသမ္ဗောဇ္ဈင်္ဂေါ။ ယံ ယထာဘူတံ ပဇာနာတိ, အစ္စာရဒ္ဓဝီရိယံ ကရောတိ။ ဥဒ္ဓစ္စဘူမီတိ ကတာ အဘိပတ္ထိတံ ပေသေတိ။ ကောသဇ္ဇဘူမီတိ ဂရဟိတော ရဟိတေဟိ အင်္ဂေဟိ ဗုဇ္ဈတိ ယံ စက္ခုသမထပထံ, သာ ဥပေက္ခာတိ။ တေန သာ ဥပေက္ခာ တဿ ဗောဇ္ဈင်္ဂဿ အင်္ဂန္တိ ကရိတွာ ဥပေက္ခာသမ္ဗောဇ္ဈင်္ဂေါတိ ဝုစ္စတေ။ ဧသော သုတ္တနိဒ္ဒေသော။

၉၃။ တတ္ထ ကတမာ ဒေသနာ? အသ္မိံ သုတ္တေ စတ္တာရိ အရိယသစ္စာနိ ဒေသိတာနိ။ တတ္ထ ကတမော ဝိစယော? သီလဝတော အဝိပ္ပဋိသာရော ယာဝ ဝိမုတ္တိ ဣမိဿာယ ပုစ္ဆာယ မိနိကိမတ္ထဿမီတိ ဒွေ ပဒါနိ ပုစ္ဆာ ဒွေ ပဒါနိ ဝိသဇ္ဇနာနိ ဒွီဟိ ပဒေဟိ ဒွေ အဘိညံ ဒွီဟိ စေဝ ပဒေဟိ ဝိသဇ္ဇနာ ကိံ ပုစ္ဆတိ နိဗ္ဗာဓိကံ ကာယဘူမိံ ကမ္မဿ တထာ ဟိ ပတိဋ္ဌာ စ အသေက္ခေ ဓမ္မေ ဥပ္ပါဒေတိ။ တတ္ထ ကတမာ ယုတ္တိ? သီလဝတော အဝိပ္ပဋိသာရော ဘဝတိ ကိံ နိစ္ဆန္ဒဿ စ ဝိရာဂေါ အတ္ထိ ဧသာ ယုတ္တိ။ တတ္ထ ကတမံ ပဒဋ္ဌာနံ? ဝီရိယံ ဝီရိယိန္ဒ္ရိယဿ ပဒဋ္ဌာနံ။ သမာဓိ သမာဓိန္ဒ္ရိယဿ ပဒဋ္ဌာနံ။ ပညာ ပညိန္ဒ္ရိယဿ ပဒဋ္ဌာနံ။ ဝီရိယံ အဒေါသဿ ပဒဋ္ဌာနံ။ သမာဓိ အလောဘဿ ပဒဋ္ဌာနံ။ ပညာ အမောဟဿ ပဒဋ္ဌာနံ။ ဝီရိယိန္ဒ္ရိယံ တိဏ္ဏံ မဂ္ဂင်္ဂါနံ ပဒဋ္ဌာနံ, သမ္မာဝါစာယ သမ္မာကမ္မန္တဿ သမ္မာအာဇီဝဿ။ သမာဓိန္ဒ္ရိယံ တိဏ္ဏံ မဂ္ဂင်္ဂါနံ ပဒဋ္ဌာနံ, သမ္မာသင်္ကပ္ပဿ သမ္မာဝါစာယ သမ္မာသမာဓိနော။ ပညိန္ဒ္ရိယံ ဒွိန္နံ မဂ္ဂင်္ဂါနံ ပဒဋ္ဌာနံ, သမ္မာသတိယာ သမ္မာဒိဋ္ဌိယာ စ။

တတ္ထ ကတမော လက္ခဏော? သီလက္ခန္ဓေ ဝုတ္တေ သဗ္ဗေ တယော ခန္ဓာ ဝုတ္တာ ဘဝန္တိ, သီလမေဝ ဟိ သေလောပမတာ ယထာ သေလော သဗ္ဗပစ္စတ္ထိကေဟိ အကရဏီယော ဧဝံ တံ စိတ္တံ သဗ္ဗကိလေသေဟိ န ကမ္ပတီတိ, အယံ အမောဟော။ ဝိရတ္တံ [ပဿ ဥဒါ။ ၃၄ ဥဒါနပါဠိယံ] ရဇနီယေသူတိ အယံ အလောဘော။ ကောပနေယျေ န ကုပ္ပတီတိ အယံ အဒေါသော။ တတ္ထ ပညာ အမောဟော ကုသလမူလံ, အလောဘော အလောဘောယေဝ, အဒေါသော အဒေါသောယေဝ။ ဣမေဟိ တီဟိ ကုသလမူလေဟိ သေက္ခဘူမိယံ ဌိတော အသေက္ခမဂ္ဂံ ဥပ္ပါဒေတိ။ သေက္ခဘူမိ သမ္ပတ္တိကမ္မဓမ္မေ ဥပ္ပါဒေတိ, သာ စ သမ္မာဝိမုတ္တိ, ယဉ္စ ဝိမုတ္တိရသဉာဏဒဿနံ ဣမေ ဒသ အသေက္ခာနံ အရဟတ္တံ ဓမ္မာ။ တတ္ထ အဋ္ဌင်္ဂိကေန မဂ္ဂေန စတုဗ္ဗိဓါ ဘာဝနာပိ လဗ္ဘတိ။ သီလဘာဝနာ ကာယဘာဝနာ စိတ္တဘာဝနာ ပညာဘာဝနာ စ။ တတ္ထ သမ္မာကမ္မန္တေန သမ္မာအာဇီဝေန စ ကာယော ဘာဝိတော။ သမ္မာဝါစာယ သမ္မာဝါယာမေန စ သီလံ ဘာဝိတံ။ သမ္မာသင်္ကပ္ပေန သမ္မာသမာဓိနာ စ စိတ္တံ ဘာဝိတံ။ သမ္မာဒိဋ္ဌိယာ သမ္မာသတိယာ စ ပညာ ဘာဝိတာ။ ဣမာယ စတုဗ္ဗိဓါယ ဘာဝနာယ ဒွေ ဓမ္မာ ဘာဝနာပါရိပူရိံ ဂစ္ဆန္တိ စိတ္တံ ပညဉ္စ။ စိတ္တံ ဘာဝနာယ သမထော, ပညာ ဘာဝနာယ ဝိပဿနာ။ တတ္ထ ပညာ အဝိဇ္ဇာပဟာနေန စိတ္တံ ဥပက္ကိလေသေဟိ အမိဿီကတန္တိ။ ပညာ ဘာဝနာယ စိတ္တဘာဝနံယေဝ ပရိပူရေတိ။ ဧဝံ ယဿ သုဘာဝိတံ စိတ္တံ ကုတော တံ ဒုက္ခမေဿတီတိ။ အပိ စ ခေါ ပန တဿ အာယသ္မတော အဗျာပါဒဓါတု အဓိမုတ္တာ, န သော ပေတံ သမာပန္နော တဿ သင်္ခါပဟာရံ ဒေတိ, သင်္ခါဝိတက္ကိတေ သရီရေ ဒုက္ခံ န ဝေဒိယတိ, အယံ သုတ္တတ္ထော။

၉၄။ တတ္ထ ကတမာ ဒေသနာ? ဣမမှိ သုတ္တေ ဒသ အသေက္ခာ အရဟတ္တဓမ္မာ ဒေသိတာ အပ္ပမာဏာ စ သမ္မာ ဝိဘာဝနာ။ တတ္ထ ကတမော ဝိစယော? သေလောပမတာ ယေ ယေ ဓမ္မာ ဝေဒနီယသုခဒုက္ခောပဂတာ, တေ သဗ္ဗေ နိရူပံ ဝါနုပဿန္တာနံ ဝူပဂတာ ကာယတော ဝေဒယိတပရိက္ခာရော အပ္ပဝတ္တိတော ဒုက္ခံ န ဝေဒိယတိ။ တတ္ထ ကတမာ ယုတ္တိ, ယဿေဝံ ဘာဝိတံ စိတ္တံ ကုတော တံ [နံ (က။)] ဒုက္ခမေဿတီတိ။ တီသု ဘာဝနာသု ဒုက္ခံ နက္ခမတိ စိတ္တံ စိတ္တဘာဝနာယ စ။ နိရောဓဘာဝနာယ စ အာနန္တရိကာ သမာဓိဘာဝနာယ စ။ ဣတိ ယဿေဝံ ဘာဝိတံ စိတ္တန္တိ သမာဓိ ဖလဿ ပဒဋ္ဌာနံ။

တတ္ထ ကတမော လက္ခဏော? ယဿေဝံ ဘာဝိတံ [ပဿ ဥဒါ။ ၃၄ ဥဒါနပါဠိယံ] စိတ္တန္တိ စိတ္တာနိ ဘာဝိတာနိ ယထာ ပဌမံ နိဒ္ဒိဋ္ဌာနိ ပညာ သီလံ ကာယော စိတ္တံ, သီလမ္ပိ သုဘာဝိတံ ကာယိကစေတသိကဉ္စ ဌိတတ္တာ နာနုပကမ္ပတီတိ ဝေဒနာပိ တထာ သညာပိ သင်္ခါရာပိ။ ကုတော တံ ဒုက္ခမေဿတီတိ သုခမ္ပိ နာနုဂစ္ဆတိ, အဒုက္ခမသုခမ္ပိ နာဂတန္တိ။

တတ္ထ ကတမော စတုဗ္ယူဟော ဟာရော? ဣဓ ဘဂဝတော ကော အဓိပ္ပါယော? ယေ ဒုက္ခေန အဓိကာ ဘဝိဿန္တိ, တေ ဧဝရူပါဟိ သမာပတ္တီဟိ ဝိရဟိဿန္တိ။ အယမေတ္ထ ဘဂဝတော အဓိပ္ပါယော။ ယေ စ အပ္ပသန္နာ, တေ ဟိ ဘဝိဿန္တိ, ပသန္နာနဉ္စ ဣတိပါမောဇ္ဇံ ဘဝိဿတိ, အယံ တတ္ထ ဘဂဝတော အဓိပ္ပါယော။ အာဝဋ္ဋောတိ နတ္ထိ အာဝဋ္ဋနဿ ဘူမိ။

ဝိဘတ္တီတိ ယဿေဝံ ဘာဝိတံ စိတ္တံ ကုတော တံ ဒုက္ခမေဿတီတိ ဒုဝိဓေါ နိဒ္ဒေသော – ဒုက္ခဟေတုနိဒ္ဒေသော စ ပဋိပက္ခနိဒ္ဒေသော စ။ ကော သော ဒုက္ခဟေတု? ယတော ဒုက္ခံ အာဂစ္ဆတိ ပဋိပက္ခေ ဝုတ္တေ သေသဓမ္မာနံ သီလံ ဟေတု စ ပစ္စယော စ, တေ သဗ္ဗေ ဓမ္မာ ဝုတ္တာ ဟောန္တိ။ ဧကဗောဓိပက္ခိယေ ဓမ္မေ ဝုတ္တေ သဗ္ဗေ ဗောဓဂမနီယာ ဓမ္မာ ဝုတ္တာ ဘဝန္တိ။

တတ္ထ ကတမော စတုဗ္ယူဟော ဟာရော? ဣမမှိ သုတ္တေ ဘဂဝတော ကော အဓိပ္ပါယော? ယေ အဝိပ္ပဋိသာရေန ဆန္ဒိကာ, တေ သီလပါရိပူရီ ဘဝန္တိ ပါမောဇ္ဇဆန္ဒိကာ အဝိပ္ပဋိသာရီပါရိပူရီ, အယမေတ္ထ ဘဂဝတော အဓိပ္ပါယော။ပေ။။ အယံ စတုဗ္ယူဟော ဟာရော။

တတ္ထ ကတမော အာဝဋ္ဋော? ဣဒံ သုတ္တံ နိဗ္ဗေဓဘာဂိယံ။ ယော နိဗ္ဗေဓေါ, အယံ နိရောဓေါ။ ယေန နိဗ္ဗိဇ္ဈတိ, သော မဂ္ဂေါ။ ယံ နိဗ္ဗိဇ္ဈတိ, တံ ဒုက္ခံ။ ယံ နိဗ္ဗေဓဂါမိနာ မဂ္ဂေန ပဟီယတိ, သမုဒယောယံ ဝုတ္တော။

တတ္ထ ကတမာ ဝိဘတ္တိ? သီလဝတော အဝိပ္ပဋိသာရောတိ ဝိဘဇ္ဇဗျာကရဏီယံ, ပရာမသန္တဿ နတ္ထိ အဝိပ္ပဋိသာရော ယာဝ ဒေါသကတံ ကာယေန ဝါ ဝါစာယ ဝါ အကုသလံ အာရဘတိ။ ကိဉ္စိပိဿ ဧဝံ ဟောတိ ‘‘သုကတမေတံ သုစရိတမေတံ နော စဿ တေန အဝိပ္ပဋိသာရေန ပါမောဇ္ဇံ ဇာယတိ ယာဝ ဝိမုတ္တိ, တဿ သီလဝတော အဝိပ္ပဋိသာရော’’တိ ဝိဘဇ္ဇဗျာကရဏီယံ, အယံ ဝိဘတ္တိဟာရော။

တတ္ထ ကတမာ ပရိဝတ္တနာ? ဣမေဟိ သတ္တဟိ ဥပနိသာသမ္ပတ္တီဟိ ဧကာဒသ ဥပနိသာ ဝိဘတ္တိယံ ပဇဟာနံ ပဇဟန္တိ, အယံ ပရိဝတ္တနာ။

တတ္ထ ကတမာ ဝေဝစနာ? ဣမေသံ အရိယဓမ္မာနံ ဗလဗောဇ္ဈင်္ဂဝိမောက္ခသမာဓိသမာပတ္တီနံ ဣမာနိ ဝေဝစနာနိ။

တတ္ထ ကတမာ ပညတ္တိ? သီလဝတော အဝိပ္ပဋိသာရောတိ သီလက္ခန္ဓေ နေက္ခမ္မပညတ္တိယာ ပညတ္တံ, နိသဇ္ဇပညတ္တိ စ ဧဝံ ဒသ အင်္ဂါနိ ဒွီဟိ ဒွီဟိ အင်္ဂေဟိ ပညတ္တာနိ။

တတ္ထ ကတမော ဩတရဏော? ဣဒံ နိဗ္ဗေဓဘာဂိယသုတ္တံ ပဉ္စသု ဩတိဏ္ဏံ ယထာ ယံ ပဌမံ နိဒ္ဒိဋ္ဌံ ဧဝမိန္ဒ္ရိယာဒိခန္ဓဓါတုအာယတနေသု နိဒ္ဒိသိတဗ္ဗာနိ။

တတ္ထ ကတမော သောဓနော ဟာရော? သီလဝတော အဝိပ္ပဋိသာရောတိ န တာဝ သုဒ္ဓေါ အာရမ္ဘော အဝိပ္ပဋိသာရိနော ပါမောဇ္ဇန္တိ န တာဝ သုဒ္ဓေါ အာရမ္ဘော ယာနိ ဧကာဒသ ပဒါနိ ဒေသိတာနိ ယဒါ တဒါ သုဒ္ဓေါ အာရမ္ဘော, အယံ သောဓနော။

တတ္ထ ကတမော အဓိဋ္ဌာနော? သီလဝေမတ္တတာယ ပညတ္တံ ဧဝံ ဒသ ပဒါနိ သဗ္ဗာနိ သီလက္ခန္ဓဿ အာနိသံသော, တေ စ ပတိရူပဒေသဝါသော စ ပစ္စယော အတ္တသမ္မာပဏိဓါနဉ္စ ဟေတု, သမာဓိက္ခန္ဓဿ သုခံ ဟေတု ပဿဒ္ဓိ ပစ္စယော, ယေန ဈာနသဟဇာတိ စ ဌာနန္တိ ဈာနင်္ဂါ အပရော ပရိယာယော ကာမေသု အာဒီနဝါနုပဿနာ သမာဓိနော ပစ္စယော နေက္ခမ္မေ အာနိသံသဒဿာဝိတာ ဟေတု။

တတ္ထ ကတမာ သမာရောပနာ? ယံ ဝီရိယိန္ဒ္ရိယံ, သော သီလက္ခန္ဓော။ ယံ သီလံ, တေ စတ္တာရော ဓမ္မာ ပဓါနာ။ ယံ ဓမ္မာနုဓမ္မပဋိပတ္တိ, သော ပါတိမောက္ခသံဝရော။

၉၅။ ယဿ သေလောပမံ စိတ္တန္တိ ဂါထာ [ပဿ ဥဒါ။ ၃၄ ဥဒါနေ], သေလောပမန္တိ ဥပမာ ယထာ သေလော ဝါတေန န ကမ္ပတိ န ဥဏှေန န သီတေန သံကမ္ပတိ။ ယထာ အနေကာ အစေတနာ, တေ ဥဏှေန မိလာယန္တိ, သီတေန အဝသုဿန္တိ, ဝါတေန ဘဇန္တိ။ န ဧဝံ သေလော ဝိရတ္တံ ရဇနီယေသု ဒေါသနီယေ န ဒုဿတီတိ ကာရဏံ ဒေါသနီယေ ဒေါမနဿန္တံ, န ဒုဋ္ဌေန ဝါ ကမ္ပတိ ဥဏှေန ဝါ, သော မိလာယတိ သီတေန ဝါ အဝသုဿတိ, ဧဝံ စိတ္တံ ရာဂေန နာနုဿတိ သီတေန ကမ္ပတီတိ။ ကိံ ကာရဏံ? ဝိရတ္တံ ရဇနီယေသု ဒေါသနီယေ န ဒုဿတိ။ ကိံ ကာရဏံ? ဒေါသနီယေ ပနဿန္တိ န ဒုဿတိ, အဒုဋ္ဌံ တံ န ကောသိဿန္တိ, တေန ကုပ္ပနီယေ န ကုပ္ပတိ, ယဿေဝံ ဘာဝိတံ စိတ္တံ ကုတော တံ ဒုက္ခနိဒ္ဒေသော စ ကုတော ဧဝရူပဿ ဒုက္ခံ အာဂမိဿတီတိ နိဒ္ဒိဋ္ဌံ။

ပရိဝတ္တနာတိ ကုတော တံ ဒုက္ခမေဿတီတိ ယံ စေတသိကံ သုခံ အနုပါဒိသေသာ အယံ နတ္ထိ သောပါဒိသေသာ အယံ အတ္ထိ။ ပုန ဧဝမာဟံသု တံ ခဏံ တံ မုဟုတ္တံ ဥဘယမေဝ အဝေဒယိတံ သောပါဒိသေသံ ယဉ္စ အနုပါဒိသေသံ ယဉ္စ တံ ခဏံ တံ မုဟုတ္တံ အနုပါဒိသေသံ ယဉ္စ သောပါဒိသေသံ စ အဝေဒယိတံ။ သုခမာပန္နဿ အနာဝတ္တိကန္တိ အယမေတ္ထ ဝိသေသော ပရိဝတ္တနာ။

တတ္ထ ကတမော ဝေဝစနော? ယဿေဝံ ဘာဝိတံ စိတ္တံ ဝါ ဘာဝိတံ သုဘာဝိတံ အနုဋ္ဌိတံ ဝတ္ထုကတံ သုသမာရဒ္ဓံ။ စိတ္တန္တိ မနော ဝိညာဏံ မနိန္ဒ္ရိယံ မနောဝိညာဏဓါတု။

တတ္ထ ကတမာ ပညတ္တိ? စိတ္တံ မနော သင်္ခါရာ ဝူပသမပညတ္တိယာ ပညတ္တံ။ သမာဓိ အသေက္ခပညတ္တိယာ ပညတ္တော။ ဒုက္ခံ ဥစ္ဆိန္နပညတ္တိယာ ပညတ္တံ။

တတ္ထ ကတမော ဩတရဏော? စိတ္တေ နိဒ္ဒိဋ္ဌေ ပဉ္စက္ခန္ဓာ နိဒ္ဒိဋ္ဌာ ဟောန္တိ, အယံ ခန္ဓေသု ဩတရဏော, မနောဝိညာဏဓါတုယာ နိဒ္ဒိဋ္ဌာယ အဋ္ဌာရသ ဓါတုယော နိဒ္ဒိဋ္ဌာ ဟောန္တိ, အယံ ဓါတူသု ဩတရဏော။ မနာယတနေ နိဒ္ဒိဋ္ဌေ သဗ္ဗာနိ အာယတနာနိ နိဒ္ဒိဋ္ဌာနိ ဟောန္တိ။ တတ္ထ မနာယတနံ နာမရူပဿ ပဒဋ္ဌာနံ။ နာမရူပပစ္စယာ သဠာယတနံ။ တထာ ပဋိစ္စသမုပ္ပါဒေ။ အယံ ဩတရဏော။ တတ္ထ ကတမော သောဓနော သုဒ္ဓေါယေဝ အာရမ္ဘော။

တတ္ထ ကတမော အဓိဋ္ဌာနော? ဆဠိန္ဒ္ရိယံ ဘာဝနာ ဧကတ္တာယံ ပညတ္တိ ဆဋ္ဌိတေန ကာယော ဧကတ္တာယ ပညတ္တော။

တတ္ထ ကတမော ပရိက္ခာရော? စိတ္တဿ ပုဗ္ဗဟေတု သမုပ္ပါဒါယ မနသိကာရော စ တပ္ပောဏတာ စ ယံ အသမာဟိတဘူမိယံ စ ဝိသေသဓမ္မာနံ အဘာဝိတတ္တာ စိတ္တသတတံ ဂစ္ဆတိ, သစေ သမာဓိနော သုခံ ဟေတု အဝိပ္ပဋိသာရော ပစ္စယော, အယံ ဟေတု အယံ ပစ္စယော ပရိက္ခာရော။

တတ္ထ ကတမာ သမာရောပနာ? ယဿေဝံ ဘာဝိတန္တိ တဿ ဓမ္မာ သမာရောပယိတဗ္ဗာ။ ကာယော သီလံ ပညာ ဘာဝိတစိတ္တန္တိ အနဘိရတံ အနပဏတံ အနေကံ အနုတံ အနာပဇ္ဇာသတ္တံ အယံ သမညာယတနာ န တဿ သေက္ခဿ သမ္မာသမာဓိ သဗ္ဗေ အသေက္ခာ ဒသ အရဟန္တဓမ္မာ နိဒ္ဒိဋ္ဌာ ဟောန္တိ။ အသေက္ခဘာဂိယာနိ သုတ္တာနိ။

၉၆။ ယဿ နူန, ဘန္တေ, ကာယဂတာသတိ အဘာဝိတာ, အယံ သော အညတရံ သဗြဟ္မစာရိံ [သဗြဟ္မစာရီနံ (က။)] အာသဇ္ဇ သမာပဇ္ဇ အပ္ပဋိနိသဇ္ဇ ဇနပဒစာရိကံ ပက္ကမေယျ, သော အာယသ္မာ ဣမသ္မိံ ဝိပ္ပဋိဇာနာတိ ဒွေ ပဇာနိ ပဋိဇာနာတိ စိတ္တဘာဝနာယဉ္စ ဒိဋ္ဌိယာ ပဟာနံ, ကာယဘာဝနာယဉ္စ ဒိဋ္ဌိပ္ပဟာနံ, ကာယဘာဝနာယဉ္စ တဏှာပဟာနံ, ယံ ပဌမံ ဥပမံ ကရောတိ။ အသုစိနာပိ သုစိနာပိ ပထဝီ နေဝ အဋ္ဋိယတိ န ဇိဂုစ္ဆတိ န ဣတိပါမောဇ္ဇံ ပဋိလဘတိ, ဧဝမေဝ ဟိ ပထဝီသမေန သော စေတသာ အနွယေန အပ္ပကေန အဝေရေန အဗျာပဇ္ဇေန ဝိဟရာမီတိ။ ဣတိ သော အာယသ္မာ ကိံ ပဋိဇာနာတိ, ကာယဘာဝနာယ သုခိန္ဒ္ရိယပဟာနံ ပဋိဇာနာတိ, စိတ္တဘာဝနာယ သောမနဿိန္ဒ္ရိယပဟာနံ ပဋိဇာနာတိ။ ကာယိကာ ဝေဒနာ ရာဂါနုသယမနုဂတာနံ သုခိန္ဒ္ရိယံ ပဋိက္ခိပတိ။ န ဟိ ဝေဒနာက္ခန္ဓံ ယာ စေတသိကာ သုခဝေဒနာ တတ္ထ အယံ ပဋိလာဘပစ္စယာ ဥပ္ပဇ္ဇတိ သုခံ သောမနဿံ။ သောတံ ပဋိက္ခိပတိ, န ဟိ မနောသမ္ဖဿဇံ ဝေဒနံ။ တတ္ထ စတူသု မဟာဘူတေသု ရူပက္ခန္ဓဿ အနုသယပဋိဃပဟာနံ ဘဏတိ။ ကာမေ ရူပဉ္စ တဉ္စ အသေက္ခဘူမိယံ။ ကာယေ ကာယာနုပဿနာ ဒိဋ္ဌဓမ္မသုခဝိဟာရဉ္စ။ ဗလေန စ ဥဿာဟေန စ သဗ္ဗံ မနသိ ကတတ္တာနံ ပဟာနံ မေဒံ ကတာလိကာယ စ ပုရိသေန စ မဏ္ဍနကဇာတိကေန စ, ဧတေဟိ ဣမဿ မာတာပိတုသမ္ဘူတံ ပစ္စဝေက္ခဏံ, သော ကာယေန စ ကာယာနုပဿနာယ စ စိတ္တေန စ စိတ္တာနုပဿနာယ စ ဒွေ ဓမ္မေ ဓါရေတိ။ ကာယကိလေသဝတ္ထုံ စိတ္တေန စ စိတ္တသန္နိဿယေ စိတ္တေန သုဘာဝိတေန သတ္တန္နံ စ သမာပတ္တီနံ ဝိဟရိတုံ ပဋိဇာနာတိ။

ဂဟပတိပုတ္တောပမတာယ စ ယထာ ဂဟပတိပုတ္တဿ နာနာရင်္ဂါနံ ဝတ္ထကရဏ္ဍကော ပုဏ္ဏော ဘဝေယျ, သော ယံ ယဒေဝ ဝတ္ထယုဂံ ပုဗ္ဗဏှသမယေ အာကင်္ခတိ, ပုဗ္ဗဏှသမယေ နိဗ္ဗာပေတိ, ဧဝံ မဇ္ဈန္ဟိကသမယေ, သာယနှသမယေ, ဧဝမေဝ သော အာယသ္မာ စိတ္တဿ သုဘာဝိတတ္တာ ယထာရူပေန ဝိဟာရေန အာကင်္ခတိ ပုဗ္ဗဏှသမယံ ဝိဟရိတုံ, တထာရူပေန [ယထာရူပေန (ဣ။ က။)] ပုဗ္ဗဏှသမယံ ဝိဟရတိ, မဇ္ဈန္ဟိကသမယေ, သာယနှသမယေ။ တေန ဝေသ အာယသ္မတာ ဥပမာယ မေ အာသိတာယ ပထဝီ ဝါ အနုတ္တရာ ဣန္ဒ္ရိယဘာဝနာ ဘာဝိတစိတ္တေန။ တေန သော အာယသ္မာ ဣဒံ အဋ္ဌဝိဓံ ဘာဝနံ ပဋိဇာနာတိ စတူသု မဟာဘူတေသု, ကာယဘာဝနံ ဥပကစဏ္ဍာလံ ပုရိသမေတကံ ဘဝတလာကာသု စိတ္တဘာဝနံ, ဣမာဟိ ဘာဝနာဟိ တာယ ဘာဝနာယ စ သမထာ ပါရိပူရိမန္တေဟိ။ ဣမေဟိ စတူဟိ ပညာပါရိပူရိမန္တေဟိ။

၉၇။ ကထံ ဥပကစဏ္ဍာလံ ပဋိကူလေသု ဓမ္မေသု အပ္ပဋိကူလသညီ ဝိဟရတိ? ကာယော ပကတိယာ အပ္ပဋိကူလံ ကာယေ ဥဒ္ဓုမာတကသညာ သံခိတ္တေန နဝ သညာ ဣမေ ပဋိကူလာ ဓမ္မာ စေသော အာယသ္မာ ပဋိကူလတော အဇိဂုစ္ဆိတော ကာယဂတာသတိယာ ဘာဝနာနုယောဂမနုယုတ္တော ဝိဟရတိ, န ဟိ တဿ ဇိဂုစ္ဆပ္ပဟာယ စိတ္တံ ပဋိကူလတိ။

ကထံ အပ္ပဋိကူလေသု ဓမ္မေသု ပဋိကူလသညီ ဝိဟရတီတိ? ကာယော သဗ္ဗလောကဿ အပ္ပဋိကူလော တံ သော အာယသ္မာ အသုဘသညာယ ဝိဟရတိ။ ဧဝံ အပ္ပဋိကူလေသု ဓမ္မေသု ပဋိကူလသညီ ဝိဟရတိ။

ကထံ ပဋိကူလေသု စ အပ္ပဋိကူလေသု စ အပ္ပဋိကူလသညီ ဝိဟရတီတိ အပိ သဗ္ဗောယံ လောကဿ ယမိဒံ မုဏ္ဍော ပတ္တပါဏီ ကုလေသု ပိဏ္ဍာယ ဝိစရတိ, တေန စ သော အာယသ္မာ သုဝဏ္ဏဒုဗ္ဗဏ္ဏေန အပ္ပဋိကူလသညီ စိတ္တေန စ ကာယေန နိဗ္ဗိဒါသဟဂတေန အပ္ပဋိကူလသညီ, ဧဝံ ပဋိကူလေသု အပ္ပဋိကူလေသု စ ဓမ္မေသု အပ္ပဋိကူလသညီ ဝိဟရတိ။

ကထံ ပဋိကူလေသု စ ဓမ္မေသု အပ္ပဋိကူလသညီ ဝိဟရတိ? ပဋိကူလေသု စ ဓမ္မေသု သုဘသညိနော ဣတ္ထိရူပေ ပဋိကူလေသု စ ဇိဂုစ္ဆိနော ဝိနီလကဝိပုဗ္ဗကေ တတ္ထ သော အာယသ္မာ ပဋိကူလသညီ ဝိဟရတိ။

ကထံ ပဋိကူလေသု ဓမ္မေသု တဒုဘယံ အဘိနိဝဇ္ဇယိတွာ ဥပေက္ခကော ဝိဟရတိ သတော စ သမ္ပဇာနော စ? အပ္ပဋိကူလေသု စ ဓမ္မေသု သုဘသညိနော ဣတ္ထိရူပေ ပဋိကူလေသု စ ဇိဂုစ္ဆိနော ဝိနီလကဝိပုဗ္ဗကေ တဒုဘယံ အဘိနိဝဇ္ဇယိတွာ ‘နေတံ မမ’‘နေသောဟမသ္မိ’‘နေသော မေ’ အတ္တာတိ ဝိဟရတိ။ ဧဝံ တဒုဘယံ အဘိနိဝဇ္ဇယိတွာ ဥပေက္ခကော ဝိဟရတိ သတော သမ္ပဇာနော။

အပရော ပရိယာယော။ တေဓါတုကော လောကသန္နိဝါသော သဗ္ဗဗာလပုထုဇ္ဇနာနံ အပ္ပဋိကူလသညာ။ တတ္ထ စ အာယသ္မာ သာရိပုတ္တော အပ္ပဋိကူလသညီ ဝိဟရတိ။ ဧဝံ အပ္ပဋိကူလေသု ဓမ္မေသု ပဋိကူလသညီ ဝိဟရတိ။

ကထံ ပဋိကူလေသု ဓမ္မေသု အပ္ပဋိကူလသညီ ဝိဟရတိ? ပဋိကူလသညိနော သဗ္ဗသေက္ခာ ဣဓ ကာ တေဓါတုကေ သဗ္ဗလောကေ။ တတ္ထ ကတမော ဘူမိပ္ပတ္တော သမာဓိဖလေ သစ္ဆိကတော အပ္ပဋိကူလသညီ ဝိဟရတိ ? ကိံ ကာရဏံ? န ဟိ တံ အတ္ထိ ယဿ လောကဿ ပဟာနာယ ပဋိကူလသညီ ဥပ္ပါဒေယျ။

ကထံ ပဋိကူလေသု စ အပ္ပဋိကူလေသု စ ဓမ္မေသု ပဋိကူလသညီ ဝိဟရတိ? တေဓါတုကေ လောကသန္နိဝါသေ ယာဝ ကာမလောကဘူမတာ ဟိ ရာဂါနံ ဝီတရာဂါနံ ပဋိကူလသမတာ ရူပါရူပဓါတုံ အပ္ပဋိကူလသမတာ။ တတ္ထ စ အာယသ္မာ သာရိပုတ္တော ပဋိကူလသညီ ဝိဟရတိ။ ဧဝံ ပဋိကူလေသု စ အပ္ပဋိကူလေသု စ ဓမ္မေသု ပဋိကူလသညီ ဝိဟရတိ။

ကထံ ပဋိကူလေသု စ အပ္ပဋိကူလေသု စ ဓမ္မေသု အပ္ပဋိကူလသညီ ဝိဟရတိ? ယံ ကိဉ္စိ ပရတော ဒုရုတ္တာနံ ဒုရာဂတာနံ ဝစနပထာနံ တံ ဝစနံ အပ္ပဋိကူလံ ယာဝတာ ဝါစသော အပ္ပတိရူပါ တထာ ဇနဿ အပ္ပဋိကူလသညာ။ တတ္ထ အာယသ္မာ သာရိပုတ္တော အဘိညာယ သစ္ဆိကတော အပ္ပဋိကူလသညီ ဝိဟရတိ, ဧဝံ ပဋိကူလေသု စ အပ္ပဋိကူလေသု စ ဓမ္မေသု အပ္ပဋိကူလသညီ ဝိဟရတိ။

၉၈။ ကထံ ပဋိကူလေသု စ အပ္ပဋိကူလေသု စ ဓမ္မေသု တဒုဘယံ အဘိနိဝဇ္ဇယိတွာ ဥပေက္ခကော စ ဝိဟရတိ သတော စ သမ္ပဇာနော? ယဉ္စ နေသံ သမနုပဿတိ ယေ ဓမ္မာ ဒုစ္စရိတာ, တေ ဓမ္မာ အပ္ပဋိကူလာ။ တတ္ထ အာယသ္မာ သာရိပုတ္တော ဣတိ ပဋိသဉ္စိက္ခတိ ယေ ဓမ္မာ ဒုစ္စရိတာ, တေ ဓမ္မာ အနိဋ္ဌဝိပါကာ။ ယေ ဓမ္မာ သုစရိတာ, တေ အာစယဂါမိနော။ သော စ သုစရိတံ အာစယဂါမိနိံ ကရိတွာ ဒုစ္စရိတံ အနိဋ္ဌဝိပါကံ ကရိတွာ တဒုဘယံ အဘိနိဝဇ္ဇယိတွာ ဥပေက္ခကော ဝိဟရတိ။

အထ ပဋိကူလေသု စ ဓမ္မေသု အပ္ပဋိကူလေသု စ ပဋိကူလသညီ ဝိဟရတိ။ တဏှာ ပဋိကူလဓမ္မာ ကိံ ကာရဏံ? တဏှာဝသေန ဟိ သတ္တာ ဒွီဟိ ဓမ္မေဟိ သတ္တာ, ကဗဠီကာရေ အာဟာရေ ရသတဏှာယ သတ္တာ, ဖဿေ သုခသညာယ သတ္တာ။ တတ္ထာယသ္မာ သာရိပုတ္တော ကဗဠီကာရေ စ အာဟာရေ ပဋိကူလသညီ ဝိဟရတိ, ဖဿေ စ ဒုက္ခသညီ ဝိဟရတိ။ ဧဝံ ပဋိကူလေသု စ အပ္ပဋိကူလေသု စ ပဋိကူလသညီ ဝိဟရတိ။

ကထံ ပဋိကူလေသု စ ဓမ္မေသု အပ္ပဋိကူလေသု စ ဓမ္မေသု အပ္ပဋိကူလသညီ ဝိဟရတိ? တဏှာက္ခယံ အနုတ္တရံ နိဗ္ဗာနံ တထာ ဗာလပုထုဇ္ဇနာနံ ပဋိကူလသညာ ပဟတသညာ စ။ တတ္ထာယသ္မတော သာရိပုတ္တဿ အပ္ပဋိကူလသညာ အဗျာပါဒသညာ စ သာမံ ပညာယ ပဿိတွာ ဧဝံ ပဋိကူလေသု စ ဓမ္မေသု အပ္ပဋိကူလသညီ ဝိဟရတိ။

ကထံ ပဋိကူလေသု စ အပ္ပဋိကူလေသု စ ဓမ္မေသု အပ္ပဋိကူလသညီ ဝိဟရတိ? တတိယေ စ နိဗ္ဗာနေ ပဋိကူလသညိနော ယသေန စ ကိတ္တိနိ စ အပ္ပဋိကူလသညိနော။ တတ္ထာယသ္မာ သာရိပုတ္တော အဿာဒဉ္စ အာဒီနဝဉ္စ နိဿရဏဉ္စ ယထာဘူတံ သမ္မာပညာယ ပဋိဇာနန္တော ပဋိကူလဉ္စ အပ္ပဋိကူလဉ္စ ဓမ္မံ တဒုဘယံ အဘိနိဝဇ္ဇယိတွာ အပ္ပဋိကူလသညီ ဝိဟရတိ။

ကထံ ပဋိကူလံ အပ္ပဋိကူလဉ္စ ဓမ္မံ တဒုဘယံ အဘိနိဝဇ္ဇယိတွာ ဥပေက္ခကော ဝိဟရတိ? သတော စ သမ္ပဇာနော စ, ယဉ္စ သမနုပဿတိ အနုနယော အပ္ပဋိကူလော ဓမ္မော ပဋိဃော စ ပဋိကူလော ဓမ္မော, တတ္ထာယသ္မာ သာရိပုတ္တော အနုနယဿ ပဋိဃပ္ပဟီနတ္တာ ဥပေက္ခကော ဝိဟရတိ သတော သမ္ပဇာနော စ။ ယဉ္စဿ သမနုပဿတိ အယံ ပဉ္စဝိဓါ အနုတ္တရာ ဣန္ဒ္ရိယဘာဝနာ။ အယံ သုတ္တနိဒ္ဒေသော။

၉၉။ တတ္ထ ကတမော ဒေသနာဟာရော? ဣမမှိ သုတ္တေ ကိံ ဒေသိတဗ္ဗံ? တတ္ထ ဝုစ္စတေ, ဣမမှိ သုတ္တေ ဒိဋ္ဌဓမ္မသုခဝိဟာရော ဒေသိတော, တထာ ဝိမုတ္တံ စိတ္တံ ပစ္စဝေက္ခဏာ စ အဓိပညာဓမ္မံ ဒေသိတံ။

တတ္ထ ကတမော ဝိစယော? ယေ ကာယေ ကာယာနုပဿိနော ဝိဟရန္တိ, တေသံ စိတ္တံ အနုနယပ္ပဋိဃေန န ဝိဟရတိ အနုနယပ္ပဋိဃေန စာဘိရမမာနဿ စိတ္တံ သမဂ္ဂတံ ဘဝိဿတီတိ ဘာဝနာယ ဗလမေတံ, အယံ ဝိစယော ဟာရော။

တတ္ထ ကတမော ယုတ္တိဟာရော? ကာယဘာဝနာယ စ စိတ္တဘာဝနာယ စ န ကိဉ္စိ သဗြဟ္မစာရီ အတိမညိဿတီတိ။ အတ္ထိ ဧသာ ယုတ္တိ, အယံ ယုတ္တိဟာရော။

တတ္ထ ကတမော ပဒဋ္ဌာနော ဟာရော? ကာယဘာဝနာယ ပဌမဿ သတိ ဥပဋ္ဌာနဿ ပဒဋ္ဌာနံ။ ယာ ပထဝီသမစိတ္တတာ, သာ အနိစ္စာနုပဿနာယ ပဒဋ္ဌာနံ။

တတ္ထ ကတမော လက္ခဏော? ယံ ပထဝီသမေန စေတသာ ဝိဟရတိ အတ္တာနုပဿီ ပထဝီသမေန ဂိဟီ ဝိဟရတိ။ ကော အတ္ထော ပထဝီသမေနာတိ? ယထာ ယေ စ သေလောပမတာယ အကမ္မယုတ္တာ ဧဝမေဝ ပထဝီသမော အယံ ဟိရိယတာယ။ အယံ လက္ခဏော။

တတ္ထ ကတမော စတုဗ္ယူဟော ဟာရော? ဣမမှိ ဗျာကရဏေ ကော တဿ အာယသ္မတော အဓိပ္ပါယော? ယေ ကေစိ အရဟန္တာ ဣန္ဒ္ရိယဘာဝနံ အာကင္ခိယန္တိ, တေ ပထဝီသမတံ ဥပ္ပါဒယိဿန္တီတိ။ အယံ အဓိပ္ပါယော။

တတ္ထ ကတမော အာဝဋ္ဋောတိ? နတ္ထိ အာဝဋ္ဋဿ ဘူမိ။

တတ္ထ ကတမော ဝိဘတ္တိ? ယော ကာယာနုပဿီ ဝိဟရတိ, သော ပထဝီသမစိတ္တတံ ပဋိလဘိဿတီတိ န ဧကံသေန။ ကိံ ကာရဏံ? ယေ ခဏ္ဍကာဒိဆိန္နကာဒိနော, န တေ ပထဝီသမစိတ္တတံ ပဋိလဘန္တိ။ သဗ္ဗာ ကာယဂတာသတိ သေက္ခဘာဝနာယ နိဗ္ဗာနံ ဖလံ, အယံ ဝိဘတ္တိ။

တတ္ထ ကတမော ပရိဝတ္တနော ဟာရော? ယေ ကာယာနုပဿိနော ဝိဟရိဿန္တိ, တေသံယေဝ ကာယပစ္စယာ ဥပ္ပဇ္ဇေယျ အာသဝါ ဝိဃာတပရိဠာဟာ, အယံ ပရိဝတ္တနော ဟာရော။

တတ္ထ ကတမော ဩတရဏော? ပဉ္စက္ခန္ဓာ [သတ္တေသု စ ပဉ္စက္ခန္ဓာ (ဣ။)] အဝိတိဏ္ဏာ [အဝတိဏ္ဏာ (ဣ။)] ဗာဝီသတိန္ဒ္ရိယာနိ, တထာ ယံ မနိန္ဒ္ရိယံ, တံ မနောဓါတု မနာယတနဉ္စ။ ယံ သမာဓိန္ဒ္ရိယံ, တံ ဓမ္မဓါတု ဓမ္မာယတနဉ္စ။ အယံ ဩတရဏော ဟာရော။

တတ္ထ ကတမော သောဓနော ဟာရော? ယေ စ မနသာ စတ္တာရော ဘာဝေတဗ္ဗာ, တေ သဗ္ဗေ ဘာဝိတာ ယံ တံ မနေန ပဟီနေ ပတ္တဗ္ဗတံ သဗ္ဗတ္ထ ဧတဿ စ အတ္ထာယ အာရမ္ဘော, သော အတ္ထော သုဒ္ဓေါ။ အယံ သောဓနော ဟာရော။

တတ္ထ ကတမော အဓိဋ္ဌာနော? အယံ သမာဓိ ဧကတ္တတာယ ပညတ္တော, ဆ ကာယာ ဧကတ္တတာယ ပညတ္တာ။ ပဉ္စိန္ဒ္ရိယာနိ ရူဣနိ ရူပကာယော။ ဆ ဝေဒနာကာယာ ဝေဒနာကာယော။ ဆ သညာကာယာ သညာကာယော။ ဆ စေတနာကာယာ စေတနာကာယော။ ဆ ဝိညာဏကာယာ ဝိညာဏကာယော။ သဗ္ဗေပိ ဧတေ ဓမ္မာ ဓမ္မကာယောတိယေဝ သင်္ခံ ဂစ္ဆန္တိ။ အယံ အဓိဋ္ဌာနော။

ပရိက္ခာရောတိ သမာပတ္တိကောသလ္လဉ္စ ဝီထိကောသလ္လဉ္စ [ဓီတိကောသလ္လဉ္စ (ဣ။)] ဟေတု။ ယဉ္စ ဂေါစရကောသလ္လံ ယဉ္စ ကလ္လံ တံ ကောသလ္လံ ပစ္စယော။ ဝေါဒါနကောသလ္လံ ဟေတု, ကလ္လံ ပစ္စယော။ သုခံ ဟေတု, အဗျာပဇ္ဇံ ပစ္စယော။ အယံ ပရိက္ခာရော။

တတ္ထ ကတမော သမာရောပနောတိ? ယထာ ပထဝီ သုစိမ္ပိ နိက္ခီပန္တေ အသုစိမ္ပိ နိက္ခိတ္တေ တာဒိသေယေဝ ဧဝံ ကာယော မနာပိကေဟိပိ ဖဿေဟိ အမနာပိကေဟိပိ ဖဿေဟိ တာဒိသောယေဝ ပဋိဃသမ္ဖဿေန ဝါ သုခါယ ဝေဒနာယ တာဒိသံ ယော စိတ္တံ။ ဣဒံ သုတ္တံ ဝိဘတ္တံ သဩပမ္မံ ဥဂ္ဃဋိတညုဿ ပုဂ္ဂလဿ ဝိဘာဂေန။ တတ္ထ သမာရောပနာယ အဝကာသော နတ္ထိ။

၁၀၀။ တတ္ထ ကတမံ သုတ္တံ သံကိလေသဘာဂိယံ? ယတော စ ကုသလေဟိ ဓမ္မေဟိ န ဝိရောဓတိ, န ဝဍ္ဎတိ, ဣမံ အာဒီနဝံ ဘဂဝါ ဒေသေတိ, တသ္မာ ဆန္နံ ဝိဝရေယျ, ဝိဝဋံ နာတိဝဿတိ, တတော အာဒီနဝတော ဝိဝရေယျာတိ တံ တီဟိ ဓမ္မေဟိ နာဘိဓံသိတာတိ အသုဘသညာယ ရာဂေန နာဘိဓံသိယတိ။ မေတ္တာယ ဒေါသေန နာဘိဓံသိယတိ။ ဝိပဿနာ မောဟေန နာဘိဓံသိယတိ။ ဧဝဉ္စဿ ယော ယော ဓမ္မော ပဋိပက္ခော တမှိ တမှိ ဓမ္မေ ပရိပူရိဿတိ။ ယော တဿ ဓမ္မဿ အကုသလော ဓမ္မော ပဋိပက္ခော, တေန နာဓိဝါသိယတိ။

အပရော ပရိယာယော။ ယေ ဣမေ ဓမ္မာ အတ္တနာ န သက္ကောတိ ဝုဋ္ဌာနံ, တေ ဧတေ ဓမ္မာ ဒေသိတာ။ ဆန္နမတိဝဿတီတိ တေဟိ ဝိတက္ကံ ယေန စ သက္ကာ ပုန ဒေသိတံ စိတ္တံ ဝိဘာဝေတုံ ပရိယောဒါပေတုံ ဝိဝေကနိန္နဿ ဝိဝေကပေါဏဿ ဝိဝေကပဗ္ဘာရဿ ဝုဒ္ဓိံ ဝိရူဠှိံ ဝေပုလ္လတံ အာပဇ္ဇတိ ကုသလေသု ဓမ္မေသု, သေယျထာပိ နာမ ဥပ္ပလံ ဝါ ကုမုဒံ ဝါ ပဒုမံ ဝါ ဥဒကေ သုက္ကပက္ခေ စန္ဒော ယာဝရတ္တိ ယာဝဒိဝသော အာဂစ္ဆတိ, တဿ ဝုဒ္ဓိယေဝ ပါဋိကင္ခိတဗ္ဗာ, န ပရိဟာနိ, ဧဝံဝိဓံ တံ စိတ္တံ နာဘိဓံသိယတိ။ အပရောပေတ္ထ ယော အကူဋော အသဌော အမာယာဝီ ဥဇု ပုရိသော ယထာဘူတံ အတ္တာနံ အာဝိကရောတိ။ တတ္ထ ယော ဆာဒေတိ တဿ အကုသလာ ဓမ္မာ စိတ္တံ အနုဓါဝန္တိ။ ဆန္နမတိဝဿတီတိ ယော ပန ဟောတိ အသဌော အကူဋော အမာယာဝီ ဥဇု ပုရိသော ယထာဘူတံ အတ္တာနံ အာဝိကရောတိ။ တဿ စိတ္တံ အကုသလေဟိ ဓမ္မေဟိ န ဝိဒ္ဓံသိယတိ, အယံ သုတ္တတ္ထော။

၁၀၁။ တတ္ထ ကတမာ ဒေသနာ? ဣဓ ဒေသိတာ ဒသ အကုသလကမ္မပထာ အဓိဝဿနတာယ ဒသ ကုသလကမ္မပထာ အနဓိဝဿနတာယ အကုသလေဟိ န ဝိသုဇ္ဈတိ။ ယထာ ဝုတ္တံ ဘဂဝတာ ‘‘စိတ္တသံကိလေသာ, ဘိက္ခဝေ, သတ္တာ သံကိလိဿန္တီ’’တိ။

တတ္ထ ကတမော ဝိစယော? ယဿေဝံ စိတ္တံ အဓိဝါသိယတိ, တဿ ဗုဇ္ဈိတဿ ယံ ဘဝေယျ ကူဋေယျ, တံ အာနန္တရိယေနပိ သတ္ထရိ ဝါ ဂုဏာနုကမ္ပနတာယ, အယံ ဝိစယော။

တတ္ထ ကတမာ ယုတ္တီတိ? ဧဝံ အနဓိဝသိယန္တံ စိတ္တံ ဝုဋ္ဌာတိ။ ဝုဋ္ဌိတံ ပတိဋ္ဌဟတိ ကုသလေသု ဓမ္မေသူတိ အတ္ထိ ဧသာ ယုတ္တိ။

ပဒဋ္ဌာနန္တိ ဆန္နမတိဝဿတီတိ ဆန္နံ အသံဝရာနံ ပဒဋ္ဌာနံ, ဝိဝဋံ နာတိဝဿတီတိ အဆန္နံ သံဝရဏာနံ။ တသ္မာ ဆန္နံ ဝိဝရေယျ ဝိဝဋံ နာတိဝဿတီတိ ဒေသနာယ ပဒဋ္ဌာနံ။

လက္ခဏောတိ ဆန္နမတိဝဿတီတိ ယေ ကေစိ ဝိစိတ္တေန ဆန္နေန ဧကလက္ခဏာ ဓမ္မာ သဗ္ဗေ တေ အဝိဒ္ဓံသိယန္တိ။ တသ္မာ ဆန္နံ ဝိဝရေယျ။ ဝိဝဋံ နာတိဝဿတီတိ ယေ ကေစိ တေန အစ္ဆန္နေန ဧကလက္ခဏာ ဓမ္မာ သဗ္ဗေ တေ နာတိဝဿန္တီတိ လက္ခဏော ဟာရော။

တတ္ထ ကတမော စတုဗ္ယူဟော ဟာရော? ဣမမှိ သုတ္တေ ဘဂဝတော ကော အဓိပ္ပါယော? ယေသံ ကေသဉ္စိ စိတ္တံ အကုသလာ ဓမ္မာ အဓိပဋိဒေသိတာ တေ ယထာဓမ္မံ ပဋိကရိဿန္တီတိ အယံ တတ္ထ ဘဂဝတော အဓိပ္ပါယော။ အယံ စတုဗ္ယူဟော ဟာရော။

အာဝဋ္ဋောတိ ယံ ဆန္နံ တံ ဒုဝိဓံ ကမ္ပမာနံ သမုစ္ဆိတဗ္ဗော။ အာနန္တရိယသမာဓီနံ။ တတ္ထ ပဿဒ္ဓိယဉ္စ မာနော အာသဝေ ဝဍ္ဎေတိ, အဿဒ္ဓိယေန စ ပမာဒံ ဂစ္ဆတိ, ပမာဒေန ဩနမတိ, ဥန္နဠဘာဝံ ဂစ္ဆတိ။ ဝုတ္တံ စေတံ ဘဂဝတာ ‘‘ဥန္နဠာနံ ပမတ္တာနံ တေသံ ဝဍ္ဎန္တိ အာသဝါ’’တိ စတ္တာရိ တာနိ ဥပါဒါနာနိ, ယာနိ စတ္တာရိ ဥပါဒါနာနိ, တေ ပဉ္စုပါဒါနက္ခန္ဓာ ဘဝန္တိ။ ဣမာနိ သစ္စာနိ ဒုက္ခဉ္စ သမုဒယော စ။ တသ္မာ ဆန္နံ ဝိဝရေယျာတိ ယေန ဟေတုနာ, တေ အာသဝါ ဝဍ္ဎန္တိ။ တေသံ ပဟီနတ္တာ အာသဝါ ပဟီယန္တေ။ တတ္ထ အပ္ပမာဒေန အဿဒ္ဓိယံ ပဟီယတိ ဥဒ္ဓစ္စကုက္ကုစ္စပ္ပဟာနေန ဩဠာရိကတာ တဿ ဒွေ ဓမ္မာ န သမထော စ ဘာဝနာ စ ပါရိပူရိံ ဂစ္ဆန္တိ။ ယော တေသံ အာသဝါနံ ခယော, အယံ နိရောဓေါ။ ဣမာနိ စတ္တာရိ သစ္စာနိ, အယံ အာဝဋ္ဋော။

တတ္ထ ကတမော ဝိဘတ္တိ ဟာရော? ဆန္နမတိဝဿတီတိ န ဧကံသော။ ကိံ ကာရဏံ? ယဿ အဿာ နိဝတ္တနာ ယထာပိ သေက္ခာနံ။ ယထာဝုတ္တံ ဘဂဝတာ –

‘‘ကိဉ္စာပိ သေက္ခော ပကရေယျ ပါပံ၊ ကာယေန ဝါစာယ ဥဒ စေတသာ ဝါ။

အဘဗ္ဗော ဟိ တဿ ပရိဂုဟနာယ၊ အဘဗ္ဗတာ ဒိဋ္ဌပဒဿ ဟောတီ’’တိ။

ကိဉ္စာပိ တေသံ နိဝါရဏံ စိတ္တံ ဟောတိ။ အပိ တု အပ္ပစ္စယာ သမာယေ စ တေ နိဒ္ဒိသိတဗ္ဗာ, အယံ ဝိဘတ္တိဟာရော။

တတ္ထ ကတမော ပရိဝတ္တနော ဟာရော။ ဆန္နမတိဝဿတီတိ ယဿ ယေ ဓမ္မာ သဗ္ဗံ အနဝိဝဋံ အတိဝဿိယတိ, ဝိဝဋံ နာတိဝဿတိ, အဝဂုဏန္တံ နာတိဝဿတိ။ အယံ ပရိဝတ္တနော ဟာရော။

တတ္ထ ကတမော ဝေဝစနော ဟာရော။ ဆန္နန္တိ အာဝုတံ နိဝုတံ ပိဟိတံ ပဋိကုဇ္ဇိတံ သဉ္ဆန္နံ ပရောဓံ, ဝိဝဋံ နာတိဝဿတီတိ ယဿ တေ ဓမ္မာ ပဗ္ဗဇ္ဇိတာ ဝိနောဒံ နာဓိဝဿိတာ ဝန္တိကတာတိ, အယံ ဝေဝစနော ဟာရော။

တတ္ထ ကတမော ပညတ္တိ ဟာရော။ ဆန္နမတိဝဿတီတိ ကိလေသဘာဂိယပညတ္တံ ဝိဝဋံ နာတိဝဿတီတိ သဓမ္မကိစ္စံ ယံ ပဋိပဒါ ပညတ္တိယာ ပညတ္တံ, တသ္မာ ဟိ ဆန္နံ ဝိဝရေယျာတိ အနုသာသနပညတ္တိယာ ပညတ္တံ, ဝိဝဋံ နာတိဝဿတီတိ နိဒ္ဓါနပညတ္တိယာ ပညတ္တံ, အယံ ပညတ္တိ ဟာရော။

တတ္ထ ကတမော ဩတရဏော ဟာရော? ဆန္နမတိဝဿတီတိ တယော ကိလေသာ ရာဂေါ ဒေါသော မောဟော, တေ ခန္ဓေသု သင်္ခါရက္ခန္ဓော။ပေ။။ တေ ပုရာ ယထာ နိဒ္ဒိဋ္ဌံ ခန္ဓဓါတုအာယတနေသု, အယံ ဩတရဏော ဟာရော။

တတ္ထ ကတမော သောဓနော ဟာရော? ယေနာရမ္ဘေန ဣဒံ သုတ္တံ ဘာသတိ သော အာရမ္ဘော နိယုတ္တော။

အဓိဋ္ဌာနောတိ ဆန္နမတိဝဿတီတိ ဧကတ္တတာယ ပညတ္တံ။ ကိံကာရဏံ? ဣဒံ ဟိ အတိဝဿတီတိ ဣမဿ စ အတိဝဿတိ ဧဝဉ္စ အတိဝဿတီတိ အယံ ဝေမတ္တတာယ ယာ သုဏသာဓါရဏေဟိ လက္ခဏေဟိ ပညာပိယတိ, သာ ဧကတ္တပညတ္တိ။

တတ္ထ ကတမော ပရိက္ခာရော? ယဉ္စ တံ အတိဝဿိယန္တိ, တဿ ဒွေ ဟေတူ ဒွေ ပစ္စယာ အကုသလပသုတေဝ ဝါစကတ္တာဘိရတိ စ။ ဣမေ ဒွေ အယောနိသောမနသိကာရော စ ကုသလာ ဓမ္မာ ဝေါပသဂ္ဂါ စ, ဣမေ ဒွေ ပစ္စယာ။

တတ္ထ ကတမော သမာရောပနော? ဆန္နမတိဝဿတီတိ ဝေမတိ ပဿတီတိ ဆန္နံ ယံ ပရိဂ္ဂဟိတုံ ယံ အဒေသိတုံ အပ္ပဿုတံ ယံ ကထံကထာ ဝိဘူတေန အကုသလမူလေန ယံ တဏှာယ စ တေ ဝဍ္ဎတိ ဒေါသာတိ သန္နိတွာ တေ အပ္ပသက္ခယေန သင်္ခါရာ။ သင်္ခါရပစ္စယာ ဝိညာဏံ ယာဝ ဇရာမရဏံ, အယံ သမာရောပနော ။ ယံ ပုန တထာ ဒေသနာ, တဿေဝ အကုသလာ ဓမ္မာ ဝုဒ္ဓိံ ဝိရူဠှိံ ဝေပုလ္လတမာပဇ္ဇတိ တဿ သင်္ခါရာ နိရောဓါ, အယံ သမာရောပနော။

၁၀၂။ စတ္တာရော ပုဂ္ဂလာ [ပဿ အ။ နိ။ ၄။၈၅] တမော တမပရာယနောတိ။ပေ။။ တတ္ထ ကတမော ဝုစ္စတေ တမော နာမ? ယော တမော အန္ဓကာရော, ယထာ ဝုတ္တံ ဘဂဝတာ ‘‘ယထာ အန္ဓကာရေ တသ္မိံ ဘယာနကေ သကမ္ပိဓါတုပုရိသော န ပဿတိ, ဧဝမေဝ အညာဏတော တမောပနန္ဓကာရော ပါပကသကမ္မသဝိပါကံ န သဒ္ဓေါ ဟောတိ။ ဣတိ ဧဝံ လက္ခဏတာ အညာဏံ တမော အဝိဇ္ဇာ မောဟော, ယေန သတ္တာ ယထာဘူတံ နပ္ပဇာနန္တိ, ဣတိ ဝုစ္စတိ တမောတိ။ သော တိဏ္ဏံ စက္ခူနံ တမော မံသစက္ခုနော ဒိဗ္ဗစက္ခုနော ပညာစက္ခုနော, ဣမေသံ စက္ခူနံ ဣဓ တမော နိဒ္ဒိသိယတိ အညာဏန္တိ။ တတ္ထ ကတမံ အညာဏံ အဒဿနံ? အထ နိဿယေ ယံ ပုဗ္ဗန္တေ အညာဏံ အပရန္တေ အညာဏံ ပုဗ္ဗန္တာပရန္တေ အညာဏံ ဟေတုမှိ အညာဏံ ပစ္စယမှိ အညာဏံ တဿ အညာဏိနော သမာဓိဘူတဿ ဧသော နိဿန္ဒော။ ယံ န ဇာနာတိ ဣဒံ သေဝိတဗ္ဗံ ဣဒံ န မနသိကာတဗ္ဗန္တိ။ သော တေန တမေန နိဒ္ဒိသိယတိ တမောပိ ယထာ ဝုစ္စတိ။ မူဠ္ဟောတိ ဧဝံ စေတနာ။ တေန တမေန သော ပုဂ္ဂလော ဝုစ္စတိ။ တမောတိ သော တေန တမေန အသမူဟတေန အသမုစ္ဆိန္နေန တပ္ပရမော ဘဝတိ တပ္ပရာယနော, အယံ ဝုစ္စတိ ပုဂ္ဂလော တမော တမပရာယနောတိ။ ပရာယနောယေဝ ဓမ္မော မနသိကာတဗ္ဗော သော တမော ဒဟတိ အညစိတ္တံ ဥပဋ္ဌပေတိ။ တေ စဿ ဓမ္မာ နိဇ္ဈာနက္ခမန္တိ။ သော သုတမယာယ ပညာယ သမနုပဿတိ။

တတ္ထ ကတမော တမော ဇောတိပရာယနော? သော တေန ပညာဝသေန ဣရိယတိ ဧဝံ တဿေဝ ဣရိယန္တဿ ပရာယနော ဘဝတိ။ အယံ ဝုစ္စတေ ပုဂ္ဂလော တမော ဇောတိပရာယနော။

တတ္ထ ကတမော ပုဂ္ဂလော ဇောတိ ဇောတိပရာယနော [ဇောတိပရာယနော (ဣ။)]? တတ္ထ ဝုစ္စတိ ဇောတိ နာမ ယံ တဿ စေ တမဿ ပဋိပက္ခေန ယေ စ ဓမ္မေ အန္တမသော ဉာဏာလောကော, သော သုဏဓမ္မော ပုဂ္ဂလော တမော ဇောတိပရာယနော, တတ္ထ ဝုစ္စတေ, ယောယံ ပုဂ္ဂလော တမော ဇောတိပရာယနော, သော ယဒိ တထာရူပံ ကလျာဏမိတ္တံ ပဋိလဘတိ, ယော နံ အကုသလတော စ နိဝါရေတိ ဘာဝိတကုသလတာဝ ဘာဝီ နိယောဇေတီတိ ။ ဧဝဉ္စ သဒ္ဓမ္မံ ဒေသေတိ။ ဣမေ ဓမ္မာ ကုသလာ, ဣမေ ဓမ္မာ အကုသလာ။ ဣမေ ဓမ္မာ သာဝဇ္ဇာ, ဣမေ ဓမ္မာ အနဝဇ္ဇာ။ ဣမေ ဓမ္မာ သေဝိတဗ္ဗာ, ဣမေ ဓမ္မာ န သေဝိတဗ္ဗာ။ ဣမေ ဓမ္မာ ဘဇိတဗ္ဗာ, ဣမေ ဓမ္မာ န ဘဇိတဗ္ဗာ။ ဣမေ ဓမ္မာ ဥပသမ္ပဇ္ဇ ဝိဟာတဗ္ဗာ, ဣမေ ဓမ္မာ န ဥပသမ္ပဇ္ဇ ဝိဟာတဗ္ဗာ။ ဣမေ ဓမ္မာ မနသိကာတဗ္ဗာ, ဣမေ ဓမ္မာ န မနသိကာတဗ္ဗာတိ။ ပစ္စတေ သညာယ ယထာ သညာယတိ သတိန္ဒ္ရိယာနိ, သော ဧဝံ ပဇာနာတိ။ ဣမေ ဓမ္မာ ကုသလာ, ဣမေ ဓမ္မာ အကုသလာ။ ဣမေ ဓမ္မာ သာဝဇ္ဇာ, ဣမေ ဓမ္မာ အနဝဇ္ဇာ။ ဣမေ ဓမ္မာ သေဝိတဗ္ဗာ, ဣမေ ဓမ္မာ န သေဝိတဗ္ဗာ။ ဣမေ ဓမ္မာ ဘာဝေတဗ္ဗာ, ဣမေ ဓမ္မာ န ဘာဝေတဗ္ဗာ။ ဣမေ ဓမ္မာ ဥပသမ္ပဇ္ဇ ဝိဟာတဗ္ဗာ, ဣမေ ဓမ္မာ န ဥပသမ္ပဇ္ဇ ဝိဟာတဗ္ဗာ။ ဣမေ ဓမ္မာ မနသိကာတဗ္ဗာ, ဣမေ ဓမ္မာ န မနသိကာတဗ္ဗာတိ။ သော တေ ဓမ္မေ သုသုယျတိ, သောတံ ဩဒဟတိ, အညံ စိတ္တံ ဥပဋ္ဌပေတိ, တေ စဿ ဓမ္မာ နိဇ္ဈာနက္ခမန္တိ, သော သုတမယာယ ပညာယ သမန္နာဂတော သော တေန ပစ္စယဝသေန ဣရိယတိ ဧဝံ တဿေဝ ဣရိယန္တိ တပ္ပရမော ဘဝတိ တပ္ပရာယနော။ အယံ ဝုစ္စတေ ပုဂ္ဂလော တမော တမပရာယနော။

တတ္ထ ကတမော ပုဂ္ဂလော ဇောတိ တမပရာယနော? ဇောတိ နာမ ယာ တဿေဝ တမဿ ပဋိပက္ခေန ယေ ဓမ္မာ အန္တမသော ဉာဏာလောကော, သော ပုန ဓမ္မော။ ကတမာ ဥစ္စတေ? ပညာယတော ပဏ္ဍိတောတိ ဝုစ္စတေ, သော ဧဝံ ပဇာနာတိ။ ဣမေ ဓမ္မာ ကုသလာ, ဣမေ ဓမ္မာ အကုသလာ။ ဣမေ ဓမ္မာ သာဝဇ္ဇာ, ဣမေ ဓမ္မာ အနဝဇ္ဇာ။ ဣမေ ဓမ္မာ သေဝိတဗ္ဗာ, ဣမေ ဓမ္မာ န သေဝိတဗ္ဗာ။ ဣမေ ဓမ္မာ ဘာဝိတဗ္ဗာ, ဣမေ ဓမ္မာ န ဘာဝိတဗ္ဗာ။ ဣမေ ဓမ္မာ ဥပသမ္ပဇ္ဇ ဝိဟာတဗ္ဗာ, ဣမေ ဓမ္မာ န ဥပသမ္ပဇ္ဇ ဝိဟာတဗ္ဗာ။ ဣမေ ဓမ္မာ မနသိကာတဗ္ဗာ, ဣမေ ဓမ္မာ န မနသိကာတဗ္ဗာ။ ဣဓ ပန ပါပမိတ္တသံသေဝနော ပါပမိတ္တဝသာနုဂေါ အကုသလေ ဓမ္မေ အဘိဝဍ္ဎေတိ, ကုသလေ ဓမ္မေ ပဇဟတိ။ သော တေန ပမာဒေန ပစ္စယသညာ အမနသိကတွာ အဿတိအသမ္ပဇညံ အာသေဝတိ။ တယာ ယော ပဋိပက္ခော တမော, သော ပဝဍ္ဎေတိ။ သော တမာဘိဘူတော ပရာယနော တမပရမော စေဝ ဘဝတိ။ အယံ ဝုစ္စတိ ပုဂ္ဂလော ဇောတိ တမပရာယနော။

၁၀၃။ တတ္ထ ကတမော ပုဂ္ဂလော ဇောတိ ဇောတိပရာယနော? တတ္ထ ဝုစ္စတေ သောယံ ပုဂ္ဂလော ကလျာဏမိတ္တဿ သန္နိဿိတော ဘဝတိ သက္ကာ သံယောဂီ ကုသလံ ဂဝေသီ, သော ကလျာဏမိတ္တေ ဥပသင်္ကမိတွာ ပရိပုစ္ဆတိ, ပရိပဉ္ဟယတိ? ကိံ ကုသလံ, ကိံ အကုသလံ? ကိံ သာဝဇ္ဇံ, ကိံ အနဝဇ္ဇံ? ကိံ သေဝိတဗ္ဗံ, ကိံ န သေဝိတဗ္ဗံ? ကိံ ဘာဝိတဗ္ဗံ, ကိံ န ဘာဝိတဗ္ဗံ? ကိံ ဥပသမ္ပဇ္ဇ ဝိဟာတဗ္ဗံ, ကိံ န ဥပသမ္ပဇ္ဇ ဝိဟာတဗ္ဗံ? ကိံ မနသိကာတဗ္ဗံ, ကိံ န မနသိကာတဗ္ဗံ? ကထံ သံကိလေသော ဟောတိ, ကထံ ဝေါဒါနံ ဟောတိ? ကထံ ပဝတ္တိ ဟောတိ, ကထံ နိဝတ္တိ ဟောတိ? ကထံ ဗန္ဓော ဟောတိ, ကထံ မောက္ခော ဟောတိ? ကထံ သက္ကာယသမုဒယော ဟောတိ, ကထံ သက္ကာယနိရောဓေါ ဟောတိ? သော ဧတ္ထ ဒေသိတံ ယထာ ဥပဋ္ဌိတံ တထာ သမ္ပဋိပဇ္ဇန္တော သော ဧဝံ ပဇာနာတိ။ ဣမေ ဓမ္မာ ကုသလာ, ဣမေ ဓမ္မာ အကုသလာ။ ဧဝံ။ပေ။။ ယာဝ ကထံ သက္ကာယသမုဒယော ဟောတိ, ကထံ သက္ကာယနိရောဓေါ ဟောတီတိ ဝိတ္ထာရေန ကာတဗ္ဗံ။ သော တေ ဓမ္မေ အဓိပါဋိကင်္ခါတိ ဧဝံ လက္ခဏံ ဉာဏံ ဝိဇ္ဇာ အာလောကံ ဝဍ္ဎေတိ။ သော ပုဂ္ဂလော တပ္ပရမော ဘဝတိ တပ္ပရာယနော, အယံ ဝုစ္စတေ ပုဂ္ဂလော ဇောတိ ဇောတိပရာယနော။

တတ္ထ ကတမော ပုဂ္ဂလော တမော တမပရာယနော? ယော အကုသလံ ဓမ္မံ ဒီပေတိ။ တံ ဘာဝနာယ ဟီနာသု ဂတီသု ဥပပတ္တိံ ဒဿေတိ, တပ္ပရမော ဘဝတိ တပ္ပရာယနော။ အယံ ဝုစ္စတေ ပုဂ္ဂလော တမော တမပရာယနော။

တတ္ထ ယော ပုဂ္ဂလော တမော ဇောတိပရာယနော? သော တမေန အကုသလဿ ကမ္မဿ ဝိပါကံ ဒဿေတိ။ တမေတိ ယံ စက္ခု ကလျာဏမိတ္တဿ ယေန အကုသလေ ဓမ္မေ ပဇဟတိ, ကုသလေ ဓမ္မေ အဘိဝဍ္ဎတိ။

တတ္ထ ယော စ ပဏီတာသု ဂတီသု ဥပပတ္တိံ ဒဿေတိ, တပ္ပရမော တေန ဝုစ္စတေ တမော ဇောတိပရာယနော။

တတ္ထ ယော ပုဂ္ဂလော ဇောတိ တမပရာယနော? ကုသလဿ ကမ္မဝိပါကံ ဒဿေတိ။ ယံ စက္ခု ပါပမိတ္တသံသဂ္ဂေန ပါပမိတ္တုပသေဝေန ပါပမိတ္တဝသာနုဂေါ အကုသလံ ဓမ္မံ အဘိဝဍ္ဎတိ, တံ ဘာဝနာယ ဟီနာသု ဂတီသု ဥပပတ္တိံ ဒဿေတိ။ တပ္ပရမော တေန ဝုစ္စတေ ဇောတိ တမပရာယနော။

တတ္ထ ယော ပုဂ္ဂလော ဇောတိ ဇောတိပရာယနော သော ဇောတိတာ ပဘာတာ [ဇောတိတဘာဝတာယ (ဣ။)] ယာဝ ပဏီတာသု ဂတီသု ဥပပတ္တိံ ဒဿေတိ။ တပ္ပရမော တေနာဟ ဇောတိ ဇောတိပရာယနော။

ဇောတိတမပရာယနေန ဒသ အကုသလာနံ ကမ္မာနံ ဥဒယံ ဒဿေတိ။ တမေန ပုဂ္ဂလေန အကုသလာနံ ကမ္မာနံ ဝိပါကံ ဒဿေတိ။ န အကုသလာနံ ဓမ္မာနံ ဝိပါကံ ဒဿေတိ။ တမေန အဋ္ဌ မိစ္ဆတ္တာနိ ဒဿေတိ။ ဇောတိနာ အဋ္ဌ သမ္မတ္တာနိ ဒဿေတိ။ ဇောတိနာ တမပရာယနေန ဒသ အကုသလကမ္မပထေ ဒဿေတိ။ ဇောတိနာ ပဏီတတ္တံ ဒဿေတိ။ တမေန ဇောတိပရာယနေန အတပနီယံ ဓမ္မံ ဒဿေတိ။ ဇောတိနာ တမပရာယနေန တပနီယံ ဓမ္မံ ဒဿေတိ။ အယံ သုတ္တတ္ထော။

၁၀၄။ တတ္ထ ကတမော ဒေသနာ ဟာရော? ဣမမှိ သုတ္တေ ကိံ ဒေသိတံ? တတ္ထ ဝုစ္စတေ ဣမမှိ သုတ္တေ ကုသလာကုသလာ ဓမ္မာ ဒေသိတာ။ ကုသလာကုသလာနဉ္စ ဓမ္မာနံ ဝိပါကော ဒေသိတော။ ဟီနပ္ပဏီတာနဉ္စ သတ္တာနံ ဂတိ နာနာကာရဏံ ဒေသိတံ။ အယံ ဒေသနာ ဟာရော။

တတ္ထ ကတမော ဝိစယော ဟာရော? အကုသလဿ ကမ္မဿ ယော ဝိပါကံ ပစ္စနုဘောတိ။ တတ္ထ ဌိတော အကုသလေ ဓမ္မေ ဥပ္ပါဒိယတိ ဝိစယန္တံ ယုဇ္ဇတိ။ ကုသလဿ ကမ္မဿ ယော ဝိပါကံ ပစ္စနုဘောတိ။ တတ္ထ ဌိတော ကုသလေ ဓမ္မေ ဥပ္ပါဒိယတိ ဝိစယန္တံ ယုဇ္ဇတိ။ အယံ ဝိစယော ယုတ္တိ စ။

တတ္ထ ကတမော ပဒဋ္ဌာနော ဟာရော? ယော ပုဂ္ဂလော ဇောတိ, သော ပစ္စဝေက္ခဏာယ ပဒဋ္ဌာနံ။ ယော ပုဂ္ဂလော တမော, သော တမာဒိန္နံ ဝါနုပဿနာယ ပဒဋ္ဌာနန္တိ ဒဿေတိ။ တမေန ဇောတိပရာယနေန အပ္ပမာဒဿ ပဒဋ္ဌာနံ ဒဿေတိ, တမော အဝိဇ္ဇာယ စ ဒိဋ္ဌိယာ စ ပဒဋ္ဌာနံ ဒဿေတိ။ ဇောတိနာ တမပရာယနေန ပမာဒဿ စ ဒိဋ္ဌိယာ စ ပဒဋ္ဌာနံ ဒဿေတိ။ အယံ ပဒဋ္ဌာနော။

တတ္ထ ကတမော လက္ခဏော ဟာရော? တမေန တမပရာယနေန တမောတိ အဝိဇ္ဇာယ နိဒ္ဒိဋ္ဌာယ သဗ္ဗကိလေသဓမ္မာ နိဒ္ဒိဋ္ဌာ ဟောန္တိ။ တမေန ဇောတိပရာယနေန ဇောတိဝိဇ္ဇာယ နိဒ္ဒိဋ္ဌာယ သဗ္ဗေ ဗောဓိပက္ခိယဓမ္မာ နိဒ္ဒိဋ္ဌာ ဟောန္တိ။ ဇောတိတမပရာယနေန ပမာဒေါ နိဒ္ဒိဋ္ဌော ဟောတိ။ တမေန ဇောတိပရာယနေန အပ္ပမာဒေါ နိဒ္ဒိဋ္ဌော ဟောတိ။ အယံ လက္ခဏော ဟာရော။

တတ္ထ ကတမော စတုဗ္ယူဟော ဟာရော? ဣမမှိ သုတ္တေ ဘဂဝတော ကော အဓိပ္ပါယော? ယေ သတ္တာ နီစကုလိနော, န တေ ဣမံ သုတွာ ကုသလေ ဓမ္မေ သမာဒါယ ဝတ္တိဿန္တိ။ ယေ သတ္တာ ဥစ္စကုလိနော, တေ ဣမံ ဓမ္မဒေသနံ သုတွာ ဘိယျောသော မတ္တာယ ကုသလေ ဓမ္မေ သမာဒါယ ဝတ္တိဿန္တီတိ။ အယံ စတုဗ္ယူဟော ဟာရော။ ဘူမိယံ ဥပဒေသော။

တတ္ထ ကတမော အာဝဋ္ဋော ဟာရော? ယာ အဝိဇ္ဇာတော ပဘူတိ တဏှာ, အယံ သမုဒယော။ ယော တမော တမပရာယနော, ဣဒံ ဒုက္ခံ။ ဣမာနိ ဒွေ သစ္စာနိ ဒုက္ခဉ္စ သမုဒယော စ ဇောတိ ယေန သုတ္တေန ဓမ္မေန ပညာပိယတိ, သော ဓမ္မော ပညိန္ဒ္ရိယဿ ပဒဋ္ဌာနံ။ တေန အမောဟေန တီဏိ ကုသလမူလာနိ ပါရိပူရိံ ဂစ္ဆန္တိ သဂ္ဂဿ ပဒဋ္ဌာနံ။

တတ္ထ ကတမာ ဝိဘတ္တိ? တမော တမပရာယနောတိ န ဧကံသေန။ ကိံ ကာရဏံ? အတ္ထိ တမော စ ဘဝေါ အပရာပရိယဝေဒနီယေန စ ကုသလေန ဇောတိနာ ပုဂ္ဂလေန သဟောပတ္တိဘာဝေ။ အတ္ထိ ဇောတိ စ ဘဝေါ အပရာပရိယဝေဒနီယေန စ အကုသလေန တမေန ပုဂ္ဂလေန သဟောပတ္တိဘာဝေ ပရိဝတ္တနာ တမေသု ပဋိပက္ခောတိ ဇောတိနာ တမပရာယနော။

တတ္ထ ကတမော ဝေဝစနော? ယော တမော, သော ဧဝံ အတ္တဗျာပါဒါယ ပဋိပန္နော, သော အဿဒ္ဓါယ ဗာလော အကုသလော အဗျတ္တော အနာဒီနဝဒဿီ။ ယော ဇောတိ, သော အတ္တဟိတာယ ပဋိပန္နော ပဏ္ဍိတော ကုသလော ဗျတ္တော အာဒီနဝဒဿီ။ အယံ ဝေဝစနော။

တတ္ထ ကတမာ ပညတ္တိ? သော ပုဂ္ဂလော ဝိပါကပညတ္တိယာ ပညာပိယတိ, အကုသလေ ပရိယာဒိန္နတာ ပညာပိယတိ။ ဇောတိကုသလဓမ္မုပပတ္တိပညတ္တိယာ ပညာပိယတိ ကုသလဓမ္မဝိပါကပညတ္တိယာ စာတိ။

ဩတရဏောတိ ယေ အဝိဇ္ဇာပစ္စယာ သင်္ခါရာ ယဉ္စ ဇရာမရဏံ ယာ စ အဝိဇ္ဇာ, တံ ပဒဋ္ဌာနံ, နိဒ္ဒေသေန ဝိဇ္ဇုပ္ပါဒေါ အဝိဇ္ဇာနိရောဓေါ ယော ယာဝ ဇရာမရဏနိရောဓေါ, ဣမေ ဒွေ ဓမ္မာ သင်္ခါရက္ခန္ဓပရိယာပန္နာ။ ဓမ္မဓါတု ဓမ္မာယတနဉ္စ ပဒဋ္ဌာနံ နိဒ္ဒေသေန ဓါတူသု။

တတ္ထ ကတမော သောဓနော? ဣမဿ သုတ္တဿ ဒေသိတဿ အာရမ္ဘော။ အဓိဋ္ဌာနောတိ တမောတိ ဘဂဝါ ဗြဝီတိ, န ဧကံ ပုဂ္ဂလံ ဒေသေတိ။ ယာဝတာ သတ္တာနံ ဂတိ, တတ္ထ ယေ ဒုစ္စရိတဓမ္မေန ဥပပန္နာ, တေ ဗဟုလာဓိဝစနေန တမော နိဒ္ဒိသတိ။ ယာ ဇောတိ သဗ္ဗသတ္တေသု ကုသလဓမ္မောပပတ္တိ သဗ္ဗံ တံ ဇောတီတိ အဘိလပတိ အယမေကတာ ပစ္စယော ယောနိသောမနသိကာရပညတ္တိ စတုန္နံ မဟာဘူတာနံ ပုဂ္ဂလာနံ။

တတ္ထ ကတမော ပရိက္ခာရော? အကုသလဿ ပါပမိတ္တတာ ပစ္စယော, အယောနိသော မနသိကာရော ဟေတု။ ကုသလဿ ကလျာဏမိတ္တတာ ပစ္စယော, ယောနိသော မနသိကာရော ဟေတု။

တတ္ထ ကတမာ သမာရောပနာတိ? ဣဓေကစ္စော နီစေ ကုလေ ပစ္စာဇာတော ဟောတီတိ နီစေ ကုလေ ပစ္စာဇာတော ရူပေသု သဒ္ဒေသု ဂန္ဓေသု ရသေသု ဖဿေသု, သော ဥပပန္နော သဗ္ဗမှိ မာနုဿကေ ဥပဘောဂပရိဘောဂေ။ ဇောတိ ပဏီတေသု ကုသလေသု ဥပပန္နော သဗ္ဗမှိ မာနုဿကေ ဥပဘောဂပရိဘောဂေ ဥပပန္နောတိ။

၁၀၅။ တတ္ထ ကတမံ သံကိလေသဘာဂိယံ နိဗ္ဗေဓဘာဂိယံ စ သုတ္တံ? န တံ ဒဠှံ ဗန္ဓနမာဟု ဓီရာတိ ဂါထာ။ ကေန ကာရဏေန တံ ဗန္ဓနံ ဒဠှံ? စတူဟိ ကာရဏေဟိ ဣဿရိယေန သက္ကာ မောစေတုံ ဓနေန ဝါ အညေန ဝါ ယာစနာယ ဝါ ပရာယနေန ဝါ။ ယေသု စ အယံ ရာဂေါ မဏိကုဏ္ဍလေသု ပုတ္တေသု ဒါရေသု စ ယာ အပေက္ခာ, ဣဒမဿ စေတသိကဗန္ဓနံ။ တံ န သက္ကာ ဣဿရိယေန ဝါ ဓနေန ဝါ အညေန ဝါ ယာစနာယ ဝါ ပရာယနေန ဝါ မောစေတုံ။ န စ တတ္ထ ကောစိ အတ္ထိ ပါဋိဘောဂေါ။ ဣမိနာ ဗန္ဓနတော မောစယိတ္ထာတိ ဒေဝေါ ဝါ မနုဿော ဝါ တဒိဒံ ဗန္ဓနံ ရာဂါနုသယေန စ ဆသု ဗာဟိရေသု စ အာယတနေသု ဗန္ဓတိ။ ရူပေသု ရူပတဏှာ ဗန္ဓတိ, ယာဝ ဓမ္မေသု ဓမ္မတဏှာ။ ယော ဣဓ လောကေ ဗန္ဓော ပရလောကသ္မိံ ဗန္ဓော နီယတိ။ သော ဗန္ဓော ဇာယတိ, ဗန္ဓော မီယတိ။ ဗန္ဓော အသ္မာ လောကာ ပရံ လောကံ ဂစ္ဆတိ။ န သက္ကာ မောစေတုံ အညတြ အရိယမဂ္ဂေန ဣမဉ္စ ဗန္ဓနံ။ မရဏဘာဝဉ္စ ဥပပတ္တိဘာဝဉ္စ ဘယတော ဝိဒိတွာ ဆန္ဒရာဂံ ပဇဟတိ။ သော ဣမံ ဆန္ဒရာဂံ ပဇဟိတွာ အတိက္ကမတိ။ အယဉ္စ လောကော ဣတော ပရံ ဒုတိယော။

တတ္ထ ယံ ဗန္ဓနာသင်္ခါရာနံ ပဟာနံ ဣဒံ ဝုစ္စတိ ဥဘယေသု ဌာနေသု ဝီရိယံ, ဂန္ဓပရိဝါတော [ဂန္ထပရိဝသော (ဣ။) ဂန္ထပရိဝုတော (က။)] သုမုနိ နောပလိမ္ပတိ။ တထေဝ ပရိဂ္ဂဟေသု ပုတ္တေသု ဒါရေသု စ အဝူဠ္ဟော သလ္လောတိ တဿေဝ တဏှာယ ပဟာနံ ဒဿေတိ။ အယံ တဏှာမူလဿ ပဟာနာ ဝရေ [အဟနာဝရေ (ဣ။), အဟနာဝရော (က။)] အပ္ပမတ္တောတိ ကာမော ပမာဒဝတ္တတိ ပဟာနာယ နေက္ခမ္မာဘိရတော အပ္ပမာဒဝိဟာရီ ဘဝတိ။ တဿ အာသယံ ပဟာနာယ နေဝ ဣမံ လောကံ အာသီသတိ န ပရလောကံ။ န ဣဓလောကံ နိဿိတံ, ပိယရူပံ သာတရူပံ အာကင်္ခတိ။ နာပိ ပရလောကံ နိဿိတံ ပိယရူပံ သာတရူပံ အာကင်္ခတိ, တေန ဝုစ္စတေ ‘‘နာသီသတေ လောကမိမံ ပရံ လောကဉ္စာ’’တိ။ ယံ တဿ ပဟာနံ တံ ဆေဒနံ အဋ္ဌကဝဂ္ဂိယေသု မုနိ နိဒ္ဒိဋ္ဌော။ သော ဣဓ ဝိရောဓေါ အဋ္ဌကဝဂ္ဂိယေသု နာသီသနံ ဣဓ အနာထာ။ တထာယံ တဏှာယ တဿ ပရိဂ္ဂဟဿ ဝတ္ထုကာမဿ ဧကဂါထာယ ဧတေ သဗ္ဗေ ကာမာ ဒဿိတာ။ တေန ဘဂဝါ ဒေသေတိ ‘‘ဧတမ္ပိ ဆေတွာန ပရိဗ္ဗဇန္တိ အနပေက္ခိနော သဗ္ဗကာမေ ပဟာယာ’’တိ။ ဣမိဿာ ဂါထာယ ဒွိဓါ နိဒ္ဒေသော သံသန္ဒနနိဒ္ဒေသော စ သမယနိဒ္ဒေသော စ, ယထာ အယံ ဂါထာ သံကိလေသဘာဂိယဉ္စ နိဗ္ဗေဓဘာဂိယဉ္စ, ဧဝံ တာယ ဂါထာယ သံကိလေသဘာဂိယဉ္စ နိဗ္ဗေဓဘာဂိယဉ္စ ဝိသဇ္ဇနာ။ ဧဝံ ဂါထာ သဗ္ဗဂါထာသု ဗျာကရဏေသု ဝါ နိဒ္ဒိဋ္ဌံ သုတ္တံ။

၁၀၆။ တတ္ထ ကတမာ ဒေသနာ? ဣမံ သုတ္တံ ကေနာဓိပ္ပါယေန ဒေသိတံ။ ယေ ရာဂစရိတာ သတ္တာ, တေ ကာမေ ပဇဟိဿန္တီတိ အယံ တတ္ထ ဘဂဝတော အဓိပ္ပါယော။

တတ္ထ ကတမော ဝိစယော? ယဿ ဒသဝတ္ထုကာ ကိလေသာ ဥတ္တိဏ္ဏာ ဝန္တာ ဝိဒိတာ။ ကတမေ ဒသဝိဓါတိ , ကိလေသကာမာ စ ဩရမ္ဘာဂိယဥဒ္ဓမ္ဘာဂိယာ စ သံယောဇနာ ဒသဝတ္ထုကာနိ အာယတနာနိ, အယံ ဝိစယော။

တတ္ထ ကတမာ ယုတ္တိ? ယေ သာရတ္တာ တေ ဂါဠှဗန္ဓနေန ဗန္ဓန္တိ အတ္ထိ ဧသာ ယုတ္တိ။

တတ္ထ ကတမော ပဒဋ္ဌာနော? သာရတ္တော မဏိကုဏ္ဍလေသု မမံကာရဿ ပဒဋ္ဌာနံ။ အပေက္ခာတိ အတီတဝတ္ထုဿ သရာဂဿ ပဒဋ္ဌာနံ။ ဧတမ္ပိ ဆေတွာတိ ဘာဝနာယ ပဒဋ္ဌာနံ။

တတ္ထ ကတမော လက္ခဏော? သာရတ္တစိတ္တော မဏိကုဏ္ဍလေသု ယော အဟံကာရေ ဝိသတ္တော မမံကာရေ ဝိသတ္တော, ယော ပုတ္တဒါရေ သာရတ္တော။ ခေတ္တဝတ္ထုသ္မိံ သာရတ္တော။ အယံ လက္ခဏော ဟာရော။

တတ္ထ ကတမော စတုဗ္ယူဟော ဟာရော? ဣဓ သုတ္တေ ဘဂဝတော ကော အဓိပ္ပါယော။ ယေ နိဗ္ဗာနေန ဆန္ဒိကာ ဘဝိဿန္တိ, တေ ပုတ္တဒါရေ တဏှံ ပဇဟိဿန္တိ။ အယံ တတ္ထ ဘဂဝတော အဓိပ္ပါယော။ ဣမာနိ စတ္တာရိ သစ္စာနိ။

တတ္ထ ကတမော အာဝဋ္ဋော? ယာ ပုတ္တဒါရေ တဏှာ, အယံ သမုဒယော။ ယေ ဥပါဒိန္နက္ခန္ဓာ, တေ ယေ စ ဗာဟိရေသု ရူပေသု ရူပပရိဂ္ဂဟော, ဣဒံ ဒုက္ခံ, ယံ တတ္ထ ဆေဒနီယံ, အယံ နိရောဓေါ။ ယေန ဘိဇ္ဇတိ, အယံ မဂ္ဂေါ။ ဝိဘတ္တီတိ နတ္ထိ ဝိဘတ္တိယာ ဘူမိ, ပရိဝတ္တနောတိ ပဋိပက္ခော နိဒ္ဒိဋ္ဌော။

တတ္ထ ကတမော ဝေဝစနော? နိဒ္ဒိဋ္ဌော ဝေဝစနော။ တတ္ထ ကတမော ဩတရဏော? အတ္ထိ တဏှာ ဧကော သတ္တော ဩတိဏ္ဏော တပ္ပစ္စယာ ဝိညာဏံ ယာဝ ဇရာမရဏံ။ ယာ တတ္ထ ဝေဒနာ, အယံ အဝိဇ္ဇာ ဝိဇ္ဇုပ္ပါဒါ အဝိဇ္ဇာနိရောဓေါ ယာဝ ဇရာမရဏနိရောဓေါ။

တတ္ထ ကတမော သောဓနော? သုဒ္ဓေါ ဂါထာယ အာရမ္ဘော။ တတ္ထ ကတမော အဓိဋ္ဌာနော? န တံ ဒဠှံ ဗန္ဓနမာဟု ဓီရာတိ ဧကတ္တတာယ ပညတ္တာ, န ဝေမတ္တတာယ။ စတ္တာရော ရာဂါ ကာမရာဂေါ ရူပရာဂေါ ဘဝရာဂေါ ဒိဋ္ဌိရာဂေါ စာတိ ဧကတ္တတာယ ပညတ္တာ။

တတ္ထ ကတမော ပရိက္ခာရော? ယေသံ ရာဂေါ မဏိကုဏ္ဍလေသု တဿ သုဘသညာ ဟေတု, အနုဗျဉ္ဇနသော စ နိမိတ္တဂ္ဂါဟိတာ ပစ္စယော။ ယာယ တေ ဆိန္နာနိ တဿ အသုဘသညာ ဟေတု, နိမိတ္တဂ္ဂဟဏအနုဗျဉ္ဇနဂ္ဂဟဏဝိနောဒနံ ပစ္စယော။

တတ္ထ ကတမော သမာရောပနော? သာရတ္တော မဏိကုဏ္ဍလေသု သမ္မူဠှဝိဓေါ ဒုဋ္ဌာတိပိ ဧတမ္ပိ [ဧဝမ္ပိ (ဣ။ က။)] ဆေတွာန ပရိဗ္ဗဇန္တီတိ တံ ပရိညာတတ္ထံ ပရိဝဇ္ဇိတတ္ထံ ပဇဟိတာ, အယံ သမာရောပနော။

၁၀၇။ ယံ စေတသိကံ ယံ ပကပ္ပိတံ ဝိတ္ထာရေန ပစ္စယော, ယံ ဝါ စေတသိကံ ကာယိကံ စေတသိကံ ကမ္မံ။ ကိံကာရဏာ? စေတသိကာ ဟိ စေတနာ မနောကမ္မာတိ ဝုစ္စတေ, သာ စေတနာကမ္မံ, ယံ စေတသိကံ ဣမံ ကာယိကဉ္စ ဝါစသိကဉ္စ ဣမာနိ တီဏိ ကမ္မာနိ နိဒ္ဒိဋ္ဌာနိ။ ကာယကမ္မံ ဝစီကမ္မဉ္စ တာနိ ကုသလာနိ ပိယံ ကာယေန စ ဝါစာယ စ အာရဘတိ ပရာမသတိ, အယံ ဝုစ္စတိ သီလဗ္ဗတပရာမာသော။ သင်္ကပ္ပနာ တေ တိဝိဓါ သင်္ခါရာ ပုညမယာ အပုညမယာ အာနေဉ္ဇမယာ, တပ္ပစ္စယာ ဝိညာဏံ တေ အာရမ္မဏမေတံ ဟောတိ ဝိညာဏဿ ဌိတိယာ။ ယာ သုဘသညာ သုခသညာ အတ္တသညာ စ။ ဣဒံ စေတသိကံ။ ယံ ရူပူပဂံ ဝိညာဏံ တိဋ္ဌတိ ရူပါရမ္မဏံ ရူပပတိဋ္ဌိတံ နန္ဒူပသေစနံ ဝုဒ္ဓိံ ဝိရူဠှိံ ဝေပုလ္လတံ ဂစ္ဆတိ, အယံ သင်္ကပ္ပနာ, ဣတိ ယံ ဝိညာဏဋ္ဌိတီသု ဌိတံ ပဌမာဘိနိဗ္ဗတ္တိအာရမ္မဏဝသေန ဥပါဒါနံ, ဣဒံ ဝုစ္စတိ စေတသိကန္တိ။

တတ္ထ ဌိတဿ အရူပဿ ယာ နိကန္တိ အဇ္ဈောသာနံ, ဣဒမ္ပိ သကမ္ပိတံ မနာပိကေသု ရူပေသု ပိယရူပသာတရူပေသု အာဘောဂေါ, ဣဒံ စေတသိကံ။ ယံ စေတေတိ သတ္တေသု [သတ္တသု (ဣ။)] မနာပိကေသု အဘိဇ္ဈာကာယဂန္ထော ပဋိဃာနုသယေသု ဗျာပါဒကာယဂန္ထော သဗ္ဗေ စတ္တာရော ဂန္ထာ, အယံ ပဉ္စသု ကာမဂုဏေသု ပဌမာဘိနိပါတော စိတ္တဿ ယာ စေတနာ ယဿ တတ္ထ အဿာဒါနုပဿိဿ အနေကာ ပါပကာ အကုသလာ ဓမ္မာ စိတ္တံ အရူပဝတိယော ဟောန္တိ။ ပုဂ္ဂလော ရာဂါနုဗန္ဓိဘူတော တေဟိ ကိလေသကာမေဟိ ယထာ ကာမကရဏီယော, အယံ ဝုစ္စတေ ကာမေသု ပကပ္ပနာ။ ဧဝံ သဗ္ဗေ စတ္တာရော ဩဃာ။ ယံ တေဟိ ကာမေဟိ သံယုတ္တော ဝိဟရတိ ဘာဝိတော အဇ္ဈောသန္နော, အယံ စေတနာ။ ယဿ တထာယံ အဝီတရာဂဿ အဓိဂတပေမဿ တဿ ဝိပရိဏာမညထာဘာဝါ ဥပ္ပဇ္ဇန္တိ သောကပရိဒေဝဒုက္ခဒေါမနဿုပါယာသာ ဒုက္ခာနုပရိဝတ္တိတံ ဝိညာဏံ ဟောတိ သရိတဿ ဝယဓမ္မသမုပ္ပါဒေါ စိတ္တံ ပရိယာဒိယတိ, ဣဒံ ဝုစ္စတိ ပကပ္ပိတန္တိ။

ဧကမေကဿ စေတေတိ စ ပကပ္ပေတိ စ ဝိညာဏဿ ဌိတိ ယာ ဟောတိ, သာ စ ဌိတိ ဒွိဓါ အာရမ္မဏဋ္ဌိတိ စ အာဟာရဋ္ဌိတိ စ။ တတ္ထ ယာ အာရမ္မဏဋ္ဌိတိ, အယံ နာမရူပဿ ပစ္စယော ။ ယာ အာဟာရဋ္ဌိတိ ယာ ပုနဗ္ဘဝါဘိနိဗ္ဗတ္တိကာ ဌိတိ ယာ စ ပေါနောဘဝိကာ ဌိတိ, အယံ ဝုစ္စတိ အာရမ္မဏံ။ တံ ဟောတိ ဝိညာဏဿ ဌိတိယာ တဿ ဝိညာဏပစ္စယာ နာမရူပံ ယာဝ ဇရာမရဏဉ္စ စေတေတိ, အထ စ ပုန ပတ္ထယတေ ယတော န ပေါနောဘဝိကာ အနာဂတဝတ္ထုမှိ, အယံ ပဋိပက္ခော နိဒ္ဒိဋ္ဌော။ န စေတေတိ န ပတ္ထယတိ အထ စ ဒူသေတီတိ ဒုဝိဓေါ နိဒ္ဒေသော။ အဿ ပုဗ္ဗေ ဟောတိ တံ စေတသိကံ တံ ပကပ္ပိတံ အသမူဟတံ တပ္ပစ္စယာ, အယံ ဝိညာဏဿ ဌိတိ ဟောတိ။

၁၀၈။ အထ ဝါ တဿ အနုသယာ အာဝိဘဝန္တိ တပ္ပစ္စယာ တဿ ပုနဗ္ဘဝေါ နိဗ္ဗတ္တတိ။ အထ ဝါ နံ သံကိယတေ အပ္ပေတု အာဂါရေ ဝါ, သုခုမာ ဝါ သန္တိ ဝါ န သံကိယတေ ကာမေ တံ ဧဝံ နိစ္စေသုပိ အာဂါရေသု ဇာတော ဟောတိ။ တံ နယတိ ယံ နော ကပ္ပေတုံ ဧဝံ သင်္ခါရာ စေတိတာ ပကပ္ပိတာ စ အာရမ္မဏဘူတာ ဟောန္တိ, ယာ စ စေတနာ ယာ စ ပကပ္ပနာ ယဉ္စ ဝတ္ထု နိဗ္ဗတ္တံ, ဥဘောပိ ဧတေ အာရမ္မဏံ ဝိညာဏဿ တထာ စေတနာယ စ သင်္ကပ္ပနာယ စ ပတ္ထနာယ စ ဘူတာ သတ္တာ စေတေတိ စ သင်္ကပ္ပေတိ စ။ ယံ ဂဝေသနာ န စ စေတေတိ န စ သင်္ကပ္ပေတိ။ ကတမေ စ သတ္တာ ဘူတာ? ယေ စ တနုဇာတအဏ္ဍဇာပိ အဏ္ဍကာ အနုဘိန္နာ သံသေဒဇာ န စ သမ္ဘိန္နာ ဣမေ ဘူတာ။ ကတမေ သမ္ဘဝေသိနော ဂဗ္ဘဂတာ အဏ္ဍဂတာ သံသရန္တော ဣမေ န စေတေတိ န ပတ္ထေတိ န စ သင်္ကပ္ပေတိ။ အနုသယေ န စ ပုနဗ္ဘဝေါ နိဗ္ဗတ္တီတိ? ယေ ဘူတာ သတ္တာ ယေ သမ္ဘဝေသိနော, တေ ထာဝရာ။ ယေ ဝါ သတော စေတေန္တိ ပတ္ထေန္တိ စ ယေ ထာဝရာ။ တေ န စ စေတေန္တိ, န စ ပတ္ထေန္တိ, န စ သင်္ကပ္ပေန္တိ, အနုသယေန စ သံသရန္တိ။

အပရော ပရိယာယော။ ယေ အရိယပုဂ္ဂလာ သေက္ခာ, တတ္ထ တေ န စ စေတေန္တိ, န စ သင်္ကပ္ပေန္တိ, အနုသယေန ပုန ဥပ္ပဇ္ဇန္တိ။

အပရော ပရိယာယော။ သုခုမာ ပါဏာ ဘူမိဂတာ ဥဒကဂတာ စက္ခုနော အာပါထံ နာဂစ္ဆန္တိ, တေ န စ စေတေန္တိ, န စ သင်္ကပ္ပေန္တိ, အနုသယေန စ သံသရန္တိ။

အပရော ပရိယာယော။ ဗာဟိကာ သဗ္ဗေ ဘိက္ခူ အဘိမာနိကာ, တေ န စ စေတေန္တိ, န စ ပတ္ထယန္တိ, အနုသယေန စ သံသရန္တိ, န စ စေတေန္တိ, န စ သင်္ကပ္ပေန္တိ, န စ အနုသေန္တိ။ အာရမ္မဏမ္ပေတံ န ဟောတိ ဝိညာဏဿ ဌိတိယာ။

န စ စေတေတီတိ ပရိယုဋ္ဌာနသမုဂ္ဃါတံ ဒဿေတိ။ န စ အနုသေတီတိ အနုသယသမုဂ္ဃါတံ ဒဿေတိ ။ န စ စေတေတီတိ ဩဠာရိကာနံ ကိလေသာနံ ပဟာနံ ဒဿေတိ။ န စ အနုသေတီတိ သုခုမာနံ ကိလေသာနံ ပဟာနံ ဒဿေတိ။ န စ စေတေတီတိ ယေန ဘူမိ စ န စ ပတ္ထယန္တီတိ သကဒါဂါမီ အနာဂါမီ, န စ အနုသေတီတိ အရဟံ, န စ စေတေတီတိ သီလက္ခန္ဓဿ ပဋိပက္ခေန ပဟာနံ ဒဿေတိ, န စ ပတ္ထယတီတိ သမာဓိက္ခန္ဓဿ ပဋိပက္ခေန ပဟာနံ ဒဿေတိ, န စ အနုသယတီတိ ပညာက္ခန္ဓဿ ပဋိပက္ခေန ပဟာနံ ဒဿေတိ, န စ စေတေတီတိ အပုညမယာနံ သင်္ခါရာနံ ပဟာနံ ဒဿေတိ, န စ ပတ္ထယတီတိ ပုညမယာနံ သင်္ခါရာနံ ပဟာနံ ဒဿေတိ, န စ အနုသေတီတိ အာနေဉ္ဇမယာနံ သင်္ခါရာနံ ပဟာနံ ဒဿေတိ, န စ စေတေတီတိ အနညာတညဿာမီတိန္ဒ္ရိယံ, န စ ပတ္ထယတီတိ အညိန္ဒ္ရိယံ, န စ အနုသယတီတိ အညာတာဝိနော ဣန္ဒ္ရိယံ။ န စ စေတေတီတိ မုဒုကာ ဣန္ဒ္ရိယဘာဝနာ, န စ ပတ္ထယတီတိ မဇ္ဈဣန္ဒ္ရိယဘာဝနာ, န စ အနုသေတီတိ အဓိမတ္တာ ဣန္ဒ္ရိယဘာဝနာ။ အယံ သုတ္တတ္ထော။

၁၀၉။ တတ္ထ ကတမာ ဒေသနာ? ဣဓ သုတ္တေ စတ္တာရိ သစ္စာနိ ဒေသိတာနိ။ ယဉ္စ စေတယိတံ ယဉ္စ ပကပ္ပိတံ အတ္ထိ ဧတံ အာရမ္မဏံ စိတ္တံ ပတိဋ္ဌတိ ဝိစိနတိ [ဝိစိနယတိ (ဣ။ က။)] ယုဇ္ဇတိ။ န စ စေတေတီတိ န စ ပတ္ထယတီတိ အတ္ထိ ဧဝံ အာရမ္မဏံ အနုသယေ ဝိညာဏမိတိ ဝိစိနိယတိ ယုဇ္ဇတိ န စ စေတေတိ န စ ပတ္ထယတိ။ အနုသယပ္ပဟာနာ ဝိညာဏဋ္ဌိတိံ န ဂဝေသန္တိ, ဝိစိယန္တံ ယုဇ္ဇတိ။ အယံ ယုတ္တိဝိစယော။

တတ္ထ ကတမော ပဒဋ္ဌာနော? စေတနာ ပရိယုဋ္ဌာနံ စေတနာပရိယုဋ္ဌာနဿ ပဒဋ္ဌာနံ။ သင်္ကပ္ပနံ ဥပါဒါနဿ ပဒဋ္ဌာနံ။ အနုသယော ပရိယုဋ္ဌာနဿ ပဒဋ္ဌာနံ။ တေသံ ဆန္ဒရာဂဝိနာသာယ ဘာဝနာ ဘဝရာဂဿ ပဟာနံ။

တတ္ထ ကတမော လက္ခဏော? ယံ စေတသိကန္တိ ဝေဒယိတံ ပကပ္ပိတံ ဥဂ္ဂဟိတံ ဝိညာတံ တဗ္ဗိညာဏံ အာရမ္မဏမ္ပိ ပစ္စယောပိ။

တတ္ထ ကတမော စတုဗ္ယူဟော? ဣဓ သုတ္တေ ဘဂဝတော ကော အဓိပ္ပါယော? ယေ ပုနဗ္ဘဝံ န ဣစ္ဆန္တိ, တေ န စေတယိဿန္တိ န စ ပတ္ထယိဿန္တီတိ, အယံ အဓိပ္ပါယော။

အာဝဋ္ဋောတိ ယာ စ စေတနာ ပတ္ထနာ စ အနုသယော စ ဝိညာဏဋ္ဌိတိပဟာနာ စ, ဣမာနိ ဒွေ သစ္စာနိ။ ဝိဘတ္တီတိ နတ္ထိ ဝိဘတ္တိယာ ဘူမိ။ ပရိဝတ္တနာ ပန ပဋိပက္ခံ သုတ္တံ။

တတ္ထ ကတမော ဝေဝစနော? စေတနာ ရူပသဉ္စေတနာ ယာဝဓမ္မသဉ္စေတနာ။ ယော အနုသယော, တေ သတ္တ အနုသယာ။

ပညတ္တီတိ စေတနာပရိယုဋ္ဌာနံ ပညတ္တိယာ ပညတ္တာ။ သင်္ကပ္ပနံ ဥပါဒါနပညတ္တိယာ ပညတ္တံ။ အနုသယော ဟေတုပညတ္တိယာ ပညတ္တော။ ဝိညာဏဋ္ဌိတိ ဥပပတ္တိဟေတုပညတ္တိယာ ပညတ္တာ။ စေတနာ သင်္ကပ္ပနာ အနုသယော သမုစ္ဆေဒေါ ဆန္ဒရာဂဝိနယပညတ္တိယာ ပညတ္တော။ ပဌမေ ကေစိ ဒွီဟိ ပရိဝတ္တကေဟိ ပဋိစ္စသမုပ္ပါဒေါ ဣဒပ္ပစ္စယတာယ မဇ္ဈပညတ္တိ။

ဩတရဏောတိ ဒွီဟိ ပရိဝတ္တကေဟိ ဒုက္ခဉ္စ သမုဒယော စ မဇ္ဈိမကေဟိ မဂ္ဂေါ စ နိရောဓေါ စ။ သောဓနောတိ သုတ္တေ သုတ္တဿ အာရမ္ဘော။

အဓိဋ္ဌာနောတိ ယဉ္စေတယိတံ သဗ္ဗံ အဓိဋ္ဌာနေန ဧကတ္တာယ ပညတ္တံ။ သင်္ကပ္ပိတန္တိ ဥပါဒါနေကတ္တာယ ပညတ္တံ။ ဝိညာဏံ ဧကတ္တာယ ပညတ္တံ။

ပရိက္ခာရောတိ သုဘဉ္စ အာရမ္မဏံ အယောနိသော မနသိကာရော စေတနာ ဟေတုပစ္စယတာယ ပစ္စယော။ ဝိညာဏဿ ပတိဋ္ဌာနော ဓမ္မော အာရမ္မဏပစ္စယတာယ ပစ္စယော။ တဿ မနသိကာရော ဟေတုပစ္စယတာယ ပစ္စယော။

တတ္ထ ကတမော သမာရောပနော? ဣဒံ သုတ္တံ သညိတံ တတ္ထ စေတေတိ ဝိသဇ္ဇနာ ဣတိ နိဒ္ဒိသိတဗ္ဗာ။ တဿ ဒိဋ္ဌိယာ ဝိညာဏပစ္စယာ နာမရူပံ ယာဝ ဇရာမရဏံ, အယံ သမာရောပနော။ အာရမ္မဏမေတံ န ဟောတိ ဝိညာဏဿ ဌိတိယာ, ဝိညာဏနိရောဓါ နာမရူပနိရောဓေါ, နာမရူပနိရောဓါ ယာဝ ဇရာမရဏနိရောဓေါ။

၁၁၀။ တတ္ထ ကတမံ သံကိလေသဘာဂိယဉ္စ နိဗ္ဗေဓဘာဂိယဉ္စ အသေက္ခဘာဂိယဉ္စ သုတ္တံ? အယံ လောကော [ပဿ ဥဒါ။ ၃၀ ဥဒါနေ] သန္တာပဇာတော ယာဝ ယေ ဟိ ကေစိ သမဏာ ဝါ ဗြာဟ္မဏာ ဝါ ဘဝေန ဘဝဿ ဝိပ္ပမောက္ခမာဟံသု။ သံကိလေသဘာဂိယံ ဥပဓိံ ဟိ ပဋိစ္စ ဒုက္ခမိဒံ သမ္ဘောတိ, ယာ တာ ပန တဏှာ ပဟီယန္တိ, ဘဝံ နာဘိနန္ဒတီတိ နိဗ္ဗေဓဿ နိဗ္ဗုတဿ [နိစ္စုတဿ (ဣ။ က။)] ဘိက္ခုနော အနုပါဒါယ ပုနဗ္ဘဝေါ န ဟောတိ။ ဥပစ္စဂါ သဗ္ဗဘဝါနိ တာဒီတိ အသေက္ခဘာဂိယံ။

တတ္ထ သန္တာပဇာတောတိ ရာဂဇော သန္တာပေါ ဒေါသဇော မောဟဇောတိ။ တေသံ သတ္တာနံ ဌာနံ ဒဿေတိ ။ လောကော သန္တာပဇာတောတိ ဖဿော တိဝိဓေါ သုခဝေဒနီယော ဒုက္ခဝေဒနီယော အဒုက္ခမသုခဝေဒနီယော။ တတ္ထ သုခဝေဒနီယော ဖဿော ရာဂသန္တာပေါ, ဒုက္ခဝေဒနီယော ဒေါသသန္တာပေါ, အဒုက္ခမသုခဝေဒနီယော မောဟသန္တာပေါ။ ယထာ စ ဘဂဝါ အာဟ ပဌမကဿ ဝလာဟကဿ ဂေါမဂ္ဂေ [ကောမဂ္ဂေ (ဣ။ က။) ပဿ အ။ နိ။ ၃။၃၅] ယေဟိ ဂဟပတိပုတ္တ ရာဂဇေဟိ ဒေါသဇေဟိ မောဟဇေဟိ သန္တာပေဟိ ဒုက္ခံ သုပတိ, တေ မမ သန္တာပါ န သန္တိ။

ရောဂံ ဝဒတိ အတ္တတောတိ တေဟိ သန္တာပေဟိ သန္တာပိတော တိဝိဓံ ဝိပလ္လာသံ ပဋိလဘတိ သညာဝိပလ္လာသံ စိတ္တဝိပလ္လာသံ ဒိဋ္ဌိဝိပလ္လာသံ။ တတ္ထ အသုဘေ သုဘန္တိ သညာဝိပလ္လာသော။ ဒုက္ခေ သုခန္တိ စိတ္တဝိပလ္လာသော။ အနိစ္စေ နိစ္စန္တိ အနတ္တနိ အတ္တာတိ ဒိဋ္ဌိဝိပလ္လာသော။

ယထာ စိတ္တဿ ဝိပလ္လာသော သညာဒိဋ္ဌိတေ တိဝိဓါ ဝိတက္ကာ – စိတ္တဝိတက္ကော ဝိပလ္လာသော သညာဝိတက္ကော ဝိပလ္လာသော ဒိဋ္ဌိဝိတက္ကော ဝိပလ္လာသောပိ။ တတ္ထ အဝိဇ္ဇာ ဝိပလ္လာသော ဂေါစရာ ဂတိပတေယျဘူမိ, ယထာ ဟိ တံ သဉ္ဇာနာတိ ယထာ ဝိဇာနာတိ ယထာ သဉ္ဇာနာတိ စ ဝိဇာနာတိ စ။ ယထာ ခန္တိ စေတေတိ ဣမေ စတ္တာရော ဝိပလ္လာသာ သတ္တာ ယေဟိ စတုဗ္ဗိဓံ အတ္တဘာဝဝတ္ထုံ ရောဂဘူတံ ဂဏ္ဍဘူတံ ‘‘အတ္တာ’’တိ ဝဒန္တိ။ ရောဂံ ဝဒတိ အတ္တတောတိ အယံ အာဝဋ္ဋော။ ယေန ယေန ဟိ မညတိ တတော တံ ဟောတိ အညထာတိ သုဘန္တိ မညတိ န တထာ ဟောတိ။ ဧဝံ သုခန္တိ နိစ္စံ အတ္တာတိ သော အညထာ ဘဝမေဝ သန္တံ အနာဂတံ ဘဝံ ပတ္ထယတိ, တေန ဝုစ္စတိ ‘‘ဘဝရာဂေါ’’တိ။ ဘဝမေဝါဘိနန္ဒတိ, ယံ အဘိနန္ဒတိ, တံ ဒုက္ခန္တိ ပဉ္စက္ခန္ဓေ နိဒ္ဒိသိယတိ။ ယဉ္စ တပ္ပစ္စယာ သောကပရိဒေဝဒုက္ခံ တဿ ဟိ ဘာဝေဿတိ။ ဧတ္တာဝတာ သံကိလေသော ဟောတိ။ ပဟာနတ္ထံ ခေါ ပန ဗြဟ္မစရိယံ ဝုဿတိ။ တိဏ္ဏံ သန္တာပါနံ ဆန္ဒရာဂဝိနယော ဟောတိ။

ဥပဓိံ ဟိ ပဋိစ္စ ဒုက္ခမိဒံ ဘဝတီတိ ယေ ဘဝမေဝါဘိနန္ဒန္တိ ယဿ ဘာဝေဿတိ, တံ ဒုက္ခံ တဿ ဒုက္ခဿ ပဟာနမာဟ။ သဗ္ဗသော ဥပါဒါနဉ္စ ယံ နတ္ထိ ဒုက္ခဿ သမ္ဘဝေါတိ စတ္တာရော ဝိပလ္လာသာ ယထာ နိဒ္ဒိဋ္ဌဥပါဒါနမာဟ။ တဿ ပဌမော ဝိပလ္လာသော ကာမုပါဒါနံ, ဒုတိယံ ဒိဋ္ဌုပါဒါနံ, တတိယံ သီလဗ္ဗတုပါဒါနံ, စတုတ္ထံ အတ္တဝါဒုပါဒါနံ, တေသံ ယော ခယော နတ္ထိ ဒုက္ခဿ သမ္ဘဝေါ ဥပဓိ နိဒါနံ ဒုက္ခနိရောဓမာဟ။ ဧဝမေတံ ယထာဘူတံ သမ္မပ္ပညာယ ပဿတော ဝိဘဝတဏှာ န ဟောတိ။ ဝိဘဝံ နာဘိနန္ဒတီတိ ဒဿနဘူမိံ မန္တေတိ သဗ္ဗသော တဏှက္ခယံ နိဗ္ဗာနန္တိ ဒွေ ဝိမုတ္တိယော ကထေတိ ရာဂဝိရာဂဉ္စ အဝိဇ္ဇာဝိရာဂဉ္စ။ တဿ ဘိက္ခုနောတိ အနုပါဒိသေသနိဗ္ဗာနဓါတုံ မန္တေတိ။ အယံ သုတ္တဿ အတ္ထနိဒ္ဒေသော။

၁၁၁။ တတ္ထ ကတမော ဝိစယော? ယဿ ယတ္ထ ပရိဠာဟေတိ တဿ ပရိဍယှန္တဿ သော ယထာဘူတံ နတ္ထိ နိဗ္ဗိန္ဒတိ စ, အယံ ဝိစယော စ ယုတ္တိ စ။ ပဒဋ္ဌာနော ရာဂဇော ပရိဠာဟော သုခိန္ဒ္ရိယဿ ဒေါမနဿိန္ဒ္ရိယဿ စ ပဒဋ္ဌာနံ။ ဒေါသဇော ပရိဠာဟော သုခိန္ဒ္ရိယဿ ဒေါမနဿိန္ဒ္ရိယဿ စ ပဒဋ္ဌာနံ။ မောဟဇော ပရိဠာဟော ဥပေက္ခိန္ဒ္ရိယဿ ဒေါမနဿိန္ဒ္ရိယဿ စ ပဒဋ္ဌာနံ။

တတ္ထ ကတမော လက္ခဏော ဟာရော? ဖဿပရေတော ဝေဒနာပရေတော သညာပရေတောပိ သင်္ခါရပရေတောပိ ယေန ယေန မညတိ ယဒိ သုဘနိမိတ္တေန ယဒိ သုခနိမိတ္တေန ယဒိ နိစ္စနိမိတ္တေန ယဒိ အတ္တနိမိတ္တေန အသုဘေ သုဘန္တိ မညတိ, ဧဝံ သဗ္ဗံ ရာဂဇေ ပရိဠာဟေ ဝုတ္တေ စတ္တာရော ပရိဠာဟာ ဝုတ္တာ ဘဝန္တိ။ ရာဂဇော ဒေါသဇော မောဟဇော ဒိဋ္ဌိဇော စ ရာဂံ ဝဒါမီတိ အတ္တတော ဝဒတိ။ သဗ္ဗာနိ ပန္နရသ ပဒါနိ အနိစ္စံ ဒုက္ခန္တိ။

တတ္ထ ကတမော စတုဗ္ယူဟော? ဣဓ သုတ္တေ ဘဂဝတော ကော အဓိပ္ပါယော? ယေ ပရိဠာဟေန န အစ္ဆန္တိ တေ ဘဝံ နာဘိနန္ဒန္တိ။ ယေ ဘဝံ နာဘိနန္ဒန္တိ, တေ ပရိနိဗ္ဗာယိဿန္တိ။ အယံ အဓိပ္ပါယော။

တတ္ထ ကတမော အာဝဋ္ဋော? သံကိလေသဘာဂိယေန ဒုက္ခဉ္စ သမုဒယဉ္စ နိဒ္ဒိသတိ။ နိဗ္ဗေဓဘာဂိယေန မဂ္ဂဉ္စ နိရောဓဉ္စ။

တတ္ထ ကတမာ ဝိဘတ္တိ? သန္တာပဇာတော ရောဂဇာတော ရောဂံ ဝဒတိ အတ္တတော တံ န ဧကံသေန ဟောတိ အမနသိကာရာ သန္တာပဇာတော ခေါ န စ ရောဂံ အတ္တတော ဝဒတိ။

တတ္ထ ကတမော ပရိဝတ္တနော? ပက္ခပဋိပက္ခနိဒဿနတ္ထံ ဘူမိ ပရိဝတ္တနာယ။

တတ္ထ ကတမော ဝေဝစနော ဟာရော? ရောဂဉ္စ အတ္တတော ဝဒတိ သလ္လံ အတ္တတော ဝဒတိ။ ပန္နရသ ပဒါနိ သဗ္ဗာနိ ဝတ္တဗ္ဗာနိ။

တတ္ထ ကတမာ ပညတ္တိ? သန္တာပဇာတောတိ ဒေါမနဿပဒဋ္ဌာနံ။ သဗ္ဗေ ဝစနပညတ္တိယာ ပညပေတိ။ ရောဂံ ဝဒတိ အတ္တတော ဝိပလ္လာသော သံကိလေသပညတ္တိယာ ပညပေတိ။ ယံ နာဘိနန္ဒတိ, တံ ဒုက္ခန္တိ ဝိပလ္လာသနိက္ခေပပညတ္တိယာ ပညတ္တာ။ တေ အကတသတ္တာ လောကာ မဇ္ဈေန ဝေမတ္တတာယ ပညတ္တာ။

တတ္ထ ကတမော ဩတရဏော? သန္တာပဇာတောတိ တီဏိ အကုသလမူလာနိ, တေ သင်္ခါရာ သင်္ခါရက္ခန္ဓပရိယာပန္နာ, ဓါတူသု ဓမ္မဓါတု, အာယတနေသု ဓမ္မာယတနံ။ ဣန္ဒ္ရိယေသု ဣတ္ထိန္ဒ္ရိယံ ပုရိသိန္ဒ္ရိယဉ္စ ပဒဋ္ဌာနံ။

တတ္ထ ကတမော သောဓနော? သုဒ္ဓေါ သုတ္တဿ အာရမ္ဘော။

တတ္ထ ကတမော အဓိဋ္ဌာနော ဟာရော? ပရိဠာဟောတိ ယေ သတ္တာ လောကာ ဧကတ္တပညတ္တိယာ ပညတ္တာ, တေ အကတသတ္တာ လောကာ မဇ္ဈေန ဝေမတ္တတာယ ပညတ္တာ။

တတ္ထ ကတမော ပရိက္ခာရော? သန္တာပဇာတောတိ အယောနိသော မနသိကာရော ဟေတု, ဝိပလ္လာသဉ္စ ပစ္စယော။ တတ္ထ ဒွီဟိ ဓမ္မေဟိ အတ္တာ အဘိနိဝိဋ္ဌာ စိတ္တဉ္စ စေတသိကဉ္စ ဓမ္မေ ဥဘယာနိ တဿ ဝိပရီတေန ပရာမသတော။ အပရော ပရိယာယော, စေတသိကေဟိ ဓမ္မေဟိ အတ္တသညာ အနတ္တသညာ သမုဂ္ဃါတေတိ။ အပရော ပရိယာယော။ အနိစ္စသညာ စေတသိကေသု ဓမ္မေသု, န တု အတ္တသညာ။ ဣဒံ ဝုစ္စတိ စိတ္တန္တိ ဝါ မနောတိ ဝါ ဝိညာဏန္တိ ဝါ ဣဒံ ဒီဃရတ္တံ အဗ္ဘုဂ္ဂတံ ဧတံ မမ, ဧသောဟမသ္မိ, ဧသော မေ အတ္တာတိ။ တတ္ထ စေတသိကာ ဓမ္မာနုပဿနာ ဧသာပိ ဓမ္မသညာ။ တဿ ကော ဟေတု, ကော ပစ္စယော? အဟံကာရော ဟေတု, မမံကာရော ပစ္စယော။

တတ္ထ ကတမော သမာရောပနော? အယံ လောကော သန္တာပဇာတောတိ အကုသလံ မန္တေတိ ဝိညာဏံ နာမရူပဿ ပစ္စယော ယာဝ ဇရာမရဏန္တိ, အယံ သမာရောပနော။

၁၁၂။ ဧဝမေတံ ယထာဘူတံ, သမ္မပ္ပညာယ ပဿတိ အကုသလမူလာနံ ပဟာနံ။ တတ္ထ အဝိဇ္ဇာနိရောဓေါ အဝိဇ္ဇာနိရောဓါ ယာဝ ဇရာမရဏနိရောဓေါ, အယံ သမာရောပနော။

စတ္တာရော ပုဂ္ဂလာ [ပဿ အ။ နိ။ ၄။၅] – အနုသောတဂါမီ ပဋိသောတဂါမီ ဌိတတ္တော, တိဏ္ဏော ပါရင်္ဂတော ထလေ တိဋ္ဌတိ ဗြာဟ္မဏောတိ။

တတ္ထ ယော အနုသောတဂါမီ အယံ ကာမေ သေဝတိ။ ပါပဉ္စ ကမ္မံ ကရောတိ ယာဝ ကာမေ ပဋိသေဝတိ ။ ဣဒံ လောဘော အကုသလမူလံ, သော ယေဝ တဏှာ, သော တေဟိ ကာမေဟိ ဝုယှတိ အနုသောတဂါမီတိ ဝုစ္စတိ။ ယော ပုဂ္ဂလော တာဟိ ဂမိတော တပ္ပစ္စယာ တဿ ဟေတု အကုသလကမ္မံ ကရောတိ ကာယေန စ ဝါစာယ စ, အယံ ဝုစ္စတိ ပါပကမ္မံ ကရောတီတိ။ တဿ တီဏိ သောတာနိ သက္ကာယဒိဋ္ဌိ ဝိစိကိစ္ဆာ သီလဗ္ဗတပရာမာသော။ ဣမေဟိ တီဟိ သောတေဟိ တိဝိဓဓါတုယံ ဥပ္ပဇ္ဇတိ ကာမဓါတုယံ ရူပဓါတုယံ အရူပဓါတုယံ။ တေန ပဋိပက္ခေန ယော ကာမေ န ပဋိသေဝတိ။ ယော သီလဝတံ န ပရာမသတိ။ ယော သက္ကာယဒိဋ္ဌီနံ ပဟာနာယ ကာမေသု ယထာဘူတံ အာဒီနဝံ ပဿတိ။ ယေန စ တေ ဓမ္မေ ပဋိသေဝတိ။ ယဉ္စ တပ္ပစ္စယာ တိဋ္ဌတိ ဗြာဟ္မဏောတိ အရဟံ ကိရ။ တတ္ထ အရဟံ တဿ ပါရင်္ဂတော ဟောတိ, ပါရင်္ဂတဿ ထလေ တိဋ္ဌတိ သောပါဒိသေသာ နိဗ္ဗာနဓါတု။ အနုသောတဂါမိနီတိ ဒဿနပ္ပဟာတဗ္ဗာနံ သံယောဇနာနံ အပ္ပဟာနမာဟ။ ပဋိသောတဂါမိနီတိ ဖလေ ဒိဋ္ဌေကဋ္ဌာနဉ္စ ကိလေသာနံ ပဟာနမာဟ, ဌိတတ္တေန ပဉ္စန္နံ ဩရမ္ဘာဂိယာနံ သံယောဇနာနံ ပဟာနမာဟ။ တတ္ထ အနုသောတဂါမိနာ မဂ္ဂရူပိမာဟ။ ပဋိသောတဂါမိနာ ဌိတတ္တေန စ မဂ္ဂမိတိမာဟ။ ပါရင်္ဂတေန သာဝကာ အသေက္ခာ စ သမ္မာသမ္ဗုဒ္ဓါ စ ဝုတ္တာ။ အနုသောတဂါမိနာ သက္ကာယသမုဒယဂါမိနိံ ပဋိပဒမာဟ။ ပဋိသောတဂါမိနာ ဌိတတ္တေန သက္ကာယနိရောဓဂါမိနိံ ပဋိပဒမာဟ။ ပါရင်္ဂတေန ဒသ အသေက္ခာ အရဟန္တာ ဓမ္မာ ဝုတ္တာ။ အယံ သုတ္တတ္ထော။

၁၁၃။ တတ္ထ ကတမာ ဒေသနာ? ဣမသ္မိံ ဟိ သုတ္တေ စတ္တာရိ အရိယသစ္စာနိ ဒေသိတာနိ။ တေဓါတုကလောကသမတိက္ကမနဉ္စ။

တတ္ထ ကတမော ဝိစယော ဟာရော? ယော ကာမေ ပဋိသေဝတိ ပါပံ [ပါပကံ (ဣ။)] ကရေယျာတိ ယော စ ကာမေ န ပဋိသေဝတိ သော ပါပကမ္မံ န ကရေယျာတိ ယော စ ဣမေဟိ ဒွီဟိ ဘူမီဟိ ဥတ္တိဏ္ဏော ပါရင်္ဂတောတိ ယာ ဝီမံသာ အယံ ဝိစယော။

ယုတ္တီတိ ယုဇ္ဇတိ သုတ္တေသု, နာယုဇ္ဇတီတိ ယာ ဝီမံသာယ, အယံ ယုတ္တိ။ ပဒဋ္ဌာနောတိ အနုသောတဂါမိနာ သတ္တန္နံ သံယောဇနာနံ ပဒဋ္ဌာနံ။ အကုသလဿ ကိရိယာ အကုသလဿ မူလာနံ ပဒဋ္ဌာနံ။ ပဋိသောတဂါမိနာ ယထာဘူတဒဿနဿ ပဒဋ္ဌာနံ။ ဌိတတ္တေန အသံဟာရိယာယ [အသဟာရိယာယ (ဣ။)] ပဒဋ္ဌာနံ။ ပါရင်္ဂတောတိ ကဒါစိ ဘူမိယာ ပဒဋ္ဌာနံ။

တတ္ထ ကတမော လက္ခဏော ဟာရော? ယော အနုသောတံ ဂစ္ဆတိ တဏှာဝသေန။ သဗ္ဗေသမ္ပိ ကိလေသာနံ ဝသေန ဂစ္ဆတိ။ ယော ပဋိသောတံ ဝါယမတိ။ တဏှာယ သဗ္ဗေသမ္ပိ သော ကိလေသာနံ ဝါယမတိ ပဋိသောတံ။ ယော အတ္တနာ ဌိတော ကာယေနပိ သော ဌိတော ဝါစာစိတ္တေနပိ သော ဌိတော။ အယံ လက္ခဏော ဟာရော။

တတ္ထ ကတမော စတုဗ္ယူဟော? ဣဓ သုတ္တေ ဘဂဝတော ကော အဓိပ္ပါယော? ယေ အနုသောတဂါမိနိယာ ပဋိပဒါယ နာဘိရမိဿန္တိ, တေ ပဋိသောတံ ဝါယမိဿန္တီတိ ယာဝ ကဒါစိ ဘူမိယံ, အယံ အဓိပ္ပါယော။ အာဝဋ္ဋောတိ ဣဓ သုတ္တေ စတ္တာရိ သုတ္တာနိ ဒေသိတာနိ။

တတ္ထ ကတမော ဝိဘတ္တိ ဟာရော? ယော ကာမေ ပဋိသေဝတိ ပါပဉ္စ ကမ္မံ ကရောတိ။ သော အနုသောတဂါမီတိ န ဧကံသေန သောတာပန္နောပိ ကာမေ ပဋိသေဝတိ။ တံ ဘာဂိယဉ္စ ပါပကမ္မံ ကရောတိ။ ကိဉ္စာပိ သေက္ခောပိ ကရေယျ ပါပံ ယထာ သုတ္တေ နိဒ္ဒိဋ္ဌော န စ သော အနုသောတဂါမီ, ဣဒံ ဝိဘဇ္ဇဗျာကရဏီယံ။ န စ ကာမေ ပဋိသေဝတိ န စ ပါပကမ္မံ ကရောတိ ပဋိသောတဂါမီ န စ ဧကံသေန သဗ္ဗေ ဗာဟိရကော ကာမေသု ဝီတရာဂေါ န စ ကာမေ ပဋိသေဝတိ, တေန စ ပါပကမ္မံ ကရောတိ အနုသောတဂါမီ ပဋိသောတဂါမီ, အယံ ဝိဘတ္တိ။

တတ္ထ ကတမော ပရိဝတ္တနော ဟာရော? နိဒ္ဒိဋ္ဌော ပဋိပက္ခော။ ဝေဝစနောတိ ကာမေသု ဝတ္ထုကာမာပိ ကိလေသကာမာပိ ရူပသဒ္ဒဂန္ဓရသဖဿပုတ္တဒါရဒါသကမ္မကရပေါရိသဉ္စ ပရိဂ္ဂဟာ။

ပညတ္တီတိ သဗ္ဗေ ပုထုဇ္ဇနာ ဧကတ္တာယ ပညတ္တာ။ အနုသောတဂါမီတိ ကိလေသသမုဒါစာရပညတ္တိယာ ပညတ္တာ။ ယေ ပန သေက္ခာ ပုဂ္ဂလာ, တေ နိဗ္ဗာနပညတ္တိယာ [နိဋ္ဌာနပညတ္တိယာ (က။)] ပညတ္တာ။ ယေ ပန အနာဂါမီ, တေ အသံဟာရိယ ပညတ္တိယာ ပညတ္တာ, အယံ ပညတ္တိ။

ဩတရဏောတိ ယော အနုသောတဂါမီ, သော ဒုက္ခံ။ ယေ တဿ ဓမ္မာ, တေ ဒုက္ခဿ သမုဒယော။ ယံ ရူပံ, အယံ ရူပက္ခန္ဓော, ဧဝံ ပဉ္စပိ ခန္ဓာ ပဋိစ္စသမုပ္ပါဒေါ, တေ ကိလေသာ သင်္ခါရက္ခန္ဓပရိယာပန္နာ ဓမ္မာယတနံ ဓမ္မဓါတု ဣန္ဒ္ရိယေသု စ ပညတ္တာ။

သောဓနောတိ ယေနာရမ္ဘေန ဣဒံ သုတ္တံ ဒေသိတံ, သော အာရမ္ဘော သဗ္ဗော သုဒ္ဓေါ။

အဓိဋ္ဌာနောတိ ပဋိသောတဂါမိနာ သဗ္ဗေ သောတာပန္နာ ဧကတ္တေန ဝါ နိဒ္ဒိဋ္ဌာ ရာဂါနုသယပဋိသောတဂါမိနော သေက္ခာဝ မဂ္ဂေါ စ သေက္ခော စ ပုဂ္ဂလော ဌိတတ္တောတိ။

ဝီတရာဂေါ ဧကတ္တာယ ပညတ္တော။ ပါရင်္ဂတောတိ သဗ္ဗေ အရဟန္တော သဗ္ဗေ ပစ္စေကဗုဒ္ဓါ သမ္မာသမ္ဗုဒ္ဓါ စ ဧကတ္တာယ ပညတ္တာ။

ပရိက္ခာရောတိ အနုသောတဂါမိနော ပါပမိတ္တပစ္စယော ကာမပရိယုဋ္ဌာနံ ဟေတု။ ပဋိသောတဂါမိနော ဒွေ ဟေတူ ဒွေ ပစ္စယာ စ ယာဝ သမ္မာဒိဋ္ဌိယာ ဥပ္ပါဒါယဒိဋ္ဌိ [ဥပါဒါယဒိဋ္ဌိ (ဣ။)], တဿ ပဋိလဒ္ဓမဂ္ဂေါ ဟေတု အာရမ္ဘော ပစ္စယော ကာယိကော စေတသိကဿ ကောဋ္ဌာသော စ။ သမာရောပနောတိ ဝိဘတ္တိ ဣဒံ သုတ္တံ နတ္ထိ သမာရောပနာယ ဘူမိ။

၁၁၄။ ပဉ္စာနိသံသာ သောတာနုဂတာနံ ဓမ္မာနံ [ပဿ အ။ နိ။ ၄။၁၉၁] ယာဝ ဒိဋ္ဌိယာ သုပ္ပဋိဝိဒ္ဓါနံ သုတ္တံ ဝိတ္ထာရေန ကာတဗ္ဗံ။ ယုဉ္ဇတော ဃဋေန္တဿ ဝါယမတော ဂိလာနော မရဏကာလေ ဒေဝဘူတော ပစ္စေကဗောဓိံ ပါပုဏာတိ။ သောတာနုဂတာတိ သဒ္ဓမ္မဿဝနေန ကတံ ဟောတိ။ န စ အဓိပညာဓမ္မဝိပဿနာယ တဿ စိတ္တံ တသိတံ ဟောတိ, န စ အနိဗ္ဗိဒ္ဓတ္တံ, ဣဒံ စ သုတ္တံ ပဉ္စန္နံ ပုဂ္ဂလာနံ ဒေသိတံ, သဒ္ဓါနုသာရိနော မုဒိန္ဒ္ရိယဿ တိက္ခိန္ဒ္ရိယဿ စ ဓမ္မာနုသာရိနော တိက္ခိန္ဒ္ရိယဿ မုဒိန္ဒ္ရိယဿ စ။ ယော ပန မောဟစရိတော ပုဂ္ဂလော န သက္ကောတိ ယုဉ္ဇိတုံ ဃဋိတုံ ဝါယမိတုံ ယထာဘူတံ ယထာသမာဓိကာ ဝိမုတ္တိ တံ ခဏံ တံ လယံ တံ မုဟုတ္တံ ဖလံ ဒဿေတိ။ သာဓု ပရိဟာယတိ ပရော တံ ဒုယှတိ, နော တု သုခအဝိပါကိနီ ဘဝတိ ။ တဿ ဒိဋ္ဌေ ယေဝ စ ဓမ္မေ ဥပပဇ္ဇအပရာပရိယဝေဒနီယံ။ တတ္ထ ယော ပုဂ္ဂလော ဓမ္မာနုသာရီ တဿ ယဒိ သောတာနုဂတာ ဓမ္မာ ဟောန္တိ သော ယုဉ္ဇန္တော ပါပုဏာတိ။ ယော ဓမ္မာနုသာရီ မုဒိန္ဒ္ရိယော, သော ဂိလာနော ပါပုဏာတိ။ ယော သဒ္ဓါနုသာရီ တိက္ခိန္ဒ္ရိယော, သော မရဏကာလသမယေ ပါပုဏာတိ။ ယော မုဒိန္ဒ္ရိယော, သော ဒေဝဘူတော ပါပုဏာတိ။ ယဒါ ဒေဝဘူတော န ပါပုဏာတိ, န သော တေနေဝ ဓမ္မရာဂေန တာယ ဓမ္မနန္ဒိယာ ပစ္စေကဗောဓိံ ပါပုဏာတိ။ ယော သောတာနုဂတေသု ယုဉ္ဇတိ ဃဋေတိ ဝါယမတိ, သော ပုဗ္ဗာပန္နေန ဝိသေသံ သဉ္ဇာနာတိ, သဉ္ဇာနန္တော ပါပုဏာတိ။ သစေ ပန ဂိလာနဿ မနသိကာရော ဟောတိ, တတ္ထ ယုဉ္ဇန္တော ပါပုဏာတိ။ သစေ ပနဿ မရဏကာလေ သံဝိဂ္ဂေါ ဟောတိ, တတ္ထ ယုဉ္ဇန္တော ပါပုဏာတိ။ သစေ ပန န ကတ္ထစိ [ကတ္ထ (ဣ။ က။), တတ္ထ (က။)] သံဝေဂေါ ဟောတိ, တဿ ဒေဝဘူတဿ သုခိနော ဓမ္မဘူတာ ပါဒါ ဧဝံ အဝိလပတိ။ သော ဧဝံ ဇာနာတိ ‘‘အယံ သော ဓမ္မဝိနယော ယတ္ထ မယံ ပုဗ္ဗေ မနုဿဘူတာ ဗြဟ္မစရိယံ စရိမှာ’’တိ။ အထ ဒေဝဘူတော ပါပုဏာတိ။ ဒိဗ္ဗေသု ဝါ ပဉ္စသု ကာမဂုဏေသု အဇ္ဈောသိတော ဟောတိ ပမာဒဝိဟာရီ, သော တေန ကုသလမူလေန ပစ္စေကဗောဓိံ ပါပုဏာတိ။

ယာ ပရတောဃောသေန ဝစသာ သုပရိစိတာ, အယံ သုတမယီ ပညာ။ ယေ ပန ဓမ္မာ ဟောန္တိ မနသာ အနုပေက္ခိတာ, အယံ စိန္တာမယီ ပညာ။ ယံ ဒိဋ္ဌိယာ သုပ္ပဋိဝိဒ္ဓါ, အယံ ဘာဝနာမယီ ပညာ ။ ယံ သောတာနုဂတာ ဝစသာ ပရိစိတာ ဟောန္တိ, သော စ ဒိဋ္ဌေ ယေဝ ဓမ္မေ ပရိနိဗ္ဗာယီ, အယံ အရဟံ ပုဂ္ဂလော။ ယော ဥပပဇ္ဇတိ ဒေဝဘူတော ပါပုဏာတိ, တတ္ထ စ ပရိနိဗ္ဗာယတိ, အယံ အနာဂါမီ။ ယော တေန ကုသလမူလေန ပစ္စေကဗောဓိံ ပါပုဏာတိ, အယံ ပုဗ္ဗယောဂသမ္ဘာရသမ္ဘူတော ပုဂ္ဂလော။

သောတာနုဂတာ ဓမ္မာတိ ပဌမံ ဝိမုတ္တာယတနံ, ဝစသာ ပရိစိတာတိ ဒုတိယံ တတိယဉ္စ ဝိမုတ္တာယတနံ, မနသာ အနုပေက္ခိတာတိ စတုတ္ထံ ဝိမုတ္တာယတနံ ဒိဋ္ဌိယာ သုပ္ပဋိဝိဒ္ဓါတိ ပဉ္စမံ ဝိမုတ္တာယတနံ။

သောတာနုဂတာယ ဝိမုတ္တိယာ ဝစသာ ယာ ဝါစာ သုပ္ပဋိဝိဒ္ဓါ အနုပုဗ္ဗဓမ္မဿ သောတေန သုတွာ သီလက္ခန္ဓေ ပရိပူရေတိ, မနသာ အနုပေက္ခိတာ သမာဓိက္ခန္ဓံ ပရိပူရေတိ, ဒိဋ္ဌိယာ သုပ္ပဋိဝိဒ္ဓါ ပညာက္ခန္ဓံ ပရိပူရေတိ။

သောတာနုဂတာ ဓမ္မာ ဗဟုဿုတာ ဟောန္တီတိ ဝိတ္ထာရေန ကာတဗ္ဗံ။ ဣဒံ ပဌမံ သဒ္ဓါပဒါနံ မနသာ အနုပေက္ခိတာတိ ပဋိသလ္လာနဗဟုလော ဝိဟရတိ, ဝိတ္ထာရေန ကာတဗ္ဗံ။ ဣဒံ ဒုတိယံ သဒ္ဓါပဒါနံ ဒိဋ္ဌိယာ သုပ္ပဋိဝိဒ္ဓါတိ အနာသဝါ စေတောဝိမုတ္တိယာ နာပရံ ဣတ္ထတ္တာယာတိ ပဇာနာတီတိ။ ဣဒံ တတိယံ သဒ္ဓါပဒါနံ။

သောတာနုဂတာ ဓမ္မာတိ သေက္ခံ သတ္ထာ ဒဿေတိ။ မနသာ အနုပေက္ခိတာတိ အရဟတ္တံ သတ္ထာ ဒဿေတိ။ ဒိဋ္ဌိယာ သုပ္ပဋိဝိဒ္ဓါတိ တထာဂတံ အရဟန္တံ သမ္မာသမ္ဗုဒ္ဓံ သတ္ထာ ဒဿေတိ။

သောတာနုဂတာ ဓမ္မာတိ ကာမာနံ နိဿရဏံ ဒဿေတိ။ မနသာ အနုပေက္ခိတာတိ ရူပဓါတုယာ နိဿရဏံ ဒဿေတိ။ ဒိဋ္ဌိယာ သုပ္ပဋိဝိဒ္ဓါတိ တေဓါတုကာနံ နိဿရဏံ ဒဿေတိ။ အယံ သုတ္တတ္ထော။

၁၁၅။ တတ္ထ ကတမော ဒေသနာဟာရော? ဣမမှိ သုတ္တေ တယော ဧသနာ ဒေသိတာ သောတာနုဂတေဟိ ဓမ္မေဟိ ဝစသာ ပရိစိတေဟိ ကာမေသနာယ သမထမဂ္ဂေါ။ ဒိဋ္ဌိယာ သုပ္ပဋိဝိဒ္ဓေဟိ ဗြဟ္မစရိယေသနာယ သမထမဂ္ဂေါ။

ဝိစယောတိ ယထာ သုတ္တံ မနသိကရောန္တော ဝိစိနန္တော သုတမယိပညံ ပဋိလဘတိ။ ယထာ စ သော မနသိကရောတီတိ ယထာ သုတဓမ္မာ တဒါ စိန္တာမယိပညံ ပဋိလဘတိ။ ယထာ ဒိဋ္ဌေဝ ဓမ္မေ မနသိကရောတိ တဒါ ဘာဝနာမယိပညံ ပဋိလဘတိ။ အယံ ဝိစယော။

သုတေန သုတမယိပညံ ပဋိလဘတိ။ စိန္တာယ စိန္တာမယိပညံ ဘာဝနာယ ဘာဝနာမယိပညံ ပဋိလဘတိ။ အတ္ထိ ဧသာ ယုတ္တိ။

ပဒဋ္ဌာနောတိ သောတာနုဂတာ ဓမ္မာတိ ဓမ္မဿဝနဿ ပဒဋ္ဌာနံ။ ဝစသာ ပရိစိတာတိ ယုဉ္ဇနာယ ပဒဋ္ဌာနံ။ မနသာ အနုပေက္ခိတာတိ ဓမ္မာနုဓမ္မာယ ဝိပဿနာယ ပဒဋ္ဌာနံ။ ဒိဋ္ဌိယာ အနုပေက္ခိတာတိ ပညာယပိ အနုပေက္ခိတာ ဒိဋ္ဌိယာပိ အနုပေက္ခိတာ။

စတုဗ္ယူဟောတိ ဣမမှိ သုတ္တေ ဘဂဝတော ကော အဓိပ္ပါယော? ယေ ဣမာဟိ ဒွီဟိ ပညာဟိ သမန္နာဂတာ တေဟိ။။

သ နိဗ္ဗုတောတိ မဂ္ဂဖလံ အနုပါဒိသေသဉ္စ နိဗ္ဗာနဓါတုံ မန္တေတိ, ဒါနေန ဩဠာရိကာနံ ကိလေသာနံ ပဟာနံ မန္တေတိ။ သီလေန မဇ္ဈိမာနံ, ပညာယ သုခုမကိလေသာနံ မန္တေတိ, ရာဂဒေါသမောဟက္ခယာ သ နိဗ္ဗုတောတိ ကတာ စ ဘူမိ။

ဒဒတော ပုညံ ပဝဍ္ဎတိ၊ သံယမတော ဝေရံ န စီယတိ။

ကုသလော စ ဇဟာတိ ပါပကန္တိ မဂ္ဂေါ ဝုတ္တော။

ရာဂဒေါသမောဟက္ခယာ သ နိဗ္ဗုတောတိ မဂ္ဂဖလမာဟ။

ဒဒတော ပုညံ ပဝဍ္ဎတိ, သံယမတောတိ တီဟိ ပဒေဟိ လောကိကံ ကုသလမူလံ ဝုတ္တံ။ ရာဂဒေါသမောဟက္ခယာ သ နိဗ္ဗုတောတိ လောကုတ္တရံ ကုသလမူလံ ဝုတ္တံ။

ဒဒတော ပုညံ ပဝဍ္ဎတိ, သံယမတော ဝေရံ န စီယတီတိ ပုထုဇ္ဇနဘူမိံ မန္တေတိ။ ကုသလော စ ဇဟာတိ ပါပကန္တိ သေက္ခဘူမိံ မန္တေတိ။ ရာဂဒေါသမောဟက္ခယာ သ နိဗ္ဗုတောတိ အသေက္ခဘူမိ ဝုတ္တာ။

ဒဒတော ပုညံ ပဝဍ္ဎတိ, သံယမတော ဝေရံ န စီယတီတိ မဂ္ဂနိယာ ပဋိပဒါ ဝုတ္တာ။ ကုသလော စ ဇဟာတိ ပါပကန္တိ သေက္ခဝိမုတ္တိ။ ရာဂဒေါသမောဟက္ခယာ သ နိဗ္ဗုတောတိ အသေက္ခဝိမုတ္တိ။

ဒဒတော ပုညံ ပဝဍ္ဎတိ, သံယမတော ဝေရံ န စီယတီတိ ဒါနကထံ သီလကထံ မဂ္ဂကထံ လောကိကာနံ ဓမ္မာနံ ဒေသနမာဟ။ ကုသလော စ ဇဟာတိ ပါပကန္တိ လောကေ အာဒီနဝါနုပဿနာ။ ရာဂဒေါသမောဟက္ခယာ သ နိဗ္ဗုတောတိ သာမုက္ကံသိကာယ ဓမ္မဒေသနာယပိ ပဋိဝိဒ္ဓါ။

ဒဒတော ပုညံ ပဝဍ္ဎတီတိ ပါဏာနံ အဘယဒါနေန ပါဏာတိပါတာ ဝေရမဏိသတ္တာနံ အဘယံ ဒေတိ။ ဧဝံ သဗ္ဗာနိ သိက္ခာပဒါနိ ကာတဗ္ဗာနိ။ သံယမတော ဝေရံ န စီယတီတိ သီလေ ပတိဋ္ဌာယ စိတ္တံ သံယမေတိ, တဿ သံယမတော ပါရိပူရိံ ဂစ္ဆတိ။ ရာဂဒေါသမောဟက္ခယာ သ နိဗ္ဗုတောတိ ဒွေ ဝိမုတ္တိယော။ အယံ သုတ္တနိဒ္ဒေသော။

၁၁၆။ တတ္ထ ကတမာ ဒေသနာ? ဣမမှိ သုတ္တေ ကိံ ဒေသိတံ? ဒွေ သုဂတိယော ဒေဝါ စ မနုဿာ စ, ဒိဗ္ဗာ စ ပဉ္စကာမဂုဏာ, မာနုဿကာ စ။ ဒွီဟိ ပဒေဟိ နိဒ္ဒေသော။ ဒဒတော ပုညံ ပဝဍ္ဎတိ, သံယမတော ဝေရံ န စီယတိ, ကုသလော စ ဇဟာတိ ပါပကန္တိ မဂ္ဂေါ ဝုတ္တော။ ရာဂဒေါသမောဟက္ခယာ သ နိဗ္ဗုတောတိ ဒွေ နိဗ္ဗာနဓါတုယော ဒေသိတာ သောပါဒိသေသာ စ အနုပါဒိသေသာ စ။ အယံ ဒေသနာ။

ဝိစယောတိ ဒဒတော ပုညံ ပဝဍ္ဎတီတိ ဣမိနာ ပဌမေန ပဒေန ဒါနမယိကပုညကိရိယဝတ္ထု ဝုတ္တံ။ တေနဿ အာနန္တရိယာနံ ကုသလာနံ ဓမ္မာနံ။ ဒုတိယေန ပဒေန။ ယန္တိ, နိယျာနိကံ သာသနန္တိ, အယံ အဓိပ္ပါယော။ အဿဝနေန စ အမနသိကာရေန စ အပ္ပဋိဝေဓေန စ သက္ကာယသမုဒယဂါမိနီ ပဋိပဒါ ဝုတ္တာ။ သဝနေန စ မနသိကာရေန စ ပဋိဝေဓေန စ သက္ကာယနိရောဓဂါမိနီ ပဋိပဒါ ဝုတ္တာ။ အယံ အာဝဋ္ဋော။

ဝိဘတ္တီတိ ဧကံသဗျာကရဏီယော။ နတ္ထိ တတ္ထ ဝိဘတ္တိယာ ဘူမိ။ ပရိဝတ္တနာတိ ယေ ပဉ္စာနိသံသာ, တေ ပဉ္စာဒိနာ ပဋိပက္ခေန တေနေဝ ဒိဋ္ဌေဝ ဓမ္မေ ပါပုဏာတိ, တံ ဥပပဇ္ဇမာနာ အပရော ပရိယာယော။

ဝေဝစနန္တိ သောတာနုဂတာ ဓမ္မာတိ ယံ သုတ္တံ ဒိဋ္ဌမ္ပိ ပညိန္ဒ္ရိယံ ဝိညတ္တမ္ပိ ဒိဋ္ဌိယာ သုပ္ပဋိဝိဒ္ဓမ္ပိ ဝိဘာဝိတမ္ပိ။

ပညတ္တီတိ သောတာနုဂတာဓမ္မာတိ ဒေသနာ အဝိဇ္ဇာပညတ္တိယာ ပညတ္တံ။ မနသိကာရော ပါမောဇ္ဇပညတ္တိယာ ပညတ္တော, ဒိဋ္ဌဓမ္မာပိ အာနိသံသပညတ္တိယာ ပညတ္တာ။

ဩတရဏောတိ တိဿော ပညာ ဝစသာ ပရိစိတေသု သုတမယီပညာ မနသာ အနုပေက္ခိတေသု စိန္တာမယီပညာ ဒိဋ္ဌိယာ သုပ္ပဋိဝိဒ္ဓါသု ဘာဝနာမယီပညာ။ ဣမာနိ အရိယသစ္စာနိ ဣန္ဒ္ရိယာနိ ဝိဇ္ဇုပ္ပါဒါ အဝိဇ္ဇာနိရောဓေါ ပဋိစ္စသမုပ္ပါဒေါ ဣန္ဒ္ရိယေသု တီဏိ ဣန္ဒ္ရိယာနိ, အာယတနေသု ဓမ္မာယတနပရိယာပန္နာ ဓါတူသု ဓမ္မဓါတုပရိယာပန္နာတိ။ သောဓနောတိ ယော အာရမ္ဘော သုတ္တဿ ပဝေသော နိယုတ္တော။

အဓိဋ္ဌာနောတိ ပဉ္စာနိသံသာတိ ဝေမတ္တတာယ ပညတ္တာ အာနိသံသာ သောတာ အနုဂတာတိ ဝေမတ္တတာယ အရိယဝေါဟာရော ပညတ္တော, ဓမ္မေ စ သဝနန္တိ ဧကတ္တတာယ ပညတ္တံ။

ပရိက္ခာရောတိ ဓမ္မဿဝနဿ ပယိရုပါသနာ ပစ္စယော, သဒ္ဓါ ဟေတု။ မနသာ အနုပေက္ခိတာတိ အတ္ထပ္ပဋိသံဝေဒိတာ ပစ္စယော, ဓမ္မပ္ပဋိသံဝေဒိတာ ဟေတု, ဒိဋ္ဌိယာ သုပ္ပဋိဝိဒ္ဓါတိ သဒ္ဓမ္မဿဝနဉ္စ မနသိကာရော စ ပစ္စယော, သုတမယီ စိန္တာမယီ ပညာ ဟေတု။ သမာရောပနောတိ ဝိဘတ္တံ သုတ္တံ အပရော ပရိယာယော နိဗ္ဗတ္တိ ဗလေ နတ္ထိ။ တတ္ထ သမာရောပနာယ ဘူမိ။

၁၁၇။ တတ္ထ ကတမံ ဝါသနာဘာဂိယဉ္စ နိဗ္ဗေဓဘာဂိယဉ္စ သုတ္တံ? ဒဒတော ပုညံ ပဝဍ္ဎတီတိ ဂါထာ။ ဒဒတောတိ ဒါနမယိကပုညကိရိယဝတ္ထု ဝုတ္တံ။ သံယမတော ဝေရံ န စီယတီတိ သီလမယိကပုညကိရိယဝတ္ထု ဝုတ္တံ။ ကုသလော စ ဇဟာတိ ပါပကန္တိ လောဘဿ စ မောဟဿ စ ဗျာပါဒဿ စ ပဟာနမာဟ။ ရာဂဒေါသမောဟက္ခယာ သ နိဗ္ဗုတောတိ လောဘဿ စ မောဟဿ စ ဗျာပါဒဿ စ ဆန္ဒရာဂဝိနယမာဟာတိ။ ဒဒတော ပုညံ ပဝဍ္ဎတီတိ ဂါထာ အလောဘော ကုသလမူလံ ဘဝတိ။ သံယမတော ဝေရံ န စီယတီတိ အဒေါသော ကုသလမူလံ ဘဝတိ။ သံယမတော ဝေရံ န စီယတီတိ အဝေရာ အသပတ္တာ အဗျာပါဒတာယ သဒါ။ ကုသလော စ ဇဟာတိ ပါပကန္တိ ဉာဏုပ္ပါဒါ အညာဏနိရောဓေါ။ စတုတ္ထပဒေန ရာဂဒေါသမောဟက္ခယေန ရာဂဝိရာဂါ စေတောဝိမုတ္တိမောဟက္ခယေန အဝိဇ္ဇာဝိရာဂါ ပညာဝိမုတ္တိ, အယံ ဝိစယော။

ယုတ္တီတိ ဒါနေ ဌိတော ဥဘယံ ဟိ ပရိပူရေတိ။ မစ္ဆရိယဉ္စ ပဇဟတိ။ ပုညဉ္စ ပဝဍ္ဎတိ။ အတ္ထိ ဧသာ ယုတ္တိ။

ပဒဋ္ဌာနန္တိ ဒဒတော ပုညံ ပဝဍ္ဎတီတိ စာဂါဓိဋ္ဌာနဿ ပဒဋ္ဌာနံ။ သံယမတော ဝေရံ န စီယတီတိ ပညာဓိဋ္ဌာနဿ ပဒဋ္ဌာနံ ကုသလော စ ဇဟာတိ ပါပကန္တိ သစ္စာဓိဋ္ဌာနဿ ပဒဋ္ဌာနံ။ ရာဂဒေါသမောဟက္ခယာ သ နိဗ္ဗုတောတိ ဥပသမာဓိဋ္ဌာနဿ ပဒဋ္ဌာနံ။ အယံ ပဒဋ္ဌာနော။

တတ္ထ ကတမော လက္ခဏော? ဒဒတော ပုညံ ပဝဍ္ဎတိ သံယမတော ဝေရံ န စီယတိ။ ဒဒတောပိ ဝေရံ န ကရိယာတိ ကုသလော စ ဇဟာတိ ပါပကံ ရာဂဒေါသမောဟက္ခယာ သ နိဗ္ဗုတော ရူပက္ခယာပိ ဝေဒနက္ခယာပိ, ယေန ရူပေန ဒိဋ္ဌံ, တေန တထာဂတော ပညပေန္တော ပညပေယျ ရူပဿ ခယာ ဝိရာဂနိရောဓါတိ ဧဝံ ပဉ္စက္ခန္ဓာ။

စတုဗ္ယူဟော ဣဓ ဘဂဝတော ကော အဓိပ္ပါယော? ယေ မဟာဘောဂါနံ ပတ္ထယိဿန္တိ? တေ ဒါနံ ဒဿန္တိ ပရိဿယပဟာနာယ, ယေ အဝေရာဘိဆန္ဒကာ, တေ ပဉ္စ ဝေရာနိ ပဇဟိဿန္တိ, ယေ ကုသလာဘိဆန္ဒကာ, တေ အဋ္ဌင်္ဂိကံ မဂ္ဂံ ဘာဝေဿန္တိ အဋ္ဌန္နံ မိစ္ဆတ္တာနံ ပဟာနာယ။ ယေ နိဗ္ဗာယိတုကာမာ, တေ ရာဂဒေါသမောဟံ ပဇဟိဿန္တီတိ အယံ ဘဂဝတော အဓိပ္ပါယော။

အာဝဋ္ဋောတိ ယဉ္စ အဒဒတော မစ္ဆရိယံ ယဉ္စ အသံယမတော ဝေရံ ယဉ္စ အကုသလဿ ပါပဿ အပ္ပဟာနံ, အယံ ဒုက္ခနိဒ္ဒေသော န သမုဒယော။ အလောဘေန စ အဒေါသေန စ အမောဟေန စ ကုသလေန ဣမာနိ တီဏိ ကုသလမူလာနိ။ တေသံ ပစ္စယော အဋ္ဌ သမ္မတ္တာနိ, အယံ မဂ္ဂေါ။ တေသံ ရာဂဒေါသမောဟာနံ ခယာ, အယံ နိရောဓေါ။

ဝိဘတ္တီတိ ဒဒတော ပုညံ ပဝဍ္ဎတီတိ န ဧကံသေန ယော ရာဇဒဏ္ဍဘယေန ဒေတိ, ယော စ အကပ္ပိယဿ ပရိဘောဂေန သီလဝန္တေသု ဒေတိ, န တဿ ပုညံ ပဝဍ္ဎတီတိ သော စေတံ ဒါနံ အကုသလေန ဒေတိ, ဒဏ္ဍဒါနံ သတ္ထဒါနံ အပုညမယံ ပဝဍ္ဎတိ, န ပုညံ။ သံယမတော ဝေရံ န စီယတီတိ န ဧကံသေန ကိံ ကာရဏံ ယဉ္စ ယော ပဒံ ဒိဋ္ဌဓမ္မိကံ ပဿတိ ယဒိ မမ ရာဇာနော ဂဟေတွာ ဟတ္ထံ ဝါ ဆိန္ဒေယျ။ပေ။။ န တေန သံယမေန ဝေရံ န ကရောတိ။ ယော တု ဧဝံ သမာဒိယတိ ပါဏာတိပါတဿ ပါပကော ဝိပါကောတိ, ဒိဋ္ဌေ ယေဝ ဓမ္မေ အဘိသမ္ပရာယေ စ ဧဝံ သဗ္ဗဿ အကုသလဿ ဟေတုတော အာရတိ။ ဣမိနာ သံယမေန ဝေရံ န စီယတိ။

ပရိဝတ္တနာတိ ဒဒတော ပုညံ ပဝဍ္ဎတီတိ အဒဒတော ပုညံ န ပဝဍ္ဎတိ။ ယံ ဒါနမယံ, တံ သံယမတော ဝေရံ န စီယတိ, အသံယမတော ဝေရံ ကရီယတိ။ ကုသလော စ ဇဟာတိ ပါပကံ အကုသလော န ဇဟာတိ။ ရာဂဒေါသမောဟက္ခယာ သနိဗ္ဗုတောတိ ဒူတံ ပေသေတွာ ပဏီတံ ပေသေတွာပိ န ပက္ကောသာမိ, သော သယမေဝ ပန မဟာဘိက္ခုသံဃပရိဝါရော အမှာကံ ဝသနဋ္ဌာနံ သမ္ပတ္တော အမှေဟိ စ သန္ထာဂါရသာလာ [သန္ဓာဂါရသာလာ (က။)] ကာရိတာ, ဧတ္ထ မယံ ဒသဗလံ အာနေတွာ မင်္ဂလံ ဘဏာပေမာတိ စိန္တေတွာ ဥပသင်္ကမိံသု။ ယေန သန္ထာဂါရံ တေနုပသင်္ကမိံသူတိ တံ ဒိဝသံ ကိရ သန္ထာဂါရေ စိတ္တကမ္မံ နိဋ္ဌာပေတွာ အဋ္ဋကာ မုတ္တမတ္တာ ဟောန္တိ။ ဗုဒ္ဓါ နာမ အရညဇ္ဈာသယာ အရညာရာမာ အန္တောဂါမေ ဝသေယျုံ ဝါ နော ဝါတိ တသ္မာ ဘဂဝတော မနံ ဇာနိတွာဝ ပဋိဇဂ္ဂိဿာမာတိ စိန္တေတွာ တေ ဘဂဝန္တံ ဥပသင်္ကမိံသု။ ဣဒါနိ ပန မနံ လဘိတွာ ပဋိဇဂ္ဂိတုကာမာ ယေန သန္ထာဂါရံ, တေနုပသင်္ကမိံသု။ သဗ္ဗသန္ထရိန္တိ ယထာ သဗ္ဗံ သန္ထတံ ဟောတိ ဧဝံ ယေန ဘဂဝါ တေနုပသင်္ကမိံသူတိ။ ဧတ္ထ ပန တေ မလ္လရာဇာနော သန္ထာဂါရံ ပဋိဇဂ္ဂိတွာ နဂရဝီထိယောပိ သမ္မဇ္ဇာပေတွာ ဓဇေ ဥဿာပေတွာ သုဝဏ္ဏဃဋိကဒလိယော စ ဌပါပေတွာ သကလနဂရံ ဒီပမာလာဟိ ဝိပ္ပကိဏ္ဏတာရကံ ဝိယ ကတွာ ခီရပကေ [ခီရုပကေ (ဣ။ က။)] ဒါရကေ ခီရံ ပါယေထ, ဒဟရေ ကုမာရေ လဟုံ လဟုံ ဘောဇာပေတွာ သယာပေထ, ဥစ္စာသဒ္ဒံ မာကရိ, အဇ္ဇ ဧကရတ္တိံ သတ္ထာ အန္တောဂါမေဝ ဝသိဿတိ, ဗုဒ္ဓါ နာမ အပ္ပသဒ္ဒကာမာ ဟောန္တီတိ ဘေရိံ စရာပေတွာ သယံ ဒဏ္ဍကဒီပိကာ အာဒါယ ယေန ဘဂဝါ တေနုပသင်္ကမိံသု။ ဘဂဝန္တံ ယေဝ ပုရက္ခတွာတိ ဘဂဝန္တံ ပုရတော ကတွာ, တတ္ထ ဘဂဝါ ဘိက္ခူနဉ္စေဝ ဥပါသကာနဉ္စ မဇ္ဈေ နိသိန္နော အတိဝိယ ဝိရောစတိ။ သမန္တပါသာဒိကော သုဝဏ္ဏဝဏ္ဏော အဘိရူပေါ ဒဿနီယော ပုရတ္ထိမကာယတော သုဝဏ္ဏဝဏ္ဏာ ရသ္မိ ဥဋ္ဌဟိတွာ ဂဂနတလေ အသီတိဟတ္ထံ ဌာနံ ဂဏှာတိ။ ပစ္ဆိမကာယတော ဒက္ခိဏဟတ္ထတော ဝါမဟတ္ထတော သုဝဏ္ဏဝဏ္ဏာ ဟေဋ္ဌာ ပါဒတလေဟိ ပဝါဠဝဏ္ဏရသ္မိ ဥဋ္ဌဟိတွာ ဃနပထဝိယံ အသီတိဟတ္ထံ ဌာနံ ဂဏှာတိ, ဧဝံ သမန္တာ အသီတိဟတ္ထမတ္တံ ဌာနံ ဆဗ္ဗဏ္ဏဗုဒ္ဓရသ္မိယော ဝိဇ္ဇောတမာနာ ဝိတဏ္ဍမာနာ ဝိဓါဝန္တိ, သဗ္ဗေ ဒိသာဘာဂါ သုဝဏ္ဏစမ္ပကပုပ္ဖေဟိ ဝိကိရိယမာနာ ဝိယ သုဝဏ္ဏဃဋတော နိက္ခန္တသုဝဏ္ဏရသဓါရာဟိ သိဉ္စမာနာ ဝိယ ပသာရိတသုဝဏ္ဏပဋပရိက္ခိတ္တာ ဝ္ဝိယ ဝေရမ္ဘဝါတသမုဋ္ဌိတကိံသုကကိံသုကာရကဏိကာရပုပ္ဖစုဏ္ဏသမောကိဏ္ဏာ ဝိယ ဝိပ္ပကသန္တံ အသီတိအနုဗျဉ္ဇနဗျာမပ္ပဘာ ဒွတ္တိံသဝရလက္ခဏသမုဇ္ဇလံ သရီရံ သမုဂ္ဂတတာရကံ ဝိယ ဂဂနတလံ ဝိကသိတမိဝ ပဒုမဝနံ သဗ္ဗဖာလိဖုလ္လော ဝိယ ယောဇနသတိကော ပါရိစ္ဆတ္တကော ပဋိပါဋိယာ ဌပိတာနံ ဒွတ္တိံသစန္ဒာနံ ဒွတ္တိံသသူရိယာနံ ဒွတ္တိံသစက္ကဝတ္တီနံ ဒွတ္တိံသဒေဝရာဇာနံ ဒွတ္တိံသမဟာဗြဟ္မာနံ နိဗ္ဗုတော အသေက္ခဿ နတ္ထိ နိဗ္ဗုတိ။

ဝေဝစနန္တိ ဒဒတော ပုညံ ပဝဍ္ဎတိ, အနုမောဒတောပိ ပုညံ ပဝဍ္ဎတိ။ စိတ္တဿ သမာဒဟတောပိ ဝေယျာဝစ္စကိရိယာယပိ ပုညံ ပဝဍ္ဎတီတိ။

ပညတ္တီတိ ဒဒတော ပုညံ ပဝဍ္ဎတိ, အလောဘဿ ပဋိနိဿယဃာတပညတ္တိယာ ပညတ္တံ။ သံယမတော ဝေရံ န စီယတီတိ အဒေါသဿ ပဋိနိဿယဃာတပညတ္တိယာ ပညတ္တံ ကုသလော စ ဇဟာတိ ပါပကန္တိ အမောဟဿ ပဋိနိဿယဃာတပညတ္တိယာ ပညတ္တံ။

ဩတရဏောတိ ပဉ္စသု ဣန္ဒ္ရိယေသု ဒဒတော ပုညံ ပဝဍ္ဎတိ, သံယမတော ဝေရံ န စီယတိ သံယမေန သီလက္ခန္ဓော။ ဩတိဏ္ဏော ဆသု ဣန္ဒ္ရိယေသု သံဝရော, အယံ သမာဓိက္ခန္ဓော, ယံ ကုသလော စ ဇဟာတိ ပါပကံ, အယံ ပညာက္ခန္ဓော, ရာဂဒေါသမောဟက္ခယာ သ နိဗ္ဗုတောတိ ဝိမုတ္တိက္ခန္ဓော။ ဓါတူသု ဓမ္မဓါတု, အာယတနေသု မနာယတနံ။

သောဓနောတိ ယေနာရမ္ဘေန ဣဒံ သုတ္တံ ဒေသိတံ သော အာရမ္ဘော သုဒ္ဓေါ။

အဓိဋ္ဌာနော ဒါနန္တိ ဧကတ္တတာယ ပညတ္တံ။ စာဂေါ ပရိစ္စာဂေါ ဓမ္မဒါနံ အာမိသဒါနံ, အဋ္ဌ ဒါနာနိ ဝိတ္ထာရေန ကာတဗ္ဗာနိ, အယံ ဝေမတ္တတာ။ န စ ဒဒတော ဧကတ္တပညတ္တိယာ ပညတ္တံ။ ခန္တီ အနဝဇ္ဇန္တိ ပညတ္တိယာ ပညတ္တံ။ ရာဂဒေါသမောဟက္ခယာ သ နိဗ္ဗုတောတိ ရောဓဝီရိယပညတ္တိယာ [ယောဓ ဝီရိယပညတ္တိယာ (ဣ။ က။)] ပညတ္တာ။

ပရိက္ခာရောတိ ဒါနဿ ပါမောဇ္ဇံ ပစ္စယော, အလောဘော ဟေတု။ သံယမတော ယောနိသော မနသိကာရော ဟေတု, ပရိစ္စာဂေါ ပစ္စယော။ ကုသလော စ ဇဟာတိ ပါပကန္တိ ယထာဘူတဒဿနံ ပစ္စယော, ဉာဏပ္ပဋိလာဘော ဟေတု။ ရာဂဒေါသမောဟက္ခယာ သ နိဗ္ဗုတောတိ ပရတော စ ဃောသော အဇ္ဈတ္တဉ္စ ယောနိသော မနသိကာရော မဂ္ဂေါ စ ဟေတု စ ပစ္စယော စ။

သမာရောပနောတိ ဒဒတော ပုညံ ပဝဍ္ဎတီတိ ဂါထာ တဿ သီလမ္ပိ ဝဍ္ဎတိ။ သံယမောပိ ဝဍ္ဎတိ။ သံယမတော ဝေရံ န စီယတီတိ။ အညေပိ ကိလေသာ န စီယန္တိ ယေပိဿ တပ္ပစ္စယာ ဥပ္ပဇ္ဇေယျုံ အာသဝါ ဝိဃာတာ, တေပိဿ န ဥပ္ပဇ္ဇန္တိ။ ရာဂဒေါသမောဟက္ခယာ သ နိဗ္ဗုတောတိ ရာဂဒေါသဿာပိ ခယာ ရာဂါနုသယဿပိ ခယာ ဒေါသဿ မောဟဿာပိ သ နိဗ္ဗုတောတိ သောပါဒိသေသာ နိဗ္ဗာနဓါတု အနုပါဒိသေသာပိ။ အယံ သမာရောပနော။

ထေရဿ မဟာကစ္စာယနဿ ပေဋကောပဒေသေ

ဟာရဿ သမ္ပာတဘူမိ သမတ္တာ။

၆၀။ ဗုဒ္ဓါနံ ဘဂဝန္တာနံ သာသနံ တိဝိဓေန သင်္ဂဟံ ဂစ္ဆတိ, ခန္ဓေသု ဓါတူသု အာယတနေသု စ။ တတ္ထ ပဉ္စက္ခန္ဓာ ရူပက္ခန္ဓော ယာဝ ဝိညာဏက္ခန္ဓော။ ဒသ ရူပအာယတနာနိ စက္ခု ရူပါ စ ယာဝ ကာယော ဖောဋ္ဌဗ္ဗာ စ, အယံ ရူပက္ခန္ဓော။ တတ္ထ ဆ ဝေဒနာကာယာ ဝေဒနာက္ခန္ဓော စက္ခုသမ္ဖဿဇာ ဝေဒနာ ယာဝ မနောသမ္ဖဿဇာ ဝေဒနာ, အယံ ဝေဒနာက္ခန္ဓော။ တတ္ထ ဆ သညာကာယာ သညာက္ခန္ဓော, ရူပသညာ ယာဝ ဓမ္မသညာ ဣမေ ဆ သညာကာယာ, အယံ သညာက္ခန္ဓော။ တတ္ထ ဆ စေတနာကာယာ သင်္ခါရက္ခန္ဓော, ရူပသဉ္စေတနာ ယာဝ ဓမ္မသဉ္စေတနာ ဣမေ ဆ စေတနာကာယာ, အယံ သင်္ခါရက္ခန္ဓော။ တတ္ထ ဆ ဝိညာဏကာယာ ဝိညာဏက္ခန္ဓော, စက္ခုဝိညာဏံ ယာဝ မနောဝိညာဏံ ဣမေ ဆ ဝိညာဏကာယာ, အယံ ဝိညာဏက္ခန္ဓော။ ဣမေ ပဉ္စက္ခန္ဓာ။

တေသံ ကာ ပရိညာ? အနိစ္စံ ဒုက္ခံ သညာ အနတ္တာတိ ဧသာ ဧတေသံ ပရိညာ။ တတ္ထ ကတမော ခန္ဓတ္ထော? သမူဟတ္ထော ခန္ဓတ္ထော, ပုဉ္ဇတ္ထော ခန္ဓတ္ထော, ရာသတ္ထော ခန္ဓတ္ထော။ တံ ယထာ ဒဗ္ဗက္ခန္ဓော ဝနက္ခန္ဓော ဒါရုက္ခန္ဓော အဂ္ဂိက္ခန္ဓော ဥဒကက္ခန္ဓော ဝါယုက္ခန္ဓော ဣတိ ဧဝံ ခန္ဓေသု သဗ္ဗသင်္ဂဟောဝ ဧဝံ ခန္ဓတ္ထော။

တတ္ထ အဋ္ဌာရသ ဓါတုယော စက္ခုဓါတု ရူပဓါတု စက္ခုဝိညာဏဓါတု။ပေ။။ မနောဓါတု ဓမ္မဓါတု မနောဝိညာဏဓါတု။ ဧတာယော အဋ္ဌာရသ ဓါတုယော။ တာသံ ပရိညာ အနိစ္စံ ဒုက္ခံ သညာ အနတ္တာတိ ဧသာ ဧတာသံ ပရိညာ။ တတ္ထ ကော ဓါတုအတ္ထော? ဝုစ္စတေ အဝယဝတ္ထော ဓါတုအတ္ထော။ အဝယဝေါတိ စက္ခု နော ပသာဒေါ စက္ခုဓါတု။ ဧဝံ ပဉ္စသု ဓါတူသု ပုန ရာဂဝဝစ္ဆေဒတ္ထော ဓါတုအတ္ထော။ ဝဝစ္ဆိန္နာ ဟိ စက္ခုဓါတု။ ဧဝံ ပဉ္စသု ပုနရာဟ ဧကန္တိပကတ္ယတ္ထေန ဓါတုအတ္ထောတိ ဝုစ္စတေ။ တံ ယထာ, ပကတိယာ အယံ ပုရိသော ပိတ္တိကော သေမှိကော ဝါတိကော သန္နိပါတိကောတိ ဧဝံ ပကတိစက္ခုဓါတု ဒသန္နံ ပိယာ စ သဗ္ဗေသု ဣန္ဒ္ရိယေသု။ပေ။။ ဝိသဘာဂတ္ထော ဓါတုအတ္ထော။

တတ္ထ ဒွါဒသာယတနာနိ ကတမာနိ? ဆ အဇ္ဈတ္တိကာနိ ဆ ဗာဟိရာနိ။ စက္ခာယတနံ ယာဝ မနာယတနန္တိ အဇ္ဈတ္တိကံ, ရူပါယတနံ ယာဝ ဓမ္မာယတနန္တိ ဗာဟိရံ။ ဧတာနိ ဒွါဒသ အာယတနာနိ။ ဧတေသံ ကာ ပရိညာ? အနိစ္စံ ဒုက္ခံ သညာ အနတ္တာတိ, ဧသာ ဧတေသံ ပရိညာ။ အပိ စ ဒွိဓါ ပရိညာ ဉာတပရိညာ စ ပဟာနပရိညာ စ။ တတ္ထ ဉာတပရိညာ နာမ အနိစ္စံ ဒုက္ခံ သညာ အနတ္တာတိ, ဧသာ ဉာတပရိညာ။ ပဟာနပရိညာ ပန ဆန္ဒရာဂပ္ပဟာနာ, ဧသာ ပဟာနပရိညာ။ တတ္ထ ကတမော အာယတနတ္ထော? ဝုစ္စတေ အာကာရတ္ထော အာယတနတ္ထော။ ယထာ သုဝဏ္ဏာကရော ဒုဗ္ဗဏ္ဏာကရော, ယထာ ဒွီဟိ တေဟိ အာကာရေဟိ တေ တေ ဂါဝါ ဥတ္တိဋ္ဌန္တိ။ ဧဝံ ဧတေဟိ စိတ္တစေတသိကာ ဂါဝါ ဥတ္တိဋ္ဌန္တိ ကမ္မကိလေသာ ဒုက္ခဓမ္မာ စ။ ပုနရာဟ အာယဒါနတ္ထော အာယတနတ္ထော။ ယထာ ရညော အာယဒါနေဟိ အာယော ဘဝတိ, ဧဝံ အာယဒါနတ္ထော အာယတနတ္ထော။

၆၁။ စတ္တာရိ အရိယသစ္စာနိ ဒုက္ခံ သမုဒယော နိရောဓေါ မဂ္ဂေါ စ။ ဒုက္ခံ ယထာ သမာသေန ဓမ္မာစရိယံ မာနသဉ္စ, သမုဒယော သမာသေန အဝိဇ္ဇာ စ တဏှာ စ, နိရောဓေါ သမာသေန ဝိဇ္ဇာ စ ဝိမုတ္တိ စ, မဂ္ဂေါ သမာသေန သမထော စ ဝိပဿနာ စ။

တတ္ထ သတ္တတိံသ ဗောဓိပက္ခိကာ ဓမ္မာ ကတမေ? စတ္တာရော သတိပဋ္ဌာနာ ယာဝ အရိယော အဋ္ဌင်္ဂိကော မဂ္ဂေါ, ဧဝမေတေ သတ္တတိံသ ဗောဓိပက္ခိကာ ဓမ္မာ။ ယေ ဓမ္မာ အတီတာနာဂတပစ္စုပ္ပန္နာနံ ဗုဒ္ဓါနံ ဘဂဝန္တာနံ ပစ္စေကဗုဒ္ဓါနံ သာဝကာနံ စ နိဗ္ဗာနာယ သံဝတ္တန္တီတိ, သော မဂ္ဂေါ စတ္တာရော သတိပဋ္ဌာနာ။ ကတမေ စတ္တာရော? ဣဓ ဘိက္ခု ကာယေ ကာယာနုပဿီ ဝိဟရတိ, သမ္မပ္ပဓါနံ။ပေ။။ ဣဒ္ဓိပါဒံ။ပေ။။ ဣန္ဒ္ရိယာနိ။ပေ။။ ဗလာနိ။ပေ။။ တတ္ထ ကော ဣန္ဒ္ရိယတ္ထော? ဣန္ဒတ္ထော ဣန္ဒ္ရိယတ္ထော, အာဓိပတေယျတ္ထော ဣန္ဒ္ရိယတ္ထော, ပသာဒတ္ထော ဣန္ဒ္ရိယတ္ထော, အသာဓါရဏံ ကဿ ကိရိယတ္ထော ဣန္ဒ္ရိယတ္ထော အနဝပရိယတ္ထော ဗလတ္ထော, ထာမတ္ထော ဗလတ္ထော, ဥပါဒါယတ္ထော ဗလတ္ထော, ဥပတ္ထမ္ဘနတ္ထော ဗလတ္ထော။

တတ္ထ ကတမေ သတ္တ ဗောဇ္ဈင်္ဂါ? သတိသမ္ဗောဇ္ဈင်္ဂေါ ယာဝ ဥပေက္ခာသမ္ဗောဇ္ဈင်္ဂေါ။ တတ္ထ ကတမော အဋ္ဌင်္ဂိကော မဂ္ဂေါ? သမ္မာဒိဋ္ဌိ ယာဝ သမ္မာသမာဓိ။ တတ္ထ အဋ္ဌင်္ဂိကော မဂ္ဂေါတိ ခန္ဓော သီလက္ခန္ဓော စ သမာဓိက္ခန္ဓော စ ပညာက္ခန္ဓော စ။ တတ္ထ ယာ စ သမ္မာဝါစာ ယော စ သမ္မာကမ္မန္တော ယော စ သမ္မာအာဇီဝေါ, အယံ သီလက္ခန္ဓော။ ယာ စ သမ္မာသတိ ယော စ သမ္မာဝါယာမော ယော စ သမ္မာသမာဓိ, အယံ သမာဓိက္ခန္ဓော။ ယော စ သမ္မာသင်္ကပ္ပော ယာ စ သမ္မာဒိဋ္ဌိ, အယံ ပညာက္ခန္ဓော။ ဧဝံ တာယော တိဿော သိက္ခာ။ ဧဝံ တီဟာကာရေဟိ ဒသ ပဒါနိ။ပေ။။။

တတ္ထ ယောဂါဝစရော သီလက္ခန္ဓေ ဌိတော ဒေါသံ အကုသလံ န ဥပါဒိယတိ, ဒေါသာနုသယံ သမူဟနတိ, ဒေါသသလ္လံ ဥဒ္ဓရတိ, ဒုက္ခဝေဒနံ ပရိဇာနာတိ, ကာမဓါတုံ သမတိက္ကမတိ။ သမာဓိက္ခန္ဓေ ဌိတော လောဘံ အကုသလံ န ဥပါဒိယတိ, ရာဂါနုသယံ သမူဟနတိ, လောဘသလ္လံ ဥဒ္ဓရတိ, သုခဝေဒနံ ပရိဇာနာတိ, ရူပဓါတုံ သမတိက္ကမတိ။ ပညာက္ခန္ဓေ ဌိတော မောဟံ အကုသလံ န ဥပါဒိယတိ, အဝိဇ္ဇာနုသယံ သမူဟနတိ, မောဟသလ္လံ ဒိဋ္ဌိသလ္လဉ္စ ဥဒ္ဓရတိ, အဒုက္ခမသုခဝေဒနံ ပရိဇာနာတိ, အရူပဓါတုံ သမတိက္ကမတိ။ ဣတိ တီဟိ ခန္ဓေဟိ တီဏိ အကုသလမူလာနိ န ဥပါဒိယတိ, စတ္တာရိ သလ္လာနိ ဥဒ္ဓရတိ, တိဿော ဝေဒနာ ပရိဇာနာတိ, တေဓါတုကံ သမတိက္ကမတိ။

၆၂။ တတ္ထ ကတမာ အဝိဇ္ဇာ? ယံ စတူသု အရိယသစ္စေသု အညာဏန္တိ ဝိတ္ထာရေန ယထာ သော ပါဏသဇ္ဇေသု ကထံကထာ ကာတဗ္ဗံ။ တတ္ထ ကတမံ ဝိညာဏံ? ဆ ဝိညာဏကာယာ ဝေဒနာ သညာ စေတနာ ဖဿော မနသိကာရော, ဣဒံ နာမံ။ တတ္ထ ကတမံ ရူပံ? စာတုမဟာဘူတိကံ စတုန္နံ မဟာဘူတာနံ ဥပါဒါယရူပဿ ပညတ္တိံ။ ဣတိ ပုရိမကဉ္စ နာမံ ဣဒဉ္စ ရူပံ တဒုဘယံ နာမရူပန္တိ ဝုစ္စတိ။ တတ္ထ ဆဠာယတနန္တိ ဆ အဇ္ဈတ္တိကာနိ အာယတနာနိ, စက္ခု အဇ္ဈတ္တိကံ အာယတနံ ယာဝ မနော အဇ္ဈတ္တိကံ အာယတနံ။ ဖဿောတိ ဆ ဖဿကာယာ စက္ခုသမ္ဖဿော ယာဝ မနောသမ္ဖဿောတိ ဖဿော။ ဆ ဝေဒနာကာယာ ဝေဒနာ။ တဏှာတိ ဆ တဏှာကာယာ တဏှာ။ ဥပါဒါနန္တိ စတ္တာရိ ဥပါဒါနာနိ ကာမုပါဒါနံ ဒိဋ္ဌုပါဒါနံ သီလဗ္ဗတုပါဒါနံ အတ္တဝါဒုပါဒါနန္တိ ဥပါဒါနံ။ ဘဝေါတိ တယော ဘဝါ ကာမဘဝေါ ရူပဘဝေါ အရူပဘဝေါ။ တတ္ထ ကတမာ ဇာတိ? ယာ ပဌမံ ခန္ဓာနံ ပဌမံ ဓါတူနံ ပဌမံ အာယတနာနံ ဥပ္ပတ္တိ ဇာတိ သဉ္ဇာတိ ဩက္ကန္တိ အဘိနိဗ္ဗတ္တိ ခန္ဓာနံ ပါတုဘာဝေါ, အယံ ဇာတိ။ တတ္ထ ကတမာ ဇရာ? ဇရာ နာမ ယံ တံ ခဏ္ဍိစ္စံ ပါလိစ္စံ ဝလိတ္တစတာ ပဝိဝိတ္တံ စတုန္နံ မဟာဘူတာနံ ဝိဝဏ္ဏတံ ဘဂ္ဂေါ တံ ဇရာ ဟီယနာ ပဟီယနာ အာယုနော ဟာနိ သံဟာနိ ဣန္ဒ္ရိယာနံ ပရိဘေဒေါ ဥပနာဟော ပရိပါကော, အယံ ဇရာ။ တတ္ထ ကတမံ မရဏံ? မရဏံ နာမ ယံ တသ္မိံ တသ္မိံ သတ္တနိကာယေ တေသံ တေသံ သတ္တာနံ စုတိ စဝနတာ မရဏံ ကာလင်္ကိရိယာ ဥဒ္ဓုမာတကာနံ ဘေဒေါ ကာယဿ ဇီဝိတိန္ဒ္ရိယဿ ဥပစ္ဆေဒေါ, ဣဒံ မရဏံ။ ဣတိ ပုရိမိကာ စ ဇရာ ဣဒဉ္စ မရဏံ တဒုဘယံ ဇရာမရဏံ။

တတ္ထ အန္ဓကာရတိမိသာ ယထာဘူတံ အပ္ပဇာနနလက္ခဏာ အဝိဇ္ဇာ သင်္ခါရာနံ ပဒဋ္ဌာနံ ဟ။ အဘိသင်္ခရဏလက္ခဏာ သင်္ခါရာ, ဥပစယပုနဗ္ဘဝါဘိရောပနပစ္စုပဋ္ဌာနာ။ တေ ဝိညာဏဿ ပဒဋ္ဌာနံ။ ဝတ္ထု သဝိညတ္တိလက္ခဏံ ဝိညာဏံ, တံ နာမရူပဿ ပဒဋ္ဌာနံ။ အနေကသန္နိဿယလက္ခဏံ နာမရူပံ, တံ သဠာယတနဿ ပဒဋ္ဌာနံ။ ဣန္ဒ္ရိယဝဝတ္ထာပနလက္ခဏံ သဠာယတနံ, တံ ဖဿဿ ပဒဋ္ဌာနံ ။ သန္နိပါတလက္ခဏော ဖဿော, သော ဝေဒနာယ ပဒဋ္ဌာနံ။ အနုဘဝနလက္ခဏာ ဝေဒနာ, သာ တဏှာယ ပဒဋ္ဌာနံ။ အဇ္ဈောသာနလက္ခဏာ တဏှာ, သာ ဥပါဒါနဿ ပဒဋ္ဌာနံ။ အာဒါနပရိဟနနလက္ခဏံ ဥပါဒါနံ, တံ ဘဝဿ ပဒဋ္ဌာနံ ။ နာနာဂတိဝိက္ခေပလက္ခဏော ဘဝေါ, သော ဇာတိယာ ပဒဋ္ဌာနံ။ ခန္ဓာနံ ပါတုဘာဝလက္ခဏာ ဇာတိ, သာ ဇရာယ ပဒဋ္ဌာနံ။ ဥပနယပရိပါကလက္ခဏာ ဇရာ, သာ မရဏဿ ပဒဋ္ဌာနံ။ အာယုက္ခယဇီဝိတဥပရောဓလက္ခဏံ မရဏံ, တံ ဒုက္ခဿ ပဒဋ္ဌာနံ။ ကာယသမ္ပီဠနလက္ခဏံ ဒုက္ခံ, တံ ဒေါမနဿဿ ပဒဋ္ဌာနံ။ စိတ္တသမ္ပီဠနလက္ခဏံ ဒေါမနဿံ, တံ သောကဿ ပဒဋ္ဌာနံ။ သောစနလက္ခဏော သောကော, သော ပရိဒေဝဿ ပဒဋ္ဌာနံ။ ဝစီနိစ္ဆာရဏလက္ခဏော ပရိဒေဝေါ, သော ဥပါယာသဿ ပဒဋ္ဌာနံ။ ယေ အာယာသာ တေ ဥပါယာသာ။

နဝ ပဒါနိ ယတ္ထ သဗ္ဗော အကုသလပက္ခော သင်္ဂဟံ သမောသရဏံ ဂစ္ဆတိ။ ကတမာနိ နဝ ပဒါနိ? ဒွေ မူလကိလေသာ, တီဏိ အကုသလမူလာနိ, စတ္တာရော ဝိပလ္လာသာ။ တတ္ထ ဒွေ မူလကိလေသာ အဝိဇ္ဇာ စ ဘဝတဏှာ စ, တီဏိ အကုသလမူလာနိ လောဘော ဒေါသော မောဟော စ။ စတ္တာရော ဝိပလ္လာသာ [အ။ နိ။ ၄။၄၉] – ‘‘အနိစ္စေ နိစ္စ’’န္တိ သညာဝိပလ္လာသော စိတ္တဝိပလ္လာသော ဒိဋ္ဌိဝိပလ္လာသော, ‘‘ဒုက္ခေ သုခ’’န္တိ သညာဝိပလ္လာသော စိတ္တဝိပလ္လာသော ဒိဋ္ဌိဝိပလ္လာသော, ‘‘အနတ္တနိ အတ္တာ’’တိ သညာဝိပလ္လာသော စိတ္တဝိပလ္လာသော ဒိဋ္ဌိဝိပလ္လာသော, ‘‘အသုဘေ သုဘ’’န္တိ သညာဝိပလ္လာသော စိတ္တဝိပလ္လာသော ဒိဋ္ဌိဝိပလ္လာသော။

၆၃။ တတ္ထ အဝိဇ္ဇာ နာမ စတူသု အရိယသစ္စေသု ယထာဘူတံ အညာဏံ, အယံ အဝိဇ္ဇာ။ ဘဝတဏှာ နာမ ယော ဘဝေသု ရာဂေါ သာရာဂေါ ဣစ္ဆာ မုစ္ဆာ ပတ္ထနာ နန္ဒီ အဇ္ဈောသာနံ အပရိစ္စာဂေါ, အယံ ဘဝတဏှာ။

တတ္ထ ကတမော လောဘော အကုသလမူလံ?

လောဘော နာမ သော တေသု တေသု ပရဝတ္ထူသု ပရဒဗ္ဗေသု ပရဋ္ဌာနေသု ပရသာပတေယျေသု ပရပရိဂ္ဂဟိတေသု လောဘော လုဗ္ဘနာ ဣစ္ဆာ မုစ္ဆာ ပတ္ထနာ နန္ဒီ အဇ္ဈောသာနံ အပရိစ္စာဂေါ, အယံ လောဘော အကုသလမူလံ။ ကဿေတံ မူလံ? လောဘော လောဘဇဿ အကုသလဿ ကာယကမ္မဿ ဝစီကမ္မဿ မနောကမ္မဿ စ, တထာ ယထာ တံသမ္ပယုတ္တာနံ စိတ္တစေတသိကာနံ ဓမ္မာနံ မူလံ။

တတ္ထ ကတမော ဒေါသော အကုသလမူလံ?

သော သတ္တေသု အာဃာတော အက္ခန္တိ အပ္ပစ္စယော ဗျာပါဒေါ ပဒေါသော အနတ္ထကာမတာ စေတသော ပဋိဃာတော, အယံ ဒေါသော အကုသလမူလံ။

ကဿေတံ မူလံ?

ဒေါသဇဿ ကာယကမ္မဿ ဝစီကမ္မဿ မနောကမ္မဿ သမ္ပယုတ္တာနဉ္စ စိတ္တစေတသိကာနံ ဓမ္မာနံ မူလံ။

တတ္ထ ကတမော မောဟော အကုသလမူလံ?

ယံ စတူသု အရိယသစ္စေသု အနဘိသမယော အသမ္ပဇ္ဇဂ္ဂါဟော အပ္ပဋိဝေဓေါ မောဟော မုယှနာ သမ္မောဟော သမ္မုယှနာ အဝိဇ္ဇာ တမော အန္ဓကာရော အာဝရဏံ နီဝရဏံ ဆဒနံ အစ္ဆဒနံ [အဝေစ္ဆဒနံ (ဣ။ က။)] အပသစ္ဆာဂမနံ ကုသလာနံ ဓမ္မာနံ, အယံ မောဟော အကုသလမူလံ။

ကဿေတံ မူလံ?

မောဟဇဿ အကုသလဿ ကာယကမ္မဿ ဝစီကမ္မဿ မနောကမ္မဿ စ တံသမ္ပယုတ္တကာနဉ္စ စိတ္တစေတသိကာနံ ဓမ္မာနံ မူလံ။

တတ္ထ ဝိပလ္လာသာ ဇာနိတဗ္ဗာ, ဝိပလ္လာသာနံ ဝတ္ထု ဇာနိတဗ္ဗံ။ ယံ ဝိပလ္လာသံ သိယာ, တံ ဇာနိတဗ္ဗံ။ တတ္ထ ဧကော ဝိပလ္လာသော တီဏိ ဝိပလ္လာသာနိ စတ္တာရိ ဝိပလ္လာသဝတ္ထူနိ။ ကတမော ဧကော ဝိပလ္လာသော စ, ယေန ပဋိပက္ခေန ဝိပလ္လာသိတံ ဂဏှာတိ?

‘‘အနိစ္စေ နိစ္စ’’န္တိ, ‘‘ဒုက္ခေ သုခ’’န္တိ, ‘‘အနတ္တနိ အတ္တာ’’တိ, ‘‘အသုဘေ သုဘ’’န္တိ, အယံ ဧကော ဝိပလ္လာသော။

ကတမာနိ စတ္တာရိ ဝိပလ္လာသဝတ္ထူနိ?

ကာယော ဝေဒနာ စိတ္တံ ဓမ္မာ စ။ ဣမာနိ စတ္တာရိ ဝိပလ္လာသဝတ္ထူနိ။

ကတမာနိ တီဏိ ဝိပလ္လာသာနိ?

သညာ စိတ္တံ ဒိဋ္ဌိ စ။ ဣမာနိ တီဏိ ဝိပလ္လာသာနိ။

တတ္ထ မနာပိကေ ဝတ္ထုမှိ ဣန္ဒ္ရိယဝတ္ထေ ဝဏ္ဏာယတနေ ဝါ ယော နိမိတ္တဿ ဥဂ္ဂါဟော, အယံ သညာဝိပလ္လာသော။ တတ္ထ ဝိပရီတစိတ္တဿ ဝတ္ထုမှိ သတိ ဝိညတ္တိ, အယံ စိတ္တဝိပလ္လာသော။ တတ္ထ ဝိပရီတစိတ္တဿ တမှိ ရူပေ ‘‘အသုဘေ သုဘ’’န္တိ ယာ ခန္တိ ရုစိ ဥပေက္ခနာ နိစ္ဆယော ဒိဋ္ဌိ နိဒဿနံ သန္တီရဏာ, အယံ ဒိဋ္ဌိဝိပလ္လာသော။ တတ္ထ ဝတ္ထုဘေဒေန ကာယေသု ဒွါဒသ ဝိပလ္လာသာ ဘဝန္တိ။ တယော ကာယေ တယော ဝေဒနာယ တယော စိတ္တေ တယော ဓမ္မေ, စတ္တာရော သညာဝိပလ္လာသာ စတ္တာရော စိတ္တဝိပလ္လာသာ စတ္တာရော ဒိဋ္ဌိဝိပလ္လာသာ, အာယတနူပစယတော စက္ခုဝိညာဏသညာသမင်္ဂိဿ ရူပေသု ဒွါဒသ ဝိပလ္လာသာ ယာဝ မနော သညာသမင်္ဂိဿ, ဓမ္မေသု ဒွါဒသ ဝိပလ္လာသာ ဆ ဒွါဒသကာ စတ္တာရိ ဝိပလ္လာသာ ဘဝန္တိ။ အာရမ္မဏနာနတ္တတော ဟိ အပရိမိတသင်္ခေယျာနံ သတ္တာနံ [အတ္တာနံ (က။)] အပရိမိတမသင်္ခေယျာ ဝိပလ္လာသာ ဘဝန္တိ ဟီနုက္ကဋ္ဌမဇ္ဈိမတာယ။

၆၄။ တတ္ထ ပဉ္စက္ခန္ဓာ စတ္တာရိ အတ္တဘာဝဝတ္ထူနိ ဘဝန္တိ။ ယော ရူပက္ခန္ဓော, သော ကာယော အတ္တဘာဝဝတ္ထု။ ယော ဝေဒနာက္ခန္ဓော, သော ဝေဒနာ အတ္တဘာဝဝတ္ထု။ ယော သညာက္ခန္ဓော စ သင်္ခါရက္ခန္ဓော စ, တေ ဓမ္မာ အတ္တဘာဝဝတ္ထု။ ယော ဝိညာဏက္ခန္ဓော, သော စိတ္တံ အတ္တဘာဝဝတ္ထု။ ဣတိ ပဉ္စက္ခန္ဓာ စတ္တာရိ အတ္တဘာဝဝတ္ထူနိ။ တတ္ထ ကာယေ ‘‘အသုဘေ သုဘ’’န္တိ ဝိပလ္လာသော ဘဝတိ။ ဧဝံ ဝေဒနာသု။ပေ။။ စိတ္တေ။ပေ။။ ဓမ္မေသု စ အတ္တဝိပလ္လာသော ဘဝတိ။ တတ္ထ စတုန္နံ ဝိပလ္လာသာနံ သမုဂ္ဃါတနတ္ထံ ဘဂဝါ စတ္တာရော သတိပဋ္ဌာနေ ဒေသေတိ ပညပေတိ ကာယေ ကာယာနုပဿီ ဝိဟရတော ‘‘အသုဘေ သုဘ’’န္တိ ဝိပလ္လာသံ သမုဂ္ဃါတေတိ, ဧဝံ ဝေဒနာသု, စိတ္တေ, ဓမ္မေသု စ ကာတဗ္ဗံ။

တတ္ထ အန္ဓကာရတိမိသာ အပ္ပဋိဝေဓလက္ခဏာ အဝိဇ္ဇာ, တဿာ ဝိပလ္လာသပဒဋ္ဌာနံ။ အဇ္ဈောသာနလက္ခဏာ တဏှာ, တဿာ ပိယရူပသာတရူပံ ပဒဋ္ဌာနံ။ အတ္တာသယဝဉ္စနာလက္ခဏော လောဘော, တဿ အဒိန္နာဒါနံ ပဒဋ္ဌာနံ။ ဣဓ ဝိဝါဒလက္ခဏော ဒေါသော, တဿ ပါဏာတိပါတော ပဒဋ္ဌာနံ။ ဝတ္ထုဝိပ္ပဋိပတ္တိလက္ခဏော မောဟော, တဿ မိစ္ဆာပဋိပတ္တိ ပဒဋ္ဌာနံ။ သင်္ခတာနံ ဓမ္မာနံ အဝိနာသဂ္ဂဟဏလက္ခဏာ နိစ္စသညာ, တဿာ သဗ္ဗသင်္ခါရာ ပဒဋ္ဌာနံ။ သာသဝဖဿောပဂမနလက္ခဏာ သုခသညာ, တဿာ မမင်္ကာရော ပဒဋ္ဌာနံ။ ဓမ္မေသု ဥပဂမနလက္ခဏာ အတ္တသညာ , တဿာ အဟင်္ကာရော ပဒဋ္ဌာနံ။ ဝဏ္ဏသင်္ဂဟဏလက္ခဏာ သုဘသညာ, တဿာ ဣန္ဒ္ရိယအသံဝရော ပဒဋ္ဌာနံ။ ဧတေဟိ နဝဟိ ပဒေဟိ ဥဒ္ဒိဋ္ဌေဟိ သဗ္ဗော အကုသလပက္ခော နိဒ္ဒိဋ္ဌော ဘဝတိ, သော စ ခေါ ဗဟုဿုတေန သက္ကာ ဇာနိတုံ နော အပ္ပဿုတေန, ပညဝတာ နော ဒုပ္ပညေန, ယုတ္တေန နော အယုတ္တေန။

နဝ ပဒါနိ ကုသလာနိ ယတ္ထ သဗ္ဗော ကုသလပက္ခော သင်္ဂဟော သမောသရဏံ ဂစ္ဆန္တိ။ ကတမာနိ နဝ ပဒါနိ? သမထော ဝိပဿနာ အလောဘော အဒေါသော အမောဟော အနိစ္စသညာ ဒုက္ခသညာ အနတ္တသညာ အသုဘသညာ စ။

တတ္ထ ကတမော သမထော? ယာ စိတ္တဿ ဌိတိ သဏ္ဌိတိ အဝဋ္ဌိတိ ဌာနံ ပဋ္ဌာနံ ဥပဋ္ဌာနံ သမာဓိ သမာဓါနံ အဝိက္ခေပေါ အဝိပ္ပဋိသာရော ဝူပသမော မာနသော ဧကဂ္ဂံ စိတ္တဿ, အယံ သမထော။

တတ္ထ ကတမာ ဝိပဿနာ? ခန္ဓေသု ဝါ ဓါတူသု ဝါ အာယတနေသု ဝါ နာမရူပေသု ဝါ ပဋိစ္စသမုပ္ပါဒေသု ဝါ ပဋိစ္စသမုပ္ပန္နေသု ဝါ ဓမ္မေသု ဒုက္ခေသု ဝါ သမုဒယေသု ဝါ နိရောဓေ ဝါ မဂ္ဂေ ဝါ ကုသလာကုသလေသု ဝါ ဓမ္မေသု သာဝဇ္ဇအနဝဇ္ဇေသု ဝါ ကဏှသုက္ကေသု ဝါ သေဝိတဗ္ဗအသေဝိတဗ္ဗေသု ဝါ သော ယထာဘူတံ ဝိစယော ပဝိစယော ဝီမံသာ ပရဝီမံသာ ဂါဟနာ အဂ္ဂါဟနာ ပရိဂ္ဂါဟနာ စိတ္တေန ပရိစိတနာ တုလနာ ဥပပရိက္ခာ ဉာဏံ ဝိဇ္ဇာ ဝါ စက္ခု ဗုဒ္ဓိ မေဓါ ပညာ ဩဘာသော အာလောကော အာဘာ ပဘာ ခဂ္ဂေါ နာရာစော [နာရဇ္ဇော (ဣ။ က။)] ဓမ္မဝိစယသမ္ဗောဇ္ဈင်္ဂေါ သမ္မာဒိဋ္ဌိ မဂ္ဂင်္ဂံ, အယံ ဝိပဿနာ။ တေနေသာ ဝိပဿနာ ဣတိ ဝုစ္စတိ ဝိဝိဓါ ဝါ ဧသာ ဝိပဿနာတိ, တသ္မာ ဧသာ ဝိပဿနာတိ ဝုစ္စတိ။ ဒွိဓါ စေသာ ဟိ ဝိပဿနာ ဓမ္မဝိပဿနာတိ ဝုစ္စတိ, ဒွိဓါ ဣမာယ ပဿတိ သုဘဉ္စ အသုဘဉ္စ ကဏှဉ္စ သုက္ကဉ္စ သေဝိတဗ္ဗဉ္စ အသေဝိတဗ္ဗဉ္စ ကမ္မဉ္စ ဝိပါကဉ္စ ဗန္ဓဉ္စ ဝိမောက္ခဉ္စ အာစယဉ္စ အပစယဉ္စ ပဝတ္တိဉ္စ နိဝတ္တိဉ္စ သံကိလေသဉ္စ ဝေါဒါနဉ္စ, ဧဝံ ဝိပဿနာတိ ဝုစ္စတိ။ အထ ဝါ ဝိဣတိ ဥပသဂ္ဂေါ ပဿနာတိ အတ္ထော တသ္မာ ဝိပဿနာတိ ဝုစ္စတေ, အယံ ဝိပဿနာ။

၆၅။ တတ္ထ ဒွေ ရောဂါ သတ္တာနံ အဝိဇ္ဇာ စ ဘဝတဏှာ စ, ဧတေသံ ဒွိန္နံ ရောဂါနံ နိဃာတာယ ဘဂဝတာ ဒွေ ဘေသဇ္ဇာနိ ဝုတ္တာနိ သမထော စ ဝိပဿနာ စ။ ဣမာနိ ဒွေ ဘေသဇ္ဇာနိ ပဋိသေဝေန္တော ဒွေ အရောဂေ သစ္ဆိကရောတိ ရာဂဝိရာဂံ စေတောဝိမုတ္တိံ အဝိဇ္ဇာဝိရာဂဉ္စ ပညာဝိမုတ္တိံ။ တတ္ထ တဏှာရောဂဿ သမထော ဘေသဇ္ဇံ, ရာဂဝိရာဂါ စေတောဝိမုတ္တိ အရောဂံ။ အဝိဇ္ဇာရောဂဿ ဝိပဿနာဘေသဇ္ဇံ အဝိဇ္ဇာဝိရာဂါ ပညာဝိမုတ္တိ အရောဂံ။ ဧဝဉှိ ဘဂဝါ စာဟ, ‘‘ဒွေ ဓမ္မာ ပရိညေယျာ [ပဿ ဒီ။ နိ။ ၃။၃၅၂] နာမဉ္စ ရူပဉ္စ, ဒွေ ဓမ္မာ ပဟာတဗ္ဗာ အဝိဇ္ဇာ စ ဘဝတဏှာ စ, ဒွေ ဓမ္မာ ဘာဝေတဗ္ဗာ သမထော စ ဝိပဿနာ စ, ဒွေ ဓမ္မာ သစ္ဆိကာတဗ္ဗာ ဝိဇ္ဇာ စ ဝိမုတ္တိ စာ’’တိ။ တတ္ထ သမထံ ဘာဝေန္တော ရူပံ ပရိဇာနာတိ, ရူပံ ပရိဇာနန္တော တဏှံ ပဇဟတိ, တဏှံ ပဇဟန္တော ရာဂဝိရာဂါ စေတောဝိမုတ္တိံ သစ္ဆိကရောတိ, ဝိပဿနံ ဘာဝေန္တော နာမံ ပရိဇာနာတိ, နာမံ ပရိဇာနန္တော အဝိဇ္ဇံ ပဇဟတိ, အဝိဇ္ဇံ ပဇဟန္တော အဝိဇ္ဇာဝိရာဂါ ပညာဝိမုတ္တိံ သစ္ဆိကရောတိ။ ယဒါ ဘိက္ခုနော ဒွေ ဓမ္မာ ပရိညာတာ ဘဝန္တိ နာမဉ္စ ရူပဉ္စ, တထာဿ ဒွေ ဓမ္မာ ပဟီနာ ဘဝန္တိ အဝိဇ္ဇာ စ ဘဝတဏှာ စ။ ဒွေ ဓမ္မာ ဘာဝိတာ ဘဝန္တိ သမထော စ ဝိပဿနာ စ, ဒွေ ဓမ္မာ သစ္ဆိကာတဗ္ဗာ ဘဝန္တိ ဝိဇ္ဇာ စ ဝိမုတ္တိ စ။ ဧတ္တာဝတာ ဘိက္ခု ကတကိစ္စော ဘဝတိ။ ဧသာ သောပါဒိသေသာ နိဗ္ဗာနဓါတု။ တဿ အာယုပရိယာဒါနာ ဇီဝိတိန္ဒ္ရိယဿ ဥပရောဓါ ဣဒဉ္စ ဒုက္ခံ နိရုဇ္ဈတိ, အညဉ္စ ဒုက္ခံ န ဥပ္ပဇ္ဇတိ။ တတ္ထ ယော ဣမေသံ ခန္ဓာနံ ဓါတုအာယတနာနံ နိရောဓေါ ဝူပသမော အညေသဉ္စ ခန္ဓဓါတုအာယတနာနံ အပ္ပဋိသန္ဓိ အပါတုဘာဝေါ, အယံ အနုပါဒိသေသာ နိဗ္ဗာနဓါတု။

တတ္ထ ကတမံ အလောဘော ကုသလမူလံ? ယံဓါတုကော အလောဘော အလုဗ္ဘနာ အလုဗ္ဘိတတ္တံ အနိစ္ဆာ အပတ္ထနာ အကန္တာ အနဇ္ဈောသာနံ။ အယံ အလောဘော ကုသလမူလံ။ ကဿေတံ မူလံ? အလောဘဇဿ ကုသလဿ ကာယကမ္မဿ ဝစီကမ္မဿ မနောကမ္မဿ တံသမ္ပယုတ္တာနဉ္စ စိတ္တစေတသိကာနံ ဓမ္မာနံ မူလံ။ အထ ဝါ အရိယော အဋ္ဌင်္ဂိကော မဂ္ဂေါ ကုသလန္တိ ဝုစ္စတိ, သော တိဏ္ဏံ မဂ္ဂင်္ဂါနံ မူလံ။ ကတမေသံ တိဏ္ဏံ, သမ္မာသင်္ကပ္ပဿ သမ္မာဝါယာမဿ သမ္မာသမာဓိဿ စ ဣမေသံ မူလန္တိ, တသ္မာ ကုသလမူလန္တိ ဝုစ္စတိ။

တတ္ထ ကတမံ အဒေါသော ကုသလမူလံ? ယာ သတ္တေသု ဝါ သင်္ခါရေသု ဝါ အနဃာတော အပ္ပဋိဃာတော အဗျာပတ္တိ အဗျာပါဒေါ အဒေါသော မေတ္တာ မေတ္တာယနာ အတ္ထကာမတာ ဟိတကာမတာ စေတသော ပသာဒေါ, အယံ အဒေါသော ကုသလမူလံ။ ကဿေတံ မူလံ? အဒေါသဇဿ ကုသလဿ ကာယကမ္မဿ ဝစီကမ္မဿ မနောကမ္မဿ တံသမ္ပယုတ္တာနဉ္စ စိတ္တစေတသိကာနံ ဓမ္မာနံ မူလံ။ အထ ဝါ တိဏ္ဏံ မဂ္ဂင်္ဂါနံ မူလံ။ ကတမေသံ တိဏ္ဏံ? သမ္မာဝါစာယ သမ္မာကမ္မန္တဿ သမ္မာအာဇီဝဿ စ ဣမေသံ တိဏ္ဏံ မဂ္ဂင်္ဂါနံ မူလံ, တသ္မာ ကုသလမူလန္တိ ဝုစ္စတိ။

တတ္ထ ကတမံ အမောဟော ကုသလမူလံ? ယံ စတူသု အရိယသစ္စေသု ယထာဘူတံ ဉာဏဒဿနံ အဘိသမယော သမ္မာ စ ပစ္စာဂမော ပဋိဝေဓေါ အမောဟော အသမ္မုယှနာ အသမ္မောဟော ဝိဇ္ဇာပကာသော အာလောကော အနာဝရဏံ သေက္ခာနံ ကုသလာနံ ဓမ္မာနံ, အယံ အမောဟော ကုသလမူလံ။ ကဿေတံ မူလံ? အမောဟဇဿ ကုသလဿ ကာယကမ္မဿ ဝစီကမ္မဿ မနောကမ္မဿ တံသမ္ပယုတ္တာနဉ္စ စိတ္တစေတသိကာနံ ဓမ္မာနံ မူလံ။ အထ ဝါ ဒွိန္နံ မဂ္ဂင်္ဂါနံ ဧတံ မူလံ။ ကတမေသံ ဒွိန္နံ? သမ္မာဒိဋ္ဌိယာ စ သမ္မာသတိယာ စ ဣမေသံ ဒွိန္နံ မဂ္ဂင်္ဂါနံ မူလံ, တသ္မာ ကုသလမူလန္တိ ဝုစ္စတိ။ ဧဝံ ဣမေသံ တီဟိ ကုသလမူလေဟိ အဋ္ဌင်္ဂိကော မဂ္ဂေါ ယောဇေတဗ္ဗော။

၆၆။ တတ္ထ ကတမာ အနိစ္စသညာ? ‘‘သဗ္ဗေ သင်္ခါရာ ဥပ္ပါဒဝယဓမ္မိနော’’တိ စ ယာ သညာ သဉ္ဇာနနာ ဝဝတ္ထပနာ ဥဂ္ဂါဟော, အယံ အနိစ္စသညာ။ တဿာ ကော နိဿန္ဒော? အနိစ္စသညာယ ဘာဝိတာယ ဗဟုလီကတာယ အဋ္ဌသု လောကဓမ္မေသု စိတ္တံ နာနုသန္ဓတိ န သန္ဓတိ န သဏ္ဌဟတိ, ဥပေက္ခာ ဝါ ပဋိက္ကူလတာ ဝါ သဏ္ဌဟတိ, အယမဿာ နိဿန္ဒော။

တတ္ထ ကတမာ ဒုက္ခသညာ? ‘‘သဗ္ဗေ သင်္ခါရာ ဒုက္ခာ’’တိ ယာ သညာ သဉ္ဇာနနာ ဝဝတ္ထပနာ ဥဂ္ဂါဟော, အယံ ဒုက္ခသညာ။ တဿာ ကော နိဿန္ဒော? ဒုက္ခသညာယ ဘာဝိတာယ ဗဟုလီကတာယ အာလဿေ သံပမာဒေ ဝိမှယေ စ စိတ္တံ နာနုသန္ဓတိ န သန္ဓတိ န သဏ္ဌဟတိ, ဥပေက္ခာ ဝါ ပဋိက္ကူလတာ ဝါ သဏ္ဌဟတိ, အယမဿာ နိဿန္ဒော။

တတ္ထ ကတမာ အနတ္တသညာ? ‘‘သဗ္ဗေသု ဓမ္မေသု အနတ္တာ’’တိ ယာ သညာ သဉ္ဇာနနာ ဝဝတ္ထပနာ ဥဂ္ဂါဟော, အယံ အနတ္တသညာ။ တဿာ ကော နိဿန္ဒော, အနတ္တသညာယ ဘာဝိတာယ ဗဟုလီကတာယ အဟင်္ကာရော စိတ္တံ နာနုသန္ဓတိ န သန္ဓတိ, မမင်္ကာရော န သဏ္ဌဟတိ, ဥပေက္ခာ ဝါ ပဋိက္ကူလတာ ဝါ သဏ္ဌဟတိ, အယမဿာ နိဿန္ဒော။

တတ္ထ ကတမာ အသုဘသညာ? ‘‘သတ္တ သင်္ခါရာ အသုဘာ’’တိ ယာ သညာ သဉ္ဇာနနာ ဝဝတ္ထပနာ ဥဂ္ဂါဟော, အယံ အသုဘသညာ။ တဿာ ကော နိဿန္ဒော? အသုဘသညာယ ဘာဝိတာယ ဗဟုလီကတာယ သုဘနိမိတ္တေ စိတ္တံ နာနုသန္ဓတိ န သန္ဓတိ န သဏ္ဌဟတိ, ဥပေက္ခာ ဝါ ပဋိက္ကူလတာ ဝါ သဏ္ဌဟတိ, အယမဿာ နိဿန္ဒော။

တတ္ထ ပဉ္စန္နံ ခန္ဓာနံ ပရိညာ ဘဂဝတာ ဒေသိတာ, ယော တတ္ထ အသုဘသညာ ရူပက္ခန္ဓဿ ပရိညတ္တံ, ဒုက္ခသညာ ဝေဒနာက္ခန္ဓဿ ပရိညတ္တံ, အနတ္တသညာ သညာက္ခန္ဓဿ သင်္ခါရက္ခန္ဓဿ ပရိညတ္တံ, အနိစ္စသညာ ဝိညာဏက္ခန္ဓဿ ပရိညတ္တံ။ တတ္ထ သမထေန တဏှံ သမုဂ္ဃါတေတိ, ဝိပဿနာ အဝိဇ္ဇံ သမုဂ္ဃါတေတိ, အဒေါသေန ဒေါသံ သမုဂ္ဃါတေတိ, အမောဟေန မောဟံ သမုဂ္ဃါတေတိ, အနိစ္စသညာယ နိစ္စသညံ သမုဂ္ဃါတေတိ, ဒုက္ခသညာယ သုခသညံ သမုဂ္ဃါတေတိ, အနတ္တသညာယ အတ္တသညံ သမုဂ္ဃါတေတိ, အသုဘသညာယ သုဘသညံ သမုဂ္ဃါတေတိ။

စိတ္တဝိက္ခေပပဋိသံဟရဏလက္ခဏော သမထော, တဿ ဈာနာနိ ပဒဋ္ဌာနံ။ သဗ္ဗဓမ္မံ ယထာဘူတံ ပဋိဝေဓလက္ခဏာ ဝိပဿနာ, တဿာ သဗ္ဗနေယျံ ပဒဋ္ဌာနံ။ ဣစ္ဆာပဋိသံဟရဏလက္ခဏော အလောဘော, တဿ အဒိန္နာဒါနာ ဝေရမဏီ ပဒဋ္ဌာနံ။ အဗျာပါဒလက္ခဏော အဒေါသော, တဿ ပါဏာတိပါတာ ဝေရမဏီ ပဒဋ္ဌာနံ။ ဝတ္ထုအပ္ပဋိဟတလက္ခဏော အမောဟော, တဿ သမ္မာပဋိပတ္တိ ပဒဋ္ဌာနံ။ သင်္ခတာနံ ဓမ္မာနံ ဝိနာသဂ္ဂဟဏလက္ခဏာ အနိစ္စသညာ, တဿာ ဥဒယဗ္ဗယော ပဒဋ္ဌာနံ။ သာသဝဖဿသဉ္ဇာနနလက္ခဏာ ဒုက္ခသညာ, တဿာ ဝေဒနာ ပဒဋ္ဌာနံ။ သဗ္ဗဓမ္မအနုပဂမနလက္ခဏာ အနတ္တသညာ, တဿာ ဓမ္မသညာ ပဒဋ္ဌာနံ။ ဝိနီလကဝိပုဗ္ဗကဥဒ္ဓုမာတကသမုဂ္ဂဟဏလက္ခဏာ အသုဘသညာ, တဿာ နိဗ္ဗိဒါ ပဒဋ္ဌာနံ။ ဣမေသု နဝသု ပဒေသု ဥပဒိဋ္ဌေသု သဗ္ဗော ကုသလပက္ခော ဥပဒိဋ္ဌော ဘဝတိ, သော စ ဗဟုဿုတေန သက္ကာ ဇာနိတုံ နော အပ္ပဿုတေန, ပညဝတာ နော ဒုပ္ပညေန, ယုတ္တေန နော အယုတ္တေနာတိ။

၆၇။ တတ္ထ နိစ္စသညာဓိမုတ္တဿ အပရာပရံ စိတ္တံ ပဏာမေန္တော သတိမပစ္စဝေက္ခတော အနိစ္စသညာ န ဥပဋ္ဌာတိ, ပဉ္စသု ကာမဂုဏေသု သုခဿာဒါဓိမုတ္တဿ ဣရိယာပထဿ အဂတိမပစ္စဝေက္ခတော ဒုက္ခသညာ န ဥပဋ္ဌာတိ, ခန္ဓဓါတုအာယတနေသု အတ္တာဓိမုတ္တဿ နာနာဓါတုအနေကဓါတုဝိနိဗ္ဘောဂမပစ္စဝေက္ခတော အနတ္တသညာ န ဥပဋ္ဌာတိ, ဝဏ္ဏသဏ္ဌာနာဘိရတဿ ကာယေ သုဘာဓိမုတ္တဿ စ ဝိပ္ပဋိစ္ဆန္နာ အသုဘသညာ န ဥပဋ္ဌာတိ။

အဝိပ္ပဋိသာရလက္ခဏာ သဒ္ဓါ, သဒ္ဒဟနာ ပစ္စုပဋ္ဌာနံ။ တဿ စတ္တာရိ သောတာပတ္တိယင်္ဂါနိ ပဒဋ္ဌာနံ။ ဧဝဉှိ ဝုတ္တံ ဘဂဝတာ [ပဿ သံယုတ္တနိကာယေ] သဒ္ဓိန္ဒ္ရိယံ ဘိက္ခဝေ, ကုဟိံ ဒဋ္ဌဗ္ဗံ, စတူသု သောတာပတ္တိယင်္ဂေသု ကုသလေသု ဓမ္မေသု။

သူရာအပဋိက္ခေပနလက္ခဏံ ဝီရိယိန္ဒ္ရိယံ, ဝီရိယိန္ဒ္ရိယာရမ္ဘော ပစ္စုပဋ္ဌာနံ။ တဿ အတီတာ စတ္တာရော သမ္မပ္ပဓါနာ ပဒဋ္ဌာနံ။ ယထာ ဝုတ္တံ ဘဂဝတာ [ပဿ သံယုတ္တနိကာယေ] ဝီရိယိန္ဒ္ရိယံ, ဘိက္ခဝေ, ကုဟိံ ဒဋ္ဌဗ္ဗံ, စတူသု သမ္မပ္ပဓါနေသု။

သတိ သရဏလက္ခဏာ, အသမ္မောဟပစ္စုပဋ္ဌာနာ။ တဿ အတီတာ စတ္တာရော သတိပဋ္ဌာနာ ပဒဋ္ဌာနံ။ ယထာ ဝုတ္တံ ဘဂဝတာ သတိန္ဒ္ရိယံ ဘိက္ခဝေ, ကုဟိံ ဒဋ္ဌဗ္ဗံ, စတူသု သတိပဋ္ဌာနေသု။

ဧကဂ္ဂလက္ခဏော သမာဓိ, အဝိက္ခေပပစ္စုပဋ္ဌာနော, တဿ စတ္တာရိ ဉာဏာနိ ပဒဋ္ဌာနံ။ ယထာ ဝုတ္တံ ဘဂဝတာ သမာဓိန္ဒ္ရိယံ, ဘိက္ခဝေ, ကုဟိံ ဒဋ္ဌဗ္ဗံ, စတူသု ဈာနေသု။

ပဇာနနလက္ခဏာ ပညာ, ဘူတတ္ထသန္တီရဏာ ပစ္စုပဋ္ဌာနာ, တဿ စတ္တာရိ အရိယသစ္စာနိ ပဒဋ္ဌာနံ။ ယထာ ဝုတ္တံ ဘဂဝတာ [ပဿ သံယုတ္တနိကာယေ] ပညိန္ဒ္ရိယံ, ဘိက္ခဝေ, ကုဟိံ ဒဋ္ဌဗ္ဗံ, စတူသု အရိယသစ္စေသု။

စတ္တာရိ စက္ကာနိ [ပဿ အ။ နိ။ ၄။၃၁] ပတိရူပဒေသဝါသော စက္ကံ, သပ္ပုရိသူပနိဿယော စက္ကံ, အတ္တသမ္မာပဏိဓါနံ စက္ကံ, ပုဗ္ဗေ ကတပုညတာ စက္ကံ။ တတ္ထ အရိယသန္နိဿယလက္ခဏော ပတိရူပဒေသဝါသော, သော သပ္ပုရိသူပနိဿယဿ ပဒဋ္ဌာနံ။ အရိယသန္နိဿယလက္ခဏော သပ္ပုရိဿူပနိဿယော, သော အတ္တသမ္မာပဏိဓါနဿ ပဒဋ္ဌာနံ။ သမ္မာပဋိပတ္တိလက္ခဏံ အတ္တသမ္မာပဏိဓါနံ, တံ ပုညာနံ ပဒဋ္ဌာနံ။ ကုသလဓမ္မောပစယလက္ခဏံ ပုညံ, တံ သဗ္ဗသမ္ပတ္တီနံ ပဒဋ္ဌာနံ။

ဧကာဒသသီလမူလကာ ဓမ္မာ သီလဝတော အဝိပ္ပဋိသာရော ဘဝတိ။ပေ။။ သော ဝိမုတ္တိဉာဏဒဿနံ ‘‘နာပရံ ဣတ္ထတ္တာယာ’’တိ ပဇာနနာ။ တတ္ထ ဝေရမဏိလက္ခဏံ သီလံ, တံ အဝိပ္ပဋိသာရဿ ပဒဋ္ဌာနံ။ န အတ္တာနုဝါဒလက္ခဏော အဝိပ္ပဋိသာရော, သော ပါမောဇ္ဇဿ ပဒဋ္ဌာနံ။ အဘိပ္ပမောဒနလက္ခဏံ ပါမောဇ္ဇံ, တံ ဣတိယာ ပဒဋ္ဌာနံ။ အတ္တမနလက္ခဏာ ဣတိ , သာ ပဿဒ္ဓိယာ ပဒဋ္ဌာနံ။ ကမ္မနိယလက္ခဏာ ပဿဒ္ဓိ, သာ သုခဿ ပဒဋ္ဌာနံ။ အဗျာပါဒလက္ခဏံ သုခံ, တံ သမာဓိနော ပဒဋ္ဌာနံ။ အဝိက္ခေပနလက္ခဏော သမာဓိ, သော ယထာဘူတဉာဏဒဿနဿ ပဒဋ္ဌာနံ။ အဝိပရီတသန္တီရဏလက္ခဏာ ပညာ, သာ နိဗ္ဗိဒါယ ပဒဋ္ဌာနံ အနာလယနလက္ခဏာ နိဗ္ဗိဒါ, သာ ဝိရာဂဿ ပဒဋ္ဌာနံ။ အသံကိလေသလက္ခဏော ဝိရာဂေါ, သော ဝိမုတ္တိယာ ပဒဋ္ဌာနံ။ အကုသလဓမ္မဝိဝေကလက္ခဏာ ဝိမုတ္တိ, သာ ဝိမုတ္တိနော ဝေါဒါနဿ ပဒဋ္ဌာနံ။

၆၈။ စတဿော အရိယဘူမိယော စတ္တာရိ သာမညဖလာနိ။ တတ္ထ ယော ယထာဘူတံ ပဇာနာတိ, ဧသာ ဒဿနဘူမိ။ သောတာပတ္တိဖလဉ္စ သော ယထာဘူတံ ပဇာနိတွာ နိဗ္ဗိန္ဒတိ, ဣဒံ တနုကာမရာဂဿ ပဒဋ္ဌာနံ ဗျာပါဒါနံ။ သကဒါဂါမိဖလဉ္စ သဏှံ ဝိရဇ္ဇတိ, အယံ ရာဂဝိရာဂါ စေတောဝိမုတ္တိ။ အနာဂါမိဖလဉ္စ ယံ အဝိဇ္ဇာဝိရာဂါ ဝိမုစ္စတိ, အယံ ကတာဘူမိ။ အရဟတ္တဉ္စ သာမညဖလာနီတိ ကော ဝစနတ္ထော, အရိယော အဋ္ဌင်္ဂိကော မဂ္ဂေါ သာမညံ, တဿေတာနိ ဖလာနိ သာမညဖလာနီတိ ဝုစ္စတိ။ ကိဿ ဗြဟ္မညဖလာနီတိ ဝုစ္စန္တေ? ဗြဟ္မညအရိယော အဋ္ဌင်္ဂိကော မဂ္ဂေါ, တဿ တာနိ ဖလာနီတိ ဗြဟ္မညဖလာနီတိ ဝုစ္စန္တေ။

တတ္ထ သောတာပန္နော ကထံ ဟောတိ? သဟ သစ္စာဘိသမယာ အရိယသာဝကဿ တီဏိ သံယောဇနာနိ ပဟီယန္တိ သက္ကာယဒိဋ္ဌိ ဝိစိကိစ္ဆာ သီလဗ္ဗတပရာမာသော စ, ဣမေသံ တိဏ္ဏံ သံယောဇနာနံ ပဟာနာ ပရိက္ခယာ အရိယသာဝကော ဟောတိ သောတာပန္နော အဝိနိပါတဓမ္မော ယာဝ ဒုက္ခဿန္တံ ကရောတိ။

တတ္ထ ကတမာ သက္ကာယဒိဋ္ဌိ? အဿုတဝါ ဗာလော ပုထုဇ္ဇနော ယာဝ အရိယဓမ္မေ အကောဝိဒေါ, သော ရူပံ အတ္တတော သမနုပဿတိ ယာဝ ဝိညာဏသ္မိံ အတ္တာနံ, သော ဣမေသု ပဉ္စသု ခန္ဓေသု အတ္တဂ္ဂါဟော ဝါ အတ္တနိယဂ္ဂါဟော ဝါ ဧသောဟမသ္မိ ဧကသ္မိံ ဝသဝတ္တိကော [အဝတ္တိတော (ဣ။ က။)] ပက္ခိတ္တော အနုဂ္ဂဟော အနုသယန္တော အင်္ဂမင်္ဂန္တိ ပရတိ။ ယာ တထာဘူတဿ ခန္တိ ရုစိ ပေက္ခနာ အာကာရပရိဝိတက္ကော ဒိဋ္ဌိနိဇ္ဈာယနာ အဘိပ္ပသန္နာ, အယံ ဝုစ္စတေ သက္ကာယဒိဋ္ဌီတိ။

တတ္ထ ပဉ္စ ဒိဋ္ဌိယော ဥစ္ဆေဒံ ဘဇန္တိ။ ကတမာယော ပဉ္စ? ရူပံ အတ္တတော သမနုပဿတိ, ယာဝ ဝိညာဏံ အတ္တတော သမနုပဿတိ, ဣမာယော ပဉ္စ ဥစ္ဆေဒံ ဘဇန္တိ, အဝသေသာယော ပန္နရသ သဿတံ ဘဇန္တိ။ ဣတိ သက္ကာယဒိဋ္ဌိပဟာနာ ဒွါသဋ္ဌိဒိဋ္ဌိဂတာနိ ပဟီယန္တိ။ ပဟာနာ ဥစ္ဆေဒံ သဿတဉ္စ န ဘဇတိ။ ဣတိ ဥစ္ဆေဒသဿတပ္ပဟာနာ အရိယသာဝကဿ န ကိဉ္စိ ဒိဋ္ဌိဂတံ ဘဝတိ, အညာ ဝါ လောကုတ္တရာယ သမ္မာဒိဋ္ဌိယာ။ ကထံ ပန သက္ကာယဒိဋ္ဌိ န ဘဝတိ? ဣဓ အရိယသာဝကော သုတဝါ ဟောတိ, သဗ္ဗော သုက္ကပက္ခော ကာတဗ္ဗော, ယာဝ အရိယဓမ္မေသု ကောဝိဒေါ ရူပံ အနတ္တတော သမနုပဿတိ, ယာဝ ဝိညာဏံ။ပေ။။ ဧဝမဿ သမနုပဿန္တဿ သက္ကာယဒိဋ္ဌိ န ဘဝတိ။

ကထံ ဝိစိကိစ္ဆာ န ဘဝတိ? ဣဓ အရိယသာဝကော ဗုဒ္ဓေ န ကင်္ခတိ, န ဝိစိကိစ္ဆတိ အဘိပ္ပသီဒတိ, ဣတိပိ သော ဘဂဝါတိ သဗ္ဗံ။ ဓမ္မေ န ကင်္ခတိ န ဝိစိကိစ္ဆတိ သဗ္ဗံ။ ယာဝ တဏှက္ခယော ဝိရာဂေါ နိရောဓေါ နိဗ္ဗာနန္တိ, ဣမိနာ ဒုတိယေန အာကင္ခိယေန ဓမ္မေန သမန္နာဂတော ဟောတိ။ သံဃေ န ကင်္ခတိ။ပေ။။ ယာဝ ပူဇာ ဒေဝါနဉ္စ မနုဿာနဉ္စာတိ, ဣမိနာ တတိယေန အာကင္ခိယေန ဓမ္မေန သမန္နာဂတော ဟောတိ။

သဗ္ဗေ သင်္ခါရာ ဒုက္ခာတိ န ကင်္ခတိ န ဝိစိကိစ္ဆတိ အဓိမုစ္စတိ အဘိပ္ပသီဒတိ။ တဏှာ ဒုက္ခသမုဒယောတိ န ကင်္ခတိ န ဝိစိကိစ္ဆတိ။ တဏှာနိရောဓါ ဒုက္ခနိရောဓေါတိ န ကင်္ခတိ န ဝိစိကိစ္ဆတိ။ အရိယော အဋ္ဌင်္ဂိကော မဂ္ဂေါ ဒုက္ခနိရောဓဂါမိနီ ပဋိပဒါတိ န ကင်္ခတိ န ဝိစိကိစ္ဆတိ အဓိမုစ္စတိ အဘိပ္ပသီဒတိ။ ယာဝ ဗုဒ္ဓေ ဝါ ဓမ္မေ ဝါ သံဃေ ဝါ ဒုက္ခေ ဝါ သမုဒယေ ဝါ နိရောဓေ ဝါ မဂ္ဂေ ဝါ ကင်္ခါယနာ ဝိမတိ ဝိစိကိစ္ဆာ ဒွေဓါပထာ အာသပ္ပနာ [အပ္ပနာ (ဣ။ က။) ဓ။ သ။ ၁၀၀၈ နိက္ခေပကဏ္ဍေ ပဿိတဗ္ဗံ] ပရိသပ္ပနာ အနဝဋ္ဌာနံ အဓိဋ္ဌာဂမနံ [အနိဋ္ဌာဂမနံ (က။)] အနေကံသော အနေကံသိကတာ, တေ တဿ ပဟီနာ ဘဝန္တိ ပဏုန္နာ ဥစ္ဆိန္နမူလာ တာလာဝတ္ထုကတာ အနဘာဝံကတာ အာယတိံ အနုပ္ပါဒဓမ္မာ။

၆၉။ တတ္ထ သီလဗ္ဗတပရာမာသော ဒွိဓါ – သီလဿ ဝါ သုဒ္ဓဿ ဝါ။ တတ္ထ သီလဿ သီလဗ္ဗတပရာမာသော ဣမိနာဟံ သီလေန ဝါ ဝတေန ဝါ တပေန ဝါ ဗြဟ္မစရိယေန ဝါ ဒေဝေါ ဝါ ဘဝိဿာမိ ဒေဝညတရော ဝါ တတ္ထ ကပေါတပါဒါဟိ အစ္ဆရာဟိ သဒ္ဓိံ ကီဠိဿာမိ ရမိဿာမိ ပရိစရိဿာမီတိ။ ယထာဘူတဒဿနန္တိ ရုစိဝိမုတ္တိ ရာဂေါ ရာဂပရိဝတ္တကာ ဒိဋ္ဌိရူပနာ ပဿနာ အသန္တုဿိတဿ သီလဗ္ဗတပရာမာသော။ တတ္ထ ကတမော သုဒ္ဓဿ သီလဗ္ဗတပရာမာသော? ဣဓေကစ္စော သီလံ ပရာမသတိ, သီလေန သုဇ္ဈတိ, သီလေန နီယတိ, သီလေန မုစ္စတိ, သုခံ ဝီတိက္ကမတိ, ဒုက္ခံ ဝီတိက္ကမတိ, သုခဒုက္ခံ ဝီတိက္ကမတိ အနုပါပုဏာတိ ဥပရိမေန။ တဒုဘယံ သီလဝတံ ပရာမသတိ တဒုဘယေန သီလဝတေန သုဇ္ဈန္တိ မုစ္စန္တိ နီယန္တိ, သုခံ ဝီတိက္ကမန္တိ, ဒုက္ခံ ဝီတိက္ကမန္တိ, သုခဒုက္ခံ ဝီတိက္ကမန္တိ, အနုပါပုဏန္တီတိ အဝိသုစိကရံ ဓမ္မံ အဝိမုတ္တိကရံ ဓမ္မံ ဝိသုစိတော ဝိမုတ္တိတော ပစ္စာဂစ္ဆန္တဿ ယာ တထာဘူတဿ ခန္တိ ရုစိ မုတ္တိ ပေက္ခနာ အာကာရပရိဝိတက္ကော ဒိဋ္ဌိနိဇ္ဈာယနာ ပဿနာ, အယံ သုဒ္ဓဿ သီလဗ္ဗတပရာမာသော။ ဧတေ ဥဘော ပရာမာသာ အရိယသာဝကဿ ပဟီနာ ဘဝန္တိ ယာဝ အာယတိံ အနုပ္ပါဒဓမ္မာ, သော သီလဝါ ဘဝတိ အရိယကန္တေဟိ သီလေဟိ သမန္နာဂတော အက္ခဏ္ဍေဟိ ယာဝ ဥပသမသံဝတ္တနိကေဟိ။ ဣမေသံ တိဏ္ဏံ သံယောဇနာနံ ပဟာနာ သုတဝါ အရိယသာဝကော ဘဝတိ သောတာပန္နော အဝိနိပါတဓမ္မော, သဗ္ဗံ။

သဟသစ္စာဘိသမယာ, ဣတိ ကော ဝစနတ္ထော? စတ္တာရော အဘိသမယာ, ပရိညာဘိသမယော ပဟာနာဘိသမယော သစ္ဆိကိရိယာဘိသမယော ဘာဝနာဘိသမယော။

တတ္ထ အရိယသာဝကော ဒုက္ခံ ပရိညာဘိသမယေန အဘိသမေတိ, သမုဒယံ ပဟာနာဘိသမယေန အဘိသမေတိ, နိရောဓံ သစ္ဆိကိရိယာဘိသမယေန အဘိသမေတိ, မဂ္ဂံ ဘာဝနာဘိသမယေန အဘိသမေတိ။ ကိံ ကာရဏံ? ဒုက္ခဿ ပရိညာဘိသမယော, သမုဒယဿ ပဟာနာဘိသမယော, နိရောဓဿ သစ္ဆိကိရိယာဘိသမယော, မဂ္ဂဿ ဘာဝနာဘိသမယော။ သမထဝိပဿနာယ ကထံ အဘိသမေတိ? အာရမ္မဏေ စိတ္တံ ဥပနိဗန္ဓေတွာ ပဉ္စက္ခန္ဓေ ဒုက္ခတော ပဿတိ။ တတ္ထ ယော ဥပနိဗန္ဓော, အယံ သမထော။ ယာ ပရိယောဂါဟနာ, အယံ ဝိပဿနာ။ ပဉ္စက္ခန္ဓေ ဒုက္ခာတိ ပဿတော ယော ပဉ္စက္ခန္ဓေသု အာလယော နိကန္တိ ဥပဂမနံ အဇ္ဈောသာနာ ဣစ္ဆာ မုစ္ဆာ ပဏိဓိ ပတ္ထနာ ပဟီယတိ။ တတ္ထ ပဉ္စက္ခန္ဓာ ဒုက္ခံ။ ယော တတ္ထ အာလယော နိကန္တိ ဥပဂမနံ အဇ္ဈောသာနံ ဣစ္ဆာ မုစ္ဆာ ပဏိဓိ ပတ္ထနာ, အယံ သမုဒယော။ ယံ တဿ ပဟာနံ, သော နိရောဓေါ သမထော ဝိပဿနာ စ မဂ္ဂေါ, ဧဝံ တေသံ စတုန္နံ အရိယသစ္စာနံ ဧကကာလေ ဧကက္ခဏေ ဧကစိတ္တေ အပုဗ္ဗံ အစရိမံ အဘိသမယော ဘဝတိ။ တေနာဟ ဘဂဝါ ‘‘သဟသစ္စာဘိသမယာ အရိယသာဝကဿ တီဏိ သံယောဇနာနိ ပဟီယန္တီ’’တိ။

၇၀။ တတ္ထ သမထဝိပဿနာ ယုဂနဒ္ဓါ ဝတ္တမာနာ ဧကကာလေ ဧကက္ခဏေ ဧကစိတ္တေ စတ္တာရိ ကိစ္စာနိ ကရောတိ, ဒုက္ခံ ပရိညာဘိသမယေန အဘိသမေတိ, ယာဝ မဂ္ဂံ ဘာဝနာဘိသမယေန အဘိသမေတိ။ ကိံ ကာရဏာ? ဒုက္ခံ ပရိညာဘိသမယော, ယာဝ မဂ္ဂံ ဘာဝနာဘိသမယော။ ဧဝံ ဒိဋ္ဌန္တော ယထာ နာဝါ ဇလံ ဂစ္ဆန္တီ စတ္တာရိ ကိစ္စာနိ ကရောတိ, ပါရိမံ တီရံ ပါပေတိ, ဩရိမံ တီရံ ဇဟတိ, ဘာရံ ဝဟတိ, သောတံ ဆိန္ဒတိ; ဧဝမေဝ သမထဝိပဿနာ ယုဂနဒ္ဓါ ဝတ္တမာနာ ဧကကာလေ ဧကက္ခဏေ ဧကစိတ္တေ စတ္တာရိ ကိစ္စာနိ ကရောတိ , ဒုက္ခံ ပရိညာဘိသမယေန အဘိသမေတိ, ယာဝ မဂ္ဂံ ဘာဝနာဘိသမယေန အဘိသမေတိ။ ယထာ ဝါ သူရိယော ဥဒယန္တော ဧကကာလေ အပုဗ္ဗံ အစရိမံ စတ္တာရိ ကိစ္စာနိ ကရောတိ, အန္ဓကာရံ ဝိဓမတိ, အာလောကံ ပါတုကရောတိ, ရူပံ နိဒဿီယတိ, သီတံ ပရိယာဒိယတိ; ဧဝမေဝ သမထဝိပဿနာ ယုဂနဒ္ဓါ ဝတ္တမာနာ ဧကကာလေ။ပေ။။ ယထာ ပဒီပေါ ဇလန္တော ဧကကာလေ အပုဗ္ဗံ အစရိမံ စတ္တာရိ ကိစ္စာနိ ကရောတိ, အန္ဓကာရံ ဝိဓမတိ, အာလောကံ ပါတုကရောတိ, ရူပံ နိဒဿီယတိ, ဥပါဒါနံ ပရိယာဒိယတိ; ဧဝမေဝ သမထဝိပဿနာ ယုဂနဒ္ဓါ ဝတ္တမာနာ ဧကကာလေ။ပေ။။။

ယဒါ အရိယသာဝကော သောတာပန္နော ဘဝတိ အဝိနိပါတဓမ္မော နိယတော ယာဝ ဒုက္ခဿန္တံ ကရောတိ, အယံ ဒဿနဘူမိ။ သောတာပတ္တိဖလဉ္စ သောတာပတ္တိဖလေ ဌိတော ဥတ္တရိ သမထဝိပဿနံ ဘာဝေန္တော ယုဂနဒ္ဓါ ဝတ္တမာနာ ကာမရာဂဗျာပါဒါနံ ယေဘုယျေန ပဟာနာ အရိယသာဝကော ဟောတိ။ သကဒါဂါမိ ပရိနိဋ္ဌိတတ္တာ သကိဒေဝ ဣမံ လောကံ အာဂန္တွာ ဒုက္ခဿန္တံ ကရောတိ, အယံ တနုဘူမိ။

သကဒါဂါမိဖလဉ္စ ယော သကဒါဂါမိဖလေ ဌိတော ဝိပဿနံ ဘာဝေန္တော ကာမရာဂဗျာပါဒေ သာနုသယေ အနဝသေသံ ပဇဟတိ, ကာမရာဂဗျာပါဒေသု အနဝသေသံ ပဟီနေသု ပဉ္စောရမ္ဘာဂိယာနိ သံယောဇနာနိ ပဟီနာနိ ဘဝန္တိ သက္ကာယဒိဋ္ဌိ သီလဗ္ဗတပရာမာသော ဝိစိကိစ္ဆာ ကာမစ္ဆန္ဒော ဗျာပါဒေါ စ, ဣမေသံ ပဉ္စန္နံ ဩရမ္ဘာဂိယာနံ သံယောဇနာနံ ပဟာနာ [ပဟာနာယ (ဣ။ က။)] အရိယသာဝကော ဟောတိ အနာဂါမီ တတ္ထ ပရိနိဗ္ဗာယီ အနာဝတ္တိဓမ္မော တသ္မာ လောကာ, အယံ ဝီတရာဂဘူမိ။

အနာဂါမိဖလဉ္စ အနာဂါမိဖလေ ဌိတော ဥတ္တရိ သမထဝိပဿနံ ဘာဝေန္တော ပဉ္စ ဥဒ္ဓမ္ဘာဂိယာနိ သံယောဇနာနိ ပဇဟတိ ရူပရာဂအရူပရာဂမာနဥဒ္ဓစ္စအဝိဇ္ဇဉ္စ။ ဣမေသံ ပဉ္စန္နံ ဥဒ္ဓမ္ဘာဂိယာနံ သံယောဇနာနံ ပဟာနာ အရိယသာဝကော အရဟာ ဘဝတိ, ခီဏာသဝေါ ဝုသိတဝါ သမ္မဒညာ [သမ္ပဇညော (ဣ။ က။)] ဝိမုတ္တော ပရိက္ခီဏဘဝသံယောဇနော အနုပ္ပတ္တသဒတ္ထော, အယံ ကတာဘူမိ။

အရဟန္တောဝ အယံ သောပါဒိသေသာ နိဗ္ဗာနဓါတု။ တဿ အာယုက္ခယာ ဇီဝိတိန္ဒ္ရိယာပရောဓါ ဣဒဉ္စ ဒုက္ခံ နိရုဇ္ဈတိ, အညဉ္စ ဒုက္ခံ န ဥပ္ပဇ္ဇတိ။ ယော ဣမဿ ဒုက္ခဿ နိရောဓေါ ဝူပသမော, အညဿ စ အပါတုဘာဝေါ, အယံ အနုပါဒိသေသာ နိဗ္ဗာနဓါတု။ ဣမာ ဒွေ နိဗ္ဗာနဓါတုယော။ ဣတိ သစ္စာနိ ဝုတ္တာနိ။ သစ္စာဘိသမယော ဝုတ္တော, ကိလေသဝဝတ္ထာနံ ဝုတ္တံ, ပဟာနံ ဝုတ္တံ, ဘူမိယော ဝုတ္တာ, ဖလာနိ ဝုတ္တာနိ, နိဗ္ဗာနဓါတုယော ဝုတ္တာ။ ဧဝမိမေသု ဝုတ္တေသု သဗ္ဗဗောဓိ ဝုတ္တာ ဘဝတိ။ ဧတ္ထ ယောဂေါ ကရဏီယော။

၇၁။ တတ္ထ ကတမာယော နဝ အနုပုဗ္ဗသမာပတ္တိယော? စတ္တာရိ ဈာနာနိ စတဿော စ အရူပသမာပတ္တိယော နိရောဓသမာပတ္တိ စ။ တတ္ထ စတ္တာရိ ဈာနာနိ ကတမာနိ? ဣဓ, ဘိက္ခဝေ, [ပဿ ဒီဃနိကာယေ] ဘိက္ခု ဝိဝိစ္စေဝ ကာမေဟီတိ ဝိတ္ထာရေန ကာတဗ္ဗာနိ။ တတ္ထ ကတမာ စတ္တာရော အရူပသမာပတ္တိယော? ဝိရာဂိနော ဝတ ဝတ္တဗ္ဗော, ယာဝ နိရောဓသမာပတ္တိ ဝိတ္ထာရေန ကာတဗ္ဗာ။ ဣမာယော နဝ အနုပုဗ္ဗသမာပတ္တိယော။

တတ္ထ ကတမံ ပဌမံ ဈာနံ? ပဉ္စင်္ဂဝိပ္ပယုတ္တံ ပဉ္စင်္ဂသမန္နာဂတံ။ ကတမေဟိ ပဉ္စဟိ အင်္ဂေဟိ ဝိပ္ပယုတ္တံ? ပဉ္စဟိ နီဝရဏေဟိ။ တတ္ထ ကတမာနိ ပဉ္စ နီဝရဏာနိ? ကာမစ္ဆန္ဒောတိ ဝိတ္ထာရေတဗ္ဗော။ တတ္ထ ကတမော ကာမစ္ဆန္ဒော? ယော ပဉ္စသု ကာမဂုဏေသု ဆန္ဒရာဂေါ ပေမံ နိကန္တိ အဇ္ဈောသာနံ ဣစ္ဆာ မုစ္ဆာ ပတ္ထနာ အပရိစ္စာဂေါ အနုသယော ပရိယုဋ္ဌာနံ, အယံ ကာမစ္ဆန္ဒနီဝရဏံ။ တတ္ထ ကတမံ ဗျာပါဒနီဝရဏံ? ယော သတ္တေသု သင်္ခါရေသု စ အာဃာတော။ပေ။။ ယထာ ဒေါသေ တထာ နိဩဋ္ဌာနာ, အယံ ဗျာပါဒေါ နီဝရဏံ။ တတ္ထ ကတမံ မိဒ္ဓံ? ယာ စိတ္တဿ ဇဠတာ စိတ္တဿ ဂရုတ္တံ စိတ္တဿ အကမ္မနီယတာ စိတ္တဿ နိက္ခေပေါ နိဒ္ဒါယနာ ပစလိကတာ ပစလာယနာ ပစလာယနံ, ဣဒံ မိဒ္ဓံ။ တတ္ထ ကတမံ ထိနံ [ထီနံ (ဣ။)]? ယာ ကာယဿ ထိနတာ ဇဠတာ ကာယဿ ဂရုတ္တာ ကာယဿ အပ္ပဿဒ္ဓိ, ဣဒံ ထိနံ။ ဣတိ ဣဒဉ္စ ထိနံ ပုရိမကဉ္စ မိဒ္ဓံ တဒုဘယံ ထိနမိဒ္ဓနီဝရဏန္တိ ဝုစ္စတိ။ တတ္ထ ကတမံ ဥဒ္ဓစ္စံ? ယော အဝူပသမော စိတ္တဿ, ဣဒံ ဥဒ္ဓစ္စံ။ တတ္ထ ကတမံ ကုက္ကုစ္စံ? ယော စေတသော ဝိလေခေါ အလဉ္စနာ ဝိလဉ္စနာ ဟဒယလေခေါ ဝိပ္ပဋိသာရော, ဣဒံ ကုက္ကုစ္စံ။ ဣတိ ဣဒဉ္စ ကုက္ကုစ္စံ ပုရိမကဉ္စ ဥဒ္ဓစ္စံ တဒုဘယံ ဥဒ္ဓစ္စကုက္ကုစ္စနီဝရဏန္တိ ဝုစ္စတိ။ တတ္ထ ကတမံ ဝိစိကိစ္ဆာနီဝရဏံ? ယော ဗုဒ္ဓေ ဝါ ဓမ္မေ ဝါ သံဃေ ဝါ။ပေ။။ အယံ ဝိစိကိစ္ဆာ။ အပိ စ ခေါ ပန ပဉ္စ ဝိစိကိစ္ဆာယော သမနန္တရာယိကာ ဒေသန္တရာယိကာ သမာပတ္တန္တရာယိကာ မဂ္ဂန္တရာယိကာ သဂ္ဂန္တရာယိကာ, ဣမာယော ပဉ္စ ဝိစိကိစ္ဆာယော ။ ဣဓ ပန သမာပတ္တန္တရာယိကာ ဝိစိကိစ္ဆာ အဓိပ္ပေတာ။ ဣမေ ပဉ္စ နီဝရဏာ။

တတ္ထ နီဝရဏာနီတိ ကော ဝစနတ္ထော, ကုတော နိဝါရယန္တီတိ? သဗ္ဗတော ကုသလပက္ခိကာ နိဝါရယန္တိ။ ကထံ [ကိံ ကံ (ဣ။ က။)] နိဝါရယန္တိ? ကာမစ္ဆန္ဒော အသုဘတော နိဝါရယတိ, ဗျာပါဒေါ မေတ္တာယ [မေတ္တတော (ဣ။)] နိဝါရယတိ, ထိနံ ပဿဒ္ဓိတော နိဝါရယတိ, မိဒ္ဓံ ဝီရိယာရမ္ဘတော နိဝါရယတိ, ဥဒ္ဓစ္စံ သမထတော နိဝါရယတိ, ကုက္ကုစ္စံ အဝိပ္ပဋိသာရတော နိဝါရယတိ, ဝိစိကိစ္ဆာ ပညာတော ပဋိစ္စသမုပ္ပါဒတော နိဝါရယတိ။

အပရော ပရိယာယော။ ကာမစ္ဆန္ဒော အလောဘတော ကုသလမူလတော နိဝါရယတိ, ဗျာပါဒေါ အဒေါသတော နိဝါရယတိ, ထိနမိဒ္ဓံ သမာဓိတော နိဝါရယတိ, ဥဒ္ဓစ္စကုက္ကုစ္စံ သတိပဋ္ဌာနေဟိ နိဝါရယတိ, ဝိစိကိစ္ဆာ အမောဟတော ကုသလမူလတော နိဝါရယတိ။

အပရော ပရိယာယော။ တယော ဝိဟာရာ ဒိဗ္ဗဝိဟာရော ဗြဟ္မဝိဟာရော အရိယဝိဟာရော။ ဒိဗ္ဗဝိဟာရော စတ္တာရိ ဈာနာနိ, ဗြဟ္မဝိဟာရော စတ္တာရိ အပ္ပမာဏာနိ, အရိယဝိဟာရော သတ္တတိံသ ဗောဓိပက္ခိယာ ဓမ္မာ။ တတ္ထ ကာမစ္ဆန္ဒော ဥဒ္ဓစ္စံ ကုက္ကုစ္စဉ္စ ဒိဗ္ဗဝိဟာရံ နိဝါရယတိ, ဗျာပါဒေါ ဗြဟ္မဝိဟာရံ နိဝါရယတိ, ထိနမိဒ္ဓံ ဝိစိကိစ္ဆာ စ အရိယဝိဟာရံ နိဝါရယတိ။

အပရော ပရိယာယော။ ကာမစ္ဆန္ဒော ဗျာပါဒေါ ဥဒ္ဓစ္စကုက္ကုစ္စဉ္စ သမထံ နိဝါရယန္တိ, ထိနမိဒ္ဓံ ဝိစိကိစ္ဆာ စ ဝိပဿနံ နိဝါရယန္တိ, အတော နီဝရဏန္တိ ဝုစ္စန္တေ။ ဣမေဟိ ပဉ္စဟိ အင်္ဂေဟိ ဝိပ္ပယုတ္တံ ပဌမံ ဈာနံ။

ကတမေဟိ ပဉ္စဟိ အင်္ဂေဟိ သမ္ပယုတ္တံ ပဌမံ ဈာနံ? ဝိတက္ကဝိစာရေဟိ ဣတိယာ သုခေန စ စိတ္တေကဂ္ဂတာယ စ။ ဣမေသံ ပဉ္စန္နံ အင်္ဂါနံ ဥပ္ပါဒပဋိလာဘသမန္နာဂမော သစ္ဆိကိရိယံ ပဌမံ ဈာနံ ပဋိလဒ္ဓန္တိ ဝုစ္စတိ။ ဣမာနိ ပဉ္စ အင်္ဂါနိ ဥပ္ပါဒေတွာ ဝိဟရတီတိ, တေန ဝုစ္စတေ ပဌမံ ဈာနံ ဥပသမ္ပဇ္ဇ ဝိဟရတီတိ ဒိဗ္ဗေန ဝိဟာရေန။

တတ္ထ ဒုတိယံ ဈာနံ စတုရင်္ဂသမန္နာဂတံ ဣတိသုခေန စိတ္တေကဂ္ဂတာယ အဇ္ဈတ္တံ သမ္ပသာဒနေန ဣမာနိ စတ္တာရိ အင်္ဂါနိ ဥပ္ပါဒေတွာ သမ္ပာဒေတွာ ဝိဟရတိ, တေန ဝုစ္စတိ ဒုတိယံ ဈာနံ ဥပသမ္ပဇ္ဇ ဝိဟရတီတိ။

တတ္ထ ပဉ္စင်္ဂသမန္နာဂတံ တတိယံ ဈာနံ သတိယာ သမ္ပဇညေ သုခေန စိတ္တေကဂ္ဂတာယ ဥပေက္ခာယ ဣမာနိ ပဉ္စင်္ဂါနိ ဥပ္ပါဒေတွာ သမ္ပာဒေတွာ ဝိဟရတိ, တေန ဝုစ္စတိ တတိယံ ဈာနံ ဥပသမ္ပဇ္ဇ ဝိဟရတီတိ။

တတ္ထ စတုတ္ထံ ဈာနံ စတုရင်္ဂသမန္နာဂတံ ဥပေက္ခာယ သတိပါရိသုဒ္ဓိယာ အဒုက္ခမသုခါယ ဝေဒနာယ စိတ္တေကဂ္ဂတာ စ, ဣမေဟိ စတူဟင်္ဂေဟိ သမန္နာဂတံ စတုတ္ထံ ဈာနံ။ ဣတိ ဣမေသံ စတုန္နံ အင်္ဂါနံ ဥပ္ပါဒေါ ပဋိလာဘော သမန္နာဂမော သစ္ဆိကိရိယာ စတုတ္ထံ ဈာနံ ပဋိလဒ္ဓန္တိ ဝုစ္စတိ။ ဣမာနိ စတ္တာရိ ဈာနာနိ ဥပ္ပါဒေတွာ သမ္ပာဒေတွာ ဥပသမ္ပဇ္ဇ ဝိဟရတိ, တေန ဝုစ္စတိ ဒိဗ္ဗေန ဝိဟာရေန ဝိဟရတီတိ။

တတ္ထ ကတမော အနိစ္စဋ္ဌော? ဣဠနဋ္ဌော အနိစ္စဋ္ဌော ပဘင်္ဂဋ္ဌော သမ္ပာပနဋ္ဌော ဝိဝေကဋ္ဌော အနိစ္စဋ္ဌော, အယံ အနိစ္စဋ္ဌော။

တတ္ထ ကတမော ဒုက္ခဋ္ဌော? ဣဠနဋ္ဌော ဒုက္ခဋ္ဌော သမ္ပီဠနဋ္ဌော သံဝေဂဋ္ဌော ဗျာဓိနဋ္ဌော, အယံ ဒုက္ခဋ္ဌော။

တတ္ထ ကတမော သုညဋ္ဌော? အနုပလိတ္တော သုညဋ္ဌော, အသမ္ဘာဇနဋ္ဌော ဂတပဋ္ဌော [အပ္ပဋ္ဌော (ဣ။)] ဝိဝဋ္ဋဋ္ဌော, အယံ သုညဋ္ဌော။

တတ္ထ ကတမော အနတ္တဋ္ဌော? အနိဿရိယဋ္ဌော အနတ္တဋ္ဌော, အဝသဝတ္တနဋ္ဌော, အကာမကာရိဋ္ဌော ပရိဝိဒဋ္ဌော, အယံ အနတ္တဋ္ဌောတိ။

သုတ္တတ္ထသမုစ္စယော နာမ သံဝတ္တိသန္တိကာ ပေဋကဘူမိ သမတ္တာ။

၄၃။ တတ္ထ ကတမော ဟာရဝိဘင်္ဂေါ? ယတ္ထ သောဠသ ဟာရာ အက္ခရသော ဘေဒံ ဂစ္ဆန္တိ။ တတ္ထ အာဒိမှိ ဒေသနာဟာရော။ တတ္ထ အယံ ဂါထာ ကုသလာ ဝါ အကုသလာ ဝါ သစ္စာနိ ဝါ သစ္စေကဒေသော ဝါ။ ကိံ ဒေသိတန္တိ? သုတ္တေ ဝီမံသာ ဒေသနာဟာရော။ ယထာ အရိယသစ္စာနိ နိက္ခေပေါ စတ္တာရိ သစ္စာနိ သာဓါရဏာနိ အသာဓါရဏာနိ စ။ ယာနိ စ အဋ္ဌာရသ ပဒါနိ ဒုက္ခတော သတ္တ ပဒါနိ သင်္ခေပေန ကာယိကေန စေတသိကေန ဒုက္ခေန, အပ္ပိယသမ္ပယောဂေန ပိယဝိပ္ပယောဂေန စ တီဟိ စ သင်္ခတာဟိ။ တတ္ထ တီဏိ သင်္ခတလက္ခဏာနိ တိဿော ဒုက္ခတာ ဥပ္ပါဒေါ သင်္ခတလက္ခဏံ, သင်္ခါရဒုက္ခတာယ ဒုက္ခတာ စ သင်္ခတလက္ခဏံ, ဝိပရိဏာမဒုက္ခတာယ ဒုက္ခတာတိ အညထတ္ထံ စ သင်္ခတလက္ခဏံ, ဒုက္ခဒုက္ခတာယ စ ဒုက္ခတာ, ဣမေသံ တိဏ္ဏံ သင်္ခတလက္ခဏာနံ တီသု ဝေဒနာဘူမီသု အဒုက္ခမသုခါ ဝေဒနာ ဥပ္ပါဒေါ သင်္ခတလက္ခဏံ, သင်္ခါရဒုက္ခတာယ စ ဒုက္ခတာ တယော သင်္ခတလက္ခဏံ, သုခါ ဝေဒနာယ စ ဝိပရိဏာမဒုက္ခတာယ စ ဒုက္ခတာတိ အညထတ္တံ သင်္ခတလက္ခဏံ, ဒုက္ခာဝေဒနာ ဒုက္ခဒုက္ခတာ စ ဒုက္ခတာ ဣမမှိ ဣမေသု နဝပဒေသု ပဌမကေသု သတ္တသု ပဒေသု သောဠသသု ပဒေသု ဒုက္ခာ ပရိယေသိတဗ္ဗာ, ဧကာဒသ ဒုက္ခတာယ စ လက္ခဏံ နိဒ္ဒေသေ နိဒ္ဒိဋ္ဌံ။ ပါတုဘာဝလက္ခဏာ ဇာတိယာ စ ပါတုဘာဝစုတိလက္ခဏော စုတောတိ ဝိတ္ထာရေန ပန္နရသပဒါနိ ကတ္တဗ္ဗာနိ, ဧဝံ သာဓါရဏာနိ အသာဓါရဏာနိ စ သတ္တသု ဒသသု ပဒေသု သညာသ တိဝိဓေ စ သာသနပ္ပဋ္ဌာနေ အဋ္ဌာရသဝိဓေသု စ သုတ္တာဓိဋ္ဌာနေသု ဒသဝိဓေသု စ သုတ္တဝိဓေယျေသု သောဠသဝိဓေသု စ ဟာရေသု ဧကဝီသတိဝိဓါယ စ ပဝိစယဝီမံသာယာတိ ဣဒံ ဒေသိတံ။ ယထာဘူတဉ္စ ဒေသိတန္တိ, အယံ ဝုစ္စတိ ဒေသနာဟာရော။

၄၄။ တတ္ထ ကတမော ဝိစယော ဟာရော?

ပဒံ ပဉှာ စ ပုစ္ဆာ စ၊ ကိံ ပုဗ္ဗံ ကိဉ္စ ပစ္ဆိမံ။

အနုဂီတိ သာ စ ဝိစယော၊ ဟာရော ဝိစယောတိ နိဒ္ဒိဋ္ဌော။

ပဒန္တိ ပဌမံ ပဒံ။ တဿ ကော အတ္ထော? ယံ ဘဂဝါ ပုဋ္ဌော အာယသ္မတာ အဇိတေန တံ ဂဟေတဗ္ဗံ, ကတိပဒါနိ ပုဋ္ဌာနိ ယထာကိံ ကေနဿု နိဝုတော လောကောတိ ဂါထာ, ဣမာနိ ကတိပဒါနိ စတ္တာရိ ဣတိ ဝိသဇ္ဇနာယ ပုစ္ဆာ။ ယတ္တကေဟိ ပဒေဟိ ဘဂဝတာ ဝိသဇ္ဇိတာနိ ပဒါနိ ဣတိ ပုစ္ဆာယ စ ယာ ပဒါနံ သင်္ကာသနာ, ဣဒံ ဝုစ္စတိ ပဒန္တိ။

ပဉှာတိ ဣမာနိ စတ္တာရိ ပဒါနိ။ ကတိ ပဉှာ? ဧကော ဝါ ဒွေ ဝါ တဒုတ္တရိ ဝါ ဣမာနိ စတ္တာရိ ပဒါနိ ဧကော ပဉ္ဟော, အတ္ထာနုပရိဝတ္တိ ဗျဉ္ဇနံ ဟောတိ, သမ္ဗဟုလာနိပိ ပဒါနိ ဧကမေဝတ္ထံ ပုစ္ဆတိ။ ဣမာနိ စတ္တာရိ ပဒါနိ အနုပရိဝတ္တီနိ တံ ဗျဉ္ဇနေန ဧကော ပဉ္ဟောဝ ဟောတိ။ ကေနဿု နိဝုတော လောကောတိ လောကံ သန္ဓာယ ပုစ္ဆတိ, ကေနဿု နပ္ပကာသတိ ကိဿာဘိလေပနံ ဗြူသီတိ တံယေဝ ပုစ္ဆတိ။ ကိံသု တဿ မဟဗ္ဘယန္တိ တံယေဝ ပုစ္ဆတိ။ ဧဝံ အတ္ထာနုပရိဝတ္တိ ဗျဉ္ဇနံ ဧကော ပဉ္ဟော ဟောတိ, သော ပဉ္ဟော စတုဗ္ဗိဓေါ ဧကံသဗျာကရဏီယော ဝိဘဇ္ဇဗျာကရဏီယော ပဋိပုစ္ဆာဗျာကရဏီယော ဌပနိယောတိ။ တတ္ထ စက္ခု အနိစ္စန္တိ ဧကံသဗျာကရဏီယော, ယံ အနိစ္စံ တံ ဒုက္ခန္တိ ဝိဘဇ္ဇဗျာကရဏီယော, သိယာ အနိစ္စံ န စက္ခု, ယာနိပိ အာယတနာနိ စ န စက္ခု, တာနိပိ အနိစ္စန္တိ န စက္ခုယေဝ, အယံ ဝိဘဇ္ဇဗျာကရဏီယော, ယံ စက္ခု တံ စက္ခုန္ဒ္ရိယံ နေတိ ပဋိပုစ္ဆာဗျာကရဏီယော, တံ စက္ခု တထာဂတောတိ ဌပနိယော။ အညတြ စက္ခုနာတိ ဌပနိယော ပဉ္ဟော။ ဣဒံ ပဉ္ဟံ ဘဂဝါ ကိံ ပုစ္ဆိတော, လောကဿ သံကိလေသော ပုစ္ဆိတော။ ကိံ ကာရဏံ? တိဝိဓေါ ဟိ သံကိလေသော တဏှာသံကိလေသော စ ဒိဋ္ဌိသံကိလေသော စ ဒုစ္စရိတသံကိလေသော စ။ တတ္ထ အဝိဇ္ဇာယ နိဝုတောတိ အဝိဇ္ဇံ ဒဿေတိ, ဇပ္ပါတိ တဏှံ ဒဿေတိ, မဟဗ္ဘယန္တိ အကုသလဿ ကမ္မဿ ဝိပါကံ ဒဿေတိ, သောတံ နာမ သုခဝေဒနီယဿ ကမ္မဿ ဒုက္ခဝေဒနီယော ဝိပါကော ဘဝိဿတီတိ နေတံ ဌာနံ ဝိဇ္ဇတီတိ ဘဂဝါ ဝိသဇ္ဇေတိ, စတူဟိ ယော ပဒေဟိ အဝိဇ္ဇာယ နိဝုတော လောကောတိ။ပေ။။ ဧဝံ ဝုစ္စတိ။

၄၅။ တဒုတ္တရိ ပဋိပုစ္ဆတိ, သဝန္တိ သဗ္ဗဓိ သောတာတိ ဂါထာ, စတ္တာရိ ပဒါနိ ပုစ္ဆတိ တံ ဘဂဝါ ဒွီဟိ ပဒေဟိ ဝိသဇ္ဇေတိ။

ယာနိ သောတာနိ လောကသ္မိံ၊ သတိ တေသံ နိဝါရဏံ။

သောတာနံ သံဝရံ ဗြူမိ၊ ပညာယေတေ ပိဓီယရေ။

ဣမာနိ စတ္တာရိ ပဒါနိ ဒွီဟိ ပဒေဟိ ဝိသဇ္ဇေတိ။ ဣဒံ ပဒန္တိ ပုစ္ဆိတော, တဿ သံကိလိဋ္ဌဿ လောကဿ ဝေါဒါနံ ပုစ္ဆိတော, သောတာနိ ဆ တဏှာကာယာ ဗဟုလာဓိဝစနေန နိဒ္ဒိဋ္ဌာ ဘဝန္တိ သဗ္ဗေဟိ အာယတနေဟိ။ တာနိ သောတာနိ ကေန နိဝါရိယန္တီတိ ပရိယုဋ္ဌာနပဟာနံ ပုစ္ဆတိ, ကေန သောတာ ပိဓီယရေတိ အနုသယသမုဂ္ဃါတံ ပုစ္ဆတိ။ တတ္ထ ဘဂဝါ ဆသု ဒွါရေသု သတိယာ ဒေသေတိ, ယော ဟိ သမ္ပဇာနော ဝိဟရတိ သတိဒေါဝါရိကေ စ တဿ ဣန္ဒ္ရိယာနိ ဂုတ္တာနိ သမ္ဘဝန္တိ။ တတ္ထ ဂုတ္တေသု ဣန္ဒ္ရိယေသု ယာ ယာ ဝိပဿနာ, သာ သာ တေသံ တေသံ သောတာနံ တဿာ စ အဝိဇ္ဇာယ ယော လောကော နိဝုတော အစ္စန္တပဟာနာယ သံဝတ္တတိ။ ဧဝံ သောတာနိ ပိဟိတာနိပိ ဘဝန္တိ တတော ဥတ္တရိ ပုစ္ဆတိ။

ပညာ စ သတိ စ နာမရူပဿ ခေါ တဿ ဘဂဝန္တံ ပုဋ္ဌုမာဂမ္မ ကတ္ထေတံ ဥပသမ္မတိ ဣမာနိ စတ္တာရိ ပဒါနိ ဘဂဝါ ဧကေန ပဒေန ဝိသဇ္ဇေတိ။

ယမေတံ ပဉ္ဟံ အပုစ္ဆိ [ပုစ္ဆသေ ပဉ္ဟံ (ဣ။ က။) ပဿ သု။ နိ။ ၁၀၄၃]၊ အဇိတ တံ ဝဒါမိ တေ။ပေ။။။

ဝိညာဏဿ နိရောဓေန၊ ဧတ္ထေတံ ဥပသမ္မတိ။

ဣမိနာ ပဉ္ဟေန ကိံ ပုစ္ဆတိ? အနုပါဒိသေသနိဗ္ဗာနဓါတုံ ပုစ္ဆတိ, တံ ဘဂဝါ အနုပါဒိသေသာယ နိဗ္ဗာနဓါတုယာ ဝိသဇ္ဇေတိ။ တတ္ထ ပဌမေန ပဉ္ဟေန သံကိလေသံ ပုစ္ဆတိ။ ဒုတိယေန ပဉ္ဟေန ဝေါဒါနံ ပုစ္ဆတိ။ တတိယေန ပဉ္ဟေန သောပါဒိသေသနိဗ္ဗာနဓါတုံ ပုစ္ဆတိ။ စတုတ္ထေန ပဉ္ဟေန အနုပါဒိသေသနိဗ္ဗာနဓါတုံ ပဋိပုစ္ဆတိ တတော ဥတ္တရိ ပဋိပုစ္ဆတိ။

ယေ စ သင်္ခါတဓမ္မာသေ၊ ယေ စ သေခါ [သေက္ခာ (က။) ပဿ သု။ နိ။ ၁၀၄၄] ပုထူ ဣဓ။

တေသံ မေ နိပကော ဣရိယံ၊ ပုဋ္ဌော ပဗြူဟိ မာရိသ။

ဣမာနိ စတ္တာရိ ပဒါနိ ပုစ္ဆတိ။ ကတိ စ ပန တေ ပဉ္ဟေ သင်္ခါတဓမ္မာ စ အရဟန္တာ သေက္ခာ စ? ကိံ ပုဗ္ဗံ ကိဉ္စ ပစ္ဆိမန္တိ အယမတ္ထော။ တတ္ထ ကတရံ ပဌမံ ပုစ္ဆတိ, ကတရံ ပစ္ဆာ? အရဟန္တံ ပဌမံ ပုစ္ဆတိ။ သေက္ခဓမ္မေ တတ္ထ ကေန ပဒေန သင်္ခါတဓမ္မာတိ အရဟန္တော ဂဟိတာ, ပုထူတိ သေက္ခာ ဂဟိတာ။ တေသံ မေ နိပကောတိ သာဓါရဏံ ပဒံ ဘဂဝန္တံ ပုစ္ဆတိ။ တဿ သာဓါရဏာနိ စ အသာဓါရဏာနိ စ ပဉ္ဟေသု ပုစ္ဆိတဗ္ဗာနိ။ တံ ဘဂဝါ ဝိသဇ္ဇေတိ။ န တထာ ပုဋ္ဌံ, ပဌမံ ပုဋ္ဌံ, တံ ပစ္ဆာ ဝိသဇ္ဇေတိ။ ယံ ပစ္ဆာ ပုစ္ဆိတံ ပဌမံ ဝိသဇ္ဇေတိ။ ကိဉ္စ ဣဒံ ပုစ္ဆိတံ ဝိသုဒ္ဓါနံ ဝိသုဇ္ဈန္တာနဉ္စ ကာ ဣရိယာတိ ဣဒံ ပုစ္ဆိ, တံ ကာမေသု နာဘိဂိဇ္ဈေယျ။ မနသာနာဝိလော သိယာတိ ပရိယုဋ္ဌာနာနိ ဝိတက္ကေန စ ဘဂဝါ နိဝါရေတိ, ဒွေ ပန ဝိတက္ကအနာဝိလတာယ ပရိယုဋ္ဌာနံ, ယထာ နီဝရဏေသု နိဒ္ဒိဋ္ဌံ။ ကုသလာ သဗ္ဗဓမ္မေသူတိ အရဟန္တံ ဝိသဇ္ဇေတိ။

ကေနဿု တရတိ ဩဃန္တိ ဂါထာ, ဣမာနိ စတ္တာရိ ပဒါနိ။ စတ္တာရောယေဝ ပဉှာ။ ကိံ ကာရဏံ, န ဟိ ဧတ္ထ အတ္ထာနုပရိဝတ္တိ ဗျဉ္ဇနံ [ယထာနုပရိဝတ္ထိဝဇ္ဇံ (ဣ။ က။)] ယထာ ပဌမံ အဇိတပဉ္ဟေသု, တဿ န ဧကံသေန ဗဟူနိ ဝိသဇ္ဇနာနိ, ဗဟုကာ ပဉှာ, ဧကောဝ န စာပိ, သဗ္ဗေ ပုစ္ဆတိ, ပုဗ္ဗေ ဝိသဇ္ဇိတော, ယထာ စတုတ္ထော အဇိတောပဉ္ဟေ, ယံ ဧတ္ထ ယထာဘူတံ ပရိယေသနာပဒဗန္ဓေန ဝိသဇ္ဇနာယော ဧဝံ ယထာဘူတံ ပရိယေသတိ။ ယော ပုန ဧတ္ထ ယံ ဧဝံ ပုစ္ဆတိ တတ္ထ အယမာကာရော ပုစ္ဆနာယံ အန္တောဇဋာ ဗဟိဇဋာတိ ဂါထာ [သံ။ နိ။ ၁။၂၉] ပုစ္ဆိတဝိသဇ္ဇနာယ မဂ္ဂိတဗ္ဗာ။ ကထံ ဝိသဇ္ဇိတာတိ ဘဂဝါတိ ဝိသဇ္ဇေတိ? သီလေ ပတိဋ္ဌာယ နရော သပညောတိ ဂါထာ။ တတ္ထ စိတ္တဘာဝနာယ သမထာ, ပညာဘာဝနာယ ဝိပဿနာ။ တတ္ထ ဧဝံ အနုမီယတိ, ယေ ဓမ္မာ သမထေန စ ဝိပဿနာယ စ ပဟီယန္တိ, တေ ဣမေ အန္တောဇဋာ ဗဟိဇဋာ။ တတ္ထ ဝိသဇ္ဇနံ သမထေန ရာဂေါ ပဟီယတိ, ဝိပဿနာယ အဝိဇ္ဇာ။ အဇ္ဈတ္တဝတ္ထုကော ရာဂေါ အန္တောဇဋာ, ဗာဟိရဝတ္ထုကော ရာဂေါ ဗဟိဇဋာ။ အဇ္ဈတ္တဝတ္ထုကာ သက္ကာယဒိဋ္ဌိ, အယံ အန္တောဇဋာ။ ဧကသဋ္ဌိ ဒိဋ္ဌိဂတာနိ စ ဗာဟိရဝတ္ထုကာနိ ဗဟိဇဋာ, ယာ ဟိ အဇ္ဈတ္တဝတ္ထုကာ ယာ ဒိဋ္ဌိဘာဂိယေန ဘဝိဿတိ, အယံ ဇဋာ။ တထာ သံခိတ္တေန ယာ ကာစိ အဇ္ဈတ္တဝတ္ထုကာ တဏှာ စ ဒိဋ္ဌိ စ, အယံ အန္တောဇဋာ။ ယာ ကာစိ ဗာဟိရဝတ္ထုကာ တဏှာ စ ဒိဋ္ဌိ စ, အယံ ဗဟိဇဋာ။

ယထာ ဒေဝတာ ဘဂဝန္တံ ပုစ္ဆတိ ‘‘စတုစက္ကံ နဝဒွါရ’’န္တိ ဂါထာ [သံယုတ္တနိကာယေ]။ တတ္ထ ဘဂဝါ ဝိသဇ္ဇေတိ ‘‘ဆေတွာ နဒ္ဓိံ ဝရတ္တံ စာ’’တိ ဂါထာ, ဣဒံ ဘဂဝါ ဒုက္ခနိရောဓဂါမိနိံ ပဋိပဒံ ဝိသဇ္ဇေတိ။ ဣမာယ ဝိသဇ္ဇနာယ ဘဂဝါ အနုမီယတိ ကိလေသေ ဧတ္ထ ပုရိမာယ ဂါထာယ နိဒ္ဒိသိတဗ္ဗေန။ တံ ဟိ စတုစက္ကန္တိ စတ္တာရော ဝါ ဟတ္ထပါဒါ။ နဝဒွါရန္တိ နဝ ဝဏမုခါနိ။ ယထာ စတုစက္ကန္တိ စတ္တာရော ဥပါဒါနာ, ဥပါဒါနပ္ပစ္စယာ ဘဝေါ, ဥပါဒါနနိရောဓါ ဘဝနိရောဓေါ။ နဝဒွါရန္တိ နဝ မာနဝိဓါ, မာနဇာတိကာယ ဟိ ဒုက္ခံ သေယျေနမှိ ပရသော တီဏိ တိကာနိ ပုဏ္ဏံ။ တိကေန သံယုတ္တံ ဟိ ပဉ္စကာမဂုဏိကော ရာဂေါ။ တတ္ထ နဒ္ဓီတိ တဏှာ ဝိသဇ္ဇီယတိ။ ဝရတ္တန္တိ မာနံ ဝိသဇ္ဇေတိ, ဣစ္ဆာ လောဘော စ ပါပကောတိ ပဉ္စကာမဂုဏိကော ရာဂေါ။ တတ္ထ ဝိသမလောဘော ပါပကောတိ နိဒ္ဒိသိယတိ သမူလတဏှန္တိ။ အညာဏမူလကာ တဏှာတိ အညာဏမူလကာ တဏှာ, တဏှာယ စ ဒိဋ္ဌိယာ စ ပဟာနံ။ ယေ စ ပုန အညေပိ ကေစိ စတုစက္ကယောဂေန တေနေဝ ကာရဏေန စ ယုဇ္ဇန္တိ, သံသာရဂါမိနော ဓမ္မာ သဗ္ဗေ နိဒ္ဒိသိတဗ္ဗာ။ တတ္ထာယံ ဂါထာ ဝိသဇ္ဇနာ ပုစ္ဆာယ စ ဝိသဇ္ဇနာယ သမေတိ [သမံတိ (ဣ။)]။ ယံ ယဒိ သန္ဒေန အထ သဟ ဗျာကရဏေန အနုဂီတိယံ စ သော ဝိစယောတိ ဘဂဝါ ယတ္တကာနိ ပဒါနိ နိက္ခိပတိ, တတ္တကေဟိ အနုဂါယတိ။

၄၆။ အဋ္ဌဟိ , ဘိက္ခဝေ, အင်္ဂေဟိ သမန္နာဂတော ဘိက္ခု ဒူတေယျံ ဂန္တုမရဟတိ [ကာတုမရဟတိ (ဣ။ က။) ပဿ အ။ နိ။ ၈။၁၆]။ ဣမာနိ အဋ္ဌ ပဒါနိ နိက္ခိတ္တာနိ။ ဆဟိ ပဒေဟိ ဘဂဝါ အနုဂါယတိ။

‘‘ယော ဝေ န ဗျထတိ [ဗျာထတိ (က။)] ပတွာ၊ ပရိသံ ဥဂ္ဂဝါဒိနိံ။

န စ ဟာပေတိ ဝစနံ၊ န စ ဆာဒေတိ သာသနံ။

‘‘အသန္ဒိဒ္ဓိံ စ ဘဏတိ၊ ပုစ္ဆိတော န စ ကုပ္ပတိ။

သ ဝေ တာဒိသကော ဘိက္ခု၊ ဒူတေယျံ ဂန္တုမရဟတီ’’တိ။

တတ္ထ ပန ဘဂဝါ ယတ္တကာနိ ပဒါနိ နိက္ခိပတိ, တတ္တကေဟိ အနုဂါယတိ။ သတ္တဟိ, ဘိက္ခဝေ, အင်္ဂေဟိ သမန္နာဂတော ကလျာဏမိတ္တော ပိယော ဂရုဘာဝနီယောတိ ဝိတ္ထာရေန, ဣဒံ ဘဂဝါ သတ္တဟိ ပဒေဟိ အနုဂါယတိ။ ဣတိ ဗဟုဿုတဝါ အနုဂါယတိ, အပ္ပတရကထံ ပဒံ ဝါ နိက္ခေပေါ, ဗဟုဿုတဝါ နဝ ပဒါနိ နိက္ခေပေါ, အပ္ပတရိကာ အနုဂီတိယာ ဗဟုတရိကာ အနုဂါယတိ။ အယံ ဝုစ္စတိ တေ အနုဂီတိ စ ဝိစယော, အယံ ဝိစယော နာမ ဟာရော။

တတ္ထ ကတမော ယုတ္တိဟာရော?

သဗ္ဗေသံ ဟာရာနံ၊ ယာ ဘူမီ ယော စ ဂေါစရော တေသံ။

ယုတ္တာယုတ္တိ ပရိက္ခာ၊ ဟာရော ယုတ္တီတိ နိဒ္ဒိဋ္ဌော။

ဟာရာနံ သောဠသန္နံ ယထာ ဒေသနာ ယထာ ဝိစယော ယော စ နိဒ္ဒိသိယတိ, အယံ နိဒ္ဒေသော။ အယံ ပုစ္ဆာ သုတ္တေသု န ယုဇ္ဇတီတိ ယာ တတ္ထ ဝီမံသာ, အယံ ယုတ္တိ။

ယထာ ဟိ သဟေတူ သပ္ပစ္စယာ သတ္တာ သံကိလိဿန္တိ, အတ္ထိ ဟေတု အတ္ထိ ပစ္စယော သတ္တာနံ သံကိလေသာယ, သဟေတူ သပ္ပစ္စယာ သတ္တာ ဝိသုဇ္ဈန္တိ, အတ္ထိ ဟေတု အတ္ထိ ပစ္စယော သတ္တာနံ ဝိသုဒ္ဓိယာ။ သီလဝတာ, အာနန္ဒ, ပုဂ္ဂလေန န ဝေယျာကရဏိယာ ကိန္တိ မေ ဝိပ္ပဋိသာရော ဥပ္ပါဒေယျ။ပေ။။ အဗျာကရဏံ ကတ္တဗ္ဗံ, အယံ ဝိသုဒ္ဓိယာ မဂ္ဂေါ။ တဿ ဟေတု ကော ပစ္စယော, သီလက္ခန္ဓဿ စတ္တာရိ စတ္တာရိ ဟေတု စ ပစ္စယော စ။ သပ္ပုရိသသံသေဝေါ ယော စ ပတိရူပဒေသဝါသော စ, အယံ ဥပါဒါပစ္စယတာ သပ္ပစ္စယော။ ယံ ပေါရာဏကမ္မံ အဿ ဝိပါကော ပစ္စယော, တာယ ပစ္စယာယ အတ္တသမ္မာပဏိဓိ, အယံ ဟေတု။ ဣတိ သီလက္ခန္ဓော သဟေတု သပ္ပစ္စယောတိ ဣဒံ လောကိကံ သီလံ။

ယံ ပန လောကုတ္တရံ သီလံ, တဿ တီဏိ ဣန္ဒ္ရိယာနိ ပစ္စယော – သဒ္ဓိန္ဒ္ရိယံ ဝီရိယိန္ဒ္ရိယံ သမာဓိန္ဒ္ရိယံ – အယံ ပစ္စယော။ သတိန္ဒ္ရိယဉ္စ ပညိန္ဒ္ရိယဉ္စ ဟေတု။ ပညာယ နိဗ္ဗေဓဂါမိနိယာ, ယံ သီလံ ဇာယတိ။ သောတာပန္နဿ စ သီလံ တေနာယံ ဟေတု အယံ ပစ္စယော။ ယံ ပုန သမာဓိနော ပဿဒ္ဓိ စ ဣတိ စ ပါမောဇ္ဇံ ပစ္စယော။ ယံ သုခံ ဟေတု တေန သမာဓိက္ခန္ဓော သဟေတု သပ္ပစ္စယော။ ယံ သမာဟိတော ယထာဘူတံ ပဇာနာတိ, အယံ ပညာ။ တဿ ပရတောဃောသော အဇ္ဈတ္တံ စ ယောနိသော မနသိကာရော ဟေတု စ ပစ္စယော စ, ဣတိ ဣမေ တယော ခန္ဓာ သဟေတူ သပ္ပစ္စယာ ဧဝံ သတ္တ ပညာ။ သတ္တဗျာကရဏီသု စ သုတ္တေသု န ယုဇ္ဇတိ။ အယံ ယုတ္တိဟာရော။ သော စတူသု မဟာပဒေသေသု ဒဋ္ဌဗ္ဗော။

၄၇။ တတ္ထ ကတမံ ပဒဋ္ဌာနံ?

ဓမ္မံ ဒေသေတိ ဇိနော၊ တဿ စ ဓမ္မဿ ယံ ပဒဋ္ဌာနံ။

ဣတိ ယာဝ သဗ္ဗဓမ္မာ၊ ဧသော ဟာရော ပဒဋ္ဌာနော။

တတ္ထ ပဉ္စကာမဂုဏာ ကာမရာဂဿ ပဒဋ္ဌာနံ။ ယေသံ ကေသဉ္စိ ကာမရာဂေါ ဥပ္ပဇ္ဇတိ ဥပ္ပန္နော ဝါ ဥပ္ပဇ္ဇိဿတိ ဝါ, ဧတေသု ယေပိ ပဉ္စသု ရူပေသု အာယတနေသု နာညတြ ဧတေဟိ ကာမရာဂဿ ပဒဋ္ဌာနန္တိ။ ဝုစ္စတေ, တေန ပဉ္စ ကာမဂုဏာ ကာမရာဂဿ ပဒဋ္ဌာနံ။ ပဉ္စိန္ဒ္ရိယာနိ ရူပရာဂဿ ပဒဋ္ဌာနံ။ မနိန္ဒ္ရိယံ ဘဝရာဂဿ ပဒဋ္ဌာနံ။ ပဉ္စက္ခန္ဓာ သက္ကာယဒိဋ္ဌိယာ ပဒဋ္ဌာနံ။ ဧကသဋ္ဌိ ဒိဋ္ဌိဂတာနိ ဒိဋ္ဌိရာဂဿ ပဒဋ္ဌာနံ။ ကာမဓါတု ကာမရာဂဿ ပဒဋ္ဌာနံ။ အရူပဓါတု အရူပရာဂဿ ပဒဋ္ဌာနံ။ သုခသညာ ကာမရာဂဿ ပဒဋ္ဌာနံ။ ဗျာပါဒသညာ ဗျာပါဒဿ ပဒဋ္ဌာနံ။ အသမ္ပဇညတာ သမ္မောဟဿ ပဒဋ္ဌာနံ။ နဝ အာဃာတဝတ္ထူနိ ဗျာပါဒဿ ပဒဋ္ဌာနံ။ နဝဝိဓံ မာနံ [နဝမာနံ ဝိဓမာနဿ (ဣ။ က။)] မာနဿ ပဒဋ္ဌာနံ။ သုခါ ဝေဒနာ ရာဂါနုသယဿ ပဒဋ္ဌာနံ။ ဒုက္ခာ ဝေဒနာ ပဋိဃာနုသယဿ ပဒဋ္ဌာနံ။ အဒုက္ခမသုခါ ဝေဒနာ အဝိဇ္ဇာနုသယဿ ပဒဋ္ဌာနံ။ အတ္တဝါဒုပါဒါနဉ္စ မုသာဝါဒေါ စ လောဘဿ ပဒဋ္ဌာနံ။ ပါဏာတိပါတော စ ပိသုဏဝါစာ စ ဖရုသဝါစာ စ ဗျာပါဒဿ ပဒဋ္ဌာနံ။ မိစ္ဆတ္တဉ္စ သမ္ဖပ္ပလာပေါ စ မောဟဿ ပဒဋ္ဌာနံ။ ဘဝံ ဘောဂဉ္စ ဝေါကာရော အဟံကာရဿ ပဒဋ္ဌာနံ။ ဗာဟိရာနံ ပရိဂ္ဂဟော မမံကာရဿ ပဒဋ္ဌာနံ။ ကာယဿ သင်္ဂံ [ကာယဝင်္ကံ (ဣ။)] ဒိဋ္ဌိယာ ပဒဋ္ဌာနံ။ ကာယိကဒေါသော ဒေါသဿ ပဒဋ္ဌာနံ။ ကာယိကကာသာဝေါ လောဘဿ ပဒဋ္ဌာနံ။ ယော ယော ဝါ ပန ဓမ္မော ယေန ယေန အာရမ္မဏေန ဥပ္ပဇ္ဇတိ သစ္စာဓိဋ္ဌာနေန ဝါ ဓမ္မာဓိဋ္ဌာနေန ဝါ အနုသယနေန ဝါ, သော ဓမ္မော တဿ ပဒဋ္ဌာနံ။ တေန သာရမ္မဏေန သော ဓမ္မော ဥပ္ပဇ္ဇတိ။

ယထာ မနုဿော ပုရိမဿ ပဒဿ ပဒဋ္ဌာနံ အလဘန္တော ဒုတိယံ ပဒံ ဥဒ္ဓရတိ, သော ပစ္ဆာနုပဒံ သံဟရတိ။ ယဒိ ပန ယော န ဒုတိယပဒဿ ပဒဋ္ဌာနံ လဘတိ, အပရံ ပဒံ ဥဒ္ဓရတိ။ တဿ ယော စေသော ပစ္စယော ဘဝတိ။ ဧဝံ ဓမ္မော ကုသလော ဝါ အကုသလော ဝါ အဗျာကတော ဝါ ပဒဋ္ဌာနံ အလဘန္တော န ပဝတ္တတိ။ ယထာ ပယုတ္တဿ ဓမ္မဿ ယောနိလာဘော [ယောနိသော လာဘော (ဣ။)], အယံ ဝုစ္စတိ ပဒဋ္ဌာနော ဟာရော။

၄၈။ တတ္ထ ကတမော လက္ခဏော ဟာရော?

ဝုတ္တမှိ ဧကဓမ္မေ၊ ယေ ဓမ္မာ ဧကလက္ခဏာ တေန။

သဗ္ဗေ ဘဝန္တိ ဝုတ္တာ၊ သော ဟာရော လက္ခဏော နာမ။

ယေသဉ္စ သုသမာရဒ္ဓါ, နိစ္စံ ကာယဂတာသတီတိ ဂါထာယ ဝုတ္တာယ ကာယဂတာသတိယာ ဝုတ္တာ ဝေဒနာဂတာ စိတ္တဂတာ ဓမ္မဂတာ စ သတိ စတုန္နံ သတိပဋ္ဌာနာနံ ဧကေန သတိပဋ္ဌာနေန။ န ဟိ စိတ္တံ ဧကသ္မိံ ဝိညာဏဋ္ဌိတိယာ ပဝတ္တတိ, နာနာသု ဂတီသု ပဝတ္တတိ, ကာယဂတာသတိယာ ဝုတ္တာယ ဝုတ္တာ ဝေဒနာဂတာ စိတ္တဓမ္မဂတာ စ။ န ဟိ ကာယဂတာသတိယာ ဘာဝိတာယ သတိပဋ္ဌာနာ စတ္တာရော ဘာဝနာပါရိပူရိံ န ဂစ္ဆန္တိ။ ဧဝံ တဿဒိသေသု ဓမ္မေသု ဝုတ္တေသု သဗ္ဗဓမ္မာ ဝုတ္တာ စ ဘဝန္တိ။

သစိတ္တပရိယောဒါပနံ, ဧတံ ဗုဒ္ဓါန သာသနန္တိ ဂါထာ စေတသိကာ ဓမ္မာ ဝုတ္တာ, စိတ္တေ ရူပံ ဝုတ္တံ။ ဣဒံ နာမရူပံ ဒုက္ခံ အရိယသစ္စံ။ တတော သစိတ္တပရိယောဒါပနာ ယံ ယံ ဩဒပေတိ, တံ ဒုက္ခံ။ ယေန ဩဒပေတိ, သော မဂ္ဂေါ။ ယတော ဩဒပနာ, သော နိရောဓေါ။ စက္ခုံ စ ပဋိစ္စ ရူပေ စ ဥပ္ပဇ္ဇတိ စက္ခုဝိညာဏံ, တတ္ထ သဟဇာတာ ဝေဒနာ သညာ စေတနာ ဖဿော မနသိကာရော ဧတေ တေ ဓမ္မာ ဧကလက္ခဏာ ဥပ္ပါဒလက္ခဏေန။ ယော စ ရူပေ နိဗ္ဗိန္ဒတိ, ဝေဒနာယ သော နိဗ္ဗိန္ဒတိ, သညာသင်္ခါရဝိညာဏေသုပိ သော နိဗ္ဗိန္ဒတိ။ ဣတိ ယေ ဧကလက္ခဏာ ဓမ္မာ, တေသံ ဧကမှိ ဓမ္မေ နိဒ္ဒိဋ္ဌေ သဗ္ဗေ ဓမ္မာ နိဒ္ဒိဋ္ဌာ ဟောန္တိ, အယံ ဝုစ္စတိ လက္ခဏော ဟာရော။

တတ္ထ ကတမော စတုဗ္ယူဟော ဟာရော?

နိရုတ္တိ အဓိပ္ပါယော စ၊ ဗျဉ္ဇနာ ဒေသနာယ စ။

သုတ္တတ္ထော ပုဗ္ဗာပရသန္ဓိ၊ ဧသော ဟာရော စတုဗ္ယူဟော။

တတ္ထ ကတမာ နိရုတ္တိ, သာ ကထံ ပရိယေသိတဗ္ဗာ [ပဿိတဗ္ဗာ (ဣ။ က။)]? ယထာ ဝုတ္တံ ဘဂဝတာ ဧကာဒသဟိ အင်္ဂေဟိ သမန္နာဂတော ဘိက္ခု ခိပ္ပံ ဓမ္မေသု မဟတ္တံ ပါပုဏာတိ, အတ္ထကုသလော စ ဟောတိ, ဓမ္မကုသလော စ ဟောတိ, နိရုတ္တိကုသလော စ ဟောတိ, ဣတ္ထာဓိဝစနကုသလော စ ဟောတိ, ပုရိသာဓိဝစနကုသလော စ, ဝိပုရိသာဓိဝစနကုသလော စ, အတီတာဓိဝစနကုသလော စ, အနာဂတာဓိဝစနကုသလော စ, ပစ္စုပ္ပန္နာဓိဝစနကုသလော စ။ ဧကာဓိပ္ပါယေန ကုသလော နာနာဓိပ္ပါယေန ကုသလော။ ကိမှိ ဒေသိတံ, အတီတာနာဂတပစ္စုပ္ပန္နံ။ ဣတ္ထာဓိဝစနေန ပုရိသာဓိဝစနေန ဝိပုရိသာဓိဝစနေန သဗ္ဗံ ယထာသုတ္တံ နိဒ္ဒိဋ္ဌံ။ တံ ဗျဉ္ဇနတော နိရုတ္တိကောသလ္လတော ယော ယံ သုတ္တဿ သုနိရုတ္တိဒုန္နိရုတ္တိတံ အဝေက္ခတိ, ဣဒံ ဧဝံ နိရောပယိတဗ္ဗံ။ ဣဒမ္ပိ န နိရောပယိတဗ္ဗံ။ ဣဒံ ဝုစ္စတေ နိရုတ္တိကောသလ္လံ။

၄၉။ တတ္ထ ကတမံ အဓိပ္ပါယကောသလ္လံ? ယထာဒေသိတဿ သုတ္တဿ သဗ္ဗဿ ဝါရံ ဂစ္ဆတိ ဣမေန ဘဂဝတာ ဒေသိတဗ္ဗန္တိ။ ယထာ ကိံ အပ္ပမာဒေါ အမတံ ပဒံ, ပမာဒေါ မစ္စုနော ပဒန္တိ ဂါထာ။ ဧတ္ထ ဘဂဝတော ကော အဓိပ္ပါယော? ယေ အသီတိမေဝ အာကင်္ခန္တိ တေ အပ္ပမတ္တာ ဝိဟရိဿန္တိ, အယံ အဓိပ္ပါယော။

ယောဂဿ ကာလံ န နိဝတ္တတိ ယာ စ၊ သော န တတ္ထ ပါပိန္တဝေ ဘဝန္တိ။

ဝေဒနာမဂ္ဂဣသိနာ [ဝေဒနာမဂ္ဂံ ဣသိနာ (ဣ။)] ပဝေဒိတံ၊ ဓုတရဇာသဝါ ဒုက္ခာ ပမောက္ခာတာ။

ဧတ္ထ ဘဂဝတော ကော အဓိပ္ပါယော? ယေ ဒုက္ခေ နာဿာဒကာ [ဒုက္ခေန သာဓကာ (ဣ။)], တေ ဝီရိယမာရဘိဿန္တိ ဒုက္ခက္ခယာယာတိ။ အယံ တတ္ထ ဘဂဝတော အဓိပ္ပါယော။ ဣတိ ဂါထာယ ဝါ ဗျာကရဏေန ဝါ ဒေသိတေ ဣမိနာ သုတ္တေန သာဓကာ, ယော ဧဝံ ဓမ္မာနုဓမ္မံ ပဋိပဇ္ဇတီတိ သော အဓိပ္ပါယော, အယံ ဝုစ္စတိ ဒေသနာဓိပ္ပါယော။

တတ္ထ ကတမော ပုဗ္ဗာပရသန္ဓိ? ယံ ဂါထာယံ ဝါ သုတ္တေသု ဝါ ပဒါနိ အသီတိ တာနိ ဘဝန္တိ ဧဝံ ဝါ ဧဝမေတိ တဿာ ဂါထာယ သုတ္တဿ ဝါ ယာနိ ပုရိမာနိ ပဒါနိ ယာနိ စ ပစ္ဆိမကာနိ , တာနိ သမောသာရေတဗ္ဗာနိ။ ဧဝံ သော ပုဗ္ဗာပရေန သန္ဓိ ဉာယတိ။ ယာ ဧကာ သမာရဒ္ဓါ ဂါထာ ဒွေ တီဏိ ဝါ တဿ မေကဒေသေ ဘာသိတာနံ အဘာသိတာဟိ ဂါထာဟိ အနိဒ္ဒိဋ္ဌော အတ္ထော ဘဝတိ တဒုပဓါရိတဗ္ဗံ။ ယံဝ သဗ္ဗာ [ယံ ဝတ္တဗ္ဗံ (ဣ။)] ဣတိဿ ပရိယေသမာနဿ ပရိယေသနာ ကင်္ခါ, တဿ ဝါ ပုဂ္ဂလဿ ပညတ္တီနံ အပရေ ပရိယေသိတဗ္ဗံ။ ဣဒံ ဝုစ္စတေ ပုဗ္ဗာပရေန သန္ဓိ။ ကောသလ္လန္တိ ဝတ္ထုတော နိဒါနကောသလ္လံ။ ဗျဉ္ဇနတော နိရုတ္တိကောသလ္လံ။ ဒေသနာဓိပ္ပါယကောသလ္လံ။ ပုဗ္ဗာပရေန သန္ဓိကောသလ္လံ။ တတ္ထ တဿ ဂါထာ ပရိယေသိတာ နိဒါနံ ဝါ။ ဥပလဗ္ဘိတုံ န အတ္ထော နိဒ္ဒိသိတဗ္ဗော ဝတ္ထုတော နိဒါနကောသလ္လံ အတ္ထကောသလ္လံ ဣမေဟိ စတူဟိ ပဒေဟိ အတ္ထော ပရိယေသိယန္တော ယထာဘူတံ ပရိယိဋ္ဌော ဟောတိ။ အထ စ သဗ္ဗော ဝတ္ထုတော ဝါ နိဒါနေန ဝါ ယော အဓိပ္ပါယော ဗျဉ္ဇနော နိရုတ္တိ သန္ဓိ စ အနုတ္တရော ဧသော ပုဗ္ဗာပရေန ဧဝံ သုတ္တတ္ထေန ဒေသိတဗ္ဗံ။ အယံ စတုဗ္ယူဟော ဟာရော။

၅၀။ တတ္ထ ကတမော အာဝဋ္ဋော ဟာရော?

ဧကမှိ ပဒဋ္ဌာနေ၊ ပရိယေသတိ သေသကံ ပဒဋ္ဌာနံ။

အာဝဋ္ဋတိ ပဋိပက္ခေ၊ အာဝဋ္ဋော နာမ သော ဟာရော။

ယထာ ကိံ ဥန္နဠာနံ ပမတ္တာနန္တိ ဂါထာယော။ ယံ ပမာဒေါ, ဣဒံ ကိဿ ပဒဋ္ဌာနံ? ကုသလာနံ ဓမ္မာနံ ဩသဂ္ဂဿ။ ကုသလဓမ္မောသဂ္ဂေါ ပန ကိဿ ပဒဋ္ဌာနံ ? အကုသလဓမ္မပဋိသေဝနာယ။ ကိဿ ပဒဋ္ဌာနံ, ကုသလဓမ္မပဋိသေဝနာယ? ကိဿ ပဒဋ္ဌာနံ, ကိလေသဝတ္ထုပဋိသေဝနာယ? ဣတိ ပမာဒေန မောဟပက္ခိယာ ဒိဋ္ဌိ အဝိဇ္ဇာ ဆန္ဒရာဂပက္ခိယာ။ တတ္ထ တဏှာ စ ဒိဋ္ဌိ စတ္တာရော အာသဝါ တဏှာ ကာမာသဝေါ စ ဘဝါသဝေါ စ ဒိဋ္ဌာသဝေါ စ အဝိဇ္ဇာသဝေါ စ။ တတ္ထ စိတ္တေ အတ္ထီတိ ဒိဋ္ဌိ စေတသိကေသု နိစ္စန္တိ ပဉ္စသု ကာမဂုဏေသု အဇ္ဈာဝဟနေန ကာမာသဝေါ, ဥပပတ္တီသု အာသတ္တိ ဘဝါသဝေါ။ တတ္ထ ရူပကာယော ကာမာသဝဿ ဘဝါသဝဿ စ ပဒဋ္ဌာနံ။ နာမကာယော ဒိဋ္ဌာသဝဿ အဝိဇ္ဇာသဝဿ စ ပဒဋ္ဌာနံ။

တတ္ထ အလ္လိယနာယ အဇ္ဈတ္တဝါဟနံ ကာမာသဝဿ လက္ခဏံ။ ပတ္ထနဂန္ထနအဘိသင်္ခါရကာယသင်္ခါရဏံ ဘဝါသဝဿ လက္ခဏံ, အဘိနိဝေသော စ ပရာမာသော စ ဒိဋ္ဌာသဝဿ လက္ခဏံ။ အပ္ပဋိဝေဓေါ ဓမ္မေသု အသမ္ပဇညာ စ အဝိဇ္ဇာသဝဿ လက္ခဏံ။ ဣမေ စတ္တာရော အာသဝါ စတ္တာရိ ဥပါဒါနာနိ။ ကာမာသဝေါ ကာမုပါဒါနံ, ဘဝါသဝေါ ဘဝုပါဒါနံ, ဒိဋ္ဌာသဝေါ ဒိဋ္ဌုပါဒါနံ, အဝိဇ္ဇာသဝေါ အတ္တဝါဒုပါဒါနံ, ဣမေဟိ စတူဟိ ဥပါဒါနေဟိ ပဉ္စက္ခန္ဓာ။ တတ္ထ အဝိဇ္ဇာသဝေါ စိတ္တေ ပဟာတဗ္ဗော, သော စိတ္တေ စိတ္တာနုပဿိဿ ပဟီယတိ။ ဒိဋ္ဌာသဝေါ ဓမ္မေသု ပဟာတဗ္ဗော, သော ဓမ္မေသု ဓမ္မာနုပဿိဿ ပဟီယတိ။ ဘဝါသဝေါ အာသတ္တိယာ ပဟာတဗ္ဗော, သော ဝေဒနာသု ဝေဒနာနုပဿိဿ ပဟီယတိ။ ကာမာသဝေါ ပဉ္စသု ကာမဂုဏေသု ပဟာတဗ္ဗော, သော ကာယေ ကာယာနုပဿိဿ ပဟီယတိ။ တတ္ထ ကာယာနုပဿနာ ဒုက္ခမရိယသစ္စံ ဘဇတိ။ ဝေဒနာနုပဿနာ ပဉ္စန္နံ ဣန္ဒ္ရိယာနံ ပစ္စယော သုခိန္ဒ္ရိယဿ ဒုက္ခိန္ဒ္ရိယဿ သောမနဿိန္ဒ္ရိယဿ ဒေါမနဿိန္ဒ္ရိယဿ ဥပေက္ခိန္ဒ္ရိယဿ, သတ္တကိလေသောပစာရော တေန သမုဒယံ ဘဇတိ။ စိတ္တေ စိတ္တာနုပဿနာ နိရောဓံ ဘဇတိ။ ဓမ္မေသု ဓမ္မာနုပဿနာ မဂ္ဂံ ဘဇတိ။ တေနဿ စတူသု စ ဒဿနေန တဿေဝ သဗ္ဗေ ပဟီယန္တိ, ယေန နိဒ္ဒိဋ္ဌာ ပဌမံ ဥန္နဠာနံ ပမတ္တာနံ တေသံ ဝဍ္ဎန္တိ အာသဝါ။ ဇာနတော ဟိ ပဿတော အာသဝါနံ ခယော ဒုက္ခံ သမုဒယော နိရောဓေါ မဂ္ဂေါ ဟိ အကုသလာ ဓမ္မာ။ ဧဝံ ပရိယေသိတဗ္ဗာ။ ယာဝ တဿ အကုသလဿ ဂတိ တတော ပဋိပက္ခေန အကုသလေ ဓမ္မေ ပရိယေသတိ တေသံ ကိလေသာနံ ဟာရေန အာဝဋ္ဋတိ။ အယံ ဝုစ္စတေ အာဝဋ္ဋော ဟာရော။ ဧဝံ သုက္ကာပိ ဓမ္မာ ပရိယေသိတဗ္ဗာ။ အကုသလဓမ္မေ အာဂမိဿ။

တတ္ထ အာဝဋ္ဋဿ ဟာရဿ အယံ ဘူမိ သတိ ဥပဋ္ဌာနာ စ ဝိပလ္လာသာ စ စတ္တာရိ ဉာဏာနိ သက္ကာယသမုပ္ပါဒါယဂါမိနီ စ ပဋိပဒါ သက္ကာယနိရောဓဂါမိနီ ပဋိပဒါ။

၅၁။ တတ္ထ ကတမော ဝိဘတ္တိ ဟာရော? ယံ ကိဉ္စိ ဝိဘဇ္ဇဗျာကရဏီယံ ဝုစ္စတိ ဝိဘတ္တိ ဟာရော။ ယထာ ကိံ အာဂန္တွာ စ ပုန ပုဂ္ဂလော ဟောတိ, နော ဝါဂတံ န ပရိဘာသတိ [နော ဝါ န ပရိဘာသတိ (ဣ။), န တာဝါယံ ပရိဘာသိ (က။)] ပရိပုစ္ဆတာယ ပဉှာယ အတိယနံ ဧကဿ ကိဉ္စိ – အယံ ဝုစ္စတေ ဝိဘတ္တိ ဟာရော။

တတ္ထ ကတမော ပရိဝတ္တနော ဟာရော။ ယံ ကိဉ္စိ ပဋိပက္ခနိဒ္ဒေသော, အယံ ဝုစ္စတိ ပရိဝတ္တနော ဟာရော။ ယထာ ဝုတ္တံ ဘဂဝတာ သမ္မာဒိဋ္ဌိကဿ ပုရိသပုဂ္ဂလဿ မိစ္ဆာဒိဋ္ဌိ နိဇ္ဇိဏ္ဏာ ဟောတီတိ ဝိတ္ထာရေန သဗ္ဗာနိ မဂ္ဂင်္ဂါနိ။ အယံ ဝုစ္စတေ ပရိဝတ္တနော ဟာရော။

တတ္ထ ကတမော ဝေဝစနော ဟာရော?

ဝေဝစနေဟိ အနေကေဟိ၊ ဧကံ ဓမ္မံ ပကာသိတံ။

သုတ္တေ ယော ဇာနာတိ သုတ္တဝိဒူ၊ ဝေဝစနော နာမ သော ဟာရော။

ယထာ အာယသ္မာ သာရိပုတ္တော ဧကမှိ ဝတ္ထုမှိ ဝေဝစနေန နာနာဝုတ္တေန ဘဂဝတာ ပသံသိတော ‘‘မဟာပညော သာရိပုတ္တော ဟာသပညော ဇဝနပညော’’တိ ဣဒံ ပညာယ ဝေဝစနံ။ ယထာ စ မဂ္ဂဝိဘင်္ဂေ နိယျာနတ္ထော ဧကမေကံ မဂ္ဂင်္ဂံ ဝေဝစနေဟိ နိဒ္ဒိဋ္ဌံ။ ဧဝံ အဝိဇ္ဇာယ ဝေဝစနာ။ ဧကံ အကုသလမူလံ တဒေဝ သန္တံ တေသု တေသု ဇနပဒေသု တေန တေန ပဇာနန္တိ။ န ဟိ အနေန တဒေဝပိ အာလပိယန္တိ အညံ ဘဇတိ။ သဗ္ဗကာမဇဟဿ ဘိက္ခုနောတိ ကာမာ အာလပိတာ။ ယဿ နိတ္ထိဏ္ဏော သင်္ကောတိ တေယေဝ ကာမေ သင်္ကာတိ အာလပတိ။ သုဏမာနဿ ပုရေတရံ ရဇ္ဇန္တိ တေယေဝ ကာမေ ရဇ္ဇန္တိ အာလပတိ။ ဧဝံ သုတ္တမှိ ယော ဓမ္မော ဒေသိယတိ တဿ ပရိယေဋ္ဌိ ‘‘ကတမဿ ဓမ္မဿ ဣဒံ နာမံ ကတမဿ ဣဒံ ဝေဝစန’’န္တိ။ သဗ္ဗညူ ဟိ ယေသံ ယေသံ ယာ နိရုတ္တိ ဟောတိ, ယထာဂါမိ တေန တေန ဒေသေတီတိ တဿ ဝေဝစနံ ပရိယေသိတဗ္ဗံ။ အယံ ဝေဝစနော ဟာရော။

၅၂။ တတ္ထ ကတမော ပညတ္တိ ဟာရော? စတ္တာရိ အရိယသစ္စာနီတိ သုတ္တံ နိဒ္ဒိသတိ, နိက္ခေပပညတ္တိ။ ယာ သမုဒယပညတ္တိ။ ကဗဠီကာရေ အာဟာရေ အတ္ထိ ဆန္ဒော အတ္ထိ ရာဂေါ ယာဝ ပတိဋ္ဌိတံ။ တတ္ထ ဝိညာဏံ ပဘဝပညတ္တိံ ပညပေတိ။ ကဗဠီကာရေ အာဟာရေ နတ္ထိ ဆန္ဒော။ပေ။။ သမုဂ္ဃါတိ ပညတ္တိ။

တဿ ကာမာသဝါပိ စိတ္တံ ဝိမုစ္စတိ, ဘဝါသဝါပိ စိတ္တံ ဝိမုစ္စတိ, အဝိဇ္ဇာသဝါပိ စိတ္တံ ဝိမုစ္စတီတိ ပဟာနပညတ္တိံ ပညပေတိ။ တဏှာ ယဿ ပုရက္ခတာ ပညာ ပရိဝတ္တတိ ဂါထာ မနာပပညတ္တိံ ပညပေတိ။ ဧဝံ ပန မနာပပညတ္တီတိ ဧကဓမ္မံ ဘဂဝါ ပညပေတိ။ န ဟိ တဏှာ ဒုက္ခသမုဒယောတိ ကာရေတွာ သဗ္ဗတ္ထ တဏှာသမုဒယော နိဒ္ဒိသိတဗ္ဗော။ ယထာ ဥပ္ပန္နံ ကာမဝိတက္ကံ နာဓိဝါသေတိ ဝိနောဒေတိ ပဇဟတီတိ ပဋိက္ခေပပညတ္တိ။ ဧဝံ သဗ္ဗေသံ ဓမ္မာနံ ကုသလာနဉ္စ အကုသလာနဉ္စ ယဉ္စဿ ဓမ္မက္ခေတ္တံ ဘဝတိ, သော စေဝ ဓမ္မော တတ္ထ ပဝတ္တတိ။ တဒဝသိဋ္ဌာ ဓမ္မာ တဿာနုဝတ္တကာ ဟောန္တိ။ သာ ဒုဝိဓါ ပညတ္တိ – ပရာဓီနပညတ္တိ စ သာဓီနပညတ္တိ စ။ ကတမာ သာဓီနပညတ္တိ? သမာဓိံ, ဘိက္ခဝေ [ပဿ သံ။ နိ။ ၃။၅], ဘာဝေထ, သမာဟိတော, ဘိက္ခဝေ, ဘိက္ခု ယထာဘူတံ ပဇာနာတိ။ ‘‘ရူပံ အနိစ္စ’’န္တိ ယထာဘူတံ ပဇာနာတိ, အယံ သာဓီနပညတ္တိ ပရာဓီနပညတ္တိ စ, သာ ပညတ္တိ ပညာယ စ သီလဿ စ, ယထာ စတ္တာရိ ဈာနာနိ ဘာဝေထ။ တဿ အတ္ထိ သမာဓိန္ဒ္ရိယံ မုဒူနိ စတ္တာရိ ဣန္ဒ္ရိယာနိ တာနိ စတုပရာဓီနာနိ, တီဏိ အဝေစ္စပ္ပသာဒေတိ ပရာဓီနံ သမာဓိန္ဒ္ရိယံ စတ္တာရိ ဣန္ဒ္ရိယာနိ ပရာဓီနာတိ စတူသု အရိယသစ္စေသု အပရာဓီနံ ပညိန္ဒ္ရိယံ သတိပဋ္ဌာနေသု သမ္မပ္ပဓါနေသု ဝီရိယိန္ဒ္ရိယံ။ ဣတိ သကေ ပဒဋ္ဌာနေ သကေ ခေတ္တသာဓီနော သော ဓမ္မော, သော စ တတ္ထ ပညာပေတဗ္ဗော။ တဿ ပဋိပက္ခာ နိဃာတော နိဒ္ဒိသိတဗ္ဗော။ ဧတ္ထာယံ အနေကာကာရပညတ္တိ ကေန ကာရဏေန အယံ ဓမ္မော ပညတ္တောတိ။ အယံ ဝုစ္စတေ ပညတ္တိ။

၅၃။ တတ္ထ ကတမော ဩတရဏော ဟာရော? ဆသု ဓမ္မေသု ဩတာရေတဗ္ဗံ။ ကတမေသု ဆသု? ခန္ဓေသု ဓါတူသု အာယတနေသု ဣန္ဒ္ရိယေသု သစ္စေသု ပဋိစ္စသမုပ္ပါဒေသု။ နတ္ထိ တံ သုတ္တံ ဝါ ဂါထာ ဝါ ဗျာကရဏံ ဝါ။ ဣမေသု ဆန္နံ ဓမ္မာနံ အညတရသ္မိံ န သန္ဒိဿတိ။ ဧတ္တာဝတာ ဧသ သဗ္ဗာ ဒေသနာ ယာ တာ ခန္ဓာ ဝါ ဓါတုယော ဝါ အာယတနာနိ ဝါ သစ္စာနိ ဝါ ပဋိစ္စသမုပ္ပါဒေါ ဝါ, တတ္ထ ပဉ္စန္နံ ခန္ဓာနံ ဝေဒနာက္ခန္ဓော ရာဂဒေါသမောဟာနံ ပဒဋ္ဌာနံ။ တတ္ထ တိဿော ဝေဒနာယော တဿ သုခါယ ဝေဒနာယ သောမနဿော သဝိစာရော, ဒုက္ခာယ ဝေဒနာယ ဒေါမနဿော သဝိစာရော, အဒုက္ခမသုခါယ ဝေဒနာယ ဥပေက္ခော သဝိစာရော။ ယံ ပုန တတ္ထ ဝေဒယိတံ ဣဒံ ဒုက္ခသစ္စံ, ခန္ဓေသု သင်္ခါရက္ခန္ဓော တတ္ထ ကာယော ပမတ္တံ သဥပဝတ္တတိ, တဉ္စ သင်္ခါရဂတော ဒွိဓါ စ ဘဝင်္ဂေါတရဏံ ကမ္မံ တီဏိ စ သင်္ခါရာနိ ပုညာဘိသင်္ခါရာ ဝါ အပုညာ ဝါ အာနေဉ္ဇာ ဝါ ဟေတု သဗ္ဗသရာဂဿ နော ဝီတရာဂဿ, ဒေါသဿ အဘိသင်္ခါရာနိ စ အဝီတရာဂေါ စေတေတိ စ ပကပ္ပေတိ စ, ဝီတရာဂေါ ပန စေတေတိ စ နော အဘိသင်္ခရောတိ, ယံ ဥဏှံ ဝဇိရံ ကဋ္ဌေ ဝါ ရုက္ခေ ဝါ အညတ္ထ ဝါ ပတန္တံ ဘိန္ဒတိ စ ဍဟတိ စ, ဧဝံ သရာဂစေတနာ စေတေတိ စ အဘိသင်္ခရောတိ စ။ ယထာ သတံ ဝဇိရံ န ဘိန္ဒတိ န စ ဍဟတိ, ဧဝံ ဝီတရာဂစေတနာ စေတေတိ န စ အဘိသင်္ခရောတိ။ တတ္ထ ပဉ္စန္နံ ခန္ဓာနံ ဧကော ခန္ဓော အနိန္ဒ္ရိယသရီရံ သညာက္ခန္ဓော။

တတ္ထ ဓါတူနံ အဋ္ဌာရသ ဓါတုယော။ တတ္ထ ယာ ရူဣ ဒသ ဓါတုယော, တာသု ဒေသိယမာနာသု ရူပက္ခန္ဓော နိဒ္ဒိသိတဗ္ဗော, ဒုက္ခံ အရိယသစ္စံ။ ယေပိ စ ဆ ဝိညာဏကာယာ မနောဓါတုသတ္တမာ, တတ္ထ ဝိညာဏက္ခန္ဓော စ နိဒ္ဒိသိတဗ္ဗော, ဒုက္ခံ အရိယသစ္စံ။ ဓမ္မဓါတု ပန ဓမ္မသမောသရဏာ, သော ဓမ္မော ဟေတုနာ စ နိဿန္ဒေန စ ဖလေန စ ကိစ္စေန စ ဝေဝစနေန စ ယေန ယေန ဥပလဗ္ဘတိ, တေန တေန နိဒ္ဒိသိတဗ္ဗော။ ယဒိ ဝါ ကုသလာ ယဒိ ဝါ အကုသလာ ယဒိ ဝါ အဗျာကတာ ယဒိ ဝါ အသင်္ခတာ။ ဒွါဒသန္နံ အာယတနာနံ ဒသ အာယတနာနိ ရူပါနိ တံ ဒုက္ခံ အရိယသစ္စံ နိဒ္ဒိသိတဗ္ဗံ။ ရူပက္ခန္ဓော စ မနာယတနဉ္စ ဝိညာဏက္ခန္ဓေန နိဒ္ဒိသိတဗ္ဗံ, ဒုက္ခံ အရိယသစ္စံ။ ဓမ္မာယတနံ နာနာဓမ္မသမောသရဏံ။ တတ္ထ ယေ ဓမ္မာ ဣန္ဒ္ရိယာနံ ဣန္ဒ္ရိယေသု နိဒ္ဒိသိတဗ္ဗာ, ယေ အနိန္ဒ္ရိယာနံ အနိန္ဒ္ရိယေသု နိဒ္ဒိသိတဗ္ဗာ။ ပရိယာယတော စ ဩတာရေတဗ္ဗာ။ ယထာ သာ ဓမ္မဓါတု တထာ ဓမ္မာယတနံ ပရိယေသိတဗ္ဗံ။ ယာယေဝ ဟိ ဓမ္မဓါတု တဒေဝ ဓမ္မာယတနံ အနူနံ အနဓိကံ။

တတ္ထ ပဋိစ္စသမုပ္ပါဒေါ အတ္ထိ တိဝိဓေါ, အတ္ထိ စတုဗ္ဗိဓေါ, အတ္ထိ ဒုဝိဓေါ။ တတ္ထ တိဝိဓေါ ပဋိစ္စသမုပ္ပါဒေါ ဟေတုဖလနိဿန္ဒော။ အဝိဇ္ဇာ သင်္ခါရာ တဏှာ ဥပါဒါနံ စ အယံ ဟေတု, ဝိညာဏံ နာမရူပံ သဠာယတနံ ဖဿော ဝေဒနာ စ အယံ ပစ္စယော, ယော ဘဝေါ အယံ ဝိပါကော, ယာ ဇာတိ မရဏံ အယံ နိဿန္ဒော။

ကထံ စတုဗ္ဗိဓေါ ဟေတု ပစ္စယော ဝိပါကော နိဿန္ဒော စ? အဝိဇ္ဇာ စ တဏှာသင်္ခါရာ စ ဥပါဒါနံ စ – အယံ ဟေတု။ ဝိညာဏံ နာမရူပဿ ပစ္စယော။ နာမရူပံ ဥပပဇ္ဇတိ, တထာ ဥပပန္နဿ သဠာယတနံ ဖဿော ဝေဒနာ စ – အယံ ပစ္စယော။ ယော ဘဝေါ အယံ ဝိပါကော။ ယာ ဇာတိ ယာ စ ဇရာမရဏံ – အယံ နိဿန္ဒော။

ကထံ ဒုဝိဓေါ ပဋိစ္စသမုပ္ပါဒေါ? အဝိဇ္ဇာ သင်္ခါရာ တဏှာ ဥပါဒါနံ – အယံ သမုဒယော။ ဝိညာဏံ နာမရူပံ သဠာယတနံ ဖဿော ဝေဒနာ ဘဝေါ ဇာတိ မရဏဉ္စ – ဣဒံ ဒုက္ခံ။ ယံ ပန အဝိဇ္ဇာနိရောဓါ သင်္ခါရနိရောဓေါ ဣမာနိ တပ္ပဋိပက္ခေန ဒွေ သစ္စာနိ။ တသ္မာ ပဋိစ္စသမုပ္ပါဒေါ ယေန အာကာရေန နိဒ္ဒိဋ္ဌော, တေန တေန နိဒ္ဒိသိတဗ္ဗော။

တထာ ဗာဝီသတိ ဣန္ဒ္ရိယာနိ။ ဒွါဒသ ဣန္ဒ္ရိယာနိ စက္ခုန္ဒ္ရိယာနိ စက္ခုန္ဒ္ရိယံ ယေန ဒေါမနဿိန္ဒ္ရိယံ, ဣဒံ ဒုက္ခံ။ ပုရိသိန္ဒ္ရိယံ စ ဒိဋ္ဌိယာ စ တဏှာပဒဋ္ဌာနံ။ ယတော ပုရိသော ပုရိသကာနံ တံ ဧဝံ ကာတဗ္ဗတာ။ အထ အဇ္ဈတ္တံ သာရဇ္ဇတိ။ အယံ အဟံကာရော တံ ယသာ သာရတ္တော ဗဟိဒ္ဓါ ပရိယေသတိ, အယံ မမံကာရော ဧဝံ ဣတ္ထီ, တတ္ထ သုခိန္ဒ္ရိယံ စ သောမနဿိန္ဒ္ရိယံ စ ပုရိသိန္ဒ္ရိယဿာနုဝတ္တကာ ဟောန္တိ။ တဿ အဓိပ္ပါယပရိပုဏ္ဏာ လောဘဓမ္မာ ကုသလမူလေ ပဝဍ္ဎေန္တိ။ တဿ စေ အယမဓိပ္ပါယော န ပါရိပူရိံ ဂစ္ဆတိ။ တဿ ဒုက္ခိန္ဒ္ရိယံ စ ဒေါမနဿိန္ဒ္ရိယံ စ ဝတ္တတိ။ ဒေါသော စ အကုသလမူလံ ပဝဍ္ဎတိ။ သစေ ပန ဥပေက္ခာ ဘာဝေတိ ဥပေက္ခိန္ဒ္ရိယဿ အနုဝတ္တကာမာ ဘဝတိ။ အမောဟော စ ကုသလမူလံ ပဝဍ္ဎတိ။ ဣတိ သတ္တ ဣန္ဒ္ရိယာနိ ကိလေသဝတ္ထုမုပါဒါယ အနန္ဝေမာနိ အဝမာနိ သဗ္ဗဿ ဝေဒနာ ဣတ္ထိန္ဒ္ရိယံ ပုရိသိန္ဒ္ရိယံ။ တတ္ထ အဋ္ဌ ဣန္ဒ္ရိယာနိ သဒ္ဓိန္ဒ္ရိယံ ယာဝ အညာတာဝိနော ဣန္ဒ္ရိယံ, အယံ ဒုက္ခနိရောဓဂါမိနီ ပဋိပဒါ။ ဒသန္နံ ပညိန္ဒ္ရိယာနံ ကာမရာဂဿ ပဒဋ္ဌာနံ။ မနိန္ဒ္ရိယံ ဘဝရာဂဿ ပဒဋ္ဌာနံ။ ပညိန္ဒ္ရိယာနိ ရူပရာဂဿ ပဒဋ္ဌာနံ။ ဣတ္ထိန္ဒ္ရိယံ စ ပုရိသိန္ဒ္ရိယံ စ သတ္တ ပညတ္တိယာ ပဒဋ္ဌာနံ။ တတ္ထ ယေန ယေန ဣန္ဒ္ရိယေန ယုတ္တံ ဝါ ဂါထာယ ဩတာရေတုံ သက္ကောတိ, တေန တေန နိဒ္ဒိသိတဗ္ဗော။ ဧဝံ ခန္ဓေသု ဓါတူသု အာယတနေသု သစ္စေသု ပဋိစ္စသမုပ္ပါဒေသု အယံ ဩတရဏော ဟာရော။

၅၄။ တတ္ထ ကတမော သောဓနော ဟာရော? ယော ဂါထာ ဧကေန အာရမ္ဘော ဘာသိဿန္တိ။ တတ္ထ ဧကိဿာ ဘာသိတာယ အဝသိဋ္ဌာသု ဘာသိတာသု သော အတ္ထော န နိဒ္ဒိသိတဗ္ဗော။ ကိံ ကာရဏံ? န ဟိ တာဝ သော အတ္ထော ဘာသိတော, သော အဘာသိတော န သက္ကာ နိဒ္ဒိသိတုံ။ ယထာ ကိံ အပ္ပမာဒေါ အမတံ ပဒန္တိ ဂါထာ အယမေကာ ဂါထာ နိဒ္ဒိသိတဗ္ဗာ။ ကိံ ကာရဏံ, အတ္ထိက္ခာတာဝ ဣမဿ အာရမ္ဘဿ အနဘာသိတံ?

ဧဝံ [ဧတံ (ဣ။) ပဿ ဓ။ ပ။ ၂၂] ဝိသေသတော ဉတွာ၊ အပ္ပမာဒမှိ ပဏ္ဍိတာ။

အပ္ပမာဒေ ပမောဒန္တိ၊ အရိယာနံ ဂေါစရေ ရတာတိ။

ဣဒံ အဘာသိတံ။ ဣမိဿာပိ ဂါထာယ ဘာသိတာယ အတ္ထော နိဒ္ဒိသိတဗ္ဗော။ ကိံ ကာရဏံ, အတ္ထိ တတ္ထ အဝသိဋ္ဌံ? တေ ဈာယိနော [ဓ။ ပ။ ၂၃] သာတတိကာ, နိစ္စံ ဒဠှပရက္ကမာတိ ဂါထာ, ဧဝံ ဣမာ ဂါထာယော ဥပဓါရိတာ ယဒါ ဘဝန္တိ, တဒါ အတ္ထော နိဒ္ဒိသိတဗ္ဗော။ ဧဝံ အဿုတပုဗ္ဗေသု သုတ္တေသု ဗျာကရဏေသု ဝါ ဧကုဒ္ဒေသော ဘာသိတော။ ယာ ဝီမံသာ တုလနာ ဣဒံ အတ္ထိ ကိစ္စံ, ဣဒံ သုတ္တံ ဘာသိတံ တဿ ဝေဝစနံ နိဒ္ဒိဋ္ဌံ ဝါ န ဝါတိ။ တတ္ထ ယာ ဝီမံသာ, အယံ ဝုစ္စတေ သောဓနော ဟာရော။

၅၅။ တတ္ထ ကတမော အဓိဋ္ဌာနော ဟာရော? ဧကတ္တတာ စ ဝေမတ္တတာ စ။ တတ္ထ ကိတပညတ္တိ စ ကိစ္စပညတ္တိ စ။ သာ ဧကတ္တတာ စ ဝေမတ္တတာ စ ယထာ ပညတ္တိ ဧကဝေဝစနေန ဝေမတ္တတာ ပဇာနာတီတိ ပညာ, သာ စ အာဓိပတေယျဋ္ဌေန ပညတ္တိ။ ယံ အနောမတ္တိယဋ္ဌေန ပညတ္တန္တိ။ တံ အနောမတ္တိယဋ္ဌေန ပညာဗလံ။ တနုဘူတာ ဂေါစရတ္တဝသာ သေဝသတိ တီသု ရတနေသု အနုဿတိ ဗုဒ္ဓါနုဿတိ ဓမ္မာနုဿတိ သံဃာနုဿတိ အဝိပရီတာနုဿရဏတာယ။ သမ္မာဒိဋ္ဌိ ဓမ္မာနံ ပဝိစယေန ဓမ္မဝိစယသမ္ဗောဇ္ဈင်္ဂေါ အဘိနီဟာရတော အဘိညာတိ။ သင်္ခေပေန မဂ္ဂါ ကာ ဝတ္ထု အဝိကောပနတာယ ဧကတ္တာ, ယထာ ဥဏှေန သံသဋ္ဌံ ဥဏှောဒကံ, သီတေန သံသဋ္ဌံ သီတောဒကံ ခါရောဒကံ ဂုဠ္ဟောဒကန္တိ, ဣဒံ ဧကတ္တတာ ဝေမတ္တတာ စ။

အတ္ထိ ပုန ဓမ္မော နာနာဓမ္မသံဃတော ဧကတော ယထာရူပံ စတ္တာရော ဝါရေတဗ္ဗာ, တဉ္စ ရူပန္တိ ဧကတ္တတာ။ ပထဝီဓါတု အာပေါ တေဇော ဝါယောဓါတူတိ ဝေမတ္တတာ။ ဧဝံ သဗ္ဗာ စတဿော ဓါတုယော ရူပန္တိ ဧကတ္တတာ, ပထဝီဓါတု အာပေါ တေဇော ဝါယောဓါတူတိ ဝေမတ္တတာ။ ပထဝီဓါတူတိ လက္ခဏတော ဧကတ္တတာ, သံကိဏ္ဏဝတ္ထုတော ဝေမတ္တတာ။ ယံ ကိဉ္စိ ကက္ခဠလက္ခဏံ, သဗ္ဗံ တံ ပထဝီဓါတူတိ ဧကတ္တတာ။ ကေသာ လောမာ နခါ ဒန္တာ ဆဝိ စမ္မန္တိ ဝေမတ္တတာ။ ဧဝံ သဗ္ဗံ စတဿော ဓါတုယော ရူပန္တိ ဧကတ္တံ။ သဒ္ဒါ ဂန္ဓာ ရသာ ဖောဋ္ဌဗ္ဗာတိ ဝေမတ္တတာ။

အတ္ထိ ပုန ဓမ္မော ဝေမတ္တတာ အညော နာမံ လဘတိ။ ယထာ ကာယာနုပဿနာယ နဝသညာ ဝိနီလကသညာ ဥဒ္ဓုမာတကသညာ, အယံ အသုဘသညာ, ယာ ဧကတ္တတာ အာရမ္မဏတော ဝေမတ္တတော, သာ ဧဝံ သညာဝေဒနာသု အာဒီနဝံ သမနုပဿတော တထာဓိဋ္ဌာနံ သမာဓိန္ဒ္ရိယံ စ သာယေဝ ဓမ္မေသု တတ္ထ သညာဘာဝနာ ဝီရိယိန္ဒ္ရိယံ စ ဓမ္မေသု ဓမ္မာနုပဿနာ စိတ္တေ အတ္တသညံ ပဇဟတော ပညိန္ဒ္ရိယံ စ စိတ္တေ စိတ္တာနုပဿနာ။ (ဣတိ) [( ) နတ္ထိ ဣ။ ပေါတ္ထကေ] ယော ကောစိ ဉာဏပစာရော သဗ္ဗသော ပညာယ ဂေါစရော ပညာ, အယံ ဝေမတ္တတာ, ယထာ ကာမရာဂေါ ဘဝရာဂေါ ဒိဋ္ဌိရာဂေါတိ ဝေမတ္တတာ တဏှာယ။ ဣတိ ယံ ဧကတ္တတာယ စ ဝေမတ္တတာယ စ ဉာဏံ ဝီမံသနာ တုလနာ။ အယံ အဓိဋ္ဌာနော ဟာရော။

၅၆။ တတ္ထ ကတမော ပရိက္ခာရော ဟာရော? သဟေတု သပ္ပစ္စယံ ဝေါဒါနဉ္စ သံကိလေသော စ, ယံ တဒုဘယံ ပရိယေဋ္ဌိ, သ ပရိက္ခာရော ဟာရော။ ဣတိ ဓမ္မာနံ သဟေတုကာနံ ဟေတု ပရိယေသိတဗ္ဗော, သပ္ပစ္စယာနံ ပစ္စယော ပရိယေသိတဗ္ဗော။

တတ္ထ ကိံ နာနာကရဏံ, ဟေတုဿ စ ပစ္စယဿ စ? သဘာဝေါ ဟေတု, ပရဘာဝေါ ပစ္စယော။ ပရဘာဝဿ ပစ္စယော ဟေတုပိ, သဘာဝဿ ဟေတုယာ ပရဘာဝဿ ကဿစိ ပစ္စယော အဝုတ္တော ဟေတု, ဝုတ္တော ပစ္စယော။ အဇ္ဈတ္တိကော ဟေတု, ဗာဟိရော ပစ္စယော။ သဘာဝေါ ဟေတု, ပရဘာဝေါ ပစ္စယော။ နိဗ္ဗတ္တကော ဟေတု, ပဋိဂ္ဂါဟကော [ပရိဂ္ဂါဟကော (က။)] ပစ္စယော။ နေဝါသိကော ဟေတု, အာဂန္တုကော ပစ္စယော။ အသာဓါရဏော ဟေတု, သာဓါရဏော ပစ္စယော။ ဧကောယေဝ ဟေတု, အပရာပရော ပစ္စယော။

ဟေတုဿ ဥပကရဏံ သမုဒါနေတဗ္ဗော။ သမုဒါနံ ဟေတု, တတ္ထ ဒုဝိဓေါ ဟေတု။ ဒုဝိဓေါ ပစ္စယော – သမနန္တရပစ္စယော စ ပရမ္ပရပစ္စယော စ။ ဟေတုပိ ဒုဝိဓေါ – သမနန္တရဟေတု စ ပရမ္ပရဟေတု စ။ တတ္ထ ကတမော ပရမ္ပရပစ္စယော? အဝိဇ္ဇာ နာမရူပဿ ပရမ္ပရပစ္စယော, ဝိညာဏံ သမနန္တရပစ္စယတာယ ပစ္စယော။ ယဒိ အာဒိမှိ အဝိဇ္ဇာနိရောဓေါ ဘဝတိ နာမရူပဿ နိရောဓေါပိ။ တတ္ထ သမနန္တရံ ကိံ ကာရဏံ ပရမ္ပရပစ္စယော သမနန္တရပစ္စယော သမုဒ္ဒါနိတော, အယံ ပစ္စယတော။ တတ္ထ ကတမော ပရမ္ပရဟေတု? ဝိဇာနန္တဿ ပရမ္ပရဟေတုတာယ ဟေတု, အညာကာရော သမနန္တရဟေတုတာယ ဟေတု။ ယဿ ဟိ ယံ သမနန္တရံ နိဗ္ဗတ္တတိ, သော တဿ ဟေတုပိ ဇာတိနိရောဓါ ဗဟိ အာကာရနိရောဓေါ, အာကာရနိရောဓါ ဒဏ္ဍနိရောဓေါ, ဒဏ္ဍနိရောဓါ ခဏ္ဍနိရောဓေါ။ ဧဝံ ဟေတုပိ ဒွိဓါ သော တာဟိ ပဿိတဗ္ဗော။

ပဋိစ္စသမုပ္ပါဒေါ ယထာ အဝိဇ္ဇာပစ္စယော တဿ ပုန ကိံပစ္စယော, အယောနိသော မနသိကာရော။ သော ကဿ ပစ္စယော သင်္ခါရာနံ, ဣတိ ပစ္စယော စ သမုပ္ပန္နံ စ တဿ ကော ဟေတု အဝိဇ္ဇာယေဝ ။ တထာ ဟိ ပုရိမာ ကောဋိ န ပညာယတိ။ တတ္ထ အဝိဇ္ဇာနုသယော အဝိဇ္ဇာပရိယုဋ္ဌာနဿ ဟေတု ပုရိမာ ဟေတု ပစ္ဆာ ပစ္စယော, သာပိ အဝိဇ္ဇာသင်္ခါရာနံ ပစ္စယော စတူဟိ ကာရဏေဟိ သဟဇာတပစ္စယတာယ သမနန္တရပစ္စယတာယ အဘိသန္ဒနပစ္စယတာယ ပတိဋ္ဌာနပစ္စယတာယ။

၅၇။ ကထံ သဟဇာတပစ္စယတာယ အဝိဇ္ဇာသင်္ခါရာနံ ပစ္စယော? ယံ စိတ္တံ ရာဂပရိယုဋ္ဌံ, တတ္ထ အဝိဇ္ဇာပရိယုဋ္ဌာနေန သဗ္ဗံ ပညာယ ဂေါစရံ ဟန္တိ။ တတ္ထ သင်္ခါရာ တိပစ္စယဋ္ဌိကာ အဒ္ဓါဘူမိကာရမဟတ္တဿ [လဒ္ဓါ ဘူမိကရမဟတ္တဿ (ဣ။ က။)] အယံ အဝိဇ္ဇာသဟသမုပ္ပန္နံ ဝုဒ္ဓိံ ဝိရူဠှိံ ဝေပုလ္လတမာပဇ္ဇန္တီ စတူဟိ ကာရဏေဟိ ပညာ ပဟီယတိ။ ကတမေဟိ စတူဟိ? အနုသယော ပရိယုဋ္ဌာနံ သံယောဇနံ ဥပါဒါနံ။ တတ္ထ အနုသယော ပရိယုဋ္ဌာနံ ဇာတိ ပရိယုဋ္ဌိတာ သံယုဇ္ဇတိ သံယုတ္တာ ဥပါဒိယတိ ဥပါဒါနပစ္စယာ ဘဝေါ။ ဧဝံ တေ သင်္ခါရာ တိဝိဓါ ဥပ္ပန္နာ ဘူမိဂတာ နာသညတ္ထ အယံ မဂ္ဂေန ဝိနီတတ္တာယာတိ [ဝိနိဘတ္တာယ (ဣ။), ဝိနိဘတ္တတာယ (က။)] တေ ထာမဂတာ အပတိဝိနီတာတိပိ တေ သင်္ခါရာတိ ဝုစ္စတိ, ဧဝံ သဟေတုသမုပ္ပန္နဋ္ဌေန အတ္ထိ မေဝ ပစ္စယာ သင်္ခါရာနံ ပစ္စယော နိဒ္ဒိဋ္ဌံ အပနေတွာ ကုသလံ အကုသလံ ကုသလော စ အကုသလော စ ပက္ခိပိတဗ္ဗော, ဝိပါကဓမ္မာ အပနေတွာ ဝစနီယံ အဝစနီယံ ဝစနီယဉ္စ အဝစနီယဉ္စ ပက္ခိပိတဗ္ဗံ, ဘဝအပေဝိရိတ္တာ, သဗ္ဗသုတ္တံ ပရိက္ခိပိတဗ္ဗံ။

ဒသ တထာဂတဗလာနိ စတ္တာရိ ဝေသာရဇ္ဇာနိ ပုညာနိ အနညာကတံ အဝိဇ္ဇာ သမနန္တရပစ္စယတာယ သင်္ခါရာနံ ပစ္စယော ယေန စိတ္တေန သဟ သမုပ္ပန္နာ အဝိဇ္ဇာ တဿ စိတ္တဿ သမနန္တရစိတ္တံ သမုပ္ပန္နန္တိ, တဿ ယံ သမနန္တရစိတ္တံ သမုပ္ပန္နန္တိ, တဿ ပစ္ဆိမဿ စိတ္တဿ ပုရိမစိတ္တံ ဟေတုပစ္စယတာယ ပစ္စယော, တေန အဝိဇ္ဇာ ဟေတု တေန စိတ္တေန ဥပါဒါနံ အနောကာသကတာ ဉာဏံ န ဥပ္ပဇ္ဇန္တိ။ ယာ တဿ အပ္ပမာဒါ ဓါတု အဘိဇ္ဈာဘိသန္ဒိတာ တဟိံ ဝိပလ္လာသာ ဥပ္ပဇ္ဇန္တိ ‘‘အသုဘေ သုဘ’’န္တိ ‘‘ဒုက္ခေ သုခ’’န္တိ, တတ္ထ သင်္ခါရာ ဥပ္ပဇ္ဇန္တိ ရတ္တာ ဒုဋ္ဌာ မူလဿ စေတနာ ရာဂပရိယုဋ္ဌာနေန ဗျာပါဒပရိယုဋ္ဌာနေန အဝိဇ္ဇာပရိယုဋ္ဌာနေန ဒိဋ္ဌိဝိပလ္လာသော ဝတ္ထုနိဒ္ဒေသေ နိဒ္ဒိသိတဗ္ဗော , ယံ ဝိပရီတစိတ္တော ဝိဇာနာတိ အယံ စိတ္တဝိပလ္လာသော, ယာ ဝိပရီတသညာ ဥပဂ္ဂဏှာတိ အယံ သညာဝိပလ္လာသော။ ယံ ဝိပရီတဒိဋ္ဌိ အဘိနိဝိသတိ အယံ ဒိဋ္ဌိဝိပလ္လာသော။ အဋ္ဌ မိစ္ဆတ္တာနိ ဝဍ္ဎန္တိ, တီဏိ အကုသလာနိ အယောနိသော မနသိကာရေ ဥပ္ပန္နံ ဝိညာဏဉ္စ ဝိဇ္ဇဉ္စ ကရောန္တိ။ ဣတိ ပုဗ္ဗာပရန္တေ အကုသလာနာတရိတရော သင်္ခါရာ ဝုဒ္ဓိံ ဝေပုလ္လတံ ဂစ္ဆန္တိ။ တေ စ မဟတာ စ အပ္ပဋိဝိဒိတာ ပေါနောဘဝိကာ [ပေါနောဗ္ဘဝိကာ (က။)] သင်္ခါရာ ဘဝန္တိ။ ဣတိ ဧဝံ အဝိဇ္ဇာ သဟဇာတပစ္စယတာယ သင်္ခါရာနံ ပစ္စယော သမနန္တရပစ္စယတာယ စ။

၅၈။ ကထံ အဘိသန္ဒနာကာရေန အဝိဇ္ဇာ သင်္ခါရာနံ ပစ္စယော? သာ အဝိဇ္ဇာ တေ သင်္ခါရေ အဘိသန္နေတိ ပရိပ္ဖရတိ။ သေယျထာပိ နာမ ဥပ္ပလံ ဝါ ပဒုမံ ဝါ တံ ဥဒကေ ဝဍ္ဎံ အဿ, သီတေန ဝါရိနာ အဘိသန္နံ ပရိသန္ဒနံ ဝုဒ္ဓိံ ဝိရူဠှိံ ဝေပုလ္လတံ အာပဇ္ဇတိ။ ဧဝံ အဘိသန္ဒနဋ္ဌေန အဝိဇ္ဇာ သင်္ခါရာနံ ပစ္စယော။

ကထံ ပတိဋ္ဌဟနဋ္ဌေန အဝိဇ္ဇာ သင်္ခါရာနံ ပစ္စယော? တေ သင်္ခါရာ အဝိဇ္ဇာယံ နိဿာယ ဝုဒ္ဓိံ ဝိရူဠှိံ ဝေပုလ္လတံ အာပဇ္ဇန္တိ။ သေယျထာပိ နာမ ဥပ္ပလံ ဝါ ပဒုမံ ဝါ ပထဝိံ နိဿာယ ပထဝိံ ပတိဋ္ဌာယ ဝုဒ္ဓိံ ဝိရူဠှိံ ဝေပုလ္လတံ အာပဇ္ဇတိ။ ဧတေ သင်္ခါရာ အဝိဇ္ဇာယံ ပတိဋ္ဌိတာ အဝိဇ္ဇာယံ နိဿာယ ဝုဒ္ဓိံ ဝိရူဠှိံ ဝေပုလ္လတံ ဂစ္ဆန္တိ။ ဧဝံ ပတိဋ္ဌဟနဋ္ဌေန အဝိဇ္ဇာ သင်္ခါရာနံ ပစ္စယော။

ပုန ရာဂသဟဂတဿ ကမ္မဿ ဝိပါကေန ပဋိသန္ဓိမှိ ဘဝေါ နိဗ္ဗတ္တတိ, တံ ကမ္မဿ [ကာမဿ (ဣ။)] သဗ္ဗံ အဘိနိဝိဋ္ဌံ အညာဏဝသေန ပေါနောဘဝိကာ သင်္ခါရာတိ ဝုစ္စန္တိ, ဧဝမ္ပိ အဝိဇ္ဇာပစ္စယာ သင်္ခါရာ အတ္ထိ။ ပုန ပဉ္စသု ယေ စ သေက္ခာ ပုဂ္ဂလာ, ယေ စ အသညိသမာပတ္တိံ သမာပန္နာ, ယေ စ ဘဝဂတာ, ယေ စ အန္တောဂတာယေဝ သံသေဒဇာ, ယေ စ ဝါ ပန အညော ဟိ ကောစိ အနာဂါမိဘူတာ န စေတေန္တိ န စ ပတ္ထေန္တိ, တေသံ ကိံ ပစ္စယာ သင်္ခါရာ။ ပုန ရာဂါ အတ္ထိ တေသံ သင်္ခါရာနိ ဥပါဒါနာနိ စိတ္တမနုဿရန္တိယေဝ အဝိပက္ကဝိပါကသမူဟတာ အသမုစ္ဆိန္နပစ္စယာ တေသံ ပုန စ ဂတော ဘဝတိ။ ဧဝမ္ပိ ဟိ အဝိဇ္ဇာပစ္စယာ သင်္ခါရာ။ ပုန သာ တေ န ဥပါဒါနာ နပိ သင်္ခါရာ အတ္ထိ, ပုန တေသံ သတ္တ အနုသယာ အသမူဟတာ အသမုစ္ဆိန္နာ တဒါရမ္မဏံ ဘဝတိ။ ဝိညာဏဿ ပတိဋ္ဌာယ ဝိညာဏပစ္စယာ နာမရူပံ။ ဧဝမ္ပိ အဝိဇ္ဇာပစ္စယာ သင်္ခါရာ။ ပုန သာ ယံ ကိဉ္စိ ကမ္မံ အာစယဂါမိ သဗ္ဗံ တံ အဝိဇ္ဇာဝသေန အဘိသင်္ခရိယတိ တဏှာဝသေန စ အလ္လီယတိ အညာဏဝသေန စ တတ္ထ အာဒီနဝမ္ပိ န ဇာနာတိ။ တဒေဝ ဝိညာဏဗီဇံ ဘဝတိ, သာယေဝ တဏှာသိနေဟော ဘဝတိ။ သာယေဝ အဝိဇ္ဇာ သမ္မောဟောတိ။ ဧဝမ္ပိ အဝိဇ္ဇာပစ္စယာ သင်္ခါရာ ဝတ္တဗ္ဗာ။ ဣတိ ဣမေဟိ အာကာရေဟိ အဝိဇ္ဇာ သင်္ခါရာနံ ပစ္စယော။

တတ္ထ အဝိဇ္ဇာယ ဟေတု အယောနိသော မနသိကာရော ပစ္စယော ဟောတိ။ တတ္ထ အဘိစ္ဆေဒေါ အယံ တတ္ထ တတိယံ ဗလံ [ဖလံ (ဣ။)] နိဝတ္တိ, အယံ ပဋိသန္ဓိ။ တတ္ထ ပုနဗ္ဘဝေါ ယော အဝေစ္ဆေဒေါ အသမုဂ္ဃါတနဋ္ဌေန အယံ အနုသယော။ ယထာ ပဋာကံ ဝါ သာဋကံ ဝါ ဒွေ ဇနာ ဣဠေသု စ ဧကာ ဝါ ဗလံ ဝါ အဿ နိဝါဋဿေသု, န ပန ဣဠေသု သောသေယျ။ တတ္ထ ယံ သိနေဟာ အာပေါဓါတု အနုပုလ္လနာ သောသေတဗ္ဗာ။ ဥဏှဓါတုမာဂမ္မ သစေ ပုန တံ အာကာသေ နိက္ခိပေယျ တံ ဥဿာဝေန ယေဘုယျတရံ သိနေဟမာပဇ္ဇေယျ, န ဟိ အနာဂမ္မ တေဇောဓါတုံ ပရိသေသံ ဂစ္ဆေယျ။ ဧဝမေဝ ဘဝဂ္ဂပရမာပိ သမာပတ္တိ န အနုရူပဿ သမုဂ္ဃါတာယ သံဝတ္တတိ။ တေ ဟိ အာလယန္တိ သမ္မသန္တိ, န စ တဏှာယ တဏှာပဟာနံ ဂစ္ဆန္တိ။ တတ္ထ သော အသမုဂ္ဃါတော။ အဝိဇ္ဇာယ အနုသယော စ စိတ္တဿ သမ္ပလိဗောဓေါ, ဣဒံ ပရိယုဋ္ဌာနံ။ ယထာဘူတံ ဝိညာဏဿ အပ္ပဋိဝေဓေါ အယံ အဝိဇ္ဇာအာသဝေါ အဝိဇ္ဇာဝိညာဏဗီဇံ ဘဝတိ။ ယံ ဗီဇံ သော ဟေတု န သမုစ္ဆိဇ္ဇတိ, အသမုစ္ဆိဇ္ဇန္တော ပဋိသန္ဒေဟတိ။ ပဋိသန္ဒဟန္တော န သမုဂ္ဃါတံ ဂစ္ဆတိ။ အသမုဂ္ဃါတံ စိတ္တံ ပရိယောနဟတိ, ပရိယောနဒ္ဓစိတ္တော ယထာဘူတံ နပ္ပဇာနာတိ, ဣတိ သညာဏဿ သာသဝတ္ထော, အဝိဇ္ဇတ္ထော, ဟေတုအတ္ထော, အဝစ္ဆေဒတ္ထော, အနိဝတ္တိအတ္ထော, ဖလတ္ထော ပဋိသန္ဓိအတ္ထော, ပုနဗ္ဘဝတ္ထော, အသမုဂ္ဃါတတ္ထော, အနုသယတ္ထော, ပရိယုဋ္ဌာနတ္ထော, အပဋိဝေဓနတ္ထော။ ဧတ္တာဝတာ အဝိဇ္ဇာယ ခေတ္တံ နိဒ္ဒိဋ္ဌံ ဘဝတိ။ အယံ ဝုစ္စတေ ပရိက္ခာရော နာမ ဟာရော။

၅၉။ တတ္ထ ကတမော သမာရောပနော ဟာရော? ဥဂ္ဃဋိတမှိ တမှိ သန္တဉ္စေဝ စ နံ ဝိတ္ထာရံ ပန ဝတ္တဗ္ဗံ။ ဝိတ္ထာရဝိဓံ စိတ္တညာ အယံ သမာရောပနော ဟာရော။ တတ္ထ နာမနိဒ္ဒေသော ဥပဃဋကာ [ဥဂ္ဃဋကာ (ဣ။)] ဝတ္ထုနိဒ္ဒေသော ဝေဝစနံ ဝတ္ထုဘူတော ဝိတ္ထာရော။ ယထာ ကိံ, ယာ ဘိက္ခူနံ ဝတ္တတော [နိဝတ္တတော (ဣ။)] ပဟာတဗ္ဗော, အယံ ဥပဃဋနာ။

တတ္ထ ကတမော သမာရောပနော? ကိဉ္စိ န ဝတ္တဗ္ဗံ, ရူပရာဂံ ဝါ နာမဝန္တပဟာတဗ္ဗံ [နာမမန္တပဟာတဗ္ဗံ (က။)]။ ယာဝ ဝိညာဏန္တိ ဝိတ္ထာရေန ကာတဗ္ဗာနိ။ အဝိဇ္ဇာ တာ ဩပမ္မေန ပညာပေတဗ္ဗာ, အယံ သမာရောပနော။ နိဿိတစိတ္တဿ စ မတ္တိကော စ နိဿယော တဏှာ စ ဒိဋ္ဌိ စ။ တတ္ထ ဒိဋ္ဌိ အဝိဇ္ဇာ တဏှာ သင်္ခါရာ။ တတ္ထ ဒိဋ္ဌိပစ္စယာ တဏှာ ဣမေ အဝိဇ္ဇာပစ္စယာ သင်္ခါရာ။ တတ္ထ နိဿိတံ ဝိညာဏံ ဣဒံ သင်္ခါရပစ္စယာ ဝိညာဏံ ယာဝ ဇရာမရဏံ, ဣဒံ သံခိတ္တေန ဘာသိတေ အဝသိဋ္ဌံ ပရောပယတိ။

အနိဿိတဿ [ပဿ ဥဒါ။ ၇၄] စလိတံ နတ္ထီတိ တဿ ဧဝံ ဒိဋ္ဌိယာ တဏှာယ စ ပဟာနံ တတ္ထ ဒိဋ္ဌိအဝိဇ္ဇာနိရောဓါယ ဘူတံ ဝိညာဏံ သရာဂဋ္ဌာနိယေသု ဓမ္မေသု တံ တံ ဓမ္မံ ဥပေစ္စ အညံ ဓမ္မံ ဓါဝတိ မက္ကဋောပမတာယ, အထ ခွဿ ပရိတ္တေသု ဓမ္မေသု သရာဂဋ္ဌာနိယေသု ဆန္ဒရာဂေါ နတ္ထိ ကုတော တတော စလနာ, အဓိမတ္တေသု သတ္တေသု စိတ္တံ နိဝေဿယတိ တံ အပတိဋ္ဌိတံ ဝိညာဏံ အနာဟာရံ နိရုဇ္ဈတိ ဝိညာဏနိရောဓါ နာမရူပနိရောဓေါ ယာဝ ဇရာမရဏနိရောဓေါ။ အယံ သမာရောပနော။

တတ္ထ ရာဂဝသေန ဝိညာဏဿ စလိတံ သပရိဂ္ဂဟော, တသ္မိံ စလိတေ အသတိ ယော ပရိကိလေသောပစာရော တိဝိဓေါ အဂ္ဂိ ပဋိပ္ပဿဒ္ဓေါ ဘဝတိ။ တေနာဟ စလိတေ အသန္တေ ပဿဒ္ဓိ ဟောတိ။ တတ္ထ ယံ သမာရောပနာ ပဿဒ္ဓကာယော သုခံ ဝေဒေတိ, သုခိနော စိတ္တံ သမာဓိယတိ။ ယာဝ ဝိမုတ္တိတမိတိ ဉာဏဒဿနံ ဘဝတိ။ သော အာသဝါနံ ခယာ စ ဝိမုတ္တိ နော ဥပပဇ္ဇတိ။ တဿ ဥပပတ္တိဿ အာဂတိဂတိယာ အသန္တိယာ နေဝိဓ န ဟုရံ န ဥဘယမန္တရေန။ ဧသေဝန္တော ဒုက္ခဿာတိ အနုပါဒိသေသာ နိဗ္ဗာနဓါတု။ ဣဒမဿ သုတ္တဿ မဇ္ဈေ သမာရောပိတံ ပဋိစ္စသမုပ္ပါဒေ စ ဝိမုတ္တိယံ စ ယောဂေါ န စ ဧတံ တဿ သံခိတ္တေန ဘာသိတဿ ဝိတ္ထာရေန အတ္ထံ ဝိဘဇ္ဇန္တိ။ အယံ ဝုစ္စတေ သမာရောပနော ဟာရော။ န စ သံကိလေသဘာဂိယေန သုတ္တေန သံကိလေသဘာဂိယော ယေ စ ဓမ္မာ သမာရောပယိတဗ္ဗာ နာညေ။ ဧဝံ ဝါသနာဘာဂိယေ နိဗ္ဗေဓဘာဂိယေ, အယံ သမာရောပနော ဟာရော။ ဣမေ သောဠသ ဟာရာ။

သုဝီရဿ မဟာကစ္စာယနဿ ဇမ္ဗုဝနဝါသိနော ပေဋကောပဒေသေ

ပဉ္စမာ ဘူမိ။

၄၀။ တတ္ထ ကတမော သုတ္တဝိစယော?

တတ္ထ ကုသလေဟိ ဓမ္မေဟိ အကုသလေဟိ ဓမ္မေဟိ ပုဗ္ဗာပရသော သာဓုကံ ဥပပရိက္ခိယတိ။ ကိံနု ခေါ ဣဒံ သုတ္တံ အာရဘိ။ပေ။။ တေဟိ သုတ္တေဟိ သဟ အဓိသန္နဋ္ဌေဟိ ယုဇ္ဇတိ ဥဒါဟု န ယုဇ္ဇတီတိ?

ယထာ ဘဂဝါ ကိလေသေ အာဒိမှိ တတ္ထ ဒေသေတိ။ ကိံ ဒေသိတံ? တေသံ ကိလေသာနံ ပဟာနံ ဥဒါဟု နော ဒေသိတန္တိ ဥပပရိက္ခိတဗ္ဗံ။ ယဒိ န ဒေသိတံ ဘဂဝတိ တေသံ ကိလေသာနံ ပဟာနံ ကုသလာ ဓမ္မာ ပရိယေသိတဗ္ဗာ ယတ္ထ တေ အကုသလာ ပဟာနံ ဂစ္ဆန္တိ။ သစေ သမန္နေဟမာနော န လဘတိ။ တတ္ထ အကုသလာ ဓမ္မာ အပကဍ္ဎိတဗ္ဗာ ဝီမံသိတဗ္ဗာ, သံကိလေသဘာဂိယသုတ္တံ, ယဒိ ကိလေသာ အပကဍ္ဎိယန္တာ။ ယေ ဝါ န ဒေန္တိ တတ္ထ ဥပပရိက္ခိတဗ္ဗာ အရိယမဂ္ဂဓမ္မာ တာသု ဘူမီသု ကိလေသာ ပဟာနံ ဂစ္ဆန္တိ, ဥဒါဟု န ဂစ္ဆန္တီတိ။ ယတ္တကာ ပန ကိလေသာ ဒေသိတာ။ န တတ္တကာ အရိယဓမ္မာ ဒေသိတာ။ ယတ္ထ ကိလေသာ ပဟာနံ ဂစ္ဆန္တိ, တတ္ထ ယေ ကိလေသာ အရိယဓမ္မာနံ ပဋိပက္ခေန န ယုဇ္ဇန္တိ, တေ အပကဍ္ဎိတဗ္ဗာ, သစေ အပကဍ္ဎိယန္တာ ယောဇနံ ဒေတိ။ တတ္ထ ဧဝံ ဝီမံသိတဗ္ဗံ။ ဒွေ တီဏိ ဝါ တဒုတ္တရိ ဝါ ကိလေသာ ဧကေန အရိယမဂ္ဂေန ပဟာနံ ဂစ္ဆန္တီတိ။ သစေ ဧဝံ ဝီမံသိယန္တာ ယောဇနံ ဒေတိ, တတ္ထ ဥပပရိက္ခိတဗ္ဗံ။ ပရမ္ပရာယ ဝါ ပိဋကသမ္ပဒါနေန ဝါ သုတ္တဿ အတ္ထော စ နတ္ထော စ။ ယံ ဝါ န သက္ကာ သုတ္တံ နိဒ္ဒိသိတုံ နေဝ သုတ္တံ ဝိစိကိစ္ဆိတဗ္ဗံ။ ဧဝံ ယထာ အာဒိမှိ ကုသလာ ဓမ္မာ ဟောန္တိ။ ယေ ကိလေသာ တေ ပဟီနေယျာတိ။ တေ ဥပပရိက္ခိတဗ္ဗာ။ ပုရော ဝါ ကုသလော ပဋိပက္ခေန ဝါ ပုရော ဒေသနာ, အနူနာ အနဓိကာ ဥဂ္ဂဟေတဗ္ဗာ။ ယထာ ပဌမော ဥတ္တိလော ယေသမိဒါနိ ကိလေသာနံ ယေ အရိယဓမ္မာ ဒေသိတာ ဣမေ ကိလေသာ ဣမေဟိ အရိယဓမ္မေဟိ ပဟီယန္တိ, ဥဒါဟု နပ္ပဟီယန္တီတိ ဝိစိနိတဗ္ဗာ။ ယဒိ ဥပပရိက္ခိယမာနာ ယုဇ္ဇန္တိ, ဂဟေတဗ္ဗာ။ အထ န ယုဇ္ဇန္တိ, ယေ ကိလေသာ အပဋိပက္ခာ ဟောန္တိ, တေ ကိလေသာ အပရိပက္ခိတဗ္ဗာ။ ယေ စ အရိယဓမ္မာ ပဋိပက္ခာ ဟောန္တိ, တေ အရိယဓမ္မာ အပကဍ္ဎိတဗ္ဗာ ။ န ဟိ အရိယဓမ္မာ အနာဂါမိကိလေသပ္ပဟာနံ ဂစ္ဆန္တိ, နာပိ အရိယဓမ္မာ သဗ္ဗကိလေသာနံ ပဟာနာယ သံဝတ္တန္တိ။ ယထာ ကုသလာ မေတ္တာ အကုသလော ရာဂေါ န တု ကုသလာ မေတ္တာတိ ကာရေတွာ အကုသလဿ ရာဂဿ ပဟာနာယ သမ္ဘဝတိ ဗျာပါဒေါ မေတ္တာယ ပဟာနံ ဂစ္ဆတိ။ တသ္မာ ဥဘော ကိလေသာ ဥပပရိက္ခိတဗ္ဗာ။ ယော ယော စ ဓမ္မော ဥပဒိသိယတိ ကုသလော ဝါ အကုသလော ဝါ သော အပကဍ္ဎိတဗ္ဗော။ သစေ တေ ယုဇ္ဇန္တိ အပကဍ္ဎိယမာနော နတ္ထိ ဥပပရိက္ခိတဗ္ဗံ။ ဒွေ ဝါ ကိလေသာ ဧကေန အရိယဓမ္မေန ပဟီနေယျာတိ ဒွီဟိ ဝါ အရိယဓမ္မေဟိ ဧကော ဝါ ကိလေသော ပဟီယတီတိ။

အထ ဝါ ဧဝမ္ပိ ဥပပရိက္ခိယမာနံ ယုဇ္ဇတိ, တတ္ထ ဝီမံသိတဗ္ဗံ ဝါ ယထာ ယုဇ္ဇတိ တတ္ထ ဝီမံသိတဗ္ဗံ ဝါ, ယထာ နနု သက္ကာ သုတ္တံ နိဒ္ဒိသိတုံ, န ဟိ သုတ္တေ ဝိစိကိစ္ဆိတဗ္ဗံ။ ကိလေသော မံ အရိယဓမ္မေသု ဒေသိတေသု ဥဘယတော ဥပပရိက္ခိတဗ္ဗံ။ ကိရ ယေ ဝါ ဣမေ ကိလေသာ ဒေသိတာ ယေ စ အရိယဓမ္မာ ဒေသိတာ ဂါထာယ ဝါ ဗျာကရဏေန ဝါ, ကိံ နု ခေါ ဣမေ ကိလေသာ ဣမေဟိ အရိယဓမ္မေဟိ ပဟီယန္တိ, ဥဒါဟု နပ္ပဟီယန္တိ? ဣမေ ဝါ အရိယဓမ္မာ ဣမေသံ ကိလေသာနံ ပဟာနာယ သံဝတ္တန္တီတိ။ ကိဉ္စာပိ ကုသလေဟိ ဓမ္မေဟိ အကုသလာ ဓမ္မာ ပဟာနံ ဂစ္ဆန္တိ။ န တု သဗ္ဗေဟိ အရိယဓမ္မေဟိ သဗ္ဗာကုသလာ ပဟာနံ ဂစ္ဆန္တိ။ ယထာ မေတ္တာ ကုသလော အကုသလော စ ရာဂေါ န တု ကုသလာ မေတ္တာ အကုသလော ရာဂေါတိ ကာရေတွာ မေတ္တာယ ရာဂေါ ပဟာနံ, ဗျာပါဒေါ မေတ္တာယ ပဟာနံ ဂစ္ဆန္တိ။ ဧဝံ ကိလေသောတိ ကာရေတွာ သုတ္တေန ပဟာနံ ဂစ္ဆတိ။ န သုတ္တော ဓမ္မောတိ ကာရေတွာ သဗ္ဗံ ကိလေသဿ ပဟာနာယ သံဝတ္တတိ။ ယံ တု သုတ္တဿ အရိယဓမ္မော သံကိလေသပဋိပက္ခော, သော တေန ပဟာနံ ဂစ္ဆတီတိ။

၄၁။ တတ္ထ ကုသလေ ဒေသိတေ သုတ္တေ ဗျာကရဏေ ဝါ သံကိလေသာ န ယုဇ္ဇန္တိ အရိယဓမ္မာ ဝါ, တေ မဟာပဒေသေ နိဒ္ဒိသိတဗ္ဗာဝယဝေန အပကဍ္ဎိတဗ္ဗာ ။ တတ္ထ ကိလေသေဟိ စ ဒေသိတေဟိ အရိယဓမ္မေသု စ ယဒိပိ တေန အရိယဓမ္မေန တေ ကိလေသာ ပဟာနံ ဂစ္ဆန္တိ။ တတ္ထပိ ဥတ္တရိ ဥပပရိက္ခိတဗ္ဗံ။ ကေန ကာရဏေန ဧတေ ကိလေသာ ပဇဟိတဗ္ဗာ, ကေန ကာရဏေန အရိယဓမ္မာ ဒေသိတာတိ? ယေန ယေန ဝါ အာကာရေန အရိယဓမ္မာ ဒေသိတာ, တေန တေန ပကာရေန အယံ ကိလေသော ဌိတော။ အတ္ထိ ဟိ ဧကော ကိလေသော, တေန ဝါ အရိယဓမ္မာ န အညထာ အညထာ ပဟာတဗ္ဗော, ယထာ ဒိဋ္ဌိ ရာဂေါ အဝိဇ္ဇာ စ ဒဿနေန ပဟာတဗ္ဗာ။ သာ စေ ဧဝဉ္စ အဝိဇ္ဇာ ဘာဝနာယ ဘူမိ ဝါ ဓမ္မာ ဘာဝနာယ ပဟာတဗ္ဗာ။ သာယေဝ ဥဒ္ဓံဘာဂိယံ အသင်္ခတဒဿနာယ ဝိမုတ္တိယာ အနိမိတ္တေန စေတောသမာဓိနာ အမနသိကာရေန ပဟီယတိ။ ဧဝံ သာတ္ထံ သဗျဉ္ဇနံ ဥပပရိက္ခိတဗ္ဗံ။ ယေ ဒဿနေန ပဟာတဗ္ဗာ ကိလေသာ ဒဿနာကာရေန အရိယဓမ္မော ဒေသိတော, ဘာဝနာယ ပဟာတဗ္ဗာ ဘာဝနာကာရေန အရိယဓမ္မော ဒေသိတော, ပတိသေဝနာ ပဟာတဗ္ဗာ ပတိသေဝနာကာရေန အရိယဓမ္မော ဒေသိတော, ဧဝံ ဝိနောဒနပဟာတဗ္ဗာ ယာဝ သတ္တ အာသဝါ ကာတဗ္ဗာ, ယာဝညထာ။ အညထာ ဟေသ ဓမ္မော ပဟာတဗ္ဗော အညေနာကာရေန အရိယဓမ္မော ဒေသိတော, သော အရိယဓမ္မော အညထာ ပရိယေသိတဗ္ဗော။ ယဒိ အယံ ဓမ္မော ပရိယေသတော ယော စ ဒေသေတိ ယေန ယေနာကာရေန, သော အရိယဓမ္မော ပရိယေသိတဗ္ဗော, တေနာကာရေန ကိလေသော ပဟီယတိ။ သော တတ္ထ ဥပပရိက္ခိတဗ္ဗော။ အထ န ယုဇ္ဇတိ ယဒိ ဟိ တေန သုတ္တေန ဝိဟိတံ သုတ္တံ ဝီမံသိတဗ္ဗံ။ ယထာ ယုဇ္ဇတိ, တထာ ဂဟေတဗ္ဗံ။ ယထာ န ယုဇ္ဇတိ, တထာ န ဂဟေတဗ္ဗံ, အဒ္ဓါ ဧတံ ဘဂဝတာ န ဘာသိတံ, အာယသ္မတာ ဝါ ဒုဂ္ဂဟိတံ, ယထာ မဟာပဒေသေ နိဒ္ဒိသိတဗ္ဗံ, ဘဂဝတာ ယထာဘူတံ ဒေသိတံ, ယော စ ဓမ္မော ဒေသိတော ကုသလော စ အကုသလော စ တဿ ဓမ္မဿ ပစ္စယော ပရိယေသိတဗ္ဗော။ န ဟိ ပစ္စယာ ဝိနာ ဓမ္မော အပ္ပစ္စယော ဥပ္ပဇ္ဇတိ။ တတ္ထ ကော အာကာရော ပရိယေသနာယ?

တတ္ထ တထာရူပံ သဟေတု သပ္ပစ္စယံ သောယံ ဓမ္မော ဝုတ္တောတိ ဣဒံ ဝီမံသိတဗ္ဗံ။ သော စ ပစ္စယော တိဝိဓေါ – မုဒု မဇ္ဈော အဓိမတ္တော။ တတ္ထ မုဒုမှိ ပစ္စယေ မုဒုဓမ္မော ဂဟေတဗ္ဗော, ဧဝံ သတ္ယေသ ပစ္စယော ဒုဝိဓေါ ပရံပရာပစ္စယော စ သမနန္တရပစ္စယော စ။ သော ပစ္စယော မုဒုတေန ဗျာဓိမတ္တံ ပရိယေသိတဗ္ဗံ။ ကိံ ကာရဏံ? အညတရောပိ ပစ္စယော အညေဟိ ပစ္စယေဟိ ပရိယတ္တိံ ဝါ ပါရိပူရိံ ဝါ ဂစ္ဆတိ ။ တတ္ထ ယော ဓမ္မော ဒေသိတော, တဿ ဓမ္မဿ ဧတေန ဝါ ကာရဏေန ဝါ ဟေတု ပရိယေသိတဗ္ဗော။ ယထာ ပစ္စယော ဟေတုနာ ပစ္စယေန စ, သော တဿ ဓမ္မဿ နိဿန္ဒော ပရိယေသိတဗ္ဗော။ ယထာ နိဒ္ဒိဋ္ဌော အဓိဋ္ဌာနေ ပဓါနံ ပရိယေသတိ, သော ပစ္စယော ပရိယေသိတဗ္ဗော။ န ဟိ မုဒုဿ ဓမ္မဿ အဓိမတ္တော နိဿန္ဒော အဓိမတ္တဿ ဝါ နိဿန္ဒဿ မုဒုဓမ္မော, အထ မုဒုဿ မုဒု မဇ္ဈာယ မဇ္ဈော အဓိမတ္တဿ အဓိမတ္တော ယုဇ္ဇတိ, တံ ဂဟေတဗ္ဗံ, အထ န ယုဇ္ဇတိ န ဂဟေတဗ္ဗံ။ ယဉ္စ ဘဂဝါ အာရဘတိ ဓမ္မံ ဒေသေတုံ, တံယေဝ ဓမ္မံ မဇ္ဈန္တပရိယောသာနံ ဒေသေတိ, ယထာ သုတ္တာဓိဋ္ဌာနေ ဓမ္မာ အာဒိမှိ နိဒ္ဒိသတိ, တံယေဝ ဗဟု တဿ သုတ္တဿ ပရိယောသာနံ။ တဿ ဟိ ဓမ္မဿ ဝသေန တံ သုတ္တံ ဟောတိ ဂါထာ ဝါ ဗျာကရဏံ ခုဒ္ဒကံ မဟန္တံ ဝါ, ယထာ ပန ဒုဝိဓါ အနုရူပန္တိ ဝါ ထပနာ စ ဒေသနာထပနာ။ ရူပန္တိပိ ဓမ္မဿ ပရိယေသိတဗ္ဗာ။ ယထာ စ ဘဂဝတာ ပဉ္စန္နံ ဣန္ဒ္ရိယာနံ သံဝရဏံ ဒေသိတံ တဏှာယ နိဂ္ဂဟဏတ္ထံ ဣစ္ဆာဝ ဟောတိ။ ဒေသေတိ ယထာ ဂေါပါလကောပမေ သုတ္တေ အညေဟိပိ သုတ္တေဟိ ဘဂဝါ ဘာသတိ ဣစ္ဆာဝ ဟောတိ မဇ္ဈိမနိကာယေ ဝိတက္ကော အယံ ဘဂဝတော ဒေသနာနုရူပန္တိ ဣတိ သော ဓမ္မော အညေသုပိ ဝေယျာကရဏေသု ပရိယေသိတဗ္ဗော။ န ဟိ ဧကံ ဟိ သုတ္တေ ဒဋ္ဌဗ္ဗော။ ယုဇ္ဇနံ တံ ဂဟေတဗ္ဗံ။

၄၂။ တတ္ထ ကတမံ အနုညာတံ? ယံ ကိဉ္စိ သုတ္တံ ဘဂဝတာ န ဘာသိတံ တဉ္စ သုတ္တေသုယေဝ န္ဒိဿတိ, ဧဝမေတံ ဓါရေတဗ္ဗံ။ ယထာ အသုကေန ဘာသိတန္တိ, တံ သုတ္တံ ဝီမံသိတဗ္ဗံ။ ကိံ နု ခေါ ဣမံ သုတ္တံ အနုညာတံ ခမံ ဘဂဝတော ဥဒါဟု နာနုညာတံ ခမံ, ကိဉ္စိ ရူပဉ္စ သုတ္တံ ဘဂဝတော အနုညာတံ ခမံ ကိဉ္စိ ရူပဉ္စ နာနုညာတံ ခမံ? ယံ သဗ္ဗသော အနောတာရေတွာ ဒသဗလော ဂေါစရံ ဒေသေတိ, တံ သဗ္ဗံ သုတ္တံ ဘဂဝတော နာနုညာတံ ခမံ။ အတ္ထိပိ သော သာဝကော ဒသဗလာနံ ဂေါစရံ ဇာနာတိ ဩဓိသော အနောဓိသော, တံ ပန ဗလံ သဗ္ဗသော န ဇာနာတိ အညထာ နာမ သဝနေန, ယထာ အာယသ္မတာ သာရိပုတ္တေန ယေန ဗြာဟ္မဏော ဩဝဒိတော, တဿ အာယသ္မတော နတ္ထိ ဣန္ဒ္ရိယဗလဝေမတ္တဉာဏံ, တေန ပုဂ္ဂလပရော [ပုဂ္ဂလော ပရောပရဉ္စ (ဣ။)] ပရဉ္စ တံ အဇာနန္တော သတိ ဥတ္တရိကရဏီယေ ဥပ္ပါဒိတော, သော ဘဂဝတာ အပသာဒိတော။ ယထာဝ အာယသ္မာ မဟာကဿပေါ ဘာဂိနေယျံ ဩဝဒတိ အနန္တရိယသမန္နာဂတော ဣဒ္ဓိပါဋိဟီရေန အင်္ဂုလိယော အဒီပေတွာ ယံ သဗ္ဗေသံ ဓမ္မာနံ ကမ္မသမာဒါနာနံ ဟေတုသော ဌာနသော ယထာဘူတံ ဉာဏံ, တဿ အာယသ္မတော သံဝိဇ္ဇတေ, တေန နံ ဩဝဒတိ, တံ ဘဂဝါ ကရောတိ။

‘‘သစေပိ ဒသ ပဇ္ဇောတေ၊ ဓါရယိဿသိ ကဿပ။

နေဝ ဒက္ခတိ ရူပါနိ၊ စက္ခု တဿ န ဝိဇ္ဇတီ’’တိ။

အပိ စ ခေါ ယထာ ဒူတော ရာဇဝစနေန သတ္တမနုသာသတိ, ဧဝံ သေသာနုဂေါ အညာတကံ ဃောသံ ပရေသံ ဒေသေတိ။ အနုညာတခမသုတ္တံ ဂဟေတဗ္ဗံ။ အနနုညာတခမံ န ဂဟေတဗ္ဗံ။

တတ္ထ ကတမော သုတ္တသင်္ကရော? ပဉ္စဝိဓံ သုတ္တံ, သံကိလေသဘာဂိယံ ဝါသနာဘာဂိယံ ဒဿနဘာဂိယံ ဘာဝနာဘာဂိယံ အသေက္ခဘာဂိယံ။ အညံ အာရာဓေယျ အညံ ဒေသေတိ အညဿ စ သုတ္တဿ အတ္ထံ အညမှိ သုတ္တေ နိဒ္ဒိသတိ။ သုတ္တဿ ဝါ ဟိ အနေကာကာရံ အတ္ထံ နိဒ္ဒိသတိ။ အရိယဓမ္မသာဓနေ အတ္ထံ ဝိဝရတိ။ ဝါသနာဘာဂိယဿ အတ္ထံ ဒဿနဘာဂိယေသု နိဒ္ဒိသတိ။ ဩရမ္ဘာဂိယာနံ သံယောဇနာနံ အတ္ထံ ဥဒ္ဓံဘာဂိယေသု နိဒ္ဒိသတိ။ မုဒုမဇ္ဈာနံ ဣန္ဒ္ရိယာနံ အဓိမတ္တေသု သုတ္တေသု နိဒ္ဒိသတိ။ ဣတိ အယံ သုတ္တံ သမ္ဘေဒံ ဟေတုနာ စ နိဿန္ဒေန စ ဖလေန စ နိဒ္ဒေသေန စ မုဒုမဇ္ဈာဓိမတ္တတာယပိ စ အတ္ထေန စ ဗျဉ္ဇနေန စ ယော သမ္ဘေဒေါ, အယံ ဝုစ္စတိ သုတ္တသင်္ကရော။ ယော အသမ္ဘေဒေါ, အယံ ဝုစ္စတိ သုတ္တဝိစယော။

တတ္ထာယံ ဥဒ္ဒါနဂါထာ

ပုရိမာနံ အက္ခဏ္ဍံ၊ ယထာဘူတဿ ပစ္စယော။

နိဿန္ဒော ဝါသနာသဒ္ဓိ၊ အနုညာ သုတ္တသင်္ကရော။

ထေရဿ မဟာကစ္စာယနဿ

သုတ္တဝိစယော နာမ စတုတ္ထဘူမိ။